ⲠⲀⲢⲀⲖⲒⲠⲞⲘⲈⲚⲀ Ⲁ̅
Ⲓ̅Ⲉ. ⲩ. ⲫⲉϩⲗⲧⲐ Ⲧⲟⲧⲉ ⲡⲉϫⲉⲆⲁⲩⲓⲇ ϫⲉ ⲙ̀ⲙⲟⲛⲫⲏⲉⲑⲛⲁⲧⲱⲟⲩⲛ ⲛ̀ϯⲕⲩⲃⲱⲧⲟⲥ ⲛ̀ⲧⲉⲫⲛⲟⲩϯ ⲉ̀ⲃⲏⲗ ⲉ̀ⲛⲓⲖⲉⲩⲓⲧⲏⲥ ϫⲉ ⲛ̀ⲑⲱⲟⲩ ⲁϥⲥⲟⲧⲡⲟⲩ ⲛ̀ϫⲉⲫⲛⲟⲩϯ ⲉ̀ⲑⲣⲟⲩϥⲁⲓ ⲙ̀ⲙⲟⲥ ⲟⲩⲟϩ ⲉ̀ϣⲉⲙϣⲓ ⲙ̀ⲡⲉϥⲙ̀ⲑⲟ ϣⲁⲉ̀ⲛⲉϩ . Ⲟⲩⲟϩ ⲁⲆⲁⲩⲓⲇ ⲑⲱⲟⲩϯ ⲙ̀ⲡⲓⲗⲁⲟⲥ ⲧⲏⲣϥ ⲉ̀ⲑⲣⲟⲩⲓ̀ⲛⲓ ⲉ̀ϩⲣⲏⲓ ⲛ̀ϯⲕⲩⲃⲱⲧⲟⲥ ⲛ̀ⲧⲉⲫⲛⲟⲩϯ ⲉ̀ⲡⲓⲙⲁ ⲉⲧⲁϥⲥⲉⲃⲧⲱⲧϥ ⲛⲁⲥ . Ⲟⲩⲟϩ ⲁⲆⲁⲩⲓⲇ ⲑⲱⲟⲩϯ ⲛ̀ⲛⲉⲛϣⲏⲣⲓ ⲛ̀Ⲁ̀ⲁⲣⲱⲛ ⲛⲉⲙⲛⲓⲖⲉⲩⲓⲧⲏⲥ. ⲉ̀ⲃⲟⲗ ϧⲉⲛⲔⲁⲁⲑⲟⲩⲣⲓⲏⲗ ⲡⲓⲁⲣⲭⲱⲛ ⲛⲉⲙⲛⲉϥⲥⲛⲏⲟⲩ ϣⲉ ϫⲱⲧ. ⲉ̀ⲃⲟⲗ ϧⲉⲛⲛⲉⲛϣⲏⲣⲓ ⲙ̀Ⲙⲉⲣⲁⲣⲓ ̀Ⲁⲥⲁⲓⲁ̀ ⲡⲁⲣⲭⲱⲛ ⲛⲉⲙⲛⲉϥⲥⲛⲏⲟⲩ ⲥⲛⲁⲩ ϣⲉ ϫⲱⲧ . Ⲛⲉⲛϣⲏⲣⲓ ⲛ̀Ⲅⲉⲇⲥⲱⲛ Ⲓⲱⲏⲗ ⲡⲟⲩⲁⲣⲭⲱⲛ ⲛⲉⲙⲛⲉϥⲥⲛⲏⲟⲩ ⲉⲩⲟⲓ ⲛ̀ϣⲉ ⲙⲁⲡ . Ⲛⲉⲛϣⲏⲣⲓ ⲛ̀Ⲉ̀ⲗⲓⲥⲁⲫⲁⲛ ⲡⲟⲩⲁⲣⲭⲱⲛ ⲛⲉ ⲥⲉⲙⲉⲓⲁ̀ ⲛⲉⲙⲛⲉϥⲥⲛⲏⲟⲩ ⲉⲩⲉⲣⲥⲛⲁⲩ ϣⲉ . Ⲛⲉⲛϣⲏⲣⲓ Ⲭ̀ⲉⲃⲣⲱⲛ Ⲉ̀ⲗⲓⲏⲗ ⲡⲟⲩⲁⲣⲭⲱⲛ ⲛⲉⲙⲛⲉϥⲥⲛⲏⲟⲩ ⲉⲩⲉⲣϧⲁⲙⲛⲉ. Ⲛⲉⲛϣⲏⲣⲓ ⲛ̀Ⲟ̀ⲍⲓⲏⲗ Ⲁ̀ⲙⲓⲛⲁⲇⲁⲃ ⲡⲟⲩⲁⲣⲭⲱⲛ ⲛⲉⲙⲛⲉϥⲥⲛⲏⲟⲩ ⲉⲩⲉⲣϣⲉ ⲛⲉⲙⲙⲏⲧⲥⲛⲁⲩ . Ⲟⲩⲟϩ ⲁ̀Ⲇⲁⲩⲓⲇ ⲙⲟⲩϯ ⲉ̀Ⲥⲁⲇⲱⲕ ⲛⲉⲙⲀ̀ⲃⲓⲁ̀ⲑⲁⲣ ⲛⲓⲟⲩⲏⲃ ⲛⲉⲙⲛⲓⲖⲉⲩⲓⲧⲏⲥ Ⲟⲩⲣⲓⲏⲗ ⲛⲉⲙⲀ̀ⲥⲁⲓⲁ̀ ⲛⲉⲙⲒⲱⲏⲗ ⲛⲉⲙⲤⲉⲙⲉⲓⲁ̀ ⲛⲉⲙⲀ̀ⲙⲓⲛⲁⲇⲁⲃ . Ⲟⲩⲟϩ ⲡⲉϫⲁϥ ⲛⲱⲟⲩ ϫⲉ ⲛ̀ⲑⲱⲧⲉⲛ ⲛⲓⲁⲣⲭⲱⲛ ⲛ̀ⲧⲉϯⲙⲉⲧⲓⲱⲧ ⲛ̀ⲧⲉⲛⲓⲖⲉⲩⲓⲧⲏⲥ. Ⲙⲁⲧⲟⲩⲃⲉⲑⲏⲛⲟⲩ ⲛ̀ⲑⲱⲧⲉⲛ ⲛⲉⲙⲛⲉⲧⲉⲛⲥⲛⲏⲟⲩ ⲟⲩⲟϩ ⲁ̀ⲛⲓⲟⲩⲓ̀ ⲉ̀ϩⲣⲏⲓ ⲛ̀ϯⲕⲩⲃⲱⲧⲟⲥ ⲛ̀ⲧⲉⲠϭⲟⲓⲥ ⲫⲛⲟⲩϯ ⲙ̀ⲡⲒⲥⲣⲁⲏⲗ ⲉ̀ⲡⲓⲙⲁ ⲉⲧⲁⲓⲥⲉⲃⲧⲱⲧϥ ⲛⲁⲥ. ϫⲉ ⲡⲁⲓⲙⲁ ⲅⲁⲣ ⲙ̀ⲡⲉⲧⲉⲛϣⲱⲡⲓ ⲉ̀ⲧⲓ ⲛ̀ⲟⲩⲁⲃ ⲟⲩⲟϩ ⲁ̀ⲫⲛⲟⲩϯ ⲓ̀ⲣⲓ ⲛϧ̀ⲏⲧⲉⲛ ⲛ̀ⲟⲩϣⲟⲧϣⲉⲧ ϫⲉ ⲙ̀ⲡⲉⲛⲕⲱϯ ⲛ̀ⲥⲁⲫⲛⲟⲩϯ ϧⲉⲛⲟⲩⲕⲁϯ . Ⲟⲩⲟϩ ⲁⲩⲧⲟⲩⲃⲟ ⲛ̀ϫⲉⲛⲓⲟⲩⲏⲃ ⲛⲉⲙⲛⲓⲖⲉⲩⲓⲧⲏⲥ ⲉ̀ⲡϫⲓⲛⲓ̀ⲛⲓ ⲉ̀ϩⲣⲏⲓ ⲉ̀ϯⲕⲩⲃⲱⲧⲟⲥ ⲛ̀ⲧⲉⲠϭⲟⲓⲥ ⲫⲛⲟⲩϯ ⲙ̀ⲡⲒⲥⲣⲁⲏⲗ. Ⲟⲩⲟϩ ⲁⲩϭⲓ ⲛ̀ϫⲉⲛⲉⲛϣⲏⲣⲓ ⲛ̀ⲛⲓⲖⲉⲩⲓⲧⲏⲥ ⲛ̀ϯⲕⲩⲃⲱⲧⲟⲥ ⲛ̀ⲧⲉⲫⲛⲟⲩϯ ⲙ̀ⲫⲣⲏϯ ⲉⲧⲁϥϩⲟⲛϩⲉⲛ ⲛ̀ϫⲉⲘⲱⲟⲩⲥⲏⲥ ϧⲉⲛⲡⲥⲁϫⲓ ⲙ̀ⲫⲛⲟⲩϯ ⲙ̀ⲫⲣⲏϯ ⲉⲧⲥϧⲏⲟⲩⲧ ⲉ̀ⲑⲣⲟⲩϥⲁⲓ ⲙ̀ⲙⲟⲥ ϧⲉⲛϩⲁⲛⲁ̀ⲛⲁⲫⲟⲣⲉⲩⲥⲓ . Ⲟⲩⲟϩ ⲡⲉϫⲉⲆⲁⲩⲓⲇ ⲛ̀ⲛⲓⲁⲣⲭⲱⲛ ⲛ̀ⲧⲉⲛⲓⲟⲩⲏⲃ ⲛⲉⲙⲛⲓⲖⲉⲩⲓⲧⲏⲥ . ϫⲉ ⲙⲁⲧⲁϩⲉⲛⲉⲧⲉⲛⲥⲛⲏⲟⲩ ⲉ̀ⲣⲁⲧⲟⲩ ⲛⲓⲯⲁⲗⲙⲱⲇⲟⲥ ϧⲉⲛϩⲁⲛⲟⲣⲅⲁⲛⲟⲛ ⲛ̀ⲧⲉⲛⲓϩⲱⲇⲏ ⲛⲉⲙϩⲁⲛⲕⲓⲛⲩⲣⲁ ⲛⲉⲙⲛⲓⲕⲩⲙⲃⲁⲗⲟⲛ ⲉ̀ⲑⲣⲟⲩϭⲓⲥⲓ ⲛ̀ⲧⲟⲩⲥⲙⲏ ϧⲉⲛⲟⲩⲥⲙⲏ ⲛ̀ⲧⲉⲟⲩⲟⲩⲛⲟϥ . Ⲟⲩⲟϩ ⲁ̀ⲛⲓⲖⲉⲩⲓⲧⲏⲥ ⲧⲁϩⲉⲈ̀ⲙⲁⲛ ⲉ̀ⲣⲁⲧϥ ⲡϣⲏⲣⲓ ⲛ̀Ⲓⲱⲏⲗ ⲉ̀ⲃⲟⲗ ϧⲉⲛⲛⲟⲩⲥⲛⲏⲟⲩ Ⲁ̀ⲥⲁⲫ ⲡϣⲏⲣⲓ ⲙ̀Ⲃⲁⲣⲁⲭⲓⲁ̀ ⲛⲉⲙ ⲉ̀ⲃⲟⲗ ϧⲉⲛⲛⲉⲛϣⲏⲣⲓ ⲙ̀Ⲙⲉⲣⲁⲣⲓ ⲛⲉϥⲥⲛⲏⲟⲩ Ⲁⲓⲑⲁⲛ ⲡϣⲏⲣⲓ ⲛ̀Ⲕⲓⲥⲉⲟⲥ . ⲛⲉⲙⲛⲟⲩⲥⲛⲏⲟⲩ ⲛⲉⲙⲱⲟⲩ ⲉⲩⲟⲓ ⲙ̀ⲙⲁϩⲃ̅ Ⲍⲁⲭⲁⲣⲓⲁⲥ ⲛⲉⲙ ̀Ⲟⲍⲓⲏⲗ ⲛⲉⲙⲤⲉⲙⲓⲣⲁⲙⲱⲑ ⲛⲉⲙⲒⲉⲓⲏⲗ ⲛⲉⲙⲈ̀ⲗⲓⲱ̀ⲏⲗ ⲛⲉⲙⲈ̀ⲗⲓⲁⲃ ⲛⲉⲙⲂⲁⲛⲁⲓⲁ ⲛⲉⲙⲘⲁⲁⲥⲁ ⲛⲉⲙⲘⲁⲑⲁⲑⲓⲁⲥ ⲛⲉⲙⲈ̀ⲗⲉⲫⲓⲁ̀ ⲛⲉⲙⲘⲉⲭⲁⲛⲓⲁⲥ ⲛⲉⲙⲀⲃⲇⲉⲇⲟⲙ ⲛⲉⲙⲒⲉⲓⲏⲗ ⲛⲉⲙⲞ̀ⲍⲓⲁⲥ ⲛⲓⲙ̀ⲛⲟⲧ. ⲛⲉⲙⲛⲓⲯⲁⲗⲙⲱⲇⲟⲥ Ⲉ̀ⲙⲁⲛ ⲛⲉⲙⲀ̀ⲥⲁⲫ ⲛⲉⲙⲀⲓⲑⲁⲛ ϧⲉⲛϩⲁⲛⲕⲩⲙⲃⲁⲗⲟⲛ ⲛ̀ϩⲟⲙⲧ ⲉ̀ⲑⲣⲟⲩⲥⲱⲧⲉⲙ ⲉ̀ⲣⲱⲟⲩ. Ⲍⲁⲭⲁⲣⲓⲁⲥ ⲛⲉⲙⲞⲍⲓⲏⲗ ⲛⲉⲙⲤⲉⲙⲓⲣⲁⲙⲱⲑ ⲛⲉⲙⲒⲉⲓⲏⲗ ⲛⲉⲙⲰ̀ⲛⲓ ⲛⲉⲙⲈ̀ⲗⲓⲁⲃ ⲛⲉⲙⲘ̀ⲁⲁⲥⲁⲓⲁ̀ ⲛⲉⲙⲂⲁⲛⲁⲓⲁ̀ ϧⲉⲛϩⲁⲛⲛⲁⲃⲗⲁ ⲉⲑⲃⲉϫⲉ Ⲁⲗⲓⲙⲱⲑ . ⲛⲉⲙⲘⲁⲧⲧⲁⲑⲓⲁ̀ ⲛⲉⲙⲀ̀ⲗⲟⲫⲁⲗⲟⲥ ⲛⲉⲙⲘⲁⲕⲉⲛⲓⲁ ⲛⲉⲙⲀⲃⲇⲉⲇⲟⲛ ⲛⲉⲙⲒⲉⲓⲏⲗ ⲛⲉⲙⲞ̀ⲍⲓⲁⲥ ϧⲉⲛϩⲁⲛⲕⲓⲛⲩⲣⲁⲥ ⲛⲉⲙⲀ̀ⲙⲁⲥⲉⲛⲩⲑ ⲉ̀ⲡϫⲓⲛϯϫⲟⲙ . ⲛⲉⲙⲬⲱⲛⲉⲛⲓⲁⲥ ⲡⲓⲁⲣⲭⲱⲛ ⲛ̀ⲧⲉⲛⲓⲖⲉⲩⲓⲧⲏⲥ ⲛⲁϥϩⲱⲥ ϧⲉⲛϩⲁⲛϩⲱⲇⲏ ϫⲉ ⲛⲉⲟⲩⲕⲁⲧϩⲏⲧ ⲡⲉ . ⲟⲩⲟϩ Ⲃⲁⲣⲁⲭⲓⲁⲥ ⲛⲉⲙⲈⲗⲕⲁⲛⲁ ⲛⲓⲙ̀ⲛⲟⲧ ⲛ̀ϯⲕⲩⲃⲱⲧⲟⲥ . ⲟⲩⲟϩ Ⲥⲟⲙⲛⲓⲁ̀ ⲛⲉⲙⲒⲱⲥⲁⲫⲁⲧ ⲛⲉⲙⲚⲁⲑⲁⲛⲁⲏⲗ ⲛⲉⲙⲀⲙⲁⲥⲁⲓ ⲛⲉⲙⲌⲁⲭⲁⲣⲓⲁⲥ ⲛⲉⲙⲂⲁⲛⲁⲓⲁ̀ ⲛⲉⲙⲈ̀ⲗⲓⲉ̀ⲍⲉⲣ ⲛⲓⲟⲩⲏⲃ ⲛⲁⲩⲉⲣⲥⲁⲗⲡⲓⲍⲓⲛ ϧⲁⲧⲉⲛϯⲕⲩⲃⲱⲧⲟⲥ ⲛ̀ⲧⲉⲫⲛⲟⲩϯ ⲟⲩⲟϩ Ⲁⲃⲇⲉⲇⲟⲙ ⲛⲉⲙⲒⲉⲓⲁ ⲛⲓⲙ̀ⲛⲟⲧ ⲛ̀ⲧⲉϯⲕⲩⲃⲱⲧⲟⲥ ⲛ̀ⲧⲉⲫⲛⲟⲩϯ. ⲚⲉⲆⲁⲩⲓⲇ ⲡⲉ ⲛⲉⲙⲛⲓⲡⲣⲉⲥⲃⲩⲧⲉⲣⲟⲥ ⲛ̀ⲧⲉⲡⲒⲥⲣⲁⲏⲗ ⲛⲉⲙⲛⲓⲭⲓⲗⲓⲁⲣⲭⲟⲥ ⲁⲩⲓ̀ⲛⲓ ⲛ̀ϯⲕⲩⲃⲱⲧⲟⲥ ⲛ̀ⲧⲉϯⲇⲓⲁⲑⲏⲕⲏ ⲛ̀ⲧⲉⲫⲛⲟⲩϯ ⲉ̀ⲃⲟⲗ ϧⲉⲛⲡⲏⲓ ⲛ̀Ⲁⲃⲇⲉⲇⲟⲙ ϧⲉⲛⲡⲟⲩⲛⲟϥ . Ⲟⲩⲟϩ ⲁⲥϣⲱⲡⲓ ϧⲉⲛⲡϫⲓⲛⲑⲣⲉⲫⲛⲟⲩϯ ϯⲛⲟⲙϯ ⲛ̀ⲛⲓⲖⲉⲩⲓⲧⲏⲥ ⲛⲏⲉⲧϥⲁⲓ ⲛ̀ϯⲕⲩⲃⲱⲧⲟⲥ ⲛ̀ⲧⲉϯⲇⲓⲁⲑⲏⲕⲏ ⲛ̀ⲧⲉⲫⲛⲟⲩϯ ⲁⲩϣⲱⲧ ⲛ̀ϣⲁϣϥ ⲙ̀ⲙⲁⲥⲓ ⲛⲉⲙϣⲁϣϥ ⲛ̀ⲱⲓⲗⲓ . Ⲟⲩⲟϩ Ⲇⲁⲩⲓⲇ ⲛⲁϥϧⲏⲕ ⲡⲉ ⲛ̀ⲟⲩⲥⲧⲟⲗⲏ ⲛ̀ϣⲉⲛⲥ ⲛⲉⲙⲛⲓⲖⲉⲩⲓⲧⲏⲥ ⲧⲏⲣⲟⲩ ⲛⲏⲉⲧϥⲁⲓ ⲛ̀ϯⲕⲩⲃⲱⲧⲟⲥ ⲛ̀ⲧⲉϯⲇⲓⲁⲑⲏⲕⲏ ⲛ̀ⲧⲉⲠϭⲟⲓⲥ ⲛⲉⲙⲛⲓⲯⲁⲗⲙⲱⲇⲟⲥ ⲛⲉⲙⲬⲱⲛⲉⲛⲓⲁ̀ ⲡⲓⲁⲣⲭⲱⲛ ⲛ̀ⲧⲉϯϩⲱⲇⲏ ⲛ̀ⲧⲉⲛⲏⲉⲧϩⲱⲥ ⲟⲩⲟϩ ⲟⲩⲥⲧⲟⲗⲏ ⲛ̀ϣⲉⲛⲥ ⲛⲁⲥϯ ϩⲓⲱⲧϥ ⲛ̀Ⲇⲁⲩⲓⲇ ⲡⲉ . Ⲟⲩⲟϩ ⲡⲒⲥⲣⲁⲏⲗ ⲧⲏⲣϥ ⲛⲁϥⲭⲏ ⲛⲁⲙⲁϥ ⲉϥⲓ̀ⲛⲓ ⲛ̀ϯⲕⲩⲃⲱⲧⲟⲥ ⲉ̀ⲡϣⲱⲓ ⲛ̀ⲧⲉϯⲇⲓⲁⲑⲏⲕⲏ ⲛ̀ⲧⲉⲠϭⲟⲓⲥ ϧⲉⲛⲟⲩⲙⲏⲓⲛⲓ ⲛⲉⲙⲟⲩⲥⲙⲏ ⲛⲉⲙⲟⲩⲥⲁⲗⲡⲓⲅⲅⲟⲥ ⲛⲉⲙϩⲁⲛⲕⲩⲙⲃⲁⲗⲟⲛ ⲉⲩⲱϣ ⲉ̀ⲃⲟⲗ ⲛⲉⲙϩⲁⲛⲛⲁⲃⲗⲁ ⲛⲉⲙϩⲁⲛⲕⲓⲛⲩⲣⲁ . Ⲟⲩⲟϩ ⲛⲁⲩⲓ̀ⲛⲓ ⲡⲉ ⲛ̀ϯⲕⲩⲃⲱⲧⲟⲥ ⲛ̀ⲧⲉϯⲇⲓⲁⲑⲏⲕⲏ ⲛ̀ⲧⲉⲠϭⲟⲓⲥ ⲟⲩⲟϩ ⲁϥⲓ̀ ϣⲁⲑⲃⲁⲕⲓ ⲛ̀Ⲇⲁⲩⲓⲇ ⲟⲩⲟϩ ⲁⲥϣⲱⲡⲓ ⲉⲧⲁ̀ϯⲕⲩⲃⲱⲧⲟⲥ ⲛ̀ⲧⲉϯⲇⲓⲁ̀ⲑⲏⲕⲏ ⲛ̀ⲧⲉⲠϭⲟⲓⲥ ⲓ̀ ⲉ̀ϧⲟⲩⲛ ⲉ̀ⲑⲃⲁⲕⲓ ⲛ̀Ⲇⲁⲩⲓⲇ ⲟⲩⲟϩ Ⲙⲉⲗⲭⲟⲗ ⲧϣⲉⲣⲓ ⲛ̀Ⲥⲁⲟⲩⲗ ⲁⲥϫⲟⲩϣⲧ ⲉ̀ⲃⲟⲗ ϧⲉⲛⲡⲓϣⲟⲩϣⲧ ⲁⲥⲛⲁⲩ ⲉ̀ⲡⲟⲩⲣⲟ Ⲇⲁⲩⲓⲇ ⲉϥϭⲟⲥϭⲉⲥ ⲟⲩⲟϩ ⲉϥⲥⲱⲃⲓ ⲟⲩⲟϩ ⲁⲥϣⲟϣϥϥ ϧⲉⲛⲧⲉⲥⲯⲩⲭⲏ.
