ⲂⲀⲤⲒⲖⲒⲀ : ⲦϢⲞⲢⲠⲈ Ⲙ̅ⲘⲚ̅ⲦⲢ̅ⲢⲞ Ⲛ̅ⲤⲀⲞⲨⲖ
Ⲛⲉⲩⲉⲛⲟⲩⲣⲱⲙⲉ ⲇⲉ ⲉⲃⲟⲗ ϩⲛ̅Ⲁⲣⲓⲙⲁⲑⲉⲓⲙ . ⲉⲃⲟⲗ ϩⲛ̅Ⲥⲓⲫⲁ . ⲡⲧⲟⲟⲩ ⲛ̅Ⲉⲫⲣⲁⲓⲙ . ⲉⲡⲉϥⲣⲁⲛ ⲡⲉ Ⲉⲗⲅⲁⲛⲁ . ⲡϣⲏⲣⲉ ⲛ̅Ⲓⲉⲣⲉⲙⲓⲁ . ⲡϣⲏⲣⲉ ⲛ̅Ϩⲏⲗⲓⲁⲥ . ⲡϣⲏⲣⲉ ⲛ̅Ⲑⲟⲕⲉ . ϩⲛ̅Ⲁⲥⲓⲃ ⲡⲧⲟⲟⲩ ⲛ̅Ⲉⲫⲣⲁⲓⲙ. ⲃ̅. Ⲁⲩⲱ ⲡⲁⲓ ⲛⲉⲟⲩⲉⲛⲧⲁϥ ⲙ̅ⲙⲁⲩ ⲛ̅ⲥϩⲓⲙⲉ ⲥⲛ̅ⲧⲉ . ⲡⲣⲁⲛ ⲛ̅ⲧⲟⲩⲉⲓ ⲙ̅ⲙⲟⲟⲩ ⲡⲉ Ⲁⲛⲛⲁ. Ⲁⲩⲱ ⲡⲣⲁⲛ ⲛ̅ⲧⲙⲉϩⲥⲛ̅ⲧⲉ ⲡⲉ Ⲫⲉⲛⲁⲛⲛⲁ . Ⲫⲉⲛⲁⲛⲛⲁ ⲇⲉ ⲛⲉⲟⲩⲉⲛ̅ⲧⲥ̅ϣⲏⲣⲉ ⲙ̅ⲙⲁⲩ. Ⲁⲛⲛⲁ ⲇⲉ ⲛ̅ⲧⲟⲥ ⲛⲉⲙⲛ̅ⲧⲥ̅ϣⲏⲣⲉ ⲙ̅ⲙⲁⲩ. ⲅ̅. Ⲡⲣⲱⲙⲉ ⲇⲉ Ⲉⲗⲕⲁⲛⲁ . ⲉⲛⲉϣⲁϥⲉⲓ ⲉϩⲣⲁⲓ ϩⲛ̅ⲧⲉϥⲡⲟⲗⲓⲥ Ⲁⲣⲙⲁⲑⲉⲓⲙ ⲕⲁⲧⲁϩⲟⲟⲩ ϩⲟⲟⲩ . ⲉⲟⲩⲱϣⲧ̅. ⲁⲩⲱ ⲉⲧⲁⲗⲉⲑⲩⲥⲓⲁ ⲉϩⲣⲁⲓ ⲙ̅ⲙⲁϩ ⲙ̅Ⲡϫⲟⲉⲓⲥ ⲡⲛⲟⲩⲧⲉ Ⲥⲁⲃⲃⲁⲱⲑ ϩⲛ̅Ⲥⲏⲗⲱ. Ⲁⲩⲱ Ϩⲏⲗⲓ ⲡⲟⲩⲏⲏⲃ ⲛⲉϥϩⲙ̅ⲡⲙⲁ ⲉⲧⲙ̅ⲙⲁⲩⲙⲛ̅ⲡⲉϥϣⲏⲣⲉ ⲥⲛⲁⲩ. Ⲟⲫⲏⲛ ⲙⲛ̅Ⲫⲓⲛⲉⲉⲥ . ⲉⲩⲟ ⲛ̅ⲟⲩⲏⲏⲃ ⲙ̅Ⲡϫⲟⲉⲓⲥ. ⲇ̅. Ⲡⲧⲱϣ ⲇⲉ ⲙ̅ⲡⲉϩⲟⲟⲩ ⲛ̅ⲧⲉⲣⲉϥϣⲱⲡⲉ . Ⲉⲗⲅⲁⲛⲁ ⲁϥϣⲱⲱⲧ ⲛ̅ⲧⲉϥⲑⲩⲥⲓⲁ ⲁϥϯ ⲛ̅ϩⲉⲛⲙⲉⲣⲓⲥ ⲙ̅Ⲫⲉⲛⲁⲛⲛⲁ ⲧⲉϥⲥϩⲓⲙⲉ . ⲙⲛ̅ⲛⲉϥϣⲏⲣⲉ ⲧⲏⲣⲟⲩ . ⲙⲛ̅ⲛⲉϥϣⲉⲉⲣⲉ. Ⲁⲛⲛⲁ ⲇⲉ ϩⲱⲱⲥ ⲁϥϯ ⲛⲁⲥ ⲛ̅ⲟⲩⲙⲉⲣⲓⲥ ⲛ̅ⲟⲩⲱⲧ ⲕⲁⲧⲁⲡⲉⲥϩⲟ . ϫⲉ ⲛⲉⲙⲛ̅ⲧⲥ̅ϣⲏⲣⲉ ⲙ̅ⲙⲁⲩ. Ⲉⲗⲅⲁⲛⲁ ⲇⲉ ⲛⲉϥⲙⲉ ⲛ̅Ⲁⲛⲛⲁ . ⲉϩⲟⲩⲉⲪⲉⲛⲁⲛⲛⲁ. Ⲁⲩⲱ Ⲡϫⲟⲉⲓⲥ ⲁϥϣⲱⲧⲙ̅ ⲉⲣⲉⲙ̅ⲡⲧⲱϣ ⲛ̅ⲧⲉⲥⲙⲏⲧⲣⲁ. Ⲋ. Ⲉⲃⲟⲗϫⲉ ⲛ̅ⲧⲟϥ Ⲡϫⲟⲉⲓⲥ ⲙ̅ⲡⲉϥϯϣⲏⲣⲉ ⲛⲁⲥ. Ⲕⲁⲧⲁⲡⲧⲱϣ ⲛ̅ⲧⲉⲥⲑⲗⲓⲯⲓⲥ . ⲁⲩⲱ ⲕⲁⲧⲁⲡⲉⲥⲟⲩⲱⲗⲥ̅ ⲛ̅ϩⲏⲧ ⲉⲧⲛⲙ̅ⲙⲁⲥ ϩⲛ̅ⲧⲉⲥⲑⲗⲓⲯⲓⲥ . Ⲁⲩⲱ ⲛⲉⲥⲑⲗⲓⲃⲉ ⲛⲉⲥⲟⲩⲱⲗⲥ̅ ⲛ̅ϩⲏⲧ ⲉⲧⲃⲉⲡⲁⲓ ⲉⲃⲟⲗϫⲉ ⲁⲠϫⲟⲉⲓⲥ ϣⲱⲧⲙ̅ . ⲉⲣⲉⲙⲡⲕⲱⲧⲉ ⲛ̅ⲧⲉⲥⲙⲏⲧⲣⲁ . ⲉⲧⲉⲙϯϣⲏⲣⲉ ⲛⲁⲥ. ⲍ̅. Ⲧⲁⲓ ⲅⲁⲣ ⲧⲉ ⲑⲉ ⲉⲛⲉⲥⲉⲓⲣⲉ ⲙ̅ⲙⲟⲥ ⲧⲉⲣⲟⲙⲡⲉ ϩⲙ̅ⲡⲧⲣⲉⲥⲃⲱⲕ ⲉϩⲣⲁⲓ ⲉⲟⲩⲱⲙ. ⲏ̅. Ⲉⲗⲕⲁⲛⲁ ⲇⲉ ⲡⲉⲥϩⲁⲓ ⲡⲉϫⲁϥ ⲛⲁⲥ . ϫⲉ Ⲁⲛⲛⲁ. Ⲛ̅ⲧⲟⲥ ⲇⲉ ⲡⲉϫⲁⲥ ⲛⲁϥ . ⲉⲓⲥ ϩⲏⲏⲧⲉ ⲁⲛⲟⲕ Ⲡϫⲟⲉⲓⲥ ϯⲥⲱⲧⲙ̅ ⲉⲣⲟⲕ . Ⲡⲉϫⲁϥ ⲛⲁⲥ ϫⲉ ⲁϩⲣⲟ ϩⲓⲛⲁⲓ ⲧⲉⲣⲓⲙⲉⲑ ⲁⲩⲱ ⲁϩⲣⲟ ⲛ̅ⲧⲉⲟⲩⲱⲙ ⲁⲛ . ⲉⲣⲉⲡⲟⲩϩⲏⲧ ⲙⲟⲕϩ̅ ⲙ̅ⲙⲟ . ⲙⲏ ⲛⲁⲛⲟⲩⲓ ⲁⲛ ⲛⲉ ⲁⲛⲟⲕ ⲉϩⲟⲩⲉⲙⲏⲧ ⲛ̅ϣⲏⲣⲉⲑ ⲑ̅. Ⲁⲩⲱ ⲁⲥⲧⲱⲛⲥ̅ ⲙⲛ̅ⲛ̅ⲥⲁ ⲛⲥ̅ⲟⲩⲱⲙ ϩⲛ̅Ⲥⲏⲗⲱ . ⲁⲥⲁϩⲉⲣⲁⲧⲥ̅ ϩⲓⲑⲏ ⲙ̅Ⲡϫⲟⲉⲓⲥ . Ϩⲏⲗⲓ ⲇⲉ ⲡⲟⲩⲏⲏⲃ ⲛⲉϥϩⲙⲟⲟⲥ ϩⲓϫⲛ̅ⲧⲉⲡⲛⲏ ⲛ̅ⲛⲉⲡⲩⲗⲏ ⲙ̅ⲡⲉⲣⲡⲉ ⲙ̅Ⲡϫⲟⲉⲓⲥ. Ⲁⲩⲱ ⲛ̅ⲧⲟⲥ ⲛⲉⲥⲟⲩⲟⲗⲥ̅ ⲛ̅ϩⲏⲧ ⲉⲙⲁⲧⲉ . ⲉⲁⲥϣⲗⲏⲗ ⲉϩⲣⲁⲓ ⲉⲠϫⲟⲉⲓⲥ ⲉⲥϫⲱ ⲙ̅ⲙⲟⲥ ⲉⲥⲣⲓⲙⲉ. ⲓ̅ⲁ. Ⲁⲩⲱ ⲉⲥⲉⲣⲏⲧ ⲛ̅ⲟⲩⲉⲣⲏⲧ ⲙ̅Ⲡϫⲟⲉⲓⲥ ⲉⲥϫⲱ ⲙ̅ⲙⲟⲥ . ϫⲉ Ⲁⲇⲱⲛⲁⲓ Ⲡϫⲟⲉⲓⲥ Ⲥⲁⲃⲃⲁⲱⲑ ϩⲛ̅ⲟⲩϭⲱϣⲧ ⲉⲕϣⲁⲛϭⲱϣⲧ̅ ⲉϫⲙ̅ⲡⲉⲑⲃ̅ⲃⲓⲟ ⲛ̅ⲧⲉⲕϩⲐⲙϩⲁⲗ. Ⲛⲅ̅ⲉⲣⲡⲁⲙⲉⲉⲩⲉ. Ⲛⲅ̅ϯ ⲛ̅ⲧⲉⲕϩⲙ̅ϩⲁⲗ ⲛ̅ⲟⲩⲥⲡⲉⲣⲙⲁ ⲛ̅ⲣⲱⲙⲉ . ϯⲛⲁⲧⲁⲁϥ ⲛⲁⲕ ⲡⲉ ⲛ̅ⲧⲁⲓⲟ ⲙ̅ⲡⲉⲕⲙ̅ⲧⲟ ⲉⲃⲟⲗ ϣⲁⲡⲉϩⲟⲟⲩ ⲙ̅ⲡⲉϥⲙⲟⲩ ⲁⲩⲱ ⲟⲩⲏⲣⲡ̅ ⲙⲛ̅ⲟⲩⲥⲓⲕⲉⲣⲁ ⲛ̅ⲛⲉϥⲥⲟⲟⲩ . ⲁⲩⲱ ⲛ̅ⲛⲉⲧⲁⲕ ⲃⲱⲕ ⲉϫⲛ̅ⲧⲉϥⲁⲡⲉ. ⲓ̅ⲃ. Ⲁⲥϣⲱⲡⲉ ⲇⲉ ⲛ̅ⲧⲉⲣⲉⲥⲱⲥⲕ̅ ⲉⲥϣⲗⲏⲗ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲉⲓⲥ . Ϩⲏⲗⲓ ⲡⲟⲩⲏⲏⲃ ⲁϥϯⲧⲟⲟⲧϥ̅ ⲉⲣⲉⲛ̅ⲣⲱⲥ. ⲓ̅ⲅ. Ⲛ̅ⲧⲟⲥ ⲇⲉ ⲛⲉⲥϣⲁϫⲉ ϩⲙ̅ⲡⲉⲥϩⲏⲧ ⲁⲩⲱ ⲛⲉⲣⲉⲛⲉⲥⲥⲡⲟⲧⲟⲩ ⲕⲓⲙ . ⲉⲛⲥⲉⲥⲱⲧⲙ̅ ⲁⲛ ⲉϩⲣⲟⲟⲩ ⲛ̅ⲧⲁⲥ . Ϩⲏⲗⲓ ⲇⲉ ⲁϥⲙⲉⲉⲩⲉ ⲉⲣⲟⲥ ϫⲉⲉⲥⲧⲁϩⲉ. ⲓ̅ⲇ. Ⲁⲩⲱ ⲡϣⲏⲣⲉ ⲛ̅Ϩⲏⲗⲓ ⲡⲉϫⲁϥ ⲛⲁⲥ . ϫⲉ ϣⲁⲛⲧⲉⲟⲩ ϣⲱⲡⲉ ⲉⲣⲛⲁϣⲱⲡⲉ ⲉⲣⲧⲁϩⲉⲑ Ⲛⲉϩⲡⲟⲩⲏⲣⲡ̅ ⲉⲃⲟⲗ ⲙ̅ⲙⲟ ⲛ̅ⲧⲉⲗⲟ ⲙ̅ⲙⲁⲩ ϩⲁⲡϩⲟ ⲙ̅Ⲡϫⲟⲉⲓⲥ. Ⲁⲩⲱ ⲁⲀⲛⲛⲁ ⲟⲩⲱϣⲃ̅ ⲡⲉϫⲁⲥ . ϫⲉ ⲛ̅ϯⲧⲁϩⲉ ⲁⲛ ⲡϫⲟⲉⲓⲥ . ⲁⲛⲟⲕ ⲧⲉ ⲧⲉⲥϩⲓⲙⲉ ⲉⲧⲟⲩⲟⲗⲥ̅ ⲛ̅ϩⲏⲧ ⲛ̅ⲑⲉ ⲙ̅ⲡⲟⲟⲩ ⲛ̅ϩⲟⲟⲩ ⲁⲩⲱ ⲙ̅ⲡⲓⲥⲉⲏⲣⲡ̅ ⲟⲩⲇⲉ ⲥⲓⲕⲉⲣⲁ . ⲉⲓⲡⲱϩⲧ̅ ⲛ̅ⲧⲁⲯⲩⲭⲏ ⲙ̅ⲡⲙ̅ⲧⲟ ⲉⲃⲟⲗ ⲙ̅Ⲡϫⲟⲉⲓⲥ. ⲓ̅Ⲋ. Ⲙ̅ⲡⲉⲣⲕⲁⲧⲉⲕϩⲙ̅ϩⲁⲗ ⲛ̅ⲧⲟⲟⲧⲕ̅ ⲛ̅ⲑⲉ ⲛ̅ⲟⲩϣⲉⲉⲣⲉ ⲉⲥⲛⲏϫ ⲉⲃⲟⲗ . ϫⲉ ⲉⲃⲟⲗϩⲙ̅ⲡⲁϣⲁⲓ ⲛ̅ⲛⲁϣⲁϫⲉ ⲁⲓⲱⲥⲕ̅ ϣⲁⲧⲉⲛⲟⲩ. ⲓ̅ⲍ. Ⲁⲩⲱ Ϩⲏⲗⲓ ⲁϥⲟⲩⲱϣⲃ̅ ⲉϥϫⲱ ⲙ̅ⲙⲟⲥ ⲛⲁⲥ . ϫⲉ ⲃⲱⲕ ϩⲛ̅ⲟⲩⲉⲓⲣⲏⲛⲏ ⲡⲛⲟⲩⲧⲉ ⲙ̅ⲡⲒ̅ⲏ̅ⲗ̅ ⲉϥⲉϯ ⲛⲉ ⲙ̅ⲡⲟⲩⲁⲓⲧⲏⲙⲁ ⲧⲏⲣϥ̅ ⲡⲉⲛⲧⲁⲣⲁⲓⲧⲉⲓ ⲙ̅ⲙⲟϥ ⲛ̅ⲧⲟⲟⲧϥ̅. ⲓ̅ⲏ. Ⲡⲉϫⲁⲥ ⲛⲁϥ ϫⲉ ⲁⲧⲉⲕϩⲙ̅ϩⲁⲗ ϭⲉⲛⲭⲁⲣⲓⲥ ⲙ̅ⲡⲙ̅ⲧⲟ ⲉⲃⲟⲗ ⲛ̅ⲛⲉⲕⲃⲁⲗ . Ⲁⲩⲱ ⲧⲉⲥϩⲓⲙⲉ ⲁⲥⲃⲱⲕ ⲉϩⲣⲁⲓ ⲉⲧⲉⲥϩⲓⲏ. Ⲁⲥⲃⲱⲕ ⲉϩⲟⲩⲛ ⲉⲡⲉⲥⲙⲁⲛ̅ϭⲟⲉⲓⲗⲉ ⲁⲥϩⲙⲟⲟⲥ . ⲁⲥⲟⲩⲱⲙ ⲙⲛ̅ⲡⲉⲥϩⲁⲓ ⲁⲩⲱ ⲁⲥⲥⲱ . ⲁⲡⲉⲥϩⲟ ⲗⲟ ⲉϥⲟⲕⲙ̅. ⲓ̅ⲑ. Ⲁⲩⲧⲱⲟⲩⲛ ⲇⲉ ⲉϩⲧⲟⲟⲩⲉ ⲁⲩⲡⲁϩⲧⲟⲩ ⲁⲩⲟⲩⲱϣⲧ̅ ⲙ̅Ⲡϫⲟⲉⲓⲥ ⲁⲩⲙⲟⲟϣⲉ ⲉⲧⲉⲩϩⲓⲏ . Ⲁⲩⲱ Ⲉⲗⲕⲁⲛⲁ ⲁϥⲉⲓ ⲉϩⲣⲁⲓ ⲉⲡⲉϥⲏⲓ Ⲁⲣⲙⲁⲑ̅ⲁⲉⲓⲙ ⲁϥⲥⲟⲩⲉⲛⲀⲛⲛⲁ ⲧⲉϥⲥϩⲓⲙⲉ . ⲁⲩⲱ Ⲡϫⲟⲉⲓⲥ ⲁϥⲉⲣⲡⲉⲥⲙⲉⲉⲩⲉ ⲁⲥⲱ. Ⲁⲥϣⲱⲡⲉ ⲇⲉ ⲙ̅ⲡⲉⲩⲟⲉⲓϣ ⲛ̅ⲛⲉϩⲟⲟⲩ . ⲁⲥϫⲡⲉⲟⲩϣⲏⲣⲉ . ⲁⲥⲙⲟⲩⲧⲉ ⲉⲡⲉϥⲣⲁⲛ ϫⲉ Ⲥⲁⲙⲟⲩⲏⲗ ⲉⲥϫⲱ ⲙ̅ⲙⲟⲥ . ϫⲉ ⲛ̅ⲧⲁⲓⲉⲧⲓ ⲙ̅ⲙⲟϥ ⲛ̅ⲧⲟⲟⲧϥ̅ ⲙ̅Ⲡϫⲟⲉⲓⲥ Ⲥⲁⲃⲁⲱⲑ. ⲕ̅ⲁ̅. Ⲁⲩⲱ ⲡⲣⲱⲙⲉ Ⲉⲗⲅⲁⲛⲁ ⲁϥⲃⲱⲕ ⲉϩⲣⲁⲓ ⲙⲛⲡⲉϥⲏⲓ ⲧⲏⲣϥ̅ ⲉⲤⲏⲗⲱ . ⲉⲧⲣⲉϥϣⲱⲱⲧ ⲛ̅ⲧⲉⲑⲩⲥⲓⲁ ⲛ̅ⲛⲉϩⲟⲟⲩ . ⲁⲩⲱ ⲉⲧⲣⲉϥϯ ⲛ̅ⲛⲉϥⲣⲉⲙⲏⲧ ⲙⲛ̅ ⲛⲉⲣⲉⲙⲏⲧ ⲧⲏⲣⲟⲩ ⲙ̅ⲡⲉϥⲕⲁϩ. ⲕ̅ⲃ̅. Ⲁⲛⲛⲁ ⲇⲉ ⲙ̅ⲡⲉⲥⲃⲱⲕ ⲉϩⲣⲁⲓ ⲛⲙ̅ⲙⲁϥ . ϫⲉ ⲁⲥϫⲟⲟⲥ ⲙ̅ⲡⲉⲥϩⲁⲓ ϫⲉ ϯⲛⲁϭⲱ . ϣⲁⲛⲧⲉⲡϣⲏⲣⲉ ⲕⲟⲩⲓ ϫⲁⲧⲉ . ⲛ̅ⲧⲁⲟⲙϫϥ̅ ϫⲉ ⲉϥⲉⲟⲩⲱⲛϩ̅ ⲉⲃⲟⲗ ϩⲓⲑⲏ ⲙ̅Ⲡϫⲟⲉⲓⲥ . ⲛϥ̅ϭⲱ ⲙ̅ⲡⲙⲁ ⲉⲧⲙ̅ⲙⲁⲩ ⲛ̅ϣⲁⲉⲛⲉϩ. ⲕ̅ⲅ̅. ⲠⲉϫⲉⲈⲗⲅⲁⲛⲁ ⲡⲉⲥϩⲁⲓ ⲛⲁⲥ . ϫⲉ ⲁⲣⲓⲡⲁⲅⲁⲑⲟⲛ ⲛ̅ⲛⲁϩⲣⲉⲛⲛⲟⲩⲃⲁⲗ . ϩⲙⲟⲟⲥ ⲛⲉ ϣⲁⲛⲧⲉⲱⲙϫ̅ ⲙ̅ⲡϣⲏⲣⲉ ⲕⲟⲩⲓ . ⲁⲗⲗⲁ Ⲡϫⲟⲉⲓⲥ ⲉϥⲉⲧⲁϩⲟ ⲉⲣⲁⲧϥ̅ ⲙ̅ⲡⲉⲛⲧⲁϥⲉⲓ ⲉⲃⲟⲗ ϩⲛ̅ⲧⲟⲩⲧⲁⲡⲣⲟ . Ⲧⲉⲥϩⲓⲙⲉ ⲇⲉ ⲁⲥϩⲙⲟⲟⲥ . ⲁⲥⲧⲥⲛ̅ⲕⲟ ⲙ̅ⲡⲉⲥϣⲏⲣⲉ ϣⲁⲛⲧⲉⲥⲱⲙϫ̅ ⲙ̅ⲙⲟϥ. ⲕ̅ⲇ̅. Ⲁⲩⲱ ⲁⲥⲉⲓ ⲉϩⲣⲁⲓ ⲛⲙ̅ⲙⲁϥ ⲉⲤⲏⲗⲱ ⲙⲛ̅ⲟⲩⲙⲁⲥⲉ ⲉϥϩⲉⲛϣⲟⲙⲧⲉ ⲛ̅ⲣⲟⲙⲡⲉ ⲁⲩⲱ ⲙⲛ̅ϩⲉⲛⲟⲉⲓⲕ . ⲙⲛ̅ⲟⲩϣⲓ ⲛ̅ⲥⲁⲙⲓⲧ . ⲁⲩⲱ ⲟⲩϣⲓ ⲛ̅ⲏⲣⲡ̅ ⲁⲥⲃⲱⲕ ⲉϩⲟⲩⲛ ⲉⲤⲏⲗⲱ ⲉⲡⲏⲓ ⲙ̅Ⲡϫⲟⲉⲓⲥ . ⲉⲣⲉⲡϣⲏⲣⲉ ⲕⲟⲩⲓ ⲛⲙ̅ⲙⲁⲩ . ⲁⲩⲧⲁϩⲟϥ ⲉⲣⲁⲧϥ̅ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲉⲓⲥ . ⲁⲩⲱ ⲡⲉϥⲉⲓⲱⲧ ⲁϥϣⲱⲧ ⲛ̅ⲧⲉⲑⲩⲥⲓⲁ . ⲉϣⲁϥⲁⲁⲥ ⲙ̅ⲙⲁϩⲠϫⲟⲉⲓⲥ . ⲕⲁⲧⲁⲡⲧⲱϣ ⲛ̅ⲛ̅ϩⲟⲟⲩ . ⲁⲩⲱ ⲁϥⲉⲓⲛⲉ ⲙ̅ⲡϣⲏⲣⲉ ⲕⲟⲩⲓ. Ⲁϥϣⲱⲱⲧ ⲙ̅ⲡⲙⲁⲥⲉ . Ⲁⲛⲛⲁ ⲇⲉ ⲧⲙⲁⲁⲩ ⲙ̅ⲡϣⲏⲣⲉ ⲕⲟⲩⲓ ⲁⲥϯ ⲙ̅ⲡⲉⲥⲟⲩⲟⲓ ⲉϨⲏⲗⲓ. ⲕ̅Ⲋ. ⲡⲉϫⲁⲥ ⲛⲁϥ . ϫⲉ ⲧⲉⲕⲯⲩⲭⲏ ⲟⲛϩ̅ . ϯϩⲧⲏⲕ ⲉⲣⲟⲓ Ⲡϫⲟⲉⲓⲥ . ⲁⲛⲟⲕ ⲧⲉ ⲧⲉⲓⲥϩⲓⲙⲉ ⲧⲉⲛⲧⲁⲥⲁϩⲉⲣⲁⲧⲥ̅ ⲙ̅ⲡⲉⲕⲙ̅ⲧⲟ ⲉⲃⲟⲗ . ϩⲙ̅ⲡⲁⲓ ⲉⲧⲣⲁϣⲗⲏⲗ ⲙ̅ⲡⲙ̅ⲧⲟ ⲉⲃⲟⲗ ⲑⲙⲠϫⲟⲉⲓⲥ ⲕ̅ⲍ̅. ⲉⲧⲃⲉⲡⲉⲓϣⲏⲣⲉ ⲕⲟⲩⲓ ⲁⲓϣⲗⲏⲗ ϭⲉ ⲉϩⲣⲁⲓ ⲉⲣⲟϥ . ⲁⲩⲱ ⲛ̅ⲧⲟϥ Ⲡϫⲟⲉⲓⲥ ⲁϥϯ ⲛⲁⲓ ⲙ̅ⲡⲁⲁⲓⲧⲏⲙⲁ ⲛ̅ⲧⲁⲓⲁⲓⲧⲉⲓ ⲑⲙⲙⲟϥ ⲛ̅ⲧⲟⲟⲧϥ̅. ⲕ̅ⲏ̅. Ⲁⲛⲟⲕ ϭⲉ ϩⲱ ϯⲛⲁⲧⲁⲁϥ ⲛ̅ⲧⲁⲓⲟ ⲙ̅Ⲡϫⲟⲉⲓⲥ ⲛ̅ⲛⲉϩⲟⲟⲩ ⲧⲏⲣⲟⲩ ⲙ̅ⲡⲉϥⲱⲛϩ̅ ⲉⲧⲣⲉϥϣⲱⲡⲉ ϩⲁⲣⲁⲧϥ̅ ⲙ̅Ⲡϫⲟⲉⲓⲥ.
