---

Life of St Anthony

written by Pope Athanasius
Coptic text from the CMCL web site http://rmcisadu.let.uniroma1.it/~cmcl/antoni/cc0065.html

---

ⲟⲩⲁⲅⲱⲛ ⲉⲛⲁⲛⲟⲩϥ ⲁⲧⲉⲧⲛⲧⲁϩⲟϥ ⲉⲣⲁⲧϥ̅ ⲛⲛⲁϩⲣⲛⲛⲙⲙⲟⲛⲁⲭⲟⲥ ⲉⲧϩⲛⲕⲏⲙⲉ ⲉⲁⲧⲉⲧⲛ̅ⲧⲟϣⲥ̅ ϩⲙⲡⲉⲧⲛϩⲏⲧ ⲉⲧⲣⲉⲧⲉⲧⲛ̅ϣⲉϣⲧⲏⲩⲧⲛ ⲛⲙ̅ⲙⲁⲩ ⲏ ⲉⲧⲣⲉⲧⲉⲧⲛ̅ⲣ̅ϩⲟⲩⲟ ⲉⲣⲟⲟⲩ ϩⲛⲧⲁⲥⲕⲏⲥⲓⲥ ⲛⲧⲉⲧⲛⲁⲣⲉⲧⲏ. ⲗⲟⲓⲡⲟⲛϭⲉ ⲁⲩϣⲱⲡⲉ ϩⲁⲧⲛⲧⲏⲩⲧⲛ̅ ⲛ̅ϭⲓⲙⲙⲟⲛⲁⲥⲧⲏⲣⲓⲟⲛ ⲁⲩⲱ ⲡⲣⲁⲛ ⲛⲛⲙⲙⲟⲛⲁⲭⲟⲥ ⲁϥⲡⲟⲗⲓⲧⲉⲩⲉ ϩⲁⲧⲛ̅ⲧⲏⲩⲧⲛ̅. ⲡⲉⲓⲟⲩⲣⲟⲧϭⲉ ⲛⲧⲉⲓⲙⲓⲛⲉ ⲟⲩⲇⲓⲕⲁⲓⲟⲛⲡⲉ ⲉⲧⲣⲉⲟⲩⲟⲛ ⲛⲓⲙ ⲁⲓⲡⲁⲓⲛⲟⲩ ⲙⲙⲟϥ ⲁⲩⲱ ⲛⲧⲉⲡⲛⲟⲩⲧⲉ ϫⲟⲕϥ ⲉⲃⲟⲗ ϩⲓⲧⲛⲛⲉⲧⲛϣⲗⲏⲗ. ⲉⲡⲉⲓⲇⲏ ⲁⲧⲉⲧⲛ̅ϣⲓⲛⲉ ⲉⲃⲟⲗ ϩⲓⲧⲟⲟⲧ ϩⲱ ⲉⲧⲃⲉⲙ̅ⲡⲟⲗⲏϯⲁ ⲙⲡⲙⲁⲕⲁⲣⲓⲟⲥ ⲁⲛⲧⲱⲛⲓⲟⲥ ⲉⲧⲉⲧⲛ̅ⲟⲩⲱϣ ⲉⲉⲓⲙⲉ ϫⲉⲛⲁϣ ⲛϩⲉ ⲁϥⲁⲣⲭⲉⲓ ⲛϩⲓⲧⲟⲟⲧϥ ⲉⲧⲁⲥⲕⲏⲥⲓⲥ ⲁⲩⲱ ϫⲉⲟⲩⲡⲉ ϫⲓⲛⲉϣⲟⲣⲡ̅ ⲁⲩⲱ ϫⲉⲑⲁⲏ ⲙⲡⲉϥⲃⲓⲟⲥ ⲛⲧⲁⲥϣⲱⲡⲉ ⲛⲁϥ ⲛⲛⲁϣ ⲛⲥ̅ⲙⲟⲧ ⲁⲩⲱ ϫⲉⲛⲉϩⲉⲙⲙⲉⲛⲉ ⲛϣⲁϫⲉ ⲉⲧⲟⲩϫⲱ ⲙⲙⲟⲟⲩ ⲉⲧⲃⲏⲏⲧϥ̅ ϫⲉⲕⲁⲥ ⲛ̅ⲧⲱⲧⲛ̅ ϩⲱⲱⲧⲧⲏⲩⲧⲛ̅ ⲉⲧⲉⲧⲛⲛⲁϯ ⲙⲡⲉⲧⲛⲟⲩⲟⲓ ⲉⲡⲕⲱϩ ⲙⲡⲉⲧⲙ̅ⲙⲁⲩⲭ ⲁⲓϣⲱⲡ ⲉⲣⲟⲓ ⲙⲡⲉⲧⲛⲟⲩⲉϩⲥⲁϩⲛⲉ ϩⲛⲟⲩⲛⲟϭ ⲛⲛⲟⲩⲣⲟⲧ. ⲁⲛⲟⲕ ⲅⲁⲣ ϩⲱ ⲟⲩⲛⲟϭ ⲛϩⲏⲩ ⲛⲁⲓⲡⲉ ⲉϥⲣ̅ⲛⲟϥⲣⲉ ϥ..ⲣ ⲉⲧⲣⲁⲣ̅ⲡⲙⲉⲉⲩⲉ ⲙⲙⲁⲧⲉ ⲛⲛⲁⲛⲧⲱⲛⲓⲟⲥ ⲡⲣⲱⲙⲉ ⲙⲡⲛⲟⲩⲧⲉ. ϯⲥⲟⲟⲩⲛ ϫⲉⲛⲧⲱⲧⲛ̅ ϩⲱⲧⲧⲏⲩⲧⲛ ⲉⲧⲉⲧⲛϣⲁⲛⲥⲱⲧⲙ̅ ⲧⲉⲧⲛ̅ⲛⲁⲣ̅ϣⲡⲏⲣⲉ ⲙⲡⲣⲱⲙⲉ ⲉⲧⲙⲙⲁⲩ ⲛⲧⲉⲧⲛ̅ⲟⲩⲱϣ ϩⲱⲧⲧⲏⲩⲧⲛ̅ ⲉⲕⲱϩ ⲉⲡⲉϥⲥⲙⲟⲧ. ⲡⲃⲓⲟⲥ ⲅⲁⲣ ⲛⲛⲁⲛⲧⲱⲛⲓⲟⲥ ⲟⲩⲭⲁⲣⲁⲕⲧⲏⲣⲡⲉ ⲉϥⲣⲱϣⲉ ⲉⲙⲙⲟⲛⲁⲭⲟⲥ ⲉⲧⲣⲉⲩⲁⲥⲕⲉⲓ. ⲛⲉⲛⲧⲁⲧⲉⲧⲛ̅ⲥⲟⲧⲙⲟⲩϭⲉ ⲉⲧⲃⲏⲏⲧϥ̅ ϩⲓⲧⲛ̅ⲛⲉⲛⲧⲁⲩϫⲟⲟⲩ ⲉⲣⲱⲧⲛ̅ ⲙⲡⲣ̅ⲣ̅ⲁⲧⲛⲁϩⲧⲉ ⲉⲣⲟⲟⲩ. ⲟⲡⲥ̅ϭⲉ ⲛϩⲟⲩⲟ ϩⲙⲡⲉⲧⲛϩⲏⲧ ϫⲉϩⲉⲛⲕⲟⲩⲓ ⲛⲉⲛⲧⲁⲧⲉⲧⲛ̅ⲥⲟⲧⲙⲟⲩ ⲉⲃⲟⲗ ϩⲓⲧⲟⲟⲧⲟⲩ. ⲡⲁⲛⲧⲱⲥ ⲅⲁⲣ ⲛⲉⲧⲙⲙⲁⲩ ϩⲱⲟⲩ ⲙⲟⲅⲓⲥ ⲁⲩⲧⲁⲩⲟ ⲉⲣⲱⲧⲛ̅ ⲛⲛⲉⲛⲧⲁⲩϭⲙϭⲟⲙ ⲉϫⲟⲟⲩ. ⲉⲧⲃⲉ ϫⲉⲁⲛⲟⲕ ϩⲱⲱⲧ ⲟⲛ ⲁⲧⲉⲧⲛ̅ⲡⲣⲟ ⲧⲣⲉⲡⲉⲓ ⲙⲙⲟⲓ ⲛⲉϯⲛⲁⲧⲁⲙⲱⲧⲛ̅ ⲉⲣⲟⲟⲩ ϩⲛⲧⲉⲓⲉⲡⲓⲥⲧⲟⲗⲏ ϩⲉⲛ ⲕⲟⲩⲓⲛⲉ ⲛⲧⲉⲡⲉⲧⲙⲙⲁⲩ. ⲛⲉϯⲙⲉⲉⲩⲉ ⲉⲣⲟⲟⲩ ⲛⲉϯⲥϩⲁⲓ ⲙⲙⲟⲟⲩ ⲛⲏⲧⲛ̅. ⲛⲧⲱⲧⲛ̅ ⲇⲉ ⲙⲡⲣ̅ⲕⲁⲧⲟⲟⲧⲧⲏⲩⲧⲛ ⲉⲃⲟⲗ ⲉⲧⲉⲧⲛϣⲓⲛⲉ ⲙⲡⲟⲩⲁ ⲡⲟⲩⲁ ⲛⲛⲉⲧⲛⲏⲩ ϣⲁⲣⲱⲧⲛ̅ ϫⲓⲛⲉ ⲡⲉϥⲙⲁ ϫⲉⲕⲁⲥ ⲉⲣⲉⲡⲟⲩⲁ ⲡⲟⲩⲁ ϫⲱ ⲉⲣⲱⲧⲛ̅ ⲙⲡⲉⲧϥ ⲥⲟⲟⲩⲛ ⲙⲙⲟϥ ⲙⲟⲅⲓⲥ ⲛϥ̅ϣⲱⲡⲉ ⲛ̅ϭⲓⲡϣⲁϫⲉ . ⲉⲛⲉⲓⲟⲩⲱϣϭⲉⲡⲉ ⲛ̅ⲧⲉⲣⲉⲓϫⲓ ⲛⲧⲉⲧⲛⲉⲡⲓⲥⲧⲟⲗⲏ ⲉⲧⲛⲛⲟⲟⲩ ⲛϩⲟⲓⲛⲉ ⲛⲛⲙⲙⲟⲛⲁⲭⲟⲥ ⲛⲁⲓ ⲉϣⲁⲩⲃⲱⲕ ϣⲁⲣⲟϥ ⲛϩⲁϩ ⲛⲥⲟⲡ ϫⲉⲕⲁⲥ ⲉⲓⲉⲉⲓⲙⲉ ⲉⲩϣⲁϫⲉ ⲛ̅ϩⲟⲩⲟ ⲉⲃⲟⲗ ϩⲓⲧⲟⲟⲧⲟⲩ ⲧⲁⲥϩⲁⲓ ⲛⲏⲧⲛ̅ ϩⲛⲟⲩⲱⲣϫ̅. ⲉⲡⲉⲓⲇⲏ ⲁⲡⲥⲏⲩ ⲙ̅ⲡⲉⲥϭⲏⲣ ⲙⲟⲟϣⲉ ⲉⲟⲩⲉⲓⲛⲉ ⲁⲩⲱ ⲛⲉϥϭⲉⲡⲏ ⲛϭⲓⲡⲉⲧⲛⲁⲛ̅ⲛⲉⲓⲥϩⲁⲓ ϣⲁ ϥ. .ⲫ ⲣⲱⲧⲛ̅ ⲉⲧⲃⲉⲡⲁⲓ ⲛⲉϯⲥⲟⲟⲩⲛ ⲙⲙⲟⲟⲩ ⲛⲉϯⲥϩⲁⲓ ⲙⲙⲟⲟⲩ ⲛⲏⲧⲛ. ⲁⲓⲛⲁⲩ ⲅⲁⲣ ⲉⲣⲟϥ ⲛϩⲁϩ ⲛⲥⲟⲡ. ⲁⲩⲱ ⲛⲉⲛⲧⲁⲓ ⲥⲱⲧⲙ ⲉⲣⲟⲟⲩ ϩⲓⲧⲙⲡⲉⲛⲧⲁϥⲟⲩⲁϩϥ ⲛⲥⲱϥ ⲛⲛⲟⲩⲕⲟⲩⲓ ⲛⲛⲟⲩⲟⲉⲓϣ ⲉⲁϥϯⲙⲟⲟⲩ ⲉⲛⲉϥϭⲓⲐϫ ⲉⲁⲓⲣ̅ⲁⲡⲁⲧⲟⲟⲧ ⲉⲥϩⲁⲓ ⲙⲙⲟⲟⲩ ⲛⲧⲉⲧⲛⲙⲛⲧⲙⲁⲓⲛⲟⲩⲧⲉ ⲉⲁⲓϥⲓⲣⲟⲟⲩϣ ϩⲁⲧⲙⲉ ⲛⲥⲁ ⲥⲁⲛⲓⲙ ϫⲉⲕⲁⲥ ⲛⲛⲉⲟⲩⲁ ⲥⲱⲧⲙ̅ ⲉϩⲉⲛϩⲃⲏⲩⲉ ⲛϩⲟⲩⲟ ⲛϥⲣⲁⲧⲛⲁϩⲧⲉ ⲁⲩⲱ ⲟⲛ ϫⲉⲛⲛⲉϥⲥⲱⲧⲙ̅ ⲉⲩϣⲁϫⲉ ⲉϥϭⲟϫⲃ̅ ⲡⲁⲣⲁⲡⲉⲧⲉϣϣⲉ ⲛϥⲕⲁⲧⲁⲫⲣⲟⲛⲉⲓ ⲙⲡⲣⲱⲙⲉ.

1. ⲁⲛⲧⲱⲛⲓⲟⲥϭⲉ ⲟⲩⲣⲙⲛ̅ⲕⲏⲙⲉⲡⲉ ⲕⲁⲧⲁⲡⲉϥⲅⲉⲛⲟⲥ. ⲛⲉϥⲉⲓⲟⲧⲉ ⲇⲉ ⲛⲉϩⲉⲛⲉⲩⲅⲉⲛⲏⲥⲛⲉ. ⲛⲉⲩⲛ̅ⲧⲁⲩ ⲅⲁⲣ ⲙⲙⲁⲩ ⲛϩⲁϩ ⲛϩⲩⲡⲁⲣⲭⲟⲛⲧⲁ ⲁⲩⲱ ⲉϩⲉⲛⲭⲣⲓⲥϯⲁⲛⲟⲥⲛⲉ ⲛⲧⲟϥ ϩⲱⲱϥ ⲟⲛ ⲁϥⲉⲓ ⲉϩⲣⲁⲓ ϩⲛⲟⲩⲙⲛⲧⲭⲣⲓⲥϯⲁⲛⲟⲥ ϫⲓⲛⲉⲧⲉϥ ⲙⲛⲧⲕⲟⲩⲓ. ⲛⲉⲩⲥⲁⲁⲛϣ̅ ⲙⲙⲟϥ ϩⲓⲧⲛⲛⲉϥⲉⲓⲟⲧⲉ. ϥ̅ⲥⲟⲟⲩⲛϭⲉ ⲁⲛ ⲛⲗⲁⲁⲩ ⲉⲓⲉⲙⲏϯ ⲛⲧⲟⲟⲩ ⲙⲛⲛⲁⲡⲉϥⲏⲓ. ⲛⲧⲉⲣⲉϥⲁⲓⲁⲓ ⲇⲉ ⲁϥⲡⲣⲟⲕⲟⲡⲧⲉ ϩⲛⲑⲩⲗⲩⲕⲓⲁ ⲙⲡⲉϥⲟⲩⲱϣ ⲉϭⲱ ⲉⲧⲥⲁⲃⲟ ⲉⲥϩⲁⲓ ⲉϥⲟⲩⲱϣ ⲛⲧⲟϥ ⲉϣⲱⲡⲉ ⲙⲡⲃⲟⲗ ⲛⲧⲥⲩⲛⲏⲑⲓⲁ ⲛⲛϣⲏⲣⲉ ϣⲏⲙ. ⲡⲉϥⲟⲩⲱϣ ⲇⲉ ⲧⲏⲣϥ̅ ⲛⲉϥϣⲟⲟⲡ ⲛⲁϥⲡⲉ ⲕⲁⲧⲁⲑⲉ ⲉⲧⲥⲏϩ ⲉⲧⲣⲉϥϭⲱ ϩⲙⲡⲉϥⲏⲓ ⲉⲙⲛ̅ ⲧϥ̅ⲕⲣⲟϥ. ⲉⲛⲉϣⲁϥⲥⲩⲛⲁⲅⲉ ⲙⲛⲛⲉϥⲉⲓⲟⲧⲉ ϩⲛⲧⲉⲕⲕⲗⲏⲥⲓⲁ ⲁⲩⲱ ⲛⲉϥϣⲟⲟⲡ ⲁⲛⲡⲉ ⲛⲣⲉϥϫⲏⲣ ϩⲱⲥ ϣⲏⲣⲉ ϣⲏⲙ ⲟⲩⲇⲉ ⲙⲡⲉϥⲕⲁⲧⲁⲫⲣⲟⲛⲉⲓ ϩⲱⲥ ⲉϥⲡⲣⲟⲕⲟⲡⲧⲉ ϩⲛⲑⲩⲗⲏⲕⲓⲁ ⲁⲗⲗⲁ ⲛⲉϥϩⲩⲡⲟⲧⲁⲥⲥⲉ ⲛⲛⲉϥⲉⲓⲟⲧⲉ ⲁⲩⲱ ⲉⲛⲉϥϯⲛϩ̅ⲧⲏϥ ⲉⲛⲉⲧⲟⲩⲱϣ ⲙⲙⲟⲟⲩ ⲁⲩⲱ ϣⲁϥϩⲁⲣⲉϩ ⲉⲧⲟⲫⲉⲗⲓⲁ ⲉⲧ̅ϣⲟⲟⲡ ⲛϩⲏⲧⲟⲩ ϩⲣⲁⲓ ⲛϩⲏⲧϥ̅. ⲟⲩⲇⲉ ⲟⲛ ϩⲱⲥ ϣⲏⲣⲉ Ⲭ.ϥ:ⲣⲟ, ϣⲏⲙ ⲉϥϣⲟⲟⲡ ϩⲛϩⲉⲛϩⲩⲡⲁⲣⲭⲟⲛⲧⲁ ⲙⲡⲉϥⲉⲛⲱⲭⲗⲉⲓ ⲕⲑ ⲛⲛⲉϥⲉⲓⲟⲧⲉ ⲉⲧⲃⲉϩⲉⲛⲧⲣⲟⲫⲏ ⲉⲩⲟϣ ⲟⲩⲇⲉ ⲙⲡⲉϥϣⲓⲛⲉ ⲟⲛ ⲛⲥⲁⲛϩⲩⲇⲟⲛⲏ ⲉⲧϣⲟⲟⲡ ϩⲣⲁⲓ ⲛ̅ϩⲛⲧⲟⲩ. ϣⲁϥⲣⲱϣⲉ ⲇⲉ ⲉⲛⲉⲧⲉϣⲁϥϩⲉ ⲉⲣⲟⲟⲩ ⲙⲙⲁⲧⲉ ⲁⲩⲱ ⲛⲉϥϣⲓⲛⲉ ⲁⲛ ⲛⲥⲁ ⲟⲩϩⲟⲩⲟⲡⲉ.

2. ⲙⲛⲛ̅ⲥⲁⲡⲙⲟⲩ ⲛⲛⲉϥⲉⲓⲟⲧⲉ ⲁϥϣⲱϫⲡ ⲙⲁⲩⲁⲁϥ ⲙⲛⲟⲩⲕⲟⲩⲓ ⲛⲥⲱⲛⲉ ⲉⲧⲱϥⲧⲉ ⲁⲩⲱ ⲛϥ̅ϩⲛⲙⲛⲧϣⲙⲏⲛⲉ ⲛⲣⲟⲙⲡⲉ ⲏ ϫⲟⲩⲱⲧⲉ ⲛⲉϥϥⲓ ⲙⲡⲣⲟⲟⲩϣ ⲙⲡⲉϥⲏⲓ ⲕⲁⲗⲱⲥ ⲙⲛⲧⲉϥ̅ ⲥⲱⲛⲉ. ⲉⲙⲡⲁⲧⲉⲥⲟⲟⲩ ⲛ̅ⲛⲉⲃⲟⲧ ⲟⲩⲉⲓⲛⲉ ⲉⲡⲙⲟⲩ ⲛⲛⲉϥⲉⲓⲟⲧⲉ ⲁⲩⲱ ⲕⲁⲧⲁⲡⲉϥⲥⲱⲛⲧ ⲛⲉϣⲁϥⲉⲓ ⲉⲃⲟⲗ ⲛϥ̅ⲃⲱⲕ ⲉⲧⲉⲕⲕⲗⲏⲥⲓⲁ ⲛϥϯϩⲧⲏϥ ⲉⲛⲉⲧⲟⲩⲱϣ ⲙⲙⲟⲟⲩ ⲁⲩⲱ ⲁϥϯ ⲙⲡⲉϥϩⲏⲧ ⲉϩⲟⲩⲛ ⲁϥϣⲟϫⲛⲉ ⲉϥⲙⲟⲟϣⲉ ϫⲉⲛⲁϣ ⲛ̅ϩⲉ ⲁⲛⲁⲡⲟⲥⲧⲟⲗⲟⲥ ⲁⲩⲕⲱ ⲛⲥⲱⲟⲩ ⲛⲛⲕⲁ ⲛⲓⲙ ⲁⲩⲟⲩⲁϩⲟⲩ ⲛⲥⲁⲡⲥⲱⲧⲏⲣ. ⲛⲉⲛⲧⲁⲩϯ ⲇⲉ ⲉⲃⲟⲗ ⲛⲛⲉⲩⲛ̅ⲕⲁ ⲕⲁⲧⲁⲑⲉ ⲉⲧⲥⲏϩ ϩⲛⲛⲉⲡⲣⲁⲝⲓⲥ ⲁⲩⲉⲓⲛⲉ ⲙⲙⲟⲟⲩ ⲁⲩⲕⲁⲁⲩ ϩⲁⲛⲟⲩⲉⲣⲏⲧⲉ ⲛⲛⲁⲡⲟⲥⲧⲟⲗⲟⲥ ⲉⲧⲣⲉⲩⲧⲁⲁⲩ ⲛⲛⲉⲧϣⲁⲁⲧ ⲁⲩⲱ ϫⲉⲟⲩⲁϣ ⲙⲙⲓⲛⲉ ⲏ ⲟⲩⲁϣ ⲛϭⲟⲧⲧⲉ ⲑⲉⲗⲡⲓⲥ ⲛⲛⲁⲓ ⲉⲧⲕⲏ ⲛⲁⲩ ⲉϩⲣⲁⲓ ϩⲛⲛⲉⲙⲡⲏⲩⲉ. ⲛⲁⲓϭⲉ ⲉϥⲙⲉⲉⲩⲉ ⲉⲣⲟⲟⲩ ϩⲙⲡⲉϥϩⲏⲧ ⲁϥⲃⲱⲕ ⲉϩⲟⲩⲛ ⲉⲧⲉⲕⲕⲗⲏⲥⲓⲁ ⲁⲩⲱ ⲁⲥϣⲱⲡⲉ ⲉⲩⲱϣ ⲙⲡⲉⲩⲁⲅⲅⲉⲗⲓⲟⲛ ⲁϥⲥⲱⲧⲙ̅ ⲉⲡϫⲟⲉⲓⲥ ⲉϥϫⲱ ⲙⲙⲟⲥ ⲙⲡⲉⲑⲓⲧⲟⲩⲱϥ ϫⲉⲉϣϫⲉ ⲕⲟⲩⲱϣ ⲉϣⲱⲡⲉ ⲛⲧⲉⲗⲓⲟⲥ ⲃⲱⲕ ⲛⲅ̅ϯ ⲉⲃⲟⲗ ⲛⲛⲉⲕϩⲩⲡⲁⲣⲭⲟⲛⲧⲁ ⲧⲏⲣⲟⲩ ⲛⲅ̅ⲧⲁⲁⲩ ⲛⲛϩⲏⲕⲉ ⲛⲅ̅ⲉⲓ ⲛⲅ̅ⲟⲩⲁϩⲕ ⲛⲥⲱⲓ ⲁⲩⲱ ⲛⲅ̅ⲕⲱ ⲛⲁⲕ ⲛⲛⲟⲩⲁϩⲟ ϩⲛⲛⲙ̅ⲡⲏⲩⲉ. ⲁⲛⲧⲱⲛⲓⲟⲥϭⲉ ϩⲱⲥ ⲉⲁϥϫⲓ ⲙⲡⲣ̅ⲡⲙⲉⲉⲩⲉ ⲛⲛⲉⲧⲟⲩⲁⲁⲃ ⲉⲃⲟⲗ ϩⲓⲧⲙ̅ⲡⲛⲟⲩ ϥ:ⲫ ⲧⲉ ⲁⲩⲱ ⲁϥⲟⲡϥ̅ ϩⲙⲡⲉϥϩⲏⲧ ϩⲱⲥⲧⲉ ⲛ̅ⲧⲁⲩⲉϣⲧⲁⲛⲁⲅⲛⲱⲥⲓⲥ ⲉⲧⲙⲙⲁⲩ ⲉⲧⲃⲏⲏⲧϥ̅ ⲁϥⲉⲓ ⲉⲃⲟⲗ ϩⲛⲧⲉⲩⲛⲟⲩ ⲉⲧⲙⲙⲁⲩ ϩⲛⲧⲉⲕⲕⲗⲏⲥⲓⲁ. ⲁⲩⲱ ⲛⲉϥⲕⲧⲏⲥⲓⲥ ⲉⲧϣⲟⲟⲡ ⲛⲁϥ ϫⲓⲛⲛⲉϥⲉⲓⲟⲧⲉ. ⲛⲉⲩⲉⲓⲣⲉ ⲇⲉⲡⲉ ⲛϣⲉⲙⲛⲧϣⲉ ⲛ̅ⲥⲉⲧⲉⲓⲱϩⲉ ⲩⲟⲩⲟⲟⲗⲉ ⲉⲙⲁⲧⲉ. ⲛⲁⲓ ⲇⲉ ⲁϥⲭⲁⲣⲓⲍⲉ ⲙⲙⲟⲟⲩ ⲛⲛ̅ⲣⲱⲙⲉ ⲙⲡⲉϥ̅ϯⲙⲉ ϫⲉⲕⲁⲥ ⲛⲛⲉⲩⲉⲛⲱⲭⲗⲉⲓ ⲛⲁϥ ⲙⲛⲧⲉϥⲥⲱⲛⲉ ϩⲛⲗⲁⲁⲩ ⲛ̅ϩⲱⲃ. ⲡⲕⲉⲥⲉⲉⲡⲉ ⲧⲏⲣⲟⲩ ⲛⲛⲕⲁ ⲉⲧϣⲟⲟⲡ ⲛⲁϥ ⲁϥⲧⲁⲁⲩ ⲉⲃⲟⲗ ⲁϥⲥⲱⲟⲩϩ ⲉϩⲟⲩⲛ ⲛϩⲉⲛϩⲟⲙⲛ̅ⲧ ⲉⲛⲁϣⲱⲟⲩ ⲁϥⲧⲁⲁⲩ ⲛⲛ̅ϩⲏⲕⲉ. ⲁϥϩⲁⲣⲉϩ ⲇⲉ ⲉϩⲉⲛⲕⲟⲩⲓ ⲉⲧⲃⲉⲧⲉϥⲥⲱⲛⲉ.

3. ⲡⲁⲗⲓⲛ ⲟⲛ ⲛⲧⲉⲣⲉϥⲃⲱⲕ ⲉϩⲟⲩⲛ ⲉⲧⲉⲕⲕⲗⲏⲥⲓⲁ ⲁϥⲥⲱⲧⲙ̅ ⲟⲛ ϩⲙ̅ⲡⲉⲩⲁⲅⲅⲉⲗⲓⲟⲛ ⲉⲣⲉⲡϫⲟⲉⲓⲥ ϫⲱ ⲙⲙⲟⲥ ϫⲉⲙⲡⲣ̅ϥⲓⲣⲟⲟⲩϣ ⲉⲡⲉϥⲣⲁⲥⲧⲉ ⲙⲡⲉϥⲁⲛⲓⲭⲉϭⲉ ⲁϥⲉⲓ ⲉⲃⲟⲗ ⲛⲧⲉⲩⲛⲟⲩ ⲁϥϯ ⲛⲛ̅ⲕⲟⲟⲩⲉ ⲉⲧⲙ̅ⲙⲁⲩ ⲛⲛ̅ϩⲏⲕⲉ. ⲧⲉϥⲥⲱⲛⲉ ⲇⲉ ⲁϥϭⲁⲗⲱⲱⲥ ⲉϩⲛ̅ⲡⲓⲥⲧⲏ ⲛϩⲓⲟⲙⲉ ⲉϥⲥⲟⲟⲩⲛ ⲙⲙⲟⲟⲩ ϫⲉϩⲉⲛⲡⲁⲣⲑⲉⲛⲟⲥⲛⲉ ϫⲉⲕⲁⲥ ϩⲱⲱⲥ ⲉⲥⲉϣⲱⲡⲉ ϩⲛⲧⲡⲁⲣⲑⲉⲛⲓⲁ. ⲛⲧⲟϥ ⲇⲉ ϩⲱⲱϥ ⲁϥⲉⲓ ⲉⲃⲟⲗ ϩⲙⲡⲉϥⲏⲓ ⲁϥϫⲓϩⲣⲁϥ ⲗⲟⲓⲡⲟⲛ ⲉⲧⲁⲥⲕⲏⲥⲓⲥ ⲉϥϯϩⲧⲏϥ ⲉⲣⲟϥ ⲁⲩⲱ ⲉϥⲉⲓⲛⲉ ⲙⲙⲟϥ ⲉϩⲣⲁⲓ ϩⲛⲟⲩⲙⲛⲧϫⲱⲱⲣⲉ. ⲉⲛⲉⲙⲡⲁⲧⲟⲩϣⲱⲡⲉ ⲅⲁⲣ ϩⲛⲕⲏⲙⲉ ⲉⲡⲧⲏⲣϥ ⲛϭⲓⲙⲙⲟⲛⲁⲥⲧⲏⲣⲓⲟⲛ ⲉⲧⲟϣ ⲁⲩⲱ ⲉⲛⲉⲙⲡⲁⲧⲉⲙⲙⲟⲛⲁⲭⲟⲥ ⲥⲟⲩⲛ̅ⲡϫⲁⲉⲓⲉ ⲉⲧⲟⲩⲏⲩ ⲁⲗⲗⲁ ⲉϣⲁⲣⲉⲡⲟⲩⲁ ⲡⲟⲩⲁ ⲛⲛⲉⲧⲟⲩⲱϣ ϫⲓϩⲣⲁϥ ⲉⲣⲟϥ ⲉⲣ̅ⲡⲃⲟⲗ ⲙⲡⲉϥϯⲙⲉ ⲛⲛⲟⲩⲕⲟⲩⲓ ⲛϥ̅ϣⲱⲡⲉ ϩⲛⲧⲁⲥⲕⲏⲥⲓⲥ ⲙⲁⲩⲁⲁϥ. ⲛⲉⲩⲛⲟⲩϩⲗ̅ⲗⲟ ⲇⲉ ϣⲟⲟⲡ ϩⲙⲡϯⲙⲉ ⲉⲧⲙ̅ⲙⲁⲩ ⲉϥⲁⲥⲕⲉⲓ ⲙⲙⲟϥ ϫⲓⲛⲉⲧⲉϥⲙⲛⲧⲕⲟⲩⲓ ϩⲛⲟⲩⲱⲛϩ ⲙⲙⲟⲛⲁⲭⲟⲥ. ⲡⲁⲓ ⲇⲉ ϥ.ⲣ̀ ⲛⲧⲉⲣⲉϥⲛⲁⲩ ⲉⲣⲟϥ ⲛ̅ϭⲓⲁⲛⲧⲱⲛⲓⲟⲥ ⲁϥⲕⲱϩ ⲉⲣⲟϥ ϩⲛⲟⲩⲡⲉⲧⲛⲁⲛⲟⲩϥ ⲁⲩⲱ ⲛ̅ⲧⲟϥ ϩⲱⲱϥ ⲟⲛ ⲁϥⲁⲣⲭⲉⲓ ⲛϣⲟⲣⲡ̅ ⲉⲧⲣⲉϥϭⲱ ϩⲙⲡⲙⲁ ⲉⲧⲙⲙⲁⲩ ⲙⲡⲃⲟⲗ ⲙ̅ⲡⲉϥϯⲙⲉ. ⲁⲩⲱ ⲉϥϣⲁⲛⲥⲱⲧⲙ̅ ⲉⲧⲃⲉⲟⲩⲣⲱⲙⲉ ⲛ̅ⲥⲡⲟⲩⲇⲁⲓⲟⲥ ⲉϥϣⲟⲟⲡ ϩⲛϩⲉⲛⲡⲣⲁⲝⲓⲥ ⲉⲛⲁⲛⲟⲩⲟⲩ ϣⲁϥⲉⲓ ⲉⲃⲟⲗ ⲛϥϣⲓⲛⲉ ⲛⲥⲁⲡⲉⲧⲙ̅ⲙⲁⲩ ⲛ̅ⲑⲉ ⲙ̅ⲡⲁϥⲛⲉⲃⲓⲱ ⲛ̅ⲥⲁⲃⲉ ⲁⲩⲱ ⲙⲉϥⲕⲧⲟϥ ⲉⲡⲉϥⲙⲁ ⲛⲥⲁⲃⲏⲗ ⲛϥⲛⲁⲩ ⲉⲡⲣⲱⲙⲉ ⲉⲧⲙⲙⲁⲩ ⲁⲩⲱ ϣⲁϥⲣ̅ⲑⲉ ⲉϣϫⲉ ⲛⲧⲁϥϫⲓ ⲉⲃⲟⲗ ϩⲓⲧⲙ̅ⲡⲣⲱⲙⲉ ⲉⲧⲙⲙⲁⲩ ⲛⲟⲩⲉⲙⲫⲟⲇⲓⲟⲛ ⲉⲧⲉϩⲓⲏ ⲉϩⲟⲩⲛ ⲉⲧⲁⲣⲉⲧⲏ. ⲛϣⲟⲣⲡ̅ ⲙⲉⲛ ⲉϥϩⲙ̅ⲡⲙⲁ ⲉⲧⲙⲙⲁⲩ ⲁϥⲕⲁⲁⲥ ϩⲙⲡⲉϥϩⲏⲧ ϫⲉⲛⲛⲉϥⲕⲟⲧϥ̅ ϫⲓⲛⲉⲡⲉⲓⲛⲁⲩ ⲉⲛϩⲩⲡⲁⲣⲭⲟⲛⲧⲁ ⲛⲛⲉϥⲉⲓⲟⲧⲉ ⲟⲩⲇⲉ ⲛⲛⲉϥⲣⲡⲙⲉⲉⲩⲉ ⲛⲛⲉϥⲥⲩⲅⲅⲉⲛⲏⲥ. ⲡⲉϥⲟⲩⲱϣ ⲇⲉ ⲧⲏⲣϥ̅ ⲁⲩⲱ ⲥⲡⲟⲩⲇⲏ ⲛⲓⲙ ⲁϥϫⲡⲟⲟⲩ ⲛⲁϥ ϩⲛⲟⲩϭⲟⲙ ⲙⲡⲕⲱⲧⲉ ⲛⲧⲁⲥⲕⲏⲥⲓⲥ. ⲛⲉϥⲣ̅ϩⲱⲃ ⲇⲉ ϩⲛⲛⲉϥϭⲓϫ ⲉⲧⲃⲉ ϫⲉⲁϥⲥⲱⲧⲙ̅ ⲉⲡⲉⲧⲥⲏϩ ⲉϥϫⲱ ⲙⲙⲟⲥ ϫⲉⲡⲉⲧⲟ ⲛⲁⲣⲅⲟⲥ ⲙⲡⲣⲧⲣⲉϥⲟⲩⲱⲙ. ⲁⲩⲱ ⲉⲛⲉϣⲁϥϫⲟ ⲉⲃⲟⲗ ⲙⲡϩⲱⲃ ⲛⲛⲉϥϭⲓϫ ⲕⲁⲗⲱⲥ ⲟⲩⲙⲉⲣⲟⲥ ⲇⲉ ⲉⲡⲉϥⲟⲉⲓⲕ ⲕⲉⲙⲉⲣⲟⲥ ⲇⲉ ⲉⲛⲉϥϫⲟ ⲙⲙⲟϥ ⲉⲃⲟⲗ ⲉⲛⲉⲧⲣ̅ⲭⲣⲓⲁ. ⲛⲉϥϣⲗⲏⲗ ⲇⲉⲡⲉ ⲉⲡⲉϩⲟⲩⲟ ⲉⲁϥⲉⲓⲙⲉ ϫⲉⲟⲩⲡⲉⲧⲉϣϣⲉⲡⲉ ⲉϣⲗⲏⲗ ⲁϫⲛⲱϫⲛ. ⲕⲁⲓⲅⲁⲣ ⲛⲉϥϯ ⲛϩⲧⲏϥ ϩⲛⲟⲩⲱⲣϫ ⲉⲛⲉⲧⲟⲩⲱϣ ⲙⲙⲟⲟⲩ ϩⲛⲧⲉⲕⲕⲗⲏⲥⲓⲁ ϩⲱⲥⲧⲉ ⲉⲧⲙ̅ⲧⲣⲉⲗⲁⲁⲩ ϩⲛⲛⲉⲧⲥⲏϩ ϩⲉ ⲉⲃⲟⲗ ⲛ̅ⲧⲟⲟⲧϥ̅. ⲛⲉϥϩⲁⲣⲉϩ ⲇⲉ ⲉⲣⲟⲟⲩ ⲧⲏⲣⲟⲩ ϩⲣⲁⲓ ⲛϩⲏⲧϥ ϩⲱⲥⲧⲉ ⲉⲧⲣⲉⲡⲉⲩⲣ̅ⲡⲙⲉⲉⲩⲉ ϣⲱⲡⲉ ϩⲙⲡⲉϥ ϥ.ⲫ̀ ϩⲏⲧ ⲉⲡⲙⲁ ⲛⲛϫⲱⲱⲙⲉ.

4. ⲧⲁⲓⲧⲉ ⲑⲉ ⲛ̅ⲧⲁⲁⲛⲧⲱⲛⲓⲟⲥ ⲉⲓⲛⲉ ⲙⲙⲟϥ ⲉϩⲣⲁⲓ ϩⲓⲱⲱⲥ ⲁⲩⲱ ⲁⲩⲙⲉⲣⲓⲧϥ̅ ϩⲓⲧⲛ̅ⲟⲩⲟⲛ ⲛⲓⲙ. ⲛⲧⲟϥ ⲇⲉ ⲛⲉϥϩⲩⲡⲟⲧⲁⲥⲥⲉ ϩⲛⲟⲩⲙⲛⲧϩⲁⲕ ⲛⲛⲉⲥⲡⲟⲩⲇⲁⲓⲟⲥ ⲉϣⲁϥⲃⲱⲕ ϣⲁⲣⲟⲟⲩ ⲁⲩⲱ ⲉⲛⲉϣⲁϥϯϩⲧⲏϥ ϩⲙⲡⲉϥϩⲏⲧ ⲉⲡϩⲱⲃ ⲙⲡⲟⲩⲁ ⲡⲟⲩⲁ ϩⲛⲧⲉϥⲁⲥⲕⲏⲥⲓⲥ ⲙⲛⲡⲉϥⲕⲱⲧ ⲉⲧⲛⲁⲛⲟⲩϥ ⲙⲛⲧⲉϥⲥⲡⲟⲩⲇⲏ. ⲟⲩⲁ ⲙⲉⲛ ⲉⲩⲣⲙⲛⲭⲁⲣⲓⲥⲡⲉ. ⲕⲉⲟⲩⲁ ⲉⲁϥⲛⲁⲩ ⲉⲣⲟϥ ⲉϥϭⲙϭⲟⲙ ϩⲛⲧⲁⲥⲕⲏⲥⲓⲥ. ⲕⲉⲟⲩⲁ ⲟⲛ ⲉⲁϥⲛⲁⲩ ⲉⲣⲟϥ ⲉϥϭⲙ̅ϭⲟⲙ ϩⲙⲡⲉϣⲗⲏⲗ. ⲕⲉⲟⲩⲁ ⲇⲉ ⲟⲛ ⲉⲛⲟⲩⲣⲉϥϭⲱⲛⲧ̅ ⲁⲛⲡⲉ. ⲕⲉⲟⲩⲁ ϩⲛⲟⲩⲙⲛⲧⲙⲁⲓⲣⲱⲙⲉ. ⲕⲉⲟⲩⲁ ⲉϥⲟ ⲛⲟⲩϣⲏ ⲛⲣⲟⲉⲓⲥ. ⲁⲩⲱ ⲕⲉⲟⲩⲁ ⲉϥⲱϣ ⲕⲁⲗⲱⲥ. ⲕⲉⲟⲩⲁ ⲟⲛ ⲉⲁϥⲣ̅ϣⲡⲏⲣⲉ ⲙⲙⲟϥ ϩⲛⲧⲉϥϩⲩⲡⲟⲙⲟⲛⲏ. ⲕⲉⲟⲩⲁ ϩⲛϩⲉⲛⲛⲏⲥϯⲁ ⲙⲛⲟⲩⲛ̅ⲕⲟⲧⲕ̅ ϩⲓⲡⲉⲥⲏⲧ. ⲁⲩⲱ ⲕⲉⲟⲩⲁ ⲉϣⲁϥϯϩⲧⲏϥ ⲉⲧⲉϥⲙⲛⲧⲣⲙ̅ⲣⲁϣ ⲁⲩⲱ ⲧⲙⲛⲧϩⲁⲣⲉϣϩⲏⲧ ⲛ̅ⲕⲉⲟⲩⲁ ⲉⲛⲉϣⲁϥⲡⲁⲣⲁⲧⲏⲣⲉⲓ ⲉⲣⲟⲥ. ϩⲁⲡⲁⲝ ϩⲁⲡⲗⲱⲥ ⲛ̅ⲧⲟⲟⲩ ⲧⲏⲣⲟⲩ ⲁϥⲡⲁⲣⲁⲧⲏⲣⲉⲓ ⲉⲧⲉⲩⲙⲛⲧⲣⲉϥϣⲙϣⲉⲛⲟⲩⲧⲉ ⲉϩⲟⲩⲛ ⲉⲡⲉⲭⲥ ⲁⲩⲱ ⲧⲁⲅⲁⲡⲏ ⲉϩⲟⲩⲛ ⲉⲛⲉⲩⲉⲣⲏⲩ. ⲉⲛⲉϥϯ ⲛϩⲧⲏϥ ⲉⲛⲁⲓ ⲧⲏⲣⲟⲩ ϩⲙⲡⲉϥϩⲏⲧ. ⲁⲩⲱ ⲧⲁⲓⲧⲉ ⲑⲉ ⲉϣⲁϥⲕⲧⲟϥ ⲉϥⲙⲉϩ ϩⲛⲛⲁⲓ ⲧⲏⲣⲟⲩ ⲉϩⲟⲩⲛ ⲉⲡⲉϥⲙⲁⲛϣⲱⲡⲉ ⲉⲧⲉϥⲁⲥⲕⲉⲓ ⲛϩⲏⲧϥ̅ ⲙⲡⲛⲟⲩⲧⲉ. ⲛⲧⲟϥ ⲇⲉ ⲁϥⲥⲱⲟⲩϩ ⲉϩⲟⲩⲛ ⲛⲛⲉⲛⲧⲁϥⲛⲁⲩ ⲉⲣⲟⲟⲩ ⲧⲏⲣⲟⲩ ϩⲙⲡⲟⲩⲁ ⲡⲟⲩⲁ ϩⲣⲁⲓ ϩⲙⲡⲉϥϩⲏⲧ ⲁϥⲥⲡⲟⲩⲇⲁⲍⲉ ⲉⲟⲩⲟⲛϩⲟⲩ ⲉⲃⲟⲗ ⲧⲏⲣⲟⲩ ϩⲣⲁⲓ ⲛϩⲏⲧϥ. ⲛⲉϥϣⲟⲟⲡ ⲅⲁⲣ ⲁⲛⲡⲉ ⲛⲣⲉϥϯⲧⲱⲛ ⲟⲩⲃⲉⲛⲉⲧϣⲏϣ ⲛⲙ̅ⲙⲁϥ ϩⲛⲧⲉϥϭⲟⲧ ⲉⲓⲉⲙⲏⲧⲉⲓ ⲡⲁⲓ ⲙⲙⲁⲧⲉ ϫⲉⲕⲁⲥ ⲛⲛⲉϥϭⲱϫⲃ̅ ⲉⲣⲟⲟⲩ ϩⲛⲛⲉϩⲃⲏⲩⲉ ⲉⲧⲛⲁⲛⲟⲩⲟⲩ ⲁⲗⲗⲁ ϫⲉⲕⲁⲥ ⲛ̅ⲧⲟϥ ⲉϥⲉⲟⲩⲱⲛϩ̅ ⲉⲃⲟⲗ ϩⲛ ⲛⲉⲧⲥⲟⲧⲡ̅. ⲁⲩⲱ ⲉϣⲁϥⲉⲓⲣⲉ ⲙⲡⲁⲓ ⲉⲧⲙ̅ⲗⲩⲡⲉⲓ ⲙⲙⲟⲟⲩ ⲁⲗⲗⲁ ⲉϣⲁϥⲧⲣⲉⲩⲣⲁϣⲉ ⲛⲧⲟϥ ⲛϩⲟⲩⲟ ⲉϩⲣⲁⲓ ⲉϫⲱϥ. ⲟⲩⲟⲛϭⲉ ⲛⲓⲙ ⲉⲧϩⲙⲡϯⲙⲉ ⲙⲛⲛⲉⲫⲓⲗⲟⲡⲟⲛⲟⲥ ⲛⲁⲓ ⲉⲧⲉⲟⲩⲛⲧⲁϥ ⲙⲙⲁⲩ ⲙⲡⲧⲱⲡ ⲉϩⲟⲩⲛ ⲉⲣⲟⲟⲩ ϣⲁⲩⲙⲟⲩⲧⲉ ⲉⲣⲟϥ ϫⲉⲡⲙⲁⲓⲛⲟⲩⲧⲉ ⲉⲩⲛⲁⲩ ⲉⲣⲟϥ ϩⲙⲡⲉϥⲥⲙⲟⲧ. ϩⲟⲓⲛⲉ ⲙⲉⲛ ϣⲁⲩⲁⲥⲡⲁⲍⲉ ⲙⲙⲟϥ ϩⲱⲥ ϣⲏⲣⲉ ϩⲉⲛⲕⲟⲟⲩⲉ ⲇⲉ ϩⲱⲥ ⲥⲟⲛ.

5. ⲡⲇⲓⲁⲃⲟⲗⲟⲥ ⲇⲉ ⲡⲙⲉⲥⲧⲉⲡⲉⲧⲛⲁⲛⲟⲩϥ ⲁⲩⲱ ⲡⲉⲫⲑⲟⲛⲏⲣⲟⲥ ⲙⲡⲉϥⲉϣϥⲉⲓ ⲉⲣⲟϥ ⲉϥⲛⲁⲩ ⲉⲡⲉⲓⲟⲩⲣⲟⲧ ⲛⲧⲉⲓⲙⲓⲛⲉ ϩⲙⲡⲉⲓϣⲏⲣⲉ ϣⲏⲙ ⲁⲗⲗⲁ ⲛⲉⲧⲉϣⲁϥⲙⲉⲗⲉⲧⲁ ⲙⲙⲟⲟⲩ ⲉⲁⲁⲩ ϣⲁϥⲧⲟⲗⲱⲙⲁ ϩⲱⲱϥ ⲟⲛ ⲉⲧⲣⲉϥⲁⲁⲩ ⲉϩⲟⲩⲛ ⲉⲣⲟϥ. ⲛϣⲟⲣⲡ ⲙⲉⲛ ⲁϥⲡⲓⲣⲁⲍⲉ ⲙⲙⲟϥ ⲉⲉⲓⲛⲉ ⲙⲙⲟϥ ⲉⲡⲉⲥⲏⲧ ⲉϫⲛⲧⲉϥⲁⲥⲕⲏⲥⲓⲥ ⲉⲁϥⲛⲟⲩϫⲉ ⲉϩⲟⲩⲛ ⲉⲣⲟϥ ⲙⲡⲣⲡⲙⲉⲉⲩⲉ ⲛⲛⲉϥϩⲩⲡⲁⲣⲭⲟⲛⲧⲁ ⲁⲩⲱ ⲟⲩⲙⲛⲧϥⲁⲓⲣⲟⲟⲩϣ ϩⲁⲧⲉϥⲥⲱⲛⲉ ⲟⲩⲣ̅ⲡⲙⲉⲉⲩⲉ ⲉϩⲟⲩⲛ ⲉⲛⲁⲡⲉϥⲅⲉⲛⲟⲥ ⲟⲩⲙⲛⲧⲙⲁⲓϩⲟⲙⲛⲧ ⲟⲩⲙⲛⲧϣⲟⲩϣⲟ ⲟⲩϩⲩⲇⲟⲛⲏ ϩⲉⲛϭⲓⲛⲟⲩⲱⲙ ⲉⲛⲁϣⲱⲟⲩ ⲁⲩⲱ ⲡⲕⲉⲥⲉⲉⲡⲉ ⲛⲛⲙ̅ⲧⲟⲛ ⲛⲧⲉⲡⲃⲓⲟⲥ. ⲁⲩⲱ ⲉⲡϩⲁⲉ ⲛⲛⲁⲓ ⲁϥⲛⲟⲩϫⲉ ⲉⲡⲉϥϩⲏⲧ ⲙⲡⲉⲛϣⲟⲧ ⲛⲧⲁⲣⲉⲧⲏ ⲁⲩⲱ ϫⲉⲟⲩⲛⲟϭⲡⲉ ⲡⲉⲥⲙⲕⲁϩ ⲁⲩⲱ ⲟⲛ ϫⲉⲛⲁϣⲉⲡⲉⲥϩⲓⲥⲉ. ⲁⲩⲱ ⲉⲛⲉϥⲕⲱ ⲛⲁϥ ⲉϩⲣⲁⲓ ⲛⲧⲙⲛ̅ⲧϭⲱⲃ ⲙⲡⲥⲱⲙⲁ ⲙⲛⲡⲁϣⲁⲓ ⲙ̅ⲡⲉⲭⲣⲟⲛⲟⲥ ⲁⲩⲱ ⲁϥⲧⲟⲩⲛⲟⲥ ⲉϩⲣⲁⲓ ⲉϫⲱϥ ⲛⲛⲟⲩⲛⲟϭ ⲛϣⲟⲉⲓϣ ⲙⲙⲉⲉⲩⲉ ⲛϩⲏⲧ ϩⲙⲡⲉϥϣⲟϫⲛⲉ ⲉϥⲟⲩⲱϣ ⲉⲡⲱⲣϫ ⲉⲃⲟⲗ ⲙⲙⲟϥ ⲙⲡⲙⲉⲉⲩⲉ ⲉⲧⲥⲟⲩⲧⲱⲛ. ⲛⲧⲉⲣⲉⲡϫⲁϫⲉ ⲛⲁⲩ ⲉⲣⲟϥ ⲙⲙⲓⲛ ⲙⲙⲟϥ ⲉϥⲟ ⲛⲁⲧϭⲟⲙ ⲛⲛⲁϩⲣⲙⲡⲟⲩⲱϣ ⲛⲛⲁⲛⲧⲱⲛⲓⲟⲥ ⲁⲩⲱ ϫⲉⲁⲩϫⲣⲟ ⲉⲣⲟϥ ⲉⲡⲉϩⲟⲩⲟ ϩⲓⲧⲛⲧⲙⲛ̅ⲧϫⲱⲱⲣⲉ ⲙⲡⲉⲧⲙ̅ⲙⲁⲩ ⲁⲩⲱ ⲇⲉⲁϥϩⲉ ⲉⲡⲉⲥⲏⲧ ϩⲓⲧⲛⲛⲉⲡⲣⲟⲥⲉⲩⲭⲏ ⲛⲛⲁⲛⲧⲱⲛⲓⲟⲥ ⲛⲁⲓ ⲉⲧϥ̅ⲉⲓⲣⲉ ⲙⲙⲟⲟⲩ ⲛⲛⲁⲩ ⲛⲓⲙ ⲧⲟⲧⲉ ⲁϥϩⲱⲕ ⲙⲙⲟϥ ⲛⲛ̅ϩⲟⲡⲗⲟⲛ ⲉⲧϩⲓϫⲛⲧϩⲗ̅ⲡⲉ ⲛϩⲏⲧϥ̅ ⲛⲁⲓ ⲉⲧⲉϥϩⲏⲕ ⲛ̅ϩⲏⲧⲟⲩ ⲁⲩⲱ ⲛ̅ⲧⲟϥ ⲉϥϣⲟⲩϣⲟⲩ ⲙⲙⲟϥ ⲉϩⲣⲁⲓ ⲉϫⲱⲟⲩ. ⲛⲁⲓ ⲅⲁⲣⲛⲉ ⲛⲉϥϣⲟⲣⲡ ⲛ̅ⲥⲟⲧⲉ ⲉⲧⲥⲟⲧⲡ̅ ⲉϣⲁϥⲛⲟⲩϫⲉ ⲙⲙⲟⲟⲩ ⲉϩⲟⲩⲛ ⲉⲛϣⲏⲣⲉ ϣⲏⲙ. ⲁϥⲉⲓ ⲇⲉ ⲉⲃⲟⲗ ⲉⲁϥϯⲟⲩⲃⲉⲁⲛⲧⲱⲛⲓⲟⲥ ⲉϥϣⲧⲟⲣⲧⲣ̅ ⲙⲙⲟϥ ⲛ̅ⲧⲉⲩϣⲏ ⲉϥⲉⲛⲱⲭⲗⲉⲓ ⲙⲉⲛ ⲛⲁϥ ⲛ̅ⲧⲉⲓϩⲉ ϩⲱⲥⲧⲉ ⲉⲧⲣⲉϥⲉⲓⲙⲉ ⲉⲡⲙⲓϣⲉ ⲉⲧϣⲟⲟⲡ ⲛⲁⲩ ⲙⲡⲉⲥⲛⲁⲩ. ⲡϫⲁϫⲉ ⲙⲉⲛ ⲉϥⲛⲟⲩϫⲉ ⲛϩⲉⲛⲙⲉⲉⲩⲉ ⲉⲩϫⲁϩⲙ̅ ⲉϩⲟⲩⲛ ⲉⲣⲟϥ. ⲁⲛⲧⲱⲛⲓⲟⲥ ⲇⲉ ϩⲱⲱϥ ϣⲁϥⲃⲟⲟⲣⲟⲩ ⲓⲧⲛⲛⲉϣⲗⲏⲗ.ϣⲁⲣⲉⲡϫⲁϫⲉ ⲙⲉⲛ ⲉⲓⲛⲉ ⲙⲡⲟⲩⲱϣ ⲛⲑⲩⲇⲟⲛⲏ ⲉϩⲟⲩⲛ ⲉⲣⲟϥ. ⲁⲛⲧⲱⲛⲓⲟⲥ ϩⲱⲱϥϣⲁϥϣⲱⲡⲉ ⲉϥϣⲓⲡⲉ ϣⲁϥⲕⲧⲟ ⲛ̅ⲛⲟⲩⲥⲟⲃⲧ ⲉⲡⲉϥⲥⲱⲙⲁ ϩⲛⲧⲡⲓⲥⲧⲓⲥ ⲙⲛⲧⲛⲏⲥϯⲁ.ⲁⲩⲱ ⲡⲇⲓⲁⲃⲟⲗⲟⲥ ⲙⲉⲛ ⲛⲉϣⲁϥϫⲓ ⲙⲡϩⲣ̅ⲃ̅ⲛⲧⲉⲥϩⲓⲙⲉ ⲛⲧⲉⲩϣⲏ ⲛϥⲣ̅ⲥⲙⲟⲧ ⲛⲓⲙ ϩⲛϩⲉⲛⲥⲭⲏⲙⲁ ϫⲉⲕⲁⲥ ⲉϥⲛⲁⲣ̅ϩⲁⲗ ⲛⲛⲁⲛⲧⲱⲛⲓⲟⲥ. ⲛⲧⲟϥ ⲇⲉ ⲉϥⲙⲉⲉⲩⲉ ⲉⲡⲉⲭⲥ ϩⲙⲡⲉϥϩⲏⲧ ⲙⲛⲡⲉⲓⲱⲣϩ̅ ⲛⲛⲟⲏⲣⲟⲛ ⲛ̅ⲧⲉϥⲯⲩⲭⲏ ϣⲁϥⲱϣⲙ̅ ⲛⲛⲉϫⲏⲃⲥ̅ ⲙⲡⲉⲧⲙⲙⲁⲩ.ⲛⲧⲟϥ ⲟⲛ ⲡϫⲁϫⲉ ⲉϥⲛⲟⲩϫⲉ ⲉϩⲟⲩⲛ ⲉⲣⲟϥ ⲙⲡⲟⲩⲱϣ ⲛ̅ⲑⲩⲇⲟⲛⲏ. ⲁⲛⲧⲱⲛⲓⲟⲥ ⲇⲉ ϣⲁϥⲣ̅ⲑⲉ ⲙⲡⲉⲧϭⲟⲛⲧ ⲁⲩⲱ ⲉⲧⲙⲟϩⲕ̅ ⲛ̅ϩⲏⲧ ⲉϥⲙⲉⲉⲩⲉ ϩⲙⲡⲉϥϩⲏⲧ ⲉⲧⲁⲡⲉⲓⲗⲏ ⲙⲡⲕⲱϩⲧ ⲙⲛⲡⲃⲛ̅ⲧ ⲉϥⲕⲱ ⲙⲙⲟⲟⲩ ϩⲁⲉⲓⲁⲧϥ̅. ⲛⲁⲓ ⲧⲏⲣⲟⲩ ⲁⲩϣⲱⲡⲉ ⲛ̅ϣⲓⲡⲉ ⲙⲡϫⲁϫⲉ. ⲡⲉⲧⲙⲉⲉⲩⲉ ⲅⲁⲣ ϫⲉϯⲛⲁⲉϣϯⲟⲩⲃⲉⲡⲛⲟⲩⲧⲉ ⲁⲩⲥⲱⲃⲉ ⲛⲥⲱϥϩⲓⲧⲛⲁⲛⲧⲱⲛⲓⲟⲥ. ⲉⲛⲉⲣⲉⲡϫⲟⲉⲓⲥ ⲅⲁⲣ ϯⲧⲟⲟⲧϥ ⲡⲁⲓ ⲛⲧⲁϥⲫⲟⲣⲉⲓ ⲛⲧⲥⲁⲣⲝ̅ ⲉⲧⲃⲏⲏⲧⲛ̅ ⲁⲩⲱ ⲉϥϯ ⲙⲡⲉϫⲣⲟ ⲛⲛⲉϥⲥⲱⲧⲡ ⲉϩⲟⲩⲛ ⲉⲡⲇⲓⲁⲃⲟⲗⲟⲥ ϩⲱⲥⲧⲉ ⲛⲧⲉⲡⲟⲩⲁ ⲡⲟⲩⲁ ⲛⲛⲉⲧⲁⲅⲱⲛⲓⲍⲉ ϫⲟⲟⲥ ϫⲉⲛⲁⲛⲟⲕ ⲁⲛ ⲁⲗⲗⲁ ⲧⲉⲭⲁⲣⲓⲥ ⲙⲡⲛⲟⲩⲧⲉ ⲉⲧⲛⲙ̅ⲙⲁⲓ.

6. ⲉⲡϩⲁⲉ ⲇⲉ ⲛⲧⲉⲣⲉϥⲧⲙ̅ⲉϣϭⲙϭⲟⲙ ⲛ̅ϭⲓⲡⲉⲇⲣⲁⲕⲱⲛ ⲉⲧⲁⲩⲟ ⲉⲡⲉⲥⲏⲧ ⲛⲛⲁⲛⲧⲱⲛⲓⲟⲥ ⲁϥϭⲱⲛ̅ⲧ ⲉⲣⲟϥ ⲙⲙⲓⲛ ⲙⲙⲟϥⲭ ⲁϥϩⲣⲟϫⲣ̅ϫ̅ ⲛⲛⲉϥⲟⲃϩⲉ ⲉϩⲣⲁⲓ ⲉϫⲱϥⲭ ⲁϥⲣ̅ⲑⲉ ⲙⲡⲉⲧⲡⲟϣⲥ ⲛϩⲏⲧ ⲁϥⲟⲩⲱⲛϩ̅ ⲛⲁϥ ⲉⲃⲟⲗ ϩⲛⲟⲩⲫⲁⲛⲧⲁⲥⲓⲁ ⲙⲡⲉⲥⲙⲟⲧ ⲛⲛⲟⲩϣⲏⲣⲉ ⲕⲟⲩⲓ ⲉϥⲕⲏⲙⲉ̀ ̀ⲁϥϣⲱⲡⲉ ⲛⲑⲉ ⲙⲡⲉⲧⲗⲟⲃⲉ ⲁϥϫⲓ ⲛⲛⲟⲩⲥⲙⲏ ⲛ̅ⲣⲱⲙⲉ ⲉϥϫⲱ ⲙⲙⲟⲥ ⲛⲛⲁⲛⲧⲱⲛⲓⲟⲥ ϫⲉⲁⲓⲐⲁⲡⲁⲛⲧⲁ ⲙⲉⲛ ⲛ̅ϩⲁϩ ⲛ̅ⲧⲉⲕϩⲉⲭ ⲁⲩⲱ ⲁⲓⲧⲁⲩⲟ ⲉⲡⲉⲥⲏⲧ ⲛⲟⲩⲙⲏⲏϣⲉ. ⲧⲉⲛⲟⲩ ⲇⲉ ⲁⲓⲣ̅ⲧⲁϭⲟⲙ ϩⲓⲱⲱⲕ ⲛⲑⲉ ⲛⲛⲕⲟⲟⲩⲉ ⲟⲛ ⲛⲧⲁⲓⲣ̅ⲧⲁϭⲟⲙ ϩⲓⲱⲟⲩ. ⲁⲁⲛⲧⲱⲛⲓⲟⲥ ⲇⲉ ϫⲛⲟⲩϥ ϫⲉⲛⲧⲕ̅ⲛⲓⲙ ⲉⲕϫⲱ ⲛⲛⲉⲓϣⲁϫⲉ ϩⲁⲧⲏⲓ. ⲛⲧⲉⲩⲛⲟⲩ ⲁϥⲱϣ ⲉⲃⲟⲗ ϩⲛⲟⲩⲥⲙⲏ ⲙⲙⲛⲧϭⲱⲃ ⲉϥϫⲱ. ⲙⲙⲟⲥ ϫⲉⲁⲛⲟⲕⲡⲉ ⲡⲉϣⲃⲏⲣ ⲛ̅ⲧⲡⲟⲣⲛⲓⲁ. ⲁⲛⲟⲕ ⲡⲉⲧⲉⲟⲩⲛⲧⲁⲓ ⲙⲙⲁⲩ ⲛⲛⲉⲥϭⲟⲣϭⲥ ⲙⲛⲛⲉⲥⲟⲩⲱϣ ⲉⲓϯⲟⲩⲃⲉⲛϣⲏⲣⲉ ϣⲏⲙ ϩⲣⲁⲓ ⲛϩⲏⲧⲟⲩ. ⲁⲩⲱ ⲉⲩⲙⲟⲩⲧⲉ ⲉⲣⲟⲓ ϫⲉⲡⲉⲡⲛⲁ ⲛⲧⲡⲟⲣⲛⲓⲐⲁ. ⲟⲩⲏⲣ ⲛⲧⲁⲩⲟⲩⲱϣ ⲉϣⲱⲡⲉ ⲛ̅ⲥⲁⲃⲉ ⲁⲩⲱ ⲁⲛⲟⲕ ⲁⲓⲣ̅ϩⲁⲗ ⲙⲙⲟⲟⲩ. ⲟⲩⲏⲣ ⲁⲩϩⲩⲡⲟⲙⲓⲛⲉ ⲁⲓⲣ̅ϩⲁⲗ ⲙⲙⲟⲟⲩ ⲉⲓⲛⲟⲩϫⲉ ⲉϩⲟⲩⲛ ⲉⲣⲟⲟⲩ ⲛϩⲉⲛⲟⲩⲱϣ ⲉⲩϩⲟⲟⲩ. ⲁⲛⲟⲕⲡⲉ ⲡⲁⲓ ⲉⲧⲉⲣⲉⲡⲉⲡⲣⲟⲫⲏⲧⲏⲥ ϭⲛⲁⲣⲓⲕⲉ ⲉϥϫⲱ ⲙⲙⲟⲥ ⲉⲧⲃⲉⲛⲉⲛⲧⲁⲩϩⲉ ⲉⲃⲟⲗ ϫⲉⲁⲩⲥⲱⲣⲙ̅ ϩⲛⲟⲩⲡⲛⲁ ⲙⲡⲟⲣⲛⲓⲁ. ⲁⲛⲟⲕ ⲅⲁⲣ ⲡⲉⲛⲧⲁⲛⲉⲧⲙⲙⲁⲩ ⲥⲱⲣⲙ̅ ⲉⲃⲟⲗ ϩⲓⲧⲟⲟⲧ ⲁⲩϩⲉ. ⲁⲛⲟⲕ ⲡⲉⲛⲧⲁⲓⲉⲛⲱⲭⲗⲉⲓ ⲛⲁⲕ ⲛϩⲁϩ ⲛⲥⲟⲡⲭ ⲛⲧⲟⲕ ⲇⲉ ⲁⲕϫⲣⲟ ⲉⲣⲟⲓ ϣⲁⲉϩⲣⲁⲓ ⲉⲧⲉⲛⲟⲩ. ⲁⲛⲧⲱⲛⲓⲟⲥ ⲇⲉ ⲁϥϣⲡϩⲙⲟⲧ ⲛ̅ⲧⲉⲡϫⲟⲉⲓⲥ ⲁⲩⲱ ⲁϥⲧⲱⲕ ⲛ̅ϩⲏⲧ ⲉϩⲣⲁⲓ ⲉϫⲱϥ ⲁⲩⲱ ⲡⲉϫⲁϥ ⲛⲁϥ ϫⲉⲕⲙⲟⲧⲛ ⲛⲧⲟⲕ ⲉⲡⲉϩⲟⲩⲟ ⲉⲧⲣⲉⲩⲕⲁⲧⲁⲫⲣⲟⲛⲉⲓ ⲙⲙⲟⲕ. ⲕⲁⲓⲅⲁⲣ ⲛ̅ⲧⲅⲟⲩⲕⲁⲙⲏ ϩⲙⲡⲉⲕϩⲏⲧ ⲁⲩⲱ ⲉⲕⲟ ⲛⲑⲉ ⲛ̅ⲛⲟⲩϣⲏⲣⲉ ⲕⲟⲩⲓ ⲉⲙⲛ̅ϭⲟⲙ ⲙⲙⲟⲕ. ⲧⲉⲛⲟⲩ ⲙⲛⲗⲁⲁⲩ ⲛⲣⲟⲟⲩϣ ϣⲟⲟⲡ ⲛⲁⲓ ϫⲓⲛⲉⲡⲉⲓⲛⲁⲩ ϩⲁⲣⲟⲕ. ⲡϫⲟⲉⲓⲥⲡⲉ ⲡⲁⲃⲟⲏⲑⲟⲥ ⲁⲩⲱ ϯⲛⲁⲙⲉϩⲉⲓⲁⲧ ⲛⲛⲁϫⲓϫⲉⲉⲩⲉ. ⲛⲁⲓ ⲇⲉ ⲛⲧⲉⲣⲉⲡϫⲁϫⲉ ⲥⲱⲧⲙ ⲉⲣⲟⲟⲩ ⲛⲧⲉⲩⲛⲟⲩ ⲁϥⲡⲱⲧ ⲉϥⲥⲧⲱⲧ ϩⲏⲧⲟⲩ ⲁⲩⲱ ⲁϥⲣ̅ϩⲟⲧⲉ ⲉϩⲱⲛ ⲉϩⲟⲩⲛ ⲉⲁⲛⲧⲱⲛⲓⲟⲥ ⲉⲡⲧⲏⲣϥ̅.

7. ⲡⲁⲓⲡⲉ ⲡϣⲟⲣⲡ ⲛⲛⲁⲑⲗⲱⲛ ⲛⲧⲁϥϣⲱⲡⲉ ⲛⲁⲛⲧⲱⲛⲓⲟⲥ ⲙⲛⲡⲇⲓⲁⲃⲟⲗⲟⲥ ⲛϩⲟⲩⲟ ⲇⲉ ⲡⲉϫⲣⲟ ⲡⲁⲡⲥⲱⲧⲏⲣ ⲡⲉⲛⲧⲁϥϣⲱⲡⲉ ⲛ̅ⲛⲁⲛⲧⲱⲛⲓⲟⲥ. ⲛ̅ⲧⲟϥ ⲅⲁⲣ ⲡⲉⲛⲧⲁϥϭⲁⲓⲐⲉⲡⲛⲟⲃⲉ ϩⲛⲧⲥⲁⲣⲝ̅ ⲛ̅ⲧⲁϥϫⲓⲧⲥ ϩⲛⲧⲡⲁⲣⲑⲉⲛⲟⲥ ⲙⲁⲣⲓⲁ ϫⲉⲕⲁⲥ ⲉⲣⲉⲡⲉⲧⲙⲁⲉⲓⲟ ⲙⲡⲛⲟⲙⲟⲥ ⲛⲁⲟⲩⲱⲛϩ̅ ⲉⲃⲟⲗ ⲛϩⲏⲧⲛ ⲉⲛⲧⲛ̅ⲙⲟⲟϣⲉ ⲁⲛ ⲕⲁⲧⲁⲥⲁⲣⲝ̅ ⲁⲗⲗⲁ ⲕⲁⲧⲁⲡⲛⲁ. ⲁⲛⲧⲱⲛⲓⲟⲥ ⲇⲉ ⲙⲡⲉϥⲁⲙⲉⲗⲉⲓ ⲟⲩⲇⲉ ⲙⲡⲉϥⲕⲁⲧⲁⲫⲣⲟⲛⲉⲓ ϩⲱⲥ ϫⲉⲁⲡⲇⲓⲁⲃⲟⲗⲟⲥ ϩⲉ ϩⲁⲛⲉϥⲟⲩⲉⲣⲏⲧⲉ. ⲟⲩⲇⲉ ⲟⲛ ⲛⲧⲟϥ ⲡϫⲁϫⲉ ⲛ̅ⲧⲉⲣⲟⲩϫⲣⲟ ⲉⲣⲟϥ ⲙⲡⲉϥⲗⲟ ⲉϥϭⲱⲣϭⲭ ⲁⲗⲗⲁ ⲉⲛⲉϥϯⲟⲩⲟⲓ ⲛⲑⲉ ⲛⲟⲩⲙⲟⲩⲓⲐ ⲉϥϣⲓⲛⲉ ⲛⲥⲁⲟⲩⲗⲟⲓϭⲉ ⲉϩⲟⲩⲛ ⲉⲁⲛⲧⲱⲛⲓⲟⲥ. ⲁⲛⲧⲱⲛⲓⲟⲥϭⲉ ⲁϥϫⲓⲥⲃⲱ ϩⲛⲧⲉⲅⲣⲁⲫⲏ ϫⲉⲛⲁϣⲱⲟⲩ ⲛ̅ⲕⲟⲧⲥ̅ ⲙⲡϫⲁϫⲉ ⲁⲩⲱ ⲁϥϣⲱⲡⲉ ϩⲛⲧⲁⲥⲕⲏⲥⲓⲥ ⲉⲡⲉϩⲟⲩⲟ ⲉϥⲙⲉⲉⲩⲉ ϩⲙⲡⲉϥϩⲏⲧ ϫⲉⲕⲁⲛ ⲙⲡⲉϥϭⲙϭⲟⲙ ⲉⲣ̅ϩⲁⲗ ⲙⲙⲟϥ ⲛϭⲓⲡϫⲁϫⲉ ϩⲛⲑⲩⲇⲟⲛⲏ ⲙⲡⲥⲱⲙⲁ ⲡⲁⲛⲧⲱⲥ ⲛϥⲛⲁϭⲱ ⲁⲛ ⲉϥⲡⲓⲣⲁⲍⲉ ⲁⲗⲗⲁ ϥⲛⲁϭⲱⲣϭ ϩⲓⲧⲛ̅ⲕⲉⲗⲟⲓϭⲉ. ⲟⲩⲙⲁⲓⲛⲟⲃⲉ ⲅⲁⲣⲡⲉ ⲡⲇⲓⲁⲃⲟⲗⲟⲥ ⲛϩⲟⲩⲟ ⲉϩⲟⲩⲛ ⲉⲛⲉⲧⲟⲩⲁⲁⲃ. ⲉⲣⲉⲁⲛⲧⲱⲛⲓⲟⲥ ⲱϥⲉ ⲙⲡⲉϥⲥⲱⲙⲁ ⲉϥⲉⲓⲣⲉ ⲙⲙⲟϥ ⲛϩⲙϩⲁⲗ ⲙⲏⲡⲱⲥ ⲉⲁϥϫⲣⲟ ⲉϩⲟⲓⲛⲉ ⲛϥ̅ⲥⲱⲕ ⲙⲙⲟϥ ⲛϥⲁⲡⲁⲧⲁ ⲙⲙⲟϥ ϩⲛϩⲉⲛⲕⲟⲟⲩⲉ. ⲁϥϣⲟϫⲛⲉ ⲇⲉ ⲉⲉⲓⲐⲛⲉ ⲙⲙⲟϥ ⲉϩⲣⲁⲓ ϩⲛϩⲉⲛⲥⲩⲛⲏⲑⲓⲁ ⲛⲛⲁⲥⲕⲏⲥⲓⲥ ⲉⲩⲙⲟϩⲕ̅ ⲁⲩⲱ ⲉⲩⲛⲁϣⲧ ⲉⲡⲉϩⲟⲩⲟ. ⲁⲩⲱ ⲛⲉⲣⲉϩⲁϩ ⲣ̅ϣⲡⲏⲣⲉ ⲙⲙⲟϥ. ⲛⲧⲟϥ ⲇⲉ ⲛⲉϥϥⲓ ϩⲁⲧⲙⲟⲕϩⲥ̅ ⲙⲛⲡϩⲓⲥⲉ ϩⲛⲟⲩⲙⲟⲧⲛⲉⲥ. ⲉⲁϥϭⲱ ⲛⲛⲟⲩⲛⲟϭ ⲛⲟⲩⲟⲉⲓϣ ϩⲣⲁⲓ ⲛ̅ϩⲏⲧϥ̅ ϩⲙ̅ⲡⲟⲩⲣⲟⲧ ⲛ̅ⲧⲉϥⲯⲩⲭⲏ ⲁϥⲣ̅ϩⲱⲃ ϩⲣⲁⲓ ⲛϩⲏⲧϥ ⲉⲩϩⲉⲝⲓⲥ ⲉⲛⲁⲛⲟⲩⲥ ϩⲱⲥⲧⲉ ⲛⲉⲛⲧⲁϥϫⲓⲧⲟⲩ ⲉⲃⲟⲗ ϩⲓⲧⲛ̅ϩⲉⲛⲕⲟⲟⲩⲉ ⲉⲩ̀ⲕ̀ⲟⲩⲓ ⲛⲗⲟⲓϭⲉ ⲁϥⲟⲩⲱⲛϩ ⲉⲃⲟⲗ ⲛⲛⲟⲩⲛⲟϭ ⲛⲥⲡⲟⲩⲇⲏ ϩⲣⲁⲓ ⲛϩⲏⲧϥ. ⲉⲛⲉϥⲟ ⲛⲛⲟⲩϣⲏ ⲛⲣⲟⲉⲓⲥ ⲛ̅ϩⲁϩ ⲛⲥⲟⲡ ⲉⲙⲉϥⲱⲃϣ̅ⲭ ⲁⲩⲱ ⲡⲁⲓ ⲛⲉϥⲉⲓⲣⲉ ⲙⲙⲟϥ ⲁⲛ ⲛⲟⲩⲥⲟⲡ ⲏ ⲥⲛⲁⲩ ⲁⲗⲗⲁ ϩⲁϩ ⲛⲥⲟⲡ ⲁⲩⲱ ⲉⲛⲉⲩⲣ̅ϣⲡⲏⲣⲉ ⲙⲙⲟϥ ⲙⲙⲁⲧⲉ. ⲉⲛⲉⲙⲉϥⲟⲩⲱⲙ ⲟⲛ ⲙⲙⲏⲛⲉ ⲉⲓⲉⲙⲏϯ ⲟⲩⲥⲟⲡ ⲉⲣϣⲁⲛⲡⲣⲏ ϩⲱⲧⲡⲭ ϩⲁϩ ⲇⲉ ⲟⲛ ⲛⲥⲟⲡ ⲉϣⲁϥⲟⲩⲱⲙ ⲙ̅ⲡⲉϥⲥⲛⲁⲩ ⲏ ⲡⲉϥϥⲧⲟⲟⲩ. ⲧⲉϥϩⲣⲉ ⲇⲉ ⲉⲧϣⲟⲟⲡ ⲛⲁϥⲡⲉ ⲟⲩⲟⲉⲓⲕ ⲙⲛⲟⲩϩⲙⲟⲩ ⲙⲛⲟⲩⲙⲟⲟⲩ. ⲉⲧⲃⲉⲁϥ ⲇⲉ ϩⲓⲏⲣⲡ ⲟⲩϩⲟⲩⲟ ⲇⲉⲡⲉ ⲉϣⲁϫⲉ ⲉⲣⲟⲟⲩ. ⲛⲥⲉϩⲉ ⲅⲁⲣ ⲁⲛ ⲉⲗⲁⲁⲩ ⲛⲧⲉⲓⲙⲓⲛⲉ ϩⲁⲧⲛⲛⲉⲥⲡⲟⲩⲇⲁⲓⲟⲥ. ⲉⲛⲉⲥⲣⲱϣⲉ ⲇⲉⲡⲉ ⲉⲣⲟϥ ⲛϭⲓⲟⲩⲧⲙⲏ ⲉϥⲛ̅ⲕⲟⲧⲕ̅ ϩⲓϫⲱⲥ ⲁⲩⲱ ϩⲁϩ ⲛ̅ⲥⲟⲡ ⲉⲛⲉϣⲁϥⲛ̅ⲕⲟⲧⲕ̅ ϩⲓⲡⲕⲁϩ ⲙⲙⲁⲧⲉ. ⲛⲉϣⲁϥⲡⲁⲣⲁⲧⲏⲣⲉⲓ ⲇⲉ ⲉⲧⲙⲧⲉϩⲥ̅ⲛⲉϩ ⲉⲣⲟϥ ⲉϥϫⲱ ⲙⲙⲟⲥ ϫⲉⲥⲡⲣⲉⲡⲉⲓ ⲛϩⲟⲩⲟ ⲛⲛϣⲏⲣⲉ ϣⲏⲙ ⲉϫⲡⲟ ⲛⲁⲩ ⲛⲧⲁⲥⲕⲏⲥⲓⲥ ϩⲛⲟⲩⲟⲩⲣⲟⲧ ⲁⲩⲱ ⲉⲧⲙ̅ⲧⲣⲉⲩϣⲓⲛⲉ ⲛ̅ⲥⲁⲛⲉⲧⲉϣⲁⲣⲉⲡⲥⲱⲙⲁ ⲕⲱ ⲛϩⲏⲧⲟⲩ ⲁⲗⲗⲁ ⲉⲧⲣⲉⲩⲧⲱⲣⲡ ⲛ̅ⲧⲟϥ ⲛⲛⲉⲧⲙⲟϩⲕ̅ ⲉϥⲙⲉⲉⲩⲉ ⲉⲡⲉϩⲣⲏⲧⲟⲛ ⲛⲧⲁⲡⲁⲡⲟⲥⲧⲟⲗⲟⲥ ϫⲟⲟϥ ϫⲉϩⲟⲧⲁⲛ ⲉⲓϣⲁⲛⲣ̅ⲁⲧϭⲟⲙ ⲧⲟⲧⲉ ϣⲁⲓϭⲙϭⲟⲙ. ⲉⲛⲉϥϫⲱ ⲙⲙⲟⲥ ϫⲉϣⲁⲣⲉⲡⲛⲟⲩⲥ ⲛ̅ⲧⲉⲯⲩⲭⲏ ϭⲙϭⲟⲙ ϩⲟⲧⲁⲛ ⲉⲣϣⲁⲛⲛⲛϩⲩⲇⲟⲛⲏ ⲙⲡⲥⲱⲙⲁ ⲣ̅ⲁⲧϭⲟⲙ. ⲁⲩⲱ ⲛⲉⲩⲣ̅ϣⲡⲏⲣⲉ ⲛⲁⲙⲉ ⲙⲡⲉⲓⲕⲉⲗⲟⲅⲓⲥⲙⲟⲥ ⲉⲧϣⲟⲟⲡ ⲛⲁϥ. ⲉⲙⲡⲉϥⲟⲩⲱϣ ⲅⲁⲣ ⲉϣⲓ ⲛ̅ⲧⲉϩⲓⲏ ⲛⲛⲗⲟⲅⲓⲥⲙⲟⲥ ⲛⲧⲁⲣⲉⲧⲏ ϩⲛⲟⲩⲭⲣⲟⲛⲟⲥ ⲟⲩⲇⲉ ⲧⲁⲛⲁⲭⲱⲣⲏⲥⲓⲥ ⲉⲃⲟⲗ ϩⲓⲧⲟⲟⲧⲥ̅ ⲁⲗⲗⲁ ϩⲛⲟⲩⲙⲉ ⲙⲛⲟⲩⲡⲣⲟϩⲁⲓⲣⲉⲥⲓⲥ. ⲛⲧⲟϥ. ⲇⲉ ⲉⲛⲉⲙⲉϥⲱⲡ ⲙⲡⲉⲭⲣⲟⲛⲟⲥ ⲛⲧⲁϥⲟⲩⲉⲓⲛⲉⲭ ⲁⲗⲗⲁ ⲙⲙⲏ̅ⲛⲉ ϩⲱⲥ ⲛⲧⲁϥⲁⲣⲭⲉⲓ ⲉⲧⲁⲥⲕⲏⲥⲓⲥ ϣⲁϥϫⲡⲟ ⲛⲁϥ ⲛⲛⲟⲩⲛⲟϭ ⲙⲡⲣⲟⲕⲟⲡⲏ ⲉϥⲙⲉⲗⲉⲧⲁ ⲙ̅ⲡⲉϩⲣⲏⲧⲟⲛ ⲙⲡⲁⲡⲟⲥⲧⲟⲗⲟⲥ ⲛⲛⲁⲩ ⲛⲓⲙ ϫⲉⲉⲛⲣⲡⲱⲃϣ ⲙⲉⲛ ⲛⲛⲁⲡⲁϩⲟⲩ ⲉⲛⲡⲱⲣϣ ⲙⲙⲟⲛ ⲉⲛⲁⲑⲏ. ⲉⲛⲉϣⲁϥⲣ̅ⲡⲙⲉⲉⲩⲉ ⲇⲉ ⲟⲛ ⲛⲧⲉⲥⲙⲏ ⲛϩⲏⲗⲓⲁⲥ ⲡⲉⲑⲉⲥⲃⲓⲧⲏⲥ ⲉϥϫⲱ ⲙⲙⲟⲥ ϫⲉϥⲟⲛϩ̅ ⲛϭⲓⲡϫⲟⲉⲓⲥ ⲡⲁⲓ ⲛⲧⲁⲓⲁϩⲉⲣⲁⲧ ⲙ̅ⲡⲉϥⲙ̅ⲧⲟ ⲉⲃⲟⲗ ⲙ̅ⲡⲟⲟⲩ. ⲉⲛⲉϥⲡⲁⲣⲁⲧⲏⲣⲉⲓ ⲇⲉ ϩⲙⲡⲧⲣⲉϥϫⲟⲟⲥ ϫⲉⲙⲡⲟⲟⲩ ⲉⲓⲉ ⲙⲉϥⲱⲡ ⲙⲡⲉⲭⲣⲟⲛⲟⲥ ⲛⲧⲁϥⲟⲩⲉⲓⲛⲉ ⲁⲗⲗⲁ ϩⲱⲥ ⲉϥⲕⲱ ⲉⲡⲉⲥⲏⲧ ⲛⲛⲁⲩ ⲛⲓⲙ ⲉϥⲥⲡⲟⲩⲇⲁⲍⲉ ⲙⲙⲏⲛⲉ ⲉⲡⲁⲣϩⲓⲥⲧⲁ ⲙⲙⲟϥ ⲙⲡⲛⲟⲩⲧⲉ ⲁⲩⲱ ⲉⲧⲁϩⲟϥ ⲉⲣⲁⲧϥ̅ ⲙⲡⲉⲥⲙⲟⲧ ⲉⲧⲉϣϣⲉ ⲉⲟⲩⲱⲛϩ̅ ⲉⲃⲟⲗ ⲙⲡⲛⲟⲩⲧⲉ ⲉϥⲟⲩⲁⲁⲃ ϩⲙⲡⲉϥϩⲏⲧ ⲁⲩⲱ ⲉϥⲥⲃⲧⲱⲧ ⲉⲥⲱⲧⲙ̅ ⲛ̅ⲥⲁⲡⲟⲩⲱϣ ⲙⲡⲉⲧⲙⲙⲁⲩ ⲙⲁⲩⲁⲁϥ ⲁⲩⲱ ⲕⲉⲗⲁⲁⲩ ⲁⲛ. ⲛⲉϥϫⲱ ⲇⲉ ⲙⲙⲟⲥ ⲛⲁϥ ⲙⲁⲩⲁⲁϥ ϫⲉϣϣⲉ ⲉⲛⲉⲧⲁⲥⲕⲉⲓ ⲉⲥⲟⲩⲛⲡⲉⲩⲃⲓⲟⲥ ⲛⲟⲩⲟⲉⲓϣ ⲛⲓⲙ ⲛⲑⲉ ⲛⲟⲩⲉⲓⲁⲗ ⲉⲃⲟⲗ ϩⲛⲧⲡⲟⲗⲏϯⲁ ⲙⲡⲛⲟϭ ϩⲏⲗⲓⲁⲥ.

8. ⲛⲧⲉⲓϩⲉ ⲇⲉ ⲁϥϩⲟⲕϥ ⲛϭⲓⲁⲛⲧⲱⲛⲓⲟⲥ ⲁϥⲃⲱⲕ ⲉϩⲟⲩⲛ ⲉⲛⲙ̅ϩⲁⲁⲩ ⲉⲧⲟⲩⲏⲩ ⲛⲧⲕⲱⲙⲏ ⲁϥϭⲱ ⲛϩⲏⲧⲟⲩ ⲉⲁϥϩⲱⲛ ⲉⲧⲟⲟⲧϥ̅ ⲛⲟⲩⲁ ⲉⲧⲣⲉϥⲉⲓⲛⲉ ⲛⲁϥ ⲙⲡⲟⲉⲓⲕ ϩⲓⲧⲛ̅ϩⲁϩ ⲛϩⲟⲟⲩ. ⲛⲧⲟϥ ⲇⲉ ⲁϥⲃⲱⲕ ⲉⲟⲩⲁ ⲛⲛⲙ̅ϩⲁⲁⲩ ⲁⲩⲱ ⲁⲡⲙⲟⲛⲁⲭⲟⲥ ϭⲱ ⲙⲁⲩⲁⲁϥ ⲉⲁϥϣⲧⲁⲙ ⲉⲣⲱϥ ⲙⲡⲣⲟ. ϩⲙⲡⲁⲓ ⲟⲛ ⲙ̅ⲡⲉϥⲉϣϥⲉⲓ ⲉⲣⲟϥ ⲛϭⲓⲡ ϥ.ⲫ ϫⲁϫⲉⲭ ⲁⲗⲗⲁ. ⲛⲉϥⲣ̅ϩⲟⲧⲉ ⲙⲏⲡⲱⲥ ϣⲏⲙ ϣⲏⲙ ⲛϥⲙⲟⲩϩ ⲛⲧⲕⲉⲉⲣⲏⲙⲟⲥ ⲛⲛⲁⲥⲕⲏⲧⲏⲥ. ⲁϥⲉⲓ ⲇⲉ ⲉⲃⲟⲗ ⲙⲛⲟⲩⲙⲏⲏϣⲉ ⲛⲇⲁⲓⲙⲱⲛⲓⲟⲛ ⲛ̅ⲧⲉⲩϣⲏ ⲁϥϫⲛⲁϥ ⲛϩⲉⲛⲛⲟϭ ⲛ̅ⲥⲏϣⲉ ϩⲱⲥⲧⲉ ⲛϥϭⲱ ⲉϥⲛⲏϫ ϩⲓⲡⲉⲥⲏⲧ ⲉⲙⲛϭⲟⲙ ⲙⲙⲟϥ ⲉϣⲁϫⲉ ⲉⲃⲟⲗ ϩⲛⲧⲃⲁⲥⲁⲛⲟⲥ ⲛⲛⲥⲁϣ. ⲁϥϫⲟⲟⲥ ⲅⲁⲣ ϩⲛⲟⲩⲱⲣϫ̅ ϫⲉⲁⲡⲙⲕⲁϩ ⲛⲛ̅ⲥⲏϣⲉ ϣⲱⲡⲉ ⲉⲩⲙⲟϩⲕ ⲛⲁⲓ ⲉⲡⲉϩⲟⲩⲟ ϩⲱⲥⲧⲉϭⲉ ϩⲉⲛⲥⲏϣⲉⲛⲉ ⲉⲃⲟⲗ ϩⲓⲧⲟⲟⲧⲟⲩ ⲛⲛⲣⲱⲙⲉ ⲉⲧϭⲙϭⲟⲙ ⲉⲩⲉⲓⲣⲉ ⲛϩⲉⲛⲃⲁⲥⲁⲛⲟⲥ. ϩⲛⲟⲩⲡⲣⲟⲛⲟⲓⲁ ⲇⲉ ⲛⲧⲉⲡⲛⲟⲩⲧⲉ ϫⲉⲙⲉⲣⲉⲡϫⲟⲉⲓⲥ ⲟϣⲃϥ̅ ⲉⲛⲉⲧϩⲉⲗⲡⲓⲍⲉ ⲉⲣⲟϥ ⲙⲡⲉϥⲣⲁⲥⲧⲉ ⲁϥⲉⲓⲛⲉ ⲛϭⲓⲡⲣⲙⲛⲥⲟⲟⲩⲛ ⲛⲛⲕⲟⲩⲓ ⲛⲛⲟⲉⲓⲕ ⲛⲁϥⲭ ⲛⲧⲉⲣⲉϥⲟⲩⲱⲛ ⲙⲡⲣⲟ ⲁϥⲛⲁⲩ ⲉⲣⲟϥ ⲉϥⲛⲏϫ ⲉϫⲙⲡⲕⲁϩ ⲛⲑⲉ ⲛⲟⲩⲣⲉϥⲙⲟⲟⲩⲧ. ⲛⲧⲉⲩⲛⲟⲩ ⲇⲉ ⲁϥⲧⲁⲗⲟϥ ⲉϫⲱϥ ⲁϥⲛ̅ⲧϥ̅ ⲉⲧⲉⲕⲕⲗⲏⲥⲓⲁ ⲉⲧϩⲛⲧⲕⲱⲙⲏ ⲁϥⲕⲁⲁϥ ⲙⲙⲁⲩ. ϩⲁϩϭⲉ ⲉⲃⲟⲗ ϩⲛⲛⲉϥⲥⲩⲅⲅⲉⲛⲏⲥ ⲙⲛⲛⲁⲧⲕⲱⲙⲏ ⲛⲉⲩⲕⲧⲏⲩ ⲉⲣⲟϥ ⲉⲩϩⲙⲟⲟⲥ ϩⲱⲥ ⲉϥⲙⲟⲟⲩⲧ ⲛϭⲓⲁⲛⲧⲱⲛⲓⲟⲥ.ϩⲛⲧⲡⲁϣⲉ ⲇⲉ ⲛⲧⲉⲩϣⲏ ⲛ̅ⲧⲉⲣⲉⲡⲉϥϩⲏⲧ ⲉⲓ ⲉⲣⲟϥ ⲁⲩⲱ ⲛⲧⲉⲣⲉϥⲧⲱⲟⲩⲛ ⲁϥⲛⲁⲩ ⲉⲣⲟⲟⲩ ⲧⲏⲣⲟⲩ ⲉⲩⲕⲧⲏⲩ ⲉⲣⲟϥ ⲉⲩⲛⲕⲟⲧⲕ̅ⲭ ⲁⲩⲱ ⲡⲏ ⲉⲛⲉϥⲥⲟⲟⲩⲛ ⲙⲙⲟϥ ⲙⲙⲁⲧⲉ ⲛⲉϥⲣⲏⲥⲡⲉ. ⲁϥϫⲱⲣⲙ̅ ⲟⲩⲃⲏϥ ⲉⲧⲣⲉϥϩⲱⲛ ⲉϩⲟⲩⲛ ⲉⲣⲟϥ ⲁϥⲁⲝⲓⲟⲩ ⲙⲙⲟϥ ⲉⲧⲣⲉϥⲧⲁⲗⲟϥ ⲉϫⲱϥ ⲛϥ̅ϫⲓⲧϥ̅ ⲟⲛ ⲉⲛⲙϩⲁⲁⲩ ⲁⲩⲱ ⲛϥⲧⲙ̅ⲛⲉϩⲥⲉ ⲛⲗⲁⲁⲩ.

9. ̀ⲁϥϫⲓⲧϥ̅ϭⲉ ⲁϥϣⲧⲁⲙ ⲙⲡⲣⲟ ⲁϥϭⲱ ⲛϩⲟⲩⲛ ⲙⲁⲩⲁⲁϥ.ⲛⲉϥϭⲙϭⲟⲙ ⲁⲛⲡⲉ ⲉⲁϩⲉⲣⲁⲧϥ̅ ⲉⲧⲃⲉⲛⲥⲏϣⲉ ⲛ ϥ.ⲣ̀ ⲛⲛ̅ⲇⲁⲓⲙⲱⲛⲭ ⲁⲗⲗⲁ ⲉⲛⲉϥⲛⲏϫⲡⲉ ϩⲓϫⲙ̅ⲡⲕⲁϩ ⲉϥϣⲗⲏⲗ. ⲁⲩⲱ ⲙⲛⲛ̅ⲥⲁⲡⲉϥϣⲗⲏⲗ ⲁϥⲁϣⲕⲁⲕ ⲉⲃⲟⲗ ⲉϥϫⲱ ⲙⲙⲟⲥ ϫⲉⲉⲓⲥϩⲏⲏⲧⲉ ϯⲙ̅ⲡⲉⲓⲙⲁ ⲁⲛⲟⲕ ⲁⲛⲧⲱⲛⲓⲟⲥ. ⲛ̅ϯⲡⲏⲧ ⲁⲛ ϩⲏⲧⲟⲩ ⲛ̅ⲛⲉⲧⲛⲥⲁϣ. ⲕⲁⲓⲅⲁⲣ ⲉⲧⲉⲧⲛϣⲁⲛⲣ̅ϩⲟⲩⲟ ⲛⲁⲓ ⲛⲁⲓ ⲙⲛⲗⲁⲁⲩ ⲛⲁϣⲡⲟⲣϫ̅ⲧ ⲉⲧⲁⲅⲁⲡⲏ ⲙⲡⲉⲭⲥ ⲓⲥ ⲡⲁϫⲟⲉⲓⲥ. ϥⲥⲏϩ ⲅⲁⲣ ϩⲛⲛⲉⲯⲁⲗⲙⲟⲥ ϫⲉⲕⲁⲛ ⲉⲣϣⲁⲛⲟⲩⲡⲟⲗⲩⲙⲟⲥ ⲧⲱⲟⲩⲛ ⲉϫⲱⲓ ⲙ̅ⲡⲁϩⲏⲧ ⲛⲁⲣ̅ϩⲟⲧⲉ ⲁⲛ. ⲛⲁⲓ ⲛⲉⲛⲧⲁⲡⲁⲥⲕⲏⲧⲏⲥ ⲙⲉⲉⲩⲉ ⲉⲣⲟⲟⲩ ⲁⲩⲱ ⲁϥϫⲟⲟⲩ. ⲡϫⲁϫⲉ ⲇⲉ ⲡⲙⲉⲥⲧⲉⲡⲉⲧⲛⲁⲛⲟⲩϥ ⲛⲓⲙ ⲁϥⲣ̅ϣⲡⲏⲣⲉ ϫⲉⲙⲛ̅ⲛ̅ⲥⲁ ⲛⲉⲓⲥⲏϣⲉ ⲧⲏⲣⲟⲩ ⲁϥⲧⲱⲕ ⲛϩⲏⲧ ⲟⲛ ⲁϥⲉⲓ ⲉⲡⲉⲓⲙⲁ ⲡⲁⲗⲓⲛ ⲟⲛ. ⲁⲡϫⲁϫⲉ ⲥⲱⲟⲩϩ ⲉϩⲟⲩⲛ ⲛⲛϥ̅ⲟⲩϩⲟⲟⲣ ⲁⲩⲱ ⲉⲛⲉϥⲛⲟⲩϭⲥⲡⲉ ⲛⲑⲉ ⲛⲛⲉⲧⲛⲁⲡⲱϩ. ⲡⲉϫⲁϥ ⲛⲁⲩ ϫⲉⲧⲉⲧⲛⲛⲁⲩ ϫⲉⲟⲩⲇⲉ ϩⲙⲡⲉⲡⲛⲁ ⲛⲧⲡⲟⲣⲛⲓⲁ ⲟⲩⲇⲉ ϩⲛϩⲉⲛⲥⲏϣⲉ ⲙⲡⲉⲛⲉϣⲧⲣⲉⲡⲁⲓϭⲱⲭ ⲁⲗⲗⲁ ⲛϩⲟⲩⲟ ⲉⲛⲉϥⲛ̅ϣⲟⲧ ϩⲓϫⲱⲛ. ⲙⲁⲣⲛ̅ⲃⲱⲕϭⲉ ⲉϩⲟⲩⲛ ϣⲁⲣⲟϥ ϩⲛϩⲉⲛⲕⲉⲥⲙⲟⲧ. ⲛⲉⲥⲙⲟⲧϭⲉ ⲙⲡⲇⲓⲁⲃⲟⲗⲟⲥⲛⲉ ⲛⲉϩⲃⲏⲩⲉ ⲛⲧⲕⲁⲕⲓⲁ. ϩⲛⲧⲉⲩϣⲏ ⲇⲉ ⲉⲧⲙ̅ⲙⲁⲩ ⲁϥⲉⲓⲣⲉ ⲛⲛⲟⲩⲕⲣⲟϥ ⲛ̅ⲧⲉⲓⲙⲓⲛⲉ ϩⲱⲥⲧⲉ ⲛⲧⲉⲡⲙⲁ ⲧⲏⲣϥ ⲉⲧⲙⲙⲁⲩ ⲣ̅ⲑⲉ ⲛⲧⲁϥⲕⲓⲙ ⲛⲧⲉⲧϥⲧⲟ ⲛϫⲟ ⲣ̅ⲑⲉ ⲉϣϫⲉⲛⲧⲁⲩⲡⲱϩ. ⲁⲛⲇⲁⲓⲙⲱⲛⲓⲟⲛ ⲉⲓ ⲉϩⲟⲩⲛ ⲛϩⲏⲧⲟⲩ ⲁⲩⲣ̅ⲥⲙⲟⲧ ⲛⲑⲏⲣⲓⲟⲛ ⲙⲛⲛⲉϫⲁⲧϥⲉ ϩⲛⲟⲩⲫⲁⲛⲧⲁⲥⲓⲁ. ⲁⲩⲱ ⲛ̅ⲧⲉⲩⲛⲟⲩ ⲁⲡⲙⲁ ⲉⲧⲙⲙⲁⲩ ϣⲱⲡⲉ ⲉϥⲙⲉϩ ⲙⲫⲁⲛⲧⲁⲥⲓⲁ ⲛⲑⲉ ⲛϩⲉⲛⲙⲟⲩⲓ ⲙⲛϩⲉⲛⲁⲣⲝ ⲙⲛϩⲉⲛⲗⲉⲟⲡⲁⲣⲇⲁ ϥ.ⲫ̀ ⲗⲓⲥ ⲙⲛϩⲉⲛⲙⲁⲥⲉ ⲙⲛϩⲉⲛϩⲟϥ ⲙⲛϩⲉⲛϩⲃⲱ ⲙⲛϩⲉⲛⲟⲩⲱⲛϣ̅ . ⲁⲩⲱ ⲛⲉⲣⲉⲡⲟⲩⲁ ⲡⲟⲩⲁ ϯ ⲙ̅ⲡⲉϥⲟⲩⲟⲓ ⲉϩⲟⲩⲛ ⲉⲣⲟϥ ϩⲛⲟⲩⲛⲟϭ ⲛⲥⲙⲏ ⲕⲁⲧⲁⲡⲉⲥⲭⲏⲙⲁ. ⲛⲛⲙⲙⲟⲩⲓ ⲉⲧⲗ̅ϩⲏⲙ ⲉⲩⲟⲩⲱϣ ⲉⲃⲱϭⲉ ⲉϫⲱϥ. ⲡⲙⲁⲥⲉ ⲇⲉ ⲁϥⲣⲑⲉ ⲉϥⲕⲱⲛⲥ̅ ⲙⲙⲟϥ. ⲡϩⲟϥ ⲇⲉ ⲛⲉϥⲥⲱϣⲉ ⲁⲩⲱ ⲛⲉϥⲡⲏϩ ⲁⲛ ϣⲁⲣⲟϥⲡⲉ. ⲁⲩⲱ ⲡⲟⲩⲱⲛϣ̅ ⲉⲛⲉϥϯ ⲙⲡⲉϥⲟⲩⲟⲓ. ⲛⲁⲓ ⲇⲉ ⲧⲏⲣⲟⲩ ⲛ̅ⲧⲁⲩⲟⲩⲱⲛϩ̅ ⲉⲃⲟⲗ ⲙ̅ⲛⲛⲉⲩⲉⲣⲏⲩ ⲁⲩⲱ ⲡⲉϩⲣⲟⲟⲩ ⲛ̅ⲧⲉⲩⲥⲙⲏ ⲛⲉϥϯϩⲟⲧⲉ ⲉⲙⲁⲧⲉ. ⲁⲛⲧⲱⲛⲓⲟⲥ ⲇⲉ ⲛⲉⲩⲙⲁⲥⲧⲓⲅⲟⲩ ⲙⲙⲟϥ ⲉⲃⲟⲗ ϩⲓⲧⲟⲟⲧⲟⲩ ⲉⲁϥⲁⲓⲥⲑⲁⲛⲉ ⲉⲩⲛⲟϭ ⲙⲙⲟⲕϩⲥ̅ ⲙⲙⲁⲧⲉ ϩⲙⲡⲉϥⲥⲱⲙⲁ. ϩⲛⲧⲉϥⲯⲩⲭⲏ ⲇⲉ ⲛⲉϥⲣⲏⲥ ⲉⲡⲉϩⲟⲩⲟⲡⲉ ⲁⲩⲱ ⲁϥϭⲱ ⲉϥⲛⲏϫ ⲉⲃⲟⲗ ⲉϥϫⲣⲁⲉⲓⲧ ⲉⲛϥ̅ⲣ̅ϩⲟⲧⲉ ⲁⲛ. ⲁϥⲁϣⲁϩⲟⲙ ⲙⲉⲛ ⲉⲧⲃⲉⲡⲙ̅ⲕⲁϩ ⲙ̅ⲡⲉϥⲥⲱⲙⲁ ⲁⲩⲱ ⲁϥⲛⲏⲫⲉ ϩⲙⲡⲉϥϩⲏⲧ ⲁϥⲣ̅ⲑⲉ ⲛⲛⲉⲧⲥⲱⲃⲉ ⲛⲥⲱⲟⲩ. ⲡⲉϫⲁϥ ⲛⲁⲩ ϫⲉⲉⲛⲉⲩⲛϭⲟⲙ ⲙⲙⲱⲧⲛ̅ ⲉϩⲟⲩⲛ ⲉⲣⲟⲓ ⲛⲉⲣⲉⲟⲩⲁ ⲛⲛⲟⲩⲱⲧ ⲛⲁⲣⲱϣⲉ ⲉϩⲟⲩⲛ ⲉⲣⲟⲓⲭ ⲁⲗⲗⲁ ⲉⲧⲃⲉ ϫⲉⲁⲡϫⲟⲉⲓⲥ ⲃⲱⲗ ⲉⲃⲟⲗ ⲛⲧⲉⲧⲛϭⲟⲙ ⲉⲧⲃⲉⲡⲁⲓ ⲧⲉⲧⲛ̅ⲡⲉⲓⲣⲁⲍⲉ ϩⲛϩⲉⲛⲁϣⲏ ϫⲉⲉⲓⲉⲣ̅ϩⲟⲧⲉ ϩⲏⲧⲧⲏⲩⲧⲛ̅. ⲁⲗⲗⲁ ⲧⲉⲧⲛ̅ⲙⲛⲧϭⲱⲃ ⲟⲩⲟⲛϩ ⲉⲃⲟⲗ ϫⲉⲧⲉⲧⲛ̅ⲧⲟⲛⲧⲛ̅ ⲙⲙⲱⲧⲛ ⲉⲛⲧⲃⲛⲟⲟⲩⲉ. ⲉⲛⲉϥⲑⲁⲣⲉⲓ ⲇⲉ ⲟⲛ ⲉϥϫⲱ ⲙⲙⲟⲥ ϫⲉⲉϣϫⲉ ⲟⲩⲛϭⲟⲙ ⲙⲙⲱⲧⲛ̅ ⲁⲩⲱ ⲁⲧⲉⲧⲛϫⲓⲉⲝⲟⲩⲥⲓⲁ ⲉϩⲟⲩⲛ ⲉⲣⲟⲓ ⲙⲡⲣ̅ϭⲱⲭ ⲁⲗⲗⲁ ⲙⲡⲉⲧⲛ̅ⲟⲩⲟⲓ ⲧⲁⲭⲏ. ⲉϣϫⲉ ⲙⲛ ϥ.ⲣ̀ ϭⲟⲙ ⲙⲙⲱⲧⲛ ⲉⲧⲃⲉⲟⲩ ⲧⲉⲧⲛϣⲧⲟⲣⲧⲣ̅ ⲙⲙⲟⲓ ⲉⲡϫⲓⲛϫⲏ. ⲧⲉⲛⲥⲫⲣⲁⲅⲓⲥ ⲅⲁⲣ ⲁⲩⲱ ⲡⲉⲛⲧ̅ⲃⲃⲟ ⲁⲩⲱ ⲡⲉⲛⲥⲟⲃⲧ ⲉⲩⲱⲣϫ ⲛⲁⲛⲡⲉ ⲧⲛ̅ⲡⲓⲥⲧⲓⲥ ⲉϩⲟⲩⲛ ⲉⲡⲉⲛϫⲟⲉⲓⲥ ⲓⲥ̅ ⲡⲉⲭⲥ. ⲛⲧⲟⲟⲩ ⲇⲉ ⲁⲩϩⲓⲧⲟⲟⲧⲟⲩ ⲉϩⲁϩ ⲉⲁⲁⲩ ⲛⲁϥ ⲁⲩⲱ ⲁⲩϩⲣⲟϫⲣϫ ⲛⲛⲉⲩⲟϥϩⲉ ⲉϩⲟⲩⲛ ⲉϩⲣⲁϥ.

10. ⲁϥϭⲱϣⲧ ⲉϩⲣⲁⲓ ⲁϥⲛⲁⲩ ⲉⲧⲙⲉⲗⲱⲧ ϩⲱⲥ ⲉⲥⲛⲁⲟⲩⲱⲛ ⲁⲩⲱ ⲁϥⲛⲁⲩ ⲛ̅ⲑⲉ ⲛⲛⲟⲩⲁⲕⲧⲓⲛ ⲛⲟⲩⲟⲉⲓⲛ ⲉϥⲛⲏⲩ ⲉⲡⲉⲥⲏⲧ ϣⲁⲣⲟϥ. ⲁⲩⲱ ϩⲛⲟⲩϣⲡⲛϣⲱⲡ ⲁⲛⲇⲁⲓⲙⲱⲛⲓⲟⲛ ⲗⲟ ⲉⲩⲟⲛϩ̅ ⲉⲃⲟⲗ ⲁⲩⲱ ⲁⲧⲙⲟⲕϩⲥ̅ ⲙⲡⲉϥⲥⲱⲙⲁ ⲗⲟ ⲛⲧⲉⲩⲛⲟⲩ ⲁⲩⲱ ⲉⲛⲉⲣⲉⲡⲙⲁ ⲉⲛⲉϥⲛϩⲏⲧϥ̅ ⲟⲩⲟϫ ⲛⲧⲉϥϩⲉ.ⲁⲛⲧⲱⲛⲓⲟⲥ ⲇⲉ ⲁϥⲁⲓⲥⲑⲁⲛⲉ ϫⲉⲁⲡϫⲟⲉⲓⲥ ⲛⲁϩⲙⲉϥ ⲁⲩⲱ ⲛⲧⲉⲣⲉϥⲁⲛⲁϩⲧⲏⲩ ⲁϥⲁⲓⲥⲑⲁⲛⲉ ϫⲉⲁϥⲁⲥⲁⲓ ⲉⲃⲟⲗ ϩⲛⲧⲙⲟⲕϩⲥ ⲁϥⲥⲟⲡⲥ̅ ⲙⲡⲉⲛⲧⲁϥⲟⲩⲱⲛϩ̅ ⲛⲁϥ ⲉⲃⲟⲗ ⲉϥϫⲱ ⲙⲙⲟⲥ ϫⲉⲉⲕⲧⲱⲛ ⲁⲩⲱ ⲉⲧⲃⲉⲟⲩ ⲙⲡⲉⲕⲟⲩⲟⲛϩ̅ ⲉⲣⲟⲓ ϫⲓⲛⲉϣⲟⲣⲡ̅ ϫⲉⲕⲁⲥ ⲉⲕⲉⲧⲁⲗϭⲟⲓ. ⲁⲟⲩⲥⲙⲏϭⲉ ϣⲱⲡⲉ ϣⲁⲣⲟϥ ⲉⲥϫⲱ ⲙⲙⲟⲥ ϫⲉⲛⲉⲓⲙⲡⲉⲓⲙⲁⲡⲉ ⲁⲗⲗⲁ ⲛⲧⲁⲓϭⲱ ⲉⲛⲁⲩ ⲉⲡⲉⲕⲁⲅⲱⲛ.ⲉⲡⲉⲓ ⲟⲩⲛ ⲁⲕϩⲩⲡⲟⲙⲓⲛⲉ ⲁⲩⲱ ⲙⲡⲟⲩϫⲣⲟ ⲉⲣⲟⲕⲭ ϯⲛⲁϣⲱⲡⲉ ⲛⲁⲕ ⲛⲃⲟⲏⲑⲟⲥ ⲛⲟⲩⲟⲉⲓϣ ⲛⲓⲙ ⲁⲩⲱ ϯⲛⲁⲁⲕ ⲛⲥⲟⲉⲓⲧ ϩⲙⲙⲁ ⲛⲓⲙ. ⲛⲁⲓ ⲇⲉ ⲛ̅ⲧⲉⲣⲉϥⲥⲟⲧⲙⲟⲩ ⲁϥⲧⲱⲟⲩⲛ ⲁϥϣⲗⲗ̅ ⲁⲩⲱ ⲁϥϭⲙϭⲟⲙ ⲛϩⲟⲩⲟ ϩⲱⲥⲧⲉ ⲛϥⲁⲓⲥⲑⲁⲛⲉ ⲉⲧϭⲟⲙ ⲛⲧⲁⲥϣⲱⲡⲉ ⲛⲁϥ ϩⲙⲡⲉϥⲥⲱⲙⲁ. ⲛⲉϥϩⲏⲛ ⲇⲉ ⲉϩⲟⲩⲛ ⲉⲙⲁⲃⲧⲏ ⲛ̅ⲣⲟⲙⲡⲉ ⲙ̅ ϥ.ⲫ̀ ⲡⲉⲩⲟⲉⲓϣ ⲉⲧⲙⲙⲁⲩ.

11. ⲙⲡⲉϥⲣⲁⲥⲧⲉ ⲁϥⲉⲓ ⲉⲃⲟⲗ ⲉϥⲣⲟⲟⲩⲧ ⲉϥϣⲙϣⲉ ⲙⲡⲛⲟⲩⲧⲉ ⲁϥⲃⲱⲕ ϣⲁⲡϩⲗⲗⲟ ⲛϣⲟⲣⲡ̅ ⲙⲙⲟⲛⲁⲭⲟⲥ ⲁϥⲁⲝⲓⲟⲩ ⲙⲙⲟϥ ⲉⲧⲣⲉϥⲃⲱⲕ ⲛⲙ̅ⲙⲁϥ ⲛⲥⲉϣⲙϣⲉ ⲙⲡϫⲟⲉⲓⲥ ϩⲓⲡϫⲁⲓⲉ. ⲡⲏ ⲇⲉ ⲁϥⲡⲁⲣⲁⲧⲉⲓ ⲉϥϫⲱ ⲙⲙⲟⲥ ⲉⲧⲃⲉⲧⲉϥϩⲏⲗⲏⲕⲓⲁ ⲁⲩⲱ ⲟⲛ ϫⲉⲙⲡⲉⲥⲩⲛⲏⲑⲓⲁ ⲛ̅ⲧⲉⲓⲙⲓⲛⲉ ϣⲱⲡⲉ ⲛⲁϥ ⲉⲛⲉϩ. ⲛⲧⲟϥ ⲇⲉ ⲟⲛ ⲛⲧⲉⲩⲛⲟⲩ ⲁϥϯ ⲙⲡⲉϥⲟⲩⲟⲓ ⲉⲡⲧⲟⲟⲩ. ⲡϫⲁϫⲉ ⲇⲉ ⲟⲛ ⲁϥⲛⲁⲩ ⲉⲧϥ̅ⲥⲡⲟⲩⲇⲏ ⲁϥⲟⲩⲱϣ ⲉϯϫⲣⲟⲡ ⲛⲁϥ ϩⲓⲧⲉϩⲓⲏ ⲁⲩⲱ ⲁϥⲛⲟⲩϫⲉ ⲛⲟⲩⲛⲟϭ ⲛ̅ⲇⲓⲥⲕⲟⲥ ⲛϩⲁⲧ ϩⲓⲧⲉϩⲓⲏ ϩⲛⲟⲩⲫⲁⲛⲧⲁⲥⲓⲁ. ⲁϥⲉⲓⲙⲉ ⲉⲛⲕⲟⲧⲥ̅ ⲙⲡⲙⲁⲥⲧⲉⲡⲉⲧⲛⲁⲛⲟⲩϥ ⲁϥⲁϩⲉⲣⲁⲧϥ̅ ⲁϥϭⲱϣⲧ ⲉⲡⲇⲓⲥⲕⲟⲥ ⲁϥⲉⲓⲙⲉ ϫⲉⲟⲩϩⲱⲃ ⲛⲧⲉⲡⲇⲓⲁⲃⲟⲗⲟⲥ ⲡⲉⲧⲛϩⲏⲧϥ̅ ⲁⲩⲱ ⲡⲉϫⲁϥ ϫⲉⲛⲧⲁⲡⲉⲓⲇⲓⲥⲕⲟⲥ ⲉⲓ ⲛⲧⲱⲛ ϩⲙⲡⲉⲓϫⲁⲓⲉ. ⲛⲛⲟⲩϩⲓⲏ ⲁⲛⲧⲉ ⲧⲁⲓ ⲉⲥⲕⲉϩⲕⲱϩ. ⲙⲛ̅ⲧⲁϭⲥⲉ ⲛⲣⲱⲙⲉ ⲛ̅ϩⲏⲧⲥ̅ ⲉϥⲙⲟⲟϣⲉ. ϩⲙⲡⲧⲣⲉϥϩⲉ ⲇⲉ ⲛⲉⲙⲛϣϭⲟⲙ ⲉⲧⲣⲉⲩⲉⲓⲙⲉ ⲉⲣⲟϥ ϫⲉⲟⲩⲛⲟϭ ⲅⲁⲣⲡⲉ ⲁⲩⲱ ⲡⲉⲛⲧⲁϥⲥⲟⲣⲙⲉϥ ϥⲛⲁⲕⲟⲧϥ̅ ⲛϥ̅ϣⲓⲛⲉ ⲛⲥⲱϥ ⲛϥ̅ϩⲉ ⲉⲣⲟϥ ⲉⲃⲟⲗ ϫⲉⲟⲩϫⲁⲓⲉⲡⲉ ⲡⲉⲓⲙⲁ ⲟⲩⲧⲉⲭⲛⲏⲧⲉ ⲧⲁⲓ ⲛ̅ⲧⲉⲡⲇⲓⲁⲃⲟⲗⲟⲥ ⲛ̅ⲧⲁⲥϣⲱⲡⲉ. ⲛⲅⲛⲁⲉϣϯϫⲣⲟⲡ ⲛⲁⲓ ⲁⲛ ⲱ ⲡⲇⲓⲁⲃⲟⲗⲟⲥ ϩⲙⲡⲁⲓⲭ ⲁⲗⲗⲁ ⲡⲁⲓ ⲛⲁϣⲱⲡⲉ ⲛⲁⲕ ⲉⲩⲧⲁⲕⲟ. ⲛⲁⲓ ⲇⲉ ⲉϥϫⲱ ⲙⲙⲟⲟⲩ ⲛϭⲓⲁⲛⲧⲱⲛⲓⲟⲥ ⲁϥⲱϫⲛ ⲛϭⲓⲡⲉⲧⲙⲙⲁⲩ ⲛⲑⲉ ⲛⲛⲟⲩⲕⲁⲡⲛⲟⲥ.

12. ⲙⲛⲛ̅ⲥⲱⲥ ⲟⲛ ⲉϥⲙⲟⲟϣⲉ ϩⲓⲧⲉϩⲓⲏ ⲁϥⲛⲁⲩ ⲉⲩⲛⲟⲩⲃ ϩⲛⲟⲩⲫⲁⲛⲧⲁⲥⲓⲁ ⲁⲛⲭ ⲁⲗⲗⲁ ϩⲛⲟⲩⲙⲉⲭ ⲉⲓⲧⲉ ⲡϫⲁϫⲉ ⲡⲉⲛⲧⲁϥⲧⲥⲁⲃⲟϥ ϥ.ⲣ ⲉⲣⲟϥ ⲉⲓⲧⲉ. ⲟⲩⲇⲩⲛⲁⲙⲓⲥ ⲉⲥϫⲟⲥⲉ ⲉⲥⲕⲩⲙⲛⲁⲍⲉ ⲙⲡϣⲟϫⲛⲉ: ⲁⲩⲱ ⲉϥⲧⲥⲁⲃⲟ ⲙⲡⲇⲓⲁⲃⲟⲗⲟⲥ ϫⲉⲛϥ̅ϩⲏϣ ⲁⲛ ϩⲁⲭⲣⲏⲙⲁ ⲟⲩⲇⲉ ⲙ̅ⲡⲉϥϫⲟⲟⲥ ⲛⲁⲛ ⲟⲩⲇⲉ ⲁⲛⲟⲛ ⲙⲡⲉⲛⲉⲓⲙⲉ ⲡⲗⲏⲛ ⲟⲩⲛⲟⲩⲃ ⲡⲉⲛⲧⲁϥⲛⲁⲩ ⲉⲣⲟϥ ϩⲛⲟⲩⲙⲉ. ⲁⲛⲧⲱⲛⲓⲟⲥ ⲇⲉ ⲁϥⲣ̅ϣⲡⲏⲣⲉ ⲙ̅ⲡⲁϣⲁⲓ ⲙⲡⲛⲟⲩⲃ ⲁϥⲥⲁⲁⲧϥ ⲇⲉ ⲁϥⲡⲱⲧ ⲛⲑⲉ ⲛⲟⲩⲁ ⲉϥⲛⲁⲡⲱⲧ ϩⲏⲧϥ̅ ⲛⲛⲟⲩⲕⲱϩⲧ̅ ϩⲱⲥⲧⲉ ⲛϥ̅ⲧⲙϩⲱⲛ ⲉⲣⲟϥ ⲉⲡⲧⲏⲣϥ̅. ⲛϩⲟⲩⲟ ⲇⲉ ⲛ̅ϩⲟⲩⲟ ⲁϥϯ ⲙⲡⲉϥⲟⲩⲟⲓ ⲉⲡⲧⲟⲟⲩ ⲁϥⲛⲁⲩ ⲉⲩⲡⲁⲣⲁⲃⲟⲗⲏ ⲉⲥⲟ ⲛϫⲁⲓⲉ ⲁⲩⲱ ⲉⲧⲃⲉⲡⲉⲭⲣⲟⲛⲟⲥ ⲉⲛⲉⲥⲙⲉϩ ⲛ̅ϫⲁⲧϥⲉ ϩⲓⲡⲉⲕⲣⲟ ⲙ̅ⲡⲉⲓⲉⲣⲟ ⲁⲩⲱ ⲁϥⲟⲩⲱϩ ϩⲙⲡⲙⲁ ⲉⲧⲙ̅ⲙⲁⲩ. ⲛϫⲁⲧϥⲉ ⲇⲉ ⲉⲧⲙⲙⲁⲩ ⲁⲩⲡⲱⲧ ⲛⲑⲉ ⲉϣϫⲉ ⲉⲩⲡⲏⲧ ⲛ̅ⲥⲱⲟⲩ ⲁⲩⲁⲛⲁⲭⲱⲣⲉⲓ ⲛⲁⲩ. ⲛⲧⲟϥ ⲇⲉ ⲁϥⲧⲱⲙ ⲙ̅ⲡⲣⲟ ⲁⲩⲱ ⲁϥⲕⲱ ⲛⲁϥ ⲛ̅ϩⲉⲛⲟⲉⲓⲕ ⲉⲧⲣⲉⲩⲣⲱϣⲉ ⲉⲣⲟϥ ⲛ̅ⲥⲟⲟⲩ ⲛⲛ̅ⲉⲃⲟⲧ. ⲡⲁⲓ ⲇⲉ ⲥⲉⲉⲓⲣⲉ ⲙ̅ⲙⲟϥ ϩⲱⲟⲩ ⲛϭⲓⲛⲉⲣⲙⲛⲕⲏⲙⲉ ⲉϣⲁⲩϭⲱ ⲛⲧⲉⲣⲟⲙⲡⲉ ⲧⲏⲣⲥ̅ ⲉⲩⲛ̅ⲧⲟⲩⲟⲉⲓⲕ ⲁⲩⲱ ⲙⲉⲩϥⲗⲁⲡⲧⲉⲓ ⲛ̅ⲗⲁⲁⲩ. ⲛⲧⲟϥ ⲇⲉ ⲁϥⲱⲧⲡ̅ϥ̅ ⲉϩⲟⲩⲛ ⲁⲩⲱ ⲛⲉⲩⲛ̅ⲧⲁϥ ⲙⲙⲁⲩ ⲙⲡⲙⲟⲟⲩ ⲁϥϭⲱ ⲛ̅ϩⲟⲩⲛ ⲙⲡⲙⲁ ⲉⲧⲙⲙⲁⲩ ⲙⲁⲩⲁⲁϥ ⲉⲛϥ̅ⲛⲏⲩ ⲉⲃⲟⲗ ⲁⲛ ⲟⲩⲇⲉ ⲉⲛϥⲛⲁⲩ ⲁⲛ ⲉⲛⲉⲧⲛⲏⲩ ϣⲁⲣⲟϥ. ⲛⲧⲟϥ ⲇⲉ ⲁϥⲣ̅ⲟⲩⲛⲟϭ ⲛⲛⲟⲩⲟⲉⲓϣ ⲉϥⲁⲥⲕⲉⲓ ⲛⲧⲉⲓϩⲉ ⲉϥⲥⲱⲕ ⲛⲁϥ ⲉϩⲣⲁⲓ ⲛⲛⲉϥⲟⲉⲓⲕ ϩⲓⲧϫⲉⲛⲉⲡⲱⲣ ⲛⲥⲉⲡⲥⲛⲁⲩ ⲉⲧⲉⲣⲟⲙⲡⲉ

13. ̀ⲛⲉⲧⲃⲏⲕ ⲇⲉ ϣⲁⲣⲟϥ ϩⲛⲛⲉⲧⲥⲟⲟⲩⲛ ⲙⲙⲟϥ ⲉⲧⲃⲉ ϫⲉⲛⲉϥⲕⲱ ⲙⲙⲟⲟⲩ ⲁⲛ ⲉⲃⲱⲕ ⲉϩⲟⲩⲛⲡⲉ ϣⲁⲩϭⲱ ϩⲓⲃⲟⲗ ⲛϩⲁϩ ⲛϩⲟⲟⲩ ⲛⲥⲉⲣ̅ϩⲉⲛϩⲟⲟⲩ ⲙⲛϩⲉⲛⲟⲩϣⲏ ϩⲓⲣⲙ̅ⲡⲣⲟⲐ ⲉⲛⲉϣⲁⲩ ϥ.ⲫ ⲥⲱⲧⲙ̅ ⲉϣϫⲉ ⲉⲣⲉϩⲉⲛⲙⲏⲏϣⲉ ϩⲓϩⲟⲩⲛ ⲛⲉⲩϣⲧⲣ̅ⲧⲱⲣ ⲁⲩⲱ ⲉⲩϯϩⲣⲟⲟⲩ ⲉⲩⲧⲁⲩⲟ ⲛϩⲉⲛⲙⲏⲏϣⲉ ⲙⲙⲛⲧϭⲱⲃ ⲉⲩⲱϣ ⲉⲃⲟⲗ ⲉⲩϫⲱ ⲙⲙⲟⲥ ϫⲉⲥⲁϩⲱⲱⲕ ⲉⲃⲟⲗ ⲛⲛⲉⲧⲉⲛⲟⲩⲛⲛⲉ. ⲟⲩ ⲉⲣⲟⲕⲡⲉ ⲡⲉⲓϫⲁⲓⲉ ⲉⲟⲩⲱϩ ⲛϩⲏⲧϥ̅. ⲛⲅⲛⲁⲉϣϥⲉⲓ ⲉⲣⲟⲕ ⲁⲛ ϩⲁⲧⲉⲛⲉⲡⲉⲓⲃⲟⲩⲗⲏ. ⲛⲣⲱⲙⲉ ⲇⲉ ⲉⲧϩⲓⲃⲟⲗ ⲉⲛⲉⲩⲙⲉⲉⲩⲉ ⲛ̅ϣⲟⲣⲡ ϫⲉϩⲉⲛⲣⲱⲙⲉ ⲛⲉⲧϩⲓϩⲟⲩⲛ ⲛⲧⲁⲩⲃⲱⲕ ⲉϩⲟⲩⲛ ϣⲁⲣⲟϥ ϩⲓϫⲛϩⲉⲛϭⲗⲟⲟϭⲉ. ⲁⲩϭⲱϣⲧϭⲉ ⲉϩⲟⲩⲛ ϩⲓⲧⲛϩⲉⲛϣⲕⲟⲗ ⲙ̅ⲡⲟⲩⲛⲁⲩ ⲉⲗⲁⲁⲩ. ⲧⲟⲧⲉ ⲁⲩⲉⲓⲙⲉ ⲛⲁⲙⲉ ϫⲉϩⲉⲛⲇⲁⲓⲙⲱⲛⲛⲉ ⲛⲉⲧⲙⲙⲁⲩ.. ⲛⲧⲟϥ ⲇⲉ ⲛⲉϥⲥⲱⲧⲙ ⲉⲣⲟⲟⲩ ⲁⲩⲱ ⲙⲡⲉϥⲣⲟⲟⲩϣ ⲁⲛⲡⲉ ϩⲁⲣⲟⲟⲩ. ⲁϥⲉⲓ ⲇⲉ ϩⲁⲧⲙ̅ⲡⲣⲟ ⲛ̅ϭⲓⲁⲛⲧⲱⲛⲓⲟⲥ ⲁϥⲡⲁⲣⲁⲕⲁⲗⲉⲓ ⲛⲛ̅ⲣⲱⲙⲉ ⲉⲧⲣⲉⲩⲁⲛⲁⲭⲱⲣⲉⲓ ⲛⲁⲩ ⲁⲩⲱ ⲉⲧⲙ̅ⲣ̅ϩⲟⲧⲉ ⲉϥϫⲱ ⲙⲙⲟⲥ ϫⲉⲧⲁⲓⲧⲉ ⲑⲉ ⲉϣⲁⲣⲉⲛⲇⲁⲓⲙⲱⲛⲓⲟⲛ ⲉⲓⲣⲉ ⲛⲛⲉⲓⲥⲙⲟⲧ ⲙ̅ⲫⲁⲛⲧⲁⲥⲓⲁ ⲉϩⲟⲩⲛ ⲉⲛⲉⲧⲣ̅ϩⲟⲧⲉ. ⲛⲧⲱⲧⲛ ⲇⲉ ⲥⲫⲣⲁⲅⲓⲍⲉ ⲙⲙⲱⲧⲛ ⲛⲧⲉⲧⲛ̅ⲃⲱⲕ ⲉⲧⲉⲧⲛ̅ⲧⲏⲕ ⲛϩⲏⲧ ⲁⲩⲱ ⲛⲧⲉⲧⲛ̅ⲗⲟ ϩⲁⲛⲁⲓ ⲉⲩⲥⲱⲃⲉ ⲛⲥⲱⲟⲩ ⲙⲁⲩⲁⲁⲩ. ⲛⲁⲓ ⲙⲉⲛ ⲁⲩⲃⲱⲕ ⲉⲣⲉⲡⲙⲁⲉⲓⲛ ⲙⲡⲉⲥⲧⲁⲩⲣⲟⲥ ⲕⲧⲏⲩ ⲉⲣⲟⲟⲩ. ⲛⲧⲟϥ ⲇⲉ ⲉⲛⲉϥϭⲉⲉⲧ ⲙⲙⲁⲩⲁⲁϥ ⲁⲩⲱ ⲙⲡⲟⲩⲉϣϭⲙϭⲟⲙ ⲉϥⲗⲁⲡⲧⲉⲓ ⲙⲙⲟϥ ⲛⲗⲁⲁⲩ ⲁⲩⲱ ⲛⲉϥⲁⲅⲱⲛⲓⲍⲉ ⲉⲡⲉϩⲟⲩⲟ ⲉⲧⲃⲉ ϫⲉⲛⲉⲑⲉⲱⲣⲓⲁ ⲙⲉⲩⲟⲩⲱϩ ⲉⲧⲟⲟⲧⲟⲩ ⲙⲙⲏⲛⲉ ⲉϣⲱⲡⲉ ϩⲙⲡⲉϥⲛⲟⲩⲥ ⲁⲩⲱ ⲧⲙⲛⲧ̅ϭⲱⲃ ⲙⲡϫⲁϫⲉ ⲉⲧϯⲟⲩⲃⲏϥ ϣⲁⲩϯ ⲛⲁϥ ⲛⲛⲟⲩⲛⲟϭ ⲛ̅ⲙⲧⲟⲛ ϩⲛⲛⲉϥϩⲓⲥⲉ ⲁⲩⲱ ⲛⲥⲉⲉⲓⲣⲉ ⲛϩⲏⲧϥ ⲛⲟⲩⲛⲟϭ ⲛⲛⲟⲩⲣⲟⲧ ⲉⲡⲉϩⲟⲩⲟ. ⲕⲁⲓⲅⲁⲣ ϥ..ⲣ ⲛⲉⲧⲥⲟⲟⲩⲛ ⲙⲙⲟϥ ⲉⲩⲃⲏⲕ ⲉⲡⲙⲁ ⲉⲧⲙ̅ⲙⲁⲩ ⲛ̅ϩⲁϩ ⲛ̅ⲥⲟⲡ ⲉⲩⲙⲉⲉⲩⲉ ϫⲉⲥⲉⲛⲁϩⲉ ⲉⲣⲟϥ ⲉϥⲙⲟⲟⲩⲧ ⲁⲩⲱ ϣⲁⲩⲥⲱⲧⲙ̅ ⲉⲣⲟϥ ⲉϥⲯⲁⲗⲗⲉⲓ ϫⲉⲙⲁⲣⲉⲡⲛⲟⲩⲧⲉ ⲧⲱⲟⲩⲛ ⲛ̅ⲧⲉⲛⲉϥϫⲁϫⲉ. ϫⲱⲱⲣⲉ ⲉⲃⲟⲗ. ⲛ̅ⲥⲉⲡⲱⲧ ⲛϭⲓⲛⲉⲧⲙⲟⲥⲧⲉ ⲙⲙⲟϥ ⲙ̅ⲡⲉϥⲙ̅ⲧⲟ ⲉⲃⲟⲗ. ⲙⲁⲣⲟⲩⲱϫⲛ̅ ⲛⲑⲉ ⲉϣⲁⲣⲉⲟⲩⲕⲁⲡⲛⲟⲥ ⲱϫⲛ̅. ⲛⲑⲉ ⲛⲛⲟⲩⲙⲟⲩⲗϩ̅ ⲉϣⲁϥⲃⲱⲗ ⲉⲃⲟⲗ ⲛⲛⲁϩⲣⲙⲡⲕⲱϩⲧ ⲛⲧⲉⲓϩⲉ ⲙⲁⲣⲟⲩⲧⲁⲕⲟ ⲛϭⲓⲛⲣⲉϥⲣ̅ⲛⲟⲃⲉ ⲙⲡⲙ̅ⲧⲟ ⲉⲃⲟⲗ ⲙⲡϩⲟ ⲙⲡⲛⲟⲩⲧⲉ. ⲁⲩⲱ ϫⲉⲁⲛϩⲉⲑⲛⲟⲥ ⲧⲏⲣⲟⲩ ⲕⲱⲧⲉ ⲉⲣⲟⲓ ⲁⲓⲃⲟⲟⲣⲟⲩ ϩⲙⲡⲣⲁⲛ ⲙⲡϫⲟⲉⲓⲥ.

14. ̀ⲁϥϩⲱⲛ ⲇⲉ ⲉϫⲉⲕϫⲟⲩⲱⲧⲉ ⲛⲣⲟⲙⲡⲉ ⲉⲃⲟⲗ ⲉϥⲁⲥⲕⲉⲓ ⲛⲧⲉⲓϩⲉ ϩⲁⲣⲓϩⲁⲣⲟϥ ⲉⲛϥ̅ⲛⲏⲩ ⲉⲃⲟⲗ ⲁⲛ ⲟⲩⲇⲉ ⲛⲥⲉⲛⲁⲩ ⲉⲣⲟϥ ⲁⲛ ⲛϩⲁϩ ⲛ̅ⲥⲟⲡ ϩⲓⲧⲛ̅ⲗⲁⲁⲩ ⲛⲣⲱⲙⲉ. ⲙⲛⲛ̅ⲥⲁⲛⲁⲓ ⲇⲉ ⲉⲣⲉϩⲁϩ ⲙⲟⲕϩ̅ ⲛϩⲏⲧ ⲉⲩⲟⲩⲱϣ ⲉⲧⲛⲧⲱⲛⲟⲩ ⲉⲣⲟϥ ⲁⲩⲱ ⲛⲉϣⲁⲩⲧⲁⲩⲟ ⲉⲡⲉⲥⲏⲧ ⲙⲡⲣⲟ ⲛϫⲛⲁϩ. ⲁϥⲉⲓ ⲇⲉ ⲉⲃⲟⲗ ⲛ̅ϭⲓⲁⲛⲧⲱⲛⲓⲟⲥ ⲉⲣⲉⲡⲛⲟⲩⲧⲉ ⲧⲟ ϩⲓⲱⲱϥ. ⲛ̅ϣⲟⲣⲡ ⲇⲉ ⲛⲧⲁϥⲉⲓ ⲉⲃⲟⲗ ϩⲛⲧⲡⲁⲣⲉⲙⲃⲟⲗⲏ ⲁϥⲟⲩⲱⲛϩ̅ ⲉⲃⲟⲗ ⲛⲛⲉⲛⲧⲁⲩⲉⲓ ϣⲁⲣⲟϥ. ⲛⲧⲉⲣⲟⲩⲛⲁⲩ ⲇⲉ ⲉⲡⲉϥⲥⲱⲙⲁ ⲁⲩⲣ̅ϣⲡⲏⲣⲉ ⲉϫⲙ̅ⲡⲉϥⲕⲛⲛⲉ ⲁⲩⲱ ϫⲉⲛϥⲕⲩⲙⲛⲁⲍⲉ ⲁⲛ ⲁⲩⲱ ⲙⲡⲉϥϭⲃⲃⲉ ϩⲱⲥ ⲉⲁϥⲉⲓ ⲉⲃⲟⲗ ϩⲛⲛⲉⲛⲏⲥϯⲁ ⲙⲛⲛⲙⲙⲓϣⲉ ⲛⲛⲇⲁⲓⲙⲱⲛⲭ ⲉϥϣⲟⲟⲡ ⲇⲉ ⲛⲧⲉϥϩⲉ ⲛⲑⲉ ⲉⲧⲟⲩⲥⲟⲟⲩⲛ ⲙⲙⲟϥ ⲙ̅ⲡⲁⲧⲉϥⲁⲛⲁⲭⲱⲣⲉⲓ. ⲉⲩⲛⲁⲩ ⲇⲉ ⲟⲛ ⲉⲡⲙⲉⲉⲩⲉ ⲛⲧⲉϥⲯⲩⲭⲏ ⲉⲥⲧⲃⲃⲏⲩ ⲁⲩⲱ ⲉⲛϥⲗⲩⲡⲉⲓ ⲁⲛ ϩⲛⲟⲩⲙ̅ⲕⲁϩ ⲛϩⲏⲧ ⲟⲩⲇⲉ ⲛϥϣⲧⲣ̅ⲧⲱⲣ ⲁⲛ ϩⲓⲧⲛⲛⲛϩⲩⲇⲟⲛⲏ ⲟⲩⲇⲉ ⲛⲉⲩⲁⲙⲁϩⲧⲉ ϥ..ⲫ ⲙⲙⲟϥ ⲁⲛ ϩⲓⲧⲛ̅ⲟⲩⲥⲱⲃⲉ ⲏ ⲟⲩⲱⲕⲙ̅ . ⲟⲩⲇⲉ ⲟⲛ ⲛⲧⲉⲣⲉϥⲛⲁⲩ ⲉⲡⲙⲏⲏϣⲉ ⲙ̅ⲡⲉϥϣⲧⲟⲣⲧⲣ̅ ⲟⲩⲇⲉ ⲙ̅ⲡⲉϥⲣⲁϣⲉ ⲉⲩⲁⲥⲡⲁⲍⲉ ⲙⲙⲟϥⲭ ⲁⲗⲗⲁ ⲛⲧⲟϥ ⲧⲏⲣϥ̅ ⲉⲛⲉϥϣⲏϣ ϩⲱⲥ ⲉⲣⲉⲡⲗⲟⲅⲟⲥ ⲣ̅ϩⲙⲙⲉ ⲙⲙⲟϥ. ⲟⲩⲙⲏⲏϣⲉ ⲇⲉ ⲟⲛ ⲉⲧϩⲙⲡⲙⲁ ⲉⲧⲙⲙⲁⲩ ⲉⲩϣⲱⲛⲉ ⲁⲡϫⲟⲉⲓⲥ ⲧⲁⲗϭⲟⲟⲩ ⲉⲃⲟⲗ ϩⲓⲧⲟⲟⲧϥ̅ ⲉⲁⲡϫⲟⲉⲓⲥ ϯ ⲛⲛⲟⲩ̅ⲭⲁⲣⲓⲥ ⲛⲛⲁⲛⲧⲱⲛⲓⲟⲥ ϩⲛⲛⲉϥϣⲁϫⲉ. ⲁⲩⲱ ϩⲁϩ ⲙⲉⲛ ⲉⲩⲗⲩⲡⲉⲓ ⲉⲛⲉϥⲥⲟⲗⲥⲗ̅ ⲙⲙⲟⲟⲩ.ⲭ ϩⲉⲛⲕⲟⲟⲩⲉ ⲇⲉ ⲉⲩⲙⲓϣⲉ ⲁϥⲧⲣⲉⲩϩⲱⲧⲡ ⲁϥⲉⲓⲛⲉ ⲙⲙⲟⲟⲩ ⲉⲩⲙⲛⲧϣⲃⲣ. ⲛⲉϥϫⲱ ⲇⲉ ⲙⲙⲟⲥ ⲛⲛⲟⲩⲟⲛ ⲛⲓⲙ ⲉⲧⲙⲧⲁⲓⲉⲗⲁⲁⲩ ϩⲛⲛⲁⲡⲕⲟⲥⲙⲟⲥ ⲉϩⲟⲩⲉ ⲉⲧⲁⲅⲁⲡⲏ ⲉϩⲟⲩⲛ ⲉⲡⲭⲥ ⲓⲥ. ⲛⲉϥϯⲥⲃⲱ ⲛⲟⲩⲟⲛ ⲛⲓⲙ: ⲉⲧⲃⲉⲛⲁⲅⲁⲑⲟⲛ ⲉⲧⲛⲁϣⲱⲡⲉ ⲁⲩⲱ ⲉⲧⲃⲉⲧⲙⲛⲧⲙⲁⲓⲣⲱⲙⲉ ⲛⲧⲁⲥϣⲱⲡⲉ ⲉϩⲟⲩⲛ ⲉⲣⲟⲛ ϩⲓⲧⲙⲡⲛⲟⲩⲧⲉ ⲉⲃⲟⲗ ϫⲉⲙⲡⲉϥϯⲥⲟ ⲉⲡⲉϥϣⲏⲣⲉ ⲙⲙⲓⲛ ⲙⲙⲟϥ ⲁⲗⲗⲁ ⲁϥⲧⲁⲁϥ ϩⲁⲣⲟⲛ ⲧⲏⲣⲛ̅. ⲁϥⲡⲓⲑⲉϭⲉ ⲟⲛ ⲛ̅ϩⲁϩ ⲉⲧⲣⲉⲩⲟⲩⲱϣ ⲉⲥⲱⲧⲡ ⲛⲁⲩ ⲛⲧⲙⲛⲧⲙⲟⲛⲁⲭⲟⲥ ⲁⲩⲱ ⲛⲧⲉⲓϩⲉ ⲁⲩϣⲱⲡⲉ ⲛ̅ϭⲓⲙⲙⲟⲛⲁⲥⲧⲏⲣⲓⲟⲛ ⲉⲧϩⲛⲛⲛ̅ⲧⲟⲩⲉⲓⲏ ⲁⲩⲱ ⲁⲡϫⲁⲓⲉ ⲙⲟⲩϩ ⲙⲙⲟⲛⲁⲭⲟⲥ ⲁⲩⲱ ⲁⲩⲟⲩⲱϩ ⲛϩⲏⲧϥ̅ ⲉⲁⲩⲉⲓ ⲉⲃⲟⲗ ϩⲛⲛⲉⲩⲙⲁ ⲛϣⲱⲡⲉ ⲁⲩⲥϩⲁⲓⲥⲟⲩ ⲛⲥⲁⲧⲡⲟⲗⲏϯⲁ ⲛⲛⲙⲡⲏⲩⲉ.

15. ⲙⲛⲛⲥⲱⲥ ⲇⲉ ⲟⲛ ⲁⲧⲉⲭⲣⲓⲁ ϣⲱⲡⲉ ⲉⲧⲣⲉϥⲃⲱⲕ ⲛϥϭⲙⲡϣⲓⲛⲉ ⲛⲛⲉⲥⲛⲏⲩ ⲉⲧϩⲙⲡⲓⲟⲙ ⲛⲉⲁϥⲉⲓ ⲉⲃⲟⲗ ϩⲙⲡⲉⲓⲟⲟⲣ ⲁⲩⲱ ⲛⲉϥⲙⲉϩ ⲛⲙ̅ⲥⲁϩ ⲛϭⲓⲡⲉⲓⲟⲟⲣ ⲉⲧⲙⲙⲁⲩ. ⲛⲧⲟϥ ⲇⲉ ⲁϥϣⲗⲏⲗ ⲁϥϫⲓⲟⲟⲣ ⲙⲛⲛⲉⲧⲛⲙ̅ⲙⲁϥ ⲁⲩⲱ ⲙⲡⲟⲩϥⲗⲁⲡⲧⲉⲓ ⲙⲙⲟⲟⲩ. ⲛⲧⲉⲣⲉϥⲕⲟⲧϥ ⲇⲉ ⲟⲛ ϥ.:ⲣ ⲉⲡⲉϥⲙⲟⲛⲁⲥⲧⲏⲣⲓⲟⲛ ⲁϥⲁⲙⲁϩⲧⲉ ⲟⲛ ⲛⲛⲉⲛϩⲓⲥⲉ ⲛⲥⲉⲙⲛⲟⲛ ⲉⲧⲙⲉϩ ⲙⲙⲛⲧϫⲱⲱⲣⲉ ⲛⲓⲙ. ⲉϥϣⲁϫⲉ ⲛϩⲁϩ ⲛⲥⲟⲡ ⲙⲛⲛⲉⲛⲧⲁⲩⲣ̅ⲙⲟⲛⲁⲭⲟⲥ ⲉϥⲁⲩⲝⲁⲛⲉ ⲙⲡⲉⲩⲟⲩⲣⲟⲧ ⲉⲡⲉϩⲟⲩⲟ. ⲡⲉϩⲟⲩⲟ ⲇⲉ ⲛⲛⲉⲥⲛⲏⲩ ⲁϥⲕⲓⲙ ⲉⲣⲟⲟⲩ ⲉϩⲟⲩⲛ ⲉⲡⲙⲉ ⲛⲧⲁⲥⲕⲏⲥⲓⲥ ⲁⲩⲱ ⲛⲉⲣⲉⲡⲗⲟⲅⲟⲥ ⲥⲱⲕ ⲛⲛⲙⲙⲏⲏϣⲉ ϣⲁⲣⲟϥ ⲁⲩⲱ ⲁϩⲁϩ ⲙⲙⲟⲛⲁⲥⲧⲏⲣⲓⲟⲛ ϣⲱⲡⲉ ⲁⲩⲱ ⲛⲉϥϩⲓ ϫⲱⲟⲩ ⲧⲏⲣⲟⲩ ⲛⲑⲉ ⲛⲛⲟⲩⲉⲓⲱⲧ ⲛⲛⲁⲅⲁⲑⲟⲥ.

16. ⲁⲥϣⲱⲡⲉ ⲇⲉ ⲛⲛⲟⲩϩⲟⲟⲩ ⲁϥⲉⲓ ⲉⲃⲟⲗ ⲁⲩⲱ ⲙⲙⲟⲛⲁⲭⲟⲥ ⲧⲏⲣⲟⲩ ⲉⲓ ϣⲁⲣⲟϥ ⲁⲩⲁⲝⲓⲟⲩ ⲙⲙⲟϥ ⲉⲥⲱⲧⲙ ⲉⲩϣⲁϫⲉ ⲉⲃⲟⲗ ϩⲓⲧⲟⲟⲧϥ ⲁⲩⲱ ⲁϥⲧⲁⲩⲉⲛⲉⲓϣⲁϫⲉ ⲉⲣⲟⲟⲩ ϩⲛⲧⲁⲥⲡⲉ ⲛⲛⲣⲙⲛ̅ⲕⲏⲙⲉ ϫⲉⲛⲉⲅⲣⲁⲫⲏ ⲙⲉⲛ ⲣⲱϣⲉ ⲉⲣⲟⲛ ⲉϯⲥⲃⲱ ⲛⲁⲛⲭ ⲁⲛⲟⲛ ⲇⲉ ⲟⲩⲡⲉⲧⲛⲁⲛⲟⲩϥ ⲛⲁⲛⲡⲉ ⲉⲧⲣⲉⲛⲡⲁⲣⲁⲕⲁⲗⲉⲓ ⲛⲛⲉⲛⲉⲣⲏⲩ ϩⲛ̅ⲧⲡⲓⲥⲧⲓⲥ ⲁⲩⲱ ⲛⲧⲛⲕⲩⲙⲛⲁⲍⲉ ⲙⲙⲟⲛ ϩⲛⲛⲛⲗⲟⲅⲟⲥ. ⲛⲧⲱⲧⲛϭⲉ ⲧⲉⲛⲟⲩ ϩⲱⲧⲧⲏⲩⲧⲛ̅ ⲧⲛⲧⲛⲧⲏⲩⲧⲛ̅ ⲉⲡⲉⲧⲛⲉⲓⲱⲧ ⲛⲧⲉⲧⲛϫⲱ ⲙ̅ⲡⲉⲧⲉⲧⲛ̅ⲥⲟⲟⲩⲛ ⲙⲙⲟϥ. ⲁⲛⲟⲕ ϩⲱ ϩⲱⲥ ⲉⲓⲟ ⲛⲛⲟϭ ⲉⲣⲱⲧⲛ̅ ϩⲛⲑⲩⲗⲏⲕⲓⲁ ⲛⲉϯⲥⲟⲟⲩⲛ ⲙⲙⲟⲟⲩ ⲙⲛⲛⲉⲛⲧⲁⲓϫⲓⲡⲓⲣⲁ ⲙⲙⲟⲟⲩ ϯⲛⲁϫⲟⲟⲩ ⲉⲣⲱⲧⲛ. ⲙⲁⲣⲉⲥϣⲱⲡⲉ ⲟⲛ ⲛⲟⲩⲟⲛ ⲛⲓⲙ ϩⲓⲟⲩⲥⲟⲡ ⲛϭⲓⲧⲉⲓⲥⲡⲟⲩⲇⲏ ⲛⲟⲩⲱⲧ ϩⲱⲥ ⲉⲁⲧⲉⲧⲛϩⲓⲧⲟⲟⲧⲧⲏⲩⲧⲛ ⲉⲧⲙⲕⲉⲧⲧⲏⲩⲧⲛ ⲉⲡⲁϩⲟⲩ ⲁⲩⲱ ⲛ̅ⲧⲉⲧⲛⲧⲙϫⲟⲟⲥ ϫⲉⲁⲛⲱⲥⲕ ϩⲛⲧⲁⲥⲕⲏⲥⲓⲥⲭ ⲁⲗⲗⲁ ⲛϩⲟⲩⲟ ϩⲱⲥ ⲉⲁⲛⲁⲣⲭⲉⲓ ⲉⲡϩⲱⲃ ⲙⲁⲣⲉϥⲣ̅ϩⲟⲩⲟ ⲅ̀ⲁⲣ ̀ⲛϭⲓⲡⲉⲧⲛ̅ⲟⲩⲣⲟⲧ. ⲡⲁϩⲉ ⲅⲁⲣ ⲙⲡⲣⲱ ϥ.:ⲫ ⲙⲉ ⲟⲩⲕⲟⲩⲓⲡⲉ ⲉⲩⲱⲡ ⲙⲙⲟϥ ⲛⲛⲁϩⲣⲙ̅ⲡⲁⲓⲱⲛ ⲉⲧⲛⲏⲩ.. ⲛ̅ⲕⲁ ⲇⲉ ⲛⲓⲙ ⲉⲧϩⲙⲡⲕⲟⲥⲙⲟⲥ ⲉϣⲁⲩⲧⲁⲁϥ ⲉⲃⲟⲗ ϩⲁⲡⲉⲧϥ̅ⲙⲡϣⲁ ⲙⲙⲟϥ ⲁⲩⲱ ⲟⲩⲛⲛ̅ⲕⲁ ⲉϥϣⲏϣ ⲙⲛⲛⲉϥⲉⲣⲏⲩ ⲉϣⲁⲩⲧⲁⲁϥ ⲛϣⲃ̅ⲓⲱ ϩⲁⲡⲉⲧϣⲏϣ ⲛⲙ̅ⲙⲁϥ. ⲡⲉⲣⲏⲧ ⲇⲉ ⲛⲧⲟϥ ⲙ̅ⲡⲱⲛϩ̅ ϣⲁⲉⲛⲉϩ ⲉⲩϣⲱⲡ ⲙⲙⲟϥ ϩⲁⲟⲩⲕⲟⲩⲓ. ϥⲥⲏϩ ⲅⲁⲣ ϫⲉⲛⲉϩⲟⲟⲩ ⲙ̅ⲡⲉⲛⲱⲛϩ̅ ϣϥⲉ ⲛⲣⲟⲙⲡⲉⲛⲉⲭ ⲡⲉϩⲟⲩⲟ ⲇⲉ ⲛⲛⲁⲓⲡⲉ ϩⲓⲥⲉ ϩⲓⲙ̅ⲕⲁϩ. ϩⲟⲧⲁⲛϭⲉ ⲉⲛϣⲁⲛϭⲱ ϩⲛⲧⲁⲥⲕⲏⲥⲓⲥ ⲛ̅ⲧⲉⲓϩⲙⲉⲛⲉ ⲛⲣⲟⲙⲡⲉ ⲏ ϣⲁϣⲉ ⲉⲛⲛⲁⲣ̅ⲣ̅ⲣⲟ ⲁⲛ ⲙⲡϣⲱϣ ⲛⲧⲉⲓϣⲉ ⲛⲣⲟⲙⲡⲉⲭ ⲁⲗⲗⲁ ⲉⲡⲙⲁ ⲛ̅ϣⲉ ⲧⲛ̅ⲛⲁⲣ̅ⲣ̅ⲣⲟ ϣⲁⲉⲛⲉϩ ϩⲉⲛⲉϩ. ⲁⲩⲱ ⲉⲛϣⲁⲛⲁⲅⲱⲛⲓⲍⲉ ϩⲓϫⲙⲡⲕⲁϩ ⲉⲛⲛⲁⲕⲗⲏⲣⲟⲛⲟⲙⲉⲓ ⲁⲛ ϩⲓϫⲙⲡⲕⲁϩⲭ ⲁⲗⲗⲁ ⲉⲩⲛ̅ⲧⲁⲛ ⲙⲙⲁⲩ ⲛⲛⲉⲛⲉⲣⲏⲧ ϩⲛⲛⲙⲡⲏⲩⲉ. ⲁⲩⲱ ⲟⲛ ⲉⲛϣⲁⲛⲕⲱ ⲉϩⲣⲁⲓ ⲙⲡⲉⲓⲥⲱⲙⲁ ⲉϣⲁϥⲧⲁⲕⲟ ⲉⲓⲉ ⲧⲛⲛⲁϫⲓⲧϥ ⲟⲛ ⲉϥⲟ ⲛⲁⲧⲧⲁⲕⲟ.

17. ϩⲱⲥⲧⲉ ⲛⲁϣⲏⲣⲉ ⲙ̅ⲡⲣ̅ⲧⲣⲉⲛⲉⲛⲅ̅ⲕⲁϭⲓ ⲁⲩⲱ ⲙⲡⲣⲧⲣⲉⲛⲙⲉⲉⲩⲉ ⲉⲡⲧⲏⲣϥ ϫⲉⲁⲛⲱⲥⲕ ⲏ ϫⲉⲧⲛⲉⲓⲣⲉ ⲛⲛⲟⲩⲛⲟϭ ⲛϩⲱⲃ. ⲛ̅ⲥⲉⲙ̅ⲡϣⲁ ⲁⲛ ⲛϭⲓⲛϩⲓⲥⲉ ⲙⲡⲉⲩⲟⲉⲓϣ ⲙⲡⲉⲟⲟⲩ ⲉⲧⲛⲁϭⲱⲗⲡ̅ ⲉⲣⲟⲛ. ⲁⲩⲱ ⲙⲡⲣⲧⲣⲉⲛϭⲱϣⲧ ⲉⲛⲁⲡⲕⲟⲥⲙⲟⲥ ⲛⲧⲛⲙⲉⲉⲩⲉ ϫⲉⲁⲛⲁⲡⲟⲧⲁⲥⲥⲉ ⲛϩⲉⲛⲛⲟϭ ⲛⲛⲕⲁ. ⲕⲁⲓⲅⲁⲣ ⲛ̅ⲧⲟϥ ⲡⲕⲁϩ ⲧⲏⲣϥ̅ ⲟⲩⲕⲟⲩⲓⲡⲉ ⲛⲛⲁϩⲣⲛⲛⲙⲡⲏⲩⲉ. ⲉϣϫⲉ ⲉⲛⲟϭⲉ ⲛϫⲟⲉⲓⲥ ⲉⲡⲕⲁϩ ⲧⲏⲣϥ̅ ⲁⲩⲱ ⲛ̅ⲧⲁ̀ⲛ̀ⲁⲡⲟⲧⲁⲥⲥⲉ ⲙⲙⲟϥⲭ ⲡⲁⲗⲓⲛ ⲟⲛ ⲛϥⲙ̅ ϥ.ⲣ̀ ϣⲁ ⲁⲛ ⲙ̅ⲡⲉⲟⲟⲩ ⲛⲧⲙⲛⲧⲉⲣⲟ ⲛⲛⲙⲡⲏⲩⲉ. ⲛⲑⲉ ⲅⲁⲣ ⲛⲛⲟⲩⲁ ⲉⲁϥⲕⲁⲧⲁⲫⲣⲟⲛⲉⲓ ⲛⲛⲟⲩⲧⲣⲁⲭⲙⲏ ⲛϩⲟⲙⲛ̅ⲧ̅ ϫⲉⲕⲁⲥ ⲉϥⲉϯϩⲏⲩ ⲛ̅ϣⲉ ⲛⲧⲣⲁⲭⲙⲏ ⲛ̅ⲛⲟⲩⲃⲭ ⲧⲁⲓⲧⲉ ⲑⲉ ⲙ̅ⲡⲉⲧⲟ ⲛϫⲟⲉⲓⲥ ⲉⲡⲕⲁϩ ⲧⲏⲣϥ̅ ⲛϥⲁⲡⲟⲧⲁⲥⲥⲉ ⲙⲙⲟϥ ⲉϣⲁϥⲕⲁⲟⲩⲕⲟⲩⲓ ⲇⲉ ⲛⲥⲱϥ ⲛϥ̅ϫⲓⲧⲟⲩ ⲛϣⲉ ⲛⲕⲱⲃ. ⲉϣϫⲉ ⲙⲡⲕⲁϩ ⲧⲏⲣϥ̅ ⲙⲡϣⲁ ⲁⲛ ⲛⲙⲡⲏⲩⲉ ⲉⲓⲉ ⲡⲉⲧⲛⲁⲕⲱ ⲛ̅ⲥⲱϥ ⲛϩⲉⲛϣⲏⲙ ⲛⲉⲓⲱϩⲉ ϩⲱⲥⲧⲉ ⲉⲧⲙ̅ⲕⲁⲁⲩ ⲛⲁϥ ⲕⲁⲛ ⲟⲩⲏⲓⲡ ⲏ ⲟⲩⲛⲟⲩⲃ ⲉⲛⲁϣⲱϥⲡⲉ ⲛϥⲕⲁⲁⲩ ⲛ̅ⲥⲱϥ ⲛϣϣⲉ ⲁⲛ ⲉϣⲟⲩϣⲟⲩ ⲙⲙⲟϥ ⲏ ⲙⲕⲁϩ ⲛϩⲏⲧ ⲉⲡⲧⲏⲣϥ̅ ϣϣⲉ ⲇⲉ ⲉⲣⲟⲛ ⲉⲗⲟⲅⲓⲍⲉ ⲙⲙⲟⲛ ⲛⲧⲉⲓϩⲉ ϫⲉⲕⲁⲛ ⲉⲛϣⲁⲛⲧⲙ̅ⲕⲁⲁⲩ ⲛ̅ⲥⲱⲛ ⲉⲧⲃⲉ ⲧⲁⲣⲉⲧⲏⲭ ⲁⲗⲗⲁ ⲙⲛⲛⲥⲱⲥ ⲉⲛϣⲁⲛⲙⲟⲩ ⲧⲛⲛⲁⲕⲁⲁⲩ ⲛ̅ⲥⲱⲛ ⲙⲉϣⲁⲕ ⲇⲉ ⲛ̅ϩⲁϩ ⲛ̅ⲥⲟⲡ ϣⲁⲛⲕⲁⲁⲩ ⲛⲛⲉⲧⲛ̅ⲧⲛ̅ⲟⲩⲁϣⲟⲩ ⲁⲛ ⲛⲑⲉ ⲛⲧⲁϥⲣ̅ⲡⲙⲉⲉⲩⲉ ⲛⲛⲁⲓ ⲛϭⲓⲡⲉⲕⲗⲏⲥⲓⲁⲥⲧⲏⲥ. ⲉⲧⲃⲉⲟⲩϭⲉ ⲛ̅ⲧⲛⲛⲁⲕⲁⲁⲩ ⲁⲛ ⲛⲥⲱⲛ ⲉⲧⲃⲉ ⲧⲁⲣⲉⲧⲏ ϫⲉⲕⲁⲥ ⲉⲛⲉⲕⲗⲏⲣⲟⲛⲟⲙⲉⲓ ⲛⲛⲟⲩⲙⲛⲧⲉⲣⲟ. ⲉⲧⲃⲉⲡⲁⲓϭⲉ ⲙⲡⲣ̅ⲧⲣⲉⲟⲩⲁ ⲙⲙⲟⲛ ⲉⲡⲉⲑⲩⲙⲉⲓ ⲉϫⲡⲟ ⲛⲁϥ ⲛϩⲉⲛⲛⲕⲁ. ⲟⲩⲡⲉ ⲡϩⲏⲩ ⲛⲛⲁⲓ. ⲉⲛϣⲁⲛⲕⲁⲁⲩ ⲛⲁⲛ ⲉⲛⲧⲛⲛⲁⲉϣϫⲓⲧⲟⲩ ⲛⲙⲙⲁⲛ ⲁⲛ. ⲁⲗⲗⲁ ⲉⲧⲃⲉⲟⲩ ⲛⲧⲟϥ ⲛⲧⲛⲛⲁⲕⲱ ⲛⲥⲱⲛ ⲁⲛ ⲛⲛⲁⲓ ⲛⲧⲛ̅ϫⲓ ⲛⲛⲉⲧⲥⲟⲧⲡ ⲉⲣⲟⲟⲩ ⲉⲧⲉⲛⲁⲓⲛⲉ. ⲟⲩⲙⲛ̅ⲧⲥⲁⲃⲉ ⲟⲩⲙⲛⲧⲥⲉⲙⲛⲟⲥ ⲟⲩⲙⲛⲧⲇⲓⲕⲁⲓⲟⲥ ⲟⲩⲙⲛⲧϫⲱⲱⲣⲉ ⲟⲩⲙⲉⲉⲩⲉ ⲛϩⲏⲧ ⲉⲛⲁⲛⲟⲩϥ ⲟⲩⲁⲅⲁⲡⲏ ⲉⲥⲧⲁϫⲣⲏⲩ ⲟⲩⲙⲛⲧⲙⲁⲓϩⲏⲕⲉ ⲟⲩⲡⲓⲥⲧⲓⲥ ⲉϩⲟⲩⲛ ⲉⲡⲉⲭⲥ ⲟⲩⲙⲛⲧⲁⲧϭⲱⲛⲧ ϥ.ⲫ̀ ⲟⲩⲙⲛⲧⲙⲁⲓϣⲙ̅ⲙⲟ. ⲛⲁⲓ ⲇⲉ ⲉⲛϣⲁⲛⲕⲁⲁⲩ ⲛⲁⲛ ⲧⲛⲛⲁϩⲉ. ⲉⲣⲟⲟⲩ ϩⲓⲑⲏ ⲙⲙⲟⲛ ⲉⲩⲥⲟⲃⲧⲉ ⲛⲁⲛ ⲛⲛⲟⲩⲙⲁⲛϣⲱⲡⲉ ϩⲙⲡⲕⲁϩ ⲛⲛⲉⲣⲙ̅ⲣⲁϣ.

18. ϩⲱⲥⲧⲉ ⲉⲃⲟⲗ ϩⲛⲛⲁⲓ ⲙⲁⲣⲉⲡⲟⲩⲁ ⲡⲟⲩⲁ ⲡⲓⲑⲉ ⲙⲙⲟϥ ⲙⲁⲩⲁⲁϥ ⲉⲧⲙⲣⲕⲟⲩⲓ ⲛϩⲏⲧⲭ ⲛϩⲟⲩⲟ ⲇⲉ ⲉϥϣⲁⲛⲇⲟⲅⲓⲙⲁⲍⲉ ⲙⲙⲟϥ ϫⲉⲟⲩϩⲙϩⲁⲗ ⲛ̅ⲧⲉⲡϫⲟⲉⲓⲥⲡⲉ ⲁⲩⲱ ϫⲉϣϣⲉ ⲉⲣⲟϥ ⲉⲣ̅ϩⲙϩⲁⲗ ⲙⲡⲉϥϫⲟⲉⲓⲥ ⲕⲁⲗⲱⲥ. ⲛⲑⲉϭⲉ ⲙⲡϩⲙϩⲁⲗ ⲛϥⲛⲁϣϫⲟⲟⲥ ⲁⲛ ⲙⲡⲉϥϫⲟⲉⲓⲥ ϫⲉⲁⲓⲣ̅ϩⲱⲃ ⲛⲥⲁϥ ⲛϯⲛⲁⲉⲓⲣⲉ ⲁⲛ ⲙⲡⲟⲟⲩⲭ ⲟⲩⲇⲉ ⲛϥⲛⲁⲱⲡ ⲁⲛ ⲙ̅ⲡⲉⲭⲣⲟⲛⲟⲥ ⲛ̅ⲧⲁϥⲟⲩⲉⲓⲛⲉ ⲛϥϭⲱ ϩⲛⲛⲛⲕⲉϩⲟⲟⲩ ⲉⲧⲛⲏⲩ ⲙⲛⲛⲥⲁⲛⲁⲓⲭ ⲁⲗⲗⲁ ⲕⲁⲧⲁⲑⲉ ⲉⲧⲥⲏϩ ϩⲙⲡⲉⲩⲁⲅⲅⲉⲗⲓⲟⲛ ϥⲛⲁⲟⲩⲱⲛϩ ⲉⲃⲟⲗ ⲙⲙⲏⲛⲉ ⲙⲡⲉⲓⲟⲩⲣⲟⲧ ϫⲉⲕⲁⲥ ⲉϥⲉⲣ̅ⲁⲛⲁϥ ⲙⲡϥ̅ϫⲟⲉⲓⲥ ⲁⲩⲱ ⲛϥⲧⲙϣⲱⲡⲉ ϩⲁⲟⲩⲕⲓⲛⲇⲩⲛⲟⲥ. ⲧⲁⲓⲧⲉ ⲑⲉ ⲁⲛⲟⲛ ϩⲱⲱⲛ ⲙⲁⲣ̅ⲛϭⲱ ⲉⲛⲙⲏⲛ ⲉⲃⲟⲗ ϩⲛⲧⲁⲥⲕⲏⲥⲓⲥ ⲙⲙⲏⲛⲉ ⲉⲛⲥⲟⲟⲩⲛ ⲙⲡⲁⲓ ϫⲉⲉⲛϣⲁⲛⲁⲙⲉⲗⲉⲓ ⲛ̅ⲛⲟⲩϩⲟⲟⲩ ⲛⲛⲟⲩⲱⲧ ⲛϥⲛⲁⲕⲱ ⲛⲁⲛ ⲉⲃⲟⲗ ⲁⲛ ⲉⲧⲃⲉⲡⲉⲭⲣⲟⲛⲟⲥ ⲛ̅ⲧⲁϥϣⲱⲡⲉⲭ ⲁⲗⲗⲁ ⲉⲧⲃⲉⲧⲉⲛⲁⲙⲉⲗⲓⲁ ϥⲛⲁϭⲱⲛⲧ̅ ⲉⲣⲟⲛ. ⲧⲁⲓ ⲅⲁⲣⲧⲉ ⲑⲉ ⲛⲧⲁⲛⲥⲱⲧⲙ ϩⲛⲛⲓⲉⲍⲉⲕⲓⲏⲗ ⲡⲉⲡⲣⲟⲫⲏⲧⲏⲥ. ⲧⲁⲓ ⲟⲛⲧⲉ ⲑⲉ ⲉⲧⲃⲉⲓⲟⲩⲇⲁⲥ ϫⲉϩⲛⲟⲩϣⲏ ⲛⲛⲟⲩⲱⲧ ⲁϥⲥⲱⲣⲙ ⲙⲡⲉϥϩⲓⲥⲉ ⲧⲏⲣϥ̅ ⲙⲡⲉⲩⲟⲉⲓϣ ⲧⲏⲣ̅ϥ ⲛⲧⲁϥⲟⲩⲉⲓⲛⲉ.

19. ⲙⲁⲣⲛⲁⲙⲁϩⲧⲉϭⲉ ⲟⲩⲛ ⲛⲧⲁⲥⲕⲏⲥⲓⲥ ⲱ ⲛⲁⲙⲉⲣⲁⲧⲉ ⲁⲩⲱ ⲙⲡⲣⲧⲣⲉⲛⲉⲛⲅⲕⲁϭⲉⲓ ⲉⲡⲧⲏⲣϥ. ⲟⲩⲛⲧⲁⲛ ⲅⲁⲣ ⲙⲙⲁⲩ ⲙⲡϫⲟⲉⲓⲥ ⲉϥϯ ⲛ̅ⲧⲟⲟⲧⲛ̅ ϩⲙⲡⲁⲓ ⲕⲁⲧⲁⲑⲉ ⲉⲧ ϥ.ⲣ̀ ⲥⲏϩ ϫⲉⲟⲩⲟⲛ ⲛⲓⲙ ⲉⲧⲟⲩⲱϣ ⲉⲣ̅ⲡⲡⲉⲧⲛⲁⲛⲟⲩϥ ϣⲁⲣⲉⲡⲛⲟⲩⲧⲉ ϯ ⲛ̅ⲧⲟⲟⲧⲟⲩ ⲉϩⲟⲩⲛ ⲉⲡⲁⲅⲁⲑⲟⲛ. ⲉⲧⲃⲉⲡⲧⲙⲣ̅ⲕⲟⲩⲓ ⲇⲉ ⲛϩⲏⲧ ⲛⲁⲛⲟⲩⲥ ⲛⲁⲛ ⲉⲧⲣⲉⲛⲙⲉⲗⲉⲧⲁ ⲙⲡⲉϩⲣⲏⲧⲟⲛ ⲙⲡⲁⲡⲟⲥⲧⲟⲗⲟⲥ ⲉϥϫⲱ ⲙⲙⲟⲥ ϫⲉϯⲙⲟⲩ ⲙⲙⲏⲛⲉ. ⲉϣⲱⲡⲉ ϩⲱⲱⲛ ⲉⲛϣⲁⲛⲣ̅ⲡⲉⲛⲱⲛϩ̅ ⲛ̅ⲧⲉⲓϩⲉ ϩⲱⲥ ⲉⲛⲙⲟⲩ ⲙⲙⲏⲛⲉ ⲛ̅ⲧⲛⲛⲁⲣ̅ⲛⲟⲃⲉ ⲁⲛ. ⲡⲁⲓ ⲇⲉ ⲡⲉϯϫⲱ ⲙⲙⲟϥ ϫⲉⲕⲁⲥ ⲉⲛϣⲁⲛⲧⲱⲟⲩⲛ ⲙⲙⲏⲛⲉ ⲛ̅ⲧⲛϫⲟⲟⲥ ϩⲙⲡⲉⲛϩⲏⲧ ϫⲉⲛⲧⲛⲛⲁϭⲱ ⲁⲛ ⲉⲛⲟⲛϩ̅ ϣⲁⲣⲟⲩϩⲉ ⲙⲡⲟⲟⲩ. ⲁⲩⲱ ⲟⲛ ⲉⲛϣⲁⲛ ⲛ̅ⲕⲟⲧⲕ̅ ⲛⲧⲛϫⲟⲟⲥ ϫⲉⲛⲧⲛ̅ⲛⲁⲧⲱⲟⲩⲛ ⲁⲛϭⲉ ⲉⲛϥⲟⲩⲱⲛϩ̅ ⲣⲱ ⲉⲃⲟⲗ ⲁⲛ ⲛϭⲓⲡⲉⲛⲱⲛϩ̅ ⲉⲩⲱⲡ ⲙⲙⲟϥ ⲙⲙⲏⲛⲉ ϩⲓⲧⲛⲧⲉⲡⲣⲟⲛⲟⲓⲁ ⲙⲡⲛⲟⲩⲧⲉ. ⲉⲛϣⲟⲟⲡϭⲉ ⲛ̅ⲧⲉⲓϩⲉ ⲁⲩⲱ ⲉⲛⲟⲛϩ̅ ⲛⲧⲉⲓϩⲉ ⲉⲓⲉ ⲧⲛⲛⲁⲣ̅ⲛⲟⲃⲉ ⲁⲛⲡⲉ ⲟⲩⲇⲉ ⲛⲧⲛⲛⲁⲉⲡⲉⲑⲩⲙⲉⲓ ⲁⲛ ⲉⲗⲁⲁⲩ ⲟⲩⲇⲉ ⲛ̅ⲧⲛⲛⲁⲥⲱⲟⲩϩ ⲛⲁⲛ ⲉϩⲟⲩⲛ ⲁⲛ ⲉϫⲙ̅ⲡⲕⲁϩⲭ ⲁⲗⲗⲁ ϩⲱⲥ ⲉⲛϭⲱϣⲧ ⲙⲙⲏⲛⲉ ϫⲉⲧⲛⲛⲁⲙⲟⲩ ⲧⲛⲛⲁϣⲱⲡⲉ ⲉⲛⲧⲛ̅ϫⲡⲉⲗⲁⲁⲩ ⲛⲁⲛ ⲁⲛ ⲁⲩⲱ ⲛⲧⲛ̅ⲕⲱ ⲛⲥⲱⲛ ⲛⲛ̅ⲕⲁ ⲛⲓⲙ. ⲧⲉⲡⲉⲑⲩⲙⲓⲁ ⲇⲉ ⲛⲥ̅ϩⲓⲙⲉ ⲏ ϩⲩⲇⲟⲛⲏ ⲉϥϫⲁϩⲙ̅ ⲛⲧⲛⲛⲁⲁⲙⲁϩⲧⲉ ⲙⲙⲟⲟⲩ ⲁⲛ ⲉⲡⲧⲏⲣϥ̅ ⲁⲩⲱ ⲛⲧⲛⲛⲁϭⲟⲗϫⲛ̅ ⲙⲙⲟⲟⲩ ⲁⲛⲭ ⲁⲗⲗⲁ ⲧⲛ̅ⲛⲁⲕⲧⲟⲟⲩ ⲉⲃⲟⲗ ⲙⲙⲟⲛ ϩⲱⲥ ⲉⲩⲛⲁⲟⲩⲉⲓⲛⲉ. ⲉⲛⲁⲅⲱⲛⲓⲍⲉ ⲛⲟⲩⲟⲉⲓϣ ⲛⲓⲙ ⲁⲩⲱ ⲉⲛϭⲱϣⲧ ϩⲏⲧϥ̅ ⲙⲡⲉϩⲟⲟⲩ ⲛⲧⲉⲕⲣⲓⲥⲓⲥ . ⲛⲟⲩⲟⲉⲓϣ ⲅⲁⲣ ⲛⲓⲙ ⲧⲛⲟϭ ⲛϩⲟⲧⲉ ⲡⲁⲅⲱⲛ ⲛⲛ̅ⲃⲁⲥⲁⲛⲟⲥ ϣⲁϥⲃⲱⲗ ⲉⲃⲟⲗ ⲙⲡⲥⲁ ⲛⲛ̅ϩⲩⲇⲟⲛⲏ ⲁⲩⲱ ⲟⲛ ϣⲁϥⲧⲁϩⲟ ⲉⲣⲁⲧⲥ̅ ⲛ̅ⲧⲉⲯⲩⲭⲏ ⲉⲥⲟ ⲛⲁⲧⲣⲓⲕⲉ.

20. ⲟⲩⲕⲟⲩⲛ ⲉⲛⲁⲣⲭⲉⲓ ⲁⲩⲱ ⲉⲛⲁϩⲉⲣⲁⲧⲛ ϩⲛⲧⲉϩⲓⲏ ⲛⲧⲁⲣⲉⲧⲏ ⲙⲁⲣⲉⲛⲡⲱⲣϣ̅ ⲙⲙⲟⲛ ⲛϩⲟⲩⲟ ⲉⲛⲁⲑⲏ ϫⲉⲕⲁⲥ ⲉⲛⲛⲁⲡⲱϩ ⲉⲡϣⲉⲓ ⲉⲧⲛⲁⲛⲟⲩϥ. ⲁⲩⲱ ⲙⲡⲣ̅ⲧⲣⲉⲗⲁⲁⲩ ⲕⲟⲧϥ̅ ⲉⲡⲁϩⲟⲩ ⲛⲑⲉ ⲛ̅ⲧⲉⲥϩⲓⲙⲉ ⲛⲗⲱⲧ ϫⲉⲁⲡϫⲟⲉⲓⲥ ϫⲟⲟⲥ ϫⲉⲙⲉⲣⲉⲗⲁⲁⲩ ⲧⲁⲗⲉⲧⲟⲟⲧϥ̅ ⲉϫⲛⲟⲩϩⲃ̅ⲃⲉ ⲛϥ̅ⲕⲟⲧϥ̅ ⲉⲡⲁϩⲟⲩ ⲛϥ̅ⲥⲟⲟⲩⲧⲛ̅ ⲉⲧⲙⲛⲧⲉⲣⲟ ⲙⲡⲛⲟⲩⲧⲉ. ⲡⲉⲓⲕⲟⲧϥϭⲉ ⲉⲡⲁϩⲟⲩ ⲛ̅ⲕⲉⲗⲁⲁⲩ ⲁⲛⲡⲉ ⲛⲥⲁⲧⲣⲉⲡⲣⲱⲙⲉ ⲣ̅ϩⲧⲏϥ ⲛϥ̅ⲙⲉⲉⲩⲉ ⲉⲛⲁⲡⲕⲟⲥⲙⲟⲥ. ⲙⲡⲣ̅ⲣ̅ϩⲟⲧⲉ ⲉⲧⲉⲧⲛⲥⲱⲧⲙ̅ ⲉⲧⲃⲉⲧⲁⲣⲉⲧⲏ ⲟⲩⲇⲉ ⲙⲡⲣ̅ⲣ̅ϣⲡⲏⲣⲉ ⲉⲧⲃⲉⲡⲣⲁⲛ. ⲛϥⲟⲩⲏⲩ ⲅⲁⲣ ⲙⲙⲟⲛ ⲁⲛ ⲟⲩⲇⲉ ⲛϥⲥⲩⲛϩⲓⲥⲧⲁ ⲁⲛ ⲙⲡⲉⲛⲃⲟⲗⲭ ⲁⲗⲗⲁ ⲉⲣⲉⲡϩⲱⲃ ϣⲟⲟⲡ ϩⲣⲁⲓ ⲛ̅ϩⲏⲧⲛ̅. ⲛϩⲉⲗⲗⲏⲛ ⲙⲉⲛ ϣⲁⲩⲁⲡⲟⲇⲏⲙⲉⲓ ⲁⲩⲱ ϣⲁⲩϫⲓⲟⲟⲣ ⲙⲉⲛ ⲛⲧⲉⲑⲁⲗⲁⲥⲥⲁ ϫⲉⲕⲁⲥ ⲉⲩⲉⲧⲥⲁⲃⲟ ⲉⲥϩⲁⲓ. ⲁⲛⲟⲛ ⲇⲉ ⲛⲧⲛⲣ̅ⲭⲣⲓⲁ ⲁⲛ ⲉⲧⲣⲉⲛⲁⲡⲟⲇⲏⲙⲓ ⲉⲧⲃⲉⲧⲙⲛⲧⲉⲣⲟ ⲛⲙ̅ⲡⲏⲩⲉ ⲟⲩⲇⲉ ⲉϫⲓⲟⲟⲣ ⲛⲧⲉⲑⲁⲗⲁⲥⲥⲁ ⲉⲧⲃⲉⲧⲁⲣⲉⲧⲏ. ⲁⲡϫⲟⲉⲓⲥ ⲅⲁⲣ ϫⲟⲟⲥ ϫⲉⲧⲙⲛⲧⲉⲣⲟ ⲛⲛⲙ̅ⲡⲏⲩⲉ ⲉⲥϩⲙⲡⲉⲧⲛ̅ⲥⲁⲛϩⲟⲩⲛ. ⲟⲩⲕⲟⲩⲛ ⲅⲁⲣ ⲉⲥⲣ̅ⲭⲣⲓⲁ ⲙⲙⲟⲛ ⲙⲙⲁⲧⲉ ⲉⲧⲣⲉⲛⲟⲩⲱϣ ⲉⲧⲃⲉϫⲉⲥϣⲟⲟⲡ ϩⲣⲁⲓ ⲛ̅ϩⲏⲧⲛ. ⲧⲉⲯⲩⲭⲏ ⲅⲁⲣ ⲉⲩⲛ̅ⲧⲁⲥ ⲙⲙⲁⲩ ⲙⲡⲛⲟⲏⲣⲟⲛ ⲛ̅ⲧⲉⲥⲫⲩ ϥ.ⲣ̀ ⲥⲓⲥ ϣⲁⲣⲉⲧⲁⲣⲉⲧⲏ ⲁϩⲉⲣⲁⲧⲥ ⲛ̅ϩⲏⲧⲥ̅ ⲉⲩⲛ̅ⲧⲁⲥ ⲙⲙⲁⲩ ⲛⲧⲉⲥⲫⲩⲥⲓⲥ ϩⲟⲧⲁⲛ ⲉⲥϣⲁⲛϭⲱ ⲛⲑⲉ ⲛⲧⲁⲩⲥⲟⲛⲧⲥ̅ ⲙⲙⲟⲥ. ⲛⲧⲁⲩⲧⲁⲙⲓⲟⲥϭⲉ ⲉⲛⲁⲛⲟⲩⲥ ⲁⲩⲱ ⲉⲥⲥⲟⲩⲧⲱⲛ. ⲉⲧⲃⲉⲡⲁⲓ ⲓⲏⲥⲟⲩ ⲛⲁⲩⲏ ⲁϥϩⲱⲛ ⲉⲧⲟⲟⲧϥ ⲙⲡⲗⲁⲟⲥ ⲉϥϫⲱ ⲙⲙⲟⲥ ϫⲉⲥⲟⲟⲩⲧⲛ̅ ⲛⲛⲉⲧⲛ̅ϩⲏⲧ ϣⲁⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲏⲗ. ⲓⲱϩⲁⲛⲛⲏⲥ ⲇⲉ ϩⲱⲱϥ ⲟⲛ ϫⲉⲥⲟⲟⲩⲧⲛ̅ ⲛ̅ⲛⲉⲧⲛ̅ϩⲓⲟⲟⲩⲉ. ϩⲙⲡⲧⲣⲉⲧⲉⲯⲩⲭⲏ ⲅⲁⲣ ϣⲱⲡⲉ ⲉⲥⲥⲟⲩⲧⲱⲛ ⲡⲁⲓⲡⲉ ⲡⲛⲟⲏⲣⲟⲛ ⲛ̅ⲧⲉⲥⲫⲩⲥⲓⲥ ⲛ̅ⲑⲉ ⲛ̅ⲧⲁⲩⲥⲟⲛⲧⲥ̅ ⲙⲙⲟⲥ. ⲡⲁⲗⲓⲛ ⲟⲛ ⲉⲥϣⲁⲛⲣⲓⲕⲉ ⲁⲩⲱ ⲛ̅ⲥϣⲱⲡⲉ ϩⲛⲟⲩϣⲓⲃⲉ ⲙⲡⲉⲥⲕⲁⲧⲁⲫⲩⲥⲓⲥ ⲧⲟⲧⲉ ϣⲁⲩϫⲟⲟⲥ ϫⲉⲧⲕⲁⲕⲓⲁⲧⲉ ⲛⲧⲉⲯⲩⲭⲏ. ⲟⲩⲕⲟⲩⲛ ⲙⲡϩⲱⲃ ⲙⲟϩⲕ̅ ⲁⲛ. ⲉⲛϣⲁⲛϭⲱ ⲛⲑⲉ ⲛⲧⲁⲩⲥⲟⲛⲧⲛ ⲙⲙⲟⲥ ⲉⲓⲉ ⲧⲛ̅ϣⲟⲟⲡ ϩⲛⲧⲁⲣⲉⲧⲏ. ⲉⲛϣⲁⲛⲙⲉⲉⲩⲉ ⲇⲉ ⲉⲡⲡⲉⲑⲟⲟⲩ ⲉⲓⲉ ⲥⲉⲛⲁϯϩⲁⲡ ⲉⲣⲟⲛ ϩⲱⲥ ⲣⲉϥϩⲟⲟⲩ. ⲁⲩⲱ ⲉϣϫⲉ ⲉⲣⲉⲡϩⲱⲃ ϣⲟⲟⲡ ⲉⲧⲣⲉⲛϫⲡⲟϥ ⲛⲁⲛ ϩⲓⲃⲟⲗ ⲛⲉϥⲛⲁϣⲱⲡⲉ ⲉϥⲙⲟϩⲕ̅ ⲛⲁⲙⲉⲡⲉ. ⲉϣϫⲉ ⲉϥϣⲟⲟⲡϭⲉ ϩⲣⲁⲓ ⲛϩⲏⲧⲛ̅ ⲉⲓⲉ ⲙⲁⲣⲉⲛⲣⲟⲉⲓⲥ ⲉⲣⲟⲛ ⲉⲃⲟⲗ ϩⲛⲛⲉⲛⲙⲉⲉⲩⲉ ⲛϩⲏⲧ ⲉⲧϫⲁϩⲙ̅ ⲁⲩⲱ ϩⲱⲥ ⲉⲁⲛϫⲓ ⲛⲛⲟⲩⲡⲁⲣⲁⲑⲏⲕⲏ ⲙⲁⲣⲉⲛϩⲁⲣⲉϩ ⲉⲧⲉⲛⲯⲩⲭⲏ ⲙⲡⲉⲛϫⲟⲉⲓⲥ ϫⲉⲕⲁⲥ ⲛⲧⲟϥ ⲉϥⲉⲥⲟⲩⲉⲛⲡⲉϥⲧⲁⲙⲓⲟ ⲉⲧⲉⲧⲉⲯⲩⲭⲏⲧⲉ ⲉⲥϣⲟⲟⲡ ⲛⲑⲉ ⲛⲧⲁϥⲧⲁⲙⲓⲟⲥ ⲙⲙⲟⲥ.

21. ⲙⲁⲣⲉⲡⲁⲅⲱⲛ ϣⲱⲡⲉ ⲛⲁⲛ ϫⲉⲕⲁⲥ ⲛⲛⲉⲡϭⲱⲛⲧ ⲉⲣϫⲟⲉⲓⲥ ⲉⲣⲟⲛ ⲁⲩⲱ ⲧⲉⲡⲉⲑⲩⲙⲓⲁ ⲛⲥ̅ⲧⲙ̅ⲁⲙⲁϩⲧⲉ ⲙⲙⲟⲛ. ϥⲥⲏϩ ⲅⲁⲣ ϫⲉⲧⲟⲣⲅⲏ ⲙⲡⲣⲱⲙⲉ ⲙⲉⲥⲣ̅ϩⲱⲃ ⲉⲧⲇⲓⲕⲁⲓⲟⲥⲩ ϥ.ⲫ̀ ⲛⲏ ⲙⲡⲛⲟⲩⲧⲉ. ⲧⲉⲡⲉⲑⲩⲙⲓⲁ ⲇⲉ ⲉⲁⲥⲱ ϣⲁⲥϫⲡⲟ ⲙⲡⲛⲟⲃⲉ. ⲡⲛⲟⲃⲉ ⲇⲉ ⲉⲁϥϫⲱⲕ ⲉⲃⲟⲗ ϣⲁϥⲙⲓⲥⲉ ⲙⲡⲙⲟⲩ. ⲉⲛⲡⲟⲗⲓⲧⲉⲩⲉ ⲇⲉ ⲛⲧⲉⲓϩⲉ ⲙⲁⲣⲉⲛⲣⲟⲉⲓⲥ ϩⲛⲟⲩⲱⲣϫ ⲕⲁⲧⲁⲑⲉ ⲉⲧⲥⲏϩ ϫⲉϩⲛϩⲁⲣⲉϩ ⲛⲓⲙ ϩⲁⲣⲉϩ ⲉⲡⲉⲕϩⲏⲧ ⲉϥⲟⲩⲁⲁⲃ. ⲟⲩⲛⲧⲁⲛ ⲅⲁⲣ ⲙⲙⲁⲩ ⲛϩⲉⲛϫⲁϫⲉ ⲉⲧⲉⲛⲇⲁⲓⲙⲱⲛⲓⲟⲛⲛⲉ ⲁⲩⲱ ⲉⲣⲉⲡⲉⲛⲙⲓϣⲉ ϣⲟⲟⲡ ⲛⲁⲛ ⲉϩⲟⲩⲛ ⲉⲣⲟⲟⲩ ⲕⲁⲧⲁⲑⲉ ⲛⲧⲁⲡⲁⲡⲟⲥⲧⲟⲗⲟⲥ ϫⲟⲟⲥ ϫⲉⲉⲣⲉⲡⲉⲛⲙⲓϣⲉ ϣⲟⲟⲡ ⲛⲁⲛ ⲁⲛ ⲟⲩⲃⲉⲥⲛⲟϥ. ⲁⲗⲗⲁ ⲟⲩⲃⲉⲛⲁⲣⲭⲏ ⲙⲛⲛⲉⲝⲟⲩⲥⲓⲁ ⲙⲛⲛⲕⲟⲥⲙⲟⲧⲱⲕⲣⲁⲧⲱⲣ ⲙⲡⲕⲁⲕⲉ ⲙⲛⲛⲉⲡⲛ̅ⲓⲕⲟⲛ ⲛⲧⲡⲟⲛⲏⲣⲓⲁ ⲉⲧϩⲁⲙⲡⲏⲩⲉ. ⲟⲩⲛⲟϭ ⲙⲉⲛⲡⲉ ⲡⲙⲏⲏϣⲉ ⲉⲧϩⲙⲡⲁⲏⲣ ⲁⲩⲱ ⲛⲥⲉⲟⲩⲏⲩ ⲙⲙⲟⲛ ⲁⲛ. ⲟⲩⲛⲟϭ ⲇⲉ ⲛϯⲁⲫⲟⲣⲁ ⲁⲩⲱ ⲛϣⲓⲃⲉ ϣⲟⲟⲡ ⲛϩⲏⲧⲟⲩ. ⲁⲩⲱ ⲉⲧⲃⲉⲧⲉⲩⲫⲩⲥⲓⲥ ⲙⲛⲧⲉⲩⲇⲓⲁⲫⲟⲣⲁ ⲡϣⲁϫⲉ ⲟϣ ⲉⲡⲉϩⲟⲩⲟ ⲉⲧⲁⲩⲟϥ. ⲡⲉⲓϣⲁϫⲉ ⲇⲉ ⲉⲓϣⲁϫⲉ ⲉⲣⲟϥ ⲡⲁϩⲉⲛⲕⲟⲟⲩⲉⲡⲉ ⲉⲩϫⲟⲥⲉ ⲉⲣⲟⲛ. ⲡⲉⲧϯϩⲧⲟⲣ ⲇⲉ ⲉⲣⲟⲛ ⲧⲉⲛⲟⲩ ⲟⲩⲁⲛⲁⲅⲕⲁⲓⲟⲛ ⲛⲁⲛⲡⲉ ⲉⲧⲣⲉⲛⲉⲓⲙⲉ ⲉⲙⲁⲧⲉ ⲉⲛⲉⲩⲕⲟⲧⲥ̅ ⲉⲧⲟⲩⲉⲓⲣⲉ ⲙⲙⲟⲟⲩ ⲉϩⲟⲩⲛ ⲉⲣⲟⲛ.

22. ⲛϣⲟⲣ̅ⲡ ⲙⲉⲛ ⲅⲁⲣ ⲧⲛⲉⲓⲙⲉ ⲉⲡⲁⲓ ϫⲉⲛⲇⲁⲓⲙⲱⲛ ⲉⲧⲟⲩⲙⲟⲩⲧⲉ ⲉⲣⲟⲟⲩ ϫⲉⲇⲁⲓⲙⲱⲛⲓⲟⲛ ⲉⲃⲟⲗ ⲁⲛ ϫⲉⲛⲧⲁⲩⲥⲟⲛⲧⲟⲩ ⲛ̅ⲧⲉⲓϩⲉ. ⲙⲙⲟⲛ ⲙⲉ ⲅⲉⲛⲟⲧⲟ. ⲙⲡⲉⲡⲛⲟⲩⲧⲉ ⲅⲁⲣ ⲥⲉⲛⲧ̅ⲗⲁⲁⲩ ⲉⲛⲉϩⲭ ⲁⲗⲗⲁ ⲛⲧⲟⲟⲩ ϩⲱⲟⲩ ⲟⲛ ⲁϥⲥⲟⲛⲧⲟⲩ ⲉⲛⲁⲛⲟⲩⲟⲩ. ⲛⲧⲉⲣⲟⲩϩⲉ ⲇⲉ ⲉⲃⲟⲗ ϥ.ⲣ̀ ϩⲙⲡⲙⲉⲉⲩⲉ ⲛⲙ̅ⲡⲏⲩⲉ ⲧⲟⲧⲉ ⲗⲟⲓⲡⲟⲛ ⲁⲩϣⲱⲡⲉ ⲉⲩⲥⲕⲣ̅ⲕⲱⲣ ϩⲓϫⲙ̅ⲡⲕⲁϩ. ⲛϩⲉⲗⲗⲏⲛ ⲙⲉⲛ ⲁⲩⲁⲡⲁⲧⲁ ⲙⲙⲟⲟⲩ ϩⲛϩⲉⲛⲫⲁⲛⲧⲁⲥⲓⲁ. ⲁⲛⲟⲛ ⲇⲉ ⲛⲉⲭⲣⲓⲥϯⲁⲛⲟⲥ ⲥⲉⲫⲑⲟⲛⲉⲓ̅ ⲉⲣⲟⲛ ⲥⲉⲕⲓⲙ ⲉⲛ̅ⲕⲁ ⲛⲓⲙ ⲉϩⲟⲩⲛ ⲉⲧⲉϩⲓⲏ ⲉⲧⲙ̅ⲧⲣⲉⲛⲃⲱⲕ ⲉϩⲣⲁⲓ ⲉⲛⲙⲡⲏⲩⲉ ϫⲉⲕⲁⲥ ⲡⲙⲁ ⲛⲧⲁⲩϩⲉ ⲉⲃⲟⲗ ⲛϩⲏⲧϥ ⲛⲛⲉⲛⲃⲱⲕ ⲉϩⲟⲩⲛ ⲉⲣⲟϥ. ⲉⲧⲃⲉⲡⲁⲓ ⲧⲛⲣ̅ⲭⲣⲓⲁ ⲛϩⲉⲛⲛⲟϭ ⲛⲛⲁⲥⲕⲏⲥⲓⲥ ⲙⲛϩⲉⲛⲛⲟϭ ⲛϣⲗⲏⲗ ϫⲉⲕⲁⲥ ⲉⲣⲉⲡⲟⲩⲁ ⲡⲟⲩⲁ ⲛⲁϫⲓ ⲛⲛⲟⲩⲡⲣⲟⲕⲟⲡⲏ ⲙⲛⲟⲩⲭⲁⲣⲓⲥⲙⲁ ⲙⲛⲟⲩⲇⲓⲁⲕⲣⲏⲥⲓⲥ ⲙⲡⲛⲁ̅ ⲛϥ̅ϭⲙϭⲟⲙ ⲉⲉⲓⲙⲉ ⲉⲛⲉⲧϣⲟⲟⲡ ⲙⲙⲟⲟⲩ ϫⲉⲁϣ ⲙⲉⲛ ⲛ̅ϩⲏⲧⲟⲩ ⲛⲉⲑⲟⲟⲩ ⲛⲛⲟⲩϣⲏⲙ ⲁⲩⲱ ϫⲉⲁϣ ⲛⲉⲑⲟⲟⲩ ⲉⲧⲙⲙⲁⲩ ⲁⲩⲱ ϫⲉⲉⲣⲉⲧⲉⲥⲡⲟⲩⲇⲏ ⲙⲡⲟⲩⲁ ⲡⲟⲩⲁ ⲉⲧⲙⲙⲁⲩ ϣⲟⲟⲡ ⲉϩⲟⲩⲛ ⲉⲁϣ ⲛ̅ϩⲱⲃ ⲁⲩⲱ ϫⲉⲛⲁϣ ⲛ̅ϩⲉ ⲉϣⲁⲩϫⲣⲟ ⲉⲡⲟⲩⲁ ⲡⲟⲩⲁ ⲙⲙⲟⲟⲩ ⲛ̅ⲥⲉⲛⲟϫϥ ⲉⲃⲟⲗ. ⲥⲉⲟϣ ⲅⲁⲣ ⲉⲙⲁⲧⲉ ⲛϭⲓⲛⲉⲩⲡⲁⲛⲟⲩⲣⲅⲓⲁ. ⲡⲙⲁⲕⲁⲣⲓⲟⲥϭⲉ ⲟⲩⲛ ⲛ̅ⲛⲁⲡⲟⲥⲧⲟⲗⲟⲥ ⲙⲛⲛⲉⲧⲉⲓⲛⲉ ⲙⲙⲟϥ ⲛⲉⲩⲥⲟⲟⲩⲛ ⲛⲛⲁⲓⲡⲉ ⲉⲩϫⲱ ⲅⲁⲣ ⲙⲙⲟⲥ ϫⲉⲛⲧⲛ̅ⲟ ⲁⲛ ⲛⲛⲁⲧⲥⲟⲟⲩⲛ ⲛⲛⲉϥⲙⲉⲉⲩⲉ. ⲁⲛⲟⲛ ⲇⲉ ϩⲱⲱⲛ ⲉⲃⲟⲗ ϩⲛⲛⲉⲛⲧⲁⲛϫⲓⲡⲓⲣⲁ ⲙⲙⲟⲟⲩ ⲉⲃⲟⲗ ϩⲓⲧⲟⲟⲧⲟⲩ ϣϣⲉ ⲉⲣⲟⲛ ⲉⲧⲁϩⲉⲛⲉⲛⲉⲣⲏⲩ ⲉⲣⲁⲧⲟⲩ ⲛϩⲏⲧⲟⲩ. ⲁⲛⲟⲕ ⲇⲉ ⲛⲉⲛⲧⲁⲓϫⲓⲡⲉⲓⲣⲁ ⲙⲙⲟⲟⲩ ⲁⲡⲟⲙⲉⲣⲟⲩⲥ ϯϫⲱ ⲙⲙⲟⲟⲩ ⲉⲣⲱⲧⲛ ϩⲱⲧⲧⲏⲩⲧⲛ̅ ϩⲱⲥ ϣⲏⲣⲉ.

23. ⲛⲁⲓ ⲙⲉⲛ ⲉⲩϣⲁⲛⲛⲁⲩⲉⲟⲩⲟⲛ ⲛⲓⲙ ⲉⲩⲫⲓⲗⲟⲡⲟⲛⲉⲓ ⲁⲩⲱ ⲉⲩⲡⲣⲟⲕⲟⲡⲧⲉ ⲛϩⲟⲩⲟ ⲇⲉ ⲙ ϥ.ⲫ̀ ⲙⲟⲛⲁⲭⲟⲥ ⲛ̅ϣⲟⲣⲡ.ⲙⲉⲛ ϣⲁⲩⲧⲟⲗⲱⲙⲁ ⲉϩⲟⲩⲛ ⲉⲣⲟⲟⲩ ⲉⲩⲡⲉⲓⲣⲁⲍⲉ ⲙⲙⲟⲟⲩ ⲉⲧⲣⲉⲩⲕⲱ ⲛϩⲉⲛⲥⲕⲁⲛⲇⲁⲗⲟⲛ ⲉϩⲟⲩⲛ ⲉⲣⲟⲟⲩ ϩⲓⲛⲉⲩϩⲓⲟⲟⲩⲉ. ⲛⲉⲩⲥⲕⲁⲛⲇⲁⲗⲟⲛ ⲇⲉⲛⲉ ⲛⲙⲉⲉⲩⲉ ⲉⲧϫⲁϩⲙ̅. ⲛϣϣⲉϭⲉ ⲁⲛ ⲉⲣⲟⲛ ⲉⲣ̅ϩⲟⲧⲉ ϩⲏⲧⲟⲩ ⲛⲛⲉⲧⲟⲩⲛⲟⲩϫⲉ ⲙⲙⲟⲟⲩ ⲉϩⲟⲩⲛ ⲉⲣⲟⲛ. ϣⲁⲣⲉⲛⲉⲧⲙⲙⲁⲩ ⲅⲁⲣ ϩⲉ ⲉⲡⲉⲥⲏⲧ ⲛⲧⲉⲩⲛⲟⲩ ϩⲓⲧⲙ̅ⲡⲉϣⲗⲏⲗ ⲙⲛⲧⲛⲏⲥϯⲁ ⲁⲩⲱ ⲧⲡⲓⲥⲧⲓⲥ ⲉϩⲟⲩⲛ ⲉⲡϫⲟⲉⲓⲥ. ⲁⲗⲗⲁ ⲉⲩϣⲁⲛϩⲉ ⲟⲛ ⲙⲉⲩⲥⲁϩⲱⲟⲩ ⲉⲃⲟⲗⲭ ⲁⲗⲗⲁ ϣⲁⲩϯⲡⲉⲩⲟⲩⲟⲓ ϩⲛⲟⲩⲕⲣⲟϥ ⲙⲛⲟⲩⲙⲛⲧ̅ⲥⲁⲛⲕⲟⲧⲥ. ⲉϣⲱⲡⲉ ⲅⲁⲣ ⲙⲉⲩⲉϣϭⲙϭⲟⲙ ⲉⲁⲡⲁⲧⲁ ⲛ̅ⲧⲉ ⲯⲩⲭⲏ ϩⲙⲡⲉⲧⲟⲩⲟⲛϩ̅ ⲉⲃⲟⲗ ϩⲓⲧⲛⲟⲩϩⲩⲇⲟⲛⲏ ⲙⲛⲟⲩϫⲱϩⲙ ϣⲁⲩⲧⲱⲟⲩⲛ ⲟⲛ ⲉϩⲣⲁⲓ ⲉϫⲱⲥ ϩⲛⲕⲉⲥⲙⲟⲧ ⲁⲩⲱ ϣⲁⲩⲡⲗⲁⲥⲥⲉ ⲛϩⲉⲛⲫⲁⲛⲧⲁⲥⲓⲁ ϫⲉⲕⲁⲥ ⲉⲩⲉⲣ̅ϩⲟⲧⲉ ⲉⲩϣⲓⲃⲉ ⲙⲡⲉⲩⲥⲙⲟⲧ ⲁⲩⲱ ⲉⲩⲧⲟⲛⲧⲛ ⲙⲙⲟⲟⲩ ⲉⲛⲉϩⲓⲟⲙⲉ ⲙⲛϩⲉⲛⲑⲏⲣⲓⲟⲛ ⲙⲛϩⲉⲛϫⲁⲧϥⲉ ⲙⲛϩⲉⲛϭⲟⲧ ⲛⲥⲱⲙⲁ ⲁⲩⲱ ϩⲉⲛⲙⲏⲏϣⲉ ⲙⲙⲁⲧⲟⲓ. ⲁⲗⲗⲁ ⲛϣϣⲉ ⲁⲛ ⲉⲡⲧⲏⲣϥ̅ ⲉⲣ̅ϩⲟⲧⲉ ϩⲏⲧⲟⲩ ⲛⲛⲉⲩⲫⲁⲛⲧⲁⲥⲓⲁ. ϩⲉⲛⲗⲁⲁⲩ ⲅⲁⲣⲛⲉ ⲁⲩⲱ ϣⲁⲩⲃⲱⲕ ⲉⲡⲧⲁⲕⲟ ϩⲛⲟⲩϭⲉⲡⲏ ⲛϩⲟⲩⲟ ⲇⲉ ⲉⲣϣⲁⲛⲟⲩⲁ ⲕⲧⲟ ⲉⲣⲟϥ ⲛⲛⲟⲩⲥⲟⲃⲧ̅ ϩⲓⲧⲛⲧⲡⲓⲥⲧⲓⲥ ⲙⲛⲡⲙⲁⲉⲓⲛ ⲙⲡⲉⲥⲧⲁⲩⲣⲟⲥ. ϩⲉⲛⲧⲟⲗⲙⲏⲣⲟⲥⲛⲉ ⲉⲙⲁⲧⲉ ⲁⲩⲱ ϩⲉⲛⲁⲧϣⲓⲡⲉⲛⲉ. ⲉⲩϣⲁⲛϫⲣⲟ ⲅⲁⲣ ⲉⲣⲟⲟⲩ ⲛⲧⲉⲓϩⲉ ⲡⲁⲗⲓⲛ ⲟⲛ ϣⲁⲩϩⲓⲧⲟⲟⲧⲟⲩ ⲉⲕⲉⲥⲙⲟⲧ. ϣⲁⲩⲇⲓⲁⲕⲣⲓⲛⲉ ϩⲱⲥ ⲉⲩϫⲱ. ⲛⲛⲉⲧⲛⲁϣⲱⲡⲉ ϥ.ⲣ̀ ⲙⲛⲛⲥⲁϩⲉⲛϩⲟⲟⲩ. ϣⲁⲩⲟⲩⲱⲛϩ̅ ⲉⲃⲟⲗ ⲉⲩϫⲟⲥⲉ ϩⲱⲥ ⲉⲩⲡⲏϩ ϣⲁⲧⲙⲉⲗⲱⲧ ⲉⲩⲡⲟϫⲧ ϩⲛⲧⲉⲩϭⲟⲧ ϫⲉⲕⲁⲥ ⲛⲉⲧⲙ̅ⲡⲟⲩⲉϣϭⲙϭⲟⲙ ⲉⲁⲡⲁⲧⲁ ⲙⲙⲟⲟⲩ ϩⲛⲛⲉⲩⲙⲉⲉⲩⲉ ⲛϩⲏⲧ ⲉⲩⲉⲉⲓⲙⲉ ϫⲉⲛⲥⲉⲛⲁⲉϣⲧⲱⲣⲡ̅ ⲙⲙⲟⲟⲩ ⲁⲛ ϩⲛⲛⲉⲓⲫⲁⲛⲧⲁⲥⲓⲁ ⲛ̅ⲧⲉⲓⲙⲓⲛⲉ. ⲉϣⲱⲡⲉ ⲇⲉ ⲟⲛ ⲉⲩϣⲁⲛϩⲉ ⲉⲧⲉⲯⲩⲭⲏ ⲉⲥⲟⲣϫ̅ ϩⲛⲧⲡⲓⲥⲧⲓⲥ ⲙⲛⲑⲉⲗⲡⲓⲥ ⲙ̅ⲡⲉⲩϩⲏⲧ ⲗⲟⲓⲡⲟⲛ ϣⲁⲩⲉⲓⲛⲉ ⲛⲙⲙⲁⲩ ⲙ̅ⲡⲉⲩⲁⲣⲭⲱⲛ.

24. ⲁⲩⲱ ⲁϥϫⲟⲟⲥ ϫⲉϣⲁⲩⲟⲩⲱⲛϩ ⲉⲃⲟⲗ ⲛ̅ϩⲁϩ ⲛⲥⲟⲡ ⲛ̅ⲧⲉⲓⲙⲓⲛⲉ ⲛⲑⲉ ⲛⲧⲁⲡⲛⲟⲩⲧⲉ ⲟⲩⲉⲛϩ̅ⲡⲇⲓⲁⲃⲟⲗⲟⲥ ⲉⲃⲟⲗ ⲛⲓⲱⲃ ⲉϥϫⲱ ⲙⲙⲟⲥ ϫⲉⲉⲣⲉⲛⲉϥⲃⲁⲗ ⲟ ⲛⲑⲉ ⲙⲡⲉⲓⲛⲉ ⲙⲡⲥⲟⲩⲛ̅ⲉϩⲧⲟⲟⲩⲉ. ϩⲉⲛⲗⲁⲙⲡⲁⲥ ⲛⲕⲱϩⲧ ⲛⲉⲧⲛⲏⲩ ⲉⲃⲟⲗ ϩⲛⲣⲱϥ ⲉⲣⲉϩⲉⲛⲁⲥⲭⲁⲣⲁ ⲛⲕⲱϩⲧ ⲛⲏⲩ ⲉⲃⲟⲗ ϩⲛⲣⲱϥ. ⲟⲩⲕⲁⲡⲛⲟⲥ ⲛ̅ϩⲣⲱ ⲉⲥⲙⲟⲩϩ ϩⲛϩⲉⲛϫⲃⲥ̅ ⲛⲕⲱϩⲧⲛⲉ ⲛ̅ⲧⲉϥⲯⲩⲭⲏ. ⲟⲩⲛⲟⲩϣⲁϩ ⲛⲕⲱϩⲧ ⲛⲏⲩ ⲉⲃⲟⲗ ϩⲛⲣⲱϥ. ⲉϥⲟⲩⲱⲛϩ̅ϭⲉ ⲙⲙⲟϥ ⲉⲃⲟⲗ ⲛⲧⲉⲓϩⲉ ⲛϭⲓⲡⲁⲣⲭⲱⲛ ⲛⲛⲉⲛⲇⲁⲓⲙⲱⲛⲓⲟⲛ ⲉϥϯϩⲟⲧⲉ ⲕⲁⲧⲁⲑⲉ ⲛ̅ⲧⲁⲓϣⲣⲡ̅ϫⲟⲟⲥ. ⲛⲉϥϯϩⲟⲧⲉ ⲛϭⲓⲡⲕⲁⲕⲟⲩⲣⲅⲟⲥ ⲉⲧⲙⲙⲁⲩ ⲉϥϫⲱ ⲙⲙⲟⲥ ϩⲛϩⲉⲛⲛⲟϭ ⲛϣⲁϫⲉ ⲕⲁⲧⲁⲑⲉ ⲛⲧⲁⲡϫⲟⲉⲓⲥ ⲧⲣⲉϥⲟⲩⲱⲛϩ ⲉⲃⲟⲗ ⲛⲓⲱⲃ ⲉϥϫⲱ ⲙⲙⲟⲥ ϫⲉⲁϥⲉⲡⲡⲉⲛⲓⲡⲉ ⲙⲡⲧⲱϩ ⲡϩⲟⲙⲛ̅ⲧ ⲛⲑⲉ ⲛⲛⲟⲩϣⲉ ⲉϥⲟⲩⲟϣϥ̅ ⲧⲉⲑⲁⲗⲗⲁⲥⲥⲁ: ⲛⲑⲉ ⲛⲟⲩⲉⲓⲁⲗ ⲁⲩⲱ ⲡϣⲓⲕ ⲙⲡⲛⲟⲩⲛ ⲛⲑⲉ ⲛⲛⲟⲩⲁⲓⲭⲙⲁⲗⲱⲥⲓⲁ. ⲁϥⲕⲱ ⲛⲁϥ ⲙⲡⲛⲟⲩⲛ ⲙⲙⲁⲛ ϥ.ⲫ̀ ⲙⲟⲟϣⲉ. ⲉⲁϥϫⲟⲟⲥ ⲟⲛ ⲛϭⲓⲡϫⲁϫⲉ ϫⲉϯⲛⲁⲡⲱⲧ ⲧⲁⲧⲁϩⲟⲟⲩ ⲁⲩⲱ ⲧⲟⲓⲕⲟⲩⲙⲉⲛⲏ ⲧⲏⲣⲥ ϯⲛⲁϥⲓⲧⲥ̅ ϩⲛⲧⲁϭⲓϫ. ⲛ̅ⲑⲉ ⲛⲛⲟⲩⲙⲁϩ ⲁⲩⲱ ⲛⲑⲉ ⲛϩⲉⲛⲥⲟⲟⲩϩⲉ ⲉⲁⲩⲗⲟ ϩⲁⲣⲟⲟⲩ. ⲉϣⲁϥϫⲉⲛⲁⲓ ⲅⲁⲣ ϩⲛⲟⲩⲧⲟⲗⲙⲏⲣⲓⲁ ⲙⲛⲟⲩⲙⲛⲧϣⲟⲩϣⲟ ⲛ̅ⲧⲉⲓⲙⲓⲛⲉ ⲉϥⲁⲡⲉⲓⲗⲏ ⲙⲉϣⲁⲕ ⲥⲉⲛⲁϣⲣ̅ⲗⲁⲁⲩ ⲛⲛ̅ⲣⲉϥϣⲙϣⲉⲛⲟⲩⲧⲉ. ⲁⲗⲗⲁ ϩⲛⲛⲉⲓⲕⲉⲥⲙⲟⲧ ⲛⲧⲉⲓⲙⲓⲛⲉ ⲛϣϣⲉ ⲁⲛ ⲉⲣ̅ϩⲟⲧⲉ ϩⲏⲧⲟⲩ ⲛⲛⲉⲩⲫⲁⲛⲧⲁⲥⲓⲁ. ⲉⲩϫⲓϭⲟⲗ ⲅⲁⲣ ⲁⲩⲱ ⲛⲥⲉϫⲉⲗⲁⲁⲩ ⲙⲙⲉ ⲁⲛ. ⲉⲧⲃⲉⲡⲁⲓ ⲉϥⲧⲁⲩⲟ ⲛⲛⲁⲓ ⲉϥⲟ ⲛϫⲁⲥⲓϩⲏⲧ ⲁⲩⲥⲟⲕϥ ϩⲓⲧⲙⲡⲥⲱⲧⲏⲣ ⲛⲑⲉ ⲛⲛⲟⲩϩⲟϥ ϩⲛⲟⲩⲟⲓⲙⲉ. ⲉⲁϥϫⲓ ⲛⲛⲟⲩⲡⲟⲣⲃⲓⲁ ϩⲙⲡⲕⲱⲧⲉ ⲛϣⲁⲛⲧϥ ⲛⲑⲉ ⲛⲛⲟⲩⲧⲣⲁⲡⲉⲧⲏⲥ ⲉⲁⲩϣⲟⲙϫϥ̅ ⲛⲛⲟⲩϩⲁⲗⲁⲕ ⲉϥⲙⲏⲣ ⲉⲧⲟⲟⲧϥ ⲙⲡϫⲟⲉⲓⲥ ⲛ̅ⲑⲉ ⲛⲛⲟⲩϫⲁϫ ⲉⲧⲣⲉⲩⲥⲱⲃⲉ ⲙⲙⲟϥ ⲉⲃⲟⲗ ϩⲓⲧⲟⲟⲧϥ̅. ⲁⲩⲕⲁⲁϥ ⲙⲛⲛⲛⲇⲁⲓⲙⲱⲛⲓⲟⲛ ⲉⲧⲛⲙⲙⲁϥ ⲛⲑⲉ ⲛ̅ⲛϩⲟϥ ⲙⲛϩⲉⲛⲟⲩⲟⲟϩⲉ ⲉⲧⲣⲉⲛϩⲱⲙ ⲉϩⲣⲁⲓ ⲉϫⲱⲟⲩ. ⲁⲛⲟⲛ ⲇⲉ ⲛⲉⲭⲣⲏⲥϯⲁⲛⲟⲥ ϣϣⲉ ⲉⲣⲟⲛ ⲉⲧⲣⲉⲛⲡⲟⲗⲩⲧⲉⲩⲉ ⲟⲩⲃⲏϥ. ⲡⲉⲧϫⲱ ⲅⲁⲣ ⲙⲙⲟⲥ ϫⲉϯⲛⲁⲃⲱⲧⲉ ⲉⲃⲟⲗ ⲛⲑⲁⲗⲁⲥⲥⲁ ⲁⲩⲱ ϯⲛⲁⲧⲁⲕⲟ ⲛⲧⲟⲓⲕⲟⲩⲙⲉⲛⲏ ⲉⲓⲥϩⲏⲏⲧⲉ ⲧⲉⲛⲟⲩ ⲙⲛϣϭⲟⲙ ⲙⲙⲟϥ ⲉⲕⲱⲗⲩ ⲙⲙⲟⲛ ⲉⲡⲟⲗⲓⲧⲉⲩⲉ ⲙ̅ⲡϫⲟⲉⲓⲥ ⲟⲩⲇⲉ ⲁⲛⲟⲕ ⲉⲧⲣⲉϥⲕⲱⲗⲩ ⲙⲙⲟⲓ ⲉⲓϫⲱ ⲛⲛⲉⲓϣⲁϫⲉ ⲉϩⲟⲩⲛ ⲉⲣⲟϥ. ⲙⲡⲣ̅ⲧⲣⲉⲛϯϩⲧⲏⲛ ⲉⲛⲉⲧϥ̅ϫⲱ ⲙⲙⲟⲟⲩ ⲁⲩⲱ ⲙⲡⲣ̅ⲧⲣⲉⲛⲣ̅ϩⲟⲧⲉ ϩⲏⲧⲟⲩ ⲛⲛϥⲫⲁⲛⲧⲁⲥⲓⲁ ⲛⲛⲟⲩϫ. ⲛⲟⲩⲟⲉⲓⲛ ⲅⲁⲣ ⲁⲛⲡⲉ ϥ.ⲣ̀ ⲙⲙⲉ ⲡⲉⲧⲣ̅ⲟⲩⲟⲉⲓⲛ ⲉⲣⲟⲟⲩⲭ ⲁⲗⲗⲁ ⲉⲩϥⲉⲓ ϩⲁⲡⲉⲓⲛⲉ ⲙⲛⲛⲙⲙⲁⲉⲓⲛ ⲙⲡⲕⲱϩⲧ ⲉⲧⲥⲃⲧⲱⲧ ⲛⲁⲩ ⲡⲁⲓ ⲉⲧⲟⲩⲛⲁⲣⲟⲕϩⲟⲩ ⲛϩⲏⲧϥ̅ ⲉⲩⲡⲓⲣⲁⲍⲉ ⲁⲩⲱ ⲉⲩϯϩⲟⲧⲉ ⲛⲛⲣⲱⲙⲉ ϩⲣⲁⲓ ⲛϩⲏⲧⲟⲩ. ⲉⲧⲃⲉⲡⲁⲓ ⲉⲩϣⲁⲛⲟⲩⲱⲛϩ ⲉⲃⲟⲗ ⲧⲉⲛⲟⲩ ϣⲁⲩⲧⲁⲕⲟ ⲙⲉⲩⲉϣϭⲙϭⲟⲙ ⲉϥⲗⲁⲡⲧⲉ ⲛⲗⲁⲁⲩ ⲛⲛⲙⲡⲓⲥⲧⲟⲥ ϣⲁⲩⲉⲓⲛⲉ ⲛⲙ̅ⲙⲁⲩ ⲙⲡⲉⲓⲛⲉ ⲙⲡⲕⲱϩⲧ ⲉⲧⲟⲩⲛⲁⲛⲟϫⲟⲩ ⲉⲣⲟϥ. ⲉⲧⲃⲉⲡⲁⲓ ⲛϣϣⲉ ⲁⲛ ⲉⲣ̅ϩⲟⲧⲉ ⲛ̅ϩⲏⲧⲟⲩ. ⲛⲉϩⲃⲏⲩⲉ ⲅⲁⲣ ⲉⲧⲟⲩⲉⲓⲣⲉ ⲙⲙⲟⲟⲩ ϩⲉⲛⲗⲁⲁⲩⲛⲉ.

25. ⲁⲩⲱ ⲥⲉⲥⲃⲧⲱⲧ ⲉⲡⲱⲱⲛⲉ. ϩⲁϩ ⲛⲥⲟⲡ ϣⲁⲩⲣ̅ⲑⲉ ⲛⲛⲉⲧⲯⲁⲗⲗⲉⲓ ϩⲛⲟⲩⲱⲕⲙ̅ ⲁⲩⲱ ϣⲁⲩϫⲱ ⲛϩⲉⲛⲗⲉⲝⲓⲥ ⲉⲃⲟⲗ ϩⲛⲛⲉⲅⲣⲁⲫⲏ. ϣⲁⲥϣⲱⲡⲉ ⲇⲉ ⲟⲛ ⲉⲛⲱϣ ⲛⲧⲟⲟⲩ ϩⲱⲟⲩ ϣⲁⲩⲧⲁⲩⲟ ⲛⲛⲉⲧⲛ̅ⲱϣ ⲙⲙⲟⲟⲩ. ϩⲉⲛⲥⲟⲡ ⲇⲉ ⲟⲛ ⲉⲛⲛ̅ⲕⲟⲧⲕ̅ ϣⲁⲩⲛⲉϩⲥⲉ ⲙⲙⲟⲛ ⲉⲧⲣⲉⲛϣⲗⲏⲗ. ⲡⲁⲓ ⲇⲉ ϣⲁⲩⲁⲁϥ ⲛϩⲁϩ ⲛⲥⲟⲡ ⲥⲭⲉⲇⲱⲛ ⲉⲛⲥⲉⲕⲱ ⲙⲙⲟⲛ ⲁⲛ ⲉⲛ̅ⲕⲟⲧⲕ̅ ϩⲟⲗⲱⲥ. ϩⲉⲛⲥⲟⲡ ⲇⲉ ⲟⲛ ⲉϣⲁⲩⲧⲛ̅ⲧⲱⲛⲟⲩ ⲉϩⲉⲛⲙⲟⲛⲁⲭⲟⲥ ⲉⲩϣⲁϫⲉ ϩⲛⲟⲩϩⲩⲡⲟⲕⲣⲏⲥⲓⲥ ϩⲱⲥ ⲣⲉϥϣⲙϣⲉⲛⲟⲩⲧⲉ ϫⲉⲕⲁⲥ ⲉⲩⲛⲁⲡⲗⲁⲛⲁ ⲙⲙⲱⲧⲛ ϩⲙ̅ⲡⲉⲓⲥⲭⲏⲙⲁ ⲛ̅ⲧⲉⲓⲙⲓⲛⲉ ⲙⲛⲛ̅ⲥⲱⲥ ⲛⲥⲉⲥⲱⲕ ⲙⲙⲱⲧⲛ ⲉⲡⲙⲁ ⲉⲧⲉϩⲛⲁⲩ. ⲁⲗⲗⲁ ⲛϣϣⲉ ⲁⲛ ⲉⲡⲣⲟⲥⲉⲭⲉ ⲉⲣⲟⲟⲩ ⲕⲁⲛ ⲉⲩϣⲁⲛⲛⲉϩⲥⲉ ⲙⲙⲱⲧⲛ̅ ⲉϣⲗⲏⲗ. ⲛⲉⲩⲉⲓⲣⲉ ⲅⲁⲣ ⲙⲡⲁⲓ ⲁⲛ ⲉⲧⲃⲉⲟⲩϩⲟⲧⲉ ⲛ̅ⲧⲉⲡⲛⲟⲩⲧⲉ ϩⲱⲥ ⲉⲩ ϥ.ⲫ̀ ϥⲓⲣⲟⲟⲩϣ ϩⲁⲣⲱⲧⲛ̅ⲭ ⲁⲗⲗⲁ ϫⲉⲕⲁⲥ ⲉⲩⲉⲓⲛⲉ ⲛⲛⲃⲁⲗϩⲏⲧ ⲉⲩⲙⲛⲧⲁⲧⲛⲁϩⲧⲉ ⲉⲧⲣⲉⲩⲣⲁⲧⲥⲟⲟⲩⲛ ⲉⲡⲉⲩⲱⲛϩ ⲁⲩⲱ ⲛⲥⲉⲟⲡⲥ ϩⲙⲡⲉⲩϩⲏⲧ ϫⲉⲉⲣⲉⲧⲉⲩⲁⲥⲕⲏⲥⲓⲥ ⲛⲁϯϩⲏⲩ ⲙⲙⲟⲟⲩ. ϣⲁⲩⲧⲣⲉⲛⲣⲱⲙⲉ ⲅⲁⲣ ⲉⲓⲙⲉ ⲉⲡⲃⲓⲟⲥ ⲛⲧⲙⲛⲧⲙⲟⲛⲁⲭⲟⲥ ⲛⲥⲉⲉⲛⲅ̅ⲕⲁϭⲓ ⲉⲣⲟϥ ϩⲱⲥ ⲉϥϩⲟⲣϣ̅ ⲉⲡⲉϩⲟⲩⲟ ⲁⲩⲱ ϣⲁⲩϯϫⲣⲟⲡ ⲛⲛⲉⲧⲡⲟⲗⲓⲧⲉⲩⲉ ⲟⲩⲃⲏⲩ.

26. ⲛⲉⲡⲣⲟⲫⲏⲧⲏⲥϭⲉ ⲛⲧⲁⲩⲧⲛⲛⲟⲟⲩⲥⲟⲩ ϩⲓⲧⲙ̅ⲡϫⲟⲉⲓⲥ ⲁⲩⲣ̅ⲛⲁⲓ ⲛⲧⲉⲓⲙⲓⲛⲉ ⲛⲛⲉⲃⲓⲏⲛ ⲉⲩϫⲱ ⲙⲙⲟⲥ ϫⲉⲟⲩⲟⲓ ⲙⲡⲉⲧⲥⲟ ⲙ̅ⲡⲉⲧϩⲓⲧⲟⲩⲱϥ ⲛⲟⲩⲧⲁⲕⲟ ⲙⲛⲟⲩⲥⲃⲱ ⲉⲥϩⲟⲟⲩ. ⲛⲉⲓϩⲃⲏⲩⲉ ⲇⲉ ⲛ̅ⲧⲉⲓⲙⲓⲛⲉ ⲙⲛⲛⲉⲓⲙⲉⲉⲩⲉ ⲛ̅ϩⲏⲧ ⲉⲩⲁⲛⲁⲥⲧⲣⲉⲫⲉ ⲛⲧⲉϩⲓⲏ ⲉⲧϫⲓⲙⲟⲉⲓⲧ ⲉϩⲟⲩⲛ ⲉⲧⲁⲣⲉⲧⲏ. ⲡϫⲟⲉⲓⲥ ⲇⲉ ⲁϥⲧⲱⲙ ⲉⲣⲱⲟⲩ ⲛⲛ̅ⲇⲁⲓⲙⲱⲛ ⲁⲩⲱ ⲁϥⲕⲱⲗⲩ ⲙⲙⲟⲟⲩ ⲉⲧⲙϣⲁϫⲉ ⲕⲁⲛ ⲉⲩϣⲁⲛϣⲁϫⲉ ⲉⲧⲃⲉⲧⲙⲉ ⲟⲛ. ⲟⲩⲙⲉ ⲅⲁⲣⲡⲉ ⲡⲉⲛⲧⲁⲩϫⲟⲟϥ ϫⲉⲛⲧⲟⲕⲡⲉ ⲡϣⲏⲣⲉ ⲙⲡⲛⲟⲩⲧⲉ. ⲁⲗⲗⲁ ⲁϥⲉⲡⲓⲧϥⲙⲁ ⲛⲁⲩ ϫⲉⲕⲁⲥ ⲛⲛⲉⲩϫⲱ ⲛⲧⲉⲩⲕⲁⲕⲓⲁ ⲛⲥⲉⲧⲁϩⲥ̅ ⲙⲛⲧⲙⲉ ⲁⲩⲱ ⲟⲛ ϥϯⲥⲃⲱ. ⲛⲁⲛ ⲉⲧⲙ̅ⲡⲣⲟⲥⲉⲭⲉ ⲉⲧ̀ⲁϩⲥ̅ ⲙⲛ ̀ⲛⲁⲓ ⲛⲧⲉⲓⲙⲓⲛⲉ ⲉⲛⲉϩ ⲕⲁⲛ ⲉϣⲱⲡⲉ ⲛⲥⲉⲣ̅ⲑⲉ ⲛⲛⲉⲧⲧⲁⲩⲟ ⲛⲧⲙⲉ. ⲁⲛⲟⲛ ⲅⲁⲣ ⲟⲩⲛⲧⲁⲛ ⲙⲙⲁⲩ ⲛⲛⲉⲅⲣⲁⲫⲏ ⲁⲩⲱ ⲧⲙⲛⲧⲣⲙϩⲉ ⲉⲃⲟⲗ ϩⲓⲧⲙ̅ⲡⲥⲱⲧⲏⲣ ϫⲉⲕⲁⲥ ⲛⲛⲉⲛϫⲓⲥⲃⲱ ⲉⲃⲟⲗ ϩⲓⲧⲙ̅ⲡⲇⲓⲁⲃⲟⲗⲟⲥ ⲡⲁⲓ ⲉⲧⲉⲙⲡⲉϥϭⲱ ϩⲛⲧⲉϥⲧⲁⲝⲓⲥⲭ ⲁⲗⲗⲁ ⲁϥⲙⲉⲉⲩⲉ ⲉϩⲉⲛϩⲃⲏⲩⲉ ⲉⲩϩⲟⲟⲩ. ⲉⲁϥⲧⲁⲩⲉϩⲉⲛⲗⲉⲝⲓⲥ ϥ.ⲣ̀ ϩⲛⲧⲉⲅⲣⲁⲫⲏ ⲁⲡϫⲟⲉⲓⲥ ⲕⲱⲗⲩ ⲙⲙⲟϥ ⲉϥϫⲱ ⲙⲙⲟⲥ ϫⲉⲡⲉϫⲉⲡⲛⲟⲩⲧⲉ ⲙⲡⲣⲉϥⲣ̅ⲛⲟⲃⲉ ϫⲉⲉⲧⲃⲉⲟⲩ ⲛⲧⲟⲕ ⲕϣⲁϫⲉ ϩⲛⲛⲁⲇⲓⲕⲁⲓⲱⲙⲁ ⲁⲩⲱ ⲕϫⲓ ⲛⲧⲁⲇⲓⲁⲑⲏⲕⲏ ϩⲓⲣⲛ̅ⲣⲱⲕ. ⲥⲉⲉⲓⲣⲉ ⲇⲉ ⲛϩⲱⲃ ⲛⲓⲙ ⲥⲉϣⲁϫⲉ ⲁⲩⲱ ⲥⲉϣⲧⲣ̅ⲧⲱⲣ ⲥⲉϩⲩⲡⲟⲕⲣⲓⲛⲉ ⲁⲩⲱ ⲥⲉⲉⲓⲣⲉ ⲙ̅ⲡⲉⲧⲉⲩⲟⲩⲁϣϥ̅ ϫⲉⲕⲁⲥ ⲉⲩⲉⲣ̅ϩⲁⲗ ⲛⲛⲃⲁⲗϩⲏⲧ. ⲥⲉⲉⲓⲣⲉ ⲇⲉ ⲟⲛ ⲛϩⲉⲛϩⲣⲟⲟⲩ ⲉⲩⲛⲁϣⲧ ⲥⲉⲥⲱⲃⲉ ϩⲛⲟⲩⲙⲛⲧⲁⲧϩⲏⲧ ⲁⲩⲱ ⲥⲉⲥⲩⲣⲓⲍⲉ. ⲉϣⲱⲡⲉ ⲇⲉ ⲙⲛⲗⲁⲁⲩ ϯ ⲛϩⲧⲏϥ ⲉⲣⲟⲟⲩ ϣⲁⲩⲣⲓⲙⲉ ⲛⲥⲉⲛⲉϩⲡⲉ ϩⲱⲥ ⲉⲁⲩϫⲣⲟ ⲉⲣⲟⲟⲩ.

27. ⲡϫⲟⲉⲓⲥ ⲇⲉ ϣⲁϥⲧⲱⲙ ⲉⲣⲱⲟⲩ ⲛⲛⲇⲁⲓⲙⲱⲛⲓⲟⲛ. ⲁⲛⲟⲛ ⲇⲉ ⲉⲁⲛϫⲓⲥⲃⲱ ϩⲓⲧⲛⲛⲉⲧⲟⲩⲁⲁⲃ ϣϣⲉ ⲉⲣⲟⲛ ϩⲱⲱⲛ ⲉⲧⲣⲉⲛⲉⲓⲣⲉ ⲛⲑⲉ ⲛ̅ⲧⲁⲛⲉⲧⲙⲙⲁⲩ ⲁⲁⲥ. ⲕⲁⲓⲅⲁⲣ ⲛⲉⲧⲙⲙⲁⲩ ϩⲱⲟⲩ ϩⲙⲡⲧⲣⲉⲩⲛⲁⲩ ⲉⲛⲁⲓ ⲁⲩϫⲟⲟⲥ ϫⲉϩⲙⲡⲧⲣⲉⲡⲣⲉϥⲣ̅ⲛⲟⲃⲉ ⲁϩⲉⲣⲁⲧϥ̅ ⲙⲡⲁⲙⲧⲟ ⲉⲃⲟⲗ ⲁⲓⲣ̅ⲙⲡⲟ ⲁⲓϣⲧⲟⲣⲧⲣ̅ ⲁⲓⲕⲁⲣⲱⲓ ⲉⲃⲟⲗ ϩⲛⲛⲁⲅⲁⲑⲟⲛ ⲁⲩⲱ ⲟⲛ ϫⲉⲁⲓⲣ̅ⲑⲉ ⲛⲛⲟⲩⲁⲗ ⲉⲙⲉϥⲥⲱⲧⲙ̅ ⲁⲩⲱ ⲛⲑⲉ ⲛⲛⲟⲩⲙ̅ⲡⲟ ⲉⲙⲉϥⲟⲩⲱⲛ ⲛⲣⲱϥ ⲁⲓⲣⲑⲉ ⲛⲛⲟⲩⲣⲱⲙⲉ ⲛϥⲥⲱⲧⲙ̅ ⲁⲛ. ⲁⲛⲟⲛ ⲇⲉ ϩⲱⲱⲛ ⲙ̅ⲡⲣ̅ⲧⲣⲉⲛⲥⲱⲧⲙ̅ ⲉⲣⲟⲟⲩ ϩⲱⲥⲧⲉ ϫⲉϩⲉⲛϣⲙⲙⲟ ⲉⲣⲟⲛⲛⲉ. ⲕⲁⲛ ⲉⲩϣⲁⲛⲛⲉϩⲥⲉ ⲙⲙⲟⲛ ⲉⲡⲉϣⲗⲏⲗ ⲛ̅ⲥⲉϣⲁϫⲉ ⲛⲙⲙⲁⲛ ⲉⲧⲃⲉϩⲉⲛⲛⲏⲥϯⲁ ⲙⲡⲣⲧⲣⲉⲛⲟⲩⲱϣ̅ⲃ ⲛⲁⲩ. ⲙⲁⲣⲉⲛϯϩⲧⲏⲛϭⲉ ⲛⲧⲟϥ ⲉⲧⲉⲥⲡⲟⲩⲇⲏ ⲛⲧⲛⲁⲥⲕⲏⲥⲓⲥ. ⲉⲩ ϥ.ⲫ̀ ⲉⲓⲣⲉ ⲅⲁⲣ ⲛ̅ϩⲱⲃ ⲛⲓⲙ ϩⲛⲟⲩⲕⲣⲟϥ. ⲛϣϣⲉ ⲁⲛ ⲉⲣ̅ϩⲟⲧⲉ ⲛϩⲏⲧⲟⲩ ⲕⲁⲛ ⲉⲩϣⲁⲛⲁⲡⲉⲓⲗⲏ ⲛⲁⲛ ⲉⲡⲙⲟⲩ. ϩⲉⲛⲁⲧϭⲟⲙ ⲅⲁⲣⲛⲉ ⲁⲩⲱ ⲙⲛϭⲟⲙ ⲙⲙⲟⲟⲩ ⲉⲣ̅ⲗⲁⲁⲩ ⲛⲁⲛ ⲙ̅ⲡⲉⲑⲟⲟⲩ.

28. ⲧⲉⲛⲟⲩϭⲉ ϯⲛⲁϫⲛⲟⲟⲩ ⲉⲧⲣⲁϫⲱ ⲛⲛⲁⲓ ϩⲛⲟⲩϣⲱⲱⲧ ⲉⲃⲟⲗ. ⲥⲉⲛⲁϣⲱⲡⲉ ⲅⲁⲣ ⲛⲏⲧⲛ̅ ϩⲛⲟⲩⲱⲣϫ̅ ⲛϭⲓⲡⲣ̅ⲡⲙⲉⲉⲩⲉ ⲛⲛⲁⲓ. ⲛⲧⲉⲣⲉϥⲉⲓⲙⲉ ⲛϭⲓⲡϫⲟⲉⲓⲥ ⲁⲡϫⲁϫⲉ ϩⲉ ⲁϥⲣ̅ϭⲱⲃ ⲙⲛⲛⲉϥⲙⲉⲉⲩⲉ ⲉⲧⲃⲉⲡⲁⲓϭⲉ ⲙⲛϭⲟⲙ ⲙⲙⲟϥ ⲉⲣ̅ⲗⲁⲁⲩ ⲛⲁⲛ ⲉⲡⲧⲏⲣϥ ϩⲱⲥ ⲧⲩⲣⲁⲛⲛⲟⲥ ⲛ̅ⲧⲉⲣⲉϥϩⲉ ⲛⲉϥϭⲉⲉⲧ ⲁⲛϭⲉⲡⲉ ⲁⲗⲗⲁ ⲛϥ̅ⲁⲡⲉⲓⲗⲏ ϩⲙⲡϣⲁϫⲉ ⲙⲙⲁⲧⲉ. ⲁⲩⲱ ⲙⲁⲣⲉⲡⲟⲩⲁ ⲡⲟⲩⲁ ⲙⲙⲱⲧⲛ ⲙⲉⲉⲩⲉ ⲉⲡⲁⲓ ⲛⲧⲉⲓⲙⲓⲛⲉ ⲁⲩⲱ ⲟⲩⲛ̅ϭⲟⲙ ⲙⲙⲟϥ ⲉⲕⲁⲧⲁⲫⲣⲟⲛⲉⲓ ⲛⲛⲉⲇⲁⲓⲙⲱⲛⲓⲟⲛ. ⲛⲉⲩⲙⲏⲣϭⲉ ⲁ̀ⲛ ̀ⲛϩⲉⲛⲥⲱⲙⲁ ⲛⲧⲉⲓⲙⲓⲛⲉ ⲛⲑⲉ ⲛⲛⲁⲛⲟⲛ ⲉⲧⲛ̅ϣⲟⲟⲡ ⲙⲙⲟⲥ ⲉⲛⲉⲟⲩⲛϣϭⲟⲙⲡⲉ ⲉⲧⲣⲉⲩϫⲟⲟⲥ ⲡ̀ⲉ ̀ϫⲉⲛⲧⲛ̅ϭⲓⲛⲉ ⲁⲛ ⲛⲛⲣⲱⲙⲉ ⲉⲩϩⲱⲡ ⲙⲙⲟⲟⲩⲭ ⲉⲛϣⲁⲛϩⲉ ⲇⲉ ⲉⲣⲟⲟⲩ ⲧⲛⲛⲁⲣ̅ⲡⲉⲑⲟⲟⲩ ⲛⲁⲩ. ⲁⲛⲟⲛϭⲉ ϩⲱⲱⲛ ⲉⲛⲉⲩⲛ̅ϭⲟⲙ ⲙⲙⲟⲛⲡⲉ ⲉϩⲱⲡ ⲙⲙⲟⲛ ⲉⲧⲙⲧⲣⲉⲩⲛⲁⲩⲉⲣⲟⲛ ⲏ ⲉϣⲧⲁⲙ ⲙⲡⲣⲟ ⲉⲣⲱⲛⲡ̀ⲉ.̀ ⲉϣϫⲉ ⲥⲉϣⲟⲟⲡ ⲇⲉ ⲁⲛ ⲛⲧⲉⲓϩⲉⲭ ⲁⲗⲗⲁ ⲉⲣⲉⲛⲣⲟ ϣⲟⲧⲙ ⲟⲩⲛϣϭⲟⲙ ⲙⲙⲟⲟⲩ ⲉⲉⲓ ⲉϩⲟⲩⲛ ϩⲙⲡⲁⲏⲣ ⲁⲩⲱ ⲥⲉϣⲟⲟⲡ ϩⲙⲡⲁⲏⲣ ⲧⲏⲣϥ̅ ⲛⲧⲟⲟⲩ ⲙⲛⲡⲉⲧⲟ ⲛⲛⲟϭ ⲉⲣⲟⲟⲩ ⲡⲇⲓⲁⲃⲟⲗⲟⲥ. ϩⲛⲙⲁⲓⲡⲉⲑⲟⲟⲩ ⲅⲁⲣ ϥ.ⲣ̀ ⲛⲉ ⲁⲩⲱ ⲉⲩⲥⲃ̅ⲧⲱⲧ ⲉⲣ̅ⲡⲉⲑⲟⲟⲩ ⲛⲛⲁⲩ ⲛⲓⲙ ⲁⲩⲱ ⲕⲁⲧⲁⲑⲉ ⲛⲧⲁⲡⲥⲱⲧⲏⲣ ϫⲟⲟⲥ ϫⲉⲟⲩⲣⲉϥϩⲉⲧⲃ̅ⲣⲱⲙⲉⲡⲉ ϫⲓⲛⲉϣⲟⲣⲡ̅ ⲛϭⲓⲡⲉⲓⲱⲧ ⲛⲧⲕⲁⲕⲓⲁ. ⲁⲛⲟⲛ ⲇⲉ ⲧⲛ̅ⲟⲛϩ̅ ⲁⲩⲱ ⲧⲛⲡⲟⲗⲓⲧⲉⲩⲉ ⲉϩⲟⲩⲛ ⲉⲣⲟⲟⲩ. ⲥⲉⲟⲩⲟⲛϩ̅ϭⲉ ⲉⲃⲟⲗ ϫⲉⲙⲛϭⲟⲙ ⲙⲙⲟⲟⲩ ⲉⲣ̅ⲗⲁⲁⲩ. ⲟⲩⲇⲉ ⲟⲛ ⲙⲛⲙⲁ ⲕⲱⲗⲩ ⲙⲙⲟⲟⲩ ⲉⲧⲙ̅ⲣ̅ⲡⲉⲑⲟⲟⲩ ⲛⲁⲛ ⲟⲩⲇⲉ ⲁⲛⲟⲛ ⲛⲉⲩϣⲃⲉⲉⲣ ⲁⲛ ϫⲉⲕⲁⲥ ⲉⲩⲉϯⲥⲟ ⲉⲣⲟⲛ ⲟⲩⲇⲉ ⲛ̅ϩⲉⲛⲙⲁⲓⲡⲉⲧⲛⲁⲛⲟⲩϥ ⲁⲛⲛⲉ ϫⲉⲕⲁⲥ ⲉⲩⲉⲧⲁϩⲟⲟⲩ ⲉⲣⲁⲧⲟⲩ ⲁⲗⲗⲁ ϩⲉⲛⲡⲟⲛⲏⲣⲟⲥⲛⲉ ⲉⲡⲉϩⲟⲩⲟ ⲁⲩⲱ ⲙⲛⲗⲁⲁⲩ ⲟ ⲛⲣⲟⲟⲩϣ ⲛⲁⲩ ⲛⲥⲁⲣ̅ⲡⲉⲑⲟⲟⲩ ⲛⲛⲉⲧⲙⲉ ⲛⲧⲁⲣⲉⲧⲏ ⲙⲛⲛⲉⲧϣⲙϣⲉ ⲙⲡⲛⲟⲩⲧⲉ ......ⲧⲙⲛⲧⲣⲉϥϣⲙϣⲉⲛⲟⲩⲧⲉ,. ⲉⲃⲟⲗ ϫⲉⲙⲛϣϭⲟⲙ ⲙⲙⲟⲟⲩ ⲛⲛⲣ̅ⲗⲁⲁⲩ ⲛⲁⲛ ⲉⲧⲃⲉⲡⲁⲓ ⲥⲉⲕⲱⲛⲥ ⲙⲙⲟⲟⲩ ⲙⲁⲩⲁⲁⲩ ϫⲉⲙⲛϣϭⲟⲙ ⲙⲙⲟⲟⲩ ⲉⲣ̅ⲗⲁⲁⲩ ⲛⲛⲉⲧⲟⲩⲁⲡⲉⲓⲗⲏ ⲉⲣⲟⲟⲩ. ϣϣⲉ ⲇⲉ ⲟⲛ ⲉⲣⲟⲛ ⲉⲉⲓⲙⲉ ⲉⲡⲉⲓⲕⲉϩⲱⲃ ϫⲉⲕⲁⲥ ⲛⲛⲉⲛⲣ̅ϩⲟⲧⲉ ϩⲏⲧⲟⲩ. ⲉⲛⲉⲟⲩⲛϣϭⲟⲙ ⲙⲙⲟⲟⲩ ⲛⲉⲩⲛⲁⲉⲓ ⲁⲛⲡⲉ ⲙⲛϩⲉⲛⲕⲉⲙⲏⲏϣⲉ ⲟⲩⲇⲉ ⲛⲉⲩⲛⲁⲉⲓⲣⲉ ⲁⲛⲡⲉ ⲛϩⲉⲛⲫⲁⲛⲧⲁⲥⲓⲁ ⲟⲩⲇⲉ ⲛⲉⲩⲛⲁⲉⲓⲣⲉ ⲁⲛⲡⲉ ⲛϩⲉⲛⲕⲟⲧⲥ ⲉⲩϣⲓⲃⲉ ⲙⲡⲉⲩⲥⲭⲏⲙⲁⲭ ⲁⲗⲗⲁ ⲛⲉⲣⲉⲟⲩⲁ ⲛⲟⲩⲱⲧ ⲛⲁⲣⲱϣⲉⲡⲉ ⲉⲧⲣⲉϥⲣ̅ⲡⲉⲧⲉϥⲟⲩⲁϣϥ̅ ⲛⲁⲛ. ⲁⲩⲱ ⲟⲛ ϫⲉⲡⲉⲧⲉⲟⲩⲛⲧϥ̅ⲉⲝⲟⲩⲥⲓⲁ ⲙⲙⲁⲩ ⲉⲛϥϩⲱⲧ̅ⲃ ⲁⲛ ϩⲛⲟⲩⲫⲁⲛⲧⲁⲥⲓⲁ ⲟⲩⲇⲉ ⲛϥⲣ̅ⲭⲣⲓⲁ ⲁⲛ ⲛϩⲉⲛⲙⲏⲏϣⲉ ⲁⲗⲗⲁ ⲛⲑⲉ ⲉⲧϥⲟⲩⲁϣⲥ ⲛ̅ⲧⲟϥ ⲛⲧⲉⲩ ϥ.ⲫ̀ ⲛⲟⲩ ϣⲁϥⲭⲣⲱ ⲛⲧⲉⲝⲟⲩⲥⲓⲁ. ⲛⲇⲁⲓⲙⲱⲛⲓⲟⲛ ⲇⲉ ⲛ̅ⲧⲟⲟⲩ ⲙⲛϭⲟⲙ ⲙⲙⲟⲟⲩ ⲉⲣ̅ⲗⲁⲁⲩ ⲉⲩⲥⲱⲃⲉ ⲛⲑⲉ ⲛⲛⲉⲧϩⲛⲛⲉⲥⲕⲩⲛⲏ ⲉⲩϣⲓⲃⲉ ⲛⲛⲉⲩⲥⲙⲟⲧ ⲁⲩⲱ ⲉⲩϯϩⲟⲧⲉ ⲛⲛ̅ϣⲏⲣⲉ ⲕⲟⲩⲓ ϩⲛϩⲉⲛⲙⲏⲏϣⲉ ⲙⲫⲁⲛⲧⲁⲥⲓⲁ ⲙⲛⲛⲉⲩϩⲣⲃ ⲛⲁⲓ ⲉⲧⲉⲛϣϣⲉ ⲛϩⲟⲩⲟ ⲉⲕⲁⲧⲁⲫⲣⲟⲛⲉⲓ ⲙⲙⲟⲟⲩ. ⲉⲓⲙⲉϭⲉ ⲛⲏⲧⲛ ϫⲉϩⲉⲛⲁⲧϭⲟⲙⲛⲉ. ⲡⲁⲅⲅⲉⲗⲟⲥ ⲇⲉ ⲛⲧⲙⲉ ⲛⲧⲁⲩⲧⲛⲛⲟⲟⲩϥ ϣⲁⲛⲁⲥⲥⲩⲣⲓⲟⲥ ⲉⲃⲟⲗ ϩⲓⲧⲙⲡϫⲟⲉⲓⲥ ⲙⲡⲉϥⲣ̅ⲭⲣⲓⲁ ⲛ̅ϩⲉⲛⲙⲏⲏϣⲉ ⲟⲩⲇⲉ ϩⲉⲛⲫⲁⲛⲧⲁⲥⲓⲁ ϩⲓⲃⲟⲗ ⲟⲩⲇⲉ ϩⲉⲛϩⲣⲟⲟⲩ ⲁⲗⲗⲁ ϩⲛⲟⲩⲥϭⲣⲉϩⲧ ⲁϥⲭⲣⲱ ϩⲛⲟⲩⲉⲝⲟⲩⲥⲓⲁ ⲁⲩⲱ ⲁϥⲙⲟⲩⲟⲩⲧ ⲙⲙⲛⲧϣⲙⲏⲛ ⲛⲧⲃⲁ ⲟⲩϭⲟⲥ. ⲛⲁⲓ ⲇⲉ ⲙⲛϣϭⲟⲙ ⲙⲙⲟⲟⲩ ⲉⲣ̅ⲗⲁⲁⲩ ⲁⲗⲗⲁ ⲥⲉⲡⲉⲓⲣⲁⲍⲉ ⲁⲩⲱ ⲥⲉϯϩⲟⲧⲉ ϩⲛϩⲉⲛⲫⲁⲛⲧⲁⲥⲓⲁ.

29. ⲉⲣϣⲁⲛⲟⲩⲁ ⲙⲉⲉⲩⲉ ⲉⲃⲟⲗ ⲉⲛⲉϩⲃⲏⲩⲉ ⲛⲓⲱⲃ ⲛϥϫⲟⲟⲥ ϫⲉⲉⲧⲃⲉⲟⲩ ⲛ̅ⲧⲉⲣⲉϥⲉⲓ ⲉⲃⲟⲗ ⲛϭⲓⲡⲇⲓⲁⲃⲟⲗⲟⲥ ⲁϥⲉⲓⲣⲉ ⲛⲁϥ ⲛⲛⲉⲓⲡⲉⲑⲟⲟⲩ ⲧⲏⲣⲟⲩ ⲁϥϥⲉⲓ ⲙⲉⲛ ⲛ̅ⲧⲟⲟⲧϥ̅ ⲛⲛⲉϥϩⲩⲡⲁⲣⲭⲟⲛⲧⲁ ⲁⲩⲱ ⲛⲉϥϣⲏⲣⲉ ⲁϥⲙⲟⲟⲩⲧⲟⲩ ⲁϥⲣⲁϩⲧϥ̅ ϩⲛⲟⲩⲥⲁϣ ⲉϥϩⲟⲟⲩ. ⲙⲁⲣⲉϥⲉⲓⲙⲉϭⲉ ⲛⲁϥ ϫⲉⲙⲡⲇⲓⲁⲃⲟⲗⲟⲥ ⲁⲛ ⲡⲉⲛⲧⲁϥϭⲙϭⲟⲙ ⲁϥⲣ̅ⲡⲁⲓⲭ ⲁⲗⲗⲁ ⲡⲛⲟⲩⲧⲉ ⲡⲉⲛⲧⲁϥϯ ⲙⲙⲟϥ ⲉⲧⲟⲟⲧϥ̅ ⲉⲧⲣⲉϥⲡⲓⲣⲁⲍⲉ ⲙⲙⲟϥ. ⲡⲁⲓ ⲅⲁⲣ ⲙⲛϣϭⲟⲙ ⲙⲙⲟϥ ⲉⲣ̅ⲗⲁⲁⲩ. ⲁϥⲁⲓⲧⲉⲓ ⲇⲉ ⲛⲧⲉⲣⲉϥϫⲓ ⲛⲧⲉⲝⲟⲩⲥⲓⲁ ⲁϥⲣⲛⲁⲓ ⲛⲁϥ. ϩⲱⲥⲧⲉ ϩⲙⲡⲁⲓ ⲛϩⲟⲩⲟ ϥⲙ̅ⲡϣⲁ ⲛϭⲓⲡϫⲁϫⲉ ⲉⲧⲣⲉⲩⲥⲟ ϥ..̀ⲣ ϣϥ̅ ϫⲉⲙⲡⲉϥⲉϣϭⲙϭⲟⲙ ⲉⲩⲣⲱⲙⲉ ⲛⲛⲟⲩⲱⲧ ⲛ̅ⲇⲓⲕⲁⲓⲟⲥ. ⲉⲛⲉϥⲛⲁⲉϣϭⲙϭⲟⲙ ⲅⲁⲣⲡⲉ ⲛⲉϥⲛⲁⲁⲓⲧⲉⲓ ⲙⲙⲟϥ ⲁⲛⲡⲉ. ⲛⲧⲉⲣⲉϥⲁⲓⲧⲓ ⲇⲉ ⲁⲛ ⲛⲛⲟⲩⲥⲟⲡ ⲛⲛⲟⲩⲱⲧ ⲁⲗⲗⲁ ⲥⲛⲁⲩ ⲁϥⲟⲩⲱⲛϩ̅ ⲉⲃⲟⲗ ϫⲉⲟⲩⲁⲧϭⲟⲙⲡⲉ ⲁⲩⲱ ⲙⲛϣϭⲟⲙ ⲙⲙⲟϥ ⲉⲣ̅ⲗⲁⲁⲩ. ⲛⲛⲟⲩϣⲡⲏⲣⲉ ⲁⲛⲧⲉ ⲧⲁⲓ ϫⲉⲙⲡⲉϥⲉϣϭⲙϭⲟⲙ ⲉϩⲟⲩⲛ ⲉⲓⲱⲃ ⲙⲛⲛⲉϥⲕⲉⲧⲃ̅ⲛⲟⲟⲩⲉ ⲛⲥⲁⲃⲏⲗ ϫⲉⲁⲡⲛⲟⲩⲧⲉ ⲥⲩⲛⲭⲱⲣⲉⲓ ⲛⲁϥ. ϣⲁϩⲣⲁⲓ ⲉⲛⲕⲉⲣⲓⲣ ⲙⲛⲧϥ̅ⲉⲝⲟⲩⲥⲓⲁ ⲙⲙⲁⲩ ⲉϩⲟⲩⲛ ⲉⲣⲟⲟⲩ. ⲁⲩⲥⲉⲡⲥⲡϫⲟⲉⲓⲥ ⲇⲉ ⲕⲁⲧⲁⲑⲉ ⲉⲧⲥⲏϩ ϩⲙⲡⲉⲩⲁⲅⲅⲉⲗⲓⲟⲛ ⲉⲩϫⲱ ⲙⲙⲟⲥ ϫⲉⲙⲁϫⲟⲟⲩⲛ ⲉϩⲟⲩⲛ ⲉⲧⲁⲅⲅⲉⲗⲏ ⲛⲛⲉϣⲁⲩ. ⲉϣϫⲉ ⲙⲛⲧⲟⲩⲉⲝⲟⲩⲥⲓⲁ ⲉϩⲟⲩⲛ ⲉⲛⲉⲣⲓⲣ ⲡⲟⲥⲱ ⲙⲁⲗⲗⲟⲛ ⲟⲩⲛⲧⲁⲩ ⲙⲙⲁⲩ ⲉϩⲟⲩⲛ ⲉⲛⲣⲱⲙⲉ ⲛⲁⲓ ⲛⲧⲁⲩⲥⲟⲛⲧⲟⲩ ⲕⲁⲧⲁⲑⲓⲕⲱⲛ ⲙⲡⲛⲟⲩⲧⲉ

30. ⲡⲛⲟⲩⲧⲉϭⲉ ⲙⲁⲩⲁⲁϥ ⲡⲉⲧⲉϣϣⲉⲡⲉ ⲉⲣ̅ϩⲟⲧⲉ ϩⲏⲧϥ ⲛⲧⲛ̅ⲕⲁⲧⲁⲫⲣⲟⲛⲉⲓ ⲛⲛⲁⲓ ⲛⲧⲉⲓⲙⲓⲛⲉ ⲛⲧⲛ̅ⲧⲙⲟⲡⲟⲩ ⲉⲡⲧⲏⲣϥ̅. ⲛϩⲟⲩⲟ ⲇⲉ ⲛ̅ⲧⲟϥ ⲛϩⲟⲥⲟⲛ ⲥⲉⲉⲓⲣⲉ ⲛⲛⲁⲓ ⲙⲁⲣⲉⲛⲟⲩⲱϩ ⲉⲧⲟⲟⲧⲛ ⲉϩⲟⲩⲛ ⲉⲧⲁⲕⲥⲏⲥⲓ ⲕⲁⲧⲁⲣⲟⲟⲩ. ⲟⲩⲛⲟϭ ⲅⲁⲣ ⲛ̅ϩⲟⲡⲗⲟⲛ ⲉϥϯ ⲟⲩⲃⲏϥⲡⲉ ⲟⲩⲃⲓⲟⲥ ⲉϥⲥⲟⲩⲧⲱⲛ ⲙⲛⲟⲩⲡⲓⲥⲧⲓⲥ ⲉϩⲟⲩⲛ ⲉⲡⲛⲟⲩⲧⲉ. ⲥⲉⲣ̅ϩⲟⲧⲉ ⲛϩⲏⲧⲥ̅ ⲛⲧⲛⲏⲥϯⲁ ⲙⲛⲧⲁⲥⲕⲏⲥⲓⲥ ⲙⲛⲡⲟⲩϣⲏ ⲛⲣⲟⲉⲓⲥ ⲙⲛⲡⲉϣⲗⲏⲗ ⲙⲛⲡⲉⲥϭⲣⲉϩⲧ ⲙⲛⲧⲙⲛⲧⲣⲙⲣⲁϣ ⲙⲛⲧⲙⲛⲧⲙⲁⲓϩⲏⲕⲉ ⲁⲩⲱ ⲧⲙⲛⲧⲛⲁ ⲙⲛⲧⲙⲛⲧⲁⲧϭⲱⲛⲧ ϩⲁⲑⲏ ⲇⲉ ⲛϩⲱⲃ ⲛⲓⲙ ⲧⲙⲛⲧⲥⲧⲙⲏⲧ ⲉϩⲟⲩⲛ ⲉⲡⲉⲭⲥ. ⲉⲧⲃⲉⲡⲁⲓ ⲅⲁⲣ ⲉⲩⲉⲓⲣⲉ ⲛⲛⲁⲓ ⲧⲏⲣⲟⲩ ϫⲉⲕⲁⲥ ⲛⲛⲉⲩϣⲱⲡⲉ ϥ..̀ⲫ ⲛϭⲓⲛⲉⲧϩⲱⲙ ⲉϩⲣⲁⲓ ⲉϫⲱⲟⲩ. ⲥⲉⲥⲟⲟⲩⲛ ⲛ̅ⲧⲉⲭⲁⲣⲓⲥ ⲛ̅ⲧⲁⲩⲧⲁⲁⲥ ⲛⲛⲙ̅ⲡⲓⲥⲧⲟⲥ ⲉϩⲟⲩⲛ ⲉⲣⲟⲟⲩ ⲉⲃⲟⲗ ϩⲓⲧⲙ̅ⲡⲥⲱⲧⲏⲣ ⲉϥϫⲱ ⲙⲙⲟⲥ ϫⲉⲉⲓⲥϩⲏⲏⲧⲉ ⲁⲛⲟⲕ ⲁⲓϯ ⲛⲏⲧⲛ ⲛ̅ⲧⲉⲝⲟⲩⲥⲓⲁ ⲉϩⲱⲙ ⲉϫⲛ̅ⲛⲛϩⲟϥ ⲙⲛⲛⲉⲟⲩⲟⲟϩⲉ ⲁⲩⲱ ⲉϫⲛⲧϭⲟⲙ ⲧⲏⲣⲥ̅ ⲙⲡϫⲁϫⲉ.

