Ⲡⲓϫⲓⲛⲱⲛϧ ⲛ̀ⲧⲉ ⲁⲃⲃⲁ Ⲡⲁⲩⲗⲟⲥ
Ⲟⲩⲙⲏϣ ⲛ̀ⲥⲟⲡ ⲁϥϣⲱⲡⲓ ⲛ̀ϫⲉ ⲟⲩⲕⲓⲙ ⲛⲉⲙ ⲟⲩⲕⲱϯ ⲉⲃⲟⲗϩⲓⲧⲟⲧⲟⲩ ⲛ̀ⲛⲓⲙⲟⲛⲁⲭⲟⲥ ⲉ̅ⲑ̅ⲩ̅ ⲛⲉⲧⲁⲩϣⲱⲡⲓ ϧⲉⲛ ⲧⲭⲱⲣⲁ ⲛ̀
Ⲁⲥϣⲱⲡⲓ ⲇⲉ ϧⲉⲛ ⲛⲓⲥⲏⲟⲩ ⲛ̀ⲧⲉ Ⲇⲉⲕⲓⲟⲥ ⲛ̀ⲇⲓⲕⲱⲧⲏⲥ ⲛⲉⲙ Ⲟⲩⲁⲗⲉⲣⲓⲁⲛⲟⲥ ⲁⲔⲟⲣⲛⲏⲗⲓⲟⲥ ϫⲱⲕ ⲙ̀ⲡⲓⲁⲅⲱⲛ ⲛ̀ⲧⲉ ϯⲙⲉⲧ⳥ ⲉⲃⲟⲗϧⲉⲛ Ⲣⲱⲙⲏ ϯⲙⲉⲧⲣⲟⲡⲟⲗⲓⲥ ⲉϩⲣⲏⲓ ⲉϫⲉⲛ ⲫⲣⲁⲛ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅. ⲡⲓⲙⲁⲕⲁⲣⲓⲟⲥ ⲇⲉ ⲁⲃⲃⲁ Ⲡⲁⲩⲗⲟⲥ ⲛⲁϥϣⲟⲡ ⲡⲉ ⲛⲉⲙ ⲧⲉϥⲥⲱⲛⲓ ⲉⲣⲉ ⲟⲩⲟⲛ ⲟⲩⲣⲱⲙⲓ ⲛ̀ⲧⲁⲥ ⲉⲁⲩⲙⲟⲩ ⲛ̀ϫⲉ ⲛⲟⲩⲓⲟϯ ⲁⲩⲭⲁ ⲟⲩⲛⲓϣϯ ⲙ̀ⲙⲉⲧⲣⲁⲙⲁⲟ ⲛⲱⲟⲩ. ⲛⲁⲣⲉ Ⲡⲁⲩⲗⲟⲥ ⲇⲉ ϧⲉⲛ ⲓ̅Ⲋ̅ ⲛ̀ⲣⲟⲙⲡⲓ. ⲛⲁϥϭⲓⲥⲃⲱ ⲡⲉ ⲉⲛⲓⲥϧⲁⲓ. ⲁⲃⲃⲁ Ⲁⲛⲧⲱⲛⲓⲟⲥ ϩⲱϥ ⲡⲉ ϧⲉⲛ ϥ̀ ⲛ̀ⲣⲟⲙⲡⲓ ⲁϥϫⲟⲥ ⲛⲁⲛ ⲛ̀ⲟⲩⲥⲟⲡ ϫⲉ ⲁⲓⲥⲟϭⲛⲓ ⲙ̀ⲡⲁϩⲏⲧ ⲛ̀ⲟⲩⲥⲏⲟⲩ ⲉⲓϫⲱ ⲙ̀ⲙⲟⲥ ϫⲉ ϩⲁⲣⲁ ⲙ̀ⲡⲉⲕⲉⲙⲟⲛⲁⲭⲟⲥ ϣⲱⲡⲓ ϧⲉⲛ ⲡⲁⲓϣⲁϥⲉ ⲉⲧⲥⲁϧⲟⲩⲛ ⲙ̀ⲙⲟⲓ. ⲟⲩⲟϩ ⲁⲥϣⲱⲡⲓ ϧⲉⲛ ⲡⲓⲉϫⲱⲣϩ ⲉⲧⲉⲙⲙⲁⲩ ⲁⲪϯ ϭⲱⲣⲟ ⲛⲏⲓ ⲉⲃⲟⲗ ⲡⲉϫⲁϥ ⲙ̀ⲡⲁⲓⲣⲏ ϫⲉ ⲉⲧⲓ ⲕⲉⲟⲩⲁⲓ ⲥⲁϧⲟⲩⲛ ⲙ̀ⲙⲟⲕ ϧⲉⲛ ⲡⲁⲓϣⲁϥⲉ ⲛⲁⲛⲉϥ ⲉϩⲟⲧⲉⲣⲟⲕ ⲟⲩⲟϩ ⲛⲉ ⲡⲉⲧⲥϣⲉ ⲡⲉ ⲛ̀ⲧⲉⲕⲓⲏⲥ ⲙ̀ⲙⲟⲕ ⲉⲉⲣⲁⲡⲁⲛⲧⲁⲛ ⲉⲣⲟϥ ϧⲉⲛ ⲟⲩⲣⲁϣⲓ ⲉϥⲟϣ.
Ⲉⲧⲁ ⲡⲓⲉϩⲟⲟⲩ ⲇⲉ ϣⲱⲡⲓ ⲁϥⲧⲱⲛϥ ⲛ̀ϫⲉ ⲡⲓⲙⲁⲕⲁⲣⲓⲟⲥ ⲁⲃⲃⲁ Ⲁⲛⲧⲱⲛⲓⲟⲥ ⲁϥⲓ ⲉⲃⲟⲗ ⲉϥⲙⲟϣⲓ ⲉⲣⲉ ⲡⲉϥϣⲃⲱⲧ ⲙ̀ⲃⲁⲓ ϧⲉⲛ ⲧⲉϥϫⲓϫ ⲉⲁϥⲟⲩⲁϩϥ ⲉϫⲱϥ ⲟⲩⲟϩ ⲁϥⲉⲣϩⲏⲧⲥ ⲙ̀ⲙⲟϣⲓ ⲕⲁⲧⲁ ⲡⲉϥⲙⲉⲩⲓ ⲙ̀ⲙⲓⲛ ⲙ̀ⲙⲟϥ ⲛ̀ϥⲉⲙⲓ ⲁⲛ ϫⲉ ⲁϥⲙⲟϣⲓ ⲉⲑⲱⲛ ⲟⲩⲇⲉ ⲁϣ ⲡⲉ ⲡⲓⲙⲱⲓⲧ ⲛ̀ⲧⲉ ⲡⲓⲁⲅⲓⲟⲥ. ⲉⲧⲁ ⲙⲉⲣⲓ ⲇⲉ ϣⲱⲡⲓ ⲟⲩⲟϩ ⲉⲧⲁ ⲡⲓⲣⲏ ϫⲉⲙϫⲟⲙ ⲁⲡⲓⲕⲁⲩⲙⲁ ϫⲉϫⲟⲙ ⲟⲛ. ⲙ̀ⲡⲉ ⲡⲓⲙⲁⲕⲁⲣⲓⲟⲥ ⲛ̀ϧⲉⲗⲗⲟ ⲁⲃⲃⲁ Ⲁⲛⲧⲱⲛⲓⲟⲥ ⲣⲓⲕⲓ ⲉⲃⲟⲗ ⲥⲁⲃⲟⲗ ⲙ̀ⲡⲓⲙⲱⲓⲧ ⲉϥϫⲱ ⲙ̀ⲙⲟⲥ ϫⲉ ϯⲛⲁϩϯ ϫⲉ Ⲫϯ ⲛⲁⲭⲁⲧ ⲛ̀ⲥⲱϥ ⲁⲛ ⲁⲗⲗⲁ ⲉϥⲉⲧⲁⲙⲟⲓ ⲉⲡⲉϥⲃⲱⲕ ⲫⲏⲉⲧⲁϥϫⲟⲥ ⲛⲏⲓ ⲉⲑⲃⲏⲧϥ ϩⲱⲥ ⲇⲉ ⲉϥⲥⲁϫⲓ ⲁϥⲥⲟⲙⲥ ⲁϥⲛⲁⲩ ⲉⲟⲩⲣⲱⲙⲓ ⲉϥⲟⲓ ⲛ̀ⲣⲏϯ ⲃ̅ ⲧⲉϥⲫⲁϣⲓ ⲉⲥⲟⲓ ⲛ̀ⲣⲱⲙⲓ ⲧⲉϥⲕⲉⲫⲁϣⲓ ⲛⲉ ⲟⲩϩⲑⲟ ⲡⲉ ⲉⲧⲉ ⲫⲁⲓ ⲡⲉ ⲫⲏⲉⲧⲟⲩⲙⲟⲩϯ ⲉⲣⲟϥ ⲛ̀ϫⲉ ⲛⲓⲥⲁⲃⲉⲩ ϫⲉ ⲓⲡⲡⲟⲕⲉⲛⲧⲁⲩⲣⲟⲥ ⲁϥⲙⲟⲩϯ ⲟⲩⲛ ⲉⲣⲟϥ ⲛ̀ϫⲉ ⲡⲓⲙⲁⲕⲁⲣⲓⲟⲥ ⲁⲃⲃⲁ Ⲁⲛⲧⲱⲛⲓⲟⲥ ⲡⲉϫⲁϥ ⲛⲁϥ ϫⲉ ⲁⲓϭⲉⲣⲟⲕ ⲛ̀ⲑⲟⲕ ⲁⲣⲉ ⲡⲓⲣⲱⲙⲓ ⲛ̀ⲧⲉ Ⲫϯ ϣⲟⲡ ⲛ̀ⲑⲱⲛ ϧⲉⲛ ⲡⲁⲙⲱⲓⲧ ⲁϥⲉⲣⲟⲩⲱ ⲛⲁϥ ϧⲉⲛ ⲟⲩϫⲓⲛⲥⲁϫⲓ ⲙ̀ⲙⲉⲧⲃⲁⲣⲃⲁⲣⲟⲥ ⲉⲣⲉ ⲣⲱϥ ϩⲓ ϩⲉⲗⲓ ⲉⲃⲟⲗ ⲁϥⲙⲟϣⲓ ⲇⲉ ⲛ̀ϫⲉ ⲡⲓⲙⲁⲕⲁⲣⲓⲟⲥ ⲁⲃⲃⲁ Ⲁⲛⲧⲱⲛⲓⲟⲥ ⲁⲡⲓⲑⲏⲣⲓⲟⲛ ⲉⲧⲉⲙⲙⲁⲩ ⲫⲱⲧ ⲉⲃⲟⲗϩⲁ ⲡⲉϥϩⲟ ⲉϥϩⲏⲗ ⲉⲟⲩⲙⲁ ⲉϥⲟⲩⲉⲥⲑⲱⲛ ⲛ̀ⲑⲟϥ ⲡⲉ ⲡⲓⲇⲓⲁⲃⲟⲗⲟⲥ ⲉⲁϥϣⲓⲃϯ ⲙ̀ⲡⲉϥⲥⲭⲏⲙⲁ ⲙ̀ⲫⲣⲏϯ ⲛ̀ⲟⲩⲓⲡⲡⲟⲕⲉⲛⲧⲁⲩⲣⲟⲥ ⲟⲩⲟϩ ⲁϥⲉⲣϣⲫⲏⲣⲓ ⲛ̀ϫⲉ ⲁⲃⲃⲁ Ⲁⲛⲧⲱⲛⲓⲟⲥ ⲉϥϫⲱ ⲙ̀ⲙⲟⲥ ϫⲉ ⲡⲱⲥ ⲁϥϣⲉⲃⲏⲓⲧϥ ⲉⲡⲁⲓⲑⲏⲣⲓⲟⲛ ⲟⲩⲟϩ ⲁϥⲟⲩⲟⲛϩϥ ⲉⲃⲟⲗ.
Ⲁⲥϣⲱⲡⲓ ⲇⲉ ⲉⲧⲁϥⲓ ⲉⲧϩⲏ ⲛ̀ⲕⲉⲕⲟⲩϫⲓ ⲁϥⲛⲁⲩ ⲉⲟⲩⲣⲱⲙⲓ ⲉϥⲟⲛⲓ ⲙ̀ⲙⲟϥ ⲉϥⲟⲓ ⲛ̀ϫⲁⲃϫⲉⲃ ⲟⲩⲟϩ ⲉϥⲟϩⲓ ⲉⲣⲁⲧϥ ϩⲓϫⲉⲛ ⲟⲩⲱⲛⲓ ⲉⲣⲉ ⲟⲩⲟⲛ ϩⲁⲛⲧⲁⲡ ϩⲓϫⲱϥ ⲛⲉⲙ ⲧⲉϥⲧⲉϩⲛⲓ ⲉⲧⲁϥⲛⲁⲩ ⲉⲣⲟϥ ⲛ̀ϫⲉ ⲁⲃⲃⲁ Ⲁⲛⲧⲱⲛⲓⲟⲥ ⲁϥϯϩⲓⲱⲧϥ ⲛ̀ϯϧⲉⲗⲗⲓⲃϣ ⲛ̀ⲧⲉ ⲡⲓⲛⲁϩϯ ⲛⲉⲙ ϯϣⲉⲃϣϯ ⲛ̀ⲧⲉ ϯⲙⲉⲑⲙⲏⲓ. ⲡⲉϫⲁϥ ⲛⲁϥ ϫⲉ ⲛ̀ⲑⲟⲕ ⲛⲓⲙ ⲫⲏⲉϯⲛⲁⲩ ⲉⲣⲟϥ. ⲁϥⲉⲣⲟⲩⲱ ⲛⲁϥ ⲛ̀ϫⲉ ⲫⲏ ϫⲉ ⲁⲛⲟⲕ ⲟⲩⲣⲉϥⲙⲱⲟⲩⲧ ⲉⲓϣⲟⲡ ϧⲉⲛ ⲡⲁⲓϣⲁϥⲉ ⲛⲉ ⲫⲁⲓ ⲟⲩⲟⲛ ⲟⲩⲁⲓ ⲡⲉ ⲉⲃⲟⲗϧⲉⲛ ⲛⲏⲉⲧⲟⲩⲙⲟⲩϯ ⲉⲣⲱⲟⲩ ⲛ̀ϫⲉ ⲛⲓⲉⲑⲛⲟⲥ ϫⲉ ⲥⲁⲧⲏⲣⲟⲥ ⲛⲁⲓ ⲅⲁⲣ ⲛⲉ ⲛⲏⲉⲧⲁⲩⲉⲣϩⲁⲗ ⲛ̀ⲛⲓⲑⲩⲭⲏ ⲛ̀ⲧⲉ ⲛⲓⲟⲩⲉⲓⲛⲓⲛ ϣⲁⲧⲟⲩⲉⲣϣⲁⲙϣⲉ ⲓϧ. ϩⲱⲥ ⲇⲉ ⲉⲣⲉ ⲡⲓⲑⲏⲣⲓⲟⲛ ϫⲱ ⲛ̀ⲛⲁⲓⲥⲁϫⲓ ⲁⲡⲓⲙⲁⲕⲁⲣⲓⲟⲥ ⲛ̀ϧⲉⲗⲗⲟ ⲙⲟϣⲓ ϩⲓ ⲡⲉϥⲙⲱⲓⲧ ⲉⲣⲉ ⲛⲉϥⲉⲣⲙⲱⲟⲩⲓ ϩⲓⲱⲟⲩⲧ ϩⲓϫⲉⲛ ⲡⲓⲕⲁϩⲓ ⲉϥⲣⲁϣⲓ ϩⲓϫⲉⲛ ⲡⲱⲟⲩ ⲙ̀Ⲡⲭ̅ⲥ̅ ⲛⲉⲙ ⲉϫⲉⲛ ⲡⲧⲁⲕⲟ ⲙ̀ⲡⲓⲇⲓⲁⲃⲟⲗⲟⲥ ⲟⲩⲟϩ ⲛⲁϥⲉⲣϣⲫⲏⲣⲓ ⲡⲉ ϫⲉ ⲁϥϫⲉⲙϫⲟⲙ ⲉⲕⲁϯ ⲉϯⲥⲁϫⲓ ⲛ̀ⲧⲉ ⲡⲓⲑⲏⲣⲓⲟⲛ ⲉⲧⲉⲙⲙⲁⲩ. ⲟⲩⲟϩ ⲛⲁϥⲙⲟⲕⲙⲉⲕ ⲛ̀ϧⲣⲏⲓ ⲛ̀ϧⲏⲧϥ ⲡⲉϫⲉ ⲁϥⲉⲣⲟⲩⲉⲓ ⲉϥⲛⲁⲙⲟϣⲓ ⲉⲑⲱⲛ.