Ⲕⲉⲫ. Ⲃ̅.
Ⲁⲩⲱ ⲛ̅ⲧⲉⲩⲛⲟⲩ ⲡⲉϫⲁⲥ . ϫⲉ ⲡⲁϩⲏⲧ ⲁϥⲧⲁϫⲣⲟ ϩⲙ̅Ⲡϫⲟⲉⲓⲥ . ⲡⲁⲧⲁⲡ ⲁϥϫⲓⲥⲉ ϩⲙ̅ⲡⲁⲛⲟⲩⲧⲉ . ⲧⲁⲧⲁⲡⲣⲟ ⲁⲥⲟⲩⲱⲛ ⲉⲙⲁⲧⲉ ⲉϫⲛ̅ⲛⲁϫⲁϫⲉ . ⲁⲓⲟⲩⲛⲟϥ Ⲡϫⲟⲉⲓⲥ ⲉϫⲙ̅ⲡⲉⲕⲟⲩϫⲁⲓ. ⲃ̅. ϫⲉ ⲙⲛ̅ⲕⲉⲟⲩⲁ ⲉϥⲟⲩⲁⲁⲃ ⲛ̅ⲑⲉ ⲙ̅Ⲡϫⲟⲉⲓⲥ ⲁⲩⲱ ⲙⲛ̅ⲕⲉⲇⲓⲕⲁⲓⲟⲥ ⲛ̅ⲑⲉ ⲙ̅ⲡⲉⲛⲛⲟⲩⲧⲉ . ⲙⲛ̅ⲕⲉⲁⲅⲓⲟⲥ ⲛ̅ⲃⲉⲗⲗⲁⲕ. ⲅ̅. Ⲙ̅ⲡⲉⲣϣⲟⲩϣⲟⲩ ⲙ̅ⲙⲱⲧⲛ̅ . ⲁⲩⲱ ⲙ̅ⲡⲣ̅ⲧⲁⲩⲉⲛⲟϭ ⲛ̅ϣⲁϫⲉ . ⲙ̅ⲡⲉⲣⲧⲣⲉⲙⲛ̅ⲧϩⲉⲣⲟⲩⲱ ⲉⲓ ⲉⲃⲟⲗ ϩⲛ̅ⲧⲉⲧⲛ̅ⲧⲁⲡⲣⲟ . ϫⲉ ⲡⲛⲟⲩⲧⲉ ⲙ̅ⲡⲥⲟⲟⲩⲛ ⲡⲉ Ⲡϫⲟⲉⲓⲥ . ⲁⲩⲱ ⲛ̅ⲧⲟϥ ⲡⲉ ⲡⲛⲟⲩⲧⲉ ⲉⲧⲥⲟⲃⲧⲉ ⲛ̅ⲛⲉϥϩⲃⲏⲩⲉ. ⲇ̅. Ⲧⲡⲓⲧⲉ ⲛ̅ⲛⲉϫⲱⲱⲣⲉ ⲁⲥϩⲱⲣⲉⲃ . ⲁⲩⲱ ⲛⲉⲧⲟ ⲛ̅ϭⲱⲃ ⲁⲩϯ ϩⲓⲱⲟⲩ ⲛ̅ⲟⲩϭⲟⲙ. Ⲛⲉⲧⲥⲓⲟⲩ ⲛ̅ⲟⲉⲓⲕ ⲁⲩϣⲱⲱⲧ . ⲛⲉⲧϣⲁⲁⲧ ϩⲱⲟⲩ ⲁⲩⲕⲁⲡϩⲓⲥⲉ ⲛ̅ⲥⲱⲟⲩ ⲛ̅ⲧⲉⲡⲕⲁϩ . ϫⲉ ⲁⲧⲁϭⲣⲏⲛ ϫⲡⲉⲥⲁϣϥ̅ ⲛ̅ϣⲏⲣⲉ . ⲧⲉⲧⲟϣ ϩⲱⲱⲥ ⲛ̅ϣⲏⲣⲉ ⲁⲥⲣ̅ϭⲱⲃ. Ⲋ. Ⲡϫⲟⲉⲓⲥ ⲡⲉⲧⲙⲟⲩⲟⲩⲧ . ⲛ̅ⲧⲟϥ ⲟⲛ ⲡⲉⲧⲧⲁⲛϩⲟ . ϥϫⲓ ⲉⲡⲉⲥϥⲧ ⲉⲀⲙⲛ̅ⲧⲉ ⲁⲩⲱ ϥⲉⲓⲛⲉ ⲉϩⲣⲁⲓ. ⲍ̅. Ⲡϫⲟⲉⲓⲥ ⲡⲉⲧϯ ⲛ̅ⲧⲙⲛⲧϩⲏⲕⲉ ⲙⲛ̅ⲧⲙⲛ̅ⲧⲣⲙ̅ⲙⲁⲟ . ⲉϥϯ ⲙ̅ⲡⲉⲑⲃ̅ⲃⲓⲟ ⲙⲛ̅ⲡϫⲓⲥⲉ. ⲏ̅. Ⲉϥϯ ⲛ̅ⲧⲟⲟⲧϥ̅ ⲙ̅ⲡⲉⲧⲙⲟⲕϩ̅ ⲉⲃⲟⲗ ϩⲙ̅ⲡⲕⲁϩ . ⲁⲩⲱ ⲉϥⲧⲟⲩⲛⲟⲥ ⲙ̅ⲡϩⲏⲕⲉ ⲉⲃⲟⲗ ϩⲛ̅ⲧⲕⲟⲡⲣⲓⲁ . ⲉϥⲑⲉⲙⲥⲟ ⲙ̅ⲙⲟϥ ⲉϩⲣⲁⲓ . ⲙⲛ̅ⲛⲉϫⲱⲱⲣⲉ ⲙ̅ⲡⲗⲁⲟⲥ . ⲉϥϯ ⲛⲁⲩ ⲙ̅ⲡⲉⲑⲣⲟⲛⲟⲥ ⲙ̅ⲡⲉⲟⲟⲩ ⲉⲕⲗⲏⲣⲟⲛⲟⲙⲉⲓ ⲙ̅ⲙⲟϥ . ⲉϥϯ ⲙ̅ⲡⲉⲣⲏⲧ ⲙ̅ⲡⲉⲧⲉⲣⲏⲧ . ⲁⲩⲱ ⲉϥⲥⲙⲟⲩ ⲉⲛⲣⲟⲙⲡⲉ ⲛ̅ⲛⲉⲇⲓⲕⲁⲓⲟⲥ. ⲑ̅. Ϫⲉ ⲧϭⲟⲙ ⲙ̅ⲡⲣⲱⲙⲉ ⲛ̅ϫⲱⲱⲣⲉ ⲛ̅ⲧⲱϥ ⲁⲛ ⲧⲉ. Ⲡϫⲟⲉⲓⲥ ⲛⲁⲉⲓⲣⲉ ⲙ̅ⲡⲉϥϫⲁϫⲉ ⲛ̅ϭⲱⲃ . Ⲡϫⲟⲉⲓⲥ ⲟⲩϩⲁⲅⲓⲟⲥ ⲡⲉ . ⲙ̅ⲡⲉⲣⲧⲣⲉⲛ̅ⲥⲁⲃⲉ ϣⲟⲩϣⲟⲩ ⲙ̅ⲙⲟϥ ϩⲛ̅ⲧⲉϥⲙⲛ̅ⲧⲥⲁⲃⲉ . ⲁⲩⲱ ⲙ̅ⲡⲉⲣⲧⲣⲉⲡϫⲱⲱⲣⲉ ϣⲟⲩϣⲟⲩ ⲙ̅ⲙⲟϥ ϩⲛ̅ⲧⲉϥⲙⲛ̅ⲧϫⲱⲱⲣⲉ . ⲁⲩⲱ ⲙ̅ⲡⲉⲣⲧⲣⲉⲡⲣⲙ̅ⲙⲁⲟ ϣⲟⲩϣⲟⲩ ⲙ̅ⲙⲟϥ ϩⲛ̅ⲧⲉϥⲙⲛ̅ⲧⲣⲙ̅ⲙⲁⲟ . ⲁⲗⲗⲁ ⲡⲉⲧⲛⲁϣⲟⲩϣⲟⲩ ⲙ̅ⲙⲟϥ ⲙⲁⲣⲉϥϣⲟⲩϣⲟⲩ ⲙ̅ⲙⲟϥ ϩⲙ̅Ⲡϫⲟⲉⲓⲥ . ⲁⲩⲱ ⲉⲧⲣⲉϥⲉⲓⲙⲉ ⲉⲠϫⲟⲉⲓⲥ ⲁⲩⲱ ⲛϥ̅ⲥⲟⲩⲱⲛϥ̅ . ⲛϥ̅ⲉⲓⲣⲉ ⲛ̅ⲟⲩϩⲁⲡ ⲙⲛ̅ⲟⲩⲇⲓⲕⲁⲓⲟⲥⲩⲛⲏ ϩⲛ̅ⲧⲙⲏⲧⲉ ⲙ̅ⲡⲕⲁϩ . Ⲡϫⲟⲉⲓⲥ ⲁϥⲃⲱⲕ ⲉϩⲣⲁⲓ ⲉⲙⲡⲏⲩⲉ . ⲁϥϯϩⲣⲟⲩⲃⲁⲓ ⲛ̅ⲧⲟϥ ⲡⲉⲧⲛⲁϯϩⲁⲡ ⲉⲡⲕⲁϩ ⲧⲏⲣϥ̅ . ⲁⲩⲱ ⲉϥⲛⲁϯϭⲟⲙ ⲛ̅ⲛ̅ⲉⲱⲣⲣⲱⲟⲩ . ⲛϥ̅ϫⲓⲥⲉ ⲙ̅ⲡⲧⲁⲡ ⲙ̅ⲡⲉϥⲭ̅ⲥ̅. ⲓ̅ⲁ. Ⲁⲩⲱ ⲡϣⲏⲣⲉ ⲕⲟⲩⲓ ⲁⲩⲕⲁⲁϥ ϩⲙ̅ⲡⲙⲁ ⲉⲧⲙ̅ⲙⲁⲩ ϩⲓⲑⲏ ⲙ̅Ⲡϫⲟⲉⲓⲥ . ⲁⲩⲃⲱⲕ ⲉϩⲣⲁⲓ ⲉⲀⲣⲙⲁⲑⲁⲉⲓⲙ . ⲡϣⲏⲣⲉ ϣⲏⲙ ⲛⲉϥϣⲙ̅ϣⲉ ϩⲓⲑⲏ ⲙ̅Ⲡϫⲟⲉⲓⲥ ⲙ̅ⲡⲉⲙⲧⲟ ⲉⲃⲟⲗ ⲛ̅Ϩⲏⲗⲓ ⲡⲟⲩⲏⲏⲃ. ⲓ̅ⲃ. Ⲁⲩⲱ ⲡϣⲏⲣⲉ ⲛ̅Ϩⲏⲗⲓ ⲡⲟⲩⲏⲏⲃ ϩⲛ̅ϣⲏⲣⲉ ⲛⲉ ⲛ̅ⲗⲟⲓⲙⲟⲥ . ⲉⲛⲥⲉⲥⲟⲟⲩⲛ ⲁⲛ ⲙ̅Ⲡϫⲟⲉⲓⲥ ⲟⲩⲇⲉ ⲡⲇⲓⲕⲁⲓⲱⲙⲁ ⲙ̅ⲡⲟⲩⲏⲏⲃ ⲛ̅ⲧⲟⲟⲧϥ̅ ⲙ̅ⲡⲗⲁⲟⲥ ϫⲧⲧⲏⲣϥ̅ . ⲉⲩⲃⲛⲏⲩ ⲉⲣ̅ⲑⲩⲥⲓⲁ. ⲓ̅ⲅ. Ⲁⲩⲱ ϣⲁϥⲉⲓ ⲛ̅ϭⲓⲡϣⲏⲣⲉ ⲙ̅ⲡⲟⲩⲏⲏⲃ ⲉⲣⲉⲡⲁϥ ⲛⲁⲡⲓⲥⲉ ⲉⲣⲉⲟⲩⲕⲣⲁⲩⲣⲁ ⲛ̅ϣⲟⲙⲛ̅ⲧ ⲛ̅ⲧⲁⲣ ϩⲛ̅ⲧⲉϥϭⲓϫ. ⲓ̅ⲇ. Ⲛϥ̅ⲧⲱⲕⲥ̅ ⲑⲙⲙⲟⲥ ⲉϩⲣⲁⲓ ⲉϫⲙ̅ⲡⲛⲟϭ ⲛ̅ⲭⲁⲗⲕⲓⲟⲛ . ⲏ ⲡⲕⲟⲩⲓ ⲛⲭⲁⲗⲕⲓⲟⲛ . ⲏ ⲧϭⲁⲗⲁϩⲧ̅ . ⲁⲩⲱ ⲡⲉϣⲁϥⲉⲓ ⲉϩⲣⲁⲓ ⲧⲏⲣϥ̅ ϩⲛ̅ⲧⲉⲕⲣⲁⲩⲣⲁ ϣⲁⲣⲉⲡⲟⲩⲏⲏⲃ ϫⲓⲧϥ̅ ⲛⲁϥ ⲧⲁⲓ ⲧⲉ ⲑⲉ ⲉⲛⲉⲩⲉⲓⲣⲉ ⲙ̅ⲙⲟⲥ ⲙ̅ⲡⲒ̅ⲏ̅ⲗ̅ ⲧⲏⲣϥ̅ . ⲉⲧⲛⲏⲩ ⲉⲣ̅ⲑⲩⲥⲓⲁ ⲙ̅Ⲡϫⲟⲉⲓⲥ ϩⲛ̅Ⲥⲏⲗⲱ. Ⲁⲩⲱ ⲙ̅ⲡⲁⲧⲉⲧⲉⲑⲩⲥⲓⲁ ϣⲱⲡⲉ . ϣⲁⲣⲉⲡϣⲏⲣⲉ ⲙ̅ⲡⲟⲩⲏⲏⲃ ⲉⲓ ⲉϥϫⲱ ⲙ̅ⲙⲟⲥ ⲙ̅ⲡⲣⲱⲙⲉ . ⲡⲉⲧⲉⲓⲣⲉ ⲛ̅ⲧⲉⲑⲩⲥⲓⲁ . ϫⲉ ⲁⲩⲉⲓⲥ . ⲡⲓⲥⲉ ⲙ̅ⲡⲟⲩⲏⲏⲃ . ⲁⲩⲱ ⲛ̅ϯⲛⲁϫⲓ ⲁⲛ ⲛ̅ⲧⲟⲟⲧⲕ̅ ⲉⲃⲟⲗ ϩⲙ̅ⲡⲉⲭⲁⲗⲕⲓⲟⲛ . ⲉⲧⲟ ⲛ̅ⲡⲉϣⲗⲱϩⲙ̅. ⲓ̅Ⲋ. Ⲁⲩⲱ ⲡⲣⲱⲙⲉ ⲉⲧⲉⲓⲣⲉ ⲛ̅ⲧⲉⲑⲩⲥⲓⲁ ⲡⲉϫⲁϥ ⲛⲁϥ . ϫⲉ ⲙⲁⲣⲉⲧⲉⲑⲩⲥⲓⲁ ϣⲱⲡⲉ ⲕⲁⲗⲱⲥ . ⲁⲩⲱ ⲛⲅ̅ϫⲓ ⲛⲁⲕ ⲉⲃⲟⲗ ⲛ̅ϩⲏⲧⲟⲩ ⲧⲏⲣⲟⲩ . ⲛ̅ⲛⲉⲧⲉⲣⲉⲧⲉⲕⲯⲩⲭⲏ ⲟⲩⲁϣⲟⲩ . Ⲡⲉϫⲁϥ ⲛⲁϥ . ϫⲉ ⲛ̅ϯⲛⲁϭⲱ ⲁⲛ . ⲁⲗⲗⲁ ⲉⲕⲛⲁϯ ⲛⲁⲓ ⲧⲉⲛⲟⲩ . Ⲉⲕϣⲁⲛⲧⲉⲙϯ ⲇⲉ ϯⲛⲁϫⲓ ⲉⲛⲧⲉⲕϭⲟⲙ ⲁⲛ ⲧⲉ. ⲓ̅ⲍ. Ⲁⲩⲱ ⲛⲉⲣⲉⲡⲉⲓϩⲱⲃ ⲟ ⲛ̅ⲛⲟⲃⲉ ϩⲓⲑⲏ ⲙ̅Ⲡϫⲟⲉⲓⲥ ⲉⲙⲁⲧⲉ ⲉⲙⲁⲧⲉ ⲉⲣⲉⲛ̅ϣⲏⲣⲉ ⲙ̅ⲡⲟⲩⲏⲏⲃ ⲉⲓⲣⲉ ⲙ̅ⲙⲟϥ ⲉⲃⲟⲗϫⲉ ⲛⲉⲩⲥⲱϣϥ̅ ⲛ̅ⲧⲉⲑⲩⲥⲓⲁ ⲙ̅Ⲡϫⲟⲉⲓⲥ. ⲓ̅ⲏ̅. Ⲥⲁⲙⲟⲩⲏⲗ ⲇⲉ ⲛⲉϥϣⲙ̅ϣⲉ ϩⲓⲑⲏ ⲙ̅Ⲡϫⲟⲉⲓⲥ ⲉⲩϣⲏⲣⲉ ϣⲏⲙ ⲡⲉ ⲉϥϭⲟⲟⲗⲉ ⲛ̅ⲟⲩⲉⲫⲟⲩⲇ. ⲓ̅ⲑ̅. Ⲁⲩⲱ ⲟⲩⲕⲟⲩⲓ ⲛ̅ϣⲉⲛⲧⲱ ⲉⲁⲧⲉϥⲙⲁⲁⲩ ⲧⲁⲙⲓⲟⲥ ⲛⲁϥ. Ⲁⲥϫⲓⲧⲥ̅ ⲛⲁϥ ⲉϩⲣⲁⲓ ⲕⲁⲧⲁⲡⲧⲱϣ ⲛ̅ⲛⲉϩⲟⲟⲩ ⲉⲥⲛⲁⲃⲱⲕ ⲉϩⲣⲁⲓ ⲙⲛ̅ⲡⲉⲥϩⲁⲓ ⲉⲉⲓⲣⲉ ⲛⲧⲉⲑⲩⲥⲓⲁ ⲕⲁⲧⲁⲡⲧⲱϣ ⲛ̅ⲛⲉϩⲟⲟⲩ. Ⲁⲩⲱ Ϩⲏⲗⲓ ⲁϥⲥⲙⲟⲩ ⲉⲈⲗⲕⲁⲛⲁ ⲙⲛ̅ⲧⲉϥⲥϩⲓⲙⲉ ⲉϥϫⲱ ⲙ̅ⲙⲟⲥ ⲛⲁϥ . ϫⲉ ⲉⲣⲉⲠϫⲟⲉⲓⲥ ⲧⲛ̅ⲛⲟⲟⲩ ⲛⲁⲕ ⲛ̅ⲟⲩⲥⲡⲉⲣⲙⲁ ⲉⲡⲙⲁ ⲙ̅ⲡⲉⲓⲧⲁⲓⲟ ⲛ̅ⲧⲁⲕⲧⲁⲁϥ ⲙ̅Ⲡϫⲟⲉⲓⲥ ⲁⲩⲱ Ⲉⲗⲅⲁⲛⲁ ⲡⲣⲱⲙⲉ ⲁϥⲃⲱⲕ ⲉϩⲣⲁⲓ ⲉⲡⲉϥⲙⲁ. ⲕ̅ⲁ̅. Ⲡϫⲟⲉⲓⲥ ⲇⲉ ⲁϥϭⲉⲙⲡϣⲓⲛⲉ ⲛ̅Ⲁⲛⲛⲁ ⲁⲥϫⲡⲟ ⲛ̅ⲕⲉϣⲟⲙⲛ̅ⲧ ⲛ̅ϣⲏⲣⲉ ⲙⲛ̅ⲕⲉϣⲉⲉⲣⲉ ⲥⲛ̅ⲧⲉ . ⲡϣⲏⲣⲉ ⲇⲉ ϣⲏⲙ Ⲥⲁⲙⲟⲩⲏⲗ ⲛⲉϥϣⲙ̅ϣⲉ ϩⲓⲑⲏ ⲙ̅Ⲡϫⲟⲉⲓⲥ. ⲕ̅ⲃ̅. Ⲁⲩⲱ Ϩⲏⲗⲓ ⲛⲉⲩϩⲗ̅ⲗⲟ ⲉⲙⲁⲧⲉ ⲡⲉ. ⲁⲩⲱ ⲁϥⲥⲱⲧⲙ̅ ⲉⲛⲉⲧⲉⲣⲉⲛⲉϥϣⲏⲣⲉ ⲉⲓⲣⲉ ⲙ̅ⲙⲟⲟⲩ ⲛ̅ⲛⲉϣⲏⲣⲉ ⲙ̅ⲡⲒ̅ⲏ̅ⲗ̅ ϫⲉ ⲛⲉϥϣⲏⲣⲉ ⲛⲉⲩⲉⲛⲕⲧⲕ̅ ⲙⲛ̅ⲛⲉϩⲓⲟⲙⲉ ⲛ̅ⲛⲉⲧⲁϩⲉⲣⲁⲧⲟⲩ ϩⲓⲣⲙ̅ⲡⲣⲟ ⲛ̅ⲧⲉⲥⲕⲩⲛⲏ ⲙ̅ⲡⲙⲁⲣⲧⲩⲣⲓⲟⲛ. ⲕ̅ⲅ̅. ⲠⲉϫⲉϨⲏⲗⲓ ⲛⲁⲩ . ϫⲉⲉⲧⲃⲉⲟⲩ ⲧⲉⲧⲛ̅ⲉⲓⲣⲉ ϩⲓⲛⲁⲓ ⲕⲁⲧⲁⲡⲉⲓϣⲁϫⲉ ⲡⲁⲓ ⲁⲛⲟⲕ ⲉϯⲥⲱⲧⲙ̅ ⲉⲣⲟϥ ⲉⲃⲟⲗ ϩⲛ̅ⲧⲧⲁⲡⲣⲟ ⲙ̅ⲡⲗⲁⲟⲥ ⲧⲏⲣϥ̅ ⲙ̅Ⲡϭ̅ⲥ. ⲕ̅ⲇ̅. ⲙ̅ⲡⲱⲣ ⲛⲁϣⲏⲣⲉ ϫⲉ ⲛⲁⲛⲟⲩⲛⲉⲓϣⲁϫⲉ ⲁⲛ ⲉϯⲥⲱⲧⲙ̅ ⲉⲣⲟⲟⲩ ⲁⲛⲟⲕ ⲙ̅ⲡⲉⲣⲉⲓⲣⲉ ϩⲓⲛⲁⲓ . ϫⲉ ⲛⲁⲛⲟⲩⲛⲉⲓϩⲣⲟⲟⲩ ⲁⲛ ⲉϯⲥⲱⲧⲙ̅ ⲉⲣⲟⲟⲩ ⲁⲛⲟⲕ ⲉⲛⲧⲉⲧⲛ̅ⲕⲱ ⲁⲛ ⲙ̅ⲡⲗⲁⲟⲥ ⲉⲣ̅ⲑⲩⲥⲓⲁ ⲙ̅Ⲡϫⲟⲉⲓⲥ. Ⲉⲣϣⲁⲛⲟⲩⲣⲱⲙⲉ ⲉⲣⲛⲟⲃⲉ ⲉⲩⲣⲱⲙⲉ ϣⲁⲩⲧⲉⲃⲉϩⲠϫⲟⲉⲓⲥ ⲉϫⲱϥ ⲉⲧⲣⲉϥⲕⲱ ⲛⲁϥ ⲉⲃⲟⲗ . ⲉϥϣⲁⲛⲉⲓⲣⲉ ⲇⲉ ⲉⲠϫⲟⲉⲓⲥ ⲛⲓⲙ ⲡⲉⲧⲛⲁϣⲗⲏⲗ ⲉϫⲱϥⲑ ⲁⲩⲱ ⲙ̅ⲡⲟⲩⲥⲱⲧⲙ̅ ⲛ̅ⲥⲁⲡⲉϩⲣⲟⲟⲩ ⲙ̅ⲡⲉⲩⲉⲓⲱⲧ . ⲉⲃⲟⲗϫⲉ ϩⲛ̅ⲟⲩⲟⲩⲱϣ ⲛⲉⲣⲉⲡⲛⲟⲩⲧⲉ ⲟⲩⲱϣ ⲉⲧⲁⲕⲟⲟⲩ. ⲕ̅Ⲋ. Ⲁⲩⲱ ⲡϣⲏⲣⲉ ϣⲏⲙ Ⲥⲁⲙⲟⲩⲏⲗ ⲛⲉϥϯ ⲉⲡⲁⲛⲁⲓ . ⲉⲛⲁⲛⲟⲩϥ ⲛⲁϩⲣⲙ̅Ⲡϫⲟⲉⲓⲥ ⲁⲩⲱ ⲛⲁϩⲣⲉⲛ̅ⲛⲉⲣⲱⲙⲉ. ⲕ̅ⲍ̅. Ⲟⲩⲣⲱⲙⲉ ⲇⲉ ⲛ̅ⲧⲉⲡⲛⲟⲩⲧⲉ ⲁϥⲓ ϣⲁϨⲏⲗⲓ ⲉϥϫⲱ ⲙ̅ⲙⲟⲥ ⲛⲁϥ . ϫⲉ ⲛⲁⲓ ⲛⲉⲧⲉⲣⲉⲠϫⲟⲉⲓⲥ ϫⲱ ⲙ̅ⲙⲟⲟⲩ ϫⲉ ϩⲛ̅ⲟⲩϭⲱⲗⲡ ⲁⲓϭⲱⲗⲡ̅ ⲉⲃⲟⲗ ⲙ̅ⲡⲏⲓ ⲙ̅ⲡⲉⲕⲉⲓⲱⲧ ⲉⲩϩⲙ̅ⲡⲕⲁϩ ⲛ̅Ⲕⲏⲙⲉ ⲉⲩⲟ ⲛ̅ϩⲙ̅ϩⲁⲗ ⲙ̅ⲡⲏⲓ ⲙ̅Ⲫⲁⲣⲁⲱ. ⲕ̅ⲏ̅. Ⲁⲩⲱ ⲁⲓⲥⲱⲧⲡ̅ ⲙ̅ⲡⲏⲓ ⲙ̅ⲡⲉⲕⲉⲓⲱⲧ ϩⲛ̅ⲛ̅ⲫⲩⲗⲏ ⲧⲏⲣⲟⲩ ⲙ̅ⲡⲒ̅ⲏ̅ⲗ̅ . ⲉⲧⲣⲉⲩϣⲱⲡⲉ ⲛⲁⲓ ⲛ̅ⲟⲩⲏⲏⲃ . ⲉⲧⲣⲉⲩⲃⲱⲕ ⲉϫⲙ̅ⲡⲉⲑⲩⲥⲓⲁⲥⲧⲏⲣⲓⲟⲛ . ⲉⲧⲣⲉⲩⲧⲁⲗⲉⲑⲩⲥⲓⲁ ⲛⲁⲓ ⲉϩⲣⲁⲓ ⲁⲩⲱ ⲛ̅ⲥⲉϭⲟⲟⲗⲟⲩ ⲙ̅ⲡⲉⲫⲟⲩⲇ . Ⲁⲩⲱ ⲁⲓϯ ⲙ̅ⲡⲏⲓ ⲙ̅ⲡⲉⲕⲉⲓⲱⲧ ⲛⲉⲛⲕⲁ ⲛⲓⲙ ⲉϣⲁⲣⲉⲛⲉϣⲏⲣⲉ ⲙ̅ⲡⲒ̅ⲏ̅ⲗ̅ ⲧⲁⲗⲟⲟⲩ ⲉϫⲙ̅ⲡⲁⲑⲩⲥⲓⲁⲥⲧⲏⲣⲓⲟⲛ ⲉⲧⲣⲉⲩⲟⲙⲟⲩ. ⲕ̅ⲑ̅. Ⲁⲩⲱ ⲉⲧⲃⲉⲟⲩ ⲁⲕϭⲱϣⲧ̅ ⲉϫⲛ̅ⲧⲁⲑⲩⲥⲓⲁ ⲁⲩⲱ ⲉϫⲙ̅ⲡⲁϣⲟⲩϩⲏⲛⲉ ϩⲛ̅ⲟⲩⲃⲁⲗ ⲛ̅ⲁⲧϣⲓⲡⲉ . ⲁⲩⲱ ⲁⲕϯⲉⲟⲟⲩ ⲛ̅ⲛⲉⲕϣⲏⲣⲉ ⲉϩⲟⲩⲉⲉⲣⲟⲓ ⲉⲧⲣⲉⲩϫⲓⲥⲙⲟⲩ ⲉⲃⲟⲗ ϩⲛ̅ⲧⲁⲡⲁⲣⲭⲏ ⲛ̅ⲧⲉⲑⲩⲥⲓⲁ ⲧⲏⲣⲥ̅ ⲙ̅ⲡⲒ̅ⲏ̅ⲗ̅ ϩⲓⲑⲏ ⲙ̅ⲙⲟⲓ. Ⲉⲧⲃⲉⲡⲁⲓ ⲛⲁⲓ ⲛⲉⲧⲉⲣⲉⲠϫⲟⲉⲓⲥ ⲡⲛⲟⲩⲧⲉ ⲙ̅ⲡⲒ̅ⲏ̅ⲗ̅ ϫⲱ ⲙ̅ⲙⲟⲟⲩ ϫⲉ ⲁⲓϫⲟⲟⲥ ϫⲉ ⲡⲉⲕⲏⲓ ⲁⲩⲱ ⲡⲏⲓ ⲙ̅ⲡⲉⲕⲉⲓⲱⲧ . ⲥⲉⲛⲁⲙⲟⲟϣⲉ ⲉⲩϣⲙ̅ϣⲉ ⲙ̅ⲡⲁⲉⲙⲧⲟ ⲉⲃⲟⲗ ⲛ̅ϣⲁⲉⲛⲉϩ . Ⲧⲉⲛⲟⲩ ϭⲉ ⲡⲉϫⲉⲠϫⲟⲉⲓⲥ ϫⲉ ⲛ̅ⲛⲉⲧⲉⲓϩⲉ ϣⲱⲡⲉ . ϫⲉ ⲛⲉⲧⲛⲁϯⲉⲟⲟⲩ ⲛⲁⲓ ϯⲛⲁϯⲉⲟⲟⲩ ⲛⲁⲩ . ⲡⲉⲧⲛⲁⲥⲟϣⲧ̅ ⲇⲉ ϯⲛⲁϯⲥⲱϣ ⲛⲁϥ. ⲗ̅ⲁ̅. Ⲉⲓⲥ ϩⲛ̅ϩⲟⲟⲩ ⲛⲏⲩ ⲁⲩⲱ ϯⲛⲁⲃⲱⲧⲉ ⲉⲃⲟⲗ ⲙ̅ⲡⲉⲕⲥⲡⲉⲣⲙⲁ ⲁⲩⲱ ⲡⲉⲥⲡⲉⲣⲙⲁ ⲙ̅ⲡⲏⲓ ⲙ̅ⲡⲉⲕⲉⲓⲱⲧ. ⲗ̅ⲃ̅. ⲛ̅ⲧⲉⲧⲙ̅ϩⲗ̅ⲗⲟ ϣⲱⲡⲉ ϩⲙ̅ⲡⲁⲏⲓ ⲛ̅ϩⲏⲧⲟⲩ ⲛ̅ⲛⲉϩⲟⲟⲩ ⲧⲏⲣⲟⲩ. ⲗ̅ⲅ̅. Ⲁⲩⲱ ⲛ̅ϯⲛⲁⲃⲱⲧⲉ ⲁⲛ ⲛ̅ⲟⲩⲣⲱⲙⲉ ⲉⲃⲟⲗ ϩⲙ̅ⲡⲁⲑⲩⲥⲓⲁⲥⲧⲏⲣⲓⲟⲛ ⲉⲧⲣⲉⲛⲉϥⲃⲁⲗ ⲧⲁⲕⲟ. Ⲁⲩⲱ ⲛ̅ⲧⲉⲧⲉϥⲯⲩⲭⲏ ⲟⲩⲱⲗⲥ̅ . ⲁⲩⲱ ⲟⲩⲟⲛ ⲛⲓⲙ ⲉⲧⲟ ⲛ̅ϩⲟⲩⲟ ϩⲙ̅ⲡⲉⲕⲏⲓ ⲥⲉⲛⲁϩⲉ ϩⲛ̅ⲧⲥⲏϥⲉ ⲛ̅ⲛ̅ⲣⲱⲙⲉ. ⲗ̅ⲇ̅. Ⲁⲩⲱ ⲡⲁⲓ ⲡⲉ ⲡⲙⲁⲉⲓⲛ ⲉⲧⲛⲁϣⲱⲡⲉ ⲉϥⲛⲁⲉⲓ ⲉϫⲙ̅ⲡⲉⲕϣⲏⲣⲉ ⲥⲛⲁⲩ Ⲟⲫⲛⲓ ⲙⲛ̅Ⲫⲓⲛⲉⲉⲥ . ⲛ̅ⲧⲟⲟⲩ ⲙ̅ⲡⲉⲥⲛⲁⲩ ⲥⲉⲛⲁⲙⲟⲩ ϩⲛ̅ⲟⲩϩⲟⲟⲩ ⲛ̅ⲟⲩⲱⲧ. Ⲁⲩⲱ ϯⲛⲁⲧⲁϩⲟ ⲉⲣⲁⲧϥ̅ ⲛⲁⲓ ⲛ̅ⲟⲩⲟⲩⲏⲏⲃ ⲉϥⲟ ⲛ̅ϩⲟⲧ . ⲡⲁⲓ ⲉϥⲛⲁⲉⲓⲣⲉ ⲛ̅ⲛⲉⲧϩⲙ̅ⲡⲁϩⲏⲧ ⲧⲏⲣⲟⲩ . ⲁⲩⲱ ⲛⲉⲧϩⲉⲛⲧⲁⲯⲩⲭⲏ . ⲁⲩⲱ ϯⲛⲁⲕⲱⲧ ⲛⲁϥ ⲛ̅ⲟⲩⲏⲓ ⲉϥⲟ ⲛ̅ϩⲟⲧ ⲛϥ̅ⲙⲟⲟϣⲉ ϩⲓⲑⲏ ⲙ̅ⲡⲁⲭ̅ⲥ̅ ⲛ̅ⲛⲉϥϩⲟⲟⲩ ⲧⲏⲣⲟⲩ. ⲗ̅Ⲋ. Ⲁⲩⲱ ⲡⲉⲧⲟ ⲛ̅ϩⲟⲩⲟ ϩⲙ̅ⲡⲉⲕⲏⲓ ⲉϥⲉⲉⲓ ⲛϥ̅ⲟⲩⲱϣⲧ̅ ⲛⲁϥ ϩⲁⲟⲩϩⲟⲃⲟⲗⲟⲥ ⲛ̅ϩⲁⲧ ⲁⲩⲱ ϩⲁⲟⲩⲟⲉⲓⲕ ⲉϥϫⲱ ⲙ̅ⲙⲟⲥ . ϫⲉ ⲛⲟϫⲧ̅ ⲉⲩⲙⲁ ⲛ̅ⲟⲩⲱϣⲧ ⲑⲛⲛⲉⲕⲙⲛ̅ⲧⲟⲩⲏⲏⲃ ⲉⲧⲣⲁⲟⲩⲉⲙⲟⲉⲓⲕ.