31. ⲕⲁⲛ ⲉⲩϣⲁⲛϩⲩⲡⲟⲕⲣⲓⲛⲉ ⲉⲩϫⲱ ⲛⲛⲉⲧⲛⲁϣⲱⲡⲉ ⲙⲡⲣ̅ⲧⲣⲉⲗⲁⲁⲩ ϯϩⲧⲏϥ ⲉⲥⲱⲧⲙ̅ ⲛⲥⲱⲟⲩ. ϣⲁⲥϣⲱⲡⲉ ⲅⲁⲣ ⲛϩⲁϩ ⲛ̅ⲥⲟⲡ ⲛⲥⲉϫⲟⲟⲥ ⲉⲧⲃⲉⲛⲉⲥⲛⲏⲩ ⲉⲧⲛⲏⲩ ⲛⲁⲛ ⲁⲩⲱ ⲙⲛⲛⲥⲁϩⲉⲛϩⲟⲟⲩ ϣⲁⲣⲉⲛⲉⲧⲙⲙⲁⲩ ⲉⲓ. ⲛⲉⲣⲉⲛⲁⲓⲇⲉ ⲉⲓⲣⲉ ⲁⲛ ϩⲱⲥ ⲉⲩϥⲓⲣⲟⲟⲩϣ ϩⲁⲛⲉⲧⲥⲱⲧⲙ̅ ⲁⲗⲗⲁ ϫⲉⲕⲁⲥ ⲉⲩⲉⲧⲱⲧ ⲙⲡⲉⲩϩⲏⲧ ⲉⲧⲣⲉⲩⲧⲁⲛϩⲟⲩⲧⲟⲩ ⲁⲩⲱ ⲙⲛⲛⲥⲱⲥ ⲉⲩϣⲁⲛϣⲱⲡⲉ ϩⲁⲧⲉⲩⲉⲝⲟⲩⲥⲓⲁ ⲛⲥⲉⲧⲁⲕⲟⲟⲩ. ⲉⲡⲓⲧⲓⲙⲁ ⲛⲁⲩ ϫⲉⲁⲛⲟⲛ ⲛⲧⲛ̅ⲣⲭⲣⲓⲁ ⲛⲁⲩ ⲁⲛ. ⲟⲩ ⲅⲁⲣⲧⲉ ⲧⲉϣⲡⲏⲣⲉ ⲉϣϫⲉ ⲥⲉϩⲛϩⲉⲛⲥⲱⲙⲁ ⲉⲩⲡⲟⲕⲉ ⲡⲁⲣⲁⲛⲣⲱⲙⲉ ⲥⲉⲛⲁⲩ ⲉⲛⲉⲧⲛⲁⲁⲣⲭⲉⲓ ⲙⲙⲟⲟϣⲉ ϣⲁⲩⲣ̅ϣⲟⲣⲡ ⲛⲥⲉⲡⲱⲧ ⲛⲥⲉϫⲱ ⲙⲡϩⲱⲃ. ⲟⲩⲛⲟⲩⲁ ⲟⲛ ⲉϥⲧⲁⲗⲏⲩ ⲉⲩϩⲧⲟ ⲛⲁⲣ̅ϣⲟⲣⲡ ⲉⲡⲉⲧⲡⲏⲧ ϩⲛⲛⲉϥⲟⲩⲉⲣⲏⲧⲉ ⲛϥⲧⲁⲩⲉⲡϣⲁϫⲉ. ϩⲱⲥⲧⲉ ⲛϣϣⲉ ⲁⲛ ⲉⲣϣⲡⲏⲣⲉ ⲙⲙⲟⲟⲩ ϩⲙⲡⲉⲓⲕⲉϩⲱⲃ. ⲛⲥⲉⲛⲁⲉⲓⲙⲉ ⲇⲉ ⲁⲛ ⲉⲛⲉⲙⲡⲁⲧⲟⲩϣⲱⲡⲉ. ⲛⲉⲧⲟⲩⲛⲁⲩ ⲇⲉ ⲉⲣⲟⲟⲩ ⲛⲧⲟⲟⲩ ⲛⲉⲧⲉϣⲁⲩⲣ̅ϣⲟⲣ̅ⲡ ⲛⲥⲉⲡⲱⲧ ⲛⲑⲉ ⲛⲛⲣⲉϥϫⲓⲟⲩⲉ ⲛⲥⲉϫⲟⲟⲩ. ⲉϫⲛⲛⲁⲓ ⲇⲉ ⲟⲛ ⲥⲉⲧⲁⲩⲟ ⲛⲛⲟⲩⲛ ϩⲱⲱⲛ ⲁⲩⲱ ϫⲉⲁⲛⲥⲱⲟⲩϩ ⲉϩⲟⲩⲛ ⲉⲛⲉⲛⲉⲣⲏⲩ ⲁⲩⲱ ϫⲉ ϥ.:̀ⲣ ⲧⲛ̅ⲧⲁⲩⲟ ⲛ̅ⲛⲉⲓϣⲁϫⲉ ⲉϩⲟⲩⲛ ⲉⲣⲟⲟⲩ ⲥⲉⲛⲁϫⲟⲟⲩ ⲙ̅ⲡⲁⲧⲉⲟⲩⲁ ⲃⲱⲕ ⲉⲃⲟⲗ ϩⲓⲧⲟⲟⲧⲛ ⲛϥ̅ϫⲟⲟⲩ. ⲡⲁⲓϭⲉ ⲟⲩⲛ ⲟⲩⲛϣϭⲟⲙ ⲛⲛⲟⲩϣⲏⲣⲉ ϣⲏⲙ ⲛ̅ⲣⲉϥⲡⲱⲧ ⲉⲁⲁϥ ⲁⲩⲱ ⲛϥⲣ̅ϣⲟⲣⲡ ⲉⲡⲉⲧⲉⲛϥ̅ϭⲉⲡⲏ ⲁⲛ ⲉⲙⲟⲟϣⲉ. ⲡⲉϯϫⲱ ⲇⲉ ⲙⲙⲟϥ ⲟⲩⲉⲧⲉⲓⲙⲓⲛⲉⲡⲉ. ⲉⲓϣⲁⲛⲟⲩⲁ ⲁⲣⲭⲉⲓ ⲙⲙⲟⲟϣⲉ ϫⲓⲛⲙⲁⲣⲏⲥ ⲏ ⲉⲃⲟⲗ ϩⲛⲕⲉⲭⲱⲣⲁ ⲉⲙⲡⲁⲧⲉϥⲁⲣⲭⲉⲓ ⲙⲉⲛ ⲛⲙⲟⲟϣⲉ ⲛⲥⲉⲥⲟⲟⲩⲛ ⲁⲛ ϫⲉⲉϥⲛⲁⲙⲟⲟϣⲉ. ⲉⲩϣⲁⲛⲛⲁⲩ ⲙⲉⲛ ⲉⲣⲟϥ ⲉⲁϥⲙⲟⲟϣⲉ ϣⲁⲩⲣ̅ϣⲟⲣⲡ ⲉⲣⲟϥ ⲉϥⲙⲟⲟϣⲉ ⲁⲩⲱ ϩⲁⲑⲏ ⲙⲡⲁⲧⲉϥⲉⲓ ϣⲁⲩϫⲟⲟⲥ ϫⲉⲙⲛⲛⲥⲁϩⲉⲛϩⲟⲟⲩ ⲡⲉⲧⲙ̅ⲙⲁⲩ ⲛⲏⲩ ⲁⲩⲱ ϣⲁⲥϣⲱⲡⲉ ⲛⲧⲉⲓϩⲉ ⲛⲧⲉⲛⲉⲧⲙⲟⲟϣⲉ ⲕⲟⲧⲟⲩ ⲉⲡⲁϩⲟⲩ ⲛⲧⲉⲛⲁⲓ ϣⲱⲡⲉ ⲛ̅ⲣⲉϥϫⲓϭⲟⲗ.

32. ⲛⲧⲉⲓϩⲉ ⲟⲛ ϣⲁⲩⲣ̅ϩⲁϩ ⲛ̅ϣⲁϫⲉ ⲉⲧⲃⲉⲡⲙⲟⲟⲩ ⲙⲡⲉⲓⲉⲣⲟ. ⲉⲩϣⲁⲛⲛⲁⲩ ⲉϩⲁϩ ⲛ̅ϩⲱⲟⲩ ϩⲙⲡⲙⲁ ⲛⲛⲉϭⲟⲟϣ ⲉⲩⲥⲟⲟⲩⲛ ϫⲉϣⲁⲣⲉⲡⲉⲓⲉⲣⲟ ⲙⲟⲩϩ ⲉⲃⲟⲗ ϩⲛⲛⲉⲧⲙⲙⲁⲩ. ⲙⲡⲁⲧⲉⲡⲙⲟⲟⲩ ⲇⲉ ⲉⲓ ⲟⲛ ⲉⲕⲏⲙⲉ ϣⲁⲩⲣ̅ϣⲟⲣⲡ ⲛⲥⲉⲡⲱⲧ ⲛ̅ⲥⲉⲧⲁⲙⲟⲟⲩ. ⲡⲁⲓ ϩⲱⲱϥ ⲟⲩⲛϣϭⲟⲙ ⲛⲛⲟⲩⲣⲱⲙⲉ ⲛϥⲡⲱⲧ ⲛϥ̅ϫⲟⲟϥ ⲉⲛⲉⲟⲩⲛϣϭⲟⲙ ⲙⲙⲟⲟⲩ ⲉⲡⲱⲧ ⲛⲑⲉ ⲛⲛⲁⲓ. ⲁⲩⲱ ⲛⲑⲉ ⲙⲡⲉⲥⲕⲟⲡⲟⲥ ⲛ̅ⲇⲁⲇ̅ ⲉϥⲃⲏⲕ ⲉϩⲣⲁⲓ ⲉⲡϫⲓⲥⲉ ⲉϣⲁϥⲣ̅ϣⲟⲣⲡ̅ ⲉⲛⲁⲩ ⲉⲡⲉⲧⲛⲏⲩ ϩⲁⲑⲏ ⲙⲡⲉⲩⲟⲉⲓϣ. ⲛⲧⲟϥ ⲇⲉ ϩⲱⲱϥ ⲡⲉⲧⲡⲏⲧ ⲛ̅ϣⲟⲣⲡ̅ ϣⲁϥⲧⲁⲩⲟ ϩⲁⲑⲏ ⲛ̅ϩⲉⲛⲕⲟⲟⲩⲉ ⲛⲛⲉⲙⲡⲁⲧⲟⲩϣⲱⲡⲉ ⲁⲛ ⲁⲗⲗⲁ ⲛⲛⲉⲧⲛⲁϣⲱⲡⲉ. ⲧⲁⲓⲧⲉ ⲑⲉ ⲛⲛⲉⲓⲕⲟⲟⲩⲉ ⲥⲉⲟⲩⲱϣ ⲉϣⲡ̅ϩⲓⲥⲉ ⲁⲩⲱ ⲥⲉⲧⲁⲙⲟ ⲛⲛⲉⲩⲉⲣⲏⲩ ϥ.:̀ⲫ ϫⲉⲕⲁⲥ ⲙⲙⲁⲧⲉ ⲉⲩⲉⲁⲡⲁⲧⲁ ⲛⲛⲣⲱⲙⲉ. ⲙⲛ̅ⲛ̅ⲥⲱⲥ ⲇⲉ ⲉⲣϣⲁⲛⲧⲉⲡⲣⲟⲛⲟⲓⲁ ⲙⲡⲛⲟⲩⲧⲉ ⲟⲩⲉϩⲥⲁϩⲛⲉ ⲛⲛⲟⲩϩⲱⲃ ⲉⲧⲃⲉⲙⲙⲟⲩⲛⲉⲓⲟⲟⲩⲉ ⲁⲩⲱ ⲉⲧⲃⲉⲛⲉⲧⲙⲟⲟϣⲉ. ⲟⲩⲛⲧϥⲧⲉⲝⲟⲩⲥⲓⲁ ⲅⲁⲣ. ϣⲁⲣⲉⲛⲇⲁⲓⲙⲱⲛⲓⲟⲛ ⲟⲩⲱⲛϩ̅ ⲉⲃⲟⲗ ⲛⲣⲉϥϫⲓϭⲟⲗ ⲁⲩⲱ ⲛⲧⲉⲛⲉⲛⲧⲁⲩⲡⲣⲟⲥⲉⲭⲉ ⲉⲣⲟⲟⲩ ϣⲱⲡⲉ ϩⲛⲟⲩⲙⲛⲧⲣⲉϥⲣ̅ϩⲁⲗ.

33. ⲧⲁⲡⲑⲁⲓⲧⲉ ⲑⲉ ⲛⲧⲁⲩⲁϩⲉⲣⲁⲧⲟⲩ ⲙⲙⲟⲥ ⲛϭⲓⲙⲙⲁⲛϣⲓⲛⲉ ⲛⲛϩⲉⲑⲛⲟⲥ ⲁⲩⲱ ⲧⲁⲓⲧⲉ ⲑⲉ ⲛⲧⲁⲛⲇⲁⲓⲙⲱⲛ ⲡⲗⲁⲛⲁ ⲙⲙⲟⲟⲩ ⲙⲡⲉⲓⲟⲩⲟⲉⲓϣ ⲁⲗⲗⲁ ⲁⲥⲗⲟ ⲛⲧⲉⲩⲛⲟⲩ ⲛϭⲓⲧⲉⲡⲗⲁⲛⲏ ϫⲉⲁϥⲉⲓ ⲛϭⲓⲡⲇⲩⲙⲉⲓⲟⲩⲣⲅⲟⲥ ⲡⲉⲛⲧⲁϥⲟⲩⲱⲥϥ ⲛⲛⲉⲛⲇⲁⲓⲙⲱⲛ ⲙⲛⲛⲉⲩⲉⲛⲉⲣⲅⲓⲁ. ⲛⲥⲉⲥⲟⲟⲩⲛ ⲅⲁⲣ ⲁⲛ ⲛ̅ⲗⲁⲁⲩ ⲉⲃⲟⲗ ϩⲓⲧⲟⲟⲧⲟⲩ ⲙⲙⲓⲛ ⲙⲙⲟⲟⲩ ⲁⲗⲗⲁ ⲛⲑⲉ ⲛϩⲉⲛⲣⲉϥϫⲓⲟⲩⲉ ϣⲁⲩⲧⲁⲩⲟ ⲛⲛⲉⲛⲧⲁⲩⲛⲁⲩ ⲉⲣⲟⲟⲩ ϩⲓⲧⲛ̅ϩⲟⲓⲛⲉ. ⲛϩⲟⲩⲟ ⲇⲉ ϩⲉⲛⲣⲉϥⲧⲟⲛⲧⲛ̅ⲛⲉ ϩⲉⲛⲡⲣⲟⲕⲛⲱⲥⲧⲏⲥ ⲁⲛⲛⲉ. ⲉⲧⲃⲉⲡⲁⲓ ⲅⲁⲣ ⲉⲩϣⲁⲛϭⲛϩⲟⲓⲛⲉ ⲛ̅ⲧⲉⲓⲙⲓⲛⲉ ⲉⲩϫⲉⲙⲉ ⲙ̅ⲡⲣ̅ⲧⲣⲉⲟⲩⲁ ⲣ̅ϣⲡⲏⲣⲉ ⲓ̅ⲏ̅ⲥ̅ⲛϭ. Ⲁ ⲙⲙⲟⲟⲩ. ⲕⲁⲓⲅⲁⲣ ⲛⲥⲁⲉⲓⲛ ⲉⲁⲩϫⲓⲡⲉⲓⲣⲁ ⲛⲛ̅ϣⲱⲛⲉ ⲉⲩϣⲁⲛⲛⲁⲩ ⲉϩⲟⲓⲛⲉ ⲉⲩϣⲱⲛⲉ ϩⲙⲡⲉⲓϣⲱⲛⲉ ⲛⲛⲟⲩⲱⲧ ϣⲁⲩⲧⲟⲛⲧⲛ ⲛϩⲁϩ ⲛⲥⲟⲡ ⲉⲃⲟⲗ ϩⲓⲧⲛⲧⲉⲩⲥⲩⲛⲏⲑⲓⲁ ⲛ̅ϣⲟⲣⲡ̅ . ⲛⲛⲉⲉⲃ ⲇⲉ ⲟⲛ ⲙⲛⲛⲟⲩⲉⲓⲏ ⲉⲃⲟⲗ ϩⲛⲧⲉⲩⲥⲩⲛⲏⲑⲓⲁ ⲉⲩϣⲁⲛⲛⲁⲩ ⲉⲧⲙⲓⲛⲉ ⲙⲡⲁⲏⲣ ⲛⲑⲉ ⲉⲧϥϣⲟⲟⲡ ⲙⲙⲟⲥ ϣⲁⲩⲣ̅ϣⲟⲣⲡ ⲉϫⲟⲟⲥ ⲉⲧⲃⲉⲡⲉⲭⲓⲙⲟⲛ ϫⲉϥⲛⲁϣⲱⲡⲉ ⲁⲩⲱ ⲉⲧⲃⲉⲡⲁⲓ ⲟⲛ ⲟⲩⲛⲟⲩⲁ ⲛⲁϫⲟⲟⲥ ϫⲉ ⲉⲃⲟⲗ ϩⲓⲧⲛ̅ⲟⲩⲛⲓϥⲉ ⲛ̅ⲧⲉⲡⲛⲟⲩⲧⲉ ⲛⲧⲁⲩⲣ̅ϣⲟⲣⲡ̅ ⲉϫⲉⲛⲁⲓ ⲁⲗⲗⲁ ⲣ ⲉⲃⲟⲗ ϩⲓⲧⲛ̅ⲧⲡⲉⲓⲣⲁ ⲙⲛⲧⲥⲩⲛⲏⲑⲓⲁ. ⲉⲧⲃⲉⲡⲁⲓ ⲛⲇⲁⲓⲙⲱⲛⲓⲟⲛ ⲉⲩⲧⲟⲛⲧⲛ̅ ϣⲁⲩⲣ̅ϣⲟⲣⲡ ⲛⲥⲉϫⲉⲛⲁⲓ ⲛⲧⲉⲓϩⲉ. ⲙⲡⲣ̅ⲧⲣⲉⲟⲩⲁ ⲣ̅ϣⲡⲏⲣⲉ ⲙⲙⲟⲟⲩ ϩⲁⲡⲉⲓϩⲱⲃ ⲟⲩⲇⲉ ⲙⲡⲣⲧⲣⲉϥϯϩⲧⲏϥ ⲉⲣⲟⲟⲩ. ⲟⲩ ⲅⲁⲣⲡⲉ ⲡϩⲱⲃ ⲏ ⲡϩⲏⲩ ⲛⲛⲉⲧⲥⲱⲧⲙ̅ ⲉⲧⲣⲉⲩⲉⲓⲙⲉ ⲉⲧⲃⲉⲛⲉⲧⲛⲏⲩ ϩⲁⲑⲏ ⲛϩⲉⲛϩⲟⲟⲩ ⲉⲃⲟⲗ ϩⲓⲧⲛⲛⲁⲓ. ⲏ ⲟⲩⲧⲉ ⲧⲉⲥⲡⲟⲩⲇⲏ ⲉⲉⲓⲙⲉ ⲉⲛⲁⲓ. ⲙⲡⲉⲓϩⲱⲃ ⲅⲁⲣ ⲁⲛ ⲛⲧⲉⲓⲙⲓⲛⲉ ⲡⲉϣⲁϥⲣ̅ϩⲱⲃ ⲉⲧⲁⲣⲉⲧⲏ ⲟⲩⲇⲉ ⲛⲛⲟⲩⲙⲁⲉⲓⲛ ⲁⲛⲡⲉ ⲛ̅ⲟⲩⲥⲙⲟⲧ ⲉⲛⲁⲛⲟⲩϥ. ⲙⲛⲗⲁⲁⲩ ⲅⲁⲣ ⲙⲙⲟⲛ ⲉⲩⲛⲁϯϩⲁⲡ ⲉⲣⲟϥ ϫⲉⲉⲧⲃⲉⲟⲩ ⲛϥ̅ⲥⲟⲟⲩⲛ ⲁⲛ ⲛⲛⲁⲓ ⲁⲩⲱ ⲙⲛⲗⲁⲁⲩ ⲉⲩⲛⲁⲙⲁⲕⲁⲣⲓⲍⲉ ⲙⲙⲟϥ ϫⲉⲁϥⲉⲓⲙⲉ ⲉⲛⲁⲓⲭ ⲁⲗⲗⲁ ⲉⲩⲛⲁⲕⲣⲓⲛⲉ ⲙ̅ⲡⲟⲩⲁ ⲡⲟⲩⲁ ϩⲛⲛⲁⲓ ϫⲉⲁϥϩⲁⲣⲉϩ ⲉⲧⲡⲓⲥⲧⲓⲥ ⲁⲩⲱ ϫⲉⲁϥϩⲁⲣⲉϩ ⲉⲛⲛ̅ⲧⲟⲗⲏ ⲡ̅ⲛ̅ⲁ̅ⲉⲥ. Ⲁ ϩⲛⲟⲩⲙⲛⲧϩⲁⲕ.

34. ⲉⲧⲃⲉⲡⲁⲓ ⲛϣϣⲉ ⲁⲛ ⲉϥⲉⲓⲣⲟⲟⲩϣ ϩⲁⲛⲁⲓ ⲏ ⲉⲧⲣⲉⲛⲁⲥⲕⲉⲓ ⲏ ⲉⲧⲣⲉⲛϣⲉⲡϩⲓⲥⲉ ⲉⲧⲃⲉⲛⲁⲓ ϫⲉⲕⲁⲥ ⲉⲛⲉⲉⲓⲙⲉ ⲉⲛⲉⲧⲛⲁϣⲱⲡⲉ ⲁⲗⲗⲁ ϫⲉⲕⲁⲥ ⲛⲧⲟϥ ⲉⲛⲉⲣⲁⲛⲁϥ ⲙⲡⲛⲟⲩⲧⲉ ⲕⲁⲗⲱⲥ. ⲛϣϣⲉ ⲅⲁⲣ ⲁⲛ ⲉϣⲗⲗ̅ ϫⲉⲉⲛⲉⲉⲓⲙⲉ ⲛ̅ϣⲟⲣⲡ̅ ⲁⲗⲗⲁ ϫⲉⲕⲁⲥ ⲛ̅ⲧⲟϥ ⲉϥⲉϣⲱⲡⲉ ⲛⲁⲛ ⲛϭⲓⲡϫⲟⲉⲓⲥ ⲉϥⲉϯ ⲛⲧⲟⲟⲧⲛ ⲉⲧⲣⲉⲛϫⲣⲟ ⲉⲡⲇⲓⲁⲃⲟⲗⲟⲥ. ⲉϣϫⲉ ⲡⲉⲓϩⲱⲃ ⲟ ⲛⲣⲟⲟⲩϣ ⲛⲁⲛ ϩⲱⲥⲧⲉ ⲉⲧⲣⲉⲛⲉⲓⲙⲉ ⲙⲁⲣⲉⲛϣⲱⲡⲉ ⲉⲛⲧⲃ̅ⲃⲏⲩ ϩⲙⲡⲉⲛϩⲏⲧ. ⲁⲛⲟⲕ ⲅⲁⲣ ϯⲡⲓⲥⲧⲉⲩⲉ ϫⲉⲟⲩⲯⲩⲭⲏ ⲉⲩϣⲁⲛⲧⲃ̅ⲃⲟⲥ ⲁⲩⲱ ⲉⲥⲁϩⲉⲣⲁⲧⲥ̅ ⲛⲥⲁⲥⲁ ⲛⲓⲙ ϩⲙⲡⲉⲥⲫⲩⲥⲓⲕⲟⲛ ⲟⲩⲛϣϭⲟⲙ ⲙⲙⲟⲥ ⲉϣⲱⲡⲉ ⲛ̅ⲣⲉϥⲛⲁⲩ ⲉⲡⲉϩⲟⲩⲟ ⲁⲩⲱ ⲉⲛⲁⲩ ⲉⲛⲉⲧⲟⲩⲏⲩ ⲙ̅ ϥ.ⲫ ⲙⲟⲥ ⲉϩⲟⲩⲉ ⲉⲛⲇⲁⲓⲙⲱⲛⲓⲟⲛ ⲛⲛⲟⲩⲙⲏⲏϣⲉ ⲛⲥⲟⲡ ⲉⲩⲛ̅ⲧⲁⲥ ⲙⲙⲁⲩ ⲙⲡϫⲟⲉⲓⲥ ⲉϥϭⲱⲗⲡ̅ ⲛⲁⲥ ⲉⲃⲟⲗ ⲛⲑⲉ ⲛ̅ⲧⲁⲉⲗⲓⲥⲥⲁⲓⲟⲥ ⲡⲉⲡⲣⲟⲫⲏⲧⲏⲥ ⲛⲁⲩ ⲉⲛⲉϩⲃⲏⲩⲉ ⲛⲅⲉⲉⲓⲥⲉ ⲁⲩⲱ ⲁϥⲛⲁⲩ ⲉⲛⲇⲩⲛⲁⲙⲓⲥ ⲉⲩⲕⲱⲧⲉ ⲉⲣⲟϥ.

35. ⲉⲩϣⲁⲛⲉⲓ ⲇⲉ ⲟⲛ ϣⲁⲣⲱⲧⲛ̅ ⲛⲧⲉⲩϣⲏ ⲛ̅ⲥⲉⲟⲩⲱϣ ⲉϫⲱ ⲉⲣⲱⲧⲛ̅ ⲛⲛⲉⲧⲛⲁϣⲱⲡⲉ ⲏ ⲛ̅ⲥⲉϫⲟⲟⲥ ϫⲉⲁⲛⲟⲛ ϩⲉⲛⲁⲅⲅⲉⲗⲟⲥ ⲙⲡⲣ̅ⲥⲱⲧⲙ̅ ⲛⲥⲱⲟⲩ. ⲉⲩϫⲓϭⲟⲗ ⲅⲁⲣ. ⲉⲩϣⲁⲛⲧⲁⲉⲓⲟ ⲇⲉ ⲟⲛ ⲛⲧⲉⲧⲛ̅ⲁⲥⲕⲏⲥⲓⲥ ⲁⲩⲱ ⲛ̅ⲥⲉⲙⲁⲕⲁⲣⲓⲍⲉ ⲙⲙⲱⲧⲛ ⲙⲡⲣ̅ⲥⲱⲧⲙ̅ ⲛⲥⲱⲟⲩ ⲁⲗⲗⲁ ⲥⲫⲣⲁⲅⲓⲍⲉ ⲙⲙⲱⲧⲛ ⲙⲛⲛⲉⲧⲛ̅ⲙⲁⲛϣⲱⲡⲉ ⲁⲩⲱ ⲛⲧⲉⲧⲛ̅ϣⲗⲏⲗ ⲧⲉⲧⲛⲛⲁⲛⲁⲩ ⲉⲣⲟⲟⲩ ⲉⲁⲩⲃⲱⲕ ϩⲛⲟⲩϣⲓⲡⲉ. ϩⲉⲛⲁⲧϭⲟⲙ ⲅⲁⲣⲛⲉ ⲁⲩⲱ ⲥⲉⲣ̅ϩⲟⲧⲉ ϩⲏⲧϥ ⲙⲡⲉⲥⲧⲁⲩⲣⲟⲥ ⲙⲡⲉⲭⲥ ⲉⲃⲟⲗ ϫⲉⲛⲧⲁϥⲕⲁⲛⲁⲓ ϩⲏⲩ ϩⲓⲧⲟⲟⲧϥ̅ ⲁⲩⲱ ⲁϥϫⲁⲓⲟⲟⲩ ⲉⲃⲟⲗ. ⲉⲩϣⲁⲛⲁϩⲉ ⲇⲉ ⲣⲁⲧⲟⲩϩⲛⲟⲩⲙⲛⲧϫⲁⲣⲃⲁⲗ ⲉⲩⲭⲟⲣⲉⲩⲉ ⲉⲩϣⲓⲃⲉ ⲙⲙⲟⲟⲩ ϩⲛϩⲉⲛⲫⲁⲛⲧⲁⲥⲓⲁ ⲙⲡⲣ̅ⲣϩⲟⲧⲉ ⲟⲩⲇⲉ ⲙⲡⲣ̅ⲡⲣⲟⲥⲉⲭⲉ ⲉⲣⲟⲟⲩ ϫⲉⲛⲁⲛⲟⲩⲟⲩ. ⲥⲙⲟⲧⲛ ⲇⲉ ⲟⲛ ⲉⲉⲓⲙⲉ ⲁⲩⲱ ⲉⲇⲓⲁⲕⲣⲓⲛⲉ ⲛⲧⲡⲁⲣⲣⲟⲩⲥⲓⲁ ⲛⲛⲉⲑⲟⲟⲩ ⲙⲛⲛⲉⲧⲛⲁⲛⲟⲩⲟⲩ ⲉⲣϣⲁⲛⲡⲛⲟⲩⲧⲉ ϯⲡⲉϩⲙⲟⲧ. ⲟⲩⲛϭⲟⲙ ⲅⲁⲣ ⲛ̅ⲥⲟⲩⲱⲛⲟⲩ ϩⲙⲡⲁⲓ. ⲡⲟⲩⲱⲛϩ̅ ⲙⲉⲛ ⲉⲃⲟⲗ ⲛⲛⲉⲧⲟⲩⲁⲁⲃ ⲉⲛϥϣⲧⲟⲣⲧⲣ̅ ⲁⲛ ⲟⲩⲇⲉ ⲛⲥⲉⲁϣⲕⲁⲕ ⲉⲃⲟⲗ ⲁⲛ ⲟⲩⲇⲉ ⲙⲛⲟⲩⲟⲛ ⲛⲁⲥⲱⲧⲙ̅ ⲉⲧⲉⲩⲥⲙⲏ. ⲉϣⲁⲩϣⲱⲡⲉ ⲅⲁⲣ ϩⲛⲟⲩⲥϭⲣⲉϩⲧ̅ ⲙⲛⲟⲩⲙⲛⲧⲣ̅ⲙⲣⲁϣ ϩⲱⲥⲧⲉ ⲛⲧⲉⲟⲩⲣⲁϣⲉ ϣⲱⲡⲉ ⲙⲛⲟⲩⲥⲟⲗⲥⲗ̅ ⲛⲧⲉⲯⲩⲭⲏ ⲉⲧⲙ̅ⲙⲁⲩ ϩⲛⲟⲩϭⲉ ϥ.ⲣ ⲡⲏ. ϥϣⲟⲟⲡ ⲅⲁⲣ ⲛⲙⲙⲁⲩ ⲛϭⲓⲡϫⲟⲉⲓⲥ ⲉⲧⲉⲛⲧⲟϥⲡⲉ ⲡⲥⲟⲗⲥⲗ̅ ⲉϥⲟ ⲛⲟⲩⲟⲉⲓⲛ ⲧⲏⲣϥ̅ ⲉⲧⲣⲉⲛⲛⲁⲩ ⲉⲛⲉⲧⲟⲩⲟⲛϩ ⲉⲃⲟⲗ. ⲉⲣϣⲁⲛϩⲟⲓⲛⲉ ⲣ̅ϩⲟⲧⲉ ϩⲱⲥ ⲣⲱⲙⲉ ⲉⲩϣⲁⲛⲛⲁⲩ ⲉⲡⲟⲩⲱⲛϩ̅ ⲉⲃⲟⲗ ⲛⲛⲉⲧⲧⲁⲓⲏⲩ ⲁⲩⲱ ⲉⲧⲛⲁⲛⲟⲩⲟⲩ ϣⲁⲣⲉⲛⲉⲧⲟⲩⲟⲛϩ̅ ⲉⲃⲟⲗ ϥⲓ ⲙⲙⲁⲩ ⲛⲑⲟⲧⲉ ⲛ̅ⲧⲉⲩⲛⲟⲩ ϩⲛⲟⲩⲁⲅⲁⲡⲏ ⲛⲑⲉ ⲛⲧⲁⲅⲁⲃⲣⲓⲏⲗ ⲁⲁⲥ ⲛⲍⲁⲭⲁⲣⲓⲁⲥ ⲁⲩⲱ ⲡⲁⲅⲅⲉⲗⲟⲥ ⲛⲧⲁϥⲟⲩⲟⲛϩ̅ ⲉⲃⲟⲗ ⲛⲛⲉϩⲓⲟⲙⲉ ϩⲙⲡⲉⲙϩⲁⲁⲩ ⲙⲡϫⲟⲉⲓⲥ ⲁⲩⲱ ⲡⲉⲛⲧⲁϥϣⲁϫⲉ ⲙⲛⲛⲛ̅ϣⲟⲟⲥ ϫⲉⲙⲡⲣⲣ̅ϩⲟⲧⲉ. ⲑⲟⲧⲉ ⲅⲁⲣ ⲛ̅ⲛⲉⲧ̅ⲙⲙⲁⲩ ⲛⲉⲥϣⲟⲟⲡ ⲁⲛ ⲉⲩⲙⲛⲧϭⲱⲃ ⲛ̅ⲧⲉⲯⲩⲭⲏ ⲁⲗⲗⲁ ⲉⲧⲣⲉⲩⲥⲟⲩⲛ̅ⲛⲉⲧⲧⲁⲓⲏⲩ ⲛ̅ⲧⲁⲩⲉⲓ ϣⲁⲣⲟⲟⲩ. ⲟⲩⲉⲧⲉⲓⲙⲓⲛⲉϭⲉⲡⲉ ⲡⲟⲩⲱⲛϩ̅ ⲉⲃⲟⲗ ⲛⲛⲉⲧⲟⲩⲁⲁⲃ.

36. ⲛⲉⲫⲁⲛⲧⲁⲥⲓⲁ ⲇⲉ ⲛ̅ⲧⲟⲟⲩ ⲛⲉⲑⲟⲟⲩ ϣⲧⲣ̅ⲧⲱⲣ ⲉⲩϣⲧⲟⲣⲧⲣ̅ ϩⲓⲧⲛ̅ϩⲉⲛϩⲣⲟⲟⲩ ⲙⲛϩⲉⲛⲛⲟϭⲛⲥⲙⲏ ⲙⲛϩⲉⲛⲁϣⲕⲁⲕ ⲛⲑⲉ ⲉϣⲁⲩⲁⲁⲥ ⲛϭⲓϩⲉⲛϣⲏⲣⲉ ⲕⲟⲩⲓ ⲛⲛⲁⲧⲥⲃⲱ ⲏ ϩⲉⲛⲗⲓⲥⲅⲏⲥ. ⲛⲁⲓ ⲇⲉ ⲛⲧⲉⲩⲛⲟⲩ ϣⲁⲣⲉⲟⲩϩⲟⲧⲉ ϣⲱⲡⲉ ⲛⲧⲉⲯⲩⲭⲏ ⲉⲃⲟⲗ ϩⲓⲧⲟⲟⲧⲟⲩ ⲟⲩⲧⲁⲣⲁⲭⲏ ⲙⲛⲟⲩϣⲧⲟⲣⲧⲣ̅ ⲛⲗⲟⲅⲓⲥⲙⲟⲥ ⲟⲩⲙⲟⲥⲧⲉ ⲟⲩⲱⲕⲙ̅ ⲟⲩⲣ̅ⲡⲙⲉⲉⲩⲉ ⲛⲛⲉⲩⲣⲙⲛⲏⲓ ⲟⲩϩⲟⲧⲉ ⲛⲧⲉⲡⲙⲟⲩ ⲙⲛⲛⲥⲁⲛⲁⲓ ⲧⲉⲡⲉⲑⲩⲙⲓⲁ ⲛⲙⲡⲉⲑⲟⲟⲩ ⲟⲩⲙⲛⲧⲕⲟⲩⲓ ⲛϩⲏⲧ ⲉϩⲟⲩⲛ ⲉⲧⲁⲣⲉⲧⲏ ⲟⲩⲙⲟⲥⲧⲉ ⲉϩⲟⲩⲛ ⲉⲧⲁⲥⲕⲏⲥⲓⲥ. ϩⲟⲧⲁⲛ ⲇⲉ ⲉⲧⲉⲧⲛ̅ϣⲁⲛⲛⲁⲩ ⲉϩⲟⲓⲛⲉ ⲉⲁⲩⲟⲩⲱⲛϩ̅ ⲉⲃⲟⲗ ⲛⲏⲧⲛ̅ ⲙⲡⲣ̅ⲣ̅ϩⲟⲧⲉ. ⲉϣⲱⲡⲉ ⲉⲩϣⲁⲛϥⲉⲓⲑⲟⲧⲉ ⲛⲧⲉⲩⲛⲟⲩ ⲛⲧⲉⲟⲩⲣⲁϣⲉ ϣⲱ ϥ.ⲫ ⲡⲉ ⲛⲏⲧⲛ̅ ⲉⲡⲉⲥⲙⲁ ⲙⲛⲟⲩⲟⲩⲛⲟϥ ⲙⲛⲟⲩⲙ̅ⲧⲟⲛ ⲙⲛⲟⲩⲥϭⲣⲉϩⲧ ⲛⲛ̅ϣⲟϫⲛⲉ ⲙⲡϩⲏⲧ ⲙⲛⲟⲩⲁⲅⲁⲡⲏ ⲉϩⲟⲩⲛ ⲉⲡⲛⲟⲩⲧⲉ ⲧⲱⲕ ⲛ̅ϩⲏⲧ ⲁⲩⲱ ⲛⲧⲉⲧⲛ̅ϣⲗⲏⲗ. ⲡⲣⲁϣⲉ ⲅⲁⲣ ⲙⲛⲡⲉⲥⲙⲓⲛⲉ ⲛⲧⲉⲯⲩⲭⲏ ϥⲟⲩⲟⲛϩ̅ ⲉⲃⲟⲗ ⲙⲡⲧⲃ̅ⲃⲟ ⲙⲡⲉⲛⲧⲁϥⲉⲓ ϣⲁⲣⲱⲧⲛ̅. ⲧⲁⲓⲧⲉ ⲑⲉ ⲛⲧⲁⲁⲃⲣⲁϩⲁⲙ ⲛⲁⲩ ⲉⲡϫⲟⲉⲓⲥ ⲁϥⲧⲉⲗⲏⲗ ⲁⲩⲱ ⲓⲱϩⲁⲛⲛⲏⲥ ⲛⲧⲉⲣⲉⲧⲉⲥⲙⲏ ⲛⲧⲡⲁⲣⲑⲉⲛⲟⲥ ⲉⲧⲟⲩⲁⲁⲃ ⲙⲁⲣⲓⲁ ⲧⲁϩⲟϥ ⲁϥⲥⲕⲓⲣⲧⲁ ϩⲛⲟⲩⲧⲉⲗⲏⲗ ⲁⲩⲱ ⲁϥϫⲓϥⲟϭⲥ.ⲉⲩϣⲁⲛⲟⲩⲱⲛϩ̅ ⲇⲉ ⲛⲏⲧⲛ ⲉⲃⲟⲗ ⲛⲧⲉⲟⲩⲛⲟϭ ⲛϣⲧⲟⲣⲧⲣ̅ ⲧⲁϩⲉⲧⲉⲯⲩⲭⲏ ⲙⲛⲟⲩⲁⲡⲉⲓⲗⲏ ⲛⲧⲉⲡⲙⲟⲩ ⲙⲛⲛⲉⲧⲛⲏⲩ ⲙⲛⲛ̅ⲥⲁⲛⲁⲓ Ⲭ . . . . . . . .,.

37. ⲙⲁⲣⲉⲡⲉⲓⲕⲉϩⲱⲃ ⲟⲛ ϣⲱⲡⲉ ⲉϥⲟⲩⲟⲛϩ̅ ⲛⲏⲧⲛ ⲉⲃⲟⲗ. ⲉⲣϣⲁⲛⲧⲉⲯⲩⲭⲏ ⲛϩⲟⲓⲛⲉ ϣⲱⲡⲉ ⲉⲥⲙⲏⲛ ⲉⲃⲟⲗ ϩⲛⲑⲟⲧⲉ ⲉⲓⲙⲉ ϫⲉⲛϫⲁϫⲉ ⲛⲉⲛⲧⲁⲩⲉⲓ. ⲙⲉⲣⲉⲛⲇⲁⲓⲙⲱⲛ ⲅⲁⲣ ⲉϣϥⲓ ⲙⲙⲁⲩ ⲛⲧⲙⲛⲧϭⲱⲃ ϩⲛⲛⲁⲓ ⲛⲧⲉⲓⲙⲓⲛⲉ ⲛⲑⲉ ⲛⲧⲁⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲁⲁⲥ ⲙⲙⲁⲣⲓⲁ ⲙⲛⲍⲁⲭⲁⲣⲓⲁⲥ ⲁⲩⲱ ⲡⲉⲛⲧⲁϥⲟⲩⲱⲛϩ̅ ⲉⲛⲉϩⲓⲟⲙⲉ ϩⲙⲡⲧⲁⲫⲟⲥⲭ ⲁⲗⲗⲁ ⲛ̅ϩⲟⲩⲟ ⲉⲩϣⲁⲛⲛⲁⲩ ⲉϩⲟⲓⲛⲉ ⲉⲩϣⲧⲣ̅ⲧⲟⲣ ϣⲁⲩⲉⲓⲣⲉ ⲛϩⲉⲛⲛⲟϭ ⲙ̅ⲫⲁⲛⲧⲁⲥⲓⲁ ⲉⲡⲉϩⲟⲩⲟ. ⲙⲛⲛⲥⲱⲥ ϣⲁⲩϫⲓⲥⲉ ⲛϩⲏⲧ ⲛ̅ⲥⲉⲥⲱⲃⲉ ⲙⲙⲟⲟⲩ ⲉⲩϫⲱ ⲙⲙⲟⲥ ϫⲉⲡⲉϩⲧ̅ⲧⲏⲩⲧⲛ̅ ⲛⲧⲉⲧⲛ̅ⲟⲩⲱϣⲧ ⲛⲁⲛ. ⲛⲧⲁⲩⲁⲡⲁⲧⲁ ⲅⲁⲣ ⲛⲛ̅ϩⲉⲗⲗⲏⲛ ϩⲙ ϥ.ⲣ̀ ⲡⲉⲓⲥⲙⲟⲧ. ⲧⲁⲓⲧⲉ ⲑⲉ ⲛ̅ⲧⲁⲩⲙⲉⲉⲩⲉ ⲉⲣⲟⲟⲩ ϫⲉϩⲉⲛⲛⲟⲩⲧⲉ ⲛⲛⲟⲩϫⲛⲉ. ⲁⲛⲟⲛ ⲇⲉ ⲙⲡⲉϥⲕⲁⲁⲛ ⲛϭⲓⲡⲉⲛϫⲟⲉⲓⲥ ⲉⲧⲣⲉⲡⲇⲓⲁⲃⲟⲗⲟⲥ ⲁⲡⲁⲧⲁ ⲙⲙⲟⲛ. ⲛⲧⲉⲣⲉϥⲉⲓⲣⲉ ⲅⲁⲣ ⲛϩⲉⲛⲫⲁⲛⲧⲁⲥⲓⲁ ⲁϥⲉⲡⲓⲧⲓⲙⲁ ⲛⲁϥ ⲓ̅ⲏ̅ⲥ̅ⲛϭ. ⲭ̅ⲣ̅ⲥ̅ ⲉϥϫⲱ ⲙⲙⲟⲥ ϫⲉⲃⲱⲕ ⲉⲡⲁϩⲟⲩ ⲙⲙⲟⲓ ⲡⲥⲁⲧⲁⲛⲁⲥ. ϥⲥⲏϩ ⲅⲁⲣ ϫⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲡⲉⲧⲕ̅ⲛⲁⲟⲩⲱϣⲧ ⲛⲁϥ ⲁⲩⲱ ⲛⲧⲟϥ ⲙⲁⲩⲁⲁϥ ⲡⲉⲧⲕ̅ⲛⲁϣⲙ̅ϣⲉ ⲛⲁϥ. ⲛϩⲟⲩⲟ ⲇⲉ ⲟⲛ ⲙⲁⲣⲉⲛⲕⲁⲧⲁⲫⲣⲟⲛⲉⲓ ⲙ̅ⲡⲉⲓⲥⲁⲛⲕⲟⲧⲥ̅. ⲡⲉⲛⲧⲁⲡϫⲟⲉⲓⲥ ϫⲟⲟϥ ⲛⲧⲁϥⲁⲁϥ ⲉⲧⲃⲏⲏⲧⲛ̅ ϫⲉⲕⲁⲥ ⲉⲩⲉⲥⲱⲧⲙ ⲉⲃⲟⲗ ϩⲓⲧⲟⲟⲧⲧⲏⲩⲧⲛ ⲛϭⲓⲛⲇⲁⲓⲙⲱⲛ ⲉⲛϣⲁϫⲉ ⲛ̅ⲧⲉⲓⲙⲓⲛⲉ ⲛⲥⲉⲣ̅ⲁⲧϭⲟⲙ ⲉⲧⲃⲉⲡϫⲟⲉⲓⲥ ⲛ̅ⲧⲁϥ ⲉⲡⲓⲧⲓⲙⲁ ⲛⲁⲩ.

38. ⲛϣϣⲉϭⲉ ⲁⲛ ⲉⲧⲣⲉⲟⲩⲁϣⲟⲩϣⲟⲩ ⲙⲙⲟϥ ϫⲉⲉϥⲛⲉϫⲇⲁⲓⲙⲱⲛⲓⲟⲛ ⲉⲃⲟⲗ ⲟⲩⲇⲉ ⲉⲧⲣⲉϥϫⲓⲥⲉ ⲛϩⲏⲧ ⲉϫⲛϩⲉⲛⲧⲁⲗϭⲟ ⲟⲩⲇⲉ ⲉⲣ̅ϣⲡⲏⲣⲉ ⲙⲡⲉⲧⲛⲉϫⲇⲁⲓⲙⲱⲛⲓⲟⲛ ⲉⲃⲟⲗ ⲙⲙⲁⲧⲉ ⲁⲩⲱ ⲉⲥⲉϣϥ̅ⲡⲉⲧⲉⲛϥⲛⲟⲩϫ ⲉⲃⲟⲗ ⲁⲛ. ⲁⲗⲗⲁ ϣϣⲉ ⲛ̅ⲧⲟϥ ⲉⲧⲣⲉⲛϯϩⲧⲏⲛ ⲉⲧⲁⲥⲕⲏⲥⲓⲥ ⲙⲡⲟⲩⲁ ⲡⲟⲩⲁ ⲁⲩⲱ ⲛⲧⲛ̅ⲕⲱϩ ⲉⲣⲟⲟⲩ. ⲡⲉⲓⲣⲉ ⲅⲁⲣ ⲛϩⲉⲛⲙⲁⲉⲓⲛ ⲙⲛϩⲉⲛϣⲡⲏⲣⲉ ⲙⲡⲱⲛ ⲁⲛⲡⲉⲭ ⲁⲗⲗⲁ ⲡⲁⲡⲉⲛⲥⲱⲧⲏⲣⲡⲉ. ⲁϥϫⲟⲟⲥ ⲅⲁⲣ ⲛⲛⲉϥⲙⲁⲑⲏⲧⲏⲥ ϫⲉⲙⲡⲣ̅ⲣⲁϣⲉ ϫⲉⲛⲇⲁⲓⲙⲱⲛⲓⲟⲛ ϩⲩⲡⲟⲧⲁⲥⲥⲉ ⲛⲏⲧⲛ̅ⲭ ⲁⲗⲗⲁ ϫ̀ⲉⲣ̀ⲁϣⲉ ⲛⲧⲟϥ ϫⲉⲛⲉⲧⲛ̅ⲣⲁⲛ ⲥⲏϩ ϩⲛⲛⲙⲡⲏⲩⲉ. Ⲭ. . . . . . . . . . . . . .,: ⲟⲩⲙⲛ̅ⲧⲙⲛ̅ⲧⲣⲉ ⲛⲧⲉⲧⲁⲣⲉⲧⲏⲡⲉ ⲡⲉⲛⲃⲓⲟⲥ. ⲉⲛϣⲁⲛⲛⲉϫⲇⲁⲓⲙⲱⲛⲓⲟⲛ ⲉⲃⲟⲗ ϥ.ⲫ̀ϥ.ⲫ̀ ⲧⲉⲭⲁⲣⲓⲥ ⲧⲁⲡⲥⲱ̅ⲣⲧⲉ. ⲉⲧⲃⲉⲡⲁⲓ ⲁϥϫⲟⲟⲥ ⲛⲛⲉⲧⲉⲛⲥⲉϣⲟⲩϣⲟⲩ ⲙⲙⲟⲟⲩ ⲁⲛ ϩⲛⲧⲁⲣⲉⲧⲏ ⲁⲗⲗⲁ ⲉⲩϣⲟⲩϣⲟⲩ ⲙⲙⲟⲟⲩ ⲉϫⲛⲛⲙⲙⲁⲉⲓⲛ ⲉⲩϫⲱ ⲙⲙⲟⲥ ϫⲉⲙⲏ ϩⲣⲁⲓ ⲁⲛ ϩⲙⲡⲉⲕⲣⲁⲛ ⲁⲛⲛⲉϫⲇⲁⲓⲙⲱⲛⲓⲟⲛ ⲉⲃⲟⲗ ⲁⲩⲱ ⲁⲛⲉⲓⲣⲉ ⲛϩⲉⲛⲛⲟϭ ⲛϭⲟⲙ ϩⲙⲡⲉⲕⲣⲁⲛⲭ ⲁϥⲟⲩⲱϣⲃ ⲛⲁⲩ ϫⲉϩⲁⲙⲏⲛ ϯϫⲱ ⲙⲙⲟⲥ ⲛⲏⲧⲛ̅ ϫⲉⲛϯⲥⲟⲟⲩⲛ ⲙⲙⲱⲧⲛ ⲁⲛ. ⲙⲡϫⲟⲉⲓⲥ ⲅⲁⲣ ⲥⲟⲟⲩⲛ ⲁⲛ ⲛⲧⲉϩⲓⲏ ⲛⲁⲥⲉⲃⲏⲥ. ϣϣⲉ ⲇⲉ ⲉⲣⲟⲛ ⲉⲧⲣⲉⲛϣⲗⲏⲗ ⲛⲛⲟⲩⲟⲉⲓϣ ⲛⲓⲙ ⲁϫⲛⲱϫⲛ ⲕⲁⲧⲁⲑⲉ ⲛⲧⲁⲩϣⲣⲡ̅ϫⲟⲟⲥ ⲉⲧⲣⲉⲛϫⲓ ⲛⲛⲟⲩϩⲙⲟⲧ ⲛⲇⲓⲁⲕⲣⲏⲥⲓⲥ ⲙⲡⲛⲁ ⲉ̀ϯⲁⲕⲣⲓⲛⲉ ⲛⲛⲉⲡⲛⲁ ̀ϫⲉⲕⲁⲥ ⲛⲛⲉⲛⲡⲓⲥⲧⲉⲩⲉ ⲙⲡⲛⲁ ⲛⲓⲙ.

39. ⲉⲛⲉⲓⲟⲩⲱϣ ⲇⲉⲡⲉ ⲉⲕⲁⲣⲱⲓ ⲁⲩⲱ ⲉⲧⲙ̅ϫⲉⲗⲁⲁⲩ ϩⲁⲣⲟⲓ. ⲁⲗⲗⲁ ϫⲉⲕⲁⲥ ⲛⲛⲉⲧⲛⲙⲉⲉⲩⲉ ϫⲉⲉⲓϫⲱ ⲛⲛⲁⲓ ⲛⲧⲉⲓϩⲉ ϩⲁⲡⲗⲟⲥ ⲁⲗⲗⲁ ⲡⲓⲥⲧⲉⲩⲉ ϫⲉⲉⲓϫⲱ ⲛⲛⲁⲓ ϩⲛⲟⲩϫⲟⲛⲧⲥ̅ ⲙⲛⲟⲩⲙⲉ. ⲁⲗⲗⲁ ϥⲥⲟⲟⲩⲛ ⲛϭⲓⲡϫⲟⲉⲓⲥ ⲉⲧⲥⲱⲧⲙ̅ ⲉⲡⲧⲃ̅ⲃⲟ ⲛⲧⲁⲥⲩⲛⲏⲇⲏⲥⲓⲥ ϫⲉⲉⲓⲛⲁϫⲟⲟⲩ ⲁⲛ ⲉⲧⲃⲏⲏⲧ ⲁⲗⲗⲁ ⲉⲧⲃⲉⲧⲉⲧⲛ̅ⲁⲅⲁⲡⲏ ⲙⲛ̅ ϥ.ⲡ̅ⲛ̅ⲁ̅ⲉⲥ. ⲭ ⲧⲉⲧⲛⲡⲣⲟⲕⲟⲡⲏ. ⲙ̀ⲛⲛ̀ⲉⲛⲧⲁⲓⲛⲁⲩ ⲉⲣⲟⲟⲩ. ⲛⲧⲉⲛⲇⲁⲓⲙⲱⲛ ⲛⲁⲓ ⲁⲛⲟⲕ ⲉϯⲛⲁϫⲟⲟⲩ ⲧⲉⲛⲟⲩ. ϩⲁϩ ⲛⲥⲟⲡ ⲁⲩⲙⲁⲕⲁⲣⲓⲍⲉ ⲙⲙⲟⲓ ⲁⲩⲱ ⲁⲩⲥⲁϩⲟⲩ ⲙⲙⲟⲓ ϩⲙⲡⲣⲁⲛ ⲙⲡϫⲟⲉⲓⲥ. ϩⲁϩ ⲛⲥⲟⲡ ⲁⲩϫⲟⲟⲥ ⲛⲁⲓ ⲉⲧⲃⲉⲡⲙⲟⲟⲩ ⲙⲡⲉⲓⲉⲣⲟⲭ ⲁⲛⲟⲕ ϩⲱ ϣⲁⲓϫⲟⲟⲥ ⲛⲁⲩ ϫⲉⲟⲩⲡⲉ ⲡⲉⲧⲛⲣⲟⲟⲩϣ ϩⲁⲡⲁⲓ. ϣⲁⲩ ϥ. ⲣ̀ ⲕⲱⲧⲉ ⲉⲣⲟⲓ ⲛⲑⲉ ⲛϩⲉⲛⲙⲁⲧⲟⲓ

ϩⲉⲛⲥⲟⲡ ⲇⲉ ⲟⲛ ϣⲁⲩⲙⲉϩⲡⲏⲓ ⲛϩ̅ⲧⲟ ϩⲓϫⲁⲧϥⲉ ⲁⲩⲱ ϣⲁⲓⲯⲁⲗⲗⲉⲓ ⲉⲓϫⲱ ⲙⲙⲟⲥ ϫⲉⲛⲁⲓ ϩⲛϩⲉⲛϩⲁⲣⲙⲁ ⲁⲩⲱ ⲛⲉⲓⲕⲟⲟⲩⲉ ϩⲛ̅ϩⲉⲛϩⲧⲱⲱⲣ ⲁⲛⲟⲛ ⲇⲉ ⲉⲛⲁⲁⲓⲁⲓ ϩⲙⲡⲣⲁⲛ ⲙⲡϫⲟⲉⲓⲥ ⲡⲉⲛⲛⲟⲩⲧⲉ. ⲁⲩⲱ ϩⲣⲁⲓ ϩⲙⲡⲉϣⲗⲏⲗ ϣⲁⲣⲉⲛⲁⲓ ϩⲉ ⲉⲡⲉⲥⲏⲧ ⲉⲃⲟⲗ ϩⲓⲧⲙ̅ⲡϫⲟⲉⲓⲥ. ⲁⲥϣⲱⲡⲉ ⲇⲉ ⲟⲛ ⲛⲛⲟⲩϩⲟⲟⲩ ⲁⲩⲉⲓ ϩⲙⲡⲕⲁⲕⲉ ⲉⲣⲉⲟⲩⲫⲁⲛⲧⲁⲥⲓⲁ ⲛⲟⲩⲟⲉⲓⲛ ⲛ̅ⲧⲟⲟⲧⲟⲩ ⲉⲩϫⲱ ⲙⲙⲟⲥ ϫⲉⲛⲧⲁⲛⲉⲓ ⲉⲣ̅ⲟⲩⲟⲉⲓⲛ ⲉⲣⲟⲕ ⲱ ⲁⲛⲧⲱⲛⲓⲟⲥ. ⲁⲛⲟⲕ ⲇⲉ ⲁⲓϣⲧⲁⲙ ⲛⲛⲁⲃⲁⲗ ⲁⲓϣⲗⲏⲗ ⲁⲩⲱ ⲛ̅ⲧⲉⲩⲛⲟⲩ ⲁⲡⲟⲩⲟⲉⲓⲛ ϫⲉⲛⲁ. ⲁⲩⲉⲓ ⲟⲛ ⲛⲛⲟⲩⲥⲟⲡ ⲛ̅ⲑⲉ ⲛⲛⲉⲧⲯⲁⲗⲗⲉⲓ ⲁⲩⲱ ⲉⲩϣⲁϫⲉ ϩⲛⲧⲉⲅⲣⲁⲫⲏ. ⲁⲛⲟⲕ ⲇⲉ ⲛⲑⲉ ⲛⲟⲩⲁⲗ ⲙⲡⲉⲓⲥⲱⲧⲙ̅. ⲁⲩⲕⲓⲙ ⲛⲛⲟⲩϩⲟⲟⲩ ⲉⲡⲁⲙⲟⲛⲁⲥⲧⲏⲣⲓⲟⲛⲭ ⲁⲛⲟⲕ ⲇⲉ ⲙ̅ⲡⲉⲓⲕⲓⲙ ϩⲙⲡⲁⲗⲟⲅⲓⲥⲙⲟⲥ. ⲁⲩⲉⲓ ⲟⲛ ⲉⲩϫⲁⲕ ⲉⲩⲥⲩⲣⲓⲍⲉ ⲉⲩϭⲟⲥϭⲥ. ⲁⲛⲟⲕ ⲇⲉ ⲁⲓϣⲗⲏⲗ ⲁⲓⲯⲁⲗⲗⲉⲓ ⲁⲩⲁⲣⲭⲉⲓ ϩⲱⲟⲩ ⲉⲣⲓⲙⲉ ⲁⲩⲱ ⲉⲧⲟⲉⲓⲧ.

40. ⲁϥⲟⲩⲱⲛϩ̅ ⲉⲃⲟⲗ ⲛⲟⲩⲥⲟⲡ ⲛϭⲓⲟⲩⲇⲁⲓⲙⲱⲛⲓⲟⲛ ⲉϥϣⲟⲓ ϩⲛⲟⲩⲫⲁⲛⲧⲁⲥⲓⲁ ⲁⲩⲱ ⲁϥⲧⲟⲗⲟⲙⲁ ⲉϫⲟⲟⲥ ϫⲉⲁⲛⲟⲕⲧⲉ ⲧϭⲟⲙ ⲙⲡⲉⲧϫⲟⲥⲉ ⲁⲩⲱ ⲁⲛⲟⲕⲡⲉ ⲧⲉⲡⲣⲟⲛⲟⲓⲁ. ⲟⲩ ⲡⲉⲧⲕⲟⲩⲁϣϥ ⲧⲁⲁⲁϥ ⲛⲁⲕ. ⲁⲛⲟⲕ ⲇⲉ ⲛϩⲟⲩⲟ ⲁⲓⲛⲓϥⲉ ⲛⲥⲱϥ ϩⲙⲡⲣⲁⲛ ⲙⲡϫⲟⲉⲓⲥ ⲁⲩⲱ ⲁⲓⲁⲣⲭⲉⲓ ⲛⲣⲱϩⲧ ⲉϣϫⲉ ⲉⲓϩⲓⲟⲩⲉ ⲉⲣⲟϥ ⲁⲩⲱ ⲡⲁⲓ ⲛ̅ⲧⲉⲓϭⲟⲧ ⲙⲛⲛⲉϥⲇⲁⲓⲙⲱⲛ ⲁⲩⲧⲁⲕⲟ ϩⲓⲧⲙⲡⲣⲁⲛ ⲙⲡⲉⲭⲥ. ⲁϥⲉⲓ ⲟⲛ ⲛⲁⲓ ⲛⲛⲟⲩϩⲟⲟⲩ ⲉⲓⲛⲏⲥⲧⲉⲩⲉ ⲙⲡⲉⲥⲙⲟⲧ ⲛⲟⲩⲙⲟⲛⲁⲭⲟⲥ ⲛϭⲓⲡⲥⲁⲛⲕⲟⲧⲥ̅. ϥ.ⲫ̀ ⲉⲩⲛ̅ϩⲉⲛⲟⲉⲓⲕ ⲛⲧⲟⲟⲧϥ ϩⲛⲟⲩⲛⲟϭ ⲙⲫⲁⲛⲧⲁⲥⲓⲁ ⲉϥⲟ ⲛⲑⲉ ⲛⲛⲟⲩⲁ ⲉϥϥⲉⲓⲣⲟⲟⲩϣ ϩⲁⲣⲟⲓ ⲉϥϫⲱ ⲙⲙⲟⲥ ⲛⲁⲓ ϩⲛⲟⲩⲙⲛⲧⲁⲧϣⲓⲡⲉ ϫⲉⲧⲱⲟⲩⲛ ⲛⲅ̅ⲟⲩⲱⲙ ⲁⲩⲱ ⲁⲗⲟ ⲉⲕϩⲛⲛⲉⲓⲙⲟⲕϩⲥ̅ ⲧⲏⲣⲟⲩ.ⲛⲅ̅ⲟⲩⲣⲱⲙⲉ ϩⲱⲱⲕ ⲁⲩⲱ ⲕⲛⲁϩⲓⲥⲉ ⲛⲅ̅ϣⲱⲛⲉ. ⲁⲛⲟⲕ ⲇⲉ ⲁⲓⲉⲓⲙⲉ ⲉⲛϥ̅ⲙⲛⲧⲥⲁⲛⲕⲟⲧⲥ̅ ⲁⲓⲁϩⲉⲣⲁⲧ ⲁⲓϣⲗⲏⲗ ⲁⲩⲱ ⲡⲉⲧⲙⲙⲁⲩ ⲙ̅ⲡⲉϥⲉϣϥⲉⲓ ⲉⲣⲟϥ ⲉⲓⲁϩⲉⲣⲁⲧ ⲉⲓϣⲗⲏⲗ ⲁⲗⲗⲁ ⲁϥⲱϫⲛ̅ ⲛ̅ⲑⲉ ⲛⲛⲟⲩⲕⲁⲡⲛⲟⲥ ⲉⲁϥⲟⲩⲱⲛϩ̅ ⲉⲃⲟⲗ ⲉϥⲃⲏⲕ ⲉⲃⲟⲗ ϩⲙⲡⲏⲓ. ϩⲁϩ ⲛⲥⲟⲡ ⲁϥⲧⲥⲁⲃⲟⲓ ⲉⲩⲛⲟⲩⲃ ϩⲓⲧⲉⲣⲏⲙⲟⲥ ϫⲉⲕⲁⲥ ⲉⲓϣⲁⲛⲛⲁⲩ ⲧⲁϫ ⲱϩ ⲉⲣⲟϥ ⲙⲙⲁⲧⲉ. ⲁⲛⲟⲕ ϫⲉ ⲁⲓⲯⲁⲗⲗⲉⲓ ⲁⲡⲉⲧⲙⲙⲁⲩ ⲃⲱⲗ ⲉⲃⲟⲗ. ϩⲁϩ ⲛⲥⲟⲡ ⲁⲩϩⲓⲟⲩⲉ ⲉⲣⲟⲓ ϩⲛϩⲉⲛⲥⲏϣⲉ. ⲁⲛⲟⲕ ⲇⲉ ⲛⲉⲓϫⲱ ⲙⲙⲟⲥ ϫⲉⲙⲛⲗⲁⲁⲩ ⲛⲁⲉϣⲡⲟⲣϫⲧ ⲉⲧⲁⲅⲁⲡⲏ ⲙ̅ⲡⲉⲭⲥ ⲁⲩⲱ ⲛⲉⲧⲙⲙⲁⲩ ⲁⲩϩⲓⲟⲩⲉ ⲉⲛⲉⲩⲉⲣⲏⲩ. ⲛⲁⲛⲟⲕ ⲁⲛ ⲡⲉⲛⲧⲁⲓⲕⲁⲧⲁⲣⲅⲉⲓ ⲛⲛⲉⲧⲙⲙⲁⲩ ⲏ ⲁⲓⲧⲣⲉⲩϭⲱ ⲁⲗⲗⲁ ⲡϫⲟⲉⲓⲥⲡⲉ ⲉϥϫⲱ ⲙⲙⲟⲥ ϫⲉⲁⲓⲛⲁⲩ ⲉⲡⲥⲁⲧⲁⲛⲁⲥ ⲉⲁϥϩⲉ ⲉⲡⲉⲥⲏⲧ ⲉⲃⲟⲗ ϩⲛⲧⲡⲉ ⲛⲑⲉ ⲛⲛⲟⲩⲉⲃⲣⲏϭⲉ. ⲁⲛⲟⲕ ⲇⲉ ⲱ ⲛⲁϣⲏⲣⲉ ⲁⲓⲣ̅ⲡⲙⲉⲉⲩⲉ ⲙⲡⲉϩⲣⲏⲧⲟⲛ ⲙ̅ⲡⲁⲡⲟⲥⲧⲟⲗⲟⲥ ⲁⲓϫⲉⲓ ⲙⲡⲉⲥⲭⲏⲙⲁ ⲉϩⲣⲁⲓ ⲉϫⲱⲓ ϫⲉⲕⲁⲥ ϩⲱⲧⲧⲏⲩⲧⲛ̅ ⲉⲧⲉⲧⲛⲛⲁϫⲓⲥⲃⲱ ⲉⲧⲙ̅ⲉⲛⲅ̅ⲕⲁϭⲓ ϩⲛⲧⲁⲥⲕⲏⲥⲓⲥ ⲁⲩⲱ ⲉⲧⲙ̅ⲣ̅ϩⲟⲧⲉ ϩⲏⲧⲟⲩ ⲛⲛⲉⲫⲁⲛⲧⲁⲥⲓⲁ ⲙⲡⲇⲓⲁⲃⲟⲗⲟⲥ.

41. ⲉⲡⲉⲓⲇⲏ ⲁⲓϣⲱⲡⲉ ⲛⲑⲉ ⲛⲛⲉⲓⲁⲑⲏⲧ ⲉⲓϫⲱ ⲛⲛⲁⲓ ϫⲓ ⲙⲡⲉⲓⲕⲉⲟⲩⲁ ⲛⲏ ϥ.ⲣ̀ ⲧⲛ̅ ⲉϩⲣⲁⲓ ⲉⲩⲙⲛⲧⲁⲧϩⲟⲧⲉ ⲛⲧⲉⲧⲛ̅ⲡⲓⲥⲧⲉⲩⲉ ϫⲉⲛϯϫⲓϭⲟⲗ ⲁⲛ. ⲁϥⲕⲱⲗϩ̅ ⲛⲛⲟⲩϩⲟⲟⲩ ⲉⲡⲣⲟ ⲙⲡⲙⲟⲛⲁⲥⲧⲏⲣⲓⲟⲛ ⲁⲩⲱ ⲛⲧⲉⲣⲓⲉⲓ ⲉⲃⲟⲗ ⲁⲓⲛⲁⲩ ⲉⲟⲩⲁ ⲉϥⲕⲏⲙ ⲉϥϫⲟⲥⲉ ⲉⲙⲁⲧⲉ. ⲁⲓϫⲛⲟⲩϥ ϫⲉⲛⲧⲕ̅ⲛⲓⲙ. ⲡⲉϫⲁϥ ϫⲉⲁⲛⲟⲕⲡⲉ ⲡⲥⲁⲧⲁⲛⲁⲥ. ⲡⲉϫⲁⲓ ⲛⲁϥ ϫⲉⲁⲩⲱ ⲉⲕⲣ̅ⲟⲩ ⲙⲡⲉⲓⲙⲁ. ⲡⲉϫⲁϥ ⲛⲁⲓ ϫⲉⲉⲧⲃⲉⲟⲩ ⲙⲙⲟⲛⲁⲭⲟⲥ ⲙⲛⲛⲉⲭⲣⲓⲥϯⲁⲛⲟⲥ ϭⲛⲁⲣⲓⲕⲉ ⲉⲣⲟⲓ ⲁⲩⲱ ⲉⲧⲃⲉⲟⲩ ⲥⲉⲥⲁϩⲟⲩ ⲙⲙⲟⲓ ⲛⲛⲁⲩ ⲛⲓⲙ. ⲡⲉϫⲁⲓ ⲛⲁϥ ϫⲉⲉⲧⲃⲉⲟⲩ ⲛ̅ⲧⲟⲕ ⲕϯϩⲓⲥⲉ ⲛⲁⲩ. ⲡⲉϫⲁϥ ϫⲉⲛⲁⲛⲟⲕ ⲁⲛⲡⲉ ⲁⲗⲗⲁ ⲛ̅ⲧⲟⲟⲩ ⲙⲁⲩⲁⲁⲩ ⲡⲉⲧϣⲧⲟⲣⲧⲣ ⲙⲙⲟⲟⲩ. ⲁⲛⲟⲕ ⲅⲁⲣ ⲁⲓⲣ̅ⲁⲧϭⲟⲙ ⲁⲩⲱ ⲁⲕⲟϣⲡⲁⲓ ϫⲉⲁⲛⲥⲏϥⲉ ⲙⲡϫⲁϫⲉ ⲱϫⲛ̅ ⲉⲡⲧⲏⲣϥ̅ ⲁⲕϣⲟⲣϣⲣ ⲛⲛⲉⲩⲡⲟⲗⲓⲥ. ⲁⲛⲟⲕ ⲅⲁⲣ ⲙⲛϯⲙⲁ ⲛϫⲓⲛⲉⲡⲉⲓⲛⲁⲩ ⲙⲛϯⲥⲟⲧⲉ ⲟⲩⲇⲉ ⲡⲟⲗⲓⲥ. ⲁⲛⲉⲭⲣⲓⲥϯⲁⲛⲟⲥ ϣⲱⲡⲉ ϩⲙⲙⲁ ⲛⲓⲙ ⲁⲡϫⲁⲓⲉ ⲙⲟⲩϩ ⲙⲙⲟⲛⲁⲭⲟⲥ. ⲙⲁⲣⲟⲩϩⲁⲣⲉϩ ⲉⲣⲟⲟⲩ ⲁⲩⲱ ⲙ̅ⲡⲣ̅ⲧⲣⲉⲩⲥⲁϩⲟⲩ ⲙⲙⲟⲓ ⲉⲡϫⲓⲛϫⲏ. ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲛϭⲓⲡⲇⲓⲁⲃⲟⲗⲟⲥ ⲁⲓⲣϣⲡⲏⲣⲉ ⲉⲙⲁⲧⲉ ⲛⲧⲉⲭⲁⲣⲓⲥ ⲙⲡϫⲟⲉⲓⲥ. ⲡⲉϫⲁⲓ ⲛⲁϥ ϫⲉⲛⲧⲅⲟⲩⲣⲉϥϫⲓϭⲟⲗ ⲁⲩⲱ ⲙⲡⲉⲕϫⲉⲙⲉ ⲉⲛⲉϩ.ⲡⲁⲓϭⲉ ⲧⲉⲛⲟⲩ ϩⲛⲟⲩⲙⲉ ⲛ̅ϩⲛⲁⲕ ⲁⲛ ⲁⲕϫⲟⲟϥ. ⲁⲗⲗⲁ ⲛⲧⲉⲣⲉⲡⲉⲭⲥ ⲉⲓ ⲁϥⲁⲁⲕ ⲛⲛⲁⲧϭⲟⲙ. ⲁⲩⲱ ⲓ̅ⲏ̅ⲥ̅ⲛϭ. ⲭ ̀ⲁϥⲧⲁⲩⲟⲕ ⲉⲡⲉⲥⲏⲧ ⲁϥⲕⲁⲁⲕ ⲕⲁϩⲏⲩ.ⲛⲧⲉⲣⲉϥⲥⲱⲧⲙ ⲇⲉ ⲉⲡⲣⲁⲛ ⲙⲡⲉⲭⲥ ⲙⲡⲉϥⲉϣϥⲉⲓ ⲉⲣⲟϥⲭ ⲁⲗⲗⲁ ⲛⲧⲉⲩⲛⲟⲩⲁϥⲣⲁⲧⲟⲩⲱⲛϩ̅ ⲉⲃⲟⲗ.

42. ⲉϣϫⲉ ⲛⲧⲟϥ ⲡⲇⲓⲁ ϥ.ⲫ̀ ⲃⲟⲗⲟⲥ ⲁϥϩⲟⲙⲟⲗⲟⲅⲉⲓ ϫⲉⲙⲛϣϭⲟⲙ ⲙⲙⲟϥ ϣϣⲉϭⲉ ⲉⲣⲟⲛ ϩⲱⲱⲛ ⲉⲕⲁⲧⲁⲫⲣⲟⲛⲉⲓ ⲙⲙⲟϥ ⲙⲛⲛⲉϥⲇⲁⲓⲙⲱⲛ. ⲡϫⲁϫⲉ ⲇⲉ ⲛⲧⲟϥ ⲙⲛⲛⲉϥⲕⲉⲟⲩϩⲟⲟⲣ ϩⲙⲡⲁⲛⲟⲩⲣⲅⲓⲁ ⲛⲧⲉⲓⲙⲓⲛⲉ ⲛⲉⲧϣⲟⲟⲡ ⲛⲁⲩ. ⲁⲛⲟⲛ ⲇⲉ ⲉⲁⲛⲉⲓⲙⲉ ⲉⲧⲉⲩⲙⲛⲧϭⲱⲃ ⲟⲩⲛϭⲟⲙ ⲙⲙⲟⲛ ⲉⲕⲁⲧⲁⲫⲣⲟⲛⲉⲓ ⲙⲙⲟⲟⲩ. ⲙⲡⲣ̅ⲧⲣⲉⲛⲡⲁϩⲧⲛ̅ ⲇⲉ ⲛⲁϥ ϩⲙⲡⲉⲛϩⲏⲧ ⲁⲩⲱ ⲙⲡⲣ̅ⲧⲣⲉⲛⲙⲉⲉⲩⲉ ⲉϩⲱⲃ ⲛⲧⲉⲓⲙⲓⲛⲉ ⲉⲡⲧⲏⲣϥ̅ .. ⲙⲁⲣⲉⲛⲧⲱⲕ ⲛϩⲏⲧ ⲛϩⲟⲩⲟ ⲁⲩⲱ ⲛⲧⲛⲣⲁϣⲉ ⲛⲛⲟⲩⲟⲉⲓϣ ⲛⲓⲙ ϩⲱⲥ ⲉⲁⲛⲟⲩϫⲁⲓ ⲁⲩⲱ ⲙⲁⲣⲉⲛⲙⲉⲉⲩⲉ ϩⲙⲡⲉⲛϩⲏⲧ ϫⲉⲡϫⲟⲉⲓⲥ ϣⲟⲟⲡ ⲛⲙ̅ⲙⲁⲛ ⲡⲁⲓ ⲛⲧⲁϥϫⲣⲟ ⲉⲣⲟⲟⲩ ⲁⲩⲱ ⲁϥⲕⲁⲧⲁⲫⲣⲟⲛⲉⲓ ⲙⲙⲟⲟⲩ. ⲙⲁⲣⲉⲛⲙⲉⲉⲩⲉ ⲛⲛⲟⲩⲟⲉⲓϣ ⲛⲓⲙ ⲁⲩⲱ ⲛⲧⲛϣⲟϫⲛⲉ ϩⲙⲡⲉⲛϩⲏⲧ ϫⲉⲉⲣⲉⲡϫⲟⲉⲓⲥ ϣⲟⲟⲡ ⲛⲙⲙⲁⲛ ⲙⲛϣϭⲟⲙ ⲛⲛϫⲁϫⲉ ⲉⲣⲗⲁⲁⲩ ⲙ̅ⲡⲉⲑⲟⲟⲩ ⲛⲁⲛ. ⲉⲩϣⲁⲛⲉⲓ ⲅⲁⲣ ⲛⲑⲉ ⲉⲧⲟⲩⲛⲁϩⲉ ⲉⲣⲟⲛ ⲙⲙⲟⲥ ⲉⲩⲛⲁϣⲱⲡⲉ ⲛⲧⲛ̅ϩⲉ ϩⲱⲟⲩ ⲁⲩⲱ ⲙⲙⲉⲉⲩⲉ ⲛϩⲏⲧ ⲉⲧⲟⲩⲛⲁϩⲉ ⲉⲣⲟⲛ ⲛϩⲏⲧⲟⲩ ⲧⲁⲓⲧⲉ ⲧⲉⲩϩⲉ ϩⲱⲟⲩ ϣⲁⲩⲉⲓⲣⲉ ⲛⲛⲉⲩⲫⲁⲛⲧⲁⲥⲓⲁ ⲟⲩⲃⲏⲛ. ⲉⲩϣⲁⲛϩⲉ ⲇⲉ ⲉⲣⲟⲛ ⲉⲛⲣ̅ϩⲟⲧⲉ ⲁⲩⲱ ⲉⲛϣⲧⲣⲧⲟⲣ ⲛⲧⲟⲟⲩ ϩⲱⲟⲩ ⲛⲑⲉ ⲛϩⲉⲛⲗⲓⲥⲧⲏⲥ ⲉϣⲁⲩϩⲉ ⲉⲡⲙⲁ ⲛⲥⲉⲣⲟⲉⲓⲥ ⲉⲣⲟϥ ⲁⲛ ⲥⲉⲛⲁⲧⲱⲟⲩⲛ ⲉϫⲱⲛ ⲁⲩⲱ ⲡⲉⲧⲛⲙⲉⲉⲩⲉ ⲉⲣⲟϥ ϩⲙⲡⲉⲛϩⲏⲧ ⲥⲉⲛⲁⲟⲩⲱϩ ⲉⲣⲟϥ ⲛⲥⲉⲁⲁϥ ⲛⲁⲛ. ⲉⲩϣⲁⲛϩⲉ ⲉⲣⲟⲛ ⲉⲛⲣ̅ϩⲟⲧⲉ ⲁⲩⲱ ⲉⲛⲟ ⲛϭⲱⲃ ϣⲁⲩⲧⲣⲉⲛⲣ̅ϩⲟⲧⲉ ⲉⲡⲉϩⲟⲩⲟ ϩⲛϩⲉⲛⲫⲁⲛⲧⲁⲥⲓⲁ ⲙⲛϩⲉⲛⲁⲡⲉⲓⲗⲏ. ⲗⲟⲓⲡⲟⲛ ϣⲁⲩⲕⲟⲗⲁⲍⲉ ⲛⲧⲉⲯⲩⲭⲏ ϩⲛⲛⲁⲓ. ⲉⲩϣⲁⲛϩⲉ ⲇⲉ ⲉⲣⲟⲛ ϥ.ⲣ̀ ⲉⲛⲣⲁϣⲉ ϩⲙ̅ⲡϫⲟⲉⲓⲥ ⲁⲩⲱ ⲉⲛⲙⲉⲉⲩⲉ ϩⲙⲡⲉⲛϩⲏⲧ ⲉⲛⲁⲅⲁⲑⲟⲛ ⲉⲧⲛⲁϣⲱⲡⲉ ⲁⲩⲱ ⲉⲛϣⲟϫⲛⲉ ⲉⲛⲁⲡϫⲟⲉⲓⲥ ⲁⲩⲱ ⲉⲛⲗⲟⲅⲓⲍⲉ ⲙⲙⲟⲛ ⲉⲛϫⲱ ⲙⲙⲟⲥ ϫⲉⲉⲣⲉⲛ̅ⲕⲁ ⲛⲓⲙ ϩⲛⲛⲉϭⲓϫ ⲙⲡϫⲟⲉⲓⲥ ⲁⲩⲱ ϫⲉⲙⲛⲇⲁⲓⲙⲱⲛ ⲛⲁⲉϣϭⲙϭⲟⲙ ⲡ̅ⲛ̅ⲁ̅ⲉⲥ. ⲭ ̀ⲉϩⲟⲩⲛ ⲉⲛⲉⲭⲣⲓⲥϯⲁⲛⲟⲥ ⲁⲩⲱ ϫⲉⲙⲛⲧⲁⲩ ⲉⲝⲟⲩⲥⲓⲁ ⲙⲙⲁⲩ ⲉϩⲟⲩⲛ ⲉⲗⲁⲁⲩⲭ ⲉⲩϣⲁⲛⲛⲁⲩ ⲉⲧⲉⲯⲩⲭⲏ ⲉⲥⲟⲣϫ̅ ϩⲛⲛⲉϣⲟϫⲛⲉ ⲛ̅ⲧⲉⲓⲙⲓⲛⲉ ⲛⲧⲉⲩⲛⲟⲩ ϣⲁⲩϫⲓϣⲓⲡ ⲛ̅ⲉⲥⲉⲕⲟⲧⲟⲩ ⲓ̅ⲏ̅ⲥ̅ⲛϭ. ⲭ ̀ⲉⲡⲁϩⲟⲩ.ⲕⲁⲧⲁⲑⲉ ⲛⲧⲁⲡϫⲁϫⲉ ϭⲛⲓⲱⲃ ⲉϥⲟⲣϫ̅ ⲁϥⲥⲁϩⲱⲱϥ ⲉⲃⲟⲗ ⲙⲙⲟϥ ⲁϥϩⲉ ⲇⲉ ⲉⲓⲟⲩⲇⲁⲥ ⲉϥⲕⲏⲕⲁϩⲏⲩ ϩⲛⲛⲁⲓ ⲁϥϥⲓⲧϥ̅ ⲉⲛⲉⲭⲙⲁⲗⲱⲧⲟⲥ. ⲉϣϫⲉ ⲧⲛ̅ⲟⲩⲱϣ ⲉⲕⲁⲧⲁⲫⲣⲟⲛⲉⲓ ⲙⲡϫⲁϫⲉ ⲙⲁⲣⲉⲛⲙⲉⲉⲩⲉ ⲛⲛⲟⲩⲟⲉⲓϣ ⲛⲓⲙ ⲉⲛⲁⲡϫⲟⲉⲓⲥ ⲁⲩⲱ ⲙⲁⲣⲉⲧⲛ̅ⲯⲩⲭⲏ ⲣⲁϣⲉ ⲛⲛⲟⲩⲟⲉⲓϣ ⲛⲓⲙ ϩⲛⲑⲉⲗⲡⲓⲥ ⲁⲩⲱ ⲧⲛ̅ⲛⲁⲛⲁⲩ ⲉⲛⲉϩⲃⲏⲩⲉ ⲛⲥⲱⲃⲉ ⲛ̅ⲛⲇⲁⲓⲙⲱⲛ ⲛⲑⲉ ⲛⲛⲟⲩⲕⲁⲡⲛⲟⲥ ⲉⲩⲡⲏⲧ ϩⲏⲧⲛ̅ ⲛⲥⲉⲡⲏⲧ ⲛⲥⲱⲛ ⲁⲛ. ϩⲉⲛϭⲱⲃ ⲅⲁⲣ ⲉⲙⲁⲧⲉⲛⲉ ⲕⲁⲧⲁⲑⲉ ⲛⲧⲁⲓϣⲣⲡ̅ϫⲟⲟⲥ ⲉⲩϭⲱϣⲧ ⲛⲛⲟⲩⲟⲉⲓϣ ⲛⲓⲙ ⲉⲃⲟⲗ ϩⲏⲧϥ̅ ⲙⲡⲕⲱϩⲧ ⲉⲧⲥⲃ̅ⲧⲱⲧ ⲛⲁⲩ.

43. ⲟⲩⲛ̅ⲧⲁⲛ ⲅⲁⲣ ⲙⲙⲁⲩ ⲙⲡⲙⲁⲉⲓⲛ ⲉⲧⲙ̅ⲣ̅ϩⲟⲧⲉ ϩⲏⲧⲟⲩ. ⲉⲣϣⲁⲛⲟⲩⲫⲁⲛⲧⲁⲥⲓⲁ ϣⲱⲡⲉ ⲛⲛⲟⲩⲁ ⲙⲡⲣⲧⲣⲉϥϩⲉ ⲉⲡⲉⲥⲏⲧ ϩⲓⲑⲏ ⲙⲙⲟⲥ ϩⲛⲟⲩⲙⲛⲧϭⲱⲃⲭ ⲁⲗⲗⲁ ⲡⲉⲧⲛⲧⲟϥⲡⲉ ⲙⲁⲣⲉϥϫⲛⲟⲩϥ ⲛϣⲟⲣⲡ̅ ⲉϥⲧⲏⲕ ⲛϩⲏⲧ ϫⲉⲛⲧⲕ̅ⲛⲓⲙ ⲏ ⲛⲧⲁⲕⲉⲓ ⲉⲧⲱⲛ. ⲉϣⲱⲡⲉ ⲙⲉⲛ ⲟⲩϭⲱⲗⲡ ⲉⲃⲟⲗ ⲉϥⲟⲩⲁⲁⲃ ⲡⲉⲛⲧⲁϥⲟⲩⲱⲛϩ̅ ⲛⲁⲕ ⲉⲃⲟⲗ ϥⲛⲁⲧⲉⲧⲡⲉⲕϩⲏⲧ ⲛⲧⲉⲧⲉⲕϩⲟⲧⲉ ⲕⲟⲧⲥ̅ ⲛⲁⲕ ⲉⲩⲣⲁϣⲉ. ⲉϣⲱⲡⲉ ⲇⲉ ϥ.ⲫ̀ ⲧⲁⲡⲇⲓⲁⲃⲟⲗⲟⲥⲧⲉ ⲛ̅ⲧⲉⲩⲛⲟⲩ ⲥⲛⲁⲣ̅ϭⲱⲃ ⲉⲥⲛⲁⲩ ⲉⲡⲉⲕϩⲏⲧ ⲉϥⲧⲃ̅ⲃⲏⲩ. ⲟⲩⲙⲁⲉⲓⲛ ⲅⲁⲣⲡⲉ ⲡⲁⲓ ⲛⲧⲙⲛⲧⲁⲧϣⲧⲟⲣⲧⲣ ⲉϫⲛⲉⲟⲩⲣⲱⲙⲉ ϫⲉⲛⲧⲕ̅ⲛⲓⲙ ⲏ ⲛ̅ⲧⲁⲕⲉⲓ ⲉⲧⲱⲛ. ⲧⲁⲓⲧⲉ ⲑⲉ ⲛ̅ⲧⲁⲡϣⲏⲣⲉ ⲛⲛⲁⲩⲏ ⲉⲓⲙⲉ ⲛⲧⲉⲣⲉϥϫⲛⲟⲩϥ. ⲙⲡⲉⲡϫⲁϫⲉ ⲇⲉ ⲟⲛ ϩⲱⲡ ⲉⲇⲁⲛⲓⲏⲗ ⲛⲧⲉⲣⲉϥϣⲓⲛⲉ ⲛⲥⲱϥ.

44. ⲛⲁⲓ ⲇⲉ ⲉϥϫⲱ ⲙⲙⲟⲟⲩ ⲛϭⲓⲁⲛⲧⲱⲛⲓⲟⲥ ⲁⲩⲣⲁϣⲉ ⲉⲙⲁⲧⲉ ⲁⲩⲱ ϩⲟⲓⲛⲉ ⲉⲃⲟⲗ ⲛϩⲏⲧⲟⲩ ⲁⲡⲉⲩⲙⲉⲉⲩⲉ ⲉⲓ ⲉϩⲟⲩⲛ ⲉⲧⲁⲣⲉⲧⲏ ⲉⲡⲉϩⲟⲩⲟ. ϩⲉⲛⲕⲟⲟⲩⲉ ⲇⲉ ⲉⲩⲟ ⲛⲕⲟⲩⲓ ⲛϩⲏⲧ ⲁⲩϫⲓ ⲛ̅ⲛⲟⲩⲥⲟⲗⲥⲗ̅ ⲁⲩⲱ ⲛⲧⲟⲟⲩ ⲧⲏⲣⲟⲩ ⲁⲩⲕⲁⲧⲁⲫⲣⲟⲛⲉⲓ ⲛⲛ̅ⲇⲁⲓⲙⲱⲛ ⲉⲁⲩⲣ̅ϣⲡⲏⲣⲉ ⲛⲧⲉⲭⲁⲣⲓⲥ ⲛⲧⲁⲡⲛⲟⲩⲧⲉ ⲧⲁⲁⲥ ⲛⲛⲁⲛⲧⲱⲛⲓⲟⲥ. ⲉⲁⲛⲧⲟⲩⲉⲓⲏ ⲙⲟⲩϩ ⲙ̅ⲙⲟⲛⲁⲭⲟⲥ ⲉⲩⲟⲩⲁⲁⲃ ⲛⲑⲉ ⲛⲛⲉⲥⲕⲩⲛⲏ ⲙⲡⲛⲟⲩⲧⲉ ⲉⲩⲯⲁⲗⲗⲉⲓ ⲉⲩⲛⲏⲥⲧⲉⲩⲉ ⲉⲩϣⲗⲏⲗ ⲉⲩⲣ̅ϩⲱⲃ ⲉⲩⲉⲓⲣⲉ ⲛϩⲉⲛⲙⲛⲧⲛⲁ ⲉⲩⲛ̅ⲧⲁⲩ ⲙⲙⲁⲩ ⲛⲧⲁⲅⲁⲡⲏ ⲙⲛⲟⲩϣⲱⲛϥ̅ ⲉϩⲟⲩⲛ ⲉⲛⲉⲩⲉⲣⲏⲩ. ⲁⲩⲱ ⲛⲉⲩϣⲟⲟⲡ ϩⲙⲡⲙⲁ ⲉⲧⲙⲙⲁⲩ ⲁⲗⲏⲑⲟⲥ ⲉϣϫⲉ ⲟⲩⲭⲱⲣⲁⲧⲉ ⲉⲥϣⲟⲟⲡ ϩⲁⲣⲓϩⲁⲣⲟⲥ. ⲛⲉϥϣⲟⲟⲡ ⲁⲛ ⲛϭⲓⲟⲩⲁ ⲙⲡⲙⲁ ⲉⲧⲙⲙⲁⲩ ⲉⲩϫⲓ ⲙⲙⲟϥ ⲛϭⲟⲛⲥ̅ ⲟⲩⲇⲉ ⲁⲣⲓⲕⲉ ⲛⲣⲉϥϫⲓϣⲱⲙ ⲁⲗⲗⲁ ⲟⲩⲙⲏⲏϣⲉ ⲛⲛⲁⲥⲕⲏⲧⲏⲥ ⲛⲉⲧϩⲙⲡⲙⲁ ⲉⲧⲙⲙⲁⲩ ⲉⲩⲙⲉⲉⲩⲉ ⲇⲉ ⲛⲟⲩⲱⲧ ⲡⲉⲧϣⲟⲟⲡ ⲛⲁⲩ ⲉϩⲟⲩⲛ ⲉⲧⲁⲣⲉⲧⲏ. ϩⲱⲥⲧⲉ ⲡⲉⲧⲛⲁⲛⲁⲩ ⲉⲣⲟⲟⲩ ⲛϥ̅ϫⲟⲟⲥ ϫⲉⲛⲁⲛⲟⲩⲛⲉⲕⲙⲁⲛϣⲱⲡⲉ ⲓⲁⲕⲱⲃ ⲁⲩⲱ ⲛⲉⲕⲥⲕⲩⲛⲏ ⲡⲓⲏⲗ̅. ⲛⲑⲉ ⲛϩⲉⲛⲙⲁⲛϣⲏⲛ ⲉⲩⲟ ⲛϩⲁⲓⲃⲥ̅ ⲁⲩⲱ ⲛⲑⲉ ⲛϩⲉⲛⲡⲁⲣⲁⲇⲓⲥⲟⲥ ϩⲓϫⲛⲛⲉⲓⲉⲣⲱⲟⲩ ⲁⲩⲱ ⲛⲑⲉ ⲙⲡⲕⲁⲣⲡⲟⲥ ⲉⲧϩⲁⲧⲛⲛⲉ ϥ.ⲣ̀ ⲙⲟⲩⲛⲉⲓⲟⲟⲩⲉ.

