ϩⲱⲃ ⲃ̅ ⲛ̀ⲏⲉϯⲛⲁϫⲟⲧⲟⲩ: ⲟⲩⲟⲛ ⲛⲓⲃⲉⲛ ⲉⲧⲁⲩⲣⲁϣⲓ ⲉϫⲱⲟⲩ ϧⲉⲛ ⲧⲫⲉ ⲉⲑⲃⲉ ⲧⲟⲩⲙⲉⲧⲁⲛⲟⲓⲁ ϩⲓϫⲉⲛ ⲡⲕⲁϩⲓ : ⲥⲉⲛⲁⲛⲁⲩ ⲁⲛ ⲉⲗⲩⲡⲏ ⲟⲩⲇⲉ ⲙⲕⲁϩ ϧⲉⲛ ⲡⲓⲙⲁ ⲉⲧⲉⲙⲙⲁⲩ : ⲛⲏⲇⲉ ⲉⲧⲉ ⲙ̀ⲡⲟⲩⲣⲁϣⲓ ⲉϫⲱⲟⲩ ϧⲉⲛ ⲧⲫⲉ ⲉⲑⲃⲉ ⲡϫⲓⲛⲧⲁⲥⲑⲟ ⲛ̀ⲧⲟⲩⲙⲉⲧⲁⲛⲟⲓⲁ ϩⲓϫⲉⲛ ⲡⲕⲁϩⲓ: ⲥⲉⲛⲁⲛⲁⲩ ⲁⲛ ⲉⲣⲁϣⲓ ⲟⲩⲇⲉ ⲁⲛⲁⲡⲁⲩⲥⲓⲥ ϧⲉⲛ ⲡⲓⲙⲁ ⲉⲧⲉⲙⲙⲁⲩ: ⲉⲣⲉ ⲛⲁⲓ ⲅⲁⲣ ⲛⲁⲉⲣ ⲡⲟⲩⲣⲁϣⲓ ϩⲓϫⲉⲛ ⲡⲕⲁϩⲓ: ⲛⲥⲉⲛⲁⲛⲁⲩ ⲁⲛ ⲉⲣⲁϣⲓ ⲟⲩⲇⲉ ⲁⲛⲁⲡⲁⲩⲥⲓⲥ ⲓⲥϫⲉⲛ ϯⲛⲟⲩ.

ⲛⲧⲉⲧⲉⲛⲥⲱⲧⲉⲙ ⲁⲛ ϫⲉ ⲱⲟⲩⲛⲓⲁⲧⲟⲩ ⲛ̀ⲛⲏⲉⲧⲉⲣϩⲏⲃⲓ ϫⲉ ⲛⲑⲱⲟⲩ ⲡⲉⲧⲟⲩⲛⲁϯϩⲟ ⲉⲣⲱⲟⲩ: ⲟⲩⲇⲉ ⲛⲓⲕⲉⲭⲱⲟⲩⲛⲓ ⲉⲑⲛⲁⲉⲣ ⲡⲟⲩⲣⲁϣⲓ ⲁⲛ ϩⲓϫⲉⲛ ⲡⲕⲁϩⲓ: ⲛⲥⲉⲛⲁⲁⲓⲧⲟⲩ ⲟⲛ ϧⲉⲛ ⲛⲓⲫⲏⲟⲩⲓ

ⲛⲧⲉⲧⲉⲛⲥⲱⲧⲉⲙ ⲁⲛ ϫⲉ ⲟⲩⲟⲓ ⲛⲱⲧⲉⲛ ⲛⲏⲉⲧⲥⲱⲃⲓ ϯⲛⲟⲩ: ϫⲉ ⲧⲉⲧⲉⲛⲛⲁⲉⲣϩⲏⲃⲓ : ⲛⲑⲱⲧⲉⲛ ⲛⲧⲉⲧⲉⲛⲣⲓⲙⲓ : ⲙⲏ ⲫⲁⲓ ⲁⲛ ⲡⲉ ⲡⲓⲥⲏⲟⲩ ⲛ̀ⲧⲉ ⲛⲏⲉⲧⲟⲓ ⲛ̀ϫⲱⲃ ϯϩⲓⲱⲧⲟⲩ ⲛ̀ⲟⲩϫⲟⲙ: ⲟⲩⲟϩ ⲫⲏⲉⲧⲉ ⲙ̀ⲙⲟⲛ ϣ̀ϫⲟⲙ ⲙ̀ⲙⲟϥ ⲉⲑⲣⲉϥϫⲟⲥ ϫⲉ ϯϫⲉⲙϫⲟⲙ ⲁⲛⲟⲕ ϧⲉⲛ ⲡϫⲓⲛⲑⲣⲉϥϯ ⲙ̀ⲡⲉϥϩⲏⲧ ⲉⲡⲓⲥⲁϫⲓ ⲉⲧⲥϧⲏⲟⲩⲧ. ⲟⲩⲟϩ ⲕⲁⲧⲁ ⲡⲥⲁϫⲓ ⲙ̀ⲡⲓⲡⲣⲟⲫⲏⲧⲏⲥ: ⲥⲉⲟϣ ⲛϫⲉ ⲛⲏⲉⲧⲁⲩⲉⲣϫⲱⲃ ϧⲉⲛ ⲡⲟⲩⲥⲱⲙⲁ: ϩⲓⲧⲉⲛ ⲡⲁϣⲁⲓ ⲛⲧⲉ ⲧⲟⲩⲡⲟⲣⲓⲁ: ⲥⲉⲛⲁⲉⲣϫⲱⲃ ⲇⲉ ⲟⲛ ϧⲉⲛ ⲛⲟⲩⲕⲉϩⲏⲧ. ⲙ̀ⲫⲣⲏϯ ⲉⲧⲉ ϯⲅⲣⲁⲫⲏ ϫⲱ ⲙ̀ⲙⲟⲥ ⲛ̀ⲛⲁⲓ ⲙⲡⲁⲓⲣⲏϯ:ϫⲉ ϥⲛⲁⲟⲩⲱϫⲡ ϧⲉⲛ ϯⲁⲕⲁⲑⲁⲣⲥⲓⲁ ⲛ̀ⲧⲉ ⲧⲉϥⲩⲭⲏ ⲉⲣⲉ ⲡⲓⲥⲁϫⲓ ⲇⲉ ⲛ̀ⲧⲉ ⲛⲏⲉⲧⲁⲩⲉⲣ ⲁⲅⲱⲛⲓⲍⲉⲥⲑⲉ ϧⲉⲛ ⲟⲩⲙⲉⲧϫⲱⲣⲓ ϫⲱ ⲙ̀ⲙⲟⲥ : ϫⲉ ⲭⲱⲗⲉⲙ ⲙⲁⲧⲁϩⲟⲕ ⲉⲣⲁⲧⲕ ⲛⲟⲩⲥⲱⲧⲡ ⲙ̀ⲫϯ: ⲛⲟⲩⲉⲣⲅⲁⲧⲏⲥ ⲙ̀ⲡⲁϥϭⲓϣⲓⲡⲓ

ⲙⲁⲣⲉⲛⲉⲣ ⲫⲟⲩⲱ ⲙ̀ⲫϯ ⲱ ⲛⲁⲥⲛⲏⲟⲩ ⲛ̀ϩⲟⲥⲟⲛ ⲡⲉⲟⲩⲟⲉⲓϣ ⲡⲉ ⲛⲉⲣϩⲱⲃ ⲙ̀ⲡⲟ̅ⲥ̅ ⲁⲣⲓⲫⲙⲉⲩⲓ ϫⲉ ⲫⲙⲟⲩ ⲛⲁⲱⲥⲕ ⲁⲛ ⲟⲩⲟϩ ⲡⲓⲕⲟⲥⲙⲟⲥ ϩⲁⲡ ⲥⲉⲧⲣⲉⲩⲡⲟⲛⲛⲉⲛ ⲉⲃⲟⲗ ⲛ̀ϧⲏⲧϥ ⲉⲩⲑⲱⲛ ⲛⲉⲛⲧⲁⲩϣⲱⲡⲓ ⲧⲏⲣⲟⲩ ϩⲁⲧⲉⲛϩⲏ ⲓⲥ ϩⲏⲏⲡⲉ ⲧⲉⲛⲟⲩ ⲥⲉⲛⲕⲟⲧⲕ ⲧⲏⲣⲟⲩ ϧⲉⲛ ⲛ̀ⲧⲁⲫⲟⲥ ⲙⲁⲣⲉⲛⲓ̀ⲣⲓ ⲇⲉ ⲛ̀ϩⲁⲛⲕⲁⲣⲡⲟⲥ ⲕⲁⲧⲁ ⲡⲉⲙ̀ⲡϣⲁ ⲛ̀ϯⲭⲁⲣⲓⲥ ⲙ̀ⲫϯ ⲉⲧⲁϥⲧⲁⲁⲥ ⲛⲁⲛ ⲥⲉ ⲉⲣⲟⲛ ⲁⲛⲟⲛ ⲛⲉⲙ ⲭⲣⲓⲥⲧⲓⲁⲛⲟⲥ ⲛⲓⲃⲉⲛ ⲉⲧⲉⲛⲧⲟⲛ ⲛⲉ ⲉⲡⲓⲟⲩⲱⲓⲛⲓ ⲙ̀ⲙⲏⲓ ⲓⲏ̅ⲥ̅ ⲡⲭ̅ⲥ̅ ⲁⲛⲟⲛ ⲇⲉ ⲁⲛⲟⲛ ϩⲁⲛⲣⲱⲙⲓ ⲟⲩⲟⲥ ⲡⲉ ⲉⲁⲛⲟⲛ ⲛⲉϥⲉⲃⲓⲁⲓⲕ ⲟⲩϣⲱⲥ ⲅⲁⲣ ⲡⲉ ⲁⲛⲟⲛ ϩⲁⲛⲉⲥⲱⲟⲩ ϧⲁ ⲧⲉϥϫⲓϫ ⲟⲩϫⲫⲟ ⲡⲉ ϧⲉⲛ ⲫⲓⲱⲧ

ⲁⲛⲟⲛ ϩⲁⲛⲇⲉ ⲁⲛⲟⲓ ⲡⲉϥ ⲡⲗⲁⲥⲙⲁ ⲟⲩⲟⲩⲱⲓⲛⲓ ⲡⲉ ⲉⲃⲟⲗϧⲉⲛ ⲡⲓⲟⲩⲱⲓⲛⲓ ⲁϥⲙⲟⲩ ϧⲁⲣⲟⲛ ⲁⲛⲟⲛ ⲛⲓⲣⲉϥⲉⲣⲛⲟⲃⲓ ⲁϥⲧⲁⲁϥ ϧⲁⲣⲟⲛ ϩⲓϫⲉⲛ ⲡⲓϣⲉ ⲙ̀ⲡⲓϫⲉ ⲭⲁⲥ ⲉϥⲉⲭⲁⲣⲓⲍⲉ ⲛⲁⲛ ⲛ̀ⲧⲉϥⲙⲉⲧⲟⲩⲣⲟ ⲓⲥϫⲉ ⲁⲡⲟ̅ⲥ̅ ⲕⲁⲧⲁ ⲫⲣⲟⲛⲓ ⲙ̀ⲡϣⲓⲡⲓ ⲁϥⲙⲟⲩ ϩⲁ ⲛⲉϥⲉⲃⲓⲁⲓⲕ ⲉⲛⲉ ⲡⲉⲧⲉϣϣⲉ ⲛ̀ⲑⲟϥ ⲁⲛ ⲡⲉ ⲉⲑⲣⲉ ⲛⲓⲉⲃⲓⲁⲓⲕ ⲙⲟⲩ ϧⲁ ⲡⲟⲩϫⲉ ⲭⲁⲥ ⲕⲁⲧⲁ ⲑⲉ ⲛ̀ⲧⲉϥⲙⲟⲩ ⲛ̀ⲥⲉⲙⲟⲩ ⲛⲉⲙⲁϥ ⲟⲩⲟϩ ⲑⲉ ⲛ̀ⲧⲁϥⲱⲛϧ ⲥⲉⲛⲁⲱⲛϧ ⲟⲛ ⲛⲉⲙⲁϥ

