ⲡⲉⲣⲫⲉⲓ ⲛ̀ⲧⲉⲛⲓϩⲉⲗⲗⲏⲛⲟⲥ
ⲛⲉⲟⲩⲟⲛⲟⲩϯⲙⲓⲇⲉ ⲥⲁⲡⲉⲙⲉⲛⲧ ⲙ̀ⲡⲓⲙⲱⲟⲩ ⲉⲩϣⲉⲙϣⲓ ⲛ̇ⲟⲩⲓⲇⲱⲗⲟⲛ ⲛ̀ϧⲏⲧϥ ⲉⲡⲉϥⲣⲁⲛⲡⲉ ⲕⲟⲑⲟⲥ ⲉϥⲧⲁⲗⲏⲟⲩⲧ ⲉϩⲣⲏⲓ ⲉϫⲉⲛ ⲟⲩϣⲟϣⲧ ϧⲉⲛⲟⲩⲏⲓ ⲁⲩϣⲁⲛϩⲱⲗ ⲉϧⲟⲩⲛ ϧⲉⲛⲡⲓⲣⲟ ⲛ̀ⲧⲉⲡⲓⲏⲓ ϣⲁⲩϫⲱⲃⲥ ⲛ̀ϫⲱⲟⲩ ⲛⲁϥ ⲉⲡⲉⲥⲏⲧ ⲟⲩⲟϩ ⲛ̀ⲥⲉⲟⲩⲱϣⲧ ⲙ̀ⲙⲟϥ.
ⲁⲩⲓ̀ ⲟⲩⲛ ⲛ̀ϫⲉⲛⲓⲡⲣⲉⲥⲃⲩⲧⲉⲣⲟⲥ ⲛ̀ⲧⲉⲡⲓⲙⲁ ⲉⲧⲉⲙⲙⲁⲩ ⲁⲩⲧⲁⲙⲉ ⲡⲁⲓⲱⲧ ⲉϩⲱⲃ ⲛⲓⲃⲉⲛ ⲉⲧⲟⲩⲓⲣⲓ ⲙ̀ⲙⲱⲟⲩ ⲛ̀ϫⲉⲛⲓϩⲉⲗⲗⲏⲛⲟⲥ ⲙ̀ⲫⲣⲏϯ ⲉⲧⲟⲩϭⲱⲡⲓ ⲛ̀ⲛⲓⲕⲟⲩϫⲓ ⲛ̀ⲁⲗⲱⲟⲩⲓ ⲛ̀ⲧⲉⲛⲓⲭⲣⲓⲥⲧⲓⲁⲛⲟⲥ ⲉⲩⲓⲣⲓ ⲙ̀ⲙⲱⲟⲩ ⲛ̀ⲑⲩⲥⲓⲁ ⲙ̀ⲡⲟⲩⲛⲟⲩϯ ⲕⲟⲑⲟⲥ.
ⲗⲟⲓⲡⲟⲛ ⲁⲩϫⲱⲣϫ ⲉⲣⲱⲟⲩ ⲛ̀ⲟⲩⲉϩⲟⲟⲩ ⲁⲩϫⲉⲙⲟⲩ ⲉⲩⲓⲣⲓ ⲛ̀ϯⲁⲛⲟⲙⲓⲁ ⲉⲩⲧⲁϩⲟ ⲛ̀ⲛⲓⲗⲁⲱⲟⲩⲓ ⲛ̀ⲧⲉⲛⲓⲭⲣⲏⲥⲧⲓⲁⲛⲟⲥ ⲉⲩⲓⲛⲓ ⲙ̀ⲙⲱⲟⲩ ⲉⲡϣⲱⲓ ⲛ̀ⲑⲩⲥⲓⲁ ⲙ̀ⲡⲟⲩⲛⲟⲩϯ ϩⲓϫⲉⲛ ϯϣⲏⲟⲩⲓ.
ⲗⲟⲓⲡⲟⲛ ⲁⲩⲧⲁϩⲟ ⲛ̀ϩⲁⲛⲕⲉⲙⲏϣ ⲛ̀ϧⲏⲧⲟⲩ ⲁⲩⲧⲏⲓⲧⲟⲩ ⲉϯⲡⲉⲧⲣⲁ ⲟⲩⲟϩ ⲁⲩⲝⲉⲣⲉⲉⲧⲁⲍⲓⲛ ⲙ̀ⲙⲱⲟⲩ ϧⲉⲛⲡⲥⲁϫⲓ ⲟⲩⲟϩ ⲁⲩⲟⲩⲱⲛϩ ⲭⲱⲣⲓⲥ ⲃⲁⲥⲁⲛⲟⲥ ⲉⲩϫⲱⲙ̀ⲙⲟⲥ ϫⲉⲁⲛϣⲁⲛⲙⲟⲩϯ ⲉⲛⲓⲕⲟⲩϫⲓ ⲛ̀ⲁⲗⲱⲟⲩⲓ ⲛ̀ⲧⲉⲛⲓⲭⲣⲏⲥⲧⲓⲁⲛⲟⲥ ⲛ̀ⲉⲣϩⲁⲗ ⲙ̀ⲙⲱⲟⲩ ⲛ̀ϯⲛⲱⲛⲟⲩ ⲛ̀ϩⲁⲛⲙⲉⲣⲟⲥ ⲛ̀ⲱⲓⲕ ⲛⲉⲙϩⲁⲛⲉⲛⲭⲁⲓ ⲛ̀ⲟⲩⲱⲙ ϣⲁⲧⲉⲛϩⲟⲧⲡⲟⲩ ⲉϧⲟⲩⲛ ⲉϩⲁⲛⲙⲁ ⲉⲩϩⲏⲡ ϩⲱⲥⲧⲉ ⲛ̀ⲥⲉⲥⲱⲧⲉⲙ ⲉⲡⲟⲩϧⲣⲱⲟⲩ ⲥⲁⲃⲟⲗ.