45. ⲛⲧⲟϥ ⲙⲉⲛ ⲁⲛⲧⲱⲛⲓⲟⲥ ⲕⲁⲧⲁⲧⲉϥⲥⲩⲛⲏⲑⲓⲁ ⲛⲉϥⲁⲛⲁⲭⲱⲣⲉⲓⲡⲉ ϩⲁⲣⲓϩⲁⲣⲟϥ ϩⲙⲡⲉϥⲙⲟⲛⲁⲥⲧⲏⲣⲓⲟⲛ ⲉϥⲟⲩⲱϩ ⲉⲧⲟⲟⲧϥ ⲙⲙⲏⲛⲉ ϩⲛⲧⲁⲥⲕⲏⲥⲓⲥ ⲛⲉϥⲁϣⲁϩⲟⲙ ⲙⲙⲏⲛⲉ ⲉϥⲙⲉⲉⲩⲉ ⲉⲃⲟⲗ ϩⲙⲡⲉϥϩⲏⲧ ⲉⲙⲙⲁⲛϣⲱⲡⲉ ⲛⲛ̅ⲙⲡⲏⲩⲉ ⲉⲣⲉⲡⲉϥⲙⲉ ϣⲟⲟⲡ ⲉϩⲟⲩⲛ ⲉⲣⲟⲟⲩ ⲉϥϭⲱϣⲧ ⲙⲙⲏⲛⲉ ⲉⲡⲃⲓⲟⲥ ⲛⲛⲣⲙⲛⲛⲟⲩⲧⲉ. ⲕⲁⲓⲅⲁⲣ ⲉϥϣⲁⲛⲛⲟⲩ ⲉⲟⲩⲱⲙ ⲏ ⲉⲛⲕⲟⲧⲕ̅ ϣⲁϥϣⲓⲡⲉ ⲉϥⲙⲉⲉⲩⲉ ϩⲙⲡⲉϥϩⲏⲧ ⲉⲡⲛⲟⲏⲣⲟⲛ ⲉⲧⲙⲛⲧⲣⲉϥⲉⲓⲱⲣϩ̅ ⲛⲧⲉϥⲯⲩⲭⲏ. ϩⲁϩ ⲇⲉ ⲟⲛ ⲛⲥⲟⲡ ⲉϥⲛⲁⲟⲩⲱⲙ ⲙⲛⲛⲉⲥⲛⲏⲩ ⲛⲉϥⲙⲉⲉⲩⲉ ⲉⲧⲉⲧⲣⲟⲫⲏ ⲙⲡⲛⲓⲕⲟⲛ ϣⲁϥⲡⲁⲣⲁⲓⲧⲉⲓ ⲉⲧⲙ̅ⲟⲩⲱⲙ ⲛϥⲃⲱⲕ ⲛϥ̅ⲗⲟ ϩⲁⲣⲟⲟⲩ ⲉϥϫⲱ ⲙⲙⲟⲥ ϫⲉⲟⲩϣⲓⲡⲉⲡⲉ ⲉⲣϣⲁⲛϩⲟⲓⲛⲉ ⲛⲁⲩ ⲉⲣⲟϥ ⲉϥⲟⲩⲱⲙ. ⲉⲛⲉϥⲟⲩⲱⲙϭⲉⲡⲉ ϩⲁⲣⲓϩⲁⲣⲟϥ ⲉⲧⲃⲉⲧⲁⲛⲁⲅⲕⲏ ⲙⲡⲥⲱⲙⲁ. ϩⲁϩ ⲟⲛ ⲛⲥⲟⲡ ϣⲁϥⲟⲩⲱⲙ ⲙⲛⲛⲉⲥⲛⲏⲩ ⲁⲩⲱ ⲉⲛⲉϥϫⲱ ⲙⲙⲟⲥ ϫⲉϣϣⲉ ⲉⲥⲣ̅ϥⲉ ⲉⲧⲉⲯⲩⲭⲏ ⲛⲛⲟⲩⲟⲉⲓϣ ⲛⲓⲙ ⲉϩⲟⲩⲉ ⲉⲡⲥⲱⲙⲁ ⲁⲩⲱ ⲛⲧⲛϯ ⲙⲡⲥⲱⲙⲁ ϩⲱⲱϥ ⲛⲛⲟⲩⲕⲟⲩⲓ ⲛⲛⲟⲉⲓⲕ ⲉⲧⲃⲉⲧⲁⲛⲁⲅⲕⲏⲭ ⲡⲕⲉⲥⲉⲉⲡⲉ ⲇⲉ ⲛⲧⲛ̅ⲥⲣ̅ϥⲉ ⲉⲧⲉⲯⲩⲭⲏ ⲁⲩⲱ ⲉϣⲓⲛⲉ ⲛⲥⲁⲧⲉⲥⲛⲟϥⲣⲉ ϫⲉⲕⲁⲥ ⲛⲛⲉⲩⲥⲱⲕ ⲙⲙⲟⲥ ⲉⲡⲉⲥⲏⲧ ⲛϭⲓⲛϩⲩⲇⲟⲛⲏ ⲙⲡⲥⲱⲙⲁⲭ ⲁⲗⲗⲁ ⲛϩⲟⲩⲟ ⲛⲧⲟϥ ⲛⲥ̅ⲧⲣⲉⲡⲥⲱⲙⲁ ⲣ̅ϩⲙϩⲁⲗ ⲛⲁⲥ. ⲡⲁⲓ ⲅⲁⲣ ⲡⲉⲧⲉⲣⲉⲡⲥⲱⲧⲏⲣ ϫⲱ ⲙⲙⲟϥ ϫⲉⲙⲡⲣ̅ϥⲉⲓⲣⲟⲟⲩϣ ϩⲁⲧⲉⲧⲛⲯⲩⲭⲏ ϫⲉⲟⲩ ⲡⲉⲧⲉⲧⲛⲛⲁⲟⲩⲟⲙϥ̅ ⲟⲩⲇⲉ ⲡⲉⲧⲛ̅ⲥⲱⲙⲁ ϫⲉⲟⲩ ⲡⲉⲧⲉⲧⲛ̅ⲛⲁⲧⲁⲁϥ ϩⲓⲱⲧⲧⲏⲩⲧⲛ̅. ⲛⲁⲓ ⲅⲁⲣ ϥ.ⲫ̀ ⲧⲏⲣⲟⲩ ⲛ̅ϩⲉⲑⲛⲟⲥ ⲛⲉⲧϣⲓⲛⲉ ⲛⲥⲱⲟⲩ. ⲡⲗⲏⲛ ϣⲓⲛⲉ ⲛ̅ϣⲟⲣⲡ ⲛⲥⲁⲧⲉϥⲙⲛⲧⲉⲣⲟ ⲙⲛⲧⲉϥⲇⲓⲕⲁⲓⲟⲥⲩⲛⲏ ⲁⲩⲱ ⲛⲁⲓ ⲧⲏⲣⲟⲩ ⲥⲉⲛⲁⲟⲩⲁϩⲟⲩ ⲉⲣⲱⲧⲛ̅ .

46. ⲙⲛⲛⲥⲁⲛⲁⲓⲇⲉ ⲁϥⲧⲁϩⲉⲧⲉⲕⲕⲗⲏⲥⲓⲁ ⲛϭⲓⲡⲇⲓⲱⲅⲙⲟⲥ ⲙⲙⲁⲝⲓⲙⲓⲛⲓⲁⲛⲟⲥ. ⲁⲩⲱ ⲉⲩⲛⲁϫⲓ ⲛ̅ⲛⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲉϩⲟⲩⲛ ⲉⲣⲁⲕⲟⲧⲉ ⲁϥⲟⲩⲁϩϥ ⲛⲥⲱⲟⲩ ⲛϭⲓⲁⲛⲧⲱⲛⲓⲟⲥ ⲉⲁϥⲗⲟ ϩⲙⲡⲙⲟⲛⲁⲥⲧⲏⲣⲓⲟⲛ ⲉϥϫⲱ ⲙⲙⲟⲥ ϫⲉⲙⲁⲣⲉⲛⲃⲱⲕ ϩⲱⲱⲛ ⲛⲧⲛ̅ⲁⲅⲱⲛⲓⲍⲉ ⲙⲛⲛⲉⲧⲟⲩⲁⲁⲃ ⲉⲩϣⲁⲛⲧⲱϩ ⲙⲙⲟⲛⲭ ⲏ ⲛⲧⲛⲛⲁⲩ ⲉⲛⲉⲧⲁⲅⲱⲛⲓⲍⲉ. ⲛⲉϥⲟⲩⲱϣ ⲅⲁⲣⲡⲉ ⲉⲣ̅ⲙⲁⲣⲧⲩⲣⲟⲥ ⲉⲁϥϭⲱ ⲉϥϣⲙϣⲉ ⲛⲛϩⲟⲙⲟⲗⲟⲅⲓⲧⲏⲥ ϩⲛⲛⲙ̅ⲙⲉⲧⲁⲗⲟⲥ ⲙⲛⲛⲉϣⲧⲉⲕⲱⲟⲩ. ⲉⲣⲉⲟⲩⲛⲟϭ ⲛ̅ⲥⲡⲟⲩⲇⲏ ϣⲟⲟⲡ ⲛⲁϥ ϩⲛⲛⲉⲛⲇⲓⲕⲁⲥⲧⲏⲣⲓⲟⲛ. ⲛⲉⲧⲟⲩⲕⲁⲗⲉⲓ ⲙⲙⲟⲟⲩ ⲉⲧⲣⲉⲩⲁⲅⲱⲛⲓⲍⲉ ⲛⲉϥⲅⲩⲙⲛⲁⲍⲉ ⲙⲙⲟⲟⲩ ⲉϩⲟⲩⲛ ⲉⲡⲟⲩⲣⲟⲧ. ⲛⲉⲧⲛⲁϣⲱⲡⲉ ⲇⲉ ⲙⲙⲁⲣⲧⲩⲣⲟⲥ ⲓ̅ⲏ̅ⲥ̅ⲛϭ. Ⲃ ⲛⲉϥⲁⲥⲡⲁⲍⲉ ⲙⲙⲟⲟⲩ ⲉϥϩⲱⲗϭ ⲉⲣⲟⲟⲩ ⲉϥⲙⲟⲟϣⲉ ⲛⲙⲙⲁⲩ ϣⲁⲛⲧⲟⲩϫⲱⲕ ⲉⲃⲟⲗ. ⲡⲇⲓⲕⲁⲥⲧⲏⲥ ⲇⲉ ⲉϥⲛⲁⲩ ⲉⲧⲉϥⲙⲛⲧⲁⲧϩⲟⲧⲉ ⲙⲛⲧⲉϥⲥⲡⲟⲩⲇⲏ ⲉϩⲟⲩⲛ ⲉⲡⲉⲓϩⲱⲃ ⲁϥⲕⲉⲗⲉⲩⲉ ⲉⲧⲙⲧⲣⲉⲗⲁⲁⲩ ⲙⲙⲟⲛⲁⲭⲟⲥ ⲟⲩⲱⲛϩ̅ ⲉⲃⲟⲗ ϩⲙⲡⲇⲓⲕⲁⲥⲧⲏⲣⲓⲟⲛ ⲁⲩⲱ ⲉⲧⲙⲧⲣⲉⲩϭⲱ ϩⲛⲧⲡⲟⲗⲓⲥ ⲉⲡⲧⲏⲣϥ. ⲛⲕⲟⲟⲩⲉ ⲇⲉ ⲧⲏⲣⲟⲩ ⲁⲩⲣ̅ⲑⲉ ⲛⲧⲁⲩϩⲟⲡⲟⲩ ⲙⲡⲉϩⲟⲟⲩ ⲉⲧⲙⲙⲁⲩ. ⲁⲛⲧⲱⲛⲓⲟⲥ ⲇⲉ ⲙⲡⲉϥⲣ̅ⲣⲟⲟⲩϣ ⲛⲁϥ ⲉⲡⲧⲏⲣ̅ϥ ϩⲱⲥⲧⲉ ⲛϥϣⲱⲙ ⲙⲡⲉϥⲉⲡⲛⲧⲏⲇⲏⲥ ⲉⲡⲉϩⲟⲩⲟ ⲁⲩⲱ ⲙⲡⲉϥⲣⲁⲥⲧⲉ ⲁϥⲁϩⲉⲣⲁⲧϥ ϩⲓⲑⲏ ⲛⲛⲟⲩⲟⲛ ⲛⲓⲙ ⲉⲁϥⲁⲗⲉ ⲉϫⲛ̅ ϥ.ⲣ̀ ⲟⲩⲙⲁ ⲉϥϫⲟⲥⲉ ⲁϥⲟⲩⲟⲛϩ̅ϥ ⲉⲃⲟⲗ ⲙⲡϩⲏⲅⲉⲙⲱⲛ ⲉϥⲡⲣⲉⲓⲱⲟⲩ ⲉⲡⲉϩⲟⲩⲟ ⲉⲁⲟⲩⲟⲛ ⲛⲓⲙ ⲣ̅ϣⲡⲏⲣⲉ ⲙⲡⲉⲓϩⲱⲃ ⲁⲩⲱ ⲛⲉⲣⲉⲡϩⲩⲅⲉⲙⲱⲛ ⲛⲁⲩ ⲉⲣⲟϥ. ⲁⲩⲱ ⲙⲛⲛⲥⲁⲧⲣⲉϥⲧⲱⲟⲩⲛ ϩⲓⲡⲙⲁⲛϯϩⲁⲡ ⲉϥⲡⲁⲣⲁⲅⲉ ⲁⲁⲛⲧⲱⲛⲓⲟⲥ ⲁϩⲉⲣⲁⲧϥ ⲙⲡⲉϥⲙ̅ⲧⲟ ⲉⲃⲟⲗ ϩⲛⲟⲩⲥϭⲣⲉϩⲧ ⲉϥⲟⲩⲱⲛϩ̅ ⲉⲃⲟⲗ ⲙ̅ⲡⲟⲩⲣⲟⲧ ⲛⲛⲉⲭⲣⲓⲥϯⲁⲛⲟⲥ. ⲉⲛⲉϥⲟⲩⲱϣ ⲅⲁⲣ ϩⲱⲱϥⲡⲉ ⲉⲣ̅ⲙⲁⲣⲧⲩⲣⲟⲥ ⲕⲁⲧⲁⲑⲉ ⲛⲧⲁⲓϣⲣⲡ̅ϫⲟⲟⲥ ⲁⲩⲱ ⲛⲉϥⲗⲩⲡⲉⲓⲡⲉ ϩⲁⲡⲉⲓⲙⲉⲣⲟⲥ ⲡⲁⲓ. ⲡϫⲟⲉⲓⲥ ⲇⲉ ⲡⲉⲛⲧⲁϥϩⲁⲣⲉϩ ⲉⲣⲟϥ ⲉⲧⲉϥⲛⲟϥⲣⲉ ⲙⲛⲧⲁϩⲉⲛⲕⲟⲟⲩⲉ ϫⲉⲕⲁⲥ ⲉⲃⲟⲗ ϩⲓⲧⲛⲧⲁⲥⲕⲏⲥⲓⲥ ⲛⲧⲁϥⲉⲓⲙⲉ ⲉⲣⲟⲥ ⲉⲃⲟⲗ ϩⲛⲛⲉⲅⲣⲁⲫⲏ ⲛϥϣⲱⲡⲉ ⲛⲥⲁϩ ⲛⲟⲩⲙⲏⲏϣⲉ. ⲕⲁⲓⲅⲁⲣ ⲉⲩⲛⲁⲩ ⲉⲡⲉϥⲥⲙⲟⲧ ⲙⲛⲑⲉ ⲛ̅ⲧⲁϥⲉⲓ ⲉϩⲣⲁⲓ ϩⲓⲱⲱⲥ ⲟⲩⲙⲏⲏϣⲉ ⲅⲁⲣ ⲁⲩⲥⲡⲟⲩⲁⲍⲉ ⲉⲕⲱϩ ⲉⲧⲉϥⲡⲟⲗⲏϯⲁ. ⲡⲁⲗⲓⲛ ⲟⲛ ⲛⲉϥϣⲙ̅ϣⲉ ⲛⲛ̅ϩⲟⲙⲟⲗⲟⲅⲓⲧⲏⲥ ⲕⲁⲧⲁⲧⲉϥⲥⲩⲛⲏⲑⲓⲁ ⲁⲩⲱ ⲛⲉϥϣⲟⲟⲡ ϩⲱⲥ ⲉϥⲙⲏⲣ ⲛⲙⲙⲁⲩ ⲉϥϩⲟⲥⲉ ⲉϥϩⲩⲡⲉⲣⲏⲧⲉⲓ.

47. ⲡⲇⲓⲱⲅⲙⲟⲥ ⲇⲉ ⲛ̅ⲧⲉⲣⲉϥⲟⲩⲱ ⲉⲁϥⲣ̅ⲙⲁⲣⲧⲩⲣⲟⲥ ⲛ̅ϭⲓⲡⲙⲁⲕⲁⲣϥⲟⲥ ⲛⲛⲉⲡⲓⲥⲕⲟⲡⲟⲥ ⲡⲉⲧⲣⲟⲥ ⲁϥⲁⲡⲟⲇⲏⲙⲉⲓ ⲉⲡⲉϥⲙⲟⲛⲁⲥⲧⲏⲣⲓⲟⲛ ⲁⲩⲱ ⲛⲉϥⲁⲛⲁⲭⲱⲣⲉⲓ ⲙⲙⲏⲛⲉ ϩⲙⲡⲙⲁ ⲉⲧⲙⲙⲁⲩ ϩⲛⲧⲉϥⲥⲩⲛⲏⲑⲓⲁ. ⲁϥϣⲱⲡⲉ ⲅⲁⲣ ϩⲛⲟⲩⲛⲟϭ ⲛⲛⲁⲥⲕⲏⲥⲓⲥ ⲉⲛⲁϣⲱⲥ ⲁⲩⲱ ⲉⲥⲛⲁϣⲧ. ⲉⲥ.Ⲃ ⲙⲙⲁⲧⲉ. ⲛⲉϥⲛⲏⲥⲧⲉⲩⲉ ⲛⲛⲟⲩⲟⲉⲓϣ ⲛⲓⲙ. ⲧⲉϥϩⲃ̅ⲥⲱ ⲙⲉⲛ. ⲉⲧϩⲓⲱⲱϥ ⲧⲉⲧⲙ̅ⲡⲉϥϩⲟⲩⲛ ⲟⲩϭⲟⲟⲩⲛⲉⲧⲉ ⲡⲉⲥⲃⲟⲗ ⲇⲉ ⲟⲩϣⲧⲏⲛ ⲛϣⲁⲁⲣⲧⲉ. ⲁⲩⲱ ϣⲁⲛⲧⲉϥⲙⲟⲩ ⲙⲡⲉϥϫⲱⲕⲙ̅ ϩⲛⲟⲩⲙⲟⲟⲩ ⲁⲩⲱ ⲙ̅ⲡⲉϥⲉⲓⲱ ⲛⲛⲉϥⲟⲩⲉⲣⲏⲧⲉ ⲉⲡⲧⲏⲣϥ̅ ⲁϫⲛⲁⲛⲁⲅⲕⲏ. ⲙⲡⲉⲗⲁⲁⲩ ⲛⲁⲩ ⲉⲣⲟϥ ⲉϥⲕⲏⲕⲁϩⲏⲩ ⲛ̅ⲥⲁⲡⲉϩⲟⲟⲩ ⲛ̅ⲧⲁϥⲙⲧⲟⲛ ⲙⲙⲟϥ ⲛϩⲏⲧϥ̅.

48. ⲉϥⲁⲛⲁⲭⲱⲣⲉⲓ ⲅⲁⲣ ⲁⲩⲱ ⲁϥⲧⲱϣ ⲉⲧⲙ̅ⲉⲓ ⲉⲃⲟⲗ ⲁⲩⲱ ⲉⲧⲙ̅ⲕⲁⲗⲁⲁⲩ ⲉⲃⲱⲕ ⲛⲁϥ ⲉϩⲟⲩⲛ ⲟⲩⲁ ⲇⲉ ϫⲉⲙⲁⲣⲧⲓⲛⲟⲥ ⲉⲩⲁⲣⲭⲱⲛⲡⲉ ϩⲛⲛⲙ̅ⲙⲁⲧⲟⲓ ⲁϥⲉⲛⲱⲭⲗⲉⲓ ⲛⲛⲁⲛⲧⲱⲛⲓⲟⲥ. ⲛⲉⲟⲩⲛⲧϥ̅ⲟⲩϣⲉⲉⲣⲉ ⲅⲁⲣ ⲙⲙⲁⲩ ⲉⲩⲉⲛⲱⲭⲗⲉⲓ ⲛⲁⲥ ϩⲓⲧⲛ̅ⲟⲩⲇⲁⲓⲙⲱⲛ ⲉϥϩⲟⲟⲩ. ⲛⲧⲉⲣⲉϥⲱⲥⲕ ⲇⲉ ⲉϥⲕⲱⲗϩ̅ ⲉⲡⲣⲟ ⲁϥⲁⲝⲓⲟⲩ ⲙⲙⲟϥ ⲉⲧⲣⲉϥⲉⲓ ⲉⲃⲟⲗ ⲛϥ̅ϣⲗⲏⲗ ⲉϩⲣⲁⲓ ⲉⲡⲛⲟⲩⲧⲉ ⲉⲧⲃⲉⲧⲉϥϣⲉⲉⲣⲉ. ⲛⲧⲟϥ ⲇⲉ ⲙⲡⲉϥⲥⲱⲧⲙ̅ ⲛⲁϥ ⲉⲟⲩⲱⲛ ⲛⲁϥ ⲙⲡⲣⲟ. ⲁϥϭⲱϣⲧ̅ ⲇⲉ ⲉⲃⲟⲗ ϩⲓⲡⲥⲁⲛⲧⲡⲉ ⲡⲉϫⲁϥ ⲛⲁϥ ϫⲉⲡⲣⲱⲙⲉ ⲉⲧⲃⲉⲟⲩ ⲕⲁϣⲕⲁⲕ ⲉⲃⲟⲗ ⲉⲣⲟⲓ ⲉⲁⲛⲅ̅ⲟⲩⲣⲱⲙⲉ ϩⲱ ⲛⲧⲉⲕϩⲉ. ⲉϣϫⲉ ⲕⲡⲓⲥⲧⲉⲩⲉ ⲉⲡⲉⲭⲥ ⲡⲁⲓ ⲉϯϣⲙϣⲉ ⲛⲁϥ ⲃⲱⲕ ⲕⲁⲧⲁⲧⲉⲕⲡⲓⲥⲧⲓⲥ ϣⲗⲏⲗ ⲉⲡⲛⲟⲩⲧⲉ ⲁⲩⲱ ⲥⲛⲁⲟⲩϫⲁⲓ. ⲁⲩⲱ ⲛⲧⲉⲩⲛⲟⲩ ⲁϥⲡⲓⲥⲧⲉⲩⲉ ⲛϭⲓⲡⲣⲱⲙⲉ ⲁϥⲉⲡⲉⲓⲕⲁⲗⲉⲓ ⲙⲡⲣⲁⲛ ⲙ̅ⲡⲉⲭⲥ ⲁⲩⲱ ⲁⲥⲧⲃ̅ⲃⲟ ⲉⲃⲟⲗ ϩⲙ̅ⲡⲇⲁⲓⲙⲱⲛⲓⲟⲛ. ϩⲁϩ ⲇⲉ ⲙⲙⲁⲉⲓⲛ ⲉⲁⲡϫⲟⲉⲓⲥ ⲁⲁⲩ ⲉⲃⲟⲗ ϩⲓⲧⲟⲟⲧϥ̅ . ⲟⲩⲙⲏⲏϣⲉ ⲅⲁⲣ ϩⲛⲛⲉⲧⲙⲟϩⲕ ⲛⲧⲉⲣⲉϥⲧⲙ̅ⲟⲩⲱⲛ ⲛⲁⲩ ⲙⲡⲣⲟ ⲛⲉⲩⲛ̅ⲕⲟⲧⲕⲡⲉ ⲙⲡⲃⲟⲗ ⲙⲡⲉϥⲙⲟⲛⲁⲥⲧⲏⲣⲓⲟⲛ ⲉⲩⲡⲓⲥⲧⲉⲩⲉ ϩⲙⲡⲉⲩϩⲏⲧ ⲧⲏⲣϥ̅ ⲁⲩⲱ ϣⲁⲩⲙⲧⲟⲛ.

49. ⲛⲧⲉⲣⲉϥⲛⲁⲩ ⲉⲡⲙⲏⲏϣⲉ ⲉⲩⲉⲛⲱⲭⲗⲉⲓ ⲛⲁϥ ⲁⲩⲱ ϫⲉⲛⲥⲉⲕⲱ ⲙⲙⲟϥ ⲁⲛ ⲉⲁⲛⲁⲭⲱⲣⲉⲓ ⲕⲁⲧⲁⲑⲉ ⲉⲧϥⲟⲩⲁϣⲥ ⲁϥⲣ̅ϩⲟⲧⲉ ⲕⲁⲧⲁⲑⲉ ⲉⲧϥⲟⲩⲁϣⲥ̅ ⲛⲧⲟϥ ⲛϭⲓⲡϫⲟⲉⲓⲥ ⲉⲉⲓⲣⲉ ⲛⲛⲉⲓϣⲡⲏⲣⲉ ⲉⲃⲟⲗ ϩⲓⲧⲟⲟⲧϥ̅ Ⲭ. . . . . . . . , ⲁⲩⲱ ⲛⲧⲉⲟⲩⲁⲙⲉⲉⲩⲉ ⲉⲣⲟϥ ϥ..̀ⲣ ⲡⲁⲣⲁⲑⲉ ⲉⲧⲉϥϣⲟⲟⲡ ⲙⲙⲟⲥ ⲁϥϫⲓϣⲟϫⲛⲉ ϩⲙⲡⲉϥϩⲏⲧ ⲁⲩⲱ ⲁϥϯⲡⲉϥⲟⲩⲟⲓ ⲉⲧⲣⲉϥⲃⲱⲕ ⲉⲡⲙⲁⲣⲏⲥ ⲛⲕⲏⲙⲉ ϣⲁⲛⲉⲧⲛ̅ⲥⲉⲥⲟⲟⲩⲛ ⲙⲙⲟϥ ⲁⲛ. ⲁϥϫⲓ ⲛⲧⲟⲟⲧⲟⲩ ⲛⲛⲉⲥⲛⲏⲩ ⲛϩⲉⲛⲕⲟⲩⲓ ⲛⲛⲟⲉⲓⲕ ⲁⲩⲱ ⲁϥϩⲙⲟⲟⲥ ϩⲁⲧⲙⲡⲉⲥⲡⲟⲧⲟⲩ ⲙⲡⲉⲓⲉⲣⲟ ⲁϥϭⲱϣⲧ̅ ϫⲉⲙⲉϣⲁⲕ ⲟⲩⲛⲟⲩϫⲟⲓ ⲛⲁⲡⲁⲣⲁⲅⲉ ⲛϥⲁⲗⲉ ⲛϥ̅ⲃⲱⲕ ⲉⲡⲙⲁ ⲉⲧⲙ̅ⲙⲁⲩ. ⲛⲁⲓ ⲇⲉ ⲉϥⲙⲉⲉⲩⲉ ⲉⲣⲟⲟⲩ ⲁⲩⲥⲙⲏ ϣⲱⲡⲉ ϣⲁⲣⲟϥ ⲉⲃⲟⲗ ϩⲛⲧⲡⲉ ⲉⲥϫⲱ ⲙⲙⲟⲥ ϫⲉⲱ ⲁⲛⲧⲱⲛϥⲟⲥ ⲉⲕⲛⲁ ⲉⲧⲱⲛ ⲙⲡⲉⲓⲙⲁ. ⲛⲧⲟϥ ⲇⲉ ⲙⲡⲉϥϣⲧⲟⲣⲧⲣ̅ ⲉⲡⲧⲏⲣϥ̅ ⲁⲗⲗⲁ ⲕⲁⲧⲁⲡⲉϥⲥⲱⲛⲧ̅ ⲛⲑⲉ ⲉϣⲁⲩⲙⲟⲩⲧⲉ ⲉⲣⲟϥ ⲉⲡⲥⲟⲡ ⲧⲁⲓ ⲟⲛⲧⲉ ⲑⲉ ⲛⲧⲁϥⲟⲩⲱϣⲃ̅ ⲙⲙⲟⲥ ϫⲉⲉⲃⲟⲗ ϫⲉⲙⲙⲏⲏϣⲉ ⲕⲱ ⲙⲙⲟⲓ ⲁⲛ ⲉⲁⲛⲁⲭⲱⲣⲉⲓ ⲏ ⲉⲥϭⲣⲁϩⲧ̅. ⲉⲧⲃⲉⲡⲁⲓ ⲉⲓⲟⲩⲱϣ ⲉⲃⲱⲕ ⲉⲡⲙⲁⲣⲏⲥ ⲛⲕⲏⲙⲉ ⲉⲧⲃⲉ ϫⲉⲥⲉⲉⲛⲱⲭⲗⲉⲓ ⲛⲁⲓ ⲙⲙⲁⲧⲉ ⲉⲩⲁⲓⲧⲉⲓ ⲙⲙⲟⲓ ⲡⲁⲣⲁⲧⲁϭⲟⲙ. ⲡⲉϫⲉⲧⲉⲥⲙⲏ ⲛⲁϥ ϫⲉⲕⲁⲛ ⲉⲕϣⲁⲛⲃⲱⲕ ⲉⲡⲙⲁⲣⲏⲥ ⲕⲁⲛ ⲉⲕϣⲁⲛⲃⲱⲕ ⲉⲛⲁⲙⲏⲩⲉ ⲕⲁⲧⲁⲑⲉ ⲉⲧⲉⲕⲙⲉⲉⲩⲉ ⲙⲙⲟⲥ ⲕⲛⲁϫⲓ ⲛⲛⲟⲩⲛⲟϭ ⲛ̅ϩⲓⲥⲉ ⲉϥⲕⲏⲃ. ⲉⲕϣⲁⲛⲟⲩⲱϣ ⲛⲁⲙⲉ ⲉⲥϭⲣⲁϩⲧ ⲃⲱⲕ ⲛⲁⲕ ⲉⲧⲉⲣⲏⲙⲟⲥ ⲉⲧϩⲓϩⲟⲩⲛ. ⲡⲉϫⲉⲁⲛⲧⲱⲛⲓⲟⲥ ϫⲉⲁⲩⲱ ⲛⲓⲙ ⲡⲉⲧⲛⲁⲧⲥⲁⲃⲟⲓ ⲉⲧⲉϩⲓⲏ ⲉⲧⲙⲙⲁⲩ ⲁⲩⲱ ⲛ̅ⲧⲉⲩⲛⲟⲩ ⲁϥⲧⲥⲁⲃⲟϥ ⲉϩⲉⲛⲥⲁⲣⲁⲕⲏⲛⲟⲥ ⲉⲩⲛⲁⲃⲱⲕ ϩⲛⲧⲉϩⲓⲏ ⲉⲧⲙⲙⲁⲩ. ⲁⲛⲧⲱⲛⲓⲟⲥ ⲇⲉ ⲁϥϯⲡⲉϥⲟⲩⲟⲓ ⲉⲣⲟⲟⲩ ⲁϥⲁⲝⲓⲟⲩ ⲙⲙⲟⲟⲩ ⲉⲧⲣⲉϥⲃⲱⲕ ⲉⲧⲉⲣⲏⲙⲟⲥ ⲛⲙⲙⲁⲩ. ⲛⲧⲟⲟⲩ ⲇⲉ ⲉϣϫⲉ ⲛⲧⲁⲧⲉⲡⲣⲟⲛⲟⲓⲁ ⲙⲡⲛⲟⲩⲧⲉ ⲉ ϥ..̀ⲫ ⲡⲓⲧⲁⲍⲉ ⲛⲁⲩ ⲁⲩϣⲟⲡϥ ⲉⲣⲟⲟⲩ ϩⲛⲟⲩⲣⲟⲧ ⲁⲩⲱ ⲁϥⲙⲟⲟϣⲉ ⲛⲙⲙⲁⲩ ⲛ̅ϣⲟⲙⲛⲧ̅ ⲛ̅ϩⲟⲟⲩ ⲙⲛϣⲟⲙⲛ̅ⲧⲉ ⲛⲟⲩϣⲏ ⲁϥⲉⲓ ⲉϫⲛⲟⲩⲛⲟϭ ⲛ̅ⲧⲟⲟⲩ ⲉϥϫⲟⲥⲉ ⲉⲣⲉⲟⲩⲛⲟϭ ⲙⲙⲟⲟⲩ ϩⲁⲣⲁⲧϥ ⲙⲡⲧⲟⲟⲩ ⲉϥⲥⲟⲧⲃ̅ ⲉⲙⲁⲧⲉ ⲁⲩⲱ ⲉϥϩⲟⲗϭ ⲉϥⲕⲏⲃ ⲉⲡⲉϩⲟⲩⲟ ⲉⲣⲉⲟⲩⲡⲟϭⲉ ⲛⲕⲁϩ ⲙ̅ⲡⲉϥⲙⲁ ⲉⲣⲉϩⲉⲛⲕⲟⲩⲓ ⲛⲃⲛⲛⲉ ⲛϩⲏⲧϥ ⲉⲛⲥⲉϥⲉⲓ ⲁⲛ ⲙⲡⲉⲩⲣⲟⲟⲩϣ.

50. ⲁⲛⲧⲱⲛⲓⲟⲥ ⲇⲉ ⲉϣϫⲉ ⲛⲧⲁⲩⲕⲓⲙ ⲉⲣⲟϥ ⲉⲃⲟⲗ ϩⲓⲧⲙⲡⲛⲟⲩⲧⲉ ⲁϥⲙⲉⲣⲓϭⲱ ϩⲙⲡⲙⲁ ⲉⲧⲙⲙⲁⲩ. ⲡⲁⲓ ⲅⲁⲣⲡⲉ ⲡⲙⲁ ⲛⲧⲁϥⲥⲩⲙⲁⲛⲉ ⲙⲙⲟϥ ⲛⲁϥ ⲛϭⲓⲡⲉⲛⲧⲁϥϣⲁϫⲉ ⲛⲙⲙⲁϥ ϩⲁⲧⲙⲡⲉⲥⲡⲟⲧⲟⲩ ⲙⲡⲉⲓⲉⲣⲟ. ⲛϣⲟⲣⲡ ⲙⲉⲛ ⲁϥϫϥ ⲛϩⲉⲛⲕⲟⲩⲓ ⲛⲛⲟⲉⲓⲕ ⲛ̅ⲧⲟⲟⲧⲟⲩ ⲛⲛⲉⲛⲧⲁϥⲙⲟⲟϣⲉ ⲛⲙⲙⲁⲩ ⲁϥϭⲱ ϩⲙⲡⲧⲟⲟⲩ ⲙⲁⲩⲁⲁϥ ⲉⲁϥϣⲱⲡⲉ ϩⲙ̅ⲡⲙⲁ ⲉⲧⲙⲙⲁⲩ ⲛⲑⲉ ⲛⲛⲟⲩⲁ ⲉⲁϥⲥⲟⲩⲛ̅ⲡⲉϥⲏⲓ. ⲛⲧⲉⲣⲟⲩⲛⲁⲩ ⲇⲉ ⲛϭⲓⲛⲥⲁⲣⲁⲕⲏⲛⲟⲥ ⲉⲡⲟⲩⲣⲟⲧ ⲛⲛⲁⲛⲧⲱⲛⲓⲟⲥ ⲉⲛⲉϣⲁⲩⲃⲱⲕ ⲛϩⲁϩ ⲛⲥⲟⲡ ϩⲛⲧⲉϩⲓⲏ ⲉⲧⲙ̅ⲙⲁⲩ ⲁⲩⲱ ⲉⲛⲉϣⲁⲩϯ ⲛⲁϥ ⲛⲛⲕⲟⲩⲓ ⲛⲛⲟⲉⲓⲕ ⲉⲩⲣⲁϣⲉ. ⲛⲉⲩⲛ̅ⲧⲁϥ ⲙⲙⲁⲩ ⲛⲛⲟⲩⲕⲟⲩⲓ ⲛ̅ⲥⲟⲗⲥⲗ̅ ⲉⲃⲟⲗ ϩⲛ̅ⲛⲛⲃⲛⲛⲉ. ⲓ̅ⲏ̅ⲥ̅ⲛϭ.Ⲃ ⲙⲛⲛ̅ⲥⲁⲛⲁⲓ ⲛⲧⲉⲣⲟⲩⲉⲓⲙⲉ ⲉⲡⲉϥⲙⲁ ⲛϭⲓⲛⲉⲥⲛⲏⲩ ⲁⲩⲣ̅ⲑⲉ ⲛ̅ϩⲉⲛϣⲏⲣⲉ ⲉⲩⲉⲓⲣⲉ ⲙⲡⲙⲉⲉⲩⲉ ⲙⲡⲉⲩⲉⲓⲱⲧ ⲁⲩⲱ ⲁⲩϥⲓⲣⲟⲟⲩϣ ϩⲁⲣⲟϥ ⲉϫⲟⲟⲩ ⲛⲁϥ ⲛ̅ⲧⲉϥⲭⲣⲓⲁ ⲧⲏⲣⲥ̅. ⲛⲧⲉⲣⲉϥⲛⲁⲩ ⲇⲉ ⲉⲣⲟⲟⲩ ⲛϭⲓⲁⲛⲧⲱⲛⲓⲟⲥ ϫⲉϩⲓⲧⲛⲧⲗⲟⲓϭⲉ ⲙⲡⲟⲉⲓⲕ ⲥⲉⲥⲕⲩⲗⲗⲉⲓ ⲙⲙⲟⲟⲩ ⲛϭⲓϩⲟⲓⲛⲉ ⲛⲛⲉⲧⲃⲏⲕ ϣⲁⲣⲟϥ ϩⲛⲧⲉⲓⲛⲟϭ ⲛϩⲓⲏ ⲉⲩϥⲉⲓ ϩⲁⲟⲩⲛⲟϭ ⲛϩⲓⲥⲉ ⲁϥϥⲓ ϥ.:̀ⲣ ⲡⲣⲟⲟⲩϣ ⲙⲡⲉⲓⲕⲉϩⲱⲃ ϩⲁⲛⲉⲥⲛⲏⲩ ⲉⲧⲃⲏⲕ ϣⲁⲣⲟϥ. ⲉⲁϥϣⲟϫⲛⲉ ϩⲙⲡⲉϥϩⲏⲧ ⲉⲁϥⲁⲝⲓⲟⲩ ⲛⲛⲉⲥⲛⲏⲩ ⲉⲧⲃⲏⲕ ϣⲁⲣⲟϥ ⲉⲧⲣⲉⲩⲉⲓⲛⲉ ⲛⲁϥ ⲛⲟⲩⲟⲕⲓⲥ ⲙⲛⲟⲩⲕⲉⲗⲉⲃⲓⲛ ⲙⲛⲟⲩϣⲏⲙ ⲛⲥⲟⲩⲟ. ⲛⲧⲉⲣⲟⲩ ⲛ̅ⲧⲟⲩ ⲇⲉ ⲛⲁϥ ⲁϥⲙⲉϣⲧⲡⲕⲁϩ ⲉⲧⲕⲱⲧⲉ ⲉⲡⲧⲟⲟⲩ ⲁϥϩⲉ ⲉⲩⲕⲟⲩⲓ ⲙⲙⲁ ⲉϣⲁϥⲣ̅ϣⲁⲩ ⲛϫⲟϥ ⲁϥⲣ̅ⲉⲓⲉⲡⲟⲩⲟⲉⲓⲉ ⲉⲣⲟϥ ⲕⲁⲗⲱⲥ ⲁϥϫⲟϥ ⲁⲩⲱ ⲁϥⲧⲥⲟϥ ⲛⲑⲉ ⲉⲧⲉϩⲛⲁϥ ⲁⲩⲱ ⲉⲛⲉϥⲉⲓⲣⲉ ⲙⲡⲁⲓ ⲉⲧⲉⲣⲟⲙⲡⲉ ⲉϣⲁϥⲕⲱ ⲛⲁϥ ⲙⲡⲉϥⲕⲟⲩⲓ ⲛⲛⲟⲉⲓⲕ ϩⲛⲟⲩⲣⲁϣⲉ ϫⲉⲛⲛⲉϥϯϩⲓⲥⲉ ⲛ̅ⲗⲁⲁⲩ ⲛⲣⲱⲙⲉ ⲁⲩⲱ ⲛⲉϥⲣⲟⲉⲓⲥ ⲉⲣⲟϥ ⲉⲡⲉϩⲟⲩⲟ ⲉⲧⲙϯϩⲓⲥⲉ ⲛⲁⲩ ϩⲛⲗⲁⲁⲩ ⲛϩⲱⲃ. ⲙⲛⲛ̅ⲥⲁⲛⲁⲓ ⲟⲛ ⲉϥⲛⲁⲩ ⲉϩⲟⲓⲛⲉ ⲉⲩⲃⲏⲕ ϣⲁⲣⲟϥ ⲁϥϫⲟ ⲛⲛⲟⲩⲕⲟⲩⲓ ⲛⲟⲩⲟⲟⲧⲉ ϫⲉⲕⲁⲥ ⲛⲉⲧⲃⲏⲕ ϣⲁⲣⲟϥ ⲉⲩⲉϭⲓⲛⲉ ⲛⲛⲟⲩⲕⲟⲩⲓ ⲛⲥⲟⲗⲥⲗ̅ ⲉⲧⲃⲉⲡϩⲓⲥⲉ ⲛ̅ⲧⲉϩⲓⲏ. ⲛϣⲟⲣⲡ ⲙⲉⲛ ⲛⲉⲑⲩⲣⲓⲟⲛ ⲉⲧϩⲛⲧⲉⲣⲏⲙⲟⲥ ⲁ̀ⲩⲱ ̀ⲉⲧⲃⲉⲡⲙⲟⲟⲩ ⲛⲉⲩⲛⲏⲩ ⲛϩⲁϩ ⲛⲥⲟⲡ ⲉⲩⲧⲁⲕⲟ ⲛⲛⲉⲧⲉϣⲁϥϫⲟⲟⲩ. ⲛⲧⲟϥ ⲇⲉ ϩⲓⲧⲛ̅ⲧⲉⲭⲁⲣⲓⲥ ⲙⲡⲛⲟⲩⲧⲉ ⲉⲧⲛⲙ̅ⲙⲁϥ ⲁϥⲁⲙⲁϩⲧⲉ ⲛⲛⲟⲩⲁ ⲛⲛⲉⲑⲏⲣⲓⲟⲛ ⲉⲧⲙ̅ⲙⲁⲩ ⲡⲉϫⲁϥ ⲛⲁⲩ ⲧⲏⲣⲟⲩ ϫⲉⲉⲧⲃⲉⲟⲩ ⲧⲉⲧⲛ̅ⲧⲁⲕⲟ ⲛⲧⲁⲙⲛⲧⲉⲓⲉⲡⲟⲩⲟⲉⲓⲉ ⲉⲛϯⲣ̅ⲗⲁⲁⲩ ⲁⲛ ⲙⲡⲉⲑⲟⲟⲩ ⲛⲏⲧⲛ̅. ϩⲙⲡⲣⲁⲛ ⲙⲡⲉⲭⲥ ⲙⲡⲣ̅ⲕⲉⲧⲧⲏⲩⲧⲛ̅ ⲉⲡⲉⲓⲙⲁ ⲛⲕⲉⲥⲟⲡ. ⲛⲉⲑⲩⲣⲓⲟⲛϭⲉ ϫⲓⲛⲉⲡⲉϩⲟⲟⲩ ⲉⲧⲙⲙⲁⲩ ⲉϣϫⲉ ⲛⲧⲁⲩⲣ̅ϩⲟⲧⲉ ϩⲏⲧϥ ⲙⲡⲉϥϣⲁϫⲉ ⲛⲧⲁϥϩⲱⲛ ⲉⲧⲟⲟⲧⲟⲩ ⲙ̅ⲡⲟⲩⲕⲟⲧⲟⲩ ⲉϩⲟⲩⲛ ⲉⲡⲧⲟⲟⲩ.

51. ⲛⲧⲟϥ ⲇⲉ ⲛⲧⲉⲓϩⲉ ⲛⲉϥϣⲟⲟⲡ ϩⲙⲡⲧⲟⲟⲩ ⲙⲁⲩⲁⲁϥ ⲉϥⲥⲣ̅ϥⲉ ⲉⲧⲁⲥⲕⲏⲥⲓⲥ ⲙⲛⲡⲉϣⲗⲏⲗ. ⲛⲉⲥⲛⲏⲩ ϥ.:̀ⲫ ⲇⲉ ⲉⲧⲃⲏⲕ. ϣⲁⲣⲟϥ ⲁⲩⲁⲝⲓⲟⲩ ⲙⲙⲟϥ ⲉⲇⲓⲁⲕⲟⲛⲉⲓ ⲛⲁϥ ϩⲓⲧⲛⲟⲩⲙⲏⲏϣⲉ ⲛⲛⲉⲃⲟⲧ ⲁⲩⲉⲓⲛⲉ ⲛⲁϥ ⲛϩⲉⲛϫⲟⲉⲓⲧ ⲙⲛϩⲉⲛⲉⲃⲣⲏⲩⲉ ⲙⲛⲟⲩⲛⲉϩ. ⲛⲉⲁϥⲣ̅ϩⲗⲗⲟ ⲅⲁⲣⲡⲉ ⲉϥϣⲟⲟⲡ ϩⲙⲡⲙⲁ ⲉⲧⲙⲙⲁⲩ. ⲟⲩⲏⲣ ⲛϩⲓⲥⲉ ⲁϥϩⲩⲡⲟⲙⲓⲛⲉ ⲉⲣⲟⲟⲩ ⲕⲁⲧⲁⲑⲉ ⲉⲧⲥⲏϩ ϫⲉⲉⲣⲉⲡⲉⲛⲙⲓϣⲉ ϣⲟⲟⲡ ⲛⲁⲛ ⲁⲛ ⲟⲩⲃⲉⲥⲛⲟϥ ϩⲓⲥⲁⲣⲝ̅ ⲁⲗⲗⲁ ⲟⲩⲃⲉⲛⲇⲁⲓⲙⲱⲛ ⲉⲑⲟⲟⲩⲭ ⲛⲧⲁⲛⲉⲓⲙⲉϭⲉ ⲉⲛⲁⲓ ϩⲓⲧⲛ̅ⲛⲉⲧⲃⲏⲕ ⲛⲁϥ ⲡ̅ⲛ̅ⲁ̅ⲉⲥ.Ⲃ ⲉϩⲟⲩⲛ. ⲕⲁⲓⲅⲁⲣ ⲁⲩⲥⲱⲧⲙ ϩⲙⲡⲙⲁ ⲉⲧⲙⲙⲁⲩ ⲉϩⲉⲛϣⲧⲟⲣⲧⲣ̅ ⲙⲛϩⲉⲛⲙⲏⲏϣⲉ ⲛ̅ⲥⲙⲏ ⲙⲛϩⲉⲛϩⲣⲟⲟⲩ ⲛϩⲟⲡⲗⲟⲛ. ϩⲛⲧⲉⲩϣⲏ ⲇⲉ ⲉⲛⲉⲩⲛⲁⲩ ⲉⲡⲧⲟⲟⲩ ⲉϥⲙⲉϩ ⲛ̅ⲧⲓⲕ ⲛ̅ⲕⲱϩⲧ ⲉⲩⲛⲁⲩ ⲉⲣⲟϥ ⲉϣϫⲉ ⲉϥⲙⲓϣⲉ ⲙⲛϩⲟⲓⲛⲉ ⲉϥⲛⲁⲩ ⲉⲣⲟⲟⲩ. ⲁⲩⲱ ⲛⲉϥϣⲗⲏⲗⲡⲉ ⲟⲩⲃⲏⲩ. ⲛⲉⲧⲃⲏⲕ ⲇⲉ ⲉϩⲟⲩⲛ ϣⲁⲣⲟϥ ⲉⲛⲉϥϯⲧⲱⲕ ⲛ̅ϩⲏⲧ ⲛⲁⲩ ⲉⲡⲉϩⲟⲩⲟ. ⲁⲗⲏⲑⲱⲥ ϥⲙⲡϣⲁ ⲛⲛⲣϣⲡⲏⲣⲉ ⲙⲙⲟϥ ϫⲉⲛⲧⲟϥ ⲙⲁⲩⲁⲁϥ ⲡⲉⲧϣⲟⲟⲡ ϩⲛⲧⲉⲓⲉⲣⲉⲙⲓⲁ ⲁⲩⲱ ⲙⲡⲉϥⲣϩⲟⲧⲉ ϩⲏⲧⲟⲩ ⲛⲛ̅ⲇⲁⲓⲙⲱⲛ ⲙⲛⲛⲉⲑⲏⲣⲓⲟⲛ ⲉⲧⲟϣ ⲉⲧϩⲙⲡⲙⲁ ⲉⲧⲙⲙⲁⲩ. ⲁⲗⲏⲑⲱⲥ ⲉϥⲛⲁϩⲧⲉ ⲉⲡϫⲟⲉⲓⲥ ⲁϥⲣ̅ⲑⲉ ⲙⲡⲧⲟⲟⲩ ⲛⲥⲓⲱⲛ ϩⲱⲥⲧⲉ ⲛϩⲟⲩⲟ ⲛⲧⲉⲛⲇⲁⲓⲙⲱⲛ ⲡⲱⲧ ⲛϩⲏⲧϥ ⲁⲩⲱ ⲛⲕⲉⲑⲏⲣⲓⲟⲛ ⲛⲛⲁⲅⲣⲓⲟⲛ ⲕⲁⲧⲁⲑⲉ ⲉⲧⲥⲏϩ ⲁⲩⲣ̅ⲉⲓⲣⲏⲛⲏ ⲛⲙⲙⲁϥ.

52. ⲡⲇⲓⲁⲃⲟⲗⲟⲥ ⲇⲉ ⲉⲛⲉϥϯⲛ̅ϩⲧⲏϥⲡⲉ ⲉⲁⲛⲧⲱⲛⲓⲟⲥ ⲕⲁⲧⲁⲑⲉ ⲛⲧⲁⲇⲁⲇ ϫⲟⲟⲥ ⲉϥⲯⲁⲗⲗⲉⲓ ϫⲉⲁϥϩⲣⲟϫⲣϫ ⲛⲛⲉϥⲟⲃ̅ ϥ.ⲣ ϩⲉ ⲉϩⲣⲁⲓ ⲉϫⲱⲓ. ⲁⲛⲧⲱⲛⲓⲟⲥ ϫⲉ ⲉⲛⲉⲩⲥⲟⲗⲥⲗ̅ ⲙⲙⲟϥⲡⲉ ⲉⲃⲟⲗ ϩⲓⲧⲙ̅ⲡⲥⲱⲧⲏⲣ ⲉϥⲧⲟⲩϫⲏⲩ ⲉⲃⲟⲗ ⲛⲧⲡⲁⲛⲟⲩⲣⲅⲓⲁ ⲙⲡϫⲁϫⲉ ⲙⲛⲛⲉϥⲙⲛⲧⲥⲁⲛⲕⲟⲧⲥ̅ ⲉⲧⲟϣ. ⲉϥⲟ ⲇⲉ ⲛⲟⲩϣⲏⲛⲣⲟⲉⲓⲥ ⲛϭⲓⲁⲛⲧⲱⲛⲓⲟⲥ ϩⲣⲁⲓ ϩⲛⲧⲉⲩϣⲏ ⲁⲡϫⲁϫⲉ ⲧⲛⲛⲟⲟⲩ ⲉϩⲣⲁⲓ ⲉϫⲱϥ ⲛⲛⲉⲑⲏⲣⲓⲟⲛ ⲁⲩⲱ ⲛϩⲟⲓⲧⲉ ⲧⲏⲣⲟⲩ ⲉⲧϩⲙⲡϫⲁⲓⲉ ⲉⲧⲙⲙⲁⲩ ⲁⲩⲉⲓ ⲉⲃⲟⲗ ϩⲛⲛⲉⲩⲃⲏⲃ ⲁⲩⲕⲱⲧⲉ ⲉⲣⲟϥ ⲛⲑⲉ ⲛ̅ⲛⲟⲩⲕⲗⲟⲙ. ⲧⲟⲩⲉⲓ ⲧⲟⲩⲉⲓ ⲙⲙⲟⲟⲩ ⲛⲉⲥⲟⲩⲱⲛ ⲛⲣⲱⲥ ⲉϩⲣⲁⲓ ⲉϫⲱϥ ⲉⲥⲁⲡⲉⲓⲗⲏ ⲉⲣⲟϥ ⲉⲥⲗⲱⲝ ⲛⲥⲱϥ. ⲛⲧⲟϥ ⲇⲉ ⲁϥⲉⲓⲙⲉ ⲉⲧⲧⲉⲭⲛⲏ ⲙⲡϫⲁϫⲉ ⲡⲉϫⲁϥ ⲛⲁⲩ ⲧⲏⲣⲟⲩ ϫⲉⲉϣϫⲉ ⲁⲧⲉⲧⲛϫⲓⲉⲝⲟⲩⲥⲓⲁ ⲉϩⲟⲩⲛ ⲉⲣⲟⲓ ϯⲥⲃ̅ⲧⲱⲧ ⲉⲧⲣⲉⲧⲉⲧⲛ̅ⲟⲩⲟⲙⲧ̅. ⲉϣϫⲉ ⲛⲇⲁⲓⲙⲱⲛ ⲛⲉⲛⲧⲁⲩϫⲉⲧⲏⲩⲧⲛ ⲙⲡⲣ̅ϭⲱ ⲙ̅ⲡⲉⲓⲙⲁ ⲁⲗⲗⲁ ⲁⲛⲁⲭⲱⲣⲉⲓ ⲛⲏⲧⲛ̅. ⲁⲛⲅ̅ⲡϩⲙϩⲁⲗ ⲅⲁⲣ ⲙ̅ⲡⲉⲭⲥ. ⲛⲁⲓ ⲇⲉ ⲉϥϫⲱ ⲙⲙⲟⲟⲩ ⲛϭⲓⲁⲛⲧⲱⲛⲓⲟⲥ ⲁⲩⲡⲱⲧ ⲛ̅ϭⲓⲛⲉⲧⲙ̅ⲙⲁⲩ ⲉⲣⲉⲡⲉϥϣⲁϫⲉ ⲡⲏⲧ ⲛ̅ⲥⲱⲟⲩ ⲛⲑⲉ ⲛⲛⲟⲩⲙⲁⲥⲧⲓⲅⲝ̅

53. ⲙⲛⲛ̅ⲥⲁϩⲉⲛϩⲟⲟⲩ ⲟⲛ ⲛⲉϥⲣ̅ϩⲱⲃ. ⲛⲉϥⲟ ⲅⲁⲣ ⲛ̅ⲣⲟⲟⲩϣ ⲛⲁϥⲡⲉ ⲉⲧⲣⲉϥϩⲁⲥⲧϥ̅. ⲁⲟⲩⲁ ⲁϩⲉⲣⲁⲧϥ ϩⲓⲣⲙ̅ⲡⲣⲟ ⲁϥⲥⲱⲕ ⲛⲧⲛⲏⲃⲧⲉⲓ ⲉⲧϥⲣ̅ϩⲱⲃ ⲉⲣⲟⲥ ⲛⲉϥϣⲗⲕ̅ⲃⲓⲣ ⲅⲁⲣⲡⲉ ⲉϥϯ ⲙⲙⲟⲟⲩ ⲛⲛⲉⲧⲛⲏⲩ ϣⲁⲣⲟϥ ⲉⲡⲙⲁ ⲛⲛⲉⲧⲟⲩⲉⲓⲛⲉ ⲙⲙⲟⲟⲩ ⲛⲁϥ. ⲛⲧⲉⲣⲉϥⲧⲱⲟⲩⲛ ⲇⲉ ⲁϥⲛⲁⲩ ⲉⲩⲑⲏⲣⲓⲟⲛ ⲉϥⲟ ⲙⲉⲛ ⲛϩⲟ ⲛⲣⲱⲙⲉ ϣⲁⲛⲉϥⲙⲉⲣⲟⲥ ⲛⲉϥⲟⲩⲉⲣⲏⲧⲉ ⲙⲛⲛⲉϥϭⲟⲡ ⲉⲩⲉⲓⲛⲉ ⲛ̅ⲛⲁϩⲉⲛⲉⲓⲱ. ⲁⲛⲧⲱⲛⲓⲟⲥ ⲇⲉ ⲛⲧⲉⲣⲉϥⲛⲁⲩ ⲉⲣⲟϥ ⲁϥⲥⲫⲣⲁⲅⲓⲍⲉ ⲙⲙⲟϥ ϥ.ⲫ ⲡⲉϫⲁϥ ⲛⲁϥ ϫⲉⲁⲛⲅⲡϩⲙϩⲁⲗ ⲙⲡⲉⲭⲥ. ⲉϣϫⲉ ⲛⲧⲁⲩⲧⲛⲛⲟⲟⲩⲕ ⲉⲣⲟⲓ ⲉⲓⲥϩⲏⲏⲧⲉ ϯⲙ̅ⲡⲉⲓⲙⲁ. ⲡⲉⲑⲩⲣⲓⲟⲛ ⲇⲉ ⲙⲛⲛⲛ̅ⲇⲁⲓⲙⲱⲛ ⲉⲧⲛ̅ⲙⲙⲁϥ ⲁⲩⲡⲱⲧ ⲙⲙⲁⲧⲉ ϩⲙⲡⲉⲓⲥⲙⲟⲧ ϩⲱⲥⲧⲉ ϩⲙⲡⲧⲣⲉϥⲧⲁϣⲉⲡⲱⲧ ⲛϥϩⲉ ⲛϥⲙⲟⲩ. ⲡⲙⲟⲩ ⲙⲡⲉⲑⲏⲣⲓⲟⲛ ⲡϩⲉ ⲉⲡⲉⲥⲏⲧ ⲛⲛⲉⲑⲏⲣⲓⲟⲛ ⲉⲑⲟⲟⲩ ⲁⲩⲱ ⲛⲇⲁⲓⲙⲱⲛ ⲉⲁⲩⲣⲁⲡⲁⲧⲟⲟⲧⲟⲩ ϩⲛϩⲱⲃ ⲛⲓⲙ ϫⲉⲕⲁⲥ ⲙⲙⲁⲧⲉ ⲉⲩⲉⲉⲓⲛⲉ ⲛⲛⲁⲛⲧⲱⲛⲓⲟⲥ ⲉⲃⲟⲗ ϩⲙⲡϫⲁⲓⲉ ⲙⲡⲟⲩⲉϣϭⲙϭⲟⲙ.

54. ⲁⲩⲁⲝⲓⲟⲩ ⲙⲙⲟϥ ⲛⲛⲟⲩϩⲟⲟⲩ ⲛϭⲓϩⲉⲛⲙⲟⲛⲁⲭⲟⲥ ϫⲉⲕⲁⲥ ⲉϥⲉⲉⲓ ⲉⲡⲉⲥⲏⲧ ϣⲁⲣⲟⲟⲩ ⲉϭⲙⲡⲉⲩϣⲓⲛⲉ ϩⲓⲧⲛⲟⲩⲛⲟϭ ⲛⲛⲟⲩⲟⲉⲓϣ ⲛⲧⲟⲟⲩ ⲙⲛⲛⲉⲩⲙⲁⲛϣⲱⲡⲉ ⲁⲩⲱ ⲁϥⲙⲟⲟϣⲉ ⲙⲛⲛⲉⲛⲧⲁⲩⲉⲓ ϣⲁⲣⲟϥ. ⲛⲉⲩⲛ̅ⲟⲩϭⲁⲙⲟⲩⲗ ⲇⲉⲡⲉ ϥⲉⲓⲟⲉⲓⲕ ⲛⲁⲩ ϩⲓⲙⲟⲟⲩ. ⲛⲉⲙⲛⲙⲟⲟⲩ ⲅⲁⲣ ϩⲛⲧⲉⲣⲏⲙⲟⲥ ⲉⲧⲙⲙⲁⲩ ⲉⲓⲉⲙⲏϯ ⲡⲧⲟⲟⲩ ⲙⲙⲁⲧⲉ ⲡⲙⲁ ⲉⲧⲉⲣⲉⲡⲙⲟⲛⲁⲥⲧⲏⲣⲓⲟⲛ ⲛⲛⲁⲛⲧⲱⲛⲓⲟⲥ ⲛϩⲏⲧϥ̅. ⲛⲧⲁⲩϥⲉⲓⲙⲟⲟⲩ ⲛⲁⲩ ⲉⲧⲉϩⲓⲏ ⲉⲡⲙⲁ ⲉⲧⲙⲙⲁⲩ. ⲛⲧⲉⲣⲉⲡⲙⲟⲟⲩϭⲉ ⲟⲩⲱ ⲛⲧⲟⲟⲧⲟⲩ ϩⲓⲧⲉϩⲓⲏ ⲛⲉϥⲛ̅ⲃⲟⲗ ⲛϭϥⲟⲩⲛⲟϭ ⲛ̅ⲕⲁⲩⲙⲁ ⲉϥⲛⲁϣⲧ ⲛⲉⲩⲕⲓⲛⲇⲉⲛⲉⲩⲉ ⲧⲏⲣⲟⲩⲡⲉ. ⲛⲧⲉⲣⲟⲩⲙⲟⲩϣⲧ ⲇⲉ ⲛⲛ̅ⲙⲙⲁ ⲧⲏⲣⲟⲩ ⲉⲧⲙ̅ ⲙⲁⲩ ⲙⲡⲟⲩϭⲛ̅ⲙⲟⲟⲩ ⲉⲥⲱ ⲁⲩⲱ ⲙⲡⲟⲩⲉϣⲙⲟⲟϣⲉ ⲉⲡⲧⲏⲣϥ̅ⲭ ⲁⲗⲗⲁ ⲁⲩⲛⲟϫⲟⲩ ϩⲓϫⲙ̅ⲡⲕⲁϩ. ⲡϭⲁⲙⲟⲩⲗ ⲇⲉ ⲁϥⲕⲁⲁⲩ ⲉⲃⲟⲗ ⲉⲧⲣⲉϥⲃⲱⲕ ⲛⲁϥ ⲉⲁⲩⲕⲁⲧⲟⲟⲧⲟⲩ ⲉⲃⲟⲗ ⲉⲡⲧⲏⲣϥ̅. ⲡϩⲗⲗⲟ ⲇⲉ ⲛⲧⲉⲣⲉϥⲛⲁⲩ ⲉⲣⲟⲟⲩ ⲉⲩⲕⲓⲛⲇⲩⲛⲉⲩⲉ ⲁϥⲁϣⲁϩⲟⲙ ⲙⲙⲁⲧⲉ ⲉⲁϥⲟⲩⲉ ⲙⲙⲟⲟⲩ ⲛⲛⲟⲩⲕⲟⲩⲓ ⲁϥⲕⲱⲗϫ̅ ⲛⲛⲉϥⲡⲁⲧ ⲁϥϣⲗⲏⲗ ⲁⲩⲱ ⲛⲧⲉⲩ ϥ.ⲣ ⲛⲟⲩ ⲁⲡϫⲟⲉⲓⲥ ⲧⲣⲉⲟⲩⲙⲟⲟⲩ ϣⲱⲡⲉ ϩⲙⲡⲙⲁ ⲛⲧⲁϥϣⲗⲏⲗ ⲛϩⲏⲧϥ̅. ⲁⲩⲱ ⲛⲧⲉⲓϩⲉ ⲁⲩⲥⲱ ⲧⲏⲣⲟⲩ ⲁⲡⲉⲩϩⲏⲧ ⲉⲓ ⲉⲣⲟⲟⲩ ⲁⲩⲱ ⲁⲩⲙⲟⲩϩ ⲛⲛⲉⲩϩⲱⲧ ⲙⲙⲟⲟⲩ ⲁⲩϣⲓⲛⲉ ⲛⲥⲁⲡϭⲁⲙⲟⲩⲗ ⲁⲩϩⲉ ⲉⲣⲟϥ. ϩⲙⲡⲧⲣⲉⲩⲕⲁⲁϥ ⲅⲁⲣ ⲉⲃⲟⲗ ⲛⲉⲁⲡⲉϥⲛⲟⲩϩ ϭⲗⲟⲙⲗⲙ̅ ⲉⲩⲱⲛⲉ ⲁϥⲁⲙⲁϩⲧⲉ ⲙⲙⲟϥ ⲁⲩⲱ ⲛⲧⲉⲓϩⲉ ⲁⲩϩⲉ ⲉⲣⲟϥ. ⲁⲩⲛ̅ⲧϥ̅ ⲁⲩⲧⲥⲟϥ ⲙⲙⲟⲟⲩ ⲁⲩⲧⲁⲗⲉⲛⲉⲩⲥⲕⲉⲩⲏ ⲉⲣⲟϥ ⲁⲩⲙⲟⲟϣⲉ ⲉⲧⲉⲩϩⲓⲏ. ⲛⲧⲉⲣⲉϥⲉⲓ ⲇⲉ ⲉⲙⲙⲟⲛⲁⲥⲧⲏⲣⲓⲟⲛ ⲉⲧϩⲓⲃⲟⲗ ⲛⲧⲟⲟⲩ ⲇⲉ ⲧⲏⲣⲟⲩ ⲉⲩⲛⲁⲩ ⲉⲣⲟϥ ⲛⲑⲉ ⲛⲛⲟⲩⲉⲓⲱⲧ ⲉⲡⲱⲟⲩⲡⲉ. ⲛⲧⲟϥ ϩⲱⲱϥ ⲁϥⲣ̅ⲑⲉ ⲛ̅ⲧⲁϥⲉⲓⲛⲉ ⲛⲁⲩ ⲛϩⲉⲛⲧⲁⲉⲓⲟ ⲉⲃⲟⲗ ϩⲙⲡⲧⲟⲟⲩ ⲉⲁϥⲧⲣⲉⲩⲣ̅ϣⲡⲏⲣⲉ ⲙⲙⲟϥ ϩⲛⲛⲉϥϣⲁϫⲉ ⲁⲩⲱ ⲁϥϯ ⲛⲁⲩ ⲛⲛⲉⲧⲣ̅ⲛⲟⲃⲣⲉ. ⲛⲉⲩⲛ̅ⲟⲩⲛⲟϭ ⲇⲉ ⲛⲣⲁϣⲉ ϣⲟⲟⲡ ϩⲙⲡⲧⲟⲟⲩ ⲁⲩⲱ ⲟⲩⲥⲟⲗⲥⲗ̅ ϩⲛⲧⲡⲓⲥⲧⲓⲥ ⲛⲛⲉⲩⲉⲣⲏⲩ. ⲁϥⲣⲁϣⲉ ⲇⲉ ϩⲱⲱϥ ⲉϥⲛⲁⲩ ⲉⲡⲟⲩⲣⲟⲧ ⲛⲛⲉⲥⲛⲏⲩ ⲁⲩⲱ ⲁϥⲛⲁⲩ ⲉⲧⲉϥⲥⲱⲛⲉ ⲉⲁⲥⲣ̅ϩⲗ̅ⲗⲱ ϩⲛⲧⲡⲁⲣⲑⲉⲛⲓⲁ ⲉⲥⲟ ⲛⲛⲟϭ ϩⲱⲱⲥ ⲉϫⲛ ϩⲉⲛⲕⲉⲡⲁⲣⲑⲉⲛⲟⲥ.

55. ⲙⲛⲛ̅ⲥⲁϩⲉⲛϩⲟⲟⲩ ⲟⲛ ⲁϥⲃⲱⲕ ⲉϩⲟⲩⲛ ⲉⲡⲧⲟⲟⲩ ⲁⲩⲱ ⲁϩⲁϩ ⲃⲱⲕ ⲉϩⲟⲩⲛ ϣⲁⲣⲟϥ ⲁ̀ⲩⲙⲁⲧⲉ ⲙⲡⲧⲁⲗϭⲟ.̀ ϩⲉⲛⲕⲟⲟⲩⲉ ⲉⲩⲙⲟϩⲕ̅ ⲛϣⲱⲛⲉ ⲁⲩⲃⲱⲕ ⲉϩⲟⲩⲛ ϣⲁⲣⲟϥ ⲁⲩⲙⲁⲧⲉ ⲙⲡⲧⲁⲗϭⲟ. ⲉⲛⲉϥϫⲱ ⲇⲉ ⲙⲙⲟⲥ ⲛⲛⲉⲥⲛⲏⲩ ⲉⲧⲃⲏⲕ ⲛⲁϥ ⲉϩⲟⲩⲛ ⲉⲡⲧⲟⲟⲩ ⲉϥϯ ⲉⲧⲟⲟⲧⲟⲩ ⲛⲧⲉⲓⲡⲁⲣⲁⲅⲅⲉⲗⲓⲁ ⲛⲛⲟⲩⲟⲉⲓϣ ⲛⲓⲙ ⲉⲡⲓⲥⲧⲉⲩⲉ ⲉⲡⲉⲭⲥ ⲁⲩⲱ ⲉⲙⲉⲣⲓⲧϥ̅ ⲁⲩⲱ ⲉϩⲁⲣⲉϩ ⲉⲣⲟⲟⲩ ⲉⲙⲉⲉⲩⲉ ⲛⲓⲙ ⲉⲧϫⲁϩⲙ̅ ⲙⲛⲛⲛϩⲩⲇⲟⲛⲏ ⲛⲧⲥⲁⲣⲝ̅ ⲁⲩⲱ ⲕⲁⲧⲁⲑⲉ ⲉⲧⲥⲏϩ ϩⲛⲛⲙⲡⲁⲣⲣⲟⲓⲙⲓⲁ ⲉⲧⲙⲧⲣⲉⲩⲣ̅ϩⲁⲗ ⲙⲙⲟⲟⲩ ϥ.ⲫ ϩⲛⲟⲩⲥⲉⲓ ⲛ̅ϩⲏ ⲁⲩⲱ ⲉⲡⲱⲧ ⲉⲃⲟⲗ ϩⲏⲧⲥ̅ ⲛⲛⲟⲩⲙⲛⲧϣⲟⲩϣⲟ ⲁⲩⲱ ⲉϣⲗⲏⲗ ⲁϫⲛ̅ⲱϫⲛ̅ ⲉⲧⲣⲉⲩⲯⲁⲗⲗⲉⲓ ⲟⲛ ⲉⲙⲡⲁⲧⲟⲩⲛ̅ⲕⲟⲧⲕ̅ ⲁⲩⲱ ⲉⲩϣⲁⲛⲧⲱⲟⲩⲛ ⲉⲩⲛ̅ⲕⲟⲧⲕ̅ ⲉⲧⲣⲉⲩⲯⲁⲗⲗⲉⲓ ⲁⲩⲱ ⲛ̅ⲥⲉⲙⲉⲗⲉⲧⲁ ⲛⲛⲉⲛⲧⲁⲩϫⲓⲧⲟⲩ ⲛⲛⲁⲡⲟⲥⲧⲏⲑⲟⲥ ⲛⲥⲉⲣ̅ⲡⲙⲉⲉⲩⲉ ⲛⲛⲉϩⲃⲏⲩⲉ ⲛⲛⲉⲧⲟⲩⲁⲁⲃ ϫⲉⲕⲁⲥ ⲉⲣⲉⲧⲉⲩⲯⲩⲭⲏ ⲛⲁϣⲱⲡⲉ ϩⲛⲛⲉϩⲃⲏⲩⲉ ⲛⲛⲉⲧⲙⲙⲁⲩ ⲉⲩⲧⲱⲃⲥ̅ ⲙⲙⲟⲥ ϩⲓⲧⲛⲛⲉⲛⲧⲟⲗⲏ. ⲛϩⲟⲩⲟ ⲇⲉ ⲉⲛⲉϥϯ ⲉⲧⲟⲟⲧⲟⲩ ⲙⲡⲉϩⲣⲏⲧⲟⲛ ⲙⲡⲁⲡⲟⲥⲧⲟⲗⲟⲥ ⲉⲧⲣⲉⲩⲙⲉⲗⲉⲧⲁ ⲙⲙⲟϥ ⲁϫⲛ̅ⲱϫⲛ̅ ϫⲉⲡⲣⲏ ⲙⲡⲣ̅ⲧⲣⲉϥϩⲱⲧⲡ ⲉⲡⲉⲧⲛⲛⲟⲩϭⲥ̅ ⲁⲩⲱ ⲡⲉⲓϣⲁϫⲉ ⲁϥϫⲟⲟϥ ϫⲉϥⲛⲏⲩ ⲉϫⲛⲉⲛⲧⲟⲗⲏ ⲛⲓⲙ ϫⲉⲕⲁⲥ ⲛⲛⲉⲡⲣⲏ ϩⲱⲧⲡ̅ ⲉϫⲙⲡⲛⲟⲩϭⲥ̅ ⲁⲛ ⲙⲙⲁⲧⲉ ⲁⲗⲗⲁ ⲉϩⲣⲁⲓ ⲉϫⲛⲛⲟⲃⲉ ⲛⲓⲙ ⲉⲁⲛⲁⲁⲩ. ⲛⲁⲛⲟⲩϥ ⲙⲉⲛ ⲁⲩⲱ ϥⲣ̅ⲛⲟϥⲣⲉ ⲡⲣⲏ ⲙⲉⲛ ⲉⲧⲙ̅ⲧⲣⲉϥⲕⲁⲧⲁⲅⲉⲓⲛⲟⲥⲅⲓ ⲙⲙⲟⲛ ⲉⲧⲃⲉⲟⲩⲕⲁⲕⲓⲁ ϩⲙⲡⲉϩⲟⲟⲩⲭ ⲡⲟⲟϩϭⲉ ⲉⲧⲙ̅ⲧⲣⲉϥϭⲛⲁⲣⲓⲕⲉ ⲉⲣⲟⲛ ⲉⲧⲃⲉⲟⲩⲛⲟⲃⲉ ⲛ̅ⲧⲉⲩϣⲏ ⲏ ⲟⲩⲙⲉⲉⲩⲉ ⲣⲱ ⲉϥϩⲟⲟⲩ. ϫⲉⲕⲁⲥϭⲉ ⲉⲣⲉⲡⲉⲓϩⲱⲃ ϣⲱⲡⲉ ⲉϥⲧⲟⲩϫⲏⲩ ⲛⲁⲛ ⲛⲁⲛⲟⲩⲥ ⲛⲁⲛ ⲉⲥⲱⲧⲙ̅ ⲛ̅ⲥⲁⲡⲁⲡⲟⲥⲧⲟⲗⲟⲥ. ϥϫⲱ ⲅⲁⲣ ⲙⲙⲟⲥ ϫⲉϫⲛⲧⲧⲏⲩⲧⲛ̅ ⲁⲩⲱ ⲛⲧⲉⲧⲛⲇⲟⲕⲓⲙⲁⲍⲉ ⲙⲙⲱⲧⲛ̅ ⲙⲙⲏⲛⲉ. ⲧⲉⲛⲟⲩϭⲉ ⲙⲁⲣⲉⲡⲟⲩⲁ ⲡⲟⲩⲁ ϫⲓ ⲙⲡⲗⲟⲅⲟⲥ ⲛⲛⲉϥϩⲃⲏⲩⲉ ⲛϥⲕⲁⲁⲩ ⲛⲧⲟⲟⲧϥ̅ ⲛⲁⲡⲉϩⲟⲟⲩ ⲙⲛⲛⲁⲧⲉⲩϣⲏ. ⲉϣϫⲉ ⲁϥⲣ̅ⲛⲟⲃⲉ ⲙⲉⲛ ⲙⲁⲣⲉϥⲗⲟ ⲉϥⲉⲓⲣⲉ. ⲉϣϫⲉ ⲙⲡⲉϥⲉⲓⲣⲉ ⲇⲉ ⲙⲡⲣ̅ⲧⲣⲉϥϣⲟⲩϣⲟⲩ ⲙⲙⲟϥⲭ ⲁⲗⲗⲁ ⲙⲁⲣⲉϥⲙⲟⲩⲛ ⲉⲃⲟⲗ ϩⲙⲡⲡⲉⲧⲛⲁⲛⲟⲩϥ. ⲁⲩⲱ ⲙⲡⲣ̅ⲧⲣⲉϥⲁⲙⲉⲗⲉⲓ ⲟⲩⲇⲉ ⲙⲡⲣ̅ⲧⲣⲉϥϭⲁⲓⲉⲡⲉⲧϩⲓ ϥ.ⲣ ⲧⲟⲩⲱϥ ⲁⲩⲱ ⲙⲡⲣ̅ⲧⲣⲉϥⲧⲙⲁⲉⲓⲟϥ ⲙⲁⲩⲁⲁϥ ⲛⲑⲉ ⲛ̅ⲧⲁϥϫⲟⲟⲥ ⲛϭⲓⲡⲥⲁϩ ⲡⲁⲩⲗⲟⲥ ϫⲉϣⲁⲛⲧⲉⲡϫⲟⲉⲓⲥ ⲉⲓ ⲡⲁⲓ ⲉⲧϩⲟⲧϩⲧ̅ ⲛⲛⲉϭⲗⲟⲟⲧⲉ. ⲟⲩⲛ̅ⲟⲩⲙⲏⲏϣⲉ ⲅⲁⲣ ⲟ ⲛⲁⲧⲥⲟⲟⲩⲛ ⲉⲛⲉⲧⲛⲉⲓⲣⲉ ⲙⲙⲟⲟⲩ ⲉⲩϩⲏⲡ ⲉⲣⲟⲟⲩ ⲁⲩⲱ ⲉⲣⲟⲛ ϩⲱⲱⲛ ⲁⲛⲟⲛ ⲙⲛⲛⲉⲧⲛⲧⲛ̅ⲉⲓⲙⲉ ⲉⲣⲟⲟⲩ ⲁⲛ. ⲡϫⲟⲉⲓⲥ ⲇⲉ ⲥⲟⲟⲩⲛ ⲙⲙⲟⲟⲩ ⲧⲏⲣⲟⲩ. ⲙⲁⲣⲉⲛϩⲓⲥⲉϭⲉ ⲙⲛⲛⲉⲛⲉⲣⲏⲩ ⲁⲩⲱ ⲛⲧⲛ̅ϥⲉⲓ ϩⲁⲛⲃⲁⲣⲟⲥ ⲛⲛⲉⲛⲉⲣⲏⲩ ⲙⲁⲣⲉⲛⲁⲛⲁⲕⲣⲓⲛⲉ ⲙⲙⲟⲛ ⲁⲩⲱ ⲛⲉⲧⲛ̅ϣⲁⲁⲧ ⲙⲙⲟⲟⲩ ⲛ̅ⲧⲛ̅ⲣⲁⲡⲁⲧⲟⲟⲧⲛ̅ ⲉϫⲟⲕⲟⲩ ⲉⲃⲟⲗ. ⲙⲁⲣⲉⲡⲉⲓϩⲱⲃ ⲇⲉ ϣⲱⲡⲉ ⲛⲏⲧⲛ ⲉϯϩⲧⲏⲧⲛ ⲉⲣⲟϥ ⲉⲧⲙ̅ⲣ̅ⲛⲟⲃⲉ. ⲙⲁⲣⲉⲡⲟⲩⲁ ⲡⲟⲩⲁ ⲙⲙⲟⲛ ϯϩⲧⲏϥ ⲉⲣⲟϥ ⲁⲩⲱ ⲛⲧⲛ̅ⲥϩⲁⲓ ⲛⲛⲉϩⲃⲏⲩⲉ ⲉⲛⲉⲓⲣⲉ ⲓ̅ⲏ̅ⲥ̅ⲛϭ. Ⲁ ⲙⲙⲟⲟⲩ ⲙⲛⲛ̅ⲕⲓⲙ ⲛⲛⲉⲛⲯⲩⲭⲏ ϩⲱⲥ ⲉⲛⲛⲁϫⲟⲟⲩ ⲉⲛⲉⲛⲉⲣⲏⲩ. ⲑⲁⲣⲉⲓϭⲉ ⲛⲏⲧⲛ ⲙⲡⲁⲓ ϫⲉⲉⲫⲟⲥⲟⲛ ⲉⲛϣⲓⲡⲉ ⲉⲧⲣⲉⲩⲉⲓⲙⲉ ⲉⲣⲟⲛ ⲧⲛⲛⲁϭⲱ ⲉⲧⲙⲣ̅ⲛⲟⲃⲉ ⲁⲩⲱ ⲉⲙⲉⲉⲩⲉ ⲣⲱ ⲉⲡⲧⲏⲣϥ ⲉⲧⲙ̅ⲣ̅ⲗⲁⲁⲩ ⲛϩⲱⲃ ⲉϥϩⲟⲟⲩ. ⲛⲓⲙ ⲅⲁⲣ ⲡⲉⲧⲣ̅ⲛⲟⲃⲉ ⲉϥⲟⲩⲱϣ ⲉⲧⲣⲉⲩⲛⲁⲩ ⲉⲣⲟϥ ⲏ ⲛⲓⲙ ⲡⲉⲛⲧⲁϥⲣ̅ⲛⲟⲃⲉ ⲉⲛϥ̅ⲛⲁϫⲓϭⲟⲗ ⲁⲛ ⲉϥⲟⲩⲱϣ ⲉⲧⲙ̅ⲧⲣⲉⲩⲉⲓⲙⲉ ⲉⲣⲟϥ. ⲛⲑⲉϭⲉ ⲉⲛⲛⲁⲩ ⲉⲛⲉⲛⲉⲣⲏⲩ ⲉⲛⲧⲛⲛⲁⲉϣⲡⲟⲣⲛⲉⲩⲉ ⲁⲛ ⲛⲧⲉⲓϩⲉ ⲟⲛ ⲙⲁⲣⲉⲛⲥϩⲁⲓ ⲛⲛ̅ⲙⲉⲉⲩⲉ ⲛ̅ϩⲏⲧ ϩⲱⲥ ⲉⲛⲛⲁϫⲟⲟⲩ ⲉⲛⲉⲛⲉⲣⲏⲩ ⲁⲩⲱ ⲛⲧⲉⲓϩⲉ ⲧⲛⲛⲁϩⲁⲣⲉϩ ⲉⲣⲟⲛ ⲉⲡⲉϩⲟⲩⲟ ⲉⲃⲟⲗ ϩⲙⲡⲙⲉⲉⲩⲉ ⲙⲡϩⲏⲧ ⲉⲧϫⲁϩⲙ̅ . ⲙⲁⲣⲉⲡⲉⲥϩⲁⲓϭⲉ ϣⲱⲡⲉ ⲛⲁⲛ ⲉⲡⲙⲁ ⲛⲛⲃⲁⲗ ⲛⲛ̅ϣⲃⲣ ⲛⲛⲁⲥⲕⲓⲧⲏⲥ ϫⲉⲉⲛⲛⲁϣⲓⲡⲉ ⲉⲥϩⲁⲓⲥⲟⲩ ϩⲱⲥ ⲉⲩⲛⲁⲩ ⲉⲣⲟⲟⲩ ⲛⲧⲛ̅ⲧⲙ̅ⲙⲉⲉⲩⲉ ϩⲱⲗⲟⲥ ⲉⲗⲁⲁⲩ ⲛ̅ϩⲱⲃ ⲉϥϩⲟⲟⲩ ϩⲙⲡⲉⲛϩⲏⲧ. ϥ.ⲫ ⲁⲩⲱ ⲉⲛϣⲁⲛⲙⲟⲟϣⲉ ϩⲙⲡⲉⲓⲥⲙⲟⲧ ⲧⲛⲛⲁϭⲙϭⲟⲙ ⲉⲣ̅ⲡⲥⲱⲙⲁ ⲛⲁⲛ ⲛ̅ϩⲙϩⲁⲗ ⲁⲩⲱ ⲛⲧⲛ̅ⲣ̅ⲁⲛⲁϥ ⲙⲡϫⲟⲉⲓⲥ ⲛⲧⲛ̅ϩⲱⲙ ⲉϫⲛⲛⲛⲕⲟⲧⲥ ⲧⲏⲣⲟⲩ ⲙⲡϫⲁϫⲉ.

56. ⲛⲁⲓ ⲙⲉⲛ ⲛⲉⲛⲉϣⲁϥϫⲟⲟⲩ ⲛⲛⲉⲧⲛⲏⲩ ϣⲁⲣⲟϥ. ⲛⲉⲧⲙⲟϩⲕ̅ ⲛⲉϥⲙⲟϩⲕ ϩⲱⲱϥ ⲛⲙⲙⲁⲩ ⲁⲩⲱ ⲉϥϣⲗⲏⲗ ϩⲁⲣⲟⲟⲩ ⲉⲣⲉⲡϫⲟⲉⲓⲥ ⲥⲱⲧⲙ ⲉⲣⲟϥ . ⲁⲩⲱ ⲉⲛⲉⲙⲉϥϣⲟⲩϣⲟⲩ ⲙⲙⲟϥ ⲉϥϣⲁⲛⲥⲱⲧⲙ̅ ⲉⲣⲟϥ ⲁⲩⲱ ⲟⲛ ⲉϥⲧⲙ̅ⲥⲱⲧⲙ ⲉⲣⲟϥ ⲉⲛⲉⲙⲉϥⲕⲣⲙ̅ⲣⲙ̅ⲡⲉⲭ ⲁⲗⲗⲁ ⲉⲛⲉϥϣⲡϩⲙⲟⲧ ⲛ̅ⲧⲉⲡϫⲟⲉⲓⲥ ⲛⲛⲟⲩⲟⲉⲓϣ ⲛⲓⲙ.ⲛⲉⲧⲙⲟϩⲕ̅ ⲇⲉ ⲉⲛⲉϥⲥⲟⲗⲥⲗ ⲓ̅ⲏ̅ⲥ̅ⲛϭ. Ⲁ ̀ⲙⲙⲟⲟⲩ ⲉⲧⲣⲉⲩϩⲣⲟϣ ⲛϩⲏⲧ ⲛⲥⲉⲉⲓⲙⲉ ϫⲉⲙⲡⲧⲁⲗϭⲟ ⲙ̅ⲡⲱϥ ⲁⲛⲡⲉ ⲟⲩⲇⲉ ⲙ̅ⲡⲁⲣⲱⲙⲉ ⲁⲛⲡⲉⲭ ⲁⲗⲗⲁ ⲡⲁⲡⲛⲟⲩⲧⲉ ⲙⲁⲩⲁⲁϥⲡⲉ ⲉϥⲉⲓⲣⲉ ϩⲙⲡⲉⲩⲟⲉⲓϣ ⲉⲧⲉϩⲛⲁϥ. ⲛⲉⲧⲙⲟϩⲕ̅ ⲟⲛ ⲛⲉⲩϫⲓ ⲙⲡϣⲁϫⲉ ⲙⲡϩ̅ⲗⲗⲟ ⲛⲑⲉ ⲛⲛⲟⲩⲧⲁⲗϭⲟ ⲉⲁⲩϫⲓⲥⲃⲱ ϩⲱⲟⲩ ⲉⲧⲙⲣ̅ⲕⲟⲩⲓ ⲛϩⲏⲧ ⲁⲗⲗⲁ ⲉⲧⲣⲉⲩⲣ̅ϩⲁⲣϣ̅ϩⲏⲧ. ⲛⲉⲧⲉϣⲁϥⲧⲁⲗϭⲟⲟⲩ ⲇⲉ ⲛⲉϥϯⲥⲃⲱ ⲛⲁⲩ ⲉϣⲡ̅ϩⲙⲟⲧ ⲛⲧⲉⲁⲛⲧⲱⲛⲓⲟⲥ ⲁⲛ ⲁⲗⲗⲁ ⲛ̅ⲧⲙ̅ⲡϫⲟⲉⲓⲥ ⲙⲁⲩⲁⲁϥ.

