Ⲁⲣⲓⲫⲙⲉⲩⲓ Ⲡ⳪

Ⲁⲣⲓⲫⲙⲉⲩⲓ ⲡϭⲟⲓⲥ ⲛ̀ⲧⲁⲙⲉⲧϫⲱⲃ, ⲟⲩⲟϩ ⲭⲱ ⲛⲏⲓ ⲉⲃⲟⲗ ⲛ̀ⲛⲁⲛⲟⲃⲓ ⲉⲧⲟϣ. ⲙⲉⲩⲓ ⲛⲓⲃⲉⲛ ⲉⲧϩⲱⲟⲩ, ⲙⲁⲣⲉϥⲫⲱⲧ ⲉⲃⲟⲗϩⲁⲣⲟⲓ: ⲟⲩⲟϩ ϩⲱⲃ ⲛⲓⲃⲉⲛ ⲉⲧϩⲱⲟⲩ ⲙⲁⲣⲉϥⲟⲩⲉⲓ ⲥⲁⲃⲟⲗ ⲙ̀ⲙⲟⲓ. ⲧⲉⲕϩⲟϯ ⲛⲉⲙ ⲡⲉⲕⲙⲉⲩⲓ, ⲙⲁⲣⲟⲩⲙⲁϩ ⲛ̀ϩⲑⲏⲓ, ⲛ̀ⲧⲁϣⲱⲡⲓ ⲛⲁⲕ ⲛ̀ⲟⲩⲉⲣⲫⲉⲓ, ⲉϥⲟⲩⲁⲃ ϧⲉⲛ ⲟⲩⲙⲉⲑⲙⲏⲓ. ϣⲱⲡⲓ ⲛ̀ϧⲣⲏⲓ ⲛ̀ϧⲏⲧ ⲡϭⲟⲓⲥ: ⲙⲁⲧⲟⲩⲃⲟⲓ. ⲁⲣⲓϩⲱⲃ ⲛ̀ϧⲏⲧ: ⲁⲣⲓϩⲱⲃ ⲛⲉⲙⲏⲓ: ⲉⲑⲃⲉ ⲡⲉⲕⲣⲁⲛ ⲉⲑⲟⲩⲁⲃ, ⲉⲧⲁⲩⲙⲟⲩϯ ⲙ̀ⲙⲟϥⲉϩⲣⲏⲓ ⲉϫⲱⲛ.

Ⲁⲣⲓⲫⲙⲉⲩⲓ ⲡϭⲟⲓⲥ ⲙ̀ⲡⲁⲓⲱⲧ ⲛⲉⲙ ⲧⲁⲙⲁⲩ ⲛⲉⲙ ⲛⲁⲥⲛⲏⲟⲩ,ⲛⲉⲙ ⲛⲏⲉⲧϧⲉⲛⲧ ⲉⲣⲟⲓ ⲛ̀ⲥⲁⲣⲕⲓⲕⲟⲛ: ⲛⲉⲙ ⲛⲁⲓⲟϯ ⲙ̀ⲡⲛⲉⲩⲙⲁⲧⲓⲕⲟⲛ: ⲛⲏⲉⲧⲟⲛϧ ⲁⲣⲉϩ ⲉⲣⲱⲟⲩ: ⲛⲉⲙ ⲛⲏⲉⲧⲁⲩⲉⲛⲕⲟⲧ ⲙⲁⲙⲧⲟⲛ ⲛⲱⲟⲩ. ⲁⲣⲓⲫⲙⲉⲩⲓ ⲡϭⲟⲓⲥ ⲛ̀ϯϩⲓⲣⲏⲛⲏ ⲛ̀ⲧⲉ ⲧⲉⲕⲟⲩⲓ ⲙ̀ⲙⲁⲩⲁⲧⲥ ⲉⲑⲟⲩⲁⲃ ⲛ̀ⲕⲁⲑⲟⲗⲓⲕⲏ ⲛ̀ⲁⲡⲟⲥⲧⲟⲗⲟⲗⲓⲕⲏ ⲛ̀ⲉⲕⲕⲗⲏⲥⲓⲁ. ⲁⲣⲓⲫⲙⲉⲩⲓ ⲡϭⲟⲓⲥ ⲙ̀ⲡⲉⲛⲙⲁⲕⲁⲣⲓⲟⲥ ⲛ̀ⲓⲱⲧ ⲉⲧⲧⲁⲓⲏⲟⲩⲧ ⲛ̀ⲁⲣⲭⲏⲉⲣⲉⲩⲥ ⲡⲁⲡⲁ ⲁⲡⲁ ....: ⲛⲉⲙ ⲛⲉⲛⲓⲟϯ ⲙ̀ⲙⲏⲧⲣⲟⲡⲟⲗⲓⲧⲏⲥ: ⲛⲉⲙ ⲛⲓⲉⲡⲓⲥⲕⲟⲡⲟⲥ: ⲛⲉⲙ ⲛⲓⲭⲱⲣⲓⲉⲡⲓⲥⲕⲟⲡⲟⲥ: ⲛⲉⲙ ⲛⲓⲟⲩⲏⲃ ⲧⲏⲣⲟⲩ: ⲛⲉⲙ ⲛⲓⲇⲓⲁⲕⲟⲛⲟⲥ: ⲛⲉⲙ ⲣⲉϥϣⲉⲙϣⲓ ⲛⲓⲃⲉⲛ ⲛ̀ⲧⲉ ϯⲉⲕⲕⲗⲏⲥⲓⲁ: ⲛⲉⲙ ⲛⲉⲛⲓⲟϯ ⲙ̀ⲙⲟⲛⲁⲭⲟⲥ: ⲛⲉⲙ ⲛⲏⲧⲏⲣⲟⲩ ⲉⲧϧⲉⲛ ϯⲡⲁⲣⲑⲉⲛⲓⲁ: ⲛⲉⲙ ⲡⲓⲗⲁⲟⲥ ⲧⲏⲣϥ ⲛ̀ⲧⲉ ϯⲉⲕⲕⲗⲏⲥⲓⲁ.

Ⲁⲣⲓⲫⲙⲉⲩⲓ ⲡϭⲟⲓⲥ ⲛ̀ϯⲕⲗⲏⲣⲓⲕⲓⲁ:ⲛⲉⲙ ⲛⲓⲁⲛⲍⲏⲃ ⲙ̀ⲡϫⲓⲛϣⲁⲛϣ ⲛ̀ⲉⲕⲕⲗⲏⲥⲓⲁ. ⲁⲣⲓⲫⲙⲉⲩⲓ ⲡϭⲟⲓⲥ ⲛ̀ⲧⲥⲱⲧⲏⲣⲓⲁ ⲙ̀ⲡⲓⲕⲟⲥⲙⲟⲥ ⲛⲉⲙ ⲡⲉⲛⲕⲁϩⲓ ⲭⲏⲙⲓ: ⲛⲉⲙ ⲛⲉⲛⲁⲣⲭⲱⲛ: ⲛⲉⲙ ⲡⲓϣⲉⲙϣⲓ ⲙ̀ⲡϫⲓⲛϯⲥⲃⲱ, ⲛⲉⲙ ⲡⲥⲁϫⲓ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ: ⲛⲉⲙ ⲡⲓⲙⲁⲛϯⲥⲃⲱ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ. ⲁⲣⲓⲫⲙⲉⲩⲓ ⲡϭⲟⲓⲥ ⲛ̀ⲛⲏⲉⲧϣⲱⲛⲓ ⲙⲁⲧⲁⲗϭⲱⲟⲩ. ⲛⲏⲉⲧⲁⲩϣⲉ ⲉⲡϣⲉⲙⲙⲟ ϭⲓⲙⲱⲓⲧ ⲛⲱⲟⲩ, ⲟⲩⲟϩ ⲙⲁⲧⲁⲥⲑⲱⲟⲩ ϧⲉⲛ ⲟⲩϩⲓⲣⲏⲛⲏ. ⲛⲏⲉⲧⲁⲩⲉⲛⲕⲟⲧ ⲙⲁⲙⲧⲟⲛ ⲛⲱⲟⲩ. ⲛⲏⲉⲧⲉⲣϩⲏⲃⲓ ⲙⲁⲛⲟⲙϯ ⲛⲱⲟⲩ. ⲛⲏⲉⲧⲁⲩϩⲉⲓ ⲙⲁⲧⲟⲩⲛⲟⲥⲟⲩ. ⲛⲏⲉⲧⲥⲟⲣⲉⲙ ⲙⲁⲧⲁⲥⲑⲱⲟⲩ ϩⲁⲣⲟⲕ. ⲛⲏⲉⲧϩⲉϫϩⲱϫⲫⲱⲗϫ ⲛⲱⲟⲩ. ⲛⲏⲉⲧϩⲟⲛϩⲉⲛ ⲛⲁⲛ ⲉⲉⲣⲡⲟⲩⲙⲉⲩⲓ ϧⲉⲛ ⲡⲓⲁⲅⲁⲑⲟⲛ ⲛ̀ⲥⲏⲟⲩ ⲛⲓⲃⲉⲛ.

Ⲉⲡϧⲁⲉ ⲡϭⲟⲓⲥ ϣⲱⲡ ⲉⲣⲟⲕ ⲛ̀ⲛⲉⲛϣⲗⲏⲗ: ϩⲓⲧⲉⲛ ⲛⲓϯⲓϩⲟ ⲛⲉⲙ ⲛⲓⲧⲱⲃϩ ⲛ̀ⲧⲉ ⲧⲉⲛϭⲟⲓⲥ ⲛ̀ⲛⲏⲃ ⲧⲏⲣⲉⲛ ϯⲑⲉⲟⲧⲟⲕⲟⲥ ⲉⲑⲟⲩⲁⲃ Ⲙⲁⲣⲓⲁ: ⲛⲉⲙ ⲛⲓⲁⲣⲭⲏⲁⲅⲅⲉⲗⲟⲥ ⲉⲑⲟⲩⲁⲃ, Ⲙⲓⲭⲁⲏⲗ ⲛⲉⲙ Ⲅⲁⲃⲣⲓⲏⲗ ⲛⲉⲙ Ⲣⲁⲫⲁⲏⲗ ⲛⲉⲙ Ⲥⲟⲩⲣⲓⲏⲗ ⲛⲉⲙ ⲧⲓⲁⲅⲙⲁ ⲧⲏⲣⲟⲩ ⲛ̀ⲧⲉ ⲧⲫⲉ ⲛⲉⲙ ⲡⲓⲁⲅⲓⲟⲥ Ⲓⲱⲁⲛⲛⲏⲥ ⲡⲓⲣⲉϥϯⲱⲙⲥ ⲛⲉⲙ ⲛⲁϭⲟⲓⲥ ⲛ̀ⲓⲟϯ ⲛ̀ⲁⲡⲟⲥⲧⲟⲗⲟⲥ ⲛⲉⲙ ⲡⲓⲁⲅⲓⲟⲥ Ⲥⲧⲉⲫⲁⲛⲟⲥ ⲛⲉⲙ ⲡⲉⲛⲓⲱⲣ Ⲙⲁⲣⲕⲟⲥ ⲡⲓⲁⲡⲟⲥⲧⲟⲗⲟⲥ ⲛⲉⲙ ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ⲛⲉⲙ ⲡⲉⲛⲓⲱⲧ ⲁⲡⲁ Ⲁⲛⲧⲱⲛⲓⲟⲥ ⲛⲉⲙ ⲡⲓⲁⲅⲓⲟⲥ ⲁⲡⲁ ... ⲛⲉⲙ ⲡⲉⲛⲓⲱⲧ Ⲁⲑⲁⲛⲁⲥⲓⲟⲥ ⲡⲓⲁⲡⲟⲥⲟⲧⲟⲗⲓⲕⲟⲥ ⲛⲉⲙ ⲁⲡⲁ Ⲡⲓϣⲱⲓ ⲛⲉⲙ ⲁⲡⲁ Ⲧⲉϫⲓⲛⲉⲙ ⲡⲭⲟⲣⲟⲥ ⲧⲏⲣϥ ⲛ̀ⲧⲉ ⲛⲏⲉⲑⲟⲩⲁⲃ ⲛⲉⲙ ⲡⲓⲁⲅⲅⲉⲗⲟⲥ ⲛ̀ⲧⲉ ⲡⲁⲓⲉϩⲟⲟⲩ. ⲥⲱⲧⲉⲙ ⲉⲣⲟⲛ ⲟⲩⲟϩ ⲛⲁⲓ ⲛⲁⲛ:ⲉⲛⲱϣ ⲉⲃⲟⲗ ⲉⲛϫⲱ ⲙ̀ⲙⲟⲥ, ϫⲉ ⲡⲉⲛⲓⲱⲧ...