ⲟⲩⲟϩ ⲡⲁⲓⲣⲏϯ ϣⲁⲛϧⲱⲧⲉⲃ ⲙ̀ⲙⲱⲟⲩ ⲛ̀ⲧⲉⲛⲥⲱⲧϥ ⲙ̀ⲡⲟⲩⲥⲛⲟϥ ⲉϯϣⲏⲟⲩⲓ ⲟⲩⲟϩ ⲛ̀ⲧⲉⲛⲓⲛⲓ ⲉⲃⲟⲗ ⲛ̀ⲛⲟⲩⲙⲁϧⲧ ⲛ̀ⲧⲉⲛⲥⲟⲕⲟⲩ ⲛ̀ⲛⲉⲩⲣⲟⲛ ⲉⲛⲉⲛⲕⲩⲑⲁⲣⲁ ⲟⲩⲟϩ ⲛ̀ⲧⲉⲛϫⲱ ⲉⲛⲉⲛⲟⲩϯ ⲛ̀ϧⲏⲧⲟⲩ. ⲡⲓⲥⲱⲙⲁⲇⲉ ϣⲁϥⲣⲟⲕϩ ⲛ̀ⲧⲉⲛⲁⲓϥ ⲛ̀ⲕⲉⲣⲙⲓ ⲙⲁⲓ ⲛⲓⲃⲉⲛ ⲉⲧⲉⲛⲛⲁⲉⲙⲓ ϫⲉⲟⲩⲟⲛ ϩⲁⲛⲭⲣⲏⲙⲁ ⲑⲟⲙⲥ ⲛ̀ϧⲏⲧϥ ⲟⲩⲟϩ ϣⲁⲛϭⲓ ⲛ̀ⲟⲩⲙⲏϣ ϧⲉⲛⲡⲓⲕⲉⲣⲙⲓ ⲛ̀ⲧⲉⲛⲥⲁⲧϥ ⲉϫⲱϥ ⲟⲩⲟϩ ⲛ̀ⲧⲉⲛϫⲱ ϧⲉⲛⲛⲉⲛⲕⲩⲑⲁⲣⲁ ⲉⲣⲉ ⲛⲉⲛⲙⲁϧⲧ ⲛ̀ⲛⲓⲕⲟⲩϫⲓ ⲛ̀ⲁⲗⲱⲟⲩⲓ ⲟⲓ ⲛ̀ⲛⲉⲩⲣⲟⲥ ⲉⲣⲱⲟⲩ ⲟⲩⲟϩ ϧⲉⲛϯⲟⲩⲛⲟⲩ ϣⲁⲣⲉ ⲛⲓⲭⲣⲏⲙⲁ ϭⲱⲣⲡ ⲉⲃⲟⲗ ⲛ̀ⲧⲉⲛⲱⲗⲓ ⲙ̀ⲫⲏⲉⲧⲉⲛⲟⲩⲁϣϥ ⲡⲁⲓⲣⲏϯ ⲁⲛⲓⲣⲱⲙⲓ ⲉⲧⲁⲩⲧⲁϩⲱⲟⲩ ϯⲭⲣⲏⲙⲁ ϣⲁⲛⲧⲟⲩⲛⲟϩⲉⲙ ⲉⲑⲃⲉ ϫⲉϩⲁⲛⲙⲁⲓⲭⲣⲏⲙⲁⲛⲉ ⲛⲓⲁⲣⲭⲱⲛ ⲛ̀ⲧⲉⲡⲓⲑⲱϣ ⲉⲧⲉⲙⲙⲁⲩ.
ⲉⲧⲁϥⲥⲱⲧⲉⲙ ⲉⲛⲁⲓ ⲛ̀ϫⲉⲡⲓⲁⲅⲓⲟⲥ ⲛ̀ⲉⲡⲓⲥⲕⲟⲡⲟⲥ ⲁⲃⲃⲁ ⲙⲁⲕⲁⲣⲓ ⲛ̀ⲧⲟⲧⲟⲩ ⲛ̀ⲛⲓⲡⲣⲉⲥⲃⲩⲧⲉⲣⲟⲥ ⲁϥⲧⲱⲛϥ ⲁϥⲙⲟϣⲓ ⲛⲉⲙⲱⲟⲩ. ⲛⲁⲛⲙⲟϣⲓⲇⲉ ⲛⲉⲙⲁϥ ⲁⲛⲟⲕ ⲛⲉⲙⲕⲉⲥⲛⲁⲩ ⲛ̀ⲛⲓϣϯ ⲛ̀ⲣⲱⲙⲓ ⲛⲓⲡⲣⲉⲥⲃⲩⲧⲉⲣⲟⲥⲇⲉ ⲥⲛⲁⲩ ⲁⲩⲙⲟϣⲓ ϧⲁϫⲱⲛ.
