Ϧⲉⲛ ⲛⲓⲉ̀ϩⲟⲟⲩ ⲇⲉ ⲛ̀ⲧⲉ ⲡⲁⲓⲱⲧ ⲁⲃⲃⲁ Ⲑⲉⲟⲗⲫⲓⲗⲟⲥ ⲡⲓⲁⲣⲭⲏⲉⲡⲓⲥⲕⲟⲡⲟⲥ ⲉⲧⲓ ⲉⲓⲟⲓ ⲛ̀ⲁⲗⲟⲩ ⲉⲓⲭⲏ ϧⲉⲛ ϯⲁⲛⲍⲏⲃ ⲉⲓϭⲓⲥ̀ⲃⲱ. Ⲛⲉ ⲟⲩⲟⲛ ⲟⲩⲥ̀ϩⲓⲙⲓ ⲇⲉ ⲙ̀ⲙⲁⲛⲓⲭⲉⲁ ϣⲟⲡ ϧⲉⲛ ⲡⲓϧⲓⲣ ⲛ̀ⲧⲉ ⲡⲁⲣⲉϥϯⲥ̀ⲃⲱ ⲛⲉ ⲟⲩⲟⲛ ⲟⲩⲕⲟⲩϫⲓ ⲛ̀ϣⲉⲣⲓ ⲛ̀ⲧⲁⲥ ⲉⲥⲛⲁⲉⲣ ⲑ ⲛ̀ⲣⲟⲙⲡⲓ ⲓⲉ ⲙⲏϯ ϯⲕⲟⲩϫⲓ ⲇⲉ ⲛ̀ⲁⲗⲟⲩ ⲛⲉ ϣⲁⲣⲉ ⲧⲉⲥⲙⲁⲩ ϫⲟⲗϩⲥ ⲛ̀ⲕⲁⲗⲱⲥ ϧⲉⲛ ϩⲁⲛϩⲉⲃⲥⲱ ⲛ̀ⲧⲉⲥⲟⲩⲟⲣⲡⲥ ⲉϯⲉⲕⲕⲗⲏⲥⲓⲁ ⲛ̀ⲧⲉ ⲛⲓⲭⲣⲏⲥⲧⲓⲁⲛⲟⲥ ⲓⲥϫⲉⲛ ⲫ̀ⲛⲁⲩ ⲙ̀ⲡⲓϫⲱⲙ ⲛ̀ϩⲟⲩⲓⲧ ⲉ̀ϣⲁⲩⲟϣϥ ⲉⲥϫⲱ ⲙ̀ⲙⲟⲥ ⲛⲁⲥ ⲙ̀ⲡⲁⲓⲣⲏϯ ϫⲉ ⲁⲛⲁⲩ ⲙ̀ⲡⲉⲣⲓ ⲉⲃⲟⲗ ⲁⲛ ϣⲁⲧⲟⲩϯ ⲛ̀ϯϩⲓⲣⲏⲛⲏ ⲫⲏⲉⲧⲉⲣⲉ ⲡⲓⲟⲩⲏⲃ ⲛⲁⲧⲏⲓϥ ⲙ̀ⲡⲉⲣ ⲟⲩⲟⲙϥ ϣⲁⲧⲉⲉⲛϥ ⲛⲏⲓ ⲉ̀ⲡⲁⲓⲙⲁ. Ⲧⲟⲧⲉ ϯⲕⲟⲩϫⲓ ⲛ̀ⲁⲗⲟⲩ ⲉⲧⲉⲙ̀ⲙⲁⲩ ⲛⲉ ϣⲁⲥϩⲱⲗ ⲛ̀ⲧⲉⲑⲁϧⲥ ⲛⲉⲙ ⲛⲓⲙⲏϣ ⲛ̀ⲧⲉ ⲛⲓⲭⲣⲏⲥⲧⲓⲁⲛⲟⲥ ⲓⲥϫⲉⲛ ⲡⲓϫⲱⲙ ⲛ̀ϩⲟⲩⲓⲧ ϣⲁⲧⲟⲩϯ ⲛ̀ϯϩⲓⲣⲏⲛⲏ.

Ⲛⲉϣⲁⲥϥⲟϫⲥ ⲉϧⲟⲩⲛ ⲛⲉⲙ ⲛⲓϩⲓⲟⲙⲓ ⲉ̀ⲡⲓⲑⲩⲥⲓⲁⲥⲧⲏⲣⲓⲟⲛ ⲛ̀ⲧⲉⲥⲥⲱⲟⲩⲧⲉⲛ ⲛⲉⲥϫⲓϫ ⲉⲃⲟⲗ ⲙ̀ⲡⲓⲁⲣⲭⲏⲉⲡⲓⲥⲕⲟⲡⲟⲥ ⲛ̀ⲧⲉⲱⲗⲓ ⲙ̀ⲡⲓⲥⲱⲙⲁ ⲛ̀ⲣⲉϥϯ ⲙ̀ⲡ̀ⲱⲛϧ ⲛ̀ⲧⲉ ⲡⲟ̅ⲥ̅ ⲛ̀ϭⲓⲟⲩⲓ ⲟⲩⲟϩ ⲛ̀ⲧⲉⲥ ϣⲁⲧⲟⲩϯ ⲛ̀ϯϩⲓⲣⲏⲛⲏ ⲛ̀ⲧⲉⲥⲉⲛϥ ⲉϧⲟⲩⲛ ϩⲁ ⲧⲉⲥⲙⲁⲩ ϧⲉⲛ ⲟⲩⲭⲱⲡ ⲁⲥϣⲁⲛϭⲓ ⲙ̀ⲡⲓⲗⲩⲡⲥⲁⲛⲟⲛ ⲛ̀ⲧⲟⲧϥ ⲛ̀ⲧⲉⲥⲉⲛϥ ⲛⲁⲥ. Ⲟⲩⲟϩ ⲥⲟⲡ ⲛⲓⲃⲉⲛ ⲉⲧⲉⲥⲛⲁⲉⲛϥ ⲛⲁⲥ ⲛⲉϣⲁⲥϭⲓ ⲛⲁⲥ ⲛ̀ⲟⲩϩⲏⲧ ⲛ̀ⲑⲏⲣⲓⲟⲛ ϩⲱⲥ ⲉⲥⲛⲁⲉⲣⲇⲟⲕⲓⲙⲁⲍⲓⲛ ⲙ̀ⲙⲟϥ ⲉ̀ⲡ̀ⲓϫⲓⲛⲉⲙⲓ ϫⲉ ϯⲁⲗⲟⲩ ⲥⲱⲧⲉⲙ ⲉ̀ⲛⲓⲁⲛⲁⲅⲛⲱⲥⲓⲥ ϣⲁⲛ ⲙ̀ⲫⲏ ⲥⲁⲧⲟⲧ ⲥⲁⲥⲓⲛⲓ ⲛ̀ⲟⲩⲥⲉⲣⲃⲉⲛⲓ ⲓϭ ⲟⲩⲁⲛⲑⲱⲡ ⲛ̀ⲧⲉⲥϫⲟⲕϫⲉⲕ ⲉⲣⲟϥ.