Ⲕⲉⲫ. Ⲅ̅
Ⲁⲩⲱ ⲡϣⲏⲣⲉ ϣⲏⲙ Ⲥⲁⲙⲟⲩⲏⲗ ⲛⲉϥϣⲙ̅ϣⲉ ⲙ̅Ⲡϫⲟⲉⲓⲥ ⲙ̅ⲡⲉⲙⲧⲟ ⲉⲃⲟⲗ ⲛ̅Ϩⲏⲗⲓ ⲡⲟⲩⲏⲏⲃ . ⲁⲩⲱ ⲡϣⲁϫⲉ ⲙ̅Ⲡϫⲟⲉⲓⲥ ⲛⲉϥⲧⲁⲓⲏⲩ ϩⲛ̅ⲛⲉϩⲟⲟⲩ ⲉⲧⲙ̅ⲙⲁⲩ . ⲉⲙⲛ̅ϩⲟⲣⲁⲥⲓⲥ ⲡⲟⲣϫ̅ ⲉⲃⲟⲗ . ⲃ̅. Ⲁⲥϣⲱⲡⲉ ⲇⲉ ⲛ̅ⲛⲉϩⲟⲟⲩ ⲉⲧⲙ̅ⲙⲁⲩ . Ϩⲏⲗⲓ ⲉϥⲛ̅ⲕⲟⲧⲕ̅ ϩⲙ̅ⲡⲉϥⲙⲁ ⲁⲩⲱ ⲛⲉϥⲃⲁⲗ ⲁⲩϫⲱⲛⲧ ⲉϩⲣⲟϣ ⲉⲣⲟϥ ⲉⲙⲉϥⲉϣⲉⲓⲱⲣϩ̅. ⲅ̅. Ⲁⲩⲱ ⲡϩⲏⲃⲥ ⲙ̅ⲡⲛⲟⲩⲧⲉ ⲙ̅ⲡⲁⲧⲟⲩϭⲟⲣϭϥ̅ . Ⲥⲁⲙⲟⲩⲏⲗ ⲛⲉϥⲛ̅ⲕⲟⲧⲕ̅ ϩⲙ̅ⲡⲉⲣⲡⲉ . ϩⲙ̅ⲡⲙⲁ ⲉⲧⲉⲣⲉⲧⲕⲓⲃⲱⲧⲟⲥ ⲙ̅ⲡⲛⲟⲩⲧⲉ ⲛ̅ϩⲏⲧϥ̅. ⲇ̅. Ⲁⲩⲱ Ⲡϫⲟⲉⲓⲥ ⲁϥⲙⲟⲩⲧⲉ ⲉⲤⲁⲙⲟⲩⲏⲗ ⲉϥϫⲱ ⲙ̅ⲙⲟⲥ ϫⲉ Ⲥⲁⲙⲟⲩⲏⲗ Ⲥⲁⲙⲟⲩⲏⲗ . Ⲡⲉϫⲁϥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ⲁⲓⲉⲓ. Ⲁⲩⲱ ⲁϥⲡⲱⲧ ⲉⲣⲁⲧϥ̅ ⲛ̅Ϩⲏⲗⲓ ⲉϥϫⲱ ⲙ̅ⲙⲟⲥ ⲛⲁϥ . ϫⲉ ⲉⲓⲥ ϩⲏⲏⲧⲉ ⲁⲛⲟⲕ ⲁⲓⲉⲓ ϫⲉ ⲁⲕⲙⲟⲩⲧⲉ ⲉⲣⲟⲓ . ⲠⲉϫⲉϨⲏⲗⲓ ⲛⲁϥ . ϫⲉ ⲙ̅ⲡⲓⲙⲟⲩⲧⲉ ⲉⲣⲟⲕ. Ⲃⲱⲕ ⲛⲅ̅ⲛ̅ⲕⲟⲧⲕ̅. Ⲁϥⲕⲧⲟϥ ⲁϥⲃⲱⲕ ⲁϥⲛ̅ⲕⲟⲧⲕ̅. Ⲋ. Ⲡϫⲟⲉⲓⲥ ⲇⲉ ⲁϥⲟⲩⲱϩ ⲉⲧⲟⲟⲧϥ̅ ⲛ̅ⲕⲉⲥⲟⲡ ⲉⲙⲟⲩⲧⲉ . ϫⲉ Ⲥⲁⲙⲟⲩⲏⲗ Ⲥⲁⲙⲟⲩⲏⲗ. Ⲁϥⲡⲱⲧ ⲟⲛ ⲉⲣⲁⲧϥ̅ ⲛ̅Ϩⲏⲗⲓ ⲙ̅ⲡⲙⲉϩⲥⲉⲡⲥⲛⲁⲩ ⲉϥϫⲱ ⲙ̅ⲙⲟⲥ ⲛⲁϥ . ϫⲉ ⲉⲓⲥ ϩⲏⲏⲧⲉ ⲁⲛⲟⲕ ⲁⲓⲉⲓ . ϫⲉ ⲁⲕⲙⲟⲩⲧⲉ ⲉⲣⲟⲓ. ⲠⲉϫⲉϨⲏⲗⲓ ⲛⲁϥ . ϫⲉ ⲙ̅ⲡⲓⲙⲟⲩⲧⲉ ⲉⲣⲟⲕ . ⲃⲱⲕ ⲛⲅ̅ⲛ̅ⲕⲟⲧⲕ̅. ⲍ̅. Ⲁⲩⲱ Ⲥⲁⲙⲟⲩⲏⲗ ⲙ̅ⲡⲁⲧⲉϥⲥⲟⲩⲉⲛⲡⲛⲟⲩⲧⲉ ⲁⲩⲱ ⲙ̅ⲡⲉⲡϣⲁϫⲉ ⲙ̅Ⲡϫⲟⲉⲓⲥ ϭⲱⲗⲡ̅ ⲉⲣⲟϥ. ⲏ̅. Ⲁⲡϫⲟⲉⲓⲥ ⲟⲩⲱϩ ⲉⲧⲟⲟⲧϥ̅ ⲉⲙⲟⲩⲧⲉ ⲙ̅ⲡⲙⲉϩϣⲟⲙⲛ̅ⲧ ⲛ̅ⲥⲟⲡ ⲉⲤⲁⲙⲟⲩⲏⲗ . ⲉϥϫⲱ ⲙ̅ⲙⲟⲥ ϫⲉ Ⲥⲁⲙⲟⲩⲏⲗ . Ⲁϥⲧⲱⲟⲩⲛ ⲟⲛ ⲁϥⲡⲱⲧ ⲉⲣⲁⲧϥ̅ ⲛ̅Ϩⲏⲗⲓ ⲉϥϫⲱ ⲙ̅ⲙⲟⲥ ⲛⲁϥ . ϫⲉ ⲉⲓⲥ ϩⲏⲏⲧⲉ ⲁⲓⲉⲓ ϫⲉ ⲕⲙⲟⲩⲧⲉ ⲉⲣⲟⲓ. Ⲁⲩⲱ Ϩⲏⲗⲓ ⲁϥⲉⲓⲙⲉ ϫⲉ Ⲡϫⲟⲉⲓⲥ ⲡⲉⲛⲧⲁϥⲙⲟⲩⲧⲉ ⲉⲡϣⲏⲣⲉ ϣⲏⲙ. ⲑ̅. Ⲁⲩⲱ ⲡⲉϫⲉϨⲏⲗⲓ ⲛⲁϥ . ϫⲉ ⲕⲟⲧⲕ̅ ⲛⲅ̅ⲛ̅ⲕⲟⲧⲕ̅ ⲡⲁϣⲏⲣⲉ ⲁⲩⲱ ⲉϥϣⲁⲛⲙⲟⲩⲧⲉ ⲉⲣⲟⲕ ⲉⲕⲉϫⲟⲟⲥ ϫⲉ Ⲡϫⲟⲉⲓⲥ ϣⲁϫⲉ ⲡⲉⲕϩⲙ̅ϩⲁⲗ ⲥⲱⲧⲙ̅. Ⲥⲁⲙⲟⲩⲏⲗ ⲇⲉ ⲁϥⲃⲱⲕ ⲁϥⲉⲛⲕⲟⲧⲕ̅ ϩⲙ̅ⲡⲉϥⲙⲁ. Ⲁⲩⲱ Ⲡϫⲟⲉⲓⲥ ⲁϥⲉⲓ ϩⲁϫⲱϥ ⲁϥⲙⲟⲩⲧⲉ ⲉⲣⲟϥ ⲛ̅ⲑⲉ ⲛ̅ⲧⲉϩⲟⲩⲉⲓⲧⲉ . ⲠⲉϫⲉⲤⲁⲙⲟⲩⲏⲗ ϫⲉ ϣⲁϫⲉ ⲡⲉⲕϩⲙ̅ϩⲁⲗ ⲥⲱⲧⲙ̅ ⲉⲣⲟⲕ. ⲓ̅ⲁ. ⲠⲉϫⲉⲠϫⲟⲉⲓⲥ ⲛ̅Ⲥⲁⲙⲟⲩⲏⲗ . ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲉⲓⲣⲉ ⲛ̅ⲛⲁϣⲁϫⲉ ϩⲙ̅ⲡⲒ̅ⲏ̅ⲗ̅ . ϫⲉⲕⲁⲥ ⲟⲩⲟⲛ ⲛⲓⲙ ⲉⲧⲛⲁⲥⲱⲧⲙ̅ ⲉⲣⲟⲟⲩ ⲛ̅ⲧⲉⲛⲉϥⲙⲁⲁϫⲉ ⲙⲟⲩⲧⲉ ⲉⲃⲟⲗ. ⲓ̅ⲃ. Ϩⲙ̅ⲡⲉϩⲟⲟⲩ ⲉⲧⲙ̅ⲙⲁⲩ ϯⲛⲁⲉⲓⲛⲉ ⲉϫⲛ̅Ϩⲏⲗⲓ ⲛ̅ϣⲁϫⲉ ⲛⲓⲙ ⲛ̅ⲧⲁⲓⲧⲁⲩⲟⲟⲩ ⲉϫⲙ̅ⲡⲉϥⲏⲓ . ϯⲛⲁϩⲓⲧⲟⲟⲧ ⲉⲁⲁⲩ . ⲛ̅ⲧⲁϫⲟⲕⲟⲩ ⲉⲃⲟⲗ. ⲓ̅ⲅ. Ⲁⲩⲱ ⲁⲓⲧⲁⲙⲟϥ ϫⲉ ϯⲛⲁϫⲓⲕⲃⲁ ⲁⲛⲟⲕ ϩⲙ̅ⲡⲉϥⲏⲓ ⲛ̅ϣⲁⲉⲛⲉϩ . ϩⲛ̅ⲛⲉϫⲓⲛϭⲟⲛⲥ̅ ⲛ̅ⲛⲉϥϣⲏⲣⲉ . ϫⲉ ⲛⲉϥϣⲏⲣⲉ ⲛⲉⲩϫⲉⲡⲉⲑⲟⲟⲩ ⲛ̅ⲥⲁⲡⲛⲟⲩⲧⲉ . ⲁⲩⲱ ⲛⲉϥϯⲥⲃⲱ ⲛⲁⲩ ⲁⲛ ⲡⲉ. ⲓ̅ⲇ. Ⲁⲩⲱ ⲛ̅ⲛⲉⲧⲉⲓϩⲉ ϣⲱⲡⲉ. Ⲁⲓⲱⲣⲕ̅ ⲉϫⲉⲙⲡⲏⲓ ⲛ̅Ϩⲏⲗⲓ . ϫⲉ ⲉⲥⲉϣⲱⲡⲉ ⲥⲉⲛⲁⲕⲱ ⲉⲃⲟⲗ ⲙ̅ϫⲓⲛϭⲟⲛⲥ̅ ⲙ̅ⲡⲏⲓ ⲛ̅Ϩⲏⲗⲓ ϩⲛ̅ⲟⲩϣⲟⲩϩⲏⲛⲉ ⲁⲩⲱ ϩⲛ̅ϩⲉⲛⲑⲩⲥⲓⲁ ⲛ̅ϣⲁⲉⲛⲉϩ. Ⲥⲁⲙⲟⲩⲏⲗ ⲇⲉ ⲁϥⲛ̅ⲕⲟⲧⲕ̅ ϣⲁϩⲧⲟⲟⲩⲉ ⲁⲩⲱ ⲁϥϣⲟⲣⲡϥ̅ ⲙ̅ⲡⲉϥϩⲧⲟⲟⲩⲉ . ⲁϥⲟⲩⲱⲛ ⲛ̅ⲛⲉⲣⲟ ⲙ̅ⲡⲏⲓ ⲙ̅Ⲡϫⲟⲉⲓⲥ . Ⲥⲁⲙⲟⲩⲏⲗ ⲇⲉ ⲁϥⲣ̅ϩⲟⲧⲉ ⲉⲧⲁⲩⲉⲑⲟⲣⲁⲥⲓⲥ ⲉϨⲏⲗⲓ. ⲓ̅Ⲋ. ⲠⲉϫⲉϨⲏⲗⲓ ⲉϩⲟⲩⲛ ϩⲛ̅Ⲥⲁⲙⲟⲩⲏⲗ . ϫⲉ Ⲥⲁⲙⲟⲩⲏⲗ ⲡⲁϣⲏⲣⲉ . Ⲡⲉϫⲁϥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲥⲱⲧⲙ̅. ⲓ̅ⲍ. ⲠⲉϫⲉϨⲏⲗⲓ ⲛⲁϥ . ϫⲉ ⲟⲩ ⲡⲉ ⲡⲏⲁϫⲉ ⲛ̅ⲧⲁⲩϫⲟⲟϥ ⲉⲣⲟⲕⲑ ⲙ̅ⲡⲉⲣϩⲱⲡ ⲉⲣⲟⲓ . ⲉⲣⲉⲡⲛⲟⲩⲧⲉ ⲉⲓⲣⲉ ⲛⲁⲕ ⲉⲕϣⲁⲛϩⲉⲡⲟⲩϣⲁϫⲉ ⲉⲣⲟⲓ ⲉⲃⲟⲗ ϩⲑⲛⲛⲉϣⲁϫⲉ ⲧⲏⲣⲟⲩ ⲛ̅ⲧⲁⲩϫⲟⲟⲩ ⲉⲛⲉⲕⲙⲁⲁϫⲉ. ⲓ̅ⲏ. Ⲁⲩⲱ Ⲥⲁⲙⲟⲩⲏⲗ ⲁϥⲧⲁⲩⲟ ⲉϨⲏⲗⲓ ⲛ̅ⲛⲉϣⲁϫⲉ ⲧⲏⲣⲟⲩ ⲙ̅ⲡⲉϥϩⲉⲡⲗⲁⲁⲩ ⲉⲣⲟϥ. ⲠⲉϫⲉϨⲏⲗⲓ ϫⲉ Ⲡϫⲟⲉⲓⲥ ⲉϥⲉⲉⲓⲣⲉ ⲛ̅ⲧⲟϥ ⲙ̅ⲡⲁⲅⲁⲑⲟⲛ ⲙ̅ⲡⲉϥⲙ̅ⲧⲟ ⲉⲃⲟⲗ. ⲓ̅ⲑ. Ⲥⲁⲙⲟⲩⲏⲗ ⲇⲉ ⲁϥϫⲓⲥⲉ ⲁⲩⲱ Ⲡϫⲟⲉⲓⲥ ⲛⲉϥϣⲟⲟⲡ ⲛⲙ̅ⲙⲁϥ . ⲉⲙⲡⲉⲗⲁⲁⲩ ϩⲛ̅ⲛⲉϥϣⲁϫⲉ ⲧⲏⲣⲟⲩ ϩⲉ ⲉⲃⲟⲗ ϩⲓϫⲙ̅ⲡⲕⲁϩ. Ⲁⲩⲱ ⲡⲒ̅ⲏ̅ⲗ̅ ⲧⲏⲣϥ̅ ⲁⲩⲉⲓⲙⲉ ϫⲓⲛⲆⲁⲛ ϣⲁⲂⲉⲣⲥⲁⲃⲉ . ϫⲉ Ⲥⲁⲙⲟⲩⲏⲗ ⲟⲩⲡⲓⲥⲧⲟⲥ ⲡⲉ ⲙ̅ⲡⲣⲟⲫⲏⲧⲏⲥ ⲙ̅ⲡⲛⲟⲩⲧⲉ. ⲕ̅ⲁ̅. Ⲁⲩⲱ Ⲡϫⲟⲉⲓⲥ ⲁϥⲟⲩⲱϩ ⲉⲧⲟⲟⲧϥ̅ ⲉⲧⲁⲙⲟⲟⲩ ϩⲛ̅Ⲥⲏⲗⲱ . ϫⲉ Ⲡϫⲟⲉⲓⲥ ⲁϥⲟⲩⲟⲛϩϥ̅ ⲉⲃⲟⲗ ⲉⲤⲁⲙⲟⲩⲏⲗ . ⲁⲩⲱ Ⲥⲁⲙⲟⲩⲏⲗ ⲁϥⲧⲁⲛϩⲟⲩⲧϥ ⲉⲧⲣⲉϥⲉⲣⲡⲣⲟⲫⲏⲧⲏⲥ ⲙ̅Ⲡϫⲟⲉⲓⲥ ⲉⲡⲒ̅ⲏ̅ⲗ̅ ⲧⲏⲣϥ̅ ⲛ̅ϫⲓⲛϫⲱϥ ⲙ̅ⲡⲕⲁϩ ϣⲁϫⲱϥ . Ⲁⲩⲱ Ϩⲏⲗⲓ ⲛⲉⲩϩⲗ̅ⲗⲟ ⲉⲙⲁⲧⲉ ⲡⲉ . ⲁⲩⲱ ⲛⲉϥϣⲏⲣⲉ ⲛⲉⲩⲙⲟⲟϣⲉ ϩⲓⲛⲁⲓ ⲡⲉ ⲉⲣⲉⲧⲉⲩϩⲓⲏ ϩⲟⲟⲩ.
Ⲕⲉⲫ. Ⲇ̅.
Ⲁⲥϣⲱⲡⲉ ⲇⲉ ϩⲛ̅ⲛⲉϩⲟⲟⲩ ⲉⲧⲙ̅ⲙⲁⲩ ⲛ̅ⲁⲗⲗⲟⲫⲩⲗⲗⲟⲥ ⲁⲩⲥⲟⲩⲱϩ ⲉϩⲟⲩⲛ ⲉⲣ̅ⲡⲟⲗⲉⲙⲟⲥ ⲙⲛ̅ⲡⲒ̅ⲏ̅ⲗ̅ . ⲁⲩⲱ ⲡⲒ̅ⲏ̅ⲗ̅ ⲁϥⲉⲓ ⲉⲃⲟⲗ ⲉⲧⲱⲙⲛ̅ⲧ ⲉⲣⲟⲟⲩ ⲉⲡⲟⲗⲉⲙⲓ ⲛⲙ̅ⲙⲁⲩ . ⲁⲩⲧⲁⲁⲩ ⲉϩⲣⲁⲓ ⲉⲀⲃⲉⲛⲉⲍⲉⲣ . Ⲛ̅ⲁⲗⲗⲟⲫⲩⲗⲗⲟⲥ ϩⲱⲟⲩ ⲁⲩⲧⲁⲁⲩ ⲉϩⲣⲁⲓ ⲉⲀⲫⲉⲕ. ⲃ̅. Ⲁⲩⲱ ⲑⲛⲁⲗⲗⲟⲫⲩⲗⲗⲟⲥ ⲁⲩⲥⲉⲣⲉⲡⲉⲙⲗⲁϩ ⲉⲃⲟⲗ ⲉⲡⲟⲗⲉⲙⲉⲓ ⲙⲛ̅ⲡⲒ̅ⲏ̅ⲗ̅ . ⲡⲡⲟⲗⲉⲙⲟⲥ ⲇⲉ ⲁϥϩⲣⲟϣ ⲉϫⲙ̅ⲡⲒ̅ⲏ̅ⲗ̅ . ⲁⲩⲱ ⲛ̅ⲣⲱⲙⲉ ⲙ̅ⲡⲒ̅ⲏ̅ⲗ̅ ⲁⲩϭⲱⲧⲡ̅ ⲙ̅ⲡⲉⲙⲧⲟ ⲉⲃⲟⲗ ⲛ̅ⲛ̅ⲁⲗⲗⲟⲫⲩⲗⲗⲟⲥ . ⲁⲩⲱ ⲁⲩⲡⲗⲏⲅⲏ ⲉⲃⲟⲗ ϩⲙ̅ⲡⲉⲙⲗⲁϩ ⲛ̅ⲧⲁϥϣⲱⲡⲉ ϩⲛ̅ⲧⲥⲱϣⲉ ⲛ̅ϭⲓϩⲙⲉ ϣⲉ ⲛ̅ⲣⲱⲙⲉ. ⲅ̅. Ⲡⲗⲁⲟⲥ ⲇⲉ ⲁϥⲉⲓ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ⲁⲩⲱ ⲛⲉⲡⲣⲉⲥⲃⲩⲧⲉⲣⲟⲥ ⲙ̅ⲡⲒ̅ⲏ̅ⲗ̅ ⲡⲉϫⲁⲩ ⲛ̅ⲛⲉⲩⲉⲣⲏⲩ . ϫⲉ ⲉⲧⲃⲉⲟⲩ Ⲡϫⲟⲉⲓⲥ ⲁϥⲑⲃ̅ⲃⲓⲟⲛ ⲙ̅ⲡⲟⲟⲩ ⲛⲁϩⲣⲁⲩ ⲛ̅ⲛ̅ⲁⲗⲗⲟⲫⲩⲗⲗⲟⲥ . Ⲙⲁⲣⲉⲛϫⲓ ⲛ̅ⲧⲕⲓⲃⲱⲧⲟⲥ ⲙ̅ⲡⲉⲛⲛⲟⲩⲧⲉ ⲉⲃⲟⲗ ϩⲛ̅Ⲥⲏⲗⲱ ⲛⲥ̅ⲉⲓ . ⲛⲥ̅ϭⲱ ϩⲛ̅ⲧⲉⲛⲙⲏⲧⲉ ⲛⲥ̅ⲛⲁϩⲙⲉⲛ ⲛ̅ⲧⲟⲟⲧⲟⲩ ⲛ̅ⲛⲉⲛϫⲁϫⲉ. ⲇ̅. Ⲡⲗⲁⲟⲥ ⲇⲉ ⲁϥϫⲟⲟⲩ ⲉϩⲣⲁⲓ ⲉⲤⲏⲗⲱ . ⲁⲩϥⲓ ⲉⲃⲟⲗ ϩⲙ̅ⲡⲙⲁ ⲉⲧⲙ̅ⲙⲁⲩ ⲛ̅ⲧⲕⲓⲃⲱⲧⲟⲥ ⲙ̅Ⲡϫⲟⲉⲓⲥ . ⲉⲣⲉⲡⲉⲭⲉⲣⲟⲩⲃⲓⲛ ϩⲓϫⲱⲥ . ⲁⲩⲱ ⲡϣⲏⲣⲉ ⲥⲛⲁⲩ ⲛ̅Ϩⲏⲗⲓ . Ⲟⲫⲛⲓ ⲙⲛ̅Ⲫⲓⲛⲉⲉⲥ . ⲁⲩⲉⲓ ⲙⲛ̅ⲧⲕⲓⲃⲱⲧⲟⲥ ⲙ̅Ⲡϫⲟⲉⲓⲥ. Ⲁⲥϣⲱⲡⲉ ⲇⲉ ⲛ̅ⲧⲉⲣⲉⲧⲕⲓⲃⲱⲧⲟⲥ ⲙ̅Ⲡϫⲟⲉⲓⲥ ⲉⲓ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ . ⲡⲒ̅ⲏ̅ⲗ̅ ⲧⲏⲣϥ̅ ⲁⲩⲉⲓ ⲉϩⲣⲁⲓ ⲉⲩⲱϣ ⲉⲃⲟⲗ ϩⲛ̅ⲟⲩⲛⲟϭ ⲛ̅ϩⲣⲟⲟⲩ ⲁⲩⲱ ⲡⲕⲁϩ ⲧⲏⲣϥ̅ ⲁϥⲕⲉⲙⲧϥ̅. Ⲋ. Ⲛ̅ⲁⲗⲗⲟⲫⲩⲗⲗⲟⲥ ⲇⲉ ⲁⲩⲥⲱⲧⲙ̅ ⲉⲡⲉⲩϩⲣⲟⲟⲩ . ⲁⲩⲱ ⲡⲉϫⲁⲩ . ϫⲉ ⲟⲩ ⲡⲉ ⲡⲉⲓϩⲣⲟⲟⲩ ⲛ̅ⲧⲁϥϣⲱⲡⲉ ϩⲛ̅ⲧⲡⲁⲣⲉⲙⲃⲟⲗⲏ ⲛ̅ⲛⲉϨⲉⲃⲣⲁⲓⲟⲥⲑ Ⲁⲩⲱ ⲁⲩⲉⲓⲙⲉ . ϫⲉ ⲧⲕⲓⲃⲱⲧⲟⲥ ⲙ̅Ⲡϫⲟⲉⲓⲥ ⲧⲉ ⲛ̅ⲧⲁⲥⲉⲓ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ. ⲍ̅. Ⲛ̅ⲁⲗⲗⲟⲫⲩⲗⲗⲟⲥ ⲇⲉ ⲁⲩⲣ̅ϩⲟⲧⲉ ⲉⲙⲁⲧⲉ . ⲡⲉϫⲁⲩ ϫⲉ ⲛⲁⲓ ⲛⲉ ⲛⲉⲛⲟⲩⲧⲉ ⲛ̅ⲧⲁⲩⲉⲓ ϣⲁⲣⲟⲟⲩ ⲉⲧⲉⲩⲡⲁⲣⲉⲙⲃⲟⲗⲏ . ⲟⲩⲟⲓ ⲛⲁⲛ ⲡⲉⲛϫⲟⲉⲓⲥ ⲛⲁϩⲙⲉⲛ ⲙ̅ⲡⲟⲟⲩ . ϫⲉ ⲙ̅ⲡⲉⲧⲱϣ ⲛ̅ⲧⲉⲓϩⲉ ϣⲱⲡⲉ ⲛ̅ⲥⲁϥ . ⲙⲛ̅ϣⲙⲛ̅ⲧ ⲙ̅ⲡⲟⲟⲩ ⲛ̅ϩⲟⲟⲩ. ⲏ̅. Ⲟⲩⲟⲓ ⲛⲁⲛ ⲛⲓⲙ ⲡⲉⲧⲛⲁⲛⲁϩⲙⲉⲛ ⲛ̅ⲧⲟⲟⲧⲟⲩ ⲑⲛⲛⲉⲓⲛⲟⲩⲧⲉ ⲉⲧϫⲟⲟⲣ ⲛⲁⲓ ⲛⲉ ⲛⲉⲛⲟⲩⲧⲉ ⲛ̅ⲧⲁⲩϣⲁⲁⲣⲉ ⲉⲔⲏⲙⲉ . ϩⲙ̅ⲡⲗⲏⲅⲏ ⲛⲓⲙ ⲁⲩⲱ ϩⲙ̅ⲡϫⲁⲉⲓⲉ ⲧⲏⲣϥ̅. ⲑ̅. Ⲧⲱⲕ ⲙ̅ⲙⲱⲧⲛ̅ ⲛ̅ⲧⲉⲧⲛ̅ⲉⲣϫⲱⲱⲣⲉ ⲛ̅ⲁⲗⲗⲟⲫⲩⲗⲗⲟⲥ . ϫⲉ ⲛ̅ⲛⲉⲧⲛ̅ⲉⲣϩⲙ̅ϩⲁⲗ ⲛ̅ⲛⲉϨⲉⲃⲣⲁⲓⲟⲥ ⲕⲁⲧⲁⲑⲉ ⲛ̅ⲧⲁⲩⲉⲣϩⲙ̅ϩⲁⲗ ⲛⲁⲛ ⲛ̅ⲧⲉⲧⲛ̅ϣⲱⲡⲉ ⲛ̅ϩⲉⲛⲣⲱⲙⲉ ⲛ̅ϫⲱⲱⲣⲉ ⲛ̅ⲧⲉⲧⲛ̅ⲙⲓϣⲉ ⲛⲙ̅ⲙⲁⲩ. Ⲁⲩⲱ ⲁⲩⲁϩⲉⲣⲁⲧⲟⲩ ⲁⲩⲙⲓϣⲉ ⲛⲙ̅ⲙⲁⲩ . ⲛ̅ⲣⲱⲙⲉ ⲇⲉ ⲙ̅ⲡⲒ̅ⲏ̅ⲗ̅ ⲁⲩϭⲱⲧⲡ̅ . ⲁⲡⲟⲩⲁ ⲡⲟⲩⲁ ⲃⲱⲕ ⲉⲧⲉϥⲥⲕⲩⲛⲏ . ⲁⲩⲛⲟϭ ⲉⲙⲁⲧⲉ ⲙ̅ⲡⲗⲏⲅⲏ ϣⲱⲡⲉ ⲛ̅ϩⲏⲧⲟⲩ ⲁⲩϩⲉ ⲉⲃⲟⲗ ϩⲙ̅ⲡⲒ̅ⲏ̅ⲗ̅ ⲛ̅ϭⲓϣⲟⲙⲛ̅ⲧ ⲛ̅ⲧⲃⲁ ⲙ̅ⲙⲏⲏϣⲉ. ⲓ̅ⲁ. Ⲁⲩⲱ ⲧⲕⲓⲃⲱⲧⲟⲥ ⲙ̅ⲡⲛⲟⲩⲧⲉ ⲁⲩϥⲓⲧⲥ̅ ⲁⲩⲱ ⲡϣⲏⲣⲉ ⲥⲛⲁⲩ ⲛ̅Ϩⲏⲗⲓ ⲁⲩⲙⲟⲟⲩⲧⲟⲩ . Ⲟⲫⲛⲓ ⲙⲛ̅Ⲫⲓⲛⲉⲉⲥ . Ⲁϥⲉⲓ ⲉϩⲣⲁⲓ ⲉⲤⲏⲗⲱ ϩⲙ̅ⲡⲉϩⲟⲟⲩ ⲉⲧⲙ̅ⲙⲁⲩ . ⲉⲣⲉⲛⲉϥϩⲟⲓⲧⲉ ⲡⲏϩ ϩⲓⲱⲱϥ . ⲁⲩⲱ ⲉⲣⲉϫⲱϥ ⲙⲉϩ ⲛ̅ⲓⲧⲉⲛ. ⲓ̅ⲅ. Ϩⲏⲗⲓ ⲇⲉ ⲛⲉϥϩⲙⲟⲟⲥ ⲡⲉ ϩⲓϫⲛ̅ⲡⲉϥⲧⲁϭⲥ̅ ϩⲓⲣⲉⲛⲧⲡⲩⲗⲏ . ⲉϥϭⲱϣⲧ̅ ⲉⲃⲟⲗ ⲉⲧⲉϩⲓⲏ ϫⲉ ⲛⲉⲣⲉⲛⲉϥϩⲏⲧ ⲡⲟϣⲥ̅ ⲉⲃⲟⲗ ⲉⲣⲟϥ ⲉⲧⲃⲉⲧⲕⲓⲃⲱⲧⲟⲥ ⲙ̅Ⲡϫⲟⲉⲓⲥ. Ⲁⲩⲱ ⲡⲣⲱⲙⲉ ⲁϥⲓ ⲉϩⲟⲩⲛ ⲉⲧⲡⲟⲗⲓⲥ ⲉⲧⲁⲙⲟⲟⲩ . ⲧⲡⲟⲗⲓⲥ ⲇⲉ ⲛ̅ⲧⲉⲧⲉⲥⲥⲱⲧⲙ̅ ⲁⲥⲱϣ ⲉⲃⲟⲗ. ⲓ̅ⲇ. ⲀⲩⲱϨⲏⲗⲓ ⲁϥⲥⲱⲧⲙ̅ ⲉⲡⲉϩⲣⲟⲟⲩ ⲙ̅ⲡⲱϣ ⲉⲃⲟⲗ . Ⲡⲉϫⲁϥ ϫⲉ ⲟⲩ ⲡⲉ ⲡⲉⲓϩⲣⲟⲟⲩ ⲙⲛ̅ⲡⲓⲱϣ ⲉⲃⲟⲗ . ⲡⲣⲱⲙⲉ ⲇⲉ ⲁϥⲡⲱⲧ ⲁϥⲉⲓ ⲉⲧⲁⲙⲉϨⲏⲗⲓ. Ϩⲏⲗⲓ ⲇⲉ ⲛⲉⲟⲩⲣⲱⲙⲉ ⲡⲉ ⲉϥϩⲛ̅ⲡⲥ̅ⲧⲁⲓⲟ ⲛ̅ⲣⲟⲙⲡⲉ . ⲛⲉϥⲃⲁⲗ ⲁⲩϩⲣⲟϣ ⲉⲣⲟϥ . ⲁⲩⲱ ⲛⲉϥⲉⲓⲱⲣϩ̅ ⲁⲛ ⲡⲉ. ⲠⲉϫⲉϨⲏⲗⲓ ⲇⲉ ⲛ̅ⲛ̅ⲣⲣⲱⲙⲉ ⲉⲧⲁϩⲉⲣⲁⲧⲟⲩ ⲙ̅ⲡⲉϥⲉⲙⲧⲟ ⲉⲃⲟⲗ . ϫⲉ ⲟⲩ ⲡⲉ ⲡⲉϩⲣⲟⲟⲩ ⲙ̅ⲡⲓⲱϣ ⲉⲃⲟⲗ. ⲓ̅Ⲋ. Ⲁⲩⲱ ⲡⲣⲱⲙⲉ ⲁϥⲡⲱⲧ . ⲁϥϯ ⲙ̅ⲡⲉϥⲟⲩⲟⲓ ⲉϨⲏⲗⲓ ⲡⲉϫⲁϥ ⲛⲁϥ . ϫⲉ ⲁⲛⲟⲕ ⲡⲉ ⲛ̅ⲧⲁⲓⲡⲱⲧ ⲉⲃⲟⲗ ϩⲛ̅ⲧⲡⲁⲣⲉⲙⲃⲟⲗⲏ ⲁⲛⲟⲕ ⲡⲉ ⲛⲧⲁⲓ . . . . ⲙ̅ⲡⲟⲟⲩ ⲉⲃⲟⲗ ϩⲙ̅ⲡⲉⲙⲗⲁϩ. ⲠⲉϫⲉϨⲏⲗⲓ ⲛⲁϥ . ϫⲉ ⲟⲩ ⲧⲉ ⲑⲉ ⲛ̅ⲧⲁⲥϣⲱⲡⲉ ⲡⲁϣⲏⲣⲉⲑ ⲓ̅ⲍ. Ⲁⲩⲱ ⲡϩⲣ̅ϣⲓⲣⲉ ⲁϥⲟⲩⲱϣⲃ̅ ⲉϥϫⲱ ⲙ̅ⲙⲟⲥ ⲛⲁϥ . ϫⲉ ⲛ̅ⲣⲱⲙⲉ ⲙ̅ⲡⲒ̅ⲏ̅ⲗ̅ ⲁⲩϭⲱⲧⲡ̅ ϩⲏⲧⲟⲩ ⲛ̅ⲛ̅ⲁⲗⲗⲟⲫⲩⲗⲗⲟⲥ . ⲁⲩⲱ ⲟⲩⲛⲟϭ ⲛ̅ⲣⲁϩⲧⲥ̅ ϣⲱⲡⲉ ⲙ̅ⲡⲗⲁⲟⲥ . ⲁⲩⲱ ⲡⲉⲕϣⲏⲣⲉ ⲥⲛⲁⲩ ⲁⲩⲙⲟⲟⲩⲧⲟⲩ . ⲧⲕⲓⲃⲱⲧⲟⲥ ⲙ̅Ⲡϫⲟⲉⲓⲥ ⲁⲩϥⲓⲧⲥ̅. ⲓ̅ⲏ. Ⲁⲥϣⲱⲡⲉ ⲇⲉ ⲛ̅ⲧⲉⲣⲉϥⲣ̅ⲡⲙⲉⲉⲩⲉ ⲛ̅ⲧⲕⲓⲃⲱⲧⲟⲥ ⲙ̅Ⲡϫⲟⲉⲓⲥ . ⲁϥϩⲉ ϩⲓϫⲙ̅ⲡⲉϥⲧⲁϭⲥ̅ ⲛ̅ⲥⲁⲡⲁϩⲟⲩ ⲉϥϩⲓⲟⲩⲉ ⲛ̅ⲧⲡⲩⲗⲏ ⲁⲡⲕⲁⲥ ⲛ̅ⲧⲉϥϫⲓⲥⲉ ⲟⲩⲱϫⲡ ⲁϥⲙⲟⲩ . ϫⲉ ⲡⲣⲱⲙⲉ ⲟⲩϩⲗⲗⲟ ⲡⲉ . ⲉⲁϥⲁⲓⲁⲓ . ⲁⲩⲱ ⲛ̅ⲧⲟϥ ⲁϥⲕⲣⲓⲛⲉ ⲙ̅ⲡⲓ̅ⲏ̅ⲗ̅ ⲛ̅ϫⲟⲩⲱⲧⲉ ⲛ̅ⲣⲟⲙⲡⲉ. ⲓ̅ⲑ̅. Ⲧⲉϥϣⲉⲗⲉⲉⲧ ⲇⲉ ⲉⲧⲉⲑⲓⲙⲉ ⲧⲉ ⲙ̅Ⲫⲓⲛⲉⲉⲥ ⲡⲉϥϣⲏⲣⲉ . ⲛⲉⲥϩⲟⲣϣ̅ ⲛⲱ ⲉⲙⲓⲥⲉ . ⲁⲩⲱ ⲛ̅ⲧⲉⲣⲉⲥⲥⲱⲧⲙ̅ ⲉⲡⲟⲩⲱ . ϫⲉ ⲁⲩϥⲓ ⲛ̅ⲧⲕⲓⲃⲱⲧⲟⲥ ⲙ̅ⲡⲛⲟⲩⲧⲉ ⲁⲩⲱ ϫⲉ ⲁⲡⲉⲥϣⲟⲙ ⲙⲟⲩ ⲙⲛ̅ⲡⲉⲥⲕⲉϩⲁⲓ . ⲁⲥⲟⲩⲉⲛⲣⲁ ⲁⲥⲣⲓⲙⲉ ⲁⲩⲱ ⲁⲥϯ ⲉⲙⲓⲥⲉ . ϫⲉ ⲁⲛ̅ⲁⲁⲕⲉ ϩⲙⲙⲟⲙ ⲉϫⲱⲥ.