Ⲓ̅Ⲋ̅. Ⲟⲩⲟϩ ⲁⲩⲓ̀ⲛⲓ ⲛ̀ϯⲕⲩⲃⲱⲧⲟⲥ ⲛ̀ⲧⲉϯⲇⲓⲁⲑⲏⲕⲏ ⲛ̀ⲧⲉⲠϭⲟⲓⲥ ⲉ̀ϧⲟⲩⲛ ⲟⲩⲟϩ ⲁⲩⲭⲁ ⲙ̀ⲙⲟⲥ ϧⲉⲛⲑⲙⲏϯ ⲛ̀ϯⲥⲕⲏⲛⲏ ⲡⲓⲙⲁ ⲉⲧⲁϥⲧⲁϫⲣⲟϥ ⲛ̀ϫⲉⲆⲁⲩⲓⲇ ⲟⲩⲟϩ ⲁⲩⲓ̀ⲛⲓ ⲉ̀ϧⲣⲏⲓ ⲛ̀ϩⲁⲛϭⲗⲓⲗ ⲉⲑⲃⲉⲟⲩⲛⲟϩⲉⲙ ⲙ̀ⲡⲉⲙⲑⲟ ⲙ̀Ⲡϭⲟⲓⲥ . Ⲟⲩⲟϩ ⲉⲧⲁϥⲟⲩⲱ̀ ⲛ̀ϫⲉⲆⲁⲩⲓⲇ ⲁϥⲓ̀ⲛⲓ ⲉ̀ϧⲣⲏⲓ ⲙ̀ⲡⲓϭⲗⲓⲗ ⲁϥⲥⲙⲟⲩ ⲉ̀ⲡⲓⲗⲁⲟⲥ ⲧⲏⲣϥ ϧⲉⲛⲫⲣⲁⲛ ⲙ̀Ⲡϭⲟⲓⲥ . Ⲟⲩⲟϩ ⲁϥⲫⲱⲣϣ ⲉ̀ϩⲣⲁϥ ⲙ̀ⲡⲓⲗⲁⲟⲥ ⲧⲏⲣϥ ⲓⲥϫⲉⲛⲟⲩⲣⲱⲙⲓ ϣⲁⲟⲩⲥϩⲓⲙⲓ ⲁϥϯ ⲛ̀ⲟⲩⲱⲓⲕ ⲛ̀Ⲁⲃⲣⲉⲙ ⲙ̀ⲫⲣⲱⲙⲓ ⲙ̀ⲯⲩⲭⲏ ⲛⲓⲃⲉⲛ ⲛⲉⲙⲟⲩⲀ̀ⲙⲟⲣⲓⲧⲏⲥ . Ⲟⲩⲟϩ ⲁϥⲑⲱϣ ⲙ̀ⲡⲉⲙⲑⲟ ⲛ̀ϯⲕⲩⲃⲱⲧⲟⲥ ⲛ̀ⲧⲉϯⲇⲓⲁⲑⲏⲕⲏ ⲙ̀Ⲡϭⲟⲓⲥ ⲉ̀ⲃⲟⲗ ϧⲉⲛⲛⲓⲖⲉⲩⲓⲧⲏⲥ ⲉ̀ϣⲉⲙϣⲓ ⲛⲉⲙ ⲉ̀ⲱϣ ⲉ̀ⲃⲟⲗ ⲛⲉⲙ ⲉ̀ⲥⲙⲟⲩ ⲉ̀Ⲡϭⲟⲓⲥ ⲫⲛⲟⲩϯ ⲙ̀ⲡⲒⲥⲣⲁⲏⲗ. ̀Ⲁⲥⲁⲫ ⲡⲓϩⲏⲅⲟⲩⲙⲉⲛⲟⲥ ⲟⲩⲟϩ ⲡⲓⲙⲁϩⲃ̅ ⲛⲉ Ⲍⲁⲭⲁⲣⲓⲁⲥ ⲛⲉⲙⲒⲱⲏⲗ ⲛⲉⲙⲤⲉⲙⲓⲣⲁⲙⲱⲑ ⲛⲉⲙⲒⲉⲓⲏⲗ ⲛⲉⲙⲘⲁⲧⲧⲁⲑⲁⲓⲁⲥ ⲛⲉⲙⲈ̀ⲗⲓⲁⲃ ⲛⲉⲙⲂⲁⲛⲁⲓⲁⲥ ⲛⲉⲙⲀⲃⲇⲉⲇⲟⲙ ⲟⲩⲟϩ Ⲓⲉⲓⲏⲗ ϧⲉⲛⲡⲓⲟⲣⲅⲁⲛⲟⲛ ⲛⲉⲙϩⲁⲛⲛⲁⲃⲗⲁ ⲛⲉⲙϩⲁⲛⲕⲓⲛⲩⲣⲁ ⲟⲩⲟϩ ̀Ⲁⲥⲁⲫ ϧⲉⲛϩⲁⲛⲕⲩⲙⲃⲁⲗⲟⲛ ⲉⲩⲱϣ ⲉ̀ⲃⲟⲗ . Ⲟⲩⲟϩ Ⲃⲁⲛⲁⲓⲁⲥ ⲛⲉⲙⲞ̀ⲍⲓⲏⲗ ⲛⲓⲟⲩⲏⲃ ϧⲉⲛϩⲁⲛⲥⲁⲗⲡⲓⲅⲅⲟⲥ ⲛ̀ⲥⲏⲟⲩ ⲛⲓⲃⲉⲛ ⲙ̀ⲡⲉⲙⲑⲟ ⲛ̀ϯⲕⲩⲃⲱⲧⲟⲥ ⲛ̀ⲧⲉϯⲇⲓⲁⲑⲏⲕⲏ ⲛ̀ⲧⲉⲫⲛⲟⲩϯ . ϧⲉⲛⲡⲓⲙⲁ ⲉ̀ⲧⲉⲙⲙⲁⲩ . Ⲧⲟⲧⲉ ⲁϥⲑⲱϣ ⲛ̀ϫⲉⲆⲁⲩⲓⲇ ⲉ̀ϩⲱⲥ ⲙ̀Ⲡϭⲟⲓⲥ ⲛ̀ϣⲟⲣⲡ ϧⲉⲛⲛⲉⲛϭⲓϫ ⲛ̀ ̀Ⲁⲥⲁⲫ ⲛⲉⲙⲡⲉϥⲥⲛⲏⲟⲩ . Ⲟⲩⲱⲛϩ ⲉ̀ⲃⲟⲗ ⲙ̀Ⲡϭⲟⲓⲥ ⲟⲩⲟϩ ⲙⲟⲩϯ ⲉ̀ⲡⲉϥⲣⲁⲛ ⲙⲁⲧⲁⲙⲉⲛⲓⲉⲑⲛⲟⲥ ⲛ̀ⲛⲉϥϩⲃⲏⲟⲩⲓ̀ . Ϩⲱⲥ ⲉ̀ⲣⲟϥ ⲟⲩⲟϩ ⲥ̀ⲙⲟⲩ ⲉ̀ⲣⲟϥ ⲥⲁϫⲓ ⲛⲉⲙⲟⲩⲟⲛ ⲛⲓⲃⲉⲛ ⲛ̀ⲛⲉϥϣⲫⲏⲣⲓ ⲧⲏⲣⲟⲩ ⲛⲏⲉⲧⲁϥⲁⲓⲧⲟⲩ ⲛ̀ϫⲉⲠϭⲟⲓⲥ . Ⲩ.ⲑ ⲫⲉϩⲗⲧⲐ Ⲕⲱϯ ⲛ̀ⲥⲁⲠϭⲟⲓⲥ ⲟⲩⲟϩ ϫⲉⲙⲛⲟⲙϯ ⲕⲱϯ ⲛ̀ⲥⲁⲡⲉϥϩⲟ ⲛ̀ⲥⲏⲟⲩ ⲛⲓⲃⲉⲛ. Ⲁⲣⲓⲫⲙⲉⲩⲓ̀ ⲛ̀ⲛⲉϥϣⲏⲣⲓ ⲧⲏⲣⲟⲩ ⲉⲧⲁϥⲁⲓⲧⲟⲩ ⲛⲉϥⲙⲏⲓⲛⲓ ⲛⲉⲙⲛⲓϩⲁⲡ ⲛ̀ⲧⲉⲣⲱϥ . Ⲡϫⲣⲟϫ ⲛ̀Ⲁⲃⲣⲁⲁⲙ ⲛⲉ ⲛⲉϥⲉ̀ⲃⲓⲁⲓⲕ ⲛⲉⲙⲛⲉⲛϣⲏⲣⲓ ⲛ̀Ⲓⲁⲕⲱⲃ ⲛⲉ ⲛⲓⲥⲱⲧⲡ ⲛ̀ⲧⲁϥ . Ⲛ̀ⲑⲟϥ ⲡⲉ Ⲡϭⲟⲓⲥ ⲡⲉⲛⲛⲟⲩϯ ⲛⲉϥϩⲁⲡ ϩⲓϫⲉⲛⲡⲓⲕⲁϩⲓ ⲧⲏⲣϥ. Ⲧⲉⲛⲓ̀ⲣⲓ ⲙ̀ⲫⲙⲉⲩⲓ̀ ⲛ̀ⲧⲉϥⲇⲓⲁⲑⲏⲕⲏ ϣⲁⲉ̀ⲛⲉϩ ⲡⲉϥⲥⲁϫⲓ ⲉⲧⲁϥⲥⲁϫⲓ ⲙ̀ⲙⲟϥ ϣⲁϩⲁⲛϩⲟ ⲛ̀ϫⲱⲟⲩ . Ⲫⲏⲉⲧⲁϥⲥⲉⲙⲛⲏⲧϥ ⲛⲉⲙⲀⲃⲣⲁⲁⲙ ⲛⲉⲙⲡⲓⲁ̀ⲛⲁϣ ⲛ̀ⲧⲁϥ ⲛ̀Ⲓ̀ⲥⲁⲁⲕ . Ⲁϥⲧⲁϩⲟ ⲉ̀ⲣⲁⲧϥ ⲛ̀Ⲓⲁⲕⲱⲃ ⲉⲩⲟⲩⲁϩⲥⲁϩⲛⲓ ⲛⲉⲙⲡⲒⲥⲣⲁⲏⲗ ⲉⲩⲇⲓⲁ̀ⲑⲏⲕⲏ ϣⲁⲉ̀ⲛⲉϩ . ⲉϥϫⲱ ⲙ̀ⲙⲟⲥ ϫⲉ ϯⲛⲁϯ ⲛⲁⲕ ⲙ̀ⲡⲓⲕⲁϩⲓ ⲛ̀Ⲭⲁⲛⲁⲁⲛ ⲟⲩⲛⲟϩ ⲛ̀ⲣⲱϣ ⲛ̀ⲧⲉⲧⲉⲕⲕⲗⲏⲣⲟⲛⲟⲙⲓⲁ. ϧⲉⲛⲡϫⲓⲛⲑⲣⲟⲩϣⲱⲡⲓ ⲉⲩⲟⲓ ⲛ̀ⲕⲟⲩϫⲓ ϧⲉⲛⲧⲟⲩⲏⲡⲓ ⲉⲩⲟⲓ ⲛ̀ⲕⲟⲩϫⲓ ⲟⲩⲟϩ ⲛ̀ⲣⲉⲙⲛ̀ϫⲱⲓⲗⲓ ⲛ̀ϧⲏⲧϥ. Ⲟⲩⲟϩ ⲁⲩⲥⲓⲛⲓ ⲉ̀ⲃⲟⲗ ϧⲉⲛⲟⲩⲉⲑⲛⲟⲥ ⲉ̀ⲟⲩⲉⲑⲛⲟⲥ ⲛⲉⲙ ⲉ̀ⲃⲟⲗ ϧⲉⲛⲟⲩⲙⲉⲧⲟⲩⲣⲟ ⲉ̀ϧⲟⲩⲛ ⲉ̀ⲕⲉⲗⲁⲟⲥ . Ⲙ̀ⲡⲉϥⲭⲁⲣⲱⲙⲓ ⲉ̀ϭⲓⲧⲟⲩ ⲛ̀ϫⲟⲛⲥ ⲟⲩⲟϩ ⲁϥⲥⲟϩⲓ ⲛ̀ϩⲁⲛⲟⲩⲣⲱⲟⲩ ⲉ̀ϩⲣⲏⲓ ⲉ̀ϫⲱⲟⲩ . ϫⲉ ⲙ̀ⲡⲉⲣϭⲓ ⲛⲉⲙⲛⲁⲭⲣⲓⲥⲧⲟⲥ ⲟⲩⲟϩ ⲙ̀ⲡⲉⲣⲉⲣⲡⲉⲧϩⲱⲟⲩ ϧⲉⲛⲛⲁⲡⲣⲟⲫⲏⲧⲏⲥ . Ϩⲱⲥ ⲉ̀ϭⲟⲓⲥ ϧⲉⲛⲟⲩϩⲱⲥ ⲙ̀ⲃⲉⲣⲓ ϩⲱⲥ ⲉ̀Ⲡϭⲟⲓⲥ ⲡⲓⲕⲁϩⲓ ⲧⲏⲣϥ ϩⲓϣⲉⲛⲛⲟⲩϥⲓ ⲙ̀ⲡⲉϥⲟⲩϫⲁⲓ ⲛ̀ⲉ̀ϩⲟⲟⲩ ϧⲁⲧϩⲏ ⲛ̀ⲉ̀ϩⲟⲟⲩ . Ⲥⲁϫⲓ ⲙ̀ⲡⲉϥⲱ̀ⲟⲩ ϧⲉⲛⲛⲓⲉⲑⲛⲟⲥ ⲛⲉⲙⲛⲉϥϣⲫⲏⲣⲓ ϧⲉⲛⲛⲓⲗⲁⲟⲥ ⲧⲏⲣⲟⲩ. ϫⲉ ⲟⲩⲛⲓϣϯ ⲡⲉ Ⲡϭⲟⲓⲥ ⲟⲩⲟϩ ϥⲥⲙⲁⲣⲱⲟⲩⲧ ⲉ̀ⲙⲁϣⲱ ϥⲟⲓ ⲛ̀ϩⲟϯ ⲉ̀ϫⲉⲛⲛⲓⲛⲟⲩϯ ⲧⲏⲣⲟⲩ . ϫⲉ ⲛⲓⲛⲟⲩϯ ⲧⲏⲣⲟⲩ ⲛ̀ⲧⲉⲛⲓⲉⲑⲛⲟⲥ ϩⲁⲛⲇⲉⲙⲱⲛ ⲛⲉ ⲟⲩⲟϩ ⲁϥⲑⲁⲙⲓⲟ̀ ⲛ̀ⲛⲓⲫⲏⲟⲩⲓ̀ . Ⲟⲩⲱ̀ⲟⲩ ⲛⲉⲙⲟⲩϣⲟⲩϣⲟⲩ ⲥⲉⲭⲏ ⲙ̀ⲡⲉϥⲙ̀ⲑⲟ ⲉ̀ⲃⲟⲗ ⲟⲩϫⲟⲙ ⲛⲉⲙⲟⲩⲥⲙⲟⲩ ⲉⲧϧⲉⲛⲡⲉϥⲙⲁ . Ⲛⲓⲙⲉⲧⲓⲱⲧ ⲛ̀ⲧⲉⲛⲓⲉⲑⲛⲟⲥ ⲙⲟⲓ ⲛ̀ⲟⲩⲱ̀ⲟⲩ ⲙ̀Ⲡϭⲟⲓⲥ ⲛⲉⲙⲟⲩϫⲟⲙ . Ⲙⲟⲓ ⲛ̀ⲟⲩⲱ̀ⲟⲩ ⲙ̀ⲡⲉϥⲣⲁⲛ ϭⲓ ⲛⲱⲧⲉⲛ ⲛ̀ϩⲁⲛⲧⲁⲓⲟ̀ ⲟⲩⲟϩ ⲁ̀ⲛⲓⲧⲟⲩ ⲙ̀ⲡⲉⲙⲑⲟ ⲙ̀Ⲡϭⲟⲓⲥ ⲟⲩⲟϩ ⲟⲩⲱϣⲧ ⲙ̀Ⲡϭⲟⲓⲥ ϧⲉⲛⲛⲉϥⲁⲩⲗⲏⲟⲩ ⲉⲑⲟⲩⲁⲃ. Ⲙⲁⲣⲉϥⲉⲣϩⲟϯ ⲛ̀ϫⲉⲡⲕⲁϩⲓ ⲧⲏⲣϥ ϧⲁⲧϩⲏ ⲙ̀ⲡϩⲟ ⲙ̀Ⲡϭⲟⲓⲥ ⲙⲁⲣⲉϥⲧⲁϩⲟϥ ⲉ̀ⲣⲁⲧϥ ⲛϫⲉⲡⲕⲁϩⲓ ⲟⲩⲟϩ ⲙ̀ⲡⲉⲛⲑⲣⲉϥⲕⲓⲙ . Ⲙⲁⲣⲉⲥⲟⲩⲛⲟϥ ⲛ̀ϫⲉⲧⲫⲉ ⲟⲩⲟϩ ⲙⲁⲣⲉⲡⲕⲁϩⲓ ⲑⲉⲗⲏⲗ ⲙⲁⲣⲟⲩϫⲟⲥ ϧⲉⲛⲛⲓⲉⲑⲛⲟⲥ ϫⲉ ⲁ̀Ⲡϭⲟⲓⲥ ⲉⲣⲟⲩⲣⲟ . Ⲙⲁⲣⲉϥϣⲱϣ ⲉ̀ⲃⲟⲗ ⲛ̀ϫⲉⲫⲓⲟⲙ ⲛⲉⲙⲡⲉϥⲙⲟϩ ⲧⲏⲣϥ ⲛⲉⲙⲛⲓϣϣⲏⲛ ⲧⲏⲣⲟⲩ ⲛ̀ⲧⲉⲧⲕⲟⲓ ⲛⲉⲙϩⲱⲃ ⲛⲓⲃⲉⲛ ⲉ̀ⲧⲉⲛ̀ϧⲏⲧⲟⲩ . Ⲧⲟⲧⲉ ⲉⲩⲉ̀ⲑⲉⲗⲏⲗ ⲛ̀ϫⲉⲛⲓⲑⲏⲣⲓⲟⲛ ⲧⲏⲣⲟⲩ ⲛ̀ⲧⲉⲡⲓⲇⲣⲩⲙⲟⲥ ⲉ̀ⲃⲟⲗ ϧⲁⲧϩⲏ ⲙ̀Ⲡϭⲟⲓⲥ ϫⲉ ϥⲛⲏⲟⲩ ⲉ̀ϯϩⲁⲡ ⲉ̀ⲡⲕⲁϩⲓ . Ⲟⲩⲱⲛϩ ⲉ̀ⲃⲟⲗ ⲙ̀Ⲡϭⲟⲓⲥ ϫⲉ ⲟⲩⲁ̀ⲅⲁⲑⲟⲥ ⲡⲉ ϫⲉ ⲡⲉϥⲛⲁⲓ ϣⲟⲡ ϣⲁⲉ̀ⲛⲉϩ. Ⲟⲩⲟϩ ⲁ̀ϫⲟⲥ ϫⲉ ⲛⲁϩⲙⲉⲛ ⲫⲛⲟⲩϯ ⲛ̀ⲧⲉⲡⲉⲛⲟⲩϫⲁⲓ ⲥⲟⲧⲧⲉⲛ ⲛ̀ⲧⲟⲧⲟⲩ ⲛ̀ⲛⲓⲉⲑⲛⲟⲥ ⲉ̀ⲡϫⲓⲛⲥⲙⲟⲩ ⲉ̀ⲡⲉⲕⲣⲁⲛ ⲉⲑⲟⲩⲁⲃ ⲟⲩⲟϩ ⲉ̀ⲑⲣⲉⲛϣⲟⲩϣⲟⲩ ⲙ̀ⲙⲟⲛ ϧⲉⲛⲛⲉⲕⲥⲙⲟⲩ . Ϥⲥⲙⲁⲣⲱⲟⲩⲧ ⲛ̀ϫⲉⲠϭⲟⲓⲥ ⲫⲛⲟⲩϯ ⲙ̀ⲡⲒⲥⲣⲁⲏⲗ ⲓⲥϫⲉⲛϯⲛⲟⲩ ⲛⲉⲙ ϣⲁⲉ̀ⲛⲉϩ ⲟⲩⲟϩ ⲉϥⲉ̀ϫⲟⲥ ⲛ̀ϫⲉⲡⲓⲗⲁⲟⲥ ⲧⲏⲣϥ ϫⲉ ̀ⲁⲙⲏⲛ. Ⲟⲩⲟϩ ⲉⲧⲁϥⲥⲙⲟⲩ ⲉ̀Ⲡϭⲟⲓⲥ . ⲁϥⲥⲱϫⲡ ⲙ̀ⲙⲁⲩ ⲛ̀Ⲁ̀ⲥⲁⲫ ⲛⲉⲙⲛⲉϥⲥⲛⲏⲟⲩ ⲛ̀ⲧⲟⲩϣⲉⲙϣⲓ ⲙ̀ⲡⲉⲙⲑⲟ ⲛ̀ϯⲕⲩⲃⲱⲧⲟⲥ ⲛ̀ϯⲇⲓⲁ̀ⲑⲏⲕⲏ ⲛ̀ⲧⲉⲫⲛⲟⲩϯ ⲛ̀ⲥⲏⲟⲩ ⲛⲓⲃⲉⲛ ⲉ̀ⲧⲉⲫⲁⲓ ⲡⲉ ⲡⲓⲉ̀ϩⲟⲟⲩ ⲡⲓⲉ̀ϩⲟⲟⲩ . Ⲩⲉⲣϭⲉ ⲏⲝϥ ⲫⲉϩⲗⲉⲛⲐ
