The Book of
Leviticus
̅ⲁ:̅ⲁ ⲟⲩⲟϩ ⲁ ⲡϭⲟⲓⲥ ⲟⲩⲁϩⲉⲙ ⲙⲟⲩϯ ⲉⲙⲱⲩⲥⲏⲥ ⲟⲩⲟϩ ⲁϥⲥⲁϫⲓ ⲛⲉⲙⲁϥ
ⲉⲃⲟⲗ ϧⲉⲛ ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲉⲩϫⲱ ⲙⲙⲟⲥ
̅ⲁ:̅ⲃ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲟϩ ⲉⲕⲉϫⲟⲥ ⲛⲱⲟⲩ ϫⲉ
ⲡⲓⲣⲱⲙⲓ ⲉⲃⲟⲗ ϧⲉⲛ ⲑⲏⲛⲟⲩ ⲉϣⲱⲡ ⲁϥϣⲁⲛⲓⲛⲓ ⲛϩⲁⲛⲇⲱⲣⲟⲛ ⲉϧⲟⲩⲛ
ⲙⲡϭⲟⲓⲥ ⲉⲃⲟⲗ ϧⲉⲛ ⲛⲓⲧⲉⲃⲛⲱⲟⲩⲓ ⲛⲉⲙ ⲉⲃⲟⲗ ϧⲉⲛ ⲛⲓⲉϩⲱⲟⲩ ⲛⲉⲙ ⲉⲃⲟⲗ
ϧⲉⲛ ⲛⲓⲉⲥⲱⲟⲩ ⲉⲣⲉⲧⲉⲛⲉⲓⲛⲓ ⲛⲛⲉⲧⲉⲛⲇⲱⲣⲟⲛ
̅ⲁ:̅ⲅ ⲉϣⲱⲡ ⲇⲉ ⲟⲩϭⲗⲓⲗ ⲛϫⲟϥϫⲉϥ ⲡⲉ ⲡⲉϥⲇⲱⲣⲟⲛ ⲉⲃⲟⲗ ϧⲉⲛ ⲛⲓⲉϩⲱⲟⲩ
ⲟⲩϩⲱⲟⲩⲧ ⲛⲁⲧⲁϭⲛⲓ ⲉϥⲉⲉⲛϥ ⲉϩⲣⲏⲓ ϩⲓⲣⲉⲛ ⲫⲣⲟ ⲛϯⲥⲕⲩⲛⲏ ⲛⲧⲉ
ϯⲙⲉⲧⲙⲉⲑⲣⲉ ⲉϥⲉⲉⲛϥ ⲉϧⲟⲩⲛ ⲉϥⲣⲁⲛⲁϥ ⲙⲡⲉⲙⲑⲟ ⲙⲡϭⲟⲓⲥ
̅ⲁ:̅ⲇ ⲟⲩⲟϩ ⲉϥⲉⲧⲁⲗⲟ ⲛⲛⲉϥϫⲓϫ ⲉϩⲣⲏⲓ ⲉϫⲉⲛ ⲧⲁⲫⲉ ⲛⲧⲉ ⲡⲓϭⲗⲓⲗ ⲉϥϣⲏⲡ
ⲛⲁϥ ⲉϥⲉⲓ ⲉϩⲣⲏⲓ ⲉϫⲱϥ
̅ⲁ:̅ⲉ ⲟⲩⲟϩ ⲉⲩⲉⲓⲛⲓ ⲙⲡⲓⲙⲁⲥⲓ ⲙⲡⲉⲙⲑⲟ ⲙⲡϭⲟⲓⲥ ⲟⲩⲟϩ ⲉⲣⲉ ⲛⲉⲛϣⲏⲣⲓ
ⲛⲁⲁⲣⲱⲛ ⲛⲓⲟⲩⲏⲃ ⲉⲩⲉⲓⲛⲓ ⲙⲡⲓⲥⲛⲟϥ ⲉϧⲟⲩⲛ ⲟⲩⲟϩ ⲉⲩⲉϫⲱϣ ⲙⲡⲓⲥⲛⲟϥ
ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉϥⲕⲱϯ ⲫⲏ ⲉⲧⲭⲏ ϩⲓⲣⲉⲛ ⲛⲓⲣⲱⲟⲩ ⲛⲧⲉ ϯⲥⲕⲩⲛⲏ
ⲛⲧⲉ ϯⲙⲉⲧⲙⲉⲑⲣⲉ
̅ⲁ:̣̅ⲋ ⲉⲩⲉϧⲓϯ ⲙⲡⲓϭⲗⲓⲗ ⲟⲩⲟϩ ⲉⲩⲉⲁⲓϥ ⲙⲙⲉⲗⲟⲥ ⲙⲉⲗⲟⲥ ⲕⲁⲧⲁ ⲙⲉⲣⲟⲥ
̅ⲁ:̅ⲍ ⲟⲩⲟϩ ⲉⲣⲉ ⲛⲉⲛϣⲏⲣⲓ ⲛⲁⲁⲣⲱⲛ ⲛⲓⲟⲩⲏⲃ ⲉⲩⲉⲧⲁⲗⲉ ⲭⲣⲱⲙ ⲉϩⲣⲏⲓ ⲉϫⲉⲛ
ⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ ⲉⲩⲉⲥⲁⲧ ⲣⲟⲕϩ ⲉϩⲣⲏⲓ ⲉϫⲉⲛ ⲡⲓⲭⲣⲱⲙ
̅ⲁ:̅ⲏ ⲟⲩⲟϩ ⲉⲣⲉ ⲛⲉⲛϣⲏⲣⲓ ⲛⲁⲁⲣⲱⲛ ⲛⲓⲟⲩⲏⲃ ⲉⲩⲉⲧⲁⲗⲟ ⲛⲛⲓⲥⲱⲙⲁ ⲉⲧⲫⲏϣ
ⲛⲉⲙ ϯⲁⲫⲉ ⲛⲉⲙ ⲡⲓⲱⲧ ⲉϫⲉⲛ ⲛⲓⲣⲟⲕϩ ⲛⲏ ⲉⲧⲭⲏ ϩⲓϫⲉⲛ ⲡⲓⲭⲣⲱⲙ ⲛⲏ
ⲉⲧⲭⲏ ϩⲓϫⲉⲛ ⲡⲓⲙⲁⲛⲉⲣϣⲱⲟⲩϣⲓ
̅ⲁ:̅ⲑ ⲛⲏ ⲉⲧⲉ ⲛϧⲏⲧϥ ⲇⲉ ⲛⲉⲙ ⲛⲓϭⲁⲗⲁⲩϫ ⲉⲩⲉⲓⲁⲩ ⲉⲃⲟⲗ ϧⲉⲛ ⲟⲩⲙⲱⲟⲩ
ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲧⲁⲗⲟ ⲛϩⲱⲃ ⲛⲓⲃⲉⲛ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ
ⲟⲩϭⲗⲓⲗ ⲡⲉ ⲡⲉϥϣⲟⲩϣⲱⲟⲩϣⲓ ⲟⲩⲥⲑⲟⲓ ⲛⲥⲑⲩⲛⲟⲩϥⲓ ⲙⲡϭⲟⲓⲥ
̅ⲁ:̅ⲓ ⲉϣⲱⲡ ⲇⲉ ⲟⲩ ⲉⲃⲟⲗ ϧⲉⲛ ⲛⲓⲉⲥⲱⲟⲩ ⲡⲉ ⲡⲉϥⲇⲱⲣⲟⲛ ⲙⲡϭⲟⲓⲥ ⲉⲃⲟⲗ
ϧⲉⲛ ⲛⲓϩⲓⲏⲃ ⲛⲉⲙ ⲉⲃⲟⲗ ϧⲉⲛ ⲛⲓⲃⲁⲙⲡⲓ ⲉⲩϭⲗⲓⲗ ⲛϫⲟϥϫⲉϥ ⲟⲩⲃⲁⲣⲏⲓⲧ
ⲛⲁⲧⲁϭⲛⲓ ⲉϥⲉϧⲟⲛⲧϥ ⲉϧⲟⲩⲛ
̅ⲁ:̅ⲓⲁ ⲟⲩⲟϩ ⲉϥⲉⲧⲁⲗⲟ ⲛⲛⲉϥϫⲓϫ ⲉϩⲣⲏⲓ ⲉϫⲉⲛ ⲧⲉϥⲁⲫⲉ ⲟⲩⲟϩ
ⲉϥⲉϧⲉⲗϧⲱⲗϥ ⲥⲁ ⲡⲓⲥⲫⲓⲣ ⲙⲡⲓⲙⲁⲛⲉⲣϣⲱⲟⲩϣⲓ ⲥⲁ ⲡⲉⲙϩⲓⲧ
ⲙⲡⲓⲙⲁⲛⲉⲣϣⲱⲟⲩϣⲓ ⲙⲡⲉⲙⲑⲟ ⲙⲡϭⲟⲓⲥ ⲟⲩⲟϩ ⲛⲉⲛϣⲏⲣⲓ ⲛⲁⲁⲣⲱⲛ ⲛⲓⲟⲩⲏⲃ
ⲉⲩⲉϫⲱϣ ⲙⲡⲓⲥⲛⲟϥ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉϥⲕⲱϯ
̅ⲁ:̅ⲓⲃ ⲟⲩⲟϩ ⲉⲩⲉⲁⲓϥ ⲕⲁⲧⲁ ⲙⲉⲗⲟⲥ ⲟⲩⲟϩ ϯⲁⲫⲉ ⲛⲉⲙ ⲡⲉϥⲱⲧ ⲉⲩⲉⲥⲁⲧⲟⲩ
ⲛϫⲉ ⲛⲓⲟⲩⲏⲃ ⲉϩⲣⲏⲓ ⲉϫⲉⲛ ⲛⲓⲣⲱⲕϩ ⲛⲏ ⲉⲧⲭⲏ ϩⲓϫⲉⲛ ⲡⲓⲭⲣⲱⲙ ⲛⲏ
ⲉⲧⲭⲏ ϩⲓϫⲉⲛ ⲡⲓⲙⲁⲛⲉⲣϣⲱⲟⲩϣⲓ
̅ⲁ:̅ⲓⲅ ⲟⲩⲟϩ ⲛⲏ ⲉⲧⲉⲛϧⲏⲧϥ ⲛⲉⲙ ⲛⲓϭⲁⲗⲁⲩϫ ⲉⲩⲉⲓⲁⲩ ϧⲉⲛ ⲟⲩⲙⲱⲟⲩ
ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲉⲛ ϩⲱⲃ ⲛⲓⲃⲉⲛ ⲟⲩⲟϩ ⲉϥⲉⲧⲁⲗⲱⲟⲩ ⲉϫⲉⲛ
ⲡⲓⲙⲁⲛⲉⲣϣⲱⲟⲩϣⲓ ⲟⲩⲟⲩⲧⲁϩ ⲉϥϣⲏⲡ ⲡⲉ ⲛⲟⲩϣⲟⲩϣⲱⲟⲩϣⲓ ⲉⲩⲥⲑⲟⲓ
ⲛⲥⲑⲩⲛⲟⲩϥⲓ ⲙⲡϭⲟⲓⲥ
̅ⲁ:̅ⲓⲇ ⲉϣⲱⲡ ⲇⲉ ⲉⲃⲟⲗ ϧⲉⲛ ⲛⲓϩⲁⲗⲁϯ ⲉϥⲛⲁⲓⲛⲓ ⲛⲟⲩⲇⲱⲣⲟⲛ ⲛϭⲗⲓⲗ ⲉϧⲟⲩⲛ
ⲙⲡϭⲟⲓⲥ ⲉϥⲉⲓⲛⲓ ⲉϧⲟⲩⲛ ⲉⲃⲟⲗ ϧⲉⲛ ⲛⲓϭⲣⲟⲙⲡϣⲁⲗ ⲓⲉ ⲉⲃⲟⲗ ϧⲉⲛ ⲛⲓϭⲣⲟⲙⲡⲓ
ⲙⲡⲉϥⲇⲱⲣⲟⲛ
̅ⲁ:̅ⲓⲉ ⲟⲩⲟϩ ⲉϥⲉⲉⲛϥ ⲛϫⲉ ⲡⲓⲟⲩⲏⲃ ϧⲁⲧⲉⲛ ⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ
ⲉϥⲉⲫⲱⲣϫ ⲛⲧⲉϥⲁⲫⲉ ⲉϥⲉⲧⲁⲗⲟⲥ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ
ⲉϥⲉⲧⲉⲗⲧⲉⲗ ⲥⲛⲟϥ ϧⲁⲧⲉⲛ ϯⲃⲁⲥⲓⲥ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ
̅ⲁ:̅ⲓⲋ ⲟⲩⲟϩ ⲉϥⲉⲱⲗⲓ ⲙⲡⲓⲗⲟⲃⲟⲥ ⲛⲉⲙ ⲛⲓⲙⲉϩⲓ ⲟⲩⲟϩ ⲉϥⲉϩⲓⲧⲟⲩ ⲉⲃⲟⲗ
ϧⲁⲧⲉⲛ ⲡⲓⲙⲁⲛⲉⲣϣⲱⲟⲩϣⲓ ⲥⲁ ⲡⲉⲓⲉⲃⲧ ⲙⲡⲓⲙⲁ ⲛⲧⲉ ϯⲕⲉⲣⲙⲓ
̅ⲁ:̅ⲓⲍ ⲟⲩⲟϩ ⲉϥⲉⲕⲟⲣϫϥ ⲉⲃⲟⲗ ϧⲉⲛ ⲛⲉϥⲧⲉⲛϩ ⲟⲩⲟϩ ⲛⲛⲉϥⲫⲁϣϥ ⲟⲩⲟϩ
ⲉϥⲉⲧⲁⲗⲟϥ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲛϫⲉ ⲡⲓⲟⲩⲏⲃ ⲉϫⲉⲛ ⲛⲓⲣⲟⲕϩ ⲉⲧⲭⲏ
ϩⲓϫⲉⲛ ⲡⲓⲭⲣⲱⲙ ⲟⲩⲟⲩⲧⲁϩ ⲡⲉ ⲉϥϣⲏⲡ ⲟⲩϣⲟⲩϣⲱⲟⲩϣⲓ ⲉⲩⲥⲑⲟⲓ
ⲛⲥⲑⲩⲛⲟⲩϥⲓ ⲉϥϣⲏⲡ ⲙⲡϭⲟⲓⲥ
̅ⲃ:̅ⲁ ⲉϣⲱⲡ ⲇⲉ ⲉⲥⲛⲁⲓⲛⲓ ⲉϧⲟⲩⲛ ⲛϫⲉ ⲟⲩⲯⲩⲭⲏ ⲛⲟⲩⲇⲱⲣⲟⲛ
ⲛϣⲟⲩϣⲱⲟⲩϣⲓ ⲙⲡϭⲟⲓⲥ ⲉϥⲉϣⲱⲡⲓ ⲛϫⲉ ⲡⲉϥⲇⲱⲣⲟⲛ ⲥⲓⲙⲉⲇⲁⲗⲓⲟⲛ ⲟⲩⲟϩ
ⲉϥⲉϫⲱϣ ⲛⲟⲩⲛⲉϩ ⲉϫⲱϥ ⲟⲩⲟϩ ⲉϥⲉⲭⲱ ⲛⲟⲩⲗⲓⲃⲁⲛⲟⲥ ⲉϩⲣⲏⲓ ⲉϫⲱϥ
ⲟⲩϣⲱⲟⲩϣⲱⲟⲩϣⲓ ⲡⲉ
̅ⲃ:̅ⲃ ⲉϥⲉⲉⲛⲟⲩ ϩⲁ ⲛⲉⲛϣⲏⲣⲓ ⲛⲁⲁⲣⲱⲛ ⲛⲓⲟⲩⲏⲃ ⲟⲩⲟϩ ⲉϥⲉⲙⲟϩ ⲛⲧⲉϥϧⲟⲣⲡⲥ
ⲉⲃⲟⲗ ϧⲉⲛ ⲡⲓⲥⲉⲙⲓⲇⲁⲗⲓⲟⲛ ⲛⲉⲙ ⲡⲓⲛⲉϩ ⲛⲉⲙ ⲡⲓⲗⲓⲃⲁⲛⲟⲥ ⲧⲏⲣϥ ⲟⲩⲟϩ ⲉⲣⲉ
ⲡⲓⲟⲩⲏⲃ ⲉϥⲉⲧⲁⲗⲟ ⲙⲡⲉϥⲙⲉⲩⲓ ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ
ⲟⲩϣⲟⲩϣⲱⲟⲩϣⲓ ⲡⲉ ⲉⲩⲥⲑⲟⲓ ⲛⲥⲑⲩⲛⲟⲩϥⲓ ⲙⲡϭⲟⲓⲥ
̅ⲃ:̅ⲅ ⲟⲩⲟϩ ⲡⲥⲉⲡⲓ ⲉⲃⲟⲗ ϧⲉⲛ ⲡⲓϣⲟⲩϣⲱⲟⲩϣⲓ ⲉϥⲉϣⲱⲡⲓ ⲛⲁⲁⲣⲱⲛ ⲛⲉⲙ
ⲛⲉϥϣⲏⲣⲓ ⲡⲉⲑⲟⲩⲁⲃ ⲛⲧⲉ ⲛⲏ ⲉⲑⲟⲩⲁⲃ ⲉⲃⲟⲗ ϧⲉⲛ ⲛⲓϣⲟⲩϣⲱⲟⲩϣⲓ ⲛⲧⲉ
ⲡϭⲟⲓⲥ
̅ⲃ:̅ⲇ ⲉϣⲱⲡ ⲉⲕⲛⲁⲓⲛⲓ ⲛⲟⲩⲇⲱⲣⲟⲛ ⲉϧⲟⲩⲛ ⲛⲟⲩϣⲟⲩϣⲱⲟⲩϣⲓ ⲉϥϫⲏϫ ϧⲉⲛ
ⲟⲩⲑⲣⲓⲣ ⲉⲃⲟⲗ ϧⲉⲛ ⲟⲩⲥⲉⲙⲓⲇⲁⲗⲓⲟⲛ ϩⲁⲛⲱⲓⲕ ⲛⲁⲧϣⲉⲙⲏⲣ ⲉⲩⲟⲩⲟϣⲉⲙ ϧⲉⲛ
ⲟⲩⲛⲉϩ ⲟⲩⲟϩ ⲛⲗⲁⲕⲁⲛⲟⲛ ⲛⲁⲧϣⲉⲙⲏⲣ ⲉⲩϫⲏϣ ϧⲉⲛ ⲟⲩⲛⲉϩ
̅ⲃ:̅ⲉ ⲉϣⲱⲡ ⲇⲉ ⲟⲩϣⲟⲩϣⲱⲟⲩϣⲓ ⲡⲉ ⲉⲃⲟⲗ ϧⲉⲛ ⲟⲩⲗⲁⲕⲉⲛⲧ ⲡⲉⲕⲇⲱⲣⲟⲛ
ⲟⲩⲥⲉⲙⲓⲇⲁⲗⲓⲟⲛ ⲉϥⲟⲩⲟϣⲉⲙ ϧⲉⲛ ⲟⲩⲛⲉϩ ⲉⲩⲉϣⲱⲡⲓ ⲉⲩⲟⲓ ⲛⲁⲧϣⲉⲙⲏⲣ
̅ⲃ:̣̅ⲋ ⲟⲩⲟϩ ⲉⲕⲉⲁⲓⲧⲟⲩ ⲛⲗⲁⲕϩ ⲉⲕⲉϫⲉϣ ⲛⲉϩ ⲉϩⲣⲏⲓ ⲉϫⲱⲟⲩ
ⲟⲩϣⲟⲩϣⲱⲟⲩϣⲓ ⲙⲡϭⲟⲓⲥ ⲡⲉ
̅ⲃ:̅ⲍ ⲉϣⲱⲡ ⲇⲉ ⲟⲩϣⲟⲩϣⲱⲟⲩϣⲓ ⲉⲃⲟⲗ ϧⲉⲛ ⲟⲩⲉⲥⲭⲉⲣⲁ ⲡⲉ ⲡⲉⲕⲇⲱⲣⲟⲛ
ⲟⲩⲥⲉⲙⲓⲇⲁⲗⲓⲟⲛ ⲉⲩⲉⲑⲁⲙⲓⲟϥ ϧⲉⲛ ⲟⲩⲛⲉϩ
̅ⲃ:̅ⲏ ⲟⲩⲟϩ ⲉϥⲉⲓⲛⲓ ⲙⲡⲓϣⲟⲩϣⲱⲟⲩϣⲓ ⲫⲏ ⲉⲧⲉϥⲛⲁⲑⲁⲙⲓⲟϥ ⲉⲃⲟⲗ ϧⲉⲛ ⲛⲁⲓ
ⲙⲡϭⲟⲓⲥ ⲟⲩⲟϩ ⲉϥⲉⲉⲛϥ ⲙⲡⲓⲟⲩⲏⲃ ⲟⲩⲟϩ ⲁϥϣⲁⲛⲑⲣⲉϥϧⲱⲛⲧ
ⲉⲡⲓⲙⲁⲛⲉⲣϣⲱⲟⲩϣⲓ
̅ⲃ:̅ⲑ ⲉϥⲉⲱⲗⲓ ⲛϫⲉ ⲡⲓⲟⲩⲏⲃ ⲉⲃⲟⲗ ϧⲉⲛ ⲡⲓϣⲟⲩϣⲱⲟⲩϣⲓ ⲙⲡⲉϥϫⲓⲛⲉⲣⲫⲙⲉⲩⲓ
ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲧⲁⲗⲟ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲛⲟⲩⲟⲩⲧⲁϩ
ⲉϥϣⲏⲡ ⲟⲩⲥⲑⲟⲓ ⲛⲥⲑⲩⲛⲟⲩϥⲓ ⲙⲡϭⲟⲓⲥ ⲡⲉ
̅ⲃ:̅ⲓ ⲫⲏ ⲇⲉ ⲉⲧⲁϥⲥⲱϫⲡ ⲉⲃⲟⲗ ϧⲉⲛ ⲡⲓϣⲟⲩϣⲱⲟⲩϣⲓ ⲉϥⲉϣⲱⲡⲓ ⲛⲁⲁⲣⲱⲛ
ⲛⲉⲙ ⲛⲉϥϣⲏⲣⲓ ⲛⲏ ⲉⲑⲟⲩⲁⲃ ⲛⲧⲉ ⲛⲏ ⲉⲑⲟⲩⲁⲃ ⲉⲃⲟⲗ ϧⲉⲛ ⲛⲓⲟⲩⲧⲁϩ
ⲉⲧϣⲏⲡ ⲙⲡϭⲟⲓⲥ
̅ⲃ:̅ⲓⲁ ϣⲟⲩϣⲱⲟⲩϣⲓ ⲛⲓⲃⲉⲛ ⲉⲧⲉⲧⲉⲛⲛⲁⲉⲛⲟⲩ ⲉϧⲟⲩⲛ ⲙⲡϭⲟⲓⲥ
ⲛⲛⲉⲧⲉⲛⲑⲁⲙⲓⲱⲟⲩ ⲉⲟⲩⲟⲛ ϣⲉⲙⲏⲣ ⲅⲁⲣ ⲛⲓⲃⲉⲛ ⲛⲉⲙ ⲉⲃⲓⲱ ⲛⲓⲃⲉⲛ
ⲛⲛⲉⲧⲉⲛⲉⲛⲟⲩ ⲉϧⲟⲩⲛ ⲛⲟⲩⲟⲩⲧⲁϩ ⲉϥϣⲏⲡ ⲙⲡϭⲟⲓⲥ
̅ⲃ:̅ⲓⲃ ⲉⲣⲉⲧⲉⲛⲉⲉⲛⲟⲩ ⲉϧⲟⲩⲛ ⲛⲟⲩⲇⲱⲣⲟⲛ ⲛⲧⲉ ⲟⲩⲁⲡⲁⲣⲭⲏ ⲙⲡϭⲟⲓⲥ
ⲛⲛⲟⲩⲉⲛⲟⲩ ⲇⲉ ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉⲩⲥⲑⲟⲓ ⲛⲥⲑⲩⲛⲟⲩϥⲓ
ⲙⲡϭⲟⲓⲥ
̅ⲃ:̅ⲓⲅ ⲟⲩⲟϩ ⲇⲱⲣⲟⲛ ⲛⲓⲃⲉⲛ ⲛⲧⲉ ⲛⲉⲧⲉⲛϣⲟⲩϣⲱⲟⲩϣⲓ ⲉⲩⲉⲙⲟⲗϩⲟⲩ ϧⲉⲛ
ⲟⲩϩⲙⲟⲩ ⲟⲩⲟϩ ⲛⲛⲉϥⲙⲟⲩⲛⲕ ⲛϫⲉ ⲟⲩϩⲙⲟⲩ ⲛⲧⲉ ⲟⲩⲇⲓⲁⲑⲏⲕⲏ ⲛⲧⲉ
ⲫⲛⲟⲩϯ ⲉⲃⲟⲗ ϩⲁ ⲛⲉⲧⲉⲛϣⲟⲩϣⲱⲟⲩϣⲓ ⲉϫⲉⲛ ⲇⲱⲣⲟⲛ ⲛⲓⲃⲉⲛ ⲛⲧⲱⲧⲉⲛ
ⲉⲣⲉⲧⲉⲛⲉⲓⲛⲓ ⲉϧⲟⲩⲛ ⲛⲟⲩϩⲙⲟⲩ
̅ⲃ:̅ⲓⲇ ⲉϣⲱⲡ ⲇⲉ ⲉⲕⲛⲁⲓⲛⲓ ⲉϧⲟⲩⲛ ⲛⲟⲩϣⲟⲩϣⲱⲟⲩϣⲓ ⲙⲡϭⲟⲓⲥ ⲉⲃⲟⲗ ϧⲉⲛ
ϩⲏ ⲛⲧⲉ ⲛⲉⲕⲟⲩⲧⲁϩ ϩⲁⲛⲃⲉⲣⲓ ⲉⲩϫⲏϫ ⲉⲩⲫⲟⲣϫ ⲉⲩϫⲏϫ ⲙⲡϭⲟⲓⲥ ⲟⲩⲟϩ
ⲉⲕⲉⲓⲛⲓ ⲉϧⲟⲩⲛ ⲙⲡⲓϣⲟⲣⲡ ⲛϣⲟⲩϣⲱⲟⲩϣⲓ ⲛⲧⲉ ⲛⲓϣⲟⲣⲡ ⲛⲟⲩⲧⲁϩ
̅ⲃ:̅ⲓⲉ ⲟⲩⲟϩ ⲉⲕⲉϫⲱϣ ⲛⲟⲩⲛⲉϩ ⲉϩⲣⲏⲓ ⲉϫⲱϥ ⲟⲩⲟϩ ⲉⲕⲉⲭⲱ ⲛⲟⲩⲗⲩⲃⲁⲛⲟⲥ
ⲉϩⲣⲏⲓ ⲉϫⲱϥ ⲟⲩϣⲟⲩϣⲱⲟⲩϣⲓ ⲡⲉ
̅ⲃ:̅ⲓⲋ ⲟⲩⲟϩ ⲉϥⲉⲓⲛⲓ ⲙⲡⲉϥⲙⲉⲩⲓ ⲉϩⲣⲏⲓ ⲛϫⲉ ⲡⲓⲟⲩⲏⲃ ⲉⲃⲟⲗ ϧⲉⲛ ⲛⲉⲧⲫⲟⲣϫ
ⲛⲉⲙ ⲡⲓⲛⲉϩ ⲛⲉⲙ ⲡⲓⲗⲩⲃⲁⲛⲟⲥ ⲧⲏⲣϥ ⲟⲩⲟⲩⲧⲁϩ ⲉϥϣⲏⲡ ⲙⲡϭⲟⲓⲥ ⲡⲉ
̅ⲅ:̅ⲁ ⲉϣⲱⲡ ⲇⲉ ⲟⲩϣⲟⲩϣⲱⲟⲩϣⲓ ⲛⲛⲟϩⲉⲙ ⲡⲉ ⲡⲉϥⲧⲁⲓⲟ ⲙⲡϭⲟⲓⲥ ⲉϣⲱⲡ
ⲙⲉⲛ ⲉⲁϥⲉⲛϥ ⲉϧⲟⲩⲛ ⲉⲃⲟⲗ ϧⲉⲛ ⲛⲓⲉϩⲱⲟⲩ ⲓⲧⲉ ⲟⲩϩⲱⲟⲩⲧ ⲓⲧⲉ ⲟⲩⲥϩⲓⲙⲓ
ⲉϥⲉⲉⲛϥ ⲉϧⲟⲩⲛ ⲉϥⲟⲓ ⲛⲁⲧⲁϭⲛⲓ ⲙⲡⲉⲙⲑⲟ ⲙⲡϭⲟⲓⲥ
̅ⲅ:̅ⲃ ⲟⲩⲟϩ ⲉϥⲉⲧⲁⲗⲟ ⲛⲛⲉϥϫⲓϫ ⲉϩⲣⲏⲓ ⲉϫⲉⲛ ⲧⲁⲫⲉ ⲙⲡⲓⲇⲱⲣⲟⲛ ⲟⲩⲟϩ
ⲉϥⲉϧⲉⲗϧⲱⲗϥ ϩⲓⲣⲉⲛ ⲛⲓⲣⲱⲟⲩ ⲛⲧⲉ ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲟⲩⲟϩ ⲉⲣⲉ
ⲛⲉⲛϣⲏⲣⲓ ⲛⲁⲁⲣⲱⲛ ⲛⲓⲟⲩⲏⲃ ⲉⲩⲉϫⲱϣ ⲙⲡⲓⲥⲛⲟϥ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ
ⲉϥⲕⲱϯ
̅ⲅ:̅ⲅ ⲟⲩⲟϩ ⲉⲩⲉⲓⲛⲓ ⲉϧⲟⲩⲛ ⲉⲃⲟⲗ ϧⲉⲛ ⲡⲓϣⲟⲩϣⲱⲟⲩϣⲓ ⲛⲧⲉ ⲡⲓⲟⲩϫⲁⲓ
ⲟⲩⲟⲩⲧⲁϩ ⲉϥϣⲏⲡ ⲙⲡϭⲟⲓⲥ ⲡⲉ ⲡⲓⲱⲧ ⲉⲧϩⲱⲃⲥ ⲛϯⲛⲉϫⲓ ⲛⲉⲙ ⲡⲓⲱⲧ
ⲛⲓⲃⲉⲛ ⲉⲧϩⲓϫⲉⲛ ϯⲛⲉϫⲓ
̅ⲅ:̅ⲇ ⲛⲉⲙ ⲡⲓϭⲗⲱⲧ ⲃ ⲛⲉⲙ ⲡⲓⲱⲧ ⲉⲧϩⲓϫⲱⲟⲩ ⲫⲏ ⲉⲧⲭⲏ ϩⲓϫⲉⲛ
ⲛⲓⲁⲗⲱϫ ⲛⲉⲙ ⲡⲓⲗⲟⲃⲟⲥ ⲉⲧⲭⲏ ϩⲓϫⲉⲛ ⲡⲓϩⲏⲡⲁⲣ ⲉⲩⲉⲟⲗϥ ⲛⲉⲙ ⲛⲓϭⲗⲱⲧ
ⲉⲩⲥⲟⲡ
̅ⲅ:̅ⲉ ⲟⲩⲟϩ ⲉⲣⲉ ⲛⲉⲛϣⲏⲣⲓ ⲛⲁⲁⲣⲱⲛ ⲛⲓⲟⲩⲏⲃ ⲉⲩⲉⲉⲛⲟⲩ ⲉϩⲣⲏⲓ ⲉϫⲉⲛ
ⲡⲓⲙⲁⲛⲉⲣϣⲱⲟⲩϣⲓ ⲉϫⲉⲛ ⲛⲓϭⲗⲓⲗ ⲉϫⲉⲛ ⲛⲓⲣⲟⲕϩ ⲛⲏ ⲉⲧⲭⲏ ϩⲓϫⲉⲛ
ⲡⲓⲭⲣⲱⲙ ⲟⲩⲟⲩⲧⲁϩ ⲉϥϣⲏⲡ ⲡⲉ ⲟⲩⲥⲑⲟⲓ ⲛⲥⲑⲩⲛⲟⲩϥⲓ ⲙⲡϭⲟⲓⲥ ⲡⲉ
̅ⲅ:̣̅ⲋ ⲉϣⲱⲡ ⲇⲉ ⲟⲩ ⲉⲃⲟⲗ ϧⲉⲛ ⲛⲓⲉⲥⲱⲟⲩ ⲡⲉ ⲡⲉϥⲇⲱⲣⲟⲛ ⲛⲟⲩϣⲟⲩϣⲱⲟⲩϣⲓ
ⲛⲛⲟϩⲉⲙ ⲙⲡϭⲟⲓⲥ ⲟⲩϩⲱⲟⲩⲧ ⲓⲉ ⲟⲩⲥϩⲓⲙⲓ ⲉϥⲉⲉⲛϥ ⲉϧⲟⲩⲛ ⲉϥⲟⲓ ⲛⲁⲧⲁϭⲛⲓ
̅ⲅ:̅ⲍ ⲉϣⲱⲡ ⲟⲩϩⲓⲏⲃ ⲡⲉ ⲡⲉϥⲇⲱⲣⲟⲛ ⲉϥⲛⲁⲉⲛϥ ⲉϧⲟⲩⲛ ⲙⲡⲉⲙⲑⲟ ⲙⲡϭⲟⲓⲥ
̅ⲅ:̅ⲏ ⲟⲩⲟϩ ⲉϥⲉⲧⲁⲗⲟ ⲛⲛⲉϥϫⲓϫ ⲉϫⲉⲛ ⲧⲁⲫⲉ ⲙⲡⲓⲇⲱⲣⲟⲛ ⲟⲩⲟϩ
ⲉϥⲉϧⲉⲗϧⲱⲗϥ ϩⲓⲣⲉⲛ ⲛⲓⲣⲱⲟⲩ ⲛⲧⲉ ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲟⲩⲟϩ ⲉⲣⲉ
ⲛⲉⲛϣⲏⲣⲓ ⲛⲁⲁⲣⲱⲛ ⲛⲓⲟⲩⲏⲃ ⲉⲩⲉϫⲱϣ ⲙⲡⲓⲥⲛⲟϥ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ
ⲉϥⲕⲱϯ
̅ⲅ:̅ⲑ ⲟⲩⲟϩ ⲉϥⲉⲓⲛⲓ ⲉϧⲟⲩⲛ ⲉⲃⲟⲗ ϧⲉⲛ ⲡⲓϣⲟⲩϣⲱⲟⲩϣⲓ ⲛⲧⲉ ⲡⲓⲟⲩϫⲁⲓ
ⲟⲩⲟⲩⲧⲁϩ ⲉϥϣⲏⲡ ⲙⲡϭⲟⲓⲥ ⲡⲓⲱⲧ ⲛⲉⲙ ⲡⲉⲧⲥⲁⲡⲉⲥⲏⲧ ⲛϯϧⲉⲗⲡⲓ
ⲟⲩⲁⲧⲁϭⲛⲓ ⲉϥⲉⲟⲗϥ ⲛⲉⲙ ⲛⲓϯⲡⲓ ⲛⲉⲙ ⲡⲓⲱⲧ ⲧⲏⲣϥ ⲉⲧϩⲱⲃⲥ ⲉϫⲉⲛ
ϯⲛⲉϫⲓ ⲛⲉⲙ ⲡⲓⲱⲧ ⲧⲏⲣϥ ⲉⲧϩⲓϫⲉⲛ ϯⲛⲉϫⲓ
̅ⲅ:̅ⲓ ⲛⲉⲙ ⲡⲓϭⲗⲱⲧ ⲃ ⲛⲉⲙ ⲡⲓⲱⲧ ⲉⲧϩⲓϫⲱⲟⲩ ⲫⲏ ⲉⲧⲭⲏ ϩⲓϫⲉⲛ
ⲛⲓⲁⲗⲱϫ ⲛⲉⲙ ⲡⲓⲗⲟⲃⲟⲥ ⲫⲏ ⲉⲧⲭⲏ ϩⲓϫⲉⲛ ⲡⲓϩⲏⲡⲁⲣ ⲉϥⲉⲟⲗϥ ⲛⲉⲙ
ⲛⲓϭⲗⲱⲧ
̅ⲅ:̅ⲓⲁ ⲟⲩⲟϩ ⲉϥⲉⲉⲛⲟⲩ ⲛϫⲉ ⲡⲓⲟⲩⲏⲃ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲟⲩⲥⲑⲟⲓ
ⲛⲥⲑⲩⲛⲟⲩϥⲓ ⲟⲩⲟⲩⲧⲁϩ ⲉϥϣⲏⲡ ⲙⲡϭⲟⲓⲥ
̅ⲅ:̅ⲓⲃ ⲉϣⲱⲡ ⲇⲉ ⲉⲃⲟⲗ ϧⲉⲛ ⲛⲓⲃⲁⲉⲙⲡⲓ ⲡⲉ ⲡⲉϥⲇⲱⲣⲟⲛ ⲙⲡϭⲟⲓⲥ ⲉϥⲉϧⲱⲛⲧ
ⲉϧⲟⲩⲛ ⲙⲡⲉⲙⲑⲟ ⲙⲡϭⲟⲓⲥ
̅ⲅ:̅ⲓⲅ ⲟⲩⲟϩ ⲉϥⲉⲧⲁⲗⲟ ⲛⲧⲉϥϫⲓϫ ⲉϩⲣⲏⲓ ⲉϫⲉⲛ ⲧⲉϥⲁⲫⲉ ⲟⲩⲟϩ
ⲉⲩⲉϧⲉⲗϧⲱⲗϥ ⲙⲡⲉⲙⲑⲟ ⲙⲡϭⲟⲓⲥ ϩⲓⲣⲉⲛ ⲛⲓⲣⲱⲟⲩ ⲛⲧⲉ ϯⲥⲕⲩⲛⲏ ⲛⲧⲉ
ϯⲙⲉⲧⲙⲉⲑⲣⲉ ⲟⲩⲟϩ ⲉⲣⲉ ⲛⲉⲛϣⲏⲣⲓ ⲛⲁⲁⲣⲱⲛ ⲛⲓⲟⲩⲏⲃ ⲉⲩⲉϫⲱϣ ⲙⲡⲓⲥⲛⲟϥ
ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉϥⲕⲱϯ
̅ⲅ:̅ⲓⲇ ⲟⲩⲟϩ ⲉϥⲉⲓⲛⲓ ⲉⲡϣⲱⲓ ⲉⲃⲟⲗ ⲙⲙⲟϥ ⲛⲟⲩⲟⲩⲧⲁϩ ⲉϥϣⲏⲡ ⲙⲡϭⲟⲓⲥ
ⲡⲓⲱⲧ ⲉⲧϩⲱⲃⲥ ⲉϫⲉⲛ ϯⲛⲉϫⲓ ⲟⲩⲟϩ ⲡⲓⲱⲧ ⲧⲏⲣϥ ⲉϩⲣⲏⲓ ⲉϫⲉⲛ ϯⲛⲉϫⲓ
̅ⲅ:̅ⲓⲉ ⲛⲉⲙ ⲡⲓϭⲗⲱⲧ ⲃ ⲛⲉⲙ ⲡⲓⲱⲧ ⲧⲏⲣϥ ⲉⲧϩⲓϫⲱⲟⲩ ⲫⲏ ⲉⲧϩⲓϫⲉⲛ
ⲛⲓⲁⲗⲱϫ ⲛⲉⲙ ⲡⲓⲗⲟⲃⲟⲥ ⲉⲧⲭⲏ ϩⲓϫⲉⲛ ⲡⲓϩⲩⲡⲁⲣ ⲉϥⲉⲟⲗⲟⲩ ⲛⲉⲙ ⲛⲓϭⲗⲱⲧ
̅ⲅ:̅ⲓⲋ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲉⲛⲟⲩ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲟⲩⲟⲩⲧⲁϩ
ⲉϥϣⲏⲡ ⲟⲩⲥⲑⲟⲓ ⲛⲥⲑⲩⲛⲟⲩϥⲓ ⲉϥϣⲏⲡ ⲙⲡϭⲟⲓⲥ ⲱⲧ ⲛⲓⲃⲉⲛ ⲁⲛⲓⲧϥ ⲙⲡϭⲟⲓⲥ
̅ⲅ:̅ⲓⲍ ⲟⲩⲛⲟⲙⲟⲥ ϣⲁ ⲉⲛⲉϩ ⲛⲧⲉ ⲛⲉⲧⲉⲛϫⲱⲟⲩ ⲛϩⲣⲏⲓ ϧⲉⲛ ⲛⲉⲧⲉⲛⲙⲁⲛϣⲱⲡⲓ
ⲧⲏⲣⲟⲩ ⲱⲧ ⲛⲓⲃⲉⲛ ⲛⲉⲙ ⲥⲛⲟϥ ⲛⲓⲃⲉⲛ ⲛⲛⲉⲧⲉⲛⲟⲩⲟⲙⲟⲩ
̅ⲇ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲇ:̅ⲃ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲉⲕϫⲱ ⲙⲙⲟⲥ ϫⲉ ⲟⲩⲯⲩⲭⲏ
ⲁⲥϣⲁⲛⲉⲣⲛⲟⲃⲓ ϧⲉⲛ ⲟⲩⲙⲉⲧⲁⲧⲉⲙⲓ ⲉⲃⲟⲗ ϧⲉⲛ ⲛⲓⲟⲩⲁϩⲥⲁϩⲛⲓ ⲧⲏⲣⲟⲩ ⲛⲧⲉ
ⲡϭⲟⲓⲥ ⲛⲏ ⲉⲧⲉ ⲥϣⲉ ⲛⲁⲓⲧⲟⲩ ⲁⲛ ⲟⲩⲟϩ ⲛⲧⲉⲥⲓⲣⲓ ⲛⲟⲩⲁⲓ ⲛⲛⲁⲓ ⲛⲟⲩϩⲗⲓ
ⲉⲃⲟⲗ ⲛϧⲏⲧⲟⲩ
̅ⲇ:̅ⲅ ⲉϣⲱⲡ ⲇⲉ ⲡⲓⲁⲣⲭⲏⲉⲣⲉⲩⲥ ⲉⲧⲑⲁϩⲥ ⲛⲧⲉϥⲉⲣⲛⲟⲃⲓ ⲉⲑⲣⲉ ⲟⲩⲗⲁⲟⲥ
ⲉⲣⲛⲟⲃⲓ ⲟⲩⲟϩ ⲉϥⲉⲓⲛⲓ ⲉϩⲣⲏⲓ ⲙⲡⲉϥⲛⲟⲃⲓ ⲉⲧⲁϥⲉⲣⲛⲟⲃⲓ ⲙⲙⲟϥ ⲛⲟⲩⲙⲁⲥⲓ
ⲉⲃⲟⲗ ϧⲉⲛ ϩⲁⲛⲉϩⲱⲟⲩ ϩⲁⲛⲁⲧⲁϭⲛⲓ ⲙⲡϭⲟⲓⲥ ⲉⲑⲃⲉ ⲡⲓⲛⲟⲃⲓ ⲉⲧⲁϥⲁⲓϥ
̅ⲇ:̅ⲇ ⲟⲩⲟϩ ⲉϥⲉⲓⲛⲓ ⲙⲡⲓⲙⲁⲥⲓ ϩⲓⲣⲉⲛ ⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ
ⲙⲡⲉⲙⲑⲟ ⲙⲡϭⲟⲓⲥ ⲉϥⲉⲧⲁⲗⲟ ⲛⲧⲉϥϫⲓϫ ⲉϫⲉⲛ ⲧⲁⲫⲉ ⲙⲡⲓⲙⲁⲥⲓ ⲙⲡⲉⲙⲑⲟ
ⲙⲡϭⲟⲓⲥ
̅ⲇ:̅ⲉ ⲟⲩⲟϩ ⲉⲣⲉ ⲡⲓⲟⲩⲏⲃ ⲫⲏ ⲉⲧⲑⲁϩⲥ ⲫⲏ ⲉⲧⲉ ⲛⲉϥϫⲓϫ ϫⲏⲕ ⲉⲃⲟⲗ
ⲉϥⲉϭⲓ ⲉⲃⲟⲗ ϧⲉⲛ ⲡⲓⲥⲛⲟϥ ⲙⲡⲓⲙⲁⲥⲓ ⲟⲩⲟϩ ⲉϥⲉϭⲓⲧϥ ⲉϧⲟⲩⲛ ⲉϯⲥⲕⲩⲛⲏ
ⲛⲧⲉ ϯⲙⲉⲧⲙⲉⲑⲣⲉ
̅ⲇ:̣̅ⲋ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲥⲱⲡ ⲙⲡⲉϥⲧⲏⲃ ϧⲉⲛ ⲡⲓⲥⲛⲟϥ ⲟⲩⲟϩ
ⲉϥⲉⲛⲟⲩϫϧ ⲉⲃⲟⲗ ϧⲉⲛ ⲡⲓⲥⲛⲟϥ ⲛⲍ ⲛⲥⲟⲡ ϧⲉⲛ ⲡⲉϥⲧⲏⲃ ⲙⲡⲉⲙⲑⲟ ⲙⲡϭⲟⲓⲥ
ⲙⲡⲓⲕⲁⲧⲁⲡⲉⲧⲁⲥⲙⲁ ⲉⲑⲟⲩⲁⲃ
̅ⲇ:̅ⲍ ⲟⲩⲟϩ ⲉϥⲉⲧⲁⲗⲟ ⲛϫⲉ ⲡⲓⲟⲩⲏⲃ ⲉⲃⲟⲗ ϧⲉⲛ ⲡⲓⲥⲛⲟϥ ⲛⲧⲉ ⲡⲓⲙⲁⲥⲓ ⲉϫⲉⲛ
ⲛⲉⲛⲧⲁⲡ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ ⲛⲧⲉ ⲡⲓⲥⲑⲩⲛⲟⲩϥⲓ ⲉⲧⲥⲁⲡⲉⲥⲏⲧ ⲫⲏ ⲉⲧ
ⲙⲡⲉⲙⲑⲟ ⲙⲡϭⲟⲓⲥ ⲉⲧⲉ ⲫⲏ ⲡⲉ ⲉⲧϧⲉⲛ ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲟⲩⲟϩ
ⲡⲓⲥⲛⲟϥ ⲧⲏⲣϥ ⲛⲧⲉ ⲡⲓⲙⲁⲥⲓ ⲉϥⲉϫⲟϣϥ ⲉϫⲉⲛ ϯⲃⲁⲥⲓⲥ ⲛⲧⲉ
ⲡⲓⲙⲁⲛⲉⲣϣⲱⲟⲩϣⲓ ⲛⲧⲉ ⲛⲓϭⲗⲓⲗ ⲛϫⲟϥϫⲉϥ ⲫⲏ ⲉⲧϩⲓⲣⲉⲛ ⲛⲓⲣⲱⲟⲩ ⲛⲧⲉ
ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ
̅ⲇ:̅ⲏ ⲡⲓⲱⲧ ⲧⲏⲣϥ ⲛⲧⲉ ⲡⲓⲙⲁⲥⲓ ⲛⲧⲉ ⲫⲛⲟⲃⲓ ⲉϥⲉⲟⲗϥ ⲉⲃⲟⲗ ⲙⲙⲟϥ ⲡⲓⲱⲧ
ⲫⲏ ⲉⲧϩⲱⲃⲥ ⲛⲛⲏ ⲉⲧⲥⲁⲃⲟⲗ ⲛⲉⲙ ⲡⲓⲱⲧ ⲧⲏⲣϥ ⲉⲧⲭⲏ ϩⲓϫⲉⲛ ⲛⲏ
ⲉⲧⲥⲁϧⲟⲩⲛ
̅ⲇ:̅ⲑ ⲛⲉⲙ ⲡⲓϭⲗⲱⲧ ⲃ ⲛⲉⲙ ⲡⲓⲱⲧ ⲉⲧϩⲓϫⲱⲟⲩ ⲫⲏ ⲉⲧⲭⲏ ϩⲓϫⲉⲛ
ⲛⲓⲁⲗⲱϫ ⲛⲉⲙ ⲡⲓⲗⲟⲃⲟⲥ ⲉⲧⲭⲏ ϩⲓϫⲉⲛ ⲡⲓϩⲩⲡⲁⲣ ⲉϥⲉⲟⲗⲟⲩ ⲛⲉⲙ ⲛⲓϭⲗⲱⲧ
ⲉⲩⲥⲟⲡ
̅ⲇ:̅ⲓ ⲙⲫⲣⲏϯ ⲉⲧⲉ ϣⲁⲩⲱⲗⲓ ⲉⲃⲟⲗ ϧⲉⲛ ⲡⲓⲙⲁⲥⲓ ⲛⲧⲉ ⲡⲓϣⲟⲩϣⲱⲟⲩϣⲓ
ⲛⲧⲉ ⲫⲛⲟϩⲉⲙ ⲟⲩⲟϩ ⲉϥⲉⲉⲛϥ ⲛϫⲉ ⲡⲓⲟⲩⲏⲃ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲛⲧⲉ
ⲡⲓϭⲗⲓⲗ ⲉⲧϣⲏⲡ
̅ⲇ:̅ⲓⲁ ⲟⲩⲟϩ ⲡϣⲁⲣ ⲛⲧⲉ ⲡⲓⲙⲁⲥⲓ ⲛⲉⲙ ⲛⲉϥⲁϥⲟⲩⲓ ⲧⲏⲣⲟⲩ ⲛⲉⲙ ϯⲁⲫⲉ ⲛⲉⲙ
ⲛⲓⲁⲕⲣⲱⲧⲏⲣⲓⲟⲛ ⲛⲉⲙ ϯⲛⲉϫⲓ ⲛⲉⲙ ⲛⲉϥϩⲱⲓⲣⲓ
̅ⲇ:̅ⲓⲃ ⲟⲩⲟϩ ⲉⲩⲉⲱⲗⲓ ⲙⲡⲓⲙⲁⲥⲓ ⲧⲏⲣϥ ⲉⲃⲟⲗ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ ⲉⲟⲩⲙⲁ
ⲉϥⲟⲩⲁⲃ ⲡⲓⲙⲁ ⲉⲧⲟⲩⲛⲁⲫⲉⲛ ϯⲕⲉⲣⲙⲓ ⲉⲃⲟⲗ ⲙⲙⲟϥ ⲟⲩⲟϩ ⲉⲩⲉⲣⲟⲕϩϥ ⲉϩⲣⲏⲓ
ⲉϫⲉⲛ ϩⲁⲛⲣⲟⲕϩ ϧⲉⲛ ⲟⲩⲭⲣⲱⲙ ⲉϩⲣⲏⲓ ⲉϫⲉⲛ ⲡϫⲱϣ ⲉⲃⲟⲗ ⲛⲧⲉ ϯⲕⲉⲣⲙⲓ
ⲉⲩⲉⲣⲟⲕϩϥ
̅ⲇ:̅ⲓⲅ ⲉϣⲱⲡ ⲇⲉ ⲛⲧⲉ ⲟⲩⲥⲩⲛⲁⲅⲱⲅⲏ ⲧⲏⲣⲥ ⲛⲧⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ
ⲉⲣⲁⲧⲉⲙⲓ ⲟⲩⲟϩ ⲛⲧⲉ ⲟⲩⲥⲁϫⲓ ⲱⲃϣ ⲉⲃⲟⲗ ϩⲁ ⲛⲉⲛⲃⲁⲗ ⲛϯⲥⲩⲛⲁⲅⲱⲅⲏ
ⲟⲩⲟϩ ⲛⲥⲉⲓⲣⲓ ⲛⲟⲩⲓ ⲉⲃⲟⲗ ϧⲉⲛ ⲛⲓⲉⲛⲧⲟⲗⲏ ⲛⲧⲉ ⲡϭⲟⲓⲥ ⲑⲏ ⲉⲧⲉ ⲥϣⲉ ⲁⲛ
ⲉⲑⲣⲉⲥϣⲱⲡⲓ ⲟⲩⲟϩ ⲛⲧⲟⲩϣⲱϥⲧ
̅ⲇ:̅ⲓⲇ ⲟⲩⲟϩ ⲛⲧⲉϥⲟⲩⲟⲛϩϥ ⲉⲣⲱⲟⲩ ⲛϫⲉ ⲡⲓⲛⲟⲃⲓ ⲉⲧⲁⲩⲉⲣⲛⲟⲃⲓ ⲛϧⲏⲧϥ
ⲟⲩⲟϩ ⲉⲣⲉ ϯⲥⲩⲛⲁⲅⲱⲅⲏ ⲉⲥⲉⲓⲛⲓ ⲛⲟⲩⲙⲁⲥⲓ ⲉⲃⲟⲗ ϧⲉⲛ ϩⲁⲛⲉϩⲱⲟⲩ
ⲛⲁⲧⲁϭⲛⲓ ⲉϩⲣⲏⲓ ⲉϫⲉⲛ ⲡⲓⲛⲟⲃⲓ ⲟⲩⲟϩ ⲉϥⲉⲉⲛϥ ⲉϯⲥⲕⲏⲛⲏ ⲛⲧⲉ
ϯⲙⲉⲧⲙⲉⲑⲣⲉ
̅ⲇ:̅ⲓⲉ ⲟⲩⲟϩ ⲉⲣⲉ ⲛⲓⲡⲣⲉⲥⲃⲩⲧⲉⲣⲟⲥ ⲛⲧⲉ ϯⲥⲩⲛⲁⲅⲱⲅⲏ ⲉⲩⲉⲧⲁⲗⲉ ⲛⲟⲩϫⲓϫ
ⲉϩⲣⲏⲓ ⲉϫⲉⲛ ⲧⲁⲫⲉ ⲙⲡⲓⲙⲁⲥⲓ ⲙⲡⲉⲙⲑⲟ ⲙⲡϭⲟⲓⲥ
̅ⲇ:̅ⲓⲋ ⲟⲩⲟϩ ⲉⲣⲉ ⲡⲓⲟⲩⲏⲃ ⲫⲏ ⲉⲧⲑⲁϩⲥ ⲉϥⲉⲓⲛⲓ ⲉⲃⲟⲗ ϧⲉⲛ ⲡⲓⲥⲛⲟϥ ⲛⲧⲉ
ⲡⲓⲙⲁⲥⲓ ⲉϧⲟⲩⲛ ⲉϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ
̅ⲇ:̅ⲓⲍ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲥⲱⲡ ⲙⲡⲉϥⲧⲏⲃ ⲉⲃⲟⲗ ϧⲉⲛ ⲡⲓⲥⲛⲟϥ ⲛⲧⲉ
ⲡⲓⲙⲁⲥⲓ ⲟⲩⲟϩ ⲉϥⲉⲛⲟⲩϫϧ ⲛⲍ ⲛⲥⲟⲡ ⲙⲡⲉⲙⲑⲟ ⲙⲡϭⲟⲓⲥ ⲛⲉⲙⲡⲉⲙⲑⲟ
ⲙⲡⲓⲕⲁⲧⲁⲡⲉⲧⲁⲥⲙⲁ ⲉⲑⲟⲩⲁⲃ
̅ⲇ:̅ⲓⲏ ⲟⲩⲟϩ ⲉϥⲉⲱⲗⲓ ⲛϫⲉ ⲡⲓⲟⲩⲏⲃ ⲉⲃⲟⲗ ϧⲉⲛ ⲡⲓⲥⲛⲟϥ ⲉϥⲉϯ ⲉϩⲣⲏⲓ ⲉϫⲉⲛ
ⲛⲓⲧⲁⲡ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ ⲫⲏ ⲉⲧⲉ ⲙⲡⲉⲙⲑⲟ ⲙⲡϭⲟⲓⲥ ⲫⲏ ⲉⲧⲭⲏ
ϧⲁⲧⲉⲛ ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲟⲩⲟϩ ⲡⲓⲥⲛⲟϥ ⲧⲏⲣϥ ⲉϥⲉϫⲟϣϥ
ϧⲁⲧⲉⲛ ϯⲃⲁⲥⲓⲥ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ ⲛⲧⲉ ⲛⲓϭⲗⲓⲗ ⲫⲏ ⲉⲧⲭⲏ ϧⲁⲧⲉⲛ
ⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ
̅ⲇ:̅ⲓⲑ ⲟⲩⲟϩ ⲡⲓⲱⲧ ⲧⲏⲣϥ ⲉϥⲉⲟⲗϥ ⲉⲃⲟⲗ ⲙⲙⲟϥ ⲟⲩⲟϩ ⲉϥⲉⲉⲛϥ ⲉϩⲣⲏⲓ
ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ
̅ⲇ:̅ⲕ ⲟⲩⲟϩ ⲉϥⲉⲓⲣⲓ ⲙⲡⲓⲙⲁⲥⲓ ⲕⲁⲧⲁ ⲫⲣⲏϯ ⲉⲧⲁϥⲓⲣⲓ ⲙⲡⲓⲙⲁⲥⲓ ⲛⲧⲉ ⲫⲛⲟⲃⲓ
ⲉⲩⲉⲑⲁⲙⲓⲟϥ ⲙⲡⲁⲓⲣⲏϯ ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ ⲉϫⲱⲟⲩ ⲛϫⲉ ⲡⲓⲟⲩⲏⲃ
ⲟⲩⲟϩ ⲉⲩⲉⲭⲱ ⲛⲱⲟⲩ ⲉⲃⲟⲗ
̅ⲇ:̅ⲕⲁ ⲟⲩⲟϩ ⲉⲩⲉⲓⲛⲓ ⲙⲡⲓⲙⲁⲥⲓ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ ⲟⲩⲟϩ ⲉⲩⲉⲣⲟⲕϩ
ⲙⲡⲓⲙⲁⲥⲓ ⲙⲫⲣⲏϯ ⲉⲧⲁⲩⲣⲱⲕϩ ⲙⲡⲓⲙⲁⲥⲓ ⲛⲧⲉ ϣⲟⲣⲡ ⲫⲁ ⲫⲛⲟⲃⲓ ⲛⲧⲉ
ⲟⲩⲥⲩⲛⲁⲅⲱⲅⲏ ⲡⲉ
̅ⲇ:̅ⲕⲃ ⲉϣⲱⲡ ⲟⲩⲛ ⲛⲧⲉ ⲡⲓⲁⲣⲭⲱⲛ ⲉⲣⲛⲟⲃⲓ ⲟⲩⲟϩ ⲛⲧⲉϥⲓⲣⲓ ⲛⲟⲩⲓ
ⲛⲛⲓⲉⲛⲧⲟⲗⲏ ⲛⲧⲉ ⲡϭⲟⲓⲥ ⲡⲉϥⲛⲟⲩϯ ⲑⲏ ⲉⲧⲉ ⲥϣⲉ ⲁⲛ ⲉⲑⲣⲉⲥϣⲱⲡⲓ ⲉϩⲛⲁϥ
ⲁⲛ ⲡⲉ ⲟⲩⲟϩ ⲛⲧⲉϥϣⲱϥⲧ
̅ⲇ:̅ⲕⲅ ⲟⲩⲟϩ ⲛⲧⲉ ⲡⲓⲛⲟⲃⲓ ⲟⲩⲱⲛϩ ⲉⲃⲟⲗ ⲉⲧⲁϥⲉⲣⲛⲟⲃⲓ ⲛϧⲏⲧϥ ⲟⲩⲟϩ ⲉϥⲉⲓⲛⲓ
ⲙⲡⲉϥⲇⲱⲣⲟⲛ ⲉϧⲟⲩⲛ ⲟⲩⲃⲁⲣⲏⲓⲧ ⲉⲃⲟⲗ ϧⲉⲛ ϩⲁⲛⲃⲁⲉⲙⲡⲓ ⲟⲩϩⲱⲟⲩⲧ
ⲛⲁⲧⲁϭⲛⲓ ⲉϫⲉⲛ ⲫⲛⲟⲃⲓ
̅ⲇ:̅ⲕⲇ ⲟⲩⲟϩ ⲉϥⲉⲧⲁⲗⲟ ⲛⲧⲉϥϫⲓϫ ⲉϫⲉⲛ ⲧⲁⲫⲉ ⲙⲡⲓⲃⲁⲣⲏⲓⲧ ⲟⲩⲟϩ
ⲉⲩⲉϧⲉⲗϧⲱⲗϥ ϧⲉⲛ ⲡⲓⲙⲁ ⲉϣⲁⲩϧⲟⲗϧⲉⲗ ⲙⲡⲓϭⲗⲓⲗ ⲙⲙⲟϥ ⲙⲡⲉⲙⲑⲟ
ⲙⲡϭⲟⲓⲥ ⲫⲁ ⲫⲛⲟⲃⲓ ⲡⲉ
̅ⲇ:̅ⲕⲉ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲱⲗⲓ ⲉⲃⲟⲗ ϧⲉⲛ ⲡⲓⲥⲛⲟϥ ⲛⲧⲉ ⲫⲁ ⲫⲛⲟⲃⲓ
ⲙⲡⲉϥⲧⲏⲃ ⲟⲩⲟϩ ⲉϥⲉⲧⲁⲗⲟ ⲉϩⲣⲏⲓ ⲉϫⲉⲛ ⲛⲓⲧⲁⲡ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ
ⲛⲧⲉ ⲛⲓϭⲗⲓⲗ ⲟⲩⲟϩ ⲡⲉϥⲥⲛⲟϥ ⲧⲏⲣϥ ⲉϥⲉϫⲟϣϥ ϧⲁ ϯⲃⲁⲥⲓⲥ ⲛⲧⲉ
ⲡⲓⲙⲁⲛⲉⲣϣⲱⲟⲩϣⲓ ⲛⲧⲉ ⲡⲓϭⲗⲓⲗ
̅ⲇ:̅ⲕⲋ ⲟⲩⲟϩ ⲡⲓⲱⲧ ⲧⲏⲣϥ ⲛⲧⲁϥ ⲉϥⲉⲉⲛϥ ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ
ⲙⲫⲣⲏϯ ⲛⲟⲩⲱⲧ ⲛⲧⲉ ⲟⲩϣⲟⲩϣⲱⲟⲩϣⲓ ⲛⲛⲟϩⲉⲙ ⲟⲩⲟϩ ⲉⲣⲉ ⲡⲓⲟⲩⲏⲃ
ⲧⲱⲃϩ ⲉϩⲣⲏⲓ ⲉϫⲱϥ ⲉⲑⲃⲉ ⲡⲉϥⲛⲟⲃⲓ ⲟⲩⲟϩ ⲉⲩⲉⲭⲱ ⲛⲁϥ ⲉⲃⲟⲗ
̅ⲇ:̅ⲕⲍ ⲉϣⲱⲡ ⲛⲧⲉ ⲟⲩⲯⲩⲭⲏ ⲙⲙⲁⲩⲁⲧⲥ ⲉⲣⲛⲟⲃⲓ ⲉⲃⲟⲗ ϧⲉⲛ ⲡⲓⲗⲁⲟⲥ ⲛⲧⲉ
ⲡⲕⲁϩⲓ ⲉϩⲛⲁⲥ ⲁⲛ ϧⲉⲛ ⲡϫⲓⲛⲓⲣⲓ ⲛⲟⲩⲓ ⲛⲛⲓⲉⲛⲧⲟⲗⲏ ⲛⲧⲉ ⲡϭⲟⲓⲥ ⲑⲏ ⲉⲧⲉ
ⲥϣⲉ ⲁⲛ ⲉⲑⲣⲉⲥϣⲱⲡⲓ ⲟⲩⲟϩ ⲛⲧⲉⲥϣⲱϥⲧ
̅ⲇ:̅ⲕⲏ ⲟⲩⲟϩ ⲛⲧⲉ ⲡⲓⲛⲟⲃⲓ ⲟⲩⲱⲛϩ ⲉⲃⲟⲗ ⲉⲧⲁϥⲉⲣⲛⲟⲃⲓ ⲙⲙⲟϥ ⲟⲩⲟϩ ⲉϥⲉⲓⲛⲓ
ⲛⲟⲩⲃⲁⲉⲙⲡⲓ ⲛⲥϩⲓⲙⲓ ⲉⲃⲟⲗ ϧⲉⲛ ϩⲁⲛⲃⲁⲉⲙⲡⲓ ⲉⲥⲟⲓ ⲛⲁⲧⲁϭⲛⲓ ⲉϥⲉⲉⲛⲥ ⲉⲑⲃⲉ
ⲡⲓⲛⲟⲃⲓ ⲉⲧⲁϥⲉⲣⲛⲟⲃⲓ ⲙⲙⲟϥ
̅ⲇ:̅ⲕⲑ ⲟⲩⲟϩ ⲉϥⲉⲧⲁⲗⲟ ⲛⲧⲉϥϫⲓϫ ⲉϫⲉⲛ ⲧⲁⲫⲉ ⲙⲡⲉϥⲛⲟⲃⲓ ⲟⲩⲟϩ
ⲉϥⲉϧⲟⲗϧⲉⲗ ⲛϯⲃⲁⲉⲙⲡⲓ ⲑⲏ ⲛⲧⲉ ⲫⲛⲟⲃⲓ ϧⲉⲛ ⲡⲓⲙⲁ ⲉⲧⲟⲩⲛⲁϧⲟⲗϧⲉⲗ
ⲙⲡⲓϭⲗⲓⲗ ⲙⲙⲟϥ
̅ⲇ:̅ⲗ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲱⲗⲓ ⲉⲃⲟⲗ ϧⲉⲛ ⲡⲉϥⲥⲛⲟϥ ⲙⲡⲉϥⲧⲏⲃ ⲟⲩⲟϩ
ⲉϥⲉⲧⲁⲗⲟ ⲉϩⲣⲏⲓ ⲉϫⲉⲛ ⲛⲓⲧⲁⲡ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ ⲛⲧⲉ ⲡⲓϭⲗⲓⲗ
ⲟⲩⲟϩ ⲡⲓⲥⲛⲟϥ ⲧⲏⲣϥ ⲉϥⲉϫⲟϣϥ ϧⲁⲧⲉⲛ ϯⲃⲁⲥⲓⲥ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ
̅ⲇ:̅ⲗⲁ ⲟⲩⲟϩ ⲡⲓⲱⲧ ⲧⲏⲣϥ ⲉϥⲉⲟⲗϥ ⲙⲫⲣⲏϯ ⲉⲧⲁϥⲱⲗⲓ ⲙⲡⲓⲱⲧ ⲉⲃⲟⲗ ϧⲉⲛ
ⲟⲩϣⲟⲩϣⲱⲟⲩϣⲓ ⲛⲛⲟϩⲉⲙ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲓⲛⲓ ⲉϩⲣⲏⲓ ⲉϫⲉⲛ
ⲡⲓⲙⲁⲛⲉⲣϣⲱⲟⲩϣⲓ ⲉⲩⲥⲑⲟⲓ ⲛⲥⲑⲩⲛⲟⲩϥⲓ ⲙⲡϭⲟⲓⲥ ⲟⲩⲟϩ ⲉⲣⲉ ⲡⲓⲟⲩⲏⲃ ⲧⲱⲃϩ
ⲉϩⲣⲏⲓ ⲉϫⲱϥ ⲟⲩⲟϩ ⲉⲩⲉⲭⲱ ⲛⲁϥ ⲉⲃⲟⲗ
̅ⲇ:̅ⲗⲃ ⲉϣⲱⲡ ⲛⲧⲉϥⲉⲛ ⲟⲩⲉⲥⲱⲟⲩ ⲉϧⲟⲩⲛ ⲛⲇⲱⲣⲟⲛ ⲉⲑⲃⲉ ⲫⲛⲟⲃⲓ ⲉϥⲉⲉⲛⲥ
ⲛⲥϩⲓⲙⲓ ⲛⲁⲧⲁϭⲛⲓ
̅ⲇ:̅ⲗⲅ ⲟⲩⲟϩ ⲉϥⲉⲧⲁⲗⲟ ⲛⲧⲉϥϫⲓϫ ⲉϩⲣⲏⲓ ⲉϫⲉⲛ ⲧⲁⲫⲉ ⲙⲫⲏ ⲉⲧⲁϥⲉⲛϥ
ⲉϩⲣⲏⲓ ⲉϫⲉⲛ ⲫⲛⲟⲃⲓ ⲟⲩⲟϩ ⲉⲩⲉϧⲉⲗϧⲱⲗϥ ⲉⲑⲃⲉ ⲫⲛⲟⲃⲓ ϧⲉⲛ ⲟⲩⲙⲁ
ⲉϣⲁⲩϧⲟⲗϧⲉⲗ ⲙⲡⲓϭⲗⲓⲗ ⲙⲙⲟϥ
̅ⲇ:̅ⲗⲇ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲱⲗⲓ ⲉⲃⲟⲗ ϧⲉⲛ ⲡⲓⲥⲛⲟϥ ⲛⲧⲉ ⲫⲏ ⲉⲑⲃⲉ
ⲫⲛⲟⲃⲓ ⲙⲡⲉϥⲧⲏⲃ ⲟⲩⲟϩ ⲉϥⲉⲧⲁⲗⲟ ⲉϫⲉⲛ ⲛⲓⲧⲁⲡ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ
ⲛⲧⲉ ⲛⲓϭⲗⲓⲗ ⲟⲩⲟϩ ⲡⲉϥⲥⲛⲟϥ ⲧⲏⲣϥ ⲉϥⲉϫⲟϣϥ ϧⲁⲧⲉⲛ ϯⲃⲁⲥⲓⲥ ⲛⲧⲉ
ⲡⲓⲙⲁⲛⲉⲣϣⲱⲟⲩϣⲓ
̅ⲇ:̅ⲗⲉ ⲟⲩⲟϩ ⲡⲉϥⲱⲧ ⲧⲏⲣϥ ⲉϥⲉⲟⲗϥ ⲙⲫⲣⲏϯ ⲉⲧⲉ ϣⲁⲩⲱⲗⲓ ⲛⲟⲩⲱⲧ ⲉⲃⲟⲗ
ϧⲉⲛ ⲟⲩⲉⲥⲱⲟⲩ ⲛⲧⲉ ⲟⲩϣⲟⲩϣⲱⲟⲩϣⲓ ⲛⲛⲟϩⲉⲙ ⲟⲩⲟϩ ⲉⲣⲉ ⲡⲓⲟⲩⲏⲃ
ⲉϥⲉⲧⲁⲗⲟ ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉϫⲉⲛ ⲛⲓϭⲗⲓⲗ ⲛⲧⲉ ⲡϭⲟⲓⲥ
ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ ⲉϫⲱϥ ⲛϫⲉ ⲡⲓⲟⲩⲏⲃ ⲉⲑⲃⲉ ⲡⲓⲛⲟⲃⲓ ⲉⲧⲁϥⲉⲣⲛⲟⲃⲓ
ⲙⲙⲟϥ ⲟⲩⲟϩ ⲉⲩⲉⲭⲱ ⲛⲁϥ ⲉⲃⲟⲗ
̅ⲉ:̅ⲁ ⲉϣⲱⲡ ⲛⲧⲉ ⲟⲩⲯⲩⲭⲏ ⲉⲣⲛⲟⲃⲓ ⲟⲩⲟϩ ⲛⲧⲉⲥⲥⲱⲧⲉⲙ ⲉⲧⲥⲙⲏ ⲛⲟⲩⲁⲛⲁϣ
ⲟⲩⲟϩ ⲫⲁⲓ ⲟⲩⲙⲉⲑⲣⲉ ⲡⲉ ⲓⲉ ⲁϥⲛⲁⲩ ⲓⲉ ⲁϥⲉⲙⲓ ⲉⲡⲓϩⲱⲃ ⲁϥϣⲧⲉⲙϫⲟⲥ
ⲉϥⲉϭⲓ ⲙⲡⲓⲛⲟⲃⲓ
̅ⲉ:̅ⲃ ⲟⲩⲟϩ ϯⲯⲩⲭⲏ ⲉⲧⲛⲁϭⲓ ⲛⲉⲙ ϩⲱⲃ ⲛⲓⲃⲉⲛ ⲉⲧϭⲁϧⲉⲙ ⲓⲉ ⲉⲑⲙⲱⲟⲩⲧ
ⲓⲉ ⲫⲏ ⲉⲧⲁ ⲛⲓⲑⲏⲣⲓⲟⲛ ⲟⲩⲱⲙ ⲉⲃⲟⲗ ⲙⲙⲟϥ ⲉⲧϭⲁϧⲉⲙ ⲛⲧⲉϥⲟⲩⲉⲙ ⲁϥ
ⲉⲧⲙⲱⲟⲩⲧ ⲉⲧⲟⲣⲉⲃ ⲉⲧϭⲁϧⲉⲙ
̅ⲉ:̅ⲅ ⲓⲉ ⲛⲧⲉϥϭⲓ ⲉⲃⲟⲗ ϧⲉⲛ ⲡϭⲱϧⲉⲙ ⲛⲧⲉ ⲟⲩⲣⲱⲙⲓ ⲉⲃⲟⲗ ϧⲉⲛ ϭⲱϧⲉⲙ
ⲛⲓⲃⲉⲛ ⲛⲧⲁϥ ⲟⲩⲟϩ ⲛⲧⲉϥϭⲓ ⲛⲉⲙⲱⲟⲩ ⲟⲩⲟϩ ⲛⲧⲉϥⲥⲱϥ ⲙⲡⲉϥⲉⲙⲓ ⲟⲩⲟϩ
ⲙⲉⲛⲉⲛⲥⲁ ⲛⲁⲓ ⲛⲧⲉϥⲉⲙⲓ ⲟⲩⲟϩ ⲛⲧⲉϥϣⲱⲃⲧ
̅ⲉ:̅ⲇ ⲓⲉ ⲟⲩⲯⲩⲭⲏ ⲑⲏ ⲉⲧⲛⲁⲱⲣⲕ ⲉⲥⲫⲟⲣϫ ϧⲉⲛ ⲛⲉⲥⲥⲫⲟⲧⲟⲩ ⲉⲓⲣⲓ
ⲛⲟⲩⲡⲉⲧϩⲱⲟⲩ ⲓⲉ ⲟⲩⲡⲉⲑⲛⲁⲛⲉϥ ⲕⲁⲧⲁ ϩⲱⲃ ⲛⲓⲃⲉⲛ ⲉⲧⲉ ⲡⲓⲣⲱⲙⲓ
ⲛⲁⲫⲟⲣϫⲟⲩ ⲛⲉⲙ ⲟⲩⲁⲛⲁϣ ⲟⲩⲟϩ ⲛⲧⲉϥⲱⲃϣ ⲉⲣⲱⲟⲩ ⲟⲩⲟϩ ⲫⲁⲓ ⲛⲧⲉϥⲉⲙⲓ
ⲟⲩⲟϩ ⲛⲧⲉϥⲉⲣⲛⲟⲃⲓ ⲛⲟⲩⲁⲓ ⲛϩⲗⲓ ⲛⲛⲁⲓ
̅ⲉ:̅ⲉ ⲟⲩⲟϩ ⲉϥⲉⲟⲩⲱⲛϩ ⲙⲡⲓⲛⲟⲃⲓ ⲉⲑⲃⲉ ⲫⲏ ⲉⲧⲁϥⲉⲣⲛⲟⲃⲓ ⲛϧⲏⲧϥ
̅ⲉ:̣̅ⲋ ⲟⲩⲟϩ ⲉϥⲉⲓⲛⲓ ⲉϩⲣⲏⲓ ⲙⲡϭⲟⲓⲥ ⲉϫⲉⲛ ⲡⲉϥϣⲱⲃⲧ ⲉϫⲉⲛ ⲡⲓⲛⲟⲃⲓ
ⲉⲧⲁϥⲉⲣⲛⲟⲃⲓ ⲙⲙⲟϥ ⲟⲩϩⲓⲉⲃⲓ ⲛⲥϩⲓⲙⲓ ⲉⲃⲟⲗ ϧⲉⲛ ⲛⲓⲉⲥⲱⲟⲩ ⲓⲉ ⲟⲩⲃⲁⲉⲙⲡⲓ
ⲛⲥϩⲓⲙⲓ ⲉⲃⲟⲗ ϧⲉⲛ ϩⲁⲛⲃⲁⲉⲙⲡⲓ ⲉϩⲣⲏⲓ ⲉϫⲉⲛ ⲫⲛⲟⲃⲓ ⲟⲩⲟϩ ⲉϥⲉⲧⲱⲃϩ
ⲉϩⲣⲏⲓ ⲉϫⲱϥ ⲛϫⲉ ⲡⲓⲟⲩⲏⲃ ⲉⲑⲃⲉ ⲡⲓⲛⲟⲃⲓ ⲟⲩⲟϩ ⲉⲩⲉⲭⲱ ⲙⲡⲓⲛⲟⲃⲓ ⲛⲁϥ
ⲉⲃⲟⲗ
̅ⲉ:̅ⲍ ⲉϣⲱⲡ ⲧⲉϥϫⲓϫ ϫⲉⲙϫⲟⲙ ⲁⲛ ⲉⲓⲣⲓ ⲙⲡⲓⲕⲁⲛⲱⲛ ⲉⲟⲩⲉⲥⲱⲟⲩ ⲉϥⲉⲓⲛⲓ
ⲉϩⲣⲏⲓ ⲉϫⲉⲛ ⲡⲉϥⲛⲟⲃⲓ ⲉⲧⲁϥⲉⲣⲛⲟⲃⲓ ⲙⲙⲟϥ ϭⲣⲟⲙⲡϣⲁⲗ ⲃ ⲓⲉ ⲙⲁⲥ ⲃ
ⲛϭⲣⲟⲙⲡⲓ ⲙⲡϭⲟⲓⲥ ⲟⲩⲁⲓ ⲉϩⲣⲏⲓ ⲉϫⲉⲛ ⲫⲛⲟⲃⲓ ⲛⲉⲙ ⲟⲩⲁⲓ ⲉⲩϭⲗⲓⲗ
̅ⲉ:̅ⲏ ⲟⲩⲟϩ ⲉϥⲉⲉⲛⲟⲩ ϩⲁ ⲡⲓⲟⲩⲏⲃ ⲟⲩⲟϩ ⲉϥⲉⲓⲛⲓ ⲉϧⲟⲩⲛ ⲛϫⲉ ⲡⲓⲟⲩⲏⲃ
ⲛϣⲟⲣⲡ ⲙⲫⲏ ⲉⲧϩⲓϫⲉⲛ ⲫⲛⲟⲃⲓ ⲟⲩⲟϩ ⲡⲓⲟⲩⲏⲃ ⲉϥⲉϭⲱⲣⲡ ⲛⲧⲉⲥⲁⲫⲉ ⲉⲃⲟⲗ
ϩⲁ ⲛⲉⲥⲙⲟϯ ⲟⲩⲟϩ ⲛⲛⲉϥⲫⲁϣⲥ
̅ⲉ:̅ⲑ ⲟⲩⲟϩ ⲉϥⲉⲛⲟⲩϫϧ ⲉⲃⲟⲗ ⲙⲡⲓⲥⲛⲟϥ ⲛⲧⲉ ⲫⲏ ⲉⲧϩⲓϫⲉⲛ ⲫⲛⲟⲃⲓ ⲉϫⲉⲛ
ϯϫⲟⲓ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ ⲟⲩϣⲓ ⲡⲥⲉⲡⲓ ⲇⲉ ⲙⲡⲓⲥⲛⲟϥ ⲉϥⲉϫⲉⲗϫⲱⲗϥ
ⲉϩⲣⲏⲓ ⲉϫⲉⲛ ϯⲃⲁⲥⲓⲥ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ ϫⲉ ⲟⲩⲏⲓ ⲅⲁⲣ ⲫⲁ ⲫⲛⲟⲃⲓ
ⲡⲉ
̅ⲉ:̅ⲓ ⲟⲩⲟϩ ⲡⲓⲙⲁϩⲃ ⲉϥⲉⲁⲓϥ ⲛⲟⲩϭⲗⲓⲗ ⲙⲫⲣⲏϯ ⲉⲧⲥⲉⲙⲡϣⲁ ⲟⲩⲟϩ
ⲉϥⲉⲧⲱⲃϩ ⲉϩⲣⲏⲓ ⲉϫⲱϥ ⲛϫⲉ ⲡⲓⲟⲩⲏⲃ ⲉⲑⲃⲉ ⲡⲓⲛⲟⲃⲓ ⲉⲧⲁϥⲁⲓϥ ⲟⲩⲟϩ
ⲉⲩⲉⲭⲱ ⲛⲁϥ ⲉⲃⲟⲗ
̅ⲉ:̅ⲓⲁ ⲉϣⲱⲡ ⲧⲉϥϫⲓϫ ϫⲓⲙⲓ ⲁⲛ ⲙⲡⲓⲏⲓ ⲛϭⲣⲟⲙⲡϣⲁⲗ ⲓⲉ ⲡⲓⲙⲁⲥ ⲃ
ⲛϭⲣⲟⲙⲡⲓ ⲉϥⲉⲓⲛⲓ ⲙⲡⲉϥⲇⲱⲣⲟⲛ ⲉϧⲟⲩⲛ ⲉⲑⲃⲉ ⲫⲏ ⲉⲧⲁϥⲉⲣⲛⲟⲃⲓ ⲙⲙⲟϥ
ⲫⲣⲉⲙⲏⲧ ⲛⲟⲩⲱⲓⲛⲓ ⲛⲥⲉⲙⲉⲧⲁⲗⲓⲟⲛ ⲉϩⲣⲏⲓ ⲉϫⲉⲛ ⲫⲛⲟⲃⲓ ⲛⲛⲉϥϫⲉϣ ⲛⲉϩ
ⲉϩⲣⲏⲓ ⲉϫⲱϥ ⲟⲩⲇⲉ ⲛⲛⲉϥⲧⲁⲗⲉ ⲗⲓⲃⲁⲛⲟⲥ ⲉϩⲣⲏⲓ ⲉϫⲱϥ ϫⲉ ⲟⲩⲓⲛⲓ ⲡⲉ
ⲉϩⲣⲏⲓ ⲉϫⲉⲛ ⲫⲛⲟⲃⲓ
̅ⲉ:̅ⲓⲃ ⲟⲩⲟϩ ⲉϥⲉⲉⲛϥ ϧⲁⲧⲉⲛ ⲡⲓⲟⲩⲏⲃ ⲉϥⲉⲙⲟϩ ⲛⲧⲉϥϧⲟⲣⲡⲥ ⲉⲥⲙⲉϩ ⲉⲃⲟⲗ
ⲛϧⲏⲧϥ ⲉⲡⲉϥⲙⲉⲩⲓ ⲉϥⲉⲧⲁⲗⲟϥ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉϫⲉⲛ ⲛⲓϭⲗⲓⲗ
ⲙⲡϭⲟⲓⲥ ⲫⲁ ⲫⲛⲟⲃⲓ ⲡⲉ
̅ⲉ:̅ⲓⲅ ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ ⲉϫⲱϥ ⲛϫⲉ ⲡⲓⲟⲩⲏⲃ ⲉⲑⲃⲉ ⲡⲉϥⲛⲟⲃⲓ
ⲉⲧⲁϥⲉⲣⲛⲟⲃⲓ ⲙⲙⲟϥ ⲉⲃⲟⲗ ϧⲉⲛ ⲟⲩⲁⲓ ⲛⲛⲁⲓ ⲟⲩⲟϩ ⲉⲩⲉⲭⲁϥ ⲛⲁϥ ⲉⲃⲟⲗ ⲫⲏ
ⲇⲉ ⲉⲧⲁϥⲥⲱϫⲡ ⲉϥⲉϣⲱⲡⲓ ⲙⲡⲓⲟⲩⲏⲃ ⲙⲫⲣⲏϯ ⲛⲟⲩϣⲟⲩϣⲱⲟⲩϣⲓ
ⲛⲥⲉⲙⲓⲇⲁⲗⲓⲟⲛ
̅ⲉ:̅ⲓⲇ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟϥ
̅ⲉ:̅ⲓⲉ ϫⲉ ϯⲯⲩⲭⲏ ⲑⲏ ⲉⲧⲛⲁⲱⲃϣ ϧⲉⲛ ⲟⲩⲉⲃϣⲓ ⲟⲩⲟϩ ⲛⲧⲉϥⲉⲣⲛⲟⲃⲓ ϧⲉⲛ
ⲟⲩⲙⲉⲧⲁⲧⲉⲙⲓ ⲉⲃⲟⲗ ϩⲁ ⲛⲏ ⲉⲑⲟⲩⲁⲃ ⲛⲧⲉ ⲡϭⲟⲓⲥ ⲟⲩⲟϩ ⲉϥⲉⲓⲛⲓ ⲉϩⲣⲏⲓ
ⲉϫⲉⲛ ⲡⲉϥϣⲱⲃⲧ ⲙⲡϭⲟⲓⲥ ⲟⲩⲱⲓⲗⲓ ⲉϥⲟⲓ ⲛⲁⲧⲁϭⲛⲓ ⲉⲃⲟⲗ ϧⲉⲛ ⲛⲓⲉⲥⲱⲟⲩ
ϧⲁ ⲧⲧⲓⲙⲏ ⲛⲟⲩϩⲁⲧ ⲛⲧⲁ ϩⲁⲛⲥⲓⲕⲗⲟⲥ ⲉⲃⲟⲗ ⲡⲓⲥⲓⲕⲗⲟⲥ ⲛⲛⲓⲉⲑⲟⲩⲁⲃ
ⲉϩⲣⲏⲓ ⲉϫⲉⲛ ⲫⲏ ⲉⲧⲁϥϣⲱϥⲧ
̅ⲉ:̅ⲓⲋ ⲛⲉⲙ ⲫⲏ ⲉⲧⲁϥⲉⲣⲛⲟⲃⲓ ⲙⲙⲟϥ ⲉⲃⲟⲗ ϩⲁ ⲛⲉⲑⲟⲩⲁⲃ ⲉϥⲉⲧⲏⲓϥ ⲟⲩⲟϩ
ⲉϥⲉⲧⲟⲩϩⲟ ⲉϩⲣⲏⲓ ⲉϫⲱϥ ⲙⲡⲓⲣⲉⲉ ⲟⲩⲟϩ ⲉϥⲉⲧⲏⲓϥ ⲙⲡⲓⲟⲩⲏⲃ ⲟⲩⲟϩ
ⲉϥⲉⲧⲱⲃϩ ⲉϩⲣⲏⲓ ⲉϫⲱϥ ⲛϫⲉ ⲡⲓⲟⲩⲏⲃ ⲛϧⲣⲏⲓ ϧⲉⲛ ⲡⲓⲱⲓⲗⲓ ⲛⲧⲉ ⲡⲓϣⲱϥⲧ
ⲟⲩⲟϩ ⲉⲩⲉⲭⲱ ⲛⲁϥ ⲉⲃⲟⲗ
̅ⲉ:̅ⲓⲍ ⲟⲩⲟϩ ⲟⲩⲯⲩⲭⲏ ⲑⲏ ⲉⲧⲛⲁⲉⲣⲛⲟⲃⲓ ⲟⲩⲟϩ ⲛⲧⲉⲥⲓⲣⲓ ⲛⲟⲩⲓ ⲛⲛⲓⲉⲛⲧⲟⲗⲏ
ⲧⲏⲣⲟⲩ ⲛⲧⲉ ⲡϭⲟⲓⲥ ⲉⲧⲉ ⲥϣⲉ ⲛⲁⲓⲧⲟⲩ ⲁⲛ ⲟⲩⲟϩ ⲛⲧⲉϥϣⲃⲧ ⲟⲩⲟϩ
ⲛⲧⲉϥϭⲓ ⲙⲡⲉϥⲛⲟⲃⲓ
̅ⲉ:̅ⲓⲏ ⲟⲩⲟϩ ⲉϥⲉⲓⲛⲓ ⲉϧⲟⲩⲛ ⲛⲟⲩⲱⲓⲗⲓ ⲉϥⲟⲓ ⲛⲁⲧⲁϭⲛⲓ ⲉⲃⲟⲗ ϧⲉⲛ ⲛⲓⲉⲥⲱⲟⲩ
ϧⲁ ⲧⲧⲓⲙⲏ ⲛⲟⲩϩⲁⲧ ⲉϫⲉⲛ ⲟⲩϣⲱϥⲧ ϧⲁ ⲡⲓⲟⲩⲏⲃ ⲟⲩⲟϩ ⲉϥⲉⲧⲱⲃϩ
ⲉϩⲣⲏⲓ ⲉϫⲱϥ ⲛϫⲉ ⲡⲓⲟⲩⲏⲃ ⲉⲑⲃⲉ ⲧⲉϥⲙⲉⲧⲁⲧⲉⲙⲓ ⲉⲧⲁϥⲉⲣⲁⲧⲉⲙⲓ ⲙⲙⲟⲥ
ⲟⲩⲟϩ ⲛⲑⲟϥ ⲉⲛⲁϥⲉⲙⲓ ⲁⲛ ⲟⲩⲟϩ ⲉⲩⲉⲭⲱ ⲛⲁϥ ⲉⲃⲟⲗ
̅ⲉ:̅ⲓⲑ ⲁϥϣⲱϥⲧ ⲅⲁⲣ ϧⲉⲛ ⲟⲩϣⲱϥⲧ ⲙⲡⲉⲙⲑⲟ ⲙⲡϭⲟⲓⲥ
̅ⲉ:̅ⲕ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲉ:̅ⲕⲁ ϫⲉ ⲟⲩⲯⲩⲭⲏ ⲁⲥϣⲁⲛⲉⲣⲛⲟⲃⲓ ⲟⲩⲟϩ ϧⲉⲛ ⲟⲩⲭⲱ ⲛⲧⲉϥⲭⲱ ⲛⲥⲱϥ
ⲛⲛⲓⲉⲛⲧⲟⲗⲏ ⲛⲧⲉ ⲡϭⲟⲓⲥ ⲟⲩⲟϩ ⲛⲧⲉϥϫⲉⲙⲉⲑⲛⲟⲩϫ ϧⲉⲛ ⲛⲏ ⲉⲧⲟⲩⲧⲱϥ
ⲛⲉⲙ ⲡⲉϥϣⲫⲏⲣ ϧⲉⲛ ⲟⲩⲡⲁⲣⲁⲑⲏⲕⲏ ⲓⲉ ⲉⲑⲃⲉ ⲟⲩⲙⲉⲧϣⲫⲏⲣ ⲓⲉ ⲉⲑⲃⲉ
ⲟⲩϩⲱⲗⲉⲙ ⲓⲉ ⲁϥϭⲓ ⲙⲡⲉϥϣⲫⲏⲣ ⲛϫⲟⲛⲥ
̅ⲉ:̅ⲕⲃ ⲓⲉ ⲛⲧⲉϥϫⲓⲙⲓ ⲛⲟⲩⲁⲅⲱ ⲉⲥⲥⲟⲣⲉⲙ ⲟⲩⲟϩ ⲛⲧⲉϥϫⲉⲙⲉⲑⲛⲟⲩϫ ⲉⲑⲃⲏⲧⲥ
ⲟⲩⲟϩ ⲛⲧⲉϥⲉⲣ ⲟⲩⲁⲛⲁϣ ϧⲉⲛ ⲟⲩϭⲓ ⲛϫⲟⲛⲥ ⲉⲑⲃⲉ ⲟⲩⲁⲓ ⲉⲃⲟⲗ ϧⲉⲛ ϩⲱⲃ
ⲛⲓⲃⲉⲛ ⲛⲧⲉ ⲛⲏ ⲉϣⲁϥⲁⲓⲧⲟⲩ ⲛϫⲉ ⲟⲩⲣⲱⲙⲓ ϩⲱⲥ ⲉⲉⲣⲛⲟⲃⲓ ϧⲉⲛ ⲛⲁⲓ
̅ⲉ:̅ⲕⲅ ⲟⲩⲟϩ ⲉⲥⲉϣⲱⲡⲓ ⲁϥϣⲁⲛⲉⲣⲛⲟⲃⲓ ⲟⲩⲟϩ ⲛⲧⲉϥϣⲱϥⲧ ⲟⲩⲟϩ ⲉϥⲉϯ
ⲙⲡⲓϩⲱⲗⲉⲙ ⲉⲧⲁϥϩⲟⲗⲙⲉϥ ⲓⲉ ⲡⲓϭⲓ ⲛϫⲟⲛⲥ ⲉⲧⲁϥϭⲓ ⲛϫⲟⲛⲥ ⲙⲙⲟϥ ⲓⲉ
ϯⲡⲁⲣⲁⲑⲏⲕⲏ ⲉⲧⲁⲩϫⲁⲗⲱⲥ ⲉⲣⲟϥ ⲓⲉ ϯⲁⲅⲱ ⲉⲧⲁϥϫⲉⲙⲥ
̅ⲉ:̅ⲕⲇ ⲛⲉⲙ ⲉⲃⲟⲗ ϧⲉⲛ ϩⲱⲃ ⲛⲓⲃⲉⲛ ⲉⲧⲁϥⲱⲣⲕ ⲉⲑⲃⲏⲧⲟⲩ ϧⲉⲛ ⲟⲩϭⲓ ⲛϫⲟⲛⲥ
ⲟⲩⲟϩ ⲉϥⲉⲧⲏⲓϥ ⲙⲡⲓⲕⲉⲫⲁⲗⲉⲟⲛ ⲛⲉⲙ ⲡⲉϥⲣⲉⲉ ⲉϥⲉⲟⲩⲁϩϥ ⲉϫⲱϥ ⲫⲏ ⲉⲧⲉ
ⲫⲱϥ ⲡⲉ ⲉϥⲉⲧⲏⲓϥ ⲛⲁϥ ϧⲉⲛ ⲡⲓⲉϩⲟⲟⲩ ⲉⲧⲟⲩⲛⲁⲥⲟϩⲓ ⲙⲙⲟϥ
̅ⲉ:̅ⲕⲉ ⲟⲩⲟϩ ⲉϥⲉⲓⲛⲓ ⲉϧⲟⲩⲛ ⲉϫⲉⲛ ⲡⲉϥϣⲱⲃⲧ ⲙⲡϭⲟⲓⲥ ⲛⲟⲩⲱⲓⲗⲓ ⲛⲁⲧⲁϭⲛⲓ
ⲉⲛⲁϣⲉⲛ ⲥⲟⲩⲉⲛϥ ⲉϫⲉⲛ ⲫⲏ ⲉⲧⲁϥϣⲱϥⲧ ⲛϧⲏⲧϥ
̅ⲉ:̅ⲕⲋ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲧⲱⲃϩ ⲉϩⲣⲏⲓ ⲉϫⲱϥ ⲙⲡⲉⲙⲑⲟ ⲙⲡϭⲟⲓⲥ ⲟⲩⲟϩ
ⲉⲩⲉⲭⲱ ⲛⲁϥ ⲉⲃⲟⲗ ⲉⲑⲃⲉ ⲫⲟⲩⲁⲓ ⲫⲟⲩⲁⲓ ⲛⲛⲏ ⲉⲧⲁϥⲁⲓⲧⲟⲩ
̣̅ⲋ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ ⲛⲁϥ
̣̅ⲋ:̅ⲃ ϫⲉ ϩⲟⲛϩⲉⲛ ⲉⲧⲟⲧϥ ⲛⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲉⲕϫⲱ ⲙⲙⲟⲥ ϫⲉ ⲫⲁⲓ
ⲡⲉ ⲫⲛⲟⲙⲟⲥ ⲛⲧⲉ ⲛⲓϭⲗⲓⲗ ⲫⲁⲓ ⲡⲉ ⲡⲓϭⲗⲓⲗ ⲉϫⲉⲛ ⲧⲉϥⲙⲟϩ ⲉϫⲉⲛ
ⲡⲓⲙⲁⲛⲉⲣϣⲱⲟⲩϣⲓ ⲙⲡⲓⲉϫⲱⲣϩ ⲧⲏⲣϥ ϣⲁ ⲡⲓⲛⲁⲩ ⲛⲧⲉ ϩⲁⲛⲁⲧⲟⲟⲩⲓ ⲟⲩⲟϩ
ⲡⲓⲭⲣⲱⲙ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ ⲉϥⲉⲙⲟϩ ⲉϩⲣⲏⲓ ⲉϫⲱϥ
̣̅ⲋ:̅ⲅ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉϯϩⲓⲱⲧϥ ⲛⲟⲩϩⲱⲃⲥ ⲛⲓⲁⲩ ⲛⲉⲙ ⲕⲉϩⲃⲟⲥ ⲛⲓⲁⲩ
ⲉϥⲛⲏⲟⲩ ⲉϧⲣⲏⲓ ϣⲁ ⲛⲉϥⲕⲁⲗ ⲉϥⲉⲧⲏⲓϥ ϩⲓⲱⲧϥ ⲉϥⲕⲱϯ ⲉⲡⲉϥⲥⲱⲙⲁ ⲟⲩⲟϩ
ⲉϥⲉⲱⲗⲓ ⲙⲡⲓϭⲗⲓⲗ ⲫⲏ ⲉⲧⲉ ⲡⲓⲭⲣⲱⲙ ⲛⲁⲟⲩⲟⲙϥ ⲡⲓϭⲗⲓⲗ ⲉⲃⲟⲗ ϧⲉⲛ
ⲡⲓⲙⲁⲛⲉⲣϣⲱⲟⲩϣⲓ ⲉϥⲉⲭⲁⲥ ϧⲁⲧⲉⲛ ⲡⲓⲙⲁⲛⲉⲣϣⲱⲟⲩϣⲓ
̣̅ⲋ:̅ⲇ ⲟⲩⲟϩ ⲉϥⲉⲃⲁϣϥ ⲛⲧⲉϥⲥⲧⲟⲗⲏ ⲟⲩⲟϩ ⲉϥⲉϯ ϩⲓⲱⲧϥ ⲛⲕⲉⲥⲧⲟⲗⲏ ⲟⲩⲟϩ
ⲉϥⲉⲱⲗⲓ ⲉⲃⲟⲗ ⲙⲡⲓϭⲗⲓⲗ ⲫⲏ ⲉⲧⲉ ⲡⲓⲭⲣⲱⲙ ⲛⲁⲟⲩⲟⲙϥ ⲥⲁⲃⲟⲗ
ⲛϯⲡⲁⲣⲉⲙⲃⲟⲗⲏ ϧⲉⲛ ⲟⲩⲙⲁ ⲉϥⲧⲟⲩⲃⲏⲟⲩⲧ
̣̅ⲋ:̅ⲉ ⲟⲩⲟϩ ⲉϥⲉⲙⲟϩ ⲛϫⲉ ⲟⲩⲭⲣⲱⲙ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉⲃⲟⲗ ⲙⲙⲟϥ
ⲟⲩⲟϩ ⲛⲛⲉϥϭⲉⲛⲟ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲥⲁϩϯ ⲉϩⲣⲏⲓ ⲉϫⲱϥ ⲛϩⲁⲛⲣⲟⲕϩ
ⲛϩⲁⲛⲁⲧⲟⲟⲩⲓ ϩⲁⲛⲁⲧⲟⲟⲩⲓ ⲉϥⲉⲧⲁⲗⲟ ⲙⲡⲓϭⲗⲓⲗ ⲉϩⲣⲏⲓ ⲉϫⲱϥ ⲟⲩⲟϩ
ⲉϥⲉⲧⲁⲗⲟ ⲉϩⲣⲏⲓ ⲉϫⲱϥ ⲙⲡⲓⲱⲧ ⲛⲧⲉ ⲡⲓⲟⲩϫⲁⲓ
̣̅ⲋ:̣̅ⲋ ⲟⲩⲟϩ ⲟⲩⲭⲣⲱⲙ ⲉϥⲉⲙⲟϩ ⲉϥⲙⲏⲛ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ
ⲛⲛⲉϥϭⲉⲛⲟ
̣̅ⲋ:̅ⲍ ⲫⲁⲓ ⲡⲉ ⲫⲛⲟⲙⲟⲥ ⲛⲧⲉ ⲡⲓϣⲟⲩϣⲱⲟⲩϣⲓ ⲫⲏ ⲉⲧⲟⲩⲛⲁⲉⲛϥ ⲉϧⲟⲩⲛ ⲛϫⲉ
ⲛⲉⲛϣⲏⲣⲓ ⲛⲁⲁⲣⲱⲛ ⲛⲓⲟⲩⲏⲃ ⲙⲡⲉⲙⲑⲟ ⲙⲡⲓⲙⲁⲛⲉⲣϣⲱⲟⲩϣⲓ
̣̅ⲋ:̅ⲏ ⲟⲩⲟϩ ⲉϥⲉⲱⲗⲓ ⲉⲃⲟⲗ ϧⲉⲛ ⲧⲉϥϧⲟⲣⲡⲥ ⲉⲃⲟⲗ ϧⲉⲛ ⲡⲓⲥⲉⲙⲉⲇⲁⲗⲓⲟⲛ ⲛⲧⲉ
ⲡⲓϣⲟⲩϣⲱⲟⲩϣⲓ ⲛⲉⲙ ⲡⲉϥⲛⲉϩ ⲛⲉⲙ ⲡⲉϥⲗⲓⲃⲁⲛⲟⲥ ⲧⲏⲣϥ ⲫⲏ ⲉⲧϣⲟⲡ ⲉϫⲉⲛ
ⲡⲓϣⲟⲩϣⲱⲟⲩϣⲓ ⲟⲩⲟϩ ⲉϥⲉⲉⲛⲟⲩ ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ
ⲟⲩⲟⲩⲧⲁϩ ⲉϥϣⲏⲡ ⲟⲩⲥⲑⲟⲓ ⲛⲥⲑⲩⲛⲟⲩϥⲓ ⲛⲧⲉ ⲡⲉϥⲙⲉⲩⲓ ⲡⲉ ⲙⲡϭⲟⲓⲥ
̣̅ⲋ:̅ⲑ ⲫⲏ ⲉⲧⲁϥⲥⲱϫⲡ ⲉⲃⲟⲗ ⲙⲙⲟϥ ⲉϥⲉⲟⲩⲟⲙϥ ⲛϫⲉ ⲁⲁⲣⲱⲛ ⲛⲉⲙ ⲛⲉϥϣⲏⲣⲓ
ⲉⲩⲉⲟⲩⲟⲙϥ ⲛⲁⲧⲕⲱⲃ ϧⲉⲛ ⲟⲩⲙⲁ ⲉϥⲟⲩⲁⲃ ⲉϧⲟⲩⲛ ϧⲉⲛ ⲟⲩⲁⲩⲗⲏ ⲛⲧⲉ
ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲉⲩⲉⲟⲩⲟⲙϥ
̣̅ⲋ:̅ⲓ ⲛⲛⲟⲩϫⲟϥϫⲉϥ ⲉⲁϥϭⲓϣⲉⲙⲏⲣ ⲁⲓⲧⲏⲓϥ ⲛⲟⲩⲧⲟⲓ ⲉⲃⲟⲗ ϧⲉⲛ ⲛⲓⲟⲩⲧⲁϩ
ⲉⲧϣⲏⲡ ⲙⲡϭⲟⲓⲥ ⲛⲉⲑⲟⲩⲁⲃ ⲛⲧⲉ ⲛⲉⲑⲟⲩⲁⲃ ⲛⲉ ⲛⲉⲙ ⲙⲫⲣⲏϯ ⲙⲫⲁ ⲡⲓⲛⲟⲃⲓ
ⲛⲉⲙ ⲙⲫⲣⲏϯ ⲙⲫⲁ ⲡⲓϣⲱϥⲧ
̣̅ⲋ:̅ⲓⲁ ϩⲱⲟⲩⲧ ⲛⲓⲃⲉⲛ ⲛⲧⲉ ⲛⲓⲟⲩⲏⲃ ⲉⲩⲉⲟⲩⲟⲙϥ ⲟⲩⲛⲟⲙⲓⲙⲟⲛ ϣⲁ ⲉⲛⲉϩ
ⲉⲛⲉⲧⲉⲛϫⲱⲟⲩ ⲉⲃⲟⲗ ϧⲉⲛ ⲛⲓⲟⲩⲧⲁϩ ⲉⲧϣⲏⲡ ⲛⲧⲉ ⲡϭⲟⲓⲥ ⲫⲏ ⲛⲓⲃⲉⲛ
ⲉⲧⲛⲁϭⲓ ⲛⲉⲙⲱⲟⲩ ⲉϥⲉⲧⲟⲩⲃⲟ
̣̅ⲋ:̅ⲓⲃ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̣̅ⲋ:̅ⲓⲅ ϫⲉ ⲫⲁⲓ ⲡⲉ ⲡⲓⲇⲱⲣⲟⲛ ⲛⲧⲉ ⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲫⲏ ⲉⲧⲟⲩⲛⲁⲉⲛϥ
ⲉϧⲟⲩⲛ ⲙⲡϭⲟⲓⲥ ⲛϩⲣⲏⲓ ϧⲉⲛ ⲡⲓⲉϩⲟⲟⲩ ⲉⲧⲉⲕⲛⲁⲑⲟϩⲥϥ ⲙⲙⲟϥ ⲟⲩⲣⲉⲙⲏⲧ
ⲛⲧⲉ ⲟⲩⲱⲓⲡⲓ ⲛⲥⲓⲙⲉⲇⲁⲗⲓⲟⲛ ⲉⲟⲩϣⲟⲩϣⲱⲟⲩϣⲓ ⲛⲥⲏⲟⲩ ⲛⲓⲃⲉⲛ ⲧⲉϥⲫⲁϣⲓ
ϧⲉⲛ ⲛⲓⲛⲁⲩ ⲛⲧⲉ ϩⲁⲛⲁⲧⲟⲟⲩⲓ ⲟⲩⲟϩ ⲧⲉϥⲕⲉⲫⲁϣⲓ ϧⲉⲛ ⲛⲓⲛⲁⲩ ⲛⲧⲉ
ϩⲁⲛⲁⲣⲟⲩϩⲓ
̣̅ⲋ:̅ⲓⲇ ⲉⲩⲉⲑⲁⲙⲓⲟϥ ϧⲉⲛ ⲟⲩⲗⲁⲕⲉⲛⲧ ϧⲉⲛ ⲟⲩⲛⲉϩ ⲉϥⲉⲉⲛϥ ⲉϧⲟⲩⲛ ⲉϥⲟⲩⲟϣⲉⲙ
ⲛⲟⲩϣⲟⲩϣⲱⲟⲩϣⲓ ⲉⲃⲟⲗ ϧⲉⲛ ϩⲁⲛⲗⲁⲕϩ ⲟⲩϣⲟⲩϣⲱⲟⲩϣⲓ ⲉⲩⲥⲑⲟⲓ
ⲛⲥⲑⲩⲛⲟⲩϥⲓ ⲙⲡϭⲟⲓⲥ
̣̅ⲋ:̅ⲓⲉ ⲡⲓⲟⲩⲏⲃ ⲉⲧⲑⲁϩⲥ ⲛⲧⲉϥϣⲉⲃⲓⲱ ⲉⲃⲟⲗ ϧⲉⲛ ⲛⲉϥϣⲏⲣⲓ ⲉϥⲉⲑⲁⲙⲓⲟϥ
ⲛⲟⲩⲛⲟⲙⲟⲥ ⲛⲉⲛⲉϩ ⲉⲩⲉϫⲟⲕϥ ⲉⲃⲟⲗ ⲧⲏⲣϥ
̣̅ⲋ:̅ⲓⲋ ⲟⲩⲟϩ ϣⲟⲩϣⲱⲟⲩϣⲓ ⲛⲓⲃⲉⲛ ⲛⲧⲉ ⲛⲓⲟⲩⲏⲃ ⲉⲩⲉⲣⲟⲕϩϥ ⲧⲏⲣϥ ⲟⲩⲟϩ
ⲛⲛⲟⲩⲟⲩⲟⲙϥ
̣̅ⲋ:̅ⲓⲍ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̣̅ⲋ:̅ⲓⲏ ϫⲉ ⲥⲁϫⲓ ⲛⲉⲙ ⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲉⲕϫⲱ ⲙⲙⲟⲥ ϫⲉ ⲫⲁⲓ ⲡⲉ
ⲫⲛⲟⲙⲟⲥ ⲉⲑⲃⲉ ⲫⲛⲟⲃⲓ ⲛϧⲣⲏⲓ ϧⲉⲛ ⲫⲙⲁ ⲉⲧⲟⲩⲛⲁϧⲟⲗϧⲉⲗ ⲙⲡⲓϭⲗⲓⲗ ⲙⲙⲟϥ
ⲉⲩⲉϧⲟⲗϧⲉⲗ ⲙⲫⲏ ⲉⲑⲃⲉ ⲫⲛⲟⲃⲓ ϩⲱϥ ⲙⲡⲉⲙⲑⲟ ⲙⲡϭⲟⲓⲥ ⲛⲏ ⲉⲑⲟⲩⲁⲃ ⲛⲧⲉ
ⲛⲏ ⲉⲑⲟⲩⲁⲃ ⲛⲉ
̣̅ⲋ:̅ⲓⲑ ⲟⲩⲟϩ ⲡⲓⲟⲩⲏⲃ ⲉⲧⲛⲁⲉⲛϥ ⲉϩⲣⲏⲓ ⲉϥⲉⲟⲩⲟⲙϥ ϧⲉⲛ ⲟⲩⲙⲁ ⲉϥⲟⲩⲁⲃ
ⲉϥⲉⲟⲩⲟⲙϥ ϧⲉⲛ ⲟⲩⲁⲩⲗⲏ ⲛⲧⲉ ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ
̣̅ⲋ:̅ⲕ ⲫⲏ ⲛⲓⲃⲉⲛ ⲉⲧⲛⲁϭⲓ ⲛⲉⲙ ⲛⲉϥⲁϥⲟⲩⲓ ⲉϥⲉⲧⲟⲩⲃⲟ ⲟⲩⲟϩ ⲫⲏ
ⲉⲧⲟⲩⲛⲁⲛⲟⲩϫϧ ⲉϩⲣⲏⲓ ⲉϫⲱϥ ⲉⲃⲟⲗ ϧⲉⲛ ⲡⲉϥⲥⲛⲟϥ ⲉϩⲣⲏⲓ ⲉϫⲉⲛ ϩⲃⲱⲥ
ⲛⲓⲃⲉⲛ ⲛⲧⲁϥ ⲉⲧⲟⲩⲛⲁⲛⲟⲩϫϧ ⲉϫⲱϥ ⲉⲩⲉⲣⲁϧϥ ϧⲉⲛ ⲟⲩⲙⲁ ⲉϥⲟⲩⲁⲃ
̣̅ⲋ:̅ⲕⲁ ⲟⲩⲟϩ ⲥⲕⲉⲩⲟⲥ ⲛⲓⲃⲉⲛ ⲙⲃⲉⲗϫ ⲉⲧⲟⲩⲛⲁⲫⲁⲥⲟⲩ ⲛϧⲏⲧϥ ⲉⲩⲉⲕⲁϣϥ
ⲉϣⲱⲡ ⲇⲉ ⲁⲩϣⲁⲛⲫⲁⲥϥ ϧⲉⲛ ⲟⲩⲥⲕⲉⲩⲟⲥ ⲛϩⲟⲙⲧ ⲉⲩⲉⲣⲁϧϥ ⲟⲩⲟϩ ⲉⲩⲉⲓⲁϥ
ⲉⲃⲟⲗ ϧⲉⲛ ⲟⲩⲙⲱⲟⲩ
̣̅ⲋ:̅ⲕⲃ ϩⲱⲟⲩⲧ ⲛⲓⲃⲉⲛ ϧⲉⲛ ⲛⲓⲟⲩⲏⲃ ⲉⲩⲉⲟⲩⲟⲙϥ ⲛⲏ ⲉⲑⲟⲩⲁⲃ ⲛⲧⲉ ⲛⲏ
ⲉⲑⲟⲩⲁⲃ ⲛⲉ ⲙⲡϭⲟⲓⲥ
̣̅ⲋ:̅ⲕⲅ ⲟⲩⲟϩ ⲛⲏ ⲧⲏⲣⲟⲩ ⲉⲧⲉ ⲉⲑⲃⲉ ⲫⲛⲟⲃⲓ ⲛⲏ ⲉⲧⲟⲩⲛⲁⲓⲛⲓ ⲉⲃⲟⲗ ϧⲉⲛ
ⲡⲟⲩⲥⲛⲟϥ ⲉϧⲟⲩⲛ ⲉϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲉⲧⲱⲃϩ ϧⲉⲛ ⲡⲉⲑⲟⲩⲁⲃ
ⲛⲛⲟⲩⲟⲩⲟⲙⲟⲩ ⲉⲩⲉⲣⲟⲕϩⲟⲩ ϧⲉⲛ ⲟⲩⲭⲣⲱⲙ
̅ⲍ:̅ⲁ ⲟⲩⲟϩ ⲫⲁⲓ ⲡⲉ ⲫⲛⲟⲙⲟⲥ ⲛⲧⲉ ϯⲙⲉⲧϣⲁϥⲧ ⲛⲏ ⲉⲑⲟⲩⲁⲃ ⲛⲧⲉ ⲛⲏ
ⲉⲑⲟⲩⲁⲃ ⲛⲉ
̅ⲍ:̅ⲃ ϧⲉⲛ ⲡⲓⲙⲁ ⲉⲧⲟⲩⲛⲁϧⲟⲗϧⲉⲗ ⲙⲡⲓϭⲗⲓⲗ ⲙⲙⲟϥ ⲉⲩⲉϧⲟⲗϧⲉⲗ ⲙⲡⲓⲕⲉⲱⲓⲗⲓ
ⲛⲧⲉ ϯⲙⲉⲧϣⲁϥⲧ ⲟⲩⲟϩ ⲡⲓⲥⲛⲟϥ ⲉϥⲉϫⲟϣϥ ⲉϫⲉⲛ ϯⲃⲁⲥⲓⲥ ⲛⲧⲉ
ⲡⲓⲙⲁⲛⲉⲣϣⲱⲟⲩϣⲓ ⲉϥⲕⲱϯ
̅ⲍ:̅ⲅ ⲛⲉⲙ ⲛⲉϥⲱⲧ ⲧⲏⲣϥ ⲉϥⲉⲉⲛϥ ⲉϧⲟⲩⲛ ⲉⲃⲟⲗ ⲛϧⲏⲧϥ ⲛⲉⲙ ϯϯⲡⲓ ⲛⲉⲙ
ⲡⲓⲱⲧ ⲧⲏⲣϥ ⲉⲧϩⲱⲃⲥ ⲛⲛⲏ ⲉⲧⲥⲁϧⲟⲩⲛ
̅ⲍ:̅ⲇ ⲛⲉⲙ ⲡⲓϭⲗⲱⲧ ⲃ ⲛⲉⲙ ⲡⲓⲱⲧ ⲉⲧϩⲓϫⲱⲟⲩ ⲫⲏ ⲉⲧⲭⲏ ϩⲓϫⲉⲛ
ⲛⲓⲁⲗⲱϫ ⲛⲉⲙ ⲡⲓⲗⲟⲃⲟⲥ ⲉⲧⲭⲏ ϩⲓϫⲉⲛ ⲡⲓϩⲩⲡⲁⲣ ⲉϥⲉⲟⲗⲟⲩ ⲛⲉⲙ ⲛⲓϭⲗⲱⲧ
ⲉⲩⲥⲟⲡ
̅ⲍ:̅ⲉ ⲟⲩⲟϩ ⲉⲣⲉ ⲛⲓⲟⲩⲏⲃ ⲉϥⲉⲉⲛⲟⲩ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲟⲩⲟⲩⲧⲁϩ
ⲉϥϣⲏⲡ ⲟⲩⲥⲑⲟⲓ ⲛⲥⲑⲩⲛⲟⲩϥⲓ ⲙⲡϭⲟⲓⲥ ⲉⲑⲃⲉ ⲟⲩⲙⲉⲧϣⲁϥⲧ ⲡⲉ
̅ⲍ:̣̅ⲋ ϩⲱⲟⲩⲧ ⲛⲓⲃⲉⲛ ⲉⲃⲟⲗ ϧⲉⲛ ⲛⲓⲟⲩⲏⲃ ⲉϥⲉⲟⲩⲟⲙⲟⲩ ϧⲉⲛ ⲟⲩⲙⲁ ⲉϥⲟⲩⲁⲃ
ⲉϥⲉⲟⲩⲟⲙⲟⲩ ⲛⲏ ⲉⲑⲟⲩⲁⲃ ⲛⲧⲉ ⲛⲏ ⲉⲑⲟⲩⲁⲃ ⲛⲉ
̅ⲍ:̅ⲍ ⲙⲫⲣⲏϯ ⲙⲫⲏ ⲉⲑⲃⲉ ⲫⲛⲟⲃⲓ ⲡⲁⲓⲣⲏϯ ⲟⲛ ⲡⲉ ⲫⲏ ⲛⲧⲉ ϯⲙⲉⲧϣⲁϥⲧ
ⲟⲩⲛⲟⲙⲟⲥ ⲛⲟⲩⲱⲧ ⲡⲉ ⲡⲓⲟⲩⲏⲃ ⲉⲧⲛⲁⲧⲱⲃϩ ⲉϫⲱⲟⲩ ϫⲉ ⲡⲓⲟⲩⲏⲃ ⲛϧⲏⲧϥ
ⲉϥⲉϣⲱⲡⲓ ⲛⲁϥ
̅ⲍ:̅ⲏ ⲟⲩⲟϩ ⲡⲓⲟⲩⲏⲃ ⲫⲏ ⲉⲧⲛⲁⲓⲛⲓ ⲉϧⲟⲩⲛ ⲛⲟⲩϭⲗⲓⲗ ⲛⲧⲉ ⲟⲩⲣⲱⲙⲓ ⲡⲓϣⲁⲣ
ⲛⲧⲉ ⲡⲓϭⲗⲓⲗ ⲫⲏ ⲉⲧⲉϥⲛⲁⲉⲛϥ ⲉϧⲟⲩⲛ ⲛⲑⲟϥ ⲉϥⲉϣⲱⲡⲓ ⲛⲁϥ
̅ⲍ:̅ⲑ ⲛⲉⲙ ϣⲟⲩϣⲱⲟⲩϣⲓ ⲛⲓⲃⲉⲛ ⲫⲏ ⲉⲧⲟⲩⲛⲁⲑⲁⲙⲓⲟϥ ϧⲉⲛ ⲟⲩⲑⲣⲓⲣ ⲛⲉⲙ ⲫⲏ
ⲛⲓⲃⲉⲛ ⲉⲧⲟⲩⲛⲁⲑⲁⲙⲓⲟϥ ϧⲉⲛ ⲉⲥⲭⲁⲣⲁ ⲛⲉⲙ ⲉϫⲉⲛ ⲟⲩⲗⲁⲕⲉⲛⲧ ⲟⲩⲟϩ
ⲡⲓⲟⲩⲏⲃ ⲉⲧⲛⲁⲉⲛϥ ⲉϧⲟⲩⲛ ⲉϥⲉϣⲱⲡⲓ ⲛⲁϥ
̅ⲍ:̅ⲓ ⲟⲩⲟϩ ϣⲟⲩϣⲱⲟⲩϣⲓ ⲛⲓⲃⲉⲛ ⲉⲧⲉ ϥⲟⲩⲟϣⲉⲙ ϧⲉⲛ ⲟⲩⲛⲉϩ ⲟⲩⲟϩ
ⲙϥⲟⲩⲟϣⲉⲙ ⲁⲛ ⲉϥⲉϣⲱⲡⲓ ⲛⲛⲓϣⲏⲣⲓ ⲧⲏⲣⲟⲩ ⲛⲧⲉ ⲁⲁⲣⲱⲛ ⲫⲟⲩⲁⲓ ⲫⲟⲩⲁⲓ
ϧⲉⲛ ⲟⲩⲙⲉⲧϩⲩⲥⲟⲥ
̅ⲍ:̅ⲓⲁ ⲫⲁⲓ ⲡⲉ ⲫⲛⲟⲙⲟⲥ ⲛⲧⲉ ⲟⲩϣⲟⲩϣⲱⲟⲩϣⲓ ⲛⲛⲟϩⲉⲙ ⲉⲧⲟⲩⲛⲁⲉⲛϥ ⲉϧⲟⲩⲛ
ⲉⲡϭⲟⲓⲥ
̅ⲍ:̅ⲓⲃ ⲉϣⲱⲡ ⲇⲉ ⲉϥⲛⲁⲉⲛϥ ⲉϧⲟⲩⲛ ⲉⲑⲃⲉ ⲟⲩⲥⲙⲟⲩ ⲉϥⲉⲓⲛⲓ ⲉϫⲉⲛ
ⲡⲓϣⲟⲩϣⲱⲟⲩϣⲓ ⲛⲥⲙⲟⲩ ⲛϩⲁⲛⲱⲓⲕ ⲉⲃⲟⲗ ϧⲉⲛ ⲥⲉⲙⲓⲇⲁⲗⲓⲟⲛ ⲉⲩⲟⲩⲟϣⲉⲙ
ϧⲉⲛ ⲟⲩⲛⲉϩ ⲛⲉⲙ ϩⲁⲛⲗⲁⲕϩ ⲛⲁⲧⲕⲱⲃ ⲉⲁⲩⲑⲁϩⲥⲟⲩ ϧⲉⲛ ⲟⲩⲛⲉϩ ⲛⲉⲙ
ⲟⲩⲥⲉⲙⲓⲇⲁⲗⲓⲟⲛ ⲉϥⲟⲩⲟϣⲉⲙ ϧⲉⲛ ⲟⲩⲛⲉϩ
̅ⲍ:̅ⲓⲅ ⲉϫⲉⲛ ϩⲁⲛⲱⲓⲕ ⲛϣⲉⲙⲏⲣ ⲉϥⲉⲓⲛⲓ ⲛⲛⲉϥⲇⲱⲣⲟⲛ ⲉϧⲟⲩⲛ ϫⲉ
ⲟⲩϣⲟⲩϣⲱⲟⲩϣⲓ ⲛⲥⲙⲟⲩ ⲛⲛⲟϩⲉⲙ ⲛⲧⲁϥ ⲡⲉ
̅ⲍ:̅ⲓⲇ ⲟⲩⲟϩ ⲉϥⲉⲓⲛⲓ ⲉϧⲟⲩⲛ ⲉⲃⲟⲗ ϩⲓⲧⲟⲧϥ ⲛⲟⲩⲁⲓ ⲉⲃⲟⲗ ϧⲉⲛ ⲛⲉϥⲇⲱⲣⲟⲛ
ⲧⲏⲣⲟⲩ ⲫⲏ ⲉⲧⲉϥⲛⲁⲧⲏⲓϥ ⲙⲡϭⲟⲓⲥ ⲉϥⲉϣⲱⲡⲓ ⲙⲡⲓⲟⲩⲏⲃ ⲫⲏ ⲉⲧⲛⲁϫⲉϣ
ⲡⲥⲛⲟϥ ⲙⲡⲓⲟⲩϫⲁⲓ
̅ⲍ:̅ⲓⲉ ⲟⲩⲟϩ ⲛⲓⲁϥ ⲛⲧⲉ ⲟⲩϣⲟⲩϣⲱⲟⲩϣⲓ ⲛⲥⲙⲟⲩ ⲛⲛⲟϩⲉⲙ ⲉⲩⲉϣⲱⲡⲓ ⲛⲁϥ
ⲟⲩⲟϩ ⲛϧⲣⲏⲓ ϧⲉⲛ ⲡⲓⲉϩⲟⲟⲩⲓ ⲉⲧⲟⲩⲛⲁⲉⲛ ⲡⲓⲇⲱⲣⲟⲛ ⲉϧⲟⲩⲛ ⲉⲩⲉⲟⲩⲟⲙϥ
ⲛⲛⲟⲩⲥⲱϫⲡ ⲉⲃⲟⲗ ⲙⲙⲟϥ ⲉⲧⲟⲟⲩⲓ
̅ⲍ:̅ⲓⲋ ⲟⲩⲟϩ ⲉϣⲱⲡ ϥⲛⲁⲓⲛⲓ ⲙⲡⲉϥⲇⲱⲣⲟⲛ ⲉϧⲟⲩⲛ ⲛⲟⲩϣⲟⲩϣⲱⲟⲩϣⲓ
ⲟⲩⲉⲩⲭⲏ ⲓⲉ ⲟⲩⲟⲩⲱϣ ϧⲉⲛ ⲡⲓⲉϩⲟⲟⲩ ⲉⲧⲉϥⲛⲁⲓⲛⲓ ⲙⲡⲉϥⲇⲱⲣⲟⲛ ⲉϧⲟⲩⲛ
ⲛⲉⲙ ⲡⲉϥⲣⲁⲥϯ ⲉⲩⲉⲟⲩⲟⲙϥ
̅ⲍ:̅ⲓⲍ ⲟⲩⲟϩ ⲫⲏ ⲉⲧⲛⲁⲥⲱϫⲡ ⲉⲃⲟⲗ ϧⲉⲛ ⲛⲓⲁϥⲟⲩⲓ ⲛⲧⲉ ⲡⲓϣⲟⲩϣⲱⲟⲩϣⲓ
ϣⲁ ⲡⲓⲉϩⲟⲟⲩ ⲙⲙⲁϩ ⲅ ⲉⲩⲉⲣⲟⲕϩϥ ϧⲉⲛ ⲟⲩⲭⲣⲱⲙ
̅ⲍ:̅ⲓⲏ ⲉϣⲱⲡ ⲇⲉ ⲉⲁϥⲟⲩⲱⲙ ⲛⲧⲉϥⲟⲩⲱⲙ ⲉⲃⲟⲗ ϧⲉⲛ ⲛⲓⲁϥⲟⲩⲓ ⲙⲡⲓⲉϩⲟⲟⲩ
ⲙⲙⲁϩ ⲅ ⲛⲛⲟⲩϣⲟⲡϥ ⲫⲏ ⲉⲧⲛⲁⲓⲛⲓ ⲉϧⲟⲩⲛ ⲛⲛⲟⲩⲟⲡϥ ⲛⲁϥ ⲟⲩⲱⲣⲉⲃ ⲡⲉ
ϯⲯⲩⲭⲏ ⲇⲉ ⲉⲧⲛⲁⲟⲩⲱⲙ ⲉⲃⲟⲗ ⲙⲙⲟϥ ⲉⲥⲉϭⲓ ⲙⲡⲓⲛⲟⲃⲓ
̅ⲍ:̅ⲓⲑ ⲟⲩⲟϩ ϩⲁⲛⲁϥ ⲁⲩϣⲁⲛϭⲓ ⲛⲉⲙ ⲉⲛⲭⲁⲓ ⲛⲓⲃⲉⲛ ⲉⲧϭⲁϧⲉⲙ
ⲛⲛⲟⲩⲟⲩⲟⲙⲟⲩ ⲉⲩⲉⲣⲟⲕϩⲟⲩ ϧⲉⲛ ⲟⲩⲭⲣⲱⲙ ⲡⲉⲧⲧⲟⲩⲃⲏⲟⲩⲧ ⲛⲓⲃⲉⲛ
ⲉⲩⲉⲟⲩⲉⲙ ⲁϥ
̅ⲍ:̅ⲕ ⲟⲩⲟϩ ϯⲯⲩⲭⲏ ⲉⲑⲛⲁⲟⲩⲱⲙ ⲉⲃⲟⲗ ϧⲉⲛ ⲛⲓⲁϥⲟⲩⲓ ⲛⲧⲉ
ⲡⲓϣⲟⲩϣⲱⲟⲩϣⲓ ⲛⲧⲉ ⲡⲓⲟⲩϫⲁⲓ ⲉⲧⲉ ⲫⲁ ⲡϭⲟⲓⲥ ⲡⲉ ⲟⲩⲟϩ ⲡⲉϥϭⲱϧⲉⲙ
ⲉϩⲣⲏⲓ ⲉϫⲱϥ ⲉⲥⲉⲧⲁⲕⲟ ⲛϫⲉ ϯⲯⲩⲭⲏ ⲉⲧⲉⲙⲙⲁⲩ ⲉⲃⲟⲗ ϧⲉⲛ ⲡⲉⲥⲗⲁⲟⲥ
̅ⲍ:̅ⲕⲁ ⲟⲩⲟϩ ⲯⲩⲭⲏ ⲛⲓⲃⲉⲛ ⲉⲧⲛⲁϭⲓ ⲛⲉⲙ ϩⲱⲃ ⲛⲓⲃⲉⲛ ⲉⲧϭⲁϧⲉⲙ ⲓⲉ ⲉⲃⲟⲗ
ϧⲉⲛ ⲡϭⲱϧⲉⲙ ⲛⲧⲉ ⲟⲩⲣⲱⲙⲓ ⲓⲉ ⲛⲏ ⲉⲧϭⲁϧⲉⲙ ⲛⲧⲉ ϥⲧⲉⲫⲁⲧ ⲓⲉ ⲥⲱϥ
ⲛⲓⲃⲉⲛ ⲉⲧϭⲁϧⲉⲙ ⲟⲩⲟϩ ⲛⲧⲉϥⲟⲩⲱⲙ ⲉⲃⲟⲗ ϧⲉⲛ ⲛⲓⲁϥⲟⲩⲓ ⲛⲧⲉ
ⲡⲓϣⲟⲩϣⲱⲟⲩϣⲓ ⲛⲧⲉ ⲡⲓⲟⲩϫⲁⲓ ⲉⲧⲉ ⲫⲁ ⲡϭⲟⲓⲥ ⲡⲉ ⲉⲥⲉⲧⲁⲕⲟ ⲛϫⲉ
ϯⲯⲩⲭⲏ ⲉⲧⲉⲙⲙⲁⲩ ⲉⲃⲟⲗ ϧⲉⲛ ⲡⲉⲥⲗⲁⲟⲥ
̅ⲍ:̅ⲕⲃ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲍ:̅ⲕⲅ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲉⲕϫⲱ ⲙⲙⲟⲥ ϫⲉ ⲱⲧ ⲛⲓⲃⲉⲛ
ⲛⲧⲉ ϩⲁⲛⲉϩⲱⲟⲩ ⲛⲉⲙ ϩⲁⲛⲉⲥⲱⲟⲩ ⲛⲉⲙ ϩⲁⲛⲃⲁⲉⲙⲡⲓ ⲛⲛⲉⲧⲉⲛⲟⲩⲟⲙⲟⲩ
̅ⲍ:̅ⲕⲇ ⲟⲩⲟϩ ⲛⲓⲱⲧ ⲛⲧⲉ ⲛⲏ ⲉⲧⲙⲱⲟⲩⲧ ⲛⲉⲙ ⲛⲏ ⲉⲧⲉ ⲛⲓⲑⲏⲣⲓⲟⲛ ⲟⲩⲱⲙ
ⲉⲃⲟⲗ ⲙⲙⲱⲟⲩ ⲉⲩⲉⲑⲁⲙⲓⲱⲟⲩ ⲉϩⲱⲃ ⲛⲓⲃⲉⲛ ⲉⲟⲩⲱⲙ ⲇⲉ ⲛⲛⲟⲩⲟⲩⲟⲙⲟⲩ
̅ⲍ:̅ⲕⲉ ⲟⲩⲟⲛ ⲛⲓⲃⲉⲛ ⲉⲧⲛⲁⲟⲩⲱⲙ ⲛⲟⲩⲱⲧ ⲉⲃⲟⲗ ϧⲉⲛ ⲛⲓⲧⲉⲃⲛⲱⲟⲩⲓ ⲛⲏ
ⲉⲧⲉⲧⲉⲛⲛⲁⲓⲛⲓ ⲉϧⲟⲩⲛ ⲛⲟⲩⲟⲩⲧⲁϩ ⲙⲡϭⲟⲓⲥ ⲉⲃⲟⲗ ⲙⲙⲱⲟⲩ ⲉⲥⲉⲧⲁⲕⲟ ⲛϫⲉ
ϯⲯⲩⲭⲏ ⲉⲧⲉⲙⲙⲁⲩ ⲉⲃⲟⲗ ϧⲉⲛ ⲡⲉⲥⲗⲁⲟⲥ
̅ⲍ:̅ⲕⲋ ⲥⲛⲟϥ ⲛⲓⲃⲉⲛ ⲛⲛⲉⲧⲉⲛⲟⲩⲟⲙⲟⲩ ϧⲉⲛ ⲛⲉⲧⲉⲛⲙⲁⲛϣⲱⲡⲓ ⲧⲏⲣⲟⲩ ⲓⲧⲉ
ⲉⲃⲟⲗ ϧⲉⲛ ⲛⲓⲧⲉⲃⲛⲱⲟⲩⲓ ⲓⲧⲉ ⲉⲃⲟⲗ ϧⲉⲛ ⲛⲓϩⲁⲗⲁϯ
̅ⲍ:̅ⲕⲍ ⲯⲩⲭⲏ ⲛⲓⲃⲉⲛ ⲉⲧⲛⲁⲟⲩⲉⲙ ⲥⲛⲟϥ ⲉⲥⲉⲧⲁⲕⲟ ⲛϫⲉ ϯⲯⲩⲭⲏ ⲉⲧⲉⲙⲙⲁⲩ
ⲉⲃⲟⲗ ϧⲉⲛ ⲡⲉⲥⲗⲁⲟⲥ
̅ⲍ:̅ⲕⲏ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲍ:̅ⲕⲑ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲏⲗ ⲉⲕⲉⲥⲁϫⲓ ⲛⲉⲙⲱⲟⲩ ⲉⲕϫⲱ ⲙⲙⲟⲥ
ϫⲉ ⲫⲏ ⲉⲧⲛⲁⲓⲛⲓ ⲉϧⲟⲩⲛ ⲛⲟⲩϣⲟⲩϣⲱⲟⲩϣⲓ ⲛⲧⲉ ⲡⲉϥⲟⲩϫⲁⲓ ⲙⲡϭⲟⲓⲥ
ⲉϥⲉⲓⲛⲓ ⲙⲡⲉϥⲇⲱⲣⲟⲛ ⲉϧⲟⲩⲛ ⲙⲡϭⲟⲓⲥ ⲉⲃⲟⲗ ϧⲉⲛ ⲡⲓϣⲟⲩϣⲱⲟⲩϣⲓ ⲛⲧⲉ
ⲡⲉϥⲟⲩϫⲁⲓ
̅ⲍ:̅ⲗ ⲟⲩⲟϩ ⲛⲉϥϫⲓϫ ⲉⲩⲉⲓⲛⲓ ⲉϧⲟⲩⲛ ⲛⲛⲓⲟⲩϫⲁⲓ ⲉⲩϣⲏⲡ ⲙⲡϭⲟⲓⲥ ⲟⲩⲟϩ
ⲡⲓⲱⲧ ⲫⲏ ⲉⲧⲭⲏ ϩⲓϫⲉⲛ ϯⲙⲉⲥⲧⲉⲛϩⲏⲧ ⲛⲉⲙ ⲡⲓⲗⲟⲃⲟⲥ ⲉⲧⲭⲏ ϩⲓϫⲉⲛ
ⲡⲓϩⲩⲡⲁⲣ ⲉϥⲉⲉⲛⲟⲩ ⲉϧⲟⲩⲛ ϩⲱⲥⲧⲉ ⲉⲉⲛⲟⲩ ⲉϩⲣⲏⲓ ⲛⲧⲁⲓⲟ ⲙⲡⲉⲙⲑⲟ
ⲙⲡϭⲟⲓⲥ
̅ⲍ:̅ⲗⲁ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲓⲛⲓ ⲉϩⲣⲏⲓ ⲙⲡⲓⲱⲧ ⲧⲏⲣϥ ⲉⲧⲭⲏ ϩⲓϫⲉⲛ
ϯⲙⲉⲥⲧⲉⲛϩⲏⲧ ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ ⲉⲣⲉ ϯⲙⲉⲥⲧⲉⲛϩⲏⲧ
ϣⲱⲡⲓ ⲛⲁⲁⲣⲱⲛ ⲛⲉⲙ ⲛⲉϥϣⲏⲣⲓ
̅ⲍ:̅ⲗⲃ ⲟⲩⲟϩ ⲡⲓϣⲱⲃϣ ⲛⲟⲩⲓⲛⲁⲙ ⲉⲣⲉⲧⲉⲛⲉⲫⲟⲣϫϥ ⲉⲃⲟⲗ ⲉⲧⲏⲓϥ ⲙⲡⲓⲟⲩⲏⲃ
ⲉⲃⲟⲗ ϧⲉⲛ ⲛⲓϣⲟⲩϣⲱⲟⲩϣⲓ ⲛⲧⲉ ⲡⲉⲧⲉⲛⲛⲟϩⲉⲙ
̅ⲍ:̅ⲗⲅ ⲫⲏ ⲉⲧⲛⲁⲉⲣⲡⲣⲟⲥⲫⲉⲣⲓⲛ ⲙⲡⲓⲥⲛⲟϥ ⲛⲧⲉ ⲡⲓⲟⲩϫⲁⲓ ⲛⲉⲙ ⲡⲓⲱⲧ ⲉⲃⲟⲗ
ϧⲉⲛ ⲛⲉⲛϣⲏⲣⲓ ⲛⲁⲁⲣⲱⲛ ⲉϥⲉϣⲱⲡⲓ ⲛⲁϥ ⲛϫⲉ ⲡⲓϣⲱⲃϣ ⲛⲟⲩⲓⲛⲁⲙ ϧⲉⲛ
ⲟⲩⲧⲟⲓ
̅ⲍ:̅ⲗⲇ ϯⲙⲉⲥⲧⲉⲛϩⲏⲧ ⲅⲁⲣ ⲛⲧⲉ ⲡⲓⲉⲡⲓⲑⲉⲙⲁ ⲛⲉⲙ ⲡⲓϣⲱⲃϣ ⲉⲧⲫⲟⲣϫ ⲉⲃⲟⲗ
ⲁⲓϭⲓⲧⲟⲩ ⲛⲧⲉⲛ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲉⲃⲟⲗ ϧⲉⲛ ⲛⲓϣⲱⲟⲩϣⲱⲟⲩϣⲓ ⲛⲧⲉ
ⲡⲉⲧⲉⲛⲛⲟϩⲉⲙ ⲁⲓⲧⲏⲓⲧⲟⲩ ⲛⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲛⲟⲩⲛⲟⲙⲓⲙⲟⲛ ⲛⲉⲛⲉϩ
ⲛⲧⲟⲧⲟⲩ ⲛⲛⲉⲛϣⲏⲣⲓ ⲙⲡⲓⲥⲣⲁⲏⲗ
̅ⲍ:̅ⲗⲉ ⲫⲁⲓ ⲡⲉ ⲡⲓⲑⲱϩⲥ ⲛⲧⲉ ⲁⲁⲣⲱⲛ ⲛⲉⲙ ⲡⲓⲑⲱϩⲥ ⲛⲧⲉ ⲛⲉϥϣⲏⲣⲓ ⲉⲃⲟⲗ
ϧⲉⲛ ⲛⲓⲟⲩⲧⲁϩ ⲉⲧϣⲏⲡ ⲛⲧⲉⲛ ⲡϭⲟⲓⲥ ϧⲉⲛ ⲡⲓⲉϩⲟⲟⲩ ⲉⲧⲁϥⲉⲛⲟⲩ ⲉϧⲟⲩⲛ
ⲉⲉⲣⲟⲩⲏⲃ ⲙⲡϭⲟⲓⲥ
̅ⲍ:̅ⲗⲋ ⲕⲁⲧⲁ ⲫⲣⲏϯ ⲉⲧⲁ ⲡϭⲟⲓⲥ ϩⲟⲛϩⲉⲛ ⲉϯ ⲛⲱⲟⲩ ⲛϩⲣⲏⲓ ϧⲉⲛ ⲡⲓⲉϩⲟⲟⲩ
ⲉⲧⲁϥⲑⲁϩⲥⲟⲩ ⲉⲃⲟⲗ ϧⲉⲛ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲛⲟⲩⲛⲟⲙⲓⲙⲟⲛ ⲛⲉⲛⲉϩ ϧⲉⲛ
ⲛⲟⲩϫⲱⲟⲩ
̅ⲍ:̅ⲗⲍ ⲫⲁⲓ ⲡⲉ ⲫⲛⲟⲙⲟⲥ ⲛⲧⲉ ⲡⲓϭⲗⲓⲗ ⲛⲉⲙ ⲡⲓϣⲟⲩϣⲱⲟⲩϣⲓ ⲛⲉⲙ ⲉⲑⲃⲉ
ⲫⲛⲟⲃⲓ ⲛⲉⲙ ⲉⲑⲃⲉ ϯⲙⲉⲧϣⲁϥⲧ ⲛⲉⲙ ⲡⲓϫⲱⲕ ⲉⲃⲟⲗ ⲛⲉⲙ ⲡⲓϣⲟⲩϣⲱⲟⲩϣⲓ
ⲛⲧⲉ ⲡⲓⲟⲩϫⲁⲓ
̅ⲍ:̅ⲗⲏ ⲙⲫⲣⲏϯ ⲉⲧⲁ ⲡϭⲟⲓⲥ ϩⲟⲛϩⲉⲛ ⲉⲧⲟⲧϥ ⲙⲙⲱⲩⲥⲏⲥ ⲛϩⲣⲏⲓ ϩⲓϫⲉⲛ
ⲡⲓⲧⲱⲟⲩ ⲛⲧⲉ ⲥⲓⲛⲁ ϧⲉⲛ ⲡⲓⲉϩⲟⲟⲩ ⲉⲧⲁϥϩⲟⲛϩⲉⲛ ⲉⲧⲟⲧⲟⲩ ⲛⲛⲉⲛϣⲏⲣⲓ
ⲙⲡⲓⲥⲣⲁⲏⲗ ⲉⲓⲛⲓ ⲉϧⲟⲩⲛ ⲛⲛⲟⲩⲇⲱⲣⲟⲛ ⲙⲡⲉⲙⲑⲟ ⲙⲡϭⲟⲓⲥ ⲛϩⲣⲏⲓ ϩⲓ ⲡϣⲁϥⲉ
ⲛⲧⲉ ⲥⲓⲛⲁ
̅ⲏ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲏ:̅ⲃ ϫⲉ ϭⲓ ⲛⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲛⲉⲙ ⲛⲓⲥⲧⲟⲗⲏ ⲛⲉⲙ ⲡⲓⲛⲉϩ ⲛⲧⲉ
ⲡⲓⲑⲱϩⲥ ⲛⲉⲙ ⲡⲓⲙⲁⲥⲓ ⲉⲧⲉ ⲉⲑⲃⲉ ⲫⲛⲟⲃⲓ ⲛⲉⲙ ⲡⲓⲱⲓⲗⲓ ⲃ ⲛⲉⲙ ⲡⲓⲕⲁⲛⲟⲩⲛ
ⲛⲧⲉ ⲛⲓⲁⲧⲕⲱⲃ
̅ⲏ:̅ⲅ ⲉⲕⲉⲑⲱⲟⲩϯ ⲛϯⲥⲩⲛⲁⲅⲱⲅⲏ ⲧⲏⲣⲥ ⲛⲧⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ϩⲓⲣⲉⲛ
ⲫⲣⲟ ⲛⲧⲉ ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ
̅ⲏ:̅ⲇ ⲟⲩⲟϩ ⲁϥⲓⲣⲓ ⲛϫⲉ ⲙⲱⲩⲥⲏⲥ ⲕⲁⲧⲁ ⲫⲣⲏϯ ⲉⲧⲁ ⲡϭⲟⲓⲥ ϩⲟⲛϩⲉⲛ ⲛⲁϥ
ⲟⲩⲟϩ ⲁϥⲑⲱⲟⲩϯ ⲛϯⲥⲩⲛⲁⲅⲱⲅⲏ ⲧⲏⲣⲥ ϩⲓⲣⲉⲛ ⲫⲣⲟ ⲛϯⲥⲕⲩⲛⲏ ⲛⲧⲉ
ϯⲙⲉⲧⲙⲉⲑⲣⲉ
̅ⲏ:̅ⲉ ⲟⲩⲟϩ ⲡⲉϫⲉ ⲙⲱⲩⲥⲏⲥ ⲛϯⲥⲩⲛⲁⲅⲱⲅⲏ ⲧⲏⲣⲥ ϫⲉ ⲫⲁⲓ ⲡⲉ ⲡⲓⲥⲁϫⲓ
ⲉⲧⲁϥϩⲟⲛϩⲉⲛ ⲙⲙⲟϥ ⲛϫⲉ ⲡϭⲟⲓⲥ
̅ⲏ:̣̅ⲋ ⲟⲩⲟϩ ⲁ ⲙⲱⲩⲥⲏⲥ ⲉⲛ ⲁⲁⲣⲱⲛ ⲉϧⲟⲩⲛ ⲛⲉⲙ ⲛⲉϥϣⲏⲣⲓ ⲟⲩⲟϩ
ⲁϥϫⲟⲕⲙⲟⲩ ϧⲉⲛ ⲟⲩⲙⲱⲟⲩ
̅ⲏ:̅ⲍ ⲟⲩⲟϩ ⲁϥϯ ϩⲓⲱⲧϥ ⲛϯϣⲑⲏⲛ ⲟⲩⲟϩ ⲁϥϧⲟⲕϥ ⲙⲡⲓⲙⲟϫϧ ⲟⲩⲟϩ ⲁϥϯ
ϩⲓⲱⲧϥ ⲛⲟⲩϩⲃⲟⲥ ⲛⲧⲉ ⲥⲁϧⲟⲩⲛ ⲟⲩⲟϩ ⲁϥϯ ⲥⲁⲡϣⲱⲓ ⲙⲙⲟϥ ⲛϯⲉⲡⲱⲙⲓⲥ
ⲟⲩⲟϩ ⲁϥϧⲟⲕϥ ⲙⲙⲱⲟⲩ ϩⲓ ⲟⲩⲥⲟⲡ ⲕⲁⲧⲁ ⲡⲓⲑⲁⲙⲓⲟ ⲛⲧⲉ ϯⲉⲡⲱⲙⲓⲥ
ⲟⲩⲟϩ ⲁϥϭⲟⲗⲕⲥ ⲉϩⲣⲏⲓ ⲉϫⲱϥ
̅ⲏ:̅ⲏ ⲟⲩⲟϩ ⲁϥⲭⲱ ⲙⲡⲓⲗⲟⲅⲓⲟⲛ ⲥⲁⲡϣⲱⲓ ⲙⲙⲟϥ ⲟⲩⲟϩ ⲁϥⲭⲱ ⲙⲡⲓⲟⲩⲱⲛϩ
ⲉⲃⲟⲗ ⲛⲧⲉ ϯⲙⲉⲑⲙⲏⲓ ⲉϫⲉⲛ ⲡⲓⲗⲟⲅⲓⲟⲛ
̅ⲏ:̅ⲑ ⲟⲩⲟϩ ⲁϥⲭⲱ ⲛⲟⲩⲙⲓⲧⲣⲁ ϩⲓϫⲉⲛ ⲧⲉϥⲁⲫⲉ ⲟⲩⲟϩ ⲁϥⲭⲱ ⲥⲁⲡϣⲱⲓ
ⲛϯⲙⲓⲧⲣⲁ ⲛⲟⲩⲡⲉⲧⲁⲗⲟⲛ ⲛⲛⲟⲩⲃ ⲙⲡⲉⲙⲑⲟ ⲙⲡⲉϥϩⲟ ⲫⲁⲓ ⲡⲉ ⲡⲓⲡⲉⲧⲁⲗⲟⲛ
ⲛⲛⲟⲩⲃ ⲉⲧⲁⲩⲧⲟⲩⲃⲟϥ ⲉⲑⲟⲩⲁⲃ ⲙⲫⲣⲏϯ ⲉⲧⲁ ⲡϭⲟⲓⲥ ⲟⲩⲁϩⲥⲁϩⲛⲓ
ⲙⲙⲱⲩⲥⲏⲥ
̅ⲏ:̅ⲓ ⲟⲩⲟϩ ⲁϥⲱⲗⲓ ⲛϫⲉ ⲙⲱⲩⲥⲏⲥ ⲉⲃⲟⲗ ϧⲉⲛ ⲡⲓⲛⲉϩ ⲛⲧⲉ ⲡⲓⲑⲱϩⲥ
̅ⲏ:̅ⲓⲁ ⲟⲩⲟϩ ⲁϥⲛⲟϫϧ ⲉⲃⲟⲗ ⲙⲙⲟϥ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲛⲍ ⲛⲥⲟⲡ
ⲟⲩⲟϩ ⲁϥⲑⲱϩⲥ ⲙⲡⲓⲙⲁⲛⲉⲣϣⲱⲟⲩϣⲓ ⲁϥⲧⲟⲩⲃⲟϥ ⲛⲉⲙ ⲛⲉϥⲥⲕⲉⲩⲟⲥ ⲛⲉⲙ
ⲡⲓⲗⲟⲩⲧⲏⲣ ⲛⲉⲙ ⲧⲉϥⲃⲁⲥⲓⲥ ⲟⲩⲟϩ ⲁϥⲧⲟⲩⲃⲟϥ ⲟⲩⲟϩ ⲁϥⲑⲱϩⲥ ⲛϯⲥⲕⲩⲛⲏ
ⲛⲉⲙ ⲛⲉⲥⲥⲕⲉⲩⲟⲥ ⲧⲏⲣⲟⲩ ⲟⲩⲟϩ ⲁϥⲧⲟⲩⲃⲱⲟⲩ
̅ⲏ:̅ⲓⲃ ⲟⲩⲟϩ ⲁ ⲙⲱⲩⲥⲏⲥ ϫⲱϣ ⲉⲃⲟⲗ ϧⲉⲛ ⲡⲓⲛⲉϩ ⲛⲑⲱϩⲥ ⲉϫⲉⲛ ⲧⲁⲫⲉ
ⲛⲁⲁⲣⲱⲛ ⲁϥⲑⲁϩⲥϥ ⲟⲩⲟϩ ⲁϥⲧⲟⲩⲃⲟϥ
̅ⲏ:̅ⲓⲅ ⲟⲩⲟϩ ⲁϥⲓⲛⲓ ⲉϧⲟⲩⲛ ⲛϫⲉ ⲙⲱⲩⲥⲏⲥ ⲛⲛⲓϣⲏⲣⲓ ⲛⲧⲉ ⲁⲁⲣⲱⲛ ⲟⲩⲟϩ
ⲁϥϯ ϩⲓⲱⲧⲟⲩ ⲛϩⲁⲛϣⲑⲏⲛ ⲟⲩⲟϩ ⲁϥϧⲟⲕⲟⲩ ⲛϩⲁⲛⲙⲟϫϧ ⲟⲩⲟϩ ⲁϥϯ
ϩⲓⲱⲧⲟⲩ ⲛϩⲁⲛⲕⲩⲇⲁⲣⲓⲥ ⲕⲁⲧⲁ ⲫⲣⲏϯ ⲉⲧⲁϥⲟⲩⲁϩⲥⲁϩⲛⲓ ⲛϫⲉ ⲡϭⲟⲓⲥ
ⲉⲧⲟⲧϥ ⲙⲙⲱⲩⲥⲏⲥ
̅ⲏ:̅ⲓⲇ ⲟⲩⲟϩ ⲁϥⲓⲛⲓ ⲉϧⲟⲩⲛ ⲙⲡⲓⲙⲁⲥⲓ ⲉⲑⲃⲉ ⲫⲛⲟⲃⲓ ⲟⲩⲟϩ ⲁⲁⲣⲱⲛ ⲛⲉⲙ
ⲛⲉϥϣⲏⲣⲓ ⲁⲩⲧⲁⲗⲟ ⲛⲛⲟⲩϫⲓϫ ⲉϫⲉⲛ ⲧⲁⲫⲉ ⲙⲡⲓⲙⲁⲥⲓ ⲫⲏ ⲛⲧⲉ ⲫⲛⲟⲃⲓ
̅ⲏ:̅ⲓⲉ ⲟⲩⲟϩ ⲁⲩϧⲉⲗϧⲱⲗϥ ⲟⲩⲟϩ ⲁϥⲱⲗⲓ ⲛϫⲉ ⲙⲱⲩⲥⲏⲥ ⲉⲃⲟⲗ ϧⲉⲛ ⲡⲓⲥⲛⲟϥ
ⲟⲩⲟϩ ⲁϥⲧⲁⲗⲟ ⲉϫⲉⲛ ⲛⲓⲧⲁⲡ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ ⲉϥⲕⲱϯ ϧⲉⲛ
ⲡⲉϥⲧⲏⲃ ⲟⲩⲟϩ ⲁϥⲧⲟⲩⲃⲟ ⲙⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ ⲡⲓⲥⲛⲟϥ ⲁϥϫⲟϣϥ
ⲉϫⲉⲛ ϯⲃⲁⲥⲓⲥ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ ⲁϥⲧⲟⲩⲃⲟϥ ⲉⲡϫⲓⲛⲓⲛⲓ ⲉϩⲣⲏⲓ
ⲉϫⲱϥ ⲛϩⲁⲛϣⲟⲩϣⲱⲟⲩϣⲓ ⲛⲧⲉ ⲡⲭⲱ ⲉⲃⲟⲗ
̅ⲏ:̅ⲓⲋ ⲟⲩⲟϩ ⲁϥⲱⲗⲓ ⲛϫⲉ ⲙⲱⲩⲥⲏⲥ ⲙⲡⲓⲱⲧ ⲉⲧϩⲓϫⲉⲛ ⲛⲏ ⲉⲧⲥⲁϧⲟⲩⲛ ⲛⲉⲙ
ⲡⲓⲗⲟⲃⲟⲥ ⲉⲧⲭⲏ ϩⲓϫⲉⲛ ⲡⲓϩⲩⲡⲁⲣ ⲛⲉⲙ ⲡⲓϭⲗⲱⲧ ⲃ ⲛⲉⲙ ⲡⲓⲱⲧ ⲉⲧⲭⲏ
ϩⲓϫⲱⲟⲩ ⲟⲩⲟϩ ⲁϥⲉⲛⲟⲩ ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲛϫⲉ ⲙⲱⲩⲥⲏⲥ
̅ⲏ:̅ⲓⲍ ⲟⲩⲟϩ ⲡⲓⲙⲁⲥⲓ ⲛⲉⲙ ⲧⲉϥⲃⲏⲣⲥⲁ ⲛⲉⲙ ⲛⲉϥⲁϥⲟⲩⲓ ⲛⲉⲙ ⲛⲉϥϩⲱⲓⲣⲓ
ⲁϥⲣⲟⲕϩⲟⲩ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ ⲕⲁⲧⲁ ⲫⲣⲏϯ ⲉⲧⲁϥⲟⲩⲁϩⲥⲁϩⲛⲓ ⲛϫⲉ
ⲡϭⲟⲓⲥ ⲉⲧⲟⲧϥ ⲙⲙⲱⲩⲥⲏⲥ
̅ⲏ:̅ⲓⲏ ⲟⲩⲟϩ ⲁϥⲓⲛⲓ ⲉϧⲟⲩⲛ ⲛϫⲉ ⲙⲱⲩⲥⲏⲥ ⲙⲡⲓⲱⲓⲗⲓ ⲙⲡⲓϭⲗⲓⲗ ⲛϫⲟϥϫⲉϥ
ⲟⲩⲟϩ ⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲁⲩⲧⲁⲗⲟ ⲛⲛⲟⲩϫⲓϫ ⲉϫⲉⲛ ⲧⲁⲫⲉ ⲙⲡⲓⲱⲓⲗⲓ
̅ⲏ:̅ⲓⲑ ⲟⲩⲟϩ ⲁϥϧⲟⲗϧⲉⲗ ⲙⲡⲓⲱⲓⲗⲓ ⲛϫⲉ ⲙⲱⲩⲥⲏⲥ ⲟⲩⲟϩ ⲁ ⲙⲱⲩⲥⲏⲥ ϫⲱϣ
ⲙⲡⲓⲥⲛⲟϥ ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉϥⲕⲱϯ
̅ⲏ:̅ⲕ ⲟⲩⲟϩ ⲡⲓⲱⲓⲗⲓ ⲁϥⲫⲁϣϥ ⲛⲁϥ ⲕⲁⲧⲁ ⲫⲛⲟⲙⲟⲥ ⲛⲧⲉ ⲛⲉϥⲙⲉⲗⲟⲥ ⲟⲩⲟϩ
ⲁ ⲙⲱⲩⲥⲏⲥ ⲁϥⲓⲛⲓ ⲉⲡϣⲱⲓ ⲛϯⲁⲫⲉ ⲛⲉⲙ ⲛⲓⲙⲉⲗⲟⲥ ⲛⲉⲙ ⲡⲓⲱⲧ
̅ⲏ:̅ⲕⲁ ⲟⲩⲟϩ ϯⲛⲉϫⲓ ⲛⲉⲙ ⲛⲓϭⲁⲗⲁⲩϫ ⲁϥⲓⲁⲩ ⲉⲃⲟⲗ ϧⲉⲛ ⲟⲩⲙⲱⲟⲩ ⲟⲩⲟϩ ⲁ
ⲙⲱⲩⲥⲏⲥ ⲁϥⲓⲛⲓ ⲙⲡⲓⲱⲓⲗⲓ ⲧⲏⲣϥ ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲟⲩϭⲗⲓⲗ
ⲛϫⲟϥϫⲉϥ ⲡⲉ ⲟⲩⲥⲑⲟⲓ ⲛⲥⲑⲩⲛⲟⲩϥⲓ ⲟⲩⲟⲩⲧⲁϩ ⲉϥϣⲏⲡ ⲙⲡϭⲟⲓⲥ ⲕⲁⲧⲁ
ⲫⲣⲏϯ ⲉⲧⲁ ⲡϭⲟⲓⲥ ϩⲟⲛϩⲉⲛ ⲉⲧⲟⲧϥ ⲙⲙⲱⲩⲥⲏⲥ
̅ⲏ:̅ⲕⲃ ⲟⲩⲟϩ ⲁϥⲓⲛⲓ ⲛϫⲉ ⲙⲱⲩⲥⲏⲥ ⲙⲡⲓⲱⲓⲗⲓ ⲙⲙⲁϩ ⲃ ⲛⲟⲩⲱⲓⲗⲓ ⲛⲧⲉ
ⲟⲩϫⲱⲕ ⲉⲃⲟⲗ ⲟⲩⲟϩ ⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲁⲩⲧⲁⲗⲟ ⲛⲛⲟⲩϫⲓϫ ⲉϫⲉⲛ
ⲧⲁⲫⲉ ⲙⲡⲓⲱⲓⲗⲓ
̅ⲏ:̅ⲕⲅ ⲟⲩⲟϩ ⲁϥϧⲉⲗϧⲱⲗϥ ⲟⲩⲟϩ ⲁϥⲱⲗⲓ ⲛϫⲉ ⲙⲱⲩⲥⲏⲥ ⲉⲃⲟⲗ ϧⲉⲛ
ⲡⲉϥⲥⲛⲟϥ ⲟⲩⲟϩ ⲁϥⲧⲁⲗⲟ ⲉϩⲣⲏⲓ ⲉϫⲉⲛ ⲗⲟⲃⲟⲥ ⲛⲧⲉ ⲫⲁⲙϣϫ ⲛⲟⲩⲓⲛⲁⲙ
ⲛⲁⲁⲣⲱⲛ ⲛⲉⲙ ⲉϫⲉⲛ ϩⲏⲧⲥ ⲛⲧⲉϥϫⲓϫ ⲛⲟⲩⲓⲛⲁⲙ ⲛⲉⲙ ⲉϫⲉⲛ ϩⲏⲧⲥ
ⲛⲧⲉϥⲫⲁⲧ ⲛⲟⲩⲓⲛⲁⲙ
̅ⲏ:̅ⲕⲇ ⲟⲩⲟϩ ⲁ ⲙⲱⲩⲥⲏⲥ ⲁϥⲓⲛⲓ ⲛⲛⲉⲛϣⲏⲣⲓ ⲛⲁⲁⲣⲱⲛ ⲟⲩⲟϩ ⲁϥⲧⲁⲗⲟ ⲛϫⲉ
ⲙⲱⲩⲥⲏⲥ ⲉϫⲉⲛ ⲛⲓⲗⲟⲃⲟⲥ ⲛⲧⲉ ⲛⲟⲩⲙⲁϣϫ ⲛⲟⲩⲓⲛⲁⲙ ⲉⲃⲟⲗ ϧⲉⲛ ⲡⲓⲥⲛⲟϥ
ⲛⲉⲙ ⲉϫⲉⲛ ϩⲏⲧⲥ ⲛⲛⲟⲩϫⲓϫ ⲛⲟⲩⲓⲛⲁⲙ ⲛⲉⲙ ⲉϫⲉⲛ ϩⲏⲧⲥ ⲛⲛⲟⲩⲫⲁⲧ
ⲛⲟⲩⲓⲛⲁⲙ ⲟⲩⲟϩ ⲁ ⲙⲱⲩⲥⲏⲥ ϫⲱϣ ⲛⲛⲓⲥⲛⲟϥ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ
̅ⲏ:̅ⲕⲉ ⲟⲩⲟϩ ⲁ ⲙⲱⲩⲥⲏⲥ ⲁϥⲱⲗⲓ ⲙⲡⲓⲱⲧ ⲛⲉⲙ ϯϯⲡⲓ ⲛⲉⲙ ⲡⲓⲱⲧ
ⲉⲧϩⲓϫⲉⲛ ϯⲛⲉϫⲓ ⲛⲉⲙ ⲡⲓⲗⲟⲃⲟⲥ ⲛⲧⲉ ⲡⲓϩⲩⲡⲁⲣ ⲛⲉⲙ ⲡⲓϭⲗⲱⲧ ⲃ ⲛⲉⲙ
ⲡⲓⲱⲧ ⲉⲧϩⲓϫⲱⲟⲩ ⲛⲉⲙ ⲡⲓϣⲱⲃϣ ⲛⲟⲩⲓⲛⲁⲙ
̅ⲏ:̅ⲕⲋ ⲟⲩⲟϩ ⲁϥⲱⲗⲓ ⲉⲃⲟⲗ ϧⲉⲛ ⲡⲓⲕⲁⲛⲟⲩⲛ ⲛⲧⲉ ⲡⲓϫⲱⲕ ⲫⲏ ⲉⲧⲭⲏ
ⲙⲡⲉⲙⲑⲟ ⲙⲡϭⲟⲓⲥ ⲛⲟⲩⲱⲓⲕ ⲛⲁⲧϣⲉⲙⲏⲣ ⲟⲩⲟϩ ⲛⲟⲩⲱⲓⲕ ⲉⲃⲟⲗ ϧⲉⲛ ⲟⲩⲛⲉϩ
ⲛⲉⲙ ⲟⲩⲁⲓ ⲛⲗⲁⲅⲁⲛⲟⲛ ⲟⲩⲟϩ ⲁϥⲧⲁⲗⲱⲟⲩ ⲉϩⲣⲏⲓ ⲉϫⲉⲛ ⲡⲓⲱⲧ ⲛⲉⲙ
ⲡⲓϣⲱⲃϣ ⲛⲟⲩⲓⲛⲁⲙ
̅ⲏ:̅ⲕⲍ ⲟⲩⲟϩ ⲁϥⲧⲁⲗⲱⲟⲩ ⲧⲏⲣⲟⲩ ⲉϫⲉⲛ ⲛⲉⲛϫⲓϫ ⲛⲁⲁⲣⲱⲛ ⲛⲉⲙ ⲉϫⲉⲛ
ⲛⲉⲛϫⲓϫ ⲛⲛⲉϥϣⲏⲣⲓ ⲟⲩⲟϩ ⲁϥⲉⲛϥ ⲉϩⲣⲏⲓ ⲉⲫⲟⲣϫ ⲉⲃⲟⲗ ⲙⲡⲉⲙⲑⲟ ⲙⲡϭⲟⲓⲥ
̅ⲏ:̅ⲕⲏ ⲟⲩⲟϩ ⲁϥⲟⲗⲟⲩ ⲛϫⲉ ⲙⲱⲩⲥⲏⲥ ⲉⲃⲟⲗ ϧⲉⲛ ⲛⲟⲩϫⲓϫ ⲟⲩⲟϩ ⲁϥⲉⲛⲟⲩ
ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉϫⲉⲛ ⲛⲓϭⲗⲓⲗ ⲛϫⲟϥϫⲉϥ ⲛⲧⲉ ⲡⲓϫⲱⲕ
ⲉⲃⲟⲗ ⲟⲩⲥⲑⲟⲓ ⲛⲥⲑⲩⲛⲟⲩϥⲓ ⲟⲩⲟⲩⲧⲁϩ ⲉϥϣⲏⲡ ⲙⲡϭⲟⲓⲥ ⲡⲉ
̅ⲏ:̅ⲕⲑ ⲟⲩⲟϩ ⲉⲧⲁϥⲱⲗⲓ ⲛϯⲙⲉⲥⲧⲉⲛϩⲏⲧ ⲛϫⲉ ⲙⲱⲩⲥⲏⲥ ⲁϥⲟⲗⲥ ⲛⲟⲩⲧⲁⲗⲟ
ⲉⲡϣⲱⲓ ⲙⲡⲉⲙⲑⲟ ⲙⲡϭⲟⲓⲥ ⲉⲃⲟⲗ ϧⲉⲛ ⲡⲓⲱⲓⲗⲓ ⲛⲧⲉ ⲡⲓϫⲱⲕ ⲉⲃⲟⲗ ⲟⲩⲟϩ
ⲁⲥϣⲱⲡⲓ ⲛⲟⲩⲧⲟⲓ ⲙⲙⲱⲩⲥⲏⲥ ⲕⲁⲧⲁ ⲫⲣⲏϯ ⲉⲧⲁ ⲡϭⲟⲓⲥ ϩⲟⲛϩⲉⲛ ⲉⲧⲟⲧϥ
ⲙⲙⲱⲩⲥⲏⲥ
̅ⲏ:̅ⲗ ⲟⲩⲟϩ ⲁϥⲱⲗⲓ ⲛϫⲉ ⲙⲱⲩⲥⲏⲥ ⲉⲃⲟⲗ ϧⲉⲛ ⲡⲓⲛⲉϩ ⲛⲧⲉ ⲡⲓⲑⲱϩⲥ ⲛⲉⲙ