ⲉⲧⲁⲛⲓ̀ ⲉϧⲏⲧ ϧⲉⲛⲛⲓⲑⲟϣ ⲛⲁⲩ ϯⲟⲩ ⲙ̀ⲙⲓⲗⲗⲓⲟⲛ ⲁⲛⲛⲁⲩ ⲉⲟⲩⲉⲣⲫⲉⲓ ⲉⲫⲱⲟⲩⲡⲉ ⲡⲁⲓⲱⲧⲇⲉ ⲁϥⲙⲟϣⲓ ⲉϧⲟⲩⲛ ⲉⲡⲥⲁ ⲙ̀ⲡⲓⲉⲣⲫⲉⲓ ⲡⲉϫⲱⲟⲩ ⲛⲁϥ ⲛ̀ϫⲉⲡⲓⲡⲉⲃⲩⲧⲉⲣⲟⲥ ⲥⲛⲁⲩ ϫⲉⲡⲁⲓⲱⲧ ⲙⲁⲣⲉⲛϩⲛⲉⲧⲉⲛ ⲥⲁⲃⲟⲗ ⲙ̀ⲡⲁⲓⲙⲁ ⲙ̀ⲙⲟⲛ ⲥⲉⲛϧⲱⲧⲉⲃ ⲙ̀ⲙⲟⲛ.
ⲛ̀ⲑⲟϥⲇⲉ ⲡⲉϫⲁϥ ϫⲉϥⲟⲛϧ ⲛ̀ϫⲉⲡϭⲟⲓⲥ ϫⲉⲕⲁⲛ ⲁⲩϣⲁⲛϧⲟⲧⲃⲉⲧ ⲛ̀ϯⲛⲁϩⲱⲗ ⲁⲛ ϣⲁⲛⲧⲁϣⲉ ⲉϧⲟⲩⲛ ⲉⲣⲟϥ ⲁϥⲙⲟϣⲓⲇⲉ ⲉϧⲟⲩⲛ ⲉⲛⲥⲁ ⲡⲓⲫⲣⲟ ⲛ̀ⲧⲉⲡⲓⲉⲣⲫⲉⲓ ϧⲉⲛϯⲟⲩⲛⲟⲩ ⲁⲡⲓⲇⲉⲙⲱⲛ ⲉⲧⲧⲁⲗⲏⲟⲩⲧ ⲉⲡⲓⲣⲟ ⲛⲉⲙⲕⲟⲑⲟⲥ ⲡⲓⲓⲇⲱⲗⲟⲛ ⲱϣ ⲉⲃⲟⲗ ϫⲉⲙⲁϣⲉⲛⲱⲧⲉⲛ ⲛ̀ⲧⲉⲧⲉⲛϩⲓⲟⲩⲓ ⲥⲁⲃⲟⲗ ⲙ̀ⲙⲁⲕⲁⲣⲓ ⲫⲁ ⲧⲕⲱⲟⲩ ⲉⲃⲟⲗ ϫⲉⲟⲩⲥⲑⲉⲣⲧⲉⲣ ⲧⲁϩⲟⲛ ϧⲉⲛⲡϫⲓⲛⲑⲣⲉⲛⲥⲱⲧⲉⲛ ⲉⲡⲉϥϧⲣⲱⲟⲩ ⲉϣⲱⲡ ⲁϥϣⲁⲛⲉⲣⲕⲉⲟⲩⲛⲟⲩ ⲙ̀ⲡⲁⲓⲙⲁ ⲧⲉⲛⲛⲁϣⲉⲛⲁⲛ ⲛ̀ⲧⲉⲛϣⲧⲉⲙⲓ ⲉⲡⲁⲓⲙⲁ ⲁⲛ ⲟⲩⲇⲉ ⲉϣⲧⲉⲙⲕⲟⲧⲧ ϫⲉⲉⲛⲁⲩ ⲉⲣⲱⲧⲉⲛ.
ⲟⲩⲟϩ ϧⲉⲛⲡϫⲓⲛⲑⲣⲟⲩⲥⲱⲧⲉⲙ ⲉⲛⲁⲓ ⲛ̀ϫⲉⲛⲓⲟⲩⲏⲃ ⲁⲩⲓ̀ ⲉⲃⲟⲗ ⲉⲣⲉ ⲟⲩⲟⲛ ϩⲁⲛϩⲟⲡⲗⲟⲛ ⲛ̀ⲧⲟⲧⲟⲩ ⲛⲉⲙϩⲁⲛⲗⲟⲅⲕⲏ ⲛⲉⲙϩⲁⲛⲕⲉⲗⲉⲃⲓⲛ ⲛⲉⲙⲛⲓⲕⲉϩⲓⲟⲙⲓ ⲁⲩϣⲉⲛⲱⲟⲩ ⲉⲡϣⲱⲓ ⲉϫⲉⲛ ⲡⲓϫⲉⲛⲉⲫⲱⲣ ⲛ̀ⲧⲉⲡⲓⲉⲣⲫⲉⲓ ⲉϩⲓⲱⲛⲓ ⲉⲣⲟⲛ ⲟⲩⲟϩ ⲡⲉϫⲱⲟⲩ ⲛⲁϥ ϫⲉⲛ̀ⲑⲟⲕⲡⲉ ⲙⲁⲕⲁⲣⲓ ⲡⲓⲣⲉⲙⲧⲕⲱⲟⲩ ⲛ̀ⲕⲁⲕⲟⲡⲁⲣⲅⲙⲁ ⲉⲧⲁⲕⲓ̀ ⲉⲡⲁⲓⲙⲁ ⲉⲕⲟⲩⲁϣ ⲟⲩ ⲁⲡⲉⲛⲛⲟⲩϯ ⲕⲏⲛ ⲉⲧⲁⲙⲟⲛ ⲉⲡⲉⲕⲙⲟⲥϯ ⲉϧⲟⲩⲛ ⲉⲣⲟⲛ ϩⲉⲛⲕ ⲉⲃⲟⲗ ϩⲁⲣⲟⲛ ⲟⲩ ⲡⲉ ⲡⲉⲕϩⲱⲃ ⲛⲉⲙⲁⲛ.
