Ⲙ̅ⲘⲀⲢⲦⲨⲢⲞⲤ   Ⲛ̅ⲚⲒⲞⲨⲆⲀⲒ
ⲘⲀⲔⲔⲀⲂⲀⲒⲞⲤ  Ⲉ̅:Ⲕ̅Ⲍ̅Ⲍ̅


  
Ⲙ̅ⲙⲁⲣⲧⲩⲣⲟⲥ  ⲛ̅ⲛ̅Ⲓⲟⲩⲇⲁⲓ  ⲉⲛⲧⲁⲩϣⲱⲡⲉ  ϩⲓⲀⲛⲧⲓⲟⲭⲓⲟⲥ  ⲡⲣⲣⲟ. Ⲉ̅:ⲕ̅ⲍ̅.  Ⲓⲟⲩⲇⲁⲥ  ⲉⲧⲉⲘⲁⲕⲕⲁⲃⲁⲓⲟⲩⲥ  ⲡⲉ. ⲙⲛ̅ϩⲉⲛⲕⲟⲟⲩⲉ  ⲛⲉⲙⲉϥ . ⲉⲩⲙⲉϩⲙⲏⲧ  ⲉⲩⲁⲛⲁⲭⲱⲣⲓ  ⲉⲛⲧⲟⲩⲉⲓⲏ . ⲁⲩϣⲱⲡⲉ  ⲉⲩⲟ  ⲛ̅ⲑⲉ  ⲛ̅ⲛ̅ⲑⲏⲣⲓⲟⲛ. ⲉⲩⲟⲩⲱⲙⲭⲟⲣⲧⲟⲥ  ⲉⲩⲙⲏⲛ  ⲉⲃⲟⲗ  ϫⲉ  ⲛⲉⲩⲙⲉⲧⲉⲭⲉ  ⲉⲡⲧⲱⲗⲙ. Ⲋ. Ⲙ̅ⲛ̅ϩ̅ⲛ̅ϩⲕⲟⲩⲉⲓ  ⲛ̅ⲟⲩⲟⲉⲓϣ  ⲁⲡⲣⲟ  ϫⲟⲟⲩ  ⲛⲟⲩϩⲗ̅ⲗⲟ  ⲛ̅Ⲑⲁⲑⲏⲛⲁⲓⲟⲥ  ⲉϯϩⲧⲟⲣ  ⲉⲛⲒⲟⲩⲇⲁⲓ  ⲉⲡⲱⲛⲉ  ⲉⲃⲟⲗ  ⲛ̅ⲛ̅ⲛⲟⲙⲟⲥ  ⲛ̅ⲛⲉⲩⲉⲓⲟⲧⲉ  ⲉⲧⲙ̅ⲡⲟⲗⲓⲧⲉⲩⲉ  ϩ̅ⲛ̅ⲛⲛⲟⲙⲟⲥ  ⲛ̅ⲛⲉⲩⲉⲓⲟⲧⲉ. ⲃ̅. ⲉϫⲱϩⲙ̅  ⲇⲉ  ⲙ̅ⲡⲉⲣⲡⲉ  ⲉⲧϩ̅ⲛ̅Ⲓ̅ⲉⲣⲟⲩⲥⲁⲗⲏⲙ . ⲉⲙⲟⲩⲧⲉ  ⲉⲣⲟϥ  ϫⲉ  ⲡⲁⲌⲉⲩⲥ  ⲛ̅Ⲟⲗⲩⲙⲡⲓⲟⲥ  ⲁⲩⲱ  ⲡⲉⲧϩⲛ̅ⲕⲟⲣⲁⲍⲉⲓⲛ  ϫⲉ  ⲡⲁⲌⲉⲩⲥ  ⲛ̅ⲝⲉⲛⲓⲟⲥ  ⲕⲁⲧⲁⲡⲟⲩⲟⲡ. ⲅ̅. Ⲛ̅ⲛⲉⲧⲟⲩⲏϩ  ϩ̅ⲙ̅ⲡⲙⲁ  ⲉⲧⲙ̅ⲙⲁⲩ  ⲧⲕⲁⲕⲓⲁ  ⲛ̅ⲧⲁⲥⲉⲓ ⲛⲉⲥⲟϣ  ⲙ̅ⲙⲁⲧⲉ . ⲁⲩⲱ  ⲛⲉⲥⲙⲟⲕϩ  ⲉϥⲓ  ϩⲁⲣⲟⲥ  ⲛ̅ⲛⲁϩⲣⲛ̅ⲟⲩⲟⲛ  ⲛⲓⲙ. ⲇ̅. ⲡⲉⲣⲡⲉ  ⲅⲁⲣ  ⲁϥⲙⲟⲩϩ  ⲙ̅ⲙⲛⲧϣⲛⲁ  ϩ̅ⲓϫⲏⲣ  ⲉⲃⲟⲗ  ϩ̅ⲓ̅ⲧ̅ⲛ̅ⲛ̅ϩⲉⲑⲛⲟⲥ . ⲉⲩⲣⲙⲛⲧⲁⲧϣⲁⲩ  ⲙ̅ⲛ̅ⲛⲉϩⲓⲟⲙⲉ  ⲉⲧⲛⲏϫ  ⲉⲃⲟⲗ  ϩ̅ⲛ̅ⲛⲉⲥⲧⲟⲁ  ⲉⲧⲟⲩⲁⲁⲃ  ⲁⲩⲱ  ⲉⲩϫⲓ  ⲉϩⲟⲩⲛ  ⲉⲙⲉⲩ  ⲛ̅ⲛⲉⲧⲉⲙⲉϣϣⲉ.  ⲉⲩⲧⲁⲗⲟ  ⲉϩⲣⲁⲓ  ⲉϫ̅ⲛ̅ⲡⲉⲑⲩⲥⲓⲟⲁⲥⲧⲏⲣⲓⲟⲛ  ⲛ̅ⲛⲉⲧϫⲁϩⲙ̅ ⲛⲉⲛⲧⲁⲡⲛⲟⲙⲟⲥ  ⲧⲥⲧⲟⲟⲩ  ⲉⲃⲟⲗ. Ⲋ. Ⲛⲉⲙ̅ⲛ̅  ⲅⲁⲣ  ⲑⲉ  ⲛ̅ⲣ̅ⲥⲁⲃⲃⲁⲧⲟⲛ  ⲟⲩⲧⲉ  ⲉⲁⲣⲏϩ  ⲉⲛϣⲁⲉ  ⲛ̅ⲛⲉⲛⲉⲓⲟⲧⲉ  ⲟⲩⲧⲉ  ⲉⲧⲣⲉⲩϩⲟⲙⲟⲗⲟⲅⲓ  ϫⲉ  ⲁϩⲉⲛⲓⲟⲩⲇⲁⲓ. ⲍ̅. Ⲛⲉⲩⲉⲓⲛⲉ  ⲙ̅ⲙⲟⲟⲩ  ϩ̅ⲛ̅ⲟⲩⲁⲛⲁⲅⲕⲏ  ⲉⲥⲥⲁϣ  ⲉϩ̅ⲣ̅ⲉⲃⲟⲧ  ⲇⲉ  ⲙⲡⲉϩⲟⲟⲩ  ⲙ̅ⲫⲟⲩⲙⲓⲥⲉ  ⲙ̅ⲡⲣ̅ⲣⲟⲉⲣⲑⲩⲥⲓⲁ . ⲁⲩⲱ  ⲛ̅ⲧⲁⲣⲉϥⲓ  ⲛ̅ϭⲓⲡϣⲁⲉ  ⲙ̅ⲡⲆⲓⲟⲛⲩⲥⲟⲥ  ⲁⲩϯϩⲧⲟⲣ  ⲉⲣⲟⲟⲩ  ⲉⲙⲟⲟϣⲉ  ϩⲁⲧⲉϥϩⲏ  ⲉⲣⲉϩⲉⲛⲕⲗⲟⲟⲙ  ϩⲓϫⲱⲟⲩ. ⲏ̅. Ⲁϥϫⲟⲟⲩ  ⲛϭⲓⲠⲧⲟⲗⲉⲙⲁⲓⲟⲥ  ⲛ̅ⲟⲩⲉϩⲥⲁϩⲛⲉ  ⲉⲛⲡⲟⲗⲓⲥ  ⲛ̅ⲟⲩⲉⲉⲓⲛⲓⲛ  ⲉⲧϩⲓⲧⲟⲩⲱⲟⲩ  ⲉⲣⲡⲁⲓⲥⲙⲟⲧ  ⲛ̅ⲟⲩⲱⲧ . ⲛ̅Ⲓⲟⲩⲇⲁⲓ  ⲉⲧⲣⲉⲩϥⲣ̅ⲑⲩⲥⲓⲁ. ⲑ̅. Ⲛⲉⲧⲉⲥⲉⲛⲁⲟⲩⲱϣⲧ  ⲇⲉ  ⲁⲛ  ⲉⲡⲱⲛⲉ   ⲉⲛⲥⲱⲛⲧ   ⲛ̅ⲛ̅ϩⲉⲗⲗⲏⲛ  ⲥⲱⲛⲁⲕⲟⲛⲥⲟⲩ. 