Ⲁⲩϫⲟⲩϣⲧ ⲇⲉ ⲉⲫⲟⲩⲟⲥⲧⲉⲛ ⲙ̀ⲡⲓⲧⲱⲟⲩ ⲁϥⲛⲁⲩ ⲉϩⲁⲛⲙⲏϣ ⲛ̀ϣⲉⲛⲧⲁⲧⲥⲓ ⲛ̀ⲧⲉ ⲛⲓⲑⲏⲣⲓⲟⲛ. ⲡⲓⲉϩⲟⲟⲩ ⲇⲉ ⲛⲉ ⲁϥⲥⲓⲛⲓ ⲟⲩⲟϩ ⲛⲁϥⲙⲟⲕⲙⲉⲕ ⲛ̀ϧⲣⲏⲓ ⲛ̀ϧⲏⲧϥ ⲉϥϫⲟⲩϣⲧ ⲉⲃⲟⲗ ⲟⲩⲟϩ ⲛⲁϥϫⲱ ⲙ̀ⲙⲟⲥ ⲡⲉϫⲉ ⲟⲩϩⲱⲃ ⲛ̀ⲁⲧϫⲟⲙ ⲡⲉ ⲫⲁⲓ ⲉⲑⲣⲉϥⲭⲁⲧ ⲛ̀ⲥⲱϥ ⲛ̀ϫⲉ Ⲫϯ. ⲛⲁϥ ⲙⲟϣⲓ ⲇⲉ ⲡⲉ ϧⲉⲛ ⲡⲓⲉϫⲱⲣϩ ⲉϥⲙⲏⲛ ⲉϯⲡⲣⲟⲥⲉⲩⲭⲏ. ⲉⲧⲁ ϣⲟⲣⲡ ⲇⲉ ϣⲱⲡⲓ ϩⲏⲏⲡⲉ ⲁϥⲛⲁⲩ ⲉⲟⲩⲛⲓϣϯ ⲛ̀ϩⲓⲱⲓϯ ⲉⲥϭⲟϫⲓ ⲟⲩⲟϩ ⲉⲥⲛⲓϥⲓ ⲉⲃⲟⲗ ⲉⲙⲁϣⲱ ⲉⲥⲛⲁ ⲉⲡϣⲱⲓ ⲉϫⲉⲛ ϯⲁⲫⲉ ⲙ̀ⲡⲓⲧⲱⲟⲩ ⲟⲩⲟϩ ⲁϥⲙⲟϣⲓ ⲛ̀ⲥⲱⲥ. ⲉⲧⲁϥϧⲱⲛⲧ ⲇⲉ ⲉⲡⲓⲃⲏⲃ ⲁϥⲛⲁⲩ ⲉⲡⲓⲑⲏⲣⲓⲟⲛ ⲉϥϩⲏⲗ ⲉϧⲟⲩⲛ ⲉⲣⲟϥ. ⲟⲩⲟϩ ⲉⲧⲁϥⲥⲟⲙⲥ ⲉϧⲟⲩⲛ ⲁϥⲛⲁⲩ ⲉϯⲁⲅⲁⲡⲓ ⲉⲥϫⲏⲕ ⲉⲃⲟⲗ ⲉⲡⲓⲙⲁⲕⲁⲣⲓⲟⲥ ⲛ̀ϧⲉⲗⲗⲟ ⲁⲃⲃⲁ Ⲡⲁⲩⲗⲉ ⲟⲩⲟϩ ⲁϥϩⲓϯϩⲟϯ ⲉⲃⲟⲗ ϩⲁⲣⲟϥ ⲁϥⲥⲟⲙⲥ ⲁϥⲛⲁⲩ ⲉⲟⲩⲱⲛⲓ ⲛ̀ϧⲟⲩⲛ ϧⲉⲛ ⲡⲓⲃⲏⲃ ⲁϥϣⲉⲛⲁϥ ⲁϥⲉⲗ ⲱⲛⲓ ⲁϥⲕⲱⲗϩ ⲉⲡⲓⲣⲟ.
Ⲁⲥϣⲱⲡⲓ ⲇⲉ ⲉⲧⲁϥⲥⲱⲧⲉⲙ ⲛ̀ϫⲉ ⲡⲓⲙⲁⲕⲁⲣⲓⲟⲥ ⲛ̀ϧⲉⲗⲗⲟ ⲉⲡⲓⲥⲉⲛⲥⲉⲛ ⲛ̀ⲧⲉ ⲡⲓϣⲉ ⲛ̀ⲱⲛⲓ ⲁϥⲧⲱⲛϥ ϩⲱϥ ⲁϥⲱⲗⲓ ⲛ̀ⲟⲩⲛⲓϣϯ ⲛ̀ⲱⲛⲓ ⲁϥϩⲓⲧϥ ϩⲓⲣⲉⲛ ⲡⲓⲣⲟ ⲉⲃⲟⲗ ⲥϧⲁⲟⲩⲛ. ⲧⲟⲧⲉ ⲁⲃⲃⲁ Ⲁⲛⲧⲱⲛⲓⲟⲥ ⲁϥϩⲓⲧϥ ⲉϫⲉⲛ ⲡⲉϥϩⲟ ⲥⲁⲃⲟⲗ ⲙ̀ⲡⲓⲣⲟ ⲉϥϯϩⲟ ⲉⲡⲓϧⲉⲗⲗⲟ ϩⲓⲛⲁ ⲛ̀ⲧⲉϥⲭⲁϥ ⲉϧⲟⲩⲛ ⲟⲩⲟϩ ⲡⲉϫⲁϥ ⲛⲁϥ ϫⲉ ϯⲭⲏ ⲙ̀ⲙⲁⲩⲁⲧ ⲥⲁⲃⲟⲗ ⲧⲁⲓ. ⲉⲧⲁⲓⲓ ⲅⲁⲣ ⲁⲛⲟⲕ ⲉⲃⲟⲗϧⲉⲛ ⲟⲩⲙⲱⲓⲧ ⲉϥⲟⲩⲏⲟⲩ ⲟⲩⲟϩ ⲉⲧⲁⲓⲓ ϫⲉ ⲛ̀ⲧⲁⲛⲁⲩ ⲉⲣⲟⲕ. ϯⲉⲙⲓ ⲇⲉ ϩⲱ ϫⲉ ϯⲙ̀ⲡ̀ϣⲁ ⲙ̀ⲙⲟⲕ ⲁⲛ ⲉⲑⲣⲓⲛⲁⲩ ⲉⲣⲟⲕ. ⲓⲥϫⲉ ⲕϣⲱⲡ ⲛ̀ⲛⲓⲑⲏⲣⲓⲟⲛ ⲉⲣⲟⲕ ⲉⲑⲃⲉⲟⲩ ⲕϣⲱⲡ ⲙ̀ⲙⲟⲓ ⲉⲣⲟⲕ ⲁⲛ ⲁⲛⲟⲕ ϧⲁ ⲡⲓⲣⲱⲙⲓ. ⲁⲓⲕⲱϯ ⲟⲩⲟϩ ⲁⲓϫⲓⲙⲓ ⲁⲓⲕⲱⲗϩ ⲉⲓⲉⲣⲑⲁⲣⲓⲛ ϫⲉ ⲛ̀ⲧⲟⲩⲁⲟⲩⲱⲛ ⲛⲏⲓ. ⲉϣⲱⲡ ⲟⲩⲛ ⲁⲓϣⲧⲉⲙϣⲁϣⲛⲓ ⲉⲡⲁⲓϩⲱⲃ ϯⲛⲁⲙⲟⲩ ϩⲓⲣⲉⲛ ⲡⲉⲕⲣⲟ ϩⲓⲛⲁ ⲁⲕϣⲁⲛⲛⲁⲩ ⲉⲡⲁⲥⲱⲙⲁ ⲛ̀ⲧⲉⲕⲑⲟⲙⲥϥ. ⲉⲧⲁϥⲁⲙⲟⲛⲓ ⲇⲉ ⲛ̀ⲧⲟⲧϥ ⲉϥϫⲱ ⲙ̀ⲙⲟⲥ ⲛ̀ⲛⲁⲓⲥⲁϫⲓ ⲛⲁϥ ⲙⲟⲡⲓⲥ ϫⲉ ⲁⲡⲓⲙⲁⲕⲁⲣⲓⲟⲥ Ⲡⲁⲩⲗⲉ ⲉⲣⲟⲩⲱ ⲛⲁϥ ⲡⲉϫⲁϥ ⲛⲁϥ ϫⲉ ⲙ̀ⲙⲟⲛ ϩⲗⲓ ⲉϥⲛⲏⲟⲩ ϧⲉⲛ ⲟⲩϫⲱⲛⲧ ⲟⲩⲇⲉ ⲙ̀ⲙⲟⲛ ϩⲗⲓ ⲛ̀ⲣⲱⲙⲓ ⲉϥϯϣⲑⲟⲩⲓⲧ. ⲉⲧⲁϥⲥⲁϫⲓ ⲛⲉⲙⲁϥ ϧⲉⲛ ϩⲁⲛⲥⲁϫⲓ ⲛ̀ϩⲙⲟⲧ ⲁϥⲟⲩⲱⲛ ⲙ̀ⲡⲓⲣⲟ ⲛⲁϥ ⲟⲩⲟϩ ⲁⲩⲙⲟⲗϫ ⲉϧⲟⲩⲛ ⲉⲛⲟⲩⲉⲣⲏⲟⲩ ⲁⲩϯⲫⲓ ⲉⲛⲟⲩⲉⲣⲏⲟⲩ ϧⲉⲛ ⲟⲩⲫⲓ ⲉ̅ⲑ̅ⲩ̅ ⲟⲩⲟϩ ⲁⲡⲓⲟⲩⲁⲓ ⲙ̀ⲙⲱⲟⲩ ⲡⲓⲟⲩⲁⲓ ⲟⲩⲱⲛϩ ⲙ̀ⲡⲉϥⲣⲁⲛ ⲙ̀ⲡⲉϥⲉⲣⲏⲟⲩ.
Ⲁⲥϣⲱⲡⲓ ⲇⲉ ⲙⲉⲛⲉⲛⲥⲁ ⲛⲁⲓ ⲁⲡⲓⲙⲁⲕⲁⲣⲓⲟⲥ Ⲡⲁⲩⲗⲟⲥ ϩⲉⲙⲥⲓ ⲉⲩⲥⲟⲡ ⲛⲉⲙ ⲁⲃⲃⲁ Ⲁⲛⲧⲱⲛⲓⲟⲥ ⲟⲩⲟϩ ⲡⲉϫⲁϥ ϫⲉ ⲉⲑⲃⲉ ⲟⲩ ⲁⲕϯ ⲙ̀ⲡⲁⲓⲛⲓϣϯ ⲛ̀ϧⲓⲥⲓ ⲛⲁⲕ ⲟⲩⲟϩ ⲁⲕⲓ ⲉⲕⲙⲟϣⲓ ϧⲉⲛ ⲡⲁⲓⲙⲱⲓⲧ ⲧⲏⲣϥ ⲉⲕⲕⲱϯ ⲛ̀ⲥⲁ ⲟⲩϧⲉⲗⲗⲟ ⲉϥⲕⲏⲛ ⲉⲃⲱⲗ ⲉⲃⲟⲗ ⲟⲩⲟϩ ⲙⲉⲛⲉⲛⲥⲁ ⲕⲉⲕⲟⲩϫⲓ ⲭⲛⲁⲛⲁⲩ ⲉⲣⲟϥ ⲉϥⲟⲓ ⲛ̀ⲕⲁϩⲓ. ⲁⲗⲗⲁ ⲉⲡⲓⲇⲏ ϯⲁⲅⲁⲡⲏ ϣⲁⲥϣⲱⲡ ⲉⲣⲟⲥ ϧⲉⲛ ϩⲱⲃ ⲛⲓⲃⲉⲛ ϯϯϩⲟ ⲉⲣⲟⲕ ⲡⲁⲥⲟⲛ Ⲁⲛⲧⲱⲛⲓⲟⲥ ⲁϫⲟⲥ ⲛⲏⲓ ϫⲉ ⲁⲣⲉ ⲡⲓϣⲗⲟⲗ ⲛ̀ⲧⲉ ϯⲙⲉⲧⲣⲱⲙⲓ ⲉⲣⲉ ⲟⲩ ϯⲛⲟⲩ. ⲙⲁⲧⲁⲙⲟⲓ ϫⲉ ⲉⲧⲓ ⲟⲛ ⲥⲉⲕⲱⲧ ⲛ̀ϩⲁⲛⲕⲱⲧ ϧⲉⲛ ⲛⲓⲡⲟⲗⲓⲥ ⲛ̀ⲁⲣⲭⲉⲟⲥ ⲛ̀ⲧⲉ
Ⲉⲧⲁ ϣⲱⲣⲡ ⲇⲉ ϣⲱⲡⲓ ⲡⲉϫⲉ ⲁⲃⲃⲁ Ⲡⲁⲩⲗⲉ ⲛ̀ⲁⲃⲃⲁ Ⲁⲛⲧⲱⲛⲓⲟⲥ ϫⲉ ⲛϣⲓⲉⲙⲓ ⲡⲉ ϧⲁϫⲱϥ ⲙ̀ⲡⲁⲓⲥⲏⲟⲩ ϫⲉ ⲕϣⲟⲡ ϧⲉⲛ ⲛⲁⲓⲑⲟϣ ⲁⲠⲭ̅ⲥ̅ ⲅⲁⲣ ⲧⲁⲙⲟⲓ ϫⲉ ⲛ̀ⲑⲟⲕ ⲟⲩϣⲫⲏⲣ. ⲙ̀ⲃⲱⲕ ⲛⲉⲙⲏⲓ ⲁⲗⲗⲁ ⲉⲡⲓⲇⲏ ⲡⲥⲏⲟⲩ ⲛ̀ⲧⲉ ⲡⲁⲃⲱⲗ ⲉⲃⲟⲗ ⲡⲉ ⲛ̀ⲧⲁϣⲱⲡⲓ ⲛⲉⲙ Ⲡⲭ̅ⲥ̅. ⲁϥϫⲱⲕ ⲉⲃⲟⲗ ⲛ̀ϫⲉ ⲡⲁⲥⲏⲟⲩ ⲟⲩⲟϩ ⲡⲁⲓⲣⲏϯ ⲡⲉ ϯⲛⲁϩϯ ⲙ̀ⲙⲟⲥ ϫⲉ ϥⲭⲏ ϧⲁϫⲱⲓ ⲛ̀ϫⲉ ⲡⲓⲭⲗⲟⲙ ⲛ̀ⲧⲉ ϯⲙⲉⲑⲙⲏⲓ ⲟⲩⲟϩ ⲉⲧⲁ Ⲫϯ ⲟⲩⲟⲣⲡⲕ ϩⲓⲛⲁ ⲛ̀ⲧⲉⲕϩⲱⲃⲥ ⲙ̀ⲡⲁⲥⲱⲙⲁ ϧⲉⲛ ⲡⲕⲁϩⲓ ⲙⲁⲗⲗⲟⲛ ⲇⲉ ϩⲓⲛⲁ ⲛ̀ⲧⲉⲕϯ ⲛⲁ ⲡⲓⲕⲁϩⲓ. Ⲁⲥϣⲱⲡⲓ ⲇⲉ ⲉⲧⲁ ⲡⲓⲙⲁⲕⲁⲣⲓⲟⲥ Ⲡⲁⲩⲗⲉ ϫⲉ ⲛⲁⲓⲥⲁϫⲓ ⲁϥⲣⲓⲙⲓ ⲛ̀ϫⲉ ⲁⲃⲃⲁ Ⲁⲛⲧⲱⲛⲓⲟⲥ ϧⲉⲛ ⲟⲩϥⲓⲁϩⲟⲙ ⲁϥϯϩⲟ ⲉⲣⲟϥ ⲉϥϫⲱ ⲙ̀ⲙⲟⲥ ϫⲉ ⲙ̀ⲡⲉⲣⲭⲁⲧ ⲛ̀ⲥⲱⲕ ⲡⲁⲙⲉⲛⲣⲓⲧ ⲁⲗⲗⲁ ⲁⲛⲓⲧ ⲛⲉⲙⲁⲕ ⲉⲡⲓⲙⲁ ⲉⲧⲉⲕⲛⲁϣⲉⲛⲁⲕ ⲉⲣⲟϥ. ⲁϥⲉⲣⲟⲩⲱ ⲛ̀ϫⲉ ⲡⲓⲙⲁⲕⲁⲣⲓⲟⲥ Ⲡⲁⲩⲗⲟⲥ ϫⲉ ⲥⲉϩⲛⲁⲕ ⲁⲛ ⲉⲕⲱϯ ⲛ̀ⲥⲁ ⲛⲏⲉⲧⲉⲛⲟⲩⲕ ⲁⲗⲗⲁ ⲛⲁ ⲡⲉⲕϣⲫⲏⲣ ⲉⲑⲃⲉ ⲫⲁⲓ ⲡⲁⲙⲉⲛⲣⲓⲧ ⲓⲥϫⲉ ⲡⲓϩⲱⲃ ϩⲱⲣϣ ⲛ̀ⲧⲟⲧⲕ ⲁⲛ ⲙⲁϣⲉⲛⲁⲕ ⲉⲧⲉⲕⲙⲟⲛⲏ ϧⲉⲛ ⲟⲩⲓⲱⲥ ⲁⲛⲓⲟⲟⲩⲓ ⲛⲏⲓ ⲛ̀ϯⲥⲧⲟⲗⲏ ⲫⲏⲉⲧⲁϥⲧⲏⲓⲥ ⲛ̀ϫⲉ ⲁⲃⲃⲁ Ⲁⲑⲁⲛⲁⲥⲓⲟⲥ ⲡⲓⲁⲣⲭⲓⲉⲡⲓⲥⲕⲟⲡⲟⲥ ϩⲓⲛⲁ ⲛ̀ⲧⲉⲕϩⲱⲃⲥ ⲙ̀ⲡⲁⲥⲱⲙⲁ ⲛ̀ϧⲏⲧⲥ. ⲛⲉ ⲉⲧⲁϥϫⲉ ⲫⲁⲓ ⲇⲉ ϫⲉ ⲁϥⲉⲣⲭⲣⲓⲁ ⲉϩⲱⲃⲥ ⲙ̀ⲡⲉϥⲥⲱⲙⲁ ⲁⲗⲗⲁ ϥⲟⲩⲱϣ ⲉϯⲧⲟⲧϥ ⲉⲃⲟⲗ ϩⲓⲛⲁ ⲛ̀ⲧⲉϣⲧⲉⲙⲛⲁⲩ ⲉⲣⲟϥ ⲉϥⲭⲱ ⲙ̀ⲡⲓⲥⲱⲙⲁ ⲉϩⲣⲏⲓ.
Ⲁⲥϣⲱⲡⲓ ⲉⲧⲁ ⲁⲃⲃⲁ Ⲁⲛⲧⲱⲛⲓⲟⲥ ⲥⲱⲧⲉⲙ ⲉⲑⲃⲉ ⲁⲃⲃⲁ Ⲁⲑⲁⲛⲁⲥⲓⲟⲥ ⲛⲉⲙ ϯⲥⲧⲟⲗⲏ ⲉⲧⲁϥⲧⲏⲓⲥ ⲛⲁϥ ⲁϥⲉⲣϣⲫⲏⲣⲓ ϫⲉ ⲁϥⲛⲁⲩ ⲉⲒⲏ̅ⲥ̅ Ⲡⲭ̅ⲥ̅ ⲛ̀ϧⲣⲏⲓ ⲛ̀ϧⲏⲧϥ ⲟⲩⲟϩ ⲁϥⲟⲩⲱϣⲧ ⲙ̀ⲙⲟϥ ⲙ̀ⲡⲉϥⲉⲣⲧⲟⲗⲙⲁⲛ ϥⲉ ⲉⲣⲟⲩⲱ ⲛⲁϥ ⲛ̀ϩⲗⲓ ⲉⲡⲧⲏⲣϥ ⲁⲗⲗⲁ ⲁϥⲣⲓⲙⲓ ⲉⲙⲁϣⲱ ⲁϥϯⲫⲓ ⲉⲣⲟϥ ⲛⲉⲙ ⲛⲉϥⲃⲁⲗ ⲟⲩⲟϩ ⲁϥⲧⲱⲛϥ ⲁϥϩⲱⲗ ⲉⲧⲉϥⲙⲟⲛⲏ. ⲁⲡⲓⲙⲁⲑⲏⲧⲏⲥ ⲃ̅ ⲛ̀ⲧⲁϥ ⲛⲏⲉⲧⲁⲩϣⲱⲡⲓ ϧⲁⲧⲟⲧϥ ⲛ̀ⲟⲩⲛⲓϣϯ ⲛ̀ⲥⲏⲟⲩ ⲁⲩⲉⲣⲡⲁⲛⲧⲁⲛ ⲉⲣⲟϥ ⲡⲉϫⲱⲟⲩ ⲛⲁϥ ϫⲉ ⲡⲉⲛⲓⲱⲧ ⲛⲁⲕⲑⲱⲛ ⲡⲉ ⲙ̀ⲡⲁⲓⲥⲏⲟⲩ ⲧⲏⲣϥ. ⲁϥⲉⲣⲟⲩⲱ ⲛⲱⲟⲩ ϩⲱϥ ⲉϥϫⲱ ⲙ̀ⲙⲟⲥ ϫⲉ ⲟⲩⲟⲓ ⲛⲏⲓ ⲁⲛⲟⲕ ϧⲁ ⲡⲓⲣⲉϥⲉⲣⲛⲟⲃⲓ ϫⲉ ⲁⲓⲧⲁⲗⲟ ⲉⲣⲟⲓ ϫⲉ ⲙⲟⲛⲁⲭⲟⲥ ⲙ̀ⲡⲗⲁⲥⲧⲟⲛ. ⲁⲓⲛⲁⲩ ⲉⲎⲗⲓⲁⲥ ⲛⲙⲉ Ⲓⲱ̅ⲁ̅ ϩⲓ ⲡϣⲁϥⲉ ⲙ̀ⲫⲟⲟⲩ ⲁⲓⲛⲁⲩ ⲉⲠⲁⲩⲗⲟⲥ ⲛ̀ⲧⲁⲫⲙⲏ ϧⲉⲛ ⲡⲓⲡⲁⲣⲁⲇⲓⲥⲟⲥ ⲟⲩⲟϩ ⲛⲁϥⲥⲁϫⲓ ⲛⲉⲙⲱⲟⲩ ⲡⲉ ⲉϥⲕⲱⲗϩ ϧⲉⲛ ⲧⲉϥⲙⲉⲥⲧⲉⲛϩⲏⲧ ⲁϥⲱⲗⲓ ⲛ̀ϯⲥⲧⲟⲗⲏ ⲁϥⲓ ⲉⲃⲟⲗ ⲟⲩⲟϩ ⲁϥⲭⲱ ⲛ̀ⲛⲓⲙⲁⲑⲏⲧⲏⲥ ⲟⲩⲟϩ ⲁⲩϯϩⲟ ⲉⲣⲟϥ ϩⲓⲛⲁ ⲛ̀ⲧⲉϥⲧⲁⲙⲱⲟⲩ ⲉϩⲱⲃ ⲛⲓⲃⲉⲛ ⲟⲩⲟϩ ⲡⲉϫⲁϥ ⲛⲱⲟⲩ ϫⲉ ⲟⲩⲥⲏⲟⲩ ⲛ̀ⲥⲁϫⲓ ⲡⲉ ⲟⲩⲟϩ ⲟⲩⲥⲏⲟⲩ ⲛ̀ⲭⲁⲣⲱϥ ⲡⲉ.
