---

Ⲡ̀ϪⲰⲘ Ⲛ̀ⲒⲰⲂ ⲠⲒⲐ̀ⲘⲎⲒ

---

ⲕⲉⲫ ⲁ̅

     ⲁ̅. Ⲛⲉ ⲟⲩⲟⲛ ⲟⲩⲣⲱⲙⲓ ⲡⲉ ⲉϥϣⲟⲡ ϧⲉⲛ ϯⲭⲱⲣⲁ ⲛ̀ⲧⲉ ϯⲀⲩⲥⲓⲇⲓⲧⲟⲥ ⲉ̀ⲡⲉϥⲣⲁⲛ ⲡⲉ Ⲓⲱⲃ ⲟⲩⲟϩ ⲡⲓⲣⲱⲙⲓ ⲉⲧⲉⲙ̀ⲙⲁⲩ ⲛⲉ ⲟⲩⲑ̀ⲙⲏⲓ ⲡⲉ ⲛ̀ⲁⲧⲁ̀ⲣⲓⲕⲓ ⲟⲩⲟϩ ⲛ̀ⲑⲉⲟⲥⲉⲃⲏⲥ ⲉ̀ⲁϥϩⲉⲛϥ ⲥⲁⲃⲟⲗ ⲙ̀ⲡⲉⲧϩⲱⲟⲩ ⲛⲓⲃⲉⲛ.
     ⲃ̅. Ⲁⲥϣⲱⲡⲓ ⲇⲉ ⲛⲁϥ ⲛ̀ϫⲉ ⲍ̅ ⲛ̀ϣⲏⲣⲓ ⲛⲉⲙ ϣⲟⲙϯ ⲛ̀ϣⲉⲣⲓ.
     ⲅ̅. Ⲟⲩⲟϩ ⲛⲉϥⲧⲉⲃⲛⲱⲟⲩⲓ̀ ⲛⲉ ⲟⲩⲟⲛ ϣⲁϣϥ ⲛ̀ϣⲟ ⲛ̀ⲉ̀ⲥⲱⲟⲩ ⲛⲉⲙ ϣⲟⲙⲧ ⲛ̀ϣⲟ ⲛ̀ϫⲁⲙⲟⲩⲗ ⲛⲉⲙ ⲧ̀ⲓⲟⲩϣⲉ ⲛ̀ϩⲉⲃⲓ ⲛ̀ⲉ̀ϩⲉ ⲛⲉⲙ ⲧ̀ⲓⲟⲩϣⲉ ⲛ̀ϯⲉⲱ ⲛ̀ⲣⲉϥⲙⲟⲛⲓ ⲟⲩⲟϩ ⲟⲩⲛⲓϣϯ ⲛ̀ϩⲩⲡⲉⲣⲉⲧⲏⲥⲙⲁ ⲛⲉⲙ ϩⲁⲛⲛⲓϣϯ ⲛ̀ϩ̀ⲃⲏⲟⲩⲓ̀ ⲛⲁⲩϣⲟⲡ ⲛⲁϥ ϩⲓϫⲉⲛ ⲡⲓⲕⲁϩⲓ ⲟⲩⲟϩ ⲛⲉ ⲟⲩⲣⲁⲙⲁⲟ̀ ⲡⲉ ⲡⲓⲣⲱⲙⲓ ⲉⲧⲉⲙ̀ⲙⲁⲩ ⲉ̀ⲃⲟⲗϧⲉⲛ ⲛⲏⲉⲧϣⲟⲡ ϧⲉⲛ ⲛⲓⲙⲁⲛ̀ϣⲁⲓ.
     ⲇ̅. Ⲟⲩⲟϩ ⲛⲁⲣⲉ ⲛⲉϥϣⲏⲣⲓ ϩⲏⲗ ⲙ̀ⲙⲏⲛⲓ ⲉⲩⲥⲱ ⲛⲉⲙ ⲛⲟⲩⲉ̀ⲣⲏⲟⲩ ϧⲉⲛ ⲡ̀ⲏⲓ ⲙ̀ⲡⲟⲩⲛⲓϣϯ ⲛ̀ⲥⲟⲛ ⲑ ⲉⲩϭⲓ ⲛⲉⲙⲱⲟⲩ ⲛ̀ⲧⲟⲩⲕⲉⲅ̅ϯ ⲛ̀ⲥⲱⲛⲓ ⲉⲩⲟⲩⲱⲙ ⲟⲩⲟϩ ⲉⲩⲥⲱ ⲛⲉⲙⲱⲟⲩ.
     ⲉ̅. Ⲟⲩⲟϩ ⲁⲣⲉϣⲁⲛ ⲛⲓⲉ̀ϩⲟⲟⲩ ⲛ̀ⲧⲉ ⲡⲓⲥⲱ ϫⲱⲕ ⲉ̀ⲃⲟⲗ ϣⲁⲣⲉ Ⲓⲱⲃ ⲟⲩⲱⲣⲡ ⲛ̀ⲧⲉϥⲧⲟⲩⲃⲱⲟⲩ ⲛ̀ⲧⲉϥϭⲓ ⲛ̀ⲟⲩⲙⲁⲥⲓ ⲛ̀ⲧⲉϥⲧⲁⲗⲟϥ ⲛ̀ϩ̀ⲣⲏⲓ ϧⲁ ⲛⲟⲩⲩⲭⲏ ⲑ ⲛⲁϥϫⲱ ⲅⲁⲣ ⲙ̀ⲙⲟⲥ ⲡⲉ ⲛ̀ϫⲉ Ⲓⲱⲃ ϫⲉ ⲙⲏⲡⲱⲥ ⲁⲩⲙⲉⲩⲓ̀ ⲉ̀ϩⲁⲛⲡⲉⲧϩⲱⲟⲩ ϧⲉⲛ ⲡⲟⲩϩⲏⲧ ⲛ̀ϫⲉ ⲛⲁϣⲏⲣⲓ ⲛⲁϩⲣⲉⲛ Ⲫϯ ⲑ ⲡⲁⲓⲣⲏϯ ⲟⲛ ⲛⲁϥⲓ̀ⲣⲓ ⲛ̀ϫⲉ Ⲓⲱⲃ ⲛ̀ⲛⲓⲉ̀ϩⲟⲟⲩ ⲧⲏⲣⲟⲩ.
     Ⲋ. Ⲁϥϣⲱⲡⲓ ⲇⲉ ⲛ̀ϫⲉ ⲡⲁⲓⲉ̀ϩⲟⲟⲩ ⲁⲩⲓ̀ ⲛ̀ϫⲉ ⲛⲓⲁⲅⲅⲉⲗⲟⲥ ⲛ̀ⲧⲉ Ⲫϯ ⲉ̀ⲟ̀ϩⲓ ⲉ̀ⲣⲁⲧⲟⲩ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ ⲟⲩⲟϩ ⲁϥⲓ̀ ϩⲱϥ ⲛ̀ϫⲉ ⲡⲓⲇⲓⲁⲃⲟⲗⲟⲥ ⲛⲉⲙⲱⲟⲩ ⲟⲩⲟϩ ⲁϥⲟ̀ϩⲓ ϩⲓϫⲉⲛ ⲡⲓⲕⲁϩⲓ ⲟⲩⲟϩ ⲁϥⲥⲓⲛⲓ ⲛ̀ϧⲏⲧϥ.
     ⲍ̅. Ⲟⲩⲟϩ ⲡⲉϫⲁϥ Ⲡⲟ̅ⲥ̅ ⲙ̀ⲡⲓⲇⲓⲁⲃⲟⲗⲟⲥ ϫⲉ ⲉⲧⲁⲕⲓ̀ ⲉ̀ⲃⲟⲗⲑⲱⲛ ⲛ̀ⲑⲟⲕ ⲟⲩⲟϩ ⲁϥⲉⲣⲟⲩⲱ̀ ⲇⲉ ⲛ̀ϫⲉ ⲡⲓⲇⲓⲁⲃⲟⲗⲟⲥ ⲡⲉϫⲁϥ : ϫⲉ ⲁⲓⲙⲉϣⲧ ⲙ̀ⲡⲓⲕⲁϩⲓ ⲧⲏⲣϥ ⲟⲩⲟϩ ⲁⲓⲙⲉϣⲧ ⲥⲁⲡⲉⲥⲏⲧ ⲛ̀ⲧ̀ⲫⲉ ⲟⲩⲟϩ ϯⲓ̀ ⲙ̀ⲡⲁⲓⲙⲁ.
     ⲏ̅. Ⲟⲩⲟϩ ⲡⲉϫⲉ Ⲡⲟ̅ⲥ̅ ⲛⲁϥ ϫⲉ ⲁⲕϯϩ̀ⲑⲏⲕ ⲟⲩⲛ ϧⲉⲛ ⲡⲉⲕϩⲏⲧ ⲉ̀ⲡⲁⲁ̀ⲗⲟⲩ Ⲓⲱⲃ ⲑ ϫⲉ ⲙ̀ⲙⲟⲛ ⲡⲉⲧⲟ̀ⲛⲓ ⲙ̀ⲙⲟϥ ϧⲉⲛ ⲡⲉⲧϣⲟⲡ ϩⲓϫⲉⲛ ⲡⲓⲕⲁϩⲓ ⲑ ⲟⲩⲑ̀ⲙⲏⲓ ⲡⲉ ⲛ̀ⲁⲧⲁ̀ⲣⲓⲕⲓ ⲟⲩⲟϩ ⲛ̀ⲑⲉⲟⲥⲉⲃⲏⲥ ⲉⲧⲁϥϩⲉⲛϥ ⲥⲁⲃⲟⲗ ⲙ̀ⲡⲉⲧϩⲱⲟⲩ ⲛⲓⲃⲉⲛ.
     ⲑ̅. Ⲟⲩⲟϩ ⲡⲉϫⲉ ⲡⲓⲇⲓⲁⲃⲟⲗⲟⲥ ⲙ̀ⲡⲉⲙ̀ⲑⲟ ⲉ̀ⲃⲟⲗ ⲙ̀Ⲡⲟ̅ⲥ̅ ϫⲉ ⲙⲏ ⲁⲣⲉ Ⲓⲱⲃ ϣⲉⲙϣⲓ ⲙ̀Ⲡⲟ̅ⲥ̅ ⲛ̀ϫⲓⲛϫⲏ.
     ⲓ̅. Ⲙⲏ ⲛ̀ⲑⲟⲕ ⲁⲛ ⲁⲕⲧⲁⲛϣⲟ ⲛ̀ⲛⲉϥϩⲩⲡⲁⲣⲭⲟⲛⲧⲁ ⲑ ⲁⲕⲥ̀ⲙⲟⲩ ⲉ̀ⲛⲏⲉⲧⲥⲁϧⲟⲩⲛ ⲛⲉⲙ ⲛⲏⲉⲧⲥⲁⲃⲟⲗ ⲙ̀ⲡⲉϥⲏⲓ ⲛⲉⲙ ⲉⲛⲭⲁⲓ ⲛⲓⲃⲉⲛ ⲉⲧⲉ ⲛ̀ⲧⲁϥ ⲉϥⲕⲱϯ ⲑ ⲛⲓϩ̀ⲃⲏⲟⲩⲓ̀ ⲛ̀ⲧⲉ ⲛⲉϥϫⲓϫ ⲁⲕⲥ̀ⲙⲟⲩ ⲉ̀ⲣⲱⲟⲩ ⲑ ⲛⲉϥⲧⲉⲃⲛⲱⲟⲩⲓ̀ ⲁⲕⲑ̀ⲣⲟⲩⲁ̀ϣⲁⲓ ϩⲓϫⲉⲛ ⲡ̀ⲕⲁϩⲓ.
     ⲓ̅ⲁ̅. Ⲁⲗⲗⲁ ⲟⲩⲱⲣⲡ ⲛ̀ⲧⲉⲕϫⲓϫ ϭⲓⲛⲉⲙ ⲛⲏⲉⲧⲉ ⲛ̀ⲧⲁϥ ⲧⲏⲣⲟⲩ ⲛ̀ⲧⲉⲛⲛⲁⲩ ϫⲉ ⲁⲛ ⲉϥⲛⲁⲥ̀ⲙⲟⲩ ⲉ̀ⲣⲟⲕ ⲙ̀ⲡⲉⲕⲙ̀ⲑⲟ.
     ⲓ̅ⲃ̅. Ⲧⲟⲧⲉ ⲡⲉϫⲉ Ⲡⲟ̅ⲥ̅ ⲙ̀ⲡⲓⲇⲓⲁⲃⲟⲗⲟⲥ ⲉ̀ⲡⲉⲧⲛ̀ⲧⲁϥ ⲙ̀ⲙⲱⲟⲩ ⲉ̀ϧ̀ⲣⲏⲓ ⲛⲁⲕ ⲛⲉⲙ ⲧⲉϥⲥⲁⲣⲝ ⲉⲃⲏⲗ ⲉ̀ⲧⲉϥⲩⲭⲏ ⲛ̀ⲑⲟⲕ ⲙ̀ⲡⲉⲣⲑ̀ⲣⲟⲩⲉⲣⲟ̅ⲥ̅ ⲉ̀ⲣⲟⲥ ⲟⲩⲟϩ ⲁϥⲓ̀ ⲛ̀ϫⲉ ⲡⲓⲇⲓⲁⲃⲟⲗⲟⲥ ⲉ̀ⲃⲟⲗ ϩⲓⲧⲉⲛ Ⲡⲟ̅ⲥ̅.
     ⲓ̅ⲅ̅. Ⲁⲥϣⲱⲡⲓ ⲇⲉ ⲙ̀ⲡⲁⲓⲉ̀ϩⲟⲟⲩ ⲛⲓϣⲏⲣⲓ ⲛ̀ⲧⲉ Ⲓⲱⲃ ⲛⲉⲙ ⲛⲉϥϣⲉⲣⲓ ⲛⲁⲩⲟⲩⲱⲙ ⲟⲩⲟϩ ⲛⲁⲩⲥⲉ ⲏⲣⲡ ϧⲉⲛ ⲡ̀ⲏⲓ ⲙ̀ⲡⲟⲩⲛⲓϣϯ ⲛ̀ⲥⲟⲛ.
     ⲓ̅ⲇ̅. Ⲟⲩⲟϩ ⲓⲥ ⲟⲩⲣⲉⲙⲛ̀ϩⲱⲃ ⲁϥⲓ̀ ϩⲁ Ⲓⲱⲃ ⲡⲉϫⲁϥ ϫⲉ ⲛⲁⲩⲥ̀ⲭⲁⲓ ⲡⲉ ⲛ̀ϫⲉ ⲛⲓϩⲉⲃⲓ ⲛ̀ⲉ̀ϩⲉ ⲟⲩⲟϩ ⲛⲓⲓⲁⲥ̀ϩⲓⲙⲓ ⲛⲁⲩⲙⲟⲛⲓ ϧⲁⲧⲟⲧⲟⲩ.
     ⲓ̅ⲉ̅. Ⲁⲩⲓ̀ ⲛ̀ϫⲉ ⲛⲏⲉⲧⲉⲣⲉⲭⲙⲁⲗⲱⲧⲉⲩⲓⲛ ⲁⲩⲉⲣⲉⲭⲙⲁⲗⲱⲧⲉⲩⲓⲛ ⲙ̀ⲙⲱⲟⲩ ⲟⲩⲟϩ ⲁⲩϧⲱⲧⲉⲃ ⲛ̀ⲛⲓⲁ̀ⲗⲱⲟⲩⲓ̀ ϧⲉⲛ ⲧ̀ⲥⲏϥⲓ ⲑ ⲁ̀ⲛⲟⲕ ⲙ̀ⲙⲁⲩⲁⲧ ⲁⲓⲛⲟϩⲉⲙ ⲁⲓⲓ̀ ⲛ̀ⲧⲁⲧⲁⲙⲟⲕ.
     ⲓ̅Ⲋ. Ⲉⲧⲓ ⲉϥⲥⲁϫⲓ ⲛ̀ϫⲉ ⲫⲁⲓ ⲁϥⲓ̀ ⲛ̀ϫⲉ ⲕⲉⲣⲉⲙⲛ̀ϩⲱⲃ ⲡⲉϫⲁϥ ⲛ̀Ⲓⲱⲃ : ϫⲉ ⲟⲩⲭ̀ⲣⲱⲙ ⲁϥⲓ̀ ⲉ̀ⲃⲟⲗϧⲉⲛ ⲧ̀ⲫⲉ ⲁϥⲣⲱⲕϩ ⲛ̀ⲛⲓⲉ̀ⲥⲱⲟⲩ ⲟⲩⲟϩ ⲁϥⲟⲩⲱⲙ ⲛ̀ⲛⲓⲙⲁⲛⲉ̀ⲥⲱⲟⲩ ⲑ ⲡⲁⲓⲣⲏϯ ⲁ̀ⲛⲟⲕ ⲇⲉ ⲙ̀ⲙⲁⲩⲁⲧ ⲁⲓⲛⲟϩⲉⲙ ⲁⲓⲓ̀ ⲛ̀ⲧⲁⲧⲁⲙⲟⲕ.
     ⲓ̅ⲍ̅. Ⲉⲧⲓ ⲉϥⲥⲁϫⲓ ⲛ̀ϫⲉ ⲫⲁⲓ ⲁϥⲓ̀ ⲛ̀ϫⲉ ⲕⲉⲣⲉⲙⲛ̀ϩⲱⲃ ⲡⲉϫⲁϥ ⲛ̀Ⲓⲱⲃ : ϫⲉ ⲛⲓϨⲩⲡⲉⲩⲥ ⲁⲩⲉⲣ ⲅ̅ ⲛ̀ϭⲛⲁϩ ⲉ̀ⲣⲟⲛ ⲁⲩⲕⲱϯ ⲛ̀ⲛⲓϫⲁⲙⲁⲩⲗⲓ ⲁⲩⲉⲣⲉⲭⲗⲱⲧⲉⲩⲓⲛ ⲙ̀ⲙⲱⲟⲩ ⲟⲩⲟϩ ⲁⲩϧⲱⲧⲉⲃ ⲛ̀ⲛⲓⲁ̀ⲗⲱⲟⲩⲓ̀ ⲛ̀ⲧ̀ⲥⲏϥⲓ ⲑ ⲁ̀ⲛⲟⲕ ⲇⲉ ⲉⲧⲁⲓⲛⲟϩⲉⲙ ⲙ̀ⲙⲁⲩⲁⲧ ⲁⲓⲓ̀ ⲛ̀ⲧⲁⲧⲁⲙⲟⲕ.
     ⲓ̅ⲏ̅. Ⲉⲧⲓ ⲉϥⲥⲁϫⲓ ⲛ̀ϫⲉ ⲫⲁⲓ ⲁϥⲓ̀ ⲛ̀ϫⲉ ⲕⲉⲣⲉⲙⲛ̀ϩⲱⲃ ⲡⲉϫⲁϥ ⲛ̀Ⲓⲱⲃ : ϫⲉ ⲉⲣⲉ ⲛⲉⲕϣⲏⲣⲓ ⲛⲉⲙ ⲛⲉⲕϣⲉⲣⲓ ⲉⲩⲟⲩⲱⲙ ⲟⲩⲟϩ ⲉⲩⲥⲱ ϧⲉⲛ ⲡ̀ⲏⲓ ⲙ̀ⲡⲟⲩⲛⲓϣϯ ⲛ̀ⲥⲟⲛ.
     ⲓ̅ⲑ̅. Ⲛ̀ⲟⲩϩⲟϯ ϧⲉⲛ ⲟⲩϩⲟϯ ⲁϥⲓ̀ ⲛ̀ϫⲉ ⲟⲩⲛⲓϣϯ ⲙ̀ⲡ̀ⲛⲉⲩⲙⲁ ⲉ̀ⲃⲟⲗϧⲉⲛ ⲡ̀ϣⲁϥⲉ ⲟⲩⲟϩ ⲁϥϭⲟϩ ⲉ̀ⲡⲓϥ̀ⲧⲟⲩ ⲛ̀ⲗⲁⲕϩ ⲛ̀ⲧⲉ ⲡⲓⲏⲓ ⲟⲩⲟϩ ⲁϥϩⲉⲓ ⲛ̀ϫⲉ ⲡⲓⲏⲓ ⲉ̀ϫⲉⲛ ⲛⲉⲕⲁ̀ⲗⲱⲟⲩⲓ̀ ⲁⲩⲙⲟⲩ ⲑ ⲁ̀ⲛⲟⲕ ⲇⲉ ⲙ̀ⲙⲁⲩⲁⲧ ⲁⲓⲛⲟϩⲉⲙ ⲁⲓⲓ̀ ⲛ̀ⲧⲁⲧⲁⲙⲟⲕ.
     ⲕ̅. Ⲡⲁⲓⲣⲏϯ ⲁϥⲧⲱⲛϥ ⲛ̀ϫⲉ Ⲓⲱⲃ ⲁϥⲫⲱϧ ⲛ̀ⲛⲉϥϩ̀ⲃⲱⲥ ⲟⲩⲟϩ ⲁϥϣⲱⲡ ⲙ̀ⲡ̀ϥⲱⲓ ⲛ̀ⲧⲉ ⲧⲉϥⲁ̀ⲫⲉ ⲟⲩⲟϩ ⲁϥϩⲓⲧϥ ⲉ̀ⲡⲉⲥⲏⲧ ⲁϥⲟⲩⲱϣⲧ ⲙ̀Ⲡⲟ̅ⲥ̅.
     ⲕ̅ⲁ̅. Ⲟⲩⲟϩ ⲡⲉϫⲁϥ : ϫⲉ ⲉⲧⲁⲓⲓ̀ ⲉ̀ⲃⲟⲗ ϧⲉⲛ ⲑ̀ⲛⲉϫⲓ ⲛ̀ⲧⲉ ⲧⲁⲙⲁⲩ ⲉⲓⲃⲏϣ ⲁⲓⲛⲁϣⲉⲛⲏⲓ ⲟⲛ ⲉⲓⲃⲏϣ ⲑ Ⲡⲟ̅ⲥ̅ ⲡⲉ ⲉⲧⲁϥⲧⲏⲓⲧⲟⲩ ⲑ Ⲡⲟ̅ⲥ̅ ⲟⲛ ⲡⲉ ⲉⲧⲁϥⲟⲗⲟⲩ ⲑ ⲕⲁⲧⲁ ⲫ̀ⲣⲏϯ ⲉⲧⲁⲥⲣⲁⲛⲁϥ ⲙ̀Ⲡⲟ̅ⲥ̅ ⲡⲁⲓⲣⲏϯ ⲡⲉ ⲉⲧⲁⲥϣⲱⲡⲓ ⲙⲁⲣⲉϥϣⲱⲡⲓ ⲛ̀ϫⲉ ⲫ̀ⲣⲁⲛ ⲙ̀Ⲡⲟ̅ⲥ̅ ⲉϥⲥ̀ⲙⲁⲣⲱⲟⲩⲧ.
     ⲕ̅ⲃ̅. Ϧⲉⲛ ⲛⲁⲓ ⲧⲏⲣⲟⲩ ⲉⲧⲁⲩϣⲱⲡⲓ ⲙ̀ⲙⲟϥ ⲙ̀ⲡⲉϥⲉⲣ ϩ̀ⲗⲓ ⲛ̀ⲛⲟⲃⲓ ⲛ̀ϫⲉ Ⲓⲱⲃ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ ⲟⲩⲟϩ ⲙ̀ⲡⲉϥϯ ⲛ̀ⲟⲩⲙⲉⲧⲁⲧⲉ̀ⲙⲓ ⲙ̀Ⲫϯ.

ⲕⲉⲫ ⲃ̅

     ⲁ̅. Ⲁⲥϣⲱⲡⲓ ⲇⲉ ⲙ̀ⲡⲁⲓⲉ̀ϩⲟⲟⲩ ⲁⲩⲓ̀ ⲛ̀ϫⲉ ⲛⲓⲁⲅⲅⲉⲗⲟⲥ ⲛ̀ⲧⲉ Ⲫϯ ⲉ̀ⲟ̀ϩⲓ ⲉ̀ⲣⲁⲧⲟⲩ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ ⲟⲩⲟϩ ⲁϥⲓ̀ ⲛ̀ϫⲉ ⲡⲓⲇⲓⲁⲃⲟⲗⲟⲥ ⲁϥⲟ̀ϩⲓ ⲉ̀ⲣⲁⲧϥ ϧⲉⲛ ⲧⲟⲩⲙⲏϯ.
     ⲃ̅. Ⲟⲩⲟϩ ⲡⲉϫⲉ Ⲡⲟ̅ⲥ̅ ⲙ̀ⲡⲓⲇⲓⲁⲃⲟⲗⲟⲥ ϫⲉ ⲉⲧⲁⲕⲓ̀ ⲉ̀ⲃⲟⲗⲑⲱⲛ ⲛ̀ⲑⲟⲕ ⲑ ⲧⲟⲧⲉ ⲡⲉϫⲉ ⲡⲓⲇⲓⲁⲃⲟⲗⲟⲥ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ ϫⲉ ⲉⲧⲁⲓⲥⲓⲛⲓ ⲉ̀ⲃⲟⲗ ⲥⲁⲡⲉⲥⲏⲧ ⲛ̀ⲧ̀ⲫⲉ ⲟⲩⲟϩ ⲁⲓⲙⲟϣⲓ ⲉ̀ⲃⲟⲗ ϩⲓϫⲉⲛ ⲡ̀ⲕⲁϩⲓ ⲧⲏⲣϥ ϯⲓ̀ ⲙ̀ⲡⲁⲓⲙⲁ.
     ⲅ̅. Ⲡⲉϫⲉ Ⲡⲟ̅ⲥ̅ ⲇⲉ ⲛⲁϥ ϫⲉ ⲁⲕϯϩ̀ⲑⲏⲕ ⲟⲩⲛ ϧⲉⲛ ⲡⲉⲕϩⲏⲧ ⲉ̀ⲡⲁⲁ̀ⲗⲟⲩ Ⲓⲱⲃ ⲑ ϫⲉ ⲙ̀ⲙⲟⲛ ⲡⲉϥⲣⲏϯ ϩⲓϫⲉⲛ ⲡⲓⲕⲁϩⲓ ⲑ ⲉ̀ⲟⲩⲣⲱⲙⲓ ⲛ̀ⲁⲧⲡⲉⲧϩⲱⲟⲩ ⲡⲉ ⲛ̀ⲑ̀ⲙⲏⲓ ⲛ̀ⲁⲧⲁ̀ⲣⲓⲕⲓ ⲉ̀ⲁϥϩⲉⲛϥ ⲥⲁⲃⲟⲗ ⲙ̀ⲡⲉⲧϩⲱⲟⲩ ⲛⲓⲃⲉⲛ ⲑ ⲉⲧⲓ ⲟⲛ ϥ̀ⲁ̀ⲙⲟⲛⲓ ⲛ̀ϯⲙⲉⲧⲁⲧⲕⲁⲕⲓⲁ ⲛ̀ⲑⲟⲕ ⲇⲉ ⲁⲕϫⲟⲥ ϧⲉⲛ ⲡⲉⲧϣⲟⲩⲓⲧ ⲉ̀ⲧⲁⲕⲟ ⲛ̀ⲛⲉϥϩⲩⲡⲁⲣⲭⲟⲛⲧⲁ.
     ⲇ̅. Ⲁϥⲉⲣⲟⲩⲱ̀ ⲛ̀ϫⲉ ⲡⲓⲇⲓⲁⲃⲟⲗⲟⲥ ⲡⲉϫⲁϥ ϫⲉ ⲟⲩϣⲁⲣ ϧⲁ ⲟⲩϣⲁⲣ ⲛⲏⲧⲏⲣⲟⲩ ⲉⲧⲉⲛ̀ⲧⲉ ⲡⲓⲣⲱⲙⲓ ⲛⲁⲧⲏⲓⲧⲟⲩ ⲉ̀ϫⲉⲛ ⲧⲉϥⲩⲭⲏ ⲑ ⲡⲁⲓⲣⲏϯ ⲇⲉ ⲁⲛ.
     ⲉ̅. Ⲁⲗⲗⲁ ⲟⲩⲱⲣⲡ ⲛ̀ⲧⲉⲕϫⲓϫ ϭⲟϩ ⲉ̀ⲛⲉϥⲕⲁⲥ ⲛⲉⲙ ⲛⲉϥⲁ̀ϥⲟⲩⲓ̀ ⲛ̀ⲧⲉⲕⲛⲁⲩ ϫⲉ ⲁⲛ ϥ̀ⲛⲁⲥ̀ⲙⲟⲩ ⲉ̀ⲣⲟⲕ ⲙ̀ⲡⲉⲕⲙ̀ⲑⲟ.
     Ⲋ. Ⲡⲉϫⲉ Ⲡⲟ̅ⲥ̅ ⲙ̀ⲡⲓⲇⲓⲁⲃⲟⲗⲟⲥ ϫⲉ ϩⲏⲡⲡⲉ ϯϯ ⲙ̀ⲙⲟϥ ⲉ̀ϧ̀ⲣⲏⲓ ⲉ̀ⲛⲉⲕϫⲓϫ ⲑ ⲙ̀ⲙⲟⲛ ⲧⲉϥⲩⲭⲏ ⲁ̀ⲣⲉϩ ⲉ̀ⲣⲟⲥ.
     ⲍ̅. Ⲁϥⲓ̀ ⲇⲉ ⲛ̀ϫⲉ ⲡⲓⲇⲓⲁⲃⲟⲗⲟⲥ ⲉ̀ⲃⲟⲗ ϩⲓⲧⲉⲛ Ⲡⲟ̅ⲥ̅ ⲟⲩⲟϩ ⲁϥϫⲟⲩⲕϩ ⲛ̀Ⲓⲱⲃ ⲛ̀ⲟⲩϣⲁϣ ⲉϥϩⲱⲟⲩ ⲓⲥϫⲉⲛ ⲛⲉϥⲫⲁⲧ ϣⲁ ⲧⲉϥⲁ̀ⲫⲉ.
     ⲏ̅. Ⲟⲩⲟϩ ⲁϥϭⲓ ⲛ̀ⲟⲩⲃⲉⲗϫ ⲁϥϧⲱϧ ⲙ̀ⲡⲓⲙⲱⲟⲩⲃⲱⲛ ⲟⲩⲟϩ ⲁϥϩⲉⲙⲥⲓ ϩⲓϫⲉⲛ ⲟⲩⲕⲟⲡⲣⲓⲁ ⲥⲁⲃⲟⲗ ⲛ̀ϯⲃⲁⲕⲓ.
     ⲑ̅. Ⲉⲧⲁϥⲥⲓⲛⲓ ⲇⲉ ⲛ̀ϫⲉ ⲟⲩⲛⲓϣϯ ⲛ̀ⲭ̀ⲣⲟⲛⲟⲥ ⲡⲉϫⲉ ⲧⲉϥⲥ̀ϩⲓⲙⲓ ⲛⲁϥ ϫⲉ ϣⲁ ⲑ̀ⲛⲁⲩ ϫⲉ ⲕ̀ϣⲱⲡ ⲉ̀ⲣⲟⲕ ⲉⲕϫⲱ ⲙ̀ⲙⲟⲥ ϫⲉ ϩⲏⲡⲡⲉ ϯⲛⲁⲟⲩⲱⲙ ⲉ̀ⲣⲟⲓ ⲛ̀ⲕⲉⲕⲟⲩϫⲓ ⲛ̀ⲭ̀ⲣⲟⲛⲟⲥ ⲉⲓϫⲟⲩϣⲧ ⲉ̀ⲃⲟⲗ ϧⲁⲧ̀ϩⲏ ⲛ̀ϯϩⲉⲗⲡⲓⲥ ⲛ̀ⲧⲉ ⲡⲁⲟⲩϫⲁⲓ ⲑ ϩⲏⲡⲡⲉ ⲅⲁⲣ ⲁϥⲧⲁⲕⲟ ⲛ̀ϫⲉ ⲡⲉⲕⲉⲣⲫ̀ⲙⲉⲩⲓ̀ ⲉ̀ⲃⲟⲗ ϩⲓϫⲉⲛ ⲡ̀ⲕⲁϩⲓ ⲑ ⲛⲓϣⲏⲣⲓ ⲛⲉⲙ ⲛⲓϣⲉⲣⲓ ⲛⲓⲛⲁⲕϩⲓ ⲛⲉⲙ ⲛⲓⲙ̀ⲕⲁϩ ⲛ̀ⲧⲉ ⲧⲁⲛⲉϫⲓ ⲛⲏⲉⲧⲁⲓϭⲓϧⲓⲥⲓ ⲉ̀ⲣⲱⲟⲩ ⲉ̀ⲡⲁⲃⲏⲣ ϧⲉⲛ ϩⲁⲛⲉⲙⲕⲁϩⲛ̀ϩⲏⲧ ⲑ ⲛ̀ⲑⲟⲕ ⲇⲉ ⲕ̀ϩⲉⲙⲥⲓ ϧⲉⲛ ϩⲁⲛϥⲉⲛⲧ ⲉⲩϩⲱⲟⲩ ⲉⲕⲟⲓ ⲛ̀ϣ̀ⲣⲱⲓⲥ ϧⲉⲛ ⲡⲓϧⲏⲙⲓ ⲛⲉⲙ ϯⲓⲱϯ ⲑ ⲁ̀ⲛⲟⲕ ϩⲱ ⲁⲓⲉⲣ ⲟⲩⲥⲉⲣⲙⲏ ⲟⲩⲟϩ ⲙ̀ⲃⲱⲕⲓ ⲉⲓⲗⲉⲗⲉ ⲉ̀ⲃⲟⲗϧⲉⲛ ⲙⲁ ⲉ̀ⲙⲁ ⲛⲉⲙ ⲉ̀ⲃⲟⲗϧⲉⲛ ⲏⲓ ⲉ̀ⲏⲓ ⲑ ⲉⲓϫⲟⲩϣⲧ ⲉ̀ⲃⲟⲗ ϫⲉ ⲁⲣⲉ ⲫ̀ⲣⲏ ⲛⲁϩⲱⲧⲡ ⲛ̀ⲑ̀ⲛⲁⲩ ϩⲓⲛⲁ ⲛ̀ⲧⲁⲙ̀ⲧⲟⲛ ⲙ̀ⲙⲟⲓ ⲉ̀ⲃⲟⲗϧⲉⲛ ⲛⲁϧⲓⲥⲓ ⲛⲉⲙ ⲛⲁⲙ̀ⲕⲁϩⲛ̀ϩⲏⲧ ⲛⲏⲉⲧⲕⲱϯ ⲉ̀ⲣⲟⲓ ϯⲛⲟⲩ ⲑ ⲁⲗⲗⲁ ϫⲉ ⲟⲩⲥⲁϫⲓ ⲙ̀Ⲡⲟ̅ⲥ̅ ⲟⲩⲟϩ ⲙⲟⲩ.
     ⲓ̅. Ⲛ̀ⲑⲟϥ ⲇⲉ ⲉⲧⲁϥϫⲟⲩϣⲧ ⲉ̀ⲣⲟⲥ ⲡⲉϫⲁϥ ϫⲉ ⲉⲧⲁⲣⲉⲥⲁϫⲓ ⲙ̀ⲫ̀ⲣⲏϯ ⲛ̀ⲟⲩⲓ̀ ⲛ̀ⲛⲓϩⲓⲟⲙⲓ ⲛ̀ⲁⲧϩⲏⲧ ⲓⲥϫⲉ ⲛⲓⲁⲅⲁⲑⲟⲛ ⲁⲛϭⲓⲧⲟⲩ ⲉ̀ⲃⲟⲗϩⲓⲧⲉⲛ Ⲡⲟ̅ⲥ̅ ⲛⲓⲡⲉⲧϩⲱⲟⲩ ⲧⲉⲛⲛⲁϥⲁⲓ ϧⲁⲣⲱⲟⲩ ⲁⲛ ⲑ ϧⲉⲛ ⲛⲁⲓ ⲧⲏⲣⲟⲩ ⲉⲧⲁⲩϣⲱⲡⲓ ⲙ̀ⲙⲟϥ ⲙ̀ⲡⲉϥⲉⲣ ϩ̀ⲗⲓ ⲛ̀ⲛⲟⲃⲓ ⲛ̀ϫⲉ Ⲓⲱⲃ ϧⲉⲛ ⲛⲉϥⲥ̀ⲫⲟⲧⲟⲩ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅.
     ⲓ̅ⲁ̅. Ⲉⲧⲁⲩⲥⲱⲧⲉⲙ ⲇⲉ ⲛ̀ϫⲉ ⲡⲉϥϣⲟⲙⲧ ⲛ̀ϣ̀ⲫⲏⲣ ⲉⲑⲃⲉ ⲛⲓⲡⲉⲧϩⲱⲟⲩ ⲧⲏⲣⲟⲩ ⲉⲧⲁⲩⲓ̀ ⲉ̀ϩ̀ⲣⲏⲓ ⲉ̀ϫⲱϥ ⲁⲩⲓ̀ ϩⲁⲣⲟϥ ⲛ̀ϫⲉ ⲫ̀ⲟⲩⲁⲓ ⲫ̀ⲟⲩⲁⲓ ⲉ̀ⲃⲟⲗϧⲉⲛ ⲧⲉϥⲭⲱⲣⲁ : Ⲉⲗⲓⲫⲁⲥ ⲡ̀ⲟⲩⲣⲟ ⲛ̀Ⲑⲉⲙⲁⲛⲱⲛ ⲛⲉⲙ Ⲃⲁⲗⲇⲁⲇ ⲡⲓⲦⲩⲣⲁⲛⲛⲟⲥ ⲛ̀ⲧⲉ ⲛⲓⲤⲁⲩⲭⲉⲱⲛ ⲛⲉⲙ Ⲥⲱⲫⲁⲣ ⲡ̀ⲟⲩⲣⲟ ⲛ̀ⲧⲉ ⲛⲓⲘⲉⲛⲛⲉⲟⲥ ⲑ ⲁⲩⲓ̀ ϩⲁⲣⲟϥ ⲉⲩⲥⲟⲡ ϫⲉ ⲛ̀ⲧⲟⲩϯⲛⲟⲙϯ ⲛⲁϥ ⲟⲩⲟϩ ⲛ̀ⲧⲟⲩϫⲉⲙⲡⲉϥϣⲓⲛⲓ.
     ⲓ̅ⲃ̅. Ⲉⲧⲁⲩⲛⲁⲩ ⲉ̀ⲣⲟϥ ϩⲓ ⲫ̀ⲟⲩⲉⲓ ⲙ̀ⲡⲟⲩⲥⲟⲩⲱⲛϥ ⲟⲩⲟϩ ⲉⲧⲁⲩⲱϣ ⲉ̀ⲃⲟⲗ ϧⲉⲛ ⲟⲩⲛⲓϣϯ ⲛ̀ⲥ̀ⲙⲏ ⲁⲩⲣⲓⲙⲓ ⲑ ⲉ̀ⲁ ⲫ̀ⲟⲩⲁⲓ ⲫ̀ⲟⲩⲁⲓ ⲙ̀ⲙⲱⲟⲩ ⲫⲱϧ ⲛ̀ⲧⲉϥⲥ̀ⲧⲟⲗⲏ ⲟⲩⲟϩ ⲁⲩⲧⲁⲗⲉ ⲕⲁϩⲓ ⲉ̀ϫⲉⲛ ⲧⲟⲩⲁ̀ⲫⲉ.
     ⲓ̅ⲅ̅. Ⲁⲩϩⲉⲙⲥⲓ ϧⲁⲧⲟⲧϥ ⲛ̀ϣⲁϣϥ ⲛ̀ⲉ̀ϩⲟⲟⲩ ⲛⲉⲙ ⲍ̅ ⲛ̀ⲉ̀ϫⲱⲣϩ ⲙ̀ⲡⲉ ⲟⲩⲟⲛ ⲙ̀ⲙⲱⲟⲩ ⲥⲁϫⲓ ⲑ ⲛⲁⲩⲛⲁⲩ ⲅⲁⲣ ⲉ̀ⲡⲓⲉⲣϧⲟⲧ ⲉϥⲙⲟⲕϩ ⲟⲩⲟϩ ⲉϥϩⲟⲣϣ ⲉⲙⲁϣⲱ.

ⲕⲉⲫ ⲅ̅

     ⲁ̅. Ⲙⲉⲛⲉⲛⲥⲁ ⲛⲁⲓ ⲇⲉ ⲁϥⲟⲩⲱⲛ ⲛ̀ⲣⲱϥ ⲛ̀ϫⲉ Ⲓⲱⲃ.
     ⲃ̅. Ⲟⲩⲟϩ ⲁϥⲥⲁϩⲟⲩⲓ̀ ⲉ̀ⲡⲉϥⲉ̀ϩⲟⲟⲩ ⲉϥϫⲱ ⲙ̀ⲙⲟⲥ ϫⲉ:
     ⲅ̅. Ⲉϥⲉ̀ⲧⲁⲕⲟ ⲛ̀ϫⲉ ⲡⲓⲉ̀ϩⲟⲟⲩ ⲉⲧⲁⲩⲙⲁⲥⲧ ⲛ̀ϧⲏⲧϥ ⲛⲉⲙ ⲡⲓⲉ̀ϫⲱⲣϩ ⲉⲧⲁⲩϫⲟⲥ ϫⲉ ⲓⲥ ⲟⲩϩⲱⲟⲩⲧ.
     ⲇ̅. Ⲡⲓⲉ̀ϫⲱⲣϩ ⲉⲧⲉⲙ̀ⲙⲁⲩ ⲉϥⲉ̀ⲉⲣⲭⲁⲕⲓ ⲟⲩⲟϩ ⲛ̀ⲛⲉϥⲕⲱϯ ⲛ̀ⲥⲱϥ ⲛ̀ϫⲉ Ⲡⲟ̅ⲥ̅ ⲉ̀ⲃⲟⲗ ⲙ̀ⲡ̀ϣⲱⲓ ⲟⲩⲇⲉ ⲛ̀ⲛⲉϥⲓ̀ ⲉ̀ϫⲱϥ ⲛ̀ϫⲉ ⲫ̀ⲟⲩⲱⲓⲛⲓ.
     ⲉ̅. Ⲉϥⲉ̀ϭⲓⲧϥ ⲛ̀ϫⲉ ⲡ̀ⲭⲁⲕⲓ ⲛⲉⲙ ⲧ̀ϧⲏⲓⲃⲓ ⲙ̀ⲫ̀ⲙⲟⲩ ⲑ ⲉϥⲉ̀ⲓ̀ ⲉ̀ϫⲱϥ ⲛ̀ϫⲉ ⲟⲩⲅ̀ⲛⲟⲫⲟⲥ ⲑ ⲉϥⲉ̀ϣⲱⲡⲓ ⲉϥⲥ̀ϩⲟⲩⲟⲣⲧ ⲛ̀ϫⲉ ⲡⲓⲉ̀ϩⲟⲟⲩ ⲉⲧⲉⲙ̀ⲙⲁⲩ.
     Ⲋ. Ⲉϥⲉ̀ϭⲓⲧϥ ⲛ̀ϫⲉ ⲟⲩⲭⲁⲕⲓ ⲑ ⲛ̀ⲛⲉϥϣⲱⲡⲓ ϧⲉⲛ ϩⲁⲛⲉ̀ϩⲟⲟⲩ ⲛ̀ⲧⲉ ⲟⲩⲣⲟⲙⲡⲓ ⲑ ⲟⲩⲇⲉ ⲛ̀ⲛⲉϥϭⲓⲏ̀ⲡⲓ ϧⲉⲛ ϩⲁⲛⲉ̀ϩⲟⲟⲩ ⲛ̀ⲧⲉ ⲟⲩⲁ̀ⲃⲟⲧ.
     ⲍ̅. Ⲁⲗⲗⲁ ⲡⲓⲉ̀ϫⲱⲣϩ ⲉⲧⲉⲙ̀ⲙⲁⲩ ⲉϥⲉ̀ϣⲱⲡⲓ ϧⲉⲛ ϩⲁⲛⲙ̀ⲕⲁϩⲛ̀ϩⲏⲧ ⲑ ⲛ̀ⲛⲉϥⲓ̀ ⲉ̀ϫⲱϥ ⲛ̀ϫⲉ ⲡ̀ⲟⲩⲛⲟϥ ⲟⲩⲇⲉ ⲫ̀ⲣⲁϣⲓ.
     ⲏ̅. Ⲁⲗⲗⲁ ⲉϥⲉ̀ⲥ̀ϩⲟⲩⲱⲣϥ ⲛ̀ϫⲉ ⲫⲏⲉⲑⲛⲁⲥⲁϩⲟⲩⲓ̀ ⲉ̀ⲡⲓⲉ̀ϩⲟⲟⲩ ⲉⲧⲉⲙ̀ⲙⲁⲩ ⲫⲏⲉⲑⲛⲁϧⲱⲧⲉⲃ ⲙ̀ⲡⲓⲛⲓϣϯ ⲛ̀ⲕⲩⲧⲟⲥ.
     ⲑ̅. Ⲉⲩⲉ̀ⲉⲣⲭⲁⲕⲓ ⲛ̀ϫⲉ ⲛⲓⲥⲓⲟⲩ ⲛ̀ⲧⲉ ⲡⲓⲉ̀ϫⲱⲣϩ ⲉⲧⲉⲙ̀ⲙⲁⲩ ⲑ ⲛ̀ⲛⲟⲩⲉⲣϩⲩⲡⲟⲙⲟⲛⲓⲛ ⲟⲩⲇⲉ ⲛ̀ⲛⲟⲩⲓ̀ ⲉ̀ⲫ̀ⲟⲩⲱⲓⲛⲓ ⲟⲩⲟϩ ⲛ̀ⲛⲟⲩⲛⲁⲩ ⲉ̀ⲡⲓⲥⲓⲟⲩ ⲛ̀ⲧⲉ ϩⲁⲛⲁⲧⲟⲟⲩⲓ̀ ⲉϥϣⲁⲓⲱⲟⲩ.
     ⲓ̅. Ϫⲉ ⲟⲩⲏⲓ ⲙ̀ⲡⲉϥϣ̀ⲑⲁⲙ ⲛ̀ⲛⲓⲡⲩⲗⲏ ⲛ̀ⲧⲉ ⲑ̀ⲛⲉϫⲓ ⲛ̀ⲧⲁⲙⲁⲩ ⲑ ⲛⲁϥⲛⲁⲱ̀ⲗⲓ ⲅⲁⲣ ⲙ̀ⲡⲁⲓⲙ̀ⲕⲁϩⲛ̀ϩⲏⲧ ⲉ̀ⲃⲟⲗϧⲉⲛ ⲛⲁⲃⲁⲗ.
     ⲓ̅ⲁ̅. Ⲁϧⲟⲓ ⲅⲁⲣ ⲙ̀ⲡⲓⲙⲟⲩ ϧⲉⲛ ⲑ̀ⲛⲉϫⲓ ⲑ ⲓⲉ ⲉⲧⲁⲓⲓ̀ ⲉ̀ⲃⲟⲗϧⲉⲛ ⲑ̀ⲛⲉϫⲓ ⲁϧⲟⲓ ⲙ̀ⲡⲓⲙⲟⲩ ⲥⲁⲧⲟⲧ.
     ⲓ̅ⲃ̅. Ⲉⲑⲃⲉ ⲟⲩ ⲇⲉ ⲁⲩⲧⲁϫⲣⲟ ⲛ̀ϫⲉ ⲛⲁⲕⲉⲗⲓ ⲑ ⲉⲑⲃⲉ ⲟⲩ ⲁⲓⲟⲩⲉⲙϭⲓ.
     ⲓ̅ⲅ̅. Ϯⲛⲟⲩ ⲇⲉ ⲛⲁⲓⲛⲁⲉⲛⲕⲟⲧ ⲡⲉ ⲟⲩⲟϩ ⲛ̀ⲧⲁⲭⲁⲣⲱⲓ ⲑ ⲛⲁⲓⲛⲁϩⲱⲣⲡ ⲡⲉ ⲟⲩⲟϩ ⲛⲁⲓⲛⲁⲙ̀ⲧⲟⲛ ⲙ̀ⲙⲟⲓ ⲡⲉ.
     ⲓ̅ⲇ̅. Ⲛⲉⲙ ϩⲁⲛⲟⲩⲣⲱⲟⲩ ⲙ̀ⲃⲟⲩⲗⲉⲩⲧⲏⲥ ⲛ̀ⲧⲉ ⲡ̀ⲕⲁϩⲓ ⲑ ⲛⲏⲉⲛⲁⲩϣⲟⲩϣⲟⲩ ⲙ̀ⲙⲱⲟⲩ ⲉ̀ϫⲉⲛ ϩⲁⲛⲥⲏϥⲓ.
     ⲓ̅ⲉ̅. Ⲓⲉ ⲛⲉⲙ ϩⲁⲛⲁⲣⲭⲱⲛ ⲛⲏⲉ̀ⲛⲁϥⲟϣ ⲛ̀ϫⲉ ⲡⲟⲩⲛⲟⲩⲃ ⲑ ⲛⲏⲉⲧⲁⲩⲙⲁϩ ⲡⲟⲩⲏⲓ ⲛ̀ϩⲁⲧ.
     ⲓ̅Ⲋ. Ⲓⲉ ⲙ̀ⲫ̀ⲣⲏϯ ⲛ̀ⲟⲩⲟⲩϧⲉ ⲉϥⲛⲏⲟⲩ ⲉ̀ⲃⲟⲗ ϧⲉⲛ ⲧⲟϯ ⲛ̀ⲧⲉ ⲧⲉϥⲙⲁⲩ ⲑ ⲓⲉ ⲙ̀ⲫ̀ⲣⲏϯ ⲛ̀ϩⲁⲛⲕⲟⲩϫⲓ ⲛ̀ⲁ̀ⲗⲱⲟⲩⲓ̀ ⲛⲏⲉⲧⲉ ⲙ̀ⲡⲟⲩⲛⲁⲩ ⲉ̀ⲫ̀ⲟⲩⲱⲓⲛⲓ.
     ⲓ̅ⲍ̅. Ⲉⲧⲁ ⲛⲓⲁ̀ⲥⲉⲃⲏⲥ ⲉⲧⲉ ⲙ̀ⲙⲟⲛ ⲟⲩϫⲱⲛⲧ ⲛ̀ⲧⲉ ⲟⲩⲙ̀ⲃⲟⲛ ⲙ̀ⲙⲁⲩ ⲑ ⲉⲧⲁⲩⲙ̀ⲧⲟⲛ ⲙ̀ⲙⲱⲟⲩ ⲙ̀ⲙⲁⲩ ⲛ̀ϫⲉ ⲛⲏⲉⲧϧⲉⲙϧⲱⲙ ϧⲉⲛ ⲡⲟⲩⲥⲱⲙⲁ.
     ⲓ̅ⲏ̅. Ⲛⲓϣⲁⲉ̀ⲛⲉϩ ⲇⲉ ⲧⲏⲣⲟⲩ ⲉⲩⲥⲟⲡ ⲛⲏⲉⲧⲉ ⲙ̀ⲡⲟⲩⲥⲱⲧⲉⲙ ⲉ̀ⲧ̀ⲥ̀ⲙⲏ ⲛ̀ⲟⲩⲫⲟⲣⲟⲗⲟⲅⲟⲥ.
     ⲓ̅ⲑ̅. Ⲟⲩⲕⲟⲩϫⲓ ⲛⲉⲙ ⲟⲩⲛⲓϣϯ ⲥⲉⲭⲏ ⲙ̀ⲙⲁⲩ ⲑ ⲛⲉⲙ ⲟⲩⲃⲱⲕ ⲉϥⲉⲣϩⲟϯ ϧⲁⲧ̀ϩⲏ ⲙ̀ⲡⲉϥϭⲟⲓⲥ.
     ⲕ̅. Ⲉⲑⲃⲉ ⲟⲩ ⲅⲁⲣ ⲁⲩϯ ⲙ̀ⲫ̀ⲟⲩⲱⲓⲛⲓ ⲛ̀ⲛⲏⲉⲧϧⲉⲛ ⲡ̀ⲭⲁⲕⲓ ⲑ ⲓⲉ ⲡ̀ⲱⲛϧ ⲛ̀ⲛⲓⲩⲭⲏ ⲉⲧϧⲉⲛ ⲡⲉⲙⲕⲁϩⲛ̀ϩⲏⲧ.
     ⲕ̅ⲁ̅. Ⲛⲏⲉⲑⲙⲉⲓ ⲙ̀ⲫ̀ⲙⲟⲩ ⲟⲩⲟϩ ⲛ̀ⲧⲟⲩϭⲓ ⲙ̀ⲙⲟϥ ⲁⲛ ⲑ ⲉⲩⲫⲱⲣⲕ ⲙ̀ⲙⲟϥ ⲙ̀ⲫ̀ⲣⲏϯ ⲛ̀ϩⲁⲛⲁ̀ϩⲱⲣ.
     ⲕ̅ⲃ̅. Ϣⲁⲩⲣⲁϣⲓ ⲇⲉ ⲉϣⲱⲡ ⲛ̀ⲧⲉ ⲧⲟⲧⲟⲩ ϭⲓ ⲙ̀ⲙⲟϥ ⲑ ⲫ̀ⲙⲟⲩ ⲟⲩⲙ̀ⲧⲟⲛ ⲙ̀ⲡⲓⲣⲱⲙⲓ ⲡⲉ.
     ⲕ̅ⲅ̅. Ⲁϥϣ̀ⲑⲁⲙ ⲅⲁⲣ ⲉ̀ⲣⲱϥ ⲛ̀ϫⲉ Ⲫϯ.
     ⲕ̅ⲇ̅. Ϧⲁϫⲱⲟⲩ ⲛ̀ϩⲁⲛϧ̀ⲣⲏⲟⲩⲓ̀ ϣⲁϥⲓ̀ ⲛ̀ϫⲉ ⲟⲩϥⲓⲁ̀ϩⲟⲙ ⲑ ϯⲛⲁⲣⲓⲙⲓ ⲁ̀ⲛⲟⲕ ⲉⲥⲁ̀ⲙⲟⲛⲓ ⲙ̀ⲙⲟⲓ ⲛ̀ϫⲉ ⲟⲩϩⲟϯ.
     ⲕ̅ⲉ̅. Ϯϩⲟϯ ⲅⲁⲣ ⲉ̀ⲛⲁⲓⲙ̀ⲡⲉⲥⲣⲱⲟⲩϣ ⲁⲥⲓ̀ ⲛⲏⲓ ⲑ ⲟⲩⲟϩ ⲑⲏⲉⲛⲁⲓⲉⲣϩⲟϯ ϧⲁⲧⲉⲥϩⲏ ⲁⲥⲓ̀ ⲉ̀ϧⲟⲩⲛ ⲉ̀ϩ̀ⲣⲁⲓ.
    ⲕ̅Ⲋ. Ⲟⲩⲇⲉ ⲙ̀ⲡⲓⲉⲣϩⲓⲣⲏⲛⲏ ⲟⲩⲇⲉ ⲙ̀ⲡⲓⲉⲣⲏⲥⲓⲭⲓⲁⲍⲓⲛ ⲟⲩⲇⲉ ⲙ̀ⲡⲓⲙ̀ⲧⲟⲛ ⲙ̀ⲙⲟⲓ ⲑ ⲁϥⲓ̀ ⲛⲏⲓ ⲛ̀ϫⲉ ⲟⲩϫⲱⲛⲧ.

ⲕⲉⲫ ⲇ̅

    Ϯϩⲟⲩⲓϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲉⲗⲓⲫⲁⲥ
     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲉⲗⲓⲫⲁⲥ ⲡⲓⲐⲉⲙⲁⲛⲓⲧⲏⲥ ⲡⲉϫⲁϥ ϫⲉ :
     ⲃ̅. Ⲙⲏⲧⲓ ⲉⲓⲥⲁϫⲓ ⲛⲉⲙⲁⲕ ϧⲉⲛ ⲟⲩϧⲓⲥⲓ ⲛ̀ⲟⲩⲙⲏϣ ⲛ̀ⲥⲟⲡ ⲑ ϯϫⲟⲙ ⲇⲉ ⲛ̀ⲧⲉ ⲛⲉⲕⲥⲁϫⲓ ⲛⲓⲙ ⲉⲑⲛⲁϣ̀ϥⲓⲧⲥ.
     ⲅ̅. Ⲓⲥϫⲉ ⲅⲁⲣ ⲛ̀ⲑⲟⲕ ⲁⲕϯⲥ̀ⲃⲱ ⲛ̀ⲟⲩⲙⲏϣ ⲟⲩⲟϩ ϩⲁⲛϫⲓϫ ⲛ̀ⲧⲉ ϩⲁⲛⲁⲧϫⲟⲙ ⲁⲕϯⲛⲟⲙϯ ⲛⲱⲟⲩ.
     ⲇ̅. Ϩⲁⲛⲟⲩⲟⲛ ⲇⲉ ⲉⲩϣⲱⲛⲓ ⲁⲕⲧⲁϩⲱⲟⲩ ⲉ̀ⲣⲁⲧⲟⲩ ϧⲉⲛ ϩⲁⲛⲥⲁϫⲓ ⲑ ϩⲁⲛⲕⲉⲗⲓ ⲇⲉ ⲉⲩⲟⲓ ⲛ̀ⲁⲧϫⲟⲙ ⲁⲕϯⲛⲟⲙϯ ⲛⲱⲟⲩ.
     ⲉ̅. Ϯⲛⲟⲩ ⲇⲉ ⲁϥⲓ̀ ⲉ̀ϫⲱⲕ ⲛ̀ϫⲉ ⲟⲩⲙ̀ⲕⲁϩ ⲟⲩⲟϩ ⲁϥϭⲟϩ ⲉ̀ⲣⲟⲕ ⲑ ⲛ̀ⲑⲟⲕ ⲇⲉ ⲁⲕⲓⲏⲥ.
     Ⲋ. Ⲙⲏ ⲁⲣⲉ ⲧⲉⲕϩⲟϯ ⲁⲛ ϫⲉ ϣⲟⲡ ϧⲉⲛ ⲟⲩⲙⲉⲧⲁⲧϩⲏⲧ ⲛⲉⲙ ⲧⲉⲕϩⲉⲗⲡⲓⲥ ϧⲉⲛ ϯⲕⲁⲕⲓⲁ ⲛ̀ⲧⲉ ⲡⲉⲕⲙⲱⲓⲧ.
     ⲍ̅. Ⲁⲣⲓⲫ̀ⲙⲉⲩⲓ̀ ϫⲉ ⲛⲓⲙ ⲁϥⲧⲁⲕⲟ ⲉϥⲟⲩⲁⲃ ⲑ ⲓⲉ ⲉⲧⲁ ϩⲁⲛⲑ̀ⲙⲏⲓ ⲧⲁⲕⲟ ⲛ̀ⲑ̀ⲛⲁⲩ ⲛⲉⲙ ⲧⲟⲩⲛⲟⲩⲛⲓ ⲧⲏⲣⲥ.
     ⲏ̅. Ⲕⲁⲧⲁ ⲫ̀ⲣⲏϯ ⲉⲧⲉⲛⲛⲁⲩ ⲛ̀ⲛⲏⲉⲧⲥ̀ⲭⲁⲓ ⲛ̀ⲛⲓⲁⲧⲟⲡⲟⲛ ⲑ ⲛⲏⲉⲧⲥⲓϯ ⲙ̀ⲙⲱⲟⲩ ⲉⲩⲉ̀ⲱⲥϧ ⲛⲱⲟⲩ ⲛ̀ϩⲁⲛⲉⲙⲕⲁϩⲛ̀ϩⲏⲧ.
     ⲑ̅. Ⲉⲃⲟⲗϧⲉⲛ ⲡⲓⲟⲩⲁϩⲥⲁϩⲛⲓ ⲛ̀ⲧⲉ Ⲡϭⲟⲓⲥ ⲉⲩⲉ̀ⲧⲁⲕⲟ ⲑ ⲉ̀ⲃⲟⲗ ⲇⲉ ϧⲉⲛ ⲡⲓⲡⲛⲉⲩⲙⲁ ⲛ̀ⲧⲉ ⲡⲉϥⲙ̀ⲃⲟⲛ ⲉⲩⲉ̀ⲃⲟⲗⲟⲩ ⲉ̀ⲃⲟⲗ.
     ⲓ̅. Ϯϫⲟⲙ ⲛ̀ⲧⲉ ⲡⲓⲙⲟⲩⲓ̀ ϯⲥ̀ⲙⲏ ⲛ̀ⲧⲉ ϯⲙⲓⲏ ⲡ̀ϣⲟⲩϣⲟⲩ ⲛ̀ⲧⲉ ⲡⲓⲇ̀ⲣⲁⲕⲱⲛ ⲁϥϭⲉⲛⲟ.
     ⲓ̅ⲁ̅. Ⲡⲓⲙⲩⲣⲙⲏⲅⲟⲗⲉⲟⲛ ⲁϥⲧⲁⲕⲟ ϫⲉ ⲙ̀ⲙⲟⲛⲧⲉϥ ϧ̀ⲣⲉ ⲙ̀ⲙⲁⲩ ⲑ ⲛⲓⲙⲁⲥ ⲛ̀ⲧⲉ ⲛⲓⲙⲟⲩⲓ̀ ⲁⲩⲙⲟⲩⲛⲕ ⲛ̀ⲛⲟⲩⲉ̀ⲣⲏⲟⲩ.
     ⲓ̅ⲃ̅. Ⲉⲛⲉ ϩ̀ⲗⲓ ⲅⲁⲣ ⲙ̀ⲙⲉⲑⲙⲏⲓ ϣⲱⲡⲓ ϧⲉⲛ ⲛⲉⲕⲥⲁϫⲓ ⲛⲉ ⲙ̀ⲙⲟⲛ ϩ̀ⲗⲓ ϧⲉⲛ ⲛⲁⲓⲡⲉⲧϩⲱⲟⲩ ⲛⲁϣⲱⲡⲓ ⲙ̀ⲙⲟⲕ ⲑ ⲙⲏ ⲡⲁⲙⲁϣϫ ⲛⲁⲥⲱⲧⲉⲙ ⲁⲛ ⲉ̀ϩⲁⲛϣ̀ⲫⲏⲣⲓ ⲉ̀ⲃⲟⲗϩⲓⲧⲟⲧϥ.
     ⲓ̅ⲅ̅. Ⲟⲩϩⲟϯ ⲇⲉ ⲛⲉⲙ ⲟⲩⲥ̀ⲙⲏ ⲛ̀ⲧⲉ ⲡⲓⲉ̀ϫⲱⲣϩ ⲉⲥⲛⲏⲟⲩ ⲛ̀ϫⲉ ⲟⲩϩⲟϯ ⲉ̀ϫⲉⲛ ⲛⲓⲣⲱⲙⲓ.
     ⲓ̅ⲇ̅. Ⲟⲩⲛ̀ϩⲟⲩⲣ ⲇⲉ ⲛⲉⲙ ⲟⲩⲥ̀ⲑⲉⲣⲧⲉⲣ ⲁⲩⲓ̀ ⲉ̀ϩ̀ⲣⲏⲓ ⲉ̀ϫⲱⲓ ⲟⲩⲟϩ ⲁϥⲕⲓⲙ ⲉ̀ⲡⲁⲕⲁⲥ ⲉⲙⲁϣⲱ.
     ⲓ̅ⲉ̅. Ⲟⲩⲡ̅ⲛ̅ⲁ̅ ⲁϥⲓ̀ ⲉ̀ϩ̀ⲣⲏⲓ ⲉ̀ϫⲉⲛ ⲡⲁϩⲟ ⲑ ⲁⲩⲥ̀ⲑⲉⲣⲧⲉⲣ ⲇⲉ ⲛ̀ϫⲉ ⲛⲁϥⲱⲓ ⲛⲉⲙ ⲛⲁⲥⲁⲣⲝ.
     ⲓ̅Ⲋ. Ⲁⲓⲧⲱⲙⲧ ⲟⲩⲟϩ ⲙ̀ⲡⲓⲥⲱⲟⲩⲛ ⲑ ⲁⲓⲛⲁⲩ ⲟⲩⲟϩ ⲛⲉ ⲙ̀ⲙⲟⲛ ⲙⲟⲣⲫⲏ ⲙ̀ⲡⲉⲙ̀ⲑⲟ ⲛ̀ⲛⲁⲃⲁⲗ ⲁⲗⲗⲁ ⲟⲩϩⲟⲣⲧϥ ⲛⲉⲙ ⲟⲩⲥ̀ⲙⲏ ⲡⲉ ⲉ̀ⲛⲁⲓⲥⲱⲧⲉⲙ ⲉ̀ⲣⲱⲟⲩ.
     ⲓ̅ⲍ̅. Ⲟⲩ ⲅⲁⲣ ⲙⲏ ϥ̀ⲛⲁϣⲱⲡⲓ ⲛ̀ϫⲉ ⲟⲩⲣⲱⲙⲓ ⲉϥⲧⲟⲩⲃⲏⲟⲩⲧ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ ⲑ ⲓⲉ ⲟⲩⲟⲛ ⲟⲩⲣⲱⲙⲓ ⲛⲁⲉⲣⲁⲧⲁ̀ⲣⲓⲕⲓ ⲉ̀ⲃⲟⲗϧⲉⲛ ⲛⲉϥϩ̀ⲃⲏⲟⲩⲓ̀.
     ⲓ̅ⲏ̅. Ⲓⲥϫⲉ ϥ̀ⲧⲉⲛϩⲟⲩⲧ ⲙ̀ⲙⲟⲥ ⲁⲛ ϧⲁ ⲛⲉϥⲁ̀ⲗⲱⲟⲩⲓ̀ ⲑ ⲛⲉϥⲁⲅⲅⲉⲗⲟⲥ ⲇⲉ ⲁϥⲙⲟⲕⲙⲉⲕ ⲉ̀ⲟⲩϩⲱⲃ ⲉϥϧⲟⲥⲓ ϧⲁⲣⲱⲟⲩ.
     ⲓ̅ⲑ̅. Ⲛⲏ ⲇⲉ ⲉⲧϣⲟⲡ ϧⲉⲛ ϩⲁⲛⲏⲓ ⲛ̀ⲟ̀ⲙⲓ ⲛⲉⲙ ⲉⲧⲉ ⲁ̀ⲛⲟⲛ ϩⲱⲛ ⲑ ⲁ̀ⲛⲟⲛ ϩⲁⲛ ⲉ̀ⲃⲟⲗϧⲉⲛ ⲡⲁⲓⲟ̀ⲙⲓ ⲛ̀ⲟⲩⲱⲧ ⲑ ⲁϥϯ ⲛ̀ⲟⲩⲉⲣϧⲟⲧ ⲛⲱⲟⲩ ⲙ̀ⲫ̀ⲣⲏϯ ⲛ̀ⲟⲩϩⲟⲗⲓ.
     ⲕ̅. Ⲟⲩⲟϩ ⲓⲥϫⲉⲛ ϣⲱⲣⲡ ϣⲁ ⲣⲟⲩϩⲓ ⲥⲉϣⲟⲡ ⲁⲛ ϫⲉ ⲑ ⲉⲑⲃⲉ ⲫⲁⲓ ϫⲉ ⲙ̀ⲙⲟⲛϣ̀ϫⲟⲙ ⲙ̀ⲙⲱⲟⲩ ⲉ̀ⲉⲣⲃⲟⲏ̀ⲑⲓⲛ ⲉ̀ⲣⲱⲟⲩ ⲙ̀ⲙⲓⲛ ⲙ̀ⲙⲱⲟⲩ ⲉⲩⲉ̀ⲧⲁⲕⲟ.
     ⲕ̅ⲁ̅. Ⲁϥⲛⲓϥⲓ ⲅⲁⲣ ⲛ̀ⲥⲱⲟⲩ ⲁⲩϣⲱⲟⲩⲓ̀ ⲑ ⲟⲩⲟϩ ⲁⲩⲧⲁⲕⲟ ϫⲉ ⲙ̀ⲙⲟⲛⲧⲟⲩ ⲥⲟⲫⲓⲁ ⲙ̀ⲙⲁⲩ.