ⲁϥⲉⲣⲟⲩⲱ ⲛ̀ϫⲉ ⲡⲉⲑⲟⲩⲁⲃ ⲡⲉϫⲁϥ ⲛⲱⲟⲩ ϫⲉⲓⲥϫⲉ ⲙ̀ⲙⲟⲛϩⲱⲃ ⲛ̀ⲧⲏⲓ ⲛⲉⲙⲱⲧⲉⲛ ⲓⲉ ⲟⲩ ⲡⲉⲧⲉⲛϩⲱⲃ ⲛⲉⲙⲛⲓϣⲏⲣⲓ ⲛ̀ⲧⲉⲛⲓⲭⲣⲏⲥⲧⲓⲁⲛⲟⲥ ⲉⲣⲉⲧⲉⲛϣⲱⲧ ⲙ̀ⲙⲱⲟⲩ ⲛ̀ⲛⲓⲇⲱⲗⲟⲛ.
ⲛ̀ⲑⲱⲟⲩⲇⲉ ⲁⲩⲉⲣⲟⲩⲱ ⲡⲉϫⲱⲟⲩ ϫⲉⲟⲩⲙⲉⲑⲙⲏⲓ ⲁⲛ ⲧⲉ ⲡⲉϫⲉ ⲫⲏⲉⲑⲟⲩⲁⲃ ⲛⲱⲟⲩ ϫⲉⲓⲥϫⲉ ⲙ̀ⲙⲟⲛ ⲭⲁⲧ ⲛ̀ⲧⲁⲓ̀ ⲉϧⲟⲩⲛ ⲛ̀ⲧⲁⲙⲟⲩϣⲧ ⲙ̀ⲡⲓⲉⲣⲫⲉⲓ ⲛ̀ⲑⲱⲟⲩⲇⲉ ⲡⲉϫⲱⲟⲩ ⲛⲁϥ ϫⲉⲁⲙⲟⲩ ⲛⲓⲡⲣⲉⲥⲃⲩⲧⲉⲣⲟⲥⲇⲉ ⲥⲛⲁⲩ ⲁⲩⲉⲣϩⲟϯ ⲙ̀ⲡⲟⲩϣⲉⲛⲱⲟⲩ ⲉϧⲟⲩⲛ ⲛ̀ⲑⲱⲟⲩ.
ⲁⲩⲧⲱⲟⲩⲛⲟⲩ ⲛ̀ϫⲉ ϫⲱⲧ ⲛ̀ⲣⲱⲙⲓ ⲁⲩϯ ⲙ̀ⲡⲓⲣⲟ ⲉⲣⲱⲛ ⲉⲩⲟⲩⲱϣ ⲉϧⲱⲧⲉⲃ ⲙ̀ⲙⲟⲛ ⲟⲩⲟϩ ⲁⲛⲟⲛ ϩⲱⲛ ⲛⲁⲛⲟⲓ ⲛ̀ϥⲧⲱⲟⲩ ⲛ̀ⲑⲱⲟⲩⲇⲉ ⲡⲉϫⲱⲟⲩ ⲛⲁⲛ ϫⲉⲁⲡⲉⲧⲉⲛⲁϩⲓ ⲕⲏⲛ ⲙ̀ⲫⲟⲟⲩ ⲓⲥ ⲡⲉⲧⲉⲛⲙⲁⲛ̀ϧⲱⲧⲉⲃ.