ⲉⲃⲟⲗ ϧⲉⲛ ⲡⲓⲥⲛⲟϥ ⲫⲏ ⲉⲧⲭⲏ ϩⲓϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ ⲁϥⲛⲟⲩϫϧ
ⲉϫⲉⲛ ⲁⲁⲣⲱⲛ ⲛⲉⲙ ⲉϫⲉⲛ ⲛⲉϥϣⲏⲣⲓ ⲛⲉⲙ ⲉϫⲉⲛ ⲛⲉϥⲥⲧⲟⲗⲏ ⲛⲉⲙ ⲉϫⲉⲛ
ⲛⲟⲩⲥⲧⲟⲗⲏ ⲟⲩⲟϩ ⲁϥⲧⲟⲩⲃⲟ ⲛⲁⲁⲣⲱⲛ ⲛⲉⲙ ⲛⲉϥⲥⲧⲟⲗⲏ ⲛⲧⲉ ⲛⲉϥϣⲏⲣⲓ
ⲛⲉⲙⲁϥ ⲡⲉ
̅ⲏ:̅ⲗⲁ ⲟⲩⲟϩ ⲡⲉϫⲉ ⲙⲱⲩⲥⲏⲥ ⲛⲁⲁⲣⲱⲛ ⲛⲉⲙ ⲛⲉϥϣⲏⲣⲓ ϫⲉ ⲫⲓⲥⲓ ⲛⲛⲓⲁⲫⲟⲩⲓ
ϧⲉⲛ ⲛⲓⲁⲩⲗⲏ ⲛⲧⲉ ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ϧⲉⲛ ⲟⲩⲙⲁ ⲉϥⲟⲩⲁⲃ ⲟⲩⲟϩ
ⲉⲣⲉⲧⲉⲛⲉⲟⲩⲟⲙⲟⲩ ⲙⲙⲁⲩ ⲛⲉⲙ ⲛⲓⲱⲓⲕ ⲛⲏ ⲉⲧⲭⲏ ϩⲓϫⲉⲛ ⲡⲓⲕⲁⲛⲟⲩⲛ ⲛⲧⲉ
ⲡⲓϫⲱⲕ ⲉⲃⲟⲗ ⲕⲁⲧⲁ ⲫⲣⲏϯ ⲉⲧⲁϥⲟⲩⲁϩⲥⲁϩⲛⲓ ⲛϫⲉ ⲡϭⲟⲓⲥ ⲉϥϫⲱ ⲙⲙⲟⲥ
ϫⲉ ⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲉⲩⲉⲟⲩⲟⲙⲟⲩ
̅ⲏ:̅ⲗⲃ ⲟⲩⲟϩ ⲛⲏ ⲉⲧⲛⲁⲥⲱϫⲡ ⲉⲃⲟⲗ ϧⲉⲛ ⲛⲓⲁϥⲟⲩⲓ ⲛⲉⲙ ⲛⲓⲱⲓⲕ ⲣⲟⲕϩⲟⲩ
ϧⲉⲛ ⲟⲩⲭⲣⲱⲙ
̅ⲏ:̅ⲗⲅ ⲟⲩⲟϩ ⲛⲛⲉⲧⲉⲛⲉⲣ ⲥⲁⲃⲟⲗ ⲙⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲧⲣⲉ ⲛⲍ
ⲛⲉϩⲟⲟⲩ ϣⲁⲧⲉ ⲟⲩⲉϩⲟⲟⲩ ϫⲱⲕ ⲟⲩⲉϩⲟⲟⲩ ⲛⲧⲉ ⲡⲉⲧⲉⲛϫⲱⲕ ⲉⲃⲟⲗ ⲍ
ⲛⲉϩⲟⲟⲩ ϥⲛⲁϫⲟⲕⲟⲩ ⲛⲛⲉⲧⲉⲛϫⲓϫ
̅ⲏ:̅ⲗⲇ ⲕⲁⲧⲁ ⲫⲣⲏϯ ⲉⲧⲁϥⲁⲓϥ ⲛϩⲣⲏⲓ ϧⲉⲛ ⲡⲁⲓⲉϩⲟⲟⲩ ⲟⲩⲟϩ ⲁϥϩⲟⲛϩⲉⲛ
ⲛϫⲉ ⲡϭⲟⲓⲥ ⲉⲓⲣⲓ ϩⲱⲥⲧⲉ ⲉⲧⲱⲃϩ ⲉϩⲣⲏⲓ ⲉϫⲉⲛ ⲑⲏⲛⲟⲩ
̅ⲏ:̅ⲗⲉ ⲟⲩⲟϩ ⲉϫⲉⲛ ⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲉⲣⲉⲧⲉⲛⲉϩⲉⲙⲥⲓ ⲛⲍ
ⲛⲉϩⲟⲟⲩ ⲙⲡⲓⲉϩⲟⲟⲩ ⲛⲉⲙ ⲡⲓⲉϫⲱⲣϩ ⲉⲣⲉⲧⲉⲛⲉⲁⲣⲉϩ ⲉⲛⲓϫⲓⲛⲁⲣⲉϩ ⲛⲧⲉ
ⲡϭⲟⲓⲥ ϩⲓⲛⲁ ⲛⲧⲉⲧⲉⲛϣⲧⲉⲙⲙⲟⲩ ⲡⲁⲓⲣⲏϯ ⲅⲁⲣ ⲁϥϩⲟⲛϩⲉⲛ ⲛⲏⲓ ⲛϫⲉ
ⲡϭⲟⲓⲥ
̅ⲏ:̅ⲗⲋ ⲟⲩⲟϩ ⲁϥⲓⲣⲓ ⲛϫⲉ ⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲛⲛⲓⲥⲁϫⲓ ⲧⲏⲣⲟⲩ ⲉⲧⲁ
ⲡϭⲟⲓⲥ ⲟⲩⲁϩⲥⲁϩⲛⲓ ⲙⲙⲱⲟⲩ ⲙⲙⲱⲩⲥⲏⲥ
̅ⲑ:̅ⲁ ⲟⲩⲟϩ ⲁⲥϣⲱⲡⲓ ϧⲉⲛ ⲡⲓⲉϩⲟⲟⲩ ⲙⲙⲁϩⲏ ⲁϥⲙⲟⲩϯ ⲛϫⲉ ⲙⲱⲩⲥⲏⲥ
ⲉⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲛⲉⲙ ⲛⲓϧⲉⲗⲗⲟⲓ ⲛⲧⲉ ⲡⲓⲥⲣⲁⲏⲗ
̅ⲑ:̅ⲃ ⲟⲩⲟϩ ⲁϥϫⲟⲥ ⲛⲁⲁⲣⲱⲛ ϫⲉ ϭⲓ ⲛⲁⲕ ⲛⲟⲩⲙⲁⲥⲓ ⲉⲃⲟⲗ ϧⲉⲛ
ϩⲁⲛⲉϩⲱⲟⲩ ⲉⲑⲃⲉ ⲫⲛⲟⲃⲓ ⲛⲉⲙ ⲟⲩⲱⲓⲗⲓ ⲉⲩϭⲗⲓⲗ ⲛϫⲟϥϫⲉϥ ⲉϥⲟⲓ
ⲛⲁⲧⲁϭⲛⲓ ⲟⲩⲟϩ ⲁⲛⲓⲧⲟⲩ ⲉϧⲟⲩⲛ ⲙⲡⲉⲙⲑⲟ ⲙⲡϭⲟⲓⲥ
̅ⲑ:̅ⲅ ⲟⲩⲟϩ ⲛⲓϧⲉⲗⲗⲟⲓ ⲛⲧⲉ ⲡⲓⲥⲣⲁⲏⲗ ⲉⲕⲉⲥⲁϫⲓ ⲛⲉⲙⲱⲟⲩ ⲉⲕϫⲱ ⲙⲙⲟⲥ ϫⲉ
ϭⲓ ⲛⲟⲩⲃⲁⲣⲏⲓⲧ ⲉⲃⲟⲗ ϧⲉⲛ ϩⲁⲛⲃⲁⲉⲙⲡⲓ ⲉⲑⲃⲉ ⲫⲛⲟⲃⲓ ⲛⲉⲙ ⲟⲩⲱⲓⲗⲓ
ⲉⲩϭⲗⲓⲗ ⲛϫⲟϥϫⲉϥ ⲛⲉⲙ ⲟⲩⲙⲁⲥⲓ ⲛⲉⲙ ⲟⲩϩⲓⲏⲃ ⲉⲁϥⲉⲣ ⲟⲩⲣⲟⲙⲡⲓ
ⲉⲩⲟⲩⲧⲁϩ ⲉϥϣⲏⲡ ⲉϥⲟⲓ ⲛⲁⲧⲁϭⲛⲓ
̅ⲑ:̅ⲇ ⲛⲉⲙ ⲟⲩⲙⲁⲥⲓ ⲉⲃⲟⲗ ϧⲉⲛ ϩⲁⲛⲉϩⲱⲟⲩ ⲛⲉⲙ ⲟⲩⲱⲓⲗⲓ ⲉⲩϣⲟⲩϣⲱⲟⲩϣⲓ
ⲛⲛⲟϩⲉⲙ ⲙⲡⲉⲙⲑⲟ ⲙⲡϭⲟⲓⲥ ⲛⲉⲙ ⲟⲩⲥⲉⲙⲓⲇⲁⲗⲓⲟⲛ ⲉϥⲟⲩⲟϣⲉⲙ ϧⲉⲛ ⲟⲩⲛⲉϩ
ϫⲉ ⲛϩⲣⲏⲓ ϧⲉⲛ ⲫⲟⲟⲩ ⲡϭⲟⲓⲥ ϥⲛⲁⲟⲩⲟⲛϩϥ ϧⲉⲛ ⲑⲏⲛⲟⲩ
̅ⲑ:̅ⲉ ⲟⲩⲟϩ ⲁⲩϭⲓ ⲕⲁⲧⲁ ⲫⲣⲏϯ ⲉⲧⲁϥϩⲟⲛϩⲉⲛ ⲉⲧⲟⲧⲟⲩ ⲛϫⲉ ⲙⲱⲩⲥⲏⲥ
ⲙⲡⲉⲙⲑⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲟⲩⲟϩ ⲁⲥⲓ ⲉϧⲟⲩⲛ ⲛϫⲉ
ϯⲥⲩⲛⲁⲅⲱⲅⲏ ⲧⲏⲣⲥ ⲟⲩⲟϩ ⲁⲥⲟϩⲓ ⲉⲣⲁⲧⲥ ⲙⲡⲉⲙⲑⲟ ⲙⲡϭⲟⲓⲥ
̅ⲑ:̣̅ⲋ ⲟⲩⲟϩ ⲡⲉϫⲉ ⲙⲱⲩⲥⲏⲥ ϫⲉ ⲫⲁⲓ ⲡⲉ ⲡⲥⲁϫⲓ ⲉⲧⲁ ⲡϭⲟⲓⲥ ϫⲟϥ ⲁⲣⲓⲧϥ
ⲟⲩⲟϩ ϥⲛⲁⲟⲩⲱⲛϩ ϧⲉⲛ ⲑⲏⲛⲟⲩ ⲛϫⲉ ⲟⲩⲱⲟⲩ ⲛⲧⲉ ⲡϭⲟⲓⲥ
̅ⲑ:̅ⲍ ⲟⲩⲟϩ ⲡⲉϫⲉ ⲙⲱⲩⲥⲏⲥ ⲛⲁⲁⲣⲱⲛ ϫⲉ ϧⲟⲕⲕ ϧⲁⲧⲉⲛ ⲡⲓⲙⲁⲛⲉⲣϣⲱⲟⲩϣⲓ
ⲟⲩⲟϩ ⲙⲁⲑⲁⲙⲓⲟ ⲙⲫⲏ ⲉⲧⲉ ⲉⲑⲃⲉ ⲫⲛⲟⲃⲓ ⲛⲉⲙ ⲉⲑⲃⲉ ⲡⲉⲕϭⲗⲓⲗ ⲛϫⲟϥϫⲉϥ
ⲟⲩⲟϩ ⲧⲱⲃϩ ⲉϩⲣⲏⲓ ⲉϫⲉⲛ ⲡⲉⲕⲭⲱ ⲉⲃⲟⲗ ⲛⲉⲙ ⲡⲉⲕⲏⲓ ⲟⲩⲟϩ ⲙⲁⲑⲁⲙⲓⲟ
ⲛⲛⲓⲇⲱⲣⲟⲛ ⲛⲧⲉ ⲡⲉⲕⲗⲁⲟⲥ ⲟⲩⲟϩ ⲧⲱⲃϩ ⲉⲑⲃⲉ ⲡⲟⲩⲭⲱ ⲉⲃⲟⲗ ⲕⲁⲧⲁ
ⲫⲣⲏϯ ⲉⲧⲁϥϩⲟⲛϩⲉⲛ ⲛϫⲉ ⲡϭⲟⲓⲥ
̅ⲑ:̅ⲏ ⲟⲩⲟϩ ⲁϥϧⲱⲛⲧ ⲛϫⲉ ⲁⲁⲣⲱⲛ ϧⲁⲧⲉⲛ ⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ
ⲁϥϧⲟⲗϧⲉⲗ ⲙⲡⲓⲕⲟⲩϫⲓ ⲙⲙⲁⲥⲓ ⲫⲏ ⲉⲧⲁϥⲉⲛϥ ⲉⲑⲃⲉ ⲫⲛⲟⲃⲓ ⲡⲉ
̅ⲑ:̅ⲑ ⲟⲩⲟϩ ⲁⲩⲓⲛⲓ ⲛϫⲉ ⲛⲉⲛϣⲏⲣⲓ ⲛⲁⲁⲣⲱⲛ ⲙⲡⲓⲥⲛⲟϥ ϩⲁⲣⲟϥ ⲟⲩⲟϩ ⲁϥⲥⲱⲡ
ⲙⲡⲉϥⲧⲏⲃ ϧⲉⲛ ⲡⲓⲥⲛⲟϥ ⲟⲩⲟϩ ⲁϥⲧⲁⲗⲟ ⲉϫⲉⲛ ⲛⲉⲛⲧⲁⲡ ⲛⲧⲉ
ⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ ⲡⲓⲥⲛⲟϥ ⲁϥϫⲟϣϥ ⲉϫⲉⲛ ϯⲃⲁⲥⲓⲥ ⲛⲧⲉ
ⲡⲓⲙⲁⲛⲉⲣϣⲱⲟⲩϣⲓ
̅ⲑ:̅ⲓ ⲟⲩⲟϩ ⲡⲓⲱⲧ ⲛⲉⲙ ⲡⲓϭⲗⲱⲧ ⲃ ⲛⲉⲙ ⲡⲓⲗⲟⲃⲟⲥ ⲉⲧⲭⲏ ϩⲓϫⲉⲛ
ⲡⲓϩⲩⲡⲁⲣ ⲛⲧⲉ ⲫⲏ ⲉⲧⲉ ⲉⲑⲃⲉ ⲫⲛⲟⲃⲓ ⲡⲉ ⲟⲩⲟϩ ⲉϥⲉⲛⲟⲩ ⲉϩⲣⲏⲓ ⲉϫⲉⲛ
ⲡⲓⲙⲁⲛⲉⲣϣⲱⲟⲩϣⲓ ⲙⲫⲣⲏϯ ⲉⲧⲁ ⲡϭⲟⲓⲥ ⲟⲩⲁϩⲥⲁϩⲛⲓ ⲉⲧⲟⲧϥ ⲙⲙⲱⲩⲥⲏⲥ
̅ⲑ:̅ⲓⲁ ⲟⲩⲟϩ ⲛⲓⲁϥⲟⲩⲓ ⲛⲉⲙ ⲛⲓⲃⲏⲣⲥⲁ ⲁϥⲣⲟⲕϩⲟⲩ ϧⲉⲛ ⲟⲩⲭⲣⲱⲙ ⲥⲁⲃⲟⲗ
ⲛϯⲡⲁⲣⲉⲙⲃⲟⲗⲏ
̅ⲑ:̅ⲓⲃ ⲟⲩⲟϩ ⲁϥϧⲟⲗϧⲉⲗ ⲛⲛⲓϭⲗⲓⲗ ⲛϫⲟϥϫⲉϥ ⲟⲩⲟϩ ⲁ ⲛⲉⲛϣⲏⲣⲓ ⲛⲁⲁⲣⲱⲛ
ⲁⲩⲓⲛⲓ ⲙⲡⲓⲥⲛⲟϥ ⲟⲩⲟϩ ⲁⲩϫⲱϣ ϧⲁⲧⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉϥⲕⲱϯ
̅ⲑ:̅ⲓⲅ ⲟⲩⲟϩ ⲡⲓϭⲗⲓⲗ ⲛϫⲟϥϫⲉϥ ⲁⲩⲉⲛϥ ⲛⲁϥ ⲕⲁⲧⲁ ⲛⲉϥⲙⲉⲗⲟⲥ ⲛⲑⲟϥ ⲛⲉⲙ
ϯⲁⲫⲉ ⲟⲩⲟϩ ⲁϥⲧⲁⲗⲱⲟⲩ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ
̅ⲑ:̅ⲓⲇ ⲟⲩⲟϩ ϯⲛⲉϫⲓ ⲛⲉⲙ ⲛⲓϭⲁⲗⲁⲩϫ ⲁϥⲓⲁⲩ ⲉⲃⲟⲗ ϧⲉⲛ ⲟⲩⲙⲱⲟⲩ ⲟⲩⲟϩ
ⲁϥⲧⲁⲗⲱⲟⲩ ⲉϫⲉⲛ ⲛⲓϭⲗⲓⲗ ⲛϫⲟϥϫⲉϥ ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ
̅ⲑ:̅ⲓⲉ ⲟⲩⲟϩ ⲁϥⲓⲛⲓ ⲉϧⲟⲩⲛ ⲛⲛⲓⲇⲱⲣⲟⲛ ⲛⲧⲉ ⲡⲓⲗⲁⲟⲥ ⲟⲩⲟϩ ⲁϥϭⲓ
ⲙⲡⲓⲃⲁⲉⲙⲡⲓ ⲫⲏ ⲉⲧⲉ ⲉⲑⲃⲉ ⲫⲛⲟⲃⲓ ⲙⲡⲓⲗⲁⲟⲥ ⲟⲩⲟϩ ⲁϥϧⲉⲗϧⲱⲗϥ ⲟⲩⲟϩ
ⲁϥⲧⲟⲩⲃⲟϥ ⲙⲫⲣⲏϯ ⲟⲛ ⲙⲫⲏ ⲉⲧⲉϣⲟⲣⲡ
̅ⲑ:̅ⲓⲋ ⲟⲩⲟϩ ⲁϥⲓⲛⲓ ⲉϧⲟⲩⲛ ⲙⲡⲓϭⲗⲓⲗ ⲛⲧⲉ ϫⲟϥϫⲉϥ ⲟⲩⲟϩ ⲁϥⲑⲁⲙⲓⲟϥ
ⲙⲫⲣⲏϯ ⲉⲧⲉⲥϣⲉ
̅ⲑ:̅ⲓⲍ ⲟⲩⲟϩ ⲁϥⲓⲛⲓ ⲉϧⲟⲩⲛ ⲙⲡⲓϣⲟⲩϣⲱⲟⲩϣⲓ ⲟⲩⲟϩ ⲁϥⲙⲟϩ ⲛⲛⲉϥϫⲓϫ
ⲉⲃⲟⲗ ⲙⲙⲟϥ ⲟⲩⲟϩ ⲁϥⲧⲁⲗⲟ ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲭⲱⲣⲓⲥ
ⲡⲓϭⲗⲓⲗ ⲛⲧⲉ ϣⲱⲣⲡ
̅ⲑ:̅ⲓⲏ ⲟⲩⲟϩ ⲁϥϧⲟⲗϧⲉⲗ ⲙⲡⲓⲙⲁⲥⲓ ⲛⲉⲙ ⲡⲓⲱⲓⲗⲓ ⲛⲧⲉ ⲡⲓϣⲟⲩϣⲱⲟⲩϣⲓ
ⲙⲡⲓⲟⲩϫⲁⲓ ⲫⲏ ⲉⲧⲉ ⲛⲧⲉ ⲡⲓⲗⲁⲟⲥ ⲟⲩⲟϩ ⲁ ⲛⲉⲛϣⲏⲣⲓ ⲛⲁⲁⲣⲱⲛ ⲁⲩⲓⲛⲓ
ⲙⲡⲓⲥⲛⲟϥ ϩⲁⲣⲟϥ ⲟⲩⲟϩ ⲁϥϫⲟϣϥ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉϥⲕⲱϯ
̅ⲑ:̅ⲓⲑ ⲛⲉⲙ ⲡⲓⲱⲧ ⲉⲧⲉ ⲉⲃⲟⲗ ϧⲉⲛ ⲡⲓⲙⲁⲥⲓ ⲛⲉⲙ ⲉⲃⲟⲗ ϧⲉⲛ ⲡⲓⲱⲓⲗⲓ ϯϯⲡⲓ
ⲛⲉⲙ ⲡⲓⲱⲧ ⲉⲧϩⲱⲃⲥ ⲉⲃⲟⲗ ⲉϫⲉⲛ ϯⲛⲉϫⲓ ⲛⲉⲙ ⲡⲓϭⲗⲱⲧ ⲃ ⲛⲉⲙ ⲡⲓⲱⲧ
ⲉⲧϩⲓϫⲱⲟⲩ ⲛⲉⲙ ⲡⲓⲗⲟⲃⲟⲥ ⲉⲧϩⲓϫⲉⲛ ⲡⲓϩⲏⲡⲁⲣ
̅ⲑ:̅ⲕ ⲟⲩⲟϩ ⲁϥⲧⲁⲗⲟ ⲛⲛⲓⲱⲧ ⲉϫⲉⲛ ϯⲙⲉⲥⲧⲉⲛϩⲏⲧ ⲟⲩⲟϩ ⲁϥⲓⲛⲓ ⲛⲛⲓⲱⲧ
ⲉϩⲣⲏⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ
̅ⲑ:̅ⲕⲁ ⲟⲩⲟϩ ϯⲙⲉⲥⲧⲉⲛϩⲏⲧ ⲛⲉⲙ ⲡⲓϣⲱⲃϣ ⲛⲟⲩⲓⲛⲁⲙ ⲁϥⲟⲗⲟⲩ ⲛϫⲉ
ⲁⲁⲣⲱⲛ ⲉⲩⲫⲱⲣϫ ⲉⲃⲟⲗ ⲙⲡⲉⲙⲑⲟ ⲙⲡϭⲟⲓⲥ ⲕⲁⲧⲁ ⲫⲣⲏϯ ⲉⲧⲁϥⲟⲩⲁϩⲥⲁϩⲛⲓ
ⲉⲧⲟⲧϥ ⲙⲙⲱⲩⲥⲏⲥ
̅ⲑ:̅ⲕⲃ ⲟⲩⲟϩ ⲁⲁⲣⲱⲛ ⲁϥⲫⲱⲣϣ ⲛⲛⲉϥϫⲓϫ ⲉⲃⲟⲗ ⲉϩⲣⲏⲓ ⲉϫⲉⲛ ⲡⲓⲗⲁⲟⲥ
ⲁϥⲥⲙⲟⲩ ⲉⲣⲱⲟⲩ ⲟⲩⲟϩ ⲁϥⲓ ⲉϧⲣⲏⲓ ⲉⲧⲁϥⲓⲣⲓ ⲙⲡⲓϣⲟⲩϣⲱⲟⲩϣⲓ ⲉⲧⲉ ⲉⲑⲃⲉ
ⲫⲛⲟⲃⲓ ⲛⲉⲙ ⲡⲓϭⲗⲓⲗ ⲛϫⲟϥϫⲉϥ ⲛⲉⲙ ⲛⲏ ⲛⲧⲉ ⲡⲓⲛⲟϩⲉⲙ
̅ⲑ:̅ⲕⲅ ⲟⲩⲟϩ ⲁϥⲓ ⲛϫⲉ ⲙⲱⲩⲥⲏⲥ ⲛⲉⲙ ⲁⲁⲣⲱⲛ ⲉϧⲟⲩⲛ ⲉϯⲥⲕⲩⲛⲏ ⲛⲧⲉ
ϯⲙⲉⲧⲙⲉⲑⲣⲉ ⲟⲩⲟϩ ⲉⲧⲁⲩⲓ ⲉⲃⲟⲗ ⲁⲩⲥⲙⲟⲩ ⲉⲡⲓⲗⲁⲟⲥ ⲧⲏⲣϥ ⲟⲩⲟϩ ⲁ
ⲡⲱⲟⲩ ⲙⲡϭⲟⲓⲥ ⲟⲩⲟⲛϩϥ ⲉⲡⲓⲗⲁⲟⲥ ⲧⲏⲣϥ
̅ⲑ:̅ⲕⲇ ⲟⲩⲟϩ ⲁϥⲓ ⲉⲃⲟⲗ ⲛϫⲉ ⲟⲩⲭⲣⲱⲙ ⲉⲃⲟⲗ ϩⲓⲧⲉⲛ ⲡϭⲟⲓⲥ ⲟⲩⲟϩ
ⲁϥⲟⲩⲱⲙ ⲛⲛⲏ ⲉⲧⲭⲏ ϩⲓϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲛⲓϭⲗⲓⲗ ⲛⲉⲙ ⲛⲓⲱⲧ
ⲟⲩⲟϩ ⲁϥⲛⲁⲩ ⲛϫⲉ ⲡⲓⲗⲁⲟⲥ ⲧⲏⲣϥ ⲟⲩⲟϩ ⲁϥⲧⲱⲙⲧ ⲟⲩⲟϩ ⲁⲩϩⲉⲓ ⲉϫⲉⲛ
ⲡⲟⲩϩⲟ
̅ⲓ:̅ⲁ ⲟⲩⲟϩ ⲁⲩⲱⲗⲓ ⲛϫⲉ ⲡϣⲏⲣⲓ ⲃ ⲛⲁⲁⲣⲱⲛ ⲛⲁⲇⲁⲃ ⲛⲉⲙ ⲁⲃⲓⲟⲩⲇ
ⲫⲟⲩⲁⲓ ⲫⲟⲩⲁⲓ ⲛⲧⲉϥϣⲟⲩⲣⲏ ⲟⲩⲟϩ ⲁⲩⲧⲁⲗⲉ ⲭⲣⲱⲙ ⲉϩⲣⲏⲓ ⲉϫⲱⲟⲩ ⲟⲩⲟϩ
ⲁⲩⲧⲁⲗⲉ ⲥⲑⲩⲛⲟⲩϥⲓ ⲉϩⲣⲏⲓ ⲉϫⲱⲟⲩ ⲟⲩⲟϩ ⲁⲩⲓⲛⲓ ⲛⲟⲩⲭⲣⲱⲙ ⲛϣⲉⲙⲙⲟ
ⲉϧⲟⲩⲛ ⲙⲡⲉⲙⲑⲟ ⲙⲡϭⲟⲓⲥ ⲫⲏ ⲉⲧⲉ ⲙⲡⲉ ⲡϭⲟⲓⲥ ⲟⲩⲁϩⲥⲁϩⲛⲓ ⲛⲱⲟⲩ
̅ⲓ:̅ⲃ ⲟⲩⲟϩ ⲁϥⲓ ⲉⲃⲟⲗ ⲛϫⲉ ⲟⲩⲭⲣⲱⲙ ⲉⲃⲟⲗ ϩⲓⲧⲉⲛ ⲡϭⲟⲓⲥ ⲟⲩⲟϩ
ⲁϥⲟⲩⲟⲙⲟⲩ ⲟⲩⲟϩ ⲁⲩⲙⲟⲩ ⲙⲡⲉⲙⲑⲟ ⲙⲡϭⲟⲓⲥ
̅ⲓ:̅ⲅ ⲟⲩⲟϩ ⲡⲉϫⲉ ⲙⲱⲩⲥⲏⲥ ⲛⲁⲁⲣⲱⲛ ϫⲉ ⲫⲁⲓ ⲡⲉ ⲡⲓⲥⲁϫⲓ ⲫⲏ ⲉⲧⲁ
ⲡϭⲟⲓⲥ ϫⲟϥ ⲉϥϫⲱ ⲙⲙⲟⲥ ϫⲉ ϯⲛⲁⲧⲟⲩⲃⲟ ϧⲉⲛ ⲛⲏ ⲉⲧϧⲉⲛⲧ ⲉⲣⲟⲓ ⲟⲩⲟϩ
ⲉⲓⲉϭⲓⲱⲟⲩ ϧⲉⲛ ϯⲥⲩⲛⲁⲅⲱⲅⲏ ⲧⲏⲣⲥ ⲟⲩⲟϩ ⲁ ⲡϩⲏⲧ ⲛⲁⲁⲣⲱⲛ ⲙⲕⲁϩ
̅ⲓ:̅ⲇ ⲟⲩⲟϩ ⲁϥⲙⲟⲩϯ ⲛϫⲉ ⲙⲱⲩⲥⲏⲥ ⲉⲙⲓⲍⲁⲏⲗ ⲛⲉⲙ ⲉⲗⲓⲥⲁⲫⲁⲛ ⲛⲉⲛϣⲏⲣⲓ
ⲛⲟⲍⲓⲏⲗ ⲛⲉⲛϣⲏⲣⲓ ⲙⲡⲥⲟⲛ ⲙⲫⲓⲱⲧ ⲛⲁⲁⲣⲱⲛ ⲟⲩⲟϩ ⲡⲉϫⲁϥ ⲛⲱⲟⲩ ϫⲉ
ⲁⲙⲱⲓⲛⲓ ⲁⲗⲓ ⲛⲉⲧⲉⲛⲥⲛⲏⲟⲩ ⲉⲃⲟⲗ ⲙⲡⲉⲙⲑⲟ ⲛⲛⲏ ⲉⲑⲟⲩⲁⲃ ⲥⲁⲃⲟⲗ
ⲛϯⲡⲁⲣⲉⲙⲃⲟⲗⲏ
̅ⲓ:̅ⲉ ⲟⲩⲟϩ ⲁⲩⲓ ⲁⲩⲟⲗⲟⲩ ϧⲉⲛ ⲛⲟⲩϩⲃⲱⲥ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ ⲕⲁⲧⲁ
ⲫⲣⲏϯ ⲉⲧⲁ ⲙⲱⲩⲥⲏⲥ ϫⲟⲥ
̅ⲓ:̣̅ⲋ ⲟⲩⲟϩ ⲡⲉϫⲉ ⲙⲱⲩⲥⲏⲥ ⲛⲁⲁⲣⲱⲛ ⲛⲉⲙ ⲉⲗⲉⲁⲍⲁⲣ ⲛⲉⲙ ⲓⲑⲁⲙⲁⲣ
ⲛⲉϥϣⲏⲣⲓ ϫⲉ ⲛⲛⲉⲧⲉⲛⲱⲗⲓ ⲛⲛⲓⲕⲩⲇⲁⲣⲓⲥ ⲉⲃⲟⲗ ϩⲓϫⲉⲛ ⲛⲉⲧⲉⲛⲁⲫⲉ ⲟⲩⲟϩ
ⲛⲛⲉⲧⲉⲛϩⲱⲃⲥ ⲛⲛⲉⲧⲉⲛⲫⲁϧⲟⲩ ϩⲓⲛⲁ ϫⲉ ⲛⲛⲉⲧⲉⲛⲙⲟⲩ ⲟⲩⲟϩ ⲛⲛⲉ
ⲟⲩϫⲱⲛⲧ ϣⲱⲡⲓ ϧⲉⲛ ϯⲥⲩⲛⲁⲅⲱⲅⲏ ⲧⲏⲣⲥ ⲛⲉⲧⲉⲛⲥⲛⲏⲟⲩ ⲡⲏⲓ ⲧⲏⲣϥ
ⲙⲡⲓⲥⲣⲁⲏⲗ ⲙⲁⲣⲟⲩⲣⲓⲙⲓ ⲉⲡⲓⲣⲱⲕϩ ⲉⲧⲁⲩⲣⲱⲕϩ ⲙⲙⲟϥ ⲛⲧⲉⲛ ⲡϭⲟⲓⲥ
̅ⲓ:̅ⲍ ⲟⲩⲟϩ ⲙⲡⲉⲧⲉⲛⲓ ⲥⲁⲃⲟⲗ ⲙⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ϫⲉ
ⲛⲛⲉⲧⲉⲛⲙⲟⲩ ⲡⲓⲛⲉϩ ⲅⲁⲣ ⲛⲧⲉ ⲡⲓⲑⲱϩⲥ ⲉⲧⲉ ⲉⲃⲟⲗ ϩⲓⲧⲉⲛ ⲡϭⲟⲓⲥ ⲉϥⲉⲓ
ⲉϫⲉⲛ ⲑⲏⲛⲟⲩ ⲟⲩⲟϩ ⲁⲩⲓⲣⲓ ⲕⲁⲧⲁ ⲡⲥⲁϫⲓ ⲙⲙⲱⲩⲥⲏⲥ
̅ⲓ:̅ⲏ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲁⲁⲣⲱⲛ ⲉϥϫⲱ ⲙⲙⲟⲥ
̅ⲓ:̅ⲑ ϫⲉ ⲟⲩⲏⲣⲡ ⲛⲉⲙ ⲟⲩⲥⲓⲕⲉⲣⲁ ⲙⲡⲉⲧⲉⲛⲥⲱⲟⲩ ⲛⲑⲟⲕ ⲛⲉⲙ ⲛⲉⲕϣⲏⲣⲓ
ⲛⲉⲙⲁⲕ ⲉⲣⲉⲧⲉⲛⲛⲁϣⲉ ⲉϧⲟⲩⲛ ⲉϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲓⲉ
ⲉⲣⲉⲧⲉⲛⲛⲁϧⲱⲛⲧ ⲉϧⲟⲩⲛ ⲉⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ ⲛⲛⲉⲧⲉⲛⲙⲟⲩ
ⲟⲩⲛⲟⲙⲓⲙⲟⲛ ⲛⲉⲛⲉϩ ⲉⲛⲉⲧⲉⲛϫⲱⲟⲩ
̅ⲓ:̅ⲓ ⲉⲟⲩⲱϯ ⲉⲃⲟⲗ ⲟⲩⲧⲉ ⲛⲏ ⲉⲑⲟⲩⲁⲃ ⲛⲉⲙ ⲛⲏ ⲉⲧⲥⲟϥ ⲛⲉⲙ ⲟⲩⲧⲉ ⲛⲏ
ⲉⲧϭⲁϧⲉⲙ ⲛⲉⲙ ⲟⲩⲧⲉ ⲛⲏ ⲉⲧⲧⲟⲩⲃⲏⲟⲩⲧ
̅ⲓ:̅ⲓⲁ ⲛⲉⲙ ⲉϯⲥⲃⲱ ⲛⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲛⲛⲓⲛⲟⲙⲓⲙⲟⲛ ⲧⲏⲣⲟⲩ ⲛⲏ ⲉⲧⲁ
ⲡϭⲟⲓⲥ ⲥⲁϫⲓ ⲙⲙⲱⲟⲩ ⲉⲃⲟⲗ ϩⲓⲧⲉⲛ ⲧϫⲓϫ ⲙⲙⲱⲩⲥⲏⲥ
̅ⲓ:̅ⲓⲃ ⲟⲩⲟϩ ⲡⲉϫⲉ ⲙⲱⲩⲥⲏⲥ ⲛⲁⲁⲣⲱⲛ ⲛⲉⲙ ⲉⲗⲉⲁⲍⲁⲣ ⲛⲉⲙ ⲓⲑⲁⲙⲁⲣ
ⲛⲉϥϣⲏⲣⲓ ⲉⲧⲁⲩⲥⲱϫⲡ ϫⲉ ϭⲓ ⲛⲟⲩϣⲟⲩϣⲱⲟⲩϣⲓ ⲛⲥⲱϫⲡ ⲉⲃⲟⲗ ϧⲉⲛ
ⲛⲓⲟⲩⲧⲁϩ ⲉⲧϣⲏⲡ ⲛⲧⲉⲛ ⲡϭⲟⲓⲥ ⲉⲣⲉⲧⲉⲛⲉⲟⲩⲱⲙ ⲛϩⲁⲛⲁⲧⲕⲱⲃ ϧⲁⲧⲉⲛ
ⲡⲓⲙⲁⲛⲉⲣϣⲱⲟⲩϣⲓ ⲛⲏ ⲉⲑⲟⲩⲁⲃ ⲛⲧⲉ ⲛⲉⲑⲟⲩⲁⲃ ⲛⲉ
̅ⲓ:̅ⲓⲅ ⲟⲩⲟϩ ⲉⲣⲉⲧⲉⲛⲉⲟⲩⲟⲙϥ ϧⲉⲛ ⲟⲩⲙⲁ ⲉϥⲟⲩⲁⲃ ⲟⲩⲛⲟⲙⲓⲙⲟⲛ ⲛⲁⲕ ⲡⲉ
ⲟⲩⲟϩ ⲟⲩⲛⲟⲙⲓⲙⲟⲛ ⲛⲛⲉⲕϣⲏⲣⲓ ⲡⲉ ⲫⲁⲓ ⲉⲃⲟⲗ ϧⲉⲛ ⲛⲓⲟⲩⲧⲁϩ ⲉⲧϣⲏⲡ
ⲛⲧⲉⲛ ⲡϭⲟⲓⲥ ⲡⲁⲓⲣⲏϯ ⲅⲁⲣ ⲁϥϩⲟⲛϩⲉⲛ ⲛⲏⲓ ⲛϫⲉ ⲡϭⲟⲓⲥ
̅ⲓ:̅ⲓⲇ ⲛⲉⲙ ϯⲙⲉⲥⲧⲉⲛϩⲏⲧ ⲛⲧⲉ ⲡⲓⲫⲱⲣϫ ⲉⲃⲟⲗ ⲛⲉⲙ ⲡⲓϣⲱⲃϣ ⲛⲧⲉ
ⲡⲓⲟⲩⲱϯ ⲉⲃⲟⲗ ⲉⲣⲉⲧⲉⲛⲉⲟⲩⲟⲙⲟⲩ ϧⲉⲛ ⲟⲩⲙⲁ ⲉϥⲟⲩⲁⲃ ⲛⲑⲟⲕ ⲛⲉⲙ ⲛⲉⲕϣⲏⲣⲓ
ⲛⲉⲙ ⲡⲉⲕⲏⲓ ⲛⲉⲙⲁⲕ ⲉⲧⲁⲩⲧⲏⲓϥ ⲅⲁⲣ ⲛⲁⲕ ⲛⲟⲩⲛⲟⲙⲓⲙⲟⲛ ⲛⲉⲙ ⲟⲩⲛⲟⲙⲓⲙⲟⲛ
ⲛⲛⲉⲕϣⲏⲣⲓ ⲉⲃⲟⲗ ϧⲉⲛ ⲛⲓϣⲟⲩϣⲱⲟⲩϣⲓ ⲛⲛⲟϩⲉⲙ ⲛⲧⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ
̅ⲓ:̅ⲓⲉ ⲡⲓϣⲱⲃϣ ⲛⲧⲉ ⲡⲓⲟⲩⲱϯ ⲉⲃⲟⲗ ⲛⲉⲙ ϯⲙⲉⲥⲧⲉⲛϩⲏⲧ ⲛⲧⲉ ⲡⲓⲫⲱⲣϫ
ⲉⲃⲟⲗ ⲉϫⲉⲛ ⲛⲓⲟⲩⲧⲁϩ ⲉⲧϣⲏⲡ ⲛⲧⲉ ⲛⲓⲱⲧ ⲉⲩⲉⲉⲛⲟⲩ ⲉϧⲟⲩⲛ ⲉⲩⲫⲱⲣϫ
ⲉⲃⲟⲗ ⲙⲡⲉⲙⲑⲟ ⲙⲡϭⲟⲓⲥ ⲟⲩⲟϩ ⲉϥⲉϣⲱⲡⲓ ⲛⲁⲕ ⲛⲉⲙ ⲛⲉⲕϣⲏⲣⲓ ⲛⲉⲙ
ⲛⲉⲕϣⲉⲣⲓ ⲛⲉⲙⲁⲕ ⲛⲟⲩⲛⲟⲙⲓⲙⲟⲛ ϣⲁ ⲉⲛⲉϩ ⲙⲫⲣⲏϯ ⲉⲧⲁ ⲡϭⲟⲓⲥ ϩⲟⲛϩⲉⲛ
ⲉⲧⲟⲧϥ ⲙⲙⲱⲩⲥⲏⲥ
̅ⲓ:̅ⲓⲋ ⲟⲩⲟϩ ⲡⲓⲃⲁⲉⲙⲡⲓ ⲉⲧⲉ ⲉⲑⲃⲉ ⲫⲛⲟⲃⲓ ϧⲉⲛ ⲟⲩⲕⲱϯ ⲁϥⲕⲱϯ ⲛⲥⲱϥ
ⲛϫⲉ ⲙⲱⲩⲥⲏⲥ ⲟⲩⲟϩ ⲫⲁⲓ ⲛⲉ ⲁⲩⲣⲟⲕϩϥ ⲡⲉ ⲟⲩⲟϩ ⲁϥϫⲱⲛⲧ ⲛϫⲉ
ⲙⲱⲩⲥⲏⲥ ⲉϫⲉⲛ ⲉⲗⲉⲁⲍⲁⲣ ⲛⲉⲙ ⲓⲑⲁⲙⲁⲣ ⲛⲉⲛϣⲏⲣⲓ ⲛⲁⲁⲣⲱⲛ ⲛⲏ
ⲉⲧⲁⲩⲥⲱϫⲡ ⲉϥϫⲱ ⲙⲙⲟⲥ
̅ⲓ:̅ⲓⲍ ϫⲉ ⲉⲑⲃⲉⲟⲩ ⲙⲡⲉⲧⲉⲛⲟⲩⲱⲙ ⲙⲫⲏ ⲉⲧⲉ ⲉⲑⲃⲉ ⲫⲛⲟⲃⲓ ϧⲉⲛ ⲟⲩⲙⲁ
ⲉϥⲟⲩⲁⲃ ϫⲉ ⲟⲩⲏⲓ ⲅⲁⲣ ⲛⲉⲑⲟⲩⲁⲃ ⲛⲧⲉ ⲛⲉⲑⲟⲩⲁⲃ ⲛⲉ ⲫⲁⲓ ⲁϥⲧⲏⲓϥ
ⲛⲱⲧⲉⲛ ⲉⲟⲩⲟⲙϥ ϩⲓⲛⲁ ⲛⲧⲉⲧⲉⲛⲱⲗⲓ ⲙⲫⲛⲟⲃⲓ ⲛⲧⲉ ϯⲥⲩⲛⲁⲅⲱⲅⲏ ⲟⲩⲟϩ
ⲛⲧⲉⲧⲉⲛⲧⲃϩ ⲉϩⲣⲏⲓ ⲉϫⲱⲟⲩ ⲙⲡⲉⲙⲑⲟ ⲙⲡϭⲟⲓⲥ
̅ⲓ:̅ⲓⲏ ⲙⲡⲟⲩⲓⲛⲓ ⲅⲁⲣ ⲉⲃⲟⲗ ϧⲉⲛ ⲡⲟⲩⲥⲛⲟϥ ⲉϧⲟⲩⲛ ⲉⲡⲉⲑⲟⲩⲁⲃ ⲙⲡⲉⲙⲑⲟ
ⲙⲡⲉϥϩⲟ ⲉⲣⲉⲧⲉⲛⲉⲟⲩⲟⲙϥ ϧⲉⲛ ⲟⲩⲙⲁ ⲉϥⲟⲩⲁⲃ ⲙⲫⲣⲏϯ ⲉⲧⲁϥⲟⲩⲁϩⲥⲁϩⲛⲓ
ⲛⲏⲓ ⲛϫⲉ ⲡϭⲟⲓⲥ
̅ⲓ:̅ⲓⲑ ⲟⲩⲟϩ ⲁϥⲥⲁϫⲓ ⲛϫⲉ ⲁⲁⲣⲱⲛ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ ϫⲉ
ⲓⲥϫⲉⲛ ⲫⲟⲟⲩ ⲁⲩⲓⲛⲓ ⲉϧⲟⲩⲛ ⲛⲛⲏ ⲉⲧⲉ ⲉⲑⲃⲉ ⲡⲟⲩⲛⲟⲃⲓ ⲛⲉⲙ ⲛⲟⲩϭⲗⲓⲗ
ⲛϫⲟϥϫⲉϥ ⲙⲡⲉⲙⲑⲟ ⲙⲡϭⲟⲓⲥ ⲟⲩⲟϩ ⲁ ϩⲁⲛⲟⲩⲟⲛ ⲙⲡⲁⲓⲣⲏϯ ϫⲉⲙⲧ ⲟⲩⲟϩ
ⲛⲧⲁⲟⲩⲱⲙ ⲙⲫⲏ ⲉⲧⲉ ⲉⲑⲃⲉ ⲫⲛⲟⲃⲓ ⲙⲫⲟⲟⲩ ⲙⲏ ϥⲛⲁϣⲱⲡⲓ ⲉϥⲣⲁⲛⲁϥ
ⲙⲡϭⲟⲓⲥ
̅ⲓ:̅ⲕ ⲟⲩⲟϩ ⲁϥⲥⲱⲧⲉⲙ ⲛϫⲉ ⲙⲱⲩⲥⲏⲥ ⲉⲡⲓϩⲱⲃ ⲟⲩⲟϩ ⲁϥⲣⲁⲛⲁϥ
̅ⲓⲁ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲛⲉⲙ ⲁⲁⲣⲱⲛ ⲉϥϫⲱ ⲙⲙⲟⲥ
̅ⲓⲁ:̅ⲃ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲉⲣⲉⲧⲉⲛϫⲱ ⲙⲙⲟⲥ ϫⲉ ⲛⲁⲓ ⲛⲉ
ⲛⲓⲧⲉⲃⲛⲱⲟⲩⲓ ⲉⲣⲉⲧⲉⲛⲉⲟⲩⲟⲙⲟⲩ ⲉⲃⲟⲗ ϧⲉⲛ ⲛⲓⲧⲉⲃⲛⲱⲟⲩⲓ ⲧⲏⲣⲟⲩ ⲉⲧϩⲓϫⲉⲛ
ⲡⲕⲁϩⲓ
̅ⲓⲁ:̅ⲅ ⲧⲉⲃⲛⲏ ⲛⲓⲃⲉⲛ ⲉⲧⲉ ⲛⲉϥϭⲟⲡ ⲫⲟⲣϫ ⲟⲩⲟϩ ⲉⲧⲱⲗⲓ ⲛⲛⲓⲓⲉⲃ ⲛⲧⲉ
ⲛⲉϥϭⲟⲡ ⲉⲧⲫⲟⲣϫ ⲟⲩⲟϩ ⲉϥⲓⲛⲓ ⲛⲟⲩⲥⲁⲑⲙⲓ ⲉⲡϣⲱⲓ ϧⲉⲛ ⲣⲱϥ ⲛⲁⲓ
ⲉⲣⲉⲧⲉⲛⲛⲁⲟⲩⲟⲙⲟⲩ
̅ⲓⲁ:̅ⲇ ⲡⲗⲏⲛ ⲛⲁⲓ ⲛⲛⲉⲧⲉⲛⲟⲩⲱⲙ ⲉⲃⲟⲗ ⲛϧⲏⲧⲟⲩ ⲉⲃⲟⲗ ϧⲉⲛ ⲛⲏ ⲉⲧⲓⲛⲓ
ⲛⲟⲩⲥⲁⲑⲙⲓ ⲉⲡϣⲱⲓ ⲛⲉⲙ ⲉⲃⲟⲗ ϧⲉⲛ ⲛⲏ ⲉⲧⲉ ⲛⲟⲩϭⲟⲡ ⲫⲟⲣϫ ⲟⲩⲟϩ
ⲉⲧⲱⲗⲓ ⲛⲛⲟⲩⲓⲉⲃ ⲡⲓϫⲁⲙⲟⲩⲗ ϫⲉ ϥⲓⲛⲓ ⲛⲟⲩⲥⲁⲑⲙⲓ ⲉⲡϣⲱⲓ ⲟⲩⲟϩ ϥⲫⲱⲣϫ
ⲁⲛ ⲛⲛⲓϭⲟⲡ ⲛⲧⲉ ⲣⲁⲧϥ ⲫⲁⲓ ϥϭⲁϧⲉⲙ ⲛⲱⲧⲉⲛ
̅ⲓⲁ:̣̅ⲋ ⲟⲩⲟϩ ⲡⲓⲭⲩⲣⲟⲅⲗⲩⲗⲗⲓⲟⲛ ϫⲉ ϥⲓⲛⲓ ⲛⲟⲩⲥⲁⲑⲙⲓ ⲉⲡϣⲱⲓ ⲛϫⲉ ⲫⲁⲓ
ⲟⲩⲟϩ ⲛⲓϭⲟⲡ ⲛⲧⲉ ⲣⲁⲧϥ ⲫⲟⲣϫ ⲁⲛ ⲫⲁⲓ ϥϭⲁϧⲉⲙ ⲛⲱⲧⲉⲛ
̅ⲓⲁ:̅ⲉ ⲟⲩⲟϩ ⲡⲓⲣⲁⲧⲫⲁⲧ ϫⲉ ⲫⲁⲓ ϥⲓⲛⲓ ⲛⲟⲩⲥⲁⲑⲙⲓ ⲉⲡϣⲱⲓ ⲟⲩⲟϩ ⲛⲓϭⲟⲡ
ⲛⲧⲉ ⲣⲁⲧϥ ⲫⲟⲣϫ ⲁⲛ ⲫⲁⲓ ϥϭⲁϧⲉⲙ ⲛⲱⲧⲉⲛ
̅ⲓⲁ:̅ⲍ ⲟⲩⲟϩ ⲡⲓⲣⲓⲣ ϫⲉ ⲛⲓϭⲟⲡ ⲛⲧⲉ ⲣⲁⲧϥ ⲫⲟⲣϫ ⲟⲩⲟϩ ϥⲱⲗⲓ ⲛⲛⲉϥⲓⲉⲃ
ⲟⲩⲟϩ ⲫⲁⲓ ϥⲓⲛⲓ ⲛⲟⲩⲥⲁⲑⲙⲓ ⲉⲡϣⲱⲓ ⲁⲛ ⲫⲁⲓ ϥϭⲁϧⲉⲙ ⲛⲱⲧⲉⲛ
̅ⲓⲁ:̅ⲏ ⲛⲛⲉⲧⲉⲛⲟⲩⲱⲙ ⲇⲉ ⲉⲃⲟⲗ ϧⲉⲛ ⲛⲟⲩⲁϥⲟⲩⲓ ⲟⲩⲇⲉ ⲫⲏ ⲉⲑⲙⲱⲟⲩⲧ
ⲛⲧⲱⲟⲩ ⲛⲛⲉⲧⲉⲛϭⲓ ⲛⲉⲙⲁϥ ⲛⲁⲓ ϩⲁⲛⲁⲕⲁⲑⲁⲣⲧⲟⲛ ⲛⲱⲧⲉⲛ ⲛⲉ
̅ⲓⲁ:̅ⲑ ⲛⲁⲓ ⲉⲣⲉⲧⲉⲛⲉⲟⲩⲟⲙⲟⲩ ⲉⲃⲟⲗ ϧⲉⲛ ⲛⲏ ⲧⲏⲣⲟⲩ ⲉⲧϧⲉⲛ ⲛⲓⲙⲱⲟⲩ ⲛⲏ
ⲧⲏⲣⲟⲩ ⲉⲧⲉ ⲟⲩⲟⲛ ⲧⲉⲛϩ ⲙⲙⲱⲟⲩ ⲟⲩⲟϩ ϣⲉⲛϥⲓ ϧⲉⲛ ⲛⲓⲙⲱⲟⲩ ⲛⲉⲙ ϧⲉⲛ
ⲛⲓⲁⲙⲁⲓⲟⲩ ⲛⲉⲙ ⲛⲓⲙⲟⲩⲛⲥⲱⲣⲉⲙ ⲛⲁⲓ ⲉⲣⲉⲧⲉⲛⲉⲟⲩⲟⲙⲟⲩ
̅ⲓⲁ:̅ⲓ ⲟⲩⲟϩ ⲛⲏ ⲧⲏⲣⲟⲩ ⲉⲧⲉ ⲙⲙⲟⲛ ⲧⲉⲛϩ ⲙⲙⲱⲟⲩ ⲟⲩⲇⲉ ϣⲉⲛϥⲓ ϧⲉⲛ
ⲛⲓⲙⲱⲟⲩ ⲛⲉⲙ ϧⲉⲛ ⲛⲓⲁⲙⲁⲓⲟⲩ ⲛⲉⲙ ϧⲉⲛ ⲛⲓⲙⲟⲩⲛⲥⲱⲣⲉⲙ ⲉⲃⲟⲗ ϧⲉⲛ ⲛⲏ
ⲧⲏⲣⲟⲩ ⲉⲧⲟⲩⲓⲛⲓ ⲙⲙⲱⲟⲩ ⲉⲃⲟⲗ ϧⲉⲛ ⲛⲓⲙⲱⲟⲩ ⲛⲉⲙ ⲉⲃⲟⲗ ϧⲉⲛ ⲯⲩⲭⲏ
ⲛⲓⲃⲉⲛ ⲉⲧⲟⲛϧ ϧⲉⲛ ⲛⲓⲙⲱⲟⲩ ⲟⲩⲱⲣⲉⲃ ⲡⲉ
̅ⲓⲁ:̅ⲓⲁ ⲉⲩⲉϣⲱⲡⲓ ⲉⲩⲟⲣⲉⲃ ⲛⲧⲉⲛ ⲑⲏⲛⲟⲩ ⲛⲛⲉⲧⲉⲛⲟⲩⲱⲙ ⲉⲃⲟⲗ ϧⲉⲛ
ⲛⲟⲩⲁϥⲓⲟⲩⲓ ⲛⲉⲙ ⲛⲏ ⲉⲧⲙⲱⲟⲩⲧ ⲛⲧⲱⲟⲩ ⲉⲩⲉϣⲱⲡⲓ ⲉⲩⲥⲟϥ ⲛⲱⲧⲉⲛ
̅ⲓⲁ:̅ⲓⲃ ⲟⲩⲟϩ ⲛⲏ ⲧⲏⲣⲟⲩ ⲉⲧϧⲉⲛ ⲛⲓⲙⲱⲟⲩ ⲉⲧⲉ ⲙⲙⲟⲛ ⲧⲉⲛϩ ⲙⲙⲱⲟⲩ ⲓⲉ
ϣⲉⲛϥⲓ ⲟⲩⲱⲣⲉⲃ ⲛⲱⲧⲉⲛ ⲡⲉ
̅ⲓⲁ:̅ⲓⲅ ⲟⲩⲟϩ ⲛⲁⲓ ⲟⲣⲃⲟⲩ ⲉⲃⲟⲗ ϧⲉⲛ ⲛⲓϩⲁⲗⲁϯ ⲟⲩⲟϩ ⲛⲛⲉⲧⲉⲛⲟⲩⲟⲙⲟⲩ
ϩⲁⲛⲱⲣⲉⲃ ⲛⲉ ⲡⲓⲁϧⲱⲙ ⲛⲉⲙ ⲡⲓⲛⲟⲩⲣⲓ ⲛⲉⲙ ⲡⲓⲁⲗⲗⲓⲁⲧⲟⲛ
̅ⲓⲁ:̅ⲓⲇ ⲛⲉⲙ ⲡⲓⲛⲟϣⲉⲣ ⲛⲉⲙ ⲡⲓⲑⲣⲉ ⲛⲉⲙ ⲛⲏ ⲉⲧⲟⲛⲓ ⲙⲙⲟϥ
̅ⲓⲁ:̅ⲓⲉ ⲛⲉⲙ ⲁⲃⲱⲕ ⲛⲓⲃⲉⲛ ⲛⲉⲙ ⲛⲏ ⲉⲧⲟⲛⲓ ⲙⲙⲟϥ
̅ⲓⲁ:̅ⲓⲋ ⲛⲉⲙ ⲥⲧⲣⲟⲩⲑⲟⲥ ⲛⲉⲙ ⲅⲗⲁⲩⲕⲱⲛ ⲛⲉⲙ ⲗⲁⲣⲟⲥ ⲛⲉⲙ ⲛⲏ ⲉⲧⲟⲛⲓ
ⲙⲙⲟϥ ⲛⲉⲙ ⲙⲟⲩⲗⲁϫ
̅ⲓⲁ:̅ⲓⲍ ⲛⲉⲙ ⲡⲓϣⲗⲱⲙⲃⲏϫ ⲛⲉⲙ ϩⲓⲡ
̅ⲓⲁ:̅ⲓⲏ ⲛⲉⲙ ⲡⲟⲣⲫⲩⲣⲱⲛⲁ ⲛⲉⲙ ϯϩⲩⲙⲏ ⲛⲉⲙ ⲕⲏⲕⲛⲟⲛ
̅ⲓⲁ:̅ⲓⲑ ⲛⲉⲙ ⲉⲗϫⲱⲃ ⲛⲉⲙ ⲭⲁⲣⲁⲧⲣⲓⲟⲛ ⲛⲉⲙ ⲛⲏ ⲉⲧⲟⲛⲓ ⲙⲙⲟϥ ⲛⲉⲙ
ϩⲏⲡⲡⲟⲥ ⲛⲉⲙ ϫⲉⲗϫⲟⲩ
̅ⲓⲁ:̅ⲕ ⲛⲉⲙ ⲛⲓϭⲁⲧϥⲓ ⲧⲏⲣⲟⲩ ⲛⲧⲉ ⲛⲓϩⲁⲗⲁϯ ⲛⲏ ⲉⲧⲙⲟϣⲓ ϩⲓ ⲧⲟⲩϥⲧⲟ
ϩⲁⲛⲱⲣⲉⲃ ⲛⲱⲧⲉⲛ ⲡⲉ
̅ⲓⲁ:̅ⲕⲁ ⲁⲗⲗⲁ ⲛⲁⲓ ⲉⲣⲉⲧⲉⲛⲉⲟⲩⲟⲙⲟⲩ ⲉⲃⲟⲗ ϧⲉⲛ ⲛⲓϭⲁⲧϥⲓ ⲛⲧⲉ ⲛⲓϩⲁⲗⲁϯ
ⲛⲏ ⲉⲧⲙⲟϣⲓ ϩⲓ ⲧⲟⲩϥⲧⲟ ⲛⲏ ⲉⲧⲉ ⲟⲩⲟⲛ ⲥⲏⲃⲓ ⲙⲙⲱⲟⲩ ⲥⲁⲡϣⲱⲓ
ⲛⲛⲟⲩⲫⲁⲧ ⲉⲩⲱϣϯ ⲛϧⲏⲧⲟⲩ ϩⲓϫⲉⲛ ⲡⲓⲕⲁϩⲓ
̅ⲓⲁ:̅ⲕⲃ ⲟⲩⲟϩ ⲛⲁⲓ ⲛⲛⲉⲧⲉⲛⲟⲩⲱⲙ ⲉⲃⲟⲗ ⲛϧⲏⲧⲟⲩ ⲡⲓⲃⲣⲟⲩⲭⲟⲥ ⲛⲉⲙ ⲛⲏ
ⲉⲧⲟⲛⲓ ⲙⲙⲟϥ ⲛⲉⲙ ⲡⲓⲱⲡⲧⲁⲕⲏⲥ ⲛⲉⲙ ⲛⲏ ⲉⲧⲟⲛⲓ ⲙⲙⲟϥ ⲟⲩⲟϩ ⲡⲉⲧϯ
ⲛⲉⲙ ⲛⲓϩⲟϥ ⲛⲉⲙ ⲡⲓϩⲟϥ ⲛⲉⲙ ⲛⲏ ⲉⲧⲟⲛⲓ ⲙⲙⲟϥ ⲛⲉⲙ ⲡⲓϣϫⲉ ⲛⲉⲙ ⲛⲏ
ⲉⲧⲟⲛⲓ ⲙⲙⲟϥ
̅ⲓⲁ:̅ⲕⲅ ⲟⲩⲟϩ ϭⲁⲧϥⲓ ⲛⲓⲃⲉⲛ ⲉⲃⲟⲗ ϧⲉⲛ ⲛⲓϩⲁⲗⲁϯ ⲛⲏ ⲉⲧⲉ ⲟⲩⲟⲛ ϥⲧⲟ
ⲙⲫⲁⲧ ⲉⲣⲱⲟⲩ ⲟⲩⲱⲣⲉⲃ ⲛⲱⲧⲉⲛ ⲡⲉ
̅ⲓⲁ:̅ⲕⲇ ⲟⲩⲟϩ ϧⲉⲛ ⲛⲁⲓ ⲉⲣⲉⲧⲉⲛⲉⲥⲱϥ ⲟⲩⲟⲛ ⲛⲓⲃⲉⲛ ⲉⲧⲛⲁϭⲓ ⲛⲉⲙ ⲛⲏ
ⲉⲑⲙⲱⲟⲩⲧ ⲛⲧⲱⲟⲩ ⲉⲩⲉϣⲱⲡⲓ ⲉⲩϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲁ:̅ⲕⲉ ⲟⲩⲟϩ ⲫⲏ ⲛⲓⲃⲉⲛ ⲉⲧⲛⲁⲱⲗⲓ ⲉⲃⲟⲗ ϧⲉⲛ ⲛⲏ ⲉⲧⲙⲱⲟⲩⲧ ⲛⲧⲱⲟⲩ
ⲉϥⲉⲣⲱϧⲓ ⲛⲛⲉϥϩⲃⲱⲥ ⲟⲩⲟϩ ⲉϥⲉϣⲱⲡⲓ ⲉϥϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲁ:̅ⲕⲋ ⲟⲩⲟϩ ϧⲉⲛ ⲛⲓⲧⲉⲃⲛⲱⲟⲩⲓ ⲧⲏⲣⲟⲩ ⲫⲏ ⲛⲓⲃⲉⲛ ⲉⲧⲉ ⲛⲓϭⲟⲡ ⲛⲧⲉ
ⲣⲁⲧϥ ⲫⲟⲣϫ ⲟⲩⲟϩ ⲉϥⲉⲱⲗⲓ ⲛⲛⲉϥⲓⲉⲃ ⲟⲩⲟϩ ⲟⲩⲥⲁⲑⲙⲓ ⲉϥⲥⲁⲑⲙⲓ ⲙⲙⲟϥ ⲁⲛ
ⲉⲩⲉϣⲱⲡⲓ ⲛⲱⲧⲉⲛ ⲉⲩϭⲁϧⲉⲙ ⲟⲩⲟϩ ⲟⲩⲟⲛ ⲛⲓⲃⲉⲛ ⲉⲧⲛⲁϭⲓ ⲛⲉⲙ ⲛⲏ
ⲉⲑⲙⲱⲟⲩⲧ ⲛⲧⲱⲟⲩ ⲉⲩⲉϣⲱⲡⲓ ⲉⲩϭⲁϧⲉⲙ
̅ⲓⲁ:̅ⲕⲍ ⲟⲩⲟϩ ⲑⲏⲣⲓⲟⲛ ⲛⲓⲃⲉⲛ ⲉⲧⲙⲟϣⲓ ϩⲓϫⲉⲛ ⲛⲟⲩϫⲓϫ ⲛⲏ ⲉⲧⲙⲟϣⲓ ϩⲓ
ⲧⲟⲩϥⲧⲟ ⲥⲉϭⲁϧⲉⲙ ⲛⲱⲧⲉⲛ ⲟⲩⲟϩ ⲟⲩⲟⲛ ⲛⲓⲃⲉⲛ ⲉⲧⲛⲁϭⲓ ⲛⲉⲙ ⲛⲏ
ⲉⲧⲙⲱⲟⲩⲧ ⲛⲧⲱⲟⲩ ⲉϥⲉϣⲱⲡⲓ ⲉϥϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲁ:̅ⲕⲏ ⲟⲩⲟϩ ⲫⲏ ⲉⲧⲛⲁⲱⲗⲓ ⲉⲃⲟⲗ ϧⲉⲛ ⲛⲏ ⲉⲧⲙⲱⲟⲩⲧ ⲛⲧⲱⲟⲩ ⲉϥⲉⲣⲱϧⲓ
ⲛⲛⲉϥϩⲃⲱⲥ ⲟⲩⲟϩ ⲉϥⲉϣⲱⲡⲓ ⲉϥϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ ⲛⲁⲓ
ⲥⲉϭⲁϧⲉⲙ ⲛⲱⲧⲉⲛ
̅ⲓⲁ:̅ⲕⲑ ⲟⲩⲟϩ ⲛⲁⲓ ⲥⲉϭⲁϧⲉⲙ ⲛⲱⲧⲉⲛ ⲉⲃⲟⲗ ϧⲉⲛ ⲛⲓϩⲁⲗⲁϯ ϭⲁⲧϥⲓ ⲛⲓⲃⲉⲛ
ⲉⲧⲙⲟϣⲓ ϩⲓϫⲉⲛ ⲡⲓⲕⲁϩⲓ ϯⲕⲁⲗⲏ ⲛⲉⲙ ⲡⲓⲫⲓⲛ ⲛⲉⲙ ⲡⲓⲙⲥⲁϩ ⲛⲧⲱⲟⲩ
̅ⲓⲁ:̅ⲗ ⲛⲉⲙ ⲡⲓⲁⲗⲓⲗ ⲛⲉⲙ ⲡⲓⲭⲁⲙⲏⲗⲉⲟⲛ ⲛⲉⲙ ⲡⲓⲁⲛⲑⲟⲩⲥ ⲛⲉⲙ ϯⲁϥⲗⲉⲗⲓ
ⲛⲉⲙ ⲡⲓⲥⲡⲁⲗⲁⲝ
̅ⲓⲁ:̅ⲗⲁ ⲛⲁⲓ ⲥⲉϭⲁϧⲉⲙ ⲛⲱⲧⲉⲛ ⲉⲃⲟⲗ ϧⲉⲛ ⲛⲓϭⲁⲧϥⲓ ⲧⲏⲣⲟⲩ ⲉⲧϩⲓϫⲉⲛ
ⲡⲕⲁϩⲓ ⲟⲩⲟϩ ⲫⲏ ⲛⲓⲃⲉⲛ ⲉⲑⲛⲁϭⲓ ⲛⲉⲙ ⲛⲏ ⲉⲧⲙⲱⲟⲩⲧ ⲛⲧⲱⲟⲩ ⲉϥⲉϣⲱⲡⲓ
ⲉϥϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲁ:̅ⲗⲃ ⲟⲩⲟϩ ⲫⲏ ⲛⲓⲃⲉⲛ ⲉⲧⲉ ⲟⲩⲟⲛ ⲟⲩⲁⲓ ⲛⲧⲉ ⲛⲁⲓ ⲛⲁϩⲉⲓ ⲉϫⲱϥ ⲉϣⲱⲡ
ⲁⲩϣⲁⲛⲙⲟⲩ ⲉϥⲉϣⲱⲡⲓ ⲉϥϭⲁϧⲉⲙ ⲓⲧⲉ ⲉⲃⲟⲗ ϧⲉⲛ ⲥⲕⲉⲩⲟⲥ ⲛⲓⲃⲉⲛ ⲛϣⲉ
ⲓⲧⲉ ⲟⲩϩⲃⲟⲥ ⲛⲧⲉ ⲟⲩϣⲁⲣ ⲓⲧⲉ ⲟⲩⲥⲟⲕ ⲥⲕⲉⲩⲟⲥ ⲛⲓⲃⲉⲛ ⲉⲧⲟⲩⲛⲁⲓⲣⲓ
ⲛⲟⲩϩⲱⲃ ⲛϧⲏⲧⲟⲩ ⲉⲩⲉⲟⲙⲥⲟⲩ ϧⲉⲛ ⲟⲩⲙⲱⲟⲩ ⲟⲩⲟϩ ⲉⲩⲉϣⲱⲡⲓ ⲉⲩϭⲁϧⲉⲙ
ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ ⲟⲩⲟϩ ⲉⲩⲉϣⲱⲡⲓ ⲉⲩⲧⲟⲩⲃⲏⲟⲩⲧ
̅ⲓⲁ:̅ⲗⲅ ⲟⲩⲟϩ ⲥⲕⲉⲩⲟⲥ ⲛⲓⲃⲉⲛ ⲙⲃⲉⲗϫ ⲉⲧⲉ ⲛⲁⲓ ⲛⲁϩⲉⲓ ⲉϧⲣⲏⲓ ⲛϧⲏⲧϥ ⲛⲏ
ⲉⲧⲉ ⲛϧⲏⲧϥ ⲉⲩⲉϣⲱⲡⲓ ⲉⲩϭⲁϧⲉⲙ ⲟⲩⲟϩ ⲡⲓⲙⲟⲕⲓ ⲉⲩⲉϧⲉⲙϧⲱⲙϥ
̅ⲓⲁ:̅ⲗⲇ ⲟⲩⲟϩ ϧⲣⲉ ⲛⲓⲃⲉⲛ ⲉⲧⲉⲧⲉⲛⲟⲩⲱⲙ ⲙⲙⲟϥ ⲉϣⲱⲡ ⲁϥϣⲁⲛϩⲉⲓ ⲉϫⲱϥ
ⲛϫⲉ ⲟⲩⲙⲱⲟⲩ ⲛⲧⲉ ⲛⲁⲓ ⲉϥⲉϣⲱⲡⲓ ⲉϥϭⲁϧⲉⲙ ⲛⲉⲙ ⲥⲱ ⲛⲓⲃⲉⲛ ⲉⲧⲉⲧⲉⲛⲥⲱ
ⲙⲙⲟϥ ϧⲉⲛ ⲙⲟⲕⲓ ⲛⲓⲃⲉⲛ ⲉϥⲉϣⲱⲡⲓ ⲉϥϭⲁϧⲉⲙ
̅ⲓⲁ:̅ⲗⲉ ⲛⲉⲙ ⲛⲏ ⲧⲏⲣⲟⲩ ⲉⲧⲛⲁϩⲉⲓ ⲉⲣⲱⲟⲩ ⲉⲃⲟⲗ ϧⲉⲛ ⲛⲏ ⲉⲧⲙⲱⲟⲩⲧ ⲛⲧⲉ
ⲛⲁⲓ ⲉⲩⲉϣⲱⲡⲓ ⲉⲩϭⲁϧⲉⲙ ϩⲁⲛⲑⲣⲓⲣ ⲛⲉⲙ ϩⲁⲛϩⲣⲱ ⲉⲩⲉⲟⲩⲟϫⲡⲟⲩ
ⲥⲉϭⲁϧⲉⲙ ⲟⲩⲟϩ ⲉⲩⲉϣⲱⲡⲓ ⲛⲱⲧⲉⲛ ⲉⲩϭⲁϧⲉⲙ
̅ⲓⲁ:̅ⲗⲋ ϣⲁⲧⲉⲛ ⲛⲓⲙⲟⲩⲙⲓ ⲙⲙⲱⲟⲩ ⲛⲉⲙ ⲛⲓⲗⲁⲕⲕⲟⲥ ⲛⲉⲙ ⲛⲓⲙⲁⲛⲑⲱⲟⲩϯ
ⲛⲧⲉ ⲛⲓⲙⲱⲟⲩ ⲉⲩⲉϣⲱⲡⲓ ⲉⲩⲟⲩⲁⲃ ⲫⲏ ⲇⲉ ⲉⲧⲛⲁϭⲓ ⲛⲉⲙ ⲛⲏ ⲉⲧⲙⲱⲟⲩⲧ
ⲛⲧⲉ ⲛⲁⲓ ⲉϥⲉϣⲱⲡⲓ ⲉϥϭⲁϧⲉⲙ
̅ⲓⲁ:̅ⲗⲍ ⲉϣⲱⲡ ⲇⲉ ⲉⲃⲟⲗ ϧⲉⲛ ⲛⲏ ⲉⲑⲙⲱⲟⲩⲧ ⲛⲧⲱⲟⲩ ⲛⲧⲟⲩϩⲉⲓ ⲉϫⲉⲛ
ϫⲣⲟϫ ⲛⲓⲃⲉⲛ ⲛⲥⲓϯ ⲫⲏ ⲉⲧⲟⲩⲛⲁⲥⲁⲧϥ ϥϭⲁϧⲉⲙ
̅ⲓⲁ:̅ⲗⲏ ⲉϣⲱⲡ ⲇⲉ ⲁⲣⲉϣⲁⲛ ⲟⲩⲙⲱⲟⲩ ⲫⲱⲛ ⲉϩⲣⲏⲓ ⲉϫⲉⲛ ϫⲣⲟϫ ⲛⲓⲃⲉⲛ
ⲟⲩⲟϩ ⲉⲃⲟⲗ ϧⲉⲛ ⲛⲏ ⲉⲧⲙⲱⲟⲩⲧ ⲛⲧⲉ ⲛⲁⲓ ⲛⲧⲟⲩϩⲉⲓ ⲉϫⲱϥ ϥϭⲁϧⲉⲙ
ⲛⲱⲧⲉⲛ
̅ⲓⲁ:̅ⲗⲑ ⲉϣⲱⲡ ⲇⲉ ⲛⲧⲉ ⲟⲩⲟⲛ ⲙⲟⲩ ⲉⲃⲟⲗ ϧⲉⲛ ⲛⲓⲧⲉⲃⲛⲱⲟⲩⲓ ⲛⲁⲓ ⲉⲧϣⲟⲡ
ⲛⲱⲧⲉⲛ ⲉⲑⲣⲉⲧⲉⲛⲟⲩⲟⲙⲟⲩ ⲫⲏ ⲛⲓⲃⲉⲛ ⲉⲑⲛⲁϭⲓ ⲛⲉⲙⲱⲟⲩ ⲧⲏⲣⲟⲩ ⲉϥⲉϣⲱⲡⲓ
ⲉϥϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲁ:̅ⲙ ⲟⲩⲟϩ ⲫⲏ ⲉⲧⲛⲁⲟⲩⲱⲙ ⲉⲃⲟⲗ ϧⲉⲛ ⲛⲏ ⲉⲧⲙⲱⲟⲩⲧ ⲛⲧⲱⲟⲩ ⲉϥⲉⲣⲱϧⲓ
ⲟⲩⲟϩ ⲉϥⲉϣⲱⲡⲓ ⲉϥϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ ⲟⲩⲟϩ ⲫⲏ ⲛⲓⲃⲉⲛ
ⲉⲧⲛⲁⲱⲗⲓ ⲉⲃⲟⲗ ϧⲉⲛ ⲛⲏ ⲉⲑⲙⲱⲟⲩⲧ ⲛⲧⲱⲟⲩ ⲉϥⲉⲣⲱϧⲓ ⲛⲛⲉϥϩⲃⲱⲥ ⲟⲩⲟϩ
ⲉϥⲉϫⲱⲕⲉⲙ ϧⲉⲛ ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ ⲉϥϭⲁϧⲉⲙ ϣⲁ ⲫⲛⲁⲩ
ⲛϩⲁⲛⲁⲣⲟⲩϩⲓ
̅ⲓⲁ:̅ⲙⲁ ⲟⲩⲟϩ ϭⲁⲧϥⲓ ⲛⲓⲃⲉⲛ ⲉⲧⲙⲟϣⲓ ϩⲓϫⲉⲛ ⲡⲓⲕⲁϩⲓ ⲟⲩⲱⲣⲉⲃ ⲛⲱⲧⲉⲛ
ⲡⲉ ⲫⲁⲓ ⲛⲛⲉⲧⲉⲛⲟⲩⲟⲙⲟⲩ
̅ⲓⲁ:̅ⲙⲃ ⲟⲩⲟϩ ⲫⲏ ⲛⲓⲃⲉⲛ ⲉⲧⲙⲟϣⲓ ϩⲓϫⲉⲛ ⲧⲉϥⲛⲉϫⲓ ⲛⲉⲙ ⲫⲏ ⲛⲓⲃⲉⲛ
ⲉⲧⲙⲟϣⲓ ϩⲓϫⲉⲛ ϯϥⲧⲟ ⲛⲥⲏⲟⲩ ⲛⲓⲃⲉⲛ ⲫⲏ ⲉⲧⲟϣ ⲙⲫⲁⲧ ϧⲉⲛ ⲛⲓϭⲁⲧϥⲓ
ⲧⲏⲣⲟⲩ ⲉⲧⲱϣϯ ϩⲓϫⲉⲛ ⲡⲕⲁϩⲓ ⲛⲛⲉⲧⲉⲛⲟⲩⲟⲙⲟⲩ ϫⲉ ⲟⲩⲱⲣⲉⲃ ⲛⲱⲧⲉⲛ ⲡⲉ
̅ⲓⲁ:̅ⲙⲅ ⲟⲩⲟϩ ⲛⲛⲉⲧⲉⲛⲥⲱϥ ⲛⲛⲉⲧⲉⲛⲯⲩⲭⲏ ϧⲉⲛ ⲛⲓϭⲁⲧϥⲓ ⲧⲏⲣⲟⲩ ⲉⲧⲱϣϯ
ϩⲓϫⲉⲛ ⲡⲕⲁϩⲓ ⲟⲩⲟϩ ⲛⲛⲉⲧⲉⲛⲥⲱϥ ⲛϧⲣⲏⲓ ϧⲉⲛ ⲛⲁⲓ ⲟⲩⲟϩ ⲛⲛⲉⲧⲉⲛϣⲱⲡⲓ
ⲉⲩϭⲁϧⲉⲙ ⲛϧⲣⲏⲓ ⲛϧⲏⲧⲟⲩ
̅ⲓⲁ:̅ⲙⲇ ϫⲉ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ ⲟⲩⲟϩ ⲉⲣⲉⲧⲉⲛⲉⲧⲟⲩⲃⲟ ϫⲉ
ϯⲟⲩⲁⲃ ⲁⲛⲟⲕ ⲡϭⲟⲓⲥ ⲡⲉⲧⲉⲛⲛⲟⲩϯ ⲟⲩⲟϩ ⲛⲛⲉⲧⲉⲛϭⲱϧⲉⲙ ⲛⲛⲉⲧⲉⲛⲯⲩⲭⲏ
ϧⲉⲛ ϭⲁⲧϥⲓ ⲛⲓⲃⲉⲛ ⲉⲧⲕⲓⲙ ϩⲓϫⲉⲛ ⲡⲓⲕⲁϩⲓ
̅ⲓⲁ:̅ⲙⲉ ϫⲉ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ ⲫⲏ ⲉⲧⲁϥⲉⲛ ⲑⲏⲛⲟⲩ ⲉⲃⲟⲗ ϧⲉⲛ
ⲡⲕⲁϩⲓ ⲛⲭⲏⲙⲓ ⲉⲑⲣⲓϣⲱⲡⲓ ⲛⲱⲧⲉⲛ ⲛⲛⲟⲩϯ ⲟⲩⲟϩ ⲉⲑⲣⲉⲧⲉⲛϣⲱⲡⲓ
ⲉⲣⲉⲧⲉⲛⲟⲩⲁⲃ ϫⲉ ϯⲟⲩⲁⲃ ⲁⲛⲟⲕ
̅ⲓⲁ:̅ⲙⲋ ⲫⲁⲓ ⲡⲉ ⲫⲛⲟⲙⲟⲥ ⲛⲧⲉ ⲛⲓⲧⲉⲃⲛⲱⲟⲩⲓ ⲛⲉⲙ ⲛⲓϩⲁⲗⲁϯ ⲛⲉⲙ ⲯⲩⲭⲏ
ⲛⲓⲃⲉⲛ ⲉⲧⲕⲓⲙ ϧⲉⲛ ⲛⲓⲙⲱⲟⲩ ⲛⲉⲙ ⲯⲩⲭⲏ ⲛⲓⲃⲉⲛ ⲉⲧⲱϣϯ ϩⲓϫⲉⲛ ⲡⲕⲁϩⲓ
̅ⲓⲁ:̅ⲙⲍ ⲟⲩⲟϩ ⲉⲟⲩⲱϯ ⲉⲃⲟⲗ ϧⲉⲛ ⲑⲙⲏϯ ⲛⲛⲏ ⲉⲧϭⲁϧⲉⲙ ⲛⲉⲙ ϧⲉⲛ ⲑⲙⲏϯ
ⲛⲛⲏ ⲉⲧⲧⲟⲩⲃⲏⲟⲩⲧ ⲟⲩⲟϩ ⲉⲧⲥⲁⲃⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ϧⲉⲛ ⲑⲙⲏϯ ⲛⲛⲏ
ⲉⲧⲧⲁⲛϧⲟ ⲛⲛⲏ ⲉⲧⲉ ⲟⲩⲟⲩⲟⲙⲟⲩ ⲛⲉⲙ ϧⲉⲛ ⲑⲙⲏϯ ⲛⲛⲏ ⲉⲧⲧⲁⲛϧⲟ ⲉⲛⲏ
ⲉⲧⲉ ⲙⲡⲁⲩⲟⲩⲟⲙⲟⲩ
̅ⲓⲃ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲓⲃ:̅ⲃ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲉⲕϫⲱ ⲙⲙⲟⲥ ϫⲉ ⲉϣⲱⲡ
ⲁⲣⲉϣⲁⲛ ⲟⲩⲥϩⲓⲙⲓ ϭⲓϫⲣⲟϫ ⲟⲩⲟϩ ⲛⲧⲉⲥⲙⲓⲥⲓ ⲛⲟⲩϩⲱⲟⲩⲧ ⲉⲥⲉϣⲱⲡⲓ
ⲉⲥϭⲁϧⲉⲙ ⲛⲍ ⲛⲉϩⲟⲟⲩ ⲕⲁⲧⲁ ⲛⲓⲉϩⲟⲟⲩ ⲛⲧⲉ ⲡⲓⲫⲱⲣϫ ⲉⲃⲟⲗ ⲛⲧⲉ
ⲡⲉⲥϭⲱϧⲉⲙ
̅ⲓⲃ:̅ⲅ ⲟⲩⲟϩ ϧⲉⲛ ⲡⲓⲉϩⲟⲟⲩ ⲙⲙⲁϩⲏ ⲉⲥⲉⲥⲟⲩⲃⲉ ⲧⲥⲁⲣⲝ ⲛⲧⲉ
ⲧⲉⲥⲙⲉⲧⲁⲧⲥⲉⲃⲓ
̅ⲓⲃ:̅ⲇ ⲟⲩⲟϩ ⲉⲥⲉⲉⲣ ⲗⲅ ⲛⲉϩⲟⲟⲩ ⲉⲥϩⲉⲙⲥⲓ ϧⲉⲛ ⲟⲩⲥⲛⲟϥ ⲛⲧⲁⲥ
ⲉϥⲧⲟⲩⲃⲏⲟⲩⲧ ⲛⲭⲁⲓ ⲛⲓⲃⲉⲛ ⲉⲑⲟⲩⲁⲃ ⲛⲛⲉⲥϭⲓ ⲛⲉⲙⲱⲟⲩ ⲟⲩⲟϩ ⲛⲛⲉⲥⲓ
ⲉϧⲟⲩⲛ ⲉⲡⲓⲙⲁⲛⲧⲟⲩⲃⲟ ϣⲁⲧⲟⲩϫⲱⲕ ⲉⲃⲟⲗ ⲛϫⲉ ⲛⲓⲉϩⲟⲟⲩ ⲛⲧⲉ ⲡⲉⲥⲧⲟⲩⲃⲟ
̅ⲓⲃ:̅ⲉ ⲉϣⲱⲡ ⲇⲉ ⲁⲥϣⲁⲛⲙⲓⲥⲓ ⲛⲟⲩⲥϩⲓⲙⲓ ⲉⲥⲉϣⲱⲡⲓ ⲉⲥϭⲁϧⲉⲙ ⲛⲓⲇ
ⲛⲉϩⲟⲟⲩ ⲕⲁⲧⲁ ⲡⲉⲥϭⲱϧⲉⲙ ⲟⲩⲟϩ ⲉⲥⲉⲉⲣ ⲝⲋ ⲛⲉϩⲟⲟⲩ ⲉⲥϩⲉⲙⲥⲓ ϧⲉⲛ
ⲟⲩⲥⲛⲟϥ ⲛⲧⲁⲥ ⲉϥⲧⲟⲩⲃⲏⲟⲩⲧ
̅ⲓⲃ:̣̅ⲋ ⲟⲩⲟϩ ⲉϣⲱⲡ ⲁⲩϣⲁⲛϫⲱⲕ ⲉⲃⲟⲗ ⲛϫⲉ ⲛⲓⲉϩⲟⲟⲩ ⲛⲧⲉ ⲡⲉⲥⲧⲟⲩⲃⲟ
ⲉϩⲣⲏⲓ ⲉϫⲉⲛ ⲟⲩϣⲏⲣⲓ ⲓⲉ ⲟⲩϣⲉⲣⲓ ⲉⲥⲉⲓⲛⲓ ⲉϧⲟⲩⲛ ⲛⲟⲩϩⲓⲏⲃ ⲉⲩϭⲗⲓⲗ
ⲛϫⲟϥϫⲉϥ ⲉⲁϥⲉⲣⲟⲩⲣⲟⲙⲡⲓ ⲛⲉⲙ ⲟⲩⲙⲁⲥ ⲛϭⲣⲟⲙⲡⲓ ⲛⲉⲙ ⲟⲩϭⲣⲟⲙⲡϣⲁⲗ
ⲉⲑⲃⲉ ⲥⲛⲟⲃⲓ ϩⲓⲣⲉⲛ ⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ϩⲁ ⲡⲓⲟⲩⲏⲃ
̅ⲓⲃ:̅ⲍ ⲟⲩⲟϩ ⲉϥⲉⲉⲛϥ ⲉϧⲟⲩⲛ ⲙⲡⲉⲙⲑⲟ ⲙⲡϭⲟⲓⲥ ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ
ⲉϫⲱⲥ ⲛϫⲉ ⲡⲓⲟⲩⲏⲃ ⲟⲩⲟϩ ⲉⲥⲉⲧⲟⲩⲃⲟ ⲉⲃⲟⲗ ϩⲁ ⲑⲙⲟⲩⲙⲓ ⲛⲧⲉ ⲡⲉⲥⲥⲛⲟϥ