Ⲁϥⲧⲱⲛϥ ⲇⲉ ⲁϥⲙⲟϣⲓ ϩⲓ ⲡⲉϥⲙⲱⲓⲧ ⲙ̀ⲡⲉϥⲱⲗⲓ ⲛ̀ϩⲗⲓ ⲛ̀ϧⲣⲏⲓ ⲛⲉⲙⲁϥ ⲉⲡⲧⲏⲣϥ ⲟⲩⲟϩ ⲛⲁϥⲓⲏⲥ ⲉϥⲙⲟϣⲓ ⲡⲉ ⲉϥⲟⲩⲱϣ ⲉⲧⲁϩⲉ ⲡⲓⲙⲁⲕⲁⲣⲓⲟⲥ Ⲡⲁⲩⲗⲟⲥ ⲉϥⲉⲣⲉⲡⲓⲑⲩⲙⲓⲛ ⲉⲛⲁⲩ ⲉⲣⲟϥ ⲛ̀ⲕⲉⲥⲟⲡ. ⲛⲁϥⲉⲣϩⲟϯ ⲅⲁⲣ ⲡⲉ ⲙⲏⲡⲱⲥ ⲉϥϩⲓ ⲡⲓⲙⲱⲓⲧ ⲛ̀ⲧⲉϥϯ ⲙ̀ⲡⲉϥⲡ̅ⲛ̅ⲁ̅ ⲉⲛⲉⲛϫⲓϫ ⲙ̀ⲡⲟ̅ⲥ̅. ⲉⲧⲁϥⲙⲟϣⲓ ϧⲉⲛ ⲡⲓⲉϩⲟⲟⲩ ⲉⲧⲉⲙⲙⲁⲩ ⲁϥⲓ ⲉⲡⲉϥⲧⲟⲟⲩⲓ ⲁⲥϣⲱⲡⲓ ⲉⲧⲁϥⲫⲛⲁⲩ ⲛ̀ⲁϫⲡⲅ̅ϯ ϣⲱⲡⲓ ⲁϥⲛⲁⲩ ⲉϯⲧⲁⲝⲓⲥ ⲛ̀ⲧⲉ ⲛⲓⲁⲅⲅⲉⲗⲟⲥ ϩⲓ ⲡⲓⲙⲱⲓⲧ ⲛⲉⲙ ⲛⲓⲁⲡⲟⲥⲧⲟⲗⲟⲥ ⲛⲉⲙ ⲡⲓⲭⲟⲣⲟⲥ ⲛ̀ⲛⲓⲡⲣⲟⲫⲏⲧⲏⲥ ⲛⲉⲙ ⲁⲃⲃⲁ Ⲡⲁⲩⲗⲉ ⲉϥϯⲙⲟⲩⲉ ϧⲉⲛ ⲧⲟⲩⲙⲏϯ ⲙ̀ⲫⲣⲏϯ ⲛ̀ⲟⲩⲭⲓⲱⲛ ⲉⲩⲥⲱⲕ ⲛⲉⲙⲱⲟⲩ ⲉⲡϣⲱⲓ ⲉⲧⲫⲉ. ϧⲉⲛ ⲡⲓⲛⲁⲩ ⲇⲉ ⲉⲧⲉⲙⲙⲁⲩ ⲁϥϩⲉⲓ ⲉϫⲉⲛ ⲡⲉϥϩⲟ ⲟⲩⲟϩ ⲛⲁϥϫⲱ ⲙ̀ⲙⲟⲥ ⲡⲉ ⲉϥⲣⲓⲙⲓ ⲟⲩⲟϩ ⲉϥϥⲓⲁϩⲟⲙ ϫⲉ ⲡⲱⲥ ⲁⲕⲭⲁⲧ ⲛ̀ⲥⲱⲕ ⲡⲁϣⲁⲙϣⲉ ⲛⲟⲩϯ ⲛ̀ⲓⲱⲧ ⲓⲉ ⲉⲑⲃⲉ ⲟⲩ ⲙ̀ⲡⲉⲕϣⲉⲡ ⲡⲁⲧⲁⲓⲉⲙⲟⲩϯ ⲉⲣⲟⲕ ⲙⲉⲛⲉⲛⲥⲁ ⲡⲁⲓⲛⲓϣϯ ⲛ̀ϭⲟϫⲓ ⲉⲧⲁⲓⲁⲓϥ ⲙ̀ⲫⲣⲏϯ ⲛ̀ⲟⲩϩⲁⲗⲏⲧ.