ϧⲉⲛ ϯⲟⲩⲛⲟⲩ ⲁⲩⲧⲱⲟⲩⲛ ⲉϫⲉⲛ ⲡⲁⲓⲱⲧ ⲁⲩⲁⲙⲟⲛⲓ ⲙ̀ⲙⲟϥ ⲛ̀ϣⲟⲣⲡ ⲉⲣⲟⲛ ⲙ̀ⲫⲣⲏϯ ⲛ̀ⲟⲩϩⲓⲏⲃ ⲛ̀ⲧⲁⲧⲁϫⲛⲓ ⲙⲉⲛⲉⲛⲥⲱⲥ ⲁⲛⲟⲛ ϩⲱⲛ ⲙ̀ⲡϣⲟⲙⲧ ⲁⲩⲧⲱⲟⲩⲛⲟⲩ ⲛ̀ϫⲉⲛⲓϩⲉⲗⲗⲏⲛⲟⲥ ⲁⲩⲧⲁⲗⲟⲛ ⲟⲩⲑⲩⲥⲓⲁ ⲉϧⲣⲏⲓ ⲉϫⲉⲛϯϣⲏⲟⲩⲓ ⲛ̀ⲧⲉ ⲡⲟⲩⲛⲟⲩϯ ⲕⲟⲑⲟⲥ ⲟⲩⲟϩ ⲛⲁⲣⲉⲛⲓϩⲓⲟⲙⲓ ⲣⲁϣⲓⲡⲉ ⲉⲩϫⲱⲙ̀ⲙⲟⲥ ϫⲉⲁⲣⲓϣⲁⲓ ⲙ̀ⲡⲉⲛⲛⲟⲩϯ ⲙ̀ⲫⲟⲟⲩ ϧⲉⲛⲛⲓⲕⲁⲕⲱⲡⲁⲣⲅⲙⲁ ⲛ̀ⲭⲣⲓⲥⲧⲓⲁⲛⲟⲥ ⲡⲉϫⲉ ⲡⲓⲛⲓϣϯ ⲉⲧⲉⲛϧⲏⲧⲟⲩ ϫⲉⲡⲉⲧⲉⲥϣⲉⲡⲉ ⲛ̀ⲧⲉⲛⲧⲁⲙⲉ ⲡⲉⲛⲁⲣⲭⲏⲉⲣⲉⲩⲥ ⲛ̀ϣⲟⲣⲡ ⲙ̀ⲡⲁⲛⲧⲉⲛϧⲟⲧⲃⲟⲩ ⲛ̀ⲧⲉⲛⲉⲣⲕⲁⲗⲓⲛ ⲙ̀ⲙⲟϥ ⲉϯⲑⲩⲥⲓⲁ ⲛ̀ⲧⲉⲡⲉⲛⲛⲟⲩϯ ⲕⲟⲑⲟⲥ.
ⲡⲥⲉⲡⲓⲇⲉ ⲁⲩⲉⲣⲥⲩⲙⲫⲱⲛⲓⲛ ⲛⲉⲙⲁϥ ⲉⲫⲁⲓ ⲛⲉ ⲫⲣⲁⲛ ⲡⲉ ⲙ̀ⲡⲟⲩⲛⲓϣϯ ϩⲟⲙⲏⲣⲟⲥ ⲉⲧⲁϥϣⲉⲛⲁϥⲇⲉ ⲛ̀ϫⲉⲫⲏⲉⲧⲁⲩⲟⲩⲟⲣⲡϥ ⲁⲓⲉⲣⲟⲩⲱ ⲡⲉϫⲏⲓ ⲙ̀ⲡⲁⲓⲱⲧ ⲉⲓⲥⲟⲛϩ ⲛⲉⲙⲁϥ ϫⲉⲉⲕⲛⲁϩⲉⲙⲥⲓ ⲛ̀ⲁⲧϣⲗⲏⲗ ϩⲓⲛⲁ ⲛ̀ⲧⲉⲛⲛⲟϩⲉⲙ ⲓⲥ ϩⲏⲡⲡⲉ ⲁⲥⲫⲟϩ ⲉⲣⲟⲛ ⲛ̀ϫⲉϯⲟⲩⲛⲟⲩ ⲛ̀ⲧⲉⲡⲉⲛⲙⲟⲩ ⲁϥⲉⲣⲟⲩⲱ ⲛ̀ϫⲉⲡⲁⲓⲱⲧ ⲉϥϫⲱⲙ̀ⲙⲟⲥ ⲛⲏⲓ ϫⲉⲙ̀ⲡⲉⲣⲉⲣϩⲟϯ ⲡⲁϣⲏⲣⲓ ⲡⲓⲛⲟⲩⲧⲓⲟⲛ ⲟⲩⲟϩ ⲡⲭ̅ⲥ̅ ⲛⲁⲉⲣⲃⲟⲏⲑⲓⲛ ⲉⲣⲟⲛ.
ⲉⲧⲓⲇⲉ ⲉⲛⲥⲁϫⲓ ⲓⲥ ⲫⲏⲉⲑⲟⲩⲁⲃ ⲁⲡⲁ ⲃⲏⲥⲁ ⲁϥⲕⲱⲗϩ ⲉⲡⲓⲣⲟ ⲛ̀ⲑⲟⲱⲩⲇⲉ ⲙ̀ⲡⲟⲩⲉⲣⲟⲩⲱ ⲛⲁϥ ⲛ̀ⲑⲟϥⲇⲉ ⲁϥⲱϣ ⲉⲃⲟⲗ ⲉϥϫⲱⲙ̀ⲙⲟⲥ ϫⲉ ⲡϭⲟⲓⲥ ⲫϯ ⲡⲓⲡⲁⲛⲧⲟⲕⲣⲁⲧⲱⲣ ⲫⲏⲉⲧⲁϥⲓⲛⲓ ⲙ̀ⲡⲉⲧⲣⲟⲥ ⲉⲃⲟⲗ ϧⲉⲛⲡⲓϣⲧⲉⲕⲟ ⲉϥⲙⲏⲣ ⲛ̀ⲛⲉϥϫⲓϫ ⲛⲉⲙⲛⲉϥϭⲁⲗⲁⲩϫ ⲉⲁϥⲑⲣⲉ ϯⲡⲩⲗⲏ ⲁⲟⲩⲱⲛ ⲛⲁϥ ⲛ̀ⲁⲧϣⲟϣⲧ ⲉⲣⲉ ⲛⲓⲉⲙⲛⲟⲧⲛⲓⲙⲁⲧⲟⲓ ⲉⲛⲕⲟⲧ ⲉⲩⲣⲱⲓⲥ ⲉⲡⲓⲣⲟ ⲟⲩⲟϩ ⲁⲡⲓⲁⲅⲅⲉⲗⲟⲥ ⲛ̀ⲧⲉ ⲡϭⲟⲓⲥ ⲥⲱⲕ ϧⲁϫⲱϥ ϣⲁⲧⲉϥⲉⲛϥ ⲉϩⲣⲏⲓ ⲉϫⲉⲛϯⲡⲩⲗⲏ ⲙ̀ⲃⲉⲛⲓⲡⲓ ⲉⲑⲛⲏⲟⲩ ⲉⲃⲟⲗ ⲉϯⲡⲟⲗⲓⲥ ⲟⲩⲟϩ ⲉⲕⲉⲑⲣⲉ ⲡⲁⲓⲉⲣⲫⲉⲓ ⲟⲩⲱⲛ ⲙ̀ⲙⲁⲩⲁⲧϥ ⲟⲩⲟϩ ϧⲉⲛϯⲟⲩⲛⲟⲩ ϧⲉⲛⲟⲩⲉⲝⲁⲡⲓⲛⲁ ⲁⲡⲓⲣⲟ ⲛ̀ⲧⲉⲡⲓⲉⲣⲫⲉⲓ ⲟⲩⲱⲛ ⲥⲁⲧⲟⲧϥ ⲁϥⲓ̀ ⲉϧⲟⲩⲛ ⲛ̀ϫⲉ ⲫⲏⲉⲑⲟⲩⲁⲃ ⲁⲡⲁ ⲃⲏⲥⲁ ⲛⲉⲙϩⲁⲛⲙⲟⲛⲁⲭⲟⲥ ⲉⲩⲛⲁⲉⲣ ⲙⲉⲧϥⲧⲱⲟⲩ ⲛ̀ⲣⲱⲙⲓ.
ⲉⲧⲁⲩⲓ̀ ⲉϧⲟⲩⲛ ⲁⲩⲛⲁⲩ ⲉⲣⲱⲟⲩ ⲛ̀ϫⲉⲛⲓϩⲉⲗⲗⲏⲛⲟⲥ ⲁⲩϣⲑⲟⲣⲧⲉⲣ ⲟⲩⲟϩ ⲁⲩϣⲱⲡⲓ ⲙ̀ⲫⲣⲏϯ ⲛ̀ⲛⲓⲱⲛⲓ ⲛ̀ⲁⲧⲯⲩⲭⲏ ϧⲉⲛϯⲟⲩⲛⲟⲩ ⲁⲩⲃⲟⲗⲧⲉⲛ ⲉⲃⲟⲗ ⲟⲩⲟϩ ⲡⲉϫⲉ ⲫⲏⲉⲑⲟⲩⲁⲃ ⲁⲡⲁ ⲃⲏⲥⲁ ⲙ̀ⲡⲁⲓⲱⲧ ϫⲉ ⲁⲣⲓⲟⲩⲁⲓ ϧⲉⲛ ⲡⲁⲓⲥⲛⲁⲩ ⲓⲉ ⲛ̀ⲧⲉⲕϯⲭⲣⲱⲙ ⲛ̀ⲧⲁϣⲗⲏⲗ ⲓⲉ ⲛ̀ⲧⲉⲕϣⲗⲏⲗ ⲛ̀ⲧⲁϯⲭⲣⲱⲙ.
ⲡⲉϫⲉ ⲡⲁⲓⲱⲧ ϫⲉⲙ̀ⲙⲟⲛ ⲁⲗⲗⲁ ⲙⲁⲣⲉⲛⲟϩⲓ ⲉⲣⲁⲧⲉⲛ ⲛ̀ⲧⲉⲛϣⲗⲏⲗ ϩⲓⲟⲩⲥⲟⲡ ⲛⲉⲙⲛⲉⲛⲉⲣⲏⲟⲩ ϣⲁⲧⲉ ⲡⲓⲭⲣⲱⲙ ⲓ̀ ⲉⲡⲉⲥⲏⲧ ⲉⲃⲟⲗϧⲉⲛⲧⲫⲉ ⲛ̀ⲧⲉϥⲣⲱⲕϩ ⲙ̀ⲡⲓⲉⲣⲫⲉⲓ ⲟⲩⲟϩ ⲉⲧⲁⲩⲟϩⲓⲇⲉ ⲉⲣⲁⲧⲟⲩ ⲁⲩϣⲗⲏⲗ ⲁⲟⲩⲥⲙⲏ ϣⲱⲡⲓ ϩⲁⲣⲱⲟⲩ ⲉⲥϫⲱⲙ̀ⲙⲟⲥ ⲛⲱⲟⲩ ϫⲉⲧⲟⲩϫⲉ ⲑⲏⲛⲟⲩ ⲉⲃⲟⲗϧⲉⲛ ⲫⲣⲟ ⲛ̀ⲧⲉⲡⲓⲉⲣⲫⲉⲓ.ⲉⲧⲓ ⲙ̀ⲡⲁⲛⲧⲉⲛⲕⲱϯ ⲙ̀ⲡⲉⲛϩⲟ ⲉⲫⲁϩⲟⲩ ϩⲏⲡⲡⲉ ⲓⲥ ⲟⲩⲛⲓϣϯ ⲛ̀ⲥⲟⲃⲧ ⲛ̀ⲭⲣⲱⲙ ⲁϥⲕⲱϯ ⲙ̀ⲡⲓⲕⲱϯ ⲙ̀ⲡⲓⲉⲣⲫⲉⲓ ⲧⲏⲣϥ ⲟⲩⲟϩ ⲁⲛⲓϫⲟⲓ ⲛ̀ⲧⲉⲡⲓⲉⲣⲫⲉⲓ ϩⲉⲓ ⲉⲡⲉⲥⲏⲧ ⲟⲩⲟϩ ⲁⲡⲓⲭⲣⲱⲙ ⲟⲩⲱⲙ ⲛ̀ⲥⲱϥ ϣⲁ ⲉϧⲣⲏⲓ ⲉⲛⲉϥⲥⲉⲛϯ.