ⲫⲁⲓ ⲡⲉ ⲫⲛⲟⲙⲟⲥ ⲛⲧⲉ ⲑⲏ ⲉⲧⲛⲁⲙⲓⲥⲓ ⲓⲧⲉ ϩⲱⲟⲩⲧ ⲓⲧⲉ ⲥϩⲓⲙⲓ
̅ⲓⲃ:̅ⲏ ⲉϣⲱⲡ ⲇⲉ ⲧⲉⲥϫⲓϫ ϫⲓⲙⲓ ⲁⲛ ⲙⲡⲓⲣⲱϣⲓ ⲉⲩϩⲓⲏⲃ ⲉⲥⲉⲱⲗⲓ
ⲛϭⲣⲟⲙⲡϣⲁⲗ ⲃ ⲓⲉ ⲙⲁⲥ ⲃ ⲛϭⲣⲟⲙⲡⲓ ⲟⲩⲁⲓ ⲉⲩϭⲗⲓⲗ ⲛϫⲟϥϫⲉϥ ⲟⲩⲟϩ
ⲟⲩⲁⲓ ⲉⲑⲃⲉ ⲫⲛⲟⲃⲓ ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ ⲉϫⲱⲥ ⲛϫⲉ ⲡⲓⲟⲩⲏⲃ ⲟⲩⲟϩ
ⲉⲥⲉⲧⲟⲩⲃⲟ
̅ⲓⲅ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲛⲉⲙ ⲁⲁⲣⲱⲛ ⲉϥϫⲱ ⲙⲙⲟⲥ
̅ⲓⲅ:̅ⲃ ϫⲉ ⲉϣⲱⲡ ⲁⲣⲉϣⲁⲛ ⲟⲩⲟⲩⲗⲏ ⲛⲧⲉ ⲟⲩⲙⲏⲓⲛⲓ ⲟⲩϩⲗⲓ ⲉϥⲟⲩⲟⲛϩ
ⲛⲧⲉϥϣⲱⲡⲓ ϧⲉⲛ ⲡϣⲁⲣ ⲛⲧⲉ ⲡⲁⲟⲩⲁⲛ ⲛⲟⲩⲣⲱⲙⲓ ⲟⲩⲟϩ ⲛⲧⲉϥϣⲱⲡⲓ ϧⲉⲛ
ⲡϣⲁⲣ ⲛⲧⲉ ⲡⲉϥⲁⲟⲩⲁⲛ ⲛϫⲉ ⲟⲩϭⲟϩ ⲛⲧⲉ ⲟⲩⲥⲉϩⲧ ⲟⲩⲟϩ ⲉϥⲉⲓ ϩⲁ
ⲁⲁⲣⲱⲛ ⲡⲓⲟⲩⲏⲃ ⲓⲉ ϩⲁ ⲟⲩⲁⲓ ⲛⲧⲉ ⲛⲉϥϣⲏⲣⲓ ⲉⲧⲟⲓ ⲛⲟⲩⲏⲃ
̅ⲓⲅ:̅ⲅ ⲟⲩⲟϩ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲉⲡⲓϭⲟϩ ϧⲉⲛ ⲡϣⲁⲣ ⲛⲧⲉ ⲡⲉϥⲁⲟⲩⲁⲛ
ⲟⲩⲟϩ ⲛⲧⲉ ⲡⲓϥⲱⲓ ⲉⲧϧⲉⲛ ⲡⲓϭⲟϩ ⲛⲧⲉϥⲟⲩⲱⲧⲉⲃ ⲉⲟⲩⲟⲩⲃⲁϣ ⲟⲩⲟϩ ⲡϩⲟ
ⲛⲧⲉ ⲡⲓϭⲟϩ ⲉϥⲑⲉⲃⲓⲏⲟⲩⲧ ⲉⲃⲟⲗ ϩⲓⲧⲉⲛ ⲡϣⲁⲣ ⲛⲧⲉ ⲡⲉϥⲁⲟⲩⲁⲛ ⲟⲩϭⲟϩ
ⲛⲧⲉ ⲟⲩⲥⲉϩⲧ ⲡⲉ ⲟⲩⲟϩ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲉϥⲉϭⲁϧⲙⲉϥ
̅ⲓⲅ:̅ⲇ ⲉϣⲱⲡ ⲇⲉ ⲛⲧⲉϥⲟⲩⲱⲛϩ ⲉϥⲟⲩⲱⲃϣ ϧⲉⲛ ⲡϣⲁⲣ ⲛⲧⲉ ⲡⲉϥⲁⲟⲩⲁⲛ
ⲟⲩⲟϩ ⲡⲉϥϩⲟ ⲛϥⲑⲉⲃⲓⲏⲟⲩⲧ ⲁⲛ ⲉⲃⲟⲗ ϩⲓⲧⲉⲛ ⲡⲓϣⲁⲣ ⲟⲩⲟϩ ⲛⲧⲉ ⲡⲉϥϥⲱⲓ
ϣⲓⲃϯ ⲁⲛ ⲉⲡⲉⲧⲟⲩⲱⲃϣ ⲁⲗⲗⲁ ϥⲟⲓ ⲛϩⲗⲟⲗ ⲟⲩⲟϩ ⲉⲣⲉ ⲡⲓⲟⲩⲏⲃ ⲟⲩⲱϯ
ⲉⲃⲟⲗ ⲙⲡⲓϭⲟϩ ⲛⲍ ⲛⲉϩⲟⲟⲩ
̅ⲓⲅ:̅ⲉ ⲟⲩⲟϩ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲉⲡⲓϭⲟϩ ϧⲉⲛ ⲡⲓⲉϩⲟⲟⲩ ⲙⲙⲁϩⲍ ⲟⲩⲟϩ
ϩⲏⲡⲡⲉ ⲡⲓϭⲟϩ ⲉϥⲟϩⲓ ⲉⲣⲁⲧϥ ⲙⲡⲉϥⲟⲩⲱⲧⲉⲃ ⲁⲛ ⲛϫⲉ ⲡⲓϭⲟϩ ϧⲉⲛ
ⲡⲓϣⲁⲣ ⲉϥⲉⲫⲟⲣϫϥ ⲉⲃⲟⲗ ⲛϫⲉ ⲡⲓⲟⲩⲏⲃ ⲛⲍ ⲛⲉϩⲟⲟⲩ ⲙⲡⲓⲙⲁϩ ⲥⲟⲡ ⲃ
̅ⲓⲅ:̣̅ⲋ ⲟⲩⲟϩ ⲉϥⲉⲛⲁⲩ ⲉⲣⲟϥ ⲛϫⲉ ⲡⲓⲟⲩⲏⲃ ϧⲉⲛ ⲡⲓⲉϩⲟⲟⲩ ⲙⲙⲁϩ ⲍ
ⲙⲡⲓⲙⲁϩ ⲥⲟⲡ ⲃ ⲟⲩⲟϩ ϩⲏⲡⲡⲉ ⲉϥⲟⲓ ⲛϩⲗⲟⲗ ⲛϫⲉ ⲡⲓϭⲟϩ ⲙⲡⲉϥⲟⲩⲱⲧⲉⲃ
ⲛϫⲉ ⲡⲓϭⲟϩ ϧⲉⲛ ⲡⲓⲥⲉϩⲧ ⲛⲧⲉ ⲡⲓϣⲁⲣ ⲟⲩⲟϩ ⲉϥⲉⲧⲟⲩⲃⲟϥ ⲛϫⲉ ⲡⲓⲟⲩⲏⲃ
ⲟⲩⲙⲏⲓⲛⲓ ⲅⲁⲣ ⲡⲉ ⲟⲩⲟϩ ⲉϥⲉⲣⲱϧⲓ ⲛⲛⲉϥϩⲃⲟⲥ ⲟⲩⲟϩ ⲉϥⲉϣⲱⲡⲓ
ⲉϥⲧⲟⲩⲃⲏⲟⲩⲧ
̅ⲓⲅ:̅ⲍ ⲉϣⲱⲡ ⲇⲉ ⲁϥϣⲁⲛⲟⲩⲱⲧⲉⲃ ⲛϫⲉ ⲡⲓⲙⲏⲓⲛⲓ ϧⲉⲛ ⲡⲓϣⲁⲣ ⲙⲉⲛⲉⲛⲥⲁ
ⲑⲣⲉϥⲛⲁⲩ ⲉⲣⲟϥ ⲛϫⲉ ⲡⲓⲟⲩⲏⲃ ⲉⲡϫⲓⲛⲧⲟⲩⲃⲟϥ ⲟⲩⲟϩ ⲉϥⲉⲟⲩⲟⲛϩϥ ⲉⲡⲓⲟⲩⲏⲃ
ⲙⲫⲙⲁϩ ⲥⲟⲡ ⲃ
̅ⲓⲅ:̅ⲏ ⲟⲩⲟϩ ⲉϥⲉⲛⲁⲩ ⲉⲣⲟϥ ⲛϫⲉ ⲡⲓⲟⲩⲏⲃ ⲟⲩⲟϩ ϩⲏⲡⲡⲉ ⲁϥⲟⲩⲱⲛϩ ⲛϫⲉ
ⲡⲓⲙⲏⲓⲛⲓ ϧⲉⲛ ⲡⲓϣⲁⲣ ⲟⲩⲟϩ ⲉϥⲉϭⲁϧⲙⲉϥ ⲛϫⲉ ⲡⲓⲟⲩⲏⲃ ⲟⲩⲥⲉϩⲧ ⲡⲉ
̅ⲓⲅ:̅ⲑ ⲟⲩⲟϩ ⲉϣⲱⲡ ⲉⲁϥϣⲱⲡⲓ ⲛϫⲉ ⲟⲩϭⲟϩ ⲛⲧⲉ ⲟⲩⲥⲉϩⲧ ϧⲉⲛ ⲟⲩⲣⲱⲙⲓ
ⲉϥⲉⲓ ϩⲁ ⲡⲓⲟⲩⲏⲃ
̅ⲓⲅ:̅ⲓ ⲟⲩⲟϩ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲟⲩⲟϩ ϩⲏⲡⲡⲉ ⲓⲥ ⲟⲩⲟⲩⲗⲏ ⲉⲥⲟⲩⲟⲃϣ
ϧⲉⲛ ⲡⲓϣⲁⲣ ⲟⲩⲟϩ ⲑⲁⲓ ⲛⲧⲉⲥⲟⲩⲱⲧⲉⲃ ⲉⲟⲩϥⲱⲓ ⲛⲧⲉϥⲟⲩⲃⲁϣ ⲟⲩⲟϩ ⲉⲃⲟⲗ
ϩⲓⲧⲉⲛ ⲡⲉⲑⲟⲩⲟϫ ⲛⲧⲉ ϯⲥⲁⲣⲝ ⲉⲧⲟⲛϧ ⲉϥⲟⲩⲟⲛϩ ϧⲉⲛ ϯⲟⲩⲗⲏ
̅ⲓⲅ:̅ⲓⲁ ⲟⲩⲥⲉϩⲧ ⲡⲉ ⲉϥⲛⲁⲉⲣⲁⲡⲁⲥ ϧⲉⲛ ⲡϣⲁⲣ ⲛⲧⲉ ⲡⲉϥⲟⲩⲁⲛ ⲟⲩⲟϩ
ⲉϥⲉϭⲁϧⲙⲉϥ ⲛϫⲉ ⲡⲓⲟⲩⲏⲃ ⲟⲩⲟϩ ⲛⲧⲉϥⲫⲟⲣϫϥ ⲉⲃⲟⲗ ϥϭⲁϧⲉⲙ
̅ⲓⲅ:̅ⲓⲃ ⲉϣⲱⲡ ⲇⲉ ϧⲉⲛ ⲟⲩⲫⲓⲣⲓ ⲛⲧⲉϥⲫⲓⲣⲓ ⲉⲃⲟⲗ ⲛϫⲉ ⲟⲩⲥⲉϩⲧ ϧⲉⲛ
ⲡⲓϣⲁⲣ ⲟⲩⲟϩ ⲛⲧⲉ ⲡⲓⲥⲉϩⲧ ϩⲱⲃⲥ ⲙⲡⲓϣⲁⲣ ⲧⲏⲣϥ ⲛⲧⲉ ⲡⲓϭⲟϩ ⲓⲥϫⲉⲛ
ϫⲱϥ ϣⲁ ⲣⲁⲧϥ ⲕⲁⲧⲁ ⲡⲓϫⲓⲛⲛⲁⲩ ⲧⲏⲣϥ ⲛⲧⲉ ⲡⲓⲟⲩⲏⲃ
̅ⲓⲅ:̅ⲓⲅ ⲟⲩⲟϩ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲟⲩⲟϩ ⲓⲥ ⲡⲓⲥⲉϩⲧ ⲉⲧⲁϥϩⲱⲃⲥ ⲉϫⲉⲛ
ⲡⲓϣⲁⲣ ⲧⲏⲣϥ ⲛⲧⲉ ⲡⲉϥⲁⲟⲩⲁⲛ ⲟⲩⲟϩ ⲉϥⲉⲧⲟⲩⲃⲟϥ ⲛϫⲉ ⲡⲓⲟⲩⲏⲃ ϫⲉ
ⲁϥⲟⲩⲱⲧⲉⲃ ⲧⲏⲣϥ ⲉⲡⲉⲑⲟⲩⲟⲃϣ ϥⲧⲟⲩⲃⲏⲟⲩⲧ
̅ⲓⲅ:̅ⲓⲇ ⲟⲩⲟϩ ϧⲉⲛ ⲡⲓⲉϩⲟⲟⲩ ⲉⲧⲉ ϥⲛⲁⲟⲩⲱⲛϩ ⲛϧⲏⲧϥ ⲛⲟⲩⲁⲟⲩⲁⲛ ⲉϥⲟⲛϧ
ⲉⲩⲉϭⲁϧⲙⲉϥ
̅ⲓⲅ:̅ⲓⲉ ⲟⲩⲟϩ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲉⲡⲓⲟⲩⲁⲛ ⲉⲑⲟⲩⲟϫ ⲟⲩⲟϩ ⲉϥⲉϭⲁϧⲙⲉϥ
ⲛϫⲉ ⲡⲓⲁⲟⲩⲁⲛ ⲉⲑⲟⲩⲟϫ ϥϭⲁϧⲉⲙ ⲟⲩⲥⲉϩⲧ ⲡⲉ
̅ⲓⲅ:̅ⲓⲋ ⲟⲩⲟϩ ⲉϣⲱⲡ ⲛⲧⲉϥⲧⲁⲥⲑⲟ ⲛϫⲉ ⲡⲓⲁⲟⲩⲁⲛ ⲉⲑⲟⲩⲟϫ ⲟⲩⲟϩ
ⲛⲧⲉϥⲟⲩⲱⲧⲉⲃ ⲉⲡⲉⲑⲟⲩⲟⲃϣ ⲟⲩⲟϩ ⲉϥⲉⲓ ϩⲁ ⲡⲓⲟⲩⲏⲃ
̅ⲓⲅ:̅ⲓⲍ ⲟⲩⲟϩ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲟⲩⲟϩ ϩⲏⲡⲡⲉ ⲁϥⲟⲩⲱⲧⲉⲃ ⲛϫⲉ
ⲡⲓϭⲟϩ ⲉⲡⲉⲑⲟⲩⲟⲃϣ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲧⲟⲩⲃⲟ ⲙⲡⲓϭⲟϩ ϥⲧⲟⲩⲃⲏⲟⲩⲧ
̅ⲓⲅ:̅ⲓⲏ ⲟⲩⲟϩ ⲟⲩⲥⲁⲣⲝ ⲉϣⲱⲡ ⲁϥϣⲁⲛϣⲱⲡⲓ ⲛϫⲉ ⲟⲩⲉⲣϧⲟⲧ ϧⲉⲛ ⲡⲉϥϣⲁⲣ
ⲟⲩⲟϩ ⲛⲧⲉϥⲕⲁϩⲕ
̅ⲓⲅ:̅ⲓⲑ ⲟⲩⲟϩ ⲛⲧⲉ ⲟⲩⲟⲩⲗⲏ ⲉⲥⲟⲩⲟⲃϣ ϣⲱⲡⲓ ϧⲉⲛ ⲫⲙⲁ ⲛⲧⲉ ⲡⲓⲉⲣϧⲟⲧ ⲓⲉ
ⲛⲧⲉⲥⲟⲩⲱⲛϩ ⲉⲥϯⲟⲩⲃⲁϣ ⲓⲉ ⲉⲥϯⲑⲣⲟϣⲣⲉϣ ⲟⲩⲟϩ ⲉϥⲉⲟⲩⲱⲛϩ ⲉⲡⲓⲟⲩⲏⲃ
̅ⲓⲅ:̅ⲕ ϩⲏⲡⲡⲉ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲟⲩⲟϩ ϩⲏⲡⲡⲉ ⲓⲥ ⲡⲉϥϩⲟ
ϥⲑⲉⲃⲓⲏⲟⲩⲧ ⲉⲃⲟⲗ ϩⲓⲧⲉⲛ ⲡⲓϣⲁⲣ ⲟⲩⲟϩ ⲡⲉϥϥⲱⲓ ⲁϥⲟⲩⲱⲧⲉⲃ ⲉⲟⲩⲟⲩⲃⲁϣ
ⲟⲩⲟϩ ⲉϥⲉϭⲁϧⲙⲉϥ ⲛϫⲉ ⲡⲓⲟⲩⲏⲃ ⲟⲩϭⲟϩ ⲛⲧⲉ ⲟⲩⲥⲉϩⲧ ⲡⲉ ⲉⲁϥⲫⲓⲣⲓ
ⲉⲃⲟⲗ ⲉϫⲉⲛ ⲡⲓⲉⲣϧⲟⲧ
̅ⲓⲅ:̅ⲕⲁ ⲉϣⲱⲡ ⲇⲉ ⲁϥϣⲁⲛⲛⲁⲩ ⲛϫⲉ ⲡⲓⲟⲩⲏⲃ ⲟⲩⲟϩ ⲓⲥ ϩⲏⲡⲡⲉ ⲙⲙⲟⲛ
ϥⲱⲓ ⲛⲟⲩⲟⲃϣ ⲛϧⲏⲧϥ ⲟⲩⲟϩ ϥⲑⲉⲃⲓⲏⲟⲩⲧ ⲁⲛ ⲉⲃⲟⲗ ϩⲓⲧⲉⲛ ⲡϣⲁⲣ ⲛⲧⲉ
ⲡⲉϥⲁⲟⲩⲁⲛ ⲟⲩⲟϩ ⲫⲁⲓ ⲟⲩϩⲗⲟⲗ ⲡⲉ ⲟⲩⲟϩ ⲉϥⲉⲫⲟⲣϫϥ ⲉⲃⲟⲗ ⲛϫⲉ ⲡⲓⲟⲩⲏⲃ
ⲛⲍ ⲛⲉϩⲟⲟⲩ
̅ⲓⲅ:̅ⲕⲃ ⲉϣⲱⲡ ⲇⲉ ϧⲉⲛ ⲟⲩϫⲱⲣ ⲛⲧⲉϥϫⲱⲣ ⲉⲃⲟⲗ ϧⲉⲛ ⲡⲓϣⲁⲣ ⲉⲉϭⲁϧⲙⲉϥ
ⲛϫⲉ ⲡⲓⲟⲩⲏⲃ ⲟⲩϭⲟϩ ⲛⲧⲉ ⲟⲩⲥⲉϩⲧ ⲡⲉ ⲉⲁϥⲫⲓⲣⲓ ⲉⲃⲟⲗ ϧⲉⲛ ⲡⲓⲉⲣϧⲟⲧ
̅ⲓⲅ:̅ⲕⲅ ⲉϣⲱⲡ ⲇⲉ ⲛⲧⲉϥⲟϩⲓ ⲙⲡⲉϥⲙⲁ ⲛϫⲉ ⲡⲓⲟⲩⲁⲛ ⲉⲑⲟⲩⲟⲩⲃϣ
ⲉⲧⲁϥⲟⲩⲱⲛϩ ⲟⲩⲟϩ ⲛⲧⲉϥϣⲧⲉⲙϫⲱⲣ ⲉⲃⲟⲗ ⲟⲩⲟⲩⲗⲏ ⲛⲧⲉ ⲡⲓⲉⲣϧⲟⲧ ⲡⲉ
ⲟⲩⲟϩ ⲉϥⲉⲧⲟⲩⲃⲟϥ ⲛϫⲉ ⲡⲓⲟⲩⲏⲃ
̅ⲓⲅ:̅ⲕⲇ ⲟⲩⲟϩ ⲟⲩⲥⲁⲣⲝ ⲉϣⲱⲡ ⲁⲣⲉϣⲁⲛ ⲟⲩⲕⲱⲕ ϣⲱⲡⲓ ϧⲉⲛ ⲡⲉϥϣⲁⲣ
ⲟⲩⲟϩ ⲉⲧⲁϥϣⲱⲡⲓ ϧⲉⲛ ⲡⲉϥϣⲁⲣ ⲉⲧⲁϥⲗⲱϫⲓ ⲉⲃⲟⲗ ⲙⲡⲓϫⲱϥ ⲛϫⲉ
ⲟⲩⲙⲏⲓⲛⲓ ⲉϥⲧⲁⲛϣⲉ ⲟⲩⲟⲛϩ ⲉϥϯⲙⲟⲩⲉ ⲓⲉ ⲉϥⲧⲁⲛϣⲉ ⲟⲩⲟⲃϣ ⲉϥⲑⲣⲉϣⲣⲱϣ
̅ⲓⲅ:̅ⲕⲉ ⲟⲩⲟϩ ⲉϥⲉⲛⲁⲩ ⲉⲣⲟϥ ⲛϫⲉ ⲡⲓⲟⲩⲏⲃ ⲟⲩⲟϩ ϩⲏⲡⲡⲉ ⲁϥⲟⲩⲱⲧⲉⲃ ⲛϫⲉ
ⲟⲩϥⲱⲓ ⲛⲟⲩⲱⲃϣ ⲉϥϯⲙⲟⲩⲉ ⲟⲩⲟϩ ⲡⲉϥϩⲟ ⲉϥⲑⲉⲃⲓⲏⲟⲩⲧ ⲉⲃⲟⲗ ⲟⲩⲧⲉ
ⲡⲓϣⲁⲣ ⲟⲩⲥⲉϩⲧ ⲡⲉ ⲉⲁϥⲫⲓⲣⲓ ⲉⲃⲟⲗ ϧⲉⲛ ⲡⲓⲕⲱⲕ ⲟⲩⲟϩ ⲉϥⲉϭⲁϧⲙⲉϥ ⲛϫⲉ
ⲡⲓⲟⲩⲏⲃ ⲟⲩϭⲟϩ ⲛⲧⲉ ⲟⲩⲥⲉϩⲧ ⲡⲉ
̅ⲓⲅ:̅ⲕⲋ ⲉϣⲱⲡ ⲇⲉ ⲁϥϣⲁⲛⲛⲁⲩ ⲛϫⲉ ⲡⲓⲟⲩⲏⲃ ⲟⲩⲟϩ ϩⲏⲡⲡⲉ ⲙⲙⲟⲛ ϥⲱⲓ
ⲛⲟⲩⲟⲃϣ ϧⲉⲛ ⲡⲉϥϯⲙⲟⲩⲉ ⲟⲩⲟϩ ϥⲑⲉⲃⲓⲏⲟⲩⲧ ⲁⲛ ⲉⲃⲟⲗ ϧⲉⲛ ⲡⲓϣⲁⲣ ⲫⲁⲓ
ⲇⲉ ⲟⲩϩⲗⲟⲗ ⲡⲉ ⲟⲩⲟϩ ⲉϥⲉⲫⲟⲣϫϥ ⲉⲃⲟⲗ ⲛϫⲉ ⲡⲓⲟⲩⲏⲃ ⲛⲍ ⲛⲉϩⲟⲟⲩ
̅ⲓⲅ:̅ⲕⲍ ⲟⲩⲟϩ ⲉϥⲉⲛⲁⲩ ⲉⲣⲟϥ ⲛϫⲉ ⲡⲓⲟⲩⲏⲃ ϧⲉⲛ ⲡⲓⲉϩⲟⲟⲩ ⲙⲙⲁϩ ⲍ
ⲉϣⲱⲡ ⲇⲉ ϧⲉⲛ ⲟⲩϫⲱⲣ ⲛⲧⲉϥϫⲱⲣ ⲉⲃⲟⲗ ϧⲉⲛ ⲡⲓϣⲁⲣ ⲟⲩⲟϩ ⲉϥⲉϭⲁϧⲙⲉϥ
ⲛϫⲉ ⲡⲓⲟⲩⲏⲃ ⲟⲩϭⲟϩ ⲛⲧⲉ ⲟⲩⲥⲉϩⲧ ⲡⲉ ⲉⲁϥⲫⲓⲣⲓ ⲉⲃⲟⲗ ϧⲉⲛ ⲡⲓϣⲁⲣ
̅ⲓⲅ:̅ⲕⲏ ⲉϣⲱⲡ ⲇⲉ ⲁϥϣⲁⲛⲟϩⲓ ϧⲉⲛ ⲡⲉϥⲙⲁ ⲛϫⲉ ⲫⲏ ⲉⲧϯⲙⲟⲩⲉ ⲟⲩⲟϩ
ⲛⲧⲉϥϣⲧⲉⲙϫⲱⲣ ⲉⲃⲟⲗ ϧⲉⲛ ⲡⲓϣⲁⲣ ⲫⲁⲓ ⲇⲉ ⲟⲩϩⲗⲟⲗ ⲡⲉ ⲟⲩⲟⲩⲗⲏ ⲛⲧⲉ
ⲟⲩⲕⲱⲕ ⲡⲉ ⲟⲩⲟϩ ⲉϥⲉⲧⲟⲩⲃⲟϥ ⲛϫⲉ ⲡⲓⲟⲩⲏⲃ ⲡⲓϣⲱⲗϩ ⲅⲁⲣ ⲡⲉ ⲛⲧⲉ
ⲡⲓⲕⲱⲕ
̅ⲓⲅ:̅ⲕⲑ ⲟⲩⲟϩ ⲟⲩⲣⲱⲙⲓ ⲓⲉ ⲟⲩⲥϩⲓⲙⲓ ⲫⲏ ⲉⲧⲉϥⲛⲁϣⲱⲡⲓ ⲛϧⲏⲧⲟⲩ ⲛϫⲉ
ⲟⲩϭⲟϩ ⲛⲧⲉ ⲟⲩⲥⲉϩⲧ ϧⲉⲛ ϯⲁⲫⲉ ⲓⲉ ϯⲙⲟⲣⲧ
̅ⲓⲅ:̅ⲗ ⲟⲩⲟϩ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲉⲡⲓϭⲟϩ ⲟⲩⲟϩ ϩⲏⲡⲡⲉ ⲓⲥ ⲡⲉϥϩⲟ ϥⲟⲓ
ⲛϫⲁⲛⲉ ⲉⲡⲓϣⲁⲣ ⲉⲟⲩⲟⲛ ⲟⲩϥⲱⲓ ⲇⲉ ⲛϧⲏⲧϥ ⲉϥⲟⲓ ⲛⲁⲟⲩⲁⲛ ⲙⲫⲣⲏϣ ⲟⲩⲟϩ
ⲉϥⲉϭⲁϧⲙⲉϥ ⲛϫⲉ ⲡⲓⲟⲩⲏⲃ ⲟⲩϧⲟⲙϧⲉⲙ ⲡⲉ ⲟⲩⲥⲉϩⲧ ⲛⲧⲉ ϯⲁⲫⲉ ⲓⲉ
ⲟⲩⲥⲉϩⲧ ⲡⲉ ⲛⲧⲉ ϯⲙⲟⲣⲧ
̅ⲓⲅ:̅ⲗⲁ ⲟⲩⲟϩ ⲉϣⲱⲡ ⲁϥϣⲁⲛⲛⲁⲩ ⲛϫⲉ ⲡⲓⲟⲩⲏⲃ ⲉⲡⲓϭⲟϩ ⲛⲧⲉ ⲡⲓϧⲟⲙϧⲉⲙ
ⲟⲩⲟϩ ϩⲏⲡⲡⲉ ⲓⲥ ⲡⲉϥϩⲟ ⲟⲩϫⲁⲛⲉ ⲁⲛ ⲡⲉ ⲉϩⲟⲧⲉ ⲡⲓϣⲁⲣ ⲟⲩⲟϩ ⲙⲙⲟⲛ
ϥⲱⲓ ⲛⲁⲟⲩⲁⲛ ⲙⲫⲏⲣϣ ⲛϧⲏⲧϥ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲫⲟⲣϫ ⲉⲃⲟⲗ
ⲙⲡⲓϭⲟϩ ⲛⲧⲉ ⲡⲓϧⲟⲙϧⲉⲙ ⲛⲍ ⲛⲉϩⲟⲟⲩ
̅ⲓⲅ:̅ⲗⲃ ⲟⲩⲟϩ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲉⲡⲓϭⲟϩ ϧⲉⲛ ⲡⲓⲉϩⲟⲟⲩ ⲙⲙⲁϩ ⲍ
ⲟⲩⲟϩ ϩⲏⲡⲡⲉ ⲙⲡⲉϥϫⲱⲣ ⲉⲃⲟⲗ ⲛϫⲉ ⲡⲓϧⲟⲙϧⲉⲙ ⲟⲩⲟϩ ⲙⲙⲟⲛ ϥⲱⲓ
ⲛⲁⲟⲩⲁⲛ ⲙⲫⲣⲏϣ ⲛϧⲏⲧϥ ⲟⲩⲟϩ ⲡϩⲟ ⲛⲧⲉ ⲡⲓϧⲟⲙϧⲉⲙ ⲛⲟⲩϫⲁⲛⲉ ⲁⲛ ⲡⲉ
ⲉⲃⲟⲗ ϩⲓⲧⲉⲛ ⲡⲓϣⲁⲣ
̅ⲓⲅ:̅ⲗⲅ ⲟⲩⲟϩ ⲉⲩⲉϧⲉⲕϩ ⲡⲓϣⲁⲣ ⲡⲓϧⲟⲙϧⲉⲙ ⲇⲉ ⲛⲛⲟⲩϧⲟⲕϥ ⲟⲩⲟϩ ⲉⲣⲉ
ⲡⲓⲟⲩⲏⲃ ⲉϥⲉⲫⲱⲣϫ ⲉⲃⲟⲗ ⲙⲡⲓϧⲟⲙϧⲉⲙ ⲛⲍ ⲛⲉϩⲟⲟⲩ ⲙⲡⲓⲙⲁϩ ⲥⲟⲡ ⲃ
̅ⲓⲅ:̅ⲗⲇ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲛⲁⲩ ⲉⲡⲓϧⲟⲙϧⲉⲙ ϧⲉⲛ ⲡⲓⲉϩⲟⲟⲩ ⲙⲙⲁϩ ⲍ
ⲟⲩⲟϩ ϩⲏⲡⲡⲉ ⲙⲡⲉϥϫⲱⲣ ⲉⲃⲟⲗ ⲛϫⲉ ⲡⲓϧⲟⲙϧⲉⲙ ϧⲉⲛ ⲡⲓϣⲁⲣ ⲙⲉⲛⲉⲛⲥⲁ
ⲑⲣⲟⲩϧⲟⲕϩϥ ⲟⲩⲟϩ ⲡϩⲟ ⲛⲧⲉ ⲡⲓϧⲟⲙϧⲉⲙ ϥⲟⲓ ⲛϫⲁⲛⲉ ⲁⲛ ϧⲉⲛ ⲡⲓϣⲁⲣ
ⲟⲩⲟϩ ⲉϥⲉⲧⲟⲩⲃⲟϥ ⲛϫⲉ ⲡⲓⲟⲩⲏⲃ ⲟⲩⲟϩ ⲉϥⲉⲣⲱϧⲓ ⲛⲛⲉϥϩⲃⲱⲥ ⲉϥⲉϣⲱⲡⲓ
ⲉϥⲧⲟⲩⲃⲏⲟⲩⲧ
̅ⲓⲅ:̅ⲗⲉ ⲉϣⲱⲡ ⲇⲉ ϧⲉⲛ ⲟⲩϫⲱⲣ ⲉⲃⲟⲗ ⲛⲧⲉϥϫⲱⲣ ⲉⲃⲟⲗ ⲛϫⲉ ⲡⲓϧⲟⲙϧⲉⲙ
ϧⲉⲛ ⲡⲓϣⲁⲣ ⲙⲉⲛⲉⲛⲥⲁ ⲑⲣⲉϥⲧⲟⲩⲃⲟϥ
̅ⲓⲅ:̅ⲗⲋ ⲟⲩⲟϩ ⲉϥⲉⲛⲁⲩ ⲉⲣⲟϥ ⲛϫⲉ ⲡⲓⲟⲩⲏⲃ ⲟⲩⲟϩ ϩⲏⲡⲡⲉ ⲁϥⲫⲱⲛϩ ⲉⲃⲟⲗ
ⲛϫⲉ ⲡⲓϧⲟⲙϧⲉⲙ ϧⲉⲛ ⲡⲓϣⲁⲣ ⲛⲛⲉϥϫⲉⲙⲡϣⲓⲛⲓ ⲛϫⲉ ⲡⲓⲟⲩⲏⲃ ⲉⲑⲃⲉ ⲡⲓϥⲱⲓ
ⲛⲁⲟⲩⲁⲛ ⲙⲫⲣⲏϣ ϥϭⲁϧⲉⲙ ⲛϫⲉ ⲫⲁⲓ
̅ⲓⲅ:̅ⲗⲍ ⲉϣⲱⲡ ⲇⲉ ⲁϥϣⲁⲛⲟϩⲓ ⲙⲡⲉϥⲙⲑⲟ ⲛϫⲉ ⲡⲓⲉⲣϧⲟⲧ ⲙⲡⲉϥⲙⲁ ⲟⲩⲟϩ
ⲛⲧⲉ ⲟⲩϥⲱⲓ ⲛⲭⲁⲙⲉ ⲣⲱⲧ ⲛϧⲏⲧϥ ⲁϥⲗⲟϫϥ ⲛϫⲉ ⲡⲓϧⲟⲙϧⲉⲙ ϥⲧⲟⲩⲃⲏⲟⲩⲧ
ⲟⲩⲟϩ ⲉϥⲉⲧⲟⲩⲃⲟϥ ⲛϫⲉ ⲡⲓⲟⲩⲏⲃ
̅ⲓⲅ:̅ⲗⲏ ⲟⲩⲟϩ ⲟⲩⲣⲱⲙⲓ ⲓⲉ ⲟⲩⲥϩⲓⲙⲓ ⲫⲏ ⲉⲧⲟⲩⲛⲁϣⲱⲡⲓ ϧⲉⲛ ⲡⲉϥϣⲁⲣ ⲛⲧⲉ
ⲧⲉϥⲥⲁⲣⲝ ⲛϫⲉ ϩⲁⲛⲁⲗ ⲉⲩⲉⲣⲟⲩⲱⲓⲛⲓ ⲉⲩϯⲟⲩⲃⲁϣ
̅ⲓⲅ:̅ⲗⲑ ⲟⲩⲟϩ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲟⲩⲟϩ ϩⲏⲡⲡⲉ ⲥⲉ ϧⲉⲛ ⲡⲓϣⲁⲣ ⲛⲧⲉ
ⲧⲉϥⲥⲁⲣⲝ ⲛϫⲉ ϩⲁⲛⲁⲗ ⲉⲩⲉⲣⲟⲩⲱⲓⲛⲓ ⲉⲩϯⲟⲩⲃⲁϣ ⲟⲩⲁⲗⲫⲟⲥ ⲡⲉ ⲉϥⲫⲟⲣⲓ
ⲉⲃⲟⲗ ϧⲉⲛ ⲡⲓϣⲁⲣ ⲛⲧⲉ ⲧⲉϥⲥⲁⲣⲝ ϥⲧⲟⲩⲃⲏⲟⲩⲧ
̅ⲓⲅ:̅ⲙ ⲉϣⲱⲡ ⲇⲉ ⲁⲣⲉϣⲁⲛ ⲧⲁⲫⲉ ⲥⲱⲓ ⲟⲩⲕⲉⲣϩⲉ ⲡⲉ ϥⲧⲟⲩⲃⲏⲟⲩⲧ
̅ⲓⲅ:̅ⲙⲁ ⲉϣⲱⲡ ⲇⲉ ⲛⲧⲉ ⲛⲁ ⲡⲉϥϩⲟ ⲥⲱⲓ ⲛⲧⲉ ⲧⲉϥⲁⲫⲉ ⲟⲩⲃⲁⲗⲙⲃⲉϩ ⲡⲉ
ϥⲧⲟⲩⲃⲏⲟⲩⲧ
̅ⲓⲅ:̅ⲙⲃ ⲉϣⲱⲡ ⲇⲉ ϧⲉⲛ ⲧⲉϥⲙⲉⲧⲕⲉⲣϩⲉ ⲓⲉ ϧⲉⲛ ⲧⲉϥⲙⲉⲧⲁⲗⲟⲩⲃⲉϩ
ⲛⲧⲉϥϣⲱⲡⲓ ⲛϫⲉ ⲟⲩϭⲟϩ ⲉϥⲟⲩⲟⲃϣ ⲓⲉ ⲉϥⲑⲣⲉϣⲣⲱϣ ⲟⲩⲥⲉϩⲧ ⲡⲉ ⲉϥⲫⲟⲣⲓ
ⲉⲃⲟⲗ ϧⲉⲛ ⲧⲉϥⲙⲉⲧⲕⲉⲣϩⲉ ⲛⲉⲙ ⲧⲉϥⲙⲉⲧⲁⲗⲟⲩⲃⲉϩ
̅ⲓⲅ:̅ⲙⲅ ⲟⲩⲟϩ ⲉϥⲉⲛⲁⲩ ⲉⲣⲟϥ ⲛϫⲉ ⲡⲓⲟⲩⲏⲃ ⲟⲩⲟϩ ϩⲏⲡⲡⲉ ⲓⲥ ⲡϩⲟ ⲛⲧⲉ
ⲡⲓϭⲟϩ ϥⲟⲩⲟⲃϣ ⲓⲉ ⲟⲩⲁⲟⲩⲁⲛ ⲛⲭⲣⲱⲙ ϧⲉⲛ ⲧⲉϥⲙⲉⲧⲕⲉⲣϩⲉ ⲓⲉ ϧⲉⲛ
ⲧⲉϥⲙⲉⲧⲁⲗⲟⲩⲃⲉϩ ⲙⲫⲣⲏϯ ⲛⲟⲩⲥⲙⲟⲧ ⲛⲧⲉ ⲟⲩⲥⲉϩⲧ ϧⲉⲛ ⲡϣⲁⲣ ⲛⲧⲉ
ⲧⲉϥⲥⲁⲣⲝ
̅ⲓⲅ:̅ⲙⲇ ⲟⲩⲣⲱⲙⲓ ⲛⲕⲁⲕⲥⲉϩⲧ ⲡⲉ ϧⲉⲛ ⲟⲩϭⲱϧⲉⲙ ⲉϥⲉϭⲁϧⲙⲉϥ ⲛϫⲉ ⲡⲓⲟⲩⲏⲃ
ϫⲉ ⲡⲉϥϭⲟϩ ϧⲉⲛ ⲧⲉϥⲁⲫⲉ
̅ⲓⲅ:̅ⲙⲉ ⲟⲩⲟϩ ⲟⲩⲕⲁⲕⲥⲉϩⲧ ⲫⲏ ⲉⲧⲉ ⲡⲓϭⲟϩ ϩⲓϫⲱϥ ⲛⲉϥϩⲃⲱⲥ ⲉⲩⲉϣⲱⲡⲓ
ⲉⲩⲫⲉⲣⲫⲱⲣ ⲟⲩⲟϩ ⲛⲧⲉϥⲁⲫⲉ ⲉⲥϩⲟⲃⲥ ⲁⲛ ⲟⲩⲟϩ ⲉϥⲉϩⲱⲃⲥ ⲙⲡⲕⲱϯ ⲛⲣⲱϥ
ⲟⲩⲟϩ ⲉⲩⲉⲙⲟⲩϯ ⲉⲣⲟϥ ϫⲉ ϥϭⲁϧⲉⲙ
̅ⲓⲅ:̅ⲙⲋ ⲛⲛⲓⲉϩⲟⲟⲩ ⲧⲏⲣⲟⲩ ⲉⲧⲉ ⲡⲓϭⲟϩ ϩⲓⲱⲧϥ ⲉⲟⲩⲁⲕⲑⲁⲣⲧⲟⲥ ⲉϥⲉϩⲉⲙⲥⲓ
ⲥⲁⲡⲥⲁ ⲉⲣⲉ ⲡⲉϥⲙⲁⲛϣⲱⲡⲓ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ
̅ⲓⲅ:̅ⲙⲍ ⲟⲩⲟϩ ⲟⲩϩⲃⲟⲥ ⲉϣⲱⲡ ⲁϥϣⲁⲛϣⲱⲡⲓ ⲛϧⲏⲧϥ ⲛϫⲉ ⲟⲩϭⲟϩ ⲛⲧⲉ
ⲟⲩⲥⲉϩⲧ ϧⲉⲛ ⲟⲩϩⲃⲟⲥ ⲛⲉⲣϣⲱⲛ ⲓⲉ ϧⲉⲛ ⲟⲩϩⲃⲟⲥ ⲛⲓⲁⲩ
̅ⲓⲅ:̅ⲙⲏ ⲓⲉ ϧⲉⲛ ⲟⲩⲟⲩⲁⲧϩⲓ ⲓⲉ ϧⲉⲛ ⲟⲩϧⲉ ⲓⲉ ϧⲉⲛ ⲟⲩⲓⲁⲩ ⲓⲉ ϧⲉⲛ ⲟⲩⲥⲟⲣⲧ
ⲓⲉ ϧⲉⲛ ⲟⲩϣⲁⲣ ⲓⲉ ϧⲉⲛ ϣⲁⲣ ⲛⲓⲃⲉⲛ ⲉⲧⲟⲩⲛⲁⲉⲣϩⲱⲃ ⲉⲣⲟϥ
̅ⲓⲅ:̅ⲙⲑ ⲟⲩⲟϩ ⲛⲧⲉϥϣⲱⲡⲓ ⲛϫⲉ ⲡⲓϭⲟϩ ⲉϥⲟⲩⲉⲧⲟⲩⲱⲧ ⲓⲉ ⲉϥⲑⲣⲉϣⲣⲱϣ
ϧⲉⲛ ⲡⲓϣⲁⲣ ⲓⲉ ϧⲉⲛ ⲡⲓϩⲃⲟⲥ ⲓⲉ ϧⲉⲛ ⲡⲓⲟⲩⲁⲑⲓ ⲓⲉ ϧⲉⲛ ⲡⲓϧⲉ ⲓⲉ ϧⲉⲛ
ⲥⲕⲉⲩⲟⲥ ⲛⲓⲃⲉⲛ ⲛϣⲁⲣ ⲟⲩϭⲟϩ ⲛⲧⲉ ⲟⲩⲥⲉϩⲧ ⲡⲉ ⲟⲩⲟϩ ⲉϥⲉⲧⲁⲙⲉ ⲡⲓⲟⲩⲏⲃ
ⲉⲣⲟϥ
̅ⲓⲅ:̅ⲉ0 ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲛⲁⲩ ⲉⲡⲓϭⲟϩ ⲟⲩⲟϩ ⲉⲣⲉ ⲡⲓⲟⲩⲏⲃ ⲫⲱⲣϫ
ⲉⲃⲟⲗ ⲉⲡⲓϭⲟϩ ⲛⲧⲉ ⲡⲓⲥⲉϩⲧ ⲛⲍ ⲛⲉϩⲟⲟⲩ
̅ⲓⲅ:̅ⲉ̅ⲁ ⲟⲩⲟϩ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲉⲡⲓϭⲟϩ ⲛⲧⲉ ⲡⲓⲥⲉϩⲧ ⲙⲡⲓⲉϩⲟⲟⲩ
ⲙⲙⲁϩ ⲍ ⲉϣⲱⲡ ⲇⲉ ⲁϥϣⲁⲛϫⲱⲣ ⲉⲃⲟⲗ ⲛϫⲉ ⲡⲓϭⲟϩ ϧⲉⲛ ⲡⲓϩⲃⲟⲥ ⲓⲉ
ϧⲉⲛ ⲡⲓⲟⲩⲁⲧϩⲓ ⲓⲉ ϧⲉⲛ ⲡⲓϧⲉ ⲓⲉ ϧⲉⲛ ⲡⲓϣⲁⲣ ⲕⲁⲧⲁ ⲛⲓϣⲁⲣ ⲧⲏⲣⲟⲩ
ⲉⲧⲟⲩⲛⲁⲑⲁⲙⲓⲱⲟⲩ ϧⲉⲛ ϯⲓⲟⲡⲏ ⲟⲩⲥⲉϩⲧ ⲉϥⲛⲁⲟϩⲓ ⲡⲉ ⲛϫⲉ ⲡⲓϭⲟϩ
ϥϭⲁϧⲉⲙ
̅ⲓⲅ:̅ⲉ̅ⲃ ⲉϥⲉⲣⲱⲕϩ ⲙⲡⲓϩⲃⲟⲥ ⲓⲉ ⲡⲓⲟⲩⲁⲑⲓ ⲓⲉ ⲡⲓϧⲉ ⲓⲧⲉ ϧⲉⲛ ⲛⲓⲥⲟⲣⲧ ⲓⲉ
ϧⲉⲛ ⲛⲓⲓⲁⲩ ⲓⲧⲉ ϧⲉⲛ ⲛⲓⲥⲕⲉⲩⲟⲥ ⲛⲓⲃⲉⲛ ⲛϣⲁⲣ ⲉⲧⲉ ⲡⲓϭⲟϩ ⲛϧⲏⲧⲟⲩ ϫⲉ
ⲟⲩⲏⲓ ⲟⲩⲥⲉϩⲧ ⲉϥⲛⲁⲟϩⲓ ⲡⲉ ⲉⲩⲉⲣⲟⲕϩⲟⲩ ϧⲉⲛ ⲟⲩⲭⲣⲱⲙ
̅ⲓⲅ:̅ⲉ̅ⲅ ⲉϣⲱⲡ ⲇⲉ ⲁϥϣⲁⲛⲛⲁⲩ ⲛϫⲉ ⲡⲓⲟⲩⲏⲃ ⲟⲩⲟϩ ⲛⲧⲉϣⲧⲉⲙ ⲡⲓϭⲟϩ
ϫⲱⲣ ⲉⲃⲟⲗ ϧⲉⲛ ⲡⲓϩⲃⲱⲥ ⲓⲉ ϧⲉⲛ ⲡⲓⲟⲩⲁⲑⲓ ⲓⲉ ϧⲉⲛ ⲡⲓϧⲉ ⲓⲉ ϧⲉⲛ ⲥⲕⲉⲩⲟⲥ
ⲛⲓⲃⲉⲛ ⲛϣⲁⲣ
̅ⲓⲅ:̅ⲉ̅ⲇ ⲟⲩⲟϩ ⲉϥⲉⲟⲩⲁϩⲥⲁϩⲛⲓ ⲛϫⲉ ⲡⲓⲟⲩⲏⲃ ⲟⲩⲟϩ ⲉϥⲉⲣⲱϧⲓ ⲙⲫⲏ ⲛⲓⲃⲉⲛ
ⲉⲧⲉ ⲡⲓϭⲟϩ ϩⲓⲱⲧϥ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲟⲩⲱϯ ⲉⲃⲟⲗ ⲙⲡⲓϭⲟϩ ⲛⲍ
ⲛⲉϩⲟⲟⲩ ⲙⲫⲙⲁ ⲥⲟⲡ ⲃ
̅ⲓⲅ:̅ⲉ̅ⲉ ⲟⲩⲟϩ ⲉϥⲉⲛⲁⲩ ⲛϫⲉ ⲡⲓⲟⲩⲏⲃ ⲙⲉⲛⲉⲛⲥⲁ ⲑⲣⲉϥⲣⲱϧⲓ ⲛϫⲉ ⲡⲓϭⲟϩ
ⲛⲧⲉϥϣⲧⲉⲙϣⲓⲃϯ ⲙⲡⲉϥϩⲟ ⲟⲩⲟϩ ⲡⲓϭⲟϩ ϥϫⲏⲣ ⲉⲃⲟⲗ ⲁⲛ ϥϭⲁϧⲉⲙ ϧⲉⲛ
ⲟⲩⲭⲣⲱⲙ ⲉⲩⲉⲣⲟⲕϩϥ ⲓⲉ ⲁϥⲧⲁϫⲣⲟ ϧⲉⲛ ⲡⲓϩⲃⲟⲥ ⲓⲉ ϧⲉⲛ ⲡⲓⲟⲩⲁⲑⲓ ⲓⲉ ϧⲉⲛ
ⲡⲓϧⲉ ⲓⲉ ϧⲉⲛ ⲡⲓϣⲁⲣ
̅ⲓⲅ:̅ⲉ̣̅ⲋ ⲟⲩⲟϩ ⲁϥϣⲁⲛⲛⲁⲩ ⲛϫⲉ ⲡⲓⲟⲩⲏⲃ ⲟⲩⲟϩ ⲓⲥ ⲡⲓϭⲟϩ ϥⲟⲓ ⲛϩⲗⲟⲗ
ⲙⲉⲛⲉⲛⲥⲁ ⲑⲣⲟⲩⲣⲁϧϥ ⲉϥⲉⲫⲁϧϥ ⲉⲃⲟⲗ ϩⲁ ⲡⲓϩⲃⲟⲥ ⲓⲉ ⲉⲃⲟⲗ ϩⲁ ⲡⲓⲟⲩⲁⲑⲓ
ⲓⲉ ⲉⲃⲟⲗ ϩⲁ ⲡⲓϧⲉ ⲓⲉ ⲉⲃⲟⲗ ϩⲁ ⲡⲓϣⲁⲣ
̅ⲓⲅ:̅ⲉ̅ⲍ ⲉϣⲱⲡ ⲇⲉ ⲟⲛ ⲛⲧⲉϥⲟⲩⲱⲛϩ ϧⲉⲛ ⲡⲓϩⲃⲟⲥ ⲓⲉ ϧⲉⲛ ⲡⲓⲟⲩⲁⲑⲓ ⲓⲉ
ϧⲉⲛ ⲡⲓϧⲉ ⲓⲉ ϧⲉⲛ ⲡⲓϣⲁⲣ ⲓⲉ ϧⲉⲛ ⲥⲕⲉⲩⲟⲥ ⲛⲓⲃⲉⲛ ⲛϣⲁⲣ ⲟⲩⲥⲉϩⲧ ⲡⲉ
ⲉϥⲛⲁⲫⲓⲣⲓ ⲉⲃⲟⲗ ϧⲉⲛ ⲟⲩⲭⲣⲱⲙ ⲉⲩⲉⲣⲱⲕϩ ⲙⲫⲏ ⲉⲧⲉ ⲡⲓϭⲟϩ ϩⲓⲱⲧϥ
̅ⲓⲅ:̅ⲉ̅ⲏ ⲟⲩⲟϩ ⲡⲓϩⲃⲟⲥ ⲓⲉ ⲡⲓⲟⲩⲁⲑⲓ ⲓⲉ ⲡⲓϧⲉ ⲓⲉ ⲥⲕⲉⲩⲟⲥ ⲛⲓⲃⲉⲛ ⲛϣⲁⲣ
ⲫⲏ
ⲉⲧⲟⲩⲛⲁⲣⲁϧϥ ⲙⲫⲙⲁϩ ⲥⲟⲡ ⲃ ⲟⲩⲟϩ ⲉϥⲉϣⲱⲡⲓ ⲉϥⲧⲟⲩⲃⲏⲟⲩⲧ
̅ⲓⲅ:̅ⲉ̅ⲑ ⲫⲁⲓ ⲡⲉ ⲫⲛⲟⲙⲟⲥ ⲛⲧⲉ ⲟⲩϭⲟϩ ⲛⲧⲉ ⲟⲩⲥⲉϩⲧ ⲓⲉ ⲛⲧⲉ ⲟⲩϩⲃⲟⲥ
ⲛⲥⲟⲣⲧ ⲓⲉ ⲟⲩⲓⲁⲩ ⲓⲉ ⲟⲩⲟⲩⲁⲑⲓ ⲓⲉ ⲟⲩϧⲉ ⲓⲉ ⲥⲕⲉⲩⲟⲥ ⲛⲓⲃⲉⲛ ⲛϣⲁⲣ
ⲉⲡϫⲓⲛⲧⲟⲩⲃⲟϥ ⲓⲉ ⲉϭⲁϧⲙⲉϥ
̅ⲓⲇ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲓⲇ:̅ⲃ ϫⲉ ⲫⲁⲓ ⲡⲉ ⲫⲛⲟⲙⲟⲥ ⲛⲧⲉ ⲡⲓⲕⲁⲕⲥⲉϩⲧ ϧⲉⲛ ⲡⲓⲉϩⲟⲟⲩ
ⲉⲧⲉϥⲛⲁⲧⲟⲩⲃⲟ ⲟⲩⲟϩ ⲉⲩⲉⲉⲛϥ ϩⲁ ⲡⲓⲟⲩⲏⲃ
̅ⲓⲇ:̅ⲅ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲓ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ ⲟⲩⲟϩ ⲉϥⲉⲛⲁⲩ ⲛϫⲉ
ⲡⲓⲟⲩⲏⲃ ⲟⲩⲟϩ ϩⲏⲡⲡⲉ ⲁϥⲧⲁⲗϭⲟ ⲛϫⲉ ⲡⲓϭⲟϩ ⲛⲧⲉ ⲡⲓⲥⲉϩⲧ ⲉⲃⲟⲗ ϧⲉⲛ
ⲡⲓⲕⲁⲕⲥⲉϩⲧ
̅ⲓⲇ:̅ⲇ ⲟⲩⲟϩ ⲉϥⲉⲟⲩⲁϩⲥⲁϩⲛⲓ ⲛϫⲉ ⲡⲓⲟⲩⲏⲃ ⲟⲩⲟϩ ⲉϥⲉϭⲓ ⲛϫⲉ ⲫⲏ
ⲉⲧⲁϥⲧⲟⲩⲃⲟ ⲛⲉⲣϫ ⲥⲛⲟⲩϯ ⲉⲩⲟⲛϧ ⲟⲩⲟϩ ⲉⲩⲧⲟⲩⲃⲏⲟⲩⲧ ⲛⲉⲙ ⲟⲩϣⲉⲛⲥⲓϥⲓ
ⲛⲉⲙ ⲟⲩϩⲱⲥ ⲛⲕⲟⲕⲕⲟⲥ ⲉϥⲥⲁϯ ⲛⲉⲙ ⲟⲩϩⲩⲥⲱⲡⲟⲥ
̅ⲓⲇ:̅ⲉ ⲟⲩⲟϩ ⲉϥⲉⲟⲩⲁϩⲥⲁϩⲛⲓ ⲛϫⲉ ⲡⲓⲟⲩⲏⲃ ⲟⲩⲟϩ ⲉⲩⲉϧⲟⲗϧⲉⲗ ⲛⲟⲩⲁⲓ
ⲛⲛⲓⲉⲣϫ ϧⲉⲛ ⲟⲩⲙⲟⲕⲓ ⲙⲃⲉⲗϫ ⲉϩⲣⲏⲓ ⲉϫⲉⲛ ⲟⲩⲙⲱⲟⲩ ⲉϥⲟⲛϧ
̅ⲓⲇ:̣̅ⲋ ⲟⲩⲟϩ ⲉϥⲉϭⲓ ⲛϯⲉⲣϫ ⲉⲧⲟⲛϧ ⲛⲉⲙ ⲡⲓϣⲉⲛⲥⲓϥⲓ ⲛⲉⲙ ⲡⲓϩⲱⲥ ⲛⲕⲟⲕⲕⲟⲥ
ⲉⲧⲥⲁϯ ⲛⲉⲙ ⲡⲓϩⲩⲥⲱⲡⲟⲥ ⲟⲩⲟϩ ⲉϥⲉⲥⲟⲡⲟⲩ ⲛⲉⲙ ϯⲉⲣϫ ⲉⲧⲟⲛϧ ϧⲉⲛ
ⲡⲥⲛⲟϥ ⲛϯⲉⲣϫ ⲉⲧⲁⲩϧⲉⲗϧⲱⲗⲥ ⲉϩⲣⲏⲓ ⲉϫⲉⲛ ⲟⲩⲙⲱⲟⲩ ⲉϥⲟⲛϧ
̅ⲓⲇ:̅ⲍ ⲟⲩⲟϩ ⲉϥⲉⲛⲟⲩϫϧ ⲛⲍ ⲛⲥⲟⲡ ⲉϩⲣⲏⲓ ⲉϫⲉⲛ ⲫⲏ ⲉⲧⲁϥⲧⲟⲩⲃⲟ ⲉⲃⲟⲗ
ϧⲉⲛ ⲡⲓⲥⲉϩⲧ ⲟⲩⲟϩ ⲉϥⲉϣⲱⲡⲓ ⲉϥⲧⲟⲩⲃⲏⲟⲩⲧ ⲟⲩⲟϩ ϯⲉⲣϫ ⲉⲧⲟⲛϧ
ⲉϥⲉⲟⲩⲟⲣⲡⲥ ⲉⲃⲟⲗ ⲉⲡⲓⲙⲉϣϣⲱⲧ
̅ⲓⲇ:̅ⲏ ⲟⲩⲟϩ ⲉϥⲉⲣⲱϧⲓ ⲛⲛⲉϥϩⲃⲱⲥ ⲛϫⲉ ⲫⲏ ⲉⲧⲁϥⲧⲟⲩⲃⲟ ⲟⲩⲟϩ ⲉϥⲉϧⲉⲕϩ
ⲡⲉϥϥⲱⲓ ⲧⲏⲣϥ ⲟⲩⲟϩ ⲉϥⲉϫⲱⲕⲉⲙ ϧⲉⲛ ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ
ⲉϥⲧⲟⲩⲃⲏⲟⲩⲧ ⲟⲩⲟϩ ⲙⲉⲛⲉⲛⲥⲁ ⲛⲁⲓ ⲉϥⲉⲓ ⲉϧⲟⲩⲛ ⲉϯⲡⲁⲣⲉⲙⲃⲟⲗⲏ ⲟⲩⲟϩ
ⲉϥⲉⲟϩⲓ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ ⲛⲍ ⲛⲉϩⲟⲟⲩ
̅ⲓⲇ:̅ⲑ ⲟⲩⲟϩ ⲉⲥⲉϣⲱⲡⲓ ϧⲉⲛ ⲡⲓⲉϩⲟⲟⲩ ⲙⲙⲁϩ ⲍ ⲉϥⲉϧⲉⲕϩ ⲡⲉϥϥⲱⲓ ⲧⲏⲣϥ
ⲧⲉϥⲁⲫⲉ ⲛⲉⲙ ⲧⲉϥⲙⲟⲣⲧ ⲛⲉⲙ ⲛⲉϥⲙⲉϫⲉⲛϩ ⲛⲉⲙ ϥⲱⲓ ⲛⲓⲃⲉⲛ ⲉⲧⲉⲛⲧⲁϥ
ⲉϥⲉϧⲟⲕϩⲟⲩ ⲟⲩⲟϩ ⲉϥⲉⲣⲱϧⲓ ⲛⲛⲉϥϩⲃⲱⲥ ⲟⲩⲟϩ ⲉϥⲉϫⲉⲕⲉⲙ ⲡⲉϥⲥⲱⲙⲁ ϧⲉⲛ
ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ ⲉϥⲧⲟⲩⲃⲏⲟⲩⲧ
̅ⲓⲇ:̅ⲓ ⲟⲩⲟϩ ϧⲉⲛ ⲡⲓⲉϩⲟⲟⲩ ⲙⲙⲁϩⲏ ⲉϥⲉϭⲓ ⲛϩⲓⲏⲃ ⲃ ⲛⲁⲧⲁϭⲛⲓ
ⲉⲁⲩⲉⲣⲟⲩⲣⲟⲙⲡⲓ ⲟⲩⲟϩ ⲟⲩⲁⲓ ⲛⲉⲥⲱⲟⲩ ⲛⲁⲧⲁϭⲛⲓ ⲉⲁϥⲉⲣⲟⲩⲣⲟⲙⲡⲓ ⲛⲉⲙ ⲅ
ⲛⲣⲉⲙⲏⲧ ⲛⲥⲉⲙⲓⲇⲁⲗⲓⲟⲛ ⲉⲩϣⲟⲩϣⲱⲟⲩϣⲓ ⲉⲩⲟⲩⲟϣⲉⲙ ϧⲉⲛ ⲟⲩⲛⲉϩ ⲛⲉⲙ
ⲟⲩⲗⲟⲕ ⲛⲛⲉϩ
̅ⲓⲇ:̅ⲓⲁ ⲟⲩⲟϩ ⲡⲓⲟⲩⲏⲃ ⲉⲧⲧⲟⲩⲃⲟ ⲉϥⲉⲧⲁϩⲟ ⲉⲣⲁⲧϥ ⲙⲡⲓⲣⲱⲙⲓ ⲉⲧⲛⲁⲧⲟⲩⲃⲟ
ⲛⲉⲙ ⲛⲁⲓ ⲙⲡⲉⲙⲑⲟ ⲙⲡϭⲟⲓⲥ ϩⲓⲣⲉⲛ ⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ
̅ⲓⲇ:̅ⲓⲃ ⲟⲩⲟϩ ⲉⲣⲉ ⲡⲓⲟⲩⲏⲃ ⲱⲗⲓ ⲙⲡⲓⲟⲩⲁⲓ ⲛϩⲓⲏⲃ ⲟⲩⲟϩ ⲉϥⲉⲉⲛϥ ⲉϩⲣⲏⲓ
ⲉϫⲉⲛ ϯⲙⲉⲧϣⲁϥⲧ ⲛⲉⲙ ⲡⲓⲗⲟⲕ ⲛⲛⲉϩ ⲟⲩⲟϩ ⲉϥⲉⲟⲩⲟⲧⲟⲩ ⲉⲃⲟⲗ
ⲛⲟⲩⲫⲱⲣϫ ⲙⲡⲉⲙⲑⲟ ⲙⲡϭⲟⲓⲥ
̅ⲓⲇ:̅ⲓⲅ ⲟⲩⲟϩ ⲉⲩⲉϧⲟⲗϧⲉⲗ ⲙⲡⲓϩⲓⲏⲃ ⲙⲡⲓⲙⲁ ⲉⲧⲟⲩⲛⲁϧⲟⲗϧⲉⲗ ⲙⲡⲓϭⲗⲓⲗ
ⲛϫⲟϥϫⲉϥ ⲙⲙⲟϥ ⲛⲉⲙ ⲛⲏ ⲉⲧⲉ ⲉⲑⲃⲉ ⲫⲛⲟⲃⲓ ϧⲉⲛ ⲟⲩⲙⲁ ⲉⲑⲟⲩⲁⲃ ⲫⲏ
ⲅⲁⲣ ⲉⲑⲃⲉ ⲫⲛⲟⲃⲓ ⲙⲫⲣⲏϯ ⲙⲫⲏ ⲉⲧⲉ ⲉⲑⲃⲉ ϯⲙⲉⲧϣⲁϥⲧ ⲉⲧϣⲟⲡ
ⲙⲡⲓⲟⲩⲏⲃ ⲛⲉⲑⲟⲩⲁⲃ ⲛⲧⲉ ⲛⲏ ⲉⲑⲟⲩⲁⲃ ⲛⲉ
̅ⲓⲇ:̅ⲓⲇ ⲟⲩⲟϩ ⲉⲣⲉ ⲡⲓⲟⲩⲏⲃ ⲱⲗⲓ ⲉⲃⲟⲗ ϧⲉⲛ ⲡⲓⲥⲛⲟϥ ⲛⲧⲉ ⲫⲏ ⲉⲧⲉ ⲉⲑⲃⲉ
ϯⲙⲉⲧϣⲁϥⲧ ⲟⲩⲟϩ ⲉϥⲉⲧⲁⲗⲟ ⲛϫⲉ ⲡⲓⲟⲩⲏⲃ ⲉϫⲉⲛ ⲡⲓⲗⲟⲃⲟⲥ ⲛⲧⲉ ⲫⲙⲁϣϫ
ⲛⲟⲩⲓⲛⲁⲙ ⲛⲧⲉ ⲫⲏ ⲉⲧⲧⲟⲩⲃⲟ ⲙⲙⲟϥ ⲛⲉⲙ ⲉϫⲉⲛ ϩⲏⲧⲥ ⲛⲧⲉϥϫⲓϫ
ⲛⲟⲩⲓⲛⲁⲙ ⲛⲉⲙ ⲉϫⲉⲛ ϩⲏⲧⲥ ⲛⲧⲉϥⲫⲁⲧ ⲛⲟⲩⲓⲛⲁⲙ
̅ⲓⲇ:̅ⲓⲉ ⲟⲩⲟϩ ⲉⲣⲉ ⲡⲓⲟⲩⲏⲃ ⲱⲗⲓ ⲉⲃⲟⲗ ϧⲉⲛ ⲡⲓⲗⲟⲕ ⲛⲛⲉϩ ⲉϥⲉϫⲱϣ ⲉϫⲉⲛ
ⲧⲉϥϫⲓϫ ⲛϫⲁϭⲏ ⲛⲧⲉ ⲡⲓⲟⲩⲏⲃ
̅ⲓⲇ:̅ⲓⲋ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲥⲉⲡ ⲡⲉϥⲧⲏⲃ ⲛⲟⲩⲓⲛⲁⲙ ϧⲉⲛ ⲡⲓⲛⲉϩ ⲉⲧϧⲉⲛ
ⲧⲉϥϫⲓϫ ⲛϫⲁϭⲏ ⲟⲩⲟϩ ⲉϥⲉⲛⲟⲩϫϧ ⲙⲡⲉϥⲧⲏⲃ ⲉⲃⲟⲗ ϧⲉⲛ ⲡⲓⲛⲉϩ ⲛⲍ
ⲛⲥⲟⲡ ⲙⲡⲉⲙⲑⲟ ⲙⲡϭⲟⲓⲥ
̅ⲓⲇ:̅ⲓⲍ ⲡⲓⲛⲉϩ ⲇⲉ ⲉⲧⲁϥⲥⲱϫⲡ ϧⲉⲛ ⲧⲉϥϫⲓϫ ⲉϥⲉⲧⲁⲗⲟϥ ⲛϫⲉ ⲡⲓⲟⲩⲏⲃ
ⲉϫⲉⲛ ⲡⲓⲗⲟⲃⲟⲥ ⲛⲧⲉ ⲫⲙⲁϣϫ ⲛⲟⲩⲓⲛⲁⲙ ⲛⲧⲉ ⲫⲏ ⲉⲧⲧⲟⲩⲃⲟ ⲙⲙⲟϥ ⲛⲉⲙ
ⲉϫⲉⲛ ϩⲏⲧⲥ ⲛⲧⲉϥϫⲓϫ ⲛⲟⲩⲓⲛⲁⲙ ⲛⲉⲙ ⲉϫⲉⲛ ϩⲏⲧⲥ ⲛⲧⲉϥⲫⲁⲧ ⲛⲟⲩⲓⲛⲁⲙ
ⲉϫⲉⲛ ⲫⲙⲁ ⲛⲧⲉ ⲡⲓⲥⲛⲟϥ ⲛⲧⲉ ⲫⲏ ⲛⲧⲉ ϯⲙⲉⲧϣⲁϥⲧ
̅ⲓⲇ:̅ⲓⲏ ⲡⲓⲛⲉϩ ⲇⲉ ⲉⲧⲁϥⲥⲱϫⲡ ⲫⲏ ⲉⲧⲭⲏ ϧⲉⲛ ⲧϫⲓϫ ⲙⲡⲓⲟⲩⲏⲃ
ⲉϥⲉⲧⲁⲗⲟϥ ⲉϫⲉⲛ ⲧⲁⲫⲉ ⲛⲧⲉ ⲫⲏ ⲉⲧⲁϥⲧⲟⲩⲃⲟ ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ
ⲉϫⲱϥ ⲛϫⲉ ⲡⲓⲟⲩⲏⲃ ⲙⲡⲉⲙⲑⲟ ⲙⲡϭⲟⲓⲥ
̅ⲓⲇ:̅ⲓⲑ ⲟⲩⲟϩ ⲉⲣⲉ ⲡⲓⲟⲩⲏⲃ ⲑⲁⲙⲓⲟ ⲙⲫⲏ ⲉⲧⲉ ⲉⲑⲃⲉ ⲫⲛⲟⲃⲓ ⲟⲩⲟϩ
ⲉϥⲉⲧⲱⲃϩ ⲛϫⲉ ⲡⲓⲟⲩⲏⲃ ⲉϫⲉⲛ ⲫⲏ ⲉⲧⲛⲁⲧⲟⲩⲃⲟ ⲉⲃⲟⲗ ϩⲁ ⲡⲓⲛⲟⲃⲓ ⲟⲩⲟϩ
ⲙⲉⲛⲉⲛⲥⲁ ⲫⲁⲓ ⲉϥⲉϧⲟⲗϧⲉⲗ ⲛϫⲉ ⲡⲓⲟⲩⲏⲃ ⲙⲡⲓϭⲗⲓⲗ ⲛϫⲟϥϫⲉϥ
̅ⲓⲇ:̅ⲕ ⲟⲩⲟϩ ⲉⲣⲉ ⲡⲓⲟⲩⲏⲃ ⲓⲛⲓ ⲉϩⲣⲏⲓ ⲙⲡⲓϭⲗⲓⲗ ⲛϫⲟϥϫⲉϥ ⲛⲉⲙ
ⲡⲓϣⲟⲩϣⲱⲟⲩϣⲓ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲙⲡⲉⲙⲑⲟ ⲙⲡϭⲟⲓⲥ ⲟⲩⲟϩ
ⲉϥⲉⲧⲱⲃϩ ⲉϩⲣⲏⲓ ⲉϫⲱϥ ⲛϫⲉ ⲡⲓⲟⲩⲏⲃ ⲟⲩⲟϩ ⲉϥⲉⲧⲟⲩⲃⲟ
̅ⲓⲇ:̅ⲕⲁ ⲉϣⲱⲡ ⲇⲉ ⲟⲩϩⲏⲕⲓ ⲡⲉ ⲟⲩⲟϩ ⲧⲉϥϫⲓϫ ϫⲓⲙⲓ ⲁⲛ ⲉϥⲉⲓⲛⲓ ⲛⲟⲩϩⲓⲏⲃ
ⲟⲩⲁⲓ ⲉⲁϥⲉⲣⲟⲩⲣⲟⲙⲡⲓ ⲉϫⲉⲛ ⲫⲏ ⲉⲧⲁϥϣⲱϥⲧ ⲛϧⲏⲧϥ ⲉⲟⲩⲫⲱⲣϫ ⲉⲃⲟⲗ
ϩⲱⲥⲇⲉ ⲉⲧⲱⲃϩ ⲉϩⲣⲏⲓ ⲉϫⲱϥ ⲛⲉⲙ ⲟⲩⲁⲓ ⲛⲣⲉⲙⲏⲧ ⲛⲥⲉⲙⲓⲇⲁⲗⲓⲟⲛ
ⲉϥⲟⲩⲟϣⲉⲙ ϧⲉⲛ ⲟⲩⲛⲉϩ ⲉⲩϣⲟⲩϣⲱⲟⲩϣⲓ ⲛⲉⲙ ⲟⲩⲁⲓ ⲛⲗⲟⲕ ⲛⲛⲉϩ
̅ⲓⲇ:̅ⲕⲃ ⲛⲉⲙ ϭⲣⲟⲙⲡϣⲁⲗ ⲃ ⲓⲉ ⲙⲁⲥ ⲃ ⲛϭⲣⲟⲙⲡⲓ ⲛⲏ ⲉⲧⲉ ⲧⲉϥϫⲓϫ
ⲛⲁϫⲉⲙⲟⲩ ⲟⲩⲟϩ ⲉⲣⲉ ⲡⲓⲟⲩⲁⲓ ϣⲱⲡⲓ ⲉⲑⲃⲉ ⲫⲛⲟⲃⲓ ⲟⲩⲟϩ ⲡⲓⲟⲩⲁⲓ ⲉⲩϭⲗⲓⲗ
ⲛϫⲟϥϫⲉϥ
̅ⲓⲇ:̅ⲕⲅ ⲟⲩⲟϩ ⲉϥⲉⲉⲛⲟⲩ ⲉϧⲟⲩⲛ ⲙⲡⲓⲉϩⲟⲟⲩ ⲙⲙⲁϩⲏ ⲉⲡϫⲓⲛⲧⲟⲩⲃⲟϥ
ⲉϥⲉⲉⲛⲟⲩ ϩⲁ ⲡⲓⲟⲩⲏⲃ ϩⲓⲣⲉⲛ ⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲙⲡⲉⲙⲑⲟ
ⲙⲡϭⲟⲓⲥ
̅ⲓⲇ:̅ⲕⲇ ⲟⲩⲟϩ ⲉϥⲉⲱⲗⲓ ⲛϫⲉ ⲡⲓⲟⲩⲏⲃ ⲙⲡⲓϩⲓⲏⲃ ⲫⲏ ⲛⲧⲉ ϯⲙⲉⲧϣⲁϥⲧ ⲛⲉⲙ
ⲡⲓⲗⲟⲕ ⲛⲧⲉ ⲡⲓⲛⲉϩ ⲟⲩⲟϩ ⲉϥⲉⲧⲁⲗⲱⲟⲩ ⲉϩⲣⲏⲓ ⲛⲟⲩϭⲗⲓⲗ ⲙⲡⲉⲙⲑⲟ
ⲙⲡϭⲟⲓⲥ
̅ⲓⲇ:̅ⲕⲉ ⲟⲩⲟϩ ⲉϥⲉϧⲟⲗϧⲉⲗ ⲙⲡⲓϩⲓⲏⲃ ⲫⲏ ⲛⲧⲉ ϯⲙⲉⲧϣⲁϥⲧ ⲟⲩⲟϩ ⲉϥⲉⲱⲗⲓ
ⲛϫⲉ ⲡⲓⲟⲩⲏⲃ ⲉⲃⲟⲗ ϧⲉⲛ ⲡⲓⲥⲛⲟϥ ⲛⲧⲉ ⲫⲏ ⲛⲧⲉ ϯⲙⲉⲧϣⲁϥⲧ ⲟⲩⲟϩ
ⲉϥⲉⲧⲁⲗⲟ ⲉϫⲉⲛ ⲡⲓⲗⲟⲃⲟⲥ ⲛⲧⲉ ⲫⲙⲁϣϫ ⲛⲟⲩⲓⲛⲁⲙ ⲛⲧⲉ ⲫⲏ ⲉⲧⲛⲁⲧⲟⲩⲃⲟ
ⲛⲉⲙ ⲉϫⲉⲛ ϩⲏⲧⲥ ⲛⲧⲉϥϫⲓϫ ⲛⲟⲩⲓⲛⲁⲙ ⲛⲉⲙ ⲉϫⲉⲛ ϩⲏⲧⲥ ⲛⲧⲉϥⲫⲁⲧ
ⲛⲟⲩⲓⲛⲁⲙ
̅ⲓⲇ:̅ⲕⲋ ⲟⲩⲟϩ ⲉⲣⲉ ⲡⲓⲟⲩⲏⲃ ϫⲱϣ ⲉⲃⲟⲗ ϧⲉⲛ ⲡⲓⲛⲉϩ ⲉϫⲉⲛ ⲧⲉϥϫⲓϫ
ⲛϫⲁϭⲏ
̅ⲓⲇ:̅ⲕⲍ ⲟⲩⲟϩ ⲛⲧⲉ ⲡⲓⲟⲩⲏⲃ ⲱⲗⲓ ⲉⲃⲟⲗ ϧⲉⲛ ⲡⲓⲛⲉϩ ⲙⲡⲉϥⲧⲏⲃ ⲛⲟⲩⲓⲛⲁⲙ
ⲉⲧϧⲉⲛ ⲧⲉϥϫⲓϫ ⲛϫⲁϭⲏ ⲛⲧⲉϥⲛⲟⲩϫϧ ⲛⲍ ⲛⲥⲟⲡ ⲙⲡⲉⲙⲑⲟ ⲙⲡϭⲟⲓⲥ
̅ⲓⲇ:̅ⲕⲏ ⲟⲩⲟϩ ⲉⲃⲟⲗ ϧⲉⲛ ⲡⲓⲛⲉϩ ⲉⲧϣⲟⲡ ϧⲉⲛ ⲧϫⲓϫ ⲙⲡⲓⲟⲩⲏⲃ ⲉϥⲉⲧⲁⲗⲟ
ⲉϫⲉⲛ ⲫⲙⲁϣϫ ⲛⲟⲩⲓⲛⲁⲙ ⲛⲧⲉ ⲫⲏ ⲉⲧⲛⲁⲧⲟⲩⲃⲟ ⲛⲉⲙ ⲉϫⲉⲛ ϩⲏⲧⲥ
ⲛⲧⲉϥϫⲓϫ ⲛⲟⲩⲓⲛⲁⲙ ⲛⲉⲙ ⲉϫⲉⲛ ϩⲏⲧⲥ ⲛⲧⲉϥⲫⲁⲧ ⲛⲟⲩⲓⲛⲁⲙ ⲉϫⲉⲛ ⲡⲓⲙⲁ
ⲟⲛ ⲛⲧⲉ ⲡⲓⲥⲛⲟϥ ⲛⲧⲉ ⲫⲏ ⲛⲧⲉ ϯⲙⲉⲧϣⲁϥⲧ
̅ⲓⲇ:̅ⲕⲑ ⲡⲓⲛⲉϩ ⲇⲉ ⲉⲧⲁϥⲥⲱϫⲡ ⲫⲏ ⲉⲧϣⲟⲡ ϧⲉⲛ ⲧϫⲓϫ ⲙⲡⲓⲟⲩⲏⲃ
ⲉϥⲉⲧⲁⲗⲟ ⲉϫⲉⲛ ⲧⲁⲫⲉ ⲛⲧⲉ ⲫⲏ ⲉⲧⲁϥⲧⲟⲩⲃⲟ ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ
ⲉϫⲱϥ ⲛϫⲉ ⲡⲓⲟⲩⲏⲃ ⲙⲡⲉⲙⲑⲟ ⲙⲡϭⲟⲓⲥ
̅ⲓⲇ:̅ⲗ ⲟⲩⲟϩ ⲉϥⲉⲑⲁⲙⲓⲟ ⲛⲟⲩⲁⲓ ⲛⲛⲓϭⲣⲟⲙⲡϣⲁⲗ ⲓⲉ ⲛⲧⲉ ⲡⲓⲙⲁⲥ ⲃ
ⲛϭⲣⲟⲙⲡⲓ ⲕⲁⲧⲁ ⲫⲣⲏϯ ⲉⲧⲁ ⲧⲉϥϫⲓϫ ϫⲉⲙϥ
̅ⲓⲇ:̅ⲗⲁ ⲡⲓⲟⲩⲁⲓ ⲉⲑⲃⲉ ⲫⲛⲟⲃⲓ ⲟⲩⲟϩ ⲡⲓⲟⲩⲁⲓ ⲉⲩϭⲗⲓⲗ ⲛϫⲟϥϫⲉϥ ⲛⲉⲙ
ⲡⲓϣⲟⲩϣⲱⲟⲩϣⲓ ⲟⲩⲟϩ ⲉⲣⲉ ⲡⲓⲟⲩⲏⲃ ⲧⲱⲃϩ ⲉϩⲣⲏⲓ ⲉϫⲉⲛ ⲫⲏ ⲉⲧⲛⲁⲧⲟⲩⲃⲟ
ⲙⲡⲉⲙⲑⲟ ⲙⲡϭⲟⲓⲥ
̅ⲓⲇ:̅ⲗⲃ ⲫⲁⲓ ⲡⲉ ⲫⲛⲟⲙⲟⲥ ⲛⲧⲉ ⲫⲏ ⲉⲧⲉ ⲡⲓϭⲟϩ ⲛϧⲏⲧϥ ⲛⲧⲉ ⲡⲓⲥⲉϩⲧ
ⲛⲉⲙ ⲫⲏ ⲉⲧⲉϥⲛⲁϫⲓⲙⲓ ⲁⲛ ϧⲉⲛ ⲧⲉϥϫⲓϫ ⲉⲓⲛⲓ ⲉϩⲣⲏⲓ ⲉϫⲉⲛ ⲡⲉϥⲧⲟⲩⲃⲟ
̅ⲓⲇ:̅ⲗⲅ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲛⲉⲙ ⲁⲁⲣⲱⲛ ⲉϥϫⲱ ⲙⲙⲟⲥ
̅ⲓⲇ:̅ⲗⲇ ϫⲉ ⲉϣⲱⲡ ⲁⲣⲉⲧⲉⲛϣⲁⲛϣⲉⲛⲱⲧⲉⲛ ⲉϧⲟⲩⲛ ⲉⲡⲕⲁϩⲓ ⲛⲧⲉ
ⲛⲓⲭⲁⲛⲁⲛⲉⲟⲥ ⲫⲏ ⲁⲛⲟⲕ ⲉϯⲛⲁⲧⲏⲓϥ ⲛⲱⲧⲉⲛ ϧⲉⲛ ⲟⲩⲕⲗⲏⲣⲟⲥ ⲟⲩⲟϩ ⲛⲧⲁϯ
ⲛⲟⲩϭⲟϩ ⲛⲧⲉ ⲟⲩⲥⲉϩⲧ ϧⲉⲛ ⲛⲓⲏⲓ ⲛⲧⲉ ⲡⲓⲕⲁϩⲓ ⲉⲧⲉⲧⲉⲛⲛⲁϭⲓⲧϥ
̅ⲓⲇ:̅ⲗⲉ ⲟⲩⲟϩ ⲉϥⲉⲓ ⲛϫⲉ ⲫⲏ ⲉⲧⲉ ⲡⲓⲏⲓ ⲫⲱϥ ⲡⲉ ⲟⲩⲟϩ ⲉϥⲉⲧⲁⲙⲉ
ⲡⲓⲟⲩⲏⲃ ⲉϥϫⲱ ⲙⲙⲟⲥ ϫⲉ ⲙⲫⲣⲏϯ ⲛⲟⲩϭⲟϩ ⲛⲧⲉ ⲟⲩⲥⲉϩⲧ ⲁϥⲟⲩⲱⲛϩ
ⲉⲣⲟⲓ ϧⲉⲛ ⲡⲁⲏⲓ
̅ⲓⲇ:̅ⲗⲋ ⲟⲩⲟϩ ⲉϥⲉⲟⲩⲁϩⲥⲁϩⲛⲓ ⲛϫⲉ ⲡⲓⲟⲩⲏⲃ ⲛϣⲟⲣⲡ ⲉⲥⲉⲕⲉϩ ⲙⲡⲓⲏⲓ
ⲙⲡⲁⲧⲉϥⲓ ⲉϧⲟⲩⲛ ⲛϫⲉ ⲡⲓⲟⲩⲏⲃ ⲉⲛⲁⲩ ⲉⲡⲓϭⲟϩ ⲟⲩⲟϩ ⲛⲛⲟⲩϣⲱⲡⲓ
ⲉⲩϭⲁϧⲉⲙ ⲛϫⲉ ⲛⲏ ⲧⲏⲣⲟⲩ ⲉⲧϧⲉⲛ ⲡⲓⲏⲓ ⲟⲩⲟϩ ⲙⲉⲛⲉⲛⲥⲁ ⲛⲁⲓ ⲉϥⲉⲓ
ⲉϧⲟⲩⲛ ⲛϫⲉ ⲡⲓⲟⲩⲏⲃ ⲉϯⲛⲓⲁⲧϥ ⲙⲡⲓⲏⲓ
̅ⲓⲇ:̅ⲗⲍ ⲟⲩⲟϩ ⲉϥⲉⲛⲁⲩ ⲉⲡⲓϭⲟϩ ⲟⲩⲟϩ ϩⲏⲡⲡⲉ ⲓⲥ ⲡⲓϭⲟϩ ϧⲉⲛ ⲛⲓϫⲟⲓ ⲛⲧⲉ
ⲡⲓⲏⲓ ϩⲁⲛϫⲁⲛⲉⲩ ⲉⲩⲟⲩⲉⲧⲟⲩⲱⲧ ⲓⲉ ⲉⲩⲟⲓ ⲛⲁⲟⲩⲁⲛ ⲛⲭⲣⲱⲙ ⲟⲩⲟϩ ⲡⲟⲩϩⲟ
ⲉϥⲑⲉⲃⲓⲏⲟⲩⲧ ⲉⲛⲓϫⲟⲓ
̅ⲓⲇ:̅ⲗⲏ ⲟⲩⲟϩ ⲉϥⲉⲓ ⲉⲃⲟⲗ ϧⲉⲛ ⲡⲓⲏⲓ ⲛϫⲉ ⲡⲓⲟⲩⲏⲃ ⲉϫⲉⲛ ⲫⲣⲟ ⲙⲡⲓⲏⲓ ⲟⲩⲟϩ
ⲉϥⲉⲟⲩⲉⲧ ⲡⲓⲏⲓ ⲉⲃⲟⲗ ⲛϫⲉ ⲡⲓⲟⲩⲏⲃ ⲛⲍ ⲛⲉϩⲟⲟⲩ
̅ⲓⲇ:̅ⲗⲑ ⲟⲩⲟϩ ⲉϥⲉⲓ ⲛϫⲉ ⲡⲓⲟⲩⲏⲃ ⲙⲡⲓⲉϩⲟⲟⲩ ⲙⲙⲁϩ ⲍ ⲟⲩⲟϩ ⲉϥⲉⲛⲁⲩ
ⲉⲡⲓⲏⲓ ⲟⲩⲟϩ ϩⲏⲡⲡⲉ ⲓⲥ ⲡⲓϭⲟϩ ⲁϥϫⲱϣ ⲉⲃⲟⲗ ϧⲉⲛ ⲛⲓϫⲟⲓ ⲛⲧⲉ ⲡⲓⲏⲓ
̅ⲓⲇ:̅ⲙ ⲟⲩⲟϩ ⲉϥⲉⲟⲩⲁϩⲥⲁϩⲛⲓ ⲛϫⲉ ⲡⲓⲟⲩⲏⲃ ⲟⲩⲟϩ ⲉⲩⲉⲑⲉⲕⲉⲙ ⲛⲓⲱⲛⲓ ⲉⲃⲟⲗ
ϧⲉⲛ ⲛⲓϫⲟⲓ ⲛⲧⲉ ⲡⲓⲏⲓ ⲟⲩⲟϩ ⲉⲩⲉϩⲓⲧⲟⲩ ⲉⲃⲟⲗ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ
ⲉⲩⲙⲁ ⲉϥϭⲁϧⲉⲙ
̅ⲓⲇ:̅ⲙⲁ ⲟⲩⲟϩ ⲉⲩⲉϧⲁϧ ⲥⲁϧⲟⲩⲛ ⲙⲡⲓⲏⲓ ⲉϥⲕⲱϯ ⲟⲩⲟϩ ⲉⲩⲉϫⲉϣ ⲡⲓⲣⲏⲓⲥⲓ
ⲉⲃⲟⲗ ⲉⲧⲁⲩϧⲁϧϥ ⲥⲁⲃⲟⲗ ⲛϯⲃⲁⲕⲓ ⲉⲩⲙⲁ ⲉϥϭⲁϧⲉⲙ
̅ⲓⲇ:̅ⲙⲃ ⲟⲩⲟϩ ⲉⲩⲉϭⲓ ⲛϩⲁⲛⲕⲉⲱⲛⲓ ⲉⲧⲁⲩϧⲁϧⲟⲩ ⲟⲩⲟϩ ⲉⲩⲉⲭⲁⲩ ⲛⲧϣⲉⲃⲓⲱ
ⲛⲛⲓⲱⲛⲓ ⲟⲩⲟϩ ⲉⲩⲉϭⲓ ⲛϩⲁⲛⲕⲉⲣⲏⲓⲥⲓ ⲉⲩⲉⲱϣϫ ⲙⲡⲓⲏⲓ
̅ⲓⲇ:̅ⲙⲅ ⲉϣⲱⲡ ⲇⲉ ⲛⲧⲉϥⲓ ⲛⲟⲩⲟϩⲉⲙ ⲛϫⲉ ⲡⲓϭⲟϩ ⲟⲩⲟϩ ⲛⲧⲉϥⲓ ⲛⲣⲱⲧ
ϧⲉⲛ ⲡⲓⲏⲓ ⲙⲉⲛⲉⲛⲥⲁ ⲑⲣⲉ ⲛⲓⲱⲛⲓ ϩⲱⲗ ⲉⲃⲟⲗ ⲟⲩⲟϩ ⲛⲧⲟⲩϧⲁϧ ⲡⲓⲏⲓ ⲟⲩⲟϩ
ⲛⲧⲟⲩⲟϣϫϥ
̅ⲓⲇ:̅ⲙⲇ ⲟⲩⲟϩ ⲉϥⲉⲓ ⲉϧⲟⲩⲛ ⲛϫⲉ ⲡⲓⲟⲩⲏⲃ ⲟⲩⲟϩ ⲉϥⲉⲛⲁⲩ ⲓⲥϫⲉⲛ ⲁϥϫⲱϣ
ϧⲉⲛ ⲡⲓⲏⲓ ⲛϫⲉ ⲡⲓϭⲟϩ ⲟⲩⲥⲉϩⲧ ⲡⲉ ⲉϥⲛⲁⲟϩⲓ ϧⲉⲛ ⲡⲓⲏⲓ ϥϭⲁϧⲉⲙ
̅ⲓⲇ:̅ⲙⲉ ⲟⲩⲟϩ ⲉⲩⲉⲉⲛ ⲡⲓⲏⲓ ⲉϧⲣⲏⲓ ⲟⲩⲟϩ ⲛⲉϥϣⲉ ⲛⲉⲙ ⲛⲉϥⲱⲛⲓ ⲛⲉⲙ
ⲡⲉϥⲣⲏⲓⲥⲓ ⲧⲏⲣϥ ⲉⲩⲉⲟⲗϥ ⲥⲁⲃⲟⲗ ⲛϯⲡⲟⲗⲓⲥ ⲉⲩⲙⲁ ⲉϥϭⲁϧⲉⲙ
̅ⲓⲇ:̅ⲙⲋ ⲟⲩⲟϩ ⲫⲏ ⲉⲧⲛⲁϣⲉ ⲉϧⲟⲩⲛ ⲉⲡⲓⲏⲓ ⲛⲛⲓⲉϩⲟⲟⲩ ⲧⲏⲣⲟⲩ ⲉⲧⲉ
ϥⲑⲓⲟⲩⲏⲟⲩⲧ ⲉⲃⲟⲗ ⲛϧⲏⲧⲟⲩ ⲉϥⲉϣⲱⲡⲓ ⲉϥϭⲁϧⲉⲙ ϣⲁ ⲣⲟⲩϩⲓ
̅ⲓⲇ:̅ⲙⲍ ⲟⲩⲟϩ ⲫⲏ ⲉⲧⲛⲁⲉⲛⲕⲟⲧ ϧⲉⲛ ⲡⲓⲏⲓ ⲉϥⲉⲣⲱϧⲓ ⲛⲛⲉϥϩⲃⲱⲥ ⲟⲩⲟϩ ⲫⲏ
ⲉⲧⲛⲁⲟⲩⲱⲙ ⲛϧⲟⲩⲛ ϧⲉⲛ ⲡⲓⲏⲓ ⲉϥⲉⲣⲱϧⲓ ⲛⲛⲉϥϩⲃⲱⲥ
̅ⲓⲇ:̅ⲙⲏ ⲉϣⲱⲡ ⲇⲉ ⲛⲧⲉϥⲓ ⲉϧⲟⲩⲛ ⲛϫⲉ ⲡⲓⲟⲩⲏⲃ ⲟⲩⲟϩ ⲛⲧⲉϥⲛⲁⲩ ⲟⲩⲟϩ
ϩⲏⲡⲡⲉ ϧⲉⲛ ⲟⲩϫⲱϣ ϥϫⲏϣ ⲁⲛ ϧⲉⲛ ⲡⲓⲏⲓ ⲛϫⲉ ⲡⲓϭⲟϩ ⲙⲉⲛⲉⲛⲥⲁ
ⲑⲣⲟⲩⲥⲉⲗϫ ⲡⲓⲏⲓ ⲟⲩⲟϩ ⲉⲣⲉ ⲡⲓⲟⲩⲏⲃ ⲉϥⲉⲧⲟⲩⲃⲟ ⲙⲡⲓⲏⲓ ϫⲉ ⲟⲩⲏⲓ
ⲁϥⲧⲁⲗϭⲟ ⲛϫⲉ ⲡⲓϭⲟϩ
̅ⲓⲇ:̅ⲙⲑ ⲟⲩⲟϩ ⲉϥⲉϭⲓ ⲉⲡϫⲓⲛⲧⲟⲩⲃⲟ ⲙⲡⲓⲏⲓ ⲛⲉⲣϫ ⲃ ⲛⲉⲙ ⲟⲩϣⲉⲛⲥⲓϥⲓ ⲛⲉⲙ
ⲟⲩⲕⲟⲕⲕⲓⲛⲟⲛ ⲉϥⲥⲁϯ ⲛⲉⲙ ⲟⲩϩⲩⲥⲱⲡⲟⲥ
̅ⲓⲇ:̅ⲉ0 ⲟⲩⲟϩ ⲉϥⲉϧⲟⲗϧⲉⲗ ⲙⲡⲓⲟⲩⲁⲓ ⲛⲉⲣϫ ⲉⲟⲩⲙⲟⲕⲓ ⲙⲃⲉⲗϫ ⲉϫⲉⲛ
ⲟⲩⲙⲱⲟⲩ ⲉϥⲟⲛϧ
̅ⲓⲇ:̅ⲉ̅ⲁ ⲟⲩⲟϩ ⲉϥⲉⲱⲗⲓ ⲙⲡⲓϣⲉⲛⲥⲓϥⲓ ⲛⲉⲙ ⲡⲓⲕⲟⲕⲕⲓⲛⲟⲛ ⲉⲧⲥⲁϯ ⲛⲉⲙ
ⲡⲓϩⲩⲥⲥⲱⲡⲟⲥ ⲛⲉⲙ ⲡⲓⲉⲣϫ ⲉⲧⲟⲛϧ ⲟⲩⲟϩ ⲉϥⲉⲥⲟⲡⲟⲩ ϧⲉⲛ ⲡⲓⲥⲛⲟϥ ⲙⲡⲓⲉⲣϫ
ⲉⲧⲁϥϧⲉⲗϧⲱⲗϥ ⲉϫⲉⲛ ⲟⲩⲙⲱⲟⲩ ⲉϥⲟⲛϧ ⲟⲩⲟϩ ⲉϥⲉⲛⲟⲩϫϧ ⲛϧⲏⲧⲟⲩ ⲉϫⲉⲛ
ⲡⲓⲏⲓ ⲛⲍ ⲛⲥⲟⲡ
̅ⲓⲇ:̅ⲉ̅ⲃ ⲟⲩⲟϩ ⲉϥⲉⲧⲟⲩⲃⲟ ⲙⲡⲓⲏⲓ ϧⲉⲛ ⲡⲓⲥⲛⲟϥ ⲙⲡⲓⲉⲣϫ ⲛⲉⲙ ⲡⲓⲙⲱⲟⲩ
ⲉⲧⲟⲛϧ ⲛⲉⲙ ⲡⲓϣⲉⲛⲥⲓϥⲓ ⲛⲉⲙ ⲡⲓϩⲩⲥⲥⲱⲡⲟⲥ ⲛⲉⲙ ⲡⲓⲕⲟⲕⲕⲓⲛⲟⲛ ⲉϥⲥⲁϯ
̅ⲓⲇ:̅ⲉ̅ⲅ ⲉϥⲉⲟⲩⲱⲣⲡ ⲉⲃⲟⲗ ⲙⲡⲓⲉⲣϫ ⲉⲧⲟⲛϧ ⲥⲁⲃⲟⲗ ⲛϯⲃⲁⲕⲓ ⲉⲡⲓⲙⲉϣϣⲱⲧ
ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ ⲉϫⲉⲛ ⲡⲓⲏⲓ ⲟⲩⲟϩ ⲉϥⲉϣⲱⲡⲓ ⲉϥⲧⲟⲩⲃⲏⲟⲩⲧ
̅ⲓⲇ:̅ⲉ̅ⲇ ⲫⲁⲓ ⲡⲉ ⲫⲛⲟⲙⲟⲥ ⲕⲁⲧⲁ ϭⲟϩ ⲛⲓⲃⲉⲛ ⲛⲧⲉ ⲟⲩⲥⲉϩⲧ ⲛⲉⲙ
ⲟⲩϧⲟⲙϧⲉⲙ
̅ⲓⲇ:̅ⲉ̅ⲉ ⲛⲉⲙ ⲟⲩⲥⲉϩⲧ ϧⲉⲛ ⲟⲩϩⲃⲱⲥ ⲛⲉⲙ ⲟⲩⲏⲓ
̅ⲓⲇ:̅ⲉ̣̅ⲋ ⲛⲉⲙ ⲟⲩⲟⲩⲗⲏ ⲛⲉⲙ ⲟⲩⲙⲏⲓⲛⲓ ⲛⲉⲙ ⲫⲏ ⲉⲧϯⲙⲟⲩⲉ
̅ⲓⲇ:̅ⲉ̅ⲍ ⲟⲩⲟϩ ϩⲱⲥⲧⲉ ⲉⲥⲁϫⲓ ⲙⲙⲟϥ ϧⲉⲛ ⲡⲓⲉϩⲟⲟⲩ ⲉⲧⲉϥⲛⲁϭⲱϧⲉⲙ ⲛⲉⲙ
ⲡⲓⲉϩⲟⲟⲩ ⲉⲧⲉϥⲛⲁⲧⲟⲩⲃⲟ ⲫⲁⲓ ⲡⲉ ⲫⲛⲟⲙⲟⲥ ⲛⲧⲉ ⲡⲓⲥⲉϩⲧ
̅ⲓⲉ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲛⲉⲙ ⲁⲁⲣⲱⲛ ⲉϥϫⲱ ⲙⲙⲟⲥ
̅ⲓⲉ:̅ⲃ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲟϩ ⲉⲕⲉϫⲟⲥ ⲛⲱⲟⲩ ϫⲉ
ⲟⲩⲣⲱⲙⲓ ⲫⲏ ⲉⲧⲉ ⲟⲩⲟⲛ ⲟⲩⲧⲉⲗⲧⲉⲗ ⲛⲁϣⲱⲡⲓ ϧⲉⲛ ⲡⲉϥⲥⲱⲙⲁ
ⲡⲉϥⲧⲉⲗⲧⲉⲗ ϭⲁϧⲉⲙ
̅ⲓⲉ:̅ⲅ ⲟⲩⲟϩ ⲫⲁⲓ ⲡⲉ ⲫⲛⲟⲙⲟⲥ ⲛⲧⲉ ⲡⲉϥϭⲱϧⲉⲙ ⲉϥⲧⲉⲗⲧⲉⲗ ⲛⲟⲩϫⲣⲟϫ
ⲉⲃⲟⲗ ϧⲉⲛ ⲡⲉϥⲥⲱⲙⲁ ⲉⲃⲟⲗϧⲉⲛ ⲡⲓⲧⲉⲗⲧⲉⲗ ⲫⲏ ⲉⲧⲉϥⲧⲁϩⲏⲟⲩⲧ ⲉⲣⲁⲧϥ
ϧⲉⲛ ⲡⲉϥⲥⲱⲙⲁ ⲉⲃⲟⲗ ϩⲓⲧⲉⲛ ⲡⲓⲧⲉⲗⲧⲉⲗ ⲫⲁⲓ ⲡⲉ ⲡⲉϥϭⲱϧⲉⲙ ⲛϧⲣⲏⲓ
ⲛϧⲏⲧϥ ϧⲉⲛ ⲛⲓⲉϩⲟⲟⲩ ⲧⲏⲣⲟⲩ ⲛⲧⲉ ⲡⲧⲉⲗⲧⲉⲗ ⲙⲡⲉϥⲥⲱⲙⲁ ⲡⲁⲓ ⲧⲉⲗⲧⲉⲗ
ⲛⲧⲉ ⲡⲉϥⲥⲱⲙⲁ ϥⲧⲁϩⲏⲟⲩⲧ ⲉⲣⲁⲧϥ ⲛϧⲏⲧϥ ⲟⲩⲉⲃⲟⲗ ϩⲓⲧⲉⲛ ⲡⲓⲧⲉⲗⲧⲉⲗ
ⲡⲉ ⲡⲉϥϭⲱϧⲉⲙ
̅ⲓⲉ:̅ⲇ ⲟⲩⲟϩ ϣⲁⲓⲣⲓ ⲛⲓⲃⲉⲛ ⲉⲧⲉϥⲛⲁⲉⲛⲕⲟⲧ ϩⲓϫⲱⲟⲩ ⲛϫⲉ ⲫⲏ ⲉⲧⲧⲉⲗⲧⲉⲗ
ϫⲣⲟϫ ⲥⲉϭⲁϧⲉⲙ ⲟⲩⲟϩ ⲥⲕⲉⲩⲟⲥ ⲛⲓⲃⲉⲛ ⲉⲧⲉϥⲛⲁϩⲉⲙⲥⲓ ϩⲓϫⲱⲟⲩ ⲛϫⲉ ⲫⲏ
ⲉⲧⲧⲉⲗⲧⲉⲗ ϫⲣⲟϫ ⲥⲉϭⲁϧⲉⲙ
̅ⲓⲉ:̅ⲉ ⲟⲩⲟϩ ⲣⲱⲙⲓ ⲛⲓⲃⲉⲛ ⲉⲧⲛⲁϭⲓ ⲛⲉⲙ ⲧⲉϥϣⲁⲓⲣⲓ ⲛⲉⲛⲕⲟⲧ ⲉϥⲉⲣⲱϧⲓ
ⲛⲛⲉϥϩⲃⲱⲥ ⲟⲩⲟϩ ⲉϥⲉϫⲱⲕⲉⲙ ⲙⲡⲉϥⲥⲱⲙⲁ ϧⲉⲛ ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ
ⲉϥϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲉ:̣̅ⲋ ⲟⲩⲟϩ ⲫⲏ ⲉⲧⲛⲁϩⲉⲙⲥⲓ ϩⲓϫⲉⲛ ⲡⲓⲥⲕⲉⲩⲟⲥ ⲫⲏ ⲛⲓⲃⲉⲛ ⲉⲧⲉϥⲛⲁϩⲉⲙⲥⲓ
ϩⲓϫⲱϥ ⲛϫⲉ ⲫⲏ ⲉⲧⲉ ⲡⲉϥϫⲣⲟϫ ⲧⲉⲗⲧⲉⲗ ⲉϥⲉⲣⲱϧⲓ ⲛⲛⲉϥϩⲃⲱⲥ ⲟⲩⲟϩ
ⲉϥⲉϫⲱⲕⲉⲙ ϧⲉⲛ ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ ⲉϥϭⲁϧⲉⲙ ϣⲁ ⲫⲛⲁⲩ
ⲛϩⲁⲛⲁⲣⲟⲩϩⲓ
̅ⲓⲉ:̅ⲍ ⲟⲩⲟϩ ⲫⲏ ⲉⲧⲛⲁϭⲓ ⲛⲉⲙ ⲡⲥⲱⲙⲁ ⲙⲫⲏ ⲉⲧⲉ ⲡⲉϥϫⲣⲟϫ ⲧⲉⲗⲧⲉⲗ
ⲉϥⲉⲣⲱϧⲓ ⲛⲛⲉϥϩⲃⲱⲥ ⲟⲩⲟϩ ⲉϥⲉϫⲱⲕⲉⲙ ϧⲉⲛ ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ
ⲉϥϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲉ:̅ⲏ ⲉϣⲱⲡ ⲇⲉ ⲁϥϣⲁⲛⲉⲗⲧⲟϥ ⲛϫⲉ ⲫⲏ ⲉⲧⲉ ⲡⲉϥϫⲣⲟϫ ⲧⲉⲗⲧⲉⲗ ⲉϫⲉⲛ
ⲫⲏ ⲉⲧⲧⲟⲩⲃⲏⲟⲩⲧ ⲉϥⲉⲣⲱϧⲓ ⲛⲛⲉϥϩⲃⲱⲥ ⲟⲩⲟϩ ⲉϥⲉϫⲱⲕⲉⲙ ϧⲉⲛ ⲟⲩⲙⲱⲟⲩ
ⲟⲩⲟϩ ⲉϥⲉϣⲱⲡⲓ ⲉϥϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲉ:̅ⲑ ⲟⲩⲟϩ ϣⲉⲛϯ ⲛⲓⲃⲉⲛ ⲉⲧⲉϥⲛⲁⲁⲗⲏⲓ ⲉⲣⲟϥ ⲛϫⲉ ⲫⲏ ⲉⲧⲉ ⲡⲉϥϫⲣⲟϫ
ⲧⲉⲗⲧⲉⲗ ⲉϥⲉϣⲱⲡⲓ ⲉϥϭⲁϧⲉⲙ
̅ⲓⲉ:̅ⲓ ⲛⲉⲙ ⲟⲩⲟⲛ ⲛⲓⲃⲉⲛ ⲉⲧⲛⲁϭⲓ ⲛⲉⲙ ⲛⲭⲁⲓ ⲛⲓⲃⲉⲛ ⲉⲧϧⲁⲣⲟϥ ⲉϥⲉϣⲱⲡⲓ
ⲉϥϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ ⲟⲩⲟϩ ⲫⲏ ⲉⲧⲛⲁⲟⲗⲟⲩ ⲉϥⲉⲣⲱϧⲓ
ⲛⲛⲉϥϩⲃⲱⲥ ⲟⲩⲟϩ ⲉϥⲉϫⲱⲕⲉⲙ ϧⲉⲛ ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ ⲉϥϭⲁϧⲉⲙ
ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲉ:̅ⲓⲁ ⲟⲩⲟϩ ⲛⲏ ⲧⲏⲣⲟⲩ ⲉⲧⲉϥⲛⲁϭⲓ ⲛⲉⲙⲱⲟⲩ ⲛϫⲉ ⲫⲏ ⲉⲧⲉ ⲡⲉϥϫⲣⲟϫ
ⲧⲉⲗⲧⲉⲗ ⲙⲡⲉϥⲓⲁ ⲛⲉϥϫⲓϫ ⲉⲃⲟⲗ ϧⲉⲛ ⲟⲩⲙⲱⲟⲩ ⲉϥⲉⲣⲱϧⲓ ⲛⲛⲉϥϩⲃⲱⲥ
ⲟⲩⲟϩ ⲉϥⲉϫⲱⲕⲉⲙ ⲙⲡⲉϥⲥⲱⲙⲁ ϧⲉⲛ ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ ⲉϥϭⲁϧⲉⲙ
ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲉ:̅ⲓⲃ ⲛⲉⲙ ⲟⲩⲙⲟⲕⲓ ⲙⲃⲉⲗϫ ⲉⲧⲉϥⲛⲁϭⲓ ⲛⲉⲙⲁϥ ⲛϫⲉ ⲫⲏ ⲉⲧⲉ ⲡⲉϥϫⲣⲟϫ
ⲧⲉⲗⲧⲉⲗ ⲉⲩⲉϧⲉⲙϧⲱⲙϥ ⲛⲉⲙ ⲟⲩⲙⲟⲕⲓ ⲛϣⲉ ⲉⲩⲉⲓⲁϥ ⲉⲃⲟⲗ ϧⲉⲛ ⲟⲩⲙⲱⲟⲩ
ⲟⲩⲟϩ ⲉϥⲉϣⲱⲡⲓ ⲉϥⲧⲟⲩⲃⲏⲟⲩⲧ
̅ⲓⲉ:̅ⲓⲅ ⲉϣⲱⲡ ⲇⲉ ⲁϥϣⲁⲛⲧⲟⲩⲃⲟ ϧⲉⲛ ⲡⲉϥⲫⲱⲛ ⲉⲃⲟⲗ ⲛϫⲉ ⲫⲏ ⲉⲧⲉ
ⲡⲉϥϫⲣⲟϫ ⲧⲉⲗⲧⲉⲗ ⲉϥⲉϭⲓⲏⲡⲓ ⲛⲁϥ ⲛⲍ ⲛⲉϩⲟⲟⲩ ⲉⲡⲉϥⲧⲟⲩⲃⲟ ⲟⲩⲟϩ
ⲉϥⲉⲣⲱϧⲓ ⲛⲛⲉϥϩⲃⲱⲥ ⲟⲩⲟϩ ⲉϥⲉϫⲱⲕⲉⲙ ⲙⲡⲉϥⲥⲱⲙⲁ ϧⲉⲛ ⲟⲩⲙⲱⲟⲩ ⲉϥⲟⲛϧ
ⲟⲩⲟϩ ⲉϥⲉϣⲱⲡⲓ ⲉϥⲧⲟⲩⲃⲏⲟⲩⲧ
̅ⲓⲉ:̅ⲓⲇ ⲙⲡⲓⲉϩⲟⲟⲩ ⲙⲙⲁϩⲏ ⲟⲩⲟϩ ⲉϥⲉϭⲓ ⲛⲁϥ ⲛϭⲣⲟⲙⲡϣⲁⲗ ⲃ ⲓⲉ ⲙⲁⲥ
ⲃ ⲛϭⲣⲟⲙⲡⲓ ⲟⲩⲟϩ ⲉϥⲉⲉⲛⲟⲩ ⲙⲡⲉⲙⲑⲟ ⲙⲡϭⲟⲓⲥ ϩⲓⲣⲉⲛ ⲛⲓⲣⲱⲟⲩ ⲛⲧⲉ
ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲟⲩⲟϩ ⲉϥⲉⲧⲏⲓⲧⲟⲩ ⲙⲡⲓⲟⲩⲏⲃ
̅ⲓⲉ:̅ⲓⲉ ⲟⲩⲟϩ ⲉⲣⲉ ⲡⲓⲟⲩⲏⲃ ⲑⲁⲙⲓⲱⲟⲩ ⲟⲩⲁⲓ ⲉⲑⲃⲉ ⲫⲛⲟⲃⲓ ⲟⲩⲁⲓ ⲉⲩϭⲗⲓⲗ
ⲛϫⲟϥϫⲉϥ ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ ⲉϫⲱϥ ⲛϫⲉ ⲡⲓⲟⲩⲏⲃ ⲙⲡⲉⲙⲑⲟ ⲙⲡϭⲟⲓⲥ
ⲉⲑⲃⲉ ⲡⲉϥⲧⲉⲗⲧⲉⲗ
̅ⲓⲉ:̅ⲓⲋ ⲟⲩⲟϩ ⲣⲱⲙⲓ ⲛⲓⲃⲉⲛ ⲉⲧⲉϥⲛⲁⲓ ⲉⲃⲟⲗ ⲛϧⲏⲧϥ ⲛϫⲉ ⲟⲩϣⲁⲓⲣⲓ ⲛϫⲣⲟϫ
ⲉϥⲉϫⲱⲕⲉⲙ ⲙⲡⲉϥⲥⲱⲙⲁ ϧⲉⲛ ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ ⲉϥϭⲁϧⲉⲙ ϣⲁ
ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲉ:̅ⲓⲍ ⲟⲩⲟϩ ϩⲃⲟⲥ ⲛⲓⲃⲉⲛ ⲓⲉ ϣⲁⲣ ⲛⲓⲃⲉⲛ ⲉⲧⲉ ⲟⲩⲟⲛ ϣⲁⲓⲣⲓ ⲛϫⲣⲟϫ
ϩⲓϫⲱⲟⲩ ⲉⲩⲉⲣⲁϧϥ ϧⲉⲛ ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ ⲉϥϭⲁϧⲉⲙ ϣⲁ ⲫⲛⲁⲩ
ⲛϩⲁⲛⲁⲣⲟⲩϩⲓ
̅ⲓⲉ:̅ⲓⲏ ⲟⲩⲟϩ ⲟⲩⲥϩⲓⲙⲓ ⲉϣⲱⲡ ⲛⲧⲉ ⲟⲩⲣⲱⲙⲓ ⲛⲕⲟⲧ ⲛⲉⲙⲁⲥ ⲛⲟⲩϣⲁⲓⲣⲓ
ⲛⲧⲉ ⲟⲩϫⲣⲟϫ ⲉⲩⲉϫⲱⲕⲉⲙ ϧⲉⲛ ⲟⲩⲙⲱⲟⲩ ⲟⲩⲟϩ ⲉⲩⲉϣⲱⲡⲓ ⲉⲩϭⲁϧⲉⲙ ϣⲁ
ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲉ:̅ⲓⲑ ⲟⲩⲟϩ ⲥϩⲓⲙⲓ ⲛⲓⲃⲉⲛ ⲉⲧⲉ ⲡⲉⲥⲥⲛⲟϥ ⲧⲉⲗⲧⲉⲗ ⲟⲩⲟϩ ⲛⲧⲉϥϣⲱⲡⲓ
ⲛϫⲉ ⲡⲉⲥⲧⲉⲗⲧⲉⲗ ϧⲉⲛ ⲡⲉⲥⲥⲱⲙⲁ ⲉⲥⲉϣⲱⲡⲓ ϧⲉⲛ ⲧⲉⲥϣⲣⲱ ⲛⲍ ⲛⲉϩⲟⲟⲩ
ⲟⲩⲟϩ ⲟⲩⲟⲛ ⲛⲓⲃⲉⲛ ⲉⲧⲛⲁϭⲓ ⲛⲉⲙⲁⲥ ⲉϥⲉϣⲱⲡⲓ ⲉϥϭⲁϧⲉⲙ ϣⲁ ⲫⲛⲁⲩ
ⲛϩⲁⲛⲁⲣⲟⲩϩⲓ
̅ⲓⲉ:̅ⲕ ⲟⲩⲟϩ ⲛⲭⲁⲓ ⲛⲓⲃⲉⲛ ⲉⲧⲉⲥⲛⲁⲛⲕⲟⲧ ϩⲓϫⲱⲟⲩ ⲉⲥⲟⲓ ⲛϣⲣⲱ ⲉⲩⲉϣⲱⲡⲓ
ⲉⲩϭⲁϧⲉⲙ ⲛⲉⲙ ⲛⲏ ⲧⲏⲣⲟⲩ ⲉⲧⲉⲥⲛⲁϩⲉⲙⲥⲓ ϩⲓϫⲱⲟⲩ ⲉⲩⲉϣⲱⲡⲓ ⲉⲩϭⲁϧⲉⲙ
̅ⲓⲉ:̅ⲕⲁ ⲟⲩⲟϩ ⲟⲩⲟⲛ ⲛⲓⲃⲉⲛ ⲉⲧⲛⲁϭⲓ ⲛⲉⲙ ⲧⲉⲥϣⲁⲓⲣⲓ ⲉϥⲉⲣⲱϧⲓ ⲛⲛⲉϥϩⲃⲱⲥ
ⲟⲩⲟϩ ⲉϥⲉϫⲱⲕⲉⲙ ⲙⲡⲉϥⲥⲱⲙⲁ ϧⲉⲛ ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ ⲉϥϭⲁϧⲉⲙ
ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲉ:̅ⲕⲃ ⲛⲉⲙ ⲟⲩⲟⲛ ⲛⲓⲃⲉⲛ ⲉⲧⲛⲁϭⲓ ⲛⲉⲙ ⲥⲕⲉⲩⲟⲥ ⲛⲓⲃⲉⲛ ⲉⲧⲉⲥⲛⲁϩⲉⲙⲥⲓ
ϩⲓϫⲱⲟⲩ ⲉⲩⲉⲣⲱϧⲓ ⲛⲛⲟⲩϩⲃⲱⲥ ⲟⲩⲟϩ ⲉⲩⲉϫⲟⲕⲙⲟⲩ ϧⲉⲛ ⲟⲩⲙⲱⲟⲩ ⲟⲩⲟϩ
ⲉⲩⲉϣⲱⲡⲓ ⲉⲩϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲉ:̅ⲕⲅ ⲉϣⲱⲡ ⲇⲉ ⲉⲥ ϩⲓϫⲉⲛ ⲧⲉⲥϣⲁⲓⲣⲓ ⲓⲉ ⲉϫⲉⲛ ⲥⲕⲉⲩⲟⲥ ⲛⲓⲃⲉⲛ
ⲉⲧⲉⲥⲛⲁϩⲉⲙⲥⲓ ϩⲓϫⲱⲟⲩ ϧⲉⲛ ⲡⲓϫⲓⲛⲧⲉϥϭⲓ ⲛⲉⲙⲁⲥ ⲉϥⲉϣⲱⲡⲓ ⲉϥϭⲁϧⲉⲙ
ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ
̅ⲓⲉ:̅ⲕⲇ ⲟⲩⲟϩ ⲉϣⲱⲡ ⲁⲣⲉϣⲁⲛ ⲟⲩⲁⲓ ⲛⲕⲟⲧ ⲛⲉⲙⲁⲥ ⲛⲟⲩϣⲁⲓⲣⲓ ⲟⲩⲟϩ ⲛⲧⲉ
ⲡⲉⲥϭⲱϧⲉⲙ ϣⲱⲡⲓ ϩⲓϫⲱϥ ⲉϥⲉϣⲱⲡⲓ ⲉϥϭⲁϧⲉⲙ ⲛⲍ ⲛⲉϩⲟⲟⲩ ⲟⲩⲟϩ
ϣⲁⲓⲣⲓ ⲛⲓⲃⲉⲛ ⲉⲧⲉϥⲛⲁⲛⲕⲟⲧ ϩⲓϫⲱⲥ ⲉⲥⲉϣⲱⲡⲓ ⲉⲥϭⲁϧⲉⲙ
̅ⲓⲉ:̅ⲕⲉ ⲟⲩⲟϩ ⲟⲩⲥϩⲓⲙⲓ ⲉϣⲱⲡ ⲉⲥⲧⲉⲗⲧⲉⲗ ⲛⲟⲩϫⲱϣ ⲉⲃⲟⲗ ⲛⲧⲉ ⲟⲩⲥⲛⲟϥ
ⲛϩⲁⲛⲙⲏϣ ⲛⲉϩⲟⲟⲩ ϧⲉⲛ ⲡⲥⲏⲟⲩ ⲁⲛ ⲛⲧⲉ ⲧⲉⲥϣⲣⲱ ⲓⲉ ⲉϣⲱⲡ ⲟⲛ
ⲉⲥⲧⲉⲗⲧⲉⲗ ⲙⲉⲛⲉⲛⲥⲁ ⲧⲉⲥϣⲣⲱ ⲛⲓⲉϩⲟⲟⲩ ⲛⲧⲉⲗⲧⲉⲗ ⲛⲧⲉ ⲡⲉⲥϭⲱϧⲉⲙ
ⲕⲁⲧⲁ ⲛⲓⲉϩⲟⲟⲩ ⲛⲧⲉ ⲧⲉⲥϣⲣⲱ ⲉⲥⲉϣⲱⲡⲓ ⲉⲥϭⲁϧⲉⲙ
̅ⲓⲉ:̅ⲕⲋ ⲟⲩⲟϩ ϣⲁⲓⲣⲓ ⲛⲓⲃⲉⲛ ⲉⲧⲉⲥⲛⲁⲉⲛⲕⲟⲧ ϩⲓϫⲱⲟⲩ ⲛⲛⲓⲉϩⲟⲟⲩ ⲧⲏⲣⲟⲩ
ⲛⲧⲉⲗⲧⲉⲗ ⲛⲧⲁⲥ ⲕⲁⲧⲁ ϯϣⲁⲓⲣⲓ ⲛⲧⲉ ⲧⲉⲥϣⲣⲱ ⲡⲁⲓⲣⲏϯ ⲉⲥⲉϣⲱⲡⲓ ⲛⲁⲥ
ⲟⲩⲟϩ ⲥⲕⲉⲩⲟⲥ ⲛⲓⲃⲉⲛ ⲉⲧⲉⲥⲛⲁϩⲉⲙⲥⲓ ϩⲓϫⲱⲟⲩ ⲉⲩⲉϣⲱⲡⲓ ⲉⲩϭⲁϧⲉⲙ
ⲕⲁⲧⲁ ⲡϭⲱϧⲉⲙ ⲛⲧⲉ ⲧⲉⲥϣⲣⲱ
̅ⲓⲉ:̅ⲕⲍ ⲫⲏ ⲛⲓⲃⲉⲛ ⲉⲧⲛⲁϭⲓ ⲛⲉⲙⲁⲥ ⲉϥϭⲁϧⲉⲙ ⲟⲩⲟϩ ⲉϥⲉⲣⲱϧⲓ ⲛⲛⲉϥϩⲃⲱⲥ
ⲟⲩⲟϩ ⲉϥⲉϫⲱⲕⲉⲙ ϧⲉⲛ ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ ⲉϥϭⲁϧⲉⲙ ϣⲁ ⲫⲛⲁⲩ
ⲛϩⲁⲛⲁⲣⲟⲩϩⲓ
̅ⲓⲉ:̅ⲕⲏ ⲟⲩⲟϩ ⲉϣⲱⲡ ⲛⲧⲉⲥⲧⲟⲩⲃⲟ ⲉⲃⲟⲗ ϩⲁ ⲡⲉⲥⲧⲉⲗⲧⲉⲗ ⲟⲩⲟϩ ⲉⲥⲉϭⲓⲏⲡⲓ
ⲛⲁⲥ ⲛⲍ ⲛⲉϩⲟⲟⲩ ⲟⲩⲟϩ ⲙⲉⲛⲉⲛⲥⲁ ⲛⲁⲓ ⲉⲥⲉⲧⲟⲩⲃⲟ
̅ⲓⲉ:̅ⲕⲑ ϧⲉⲛ ⲡⲓⲉϩⲟⲟⲩ ⲙⲙⲁϩⲏ ⲟⲩⲟϩ ⲉⲥⲉϭⲓ ⲛⲁⲥ ⲛϭⲣⲟⲙⲡϣⲁⲗ ⲃ ⲓⲉ
ⲙⲁⲥ ⲃ ⲛϭⲣⲟⲙⲡⲓ ⲟⲩⲟϩ ⲉⲥⲉⲉⲛⲟⲩ ϩⲁ ⲡⲓⲟⲩⲏⲃ ⲉϫⲉⲛ ⲫⲣⲟ ⲛϯⲥⲕⲩⲛⲏ
ⲛⲧⲉ ϯⲙⲉⲧⲙⲉⲑⲣⲉ
̅ⲓⲉ:̅ⲗ ⲟⲩⲟϩ ⲉⲣⲉ ⲡⲓⲟⲩⲏⲃ ⲑⲁⲙⲓⲉ ⲟⲩⲓ ⲙⲙⲱⲟⲩ ⲉⲑⲃⲉ ⲫⲛⲟⲃⲓ ⲟⲩⲟϩ
ϯⲕⲉⲟⲩⲓ ⲉⲩϭⲗⲓⲗ ⲛϫⲟϥϫⲉϥ ⲟⲩⲟϩ ⲉⲣⲉ ⲡⲓⲟⲩⲏⲃ ⲧⲱⲃϩ ⲉϩⲣⲏⲓ ⲉϫⲱⲥ
ⲙⲡⲉⲙⲑⲟ ⲙⲡϭⲟⲓⲥ ⲉⲑⲃⲉ ⲡⲧⲉⲗⲧⲉⲗ ⲛⲧⲉ ⲡⲉⲥϭⲱϧⲉⲙ
̅ⲓⲉ:̅ⲗⲁ ⲟⲩⲟϩ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲁⲣⲓⲧⲟⲩ ⲛⲣⲉϥⲉⲣϩⲟϯ ⲉⲃⲟⲗ ϩⲁ
ⲛⲟⲩϭⲱϧⲉⲙ ⲟⲩⲟϩ ⲛⲛⲟⲩⲙⲟⲩ ⲉⲑⲃⲉ ⲡⲟⲩϭⲱϧⲉⲙ ϧⲉⲛ ⲡϫⲓⲛⲧⲟⲩϭⲱϧⲉⲙ
ⲛⲧⲁⲥⲕⲩⲛⲏ ⲉⲧⲉ ⲛϧⲏⲧⲟⲩ
̅ⲓⲉ:̅ⲗⲃ ⲫⲁⲓ ⲡⲉ ⲫⲛⲟⲙⲟⲥ ⲛⲧⲉ ⲫⲏ ⲉⲧⲉ ⲡⲉϥϫⲣⲟϫ ⲧⲉⲗⲧⲉⲗ ⲛⲉⲙ ⲫⲏ
ⲛⲓⲃⲉⲛ ⲉⲧⲉ ⲟⲩⲟⲛ ϣⲁⲓⲣⲓ ⲛϫⲣⲟϫ ⲛⲁⲓ ⲉⲃⲟⲗ ⲛϧⲏⲧϥ ϩⲱⲥⲇⲉ ⲉϭⲱϧⲉⲙ
ⲛϧⲏⲧⲥ
̅ⲓⲉ:̅ⲗⲅ ⲛⲉⲙ ⲑⲏ ⲉⲧⲉ ⲡⲉⲥⲥⲛⲟϥ ⲧⲉⲗⲧⲉⲗ ϧⲁⲣⲟⲥ ϧⲉⲛ ⲧⲉⲥϣⲣⲱ ⲛⲉⲙ ⲫⲏ
ⲉⲧⲉ ⲡⲉϥⲥⲛⲟϥ ⲧⲉⲗⲧⲉⲗ ⲡⲓϩⲱⲟⲩⲧ ⲛⲉⲙ ϯⲥϩⲓⲙⲓ ⲛⲉⲙ ⲣⲱⲙⲓ ⲛⲓⲃⲉⲛ
ⲉⲧⲛⲁⲉⲛⲕⲟⲧ ⲛⲉⲙ ⲑⲏ ⲉⲧⲟⲓ ⲛⲕⲉⲙⲁ
̅ⲓⲋ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲙⲉⲛⲉⲛⲥⲁ ⲑⲣⲟⲩⲙⲟⲩ ⲛϫⲉ
ⲡϣⲏⲣⲓ ⲃ ⲛⲁⲁⲣⲱⲛ ϧⲉⲛ ⲡϫⲓⲛⲑⲣⲟⲩⲉⲛ ⲭⲣⲱⲙ ⲛϣⲉⲙⲙⲟ ⲉϧⲟⲩⲛ ⲙⲡⲉⲙⲑⲟ
ⲙⲡϭⲟⲓⲥ ⲟⲩⲟϩ ⲁⲩⲙⲟⲩ
̅ⲓⲋ:̅ⲃ ⲟⲩⲟϩ ⲡⲉϫⲉ ⲡϭⲟⲓⲥ ⲙⲙⲱⲩⲥⲏⲥ ϫⲉ ⲥⲁϫⲓ ⲛⲉⲙ ⲁⲁⲣⲱⲛ ⲡⲉⲕⲥⲟⲛ
ⲟⲩⲟϩ ⲙⲡⲉⲛⲑⲣⲉϥϣⲉⲛⲁϥ ⲛⲟⲩⲟⲛⲟⲩ ⲛⲓⲃⲉⲛ ⲉϧⲟⲩⲛ ⲉⲡⲉⲑⲟⲩⲁⲃ ⲥⲁϧⲟⲩⲛ
ⲙⲡⲓⲕⲁⲧⲁⲡⲉⲧⲁⲥⲙⲁ ⲛⲁϩⲣⲁϥ ⲛϯⲥⲉⲥⲃⲟϩ ⲑⲏ ⲉⲧⲭⲏ ϩⲓϫⲉⲛ ϯⲕⲩⲃⲱⲧⲟⲥ
ⲟⲩⲟϩ ⲛⲛⲉϥⲙⲟⲩ ϧⲉⲛ ⲟⲩϭⲏⲡⲓ ⲅⲁⲣ ϯⲛⲁⲟⲩⲟⲩⲛϩⲧ ϩⲓϫⲉⲛ ϯⲥⲉⲥⲃⲟϩ
̅ⲓⲋ:̅ⲅ ⲡⲁⲓⲣⲏϯ ⲉϥⲉⲓ ⲉϧⲟⲩⲛ ⲉⲡⲉⲑⲟⲩⲁⲃ ⲛϫⲉ ⲁⲁⲣⲱⲛ ϧⲉⲛ ⲟⲩⲙⲁⲥⲓ ⲉⲃⲟⲗ
ϧⲉⲛ ϩⲁⲛⲉϩⲱⲟⲩ ⲉⲑⲃⲉ ⲫⲛⲟⲃⲓ ⲛⲉⲙ ⲟⲩⲱⲓⲗⲓ ⲉⲩϭⲗⲓⲗ ⲛϫⲟϥϫⲉϥ
̅ⲓⲋ:̅ⲇ ⲟⲩϩⲃⲟⲥ ⲛⲓⲁⲩ ⲉⲁⲩⲧⲟⲩⲃⲟϥ ⲉϥⲉⲧⲏⲓϥ ϩⲓⲱⲧϥ ⲛⲉⲙ ⲟⲩϩⲃⲟⲥ ⲛⲓⲁⲩ
ⲉϥⲛⲏⲟⲩ ⲉϧⲣⲏⲓ ϣⲁ ⲛⲉϥⲕⲁⲗ ⲉϥⲉϣⲱⲡⲓ ϩⲓϫⲉⲛ ⲡⲉϥⲥⲱⲙⲁ ⲟⲩⲟϩ ⲉϥⲉϧⲟⲕϥ
ⲛⲟⲩⲙⲟϫϧ ⲛⲓⲁⲩ ⲛⲉⲙ ⲟⲩⲕⲩⲇⲁⲣⲓⲥ ⲛⲓⲁⲩ ⲉϥⲉⲧⲏⲓⲧⲟⲩ ϩⲓⲱⲧϥ ϩⲁⲛϩⲃⲟⲥ
ⲉⲩⲟⲩⲁⲃ ⲛⲉ ⲟⲩⲟϩ ⲉϥⲉϫⲱⲕⲉⲙ ⲙⲡⲉϥⲥⲱⲙⲁ ⲧⲏⲣϥ ϧⲉⲛ ⲟⲩⲙⲱⲟⲩ ⲟⲩⲟϩ
ⲉϥⲉϯ ⲛⲛⲁⲓ ϩⲓⲱⲧϥ
̅ⲓⲋ:̅ⲉ ⲟⲩⲟϩ ⲉϥⲉϭⲓ ⲛⲧⲟⲧⲥ ⲛϯⲥⲩⲛⲁⲅⲱⲅⲏ ⲧⲏⲣⲥ ⲛⲧⲉ ⲛⲉⲛϣⲏⲣⲓ
ⲙⲡⲓⲥⲣⲁⲏⲗ ⲙⲃⲁⲣⲏⲓⲧ ⲃ ⲉⲃⲟⲗ ϧⲉⲛ ϩⲁⲛⲃⲁⲙⲡⲓ ⲉⲑⲃⲉ ⲫⲛⲟⲃⲓ ⲛⲉⲙ ⲟⲩⲁⲓ
ⲛⲱⲓⲗⲓ ⲉⲩϭⲗⲓⲗ ⲛϫⲟϥϫⲉϥ
̅ⲓⲋ:̣̅ⲋ ⲟⲩⲟϩ ⲉⲣⲉ ⲁⲁⲣⲱⲛ ⲉϥⲉⲓⲛⲓ ⲙⲡⲉϥⲙⲁⲥⲓ ⲉⲑⲃⲉ ⲫⲛⲟⲃⲓ ⲟⲩⲟϩ ⲉϥⲉⲧⲱⲃϩ
ⲉϩⲣⲏⲓ ⲉϫⲱϥ ⲛⲉⲙ ⲉϫⲉⲛ ⲡⲉϥⲏⲓ ⲧⲏⲣϥ
̅ⲓⲋ:̅ⲍ ⲟⲩⲟϩ ⲉϥⲉϭⲓ ⲙⲡⲓⲃⲁⲙⲡⲓ ⲃ ⲟⲩⲟϩ ⲉϥⲉⲧⲁϩⲱⲟⲩ ⲉⲣⲁⲧⲟⲩ ⲙⲡⲉⲙⲑⲟ
ⲙⲡϭⲟⲓⲥ ϧⲁⲧⲉⲛ ⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ
̅ⲓⲋ:̅ⲏ ⲟⲩⲟϩ ⲉⲣⲉ ⲁⲁⲣⲱⲛ ⲉϥⲉⲧⲁⲗⲉ ⲕⲗⲏⲣⲟⲥ ⲉϫⲉⲛ ⲡⲓⲃⲁⲉⲙⲡⲓ ⲃ ⲟⲩⲁⲓ
ⲛⲕⲗⲏⲣⲟⲥ ⲙⲡϭⲟⲓⲥ ⲟⲩⲁⲓ ⲛⲕⲗⲏⲣⲟⲥ ⲙⲡⲓⲁⲡⲟⲙⲉⲣⲟⲥ ⲡⲉⲧⲉⲙⲡϣⲁ ⲛϯⲧⲟⲧϥ
ⲉⲃⲟⲗ
̅ⲓⲋ:̅ⲑ ⲟⲩⲟϩ ⲉⲣⲉ ⲁⲁⲣⲱⲛ ⲓⲛⲓ ⲙⲡⲓⲃⲁⲙⲡⲓ ⲉϧⲟⲩⲛ ⲫⲏ ⲉⲧⲁ ⲡⲓⲕⲗⲏⲣⲟⲥ ⲛⲧⲉ
ⲡϭⲟⲓⲥ ⲓ ⲉϩⲣⲏⲓ ⲉϫⲱϥ ⲟⲩⲟϩ ⲉϥⲉⲉⲛϥ ⲉϩⲣⲏⲓ ⲉⲑⲃⲉ ⲫⲛⲟⲃⲓ
̅ⲓⲋ:̅ⲓ ⲟⲩⲟϩ ⲡⲓⲃⲁⲙⲡⲓ ⲫⲏ ⲉⲧⲁ ⲡⲓⲕⲗⲏⲣⲟⲥ ⲓ ⲉϩⲣⲏⲓ ⲉϫⲱϥ ⲛⲧⲉ
ⲡⲓⲁⲡⲟⲙⲉⲣⲟⲥ ⲉϥⲉⲧⲁϩⲟϥ ⲉⲣⲁⲧϥ ⲉϥⲟⲛϧ ⲙⲡⲉⲙⲑⲟ ⲙⲡϭⲟⲓⲥ ϩⲱⲥⲇⲉ
ⲉⲧⲱⲃϩ ⲉϫⲱϥ ϩⲱⲥⲇⲉ ⲉⲟⲩⲟⲣⲡϥ ⲉⲃⲟⲗ ⲉⲡⲓϩⲓⲟⲩⲓ ⲉⲃⲟⲗ ⲟⲩⲟϩ ⲉⲭⲁϥ
ⲉⲃⲟⲗ ⲉⲡϣⲁϥⲉ
̅ⲓⲋ:̅ⲓⲁ ⲟⲩⲟϩ ⲉⲣⲉ ⲁⲁⲣⲱⲛ ⲓⲛⲓ ⲙⲡⲉϥⲙⲁⲥⲓ ⲉⲧⲉ ⲉⲑⲃⲉ ⲫⲛⲟⲃⲓ ⲟⲩⲟϩ
ⲉϥⲉⲧⲱⲃϩ ⲉϩⲣⲏⲓ ⲉϫⲱϥ ⲛⲉⲙ ⲡⲉϥⲏⲓ ⲟⲩⲟϩ ⲉϥⲉϧⲟⲗϧⲉⲗ ⲙⲡⲓⲙⲁⲥⲓ ⲉⲧⲉ
ⲉⲑⲃⲉ ⲫⲛⲟⲃⲓ
̅ⲓⲋ:̅ⲓⲃ ⲟⲩⲟϩ ⲉϥⲉϭⲓ ⲛϯϣⲟⲩⲣⲏ ⲉⲥⲙⲉϩ ⲛϫⲉⲃⲥ ⲛⲭⲣⲱⲙ ⲉⲃⲟⲗ ϧⲉⲛ
ⲡⲓⲙⲁⲛⲉⲣϣⲱⲟⲩϣⲓ ⲉⲧⲭⲏ ⲙⲡⲉⲙⲑⲟ ⲙⲡϭⲟⲓⲥ ⲟⲩⲟϩ ⲉϥⲉⲙⲟϩ ⲛⲧⲉϥϫⲓϫ
ⲉⲃⲟⲗ ϧⲉⲛ ⲡⲓⲥⲑⲩⲛⲟⲩϥⲓ ⲉⲧⲥⲁⲧⲏⲟⲩⲧ ⲉⲧϣⲟⲙ ⲟⲩⲟϩ ⲉϥⲉⲟⲗϥ ⲉϧⲟⲩⲛ
ⲥⲁϧⲟⲩⲛ ⲙⲡⲓⲕⲁⲧⲁⲡⲉⲧⲁⲥⲙⲁ
̅ⲓⲋ:̅ⲓⲅ ⲉϥⲉⲧⲁⲗⲟ ⲙⲡⲓⲥⲑⲩⲛⲟⲩϥⲓ ⲉϫⲉⲛ ⲡⲓⲭⲣⲱⲙ ⲙⲡⲉⲙⲑⲟ ⲙⲡϭⲟⲓⲥ ⲟⲩⲟϩ
ⲉⲣⲉ ⲡⲓⲭⲣⲉⲙⲧⲥ ⲛⲧⲉ ⲡⲓⲥⲑⲩⲛⲟⲩϥⲓ ⲉϥⲉϩⲱⲃⲥ ⲉⲃⲟⲗ ⲉϫⲉⲛ ϯⲥⲉⲥⲃⲟϩ ⲉⲧⲭⲏ
ϩⲓϫⲉⲛ ⲛⲓⲙⲉⲧⲙⲉⲑⲣⲉⲩ ⲟⲩⲟϩ ⲛⲛⲉϥⲙⲟⲩ
̅ⲓⲋ:̅ⲓⲇ ⲟⲩⲟϩ ⲉϥⲉⲱⲗⲓ ⲉⲃⲟⲗ ϧⲉⲛ ⲡⲓⲥⲛⲟϥ ⲙⲡⲓⲙⲁⲥⲓ ⲟⲩⲟϩ ⲉϥⲉⲛⲟⲩϫϧ
ⲛⲧⲉϥϫⲓϫ ϩⲓϫⲉⲛ ϯⲥⲉⲥⲃⲟϩ ⲥⲁ ⲛⲓⲙⲁⲛϣⲁⲓ ⲙⲡⲉⲙⲑⲟ ⲛϯⲥⲉⲥⲃⲟϩ ⲛⲍ ⲛⲥⲟⲡ
ⲉⲃⲟⲗ ϧⲉⲛ ⲡⲓⲥⲛⲟϥ ⲙⲡⲉϥⲧⲏⲃ
̅ⲓⲋ:̅ⲓⲉ ⲟⲩⲟϩ ⲉϥⲉϧⲟⲗϧⲉⲗ ⲙⲡⲓⲃⲁⲙⲡⲓ ⲉⲧⲉ ⲉⲑⲃⲉ ⲫⲛⲟⲃⲓ ⲫⲏ ⲉⲧⲁϥϭⲓⲧϥ
ⲛⲧⲟⲧϥ ⲙⲡⲓⲗⲁⲟⲥ ⲙⲡⲉⲙⲑⲟ ⲙⲡϭⲟⲓⲥ ⲟⲩⲟϩ ⲉϥⲉⲓⲛⲓ ⲉⲃⲟⲗ ϧⲉⲛ ⲡⲉϥⲥⲛⲟϥ
ⲥⲁϧⲟⲩⲛ ⲙⲡⲓⲕⲁⲧⲁⲡⲉⲧⲁⲥⲙⲁ ⲟⲩⲟϩ ⲉϥⲉⲑⲁⲙⲓⲟ ⲙⲡⲉϥⲥⲛⲟϥ ⲙⲫⲣⲏϯ
ⲉⲧⲁϥⲑⲁⲙⲓⲟ ⲙⲡⲓⲥⲛⲟϥ ⲙⲡⲓⲙⲁⲥⲓ ⲟⲩⲟϩ ⲉϥⲉⲛⲟⲩϫϧ ⲙⲡⲉϥⲥⲛⲟϥ ⲉϫⲉⲛ
ⲡⲓⲩⲗⲁⲥⲧⲏⲣⲓⲟⲛ ⲙⲡⲉⲙⲑⲟ ⲙⲡϩⲟ ⲛϯⲥⲉⲥⲃⲟϩ
̅ⲓⲋ:̅ⲓⲋ ⲟⲩⲟϩ ⲉϥⲉⲧⲟⲩⲃⲟ ⲙⲡⲓⲙⲁ ⲉⲑⲟⲩⲁⲃ ⲉⲃⲟⲗ ϩⲁ ⲛⲓϭⲱϧⲉⲙ ⲛⲧⲉ
ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲛⲉⲙ ⲉⲃⲟⲗ ϩⲁ ⲛⲟⲩϭⲓⲛϫⲟⲛⲥ ⲉⲑⲃⲉ ⲛⲟⲩⲛⲟⲃⲓ ⲧⲏⲣⲟⲩ
ⲟⲩⲟϩ ⲉϥⲉⲓⲣⲓ ⲙⲡⲁⲓⲣⲏϯ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲉⲧⲁⲩⲥⲟⲛⲧⲥ
ⲛϧⲏⲧⲟⲩ ϧⲉⲛ ⲑⲙⲏϯ ⲙⲡⲟⲩϭⲱϧⲉⲙ
̅ⲓⲋ:̅ⲓⲍ ⲟⲩⲟϩ ⲣⲱⲙⲓ ⲛⲓⲃⲉⲛ ⲛⲛⲉϥϣⲱⲡⲓ ϧⲉⲛ ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ
ⲉϣⲱⲡ ⲉϥⲛⲁϣⲉⲛⲁϥ ⲉϧⲟⲩⲛ ⲛⲑⲟϥ ⲉⲧⲱⲃϩ ϧⲉⲛ ⲡⲉⲑⲟⲩⲁⲃ ϣⲁⲧⲉϥⲓ ⲉⲃⲟⲗ
ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ ⲉϫⲱϥ ⲛⲉⲙ ⲉϫⲉⲛ ⲡⲉϥⲏⲓ ⲛⲉⲙ ⲉϩⲣⲏⲓ ⲉϫⲉⲛ
ⲥⲩⲛⲁⲅⲱⲅⲏ ⲛⲓⲃⲉⲛ ⲛⲧⲉ ⲡⲓⲥⲣⲁⲏⲗ
̅ⲓⲋ:̅ⲓⲏ ⲟⲩⲟϩ ⲉϥⲉⲓ ⲉⲃⲟⲗ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲫⲏ ⲉⲧⲭⲏ ⲙⲡⲉⲙⲑⲟ
ⲙⲡϭⲟⲓⲥ ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ ⲉϫⲱϥ ⲟⲩⲟϩ ⲉϥⲉⲱⲗⲓ ⲉⲃⲟⲗ ϧⲉⲛ ⲡⲓⲥⲛⲟϥ
ⲛⲧⲉ ⲡⲓⲙⲁⲥⲓ ⲛⲉⲙ ⲉⲃⲟⲗ ϧⲉⲛ ⲡⲓⲥⲛⲟϥ ⲙⲡⲓⲃⲁⲙⲡⲓ ⲟⲩⲟϩ ⲉϥⲉⲧⲁⲗⲟ ⲉϫⲉⲛ
ⲛⲓⲧⲁⲡ ⲛⲧⲉ ⲡⲓⲙⲁⲛⲉⲣϣⲱⲟⲩϣⲓ ⲉϥⲕⲱϯ
̅ⲓⲋ:̅ⲓⲑ ⲉϥⲉⲛⲟⲩϫϧ ⲉϫⲱϥ ⲛⲍ ⲛⲥⲟⲡ ⲉⲃⲟⲗ ϧⲉⲛ ⲡⲓⲥⲛⲟϥ ⲙⲡⲉϥⲧⲏⲃ ⲟⲩⲟϩ
ⲉϥⲉⲧⲟⲩⲃⲟϥ ⲟⲩⲟϩ ⲉϥⲉⲉⲣⲁⲅⲓⲁⲍⲓⲛ ⲙⲙⲟϥ ⲉⲃⲟⲗ ϩⲁ ⲛⲓϭⲱϧⲉⲙ ⲛⲧⲉ
ⲛⲉⲛϣⲏⲣⲓ ⲙⲡⲓⲥⲣⲁⲏⲗ
̅ⲓⲋ:̅ⲕ ⲟⲩⲟϩ ⲉϥⲉϫⲱⲕ ⲉϥⲧⲟⲩⲃⲟ ⲙⲡⲉⲑⲟⲩⲁⲃ ⲛⲉⲙ ϯⲥⲕⲩⲛⲏ ⲛⲧⲉ
ϯⲙⲉⲧⲙⲉⲑⲣⲉ ⲛⲉⲙ ⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ ⲉⲑⲃⲉ ⲛⲓⲟⲩⲏⲃ ⲉϥⲉⲧⲟⲩⲃⲟ
ⲟⲩⲟϩ ⲉϥⲉⲓⲛⲓ ⲙⲡⲓⲃⲁⲙⲡⲓ ⲉⲧⲟⲛϧ
̅ⲓⲋ:̅ⲕⲁ ⲟⲩⲟϩ ⲉⲣⲉ ⲁⲁⲣⲱⲛ ⲉϥⲉⲧⲁⲗⲟ ⲛⲧⲉϥϫⲓϫ ⲥⲛⲟⲩϯ ⲉϧⲣⲏⲓ ⲉϫⲉⲛ
ⲧⲁⲫⲉ ⲙⲡⲓⲃⲁⲙⲡⲓ ⲉⲧⲟⲛϧ ⲟⲩⲟϩ ⲉϥⲉⲟⲩⲱⲛϩ ⲉⲃⲟⲗ ⲉϩⲣⲏⲓ ⲉϫⲱϥ
ⲛⲛⲓⲁⲛⲟⲙⲓⲁ ⲧⲏⲣⲟⲩ ⲛⲧⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲛⲉⲙ ⲛⲟⲩⲁⲇⲓⲕⲓⲁ ⲧⲏⲣⲟⲩ
ⲛⲉⲙ ⲛⲟⲩⲛⲟⲃⲓ ⲧⲏⲣⲟⲩ ⲟⲩⲟϩ ⲉϥⲉⲧⲁⲗⲱⲟⲩ ⲉϩⲣⲏⲓ ⲉϫⲉⲛ ⲧⲁⲫⲉ ⲙⲡⲓⲃⲁⲙⲡⲓ
ⲉⲧⲟⲛϧ ⲟⲩⲟϩ ⲉϥⲉⲟⲩⲟⲣⲡϥ ⲉⲃⲟⲗ ϧⲉⲛ ⲧϫⲓϫ ⲛⲟⲩⲣⲱⲙⲓ ⲉϥⲥⲉⲃⲧⲱⲧ ⲉⲃⲟⲗ
ⲉⲡϣⲁϥⲉ
̅ⲓⲋ:̅ⲕⲃ ⲟⲩⲟϩ ⲉⲣⲉ ⲡⲓⲃⲁⲙⲡⲓ ⲉϥⲉⲱⲗⲓ ⲉϫⲱϥ ⲛⲛⲟⲩⲁⲛⲟⲙⲓⲁ ⲉⲟⲩⲕⲁϩⲓ
ⲛⲁⲧϩⲱⲙⲓ ⲉϫⲱϥ ⲟⲩⲟϩ ⲉϥⲉⲟⲩⲱⲣⲡ ⲙⲡⲓⲃⲁⲙⲡⲓ ⲉⲃⲟⲗ ⲉⲡϣⲁϥⲉ
̅ⲓⲋ:̅ⲕⲅ ⲟⲩⲟϩ ⲉϥⲉⲓ ⲛϫⲉ ⲁⲁⲣⲱⲛ ⲉϧⲟⲩⲛ ⲉϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ
ⲟⲩⲟϩ ⲉϥⲉⲃⲁϣϥ ⲛϯⲥⲧⲟⲗⲏ ⲑⲏ ⲉⲛⲁⲥⲧⲟⲓ ϩⲓⲱⲧϥ ⲉϥⲛⲁϣⲉ ⲉϧⲟⲩⲛ
ⲉⲡⲉⲑⲟⲩⲁⲃ ⲟⲩⲟϩ ⲉϥⲉⲭⲁⲥ ⲙⲡⲓⲙⲁ ⲉⲧⲉⲙⲙⲁⲩ
̅ⲓⲋ:̅ⲕⲇ ⲟⲩⲟϩ ⲉϥⲉϫⲱⲕⲉⲙ ⲙⲡⲉϥⲥⲱⲙⲁ ϧⲉⲛ ⲟⲩⲙⲱⲟⲩ ϧⲉⲛ ⲟⲩⲙⲁ ⲉϥⲟⲩⲁⲃ
ⲟⲩⲟϩ ⲉϥⲉϯ ϩⲓⲱⲧϥ ⲛⲧⲉϥⲥⲧⲟⲗⲏ ⲟⲩⲟϩ ⲉϥⲉⲓ ⲉⲃⲟⲗ ⲉϥⲉⲑⲁⲙⲓⲟ
ⲙⲡⲉϥⲟⲩⲧⲁϩ ⲧⲏⲣϥ ⲛⲉⲙ ⲡⲟⲩⲧⲁϩ ⲧⲏⲣϥ ⲛⲧⲉ ⲡⲉϥⲗⲁⲟⲥ ⲟⲩⲟϩ
ⲉϥⲉⲧⲱⲃϩ ⲉϩⲣⲏⲓ ⲉϫⲱϥ ⲛⲉⲙ ⲉϫⲉⲛ ⲡⲉϥⲏⲓ ⲛⲉⲙ ⲉϩⲣⲏⲓ ⲉϫⲉⲛ ⲡⲓⲗⲁⲟⲥ
ⲙⲫⲣⲏϯ ⲉⲧⲁϥⲧⲱⲃϩ ⲉϩⲣⲏⲓ ⲉϫⲉⲛ ⲛⲓⲟⲩⲏⲃ
̅ⲓⲋ:̅ⲕⲉ ⲟⲩⲟϩ ⲡⲓⲱⲧ ⲉϣⲁⲩⲉⲛϥ ⲉϩⲣⲏⲓ ⲉϫⲉⲛ ⲫⲛⲟⲃⲓ ⲉϥⲉⲉⲛϥ ⲉϩⲣⲏⲓ ⲉϫⲉⲛ
ⲡⲓⲙⲁⲛⲉⲣϣⲱⲟⲩϣⲓ
̅ⲓⲋ:̅ⲕⲋ ⲟⲩⲟϩ ⲫⲏ ⲉⲧⲛⲁⲟⲩⲱⲣⲡ ⲙⲡⲓⲃⲁⲙⲡⲓ ⲉⲃⲟⲗ ⲫⲏ ⲉⲧⲁⲩⲟⲩⲟⲣⲡϥ ⲉⲃⲟⲗ
ⲉⲩⲭⲱ ⲉⲃⲟⲗ ⲉϥⲉⲣⲱϧⲓ ⲛⲛⲉϥϩⲃⲱⲥ ⲟⲩⲟϩ ⲉϥⲉϫⲱⲕⲉⲙ ⲙⲡⲉϥⲥⲱⲙⲁ ϧⲉⲛ
ⲟⲩⲙⲱⲟⲩ ⲟⲩⲟϩ ⲙⲉⲛⲉⲛⲥⲁ ⲛⲁⲓ ⲉϥⲉϣⲉⲛⲁϥ ⲉϧⲟⲩⲛ ⲉϯⲡⲁⲣⲉⲙⲃⲟⲗⲏ
̅ⲓⲋ:̅ⲕⲍ ⲟⲩⲟϩ ⲡⲓⲙⲁⲥⲓ ⲫⲏ ⲉⲧⲉ ⲉⲑⲃⲉ ⲫⲛⲟⲃⲓ ⲛⲉⲙ ⲡⲓⲃⲁⲙⲡⲓ ⲫⲏ ⲉⲧⲉ
ⲉⲑⲃⲉ ⲫⲛⲟⲃⲓ ⲛⲁⲓ ⲉⲧⲁⲩⲉⲛ ⲡⲟⲩⲥⲛⲟϥ ⲉϧⲟⲩⲛ ⲉⲡϫⲓⲛⲧⲱⲃϩ ϧⲉⲛ ⲡⲉⲑⲟⲩⲁⲃ
ⲉⲩⲉⲟⲗⲟⲩ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ ⲟⲩⲟϩ ⲉⲩⲉⲣⲟⲕϩⲟⲩ ϧⲉⲛ ⲡⲓⲭⲣⲱⲙ ⲛⲉⲙ
ⲛⲟⲩϣⲁⲣ ⲛⲉⲙ ⲛⲟⲩⲁϥⲟⲩⲓ ⲛⲉⲙ ⲛⲟⲩϩⲱⲓⲣⲓ
̅ⲓⲋ:̅ⲕⲏ ⲫⲏ ⲉⲧⲛⲁⲣⲟⲕϩⲟⲩ ⲉϥⲉⲣⲱϧⲓ ⲛⲛⲉϥϩⲃⲱⲥ ⲟⲩⲟϩ ⲉϥⲉϫⲱⲕⲉⲙ
ⲙⲡⲉϥⲥⲱⲙⲁ ϧⲉⲛ ⲟⲩⲙⲱⲟⲩ ⲟⲩⲟϩ ⲙⲉⲛⲉⲛⲥⲁ ⲛⲁⲓ ⲉϥⲉⲓ ⲉϧⲟⲩⲛ
ⲉϯⲡⲁⲣⲉⲙⲃⲟⲗⲏ
̅ⲓⲋ:̅ⲕⲑ ⲟⲩⲟϩ ⲉⲣⲉ ⲫⲁⲓ ϣⲱⲡⲓ ⲛⲱⲧⲉⲛ ⲛⲟⲩⲛⲟⲙⲟⲥ ⲛⲉⲛⲉϩ ⲛϩⲣⲏⲓ ϧⲉⲛ
ⲡⲓⲁⲃⲟⲧ ⲙⲙⲁϩⲍ ⲛⲥⲟⲩⲁⲓ ⲙⲡⲓⲁⲃⲟⲧ ⲉⲣⲉⲧⲉⲛⲉⲑⲉⲃⲓⲟ ⲛⲛⲉⲧⲉⲛⲯⲩⲭⲏ ⲟⲩⲟϩ
ϫⲓⲛⲉⲣϩⲱⲃ ⲛⲓⲃⲉⲛ ⲛⲛⲉⲧⲉⲛⲁⲓⲧⲟⲩ ⲡⲓⲣⲉⲙⲛϯⲙⲓ ⲛⲉⲙ ⲡⲓϣⲉⲙⲙⲟ ⲉⲑⲟⲩⲉϩ
ⲉⲣⲱⲧⲉⲛ
̅ⲓⲋ:̅ⲗ ⲛϩⲣⲏⲓ ⲅⲁⲣ ϧⲉⲛ ⲡⲁⲓⲉϩⲟⲟⲩ ⲉⲩⲉⲧⲱⲃϩ ⲉϩⲣⲏⲓ ⲉϫⲱⲧⲉⲛ ⲉⲧⲟⲩⲃⲉ
ⲑⲏⲛⲟⲩ ⲉⲃⲟⲗ ϩⲁ ⲛⲉⲧⲉⲛⲛⲟⲃⲓ ⲧⲏⲣⲟⲩ ⲙⲡⲉⲙⲑⲟ ⲙⲡϭⲟⲓⲥ ⲟⲩⲟϩ
ⲉⲣⲉⲧⲉⲛⲉⲧⲟⲩⲃⲟ
̅ⲓⲋ:̅ⲗⲁ ϩⲁⲛⲥⲁⲃⲃⲁⲧⲟⲛ ⲛⲧⲉ ϩⲁⲛⲥⲁⲃⲃⲁⲧⲟⲛ ⲛⲱⲧⲉⲛ ⲟⲩⲟϩ ⲉⲣⲉⲧⲉⲛⲉⲑⲉⲃⲓⲟ
ⲛⲛⲉⲧⲉⲛⲯⲩⲭⲏ ⲟⲩⲛⲟⲙⲓⲙⲟⲛ ⲛⲉⲛⲉϩ
̅ⲓⲋ:̅ⲗⲃ ⲟⲩⲟϩ ⲉϥⲉⲧⲱⲃϩ ⲉⲑⲃⲉ ⲟⲩⲭⲱ ⲉⲃⲟⲗ ⲛϫⲉ ⲡⲓⲟⲩⲏⲃ ⲫⲏ
ⲉⲧⲟⲩⲛⲁⲑⲁϩⲥϥ ⲛⲉⲙ ⲫⲏ ⲉⲧⲟⲩⲛⲁϫⲱⲕ ⲛⲛⲉϥϫⲓϫ ⲉⲃⲟⲗ ⲛⲧⲉϥⲉⲣⲟⲩⲏⲃ
ⲙⲉⲛⲉⲛⲥⲁ ⲡⲉϥⲓⲱⲧ ⲟⲩⲟϩ ⲉϥⲉϯ ϩⲓⲱⲧϥ ⲛϯⲥⲧⲟⲗⲏ ⲛⲓⲁⲩ ϯⲥⲧⲟⲗⲏ
ⲉⲑⲟⲩⲁⲃ
̅ⲓⲋ:̅ⲗⲅ ⲟⲩⲟϩ ⲉϥⲉⲧⲟⲩⲃⲟ ⲙⲡⲉⲑⲟⲩⲁⲃ ⲛⲧⲉ ⲛⲉⲑⲟⲩⲁⲃ ⲛⲉⲙ ϯⲥⲕⲩⲛⲏ ⲛⲧⲉ
ϯⲙⲉⲧⲙⲉⲑⲣⲉ ⲛⲉⲙ ⲡⲓⲙⲁⲛⲉⲣϣⲱⲟⲩϣⲓ ⲉϥⲉⲧⲟⲩⲃⲟϥ ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ
ⲉϫⲉⲛ ⲛⲓⲟⲩⲏⲃ ⲛⲉⲙ ⲉϫⲉⲛ ϯⲥⲩⲛⲁⲅⲱⲅⲏ ⲧⲏⲣⲥ
̅ⲓⲋ:̅ⲗⲇ ⲫⲁⲓ ⲟⲩⲛⲟⲙⲓⲙⲟⲛ ⲛⲉⲛⲉϩ ⲛⲱⲧⲉⲛ ⲡⲉ ⲉⲧⲱⲃϩ ⲉⲑⲃⲉ ⲟⲩⲭⲱ ⲉⲃⲟⲗ
ⲛⲧⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲉⲃⲟⲗ ϩⲁ ⲛⲟⲩⲛⲟⲃⲓ ⲧⲏⲣⲟⲩ ⲟⲩⲥⲟⲡ ⲛⲧⲉⲛ
ⲣⲟⲙⲡⲓ ⲉⲩⲉⲓⲣⲓ ⲙⲫⲁⲓ ⲕⲁⲧⲁ ⲫⲣⲏϯ ⲉⲧⲁ ⲡϭⲟⲓⲥ ⲟⲩⲁϩⲥⲁϩⲛⲓ ⲙⲙⲱⲩⲥⲏⲥ
̅ⲓⲍ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲓⲍ:̅ⲃ ϫⲉ ⲥⲁϫⲓ ⲛⲉⲙ ⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ
ⲟⲩⲟϩ ⲉⲕⲉϫⲟⲥ ⲛⲱⲟⲩ ϫⲉ ⲫⲁⲓ ⲡⲉ ⲡⲓⲥⲁϫⲓ ⲉⲧⲁ ⲡϭⲟⲓⲥ ϩⲟⲛϩⲉⲛ ⲙⲙⲟϥ
ⲉϥϫⲱ ⲙⲙⲟⲥ
̅ⲓⲍ:̅ⲅ ϫⲉ ⲫⲣⲱⲙⲓ ⲫⲣⲱⲙⲓ ⲛⲧⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲫⲏ ⲉⲧⲛⲁϧⲟⲗϧⲉⲗ
ⲛⲟⲩⲙⲁⲥⲓ ⲓⲉ ⲟⲩⲉⲥⲱⲟⲩ ⲓⲉ ⲟⲩⲃⲁⲙⲡⲓ ϧⲉⲛ ϯⲡⲁⲣⲉⲙⲃⲟⲗⲏ ⲛⲉⲙ ⲫⲏ
ⲉⲧⲛⲁϣⲱⲧ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ
̅ⲓⲍ:̅ⲇ ⲟⲩⲟϩ ⲛⲧⲉϥϣⲧⲉⲙⲉⲛϥ ⲉϩⲣⲉⲛ ⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ
ϩⲱⲥⲇⲉ ⲉⲑⲁⲙⲓⲟϥ ⲛⲟⲩϭⲗⲓⲗ ⲛϫⲟϥϫⲉϥ ⲓⲉ ⲟⲩⲟⲩϫⲁⲓ ⲙⲡϭⲟⲓⲥ ⲉϥϣⲏⲡ
ⲉⲩⲥⲑⲟⲓ ⲛⲥⲑⲩⲛⲟⲩϥⲓ ⲟⲩⲟϩ ⲫⲏ ⲉⲧⲛⲁϣⲱⲧ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ ⲟⲩⲟϩ
ⲛⲧⲉϥϣⲧⲉⲙⲉⲛϥ ϩⲓⲣⲉⲛ ⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ϩⲱⲥⲇⲉ ⲉⲓⲛⲓ
ⲛⲟⲩⲇⲱⲣⲟⲛ ⲙⲡϭⲟⲓⲥ ⲙⲡⲉⲙⲑⲟ ⲛϯⲥⲕⲩⲛⲏ ⲛⲧⲉ ⲡϭⲟⲓⲥ ⲉⲩⲉⲱⲡ ⲛⲟⲩⲥⲛⲟϥ
ⲙⲡⲓⲣⲱⲙⲓ ⲉⲧⲉⲙⲙⲁⲩ ⲟⲩⲥⲛⲟϥ ⲁϥⲫⲟⲛϥ ⲉⲃⲟⲗ ⲉⲥⲉϥⲱϯ ⲉⲃⲟⲗ ⲛϫⲉ ϯⲯⲩⲭⲏ
ⲉⲧⲉⲙⲙⲁⲩ ⲉⲃⲟⲗ ϧⲉⲛ ⲡⲉⲥⲗⲁⲟⲥ
̅ⲓⲍ:̅ⲉ ϩⲟⲡⲱⲥ ⲛⲧⲟⲩⲓⲛⲓ ⲛϫⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲛⲛⲟⲩϣⲟⲩϣⲱⲟⲩϣⲓ ⲛⲏ
ⲧⲏⲣⲟⲩ ⲉⲧⲟⲩⲛⲁϧⲉⲗϧⲱⲗⲟⲩ ϧⲉⲛ ⲛⲓⲙⲉϣϣⲟϯ ⲉⲩⲉⲉⲛⲟⲩ ⲙⲡϭⲟⲓⲥ ϩⲓⲣⲉⲛ
ⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ϩⲁ ⲡⲓⲟⲩⲏⲃ ⲟⲩⲟϩ ⲉⲩⲉϣⲱⲧ
ⲛⲟⲩϣⲟⲩϣⲱⲟⲩϣⲓ ⲛⲟⲩϫⲁⲓ ⲙⲡϭⲟⲓⲥ
̅ⲓⲍ:̣̅ⲋ ⲟⲩⲟϩ ⲉⲣⲉ ⲡⲓⲟⲩⲏⲃ ϫⲱϣ ⲙⲡⲓⲥⲛⲟϥ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ
ⲙⲡⲉⲙⲑⲟ ⲙⲡϭⲟⲓⲥ ϧⲁⲧⲉⲛ ⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲟⲩⲟϩ ⲉϥⲉⲓⲛⲓ
ⲙⲡⲓⲱⲧ ⲉⲩⲥⲑⲟⲓ ⲛⲥⲑⲩⲛⲟⲩϥⲓ ⲙⲡϭⲟⲓⲥ
̅ⲓⲍ:̅ⲍ ⲟⲩⲟϩ ⲛⲛⲟⲩⲟⲩⲁϩⲧⲟⲧⲟⲩ ϫⲉ ⲉϣⲱⲧ ⲛⲛⲟⲩϣⲟⲩϣⲱⲟⲩϣⲓ
ⲛⲛⲓⲙⲉⲧⲉⲫⲗⲏⲟⲩ ⲛⲏ ⲛⲑⲱⲟⲩ ⲉⲧⲁⲩⲉⲣⲡⲟⲣⲛⲉⲩⲓⲛ ⲥⲁⲙⲉⲛϩⲏⲟⲩ ⲟⲩⲛⲟⲙⲓⲙⲟⲛ
ⲛⲉⲛⲉϩ ⲉϥⲉϣⲱⲡⲓ ⲛⲱⲧⲉⲛ ⲉⲛⲉⲧⲉⲛϫⲱⲟⲩ
̅ⲓⲍ:̅ⲏ ⲟⲩⲟϩ ⲉⲕⲉϫⲟⲥ ⲛⲱⲟⲩ ϫⲉ ⲫⲣⲱⲙⲓ ⲫⲣⲱⲙⲓ ⲉⲃⲟⲗ ϧⲉⲛ ⲛⲉⲛϣⲏⲣⲓ
ⲙⲡⲓⲥⲣⲁⲏⲗ ⲓⲉ ⲉⲃⲟⲗ ϧⲉⲛ ⲛⲓϣⲉⲙⲙⲱⲟⲩ ⲉⲩⲟⲩⲉϩ ⲉⲣⲱⲧⲉⲛ ⲫⲏ ⲉⲧⲛⲁⲓⲣⲓ
ⲛⲟⲩϭⲗⲓⲗ ⲛϫⲟϥϫⲉϥ ⲓⲉ ⲟⲩϣⲟⲩϣⲱⲟⲩϣⲓ
̅ⲓⲍ:̅ⲑ ⲟⲩⲟϩ ⲛⲧⲉϥϣⲧⲉⲙⲉⲛϥ ϩⲓⲣⲉⲛ ⲫⲣⲟ ⲛϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ
ⲉⲁⲓϥ ⲙⲡϭⲟⲓⲥ ⲉⲥⲉϥⲱϯ ⲉⲃⲟⲗ ⲛϫⲉ ϯⲯⲩⲭⲏ ⲉⲧⲉⲙⲙⲁⲩ ⲉⲃⲟⲗ ϧⲉⲛ
ⲡⲉⲥⲗⲁⲟⲥ
̅ⲓⲍ:̅ⲓ ⲟⲩⲟϩ ⲫⲣⲱⲙⲓ ⲫⲣⲱⲙⲓ ⲛⲧⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲓⲉ ⲉⲃⲟⲗ ϧⲉⲛ
ⲛⲓϣⲉⲙⲙⲱⲟⲩ ⲉⲧⲟⲩⲉϩ ϧⲉⲛ ⲑⲏⲛⲟⲩ ⲫⲏ ⲉⲧⲛⲁⲟⲩⲉⲙ ⲥⲛⲟϥ ⲛⲓⲃⲉⲛ ϧⲉⲛ
ⲑⲏⲛⲟⲩ ⲟⲩⲟϩ ⲉⲓⲉⲥⲉⲙⲛⲉ ⲡⲁϩⲟ ⲉϫⲉⲛ ϯⲯⲩⲭⲏ ⲉⲧⲉⲙⲙⲁⲩ ⲉⲧⲛⲁⲟⲩⲱⲙ
ⲙⲡⲓⲥⲛⲟϥ ⲟⲩⲟϩ ⲉⲓⲉⲧⲁⲕⲟⲥ ⲉⲃⲟⲗ ϧⲉⲛ ⲡⲉⲥⲗⲁⲟⲥ
̅ⲓⲍ:̅ⲓⲁ ϯⲯⲩⲭⲏ ⲅⲁⲣ ⲛⲧⲉ ⲥⲁⲣⲝ ⲛⲓⲃⲉⲛ ⲡⲉ ⲡⲉⲥⲥⲛⲟϥ ⲟⲩⲟϩ ⲁⲛⲟⲕ
ⲁⲓⲧⲏⲓϥ ⲛⲱⲧⲉⲛ ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉⲧⲱⲃϩ ⲉⲑⲃⲉ ⲡⲧⲟⲩⲃⲟ ⲛⲧⲉ
ⲛⲉⲧⲉⲛⲯⲩⲭⲏ ⲡⲉⲥⲥⲛⲟϥ ⲅⲁⲣ ⲛⲧϣⲉⲃⲓⲱ ⲛⲟⲩⲯⲩⲭⲏ ⲉϥⲉⲧⲱⲃϩ
ⲉⲡϫⲓⲛⲧⲟⲩⲃⲟ
̅ⲓⲍ:̅ⲓⲃ ⲉⲑⲃⲉⲫⲁⲓ ⲁⲓϫⲟⲥ ⲛⲛⲉⲛϣⲏⲣⲓ ⲙⲡⲓⲥⲣⲁⲏⲗ ϫⲉ ⲯⲩⲭⲏ ⲛⲓⲃⲉⲛ ⲉⲃⲟⲗ
ϧⲉⲛ ⲑⲏⲛⲟⲩ ⲛⲛⲉϥⲟⲩⲉⲙ ⲥⲛⲟϥ ⲟⲩⲟϩ ⲡⲓϣⲉⲙⲙⲟ ⲉⲧⲟⲩⲉϩ ⲉⲣⲱⲧⲉⲛ
ⲛⲛⲉϥⲟⲩⲉⲙ ⲥⲛⲟϥ
̅ⲓⲍ:̅ⲓⲅ ⲟⲩⲟϩ ⲫⲣⲱⲙⲓ ⲫⲣⲱⲙⲓ ⲛⲧⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲓⲉ ⲉⲃⲟⲗ ϧⲉⲛ
ⲛⲓϣⲉⲙⲙⲱⲟⲩ ⲉⲧⲟⲩⲉϩ ϧⲉⲛ ⲑⲏⲛⲟⲩ ⲫⲏ ⲉⲧⲛⲁⲧⲁϩⲟ ⲛⲟⲩϫⲟⲣϫⲥ ⲓⲧⲉ
ⲟⲩⲑⲏⲣⲓⲟⲛ ⲓⲧⲉ ⲟⲩϩⲁⲗⲏⲧ ⲫⲏ ⲉⲑⲟⲩⲟⲩⲱⲙ ⲙⲙⲟϥ ⲉϥⲉⲫⲱⲛ ⲙⲡⲉϥⲥⲛⲟϥ
ⲉⲃⲟⲗ ⲉϥⲉϩⲟⲃⲥϥ ϧⲉⲛ ⲡⲓⲕⲁϩⲓ
̅ⲓⲍ:̅ⲓⲇ ϯⲯⲩⲭⲏ ⲅⲁⲣ ⲛⲧⲉ ⲥⲁⲣⲝ ⲛⲓⲃⲉⲛ ⲡⲉ ⲡⲉⲥⲥⲛⲟϥ ⲟⲩⲟϩ ⲁϫⲟⲥ
ⲛⲛⲉⲛϣⲏⲣⲓ ⲙⲡⲓⲥⲣⲁⲏⲗ ϫⲉ ⲛⲛⲉⲧⲉⲛⲟⲩⲉⲙ ⲥⲛⲟϥ ⲛⲧⲉ ⲥⲁⲣⲝ ⲛⲓⲃⲉⲛ ϫⲉ
ⲧⲯⲩⲭⲏ ⲛⲧⲉ ⲥⲁⲣⲝ ⲛⲓⲃⲉⲛ ⲡⲉ ⲡⲉⲥⲥⲛⲟϥ ⲫⲏ ⲛⲓⲃⲉⲛ ⲉⲧⲛⲁⲟⲩⲱⲙ ⲙⲙⲟϥ
ⲉϥⲉϥⲱϯ ⲉⲃⲟⲗ
̅ⲓⲍ:̅ⲓⲉ ⲟⲩⲟϩ ⲯⲩⲭⲏ ⲛⲓⲃⲉⲛ ⲉⲧⲛⲁⲟⲩⲱⲙ ⲙⲡⲉⲧⲙⲱⲟⲩⲧ ⲓⲉ ⲫⲏ ⲉⲧⲁ
ⲡⲑⲏⲣⲓⲟⲛ ⲟⲩⲟⲙϥ ⲓⲧⲉ ϧⲉⲛ ⲛⲓⲣⲉⲙⲛϯⲙⲓ ⲓⲧⲉ ϧⲉⲛ ⲛⲓϣⲉⲙⲙⲱⲟⲩ ⲉϥⲉⲣⲱϧⲓ
ⲛⲛⲉϥϩⲃⲱⲥ ⲟⲩⲟϩ ⲉϥⲉϫⲱⲕⲉⲙ ⲙⲡⲉϥⲥⲱⲙⲁ ϧⲉⲛ ⲟⲩⲙⲱⲟⲩ ⲟⲩⲟϩ ⲉϥⲉϣⲱⲡⲓ
ⲉϥϭⲁϧⲉⲙ ϣⲁ ⲫⲛⲁⲩ ⲛϩⲁⲛⲁⲣⲟⲩϩⲓ ⲟⲩⲟϩ ⲉϥⲉϣⲱⲡⲓ ⲉϥⲧⲟⲩⲃⲏⲟⲩⲧ
̅ⲓⲍ:̅ⲓⲋ ⲉϣⲱⲡ ⲇⲉ ⲁϥϣⲧⲉⲙⲣⲱϧⲓ ⲛⲛⲉϥϩⲃⲱⲥ ⲟⲩⲟϩ ⲛⲧⲉϥϣⲧⲉⲙϫⲱⲕⲉⲙ
ⲙⲡⲉϥⲥⲱⲙⲁ ϧⲉⲛ ⲟⲩⲙⲱⲟⲩ ⲉϥⲉϭⲓ ⲙⲡⲉϥⲛⲟⲃⲓ
̅ⲓⲏ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲓⲏ:̅ⲃ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲟϩ ⲉⲕⲉϫⲟⲥ ⲛⲱⲟⲩ ϫⲉ
ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲏ:̅ⲅ ⲛⲛⲉⲧⲉⲛⲓⲣⲓ ⲕⲁⲧⲁ ⲛⲓⲙⲉⲧⲁⲧⲥⲃⲱ ⲛⲧⲉ ⲡⲕⲁϩⲓ ⲛⲭⲏⲙⲓ ⲫⲁⲓ
ⲉⲧⲁⲣⲉⲧⲉⲛⲉⲣⲣⲉⲙⲛϫⲱⲓⲗⲓ ⲛϧⲏⲧϥ ⲟⲩⲟϩ ⲛⲛⲉⲧⲉⲛⲓⲣⲓ ⲕⲁⲧⲁ ⲛⲓⲙⲉⲧⲁⲧⲥⲃⲱ
ⲛⲧⲉ ⲡⲕⲁϩⲓ ⲛⲭⲁⲛⲁⲁⲛ ⲫⲁⲓ ⲁⲛⲟⲕ ⲉϯⲛⲁⲉⲛ ⲑⲏⲛⲟⲩ ⲉϧⲟⲩⲛ ⲉⲣⲟϥ ⲟⲩⲟϩ
ⲛⲛⲉⲧⲉⲛⲙⲟϣⲓ ⲛⲥⲁ ⲛⲟⲩⲛⲟⲙⲓⲙⲟⲛ
̅ⲓⲏ:̅ⲇ ⲟⲩⲟϩ ⲛⲁϩⲁⲡ ⲉⲣⲉⲧⲉⲛⲉⲁⲓⲧⲟⲩ ⲟⲩⲟϩ ⲛⲁⲟⲩⲁϩⲥⲁϩⲛⲓ ⲉⲣⲉⲧⲉⲛⲉⲁⲣⲉϩ
ⲉⲣⲱⲟⲩ ⲟⲩⲟϩ ⲙⲟϣⲓ ⲛϧⲣⲏⲓ ⲛϧⲏⲧⲟⲩ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲏ:̅ⲉ ⲟⲩⲟϩ ⲉⲣⲉⲧⲉⲛⲉⲁⲣⲉϩ ⲉⲛⲁⲟⲩⲁϩⲥⲁϩⲛⲓ ⲧⲏⲣⲟⲩ ⲛⲉⲙ ⲛⲁϩⲁⲡ ⲧⲏⲣⲟⲩ
ⲟⲩⲟϩ ⲉⲣⲉⲧⲉⲛⲉⲁⲓⲧⲟⲩ ⲛⲁⲓ ⲉⲧⲉ ⲫⲣⲱⲙⲓ ⲛⲁⲁⲓⲧⲟⲩ ⲉϥⲉⲱⲛϧ ⲛϧⲏⲧⲟⲩ
ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲏ:̣̅ⲋ ⲫⲣⲱⲙⲓ ⲫⲣⲱⲙⲓ ⲛⲛⲉϥⲧⲟⲙϥ ⲉⲉⲛⲭⲁⲓ ⲛⲓⲃⲉⲛ ⲉⲧⲏⲡ ⲉⲧⲉϥⲥⲁⲣⲝ ⲉⲃⲱϣ
ⲛⲛⲟⲩϣⲓⲡⲓ ⲉⲃⲟⲗ ⲁⲛⲟⲕ ⲡϭⲟⲓⲥ
̅ⲓⲏ:̅ⲍ ⲟⲩϣⲓⲡⲓ ⲛⲧⲉ ⲡⲉⲕⲓⲱⲧ ⲛⲉⲙ ⲟⲩϣⲓⲡⲓ ⲛⲧⲉ ⲧⲉⲕⲙⲁⲩ ⲛⲛⲉⲕϭⲟⲣⲡϥ
ⲉⲃⲟⲗ ⲧⲉⲕⲙⲁⲩ ⲅⲁⲣ ⲧⲉ ⲛⲛⲉⲕϭⲱⲣⲡ ⲙⲡⲉⲥϣⲓⲡⲓ ⲉⲃⲟⲗ
̅ⲓⲏ:̅ⲏ ⲡϣⲓⲡⲓ ⲛⲧⲉ ⲧⲥϩⲓⲙⲓ ⲙⲡⲉⲕⲓⲱⲧ ⲛⲛⲉⲕϭⲟⲣⲡϥ ⲉⲃⲟⲗ ⲟⲩϣⲓⲡⲓ ⲅⲁⲣ
ⲡⲉ ⲛⲧⲉ ⲡⲉⲕⲓⲱⲧ
̅ⲓⲏ:̅ⲑ ⲛⲛⲉⲕϭⲱⲣⲡ ⲉⲃⲟⲗ ⲙⲡϣⲓⲡⲓ ⲛⲧⲉ ⲧⲉⲕⲥⲱⲛⲓ ⲛϣⲉⲛⲓⲱⲧ ⲓⲉ ⲛϣⲉⲛⲙⲁⲩ
ⲉⲁⲩⲙⲁⲥⲥ ⲛϧⲟⲩⲛ ⲓⲉ ⲟⲩⲙⲁⲥⲥ ⲙⲃⲟⲗ ⲛⲛⲉⲕϭⲱⲣⲡ ⲙⲡⲟⲩϣⲓⲡⲓ ⲉⲃⲟⲗ
̅ⲓⲏ:̅ⲓ ⲟⲩϣⲓⲡⲓ ⲛⲧⲉ ⲧϣⲉⲣⲓ ⲛⲟⲩϣⲏⲣⲓ ⲛⲧⲁⲕ ⲓⲉ ⲧϣⲉⲣⲓ ⲛⲟⲩϣⲉⲣⲓ
ⲛⲛⲉⲕϭⲟⲣⲡϥ ⲉⲃⲟⲗ ϫⲉ ⲟⲩⲏⲓ ⲅⲁⲣ ⲟⲩϣⲓⲡⲓ ⲛⲧⲁⲕ ⲡⲉ
̅ⲓⲏ:̅ⲓⲁ ⲟⲩϣⲓⲡⲓ ⲛⲧⲉ ⲧϣⲉⲣⲓ ⲛⲧⲥϩⲓⲙⲓ ⲙⲡⲉⲕⲓⲱⲧ ⲛⲛⲉⲕϭⲟⲣⲡϥ ⲉⲃⲟⲗ
ⲧⲉⲕⲥⲱⲛⲓ ⲅⲁⲣ ⲛϣⲉⲛⲓⲱⲧ ⲧⲉ ⲛⲛⲉⲕϭⲱⲣⲡ ⲙⲡⲉⲥϣⲓⲡⲓ ⲉⲃⲟⲗ
̅ⲓⲏ:̅ⲓⲃ ⲟⲩϣⲓⲡⲓ ⲛⲧⲉ ⲧⲥⲱⲛⲓ ⲙⲡⲉⲕⲓⲱⲧ ⲛⲛⲉⲕϭⲟⲣⲡϥ ⲉⲃⲟⲗ ⲟⲩⲣⲉⲙⲛⲏⲓ ⲅⲁⲣ
ⲛⲧⲉ ⲡⲉⲕⲓⲱⲧ ⲧⲉ
̅ⲓⲏ:̅ⲓⲅ ⲟⲩϣⲓⲡⲓ ⲛⲧⲉ ⲧⲥⲱⲛⲓ ⲛⲧⲉⲕⲙⲁⲩ ⲛⲛⲉⲕϭⲟⲣⲡϥ ⲉⲃⲟⲗ ⲟⲩⲣⲉⲙⲛⲏⲓ ⲅⲁⲣ
ⲛⲧⲉ ⲧⲉⲕⲙⲁⲩ ⲧⲉ
̅ⲓⲏ:̅ⲓⲇ ⲟⲩϣⲓⲡⲓ ⲛⲧⲉ ⲡⲥⲟⲛ ⲙⲡⲉⲕⲓⲱⲧ ⲛⲛⲉⲕϭⲟⲣⲡϥ ⲉⲃⲟⲗ ⲛⲛⲉⲕϣⲉ ⲉϧⲟⲩⲛ
ϩⲁ ⲧⲉϥⲥϩⲓⲙⲓ ⲟⲩⲥⲩⲅⲅⲉⲛⲏⲥ ⲛⲧⲁⲕ ⲧⲉ
̅ⲓⲏ:̅ⲓⲉ ⲟⲩϣⲓⲡⲓ ⲛⲧⲉ ⲟⲩϣⲉⲗⲉⲧ ⲛⲧⲁⲕ ⲛⲛⲉⲕϭⲟⲣⲡϥ ⲉⲃⲟⲗ ⲟⲩⲥϩⲓⲙⲓ ⲛⲧⲉ
ⲡⲉⲕϣⲏⲣⲓ ⲧⲉ ⲛⲛⲉⲕϭⲱⲣⲡ ⲙⲡⲉⲥϣⲓⲡⲓ ⲉⲃⲟⲗ
̅ⲓⲏ:̅ⲓⲋ ⲟⲩϣⲓⲡⲓ ⲛⲧⲉ ⲧⲥϩⲓⲙⲓ ⲙⲡⲉⲕⲥⲟⲛ ⲛⲛⲉⲕϭⲟⲣⲡϥ ⲉⲃⲟⲗ ⲟⲩϣⲓⲡⲓ ⲅⲁⲣ
ⲡⲉ ⲛⲧⲉ ⲡⲉⲕⲥⲟⲛ
̅ⲓⲏ:̅ⲓⲍ ⲛⲛⲉⲕϭⲱⲣⲡ ⲉⲃⲟⲗ ⲙⲡϣⲓⲡⲓ ⲛⲧⲉ ⲟⲩⲥϩⲓⲙⲓ ⲛⲉⲙ ⲟⲩϣⲉⲣⲓ ⲛⲧⲁⲥ
ⲛⲛⲉⲕϭⲓ ⲛⲧϣⲉⲣⲓ ⲛⲧⲉ ⲡⲉⲥϣⲏⲣⲓ ⲛⲉⲙ ⲧϣⲉⲣⲓ ⲛⲧⲉ ⲧⲉⲥϣⲉⲣⲓ ⲉⲡϭⲱⲣⲡ
ⲙⲡⲟⲩϣⲓⲡⲓ ⲉⲃⲟⲗ ϩⲁⲛⲣⲉⲙϧⲉⲛⲏⲓ ⲅⲁⲣ ⲛⲧⲁⲕ ⲛⲉ ⲟⲩⲙⲉⲧⲁⲥⲉⲃⲏⲥ ⲧⲉ
̅ⲓⲏ:̅ⲓⲏ ⲛⲛⲉⲕϭⲓ ⲛⲟⲩⲥϩⲓⲙⲓ ⲉϫⲉⲛ ⲧⲉⲥⲥⲱⲛⲓ ⲉⲥ ⲟⲩⲃⲏⲥ ϧⲉⲛ ⲟⲩⲭⲟϩ
ⲉϭⲱⲣⲡ ⲙⲡⲉⲥϣⲓⲡⲓ ⲉⲃⲟⲗ ⲉϩⲣⲏⲓ ⲉϫⲱⲥ
̅ⲓⲏ:̅ⲓⲑ ⲟⲩⲟϩ ⲛⲛⲉⲕϣⲉⲛⲁⲕ ⲉϧⲟⲩⲛ ϩⲁ ⲟⲩⲥϩⲓⲙⲓ ⲉⲁⲩⲟⲩⲟⲧⲥ ⲉⲃⲟⲗ ⲉⲥ ϧⲉⲛ
ⲡⲉⲥϭⲱϧⲉⲙ ⲉϭⲱⲣⲡ ⲙⲡⲉⲥϣⲓⲡⲓ ⲉⲃⲟⲗ
̅ⲓⲏ:̅ⲕ ⲟⲩⲟϩ ⲛⲛⲉⲕϯ ⲛⲟⲩϣⲁⲓⲣⲓ ⲛⲧⲉ ⲟⲩϫⲣⲟϫ ⲛⲧⲁⲕ ϧⲉⲛ ϯⲥϩⲓⲙⲓ
ⲙⲡⲉⲕϣⲫⲏⲣ ϩⲱⲥⲇⲉ ⲉϭⲱϧⲉⲙ ⲛϧⲏⲧⲥ
̅ⲓⲏ:̅ⲕⲁ ⲟⲩⲟϩ ⲛⲛⲉⲕϯ ⲉⲃⲟⲗ ϧⲉⲛ ⲡⲉⲕϫⲣⲟϫ ⲉⲑⲣⲉϥϣⲉⲙϣⲓ ⲛⲟⲩⲁⲣⲭⲱⲛ
ⲟⲩⲟϩ ⲛⲛⲉⲕⲥⲱϥ ⲙⲡⲓⲣⲁⲛ ⲉⲑⲟⲩⲁⲃ ⲁⲛⲟⲕ ⲡⲉ ⲡϭⲟⲓⲥ
̅ⲓⲏ:̅ⲕⲃ ⲛⲛⲉⲕⲉⲛⲕⲟⲧ ⲛⲉⲙ ϩⲱⲟⲩⲧ ⲉⲟⲩϣⲁⲓⲣⲓ ⲛⲧⲉ ⲟⲩⲥϩⲓⲙⲓ ⲟⲩⲥⲱϥ ⲅⲁⲣ
ⲡⲉ
̅ⲓⲏ:̅ⲕⲅ ⲟⲩⲟϩ ⲛⲛⲉⲕϯ ⲛⲧⲉⲕϣⲁⲓⲣⲓ ⲛⲉⲙ ϥⲧⲉⲫⲁⲧ ⲛⲓⲃⲉⲛ ⲉϯϫⲣⲟϫ
ⲛⲧⲉⲕϭⲱϧⲉⲙ ϧⲁⲣⲟϥ ⲟⲩⲟϩ ⲟⲩⲥϩⲓⲙⲓ ⲛⲛⲉⲥⲟϩⲓ ⲉⲣⲁⲧⲥ ϧⲁⲧⲉⲛ ϥⲧⲉⲫⲁⲧ
ⲛⲓⲃⲉⲛ ⲛⲧⲉϥⲁⲗⲏⲓ ⲉϫⲱⲥ ⲟⲩⲱⲣⲉⲃ ⲅⲁⲣ ⲡⲉ
̅ⲓⲏ:̅ⲕⲇ ⲙⲡⲉⲣⲥⲱϥ ϧⲉⲛ ⲛⲁⲓ ⲧⲏⲣⲟⲩ ⲁⲩⲥⲱϥ ⲅⲁⲣ ϧⲉⲛ ⲛⲁⲓ ⲧⲏⲣⲟⲩ ⲛϫⲉ
ⲛⲓⲉⲑⲛⲟⲥ ⲛⲏ ⲉϯⲛⲁϩⲓⲧⲟⲩ ⲉⲃⲟⲗ ϧⲁⲧϩⲏ ⲙⲡⲉⲧⲉⲛϩⲟ
̅ⲓⲏ:̅ⲕⲉ ⲟⲩⲟϩ ⲁ ⲡⲕⲁϩⲓ ⲥⲱϥ ⲉⲙⲁϣⲱ ⲟⲩⲟϩ ⲉⲑⲃⲏⲧϥ ⲁⲓϯϣⲉⲃⲓⲱ ⲛⲱⲟⲩ
ⲛⲛⲟⲩⲁⲇⲓⲕⲓⲁ ⲟⲩⲟϩ ⲁ ⲡⲕⲁϩⲓ ϩⲣⲟϣ ⲉϫⲉⲛ ⲛⲏ ⲉⲧϩⲉⲙⲥⲓ ϩⲓϫⲱϥ
̅ⲓⲏ:̅ⲕⲋ ⲟⲩⲟϩ ⲁⲣⲉϩ ⲉⲛⲁⲛⲟⲙⲓⲙⲟⲛ ⲧⲏⲣⲟⲩ ⲛⲉⲙ ⲛⲁⲟⲩⲁϩⲥⲁϩⲛⲓ ⲧⲏⲣⲟⲩ
ⲟⲩⲟϩ ⲛⲛⲉⲧⲉⲛⲓⲣⲓ ⲉⲃⲟⲗ ϧⲉⲛ ⲛⲁⲓⲱⲣⲉⲃ ⲧⲏⲣⲟⲩ ⲓⲧⲉ ⲡⲓⲣⲉⲙⲛϯⲙⲓ ⲓⲧⲉ
ⲡⲓϣⲉⲙⲙⲟ ⲉⲧⲁϥϣⲟⲡ ϧⲉⲛ ⲑⲏⲛⲟⲩ
̅ⲓⲏ:̅ⲕⲍ ⲛⲁⲓⲱⲣⲉⲃ ⲅⲁⲣ ⲧⲏⲣⲟⲩ ⲁⲩⲁⲓⲧⲟⲩ ⲛϫⲉ ⲛⲓⲣⲱⲙⲓ ⲛⲧⲉ ⲡⲓⲕⲁϩⲓ ⲛⲏ
ⲉⲛⲁⲩ ϧⲁϫⲱⲧⲉⲛ ⲟⲩⲟϩ ⲛⲧⲉ ⲡⲕⲁϩⲓ ⲥⲱϥ
̅ⲓⲏ:̅ⲕⲏ ⲟⲩⲟϩ ϩⲓⲛⲁ ⲛⲧⲉϣⲧⲉⲙ ⲡⲓⲕⲁϩⲓ ϩⲣⲟϣ ⲉϫⲉⲛ ⲑⲏⲛⲟⲩ ⲟⲩⲟϩ
ⲛⲧⲉϥⲙⲉⲥⲧⲉ ⲑⲏⲛⲟⲩ ϧⲉⲛ ⲡϫⲓⲛⲑⲣⲉⲧⲉⲛⲥⲟϥϥ ⲙⲫⲣⲏϯ ⲉⲧⲁϥϩⲣⲟϣ ⲉϫⲉⲛ
ⲛⲓⲉⲑⲛⲟⲥ ⲉⲛⲁⲩ ϧⲁϫⲱⲧⲉⲛ
̅ⲓⲏ:̅ⲕⲑ ϫⲉ ⲫⲏ ⲛⲓⲃⲉⲛ ⲉⲧⲛⲁⲓⲣⲓ ⲉⲃⲟⲗ ϧⲉⲛ ⲛⲁⲓⲥⲱϥ ⲉⲩⲉϥⲱϯ ⲉⲃⲟⲗ ⲛϫⲉ
ⲛⲓⲯⲩⲭⲏ ⲉⲧⲛⲁⲓⲣⲓ ⲛⲛⲁⲓ ⲉⲃⲟⲗ ϧⲉⲛ ⲑⲙⲏϯ ⲙⲡⲟⲩⲗⲁⲟⲥ
̅ⲓⲏ:̅ⲗ ⲟⲩⲟϩ ⲁⲣⲉϩ ⲉⲛⲁⲟⲩⲁϩⲥⲁϩⲛⲓ ϩⲟⲡⲱⲥ ⲛⲧⲉⲧⲉⲛϣⲧⲉⲙⲓⲣⲓ ⲉⲃⲟⲗ ϧⲉⲛ
ⲛⲓⲛⲟⲙⲓⲙⲟⲛ ⲧⲏⲣⲟⲩ ⲉⲧⲟⲣⲉⲃ ⲛⲁⲓ ⲉⲧⲁⲩϣⲱⲡⲓ ⲙⲙⲁⲩ ϧⲁϫⲱⲧⲉⲛ ⲟⲩⲟϩ
ⲛⲛⲉⲧⲉⲛϭⲱϧⲉⲙ ⲛϧⲏⲧⲟⲩ ϫⲉ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲓⲑ:̅ⲃ ϫⲉ ⲥⲁϫⲓ ⲛⲉⲙ ϯⲥⲩⲛⲁⲅⲱⲅⲏ ⲧⲏⲣⲥ ⲛⲧⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲟϩ
ⲉⲕⲉϫⲟⲥ ⲛⲱⲟⲩ ϫⲉ ϣⲱⲡⲓ ⲉⲣⲉⲧⲉⲛⲟⲩⲁⲃ ϫⲉ ϯⲟⲩⲁⲃ ⲁⲛⲟⲕ ⲡⲉ ⲡϭⲟⲓⲥ
ⲡⲉⲧⲉⲛⲛⲟⲩϯ
̅ⲓⲑ:̅ⲅ ⲫⲟⲩⲁⲓ ⲫⲟⲩⲁⲓ ⲙⲁⲣⲉϥⲉⲣϩⲟϯ ϧⲁⲧϩⲏ ⲛⲟⲩⲓⲱⲧ ⲛⲧⲁϥ ⲛⲉⲙ ⲟⲩⲙⲁⲩ
ⲛⲧⲁϥ ⲟⲩⲟϩ ⲛⲁⲥⲁⲃⲃⲁⲧⲟⲛ ⲁⲣⲉϩ ⲉⲣⲱⲟⲩ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲇ ⲛⲛⲉⲧⲉⲛⲙⲟϣⲓ ⲛⲥⲁ ⲛⲓⲓⲇⲱⲗⲟⲛ ⲟⲩⲟϩ ϩⲁⲛⲛⲟⲩϯ ⲙⲫⲱⲧϩ
ⲛⲛⲉⲧⲉⲛⲑⲁⲙⲓⲱⲟⲩ ⲛⲱⲧⲉⲛ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲉ ⲟⲩⲟϩ ⲉϣⲱⲡ ⲁⲣⲉⲧⲉⲛϣⲁⲛϣⲱⲧ ⲛⲟⲩϣⲟⲩϣⲱⲟⲩϣⲓ ⲛⲛⲟϩⲉⲙ ⲙⲡϭⲟⲓⲥ
ⲉⲣⲉⲧⲉⲛⲉϣⲁⲧϥ ⲉϥϣⲏⲡ ⲛⲱⲧⲉⲛ
̅ⲓⲑ:̣̅ⲋ ϧⲉⲛ ⲡⲓⲉϩⲟⲟⲩ ⲉⲧⲉⲧⲉⲛⲛⲁϣⲱⲧ ⲉⲩⲉⲟⲩⲟⲙϥ ⲛⲉⲙ ⲡⲉϥⲣⲁⲥϯ ⲉϣⲱⲡ
ⲇⲉ ⲁϥϣⲁⲛⲥⲱϫⲡ ϣⲁ ⲟⲩⲉϩⲟⲟⲩ ⲙⲙⲁϩ ⲅ ⲉⲩⲉⲣⲟⲕϩϥ ϧⲉⲛ ⲟⲩⲭⲣⲱⲙ
̅ⲓⲑ:̅ⲍ ⲉϣⲱⲡ ⲇⲉ ϧⲉⲛ ⲟⲩⲟⲩⲱⲙ ⲛⲧⲟⲩⲟⲩⲟⲙϥ ϧⲉⲛ ⲡⲓⲉϩⲟⲟⲩ ⲙⲙⲁϩ ⲅ
ⲛⲟⲩϣⲱⲧ ⲁⲛ ⲡⲉ ⲛⲛⲟⲩϣⲟⲡϥ
̅ⲓⲑ:̅ⲏ ⲫⲏ ⲇⲉ ⲉⲧⲛⲁⲟⲩⲟⲙϥ ⲉϥⲉϭⲓ ⲛⲟⲩⲛⲟⲃⲓ ϫⲉ ⲛⲏ ⲉⲑⲟⲩⲁⲃ ⲛⲧⲉ ⲡϭⲟⲓⲥ
ⲁϥϭⲁϧⲙⲟⲩ ⲟⲩⲟϩ ⲉⲩⲉϥⲱϯ ⲉⲃⲟⲗ ⲛϫⲉ ⲛⲓⲯⲩⲭⲏ ⲉⲧⲛⲁⲟⲩⲱⲙ ⲉⲃⲟⲗ ϧⲉⲛ
ⲡⲟⲩⲗⲁⲟⲥ
̅ⲓⲑ:̅ⲑ ⲟⲩⲟϩ ⲉϣⲱⲡ ⲁⲣⲉⲧⲉⲛϣⲁⲛⲱⲥϧ ⲙⲡⲓⲱⲥϧ ⲛⲧⲉ ⲡⲉⲧⲉⲛⲕⲁϩⲓ
ⲛⲛⲉⲧⲉⲛⲱⲥϧ ⲉⲡⲧⲏⲣϥ ⲙⲡⲓⲱⲥϧ ⲛⲧⲉ ⲧⲕⲟⲓ ⲛⲏ ⲉⲧⲛⲁϩⲉⲓ ⲛⲧⲉ ⲡⲉⲕⲱⲥϧ
ⲛⲛⲉⲕⲥⲟⲕⲟⲩ
̅ⲓⲑ:̅ⲓ ⲟⲩⲟϩ ⲡⲉⲕⲓⲁϩⲁⲗⲟⲗⲓ ⲛⲛⲉⲕⲕⲟⲧⲕ ⲉϭⲟⲗϥ ⲛⲕⲉⲥⲟⲡ ⲟⲩⲟϩ ⲛⲓⲛⲁⲫⲣⲓ
ⲛⲧⲉ ⲡⲉⲕⲓⲁϩⲁⲗⲟⲗⲓ ⲛⲛⲉⲕⲥⲟⲕⲟⲩ ⲉⲕⲉⲥⲟϫⲡⲟⲩ ⲙⲡⲓϩⲏⲕⲓ ⲛⲉⲙ ⲡⲓϣⲉⲙⲙⲟ
ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲓⲁ ⲛⲛⲉⲧⲉⲛϭⲓⲟⲩⲓ ⲛⲛⲉⲧⲉⲛϫⲉⲙⲉⲑⲛⲟⲩϫ ⲟⲩⲇⲉ ⲛⲛⲉ ⲫⲟⲩⲁⲓ ⲫⲟⲩⲁⲓ ϭⲓ
ⲙⲡⲉϥϣⲏⲣ ⲛϫⲟⲛⲥ
̅ⲓⲑ:̅ⲓⲃ ⲟⲩⲟϩ ⲛⲛⲉⲧⲉⲛⲱⲣⲕ ⲙⲡⲁⲣⲁⲛ ⲉϫⲉⲛ ⲟⲩⲙⲉⲧⲟϫⲓ ⲟⲩⲟϩ ⲛⲛⲉⲧⲉⲛⲥⲱϥ
ⲙⲡⲓⲣⲁⲛ ⲉⲑⲟⲩⲁⲃ ⲛⲧⲉ ⲡⲉⲧⲉⲛⲛⲟⲩϯ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲓⲅ ⲛⲛⲉⲕⲉⲣⲁⲇⲓⲕⲓⲛ ⲙⲡⲉⲕϣⲫⲏⲣ ⲛⲛⲉⲕϩⲱⲗⲉⲙ ⲛⲛⲉ ⲫⲃⲉⲭⲉ
ⲛⲟⲩⲣⲉⲙⲙⲃⲉⲭⲉ ⲛⲕⲟⲧ ⲛⲧⲟⲧⲕ ϣⲁ ϩⲁⲛⲁⲧⲟⲟⲩⲓ
̅ⲓⲑ:̅ⲓⲇ ⲛⲛⲉⲕϫⲉ ⲡⲉⲧϩⲱⲟⲩ ⲛⲥⲁ ⲟⲩⲕⲟⲩⲣ ⲛⲛⲉⲕⲭⲱ ⲛⲟⲩϭⲣⲟⲡ ⲙⲡⲉⲙⲑⲟ
ⲛⲟⲩⲃⲉⲗⲗⲉ ⲉⲕⲉⲉⲣϩⲟϯ ϧⲁⲧϩⲏ ⲙⲡϭⲟⲓⲥ ⲡⲉⲕⲛⲟⲩϯ ⲁⲛⲟⲕ ⲡⲉ ⲡϭⲟⲓⲥ
ⲡⲉⲧⲉⲛⲛⲟⲩϯ
̅ⲓⲑ:̅ⲓⲉ ⲛⲛⲉⲧⲉⲛⲓⲣⲓ ⲛⲟⲩϭⲓⲛϫⲟⲛⲥ ϧⲉⲛ ⲟⲩϩⲁⲡ ⲛⲛⲉⲕϭⲓ ⲛⲟⲩϩⲏⲕⲓ ⲟⲩⲇⲉ
ⲛⲛⲉⲕϭⲓϣⲫⲏⲣⲓ ⲙⲡϩⲟ ⲛⲟⲩϫⲱⲣⲓ ϧⲉⲛ ⲟⲩⲙⲉⲑⲙⲏⲓ ⲉⲕⲉϯϩⲁⲡ ⲉⲡⲉⲕϣⲫⲏⲣ
̅ⲓⲑ:̅ⲓⲋ ⲛⲛⲉⲕⲙⲟϣⲓ ϧⲉⲛ ⲟⲩⲭⲣⲟϥ ϧⲉⲛ ⲡⲉⲕⲉⲑⲛⲟⲥ ⲛⲛⲉⲕⲉⲣϣⲫⲏⲣ ⲛⲟϩⲓ
ⲉⲣⲁⲧⲕ ⲉϫⲉⲛ ⲡⲥⲛⲟϥ ⲙⲡⲉⲕϣⲫⲏⲣ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲓⲍ ⲛⲛⲉⲕⲙⲉⲥⲧⲉ ⲡⲉⲕⲥⲟⲛ ϧⲉⲛ ⲡⲉⲕϩⲏⲧ ϧⲉⲛ ⲟⲩⲥⲟϩⲓ ⲉⲕⲉⲥⲁϩⲉ
ⲡⲉⲕϣⲫⲏⲣ ⲟⲩⲟϩ ⲛⲛⲉⲕϭⲓ ⲛⲟⲩⲛⲟⲃⲓ ⲉⲑⲃⲏⲧϥ
̅ⲓⲑ:̅ⲓⲏ ⲟⲩⲟϩ ⲛⲛⲉ ⲧⲉⲕϫⲓϫ ϭⲓⲙⲡϣⲓϣ ⲛⲛⲉⲕⲭⲁ ⲟⲩⲁⲣⲓⲕⲓ ⲛϧⲏⲧⲕ ⲛⲧⲉⲛ
ⲛⲉⲛϣⲏⲣⲓ ⲙⲡⲉⲕⲗⲁⲟⲥ ⲛⲛⲉⲕⲕⲱϯ ⲛⲥⲁ ϯϣⲉⲃⲓⲱ ⲉⲕⲉⲉⲣⲁⲅⲁⲡⲁⲛ ⲙⲡⲉⲕϣⲫⲏⲣ
ⲙⲡⲉⲕⲣⲏϯ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲓⲑ ⲡⲁⲛⲟⲙⲟⲥ ⲁⲣⲉϩ ⲉⲣⲟϥ ⲛⲉⲕⲧⲉⲃⲛⲱⲟⲩⲓ ⲛⲛⲉⲕⲑⲣⲟⲩϭⲓϫⲣⲟϫ ⲉⲃⲟⲗ ϧⲉⲛ
ϩⲁⲛⲧⲉⲃⲛⲱⲟⲩⲓ ⲉⲩϣⲉⲃⲓⲏⲟⲩⲧ ⲟⲩⲟϩ ⲡⲉⲕⲓⲁϩⲁⲗⲟⲗⲓ ⲛⲛⲉⲕⲥⲁⲧϥ ϧⲉⲛ
ⲟⲩϣⲓⲃϯ ⲟⲩⲟϩ ⲟⲩϩⲃⲟⲥ ⲉϥⲥⲏϧ ⲉⲃⲟⲗ ϧⲉⲛ ⲥⲛⲁⲩ ⲉⲟⲩⲟⲩⲱⲧⲉⲃ ⲡⲉ
ⲛⲛⲉⲕⲧⲏⲓϥ ϩⲓⲱⲧⲕ
̅ⲓⲑ:̅ⲕ ⲟⲩⲟϩ ⲉⲥⲉϣⲱⲡⲓ ⲁⲣⲉϣⲁⲛ ⲟⲩⲁⲓ ⲛⲕⲟⲧ ⲛⲉⲙ ⲟⲩⲥϩⲓⲙⲓ ⲛⲟⲩϣⲁⲓⲣⲓ
ⲛϫⲣⲟϫ ⲟⲩⲟϩ ⲑⲁⲓ ⲟⲩⲃⲱⲕⲓ ⲧⲉ ⲉⲁⲩⲁⲣⲉϩ ⲉⲣⲟⲥ ⲛⲟⲩⲣⲱⲙⲓ ⲟⲩⲟϩ ⲑⲁⲓ
ⲙⲡⲟⲩⲥⲟⲧⲥ ϧⲉⲛ ϩⲁⲛⲥⲱϯ ⲓⲉ ⲟⲩⲙⲉⲧⲣⲉⲙϩⲉ ⲙⲡⲟⲩⲧⲏⲓⲥ ⲛⲁⲥ
ⲟⲩϫⲉⲙⲡϣⲓⲛⲓ ⲉϥⲉϣⲱⲡⲓ ⲛⲱⲟⲩ ⲙⲡⲟⲩⲙⲟⲩ ϫⲉ ⲙⲡⲟⲩⲁⲓⲥ ⲛⲣⲉⲙϩⲉ
̅ⲓⲑ:̅ⲕⲁ ⲟⲩⲟϩ ⲉϥⲉⲓⲛⲓ ⲉϩⲣⲏⲓ ⲉϫⲉⲛ ϯⲙⲉⲧϣⲁϥⲧ ⲙⲡϭⲟⲓⲥ ϩⲓⲣⲉⲛ ⲫⲣⲟ ⲛⲧⲉ
ϯⲥⲕⲩⲛⲏ ⲛⲧⲉ ϯⲙⲉⲧⲙⲉⲑⲣⲉ ⲛⲟⲩⲱⲓⲗⲓ ⲛⲧⲉ ⲟⲩⲙⲉⲧϣⲁϥⲧ
̅ⲓⲑ:̅ⲕⲃ ⲟⲩⲟϩ ⲉϥⲉⲧⲱⲃϩ ⲉϩⲣⲏⲓ ⲉϫⲱϥ ⲛϫⲉ ⲡⲓⲟⲩⲏⲃ ϧⲉⲛ ⲡⲓⲱⲓⲗⲓ ⲛⲧⲉ
ϯⲙⲉⲧϣⲁϥⲧ ⲙⲡⲉⲙⲑⲟ ⲙⲡϭⲟⲓⲥ ⲉⲑⲃⲉ ⲡⲉϥⲛⲟⲃⲓ ⲉⲧⲁϥⲉⲣⲛⲟⲃⲓ ⲙⲙⲟϥ ⲟⲩⲟϩ
ⲉⲩⲉⲭⲁ ⲡⲉϥⲛⲟⲃⲓ ⲛⲁϥ ⲉⲃⲟⲗ ⲉⲧⲁϥⲉⲣⲛⲟⲃⲓ ⲙⲙⲟϥ
̅ⲓⲑ:̅ⲕⲅ ⲉϣⲱⲡ ⲇⲉ ⲁⲣⲉⲧⲉⲛϣⲁⲛϣⲉⲛⲱⲧⲉⲛ ⲉϧⲟⲩⲛ ⲉⲡⲓⲕⲁϩⲓ ⲫⲏ ⲉⲧⲉ
ⲡϭⲟⲓⲥ ⲡⲉⲧⲉⲛⲛⲟⲩϯ ⲛⲁⲧⲏⲓϥ ⲛⲱⲧⲉⲛ ⲟⲩⲟϩ ⲛⲧⲉⲧⲉⲛϭⲟ ⲛϣϣⲏⲛ ⲛⲓⲃⲉⲛ
ⲙⲙⲁⲥ ⲟⲩⲧⲁϩ ⲉⲫⲟⲩⲟⲙϥ ⲟⲩⲟϩ ⲉⲣⲉⲧⲉⲛⲉⲧⲟⲩⲃⲟ ⲙⲡⲉϥϭⲱϧⲉⲙ ⲡⲉϥⲟⲩⲧⲁϩ
ⲉϥⲉϣⲱⲡⲓ ⲛⲱⲧⲉⲛ ⲛⲅ ⲛϯⲣⲟⲙⲡⲓ ⲉϥϭⲁϧⲉⲙ ⲛⲛⲉⲧⲉⲛⲟⲩⲟⲙϥ
̅ⲓⲑ:̅ⲕⲇ ⲟⲩⲟϩ ϧⲉⲛ ϯⲙⲁϩ ⲇ ⲉϥⲉϣⲱⲡⲓ ⲛϫⲉ ⲡⲉϥⲟⲩⲧⲁϩ ⲧⲏⲣϥ ⲉϥⲟⲩⲁⲃ
ⲉⲩⲱϣ ⲙⲙⲟϥ ⲙⲡϭⲟⲓⲥ
̅ⲓⲑ:̅ⲕⲉ ⲛϩⲣⲏⲓ ⲇⲉ ϧⲉⲛ ϯⲣⲟⲙⲡⲓ ⲙⲙⲁϩ ⲉ ⲉⲣⲉⲧⲉⲛⲉⲟⲩⲱⲙ ⲙⲡⲉϥⲟⲩⲧⲁϩ
ⲟⲩⲧⲟⲩϩⲟ ⲛⲱⲧⲉⲛ ⲡⲉ ⲛⲉϥⲅⲉⲛⲏⲙⲁ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲕⲋ ⲙⲡⲉⲣⲟⲩⲱⲙ ϩⲓϫⲉⲛ ⲛⲓⲧⲱⲟⲩ ⲟⲩⲟϩ ⲛⲛⲉⲧⲉⲛϭⲓⲛⲓ ⲟⲩⲟϩ
ⲛⲛⲉⲧⲉⲛⲉⲣⲣⲉϥϭⲓϣⲏⲙ ϧⲉⲛ ⲛⲓϩⲁⲗⲁϯ
̅ⲓⲑ:̅ⲕⲍ ⲛⲛⲉⲧⲉⲛⲑⲁⲙⲓⲉ ϫⲓϭⲱⲓ ⲉⲃⲟⲗ ϧⲉⲛ ⲡϥⲱⲓ ⲛⲧⲉⲧⲉⲛⲁⲫⲉ ⲟⲩⲇⲉ
ⲛⲛⲉⲧⲉⲛⲧⲁⲕⲉ ⲡϩⲟ ⲛⲧⲉ ⲛⲉⲧⲉⲛⲙⲟⲣⲧ
̅ⲓⲑ:̅ⲕⲏ ⲟⲩⲟϩ ϩⲁⲛϣⲱⲧ ⲛϭⲟⲧϭⲉⲧ ⲛⲛⲉⲧⲉⲛⲑⲁⲙⲓⲱⲟⲩ ϧⲉⲛ ⲛⲉⲧⲉⲛⲥⲱⲙⲁ
ⲉϩⲣⲏⲓ ⲉϫⲉⲛ ⲟⲩⲯⲩⲭⲏ ⲟⲩⲟϩ ϩⲁⲛⲥϧⲁⲓ ⲉⲩⲑⲉⲕⲑⲱⲕ ⲛⲛⲉⲧⲉⲛⲑⲁⲙⲓⲱⲟⲩ ϧⲉⲛ
ⲑⲏⲛⲟⲩ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲕⲑ ⲛⲛⲉⲕⲥⲱϥ ⲛⲧⲉⲕϣⲉⲣⲓ ⲉⲑⲣⲉⲥⲉⲣⲡⲟⲣⲛⲉⲩⲓⲛ ⲟⲩⲟϩ ⲛⲛⲉ ⲡⲕⲁϩⲓ
ⲉⲣⲡⲟⲣⲛⲉⲩⲓⲛ ⲟⲩⲟϩ ⲛⲧⲉϥⲙⲟϩ ⲛϫⲉ ⲡⲕⲁϩⲓ ⲛⲁⲛⲟⲙⲓⲁ
̅ⲓⲑ:̅ⲗ ⲛⲁⲥⲁⲃⲃⲁⲧⲟⲛ ⲉⲣⲉⲧⲉⲛⲉⲁⲣⲉϩ ⲉⲣⲱⲟⲩ ⲟⲩⲟϩ ⲉⲣⲉⲧⲉⲛⲉⲉⲣϩⲟϯ ϧⲁⲧϩⲏ
ⲛⲛⲏ ⲉⲑⲟⲩⲁⲃ ⲛⲧⲏⲓ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲗⲁ ⲛⲛⲉⲧⲉⲛⲙⲟϣⲓ ⲛⲥⲁ ⲛⲓⲣⲉϥⲙⲟⲩϯ ϧⲉⲛ ⲑⲛⲉϫⲓ ⲛⲉⲙ ⲛⲓⲣⲉϥϣⲉⲛϩⲓⲛ
ⲛⲛⲉⲧⲉⲛⲧⲉⲙ ⲑⲏⲛⲟⲩ ⲉⲣⲱⲟⲩ ϫⲉ ⲛⲛⲉⲧⲉⲛϭⲱϧⲉⲙ ⲛϧⲏⲧⲟⲩ ⲁⲛⲟⲕ ⲡⲉ
ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲗⲃ ⲧⲱⲛⲕ ϧⲁϫⲱϥ ⲛⲟⲩⲣⲉⲙⲛⲥⲭⲓⲙ ⲟⲩⲟϩ ⲙⲁⲧⲁⲓⲉ ⲙⲟⲩϯ ⲛⲛⲓϧⲉⲗⲗⲟⲓ
ⲁⲣⲓϩⲟϯ ϧⲁⲧϩⲏ ⲙⲡⲉⲕⲛⲟⲩϯ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲗⲅ ⲉϣⲱⲡ ⲁϥϣⲁⲛⲓ ϩⲁⲣⲱⲧⲉⲛ ⲛϫⲉ ⲟⲩϣⲉⲙⲙⲟ ⲉϧⲟⲩⲛ ⲉⲡⲉⲧⲉⲛⲕⲁϩⲓ
ⲛⲛⲉⲧⲉⲛϩⲉϫϩⲱϫϥ
̅ⲓⲑ:̅ⲗⲇ ⲉϥⲉϣⲱⲡⲓ ϧⲉⲛ ⲑⲏⲛⲟⲩ ⲙⲫⲣⲏϯ ⲙⲡⲓⲣⲉⲙⲛϯⲙⲓ ⲛϫⲉ ⲡⲓϣⲉⲙⲙⲟ
ⲉⲧⲛⲏⲟⲩ ϩⲁⲣⲱⲧⲉⲛ ⲟⲩⲟϩ ⲉⲕⲉⲙⲉⲛⲣⲓⲧϥ ⲙⲡⲉⲕⲣⲏϯ ϫⲉ ⲁⲣⲉⲧⲉⲛϣⲱⲡⲓ
ϩⲱⲧⲉⲛ ⲛϣⲉⲙⲙⲟ ϧⲉⲛ ⲡⲕⲁϩⲓ ⲛⲭⲏⲙⲓ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲓⲑ:̅ⲗⲉ ⲛⲛⲉⲧⲉⲛⲓⲣⲓ ⲛⲟⲩϭⲓⲛϫⲟⲛⲥ ϧⲉⲛ ⲟⲩϩⲁⲡ ϧⲉⲛ ϩⲁⲛϣⲓ ⲛⲉⲙ
ϩⲁⲛⲥⲧⲁⲙⲛⲟⲥ ⲛⲉⲙ ϩⲁⲛⲙⲁϣⲓ
̅ⲓⲑ:̅ⲗⲋ ϩⲁⲛⲙⲁϣⲓ ⲛⲑⲙⲏⲓ ⲛⲉⲙ ⲟⲩϣⲓ ⲛⲑⲙⲏⲓ ⲛⲉⲙ ⲟⲩⲭⲟⲩⲥ ⲛⲑⲙⲏⲓ
ⲉⲩⲉϣⲱⲡⲓ ⲛⲱⲧⲉⲛ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ ⲫⲏ ⲉⲧⲁϥⲉⲛ ⲑⲏⲛⲟⲩ
ⲉⲃⲟⲗ ϧⲉⲛ ⲡⲕⲁϩⲓ ⲛⲭⲏⲙⲓ
̅ⲓⲑ:̅ⲗⲍ ⲟⲩⲟϩ ⲁⲣⲉϩ ⲉⲡⲁⲛⲟⲙⲟⲥ ⲧⲏⲣϥ ⲛⲉⲙ ⲛⲁⲟⲩⲁϩⲥⲁϩⲛⲓ ⲧⲏⲣⲟⲩ
ⲉⲣⲉⲧⲉⲛⲉⲁⲓⲧⲟⲩ ⲁⲛⲟⲕ ⲡⲉ ⲡϭⲟⲓⲥ
̅ⲕ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕ:̅ⲃ ϫⲉ ⲉⲕⲉⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ϫⲉ ⲉϣⲱⲡ ⲛⲧⲉ ⲟⲩⲁⲓ ⲉⲃⲟⲗ
ϧⲉⲛ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲓⲉ ⲉⲃⲟⲗ ϧⲉⲛ ⲛⲓϣⲉⲙⲙⲱⲟⲩ ⲉⲧⲁⲩⲟⲩⲟϩ ϧⲉⲛ
ⲡⲓⲥⲣⲁⲏⲗ ⲛⲧⲉϥϯ ⲉⲃⲟⲗ ϧⲉⲛ ⲡⲉϥϫⲣⲟϫ ⲛⲟⲩⲁⲣⲭⲱⲛ ϧⲉⲛ ⲟⲩⲙⲟⲩ
ⲙⲁⲣⲟⲩϧⲟⲑⲃⲉϥ ⲟⲩⲟϩ ⲡⲓⲉⲑⲛⲟⲥ ⲉⲧϩⲓϫⲉⲛ ⲡⲓⲕⲁϩⲓ ⲉⲩⲉϩⲓⲱⲛⲓ ⲉϫⲱϥ ϧⲉⲛ
ϩⲁⲛⲱⲛⲓ
̅ⲕ:̅ⲅ ⲟⲩⲟϩ ⲁⲛⲟⲕ ϯⲛⲁⲥⲉⲙⲛⲓ ⲙⲡⲁϩⲟ ⲉϫⲉⲛ ⲡⲓⲣⲱⲙⲓ ⲉⲧⲉⲙⲙⲁⲩ ⲟⲩⲟϩ
ⲉⲓⲉⲧⲁⲕⲟϥ ⲉⲃⲟⲗ ϧⲉⲛ ⲡⲉϥⲗⲁⲟⲥ ϫⲉ ⲟⲩⲏⲓ ⲁϥϯ ⲉⲃⲟⲗ ϧⲉⲛ ⲡⲉϥϫⲣⲟϫ
ⲛⲟⲩⲁⲣⲭⲱⲛ ϩⲓⲛⲁ ⲛⲧⲉϥⲥⲱϥ ⲛⲛⲏ ⲉⲑⲟⲩⲁⲃ ⲛⲧⲏⲓ ⲟⲩⲟϩ ⲛⲧⲉϥⲥⲱϥ ⲙⲫⲣⲁⲛ
ⲛⲛⲏ ⲉⲧⲁⲩϣⲱⲡⲓ ⲛⲏⲓ ⲉⲩⲟⲩⲁⲃ
̅ⲕ:̅ⲇ ⲉϣⲱⲡ ⲇⲉ ϧⲉⲛ ⲟⲩϩⲓⲡϩⲟ ⲛⲧⲟⲩϩⲓⲡϩⲟ ⲛϫⲉ ⲛⲓⲣⲉⲙⲛϯⲙⲓ ⲛⲧⲉ
ⲡⲓⲕⲁϩⲓ ⲟⲩⲟϩ ⲛⲧⲟⲩⲱⲗⲓ ⲛⲛⲟⲩⲃⲁⲗ ⲉⲃⲟⲗ ϩⲁ ⲡⲓⲣⲱⲙⲓ ⲉⲧⲉⲙⲙⲁⲩ ϧⲉⲛ
ⲡϫⲓⲛⲑⲣⲉϥϯ ⲉⲃⲟⲗ ϧⲉⲛ ⲡⲉϥϫⲣⲟϫ ⲛⲟⲩⲁⲣⲭⲱⲛ ϩⲱⲥⲇⲉ ⲉϣⲧⲉⲙϧⲟⲑⲃⲉϥ
̅ⲕ:̅ⲉ ⲟⲩⲟϩ ⲉⲓⲉⲥⲉⲙⲛⲓ ⲙⲡⲁϩⲟ ⲉϫⲉⲛ ⲡⲓⲣⲱⲙⲓ ⲉⲧⲉⲙⲙⲁⲩ ⲛⲉⲙ
ⲧⲉϥⲥⲩⲅⲅⲉⲛⲓⲁ ⲟⲩⲟϩ ⲉⲓⲉⲧⲁⲕⲟϥ ⲛⲉⲙ ⲟⲩⲟⲛ ⲛⲓⲃⲉⲛ ⲉⲧⲁⲩϯⲙⲁϯ ⲛⲉⲙⲁϥ
ϩⲱⲥⲇⲉ ⲉⲑⲣⲟⲩⲉⲣⲡⲟⲣⲛⲉⲩⲓⲛ ⲉⲛⲓⲁⲣⲭⲱⲛ ⲉⲃⲟⲗ ϧⲉⲛ ⲡⲟⲩⲗⲁⲟⲥ
̅ⲕ:̣̅ⲋ ⲟⲩⲟϩ ϯⲯⲩⲭⲏ ⲉⲧⲛⲁⲙⲟϣⲓ ⲛⲥⲁ ⲛⲏ ⲉⲧⲙⲟⲩϯ ⲉⲃⲟⲗ ϧⲉⲛ ⲑⲛⲉϫⲓ ⲓⲉ
ⲛⲓⲣⲉϥϣⲉⲛϩⲓⲛ ϩⲱⲥⲇⲉ ⲉⲉⲣⲡⲟⲣⲛⲉⲩⲓⲛ ⲥⲁⲫⲁϩⲟⲩ ⲙⲙⲱⲟⲩ ⲉⲓⲉⲥⲉⲙⲛⲓ ⲙⲡⲁϩⲟ
ⲉϫⲉⲛ ϯⲯⲩⲭⲏ ⲉⲧⲉⲙⲙⲁⲩ ⲟⲩⲟϩ ⲉⲓⲉⲧⲁⲕⲟⲥ ⲉⲃⲟⲗ ϧⲉⲛ ⲡⲉⲥⲗⲁⲟⲥ
̅ⲕ:̅ⲍ ⲟⲩⲟϩ ⲉⲣⲉⲧⲉⲛⲉϣⲱⲡⲓ ⲉⲣⲉⲧⲉⲛⲟⲩⲁⲃ ϫⲉ ϯⲟⲩⲁⲃ ⲁⲛⲟⲕ ⲡϭⲟⲓⲥ
ⲡⲉⲧⲉⲛⲛⲟⲩϯ
̅ⲕ:̅ⲏ ⲟⲩⲟϩ ⲉⲣⲉⲧⲉⲛⲉⲁⲣⲉϩ ⲉⲛⲁⲟⲩⲁϩⲥⲁϩⲛⲓ ⲧⲏⲣⲟⲩ ⲟⲩⲟϩ ⲉⲣⲉⲧⲉⲛⲉⲁⲓⲧⲟⲩ
ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲧⲟⲩⲃⲟ ⲙⲙⲱⲧⲉⲛ
̅ⲕ:̅ⲑ ⲫⲣⲱⲙⲓ ⲫⲣⲱⲙⲓ ⲉⲧⲛⲁϫⲉ ⲟⲩⲥⲁϫⲓ ⲉϥϩⲱⲟⲩ ⲛⲥⲁ ⲡⲉϥⲓⲱⲧ ⲓⲉ
ⲧⲉϥⲙⲁⲩ ϧⲉⲛ ⲟⲩⲙⲟⲩ ⲙⲁⲣⲟⲩϧⲟⲑⲃⲟⲩ ⲁϥϫⲉ ⲡⲉⲧϩⲱⲟⲩ ϧⲁ ⲡⲉϥⲓⲱⲧ ⲓⲉ
ⲧⲉϥⲙⲁⲩ ⲉϥⲉϣⲱⲡⲓ ⲉϥⲟⲓ ⲛⲉⲛⲟⲭⲟⲥ
̅ⲕ:̅ⲓ ⲫⲣⲱⲙⲓ ⲫⲣⲱⲙⲓ ⲉⲧⲛⲁⲉⲣⲛⲱⲓⲕ ⲉⲧⲥϩⲓⲙⲓ ⲛⲟⲩⲣⲱⲙⲓ ⲓⲉ ⲫⲏ
ⲉⲧⲛⲁⲉⲣⲛⲱⲓⲕ ⲉⲧⲥϩⲓⲙⲓ ⲙⲡⲉϥϣⲫⲏⲣ ϧⲉⲛ ⲟⲩⲙⲟⲩ ⲉⲩⲉϧⲟⲑⲃⲉϥ ⲫⲏ ⲉⲧⲟⲓ
ⲛⲛⲱⲓⲕ ⲛⲉⲙ ⲑⲏ ⲉⲧⲟⲩⲟⲓ ⲛⲛⲱⲓⲕ ⲉⲣⲟⲥ
̅ⲕ:̅ⲓⲁ ⲟⲩⲟϩ ⲉϣⲱⲡ ⲁⲣⲉϣⲁⲛ ⲟⲩⲁⲓ ⲛⲕⲟⲧ ⲛⲉⲙ ⲧⲥϩⲓⲙⲓ ⲙⲡⲉϥⲓⲱⲧ
ⲡⲓϣⲓⲡⲓ ⲙⲡⲉϥⲓⲱⲧ ⲁϥϭⲟⲣⲡϥ ⲉⲃⲟⲗ ϧⲉⲛ ⲟⲩⲙⲟⲩ ⲙⲁⲣⲟⲩϧⲟⲑⲃⲟⲩ ⲙⲡⲃ
ⲟⲩⲟⲛ ⲉⲣⲱⲟⲩ
̅ⲕ:̅ⲓⲃ ⲟⲩⲟϩ ⲉϣⲱⲡ ⲛⲧⲉ ⲟⲩⲁⲓ ⲛⲕⲟⲧ ⲛⲉⲙ ⲟⲩϣⲉⲗⲉⲧ ⲛⲧⲁϥ ϧⲉⲛ
ⲟⲩⲙⲟⲩ ⲙⲁⲣⲟⲩϧⲟⲑⲃⲟⲩ ⲙⲡⲃ ⲉⲁⲩⲉⲣⲁⲥⲉⲃⲏⲥ ⲅⲁⲣ ⲟⲩⲟⲛ ⲉⲣⲱⲟⲩ
̅ⲕ:̅ⲓⲅ ⲟⲩⲟϩ ⲫⲏ ⲉⲧⲛⲁⲛⲕⲟⲧ ⲛⲉⲙ ⲟⲩϩⲱⲟⲩⲧ ⲉⲟⲩϣⲁⲓⲣⲓ ⲛⲥϩⲓⲙⲓ ⲟⲩⲥⲱϥ
ⲅⲁⲣ ⲁⲩⲁⲓϥ ⲙⲡⲃ ϧⲉⲛ ⲟⲩⲙⲟⲩ ⲙⲁⲣⲟⲩϧⲟⲑⲃⲟⲩ ⲟⲩⲟⲛ ⲉⲣⲱⲟⲩ
̅ⲕ:̅ⲓⲇ ⲫⲏ ⲉⲧⲛⲁϭⲓ ⲛⲟⲩⲥϩⲓⲙⲓ ⲛⲉⲙ ⲧⲉⲥⲙⲁⲩ ⲟⲩⲁⲛⲟⲙⲓⲁ ⲧⲉ ⲉⲩⲉⲣⲟⲕϩϥ
ϧⲉⲛ ⲟⲩⲭⲣⲱⲙ ⲛⲉⲙ ⲛⲓⲕⲉⲭⲱⲟⲩⲛⲓ ⲟⲩⲟϩ ⲛⲛⲉ ⲁⲛⲟⲙⲓⲁ ϣⲱⲡⲓ ϧⲉⲛ ⲑⲏⲛⲟⲩ
̅ⲕ:̅ⲓⲉ ⲟⲩⲟϩ ⲫⲏ ⲉⲧⲛⲁⲛⲕⲟⲧ ⲛⲉⲙ ⲧⲉⲃⲛⲏ ⲛⲓⲃⲉⲛ ϧⲉⲛ ⲟⲩⲙⲟⲩ
ⲙⲁⲣⲟⲩϧⲟⲑⲃⲉϥ ⲟⲩⲟϩ ⲡⲓⲧⲉⲃⲛⲏ ⲉⲣⲉⲧⲉⲛⲉϧⲟⲑⲃⲉϥ
̅ⲕ:̅ⲓⲋ ⲟⲩⲟϩ ϯⲥϩⲓⲙⲓ ⲉⲧⲛⲁϣⲉⲛⲁⲥ ϧⲁⲧⲉⲛ ⲧⲉⲃⲛⲏ ⲛⲓⲃⲉⲛ ⲉⲉⲛⲕⲟⲧ ⲛⲉⲙⲁⲥ
ⲉⲣⲉⲧⲉⲛⲉϧⲱⲧⲉⲃ ⲛϯⲥϩⲓⲙⲓ ⲛⲉⲙ ⲡⲓⲧⲉⲃⲛⲏ ϧⲉⲛ ⲟⲩⲙⲟⲩ ⲙⲁⲣⲟⲩⲙⲟⲩ ⲟⲩⲟⲛ
ⲉⲣⲱⲟⲩ
̅ⲕ:̅ⲓⲍ ⲫⲏ ⲉⲧⲛⲁϭⲓ ⲛⲧⲉϥⲥⲱⲛⲓ ⲛϣⲉⲛⲓⲱⲧ ⲓⲉ ⲛϣⲉⲛⲙⲁⲩ ⲟⲩⲟϩ ⲛⲧⲉϥⲛⲁⲩ
ⲉⲡⲉⲥϣⲓⲡⲓ ⲟⲩⲟϩ ⲛⲑⲟⲥ ϩⲱⲥ ⲛⲧⲉⲥⲛⲁⲩ ⲉⲡⲉϥϣⲓⲡⲓ ⲟⲩϣⲱϣ ⲡⲉ ⲉⲩⲉϥⲱϯ
ⲉⲃⲟⲗ ⲙⲡⲉⲙⲑⲟ ⲛⲛⲓϣⲏⲣⲓ ⲛⲧⲉ ⲡⲉϥⲅⲉⲛⲟⲥ ⲟⲩϣⲓⲡⲓ ⲛⲧⲉ ⲧⲉϥⲥⲱⲛⲓ
ⲁϥϭⲟⲣⲡϥ ⲉⲃⲟⲗ ⲉϥⲉϭⲓ ⲙⲡⲉϥⲛⲟⲃⲓ
̅ⲕ:̅ⲓⲏ ⲟⲩⲟϩ ⲟⲩⲣⲱⲙⲓ ⲁϥϣⲁⲛⲛⲕⲟⲧ ⲛⲉⲙ ⲟⲩⲥϩⲓⲙⲓ ⲉⲥⲟⲓ ⲛⲕⲉⲙⲁ ⲟⲩⲟϩ
ⲛⲧⲉϥϭⲱⲣⲡ ⲙⲡⲉⲥϣⲓⲡⲓ ⲉⲃⲟⲗ ⲧⲉⲥⲙⲟⲩⲙⲓ ⲁϥϭⲟⲣⲡⲥ ⲉⲃⲟⲗ ⲟⲩⲟϩ ⲛⲑⲟⲥ
ϩⲱⲥ ⲁⲥⲃⲱϣ ⲉⲃⲟⲗ ⲙⲡⲧⲉⲗⲧⲉⲗ ⲛⲧⲉ ⲡⲉⲥⲥⲛⲟϥ ⲉⲩⲉϥⲱϯ ⲉⲃⲟⲗ ⲙⲡⲃ
ⲉⲃⲟⲗ ϧⲉⲛ ⲛⲟⲩϫⲱⲟⲩ
̅ⲕ:̅ⲓⲑ ⲟⲩⲟϩ ⲟⲩϣⲓⲡⲓ ⲛⲧⲉ ⲧⲥⲱⲛⲓ ⲙⲡⲉⲕⲓⲱⲧ ⲛⲉⲙ ⲟⲩⲥⲱⲛⲓ ⲛⲧⲉ
ⲧⲉⲕⲙⲁⲩ ⲛⲛⲉⲕϭⲟⲣⲡϥ ⲉⲃⲟⲗ ϯⲙⲉⲧⲣⲉⲙϧⲉⲛⲏⲓ ⲅⲁⲣ ⲁⲩϭⲟⲣⲡⲥ ⲉⲃⲟⲗ ⲉⲩⲉϭⲓ
ⲛⲟⲩⲛⲟⲃⲓ
̅ⲕ:̅ⲕ ⲫⲏ ⲉⲧⲛⲁⲛⲕⲟⲧ ⲛⲉⲙ ⲧⲉϥⲥⲩⲅⲅⲉⲛⲏⲥ ⲟⲩϣⲓⲡⲓ ⲛⲧⲉ ⲧⲉϥⲥⲩⲅⲅⲉⲛⲓⲁ
ⲁϥϭⲟⲣⲡϥ ⲉⲃⲟⲗ ⲉⲩⲉⲙⲟⲩ ⲉⲩⲟⲓ ⲛⲁⲧϣⲏⲣⲓ ⲙⲡⲃ
̅ⲕ:̅ⲕⲁ ⲟⲩⲟϩ ⲟⲩⲣⲱⲙⲓ ⲫⲏ ⲉⲧⲛⲁϭⲓ ⲧⲥϩⲓⲙⲓ ⲙⲡⲉϥⲥⲟⲛ ⲟⲩϭⲱϧⲉⲙ ⲡⲉ
ⲟⲩϣⲓⲡⲓ ⲛⲧⲉ ⲡⲉϥⲥⲟⲛ ⲁϥϭⲟⲣⲡϥ ⲉⲃⲟⲗ ⲉⲩⲉⲙⲟⲩ ⲉⲩⲟⲓ ⲛⲁⲧϣⲏⲣⲓ
̅ⲕ:̅ⲕⲃ ⲟⲩⲟϩ ⲉⲣⲉⲧⲉⲛⲉⲁⲣⲉϩ ⲉⲛⲁⲟⲩⲁϩⲥⲁϩⲛⲓ ⲧⲏⲣⲟⲩ ⲛⲉⲙ ⲛⲁϩⲁⲡ ⲟⲩⲟϩ
ⲉⲣⲉⲧⲉⲛⲉⲁⲓⲧⲟⲩ ⲟⲩⲟϩ ⲛⲛⲉ ⲡⲕⲁϩⲓ ⲙⲉⲥⲧⲉ ⲑⲏⲛⲟⲩ ⲫⲏ ⲁⲛⲟⲕ ⲉϯⲛⲁⲉⲗ
ⲑⲏⲛⲟⲩ ⲉϧⲟⲩⲛ ⲉⲣⲟϥ ⲉϣⲱⲡⲓ ⲙⲙⲁⲩ
̅ⲕ:̅ⲕⲅ ⲟⲩⲟϩ ⲛⲛⲉⲧⲉⲛⲙⲟϣⲓ ϧⲉⲛ ⲛⲓⲛⲟⲙⲓⲙⲟⲛ ⲛⲧⲉ ⲛⲓⲉⲑⲛⲟⲥ ⲛⲏ ⲁⲛⲟⲕ
ⲉϯⲛⲁⲟⲩⲟⲣⲡⲟⲩ ⲉⲃⲟⲗ ϩⲁⲣⲱⲧⲉⲛ ϫⲉ ⲟⲩⲏⲓ ⲛⲁⲓ ⲧⲏⲣⲟⲩ ⲁⲩⲁⲓⲧⲟⲩ ⲟⲩⲟϩ
ⲁⲓⲟⲣⲃⲟⲩ
̅ⲕ:̅ⲕⲇ ⲟⲩⲟϩ ⲁⲓϫⲟⲥ ⲛⲱⲧⲉⲛ ϫⲉ ⲛⲑⲱⲧⲉⲛ ⲉⲧⲛⲁⲉⲣⲕⲗⲏⲣⲟⲛⲟⲙⲓⲛ
ⲙⲡⲟⲩⲕⲁϩⲓ ⲟⲩⲟϩ ⲁⲛⲟⲕ ⲉⲓⲉⲧⲏⲓϥ ⲛⲱⲧⲉⲛ ϧⲉⲛ ⲟⲩϫⲫⲟ ⲡⲓⲕⲁϩⲓ ⲉⲧϧⲁϯ
ⲛⲉⲣⲱϯ ϩⲓ ⲉⲃⲓⲱ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ ⲫⲏ ⲉⲧⲁϥⲟⲩⲉⲧ ⲑⲏⲛⲟⲩ
ⲉⲃⲟⲗ ⲛⲛⲓⲉⲑⲛⲟⲥ ⲧⲏⲣⲟⲩ
̅ⲕ:̅ⲕⲉ ⲟⲩⲟϩ ⲉⲣⲉⲧⲉⲛⲉⲟⲩⲉⲧ ⲑⲏⲛⲟⲩ ⲉⲃⲟⲗ ⲟⲩⲧⲉ ⲑⲙⲏϯ ⲛⲛⲓⲧⲉⲃⲛⲱⲟⲩⲓ
ⲉⲧϭⲁϧⲉⲙ ⲛⲉⲙ ⲟⲩⲧⲉ ⲑⲙⲏϯ ⲛⲛⲓⲧⲉⲃⲛⲱⲟⲩⲓ ⲉⲧⲧⲟⲩⲃⲏⲟⲩⲧ ⲛⲉⲙ ⲟⲩⲧⲉ
ⲑⲙⲏϯ ⲛⲛⲓϩⲁⲗⲁϯ ⲉⲧⲧⲟⲩⲃⲏⲟⲩⲧ ⲛⲉⲙ ⲛⲏ ⲉⲧϭⲁϧⲉⲙ ⲟⲩⲟϩ ⲛⲛⲉⲧⲉⲛⲱⲣⲉⲃ
ⲛⲛⲉⲧⲉⲛⲯⲩⲭⲏ ϧⲉⲛ ⲛⲓⲧⲉⲃⲛⲱⲟⲩⲓ ⲛⲉⲙ ϧⲉⲛ ⲛⲓϩⲁⲗⲁϯ ⲛⲉⲙ ϧⲉⲛ ⲛⲓϭⲁⲧϥⲓ
ⲛⲧⲉ ⲡⲕⲁϩⲓ ⲛⲁⲓ ⲉⲧⲁⲓⲟⲩⲟⲧⲟⲩ ⲛⲱⲧⲉⲛ ⲉⲃⲟⲗ ϧⲉⲛ ⲟⲩϭⲱϧⲉⲙ
̅ⲕ:̅ⲕⲋ ⲟⲩⲟϩ ⲉⲣⲉⲧⲉⲛⲉϣⲱⲡⲓ ⲛⲏⲓ ⲉⲣⲉⲧⲉⲛⲟⲩⲁⲃ ϫⲉ ϯⲟⲩⲁⲃ ⲁⲛⲟⲕ ⲡϭⲟⲓⲥ
ⲡⲉⲧⲉⲛⲛⲟⲩϯ ⲫⲏ ⲉⲧⲁϥⲉⲛ ⲑⲏⲛⲟⲩ ⲉⲃⲟⲗ ϧⲉⲛ ⲡⲕⲁϩⲓ ⲛⲭⲏⲙⲓ ⲛⲉⲙ ϧⲉⲛ
ⲑⲙⲏϯ ⲛⲛⲓⲉⲑⲛⲟⲥ ⲧⲏⲣⲟⲩ ⲉⲡϫⲓⲛⲧⲉⲧⲉⲛϣⲱⲡⲓ ⲛⲏⲓ
̅ⲕ:̅ⲕⲍ ⲟⲩⲟϩ ⲟⲩⲣⲱⲙⲓ ⲓⲉ ⲟⲩⲥϩⲓⲙⲓ ⲫⲏ ⲉⲧⲛⲁⲉⲣⲣⲉϥϣⲓⲛⲓ ϧⲉⲛ ⲑⲛⲉϫⲓ ⲓⲉ
ⲟⲩⲣⲉϥϣⲉⲛϩⲓⲛ ϧⲉⲛ ⲟⲩⲙⲟⲩ ⲙⲁⲣⲉϥⲙⲟⲩ ϧⲉⲛ ϩⲁⲛⲱⲛⲓ ⲉⲣⲉⲧⲉⲛⲉϩⲓⲱⲛⲓ
ⲉϫⲱⲟⲩ ϫⲉ ⲟⲩⲟⲛ ⲉⲣⲱⲟⲩ
̅ⲕⲁ:̅ⲁ ⲟⲩⲟϩ ⲡⲉϫⲉ ⲡϭⲟⲓⲥ ⲙⲙⲱⲩⲥⲏⲥ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲛⲁⲁⲣⲱⲛ
ⲛⲓⲟⲩⲏⲃ ⲟⲩⲟϩ ⲉⲕⲉϫⲟⲥ ⲛⲱⲟⲩ ϫⲉ ϧⲉⲛ ⲯⲩⲭⲏ ⲛⲓⲃⲉⲛ ⲛⲛⲟⲩϭⲱϧⲉⲙ ϧⲉⲛ
ⲡⲟⲩⲉⲑⲛⲟⲥ
̅ⲕⲁ:̅ⲃ ⲁⲗⲗⲁ ϧⲉⲛ ⲡⲓⲣⲉⲙϧⲉⲛⲏⲓ ⲫⲏ ⲉⲧϧⲉⲛⲧ ⲉⲣⲱⲟⲩ ⲉϫⲉⲛ ⲟⲩⲓⲱⲧ ⲛⲉⲙ
ⲟⲩⲙⲁⲩ ⲛⲉⲙ ⲉϫⲉⲛ ⲟⲩϣⲏⲣⲓ ⲛⲉⲙ ϩⲁⲛϣⲉⲣⲓ ⲉϫⲉⲛ ⲟⲩⲥⲟⲡ
̅ⲕⲁ:̅ⲅ ⲛⲉⲙ ⲟⲩⲥⲱⲛⲓ ⲛⲧⲁϥ ⲙⲡⲁⲣⲑⲉⲛⲟⲥ ⲫⲏ ⲉⲧϧⲉⲛⲧ ⲉⲣⲟⲥ ⲑⲏ ⲉⲧⲉ
ⲙⲡⲟⲩⲧⲏⲓⲥ ⲛϩⲁⲓ ϧⲉⲛ ⲛⲁⲓ ⲉϥⲉϭⲱϧⲉⲙ
̅ⲕⲁ:̅ⲇ ⲛⲛⲉϥϭⲱϧⲉⲙ ϧⲉⲛ ⲟⲩⲉⲝⲁⲡⲓⲛⲁ ϧⲉⲛ ⲡⲉϥⲗⲁⲟⲥ ⲉⲩⲥⲱϥ ⲛⲧⲁϥ
̅ⲕⲁ:̅ⲉ ⲟⲩⲟϩ ⲛⲛⲉⲧⲉⲛϧⲱⲕϩ ⲛⲧⲉⲧⲉⲛⲁⲫⲉ ϧⲉⲛ ⲟⲩⲙⲉⲧⲕⲉⲣϩⲉ ⲉϫⲉⲛ
ⲟⲩⲣⲉϥⲙⲱⲟⲩⲧ ⲟⲩⲟϩ ⲛⲛⲟⲩϧⲱⲕϩ ⲙⲫⲙⲟϩ ⲛⲧⲉ ⲛⲟⲩⲙⲟⲣⲧ ⲟⲩⲟϩ
ⲛⲛⲟⲩϣⲱⲧ ⲛϩⲁⲛϭⲟⲧϭⲉⲧ ⲉϫⲉⲛ ⲛⲟⲩⲥⲁⲣⲝ
̅ⲕⲁ:̣̅ⲋ ⲉⲩⲉϣⲱⲡⲓ ⲉⲩⲟⲩⲁⲃ ⲙⲡⲟⲩⲛⲟⲩϯ ⲟⲩⲟϩ ⲛⲛⲟⲩⲥⲱϥ ⲙⲫⲣⲁⲛ
ⲙⲡⲟⲩⲛⲟⲩϯ ⲛⲓϣⲟⲩϣⲱⲟⲩϣⲓ ⲅⲁⲣ ⲛⲧⲉ ⲡϭⲟⲓⲥ ϩⲁⲛⲇⲱⲣⲟⲛ ⲛⲉ ⲛⲧⲉ
ⲡⲟⲩⲛⲟⲩϯ ⲛⲏ ⲛⲑⲱⲟⲩ ⲉⲧⲟⲩⲓⲛⲓ ⲙⲙⲱⲟⲩ ⲉϧⲟⲩⲛ ⲟⲩⲟϩ ⲉⲩⲉϣⲱⲡⲓ
ⲉⲩⲟⲩⲁⲃ
̅ⲕⲁ:̅ⲍ ⲟⲩⲥϩⲓⲙⲓ ⲙⲡⲟⲣⲛⲏ ⲟⲩⲟϩ ⲉⲥⲥⲟϥ ⲛⲛⲟⲩϭⲓⲥ ⲛⲱⲟⲩ ⲟⲩⲥϩⲓⲙⲓ ⲉⲥϩⲱⲟⲩⲓ
ⲉⲃⲟⲗ ⲛⲧⲉⲛ ⲡⲉⲥϩⲁⲓ ⲛⲛⲟⲩϭⲓⲥ ⲛⲱⲟⲩ ϫⲉ ϥⲟⲩⲁⲃ ⲛϫⲉ ⲡϭⲟⲓⲥ ⲡⲉϥⲛⲟⲩϯ
̅ⲕⲁ:̅ⲏ ⲟⲩⲟϩ ⲉⲕⲉⲧⲟⲩⲃⲟϥ ⲛⲓⲇⲱⲣⲟⲛ ⲛⲧⲉ ⲡϭⲟⲓⲥ ⲡⲉⲧⲉⲛⲛⲟⲩϯ ⲫⲁⲓ ⲉⲧⲓⲛⲓ
ⲙⲙⲱⲟⲩ ⲉϧⲟⲩⲛ ⲉϥⲉϣⲱⲡⲓ ⲉϥⲟⲩⲁⲃ ϫⲉ ϯⲟⲩⲁⲃ ⲁⲛⲟⲕ ⲡϭⲟⲓⲥ ⲡⲉⲧⲧⲟⲩⲃⲟ
ⲙⲙⲱⲧⲉⲛ
̅ⲕⲁ:̅ⲑ ⲟⲩⲟϩ ⲉϣⲱⲡ ⲁⲣⲉϣⲁⲛ ⲧϣⲉⲣⲓ ⲛⲟⲩⲟⲩⲏⲃ ⲥⲟϥ ⲛⲧⲉⲥⲉⲣⲡⲟⲣⲛⲉⲩⲓⲛ ⲑⲁⲓ
ⲁⲥⲥⲱϥ ⲙⲫⲣⲁⲛ ⲙⲡⲉⲥⲓⲱⲧ ⲉⲩⲉⲣⲟⲕϩⲥ ϩⲓϫⲉⲛ ⲟⲩⲭⲣⲱⲙ
̅ⲕⲁ:̅ⲓ ⲟⲩⲟϩ ⲡⲓⲟⲩⲏⲃ ⲡⲓⲛⲓϣϯ ⲉⲃⲟⲗ ϧⲉⲛ ⲛⲉϥⲥⲛⲏⲟⲩ ⲫⲏ ⲉⲧⲁⲩϫⲱϣ
ⲉϫⲉⲛ ⲧⲉϥⲁⲫⲉ ⲉⲃⲟⲗ ϧⲉⲛ ⲡⲓⲑⲱϩⲥ ⲫⲏ ⲉⲧϫⲏⲕ ⲉⲃⲟⲗ ⲉϯϩⲓⲱⲧϥ ⲛⲛⲏ
ⲉⲑⲟⲩⲁⲃ ⲛⲛⲉϥⲱⲗⲓ ⲛϯⲕⲩⲇⲁⲣⲓⲥ ⲉⲃⲟⲗ ϩⲓϫⲉⲛ ⲧⲉϥⲁⲫⲉ ⲟⲩⲟϩ ⲛⲛⲉϥⲫⲱϧ
ⲛⲛⲉϥϩⲃⲱⲥ
̅ⲕⲁ:̅ⲓⲁ ⲟⲩⲟϩ ⲛⲛⲉϥϣⲉ ⲉϧⲟⲩⲛ ⲉϫⲉⲛ ⲯⲩⲭⲏ ⲛⲓⲃⲉⲛ ⲉⲁⲥⲙⲟⲩ ⲉϫⲉⲛ ⲟⲩⲓⲱⲧ
ⲛⲧⲁϥ ⲛⲉⲙ ⲉϫⲉⲛ ⲟⲩⲙⲁⲩ ⲛⲧⲁϥ ⲛⲛⲉϥϭⲱϧⲉⲙ
̅ⲕⲁ:̅ⲓⲃ ⲛⲛⲉϥⲓ ⲉⲃⲟⲗ ϧⲉⲛ ⲛⲏ ⲉⲑⲟⲩⲁⲃ ⲛⲛⲉϥⲥⲱϥ ⲙⲡⲓⲣⲁⲛ ⲉⲑⲟⲩⲁⲃ ⲛⲧⲉ
ⲡⲉϥⲛⲟⲩϯ ϫⲉ ⲡⲓⲛⲉϩ ⲛⲑⲱϩⲥ ⲉⲑⲟⲩⲁⲃ ⲛⲧⲉ ⲡⲉϥⲛⲟⲩϯ ϩⲓϫⲱϥ ⲁⲛⲟⲕ ⲡⲉ
ⲡϭⲟⲓⲥ
̅ⲕⲁ:̅ⲓⲅ ⲫⲁⲓ ⲉϥⲉϭⲓ ⲛⲁϥ ⲛⲟⲩⲥϩⲓⲙⲓ ⲙⲡⲁⲣⲑⲉⲛⲟⲥ ⲉⲃⲟⲗ ϧⲉⲛ ⲡⲉϥⲅⲉⲛⲟⲥ
̅ⲕⲁ:̅ⲓⲇ ⲟⲩⲭⲏⲣⲁ ⲇⲉ ⲛⲉⲙ ⲟⲩⲓ ⲉⲥϩⲱⲟⲩⲓ ⲉⲃⲟⲗ ⲛⲉⲙ ⲟⲩⲓ ⲉⲥⲥⲟϥ ⲛⲉⲙ
ⲟⲩⲡⲟⲣⲛⲏ ⲛⲁⲓ ⲛⲛⲉϥϭⲓⲧⲟⲩ ⲁⲗⲗⲁ ⲟⲩⲡⲁⲣⲑⲉⲛⲟⲥ ⲉⲃⲟⲗ ϧⲉⲛ ⲡⲉϥⲅⲉⲛⲟⲥ
ⲉϥⲉϭⲓⲥ ⲉⲟⲩⲥϩⲓⲙⲓ
̅ⲕⲁ:̅ⲓⲉ ⲟⲩⲟϩ ⲛⲛⲉϥϭⲱϧⲉⲙ ⲙⲡⲉϥϫⲣⲟϫ ϧⲉⲛ ⲡⲉϥⲗⲁⲟⲥ ⲁⲛⲟⲕ ⲡⲉ ⲡϭⲟⲓⲥ
ⲫⲏ ⲉⲧⲧⲟⲩⲃⲟ ⲙⲙⲟϥ
̅ⲕⲁ:̅ⲓⲋ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕⲁ:̅ⲓⲍ ϫⲉ ⲁϫⲟⲥ ⲛⲁⲁⲣⲱⲛ ⲉⲕϫⲱ ⲙⲙⲟⲥ ϫⲉ ⲟⲩⲣⲱⲙⲓ ⲉⲃⲟⲗ ϧⲉⲛ
ⲡⲉⲕⲅⲉⲛⲟⲥ ϧⲉⲛ ⲛⲉⲧⲉⲛϫⲱⲟⲩ ⲫⲏ ⲉⲧⲉ ⲟⲩⲟⲛ ⲁϭⲛⲓ ⲛϧⲏⲧϥ ⲛⲛⲉϥϣⲓ
ⲉϧⲟⲩⲛ ⲉⲓⲛⲓ ⲉϩⲣⲏⲓ ⲛⲛⲓⲇⲱⲣⲟⲛ ⲛⲧⲉ ⲡⲉϥⲛⲟⲩϯ
̅ⲕⲁ:̅ⲓⲏ ⲟⲩⲣⲱⲙⲓ ⲛⲓⲃⲉⲛ ⲫⲏ ⲉⲧⲉ ⲟⲩⲟⲛ ⲁϭⲛⲓ ⲛϧⲏⲧϥ ⲛⲛⲉϥϣⲓ ⲉϧⲟⲩⲛ
ⲟⲩⲣⲱⲙⲓ ⲙⲃⲉⲗⲗⲉ ⲓⲉ ⲛϭⲁⲗⲉ ⲓⲉ ⲛϫⲁϫϣⲁⲓ ⲓⲉ ⲉⲣⲉ ⲡⲉϥⲙⲁϣϫ ϫⲏϫⲓ
ⲉⲃⲟⲗ
̅ⲕⲁ:̅ⲓⲑ ⲓⲉ ⲣⲱⲙⲓ ⲉⲣⲉ ⲟⲩⲟⲛ ⲟⲩϧⲟⲙϧⲉⲙ ⲛϧⲏⲧϥ ⲛⲧⲉ ⲟⲩϫⲓϫ ⲓⲉ
ⲟⲩϧⲟⲙϧⲉⲙ ⲛⲧⲉ ⲟⲩⲫⲁⲧ
̅ⲕⲁ:̅ⲕ ⲓⲉ ⲉϥⲟⲓ ⲛϫⲟ ⲓⲉ ⲉⲣⲉ ⲛⲉϥⲃⲁⲗ ⲟⲓ ⲛⲁⲟⲩⲁⲛ ⲛⲭⲗⲟ ⲓⲉ ⲉϥⲟⲓ
ⲛⲕⲁⲕⲃⲁⲗ ⲓⲉ ⲟⲩⲣⲱⲙⲓ ⲉⲣⲉ ⲟⲩⲟⲛ ⲟⲩⲯⲱⲣⲁ ⲛⲁⲅⲣⲓⲟⲛ ϩⲓⲱⲧϥ ⲓⲉ ⲟⲩⲁⲗ ⲓⲉ
ⲛⲟⲩⲱⲧ ⲡⲉ ⲛⲉϥⲁⲑⲣⲉⲩ
̅ⲕⲁ:̅ⲕⲁ ⲫⲏ ⲛⲓⲃⲉⲛ ⲉⲃⲟⲗ ϧⲉⲛ ⲡϫⲣⲟϫ ⲛⲁⲁⲣⲱⲛ ⲉⲧⲉ ⲟⲩⲟⲛ ⲁϭⲛⲓ ⲛϧⲏⲧϥ
ⲛⲛⲉϥϧⲱⲛⲧ ⲉϧⲟⲩⲛ ⲉⲓⲛⲓ ⲉϩⲣⲏⲓ ⲛⲛⲓϣⲟⲩϣⲱⲟⲩϣⲓ ⲛⲧⲉ ⲡϭⲟⲓⲥ ϫⲉ ⲟⲩⲏⲓ
ⲟⲩⲟⲛ ⲁϭⲛⲓ ⲛϧⲏⲧϥ ⲛⲛⲉϥϣⲓ ⲉϧⲟⲩⲛ ⲉⲉⲛ ⲇⲱⲣⲟⲛ ⲉϧⲟⲩⲛ ⲙⲡⲉϥⲛⲟⲩϯ
̅ⲕⲁ:̅ⲕⲃ ⲛⲏ ⲉⲑⲟⲩⲁⲃ ⲛⲉ ⲛⲧⲉ ⲛⲏ ⲉⲑⲟⲩⲁⲃ ⲟⲩⲟϩ ⲉϥⲉⲟⲩⲱⲙ ⲉⲃⲟⲗ ϧⲉⲛ ⲛⲏ
ⲉⲑⲟⲩⲁⲃ
̅ⲕⲁ:̅ⲕⲅ ⲡⲗⲏⲛ ⲛⲛⲉϥϣⲉ ⲉϧⲟⲩⲛ ϧⲁⲧⲉⲛ ⲡⲓⲕⲁⲧⲁⲡⲉⲧⲁⲥⲙⲁ ⲟⲩⲟϩ
ⲛⲛⲉϥϧⲱⲛⲧ ⲉϧⲟⲩⲛ ϧⲁⲧⲉⲛ ⲡⲓⲙⲁⲛⲉⲣϣⲱⲟⲩϣⲓ ϫⲉ ⲟⲩⲟⲛ ⲁϭⲛⲓ ⲛϧⲏⲧϥ
ⲟⲩⲟϩ ⲛⲛⲉϥⲥⲱϥ ⲙⲡⲉⲑⲟⲩⲁⲃ ⲛⲧⲉ ⲡⲉϥⲛⲟⲩϯ ϫⲉ ⲁⲛⲟⲕ ⲡⲉ ⲡϭⲟⲓⲥ ⲫⲏ
ⲉⲧⲧⲟⲩⲃⲟ ⲙⲙⲱⲟⲩ
̅ⲕⲁ:̅ⲕⲇ ⲟⲩⲟϩ ⲁ ⲙⲱⲩⲥⲏⲥ ⲥⲁϫⲓ ⲛⲉⲙ ⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲛⲉⲙ
ⲛⲉⲛϣⲏⲣⲓ ⲧⲏⲣⲟⲩ ⲙⲡⲓⲥⲣⲁⲏⲗ
̅ⲕⲃ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕⲃ:̅ⲃ ϫⲉ ⲁϫⲟⲥ ⲛⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲟⲩⲟϩ ⲙⲁⲣⲟⲩϯϩⲑⲏⲟⲩ ⲉⲃⲟⲗ ϩⲁ
ⲛⲏ ⲉⲑⲟⲩⲁⲃ ⲛⲧⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲟϩ ⲛⲛⲟⲩⲥⲱϥ ⲙⲫⲣⲁⲛ ⲛⲧⲉ ⲛⲏ
ⲉⲑⲟⲩⲁⲃ ⲛⲧⲏⲓ ⲛⲏ ⲧⲏⲣⲟⲩ ⲉⲧⲟⲩⲛⲁⲉⲣⲁⲅⲓⲁⲍⲓⲛ ⲙⲙⲱⲟⲩ ⲛⲏⲓ ⲁⲛⲟⲕ ⲡⲉ
ⲡϭⲟⲓⲥ
̅ⲕⲃ:̅ⲅ ⲁϫⲟⲥ ⲛⲱⲟⲩ ϫⲉ ϧⲉⲛ ⲛⲉⲧⲉⲛϫⲱⲟⲩ ⲣⲱⲙⲓ ⲛⲓⲃⲉⲛ ⲉⲃⲟⲗ ϧⲉⲛ
ⲡⲉⲧⲉⲛϫⲣⲟϫ ⲧⲏⲣϥ ⲉⲧⲛⲁⲓ ⲉϧⲟⲩⲛ ⲉⲛⲏ ⲉⲑⲟⲩⲁⲃ ⲛⲏ ⲧⲏⲣⲟⲩ