Ⲡⲕⲉⲡⲉⲑⲟⲟⲩ  ⲇⲉ  ⲟⲛ  ⲁϥϣⲱⲡⲉ  ⲉϥⲛⲟϣⲧ  ⲉⲛⲉⲩⲉⲣⲟϥ . ⲥϩⲓⲙⲉ  ⲅⲁⲣ  ⲥⲛⲧⲉ  ⲉⲁⲩⲥⲃ̅ⲃⲉ  ⲛ̅ⲛⲉⲩϣⲏⲣⲉ  ⲕⲟⲩⲉⲓ  ⲉⲛⲉⲩⲕⲓⲃⲉ  ⲁⲩⲡⲉⲣⲓⲁⲅⲉ  ⲙⲙⲟⲟⲩ  ϩ̅ⲛ̅ⲧⲡⲟⲗⲟⲓⲥ  ⲧⲏⲣⲥ̅  ⲁⲩⲛⲟϫⲟⲩ  ⲉⲃⲟⲗ  ⲉⲡⲉⲥⲏⲧ. ⲓ̅ⲁ̅. Ϩⲉⲛⲕⲟⲟⲩⲉ ⲁⲩⲡⲱⲧ  ⲛ̅ϫⲓⲟⲩⲉ  ⲉϩⲣⲁⲓ  ⲉⲛⲧⲁⲫⲟⲥ  ⲉⲧϩⲏⲛ  ⲉϩⲟⲩⲛ  ⲉⲣⲟⲟⲩ  ⲉⲧⲣⲉⲩⲧⲙ̅ⲣ̅ⲙ̅ⲡϣⲁ  ⲛ̅ⲥⲁϣ . ⲀⲩⲧⲁⲙⲉⲪⲓⲗⲓⲡⲡⲟⲥ  ⲉⲣⲟⲟⲩ  ⲁϥⲛⲟϫⲟⲩ  ⲉⲃⲟⲗ  ϫⲉ  ⲛⲉⲩⲣ̅ϩⲟⲧⲉ  ⲉⲣⲃⲟⲏⲑⲓ  ⲉⲣⲟⲟⲩ  ⲕⲁⲧⲁⲡⲉϩⲟⲟⲩ  ⲛ̅ⲧⲙ̅ⲙⲛⲧⲥⲉⲙⲛⲟⲥ  ⲉⲧⲧⲁⲉⲓⲏⲩ. ⲓ̅ⲃ̅. ϯⲥⲟⲡⲥⲡ  ϭⲉ ⲛ̅ⲛⲉⲧⲱϣ  ⲙ̅ⲡⲁⲓϫⲱⲙⲉ  ⲉⲧⲙ̅ⲡⲱϣ  ⲛ̅ϩⲏⲧ  ϩⲛ̅ⲛⲁⲓϩⲓⲥⲉ . ⲁⲗⲗⲁ  ⲉⲙⲟⲕⲙⲉⲕ  ϫⲉ  ⲉⲣⲉⲛⲁⲓⲑⲗⲓⲯⲓⲥ  ϣⲟⲟⲡ  ⲙⲡⲉⲛⲅⲉⲛⲟⲥ  ⲉⲩⲧⲁⲕⲟ  ⲁⲛ  ⲁⲗⲗⲁ  ⲉⲩⲥⲃⲱ. ⲓ̅ⲅ̅. ⲉⲧ̅ⲙ̅ⲧⲣⲉⲩⲕⲁⲁⲛ  ⲅⲁⲣ  ⲡⲉ  ⲉϣⲉϥⲧⲉ  ⲁⲗⲗⲁ  ⲧⲉⲛⲟⲩ  ⲥⲉⲣⲉⲡⲓⲧⲓⲙⲁ  ⲛⲁⲩ  ⲟⲩⲙⲟⲉⲓⲛ  ⲛ̅ⲛⲟϭ  ⲡⲉ  ⲉⲛⲁⲛⲟⲩϥ. ⲓ̅ⲇ̅. ⲛⲉϥⲕⲣⲓⲛⲉ  ⲅⲁⲣ  ⲙ̅ⲙⲟⲛ ⲁⲛ  ⲛ̅ϭⲓⲠϫⲟⲉⲓⲥ  ⲛ̅ⲑⲉ  ⲛ̅ⲛ̅ϩⲉⲑⲛⲟⲥ  ⲉϣⲁϥϭⲱ  ⲉϥϩⲟⲣϣ  ⲛ̅ϩⲏⲧ  ⲉϫⲱⲟⲩ  ϣⲁⲛⲧⲟⲩϫⲱⲕ  ⲉⲃⲟⲗ  ⲛ̅ϥ̅ⲕⲟⲗⲁⲍⲉ  ⲙ̅ⲙⲟⲟⲩ.  ⲙⲏⲡⲱⲥ ϩⲱⲱⲛ  ⲛ̅ⲧⲛ̅ⲉⲓ  ⲉϩⲣⲁⲓ  ⲉⲡϫⲱⲕ  ⲛ̅ⲛⲉⲛⲛⲟⲃⲉ  ⲛϥϫⲓⲕⲃⲁ  ⲛ̅ϩⲏⲧⲛ̅. ⲓ̅Ⲋ. Ⲉⲧⲃⲉⲡⲁⲓ  ⲣⲱ  ⲙ̅ⲡⲉϥϥⲓ  ⲙ̅ⲡⲉϥⲛⲁⲁ  ⲉⲛⲏϩⲉ  ⲉⲃⲟⲗ  ϩⲓϫⲱⲛ  ⲁⲗⲗⲁ  ⲉϥϯⲥⲃⲱ  ⲙ̅ⲡⲉϥⲗⲁⲟⲥ  ϩ̅ⲛ̅ϩⲉⲛⲑⲗⲓⲯⲓⲥ  ⲉⲛϥⲕⲱ  ⲙⲙⲟⲛ  ⲁⲛ  ⲛ̅ⲥⲱϥ.  ⲓ̅ⲍ̅. Ⲡⲗⲏⲛ  ⲛ̅ⲧⲁⲛϫⲓ ⲛⲁⲓ  ⲉⲩⲣ̅ⲡⲙⲉⲉⲩⲉ  ⲙⲁⲣⲛ̅ϣⲁϫⲉ  ⲛ̅ⲇⲉ  ⲉⲛⲉⲛⲧⲁⲩϣⲱⲡⲉ  ϩⲓⲧⲛ̅ϩⲉⲛⲕⲟⲩⲉⲓ  ⲛ̅ϣⲁϫⲉ.  ⲓ̅ⲏ̅.