ⲕⲉⲫ ⲉ̅

     ⲁ̅. Ⲱϣ ⲇⲉ ⲉ̀ϩ̀ⲣⲏⲓ ⲟⲩⲟϩ ⲁ̀ⲛⲁⲩ ϫⲉ ⲛⲓⲙ ⲁϥⲥⲱⲧⲉⲙ ⲉ̀ⲣⲟⲕ ⲑ ⲓⲥϫⲉ ⲭ̀ⲛⲁⲛⲁⲩ ⲉ̀ⲟⲩⲁⲓ ⲛ̀ⲛⲓⲁⲅⲅⲉⲗⲟⲥ ⲉⲑⲟⲩⲁⲃ.
     ⲃ̅. Ⲕⲉ ⲅⲁⲣ ϣⲁⲣⲉ ⲡⲓϫⲱⲛⲧ ⲧⲁⲕⲟ ⲛ̀ⲛⲓⲁⲧϩⲏⲧ ⲑ ⲡⲓⲭⲟϩ ⲇⲉ ϣⲁϥϧⲱⲧⲉⲃ ⲙ̀ⲫⲏⲉⲧⲥⲟⲣⲉⲙ.
     ⲅ̅. Ⲁⲛⲟⲕ ⲇⲉ ⲁⲓⲛⲁⲩ ⲉ̀ϩⲁⲛⲁⲧϩⲏⲧ ⲉ̀ⲁⲩϩⲓ ⲛⲟⲩⲛⲓ ⲉ̀ⲃⲟⲗ ⲟⲩⲟϩ ⲥⲁⲧⲟⲧϥ ⲁⲩⲟⲩⲱⲙ ⲙ̀ⲡⲟⲩⲥⲱϯ.
     ⲇ̅. Ⲛⲟⲩϣⲏⲣⲓ ⲇⲉ ⲉⲩⲉ̀ϩⲉⲓ ⲙ̀ⲡⲓⲟⲩϫⲁⲓ ⲑ ⲉⲩⲉ̀ⲧ̀ϩⲉⲙⲕⲱⲟⲩ ⲇⲉ ϩⲓⲣⲉⲛ ⲛⲓⲣⲱⲟⲩ ⲛ̀ⲧⲉ ⲛⲏⲉⲧⲥ̀ⲃⲟⲕ ⲉ̀ⲣⲱⲟⲩ ⲟⲩⲟϩ ⲛ̀ⲛⲉϥϣⲱⲡⲓ ⲛ̀ϫⲉ ⲫⲏⲉⲑⲛⲁⲛⲁϩⲙⲟⲩ.
     ⲉ̅. Ⲛⲏ ⲅⲁⲣ ⲉⲧⲁⲩⲑⲟⲩⲱⲧⲟⲩ ⲛ̀ϫⲉ ⲛⲏⲉⲧⲉⲙ̀ⲙⲁⲩ ϩⲁⲛⲑ̀ⲙⲏⲓ ⲉⲩⲉ̀ⲟⲩⲟⲙⲟⲩ ⲑ ⲛ̀ⲑⲱⲟⲩ ⲇⲉ ⲛ̀ⲛⲟⲩⲉⲣ ⲉ̀ⲃⲟⲗ ⲉ̀ϩⲁⲛⲡⲉⲧϩⲱⲟⲩ.
     Ⲋ. Ⲉⲥⲉ̀ⲙⲟⲩⲛⲕ ⲛ̀ϫⲉ ⲧⲟⲩⲛⲟⲙϯ ⲑ ⲛ̀ⲛⲉϥⲓ̀ ⲅⲁⲣ ⲛ̀ϫⲉ ⲟⲩϧⲓⲥⲓ ⲉ̀ⲃⲟⲗϧⲉⲛ ⲡ̀ⲕⲁϩⲓ ⲑ ⲟⲩⲇⲉ ⲛ̀ⲛⲉϥⲣⲱⲧ ϧⲉⲛ ⲛⲓⲧⲱⲟⲩ ⲛ̀ϫⲉ ⲟⲩⲙ̀ⲕⲁϩ.
     ⲍ̅. Ⲁⲗⲗⲁ ⲫ̀ⲣⲱⲙⲓ ⲉ̀ⲧⲟⲩⲙⲓⲥⲓ ⲙ̀ⲙⲟϥ ⲉ̀ⲃⲟⲗϧⲉⲛ ⲟⲩϧⲓⲥⲓ ⲑ ⲛⲓⲙⲁⲥ ⲛ̀ⲧⲉ ⲛⲓⲁ̀ϧⲱⲙ ⲥⲉϩⲏⲗ ⲉ̀ⲡ̀ϭⲓⲥⲓ.
     ⲏ̅. Ⲡⲁⲓⲣⲏϯ ⲇⲉ ⲁⲛ ⲁⲗⲗⲁ ⲁ̀ⲛⲟⲕ ϯⲧⲱⲃϩ ⲙ̀Ⲡϭⲟⲓⲥ ⲑ Ⲡϭⲟⲓⲥ ⲇⲉ ⲫ̀ⲛⲏⲃ ⲛ̀ⲧⲉ ⲟⲩⲟⲛ ⲛⲓⲃⲉⲛ ϯⲛⲁⲱϣ ⲉ̀ⲡ̀ϣⲱⲓ ϩⲁⲣⲟϥ.
     ⲑ̅. Ⲫⲏⲉⲧⲓ̀ⲣⲓ ⲛ̀ϩⲁⲛⲛⲓϣϯ ⲟⲩⲟϩ ⲛ̀ⲁⲧϧⲉⲧϧⲱⲧⲟⲩ ⲛⲉⲙ ϩⲁⲛϩ̀ⲃⲏⲟⲩⲓ̀ ⲉⲩϧⲉⲛ ⲡ̀ⲱ̀ⲟⲩ ⲛⲉⲙ ϩⲁⲛϣ̀ⲫⲏⲣⲓ ⲙ̀ⲙⲟⲛⲧⲟⲩ ⲏ̀ⲡⲓ.
     ⲓ̅. Ⲫⲏⲉⲧϯ ⲛ̀ⲟⲩⲙⲟⲩⲛϩⲱⲟⲩ ϩⲓϫⲉⲛ ⲡ̀ⲕⲁϩⲓ ⲑ ⲫⲏⲉⲧⲧⲁⲟⲩⲉ̀ ⲙⲱⲟⲩ ⲉ̀ϫⲉⲛ ⲛⲏⲉⲧⲥⲁⲡⲉⲥⲏⲧ ⲛ̀ⲧ̀ⲫⲉ.
     ⲓ̅ⲁ̅. Ⲫⲏⲉⲧϭⲓⲥⲓ ⲛ̀ⲛⲏⲉⲧⲑⲉⲃⲓⲏⲟⲩⲧ ⲟⲩⲟϩ ⲉⲧⲧⲟⲩⲛⲟⲥ ⲛ̀ⲛⲏⲉⲧⲁⲩⲧⲁⲕⲟ.
     ⲓ̅ⲃ̅. Ⲫⲏⲉⲧⲫⲱⲛϩ ⲛ̀ⲛⲓⲥⲟϭⲛⲓ ⲛ̀ⲧⲉ ⲛⲓⲡⲁⲛⲟⲩⲣⲅⲟⲥ ⲑ ⲟⲩⲟϩ ⲛ̀ⲛⲟⲩⲉⲣ ϩ̀ⲗⲓ ⲙ̀ⲙⲉⲑⲙⲏⲓ ⲛ̀ϫⲉ ⲛⲟⲩϫⲓϫ.
     ⲓ̅ⲅ̅. Ⲫⲏⲉⲧⲧⲁϩⲟ ⲛ̀ⲛⲓⲥⲁⲃⲉⲩ ϧⲉⲛ ⲧⲟⲩⲥ̀ⲃⲱ ⲑ ⲡ̀ⲥⲟϭⲛⲓ ⲇⲉ ⲛ̀ⲧⲉ ⲛⲓⲥⲁⲛⲕⲟⲧⲥ ⲁϥⲑ̀ⲣⲉϥⲧⲱⲙⲧ.
     ⲓ̅ⲇ̅. Ⲉⲣⲉ ⲟⲩⲭⲁⲕⲓ ⲓ̀ ⲉ̀ϧⲟⲩⲛ ⲉ̀ϩ̀ⲣⲁⲩ ϧⲉⲛ ⲡⲓⲉ̀ϩⲟⲟⲩ ⲑ ⲉⲩⲉ̀ϫⲟⲙϫⲉⲙ ⲇⲉ ⲙ̀ⲙⲉⲣⲓ ⲙ̀ⲫ̀ⲣⲏϯ ⲙ̀ⲡⲓⲉ̀ϫⲱⲣϩ.
     ⲓ̅ⲉ̅. Ⲉⲩⲉ̀ⲧⲁⲕⲟ ϧⲉⲛ ⲡⲓⲡⲟⲗⲉⲙⲟⲥ ⲑ ⲡⲓⲁⲧϫⲟⲙ ⲇⲉ ⲉϥⲉ̀ⲉⲣ ⲉ̀ⲃⲟⲗ ϧⲉⲛ ⲧ̀ϫⲓϫ ⲙ̀ⲫⲏⲉⲧⲉ ⲟⲩⲟⲛϣ̀ϫⲟⲙ ⲙ̀ⲙⲟϥ.
     ⲓ̅Ⲋ. Ⲉⲣⲉ ⲟⲩϩⲉⲗⲡⲓⲥ ϣⲱⲡⲓ ⲛ̀ⲟⲩⲁⲧϫⲟⲙ ⲑ ⲉϥⲉ̀ⲑⲱⲙ ⲇⲉ ⲛ̀ϫⲉ ⲣⲱϥ ⲛ̀ⲟⲩⲣⲉϥϭⲓⲛ̀ϫⲟⲛⲥ.
     ⲓ̅ⲍ̅. Ⲱⲟⲩⲛⲓⲁⲧϥ ⲙ̀ⲡⲓⲣⲱⲙⲓ ⲉⲧⲉϥⲛⲁⲥⲟϩⲓ ⲙ̀ⲙⲟϥ ⲛ̀ϫⲉ Ⲡϭⲟⲓⲥ ⲑ ϯⲥ̀ⲃⲱ ⲇⲉ ⲛ̀ⲧⲉ Ⲡⲓⲡⲁⲛⲧⲟⲕⲣⲁⲧⲱⲣ ⲙ̀ⲡⲉⲣϣⲱⲡⲓ ⲛ̀ⲭ̀ⲟⲩⲁϣⲥ ⲁⲛ.
     ⲓ̅ⲏ̅. Ⲛ̀ⲑⲟϥ ⲇⲉ ⲉⲧϯⲙ̀ⲕⲁϩ ⲟⲩⲟϩ ⲡⲁⲗⲓⲛ ⲟⲛ ϣⲁϥϯⲙ̀ⲧⲟⲛ ⲑ ⲁϥϣⲁⲛϯⲉⲣϧⲟⲧ ϣⲁⲣⲉ ⲛⲉϥϫⲓϫ ⲟⲛ ⲧⲁⲗϭⲟ.
     ⲓ̅ⲑ̅. Ⲥⲟⲟⲩ ⲛ̀ⲥⲟⲡ ϥ̀ⲛⲁⲛⲁϩⲙⲉⲕ ⲉ̀ⲃⲟⲗϧⲉⲛ ϩⲁⲛⲁⲛⲁⲅⲕⲏ ⲑ ϧⲉⲛ ⲡⲓⲙⲁϩϣⲁϣϥ ⲇⲉ ⲛ̀ⲛⲉ ⲡⲉⲧϩⲱⲟⲩ ϭⲟϩ ⲉ̀ⲣⲟⲕ.
     ⲕ̅. Ϧⲉⲛ ⲟⲩϩ̀ⲃⲱⲛ ⲉϥⲉ̀ⲛⲁϩⲙⲉⲕ ⲛ̀ⲧⲟⲧϥ ⲙ̀ⲫ̀ⲙⲟⲩ ⲑ ϧⲉⲛ ⲟⲩⲡⲟⲗⲉⲙⲟⲥ ⲇⲉ ⲉϥⲉ̀ⲛⲁϩⲙⲉⲕ ⲉ̀ⲃⲟⲗ ⲛ̀ⲧⲟⲧϥ ⲛ̀ⲟⲩⲃⲉⲛⲓⲡⲓ.
     ⲕ̅ⲁ̅. Ⲉϥⲉ̀ⲭⲟⲡⲕ ⲉ̀ⲃⲟⲗϩⲁ ⲟⲩⲙⲁⲥⲧⲓⲅⲅⲟⲥ ⲛ̀ⲧⲉ ⲟⲩⲗⲁⲥ ⲑ ⲟⲩⲟϩ ⲛ̀ⲛⲉⲕⲉⲣϩⲟϯ ⲉⲩⲛⲏⲟⲩ ⲛ̀ϫⲉ ϩⲁⲛⲡⲉⲧϩⲱⲟⲩ.
     ⲕ̅ⲃ̅. Ⲛⲓⲣⲉϥϭⲓⲛ̀ϫⲟⲛⲥ ⲇⲉ ⲛⲉⲙ ⲛⲓⲁ̀ⲛⲟⲙⲟⲥ ⲉⲕⲉ̀ⲥⲱⲃⲓ ⲙ̀ⲙⲱⲟⲩ.
     ⲕ̅ⲅ̅. Ⲛⲓⲑⲏⲣⲓⲟⲛ ⲛ̀ⲁⲅⲣⲓⲟⲛ ⲉⲩⲉ̀ⲉⲣϩⲓⲣⲏⲛⲏ ⲛⲉⲙⲁⲕ.
     ⲕ̅ⲇ̅. Ⲧⲟⲧⲉ ⲉⲕⲉ̀ⲉ̀ⲙⲓ ϫⲉ ⲉϥⲉ̀ⲉⲣϩⲓⲣⲏⲛⲏ ⲛ̀ϫⲉ ⲡⲉⲕⲏⲓ ⲑ ⲡ̀ⲥⲟⲃϯ ⲇⲉ ⲛ̀ⲧⲉ ⲧⲉⲕⲥ̀ⲕⲉⲡⲏ ⲛ̀ⲛⲉϥⲉⲣⲃⲟⲛⲓ.
     ⲕ̅ⲉ̅. Ⲉⲕⲉ̀ⲉ̀ⲙⲓ ϫⲉ ϥ̀ⲟϣ ⲛ̀ϫⲉ ⲡⲉⲕϫ̀ⲣⲟϫ ⲑ ⲛⲉⲕϣⲏⲣⲓ ⲉⲩⲉ̀ⲉⲣ ⲙ̀ⲫ̀ⲣⲏϯ ⲛ̀ⲛⲓⲥ̀ⲙⲁϩ ⲧⲏⲣⲟⲩ ⲛ̀ⲧⲉ ⲧ̀ⲕⲟⲓ.
     ⲕ̅Ⲋ. Ⲉⲕⲉ̀ⲓ̀ ⲇⲉ ⲉ̀ⲡⲓⲙ̀ϩⲁⲩ ⲙ̀ⲫ̀ⲣⲏϯ ⲛ̀ⲟⲩⲥⲟⲩⲟ̀ ϧⲉⲛ ⲧⲉϥⲟⲩⲛⲟⲩ ⲉ̀ⲁⲩⲟⲥϧϥ ϧⲉⲛ ⲡⲉϥⲥⲏⲟⲩ ⲑ ⲓⲉ ⲙ̀ⲫ̀ⲣⲏϯ ⲛ̀ⲟⲩϩⲟⲓ ⲛ̀ⲧⲉ ⲟⲩϭⲛⲱⲟⲩ ⲉ̀ⲁⲩⲟⲗⲥ ⲉ̀ϧⲟⲩⲛ ϧⲉⲛ ⲧⲉⲥⲟⲩⲛⲟⲩ.
     ⲕ̅ⲍ̅. Ϩⲏⲡⲡⲉ ⲓⲥ ⲛⲁⲓ ⲁⲛϧⲉⲧϧⲱⲧⲟⲩ ⲙ̀ⲡⲁⲓⲣⲏϯ ⲑ ⲛⲁⲓ ⲇⲉ ⲛⲉ ⲛⲏⲉⲧⲁⲛⲥⲟⲑⲙⲟⲩ ⲑ ⲛ̀ⲑⲟⲕ ⲇⲉ ⲁⲣⲓⲉ̀ⲙⲓ ⲛ̀ϧ̀ⲣⲏⲓ ⲛ̀ϧⲏⲧⲕ ϫⲉ ⲟⲩ ⲡⲉⲧⲁⲕⲁⲓϥ.

ⲕⲉⲫ Ⲋ

    Ϯϩⲟⲩⲓϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ
     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲓⲱⲃ ⲡⲉϫⲁϥ ϫⲉ :
     ⲃ̅. Ⲉϣⲱⲡ ⲇⲉ ⲉϥϣⲓ ⲛ̀ⲧⲉϥϣⲓ ⲙ̀ⲡⲁϫⲱⲛⲧ ⲛ̀ϫⲉ ⲟⲩⲁⲓ ⲟⲩⲟϩ ⲛ̀ⲧⲉϥⲱ̀ⲗⲓ ⲛ̀ⲛⲁⲙ̀ⲕⲁϩⲛ̀ϩⲏⲧ ϧⲉⲛ ⲟⲩⲙⲁϣⲓ ⲉⲩⲥⲟⲡ.
     ⲅ̅. Ⲕⲉⲧⲏ ⲥⲉⲛⲁϣⲱⲡⲓ ⲉⲩϩⲟⲣϣ ⲉϩⲟⲧⲉ ⲡⲓϣⲱ ⲛ̀ⲧⲉ ⲫ̀ⲓⲟⲙ ⲑ ⲁⲗⲗⲁ ⲓⲥϫⲉⲕ ⲁⲣⲉ ⲛⲁⲥⲁϫⲓ ϩⲱⲟⲩ.
     ⲇ̅. Ⲛⲓⲥⲟⲑⲛⲉϥ ⲅⲁⲣ ⲛ̀ⲧⲉ Ⲡϭⲟⲓⲥ ⲥⲉⲭⲏ ϧⲉⲛ ⲡⲁⲥⲱⲙⲁ ⲑ ⲛⲏⲉⲧⲉ ⲛⲟⲩⲙ̀ⲃⲟⲛ ⲥⲱ ⲙ̀ⲡⲁⲥ̀ⲛⲟϥ ⲑ ⲉϣⲱⲡ ⲁⲓϣⲁⲛⲉⲣϩⲏⲧⲥ ⲛ̀ⲥⲁϫⲓ ⲛ̀ⲑⲱⲟⲩ ⲥⲉⲑⲟⲩⲝ ⲙ̀ⲙⲟⲓ.
     ⲉ̅. Ⲟⲩ ⲅⲁⲣ ⲙⲏ ϥ̀ⲛⲁⲱϣ ⲉ̀ⲃⲟⲗ ⲉ̀ⲡ̀ⲁⲩⲏⲣ ⲛ̀ϫⲉ ⲟⲩⲓⲁⲛⲧⲱⲟⲩ ⲉⲃⲏⲗ ⲉϥⲕⲱϯ ⲛ̀ⲥⲁ ϧ̀ⲣⲉ ⲑ ⲓⲉ ⲁⲛ ϥ̀ⲛⲁϯ ⲛ̀ⲧⲉϥⲥ̀ⲙⲏ ⲛ̀ϫⲉ ⲟⲩⲙⲁⲥⲓ ϩⲓϫⲉⲛ ⲧⲉϥⲟⲩⲟⲛϩϥ ⲉⲣⲉ ⲟⲩⲟⲛⲧⲉϥ ϧ̀ⲣⲉ ⲙ̀ⲙⲁⲩ.
     Ⲋ. Ⲙⲏ ⲥⲉⲛⲁⲟⲩⲉⲙ ⲱⲓⲕ ⲛ̀ⲁⲧϩ̀ⲙⲟⲩ ⲑ ⲓⲉ ⲟⲩⲟⲛ ϩ̀ⲗⲏϫⲓ ⲛ̀ⲧⲉ ϩⲁⲛⲥⲁϫⲓ ⲉⲩϣⲟⲩⲓⲧ.
     ⲍ̅. Ⲙ̀ⲙⲟⲛϣ̀ϫⲟⲙ ⲅⲁⲣ ⲛ̀ⲧⲉⲥⲕⲓⲙ ⲛ̀ϫⲉ ⲧⲁⲩⲭⲏ ⲑ ϯⲛⲁⲩ ⲅⲁⲣ ⲉ̀ⲛⲁϧⲏⲓⲃⲓ ⲉⲩⲙ̀ⲣⲟϣⲧ ⲙ̀ⲫ̀ⲣⲏϯ ⲙ̀ⲡ̀ⲥ̀ⲑⲟⲓ ⲛ̀ⲟⲩⲙⲟⲩⲓ̀.
     ⲏ̅. Ⲉⲛⲉ ⲁϥϯ ⲅⲁⲣ ⲛⲏⲓ ⲡⲉ ⲟⲩⲟϩ ⲛ̀ⲧⲉϥⲓ̀ ⲛ̀ϫⲉ ⲫⲏⲉ̀ϯⲉ̀ⲣⲉⲧⲓⲛ ⲙ̀ⲙⲟϥ ⲑ ⲟⲩⲟϩ ⲛ̀ⲧⲉ Ⲡⲟ̅ⲥ̅ ϯ ⲛ̀ⲧⲁϩⲉⲗⲡⲓⲥ.
     ⲑ̅. Ⲙⲁⲣⲉϥⲉⲣϩⲏⲧⲥ ⲛ̀ϫⲉ Ⲡϭⲟⲓⲥ ⲟⲩⲟϩ ⲛ̀ⲧⲉϥϭⲟϩ ⲙ̀ⲙⲟⲓ ⲑ ⲙ̀ⲡⲉⲛⲑ̀ⲣⲉϥϧⲟⲑⲃⲉⲧ ⲇⲉ ϣⲁ ⲉ̀ⲃⲟⲗ.
     ⲓ̅. Ⲉⲥⲉ̀ϣⲱⲡⲓ ⲇⲉ ⲛⲏⲓ ⲉ̀ⲟⲩⲙ̀ϩⲁⲩ ⲛ̀ϫⲉ ⲧⲁⲃⲁⲕⲓ ⲑⲏⲉ̀ⲛⲁⲓϭⲓⲫⲉⲓ ⲉ̀ϫⲉⲛ ⲛⲉⲥⲥⲟⲃϯ ⲑ ⲛ̀ⲛⲁϯⲁ̀ⲥⲟ ⲅⲁⲣ ⲁ̀ⲛⲟⲕ ⲙ̀ⲡⲓϫⲉⲙⲉⲑⲛⲟⲩϫ ⲅⲁⲣ ⲁ̀ⲛⲟⲕ ⲉ̀ⲛⲓⲥⲁϫⲓ ⲛ̀ⲧⲉ Ⲡⲁⲛⲟⲩϯ ⲉⲩⲟⲩⲁⲃ.
     ⲓ̅ⲁ̅. Ⲟⲩ ⲅⲁⲣ ⲧⲉ ⲧⲁϫⲟⲙ ϫⲉ ⲁ̀ⲙⲟⲛⲓ ⲛ̀ⲧⲟⲧ ⲑ ⲓⲉ ⲁϣ ⲡⲉ ⲡⲁⲭ̀ⲣⲟⲛⲟⲥ ϫⲉ ⲉϣⲱⲡ ⲉ̀ⲣⲟⲥ ⲛ̀ϫⲉ ⲧⲁⲩⲭⲏ.
     ⲓ̅ⲃ̅. Ⲙⲏ ⲟⲩϫⲟⲙ ⲛ̀ⲱ̀ⲛⲓ ⲧⲉ ⲧⲁϫⲟⲙ ⲑ ⲓⲉ ⲧⲁⲥⲁⲣⲝ ⲟⲩϩⲟⲙⲧ ⲧⲉ.
     ⲓ̅ⲅ̅. Ϯⲃⲟⲏ̀ⲑⲓⲁ ⲇⲉ ⲁⲥⲟⲩⲉⲓ ⲙ̀ⲙⲟⲓ ⲑ ⲟⲩⲟϩ ⲁϥⲭⲁⲧ ⲛ̀ⲥⲱϥ ⲛ̀ϫⲉ ⲫ̀ⲛⲁⲓ.
     ⲓ̅ⲇ̅. Ⲡⲓϫⲉⲙⲡ̀ϣⲓⲛⲓ ⲇⲉ ⲛ̀ⲧⲉ Ⲡⲟ̅ⲥ̅ ⲁϥϩⲓⲡ̀ϩⲟ ⲙ̀ⲙⲟⲓ.
     ⲓ̅ⲉ̅. Ⲙ̀ⲡⲟⲩϫⲟⲩϣⲧ ⲉ̀ⲣⲟⲓ ⲛ̀ϫⲉ ⲛⲏⲉⲧϧⲉⲛⲧ ⲉ̀ⲣⲟⲓ ⲑ ⲙ̀ⲫ̀ⲣⲏϯ ⲛ̀ⲟⲩⲙⲟⲩⲛⲥⲱⲣⲉⲙ ⲉ̀ⲁϥⲙⲟⲩⲛⲕ ⲓⲉ ⲙ̀ⲫ̀ⲣⲏϯ ⲛ̀ⲟⲩϫⲟⲗ ⲉ̀ⲁⲩⲥⲉⲛⲧ.
     ⲓ̅Ⲋ. Ⲛⲏⲉⲛⲁⲩⲉⲣϩⲟϯ ϧⲁⲧⲁϩⲏ ⲑ ϯⲛⲟⲩ ⲇⲉ ⲁⲩⲧⲱⲟⲩⲛⲟⲩ ⲉ̀ϩ̀ⲣⲏⲓ ⲉ̀ϫⲱⲓ ⲙ̀ⲫ̀ⲣⲏϯ ⲛ̀ⲟⲩⲭⲓⲱⲛ ⲓⲉ ⲟⲩⲭ̀ⲣⲓⲥⲧⲁⲗⲗⲟⲥ ⲉ̀ⲁϥϭⲱⲥ.
     ⲓ̅ⲍ̅. Ⲕⲁⲧⲁ ⲫ̀ⲣⲏϯ ⲉⲧⲉ ⲁϥϣⲁⲛⲃⲱⲗ ⲉ̀ⲃⲟⲗ ⲁⲣⲉϣⲁⲛ ⲟⲩϧ̀ⲙⲟⲙ ϣⲱⲡⲓ ⲑ ⲙ̀ⲡⲁⲩⲥⲟⲩⲱⲛϥ ⲙ̀ⲫ̀ⲣⲏϯ ⲉ̀ⲛⲁϥⲟⲓ ⲙ̀ⲙⲟϥ.
     ⲓ̅ⲏ̅. Ⲡⲁⲓⲣⲏϯ ⲁ̀ⲛⲟⲕ ϩⲱ ⲁⲩⲭⲁⲧ ⲛ̀ⲥⲱⲟⲩ ⲛ̀ϫⲉ ⲟⲩⲟⲛ ⲛⲓⲃⲉⲛ ⲑ ⲁⲓⲧⲁⲕⲟ ⲇⲉ ⲟⲩⲟϩ ⲁⲓⲉⲣ ⲥⲁⲃⲟⲗ ⲙ̀ⲡⲁⲏⲓ.
     ⲓ̅ⲑ̅. Ⲁⲛⲁⲩ ⲉ̀ⲛⲓⲙⲱⲓⲧ ⲛ̀ⲧⲉ Ⲑⲉⲙⲁⲛⲱⲛ ⲛⲉⲙ ⲛⲓⲙⲓⲧⲱⲟⲩⲓ̀ ⲛ̀ⲧⲉ Ⲥⲁⲃⲱⲛ ⲛⲏⲉⲑⲛⲁⲩ.
     ⲕ̅. Ⲟⲩⲟϩ ⲟⲩϣ̀ⲫⲓⲧ ⲉϥⲉ̀ϣⲱⲡⲓ ⲛ̀ⲛⲏⲉⲧⲉϩ̀ⲑⲏⲟⲩ ⲭⲏ ⲉ̀ϩⲁⲛⲃⲁⲕⲓ ⲛⲉⲙ ϩⲁⲛⲭ̀ⲣⲏⲙⲁ.
     ⲕ̅ⲁ̅. Ⲛ̀ⲑⲱⲧⲉⲛ ⲇⲉ ϩⲱⲧⲉⲛ ⲁⲣⲉⲧⲉⲛⲧⲱⲟⲩⲛ ⲉ̀ϩ̀ⲣⲏⲓ ⲉ̀ϫⲱⲓ ϧⲉⲛ ⲟⲩⲙⲉⲧⲁⲧⲛⲁⲓ ϩⲱⲥ ⲇⲉ ⲉⲧⲁⲣⲉⲧⲉⲛⲛⲁⲩ ⲉ̀ⲡⲓⲉⲣϧⲟⲧ ⲁⲣⲓϩⲟϯ.
     ⲕ̅ⲃ̅. Ⲟⲩ ⲅⲁⲣ ⲙⲏⲧⲓ ⲁⲓⲉ̀ⲣⲉⲧⲓⲛ ⲛ̀ⲟⲩϩ̀ⲗⲓ ⲉ̀ⲧⲉⲛ ⲑⲏⲛⲟⲩ ⲑ ⲓⲉ ⲁⲓⲉⲣⲭ̀ⲣⲓⲁ ⲛ̀ⲧⲉⲧⲉⲛϫⲟⲙ.
     ⲕ̅ⲅ̅. Ϩⲱⲥ ⲇⲉ ⲛ̀ⲧⲉⲧⲉⲛⲛⲁϩⲙⲉⲧ ⲛ̀ⲧⲟⲧⲟⲩ ⲛ̀ⲛⲁϫⲁϫⲓ ⲑ ⲓⲉ ϩⲓⲛⲁ ⲛ̀ⲧⲉⲧⲉⲛⲥⲟⲧⲧ ⲉ̀ⲃⲟⲗ ⲛ̀ⲧⲟⲧⲟⲩ ⲛ̀ϩⲁⲛϫⲱⲣⲓ.
     ⲕ̅ⲇ̅. Ⲙⲁⲥ̀ⲃⲱ ⲛⲏⲓ ⲑ ⲁ̀ⲛⲟⲕ ⲇⲉ ϯⲛⲁⲭⲁⲣⲱⲓ ⲑ ⲫⲏⲉⲧⲁⲓⲥⲱⲣⲉⲙ ⲙ̀ⲙⲟϥ ⲙⲁⲧⲁⲙⲟⲓ ⲉ̀ⲣⲟϥ.
     ⲕ̅ⲉ̅. Ⲁⲗⲗⲁ ⲓⲥϫⲉⲕ ⲥⲉϩⲱⲟⲩ ⲛ̀ϫⲉ ⲛⲓⲥⲁϫⲓ ⲛ̀ⲧⲉ ⲡⲓⲑ̀ⲙⲏⲓ ⲑ ϯⲉ̀ⲣⲉⲧⲓⲛ ⲅⲁⲣ ⲁⲛ ⲛ̀ⲟⲩϫⲟⲙ ⲉ̀ⲧⲉⲛ ⲑⲏⲛⲟⲩ.
     ⲕ̅Ⲋ. Ⲟⲩⲇⲉ ⲡⲉⲧⲉⲛⲥⲟϩⲓ ⲛⲁⲑ̀ⲣⲓⲕⲏⲛ ⲁⲛ ϧⲉⲛ ϩⲁⲛⲥⲁϫⲓ ⲑ ⲟⲩ ⲅⲁⲣ ⲟⲩⲥ̀ⲙⲏ ⲛ̀ⲧⲉ ⲛⲉⲧⲉⲛⲥⲁϫⲓ ϯⲛⲁⲉⲣⲁⲛⲉⲭⲉⲥⲑⲉ ⲙ̀ⲙⲟⲥ ⲁⲛ.
     ⲕ̅ⲍ̅. Ⲡⲗⲏⲛ ⲁⲣⲉⲧⲉⲛⲧⲱⲟⲩⲛⲟⲩ ⲉ̀ϩ̀ⲣⲏⲓ ⲉ̀ϫⲉⲛ ⲟⲩⲟⲣⲫⲁⲛⲟⲥ ⲑ ⲧⲉⲧⲉⲛϭⲓⲫⲉⲓ ⲇⲉ ⲉ̀ϩ̀ⲣⲏⲓ ⲉ̀ϫⲉⲛ ⲡⲉⲧⲉⲛϣ̀ⲫⲏⲣ.
     ⲕ̅ⲏ̅. Ϯⲛⲟⲩ ϫⲉ ϯⲛⲁϫⲟⲩϣⲧ ⲉ̀ⲛⲉⲧⲉⲛϩⲟ ⲟⲩⲟϩ ϯⲛⲁϫⲉⲙⲉⲑⲛⲟⲩϫ ⲁⲛ.
     ⲕ̅ⲑ̅. Ϩⲉⲙⲥⲓ ⲟⲩⲛ ⲟⲩⲟϩ ⲙ̀ⲡⲉⲛⲑ̀ⲣⲉ ϭⲓⲛ̀ϫⲟⲛⲥ ϣⲱⲡⲓ ⲑ ⲟⲩⲟϩ ⲡⲁⲗⲓⲛ ⲙⲁⲙⲁϯ ⲛⲉⲙ ⲡⲓⲑ̀ⲙⲏⲓ.
     ⲗ̅. Ⲙ̀ⲙⲟⲛ ⲙⲉⲧⲟ̀ϫⲓ ⲅⲁⲣ ⲭⲏ ϧⲉⲛ ⲡⲁⲗⲁⲥ ϣⲁⲛ ⲟⲩⲕⲁϯ ⲁⲛ ⲡⲉⲧⲉⲥⲉⲣⲙⲉⲗⲉⲧⲁⲛ ⲉ̀ⲣⲟϥ ⲛ̀ϫⲉ ⲧⲁϣ̀ⲃⲱⲃⲓ.