Ⲕ̅ⲏ̅. Ⲩ. ⲫⲉϩⲗⲧⲐ Ⲟⲩⲟϩ ⲁϥⲟ̀ϩⲓ ⲉ̀ⲣⲁⲧϥ ⲛ̀ϫⲉⲆⲁⲩⲓⲇ ϧⲉⲛⲑⲙⲏϯ ⲛ̀ϯⲉⲕⲕⲗⲏⲥⲓⲁ̀ ⲟⲩⲟϩ ⲡⲉϫⲁϥ ϫⲉ ⲥⲱⲧⲉⲙ ⲉ̀ⲣⲟⲓ ⲛⲁⲥⲛⲏⲟⲩ ⲟⲩⲟϩ ⲡⲁⲗⲁⲟⲥ ⲁ̀ⲛⲟⲕ ⲅⲁⲣ ⲁⲥⲓ̀ ⲉ̀ϫⲉⲛⲡⲁϩⲏⲧ ⲉⲕⲱⲧ ⲛ̀ⲟⲩⲏⲓ ⲉ̀ⲟⲩⲙⲁⲛⲉⲙⲧⲟⲛ ⲛ̀ϯⲕⲩⲃⲱⲧⲟⲥ ⲛ̀ⲧⲉϯⲇⲓⲁ̀ⲑⲏⲕⲏ ⲛ̀ⲧⲉⲫⲛⲟⲩϯ ⲛⲉⲙⲟⲩⲙⲁⲛ̀ⲥⲉⲙⲛⲓ ⲛ̀ⲧⲉⲛⲉϥϭⲁⲗⲁⲩϫ ⲟⲩⲟϩ ⲁⲓⲥⲟⲃϯ ⲛ̀ⲟⲩⲙⲏϣ ⲛ̀ϣⲁⲩ ⲛ̀ⲧⲉⲡⲕⲱⲧ ⲙ̀ⲡⲓⲏⲓ . Ⲟⲩⲟϩ ⲡⲉϫⲉⲠϭⲟⲓⲥ ⲛⲏⲓ ϫⲉ ⲛ̀ⲛⲉⲕⲕⲱⲧ ⲛⲏⲓ ⲛ̀ⲟⲩⲏⲓ ⲛ̀ⲑⲟⲕ ⲉ̀ⲡϫⲓⲛⲙⲟⲩϯ ⲉ̀ⲡⲁⲣⲁⲛ ⲉ̀ϩⲣⲏⲓ ⲉ̀ϫⲱϥ ϫⲉ ⲛ̀ⲑⲟⲕ ⲟⲩⲣⲱⲙⲓ ⲙ̀ⲡⲟⲗⲉⲙⲓⲥⲧⲏⲥ ⲛ̀ⲑⲟⲕ ⲟⲩⲟϩ ⲁⲕⲫⲱⲛ ⲛ̀ⲟⲩⲙⲏϣ ⲛ̀ⲥⲛⲟϥ ⲉ̀ⲃⲟⲗ . Ⲟⲩⲟϩ ⲁ̀Ⲡϭⲟⲓⲥ ⲫⲛⲟⲩϯ ⲥⲱⲧⲡ ⲛ̀ϧⲏⲧ ⲉ̀ⲃⲟⲗ ⲟⲩⲧⲉⲡⲏⲓ ⲧⲏⲣϥ ⲛ̀ⲧⲉⲡⲁⲓⲱⲧ ⲉ̀ⲑⲣⲓϣⲱⲡⲓ ⲛ̀ⲟⲩⲣⲟ ⲉ̀ϫⲉⲛⲡⲒⲥⲣⲁⲏⲗ ⲧⲏⲣϥ ϣⲁⲉ̀ⲛⲉϩ ⲟⲩⲟϩ ϧⲉⲛⲒⲟⲩⲇⲁⲥ ⲟⲛ ⲁⲥⲣⲁⲛⲁϥ ⲛ̀ϫⲉⲧⲁⲙⲉⲧⲟⲩⲣⲟ ⲟⲩⲟϩ ⲉ̀ⲃⲟⲗ ϧⲉⲛⲒⲟⲩⲇⲁⲥ ⲁϥⲥⲱⲧⲡ ϧⲉⲛⲡⲏⲓ ⲙ̀ⲡⲁⲓⲱⲧ ⲁϥⲟⲩⲱϣ ⲛ̀ϧⲏⲧ ⲉ̀ⲑⲣⲓⲉⲣⲟⲩⲣⲟ ⲉ̀ϫⲉⲛⲡⲒⲥⲣⲁⲏⲗ ⲧⲏⲣϥ. Ⲟⲩⲟϩ ϧⲉⲛⲛⲁϣⲏⲣⲓ ⲧⲏⲣⲟⲩ ϫⲉ ⲁ̀Ⲡϭⲟⲓⲥ ϯ ⲛ̀ⲟⲩⲙⲏϣ ⲛ̀ϣⲏⲣⲓ ⲛⲏⲓ ⲁϥⲥⲱⲧⲡ ⲛ̀Ⲥⲟⲗⲟⲙⲱⲛ ⲡⲁϣⲏⲣⲓ ⲉ̀ⲑⲣⲉϥϩⲉⲙⲥⲓ ϩⲓϫⲉⲛⲡⲓⲑⲣⲟⲛⲟⲥ ⲛ̀ⲧⲉϯⲙⲉⲧⲟⲩⲣⲟ ϩⲓϫⲉⲛⲡⲒⲥⲣⲁⲏⲗ . Ⲟⲩⲟϩ ⲡⲉϫⲉⲠϭⲟⲓⲥ ⲫⲛⲟⲩϯ ⲛⲏⲓ ϫⲉ Ⲥⲟⲗⲟⲙⲱⲛ ⲉⲑⲛⲁⲕⲱⲧ ⲙ̀ⲡⲁⲏⲓ ⲛⲉⲙⲧⲁⲁⲩⲗⲏ ϫⲉⲟⲩⲏⲓ ⲁⲓⲥⲱⲧⲡ ⲛ̀ϧⲏⲧϥ ⲉ̀ⲑⲣⲉϥϣⲱⲡⲓ ⲛⲏⲓ ⲛ̀ⲟⲩϣⲏⲣⲓ ⲟⲩⲟϩ ⲁ̀ⲛⲟⲕ ϩⲱ ⲉⲓⲉ̀ϣⲱⲡⲓ ⲛⲁϥ ⲉⲩⲓⲱⲧ . Ⲉⲓⲉ̀ⲧⲟⲩⲛⲟⲥ ⲛ̀ⲧⲉϥⲙⲉⲧⲟⲩⲣⲟ ϣⲁⲉ̀ⲛⲉϩ ⲉ̀ϣⲱⲡ ⲁϥϣⲁⲛⲁ̀ⲣⲉϩ ⲉ̀ⲛⲁⲉⲛⲧⲟⲗⲏ ⲛⲉⲙⲛⲁϩⲁⲡ ⲙ̀ⲫⲣⲏϯ ⲙ̀ⲡⲁⲓⲉ̀ϩⲟⲟⲩ . ϯⲛⲟⲩ ⲇⲉ ϩⲏⲡⲡⲉ ⲙ̀ⲡⲉⲙⲑⲟ ⲛ̀ϯⲉⲕⲕⲗⲏⲥⲓⲁ ⲛ̀ⲧⲉⲠϭⲟⲓⲥ ⲉ̀ⲣⲉⲧⲉⲛⲥⲙⲟⲩ ⲉ̀Ⲡϭⲟⲓⲥ ⲡⲉⲛⲛⲟⲩϯ ⲟⲩⲟϩ ⲉ̀ⲣⲉⲧⲉⲛⲁ̀ⲣⲉϩ ⲉ̀ⲛⲓⲉⲛⲧⲟⲗⲏ ⲧⲏⲣⲟⲩ ⲛ̀ⲧⲉⲫⲛⲟⲩϯ ϩⲓⲛⲁ ⲛ̀ⲧⲉⲧⲉⲛⲉⲣⲕⲗⲏⲣⲟⲛⲟⲙⲓⲁ ⲙ̀ⲡⲓⲕⲁϩⲓ ⲟⲩⲟϩ ⲉ̀ⲣⲉⲧⲉⲛⲉ̀ⲧⲏⲓϥ ⲛ̀ⲕⲗⲏⲣⲟⲛⲟⲙⲓⲁ ⲛ̀ⲛⲉⲧⲉⲛϣⲏⲣⲓ ⲙⲉⲛⲉⲛⲥⲱⲧⲉⲛ ϣⲁⲉ̀ⲛⲉϩ . Ⲟⲩⲟϩ ϯⲛⲟⲩ ⲡⲁϣⲏⲣⲓ Ⲥⲟⲗⲟⲙⲱⲛ ⲥⲟⲩⲉⲛⲫⲛⲟⲩϯ ⲛ̀ⲧⲉⲛⲉⲕⲓⲟϯ ⲟⲩⲟϩ ⲁ̀ⲣⲓⲃⲱⲕ ⲛⲁϥ ϧⲉⲛⲟⲩϩⲏⲧ ⲛ̀ⲟⲩⲱⲧ ⲉϥϫⲏⲕ ⲉ̀ⲃⲟⲗ ⲛⲉⲙⲟⲩⲯⲩⲭⲏ ⲉⲥⲥⲟⲩⲧⲱⲛ ϫⲉ Ⲡϭⲟⲓⲥ ⲡⲉⲧⲉⲣⲇⲟⲕⲓⲙⲁⲍⲓⲛ ⲛ̀ϩⲏⲧ ⲛⲓⲃⲉⲛ ⲟⲩⲟϩ ⲉϥⲥⲱⲟⲩⲛ ⲙ̀ⲙⲉⲩⲓ̀ ⲛⲓⲃⲉⲛ ⲉ̀ϣⲱⲡ ⲁⲕϣⲁⲛⲕⲱϯ ⲛ̀ⲥⲱϥ ⲉⲕⲉ̀ϫⲉⲙϥ ⲉ̀ϣⲱⲡ ⲁⲕϣⲁⲛⲭⲁϥ ⲛ̀ⲥⲱⲕ ⲉϥⲉ̀ⲭⲁⲕ ⲛ̀ⲥⲱϥ ϣⲁⲉ̀ⲛⲉϩ. Ⲁⲛⲁⲩ ϫⲉ ϯⲛⲟⲩ ⲁ̀Ⲡϭⲟⲓⲥ ⲥⲟⲧⲡⲕ ⲉ̀ⲕⲱⲧ ⲛⲁϥ ⲛ̀ⲟⲩⲏⲓ ⲉ̀ⲟⲩⲙⲁ ⲉϥⲟⲩⲁⲃ ⲛ̀ⲧⲁϥ ϫⲉⲙⲛⲟⲙϯ ⲟⲩⲟϩ ⲁ̀ⲣⲓⲟⲩⲓ̀ . Ⲟⲩⲟϩ ⲁ̀Ⲇⲁⲩⲓⲇ ⲡⲟⲩⲣⲟ ⲧⲁⲙⲉⲤⲟⲗⲟⲙⲱⲛ ⲡⲉϥϣⲏⲣⲓ ⲉ̀ⲡⲓⲥⲙⲟⲧ ⲛ̀ⲧⲉⲡⲓⲉⲣⲫⲉⲓ ⲛⲉⲙⲡⲑⲱϣ ⲛ̀ⲛⲉϥⲏⲓ ⲛⲉⲙⲡⲉϥⲥⲁϧⲟⲧ ⲛⲉⲙⲛⲉϥⲙⲁ ⲉⲧⲥⲁⲡϣⲱⲓ ⲛⲉⲙⲛⲉϥⲁ̀ⲡⲟⲑⲩⲕⲏ ⲉⲧⲥⲁϧⲟⲩⲛ ⲛⲉⲙⲡⲓⲏⲓ ⲛ̀ⲧⲉⲡⲓⲭⲁⲛⲟⲃⲓ ⲉ̀ⲃⲟⲗ . ⲛⲉⲙⲡⲑⲱϣ ⲉ̀ⲛⲁϥⲕⲏⲛ ϧⲉⲛⲡⲉϥⲡⲛⲉⲩⲙⲁ ⲉⲑⲃⲉⲛⲓⲁⲩⲗⲏⲟⲩ ⲛ̀ⲧⲉⲡⲏⲓ ⲙ̀Ⲡϭⲟⲓⲥ ⲛⲉⲙⲛⲓⲡⲁⲥⲧⲟⲫⲟⲣⲓⲟⲛ ⲧⲏⲣⲟⲩ ⲉⲧⲕⲱϯ ⲛ̀ⲛⲓⲁ̀ⲡⲟⲑⲏⲕⲏ ⲛ̀ⲧⲉⲡⲏⲓ ⲙ̀Ⲡϭⲟⲓⲥ ⲛⲉⲙⲛⲓⲁ̀ⲡⲟⲑⲏⲕⲏ ⲛ̀ⲧⲉⲛⲏⲉⲑⲟⲩⲁⲃ. ⲛⲉⲙⲛⲓⲕⲁⲧⲁⲗⲩⲙⲁ ⲉ̀ⲧⲉⲛⲁⲓ ⲛⲉ ⲛⲓⲙⲁⲛⲟⲩⲟϩ ⲛⲉⲙⲛⲓϩⲱⲥ ⲛ̀ⲧⲉⲛⲓⲧⲁⲝⲓⲥ ⲛ̀ⲧⲉⲛⲓⲟⲩⲏⲃ ⲛⲉⲙⲛⲓⲖⲉⲩⲓⲧⲏⲥ ϧⲉⲛϩⲱⲃ ⲛⲓⲃⲉⲛ ⲛ̀ϣⲉⲙϣⲓ ⲛ̀ⲧⲉⲡⲏⲓ ⲙ̀Ⲡϭⲟⲓⲥ . ⲛⲉⲙⲡⲓϣⲓ ⲛ̀ⲧⲉⲡⲓⲛⲟⲩⲃ ⲛⲓⲛⲟⲩⲃ ⲛⲉⲙⲛⲓϩⲁⲧ. ⲛⲉⲙⲛⲓⲗⲩⲭⲛⲓⲁ ⲛⲉⲙⲛⲓϧⲏⲃⲥ ⲁϥϯ ⲙ̀ⲡⲟⲩϣⲓ ⲛⲁϥ . Ⲡⲁⲓⲣⲏϯ ⲡⲓϣⲓ ⲛ̀ⲧⲉϯⲧⲣⲁⲡⲉⲍⲁ ⲁϥⲧⲏⲓⲧⲟⲩ ⲛⲁϥ ⲛⲓⲧⲣⲁⲡⲉⲍⲁ ⲛ̀ⲧⲉϯⲡⲣⲟⲑⲉⲥⲓⲥ ϯⲟⲩⲓ̀ ϯⲟⲩⲓ̀ ⲛ̀ⲧⲉⲛⲓⲧⲣⲁⲡⲉⲍⲁ ⲛⲁⲥⲟⲓ ⲛ̀ⲛⲟⲩⲃ . Ⲡⲓⲣⲏϯ ⲟⲛ ⲛⲁⲛⲓϩⲁⲧ . ⲛⲉⲙⲛⲓⲕⲣⲉⲁⲅⲣⲁ ⲛⲉⲙⲛⲓⲕⲱⲑⲱⲛ ⲛ̀ⲟⲩⲱ̀ⲧⲉⲛ ⲉ̀ⲃⲟⲗ ⲛ̀ⲧⲱⲟⲩ ⲛⲉⲙⲛⲓⲫⲩⲁ̀ⲗⲏ ⲛ̀ⲛⲟⲩⲃ ⲛⲉⲙⲡⲓϣⲓ ⲛ̀ⲧⲉⲡⲓⲛⲟⲩⲃ ⲛⲉⲙⲡⲓϩⲁⲧ ⲛⲉⲙⲛⲓⲁ̀ⲫⲟⲧ ⲛⲉⲙⲡϣⲓ ⲙ̀ⲡⲓⲟⲩⲁⲓ ⲡⲓⲟⲩⲁⲓ ⲙ̀ⲙⲱⲟⲩ. ⲛⲉⲙⲫⲁⲡⲓⲙⲁⲛⲉⲣϣⲱⲟⲩϣⲓ ⲛ̀ⲛⲟⲩⲃ ⲛ̀ⲧⲉⲡⲓⲥⲑⲟⲓⲛⲟⲩϥⲓ ⲉⲧⲱⲧⲡ ⲛⲉⲙⲡⲓⲥⲙⲟⲧ ⲛ̀ⲛⲓϩⲁⲣⲙⲁ ⲛ̀ⲧⲉⲛⲓⲭⲉⲣⲟⲩⲃⲓⲙ ⲛⲏⲉ̀ⲧⲉⲛⲟⲩⲧⲉⲛϩ ⲫⲱⲣϣ ⲉ̀ⲃⲟⲗ ⲉⲩⲉⲣϧⲏⲓⲃⲓ ⲛ̀ϯⲕⲩⲃⲱⲧⲟⲥ ⲛ̀ⲧⲉϯⲇⲓⲁⲑⲏⲕⲏ ⲛ̀ⲧⲉⲠϭⲟⲓⲥ . ⲉⲩⲥϧⲏⲟⲩⲧ ⲧⲏⲣⲟⲩ ⲉ̀ⲃⲟⲗ ϩⲓⲧⲉⲛⲧϭⲓϫ ⲙ̀Ⲡϭⲟⲓⲥ ⲟⲩⲟϩ ⲁ̀Ⲇⲁⲩⲓⲇ ⲧⲁⲙⲉⲤⲟⲗⲟⲙⲱⲛ ⲡⲉϥϣⲏⲣⲓ ⲉ̀ⲡⲓⲥⲙⲟⲧ ⲛ̀ⲧⲉϯϫⲓⲛⲉⲣϩⲱⲃ ⲛⲉⲙⲡⲑⲱϣ ⲕⲁⲧⲁⲡⲓⲕⲁϯ ⲉⲧⲁϥϣⲱⲡⲓ ⲛ̀ϣⲏⲧϥ. Ⲟⲩⲟϩ ⲡⲉϫⲉⲆⲁⲩⲓⲇ ⲛ̀Ⲥⲟⲗⲟⲙⲱⲛ ⲡⲉϥϣⲏⲣⲓ ϫⲉ ϯϭⲣⲟ ⲙ̀ⲙⲟⲕ ⲟⲩⲟϩ ⲙ̀ⲡⲉⲣⲉⲣϩⲟϯ ⲟⲩⲇⲉ ⲙ̀ⲡⲉⲣⲛⲟⲩϣⲡ ϫⲉⲟⲩⲏⲓ Ⲡϭⲟⲓⲥ ⲡⲁⲛⲟⲩϯ ⲭⲏ ⲛⲉⲙⲁⲕ ⲟⲩⲟϩ ⲛ̀ⲛⲉϥⲭⲁⲕ ⲛ̀ⲥⲱϥ ϣⲁⲧⲉⲕϫⲱⲕ ⲉ̀ⲃⲟⲗ ⲛ̀ϩⲱⲃ ⲛⲓⲃⲉⲛ ⲛ̀ϣⲉⲙϣⲓ ⲛ̀ⲧⲉⲡⲏⲓ ⲙ̀Ⲡϭⲟⲓⲥ ⲟⲩⲟϩ ϩⲏⲡⲡⲉ ⲁⲓⲧⲁⲙⲟⲕ ⲉ̀ϩⲱⲃ ⲛⲓⲃⲉⲛ ⲛⲉⲙⲡⲥⲙⲟⲧ ⲙ̀ⲡⲑⲱϣ ⲙ̀ⲡⲓⲉⲣⲫⲉⲓ ⲛⲉⲙⲛⲉϥⲥⲁϧⲱⲧ ⲛⲉⲙⲡⲉϥⲙⲁ ⲉⲧⲥⲁⲡϣⲱⲓ ⲛⲉⲙⲛⲉϥⲁ̀ⲡⲟⲑⲏⲕⲏ ⲉⲧⲥⲁϧⲟⲩⲛ ⲛⲉⲙⲡⲏⲓ ⲛ̀ⲧⲉⲡⲡⲗⲁⲥⲧⲏⲣⲓⲟⲛ ⲛⲉⲙⲡⲥⲙⲟⲧ ⲛ̀ⲧⲉⲡⲏⲓ ⲙ̀Ⲡϭⲟⲓⲥ . Ⲟⲩⲟϩ ϩⲏⲡⲡⲉ ⲓⲥ ⲛⲓⲧⲁⲝⲓⲥ ⲛ̀ⲧⲉⲛⲓⲟⲩⲏⲃ ⲛⲉⲙⲛⲓⲖⲉⲩⲓⲧⲏⲥ ⲉ̀ⲑⲣⲟⲩⲓ̀ⲣⲓ ⲛ̀ϣⲉⲙϣⲓ ⲛⲓⲃⲉⲛ ⲛ̀ⲧⲉⲡⲏⲓ ⲙ̀Ⲡϭⲟⲓⲥ ⲫⲛⲟⲩϯ ⲟⲩⲟϩ ⲉⲩⲉ̀ϣⲱⲡⲓ ⲛⲉⲙⲁⲕ ⲛ̀ϫⲉⲛⲓⲥⲁϧ ⲧⲏⲣⲟⲩ ⲛⲉⲙⲟⲩⲟⲛ ⲛⲓⲃⲉⲛ ⲉⲧϧⲟⲧϧⲉⲧ ϧⲉⲛϯⲥⲟⲫⲓⲁ̀ ϧⲉⲛⲧⲉⲭⲛⲏ ⲛⲓⲃⲉⲛ ⲟⲩⲟϩ ⲛⲓⲁⲣⲭⲱⲛ ⲛⲉⲙⲡⲓⲗⲁⲟⲥ ⲧⲏⲣϥ ⲥⲉⲛⲁⲥⲱⲧⲉⲙ ⲛ̀ⲥⲁⲥⲁϫⲓ ⲛⲓⲃⲉⲛ ⲛ̀ⲧⲁⲕ.