57. ⲟⲩⲁ ⲇⲉ ⲉⲩⲙⲟⲩⲧⲉ ⲉⲣⲟϥ ϫⲉⲫⲣⲟⲛⲧⲱⲛ ⲉⲩⲉⲃⲟⲗⲡⲉ ϩⲙⲡⲡⲁⲗⲗⲁⲇⲓⲟⲛ ⲉⲩⲛⲟⲩϣⲱⲛⲉ ⲛⲙⲙⲁϥ ⲉϥϩⲟⲟⲩ. ⲉϥⲟⲩⲟϭⲟⲩⲉϭ ⲅⲁⲣ ⲙⲡⲉϥⲗⲁⲥ ⲁⲩⲱ ⲛⲉⲣⲉⲛⲉϥⲃⲁⲗ ⲛⲁⲧⲁⲕⲟⲡⲉ. ⲁϥⲃⲱⲕ ⲉϩⲟⲩⲛ ⲉⲡⲧⲟⲟⲩ ⲁϥⲁⲝⲓⲟⲩ ⲙⲡϩ̅ⲗⲗⲟ ⲉⲧⲣⲉϥϣⲗⲏⲗ ⲉϫⲱϥ. ⲛⲧⲟϥ ⲇⲉ ⲁⲛⲧⲱⲛⲓⲟⲥ ⲁϥϣⲗⲗ̅ ⲁⲩⲱ ⲡⲉϫⲁϥ ⲛⲁϥ ϫⲉⲃⲱⲕ ⲕⲛⲁⲟⲩϫⲁⲓ. ⲛⲧⲟϥ ⲇⲉ ⲁϥϫⲓⲧϥ̅ ⲛϫⲛⲁϩ ⲁϥϭⲱ ϩⲁⲧⲏϥ ⲛϩⲉⲛⲕⲟⲩⲓ ⲛϩⲟⲟⲩ.ⲁⲛⲧⲱⲛⲓⲟⲥ ⲇⲉ ⲡⲉϫⲁϥ ⲛⲁϥ ϫⲉⲙⲛϣϭⲟⲙ ⲉⲧⲣⲉⲕⲧⲁⲗϭⲟ ϥ.ⲣ ⲙⲡⲉⲓⲙⲁ. ⲁⲗⲗⲁ ⲃⲱⲕ ⲛⲁⲕ ⲁⲩⲱ ⲉⲕϣⲁⲛⲡⲱϩ ⲉⲕⲏⲙⲉ ⲕⲛⲁⲛⲁⲩ ⲉⲡⲙⲁⲉⲓⲛ ⲙⲡⲧⲁⲗϭⲟ ⲉⲧⲛⲁⲧⲁϩⲟⲕ. ⲁⲩⲱ ⲁϥⲡⲓⲥⲧⲉⲩⲉ ⲛϭⲓⲡⲉⲧⲙⲙⲁⲩ ⲁϥⲉⲓ ⲉⲃⲟⲗ ⲁⲩⲱ ⲛⲧⲉⲣⲉϥⲛⲁⲩ ⲉⲕⲏⲙⲉ ⲁϥⲗⲟ ⲛϭⲓⲡⲉϥϣⲱⲛⲉ ⲁⲩⲱ ⲁϥϣⲱⲡⲉ ⲉϥⲟⲩⲟϫ ⲛϭⲓⲡⲣⲱⲙⲉ ⲕⲁⲧⲁⲡϣⲁϫⲉ ⲛⲛⲁⲛⲧⲱⲛⲓⲟⲥ ⲡⲉⲛⲧⲁϥⲉⲓⲙⲉ ⲉⲣⲟϥ ϩⲓⲧⲙⲡⲥⲱⲧⲏⲣ ⲁⲓⲧⲉⲓ ⲉϥϣⲗⲏⲗ.

58. ⲟⲩⲡⲁⲣⲑⲉⲛⲟⲥ ⲇⲉ ⲟⲛ ⲉⲩⲉⲃⲟⲗ ϩⲙⲡⲟⲩⲥⲓⲣⲉⲧⲉ ⲛⲧⲉⲧⲣϥⲡⲟⲗⲓⲥ ⲉⲩⲛⲟⲩϣⲱⲛⲉ ⲛⲙⲙⲁⲥ ⲉϥϩⲟⲟⲩ ⲉⲙⲁⲧⲉ ⲁⲩⲱ ⲉϥⲙⲟϩⲕ̅ ⲉⲡⲉϩⲟⲩⲟ. ⲙ̅ⲙⲟⲟⲩ ⲅⲁⲣ ⲉϣⲁⲩϩⲉ ⲉⲃⲟⲗ ϩⲛⲣⲱⲥ ⲙⲛϣⲁⲁⲛⲧⲥ̅ ⲙⲛⲛⲉⲥⲙⲁⲁϫⲉ ϣⲁⲩϣⲱⲡⲉ ⲛϩⲛ̅ⲃⲛ̅ⲧ. ⲉⲛⲉⲥⲥⲏϭ ⲇⲉ ⲟⲛⲡⲉ ϩⲙⲡⲉⲥⲥⲱⲙⲁ ⲁⲩⲱ ⲛⲉⲣⲉⲛⲉⲥⲕⲉⲃⲁⲗ ⲧⲁⲕⲏⲩⲡⲉ. ⲛⲉⲥⲉⲓⲟⲧⲉ ⲇⲉ ⲛⲧⲉⲣⲟⲩⲉⲓⲙⲉ ⲉϩⲟⲓⲛⲉ ⲛ̅ⲙⲙⲟⲛⲁⲭⲟⲥ ⲉⲩⲃⲏⲕ ϣⲁⲁⲛⲧⲱⲛⲓⲟⲥ ⲁⲩⲡⲓⲥⲧⲉⲩⲉ ⲉⲡϫⲟⲉⲓⲥ ⲡⲉⲛⲧⲁϥⲧⲁⲗϭⲉⲧⲉⲧⲉⲣⲉⲡⲉⲥⲛⲟϥ ϩⲁⲣⲟⲥ ⲁⲩⲁⲝⲓⲟⲩ ⲙⲙⲟⲟⲩ ⲉⲧⲣⲉⲩⲕⲁⲁⲩ ⲉⲙⲟⲟϣⲉ ⲛⲙⲙⲁⲩ. ⲛⲁⲓ ⲇⲉ ⲛⲧⲉⲣⲟⲩⲡⲓⲑⲉ ⲁⲩⲃⲱⲕ ⲛⲙⲙⲁⲩ ⲉϩⲟⲩⲛ ⲉⲡⲧⲟⲟⲩ. ⲛⲧⲉⲣⲟⲩϩⲱⲛ ⲉϩⲟⲩⲛ ⲉⲡⲙⲁ ⲁⲩϭⲱ ϩⲁϩⲧⲙⲡⲁⲡⲛⲟⲩⲧⲉ ⲡⲙⲟⲛⲁⲭⲟⲥ ⲁⲩⲱ ⲡϩⲟⲙⲟⲗⲟⲅⲓⲧⲏⲥ. ⲛⲉⲥⲛⲏⲩ ⲇⲉ ⲁⲩⲃⲱⲕ ⲉϩⲟⲩⲛ ϣⲁⲁⲛⲧⲱⲛⲓⲟⲥ ⲁⲩⲱ ⲛⲧⲉⲣⲟⲩϩⲓⲧⲟⲟⲧⲟⲩ ⲉⲧⲁⲙⲟϥ ⲉⲧⲃⲉⲧⲡⲁⲣⲑⲉⲛⲟⲥ ⲁϥⲣ̅ϣⲟⲣⲡ ⲉⲣⲟⲟⲩ ⲁϥⲧⲁⲙⲟⲟⲩ ⲉⲡϣⲱⲛⲉ ⲉⲧϣⲟⲟⲡ ⲙⲙⲟⲥ ⲁⲩⲱ ϫⲉⲛⲧⲁⲥⲙⲟⲟϣⲉ ⲛⲙⲙⲁⲩ ⲛⲛⲁϣ ⲛ̅ϩⲉ. ⲙⲛⲛⲥⲱⲥ ⲁⲩⲁⲝⲓⲟⲩ ⲙⲙⲟϥ ⲉⲧⲣⲉϥⲕⲁⲁⲩ ⲉⲃⲱⲕ ⲉϩⲟⲩⲛ. ⲛⲧⲟϥ ⲇⲉ ⲙⲡⲉϥⲕⲁⲁⲩ ⲉⲃⲱⲕ ⲛⲁϥ ⲉϩⲟⲩⲛ ⲁⲗⲗⲁ ⲡⲉϫⲁϥ ⲛⲁⲩ ϥ.ⲫ ϫⲉⲃⲱⲕ ⲉⲃⲟⲗ ⲛ̅ⲧⲱⲧⲛ̅.ⲧⲉⲧⲛⲛⲁϩⲉ ⲉⲣⲟⲥ ⲉⲁⲥⲧⲁⲗϭⲟ ⲉϣⲱⲡⲉ ⲙⲡⲉⲥⲙⲟⲩ. ⲙⲡⲱⲓ ⲅⲁⲣ ⲁⲛⲡⲉ ⲡⲉⲓϩⲱⲃ ⲁⲗⲗⲁ ⲡⲁⲡⲥⲱⲧⲏⲣⲡⲉ. ⲉϥⲉⲓⲣⲉ ⲇⲉ ⲙⲡⲉϥⲛⲁ ϩⲙ̅ⲙⲁ ⲛⲓⲙ ⲛⲛⲉⲧⲉⲡⲉⲓⲕⲁⲗⲉⲓ ⲙⲡⲉϥⲣⲁⲛ. ⲧⲁⲓ ϩⲱⲱⲥ ⲧⲉⲛⲟⲩ ⲁⲡϫⲟⲉⲓⲥ ϯ ⲛⲁⲥ ⲙⲡⲧⲁⲗϭⲟ ⲛⲧⲉⲣⲉⲥϣⲗⲏⲗ ⲉϩⲣⲁⲓ ⲉⲣⲟϥ.ⲁⲛⲟⲕ ⲇⲉ ϩⲱ ⲁⲧⲉϥⲙⲛⲧⲁⲅⲁⲑⲟⲥ ⲧⲁⲙⲟⲓ ϫⲉϥⲛⲁⲧⲁⲗϭⲟⲥ. ⲁⲩⲉⲓ ⲉⲃⲟⲗ ⲁⲩϩⲉ ⲉⲛⲉⲥⲉⲓⲟⲧⲉ ⲉⲩⲣⲁϣⲉ ⲉⲁⲧⲉⲩϣⲉⲉⲣⲉ ⲟⲩϫⲁⲓ.

59. ⲉⲩⲃⲏⲕ ⲇⲉ ⲟⲛ ⲛⲁϥ ⲉϩⲟⲩⲛ ⲛϭⲓⲥⲟⲛ ⲥⲛⲁⲩ ⲁⲡⲙⲟⲟⲩ ⲟⲩⲱ ⲛⲧⲟⲟⲧⲟⲩ ϩⲓⲧⲉϩⲓⲏ ⲁⲡⲟⲩⲁ ⲙⲙⲟⲟⲩ ⲙⲟⲩ ⲁⲩⲱ ⲡⲕⲉⲟⲩⲁ ⲙⲙⲟⲟⲩ ⲛⲉϥⲛⲁⲙⲟⲩⲡⲉ. ⲛⲧⲉⲣⲉϥⲧⲙⲉϣϭⲙϭⲟⲙ ⲉⲙⲟⲟϣⲉ ⲉⲁϥⲛⲟϫϥ̅ ⲉϫⲙ̅ⲡⲕⲁϩ ⲉϥⲡⲣⲟⲥⲇⲟⲕⲁ ⲉⲙⲟⲩ. ⲁⲛⲧⲱⲛⲓⲟⲥ ⲇⲉ ⲁϥⲙⲟⲩⲧⲉ ⲉⲥⲟⲛ ⲥⲛⲁⲩ ⲉⲩϩⲁⲧⲏϥ ⲙⲡⲉϩⲟⲟⲩ ⲉⲧⲙ̅ⲙⲁⲩ. ⲡⲉϫⲁϥ ⲛⲁⲩ ϫⲉϫⲓ ⲛⲏⲧⲛ̅ ⲛⲛⲟⲩϣⲟϣⲟⲩ ⲙⲙⲟⲟⲩ ⲛⲧⲉⲧⲛⲃⲱⲕ ϩⲛⲧⲉϩⲓⲏ ⲛⲕⲏⲙⲉ. ⲧⲉⲧⲛⲛⲁϩⲉ ⲉⲥⲟⲛ ⲥⲛⲁⲩ ⲉⲩⲛⲏⲩ ϣⲁⲣⲟⲓ ⲉⲁⲟⲩⲁ ⲛϩⲏⲧⲟⲩ ⲙⲟⲩ ⲡⲕⲉⲟⲩⲁ ⲇⲉ ⲉⲁϥϩⲱⲛ ⲉⲙⲟⲩ. ϭⲉⲡⲏ ⲙⲙⲱⲧⲛ ⲧⲁϩⲟϥ. ⲛⲧⲁⲡⲁⲓϭⲉ ⲧⲉⲛⲟⲩ ϭⲱⲗⲡ̅ ⲛⲁⲓ ⲉⲃⲟⲗ ⲉⲓϣⲗⲏⲗ. ⲛⲧⲉⲣⲟⲩⲃⲱⲕ ⲇⲉ ⲁⲩϩⲉ ⲉⲡⲟⲩⲁ ⲉϥⲙⲟⲟⲩⲧ ⲁⲩϥⲓⲧϥ̅ ⲁⲩⲧⲟⲙⲥϥ̅. ⲡⲕⲉⲟⲩⲁ ⲇⲉ ⲁⲩϯⲙⲟⲟⲩ ⲛⲁϥ ⲁⲡⲉϥⲧⲏⲩ ⲉⲓ ⲉⲣⲟϥ ⲁⲩⲛ̅ⲧϥ̅ ϣⲁⲡϩⲗⲗⲟ. ⲛⲉⲣⲉⲧⲉϩⲓⲏ ⲅⲁⲣ ⲟⲩⲏⲩ ⲛⲛⲟⲩϩⲟⲟⲩ ⲙⲙⲟⲟϣⲉ. ⲉⲣϣⲁⲛⲟⲩⲁ ⲇⲉ ϣⲓⲛⲉ ϫⲉⲉⲧⲃⲉⲟⲩ ⲙⲡⲉϥϫⲟⲟⲥ ⲙⲡⲁⲧⲉⲡⲕⲉⲟⲩⲁ ⲙⲟⲩ ⲛⲉϥϫⲱ ⲇⲉ ⲙⲡⲁⲓ ⲁⲛ ϩⲛⲟⲩⲥⲟⲟⲩⲧⲛ ⲉϥϣⲓⲛⲉ. ⲙⲡⲁⲁⲛⲧⲱⲛⲓⲟⲥ ⲅⲁⲣ ⲁⲛⲡⲉ ⲡϩⲁⲡ ⲙⲡⲛⲟⲩⲧⲉ ⲡⲁⲓ ⲛⲧⲁϥⲧⲟϣϥ̅ ⲉⲧⲃⲉ ϥ.ⲣ ⲡⲉⲧⲙ̅ⲙⲁⲩ.. ⲉⲁϥⲕⲣⲓⲛⲉ ⲁⲩⲱ ⲁϥϭⲉⲗⲡⲡϩⲱⲃ ⲛⲁⲓ ⲉⲃⲟⲗ. ⲧⲁⲓ ⲅⲁⲣ ⲙⲙⲁⲧⲉⲧⲉ ⲧⲉϣⲡⲏⲣⲉ ⲛⲛⲁⲛⲧⲱⲛⲓⲟⲥ ⲡ̅ⲛ̅ⲁ̅ⲉⲥ. Ⲁ ̀ϫⲉⲉϥϩⲙ̅ⲡⲧⲟⲟⲩ. ⲉϥϩⲙⲟⲟⲥ ⲉⲣⲉⲡϫⲟⲉⲓⲥ ⲧⲁⲙⲟ ⲙⲙⲟϥ ⲉⲛⲉⲧⲟⲩⲏⲩ ⲙⲙⲟϥ.

60. ⲕⲁⲓⲅⲁⲣ ⲛⲟⲩϩⲟⲟⲩ ⲟⲛ ⲉϥϩⲙⲟⲟⲥ ϩⲙⲡⲧⲟⲟⲩ ⲁϥϭⲱϣⲧ ⲁϥⲛⲁⲩ ⲉⲟⲩⲁ ⲉⲩϥⲉⲓ ⲙⲙⲟϥ ⲉϩⲣⲁⲓ ϩⲙⲡⲁⲏⲣ ⲉⲣⲉⲟⲩⲛⲟϭ ⲛ̅ⲣⲁϣⲉ ϣⲟⲟⲡ ⲛⲛⲉⲧⲛⲏⲩ ⲉⲧⲱⲙⲛⲧ ⲉⲣⲟϥ. ⲁϥⲣ̅ϣⲡⲏⲣⲉ ⲇⲉ ⲛϭⲓⲁⲛⲧⲱⲛⲓⲟⲥ ⲁⲩⲱ ⲁϥⲙⲁⲕⲁⲣⲓⲍⲉ ⲙⲡⲉⲓⲭⲟⲣⲟⲥ ⲛ̅ⲧⲉⲓⲙⲓⲛⲉ. ⲁϥϣⲗⲏⲗ ⲇⲉ ⲉϥⲟⲩⲱϣ ⲉⲉⲓⲙⲉ ϫⲉⲟⲩⲡⲉ ⲡⲁⲓ ⲛⲧⲁϥⲛⲁⲩ ⲉⲣⲟϥ. ⲁⲩⲱ ⲛ̅ⲧⲉⲩⲛⲟⲩ ⲁⲩⲥⲙⲏ ⲉⲓ ⲛⲁϥ ϫⲉⲧⲁⲓⲧⲉ ⲧⲉⲯⲩⲭⲏ ⲛⲛⲁⲙⲟⲩⲛ ⲡⲙⲟⲛⲁⲭⲟⲥ ⲉϥϩⲙⲡⲧⲟⲟⲩ ⲙⲡϩⲟⲥⲙ̅. ⲡⲁⲓ ϩⲱⲱϥ ⲟⲛ ⲛⲉⲩⲁⲥⲕⲓⲧⲏⲥ ⲇⲉⲡⲉ ϫⲓⲛⲉⲧⲉϥⲙⲛⲧⲕⲟⲩⲓ ϣⲁⲧⲉϥⲙⲛⲧϩⲗⲗⲟ. ⲡⲧⲟⲟⲩ ⲇⲉ ⲙⲡϩⲟⲥⲙ̅ ⲉⲛⲉϥⲟⲩⲏⲩ ⲙⲡⲧⲟⲟⲩ ⲛⲛⲁⲛⲧⲱⲛⲓⲟⲥ ⲙⲙⲛⲧϣⲟⲙⲧⲉ ⲛϩⲟⲟⲩ ⲙⲙⲟⲟϣⲉ. ⲛⲉⲧϩⲁⲧⲛ̅ⲁⲛⲧⲱⲛⲓⲟⲥ ⲇⲉ ⲉⲩⲛⲁⲩ ⲉⲡϩⲗⲗⲟ ⲉϥ̅ⲣϣⲡⲏⲣⲉ ⲁⲩⲁⲝⲓⲟⲩ ⲙⲙⲟϥ ⲉⲩⲟⲩⲱϣ ⲉⲉⲓⲙⲉ ⲉⲡϩⲱⲃ ⲁⲩⲱ ⲁϥϫⲟⲟⲥ ⲛⲁⲩ ϫⲉⲛⲧⲁⲁⲙⲟⲩⲛ ⲡⲁⲡⲧⲟⲟⲩ ⲙⲡϩⲟⲥⲙ̅ ⲙⲧⲟⲛ ⲙⲙⲟϥ ⲧⲉⲛⲟⲩ. ⲉⲛⲉϥⲥⲟⲟⲩⲛ ⲅⲁⲣ ⲙⲙⲟϥ ⲧ̀ⲉⲛⲟⲩⲡ̀ⲉ ⲉⲃⲟⲗ ϫⲉⲛⲉϥⲃⲏⲕ ϣⲁⲣⲟϥ ⲛϩⲁϩ ⲛ̅ⲥⲟⲡ ⲉⲡⲙⲁ ⲉⲧⲙ̅ⲙⲁⲩ ⲁⲩⲱ ϫⲉⲁϩⲁϩ ⲙⲙⲁⲉⲓⲛ ϣⲱⲡⲉ ⲉⲃⲟⲗ ϩⲓⲧⲟⲟⲧϥ̅ ̅ϩⲱⲱϥ. ⲟⲩⲁ ⲇⲉⲡⲉ ⲡⲁⲓ ⲉⲃⲟⲗ ⲛϩⲏⲧⲟⲩ. ⲁⲧⲉⲭⲣⲓⲁ ϣⲱⲡⲉ ⲛⲛⲟⲩϩⲟⲟⲩ ⲉⲧⲣⲉϥϫⲓⲟⲟⲣ ⲙⲡⲉⲓⲉⲣⲟ ⲉⲧⲟⲩⲙⲟⲩⲧⲉ ⲉⲣⲟϥ ϫⲉⲡⲗⲩⲕⲟⲥ ⲉⲛⲉⲧⲉⲙⲏⲣⲉⲧⲉ. ⲁϥⲁⲝⲓⲟⲩ ⲛⲛⲟⲩⲁ. ϫⲉⲑⲉⲟⲇⲱⲣⲟⲥ ⲉϥ ϥ.ⲫ ⲙⲟⲟϣⲉ ⲛⲙⲙⲁϥ ⲉⲧⲣⲉϥⲟⲩⲉ ⲙⲙⲟϥ ⲛⲛⲟⲩⲕⲟⲩⲓ ϫⲉⲛⲛⲉⲩⲛⲁⲩ ⲉⲛⲉⲩⲉⲣⲏⲩ ⲉⲩⲛⲏⲃⲉ ϩⲙⲡⲙⲟⲟⲩ ⲉⲩⲕⲏⲕⲁϩⲏⲩ. ⲉϥϣⲓⲡⲉ ⲇⲉ ⲁⲩⲱ ⲉϥϥⲉⲓⲣⲟⲟⲩϣ ϩⲛⲟⲩϣⲡ ⲛ̅ϣⲱⲡ ⲁⲩϫⲓⲧϥ̅ ⲉⲡⲉⲕⲣⲟ. ⲑⲉⲟⲇⲱⲣⲟⲥ ⲇⲉ ϩⲱⲱϥ ⲉⲛⲉⲟⲩⲣⲱⲙⲉⲡⲉ ⲛ̅ⲣⲉϥⲣ̅ϩⲟⲧⲉ ⲛⲧⲉⲣⲉϥⲛⲁⲩ ϫⲉⲁϥⲣ̅ϣⲟⲣⲡ ⲉⲣⲟϥ ⲉⲡⲉⲕⲣⲟ ⲁⲩⲱ ϫⲉ ⲙⲛⲙⲟⲟⲩ ϩⲙⲡⲉϥⲥⲱⲙⲁ ⲁϥⲁⲝⲓⲟⲩ ⲙⲙⲟϥ ⲉⲧⲣⲉϥⲉⲓⲙⲉ ⲉⲡⲉⲥⲙⲟⲧ ⲛ̅ⲧⲁϥϫⲓⲟⲟⲣ ⲙⲙⲟϥ. ⲛⲧⲉⲣⲉϥⲛⲁⲩ ϫⲉⲙⲡⲉϥⲟⲩⲱϣ ⲉϫⲟⲟⲥ ⲛⲁϥ ⲁϥⲁⲙⲁϩⲧⲉ ⲛⲛⲉϥ̅ ϩⲟⲉⲓⲧⲉ ⲙⲛⲛⲉϥⲟⲩⲉⲣⲏⲧⲉ ⲉⲧⲙ̅ⲕⲁⲁϥ ⲉⲃⲟⲗ ⲉⲓⲉⲙⲏϯ ⲛϥⲧⲁⲙⲟϥ ⲉⲡⲉⲛⲧⲁϥϣⲱⲡⲉ ⲙⲙⲟϥ. ⲁⲙⲟⲩⲛ ⲇⲉ ⲛⲧⲉⲣⲉϥⲛⲁⲩ ⲉⲧⲙⲛⲧⲣⲉϥϯⲧⲱⲛ ⲛⲑⲉⲟⲇⲱⲣⲟⲥ ⲁϥⲧⲣⲉⲑⲉⲟⲇⲱⲣⲟⲥ ϩⲱⲱϥ ϯϩⲣⲟⲟⲩ ⲛⲁϥ ⲉⲧⲙ̅ϫⲟⲟⲥ ⲉⲣⲱⲙⲉ ϣⲁⲡⲉϩⲟⲟⲩ ⲙⲡⲉϥⲙⲟⲩ. ⲁϥⲧⲁⲙⲟϥ ⲛⲧⲉⲓϩⲉ ϫⲉⲛⲧⲁⲩϥⲓⲧ ⲁⲩⲕⲁⲁⲧ ϩⲓⲡⲉⲕⲣⲟ. ⲙⲡⲉⲓⲙⲟⲟϣⲉ ϩⲱⲗⲟⲥ. ⲁⲩⲱ ⲡⲉⲓϩⲱⲃ ⲛ̅ⲧϭⲟⲙ ⲛⲣⲱⲙⲉ ⲁⲛⲧⲉ ⲉⲧⲣⲉϥϣⲱⲡⲉ ⲛⲁⲩⲭ ⲁⲗⲗⲁ ⲡⲁⲡⲛⲟⲩⲧⲉⲡⲉ ⲙⲁⲩⲁⲁϥ ⲙⲛⲛⲉⲧϥ̅ⲟⲩⲱϣ ⲉⲧⲁⲁϥ ⲛⲁⲩ ⲛⲑⲉ ⲛⲧⲁϥⲁⲁⲥ ⲙⲡⲛⲟϭ ⲛⲛⲁⲡⲟⲥⲧⲟⲗⲟⲥ ⲡⲉⲧⲣⲟⲥ. ⲑⲉⲟⲇⲱⲣⲟⲥ ⲇⲉ ⲙⲛⲛⲥⲁⲧⲣⲉⲁⲙⲟⲩⲛ ⲙⲟⲩ ⲛ̅ⲧⲁϥϫⲉⲡⲁⲓ ⲉⲣⲟⲛ. ⲛⲉⲥⲛⲏⲩ ⲇⲉ ⲛⲧⲁⲁⲛⲧⲱⲛⲓⲟⲥ ϫⲟⲟⲥ ⲛⲁⲩ ⲉⲧⲃⲉⲡⲙⲟⲩ ⲛⲛⲁⲙⲟⲩⲛ ⲁⲩⲥϩⲁⲓ ⲙ̅ⲡⲉϩⲟⲟⲩ ⲉⲧⲙⲙⲁⲩ ⲉⲧⲟⲟⲧⲟⲩ ⲁⲩⲱ ⲛⲧⲉⲣⲟⲩⲉⲓ ⲉⲡⲧⲟⲟⲩ ⲙⲡϩⲟⲥⲙ̅ ⲛϭⲓⲛⲉⲥⲛⲏⲩ ⲙⲛⲛⲥⲁⲙⲁⲁⲃ ⲛϩⲟⲟⲩ ⲁⲩ ϥ.ⲣ̀ ϫⲛⲟⲩⲟⲩ Ⲭ. . . . ., ⲁⲩⲱ ⲛⲧⲉⲩⲛⲟⲩ ⲛⲧⲁⲡϩⲗ̅ⲗⲟ ⲛⲁⲩ ⲉⲧⲉⲯⲩⲭⲏ ⲛⲛⲁⲙⲟⲩⲛ ⲉⲩϫⲓ ⲙⲙⲟⲥ ⲉϩⲣⲁⲓ ⲉⲧⲡⲉ ⲛⲧⲟⲥ ⲡⲉⲛⲧⲁϥⲙ̅ⲧⲟⲛ ⲙⲙⲟϥ ⲛϩⲏⲧⲥ. ⲁⲩⲱ ⲛⲁⲓ ⲙⲛⲛⲉⲓⲕⲟⲟⲩⲉ ⲁⲩⲣ̅ϣⲡⲏⲣⲉ ⲙⲡⲧⲃ̅ⲃⲟ ⲛ̅ⲧⲉⲯⲩⲭⲏ ⲛⲛⲁⲛⲧⲱⲛⲓⲟⲥ ϫⲉⲛⲁϣ ⲛ̅ϩⲉ ⲡⲉⲛⲧⲁϥϣⲱⲡⲉ ϩⲙⲡⲉⲓⲛⲟϭ ⲛⲟⲩⲉ ⲛⲧⲉⲓϭⲟⲧ ⲙⲙⲛⲧϣⲟⲙⲧⲉ ⲛϩⲟⲟⲩ ⲙⲙⲟⲟϣⲉ ⲁϥⲉⲓⲙⲉ ⲉⲣⲟϥ ⲛ̅ⲧⲉⲩⲛⲟⲩ.

61. ⲡⲕⲟⲙⲓⲥ ⲇⲉ ⲟⲛ ⲁⲣⲭⲏⲗⲁⲟⲥ ⲛ̅ⲧⲉⲣⲉϥϩⲉ ⲉⲣⲟϥ ⲛⲛⲟⲩϩⲟⲟⲩ ϩⲙⲡⲧⲟⲟⲩ ⲉⲧϩⲓⲃⲟⲗ ⲁϥⲁⲝⲓⲟⲩ ⲙⲙⲟϥ ⲉⲧⲣⲉϥϣⲗⲏⲗ ⲙⲙⲁⲧⲉ ϩⲁⲡⲟⲗⲩⲕⲣⲁⲧⲓⲁ ⲟⲩⲡⲁⲣⲑⲉⲛⲟⲥ ⲉⲥϩⲛⲗⲁⲟⲇⲟⲕⲓⲁ ⲉⲟⲩϣⲡⲏⲣⲉⲧⲉ ϩⲛⲧⲉⲥⲡⲟⲗⲏϯⲁ ⲁⲩⲱ ⲉⲣⲉⲡⲉⲭⲥ ϩⲣⲁⲓ ⲛϩⲏⲧⲥ̅. ⲛⲉⲣⲉⲧⲉⲧⲙⲙⲁⲩ ϣⲱⲛⲉ ⲉⲥⲙⲟϩⲕ̅ ⲉⲡⲉⲥⲧⲟⲙⲁⲭⲟⲥ ⲙⲛⲡⲉⲥⲥⲡⲓⲣ ⲉⲃⲟⲗ ϩⲙ̅ⲡⲉϩⲟⲩⲟ ⲛ̅ⲛⲉⲥⲁⲥⲕⲏⲥⲓⲥ ⲁⲩⲱ ⲛⲉⲥⲟ ⲛϭⲱⲃ ⲧⲏⲣⲥ ϩⲙⲡⲉⲥⲥⲱⲙⲁ. ⲁⲛⲧⲱⲛⲓⲟⲥϭⲉ ⲁϥϣⲗⲏⲗ. ⲡⲕⲟⲙⲓⲥ ⲇⲉ ⲁϥⲥϩⲁⲓ ⲉⲧⲟⲟⲧϥ̅ ⲙⲡⲉϩⲟⲟⲩ ⲛ̅ⲧⲁⲡⲉϣⲗⲏⲗ ϣⲱⲡⲉ ϩⲓⲧⲛ̅ⲁⲛⲧⲱⲛⲓⲟⲥ ⲉⲧⲃⲏⲏⲧⲥ̅ ⲁⲩⲱ ⲛⲧⲉⲣⲉϥⲃⲱⲕ ⲉⲗⲁⲟⲇⲟⲕⲓⲁ ⲁϥϩⲉ ⲉⲧⲡⲁⲣⲑⲉⲛⲟⲥ ⲉⲁⲥⲟⲩϫⲁⲓ. ⲁⲩⲱ ⲁϥϣⲓⲛⲉ ϫⲉⲛⲧⲁⲥⲗⲟ ⲛⲛⲁϣ ⲛ̅ϩⲟⲟⲩ ϩⲙⲡϣⲱⲛⲉ ⲁϥⲉⲓⲛⲉ ⲉⲃⲟⲗ ⲙⲡⲉⲭⲁⲣⲧⲏⲥ ⲉⲧⲉⲣⲉⲡⲉϩⲟⲟⲩ ⲙⲡⲉϣⲗⲏⲗ ⲥⲏϩ ⲉⲣⲟϥ ⲁⲩⲱ ⲁϥⲧⲥⲁⲃⲉⲛⲉⲧⲙⲙⲁⲩ ⲉⲧⲉⲩⲛⲟⲩ ⲉⲥⲥⲏϩ ϩⲙⲡⲉⲭⲁⲣⲧⲏⲥ. ⲁⲩⲣ̅ϣⲡⲏⲣⲉ ⲧⲏⲣⲟⲩ ⲛ̅ⲧⲉⲣⲟⲩⲉⲓⲙⲉ ϫⲉⲛⲧⲁⲡϫⲟⲉⲓⲥ ⲧⲁⲗϭⲟⲥ ⲉⲃⲟⲗ ϩⲙⲡⲉⲥϩⲓⲥⲉ ⲙⲡⲛⲁⲩ ⲛ̅ⲧⲁⲁⲛⲧⲱⲛⲓⲟⲥ ϣⲗⲏⲗ ϩⲁⲣⲟⲥ ⲉⲁϥⲥⲟⲡⲥ̅ ⲛⲧⲙⲛⲧⲁⲅⲁⲑⲟⲥ ⲙⲡⲥⲱⲧⲏⲣ ⲉⲧⲃⲏⲏⲧⲥ̅.

62. ⲉⲧⲃⲉⲛⲉⲧⲉ ϥ.ⲫ̀ ϣⲁⲩⲃⲱⲕ ⲇⲉ ϣⲁⲣⲟϥ ⲛϩⲁϩ ⲛⲥⲟⲡ ϣⲁϥⲣ̅ϣⲟⲣⲡ ⲛϥϫⲟⲟⲥ ⲉⲧⲃⲏⲏⲧⲟⲩ ϩⲁⲑⲏ ⲛϩⲉⲛϩⲟⲟⲩ ⲙ̅ⲡⲁⲧⲟⲩⲉⲓ. ϩⲉⲛⲥⲟⲡ ⲟⲛ ϣⲁϥϫⲟⲟⲥ ϩⲁⲑⲏ ⲛⲛⲟⲩⲉⲃⲟⲧ ⲁⲩⲱ ϣⲁϥⲧⲁⲩⲉⲡϩⲱⲃ ⲉⲧⲟⲩⲛⲏⲩ ϣⲁⲣⲟϥ ⲉⲧⲃⲏⲏⲧϥ̅. ϩⲟⲓⲛⲉ ⲙⲉⲛ ϣⲁⲩⲉⲓ ⲉⲧⲃⲉⲡⲛⲁⲩ ⲉⲣⲟϥ ⲙⲙⲁⲧⲉ. ϩⲉⲛⲕⲟⲟⲩⲉ ⲇⲉ ⲟⲛ ⲉⲩⲙⲟϩⲕ ϩⲓⲧⲛⲛⲉⲡⲛⲁ ⲁⲩⲱ ⲟⲩⲟⲛ ⲛⲓⲙ ⲉⲧⲃⲏⲕ ϣⲁⲣⲟϥ ⲛ̅ⲥⲉⲱⲡ ⲁⲛ ⲙⲡϩⲓⲥⲉ ⲛⲧⲉϩⲓⲏ ϫⲉⲟⲩⲥⲕⲩⲗⲙⲟⲥⲡⲉ ⲏ ϫⲉⲟⲩⲛⲟⲥⲉ ϩⲣⲁⲓ ⲛ̅ϩⲏⲧϥ̅. ϣⲁⲣⲉⲡⲟⲩⲁ ⲡⲟⲩⲁ ⲅⲁⲣ ⲕⲧⲟϥ ⲛϥⲁⲓⲥⲑⲁⲛⲉ ⲏ ⲛϥⲉⲓⲙⲉ ⲉⲧⲛⲟϥⲣⲉ ⲛⲧⲁⲥϣⲱⲡⲉ ⲛⲁϥ. ⲉϥⲛⲁⲩ ⲇⲉ ⲉⲛⲁⲓ ⲛⲧⲉⲓⲙⲓⲛⲉ ⲁⲩⲱ ⲉϥϫⲱ ⲙⲙⲟⲟⲩ ⲛⲉϥⲁⲝⲓⲟⲩ ⲛϭⲓⲁⲛⲧⲱⲛⲓⲟⲥ ⲛⲛⲉⲥⲛⲏⲩ ⲉⲧⲙⲧⲣⲉⲗⲁⲁⲩ ⲣ̅ϣⲡⲏⲣⲉ ⲙⲙⲟϥⲭ ⲁⲗⲗⲁ ⲉⲧⲣⲉⲩⲣ̅ϣⲡⲏⲣⲉ ⲛⲧⲟϥ ⲙⲡϫⲟⲉⲓⲥ ϫⲉⲁⲛⲟⲛ ϩⲉⲛⲣⲱⲙⲉ ⲁⲩⲱ ⲁϥⲭⲁⲣⲓⲍⲉ ⲛⲁⲛ ⲉⲧⲣⲉⲛⲥⲟⲩⲱⲛϥ̅ ⲕⲁⲧⲁⲧⲉⲛϭⲟⲙ.

63. ⲁϥⲉⲓ ⲇⲉ ⲟⲛ ⲛⲟⲩϩⲟⲟⲩ ⲉⲙⲙⲟⲛⲁⲥⲧⲏⲣⲓⲟⲛ ⲉⲧϩⲓⲃⲟⲗ ⲁⲩⲁⲝⲓⲟⲩ ⲙⲙⲟϥ ⲉⲧⲣⲉϥⲉⲓ ⲉⲩϫⲟⲓ ⲛϥ̅ϣⲗⲏⲗ ⲙⲛϩⲉⲛⲙⲟⲛⲁⲭⲟⲥ. ⲛⲧⲟϥ ⲇⲉ ⲙⲁⲩⲁⲁϥ ⲁⲩⲥⲧⲟⲓ ⲧⲁϩⲟϥ ⲉϥⲥⲁϣⲉ ⲁⲩⲱ ⲉϥϩⲟⲟⲩ ⲙⲙⲁⲧⲉ. ⲛⲉⲥⲛⲏⲩ ⲇⲉ ⲉⲧϩⲓⲡϫⲟⲓ ⲛⲉⲩϫⲱ ⲙⲙⲟⲥ ϫⲉϩⲛⲧⲃ̅ⲧⲛⲉ ⲉⲩϩⲓⲡϫⲟⲓ ⲙⲛϩⲉⲛⲧⲁⲣⲓⲭⲟⲛ ⲁⲩⲱ ⲡⲉⲩⲥⲧⲟⲓⲡⲉ ⲡⲁⲓ ⲉⲧϣⲟⲟⲡ.ⲛⲧⲟϥ ⲇⲉ ⲡⲉϫⲁϥ ϫⲉⲟⲩⲉⲧⲉⲓⲙⲓⲛⲉⲡⲉ ⲡⲉⲓⲥϯⲃⲱⲱⲛ ⲉϯϣⲱⲗⲙ̅ ⲉⲣⲟϥ.ⲁⲓⲧⲓ ⲇⲉ ⲉϥϣⲁϫⲉ ⲁⲩϣⲏⲣⲉ ϣⲏⲙ ⲉⲓ ⲉⲩⲛⲟⲩⲇⲁⲓⲙⲱⲛⲓⲟⲛ ϩⲓⲱⲱϥ ⲁϥⲣ̅ϣⲟⲣⲡ ⲛⲛⲉⲓ ⲉϩⲟⲩⲛ ⲉⲡϫⲟⲓ ⲁⲩⲱ ⲛⲧⲉⲩⲛⲟⲩ ⲁϥ ϥ.ⲣ̀ ⲱϣ ⲉⲃⲟⲗ ⲉϥⲉⲡⲓⲧⲓⲙⲁ ⲙⲡⲇⲁⲓⲙⲱⲛⲓⲟⲛ ϩⲙⲡⲣⲁⲛ ⲛⲓⲥ ⲡⲉⲭⲥ ⲁⲩⲱ ⲛⲧⲉⲩⲛⲟⲩ ⲁϥⲉⲓ ⲉⲃⲟⲗ ϩⲙⲡϣⲏⲣⲉ ϣⲏⲙ ⲁⲩⲱ ⲁϥϣⲱⲡⲉ ⲉϥⲧⲟⲩϫⲏⲩ ⲉⲁⲩⲉⲓⲙⲉ ⲧⲏⲣⲟⲩ ϫⲉⲡⲁⲡⲇⲁⲓⲙⲱⲛⲡⲉ ⲡⲉⲥⲧⲟⲓ ⲉⲧⲙ̅ⲙⲁⲩ.

64. ⲕⲉⲟⲩⲁ ⲇⲉ ⲟⲛ ⲉⲟⲩⲛⲟϭⲡⲉ ⲁⲩⲱ ⲉϥϯⲥⲟⲉⲓⲧ ⲉⲣⲉⲟⲩⲇⲁⲓⲙⲱⲛⲓⲟⲛ ϩⲓⲱⲱϥ Ⲭ. . . . . , . ⲡⲇⲁⲓⲙⲱⲛ ⲇⲉ ⲛⲉϥϩⲟⲟⲩ ⲙⲙⲁⲧⲉⲡⲉ ϩⲱⲥⲧⲉ ⲡⲉⲧϥ̅ϩⲓⲱⲱϥ ⲛϥ̅ⲧⲙⲉⲓⲙⲉ ϫⲉⲉⲩⲉⲓⲛⲉ ⲙⲙⲟϥ ϣⲁⲁⲛⲧⲱⲛⲓⲟⲥ ⲁⲗⲗⲁ ⲛⲉϥⲟⲩⲱⲙ ⲛ̅ⲥⲁⲛⲉϥⲥⲁⲣⲝ ⲙⲙⲓⲛ ⲙⲙⲟϥ. ⲛⲉⲛⲧⲁⲩⲛ̅ⲧϥ ⲇⲉ ⲁⲩⲡⲁⲣⲁⲕⲁⲗⲉⲓ ⲛⲛⲁⲛⲧⲱⲛⲓⲟⲥ ⲉⲧⲣⲉϥϣⲗⲏⲗ ⲉϫⲱϥ. ⲛⲧⲟϥ ⲇⲉ ⲁϥⲙ̅ⲕⲁϩ ⲛϩⲏⲧ ⲉϫⲙⲡϩⲣ̅ϣⲓⲣⲉ. ⲁϥϣⲗⲏⲗ ⲇⲉ ⲁⲩⲱ ⲛⲉϥⲟ ⲛⲟⲩϣⲏⲛⲣⲟⲉⲓⲥ ⲛⲙⲙⲁϥ ϩⲛⲧⲉⲩϣⲏ ⲧⲏⲣⲥ̅ ⲉⲧⲙⲙⲁⲩ. ⲡϩⲣ̅ϣⲓⲣⲉ ⲇⲉ ϩⲛⲟⲩϣⲡⲛ̅ϣⲱⲡ ⲁϥϥⲟϭϥ ⲉϩⲣⲁⲓ ⲉϫⲛ̅ⲁⲛⲧⲱⲛⲓⲟⲥ ⲙⲡⲛⲁⲩ ⲉϩⲧⲟⲟⲩⲉ ⲁϥⲃⲱⲱⲣⲉ ⲙⲙⲟϥ. ⲛⲧⲉⲣⲟⲩⲛⲁⲩ ⲇⲉ ⲛϭⲓⲛⲉⲛⲧⲁⲩⲉⲓ ⲛⲙⲙⲁϥ ⲁⲩⲁⲕⲁⲛⲁⲕⲧⲉⲓ. ⲡⲉϫⲉⲁⲛⲧⲱⲛⲓⲟⲥ ⲛⲁⲩ ϫⲉⲙⲡⲣ̅ϭⲱⲛⲧ̅ ⲉⲡϣⲏⲣⲉ ϣⲏⲙ. ⲛⲧⲟϥ ⲅⲁⲣ ⲁⲛ ⲡⲉⲧⲉⲓⲣⲉ ⲛⲛⲁⲓ ⲁⲗⲗⲁ ⲡⲉⲡⲛⲁ̅ⲡⲉ ⲉⲧⲛ̅ϩⲏⲧϥ̅. ⲛⲧⲉⲣⲉϥⲉⲡⲓⲧⲓⲙⲁ ⲇⲉ ⲛⲁϥ ⲁϥⲕⲉⲗⲉⲩⲉ ⲛⲁϥ ⲉⲧⲣⲉϥⲃⲱⲕ ⲉϩⲣⲁⲓ ⲉϩⲉⲛⲙⲁ ⲉⲙⲛⲙⲟⲟⲩ ⲛϩⲏⲧⲟⲩ. ⲡⲉϫⲉⲁⲛⲧⲱⲛⲓⲟⲥ ⲅⲁⲣ ⲛⲁⲩ ϫⲉⲛⲧⲉⲣⲉϥϯ ⲙ̅ⲡⲉϥⲟⲩⲟⲓ ⲉϩⲟⲩⲛ ⲉⲣⲟⲓ ⲟⲩⲙⲁⲉⲓⲛⲡⲉ ⲛⲧϭⲓⲛⲉⲓ ⲉⲃⲟⲗ ⲙⲡⲇⲁⲓⲙⲱⲛ. ⲛⲁⲓ ⲇⲉ ⲛ̅ⲧⲉⲣⲉⲁⲛⲧⲱⲛⲓⲟⲥ ϫⲟⲟⲩ ⲛⲧⲉⲩⲛⲟⲩ ⲁⲡϣⲏⲣⲉϣⲏⲙ ϣⲱⲡⲉ ⲉϥⲧⲟⲩϫⲏⲩ ⲁⲩⲱ ⲛⲧⲉⲩⲛⲟⲩ ⲁⲡⲉϥϩⲏⲧ ⲥⲙⲓⲛⲉ ⲁϥⲉⲓⲙⲉ ϫⲉⲉϥⲧⲱⲛ ⲁϥⲁⲥⲡⲁⲍⲉ ⲙⲡϩⲗ̅ⲗⲟ ⲉϥϣⲡϩⲙⲟⲧ ⲛⲧⲉⲡⲛⲟⲩⲧⲉ ϥ.ⲫ̀ ⲙⲛ̅ⲛⲉϥⲡⲉⲧⲟⲩⲁⲁⲃ.

65. ϩⲁϩϭⲉ ⲛ̅ϩⲱⲃ ⲛⲧⲉⲓⲙⲓⲛⲉ ⲉⲁⲡⲉϩⲟⲩⲟ ⲛⲛⲙ̅ⲙⲟⲛⲁⲭⲟⲥ ϫⲟⲟⲩ ϩⲛⲟⲩⲥⲩⲙⲫⲱⲛⲓⲁ ϫⲉⲁⲩϣⲱⲡⲉ ⲉⲃⲟⲗ ϩⲓⲧⲟⲟⲧϥ ϩⲛⲟⲩⲙⲟⲧⲛⲥ̅. ⲉϩⲉⲛϣⲡⲏⲣⲉϭⲉ ⲁⲛⲛⲉ ⲛⲁⲓ ⲛϩⲟⲩⲟ ⲛⲛⲁϩⲣⲛ̅ⲛⲛ̅ⲕⲟⲟⲩⲉ ⲛⲧⲁⲩⲟⲩⲱⲛϩ̅ ⲉⲃⲟⲗ.ⲁⲥϣⲱⲡⲉ ⲇⲉ ⲛⲛⲟⲩϩⲟⲟⲩ ⲉϥⲛⲁⲟⲩⲱⲙ ⲁⲩⲱ ⲛⲧⲉⲣⲉϥⲧⲱⲟⲩⲛ ⲉϣⲗⲏⲗ.ⲛⲉⲡⲛⲁⲩ ⲛϫⲡⲯⲓⲧⲉⲡⲉ. ⲁϥⲉⲓⲙⲉ ⲉⲣⲟϥ ⲙⲁⲩⲁⲁϥ ⲉⲁⲩⲧⲟⲣⲡϥ̅ ϩⲙⲡⲉϥϩⲏⲧ ⲁⲩⲱ ⲧⲉϣⲡⲏⲣⲉⲧⲉ ⲛϩⲟⲩⲟ ϫⲉⲛⲉϥⲁϩⲉⲣⲁⲧϥ̅ⲡⲉ ⲉϥⲛⲁⲩ ⲉⲣⲟϥ ⲙⲙⲓⲛ ⲙⲙⲟϥ ⲉϣϫⲉ ⲛⲧⲁϥⲣ̅ⲡⲉϥⲃⲟⲗ ⲙⲁⲩⲁⲁϥ ⲁⲩⲱ ⲛⲉⲣⲉϩⲟⲓⲛⲉ ϫⲓⲙⲟⲉⲓⲧ ⲛ̅ϩⲏⲧϥ ⲉⲡⲁⲏⲣ ⲁⲩⲱ ⲉⲣⲉϩⲉⲛⲕⲟⲟⲩⲉ ⲁϩⲉⲣⲁⲧⲟⲩ ⲉⲡⲁⲏⲣ ⲉⲩϩⲟⲟⲩ ⲙⲙⲁⲧⲉ ⲁⲩⲱ ⲉⲩⲥⲁϣⲉ ⲉⲩⲟⲩⲱϣ ⲉⲁⲙⲁϩⲧⲉ ⲙⲙⲟϥ ⲉⲧⲙⲧⲣⲉϥⲥⲓⲛⲉ ⲙⲙⲟⲟⲩ ⲁⲩⲱ ⲉϫⲱⲱⲃⲉ ⲙ̅ⲙⲟⲟⲩ. ⲛⲉⲧϫⲓⲙⲟⲉⲓⲧ ⲇⲉ ϩⲏⲧϥ̅ ⲛⲉⲩⲱϣ ⲉⲟⲩⲃⲏⲩⲡⲉ ⲁⲛⲉⲑⲟⲟⲩ ⲉⲧⲙⲙⲁⲩ ϫⲟⲛⲧⲟⲩ ⲉϥⲓⲱⲡ ⲛⲙ̅ⲙⲁϥ ϫⲉⲕⲁⲥ ⲉⲩⲉⲉⲓⲙⲉ ϫⲉϥⲛ̅ⲧⲟⲟⲧⲟⲩ ⲏ ϥⲟ ⲛϩⲩⲡⲉⲩⲑⲩⲛⲟⲥ ⲛⲁⲩ. ⲛ̅ⲧ̅ⲉⲣⲟⲩⲱϣ ⲇⲉ ⲛϭⲓⲛⲉⲑⲟⲟⲩ ⲉⲧⲙ̅ⲙⲁⲩ ⲉϥⲓⲱⲡ ⲛⲙⲙⲁϥ ϫⲓⲛⲡⲉϩⲟⲟⲩ ⲛⲧⲁⲩϫⲡⲟϥ ⲁⲛⲉⲧϫⲓⲙⲟⲉⲓⲧ ϩⲏⲧϥ̅ ⲕⲱⲗⲩ ⲙⲙⲟⲟⲩ ⲉⲩϫⲱ ⲙⲙⲟⲥ ⲛⲁⲩ ϫⲉⲛⲁϫⲓⲛⲉⲡⲉϩⲟⲟⲩ ⲙⲉⲛ ⲙⲡⲉϥϫⲡⲟ ⲁⲡϫⲟⲉⲓⲥ ϥⲟⲧⲟⲩ ⲉⲃⲟⲗ. ϫⲓⲛⲉⲡⲉϩⲟⲟⲩ ⲛⲧⲁϥⲣ̅ⲙⲟⲛⲁⲭⲟⲥ ⲁⲩⲱ ⲁϥⲉⲣⲏⲧ ⲙⲙⲟϥ ⲛⲡⲛⲟⲩⲧⲉ ⲉⲝⲓⲥⲧⲓ ⲛⲏⲧⲛ ⲉϥⲓⲱⲡ ⲛⲙⲙⲁϥ ϫⲓⲛⲉⲡⲉϩⲟⲟⲩ ⲉⲧⲙⲙⲁⲩ. ⲧⲟⲧⲉ ⲛⲉⲧⲕⲁⲧⲏⲅⲟⲣⲉⲓ ⲙⲙⲟϥ ⲛⲧⲉⲣⲟⲩⲧⲙ̅ⲉϣϭⲙϭⲟⲙ ⲉⲧⲁϩⲟⲟⲩ ⲉⲣⲁⲧⲟⲩ ⲉⲣⲟϥ ⲏ ⲉϫⲡⲓⲟϥ ϩⲛⲧⲉⲩⲛⲟⲩ ⲉⲧⲙⲙⲁⲩ ⲁⲧⲉϩⲓⲏ ϣⲱⲡⲉ ⲛⲁϥ ⲛⲣⲙ̅ϩⲉ ⲙⲡⲟⲩ ϥ.ⲣ ⲉϣⲁⲙⲁϩⲧⲉ ⲙⲙⲟϥ ⲁⲗⲗⲁ ⲛⲧⲉⲩⲛⲟⲩ ⲁϥⲛⲁⲩ ⲉⲣⲟϥ ⲙⲙⲓⲛ ⲙⲙⲟϥ ⲉϣϫⲉ ⲉϥⲁϩⲉⲣⲁⲧϥ ⲉⲧⲉϥϩⲉ ⲉⲡⲉϣⲗⲏⲗ ⲛϭⲓⲁⲛⲧⲱⲛⲓⲟⲥ. ⲉⲁϥⲣ̅ⲡⲱⲃϣ̅ ⲙⲉⲛ ⲉⲧⲣⲉϥⲟⲩⲱⲙ ⲁⲩⲱ ⲁϥϭⲱ ⲙⲡⲥⲉⲉⲡⲉ ⲙⲡⲉϩⲟⲟⲩ ⲉⲧⲙ̅ⲙⲁⲩ ⲙⲛⲧⲕⲉⲟⲩϣⲏ ⲉϥⲁϣⲁϩⲟⲙ ⲁⲩⲱ ⲉϥⲥⲟⲡⲥ̅. ⲁϥⲣ̅ϣⲡⲏⲣⲉ ⲅⲁⲣ ⲛⲧⲉⲣⲉϥⲛⲁⲩ ϫⲉⲉⲣⲉⲡⲉⲛⲙⲓϣⲉ ϣⲟⲟⲡ ⲛⲁⲛ ϣⲁⲟⲩⲏⲣ ⲁⲩⲱ ϫⲉⲉⲣⲉⲟⲩⲁ ⲛⲁⲉϣϭⲙϭⲟⲙ ⲉⲥⲉⲓⲛⲉ ⲉϩⲣⲁⲓ ϩⲙⲡⲁⲏⲣ ϩⲓⲧⲛ̅ⲟⲩⲏⲣ ⲛ̅ϩⲓⲥⲉ ⲉⲁϥⲣ̅ⲡⲙⲉⲉⲩⲉ ⲙ̅ⲡⲁⲡⲟⲥⲧⲟⲗⲟⲥ ⲉϥϫⲱ ⲙⲙⲟⲥ ϫⲉⲕⲁⲧⲁⲡⲁⲣⲭⲱⲛ ⲛⲧⲉⲝⲟⲩⲥⲓⲁ ⲙⲡⲁⲏⲣ. ⲉⲩⲛ̅ⲧⲉⲡϫⲁϫⲉ ⲅⲁⲣ ⲧⲉⲝⲟⲩⲥⲓⲁ ⲙⲙⲁⲩ ϩⲙⲡⲁⲓ ϩⲙⲡⲧⲣⲉϥⲙⲓϣⲉ ⲛϥ̅ⲡⲓⲣⲁⲍⲉ ⲛϥⲁⲙⲁϩⲧⲉ ⲁⲩⲱ ⲛϥⲕⲱⲗⲩ ⲛⲛⲉⲧⲃⲏⲕ ⲉϩⲣⲁⲓ ϩⲓⲧⲟⲟⲧϥ̅. ⲉⲧⲃⲉⲡⲁⲓ ⲛϩⲟⲩⲟ ⲁϥϩⲱⲛ ⲉⲧⲟⲟⲧⲛ̅ ⲉϥϫⲱ ⲙⲙⲟⲥ ϫⲉϫⲓ ⲛⲏⲧⲛ ⲙⲡϩⲱⲕ ⲙⲡⲛⲟⲩⲧⲉ ϫⲉⲕⲁⲥ ⲉⲧⲉⲧⲛⲛⲁⲉϣϭⲙϭⲟⲙ ⲉⲁϩⲉⲣⲁⲧⲧⲏⲩⲧⲛ ϩⲙⲡⲉϩⲟⲟⲩ ⲙ̅ⲡⲟⲛⲏⲣⲟⲛ ϫⲉⲕⲁⲥ ⲛⲛⲉⲡϫⲁϫⲉ ϭⲛ̅ⲗⲁⲁⲩ ⲛ̅ϩⲱⲃ ⲉϥϩⲟⲟⲩ ⲉϩⲟⲩⲛ ⲉⲣⲱⲧⲛ̅ ⲧⲁⲣⲉϥϫⲓϣⲓⲡⲉ. ⲁⲛⲟⲛ ⲇⲉ ⲛ̅ⲧⲉⲣⲉⲛⲉⲓⲙⲉ ⲉⲡⲁⲓ ⲛⲧⲁϥϣⲱⲡⲉ ⲁⲛⲣ̅ⲡⲙⲉⲉⲩⲉ ⲙⲡⲁⲡⲟⲥⲧⲟⲗⲟⲥ ⲉϥϫⲱ ⲙⲙⲟⲥ ϫⲉⲉⲓⲧⲉ ⲉϥϩⲙⲡⲥⲱⲙⲁ ⲛ̅ϯⲥⲟⲟⲩⲛ ⲁⲛ ⲉⲓⲧⲉ ⲉϥⲙ̅ⲡⲃⲟⲗ ⲙⲡⲥⲱⲙⲁ ⲛ̅ϯⲥⲟⲟⲩⲛ ⲁⲛ ⲡⲛⲟⲩⲧⲉ ⲡⲉⲧⲥⲟⲟⲩⲛ. ⲁⲗⲗⲁ ⲡⲁⲩⲗⲟⲥ ⲙⲉⲛ ⲛ̅ⲧⲁⲩϥⲓⲧϥ̅ ϣⲁⲧⲙⲉϩϣⲟⲙⲛⲧⲉ ⲙⲡⲉ ⲁϥⲥⲱⲧⲙ̅ ⲉϩⲉⲛϣⲁϫⲉ ⲉⲩϩⲏⲡ ⲁϥⲉⲓ ⲉⲡⲉⲥⲏⲧ. ⲁⲛⲧⲱⲛⲓⲟⲥ ⲇⲉ ⲛⲧⲟϥ ⲛⲧⲁϥⲛⲁⲩ ⲉⲣⲟϥ ⲉⲁϥⲡⲱϩ ϣⲁⲡⲁⲏⲣ ⲙⲙⲓⲛ ⲙⲙⲟϥ ⲁⲩⲱ ⲁϥⲁⲅⲱⲛⲓⲍⲉ ϣⲁⲛⲧⲉϥⲟⲩⲱⲛϩ ⲉ ϥ.ⲫ ⲃⲟⲗ ⲉϥⲟ ⲛⲣⲙϩⲉ.

66. ⲛⲉⲩⲛ̅ⲧⲁϥ ⲇⲉ ⲟⲛ ⲙⲙⲁⲩ ⲙⲡⲉⲓⲕⲉϩⲱⲃ ⲛ̅ϩⲙⲟⲧ. ⲉϥϩⲙⲟⲟⲥ ⲅⲁⲣ ⲙⲁⲩⲁⲁϥ ϩⲙⲡⲧⲟⲟⲩ ⲉⲣϣⲁⲛⲟⲩϣⲁϫⲉ ⲛⲍⲏⲧⲏⲙⲁ ⲉⲓ ⲛⲛⲁϩⲣⲁϥ ⲛϥⲁⲡⲟⲣⲉⲓ ⲛϩⲏⲧϥ̅ ϣⲁⲣⲉⲧⲉⲡⲣⲟⲛⲟⲓⲁ ϭⲟⲗⲡϥ̅ ⲛⲁϥ ⲉⲃⲟⲗ ⲉϥϣⲗⲏⲗ ⲁⲩⲱ ⲡⲙⲁⲕⲁⲣⲓⲧⲏⲥ ⲉⲧⲙⲙⲁⲩ ⲁⲛⲧⲱⲛⲓⲟⲥ ⲛⲉⲩⲣⲉϥϫⲓⲥⲃⲱⲡⲉ ⲛ̅ⲧⲉⲡⲛⲟⲩⲧⲉ ⲕⲁⲧⲁⲛⲉⲧⲥⲏϩ. ⲙⲛⲛ̅ⲥⲁⲛⲁⲓ ⲇⲉ ⲟⲛ ⲁⲡϣⲁϫⲉ ϣⲱⲡⲉ ⲛⲁϥ ⲛⲛⲟⲩϩⲟⲟⲩ ⲙⲛϩⲟⲓⲛⲉ ⲉⲁⲩⲃⲱⲕ ϣⲁⲣⲟϥ ⲉⲧⲃⲉⲧⲇⲓⲁⲅⲱⲅⲏ ⲛⲧⲉⲯⲩⲭⲏ ⲉⲧⲃⲉⲡⲉⲥⲙⲁⲛϣⲱⲡⲉ ⲏ ϫⲉⲁϣⲡⲉ ⲡⲙⲁ ⲉⲧⲛⲁϣⲱⲡⲉ ⲛⲁⲥ ⲙⲛⲛ̅ⲥⲁⲛⲁⲓ.ϩⲣⲁⲓ ⲇⲉ ϩⲛⲧⲕⲉⲟⲩϣⲏ ⲁⲟⲩⲁ ⲙⲟⲩⲧⲉ ⲉⲣⲟϥ ⲉⲃⲟⲗ ϩⲛⲧⲡⲉ ⲉϥϫⲱ ⲙⲙⲟⲥ ϫⲉⲁⲛⲧⲱⲛⲓⲉ ⲁⲙⲟⲩ ⲉⲃⲟⲗ ⲛⲅ̅ⲛⲁⲩ. Ⲭ . . . . ., ⲛⲉϥⲥⲟⲟⲩⲛ ⲅⲁⲣ ϫⲉⲛⲓⲙ ⲛⲉⲧⲉϣϣⲉ ⲉⲥⲱⲧⲙ ⲛⲥⲱⲟⲩ ⲁϥϭⲱϣⲧ ⲉϩⲣⲁⲓ ⲁϥⲛⲁⲩ ⲉⲟⲩⲁ ⲉⲩⲗⲁϣⲓⲏⲡⲉ ⲛϭⲁⲓⲉ ⲉⲙⲁⲧⲉ ϩⲙⲡⲉϥⲉⲓⲛⲉ ⲉϥⲟ ⲛϩⲟⲧⲉ ⲉϥⲁϩⲉⲣⲁⲧϥ̅ ⲉϥⲡⲏϩ ϣⲁⲛⲉⲕⲗⲟⲟⲗⲉ ⲉⲣⲉϩⲟⲓⲛⲉ ⲃⲏⲕ ⲉϩⲣⲁⲓ ⲉⲣⲉϩⲛ̅ⲧⲛϩ̅ ⲙⲙⲟⲟⲩ. ⲁⲩⲱ ⲡⲉⲧⲙ̅ⲙⲁⲩ ⲛⲉϥⲥⲟⲟⲩⲧⲛ̅ ⲛ̅ⲧⲉϥϭⲓϫ ⲉⲃⲟⲗ. ϩⲟⲓⲛⲉ ⲙⲉⲛ ⲛⲉϥⲕⲱⲗⲩ ⲙⲙⲟⲟⲩ. ϩⲉⲛⲕⲟⲟⲩⲉ ⲇⲉ ⲉⲩϩⲏⲗ ⲁⲩⲣ̅ϩⲓⲧⲡⲉ ⲙⲙⲟϥ ⲉⲧⲣⲉⲩϫⲓⲧⲟⲩ ⲉϩⲣⲁⲓ. ⲁⲩⲱ ϩⲙⲡⲁⲓ ⲛⲉϥϩⲣⲟϫⲣϫ̅ ⲛⲛⲉϥⲟⲃϩⲉ ⲛϭⲓⲡⲗⲁϣⲓⲏ ⲉⲧⲙ̅ⲙⲁⲩ. ϣⲁϥⲣⲁϣⲉ ⲇⲉ ⲛⲧⲟϥ ⲉϫⲛⲛⲉⲧϩⲏⲩ ⲉⲡⲉⲥⲏⲧ ϩⲁⲣⲁⲧϥ̅. ⲁⲩⲥⲙⲏ ⲇⲉ ϣⲱⲡⲉ ϣⲁⲁⲛⲧⲱⲛⲓⲟⲥ ϫⲉⲛⲟⲓ ⲙⲡⲉⲧⲕ̅ⲛⲁⲩ ⲉⲣⲟϥ ⲁⲩⲱ ⲛⲧⲉⲣⲉϥⲟⲩⲱⲛ ⲛϭⲓⲡⲉϥϩⲏⲧ ⲁϥⲉⲓⲙⲉ ϫⲉⲡⲉⲓⲛⲉ ⲉϩⲣⲁⲓⲡⲉ ⲡⲁⲓ ⲛⲛⲉⲯⲩⲭⲟⲟⲩⲉ ⲛ̅ⲧⲁϥⲛⲁⲩ ⲉⲣⲟⲟⲩ. ⲁⲩⲱ ⲡⲗⲁϣⲓⲏ ⲉⲧⲙ̅ⲙⲁⲩ ⲉⲧⲁ ϥ..ⲣ ϩⲉⲣⲁⲧϥ̅ⲡⲉ ⲡϫⲁϫⲉ ⲉⲧⲫⲑⲟⲛⲉⲓ ⲉⲙⲡⲓⲥⲧⲟⲥ ⲁⲩⲱ ⲁϥⲁⲙⲁϩⲧⲉ ⲛⲛⲉⲧϭⲏⲡ ⲛ̅ⲧⲟⲟⲧϥ̅ ⲉⲧⲟ ⲛⲁϥ ⲛ̅ϩⲩⲡⲉⲩⲑⲩⲛⲟⲥ ⲁ̀ⲩⲱ ⲁϥⲁⲙⲁϩⲧⲉ ⲛⲛⲉⲧϭⲏⲡ ⲛ̅ⲧⲟⲟⲧϥ ̀ⲁⲩⲱ ⲉϥⲕⲱⲗⲩ ⲙⲙⲟⲟⲩ ⲕⲁⲛ ⲉⲩϣⲁⲛⲥⲓⲛⲉ ⲛ̅ⲧⲟⲟⲧϥ̅ ⲉⲧⲙ̅ⲧⲣⲉⲩϫⲱⲱⲃⲉ ⲉϩⲟⲩⲛ ϩⲛⲟⲩⲙⲛⲧⲁⲙⲉⲣⲓⲙⲉⲛⲟⲥ ⲙⲛⲟⲩⲙⲛⲧⲁⲧⲣⲟⲟⲩϣ. ⲛⲉⲧⲙ̅ⲡⲟⲩⲥⲱⲧⲙ̅ ⲇⲉ ⲛ̅ⲥⲱϥ ⲉⲙⲡⲉϥⲉϣϭⲙϭⲟⲙ ⲉⲁⲙⲁϩⲧⲉ ⲉϫⲱⲟⲩ ⲁⲗⲗⲁ ⲛⲉⲩⲃⲏⲕ ⲉϩⲣⲁⲓ ϩⲓⲧⲡⲉ ⲙ̅ⲙⲟϥ. ⲡⲁⲓ ⲟⲛ ⲛ̅ⲧⲉⲣⲉϥⲛⲁⲩ ⲉⲣⲟϥ ⲁϥⲣ̅ⲑⲉ ⲛ̅ⲧⲁⲩⲧⲱⲃⲥ̅ ⲙⲙⲟϥ ⲉⲡⲉϩⲟⲩⲟ ⲉϥⲁⲅⲱⲛⲓⲍⲉ ⲉⲡⲣⲟⲕⲟⲡⲧⲉ ⲉⲛⲁⲑⲏ ⲙⲙⲏⲛⲉ. ⲛⲁⲓ ⲇⲉ ⲁϥϫⲟⲟⲩ ⲉⲁϥⲧⲁⲩⲟⲟⲩ ⲉⲣⲟϥ ⲉϩⲛⲁϥ ⲁⲛⲭ ⲁⲗⲗⲁ ϩⲙⲡ̅ⲧⲣⲉϥⲱⲥⲕ̅ ⲉϣⲗⲏⲗ ⲉⲁϥⲣ̅ϣⲡⲏⲣⲉ ϩⲁⲣⲓϩⲁⲣⲟϥ ⲙⲁⲩⲁⲁϥ ⲁⲩϫⲛⲟⲩϥ ⲛ̅ϭⲓⲛⲉⲧⲛⲙ̅ⲙⲁϥ ⲉⲩⲑⲗⲓⲃⲉ ⲙⲙⲟϥ ⲉⲩⲉⲛⲱⲭⲗⲉⲓ ⲛⲁϥ ⲉⲧⲣⲉϥⲧⲁⲙⲟⲟⲩ ⲉⲛⲉⲧϥ̅ⲛⲁⲩ ⲉⲣⲟⲟⲩ ⲁⲩⲱ ⲛⲧⲉⲓϩⲉ ⲁⲩⲁⲛⲁⲅⲕⲁⲍⲉ ⲙⲙⲟϥ ⲁϥϫⲟⲟⲩ ⲛⲁⲩ ⲛⲑⲉ ⲛⲛⲟⲩⲉⲓⲱⲧ ⲉⲙⲛϣϭⲟⲙ ⲙⲙⲟϥ ⲉϩⲉⲡⲗⲁⲁⲩ ⲉⲛⲉϥϣⲏⲣⲉ ⲁⲩⲱ ϫⲉϥⲥⲟⲟⲩⲛ ϫⲉⲧⲉϥⲥⲩⲛⲏⲇⲏⲥⲓⲥ ⲧⲃ̅ⲃⲏⲩ ⲁⲩⲱ ϫⲉⲛⲉⲧϥ̅ⲛⲁϫⲟⲟⲩ ⲥⲉⲛⲁϣⲱⲡⲉ ⲛⲛⲟϥⲣⲉ ⲛϩⲉⲛⲕⲟⲟⲩⲉ ⲛ̅ⲥⲉⲉⲓⲙⲉ ⲁⲩⲱ ⲛ̅ⲥⲉϫⲓⲥⲃⲱ ⲉⲃⲟⲗ ⲙⲙⲟϥ ϫⲉⲟⲩⲛⲕⲁⲣⲡⲟⲥ ⲉⲛⲁⲛⲟⲩϥ ϣⲟⲟⲡ ϩⲛⲧⲁⲥⲕⲏⲥⲓⲥ ⲁⲩⲱ ϫⲉⲛⲉⲓϭⲱⲗⲡ ⲉⲃⲟⲗ ϣⲁⲩϣⲱⲡⲉ ⲛ̅ⲥⲟⲗⲥⲗ̅ ⲛ̅ϩⲁϩ ⲛⲥⲟⲛ ⲉⲩⲃⲏⲕ ϣⲁⲣⲟϥ.

67. ⲟⲩⲣⲱⲙⲉ ⲅⲁⲣ ⲉⲛⲁⲛⲟⲩϥⲡⲉ ϩⲙⲡⲉϥⲥⲙⲟⲧ ⲉϥⲧⲃ̅ⲃⲏⲩ ϩⲙⲡⲉϥϩⲏⲧ.ⲉϥϣⲟⲟⲡ ⲇⲉ ⲛ̅ⲧⲉⲓϩⲉ ⲛⲉϥⲧⲁⲉⲓⲟⲡⲉ ⲛⲛ̅ⲕⲁⲛⲱⲛ ⲛⲧⲉⲕⲕⲗⲏⲥⲓⲁ ⲉⲡⲉϩⲟⲩⲟ ⲁⲩⲱ ⲛⲉϥⲟⲩⲱϣ ⲉⲧⲣⲉⲕⲗⲏⲣⲓⲕⲟⲥ ⲛⲓⲙ ⲉⲣ̅ϩⲓⲑⲏ ⲙⲙⲟϥ ϩⲙⲡⲧⲁⲉⲓⲟ. ϥ..ⲫ ⲉⲙⲉϥϣⲓⲡⲉ. ⲅⲁⲣ ⲉⲕⲱⲗϫ̅ ⲛⲧⲉϥⲁⲡⲉ ⲙⲡⲉⲡⲓⲥⲕⲟⲡⲟⲥ ⲏ ⲡⲉⲡⲣⲉⲥⲃⲩⲧⲉⲣⲟⲥ.ⲉϣⲱⲡⲉ ⲇⲉ ⲟⲛ ⲉⲣϣⲁⲛⲟⲩⲇⲓⲁⲕⲟⲛⲟⲥ ⲃⲱⲕ ϣⲁⲣⲟϥ ⲛⲛⲟⲩϩⲟⲟⲩ ⲉⲧⲣⲉϥⲱⲫⲉⲗⲉⲓ ⲉⲃⲟⲗ ϩⲓⲧⲟⲟⲧϥ̅ ⲛ̀ⲛ̀ⲉⲧⲣ̅ⲛⲟϥⲣⲉ ⲙⲉⲛ ⲛⲁϥ ϣⲁϥϣⲁϫⲉ ⲉⲣⲟϥ ⲛ̅ϩⲏⲧⲟⲩ. ⲉⲩϣⲁⲛⲛⲟⲩ ⲉϣⲗⲏⲗ ϣⲁϥϯⲡⲙⲁ ⲛⲁϥ ⲉϣⲗⲏⲗ ϩⲓⲑⲏ ⲙⲙⲟϥ Ⲭ. . . . ., ⲉϥⲁⲝⲓⲟⲩ ⲛⲛⲉⲧϩⲁⲧⲏϥ ⲉⲧⲣⲉϥⲥⲱⲧⲙ̅ ⲉⲃⲟⲗ ϩⲓⲧⲟⲟⲧⲟⲩ ⲁⲩⲱ ϣⲁϥϩⲟⲙⲟⲗⲟⲅⲉⲓ ϫⲉⲁⲓⲱⲫⲉⲗⲉⲓ ⲉⲣϣⲁⲛⲟⲩⲁ ϫⲉⲟⲩϣⲁϫⲉ ⲉϥⲣ̅ⲛⲟⲃⲣⲉ ⲙⲡⲉϥⲙ̅ⲧⲟ ⲉⲃⲟⲗ. ⲡⲉϥϩⲟ ⲇⲉ ⲉⲩⲛ̅ⲧⲁϥ ⲙⲙⲁⲩ ⲛⲛⲟⲩⲛⲟϭ ⲛ̅ⲭⲁⲣⲓⲥⲙⲁ ⲙⲡⲙⲧⲟ ⲉⲃⲟⲗ ⲙⲡⲥⲱⲧⲏⲣ. ⲉϣⲱⲡⲉ ⲇⲉ ⲉϥϩⲛⲧⲙⲏⲧⲉ ⲛⲛⲟⲩⲙⲏⲏϣⲉ ⲙⲙⲟⲛⲁⲭⲟⲥ ⲛⲧⲉⲟⲩⲁ ⲟⲩⲱϣ ⲉⲛⲁⲩ ⲉⲣⲟϥ ⲉⲛϥⲥⲟⲟⲩⲛ ⲙⲙⲟϥ ⲁⲛ ϣⲁϥⲙⲟⲟϣⲉ ⲉϩⲟⲩⲛ ⲛⲧⲉⲩⲛⲟⲩ ϣⲁϥⲕⲱ ⲛⲥⲱϥ ⲛ̅ϭⲓⲡⲉⲧⲙⲙⲁⲩ ⲛⲛ̅ⲕⲉⲙⲟⲛⲁⲭⲟⲥ ⲧⲏⲣⲟⲩ ⲉⲧϩⲁⲧⲛⲁⲛⲧⲱⲛⲓⲟⲥ ϣⲁϥⲃⲱⲕ ⲇⲉ ⲉϩⲟⲩⲛ ⲉⲣⲟϥ ⲛⲑⲉ ⲉϣϫⲉ ⲉⲣⲉⲡϩⲟ ⲛⲛⲁⲛⲧⲱⲛⲓⲟⲥ ⲥⲱⲕ ⲙⲡⲉⲧⲙ̅ⲙⲁⲩ ϣⲁⲣⲟϥ. ⲛⲉⲣⲉⲁⲛⲧⲱⲛⲓⲟⲥ ⲅⲁⲣ ⲟ ⲁⲛ ⲛⲛⲟϭ ϩⲛⲧⲉϥϣⲓⲏ ⲟⲩⲇⲉ ϩⲙⲡⲉϥⲡⲱϭⲕ ⲉⲛⲉⲧϩⲁⲧⲏϥ ⲁⲗⲗⲁ ⲉϥϣⲟⲃⲉ ⲉⲣⲟⲟⲩ ⲧⲏⲣⲟⲩ ϩⲙⲡⲉϥⲥⲙⲟⲧ ⲙⲛⲡⲉϥϩⲩⲑⲟⲥ ⲁⲩⲱ ⲟⲛ ϩⲙⲡⲧⲃ̅ⲃⲟ ⲛⲧⲉϥⲯⲩⲭⲏ. ⲉⲣϣⲁⲛⲧⲉⲯⲩⲭⲏ ⲅⲁⲣ ϣⲱⲡⲉ ⲉⲛⲥ̅ϣⲧⲣ̅ⲧⲱⲣ ⲁⲛ ϣⲁⲥϫⲡⲟ ⲛⲁⲥ ⲛⲛⲉⲥⲑⲩⲥⲓⲥ ⲉⲧϩⲓⲃⲟⲗ ⲉⲙⲛϣⲧⲟⲣⲧⲣ̅ ⲛϩⲏⲧⲟⲩ ϩⲱⲥⲧⲉ ⲉⲃⲟⲗ ϩⲙⲡⲣⲁϣⲉ ⲛⲧⲉⲯⲩⲭⲏ ϣⲁⲣⲉⲡϩⲟ ϣⲱⲡⲉ ⲉϥⲣⲟⲟⲩⲧ ⲁⲩⲱ ⲉ ϩⲛⲛ̅ⲕⲏⲛⲏⲥⲓⲥ ⲙⲡⲥⲱⲙⲁ ϣⲁⲩⲁⲓⲥⲑⲁⲛⲉ ⲛⲥⲉⲛⲟⲓ ⲉⲧⲕⲁⲧⲁⲥⲧⲁⲥⲓⲥ ⲏ ⲡⲉⲥ ϥ.:ⲣ ⲙⲓⲛⲉ ⲛ̅ⲧⲉⲯⲩⲭⲏ ⲛ̅ⲑⲉ ⲉⲧⲥ̅ϣⲟⲟⲡ ⲙⲙⲟⲥ ⲕⲁⲧⲁⲑⲉ ⲉⲧⲥⲏϩ ϫⲉϣⲁⲣⲉⲟⲩϩⲏⲧ ⲉϥⲉⲩⲫⲣⲁⲛⲉ ϯⲟⲩⲣⲟⲧ ⲉⲡϩⲟⲭ ϣⲁϥⲱⲕⲙ̅ ⲇⲉ ⲉϥϩⲛϩⲉⲛⲗⲩⲡⲉⲓ. ⲧⲁⲓⲧⲉ ⲑⲉ ⲛⲧⲁⲓⲁⲕⲱⲃ ⲥⲟⲩⲛ̅ⲗⲁⲃⲁⲛ ⲉϥⲙⲉⲉⲩⲉ ⲉⲣⲟϥ ⲉϩⲉⲛⲡⲉⲑⲟⲟⲩ ⲡⲉϫⲁϥ ϫⲉⲙⲡϩⲟ ⲙ̅ⲡⲉⲧⲛ̅ⲉⲓⲱⲧ ⲛⲙⲙⲁⲓ ⲁⲛ ⲛⲑⲉ ⲛⲥⲁϥ ⲙⲛϣⲙ̅ⲧⲉⲡⲟⲟⲩ ⲛϩⲟⲟⲩ. ⲧⲁⲓ ⲟⲛⲧⲉ ⲑⲉ ⲛ̅ⲧⲁⲥⲁⲙⲟⲩⲏⲗ ⲥⲟⲩⲛ̅ⲇⲁⲇ̅. ⲛⲉⲣⲉⲛⲉϥⲃⲁⲗ ⲅⲁⲣ ⲙⲉϩ ⲛ̅ⲣⲁϣⲉ ⲛⲉϥⲟⲃϩⲉ ⲛⲑⲉ ⲛⲛⲟⲩⲉⲣⲱⲧⲉ. ⲧⲁⲓⲧⲉ ⲑⲉ ⲉϣⲁⲩⲥⲟⲩⲛ̅ⲁⲛⲧⲱⲛⲓⲟⲥ ⲙⲙⲟⲥ. ⲛⲧⲁϥϣⲧⲟⲣⲧⲣ̅ ⲅⲁⲣ ⲛⲛⲁϣ ⲛ̅ϩⲟⲟⲩ ⲉⲣⲉⲧⲉϥⲯⲩⲭⲏ ⲅⲁⲣ ϣⲟⲟⲡ ϩⲛⲟⲩⲥϭⲣⲉϩⲧ. ⲛⲧⲁϥϣⲱⲡⲉ ⲉϥⲱⲕⲙ̅ ⲛⲛⲁϣ ⲛϩⲟⲟⲩ ⲉⲛⲉϩ ⲉⲣⲉⲡⲉϥϩⲏⲧ ⲣⲁϣⲉ ⲛ̅ⲛⲁⲩ ⲛⲓⲙ.

68. ⲛⲉⲩϣⲡⲏⲣⲉ ⲇⲉⲡⲉ ϩⲛⲧⲉϥⲡⲓⲥⲧⲓⲥ ⲉϥⲟ ⲛⲉⲩⲥⲉⲃⲏⲥ.ⲙⲡⲉϥⲕⲟⲓⲛⲱⲛⲉⲓ ⲇⲉ ⲙⲛⲙⲙⲉⲗⲓⲧⲓⲁⲛⲟⲥ ⲉϥⲥⲟⲟⲩⲛ ⲛⲧⲉⲩⲡⲟⲛⲏⲣⲓⲁ ⲙⲛⲧⲉⲩⲙⲛⲧⲁⲡⲟⲥⲧⲁⲧⲏⲥ ⲟⲩⲇⲉ ⲙⲙⲁⲛⲉⲓⲭⲁⲓⲟⲥ ⲁⲗⲗⲁ ⲉϥϯⲥⲃⲱ ⲛⲁⲩ ⲙⲙⲁⲧⲉ ⲉⲧⲣⲉⲩⲡⲱⲱⲛⲉ ⲉϩⲟⲩⲛ ⲉⲧⲙⲛⲧⲣⲉϥϣⲙ̅ϣⲉⲛⲟⲩⲧⲉ ⲉϥⲡⲁⲣⲁⲅⲅⲓⲗⲉ ⲛⲁⲩ ϫⲉⲧⲙⲛⲧϣⲃⲏⲣ ⲛⲛⲉⲧⲙ̅ⲙⲁⲩ ⲏ ϣⲁϫⲉ ⲣⲱ ⲛⲙⲙⲁⲩ ⲟⲩⲃⲗⲁⲡⲧⲉⲓⲡⲉ ⲁⲩⲱ ⲟⲩⲧⲁⲕⲟⲡⲉ ⲛ̅ⲧⲉⲯⲩⲭⲏ. ⲧⲁⲓⲧⲉ ⲑⲉ ⲉϥⲃⲱⲧⲉ ⲛⲑⲉⲣⲉⲥⲓⲥ ⲛ̅ⲛⲁⲣⲓⲁⲛⲟⲥ ⲉϥⲡⲁⲣⲁⲅⲅⲉⲓⲗⲉ ⲛⲟⲩⲟⲛ ⲛⲓ̅ⲙ ⲉⲧⲙ̅ϩⲱⲛ ⲉϩⲟⲩⲛ ⲉⲣⲟⲟⲩ ⲉⲡⲧⲏⲣϥ̅. ⲁϩⲟⲓⲛⲉϭⲉ ⲛⲛⲁⲣⲓⲁⲛⲟⲥ ⲛⲛⲟⲩϩⲟⲟⲩ ⲃⲱⲕ ϣⲁⲣⲟϥ ⲁϥⲁⲛⲁⲕⲣⲓⲛⲉ ⲙⲙⲟⲟⲩ ⲁⲩⲱ ⲛⲧⲉⲣⲉϥⲉⲓⲙⲉ ⲉⲣⲟⲟⲩ ϫⲉϩⲉⲛⲁⲥⲉⲃⲏⲥⲛⲉ ⲉⲡⲉ ϥ.:ⲫ ϩⲟⲩⲟ. ⲁϥⲡⲱⲧ ⲛⲥⲱⲟⲩ ⲉⲃⲟⲗ ϩⲙⲡⲧⲟⲟⲩ ⲉϥϫⲱ ⲙⲙⲟⲥ ϫⲉⲛⲉⲩϣⲁϫⲉ ϩⲟⲟⲩ ⲉⲛϩⲟϥ.