ⲉⲧⲟⲩⲛⲁⲧⲟⲩⲃⲱⲟⲩ ⲙⲡϭⲟⲓⲥ ⲛϫⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲟϩ ⲡⲉϥϭⲱϧⲉⲙ
ⲉϥ ⲉⲥⲉϥⲱϯ ⲉⲃⲟⲗ ϩⲁⲣⲟⲓ ⲛϫⲉ ϯⲯⲩⲭⲏ ⲉⲧⲉⲙⲙⲁⲩ ⲁⲛⲟⲕ ⲡⲉ ⲡϭⲟⲓⲥ
̅ⲕⲃ:̅ⲇ ⲟⲩⲟϩ ⲟⲩⲣⲱⲙⲓ ⲉⲃⲟⲗ ϧⲉⲛ ⲡϫⲣⲟϫ ⲛⲁⲁⲣⲱⲛ ⲡⲓⲟⲩⲏⲃ ⲉϣⲱⲡ ⲉϥⲟⲓ
ⲛⲥⲉϩⲧ ⲓⲉ ⲉϥⲧⲉⲗⲧⲉⲗ ϫⲣⲟϫ ⲛⲛⲉϥⲟⲩⲱⲙ ⲉⲃⲟⲗ ϧⲉⲛ ⲛⲏ ⲉⲑⲟⲩⲁⲃ
ϣⲁⲧⲉϥⲧⲟⲩⲃⲟ ⲟⲩⲟϩ ⲫⲏ ⲉⲧⲛⲁϭⲓ ⲛⲉⲙ ϭⲱϧⲉⲙ ⲛⲓⲃⲉⲛ ⲛⲧⲉ ⲟⲩⲯⲩⲭⲏ ⲓⲉ
ⲟⲩⲣⲱⲙⲓ ⲫⲏ ⲉⲧⲉ ⲟⲩⲟⲛ ⲟⲩϣⲁⲓⲣⲓ ⲛϫⲣⲟϫ ⲛⲁⲓ ⲉⲃⲟⲗ ⲙⲙⲟϥ
̅ⲕⲃ:̅ⲉ ⲓⲉ ⲫⲏ ⲛⲓⲃⲉⲛ ⲉⲧⲛⲁϭⲓ ⲛⲉⲙ ϭⲁⲧϥⲓ ⲛⲓⲃⲉⲛ ⲉϥϭⲱϧⲉⲙ ⲫⲏ ⲉⲧⲥⲱϥ
ⲙⲙⲟϥ ⲕⲁⲧⲁ ϭⲱϧⲉⲙ ⲛⲓⲃⲉⲛ ⲛⲧⲁϥ
̅ⲕⲃ:̣̅ⲋ ϯⲯⲩⲭⲏ ⲉⲧⲛⲁϭⲓ ⲛⲉⲙⲁϥ ⲉⲥⲉϣⲱⲡⲓ ⲉⲥϭⲁϧⲉⲙ ϣⲁ ⲫⲛⲁⲩ
ⲛϩⲁⲛⲁⲣⲟⲩϩⲓ ⲛⲛⲉϥⲟⲩⲱⲙ ⲉⲃⲟⲗ ϧⲉⲛ ⲛⲏ ⲉⲑⲟⲩⲁⲃ ⲉϣⲱⲡ ⲁϥϣⲧⲉⲙϫⲱⲕⲉⲙ
ⲙⲡⲉϥⲥⲱⲙⲁ ϧⲉⲛ ⲟⲩⲙⲱⲟⲩ
̅ⲕⲃ:̅ⲍ ⲟⲩⲟϩ ⲛⲧⲉ ⲫⲣⲏ ϩⲱⲧⲡ ⲟⲩⲟϩ ⲉϥⲉϣⲱⲡⲓ ⲉϥⲧⲟⲩⲃⲏⲟⲩⲧ ⲟⲩⲟϩ
ⲧⲟⲧⲉ ⲉϥⲉⲟⲩⲱⲙ ⲉⲃⲟⲗ ϧⲉⲛ ⲛⲏ ⲉⲑⲟⲩⲁⲃ ϫⲉ ⲟⲩⲏⲓ ⲟⲩⲉⲣⲓ ⲛⲧⲁϥ ⲡⲉ
̅ⲕⲃ:̅ⲏ ⲟⲩⲟϩ ⲡⲉⲧⲙⲱⲟⲩⲧ ⲛⲉⲙ ⲛⲓⲟⲩⲱⲙ ⲛⲑⲏⲣⲓⲟⲛ ⲛⲛⲉϥⲟⲩⲟⲙⲟⲩ ϫⲉ
ⲛⲛⲉϥϭⲱϧⲉⲙ ⲛϧⲏⲧⲟⲩ ⲁⲛⲟⲕ ⲡⲉ ⲡϭⲟⲓⲥ
̅ⲕⲃ:̅ⲑ ⲟⲩⲟϩ ⲉⲩⲉⲁⲣⲉϩ ⲉⲛⲁϫⲓⲛⲁⲣⲉϩ ϩⲓⲛⲁ ⲛⲧⲟⲩϣⲧⲉⲙϭⲓ ⲛⲟⲃⲓ ⲉⲑⲃⲏⲧⲟⲩ
ⲟⲩⲟϩ ⲛⲧⲟⲩⲙⲟⲩ ⲉⲑⲃⲏⲧⲟⲩ ⲉϣⲱⲡ ⲛⲧⲟⲩⲥⲟϥⲟⲩ ϫⲉ ⲁⲛⲟⲕ ⲡⲉ ⲡϭⲟⲓⲥ ⲫⲏ
ⲉⲧⲉⲣⲁⲅⲓⲁⲍⲓⲛ ⲙⲙⲱⲟⲩ
̅ⲕⲃ:̅ⲓ ⲟⲩⲟϩ ϣⲉⲙⲙⲟ ⲛⲓⲃⲉⲛ ⲛⲛⲉϥⲟⲩⲱⲙ ⲉⲃⲟⲗ ϧⲉⲛ ⲛⲏ ⲉⲑⲟⲩⲁⲃ ⲟⲩⲟϩ
ⲟⲩⲣⲉⲙⲛϫⲱⲓⲗⲓ ⲛⲧⲉ ⲟⲩⲟⲩⲏⲃ ⲓⲉ ⲟⲩⲣⲉⲙⲃⲉⲭⲉ ⲛⲛⲉϥⲟⲩⲱⲙ ⲉⲃⲟⲗ ϧⲉⲛ ⲛⲏ
ⲉⲑⲟⲩⲁⲃ
̅ⲕⲃ:̅ⲓⲁ ⲟⲩⲟϩ ⲉϣⲱⲡ ⲁⲣⲉϣⲁⲛ ⲟⲩⲟⲩⲏⲃ ϣⲱⲡ ⲛⲟⲩⲯⲩⲭⲏ ϧⲁ ϩⲁⲧ ⲫⲁⲓ
ⲉϥⲉⲟⲩⲱⲙ ⲉⲃⲟⲗ ϧⲉⲛ ⲛⲉϥⲱⲓⲕ ⲛⲉⲙ ⲛⲉϥⲙⲉⲥϧⲉⲛⲏⲓ ⲛⲁⲓ ϩⲱⲟⲩ ⲉⲩⲉⲟⲩⲱⲙ
ⲉⲃⲟⲗ ϧⲉⲛ ⲛⲉϥⲱⲓⲕ
̅ⲕⲃ:̅ⲓⲃ ⲟⲩⲟϩ ⲟⲩϣⲉⲣⲓ ⲛⲧⲉ ⲟⲩⲣⲱⲙⲓ ⲛⲟⲩⲏⲃ ⲉϣⲱⲡ ⲁⲥϣⲁⲛϣⲱⲡⲓ ⲛⲉⲙ
ⲟⲩϩⲁⲓ ⲛⲁⲗⲗⲟⲅⲉⲛⲏⲥ ⲑⲁⲓ ⲛⲛⲉⲥⲟⲩⲱⲙ ⲉⲃⲟⲗ ϧⲉⲛ ⲛⲓⲁⲡⲁⲣⲭⲏ ⲉⲑⲟⲩⲁⲃ
̅ⲕⲃ:̅ⲓⲅ ⲟⲩⲟϩ ⲟⲩϣⲉⲣⲓ ⲛⲧⲉ ⲟⲩⲟⲩⲏⲃ ⲁⲥϣⲁⲛⲉⲣⲭⲏⲣⲁ ⲓⲉ ⲉⲁⲩϩⲓⲧⲥ ⲉⲃⲟⲗ
ⲉϣⲧⲉⲙⲉⲣⲉ ϫⲣⲟϫ ϣⲱⲡⲓ ⲛⲁⲥ ⲉⲥⲉⲕⲟⲧⲥ ⲉⲡⲏⲓ ⲛⲧⲉ ⲡⲉⲥⲓⲱⲧ ⲕⲁⲧⲁ
ⲧⲉⲥⲙⲉⲧⲁⲗⲟⲩ ⲉⲥⲉⲟⲩⲱⲙ ⲉⲃⲟⲗ ϧⲉⲛ ⲛⲓⲱⲓⲕ ⲛⲧⲉ ⲡⲉⲥⲓⲱⲧ ⲟⲩⲟϩ
ⲁⲗⲗⲟⲅⲉⲛⲏⲥ ⲛⲓⲃⲉⲛ ⲛⲛⲉϥⲟⲩⲱⲙ ⲉⲃⲟⲗ ⲙⲙⲱⲟⲩ
̅ⲕⲃ:̅ⲓⲇ ⲫⲣⲱⲙⲓ ⲉⲧⲛⲁⲟⲩⲱⲙ ⲉⲃⲟⲗ ϧⲉⲛ ⲛⲏ ⲉⲑⲟⲩⲁⲃ ⲛϥⲉⲙⲓ ⲁⲛ ⲟⲩⲟϩ
ⲉϥⲉⲧⲟⲩϩⲟ ⲉϫⲱϥ ⲛⲟⲩⲧⲉⲣⲉⲉ ⲛⲧⲁϥ ⲟⲩⲟϩ ⲉϥⲉϯ ⲙⲡⲉⲑⲟⲩⲁⲃ ⲙⲡⲓⲟⲩⲏⲃ
̅ⲕⲃ:̅ⲓⲉ ⲟⲩⲟϩ ⲛⲛⲟⲩⲥⲱϥ ⲛⲛⲏ ⲉⲑⲟⲩⲁⲃ ⲛⲧⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲛⲏ
ⲛⲑⲱⲟⲩ ⲉⲧⲟⲩⲫⲱⲣϫ ⲙⲙⲱⲟⲩ ⲙⲡϭⲟⲓⲥ
̅ⲕⲃ:̅ⲓⲋ ⲟⲩⲟϩ ⲉⲩⲉⲓⲛⲓ ⲉϫⲱⲟⲩ ⲛⲟⲩⲁⲛⲟⲙⲓⲁ ⲛⲧⲉ ⲟⲩⲙⲉⲧϣⲁϥⲧ ϧⲉⲛ
ⲡϫⲓⲛⲑⲣⲟⲩⲟⲩⲱⲙ ⲛⲛⲏ ⲉⲑⲟⲩⲁⲃ ⲛⲧⲱⲟⲩ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲧⲟⲩⲃⲟ
ⲙⲙⲱⲟⲩ
̅ⲕⲃ:̅ⲓⲍ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕⲃ:̅ⲓⲏ ϫⲉ ⲥⲁϫⲓ ⲛⲉⲙ ⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲛⲉⲙ ϯⲥⲩⲛⲁⲅⲱⲅⲏ ⲧⲏⲣⲥ
ⲛⲧⲉ ⲡⲓⲥⲣⲁⲏⲗ ⲟⲩⲟϩ ⲉⲕⲉϫⲟⲥ ⲛⲱⲟⲩ ϫⲉ ⲫⲣⲱⲙⲓ ⲫⲣⲱⲙⲓ ⲉⲃⲟⲗ ϧⲉⲛ
ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲓⲉ ⲉⲃⲟⲗ ϧⲉⲛ ⲛⲓϣⲉⲙⲙⲱⲟⲩ ⲉⲧϧⲉⲛ ⲡⲓⲥⲣⲁⲏⲗ ⲫⲏ
ⲉⲧⲛⲁⲓⲛⲓ ⲛⲛⲉϥⲇⲱⲣⲟⲛ ⲉϧⲟⲩⲛ ⲕⲁⲧⲁ ⲟⲩⲟⲙⲟⲗⲟⲅⲓⲁ ⲛⲓⲃⲉⲛ ⲛⲧⲱⲟⲩ ⲓⲉ
ⲕⲁⲧⲁ ⲟⲩⲱϣ ⲛϩⲏⲧ ⲛⲓⲃⲉⲛ ⲛⲧⲱⲟⲩ ⲛⲏ ⲧⲏⲣⲟⲩ ⲉⲧⲟⲩⲛⲁⲉⲛⲟⲩ ⲉϧⲟⲩⲛ
ⲙⲡϭⲟⲓⲥ ⲉⲩϭⲗⲓⲗ ⲛϫⲟϥϫⲉϥ
̅ⲕⲃ:̅ⲓⲑ ⲉⲩϣⲏⲡ ⲛⲱⲧⲉⲛ ϩⲁⲛϩⲱⲟⲩⲧ ⲛⲁⲧⲁϭⲛⲓ ⲉⲃⲟⲗ ϧⲉⲛ ϩⲁⲛⲉϩⲱⲟⲩ
ⲛⲉⲙ ⲉⲃⲟⲗ ϧⲉⲛ ⲛⲓⲉⲥⲱⲟⲩ ⲛⲉⲙ ⲉⲃⲟⲗ ϧⲉⲛ ⲛⲓⲃⲁⲙⲡⲓ
̅ⲕⲃ:̅ⲕ ⲧⲏⲣⲟⲩ ⲉⲧⲉ ⲟⲩⲟⲛ ⲁϭⲛⲓ ⲛϧⲏⲧⲟⲩ ⲛⲛⲟⲩⲉⲛⲟⲩ ⲉϩⲣⲏⲓ ⲙⲡϭⲟⲓⲥ ϫⲉ
ⲟⲩⲏⲓ ⲅⲁⲣ ⲥⲉϣⲏⲡ ⲛⲱⲧⲉⲛ ⲁⲛ
̅ⲕⲃ:̅ⲕⲁ ⲟⲩⲟϩ ⲫⲣⲱⲙⲓ ⲉⲧⲛⲁⲓⲛⲓ ⲉϧⲟⲩⲛ ⲛⲟⲩϣⲟⲩϣⲱⲟⲩϣⲓ ⲛⲛⲟϩⲉⲙ ⲙⲡϭⲟⲓⲥ
ⲉⲁϥⲟⲩⲉⲧ ⲟⲩⲉⲩⲭⲏ ⲉⲃⲟⲗ ⲓⲉ ⲕⲁⲧⲁ ⲟⲩⲱϣ ⲛϩⲏⲧ ⲓⲉ ϧⲉⲛ ⲛⲉⲧⲉⲛϣⲁⲓ
ⲉⲃⲟⲗ ϧⲉⲛ ⲛⲓⲉϩⲱⲟⲩ ⲓⲉ ⲉⲃⲟⲗ ϧⲉⲛ ⲛⲓⲉⲥⲱⲟⲩ ⲙⲙⲟⲛ ⲁϭⲛⲓ ⲛϧⲏⲧⲟⲩ ϫⲉ
ⲛⲧⲉϥϣⲱⲡⲓ ⲉϥϣⲏⲡ ⲁϭⲛⲓ ⲛⲓⲃⲉⲛ ⲛⲛⲉϥϣⲱⲡⲓ ⲛϧⲏⲧϥ
̅ⲕⲃ:̅ⲕⲃ ⲟⲩⲃⲉⲗⲗⲉ ⲓⲉ ⲟⲩⲁⲓ ⲉϥϧⲉⲙϧⲱⲙ ⲓⲉ ⲉⲣⲉ ⲡⲉϥⲗⲁⲥ ϣⲁⲧ ⲓⲉ ⲉϥⲑⲟⲩⲑⲟⲩ
ⲓⲉ ⲉϥⲟⲓ ⲛϫⲉⲣϫⲓ ⲛⲁⲅⲣⲓⲟⲛ ⲓⲉ ⲉⲟⲩⲟⲛ ϩⲁⲛⲙⲉϣⲫⲱⲛⲓ ϩⲓⲱⲧϥ ⲛⲁⲓ
ⲙⲡⲁⲓⲣⲏϯ ⲛⲛⲟⲩⲉⲛⲟⲩ ⲉϩⲣⲏⲓ ⲙⲡϭⲟⲓⲥ ⲟⲩⲟϩ ⲛⲛⲉⲧⲉⲛϯ ⲉⲃⲟⲗ ⲙⲙⲱⲟⲩ
ⲉϫⲉⲛ ⲡⲓⲙⲁⲛⲉⲣϣⲱⲟⲩϣⲓ ⲉⲩⲟⲩⲧⲁϩ ⲉϥϣⲏⲡ ⲙⲡϭⲟⲓⲥ
̅ⲕⲃ:̅ⲕⲅ ⲟⲩⲟϩ ⲟⲩⲙⲁⲥⲓ ⲓⲉ ⲟⲩⲉⲥⲱⲟⲩ ⲉⲣⲉ ⲡⲟⲩⲙⲁϣϫ ϫⲏϫⲓ ⲉⲃⲟⲗ ⲓⲉ
ⲉϥⲥⲃⲟⲕ ⲛⲥⲏⲧ ⲛⲁⲓ ⲉⲣⲉⲧⲉⲛⲉϧⲉⲗϧⲱⲗⲟⲩ ⲛⲱⲧⲉⲛ ⲛⲛⲉⲧⲉⲛⲉⲛⲟⲩ ⲇⲉ ⲉϩⲣⲏⲓ
ⲛⲟⲩⲉⲩⲭⲏ ϫⲉ ⲛⲥⲉϣⲏⲡ ⲁⲛ
̅ⲕⲃ:̅ⲕⲇ ⲫⲏ ⲉⲧⲗⲁⲥ ⲛⲛⲉϥⲁⲗ ⲓⲉ ⲫⲏ ⲉⲧⲁⲩϩⲟϫϩⲉϫ ⲛⲛⲟⲩϥ ⲛⲉⲙ ⲫⲏ
ⲉⲧⲁⲩϣⲉⲧ ⲛⲟⲩϥ ⲉⲃⲟⲗ ⲛⲉⲙ ⲫⲏ ⲉⲧⲁⲩⲑⲉⲕⲉⲙ ⲛⲟⲩϥ ⲉⲃⲟⲗ ⲛⲛⲉⲧⲉⲛⲉⲛⲟⲩ
ⲉϧⲟⲩⲛ ⲙⲡϭⲟⲓⲥ ⲟⲩⲟϩ ⲛⲛⲉⲧⲉⲛⲑⲁⲙⲓⲟ ⲛϩⲁⲛⲟⲩⲟⲛ ⲙⲡⲁⲓⲣⲏϯ ϩⲓϫⲉⲛ
ⲡⲉⲧⲉⲛⲕⲁϩⲓ
̅ⲕⲃ:̅ⲕⲉ ⲟⲩⲟϩ ⲉⲃⲟⲗ ϧⲉⲛ ⲧϫⲓϫ ⲛⲟⲩⲁⲗⲗⲟⲅⲉⲛⲏⲥ ⲛⲛⲉⲧⲉⲛⲓⲛⲓ ⲛⲛⲓⲇⲱⲣⲟⲛ
ⲛⲧⲉ ⲡⲉⲧⲉⲛⲛⲟⲩϯ ⲉⲃⲟⲗ ϧⲉⲛ ⲛⲁⲓ ⲧⲏⲣⲟⲩ ϫⲉ ϩⲁⲛⲧⲁⲕⲟ ⲉⲧⲉ ⲛϧⲏⲧⲟⲩ
ⲟⲩⲟⲛ ⲁϭⲛⲓ ⲛϧⲏⲧⲟⲩ ⲥⲉϣⲏⲡ ⲛⲱⲧⲉⲛ ⲁⲛ
̅ⲕⲃ:̅ⲕⲋ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕⲃ:̅ⲕⲍ ϫⲉ ⲟⲩⲙⲁⲥⲓ ⲓⲉ ⲟⲩⲉⲥⲱⲟⲩ ⲓⲉ ⲟⲩⲃⲁⲙⲡⲓ ⲉϣⲱⲡ ⲁⲩϣⲁⲛⲙⲁⲥⲟⲩ
ⲟⲩⲟϩ ⲛⲧⲟⲩⲉⲣ ⲍ ⲛⲉϩⲟⲟⲩ ϧⲁⲣⲁⲧⲥ ⲛⲧⲟⲩⲙⲁⲩ ϧⲉⲛ ⲡⲓⲉϩⲟⲟⲩ ⲇⲉ ⲙⲙⲁϩ
ⲏ ⲛⲉⲙ ⲛⲏ ⲉⲧⲛⲏⲟⲩ ⲉⲩⲉⲉⲛⲟⲩ ⲉϩⲣⲏⲓ ⲛⲧⲁⲓⲟ ⲉⲩⲟⲩⲧⲁϩ ⲉϥϣⲏⲡ ⲙⲡϭⲟⲓⲥ
̅ⲕⲃ:̅ⲕⲏ ⲟⲩⲟϩ ⲟⲩⲉϩⲉ ⲛⲉⲙ ⲟⲩⲉⲥⲱⲟⲩ ⲛⲑⲟⲥ ⲛⲉⲙ ⲛⲉϥϣⲏⲣⲓ
ⲛⲛⲉⲧⲉⲛϧⲉⲗϧⲱⲗⲟⲩ ϧⲉⲛ ⲟⲩⲉϩⲟⲟⲩ ⲛⲟⲩⲱⲧ
̅ⲕⲃ:̅ⲕⲑ ⲉϣⲱⲡ ⲇⲉ ⲉⲕⲛⲁϣⲱⲧ ⲛⲟⲩϣⲟⲩϣⲱⲟⲩϣⲓ ⲛⲟⲩⲉⲩⲭⲏ ⲛⲧⲉ ⲟⲩⲣⲁϣⲓ
ⲙⲡϭⲟⲓⲥ ⲉⲣⲉⲧⲉⲛⲉϣⲁⲧϥ ⲉϥϣⲏⲡ ⲛⲱⲧⲉⲛ
̅ⲕⲃ:̅ⲗ ⲉⲩⲉⲟⲩⲟⲙϥ ϧⲉⲛ ⲡⲓⲉϩⲟⲟⲩ ⲉⲧⲉⲙⲙⲁⲩ ⲟⲩⲟϩ ⲛⲛⲉⲧⲉⲛⲥⲱϫⲡ ⲉⲃⲟⲗ
ϧⲉⲛ ⲛⲉϥⲁϥⲟⲩⲓ ⲉⲡⲉϥⲧⲟⲟⲩⲓ ⲁⲛⲟⲕ ⲡⲉ ⲡϭⲟⲓⲥ
̅ⲕⲃ:̅ⲗⲁ ⲟⲩⲟϩ ⲉⲣⲉⲧⲉⲛⲉⲁⲣⲉϩ ⲉⲛⲁⲉⲛⲧⲟⲗⲏ ⲟⲩⲟϩ ⲉⲣⲉⲧⲉⲛⲉⲁⲓⲧⲟⲩ ⲁⲛⲟⲕ ⲡⲉ
ⲡϭⲟⲓⲥ
̅ⲕⲃ:̅ⲗⲃ ⲟⲩⲟϩ ⲛⲛⲉⲧⲉⲛⲥⲉϥ ⲫⲣⲁⲛ ⲙⲡⲉⲑⲟⲩⲁⲃ ⲟⲩⲟϩ ⲉⲓⲉⲧⲟⲩⲃⲟ ϧⲉⲛ ⲑⲙⲏϯ
ⲛⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲧⲟⲩⲃⲟ ⲙⲙⲱⲧⲉⲛ
̅ⲕⲃ:̅ⲗⲅ ⲉⲁⲓⲉⲛ ⲑⲏⲛⲟⲩ ⲉⲃⲟⲗ ϧⲉⲛ ⲡⲕⲁϩⲓ ⲛⲭⲏⲙⲓ ϫⲉ ⲛⲧⲁϣⲱⲡⲓ ⲛⲛⲟⲩϯ
ⲁⲛⲟⲕ ⲡⲉ ⲡϭⲟⲓⲥ
̅ⲕⲅ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕⲅ:̅ⲃ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲟϩ ⲉⲕⲉϫⲟⲥ ⲛⲱⲟⲩ ϫⲉ
ⲛⲓϣⲁⲓ ⲛⲧⲉ ⲡϭⲟⲓⲥ ⲛⲏ ⲉⲧⲉⲧⲉⲛⲙⲟⲩϯ ⲉⲣⲱⲟⲩ ⲉⲩϯⲣⲁⲛ ⲉⲣⲱⲟⲩ ϫⲉ
ⲥⲉⲟⲩⲁⲃ ⲛⲁⲓ ⲛⲉ ⲛⲁϣⲁⲓ
̅ⲕⲅ:̅ⲅ ̣̅ⲋ ⲛⲉϩⲟⲟⲩ ⲉⲕⲉⲓⲣⲓ ⲛⲛⲉⲕϩⲃⲏⲟⲩⲓ ⲛϧⲏⲧⲟⲩ ⲡⲓⲉϩⲟⲟⲩ ⲇⲉ ⲙⲙⲁϩ ⲍ
ϩⲁⲛⲥⲁⲃⲃⲁⲧⲟⲛ ⲟⲩⲟϩ ⲟⲩⲙⲧⲟⲛ ⲉⲩⲉⲙⲟⲩϯ ⲉⲣⲟϥ ϫⲉ ϥⲟⲩⲁⲃ ⲙⲡϭⲟⲓⲥ
ϩⲱⲃ ⲛⲓⲃⲉⲛ ⲛⲛⲉⲧⲉⲛⲁⲓⲧⲟⲩ ϩⲁⲛⲥⲁⲃⲃⲁⲧⲟⲛ ⲛⲉ ⲛⲧⲉ ⲡϭⲟⲓⲥ ϧⲉⲛ
ⲙⲁⲛϣⲱⲡⲓ ⲛⲓⲃⲉⲛ ⲛⲧⲱⲧⲉⲛ
̅ⲕⲅ:̅ⲇ ⲛⲁⲓϣⲁⲓ ⲛⲁⲓ ⲥⲉⲟⲩⲁⲃ ⲙⲡϭⲟⲓⲥ ⲉⲩⲉⲙⲟⲩϯ ⲉⲣⲱⲟⲩ ϫⲉ ⲥⲉⲟⲩⲁⲃ ⲛⲏ
ⲉⲧⲉⲧⲉⲛⲛⲁⲙⲟⲩϯ ⲉⲣⲱⲟⲩ ϧⲉⲛ ⲛⲟⲩⲥⲏⲟⲩ
̅ⲕⲅ:̅ⲉ ϧⲉⲛ ⲡⲓϩⲟⲩⲓⲧ ⲛⲁⲃⲟⲧ ϧⲉⲛ ⲥⲟⲩⲓⲇ ⲙⲡⲓⲁⲃⲟⲧ ϧⲉⲛ ⲑⲙⲏϯ ⲛⲧⲉ
ⲛⲓⲁⲛⲁⲣⲟⲩϩⲓ ⲟⲩⲡⲁⲥⲭⲁ ⲡⲉ ⲙⲡϭⲟⲓⲥ
̅ⲕⲅ:̣̅ⲋ ⲟⲩⲟϩ ϧⲉⲛ ⲡⲓⲉϩⲟⲟⲩ ⲛⲧⲉ ⲥⲟⲩⲓⲉ ⲙⲡⲓⲁⲃⲟⲧ ⲟⲩϣⲁⲓ ⲛⲧⲉ
ⲛⲓⲁⲧⲕⲱⲃ ⲡⲉ ⲙⲡϭⲟⲓⲥ ⲍ ⲛⲉϩⲟⲟⲩ ⲉⲣⲉⲧⲉⲛⲉⲟⲩⲉⲙ ⲁⲧϣⲉⲙⲏⲣ
̅ⲕⲅ:̅ⲍ ⲟⲩⲟϩ ⲡⲓⲉϩⲟⲟⲩ ⲛϩⲟⲩⲓⲧ ⲉϥⲉϣⲱⲡⲓ ⲛⲱⲧⲉⲛ ⲉⲩⲉⲙⲟⲩϯ ⲉⲣⲟϥ ϫⲉ
ϥⲟⲩⲁⲃ ϩⲱⲃ ⲛⲓⲃⲉⲛ ⲛϣⲉⲙϣⲓ ⲛⲛⲉⲧⲉⲛⲑⲁⲙⲓⲱⲟⲩ
̅ⲕⲅ:̅ⲏ ⲟⲩⲟϩ ⲉⲣⲉⲧⲉⲛⲉⲓⲛⲓ ⲉϧⲟⲩⲛ ⲛϩⲁⲛϭⲗⲓⲗ ⲛϫⲟϥϫⲉϥ ⲙⲡϭⲟⲓⲥ ⲛⲍ
ⲛⲉϩⲟⲟⲩ ⲟⲩⲟϩ ⲡⲓⲉϩⲟⲟⲩ ⲙⲙⲁϩ ⲍ ⲉϥⲉϣⲱⲡⲓ ⲉⲩⲙⲟⲩϯ ⲉⲣⲟϥ ⲛⲱⲧⲉⲛ ϫⲉ
ϥⲟⲩⲁⲃ ⲛⲛⲉⲧⲉⲛⲑⲁⲙⲓⲟ ⲛϩⲱⲃ ⲛⲓⲃⲉⲛ ⲛϣⲉⲙϣⲓ
̅ⲕⲅ:̅ⲑ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕⲅ:̅ⲓ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲟϩ ⲉⲕⲉϫⲟⲥ ⲛⲱⲟⲩ ϫⲉ
ⲉϣⲱⲡ ⲁⲣⲉⲧⲉⲛϣⲁⲛϣⲉⲛⲱⲧⲉⲛ ⲉϧⲟⲩⲛ ⲉⲡⲓⲕⲁϩⲓ ⲫⲏ ⲁⲛⲟⲕ ⲉϯⲛⲁⲧⲏⲓϥ
ⲛⲱⲧⲉⲛ ⲟⲩⲟϩ ⲛⲧⲉⲧⲉⲛⲱⲥϧ ⲙⲡⲉϥⲱⲥϧ ⲟⲩⲟϩ ⲉⲣⲉⲧⲉⲛⲉⲓⲛⲓ ⲛϩⲁⲛⲭⲛⲁⲩ
ⲉϩⲣⲏⲓ ⲛϩⲁⲛⲁⲡⲁⲣⲭⲏ ⲛⲧⲉ ⲡⲉⲧⲉⲛⲱⲥϧ ϩⲁ ⲡⲓⲟⲩⲏⲃ
̅ⲕⲅ:̅ⲓⲁ ⲟⲩⲟϩ ⲉϥⲉⲓⲛⲓ ⲙⲡⲓⲭⲛⲁⲩ ⲉϩⲣⲏⲓ ⲙⲡⲉⲙⲑⲟ ⲙⲡϭⲟⲓⲥ ⲉϥϣⲏⲡ ⲛⲱⲧⲉⲛ
ⲉⲫⲣⲁⲥϯ ⲛⲧⲉ ⲡⲓⲉϩⲟⲟⲩ ⲛϩⲟⲩⲓⲧ ⲉϥⲉⲉⲛϥ ⲉϩⲣⲏⲓ ⲛϫⲉ ⲡⲓⲟⲩⲏⲃ
̅ⲕⲅ:̅ⲓⲃ ⲟⲩⲟϩ ⲉⲣⲉⲧⲉⲛⲉⲑⲁⲙⲓⲟ ϧⲉⲛ ⲡⲓⲉϩⲟⲟⲩ ⲉⲧⲟⲩⲛⲁⲉⲛ ⲡⲓⲭⲛⲁⲩ ⲉϩⲣⲏⲓ
ⲛⲟⲩⲉⲥⲱⲟⲩ ⲛⲁⲧⲁϭⲛⲓ ⲉⲁϥⲉⲣ ⲟⲩⲣⲟⲙⲡⲓ ⲉⲩϭⲗⲓⲗ ⲛϫⲟϥϫⲉϥ ⲙⲡϭⲟⲓⲥ
̅ⲕⲅ:̅ⲓⲅ ⲟⲩⲟϩ ⲡⲉϥϣⲟⲩϣⲱⲟⲩϣⲓ ⲣⲉⲙⲏⲧ ⲃ ⲛⲥⲉⲙⲓⲇⲁⲗⲓⲟⲛ ⲉϥⲟⲩⲟϣⲉⲙ ϧⲉⲛ
ⲟⲩⲛⲉϩ ⲉⲩϣⲟⲩϣⲱⲟⲩϣⲓ ⲙⲡϭⲟⲓⲥ ⲛⲥⲑⲟⲓ ⲛⲥⲑⲩⲛⲟⲩϥⲓ ⲙⲡϭⲟⲓⲥ ⲛⲉⲙ
ⲟⲩⲥⲡⲟⲛⲇⲏ ⲛⲧⲉϥ ⲡⲓⲧⲉⲣⲉ ⲇ ⲛⲧⲉ ⲡⲓϩⲓⲛ ⲛⲧⲉ ⲟⲩⲏⲣⲡ
̅ⲕⲅ:̅ⲓⲇ ⲛⲉⲙ ⲟⲩⲱⲓⲕ ⲟⲩⲟϩ ϩⲁⲛⲥⲟⲩⲟ ⲙⲃⲉⲣⲓ ⲉⲩⲫⲟⲣϫ ⲉⲩϫⲏϫ
ⲛⲛⲉⲧⲉⲛⲟⲩⲟⲙⲟⲩ ϣⲁ ⲉϧⲟⲩⲛ ⲉⲡⲁⲓⲉϩⲟⲟⲩ ⲫⲁⲓ ϣⲁⲧⲉⲧⲉⲛⲓⲛⲓ ⲛⲛⲓⲇⲱⲣⲟⲛ
ⲛⲧⲉ ⲡⲉⲧⲉⲛⲛⲟⲩϯ ⲉϧⲟⲩⲛ ⲛⲟⲩⲛⲟⲙⲓⲙⲟⲛ ⲛⲉⲛⲉϩ ϧⲉⲛ ⲛⲉⲧⲉⲛϫⲱⲟⲩ ⲛϧⲣⲏⲓ
ϧⲉⲛ ⲙⲁⲛϣⲱⲡⲓ ⲛⲓⲃⲉⲛ ⲛⲧⲱⲧⲉⲛ
̅ⲕⲅ:̅ⲓⲉ ⲟⲩⲟϩ ϭⲓⲏⲡⲓ ⲛⲱⲧⲉⲛ ⲓⲥϫⲉⲛ ⲫⲣⲁⲥϯ ⲛⲧⲉ ⲛⲓⲥⲁⲃⲃⲁⲧⲟⲛ ⲓⲥϫⲉⲛ
ⲡⲓⲉϩⲟⲟⲩ ⲉⲧⲉⲧⲉⲛⲛⲁⲓⲛⲓ ⲉϧⲟⲩⲛ ⲙⲡⲓⲭⲛⲁⲩ ⲛⲧⲉ ⲡⲓⲧⲁⲗⲟ ⲉⲡϣⲱⲓ
ⲉⲕⲉϭⲓⲏⲡⲓ ⲛⲍ ⲛⲁⲛⲍ ⲉⲩϫⲏⲕ ⲉⲃⲟⲗ
̅ⲕⲅ:̅ⲓⲋ ϣⲁ ⲫⲣⲁⲥϯ ⲛⲧⲉ ϯⲉⲃⲇⲟⲙⲁⲥ ⲛϧⲁⲏ ⲉⲣⲉⲧⲉⲛⲉϭⲓⲏⲡⲓ ⲛⲛ ⲛⲉϩⲟⲟⲩ
ⲟⲩⲟϩ ⲉⲣⲉⲧⲉⲛⲉⲓⲛⲓ ⲉϧⲟⲩⲛ ⲛⲟⲩϣⲟⲩϣⲱⲟⲩϣⲓ ⲙⲃⲉⲣⲓ ⲙⲡϭⲟⲓⲥ
̅ⲕⲅ:̅ⲓⲍ ⲉⲃⲟⲗ ϧⲉⲛ ⲡⲉⲧⲉⲛⲙⲁⲛϣⲱⲡⲓ ⲟⲩⲟϩ ⲉⲣⲉⲧⲉⲛⲉⲓⲛⲓ ⲛϩⲁⲛⲱⲓⲕ ⲛⲧⲁⲗⲟ
ⲉⲡϣⲱⲓ ⲱⲓⲕ ⲃ ⲉⲃⲟⲗ ϧⲉⲛ ⲣⲉⲙⲏⲧ ⲃ ⲉⲩⲉϣⲱⲡⲓ ⲛⲥⲉⲙⲓⲇⲁⲗⲓⲟⲛ
ⲉⲩⲉϫⲟϫⲟⲩ ⲉⲟⲩⲟⲛ ϣⲉⲙⲏⲣ ⲙⲙⲱⲟⲩ ⲛⲧⲉ ϩⲁⲛϣⲟⲣⲡ ⲛⲟⲩⲧⲁϩ ⲙⲡϭⲟⲓⲥ
̅ⲕⲅ:̅ⲓⲏ ⲟⲩⲟϩ ⲉⲣⲉⲧⲉⲛⲉⲓⲛⲓ ⲛϩⲣⲏⲓ ⲛⲉⲙ ⲛⲓⲱⲓⲕ ⲛⲍ ⲛϩⲓⲏⲃ ⲛⲁⲧⲁϭⲛⲓ
ⲉⲁⲩⲉⲣ ⲟⲩⲣⲟⲙⲡⲓ ⲛⲉⲙ ⲟⲩⲁⲓ ⲙⲙⲁⲥⲓ ⲉⲃⲟⲗ ϧⲉⲛ ϩⲁⲛⲉϩⲱⲟⲩ ⲛⲉⲙ ⲱⲓⲗⲓ ⲃ
ⲛⲁⲧⲁϭⲛⲓ ⲟⲩⲟϩ ⲉⲩϣⲱⲡⲓ ⲉⲩϭⲗⲓⲗ ⲛϫⲟϥϫⲉϥ ⲙⲡϭⲟⲓⲥ ⲟⲩⲟϩ
ⲛⲟⲩϣⲟⲩϣⲱⲟⲩϣⲓ ⲛⲉⲙ ⲛⲟⲩⲟⲩⲱⲧⲉⲛ ⲉⲃⲟⲗ ⲟⲩϣⲟⲩϣⲱⲟⲩϣⲓ ⲡⲉ ⲛⲥⲑⲟⲓ
ⲛⲥⲑⲩⲛⲟⲩϥⲓ ⲙⲡϭⲟⲓⲥ
̅ⲕⲅ:̅ⲓⲑ ⲟⲩⲟϩ ⲉⲣⲉⲧⲉⲛⲉⲑⲁⲙⲓⲟ ⲛⲟⲩⲃⲁⲙⲡⲓ ⲉⲑⲃⲉ ⲫⲛⲟⲃⲓ ⲛⲉⲙ ϩⲓⲏⲃ ⲃ
ⲉⲁⲩⲉⲣⲟⲩⲣⲟⲙⲡⲓ ⲉⲩϣⲟⲩϣⲱⲟⲩϣⲓ ⲛⲛⲟϩⲉⲙ ⲛⲉⲙ ⲟⲩⲱⲓⲕ ⲛⲧⲉ ⲛⲓϣⲟⲣⲡ
ⲛⲟⲩⲧⲁϩ
̅ⲕⲅ:̅ⲕ ⲟⲩⲟϩ ⲉϥⲉⲓⲛⲓ ⲉϩⲣⲏⲓ ⲙⲙⲱⲟⲩ ⲛϫⲉ ⲡⲓⲟⲩⲏⲃ ⲛⲉⲙ ⲛⲓⲱⲓⲕ ⲛⲧⲉ
ⲛⲓϣⲟⲣⲡ ⲛⲟⲩⲧⲁϩ ⲛⲟⲩⲧⲁⲗⲟ ⲉⲡϣⲱⲓ ⲙⲡⲉⲙⲑⲟ ⲙⲡϭⲟⲓⲥ ⲛⲉⲙ ⲡⲓϩⲓⲏⲃ ⲃ
ⲉⲩⲉϣⲱⲡⲓ ⲉⲩⲟⲩⲁⲃ ⲙⲡϭⲟⲓⲥ ⲟⲩⲟϩ ⲡⲓⲟⲩⲏⲃ ⲉⲧⲛⲁⲉⲣⲡⲣⲟⲥⲫⲉⲣⲓⲛ ⲙⲙⲱⲟⲩ
ⲉⲩⲉϣⲱⲡⲓ ⲛⲁϥ
̅ⲕⲅ:̅ⲕⲁ ⲟⲩⲟϩ ⲉⲣⲉⲧⲉⲛⲉⲙⲟⲩϯ ⲉⲡⲁⲓⲉϩⲟⲟⲩ ⲫⲁⲓ ϫⲉ ⲡⲉⲧⲟⲩⲙⲟⲩϯ ⲉⲣⲟϥ
ⲉϥⲉϣⲱⲡⲓ ⲛⲱⲧⲉⲛ ⲉϥⲟⲩⲁⲃ ϩⲱⲃ ⲛⲓⲃⲉⲛ ⲛϣⲉⲙϣⲓ ⲛⲛⲉⲧⲉⲛⲉⲛⲁⲓⲧⲟⲩ ⲛϧⲏⲧϥ
ⲛⲟⲩⲛⲟⲙⲓⲙⲟⲛ ⲛⲉⲛⲉϩ ϧⲉⲛ ⲛⲉⲧⲉⲛϫⲱⲟⲩ ⲉϩⲣⲏⲓ ϧⲉⲛ ⲙⲁⲛϣⲱⲡⲓ ⲛⲓⲃⲉⲛ
ⲛⲧⲱⲧⲉⲛ
̅ⲕⲅ:̅ⲕⲃ ⲟⲩⲟϩ ⲉⲣⲉⲧⲉⲛⲛⲁⲱⲥϧ ⲙⲡⲓⲱⲥϧ ⲛⲧⲉ ⲡⲉⲧⲉⲛⲕⲁϩⲓ ⲛⲛⲉⲧⲉⲛϫⲱⲕ
ⲙⲡⲓⲥⲱϫⲡ ⲙⲡⲱⲥϧ ⲛⲧⲉ ⲡⲉⲧⲉⲛⲓⲟϩⲓ ϧⲉⲛ ⲡϫⲓⲛⲧⲉⲕⲱⲥϧ ⲟⲩⲟϩ ⲛⲏ
ⲉⲧⲛⲁϩⲉⲓ ⲛⲧⲉ ⲡⲉⲕⲱⲥϧ ⲛⲛⲉⲕⲥⲟⲕⲟⲩ ⲉⲕⲉⲥⲟϫⲡⲟⲩ ⲙⲡⲓϩⲏⲕⲓ ⲛⲉⲙ
ⲡⲓϣⲉⲙⲙⲟ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲕⲅ:̅ⲕⲅ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕⲅ:̅ⲕⲇ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲉⲕϫⲱ ⲙⲙⲟⲥ ϫⲉ ⲛϧⲣⲏⲓ ϧⲉⲛ
ⲡⲓⲁⲃⲟⲧ ⲙⲙⲁϩ ⲍ ⲛⲥⲟⲩⲁⲓ ⲙⲡⲓⲁⲃⲟⲧ ⲉϥⲉϣⲱⲡⲓ ⲛⲱⲧⲉⲛ ⲟⲩⲙⲧⲟⲛ
ⲟⲩϫⲓⲛⲉⲣⲫⲙⲉⲩⲓ ⲛⲧⲉ ϩⲁⲛⲥⲁⲗⲡⲓⲅⲅⲟⲥ ⲉⲩⲉⲙⲟⲩϯ ⲉⲣⲟϥ ϫⲉ ϥⲟⲩⲁⲃ
ⲙⲡϭⲟⲓⲥ
̅ⲕⲅ:̅ⲕⲉ ϩⲱⲃ ⲛⲓⲃⲉⲛ ⲛϣⲉⲙϣⲓ ⲛⲛⲉⲧⲉⲛⲑⲁⲙⲓⲱⲟⲩ ⲟⲩⲟϩ ⲉⲣⲉⲧⲉⲛⲉⲓⲛⲓ ⲉϧⲟⲩⲛ
ⲛϩⲁⲛϭⲗⲓⲗ ⲛϫⲟϥϫⲉϥ ⲙⲡϭⲟⲓⲥ
̅ⲕⲅ:̅ⲕⲋ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕⲅ:̅ⲕⲍ ϫⲉ ⲥⲟⲩⲓ ⲙⲡⲓⲁⲃⲟⲧ ⲙⲙⲁϩ ⲍ ⲟⲩⲉϩⲟⲟⲩ ⲛⲧⲱⲃϩ ⲉⲑⲃⲉ ⲟⲩⲭⲱ
ⲉⲃⲟⲗ ⲉϥⲉϣⲱⲡⲓ ⲉⲩⲙⲟⲩϯ ⲉⲣⲟϥ ⲛⲱⲧⲉⲛ ϫⲉ ϥⲟⲩⲁⲃ ⲟⲩⲟϩ ⲉⲣⲉⲧⲉⲛⲉⲑⲉⲃⲓⲟ
ⲛⲛⲉⲧⲉⲛⲯⲩⲭⲏ ⲟⲩⲟϩ ⲉⲣⲉⲧⲉⲛⲉⲓⲛⲓ ⲉϧⲟⲩⲛ ⲛϩⲁⲛϭⲗⲓⲗ ⲛϫⲟϥϫⲉϥ ⲙⲡϭⲟⲓⲥ
̅ⲕⲅ:̅ⲕⲏ ϩⲱⲃ ⲛⲓⲃⲉⲛ ⲛⲛⲉⲧⲉⲛⲁⲓⲧⲟⲩ ⲛϧⲏⲧϥ ϧⲉⲛ ⲡⲁⲓⲉϩⲟⲟⲩ ⲫⲁⲓ ⲟⲩⲉϩⲟⲟⲩ
ⲛⲧⲱⲃϩ ⲉⲑⲃⲉ ⲟⲩⲭⲱ ⲉⲃⲟⲗ ⲛⲱⲧⲉⲛ ⲡⲉ ⲉⲧⲱⲃϩ ⲉⲑⲃⲉ ⲑⲏⲛⲟⲩ ⲙⲡⲉⲙⲑⲟ
ⲙⲡϭⲟⲓⲥ ⲡⲉⲧⲉⲛⲛⲟⲩϯ
̅ⲕⲅ:̅ⲕⲑ ⲯⲩⲭⲏ ⲛⲓⲃⲉⲛ ⲉⲧⲉ ⲛⲥⲛⲁⲑⲉⲃⲓⲟⲥ ⲁⲛ ϧⲉⲛ ⲡⲁⲓⲉϩⲟⲟⲩ ⲫⲁⲓ ⲉⲥⲉϥⲱϯ
ⲉⲃⲟⲗ ϧⲉⲛ ⲡⲉⲥⲗⲁⲟⲥ
̅ⲕⲅ:̅ⲗ ⲟⲩⲟϩ ⲯⲩⲭⲏ ⲛⲓⲃⲉⲛ ⲉⲧⲛⲁⲓⲣⲓ ⲛⲟⲩϩⲱⲃ ϧⲉⲛ ⲡⲁⲓⲉϩⲟⲟⲩ ⲫⲁⲓ
ⲉⲥⲉⲧⲁⲕⲟ ⲛϫⲉ ϯⲯⲩⲭⲏ ⲉⲧⲉⲙⲙⲁⲩ ⲉⲃⲟⲗ ϧⲉⲛ ⲡⲉⲥⲗⲁⲟⲥ
̅ⲕⲅ:̅ⲗⲁ ϩⲱⲃ ⲛⲓⲃⲉⲛ ⲛⲛⲉⲧⲉⲛⲑⲁⲙⲓⲱⲟⲩ ⲛⲟⲩⲙⲟⲙⲓⲙⲟⲛ ⲛⲉⲛⲉϩ ϧⲉⲛ
ⲛⲉⲧⲉⲛϫⲱⲟⲩ ⲛϧⲣⲏⲓ ϧⲉⲛ ⲙⲁⲛϣⲱⲡⲓ ⲛⲓⲃⲉⲛ ⲛⲧⲱⲧⲉⲛ
̅ⲕⲅ:̅ⲗⲃ ⲉⲩⲉϣⲱⲡⲓ ⲛⲱⲧⲉⲛ ⲛϩⲁⲛⲥⲁⲃⲃⲁⲧⲟⲛ ⲛⲧⲉ ϩⲁⲛⲥⲁⲃⲃⲁⲧⲟⲛ ⲟⲩⲟϩ
ⲉⲣⲉⲧⲉⲛⲉⲑⲉⲃⲓⲟ ⲛⲛⲉⲧⲉⲛⲯⲩⲭⲏ ⲓⲥϫⲉⲛ ⲥⲟⲩ ⲑ ⲙⲡⲓⲁⲃⲟⲧ ⲓⲥϫⲉⲛ
ϩⲁⲛⲁⲣⲟⲩϩⲓ ⲉⲣⲉⲧⲉⲛⲉⲉⲣⲥⲁⲃⲃⲁⲧⲓⲍⲓⲛ ⲛⲛⲉⲧⲉⲛⲥⲁⲃⲃⲁⲧⲟⲛ
̅ⲕⲅ:̅ⲗⲅ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕⲅ:̅ⲗⲇ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲉⲕϫⲱ ⲙⲙⲟⲥ ϫⲉ ⲛϩⲣⲏⲓ ϧⲉⲛ
ⲡⲓⲁⲃⲟⲧ ⲙⲙⲁϩ ⲍ ⲛⲥⲟⲩ ⲓⲉ ⲫⲁⲓ ⲟⲩϣⲁⲓ ⲡⲉ ⲛⲧⲉ ϩⲁⲛⲥⲕⲩⲛⲏ ⲛⲍ
ⲛⲉϩⲟⲟⲩ ⲙⲡϭⲟⲓⲥ
̅ⲕⲅ:̅ⲗⲉ ⲟⲩⲟϩ ⲡⲓⲉϩⲟⲟⲩ ⲛϩⲟⲩⲓⲧ ⲉⲩⲉⲙⲟⲩϯ ⲉⲣⲟϥ ϫⲉ ϥⲟⲩⲁⲃ
ⲛⲛⲉⲧⲉⲛⲑⲁⲙⲓⲉ ϩⲱⲃ ⲛⲓⲃⲉⲛ ⲛϣⲉⲙϣⲓ
̅ⲕⲅ:̅ⲗⲋ ⲍ ⲛⲉϩⲟⲟⲩ ⲉⲣⲉⲧⲉⲛⲉⲓⲛⲓ ⲉϧⲟⲩⲛ ⲛϩⲁⲛϭⲗⲓⲗ ⲛϫⲟϥϫⲉϥ ⲙⲡϭⲟⲓⲥ
ⲟⲩⲟϩ ⲡⲓⲉϩⲟⲟⲩ ⲙⲙⲁϩⲏ ⲉϥⲉϣⲱⲡⲓ ⲉⲩⲙⲟⲩϯ ⲉⲣⲟϥ ⲛⲱⲧⲉⲛ ϫⲉ ϥⲟⲩⲁⲃ
ⲟⲩⲟϩ ⲉⲣⲉⲧⲉⲛⲉⲓⲛⲓ ⲉϧⲟⲩⲛ ⲛϩⲁⲛϭⲗⲓⲗ ⲛϫⲟϥϫⲉϥ ⲙⲡϭⲟⲓⲥ ⲟⲩⲙⲱⲓⲧ ⲉⲃⲟⲗ
ⲡⲉ ⲛⲛⲉⲧⲉⲛⲑⲁⲙⲓⲉ ϩⲱⲃ ⲛⲓⲃⲉⲛ ⲛϣⲉⲙϣⲓ
̅ⲕⲅ:̅ⲗⲍ ⲛⲁⲓ ⲛⲉ ⲛⲓϣⲁⲓ ⲛⲧⲉ ⲡϭⲟⲓⲥ ⲛⲏ ⲉⲧⲉⲧⲉⲛⲛⲁⲙⲟⲩϯ ⲉⲣⲱⲟⲩ ϧⲉⲛ
ⲟⲩⲙⲟⲩϯ ϫⲉ ⲥⲉⲟⲩⲁⲃ ϩⲱⲥⲇⲉ ⲉⲓⲛⲓ ⲉϧⲟⲩⲛ ⲛⲟⲩⲟⲩⲧⲁϩ ⲉϥϣⲏⲡ ⲙⲡϭⲟⲓⲥ
ϩⲁⲛϭⲗⲓⲗ ⲛⲉⲙ ⲛⲟⲩϣⲟⲩϣⲱⲟⲩϣⲓ ⲛⲉⲙ ⲛⲓⲟⲩⲱⲧⲉⲛ ⲉⲃⲟⲗ ⲛⲏ ⲉⲧⲉ ⲙⲙⲏⲛⲓ
ⲙⲙⲏⲛⲓ
̅ⲕⲅ:̅ⲗⲏ ⲥⲁⲃⲟⲗ ⲛⲛⲓⲥⲁⲃⲃⲁⲧⲟⲛ ⲛⲧⲉ ⲡϭⲟⲓⲥ ⲛⲉⲙ ⲥⲁⲃⲟⲗ ⲛⲛⲉⲧⲉⲛⲧⲁⲓⲟ ⲛⲉⲙ
ⲥⲁⲃⲟⲗ ⲛⲛⲉⲧⲉⲛⲉⲩⲭⲏ ⲧⲏⲣⲟⲩ ⲛⲉⲙ ⲥⲁⲃⲟⲗ ⲛⲛⲉⲧⲉⲛⲱϣ ⲛⲏ
ⲉⲧⲉⲧⲉⲛⲛⲁⲧⲏⲓⲧⲟⲩ ⲙⲡϭⲟⲓⲥ
̅ⲕⲅ:̅ⲗⲑ ⲟⲩⲟϩ ϧⲉⲛ ⲡⲓⲉϩⲟⲟⲩ ⲛⲥⲟⲩ ⲓⲉ ⲙⲡⲓⲁⲃⲟⲧ ⲙⲙⲁϩ ⲍ ⲉϣⲱⲡ
ⲁⲣⲉⲧⲉⲛϣⲁⲛϫⲱⲕ ⲉⲃⲟⲗ ⲛⲛⲓⲟⲩⲧⲁϩ ⲛⲧⲉ ⲡⲕⲁϩⲓ ⲁⲣⲓϣⲁⲓ ⲙⲡϭⲟⲓⲥ ⲛⲍ
ⲛⲉϩⲟⲟⲩ ⲡⲓⲉϩⲟⲟⲩ ⲛϩⲟⲩⲓⲧ ⲟⲩⲙⲧⲟⲛ ⲡⲉ ⲟⲩⲟϩ ⲡⲓⲉϩⲟⲟⲩ ⲙⲙⲁϩⲏ
ⲟⲩⲙⲧⲟⲛ ⲡⲉ
̅ⲕⲅ:̅ⲙ ⲟⲩⲟϩ ⲉⲣⲉⲧⲉⲛⲉϭⲓ ⲛⲱⲧⲉⲛ ⲙⲡⲓⲉϩⲟⲟⲩ ⲛϩⲟⲩⲓⲧ ⲛⲟⲩⲟⲩⲧⲁϩ
ⲉϥⲥⲁⲓⲱⲟⲩ ⲛⲧⲉ ⲟⲩϣⲉ ⲛⲉⲙ ⲟⲩⲙⲉⲧⲥⲁⲓⲉ ⲛⲧⲉ ϩⲁⲛⲃⲉⲛⲓ ⲛⲉⲙ ϩⲁⲛϫⲁⲗ
ⲛⲗⲁϫⲱⲃⲓ ⲛⲧⲉ ⲟⲩϣⲉ ⲛⲉⲙ ϩⲁⲛϫⲁⲗ ⲛⲧⲉ ϩⲁⲛⲑⲱⲣⲓ ⲛⲉⲙ ϩⲁⲛϣⲉ
ⲛϣⲓⲧⲥ ⲉⲃⲟⲗ ϧⲉⲛ ⲟⲩⲙⲟⲩⲛⲥⲱⲣⲉⲙ ⲟⲩⲟϩ ⲉⲣⲉⲧⲉⲛⲉⲟⲩⲛⲟϥ ⲙⲡⲉⲙⲑⲟ ⲙⲡϭⲟⲓⲥ
ⲡⲉⲧⲉⲛⲛⲟⲩϯ ⲛϯⲍ ⲛⲉϩⲟⲟⲩ ⲛⲧⲉ ϯⲣⲟⲙⲡⲓ
̅ⲕⲅ:̅ⲙⲁ ⲟⲩⲛⲟⲙⲓⲙⲟⲛ ⲛⲉⲛⲉϩ ϧⲉⲛ ⲛⲉⲧⲉⲛϫⲱⲟⲩ ϧⲉⲛ ⲡⲓⲁⲃⲟⲧ ⲙⲙⲁϩ ⲍ
ⲉⲣⲉⲧⲉⲛⲉⲉⲣϣⲁⲓ ⲙⲙⲟϥ
̅ⲕⲅ:̅ⲙⲃ ⲉⲣⲉⲧⲉⲛⲉϣⲱⲡⲓ ϧⲉⲛ ϩⲁⲛⲥⲕⲩⲛⲏ ⲛⲍ ⲛⲉϩⲟⲟⲩ ⲟⲩⲟϩ ⲣⲉⲙⲛϯⲙⲓ
ⲛⲓⲃⲉⲛ ϧⲉⲛ ⲡⲓⲥⲣⲁⲏⲗ ⲉⲩⲉϣⲱⲡⲓ ϧⲉⲛ ϩⲁⲛⲥⲕⲩⲛⲏ
̅ⲕⲅ:̅ⲙⲅ ϩⲟⲡⲱⲥ ⲛⲧⲟⲩⲛⲁⲩ ⲛϫⲉ ⲛⲉⲧⲉⲛϫⲱⲟⲩ ϫⲉ ⲁⲓⲑⲣⲉ ⲛⲉⲛϣⲏⲣⲓ
ⲙⲡⲓⲥⲣⲁⲏⲗ ϣⲱⲡⲓ ϧⲉⲛ ϩⲁⲛⲥⲕⲩⲛⲏ ⲉⲓⲛⲁⲉⲛⲟⲩ ⲉⲃⲟⲗ ϧⲉⲛ ⲡⲕⲁϩⲓ ⲛⲭⲏⲙⲓ
ϫⲉ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲕⲅ:̅ⲙⲇ ⲟⲩⲟϩ ⲁ ⲙⲱⲩⲥⲏⲥ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲛⲛⲓϣⲁⲓ ⲛⲧⲉ
ⲡϭⲟⲓⲥ
̅ⲕⲇ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕⲇ:̅ⲃ ϫⲉ ϩⲟⲛϩⲉⲛ ⲉⲧⲟⲧⲟⲩ ⲛⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲟϩ ⲙⲣⲟⲩϭⲓ ⲛⲁⲕ
ⲛⲟⲩⲛⲉϩ ⲉⲃⲟⲗ ϧⲉⲛ ϩⲁⲛϫⲱⲓⲧ ⲉϥⲧⲟⲩⲃⲏⲟⲩⲧ ⲉϥⲧⲉⲛⲛⲏⲟⲩⲧ ⲉⲩⲟⲩⲱⲓⲛⲓ
ⲉⲧⲉⲙ ⲙϩⲟ ⲛⲟⲩϧⲏⲃⲥ
̅ⲕⲇ:̅ⲅ ⲥⲁⲃⲟⲗ ⲙⲡⲓⲕⲁⲧⲁⲡⲉⲧⲁⲥⲙⲁ ⲛⲥⲏⲟⲩ ⲛⲓⲃⲉⲛ ϧⲉⲛ ϯⲥⲕⲩⲛⲏ ⲛⲧⲉ
ϯⲙⲉⲧⲙⲉⲑⲣⲉ ⲟⲩⲟϩ ⲉⲩⲉⲧⲉⲙⲙⲟϥ ⲛϫⲉ ⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲓⲥϫⲉⲛ
ⲡⲓⲛⲁⲩ ⲛⲧⲉ ϩⲁⲛⲁⲣⲟⲩϩⲓ ϣⲁ ⲡⲓⲛⲁⲩ ⲛⲧⲉ ϩⲁⲛⲁⲧⲟⲟⲩⲓ ⲙⲡⲉⲙⲑⲟ
ⲙⲡϭⲟⲓⲥ ⲉϥⲙⲏⲛ ⲛⲟⲩⲛⲟⲙⲓⲙⲟⲛ ⲛⲉⲛⲉϩ ϧⲉⲛ ⲛⲉⲧⲉⲛϫⲱⲟⲩ
̅ⲕⲇ:̅ⲇ ⲉϫⲉⲛ ϯⲗⲩⲭⲛⲓⲁ ⲉⲧⲧⲟⲩⲃⲏⲟⲩⲧ ⲉⲣⲉⲧⲉⲛⲉⲧⲉⲙ ⲙϩⲟ ⲛⲛⲓϧⲏⲃⲥ
ⲙⲡⲉⲙⲑⲟ ⲙⲡϭⲟⲓⲥ ϣⲁ ⲡⲓⲛⲁⲩ ⲛⲧⲉ ϩⲁⲛⲁⲧⲟⲟⲩⲓ
̅ⲕⲇ:̅ⲉ ⲟⲩⲟϩ ⲉⲣⲉⲧⲉⲛⲉϭⲓ ⲛⲟⲩⲥⲉⲙⲓⲇⲁⲗⲓⲟⲛ ⲉⲣⲉⲧⲉⲛⲉⲑⲁⲙⲓⲟϥ ⲛⲓⲃ ⲛⲱⲓⲕ ⲉⲣⲉ
ⲫⲟⲩⲁⲓ ⲫⲟⲩⲁⲓ ⲛⲛⲓⲱⲓⲕ ⲉⲟⲩⲟⲛ ϣⲓ ⲃ ⲛⲣⲉⲙⲏⲧ ⲛϧⲏⲧϥ
̅ⲕⲇ:̣̅ⲋ ⲟⲩⲟϩ ⲉⲣⲉⲧⲉⲛⲉⲧⲁⲗⲱⲟⲩ ⲉⲡϣⲱⲓ ⲛϫⲓⲛⲧⲁⲗⲟ ⲃ ̣̅ⲋ ⲛⲱⲓⲕ ⲉϯⲟⲩⲓ
ⲛⲧⲟⲓ ⲉϫⲉⲛ ϯⲧⲣⲁⲡⲉⲍⲁ ⲉⲧⲧⲟⲩⲃⲏⲟⲩⲧ ⲙⲡⲉⲙⲑⲟ ⲙⲡϭⲟⲓⲥ
̅ⲕⲇ:̅ⲍ ⲟⲩⲟϩ ⲉϥⲉⲧⲁⲗⲟ ⲉϩⲣⲏⲓ ⲉϫⲉⲛ ⲡⲓⲑⲉⲙⲁ ⲛⲟⲩⲗⲓⲃⲁⲛⲟⲥ ⲉⲧⲧⲟⲩⲃⲏⲟⲩⲧ
ⲛⲉⲙ ⲟⲩϩⲙⲟⲩ ⲟⲩⲟϩ ⲉⲩⲉϣⲱⲡⲓ ⲛϫⲉ ⲛⲓⲱⲓⲕ ⲉⲩⲭⲏ ⲉϧⲣⲏⲓ ⲉⲡϫⲓⲛⲉⲣⲫⲙⲉⲩⲓ
ⲙⲡϭⲟⲓⲥ
̅ⲕⲇ:̅ⲏ ⲙⲡⲓⲉϩⲟⲟⲩ ⲛⲧⲉ ⲛⲓⲥⲁⲃⲃⲁⲧⲟⲛ ⲉⲣⲉⲧⲉⲛⲉⲭⲁⲩ ⲉϧⲣⲏⲓ ⲙⲡⲉⲙⲑⲟ ⲙⲡϭⲟⲓⲥ
ⲛⲥⲏⲟⲩ ⲛⲓⲃⲉⲛ ⲉⲧⲟⲧⲟⲩ ⲛⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲛⲟⲩⲇⲓⲁⲑⲏⲕⲏ ⲛⲉⲛⲉϩ
̅ⲕⲇ:̅ⲑ ⲟⲩⲟϩ ⲉϥⲉϣⲱⲡⲓ ⲛⲁⲁⲣⲱⲛ ⲛⲉⲙ ⲛⲉϥϣⲏⲣⲓ ⲟⲩⲟϩ ⲉⲩⲉⲟⲩⲟⲙϥ ϧⲉⲛ
ⲟⲩⲙⲁ ⲉϥⲟⲩⲁⲃ ⲛⲏ ⲉⲑⲟⲩⲁⲃ ⲅⲁⲣ ⲛⲧⲉ ⲛⲏ ⲉⲑⲟⲩⲁⲃ ⲛⲉ ⲫⲁⲓ ⲅⲁⲣ ϥϣⲟⲡ
ⲛⲁϥ ⲉϥⲟⲩⲁⲃ ⲉⲃⲟⲗ ϧⲉⲛ ⲛⲏ ⲉⲧⲟⲩϣⲱⲧ ⲙⲙⲱⲟⲩ ⲛϣⲟⲩϣⲱⲟⲩϣⲓ ⲙⲡϭⲟⲓⲥ
ⲛⲟⲩⲛⲟⲙⲓⲙⲟⲛ ⲛⲉⲛⲉϩ
̅ⲕⲇ:̅ⲓ ⲟⲩⲟϩ ⲁϥⲓ ⲉⲃⲟⲗ ⲛϫⲉ ⲡϣⲏⲣⲓ ⲛⲟⲩⲥϩⲓⲙⲓ ⲛⲓⲥⲣⲁⲏⲗⲓⲧⲓⲥ ⲟⲩⲟϩ ⲫⲁⲓ
ⲛⲉ ⲟⲩϣⲏⲣⲓ ⲡⲉ ⲛⲧⲉ ⲟⲩⲣⲉⲙⲛⲭⲏⲙⲓ ϧⲉⲛ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲟϩ
ⲁϥⲙⲗⲁϧ ϧⲉⲛ ϯⲡⲁⲣⲉⲙⲃⲟⲗⲏ ⲛϫⲉ ⲡⲓ ⲉⲃⲟⲗ ϧⲉⲛ ϯⲓⲥⲣⲁⲏⲗⲓⲧⲓⲥ ⲛⲉⲙ
ⲟⲩⲣⲱⲙⲓ ⲛⲓⲥⲣⲁⲏⲗⲓⲧⲏⲥ
̅ⲕⲇ:̅ⲓⲁ ⲟⲩⲟϩ ⲉⲧⲁϥⲙⲟⲩϯ ⲉⲡⲓⲣⲁⲛ ⲛϫⲉ ⲡϣⲏⲣⲓ ⲛϯⲓⲥⲣⲁⲏⲗⲓⲧⲏⲥ ⲁϥⲥⲁϩⲟⲩⲓ
ⲟⲩⲟϩ ⲁⲩⲉⲛϥ ϩⲁ ⲙⲱⲩⲥⲏⲥ ⲟⲩⲟϩ ⲫⲣⲁⲛ ⲛⲧⲉϥⲙⲁⲩ ⲡⲉ ⲥⲁⲗⲱⲙⲓⲑⲓ
ⲧϣⲉⲣⲓ ⲛⲇⲁⲙⲃⲣⲓ ⲉⲃⲟⲗ ϧⲉⲛ ⲧⲫⲩⲗⲏ ⲛⲇⲁⲛ
̅ⲕⲇ:̅ⲓⲃ ⲟⲩⲟϩ ⲁⲩϩⲓⲧϥ ⲉϧⲣⲏⲓ ⲉⲡⲓϣⲧⲉⲕⲟ ϫⲉ ⲛⲧⲟⲩϯϩⲁⲡ ⲉⲣⲟϥ ⲉⲃⲟⲗ
ϩⲓⲧⲉⲛ ⲡⲓⲟⲩⲁϩⲥⲁϩⲛⲓ ⲛⲧⲉ ⲡϭⲟⲓⲥ
̅ⲕⲇ:̅ⲓⲅ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕⲇ:̅ⲓⲇ ϫⲉ ⲁⲛⲓⲟⲩⲓ ⲉⲃⲟⲗ ⲙⲫⲏ ⲉⲧⲁϥⲥⲁϩⲟⲩⲓ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ ⲟⲩⲟϩ
ⲟⲩⲟⲛ ⲛⲓⲃⲉⲛ ⲉⲧⲁⲩⲥⲱⲧⲉⲙ ⲉⲩⲉⲧⲁⲗⲟ ⲛⲛⲟⲩϫⲓϫ ⲉϩⲣⲏⲓ ⲉϫⲉⲛ ⲧⲉϥⲁⲫⲉ
ⲟⲩⲟϩ ⲙⲁⲣⲟⲩϩⲓⲱⲛⲓ ⲉϫⲱϥ ⲛϫⲉ ϯⲥⲩⲛⲁⲅⲱⲅⲏ ⲧⲏⲣⲥ
̅ⲕⲇ:̅ⲓⲉ ⲟⲩⲟϩ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲉⲕϫⲱ ⲙⲙⲟⲥ ϫⲉ ⲫⲣⲱⲙⲓ
ⲫⲣⲱⲙⲓ ⲫⲏ ⲉⲧⲁϥⲥⲁϩⲟⲩⲓ ⲉⲡⲉϥⲛⲟⲩϯ ⲉϥⲉϭⲓ ⲛⲟⲩⲛⲟⲃⲓ
̅ⲕⲇ:̅ⲓⲋ ⲉϥϫⲱ ⲇⲉ ⲙⲫⲣⲁⲛ ⲙⲡϭⲟⲓⲥ ϧⲉⲛ ⲟⲩⲙⲟⲩ ⲙⲁⲣⲟⲩϧⲟⲑⲃⲉϥ ϧⲉⲛ
ϩⲁⲛⲱⲛⲓ ⲙⲁⲣⲟⲩϩⲓⲱⲛⲓ ⲉⲣⲟϥ ⲛϫⲉ ϯⲥⲩⲛⲁⲅⲱⲅⲏ ⲧⲏⲣⲥ ⲛⲧⲉ ⲛⲉⲛϣⲏⲣⲓ
ⲙⲡⲓⲥⲣⲁⲏⲗ ⲓⲧⲉ ⲟⲩϣⲉⲙⲙⲟ ⲓⲧⲉ ⲟⲩⲣⲉⲙⲛϯⲙⲓ ϧⲉⲛ ⲡϫⲓⲛⲑⲣⲉϥϫⲉ ⲟⲩⲁ
ⲉⲫⲣⲁⲛ ⲙⲡϭⲟⲓⲥ ⲙⲁⲣⲉϥⲙⲟⲩ
̅ⲕⲇ:̅ⲓⲍ ⲟⲩⲟϩ ⲫⲣⲱⲙⲓ ⲫⲣⲱⲙⲓ ⲉⲧⲛⲁϯ ⲛⲟⲩⲉⲣϧⲟⲧ ⲛⲟⲩⲯⲩⲭⲏ ⲧⲏⲣⲥ ⲛⲧⲉ
ⲟⲩⲣⲱⲙⲓ ⲟⲩⲟϩ ⲛⲧⲉϥⲙⲟⲩ ϧⲉⲛ ⲟⲩⲙⲟⲩ ⲙⲁⲣⲉϥⲙⲟⲩ
̅ⲕⲇ:̅ⲓⲏ ⲟⲩⲟϩ ⲫⲏ ⲉⲧⲛⲁϯ ⲛⲟⲩⲉⲣϧⲟⲧ ⲛⲟⲩⲧⲉⲃⲛⲏ ⲟⲩⲟϩ ⲛⲧⲉϥⲙⲟⲩ
ⲙⲁⲣⲟⲩϯ ⲛⲟⲩⲯⲩⲭⲏ ϧⲁ ⲟⲩⲯⲩⲭⲏ
̅ⲕⲇ:̅ⲓⲑ ⲟⲩⲟϩ ⲉϣⲱⲡ ⲁⲣⲉϣⲁⲛ ⲟⲩⲁⲓ ϯ ⲛⲟⲩⲁϭⲛⲓ ⲙⲡⲉϥϣⲫⲏⲣ ⲙⲫⲣⲏϯ
ⲉⲧⲁϥⲁⲓⲥ ⲡⲁⲓⲣⲏϯ ⲉⲩⲉⲓⲣⲓ ⲛⲧⲉⲥϣⲉⲃⲓⲱ
̅ⲕⲇ:̅ⲕ ⲟⲩϧⲟⲙϧⲉⲙ ϧⲁ ⲟⲩϧⲟⲙϧⲉⲙ ⲟⲩⲃⲁⲗ ϧⲁ ⲟⲩⲃⲁⲗ ⲟⲩⲛⲁϫϩⲓ ϧⲁ
ⲟⲩⲛⲁϫϩⲓ ⲕⲁⲧⲁ ⲫⲣⲏϯ ⲉⲧⲉϥⲛⲁϯ ⲛⲟⲩⲁϭⲛⲓ ⲛⲟⲩⲣⲱⲙⲓ ⲡⲁⲓⲣⲏϯ ⲉⲩⲉϯ
ⲛⲁϥ
̅ⲕⲇ:̅ⲕⲁ ⲟⲩⲟϩ ⲫⲏ ⲉⲧⲛⲁϯ ⲛⲟⲩⲉⲣϧⲟⲧ ⲛⲟⲩⲣⲱⲙⲓ ⲟⲩⲟϩ ⲛⲧⲉϥⲙⲟⲩ ϧⲉⲛ
ⲟⲩⲙⲟⲩ ⲙⲁⲣⲟⲩϧⲟⲑⲃⲉϥ
̅ⲕⲇ:̅ⲕⲃ ⲟⲩⲑⲙⲁⲓⲟ ⲛⲟⲩⲱⲧ ⲉϥⲉϣⲱⲡⲓ ⲙⲡⲓⲣⲉⲙⲛϯⲙⲓ ⲛⲉⲙ ⲡⲓϣⲉⲙⲙⲟ ϫⲉ
ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲕⲇ:̅ⲕⲅ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ
ⲟⲩⲟϩ ⲁⲩⲓⲛⲓ ⲉⲃⲟⲗ ⲙⲫⲏ ⲉⲧⲁϥⲥⲁϩⲟⲩⲓ ⲥⲁⲃⲟⲗ ⲛϯⲡⲁⲣⲉⲙⲃⲟⲗⲏ ⲟⲩⲟϩ
ⲁⲩⲥⲉⲧ ⲱⲛⲓ ⲉϫⲱϥ ϧⲉⲛ ϩⲁⲛⲱⲛⲓ ⲛϫⲉ ϯⲥⲩⲛⲁⲅⲱⲅⲏ ⲧⲏⲣⲥ ⲟⲩⲟϩ ⲁ
ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲓⲣⲓ ⲕⲁⲧⲁ ⲫⲣⲏϯ ⲉⲧⲁ ⲡϭⲟⲓⲥ ⲟⲩⲁϩⲥⲁϩⲛⲓ
ⲙⲙⲱⲩⲥⲏⲥ
̅ⲕⲉ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ϩⲓ ⲡⲧⲱⲟⲩ ⲛⲥⲓⲛⲁ ⲉϥϫⲱ
ⲙⲙⲟⲥ
̅ⲕⲉ:̅ⲃ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲟϩ ⲉⲕⲉϫⲟⲥ ⲛⲱⲟⲩ ϫⲉ
ⲉϣⲱⲡ ⲁⲣⲉⲧⲉⲛϣⲁⲛϣⲉⲛⲱⲧⲉⲛ ⲉϧⲟⲩⲛ ⲉⲡⲓⲕⲁϩⲓ ⲫⲏ ⲁⲛⲟⲕ ⲉϯⲛⲁⲧⲏⲓϥ
ⲛⲱⲧⲉⲛ ⲟⲩⲟϩ ⲉϥⲉⲉⲣⲉⲙⲧⲟⲛ ⲛϫⲉ ⲡⲓⲕⲁϩⲓ ⲫⲏ ⲁⲛⲟⲕ ⲉϯⲛⲁⲧⲏⲓϥ ⲛⲱⲧⲉⲛ
ϩⲁⲛⲥⲁⲃⲃⲁⲧⲟⲛ ⲛⲧⲉ ⲡϭⲟⲓⲥ ⲛⲉ
̅ⲕⲉ:̅ⲅ ̣̅ⲋ ⲛⲣⲟⲙⲡⲓ ⲉⲕⲉⲥⲓϯ ⲙⲡⲉⲕⲓⲟϩⲓ ⲟⲩⲟϩ ̣̅ⲋ ⲛⲣⲟⲙⲡⲓ ⲉⲕⲉϣⲱⲧ
ⲙⲡⲉⲕⲓⲁϩⲁⲗⲟⲗⲓ ⲟⲩⲟϩ ⲉⲕⲉⲑⲱⲟⲩϯ ⲙⲡⲉϥⲟⲩⲧⲁϩ
̅ⲕⲉ:̅ⲇ ⲛϧⲣⲏⲓ ⲇⲉ ϧⲉⲛ ϯⲙⲁϩ ⲍ ⲛⲣⲟⲙⲡⲓ ϩⲁⲛⲥⲁⲃⲃⲁⲧⲟⲛ ⲛⲉ ⲟⲩⲙⲧⲟⲛ
ⲉϥⲉϣⲱⲡⲓ ⲙⲡⲓⲕⲁϩⲓ ϩⲁⲛⲥⲁⲃⲃⲁⲧⲟⲛ ⲙⲡϭⲟⲓⲥ ⲡⲉⲕⲓⲟϩⲓ ⲛⲛⲉⲕⲥⲁⲧϥ ⲟⲩⲟϩ
ⲛⲛⲉⲕϣⲱⲧ ⲙⲡⲉⲕⲓⲁϩⲁⲗⲟⲗⲓ
̅ⲕⲉ:̅ⲉ ⲟⲩⲟϩ ⲛⲏ ⲉⲧⲛⲁⲣⲱⲧ ⲛⲟⲩⲁⲧⲟⲩ ⲛⲧⲉ ⲡⲉⲕⲓⲟϩⲓ ⲛⲛⲉⲕⲥⲟⲕⲟⲩ ⲟⲩⲟϩ
ⲡⲓⲓⲁϩⲁⲗⲟⲗⲓ ⲛⲧⲉ ⲡⲉⲕⲧⲟⲩⲃⲟ ⲛⲛⲉⲕϭⲟⲗϥ ⲟⲩⲣⲟⲙⲡⲓ ⲛⲧⲉ ⲟⲩⲙⲧⲟⲛ
ⲉⲥⲉϣⲱⲡⲓ ⲙⲡⲓⲕⲁϩⲓ
̅ⲕⲉ:̣̅ⲋ ⲟⲩⲟϩ ⲉⲩⲉϣⲱⲡⲓ ⲛϫⲱ ⲛⲓⲥⲁⲃⲃⲁⲧⲟⲛ ⲛⲧⲉ ⲡⲓⲕⲁϩⲓ ⲉⲕⲉⲟⲩⲟⲙⲟⲩ
ⲛⲑⲟⲕ ⲛⲉⲙ ⲡⲉⲕⲃⲱⲕ ⲛⲉⲙ ⲧⲉⲕⲃⲱⲕⲓ ⲛⲉⲙ ⲡⲉⲕⲣⲉⲙⲃⲉⲭⲉ ⲛⲉⲙ
ⲡⲓⲣⲉⲙⲛϫⲱⲓⲗⲓ ⲉⲑⲟⲩⲉϩ ⲉⲣⲟⲕ
̅ⲕⲉ:̅ⲍ ⲛⲉⲙ ⲛⲉⲕⲧⲉⲃⲛⲱⲟⲩⲓ ⲛⲉⲙ ⲛⲓⲑⲏⲣⲓⲟⲛ ⲉⲧϧⲉⲛ ⲡⲉⲕⲕⲁϩⲓ ⲉϥⲉϣⲱⲡⲓ
ⲛⲱⲧⲉⲛ ⲛϫⲉ ⲡⲉϥⲟⲩⲧⲁϩ ⲧⲏⲣϥ ⲉⲩϧⲣⲉ
̅ⲕⲉ:̅ⲏ ⲟⲩⲟϩ ⲉⲕⲉⲱⲡ ⲛⲁⲕ ⲛⲍ ⲛⲉⲙⲧⲟⲛ ⲛⲧⲉ ϩⲁⲛⲣⲟⲙⲡⲓ ⲍ ⲛⲣⲟⲙⲡⲓ ⲛⲍ
ⲛⲥⲟⲡ ⲟⲩⲟϩ ⲉⲩⲉϣⲱⲡⲓ ⲛⲁⲕ ⲛϫⲉ ⲍ ⲛⲉⲃⲇⲟⲙⲁⲥ ⲛⲧⲉ ϩⲁⲛⲣⲟⲙⲡⲓ ⲙⲑ
ⲛⲣⲟⲙⲡⲓ
̅ⲕⲉ:̅ⲑ ⲟⲩⲟϩ ⲉⲣⲉⲧⲉⲛⲉϩⲓⲱⲓϣ ⲛⲟⲩⲥⲙⲏ ⲛⲥⲁⲗⲡⲓⲅⲅⲟⲥ ϧⲉⲛ ⲡⲉⲧⲉⲛⲕⲁϩⲓ ⲧⲏⲣϥ
ϧⲉⲛ ⲡⲓⲁⲃⲟⲧ ⲙⲙⲁϩⲍ ⲛⲥⲟⲩⲓ ⲙⲡⲓⲁⲃⲟⲧ ϧⲉⲛ ⲡⲓⲉϩⲟⲟⲩ ⲛⲧⲉ ⲡⲓⲧⲱⲃϩ
ⲉⲑⲃⲉ ⲟⲩⲭⲱ ⲉⲃⲟⲗ ⲉⲣⲉⲧⲉⲛⲉϩⲓⲱⲓϣ ϧⲉⲛ ⲟⲩⲥⲁⲗⲡⲓⲅⲅⲟⲥ ϧⲉⲛ ⲡⲉⲧⲉⲛⲕⲁϩⲓ
ⲧⲏⲣϥ
̅ⲕⲉ:̅ⲓ ⲟⲩⲟϩ ⲉⲣⲉⲧⲉⲛⲉⲧⲟⲩⲃⲟ ⲛϯⲣⲟⲙⲡⲓ ⲙⲙⲁϩ ⲛ ⲟⲩⲟϩ ⲉⲣⲉⲧⲉⲛⲉϩⲓⲱⲓϣ
ⲛⲟⲩⲭⲱ ⲉⲃⲟⲗ ⲛϩⲣⲏⲓ ϩⲓϫⲉⲛ ⲡⲓⲕⲁϩⲓ ⲛⲟⲩⲟⲛ ⲛⲓⲃⲉⲛ ⲉⲧϣⲟⲡ ϩⲓⲱⲧϥ
ⲟⲩⲣⲟⲙⲡⲓ ⲛⲧⲉ ⲡⲭⲱ ⲉⲃⲟⲗ ⲧⲉ ⲉⲥⲉϣⲱⲡⲓ ⲉⲥϯⲙⲏⲓⲛⲓ ⲛⲱⲧⲉⲛ ⲛϫⲉ ⲑⲁⲓ
ⲟⲩⲟϩ ⲉϥⲉⲕⲟⲧϥ ⲛϫⲉ ⲫⲟⲩⲁⲓ ⲫⲟⲩⲁⲓ ⲉⲑⲏ ⲉⲧⲉ ⲑⲱϥ ⲛⲕⲧⲏⲥⲓⲥ ⲟⲩⲟϩ
ⲫⲟⲩⲁⲓ ⲫⲟⲩⲁⲓ ⲉⲣⲉⲧⲉⲛⲉϣⲉⲛⲱⲧⲉⲛ ⲉⲑⲏ ⲉⲧⲉ ⲑⲱⲧⲉⲛ ⲙⲡⲁⲧⲣⲓⲥ
̅ⲕⲉ:̅ⲓⲁ ⲟⲩⲙⲏⲓⲛⲓ ⲛⲧⲉ ⲟⲩⲭⲱ ⲉⲃⲟⲗ ⲛⲱⲧⲉⲛ ⲧⲉ ⲑⲁⲓ ⲟⲩⲟϩ ϯⲣⲟⲙⲡⲓ
ⲙⲙⲁϩ ⲛ ⲉⲥⲉϣⲱⲡⲓ ⲛⲱⲧⲉⲛ ⲛⲟⲩⲣⲟⲙⲡⲓ ⲉⲥϫⲏⲕ ⲉⲃⲟⲗ ⲛⲛⲉⲧⲉⲛⲥⲓϯ ⲛϧⲏⲧⲥ
ⲟⲩⲇⲉ ⲛⲛⲉⲧⲉⲛⲱⲥϧ ⲛⲛⲏ ⲉⲧⲛⲏⲟⲩ ⲉϩⲣⲏⲓ ⲛⲟⲩⲁⲧⲟⲩ ⲛⲧⲁϥ ⲟⲩⲟϩ
ⲛⲛⲉⲧⲉⲛϭⲱⲗ ⲛⲛⲏ ⲉⲧⲧⲟⲩⲃⲏⲟⲩⲧ ⲛⲧⲁϥ
̅ⲕⲉ:̅ⲓⲃ ϫⲉ ⲟⲩⲙⲏⲓⲛⲓ ⲛⲧⲉ ⲟⲩⲭⲱ ⲉⲃⲟⲗ ⲧⲉ ⲉϥⲉϣⲱⲡⲓ ⲛⲱⲧⲉⲛ ⲉϥⲟⲩⲁⲃ
ⲟⲩⲟϩ ⲉⲣⲉⲧⲉⲛⲉⲟⲩⲱⲙ ⲛⲛⲉⲥⲟⲩⲧⲁϩ ⲉⲃⲟⲗ ϧⲉⲛ ⲛⲓⲙⲉϣϣⲟϯ
̅ⲕⲉ:̅ⲓⲅ ϧⲉⲛ ϯⲣⲟⲙⲡⲓ ⲛⲧⲉ ⲡⲭⲱ ⲉⲃⲟⲗ ⲛⲧⲉ ⲡⲉϥⲙⲏⲓⲛⲓ ⲉϥⲉⲕⲟⲧϥ ⲛϫⲉ
ⲫⲟⲩⲁⲓ ⲫⲟⲩⲁⲓ ⲉⲡⲉϥⲙⲁⲛϣⲱⲡⲓ ⲉⲧⲁϥϫⲫⲟϥ
̅ⲕⲉ:̅ⲓⲇ ⲟⲩⲟϩ ⲉϣⲱⲡ ⲛⲧⲉⲕϯ ⲛⲟⲩⲛⲭⲁⲓ ⲉⲃⲟⲗ ⲙⲡⲉⲕϣⲫⲏⲣ ⲓⲉ ⲛⲧⲉⲕϣⲱⲡ
ⲛⲧⲟⲧϥ ⲙⲡⲉⲕϣⲫⲏⲣ ⲙⲡⲉⲛⲑⲣⲉ ⲫⲣⲱⲙⲓ ϩⲟϫϩⲉϫ ⲙⲡⲉϥϣⲫⲏⲣ
̅ⲕⲉ:̅ⲓⲉ ⲕⲁⲧⲁ ⲧⲏⲡⲓ ⲛⲧⲉ ⲛⲓⲣⲟⲙⲡⲓ ⲟⲩⲟϩ ⲙⲉⲛⲉⲛⲥⲁ ⲡⲓⲙⲏⲓⲛⲓ ⲉⲕⲉϣⲱⲡ
ⲛⲧⲟⲧϥ ⲙⲡⲉⲕϣⲫⲏⲣ ⲕⲁⲧⲁ ⲧⲏⲡⲓ ⲛⲛⲓⲣⲟⲙⲡⲓ ⲛⲧⲉ ⲛⲓⲟⲩⲧⲁϩ ⲉϥⲉϯ ⲛⲁⲕ
ⲛⲟⲩϣⲉⲃⲓⲱ
̅ⲕⲉ:̅ⲓⲋ ⲕⲁⲧⲁ ⲡⲓϩⲟⲩⲟ ⲛⲧⲉ ⲛⲓⲣⲟⲙⲡⲓ ⲉϥⲉⲑⲣⲉ ⲡⲉϥϫⲫⲟ ⲁϣⲁⲓ ⲛⲁⲕ ⲟⲩⲟϩ
ⲕⲁⲧⲁ ⲡⲓⲥⲃⲟⲕ ⲛⲧⲉ ⲛⲓⲣⲟⲙⲡⲓ ⲉϥⲉⲑⲣⲉ ⲡⲉϥϫⲫⲟ ⲥⲃⲟⲕ ϫⲉ ⲛⲑⲟϥ
ⲉⲧⲛⲁϯϣⲉⲃⲓⲱ ⲛⲁⲕ ⲛⲧⲏⲡⲓ ⲛⲧⲉ ⲛⲓⲟⲩⲧⲁϩ
̅ⲕⲉ:̅ⲓⲍ ⲟⲩⲟϩ ⲙⲡⲉⲛⲑⲣⲉ ⲫⲣⲱⲙⲓ ϩⲟϫϩⲉϫ ⲙⲡⲉϥϣⲫⲏⲣ ⲟⲩⲟϩ ⲉⲕⲉⲉⲣϩⲟϯ
ϧⲁⲧϩⲏ ⲙⲡϭⲟⲓⲥ ⲡⲉⲕⲛⲟⲩϯ ϫⲉ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲕⲉ:̅ⲓⲏ ⲟⲩⲟϩ ⲉⲣⲉⲧⲉⲛⲉⲓⲣⲓ ⲛⲛⲁⲙⲉⲑⲙⲏⲓ ⲧⲏⲣⲟⲩ ⲛⲉⲙ ⲛⲁϩⲁⲡ ⲧⲏⲣⲟⲩ ⲟⲩⲟϩ