Ⲉⲗⲉⲁⲍⲁⲣ  ⲟⲩⲁ  ⲛ̅ⲛⲟϭ  ⲛ̅ⲅⲣⲁⲙⲙⲁⲧⲉⲩⲥ  ⲡⲉ  ⲟⲩⲣⲱⲙⲉ  ⲉⲁϥⲁⲓⲁⲉⲓ  ϩ̅ⲛ̅ⲧⲉϥϭⲟⲧ .  ⲉϥϫⲟⲥⲉ  ⲉⲛⲉⲥⲱϥ  ϩ̅ⲛ̅ⲡⲉϥⲥⲙⲟⲧ  ⲙ̅ⲡⲉϥϩⲟ  ⲉⲁⲩⲁⲛⲁⲅⲕⲁⲍⲉ  ⲙ̅ⲙⲟϥ  ⲉⲩⲱⲙⲉϥ  ⲛ̅ⲣⲓⲣ. ⲓ̅ⲑ̅. Ⲛⲧⲟϥ  ⲇⲉ  ⲁϥⲥⲱⲡⲥ  ⲛⲁϥ  ⲙ̅ⲡⲙⲟⲩ  ⲛ̅ⲟⲩⲉⲟⲟⲩ ⲉϩⲟⲩⲉⲡⲱⲛϩ  ϩ̅ⲛ̅ⲟⲩϣⲓⲡⲉ  ⲁϥϯⲡⲉϥⲟⲩⲁⲉⲓⲉ  ⲟⲩⲁⲁϥ  ⲉϩⲟⲩⲛ  ⲉⲧⲃⲁⲥⲁⲛⲟⲥ  ϩ̅ⲛ̅ⲟⲩⲟⲩⲣⲟⲧ.  ⲉⲁϥϯⲧⲱⲕ  ⲕⲁⲧⲁⲑⲉ  ⲉⲧⲉϣϣⲉ  ⲛ̅ⲛⲉⲧⲟⲩⲉϣϩⲩⲡⲟⲙⲓⲛⲉ   ⲉⲧⲃⲉⲉϩⲟⲩⲛ  ⲉⲡⲱⲛϩ. ⲕ̅ⲁ̅. Ⲛⲉⲧⲧⲏϣ  ⲇⲉ  ⲉϫ̅ⲛ̅ⲧⲉⲑⲩⲥⲓⲁ  ⲛ̅ⲁⲛⲟⲙⲟⲛ  ⲉⲧⲃⲉⲧⲙⲛⲧϣⲃⲏⲣ  ⲉⲧⲉⲩⲛ̅ⲧⲁⲩⲥ  ⲉϩⲟⲩⲛ  ⲉⲡⲣⲱⲙⲉ  ϫⲓⲛϣⲟⲣⲡ  ⲛ̅ⲟⲩⲟⲉⲓϣ  ⲁⲩϫⲓⲧϥ̅  ⲛ̅ⲥⲁⲩⲥⲁ  ⲁⲩⲥⲉⲡⲥⲱⲡϥ  ⲉⲧⲣⲉⲩⲉⲓⲛⲉ  ⲛⲁϥ  ⲛ̅ϩⲉⲛⲁϥ  ⲉⲁⲩⲧⲁⲙⲓⲟⲟⲩ  ⲉⲃⲟⲗ  ϩⲓⲧⲟⲟⲧϥ  ⲛⲁⲓ  ⲉϣⲁⲩⲟⲩⲱⲙ  ⲉⲃⲟⲗ  ⲛ̅ϩⲏⲧⲟⲩ  ⲛ̅ϥϩⲩⲡⲟⲕⲣⲓⲛⲉ  ⲇⲉ  ⲛ̅ⲑⲉ  ⲛ̅ⲛⲉⲧⲟⲩⲱⲙ  ⲉⲃⲟⲗ  ϩ̅ⲛ̅ⲛⲉϥⲑⲩⲥⲓⲁ  ⲉⲛⲧⲁⲡⲣⲟ  ⲟⲩⲉϩⲥⲁϩⲛⲉ  ⲙ̅ⲙⲟⲟⲩ  ϫⲉⲕⲁⲁⲥ  ⲉⲃⲁⲣⲡⲁⲓ. ⲕ̅ⲃ̅. ⲛ̅ⲥⲉⲕⲁⲁϥ  ⲉⲃⲟⲗ  ⲙ̅ⲡⲙⲟⲩ. ⲕ̅ⲅ̅. Ⲛ̅ⲧⲟϥ  ⲇⲉ  ⲁϥⲙⲉⲕⲙⲟⲩⲕϥ  ϩⲛ̅ⲟⲩⲥⲁϩⲛⲉ  ⲉⲛⲁⲛⲟⲩϥ  ⲉϥⲙ̅ⲡϣⲁ  ⲛ̅ⲧⲉϥⲙ̅ⲛ̅ⲧ̅ϩⲗ̅ⲗⲟ  ⲉⲧⲧⲁⲓⲏⲩ  ⲙ̅ⲛ̅ⲧⲡⲟⲗⲓⲧⲓⲁ   ⲉⲧⲧⲃⲃⲏⲩ  ⲁⲩⲱ  ⲧⲁⲛⲁⲥⲧⲣⲟⲫⲏ  ⲉⲧⲛⲁⲛⲟⲩⲥ  ϫⲓⲛⲧⲉϥⲙⲛⲧⲕⲟⲩⲉⲓ  ⲙⲛ̅ⲛⲟⲙⲟⲑⲉⲥⲓⲁ  ⲉⲧⲟⲩⲁⲁⲃ  ⲉⲛⲧⲁⲡⲛⲟⲩⲧⲉ  ⲥⲟⲛⲧⲥ̅  ⲁϥⲟⲩⲱϣⲃ . ⲉϥϫⲱ  ⲙ̅ⲙⲟⲥ  ϫⲉ . ϫⲟⲟⲩⲧ  ⲉⲀⲙⲛ̅ⲧⲉ  ϩⲛⲟⲩϭⲉⲡⲏ. ⲕ̅ⲇ̅. Ⲛ̅ⲧⲁϭⲟⲧ  ⲁⲛ  ⲧⲉ  ϩⲩⲡⲟⲕⲣⲓⲛⲉ . ϫⲉⲕⲁⲁⲥ  ⲟⲩⲙⲏϣⲉ   ⲛ̅ϣⲏⲣⲉ  ϣⲏⲙ  ⲉⲩⲙⲉⲩⲉ  ϫⲉ  Ⲉⲗⲉⲁⲍⲁⲣⲟⲥ  ⲉϥϩⲛⲡⲥⲧⲁⲓⲟⲩ  ⲣ̅ⲣⲟⲙⲡⲉ  ⲉⲛⲧⲁϥⲡⲱⲛⲉ  ⲉⲩⲙⲛⲧϩⲉⲑⲛⲟⲥ.  ⲛ̅ⲧⲟⲟⲩ  ⲇⲉ  ⲛ̅ⲥⲉⲡⲗⲁⲛⲁ  ⲉⲧⲉϥϩⲩⲡⲟⲕⲣⲓⲥⲓⲥ  ⲙ̅ⲛ̅ⲡⲁⲓⲕⲟⲩⲉⲓ  ⲛ̅ⲱⲛϩ  ⲉⲧⲥⲏϣ  ⲧⲁϫⲡⲟ  ⲛⲁⲣ̅  ⲛ̅ⲟⲩⲧⲱⲗⲙ̅  ⲙ̅ⲛ̅ⲟⲩϣⲓⲡⲉ  ϩⲛⲧⲁⲙⲛⲧϩⲗⲗⲟ. ⲕ̅Ⲋ. Ⲕⲁⲛ  ⲉⲉⲓϣⲁⲛⲣ̅ⲃⲟⲗ  ϯⲛⲟⲩ  ⲉⲛⲥⲏϥⲉ  ⲛⲣ̅ⲣⲱⲙⲉ  ⲛ̅ϯⲛⲁⲣⲃⲟⲗ  ⲁⲛ  ⲉⲧϭⲓϫ  ⲙ̅ⲡⲡⲁⲛⲧⲟⲕⲣⲁⲧⲱⲣ  ⲟⲩⲧⲉ  ⲉⲓⲟⲛϩ  ⲟⲩⲧⲉ  ⲉⲓϣⲁⲛⲙⲟⲩ.  ⲕ̅ⲍ̅. Ⲉⲧⲃⲉⲡⲁⲓ  ⲧⲉⲛⲟⲩ  ⲙⲉⲛ  ϯⲛⲁⲙⲟⲩ  ϩ̅ⲛ̅ⲟⲩⲙⲛⲧϫⲱⲱⲣⲉ  ⲧⲁⲩⲱⲛϩ  ⲉⲃⲟⲗ  ⲉⲓⲙ̅ⲡϣⲁ  ⲛⲧⲁⲙⲛⲧϩⲗ̅ⲗⲟ.  ⲕ̅ⲏ̅. ⲧⲁⲕⲱ  ⲇⲉ  ⲛ̅ⲛ̅ϣⲏⲣⲉ  ϣⲏⲙ  ⲛ̅ⲟⲩⲥⲙⲟⲧ   ⲙ̅ⲙⲛⲧϫⲱⲱⲣⲉ  ⲉⲧⲣⲉⲩⲙⲟⲩ  ϩⲱⲟⲩ  ϩ̅ⲛ̅ⲟⲩⲟⲩⲣⲟⲧ ⲙⲛⲟⲩⲧⲱⲕ  ⲛϩⲏⲧ  ϩⲁⲡⲛⲟⲙⲟⲥ  ⲉⲧⲟⲩⲁⲁⲃ  ⲛ̅ⲥⲉⲙⲛⲟⲛ. Ⲛ̅ⲧⲁⲣⲉϥϫⲉⲛⲁⲓ  ⲛ̅ⲧⲉⲩⲛⲟⲩ  ⲁϥϯⲡⲉⲣⲟⲩⲟⲉⲓⲉ  ⲉⲧⲃⲁⲥⲁⲛⲟⲥ. ⲕ̅ⲑ̅. Ⲛ̅ⲧⲟⲟⲩ  ⲇⲉ  ⲉⲩⲙⲟⲕϩ  ⲛ̅ϩⲏⲧ  ⲉϫⲱϥ . Ⲙⲛ̅ⲛ̅ⲥⲱⲥ  ⲁⲩϭⲱⲛⲧ  ⲉⲣⲟϥ  ⲉⲧⲃⲉⲛⲉⲛⲧⲁϥϫⲟⲟⲩ  ⲉⲩϫⲱ  ⲙⲙⲟⲥ . ϫⲉ  ⲟⲩⲁⲡⲟⲛⲟⲓⲁ.  Ⲡⲉⲛ̅ⲧⲁⲣⲉϥⲛⲟⲩ  ⲇⲉ  ⲉⲙⲟⲩ . ⲁϥⲁϣⲉϩⲟⲙ  ⲉϥϫⲱ  ⲙⲙⲟⲥ . ϫⲉ  ϥⲟⲩⲟⲛϩ  ⲉⲃⲟⲗ  ⲙ̅Ⲡϫⲟⲉⲓⲥ  ⲡⲉⲧⲥⲟⲟⲩⲛ  ⲛ̅ϩⲱⲃ  ⲛⲓⲙ  ϫⲉ  ⲟⲩⲛϭⲟⲙ  ⲙ̅ⲙⲟⲓ  ⲉⲧⲣⲉⲩⲕⲁⲧ  ⲉⲃⲟⲗ  ⲙ̅ⲡⲙⲟⲩ  ⲛϯϥⲓ  ϩⲁϩⲉⲛⲧⲕⲉ  ⲉⲩⲛⲁϣⲧ  ϩ̅ⲙ̅ⲡⲁⲥⲱⲙⲁ  ⲉⲩⲙⲁⲥⲧⲓⲅⲟⲩ  ⲙ̅ⲙⲟⲓ  ϩⲁⲧⲁⲯⲩⲭⲏ . Ⲉⲉⲓϣⲱⲡ  ⲛ̅ⲛⲁⲓϩⲓⲥⲉ  ⲉⲧⲃⲉⲧⲉϥϩⲟⲧⲉ. ⲗ̅ⲁ̅. Ⲡⲁⲓ  ⲙⲉⲛ ⲁϥⲛ̅ⲕⲟⲧⲕ̅ . ϩ̅ⲛ̅ⲡⲁⲓⲥⲙⲟⲧ  ⲉⲁϥⲕⲱ  ⲙ̅ⲡϥⲙⲟⲩ  ⲙⲙⲟⲉⲓⲛ  ⲛ̅ⲧⲙⲛⲧϫⲱⲱⲣⲉ  ⲁⲩⲱ  ⲛ̅ⲣ̅ⲡⲙⲉⲩⲉ  ⲁⲣⲉⲧⲏ  ⲟⲩ  ⲙⲟⲛⲟⲛ  ⲛ̅ⲛ̅ϣⲏⲣⲉ  ϣⲏⲙ  ⲁⲗⲗⲁ  ⲙ̅ⲡⲉϩⲟⲩⲟ  ⲛ̅ⲡϥϩⲉⲑⲛⲟⲥ.

Ⲍ̅. Ⲁⲥϣⲱⲡⲉ  ⲛ̅ⲕⲉⲥⲟϣϥ  ⲛ̅ⲥⲟⲛ  ⲙ̅ⲛ̅ⲧⲉⲩⲙⲁⲁⲩ  ⲉⲩϯϩⲧⲟⲣ  ⲉⲣⲟⲟⲩ  ϩⲓⲧ̅ⲙ̅ⲡⲣⲟ  ⲉⲩⲱⲙ ⲉⲃⲟⲗ  ϩⲛⲧⲉⲑⲩⲥⲓⲁ  ⲉⲧϫⲁϩⲙ  ⲉⲩϩⲓⲟⲩⲉ   ⲉⲣⲟⲟⲩ  ϩ̅ⲛ̅ϩⲉⲛⲙⲁⲥⲧⲓⲅⲝ  ⲙⲛϩⲉⲛⲕⲱⲃϩ. ⲃ̅. Ϩⲁⲟⲩⲁ  ⲇⲉ  ⲛ̅ϩⲏⲧⲟⲩ  ⲛϣⲟⲣⲡ  ⲛ̅ϣⲁϫⲉ  ⲉϥϫⲱ  ⲙ̅ⲙⲟⲥ . ϫⲉ  ⲉⲕϣⲓⲛⲉ  ⲙ̅ⲙⲟⲛ  ⲉⲟⲩ  ⲛⲉ  ⲕⲛⲁⲥⲉⲧⲙ̅ⲟⲩ  ⲛ̅ⲧⲟⲧⲛ̅  ⲧⲛ̅ⲥ̅ⲃ̅ⲧⲱⲧ  ⲅⲁⲣ  ⲉⲙⲟⲩ  ⲉϩⲟⲩⲉⲡⲁⲣⲁⲃⲁ  ⲛ̅ⲛⲟⲙⲟⲥ  ⲛ̅ⲛⲉⲛⲉⲓⲟⲧⲉ . ⲅ̅. Ⲁϥϭⲱⲛⲧ  ⲛϭⲓⲡⲣⲣⲟ  ⲁϥⲟⲩⲉϩⲥⲁϩⲛⲉ  ⲉⲥⲁϩⲧⲉ  ϩⲁϩⲉⲛⲗⲁⲕ̅ⲛ̅ⲧ̅  ⲙ̅ⲛ̅ϩⲉⲛⲭⲁⲗⲕⲓⲟⲛ. ⲇ̅. Ⲛ̅ⲧⲁⲣⲟⲩϫⲉⲣⲟ  ⲇⲉ  ⲁϥϫⲟⲟϥ  ⲉϣⲱⲱⲧ  ⲙ̅ⲡⲗⲉⲥ  ⲙⲡⲉⲛⲧⲁϥϣⲁϫⲉ  ⲛ̅ϣⲟⲣⲡ  ⲛ̅ⲥⲉⲕⲉⲕⲡⲉϥϣⲁⲁⲣ  ⲛ̅ⲥⲉⲛⲛⲉϥⲕⲉⲉⲥ  ⲉⲃⲟⲗ  ⲉⲩϭⲱϣⲧ  ⲛ̅ⲥⲱϥ  ⲛ̅ϭⲓⲛⲉϥⲥⲛⲏⲩ  ⲙ̅ⲛ̅ⲧⲉϥⲙⲁⲁⲩ  ⲛ̅ⲧⲁⲣⲉϥⲧⲁⲕⲟ  ⲛ̅ⲇⲉ  ⲉⲡⲧⲏⲣϥ.  Ⲉⲧⲓ  ⲉϥⲛⲓϥⲉ  ⲁϥⲟⲩⲉϩⲥⲁϩⲛⲉ  ⲉⲧⲁⲗⲟϥ  ⲉϩⲣⲁⲓ  ⲉⲉϥ  ⲛ̅ⲗⲁⲕ̅ⲛ̅ⲧ̅. Ⲛ̅ⲧⲁⲣⲉⲡⲕⲁⲡⲛⲟⲥ  ⲇⲉ  ⲛ̅ⲧⲗⲁⲕ̅ⲛ̅ⲧ̅  ⲉⲓ  ⲉϩⲣⲁⲓ  ⲉⲡⲉϩⲟⲩⲟ  ⲁⲩⲥⲟⲡⲥⲡ  ⲛ̅ⲛⲉⲩⲉⲣⲏⲩ  ⲙ̅ⲛ̅ⲧⲉⲩⲙⲁⲁⲩ  ⲉⲩϫⲱ  ⲙ̅ⲙⲟⲥ. Ⲋ. ϫⲉ  ⲙⲁⲣⲉⲛⲙⲟⲩ  ϩⲱⲱⲛ  ϩ̅ⲛ̅ⲟⲩⲙ̅ⲛ̅ⲧϫⲱⲱⲣⲉ . Ⲡϫⲟⲉⲓⲥ  ⲅⲁⲣ  ⲡⲛⲟⲩⲧⲉ  ⲙⲓϣⲉ  ⲉϫⲱⲛ  ⲕⲁⲧⲁⲑⲉ  ⲉⲛⲧⲁϥϫⲟⲟⲥ  ⲛ̅ϭⲓⲘⲱⲟⲩⲥⲏⲥ  ϩ̅ⲛ̅ⲧⲉϥⲱⲇⲏ  ⲉⲧⲣ̅ⲙ̅ⲛ̅ⲧ̅ⲣⲉ . ϫⲉ  ⲥⲉⲛⲁⲥⲉⲡⲥⲱⲡ  ⲉϫⲛ̅ⲛⲉϥϩⲙϩⲁⲗ. ⲍ̅.