ⲕⲉⲫ ⲍ̅

     ⲁ̅. Ⲙⲏ ⲟⲩϭⲱⲛⲧ ⲁⲛ ⲡⲉ ⲡ̀ⲱⲛϧ ⲛ̀ⲟⲩⲣⲱⲙⲓ ϩⲓϫⲉⲛ ⲡ̀ⲕⲁϩⲓⲑ ⲟⲩⲟϩ ⲡⲉϥⲱⲛϧ ⲙ̀ⲫ̀ⲣⲏϯ ⲛ̀ⲟⲩⲣⲉⲙⲃⲉⲭⲉ ⲙ̀ⲙⲏⲛⲓ.
     ⲃ̅. Ⲓⲉ ⲙ̀ⲫ̀ⲣⲏϯ ⲛ̀ⲟⲩⲃⲱⲕ ⲉϥⲉⲣϩⲟϯ ϧⲁⲧ̀ϩⲏ ⲙ̀ⲡⲉϥϭⲟⲓⲥ ⲉ̀ⲁϥϫⲓⲙⲓ ⲛ̀ⲟⲩϧⲏⲓⲃⲓ ⲑ ⲓⲉ ⲙ̀ⲫ̀ⲣⲏϯ ⲛ̀ⲟⲩⲣⲉⲙⲃⲉⲭⲉ ⲉϥϫⲟⲩϣⲧ ⲉ̀ⲃⲟⲗ ϧⲁⲧ̀ϩⲏ ⲙ̀ⲡⲉϥⲃⲉⲭⲉ.
     ⲅ̅. Ⲡⲁⲓⲣⲏϯ ⲁ̀ⲛⲟⲕ ϩⲱ ⲁⲓⲁ̀ⲙⲟⲛⲓ ⲛ̀ⲧⲟⲧ ⲉ̀ϩⲁⲛⲉ̀ⲃⲏⲧ ⲉⲩϣⲟⲩⲓⲧ ⲑ ϩⲁⲛⲉ̀ϫⲱⲣϩ ⲛ̀ⲉⲙⲕⲁϩⲛ̀ϩⲏⲧ ⲡⲉⲧⲧⲟⲓ ⲛⲏⲓ.
     ⲇ̅. Ⲁⲓϣⲁⲛⲉⲛⲕⲟⲧ ϯϫⲱ ⲙ̀ⲙⲟⲥ ϫⲉ ⲁⲣⲉ ϣⲱⲣⲡ ⲛⲁϣⲱⲡⲓ ⲛ̀ⲑ̀ⲛⲁⲩ ⲑ ⲡⲁⲗⲓⲛ ⲟⲛ ⲁⲓϣⲁⲛⲧⲱⲛⲧ ϯϫⲱ ⲙ̀ⲙⲟⲥ ϫⲉ ⲉⲣⲉ ⲫ̀ⲣⲏ ⲛⲁϩⲱⲧⲡ ⲛ̀ⲑ̀ⲛⲁⲩ ⲑ ϯⲙⲉϩ ⲇⲉ ⲛ̀ⲉⲙⲕⲁϩⲛ̀ϩⲏⲧ ⲓⲥϫⲉⲛ ⲣⲟⲩϩⲓ ϣⲁ ϣⲱⲣⲡ.
     ⲉ̅. Ⲁϥⲃⲓϯ ⲉ̀ⲃⲟⲗ ⲛ̀ϫⲉ ⲡⲁⲕⲁⲥ ϩⲓⲧⲉⲛ ϩⲁⲛϥⲉⲛⲧ ⲉⲩϩⲱⲟⲩ ⲑ ⲟⲩⲟϩ ⲛⲁⲙⲟⲩⲃⲱⲛ ⲥⲉⲑ̀ⲣⲟ ⲙ̀ⲡⲓⲕⲁϩⲓ ⲗⲱⲕ ⲉⲓϧⲱϧ ⲉ̀ⲛⲁⲉⲣϧⲱⲧ.
     Ⲋ. Ⲡⲁϫⲓⲛⲱⲛϧ ⲇⲉ ϥ̀ⲁⲥⲓⲱⲟⲩ ⲉϩⲟⲧⲉ ⲟⲩϫⲓⲛⲥⲁϫⲓ ⲑ ⲁϥⲧⲁⲕⲟ ⲇⲉ ϧⲉⲛ ⲟⲩϩⲉⲗⲡⲓⲥ ⲉⲥϣⲟⲩⲓⲧ.
     ⲍ̅. Ⲁⲣⲓⲫ̀ⲙⲉⲩⲓ̀ ⲟⲩⲛ ϫⲉ ⲟⲩⲡ̅ⲛⲉⲩⲙⲁ ⲡⲉ ⲡⲁⲱⲛϧ ⲑ ⲟⲩⲟϩ ϥ̀ⲛⲁⲧⲁⲥⲑⲟ ⲁⲛ ϫⲉ ⲉ̀ⲛⲁⲩ ⲉ̀ϩⲁⲛⲁⲅⲁⲑⲟⲛ ⲛ̀ϫⲉ ⲡⲁⲃⲁⲗ.
     ⲏ̅. Ⲛ̀ⲛⲉϥⲥⲟⲙⲥ ⲛ̀ϫⲉ ⲫ̀ⲃⲁⲗ ⲙ̀ⲫⲏⲉⲑⲛⲁⲩ ⲉ̀ⲣⲟⲓ ⲛⲉⲕⲃⲁⲗ ⲛ̀ϧⲏⲧⲟⲩ ⲑ ⲟⲩⲟϩ ϯϣⲟⲡ ⲁⲛ ϫⲉ.
     ⲑ̅. Ⲙ̀ⲫ̀ⲣⲏϯ ⲛ̀ⲟⲩϭⲏⲡⲓ ⲉ̀ⲁⲥⲧⲟⲩⲃⲟ ⲉ̀ⲃⲟⲗϧⲉⲛ ⲧ̀ⲫⲉ ⲑ ⲁⲣⲉϣⲁⲛ ⲣⲱⲙⲓ ϣⲉⲛⲁϥ ⲉ̀ϧ̀ⲣⲏⲓ ⲉ̀ⲁⲙⲉⲛϯ ⲙ̀ⲡⲁϥⲓ̀ ⲉ̀ⲡ̀ϣⲱⲓ ϫⲉ.
     ⲓ̅. Ⲟⲩⲇⲉ ⲛ̀ⲛⲉϥϫⲉ ⲉ̀ⲡⲉϥⲏⲓ ⲙ̀ⲙⲓⲛ ⲙ̀ⲙⲟϥ ⲟⲩⲇⲉ ⲛ̀ⲛⲉϥⲥⲟⲩⲱⲛϥ ⲛ̀ϫⲉ ⲡⲉϥⲙⲁ.
     ⲓ̅ⲁ̅. Ⲉⲑⲃⲉ ⲫⲁⲓ ⲟⲩⲛ ⲟⲩⲇⲉ ⲁ̀ⲛⲟⲕ ⲛ̀ⲛⲁϯⲁ̀ⲥⲟ ϧⲉⲛ ⲣⲱⲓ ⲉⲓⲥⲁϫⲓ ⲑ ⲉⲓⲭⲏ ϧⲉⲛ ϩⲁⲛⲁⲛⲁⲅⲕⲏ ⲛ̀ⲧⲉ ⲡⲁⲡⲛⲉⲩⲙⲁ ⲑ ⲉⲓⲉ̀ⲁ̀ⲟⲩⲱⲛ ⲙ̀ⲡ̀ϣⲁϣⲓ ⲛ̀ⲧⲉ ⲧⲁⲩⲭⲏ ⲉⲓⲧⲁⲧϩⲏⲟⲩⲧ.
     ⲓ̅ⲃ̅. Ⲙⲏ ⲁ̀ⲛⲟⲕ ⲟⲩⲓⲟⲙ ⲁ̀ⲛⲟⲕ ⲓⲉ ⲁ̀ⲛⲟⲕ ⲟⲩⲇ̀ⲣⲁⲕⲱⲛ ⲑ ϫⲉ ⲕ̀ⲑⲱϣ ⲛ̀ⲟⲩϫⲓⲛⲁ̀ⲣⲉϩ ⲉ̀ϩ̀ⲣⲏⲓ ⲉ̀ϫⲱⲓ.
     ⲓ̅ⲅ̅. Ⲁⲓϫⲟⲥ ϫⲉ ϥ̀ⲛⲁϯⲛⲟⲙϯ ⲛⲏⲓ ⲛ̀ϫⲉ ⲡⲁϭⲗⲟϫ ⲑ ϯⲛⲁϫⲉ ⲟⲩⲥⲁϫⲓ ⲇⲉ ϧⲁⲣⲓϧⲁⲣⲟⲓ ϩⲓϫⲉⲛ ⲡⲁⲙⲁⲛⲉⲛⲕⲟⲧ.
     ⲓ̅ⲇ̅. Ⲕ̀ϯϩⲟϯ ⲛⲏⲓ ϧⲉⲛ ϩⲁⲛⲣⲁⲥⲟⲩⲓ̀ ⲑ ⲟⲩⲟϩ ⲕ̀ϣ̀ⲑⲟⲣⲧⲉⲣ ⲙ̀ⲙⲟⲓ ϧⲉⲛ ϩⲁⲛϩⲟⲣⲁⲙⲁ.
     ⲓ̅ⲉ̅. Ⲉⲕⲉ̀ⲱ̀ⲗⲓ ⲛ̀ⲧⲁⲩⲭⲏ ⲉ̀ⲃⲟⲗ ϧⲉⲛ ⲡⲁⲡⲛⲉⲩⲙⲁ ⲑ ⲛⲁⲕⲁⲥ ⲇⲉ ⲉ̀ⲃⲟⲗϩⲁ ⲫ̀ⲙⲟⲩ.
     ⲓ̅Ⲋ. Ⲁⲓⲛⲁⲱⲛϧ ⲅⲁⲣ ⲁⲛ ϣⲁ ⲉ̀ⲛⲉϩ ϩⲓⲛⲁ ⲛ̀ⲧⲁⲱⲟⲩⲛ̀ϩⲏⲧ ⲑ ϩⲉⲛⲕ ⲟⲩⲛ ⲉ̀ⲃⲟⲗ ⲙ̀ⲙⲟⲓ ⲑ ϥ̀ϣⲟⲩⲓⲧ ⲅⲁⲣ ⲛ̀ϫⲉ ⲡⲁⲱⲛϧ.
     ⲓ̅ⲍ̅. Ⲟⲩ ⲅⲁⲣ ⲡⲉ ⲫ̀ⲣⲱⲙⲓ ϫⲉ ⲁⲕⲁⲓϥ ⲛ̀ⲛⲓϣϯ ⲑ ⲓⲉ ϫⲉ ⲕ̀ϯ ⲛ̀ϩ̀ⲑⲏⲕ ⲉ̀ⲣⲟϥ.
     ⲓ̅ⲏ̅. Ⲟⲩⲟϩ ⲕ̀ϭⲓⲙ̀ⲡⲉϥϣⲓⲛⲓ ϣⲁ ϩⲁⲛⲁⲧⲟⲟⲩⲓ̀ ⲑ ⲟⲩⲟϩ ⲕ̀ⲑⲱϣ ⲙ̀ⲙⲟϥ ⲉ̀ⲟⲩⲙ̀ⲧⲟⲛ.
     ⲓ̅ⲑ̅. Ϣⲁ ⲑ̀ⲛⲁⲩ ϫⲉ ⲕ̀ⲭⲱ ⲙ̀ⲙⲟⲓ ⲉ̀ⲃⲟⲗ ⲁⲛ ⲑ ⲟⲩⲇⲉ ⲕ̀ϣⲱⲡ ⲙ̀ⲙⲟⲓ ⲁⲛ ϣⲁϯⲱⲙⲕ ⲙ̀ⲡⲁⲑⲁϥ ϧⲉⲛ ⲟⲩⲙ̀ⲕⲁϩⲛ̀ϩⲏⲧ.
     ⲕ̅. Ⲓⲥϫⲉ ⲁ̀ⲛⲟⲕ ⲁⲓⲉⲣⲛⲟⲃⲓ ⲟⲩ ⲡⲉϯⲛⲁϣ̀ⲁⲓϥ ⲛⲁⲕ ⲫⲏⲉⲧⲥⲱⲟⲩⲛ ⲙ̀ⲡ̀ϩⲏⲧ ⲛ̀ⲛⲓⲣⲱⲙⲓ ⲑ ⲉⲑⲃⲉ ⲟⲩ ⲁⲕⲭⲁⲧ ⲉⲓⲥⲉⲙⲓ ⲟⲩⲃⲏⲕ ⲑ ϯⲟⲓ ⲇⲉ ⲛ̀ⲟⲩⲧ̀ⲫⲱ ⲉ̀ϩ̀ⲣⲏⲓ ⲉ̀ϫⲱⲕ.
     ⲕ̅ⲁ̅. Ⲟⲩⲟϩ ⲉⲑⲃⲉ ⲟⲩ ⲙ̀ⲡⲉⲕⲉⲣⲡⲱⲃϣ ⲛ̀ⲧⲁⲁ̀ⲛⲟⲙⲓⲁ ⲟⲩⲟϩ ⲛ̀ⲧⲉⲕⲧⲟⲩⲃⲟ ⲙ̀ⲡⲁⲛⲟⲃⲓ ⲑ ϯⲛⲟⲩ ⲇⲉ ϯⲛⲁϣⲉⲛⲏⲓ ⲉ̀ⲡ̀ⲕⲁϩⲓ ⲑ ⲟⲩⲟϩ ⲛ̀ⲧⲁϣ̀ⲧⲉⲙϣⲱⲡⲓ ϫⲉ ⲉⲓϣⲱⲣⲡ ⲙ̀ⲙⲟⲓ.

ⲕⲉⲫ ⲏ̅

    Ϯϩⲟⲩⲓϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲃⲁⲗⲇⲁⲇ
     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲃⲁⲗⲇⲁⲇ ⲡⲓⲤⲁⲩⲭⲓⲧⲏⲥ ⲡⲉϫⲁϥ ϫⲉ:
     ⲃ̅. Ϣⲁ ⲑ̀ⲛⲁⲩ ϫⲉ ⲕ̀ⲥⲁϫⲓ ϧⲉⲛ ⲛⲁⲓⲥⲁϫⲓ ⲑ ⲟⲩⲡ̅ⲛ̅ⲁ̅ ⲛ̀ⲣⲉϥϫⲉⲙⲏϣ ⲛ̀ⲥⲁϫⲓ ⲉⲧϧⲉⲛ ⲣⲱⲕ.
     ⲅ̅. Ⲙⲏ Ⲡϭⲟⲓⲥ ⲛⲁϭⲓⲛ̀ϫⲟⲛⲥ ⲉϥϯϩⲁⲡ ⲑ ⲓⲉ ⲫⲏⲉⲧⲁϥⲑⲁⲙⲓⲟ ⲛ̀ϩⲱⲃ ⲛⲓⲃⲉⲛ ϥ̀ⲛⲁϣ̀ⲑⲟⲣⲧⲉⲣ ⲛ̀ϯⲙⲉⲑⲙⲏⲓ.
     ⲇ̅. Ⲓⲥϫⲉ ⲛⲉⲕϣⲏⲣⲓ ⲁⲩⲉⲣⲛⲟⲃⲓ ⲙ̀ⲡⲉϥⲙ̀ⲑⲟ ⲑ ⲁⲩⲟⲩⲱⲣⲡ ⲛ̀ⲟⲩⲁ̀ⲛⲟⲙⲓⲁ ϧⲉⲛ ⲧⲉⲕϫⲓϫ.
     ⲉ̅. Ⲛ̀ⲑⲟⲕ ⲇⲉ ϣⲟⲣⲡⲕ ϩⲁ Ⲡⲟ̅ⲥ̅ Ⲡⲓⲡⲁⲛⲧⲟⲕⲣⲁⲧⲱⲣ ⲉⲕⲧⲱⲃϩ ⲙ̀ⲙⲟϥ.
     Ⲋ. Ⲓⲥϫⲉ ⲭ̀ⲟⲩⲁⲃ ⲟⲩⲟϩ ⲕ̀ⲟⲓ ⲛ̀ⲑ̀ⲙⲏⲓ ⲉϥⲉ̀ⲥⲱⲧⲉⲙ ⲉ̀ⲡⲉⲕⲧⲱⲃϩ ⲑ ⲉϥⲉ̀ϯ ⲇⲉ ⲛⲁⲕ ⲛ̀ⲟⲩⲙⲁⲛϣⲱⲡⲓ ⲛ̀ⲧⲉ ⲟⲩⲙⲉⲑⲙⲏⲓ.
     ⲍ̅. Ⲉⲩⲉ̀ϣⲱⲡⲓ ⲟⲩⲛ ⲛ̀ϫⲉ ⲛⲉⲕϩⲟⲩⲁϯ ⲉⲩⲥ̀ⲃⲟⲕ ⲑ ⲛⲉⲕϧⲁⲉⲩ ⲇⲉ ⲉⲩⲉ̀ⲉⲣ ϩⲁⲛⲁⲧⲏ̀ⲡⲓ.
     ⲏ̅. Ϣⲓⲛⲓ ⲅⲁⲣ ⲛ̀ⲧⲟⲧⲥ ⲛ̀ⲟⲩⲅⲉⲛⲉⲁ̀ ⲛ̀ⲧⲉ ϣⲟⲣⲡ ⲑ ϧⲟⲧϧⲉⲧ ⲇⲉ ⲕⲁⲧⲁ ⲛⲓⲅⲉⲛⲟⲥ ⲛ̀ⲧⲉ ⲛⲉⲛⲓⲟϯ.
     ⲑ̅. Ⲁⲛⲟⲛ ⲛⲁ ⲥⲁϥ ⲅⲁⲣ ⲟⲩⲟϩ ⲧⲉⲛⲉ̀ⲙⲓ ⲁⲛ ⲑ ⲟⲩϧⲏⲓⲃⲓ ⲅⲁⲣ ⲡⲉ ⲡⲉⲛϫⲓⲛⲱⲛϧ ϩⲓϫⲉⲛ ⲡ̀ⲕⲁϩⲓ.
     ⲓ̅. Ⲙⲏ ⲛⲁⲓ ⲁⲛ ⲉⲧⲛⲁϯⲥ̀ⲃⲱ ⲛⲁⲕ ⲟⲩⲟϩ ⲛ̀ⲧⲟⲩⲧⲁⲙⲟⲕ ⲑ ⲟⲩⲟϩ ⲛ̀ⲧⲟⲩⲉⲛ ϩⲁⲛⲥⲁϫⲓ ⲉ̀ⲃⲟⲗϧⲉⲛ ⲡⲉⲕϩⲏⲧ.
     ⲓ̅ⲁ̅. Ⲙⲏ ϥ̀ⲛⲁⲫⲓⲣⲓ ⲉ̀ⲃⲟⲗ ⲛ̀ϫⲉ ⲟⲩϭⲟⲛϥ ⲛ̀ⲟⲩⲉϣⲉⲛ ⲙⲱⲟⲩ ⲑ ⲓⲉ ϥ̀ⲛⲁϭⲓⲥⲓ ⲛ̀ϫⲉ ⲟⲩⲃⲉϫⲏⲛ ⲛ̀ⲟⲩⲉϣⲉⲛ ⲥⲱ.
     ⲓ̅ⲃ̅. Ⲉⲧⲓ ⲉϥⲭⲏ ϩⲓϫⲉⲛ ⲧⲉϥⲛⲟⲩⲛⲓ ⲟⲩⲟϩ ⲛ̀ⲛⲟⲩⲟⲥϧϥ ⲙ̀ⲡⲁⲧⲉϥⲥⲱ ⲛ̀ϫⲉ ⲥⲓⲙ ⲛⲓⲃⲉⲛ ϣⲁϥϣⲱⲟⲩⲓ̀.
     ⲓ̅ⲅ̅. Ⲁⲥⲛⲁϣⲱⲡⲓ ⲟⲩⲛ ⲙ̀ⲡⲁⲓⲣⲏϯ ⲛ̀ϫⲉ ⲧ̀ϧⲁⲉ̀ ⲛ̀ⲟⲩⲟⲛ ⲛⲓⲃⲉⲛ ⲉⲑⲛⲁⲉⲣⲡⲱⲃϣ ⲙ̀Ⲡⲟ̅ⲥ̅ ⲑ ⲧ̀ϩⲉⲗⲡⲓⲥ ⲅⲁⲣ ⲙ̀ⲡⲓⲁ̀ⲥⲉⲃⲏⲥ ⲉⲥⲉ̀ⲧⲁⲕⲟ.
     ⲓ̅ⲇ̅. Ⲡⲉϥⲏⲓ ⲅⲁⲣ ⲛ̀ⲛⲉϥϣⲱⲡⲓ ⲛ̀ϧⲏⲧϥ ⲛ̀ϫⲉ ϩ̀ⲗⲓ ⲑ ⲧⲉϥⲥ̀ⲕⲏⲛⲏ ⲅⲁⲣ ⲉⲥⲉ̀ⲉⲣ ⲙ̀ⲫ̀ⲣⲏϯ ⲛ̀ⲟⲩⲥ̀ⲧⲁϫⲟⲩⲗ.
     ⲓ̅ⲉ̅. Ⲉϣⲱⲡ ⲁϥϣⲁⲛⲧⲁϫⲣⲟ ⲙ̀ⲡⲉϥⲏⲓ ⲛ̀ⲛⲉϥⲥⲉⲙⲛⲓ ⲑ ⲁϥϣⲁⲛⲉⲣϩⲏⲧⲥ ⲇⲉ ⲛ̀ⲛⲉϥⲁ̀ⲙⲟⲛⲓ ⲛ̀ⲧⲟⲧϥ.
     ⲓ̅Ⲋ. Ϥ̀ⲫⲟⲥⲓ ⲅⲁⲣ ⲁⲛ ⲉ̀ⲃⲟⲗϩⲓⲧⲉⲛ ⲫ̀ⲣⲏ ⲑ ⲟⲩⲟϩ ⲉ̀ⲃⲟⲗϩⲓⲧⲉⲛ ⲡⲉϥⲧ̀ϩⲟ ⲉϥⲉ̀ⲓ̀ ⲉ̀ⲃⲟⲗ ⲛ̀ϫⲉ ⲡⲉϥϫⲁⲗ.
     ⲓ̅ⲍ̅. Ⲉϥⲉ̀ⲉⲛⲕⲟⲧ ϩⲓϫⲉⲛ ϩⲁⲛⲑⲱⲟⲩⲧⲥ ⲛ̀ⲱ̀ⲛⲓ ⲑ ⲉϥⲉ̀ⲱⲛϧ ⲇⲉ ϧⲉⲛ ⲑ̀ⲙⲏϯ ⲛ̀ϩⲁⲛⲭⲁⲗⲓⲝ.
     ⲓ̅ⲏ̅. Ⲉϣⲱⲡ ⲁϥϣⲁⲛⲱⲙⲕ ⲛ̀ϫⲉ ⲡⲓⲙⲁ ⲉϥⲉ̀ϫⲉⲙⲉⲑⲛⲟⲩϫ ⲉ̀ⲣⲟϥ ⲑ ⲙ̀ⲡⲉⲕⲛⲁⲩ ⲉ̀ⲟⲩⲟⲛ ⲙ̀ⲡⲁⲓⲣⲏϯ ϫⲉ.
     ⲓ̅ⲑ̅. Ⲫ̀ⲟⲩⲱϫⲡ ⲙ̀ⲡⲓⲁ̀ⲥⲉⲃⲏⲥ ⲉϥⲉ̀ϣⲱⲡⲓ ⲙ̀ⲡⲁⲓⲣⲏϯ ⲑ ⲉϥⲉ̀ⲫⲓⲣⲓ ⲇⲉ ⲛ̀ϫⲉ ⲕⲉⲟⲩⲁⲓ ⲉ̀ⲃⲟⲗϧⲉⲛ ⲡ̀ⲕⲁϩⲓ.
     ⲕ̅. Ⲡⲟ̅ⲥ̅ ⲇⲉ ⲛ̀ⲛⲉϥⲭⲱ ⲛ̀ⲥⲱϥ ⲙ̀ⲡⲓⲁⲧⲕⲁⲕⲟⲥ ⲑ ⲇⲱⲣⲟⲛ ⲇⲉ ⲛⲓⲃⲉⲛ ⲛ̀ⲧⲉ ⲛⲓⲁ̀ⲥⲉⲃⲏⲥ ⲛ̀ⲛⲉϥϣⲟⲡⲟⲩ.
     ⲕ̅ⲁ̅. Ⲛⲓⲑ̀ⲙⲏⲓ ⲇⲉ ⲉϥⲉ̀ⲙⲁϩ ⲣⲱⲟⲩ ⲛ̀ⲣⲁϣⲓ ⲑ ⲟⲩⲟϩ ⲛⲟⲩⲥ̀ⲫⲟⲧⲟⲩ ⲉϥⲉ̀ⲙⲁϩⲟⲩ ⲛ̀ⲟⲩⲱⲛϩ ⲉ̀ⲃⲟⲗ.
     ⲕ̅ⲃ̅. Ⲛⲟⲩϫⲁϫⲓ ⲇⲉ ⲉⲩⲉ̀ϯϩⲓⲱⲧⲟⲩ ⲛ̀ⲟⲩϣⲓⲡⲓ ⲑ ⲫ̀ⲙⲁⲛ̀ϣⲱⲡⲓ ⲛ̀ⲛⲓⲁ̀ⲥⲉⲃⲏⲥ ⲛ̀ⲛⲉϥϣⲱⲡⲓ.

ⲕⲉⲫ ⲑ̅

    Ϯⲙⲁϩⲃ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ
     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲓⲱⲃ ⲡⲉϫⲁϥ ϫⲉ :
     ⲃ̅. Ⲧⲁⲫ̀ⲙⲏⲓ ϯⲉ̀ⲙⲓ ϫⲉ ⲟⲩⲡⲁⲓⲣⲏϯ ⲡⲉ ⲉⲧϣⲟⲡ ⲑ ⲡⲱⲥ ⲅⲁⲣ ⲟⲩⲟⲛ ⲣⲱⲙⲓ ⲛⲁⲉⲣⲑ̀ⲙⲏⲓ ⲙ̀ⲡⲉⲙ̀ⲑⲟ ⲙ̀Ⲡϭⲟⲓⲥ.
     ⲅ̅. Ⲁϥϣⲁⲛⲟⲩⲱϣ ⲅⲁⲣ ⲉ̀ϭⲓϩⲁⲡ ⲟⲩⲃⲏϥ ⲛ̀ⲛⲉϥⲉⲣⲟⲩⲱ̀ ⲛⲁϥⲑ ϩⲓⲛⲁ ⲛ̀ⲧⲉϥϣ̀ⲧⲉⲙⲉⲣⲁⲛⲧⲓⲗⲉⲅⲓⲛ ⲉⲑⲃⲉ ⲟⲩⲥⲁϫⲓ ⲛ̀ⲟⲩⲱⲧ ⲛ̀ⲧⲁϥ ⲉ̀ⲃⲟⲗϧⲉⲛ ϩⲁⲛⲁⲛϣⲟ.
     ⲇ̅. Ⲟⲩⲥⲁⲃⲉ ⲅⲁⲣ ϧⲉⲛ ⲡⲉϥⲕⲁϯ ⲡⲉ ⲑ ϥ̀ⲁ̀ⲙⲁϩⲓ ⲟⲩⲟϩ ⲟⲩⲛⲓϣϯ ⲡⲉ ⲑ ⲛⲓⲙ ⲡⲉ ⲉⲧⲁϥϣⲱⲡⲓ ⲉϥⲟⲓ ⲛ̀ⲥⲩⲛⲕ̀ⲗⲏⲣⲟⲥ ⲙ̀ⲡⲉϥⲙ̀ⲑⲟ ⲟⲩⲟϩ ⲁϥⲁ̀ⲙⲟⲛⲓ ⲛ̀ⲧⲟⲧϥ.
     ⲉ̅. Ⲫⲏⲉⲧⲑ̀ⲣⲟ ⲛ̀ⲛⲓⲧⲱⲟⲩ ⲉ̀ⲉⲣⲁⲡⲁⲥ ⲟⲩⲟϩ ⲥⲉⲉ̀ⲙⲓ ⲁⲛ ⲑ ⲫⲏⲉⲧⲟⲩⲱϫⲡ ⲙ̀ⲙⲱⲟⲩ ϧⲉⲛ ⲟⲩϫⲱⲛⲧ.
     Ⲋ. Ⲫⲏⲉⲑⲙⲟⲛⲙⲉⲛ ⲥⲁⲡⲉⲥⲏⲧ ⲛ̀ⲧ̀ⲫⲉ ⲛⲉⲙ ⲛⲟⲩⲥⲉⲛϯ.
     ⲍ̅. Ⲫⲏⲉⲧϫⲱ ⲙ̀ⲙⲟⲥ ⲙ̀ⲫ̀ⲣⲏ ⲟⲩⲟϩ ⲙ̀ⲡⲁϥϣⲁⲓ ⲑ ϥ̀ⲉⲣⲥ̀ⲫⲣⲁⲅⲓⲍⲓⲛ ⲛ̀ⲧ̀ⲫⲉ ϧⲉⲛ ϩⲁⲛⲥⲓⲟⲩ.
     ⲏ̅. Ⲫⲏⲉⲧϭⲱⲗⲕ ⲛ̀ⲧ̀ⲫⲉ ⲙ̀ⲙⲁⲩⲁⲧϥ ⲑ ⲟⲩⲟϩ ϥ̀ⲙⲟϣⲓ ϩⲓϫⲉⲛ ⲫ̀ⲓⲟⲙ ϩⲱⲥ ϩⲓϫⲉⲛ ⲡⲓⲕⲁϩⲓ.
     ⲑ̅. Ⲫⲏⲉⲧⲑⲁⲙⲓⲟ ⲛ̀ϭⲓⲙⲟⲩⲧ ⲛⲉⲙ ⲡⲓⲥⲓⲟⲩ ⲛ̀ⲧⲉ ⲁ̀ⲣⲟⲩϩⲓ ⲛⲉⲙ ⲡⲓⲥⲓⲟⲩ ⲛ̀ⲧⲉ ϣⲱⲣⲡ ⲛⲉⲙ ⲡ̀ϣⲱⲃϣ ⲛⲉⲙ ⲛⲓⲧⲁⲙⲓⲟⲛ ⲛ̀ⲧⲉ ⲫ̀ⲣⲏⲥ.
     ⲓ̅. Ⲫⲏⲉⲧⲓ̀ⲣⲓ ⲛ̀ϩⲁⲛⲛⲓϣϯ ⲛⲉⲙ ϩⲁⲛⲁⲧϧⲉⲧϧⲱⲧⲟⲩ ⲛⲉⲙ ⲛⲓϩ̀ⲃⲏⲟⲩⲓ̀ ⲉⲧϧⲉⲛ ⲡ̀ⲱ̀ⲟⲩ ⲑ ⲛⲉⲙ ⲛⲓϣ̀ⲫⲏⲣⲓ ⲉⲧⲉ ⲙ̀ⲙⲟⲛ ⲏ̀ⲡⲓ ⲧⲟⲓ ⲉ̀ⲣⲱⲟⲩ.
     ⲓ̅ⲁ̅. Ⲉϣⲱⲡ ⲁϥϣⲁⲛⲟⲩⲟⲑⲃⲉⲧ ⲛ̀ⲛⲁⲛⲁⲩ ⲉ̀ⲣⲟϥ ⲑ ⲁϥϣⲁⲛⲥⲉⲛⲧ ⲛ̀ⲛⲁⲉ̀ⲙⲓ ⲟⲛ.
     ⲓ̅ⲃ̅. Ⲡⲁⲓⲣⲏϯ ⲟⲛ ⲉϣⲱⲡ ⲁϥϣⲁⲛϣⲁⲣⲓ ⲛⲓⲙ ⲡⲉⲑⲛⲁⲧⲁⲥⲑⲟ ⲑ ⲓⲉ ⲛⲓⲙ ⲡⲉⲑⲛⲁϣ̀ϫⲟⲥ ⲛⲁϥ ϫⲉ ⲟⲩ ⲡⲉⲧⲁⲕⲁⲓϥ.
     ⲓ̅ⲅ̅. Ⲛ̀ⲑⲟϥ ⲇⲉ ⲁϥⲫⲱⲛϩ ⲙ̀ⲡⲉϥϩⲟ ⲉ̀ⲃⲟⲗϩⲁ ⲟⲩϫⲱⲛⲧ ⲉⲧⲁⲩⲕⲱⲗϫ ⲇⲉ ⲉ̀ⲃⲟⲗ ⲙ̀ⲙⲟϥ ⲛ̀ϫⲉ ⲛⲓⲕⲏⲧⲟⲥ ⲉⲧⲥⲁⲡⲉⲥⲏⲧ ⲛ̀ⲧ̀ⲫⲉ.
     ⲓ̅ⲇ̅. Ⲉϣⲱⲡ ⲇⲉ ⲛ̀ⲧⲉϥⲥⲱⲧⲉⲙ ⲉ̀ⲣⲟⲓ ⲓⲉ ⲛ̀ⲧⲉϥⲉⲣⲇⲓⲁⲕⲣⲓⲛⲓⲛ ⲛ̀ⲛⲁⲥⲁϫⲓ.
     ⲓ̅ⲉ̅. Ⲉϣⲱⲡ ⲇⲉ ⲁ̀ⲛⲟⲕ ⲟⲩⲑ̀ⲙⲏⲓ ⲙ̀ⲡⲉϥⲥⲱⲧⲉⲙ ⲉ̀ⲣⲟⲓ ⲑ ⲡⲉϥϩⲏⲧ ⲉⲓⲧⲱⲃϩ ⲙ̀ⲙⲟϥ.
     ⲓ̅Ⲋ. Ⲉϣⲱⲡ ⲅⲁⲣ ⲛ̀ⲧⲁⲙⲟⲩϯ ⲟⲩⲟϩ ⲛ̀ⲧⲉϥⲥⲱⲧⲉⲙ ⲉ̀ⲣⲟⲓ ⲛ̀ϯⲛⲁⲧⲉⲛϩⲟⲩⲧⲥ ⲁⲛ ϫⲉ ⲁϥⲥⲱⲧⲉⲙ ⲉ̀ⲣⲟⲓ.
     ⲓ̅ⲍ̅. Ⲙⲏⲡⲱⲥ ⲛ̀ⲧⲉϥϥⲟⲧⲧ ⲉ̀ⲃⲟⲗϧⲉⲛ ⲟⲩⲅ̀ⲛⲟⲫⲟⲥ ⲁϥⲑ̀ⲣⲟⲩⲁ̀ϣⲁⲓ ⲛ̀ϫⲉ ⲛⲁϧⲟⲙϧⲉⲙ ϧⲉⲛ ⲟⲩⲡⲉⲧϣⲟⲩⲓⲧ.
     ⲓ̅ⲏ̅. Ϥ̀ⲭⲱ ⲙ̀ⲙⲟⲓ ⲁⲛ ⲉ̀ⲛⲓϥⲓ ⲑ ⲁϥⲙⲁϩⲧ ⲅⲁⲣ ⲛ̀ϣⲁϣⲓ.
     ⲓ̅ⲑ̅. Ⲟⲧⲓ ⲙⲉⲛ ⲅⲁⲣ ⲁϥⲁ̀ⲙⲁϩⲓ ϧⲉⲛ ⲟⲩϫⲟⲙ ⲛⲓⲙ ⲉⲑⲛⲁϯ ⲉ̀ϧⲟⲩⲛ ⲉ̀ϩ̀ⲣⲁϥ ⲛⲉⲙ ⲡⲉϥϩⲁⲡ.
     ⲕ̅. Ⲉϣⲱⲡ ⲅⲁⲣ ⲁ̀ⲛⲟⲕ ⲟⲩⲑ̀ⲙⲏⲓ ⲣⲱⲓ ⲛⲁⲉⲣⲙⲉⲧⲁ̀ⲥⲉⲃⲏⲥ ⲑ ⲉϣⲱⲡ ⲅⲁⲣ ⲁ̀ⲛⲟⲕ ⲟⲩⲁⲧⲁ̀ⲣⲓⲕⲓ ⲁⲓⲛⲁⲓ̀ ⲉ̀ⲃⲟⲗ ⲉⲓⲕⲟⲗϫ.
     ⲕ̅ⲁ̅. Ⲓⲧⲉ ⲅⲁⲣ ⲁⲓⲉⲣⲙⲉⲧⲁ̀ⲥⲉⲃⲏⲥ ϯⲉ̀ⲙⲓ ⲁⲛ ϧⲉⲛ ⲧⲁⲩⲭⲏ ⲑ ⲡⲗⲏⲛ ϫⲉ ⲁⲩⲱ̀ⲗⲓ ⲙ̀ⲡⲁⲱⲛϧ.
    ⲕ̅ⲃ̅. Ⲉⲑⲃⲉ ⲫⲁⲓ ⲁⲓϫⲟⲥ ϫⲉ ⲟⲩⲛⲓϣϯ ⲛⲉⲙ ⲟⲩϫⲱⲣⲓ ϥ̀ⲛⲁⲧⲁⲕⲱⲟⲩ ϧⲉⲛ ⲟⲩϫⲱⲛⲧ.
     ⲕ̅ⲅ̅. Ϫⲉ ⲛⲓⲥⲁⲙⲡⲉⲧϩⲱⲟⲩ ⲥⲉϧⲉⲛ ⲟⲩⲙⲟⲩ ⲉϥⲟⲓ ⲛ̀ϣ̀ⲫⲏⲣⲓ ⲑ ⲁⲗⲗⲁ ⲥⲉⲥⲱⲃⲓ ⲛ̀ⲛⲓⲑ̀ⲙⲏⲓ.
     ⲕ̅ⲇ̅. Ⲁⲩⲧⲏⲓⲧⲟⲩ ⲅⲁⲣ ⲉ̀ϧ̀ⲣⲏⲓ ⲉ̀ⲧⲟⲧϥ ⲙ̀ⲡⲓⲁ̀ⲥⲉⲃⲏⲥ ⲑ ⲛⲓϩⲟ ⲇⲉ ⲛ̀ⲧⲉ ⲛⲓⲣⲉϥϯϩⲁⲡ ϥ̀ϩⲱⲃⲥ ⲙ̀ⲙⲱⲟⲩ ⲟⲩⲟϩ ⲙ̀ⲙⲟⲛ ⲛ̀ⲑⲟϥ ⲡⲉ.
     ⲕ̅ⲉ̅. Ⲡⲁϫⲓⲛⲱⲛϧ ⲇⲉ ϥ̀ⲁⲥⲓⲱⲟⲩ ⲉϩⲟⲧⲉ ⲟⲩϫⲓⲛϭⲟϫⲓ ⲁⲩⲫⲱⲧ ⲟⲩⲟϩ ⲙ̀ⲡⲟⲩⲛⲁⲩ.
     ⲕ̅Ⲋ. Ⲓⲥϫⲉ ⲟⲩⲟⲛ ⲧⲁⲧⲥⲓ ⲙ̀ⲙⲱⲓⲧ ⲛ̀ⲧⲉ ⲛⲓⲉ̀ϫⲏⲟⲩ ⲓⲉ ⲛ̀ⲧⲉ ⲟⲩⲁ̀ϧⲱⲙ ⲉϥϩⲏⲗ ⲉϥⲕⲱϯ ⲛ̀ⲥⲁ ⲟⲩϧ̀ⲣⲉ ⲛⲁϥ.
     ⲕ̅ⲍ̅. Ⲁⲓϣⲁⲛⲫⲓⲣⲓ ⲅⲁⲣ ϯⲛⲁⲉⲣⲡⲱⲃϣ ⲉⲓⲥⲁϫⲓ ⲁⲓⲛⲁⲕⲱⲗϫ ⲙ̀ⲡⲁϩⲟ ⲉ̀ϧ̀ⲣⲏⲓ ⲟⲩⲟϩ ⲛ̀ⲧⲁϥⲓⲁ̀ϩⲟⲙ.
     ⲕ̅ⲏ̅. Ϯⲕⲓⲙ ⲇⲉ ϧⲉⲛ ⲛⲁⲙⲉⲗⲟⲥ ⲧⲏⲣⲟⲩ ⲑ ϯⲉ̀ⲙⲓ ⲅⲁⲣ ϫⲉ ⲭ̀ⲛⲁⲭⲁⲧ ⲉⲓⲟⲓ ⲛ̀ⲁⲑⲛⲟⲃⲓ.
     ⲕ̅ⲑ̅. Ⲉⲡⲓⲇⲏ ⲁ̀ⲛⲟⲕ ⲟⲩⲁ̀ⲥⲉⲃⲏⲥ ⲉⲑⲃⲉ ⲟⲩ ⲙ̀ⲡⲓⲙⲟⲩ.
     ⲗ̅. Ⲁⲓϣⲁⲛϫⲱⲕⲉⲙ ⲅⲁⲣ ϧⲉⲛ ⲟⲩⲭⲓⲱⲛ ⲑ ⲟⲩⲟϩ ⲛ̀ⲧⲁⲧⲟⲩⲃⲟⲓ ϧⲉⲛ ϩⲁⲛϫⲓϫ ⲉⲩⲟⲩⲁⲃ.
     ⲗ̅ⲁ̅. Ⲁⲩϭⲟϫⲧ ⲉⲙⲁϣⲱ ϧⲉⲛ ⲟⲩⲑⲱⲗⲉⲃ ⲑ ⲁⲥⲟⲣⲃⲉⲧ ⲇⲉ ⲛ̀ϫⲉ ⲧⲁⲥ̀ⲧⲟⲗⲏ.
     ⲗ̅ⲃ̅. Ⲛ̀ⲑⲟⲕ ⲟⲩⲣⲱⲙⲓ ⲅⲁⲣ ⲁⲛ ⲙ̀ⲡⲁⲓⲣⲏϯ ⲑ ⲫⲏⲉϯⲛⲁϭⲓϩⲁⲡ ⲛⲉⲙⲁϥ ϩⲓⲛⲁ ⲛ̀ⲧⲉⲛⲓ̀ ⲉⲩϩⲁⲡ ⲉⲩⲥⲟⲡ.
     ⲗ̅ⲅ̅. Ⲁⲙⲟⲓ ⲛⲉ ⲟⲩⲟⲛ ⲟⲩⲙⲉⲥⲓⲧⲏⲥ ⲟⲩⲧⲱⲛ ⲡⲉ ⲉϥⲥⲟϩⲓ ⲟⲩⲟϩ ⲉϥⲉ̀ⲥⲱⲧⲉⲙ ⲟⲩⲧⲱⲛ ⲙ̀ⲡ̀ⲥ̀ⲛⲁⲩ.
     ⲗ̅ⲇ̅. Ⲙⲁⲣⲉϥⲱ̀ⲗⲓ ⲙ̀ⲡⲉϥϣ̀ⲃⲱⲧ ⲉ̀ⲃⲟⲗϩⲁⲣⲟⲓ ⲑ ⲧⲉϥϩⲟϯ ⲇⲉ ⲙ̀ⲡⲉⲛⲑ̀ⲣⲉⲥϣ̀ⲧⲉⲣⲑⲱⲣⲧ.
     ⲗ̅ⲉ̅. Ⲛ̀ⲛⲁⲉⲣϩⲟϯ ⲁⲗⲗⲁ ⲉⲓⲉ̀ⲥⲁϫⲓ ⲑ ϯⲥⲱⲟⲩⲛ ⲅⲁⲣ ⲁⲛ ⲙ̀ⲡⲁⲓⲣⲏϯ ⲁⲗⲗⲁ ⲉⲓϧⲟⲥⲓ ϧⲉⲛ ⲧⲁⲩⲭⲏ.

ⲕⲉⲫ ⲓ̅

     ⲁ̅. Ⲉⲓϥⲓⲁ̀ϩⲟⲙ ϯⲛⲁϫⲉ ⲛⲁⲥⲁϫⲓ ⲛⲁϩⲣⲁϥ.
     ⲃ̅. Ⲟⲩⲟϩ ϯⲛⲁϫⲟⲥ ⲙ̀Ⲡⲟ̅ⲥ̅ ϫⲉ ⲙ̀ⲡⲉⲣϯⲥ̀ⲃⲱ ⲛⲏⲓ ⲉ̀ⲉⲣⲙⲉⲧⲁ̀ⲥⲉⲃⲏⲥ ⲑ ⲟⲩⲟϩ ⲉⲑⲃⲉ ⲟⲩ ⲁⲕϯϩⲁⲡ ⲉ̀ⲣⲟⲓ ⲙ̀ⲡⲁⲓⲣⲏϯ.
     ⲅ̅. Ⲙⲏ ⲛⲁⲛⲉⲥ ⲛⲁⲕ ⲁⲓϣⲁⲛϭⲓⲛ̀ϫⲟⲛⲥ ϫⲉ ⲁⲕⲭⲱ ⲛ̀ⲥⲱⲕ ⲛ̀ⲛⲓϩ̀ⲃⲏⲟⲩⲓ̀ ⲛ̀ⲧⲉ ⲛⲉⲕϫⲓϫ.
     ⲇ̅. Ⲡ̀ⲥⲟϭⲛⲓ ⲇⲉ ⲛ̀ⲧⲉ ⲛⲓⲁ̀ⲥⲉⲃⲏⲥ ⲁⲕϯϩ̀ⲑⲏⲕ ⲉ̀ⲣⲟϥ ⲑ ⲙⲏ ⲁⲕⲛⲁⲩ ϩⲱⲕ ⲙ̀ⲫ̀ⲣⲏϯ ⲛ̀ⲟⲩⲣⲱⲙⲓ ⲉϥⲛⲁⲩ.
     ⲉ̅. Ⲓⲉ ⲡⲉⲕϫⲓⲛⲱⲛϧ ⲟⲩϫⲓⲛⲱⲛϧ ⲛ̀ⲣⲱⲙⲓ ⲡⲉ ⲑ ⲓⲉ ⲛⲉⲕⲣⲟⲙⲡⲓ ϩⲁⲛⲣⲟⲙⲡⲓ ⲛ̀ⲣⲱⲙⲓ ⲛⲉ.
     Ⲋ. Ϫⲉ ⲁⲕⲕⲱϯ ⲛ̀ⲥⲁ ⲧⲁⲁ̀ⲛⲟⲙⲓⲁ ⲑ ⲟⲩⲟϩ ⲛⲁⲛⲟⲃⲓ ⲁⲕϧⲉⲧϧⲱⲧⲟⲩ.
     ⲍ̅. Ⲕ̀ⲥⲱⲟⲩⲛ ⲅⲁⲣ ϫⲉ ⲙ̀ⲡⲓⲉⲣⲁ̀ⲥⲉⲃⲏⲥ ⲑ ⲛⲓⲙ ⲡⲉ ⲫⲏⲉⲧⲱ̀ⲗⲓ ⲉ̀ⲃⲟⲗϧⲉⲛ ⲛⲉⲕϫⲓϫ.
     ⲏ̅. Ⲛⲉⲕϫⲓϫ ⲁⲩⲉⲣⲡ̀ⲗⲁⲍⲓⲛ ⲙ̀ⲙⲟⲓ ⲟⲩⲟϩ ⲁⲩⲑⲁⲙⲓⲟⲓ ⲑ ⲙⲉⲛⲉⲛⲥⲁ ⲛⲁⲓ ⲇⲉ ⲁⲕⲕⲟⲧⲕ ⲁⲕϯ ⲛ̀ⲟⲩⲉⲣϧⲟⲧ ⲛⲏⲓ.
     ⲑ̅. Ⲁⲣⲓⲫ̀ⲙⲉⲩⲓ̀ ϫⲉ ⲁⲕⲉⲣⲡ̀ⲗⲁⲍⲓⲛ ⲙ̀ⲙⲟⲓ ⲛ̀ⲟⲩⲟ̀ⲙⲓ ⲑ ⲟⲩⲟϩ ⲁⲕⲧⲁⲥⲑⲟⲓ ⲟⲛ ⲉ̀ⲡ̀ⲕⲁϩⲓ.
     ⲓ̅. Ⲙⲏ ⲉⲧⲁⲕϩⲟⲣⲧ ⲁⲛ ⲙ̀ⲫ̀ⲣⲏϯ ⲛ̀ⲟⲩⲉⲣⲱϯ ⲑ ⲁⲕⲑ̀ⲣⲓϭⲱⲥ ⲇⲉ ⲙ̀ⲫ̀ⲣⲏϯ ⲛ̀ⲟⲩⲁⲗⲱⲙ.
     ⲓ̅ⲁ̅. Ⲟⲩϣⲁⲣ ⲛⲉⲙ ϩⲁⲛϥⲱⲓ ⲁⲕⲧⲏⲓⲧⲟⲩ ϩⲓⲱⲧ ⲟⲩⲟϩ ⲁⲕⲙⲟⲗϧⲧ ϧⲉⲛ ϩⲁⲛⲕⲁⲥ ⲛⲉⲙ ϩⲁⲛⲙⲟϯ.
     ⲓ̅ⲃ̅. Ⲟⲩⲱⲛϧ ⲇⲉ ⲛⲉⲙ ⲟⲩⲛⲁⲓ ⲁⲕⲭⲁⲩ ⲛ̀ϧⲏⲧ ⲑ ⲟⲩⲟϩ ⲡⲉⲕϫⲉⲙⲡ̀ϣⲓⲛⲓ ⲁϥⲁ̀ⲣⲉϩ ⲉ̀ⲡⲁⲡⲛⲉⲩⲙⲁ.
     ⲓ̅ⲅ̅. Ⲛⲁⲓ ⲧⲏⲣⲟⲩ ⲥⲉⲭⲏ ⲛ̀ϧⲏⲧ ⲟⲩⲟϩ ϯⲉ̀ⲙⲓ ϫⲉ ⲟⲩⲟⲛϣ̀ϣ̀ϫⲟⲙ ⲙ̀ⲙⲟⲕ ϧⲉⲛ ϩⲱⲃ ⲛⲓⲃⲉⲛ ⲑ ⲟⲩⲟϩ ⲙ̀ⲙⲟⲛ ϩ̀ⲗⲓ ⲟⲓ ⲛ̀ⲁⲧϫⲟⲙ ⲛ̀ⲧⲟⲧⲕ.
     ⲓ̅ⲇ̅. Ⲉϣⲱⲡ ⲅⲁⲣ ⲁⲓϣⲁⲛⲉⲣⲛⲟⲃⲓ ⲭ̀ⲛⲁⲁ̀ⲣⲉϩ ⲉ̀ⲣⲟⲓ ⲑ ⲙ̀ⲡⲉⲕⲧⲟⲩⲃⲟⲓ ⲇⲉ ⲉ̀ⲃⲟⲗϩⲁ ⲛⲁⲁ̀ⲛⲟⲙⲓⲁ.
     ⲓ̅ⲉ̅. Ⲉϣⲱⲡ ⲅⲁⲣ ⲁⲓϣⲁⲛⲉⲣⲛⲟⲃⲓ ⲟⲩⲟⲓ ⲛⲏⲓ ⲑ ⲉϣⲱⲡ ⲇⲉ ⲉⲓⲟⲓ ⲛ̀ⲑ̀ⲙⲏⲓ ϯϣ̀ϥⲓ ⲉ̀ϫⲱⲓ ⲉ̀ⲡ̀ϣⲱⲓ ⲁⲛ ⲑ ϯⲙⲉϩ ⲅⲁⲣ ⲛ̀ϣⲱϣ.
     ⲓ̅Ⲋ. Ⲥⲉϫⲱⲣϫ ⲅⲁⲣ ⲉ̀ⲣⲟⲓ ⲙ̀ⲫ̀ⲣⲏϯ ⲛ̀ⲟⲩⲙⲟⲩⲓ̀ ⲉ̀ⲡ̀ϧⲟⲗϧⲉⲗ ⲑ ⲡⲁⲗⲓⲛ ⲟⲛ ⲁⲓⲕⲟⲧ ⲁⲕϯⲙ̀ⲕⲁϩ ⲛⲏⲓ ⲉ̀ⲙⲁϣⲱ.
     ⲓ̅ⲍ̅. Ⲉⲕⲓ̀ⲣⲓ ⲙ̀ⲡⲁⲉⲧⲁⲥⲙⲟⲥ ⲙ̀ⲃⲉⲣⲓ ⲉ̀ϩ̀ⲣⲏⲓ ⲉ̀ϫⲱⲓ ⲁⲕⲉⲣⲭ̀ⲣⲁⲥⲑⲉ ⲛⲏⲓ ϧⲉⲛ ⲟⲩⲛⲓϣϯ ⲛ̀ϫⲱⲛⲧ ⲑ ⲁⲕⲓ̀ⲛⲓ ⲇⲉ ⲛ̀ϩⲁⲛⲡⲓⲣⲁⲥⲙⲟⲥ ⲉ̀ϩ̀ⲣⲏⲓ ⲉ̀ϫⲱⲓ.
     ⲓ̅ⲏ̅. Ⲉⲑⲃⲉ ⲟⲩ ⲁⲕⲉⲛⲧ ⲉ̀ⲃⲟⲗϧⲉⲛ ⲑ̀ⲛⲉϫⲓ ⲑ ⲟⲩⲟϩ ⲙ̀ⲡⲓⲙⲟⲩ ϩⲓⲛⲁ ⲛ̀ⲧⲉϣ̀ⲧⲉⲙ ⲃⲁⲗ ⲛ̀ⲣⲱⲙⲓ ⲛⲁⲩ ⲉ̀ⲣⲟⲓ.
     ⲓ̅ⲑ̅. Ⲟⲩⲟϩ ⲛ̀ⲧⲁⲉⲣ ⲙ̀ⲫ̀ⲣⲏϯ ⲛ̀ⲟⲩⲁⲓ ⲙ̀ⲡⲉϥϣⲱⲡⲓ ⲣⲱ ⲑ ⲉⲑⲃⲉ ⲟⲩ ⲉⲧⲁⲓⲓ̀ ⲉ̀ⲃⲟⲗ ϧⲉⲛ ⲑ̀ⲛⲉϫⲓ ⲙ̀ⲡⲓϩⲱⲗ ⲉ̀ⲟⲩⲙ̀ϩⲁⲩ.
     ⲕ̅. Ϣⲁⲛ ⲟⲩⲕⲟⲩϫⲓ ⲁⲛ ⲡⲉ ⲡ̀ⲥⲏⲟⲩ ⲛ̀ⲧⲉ ⲡⲁⲱⲛϧ ⲑ ⲭⲁⲧ ⲛ̀ⲧⲁⲙ̀ⲧⲟⲛ ⲙ̀ⲙⲟⲓ ⲛ̀ⲟⲩⲕⲟⲩϫⲓ.
     ⲕ̅ⲁ̅. Ⲙ̀ⲡⲁϯϣⲉⲛⲏⲓ ⲉ̀ⲡⲓⲙⲁ ⲉ̀ϯⲛⲁⲧⲁⲥⲑⲟⲓ ⲁⲛ ϫⲉ ⲉ̀ⲃⲟⲗ ⲛ̀ϧⲏⲧϥ ⲉ̀ⲡⲓⲙⲁ ⲛ̀ⲭⲁⲕⲓ ⲛⲉⲙ ⲅ̀ⲛⲟⲫⲟⲥ ⲑ ⲡⲓⲕⲁϩⲓ ⲛ̀ⲭⲁⲕⲓ ϣⲁ ⲉ̀ⲛⲉϩ ⲑ ⲡⲓⲙⲁ ⲉⲧⲉ ⲙ̀ⲙⲟⲛ ⲟⲩⲱⲓⲛⲓ ⲙ̀ⲙⲁⲩ ⲟⲩⲇⲉ ⲙ̀ⲡⲁⲩⲛⲁⲩ ⲉ̀ⲡ̀ⲱⲛϧ ⲛ̀ⲧⲉ ⲛⲓⲣⲱⲙⲓ ⲙ̀ⲙⲁⲩ.

ⲕⲉⲫ ⲓ̅ⲁ̅

    Ϯϩⲟⲩⲓϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲥⲱⲫⲁⲣ
     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲥⲱⲫⲁⲣ ⲡⲓⲘⲉⲛⲛⲉⲟⲥ ⲟⲩⲟϩ ⲡⲉϫⲁϥ ϫⲉ
     ⲃ̅. Ⲫⲏⲉⲧϫⲱ ⲛ̀ⲟⲩⲙⲏϣ ⲛ̀ⲥⲁϫⲓ ⲉϥⲉ̀ⲥⲱⲧⲉⲙ ⲉ̀ⲡ̀ⲟⲩⲟϩⲉⲙ ⲓⲥϫⲉ ⲫⲏⲉⲧⲥⲱⲟⲩⲛ ⲛ̀ⲥⲁϫⲓ ϥ̀ⲙⲉⲩⲓ̀ ⲉ̀ⲣⲟϥ ϫⲉ ⲟⲩⲑ̀ⲙⲏⲓ ⲡⲉ.
     ⲅ̅. Ϥ̀ⲥ̀ⲙⲁⲣⲱⲟⲩⲧ ⲛ̀ϫⲉ ⲫ̀ⲙⲓⲥⲓ ⲛ̀ⲟⲩⲥ̀ϩⲓⲙⲓ ⲉⲧⲟⲓ ⲛ̀ⲟⲩⲕⲟⲩϫⲓ ⲛ̀ⲱⲛϧ ⲑ ⲙ̀ⲡⲉⲣϣⲱⲡⲓ ⲉⲕⲟϣ ϧⲉⲛ ⲛⲉⲕⲥⲁϫⲓ ⲙ̀ⲙⲟⲛ ϩ̀ⲗⲓ ⲅⲁⲣ ⲉϥϭⲓϩⲁⲡ ⲟⲩⲃⲏⲕ.
     ⲇ̅. Ⲙ̀ⲡⲉⲣϫⲟⲥ ϫⲉ ϯⲧⲟⲩⲃⲏⲟⲩⲧ ⲟⲩⲟϩ ϯⲟⲓ ⲛ̀ⲁⲧⲁ̀ⲣⲓⲕⲓ ⲙ̀ⲡⲉϥⲙ̀ⲑⲟ.
     ⲉ̅. Ⲁⲗⲗⲁ ⲁⲣⲉ Ⲡⲟ̅ⲥ̅ ⲛⲁⲥⲁϫⲓ ⲛⲉⲙⲁⲕ ⲛ̀ⲁϣ ⲛ̀ⲣⲏϯ ⲑ ⲟⲩⲟϩ ⲛ̀ⲧⲉϥⲟⲩⲱⲛ ⲛ̀ⲛⲉϥⲥ̀ⲫⲟⲧⲟⲩ ⲛⲉⲙⲁⲕ.
     Ⲋ. Ϩⲓⲛⲁ ⲛ̀ⲧⲉϥⲧⲁⲙⲟⲕ ⲉ̀ⲧ̀ϫⲟⲙ ⲛ̀ⲧⲉ ⲟⲩⲥⲟⲫⲓⲁ ⲑ ϫⲉ ⲟⲩⲏⲓ ϥ̀ⲛⲁϣⲱⲡⲓ ⲉϥⲕⲏⲃ ⲉ̀ⲣⲟⲕ ⲑ ⲧⲟⲧⲉ ⲉⲕⲉ̀ⲉ̀ⲙⲓ ϫⲉ ⲉⲧⲁ ϩⲁⲛⲟⲩⲟⲛ ϣⲱⲡⲓ ⲛⲁⲕ ⲉ̀ⲃⲟⲗϩⲓⲧⲉⲛ Ⲡϭⲟⲓⲥ ⲉⲩⲙ̀ⲡ̀ϣⲁ ⲛ̀ⲛⲓⲛⲟⲃⲓ ⲉⲧⲁⲕⲁⲓ.
     ⲍ̅. Ⲙⲏ ⲭ̀ⲛⲁϣ̀ϫⲓⲙⲓ ⲙ̀ⲡⲓⲙⲱⲓⲧ ⲛ̀ⲧⲉ Ⲡϭⲟⲓⲥ ⲓⲉ ⲁⲕϣⲉ ⲁⲩⲣⲏϫⲟⲩ ⲛ̀ⲛⲏⲉⲧⲁϥⲑⲁⲙⲓⲱⲟⲩ ⲛ̀ϫⲉ Ⲡⲓⲡⲁⲛⲧⲟⲕⲣⲁⲧⲱⲣ.
     ⲏ̅. Ⲥ̀ϭⲟⲥⲓ ⲛ̀ϫⲉ ⲧ̀ⲫⲉ ⲟⲩⲟϩ ⲟⲩ ⲡⲉ ⲉⲧⲉⲕⲛⲁⲁⲓϥ ⲑ ϩⲁⲛⲟⲩⲟⲛ ⲇⲉ ⲡⲉ ⲉⲧⲉⲕⲥⲱⲟⲩⲛ ⲙ̀ⲙⲱⲟⲩ ⲉⲩϣⲏⲕ ⲉϩⲟⲧⲉ ⲛⲏⲉⲧϧⲉⲛ ⲁ̀ⲙⲉⲛϯ.
     ⲑ̅. Ⲓⲉ ⲉⲩϣⲏⲟⲩ ⲉϩⲟⲧⲉ ϯϣⲓⲏ̀ ⲛ̀ⲧⲉ ⲡ̀ⲕⲁϩⲓ ⲓⲉ ⲉϩⲟⲧⲉ ⲡⲓⲟⲩⲟⲥⲑⲉⲛ ⲛ̀ⲧⲉ ⲫ̀ⲓⲟⲙ.
     ⲓ̅. Ⲉϣⲱⲡ ⲁϥϣⲁⲛⲟⲩⲱϫⲡ ⲛ̀ϩⲱⲃ ⲛⲓⲃⲉⲛ ⲉ̀ϧ̀ⲣⲏⲓ ⲛⲓⲙ ⲉⲑⲛⲁϫⲟⲥ ⲛⲁϥ ϫⲉ ⲟⲩ ⲡⲉⲧⲉⲕⲁⲓϥ.
     ⲓ̅ⲁ̅. Ⲛ̀ⲑⲟϥ ⲅⲁⲣ ⲉⲧⲥⲱⲟⲩⲛ ⲛ̀ⲛⲓϩ̀ⲃⲏⲟⲩⲓ̀ ⲛ̀ⲧⲉ ⲛⲓⲁ̀ⲛⲟⲙⲟⲥ ⲁϥϣⲁⲛⲛⲁⲩ ⲇⲉ ⲉ̀ϩⲁⲛⲙⲉⲧⲁⲧⲟⲡⲟⲥ ⲙ̀ⲡⲁϥⲱⲃϣ ⲉ̀ⲣⲱⲟⲩ.
     ⲓ̅ⲃ̅. Ⲫ̀ⲣⲱⲙⲓ ⲇⲉ ⲉϥϩⲉⲗϩⲉⲗ ⲛ̀ⲕⲉⲣⲏϯ ϧⲉⲛ ϩⲁⲛⲥⲁϫⲓ: ⲟⲩⲣⲱⲙⲓ ⲇⲉ ⲛ̀ⲟⲩϫ̀ⲫⲟ ⲛ̀ⲧⲉ ⲟⲩⲥ̀ϩⲓⲙⲓ ⲁϥⲟⲓ ⲛ̀ϩⲩⲥⲟⲥ ⲉ̀ⲟⲩⲓⲁⲛ̀ⲧⲱⲟⲩ.
     ⲓ̅ⲅ̅. Ⲓⲥϫⲉ ⲅⲁⲣ ⲛ̀ⲑⲟⲕ ⲁⲕⲭⲱ ⲙ̀ⲡⲉⲕϩⲏⲧ ⲉϥⲧⲟⲩⲃⲏⲟⲩⲧ ⲉⲕⲉ̀ⲃⲁϣⲕ ⲇⲉ ⲙ̀ⲡⲓϭⲱϧⲉⲙ ⲟⲩⲟϩ ⲙ̀ⲡⲉⲕⲉⲣϩⲟϯ: ⲕ̀ϥⲁⲓ ⲇⲉ ⲛ̀ⲛⲉⲕϫⲓϫ ⲉ̀ⲡ̀ϣⲱⲓ ϩⲁⲣⲟϥ.
     ⲓ̅ⲇ̅. Ⲓⲥϫⲉ ⲇⲉ ⲟⲩⲟⲛ ϩ̀ⲗⲓ ⲙ̀ⲙⲉⲧⲁ̀ⲛⲟⲙⲟⲥ ϧⲉⲛ ⲛⲉⲕϫⲓϫ ⲙⲁⲣⲉϥⲟⲩⲉⲓ ⲙ̀ⲙⲟⲕ: ⲙ̀ⲡⲉⲛⲑ̀ⲣⲉ ϩ̀ⲗⲓ ⲇⲉ ⲛ̀ϭⲓⲛ̀ϫⲟⲛⲥ ϣⲱⲡⲓ ϧⲉⲛ ⲡⲉⲕⲏⲓ.
     ⲓ̅ⲉ̅. Ⲡⲁⲓⲣⲏϯ ⲅⲁⲣ ⲉϥⲉ̀ⲉⲣⲟⲩⲱⲓⲛⲓ ⲛ̀ϫⲉ ⲡⲉⲕϩⲟ ⲙ̀ⲫ̀ⲣⲏϯ ⲛ̀ⲟⲩⲙⲱⲟⲩ ⲉϥⲧⲟⲩⲃⲏⲟⲩⲧ : ⲉⲕⲉ̀ⲃⲁϣⲕ ⲇⲉ ⲙ̀ⲡⲓϭⲱϧⲉⲙ ⲟⲩⲟϩ ⲛ̀ⲛⲉⲕⲉⲣϩⲟϯ:
     ⲓ̅Ⲋ. Ⲡⲓϧⲓⲥⲓ ⲉⲕⲉ̀ⲉⲣⲡⲉϥⲱⲃϣ ⲙ̀ⲫ̀ⲣⲏϯ ⲛ̀ⲟⲩⲙⲱⲟⲩ ⲉ̀ⲁϥⲥⲓⲥⲓⲛⲓ ⲟⲩⲟϩ ⲛ̀ⲛⲉⲕϣ̀ⲑⲟⲣⲧⲉⲣ.
     ⲓ̅ⲍ̅. Ⲧⲉⲕⲉⲩⲭⲏ ⲇⲉ ⲉⲥⲉ̀ⲉⲣ ⲙ̀ⲫ̀ⲣⲏϯ ⲙ̀ⲡⲓⲥⲓⲟⲩ ⲛ̀ⲧⲉ ϩⲁⲛⲁ̀ⲧⲟⲟⲩⲓ̀ : ⲉϥⲉ̀ⲫⲓⲣⲓ ⲇⲉ ⲛⲁⲕ ⲛ̀ϫⲉ ⲟⲩⲱⲛϧ ⲓⲥϫⲉⲛ ϩⲁⲛⲁ̀ⲙⲉⲣⲓ.
     ⲓ̅ⲏ̅. Ⲧⲟⲧⲉ ⲉⲕⲉ̀ⲭⲁ ϩ̀ⲑⲏⲕ ϫⲉ ⲟⲩⲟⲛ ⲟⲩϩⲉⲗⲡⲓⲥ ϣⲟⲡ ⲛⲁⲕ:ⲉ̀ⲃⲟⲗ ⲇⲉ ϧⲉⲛ ⲟⲩⲣⲱⲟⲩϣ ⲛⲉⲙ ⲟⲩϩⲟϯ ⲉⲥⲉ̀ϣⲱⲡⲓ ⲛⲁⲕ ⲛ̀ϫⲉ ⲟⲩϩⲓⲣⲏⲛⲏ.
     ⲓ̅ⲑ̅. Ⲉⲕⲉ̀ⲉⲣⲏⲥⲓⲭⲁⲍⲓⲛ ⲅⲁⲣ ⲟⲩⲟϩ ⲛ̀ⲛⲉϥϣⲱⲡⲓ ⲛ̀ϫⲉ ⲫⲏⲉⲧⲃⲱⲧⲥ ⲉ̀ⲣⲟⲕ : ⲉⲩⲉ̀ⲕⲟⲧⲟⲩ ⲇⲉ ⲛ̀ϫⲉ ϩⲁⲛⲙⲏϣ ⲉⲩⲉ̀ϯϩⲟ ⲉ̀ⲣⲟⲕ.
     ⲕ̅. Ⲡⲓⲟⲩϫⲁⲓ ⲇⲉ ⲉϥⲉ̀ⲭⲁⲩ ⲛ̀ⲥⲱⲟⲩ : ⲡ̀ⲧⲁⲕⲟ ⲅⲁⲣ ⲡⲉ ⲧⲟⲩϩⲉⲗⲡⲓⲥ : ⲛⲓⲃⲁⲗ ⲇⲉ ⲛ̀ⲧⲉ ⲛⲓⲁ̀ⲥⲉⲃⲏⲥ ⲉⲩⲉ̀ⲃⲱⲗ ⲉ̀ⲃⲟⲗ.