ⲡⲁⲓⲱⲧⲇⲉ ⲁϥⲥⲁϩⲟⲩⲓ ⲉⲡⲓⲉⲣⲫⲉⲓ ⲉϥϫⲱⲙ̀ⲙⲟⲥ ϫⲉⲛ̀ⲛⲉϩ̀ⲗⲓ ⲛ̀ϣϣⲏⲛ ϣⲱⲡⲓ ⲛ̀ϧⲏⲧϥ ⲉϥⲟⲓ ⲛ̀ϧⲏⲓⲃⲓ ⲟⲩⲇⲉ ⲛ̀ⲛⲟⲩϭⲉ ϫⲣⲟϫ ⲛ̀ϧⲏⲧϥ ϣⲁ ⲉⲛⲉϩ ⲉϥⲉ̀ϣⲱⲡⲓ ⲛ̀ⲏⲓ ⲛ̀ⲛⲓⲑⲏⲣⲓⲟⲛ ⲛⲉⲙⲛⲓϭⲁⲧⲫⲓ ⲛ̀ⲧⲉⲡⲕⲁϩⲓ ⲟⲩⲟϩ ϧⲉⲛϯⲟⲩⲛⲟⲩ ⲉⲧⲉⲙⲙⲁⲩ ⲁⲟⲩⲇⲉⲙⲱⲛ ⲛ̀ⲁⲕⲁⲑⲁⲣⲧⲟⲥ ϩⲱⲗ ⲉϧⲟⲩⲛ ⲉⲟⲩⲣⲱⲙⲓ ⲁϥϣⲉⲛⲁϥ ⲉϧⲟⲩⲛ ⲉϯⲃⲁⲕⲓ ⲁϥⲱϣ ⲉⲃⲟⲗ ⲉϥϫⲱⲙ̀ⲙⲟⲥ ϫⲉⲙⲁⲣⲉ ⲛⲓϩⲉⲗⲗⲏⲛⲟⲥ ⲧⲏⲣⲟⲩ ⲫⲱⲧ ⲛⲱⲟⲩ ϫⲉϩⲏⲡⲡⲉ ⲓⲥ ⲃⲏⲥⲁ ⲛⲉⲙⲙⲁⲕⲁⲣⲓ ⲛⲓⲣⲉⲙⲧⲕⲱⲟⲩ ⲁⲩⲓ̀.
ⲡⲁⲓⲱⲧⲇⲉ ⲁϥⲉⲣⲡⲛⲁⲧⲁⲛ ⲉϩⲟⲙⲏⲣⲟⲥ ⲡⲓⲛⲓϣϯ ⲛ̀ⲧⲱⲟⲩ ϩⲓ ⲡⲓⲙⲱⲓⲧ ⲛ̀ⲑⲟϥⲡⲉ ⲡⲓⲁⲣⲭⲏⲉⲣⲉⲩⲥ ⲟⲩⲟϩ ⲁⲡⲁⲓⲱⲧ ⲉⲙⲓ ϧⲉⲛⲡⲓⲡⲛⲉⲩⲙⲁ ϫⲉⲛ̀ⲑⲟϥⲡⲉ ⲡⲓⲛⲓϣϯ ⲉⲧⲁⲩⲟⲩⲱⲣⲡ ⲛ̀ⲥⲱϥ ⲡⲉϫⲉ ⲡⲁⲓⲱⲧ ⲛⲁϥ ϫⲉⲉⲑⲃⲉ ⲟⲩ ⲙ̀ⲡⲉⲕⲓ̀ ⲛ̀ⲧⲉⲕⲉⲣϣⲁⲓ ϧⲉⲛ ⲡⲉⲛϧⲱⲧⲉⲃ ⲉⲩⲛⲁϣⲁⲧⲧⲉⲛ ⲙ̀ⲡⲉⲕⲛⲟⲩϯ ⲕⲟⲑⲟⲥ.