Ⲛ̅ⲧⲁⲡϣⲟⲣⲡ  ⲇⲉ  ⲙⲟⲩ  ϩ̅ⲛ̅ⲡⲉⲓⲥⲙⲟⲧ  ⲡⲙⲉϩⲥⲛⲁⲩ  ⲟⲛ  ⲁⲩⲛ̅ⲧϥ  ⲉⲩⲥⲱⲃⲉ  ⲛ̅ⲥⲱϥ. Ⲁⲩⲕⲉⲕⲡϣⲁⲁⲣ  ⲛ̅ⲧⲉϥⲁⲡⲉ  ⲙ̅ⲛ̅ⲛⲉϥϥⲱⲉ  ⲁⲩϫⲛⲟⲩϥ . ϫⲉ  ⲕⲛⲁⲟⲩⲱⲙ  ⲉⲙⲡⲁⲧⲟⲩⲧⲓⲙⲱⲣⲓⲁ  ⲙ̅ⲡⲉⲕⲥⲱⲙⲁ  ⲕⲁⲧⲁⲙⲉⲗⲟⲥ. ⲏ̅. Ⲛ̅ⲧⲟϥ   ⲇⲉ  ⲁϥⲟⲩⲱϣⲃ̅  ϩ̅ⲛ̅ⲧⲉⲥⲡⲉ  ⲛ̅ⲛⲉϥⲉⲓⲟⲧⲉ  ⲉϥϫⲱ  ⲙ̅ⲙⲟⲥ . ϫⲉ  ⲛ̅ⲑⲉ  ⲛ̅ⲧⲁⲡϣⲟⲣⲡ  ϥⲓ  ϩⲁⲧⲃⲁⲥⲁⲛⲟⲥ  ⲁⲛⲟⲕ  ϩⲱⲱⲧ  ⲟⲛ  ⲛ̅ⲧⲉⲉⲓϩⲉ. ⲑ̅. Ⲛⲧⲁⲣⲉϥⲛⲟⲩ  ⲇⲉ  ⲉϯⲡⲉⲡ̅ⲛ̅ⲁ̅  ⲡⲉϫⲁϥ . ϫⲉ  ⲛ̅ⲧⲟⲕ  ⲙⲉⲛ  ⲡⲣⲉϥⲣ̅ⲃⲱⲛ  ⲉⲕⲛⲁⲣⲃⲟⲗ  ϩ̅ⲛ̅ⲡⲁⲓⲱⲛϩ  ⲡⲣⲣⲟ  ⲇⲉ  ⲙ̅ⲡⲕⲟⲥⲙⲟⲥ  ⲉⲁⲛⲙⲟⲩ  ϩⲁⲛⲉϥⲛⲟⲙⲟⲥ  ϥⲛⲁⲧⲟⲩⲛⲟⲥⲛ̅  ⲉⲩⲱⲛϩ  ϣⲁⲉⲛⲉϩ. 

Ⲙⲛⲛ̅ⲥⲁⲡⲁⲓ  ⲁⲩⲉⲓⲛⲉⲡⲙⲉϩϣⲟⲙⲧ . Ⲁⲩⲁⲓⲧⲓ  ⲙ̅ⲡⲉϥⲗⲉⲥ  ⲛⲧⲉⲩⲛⲟⲩ  ⲁϥⲧⲁⲩⲁϥ  ⲉⲃⲟⲗ  ⲁϥϥⲓ  ⲛ̅ⲛⲉϥϭⲓϫ  ⲉϩⲣⲁⲓ. ⲓ̅ⲁ̅. ⲉϥⲧⲏⲕ  ⲛ̅ϩⲏⲧ  ⲉϥϫⲱ  ⲙ̅ⲙⲟⲥ  ϩ̅ⲛ̅ⲟⲩⲙ̅ⲛ̅ⲧϫⲱⲱⲣⲉ . Ⲛ̅ⲧⲁⲩϯⲛⲁⲓ  ⲛⲏⲓ   ⲉⲃⲟⲗ  ϩ̅ⲛ̅ⲧⲡⲉ  ⲁⲩⲱ  ⲉⲉⲓⲛⲉ  ⲉⲣⲟⲟⲩ  ⲉⲧϥⲉ  ⲛⲉϥϩⲟⲧⲉ  ⲙ̅ⲛ̅ⲡⲉϥⲛⲟⲙⲟⲥ . ⲉⲓⲛⲁϩⲧⲉ  ϫⲉ  ϯⲛⲁϫⲓⲧⲟⲩ  ⲟⲛ  ⲉⲃⲟⲗ  ϩⲓⲧⲟⲟⲧϥ. ⲓ̅ⲃ̅. ϩⲱⲥⲧⲉ  ⲛⲥⲉⲣϣⲡⲏⲣⲉ  ⲛ̅ⲧⲉⲯⲩⲭⲏ  ⲙⲡϣⲏⲣⲉ  ϣⲏⲙ  ⲛϭⲟⲡⲣⲟ  ⲙ̅ⲛ̅ⲛⲉⲧⲙⲙⲁϥ  ⲛ̅ⲑⲉ  ⲛ̅ⲧⲁϥⲟⲡϥ  ⲙ̅ⲙⲟⲕϩⲥ  ⲛ̅ⲑⲉ  ⲛ̅ⲛⲓⲗⲁⲁⲩ.  ⲓ̅ⲅ̅.