Ⲁϥϣⲁⲛⲧⲁⲟⲩⲉ ⲥ̀ⲛⲟϥ ⲉⲃⲟⲗ ϣⲁⲥⲟⲗϥ ⲛ̀ϯⲟⲩⲛⲟⲩ ⲛ̀ⲧⲉⲥⲕⲟⲩⲗⲱⲗϥ ⲛ̀ⲟⲩⲙⲁⲡⲡⲁ ⲛ̀ϣⲉⲛⲥ ⲛ̀ⲧⲉⲥⲟⲗϥ ⲛ̀ⲧⲉⲥⲭⲁϥ ϧⲉⲛ ⲟⲩⲕⲁⲯⲁ ⲛ̀ⲛⲟⲩⲃ ⲛ̀ⲧⲉⲥⲁⲣⲉϩ ⲉⲣⲟϥ ⲉϧⲟⲩⲛ ⲉⲡⲉⲏⲓ. Ⲁⲥⲧⲱⲛⲥ ⲇⲉ ⲛ̀ϫⲉ ϯⲥ̀ϩⲓⲙⲓ ⲁⲥⲟⲩⲱⲣⲡ ⲟⲛ ⲛ̀ⲧⲉⲥⲕⲟⲩϫⲓ ⲛ̀ϣⲉⲣⲓ ⲉ̀ϯⲉⲕⲕⲗⲏⲥⲓⲁ ⲕⲁⲧⲁ ϯⲥⲩⲛⲏⲑⲓⲁ ⲉⲑⲣⲉⲥϭⲓ ⲙ̀ⲡⲓⲗⲩⲥⲁⲛⲟⲛ. Ⲟⲩⲟϩ ϣⲉⲛ ⲡ̀ϫⲓⲛⲑ̀ⲣⲉⲥⲓ̀ ⲉⲃⲟⲗ ⲛ̀ϫⲉ ϯⲕⲟⲩϫⲓ ⲛ̀ϣⲉⲣⲓ ⲁⲥϫⲓⲙⲓ ϩ̀ⲁⲛϧⲉⲗϣⲁⲓⲣⲓ ⲉⲛⲁⲡⲉϧⲓⲣ ⲛⲉ ⲁⲥϭⲓϩⲣⲁⲥ ⲛⲉⲙⲱⲟⲩ ϩⲱⲥ. Ⲙⲟⲅⲓⲥ ⲁⲥϩⲱⲗ ⲉ̀ϯⲉⲕⲕⲗⲏⲓⲥⲓⲁ ⲙ̀ⲡⲓⲛⲁⲩ ⲉⲧⲟⲩⲉⲣⲯⲁⲗⲓⲛ ⲉϯⲡⲣⲟⲥⲫⲟⲣⲁ ⲁⲥϥⲟϫⲥ ⲟⲛ ⲉϧⲟⲩⲛ ⲛⲉⲙ ⲙⲏϣ ϧⲉⲛ ⲡⲓⲑⲓⲥⲩⲓⲁⲥⲧⲏⲣⲓⲟⲛ ⲁⲥⲉⲛϥ ⲛ̀ⲧⲉⲥⲙⲁⲩ ϧⲉⲛ ⲟⲩⲭⲱⲡ. Ⲧⲉⲥⲙⲁⲩ ⲇⲉ ⲁⲥⲟⲩⲱϣ ⲉ̀ⲉ̀ⲙⲓ ϫⲉ ⲁⲥⲥⲱⲧⲉⲙ ⲉ̀ⲛⲓⲁⲛⲁⲅⲛⲱⲥⲓⲥ ϣⲁ ⲙ̀ⲫⲏ. Ⲁⲥⲱⲗⲓ ⲟⲛ ⲛ̀ϯⲥⲟⲩⲣⲓ ⲁⲥϫⲟⲕϫⲉⲕ ⲉⲣⲟϥ ⲕⲁⲧⲁ ⲧⲉⲥⲥⲩⲛⲏⲑⲓⲁ ⲙ̀ⲡⲉⲧϥⲧⲁⲟⲩⲥ ⲥ̀ⲛⲟϥ ⲉⲃⲟⲗ ϫⲉ ⲟⲩⲏⲓ ⲙ̀ⲡⲉⲥⲥⲱⲧⲉⲙ ⲉ̀ⲛⲓⲁⲛⲁⲅⲛⲱⲥⲓⲥ. Ⲧⲟⲧⲉ ⲁⲥⲉⲙⲓ ⲛ̀ϫⲉ ϯⲥ̀ϩⲓⲙⲓ ϫⲉ ⲙ̀ⲡⲉϯⲁⲗⲟⲩ ϩⲱⲗ ⲉ̀ϯⲉⲕⲕⲗⲏⲓⲥⲁ ⲛ̀ⲧⲉⲥⲥⲱⲧⲉⲙ ⲉ̀ⲛⲓⲁⲛⲁⲅⲱⲥⲓⲥ. Ⲗⲟⲓⲡⲟⲛ ⲁⲥⲁⲙⲟⲛⲓ ⲛ̀ϯⲁⲗⲟⲩ ⲁⲥϯ ⲛ̀ⲁϩⲛⲙⲏϣϣⲁϣ ⲛⲁⲥ ⲡⲁⲣⲁ ⲕⲉⲕⲟⲩϫⲓ ⲛ̀ⲧⲉⲥϧⲟⲑⲃⲉⲥ ⲉⲑⲃⲉ ⲡⲉⲥϫⲱⲛⲧ. Ⲡⲁⲣⲉϥϯⲥ̀ⲃⲱ ⲇⲉ ⲁϥⲥⲱⲧⲉⲙ ⲉⲛⲓϣⲏϣⲓ ⲉⲣⲉ ϯⲥ̀ϩⲓⲙⲓ ϯ ⲙ̀ⲙⲱⲟⲩ ⲛ̀ϯⲕⲟⲩϫⲓ ⲛ̀ⲁⲗⲟⲩ ⲉⲡⲓⲇⲏ ⲛⲁⲣⲉ ⲛⲏⲓ ⲙ̀ⲡⲁⲣⲉϥϯⲥ̀ⲃⲱ ⲇⲉ ⲁϥⲥⲱⲧⲉⲙ ⲭⲏ ϧⲁⲑⲟⲩⲱⲥ ⲙ̀ⲫ̀ⲣⲏϯ ⲉⲧⲁⲓⲕⲏⲛ ⲉϫⲟⲥ ⲗⲟⲓⲡⲟⲛ ⲁϥϯϩ̀ⲏϥ ⲛ̀ⲟⲩⲉϩⲟⲟⲩ ⲉⲣⲉ ⲧⲉⲥⲙⲁⲩ ⲭⲏ ⲙ̀ⲙⲁⲩ ⲁⲛ ⲁϥⲥⲁϫⲓ ⲛⲉⲙ ϯⲕⲟⲩϫⲓ ⲛ̀ⲁⲗⲟⲩ ⲕⲟⲗⲗⲁⲕⲉⲩⲓⲕⲱⲥ ϫⲉ ⲟⲩ ⲡⲉ ⲉⲧⲁⲉⲣⲁⲓϥ ⲉⲧⲁⲣⲉⲓ̀ ⲉⲡⲁⲓⲛⲓϣϯ ⲛ̀ⲉⲙⲕⲁϩ ⲛⲉⲙ ⲧⲁⲓⲛⲓϣϯ ⲛ̀ϣⲏϣⲓ ⲙ̀ⲡⲁⲓⲥ̀ⲙⲟⲧ. Ⲛ̀ⲑⲟⲥ ⲇⲉ ⲁⲥⲟⲩⲱⲛϩ ⲙ̀ⲡⲓϩⲱⲃ ⲉⲡⲁⲥⲁϧ ⲉⲥϫⲱ ⲙ̀ⲙⲟⲥ ϫⲉ ⲡⲁⲓⲣⲏϯ ⲉⲧⲁⲧⲁⲙⲁⲩ ⲟⲩⲱⲣⲡ ⲙ̀ⲙⲟⲓ ⲉϯⲉⲕⲕⲗⲏⲥⲓⲁ ⲛ̀ⲧⲉ ⲛⲓⲭⲣⲏⲓⲥⲧⲓⲁⲛⲟⲥ ⲉⲓϭⲓ ⲛ̀ⲛⲓⲗⲯⲁⲛⲟⲛ ⲛ̀ⲧⲉ ⲡⲟ̅ⲥ̅ ⲉⲓⲓ̀ⲛⲓ ⲙ̀ⲙⲱⲟⲩ ⲛⲁⲥ ⲉϧⲟⲩⲛ. Ⲡϫⲁϥ ⲛⲁⲥ ϫⲉ ⲉⲥⲉⲣϩⲱⲃ ⲟⲩ ⲛ̀ϧⲏⲧⲟⲩ.