Ⲟⲩⲟϩ ⲉⲧⲁϥⲓ ⲉϧⲟⲩⲛ ⲉⲡⲓⲃⲏⲃ ⲁϥⲛⲁⲩ ⲉⲁⲃⲃⲁ Ⲡⲁⲩⲗⲉ ⲉϥϩⲱⲟⲩⲓ ⲉϫⲉⲛ ⲛⲉϥⲕⲉⲗⲓ ⲟⲩⲟϩ ⲧⲉⲥⲁⲫⲉ ⲉⲥⲥⲟⲙⲥ ⲉⲡϣⲱⲓ ⲉⲧⲫⲉ ⲉⲣⲉ ⲛⲉϥϫⲓϫ ⲫⲟⲣϣ ⲉⲃⲟⲗ ⲟⲩⲟϩ ⲛⲁϥⲙⲟⲕⲙⲉⲕ ⲛ̀ϫⲉ ⲁⲃⲃⲁ Ⲁⲛⲧⲱⲛⲓⲟⲥ ϫⲉ ⲁⲣⲏⲟⲩ ⲉϥⲟⲛϧ ⲟⲩⲟϩ ⲉϥⲧⲱⲃϩ. ⲟⲩⲟϩ ⲁϥⲟϩⲓ ⲉⲣⲁⲧϥ ϩⲱϥ ⲛ̀ϫⲉ ⲁⲃⲃⲁ Ⲁⲛⲧⲱⲛⲓⲟⲥ ⲁϥⲉⲣϣⲫⲏⲣ ⲛ̀ⲧⲱⲃϩ ⲛⲉⲙⲁϥ. ⲁⲥϣⲱⲡⲓ ⲇⲉ ⲉⲧⲁ ⲡⲓⲛⲁⲩ ⲥⲓⲛⲓⲥ ⲙ̀ⲡⲉϥⲥⲱⲧⲉⲙ ⲉⲥⲙⲏ ⲟⲩⲇⲉ ϥⲓⲁϩⲟⲙ ⲕⲁⲧⲁ ϯⲥⲩⲛⲏⲑⲓⲁ ⲛ̀ⲧⲉ ⲛⲏⲉⲧⲧⲱⲃϩ. ⲧⲟⲧⲉ ⲁϥⲉⲙⲓ ϫⲉ ⲡⲓⲥⲱⲙⲁ ⲙ̀ⲙⲁⲩⲁⲧϥ ⲡⲉ ⲉⲧⲧⲱⲃϩ ⲟⲩⲟϩ ⲁϥϯⲱⲟⲩ ⲙ̀Ⲫϯ ⲫⲏⲉⲧⲉⲣⲉ ϩⲱⲃ ⲛⲓⲃⲉⲛ ⲟⲛϧ ⲛ̀ⲧⲟⲧϥ. ⲟⲩⲟϩ ⲁϥⲕⲟⲩⲗⲱⲗ ⲙ̀ⲡⲉϥⲥⲱⲙⲁ ϧⲉⲛ ϯⲥⲧⲟⲗⲏ ⲉ̅ⲑ̅ⲩ̅ ⲟⲩⲟϩ ⲁϥϥⲁⲓ ⲙ̀ⲙⲟϥ ⲁϥⲉⲛϥ ⲉⲑⲙⲏϯ ⲁϥⲉⲣⲯⲁⲗⲓⲛ ⲉⲣⲟϥ ⲕⲁⲧⲁ ⲛⲓⲡⲁⲣⲁⲇⲓⲥⲟⲥ ⲛ̀ⲧⲉ ⲛⲓⲭⲣⲓⲥⲧⲓⲁⲛⲟⲥ. ⲁⲡϩⲏⲧ ⲇⲉ ⲛ̀ⲁⲡⲁ Ⲁⲛⲧⲱⲛⲓⲟⲥ ⲙ̀ⲕⲁϩ ⲉⲣⲟϥ ⲉϥϫⲱ ⲙ̀ⲙⲟⲥ ϫⲉ ⲉⲓⲛⲁ ⲉⲣ ⲟⲩ ϫⲉ ⲙ̀ⲡⲓⲉⲣⲫⲙⲉⲩⲓ ⲛ̀ⲓⲛⲓ ⲛⲉⲙⲏⲓ ⲛ̀ⲟⲩⲁⲙⲉ ⲛⲉⲙ ⲟⲩϭⲁⲗⲉ ϩⲓⲛⲁ ⲛ̀ⲧⲁϣⲱⲕ ⲛ̀ⲧⲁⲑⲱⲙⲥ ⲙ̀ⲡⲓⲥⲱⲙⲁ. ⲁϥϣⲱⲡⲓ ⲉϥⲙⲟⲕⲙⲉⲕ ⲙ̀ⲙⲟϥ ϫⲉ ⲉⲓⲛⲉⲣ ⲟⲩ ⲉϣⲱⲡ ⲁⲓϣⲁⲛϩⲱⲗ ⲉϯⲙⲟⲛⲏ ϫⲉ ⲛ̀ⲧⲁⲓⲛⲓ ⲙⲟⲅⲓⲥ ⲛ̀ⲧⲁⲓ ⲛ̀ⲇ̅ ⲛ̀ⲉϩⲟⲟⲩ ⲟⲩⲟϩ ⲡⲉϫⲁϥ ⲙ̀ⲡⲁⲓⲣⲏϯ ϫⲉ ⲡⲁⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲉⲓⲙⲟⲩ ⲙ̀ⲡⲁⲓⲙⲁ ⲛⲉⲙ ⲡⲉⲕⲣⲉϥϣⲉⲙϣⲓ ⲉⲑⲛⲁⲛⲉϥ.
Ϩⲱⲥ ⲇⲉ ⲉϥϫⲱ ⲙ̀ⲙⲟⲥ ⲛ̀ⲛⲓⲁ ⲥⲁϫⲓ ⲓⲥ ϩⲏⲡⲡⲉ ⲓⲥ ⲙⲟⲩⲓ ⲃ̅ ⲁⲩⲓ ⲉⲩϭϭⲟϫⲓ ⲉⲩⲥⲟⲡ ⲟⲩⲟϩ ⲉⲧⲁϥⲛⲁⲩ ⲉⲣⲱⲟⲩ ⲁⲧⲉϥⲥⲟⲩⲣⲓ ϩⲓ ⲉⲣⲁⲧⲥ ⲙⲉⲛⲉⲛⲥⲁ ⲛⲁⲓ ⲁϥⲧⲁϫⲣⲉ ⲡⲉϥⲙⲉⲩⲓ ϧⲉⲛ Ⲫϯ ⲟⲩⲟϩ ⲁϥϣⲱⲡⲓ ϫⲉ ⲉϥⲛⲁⲩ ϧⲉⲛ ⲟⲩⲙⲉⲧⲁⲧϩⲟϯ ⲙ̀ⲫⲣⲏϯ ⲛ̀ⲟⲩⲓ ⲉϥⲛⲁⲩ ⲉϩⲟ ⲛ̀ϭⲣⲟⲙⲡⲓ ⲉⲩϩⲏⲗ. ⲁⲩⲓ ⲟⲛ ⲛ̀ϫⲉ ⲛⲓⲙⲟⲩⲓ ⲁⲛⲟϩⲓ ⲉⲣⲁⲧⲟⲩ ⲉϫⲉⲛ ⲡⲓⲥⲱⲙⲁ ⲛ̀ⲁⲃⲃⲁ Ⲡⲁⲩⲗⲉ ⲟⲩⲟϩ ⲛⲁⲩⲕⲓⲙ ⲛ̀ⲛⲟⲩⲥⲁⲧ ⲉⲩⲟⲓ ⲙ̀ⲫⲣⲏϯ ϫⲉ ⲉⲩⲥⲟⲡⲥⲉⲡ ⲛ̀ⲁⲃⲃⲁ Ⲁⲛⲧⲱⲛⲓⲟⲥ ⲁⲩϩⲓⲧⲟⲩ ϧⲁⲣⲁⲧϥ ⲉⲩϧⲁⲣⲁϫⲣⲉϫ ⲛ̀ⲛⲟⲩⲛⲁϫϩⲓ ⲉⲩⲱϣ ⲉⲃⲟⲗ. ⲧⲟⲧⲉ ⲁϥⲉⲙⲓ ⲛ̀ϫⲉ ⲁⲃⲃⲁ Ⲁⲛⲧⲱⲛⲓⲟⲥ ϫⲉ ⲉⲩⲕⲱϯ ⲛ̀ⲧⲉϥⲥⲙⲟⲩ ⲉⲣⲱⲟⲩ ⲟⲩⲟϩ ⲛⲉ ϣⲁⲩⲣⲓⲙⲓ ⲡⲉϫⲉ ⲁϥⲙⲧⲟⲛ ⲙ̀ⲙⲟϥ ⲛ̀ϫⲉ ⲡⲓⲙⲁⲕⲁⲣⲓⲟⲥ Ⲡⲁⲩⲗⲟⲥ.