ⲕⲉⲫ ⲓ̅ⲃ̅

    Ϯⲙⲁϩⲅ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲓⲱⲃ ⲡⲉϫⲁϥ ϫⲉ :
     ⲃ̅. Ⲓⲧⲁ ⲛ̀ⲑⲱⲧⲉⲛ ϩⲁⲛⲣⲱⲙⲓ ⲓⲉ ⲁⲥⲛⲁⲙⲟⲩ ⲛⲉⲙⲱⲧⲉⲛ ⲛ̀ϫⲉ ϯⲥⲟⲫⲓⲁ.
     ⲅ̅. Ⲁⲛⲟⲕ ⲙⲉⲛ ϩⲱ ⲟⲩⲟⲛ ϩⲏⲧ ⲙ̀ⲙⲟⲓ ⲙ̀ⲡⲉⲧⲉⲛⲣⲏϯ: ⲟⲩⲟϩ ⲟⲩⲣⲱⲙⲓ ⲛ̀ⲑ̀ⲙⲏⲓ ⲛ̀ⲁⲧⲁ̀ⲣⲓⲕⲓ ⲁϥϣⲱⲡⲓ ⲉ̀ⲡ̀ⲥⲱⲃⲓ.
     ⲇ̅. Ⲁⲩⲥⲉⲃⲧⲱⲧϥ ⲅⲁⲣ ⲉ̀ⲟⲩⲭ̀ⲣⲟⲛⲟⲥ ⲉϥⲑⲏϣ ⲉⲑⲣⲉϥϩⲉⲓ ϧⲁ ⲡ̀ⲉⲣϣⲓϣⲓ ⲛ̀ϩⲁⲛⲕⲉⲭⲱⲟⲩⲛⲓ:ⲟⲩⲟϩ ⲉⲑⲣⲟⲩϣⲱⲗ ⲛ̀ⲛⲉϥⲏⲟⲩ ⲛ̀ϫⲉ ϩⲁⲛⲁ̀ⲛⲟⲙⲟⲥ.
     ⲉ̅. Ⲁⲗⲗⲁ ⲙ̀ⲡⲉⲛⲑ̀ⲣⲉϥⲭⲁ ϩ̀ⲑⲏϥ ⲛ̀ϫⲉ ϩ̀ⲗⲓ ⲛ̀ⲥⲁⲙ̀ⲡⲉⲧϩⲱⲟⲩ ϫⲉ ϥ̀ⲛⲁϣⲱⲡⲓ ⲉϥⲧⲟⲩⲃⲏⲟⲩⲧ.
     Ⲋ. Ⲛⲏ ⲧⲏⲣⲟⲩ ⲉⲧϯϫⲱⲛⲧ ⲙ̀Ⲡⲟ̅ⲥ̅ : ⲙⲏ ⲛ̀ⲑⲱⲟⲩ ϩⲱⲟⲩ ⲥⲉⲛⲁⲉⲣⲉⲧⲁⲛ ⲉ̀ⲣⲱⲟⲩ ⲁⲛ.
     ⲍ̅. Ⲁⲗⲗⲁ ϣⲉⲛ ⲛⲓⲧⲉⲃⲛⲱⲟⲩⲓ̀ ⲉϣⲱⲡ ⲛ̀ⲧⲟⲩϫⲟⲥ ⲛⲁⲕ: ⲓⲉ ⲛⲓϩⲁⲗⲁϯ ⲛ̀ⲧⲉ ⲧ̀ⲫⲉ ⲉϣⲱⲡ ⲛ̀ⲧⲟⲩⲧⲁⲙⲟⲕ.
     ⲏ̅. Ⲫⲓⲣⲓ ϧⲁⲧⲉⲛ ⲡⲓⲕⲁϩⲓ ⲉϣⲱⲡ ⲛ̀ⲧⲉϥϫⲟⲥ ⲛⲁⲕ : ⲓⲉ ⲛ̀ⲧⲟⲩⲫⲓⲣⲓ ϧⲁⲧⲟⲧⲕ ⲛ̀ϫⲉ ⲛⲓⲧⲉⲃⲧ ⲛ̀ⲧⲉ ⲫ̀ⲓⲟⲙ.
     ⲑ̅. Ⲛⲓⲙ ⲉⲧⲉ ⲙ̀ⲡⲉϥⲉ̀ⲙⲓ ϧⲉⲛ ⲛⲁⲓ ⲧⲏⲣⲟⲩ ϫⲉ ⲧ̀ϫⲓϫ ⲙ̀Ⲡⲟ̅ⲥ̅ ⲁⲥⲑⲁⲙⲓⲉ̀ ⲛⲁⲓ ⲧⲏⲣⲟⲩ.
     ⲓ̅. Ⲙⲏ ⲁⲩⲭⲏ ⲁⲛ ϧⲉⲛ ⲛⲉϥϫⲓϫ ⲛ̀ϫⲉ ⲛⲓⲩⲭⲏ ⲛ̀ⲧⲉ ⲛⲏⲉⲧⲟⲛϧ ⲧⲏⲣⲟⲩ ⲛⲉⲙ ⲡⲓⲡ̅ⲛ̅ⲁ̅ ⲛ̀ⲧⲉ ⲣⲱⲙⲓ ⲛⲓⲃⲉⲛ.
     ⲓ̅ⲁ̅. Ⲡⲓⲛⲟⲩⲥ ⲙⲉⲛ ⲅⲁⲣ ⲉⲧϧⲟⲧϧⲉⲧ ⲛ̀ⲛⲓⲥⲁϫⲓ : ϯϣ̀ⲃⲱⲃⲓ ⲇⲉ ⲉⲧϫⲉⲙϯⲡⲓ ⲛ̀ⲛⲓϧ̀ⲣⲏⲟⲩⲓ̀.
     ⲓ̅ⲃ̅. Ⲁⲣⲉ ϯⲥⲟⲫⲓⲁ ⲅⲁⲣ ϣⲟⲡ ϧⲉⲛ ⲟⲩⲛⲓϣϯ ⲛ̀ⲭ̀ⲣⲟⲛⲟⲥ: ϯⲉⲡⲓⲥⲧⲏⲙⲏ ⲇⲉ ⲁⲥϧⲉⲛ ⲟⲩⲛⲓϣϯ ⲛ̀ϫⲓⲛⲱⲛϧ.
     ⲓ̅ⲅ̅. Ⲁⲣⲉ ϯⲥⲟⲫⲓⲁ ⲭⲏ ϧⲁⲧⲟⲧϥ ⲛⲉⲙ ϯⲛⲓϣϯ ⲛ̀ϫⲟⲙ: ⲫⲱϥ ⲡⲉ ⲡⲓⲥⲟϭⲛⲓ ⲛⲉⲙ ⲡⲓⲕⲁϯ.
     ⲓ̅ⲇ̅. Ⲉϣⲱⲡ ⲁϥϣⲁⲛⲥⲱⲥ ⲛⲓⲙ ⲉⲑⲛⲁϣ̀ⲕⲱⲧ : ⲁϥϣⲁⲛϣ̀ⲑⲁⲙ ⲉ̀ϩ̀ⲣⲉⲛ ⲛⲓⲣⲱⲙⲓ ⲛⲓⲙ ⲉⲑⲛⲁϣ̀ⲟⲩⲱⲛ.
     ⲓ̅ⲉ̅. Ⲁϥϣⲁⲛⲧⲁϩⲛⲟ ⲙ̀ⲡⲓⲙⲱⲟⲩ ϥ̀ⲛⲁⲧ̀ϣⲟⲩⲓⲉ ⲡⲓⲕⲁϩⲓ:  ⲁϥϣⲁⲛⲭⲁ ϩ̀ⲣⲁϥ ⲛⲁϥ ϥ̀ⲛⲁⲧⲁⲕⲟϥ ⲉ̀ⲁϥⲟⲩⲟϫⲡϥ.
     ⲓ̅Ⲋ. Ⲫⲱϥ ⲡⲉ ⲡⲓⲁ̀ⲙⲁϩⲓ ⲛⲉⲙ ϯϫⲟⲙ:ⲫⲱϥ ⲡⲉ ⲡⲓⲉ̀ⲙⲓ ⲛⲉⲙ ⲡⲓⲕⲁϯ.
     ⲓ̅ⲍ̅. Ⲫⲏⲉⲧⲱ̀ⲗⲓ ⲛ̀ⲛⲓⲣⲉϥⲥⲟϭⲛⲓ ⲛ̀ⲉⲭⲙⲁⲗⲱⲧⲟⲥ : ⲛⲓⲣⲉϥϯϩⲁⲡ ⲇⲉ ⲛ̀ⲧⲉ ⲡ̀ⲕⲁϩⲓ ⲁϥⲑ̀ⲣⲟⲩⲧⲱⲙⲧ.
     ⲓ̅ⲏ̅. Ⲫⲏⲉⲧⲧ̀ϩⲉⲙⲥⲟ ⲛ̀ϩⲁⲛⲟⲩⲣⲱⲟⲩ ϩⲓ ϩⲁⲛⲑ̀ⲣⲟⲛⲟⲥ: ⲟⲩⲟϩ ⲁϥⲙⲟⲩⲣ ⲛ̀ⲛⲟⲩϯⲡⲓ ⲛ̀ⲟⲩⲙⲟⲩϫϧ.
     ⲓ̅ⲑ̅. Ⲫⲏⲉⲧⲟⲩⲱⲣⲡ ⲛ̀ϩⲁⲛⲟⲩⲏⲃ ⲛ̀ⲉⲭⲙⲁⲗⲱⲧⲟⲥ : ⲛⲓϫⲱⲣⲓ ⲇⲉ ⲛ̀ⲧⲉ ⲡ̀ⲕⲁϩⲓ ⲁϥⲟⲩⲟϫⲡⲟⲩ.
     ⲕ̅. Ⲫⲏⲉⲧϣⲱⲃⲧ ⲛ̀ⲛⲓⲥ̀ⲫⲟⲧⲟⲩ ⲛ̀ⲧⲉ ⲛⲓⲡⲓⲥⲧⲟⲥ : ⲡⲓⲕⲁϯ ⲇⲉ ⲛ̀ⲧⲉ ⲛⲓⲡ̀ⲣⲉⲥⲃⲩⲧⲉⲣⲟⲥ ⲁϥⲉ̀ⲙⲓ ⲉ̀ⲣⲟϥ.
     ⲕ̅ⲁ̅. Ⲫⲏⲉⲧϫⲱϣ ⲛ̀ⲟⲩϣⲱϣ ⲉ̀ϫⲉⲛ ϩⲁⲛⲁⲣⲭⲱⲛ : ⲛⲏⲉⲧⲑⲉⲃⲓⲏⲟⲩⲧ ⲁϥⲧⲁⲗϭⲱⲟⲩ.
     ⲕ̅ⲃ̅. Ⲫⲏⲉⲧϭⲱⲣⲡ ⲛ̀ⲛⲏⲉⲧϣⲏⲕ ⲉ̀ⲃⲟⲗ ϧⲉⲛ ⲡ̀ⲭⲁⲕⲓ:ⲁϥⲓ̀ⲛⲓ ⲇⲉ ⲉ̀ⲃⲟⲗ ⲙ̀ⲫ̀ⲟⲩⲱⲓⲛⲓ ⲛ̀ϯϧⲏⲓⲃⲓ ⲛ̀ⲧⲉ ⲫ̀ⲙⲟⲩ.
     ⲕ̅ⲅ̅. Ⲫⲏⲉⲧⲥⲱⲣⲉⲙ ⲛ̀ϩⲁⲛϣ̀ⲗⲱⲗ ⲟⲩⲟϩ ⲉϥⲧⲁⲕⲟ ⲙ̀ⲙⲱⲟⲩ : ⲉϥϣ̀ⲧⲟ ⲛ̀ϩⲁⲛⲑ̀ⲛⲟⲥ ⲉ̀ⲡⲉⲥⲏⲧ ⲟⲩⲟϩ ⲉϥⲉ̀ϭⲓⲙⲱⲓⲧ ϧⲁϫⲱⲟⲩ.
     ⲕ̅ⲇ̅. Ⲫⲏⲉⲧϣⲱⲃⲧ ⲛ̀ⲛⲓϩⲏⲧ ⲛ̀ⲧⲉ ⲛⲓⲁⲣⲭⲱⲛ ⲛ̀ⲧⲉ ⲡ̀ⲕⲁϩⲓ : ⲁϥⲥⲟⲣⲙⲟⲩ ⲇⲉ ϧⲉⲛ ⲟⲩⲙⲱⲓⲧ ⲛ̀ⲥⲉⲥⲱⲟⲩⲛ ⲙ̀ⲙⲟϥ ⲁⲛ.
     ⲕ̅ⲉ̅. Ⲉⲩⲉ̀ϫⲟⲙϫⲉⲙ ⲇⲉ ⲉ̀ⲟⲩⲭⲁⲕⲓ ⲟⲩⲟϩ ⲉ̀ⲟⲩⲟⲩⲱⲓⲛⲓ ⲁⲛ : ⲉⲩⲉ̀ⲥⲱⲣⲉⲙ ⲇⲉ ⲙ̀ⲫ̀ⲣⲏϯ ⲙ̀ⲫⲏⲉⲧⲑⲁϧⲓ.

ⲕⲉⲫ ⲓ̅ⲅ̅

     ⲁ̅. Ϩⲏⲡⲡⲉ ⲓⲥ ⲛⲁⲓ ⲁϥⲛⲁⲩ ⲉ̀ⲣⲱⲟⲩ ⲛ̀ϫⲉ ⲡⲁⲃⲁⲗ : ⲟⲩⲟϩ ⲁϥⲥⲟⲑⲙⲟⲩ ⲛ̀ϫⲉ ⲡⲁⲙⲁϣϫ.
     ⲃ̅. Ⲟⲩⲟϩ ϯⲥⲱⲟⲩⲛ ϩⲱ ⲛ̀ⲛⲏⲉⲧⲉⲧⲉⲛⲥⲱⲟⲩⲛ ⲙ̀ⲙⲱⲟⲩ ⲟⲩⲟϩ ϯⲟⲓ ⲛ̀ⲁⲧⲕⲁϯ ⲁⲛ ⲉϩⲟⲧⲉⲣⲱⲧⲉⲛ.
     ⲅ̅. Ⲙ̀ⲙⲟⲛ ⲟⲩⲥ̀ⲙⲏ ⲇⲉ ⲁⲗⲗⲁ ⲁ̀ⲛⲟⲕ ϯⲛⲁⲥⲁϫⲓ ⲛⲁϩⲣⲉⲛ Ⲡⲟ̅ⲥ̅ : ϯⲛⲁⲥⲟϩⲓ ⲇⲉ ⲙ̀ⲡⲉϥⲙ̀ⲑⲟ ⲓⲥϫⲉ ϥ̀ⲛⲁⲟⲩⲱϣ.
     ⲇ̅. Ⲛ̀ⲑⲱⲧⲉⲛ ⲇⲉ ⲛ̀ⲑⲱⲧⲉⲛ ⲛ̀ϩⲁⲛⲥⲏⲓⲛⲓ ⲛ̀ⲣⲉϥϭⲓⲛ̀ϫⲟⲛⲥ ⲛⲉⲙ ϩⲁⲛⲣⲉϥⲧⲁⲗϭⲟ ⲛ̀ⲧⲉ ⲛⲓⲡⲉⲧϩⲱⲟⲩ ⲧⲏⲣⲟⲩ.
     ⲉ̅. Ⲉⲥⲉ̀ϣⲱⲡⲓ ⲇⲉ ⲛⲱⲧⲉⲛ ⲉⲣⲉⲧⲉⲛⲉ̀ⲭⲁⲣⲱⲧⲉⲛ ⲟⲩⲟϩ ⲉⲥⲉ̀ⲓ̀ ⲛⲱⲧⲉⲛ ⲉ̀ⲃⲟⲗ ⲛ̀ϫⲉ ⲟⲩⲥⲟⲫⲓⲁ.
     Ⲋ. Ⲥⲱⲧⲉⲙ ⲉ̀ⲡⲓⲥⲟϩⲓ ⲛ̀ⲧⲉ ⲣⲱⲓ ⲟⲩⲟϩ ⲙⲁϩ̀ⲑⲏⲧⲉⲛ ⲉ̀ⲡ̀ϩⲁⲡ ⲛ̀ⲧⲉ ⲛⲁⲥ̀ⲫⲟⲧⲟⲩ.
     ⲍ̅. Ⲙⲏ ⲁⲣⲉⲧⲉⲛⲥⲁϫⲓ ⲁⲛ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ : ⲧⲉⲧⲉⲛⲛⲁϫⲉ ⲟⲩⲭ̀ⲣⲟϥ ⲇⲉ ⲙ̀ⲡⲉϥⲙ̀ⲑⲟ.
     ⲏ̅. Ⲓⲉ ⲧⲉⲧⲉⲛⲭⲁⲣⲱⲧⲉⲛ:ⲛ̀ⲑⲱⲧⲉⲛ ⲇⲉ ⲁⲣⲓⲣⲉϥϯϩⲁⲡ.
     ⲑ̅. Ⲛⲁⲛⲉⲥ ⲇⲉ ⲉϣⲱⲡ ⲛ̀ⲧⲉϥϧⲉⲧϧⲉⲧ ⲑⲏⲛⲟⲩ : ⲉϣⲱⲡ ⲅⲁⲣ ⲉⲣⲉⲧⲉⲛⲓ̀ⲣⲓ ⲛ̀ϩⲱⲃ ⲛⲓⲃⲉⲛ ⲉⲧⲟⲩⲛⲁⲟⲩⲁϩ ⲑⲏⲛⲟⲩ ⲉ̀ⲣⲱⲟⲩ ϥ̀ⲛⲁⲥⲟϩⲓ ⲙ̀ⲙⲱⲧⲉⲛ ϧⲉⲛ ⲟⲩⲥ̀ⲃⲟⲕ ⲁⲛ.
     ⲓ̅. Ⲉϣⲱⲡ ⲇⲉ ⲛ̀ⲧⲉⲧⲉⲛϫⲟⲩϣⲧ ⲉ̀ϩⲟ ϧⲉⲛ ⲡⲉⲧϩⲏⲡ.
     ⲓ̅ⲁ̅. Ⲙⲏ ⲥ̀ⲛⲁϣ̀ⲑⲉⲣⲧⲉⲣ ⲑⲏⲛⲟⲩ ⲁⲛ ⲛ̀ϫⲉ ⲧⲉϥϩⲉⲗⲓ.
     ⲓ̅ⲃ̅. Ⲟⲩϩⲟϯ ⲇⲉ ⲉⲥⲉ̀ⲓ̀ ⲉ̀ϫⲉⲛ ⲑⲏⲛⲟⲩ ⲉ̀ⲃⲟⲗϩⲓⲧⲟⲧϥ : ⲉϥⲉ̀ϣⲱⲡⲓ ⲛ̀ϫⲉ ⲡⲉⲧⲉⲛϣⲟⲩϣⲟⲩ ⲙ̀ⲫ̀ⲣⲏϯ ⲙ̀ⲡⲓⲕⲉⲣⲙⲓ : ⲡⲉⲧⲉⲛⲥⲱⲙⲁ ⲇⲉ ⲉϥⲉ̀ⲉⲣⲕⲁϩⲓ.
     ⲓ̅ⲅ̅. Ⲭⲁⲣⲱⲧⲉⲛ ϩⲓⲛⲁ ⲛ̀ⲧⲁⲥⲁϫⲓ ⲟⲩⲟϩ ⲛ̀ⲧⲁⲙ̀ⲧⲟⲛ ⲙ̀ⲙⲟⲓ ⲉ̀ⲃⲟⲗϩⲁ ⲟⲩϫⲱⲛⲧ.
     ⲓ̅ⲇ̅. Ⲉⲁⲓϭⲓ ⲛ̀ⲛⲁⲥⲁⲣⲝ ϧⲉⲛ ⲛⲁϣⲟⲗ: ⲧⲁⲩⲭⲏ ⲇⲉ ϯⲛⲁⲭⲁⲥ ϧⲉⲛ ⲛⲁϫⲓϫ.
     ⲓ̅ⲉ̅. Ⲉϣⲱⲡ ⲛ̀ⲧⲉϥϧⲟⲑⲃⲉⲧ ⲛ̀ϫⲉ ⲫⲏⲉⲧⲉ ⲟⲩⲟⲛϣ̀ϫⲟⲙ ⲙ̀ⲙⲟϥ : ⲉⲡⲓⲇⲏ ⲁϥⲉⲣⲡ̀ⲕⲉ ⲉⲣϩⲏⲧⲥ ⲙ̀ⲙⲟⲛ ϯⲛⲁⲥⲁϫⲓ ⲟⲩⲟϩ ϯⲛⲁⲥⲟϩⲓ ⲙ̀ⲡⲉϥⲙ̀ⲑⲟ.
     ⲓ̅Ⲋ. Ⲟⲩⲟϩ ⲫⲁⲓ ⲉϥⲉ̀ϣⲱⲡⲓ ⲛⲏⲓ ⲉⲩⲛⲟϩⲉⲙ : ⲙ̀ⲡⲁⲣⲉ ⲭ̀ⲣⲟϥ ⲅⲁⲣ ⲓ̀ ⲉ̀ϧⲟⲩⲛ ⲙ̀ⲡⲉϥⲙ̀ⲑⲟ.
     ⲓ̅ⲍ̅. Ⲥⲱⲧⲉⲙ ⲥⲱⲧⲉⲙ ⲉ̀ⲛⲁⲥⲁϫⲓ : ϯⲛⲁⲥⲁϫⲓ ⲅⲁⲣ ⲉⲣⲉⲧⲉⲛⲉ̀ⲥⲱⲧⲉⲙ.
     ⲓ̅ⲏ̅. Ϩⲏⲡⲡⲉ ⲓⲥ ϯϧⲉⲛⲧ ⲁ̀ⲛⲟⲕ ⲉ̀ⲡ̀ϩⲁⲡ : ϯⲉ̀ⲙⲓ ⲁ̀ⲛⲟⲕ ϫⲉ ϯⲛⲁⲟⲩⲱⲛϩ ⲉ̀ⲃⲟⲗ ⲉⲓⲟⲓ ⲛ̀ⲑ̀ⲙⲏⲓ.
     ⲓ̅ⲑ̅. Ⲛⲓⲙ ⲅⲁⲣ ⲉⲑⲛⲁϣ̀ϭⲓϩⲁⲡ ⲛⲉⲙⲏⲓ ϫⲉ ⲛ̀ⲧⲁⲭⲁⲣⲱⲓ ϯⲛⲟⲩ : ⲟⲩⲟϩ ϯⲛⲟⲩ ⲛ̀ⲧⲁⲭⲁⲧⲟⲧ ⲉ̀ⲃⲟⲗ.
     ⲕ̅. Ⲉⲕⲉ̀ⲉⲣⲭ̀ⲣⲁⲥⲑⲉ ⲇⲉ ⲛⲏⲓ ϧⲉⲛ ϩⲱⲃ ⲛⲓⲃⲉⲛ : ⲧⲟⲧⲉ ⲛ̀ⲛⲁⲭⲟⲡⲧ ⲉ̀ⲃⲟⲗϩⲁ ⲡⲉⲕϩⲟ.
     ⲕ̅ⲁ̅. Ⲱⲗⲓ ⲛ̀ⲧⲉⲕϫⲓϫ ⲉ̀ⲃⲟⲗϩⲁⲣⲟⲓ ⲟⲩⲟϩ ⲙ̀ⲡⲉⲛⲑ̀ⲣⲉⲥϣ̀ⲧⲉⲣⲑⲱⲣⲧ ⲛ̀ϫⲉ ⲧⲉⲕϩⲟϯ.
     ⲕ̅ⲃ̅. Ⲓⲧⲁ ⲉⲕⲉ̀ⲙⲟⲩϯ ⲁ̀ⲛⲟⲕ ⲇⲉ ϯⲛⲁⲉⲣⲟⲩⲱ̀ ⲛⲁⲕ : ⲓⲉ ⲛ̀ⲧⲉⲕⲥⲁϫⲓ ⲁ̀ⲛⲟⲕ ⲇⲉ ⲉⲓⲉ̀ⲟⲩⲱϩⲉⲙ ⲛⲁⲕ.
     ⲕ̅ⲅ̅. Ⲁⲩⲏⲣ ⲛⲉ ⲛⲁⲛⲟⲃⲓ ⲛⲉⲙ ⲛⲁⲁ̀ⲛⲟⲙⲓⲁ : ⲙⲁⲧⲁⲙⲟⲓ ϫⲉ ϩⲁⲛ ⲟⲩ ⲛⲉ.
     ⲕ̅ⲇ̅. Ⲉⲑⲃⲉ ⲟⲩ ⲕ̀ⲭⲱⲡ ⲙ̀ⲙⲟⲕ ⲉ̀ⲣⲟⲓ:ⲁⲕⲭⲁⲧ ⲇⲉ ⲛ̀ⲧⲟⲧⲕ ⲙ̀ⲫ̀ⲣⲏϯ ⲛ̀ⲟⲩⲁⲓ ⲉϥⲟⲩⲃⲏⲕ.
     ⲕ̅ⲉ̅. Ⲙⲏ ⲭ̀ⲛⲁⲉⲣϩⲟϯ ⲙ̀ⲫ̀ⲣⲏϯ ⲛ̀ⲟⲩϫⲱⲃⲓ ⲉⲣⲉ ⲡ̀ⲑⲏⲟⲩ ⲕⲓⲙ ⲉ̀ⲣⲟⲥ ⲓⲉ ⲁⲕϯⲟⲩⲃⲏⲓ ⲙ̀ⲫ̀ⲣⲏϯ ⲛ̀ⲟⲩⲥⲓⲙ ⲉⲣⲉ ⲡ̀ⲑⲏⲟⲩ ⲱ̀ⲗⲓ ⲙ̀ⲙⲟϥ.
     ⲕ̅Ⲋ. Ϫⲉ ⲁⲕⲥ̀ϧⲁⲓ ⲛ̀ϩⲁⲛⲡⲉⲧϩⲱⲟⲩ ϧⲁⲣⲟⲓ:ⲛⲓⲛⲟⲃⲓ ⲛ̀ⲧⲉ ⲧⲁⲙⲉⲧⲁ̀ⲗⲟⲩ ⲁⲕⲉⲛⲟⲩ ⲉ̀ϩ̀ⲣⲏⲓ ⲉ̀ϫⲱⲓ.
     ⲕ̅ⲍ̅. Ⲁⲕⲭⲱ ⲇⲉ ⲛ̀ⲧⲁϭⲁⲗⲟϫ ϧⲉⲛ ⲟⲩϣⲓⲕ : ⲁⲕⲁ̀ⲣⲉϩ ⲇⲉ ⲉ̀ⲛⲁϩ̀ⲃⲏⲟⲩⲓ̀ ⲧⲏⲣⲟⲩ : ⲁⲕϣⲉⲛⲁⲕ ⲇⲉ ⲉ̀ϧ̀ⲣⲏⲓ ⲛ̀ⲛⲓⲛⲟⲩⲛⲓ ⲛ̀ⲧⲉ ⲣⲁⲧ.
     ⲕ̅ⲏ̅. Ⲛⲏⲉϣⲁⲩⲉⲣⲁ̀ⲡⲁⲥ ⲙ̀ⲫ̀ⲣⲏϯ ⲛ̀ⲟⲩⲁⲥⲕⲟⲥ ⲓⲉ ⲙ̀ⲫ̀ⲣⲏϯ ⲛ̀ⲟⲩϩ̀ⲃⲱⲥ ⲉⲧⲁ ⲟⲩϩⲟⲗⲓ ⲟⲩⲟⲙϥ.

ⲕⲉⲫ ⲓ̅ⲇ̅

     ⲁ̅. Ⲫ̀ⲣⲱⲙⲓ ⲅⲁⲣ ⲙ̀ⲙⲓⲥⲓ ⲉ̀ⲃⲟⲗϧⲉⲛ ⲟⲩⲥ̀ϩⲓⲙⲓ ⲟⲩⲕⲟⲩϫⲓ ⲛ̀ⲁ̀ϩⲓ ⲡⲉ ⲟⲩⲟϩ ϥ̀ⲙⲉϩ ⲛ̀ϫⲱⲛⲧ.
     ⲃ̅. Ⲓⲉ ⲙ̀ⲫ̀ⲣⲏϯ ⲛ̀ⲟⲩϩ̀ⲣⲏⲣⲓ ⲉ̀ⲁⲥⲫⲓⲣⲓ ⲉ̀ⲃⲟⲗ ⲉ̀ⲁⲥϥⲟⲣϥⲉⲣ: ϣⲁⲥⲫⲱⲧ ⲇⲉ ⲙ̀ⲫ̀ⲣⲏϯ ⲛ̀ⲟⲩϧⲏⲓⲃⲓ ⲟⲩⲟϩ ⲛ̀ⲛⲉϥⲟ̀ϩⲓ ⲉ̀ⲣⲁⲧϥ.
     ⲅ̅. Ⲙⲏ ⲡⲁⲓⲭⲉⲧ ⲙ̀ⲡⲉⲕϥⲓⲱⲡ ⲛⲉⲙⲁϥ : ⲟⲩⲟϩ ⲁⲕⲑ̀ⲣⲉ ⲫⲁⲓ ⲓ̀ ⲉ̀ϧⲟⲩⲛ ⲙ̀ⲡⲉⲕⲙ̀ⲑⲟ ϧⲉⲛ ⲟⲩϩⲁⲡ.
     ⲇ̅. Ⲛⲓⲙ ⲅⲁⲣ ⲉⲑⲛⲁϣⲱⲡⲓ ⲉϥⲧⲟⲩⲃⲏⲟⲩⲧ ⲁⲧϭⲛⲉ ⲛⲟⲃⲓ : ⲁⲗⲗⲁ ⲙ̀ⲙⲟⲛ ϩ̀ⲗⲓ.
     ⲉ̅. Ⲕⲁⲛ ⲟⲩⲉ̀ϩⲟⲟⲩ ⲛ̀ⲟⲩⲱⲧ ⲡⲉ ⲡⲉϥϫⲓⲛⲱⲛϧ ϩⲓϫⲉⲛ ⲡ̀ⲕⲁϩⲓ : ⲟⲩⲟϩ ⲉⲩⲏⲡ ⲛ̀ⲧⲟⲧϥ ⲛ̀ϫⲉ ⲛⲉϥⲉⲃⲏⲧ ⲁⲕⲭⲁϥ ⲉ̀ⲟⲩⲭ̀ⲣⲟⲛⲟⲥ ⲟⲩⲟϩ ⲛ̀ⲛⲉϥⲥⲉⲛϥ.
     Ⲋ. Ϩⲉⲛⲕ ⲉ̀ⲃⲟⲗ ⲙ̀ⲙⲟϥ ϩⲓⲛⲁ ⲛ̀ⲧⲉϥϩⲉⲣⲓ ⲙ̀ⲙⲟϥ ⲟⲩⲟϩ ⲛ̀ⲧⲉϥϯⲙⲁϯ ϧⲉⲛ ⲡⲉϥϫⲓⲛⲱⲛϧ ⲙ̀ⲫ̀ⲣⲏϯ ⲛ̀ⲟⲩⲣⲉⲙⲃⲉⲭⲉ.
     ⲍ̅. Ⲡⲓϣ̀ϣⲏⲛ ⲅⲁⲣ ⲟⲩⲟⲛⲧⲉϥ ϩⲉⲗⲡⲓⲥ ⲙ̀ⲙⲁⲩ : ⲉϣⲱⲡ ⲇⲉ ⲁⲩϣⲁⲛⲕⲟⲣϫϥ ϣⲁϥⲫⲓⲣⲓ ⲉ̀ⲃⲟⲗ ⲟⲛ : ⲧⲉϥϩ̀ⲣⲓⲓ ⲇⲉ ⲙ̀ⲡⲁⲥⲙⲟⲩⲛⲕ.
     ⲏ̅. Ⲁⲥϣⲁⲛⲁⲓⲁⲓ ⲅⲁⲣ ϧⲉⲛ ⲡ̀ⲕⲁϩⲓ ⲛ̀ϫⲉ ⲧⲉϥⲛⲟⲩⲛⲓ : ⲟⲩⲟϩ ⲛ̀ⲧⲉϥⲙⲟⲩ ϧⲉⲛ ⲟⲩⲡⲉⲧⲣⲁ ⲛ̀ϫⲉ ⲡⲉϥϯⲟⲩⲱ̀.
     ⲑ̅. Ⲉϥⲉ̀ⲫⲓⲣⲓ ⲉ̀ⲃⲟⲗ ⲛ̀ⲧⲉⲛ ⲡ̀ⲥ̀ⲑⲟⲓ ⲛ̀ⲟⲩⲙⲱⲟⲩ : ⲉϥⲉ̀ⲉⲣ ⲟⲩⲧⲁϩ ⲇⲉ ⲙ̀ⲫ̀ⲣⲏϯ ⲛ̀ⲟⲩϭⲟ ⲙ̀ⲃⲉⲣⲓ.
     ⲓ̅. Ⲫ̀ⲣⲱⲙⲓ ⲇⲉ ⲁϥϣⲁⲛⲙⲟⲩ ⲁϥϣⲉⲛⲁϥ : ⲟⲩⲟϩ ⲁϥϣⲁⲛϩⲉⲓ ⲛ̀ϫⲉ ⲟⲩⲣⲱⲙⲓ ϥ̀ϣⲟⲡ ⲁⲛ ϫⲉ.
     ⲓ̅ⲁ̅. Ϧⲉⲛ ⲟⲩⲭ̀ⲣⲟⲛⲟⲥ ⲅⲁⲣ ϣⲁϥⲙⲟⲩⲛⲕ ⲛ̀ϫⲉ ⲫ̀ⲓⲟⲙ : ⲫ̀ⲓⲁⲣⲟ ⲇⲉ ϣⲁϥϣⲱϥ ⲟⲩⲟϩ ϣⲁϥϣⲱⲟⲩⲓ̀.
     ⲓ̅ⲃ̅. Ⲟⲩⲣⲱⲙⲓ ⲇⲉ ⲁϥϣⲁⲛⲉⲛⲕⲟⲧ ⲛ̀ⲛⲉϥⲧⲱⲛϥ ϩⲟⲥⲟⲛ ⲉⲥϣⲟⲡ ⲛ̀ϫⲉ ⲧ̀ⲫⲉ ⲟⲩⲟϩ ⲛ̀ⲛⲉϥⲧⲱⲙⲓ : ⲟⲩⲟϩ ⲛ̀ⲛⲟⲩⲛⲉϩⲥⲓ ⲉ̀ⲃⲟⲗϧⲉⲛ ⲡⲟⲩⲉⲛⲕⲟⲧ.
     ⲓ̅ⲅ̅. Ⲁⲙⲟⲓ ⲛⲉⲁⲕⲁ̀ⲣⲉϩ ⲉ̀ⲣⲟⲓ ⲡⲉ ϧⲉⲛ ⲁ̀ⲙⲉⲛϯ : ⲛ̀ⲧⲉⲕⲭⲟⲡⲧ ⲇⲉ ϣⲁⲛⲧⲉϥⲥⲓⲛⲓ ⲛ̀ϫⲉ ⲡⲉⲕϫⲱⲛⲧ : ⲟⲩⲟϩ ⲛ̀ⲧⲉⲕϯⲛⲉⲓ ⲛⲏⲓ ⲉ̀ⲟⲩⲭ̀ⲣⲟⲛⲟⲥ ⲉⲕⲛⲁⲉⲣⲡⲁⲙⲉⲩⲓ̀ ⲛ̀ϧⲏⲧϥ.
     ⲓ̅ⲇ̅. Ⲁϥϣⲁⲛⲙⲟⲩ ⲅⲁⲣ ⲛ̀ϫⲉ ⲫ̀ⲣⲱⲙⲓ ϥ̀ⲛⲁⲱⲛϧ ⲉ̀ⲁϥϫⲉⲕ ⲛⲓⲉ̀ϩⲟⲟⲩ ⲉ̀ⲃⲟⲗ ⲛ̀ⲧⲉ ⲡⲉϥⲱⲛϧ:ϯⲛⲁⲁ̀ⲙⲟⲛⲓ ⲛ̀ⲧⲟⲧ ϣⲁⲧⲟⲩⲑⲁⲙⲓⲟⲓ ⲛ̀ⲕⲉⲥⲟⲡ ⲟⲛ.
     ⲓ̅ⲉ̅. Ⲓⲧⲁ ⲉⲕⲉ̀ⲙⲟⲩϯ ⲁ̀ⲛⲟⲕ ⲇⲉ ⲉⲓⲉ̀ⲉⲣⲟⲩⲱ̀ ⲛⲁⲕ : ⲛⲓ
    ϩ̀ⲃⲏⲟⲩⲓ̀ ⲛ̀ⲧⲉ ⲛⲉⲕϫⲓϫ ⲙ̀ⲡⲉⲣⲭⲁⲩ ⲛ̀ⲥⲱⲕ.
     ⲓ̅Ⲋ. Ⲁⲕϭⲓⲏ̀ⲡⲓ ⲇⲉ ⲛ̀ⲛⲁϩ̀ⲃⲏⲟⲩⲓ̀ ⲧⲏⲣⲟⲩ : ⲟⲩⲟϩ ⲛ̀ⲛⲉ ϩ̀ⲗⲓ ⲛ̀ⲧⲉ ⲛⲁⲛⲟⲃⲓ ⲥⲉⲛⲕ.
     ⲓ̅ⲍ̅. Ⲁⲕⲉⲣⲥ̀ⲕⲉⲡⲁⲍⲓⲛ ⲇⲉ ⲛ̀ⲛⲁⲁ̀ⲛⲟⲙⲓⲁ ϧⲉⲛ ⲟⲩⲁ̀ⲥⲟⲩⲓ̀: ⲁⲕϯⲙⲏⲓⲛⲓ ⲇⲉ ⲛ̀ⲛⲏⲉⲧⲁⲓⲉⲣⲡⲁⲣⲁⲃⲉⲛⲓⲛ ⲙ̀ⲙⲱⲟⲩ ⲛ̀ϯⲟⲩⲱϣ ⲁⲛ.
     ⲓ̅ⲏ̅. Ⲡⲗⲏⲛ ⲟⲩⲧⲱⲟⲩ ⲉϥϩⲓⲱⲟⲩⲧ ⲉϥⲉ̀ϩⲉⲓ : ⲟⲩⲟϩ ⲟⲩⲡⲉⲧⲣⲁ ⲉⲥⲉⲣⲁ̀ⲡⲁⲥ ⲉ̀ⲃⲟⲗϧⲉⲛ ⲡⲉⲥⲙⲁ.
     ⲓ̅ⲑ̅. Ⲁ ϩⲁⲛⲙⲱⲟⲩ ⲥ̀ⲗⲁϫⲗⲉϫ ⲛ̀ϩⲁⲛⲱ̀ⲛⲓ : ⲟⲩⲟϩ ⲁ ϩⲁⲛⲙⲱⲟⲩ ⲑⲟⲩⲉⲗⲉ ⲛⲏⲉⲧϭⲟⲥⲓ ⲛ̀ⲧⲉ ⲡⲓⲟⲩⲁⲛ ⲛ̀ⲧⲉ ⲡ̀ⲕⲁϩⲓ : ⲟⲩⲟϩ ⲧ̀ϩⲩⲡⲟⲙⲟⲛⲏ ⲛ̀ⲧⲉ ⲟⲩⲣⲱⲙⲓ ⲁⲕⲧⲁⲕⲟⲥ.
     ⲕ̅. Ⲁⲕϯⲧⲟⲧⲕ ⲙ̀ⲙⲟϥ ⲟⲩⲟϩ ⲁϥϣⲉⲛⲁϥ ϣⲁ ⲉ̀ⲃⲟⲗ : ⲁⲕⲧⲁϫⲣⲟ ⲙ̀ⲡⲉⲕϩⲟ ⲉ̀ϩ̀ⲣⲏⲓ ⲉ̀ϫⲱϥ ⲟⲩⲟϩ ⲁⲕⲟⲩⲟⲣⲡϥ ⲉ̀ⲃⲟⲗ.
     ⲕ̅ⲁ̅. Ⲁⲩϣⲁⲛⲁ̀ϣⲁⲓ ⲇⲉ ⲛ̀ϫⲉ ⲛⲉϥϣⲏⲣⲓ ⲛ̀ϥ̀ⲉ̀ⲙⲓ ⲁⲛ:ⲁⲩϣⲁⲛⲥ̀ⲃⲟⲕ ⲇⲉ ϥ̀ⲥⲱⲟⲩⲛ ⲁⲛ.
     ⲕ̅ ⲃ̅. Ⲁⲗⲗⲁ ⲛⲉϥⲥⲁⲣⲝ ⲁⲩϭⲓⲙ̀ⲕⲁϩ:ⲧⲉϥⲩⲭⲏ ⲇⲉ ⲁⲥⲉⲣϩⲏⲃⲓ.