Ⲛ̀ⲑⲟⲥ ⲇⲉ ⲛⲉϫⲁⲥ ϫⲉ ⲉⲥϩⲓⲟⲩⲓ ⲙ̀ⲙⲱⲟⲩ ⲉⲟⲩⲕⲁⲯⲁⲛ ⲃ̀ⲃⲟⲩⲃ ⲉⲥⲭⲱ ⲙ̀ⲙⲱⲟⲩ ⲛ̀ⲧⲟⲧⲥ. Ⲡⲁⲣⲉϥϯⲥ̀ⲃⲱ ⲇⲉ ⲙ̀ⲡⲉϥϣⲱⲡⲓ ⲛ̀ⲁⲙⲉⲗⲉⲥ ϧⲉⲛ ⲡⲁⲓⲙⲉⲣⲟⲥ ⲉⲡⲧⲏⲣϥ ⲁⲗⲗⲁ ⲁϥⲧⲱⲛϥ ⲁϥϩⲱⲗ ⲉϯⲉⲕⲕⲗⲏⲥⲓⲁ ⲁϥⲟⲩⲉⲛϩ ⲡⲓϩⲱⲃ ⲙ̀ⲡⲓⲁⲣⲭⲏⲉⲡⲓⲥⲕⲟⲡⲟⲥ ⲁⲃⲃⲁ Ⲑⲉⲟϥⲓⲗⲟⲥ. ϩϦⲉⲛ ⲧ̀ⲟⲩⲛⲟⲩ ⲛ̀ϩⲁⲛⲕ̀ⲗⲏⲣⲓⲕⲟⲥ ⲛⲉⲙ ϩⲁⲛⲙⲁⲧⲟⲓ ⲁⲩⲓ̀ⲛⲓ ⲛ̀ϯⲥ̀ϩⲓⲙⲓ ⲛⲉⲙ ⲧⲉⲥⲕⲟⲩϫⲓ ⲛ̀ϣⲉⲣⲓ ⲙ̀ⲡⲁⲧⲟⲩⲉ̀ⲙⲓ ⲛ̀ϩ̀ⲗⲓ ⲛ̀ϩⲱⲃ ⲁⲩⲟⲗⲟⲩ ⲉϯⲉⲕⲕⲗⲏⲥⲓⲁ. Ⲁⲡⲓⲁⲣⲭⲏⲉⲡⲓⲥⲕⲟⲡⲟⲥ ⲥⲁϫⲓ ⲛⲉⲙ ⲧ̀ⲥ̀ϩⲓⲙⲓ ⲉϥϫⲱ ⲙ̀ⲙⲟⲥ ϫⲉ ϯⲧⲁⲣⲕⲟ ⲙ̀ⲙⲟ ⲙ̀Ⲫϯ ⲥⲟϯ ⲥ̀ϩⲓⲙⲓ ϫⲉ ⲉⲑⲣⲉⲉⲣϩⲉⲗⲡⲓⲥ ⲉⲛ ⲟⲩ ⲓⲉ ⲉⲧⲁⲣⲉⲭⲁ ϯϩⲟϯ ⲛ̀ⲧⲉ Ⲫϯ ⲛ̀ⲑⲱⲛ ⲉⲣⲉⲕⲱⲗ ⲛ̀ⲛⲓⲙⲉⲗⲟⲥ ⲛ̀ⲧⲉ Ⲡⲭⲥ̅ ⲉⲣⲉϯ ⲙ̀ⲙⲱⲟⲩ ϧⲁ ϩⲁⲛⲭ̀ⲣⲏⲙⲁ. Ϯⲥ̀ϩⲓⲙⲓ ⲇⲉ ⲁⲥⲉⲣⲟⲙⲟⲗⲅⲓⲛ ⲛ̀ϯⲟⲩⲛⲟⲩ ⲭⲱⲣⲓⲥ ⲃⲁⲍⲁⲛⲟⲥ ⲉⲥϫⲱ ⲙ̀ⲙⲟⲥ ⲙ̀ⲡⲁϯⲧ̀ⲡⲓⲧⲟⲩ ⲁⲗⲗⲁ ϩⲏⲡⲡⲉ ϯⲁⲣⲉϩ ⲉⲣⲱⲟⲩ ϣⲉⲛ ⲡⲁⲏⲓ. Ⲟⲩⲟϩ ϧⲉⲛ ϯⲟⲩⲛⲟⲩ ⲁϥⲟⲩⲱⲣⲡ ⲛ̀ϩⲁⲛⲡ̀ⲣⲉⲥⲃⲩⲧⲉⲣⲟⲥ ⲛⲉⲙ ϩⲁⲛⲕⲉⲡⲓⲥⲧⲟⲥ ⲛ̀ⲟⲣⲑⲟⲇⲟⲝⲟⲥ ⲉ̀ⲡ̀ⲏⲓ ⲛ̀ϯⲥ̀ϩⲓⲙⲓ ⲟⲩⲟϩ ⲉⲧⲁⲩϧⲱⲛⲧ ⲉ̀ⲡⲓⲙⲁ ⲉⲣⲉ ϯⲕⲁⲯⲁ ⲙ̀ⲙⲟϥ ⲁⲩⲛⲁⲩ ⲛ̀ϩⲁⲛⲛⲓϣϯ ⲛ̀ⲥⲉⲧⲉⲃⲣⲏϫ ⲛ̀ⲭⲣⲱⲙ ⲟⲩⲟϩ ϧⲉⲛ ⲡ̀ϫⲓⲛⲑ̀ⲟⲩϣ̀ⲗⲏⲗ ⲁⲟⲩⲥⲩⲛⲭⲱⲣⲏⲥⲓⲥ ϣⲱⲡⲓ ⲁⲩⲧⲁⲗⲟ ⲛ̀ϯⲕⲟⲩϫⲓ ⲛ̀ⲕⲁⲯⲁ ⲛ̀ⲛⲟⲩⲃ ⲁⲩⲉⲛⲥ ϣⲁ ⲡⲓⲁⲣⲭⲏ ⲉⲡⲓⲥⲕⲟⲡⲟⲥ. ϩϦⲉⲛ ⲡ̀ϫⲓⲛⲑ̀ⲣⲟⲩⲱⲣⲡ ⲙ̀ⲙⲟⲥ ⲛⲁϥ ϫⲉ ⲡⲁⲟ̅ⲥ̅ ⲛ̀ⲓⲱⲧ ⲓⲥϫⲉ ⲟⲩⲟⲛ ϣ̀ϫⲟⲙ ⲛⲁⲓ ϧⲁ ⲧⲁⲙⲉⲧⲣⲉϥⲉⲣⲛⲟⲃⲓ ⲛ̀ⲧⲉⲕⲭⲱ ⲛⲏⲓ ⲉⲃⲟⲗ ⲛ̀ⲧⲁⲉⲣⲙⲉⲧⲁⲛⲓⲟⲛ.