Ⲛ̅ⲧⲁⲣⲉⲡⲁⲓ  ⲇⲉ  ⲙⲟⲩ   ⲡⲙⲉϩϥⲧⲟⲟⲩ  ⲟⲛ  ⲛ̅ⲧⲉⲓϩⲉ  ⲁⲩⲃⲁⲥⲁⲛⲓⲍⲉ  ⲙ̅ⲙⲟϥ  ⲉⲩϩⲓⲟⲩⲉ  ⲉⲣⲟϥ. ⲓ̅ⲇ̅. Ⲛⲧⲁⲣⲉϥⲛⲟⲩⲉ  ⲇⲉ  ⲉⲙⲟⲩ  ⲡⲉϫⲁϥ  ⲛⲧⲉⲓϩⲉ . ϫⲉ   ⲛⲁⲛⲟⲩⲥ  ⲛⲁⲛ  ⲉⲙⲟⲩ  ⲉⲃⲟⲗ  ϩⲓⲧ̅ⲛ̅ⲣ̅ⲣⲱⲙⲉ  ⲉϭⲱϣⲧ  ⲉⲃⲟⲗ  ϩⲏⲧⲥ̅  ⲛ̅ⲑⲉⲗⲡⲓⲥ  ⲙ̅ⲡⲛⲟⲩⲧⲉ  ⲉⲧⲣⲉϥⲧⲟⲩⲛⲟⲥⲛ̅  ⲛ̅ⲕⲉⲥⲟⲡ . Ⲛ̅ⲧⲟⲕ  ⲇⲉ  ⲙ̅ⲛⲁⲛⲁⲥⲧⲁⲥⲓⲥ  ⲛ̅ⲱⲛϩ  ϣⲟⲟⲡ  ⲛⲁⲕ.

Ⲡⲙⲉϩϯⲟⲩ  ⲟⲛ  ⲛ̅ⲧⲁⲓϩⲉ  ⲁⲩⲛⲧϥ  ⲉⲩϩⲉⲧⲁⲍⲉ  ⲙⲙⲟϥ . ⲛ̅ⲧⲟϥ ⲇⲉ  ⲁϥϭⲱϣⲧ  ⲉϩⲟⲩⲛ  ⲉϩⲣⲁϥ  ⲡⲉϫⲁϥ  ϫⲉ. ⲓ̅Ⲋ. ⲛ̅ⲧⲟⲕ  ⲙⲉⲛ  ⲛⲧⲕ̅ⲟⲩⲣⲱⲙⲉ  ⲉϥⲛⲁⲧⲁⲕⲟ . ⲁⲕϫⲓ  ⲛ̅ⲧⲉⲝⲟⲩⲥⲓⲁ  ⲛ̅ⲣ̅ⲣⲱⲙⲉ  ⲉⲕⲉⲓⲣⲉ  ⲙ̅ⲡⲉⲧⲉⲕⲟⲩⲁϣϥ . Ⲙ̅ⲡⲣ̅ⲣⲡⲙⲉⲩⲉ  ϭⲉ  ϫⲉ  ⲛⲧⲁⲡⲛⲟⲩⲧⲉ  ⲕⲁⲡⲉⲛⲅⲉⲛⲟⲥ  ⲛ̅ⲥⲱϥ. ⲓ̅ⲍ̅. Ϭⲱϣⲧ  ⲛ̅ⲇⲉ  ⲛ̅ⲑⲉ  ⲉⲧϥⲛⲁⲃⲁⲥⲁⲛⲓⲍⲉ  ⲙ̅ⲙⲟⲕ  ⲙ̅ⲛ̅ⲡⲉⲕⲥⲡⲉⲣⲙⲁ. ⲓ̅ⲏ̅. Ⲙⲛ̅ⲛ̅ⲥⲁⲡⲁⲓ  ⲁⲩⲉⲓⲛⲉ  ⲙ̅ⲡⲙⲉϩⲥⲟⲟⲩ . ⲛⲧⲟϥ  ⲇⲉ  ⲛⲧⲁⲣⲉϥⲉⲓ  ⲉϥⲛⲁⲙⲟⲩ  ⲡⲉϫⲁϥ  ϫⲉ :  Ⲙ̅ⲡⲣⲣ̅ⲡⲗⲁⲛⲁ  ⲉⲡϫⲓⲛϫⲏ  ⲁⲛⲟⲛ  ⲅⲁⲣ  ⲉⲛϣⲱⲡ  ⲛ̅ⲛⲁⲓ  ⲉⲧⲃⲉⲛⲉⲛⲛⲟⲃⲉ  ⲉⲛⲧⲁⲛⲁⲁⲩ  ⲙ̅ⲡⲉⲛⲛⲟⲩⲧⲉ. ⲓ̅ⲑ̅. Ⲛⲧⲟⲕ  ⲇⲉ  ⲙ̅ⲡⲣⲣ̅ⲡⲙⲉⲩⲉ  ϫⲉ  ⲕⲛⲁⲣⲃⲟⲗ  ⲉⲕϯ  ⲟⲩⲃⲉⲡⲛⲟⲩⲧⲉ.  Ⲟⲩϣⲡⲏⲣⲉ  ⲇⲉ  ⲛ̅ϩⲟⲩⲟ  ⲧⲉ  ⲧⲉⲩⲙⲁⲁⲩ  ϩⲱⲥ  ⲉⲥⲙ̅ⲡϣⲁ  ⲛ̅ⲟⲩⲣⲡⲙⲉⲩⲉ  ⲉⲛⲁⲛⲟⲩϥ . ⲧⲁⲓ  ⲉⲧϭⲱϣⲧ  ⲉϫⲛ̅ⲥⲁϣϥ   ⲛ̅ϣⲏⲣⲉ  ⲉⲩⲧⲁⲕⲟ  ⲙ̅ⲙⲁϥ  ϩ̅ⲛ̅ⲟⲩϩⲟⲟⲩ  ⲛ̅ⲟⲩⲱⲧ . ⲉⲥϥⲓ  ϩⲁⲣⲟⲥ  ϩⲛ̅ⲟⲩⲙⲛ̅ⲧ̅ϫⲱⲱⲣⲉ  ⲉⲧⲃⲉⲑⲉⲗⲡⲓⲥ  ⲙ̅ⲡⲛⲟⲩⲧⲉ. ⲕ̅ⲁ̅. Ⲉⲥⲥⲟⲡⲥⲡ  ⲙ̅ⲡⲟⲩⲁ  ⲡⲟⲩⲁ  ⲙ̅ⲙⲟⲟⲩ  ϩ̅ⲛ̅ⲧⲉⲥⲁⲥⲡⲉ  ⲉⲥϫⲏⲕ  ⲉⲃⲟⲗ  ϩⲛ̅ⲟⲩⲙⲛⲧϫⲱⲣⲉ  ⲉⲁⲥⲧⲟⲩⲛⲉⲥⲡⲉⲥⲙⲉⲩⲉ  ⲛ̅ⲧⲉⲥⲙⲛⲧⲥϩⲓⲙⲉ  ϩ̅ⲛ̅ⲟⲩϭⲱⲛⲧ  ⲙ̅ⲙⲛⲧϩⲟⲟⲩⲧ  ⲉⲥϫⲱ  ⲙⲙⲟⲥ  ⲛⲁⲩ.  ⲕ̅ⲃ̅. ϫⲉ  ⲛϯⲥⲟⲟⲩⲛ  ⲁⲛ  ϫⲉ  ⲛⲧⲁⲧⲉⲧⲛ̅ⲁϣ  ⲛ̅ϩⲉ  ϩⲣⲁⲓ  ⲛ̅ϩⲏⲧ  ⲟⲩⲇⲉ  ⲁⲛⲟⲕ  ⲁ̅ⲛ̅ⲁϩϯ  ⲛⲏⲧⲛ  ⲙ̅ⲡⲱⲛϩ  ⲙ̅ⲛ̅ⲡⲉⲡ̅ⲛ̅ⲁ̅  ⲙⲛⲡⲥⲱⲙⲁ  ⲙ̅ⲡⲟⲩⲁ  ⲡⲟⲩⲁ. ⲕ̅ⲅ̅. Ⲧⲉⲛⲟⲩ ⲧⲉ  ⲡⲣⲉϥⲥⲱⲛⲧ  ⲙ̅ⲡⲕⲟⲥⲙⲟⲥ  ⲧⲏⲣϥ  ⲁϥⲡⲗⲁⲥⲥⲉ  ⲙ̅ⲡⲣⲱⲙⲉ  ⲙ̅ⲛ̅ⲛ̅ⲕⲁⲁ  ⲛⲓⲙ  ⲁϥϯ  ⲛⲏⲧⲛ̅  ⲟⲛ  ⲙ̅ⲡⲉⲡ̅ⲛ̅ⲁ̅  ⲙ̅ⲡⲱⲛϩ  ϩ̅ⲛ̅ⲡⲉϥⲛⲁ  ⲛ̅ⲑⲉ  ⲛ̅ⲧⲁⲧⲉⲧ̅ⲛ̅ϣⲧⲏⲩⲧ̅ⲛ̅  ⲉⲣⲱⲧⲛ  ⲉⲧⲃⲉⲡⲉϥⲛⲟⲙⲟⲥ.  ⲕ̅ⲇ̅.