ⲉⲣⲉⲧⲉⲛⲉⲁⲣⲉϩ ⲉⲣⲱⲟⲩ ⲟⲩⲟϩ ⲉⲣⲉⲧⲉⲛⲉⲁⲓⲧⲟⲩ ⲟⲩⲟϩ ⲉⲣⲉⲧⲉⲛⲉϣⲱⲡⲓ ϩⲓϫⲉⲛ
ⲡⲓⲕⲁϩⲓ ϧⲉⲛ ⲟⲩⲧⲁϫⲣⲟ ⲛϩⲏⲧ
̅ⲕⲉ:̅ⲓⲑ ⲟⲩⲟϩ ⲡⲓⲕⲁϩⲓ ⲉϥⲉϯ ⲛⲛⲉϥⲟⲩⲧⲁϩ ⲟⲩⲟϩ ⲉⲣⲉⲧⲉⲛⲉⲟⲩⲱⲙ ⲉⲡⲥⲓ
ⲟⲩⲟϩ ⲉⲣⲉⲧⲉⲛⲉϣⲱⲡⲓ ϩⲓϫⲉⲛ ⲡⲓⲕⲁϩⲓ ϧⲉⲛ ⲟⲩⲧⲁϫⲣⲟ ⲛϩⲏⲧ
̅ⲕⲉ:̅ⲕ ⲉϣⲱⲡ ⲇⲉ ⲁⲣⲉⲧⲉⲛϣⲁⲛϫⲟⲥ ϫⲉ ⲟⲩ ⲡⲉⲧⲉⲛⲛⲁⲟⲩⲟⲙϥ ϧⲉⲛ ϯⲣⲟⲙⲡⲓ
ⲙⲙⲁϩ ⲍ ⲉϣⲱⲡ ⲛⲧⲉⲛϣⲧⲉⲙⲥⲓϯ ⲟⲩⲟϩ ⲛⲧⲉⲛϣⲧⲉⲙⲑⲱⲟⲩϯ ⲛⲛⲉⲛⲟⲩⲧⲁϩ
̅ⲕⲉ:̅ⲕⲁ ⲟⲩⲟϩ ⲉⲓⲉⲟⲩⲱⲣⲡ ⲛⲱⲧⲉⲛ ⲙⲡⲁⲥⲙⲟⲩ ϧⲉⲛ ϯⲣⲟⲙⲡⲓ ⲙⲙⲁϩ ̣̅ⲋ ⲟⲩⲟϩ
ⲉⲣⲉ ⲡⲓⲕⲁϩⲓ ⲧⲁⲟⲩⲟ ⲙⲡⲓⲟⲩⲧⲁϩ ⲉⲃⲟⲗ ⲉϥⲕⲏⲃ ⲛⲅ ⲛⲥⲟⲡ ⲉⲑⲃⲉ ϯⲅ
ⲛⲣⲟⲙⲡⲓ
̅ⲕⲉ:̅ⲕⲃ ⲟⲩⲟϩ ⲉⲣⲉⲧⲉⲛⲉⲥⲓϯ ϧⲉⲛ ϯⲣⲟⲙⲡⲓ ⲙⲙⲁϩⲏ ⲟⲩⲟϩ ⲉⲣⲉⲧⲉⲛⲉⲟⲩⲱⲙ
ⲛϩⲁⲛⲁⲡⲁⲥ ⲉⲃⲟⲗ ϧⲉⲛ ⲛⲓⲟⲩⲧⲁϩ ϣⲁ ϯⲣⲟⲙⲡⲓ ⲙⲙⲁϩⲑ ϣⲁⲧⲟⲩⲓ ⲛϫⲉ
ⲛⲉⲥⲟⲩⲧⲁϩ ⲟⲩⲟϩ ⲉⲣⲉⲧⲉⲛⲉⲟⲩⲱⲙ ⲛϩⲁⲛⲁⲡⲁⲥ ⲛⲧⲉ ϩⲁⲛⲁⲡⲁⲥ
̅ⲕⲉ:̅ⲕⲅ ⲟⲩⲟϩ ⲛⲛⲟⲩϯ ⲙⲡⲓⲕⲁϩⲓ ⲉⲃⲟⲗ ⲉⲩⲧⲁϫⲣⲟ ⲫⲱⲓ ⲅⲁⲣ ⲡⲉ ⲡⲓⲕⲁϩⲓ
ⲉⲑⲃⲉ ϫⲉ ⲛⲑⲱⲧⲉⲛ ϩⲁⲛϣⲉⲙⲙⲱⲟⲩ ⲟⲩⲟϩ ⲛⲣⲉⲙⲛϫⲱⲓⲗⲓ ⲙⲡⲁⲙⲑⲟ
̅ⲕⲉ:̅ⲕⲇ ⲟⲩⲟϩ ⲕⲁⲧⲁ ⲡⲓⲕⲁϩⲓ ⲧⲏⲣϥ ⲛⲧⲉ ⲡⲉⲧⲉⲛⲁⲙⲁϩⲓ ⲉⲣⲉⲧⲉⲛⲉϯ
ⲛϩⲁⲛⲥⲱϯ ⲙⲡⲓⲕⲁϩⲓ
̅ⲕⲉ:̅ⲕⲉ ⲉϣⲱⲡ ⲇⲉ ⲉϥⲟⲓ ⲛϩⲏⲕⲓ ⲛϫⲉ ⲡⲉⲕⲥⲟⲛ ⲉⲧⲛⲉⲙⲁⲕ ⲟⲩⲟϩ ⲛⲧⲉϥϯ
ⲉⲃⲟⲗ ϧⲉⲛ ⲡⲉϥⲁⲙⲁϩⲓ ⲟⲩⲟϩ ⲛⲧⲉϥⲓ ⲛϫⲉ ⲫⲏ ⲉⲧϫⲏϥ ⲉⲧϧⲉⲛⲧ ⲉⲣⲟϥ
ⲉϥⲉⲥⲱϯ ⲙⲡⲓϯ ⲉⲃⲟⲗ ⲛⲧⲉ ⲡⲉϥⲥⲟⲛ
̅ⲕⲉ:̅ⲕⲋ ⲉϣⲱⲡ ⲇⲉ ⲉⲟⲩⲟⲛ ⲟⲩⲁⲓ ⲙⲙⲟⲛ ⲡⲉⲧϫⲏϥ ϧⲁⲣⲟϥ ⲙⲡⲉ ⲧⲉϥϫⲓϫ
ϫⲓⲙⲓ ϧⲉⲛ ⲧⲉϥϫⲓϫ ⲟⲩⲟϩ ⲛⲧⲉϥϫⲓⲙⲓ ⲛⲁϥ ⲙⲡⲓⲣⲱϣⲓ ⲛⲥⲱϯ ⲛⲧⲁϥ
̅ⲕⲉ:̅ⲕⲍ ⲟⲩⲟϩ ⲉϥⲉϥⲓ ⲙⲡⲱⲡ ⲛⲛⲓⲣⲟⲙⲡⲓ ⲛⲧⲉ ⲡⲉϥϯ ⲉⲃⲟⲗ ⲟⲩⲟϩ ⲫⲏ ⲉⲧⲟⲓ
ⲛϩⲟⲩⲟ ⲉϥⲉⲧⲏⲓϥ ⲙⲡⲓⲣⲱⲙⲓ ⲫⲏ ⲉⲧⲁϥϯ ⲛⲁϥ ⲉⲃⲟⲗ ⲟⲩⲟϩ ⲉϥⲉⲧⲁⲥⲑⲟ
ⲉⲡⲉϥⲁⲙⲁϩⲓ
̅ⲕⲉ:̅ⲕⲏ ⲉϣⲱⲡ ⲇⲉ ⲛⲧⲉϣⲧⲉⲙ ⲧⲉϥϫⲓϫ ϫⲓⲙⲓ ⲙⲡⲓⲣⲱϣⲓ ϩⲱⲥⲇⲉ ⲉϯϣⲉⲃⲓⲱ
ⲛⲁϥ ⲉϥⲉϣⲱⲡⲓ ⲛϫⲉ ⲡⲓⲧⲏⲓϥ ⲉⲃⲟⲗ ⲛⲧⲟⲧϥ ⲙⲫⲏ ⲉⲧⲁϥϣⲱⲡ ϣⲁ
ϯⲙⲁϩ̣̅ⲋ ⲛⲣⲟⲙⲡⲓ ⲛⲧⲉ ⲡⲓⲭⲱ ⲉⲃⲟⲗ ⲟⲩⲟϩ ⲉϥⲉⲓ ⲉⲃⲟⲗ ϧⲉⲛ ⲡⲥⲏⲟⲩ ⲛⲧⲉ
ⲡⲓⲭⲱ ⲉⲃⲟⲗ ⲟⲩⲟϩ ⲉϥⲉⲧⲁⲥⲑⲟ ⲙⲡⲉϥⲁⲙⲁϩⲓ
̅ⲕⲉ:̅ⲕⲑ ⲟⲩⲟϩ ⲉϣⲱⲡ ⲁⲣⲉϣⲁⲛ ⲟⲩⲁⲓ ϯ ⲛⲟⲩⲏⲓ ⲉⲃⲟⲗ ⲉⲩϣⲟⲡ ⲛϧⲏⲧϥ ⲉϥ
ϧⲉⲛ ⲟⲩⲃⲁⲕⲓ ⲉⲥⲧⲁⲕⲧⲏⲟⲩⲧ ⲛⲥⲟⲃⲧ ⲟⲩⲟϩ ⲉϥⲉϣⲱⲡⲓ ⲛϫⲉ ⲡⲉϥⲥⲱϯ
ϣⲁⲧⲉⲥϫⲱⲕ ⲉⲃⲟⲗ ⲛϫⲉ ϯⲣⲟⲙⲡⲓ ⲛⲧⲉ ϩⲁⲛⲉϩⲟⲟⲩ ⲉϥⲉϣⲱⲡⲓ ⲛϫⲉ
ⲡⲉϥⲥⲱϯ
̅ⲕⲉ:̅ⲗ ⲉϣⲱⲡ ⲁⲩϣⲧⲉⲙⲥⲟⲧϥ ϣⲁⲧⲉⲥϫⲱⲕ ⲉⲃⲟⲗ ⲛϫⲉ ϯⲣⲟⲙⲡⲓ ⲧⲏⲣⲥ
ⲉϥⲉϣⲱⲡⲓ ⲛϫⲉ ⲡⲓⲏⲓ ⲫⲏ ⲉⲧϧⲉⲛ ϯⲃⲁⲕⲓ ⲉⲧⲧⲁⲕⲧⲏⲟⲩⲧ ⲛⲥⲟⲃⲧ ϧⲉⲛ
ⲟⲩⲧⲁϫⲣⲟ ⲙⲫⲏ ⲉⲧⲁϥϣⲟⲡϥ ⲉϥⲉϣⲱⲡⲓ ⲛⲁϥ ⲉⲛⲉϥϫⲱⲟⲩ ⲟⲩⲟϩ ⲛⲛⲉϥⲓ
ⲉⲃⲟⲗ ϧⲉⲛ ⲡⲥⲏⲟⲩ ⲛⲧⲉ ⲡⲓⲭⲱ ⲉⲃⲟⲗ
̅ⲕⲉ:̅ⲗⲁ ⲛⲓⲏⲓ ⲇⲉ ⲛⲑⲱⲟⲩ ⲉⲧϧⲉⲛ ⲛⲓⲉⲣⲃⲓ ⲛⲏ ⲉⲧⲉ ⲙⲙⲟⲛ ⲥⲟⲃⲧ ⲧⲁⲕⲧⲏⲟⲩⲧ
ⲉⲣⲱⲟⲩ ⲉⲩⲉⲟⲡⲟⲩ ⲉϯⲕⲟⲓ ⲛⲧⲉ ⲡⲓⲕⲁϩⲓ ⲉⲩⲉϣⲱⲡⲓ ⲉⲩⲥⲱϯ ⲙⲙⲱⲟⲩ ⲛⲥⲏⲟⲩ
ⲛⲓⲃⲉⲛ ϧⲉⲛ ⲡⲥⲏⲟⲩ ⲛⲧⲉ ⲡⲓⲭⲱ ⲉⲃⲟⲗ ⲉⲩⲉⲓ ⲉⲃⲟⲗ
̅ⲕⲉ:̅ⲗⲃ ⲟⲩⲟϩ ⲛⲓⲃⲁⲕⲓ ⲛⲧⲉ ⲛⲓⲗⲉⲩⲓⲧⲏⲥ ⲛⲓⲏⲓ ⲛⲧⲉ ⲛⲓⲃⲁⲕⲓ ⲛⲧⲉ ⲡⲟⲩⲁⲙⲁϩⲓ
ⲉⲩⲉϣⲱⲡⲓ ⲉⲩⲥⲱϯ ⲙⲙⲱⲟⲩ ⲛⲥⲏⲟⲩ ⲛⲓⲃⲉⲛ ⲛϫⲉ ⲛⲓⲗⲉⲩⲓⲧⲏⲥ
̅ⲕⲉ:̅ⲗⲅ ⲟⲩⲟϩ ⲫⲏ ⲉⲧⲛⲁⲥⲱϯ ⲛⲧⲟⲧⲟⲩ ⲛⲛⲓⲗⲉⲩⲓⲧⲏⲥ ⲉϥⲉⲓ ⲉⲃⲟⲗ ⲛϫⲉ ⲡⲓϯ
ⲉⲃⲟⲗ ⲛⲧⲉ ⲛⲓⲏⲓ ⲛⲧⲉ ⲑⲃⲁⲕⲓ ⲛⲧⲉ ⲡⲟⲩⲁⲙⲁϩⲓ ϧⲉⲛ ⲡⲥⲏⲟⲩ ⲛⲧⲉ ⲡⲓⲭⲱ
ⲉⲃⲟⲗ ϫⲉ ⲛⲓⲏⲓ ⲛⲧⲉ ⲛⲓⲃⲁⲕⲓ ⲛⲧⲉ ⲛⲓⲗⲉⲩⲓⲧⲏⲥ ⲟⲩⲁⲙⲁϩⲓ ⲛⲧⲱⲟⲩ ⲡⲉ ϧⲉⲛ
ⲑⲙⲏϯ ⲛⲛⲉⲛϣⲏⲣⲓ ⲙⲡⲓⲥⲣⲁⲏⲗ
̅ⲕⲉ:̅ⲗⲇ ⲟⲩⲟϩ ⲛⲓⲕⲟⲓ ⲉⲧⲁⲩⲟⲩⲟⲧⲟⲩ ⲛⲱⲟⲩ ⲉⲃⲟⲗ ⲛⲛⲓⲃⲁⲕⲓ ⲛⲛⲟⲩⲧⲏⲓⲧⲟⲩ
ⲉⲃⲟⲗ ϫⲉ ⲟⲩⲁⲙⲁϩⲓ ⲛⲧⲱⲟⲩ ⲛⲉⲛⲉϩ ⲡⲉ ⲫⲁⲓ
̅ⲕⲉ:̅ⲗⲉ ⲉϣⲱⲡ ⲇⲉ ⲡⲉⲕⲥⲟⲛ ⲉⲧⲛⲉⲙⲁⲕ ⲟⲩϩⲏⲕⲓ ⲡⲉ ⲟⲩⲟϩ ⲛⲧⲉϥⲉⲣⲁⲧϫⲟⲙ
ϧⲉⲛ ⲛⲉϥϫⲓϫ ϧⲁⲧⲟⲧⲕ ⲉⲕⲉϯⲧⲟⲧϥ ⲙⲫⲣⲏϯ ⲛⲟⲩϣⲉⲙⲙⲟ ⲛⲉⲙ
ⲟⲩⲣⲉⲙⲛϫⲱⲓⲗⲓ ⲟⲩⲟϩ ⲉϥⲉⲱⲛϧ ⲛϫⲉ ⲡⲉⲕⲥⲟⲛ ⲛⲉⲙⲁⲕ
̅ⲕⲉ:̅ⲗⲋ ⲛⲛⲉⲕϭⲓ ⲙⲏⲥⲓ ⲛⲧⲟⲧϥ ⲟⲩⲇⲉ ⲉϫⲉⲛ ⲟⲩⲙⲏϣ ⲟⲩⲟϩ ⲉⲕⲉⲉⲣϩⲟϯ
ϧⲁⲧϩⲏ ⲙⲡϭⲟⲓⲥ ⲡⲉⲕⲛⲟⲩϯ ϫⲉ ⲁⲛⲟⲕ ⲡⲉ ⲡϭⲟⲓⲥ ⲟⲩⲟϩ ⲉϥⲉⲱⲛϧ ⲛϫⲉ
ⲡⲉⲕⲥⲟⲛ ⲛⲉⲙⲁⲕ
̅ⲕⲉ:̅ⲗⲍ ⲛⲛⲉⲕϯ ⲙⲡⲉⲕϩⲏⲧ ⲛⲁϥ ⲉⲑⲙⲏⲥⲓ ⲟⲩⲟϩ ⲉϫⲉⲛ ⲟⲩⲙⲉⲧϩⲟⲩⲟ ⲛⲛⲉⲕϯ
ⲛⲛⲉⲕϧⲣⲏⲟⲩⲓ ⲛⲁϥ
̅ⲕⲉ:̅ⲗⲏ ϫⲉ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ ⲫⲏ ⲉⲧⲁϥⲉⲛ ⲑⲏⲛⲟⲩ ⲉⲃⲟⲗ ϧⲉⲛ
ⲡⲕⲁϩⲓ ⲛⲭⲏⲙⲓ ⲉϯ ⲛⲱⲧⲉⲛ ⲙⲡⲓⲕⲁϩⲓ ⲛⲧⲉ ⲭⲁⲛⲁⲁⲛ ϫⲉ ⲛⲧⲁϣⲱⲡⲓ
ⲛⲱⲧⲉⲛ ⲛⲛⲟⲩϯ
̅ⲕⲉ:̅ⲗⲑ ⲉϣⲱⲡ ⲇⲉ ⲁⲣⲉϣⲁⲛ ⲡⲉⲕⲥⲟⲛ ϩⲉⲓ ⲙⲡⲉⲕⲙⲑⲟ ⲟⲩⲟϩ ⲛⲧⲟⲩⲧⲏⲓϥ
ⲛⲁⲕ ⲉⲃⲟⲗ ⲛⲛⲉϥⲉⲣⲃⲱⲕ ⲛⲁϥ ϧⲉⲛ ⲟⲩⲙⲉⲧⲃⲱⲕ ⲛⲧⲉ ⲟⲩⲃⲱⲕ
̅ⲕⲉ:̅ⲙ ⲉϥⲉϣⲱⲡⲓ ϧⲁⲧⲟⲧⲕ ⲙⲫⲣⲏϯ ⲛⲟⲩⲣⲉⲙⲃⲉⲭⲉ ⲛⲉⲙ ⲟⲩⲣⲉⲙⲛϫⲱⲓⲗⲓ
ⲉϥⲉⲉⲣϩⲱⲃ ⲛⲁⲕ ϣⲁ ϯⲣⲟⲙⲡⲓ ⲛⲧⲉ ⲡⲓⲭⲱ ⲉⲃⲟⲗ
̅ⲕⲉ:̅ⲙⲁ ⲟⲩⲟϩ ⲉϥⲉⲓ ⲉⲃⲟⲗ ϧⲉⲛ ϯⲣⲟⲙⲡⲓ ⲛⲧⲉ ⲡⲓⲭⲱ ⲉⲃⲟⲗ ⲛⲑⲟϥ ⲛⲉⲙ
ⲛⲉϥϧⲣⲟϯ ⲛⲉⲙⲁϥ ⲟⲩⲟϩ ⲉϥⲉϣⲉⲛⲁϥ ⲉⲡⲉϥϫⲱⲟⲩ ⲟⲩⲟϩ ⲉϥⲉϭⲟϫⲓ ⲉⲡⲁⲙⲁϩⲓ
ⲛⲧⲉ ⲛⲉϥⲓⲟϯ
̅ⲕⲉ:̅ⲙⲃ ϫⲉ ⲟⲩⲏⲓ ⲅⲁⲣ ϩⲁⲛⲉⲃⲓⲁⲓⲕ ⲛⲧⲏⲓ ⲛⲉ ⲛⲁⲓ ⲛⲏ ⲉⲧⲁⲓⲉⲛⲟⲩ ⲉⲃⲟⲗ ϧⲉⲛ
ⲡⲕⲁϩⲓ ⲛⲭⲏⲙⲓ ⲛⲛⲉⲕⲧⲏⲓϥ ⲉⲃⲟⲗ ϧⲉⲛ ⲟⲩⲙⲉⲧⲃⲱⲕ ⲛⲧⲉ ⲟⲩⲃⲱⲕ
̅ⲕⲉ:̅ⲙⲅ ⲛⲛⲉⲕϧⲟⲑⲃⲉϥ ϧⲉⲛ ⲟⲩϧⲓⲥⲓ ⲉϥⲙⲟⲕϩ ⲟⲩⲟϩ ⲉⲕⲉⲉⲣϩⲟϯ ϧⲁⲧϩⲏ
ⲙⲡϭⲟⲓⲥ ⲡⲉⲕⲛⲟⲩϯ
̅ⲕⲉ:̅ⲙⲇ ⲟⲩⲟϩ ⲟⲩⲃⲱⲕ ⲓⲉ ⲟⲩⲃⲱⲕⲓ ⲛⲏ ⲧⲏⲣⲟⲩ ⲉⲧⲛⲁϣⲱⲡⲓ ⲛⲁⲕ ⲉⲃⲟⲗ
ϧⲉⲛ ⲛⲓⲉⲑⲛⲟⲥ ⲧⲏⲣⲟⲩ ⲛⲏ ⲉⲧⲕⲱϯ ⲉⲣⲟⲕ ⲉⲃⲟⲗ ⲛϧⲏⲧⲟⲩ ⲉⲣⲉⲧⲉⲛⲉϣⲱⲡ
ⲛⲱⲧⲉⲛ ⲛϩⲁⲛⲃⲱⲕ ⲛⲉⲙ ϩⲁⲛⲃⲱⲕⲓ
̅ⲕⲉ:̅ⲙⲉ ⲟⲩⲟϩ ⲉⲃⲟⲗ ϧⲉⲛ ⲛⲓϣⲏⲣⲓ ⲛⲧⲉ ⲛⲓⲣⲉⲙⲛϫⲱⲓⲗⲓ ⲉⲧϣⲟⲡ ϧⲉⲛ ⲑⲏⲛⲟⲩ
ⲉⲃⲟⲗ ϧⲉⲛ ⲛⲁⲓ ⲉⲣⲉⲧⲉⲛⲉϣⲱⲡ ⲛⲱⲧⲉⲛ ⲛⲉⲙ ⲉⲃⲟⲗ ϧⲉⲛ ⲛⲟⲩⲥⲩⲅⲅⲉⲛⲓⲁ ⲛⲏ
ⲧⲏⲣⲟⲩ ⲉⲧⲛⲁϣⲱⲡⲓ ϧⲉⲛ ⲡⲉⲧⲉⲛⲕⲁϩⲓ ⲙⲁⲣⲟⲩϣⲱⲡⲓ ⲛⲱⲧⲉⲛ ⲉⲩⲁⲙⲁϩⲓ
̅ⲕⲉ:̅ⲙⲋ ⲟⲩⲟϩ ⲉⲣⲉⲧⲉⲛⲉⲫⲁϣⲟⲩ ⲉϩⲣⲉⲛ ⲛⲉⲧⲉⲛϣⲏⲣⲓ ⲙⲉⲛⲉⲛⲥⲱⲧⲉⲛ ⲟⲩⲟϩ
ⲉⲩⲉϣⲱⲡⲓ ⲛⲱⲧⲉⲛ ⲉⲣⲉⲧⲉⲛⲉⲁⲙⲁϩⲓ ⲙⲙⲱⲟⲩ ϣⲁ ⲉⲛⲉϩ ⲉⲃⲟⲗ ⲇⲉ
ⲛⲉⲧⲉⲛⲥⲛⲏⲟⲩ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲫⲟⲩⲁⲓ ⲫⲟⲩⲁⲓ ⲛⲛⲉϥⲧϩⲉⲙⲕⲟ ⲙⲡⲉϥⲥⲟⲛ
ϧⲉⲛ ϩⲁⲛϧⲓⲥⲓ ⲉⲩⲙⲟⲕϩ
̅ⲕⲉ:̅ⲙⲍ ⲟⲩⲟϩ ⲉϣⲱⲡ ⲁϥϣⲁⲛϫⲓⲙⲓ ϧⲉⲛ ⲧⲉϥϫⲓϫ ⲛϫⲉ ⲡⲓϣⲉⲙⲙⲟ ⲓⲉ
ⲡⲓⲣⲉⲙⲛϫⲱⲓⲗⲓ ⲉⲧ ϧⲁⲧⲟⲧⲕ ⲟⲩⲟϩ ⲛⲧⲉ ⲡⲉⲕⲥⲟⲛ ⲉⲣⲁⲧϫⲓⲙⲓ ⲟⲩⲟϩ
ⲛⲧⲟⲩⲧⲏⲓϥ ⲉⲃⲟⲗ ⲙⲡⲓϣⲉⲙⲙⲟ ⲓⲉ ⲡⲓⲣⲉⲙⲛϫⲱⲓⲗⲓ ⲉⲧϧⲁⲧⲟⲧⲕ ⲓⲉ ⲟⲩϣⲉⲙⲙⲟ
ⲓⲥϫⲉⲛ ⲧⲉϥϫⲓⲛⲙⲓⲥⲓ
̅ⲕⲉ:̅ⲙⲏ ⲙⲉⲛⲉⲛⲥⲁ ⲑⲣⲟⲩⲧⲏⲓϥ ⲉⲃⲟⲗ ⲟⲩⲥⲱϯ ⲉϥⲉϣⲱⲡⲓ ⲛⲁϥ ⲟⲩⲁⲓ ⲉⲃⲟⲗ ϧⲉⲛ
ⲛⲉϥⲥⲛⲏⲟⲩ ⲉϥⲉⲥⲟⲧϥ
̅ⲕⲉ:̅ⲙⲑ ⲟⲩⲥⲟⲛ ⲛⲧⲉ ⲡⲉϥⲓⲱⲧ ⲓⲉ ⲡϣⲏⲣⲓ ⲛⲟⲩⲥⲟⲛ ⲛⲧⲉ ⲡⲉϥⲓⲱⲧ ⲉϥⲉⲥⲟⲧϥ
ⲓⲉ ⲉⲃⲟⲗ ϧⲉⲛ ⲛⲓⲣⲉⲙϧⲉⲛⲏⲓ ⲛⲧⲉ ⲧⲉϥⲥⲁⲣⲝ ⲓⲉ ⲉⲃⲟⲗ ϧⲉⲛ ⲧⲉϥⲫⲩⲗⲏ
ⲉϥⲉⲥⲟⲧϥ ⲉϣⲱⲡ ⲇⲉ ⲁϥϣⲁⲛϫⲓⲙⲓ ϧⲉⲛ ⲧⲉϥϫⲓϫ ⲉϥⲉⲥⲱϯ ⲙⲙⲟϥ ⲙⲙⲓⲛ
ⲙⲙⲟϥ
̅ⲕⲉ:̅ⲉ0 ⲟⲩⲟϩ ⲉϥⲉϥⲓⲱⲡ ⲛⲉⲙ ⲫⲏ ⲉⲧⲁϥϣⲟⲡϥ ⲉⲣⲟϥ ⲉⲃⲟⲗ ϧⲉⲛ ϯⲣⲟⲙⲡⲓ
ⲛⲧⲉ ⲡⲉϥⲧⲏⲓϥ ⲉⲃⲟⲗ ⲙⲙⲓⲛ ⲙⲙⲟϥ ϣⲁ ϯⲣⲟⲙⲡⲓ ⲛⲧⲉ ⲡⲓⲭⲱ ⲉⲃⲟⲗ ⲟⲩⲟϩ
ⲉϥⲉϣⲱⲡⲓ ⲛϫⲉ ⲡⲓϩⲁⲧ ⲛⲧⲉ ⲡⲉϥⲧⲏⲓϥ ⲉⲃⲟⲗ ⲙⲫⲣⲏϯ ⲛⲟⲩⲣⲉⲙⲃⲉⲭⲉ
ⲛⲟⲩⲣⲟⲙⲡⲓ ⲉⲃⲟⲗ ϧⲉⲛ ⲟⲩⲣⲟⲙⲡⲓ ⲉϥⲉϣⲱⲡⲓ ⲛⲉⲙⲁϥ
̅ⲕⲉ:̅ⲉ̅ⲁ ⲉϣⲱⲡ ⲇⲉ ⲛⲧⲉ ⲟⲩϩⲟⲩⲟ ⲛⲛⲓⲣⲟⲙⲡⲓ ⲉϥⲉϣⲱⲡⲓ ⲛⲟⲩⲁⲓ ⲕⲁⲧⲁ ⲛⲁⲓ
ⲉϥⲉϯ ⲛⲛⲉϥⲥⲱϯ ⲉⲃⲟⲗ ϧⲉⲛ ⲡⲓϩⲁⲧ ⲛⲧⲉ ⲡⲉϥⲧⲏⲓϥ ⲉⲃⲟⲗ
̅ⲕⲉ:̅ⲉ̅ⲃ ⲉϣⲱⲡ ⲇⲉ ⲛⲧⲉ ⲟⲩⲕⲟⲩϫⲓ ⲥⲱϫⲡ ⲉⲃⲟⲗ ϧⲉⲛ ⲛⲓⲣⲟⲙⲡⲓ ⲉϯⲣⲟⲙⲡⲓ
ⲛⲧⲉ ⲡⲓⲭⲱ ⲉⲃⲟⲗ ⲟⲩⲟϩ ⲉϥⲉϥⲓⲱⲡ ⲛⲉⲙⲁϥ ⲕⲁⲧⲁ ⲛⲉϥⲣⲟⲙⲡⲓ ⲟⲩⲟϩ ⲉϥⲉϯ
ⲛⲛⲉϥⲥⲱϯ ⲙⲫⲣⲏϯ ⲛⲟⲩⲣⲉⲙⲃⲉⲭⲉ
̅ⲕⲉ:̅ⲉ̅ⲅ ⲛⲟⲩⲣⲟⲙⲡⲓ ⲉⲃⲟⲗ ϧⲉⲛ ⲟⲩⲣⲟⲙⲡⲓ ⲉϥⲉϣⲱⲡⲓ ⲛⲉⲙⲁϥ ⲛⲛⲉⲕⲧϩⲉⲙⲕⲟϥ
ϧⲉⲛ ϩⲁⲛϧⲓⲥⲓ ⲉⲩⲙⲟⲕϩ ⲙⲡⲉⲕⲙⲑⲟ
̅ⲕⲉ:̅ⲉ̅ⲇ ⲉϣⲱⲡ ⲇⲉ ⲛⲧⲉϣⲧⲉⲙⲥⲱϯ ϣⲱⲡⲓ ⲕⲁⲧⲁ ⲛⲁⲓ ⲟⲩⲟϩ ⲉϥⲉⲓ ⲉⲃⲟⲗ
ϧⲉⲛ ϯⲣⲟⲙⲡⲓ ⲛⲧⲉ ⲡⲓⲭⲱ ⲉⲃⲟⲗ ⲛⲑⲟϥ ⲛⲉⲙ ⲛⲉϥϣⲏⲣⲓ ⲛⲉⲙⲁϥ
̅ⲕⲉ:̅ⲉ̅ⲉ ϫⲉ ⲟⲩⲏⲓ ⲅⲁⲣ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲛⲁⲉⲃⲓⲁⲓⲕ ⲛⲉ ϩⲁⲛⲁⲗⲱⲟⲩⲓ
ⲛⲧⲏⲓ ⲛⲉ ⲛⲁⲓ ⲛⲏ ⲉⲧⲁⲓⲉⲛⲟⲩ ⲉⲃⲟⲗ ϧⲉⲛ ⲡⲕⲁϩⲓ ⲛⲭⲏⲙⲓ ϫⲉ ⲁⲛⲟⲕ ⲡⲉ
ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲕⲋ:̅ⲁ ⲛⲛⲉⲧⲉⲛⲑⲁⲙⲓⲟ ⲛⲱⲧⲉⲛ ⲛϩⲁⲛⲙⲟⲩⲛⲕ ⲛϫⲓϫ ⲟⲩⲇⲉ ⲫⲱⲧϩ ⲟⲩⲇⲉ
ⲛⲛⲉⲧⲉⲛⲧⲁϩⲉ ⲥⲧⲩⲗⲏ ⲛⲱⲛⲓ ⲉⲣⲁⲧⲥ ⲟⲩⲇⲉ ⲛⲛⲉⲧⲉⲛⲭⲁ ⲟⲩⲱⲛⲓ ⲉϣⲓⲛⲓ
ⲛⲧⲟⲧϥ ϧⲉⲛ ⲡⲉⲧⲉⲛⲕⲁϩⲓ ⲉⲡϫⲓⲛⲧⲉⲧⲉⲛⲟⲩⲱϣⲧ ⲙⲙⲟϥ ϫⲉ ⲁⲛⲟⲕ ⲡⲉ
ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲕⲋ:̅ⲃ ⲛⲁⲥⲁⲃⲃⲁⲧⲟⲛ ⲉⲣⲉⲧⲉⲛⲉⲁⲣⲉϩ ⲉⲣⲱⲟⲩ ⲟⲩⲟϩ ⲁⲣⲓϩⲟϯ ϧⲁⲧϩⲏ ⲛⲛⲏ
ⲉⲑⲟⲩⲁⲃ ⲛⲧⲏⲓ ϫⲉ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ
̅ⲕⲋ:̅ⲅ ⲟⲩⲟϩ ⲉϣⲱⲡ ⲛⲧⲉⲧⲉⲛⲙⲟϣⲓ ϧⲉⲛ ⲛⲁⲟⲩⲁϩⲥⲁϩⲛⲓ ⲟⲩⲟϩ ⲛⲁⲉⲛⲧⲟⲗⲏ
ⲛⲧⲉⲧⲉⲛⲁⲣⲉϩ ⲉⲣⲱⲟⲩ ⲟⲩⲟϩ ⲛⲧⲉⲧⲉⲛⲁⲓⲧⲟⲩ
̅ⲕⲋ:̅ⲇ ⲟⲩⲟϩ ⲉⲓⲉϯ ⲙⲡⲓⲙⲟⲩⲛⲱϣⲓ ϧⲉⲛ ⲡⲉϥⲥⲏⲟⲩ ⲟⲩⲟϩ ⲡⲓⲕⲁϩⲓ ⲉϥⲉϯ
ⲛⲛⲉϥⲟⲩⲧⲁϩ ⲟⲩⲟϩ ⲛⲓϣϣⲏⲛ ⲛⲧⲉ ⲛⲓⲙⲉϣϣⲟϯ ⲉⲩⲉϯ ⲙⲡⲟⲩⲟⲩⲧⲁϩ
̅ⲕⲋ:̅ⲉ ⲟⲩⲟϩ ⲉⲣⲉ ⲡⲓϭⲛⲱⲟⲩ ⲧⲁϩⲟ ⲛⲱⲧⲉⲛ ⲙⲡⲓϭⲱⲗ ⲟⲩⲟϩ ⲡⲓϭⲱⲗ
ⲉϥⲉⲧⲁϩⲉ ⲡⲓⲥⲓϯ ⲟⲩⲟϩ ⲉⲣⲉⲧⲉⲛⲉⲟⲩⲱⲙ ⲙⲡⲉⲧⲉⲛⲱⲓⲕ ⲉⲡⲥⲓ ⲟⲩⲟϩ
ⲉⲣⲉⲧⲉⲛⲉϣⲱⲡⲓ ⲛⲟⲩⲧⲁϫⲣⲟ ϩⲓϫⲉⲛ ⲡⲉⲧⲉⲛⲕⲁϩⲓ
̅ⲕⲋ:̣̅ⲋ ⲟⲩⲟϩ ⲉⲓⲉϯ ⲛⲟⲩϩⲓⲣⲏⲛⲏ ϩⲓϫⲉⲛ ⲡⲉⲧⲉⲛⲕⲁϩⲓ ⲟⲩⲟϩ ⲉⲣⲉⲧⲉⲛⲉⲛⲕⲟⲧ
ⲛⲛⲉϥϣⲱⲡⲓ ⲛϫⲉ ⲫⲏ ⲉⲧⲛⲟⲩϣⲡ ⲟⲩⲟϩ ⲛⲓⲑⲏⲣⲓⲟⲛ ⲉⲧϩⲱⲟⲩ ϯⲛⲁⲧⲁⲕⲱⲟⲩ
ⲉⲃⲟⲗ ϧⲉⲛ ⲡⲉⲧⲉⲛⲕⲁϩⲓ ⲟⲩⲟϩ ⲛⲛⲉ ⲡⲟⲗⲉⲙⲟⲥ ⲥⲓⲛⲓ ⲉⲃⲟⲗ ϧⲉⲛ ⲡⲉⲧⲉⲛⲕⲁϩⲓ
̅ⲕⲉ:̅ⲍ ⲟⲩⲟϩ ⲉⲣⲉⲧⲉⲛⲉϭⲟϫⲓ ⲛⲥⲁ ⲛⲉⲧⲉⲛϫⲁϫⲓ ⲟⲩⲟϩ ⲉⲩⲉϩⲉⲓ ⲙⲡⲉⲧⲉⲛⲙⲑⲟ
ϧⲉⲛ ⲟⲩϧⲱⲧⲉⲃ
̅ⲕⲋ:̅ⲏ ⲟⲩⲟϩ ⲉⲣⲉ ⲉ ⲉⲃⲟⲗ ϧⲉⲛ ⲑⲏⲛⲟⲩ ⲉⲩⲉϭⲟϫⲓ ⲛⲥⲁ ⲣ ⲟⲩⲟϩ ⲣ ⲉⲃⲟⲗ
ϧⲉⲛ ⲑⲏⲛⲟⲩ ⲉⲩⲉϭⲟϫⲓ ⲛⲥⲁ ϩⲁⲛⲁⲛⲑⲃⲁ ⲟⲩⲟϩ ⲉⲩⲉϩⲉⲓ ⲛϫⲉ ⲛⲉⲧⲉⲛϫⲁϫⲓ
ϧⲉⲛ ⲧⲥⲏϥⲓ ⲙⲡⲉⲧⲉⲛⲙⲑⲟ ⲉⲃⲟⲗ
̅ⲕⲋ:̅ⲑ ⲟⲩⲟϩ ⲉⲓⲉⲥⲟⲙⲥ ⲉϫⲉⲛ ⲑⲏⲛⲟⲩ ⲟⲩⲟϩ ⲉⲓⲉⲑⲣⲉⲧⲉⲛⲁⲓⲁⲓ ⲟⲩⲟϩ
ⲉⲓⲉⲑⲣⲉⲧⲉⲛⲁϣⲁⲓ ⲟⲩⲟϩ ⲉⲓⲉⲥⲉⲙⲛⲓ ⲛⲧⲁⲇⲓⲁⲑⲏⲕⲏ ⲛⲉⲙⲱⲧⲉⲛ
̅ⲕⲋ:̅ⲓ ⲟⲩⲟϩ ⲉⲣⲉⲧⲉⲛⲉⲟⲩⲱⲙ ⲛϩⲁⲛⲁⲡⲁⲥ ⲛⲉⲙ ϩⲁⲛⲁⲡⲁⲥ ⲛⲧⲉ ϩⲁⲛⲁⲡⲁⲥ
ⲟⲩⲟϩ ⲉⲣⲉⲧⲉⲛⲉⲓⲛⲓ ⲉⲃⲟⲗ ⲛϩⲁⲛⲁⲡⲁⲥ ⲙⲡⲉⲙⲑⲟ ⲛϩⲁⲛⲃⲉⲣⲓ
̅ⲕⲋ:̅ⲓⲁ ⲟⲩⲟϩ ⲉⲓⲉⲭⲱ ⲛⲧⲁⲥⲕⲩⲛⲏ ϧⲉⲛ ⲑⲏⲛⲟⲩ ⲟⲩⲟϩ ⲛⲛⲉ ⲧⲁⲯⲩⲭⲏ ϭⲓ
ⲑⲏⲛⲟⲩ ⲙⲃⲟϯ
̅ⲕⲋ:̅ⲓⲃ ⲟⲩⲟϩ ⲉⲓⲉⲙⲟϣⲓ ϧⲉⲛ ⲑⲏⲛⲟⲩ ⲉⲓⲉϣⲱⲡⲓ ⲛⲱⲧⲉⲛ ⲛⲛⲟⲩϯ ⲟⲩⲟϩ
ⲛⲑⲱⲧⲉⲛ ϩⲱⲧⲉⲛ ⲉⲣⲉⲧⲉⲛⲉϣⲱⲡⲓ ⲛⲏⲓ ⲛⲟⲩⲗⲁⲟⲥ
̅ⲕⲋ:̅ⲓⲅ ϫⲉ ⲁⲛⲟⲕ ⲡⲉ ⲡϭⲟⲓⲥ ⲡⲉⲧⲉⲛⲛⲟⲩϯ ⲫⲏ ⲉⲧⲁϥⲉⲛ ⲑⲏⲛⲟⲩ ⲉⲃⲟⲗ ϧⲉⲛ
ⲡⲕⲁϩⲓ ⲛⲭⲏⲙⲓ ⲉⲧⲉⲧⲉⲛⲟⲓ ⲙⲃⲱⲕ ⲟⲩⲟϩ ⲁⲓϧⲟⲙϧⲉⲙ ⲙⲡⲥⲛⲁⲩϩ ⲛⲧⲉ
ⲡⲉⲧⲉⲛⲛⲁϩⲃⲉϥ ⲟⲩⲟϩ ⲁⲓⲉⲛ ⲑⲏⲛⲟⲩ ⲉⲃⲟⲗ ⲛⲉⲙ ⲟⲩⲡⲁⲣⲣⲏⲥⲓⲁ
̅ⲕⲋ:̅ⲓⲇ ⲉϣⲱⲡ ⲇⲉ ⲁⲣⲉⲧⲉⲛϣⲧⲉⲙⲥⲱⲧⲉⲙ ⲛⲥⲱⲓ ⲟⲩⲟϩ ⲛⲧⲉⲧⲉⲛϣⲧⲉⲙⲓⲣⲓ
ⲛⲛⲁⲟⲩⲁϩⲥⲁϩⲛⲓ
̅ⲕⲋ:̅ⲓⲉ ⲁⲗⲗⲁ ⲛⲧⲉⲧⲉⲛⲉⲣⲁⲧⲑⲱⲧ ⲛϩⲏⲧ ⲉⲣⲱⲟⲩ ⲟⲩⲟϩ ⲛⲁϩⲁⲡ
ⲛⲧⲉⲧⲉⲛⲙⲉⲥⲧⲱⲟⲩ ϧⲉⲛ ⲛⲉⲧⲉⲛⲯⲩⲭⲏ ϩⲱⲥⲇⲉ ⲛⲑⲱⲧⲉⲛ ⲛⲧⲉⲧⲉⲛϣⲧⲉⲙⲓⲣⲓ
ⲛⲛⲁⲉⲛⲧⲟⲗⲏ ⲧⲏⲣⲟⲩ ϩⲱⲥⲇⲉ ⲛⲧⲉⲧⲉⲛϫⲱⲣ ⲛⲧⲁⲇⲓⲁⲑⲏⲕⲏ ⲉⲃⲟⲗ
̅ⲕⲋ:̅ⲓⲋ ⲟⲩⲟϩ ⲁⲛⲟⲕ ϩⲱ ⲉⲓⲉⲓⲣⲓ ⲛⲱⲧⲉⲛ ⲙⲡⲁⲓⲣⲏϯ ⲟⲩⲟϩ ⲉⲓⲉⲧⲟⲩϩⲟ ⲉϫⲉⲛ
ⲑⲏⲛⲟⲩ ⲛϯⲙⲉⲧⲁⲧϣⲁϣⲛⲓ ⲛⲉⲙ ϯⲯⲱⲣⲁ ⲛⲉⲙ ⲡⲓⲥⲑⲉⲣⲧⲉⲣ ⲛⲉⲧⲉⲛⲃⲁⲗ
ⲉⲩⲧⲏⲥ ⲟⲩⲟϩ ⲉⲩⲧⲟⲙⲧ ⲟⲩⲟϩ ⲛⲉⲧⲉⲛⲯⲩⲭⲏ ⲉⲩⲃⲏⲗ ⲉⲃⲟⲗ ⲟⲩⲟϩ
ⲉⲣⲉⲧⲉⲛⲉⲥⲓϯ ⲙⲡⲉⲧⲉⲛϫⲣⲟϫ ⲉⲡⲉⲧϣⲟⲩⲓⲧ ⲟⲩⲟϩ ⲉⲩⲉⲟⲩⲟⲙⲟⲩ ⲛϫⲉ ⲛⲏ
ⲉⲧϯ ⲟⲩⲃⲉ ⲑⲏⲛⲟⲩ
̅ⲕⲋ:̅ⲓⲍ ⲟⲩⲟϩ ⲉⲓⲉⲧⲁϫⲣⲟ ⲙⲡⲁϩⲟ ⲉϫⲉⲛ ⲑⲏⲛⲟⲩ ⲟⲩⲟϩ ⲉⲣⲉⲧⲉⲛⲉϩⲉⲓ
ⲙⲡⲉⲙⲑⲟ ⲛⲛⲉⲧⲉⲛϫⲁϫⲓ ⲟⲩⲟϩ ⲉⲩⲉϭⲟϫⲓ ⲛⲥⲱⲧⲉⲛ ⲛϫⲉ ⲛⲏ ⲉⲑⲙⲟⲥϯ
ⲙⲙⲱⲧⲉⲛ ⲟⲩⲟϩ ⲉⲣⲉⲧⲉⲛⲉⲫⲱⲧ ⲙⲙⲟⲛ ⲡⲉⲧϭⲟϫⲓ ⲛⲥⲁ ⲑⲏⲛⲟⲩ
̅ⲕⲋ:̅ⲓⲏ ⲟⲩⲟϩ ϣⲁ ⲫⲁⲓ ⲁⲣⲉⲧⲉⲛϣⲧⲉⲙⲥⲱⲧⲉⲙ ⲛⲥⲱⲓ ⲟⲩⲟϩ ⲉⲓⲉⲟⲩⲁϩⲧⲟⲧ
ⲉⲉⲣⲡⲉⲇⲉⲩⲓⲛ ⲙⲙⲱⲧⲉⲛ ϧⲉⲛ ⲍ ⲛⲉⲣϧⲟⲧ ⲉϫⲉⲛ ⲛⲉⲧⲉⲛⲛⲟⲃⲓ
̅ⲕⲋ:̅ⲓⲑ ⲟⲩⲟϩ ⲉⲓⲉϧⲟⲙϧⲉⲙ ⲙⲡϣⲱⲃϣ ⲛⲧⲉⲧⲉⲛⲙⲉⲧⲣⲉϥϩⲓⲡϩⲟ ⲟⲩⲟϩ ⲉⲓⲉⲭⲱ
ⲛⲧⲫⲉ ⲛⲱⲧⲉⲛ ⲙⲫⲣⲏϯ ⲛⲟⲩⲃⲉⲛⲓⲡⲓ ⲛⲉⲙ ⲡⲓⲕⲁϩⲓ ⲙⲫⲣⲏϯ ⲛⲟⲩϩⲟⲙⲧ
ⲛⲱⲧⲉⲛ
̅ⲕⲋ:̅ⲕ ⲟⲩⲟϩ ⲧⲉⲧⲉⲛϫⲟⲙ ⲉⲥⲉϣⲱⲡⲓ ⲉⲡⲉⲧϣⲟⲩⲓⲧ ⲟⲩⲟϩ ⲛⲛⲉ ⲡⲉⲧⲉⲛⲕⲁϩⲓ
ϯ ⲙⲡⲉϥⲟⲩⲧⲁϩ ⲟⲩⲟϩ ⲡⲓϣϣⲏⲛ ⲛⲧⲉⲧⲉⲛⲕⲟⲓ ⲛⲛⲉϥϯ ⲙⲡⲉϥⲟⲩⲧⲁϩ
̅ⲕⲋ:̅ⲕⲁ ⲟⲩⲟϩ ⲙⲉⲛⲉⲛⲥⲁ ⲛⲁⲓ ⲉϣⲱⲡ ⲛⲧⲉⲧⲉⲛⲙⲟϣⲓ ⲉⲣⲉⲧⲉⲛⲣⲁⲕⲓ ⲟⲩⲟϩ
ⲛⲧⲉⲧⲉⲛϣⲧⲉⲙⲥⲱⲧⲉⲙ ⲛⲥⲱⲓ ⲟⲩⲟϩ ⲉⲓⲉⲧⲟⲩϩⲟ ⲉⲣⲱⲧⲉⲛ ⲛⲍ ⲛⲉⲣϧⲟⲧ
ⲕⲁⲧⲁ ⲛⲉⲧⲉⲛⲛⲟⲃⲓ
̅ⲕⲋ:̅ⲕⲃ ⲟⲩⲟϩ ⲉⲓⲉⲟⲩⲱⲣⲡ ⲉϫⲉⲛ ⲑⲏⲛⲟⲩ ⲛⲛⲓⲑⲏⲣⲓⲟⲛ ⲛⲁⲅⲣⲓⲟⲛ ⲛⲧⲉ ⲡⲓⲕⲁϩⲓ
ⲟⲩⲟϩ ⲉⲩⲉⲟⲩⲉⲙ ⲑⲏⲛⲟⲩ ⲟⲩⲟϩ ⲉⲩⲉⲙⲟⲩⲛⲕ ⲛⲛⲉⲧⲉⲛⲧⲉⲃⲛⲱⲟⲩⲓ ⲟⲩⲟϩ
ⲉⲩⲉⲉⲣ ⲑⲏⲛⲟⲩ ⲛⲕⲟⲩϫⲓ ⲟⲩⲟϩ ⲉⲩⲉϣⲱⲡⲓ ⲉⲩϣⲏϥ ⲛϫⲉ ⲛⲉⲧⲉⲛⲙⲱⲓⲧ
̅ⲕⲋ:̅ⲕⲅ ⲟⲩⲟϩ ⲉϣⲱⲡ ⲉϩⲣⲏⲓ ⲉϫⲉⲛ ⲛⲁⲓ ⲛⲧⲉⲧⲉⲛϣⲧⲉⲙϭⲓⲥⲃⲱ ⲁⲗⲗⲁ
ⲛⲧⲉⲧⲉⲛⲙⲟϣⲓ ⲛⲉⲙⲏⲓ ⲉⲣⲉⲧⲉⲛⲣⲁⲕⲓ
̅ⲕⲋ:̅ⲕⲇ ⲁⲛⲟⲕ ϩⲱ ⲉⲓⲉⲙⲟϣⲓ ⲛⲉⲙⲱⲧⲉⲛ ϧⲉⲛ ⲟⲩϫⲱⲛⲧ ⲉϥⲣⲁⲕⲓ ⲟⲩⲟϩ
ⲉⲓⲉϣⲁⲣⲓ ⲉⲣⲱⲧⲉⲛ ⲕⲉⲅⲉ ⲛⲍ ⲛⲥⲟⲡ ⲛⲧϣⲉⲃⲓⲱ ⲛⲛⲉⲧⲉⲛⲛⲟⲃⲓ
̅ⲕⲋ:̅ⲕⲉ ⲟⲩⲟϩ ⲉⲓⲉⲓⲛⲓ ⲉϩⲣⲏⲓ ⲉϫⲱⲧⲉⲛ ⲛⲟⲩⲥⲏϥⲓ ⲉⲥϭⲓⲙⲡϣⲓϣ ⲛⲟⲩϩⲁⲡ ⲛⲧⲉ
ⲟⲩⲇⲓⲁⲑⲏⲕⲏ ⲟⲩⲟϩ ⲉⲣⲉⲧⲉⲛⲉⲫⲱⲧ ⲉⲛⲉⲧⲉⲛⲃⲁⲕⲓ ⲟⲩⲟϩ ⲉⲓⲉⲟⲩⲱⲣⲡ ⲛⲟⲩⲙⲟⲩ
ⲉϧⲟⲩⲛ ⲉⲣⲱⲧⲉⲛ ⲟⲩⲟϩ ⲉⲩⲉϯ ⲑⲏⲛⲟⲩ ⲉϧⲣⲏⲓ ⲉⲛⲉⲛϫⲓϫ ⲛⲧⲉ ⲛⲉⲧⲉⲛϫⲁϫⲓ
̅ⲕⲋ:̅ⲕⲋ ϧⲉⲛ ⲡϫⲓⲛⲑⲣⲟⲩϩⲉϫϩⲉϫ ⲑⲏⲛⲟⲩ ϧⲉⲛ ⲡⲓⲥⲟⲩⲟ ⲛⲉⲙ ⲡⲓⲱⲓⲕ ⲟⲩⲟϩ
ⲉⲣⲉ ⲙⲏϯ ⲛⲥϩⲓⲙⲓ ⲉⲩⲉϫⲱϫ ⲛⲛⲉⲧⲉⲛⲱⲓⲕ ϧⲉⲛ ⲟⲩⲑⲣⲓⲣ ⲛⲟⲩⲱⲧ ⲟⲩⲟϩ
ⲉⲩⲉϯ ⲛⲛⲓⲱⲓⲕ ⲛⲱⲧⲉⲛ ϧⲉⲛ ⲟⲩⲙⲁϣⲓ ⲟⲩⲟϩ ⲉⲣⲉⲧⲉⲛⲉⲟⲩⲱⲙ ⲛⲛⲉⲧⲉⲛⲥⲓ
̅ⲕⲋ:̅ⲕⲍ ⲉϣⲱⲡ ⲇⲉ ⲉϩⲣⲏⲓ ⲉϫⲉⲛ ⲛⲁⲓ ⲛⲧⲉⲧⲉⲛϣⲧⲉⲙⲥⲱⲧⲉⲙ ⲛⲥⲱⲓ ⲁⲗⲗⲁ
ⲛⲧⲉⲧⲉⲛⲙⲟϣⲓ ⲛⲉⲙⲏⲓ ⲉⲣⲉⲧⲉⲛⲣⲁⲕⲓ
̅ⲕⲋ:̅ⲕⲏ ⲁⲛⲟⲕ ϩⲱ ⲉⲓⲉⲙⲟϣⲓ ⲛⲉⲙⲱⲧⲉⲛ ϧⲉⲛ ⲟⲩϫⲱⲛⲧ ⲉϥⲣⲁⲕⲓ ⲟⲩⲟϩ
ⲉⲓⲉϯϣⲉⲃⲓⲱ ⲛⲱⲧⲉⲛ ⲁⲛⲟⲕ ⲛⲍ ⲛⲥⲟⲡ ⲕⲁⲧⲁ ⲛⲉⲧⲉⲛⲛⲟⲃⲓ
̅ⲕⲋ:̅ⲕⲑ ⲟⲩⲟϩ ⲉⲣⲉⲧⲉⲛⲉⲟⲩⲱⲙ ⲛⲛⲓⲥⲁⲣⲝ ⲛⲧⲉ ⲛⲉⲧⲉⲛϣⲏⲣⲓ ⲛⲉⲙ ⲛⲓⲥⲁⲣⲝ
ⲛⲧⲉ ⲛⲉⲧⲉⲛϣⲉⲣⲓ ⲉⲣⲉⲧⲉⲛⲉⲟⲩⲟⲙⲟⲩ
̅ⲕⲋ:̅ⲗ ⲟⲩⲟϩ ⲉⲓⲉϣⲱϥ ⲛⲧⲉⲧⲉⲛⲥⲧⲩⲗⲏ ⲟⲩⲟϩ ⲉⲓⲉϥⲱϯ ⲉⲃⲟⲗ
ⲛⲛⲉⲧⲉⲛⲓⲉⲃⲛϣⲉ ⲛⲉⲙ ⲛⲉⲧⲉⲛⲙⲟⲩⲛⲕ ⲛϫⲓϫ ⲟⲩⲟϩ ⲉⲓⲉⲭⲱ ⲛⲛⲉⲧⲉⲛⲕⲉⲗⲓ
ⲉϫⲉⲛ ⲛⲓⲕⲉⲗⲓ ⲛⲧⲉ ⲛⲉⲧⲉⲛⲓⲇⲱⲗⲟⲛ ⲟⲩⲟϩ ⲉⲣⲉ ⲧⲁⲯⲩⲭⲏ ⲙⲉⲥⲧⲉ ⲑⲏⲛⲟⲩ
̅ⲕⲋ:̅ⲗⲁ ⲟⲩⲟϩ ⲉⲓⲉⲭⲱ ⲛⲛⲉⲧⲉⲛⲃⲁⲕⲓ ⲉⲡϣⲱϥ ⲟⲩⲟϩ ⲉⲓⲉⲥⲱϥ ⲛⲛⲏ ⲉⲑⲟⲩⲁⲃ
ⲛⲧⲱⲧⲉⲛ ⲟⲩⲟϩ ⲛⲛⲁϣⲱⲗⲉⲙ ⲉⲡⲥⲑⲟⲓ ⲛⲧⲉ ⲛⲉⲧⲉⲛϣⲟⲩϣⲱⲟⲩϣⲓ
̅ⲕⲋ:̅ⲗⲃ ⲟⲩⲟϩ ⲉⲓⲉϣⲱϥ ⲙⲡⲉⲧⲉⲛⲕⲁϩⲓ ⲟⲩⲟϩ ⲉⲩⲉⲉⲣϣⲫⲏⲣⲓ ⲉϩⲣⲏⲓ ⲉϫⲱϥ
ⲛϫⲉ ⲛⲉⲧⲉⲛϫⲁϫⲓ ⲛⲏ ⲉⲧϣⲟⲡ ⲛϧⲏⲧϥ
̅ⲕⲋ:̅ⲗⲅ ⲟⲩⲟϩ ⲉⲓⲉϫⲉⲣ ⲑⲏⲛⲟⲩ ⲉⲃⲟⲗ ϧⲉⲛ ⲛⲓⲉⲑⲛⲟⲥ ⲟⲩⲟϩ ⲉⲥⲉⲙⲉⲛⲕ ⲑⲏⲛⲟⲩ
ⲛϫⲉ ⲟⲩⲥⲏϥⲓ ⲉⲥⲙⲟϣⲓ ⲉϫⲉⲛ ⲑⲏⲛⲟⲩ ⲟⲩⲟϩ ⲉⲣⲉ ⲡⲉⲧⲉⲛⲕⲁϩⲓ ϣⲱⲡⲓ
ⲉⲡϣⲱϥ ⲛⲉⲙ ⲛⲉⲧⲉⲛⲡⲟⲗⲓⲥ ⲉⲩⲉϣⲱⲡⲓ ⲉⲩϣⲏϥ
̅ⲕⲋ:̅ⲗⲇ ⲟⲩⲟϩ ⲧⲟⲧⲉ ⲉⲣⲉ ⲡⲕⲁϩⲓ ϯⲙⲁϯ ⲛⲛⲉϥⲥⲁⲃⲃⲁⲧⲟⲛ ϧⲉⲛ ⲛⲓⲉϩⲟⲟⲩ
ⲧⲏⲣⲟⲩ ⲛⲧⲉ ⲡⲉϥϣⲱϥ ⲟⲩⲟϩ ⲛⲑⲱⲧⲉⲛ ϩⲱⲧⲉⲛ ⲉⲣⲉⲧⲉⲛⲉϣⲱⲡⲓ ϧⲉⲛ
ⲡⲕⲁϩⲓ ⲛⲧⲉ ⲛⲉⲧⲉⲛϫⲁϫⲓ ⲟⲩⲟϩ ⲧⲟⲧⲉ ⲉⲣⲉ ⲡⲓⲕⲁϩⲓ ⲉⲣⲥⲁⲃⲃⲁⲧⲓⲍⲓⲛ
ⲟⲩⲟϩ ⲉϥⲉϯⲙⲁϯ ⲛⲛⲉϥⲥⲁⲃⲃⲁⲧⲟⲛ
̅ⲕⲋ:̅ⲗⲉ ⲛⲛⲓⲉϩⲟⲟⲩ ⲧⲏⲣⲟⲩ ⲛⲧⲉ ⲡⲉϥϣⲱϥ ⲉϥⲉⲉⲣⲥⲁⲃⲃⲁⲧⲓⲍⲓⲛ ⲛⲛⲏ ⲉⲧⲉ
ⲙⲡⲉϥⲉⲣⲥⲁⲃⲃⲁⲧⲓⲍⲓⲛ ⲙⲙⲱⲟⲩ ϧⲉⲛ ⲛⲉⲧⲉⲛⲥⲁⲃⲃⲁⲧⲟⲛ ⲙⲡⲓⲥⲏⲟⲩ
ⲉⲛⲁⲣⲉⲧⲉⲛϣⲟⲡ ϩⲓⲱⲧϥ
̅ⲕⲋ:̅ⲗⲋ ⲟⲩⲟϩ ⲛⲏ ⲉⲁⲩⲥⲱϫⲡ ⲉⲃⲟⲗ ϧⲉⲛ ⲑⲏⲛⲟⲩ ϯⲛⲁϯ ⲛⲟⲩϩⲉⲗⲓ ⲉϧⲣⲏⲓ
ⲉⲡⲟⲩϩⲏⲧ ⲛϧⲣⲏⲓ ϧⲉⲛ ⲡⲓⲕⲁϩⲓ ⲛⲧⲉ ⲛⲟⲩϫⲁϫⲓ ⲟⲩⲟϩ ⲉϥⲉϭⲟϫⲓ ⲛⲥⲱⲟⲩ
ⲛϫⲉ ⲡϧⲣⲱⲟⲩ ⲛⲟⲩϫⲱⲃⲓ ⲉⲩⲓⲛⲓ ⲙⲙⲟⲥ ⲟⲩⲟϩ ⲉⲩⲉⲫⲱⲧ ⲙⲫⲣⲏϯ
ⲛϩⲁⲛⲟⲩⲟⲛ ⲉⲩⲫⲏⲧ ⲉⲃⲟⲗ ϧⲉⲛ ⲡⲓⲡⲟⲗⲉⲙⲟⲥ ⲟⲩⲟϩ ⲉⲩⲉϩⲉⲓ ⲙⲙⲟⲛ
ⲡⲉⲧϭⲟϫⲓ ⲛⲥⲱⲟⲩ
̅ⲕⲋ:̅ⲗⲍ ⲟⲩⲟϩ ⲉϥⲉϩⲓⲡϩⲟ ⲛϫⲉ ⲟⲩⲥⲟⲛ ⲙⲡⲉϥⲥⲟⲛ ⲙⲫⲣⲏϯ ⲛⲟⲩⲡⲟⲗⲉⲙⲟⲥ
ⲙⲙⲟⲛ ⲡⲉⲧϭⲟϫⲓ ⲛⲥⲱⲟⲩ ⲟⲩⲟϩ ⲛⲛⲉⲧⲉⲛϣϫⲉⲙϫⲟⲙ ⲛⲟϩⲓ ⲉϧⲟⲩⲛ ⲉϩⲣⲉⲛ
ⲛⲉⲧⲉⲛϫⲁϫⲓ
̅ⲕⲋ:̅ⲗⲏ ⲟⲩⲟϩ ⲉⲣⲉⲧⲉⲛⲉⲧⲁⲕⲟ ϧⲉⲛ ⲛⲓⲉⲑⲛⲟⲥ ⲟⲩⲟϩ ⲉⲣⲉ ⲡⲓⲕⲁϩⲓ ⲛⲧⲉ
ⲛⲉⲧⲉⲛϫⲁϫⲓ ⲉϥⲉⲟⲩⲉⲙ ⲑⲏⲛⲟⲩ
̅ⲕⲋ:̅ⲗⲑ ⲟⲩⲟϩ ⲛⲏ ⲉⲧⲁⲩⲥⲱϫⲡ ⲉⲃⲟⲗ ϧⲉⲛ ⲑⲏⲛⲟⲩ ⲉⲩⲉⲧⲁⲕⲟ ⲉⲑⲃⲉ ⲛⲟⲩⲛⲟⲃⲓ
ⲟⲩⲟϩ ⲉⲑⲃⲉ ⲛⲉⲛⲛⲟⲃⲓ ⲛⲧⲉ ⲛⲟⲩⲓⲟϯ ϧⲉⲛ ⲡⲕⲁϩⲓ ⲛⲧⲉ ⲛⲟⲩϫⲁϫⲓ ⲉⲩⲉⲃⲱⲗ
ⲉⲃⲟⲗ
̅ⲕⲋ:̅ⲙ ⲟⲩⲟϩ ⲉⲩⲉⲟⲩⲱⲛϩ ⲛⲛⲟⲩⲛⲟⲃⲓ ⲉⲃⲟⲗ ⲛⲉⲙ ⲛⲓⲛⲟⲃⲓ ⲛⲧⲉ ⲛⲟⲩⲓⲟϯ ϫⲉ
ⲟⲩⲏⲓ ⲁⲩⲉⲣⲡⲁⲣⲁⲃⲉⲛⲓⲛ ⲁⲩϩⲓⲡϩⲟ ⲙⲙⲟⲓ ⲟⲩⲟϩ ϫⲉ ⲁⲩⲙⲟϣⲓ ⲙⲡⲁⲙⲑⲟ
ⲉⲩⲣⲁⲕⲓ
̅ⲕⲋ:̅ⲙⲁ ⲁⲛⲟⲕ ϩⲱ ⲁⲓⲙⲟϣⲓ ⲛⲉⲙⲱⲟⲩ ϧⲉⲛ ⲟⲩϫⲱⲛⲧ ⲉϥⲣⲁⲕⲓ ⲟⲩⲟϩ
ⲉⲓⲉⲧⲁⲕⲱⲟⲩ ⲉⲃⲟⲗ ϧⲉⲛ ⲡⲕⲁϩⲓ ⲛⲧⲉ ⲛⲟⲩϫⲁϫⲓ ⲧⲟⲧⲉ ⲉϥⲉϣⲫⲓⲧ ⲛϫⲉ
ⲡⲟⲩϩⲏⲧ ⲛⲁⲧⲥⲉⲃⲓ ⲟⲩⲟϩ ⲧⲟⲧⲉ ⲉⲩⲉⲕⲁϯ ⲉⲛⲟⲩⲛⲟⲃⲓ
̅ⲕⲋ:̅ⲙⲃ ⲟⲩⲟϩ ⲉⲓⲉⲉⲣⲫⲙⲉⲩⲓ ⲛϯⲇⲓⲁⲑⲏⲕⲏ ⲛⲧⲉ ⲓⲁⲕⲱⲃ ⲛⲉⲙ ϯⲇⲓⲁⲑⲏⲕⲏ ⲛⲧⲉ
ⲓⲥⲁⲁⲕ ⲛⲉⲙ ϯⲇⲓⲁⲑⲏⲕⲏ ⲛⲧⲉ ⲁⲃⲣⲁⲁⲙ ⲉⲓⲉⲉⲣⲡⲟⲩⲙⲉⲩⲓ ⲟⲩⲟϩ ⲉⲓⲉⲉⲣⲫⲙⲉⲩⲓ
ⲙⲡⲓⲕⲁϩⲓ
̅ⲕⲋ:̅ⲙⲅ ⲟⲩⲟϩ ⲡⲓⲕⲁϩⲓ ⲉϥⲉⲥⲱϫⲡ ⲉⲃⲟⲗ ϩⲁⲣⲱⲟⲩ ⲟⲩⲟϩ ⲧⲟⲧⲉ ⲉⲣⲉ
ⲡⲓⲕⲁϩⲓ ϣⲱⲡ ⲉⲣⲟϥ ⲛⲛⲉϥⲥⲁⲃⲃⲁⲧⲟⲛ ϧⲉⲛ ⲡϫⲓⲛⲧⲉϥϣⲱϥ ⲉⲑⲃⲏⲧⲟⲩ ⲟⲩⲟϩ
ⲛⲑⲱⲟⲩ ϩⲱⲟⲩ ⲉⲩⲉϣⲱⲡ ⲉⲣⲱⲟⲩ ⲛⲛⲟⲩⲁⲛⲟⲙⲓⲁ ⲛⲧϣⲉⲃⲓⲱ ϫⲉ ⲛⲁϩⲁⲡ
ⲁⲩϩⲓⲡϩⲟ ⲙⲙⲱⲟⲩ ⲟⲩⲟϩ ⲛⲁⲟⲩⲁϩⲥⲁϩⲛⲓ ⲁⲩⲙⲉⲥⲧⲱⲟⲩ ϧⲉⲛ ⲛⲟⲩⲯⲩⲭⲏ
̅ⲕⲋ:̅ⲙⲇ ⲟⲩⲇⲉ ⲙⲡⲁⲓⲣⲏϯ ⲟⲛ ⲉⲩⲭⲏ ϧⲉⲛ ⲡⲕⲁϩⲓ ⲛⲧⲉ ⲛⲟⲩϫⲁϫⲓ
ⲙⲡⲓϩⲓⲡϩⲟ ⲙⲙⲱⲟⲩ ⲟⲩⲇⲉ ⲁⲓⲙⲉⲥⲧⲱⲟⲩ ϩⲱⲥⲇⲉ ⲉⲙⲟⲛⲕⲟⲩ ⲉⲃⲟⲗ
ⲉⲡϫⲓⲛϫⲉⲣ ⲧⲁⲇⲓⲁⲑⲏⲕⲏ ⲉⲃⲟⲗ ⲉⲧϣⲟⲡ ϩⲁⲣⲱⲟⲩ ⲁⲛⲟⲕ ⲡⲉ ⲡϭⲟⲓⲥ
ⲡⲉⲧⲉⲛⲛⲟⲩϯ
̅ⲕⲋ:̅ⲙⲉ ⲟⲩⲟϩ ⲉⲓⲉⲉⲣⲫⲙⲉⲩⲓ ⲛⲟⲩⲇⲓⲁⲑⲏⲕⲏ ⲛⲧⲱⲟⲩ ⲛϣⲟⲣⲡ ϫⲉ ⲁⲓⲉⲛⲟⲩ
ⲉⲃⲟⲗ ϧⲉⲛ ⲡⲕⲁϩⲓ ⲛⲭⲏⲙⲓ ⲉⲃⲟⲗ ϧⲉⲛ ⲡⲏⲓ ⲛⲧⲉ ⲟⲩⲙⲉⲧⲃⲱⲕ ⲙⲡⲉⲙⲑⲟ
ⲛⲛⲓⲉⲑⲛⲟⲥ ⲉⲡϫⲓⲛⲧⲁϣⲱⲡⲓ ⲛⲱⲟⲩ ⲛⲛⲟⲩϯ ϫⲉ ⲁⲛⲟⲕ ⲡⲉ ⲡϭⲟⲓⲥ
̅ⲕⲋ:̅ⲙⲋ ⲛⲁⲓ ⲛⲉ ⲛⲓϩⲁⲡ ⲛⲉⲙ ⲛⲓⲟⲩⲁϩⲥⲁϩⲛⲓ ⲛⲉⲙ ⲡⲓⲛⲟⲙⲟⲥ ⲫⲏ ⲉⲧⲁ
ⲡϭⲟⲓⲥ ⲧⲏⲓϥ ⲟⲩⲧⲱϥ ⲛⲉⲙ ⲟⲩⲧⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ϩⲓ ⲡⲧⲱⲟⲩ ⲛⲥⲓⲛⲁ
ϧⲉⲛ ⲧϫⲓϫ ⲙⲙⲱⲩⲥⲏⲥ
̅ⲕⲍ:̅ⲁ ⲟⲩⲟϩ ⲁ ⲡϭⲟⲓⲥ ⲥⲁϫⲓ ⲛⲉⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ
̅ⲕⲍ:̅ⲃ ϫⲉ ⲥⲁϫⲓ ⲛⲉⲙ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲟϩ ⲉⲕⲉϫⲟⲥ ⲛⲱⲟⲩ ϫⲉ
ⲫⲣⲱⲙⲓ ⲫⲣⲱⲙⲓ ⲫⲏ ⲉⲧⲛⲁⲱϣ ⲛⲟⲩⲉⲩⲭⲏ ϩⲱⲥⲇⲉ ⲉϯ ⲛⲧⲧⲓⲙⲏ ⲛⲑⲏ
ⲉⲧⲉⲑⲱϥ ⲙⲯⲩⲭⲏ ⲙⲡϭⲟⲓⲥ
̅ⲕⲍ:̅ⲅ ⲉⲥⲉϣⲱⲡⲓ ⲛϫⲉ ϯⲧⲓⲙⲏ ⲛⲧⲉ ⲡⲓϩⲱⲟⲩⲧ ⲓⲥϫⲉⲛ ⲕ ⲛⲣⲟⲙⲡⲓ ϣⲁ ⲝ
ⲛⲣⲟⲙⲡⲓ ⲉⲥⲉϣⲱⲡⲓ ⲛϫⲉ ⲧⲉϥⲧⲓⲙⲏ ⲉⲛ ⲛⲥⲁⲑⲉⲣⲓ ⲉⲩⲕⲏⲃ ϧⲉⲛ ⲡⲓϣⲓ ⲛⲧⲉ
ϯⲙⲁϣⲓ ⲉⲑⲟⲩⲁⲃ
̅ⲕⲍ:̅ⲇ ϯⲥϩⲓⲙⲓ ⲇⲉ ⲉⲥⲉϣⲱⲡⲓ ⲛϫⲉ ⲧⲉⲥⲧⲓⲙⲏ ⲉⲗ ⲛⲥⲁⲑⲉⲣⲓ ⲉⲩⲕⲏⲃ
̅ⲕⲍ:̅ⲉ ⲉϣⲱⲡ ⲇⲉ ⲉϥⲭⲏ ϧⲉⲛ ⲉ ⲛⲣⲟⲙⲡⲓ ϣⲁ ⲕ ⲛⲣⲟⲙⲡⲓ ⲉⲥⲉϣⲱⲡⲓ ⲛϫⲉ
ϯⲧⲓⲙⲏ ⲛⲧⲉ ⲡⲓϩⲱⲟⲩⲧ ⲉⲕ ⲛⲥⲁⲑⲉⲣⲓ ⲉⲩⲕⲏⲃ ϯⲥϩⲓⲙⲓ ⲇⲉ ⲉⲓ ⲛⲥⲁⲑⲉⲣⲓ
ⲉⲩⲕⲏⲃ
̅ⲕⲍ:̣̅ⲋ ⲓⲥϫⲉⲛ ⲟⲩⲁⲃⲟⲧ ⲇⲉ ⲉⲡϣⲱⲓ ϣⲁ ⲉ ⲛⲣⲟⲙⲡⲓ ⲉⲥⲉϣⲱⲡⲓ ⲛϫⲉ ⲧⲧⲓⲙⲏ
ⲛⲧⲉ ⲡⲓϩⲱⲟⲩⲧ ⲉⲉ ⲛⲥⲁⲑⲉⲣⲓ ⲛϩⲁⲧ ⲉⲩⲕⲏⲃ ϯⲥϩⲓⲙⲓ ⲇⲉ ⲉⲅ ⲛⲥⲁⲑⲉⲣⲓ
ⲉⲩⲕⲏⲃ
̅ⲕⲍ:̅ⲍ ⲉϣⲱⲡ ⲇⲉ ⲓⲥϫⲉⲛ ⲝ ⲛⲣⲟⲙⲡⲓ ⲟⲩⲟϩ ⲉⲡϣⲱⲓ ⲉϣⲱⲡ ⲙⲉⲛ
ⲟⲩϩⲱⲟⲩⲧ ⲡⲉ ⲉⲥⲉϣⲱⲡⲓ ⲛϫⲉ ⲧⲉϥⲧⲓⲙⲏ ⲙⲓⲉ ⲛⲥⲁⲑⲉⲣⲓ ⲛϩⲁⲧ ⲉⲩⲕⲏⲃ
ⲉϣⲱⲡ ⲇⲉ ⲟⲩⲥϩⲓⲙⲓ ⲧⲉ ⲉⲓ ⲛⲥⲁⲑⲉⲣⲓ ⲉⲩⲕⲏⲃ
̅ⲕⲍ:̅ⲏ ⲉϣⲱⲡ ⲇⲉ ⲉϥⲑⲉⲃⲓⲏⲟⲩⲧ ϧⲉⲛ ϯⲧⲓⲙⲏ ⲉϥⲉⲟϩⲓ ⲉⲣⲁⲧϥ ⲙⲡⲉⲙⲑⲟ
ⲙⲡⲓⲟⲩⲏⲃ ⲟⲩⲟϩ ⲉⲣⲉ ⲡⲓⲟⲩⲏⲃ ⲉⲣⲧⲓⲙⲏ ⲙⲙⲟϥ ⲕⲁⲧⲁ ⲫⲣⲏϯ ⲉⲧⲉ ⲟⲩⲟⲛ
ϣϫⲟⲙ ⲛⲧϫⲓϫ ⲙⲫⲏ ⲉⲧⲁϥⲱϣ ⲡⲁⲓⲣⲏϯ ⲉϥⲉⲉⲣⲧⲓⲙⲏ ⲙⲙⲟϥ ⲛϫⲉ ⲡⲓⲟⲩⲏⲃ
̅ⲕⲍ:̅ⲑ ⲉϣⲱⲡ ⲇⲉ ⲉⲃⲟⲗ ϧⲉⲛ ⲛⲓⲧⲉⲃⲛⲱⲟⲩⲓ ⲉⲧⲟⲩⲓⲛⲓ ⲙⲙⲱⲟⲩ ⲉϧⲟⲩⲛ
ⲙⲡϭⲟⲓⲥ ⲛⲧⲁⲓⲟ ⲛⲧⲉ ⲟⲩⲁⲓ ϯ ⲉⲃⲟⲗ ⲛϧⲏⲧⲟⲩ ⲙⲡϭⲟⲓⲥ ⲉϥⲉϣⲱⲡⲓ ⲉϥⲟⲩⲁⲃ
̅ⲕⲍ:̅ⲓ ⲛⲛⲉϥϣⲉⲃⲓⲉ ⲡⲉⲑⲛⲁⲛⲉϥ ϧⲁ ⲡⲉⲧϩⲱⲟⲩ ⲟⲩⲇⲉ ⲡⲉⲧϩⲱⲟⲩ ϧⲁ
ⲡⲉⲑⲛⲁⲛⲉϥ ⲉϣⲱⲡ ⲇⲉ ⲉϥⲛⲁϣⲓⲃϯ ⲛⲧⲉϥϣⲉⲃⲓⲉ ⲟⲩⲧⲉⲃⲛⲏ ϧⲁ ⲟⲩⲧⲉⲃⲛⲏ
ⲉⲩⲉϣⲱⲡⲓ ⲉⲩⲟⲩⲁⲃ ⲛⲑⲟϥ ⲛⲉⲙ ⲧⲉϥϣⲉⲃⲓⲱ
̅ⲕⲍ:̅ⲓⲁ ⲉϣⲱⲡ ⲇⲉ ⲟⲩⲧⲉⲃⲛⲏ ⲉϥϭⲁϧⲉⲙ ⲡⲉ ⲟⲩⲁⲓ ⲉⲃⲟⲗ ϧⲉⲛ ⲛⲏ ⲉⲧⲉ
ⲛⲥϣⲉ ⲁⲛ ⲉⲓⲛⲓ ⲉⲃⲟⲗ ⲛϧⲏⲧⲟⲩ ⲛⲟⲩⲧⲁⲓⲟ ⲙⲡϭⲟⲓⲥ ⲉϥⲉⲧⲁϩⲉ ⲡⲓⲧⲉⲃⲛⲏ
ⲉⲣⲁⲧϥ ⲙⲡⲉⲙⲑⲟ ⲙⲡⲓⲟⲩⲏⲃ
̅ⲕⲍ:̅ⲓⲃ ⲟⲩⲟϩ ⲉϥⲉⲉⲣⲧⲓⲙⲏ ⲉⲣⲟϥ ⲛϫⲉ ⲡⲓⲟⲩⲏⲃ ⲟⲩⲧⲉ ⲟⲩⲁⲓ ⲉⲑⲛⲁⲛⲉϥ ⲛⲉⲙ
ⲟⲩⲧⲉ ⲟⲩⲁⲓ ⲉϥϩⲱⲟⲩ ⲕⲁⲧⲁ ⲫⲏ ⲉⲧⲉ ⲡⲓⲟⲩⲏⲃ ⲉⲣⲧⲓⲙⲏ ⲉⲣⲟϥ ⲉϥⲉⲟϩⲓ
ⲉⲣⲁⲧϥ ⲙⲡⲁⲓⲣⲏϯ
̅ⲕⲍ:̅ⲓⲅ ⲉϣⲱⲡ ⲇⲉ ϧⲉⲛ ⲟⲩⲥⲱϯ ⲛⲧⲉϥⲥⲟⲧϥ ⲉϥⲉⲧⲟⲩϩⲉ ⲡⲓⲣⲉⲉ ⲉϫⲉⲛ
ⲧⲉϥⲧⲓⲙⲏ
̅ⲕⲍ:̅ⲓⲇ ⲟⲩⲟϩ ⲫⲣⲱⲙⲓ ⲫⲏ ⲉⲧⲛⲁⲉⲣⲁⲅⲓⲁⲍⲓⲛ ⲙⲡⲉϥⲏⲓ ⲉϥⲟⲩⲁⲃ ⲙⲡϭⲟⲓⲥ
ⲟⲩⲟϩ ⲉϥⲉⲉⲣⲧⲓⲙⲏ ⲉⲣⲟϥ ⲛϫⲉ ⲡⲓⲟⲩⲏⲃ ⲟⲩⲧⲉ ⲫⲏ ⲉⲧⲛⲁⲛⲉϥ ⲛⲉⲙ ⲟⲩⲧⲉ
ⲫⲏ ⲉⲧϩⲱⲟⲩ ⲙⲫⲣⲏϯ ⲉⲧⲉ ⲡⲓⲟⲩⲏⲃ ⲛⲁⲉⲣⲧⲓⲙⲏ ⲉⲣⲟϥ ⲡⲁⲓⲣⲏϯ ⲉϥⲉⲟϩⲓ
̅ⲕⲍ:̅ⲓⲉ ⲉϣⲱⲡ ⲇⲉ ⲛϫⲉ ⲫⲏ ⲉⲧⲁϥⲉⲣⲁⲅⲓⲁⲍⲓⲛ ⲙⲡⲉϥⲏⲓ ⲛⲧⲉϥⲥⲱϯ ⲙⲡⲉϥⲏⲓ
ⲉϥⲉⲧⲟⲩϩⲟ ⲉϩⲣⲏⲓ ⲉϫⲱϥ ⲙⲡⲓⲣⲉⲉ ⲛⲧⲉ ⲡⲓϩⲁⲧ ⲛⲧⲉ ⲧⲉϥⲧⲓⲙⲏ ⲟⲩⲟϩ
ⲉϥⲉϣⲱⲡⲓ ⲛⲁϥ
̅ⲕⲍ:̅ⲓⲋ ⲉϣⲱⲡ ⲇⲉ ⲛⲧⲉ ⲡⲓⲣⲱⲙⲓ ⲉⲣⲁⲅⲓⲁⲍⲓⲛ ⲉⲃⲟⲗ ϧⲉⲛ ⲧⲕⲟⲓ ⲛⲧⲉ
ⲡⲉϥⲁⲙⲁϩⲓ ⲙⲡϭⲟⲓⲥ ⲟⲩⲟϩ ⲉⲥⲉϣⲱⲡⲓ ⲛϫⲉ ⲧⲉϥⲧⲓⲙⲏ ⲕⲁⲧⲁ ⲡⲉϥϫⲣⲟϫ
ⲛⲛ ⲛⲥⲁⲑⲉⲣⲓ ⲉⲩⲕⲏⲃ ϧⲁ ⲟⲩⲕⲟⲣⲟⲥ ⲛⲓⲱⲧ
̅ⲕⲍ:̅ⲓⲍ ⲉϣⲱⲡ ⲇⲉ ⲁϥϣⲁⲛⲧⲟⲩⲃⲟ ⲙⲡⲉϥⲓⲟϩⲓ ⲓⲥϫⲉⲛ ϯⲣⲟⲙⲡⲓ ⲛⲧⲉ ⲡⲓⲭⲱ
ⲉⲃⲟⲗ ⲉⲩⲉⲥⲉⲙⲛⲏⲧϥ ⲕⲁⲧⲁ ⲧⲉϥⲧⲓⲙⲏ
̅ⲕⲍ:̅ⲓⲏ ⲉϣⲱⲡ ⲇⲉ ⲉⲡϧⲁⲉ ⲙⲉⲛⲉⲛⲥⲁ ⲡⲓⲭⲱ ⲉⲃⲟⲗ ⲛⲧⲉϥⲉⲣⲁⲅⲓⲁⲍⲓⲛ
ⲙⲡⲉϥⲓⲟϩⲓ ⲟⲩⲟϩ ⲉⲣⲉ ⲡⲓⲟⲩⲏⲃ ⲉⲡ ⲡⲓϩⲁⲧ ⲉⲣⲟϥ ⲓⲥϫⲉⲛ ⲛⲓⲣⲟⲙⲡⲓ ⲉⲧⲥⲟϫⲡ
ϣⲁ ϯⲣⲟⲙⲡⲓ ⲛⲧⲉ ⲡⲓⲭⲱ ⲉⲃⲟⲗ ⲟⲩⲟϩ ⲉⲩⲉⲱⲗⲓ ⲛⲧⲉϥϣⲉⲃⲓⲱ ⲉⲃⲟⲗ ϧⲉⲛ
ⲧⲉϥⲧⲓⲙⲏ
̅ⲕⲍ:̅ⲓⲑ ⲟⲩⲟϩ ⲉϣⲱⲡ ⲉϥⲛⲁⲥⲱϯ ⲙⲡⲉϥⲓⲟϩⲓ ⲛϫⲉ ⲫⲏ ⲉⲧⲁϥⲉⲣⲁⲅⲓⲁⲍⲓⲛ
ⲙⲙⲟϥ ⲉϥⲉⲧⲟⲩϩⲉ ⲡⲓⲣⲉⲉ ⲛⲧⲉ ⲡⲓϩⲁⲧ ⲛⲧⲉ ⲧⲉϥⲧⲓⲙⲏ ⲟⲩⲟϩ ⲉϥⲉϣⲱⲡⲓ
ⲛⲁϥ
̅ⲕⲍ:̅ⲕ ⲉϣⲱⲡ ⲇⲉ ⲛⲧⲉϥⲥⲱϯ ⲙⲡⲓⲓⲟϩⲓ ⲟⲩⲟϩ ⲛⲧⲉϥϯ ⲙⲡⲓⲓⲟϩⲓ ⲉⲃⲟⲗ
ⲛⲕⲉⲥⲟⲡ ⲛⲕⲉⲣⲱⲙⲓ ⲛⲛⲉϥⲥⲉⲧ ⲡⲓⲓⲟϩⲓ ϫⲉ
̅ⲕⲍ:̅ⲕⲁ ⲁⲗⲗⲁ ⲉϣⲱⲡ ⲁⲣⲉϣⲁⲛ ϯⲣⲟⲙⲡⲓ ⲛⲧⲉ ⲡⲓⲭⲱ ⲉⲃⲟⲗ ⲥⲓⲛⲓ ⲉϥⲉϣⲱⲡⲓ
ⲉϥⲟⲩⲁⲃ ⲉⲩⲉⲱⲥϧ ⲙⲙⲟϥ ⲙⲡϭⲟⲓⲥ ⲙⲫⲣⲏϯ ⲙⲡⲓⲕⲁϩⲓ ⲉⲧⲁⲩⲥⲟⲧϥ ⲉⲃⲟⲗ
ⲙⲡⲓⲟⲩⲏⲃ ⲟⲩⲟϩ ⲉϥⲉϣⲱⲡⲓ ⲛⲁϥ ⲛⲟⲩⲁⲙⲁϩⲓ
̅ⲕⲍ:̅ⲕⲃ ⲉϣⲱⲡ ⲇⲉ ⲛⲧⲉϥⲉⲣⲁⲅⲓⲁⲍⲓⲛ ⲙⲡϭⲟⲓⲥ ⲉⲃⲟⲗ ϧⲉⲛ ⲟⲩⲓⲟϩⲓ
ⲉⲧⲁϥϣⲟⲡϥ ⲉⲛⲉ ⲉⲃⲟⲗ ϧⲉⲛ ⲡⲓⲓⲟϩⲓ ⲁⲛ ⲡⲉ ⲛⲧⲉ ⲡⲉϥⲁⲙⲁϩⲓ
̅ⲕⲍ:̅ⲕⲅ ⲉϥⲉϥⲓⲱⲡ ⲛⲉⲙⲁϥ ⲛϫⲉ ⲡⲓⲟⲩⲏⲃ ⲉⲡⲓⲧⲉⲗⲟⲥ ⲛⲧⲉ ϯⲧⲓⲙⲏ ⲉⲃⲟⲗ ϧⲉⲛ
ϯⲣⲟⲙⲡⲓ ⲛⲧⲉ ⲡⲓⲭⲱ ⲉⲃⲟⲗ ⲟⲩⲟϩ ⲉϥⲉϯ ⲛϯⲧⲓⲙⲏ ϧⲉⲛ ϯⲣⲟⲙⲡⲓ ⲉⲧⲉⲙⲙⲁⲩ
ⲉⲥⲟⲩⲁⲃ ⲙⲡϭⲟⲓⲥ
̅ⲕⲍ:̅ⲕⲇ ⲟⲩⲟϩ ϧⲉⲛ ϯⲣⲟⲙⲡⲓ ⲛⲧⲉ ⲡⲓⲭⲱ ⲉⲃⲟⲗ ⲉⲩⲉϯ ⲙⲡⲓⲓⲟϩⲓ ⲙⲡⲓⲣⲱⲙⲓ
ⲫⲏ ⲉⲧⲁϥϣⲟⲡϥ ⲛⲧⲟⲧϥ ⲫⲏ ⲉⲧⲉⲫⲱϥ ⲡⲉ ⲡⲓⲓⲟϩⲓ
̅ⲕⲍ:̅ⲕⲉ ⲟⲩⲟϩ ⲧⲓⲙⲏ ⲛⲓⲃⲉⲛ ⲉⲥⲉϣⲱⲡⲓ ⲉⲩϣⲓ ⲙⲙⲟⲥ ϧⲉⲛ ϩⲁⲛⲙⲁϣⲓ
ⲉⲩⲟⲩⲁⲃ ⲟⲩⲟϩ ⲉⲥⲉϣⲱⲡⲓ ⲛϫⲉ ϯⲥⲁⲑⲉⲣⲓ ⲉⲥⲕⲏⲃ ⲛⲕ ⲛⲟⲃⲟⲗⲟⲥ
̅ⲕⲍ:̅ⲕⲋ ⲟⲩⲟϩ ϣⲁⲙⲓⲥⲓ ⲛⲓⲃⲉⲛ ⲉⲧⲛⲁϣⲱⲡⲓ ϧⲉⲛ ⲛⲉⲧⲉⲛⲧⲉⲃⲛⲱⲟⲩⲓ ⲉϥⲉϣⲱⲡⲓ
ⲙⲡϭⲟⲓⲥ ⲟⲩⲟϩ ⲛⲛⲉ ϩⲗⲓ ϣⲉⲃⲓⲏⲧϥ ⲓⲧⲉ ⲟⲩⲙⲁⲥⲓ ⲓⲧⲉ ⲟⲩⲉⲥⲱⲟⲩ
ⲉⲩⲉϣⲱⲡⲓ ⲙⲡϭⲟⲓⲥ
̅ⲕⲍ:̅ⲕⲍ ⲉϣⲱⲡ ⲇⲉ ⲉⲃⲟⲗ ϧⲉⲛ ⲛⲓϥⲧⲉⲫⲁⲧ ⲉⲧϭⲁϧⲉⲙ ⲉϥⲉϣⲓⲃϯ ⲕⲁⲧⲁ
ⲧⲉϥⲧⲓⲙⲏ ⲟⲩⲟϩ ⲉϥⲉⲧⲟⲩϩⲟ ⲉϫⲱϥ ⲙⲡⲉϥⲣⲉⲉ ⲟⲩⲟϩ ⲉϥⲉϣⲱⲡⲓ ⲛⲁϥ
ⲉϣⲱⲡ ⲇⲉ ⲁϥϣⲧⲉⲙⲥⲟⲧϥ ⲉⲩⲉⲧⲏⲓϥ ⲉⲃⲟⲗ ⲕⲁⲧⲁ ⲧⲉϥⲧⲓⲙⲏ
̅ⲕⲍ:̅ⲕⲏ ⲁⲛⲁⲑⲉⲙⲁ ⲇⲉ ⲛⲓⲃⲉⲛ ⲫⲏ ⲉⲧⲉ ⲫⲣⲱⲙⲓ ⲛⲁⲧⲏⲓϥ ⲙⲡϭⲟⲓⲥ ⲉⲃⲟⲗ ϧⲉⲛ
ⲛⲭⲁⲓ ⲛⲓⲃⲉⲛ ⲉⲧⲉ ⲛⲧⲁϥ ⲓⲥϫⲉⲛ ⲫⲣⲱⲙⲓ ϣⲁ ⲡⲧⲉⲃⲛⲏ ⲟⲩⲟϩ ⲛⲛⲉϥϯ ⲉⲃⲟⲗ
ϧⲉⲛ ⲟⲩⲓⲟϩⲓ ⲛⲧⲉ ⲟⲩⲁⲙⲁϩⲓ ⲛⲧⲁϥ ⲟⲩⲇⲉ ⲛⲛⲉϥⲥⲉⲧ ⲁⲛⲁⲑⲉⲙⲁ ⲛⲓⲃⲉⲛ
ⲉⲧⲉϥⲛⲁⲱϣ ⲙⲙⲱⲟⲩ ϫⲉ ⲡⲉⲑⲟⲩⲁⲃ ⲡⲉ ⲛⲧⲉ ⲛⲏ ⲉⲑⲟⲩⲁⲃ ⲙⲡϭⲟⲓⲥ
̅ⲕⲍ:̅ⲕⲑ ⲟⲩⲟϩ ⲛⲭⲁⲓ ⲛⲓⲃⲉⲛ ⲛⲁⲛⲁⲑⲉⲙⲁ ⲉⲧⲟⲩⲛⲁⲉⲛⲟⲩ ⲉϩⲣⲏⲓ ⲉϫⲉⲛ ⲛⲓⲣⲱⲙⲓ
ⲛⲛⲟⲩⲥⲟⲧⲟⲩ ⲁⲗⲗⲁ ϧⲉⲛ ⲟⲩⲙⲟⲩ ⲉⲩⲉⲙⲟⲩ
̅ⲕⲍ:̅ⲗ ⲣⲉⲙⲏⲧ ⲛⲓⲃⲉⲛ ⲛⲧⲉ ⲡⲓⲕⲁϩⲓ ⲉⲃⲟⲗ ϧⲉⲛ ⲡϫⲣⲟϫ ⲛⲧⲉ ⲡⲓⲕⲁϩⲓ ⲛⲉⲙ
ⲉⲃⲟⲗ ϧⲉⲛ ⲡⲟⲩⲧⲁϩ ⲛⲧⲉ ⲛⲓϣϣⲏⲛ ⲛⲁ ⲡϭⲟⲓⲥ ⲛⲉ ⲥⲉⲟⲩⲁⲃ ⲙⲡϭⲟⲓⲥ
̅ⲕⲍ:̅ⲗⲁ ⲉϣⲱⲡ ⲇⲉ ϧⲉⲛ ⲟⲩⲥⲱϯ ⲛⲧⲉϥⲥⲱϯ ⲙⲡⲉϥⲣⲉⲙⲏⲧ ⲉϥⲉⲧⲟⲩϩⲟ ⲉϩⲣⲏⲓ
ⲉϫⲱϥ ⲙⲡⲉϥⲣⲉⲉ
̅ⲕⲍ:̅ⲗⲃ ⲟⲩⲟϩ ⲣⲉⲙⲏⲧ ⲛⲓⲃⲉⲛ ⲛⲧⲉ ϩⲁⲛⲉϩⲱⲟⲩ ⲛⲉⲙ ϩⲁⲛⲉⲥⲱⲟⲩ ⲟⲩⲟϩ ⲛⲏ
ⲧⲏⲣⲟⲩ ⲉⲧⲛⲁⲥⲓⲛⲓ ϧⲉⲛ ⲟⲩⲏⲡⲓ ⲥⲁⲡⲉⲥⲏⲧ ⲙⲡⲓϣⲃⲱⲧ ⲡⲟⲩⲣⲉⲙⲏⲧ
ⲉϥⲉϣⲱⲡⲓ ⲉϥⲟⲩⲁⲃ ⲙⲡϭⲟⲓⲥ
̅ⲕⲍ:̅ⲗⲅ ⲛⲛⲉⲕϣⲉⲃⲓⲏⲧϥ ⲟⲩⲁⲓ ⲉⲛⲁⲛⲉϥ ϧⲁ ⲟⲩⲁⲓ ⲉϥϩⲱⲟⲩ ⲟⲩⲇⲉ ⲟⲩⲁⲓ
ⲉϥϩⲱⲟⲩ ϧⲁ ⲟⲩⲁⲓ ⲉⲛⲁⲛⲉϥ ⲉϣⲱⲡ ⲇⲉ ⲁⲕϣⲁⲛϣⲉⲃⲓⲏⲧϥ ϧⲉⲛ ⲟⲩϣⲓⲃϯ
ⲛⲑⲟϥ ⲛⲉⲙ ⲧⲉϥϣⲉⲃⲓⲱ ⲉⲩⲉϣⲱⲡⲓ ⲉⲩⲟⲩⲁⲃ ⲛⲛⲟⲩⲥⲟⲧϥ
̅ⲕⲍ:̅ⲗⲇ ⲛⲁⲓ ⲛⲉ ⲛⲓⲉⲛⲧⲟⲗⲏ ⲉⲧⲁ ⲡϭⲟⲓⲥ ϩⲟⲛϩⲉⲛ ⲙⲙⲱⲟⲩ ⲙⲙⲱⲩⲥⲏⲥ ⲟⲩⲃⲉ
ⲛⲉⲛϣⲏⲣⲓ ⲙⲡⲓⲥⲣⲁⲏⲗ ϩⲓ ⲡⲧⲱⲟⲩ ⲛⲥⲓⲛⲁ