Judges (Bohairic)
ⲟⲩⲟϩ ⲓⲉⲫⲑⲁⲉ
ⲁϥⲱϣ ⲛⲟⲩⲉⲩⲭⲏ ⲙⲡϭⲟⲓⲥ ⲟⲩⲟϩ ⲡⲉϫⲁϥ ϫⲉ ⲉϣⲱⲡ ⲛⲧⲉ ⲡϭⲟⲓⲥ ϯ
ⲛⲛⲉⲛϣⲏⲣⲓ ⲛⲁⲙⲙⲱⲛ ⲉϧⲣⲏⲓ ⲉⲛⲁϫⲓϫ
ⲉⲥⲉϣⲱⲡⲓ ⲫⲏ ⲉⲑⲛⲁⲓ ⲉⲃⲟⲗ ⲉϩⲣⲁⲓ ⲉⲃⲟⲗ ϧⲉⲛ ⲫⲣⲟ ⲛⲧⲉ ⲡⲁⲏⲓ ϧⲉⲛ
ⲡϫⲓⲛⲑⲣⲓⲧⲁⲥⲑⲟ ϧⲉⲛ ⲟⲩϩⲓⲣⲏⲛⲏ ⲉⲃⲟⲗ ϩⲁ ⲛⲉⲛϣⲏⲣⲓ ⲛⲁⲙⲙⲱⲛ ⲉϥⲉϣⲱⲡⲓ
ⲙⲡϭⲟⲓⲥ ⲟⲩⲟϩ ⲉⲓⲉⲉⲛϥ ⲛϩⲣⲏⲓ ⲛⲟⲩϭⲗⲓⲗ ⲙⲡϭⲟⲓⲥ
ⲟⲩⲟϩ ⲁϥⲉⲣϫⲓⲛⲓⲟⲣ ⲛϫⲉ ⲓⲉⲫⲑⲁⲉ ϩⲁ ⲛⲉⲛϣⲏⲣⲓ ⲛⲁⲙⲙⲱⲛ ⲉϯ ⲟⲩⲃⲏⲟⲩ
ⲟⲩⲟϩ ⲁϥⲧⲏⲓⲧⲟⲩ ⲛϫⲉ ⲡϭⲟⲓⲥ ⲉϧⲣⲏⲓ ⲉⲛⲉϥϫⲓϫ
ⲁϥϣⲁⲣⲓ ⲇⲉ ⲉⲣⲱⲟⲩ ϧⲉⲛ ⲟⲩⲛⲓϣϯ ⲛⲉⲣϧⲟⲧ ⲓⲥϫⲉⲛ ⲁⲣⲟⲏⲣ ϣⲁⲧⲉⲕⲓ
ⲉⲁⲣⲛⲱⲛ ϧⲉⲛ ⲧⲏⲡⲓ ϫⲱⲧ ⲙⲃⲁⲕⲓ ⲛⲉⲙ ϣⲁ ⲉⲃⲉⲗⲭⲁⲣⲓⲙ ⲛⲟⲩⲛⲓϣϯ
ⲛⲉⲣϧⲟⲧ ⲉⲙⲁϣⲱ ⲟⲩⲟϩ ⲁⲩⲑⲉⲃⲓⲟ ⲛϫⲉ ⲛⲉⲛϣⲏⲣⲓ ⲛⲁⲙⲙⲱⲛ ⲉⲃⲟⲗ ϩⲁ ⲡϩⲟ
ⲛⲛⲉⲛϣⲏⲣⲓ ⲙⲡⲓⲥⲣⲁⲏⲗ
ⲟⲩⲟϩ ⲁϥⲧⲁⲥⲑⲟ ⲛϫⲉ ⲓⲉⲫⲑⲁⲉ ⲉⲙⲁⲥⲥⲏⲫⲁ ⲉϧⲟⲩⲛ ⲉⲡⲉϥⲏⲓ ⲟⲩⲟϩ ϩⲏⲡⲡⲉ
ⲓⲥ ⲧⲉϥϣⲉⲣⲓ ⲛⲁⲥⲛⲏⲟⲩ ⲉⲃⲟⲗ ⲉϩⲣⲁϥ ⲡⲉ ϧⲉⲛ ϩⲁⲛⲕⲉⲙⲕⲉⲙ ⲛⲉⲙ
ϩⲁⲛⲭⲟⲣⲟⲥ ⲉⲟⲩϣⲉⲣⲓ ⲙⲙⲁⲩⲁⲧ ⲧⲉ ⲙⲙⲉⲛⲣⲓⲧ ⲛⲧⲁϥ ⲛⲉ ⲙⲙⲟⲛⲧⲉϥ ϣⲉⲣⲓ
ⲙⲙⲁⲩ ⲡⲉ ⲟⲩⲇⲉ ϣⲏⲣⲓ ⲉⲃⲏⲗ ⲉⲣⲟⲥ
ⲟⲩⲟϩ ⲁⲥϣⲱⲡⲓ ⲉⲧⲁϥⲛⲁⲩ ⲉⲣⲟⲥ ⲁϥⲫⲱϧ ⲛⲛⲉϥϩⲃⲱⲥ ⲟⲩⲟϩ ⲡⲉϫⲁϥ ϫⲉ
ⲟⲩⲟⲓ ⲛⲏⲓ ⲥⲉⲙⲉⲓ ⲧⲁϣⲉⲣⲓ ⲁⲣⲉϭⲓ ⲁⲟⲩⲱ ⲙⲙⲟⲓ ϧⲉⲛ ⲟⲩϭⲣⲟⲡ ⲁⲣⲉϣⲱⲡⲓ