Ⲁⲛⲧⲓⲟⲭⲟⲥ  ⲇⲉ  ⲉϥϫⲱ  ⲙ̅ⲙⲟⲥ  ϫⲉ  ⲥⲉⲕⲁⲧⲁⲫⲣⲟⲛⲓ  ⲙ̅ⲙⲟⲉⲓ ⲉϥⲛⲁⲩ  ⲉⲧⲉⲥⲙⲏ  ⲉⲧⲟⲩⲛⲁϭⲛⲉϭ  ⲙ̅ⲙⲟϥ. Ⲉⲧⲓ  ⲉⲣⲉⲡⲕⲟⲩⲉⲓ  ⲛ̅ϩⲏⲧⲟⲩ  ϣⲟⲟⲡ  ⲁϥⲥⲡⲥⲱⲡ  ⲟⲩ  ⲙⲟⲛⲟⲛ  ϩ̅ⲙ̅ⲡϣⲁϫⲉ  ⲁⲗⲗⲁ  ϩ̅ⲛ̅ϩⲉⲛⲁⲛⲁϣ  ⲉϥⲡⲓⲑⲉ  ⲙ̅ⲙⲟϥ . ϫⲉ  ϯⲛⲁⲁⲁⲕ  ⲣ̅ⲣ̅ⲙⲙⲁⲟ  ⲁⲩⲱ  ⲙ̅ⲙⲁⲕⲁⲣⲓⲟⲥ  ⲉⲕϣⲁⲛⲡⲱⲱⲛⲉ  ⲉⲃⲟⲗ  ϩ̅ⲛ̅ⲛⲛⲟⲙⲟⲥ  ⲛ̅ⲛⲉⲕⲉⲓⲟⲧⲉ  ⲧⲁⲁⲕ  ⲛⲁⲓ  ⲛϣⲃⲏⲣ  ϯⲛⲁⲁⲁⲕ  ⲛ̅ϩⲉⲛⲉⲝⲟⲩⲥⲓⲁ.  Ⲡϣⲏⲣⲉ  ϣⲏⲙ  ⲛ̅ⲧⲁⲣⲉϥⲧⲙ̅ϯϩⲧⲏϥ  ϩⲁⲡⲣⲣⲟ  ⲙⲟⲩⲧⲉ  ⲉⲧⲉϥⲙⲁⲁⲩ  ⲁϥⲥⲉⲡⲥⲱⲡ̅ⲥ̅  ⲉⲡⲓⲑⲉ  ⲙ̅ⲡ̅ϣⲏⲣⲉ  ϣⲏⲙ  ⲉⲧⲣⲉϥⲟⲩϫⲁⲓ. ⲕ̅ⲍ̅. Ⲛ̅ⲧⲟⲥ  ⲛ̅ⲇⲉ  ⲛ̅ⲧⲁⲣⲉⲥⲥⲱⲧⲙ̅  ⲁⲥⲡⲁϩⲧⲥ̅  ϩⲁⲣⲉⲧϥ  ⲙ̅ⲡϣⲏⲣⲉ  ϣⲏⲙ  ⲉⲥⲛⲟϭⲛⲉϭ  ⲙ̅ⲡⲧⲩⲣⲁⲛⲛⲟⲥ  ⲟⲩⲉϩⲓⲏⲧ  ⲡⲉϫⲁⲥ  ⲛⲁϥ  ⲛ̅ⲧⲉⲉⲓϩⲉ  ϩ̅ⲛ̅ⲧⲉⲥⲁⲥⲡⲉ . ϫⲉ  ⲡⲁϣⲏⲣⲉ  ⲛⲁⲉ   ⲛⲁⲓ  ⲧⲁⲓ  ⲉⲛⲧⲁⲥϥⲓ  ϩⲁⲣⲟⲕ  ⲙ̅ⲡⲥⲓⲧ  ⲛ̅ⲉⲃⲟⲧ  ϩ̅ⲛ̅ⲑⲏ  ⲁⲥⲧⲥⲉⲛⲕⲟⲕ  ⲛ̅ϣⲁⲙⲧⲉ  ⲣ̅ⲣⲟⲙⲡⲉ .  ⲁⲓⲥⲁⲛⲟⲩϣⲕ  ⲁⲓⲁⲁⲕ  ⲛ̅ⲧⲉⲓϭⲟⲧ . ⲕ̅ⲏ̅. ϯⲥⲟⲡⲥⲉⲡ  ⲙ̅ⲙⲟⲕ  ⲡⲁϣⲏⲣⲉ  ⲉⲧⲣⲉⲕϭⲱϣⲧ  ⲉⲧⲡⲉ  ⲙ̅ⲛ̅ⲡⲕⲁϩ  ⲙ̅ⲛ̅ⲛⲉⲧⲛ̅ϩⲏⲧⲟⲩ  ⲧⲏⲣⲟⲩ  ⲉⲧⲣⲉⲕⲉⲓⲙⲉ  ϫⲉ  ⲛⲧⲁⲡⲛⲟⲩⲧⲉ  ⲧⲁⲙⲓⲟⲟⲩ  ⲉⲃⲟⲗ  ϩ̅ⲛ̅ⲛⲉⲧⲉⲛⲥⲉϣⲟⲟⲡ  ⲁⲛ. ⲧⲁⲓ  ⲟⲛ  ⲧⲉ  ⲑⲉ  ⲙ̅ⲡⲅⲉⲛⲟⲥ  ⲛ̅ⲣ̅ⲣⲱⲙⲉ. ⲕ̅ⲑ̅. Ⲙ̅ⲡⲣ̅ⲣϩⲟⲧⲉ  ϩⲏⲧϥ  ⲙ̅ⲡⲣⲉϥϩⲱⲧⲃ  ⲁⲗⲗⲁ  ϣⲱⲡⲉ  ⲉⲕⲙⲡϣⲁ  ⲛⲉⲕⲥⲛⲏⲩ  ⲛⲅϣⲱⲡ  ⲉⲣⲟⲕ  ⲙ̅ⲡⲙⲟⲩ  ϫⲉⲕⲁⲁⲥ  ϩⲙⲡⲙⲁ  ⲙ̅ⲡⲛⲟⲩⲧⲉ  ⲉϥⲉⲧⲁⲁⲕ  ⲛⲏⲓ  ⲙ̅ⲛ̅ⲛⲉⲕⲥⲛⲏⲩ.  Ⲉⲙⲡⲁⲧⲉⲥⲟⲩⲱ  ⲛ̅ⲛⲓϣⲁϫⲉ  ⲡⲉϫⲁϥ  ⲛ̅ϭⲓⲡⲏⲣⲉ  ϣⲏⲙ . ⲉⲧⲉⲧⲛϭⲉⲉⲧ  ⲉⲛⲓⲙ  ⲛ̅ⲧⲁⲥⲱⲧⲙ̅  ⲁⲛ  ⲛ̅ⲥⲁⲡⲟⲩⲁϩⲥⲁϩⲛⲉ   ⲙ̅ⲡⲣⲣⲟ  ⲡⲟⲩⲉϩⲥⲁϩⲛⲉ  ⲇⲉ  ⲛ̅ⲧⲟϥ  ⲙ̅ⲡ̅ⲛⲟⲙⲟⲥ  ⲙ̅Ⲙⲱⲟⲩⲥⲏⲥ  ⲉⲛⲧⲁϥⲁⲁϥ  ⲛ̅ⲛⲉ̅ⲛⲉⲓⲁⲧⲉ  ϯⲛⲁⲥⲱⲧⲙ̅  ⲛ̅ⲥⲱϥ. ⲗ̅ⲁ̅. Ⲛ̅ⲧⲟⲕ  ⲇⲉ  ⲉⲕⲙⲉⲩⲉ  ⲉⲡⲉⲑⲟⲟⲩ  ⲛⲓⲙ  ⲉϩⲟⲩⲛ  