69. ⲁⲩϫⲓϭⲟⲗ ⲟⲛ ⲛⲟⲩϩⲟⲟⲩ ⲛϭⲓⲛⲁⲣⲓⲁⲛⲟⲥ ϩⲱⲥ ⲉϥⲡⲓⲥⲧⲉⲩⲉ ⲛⲑⲉ ⲉⲧⲟⲩϫⲱ ⲙⲙⲟⲥ. ⲁϥⲁⲅⲁⲛⲁⲕⲧⲉⲓ ⲁⲩⲱ ⲁϥⲣ̅ϣⲡⲏⲣⲉ ⲉⲡⲉϩⲟⲩⲟ ⲛⲧⲉⲣⲉϥⲥⲱⲧⲙ̅. ⲙⲛⲛ̅ⲥⲱⲥ ⲇⲉ ⲁⲩⲥⲡⲥⲱⲡϥ ⲛϭⲓⲛⲉⲉⲡⲓⲥⲕⲟⲡⲟⲥ ⲙⲛⲛⲉⲡⲣⲉⲥⲃⲩⲧⲉⲣⲟⲥ ⲙⲛⲛⲉⲥⲛⲏⲩ ⲧⲏⲣⲟⲩ ⲁϥⲉⲓ ⲉⲡⲉⲥⲏⲧ ϩⲓⲡⲧⲟⲟⲩ ⲁϥⲃⲱⲕ ⲉϩⲟⲩⲛ ⲉⲣⲁⲕⲟⲧⲉ ⲁϥⲧⲁϣⲉⲟⲉⲓϣ ⲛⲛⲁⲣⲓⲁⲛⲟⲥ ⲉϥⲃⲱⲧⲉ ⲙⲙⲟⲟⲩ ⲉⲃⲟⲗ ⲉϥϫⲱ ⲙⲙⲟⲥ ⲉⲑⲩⲣⲁⲓⲥⲓⲥ ⲉⲧⲙ̅ⲙⲁⲩ ϫⲉⲥϫⲁϩⲙ ⲡⲁⲣⲁⲛⲕⲟⲟⲩⲉ ⲧⲏⲣⲟⲩ. ⲥⲉⲟ ⲅⲁⲣ ⲙⲡⲣⲟⲇⲣⲟⲙⲟⲥ ⲙⲡⲁⲛⲧⲓⲭⲣⲓⲥⲧⲟⲥ. ⲁⲩⲱ ⲁϥϯⲥⲃⲱ ⲙⲡⲗⲁⲟⲥ ϫⲉⲛⲟⲩⲥⲱⲛⲧ̅ ⲁⲛⲡⲉ ⲡϣⲏⲣⲉ ⲙⲡⲛⲟⲩⲧⲉ ⲁⲩⲱ ϫⲉⲛⲧⲁϥϣⲱⲡⲉ ⲁⲛ ⲉⲃⲟⲗ ϩⲙⲡⲉⲧⲉⲛⲉϥϣⲟⲟⲡ ⲁⲛ ⲁⲗⲗⲁ ⲟⲩⲉⲃⲟⲗⲡⲉ ϩⲛⲧⲟⲩⲥⲓⲁ ⲙⲡⲉⲓⲱⲧ ⲡⲗⲟⲅⲟⲥⲡⲉ ⲁⲩⲱ ⲧⲥⲟⲫⲓⲁ ⲙ̅ⲡⲉⲓⲱⲧ. ⲉⲧⲃⲉⲡⲁⲓ ⲟⲩⲙⲛⲧⲁⲥⲉⲃⲏⲥⲡⲉ ϫⲟⲟⲥ ϫⲉⲁⲩⲟⲩⲟⲉⲓϣ ϣⲱⲡⲉ ⲉⲛϥ̅ϣⲟⲟⲡ ⲁⲛ. ϥϣⲟⲟⲡ ⲅⲁⲣ ⲛⲛⲟⲩⲟⲉⲓϣ ⲛⲓⲙ ⲙⲛⲡⲉϥⲉⲓⲱⲧ ⲛϭⲓⲡⲗⲟⲅⲟⲥ. ⲉⲧⲃⲉⲡⲁⲓ ⲙⲡⲣ̅ⲕⲁⲗⲁⲁⲩ ⲛ̅ⲕⲟⲓⲛⲱⲛⲓⲁ ⲛⲏⲧⲛ̅ ⲙⲛⲛⲁⲣⲓⲁⲛⲟⲥ. ⲙⲛⲗⲁⲁⲩ ⲅⲁⲣ ⲛⲕⲟⲓⲛⲱⲛⲓⲁ ϣⲟⲟⲡ ⲙⲡⲟⲩⲟⲉⲓⲛ ⲙⲛⲡⲕⲁⲕⲉ. ⲛⲧⲱⲧⲛ ⲅⲁⲣ ⲛⲧⲉⲧⲛϩⲉⲛⲭⲣⲓⲥϯⲁⲛⲟⲥ ⲉⲧⲉⲧⲛϣⲟⲟⲡ ⲛⲛⲉⲩⲥⲉⲃⲏⲥ ϩⲛⲧⲡⲓⲥⲧⲓⲥ. ⲛⲁⲓ ⲇⲉ ⲛⲧⲟⲟⲩ ⲉⲩϫⲱ ⲙⲙⲟⲥ ϫⲉⲟⲩⲥⲱⲛⲧⲡⲉ ⲡϣⲏⲣⲉ ⲙⲡⲛⲟⲩⲧⲉ ⲉⲛⲥⲉϣⲟⲃⲉ ⲁⲛ ⲛ̅ⲗⲁⲁⲩ ⲛ̅ϩⲉⲑⲛⲟⲥ ⲉⲩϣⲙϣⲉ ⲙⲡⲥⲱⲛⲧ ⲡⲁⲣⲁⲡⲉⲛⲧⲁϥⲥⲱⲛⲧ. ⲡⲓⲥⲧⲉⲩⲉ ⲇⲉ ϫⲉⲛⲧⲟϥ ϥ. ̀ⲡⲥⲱⲛⲧ̅ ⲧⲏⲣϥ̅ ϥϭⲟⲛⲧ ⲉⲣⲟⲟⲩ ϫⲉⲡⲣⲉϥⲥⲱⲛⲧ ⲁⲩⲱ ⲡϫⲟⲉⲓⲥ ⲙⲡⲧⲏⲣϥ̅ ⲡⲉⲛⲧⲁϥⲧⲣⲉⲡⲧⲏⲣϥ̅ ϣⲱⲡⲉ ⲛϩⲏⲧϥ̅ ⲥⲉⲱⲡ ⲙⲙⲟϥ ⲉϩⲟⲩⲛ ⲙⲛⲛⲉⲛⲧⲁⲩϣⲱⲡⲉ.

70. ⲡⲗⲁⲟⲥ ⲇⲉ ⲧⲏⲣϥ̅ ⲛⲉⲩⲣⲁϣⲉⲡⲉ ⲉⲩⲥⲱⲧⲙ̅ ⲉⲛⲁⲓ ⲉⲃⲟⲗ ϩⲓⲧⲟⲟⲧϥ̅ ⲛⲛⲟⲩⲣⲱⲙⲉ ⲛⲧⲉⲓⲙⲓⲛⲉ ⲉϥⲃⲱⲧⲉ ⲛⲑⲉⲣⲉⲥⲓⲥ ⲉⲧⲙ̅ⲙⲁⲩ ⲧⲁⲓ ⲉⲧⲙⲓϣⲉ ⲙⲛⲡⲉⲭⲣⲓⲥⲧⲟⲥ.ⲟⲩⲟⲛϭⲉ ⲛⲓⲙ ⲉⲧϩⲛⲧⲡⲟⲗⲓⲥ ⲛⲉⲩⲡⲏⲧ ϩⲓⲟⲩⲥⲟⲡ ⲉⲩⲟⲩⲱϣ ⲉⲛⲁⲩ ⲉⲁⲛⲧⲱⲛⲓⲟⲥ ⲁⲩⲱ ⲛϩⲉⲑⲛⲓⲕⲟⲥ ⲙⲛⲛⲉⲧⲉϣⲁⲩⲙⲟⲩⲧⲉ ⲉⲣⲟⲟⲩ ϫⲉⲟⲩⲏⲏⲃ ⲁⲩⲉⲓ ⲉⲧⲉⲕⲕⲗⲏⲥⲓⲁ ⲉⲩϫⲱ ⲙⲙⲟⲥ ϫⲉⲉⲛⲟⲩⲱϣ ⲉⲛⲁⲩ ⲉⲡⲣⲱⲙⲉ ⲙⲡⲛⲟⲩⲧⲉ ⲁⲛⲧⲱⲛⲓⲟⲥ . ⲕⲁⲓⲅⲁⲣ ϩⲙⲡⲙⲁ ⲉⲧⲙ̅ⲙⲁⲩ ⲟⲛ ⲁⲡϫⲟⲉⲓⲥ ⲧⲃ̅ⲃⲉϩⲁϩ ⲉⲃⲟⲗ ϩⲓⲧⲟⲟⲧϥ̅ ⲉⲩⲟ ⲛⲇⲁⲓⲙⲱⲛⲓⲟⲛ ⲁⲩⲱ ⲛⲉⲧⲉⲣⲉⲛⲉⲩϩⲏⲧ ⲧⲁⲕⲏⲩ ⲉⲣⲟⲟⲩ ⲁϥⲧⲁⲗϭⲟⲟⲩ. ϩⲁϩ ⲟⲛ ϩⲛⲛⲉϩⲉⲗⲗⲏⲛ ⲁⲩⲁⲝⲓⲟⲩ ⲉⲧⲣⲉⲩϫⲱϩ ⲙⲙⲁⲧⲉ ⲉⲡϩⲗⲗⲟ ⲉⲩⲡⲓⲥⲧⲉⲩⲉ ϫⲉⲥⲉⲛⲁⲱⲫⲉⲗⲉⲓ ϩⲙⲡⲧⲣⲉⲩϫⲱϩ ⲉⲣⲟϥ. ⲙ̅ⲙⲁⲧⲉ. ⲁⲩⲱ ⲁⲩⲙⲏⲏϣⲉϣⲱⲡⲉ ⲛⲭⲣⲓⲥϯⲁⲛⲟⲥ ϩⲛⲛⲉϩⲟⲟⲩ ⲉⲧⲙ̅ⲙⲁⲩ.

71. ⲛⲧⲉⲣⲉϥⲛⲟⲩ ⲇⲉ ⲉⲁⲡⲟⲇⲏⲙⲉⲓ ⲁⲛⲟⲛ ⲇⲉ ⲛⲉⲛⲑⲫⲟ ⲙ̅ⲙⲟϥ ⲉⲃⲟⲗ. ⲛⲧⲉⲣⲉⲛⲡⲱϩ ⲇⲉ ⲉⲧⲡⲩⲗⲏ ⲁⲩⲥϩⲓⲙⲉ ⲱϣ ⲉⲃⲟⲗ ϩⲓⲡⲁϩⲟⲩ ⲙⲙⲟϥ ⲉⲥϫⲱ ⲙⲙⲟⲥ ϫⲉⲁϩⲉⲣⲁⲧⲕ̅ ⲱ ⲡⲣⲱⲙⲉ ⲙⲡⲛⲟⲩⲧⲉ ϫⲉⲟⲩⲛⲟⲩⲇⲁⲓⲙⲱⲛ ⲉⲛⲱⲭⲗⲉⲓ ⲛ̅ⲧⲁϣⲉⲉⲣⲉ ⲉⲙⲁⲧⲉ ⲉϥϩⲓⲧⲉ ⲙⲙⲟⲥ. ⲁϩⲉ ⲉⲣⲟⲓ ϯⲥⲟⲡⲥ̅ ⲙⲙⲟⲕ ⲙ̅ⲡⲣⲧⲣⲁⲕⲓⲛⲇⲩⲛⲉⲩⲉ ϩⲱⲥ ⲉⲓⲡⲏⲧ ⲛ̅ⲥⲱⲕ. ⲛⲁⲓ ⲇⲉ ⲛⲧⲉⲣⲉϥⲥⲱⲧⲙ ⲉⲣⲟⲟⲩ ⲛϭⲓⲡϩⲗⲗⲟ ⲁϥⲁϩⲉⲣⲁⲧϥ̅ ⲛⲧⲉⲣⲉⲥⲡⲱϩ ⲇⲉ ⲉⲣⲟϥ ⲛ̅ϭⲓ ϥ.ⲫ̀ ⲧⲉⲥϩⲓⲙ̅ⲉ ⲛⲧⲉⲩⲛⲟⲩ ⲁⲧϣⲉⲉⲣⲉ ϣⲏⲙ ϩⲉ ϩⲁⲣⲁⲧϥ̅. ⲁⲛⲧⲱⲛⲓⲟⲥ ⲇⲉ ⲛ̅ⲧⲉⲣⲉϥϣⲗⲏⲗ ⲁϥⲧⲁⲩⲟ ⲙⲡⲣⲁⲛ ⲙⲡⲉⲭⲥ ⲁⲥⲧⲱⲟⲩⲛ ⲛ̅ϭⲓⲧⲉⲥϣⲉⲉⲣⲉ ⲉⲥⲧⲟⲩϫⲏⲩ ⲁⲩⲱ ⲁⲧⲉⲥⲙⲁⲁⲩ ⲥⲙⲟⲩ ⲉⲡⲛⲟⲩⲧⲉ ⲙⲛⲡⲉϥⲡⲉⲧⲟⲩⲁⲁⲃ ⲁⲛⲧⲱⲛⲓⲟⲥ. ⲛⲧⲟϥ ⲇⲉ ⲛⲉϥⲣⲁϣⲉ ⲉϥⲛⲁⲃⲱⲕ ⲉⲡⲧⲟⲟⲩ ⲛⲑⲉ ⲛⲛⲟⲩⲁ ⲉϥⲛⲁⲃⲱⲕ ⲉⲡⲉϥⲏⲓ.

72. ⲁⲩⲱ ⲟⲩϣⲡⲏⲣⲉⲡⲉ ϫⲉⲛϥⲛⲟⲓ ⲁⲛ ⲛ̅ⲥϩⲁⲓ ⲉⲟⲩⲣⲙⲛ̅ϩⲏⲧⲡⲉ ⲉϥⲛⲟⲓ ⲛⲧⲙⲛⲧⲥⲁⲃⲉ. ⲁⲫⲓⲗⲟⲥⲟⲫⲟⲥ ⲥⲛⲁⲩ ⲉⲓ ϣⲁⲣⲟϥ ⲛⲛⲟⲩϩⲟⲟⲩ ⲉϩⲉⲛϩⲉⲗⲗⲏⲛⲛⲉ ⲉⲩⲟⲩⲱϣ ⲉⲡⲓⲣⲁⲍⲉ ⲛⲛⲁⲛⲧⲱⲛⲓⲟⲥ. ⲛⲉϥϩⲓⲡⲧⲟⲟⲩ ⲇⲉⲡⲉ ⲉⲧϩⲓⲃⲟⲗ. ⲛⲧⲟϥ ⲇⲉ ⲁϥⲥⲟⲩⲛ̅ⲛⲣⲱⲙⲉ ϩⲙⲡⲉⲩϩⲟ ⲛⲧⲉⲣⲉϥⲉⲓ ⲉⲃⲟⲗ ϣⲁⲣⲟⲟⲩ ⲡⲉϫⲁϥ ⲛⲁⲩ ϩⲓⲧⲛⲟⲩϩⲉⲣⲙⲉⲛⲉⲩⲧⲏⲥ ⲉϥⲟⲩⲱϩⲙ̅ ⲛⲁⲩ ϫⲉⲉⲧⲃⲉⲟⲩ ⲁⲧⲉⲧⲛⲥⲕⲩⲗⲗⲉⲓ ⲙⲙⲱⲧⲛ ⲱ ⲛⲉⲫⲓⲗⲟⲥⲟⲫⲟⲥ ⲁⲧⲉⲧⲛ̅ⲉⲓ ϣⲁⲟⲩⲣⲱⲙⲉ ⲛⲥⲟϭ. ⲛⲧⲟⲟⲩ ⲇⲉ ⲡⲉϫⲁⲩ ϫⲉⲛⲧⲅⲟⲩⲥⲟϭ ⲁⲛ ⲁⲗⲗⲁ ⲛⲧⲅⲟⲩⲥⲁⲃⲉ ⲉⲡⲉϩⲟⲩⲟ. ⲡⲉϫⲁϥ ⲛⲁⲩ ϫⲉⲉϣϫⲉ ⲛⲧⲁⲧⲉⲧⲛ̅ⲉⲓ ϣⲁⲟⲩⲥⲟϭ ⲉⲓⲉ ⲡⲉⲧⲛ̅ϩⲓⲥⲉ ϣⲟⲩⲉⲓⲧ. ⲉϣϫⲉ ⲧⲉⲧⲛ̅ⲙⲉⲉⲩⲉ ⲉⲣⲟⲓ ϫⲉⲁⲛⲅⲟⲩⲥⲁⲃⲉ ϣⲱⲡⲉ ⲛ̅ⲧⲁϩⲉ ϩⲱ. ϣϣⲉ ⲅⲁⲣ ⲉⲧⲛ̅ⲧⲱⲛⲉⲛ ⲉⲛⲉⲧⲛⲁⲛⲟⲩⲟⲩ ⲁⲩⲱ ⲛ̅ⲧⲛ̅ⲕⲱϩ ⲉⲣⲟⲟⲩ. ⲉⲛⲉⲁⲛⲟⲕ ⲅⲁⲣ ⲡⲉⲛⲧⲁⲓⲉⲓ ϣⲁⲣⲱⲧⲛ̅ ⲉⲛⲉⲓⲛⲁⲕⲱϩ ⲉⲣⲱⲧⲛ̅.ⲉϣϫⲉ ⲛⲧⲱⲧⲛ ⲁⲧⲉⲧⲛⲉⲓ ϣⲁⲣⲟⲓ ϣⲱⲡⲉ ⲛ̅ⲧⲁϩⲉ ⲉⲁⲛⲅ̅ⲟⲩⲭⲣⲓⲥϯⲁⲛⲟⲥ ⲅⲁⲣ.ⲛⲧⲟⲟⲩ ⲇⲉ ⲁⲩⲣ̅ϣⲡⲏⲣⲉ ⲁⲩⲃⲱⲕ ⲛⲁⲩ. ⲉⲛⲉⲁⲩⲛⲁⲩ ⲅⲁⲣ ⲉⲛⲕⲉⲇⲁⲓⲙⲱⲛⲓⲟⲛ ⲉⲩⲣ̅ϩⲟⲧⲉ ϩⲏⲧϥ ⲛⲛⲁⲛⲧⲱⲛⲓⲟⲥ.

73. ϩⲉⲛⲕⲟⲟⲩⲉ ⲟⲛ ⲛⲧⲉⲓⲙⲓⲛⲉ ⲁⲩⲉⲓ ϣⲁⲣⲟϥ ⲉⲡⲧⲟⲟⲩ ⲉⲧϩⲓ ϥ.ⲣ̀ ⲃⲟⲗ ⲉⲁⲩⲙⲉⲉⲩⲉ ϫⲉⲉⲩⲛⲁⲣ̅ϩⲁⲗ ⲙⲙⲟϥ ϫⲉⲛϥ̅ⲥⲟⲟⲩⲛ ⲁⲛ ⲉⲥϩⲁⲓ. ⲡⲉϫⲁϥ ⲛⲁⲩ ⲛ̅ϭⲓⲁⲛⲧⲱⲛⲓⲟⲥ ϫⲉⲛⲧⲱⲧⲛ̅ ⲉⲧⲉⲧⲛ̅ϫⲱ ⲙⲙⲟⲥ ϫⲉⲁϣ ⲡⲉⲧⲟ ⲛϣⲟⲣ̅ⲡ ⲡϩⲏⲧⲡⲉ ϫⲓⲛ ⲙⲙⲟⲛ ⲛⲉⲥϩⲁⲓⲛⲉ. ⲁϣ ⲙⲙⲟⲟⲩ ⲡⲉⲧⲟ ⲛⲗⲟⲓϭⲉ ⲉⲛⲉⲩⲉⲣⲏⲩ ⲡϩⲏⲧ ⲡⲉⲧⲟ ⲛⲁⲓϯⲟⲥ ⲛⲛⲉⲥϩⲁⲓ ϫⲓⲛ ⲙⲙⲟⲛ ⲛⲉⲥϩⲁⲓ ⲛⲉⲧⲟ ⲛⲁⲓϯⲟⲥ ⲙⲡϩⲏⲧ. ⲁⲩⲱ ⲛⲧⲁⲩⲥⲉⲛⲧⲁϣ ⲙⲙⲟⲟⲩ ⲉⲧⲃⲉⲁϣ. ⲛⲧⲟⲟⲩ ⲇⲉ ⲡⲉϫⲁⲩ ϫⲉⲡϣⲟⲣⲡⲡⲉ ⲡϩⲏⲧ ⲁⲩⲱ ⲡϩⲏⲧⲡⲉ ⲡⲣⲉϥϭⲓⲛⲉ ⲛⲛⲉⲥϩⲁⲓ. ⲡⲉϫⲉⲁⲛⲧⲱⲛⲓⲟⲥ ⲛⲁⲩ ϫⲉⲡⲉⲧⲉⲣⲉⲡⲉϥϩⲏⲧ ⲧⲟⲩϫⲏⲩ ⲛⲁϥ ⲛⲟⲩⲁⲛⲁⲅⲕⲁⲓⲟⲛⲡⲉ ⲡⲉⲥϩⲁⲓ ⲁⲛ ⲙⲡⲉⲧⲙⲙⲁⲩ. ⲡⲉⲓϣⲁϫⲉ ⲇⲉ ⲟⲛ ⲁⲛⲉⲧⲙⲙⲁⲩ ⲙⲛⲛⲛⲕⲟⲟⲩⲉ ⲣ̅ϣⲡⲏⲣⲉ ⲙⲙⲟϥ. ⲁⲩⲃⲱⲕ ⲉⲩⲣϣⲡⲏⲣⲉ ϫⲉⲁⲩⲛⲁⲩ ⲉⲡⲉⲓⲥⲟⲟⲩⲛ ϩⲙⲡⲉⲓϩⲩⲇⲓⲱⲧⲏⲥ ⲛⲧⲉⲓⲙⲓⲛⲉ. ⲕⲁⲓⲅⲁⲣ ⲙⲛ̅ⲧⲁϥ ⲙⲙⲁⲩ ⲙ̅ⲡⲉϥⲥⲙⲟⲧ ⲉϥⲟ ⲛⲁⲅⲣⲓⲟⲥ ϩⲱⲥ ⲉϥϣⲟⲟⲡ ϩⲛⲛⲉⲧⲟⲩⲉⲓⲏ ⲉⲁϥⲣ̅ϩⲗⲗⲟ ϩⲛⲛⲙⲙⲁ ⲉⲧⲙⲙⲁⲩ. ⲁⲗⲗⲁ ⲛⲉⲩⲛ̅ⲧⲁϥ ⲙ̅ⲙⲁⲩ ⲛⲛⲟⲩⲛⲟϭ ⲛ̅ⲭⲁⲣⲓⲥ ⲉϥϣⲟⲟⲡ ⲛⲑⲉ ⲛⲛⲟⲩⲣⲙⲛⲡⲟⲗⲓⲥ ⲉⲩⲛ̅ⲧⲁϥ ⲙⲙⲁⲩ ⲙ̅ⲡⲉϥϣⲁϫⲉ ⲉϥϫⲟⲕⲣ̅ ⲛϩⲙⲟⲩ ⲛⲧⲉⲧⲙⲛⲧⲛⲟⲩⲧⲉ. ϩⲱⲥⲧⲉ ⲛ̅ⲧⲉⲧⲙ̅ⲗⲁⲁⲩ ⲫⲑⲟⲛⲉⲓ ⲉⲣⲟϥ. ⲛⲉⲩⲣⲁϣⲉ ⲉⲡⲉϩⲟⲩⲟ ⲛϭⲓⲟⲩⲟⲛ ⲛⲓⲙ ⲉⲧⲃⲏⲕ ⲉϩⲟⲩⲛ ϣⲁⲣⲟϥ.

74. ⲁϩⲉⲛⲕⲟⲟⲩⲉ ⲉⲓ ⲟⲛ ϣⲁⲣⲟϥ ⲛⲛⲟⲩⲥⲟⲡ ⲙⲛⲛⲥⲁⲛⲁⲓ. ⲛⲧⲟⲟⲩ ⲙⲛⲛⲉⲧⲟⲩⲙⲉⲉⲩⲉ ⲉⲣⲟⲟⲩ ϫⲉϩⲉⲛⲥⲟⲫⲟⲥⲛⲉ ⲛⲛⲁϩⲣⲛⲛⲛϩⲉⲗⲗⲏⲛ ⲉⲩϫⲛⲟⲩ ⲙⲙⲟϥ ⲁⲩⲱ ⲉⲩϣⲓⲛⲉ ⲉⲃⲟⲗ ϩⲓⲧⲟⲟⲧϥ̅ ⲉⲧⲃⲉⲧⲡⲓⲥⲧⲓⲥ ⲉⲧϣⲟⲟⲡ ⲛⲁⲛ ⲉϩⲟⲩⲛ ⲉⲡⲉⲭⲥ ⲓⲥ ⲡϫⲟⲉⲓⲥ ⲁⲩⲱ ⲁⲩⲧⲟⲗⲟⲙⲁ ⲉϣⲁϫⲉ ⲉⲧⲃⲉⲡⲧⲁϣⲉⲟⲉⲓϣ ⲙ̅ ϥ.ⲫ̀ ⲡⲉⲥⲧⲁⲩⲣⲟⲥ ⲙⲡⲉⲭⲥ ⲁⲩⲱ ⲁⲩϯⲧⲱⲛ ⲛⲙⲙⲁϥ ⲉⲩⲟⲩⲱϣ ⲛⲥⲱⲃⲉ ⲛⲥⲱϥ. ⲁϥϭⲱ ⲇⲉ ⲛⲛⲟⲩⲕⲟⲩⲓ ⲛϭⲓⲁⲛⲧⲱⲛⲓⲟⲥ. ⲛϣⲟⲣⲡ ⲙⲉⲛ ⲁϥⲙ̅ⲕⲁϩ ⲛϩⲏⲧ ⲉⲧⲃⲉⲧⲉⲩⲙⲛⲧⲁⲧⲥⲟⲟⲩⲛ. ⲙⲛⲛ̅ⲥⲱⲥ ⲁϥϣⲁϫⲉ ⲛⲙⲙⲁⲩ ϩⲓⲧⲛ̅ⲟⲩϩⲉⲣⲙⲉⲛⲉⲩⲧⲏⲥ ϫⲉⲟⲩ ⲡⲉⲧⲥⲟⲧⲡ ⲉϩⲟⲙⲟⲗⲟⲅⲉⲓⲡⲉ ⲛⲛⲟⲩⲥⲧⲁⲩⲣⲟⲥ ϫⲓⲛ ⲙⲙⲟⲛ ⲉⲧⲣⲉⲛⲧⲱϭⲉⲡⲉ ⲛϩⲉⲛⲙⲛⲧⲛⲟⲉⲓⲕ ⲙⲛϩⲉⲛⲙⲛⲧⲣⲉϥⲥⲉⲉϥϣⲏⲣⲉ ϣⲏⲙ ⲉⲛⲉⲧⲉⲧⲛⲙⲟⲩⲧⲉ ⲉⲣⲟⲟⲩ ϫⲉⲛⲟⲩⲧⲉ. ⲡⲉⲧⲛ̅ϫⲱ ⲅⲁⲣ ⲙⲙⲟϥ ⲧⲛ̅ϩⲟⲙⲟⲗⲟⲅⲉⲓ ⲙⲙⲟϥ ⲉⲩⲙⲁⲉⲓⲛⲡⲉ ⲛⲛⲟⲩⲙⲛⲧϫⲱⲱⲣⲉⲡⲉ ⲁⲩⲱ ⲟⲩⲥⲓⲙⲓⲟⲛⲡⲉ ⲉⲧⲣⲉⲛⲕⲁⲧⲁⲫⲣⲟⲛⲉⲓ ⲙⲙⲟϥ . ⲛⲧⲱⲧⲛ̅ ⲇⲉ ⲛⲉⲧⲉⲧⲛϫⲱ ⲙⲙⲟⲟⲩ ϩⲉⲛⲡⲁⲑⲟⲥ ⲛⲧⲉⲡϫⲱϩⲙ̅ⲛⲉ. ⲙⲛⲛⲥⲱⲥ ⲟⲩ ⲡⲉⲧⲥⲟⲧⲡ̅ ⲉϫⲟⲟϥ ϫⲉⲙⲡⲉⲡⲗⲟⲅⲟⲥ ⲙⲡⲛⲟⲩⲧⲉ ⲥⲱⲣⲙ̅ ⲁⲗⲗⲁ ⲛⲧⲟϥ ⲉϥⲟ ⲛⲑⲉ ⲉⲧⲉϥϣⲟⲟⲡ ⲙⲙⲟⲥ ⲉⲁϥϫⲓ ⲛⲟⲩⲥⲱⲙⲁ ⲛⲣⲱⲙⲉ ϫⲉⲕⲁⲥ ⲉϥⲉⲣ̅ⲡⲡⲉⲧⲛⲁⲛⲟⲩϥ ⲛⲙⲙⲁⲛ ⲉⲁϥⲕⲟⲓⲛⲱⲛⲉⲓ ⲉⲡⲉϫⲡⲟ ⲛⲣⲱⲙⲉ ϫⲉⲕⲁⲥ ⲉϥⲉⲧⲣⲉⲛⲣⲱⲙⲉ ϣⲱⲡⲉ ⲛ̅ⲕⲟⲓⲛⲱⲛⲟⲥ ⲉⲧⲉⲫⲩⲥⲓⲥ ⲛⲧⲙⲛⲧⲛⲟⲩⲧⲉ ⲉⲧⲉⲓⲱⲣϩ̅ . ϫⲓⲛ ⲙⲙⲟⲛ ⲛ̅ⲧⲟϥ ⲟⲩⲡⲉⲧⲉϣϣⲉⲡⲉ ⲉⲧⲛ̅ⲧⲱⲛⲡⲛⲟⲩⲧⲉ ⲉϩⲉⲛⲧⲃ̅ⲛⲟⲟⲩⲉ ⲛⲛⲁⲗⲟⲕⲟⲛ ⲁⲩⲱ ⲉϣⲙϣⲉ ⲛⲁⲩ ϩⲱⲥ ⲛⲟⲩⲧⲉ ⲙⲛⲛ̅ϫⲁⲧϥⲉ ⲙⲛⲛϩⲓⲕⲱⲛ ⲛⲣⲱⲙⲉ. ⲛⲁⲓ ⲅⲁⲣ ⲛⲉⲧⲉⲧⲛϣⲙϣⲉ ⲛⲁⲩ. ⲁⲩⲱ ⲛⲧⲱⲧⲛ ⲛⲉⲥⲟⲫⲟⲥ ⲛⲛⲁϣ ⲛ̅ϩⲉ ⲧⲉⲧⲛⲛⲁⲉϣⲥⲱⲃⲉ. ⲛⲥⲱⲛ ϫⲉⲧⲛ̅ϫⲱ ⲙⲙⲟⲥ ϫⲉ ϥ..ⲣ ⲁⲡⲉⲭⲥ ⲟⲩⲱⲛϩ̅ ⲉⲃⲟⲗ ⲉϥⲟ ⲛⲣⲱⲙⲉ ϩⲟⲡⲟⲩ ⲇⲉ ⲉⲧⲉⲧⲛϫⲱ ⲙⲙⲟⲥ ϫⲉⲛⲧⲁⲧⲉⲫⲩⲭⲏ ⲉⲓ ⲉⲃⲟⲗ ϩⲓⲧⲙ̅ⲡⲛⲟⲩⲧⲉ ⲁⲩⲱ ⲧⲁⲓ ⲁⲥⲡⲗⲁⲛⲁ ⲁⲥϩⲉ ⲉⲡⲉⲥⲏⲧ ⲉⲃⲟⲗ ϩⲛⲧⲕⲏⲡⲉ ⲛⲧⲡⲉ ⲉⲡⲥⲱⲙⲁ. ϯⲡⲓⲑⲉϭⲉ ⲧⲉⲛⲟⲩ ⲉⲛⲉⲧⲛ̅ϫⲱ ⲙⲙⲟⲟⲩ ϫⲉⲛⲧⲁⲥⲉⲓ ⲉϩⲟⲩⲛ ⲉⲡⲣⲱⲙⲉ ⲙⲁⲩⲁⲁϥ ⲉⲛⲥ̅ⲡⲱⲱⲛⲉ ⲁⲛ ⲉϩⲟⲩⲛ ⲉⲛⲧⲃ̅ⲛⲟⲟⲩⲉ ⲙⲛⲛ̅ϫⲁⲧϥⲉ. ⲧⲡⲓⲥⲧⲓⲥ ⲅⲁⲣ ⲉⲥϫⲱ ⲙⲙⲟⲥ ϫⲉⲛⲧⲁⲡⲉⲭⲥ ⲉⲓ ⲉⲧⲃⲉⲡⲟⲩϫⲁⲓ ⲛⲛⲣⲱⲙⲉ. ⲛⲧⲱⲧⲛ̅ ⲇⲉ ⲉⲧⲉⲧⲛ̅ϫⲱ ⲙⲙⲟⲥ ⲉⲧⲉⲧⲛ̅ⲉⲓⲛⲉ ⲉϩⲟⲩⲛ ⲛϩⲉⲛⲡⲗⲁⲛⲏ ⲛⲧⲉⲯⲩⲭⲏ ϩⲱⲥ ⲉⲩⲁⲅⲉⲛⲏⲧⲟⲥⲧⲉ. ⲁⲛⲟⲛ ⲇⲉ ⲧⲛ̅ⲙⲉⲉⲩⲉ ϩⲙⲡⲉⲛϩⲏⲧ ⲉⲧϭⲟⲙ ⲛ̅ⲧⲉⲡⲣⲟⲛⲟⲓⲁ ϫⲉⲛⲟⲩⲁⲧϭⲟⲙ ⲁⲛ ⲛⲧⲙⲛⲧⲛⲟⲩⲧⲉⲡⲉ ⲡⲁⲓ. ⲛⲧⲱⲧⲛ ⲇⲉ ⲉⲧⲉⲧⲛ̅ϫⲱ ⲙⲙⲟⲥ ⲛⲧⲉⲯⲩⲭⲏ ϫⲉⲧϩⲓⲕⲱⲛ ⲙⲡⲛⲟⲩⲧⲉⲧⲉ ⲉⲧⲉⲧⲛ̅ⲧⲱϭⲉ ⲉⲣⲟⲥ ⲛⲛⲟⲩϩⲉ ⲁⲩⲱ ⲧⲉⲧⲛϫⲱ ⲛϩⲙⲙⲉⲑⲟⲥ ⲉⲣⲟⲥ ϫⲉⲁⲥⲣⲓⲕⲉ ⲁⲩⲱ ⲧⲉⲧⲛ̅ⲉⲓⲛⲉ ⲉϩⲟⲩⲛ ⲉⲡⲛⲟⲩⲥ ϫⲉϣⲁϥⲣⲓⲕⲉ ϩⲱⲱϥ ⲉⲧⲃⲉⲧⲉⲯⲩⲭⲏ. ⲡⲉⲥⲙⲟⲧ ⲅⲁⲣ ⲉⲧⲉⲣⲉⲧϩⲓⲕⲱⲛ ⲟ ⲙⲙⲟϥ ⲧⲁⲛⲁⲅⲕⲏⲧⲉ ⲉⲧⲣⲉⲡⲁⲓ ϩⲱⲱϥ ⲟⲛ ϣⲱⲡⲉ ⲛⲧⲉⲓⲙⲓⲛⲉ ⲛⲑⲉ ⲙⲡⲉⲧⲉⲣⲉⲧϩⲓⲕⲱⲛ ϣⲟⲟⲡ ⲛⲁϥ. ⲉϣⲱⲡⲉ ⲇⲉ ⲉⲧⲉⲧⲛ̅ϣ̅ⲁⲛⲙⲉⲉⲩⲉ ⲉⲛⲁⲓ ⲉⲧⲃⲉⲡⲛⲟⲩⲥ ⲁⲣⲓⲡⲙⲉⲉⲩⲉ ϫⲉⲧⲉⲧⲛ̅ϫⲓⲟⲩⲁ ϩⲱⲱϥ ⲟⲛ ⲉϩⲟⲩⲛ ⲉⲡⲉⲓⲱⲧ ⲙⲡⲛⲟⲩⲥ.

75. ⲉⲧⲃⲉⲡⲉⲥⲧⲁⲩⲣⲟⲥ ⲇⲉ ⲟⲩ ⲡⲉⲧⲥⲟⲧⲡ̅ ⲉⲧⲣⲉⲧⲉⲧⲛϫⲟⲟϥ ϩⲩⲡⲟⲙⲓⲛⲉⲡⲉ ⲉⲡⲉⲥⲧⲁⲩⲣⲟⲥ ϩⲙⲡⲧⲣⲉⲩⲉⲓⲣⲉ ⲛⲧⲉⲩⲉ ϥ..ⲫ ⲡⲉⲓⲃⲟⲩⲗⲏ ⲛ̅ϭⲓⲛⲣⲱⲙⲉ ⲙ̅ⲡⲟⲛⲏⲣⲟⲥ ⲉⲧⲙⲙⲁⲩ ⲁⲩⲱ ⲉⲧⲙ̅ⲣ̅ϩⲟⲧⲉ ϩⲏⲧϥ̅ ⲛ̅ⲗⲁⲁⲩ ⲙⲙⲟⲩ ⲉⲩⲉⲓⲛⲉ ⲙⲙⲟϥ ⲉϫⲱϥ ⲛϭⲓⲛⲉⲧⲙ̅ⲙⲁⲩ ϫⲓⲛ ⲙⲙⲟⲛ ϩⲙⲡⲧⲣⲉⲧⲉⲧⲛ̅ϫⲱ ⲛϩⲉⲛⲙⲩⲑⲟⲥ ⲙⲛϩⲉⲛϣⲃⲱ ⲉⲧⲉⲧⲛ̅ⲉⲓⲛⲉ ⲉϩⲟⲩⲛ ⲛϩⲉⲛⲡⲗⲁⲛⲏ ⲛⲟⲩⲥⲓⲣⲉ ⲙⲛⲛⲏⲥⲉ ⲙⲛⲛⲉⲡⲉⲓⲃⲟⲗⲏ ⲛⲍⲏⲑ ⲙⲛ ⲡⲱⲧ ⲛⲕⲣⲟⲛⲟⲥ ⲁⲩⲱ ϫⲉⲁϥⲱⲙⲕ̅ ⲛⲛⲉϥϣⲏⲣⲉ ⲁⲩⲱ ϩⲛⲙⲙⲛⲧⲣⲉϥϩⲉⲧⲃ̅ⲉⲓⲱⲧ. ⲛⲁϣ ⲅⲁⲣ ⲛϩⲉ ⲧⲉⲛⲟⲩ ⲧⲉⲧⲛ̅ⲥⲱⲃⲉ ⲛⲥⲁⲡⲉⲥⲧⲁⲩⲣⲟⲥ ⲁⲩⲱ ⲛⲧⲉⲧⲛⲣ̅ϣⲡⲏⲣⲉ ⲁⲛ ⲙⲡⲉϥⲧⲱⲟⲩⲛ ⲉⲃⲟⲗ ϩⲛⲛⲉⲧⲙⲟⲟⲩⲧ. ⲛⲉⲛⲧⲁⲩϫⲱ ⲅⲁⲣ ⲙⲡⲁⲓ ⲛⲧⲟⲟⲩ ⲟⲛ ⲛⲉⲛⲧⲁⲩⲥϩⲁⲓ ⲙⲡⲉⲓⲕⲉⲟⲩⲁ. ⲏ ⲉⲧⲃⲉⲟⲩ ⲣⲱ ⲧⲉⲧⲛ̅ⲉⲓⲣⲉ ⲙⲡⲙⲉⲉⲩⲉ ⲙⲡⲉⲥⲧⲁⲩⲣⲟⲥ ⲧⲉⲧⲛ̅ⲕⲱ ⲛ̅ⲥⲱⲧⲛ ⲛⲛⲉⲧⲙⲟⲟⲩⲧ ⲛⲧⲁϥⲧⲟⲩⲛⲟⲥⲟⲩ ⲙⲛⲛⲃⲗ̅ⲗⲉ ⲛ̅ⲧⲁϥⲧⲣⲉⲩⲛⲁⲩ ⲉⲃⲟⲗ ⲙⲛⲛⲉⲧⲥⲏϭ ⲛⲧⲁϥⲧⲁⲗϭⲟⲟⲩ ⲙⲛⲛⲉⲧⲥⲟⲃϩ̅ ⲛⲧⲁϥⲧⲃ̅ⲃⲟⲟⲩ ⲁⲩⲱ ϫⲉⲁϥⲙⲟⲟϣⲉ ϩⲓϫⲛⲛⲙⲙⲟⲟⲩ ⲛⲑⲁⲗⲁⲥⲥⲁ ⲙⲛⲛⲙⲙⲁⲉⲓⲛ ⲙⲛⲛⲕⲉϣⲡⲏⲣⲉ ⲛⲧⲁϥⲁⲁⲩ ⲛⲁⲓ ⲉⲧⲉⲙⲛϣϭⲟⲙ ⲛⲣⲱⲙⲉ ⲁⲁⲩ ⲁⲗⲗⲁ ⲛⲁⲓ ⲛⲉⲧⲟⲩⲱⲛϩ̅ ⲉⲃⲟⲗ ⲙⲡⲉⲭⲥ ϫⲉⲟⲩⲛⲟⲩⲧⲉⲡⲉ. ⲧⲉⲧⲛⲟⲩⲟⲛϩ̅ϭⲉ ⲉⲃⲟⲗ ϫⲉⲧⲉⲧⲛⲉⲓⲣⲉ ⲛⲛⲟⲩⲛⲟϭ ⲛϫⲓⲛϭⲟⲛⲥ̅ ⲉⲙⲁⲧⲉ ⲉⲛⲧⲉⲧⲛ̅ⲱϣ ⲁⲛ ⲛⲛⲉⲅⲣⲁⲫⲏ ϩⲙⲡⲉⲧⲛ̅ϩⲏⲧ ⲧⲏⲣϥ̅ ⲁⲩⲱ ϩⲛⲟⲩⲥⲟⲟⲩⲧⲛ̅ . ⲁⲗⲗⲁ ⲛ̅ⲧⲱⲧⲛ ⲙⲉⲛ ⲁϣⲟⲩ ϩⲛⲟⲩⲥⲟⲟⲩⲧⲛ̅ ⲛⲧⲉⲧⲛ̅ⲛⲁⲩ ϫⲉⲛⲉⲛⲧⲁϥⲁⲁⲩ ⲛϭⲓⲡⲉⲭⲥ ⲟⲩⲱⲛϩ̅ ⲙⲙⲟϥ ⲉⲃⲟⲗ ϫⲉⲟⲩⲛⲟⲩⲧⲉⲡⲉ ⲉⲁϥⲉⲓ ⲉⲧⲃⲉⲡⲟⲩϫⲁⲓ ⲛⲛ̅ⲣⲱⲙⲉ.

76. ⲛⲧⲱⲧⲛ ϩⲱⲱⲧ ϥ..ⲣ ⲧⲏⲩⲧⲛ̅ ⲁϫⲓⲛⲟⲩⲧⲛ ⲛⲁⲛ . ⲟⲩ ⲅⲁⲣ ⲡⲉⲧⲉⲧⲉⲧⲛ̅ⲛⲁϫⲟⲟϥ ⲉⲁⲧⲉⲧⲛ̅ϫⲓⲥⲃⲱ ⲉⲣⲟϥ ϩⲓⲧⲛⲛⲛⲧⲃ̅ⲛⲟⲟⲩⲉ ⲛⲛⲁⲗⲟⲅⲟⲛ ⲛⲥⲁϩⲛⲙⲛⲧⲁⲗⲟⲅⲟⲛ ⲙⲛⲟⲩⲙⲛⲧⲁⲅⲣⲓⲟⲥ. ⲉϣⲱⲡⲉ ⲇⲉ ⲕⲁⲧⲁⲑⲉ ⲉϯⲥⲱⲧⲙ ⲙⲙⲟⲥ ⲉⲧⲉⲧⲛⲟⲩⲱϣ ⲉϫⲟⲟⲥ ϫⲛⲉⲧⲏⲩⲧⲛ ⲉⲛⲉⲛⲧⲁⲩϫⲟⲟⲩ ϩⲛⲟⲩⲡⲁⲣⲁⲃⲟⲗⲏ ⲁⲩⲱ ⲧⲉⲧⲛⲛⲁⲗⲏⲣⲟⲅⲟⲣⲉⲓ ⲙⲙⲟⲟⲩ ⲛⲧⲉⲧⲛϫⲟⲟⲩ ϩⲛⲕⲉⲥⲙⲟⲧ. ⲧϣⲉⲉⲣⲉ ϣⲏⲙ ⲙⲉⲛ ⲛⲧⲁⲩⲧⲟⲣⲡⲥ̅ ⲧⲉⲧⲛ̅ⲉⲓⲣⲉ ⲙⲙⲟⲥ ⲛⲧⲩⲡⲟⲥ ⲙⲡⲕⲁϩ ⲁⲩⲱ ⲧⲙⲛⲧϭⲁⲗⲉ ⲛⲛⲉⲫⲩⲥⲧⲟⲥ ⲉⲧⲉⲧⲛⲉⲓⲛⲉ ⲙⲙⲟⲥ ⲉϩⲣⲁⲓ ⲉϫⲙ̅ⲡⲕⲱϩⲧ̅ ⲁⲩⲱ ϩⲏⲣⲁ ⲉϫⲙ̅ⲡ̅ⲁⲏⲣ ⲁⲡⲟⲗⲗⲱⲛ ⲉϫⲙ̅ⲡⲣⲏ ⲁⲣⲧⲉⲙⲓⲥ ⲉϫⲙⲡⲟⲟϩ ⲡⲟⲥⲓⲧⲱⲛ ⲉϫⲛ̅ⲑⲁⲗⲁⲥⲥⲁ. ϩⲙⲡⲁⲓ ⲅⲁⲣ ⲟⲛ ⲉⲧⲉⲧⲛ̅ϣⲙ̅ϣⲉ ⲁⲛ ⲙⲡⲛⲟⲩⲧⲉ ⲁⲗⲗⲁ ⲉⲧⲉⲧⲛ̅ϣⲙ̅ϣⲉ ⲙⲡⲥⲱⲛⲧ ⲡⲁⲣⲁⲡⲛⲟⲩⲧⲉ ⲡⲁⲓ ⲛⲧⲁϥⲥⲛ̅ⲧⲉⲛⲕⲁ ⲛⲓⲙ. ⲉϣϫⲉ ⲛⲧⲁⲧⲉⲧⲛⲥⲙⲓⲛⲉ ⲅⲁⲣ ⲛⲛⲁⲓ ⲛⲧⲉⲓϩⲉ ϫⲉⲛⲁⲛⲟⲩⲡⲥⲱⲛⲧ̅ ⲁⲗⲗⲁ ⲡⲉⲧⲉϣϣⲉ ⲉⲣⲱⲧⲛ̅ⲡⲉ ⲉⲣ̅ϣⲡⲏⲣⲉ ⲙⲙⲟϥ ⲙⲙⲁⲧⲉ ⲁⲩⲱ ⲉⲧⲙⲉⲓⲣⲉ ⲙⲡⲥⲱⲛⲧ ⲛⲛⲛⲟⲩⲧⲉ ⲉⲟⲩⲱϣⲧ̅ ⲛⲁϥ ϫⲉⲕⲁⲥ ⲛⲛⲉⲧⲛϯ ⲙⲡⲧⲁⲉⲓⲟ ⲙⲡⲣⲉϥⲥⲱⲛⲧ ⲛⲛ̅ⲧⲁϥⲥⲟⲛⲧⲟⲩ. ⲉϣϫⲉ ⲛⲧⲉⲓϩⲉ ⲅⲁⲣ ⲁⲛⲧⲉ ⲉⲓⲉ ϣϣⲉ ⲉⲣⲱⲧⲛ̅ ⲉϥⲓⲡⲧⲁⲉⲓⲟ ⲛⲛⲟⲩⲁⲣⲭⲓⲇⲉⲕⲧⲟⲛ ⲛⲧⲉⲧⲛⲉⲓⲛⲉ ⲙⲙⲟϥ ⲉϫⲙⲡⲏⲓ ⲙⲡⲉⲛⲧⲁϥⲕⲟⲧϥ ⲏ ⲙⲙⲟⲛ ⲡⲧⲁⲉⲓⲟ ⲛⲛⲟⲩⲥⲧⲣⲁⲧⲏⲅⲟⲥ ⲛⲧⲉⲧⲛ̅ⲧⲁⲁϥ ⲙⲡⲉϥⲙⲁⲧⲟⲓ. ⲟⲩϭⲉ ⲧⲉⲛⲟⲩ ⲡⲉⲧⲛ̅ⲛⲁϫⲟⲟϥ ⲛⲛⲁϩⲣⲛ̅ⲛⲁⲓ ϫⲉⲕⲁⲥ ⲉⲛⲉⲉⲓⲙⲉ ϫⲉⲙⲛⲧⲉⲡⲉⲥⲧⲁⲩⲣⲟⲥ ⲗⲁⲁⲩ ⲛ̅ϩⲱⲃ ⲙⲙⲁⲩ ⲉϥⲙ̅ⲡ ϥ..ⲫ ϣⲁ ⲛ̅ⲥⲱⲃⲉ ⲛ̅ⲥⲱϥ.

77. ⲛⲉⲧⲙⲙⲁⲩ ⲇⲉ ⲁⲩⲁⲡⲟⲣⲉⲓ ⲉⲩϭⲱϣⲧ ⲉⲡⲉⲓⲥⲁ ⲙⲛⲡⲁⲓ. ⲁϥⲥⲱⲃⲉⲇⲉ ⲛϭⲓⲁⲛⲧⲱⲛⲓⲟⲥ ⲡⲉϫⲁϥ ⲛⲁⲩ ϩⲓⲧⲙ̅ⲡϩⲉⲣⲙⲉⲛⲉⲩⲧⲏⲥ ϫⲉⲛⲁⲓ ⲙⲉⲛ ⲟⲩⲉⲛⲧⲁⲩ ⲙⲙⲁⲩ ⲙⲡⲉⲩϫⲡⲓⲟ ⲉϥⲟⲩⲟⲛϩ̅ ⲉⲃⲟⲗ ϩⲓⲧⲛ̅ⲟⲩⲟⲛ ⲛⲓⲙ. ⲉⲡⲉⲓⲇⲏ ⲛⲧⲱⲧⲛ ⲛ̅ϩⲟⲩⲟ ⲧⲉⲧⲛ̅ⲑⲁⲣⲉⲓ ⲛϩⲉⲛϣⲁϫⲉ ⲉⲩⲛ̅ⲁⲡⲟⲇⲏⲝⲓⲥ ⲛ̅ϩⲏⲧⲟⲩ ⲁⲩⲱ ⲉⲩⲛ̅ⲧⲏⲧⲛ ⲙⲙⲁⲩ ⲛⲧⲉⲓⲧⲉⲭⲛⲏ ⲧⲉⲧⲛⲟⲩⲱϣ ϫⲉⲕⲁⲥ ⲁⲛⲟⲛ ϩⲱⲱⲛ ⲛⲛϣⲙϣⲉ ⲙⲡⲛⲟⲩⲧⲉ ⲁϫⲛ̅ⲁⲡⲟⲇⲏⲝⲓⲥ ⲙⲡϣⲁϫⲉ ⲛⲧⲱⲧⲛϭⲉ ϫⲱ ⲛⲛⲉϩⲃⲏⲩⲉ ⲉⲣⲟⲛ ⲛϣⲟⲣⲡ ϫⲉⲛⲁϣ ⲛ̅ϩⲉ ⲡⲥⲟⲟⲩⲛ ⲙⲡⲛⲟⲩⲧⲉ ⲛⲁⲟⲩⲱⲛϩ̅ ⲉⲃⲟⲗ ⲛϩⲟⲩⲟ ⲁⲩⲱ ⲥⲉⲛⲁⲥⲟⲩⲱⲛϥ̅ ⲉⲃⲟⲗ ϩⲛⲛⲉⲩⲁⲡⲟⲇⲏⲝⲓⲥ ϫⲉⲛⲟ̀ⲩⲉ̀ⲃⲟⲗ ϩⲓⲧⲛⲟⲩⲉⲛⲉⲣⲅⲓⲁ ⲙⲡⲓⲥⲧⲓⲥ. ⲁⲩⲱ ⲁϣ ⲧⲉⲧⲟ ⲛⲛⲟϭ ⲧⲡⲓⲥⲧⲓⲥⲧⲉ ϩⲓⲧⲛ̅ⲟⲩⲉⲛⲉⲣⲅⲓⲁ ϫⲓⲛ ⲙⲙⲟⲛ ⲧⲁⲡⲟⲇⲏⲝⲓⲥⲧⲉ ϩⲓⲧⲛ̅ϩⲉⲛϣⲁϫⲉ. ⲁⲩⲟⲩⲱϣⲃ̅ ⲛ̅ϭⲓⲛⲉⲧⲙ̅ⲙⲁⲩ ϫⲉⲧⲡⲓⲥⲧⲓⲥ ϩⲓⲧⲛ̅ⲧⲉⲛⲉⲣⲅⲓⲁ ⲧⲉⲧⲛⲟϭ ⲁⲩⲱ ⲡⲁⲓⲡⲉ ⲡⲥⲟⲟⲩⲛ ⲙⲙⲉ ⲉⲧⲟⲣϫ. ⲁϥⲟⲩⲱϣⲃ ⲛ̅ϭⲓⲁⲛⲧⲱⲛⲓⲟⲥ ϫⲉⲕⲁⲗⲱⲥ ⲁⲧⲉⲧⲛϫⲟⲟⲥ ⲛⲧⲉⲓϩⲉ. ⲧⲡⲓⲥⲧⲓⲥ ⲅⲁⲣ ⲉϣⲁⲥϣⲱⲡⲉ ⲉⲃⲟⲗ ϩⲓⲧⲛⲧⲇⲓⲁⲑⲏⲥⲓⲥ ⲛ̅ⲧⲉⲯⲩⲭⲏ ϩⲱⲥⲧⲉϭⲉ ⲛⲉⲧⲉⲟⲩⲛⲧⲁⲩ ⲙⲙⲁⲩ ⲛⲧⲉⲛⲉⲣⲅⲓⲁ ⲛⲧⲡⲓⲥⲧⲓⲥ ⲛⲛⲟⲩⲁⲛⲁⲅⲕⲁⲓⲟⲛ ⲁⲛⲧⲉ ⲛⲛⲉⲧⲙⲙⲁⲩ ⲏ ⲙⲉϣⲁⲕ ⲣⲱ ⲟⲩϩⲟⲩⲟⲧⲉ ⲧⲁⲡⲟⲇⲏⲝⲓⲥ ⲛⲛ̅ϣⲁϫⲉ. ⲕⲁⲓⲅⲁⲣ ⲡⲉⲧⲛⲛⲟⲓ ⲙⲙⲟϥ ϩⲓⲧⲛⲧⲡⲓⲥⲧⲓⲥ ⲡⲁⲓ ⲛ̅ⲧⲱⲧⲛ ⲉⲧⲉⲧⲛ̅ ϥ..ⲣ ⲟⲩⲱϣ ⲉⲧⲁⲙⲓⲟϥ ϩⲓⲧⲛ̅ϩⲉⲛϣⲁϫⲉ. ⲙⲉϣⲁⲕ ⲣⲱ ⲙⲛϣϭⲟⲙ ⲙⲙⲱⲧⲛ ⲉⲛⲟⲓ ⲛⲛⲉⲧⲛϫⲱ ⲙⲙⲟⲟⲩ. ϩⲱⲥⲧⲉ ⲥⲥⲟⲧⲡ̅ ⲁⲩⲱ ⲥⲧⲁϫⲣⲏⲩ ⲛϩⲟⲩⲟ ⲛϭⲓⲧⲉⲛⲉⲣⲅⲓⲁ ϩⲓⲧⲛ̅ⲧⲡⲓⲥⲧⲓⲥ ⲉϩⲟⲩⲉ ⲉⲛⲉⲧⲛϣⲁϫⲉ ⲛⲥⲟⲫⲟⲥ ⲉⲧⲉⲧⲛ̅ⲥⲩⲛⲍⲏⲧⲉⲓ ⲛϩⲏⲧⲟⲩ.

78. ⲁⲛⲟⲛ ⲇⲉ ⲛⲉⲭⲣⲓⲥϯⲁⲛⲟⲥ ⲛⲉⲩⲛⲧⲁⲛ ⲙⲙⲁⲩ ⲁⲛ ⲛⲙⲙⲩⲥⲧⲏⲣⲓⲟⲛ̅ ϩⲛⲟⲩⲥⲟⲫⲓⲁ ⲛϣⲁϫⲉ ⲛⲧⲉⲛⲉϩⲉⲗⲗⲏⲛ ⲁⲗⲗⲁ ϩⲛⲟⲩϭⲟⲙ ⲙⲡⲓⲥⲧⲓⲥ ⲉⲩϯ ⲙⲙⲟⲥ ⲛⲁⲛ ⲉⲃⲟⲗ ϩⲓⲧⲙⲡⲉⲭⲥ. ϫⲉⲕⲁⲥ ⲇⲉ ⲉⲧⲉⲧⲛⲛⲁⲉⲓⲙⲉ ϫⲉⲟⲩⲙⲉⲡⲉ ⲡϣⲁϫⲉ ⲉⲓⲥϩⲏⲏⲧⲉ ⲧⲉⲛⲟⲩ ⲛ̅ⲧⲛ̅ⲥⲟⲟⲩⲛ ⲁⲛ ⲛ̅ⲥϩⲁⲓ ⲧⲛⲡⲓⲥⲧⲉⲩⲉ ⲉⲡⲛⲟⲩⲧⲉ ⲉⲁⲛⲥⲟⲩⲛ̅ⲧⲉϥⲡⲣⲟⲛⲟⲓⲁ ⲧⲁⲓ ⲉⲧϣⲟⲟⲡ ⲉϩⲟⲩⲛ ⲉⲡⲉϥⲧⲁⲙⲓⲟ. ⲁⲩⲱ ϫⲉⲉⲥⲉⲛⲉⲣⲅⲉⲓ ⲛϭⲓⲧⲛⲡⲓⲥⲧⲓⲥ ⲉⲓⲥϩⲏⲏⲧⲉ ⲧⲉⲛⲟⲩ ⲁⲛⲟⲛ ⲧⲛⲧⲁϫⲣⲏⲩ ⲉϫⲛⲧⲡⲓⲥⲧⲓⲥ ⲉϩⲟⲩⲛ ⲉⲡⲉⲭⲥ. ⲛⲧⲱⲧⲛ ⲇⲉ ϩⲛϩⲉⲛⲙⲓϣⲉ ⲛ̅ϣⲁϫⲉ ⲛ̅ⲥⲟⲫⲓⲁ ⲉⲧⲉⲧⲛϫⲓⲥⲉ ⲙⲙⲱⲧⲛ. ⲁⲩⲱ ⲛⲉⲫⲁⲛⲧⲁⲥⲓⲁ ⲙⲉⲛ ⲛⲛⲉⲧⲛⲉⲓⲇⲱⲗⲟⲛ ⲥⲉⲟⲩⲱⲥϥ̅ . ⲧⲛⲡⲓⲥⲧⲓⲥ ̅ ⲧⲉ ⲧⲟⲛ ⲛ ̅ : ⲥⲡⲟⲣϣ̅ ⲉⲃⲟⲗ ϩⲙⲙⲁ ⲛⲓⲙ. ⲛⲧⲱⲧⲛ ⲙⲉⲛ ⲉⲧⲉⲧⲛ̅ⲥⲩⲛⲍⲏⲧⲉⲓ ⲁⲩⲱ ⲉⲧⲉⲧⲛⲙⲓϣⲉ ϩⲛϩⲉⲛϣⲁϫⲉ ⲉⲩⲙⲉϩ ⲛⲕⲟⲧⲥ̅ ⲉⲛⲧⲉⲧⲛⲛⲁⲉϣⲡⲓⲑⲉ ⲙⲙⲟⲛ ⲁⲛ ⲉⲧⲣⲉⲛⲣ̅ϩⲉⲗⲗⲏⲛ. ⲁⲛⲟⲛ ⲇⲉ ⲉⲛϯⲥⲃⲱ ⲛⲧⲡⲓⲥⲧⲓⲥ ⲉϩⲟⲩⲛ ⲉⲡⲉⲭⲥ ⲧⲛⲕⲧⲟ ⲙⲙⲱⲧⲛ ⲉⲃⲟⲗ ϩⲛⲧⲉⲧⲛ̅ⲙⲛⲧⲣⲉϥϣⲙϣⲉⲉⲓⲇⲱⲗⲟⲛ ⲉⲧ ϥ..ⲫ ϫⲁϩⲙ̅ ⲉⲧⲣⲉⲟⲩⲟⲛ ⲛⲓⲙ ⲥⲟⲩⲛ̅ⲡⲉⲭⲥ ϫⲉⲟⲩⲛⲟⲩⲧⲉⲡⲉ ⲁⲩⲱ ⲟⲩϣⲏⲣⲉ ⲛⲛⲟⲩⲧⲉ. ⲛⲧⲱⲧⲛ ϩⲱⲧⲧⲏⲩⲧⲛ̅ ⲉϣⲁⲣⲉ ⲡⲉⲧⲛ̅ϣⲙ̅ϣⲉ ⲉⲧⲉⲧⲛ̅ⲉⲓⲣⲉ ⲙⲙⲟϥ ⲛⲛⲇⲁⲓⲙⲱⲛ ⲟⲩⲱⲛϩ̅ ⲉⲃⲟⲗ ϫⲉⲛϥ̅ⲧⲁⲓⲏⲩ ⲁⲛ. ⲁⲩⲱ ⲛ̅ⲧⲱⲧⲛ̅ ⲙⲉⲛ ϩⲣⲁⲓ ϩⲛⲛⲉⲧⲛⲥⲧⲓⲭⲟⲥ ⲏ ⲛⲉⲧⲛⲗⲉⲝⲓⲥ ⲉⲧⲛⲁⲛⲟⲩⲟⲩ ⲙⲛⲧⲉⲧⲛ̅ϭⲓⲛϣⲁϫⲉ ⲉⲧⲛⲉⲥⲱⲥ ⲛ̅ⲧⲉⲧⲛⲛⲁⲉϣϭⲙϭⲟⲙ ⲁⲛ ⲉϯϫⲣⲟⲡ ⲛ̅ⲧⲉⲥⲃⲱ ⲙ̅ⲡⲉⲭⲥ. ⲁⲛⲟⲛ ⲇⲉ ⲉⲛϫⲱ ⲙⲙⲁⲧⲉ ⲙⲡⲣⲁⲛ ⲙ̅ⲡⲉⲭⲥ ⲡⲉⲛⲧⲁⲩⲥⲧⲁⲩⲣⲟⲩ ⲙⲙⲟϥ ⲧⲛ̅ⲡⲏⲧ ⲛⲥⲁⲛⲇⲁⲓⲙⲱⲛ ⲁⲩⲱ ⲉⲛⲛⲟⲩϫⲉ ⲙⲙⲟⲟⲩ ⲉⲃⲟⲗ ϩⲙⲡⲁⲓ. ⲁⲩⲱ ϩⲙⲡⲙⲁ ⲉⲧⲉⲣⲉⲡⲙⲁⲉⲓⲛ ⲙⲡⲉⲥⲧⲁⲩⲣⲟⲥ ϣⲟⲟⲡ ⲛϩⲏⲧϥ ϣⲁⲣⲉⲧⲙⲁⲅⲓⲁ ⲣⲁⲧϭⲟⲙ ⲧⲙⲛⲧⲣⲉϥⲣⲡⲁϩⲣⲉ ⲇⲉ ⲛⲥⲉⲛⲉⲣⲅⲉⲓ ⲁⲛ.

79. ⲁϫⲓⲥϭⲉ ⲛⲁⲛ ϫⲉⲉⲩⲧⲱⲛ ⲧⲉⲛⲟⲩ ⲛⲉⲧⲛ̅ⲙⲁⲅⲓⲁ. ⲉⲩⲧⲱⲛ ⲛⲛ̅ⲣⲉϥⲙⲟⲩⲧⲉ ⲛ̅ⲛⲣⲙⲛⲕⲏⲙⲉ. ⲉⲩⲧⲱⲛ ⲛⲉⲫⲁⲛⲧⲁⲥⲓⲁ ⲛⲛⲣⲙⲛⲕⲏⲙⲉ ⲉⲩⲣ̅ϩⲓⲕ ⲛϩⲏⲧⲟⲩ. ⲁⲛⲁⲓ ⲧⲏⲣⲟⲩ ⲱϫⲛ̅ ϩⲛⲛⲁϣ ⲛⲟⲩⲟⲉⲓϣ ⲉⲓⲉⲙⲏⲧⲉⲓ ϩⲙⲡⲉⲩⲟⲉⲓϣ ⲛⲧⲁϥϣⲱⲡⲉ ⲛϩⲏⲧϥ̅ ⲛϭⲓⲡⲉⲥⲧⲁⲩⲣⲟⲥ ⲙⲡⲉⲭⲥ. ⲁⲣⲁϭⲉ ⲡⲁⲓ ⲡⲉⲧⲙⲡϣⲁ ⲛⲥⲱⲃⲉ ⲛⲥⲱϥ ϫⲓⲛ ⲙⲙⲟⲛ ⲛⲧⲟϥ ⲡⲉⲧⲉϣϣⲉⲡⲉ ⲉⲥⲱⲃⲉ ⲛⲥⲁⲛⲉⲧⲛⲟⲩⲱⲥϥ̅ ϩⲓⲧⲙ̅ⲡⲉⲧⲙ̅ⲙⲁⲩ ⲁⲩⲱ ⲉⲩϫⲡⲓⲟ ⲙⲙⲟⲟⲩ ⲉⲃⲟⲗ ϩⲓⲧⲟⲟⲧϥ̅ ⲉϩⲉⲛϭⲱⲃⲛⲉ. ⲕⲁⲓⲅⲁⲣ ⲡⲉⲓⲕⲉϩⲱⲃ ⲟⲛ ⲟⲩϣⲡⲏⲣⲉⲡⲉ ϫⲉⲛⲟⲩⲧⲉⲛ ⲙⲉⲛ ⲛⲥⲉⲡⲏⲧ ⲛ̅ⲥⲱⲟⲩ ⲁⲛⲭ ⲁⲗⲗⲁ ⲛ̅ⲣⲱⲙⲉ ⲧⲁⲉⲓⲟ ⲙⲙⲟⲟⲩ ⲕⲁⲧⲁⲡⲟⲗⲓⲥ. ⲛⲁⲡⲉⲭⲥ ⲇⲉ ⲥⲉⲡⲏⲧ ⲛ̅ⲥⲱⲟⲩ ⲥⲉⲣⲟⲟⲩⲧ ⲥⲉϯ ⲉⲑⲏ ⲁⲩⲱ ⲥⲉⲁ ϥ..ⲣ̀ ϣⲁⲓ ⲉϩⲟⲩⲉⲛⲟⲩⲧⲛ̅. ⲛⲟⲩⲧⲛ̅ ⲙⲉⲛ ⲉⲩϣⲁⲛϣⲧⲁⲙ ⲉⲣⲱⲟⲩ ϣⲁⲩⲧⲁⲕⲟ. ⲧⲡⲓⲥⲧⲓⲥ ⲇⲉ ⲙⲡⲉⲭⲥ ⲉⲩⲥⲱⲃⲉ ⲛⲥⲱⲥ ⲉⲃⲟⲗ ϩⲓⲧⲛⲧⲏⲩⲧⲛ̅ ⲁⲛⲣ̅ⲣⲱⲟⲩ ⲡⲱⲧ ⲛⲥⲱⲥ ⲛϩⲁϩ ⲛⲥⲟⲡ ⲁⲩⲱ ⲁⲥⲙⲉϩⲧⲟⲓⲕⲟⲩⲙⲉⲛⲏ ⲟⲩⲛ ⲧⲏⲣⲥ̅. ⲁϣ ⲟⲩⲛ ⲛⲛⲟⲩⲟⲉⲓϣ ⲡⲉⲛⲧⲁⲡⲥⲟⲟⲩⲛ ⲛⲧⲉϥⲙⲛⲧⲛⲟⲩⲧⲉ ⲣ̅ⲟⲩⲟⲉⲓⲛ ⲛⲧⲉⲓϩⲉ ⲧⲏⲣⲥ̅ ⲏ ⲁϣⲡⲉ ⲡⲉⲩⲟⲉⲓϣ ⲛ̅ⲧⲁⲩⲕⲁⲧⲁⲫⲣⲟⲛⲉⲓ ⲙⲡⲙⲟⲩ ⲛϩⲏⲧϥ̅ ⲉⲓⲉⲙⲏϯ ⲡⲉϩⲟⲟⲩ ⲛⲧⲁϥϣⲱⲡⲉ ⲛϭⲓⲡⲉⲥⲧⲁⲩⲣⲟⲥ ⲙⲡⲉⲭⲥ. ⲛⲛⲉⲗⲁⲁⲩ ⲣ̅ϩⲏⲧⲥⲛⲁⲩ ⲉⲛⲉϩ ⲉⲩⲛⲁⲩ ⲉⲙⲙⲁⲣⲧⲩⲣⲟⲥ ⲉⲩⲕⲁⲧⲁⲫⲣⲟⲛⲉⲓ ⲙⲡⲙⲟⲩ ⲉⲧⲃⲉⲡⲉⲭⲥ̅ ⲁⲩⲱ ⲙⲡⲁⲣⲑⲉⲛⲟⲥ ⲛⲧⲉⲕⲕⲗⲏⲥⲓⲁ ⲉⲩϩⲁⲣⲉϩ ⲉⲡⲉⲩⲥⲱⲙⲁ ⲉϥⲧⲃ̅ⲃⲏⲩ ⲙⲡⲉⲭⲥ.

80. ⲛⲛⲉⲓⲙⲁⲉⲓⲛϭⲉ ⲣⲱϣⲉ ⲁⲛ ⲉⲟⲩⲱⲛϩ̅ ⲉⲃⲟⲗ ⲛⲧⲡⲓⲥⲧⲓⲥ ⲉⲧⲥⲟⲩⲧⲱⲛ ⲉⲧϫⲓ ⲉϩⲟⲩⲛ ⲉⲡⲉⲭⲥ ϫⲉⲛⲧⲟⲥ ⲧⲉⲧϣⲟⲟⲡ ⲙⲙⲉ ⲉϩⲟⲩⲛ ⲉⲧⲙⲛⲧⲣⲉϥϣⲙ̅ϣⲉⲛⲟⲩⲧⲉ. ⲉϣϫⲉ ⲛⲧⲱⲧⲛ ⲇⲉ ⲧⲉⲧⲛⲟ ⲛⲁⲧⲛⲁϩⲧⲉ ⲧⲉⲧⲛ̅ϣⲓⲛⲉ ⲛⲥⲁϩⲉⲛⲁⲡⲟⲇⲏⲝⲓⲥ ⲉⲃⲟⲗ ϩⲛϩⲉⲛϣⲁϫⲉ ⲁⲛⲟⲛ ⲇⲉ ⲉⲛⲛⲁϯⲁⲡⲟⲇⲏⲝⲓⲥ ⲁⲛ ⲉⲧⲣⲉⲛⲟⲩⲱⲛϩ ⲉⲃⲟⲗ ⲕⲁⲧⲁⲑⲉ ⲛⲧⲁⲡⲉⲛⲥⲁϩ ϫⲟⲟⲥ ϩⲛⲟⲩⲡⲓⲑⲉ ⲛⲥⲟⲫⲓⲁ ⲛϣⲁϫⲉ ⲛⲧⲉⲛⲛϩⲉⲗⲗⲏⲛ. ⲉⲛⲛⲁⲧⲉⲧⲡⲉⲛϩⲏⲧ ⲇⲉ ϩⲛⲧⲡⲓⲥⲧⲓⲥ ⲉⲥⲉⲛⲉⲣⲅⲉⲓ ⲉⲥⲣ̅ϣⲟⲣⲡ ⲉⲛⲉⲧⲛ̅ϣⲁϫⲉ ⲉⲧⲉⲧⲛ̅ⲧⲁⲙⲓⲟ ⲙⲙⲟⲟⲩ. ⲉⲓⲥϩⲏⲏⲧⲉ ⲟⲩⲛϩⲟⲓⲛⲉ ⲙ̅ⲡⲉⲓⲙⲁ ⲉⲩⲙⲟϩⲕ̅ ϩⲓⲧⲛⲛⲛⲇⲁⲓⲙⲱⲛ. ⲉⲛⲉⲁϩⲟⲓⲛⲉ ⲉⲓ ϣⲁⲣⲟϥⲡⲉ ⲉⲣⲉϩⲉⲛⲇⲁⲓⲙⲱⲛ ⲉⲛⲱⲭⲗⲉⲓ ⲛⲁⲩ ⲁⲩⲱ ⲁϥⲛ̅ⲧⲟⲩ ⲉⲧⲙⲏⲧⲉ ⲡⲉϫⲁϥ ⲛⲁⲩ ϫⲉϩⲣⲁⲓ ϩⲛⲛⲉⲧⲛ̅ϣⲁϫⲉ ⲉⲧⲙⲉϩ ⲛ̅ ϥ..ⲫ̀ ⲕⲟⲧⲥ̅ ⲏ ⲧⲉⲭⲛⲏ ⲉⲧⲉⲧⲛⲟⲩⲁϣⲥ ⲏ ⲟⲩⲙⲛⲧⲣⲉϥⲣ̅ϩⲓⲕ ⲉⲡⲉⲓⲕⲁⲗⲉⲓ ⲛⲛⲉⲧⲛ̅ⲇⲁⲓⲙⲱⲛ ⲛⲧⲉⲧⲛ̅ⲧⲃⲃⲟⲟⲩ. ⲉϣϫⲉ ⲙⲛϣϭⲟⲙ ⲙⲙⲱⲧⲛ ⲉⲓⲕⲱ ⲉⲡⲉⲥⲏⲧ ⲙ̅ⲡⲉⲓⲙⲓϣⲉ ⲉⲧⲉⲧⲛ̅ⲉⲓⲣⲉ ⲙⲙⲟϥ ⲛⲙⲙⲁⲛ ⲁⲩⲱ ⲧⲉⲧⲛⲛⲁⲛⲁⲩ ⲉⲧϭⲟⲙ ⲙⲡⲉⲭⲥ. ⲛⲧⲉⲣⲉϥϫⲉⲛⲁⲓ ⲇⲉ ⲁϥⲉⲡⲉⲓⲕⲁⲗⲉⲓ ⲙⲡⲉⲭⲥ ⲁϥⲥⲫⲣⲁⲅⲓⲍⲉ ⲛⲛⲉⲧⲙⲟϩⲕ ϩⲙⲡⲙⲁⲉⲓⲛ ⲙ̅ⲡⲉⲥⲧⲁⲩⲣⲟⲥ ⲛϣⲟⲙⲛⲧ ⲛ̅ⲥⲟⲡ ⲁⲩⲱ ⲛⲧⲉⲩⲛⲟⲩ ⲁⲛⲣⲱⲙⲉ ⲟⲩϫⲁⲓ ⲁⲩⲱ ⲁⲩϣⲡϩⲙⲟⲧ ⲛⲧⲙⲡϫⲟⲉⲓⲥ ⲓⲥ̅. ⲛⲉⲧⲟⲩⲙⲟⲩⲧⲉ ⲉⲣⲟⲟⲩ ϫⲉⲫⲓⲗⲟⲥⲟⲫⲟⲥ ⲁⲩⲣ̅ϣⲡⲏⲣⲉ ⲁⲩⲱ ⲁⲩⲡⲱϣⲥ̅ ⲉϫⲛ̅ⲧⲙⲛⲧⲥⲁⲃⲉ ⲙⲡⲣⲱⲙⲉ ⲙⲡⲛⲟⲩⲧⲉ ⲙⲛⲡⲙⲁⲉⲓⲛ ⲛⲧⲁϥϣⲱⲡⲉ. ⲡⲉϫⲁϥ ⲛⲁⲩ ⲛ̅ϭⲓⲁⲛⲧⲱⲛⲓⲟⲥ ϫⲉⲉⲧⲃⲉⲟⲩ ⲧⲉⲧⲛ̅ⲣ̅ϣⲡⲏⲣⲉ ⲙⲙⲟⲓ. ⲛ̅ⲁⲛⲟⲕ ⲁⲛ ⲡⲉⲧⲉⲓⲣⲉ ⲙ̅ⲡⲁⲓ ⲁⲗⲗⲁ ⲡⲉⲭⲥ ⲡⲉⲧⲉⲓⲣⲉ ⲙⲙⲟϥ ⲛⲛⲉⲧⲡⲓⲥⲧⲉⲩⲉ ⲉⲣⲟϥ. ⲡⲓⲥⲧⲉⲩⲉ ϩⲱⲧⲧⲏⲩⲧⲛ ⲛ̅ⲧⲉⲧⲛϣⲱⲡⲉ ⲛ̅ⲧⲉⲓϩⲉ ⲁⲩⲱ ⲧⲉⲧⲛⲛⲁⲉⲓⲙⲉ ϫⲉⲉⲣⲉⲛⲉⲛϣⲁϫⲉ ϣⲟⲟⲡ ⲁⲛ ϩⲛⲟⲩⲧⲉⲭⲛⲏ ⲛϣⲁϫⲉ ⲁⲗⲗⲁ ϩⲛⲟⲩⲡⲓⲥⲧⲓⲥ ⲉⲥⲉⲛⲉⲣⲅⲉⲓ ϩⲓⲧⲛⲟⲩⲁⲅⲁⲡⲏ ⲉϩⲟⲩⲛ ⲉⲡⲉⲭⲥ. ⲧⲁⲓ ⲧⲉⲛⲟⲩ ⲉⲧⲉⲧⲛϣⲁⲛϫⲡⲟⲥ ⲛⲏⲧⲛ̅ ⲛ̅ⲧⲉⲧⲛⲕⲁⲁⲥ ⲛⲏⲧⲛ ⲛ̅ⲧⲉⲧⲛⲛⲁϣⲓⲛⲉ ⲁⲛ ⲛⲥⲁϩⲉⲛⲁⲡⲟⲇⲏⲝⲓⲥ ⲛ̅ϣⲁϫⲉⲭ ⲁⲗⲗⲁ ⲧⲉⲧⲛⲛⲁⲟⲡⲥ̅ ⲛ̅ϩⲏⲧⲧⲏⲩⲧⲛ̅ ϫⲉⲥⲣⲱϣⲉ ⲛϭⲓⲧⲡⲓⲥⲧⲓⲥ ⲉϩⲟⲩⲛ ⲉⲡⲉⲭⲥ. ⲛⲁⲓ ⲇⲉⲛⲉ ⲛⲉϣⲁϫⲉ ⲛⲛⲁⲛⲧⲱⲛⲓⲟⲥ ⲛ̅ⲛⲁϩⲣⲛⲛⲉⲧⲙⲙⲁⲩ. ⲛⲧⲟⲟⲩ ⲇⲉ ⲁⲩⲣ̅ϣⲡⲏⲣⲉ ⲙⲙⲟϥ ⲙⲙⲁⲧⲉ ⲁⲩⲃⲱⲕ ⲉⲩⲉⲩⲭⲁⲣⲓⲥⲧⲉⲓ ⲛⲁϥ ⲁⲩⲱ ⲁⲩϩⲟⲙⲟⲗⲟⲅⲉⲓ ϫⲉⲁ ϥ..ⲣ̀ ⲛⲉϥϣⲁϫⲉ ⲱⲫⲉⲗⲉⲓ ⲙⲙⲟⲛ ⲕⲁⲗⲱⲥ.

81. ⲁⲡⲥⲟⲉⲓⲧ ⲛⲛⲁⲛⲧⲱⲛⲓⲟⲥ ⲡⲱϩ ϣⲁⲛⲉⲣⲣⲱⲟⲩ. ⲛⲁⲓ ⲇⲉ ⲛⲧⲉⲣⲟⲩⲥⲱⲧⲙ̅ ⲉⲣⲟⲟⲩ ⲛϭⲓⲕⲱⲥⲧⲁⲛϯⲛⲟⲥ ⲡⲁⲩⲧⲱⲕⲣⲁⲧⲱⲣ ⲙⲛⲕⲟⲥⲧⲁⲛⲧⲓⲟⲥ ⲙⲛⲕⲟⲥⲧⲁⲥ ⲁⲩⲥϩⲁⲓ ⲛⲁϥ ϫⲉⲡⲉⲛⲉⲓⲱⲧ ⲁⲩⲱ ⲁⲩⲁⲓⲧⲉⲓ ⲛϫⲓⲥϩⲁⲓ ϩⲱⲟⲩ ⲉⲃⲟⲗ ϩⲓⲧⲟⲟⲧϥ̅. ⲁⲗⲗⲁ ⲙ̅ⲡⲉⲛⲉⲥϩⲁⲓ ⲣ̅ⲣⲟⲟⲩϣ ⲛⲁϥ ⲁⲩⲱ ⲙⲡⲉϥⲣⲁϣⲉ ⲉϫⲛⲛⲉⲡⲓⲥⲧⲟⲗⲏ ⲛⲛⲉⲣⲣⲱⲟⲩ. ⲛⲧⲟϥ ⲇⲉ ⲉⲛⲉϥϣⲟⲟⲡ ⲛ̅ⲧⲉϥϩⲉ ⲕⲁⲧⲁⲑⲉ ⲉⲛⲉϥⲟ ⲙⲙⲟⲥ ⲙⲡⲁⲧⲟⲩⲥⲁⲓ ⲛⲁϥ ⲛϭⲓⲛⲉⲣⲣⲱⲟⲩ. ⲛⲧⲉⲣⲉϥϫⲓ ⲛⲛⲉⲥϩⲁⲓ ⲁϥⲙⲟⲩⲧⲉ ⲉⲙⲙⲟⲛⲁⲭⲟⲥ ⲡⲉϫⲁϥ ⲛⲁⲩ ϫⲉⲉⲧⲃⲉⲟⲩ ⲧⲉⲧⲛⲣ̅ϣⲡⲏⲣⲉ ϫⲉⲁⲡⲣ̅ⲣⲟ ⲥϩⲁⲓ ⲛⲁⲛ. ⲕⲁⲓⲅⲁⲣ ⲟⲩⲣⲱⲙⲉ ϩⲱⲱϥⲡⲉ. ⲁⲗⲗⲁ ⲁⲣⲓϣⲡⲏⲣⲉ ⲛⲧⲟϥ ⲛϩⲟⲩⲟ ϫⲉⲁⲡⲛⲟⲩⲧⲉ ⲥϩⲁⲓ ⲛⲁⲛ ⲙⲡⲉϥⲛⲟⲙⲟⲥ ⲁⲩⲱ ⲁϥϣⲁϫⲉ ⲛⲙⲙⲁⲛ ϩⲓⲧⲙⲡⲉϥϣⲏⲣⲉ. ⲛⲛⲉϥⲟⲩⲱϣ ⲇⲉ ⲁⲛ ⲉϫⲓ ⲛⲛⲉⲩⲉⲡⲓⲥⲧⲟⲗⲏ ⲉϥϫⲱ ⲙⲙⲟⲥ ϫⲉⲛϯⲥⲟⲟⲩⲛ ⲛⲥϩⲁⲓ ⲁⲛ. ⲁⲙⲙⲟⲛⲁⲭⲟⲥ ⲡⲣⲟⲧⲣⲉⲡⲉⲓ ⲙⲙⲟϥ ⲉⲩϫⲱ ⲙⲙⲟⲥ ϫⲉϩⲉⲛⲭⲣⲓⲥϯⲁⲛⲟⲥⲛⲉ. ⲙⲡⲣ̅ⲁⲡⲟⲣⲉⲓ ⲙⲙⲟⲟⲩ ϫⲉⲛⲛⲉⲩⲥⲕⲁⲛⲇⲁⲗⲓⲍⲉ. ⲧⲟⲧⲉ ⲁϥⲕⲁⲁⲩ ⲉⲟϣⲟⲩ ⲁⲩⲱ ⲁϥⲥϩⲁⲓ ⲛⲁⲩ ⲙⲡⲉⲩϩⲓⲥⲟⲛ ⲉϥⲁⲓⲡⲉⲛⲟⲩ ⲙⲙⲟⲟⲩ ϫⲉⲥⲉⲟⲩⲱϣⲧ ⲙⲡⲉⲭⲥ ⲉⲁϥⲥⲩⲙⲃⲟⲩⲗⲉⲩⲉ ⲛⲁⲩ ⲉⲛⲉⲧϫⲓ ⲉϩⲟⲩⲛ ⲉⲡⲉⲩⲟⲩϫⲁⲓ ⲁⲩⲱ ⲉⲧⲙⲙⲉⲉⲩⲉ ⲉⲛⲁⲡⲉⲓⲙⲁ ϫⲉϩⲉⲛⲛⲟϭⲛⲉ. ϩⲉⲛⲡⲣⲟⲥⲟⲩⲟⲉⲓϣ ⲅⲁⲣⲛⲉ. ⲁⲗⲗⲁ ⲉⲧⲣⲉⲩⲣ̅ⲡⲙⲉⲉⲩⲉ ϩⲱⲟⲩ ⲛⲧⲉⲕⲣⲓⲥⲓⲥ ⲉⲧⲛⲁϣⲱⲡⲉ ⲁⲩⲱ ϫⲉⲡϫⲟⲉⲓⲥⲡⲉ ⲡⲉⲛⲣ̅ⲣⲟ ⲧⲏⲣⲛ̅. ⲁϥⲁⲝⲓⲟⲩ ⲟⲛ ⲙⲙⲟⲟⲩ ϥ..ⲫ̀ ⲉⲧⲣⲉⲩϣⲱⲡⲉ ⲙⲙⲁⲓⲛⲟⲩⲧⲉ ⲁⲩⲱ ⲙⲙⲁⲓⲣⲱⲙⲉ ⲁⲩⲱ ⲛⲥⲉⲣ̅ⲡⲇⲓⲕⲁⲓⲟⲛ. ⲛⲧⲟⲟⲩ ⲇⲉ ⲛⲧⲉⲣⲟⲩϫⲓ ⲛⲛⲉϥⲥϩⲁⲓ ⲁⲩⲣⲁϣⲉ ⲉⲙⲁⲧⲉ ⲁⲩⲱ ⲧⲁⲓⲧⲉ ⲑⲉ ⲉⲧϥ̅ⲉⲓⲣⲉ ⲙⲙⲟⲥ ϩⲓⲧⲛⲟⲩⲟⲛ ⲛⲓⲙ.