Ⲕ̅Ⲑ̅. Ⲟⲩⲟϩ ⲡⲉϫⲉⲡⲟⲩⲣⲟ Ⲇⲁⲩⲓⲇ ⲛ̀ϯⲉⲕⲕⲗⲏⲥⲓⲁ̀ ⲧⲏⲣⲥ ϫⲉ Ⲥⲟⲗⲟⲙⲱⲛ ⲡⲁϣⲏⲣⲓ ⲫⲁⲓ ⲉⲧⲁⲫⲛⲟⲩϯ ⲥⲟⲧⲡϥ ⲛ̀ϧⲏⲧϥ ⲟⲩⲁ̀ⲗⲟⲩ ⲡⲉ ⲟⲩⲟϩ ϥϫⲏⲛ ⲟⲩⲟϩ ⲡⲓϩⲱⲃ ⲟⲩⲛⲓϣϯ ⲡⲉ ⲡⲗⲏⲛ ⲡⲓϩⲱⲃ ⲫⲁⲟⲩⲣⲱⲙⲓ ⲁⲛ ⲡⲉ ⲁⲗⲗⲁ ⲫⲁⲠϭⲟⲓⲥ ⲫⲛⲟⲩϯ ⲡⲉ . Ⲟⲩⲟϩ ⲕⲁⲧⲁϯϫⲟⲙ ⲧⲏⲣⲥ ⲁⲓⲥⲟⲃϯ ⲉ̀ϧⲟⲩⲛ ⲉ̀ⲡⲏⲓ ⲙ̀Ⲡϭⲟⲓⲥ ⲡⲁⲛⲟⲩϯ ⲛ̀ⲟⲩⲛⲟⲩⲃ ⲛⲉⲙⲟⲩϩⲁⲧ ⲛⲉⲙⲟⲩϩⲟⲙⲧ ⲛⲉⲙⲟⲩⲃⲉⲛⲓⲡⲓ ⲛⲉⲙⲛⲓϣⲉ ⲛⲉⲙϩⲁⲛⲱ̀ⲛⲓ ⲉⲩⲑⲏⲧ ⲟⲩⲟϩ ⲉⲩϫⲏⲕ ⲉ̀ⲃⲟⲗ ⲛⲉⲙϩⲁⲛⲛⲓϣϯ ⲛ̀ⲱ̀ⲛⲓ ⲉ̀ⲛⲁϣⲉⲛⲥⲟⲩⲉ̀ⲛⲟⲩ ⲛⲉⲙⲱ̀ⲛⲓ ⲛⲓⲃⲉⲛ ⲉⲧⲧⲁⲓⲏ̀ⲟⲩⲧ ⲛⲉⲙⲟⲩⲇⲟⲡⲁⲧⲓⲟⲛ ⲉϥⲟϣ . Ⲟⲩⲟϩ ϧⲉⲛⲡϫⲓⲛⲑⲣⲓϯⲙⲁϯ ⲉ̀ϧⲟⲩⲛ ⲉ̀ⲡⲏⲓ ⲙ̀Ⲡϭⲟⲓⲥ ⲡⲁⲛⲟⲩϯ ⲉ̀ⲧⲓ ϥϣⲟⲡ ⲛⲏⲓ ⲛ̀ϫⲉⲟⲩⲛⲟⲩⲃ ⲛⲉⲙⲟⲩϩⲁⲧ ⲉ̀ⲁⲓⲑⲁⲙⲓⲟϥ ⲟⲩⲟϩ ϩⲏⲡⲡⲉ ⲁⲓϯ ⲉ̀ϧⲟⲩⲛ ⲉ̀ⲡⲏⲓ ⲙ̀ⲡⲁⲛⲟⲩϯ ⲉ̀ⲟⲩϭⲓⲥⲓ ⲥⲁⲃⲟⲗ ⲛ̀ⲛⲏⲉⲧⲁⲓⲥⲉⲃⲧⲱⲧⲟⲩ ⲉ̀ⲡⲏⲓ ⲙ̀ⲫⲏⲉⲑⲟⲩⲁⲃ . ⲅ̅ ⲛ̀ϣⲟ ⲛ̀ϫⲓⲛϭⲱⲣ ⲛ̀ⲛⲟⲩⲃ ⲉ̀ⲃⲟⲗ ϧⲉⲛⲟⲩⲥⲟⲩⲫⲓⲣ ⲛⲉⲙⲅ̅ ⲛ̀ϣⲟ ⲛ̀ϫⲓⲛϭⲱⲣ ⲛ̀ϩⲁⲧ ⲛ̀ⲥⲱⲧⲡ ⲉ̀ⲗⲁⲗⲱ ⲉ̀ⲛⲓϫⲟⲓ ⲛ̀ⲧⲉⲡⲓⲉⲣⲫⲉⲓ. ⲉ̀ⲃⲟⲗ ϩⲓⲧⲉⲛⲛⲉⲛϫⲓϫ ⲛ̀ⲧⲉⲛⲓⲧⲉⲭⲛⲓⲧⲏⲥ ⲟⲩⲟϩ ⲛⲓⲙ ⲉⲧⲉⲣⲟⲩⲟⲧ ⲙ̀ⲫⲟⲟⲩ ⲉ̀ϫⲉⲕⲛⲉϥϫⲓϫ ⲉ̀ⲃⲟⲗ ⲙ̀Ⲡϭⲟⲓⲥ . Ⲟⲩⲟϩ ⲁⲩⲉⲣⲟⲩⲟⲧ ⲛ̀ϩⲏⲧ ⲛ̀ϫⲉⲛⲓⲁⲣⲭⲱⲛ ⲛ̀ⲧⲉⲛⲉⲛϣⲏⲣⲓ ⲙ̀ⲡⲒⲥⲣⲁⲏⲗ ⲛⲉⲙⲛⲓⲁⲣⲭⲱⲛ ⲧⲏⲣⲟⲩ ⲛ̀ⲧⲉⲛⲓⲙⲉⲧⲓⲱⲧ ⲛⲉⲙⲛⲓⲭⲓⲗⲓⲁⲣⲭⲟⲥ ⲛⲉⲙⲛⲓⲡⲣⲟⲥⲧⲁⲧⲏⲥ ⲛ̀ⲧⲉⲛⲓϩⲃⲏⲟⲩⲓ̀ ⲛⲉⲙⲛⲓⲟⲓⲕⲟⲛⲟⲙⲟⲥ ⲛ̀ⲧⲉⲡⲟⲩⲣⲟ . Ⲟⲩⲟϩ ⲁⲩϯ ⲛ̀ⲛⲓϩⲃⲏⲟⲩⲓ̀ ⲛ̀ⲧⲉⲡⲏⲓ ⲙ̀Ⲡϭⲟⲓⲥ ⲉ̅ ⲛ̀ϣⲟ ⲛ̀ϫⲓⲛϭⲱⲣ ⲛ̀ⲛⲟⲩⲃ ⲛⲉⲙⲓ̅ⲏ̅ ⲛ̀ϫⲓⲛϭⲱⲣ ⲛ̀ϩⲟⲙⲧ ⲛ̀ⲣ̅ ⲛ̀ϣⲟ ⲇⲉ ⲛ̀ϫⲓⲛϭⲱⲣ ⲙ̀ⲃⲉⲛⲓⲡⲓ . Ⲟⲩⲟⲛ ⲛⲓⲃⲉⲛ ⲉⲧⲁϥϫⲉⲙⲟⲩⲱ̀ⲛⲓ ⲛⲓⲃⲉⲛ ⲉⲧⲧⲁⲓⲏ̀ⲟⲩⲧ ⲛ̀ⲧⲟⲧϥ ⲁⲩⲧⲏⲓⲧⲟⲩ ⲉ̀ϧⲟⲩⲛ ⲉ̀ⲡⲏⲓ ⲙ̀ⲫⲛⲟⲩϯ ⲉ̀ⲃⲟⲗ ϩⲓⲧⲉⲛⲧϫⲓϫ ⲛ̀Ⲓⲉⲏⲗ ⲛ̀Ⲅⲉⲇⲥⲱⲛ . Ⲟⲩⲟϩ ⲁϥⲟⲩⲛⲟϥ ⲛ̀ϫⲉⲡϩⲏⲧ ⲙ̀ⲡⲓⲗⲁⲟⲥ ϧⲉⲛⲠϭⲟⲓⲥ ⲡⲟⲩⲛⲟⲩϯ ⲟⲩⲟϩ ⲁϥⲟⲩⲛⲟϥ ⲛ̀ϫⲉⲆⲁⲩⲓⲇ ⲡⲟⲩⲣⲟ ϧⲉⲛⲟⲩϩⲏⲧ ⲉϥϫⲏⲕ ⲉ̀ⲃⲟⲗ. Ⲟⲩⲟϩ ⲁϥⲥⲙⲟⲩ ⲉ̀Ⲡϭⲟⲓⲥ ⲛ̀ϫⲉⲡⲟⲩⲣⲟ Ⲇⲁⲩⲓⲇ ⲙ̀ⲡⲉⲙⲑⲟ ⲛ̀ϯⲉⲕⲕⲗⲏⲥⲓⲁ̀ ⲧⲏⲣⲥ ⲉϥϫⲱ ⲙ̀ⲙⲟⲥ ϫⲉ ϥⲥⲙⲁⲣⲱⲟⲩⲧ ⲛ̀ϫⲉⲠϭⲟⲓⲥ ⲫⲛⲟⲩϯ ⲙ̀ⲡⲒⲥⲣⲁⲏⲗ ⲡⲉⲛⲓⲱⲧ ⲓⲥϫⲉⲛⲡⲉⲛⲉϩ ⲛⲉⲙϣⲁⲉ̀ⲛⲉϩ . Ⲑⲱⲕ Ⲡϭⲟⲓⲥ ⲧⲉ ϯⲙⲉⲧⲟⲩⲣⲟ ⲛⲉⲙϯⲙⲉⲧⲛⲓϣϯ ⲛⲉⲙϯϫⲟⲙ ⲛⲉⲙⲡⲓϣⲟⲩϣⲟⲩ ⲛⲉⲙⲡⲓϭⲣⲟ ⲛ̀ⲑⲟⲕ ⲅⲁⲣ ⲉⲧⲟⲓ ⲛ̀ⲛⲏⲃ ⲉ̀ⲛⲏⲉⲧϧⲉⲛⲧⲫⲉ ⲉ̀ⲡϣⲱⲓ ⲛⲉⲙϩⲓϫⲉⲛⲡⲓⲕⲁϩⲓ ⲉ̀ⲡⲉⲥⲏⲧ ⲉ̀ⲃⲟⲗ ⲅⲁⲣ ϧⲁⲧϩⲏ ⲙ̀ⲡⲉⲕϩⲟ ⲉϥⲉ̀ϣⲑⲟⲣⲧⲉⲣ ⲛ̀ϫⲉⲟⲩⲣⲟ ⲛⲓⲃⲉⲛ ⲛⲉⲙϣⲗⲟⲗ . Ⲟⲩⲟϩ ⲉⲩⲉ̀ϩⲱⲥ ⲉ̀ⲣⲟⲕ ⲛ̀ϫⲉⲣⲱⲙⲓ ⲛⲓⲃⲉⲛ ⲁⲥⲭⲏ ⲅⲁⲣ ϧⲁⲧⲟⲧⲕ ⲛ̀ϫⲉϯⲙⲉⲧⲣⲁⲙⲁⲟ̀ ⲛⲉⲙⲡⲓⲱ̀ⲟⲩ ⲛ̀ⲑⲟⲕ ⲅⲁⲣ ⲉⲧⲟⲓ ⲛ̀ⲁⲣⲭⲱⲛ ⲉ̀ⲉⲛⲭⲁⲓ ⲛⲓⲃⲉⲛ ⲛⲉⲙⲉ̀ϫⲉⲛⲁⲣⲭⲏ ⲛⲓⲃⲉⲛ ⲥⲭⲏ ϧⲉⲛⲧⲉⲕϭⲓϫ ⲛ̀ϫⲉⲟⲩϫⲟⲙ ⲛⲉⲙⲟⲩⲙⲉⲧϫⲱⲣⲓ ⲛ̀ⲑⲟⲕ ⲉⲧϭⲟⲥⲓ ⲟⲩⲟϩ ⲉⲧⲑⲉⲃⲓⲟ̀ ⲛ̀ⲑⲟⲕ ⲉⲧϯϫⲟⲙ ⲛⲱⲟⲩ ⲧⲏⲣⲟⲩ Ⲡϭⲟⲓⲥ ⲡⲓⲡⲁⲛⲧⲱⲕⲣⲁⲧⲱⲣ . ϯⲛⲟⲩ ⲧⲉⲛⲟⲩⲟⲛϩⲕ ⲉ̀ⲃⲟⲗ ⲟⲩⲟϩ ⲧⲉⲛⲥⲙⲟⲩ ⲉ̀ⲫⲣⲁⲛ ⲙ̀ⲡⲉⲕⲱ̀ⲟⲩ . Ⲁ̀ⲛⲟⲕ ⲛⲓⲙ ⲁ̀ⲛⲟⲕ Ⲡϭⲟⲓⲥ ⲓⲉ ⲛⲓⲙ ⲡⲉ ⲡⲁⲗⲁⲟⲥ ϫⲉ ⲉⲛⲛⲁϣϫⲉⲙϫⲟⲙ ⲛ̀ⲉⲣⲟⲩⲟⲧ ⲛⲁⲕ ⲛ̀ⲛⲁⲓ ϫⲉ ⲛ̀ⲭⲁⲓ ⲛⲓⲃⲉⲛ ⲛⲟⲩⲕ ⲛⲉ ⲟⲩⲟϩ ⲁⲛϯ ⲛⲁⲕ ⲉ̀ⲃⲟⲗϧⲉⲛⲛⲏ ⲉ̀ⲧⲉⲛⲟⲩⲕ. ϫⲉ ⲁ̀ⲛⲟⲛ ϩⲁⲛⲣⲉⲙⲛ̀ϫⲱⲓⲗⲓ ⲙ̀ⲡⲉⲕⲙ̀ⲑⲟ ⲙ̀ⲫⲣⲏϯ ⲛ̀ⲛⲉⲛⲓⲟϯ ⲧⲏⲣⲟⲩ ⲛ̀ϣⲟⲣⲡ ⲟⲩⲟϩ ⲛⲉⲛⲉ̀ϩⲟⲟⲩ ⲁⲩ ⲙ̀ⲫⲣⲏϯ ⲛ̀ⲟⲩϧⲏⲓⲃⲓ ϩⲓϫⲉⲛⲡⲓⲕⲁϩⲓ ϫⲉ ⲙ̀ⲙⲟⲛ ϩⲩⲡⲟⲙⲓⲛⲏ ϣⲟⲡ . Ⲡϭⲟⲓⲥ ⲡⲉⲛⲛⲟⲩϯ ⲁⲓⲥⲟⲃϯ ⲛ̀ⲟⲩⲙⲏϣ ⲉ̀ⲡϫⲓⲛⲕⲱⲧ ⲛ̀ⲟⲩⲏⲓ ⲙ̀ⲡⲉⲕⲣⲁⲛ ⲉⲑⲟⲩⲁⲃ ϫⲉ ϩⲁⲛⲉ̀ⲃⲟⲗ ϧⲉⲛⲧⲉⲕϫⲓϫ ⲧⲏⲣⲟⲩ ⲛⲉ . Ⲁⲓⲉ̀ⲙⲓ Ⲡϭⲟⲓⲥ ϫⲉ ⲛ̀ⲑⲟⲕ ⲉⲧⲉⲣⲉ̀ⲧⲁⲍⲓⲛ ⲛ̀ϩⲏⲧ ⲛⲓⲃⲉⲛ ⲉⲕⲙⲏⲓ ⲛ̀ϯⲇⲓⲕⲉⲟⲥⲩⲛⲏ ϧⲉⲛⲟⲩⲙⲉⲧⲁⲧⲕⲁⲕⲓⲁ̀ ⲛ̅ⲧⲉⲡⲁϩⲏⲧ ⲁⲓⲉⲣⲟⲩⲟⲧ ϧⲉⲛⲛⲁⲓ ⲧⲏⲣⲟⲩ . ϯⲛⲟⲩ ⲇⲉ ϩⲏⲡⲡⲉ ⲡⲉⲕⲗⲁⲟⲥ ⲛⲏⲉⲧⲁⲩϫⲉⲙⲟⲩ ϧⲉⲛⲡⲁⲓⲙⲁ ⲙ̀ⲫⲟⲟⲩ ⲁⲩⲛⲁⲩ ⲉ̀ⲣⲱⲟⲩ ϧⲉⲛⲟⲩⲑⲉⲗⲏⲗ ⲛ̀ϩⲏⲧ ϧⲉⲛⲠϭⲟⲓⲥ ⲡⲟⲩⲛⲟⲩϯ ⲉⲩⲉⲣⲟⲩⲟⲧ . Ⲫⲛⲟⲩϯ ⲛ̀ⲧⲉⲛⲉⲛⲓⲟϯ Ⲁⲃⲣⲁⲁⲙ ⲛⲉⲙⲒⲥⲁⲁⲕ ⲛⲉⲙⲒⲁⲕⲱⲃ ⲁ̀ⲣⲉϩ ⲛ̀ⲛⲁⲓⲙⲉⲩⲓ̀ ⲉⲑⲛⲁⲛⲉⲩ ϧⲉⲛⲡϩⲏⲧ ⲙ̀ⲡⲁⲓⲗⲁⲟⲥ ⲛ̀ⲥⲏⲟⲩ ⲛⲓⲃⲉⲛ ⲥⲟⲩⲧⲱⲛ ⲛ̀ⲛⲟⲩϩⲏⲧ ⲉ̀ϧⲟⲩⲛ ⲉ̀ⲣⲟⲕ Ⲡϭⲟⲓⲥ . ⲟⲩⲟϩ Ⲥⲟⲗⲟⲙⲱⲛ ⲡⲁϣⲏⲣⲓ ⲙⲟⲓ ⲛⲁϥ ⲛ̀ⲟⲩϩⲏⲧ ⲛ̀ⲁ̀ⲅⲁⲑⲟⲛ ⲉ̀ⲡϫⲓⲛⲁ̀ⲣⲉϩ ⲉ̀ⲛⲉⲕⲉⲛⲧⲟⲗⲏ ⲛⲉⲙⲛⲉⲕⲛⲟⲙⲟⲥ ⲛⲉⲙⲛⲉⲕⲟⲩⲁϩⲥⲁϩⲛⲓ ⲟⲩⲟϩ ⲛ̀ⲧⲉϥⲓ̀ⲛⲓ ⲛ̀ⲟⲩⲥⲟⲃϯ ⲉ̀ⲡϫⲱⲕ ⲙ̀ⲡⲉⲕⲏⲓ. Ⲟⲩⲟϩ ⲡⲉϫⲉⲡⲟⲩⲣⲟ Ⲇⲁⲩⲓⲇ ⲛ̀ϯⲉⲕⲕⲗⲏⲥⲓⲁ̀ ⲧⲏⲣⲥ ⲛ̀ⲧⲉⲡⲒⲥⲣⲁⲏⲗ ϫⲉ ⲥⲙⲟⲩ ⲉ̀Ⲡϭⲟⲓⲥ ⲡⲉⲧⲉⲛⲛⲟⲩϯ ⲟⲩⲟϩ ⲁⲩⲥⲙⲟⲩ ⲉ̀Ⲡϭⲟⲓⲥ ⲫⲛⲟⲩϯ ⲛ̀ⲧⲉⲛⲟⲩⲓⲟϯ ⲛ̀ϫⲉϯⲉⲕⲕⲗⲏⲥⲓⲁ̀ ⲧⲏⲣⲥ ⲛ̀ⲧⲉⲡⲒⲥⲣⲁⲏⲗ ⲁⲩⲕⲉⲗϫⲕⲉⲗⲓ ⲟⲩⲟϩ ⲁⲩⲥⲙⲟⲩ ⲉ̀Ⲡϭⲟⲓⲥ ⲫⲛⲟⲩϯ ⲛⲉⲙⲡⲟⲩⲣⲟ . Ⲟⲩⲟϩ ⲁ̀ⲡⲟⲩⲣⲟ Ⲇⲁⲩⲓⲇ ϣⲱⲧ ⲛ̀ⲟⲩϣⲟⲩϣⲱⲟⲩϣⲓ ⲙ̀ⲫⲛⲟⲩϯ ϧⲉⲛⲡⲉϥⲣⲁⲥϯ ⲙ̀ⲡⲓⲉ̀ϩⲟⲟⲩ ⲛ̀ϩⲟⲩⲓⲧ ⲁϥⲓ̀ⲛⲓ ⲛ̀ϩⲁⲛϭⲗⲓⲗ ⲉ̀ϩⲣⲏⲓ ⲙ̀Ⲡϭⲟⲓⲥ ⲟⲩϣⲟ ⲙ̀ⲙⲁⲥⲓ ⲛⲉⲙⲟⲩϣⲟ ⲛ̀ⲱⲓⲗⲓ ⲛⲉⲙⲟⲩϣⲟ ⲛ̀ϩⲓⲏⲃ ⲛⲉⲙⲛⲟⲩⲟⲩⲱ̀ⲧⲉⲛ ⲉ̀ⲃⲟⲗ ⲛⲉⲙϩⲁⲛⲙⲏϣ ⲛ̀ϣⲟⲩϣⲱⲟⲩϣⲓ ⲙ̀ⲡⲓⲗⲁⲟⲥ . Ⲁⲩⲟⲩⲱⲙ ⲟⲩⲟϩ ⲁⲩⲥⲱ ⲙ̀ⲡⲉⲙⲑⲟ ⲙ̀Ⲡϭⲟⲓⲥ ϧⲉⲛⲟⲩⲛⲓϣϯ ⲛ̀ⲣⲁϣⲓ. : Ⲩⲉⲣϭⲉ ϣϣⲏⲑ ⲫⲉϩⲗⲉⲛⲐ
ⲡⲁⲣⲁⲗⲓⲡⲟⲙⲉⲛⲁ ⲁ̅
ⲠⲀⲢⲀⲖⲒⲠⲞⲘⲈⲚⲀ Ⲃ̅
Ⲅ̅. Ⲟⲩⲟϩ ⲁϥⲉⲣϩⲏⲧⲥ ⲛ̀ϫⲉⲤⲟⲗⲟⲙⲱⲛ ⲉⲕⲱⲧ ⲙ̀ⲡⲏⲓ ⲙ̀Ⲡϭⲟⲓⲥ ϧⲉⲛⲒⲉⲣⲟⲩⲥⲁⲗⲏⲙ ϧⲉⲛⲡⲓⲧⲱⲟⲩ ⲛ̀ⲧⲉⲛⲓⲀ̀ⲙⲟⲣⲣⲉⲟⲥ ⲡⲓⲙⲁ ⲉⲧⲁ̀Ⲡϭⲟⲓⲥ ⲟⲩⲟⲛϩϥ ⲉ̀Ⲇⲁⲩⲓⲇ ⲡⲉϥⲓⲱⲧ ⲙ̀ⲙⲁⲩ ⲡⲓⲙⲁ ⲉⲧⲁϥⲥⲉⲃⲧⲱⲧϥ ϧⲉⲛⲡⲓϭⲛⲱⲟⲩ ⲛ̀ⲧⲉⲞⲣⲛⲁⲛ ⲡⲓⲒⲉⲃⲟⲩⲥⲉⲟⲥ . Ⲟⲩⲟϩ ⲁϥⲉⲣϩⲏⲧⲥ ⲛ̀ⲕⲱⲧ ϧⲉⲛⲡⲓⲁ̀ⲃⲟⲧ ⲙ̀ⲙⲁϩⲃ ϧⲉⲛϯⲙⲁϩⲇ̅ ⲛ̀ⲣⲟⲙⲡⲓ ⲛ̀ⲧⲉⲧⲉϥⲙⲉⲧⲟⲩⲣⲟ . Ⲟⲩⲟϩ ϧⲉⲛⲛⲁⲓ ⲁϥⲉⲣϩⲏⲧⲥ ⲛ̀ϫⲉⲤⲟⲗⲟⲙⲱⲛ ⲉ̀ⲕⲱⲧ ⲙ̀ⲡⲏⲓ ⲙ̀Ⲡϭⲟⲓⲥ ⲧⲉϥϣⲓⲏ ⲇⲉ ⲉⲥⲓ̀ⲣⲓ ⲛ̀ⲥⲉ ⲙ̀ⲙⲁϩⲓ ⲟⲩⲟϩ ⲡⲉϥⲟⲩⲟⲥⲑⲉⲛ ϫⲱⲧ ⲙ̀ⲙⲁϩⲓ . ⲛⲉⲙⲡⲓⲉ̀ⲗⲁⲙ ⲙ̀ⲡⲉⲙⲑⲟ ⲙ̀ⲡⲓⲏⲓ ⲉϥⲟⲓ ⲛ̀ϫⲱⲧ ⲙ̀ⲙⲁϩⲓ ⲛ̀ϣⲓⲏ ⲟⲩⲟϩ ⲡⲉϥϭⲓⲥⲓ ⲉϥⲓ̀ⲣⲓ ⲛ̀ϣⲉ ϫⲱⲧ ⲙ̀ⲙⲁϩⲓ ⲟⲩⲟϩ ⲁϥⲗⲁⲗⲱϥ ⲛ̀ⲛⲟⲩⲃ ⲉϥⲧⲟⲩⲃⲏⲟⲩⲧ ⲥⲁϧⲟⲩⲛ ⲛⲉⲙⲥⲁⲃⲟⲗ. Ⲟⲩⲟϩ ⲡⲓⲛⲓϣϯ ⲛ̀ⲏⲓ ⲁϥⲧⲁϫⲣⲟϥ ϧⲉⲛϩⲁⲛϣⲉⲛⲥⲓϥⲓ ⲟⲩⲟϩ ⲁϥⲗⲁⲗⲱϥ ⲉ̀ⲃⲟⲗ ϧⲉⲛⲟⲩⲛⲟⲩⲃ ⲛ̀ⲕⲁⲑⲁⲣⲟⲥ ⲁϥⲫⲱⲧϩ ⲛ̀ϧⲏⲧϥ ⲛ̀ϩⲁⲛⲃⲉⲛⲓ ⲛⲉⲙⲛⲏⲉⲧⲁ̀ϣⲓ ⲉ̀ϩⲣⲏⲓ. Ⲁϥⲥⲟⲗⲥⲉⲗ ⲙ̀ⲡⲓⲏⲓ ⲉ̀ⲃⲟⲗ ϧⲉⲛϩⲁⲛⲱ̀ⲛⲓ ⲉⲩⲧⲁⲓⲏ̀ⲟⲩⲧ ⲉ̀ⲛⲁϣⲉⲛⲥⲟⲩⲉ̀ⲛⲟⲩ ⲛⲉⲙⲉ̀ⲃⲟⲗ ϧⲉⲛⲡⲓⲛⲟⲩⲃ ⲉⲧⲧⲟⲩⲃⲏⲟⲩⲧ ⲛ̀ⲧⲉⲪⲁⲣⲟⲩⲓⲙ. Ⲟⲩⲟϩ ⲁϥⲗⲁⲗⲉⲡⲓⲏⲓ ⲛ̀ⲛⲟⲩⲃ ⲛⲉⲙⲛⲓϫⲟⲓ ⲛ̀ⲧⲉⲡⲓⲏⲓ ⲛⲉⲙⲡⲉϥⲡⲩⲗⲱⲛ ⲛⲉⲙⲛⲉϥⲙⲁⲛϫⲟⲩϣⲧ ⲉ̀ⲃⲟⲗ ⲛ̀ⲧⲁϥ ⲛⲉⲙⲛⲉϥⲟⲩⲉϫⲣⲱⲟⲩⲓ̀ ⲁϥⲟϣϫⲟⲩ ⲛ̀ⲛⲟⲩⲃ ⲟⲩⲟϩ ⲁϥⲫⲱⲧϩ ⲛ̀ϩⲁⲛⲭⲉⲣⲟⲩⲃⲓⲙ ϩⲓϫⲱⲟⲩ ⲛⲉⲙ ϩⲓⲛⲓϫⲟⲓ . Ⲁϥⲑⲁⲙⲓⲟ̀ ⲙ̀ⲡⲓⲙⲁ ⲉⲑⲟⲩⲁⲃ ⲛ̀ⲧⲉⲛⲏⲉⲑⲟⲩⲁⲃ ⲙ̀ⲡⲉⲙⲑⲟ ⲙ̀ⲡⲓⲏⲓ ⲧⲉϥϣⲓⲏ ⲉⲥⲟⲓ ⲛ̀ϫⲱⲧ ⲙ̀ⲙⲁϩⲓ ⲛⲉⲙⲡⲉϥⲟⲩⲟⲥⲑⲉⲛ ⲁϥⲟⲩⲟϣϫϥ ⲛ̀ⲛⲟⲩⲃ ⲉϥⲧⲟⲩⲃⲏⲟⲩⲧ ⲁϥⲫⲱⲧϩ ⲛ̀ⲭⲉⲣⲟⲩⲃⲓⲙ ⲥⲟⲟⲩ ϣⲉ ⲛ̀ϫⲓⲛϭⲱⲣ ⲛ̀ⲛⲟⲩⲃ . Ⲟⲩⲟϩ ⲡϣⲓ ⲙ̀ⲡⲓⲟⲩⲁⲓ ⲡⲓⲟⲩⲁⲓ ⲡⲉ ⲧⲁⲓⲟⲩ ⲛ̀ⲥⲓⲕⲗⲟⲥ ⲛ̀ⲛⲟⲩⲃ ⲟⲩⲟϩ ⲁϥⲗⲁⲗⲉ ⲥⲁⲡϣⲱⲓ ⲙ̅ⲙⲱⲟⲩ ⲛ̀ⲛⲟⲩⲃ. Ⲟⲩⲟϩ ⲁϥⲑⲁⲙⲓⲟ ⲛ̀ϩⲁⲛⲭⲉⲣⲟⲩⲃⲓⲙ ϧⲉⲛⲡⲓⲙⲁ ⲉⲑⲟⲩⲁⲃ ⲛ̀ⲧⲉⲛⲏⲉⲑⲟⲩⲁⲃ ⲉ̀ⲃⲟⲗϧⲉⲛϩⲁⲛϣⲉ ⲟⲡⲩⲟϩ ⲁϥⲗⲁⲗⲱⲟⲩ ⲛ̀ⲛⲟⲩⲃ . Ⲟⲩⲟϩ ⲛⲓⲧⲉⲛϩ ⲛ̀ⲧⲉⲛⲓⲭⲉⲣⲟⲩⲃⲓⲙ ⲉⲩⲫⲱⲣϣ ⲉ̀ⲃⲟⲗ ⲧϣⲓⲏ ⲙ̀ⲡⲓⲟⲩⲁⲓ ⲡⲓⲟⲩⲁⲓ ⲛ̀ⲧⲉⲛⲓⲧⲉⲛϩ ⲉⲥⲟⲓ ⲛ̀ϫⲱⲧ ⲙ̀ⲙⲁϩⲓ ⲉⲩⲫⲱⲣϣ ⲉ̀ⲃⲟⲗ ⲉⲩϭⲓ ⲛⲉⲙⲛⲓϫⲟⲓ ⲛ̀ⲧⲉⲡⲓⲏⲓ ⲟⲩⲟϩ ⲡⲓⲭⲉⲣⲟⲩⲃⲓⲙ ⲙ̀ⲙⲁϩⲃ̅ ⲡⲁⲓ ϣⲓⲣⲱ ⲡⲉ ⲉ̀ⲣⲉⲛⲟⲩⲧⲉⲛϩ ϭⲓ ⲛⲉⲙⲟⲩⲟⲛ ⲙ̀ⲙⲱⲟⲩ ⲉⲩϭⲓ ⲛⲉⲙⲛⲓϫⲟⲓ ⲛ̀ⲧⲉⲡⲓⲏⲓ . Ⲟⲩⲟϩ ⲛⲓⲧⲉⲛϩ ⲛ̀ⲧⲉⲛⲓⲭⲉⲣⲟⲩⲃⲓⲙ ⲉⲩⲫⲱⲣϣ ⲉ̀ⲃⲟⲗ ⲉⲩⲟ̀ϩⲓ ⲉ̀ⲣⲁⲧⲟⲩ ⲉ̀ϫⲉⲛⲛⲟⲩϭⲁⲗⲁⲩϫ ⲟⲩⲟϩ ⲛⲟⲩϩⲟ ⲛⲁⲩϫⲟⲩϣⲧ ⲡⲉ ⲉ̀ⲡⲓⲏⲓ . Ⲟⲩⲟϩ ⲁϥⲑⲁⲙⲓⲟ̀ ⲙ̀ⲡⲓⲕⲁⲧⲁⲡⲉⲧⲁⲥⲙⲁ ⲉ̀ⲃⲟⲗ ϧⲉⲛⲟⲩⲩ̀ⲁⲕⲓⲛⲑⲓⲛⲟⲛ ⲛⲉⲙⲟⲩⲕⲟⲕⲕⲓⲛⲟⲛ ⲛⲉⲙⲟⲩϣⲉⲛⲥ ⲟⲩⲟϩ ⲁϥⲥⲱϧⲓ ⲛ̀ⲟⲩⲥⲱϧⲓ ⲛ̀ⲭⲉⲣⲟⲩⲃⲓⲙ. Ⲟⲩⲟϩ ⲁϥⲑⲁⲙⲓⲟ̀ ⲛ̀ⲥⲧⲩⲗⲟⲥ ⲃ̅ ⲙ̀ⲡⲉⲙⲑⲟ ⲙ̀ⲡⲓⲏⲓ ⲥⲁⲃⲟⲗ ⲉ̀ⲃⲟⲗ ⲙ̀ⲙⲁⲡϯⲟⲩ ⲙ̀ⲙⲁϩⲓ ⲙ̀ⲡⲟⲩϭⲓⲥⲓ ⲡⲓⲟⲩⲁⲓ ⲡⲓⲟⲩⲁⲓ ⲛⲉⲙⲛⲟⲩⲕⲉⲫⲁⲗⲓⲥ ⲉⲩⲟⲓ ⲛ̀ϯⲟⲩ ⲙ̀ⲙⲁϩⲓ . Ⲟⲩⲟϩ ⲁϥⲑⲁⲙⲓⲟ̀ ⲛ̀ϩⲁⲛⲥⲉⲣⲥⲉⲣⲱⲑ ϧⲉⲛⲡⲓⲇⲁⲃⲓⲣ ⲧⲁⲓⲟⲩ ⲙ̀ⲙⲁϩⲓ ⲟⲩⲟϩ ⲁϥⲭⲁⲩ ϩⲓϫⲉⲛⲛⲓⲁ̀ⲫⲏⲟⲩⲓ̀ ⲛ̀ⲧⲉⲛⲓⲥⲧⲩⲗⲟⲥ ⲟⲩⲟϩ ⲁϥⲑⲁⲙⲓⲟ̀ ϣ̀ⲉ ⲛ̀ⲉⲣⲙⲁⲛ ⲁϥⲭⲁⲩ ⲉ̀ϫⲉⲛⲛⲏⲉⲧⲁ̀ϣⲓ ⲉ̀ϩⲣⲏⲓ . Ⲁϥⲧⲁϩⲉⲛⲓⲥⲧⲩⲗⲟⲥ ⲉ̀ⲣⲁⲧⲟⲩ ⲟⲩⲁⲓ ⲥⲁⲟⲩⲓ̀ⲛⲁⲙ ⲛⲉⲙⲟⲩⲁⲓ ⲥⲁϫⲁϭⲏ ⲟⲩⲟϩ ⲁϥⲙⲟⲩϯ ⲉ̀ⲫⲣⲁⲛ ⲙ̀ⲫⲏⲉⲧⲥⲁⲟⲩⲓ̀ⲛⲁⲙ ϫⲉ ⲡⲓⲧⲁϩⲟ ⲉ̀ⲣⲁⲧϥ ⲟⲩⲟϩ ⲫⲏⲉⲧⲥⲁϫⲁϭⲏ ϫⲉ ϯϫⲟⲙ.
Ⲇ̅. Ⲟⲩⲟϩ ⲁϥⲑⲁⲙⲓⲟ̀ ⲙ̀ⲡⲓⲙⲁⲛⲉⲣϣⲱⲟⲩϣⲓ ⲉϥⲟⲓ ⲛ̀ϫⲱⲧ ⲙ̀ⲙⲁϩⲓ ⲛ̀ⲧⲉϥϣⲓⲏ̀ ⲛⲉⲙϫⲱⲧ ⲙ̀ⲙⲁϩⲓ ⲛ̀ⲟⲩⲟⲥⲑⲉⲛ ⲛⲉⲙⲙⲏⲧ ⲙ̀ⲙⲁϩⲓ ⲛ̀ϭⲓⲥⲓ . Ⲟⲩⲟϩ ⲁϥⲑⲁⲙⲓⲟ̀ ⲙ̀ⲫⲓⲟⲙ ⲛ̀ϩⲟⲙⲧ ⲛ̀ϫⲱϣ ⲉϥⲓ̀ⲣⲓ ⲙ̀ⲙⲏⲧ ⲙ̀ⲙⲁϩⲓ ⲛ̀ϧⲏⲧϥ ⲉϥⲕⲱϯ ⲛⲉⲙⲉ̅ ⲙ̀ⲙⲁϩⲓ ⲛ̀ϭⲓⲥⲓ ⲟⲩⲟϩ ⲉϥⲓ̀ⲣⲓ ⲙ̀ⲙⲁⲡ ⲙ̀ⲙⲁϩⲓ . Ⲉⲩⲕⲱϯ ⲙ̀ⲡⲓⲗⲟⲩⲧⲏⲣ ⲉϥⲕⲱϯ ⲛⲉⲙⲛⲓⲙⲱⲟⲩ ⲉⲩⲛⲏⲟⲩ ⲉ̀ⲃⲟⲗ ϧⲉⲛⲃ̅ ⲙ̀ⲙⲟⲩⲓ̀ ϧⲉⲛⲟⲩϫⲓⲛⲟⲩⲱ̀ⲧⲉⲛ ⲛ̀ϩⲟⲙⲧ . Ⲁϥⲑⲁⲙⲓⲟ̀ ⲙ̀ⲡⲓⲙⲏⲧⲥⲛⲁⲩ ⲙ̀ⲙⲁⲥⲓ ⲅ̅ ⲅⲁⲣ ⲉⲩϫⲟⲩϣⲧ ⲉ̀ⲡⲉⲙϩⲓⲧ ⲅ̅ ⲉⲩϫⲟⲩϣⲧ ⲉ̀ⲫⲣⲏⲥ ⲅ̅ ⲉⲩϫⲟⲩϣⲧ ⲉ̀ⲡⲉⲙⲉⲛⲧ ⲅ̅ ⲉⲩϫⲟⲩϣⲧ ⲉ̀ⲡⲓⲉⲃⲧ ⲛⲉⲙⲫⲓⲟⲙ ⲥⲁⲡϣⲱⲓ ⲙ̀ⲙⲱⲟⲩ ⲧⲏⲣⲟⲩ ⲟⲩⲟϩ ⲉ̀ⲣⲉⲛⲓⲫⲁϩⲟⲩ ⲙ̀ⲙⲱⲟⲩ ⲧⲏⲣⲟⲩ ⲫⲟⲛϩ ⲉ̀ϧⲟⲩⲛ. Ⲡⲓⲟⲩⲙⲟⲧ ⲇⲉ ⲛ̀ⲧⲉⲫⲓⲟⲙ ⲉϥⲓ̀ⲣⲓ ⲛ̀ⲟⲩϣⲟⲡ ⲟⲩⲟϩ ⲡⲉϥⲥⲫⲟⲧⲟⲩ ⲉϥⲟⲓ ⲙ̀ⲫⲣⲏϯ ⲙ̀ⲡⲥⲙⲟⲧ ⲛ̀ⲟⲩⲁ̀ⲫⲟⲧ ⲉϥⲫⲟⲣⲓ ⲉ̀ⲃⲟⲗ ⲛ̀ⲓⲉⲃ ⲛ̀ϣⲱϣⲉⲛ ⲛ̀ⲫⲱⲧϩ ⲉϥⲱ̀ⲗⲓ ⲛ̀ϣⲟⲙⲧ ⲛ̀ϣⲟ ⲙ̀ⲙⲉⲧⲣⲧⲏⲥ ⲟⲩⲟϩ ⲁϥϫⲱⲕ ⲉ̀ⲃⲟⲗ. Ⲟⲩⲟϩ ⲁϥⲑⲁⲙⲓⲟ̀ ⲙ̀ⲙⲏⲧ ⲛ̀ⲗⲟⲩⲧⲏⲣ ⲁϥⲭⲁϯⲟⲩ ⲥⲁⲟⲩⲓ̀ⲛⲁⲙ ⲛⲉⲙϯⲟⲩ ⲥⲁϭⲁϫⲏ ϫⲉ ⲛ̀ⲧⲟⲩⲓⲱⲓ ⲉ̀ⲃⲟⲗ ⲛ̀ϧⲏⲧⲟⲩ ⲛ̀ⲛⲓϩⲃⲏⲟⲩⲓ̀ ⲛ̀ⲧⲉⲛⲓϭⲗⲓⲗ ⲟⲩⲟϩ ⲛ̀ⲧⲟⲩϫⲟⲕⲙⲟⲩ ⲛ̀ϧⲏⲧⲟⲩ ⲫⲓⲟⲙ ⲇⲉ ⲉ̀ⲑⲣⲟⲩⲓⲁⲩ ⲉ̀ⲃⲟⲗ ⲛ̀ϧⲏⲧϥ ⲛ̀ϫⲉⲛⲓⲟⲩⲏⲃ . Ⲟⲩⲟϩ ⲁϥⲑⲁⲙⲓⲟ̀ ⲙⲏⲧ ⲛ̀ⲗⲩⲭⲛⲓⲁ̀ ⲛ̀ⲛⲟⲩⲃ ⲕⲁⲧⲁⲡⲟⲩϩⲁⲡ ⲁϥⲭⲁⲩ ϧⲉⲛⲡⲓⲉⲣⲫⲉⲓ ϯⲟⲩ ⲥⲁⲟⲩⲓ̀ⲛⲁⲙ ⲛⲉⲙϯⲟⲩ ⲥⲁϭⲁϫⲏ . Ⲟⲩⲟϩ ⲁϥⲑⲁⲙⲓⲟ̀ ⲛ̀ϣⲉ ⲙ̀ⲫⲩⲁ̀ⲗⲏ ⲛ̀ⲛⲟⲩⲃ . Ⲁϥⲑⲁⲙⲓⲉ̀ⲛⲓⲁⲩⲗⲏ ⲛ̀ⲧⲉⲛⲓⲟⲩⲏⲃ ⲛⲉⲙϯⲛⲓϣϯ ⲛ̀ⲁⲩⲗⲏ ⲛⲉⲙⲛⲉⲥⲣⲱⲟⲩ ⲛⲉⲙⲛⲉⲥϣⲟⲩϣⲧ ⲉⲩⲑⲙⲁⲓⲏ̀ⲟⲩⲧ ⲛ̀ⲓⲉⲃ ⲛ̀ϩⲟⲙⲧ. Ⲟⲩⲟϩ ⲫⲓⲟⲙ ⲁϥⲭⲁϥ ⲥⲁⲡⲓⲥⲫⲓⲣ ⲛ̀ⲟⲩⲓ̀ⲛⲁⲙ ⲛ̀ⲧⲉⲡⲏⲓ ⲥⲁⲡⲓⲉⲃⲧ. Ⲟⲩⲟϩ ⲁϥⲑⲁⲙⲓⲟ̀ ⲛ̀ϫⲉⲬⲓⲣⲁⲙ ⲛ̀ⲛⲓⲕⲣⲉⲁⲅⲣⲁ ⲛⲉⲙⲛⲓϣⲟⲩⲣⲏ ⲛⲉⲙϯⲉⲥⲭⲁⲣⲁ ⲛ̀ⲧⲉⲡⲓⲙⲁⲛⲉⲣϣⲱⲟⲩϣⲓ ⲛⲉⲙⲛⲉϥⲥⲕⲉⲩⲟⲥ ⲧⲏⲣⲟⲩ ⲟⲩⲟϩ ⲁ̀Ⲭⲓⲣⲁⲙ ϫⲱⲕ ⲙ̀ⲡⲓϩⲱⲃ ⲉ̀ⲃⲟⲗ ⲫⲏⲉⲧⲁϥⲑⲁⲙⲓⲟϥ ⲛ̀ϫⲉⲡⲟⲩⲣⲟ Ⲥⲟⲗⲟⲙⲱⲛ ϧⲉⲛⲡⲏⲓ ⲙ̀ⲫⲛⲟⲩϯ . Ⲟⲩⲟϩ ⲁϥⲑⲁⲙⲓⲟ̀ ⲛ̀ⲥⲧⲩⲗⲟⲥ ⲃ̅ ⲉⲩⲭⲏ ϩⲓϫⲱⲟⲩ ⲛ̀ϫⲉⲛⲓⲅⲱⲗⲁⲑⲟⲥ ⲛⲉⲙⲛⲓⲭⲱⲣⲁⲣⲉⲑ ⲛⲏⲉⲧⲭⲏ ϩⲓϫⲉⲛⲛⲓⲥⲧⲩⲗⲟⲥ ⲛⲉⲙⲡⲥⲙⲟⲧ ⲛ̀ⲧⲉϯⲗⲩⲭⲛⲓⲁ̀ ⲛ̀ⲛⲟⲩⲃ. ⲛⲉⲙϥⲧⲱⲟⲩ ϣⲉ ⲛ̀ϣⲕⲉⲗⲕⲓⲗ ⲛ̀ⲛⲟⲩⲃ ⲛⲉⲙⲟⲩϣⲛⲉ ⲉϥϩⲱⲃⲥ ⲛ̀ϯⲅⲱⲗⲁⲑ ⲃ̅ϯ ⲛ̀ⲧⲉⲛⲓⲭⲱⲑⲁⲣⲉⲑ ⲛⲏⲉⲧⲥⲁⲡϣⲱⲓ ⲛ̀ⲛⲓⲥⲧⲩⲗⲟⲥ . Ⲟⲩⲟϩ ⲁϥⲑⲁⲙⲓⲟ ⲙ̀ⲓ̅ ⲙ̀ⲙⲉⲭⲱⲛⲱⲑ. ⲕⲉⲫⲓⲟⲙ ⲛ̀ⲧⲉⲡⲓⲙⲏⲧⲥⲛⲁⲩ ⲙ̀ⲙⲁⲥⲓ ⲉⲧⲥⲁⲡⲉⲥⲏⲧ ⲙ̀ⲙⲟϥ . ⲛⲉⲙⲛⲏ ⲉ̀ϣⲁⲩⲉⲣⲕⲉⲣⲙⲓ ⲉ̀ⲃⲟⲗ ⲙ̀ⲙⲱⲟⲩ ⲛⲉⲙⲛⲏ ⲉ̀ϣⲁⲩⲧⲁⲗⲉϣⲟⲩϣⲱⲟⲩϣⲓ ⲉ̀ⲡϣⲱⲓ ϩⲓϫⲱⲟⲩ ⲛⲉⲙⲛⲓⲗⲉⲃⲏⲥ ⲛⲉⲙⲛⲓⲕⲣⲉⲁⲅⲣⲁ ⲛⲉⲙⲛⲓⲥⲕⲉⲩⲟⲥ ⲧⲏⲣⲟⲩ ⲛⲏⲉⲧⲁϥⲑⲁⲙⲓⲱ̀ⲟⲩ ⲛ̀ϫⲉⲬⲓⲣⲁⲙ ⲁϥⲉ̀ⲛⲟⲩ ϩⲁⲤⲟⲗⲟⲙⲱⲛ ⲡⲟⲩⲣⲟ ⲉ̀ⲡⲏⲓ ⲙ̀Ⲡϭⲟⲓⲥ ⲉ̀ⲃⲟⲗ ϧⲉⲛⲟⲩϩⲟⲙⲧ ⲉϥⲧⲟⲩⲃⲏⲟⲩⲧ . ⲉ̀ⲃⲟⲗ ϧⲉⲛⲛⲓⲡⲉⲣⲓⲭⲱⲣⲟⲥ ⲛ̀ⲧⲉⲡⲓⲒⲟⲣⲇⲁⲛⲏⲥ ⲟⲩⲟϩ ⲁϥⲟⲩⲟⲑⲃⲟⲩ ⲛ̀ϫⲉⲡⲟⲩⲣⲟ ϧⲉⲛⲡⲏⲓ ⲛ̀Ⲥⲟⲩⲭⲱⲑ ⲛⲉⲙⲀ̀ⲙⲉⲥⲁⲣⲏⲇⲁⲑⲁ . Ⲟⲩⲟϩ ⲁϥⲑⲁⲙⲓⲟ̀ ⲛ̀ϫⲉⲤⲟⲗⲟⲙⲱⲛ ⲛ̀ⲛⲓⲥⲕⲉⲩⲟⲥ ⲧⲏⲣⲟⲩ ϧⲉⲛⲡⲏⲓ ⲙ̀Ⲡϭⲟⲓⲥ ⲛⲉⲙⲡⲓⲙⲁⲛⲉⲣϣⲱⲟⲩϣⲓ ⲛ̀ⲛⲟⲩⲃ ⲛⲉⲙϯⲧⲣⲁⲡⲉⲍⲁ ⲛ̀ⲧⲉⲛⲓⲱⲓⲕ ⲉⲧⲭⲏ ϩⲓϫⲉⲛϯⲡⲣⲟⲑⲏⲥⲓⲥ. ⲛⲉⲙⲛⲓⲗⲩⲭⲛⲓⲁ̀ ⲛⲉⲙⲛⲓϧⲏⲃⲥ ⲛ̀ⲧⲉⲡⲓⲟⲩⲱⲓⲛⲓ ⲕⲁⲧⲁⲡⲟⲩϩⲁⲡ ⲙ̀ⲡⲉⲙⲑⲟ ⲙ̀ⲡⲓⲧⲁⲃⲓⲣ ⲉϥⲧⲟⲩⲃⲏⲟⲩⲧ . ⲛⲉⲙⲛⲓⲉ̀ϭⲁⲩ ⲛⲉⲙⲛⲓϫⲏ ⲛⲉⲙⲛⲓϣⲟⲩⲣⲏ ⲛⲉⲙⲛⲓⲥⲃⲉ ⲧⲏⲣⲟⲩ ⲉ̀ⲃⲟⲗ ϧⲉⲛⲟⲩⲛⲟⲩⲃ ⲉϥⲧⲟⲩⲃⲏⲟⲩⲧ. ⲛⲉⲙⲛⲓⲥⲃⲉ ⲉⲧⲥⲁϧⲟⲩⲛ ⲙ̀ⲡⲓⲏⲓ ⲫⲏⲉⲑⲟⲩⲁⲃ ⲛ̀ⲧⲉⲛⲏⲉⲑⲟⲩⲁⲃ ⲟⲩⲟϩ ⲛⲓⲥⲃⲉ ⲛ̀ⲧⲉⲡⲓⲉⲣⲫⲉⲓ .