ϯϫⲱ ⲙ̀ⲡⲁⲓⲥⲁϫⲓ ⲟⲩⲟϩ ⲛ̀ϯⲛⲁⲭⲁϥ ⲁⲛ: ⲉⲧⲉ ⲫⲁⲓ ⲡⲉ: ϫⲉ ⲙ̀ⲡⲉⲣⲙⲉⲩⲓ ϫⲉ ⲙⲉⲛⲉⲛⲥⲁ ⲑⲣⲟⲩⲫⲱⲣϫ ⲉⲃⲟⲗ ⲙ̀ⲡⲓⲧⲟϩ ⲉⲡⲓⲥⲟⲩⲟ ⲟⲩⲟⲛ ⲟⲩⲙⲧⲟⲛ ⲛⲁⲧⲁϩⲉ ⲛⲓⲣⲉϥⲉⲣⲛⲟⲃⲓ : ϯϫⲱ ⲙⲙⲟⲥ ⲛⲱⲧⲉⲛ ⲕⲁⲧⲁ ϯⲙⲉⲧⲙⲉⲑⲣⲉ ⲛⲛⲓⲅⲣⲁⲫⲏ: ϫⲉ ⲓⲧⲉ ⲁⲅⲅⲉⲗⲟⲥ ⲓⲧⲉ ⲁⲣⲭⲓⲁⲅⲅⲉⲗⲟⲥ ⲥⲉⲛⲁⲭⲱ ⲛⲱⲟⲩ ⲧⲏⲣⲟⲩ : ⲟⲩⲟϩ ⲟⲛ ⲛⲓⲕⲉⲉ̅ⲑ̅ⲩ̅ ⲥⲉⲛⲁⲭⲁⲣⲱⲟⲩ ⲧⲏⲣⲟⲩ : ⲛ̀ⲧⲉϥϣⲱⲡⲓ ⲛ̀ϫⲉ ⲡⲓϩⲁⲡ ⲛ̀ⲧⲉ ⲫϯ: ⲟⲩⲥⲁϫⲓ ⲉϥϫⲱⲕ ⲉⲃⲟⲗ ⲟⲩⲟϩ ⲉϥϣⲱⲧ ϧⲉⲛ ⲡⲓⲉϩⲟⲟⲩ ⲉⲧⲉϥⲛⲁⲫⲱⲣϫ ⲉⲃⲟⲗ ⲛ̀ϫⲉ ⲛⲓⲥⲁⲙⲡⲉⲧϩⲱⲟⲩ ϧⲉⲛ ⲑⲙⲏϯ ⲛ̀ⲛⲓⲑⲙⲏⲓ: ⲙ̀ⲫⲛⲁⲩ ⲉⲧⲟⲩⲛⲁϩⲓⲟⲩⲓ ⲛⲛⲓⲣⲉϥⲉⲣⲛⲟⲃⲓ ⲉϧⲣⲏⲓ ⲉϯϩⲣⲱ ⲛⲭⲣⲱⲙ ⲉⲑⲙⲟϩ: ⲓⲉ ⲁⲣⲉ ⲫϯ ⲟⲓ ⲙ̀ⲫⲣⲏϯ ⲛ̀ⲛⲓⲣⲱⲙⲓ : ⲛ̀ⲧⲉϥⲭⲱ ⲛⲁϥ ⲛ̀ⲟⲩⲥⲩⲙⲃⲱⲗⲟⲥ ⲓⲉ ⲟⲩⲥⲩⲛⲕⲁⲑⲉⲇⲣⲟⲥ ⲉⲑⲣⲉϥϣⲉⲛϥ : ⲁⲣⲉ ⲫϯ ⲅⲁⲣ ⲛⲁⲉⲣⲡⲱⲃϣ ⲛⲟⲩ ϩⲓⲛⲁ ⲛ̀ⲧⲉ ⲟⲩⲁⲓ ⲉⲣⲟⲩⲱ ⲙ̀ⲙⲟϥ : ⲓⲉ ⲛ̀ⲧⲉϥϣⲉⲛϥ ⲛ̀ⲟⲩⲥⲁϫⲓ ⲉⲃⲏⲗ ⲉⲫⲁⲓ ⲙ̀ⲙⲁⲩⲁⲧϥ: ⲉϫⲟⲥ ⲉⲩⲥⲟⲡ ϩⲓⲣⲱ ⲛⲟⲩⲱⲧ: ϫⲉ ⲱ ⲫⲏⲉⲧϯϩⲁⲡ ⲙ̀ⲙⲏⲓ: ϩⲁⲛⲙⲉⲑⲙⲏⲓ ⲛⲉ ⲛⲉⲕϩⲁⲡ : ⲫⲏⲉⲧϯ ⲙ̀ⲡⲓⲟⲩⲁⲓ ⲡⲓⲟⲩⲁⲓ ⲕⲁⲧⲁ ⲛⲉϥϩⲃⲏⲟⲩⲓ : ⲉⲁⲛⲟⲛ ⲁⲛ ⲡⲉ ⲉⲧϯ ⲙ̀ⲫⲙⲉⲩⲓ ⲛⲁⲕ ⲉⲛⲁⲓ: ⲛ̀ⲑⲟⲕ ⲡⲉ ⲉⲧⲁⲙⲉⲧϣⲉⲛϩⲏⲧ ⲛ̀ⲧⲉⲛϣⲱⲡⲓ ⲉⲃⲟⲗϩⲓⲧⲟⲧⲕ

ⲟⲩⲟⲛ ϩⲁⲛϩⲃⲏⲟⲩⲓ ⲉⲛⲙⲉⲩⲓ ⲉⲣⲱⲟⲩ ϫⲉ ϩⲁⲛⲁⲅⲁⲑⲟⲛ ⲛⲉ: ⲉϩⲁⲛⲡⲉⲧϩⲱⲟⲩ ⲛⲉ ϧⲁⲧⲉⲛ ⲫϯ: ⲉⲧⲉ ⲫⲁⲓ ⲡⲉ ϫⲉ ⲉⲛϥⲁⲓ ϧⲁ ⲛⲉⲛⲉⲣⲏⲟⲩ ⲉⲛⲉⲣⲛⲟⲃⲓ ϧⲉⲛ ⲛⲓⲧⲟⲡⲟⲥ ⲉ̅ⲑ̅ⲩ̅: ⲛⲏⲉⲧⲁ ⲡⲟ̅ⲥ̅ ϭⲓ ⲁⲛ ⲉⲃⲟⲗϧⲉⲛ ⲛⲓϣϣⲏⲛ ⲉⲧϩⲱⲟⲩ ⲛⲉⲙ ⲛⲓϣϣⲏⲛ ⲉⲑⲛⲁⲛⲉⲩ ⲁϥϭⲟ ⲙ̀ⲡⲓⲡⲁⲣⲁⲇⲓⲟⲥ: ⲁⲗⲗⲁ ϫⲉ ⲉⲧⲁϥϭⲓ ⲉⲃⲟⲗϧⲉⲛ ⲛⲓϣϣⲏⲛ ⲉⲑⲛⲁⲛⲉⲩ ⲁϥϭⲟϥ ⲟⲩⲟϩ ⲉⲧⲁϥϭⲟϥ ⲁⲛ ϧⲉⲛ ϩⲁⲛϣϣⲏⲛ ⲛⲁⲧⲟⲩⲧⲁϩ ⲓⲉ ⲉϥϩⲱⲟⲩ ⲛ̀ϫⲉ ⲡⲟⲩⲧⲁϩ ⲟⲩⲟϩ ⲙⲟⲛⲟⲛ ⲫⲁⲓ ⲁⲗⲗⲁ ⲛⲉⲙ ⲛⲓⲣⲱⲙⲓ ⲉⲧⲁϥⲭⲁⲩ ⲙⲙⲁⲩⲁⲧⲟⲩ ⲉⲙⲁⲩ: ϧⲉⲛ ⲡϫⲓⲛⲑⲣⲟⲩ ⲉⲣⲡⲁⲣⲁⲃⲉⲛⲓⲛ ⲙ̀ⲡⲉϥⲉⲣⲁⲛⲁⲭⲉⲥⲑⲉ: ⲁⲗⲗⲁ ⲁϥϩⲓⲧⲟⲩ ⲉⲃⲟⲗⲛϧⲏⲧϥ :ⲁⲣⲓⲉⲙⲓ ⲉⲃⲟⲗϧⲉⲛ ⲫⲁⲓ ⲱⲛⲓⲥⲛⲏⲟⲩ ⲙ̀ⲙⲉⲛⲣⲓⲧ : ϫⲉ ⲥϣⲉ ⲁⲛ ⲉⲙⲁϩ ⲛⲓⲧⲟⲡⲟⲥ ⲉ̅ⲑ̅ⲩ̅ ⲛ̀ⲧⲉ ⲫϯ ⲉⲃⲟⲗϧⲉⲛ ⲛⲓⲣⲱⲙⲓ ⲉⲧϩⲱⲟⲩ ⲛⲉⲙ ⲛⲓⲁⲅⲁⲑⲟⲥ: ⲙ̀ⲫⲣⲏϯ ⲉⲧⲉ ⲡⲓⲕⲟⲥⲙⲟⲥ ⲧⲏⲣϥ ⲙⲟϩ ⲛ̀ⲣⲉϥⲉⲣⲛⲟⲃⲓ ⲛⲉⲙ ⲣⲉϥϭⲓⲛϫⲟⲛⲥ: ⲛⲉⲙ ϩⲁⲛⲁⲅⲁⲑⲟⲥ ⲛⲉⲙ ϩⲁⲛⲁⲕⲁⲑⲁⲣⲧⲟⲥ: ⲁⲗⲗⲁ ⲛⲏⲉⲧⲉⲣⲛⲟⲃⲓ ⲉϣⲧⲉⲙⲭⲁⲩ ⲛϧⲏⲧⲟⲩ ⲁⲗⲗⲁ ⲉϩⲓⲧⲟⲩ ⲉⲃⲟⲗ ϯⲥⲱⲟⲩⲛ ϫⲉ ⲡⲓⲕⲁϩⲓ ⲧⲏⲣϥ ⲫⲁ ⲡⲟ̅ⲥ̅ ⲡⲉ ⲟⲩⲟϩ ⲉϣϫⲉ ⲕⲁⲧⲁ ⲑⲉⲙⲡⲉϥⲏⲓ ⲑⲁⲓ ⲧⲉ ⲡⲕⲁϩⲓ ⲧⲏⲣϥ ⲉⲧⲟⲩⲏϩ ⲛ̀ϧⲏⲧϥ ϣⲟⲡ ⲉϧⲟⲩⲛ ⲉⲣⲟϥ ⲉⲑⲃⲉ ⲫⲁⲓ ⲥϣⲉ ⲛⲁⲛ ⲛ̀ⲧⲉⲛⲉⲣϩⲟϯ ϧⲁⲧⲉϥϩⲏ ⲟⲩⲟϩ ⲧⲉⲛⲁⲣⲉϩ

ⲉⲛⲉϥⲉⲛⲧⲟⲗⲏ ⲉϣⲱⲡ ⲛϣⲁⲛϩⲉ ϧⲉⲛ ⲑⲩⲉⲓ ⲉⲃⲟⲗ ⲛϧⲏⲧⲟⲩ ⲙⲁⲣⲉⲛⲣⲓⲙⲓ ⲟⲩⲟϩ ⲛⲧⲉⲛⲛⲉϩⲡⲓ ⲉⲣⲟⲛ ⲙ̀ⲙⲓⲛ ⲙ̀ⲙⲟⲛ ⲙ̀ⲡⲉϥⲙⲑⲟ ⲉⲃⲟⲗ ϫⲉⲭⲁⲥ ⲁϥϣⲁⲛⲛⲁⲩ ⲉⲡⲉⲙⲕⲁϩ ⲛ̀ⲛⲉⲛⲩⲭⲏ ⲛⲉⲙ ⲧⲉⲥⲡⲟⲧⲉ ⲛⲑⲉ ⲛ̀ⲧⲉⲥϩⲓⲙⲓ ⲛ̀ⲧⲁⲥϩⲱⲣⲡ ⲛ̀ⲛⲉϥⲟⲩⲉⲣⲏϯ ϧⲉⲛ ⲛⲉⲥⲣⲓⲙⲓ ⲧⲉⲛⲉⲣⲉⲙⲡϣⲁ ⲇⲉ ⲛ̀ⲧⲉⲥⲥⲙⲏ ⲉⲧϩⲟⲗϫ ϫⲉ ⲛⲉⲕⲛⲟⲃⲓ ⲭⲏ ⲛⲁⲕ ⲉⲃⲟⲗ ⲃⲱⲕ ⲛⲁⲕ ϧⲉⲛ ⲟⲩϩⲓⲣⲏⲛⲏ ⲧⲉⲕⲛⲁϩϯ ⲧⲉⲛⲧⲁⲥ ⲛⲁϩⲙⲉⲕ ⲁⲧⲉⲧⲉⲛⲛⲁⲩ ⲱ ⲛⲁⲥⲛⲏⲟⲩ ϫⲉ ϯⲛⲁϩϯ ⲁⲥⲉⲣϩⲱⲃ ⲙ̀ⲡⲓⲟⲩϫⲁⲓ ⲟⲩⲟϩ ⲁⲥⲟⲩⲱⲛϩ ⲉⲃⲟⲗ ⲛ̀ⲧⲉⲥⲡⲟⲇⲏ ⲛ̀ϧⲏⲧϥ ⲉⲑⲃⲉ ⲫⲁⲓ ⲛⲓⲃⲉⲛ ⲉⲧⲉⲙⲛⲉⲙⲧⲉϥ ⲥⲡⲟⲇⲏ ⲙ̀ⲙⲁⲩ ϧⲉⲛ ⲡⲓⲁⲣⲉϩ ⲉⲛⲓⲉⲛⲧⲟⲗⲏ ⲛ̀ⲧⲉ ⲫϯ ⲟⲩⲟϩ ⲁϥϭⲓϣϣⲱⲟⲩ ⲛⲓⲛⲉⲛⲥⲁⲃⲏⲟⲩ ϧⲉⲛ ⲡⲓⲡ̅ⲛ̅ⲁ̅ ⲉⲧⲁⲩⲉⲣⲙⲉⲑⲣⲉ ϧⲁⲣⲱⲟⲩ ϭⲓⲛⲏⲟⲩ ⲥⲱⲟⲩⲛ ⲛ̀ϯⲙⲉ ⲛⲉϥϭⲓ ⲙ̀ⲡⲉϥⲥⲟϭⲛⲓ ϩⲓ ⲛⲉϥϩⲃⲏⲟⲩⲓ ϫⲉ ⲛⲉⲙ ⲡⲉϥⲛⲁϩϯ ⲙ̀ⲙⲁⲩ ⲟⲩⲟϩ ⲫⲁⲓ ϣⲁϥϩⲓ ϧⲉⲛ ϩⲱⲃ ⲛⲓⲃⲉⲛ ⲉⲧϩⲱⲟⲩ ⲉⲩⲧⲁⲕⲉ ⲧⲉⲩⲭⲏ ⲕⲁⲧⲁ ⲟⲉⲉⲧⲥⲉϩ ϫⲉ ⲡⲥⲟⲫⲟⲥ ϣⲁϥϭⲓⲥⲟϭⲛⲓ ⲟⲩⲟϩ ⲛⲉϥⲉⲣϩⲱⲃ ⲟⲩⲟϩ ⲡⲁⲑⲏⲧ ϣⲁϥⲡⲱⲧ ⲉϫⲉⲛ ⲡⲉϥϩⲟ

---