ⲕⲉⲫ ⲓ̅ⲉ̅

    Ϯⲙⲁϩⲃ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲉⲗⲓⲫⲁⲥ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲉⲗⲓⲫⲁⲥ ⲡⲓⲐⲉⲙⲁⲛⲓⲧⲏⲥ ⲡⲉϫⲁϥ ϫⲉ :
     ⲃ̅. Ⲙⲏ ⲟⲩⲟⲛ ⲟⲩⲥⲁⲃⲉ ⲛⲁϯ ⲛ̀ⲟⲩⲉⲣⲟⲩⲱ̀ ⲛ̀ⲟⲩⲕⲁϯ ⲛ̀ⲧⲉ ⲟⲩⲡ̅ⲛ̅ⲁ̅ : ⲁϥⲙⲁϩ ⲧⲉⲛⲛⲉϫⲓ ⲅⲁⲣ ⲛ̀ⲉⲙⲕⲁϩ.
     ⲅ̅. Ⲉϥⲉ̀ⲥⲟϩⲓ ϧⲉⲛ ϩⲁⲛⲥⲁϫⲓ ⲛ̀ⲥ̀ϣⲉ ⲁⲛ : ϧⲉⲛ ϩⲁⲛⲥⲁϫⲓ ⲙ̀ⲙⲟⲛ ϩⲏⲟⲩ ⲛ̀ϧⲏⲧⲟⲩ.
     ⲇ̅. Ⲙⲏ ϩⲱⲕ ⲉⲧⲁⲕⲭⲁ ⲧⲉϥϩⲟϯ ⲛ̀ⲥⲱⲕ : ⲁⲕϫⲉⲕ ϩⲁⲛⲥⲁϫⲓ ⲇⲉ ⲉ̀ⲃⲟⲗ ⲙ̀ⲡⲁⲓⲣⲏϯ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅.
     ⲉ̅. Ⲕ̀ⲟⲓ ⲛ̀ⲉ̀ⲛⲟⲭⲟⲥ ⲉ̀ⲛⲓⲥⲁϫⲓ ⲛ̀ⲧⲉ ⲣⲱⲕ:ⲙ̀ⲡⲉⲕⲉⲣⲇⲓⲁⲕⲕⲣⲓⲛⲓⲛ ⲉ̀ⲛⲓⲥⲁϫⲓ ⲛ̀ⲧⲉ ⲛⲓⲣⲉⲙⲛ̀ϫⲟⲙ.
     Ⲋ. Ⲉϥⲉ̀ⲥⲟϩⲓ ⲙ̀ⲙⲟⲕ ⲛ̀ϫⲉ ⲣⲱⲕ ⲟⲩⲟϩ ⲁ̀ⲛⲟⲕ ⲁⲛ : ⲛⲉⲕⲥ̀ⲫⲟⲧⲟⲩ ⲇⲉ ⲉⲩⲉ̀ⲉⲣⲙⲉⲑⲣⲉ ϧⲁⲣⲟⲕ.
     ⲍ̅. Ⲟⲅⲁⲣ ⲙⲏ ⲁⲩⲙⲁⲥⲕ ϧⲁⲧ̀ϩⲏ ⲛ̀ⲣⲱⲙⲓ ⲛⲓⲃⲉⲛ : ⲓⲉ ⲁⲕϭⲱⲥ ϧⲁⲧ̀ϩⲏ ⲛ̀ⲛⲓⲧⲱⲟⲩ.
     ⲏ̅. Ⲓⲉ ⲁⲕⲥⲱⲧⲉⲙ ⲉ̀ⲡⲓⲟⲩⲁϩⲥⲁϩⲛⲓ ⲛ̀ⲧⲉ Ⲡⲟ̅ⲥ̅ : ⲁⲥⲫⲟϩ ⲇⲉ ⲉ̀ⲣⲟⲕ ⲛ̀ϫⲉ ϯⲥⲟⲫⲓⲁ.
     ⲑ̅. Ⲟⲩ ⲅⲁⲣ ⲉⲧⲉⲕⲥⲱⲟⲩⲛ ⲙ̀ⲙⲟϥ ⲛ̀ⲧⲉⲛⲥⲱⲟⲩⲛ ⲙ̀ⲙⲟϥ ⲁⲛ : ⲓⲉ ⲟⲩ ⲡⲉⲧⲉⲕⲕⲁϯ ⲉ̀ⲣⲟϥ ⲉϩⲟⲧⲉⲣⲟⲛ.
     ⲓ̅. Ⲕⲉ ⲅⲁⲣ ⲛ̀ⲑⲟⲕ ⲟⲩϧⲉⲗⲗⲟ ⲟⲩⲟϩ ⲛ̀ⲑⲟⲕ ⲟⲩⲁ̀ⲡⲁⲥ ⲛ̀ϧⲏⲧⲉⲛ : ⲕ̀ϩⲟⲣϣ ⲉ̀ⲡⲉⲕⲓⲱⲧ ϧⲉⲛ ϩⲁⲛⲉ̀ϩⲟⲟⲩ.
     ⲓ̅ⲁ̅. Ⲛ̀ⲧ̀ϣⲉⲃⲓⲱ ⲛ̀ⲛⲉⲕⲛⲟⲃⲓ Ⲁⲩⲉⲣⲙⲁⲥⲧⲓⲅⲅⲟⲓⲛ ⲙ̀ⲙⲟⲕ ⲛ̀ⲟⲩⲕⲟⲩϫⲓ ⲁⲕⲥⲁϫⲓ ⲛ̀ϩⲁⲛⲛⲓϣϯ ⲉⲙⲁϣⲱ.
     ⲓ̅ⲃ̅. Ⲟⲩ ⲡⲉ ⲉⲧⲁ ⲡⲉⲕϩⲏⲧ ⲉⲣⲧⲟⲗⲙⲁⲛ ⲉ̀ⲣⲟϥ : ⲓⲉ ⲟⲩ ⲡⲉ ⲉⲧⲁ ⲛⲉⲕⲃⲁⲗ ϫⲟⲩϣⲧ ⲉ̀ⲣⲟϥ.
     ⲓ̅ⲅ̅. Ϫⲉ ⲟⲩϫⲱⲛⲧ ⲉⲧⲁⲕⲥⲁϫⲓ ⲙ̀ⲙⲟϥ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ : ⲉⲕⲉ̀ⲛ ϩⲁⲛⲥⲁϫⲓ ⲙ̀ⲡⲁⲓⲣⲏϯ ⲉ̀ⲃⲟⲗϧⲉⲛ ⲣⲱⲕ.
     ⲓ̅ⲇ̅. Ⲛⲓⲙ ⲅⲁⲣ ⲡⲉ ⲫ̀ⲣⲱⲙⲓ ϫⲉ ⲉϥⲉ̀ϣⲱⲡⲓ ⲉϥⲟⲓ ⲛ̀ⲁⲧⲁ̀ⲣⲓⲕⲓ : ⲓⲉ ⲟⲩ ⲡⲉ ⲟⲩⲙⲓⲥⲓ ⲉ̀ⲃⲟⲗϧⲉⲛ ⲟⲩⲥ̀ϩⲓⲙⲓ ϫⲉ ϥ̀ⲛⲁⲉⲣ ⲟⲩⲑ̀ⲙⲏⲓ.
     ⲓ̅ⲉ̅. Ⲓⲥϫⲉ ⲛⲏⲉⲑⲟⲩⲁⲃ ϥ̀ⲧⲉⲛϩⲟⲩⲧ ⲙ̀ⲙⲟⲥ ϧⲁⲣⲱⲟⲩ ⲁⲛ: ⲧ̀ⲫⲉ ⲇⲉ ⲥ̀ⲧⲟⲩⲃⲏⲟⲩⲧ ⲁⲛ ⲙ̀ⲡⲉϥⲙ̀ⲑⲟ.
     ⲓ̅Ⲋ. Ⲓⲉ ⲟⲩⲏⲣ ⲡⲉ ⲡⲓⲣⲱⲙⲓ ⲉⲧⲟ̀ⲣⲉⲃ ⲟⲩⲟϩ ⲉⲧϭⲁϧⲉⲙ: ⲉϥⲥⲉ ϭⲓⲛ̀ϫⲟⲛⲥ ⲙ̀ⲫ̀ⲣⲏϯ ⲛ̀ⲟⲩⲣⲉϥⲥⲱ .
     ⲓ̅ⲍ̅. Ϯⲛⲁⲧⲁⲙⲟⲕ ⲟⲩⲛ ⲥⲱⲧⲉⲙ ⲉ̀ⲣⲟⲓ : ⲛⲏⲉⲧⲁⲓⲛⲁⲩ ⲉ̀ⲣⲱⲟⲩ ϯⲛⲁϫⲟⲧⲟⲩ ⲛⲁⲕ.
     ⲓ̅ⲏ̅. Ⲛⲏⲉⲧⲟⲩⲛⲁϫⲟⲧⲟⲩ ⲛ̀ϫⲉ ⲛⲓⲥⲁⲃⲉⲩ ⲟⲩⲟϩ ⲙ̀ⲡⲟⲩⲭⲟⲡⲟⲩ ⲛ̀ϫⲉ ⲛⲟⲩⲓⲟϯ.
     ⲓ̅ⲑ̅. Ⲛ̀ⲑⲱⲟⲩ ⲇⲉ ⲙ̀ⲙⲁⲩⲁⲧⲟⲩ ⲁⲩϯ ⲙ̀ⲡⲓⲕⲁϩⲓ ⲛⲱⲟⲩ: ⲟⲩⲟϩ ⲙ̀ⲡⲉϥⲓ̀ ⲛ̀ϫⲉ ⲟⲩϣⲉⲙⲙⲟ ⲉ̀ϩ̀ⲣⲏⲓ ⲉ̀ϫⲱⲟⲩ.
     ⲕ̅. Ⲡ̀ⲱⲛϧ ⲅⲁⲣ ⲧⲏⲣϥ ⲙ̀ⲡⲓⲁ̀ⲥⲉⲃⲏⲥ ⲁϥⲭⲏ ϧⲉⲛ ⲟⲩⲣⲱⲟⲩϣ : ϩⲁⲛⲣⲟⲙⲡⲓ ⲇⲉ ⲉⲩⲏⲡ ⲉⲧⲧⲟⲓ ⲛ̀ⲟⲩⲣⲉⲙⲛ̀ϫⲟⲙ.
     ⲕ̅ⲁ̅. Ⲧⲉϥϩⲟϯ ⲇⲉ ⲁⲥⲭⲏ ϧⲉⲛ ⲛⲉϥⲙⲁϣϫ : ϩⲟⲧⲁⲛ ⲁϥϣⲁⲛⲙⲉⲩⲓ̀ ϫⲉ ⲁϥⲉⲣϩⲓⲣⲏⲛⲏ ϣⲁϥⲓ̀ ⲛ̀ϫⲉ ⲡⲉϥⲟⲩⲱϫⲡ.
     ⲕ̅ⲃ̅. Ⲙ̀ⲡⲉⲛⲑ̀ⲣⲉϥⲧⲉⲛϩⲟⲩⲧⲥ ϫⲉ ⲉϥⲛⲁⲉⲣ ⲉ̀ⲃⲟⲗ ⲉ̀ⲡ̀ⲭⲁⲕⲓ : ⲁϥⲧⲏⲓϥ ⲅⲁⲣ ϩⲏⲇⲏ ⲉ̀ⲧⲟⲧϥ ⲙ̀ⲫ̀ⲃⲉⲛⲓⲡⲓ.
     ⲕ̅ⲅ̅. Ⲁⲩⲑⲁϣϥ ⲉ̀ϩⲁⲛϧ̀ⲣⲏⲟⲩⲓ̀ ⲛ̀ⲛⲓⲛⲟϣⲉⲣ : ϥ̀ⲥⲱⲟⲩⲛ ⲇⲉ ⲛ̀ϧ̀ⲣⲏⲓ ⲛ̀ϧⲏⲧϥ ϫⲉ ⲁϥⲭⲏ ⲉⲩⲟⲩⲱϫⲡ : ⲉϥⲉ̀ϣ̀ⲧⲉⲣⲑⲱⲣϥ ⲇⲉ ⲛ̀ϫⲉ ⲟⲩⲉ̀ϩⲟⲟⲩ ⲛ̀ⲭⲁⲕⲓ.
     ⲕ̅ⲇ̅. Ⲟⲩⲁⲛⲁⲅⲕⲏ ⲇⲉ ⲛⲉⲙ ⲟⲩⲑ̀ⲗⲓⲓⲥ ⲉⲩⲉ̀ⲁ̀ⲙⲟⲛⲓ ⲙ̀ⲙⲟϥ : ⲙ̀ⲫ̀ⲣⲏϯ ⲛ̀ⲟⲩⲥⲁⲧⲏⲅⲟⲩⲥ ⲉϥϧⲉⲛ ⲟⲩⲙⲉⲧⲛⲓϣϯ ⲟⲩⲟϩ ⲛ̀ⲧⲉϥϩⲉⲓ.
     ⲕ̅ⲉ̅. Ϫⲉ ⲁϥϭⲓⲥⲓ ⲛ̀ⲛⲉϥϫⲓϫ ⲟⲩⲃⲉ Ⲡⲟ̅ⲥ̅:ⲁϥⲧⲱⲟⲩⲛ ⲇⲉ ⲛ̀ⲧⲉϥⲛⲁϩⲃⲓ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ Ⲡⲓⲡⲁⲛⲧⲟⲕⲣⲁⲧⲱⲣ.
     ⲕ̅Ⲋ. Ⲁϥϭⲟϫⲓ ⲇⲉ ⲙ̀ⲡⲉϥⲙ̀ⲑⲟ ϧⲉⲛ ⲟⲩϣⲱϣ ϧⲉⲛ ⲧⲉϥϧ̀ⲑⲏ ϧⲉⲛ ⲡ̀ⲥⲟⲓ ⲛ̀ⲧⲉ ⲧⲉϥϣⲉⲃϣⲓ.
     ⲕ̅ⲍ̅. Ϫⲉ ⲁϥϩⲱⲃⲥ ⲙ̀ⲡⲉϥϩⲟ ϧⲉⲛ ⲡⲉϥⲱⲧ : ⲟⲩⲟϩ ⲁϥⲑⲁⲙⲓⲟ ⲛ̀ⲟⲩⲡⲉⲣⲓⲥⲧⲟⲙⲓⲟⲛ ϩⲓ ⲛⲉϥⲁ̀ⲗⲱϫ ⲉϥⲉ̀ϣⲱⲡⲓ ϧⲉⲛ ϩⲁⲛⲃⲁⲕⲓ ⲛ̀ϣⲁϥⲉ.
     ⲕ̅ⲏ̅. Ⲉϥⲉ̀ϣⲉⲛⲁϥ ⲇⲉ ⲉ̀ϧⲟⲩⲛ ⲉ̀ϩⲁⲛⲏⲓ ⲙ̀ⲙⲟⲛ ⲡⲉⲧϣⲟⲡ ⲛ̀ϧⲏⲧⲟⲩ.
     ⲕ̅ⲑ̅. Ⲛⲏ ⲇⲉ ⲉⲧⲁⲩⲑⲟⲩⲱⲧⲟⲩ ⲛ̀ϫⲉ ⲛⲏ ⲉⲩⲉ̀ⲟⲗⲟⲩ ⲛ̀ϫⲉ ϩⲁⲛⲕⲉⲭⲱⲟⲩⲛⲓ ⲟⲩⲇⲉ ⲛ̀ⲛⲉϥⲉⲣⲣⲁⲙⲁⲟ̀ : ⲟⲩⲇⲉ ⲛ̀ⲛⲟⲩⲟ̀ϩⲓ ⲛ̀ϫⲉ ⲉϥϩⲩⲡⲁⲣⲭⲟⲛⲧⲁ.
     ⲗ̅. Ⲟⲩⲇⲉ ⲛ̀ⲛⲉϥϩⲓⲟⲩⲓ̀ ⲛ̀ⲟⲩϧⲏⲓⲃⲓ ϩⲓϫⲉⲛ ⲡ̀ⲕⲁϩⲓ : ⲟⲩⲇⲉ ⲛ̀ⲛⲉϥⲉⲣ ⲉ̀ⲃⲟⲗ ⲉ̀ⲡ̀ⲭⲁⲕⲓ : ⲫⲏⲉⲑⲛⲁⲣⲱⲧ ⲛ̀ⲧⲁϥ ⲉϥⲉ̀ⲑ̀ⲣⲉϥⲗⲱⲙ ⲛ̀ϫⲉ ⲡ̀ⲑⲏⲟⲩ.
     ⲗ̅ⲁ̅. Ⲉⲥⲉ̀ϥⲟⲣϥⲉⲣ ⲛ̀ϫⲉ ⲧⲉϥϩ̀ⲣⲏⲣⲓ ⲙ̀ⲡⲉⲛⲑ̀ⲣⲉϥⲧⲉⲛϩⲟⲩⲧⲥ ϫⲉ ϥ̀ⲛⲁϣⲱⲡⲓ ⲉϥⲥ̀ⲙⲟⲛⲧ : ϩⲁⲛⲡⲉⲧϣⲟⲩⲓⲧ ⲅⲁⲣ ⲉⲩⲉ̀ⲓ̀ ⲛⲁϥ ⲉ̀ⲃⲟⲗ.
     ⲗ̅ⲃ̅. Ⲡⲉϥϣⲁⲧϣⲉ ⲉϥⲉ̀ⲧⲁⲕⲟ ⲙ̀ⲡⲁⲧⲉⲥⲉⲣⲛⲉⲓ : ⲡⲉϥϫⲁⲗ ⲛ̀ⲛⲉϥⲫⲓⲣⲓ ⲉ̀ⲃⲟⲗ.
     ⲗ̅ⲅ̅. Ⲉϥⲉ̀ϭⲟⲗϥ ⲇⲉ ⲙ̀ⲫ̀ⲣⲏϯ ⲛ̀ⲟⲩϣⲉⲗϣⲏⲓⲗⲓ ⲙ̀ⲡⲁⲧⲉⲥⲉⲣⲛⲉⲓ : Ⲉϥⲉ̀ϥⲟⲣϥⲉⲣ ⲇⲉ ⲙ̀ⲫ̀ⲣⲏϯ ⲛ̀ⲟⲩϩ̀ⲣⲏⲣⲓ ⲛ̀ϫⲱⲓⲧ.
     ⲗ̅ⲇ̅. Ϯⲙⲉⲧⲙⲉⲑⲣⲉ ⲅⲁⲣ ⲛ̀ⲧⲉ ⲡⲓⲁ̀ⲥⲉⲃⲏⲥ ⲫ̀ⲙⲟⲩ ⲡⲉ : ⲟⲩⲭ̀ⲣⲱⲙ ⲅⲁⲣ ⲉϥⲉ̀ⲣⲱⲕϩ ⲛ̀ⲛⲓⲏⲓ ⲛ̀ⲛⲓⲣⲉϥϭⲓ ⲇⲱⲣⲟⲛ.
     ⲗ̅ⲉ̅. Ⲉϥⲉ̀ϭⲓ ⲇⲉ ⲛ̀ϩⲁⲛⲉⲙⲕⲁϩⲛ̀ϩⲏⲧ ϧⲉⲛ ⲧⲉϥⲛⲉϫⲓ : ϩⲁⲛⲡⲉⲧϣⲟⲩⲓⲧ ⲇⲉ ⲉⲩⲉ̀ⲓ̀ ⲛⲁϥ ⲉ̀ⲃⲟⲗ : ⲧⲉϥⲛⲉϫⲓ ⲇⲉ ⲉⲥⲉ̀ϣⲱⲡⲓ ϧⲉⲛ ⲟⲩⲭ̀ⲣⲟϥ.

ⲕⲉⲫ ⲓ̅Ⲋ

    Ϯⲙⲁϩⲇ̅ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲓⲱⲃ ⲡⲉϫⲁϥ ϫⲉ :
     ⲃ̅. Ⲁⲓⲥⲱⲧⲉⲙ ⲅⲁⲣ ⲉ̀ⲟⲩⲙⲏϣ ⲙ̀ⲡⲁⲓⲣⲏϯ : ⲛⲓⲣⲉϥϯⲛⲟⲙϯ ⲧⲏⲣⲟⲩ ⲛ̀ⲧⲉ ⲛⲓⲥⲁⲙ̀ⲡⲉⲧϩⲱⲟⲩ.
     ⲅ̅. Ⲟⲩ ⲅⲁⲣ ⲙⲏ ⲟⲩⲧⲁⲝⲓⲥ ⲉⲧϣⲟⲡ ⲛ̀ⲛⲓⲥⲁϫⲓ ⲛ̀ⲧⲉ ⲡⲓⲡ̅ⲛ̅ⲁ̅ : ⲓⲉ ⲟⲩ ⲡⲉ ⲉⲧⲉⲣⲟ̀ⲛⲟⲭⲗⲓⲛ ⲛⲁⲕ ϫⲉ ⲁⲕⲉⲣⲟⲩⲱ̀.
     ⲇ̅. Ⲁⲛⲟⲕ ϩⲱ ϯⲛⲁⲥⲁϫⲓ ⲙ̀ⲡⲉⲧⲉⲛⲣⲏϯ : ⲉ̀ⲛⲁⲥⲭⲏ ⲡⲉ ⲛ̀ϫⲉ ⲧⲉⲧⲉⲛⲩⲭⲏ ⲛ̀ⲧ̀ϣⲉⲃⲓⲱ ⲛ̀ⲑⲱⲓ.
     ⲉ̅. Ⲓⲧⲁ ⲉⲓⲉ̀ⲧⲱⲟⲩⲛⲟⲩ ⲉ̀ϫⲉⲛ ⲑⲏⲛⲟⲩ : ϧⲉⲛ ϩⲁⲛⲥⲁϫⲓ ϯⲛⲁⲕⲓⲙ ⲇⲉ ⲛ̀ⲧⲁⲁ̀ⲫⲉ ϧⲁⲣⲱⲧⲉⲛ.
     Ⲋ. Ⲉⲥⲉ̀ϣⲱⲡⲓ ⲇⲉ ϧⲉⲛ ⲣⲱⲓ ⲛ̀ϫⲉ ⲟⲩϫⲟⲙ : ⲡ̀ⲕⲓⲙ ⲇⲉ ⲛ̀ⲧⲉ ⲛⲁⲥ̀ⲫⲟⲧⲟⲩ ⲛ̀ⲛⲁϯⲁ̀ⲥⲟ ⲉ̀ⲣⲟϥ.
     ⲍ̅. Ⲁⲓϣⲁⲛⲥⲁϫⲓ ⲅⲁⲣ ⲛ̀ⲛⲁⲙ̀ⲕⲁⲩϩ ⲉ̀ⲡⲁⲉⲣϧⲟⲧ : ⲁⲓϣⲁⲛⲭⲁⲣⲱⲓ ⲇⲉ ⲟⲛ ⲟⲩ ⲡⲉ ⲡ̀ⲥ̀ⲃⲟⲕ ⲛ̀ⲧⲉ ⲡⲁⲙ̀ⲕⲁϩ.
     ⲏ̅. Ϯⲛⲟⲩ ⲇⲉ ⲁϥϯϧⲓⲥⲓ ⲛⲏⲓ ⲁϥⲁⲓⲧ ⲛ̀ⲥⲟϫ ⲉ̀ⲁⲓⲉⲣϩⲟⲗⲓ ⲟⲩⲟϩ ⲁϥⲁ̀ⲙⲟⲛⲓ ⲙ̀ⲙⲟⲓ.
     ⲑ̅. Ⲁⲥϣⲱⲡⲓ ⲉⲩⲙⲉⲧⲙⲉⲑⲣⲉ ⲟⲩⲟϩ ⲁⲥⲧⲱⲛⲥ ⲛ̀ϧⲏⲧ ⲛ̀ϫⲉ ⲧⲁⲙⲉⲑⲛⲟⲩϫ : ⲁⲥⲉⲣⲟⲩⲱ̀ ⲟⲩⲃⲏⲓ ⲙ̀ⲡⲉⲙ̀ⲑⲟ ⲙ̀ⲡⲁϩⲟ.
     ⲓ̅. Ⲉⲁϥⲉⲣⲭ̀ⲣⲁⲥⲑⲉ ϧⲉⲛ ⲟⲩϫⲱⲛⲧ : ⲁϥⲣⲱϧⲧ ⲙ̀ⲙⲟⲓ ⲉ̀ϧ̀ⲣⲏⲓ: ⲁϥϧ̀ⲣⲁϫⲣⲉϫ ⲛ̀ⲛⲉϥⲛⲁϫϩⲓ ⲉ̀ϩ̀ⲣⲏⲓ ⲉ̀ϫⲱⲓ: ⲁϥⲓ̀ⲛⲓ ⲉ̀ϩ̀ⲣⲏⲓ ⲉ̀ϫⲱⲓ ⲛ̀ⲛⲓⲥⲟⲑⲛⲉϥ ⲛ̀ⲧⲉ ⲛⲉϥⲣⲉϥϫⲱⲛⲧ.
     ⲓ̅ⲁ̅. Ⲁϥⲉⲣⲛⲓϣϯ ⲉ̀ϩ̀ⲣⲏⲓ ⲉ̀ϫⲱⲓ ϧⲉⲛ ⲟⲩⲑⲟⲩⲝ ⲛ̀ⲧⲉ ⲛⲉϥⲃⲁⲗ : ⲁⲩϯ ⲛ̀ⲟⲩⲉⲣϧⲟⲧ ⲛⲏⲓ ⲉ̀ϫⲉⲛ ⲛⲁⲕⲉⲗⲓ ϧⲉⲛ ⲟⲩⲉⲛⲭⲁⲓ ⲉϥϫⲟⲩⲕϩ : ⲁⲩϭⲟϫⲓ ⲇⲉ ⲉ̀ϩ̀ⲣⲏⲓ ⲉ̀ϫⲱⲓ ⲉⲩⲥⲟⲡ.
     ⲓ̅ⲃ̅. Ⲁϥⲧⲏⲓⲧ ⲅⲁⲣ ⲛ̀ϫⲉ Ⲡⲟ̅ⲥ̅ ⲉ̀ϧ̀ⲣⲏⲓ ⲉ̀ⲛⲉⲛϫⲓϫ ⲛ̀ϩⲁⲛⲣⲉϥϭⲓⲛ̀ϫⲟⲛⲥ : ⲁϥⲃⲉⲣⲃⲱⲣⲧ ⲇⲉ ⲉ̀ϫⲉⲛ ϩⲁⲛⲁ̀ⲥⲉⲃⲏⲥ.
     ⲓ̅ⲅ̅. Ⲉⲓⲟⲓ ⲛ̀ϩⲓⲣⲏⲛⲏ ⲁϥϫⲟⲣⲧ ⲉ̀ⲃⲟⲗ : ⲟⲩⲟϩ ⲁϥⲁ̀ⲙⲟⲛⲓ ⲙ̀ⲡ̀ϥⲱⲓ ⲛ̀ⲧⲉ ⲧⲁⲁ̀ⲫⲉ ⲁϥϥⲟϫⲧ : ⲁϥⲧⲁϩⲟⲓ ⲉ̀ⲣⲁⲧ ⲙ̀ⲫ̀ⲣⲏϯ ⲛ̀ⲟⲩⲥ̀ⲕⲟⲡⲟⲥ.
     ⲓ̅ⲇ̅. Ⲁⲩⲕⲱϯ ⲉ̀ⲣⲟⲓ ⲛ̀ϩⲁⲛⲗⲟⲅⲭⲏ ⲁⲩϩⲓⲟⲩⲓ̀ ⲙ̀ⲙⲱⲟⲩ ⲛ̀ⲛⲁϭⲗⲱⲧ ⲛ̀ⲥⲉϯⲁ̀ⲥⲟ ⲁⲛ : ⲁⲩⲫⲱⲛ ⲙ̀ⲡⲁϣⲁϣⲓ ϩⲓϫⲉⲛ ⲡⲓⲕⲁϩⲓ.
     ⲓ̅ⲉ̅. Ⲁⲩⲧⲁⲟⲩⲟⲓ ⲉ̀ϩ̀ⲣⲏⲓ ⲉ̀ⲟⲩϩ̀ⲧⲟⲡ ⲉ̀ϫⲉⲛ ⲟⲩϩ̀ⲧⲟⲡ : ⲁⲩϭⲟϫⲓ ⲉ̀ϫⲱⲓ ⲛ̀ϫⲉ ϩⲁⲛϫⲱⲣⲓ.
     ⲓ̅Ⲋ. Ⲁⲩⲃⲟⲣⲃⲉⲣ ⲛ̀ⲟⲩⲥⲟⲕ ⲉ̀ϫⲉⲛ ⲡⲁϣⲁⲣ : ⲧⲁϫⲟⲙ ⲇⲉ ⲁⲥϭⲉⲛⲟ ϩⲓϫⲉⲛ ⲡⲓⲕⲁϩⲓ.
     ⲓ̅ⲍ̅. Ⲁⲥⲣⲱⲕϩ ⲛ̀ϫⲉ ⲧⲁⲛⲉϫⲓ ⲉ̀ⲃⲟⲗϧⲉⲛ ⲫ̀ⲣⲓⲙⲓ : ⲟⲩⲟϩ ⲟⲩϧⲏⲓⲃⲏ ⲉⲧⲭⲏ ϩⲓϫⲉⲛ ⲛⲁⲃⲟⲩϩⲓ.
     ⲓ̅ⲏ̅. Ⲛⲉ ⲙ̀ⲙⲟⲛ ϩ̀ⲗⲓ ⲛ̀ϭⲓⲛ̀ϫⲟⲛⲥ ϧⲉⲛ ⲛⲁϫⲓϫ : ⲥ̀ⲧⲟⲩⲃⲏⲟⲩⲧ ⲇⲉ ⲛ̀ϫⲉ ⲧⲁⲡ̀ⲣⲟⲥⲉⲩⲭⲏ.
     ⲓ̅ⲑ̅. Ⲡ̀ⲕⲁϩⲓ ⲙ̀ⲡⲉⲛⲑ̀ⲣⲉϥϩⲱⲃⲥ ⲉ̀ⲃⲟⲗ ⲉ̀ϫⲉⲛ ⲡ̀ⲥ̀ⲛⲟϥ ⲛ̀ⲧⲁⲥⲁⲣⲝ : ⲟⲩⲟϩ ⲙ̀ⲡⲉⲛⲑ̀ⲣⲉ ⲙⲁ ϣⲱⲡⲓ ⲙ̀ⲡⲁϧ̀ⲣⲱⲟⲩ.
     ⲕ̅. Ⲟⲩⲟϩ ϯⲛⲟⲩ ϥ̀ϣⲟⲡ ϧⲉⲛ ⲧ̀ⲫⲉ ⲛ̀ϫⲉ ⲡⲁⲙⲉⲑⲣⲉ : ⲫⲏⲉⲧⲥⲱⲟⲩⲛ ⲙ̀ⲙⲟⲓ ϧⲉⲛ ⲛⲏⲉⲧϭⲟⲥⲓ.
     ⲕ̅ⲁ̅. Ⲉϥⲉ̀ⲫⲟϩ ⲉ̀ϧⲟⲩⲛ ϩⲁ Ⲡⲟ̅ⲥ̅ ⲛ̀ϫⲉ ⲡⲁⲧⲱⲃϩ : ⲡⲁⲃⲁⲗ ⲇⲉ ⲉϥⲉ̀ⲧⲁⲟⲩⲟ̀ ⲉⲣⲙⲏ ⲉ̀ⲡⲉⲥⲏⲧ ⲙ̀ⲡⲉϥⲙ̀ⲑⲟ.
     ⲕ̅ⲃ̅. Ⲉϥⲉ̀ϣⲱⲡⲓ ⲇⲉ ⲛ̀ϫⲉ ⲟⲩⲥⲟϩⲓ ⲛ̀ⲟⲩⲣⲱⲙⲓ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ : ⲟⲩⲟϩ ⲡ̀ϣⲏⲣⲓ ⲛ̀ⲟⲩⲣⲱⲙⲓ ⲙ̀ⲡⲉϥϣ̀ⲫⲏⲣ.
     ⲕ̅ⲅ̅. Ⲁⲩⲓ̀ ⲇⲉ ⲛ̀ϫⲉ ϩⲁⲛⲣⲟⲙⲡⲓ ⲙ̀ⲙⲟⲛ ⲏ̀ⲡⲓ ⲧⲟⲓ ⲉ̀ⲣⲱⲟⲩ : ϯⲛⲁϣⲉⲛⲏⲓ ϩⲓ ⲡⲓⲙⲱⲓⲧ ⲉ̀ϯⲛⲁⲧⲁⲥⲑⲟⲓ ⲁⲛ ϫⲉ ⲉ̀ⲃⲟⲗϩⲓⲱⲧϥ.