Ⲉ̅. Ⲟⲩⲟϩ ⲁϥϫⲱⲕ ⲉ̀ⲃⲟⲗ ⲛ̀ϩⲱⲃ ⲛⲓⲃⲉⲛ ⲉⲧⲁϥⲑⲁⲙⲓⲱ̀ⲟⲩ ⲛ̀ϫⲉⲡⲟⲩⲣⲟ Ⲥⲟⲗⲟⲙⲱⲛ ϧⲉⲛⲡⲏⲓ ⲙ̀Ⲡϭⲟⲓⲥ ⲟⲩⲟϩ ⲁϥⲓ̀ⲛⲓ ⲉ̀ϧⲟⲩⲛ ⲛ̀ϫⲉⲤⲟⲗⲟⲙⲱⲛ ⲛⲏⲉⲑⲟⲩⲁⲃ ⲛ̀ⲧⲉⲆⲁⲩⲓⲇ ⲡⲉϥⲓⲱⲧ ⲛ̀ⲛⲟⲩⲃ ⲛⲉⲙϩⲁⲧ ⲟⲩⲟϩ ⲛⲓⲥⲕⲉⲩⲟⲥ ⲁϥϩⲓⲧⲟⲩ ⲉ̀ϧⲟⲩⲛ ⲉ̀ⲛⲓⲁ̀ϩⲱⲣ ⲛ̀ⲧⲉⲠϭⲟⲓⲥ. Ⲧⲟⲧⲉ Ⲥⲟⲗⲟⲙⲱⲛ ⲁϥⲑⲱⲟⲩϯ ⲛ̀ⲛⲓⲡⲣⲉⲥⲃⲩⲧⲉⲣⲟⲥ ⲛⲉⲙⲛⲓⲁⲣⲭⲱⲛ ⲧⲏⲣⲟⲩ ⲛ̀ⲧⲉⲛⲓⲫⲩⲗⲏ ⲛ̀ⲛⲓⲙⲉⲧⲓⲱⲧ ⲛ̀ⲛⲉⲛϣⲏⲣⲓ ⲙ̀ⲡⲒⲥⲣⲁⲏⲗ ⲉ̀Ⲓⲉⲣⲟⲩⲥⲁⲗⲏⲙ ϫⲉ ⲛ̀ⲧⲟⲩⲓ̀ⲛⲓ ⲉ̀ⲡϣⲱⲓ ⲛ̀ϯⲕⲩⲃⲱⲧⲟⲥ ⲛ̀ⲧⲉϯⲇⲓⲁⲑⲏⲕⲏ ⲛ̀ⲧⲉⲠϭⲟⲓⲥ ⲉ̀ⲃⲟⲗ ϧⲉⲛⲑⲃⲁⲕⲓ ⲛ̀Ⲇⲁⲩⲓⲇ ⲉ̀ⲧⲉⲑⲁⲓ ⲧⲉ Ⲥⲓⲱⲛ . Ⲟⲩⲟϩ ⲁϥⲑⲱⲟⲩϯ ϩⲁⲡⲟⲩⲣⲟ ⲛ̀ϫⲉⲡⲒⲥⲣⲁⲏⲗ ⲧⲏⲣϥ ϧⲉⲛⲡϣⲁⲓ ⲫⲁⲓ ⲡⲉ ⲡⲓⲁ̀ⲃⲟⲧ ⲙ̀ⲙⲁϩϣⲁϣϥ . Ⲟⲩⲟϩ ⲁⲩⲓ̀ ⲛ̀ϫⲉⲛⲓⲡⲣⲉⲥⲃⲩⲧⲉⲣⲟⲥ ⲧⲏⲣⲟⲩ ⲛ̀ⲧⲉⲡⲒⲥⲣⲁⲏⲗ ⲟⲩⲟϩ ⲁⲩϭⲓ ⲛ̀ⲛⲓⲖⲉⲩⲓ̀ⲧⲏⲥ ⲧⲏⲣⲟⲩ ⲛ̀ⲧⲟⲩⲉ̀ⲛⲟⲩ ⲉ̀ⲡϣⲱⲓ ⲛ̀ϯⲕⲩⲃⲱⲧⲟⲥ. ⲛⲉⲙϯⲥⲕⲩⲛⲙⲏ ⲛ̀ⲧⲉϯⲙⲉⲧⲙⲉⲑⲣⲉ ⲛⲉⲙⲛⲓⲥⲕⲩⲟⲥ ⲧⲏⲣⲟⲩ ⲉⲑⲟⲩⲁⲃ ⲛ̀ⲧⲉϯⲥⲕⲩⲛⲏ ⲟⲩⲟϩ ⲁⲩⲉ̀ⲛⲟⲩ ⲉ̀ⲡϣⲱⲓ ⲛ̀ϫⲉⲛⲓⲟⲩⲏⲃ ⲛⲉⲙⲛⲓⲖⲉⲩⲓⲧⲏⲥ . ⲛⲉⲙⲡⲟⲩⲣⲟ ⲉⲩⲥⲟⲡ ⲛⲉⲙⲱⲟⲩ ⲟⲩⲟϩ ϯⲥⲩⲛⲁⲅⲱⲅⲏ ⲧⲏⲣⲥ ⲛ̀ⲧⲉⲡⲒⲥⲣⲁⲏⲗ ⲛⲉⲙⲛⲏⲉⲧⲉⲣϩⲟϯ ⲛⲉⲙⲛⲏⲉⲧⲁⲩⲑⲱⲟⲩϯ ϩⲁⲡⲟⲩⲣⲟ Ⲥⲟⲗⲟⲙⲱⲛ ⲛⲁⲩⲭⲏ ϩⲁϫⲱⲥ ⲡⲉ ⲛ̀ϯⲕⲩⲃⲱⲧⲟⲥ ⲉⲩϣⲱⲧ ⲛ̀ϩⲁⲛⲙⲁⲥⲓ ⲛⲉⲙϩⲁⲛⲉ̀ⲥⲱⲟⲩ ⲉ̀ⲧⲉ ⲙ̀ⲙⲟⲛⲧⲟⲩⲏ̀ⲡⲓ . Ⲟⲩⲟϩ ⲁⲩⲱ̀ⲗⲓ ⲛ̀ϫⲉⲛⲓⲟⲩⲏⲃ ⲛ̀ϯⲕⲩⲃⲱⲧⲟⲥ ⲛ̀ⲧⲉϯⲇⲓⲁ̀ⲑⲏⲕⲏ ⲛ̀ⲧⲉⲠϭⲟⲓⲥ ⲉ̀ϧⲟⲩⲛ ⲉ̀ⲡⲉⲥⲙⲁ ⲉ̀ⲡⲓⲧⲁⲃⲓⲣ ⲛ̀ⲧⲉⲡⲓⲏⲓ ⲉ̀ϧⲟⲩⲛ ⲉ̀ⲡⲓⲙⲁ ⲉⲑⲟⲩⲁⲃ ⲛ̀ⲧⲉⲛⲏⲉⲑⲟⲩⲁⲃ ⲥⲁⲡⲉⲥⲏⲧ ⲛ̀ⲛⲓⲭⲉⲣⲟⲩⲃⲓⲙ . Ⲟⲩⲟϩ ⲛⲁⲣⲉⲛⲓⲧⲉⲛϩ ⲛ̀ⲧⲉⲛⲓⲭⲉⲣⲟⲩⲃⲓⲙ ⲫⲱⲣϣ ⲉ̀ⲃⲟⲗ ϩⲓϫⲉⲛⲡⲓⲙⲁ ⲛ̀ⲧⲉϯⲕⲩⲃⲱⲧⲟⲥ ⲛⲁⲣⲉⲛⲓⲭⲉⲣⲟⲩⲃⲓⲙ ϩⲱⲃⲥ ⲉ̀ⲃⲟⲗ ϩⲓϫⲱⲥ ⲛⲉⲙ ⲉ̀ϫⲉⲛⲛⲉⲥⲁ̀ⲛⲁⲫⲟⲣⲟⲛ ⲥⲁⲡϣⲱⲓ ⲙ̀ⲙⲱⲟⲩ . Ⲛⲁⲩϣⲁⲩ ⲅⲁⲣ ⲡⲉ ⲛ̀ϫⲉⲛⲓⲁ̀ⲛⲁⲫⲟⲣⲟⲛ ⲟⲩⲟϩ ⲛⲓⲁ̀ⲛⲁⲫⲟⲣⲟⲛ ⲛⲁⲣⲉⲛⲟⲩⲁ̀ⲫⲏⲟⲩⲓ̀ ⲛⲏⲟⲩ ⲉ̀ⲃⲟⲗ ϧⲉⲛⲛⲏⲉⲑⲟⲩⲁⲃ ⲙ̀ⲡⲉⲙⲑⲟ ⲙ̀ⲡⲓⲧⲁⲃⲓⲣ ⲛⲁⲩϫⲟⲩϣⲧ ⲥⲁⲃⲟⲗ ⲁⲛ ⲡⲉ ⲟⲩⲟϩ ⲛⲁⲩⲭⲏ ⲙ̀ⲙⲁⲩ ⲡⲉ ϣⲁⲉ̀ϧⲟⲩⲛ ⲉ̀ⲫⲟⲟⲩ. Ⲟⲩⲟϩ ⲛⲉⲙ̀ⲙⲟⲛϩ̀ⲗⲓ ϧⲉⲛϯⲕⲩⲃⲱⲧⲟⲥ ⲡⲉ ⲉ̀ⲃⲏⲗ ⲉ̀ϯⲡⲗⲁⲝ ⲃ̅ ⲛ̀ⲱ̀ⲛⲓ ⲛⲏⲉⲧⲁ̀Ⲙⲱⲟⲩⲥⲏⲥ ⲭⲁⲩ ⲙ̀ⲙⲁⲩ ϧⲉⲛⲬⲱⲣⲏⲃ ⲛⲏⲉⲧⲁ̀ⲫⲛⲟⲩϯ ⲥⲉⲙⲛⲏⲧⲟⲩ ⲛⲉⲙⲛⲉⲛϣⲏⲣⲓ ⲙ̀ⲡⲒⲥⲣⲁⲏⲗ ⲉⲩⲛⲏⲟⲩ ⲉ̀ⲃⲟⲗ ϧⲉⲛⲡⲕⲁϩⲓ ⲛ̀Ⲭⲏⲙⲓ . Ⲟⲩⲟϩ ⲁⲥϣⲱⲡⲓ ϧⲉⲛⲡϫⲓⲛⲑⲣⲉⲛⲓⲟⲩⲏⲃ ⲓ̀ ⲉ̀ⲃⲟⲗ ϧⲉⲛⲡⲏⲓ ⲉⲑⲟⲩⲁⲃ ϫⲉⲟⲩⲏⲓ ⲛⲓⲟⲩⲏⲃ ⲧⲏⲣⲟⲩ ⲉⲧⲁⲩϫⲉⲙⲟⲩ ⲁⲩⲧⲟⲩⲃⲱⲟⲩ ϫⲉ ⲛⲁⲩⲑⲏϣ ⲁⲛ ⲡⲉ ⲕⲁⲧⲁⲛⲟⲩⲉ̀ϩⲟⲟⲩ ⲛ̀ϣⲉⲙϣⲓ . Ⲟⲩⲟϩ ⲛⲓⲖⲉⲩⲓⲧⲏⲥ ⲧⲏⲣⲟⲩ ⲛⲉⲙⲛⲓⲟⲩⲏⲃ ⲛⲉⲙⲛⲓⲯⲁⲗⲙⲱⲇⲟⲥ ⲧⲏⲣⲟⲩ ⲛⲉⲛϣⲏⲣⲓ ⲛ̀Ⲁⲥⲁⲫ ⲛⲉⲙⲈ̀ⲙⲁⲛ ⲛⲉⲙⲒ̀ⲇⲓⲑⲟⲩⲛ ⲛⲉⲙⲛⲉϥϣⲏⲣⲓ ⲛⲉⲙⲛⲉϥⲥⲛⲏⲟⲩ ⲉ̀ⲟⲩⲟⲛϩⲁⲛⲥⲧⲟⲗⲏ ⲛ̀ϣⲉⲛⲥ ⲧⲟⲓ ϩⲓⲱ̀ⲧⲟⲩ ⲡⲉ ϧⲉⲛϩⲁⲛⲕⲩⲙⲃⲁⲗⲟⲛ ⲛⲉⲙϩⲁⲛⲛⲁⲃⲗⲁ ⲛⲉⲙϩⲁⲛⲕⲓⲛⲩⲣⲁ ⲉⲩϩⲱⲥ ⲛ̀ϧⲏⲧⲟⲩ ⲙ̀ⲡⲉⲙⲑⲟ ⲙ̀ⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ ⲉⲩⲛⲉⲙⲱⲟⲩ ⲛ̀ϫⲉϣⲉϫⲱⲧ ⲛ̀ⲟⲩⲏⲃ ⲉⲩⲉⲣⲥⲁⲗⲡⲓⲍⲓⲛ ϧⲉⲛϯⲥⲁⲗⲡⲓⲅⲝ . Ⲟⲩⲟϩ ⲁⲥϣⲱⲡⲓ ϧⲉⲛⲡϫⲓⲛⲑⲣⲟⲩⲉⲣⲥⲁⲗⲡⲓⲍⲓⲛ ⲟⲩⲟϩ ⲛ̀ⲧⲟⲩⲉⲣⲯⲁⲗⲓⲛ ϧⲉⲛⲡϫⲓⲛⲑⲣⲟⲩⲙⲟⲩϯ ϧⲉⲛⲟⲩϧⲣⲱⲟⲩ ⲛ̀ⲟⲩⲱⲧ ⲉ̀ⲑⲣⲟⲩⲟⲩⲱⲛϩ ⲉ̀ⲃⲟⲗ ⲟⲩⲟϩ ⲛ̀ⲧⲟⲩⲥⲙⲟⲩ ⲉ̀Ⲡϭⲟⲓⲥ ⲟⲩⲟϩ ⲉⲧⲁⲩϭⲓⲥⲓ ⲛ̀ⲧⲟⲩⲥⲙⲏ ϧⲉⲛⲛⲓⲥⲁⲗⲡⲓⲅⲝ ⲛⲉⲙⲛⲓⲕⲩⲙⲃⲁⲗⲟⲛ ⲛⲉⲙⲛⲓⲟⲣⲅⲁⲛⲟⲛ ⲛⲉⲙϩⲁⲛϩⲱⲇⲏ ⲛⲁⲩϫⲱ ⲙ̀ⲙⲟⲥ ϫⲉ ⲟⲩⲱⲛϩ ⲉ̀ⲃⲟⲗ ⲙ̀Ⲡϭⲟⲓⲥ ϫⲉ ⲟⲩⲁ̀ⲅⲁⲑⲟⲥ ⲡⲉ ϫⲉ ⲡⲉϥⲛⲁⲓ ϣⲟⲡ ϣⲁⲉ̀ⲛⲉϩ ⲟⲩⲟϩ ⲁϥⲙⲟϩ ⲛ̀ϫⲉⲡⲓⲏⲓ ⲉ̀ⲃⲟⲗ ϧⲉⲛⲟⲩϭⲏⲡⲓ ⲛ̀ⲱ̀ⲟⲩ ⲛ̀ⲧⲉⲠϭⲟⲓⲥ . Ⲟⲩⲟϩ ⲛⲁⲩϣϫⲉⲙϫⲟⲙ ⲁⲛ ⲡⲉ ⲛ̀ϫⲉⲛⲓⲟⲩⲏⲃ ⲛ̀ⲧⲉⲠϭⲟⲓⲥ ⲉ̀ⲟ̀ϩⲓ ⲉ̀ⲣⲁⲧⲟⲩ ⲉ̀ϣⲉⲙϣⲓ ⲉ̀ⲃⲟⲗ ϩⲁⲡϩⲟ ⲛ̀ϯϭⲏⲡⲓ ϫⲉ ⲁ̀ⲡⲓⲱ̀ⲟⲩ ⲛ̀ⲧⲉⲠϭⲟⲓⲥ ⲙⲟϩ ⲙ̀ⲡⲓⲏⲓ ⲛ̀ⲧⲉⲫⲛⲟⲩϯ .
Ⲋ. Ⲟⲩⲟϩ ⲡⲉϫⲉⲤⲟⲗⲟⲙⲱⲛ ϫⲉ Ⲡϭⲟⲓⲥ ⲁϥϫⲟⲥ ⲉ̀ⲑⲣⲉϥϣⲱⲡⲓ ϧⲉⲛⲟⲩⲅⲛⲟⲫⲟⲥ . Ⲟⲩⲟϩ ⲁ̀ⲛⲟⲕ ⲁⲓⲕⲱⲧ ⲛ̀ⲟⲩⲏⲓ ⲙ̀ⲡⲉⲕⲣⲁⲛ ⲉϥⲟⲩⲁⲃ ⲛⲁⲕ Ⲡ̀ϭⲟⲓⲥ ⲉ̀ⲑⲣⲉⲕϣⲱⲡⲓ ⲙ̀ⲙⲁⲩ ϣⲉ̀ⲛⲉϩ . Ⲟⲩⲟϩ ⲁⲡⲟⲩⲣⲟ ⲧⲁⲥⲑⲟ ⲙ̀ⲡⲉϥϩⲟ ⲁϥⲥⲙⲟⲩ ⲉ̀ϯⲉⲕⲕⲗⲏⲥⲓⲁ̀ ⲧⲏⲣⲥ ⲛ̀ⲧⲉⲡⲒⲥⲣⲁⲏⲗ ⲛⲁⲥⲟ̀ϩⲓ ⲉ̀ⲣⲁⲧⲥ ⲡⲉ ⲛ̀ϫⲉϯⲉⲕⲕⲗⲏⲥⲓⲁ̀ ⲧⲏⲣⲥ . Ⲟⲩⲟϩ ⲡⲉϫⲁϥ ϫⲉ ϥⲥⲙⲁⲣⲱⲟⲩⲧ ⲛ̀ϫⲉⲠϭⲟⲓⲥ ⲫⲛⲟⲩϯ ⲙ̀Ⲓⲥⲣⲁⲏⲗ ⲫⲏⲉⲧⲁϥⲥⲁϫⲓ ⲉ̀ⲃⲟⲗ ϧⲉⲛⲣⲱϥ ⲛ̀Ⲇⲁⲩⲓⲇ ⲡⲁⲓⲱⲧ ⲟⲩⲟϩ ⲁϥϫⲟⲕⲟⲩ ⲉ̀ⲃⲟⲗ ⲙ̀ⲡⲉⲧⲉⲛⲙ̀ⲑⲟ ϧⲉⲛⲛⲁϭⲓϫ ⲕⲁⲧⲁⲫⲣⲏϯ ⲉⲧⲁϥϫⲟⲥ ⲛ̀ϫⲉⲠϭⲟⲓⲥ. ϫⲉ ⲓⲥϫⲉⲛⲡⲓⲉ̀ϩⲟⲟⲩ ⲉⲧⲁⲓⲓ̀ⲛⲓ ⲙ̀ⲡⲁⲗⲁⲟⲥ ⲉ̀ⲃⲟⲗ ϧⲉⲛⲡⲕⲁϩⲓ ⲛ̀Ⲭⲏⲙⲓ ⲙ̀ⲡⲓⲥⲱⲧⲡ ⲛ̀ⲟⲩⲃⲁⲕⲓ ⲉ̀ⲃⲟⲗ ϧⲉⲛⲛⲓⲫⲩⲗⲏ ⲧⲏⲣⲟⲩ ⲛ̀ⲧⲉⲠⲓⲥⲣⲁⲏⲗ ⲉ̀ⲡϫⲓⲛⲕⲱⲧ ⲛ̀ⲟⲩⲏⲓ ⲛⲏⲓ ⲉ̀ⲑⲣⲉϥϣⲱⲡⲓ ⲙ̀ⲙⲁⲩ ⲛ̀ϫⲉⲡⲁⲣⲁⲛ ⲟⲩⲟϩ ⲙ̀ⲡⲓⲥⲱⲧⲡ ⲛ̀ⲟⲩⲣⲱⲙⲓ ⲉ̀ⲟⲩϩⲏⲅⲟⲩⲙⲉⲛⲟⲥ ϩⲓϫⲉⲛⲡⲁⲗⲁⲟⲥ Ⲡⲓⲥⲣⲁⲏⲗ . ⲟⲩⲟϩ ⲁⲓⲥⲱⲧⲡ ⲉ̀Ⲓⲉⲣⲟⲩⲥⲁⲗⲏⲙ ⲉ̀ⲡϫⲓⲛⲭⲱ ⲙ̀ⲡⲁⲣⲁⲛ ⲙ̀ⲙⲁⲩ ⲟⲩⲟϩ ⲁⲓⲥⲱⲧⲡ ⲛ̀Ⲇⲁⲩⲓⲇ ⲉ̀ⲑⲣⲉϥϣⲱⲡⲓ ⲛ̀ϩⲏⲅⲟⲩⲙⲉⲛⲟⲥ ⲉ̀ϫⲉⲛⲡⲁⲗⲁⲟⲥ ⲡⲒⲥⲣⲁⲏⲗ ⲡⲉϫⲉⲠϭⲟⲓⲥ . Ⲟⲩⲟϩ ⲁⲥϣⲱⲡⲓ ⲉⲧⲁⲥⲓ̀ ⲉ̀ϫⲉⲛⲡϩⲏⲧ ⲙ̀ⲡⲁⲓⲱⲧ Ⲇⲁⲩⲓⲇ ⲉ̀ⲡϫⲓⲛⲕⲱⲧ ⲛ̀ⲟⲩⲏⲓ ⲙ̀ⲫⲣⲁⲛ ⲙ̀Ⲡϭⲟⲓⲥ ⲫⲛⲟⲩϯ ⲙ̀Ⲡⲓⲥⲣⲁⲏⲗ . ⲟⲩⲟϩ ⲡⲉϫⲉⲠϭⲟⲓⲥ ⲛ̀Ⲇⲁⲩⲓⲇ ⲡⲁⲓⲱⲧ ϫⲉ ⲫⲙⲁ ϫⲉ ⲁⲥⲓ̀ ⲉ̀ϫⲉⲛⲡⲉⲕϩⲏⲧ ⲉ̀ⲕⲱⲧ ⲛ̀ⲟⲩⲏⲓ ⲙ̀ⲡⲁⲣⲁⲛ ⲕⲁⲗⲱⲥ ⲁⲥⲓ̀ ⲉ̀ϫⲉⲛⲡⲉⲕϩⲏⲧ . Ⲡⲗⲏⲛ ⲛ̀ⲑⲟⲕ ⲁⲛ ⲉⲑⲛⲁⲕⲱⲧ ⲙ̀ⲡⲓⲏⲓ ⲛⲏⲓ ⲁⲗⲗⲁ ⲡⲉⲕϣⲏⲣⲓ ⲡⲉ ⲫⲏⲉⲑⲛⲁⲓ̀ ⲉ̀ⲃⲟⲗ ϧⲉⲛⲧⲉⲕϯⲡⲓ ⲫⲁⲓ ⲉⲑⲛⲁⲕⲱⲧ ⲛ̀ⲟⲩⲏⲓ ⲙ̀ⲡⲁⲣⲁⲛ. Ⲟⲩⲟϩ ⲁ̀Ⲡϭⲟⲓⲥ ⲧⲟⲩⲛⲉⲥⲡⲉϥⲥⲁϫⲓ ⲉⲧⲁϥⲥⲁϫⲓ ⲙ̀ⲙⲟϥ ⲉ̀ⲑⲣⲓϣⲱⲡⲓ ⲛ̀ϣⲉⲃⲓⲱ ⲛ̀Ⲇⲁⲩⲓⲇ ⲡⲁⲓⲱⲧ ⲟⲩⲟϩ ⲁⲓϩⲉⲙⲥⲓ ϩⲓϫⲉⲛⲡⲓⲑⲣⲟⲛⲟⲥ ⲛ̀ⲧⲉϯⲙⲉⲧⲟⲩⲣⲟ ⲉ̀ϫⲉⲛⲡⲓⲗⲁⲟⲥ ⲙ̀ⲡⲒⲥⲣⲁⲏⲗ ⲟⲩⲟϩ ⲁⲓⲕⲱⲧ ⲙ̀ⲡⲓⲏⲓ ⲙ̀ⲫⲣⲁⲛ ⲙ̀Ⲡϭⲟⲓⲥ ⲫⲛⲟⲩϯ ⲙ̀ⲡⲒⲥⲣⲁⲏⲗ . Ⲟⲩⲟϩ ⲁⲓⲭⲱ ⲙ̀ⲙⲁⲩ ⲛ̀ϯⲕⲩⲃⲱⲧⲟⲥ ⲑⲁⲓ ⲉⲧⲉϥϣⲱⲡⲓ ⲛ̀ϧⲏⲧⲥ ⲛ̀ϫⲉϯⲇⲓⲁ̀ⲑⲏⲕⲏ ⲉⲧⲁϥⲥⲉⲙⲛⲏⲧⲥ ⲛ̀ϫⲉⲠϭⲟⲓⲥ ⲛⲉⲙⲡⲒⲥⲣⲁⲏⲗ . Ⲟⲩⲟϩ ⲁϥⲟ̀ϩⲓ ⲉ̀ⲣⲁⲧϥ ⲙ̀ⲡⲉⲙⲑⲟ ⲙ̀ⲡⲓⲙⲁⲛⲉⲣϣⲱⲟⲩϣⲓ ⲛ̀ⲧⲉⲠϭⲟⲓⲥ ⲙ̀ⲡⲉⲙⲑⲟ ⲛ̀ϯⲉⲕⲕⲗⲉⲥⲓⲁ̀ ⲧⲏⲣⲥ ⲛ̀ⲧⲉⲡⲒⲥⲣⲁⲏⲗ ⲟⲩⲟϩ ⲁϥⲫⲱⲣϣ ⲛ̀ⲛⲉϥϭⲓϫ ⲉ̀ⲃⲟⲗ ⲉ̀ⲡϣⲱⲓ ⲉ̀ⲧⲫⲉ . Ⲡⲉϫⲁϥ ϫⲉ Ⲡϭⲟⲓⲥ ⲫⲛⲟⲩϯ ⲙ̀ⲡⲒⲥⲣⲁⲏⲗ ⲙ̀ⲙⲟⲛ ⲕⲉⲛⲟⲩϯ ⲉϥⲟ̀ⲛⲓ ⲙ̀ⲙⲟⲕ ⲟⲩⲇⲉ ϧⲉⲛⲧⲫⲉ ⲟⲩⲇⲉ ϩⲓϫⲉⲛⲡⲓⲕⲁϩⲓ ⲉⲕⲁ̀ⲣⲉϩ ⲛ̀ⲧⲉⲕⲇⲓⲁ̀ⲑⲏⲕⲏ ⲛⲉⲙⲡⲉⲕⲛⲁⲓ ⲛ̀ⲛⲉⲕⲁ̀ⲗⲱⲟⲩⲓ̀ ⲛⲁⲓⲉⲑⲛⲁⲙⲟϣⲓ ⲙ̀ⲡⲉⲕⲙ̀ⲑⲟ ϧⲉⲛⲟⲩϩⲏⲧ ⲉϥⲥⲟⲩⲧⲱⲛ. ⲙ̀ⲫ̀ⲣⲏϯ ⲉⲧⲁⲕⲁ̀ⲣⲉϩ ⲛ̀Ⲇⲁⲩⲓⲇ ⲡⲁⲓⲱⲧ ⲟⲩⲟϩ ⲛⲓⲉⲧⲁⲕⲥⲁϫⲓ ⲙ̀ⲙⲱⲟⲩ ⲁⲕϫⲟⲕⲟⲩ ⲛⲁϥ ⲉ̀ⲃⲟⲗ ⲙ̀ⲫⲣⲏϯ ⲙ̀ⲡⲁⲓⲉ̀ϩⲟⲟⲩ . ϯⲛⲟⲩ Ⲡϭⲟⲓⲥ ⲫⲛⲟⲩϯ ⲙ̀ⲡⲒⲥⲣⲁⲏⲗ ⲁ̀ⲣⲉϩ ⲉ̀ⲛⲏⲉⲧⲁⲕⲥⲁϫⲓ ⲙ̀ⲙⲱⲟⲩ ⲛⲉⲙⲡⲉⲕⲁ̀ⲗⲟⲩ Ⲇⲁⲩⲓⲇ ⲉⲕϫⲱ ⲙ̀ⲙⲟⲥ ϫⲉ ⲛ̀ⲛⲉϥⲙⲟⲩⲛⲕ ⲛ̀ϫⲉⲟⲩⲣⲱⲙⲓ ⲛ̀ⲧⲁⲕ ⲉϥϩⲉⲙⲥⲓ ϩⲓϫⲉⲛⲡⲓⲑⲣⲟⲛⲟⲥ ⲙ̀ⲡⲒⲥⲣⲁⲏⲗ ⲡⲗⲏⲛ ⲁ̀ⲣⲉϣⲁⲛⲛⲉⲕϣⲏⲣⲓ ⲁ̀ⲣⲉϩ ⲉ̀ⲛⲁⲉⲛⲧⲟⲗⲏ ⲟⲩⲟϩ ⲛ̀ⲥⲉⲙⲟϣⲓ ϩⲓⲛⲁⲙⲱⲓⲧ ⲙ̀ⲫⲣⲏϯ ⲉⲧⲁⲕⲙⲟϣⲓ ⲙ̀ⲡⲁⲙ̀ⲑⲟ . ϯⲛⲟⲩ Ⲡϭⲟⲓⲥ ⲫⲛⲟⲩϯ ⲙ̀ⲡⲒⲥⲣⲁⲏⲗ ⲙⲁⲣⲉϥϣⲱⲡⲓ ⲉϥⲉⲛϩⲟⲧ ⲛ̀ϫⲉⲡⲉⲕⲥⲁϫⲓ ⲫⲏⲉⲧⲁⲕⲥⲁϫⲓ ⲙ̀ⲙⲟϥ ⲛⲉⲙⲡⲉⲕⲁ̀ⲗⲟⲩ ⲡⲁⲓⲱⲧⲆⲁⲩⲓⲇ . ϫⲉ ⲁⲗⲓⲑⲱⲥ ⲫⲛⲟⲩϯ ⲛⲁϣⲱⲡⲓ ⲛⲉⲙⲛⲓⲣⲱⲙⲓ ϩⲓϫⲉⲛⲡⲕⲁϩⲓ ⲓⲥϫⲉⲧⲫⲉ ⲛⲉⲙⲧⲫⲉ ⲛ̀ⲧⲉⲧⲫⲉ ⲛⲁⲠϭⲟⲓⲥ ⲛⲉ ⲟⲩⲟϩ ⲧⲫⲉ ⲭⲏ ⲛⲉⲙⲁⲕ ⲟⲩⲟϩ ⲛⲓⲙ ⲡⲉ ⲡⲁⲓⲏⲓ ⲉⲧⲁⲓⲕⲟⲧϥ ⲕⲁⲧⲁⲧⲁⲙⲉⲧϩⲏⲕⲓ . Ⲉⲕⲉ̀ϫⲟⲩϣⲧ ⲉ̀ϫⲉⲛϯⲡⲣⲟⲥⲉⲩⲭⲏ ⲙ̀ⲡⲉⲕⲁ̀ⲗⲟⲩ ⲛⲉⲙⲡⲉϥⲧⲱⲃϩ Ⲡϭⲟⲓⲥ ⲡⲁⲛⲟⲩϯ ⲉ̀ⲑⲣⲉⲕⲥⲱⲧⲉⲙ ⲉ̀ⲡⲁⲧⲱⲃϩ ⲛⲉⲙⲧⲁⲡⲣⲟⲥⲉⲩⲭⲏ ⲑⲏⲉ̀ϯⲛⲁⲉⲣⲡⲣⲟⲥⲉⲩⲭⲉⲥⲑⲉ ⲙ̀ⲙⲟⲥ ⲙ̀ⲡⲉⲕⲙ̀ⲑⲟ ⲙ̀ⲡⲁⲓⲉ̀ϩⲟⲟⲩ ⲙ̀ⲫⲟⲟⲩ. Ⲙⲁⲣⲉⲛⲉⲕⲃⲁⲗ ϣⲱⲡⲓ ⲉⲩⲟⲩⲱⲛ ⲉ̀ϫⲉⲛⲡⲁⲓⲏⲓ ⲙ̀ⲡⲓⲉ̀ϩⲟⲟⲩ ⲛⲉⲙⲡⲓⲉ̀ϫⲱⲣϩ ϧⲉⲛⲡⲁⲓⲧⲟⲡⲟⲥ ⲫⲁⲓⲉⲧⲁⲕϫⲟⲥ ϫⲉ ⲡⲉⲕⲣⲁⲛ ⲉⲩⲉ̀ⲙⲟⲩϯ ⲉ̀ⲣⲟϥ ⲙ̀ⲙⲁⲩ . Ⲟⲩⲟϩ ⲉⲕⲉ̀ⲥⲱⲧⲉⲙ ⲙ̀ⲡⲧⲱⲃϩ ⲙ̀ⲡⲉⲕⲁ̀ⲗⲟⲩ ⲛⲉⲙⲡⲉⲕⲗⲁⲟⲥ ⲡⲒⲥⲣⲁⲏⲗ ⲉ̀ϣⲱⲡ ⲁⲩϣⲁⲛⲉⲣⲡⲣⲟⲥⲉⲩⲭⲉⲥⲑⲉ ϧⲉⲛⲡⲁⲓⲙⲁ ⲛ̀ⲑⲟⲕ ⲉⲕⲉ̀ⲥⲱⲧⲉⲙ ⲉ̀ⲃⲟⲗ ϧⲉⲛⲡⲉⲕⲙⲁⲛ̀ϣⲱⲡⲓ ⲉⲧⲥⲉⲃⲧⲱⲧ ⲛ̀ⲧⲉⲧⲫⲉ ⲉⲕⲉ̀ⲥⲱⲧⲉⲙ ⲟⲩⲟϩ ⲉⲕⲉ̀ⲭⲱ ⲉ̀ⲃⲟⲗ ⲛ̀ⲛⲟⲩⲛⲟⲃⲓ ⲉⲧⲁⲩⲁⲓⲧⲟⲩ . Ⲉϣⲱⲡ ⲁ̀ⲣⲉϣⲁⲛⲟⲩⲣⲱⲙⲓ ⲉⲣⲛⲟⲃⲓ ⲉ̀ⲡⲉϥϣⲫⲏⲣ ⲟⲩⲟϩ ⲛ̀ⲧⲉϥϭⲓ ⲛ̀ⲟⲩⲥⲁϩⲟⲩⲓ̀ ⲉ̀ϩⲣⲏⲓ ⲉ̀ϫⲱϥ ⲉ̀ⲑⲣⲉϥⲥⲁϩⲟⲩⲓ̀ ⲙ̀ⲙⲟϥ ⲟⲩⲟϩ ⲛ̀ⲧⲉϥⲥⲁϩⲟⲩⲓ̀ ⲉ̀ⲣⲟϥ ⲟⲩⲟϩ ⲛ̀ⲧⲉϥⲓ̀ ⲙ̀ⲡⲉⲙⲑⲟ ⲙ̀ⲡⲁⲓⲏⲓ ⲫⲁⲓ . Ⲛ̀ⲑⲟⲕ ⲉⲕⲉ̀ⲥⲱⲧⲉⲙ ⲉ̀ⲃⲟⲗ ϧⲉⲛⲧⲉⲕⲫⲉ ⲉⲕⲉ̀ⲓ̀ⲣⲓ ⲟⲩⲟϩ ⲉⲕⲉ̀ϯϩⲁⲡ ⲛ̀ⲛⲉⲕⲉ̀ⲃⲓⲁⲓⲕ ⲉ̀ⲡϫⲓⲛϯϣⲉⲃⲓⲱ ⲙ̀ⲡⲓⲁ̀ⲛⲟⲙⲟⲥ ⲕⲁⲧⲁⲡⲉϥⲙⲱⲓⲧ ⲉ̀ϫⲉⲛⲧⲉϥⲁ̀ⲫⲉ ⲟⲩⲟϩ ⲉ̀ⲑⲙⲁⲓⲉ̀ⲡⲓⲑⲙⲏⲓ ⲉ̀ϯϣⲉⲃⲓⲱ ⲛⲁϥ ⲕⲁⲧⲁⲉϥⲙⲉⲑⲙⲏⲓ . Ⲟⲩⲟϩ ⲉ̀ϣⲱⲡⲁϥϣⲁⲛϧⲟⲙϧⲉⲙ ⲛ̀ϫⲉⲡⲉⲕⲗⲁⲟⲥ ⲡⲒⲥⲣⲁⲏⲗ ⲙ̀ⲡⲉⲙⲑⲟ ⲛ̀ⲛⲉϥϫⲁϫⲓ ⲁⲩϣⲁⲛⲛⲟⲃⲓ ⲉ̀ⲣⲟⲕ ⲟⲩⲟϩ ⲛ̀ⲧⲟⲩⲕⲟⲧⲟⲩ ⲛ̀ⲧⲟⲩⲟⲩⲱⲛϩ ⲉ̀ⲃⲟⲗ ⲙ̀ⲡⲉⲕⲣⲁⲛ ⲛ̀ⲧⲟⲩⲧⲱⲃϩ ⲙ̀ⲡⲉⲕⲣⲁⲛ ⲉⲑⲟⲩⲁⲃ ⲟⲩⲟϩ ⲛ̀ⲧⲟⲩⲉⲣⲡⲣⲟⲥⲉⲩⲭⲉⲥⲑⲉ ⲙ̀ⲡⲉⲕⲙ̀ⲑⲟ ϧⲉⲛⲡⲁⲓⲏⲓ . Ⲛ̀ⲑⲟⲕ ⲉⲕⲉ̀ⲥⲱⲧⲉⲙ ⲉ̀ⲃⲟⲗ ϧⲉⲛⲧ̀ⲫⲉ ⲉⲕⲉ̀ⲕⲱ ⲉ̀ⲃⲟⲗ ⲛ̀ⲛⲓⲛⲟⲃⲓ ⲛ̀ⲧⲉⲡⲉⲕⲗⲁⲟⲥ ⲡⲒⲥⲣⲁⲏⲗ ⲉⲕⲉ̀ⲧⲁⲥⲑⲱⲟⲩ ⲉ̀ⲡⲓⲕⲁϩⲓ ⲉⲧⲁⲕⲧⲏⲓϥ ⲛⲱⲟⲩ ⲛⲉⲙⲛⲟⲩⲓⲟϯ. ϧⲉⲛⲡϫⲓⲛⲧⲁϩⲛⲟ ⲛ̀ⲧⲫⲉ ⲉ̀ϣⲧⲉⲙⲑⲣⲉⲙⲟⲩⲛϩⲱⲟⲩ ϣⲱⲡⲓ ϫⲉ ⲥⲉⲛⲁⲉⲣⲛⲟⲃⲓ ⲉ̀ⲣⲟⲕ ⲟⲩⲟϩ ⲁⲩϣⲁⲧⲱⲃϩ ϧⲉⲛⲡⲁⲓⲙⲁ ⲟⲩⲟϩ ⲛ̀ⲧⲟⲩⲥⲙⲟⲩ ⲉ̀ⲡⲉⲕⲣⲁⲛ ⲟⲩⲟϩ ⲛ̀ⲧⲟⲩⲧⲁⲥⲑⲱⲟⲩ ⲉ̀ⲃⲟⲗ ϩⲁⲛⲟⲩⲛⲟⲃⲓ ⲉⲑⲃⲉϫⲉ ⲁⲕⲑⲉⲃⲓⲱ̀ⲟⲩ . Ⲛ̀ⲑⲟⲕ Ⲡϭⲟⲓⲥ ⲉⲕⲉ̀ⲥⲱⲧⲉⲙ ⲉ̀ⲃⲟⲗ ϧⲉⲛⲧⲫⲉ ⲉⲕⲉ̀ⲭⲱ ⲛ̀ⲛⲓⲛⲟⲃⲓ ⲛ̀ⲧⲉⲛⲉⲕⲁ̀ⲗⲱⲟⲩⲓ̀ ⲛⲱⲟⲩ ⲉ̀ⲃⲟⲗ ⲛⲉⲙⲡⲉⲕⲗⲁⲟⲥ ⲡⲒⲥⲣⲁⲏⲗ ⲉⲕⲉ̀ⲧⲁⲙⲱⲟⲩ ⲉ̀ⲡⲓⲙⲱⲓⲧ ⲉⲑⲛⲁⲛⲉϥ ⲫⲏⲉⲧⲟⲩⲛⲁⲙⲟϣⲓ ϩⲓⲱⲧϥ ⲉⲕⲉ̀ϯ ⲛ̀ⲟⲩⲙⲟⲩⲛϩⲱⲟⲩ ϩⲓϫⲉⲛⲡⲓⲕⲁϩⲓ ⲫⲏⲉⲧⲁⲕⲧⲏⲓϥ ⲙ̀ⲡⲉⲕⲗⲁⲟⲥ ⲡⲒⲥⲣⲁⲏⲗ ⲉⲩⲗⲏⲣⲟⲛⲟⲙⲓⲁ̀ . Ⲟⲩϩⲃⲱⲛ ⲁϥϣⲁⲛϣⲱⲡⲓ ϩⲓϫⲉⲛⲡⲓⲕⲁϩⲓ ⲓⲉ ⲟⲩⲙⲟⲩ ⲁϥϣⲁⲛϣⲱⲡⲓ ⲓⲉ ⲟⲩϫⲓⲛⲫⲉϩ ⲛⲉⲙⲓⲕⲧⲉⲣⲟⲥ ⲓⲉ ⲟⲩⲣⲱⲕϩ ⲓⲉ ⲟⲩϣϫⲉ ⲓⲉ ⲟⲩⲃⲣⲟⲩⲭⲟⲥ ⲁϥϣⲁⲛϩⲟϫϩⲉϫ ⲙ̀ⲡⲉⲕⲗⲁⲟⲥ ⲙ̀ⲡⲉⲙⲑⲟ ⲛ̀ⲛⲟⲩϫⲁϫⲓ ⲉ̀ϧⲟⲩⲛ ⲉ̀ⲛⲟⲩⲃⲁⲕⲓ ⲕⲁⲧⲁⲟⲩϫⲓⲛⲉⲣϩⲱⲃ ⲛⲓⲃⲉⲛ ⲛⲉⲙⲉⲣϧⲱⲧ ⲛⲓⲃⲉⲛ ⲛⲉⲙⲙ̀ⲕⲁϩ ⲛⲓⲃⲉⲛ . ⲛⲉⲙⲡⲣⲟⲥⲉⲩⲭⲏ ⲛⲓⲃⲉⲛ ⲛⲉⲙⲧⲱⲃϩ ⲛⲓⲃⲉⲛ ⲁⲩϣⲁⲛϣⲱⲡⲓ ⲛ̀ⲧⲉⲡⲓⲣⲱⲙⲓ ⲛⲉⲙⲡⲉⲕⲗⲁⲟⲥ ⲡⲒⲥⲣⲁⲏⲗ ⲉ̀ϣⲱⲡ ⲁ̀ⲣⲉϣⲁⲛⲡⲓⲣⲱⲙⲓⲥⲟⲩⲉⲛⲡⲉϥⲛⲟⲃⲓ ⲛⲉⲙⲡⲉϥⲉⲙⲕⲁϩ ⲛⲉⲙⲡⲉϥⲁϭⲛⲓ ⲛ̀ⲧⲉϥⲫⲱⲣϣ ⲛ̀ⲛⲉϥϭⲓϫ ⲉ̀ⲃⲟⲗ ϧⲉⲛⲡⲁⲓⲏⲓ. Ⲛ̀ⲑⲟⲕ ⲉⲕⲉ̀ⲥⲱⲧⲉⲙ ⲉ̀ⲃⲟⲗ ϧⲉⲛⲡⲉⲕⲙⲁⲛϣⲱⲡⲓ ⲉⲧⲥⲉⲃⲧⲱⲧ ⲛ̀ⲧⲉⲧⲫⲉ ⲁⲩⲱ ⲛ̀ⲧⲉⲕⲧⲁⲗϭⲱⲟⲩ ⲉⲕⲉ̀ϯ ⲙ̀ⲡⲓⲣⲱⲙⲓ ⲕⲁⲧⲁⲡⲉϥⲙⲱⲓⲧ ⲙ̀ⲫⲣⲏϯ ⲉⲧⲁⲕⲥⲱⲟⲩⲛ ⲛ̀ⲛⲟⲩϩⲏⲧ ϫⲉ ⲛ̀ⲧⲟⲕ ⲙ̀ⲙⲁⲩⲁⲧⲕ ⲉⲧⲥⲱⲟⲩⲛ ⲙ̀ⲡϩⲏⲧ ⲛ̀ⲛⲛⲓϣⲏⲣⲓ ⲛ̀ⲧⲉⲛⲓⲣⲱⲙⲓ . ϩⲟⲡⲱⲥ ⲛ̀ⲧⲟⲩⲉⲣϩⲟϯ ϧⲁⲧⲉⲕϩⲏ ⲛ̀ⲛⲓⲉ̀ϩⲟⲟⲩ ⲧⲏⲣⲟⲩ ⲉⲧⲟⲩⲛⲁⲱⲛϧ ⲙ̀ⲙⲱⲟⲩ ϩⲓϫⲉⲛⲡⲓⲕⲁϩⲓ ⲫⲏⲉⲧⲁⲕⲧⲏⲓϥ ⲛ̀ⲛⲟⲩⲓⲟϯ . Ⲟⲩⲟϩ ϣⲉⲙⲙⲟ ⲛⲓⲃⲉⲛ ⲉ̀ⲧⲉⲛ̀ⲟⲩ ⲉ̀ⲃⲟⲗ ϧⲉⲛⲡⲉⲕⲗⲁⲟⲥ ⲡⲒⲥⲣⲁⲏⲗ ⲁⲛ ⲡⲉ ⲛ̀ⲧⲉϥⲓ̀ ⲉ̀ⲃⲟⲗ ϧⲉⲛⲟⲩⲕⲁϩⲓ ⲉϥⲟⲩⲏ̀ⲟⲩ ⲉⲑⲃⲉⲡⲉⲕⲛⲓϣϯ ⲛ̀ⲣⲁⲛ ⲛⲉⲙⲧⲉⲕϭⲓϫ ⲉⲧⲁ̀ⲙⲁϩⲓ ⲛⲉⲙⲡⲉⲕϣⲱⲃϣ ⲉⲧϭⲟⲥⲓ ⲟⲩⲟϩ ⲛ̀ⲧⲟⲩⲧⲱⲃϩ ⲙ̀ⲡⲉⲕⲣⲁⲛ ⲉⲑⲟⲩⲁⲃ ϧⲉⲛⲡⲁⲓⲙⲁ . Ⲉⲕⲉ̀ⲥⲱⲧⲉⲙ ⲉ̀ⲃⲟⲗ ϧⲉⲛⲧⲫⲉ ⲉ̀ⲃⲟⲗ ϧⲉⲛⲡⲉⲕⲙⲁⲛϣⲱⲡⲓ ⲉⲧⲥⲉⲃⲧⲱⲧ ⲉⲕⲉ̀ⲓ̀ⲣⲓ ⲕⲁⲧⲁϩⲱⲃ ⲛⲓⲃⲉⲛ ⲉⲧⲁⲩⲛⲁⲧⲟⲃϩⲕ ⲉⲑⲃⲏⲧⲟⲩ ⲛ̀ϫⲉⲛⲓϣⲉⲙⲙⲱⲟⲩ ϩⲓⲛⲁ ⲛ̀ⲧⲟⲩⲥⲟⲩⲉⲛⲡⲉⲕⲣⲁⲛ ⲉⲑⲟⲩⲁⲃ ⲛ̀ϫⲉⲛⲓⲗⲁⲟⲥ ⲧⲏⲣⲟⲩ ⲛ̀ⲧⲉⲡⲕⲁϩⲓ ⲟⲩⲟϩ ⲛ̀ⲧⲟⲩⲉⲣϩⲟϯ ϧⲁⲧⲉⲕϩⲏ ⲙ̀ⲫⲣⲏϯ ⲙ̀ⲡⲉⲕⲗⲁⲟⲥ ⲡⲒⲥⲣⲁⲏⲗ ⲟⲩⲟϩ ⲟⲛ ⲛ̀ⲧⲟⲩⲉ̀ⲙⲓ ϫⲉ ⲁϥⲙⲟⲩϯ ⲟⲩⲃⲉⲡⲉⲕⲣⲁⲛ ⲉ̀ϧⲣⲏⲓ ⲉ̀ϫⲉⲛⲡⲁⲓⲏⲓ ⲉⲧⲁⲓⲕⲟⲧϥ . Ⲉϣⲱⲡ ⲇⲉ ⲁ̀ⲣⲉϣⲁⲛⲡⲉⲕⲗⲁⲟⲥ ϣⲉ ⲛⲁϥ ⲉ̀ⲃⲟⲗ ⲉ̀ⲡⲓⲡⲟⲗⲉⲙⲟⲥ ⲉ̀ϫⲉⲛⲛⲟⲩϫⲁϫⲓ ϩⲓⲡⲓⲙⲱⲓⲧ ⲉⲧⲉⲕⲛⲁⲟⲩⲟⲣⲡⲟⲩ ϩⲓⲱⲧϥ ⲟⲩⲟϩ ⲛ̀ⲧⲟⲩⲧⲱⲃϩ ⲉ̀ⲡϣⲱⲓ ϩⲁⲣⲟⲕ ⲕⲁⲧⲁⲡⲁⲓⲙⲱⲓⲧ ⲛ̀ⲧⲉⲧⲁⲓⲃⲁⲕⲓ ⲛⲉⲙⲡⲁⲓⲏⲓ ⲉⲧⲁⲓⲕⲟⲧϥ ⲙ̀ⲡⲉⲕⲣⲁⲛ. Ⲟⲩⲟϩ ⲉⲕⲉ̀ⲥⲱⲧⲉⲙ ⲉ̀ⲃⲟⲗ ϧⲉⲛⲧⲫⲉ ⲉ̀ⲡⲟⲩⲧⲱⲃϩ ⲛⲉⲙⲧⲟⲩⲡⲣⲟⲥⲉⲩⲭⲏ ⲉⲕⲉ̀ⲓ̀ⲣⲓ ⲙ̀ⲡⲟⲩⲑⲙⲁⲓⲟ̀ . ϫⲉ ⲥⲉⲛⲁⲉⲣⲛⲟⲃⲓ ⲉ̀ⲣⲟⲕ ⲟⲩⲟϩ ⲙ̀ⲙⲟⲛⲣⲱⲙⲓ ϫⲉ ϥⲛⲁⲉⲣⲛⲟⲃⲓ ⲁⲛ ⲉⲕⲉ̀ϣⲁⲣⲓ ⲉ̀ⲣⲱⲟⲩ ⲟⲩⲟϩ ⲉⲕⲉ̀ⲧⲏⲓⲧⲟⲩ ⲉ̀ϧⲣⲏⲓ ⲛ̀ⲛⲉⲛϫⲓϫ ⲛ̀ⲛⲟⲩϫⲁϫⲓ ⲉⲩⲉⲣⲉ̀ⲭⲙⲁⲗⲱⲧⲉⲩⲓⲛ ⲙ̀ⲙⲱⲟⲩ ⲉ̀ⲡⲕⲁϩⲓ ⲛ̀ⲛⲟⲩϫⲁϫⲓ ϧⲉⲛⲟⲩⲉ̀ⲭⲙⲁⲗⲱⲥⲓⲁ̀ ⲉ̀ⲟⲩⲕⲁϩⲓ ⲉϥⲟⲩⲏ̀ⲟⲩ ⲓⲉ ⲉϥϧⲉⲛⲧ . Ⲟⲩⲟϩ ⲛ̀ⲧⲟⲩⲕⲟⲧⲟⲩ ⲙ̀ⲡⲟⲩϩⲏⲧ ϧⲉⲛⲡⲕⲁϩⲓ ⲉⲧⲟⲩⲉⲣⲉ̀ⲭⲙⲁⲗⲱⲧⲉⲩⲓⲛ ⲙ̀ⲙⲱⲟⲩ ⲙ̀ⲙⲁⲩ ⲕⲁ ⲅⲁⲣ ⲉⲩⲉ̀ⲕⲟⲧⲟⲩ ⲛ̀ⲧⲟⲩⲧⲱⲃϩ ⲙ̀ⲡⲉⲕⲣⲁⲛ Ⲡϭⲟⲓⲥ ⲉⲩϫⲱ ⲙ̀ⲙⲟⲥ . ϫⲉ ⲁⲛⲉⲣⲛⲟⲃⲓ ⲁⲛϭⲓ ⲛ̀ϫⲟⲛⲥ ⲁⲛⲉⲣⲁ̀ⲛⲟⲙⲓⲛ . Ⲟⲩⲟϩ ⲛ̀ⲧⲟⲩⲕⲟⲧⲟⲩ ϩⲁⲣⲟⲕ ϧⲉⲛⲟⲩϩⲏⲧ ⲧⲏⲣϥ ⲛⲉⲙⲧⲟⲩⲯⲩⲭⲏ ⲧⲏⲣⲥ ϧⲉⲛⲡⲓⲕⲁϩⲓ ⲛ̀ⲧⲉⲛⲏⲉⲧⲁⲩⲉⲣⲉ̀ⲭⲙⲁⲗⲱⲧⲉⲩⲓⲛ ⲙ̀ⲙⲱⲟⲩ ⲛ̀ⲧⲟⲩⲧⲱⲃϩ ϧⲉⲛⲫⲙⲱⲓⲧ ⲛ̀ⲧⲉⲧⲟⲩⲃⲁⲕⲓ ⲛⲉⲙⲡⲟⲩⲕⲁϩⲓ ⲫⲏⲉⲧⲁⲕⲧⲏⲓϥ ⲛ̀ⲛⲟⲩⲓⲟϯ ⲛⲉⲙⲧⲁⲓⲃⲁⲕⲓ ⲉⲧⲁⲕⲥⲟⲧⲡⲥ ⲛⲉⲙⲡⲁⲓⲏⲓ ⲉⲧⲁⲓⲕⲟⲧϥ ⲙ̀ⲡⲉⲕⲣⲁⲛ ⲉⲑⲟⲩⲁⲃ . Ⲟⲩⲟϩ ⲉⲕⲉ̀ⲥⲱⲧⲉⲙ ⲉ̀ⲃⲟⲗ ϧⲉⲛⲧⲫⲉ ⲉ̀ⲧⲟⲩⲡⲣⲟⲥⲉⲩⲭⲏ ⲛⲉⲙⲡⲟⲩⲧⲱⲃϩ ⲉⲕⲉ̀ⲓ̀ⲣⲓ ⲛ̀ϩⲁⲛϩⲁⲡ ⲟⲩⲟϩ ⲉⲕⲉ̀ⲕⲱ ⲉ̀ⲃⲟⲗ ⲙ̀ⲡⲉⲕⲗⲁⲟⲥ ⲉⲧⲁϥⲉⲣⲛⲟⲃⲓ ⲉ̀ⲣⲟⲕ . ϯⲛⲟⲩ ⲙⲁⲣⲟⲩϣⲱⲡⲓ ⲛ̀ϫⲉⲛⲉⲕⲃⲁⲗ ⲉⲩϫⲟⲩϣⲧ ϩⲓϫⲉⲛⲛⲉⲕⲉ̀ⲃⲓⲁⲓⲕ ⲛⲉⲕⲙⲁϣϫ ⲉⲩⲥⲱⲧⲉⲙ ⲉ̀ⲧⲟⲩⲡⲣⲟⲥⲉⲩⲭⲏ ϧⲉⲛⲡⲁⲓⲧⲟⲡⲟⲥ . ϯⲛⲟⲩ ⲫⲛⲟⲩϯ ⲧⲱⲛⲕ ⲉ̀ⲡⲉⲕⲙ̀ⲧⲟⲛ ⲛ̀ⲑⲟⲕ ⲛⲉⲙϯⲕⲩⲃⲱⲧⲟⲥ ⲛ̀ⲧⲉⲧⲉⲕϫⲟⲙ ⲛⲉⲕⲟⲩⲏⲛ Ⲡϭⲟⲓⲥ ⲫⲛⲟⲩϯ ⲙⲁⲣⲟⲩϯ ϩⲓⲱ̀ⲧⲟⲩ ⲛ̀ⲟⲩⲟⲩϫⲁⲓ ⲟⲩⲟϩ ⲙⲁⲣⲟⲩⲟⲩⲛⲟϥ ⲙ̀ⲙⲱⲟⲩ ⲛ̀ϫⲉⲛⲉⲕϣⲏⲣⲓ ϧⲉⲛϩⲁⲛⲁⲅⲁⲑⲟⲛ . Ⲡϭⲟⲓⲥ ⲫⲛⲟⲩϯ ⲙ̀ⲡⲉⲣⲫⲱⲛϩ ⲙ̀ⲡⲉⲕϩⲟ ⲥⲁⲃⲟⲗ ⲙ̀ⲙⲟⲛ ⲁ̀ⲣⲓⲫ̀ⲙⲉⲩⲓ̀ ⲛ̀ⲛⲉⲕⲛⲁⲓ ⲛⲉⲙⲆⲁⲩⲓⲇ ⲡⲁⲓⲱⲧ ⲡⲉⲕⲃⲱⲕ .