ⲉⲛϨⲉⲃⲣⲁⲓⲟⲥ  ⲛⲉⲕⲣ̅ⲃⲟⲗ  ⲉⲧϭⲓϫ  ⲙ̅ⲡⲛⲟⲩⲧⲉ  ⲁⲛ. ⲗ̅ⲃ̅. ⲁⲛⲟⲛ  ⲅⲁⲣ  ⲛ̅ⲧⲁⲛϣⲡⲛⲁⲓ  ⲉⲧⲃⲉⲛⲉⲛⲛⲟⲃⲉ  ⲉϥϫⲡⲓⲟ  ⲙ̅ⲙⲟⲛ  ⲛ̅ϭⲓⲠⲉⲛϫⲟⲉⲓⲥ  ⲡⲉⲧⲟⲛϩ: ⲗ̅ⲅ̅. Ⲉⲁϥϭⲱⲛⲧ  ⲉⲣⲟⲛ  ⲛ̅ⲟⲩⲕⲟⲩⲉⲓ  ⲉϥϯⲥⲃⲱ  ⲛⲁⲛ . ⲙⲛ̅ⲛ̅ⲥⲱⲥ  ⲇⲉ  ϥⲛⲁϩⲱⲧⲡ  ⲉⲛⲉϥϩⲙ̅ϩⲁⲗ. ⲗ̅ⲇ̅. Ⲛ̅ⲧⲟⲕ  ⲇⲉ  ⲡⲉⲧϫⲁϩⲙ̅  ⲉⲧⲟ  ⲛⲃⲁⲧⲉ  ⲛ̅ⲣ̅ⲣⲱⲙⲉ  ⲛⲓⲙ  ⲙ̅ⲡⲣ̅ϫⲓⲥⲉ  ⲛ̅ϩⲏⲧ  ⲉⲡϫⲓⲛϫⲏ  ⲉϫⲛ̅ϩ̅ⲛ̅ϩⲉⲗⲡⲓⲥ  ⲉⲩϣⲟⲩⲉⲓⲧ  ⲉⲁⲕⲧⲟⲕ  ⲉϩⲣⲁⲓ  ⲉϫ̅ⲛ̅ⲛ̅ϣⲏⲣⲉ  ⲛ̅ⲧⲡⲉ   ⲉⲙⲡⲁⲧⲉⲕⲣ̅ⲃⲟⲗ  ⲉⲧⲕⲣⲓⲥⲓⲥ  ⲙ̅ⲡⲛⲟⲩⲧⲉ  ⲡⲡⲁⲛⲧⲟⲕⲣⲁⲧⲱⲣ. ⲗ̅Ⲋ. Ⲛⲁⲥⲛⲏⲩ  ⲅⲁⲣ  ⲧⲉⲛⲟⲩ  ⲉⲁⲩϥⲓ  ϩⲁⲟⲩⲕⲟⲩⲓ  ⲛ̅ϩⲓⲥⲉ  ⲁⲩϣⲱⲡⲉ  ϩ̅ⲛ̅ⲇⲓⲁⲑⲏⲕⲏ  ⲙ̅ⲡⲛⲟⲩⲧⲉ .  Ⲛ̅ⲧⲟⲕ  ⲇⲉ  ϩⲣⲁⲓ  ϩ̅ⲛ̅ⲧⲉϥⲕⲣⲓⲥⲓⲥ  ⲕⲛⲁϫⲓ  ⲛ̅ⲟⲩⲕⲟⲗⲁⲥⲓⲥ  ⲉⲥⲙ̅ⲡϣⲁ  ⲛ̅ⲧⲉⲕⲙⲛ̅ⲧϫⲁⲥⲓϩⲏⲧ. ⲗ̅ⲍ̅. Ⲁⲛⲟⲕ  ⲇⲉ  ⲟⲛ  ⲛ̅ⲑⲉ  ⲛ̅ⲛⲁⲕⲉⲥⲛⲏⲩ  ϯⲛⲁϯ  ⲙⲡⲁⲥⲱⲙⲁ  ⲙ̅ⲛ̅ⲧⲁⲯⲩⲭⲏ  ⲛ̅ⲛⲁⲛⲟⲙⲟⲥ  ⲛ̅ⲛⲁⲉⲓⲁⲧⲉ  ⲉⲉⲓⲉⲡⲓⲕⲁⲗⲉⲓ  ⲙ̅ⲡⲛⲟⲩⲧⲉ  ⲉⲕⲱⲉ  ⲉⲃⲟⲗ  ⲙ̅ⲡⲉⲛⲅⲉⲛⲟⲥ  ϩ̅ⲛ̅ⲟⲩϭⲉⲡⲏ . Ⲛ̅ⲧⲟⲕ  ⲇⲉ  ϩ̅ⲛ̅ϩⲉⲛⲥⲏϣⲉ  ⲙ̅ⲛ̅ϩⲉⲛⲙⲁⲥⲧⲓⲅⲝ  ⲉⲧⲣⲉⲕϩⲟⲙⲟⲗⲟⲅⲉⲓ  ϫⲉ  ⲛ̅ⲧⲟϥ  ⲡⲉ  ⲡⲛⲟⲩⲧⲉ  ⲟⲩⲁⲁϥ. ⲗ̅ⲏ̅. ⲛ̅ⲥⲉϭⲱ  ⲉϩⲣⲁⲓ  ⲉϫⲱⲓ  ⲙ̅ⲛ̅ⲛⲁⲥⲛⲏⲩ  ⲛ̅ϭⲓⲧⲟⲣⲅⲏ  ⲙ̅Ⲡⲡⲁⲛⲧⲟⲕⲣⲁⲧⲱⲣ  ⲧⲉⲛⲧⲁϥⲛ̅ⲧ̅ⲥ̅  ⲉϩⲣⲁⲓ  ⲉϫ̅ⲛ̅ⲡⲉⲛⲅⲉⲛⲟⲥ  ⲧⲏⲣϥ  ϩ̅ⲛ̅ⲟⲩⲙ̅ⲡϣⲁ. ⲗ̅ⲑ̅.

Ⲁϥϭⲱⲛⲧ  ⲇⲉ  ⲉⲡⲁⲓ  ⲛ̅ϩⲟⲩⲟ  ⲛ̅ϭⲓⲡⲣ̅ⲣⲟ  ⲡⲁⲣⲁⲡⲕⲉⲥⲉⲉⲡⲉ  ⲧⲏⲣϥ . Ⲁϥⲙⲟⲟⲩⲧϥ  ⲛ̅ⲧⲟϥ  ⲙ̅ⲙⲓⲛ  ⲙ̅ⲙⲟϥ  ⲉϥϣⲓⲡⲉ  ⲛⲑⲉ  ⲉⲛⲧⲁϥⲛⲉϭⲛⲟⲩϭϥ.  Ⲧⲁⲓ  ⲧⲉ  ⲑⲉ  ⲉⲛⲧⲁⲡⲉⲉⲓⲕⲉⲙⲟⲩ  ϩ̅ⲛ̅ⲟⲩⲧⲃⲃⲟ  ⲉϥⲛⲁϩⲧⲉ  ⲉⲠϫⲟⲉⲓⲥ  ϣⲁⲑⲁⲏ. ⲙ̅ⲁ̅.Ⲙⲛⲛ̅ⲥⲁⲛϣⲏⲣⲉ  ⲇⲉ  ⲧⲏⲣⲟⲩ  ⲁⲥⲙⲟⲩ  ϩⲱⲱⲥ  ⲛ̅ϭⲓⲧⲉⲩⲙⲁⲁⲩ.                  :

ⲙ̅ⲙⲁⲣⲧⲩⲣⲟⲥ  ⲙ̅Ⲙⲁⲕⲕⲁⲃⲁⲓⲟⲥ . ⲡⲙⲉϩⲥⲛⲁⲩ  ⲛ̅ϫⲱⲱⲙⲉ