ⲛ̀ⲑⲟϥⲇⲉ ⲡⲉϫⲁϥ ⲛⲁϥ ϫⲉⲛ̀ⲑⲟⲕ ⲣⲱ ⲕⲉⲣϣⲁⲓ ⲁⲛ ⲉⲁⲓⲕ ⲛ̀ⲥⲡⲟⲛⲇⲏ ⲙ̀ⲡⲉⲛⲛⲟⲩϯ ϫⲉⲛ̀ⲑⲟⲕ ⲟⲩϧⲉⲗⲗⲟ ϧⲉⲛϯⲟⲩⲛⲟⲩ ⲁⲡⲁⲓⲱⲧ ϭⲱⲣⲉⲙ ⲉⲛⲓⲥⲛⲏⲟⲩ ϫⲉⲁⲙⲟⲛⲓ ⲙ̀ⲙⲟϥ ⲛ̀ⲧⲉⲧⲉⲛⲥⲟⲛϩϥ ⲡⲓⲟⲩⲏⲃⲇⲉ ⲉⲧⲉⲙⲙⲁⲩ ⲛ̀ⲁⲕⲁⲑⲁⲣⲧⲟⲥ ⲁϥⲱϣ ⲉⲃⲟⲗ ⲉϥϫⲱ ⲙ̀ⲙⲟⲥ ϫⲉⲡⲓⲛⲓϣϯ ⲛ̀ⲛⲟⲩϯ ⲕⲟⲑⲟⲥ ⲡⲁⲣⲭⲏⲥⲧⲣⲁⲧⲏⲅⲟⲩⲥ ⲙ̀ⲡⲓⲁⲏⲣ ⲡⲥⲟⲛ ⲙ̀ⲡⲓⲁⲡⲟⲗⲗⲱⲛ ⲛⲁϩⲙⲉⲧ ϫⲉⲁⲛⲟⲕ ⲉⲧⲟⲓ ⲛ̀ⲁⲣⲭⲏⲉⲣⲉⲩⲥ ⲛⲁⲕ.ⲡⲉϫⲉ ⲡⲁⲓⲱⲧ ⲛⲁϥ ϫⲉⲣⲟⲕϩⲕ ⲉⲕⲟⲛϧ ⲛⲉⲙⲡⲉⲕⲛⲟⲩϯ ⲕⲟⲑⲟⲥ ⲉⲧⲁⲩⲙⲟϣⲓⲇⲉ ⲁⲩⲓ̀ ⲉⲃⲟⲗ ⲉⲡⲓϯⲙⲓ ⲁⲫⲙⲏϣ ⲛ̀ⲧⲉⲛⲓⲟⲣⲑⲟⲇⲟⲝⲟⲥ ⲓ̀ ⲉⲃⲟⲗ ⲁⲩⲙⲟϣⲓ ϧⲁϫⲱⲟⲩ ⲧⲟⲧⲉ ⲁϥⲟⲩⲁϩⲥⲁϩⲛⲓ ⲛⲱⲟⲩ ⲉϭⲉⲣⲟ ⲛ̀ⲟⲩⲭⲣⲱⲙ ⲛ̀ⲥⲉϩⲓⲟⲩⲓ ⲛ̀ϩⲟⲙⲏⲣⲟⲥ ⲡⲓⲟⲩⲏⲃ ⲉϧⲟⲩⲛ ⲉⲣⲟϥ ⲟⲩⲟϩ ⲁⲩⲣⲱⲕϩ ⲙ̀ⲙⲟϥ ⲛⲉⲙⲛⲓⲕⲉⲓⲇⲱⲗⲟⲛ ⲉⲧⲁ[ⲩ]ϫⲉⲙⲟⲩ ϧⲉⲛ ⲡⲉϥⲏⲓ.
ⲡⲕⲉⲥⲉⲡⲓ ⲛ̀ⲛⲓϩⲉⲗⲗⲏⲛⲟⲥ ⲟⲩⲙⲏϣ ⲛ̀ϧⲏⲧⲟⲩ ⲁⲩϣⲱⲡⲓ ⲛ̀ⲭⲣⲥⲓⲧⲓⲁⲛⲟⲥ ⲟⲩⲟϩ ⲁⲩϭⲓⲱⲙⲥ ϩⲁⲛⲕⲉⲭⲱⲟⲩⲛⲓ ⲙ̀ⲡⲟⲩⲟⲩⲱϣ ⲁⲗⲗⲁ ⲁⲩϭⲓ ⲙ̀ⲫⲏⲉⲧⲉ ⲛ̀ⲧⲱⲟⲩ ⲁⲩϩⲓⲧⲟⲩ ⲉⲛⲓⲙⲱⲟⲩ ⲛⲉⲙⲛⲓⲗⲁⲕⲕⲟⲥ ⲁⲩϣⲉⲛⲱⲟⲩ ⲙ̀ⲙⲁⲩⲁⲧⲟⲩ ⲛⲉⲙⲛⲟⲩⲇⲱⲗⲟⲛ ⲉⲟⲩⲙⲁ ⲛ̀ϣⲁϥⲉ.
ⲁⲩϭⲓⲏⲡⲓ ⲛ̀ⲛⲓⲇⲱⲗⲟⲛ ⲉⲧⲁⲩⲟⲩϫⲡⲟⲩ ⲙ̀ⲡⲓⲛⲁⲩ ⲉⲧⲉⲙⲙⲁⲩ ⲁⲛϫⲉⲙⲟⲩ ⲉⲩⲓ̀ⲣⲓ ⲛ̀ϣⲟⲙⲧ ⲛ̀ⲓⲇⲱⲗⲟⲛ ⲛⲏⲇⲉ ⲉⲧⲁⲩⲫⲱⲧ ⲁⲛⲓⲭⲣⲓⲥⲧⲓⲁⲛⲟⲥ ϣⲱⲡⲓ ϧⲉⲛⲛⲟⲩⲏⲓ.