Ⲡⲓⲁⲣⲭⲏⲉⲡⲓⲥⲕⲟⲡⲟⲥ ⲇⲉ ⲁϥϯ ⲛⲁⲥ ⲛ̀ϩⲙⲉ ⲛ̀ⲉϩⲟⲟⲩ ⲛ̀ⲛⲏⲥⲧⲓⲁ ⲁϥⲉⲣⲕⲁⲑⲏⲕⲓⲛ ⲙ̀ⲙⲟⲥ ⲛ̀ϣⲟⲣⲡ ⲁϥⲑ̀ⲟⲩⲥⲟⲃϯ ⲛⲁϥ ⲙ̀ⲡⲓⲃⲁⲛⲧⲓⲥⲏⲣⲓⲟⲛ ⲁϥϯⲱⲙⲥ ⲛⲁⲥ ⲉⲛⲙ ⲧⲉⲥϣⲉⲣⲓ ϣⲉⲛ ⲫ̀ⲣⲁⲛ ⲙ̀ⲫⲓⲱⲧ ⲛⲉⲙ ⲡ̀ϣⲏⲣⲓ ⲛⲉⲙ ⲡⲓⲡⲛ̅ⲁ̅ ⲉⲑ̅ⲩ̅ ⲁϥϯ ⲛⲱⲟⲩ ⲉⲃⲟⲗ ϣⲉⲛ ⲡⲓⲙⲩⲥⲧⲏⲣⲓⲟⲛ ⲡⲓⲥⲱⲙⲁ ⲛⲉⲙ ⲡⲓⲥ̀ⲛⲟϥ ⲛ̀ⲧⲉ ⲡⲉⲛⲟ̅ⲥ̅ Ⲓⲏⲥ̅ Ⲡⲭⲥ̅ . Ϯⲥ̀ϩⲓⲙⲓ ⲇⲉ ϩⲱⲥ ⲁⲥⲉⲣⲭⲁⲣⲓⲍⲉⲥⲑⲉ ⲛⲁϥ ⲛ̀ⲛⲏⲉⲧⲉⲛⲟⲩⲥ ⲧⲏⲣⲟⲩ ⲛⲉⲥⲭ̀ⲣⲏⲙⲁ ⲧⲏⲣⲟⲩ ⲁⲥⲥⲟⲩⲣⲩ ⲛ̀ⲛⲓϩⲏⲕⲓ ⲟⲩⲟϩ ⲡⲉⲥⲛⲓϣϯ ⲛ̀ⲏⲓ ⲁⲥⲑ̀ⲣⲟⲩⲕⲟⲧϥ ⲛ̀ⲉⲕⲕⲗⲏⲥⲓⲁ ⲁϥⲣⲟⲩϣⲉⲡ ϫⲱⲟⲩ ⲁⲩϣⲱⲡⲓ ⲙ̀ⲙⲟⲛⲁⲭⲏ ⲁⲩϩⲉⲙⲥⲓ ϧⲉⲛ ϯⲙⲟⲛⲏ ⲛ̀ⲧⲉ ⲛⲓⲡⲁⲣⲑⲉⲛⲟⲥ ⲉⲧϧⲉⲛ ⲣⲁⲕⲟⲩϯ ϣⲁ ⲡⲓⲉϩⲟⲟⲩ ⲉⲧⲁⲩϫⲱⲕ ⲙ̀ⲡⲟⲩⲟ̅ⲥ̅ ⲉⲃⲟⲗϧⲉⲛ ⲟⲩⲙⲉⲧⲟⲣⲑⲟⲇⲟⲝⲟⲥ.

Ⲧⲁⲓϣ̀ϥⲏⲣⲓ ⲟⲩⲛ ⲉⲧⲁⲥϣⲱⲡⲓ ϧⲉⲛ ϯⲡⲟⲗⲓⲥ Ⲣⲁⲕⲟⲩϯ ϧⲉⲛ ⲛⲓⲉϩⲟⲟⲩ ⲛ̀ⲧⲉ ⲧⲁⲙⲉⲧⲕⲟⲩϫⲓ ⲕⲁⲧⲁ ⲫ̀ⲣⲏϯ ⲉⲧⲁⲓϫⲟⲥ ⲓⲥϫⲉⲛ ϣⲱⲟⲣⲡ. ⲉⲓϫⲱ ⲛ̀ⲛⲁⲓ ⲉ̀ⲧⲉⲧⲉⲛⲁⲅⲁⲡⲏ ⲉⲓⲧⲁⲙⲟ ⲙ̀ⲙⲱⲧⲉⲛ ϫⲉ Ⲫϯ ⲙⲟϣⲓ ⲛⲥⲏⲟⲩ ⲛⲓⲃⲉⲛ ⲉϥⲕⲱⲧ ⲉϧⲟⲩⲛ ⲉⲧⲉϥϣⲁⲓⲣⲓ ⲛ̀ⲗⲟⲅⲓⲕⲟⲛ.