82. ⲟⲩⲉⲧⲉⲓⲙⲓⲛⲉⲡⲉ ϫⲉ ϩⲙⲡⲧⲣⲉⲩⲥⲟⲩⲱⲛϥ. ⲉⲛⲉϥⲁⲥⲕⲉⲓ ⲟⲛ ⲛ̅ⲧⲉϥϩⲉ. ⲕⲁⲓⲅⲁⲣ ϩⲁϩ ⲛⲥⲟⲡ ϣⲁϥϩⲙⲟⲟⲥ ϩⲓⲡⲧⲟⲟⲩ ϣⲁϥⲉⲓⲙⲉ ⲉⲛⲉⲧϣⲟⲟⲡ ϩⲛⲕⲏⲙⲉ ⲁⲩⲱ ϣⲁϥϫⲟⲟⲥ ⲉⲥⲁⲣⲁⲡⲓⲟⲛ ⲡⲉⲡⲓⲥⲕⲟⲡⲟⲥ ⲉϥⲛ̅ϩⲟⲩⲛⲡⲧⲟⲟⲩ ⲛⲙⲙⲁϥ. ⲁⲥϣⲱⲡⲉ ⲇⲉ ⲛⲛⲟⲩϩⲟⲟⲩ ⲉϥϩⲙⲟⲟⲥ ⲉϥⲣ̅ϩⲱⲃ ⲁϥϣⲱⲡⲉ ϩⲛⲟⲩⲉⲕⲥⲧⲁⲥⲓⲥ ⲁⲩⲱ ⲉⲛⲉϥⲁϣⲁϩⲟⲙ ⲉⲡⲉϩⲟⲩⲟ ⲉϥϣⲟⲟⲡ ϩⲛⲧⲉⲑⲉⲱⲣⲓⲁ ⲙⲡϭⲱⲗⲡ ⲉⲃⲟⲗ. ⲁⲓⲧⲉⲓ ⲇⲉ ⲙⲛⲛⲥⲁⲟⲩⲛⲟⲩ ⲁϥⲛⲕⲟⲧⲕ̅ ⲙⲛⲛⲉⲥⲛⲏⲩ ⲉϥⲁϣⲁϩⲟⲙ ⲁⲩⲱ ⲁϥϣⲱⲡⲉ ϩⲛⲟⲩϩⲟⲧⲉ ⲁϥⲧⲱⲟⲩⲛ ⲁϥϣⲗⲏⲗ ⲁϥⲕⲱⲗϫ̅ ⲛⲛⲉϥⲡⲁⲧ ⲁⲩⲱ ⲁϥⲧⲱⲟⲩⲛ ⲁϥⲣⲓⲙⲉ ⲛϭⲓⲡϩⲗⲗⲟ. ⲁⲩⲥⲧⲱⲧ ⲇⲉ ϩⲱⲟⲩ ⲛϭⲓⲛⲉⲧϩⲁⲧⲏϥ ⲁⲩⲱ ⲁⲩⲣ̅ϩⲟⲧⲉ ⲉⲙⲁⲧⲉ ⲁⲩⲁⲝⲓⲟⲩ ⲙⲙⲟϥ ⲉⲧⲣⲉϥⲧⲁⲙⲟⲟⲩ ⲉⲡⲉⲛⲧⲁϥⲛⲁⲩ ⲉⲣⲟϥ ⲉⲁⲩϫⲓⲧϥ ⲛϭⲟⲛⲥ̅ ⲙⲙⲁⲧⲉ ϣⲁⲛⲧⲉϥⲧⲁⲙⲟⲟⲩ ⲉⲡⲉⲛⲧⲁϥⲛⲁⲩ ⲉⲣⲟϥ. ⲛⲧⲟϥ ⲇⲉ ⲡⲉϫⲁϥ ⲛⲁⲩ ϩⲛⲟⲩⲛⲟϭ ⲛⲛⲙⲕⲁϩ ⲛ̅ϩⲏⲧ ϫⲉⲛⲁϣⲏⲣⲉ ⲥⲥⲟⲧⲡ̅ ⲛⲁⲓ ⲉⲧⲣⲁⲙⲟⲩ ⲉⲙⲡⲁⲧⲉⲛⲉⲛⲧⲁⲓⲛⲁⲩ ⲉⲣⲟⲟⲩ ϣⲱⲡⲉ. ⲁⲩⲁⲝⲓⲟⲩ ⲙⲙⲟϥ ⲉⲡⲉϩⲟⲩⲟ ⲉⲧⲣⲉϥⲧⲁⲙⲟⲟⲩ. ⲛⲧⲟϥ ⲇⲉ ⲁϥⲣⲓⲙⲉ ⲡⲉϫⲁϥ ⲛⲁⲩ ϫⲉⲟⲩⲛⲟⲩⲟⲣⲅⲏ ⲛⲁⲧⲁϩⲉⲧⲉⲕⲕⲗⲏⲥⲓⲁ ⲁⲩⲱ ⲥⲉⲛⲁⲧⲁⲁⲥ ⲉⲧⲟⲟⲧⲟⲩ ⲛϩⲉⲛⲣⲱⲙⲉ ⲉⲩⲉⲓⲛⲉ ⲛϩⲉⲛⲧⲃ̅ⲛⲟⲟⲩⲉ. ⲁⲓⲛⲁⲩ ⲅⲁⲣ ⲉⲧⲉⲕⲕⲗⲏⲥⲓⲁ ⲉⲣⲉϩⲉⲛⲙⲁⲥⲡⲟⲣⲕ̅ ⲁϩⲉⲣⲁ ϥ..ⲣ ⲧⲟⲩ ⲉⲣⲟⲥ ⲉⲩⲕⲧⲏⲩ ⲉⲣⲟⲥ ⲛⲥⲁⲥⲁⲛⲓⲙ ⲁⲩⲱ ⲉⲩϯⲧⲃⲏⲣ ⲛⲛⲉⲧⲛ̅ϩⲟⲩⲛ ⲉⲡⲙⲁ ⲉⲧⲙⲙⲁⲩ ⲛⲑⲉ ⲛⲛⲧⲃ̅ⲛⲟⲟⲩⲉ ⲉⲩⲥⲕⲓⲣⲧⲁ ⲁⲩⲱ ⲉⲩⲁⲧⲁⲕⲧⲉⲓ. ⲉⲓⲧⲁ ⲛⲧⲉⲣⲉⲓⲁϣⲁϩⲟⲙ ⲡⲁⲛⲧⲱⲥ ⲁⲧⲉⲧⲛⲁⲓⲥⲑⲁⲛⲉ ⲁⲓⲥⲱⲧⲙ̅ ⲉⲩⲥⲙⲏ ⲉⲥϫⲱ ⲙⲙⲟⲥ ϫⲉⲥⲉⲛⲁϣⲱϥ ⲙⲡⲉⲑⲩⲥⲓⲁⲥⲧⲏⲣⲓⲟⲛ. ⲛⲁⲓ ⲁϥⲛⲁⲩ ⲉⲣⲟⲟⲩ ⲛϭⲓⲡϩ̅ⲗⲗⲟ ⲙⲙⲁⲓⲛⲟⲩⲧⲉ. ⲙⲛⲛⲥⲁⲣⲟⲙⲡⲉ ⲥⲛ̅ⲧⲉ ⲁⲛⲁⲣⲓⲁⲛⲟⲥ ϥⲱϭⲉ ⲉϫⲛ̅ⲧⲉⲕⲕⲗⲏⲥⲓⲁ ⲁⲩⲅⲱⲣⲡ̅ ⲙⲙⲟⲥ ⲁⲩⲧⲱⲣⲡ ⲛⲛⲉϩⲛⲁⲁⲩ ⲉⲧⲛ̅ϩⲏⲧⲥ̅ ϩⲛⲟⲩϫⲓⲛϭⲟⲛⲥ̅ ⲁⲩⲧⲣⲉⲛϩⲉⲑⲛⲓⲕⲟⲥ ϥⲉⲓ ϩⲁⲣⲟⲟⲩ ⲁⲩⲁⲛⲁⲅⲕⲁⲍⲉ ⲛⲛⲙⲙⲏⲏϣⲉ ⲉⲧⲣⲉⲛⲉⲧϩⲛⲛⲉⲣⲅⲁⲥⲓⲁ ⲥⲩⲛⲁⲅⲉ ⲛⲙⲙⲁⲩ. ⲧⲟⲧⲉ ⲁⲛⲟⲛ ⲧⲏⲣⲛ̅ ⲁⲛⲉⲓⲙⲉ ϫⲉⲡⲁⲓⲡⲉ ⲡⲉⲧⲃⲏⲣ ⲛⲙⲙⲁⲥⲡⲟⲣⲕ̅ ⲛⲧⲁⲩⲣ̅ϣⲟⲣⲡ ⲉⲧⲁⲙⲉⲁⲛⲧⲱⲛⲓⲟⲥ ⲉⲣⲟϥ ⲉⲧⲉⲛⲁⲓⲛⲉ ⲧ̀ⲉⲣⲅⲁⲥⲓⲁ ̀ⲉⲧⲉⲣⲉⲛⲁⲣⲓⲁⲛⲟⲥ ⲉⲓⲣⲉ ⲙⲙⲟⲟⲩ ϩⲛⲟⲩⲙⲛⲧⲁⲗⲟⲅⲟⲥ ⲛ̅ⲑⲉ ⲛⲛⲧⲃ̅ⲛⲟⲟⲩⲉ. ⲛⲧⲉⲣⲉϥⲛⲁⲩ ⲇⲉ ⲉⲧⲉⲓⲑⲉⲱⲣⲓⲁ ⲁϥⲉⲓⲙⲉ ϫⲉⲛⲁⲓ ⲛⲉⲧⲧⲏϣ ⲉϣⲱⲡⲉ ⲁⲩⲱ ⲁϥϫⲟⲟⲥ ⲛⲁⲛ ϫⲉⲙⲡⲣ̅ⲣ̅ⲕⲟⲩⲓ ⲛϩⲏⲧ ⲛⲁϣⲏⲣⲉ ϫⲉⲛⲑⲉ ⲛⲧⲁⲡϫⲟⲉⲓⲥ ϭⲱⲛⲧ ⲧⲁⲓⲧⲉ ⲑⲉ ⲉⲧϥ̅ⲛⲁⲧⲁⲗϭⲟ ⲁⲩⲱ ⲥⲛⲁϣⲱⲡⲉ ⲟⲛ ⲛϭⲓⲧⲉⲕⲕⲗⲏⲥⲓⲁ ϩⲙⲡⲉⲥⲧⲁⲉⲓⲟ ⲛⲕⲉⲥⲟⲡ ⲁⲩⲱ ⲛⲥ̅ⲣ̅ⲟⲩⲟⲉⲓⲛ ⲛⲑⲉ ⲉⲛⲉⲥⲟ ⲙⲙⲟⲥ ⲛϣⲟⲣⲡ̅ ⲁⲩⲱ ⲧⲉⲧⲛⲛⲁⲛⲁⲩ ⲉⲛⲉⲛⲧⲁⲩⲡⲱⲧ ⲛⲥⲱⲟⲩ ⲉⲁⲩⲉⲓ ⲟⲛ ⲉⲡⲉⲩⲙⲁⲛⲧⲉⲩϩⲉ ⲁⲩⲱ ⲛⲧⲉⲛⲁⲥⲉⲃⲏⲥ ⲁⲛⲁⲭⲱⲣⲉⲓ ⲛⲁⲩ ⲉⲛⲉⲩⲃⲏⲃ. ⲧⲡⲓⲥⲧⲓⲥ ⲇⲉ ⲛⲛⲉⲩⲥⲉⲃⲏⲥ ⲉⲧⲉⲧⲙⲛⲧⲣⲉϥϣⲙ̅ϣⲉⲛⲟⲩⲧⲉⲧⲉ ⲛⲥ̅ⲡⲁⲣⲣⲏⲥⲓⲁⲍⲉ ⲙⲙⲟⲥ ϩⲙⲙⲁ ⲛⲓⲙ ϩⲛⲟⲩⲙⲛⲧⲣⲙ̅ⲣⲁϣ. ϩⲁⲣⲉϩ ⲉⲣⲱⲧⲛ ⲙⲙⲁⲧⲉ ⲙ̅ⲡⲣ̅ⲥⲱⲱϥ ϥ..ⲫ ⲙⲙⲱⲧⲛ̅ ⲙⲛⲛⲁⲣⲓⲁⲛⲟⲥ. ⲧⲉⲩⲥⲃⲱ ⲅⲁⲣ ⲛⲧⲁⲛⲁⲡⲟⲥⲧⲟⲗⲟⲥ ⲁⲛⲧⲉⲭ ⲁⲗⲗⲁ ⲧⲁⲛⲇⲁⲓⲙⲱⲛⲧⲉ ⲙⲛⲡⲉⲩⲉⲓⲱⲧ ⲡⲇⲓⲁⲃⲟⲗⲟⲥ ⲁⲩⲱ ⲟⲩⲁⲗⲟⲅⲟⲥⲡⲉ ⲡⲥⲟⲟⲩⲛ ⲉⲙⲛϣϭⲟⲙ ⲙⲙⲟⲟⲩ ⲛⲛⲁϩⲣⲛⲟⲩϩⲏⲧ ⲉϥⲥⲟⲩⲧⲱⲛ ⲛⲑⲉ ⲛⲧⲙⲛⲧⲧⲃⲛⲏ ⲛⲛⲙⲙⲁⲥⲡⲟⲣⲕ̅.

83. ⲛⲁⲓ ⲙⲉⲛⲛⲉ ⲛⲉϣⲁϫⲉ ⲛⲛⲁⲛⲧⲱⲛⲓⲟⲥ. ⲛϣϣⲉ ⲁⲛ ⲉⲣⲁⲧⲛⲁϩⲧⲉ ⲉⲣⲟⲟⲩ ⲉⲃⲟⲗ ϫⲉⲁⲛⲉϥϣⲡⲏⲣⲉ ⲧⲏⲣⲟⲩ ϣⲱⲡⲉ ϩⲓⲧⲛ̅ⲟⲩⲣⲱⲙⲉ. ⲡⲉⲓⲉⲣⲏⲧ ⲅⲁⲣ ⲡⲁⲡⲥⲱⲧⲏⲣⲡⲉ ⲉϥϫⲱ ⲙⲙⲟⲥ ϫⲉⲉϣⲱⲡⲉ ⲟⲩⲛⲧⲏⲧⲛ̅ ⲡⲓⲥⲧⲓⲥ ⲙⲙⲁⲩ ⲛⲛⲁⲡϣⲁⲩ ⲛⲛⲟⲩⲃⲗⲃⲓⲗⲉ ⲛϣⲗ̅ⲧⲙ̅ ⲧⲉⲧⲛⲛⲁϫⲟⲟⲥ ⲙⲡⲉⲓⲧⲟⲟⲩ ϫⲉⲡⲱⲱⲛⲉ ⲉⲃⲟⲗ ⲛϥⲡⲱⲱⲛⲉ. ⲁⲩⲱ ⲟⲛ ϫⲉϩⲁⲙⲏⲛ ϯϫⲱ ⲙⲙⲟⲥ ⲛⲏⲧⲛ ϫⲉⲡⲉⲧⲉⲧⲛⲛⲁⲁⲓⲧⲉⲓ ⲙⲙⲟϥ ⲛⲧⲙ̅ⲡⲁⲉⲓⲱⲧ ϥⲛⲁⲧⲁⲁϥ ⲛⲏⲧⲛ̅ ϩⲙⲡⲁⲣⲁⲛ. ⲁⲓⲧⲉⲓ ⲁⲩⲱ ⲧⲉⲧⲛⲛⲁϫⲓ. ⲛⲧⲟϥ ⲟⲛ ⲡⲉⲧϫⲱ ⲙⲙⲟⲥ ⲛⲛⲉϥⲙⲁⲑⲏⲧⲏⲥ ⲙⲛⲟⲩⲟⲛ ⲛⲓⲙ ⲉⲧⲡⲓⲥⲧⲉⲩⲉ ⲉⲣⲟϥ ϫⲉⲛⲉⲧϣⲱⲛⲉ ⲁⲣⲓⲡⲁϩⲣⲉ ⲉⲣⲟⲟⲩ. ⲛⲉⲧⲥⲟⲃϩ̅ ⲧⲃ̅ⲃⲟⲟⲩ. ⲛⲇⲁⲓⲙⲱⲛⲓⲟⲛ ⲛⲟϫⲟⲩ ⲉⲃⲟⲗ. ⲁⲧⲉⲧⲛ̅ϫⲓ ⲛϫⲓⲛϫⲏ ϯ ⲟⲛ ⲛϫⲓⲛϫⲏ.

84. ⲛⲉϥⲟⲩⲉϩⲥⲁϩⲛⲉ ⲁⲛ ⲛⲧⲟϥ ⲛϭⲓⲁⲛⲧⲱⲛⲓⲟⲥ ⲉϥⲉⲓⲣⲉ ⲛϩⲉⲛⲧⲁⲗϭⲟⲭ ⲁⲗⲗⲁ ⲉϥϣⲗⲏⲗ ⲁⲩⲱ ⲉϥⲧⲁⲩⲟ ⲙⲡⲣⲁⲛ ⲙⲡⲛⲟⲩⲧⲉ ϫⲉⲕⲁⲥ ⲉⲣⲉⲡϩⲱⲃ ⲛⲁⲟⲩⲱⲛϩ̅ ⲉⲃⲟⲗ ⲛⲟⲩⲟⲛ ⲛⲓⲙ ϫⲉⲛⲧⲟϥ ⲁⲛ ⲡⲉⲧⲉⲓⲣⲉ ⲛⲛⲁⲓ ⲁⲗⲗⲁ ⲡϫⲟⲉⲓⲥ ⲡⲉⲧⲉⲓⲣⲉ ⲛ̅ⲧⲉϥⲙⲛⲧⲙⲁⲓⲣⲱⲙⲉ ϩⲓⲧⲛ̅ⲁⲛⲧⲱⲛⲓⲟⲥ ⲡⲉϥⲥⲱⲧⲡ ⲁⲩⲱ ⲛⲧⲟϥ ⲉⲧⲧⲁⲗϭⲟ ⲛⲛⲉⲧⲙⲟϩⲕ̅ . ⲁⲛⲧⲱⲛⲓⲟⲥ ⲇⲉ ⲉϥⲙⲟϩⲕ̅ ⲛ̅ϩⲏⲧ ⲉⲡⲉ ϥ...ⲣ ϩⲟⲩⲟ ⲉⲩⲉⲛⲱⲭⲗⲉⲓ ⲛⲁϥ ϩⲓⲧⲛⲛⲙⲙⲏⲏϣⲉ ⲉⲩⲥⲱⲕ ⲙⲙⲟϥ ⲉⲡⲧⲟⲟⲩ ⲉⲧϩⲓⲃⲟⲗ. ⲕⲁⲓⲅⲁⲣ ⲛ̅ⲣⲉϥϯϩⲁⲡ ⲧⲏⲣⲟⲩ ⲁⲩⲁⲝⲓⲟⲩ ⲙⲙⲟϥ ⲉⲧⲣⲉϥⲉⲓ ⲉⲡⲉⲥⲏⲧ ϩⲓⲡⲧⲟⲟⲩ ⲉⲃⲟⲗ ϫⲉⲙⲛϣϭⲟⲙ ⲉⲧⲣⲉⲩⲃⲱⲕ ⲉϩⲟⲩⲛ ⲉⲡⲙⲁ ⲉⲧⲙⲙⲁⲩ ⲉⲧⲃⲉⲛⲉⲧⲟⲩⲏϩ ⲛⲥⲱⲟⲩ. ⲛⲧⲟϥ ⲙⲉⲛ ⲛⲉϥⲡⲁⲣⲁⲧⲏⲣⲉⲓ ⲉⲧⲙ̅ⲃⲱⲕ ϣⲁⲣⲟⲟⲩ. ⲁⲩϫⲟⲟⲩ ϣⲁⲣⲟϥ ⲛ̅ϩⲟⲓⲛⲉ ⲉⲩⲛ̅ϩⲉⲛⲁⲓⲧⲓⲁ ϫⲓ ⲉϩⲟⲩⲛ ⲉⲣⲟⲟⲩ ⲉⲩⲛ̅ⲧⲟⲟⲧⲟⲩ ⲛϩⲉⲛⲙⲁⲧⲟⲓ ϫⲉⲕⲁⲥ ϩⲓⲧⲛ̅ⲧⲗⲟⲓϭⲉ ⲛⲛⲉⲧⲙⲙⲁⲩ ⲉϥⲉⲉⲓ ⲉⲡⲉⲥⲏⲧ ϣⲁⲣⲟⲟⲩ. ⲛⲧⲉⲣⲉϥⲉⲓ ⲇⲉ ⲉⲡⲉⲥⲏⲧ ⲛϥⲛⲁⲩ ⲉⲛⲉⲧⲙⲙⲁⲩ ⲉⲩⲣⲓⲙⲉ. ⲡⲉϥⲥⲕⲉⲗⲙⲟⲥ ⲇⲉ ⲙ̅ⲡⲉϥϣⲱⲡⲉ ⲉϥϣⲟⲩⲉⲓⲧ ⲏ ϩⲱⲥ ⲉⲙⲛϩⲏⲩ ⲛ̅ϩⲏⲧϥ. ϣⲁϥϣⲱⲡⲉ ⲅⲁⲣ ⲛ̅ⲛⲟϥⲣⲉ ⲛⲛⲙⲙⲏⲏϣⲉ ⲁⲩⲱ ⲧⲉϥϭⲓⲛⲉⲓ ϣⲁⲥϣⲱⲡⲉ ϩⲛϩⲉⲛⲡⲉⲧⲛⲁⲛⲟⲩⲟⲩ. ϣⲁϥⲱⲫⲉⲗⲉⲓ ⲇⲉ ⲛⲛⲁⲣⲭⲱⲛ ⲙⲛⲛⲛⲣⲉϥϯϩⲁⲡ ⲉϥⲥⲩⲙⲃⲟⲩⲗⲉⲩⲉ ⲛⲁⲩ ⲁⲩⲱ ⲉϥϩⲱⲛ ⲉⲧⲟⲟⲧⲟⲩ ⲉⲧⲣⲉⲩⲙⲉⲣⲉⲡⲇⲓⲕⲁⲓⲟⲛ ϩⲁⲑⲏ ⲛ̅ϩⲱⲃ ⲛⲓⲙ ⲁⲩⲱ ⲛⲥⲉⲣ̅ϩⲟⲧⲉ ϩⲏⲧϥ̅ ⲙⲡⲛⲟⲩⲧⲉ ⲁⲩⲱ ⲉⲧⲣⲉⲩⲉⲓⲙⲉ ϫⲉϩⲙⲡϩⲁⲡ ⲉⲧⲟⲩⲛⲁϯϩⲁⲡ ⲛ̅ϩⲏⲧϥ̅ ⲉⲩⲛⲁϯϩⲁⲡ ⲉⲣⲟⲟⲩ ⲛϩⲏⲧϥ. ⲡⲗⲏⲛ ⲛⲉϥⲙⲉⲣⲉϭⲱ ϩⲓⲡⲧⲟⲟⲩ ⲛ̅ϭⲓⲡⲡⲉⲧⲟⲩⲁⲁⲃ ⲡⲁⲣⲁϩⲱⲃ ⲛⲓⲙ.

85. ⲁⲥϣⲱⲡⲉ ⲇⲉ ⲛⲛⲟⲩϩⲟⲟⲩ ⲁⲩϫⲓⲧϥ ⲛ̅ϭⲟⲛⲥ̅ ⲛϭⲓⲛⲉⲧⲣ̅ⲭⲣⲓⲁ ⲛⲁϥ ⲁⲩⲱ ⲡⲉⲥⲧⲣⲁⲧⲉⲗⲁⲧⲏⲥ ⲁϥⲁⲝⲓⲟⲩ ϩⲓⲧⲛ̅ⲟⲩⲙⲏⲏϣⲉ ⲛ̅ϣⲁϫⲉ ⲉⲧⲣⲉϥϭⲱ ⲛ̅ϩⲉⲛⲕⲉⲕⲟⲩⲓ ⲛϩⲟⲟⲩ. ⲛⲧⲟϥ ⲇⲉ ⲁϥⲁⲛⲇⲓⲗⲓⲅⲉ ⲙⲡⲉϥϭⲱ ⲉϥϫⲱ ⲙⲙⲟⲥ ϫⲉⲙⲛϣϭⲟⲙ ⲙⲙⲟⲓ ⲉⲧⲣⲁⲱⲥⲕ̅ ⲛⲙⲙⲏⲧⲛ̅ ⲁⲩⲱ ⲁϥϫⲱ ϥ...ⲫ ⲛⲁϥ ⲛⲟⲩⲡⲁⲣⲁⲧⲓⲅⲙⲁ ⲉⲛⲉⲥⲱϥ ⲉϥϫⲱ ⲙⲙⲟⲥ ϫⲉⲛⲑⲉ ⲛⲛⲧⲃ̅ⲧ ⲉⲩϣⲁⲛⲱⲥⲕ̅ ϩⲙⲡⲡⲉⲧϣⲟⲩⲱⲟⲩ ϣⲁⲩϭⲉⲡⲏ ⲉⲙⲟⲩ ⲧⲁⲓⲧⲉ ⲑⲉ ⲛⲛⲙⲙⲟⲛⲁⲭⲟⲥ ⲉⲩϣⲁⲛⲱⲥⲕ̅ ⲛⲙ̅ⲙⲏⲧⲛ̅ ϣⲁⲩϭⲉⲡⲏ ⲉⲃⲱⲗ ⲉⲃⲟⲗ. ⲡⲉⲧⲉϣϣⲉ ⲉⲣⲟⲛⲡⲉ ⲛⲑⲉ ⲙⲡⲧⲃⲧ ⲉϥϭⲉⲡⲏ ⲉⲃⲱⲕ ⲛⲁϥ ⲉⲧⲉⲑⲁⲗⲗⲁⲥⲥⲁ ⲉⲧⲣⲉⲡⲙⲟⲛⲁⲭⲟⲥ ϩⲱⲱϥ ϭⲉⲡⲏ ⲉⲃⲱⲕ ⲉⲡⲧⲟⲟⲩ . ⲙⲏⲡⲟⲧⲉ ⲛ̅ⲧⲛⲱⲥⲕ̅ ⲛⲧⲛⲣ̅ⲡⲱⲃϣ ⲙⲡϩⲁⲣⲉϩ ⲉⲧϩⲓϩⲟⲩⲛ. ⲛⲁⲓ ⲇⲉ ⲛ̅ⲧⲉⲣⲉϥⲥⲱⲧⲙ ⲉⲣⲟⲟⲩ ⲛ̅ϭⲓⲡⲉⲥⲧⲣⲁⲧⲉⲗⲁⲧⲏⲥ ⲁϥⲣ̅ϣⲡⲏⲣⲉ ⲉϥϫⲱ ⲙⲙⲟⲥ ϫⲉⲟⲩϩⲙϩⲁⲗ ⲛⲧⲉⲡⲛⲟⲩⲧⲉⲡⲉ ⲡⲁⲓ. ⲛ̅ⲧⲁⲡⲉⲓϩⲩⲇⲓⲱⲧⲏⲥ ⲛ̅ⲧⲉⲓⲙⲓⲛⲉ ϩⲉ ⲉⲡⲉⲓⲥⲟⲟⲩⲛ ⲧⲱⲛ ⲙⲛⲡⲉⲓⲛⲟⲩⲥ ⲙⲛⲡⲉⲓϩⲏⲧ ⲛ̅ⲥⲁⲃⲉ ⲛ̅ⲥⲁⲃⲏⲗ ϫⲉⲡⲛⲟⲩⲧⲉ ⲙⲉ ⲙⲙⲟϥ.

86. ⲟⲩⲥⲧⲣⲁⲧⲉⲗⲁⲧⲏⲥ ⲉⲡⲉϥⲣⲁⲛⲡⲉ ⲟⲩⲁⲗⲁⲅⲓⲟⲥ ⲁϥⲇⲓⲱⲕⲉⲓ ⲛⲥⲱⲛ ⲁⲛⲟⲛ ⲛⲉⲭⲣⲓⲥϯⲁⲛⲟⲥ ⲉⲧⲃⲉⲧⲉⲥⲡⲟⲩⲇⲏ ⲉⲧϥ̅ⲉ̅ⲓⲣⲉ ⲙⲙⲟⲥ ⲛⲛⲁⲣⲓⲁⲛⲟⲥ. ⲉⲛϥ̅ϩⲟⲟⲩ ⲉⲡⲉϩⲟⲩⲟ ⲉϥⲟ ⲛⲟⲩⲁⲓϩⲏⲧ ⲉⲙⲁⲧⲉ ϩⲱⲥⲧⲉ ⲛϥ̅ϩⲓⲟⲩⲉ ⲉⲛⲕⲉⲡⲁⲣⲑⲉⲛⲟⲥ ⲁⲩⲱ ⲛϥ̅ⲕⲁⲙⲙⲟⲛⲁⲭⲟⲥ ⲕⲁϩⲏⲩ ⲛⲛⲉⲩϩⲟⲉⲓⲧⲉ ⲛϥ̅ϩⲓⲟⲩⲉ ⲉⲣⲟⲟⲩ. ⲁⲛⲧⲱⲛⲓⲟⲥ ⲇⲉ ⲁϥϫⲟⲟⲩ ϣⲁⲣⲟϥ ⲛⲟⲩⲉⲡⲓⲥⲧⲟⲗⲏ ϩⲛϩⲉⲛϣⲁϫⲉ ⲛⲧⲉⲓⲙⲓⲛⲉ ⲉϥϫⲱ ⲙⲙⲟⲥ ϫⲉϯⲛⲁⲩ ⲉⲩⲟⲣⲅⲏ ⲉⲥⲛⲏⲩ ⲉϫⲱⲕ . ⲁⲗⲟⲕ ⲉⲕⲇⲓⲱⲕⲉⲓ ⲛⲥⲁⲛⲉⲭⲣⲓⲥϯⲁⲛⲟⲥ ⲙⲏⲡⲱⲥ ⲛⲧⲉⲧⲟⲣⲅⲏ ⲉⲓ ⲉϫⲱⲕ ⲙⲡⲁⲧⲉⲕⲉⲓⲙⲉ. ⲛⲧⲉⲣⲉⲟⲩⲁⲗⲁⲅⲓⲟⲥ ⲇⲉ ϫⲓ ⲛⲧⲉⲡⲓⲥⲧⲟⲗⲏ ⲁϥⲥⲱⲃⲉ ⲁⲩⲱ ϥ..:ⲣ ⲁϥⲛⲟϫⲥ̅ ⲉⲃⲟⲗ ⲉϥⲛⲉϫⲡⲁϭⲥⲉ ⲛⲥⲱⲥ . ⲛⲉⲛⲧⲁⲩϫⲓⲧⲥ̅ ⲇⲉ ⲛⲁϥ ⲁϥⲥⲟϣⲟⲩ ⲁⲩⲱ ⲁϥϩⲱⲛ ⲉⲧⲟⲟⲧⲟⲩ ⲉⲧⲣⲉⲩϫⲱ ⲛⲛⲁⲛⲧⲱⲛⲓⲟⲥ ⲛⲛⲉⲓϣⲁϫⲉ ⲧⲏⲣⲟⲩ ϫⲉⲉⲃⲟⲗ ϫⲉⲁⲕϣⲁⲛϩⲧⲏⲕ ϩⲁⲙⲙⲟⲛⲁⲭⲟⲥ ⲁⲩⲱ ⲁⲕϥⲓⲣⲟⲟⲩϣ ϩⲁⲣⲟⲟⲩ ⲉⲓⲥϩⲏⲏⲧⲉ ϯⲛⲏⲩ ϣⲁⲣⲟⲕ ⲁⲩⲱ ⲛϯⲛⲁϯⲥⲟ ⲉⲣⲟⲕ ⲁⲛ. ⲁⲩⲱ ⲙ̅ⲡⲁⲧⲉϯⲟⲩ ⲛ̅ϩⲟⲟⲩ ⲟⲩⲉⲓⲛⲉ ⲁⲧⲟⲣⲅⲏ ⲉⲓ ⲉϫⲱϥ. ⲁϥⲉⲓ ⲇⲉ ⲉⲃⲟⲗ ⲛϭⲓⲟⲩⲁⲗⲁⲅⲓⲟⲥ ⲉⲧϣⲟⲣⲡⲉ ⲙⲙⲟⲛⲏ ϫⲓⲛⲣⲁⲕⲟⲧⲉ ⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ ϫⲉⲭⲉⲣⲉⲩ ⲉⲣⲉⲛⲉⲥⲧⲟⲣⲓⲟⲥ ⲡⲉⲡⲁⲣⲭⲟⲥ ⲛⲣⲁⲕⲟⲧⲉ ⲙⲟⲟϣⲉ ⲛⲙⲙⲁϥ . ⲛⲧⲟⲟⲩ ⲇⲉ ⲛⲉⲩⲧⲁⲗⲏⲩ ⲉⲛⲉⲩϩⲧⲱⲱⲣ ⲉⲛⲁⲟⲩⲁⲗⲁⲅⲓⲟⲥⲛⲉ ⲁⲩⲱ ⲛⲉϩⲧⲱⲱⲣ ⲉⲧⲙ̅ⲙⲁⲩ ⲉⲛⲉⲩⲟ ⲛⲣⲙ̅ⲣⲁϣⲡⲉ ⲡⲁⲣⲁⲛⲉϩⲧⲱⲱⲣ ⲧⲏⲣⲟⲩ ⲉⲧϣⲟⲟⲡ ⲛⲁϥ. ⲉⲙⲡⲁⲧⲟⲩⲡⲱϩϭⲉ ⲉⲡⲙⲁ ⲉⲧⲙⲙⲁⲩ ⲁⲛⲉϩⲧⲱⲱⲣ ⲁⲣⲭⲉⲓ ⲛⲥⲱⲃⲉ ⲙⲛⲛⲉⲩⲉⲣⲏⲩ ⲕⲁⲧⲁⲧⲉⲩⲥⲩⲛⲏⲑⲓⲁ ⲁⲩⲱ ϩⲛⲧⲉⲩⲛⲟⲩ ϩⲛⲟⲩϣⲥⲛⲉ ⲡⲉϩⲧⲟ ⲉⲧⲉⲣⲉⲛⲉⲥⲧⲟⲣⲓⲟⲥ ⲧⲁⲗⲏⲩ ⲉⲣⲟϥ ⲛⲧⲟϥ ⲡⲉⲧⲟ ⲛⲣⲙ̅ⲣⲁϣ ⲉⲡⲉϩⲟⲩⲟ ⲁϥⲙⲉϩⲣⲱϥ ϩⲛⲧⲟⲩⲉⲣⲏⲧⲉ ⲛⲛⲟⲩⲁⲗⲁⲅⲓⲟⲥ ⲁϥⲧⲁⲩⲟϥ ⲉⲡⲉⲥⲏⲧ ⲁϥⲛ̅ⲕⲟⲧⲕ̅ ϩⲓϫⲱϥ ⲁⲩⲱ ⲛⲧⲉⲓϩⲉ ⲁϥⲥⲉⲗⲡⲡⲉϥⲙⲉⲣⲟⲥ ⲉⲃⲟⲗ ϩⲛⲛⲉϥⲟⲃϩⲉ . ϩⲛⲧⲉⲩⲛⲟⲩ ⲉⲧⲙⲙⲁⲩ ⲁⲩϫⲓ ⲙⲙⲟϥ ⲉⲧⲡⲟⲗⲓⲥ ⲙⲡϩⲟⲩⲛ ⲇⲉ ⲛ̅ϣⲟⲙⲛⲧ ⲛϩⲟⲟⲩ ⲁϥⲙⲟⲩ . ⲁⲩⲱ ⲁⲟⲩⲟⲛ ⲛⲓⲙ ⲣ̅ϣⲡⲏⲣⲉ ⲙ̅ⲡⲉⲛⲧⲁⲁⲛⲧⲱⲛⲓⲟⲥ ϫⲟⲟϥ ⲉⲁϥϫⲱⲕ ⲉⲃⲟⲗ ⲉϫⲱϥ ϩⲛⲟⲩϭⲉⲡⲏ.

87. ⲛⲧⲉⲓϩⲉ ⲟⲛ ⲛⲉϥϯⲥⲃⲱ ϥ..:ⲫ ⲛ̅ⲣⲱⲙⲉ ⲛⲓⲙ ⲉⲧⲣⲉⲩϩⲣⲟⲕⲡⲉ. ϩⲉⲛⲕⲟⲟⲩⲉ ⲇⲉ ⲟⲛ ⲉⲁⲩⲉⲓ ϣⲁⲣⲟϥ ⲛⲉϥϯⲥⲃⲱ ⲛⲁⲩ ϩⲱⲥⲧⲉ ⲉⲧⲣⲉⲩⲣ̅ⲡⲱⲃϣ̅ ⲛⲥⲉϫⲓ ⲛⲧⲇⲓⲕⲏ ϩⲓⲧⲙⲡⲇⲓⲕⲁⲥⲧⲏⲣⲓⲟⲛ ⲁⲩⲱ ⲛ̅ⲥⲉⲙⲁⲕⲁⲣⲓⲍⲉ ⲙⲙⲟⲟⲩ ϩⲙⲡⲉⲩⲃⲓⲟⲥ. ⲛⲉϥⲡⲣⲟϩⲓⲥⲧⲁ ⲇⲉ ⲉⲛⲉⲧⲟⲩϫⲓ ⲙⲙⲟⲟⲩ ⲛϭⲟⲛⲥ̅ ϩⲱⲥⲧⲉ ⲛⲧⲉϩⲟⲓⲛⲉ ⲙⲉⲉⲩⲉ ϩⲙⲡⲉⲩϩⲏⲧ ϫⲉⲛⲧⲟϥ ⲡⲉⲛⲧⲁⲩⲣϫⲓⲛϭⲟⲛ̅ⲥ ⲉⲣⲟϥ. ⲛⲉϥⲟ ⲇⲉ ⲛϩⲓⲕⲁⲛⲟⲥ ⲉⲧⲙⲛⲧⲣⲉϥⲱⲫⲉⲗⲉⲓ ⲛⲛⲟⲩⲟⲛ ⲛⲓⲙ ϩⲱⲥⲧⲉ ⲟⲩⲙⲏⲏϣⲉ ⲉⲩⲛ̅ⲧⲁⲩ ⲙⲙⲁⲩ ⲛϩⲁϩ ⲛⲛ̅ⲕⲁ ⲁϥⲧⲣⲉⲩⲕⲁⲁⲩ ⲛⲥⲱⲟⲩ ⲁⲩⲣ̅ⲙⲟⲛⲁⲭⲟⲥ. ⲛⲉϥⲟ ⲇⲉ ⲛⲛⲟⲩⲥⲁⲉⲓⲛ ⲉⲁⲡⲛⲟⲩⲧⲉ ⲕⲁⲁϥ ϩⲛⲕⲏⲙⲉ. ⲛⲓⲙ ⲅⲁⲣ ⲉⲛⲉϩ ⲡⲉⲛⲧⲁϥⲉⲓ ϣⲁⲣⲟϥ ⲉϥⲙⲟϩⲕ̅ ⲛϩⲏⲧ ⲉⲙⲡⲉϥⲕⲧⲟϥ ⲉⲡⲉϥⲏⲓ ⲉϥⲣⲁϣⲉ . ⲏ ⲛⲓⲙ ⲡⲉⲛⲧⲁϥⲉⲓ ⲉⲧⲃⲉⲛⲉϥⲣⲱⲙⲉ ⲛⲧⲁⲩⲙⲟⲩ ⲙⲡⲉϥⲕⲱ ⲉϩⲣⲁⲓ ⲙⲡϩⲏⲃⲉ . ⲛⲓⲙ ⲛ̅ϩⲏⲕⲉ ⲡⲉⲛⲧⲁϥⲉⲓ ϣⲁⲣⲟϥ ⲁⲩⲱ ⲙⲡⲉϥⲥⲟⲗⲥⲗ̅ ϩⲛⲧⲉϥⲙⲛⲧϩⲏⲕⲉ . ⲛⲓⲙ ⲙⲙⲟⲛⲁⲭⲟⲥ ⲡⲉⲛⲧⲁϥⲣ̅ⲕⲟⲩⲓ ⲛϩⲏⲧ ⲁⲩⲱ ⲛϥⲉⲓ ϣⲁⲣⲟϥ ⲉⲙⲡⲉϥϭⲙϭⲟⲙ . ⲛⲓⲙ ⲛ̅ϣⲏⲣⲉ ϣⲏⲙ ⲡⲉⲛⲧⲁϥⲉⲓ ⲉⲡⲧⲟⲟⲩ ⲁϥⲛⲁⲩ ⲉⲁⲛⲧⲱⲛⲓⲟⲥ ⲉⲙⲡⲉϥϣⲟⲟⲩⲉ ⲛⲧⲉⲩⲛⲟⲩ ⲉⲃⲟⲗ ϩⲛⲛⲛϩⲩⲇⲟⲛⲏ ⲉⲧⲡⲟⲗⲩⲙⲉⲓ ⲛⲙⲙⲁϥ. ⲏ ⲛⲓⲙ ⲡⲉⲧⲉⲣⲉⲛⲉϥⲙⲉⲉⲩⲉ ⲛ̅ϩⲏⲧ ⲉⲛⲱⲭⲗⲉⲓ ⲛⲁϥ ⲉⲙⲡⲉϥϣⲱⲡⲉ ⲉϥⲥϭⲣⲉϩⲧ ϩⲙⲡⲉϥϩⲏⲧ.

88. ⲕⲁⲓⲅⲁⲣ ⲟⲩⲛⲟϭⲡⲉ ⲡϩⲱⲃ ⲛ̅ⲧⲁⲥⲕⲏⲥⲓⲥ ⲛⲛⲁⲛⲧⲱⲛⲓⲟⲥ ⲉⲟⲩⲛⲧⲁϥ ⲙⲙⲁⲩ ⲛⲛⲟⲩϩⲙⲟⲧ ⲉⲇⲓⲁⲕⲣⲓⲛⲉ ⲛⲛⲉⲡ ϥ..ⲣ̀ ⲛ̅ⲁ ⲕⲁⲧⲁⲑⲉ ⲛⲧⲁⲓϣⲣⲡ̅ϫⲟⲟⲥ . ϣⲁϥⲉⲓⲙⲉ ⲅⲁⲣ ⲉⲡⲉⲧⲕⲓⲙ ϩⲣⲁⲓ ⲛϩⲏⲧϥ̅ ⲁⲩⲱ ϣⲁϥⲥⲟⲩⲛ̅ⲑⲟⲣⲙⲏ ⲙⲡⲟⲩⲁ ⲡⲟⲩⲁ ⲙⲙⲟⲟⲩ ⲉⲧϣⲟⲟⲡ ⲛⲁϥ ⲉⲧⲣⲉϥⲉⲓⲣⲉ ⲛϩⲉⲛⲉⲡⲉⲓⲃⲟⲩⲗⲏ ⲙⲛϩⲉⲛⲡⲉⲑⲟⲟⲩ. ⲟⲩ ⲙⲟⲛⲟⲛ ⲇⲉ ⲛⲧⲟϥ ⲁⲛⲧⲱⲛⲓⲟⲥ ⲙⲡⲟⲩⲉϣϭⲙϭⲟⲙ ⲉⲥⲱⲃⲉ ⲛⲥⲱϥ ⲛϭⲓⲛⲉⲧⲙⲙⲁⲩ ⲁⲗⲗⲁ ⲛ̅ⲕⲟⲟⲩⲉ ⲉⲧⲟⲩⲙⲓϣⲉ ⲛⲙⲙⲁⲩ ⲟⲩⲃⲏⲩ ⲉⲩⲉⲛⲱⲭⲗⲉⲓ ⲛⲁⲩ ϩⲛⲛⲉⲩⲙⲉⲉⲩⲉ ⲛ̅ϩⲏⲧ ϩⲓⲧⲛⲛⲉⲧⲙⲙⲁⲩ ϣⲁϥϯⲥⲃⲱ ⲛⲁⲩ ϫⲉϩⲉⲛⲁϣ ⲛⲥⲙⲟⲧ ⲉⲛⲛⲁⲉϣϭⲙ̅ϭⲟⲙ ⲉⲛⲉⲩⲉⲡⲉⲓⲃⲟⲩⲗⲏ ⲉϥϫⲱ ⲉⲣⲟⲟⲩ ⲛⲛⲙⲙⲛⲧⲥⲁⲛⲕⲟⲧⲥ̅ ⲉⲧⲉⲛⲉⲣⲅⲉⲓ ϩⲙⲡⲉⲩⲥⲁⲛϩⲟⲩⲛ. ⲡⲟⲩⲁ ⲇⲉ ⲡⲟⲩⲁ ⲛⲛⲉⲧⲛⲏⲩ ϣⲁⲣⲟϥ ϣⲁⲩϭⲙ̅ϭⲟⲙ ⲉϣϫⲉ ⲛⲧⲁⲩⲅⲩⲙⲛⲁⲍⲉ ⲙⲙⲟϥ ⲉⲃⲟⲗ ϩⲓⲧⲟⲟⲧϥ̅. ⲟⲩⲏⲣ ⲙⲡⲁⲣⲑⲉⲛⲟⲥ ⲉⲁⲩϫⲓϩⲱⲛ ⲛⲁⲩ ⲉⲁⲩⲛⲁⲩ ⲙⲙⲁⲧⲉ ⲉⲁⲛⲧⲱⲛⲓⲟⲥ ⲉϥϩⲓⲡⲉⲕⲣⲟ ⲁⲩϭⲱ ⲉⲩⲟ ⲙⲡⲁⲣⲑⲉⲛⲟⲥ ⲙⲡⲣ̅ⲣⲟ ⲙⲙⲉ ⲡⲉⲭⲥ ϣⲁⲡⲉϩⲟⲟⲩ ⲙⲡⲉⲩⲙⲟⲩ. ⲉⲩⲛⲏⲩ ⲇⲉ ϣⲁⲣⲟϥ ϫⲓⲛⲛⲉⲭⲱⲣⲁ ⲉⲧⲙ̅ⲡⲥⲁⲛⲃⲟⲗ ⲁⲩⲱ ϣⲁⲣⲉⲛⲉⲧⲙⲙⲁⲩ ⲟⲛ ⲱⲫⲉⲗⲉⲓ ⲉⲃⲟⲗ ϩⲓⲧⲟⲟⲧϥ ϣⲁⲩⲕⲟⲧⲟⲩ ⲉⲛⲉⲩⲙⲁ ⲉϥⲑⲡⲟ ⲙⲙⲟⲟⲩ ⲉⲃⲟⲗ ⲛ̅ⲑⲉ ⲛⲟⲩⲉⲓⲱⲧ ⲛⲛⲁⲅⲁⲑⲟⲥ. ⲕⲁⲓⲅⲁⲣ ⲛⲧⲉⲣⲉϥⲛ̅ⲕⲟⲧⲕ̅ ⲁⲩϣⲱⲡⲉ ⲧⲏⲣⲟⲩ ⲛⲑⲉ ⲛϩⲉⲛⲟⲣⲫⲁⲛⲟⲥ ⲉⲁⲩϥⲉⲓ ⲙⲡⲉⲩⲉⲓⲱⲧ ⲛⲧⲟⲟⲧⲟⲩ.

89. ⲑⲁⲏ ⲇⲉ ⲙ̅ⲡⲉϥⲁϩⲉ ⲛⲑⲉ ⲛⲧⲁϥϣⲱⲡⲉ ⲙⲙⲟⲥ ϥⲙⲡϣⲁ ⲉⲧⲣⲉⲛⲣ̅ⲡⲉϥⲙⲉⲉⲩⲉ ⲁⲩⲱ ⲛⲧⲱⲧⲛ ϩⲱⲧⲧⲏⲩⲧⲛ ⲛⲧⲉⲧⲛⲥⲱⲧⲙ̅ ⲉⲣⲟⲓ ϩⲛⲟⲩϯϩⲧⲏϥ . ⲕⲁⲓ ϥ..ⲫ̀ ⲅⲁⲣ ⲡⲉⲓⲕⲉⲟⲩⲁ ⲁϥϣⲱⲡⲉ ⲙⲙⲟϥ ⲉⲧⲣⲉⲟⲩⲟⲛ ⲛⲓⲙ ⲕⲱϩ ⲉⲣⲟϥ. ⲁϥϭⲙⲡϣⲓⲛⲉ ⲛⲛⲉⲥⲛⲏⲩ ⲉⲧⲟⲩⲏϩ ϩⲙ̅ⲡⲧⲟⲟⲩ ⲉⲧϩⲓⲃⲟⲗ ⲁⲩⲱ ⲁϥϣⲣⲡ̅ⲉⲓⲙⲉ ϩⲓⲧⲛⲧⲉⲡⲣⲟⲛⲟⲓⲁ ⲉⲡⲉϩⲟⲟⲩ ⲙⲡⲉϥⲙⲟⲩ . ⲁϥϣⲁϫⲉ ⲙⲛⲛⲉⲥⲛⲏⲩ ⲉϥϫⲱ ⲙⲙⲟⲥ ϫⲉⲡⲁϩⲁⲉ ⲛⲥⲟⲡⲡⲉ ⲡⲁⲓ ⲧⲁⲉⲓ ϣⲁⲣⲱⲧⲛ̅ ⲉϭⲙⲡⲉⲧⲛϣⲓⲛⲉ ⲁⲩⲱ ⲛⲧⲛⲛⲁⲕⲧⲟⲛ ⲁⲛ ⲉⲛⲁⲩ ⲉⲛⲉⲛⲉⲣⲏⲩ ϩⲙⲡⲉⲓⲕⲟⲥⲙⲟⲥ ⲛⲕⲉⲥⲟⲡ. ⲁⲡⲕⲁⲓⲣⲟⲥ ϩⲱⲛ ⲉϩⲟⲩⲛ ⲉⲧⲣⲁⲃⲱⲗ ⲉⲃⲟⲗ ϩⲱ. ⲁⲓϩⲱⲛ ⲅⲁⲣ ⲉϩⲟⲩⲛ ⲉϣⲉ ⲙⲛϯ ⲛ̅ⲣⲟⲙⲡⲉ. ⲛⲧⲟⲟⲩ ⲇⲉ ⲛⲧⲉⲣⲟⲩⲥⲉⲧⲙ̅ⲛⲁⲓ ⲁⲩⲣⲓⲙⲉ ⲁⲩⲱ ⲁⲩϩⲱⲗϭ ⲉⲣⲟϥ ⲁⲩϯⲡⲉⲓ ⲉⲣⲱϥ. ⲡϩⲗⲗⲟ ⲇⲉ ⲛⲉϥⲣⲁϣⲉ ϩⲱⲥ ⲉϥⲛⲏⲩ ⲉⲃⲟⲗ ϩⲛⲟⲩⲙⲁⲛϣⲙⲙⲟ ⲉⲧⲣⲉϥⲃⲱⲕ ⲉⲧⲉϥⲡⲟⲗⲓⲥ ⲙⲙⲓⲛ ⲙⲙⲟϥ. ⲛⲉϥϣⲁϫⲉ ⲇⲉ ⲛⲙ̅ⲙⲁⲩ ⲁⲩⲱ Ⲭ. . . ., ⲉⲧⲙ̅ⲣ̅ⲕⲟⲩⲓ ⲛϩⲏⲧ ϩⲛⲛⲉϩⲓⲥⲉ ⲁⲩⲱ ⲉⲧⲙⲉⲛⲅ̅ⲕⲁϭⲓ ⲛⲥⲉⲕⲁⲧⲟⲟⲧⲟⲩ ⲉⲃⲟⲗ ϩⲛⲧⲁⲥⲕⲏⲥⲓⲥ ⲁⲗⲗⲁ ⲉⲧⲣⲉⲩⲟⲩⲱⲛϩ̅ ⲉⲃⲟⲗ ϩⲱⲥ ⲉⲩⲛⲁⲙⲟⲩ ⲙⲙⲏⲛⲉ ⲕⲁⲧⲁⲑⲉ ⲛ̅ⲧⲁⲓϣⲣⲡϫⲟⲟⲥ ⲉⲧⲣⲉⲩⲣ̅ⲁⲡⲁⲧⲟⲟⲧⲟⲩ ϩⲛⲥⲡⲟⲩⲇⲏ ⲛⲓⲙ ⲉϩⲁⲣⲉϩ ⲉⲧⲉⲩⲯⲩⲭⲏ ⲉⲃⲟⲗ ϩⲙⲙⲉⲉⲩⲉ ⲛⲓⲙ ⲉⲑⲟⲟⲩ ⲁⲩⲱ ⲛ̅ⲧⲉⲧⲛ̅ⲧⲙϫⲱϩ ⲉⲙⲙⲉⲗⲓⲧⲓⲁⲛⲟⲥ ⲛⲭⲣⲓⲥⲙⲁⲧⲓⲕⲟⲥ. ⲧⲉⲧⲛⲥⲟⲟⲩⲛ ⲅⲁⲣ ⲛ̅ⲧⲉⲩⲡⲣⲟϩⲁⲓⲣⲉⲥⲓⲥ ⲉⲧϫⲁϩⲙ̅ ⲙⲛⲧⲉⲩⲡⲟⲛⲏⲣⲓⲁ . ⲁⲩⲱ ⲉⲧⲙ̅ⲕⲁⲗⲁⲁⲩ ⲛⲕⲟⲓⲛⲱⲛⲓⲁ ⲛⲏⲧⲛ̅ ⲙⲛⲛⲁⲣⲓⲁⲛⲟⲥ . ⲁⲧⲉⲩⲙⲛⲧⲁⲥⲉⲃⲏⲥ ⲅⲁⲣ ⲟⲩⲱⲛϩ̅ ⲉⲃⲟⲗ ⲛⲛⲟⲩⲟⲛ ⲛⲓⲙ. ⲕⲁⲛ ⲉⲧⲉⲧⲛ̅ϣⲁⲛⲛⲁⲩ ⲉⲛⲁⲣⲭⲱⲛ ϥ..ⲣ̀ ⲙⲛⲛⲛ̅ⲣⲉϥϯϩⲁⲡ ⲉⲩⲡⲣⲟϩⲓⲥⲧⲁ ⲙⲙⲟⲟⲩ ⲙⲡⲣ̅ϣⲧⲟⲣⲧⲣ̅ . ⲥⲛⲁⲗⲟ ⲅⲁⲣ ⲛϭⲓⲧⲉⲩⲫⲁⲛⲧⲁⲥⲓⲁ ⲧⲁⲓ ⲉⲧϣⲟⲟⲡ ⲡⲣⲟⲥⲟⲩⲕⲟⲩⲓ ⲛⲛⲟⲩⲟⲉⲓϣ. ϩⲁⲣⲉϩϭⲉ ⲉⲣⲱⲧⲛ ⲉⲧⲉⲧⲛⲟⲩⲁⲁⲃ ⲉⲃⲟⲗ ϩⲛⲛⲉⲧⲙⲙⲁⲩ ⲁⲩⲱ ϩⲁⲣⲉϩ ⲉⲙⲡⲁⲣⲁⲇⲟⲥⲓⲥ ⲛⲛⲉⲧⲛⲉⲓⲟⲧⲉ ⲁⲩⲱ ϩⲁⲑⲏ ⲛϩⲱⲃ ⲛⲓⲙ ⲧⲡⲓⲥⲧⲓⲥ ⲉϩⲟⲩⲛ ⲉⲡⲉⲛϫⲟⲉⲓⲥ ⲓⲥ ⲡⲉⲭⲥ.

90. ⲛⲧⲉⲣⲉⲛⲉⲥⲛⲏⲩ ⲇⲉ ϫⲓⲛⲧϥ̅ ⲛϭⲟⲛⲥ̅ ⲉⲩⲟⲩⲱϣ ⲉⲧⲣⲉϥϭⲱ ϩⲁⲧⲏⲩ ϣⲁⲛⲧⲉϥϫⲱⲕ ⲉⲃⲟⲗ ⲙⲡⲉϥⲟⲩⲟⲉⲓϣ ⲟⲩⲇⲉ ⲅⲁⲣ ⲙⲡⲉϥⲁⲛⲉⲭⲉ ⲉⲧⲃⲉⲡⲉⲓϩⲱⲃ ⲡⲁⲓ ⲛ̅ϩⲟⲩⲟ ⲉⲃⲟⲗ ϫⲉⲛⲉⲣⲙⲛⲕⲏⲙⲉ ⲥⲉⲙⲉ ⲛⲛⲉⲥⲱⲙⲁ ⲛⲛⲉⲥⲡⲟⲩⲇⲁⲓⲟⲥ ⲉϣⲁⲩⲙⲟⲩ ⲛϩⲟⲩⲟ ⲇⲉ ⲙⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲉϣⲁⲩⲕⲟⲟⲥⲟⲩ ⲛⲥⲉϭⲟⲟⲗⲟⲩ ⲛϩⲉⲛϩⲃ̅ⲥⲱ ⲛⲥⲉⲧⲱⲙⲥ̅ ⲙⲙⲟⲟⲩ ⲁⲛ ⲉⲡⲕⲁϩ ⲁⲗⲗⲁ ⲉⲩⲕⲱ ⲙⲙⲟⲟⲩ ϩⲓϩⲉⲛϭⲗⲟϭ ⲉⲩϩⲁⲣⲉϩ ⲉⲣⲟⲟⲩ ϩⲁϩⲧⲏⲩ ⲉⲩⲙⲉⲉⲩⲉ ϫⲉϩⲙⲡⲁⲓ ⲉⲩϯⲧⲁⲉⲓⲟ ⲙ̅ⲡⲉⲛⲧⲁϥⲛ̅ⲕⲟⲧⲕ̅. ⲁⲛⲧⲱⲛⲓⲟⲥ ⲇⲉ ⲁϥϣⲁϫⲉ ⲙⲛⲛⲉⲉⲡⲓⲥⲕⲟⲡⲟⲥ. ⲉϥⲁⲝⲓⲟⲩ ⲙⲙⲟⲟⲩ ϩⲁⲡⲉⲓϩⲱⲃ ⲡⲁⲓ ϫⲉⲕⲁⲥ ⲉⲩⲉϩⲱⲛ ⲉⲧⲟⲟⲩⲟⲩ ⲛⲛ̅ⲗⲁⲟⲥ ⲉⲧⲃⲉⲡⲁⲓ . ⲛⲧⲟϥ ϩⲱⲱϥ ⲟⲛ ϣⲁϥϫⲡⲓⲉⲛ̅ⲗⲁⲟⲥ ⲛϥⲉⲡⲓⲧⲓⲙⲁ ⲛⲛⲉϩⲓⲟⲙⲉ ⲉϥϫⲱ ⲙⲙⲟⲥ ϫⲉⲛⲟⲩⲇⲓⲕⲁⲓⲟⲛ ⲁⲛⲡⲉ ⲡⲁⲓ . ⲕⲁⲓⲅⲁⲣ ⲛⲙ̅ϩⲁⲁⲩ ⲛⲛⲉⲙⲡⲁⲧⲣⲓⲁⲣⲭⲏⲥ ⲙⲛⲛⲉⲡⲣⲟⲫⲏⲧⲏⲥ ⲥⲉϣⲟⲟⲡ ϣⲁⲉϩⲟⲩⲛ ⲉⲡⲟⲟⲩ ⲛϩⲟⲟⲩ . ⲡⲥⲱⲙⲁ ⲉⲧⲥⲙⲁⲙⲁⲁⲧ ⲙ̅ⲡⲉⲛϫⲟⲉⲓⲥ ⲓⲥ ⲡⲉⲭⲥ ⲁⲩⲕⲁⲁϥ ϩⲛⲟⲩⲙ̅ϩⲁⲁⲩ ⲁⲩϩⲱⲡ ⲙⲙⲟϥ ϣⲁⲛⲧⲉϥⲧⲱⲟⲩⲛ ϩⲙⲡⲙⲉϩϣⲟⲙⲛⲧ ⲛϩⲟⲟⲩ. ϥ..ⲫ̀ ⲉϥϫⲱ ⲇⲉ ⲛⲛⲁⲓ ⲛϭⲓⲡⲙⲁⲕⲁⲣⲓⲟⲥ ⲉϥⲟⲩⲱϣ ⲉⲧⲣⲉⲩϩⲱⲡ ⲉⲡⲕⲁϩ ⲙⲡⲥⲱⲙⲁ ⲛⲛⲉⲧⲛⲁⲙⲟⲩ ⲉⲓⲧⲉ ⲇⲓⲕⲁⲓⲟⲥ ⲉⲓⲧⲉ ⲣⲉϥⲣ̅ⲛⲟⲃⲉ . ⲁϣ ⲅⲁⲣⲡⲉ ⲡⲛⲟϭ ⲛϩⲙϩⲁⲗⲛⲉ ϫⲓⲛ ⲙⲙⲟⲛ ⲡⲉⲩϫⲟⲉⲓⲥⲡⲉ. ϩⲁϩ ⲙⲉⲛ ⲁⲩⲥⲱⲧⲙ̅ ⲛⲥⲱϥ ⲁⲩϩⲟⲡⲟⲩ ϩⲙⲡⲕⲁϩ.

91. ⲛⲧⲟϥ ⲇⲉ ⲉⲛⲉϥⲣ̅ϩⲟⲧⲉⲡⲉ ϫⲉⲛⲛⲉⲩⲣⲡⲉϥⲥⲱⲙⲁ ⲛⲧⲉⲓϩⲉ ⲁϥϭⲉⲡⲏ ⲁϥⲥⲩⲙⲁⲛⲉ ⲛⲛⲉⲥⲛⲏⲩ ⲉⲧϩⲓⲡⲧⲟⲟⲩ ⲉⲧϩⲓⲃⲟⲗ ⲁⲩⲱ ⲁϥⲃⲱⲕ ⲉⲡⲧⲟⲟⲩ ⲉⲧϩⲓϩⲟⲩⲛ ⲡⲙⲁ ⲉⲛⲉϥϣⲟⲟⲡ ⲛϩⲏⲧϥ. ⲁⲩⲱ ⲓ̅ⲏ̅ⲥ̅ⲛϭ. ⲡ̅ⲛ̅ⲁ̅ ⲙⲛⲛⲥⲁϩⲉⲛⲕⲟⲩⲓ ⲛϩⲟⲟⲩ ⲁϥϣⲱⲛⲉ. ⲁϥⲙⲟⲩⲧⲉ ⲉⲛⲉⲥⲛⲏⲩ ⲉⲧϩⲁⲧⲏϥ. ⲉⲛⲉⲩⲙⲉϩⲥⲛⲁⲩ ⲇⲉⲡⲉ ⲛⲁⲓ ⲛⲧⲁⲩϭⲱ ⲛⲙⲙⲁϥ ⲛⲛⲁⲁⲙⲏⲧⲉ ⲛⲣⲟⲙⲡⲉ ⲉⲩϣⲙ̅ϣⲉ ⲙⲙⲟϥ ϫⲉⲁϥⲣϩⲗⲗⲟ. ⲡⲉϫⲁϥ ⲛⲁⲩ ϫⲉⲁⲛⲟⲕ ⲙⲉⲛ ⲉⲓⲛⲁⲃⲱⲕ ϩⲓⲧⲉϩⲓⲏ ⲛⲛⲁⲉⲓⲟⲧⲉ ⲕⲁⲧⲁⲑⲉ ⲉⲧⲥⲏϩ. ϯⲛⲁⲩ ⲅⲁⲣ ⲉⲣⲟⲓ ⲉⲣⲉⲡϫⲟⲉⲓⲥ ⲕⲁⲗⲉⲓ ⲙⲙⲟⲓ ⲧⲁⲃⲱⲕ ϣⲁⲣⲟϥ . ⲛⲧⲱⲧⲛ ⲇⲉ ⲛⲏⲫⲉ ⲙⲙⲱⲧⲛ ⲁⲩⲱ ⲙⲡⲣ̅ⲥⲱⲣⲙ̅ ⲛⲧⲉⲧⲛⲁⲥⲕⲏⲥⲓⲥ ⲉⲧⲉⲧⲛϣⲟⲟⲡ ⲛϩⲏⲧⲥ ⲙⲡⲉⲓⲛⲟϭ ⲛⲟⲩⲟⲉⲓϣ. ⲁⲗⲗⲁ ϣⲱⲡⲉ ⲛⲑⲉ ⲛⲧⲁⲧⲉⲧⲛⲁⲣⲭⲉⲓ ⲉⲣⲟⲥ ⲛ̅ⲧⲉⲧⲛ̅ϩⲁⲣⲉϩ ⲉⲡⲉⲧⲛⲟⲩⲣⲟⲧ. ⲉⲧⲉⲧⲛⲥⲟⲟⲩⲛ ⲛⲛ̅ⲕⲟⲧⲥ̅ ⲛⲛⲇⲁⲓⲙⲱⲛ ⲉⲑⲟⲟⲩ. ⲁⲧⲉⲧⲛⲛⲁⲩ ⲙⲉⲛ ⲉⲣⲟⲟⲩ ϫⲉϩⲉⲛϭⲱⲃⲛⲉ . ⲙ̅ⲡⲣⲣ̅ϩⲟⲧⲉ ϩⲏⲧⲟⲩ ⲁⲗⲗⲁ ⲕⲁⲡⲉⲭⲥ ⲛϩⲏⲧⲧⲏⲩⲧⲛ̅ ⲛⲟⲩⲟⲉⲓϣ ⲛⲓⲙ ⲛ̅ⲧⲉⲧⲛⲧⲁϫⲣⲉⲧⲏⲩⲧⲛ̅ ⲉϩⲣⲁⲓ ⲉϫⲱϥ ⲉⲧⲉⲧⲛϣⲉϣⲥϯⲛⲟⲩϥⲉ ⲉⲃⲟⲗ ϩⲙⲡⲉⲭⲥ . ϩⲱⲥ ⲉⲧⲉⲧⲛⲛⲁⲙⲟⲩ ⲙⲙⲏⲛⲉ ⲛⲧⲉⲧⲛ̅ⲣ̅ⲡⲙⲉⲉⲩⲉ ⲛⲛⲉⲛⲧⲁⲧⲉⲧⲛⲥⲟⲧⲙⲟⲩ ⲛ̅ⲧⲟⲟⲧ. ⲙⲡⲣ̅ ϥ.:ⲣ ⲧⲣⲉⲗⲁⲁⲩ ⲛ̅ⲕⲟⲓⲛⲱⲛⲓⲁ ϣⲱⲡⲉ ⲛⲏⲧⲛ̅ ⲉϩⲟⲩⲛ ⲉⲛⲉⲓⲥⲭⲓⲥⲙⲁⲧⲓⲕⲟⲥ ⲙⲙⲉⲗⲓⲧⲓⲁⲛⲟⲥ ⲙⲛⲛⲁⲣⲓⲁⲛⲟⲥ ⲙⲛⲛⲉϩⲁⲓⲣⲉⲧⲓⲕⲟⲥ. ⲧⲉⲧⲛⲥⲟⲟⲩⲛ ϫⲉⲁⲓⲥⲁϩⲱⲱⲧ ⲉⲃⲟⲗ ⲙⲙⲟⲟⲩ ⲛⲛⲁϣ ⲛ̅ϩⲉ ⲉⲧⲃⲉⲧⲉⲩϩⲁⲓⲣⲉⲥⲓⲥ ⲉⲑⲟⲟⲩ ⲙⲛⲧⲉⲩⲙⲛⲧⲣⲉϥⲙⲓϣⲉ ⲙⲛⲡⲉⲭⲥ. ⲥⲡⲟⲩⲇⲁⲍⲉ ϩⲱⲱⲧⲧⲏⲩⲧⲛ̅ ⲛⲧⲉⲧⲛ̅ⲣⲁⲡⲁⲧⲟⲟⲧⲧⲏⲩⲧⲛ̅ ϩⲛϩⲱⲃ ⲛⲓⲙ ⲉⲧⲱϭⲉ ⲙⲙⲱⲧⲛ̅ ⲉⲡⲉⲭⲥ ⲡϫⲟⲉⲓⲥ ⲙⲛⲛⲥⲱⲥ ⲛⲉϥⲡⲉⲧⲟⲩⲁⲁⲃ ϫⲉⲕⲁⲥ ⲉⲧⲉⲧⲛ̅ϣⲁⲛⲙⲟⲩ ⲉⲩⲉϣⲉⲡⲧⲏⲩⲧⲛ ⲉϩⲟⲩⲛ ⲉⲛⲉⲥⲕⲩⲛⲏ ⲛ̅ϣⲁⲉⲛⲉϩ ϩⲱⲥ ϣⲃⲏⲣ ϩⲓⲣⲙⲛ̅ⲥⲟⲟⲩⲛ. ⲕⲁⲛⲁⲓ ϩⲙⲡⲉⲧⲛϩⲏⲧ ⲛⲧⲉⲧⲛ̅ⲙⲉⲉⲩⲉ ⲉⲣⲟⲟⲩ ⲁⲩⲱ ⲉϣϫⲉ ⲧⲉⲧⲛ̅ϥⲓⲣⲟⲟⲩϣ ϩⲁⲣⲟⲓ ⲁⲩⲱ ⲧⲉⲧⲛ̅ⲉⲓⲣⲉ ⲙ̅ⲡⲁⲙⲉⲉⲩⲉ ϩⲱⲥ ⲉⲓⲱⲧ ⲙⲡⲣ̅ⲕⲁⲁⲩ ⲉϫⲓ ⲙⲡⲁⲥⲱⲙⲁ ⲉⲕⲏⲙⲉ ⲙⲏⲡⲱⲥ ⲛⲥⲉⲕⲁⲁϥ ϩⲛⲛⲉⲩⲏⲓ. ⲉⲧⲃⲉⲡⲉⲓϩⲱⲃ ⲅⲁⲣ ⲛⲧⲁⲓⲉⲓ ⲉϩⲟⲩⲛ ⲉⲡⲉⲓⲧⲟⲟⲩ. ⲧⲉⲧⲛⲥⲟⲟⲩⲛ ϫⲉⲛⲟⲩⲟⲉⲓϣ ⲛⲓⲙ ϯϫⲡⲓⲟ ⲛⲛⲉⲧⲉⲓⲣⲉ ⲙⲡⲁⲓ ⲁⲩⲱ ϯⲡⲁⲣⲁⲅⲅⲓⲗⲉ ⲛⲁⲩ ⲉⲧⲣⲉⲩⲗⲟ ϩⲛⲧⲉⲓⲥⲩⲛⲏⲑⲓⲁ ⲛⲧⲉⲓⲙⲓⲛⲉ. ⲛⲧⲱⲧⲛ ⲇⲉ ⲧⲱⲙⲥ̅ ⲙ̅ⲡⲁⲥⲱⲙⲁⲣⲟ ⲉⲡⲕⲁϩ ⲁⲩⲱ ϩⲁⲣⲉϩ ⲉⲛⲁϣⲁϫⲉ ϫⲉ ⲡ̅ⲛ̅ⲁ̅ⲉⲥ.ⲡ̅ⲛ̅ⲁ̅ ⲕⲁⲥ ⲛⲛⲉⲗⲁⲁⲩ ⲉⲓⲙⲉ ⲉⲡⲙⲁ ⲉⲧⲉⲣⲉⲡⲁⲥⲱⲙⲁ ⲛϩⲏⲧϥ̅ ⲉⲓⲉⲙⲏϯ ⲛⲧⲱⲧⲛ ⲙⲙⲁⲧⲉ. ⲁⲛⲟⲕ ⲅⲁⲣ ϯⲛⲁϫⲓ ⲙⲙⲟϥ ϩⲙⲡⲉϩⲟⲟⲩ ⲙⲡϫⲟⲉⲓⲥ ⲭ ⲉϥⲟ ⲛⲁⲧⲧⲁⲕⲟ. ⲛⲁϩⲟⲉⲓⲧⲉ ⲓ̅ⲏ̅ⲥ̅ⲛϭ.ⲡ̅ⲛ̅ⲁ̅ ⲇⲉ ⲡⲟϣⲟⲩ ϯ ⲛⲁⲑⲁⲛⲁⲥⲓⲟⲥ ⲛⲧⲁϣⲧⲏⲛ ⲛϣⲁⲁⲣ ⲙⲛⲡⲁⲡⲣⲏϣ ⲉⲧⲡⲟⲣϣ̅ ϩⲁⲣⲟⲓ. ⲛⲧⲟϥ ⲅⲁⲣ ⲡⲉⲛⲧⲁϥⲧⲁⲁϥ ⲛⲁⲓ ⲉϥⲟ ⲛϣⲁⲓ. ⲉⲓⲥϩⲏⲏⲧⲉ ⲁϥⲣⲡⲗϭⲉ. ⲁⲩⲱ ⲥⲁⲣⲁⲡⲓⲟⲛ ⲡⲉⲡⲓⲥⲕⲟⲡⲟⲥ ⲛⲧⲉⲧⲛ̅ϯ ⲛⲁϥ ⲛⲧⲁⲙⲉ ϥ.:ⲫ ⲗⲱⲧⲏ . ⲛ̅ⲧⲱⲧⲛ̅ ϩⲱⲧⲧⲏⲩⲧⲛ̅ ⲕⲱ ⲛⲏⲧⲛ̅ ⲛⲧⲁϣⲧⲏⲛ ⲛϥⲱ ⲁⲩⲱ ϣⲱⲡⲉ ⲉⲧⲉⲧⲛ̅ⲟⲩⲟϫ ⲱ ⲛⲁϣⲏⲣⲉ . ⲁⲛⲧⲱⲛⲓⲟⲥ ⲅⲁⲣ ⲉϥⲛⲁⲡⲱⲱⲛⲉ ⲉⲃⲟⲗ ϩⲙⲡⲉⲓⲃⲓⲟⲥ ⲁⲩⲱ ⲛϥ̅ϣⲟⲟⲡ ⲛⲙⲙⲏⲧⲛ ⲁⲛ ϫⲓⲛⲧⲉⲛⲟⲩ.

92. ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲁⲩϯⲡⲉⲓ ⲉⲣⲱϥ ⲧⲏⲣⲟⲩ ⲁⲩⲱ ⲁϥⲧⲁⲗⲉⲛⲉϥⲟⲩⲉⲣⲏⲧⲉ ⲉϫⲙ̅ⲡⲙⲁⲛⲛ̅ⲕⲟⲧⲕ ⲁϥⲛⲁⲩ ⲉⲛⲉⲛⲧⲁⲩⲉⲓ ⲛⲥⲱϥ ⲛⲑⲉ ⲛϩⲉⲛϣⲃⲉⲉⲣ ⲁϥⲣⲁϣⲉ ⲛⲙⲙⲁⲩ. ⲛⲉⲣⲉⲡⲉⲩϩⲟ ⲅⲁⲣ ⲣⲟⲟⲩⲧ ⲁⲩⲱ ⲁⲩⲛⲁⲩ ⲉⲣⲟϥ ⲉϥⲧⲉⲗⲏⲗ ⲉϥⲛⲁⲃⲱⲕ ϣⲁⲡϫⲟⲉⲓⲥ. ⲁⲩⲱ ⲛⲧⲉⲓϩⲉ ⲁϥϯ ⲙⲡⲉϥⲡⲛⲁ ⲉⲛⲉϭⲓϫ ⲙⲡⲛⲟⲩⲧⲉ ⲁϥⲃⲱⲕ ϩⲁϩⲧⲛ̅ⲛⲉϥⲉⲓⲟⲧⲉ. ⲛⲉⲥⲛⲏⲩ ⲇⲉ ⲕⲁⲧⲁⲑⲉ ⲛ̅ⲧⲁϥϩⲱⲛ ⲉⲧⲟⲟⲧⲟⲩ ⲁⲩⲕⲱⲱⲥ ⲙⲡⲉϥⲥⲱⲙⲁ ⲁⲩϩⲟⲡϥ ϩⲙⲡⲕⲁϩ ⲁⲩⲱ ⲙⲛⲗⲁⲁⲩ ⲥⲟⲟⲩⲛ ⲙⲙⲟϥ ϣⲁⲉϩⲣⲁⲓ ⲉⲧⲉⲛⲟⲩ ϫⲉⲉϥⲧⲱⲙⲥ̅ ⲧⲱⲛ ⲉⲓⲉⲙⲏⲧⲓ ⲛⲉϥⲙⲁⲑⲏⲧⲏⲥ ⲙⲁⲩⲁⲁⲩ. ⲡⲉⲛⲧⲁϥϫⲓ ⲇⲉ ⲛⲧⲃⲁⲗⲟⲧ ⲙⲡⲙⲁⲕⲁⲣⲓⲟⲥ ⲁⲛⲧⲱⲛⲓⲟⲥ ⲙⲛⲡⲉϩⲃⲟⲟⲥ ⲛⲧⲁϥϩⲓⲧⲉ ⲙⲙⲟϥ ⲁϥϩⲁⲣⲉϩ ⲉⲣⲟⲟⲩ ⲛⲁϥ ⲛⲑⲉ ⲛⲛⲟⲩⲛⲟϭ ⲛⲭⲣⲏⲙⲁ. ⲕⲁⲓⲅⲁⲣ ⲉϥⲛⲁⲩ ⲉⲣⲟⲟⲩ ⲉϥⲟ ⲛⲑⲉ ⲉϥⲛⲁⲩ ⲉⲁⲛⲧⲱⲛⲓⲟⲥ. ⲉϥϣⲁⲛϭⲟⲟⲗⲉϥ ⲙⲙⲟⲟⲩ ⲉϥⲟ ⲛⲑⲉ ⲙⲡⲉⲧϥⲓ ⲉϩⲣⲁⲓ ϩⲁⲛⲉϥⲥⲃⲟⲟⲩⲉ ϩⲛⲟⲩⲣⲁϣⲉ.

93. ⲧⲁⲓϭⲉ ⲟⲩⲛⲧⲉ ⲑⲁⲏ ⲛⲛⲁⲛⲧⲱⲛⲓⲟⲥ ϩⲙⲡⲥⲱⲙⲁ ⲁⲩⲱ ⲧⲁⲓⲧⲉ ⲑⲁⲏ ⲛⲧⲉϥⲁⲥⲕⲏⲥⲓⲥ. ⲁⲩⲱ ⲕⲁⲛ ⲉϣϫⲉ ⲛⲁⲓ ϩⲉⲛⲕⲟⲩⲓⲛⲉ ⲛⲛⲁϩⲣⲛ̅ⲛⲁⲣⲉⲧⲏ ⲙⲡⲣⲱⲙⲉ ⲉⲧⲙ̅ⲙⲁⲩ ⲛⲧⲱⲧⲛ̅ ϩⲱⲱⲧⲧⲏⲩⲧⲛ ⲙⲉⲉⲩⲉ ⲉⲃⲟⲗ ⲉⲛⲁⲓ ϫⲉⲟⲩⲁϣ ϥ.:ⲣ ⲙⲙⲓⲛⲉⲡⲉ ⲁⲛⲧⲱⲛⲓⲟⲥ ⲡⲣⲱⲙⲉ ⲙⲡⲛⲟⲩⲧⲉ ⲡ̅ⲛ̅ⲁ̅ⲉⲥ.ⲭ ̀ⲡⲁⲓ ϫⲓⲛⲉⲧⲉϥⲙⲛⲧⲕⲟⲩⲓ ϣⲁⲧⲉϥⲙⲛⲧϩⲗⲗⲟ ⲉϥϩⲁⲣⲉϩ ⲉⲧⲁⲥⲕⲏⲥⲓⲥ ⲛⲛⲟⲩⲟⲉⲓϣ ⲛⲓⲙ. ⲙⲡⲉⲡⲟⲩⲱϣ ⲛⲛϭⲓⲛⲟⲩⲱⲙ ⲉⲛⲁϣⲱⲟⲩ ϫⲣⲟ ⲉⲧⲉϥⲙⲛⲧϩⲗⲗⲟ ⲁⲩⲱ ⲙⲡⲉϥϣⲓⲃⲉ ⲙⲡⲉⲥⲭⲏⲙⲁ ⲛⲧⲉϥϩⲃ̅ⲥⲱ ⲉⲧⲃⲉⲧⲙⲛⲧⲁⲧϭⲟⲙ ⲙⲡⲥⲱⲙⲁ. ⲙⲡⲉϥⲉⲓⲱ ⲛⲛⲉϥⲟⲩⲉⲣⲏⲧⲉ ϩⲛⲟⲩⲙⲟⲟⲩ ⲁⲩⲱ ⲁϥϣⲱⲡⲉ ϩⲛⲛⲁⲓ ⲧⲏⲣⲟⲩ ⲙⲡⲉϥⲗⲁⲃⲏ ⲧⲁϩⲟϥ. ⲕⲁⲓⲅⲁⲣ ⲛⲉⲣⲉⲛⲉϥⲃⲁⲗ ⲧⲟⲩϫⲏⲩ ⲛⲁϥ ⲙⲡⲉⲗⲁⲁⲩ ⲛϫⲃⲓⲛ ⲧⲁϩⲟⲟⲩ ⲉϥⲛⲁⲩ ⲉⲃⲟⲗ ⲕⲁⲗⲱⲥ. ⲁⲩⲱ ⲙ̅ⲡⲉⲟⲩⲟⲛ ϩⲛⲛⲉϥⲟⲃϩⲉ ϩⲉ ⲉⲃⲟⲗ ⲁⲗⲗⲁ ⲛⲧⲁⲩϩⲓⲧⲉ ⲙⲙⲁⲧⲉ ϩⲓⲧⲛⲧⲛⲟϭ ⲛϩⲏⲗⲏⲕⲓⲁ ⲛⲧⲉϥⲙⲛⲧϩⲗⲗⲟ. ⲉϥⲧⲟⲩϫⲏⲩ ⲡ̅ⲛ̅ⲁ̅ⲉⲥ.ⲡ̅ⲛ̅ⲁ̅ ⲟⲛ ϩⲛⲛϥ̅ⲟⲩⲉⲣⲏⲧⲉ ⲙⲛⲛⲉϥϭⲓϫ. ⲛⲉϥⲟⲩⲱⲛϩ ⲇⲉ ⲉⲃⲟⲗⲡⲉ ⲉⲛⲉⲥⲱϥ ⲁⲩⲱ ⲉϥⲡⲣⲓⲱⲟⲩ ⲉϩⲟⲩⲉ ⲉⲛⲁⲓ ⲉⲧⲟⲩⲱⲙ ϩⲛⲛ̅ⲛϭⲓⲛⲟⲩⲱⲙ ⲉⲛⲁϣⲱⲟⲩ ⲙⲛⲛⲉⲧϫⲱⲕⲙ̅ ϩⲛⲛⲉⲥⲓⲟⲟⲩⲛ ⲁⲩⲱ ⲉⲩϯ ϩⲓⲱⲟⲩ ⲛ̅ϩⲉⲛϩⲃ̅ⲥⲱ ⲉⲛⲉⲥⲱⲟⲩ ⲁⲩⲱ ⲛⲉϥⲣⲟⲟⲩⲧⲡⲉ ϩⲛⲧⲉϥϭⲟⲙ. ⲟⲩⲙⲁⲉⲓⲛ ⲛⲁⲛⲡⲉ ⲡⲁⲓ ⲛⲧⲉⲧⲉϥⲯⲩⲭⲏ ⲙⲛⲧⲉϥⲁⲣⲉⲧⲏ ⲉϥⲟ ⲙⲙⲁⲓⲛⲟⲩⲧⲉ ϫⲉⲁϥϣⲱⲡⲉ ⲉϥⲟ ⲛⲥⲟⲉⲓⲧ ϩⲙ̅ⲙⲁ ⲛⲓⲙ ⲁⲩⲱ ⲁⲩⲣ̅ϣⲡⲏⲣⲉ ⲙⲙⲟϥ ⲛϭⲓⲟⲩⲟⲛ ⲛⲓⲙ ⲉⲧⲛⲁⲩ ⲉⲣⲟϥ ⲁⲩⲱ ⲛⲉⲩⲙⲉ ⲙⲙⲟϥ ⲛϭⲓⲛⲉⲧⲙ̅ⲡ̅ⲟⲩⲛⲁⲩ ⲉⲣⲟϥ. ⲛⲧⲁⲩⲥⲟⲩⲛ̅ⲁⲛⲧⲱⲛⲓⲟⲥ ⲁⲛ ⲉⲧⲃⲉϩⲉⲛϫⲱⲱⲙⲉ ⲉⲁϥⲥⲁϩⲟⲩ ⲉⲩⲙⲉϩ ⲛⲥⲩⲛⲧⲁⲅⲙⲁ ⲟⲩⲇⲉ ϩⲛⲟⲩⲥⲟⲫⲓⲁ ⲁⲛ ⲉⲥϩⲓⲃⲟⲗ ⲁⲗⲗⲁ ⲉⲧⲃⲉⲧⲉϥⲙⲛⲧⲣⲉϥ ϥ.:ⲫ ϣⲙ̅ϣⲉⲛⲟⲩⲧⲉ ⲙⲙⲁⲧⲉ. ⲛⲁϣ ⲅⲁⲣ ⲛϩⲉ ⲁⲡⲉϥⲥⲟⲉⲓⲧ ⲃⲱⲕ ϣⲁⲧⲅⲁⲗⲓⲗⲁⲓⲁ ⲁⲩⲱ ⲡⲁⲓ ⲁϥⲃⲱⲕ ϣⲁⲧⲉⲥⲡⲁⲛⲓⲁ ⲁϥϩⲙⲟⲟⲥ ϩⲁⲟⲩⲧⲟⲟⲩ ⲉϥϩⲏⲡ. ⲛⲧⲁⲩⲥⲱⲧⲙϭⲉ ⲉⲡⲉϥⲣⲁⲛ ⲧⲱⲛ ϩⲛϩⲣⲱⲙⲏ ⲙⲛⲧⲁⲫⲣⲓⲕⲏ. ⲉⲓⲉⲙⲏϯ ⲡⲛⲟⲩⲧⲉ ⲉⲧⲟⲩⲉϩⲥⲁϩⲛⲉ ⲉⲧⲣⲉⲩⲥⲟⲩⲛ̅ⲛⲉⲧⲉⲛⲟⲩϥⲛⲉ ϩⲙⲙⲁ ⲛⲓⲙ ⲡⲉⲛⲧⲁϥⲉⲣⲏⲧ ⲛⲛⲁⲛⲧⲱⲛⲓⲟⲥ ϫⲓⲛⲛϣⲟⲣⲡ̅. ⲕⲁⲓⲅⲁⲣ ⲛⲧⲟϥ ⲉϥϣⲁⲛⲉⲓⲣⲉ ϩⲛⲟⲩϩⲱⲡ ⲛϥⲧⲙ̅ⲟⲩⲟⲛϩⲟⲩ ⲉⲃⲟⲗ ϣⲁⲣⲉⲡϫⲟⲉⲓⲥ ⲟⲩⲟⲛϩⲟⲩ ⲉⲃⲟⲗ ⲛⲟⲩⲟⲛ ⲛⲓⲙ ⲛⲑⲉ ⲛⲛⲟⲩϩⲏⲃⲥ̅ ϫⲉⲕⲁⲥ ⲛⲉⲧⲛⲁⲥⲱⲧⲙ ⲉⲩⲉϫⲓ ϩⲱⲟⲩ ⲛⲛⲟⲩⲕⲱϩ ⲉϩⲟⲩⲛ ⲉⲧⲁⲣⲉⲧⲏ.

94. ⲛⲁⲓϭⲉ ⲧⲉⲛⲟⲩ ⲟϣⲟⲩ ⲉⲛⲉⲥⲛⲏⲩ ϫⲉⲕⲁⲥ ⲉⲩⲉⲓⲙⲉ ϫⲉϣϣⲉ ⲉⲡⲃⲓⲟⲥ ⲛⲛⲙⲙⲟⲛⲁⲭⲟⲥ ⲉϣⲱⲡⲉ ⲛⲛⲁϣ ⲛ̅ϩⲉ ⲁⲩⲱ ⲛⲥⲉⲧⲱⲧ ⲛϩⲏⲧ ⲉϫⲙ̅ⲡⲉⲛϫⲟⲉⲓⲥ ⲓⲥ ⲡⲉⲭⲥ ⲡⲉⲧϯⲉⲟⲟⲩ ⲛⲛⲉⲧϯⲉⲟⲟⲩ ⲛⲁϥ ⲁⲩⲱ ⲉⲧⲟ ⲛϩⲙϩⲁⲗ ⲛⲁϥ ϣⲁⲃⲟⲗ Ⲭ........, ⲛϥⲁⲁⲩ ⲛⲥⲟⲉⲓⲧ ⲉⲧⲃⲉⲧⲛⲟϥⲣⲉ ⲛϩⲉⲛⲕⲟⲟⲩⲉ. ⲉϣⲱⲡⲉ ⲇⲉ ⲟⲛ ⲧⲉⲭⲣⲓⲁⲧⲉ ⲟϣⲟⲩ ⲉⲛⲕⲉϩⲉⲑⲛⲟⲥ ϫⲉⲕⲁⲥ ϩⲱⲟⲩ ⲉⲩⲉϫⲓ ⲛⲟⲩⲥⲟⲟⲩⲛ ϫⲉⲟⲩ ⲙⲟⲛⲟⲛ ⲡⲉⲛϫⲟⲉⲓⲥ ⲓⲥ̅ ⲡⲉⲭⲥ ⲟⲩⲛⲟⲩⲧⲉⲡⲉ ⲁⲗⲗⲁ ⲡϣⲏⲣⲉ ⲙⲡⲛⲟⲩⲧⲉⲡⲉ ⲁⲩⲱ ⲛⲉⲧϣⲙϣⲉ ⲛⲁϥ ϩⲙⲡⲉⲩϩⲏⲧ ⲧⲏⲣϥ ϣⲁⲩⲡⲱⲧ ⲛⲥⲁⲛⲇⲁⲓⲙⲱⲛ ⲛⲉⲧⲉⲣⲉⲛⲉϩⲉⲑⲛⲟⲥ ⲙⲉⲉⲩⲉ ⲉⲣⲟⲟⲩ ϫⲉϩⲛⲛⲟⲩⲧⲉⲛⲉ. ⲛⲁⲓϭⲉ ⲛⲉⲭⲣⲓⲥϯⲁⲛⲟⲥ ϫⲡⲓⲟ ⲙⲙⲟⲟⲩ ϫⲉⲟⲩ ⲙⲟⲛⲟⲛ ϫ̀ⲉ ̀ⲛϩⲉⲛⲛⲟⲩⲧⲉ ⲁⲛⲛⲉ ⲁⲗⲗⲁ ⲥⲉϩⲱⲙ ⲉϩⲣⲁⲓ ⲉϫⲱⲟⲩ ⲥⲉⲡⲏⲧ ⲛⲥⲱⲟⲩ ϩⲱⲥ ϥ.:ⲣ ⲡⲗⲁⲛⲟⲥ ⲁⲩⲱ ⲛ̅ⲣⲉϥⲧⲁⲕⲉⲣⲱⲙⲉ. ⲛⲧⲱⲧⲛϭⲉ ⲱ ⲛⲉⲥⲛⲏⲩ ⲟⲩϫⲁⲓ ϩⲛⲧϭⲟⲙ ⲛⲧⲉⲧⲣⲓⲁⲥ ⲉⲧⲟⲩⲁⲁⲃ. ϩⲁⲙⲏⲛ.

---