Ⲍ̅. Ⲟⲩⲟϩ ⲉⲧⲁϥⲟⲩⲱ ⲉϥⲧⲱⲃϩ ⲛ̀ϫⲉⲡⲟⲩⲣⲟ Ⲥⲟⲗⲟⲙⲱⲛ ⲁϥⲓ̀ ⲉ̀ⲡⲉⲥⲏⲧ ⲉ̀ⲃⲟⲗ ϧⲉⲛⲧⲫⲉ ⲛ̀ϫⲉⲟⲩⲭⲣⲱⲙ ⲟⲩⲟϩ ⲁϥⲟⲩⲱⲙ ⲛ̀ⲛⲓϭⲗⲓⲗ ⲛⲉⲙⲛⲓϣⲟⲩϣⲱⲟⲩϣⲓ ⲟⲩⲟϩ ⲁ̀ⲡⲓⲏⲓ ⲙⲟϩ ⲉ̀ⲃⲟⲗ ϧⲉⲛⲟⲩⲱ̀ⲟⲩ ⲛ̀ⲧⲉⲠϭⲟⲓⲥ . ⲟⲩⲟϩ ⲙ̀ⲡⲟⲩϣϫⲟⲙ ⲛ̀ϫⲉⲛⲓⲟⲩⲏⲃ ⲉ̀ϣⲉ ⲉ̀ϧⲟⲩⲛ ⲉ̀ⲡⲏⲓ ⲙ̀ⲫⲛⲟⲩϯ ⲙ̀ⲡⲓⲥⲏⲟⲩ ⲧⲏⲣϥ ⲉ̀ⲧⲉⲙⲙⲁⲩ ϫⲉ ⲁ̀ⲡⲱⲟⲩ ⲙ̀Ⲡϭⲟⲓⲥ ⲙⲟϩ ⲙ̀ⲡⲓⲏⲓ . Ⲟⲩⲟϩ ⲛⲉⲛϣⲏⲣⲓ ⲧⲏⲣⲟⲩ ⲙ̀ⲡⲒⲥⲣⲁⲏⲗ ⲛⲁⲩ ⲉ̀ⲡⲓⲭⲣⲱⲙ ⲉϥⲛⲏⲟⲩ ⲉ̀ⲡⲉⲥⲏⲧ ⲛⲉⲙⲡⲱⲟⲩ ⲛ̀ⲧⲉⲠϭⲟⲓⲥ ϩⲓϫⲉⲛⲡⲓⲏⲓ ⲟⲩⲟϩ ⲁⲩϩⲉⲓ ϩⲓϫⲉⲛⲡⲟⲩϩⲟ ⲉ̀ϫⲉⲛⲡⲓⲗⲓⲑⲟⲥⲧⲣⲱⲧⲟⲛ ⲁⲩⲟⲩⲱϣⲧ ⲙ̀ⲡⲉⲙⲑⲟ ⲙ̀Ⲡϭⲟⲓⲥ ⲟⲩⲟϩ ⲁⲩⲥⲙⲟⲩ ⲉ̀Ⲡϭⲟⲓⲥ ϫⲉ ⲟⲩⲁ̀ⲅⲁⲑⲟⲥ ⲡⲉ ϫⲉ ⲡⲉϥⲛⲁⲓ ϣⲟⲡ ϣⲁⲉⲛⲉϩ . ϫⲉ ⲁ̀ⲡⲟⲩⲣⲟ ⲛⲉⲙⲡⲓⲗⲁⲟⲥ ⲧⲏⲣϥ ⲁⲩϣⲱⲧ ⲛ̀ⲛⲓϣⲟⲩϣⲱⲟⲩϣⲓ ⲙ̀ⲡⲉⲙⲑⲟ ⲙ̀Ⲡϭⲟⲓⲥ. Ⲟⲩⲟϩ ⲁ̀ⲡⲟⲩⲣⲟ Ⲥⲟⲗⲟⲙⲱⲛ ϣⲱⲧ ⲛ̀ϫⲱⲧ ⲥⲛⲁⲩ ⲛ̀ϣⲟ ⲙ̀ⲙⲁⲥⲓ ⲛⲉⲙ ϣⲉ ϫⲱⲧ ⲛ̀ϣⲟ ⲛ̀ⲥⲱⲟⲩ ⲟⲩⲟϩ ⲁϥⲓ̀ⲣⲓ ⲙ̀ⲡⲓⲁⲓⲕ ⲛ̀ⲧⲉⲡⲏⲓ ⲙ̀Ⲡϭⲟⲓⲥ ⲛⲉⲙⲡⲓⲗⲁⲟⲥ ⲧⲏⲣϥ . Ⲟⲩⲟϩ ⲁⲩⲟ̀ϩⲓ ⲉ̀ⲣⲁⲧⲟⲩ ⲛ̀ϫⲉⲛⲓⲟⲩⲏⲃ ⲉ̀ϫⲉⲛⲡⲓⲙⲁⲛⲁ̀ⲣⲉϩ ⲛⲉⲙⲛⲛⲓⲖⲉⲩⲓⲧⲏⲥ ϧⲉⲛϩⲁⲛⲟⲣⲅⲁⲛⲟⲛ ⲛ̀ⲧⲉⲛⲓϩⲱⲇⲏ ⲛⲏⲉⲧⲁϥⲑⲁⲙⲓⲱ̀ⲟⲩ ⲛ̀ϫⲉⲡⲟⲩⲣⲟ Ⲇⲁⲩⲓⲇ ⲉⲩⲟⲩⲱⲛϩ ⲉ̀ⲃⲟⲗ ⲙ̀Ⲡϭⲟⲓⲥ ϫⲉ ⲟⲩⲁⲅⲁⲑⲟⲥ ⲡⲉ ϫⲉ ⲡⲉϥⲛⲁⲓ ϣⲟⲡ ϣⲁⲉⲛⲉϩ ⲛⲁⲩϩⲱⲥ ⲡⲉ ϧⲉⲛⲛⲓϩⲱⲇⲏ ⲛ̀ⲧⲉⲆⲁⲩⲓⲇ ϧⲉⲛⲛⲟⲩϫⲓϫ ⲟⲩⲟϩ ⲛⲁⲩⲉⲣⲥⲁⲗⲡⲓⲍⲓⲛ ⲛ̀ϫⲉⲛⲓⲟⲩⲏⲃ ϧⲉⲛⲟⲩⲥⲁⲗⲡⲓⲅⲝ ⲙ̀ⲡⲟⲩⲙ̀ⲑⲟ ⲟⲩⲟϩ ⲛⲁϥⲟ̀ϩⲓ ⲉ̀ⲣⲁⲧϥ ⲛ̀ϫⲉⲡⲒⲥⲣⲁⲗ ⲧⲏⲣϥ . Ⲟⲩⲟϩ ⲁ̀Ⲥⲟⲗⲟⲙⲱⲛ ⲧⲟⲩⲃⲟ ⲛ̀ϯⲁⲩⲗⲏ ⲉⲧϧⲉⲛⲑⲙⲏϯ ⲙ̀ⲡⲏⲓ ⲙ̀Ⲡϭⲟⲓⲥ ⲉⲧⲁϥⲓ̀ⲣⲓ ⲙ̀ⲙⲁⲩ ⲛ̀ⲓϭⲗⲓⲗ ⲛⲉⲙⲛⲓⲱⲧ ⲛ̀ⲧⲉⲛⲓⲟⲩϫⲁⲓ ϫⲉ ⲛⲁϥⲱ̀ⲗⲓ ⲁⲛ ⲡⲉ ⲛ̀ϫⲉⲛⲓⲙⲁⲛⲉⲣϣⲱⲟⲩϣⲓ ⲛ̀ϩⲟⲙⲧ ⲫⲏⲉⲧⲁϥⲑⲁⲙⲓⲟ̀ ⲛ̀ϫⲉⲤⲟⲗⲟⲙⲱⲛ ⲛⲁϥⲱ̀ⲗⲓ ⲁⲛ ⲡⲉ ⲛ̀ⲛⲓϣⲟⲩϣⲱⲟⲩϣⲓ ⲛⲉⲙⲛⲓⲱⲧ ⲛⲉⲙⲡⲓⲙⲁⲛⲛⲁ . Ⲟⲩⲟϩ ⲁϥⲉⲣϣⲁⲓ ⲛ̀ϫⲉⲡⲟⲩⲣⲟ Ⲥⲟⲗⲟⲙⲱⲛ ⲙ̀ⲡⲓⲥⲏⲟⲩ ⲉ̀ⲧⲉⲙⲙⲁⲩ ⲛ̀ϣⲁϣϥ ⲛ̀ⲉ̀ϩⲟⲟⲩ ⲛⲉⲙⲡⲒⲥⲣⲁⲏⲗ ⲧⲏⲣϥ ⲛⲉⲙⲁϥ ϧⲉⲛⲟⲩⲛⲓϣϯ ⲛ̀ⲑⲱⲟⲩⲧⲥ ⲉⲥⲟϣ ⲉ̀ⲙⲁϣⲱ ⲓⲥϫⲉⲛⲡⲓⲙⲱⲓⲧ ⲉ̀ϧⲟⲩⲛ ⲛ̀ⲧⲉⲏ̀ⲙⲁⲑ ϣⲁⲉϧⲣⲏⲓ ⲉ̀ⲡⲓⲙⲟⲩⲛⲥⲱⲣⲉⲙ ⲛ̀ⲧⲉⲬⲏⲙⲓ . Ⲟⲩⲟϩ ϧⲉⲛⲡⲓⲙⲁϩⲕ̅ ⲛ̀ⲉ̀ϩⲟⲟⲩ ⲁϥⲓ̀ⲣⲓ ⲛ̀ϣⲁⲓ ϧⲉⲛⲡⲟⲩϫⲓⲛⲙⲟϣⲓ ⲉ̀ⲃⲟⲗ ϫⲉ ⲛⲁⲡⲁⲓⲕ ⲛ̀ⲧⲉⲡⲓⲙⲁⲛⲉⲣϣⲱⲟⲩϣⲓ ⲟⲩⲟϩ ⲁϥⲓ̀ⲣⲓ ⲛ̀ⲍ̅ ⲛ̀ⲉ̀ϩⲟⲟⲩ ⲛ̀ϣⲁⲓ. ϧⲉⲛⲟⲩⲥⲟⲩϫⲱⲧ ϣⲟⲙⲧ ⲙ̀ⲡⲓⲁ̀ⲃⲟⲧ ⲙ̀ⲙⲁϩϣⲁϣϥ ⲟⲩⲟϩ ⲁϥⲟⲩⲱⲣⲡ ⲙ̀ⲡⲓⲗⲁⲟⲥ ⲉ̀ⲃⲟⲗ ⲫⲟⲩⲁⲓ ⲫⲟⲩⲁⲓ ⲉ̀ⲡⲉϥⲙⲁⲛϣⲱⲡⲓ ⲉⲩⲟⲩⲛⲟϥ ⲙ̀ⲙⲱⲟⲩ ϧⲉⲛⲡⲟⲩϩⲏⲧ ⲉ̀ϩⲣⲏⲓ ⲉ̀ϫⲉⲛⲛⲓⲁ̀ⲅⲁⲑⲟⲛ ⲧⲏⲣⲟⲩ ⲉⲧⲁ̀Ⲡϭⲟⲓⲥ ⲁⲓⲧⲟⲩ ⲛⲉⲙⲡⲟⲩⲣⲟ Ⲇⲁⲩⲓⲇ ⲛⲉⲙⲤⲟⲗⲟⲙⲱⲛ ⲛⲉⲙⲡⲒⲥⲣⲁⲏⲗ ⲧⲏⲣϥ . Ⲟⲩⲟϩ ⲁⲡⲟⲩⲣⲟ Ⲥⲟⲗⲟⲙⲱⲛ ϫⲱⲕ ⲛ̀ϩⲱⲃ ⲛⲓⲃⲉⲛ ⲉ̀ⲃⲟⲗ ⲉⲧⲁϥⲟⲩⲱϣ ⲉ̀ⲁⲓⲧⲟⲩ ϧⲉⲛⲧⲉϥⲯⲩⲭⲏ ⲉ̀ⲡⲏⲓ ⲙ̀Ⲡϭⲟⲓⲥ ⲟⲩⲟϩ ⲁϥⲥⲱⲟⲩⲧⲉⲛ ⲁϥϫⲱⲕ ⲙ̀ⲡⲏⲓ ⲙ̀Ⲡϭⲟⲓⲥ ⲉ̀ⲃⲟⲗ ⲛ̀ϫⲉⲤⲟⲗⲟⲙⲱⲛ ⲛⲉⲙⲡⲉϥⲏⲓ ⲉⲩⲥⲟⲡ ϧⲉⲛϩⲱⲃ ⲛⲓⲃⲉⲛ . Ⲟⲩⲟϩ ⲁ̀Ⲡϭⲟⲓⲥ ⲟⲩⲟⲛϩϥ ⲉ̀Ⲥⲟⲗⲟⲙⲱⲛ ϧⲉⲛⲡⲓⲉ̀ϫⲱⲣϩ ⲡⲉϫⲁϥ ⲛⲁϥ ϫⲉ ⲁⲓⲥⲱⲧⲉⲙ ⲛ̀ⲧⲉⲕⲡⲣⲟⲥⲉⲩⲭⲏ ⲟⲩⲟϩ ⲁⲓⲥⲱⲧⲡ ⲛⲏⲓ ⲙ̀ⲡⲁⲓⲙⲁ ⲛ̀ⲟⲩⲏⲓ ⲛ̀ϣⲟⲩϣⲱⲟⲩϣⲓ . ⲟⲩⲟϩ ⲉ̀ϣⲱⲡ ⲁⲓϣⲁⲛⲧⲁϩⲛⲟ ⲉ̀ⲧⲫⲉ ⲉ̀ϣⲧⲉⲙⲑⲣⲉⲙⲟⲩⲛϩⲱⲟⲩ ⲟⲩⲟϩ ⲉ̀ϣⲱⲡ ⲁⲓϣⲁⲛϩⲟⲛϩⲉⲛ ⲉ̀ⲧⲟⲧϥ ⲙ̀ⲡⲓϣϫⲉ ⲉ̀ⲟⲩⲱⲙ ⲛ̀ⲛⲓϣϣⲏⲛ ⲛⲉⲙ ⲁⲓⲁⲛⲟⲩⲱⲣⲡ ⲛ̀ⲟⲩⲙⲟⲩ ⲉ̀ϫⲉⲛⲡⲁⲗⲁⲟⲥ . ⲟⲩⲟϩ ⲉⲩⲉ̀ϣⲱⲡⲓ ⲉⲩⲥⲃⲟⲕ ϧⲉⲛⲧⲟⲩⲏ̀ⲡⲓ ⲉ̀ⲧⲉⲣⲛⲁⲓ ⲛⲉ ⲛⲏⲉⲧⲁⲓⲉ̀ⲛⲟⲩ ⲉ̀ⲃⲟⲗ ϧⲉⲛⲬⲏⲙⲓ ⲟⲩⲟϩ ⲁⲩⲙⲟⲩϯ ⲙ̀ⲡⲁⲣⲁⲛ ⲉ̀ϩⲣⲏⲓ ⲉ̀ϫⲱⲟⲩ ⲁⲩϣⲁⲛⲧⲱⲃϩ ⲟⲩⲟϩ ⲛ̀ⲥⲉⲕⲱϯ ⲙ̀ⲡⲁϩⲟ ⲛ̀ⲧⲟⲩⲧⲁⲥⲑⲱⲟⲩ ⲉ̀ⲃⲟⲗ ϩⲁⲛⲟⲩⲙⲱⲓⲧ ⲉⲧϩⲱⲟⲩ ⲁ̀ⲛⲟⲕ ⲉⲓⲉ̀ⲥⲱⲧⲉⲙ ⲉ̀ⲣⲱⲟⲩ ⲉ̀ⲃⲟⲗ ϧⲉⲛⲧⲫⲉ ⲉⲓⲉ̀ⲭⲱ ⲛ̀ⲛⲟⲩⲛⲟⲃⲓ ⲉ̀ⲃⲟⲗ ⲟⲩⲟϩ ⲉⲓⲉ̀ⲟⲩϫⲁⲓ ⲙ̀ⲡⲟⲩⲕⲁϩⲓ ⲛⲉⲙⲛⲟⲩⲙ̀ⲕⲁⲩϩ ⲉⲩⲥⲟⲡ. Ⲛⲁⲃⲁⲗ ⲅⲁⲣ ⲉⲩⲉ̀ϣⲱⲡⲓ ⲉⲟⲩⲏⲛ ⲉ̀ϩⲣⲏⲓ ⲉ̀ϫⲱⲟⲩ ⲟⲩⲟϩ ⲛⲁⲙⲁϣϫ ⲉⲩⲉ̀ⲥⲱⲧⲉⲙ ⲉ̀ⲡⲟⲩⲧⲱⲃϩ ϧⲉⲛⲡⲁⲓⲧⲟⲡⲟⲥ . Ϩⲏⲡⲡⲉ ⲁⲓⲥⲱⲧⲡ ⲙ̀ⲡⲁⲓⲙⲁ ⲟⲩⲟϩ ⲁⲓⲧⲟⲩⲃⲟϥ ⲉ̀ⲑⲣⲉϥϣⲱⲡⲓ ⲙ̀ⲙⲁⲩ ⲛ̀ϫⲉⲡⲁⲣⲁⲛ ϣⲁⲉⲛⲉϩ ⲟⲩⲟϩ ⲉⲩⲉ̀ϣⲱⲡⲓ ⲙ̀ⲙⲁⲩ ⲛ̀ϫⲉⲛⲁⲃⲁⲗ ⲛⲉⲙⲡⲁϩⲏⲧ ⲛ̀ⲛⲓⲉ̀ϩⲟⲟⲩ ⲧⲏⲣⲟⲩ . Ⲩⲉⲣϭⲉ ⲝϣϣ ⲫⲉϩⲗⲉⲛⲐ :
ⲡⲁⲣⲁⲗⲓⲡⲟⲙⲉⲛⲁ ⲃ̅