ⲙⲡⲉⲙⲑⲟ ⲛⲛⲁⲃⲁⲗ ⲟⲩⲟϩ ⲁⲛⲟⲕ ⲁⲓⲟⲩⲱⲛ ⲛⲣⲱⲓ ⲛⲁϩⲣⲉⲛ ⲡϭⲟⲓⲥ ⲙⲙⲟⲛ
ϣϫⲟⲙ ⲉϫⲱⲗ ⲉⲃⲟⲗ
ⲟⲩⲟϩ ⲡⲉϫⲁⲥ ⲛⲁϥ ϫⲉ ⲡⲁⲓⲱⲧ ⲓⲥϫⲉ ⲁⲕⲟⲩⲱⲛ ⲉⲣⲱⲕ ϧⲁⲣⲟⲓ ⲛⲁϩⲣⲉⲛ
ⲡϭⲟⲓⲥ ⲁⲣⲓⲟⲩⲓ ⲙⲙⲟⲓ ⲕⲁⲧⲁ ⲫⲣⲏϯ ⲉⲧⲁⲥⲓ ⲉⲃⲟⲗ ϧⲉⲛ ⲣⲱⲕ ⲟⲩⲟϩ
ⲛⲛⲉⲕϫⲱⲗ ⲉⲃⲟⲗ ⲙⲡϭⲟⲓⲥ ⲙⲉⲛⲉⲛⲥⲁ ⲑⲣⲉϥⲓⲣⲓ ⲛⲁⲕ ⲛϫⲉ ⲡϭⲟⲓⲥ ⲛⲟⲩϭⲓ
ⲙⲡϣⲓϣ ⲉⲃⲟⲗ ϧⲉⲛ ⲛⲉⲕϫⲁϫⲓ ⲛⲛⲉⲛϣⲏⲣⲓ ⲛⲁⲙⲙⲱⲛ
ⲟⲩⲟϩ ⲡⲉϫⲁⲥ ⲙⲡⲉⲥⲓⲱⲧ ϫⲉ ⲁⲣⲓⲟⲩⲓ ⲛⲏⲓ ϯⲛⲟⲩ ⲡⲁⲓⲱⲧ ⲙⲡⲁⲓⲥⲁϫⲓ ⲭⲁⲧ
ⲛⲁⲃⲟⲧ ⲥⲛⲁⲩ ⲛⲧⲁϣⲉⲛⲏⲓ ⲛⲧⲁⲣⲓⲙⲓ ⲉϫⲉⲛ ⲛⲓⲧⲱⲟⲩ ⲉϩⲣⲏⲓ ⲉϫⲉⲛ
ⲧⲁⲙⲉⲧⲡⲁⲣⲑⲉⲛⲟⲥ ⲁⲛⲟⲕ ⲛⲉⲙ ⲛⲁϣⲫⲉⲣⲓ
ⲟⲩⲟϩ ⲡⲉϫⲁϥ ⲛⲁⲥ ϫⲉ ⲙⲁϣⲉⲛⲉ ⲟⲩⲟϩ ⲁϥⲭⲁⲥ ⲛⲁⲃⲟⲧ ⲥⲛⲁⲩ ⲉⲥⲣⲓⲙⲓ
ⲛⲑⲟⲥ ⲛⲉⲙ ⲛⲉⲥϣⲫⲉⲣⲓ ⲟⲩⲟϩ ⲁⲥⲣⲓⲙⲓ ⲉϫⲉⲛ ⲧⲉⲥⲙⲉⲧⲡⲁⲣⲑⲉⲛⲟⲥ ⲉϫⲉⲛ
ⲛⲓⲧⲱⲟⲩ
ⲟⲩⲟϩ ⲁⲥϣⲱⲡⲓ ⲙⲉⲛⲉⲛⲥⲁ ⲡⲓⲁⲃⲟⲧ ⲥⲛⲁⲩ ⲁⲥⲓ ϩⲁ ⲡⲉⲥⲓⲱⲧ ⲁϥϫⲱⲕ
ⲛⲧⲉϥⲉⲩⲭⲏ ⲛⲁϥ ⲉⲃⲟⲗ ⲑⲏ ⲉⲧⲁϥⲱϣ ⲙⲙⲟⲥ ⲟⲩⲟϩ ⲛⲑⲟⲥ ⲙⲡⲉⲥⲥⲟⲩⲉⲛ ϩⲗⲓ
ⲟⲩⲟϩ ⲁⲥϣⲱⲡⲓ ⲛⲟⲩϩⲱⲛ ϧⲉⲛ ⲡⲓⲥⲣⲁⲏⲗ
ⲓⲥϫⲉⲛ ⲛⲓⲉϩⲟⲟⲩ ϣⲁ ⲛⲓⲉϩⲟⲟⲩ ⲛⲁⲩϣⲉ ⲛⲱⲟⲩ ⲛϫⲉ ⲛⲓϣⲉⲣⲓ ⲛⲧⲉ
ⲡⲓⲥⲣⲁⲏⲗ ⲉⲩⲉⲣⲑⲣⲓⲛⲓⲛ ⲛⲧϣⲉⲣⲓ ⲛⲧⲉ ⲓⲉⲫⲑⲁⲉ ⲛⲅⲁⲗⲁⲁⲇⲓⲧⲏⲥ ⲉϫⲉⲛ
ϥⲧⲱⲟⲩ ⲛⲉϩⲟⲟⲩ ϧⲉⲛ ϯⲣⲟⲙⲡⲓ