Ⲁⲥϣⲱⲡⲓ ⲇⲉ ⲙⲉⲛⲉⲛⲥⲁ ⲛⲁⲓ ⲁⲩⲉⲣϩⲏⲧⲥ ⲛ̀ϣⲱⲕⲓ ϧⲉⲛ ⲡⲓⲕⲁϩⲓ ϧⲉⲛ ⲛⲟⲩⲓⲉⲃ ⲁⲩϣⲱⲕⲓ ⲉϩⲣⲏⲓ ⲛ̀ⲧⲙⲁⲓⲏ ⲛ̀ⲟⲩⲣⲱⲙⲓ ⲛⲉ ϣⲁⲩⲕⲓⲙ ⲛ̀ⲛⲟⲩⲙⲁϣϫ ⲡⲉ ⲉⲩⲑⲉⲃⲓⲟ ⲛ̀ϫⲱⲟⲩ ⲛ̀ⲁⲡⲁ Ⲁⲧⲱⲛⲓⲟⲥ ⲟⲩⲟϩ ⲛⲉϣⲁⲩⲗⲱϫϩ ⲛ̀ⲛⲉϥⲫⲁⲧ ⲡⲉ ⲛⲉⲙ ⲛⲉⲙ ⲛⲉϥϫⲓϫ ϧⲉⲛ ⲡⲟⲩⲗⲁⲥ ϩⲱⲥⲧⲉ ⲛ̀ⲧⲉϥⲕⲁϯ ϫⲉ ⲛ̀ⲧⲉϥⲥⲙⲟⲩ ⲉⲣⲱⲟⲩ ⲟⲩⲟϩ ⲁϥϣⲑⲟⲣⲧⲉⲣ ⲉϫⲉⲛ ϯϣⲫⲏⲣⲓ ⲛ̀ⲧⲉ ⲡⲱⲟⲩ ⲙ̀Ⲡⲭ̅ⲥ̅ ⲡⲉⲛⲟ̅ⲥ̅. ϫⲉ ⲡⲱⲥ ⲣⲱ ϯⲫⲩⲥⲓⲥ ⲛ̀ⲧⲉ ⲛⲓⲑⲏⲣⲓⲟⲛ ⲥⲉⲉⲙⲓ ⲉⲛⲓⲣⲱⲙⲓ ⲉⲛⲁⲛⲉⲩ ⲛⲉⲙ ⲛⲓⲥⲱⲧⲡ ⲛ̀ⲧⲉ Ⲫϯ ⲟⲩⲟϩ ⲡⲉϫⲁϥ ϫⲉ ⲱ ⲡⲟ̅ⲥ̅ ⲫⲏⲉⲧⲉ ⲙ̀ⲙⲟⲛ ⲟⲩϫⲱⲃⲓ ⲛⲁϩⲉⲓ ϩⲓϫⲉⲛ ⲡⲓⲕⲁϩⲓ ⲥⲁⲃⲟⲗ ⲙ̀ⲡⲉϥⲟⲩⲱϣ ⲟⲩⲇⲉ ⲟⲩϭⲁϫ ⲛ̀ⲛⲉϥϩⲉⲓ ⲥⲁⲃⲟⲗ ⲙ̀ⲡⲉϥⲟⲩⲁϩⲥⲁϩⲛⲓ ⲛ̀ⲑⲟⲕ ⲉⲕⲉⲥⲙⲟⲩ ⲉⲣⲟⲛ ⲧⲏⲣⲉⲛ. ⲟⲩⲟϩ ⲁϥⲑⲱϩⲥ ⲉⲣⲱⲟⲩ ⲛ̀ⲛⲉϥϫⲓϫ ⲉϥⲥⲙⲟⲩ ⲉⲣⲱⲟⲩ ⲁϥⲉⲣⲕⲉⲗⲉⲩⲓⲛ ⲛⲱⲟⲩ ϫⲉ ⲙⲁϣⲉⲛⲱⲧⲉⲛ ⲉⲡⲉⲧⲉⲛⲙⲱⲓⲧ ⲉⲧⲁⲩϣⲉⲛⲱⲟⲩ ⲇⲉ ⲛ̀ϫⲉ ⲛⲓⲙⲟⲩⲓ ⲁⲁⲡⲁ Ⲁⲛⲧⲱⲛⲓⲟⲥ ϥⲁⲓ ⲡⲓⲥⲱⲙⲁ ⲛ̀ⲧⲉ ⲡⲓⲙⲁⲕⲁⲣⲓⲟⲥ Ⲡⲁⲩⲗⲟⲥ ⲕⲁⲧⲁ ⲧⲕⲁϩⲥ ⲛ̀ⲛⲓⲙⲟⲛⲁⲭⲟⲥ.
Ⲁⲥϣⲱⲡⲓ ⲇⲉ ⲙⲉⲛⲉⲛⲥⲁ ⲟⲩⲉϩⲟⲟⲩ ⲙ̀ⲫⲣⲏϯ ⲛ̀ⲟⲩⲕⲗⲏⲣⲟⲛⲟⲙⲟⲥ ⲛ̀ⲧⲁⲫⲙⲏ ⲁϥⲱⲗⲓ ⲛ̀ϯϣⲑⲏⲛ ⲛ̀ⲧⲉ ⲡⲓⲙⲁⲕⲁⲣⲓⲟⲥ Ⲡⲁⲩⲗⲉ ⲫⲏⲉⲧⲁϥⲑⲁⲙⲓⲟⲥ ⲛⲁϥ ⲉⲃⲟⲗϧⲉⲛ ⲛⲓϣⲉⲛⲃⲉⲛⲓ ⲁϥⲧⲁⲥⲑⲟϥ ⲉⲧⲉϥⲙⲟⲛⲏ. ⲁϥⲧⲁⲙⲉ ⲛⲓⲥⲛⲏⲟⲩ ⲉϩⲱⲃ ⲛⲓⲃⲉⲛ ⲉⲧⲁⲩϣⲱⲡⲓ ⲙ̀ⲙⲟϥ ⲟⲩⲟϩ ⲁϥⲧⲥⲁⲃⲱⲟⲩ ⲉϯⲕⲉⲗⲉⲩ ⲑⲁⲓ ⲧⲏⲣⲥ ⲛ̀ⲧⲉ ⲛⲓϩⲃⲏⲟⲩⲓ. ⲗⲟⲓⲡⲟⲛ ⲕⲁⲧⲁ ⲡϣⲱⲓ ⲙ̀ⲡⲓⲡⲁⲥⲭⲁ ⲛⲉⲙ ϯⲡⲉⲛⲧⲓⲕⲟⲥⲧⲏ ϣⲁϥϯ ⲛ̀ϯϣⲑⲏⲛ ϩⲓⲱⲧϥ ⲛ̀ⲧⲉ ⲡⲓⲙⲁⲕⲁⲣⲓⲟⲥ Ⲡⲁⲩⲗⲟⲥ. ⲟⲩⲟϩ ϣⲁϥⲧⲱⲃϩ ⲉⲥⲧⲟⲓ ⲉⲡⲉϥⲥⲱⲙⲁ.
Ⲁⲛⲟⲕ ⲇⲉ Ⲓⲉⲣⲱⲛⲩⲙⲟⲥ ⲡⲓⲣⲉϥⲉⲣⲛⲟⲃⲓ ϯϯϩⲟ ⲉⲟⲩⲟⲛ ⲛⲓⲃⲉⲛ ⲉⲑⲛⲁⲱϣ ⲙ̀ⲡⲓⲁϫⲱⲙ ϩⲓⲛⲁ ⲛ̀ⲧⲉⲧⲉⲛⲉⲣⲡⲁⲙⲉⲩⲓ ϫⲉ ⲟⲩⲏⲓ ⲅⲁⲣ ϯⲟⲩⲉϣ ϯϣⲑⲏⲛ ⲛ̀ⲧⲉ ⲡⲓⲙⲁⲕⲁⲣⲓⲟⲥ Ⲡⲁⲩⲗⲉ ⲛⲉⲙ ⲡⲉϥⲛⲁϩϯ ⲉϩⲟⲧⲉ ϯⲡⲟⲣⲫⲩⲣⲁ ⲛ̀ⲧⲉ ⲛⲓⲟⲩⲣⲱⲟⲩ ⲛⲉⲙ ⲡⲟⲩϭⲓϩⲃⲱⲥ ⲛⲉⲙ ⲡⲩⲱⲟⲩ ⲧⲏⲣϥ ⲁⲙⲏⲛ. Ⲉⲟⲩⲱⲟⲩ ⲙ̀ⲫⲓⲱⲧ ⲛⲉⲙ ⲡϣ.ⲣⲓ ⲛⲉⲙ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ϯⲛⲟⲩ ⲛⲉⲙ ⲛ̀ⲥⲏⲟⲩ ⲛⲓⲃⲉⲛ ⲛⲉⲙ ϣⲁ ⲉⲛⲉϩ ⲛ̀ⲧⲉ ⲛⲓⲉⲛⲉϩ ⲁⲙⲏⲛ.