ⲕⲉⲫ ⲓ̅ⲍ̅

     ⲁ̅. Ϯⲛⲁϭⲓⲙ̀ⲕⲁϩ ⲇⲉ ⲉϥⲓ̀ⲛⲓ ⲙ̀ⲙⲟⲓ ⲛ̀ϫⲉ ⲟⲩⲡ̅ⲛ̅ⲁ̅ : ⲟⲩⲕⲁⲓⲥⲓ ⲡⲉ ⲉ̀ϯⲟ̀ϩⲓ ⲛⲁⲥ ⲟⲩⲟϩ ϯϭⲓ ⲙ̀ⲙⲟⲥ ⲁⲛ.
     ⲃ̅. Ϯϯϩⲟ ⲉⲓϧⲟⲥⲓ ⲟⲩⲟϩ ⲟⲩ ⲡⲉϯⲛⲁⲁⲓϥ : ⲁⲩⲕⲱⲗⲡ ⲇⲉ ⲛ̀ⲛⲁϩⲩⲡⲁⲣⲭⲟⲛⲧⲁ ⲛ̀ϫⲉ ϩⲁⲛϣⲉⲙ
    ⲙⲱⲟⲩ.
     ⲅ̅. Ⲛⲓⲙ ⲡⲉ ⲫⲁⲓ ⲙⲁⲣⲟⲩⲙⲟⲣϥ ⲛⲉⲙ ⲧⲁϫⲓϫ.
     ⲇ̅. Ϫⲉ ⲁⲩⲭⲱⲡ ⲙ̀ⲡⲟⲩϩⲏⲧ ⲉ̀ⲃⲟⲗϩⲁ ⲟⲩⲙⲉⲧⲥⲁⲃⲉ : ⲉⲑⲃⲉ ⲫⲁⲓ ⲛ̀ⲛⲉϥϭⲁⲥⲟⲩ ⲛ̀ϫⲉ Ⲫϯ.
     ⲉ̅. Ⲉϥⲉ̀ϫⲉ ϩⲁⲛⲕⲁⲕⲓⲁ ⲉ̀ϩ̀ⲣⲏⲓ ⲉ̀ϫⲱⲟⲩ : ⲛⲁⲃⲁⲗ ⲇⲉ ⲁⲩⲃⲱⲗ ⲉ̀ⲃⲟⲗ ⲉ̀ϫⲉⲛ ⲛⲁϣⲏⲣⲓ.
     Ⲋ. Ⲁⲩⲭⲁⲧ ⲇⲉ ⲉⲩϣ̀ϫⲏⲓ ϧⲉⲛ ⲛⲓⲉⲑⲛⲟⲥ : ⲁⲓϣⲱⲡⲓ ⲇⲉ ⲛⲱⲟⲩ ⲉⲩⲥⲱⲃⲓ.
     ⲍ̅. Ⲁⲩⲧⲱⲙⲧ ⲅⲁⲣ ⲛ̀ϫⲉ ⲛⲁⲃⲁⲗ ⲉ̀ⲃⲟⲗϧⲉⲛ ⲡ̀ϫⲱⲛⲧ: ⲁⲩⲃⲱⲧⲥ ⲉ̀ⲣⲟⲓ ⲉⲙⲁϣⲱ ⲛ̀ϫⲉ ⲟⲩⲟⲛ ⲛⲓⲃⲉⲛ.
     ⲏ̅. Ⲁⲩⲉⲣϣ̀ⲫⲏⲣⲓ ⲇⲉ ⲛ̀ϫⲉ ⲛⲓⲑ̀ⲙⲏⲓ ⲉ̀ϫⲉⲛ ⲫⲁⲓ :ⲟⲩⲑ̀ⲙⲏⲓ ⲇⲉ ⲉϥⲉ̀ⲧⲱⲛϥ ⲉ̀ϫⲉⲛ ⲟⲩⲡⲁⲣⲁⲛⲟⲙⲟⲥ.
     ⲑ̅. Ⲉϥⲉ̀ϭⲓ ⲇⲉ ⲙ̀ⲡⲉϥⲙⲱⲓⲧ ⲛ̀ϫⲉ ⲟⲩⲡⲓⲥⲧⲟⲥ : ⲡⲉⲧⲧⲟⲩⲃⲏⲟⲩⲧ ⲇⲉ ⲉϥⲉ̀ϭⲓ ⲛ̀ⲟⲩϫⲟⲙ ϧⲉⲛ ⲧⲉϥϫⲓϫ.
     ⲓ̅. Ⲙ̀ⲙⲟⲛ ⲇⲉ ⲁⲗⲗⲁ ⲙⲁⲧⲁϫⲣⲉ ⲑⲏⲛⲟⲩ ⲧⲏⲣⲟⲩ ⲟⲩⲟϩ ⲁ̀ⲙⲱⲓⲛⲓ : ϯⲙⲉⲑⲙⲏⲓ ⲅⲁⲣ ϧⲉⲛ ⲑⲏⲛⲟⲩ ⲁⲛ.
     ⲓ̅ⲁ̅. Ⲛⲁⲉ̀ϩⲟⲟⲩ ⲁⲩⲥⲓⲛⲓ ϧⲉⲛ ⲟⲩⲙ̀ⲣⲟϣⲧ : ⲁⲩⲫⲱϫⲓ ⲛ̀ϫⲉ ⲛⲓⲙⲟϯ ⲛ̀ⲧⲉ ⲡⲁϩⲏⲧ.
     ⲓ̅ⲃ̅. Ⲡⲓⲉ̀ϫⲱⲣϩ ⲇⲉ ⲁⲓⲭⲁϥ ⲉ̀ⲟⲩⲉ̀ϩⲟⲟⲩ : ⲫ̀ⲟⲩⲱⲓⲛⲓ ⲇⲉ ϧⲉⲛⲧ ⲉ̀ⲃⲟⲗϩⲁ ⲡ̀ϩⲟ ⲙ̀ⲡⲓⲭⲁⲕⲓ.
     ⲓ̅ⲅ̅. Ⲉϣⲱⲡ ⲅⲁⲣ ⲁⲓϣⲁⲛⲟⲩⲱⲙ ⲉ̀ⲣⲟⲓ ⲁ̀ⲙⲉⲛϯ ⲡⲉ ⲡⲁⲏⲓ : ϧⲉⲛ ⲟⲩⲅ̀ⲛⲟⲫⲟⲥ ⲇⲉ ⲁⲓⲫⲱⲣϣ ⲙ̀ⲡⲁⲫ̀ⲣⲏϣ.
     ⲓ̅ⲇ̅. Ⲁⲓⲙⲟⲩϯ ⲟⲩⲃⲉ ⲫ̀ⲙⲟⲩ ϫⲉ ⲡⲁⲓⲱⲧ : ⲡ̀ⲧⲁⲕⲟ ⲇⲉ ϫⲉ ⲧⲁⲙⲁⲩ ⲛⲉⲙ ⲧⲁⲥⲱⲛⲓ.
     ⲓ̅ⲉ̅. Ⲁⲥⲑⲱⲛ ⲟⲩⲛ ⲛ̀ϫⲉ ⲧⲁϩⲉⲗⲡⲓⲥ : ⲓⲉ ⲁⲛ ϯⲛⲁⲛⲁⲩ ⲉ̀ϩⲁⲛⲁ̀ⲅⲁⲑⲟⲛ : ⲓⲉ ⲁⲛ ⲥⲉⲛⲁⲓ̀ ⲛⲉⲙⲏⲓ ⲉ̀ϧ̀ⲣⲏⲓ ⲉ̀ⲁ̀ⲙⲉⲛϯ : ⲓⲉ ⲧⲉⲛⲛⲁϣⲉⲛⲁⲛ ⲉ̀ⲡ̀ⲕⲁϩⲓ ⲉⲩⲥⲟⲡ.

ⲕⲉⲫ ⲓ̅ⲏ̅

    Ϯⲙⲁϩⲃ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲃⲁⲗⲇⲁⲇ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲃⲁⲗⲇⲁⲇ ⲡⲓⲤⲁⲩⲭⲓⲧⲏⲥ ⲡⲉϫⲁϥ ϫⲉ :
     ⲃ̅. Ϣⲁ ⲑ̀ⲛⲁⲩ ϫⲉ ⲭ̀ⲛⲁⲕⲏⲛ ⲁⲛ : ⲭⲁⲣⲱⲕ ϩⲓⲛⲁ ⲛ̀ⲧⲉⲛⲥⲁϫⲓ ϩⲱⲛ.
     ⲅ̅. Ⲉⲑⲃⲉ ⲟⲩ ⲁⲛⲭⲁⲣⲱⲛ ⲙ̀ⲡⲉⲕⲙ̀ⲑⲟ ⲙ̀ⲫ̀ⲣⲏϯ ⲛ̀ⲛⲓⲧⲉⲃⲛⲱⲟⲩⲓ̀.
     ⲇ̅. Ⲁϥⲉⲣⲭ̀ⲣⲁⲥⲑⲉ ⲛⲁⲕ ϧⲉⲛ ⲟⲩϫⲱⲛⲧ:ⲟⲩ ⲅⲁⲣ ⲁⲕϣⲁⲛⲙⲟⲩ ⲛ̀ⲑⲟⲕ ⲙⲏ ⲥⲉⲛⲁⲉⲣⲁⲧϣⲱⲡⲓ ⲛ̀ϧⲏⲧⲟⲩ ⲛ̀ϫⲉ ⲙⲁⲓ ⲛⲓⲃⲉⲛ ⲉⲧⲥⲁⲡⲉⲥⲏⲧ ⲛ̀ⲧ̀ⲫⲉ : ϣⲁⲛ ⲥⲉⲛⲁⲟⲩⲱϫⲡ ⲛ̀ϫⲉ ϩⲁⲛⲧⲱⲟⲩ ⲉ̀ⲃⲟⲗϧⲉⲛ ⲛⲟⲩⲥⲉⲛϯ.
     ⲉ̅. Ⲟⲩⲟϩ ⲫ̀ⲟⲩⲱⲓⲛⲓ ⲛ̀ⲧⲉ ⲛⲓⲁ̀ⲥⲉⲃⲏⲥ ϥ̀ⲛⲁϭⲉⲛⲟ : ⲟⲩⲟϩ ⲛ̀ⲛⲉϥⲓ̀ ⲉ̀ⲃⲟⲗ ⲛ̀ϫⲉ ⲡⲟⲩϣⲁϩ.
     Ⲋ. Ⲡⲉϥⲟⲩⲱⲓⲛⲓ ⲉϥⲉ̀ⲉⲣⲭⲁⲕⲓ ϧⲉⲛ ⲡⲉϥⲏⲓ : ⲉϥⲉ̀ϭⲉⲛⲟ ⲇⲉ ⲛ̀ϫⲉ ⲡⲓϧⲏⲃⲥ ⲛⲁϩⲣⲁϥ.
     ⲍ̅. Ⲉⲩⲉ̀ⲱ̀ⲗⲓ ⲛ̀ⲛⲉϥϩⲩⲡⲁⲣⲭⲟⲛⲧⲁ ⲛ̀ϫⲉ ϩⲁⲛⲉ̀ⲗⲁⲭⲓⲥⲧⲟⲥ : ⲉϥⲉ̀ϣⲱϥⲧ ⲇⲉ ϧⲉⲛ ⲡⲉϥⲥⲟϭⲛⲓ.
     ⲏ̅. Ⲉⲥⲉ̀ⲣⲁⲟⲩⲱ̀ ⲇⲉ ϧⲉⲛ ⲟⲩⲫⲁϣ ⲛ̀ϫⲉ ⲧⲉϥⲫⲁⲧ : ⲟⲩⲟϩ ⲉⲥⲉ̀ϭⲗⲟⲙⲗⲉⲙ ϧⲉⲛ ⲟⲩϣ̀ⲛⲉ.
     ⲑ̅. Ⲉⲩⲉ̀ϩⲉⲓ ⲇⲉ ⲉ̀ϩ̀ⲣⲏⲓ ⲉ̀ϫⲱϥ ⲛ̀ϫⲉ ϩⲁⲛⲫⲁϣ : ⲉⲩⲉ̀ⲑ̀ⲣⲟⲩϫⲉⲙϫⲟⲙ ⲉ̀ϩ̀ⲣⲏⲓ ⲉ̀ϫⲱϥ ⲛ̀ϫⲉ ϩⲁⲛⲟⲩⲟⲛ ⲉⲩⲟ̀ⲃⲓ.
     ⲓ̅. Ϥ̀ⲭⲏⲡ ϧⲉⲛ ⲡ̀ⲕⲁϩⲓ ⲛ̀ϫⲉ ⲡⲉϥⲙⲟϩ ⲟⲩⲟϩ ⲡⲉϥϫⲓⲛⲧⲁϩⲟ ϩⲓ ⲡⲓⲙⲱⲓⲧ.
     ⲓ̅ⲁ̅. Ⲉⲩⲉ̀ⲧⲁⲕⲟϥ ⲛ̀ϫⲉ ϩⲁⲙ̀ⲕⲁϩⲛ̀ϩⲏⲧ ⲉⲩⲕⲱϯ ⲉ̀ⲣⲟϥ: ⲟⲩⲙⲏϣ ⲇⲉ ⲉⲩⲉ̀ⲓ̀ ⲙ̀ⲡ̀ⲕⲱϯ ⲛ̀ⲧⲉϥϭⲁⲗⲟϫ ϧⲉⲛ ⲟⲩϩⲱⲃ ⲉϥϩⲉϫϩⲱϫ.
     ⲓ̅ⲃ̅. Ⲁⲩⲥⲟⲃϯ ⲇⲉ ⲛⲁϥ ⲛ̀ⲟⲩⲱϫⲡ ⲉϥⲟⲓ ⲛ̀ϣ̀ⲫⲏⲣⲓ.
     ⲓ̅ⲅ̅. Ⲉⲩⲉ̀ⲟⲩⲱⲙ ⲇⲉ ⲛ̀ⲛⲓⲥⲏⲃⲓ ⲛ̀ⲧⲉ ⲣⲁⲧϥ : ⲉⲣⲉ ⲫ̀ⲙⲟⲩ ⲇⲉ ⲟⲩⲱⲙ ⲛ̀ⲛⲏⲉⲧⲥⲁⲓⲱⲟⲩ.
     ⲓ̅ⲇ̅. Ⲟⲩⲟϩ ⲉⲩⲉ̀ⲱ̀ⲗⲓ ⲙ̀ⲡⲓⲧⲁⲗϭⲟ ⲉ̀ⲃⲟⲗϧⲉⲛ ⲡⲉϥⲏⲓ : ⲉⲥⲉ̀ⲧⲁϩⲟϥ ⲛ̀ϫⲉ ⲟⲩⲁ̀ⲛⲁⲅⲕⲏ : ⲟⲩⲉ̀ⲧⲓⲁ ⲛ̀ⲟⲩⲣⲟ ⲉⲥⲉ̀ⲟⲩⲱⲛϩ ϧⲉⲛ ⲧⲉϥⲥ̀ⲕⲏⲛⲏ.
     ⲓ̅ⲉ̅. Ϧⲉⲛ ⲡⲓⲉ̀ϫⲱⲣϩ ⲛⲏⲉⲧⲥⲁⲓⲱⲟⲩ ⲛ̀ⲧⲁϥ ⲉⲩⲉ̀ⲙⲟϩ ⲛ̀ⲑⲏⲛ.
     ⲓ̅Ⲋ. Ⲛⲉϥⲛⲟⲩⲛⲓ ⲉⲩⲉ̀ϣⲱⲟⲩⲓ̀ ⲥⲁⲡⲉⲥⲏⲧ ⲙ̀ⲙⲟϥ : ⲟⲩⲟϩ ⲡⲉϥⲱⲥϧ ⲉϥⲉ̀ϩⲉⲓ ⲥⲁⲡ̀ϣⲱⲓ ⲙ̀ⲙⲟϥ.
     ⲓ̅ⲍ̅. Ⲡⲉϥⲙⲉⲩⲓ̀ ⲉϥⲉ̀ⲧⲁⲕⲟ ⲉ̀ⲃⲟⲗ ϩⲓϫⲉⲛ ⲡ̀ⲕⲁϩⲓ : ⲟⲩⲟϩ ⲟⲩⲟⲛ ⲟⲩⲣⲁⲛ ϣⲟⲡ ⲛⲁϥ ϩⲓϫⲉⲛ ⲡⲉϥϩⲟ ⲥⲁⲃⲟⲗ.
     ⲓ̅ⲏ̅. Ⲉϥⲉ̀ϩⲓⲧϥ ⲉ̀ⲃⲟⲗ ϧⲉⲛ ⲫ̀ⲟⲩⲱⲓⲛⲓ ⲉ̀ⲡ̀ⲭⲁⲕⲓ.
     ⲓ̅ⲑ̅. Ⲛ̀ⲛⲉϥϣⲱⲡⲓ ⲉϥⲟⲓ ⲛ̀ⲥⲟⲩⲏⲛ ϧⲉⲛ ⲡⲉϥⲗⲁⲟⲥ : ⲟⲩⲇⲉ ⲛ̀ⲛⲉϥⲛⲟϩⲉⲙ ϧⲉⲛ ⲛⲏⲉⲧⲥⲁⲡⲉⲥⲏⲧ ⲛ̀ⲧ̀ⲫⲉ ⲛ̀ϫⲉ ⲡⲉϥⲏⲓ : ⲁⲗⲗⲁ ⲉⲩⲉ̀ⲱⲛϧ ϧⲉⲛ ⲛⲏⲉⲧⲉⲛⲟⲩϥ ⲛ̀ϫⲉ ϩⲁⲛⲕⲉⲭⲱⲟⲩⲛⲓ.
     ⲕ̅. Ⲁⲩϥⲓⲁ̀ϩⲟⲙ ⲉ̀ϩ̀ⲣⲏⲓ ⲉ̀ϫⲱϥ ϩⲁⲛϧⲁⲉⲩ:ⲟⲩⲟϩ ⲁⲩⲉⲣϣ̀ⲫⲏⲣⲓ ⲛ̀ϫⲉ ϩⲁⲛϣⲟⲣⲡ.
     ⲕ̅ⲁ̅. Ⲛⲁⲓ ⲛⲉ ⲛⲓⲏⲟⲩ ⲛ̀ⲧⲉ ⲛⲓⲣⲉϥϭⲓⲛ̀ϫⲟⲛⲥ : ⲫⲁⲓ ⲇⲉ ⲡⲓⲧⲟⲡⲟⲥ ⲛ̀ⲧⲉ ⲛⲏⲉⲧⲉ ⲙ̀ⲡⲟⲩⲥⲟⲩⲉⲛ Ⲡⲟ̅ⲥ̅.

ⲕⲉⲫ ⲓ̅ⲑ̅

    Ϯⲙⲁϩⲉ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲓⲱⲃ ⲡⲉϫⲁϥ ϫⲉ :
     ⲃ̅. Ϣⲁ ⲑ̀ⲛⲁⲩ ⲧⲉⲧⲉⲛϯϧⲓⲥⲓ ⲛ̀ⲧⲁⲩⲭⲏ ⲟⲩⲟϩ ⲧⲉⲧⲉⲛϣ̀ⲑⲟⲣⲧⲉⲣ ⲙ̀ⲙⲟⲓ ϧⲉⲛ ϩⲁⲛⲥⲁϫⲓ.
     ⲅ̅. Ⲙⲟⲛⲟⲛ ⲁⲣⲓⲉ̀ⲙⲓ ϫⲉ Ⲡⲟ̅ⲥ̅ ⲁϥⲁⲓⲧ ⲙ̀ⲡⲁⲓⲣⲏϯ: ⲧⲉⲧⲉⲛⲥⲁϫⲓ ⲛ̀ⲥⲱⲓ ⲟⲩⲟϩ ⲧⲉⲧⲉⲛϣ̀ⲫⲓⲧ ϧⲁϫⲱⲓ ⲁⲛ ⲟⲩⲟϩ ⲧⲉⲧⲉⲛⲧⲁⲣϣⲏⲟⲩⲧ ⲉ̀ϫⲱⲓ.
     ⲇ̅. Ⲭⲁⲥ ⲇⲉ ϫⲉ ⲁ̀ⲛⲟⲕ ⲁⲓⲥⲱⲣⲉⲙ ⲛ̀ⲧⲁⲫ̀ⲙⲏⲓ ⲟⲩⲟϩ ϫⲉ ϥ̀ϣⲟⲡ ⲛⲉⲙⲏⲓ ⲛ̀ϫⲉ ⲡⲓⲡ̀ⲗⲁⲛⲟⲥ ⲉⲑⲣⲓϫⲉ ϩⲁⲛⲥⲁϫⲓ ⲛ̀ⲥ̀ϣⲉ ⲛ̀ϫⲟⲧⲟⲩ ⲁⲛ.
     ⲉ̅. Ⲛⲁⲥⲁϫⲓ ⲇⲉ ⲥⲉⲥⲟⲣⲉⲙ ⲟⲩⲟϩ ⲙ̀ⲡⲓϫⲟⲧⲟⲩ ϧⲉⲛ ⲡⲟⲩⲥⲏⲟⲩ : ⲉⲑⲃⲉ ⲟⲩ ⲛ̀ⲑⲱⲧⲉⲛ ⲧⲉⲧⲉⲛϭⲓⲥⲓ ⲙ̀ⲙⲱⲧⲉⲛ ⲉ̀ϩ̀ⲣⲏⲓ ⲉ̀ϫⲱⲓ : ⲧⲉⲧⲉⲛⲟⲓ ⲛ̀ⲛⲓϣϯ ⲉ̀ϩ̀ⲣⲏⲓ ⲉ̀ϫⲱⲓ ϧⲉⲛ ⲟⲩϣⲱϣ.
     Ⲋ. Ⲁⲣⲓⲉ̀ⲙⲓ ⲟⲩⲛ ϫⲉ Ⲡⲟ̅ⲥ̅ ⲡⲉ ⲉⲧⲁϥϣ̀ⲧⲉⲣⲑⲱⲣⲧ : ⲁϥϭⲓⲥⲓ ⲇⲉ ⲉ̀ⲡⲉϥⲧⲁϫⲣⲟ ⲉ̀ϩ̀ⲣⲏⲓ ⲉ̀ϫⲱⲓ.
     ⲍ̅. Ϩⲏⲡⲡⲉ ϯⲛⲁⲥⲱⲃⲓ ϧⲉⲛ ⲟⲩϣⲱϣ ⲟⲩⲟϩ ⲛ̀ⲛⲁⲥⲁϫⲓ : ϯⲱϣ ⲉ̀ⲃⲟⲗ ⲟⲩⲟϩⲙ̀ⲙⲟⲛ ϩⲁⲡ ϣⲟⲡ.
     ⲏ̅. Ⲁⲩⲕⲱϯ ⲙ̀ⲡⲁⲕⲱϯ ⲟⲩⲟϩ ⲛ̀ⲛⲁⲥⲓⲛⲓ : ⲁϥⲭⲱ ⲛ̀ⲟⲩⲭⲁⲕⲓ ϩⲓϫⲉⲛ ⲡⲁϩⲟ.
     ⲑ̅. Ⲟⲩⲟϩ ⲁϥⲃⲁϣⲧ ⲙ̀ⲡⲁⲱ̀ⲟⲩ : ⲁⲩⲱ̀ⲗⲓ ⲇⲉ ⲙ̀ⲡⲁⲭ̀ⲗⲟⲙ ⲉ̀ⲃⲟⲗ ϩⲓϫⲉⲛ ⲧⲁⲁ̀ⲫⲉ.
     ⲓ̅. Ⲁϥϫⲟⲣⲧ ⲉ̀ⲃⲟⲗϧⲉⲛ ⲛⲏⲉⲧⲕⲱϯ ⲉ̀ⲣⲟⲓ ⲟⲩⲟϩ ⲁⲓϣⲉⲛⲏⲓ : ⲁⲩⲕⲱⲣϫ ⲇⲉ ⲛ̀ⲧⲁϩⲉⲗⲡⲓⲥ ⲙ̀ⲫ̀ⲣⲏϯ ⲛ̀ⲟⲩϣ̀ϣⲏⲛ.
     ⲓ̅ⲁ̅. Ⲁϥⲉⲣⲭ̀ⲣⲁⲥⲑⲉ ⲇⲉ ⲛⲏⲓ ϧⲉⲛ ⲟⲩϫⲱⲛⲧ ⲉⲙⲁϣⲱ : ⲁϥⲭⲁⲧ ⲇⲉ ⲛ̀ⲧⲟⲧϥ ⲙ̀ⲫ̀ⲣⲏϯ ⲛ̀ⲟⲩϫⲁϫⲓ.
     ⲓ̅ⲃ̅. Ⲁⲩⲓ̀ ⲇⲉ ⲉ̀ϩ̀ⲣⲏⲓ ⲉ̀ϫⲱⲓ ⲉⲩⲥⲟⲡ ⲛ̀ϫⲉ ⲛⲉϥϭⲱⲛⲧ ⲧⲏⲣⲟⲩ : ⲁⲩⲕⲱϯ ⲉ̀ⲣⲟⲓ ϩⲓ ⲛⲁⲙⲱⲓⲧ ⲛ̀ϫⲉ ϩⲁⲛⲣⲉϥϫⲱⲣϫ.
     ⲓ̅ⲅ̅. Ⲁⲩϣⲉⲛⲱⲟⲩ ⲇⲉ ⲉ̀ⲃⲟⲗϩⲁⲣⲟⲓ ⲛ̀ϫⲉ ⲛⲁⲥ̀ⲛⲏⲟⲩ : ⲁⲩⲥⲟⲩⲉⲛ ϩⲁⲛϣⲉⲙⲙⲱⲟⲩ ⲉϩⲟⲧⲉⲣⲟⲓ.
     ⲓ̅ⲇ̅. Ⲛⲁϣ̀ⲫⲏⲣ ⲇⲉ ⲁⲩⲉⲣⲁⲑⲛⲁⲓ : ⲙ̀ⲡⲟⲩⲟⲡⲧ ⲇⲉ ⲛ̀ϫⲉ ⲛⲏⲉⲧϧⲉⲛⲧ ⲉ̀ⲣⲟⲓ : ⲟⲩⲟϩ ⲛⲏⲉⲧⲥⲱⲟⲩⲛ ⲙ̀ⲡⲁⲣⲁⲛ ⲁⲩⲉⲣⲡⲁⲱⲃϣ.
     ⲓ̅ⲉ̅. Ⲛⲓⲑⲉϣⲉⲩ ⲛ̀ⲧⲉ ⲡⲁⲏⲓ ⲛⲉⲙ ⲛⲁⲃⲱⲕⲓ ⲛⲁⲓⲟⲓ ⲛ̀ϣⲉⲙⲙⲟ ⲡⲉ ⲙ̀ⲡⲟⲩⲙ̀ⲑⲟ ⲉ̀ⲃⲟⲗ.
     ⲓ̅Ⲋ. Ⲁⲓⲙⲟⲩϯ ⲉ̀ⲡⲁⲃⲱⲕ ⲟⲩⲟϩ ⲙ̀ⲡⲉϥⲉⲣⲟⲩⲱ̀ ⲛⲏⲓ : ⲛⲁⲓϯϩⲟ ⲇⲉ ϧⲉⲛ ⲣⲱⲓ ⲟⲩⲟϩ ⲛⲁⲓⲧⲱⲃϩ ⲛ̀ⲧⲁⲥ̀ϩⲓⲙⲓ.
     ⲓ̅ⲍ̅. Ⲛⲁⲓⲙⲟⲩϯ ⲡⲉ ⲉⲓϯϩⲟ ⲉ̀ⲛⲓϣⲏⲣⲓ ⲛ̀ⲧⲉ ⲛⲁⲡⲁⲗⲗⲁⲕⲏ.
     ⲓ̅ⲏ̅. Ⲛ̀ⲑⲱⲟⲩ ⲇⲉ ⲁⲩϩⲓⲡ̀ϩⲟ ⲙ̀ⲙⲟⲓ ϣⲁ ⲉ̀ⲛⲉϩ : ⲉϣⲱⲡ ⲁⲓϣⲁⲧⲱⲛⲧ ⲥⲉⲥⲁϫⲓ ⲛ̀ⲥⲱⲓ.
     ⲓ̅ⲑ̅. Ⲁⲩⲟⲣϥⲉⲧ ⲛ̀ϫⲉ ⲛⲏⲉⲧⲥⲱⲟⲩⲛ ⲙ̀ⲙⲟⲓ : ⲛⲏⲉ̀ⲛⲁⲓⲙⲉⲓ ⲙ̀ⲙⲱⲟⲩ ⲁⲩⲧⲱⲟⲩⲛⲟⲩ ⲉ̀ϩ̀ⲣⲏⲓ ⲉ̀ϫⲱⲓ.
     ⲕ̅. Ⲁⲩⲉⲣϩⲟⲗⲓ ⲛ̀ϫⲉ ⲛⲁⲥⲁⲣⲝ ⲛⲉⲙ ⲡⲁϣⲁⲣ : ⲟⲩⲟϩ ⲥⲉⲟⲩⲱⲙ ⲛ̀ⲛⲁⲥⲁⲣⲝ ϧⲉⲛ ⲛⲟⲩϣⲟⲗ.
     ⲕ̅ⲁ̅. Ⲛⲁⲓ ⲛⲏⲓ ⲛⲁⲓ ⲛⲏⲓ ⲱ ⲛⲁϣ̀ⲫⲏⲣ : ⲧ̀ϫⲓϫ ⲙ̀Ⲡⲟ̅ⲥ̅ ⲡⲉⲧⲁⲥϭⲟϩ ⲉ̀ⲣⲟⲓ.
     ⲕ̅ⲃ̅. Ⲉⲑⲃⲉ ⲟⲩ ⲧⲉⲧⲉⲛϭⲟϫⲓ ⲛ̀ⲥⲱⲓ ⲙ̀ⲫ̀ⲣⲏϯ ⲙ̀Ⲡⲟ̅ⲥ̅ : ⲟⲩⲟϩ ⲧⲉⲧⲉⲛⲥⲏⲟⲩ ⲁⲛ ⲉ̀ⲃⲟⲗϧⲉⲛ ⲛⲁⲥⲁⲣⲝ.
     ⲕ̅ⲅ̅. Ⲛⲓⲙ ⲅⲁⲣ ⲉⲑⲛⲁⲧⲏⲓⲥ ⲉⲑⲣⲟⲩⲥ̀ϧⲉ ⲛⲁⲥⲁϫⲓ:ⲛ̀ⲧⲟⲩⲭⲁⲩ ⲇⲉ ϩⲓ ⲟⲩϫⲱⲙ ϣⲁ ⲉ̀ⲛⲉϩ.
     ⲕ̅ⲇ̅. Ϧⲉⲛ ⲟⲩⲅ̀ⲣⲁⲫⲓⲟⲛ ⲙ̀ⲃⲉⲛⲓⲡⲓ ⲛⲉⲙ ⲟⲩⲧⲁⲧϩ : ⲓⲉ ⲛ̀ⲧⲟⲩⲫⲟⲧϩⲟⲩ ϩⲓ ⲟⲩⲡⲉⲧⲣⲁ.
     ⲕ̅ⲉ̅. Ϯⲥⲱⲟⲩⲛ ⲅⲁⲣ ϫⲉ ⲟⲩϣⲁⲉ̀ⲛⲉϩ ⲡⲉ ⲫⲏⲉⲑⲛⲁⲃⲟⲗⲧ ⲉ̀ⲃⲟⲗ ϩⲓϫⲉⲛ ⲡⲓⲕⲁϩⲓ.
     ⲕ̅Ⲋ. Ⲉⲑⲣⲉϥⲧⲟⲩⲛⲟⲥ ⲡⲁϣⲁⲣ : ⲫⲏⲉⲑⲟⲩⲱⲧϩ ⲛ̀ⲛⲁⲓ ⲉ̀ⲡ̀ϣⲱⲓ : ⲉⲧⲁ ⲛⲁⲓ ⲅⲁⲣ ϣⲱⲡⲓ ⲛⲏⲓ ⲉ̀ⲃⲟⲗϩⲓⲧⲉⲛ Ⲡⲟ̅ⲥ̅.
     ⲕ̅ⲍ̅. Ⲛⲏ ⲁ̀ⲛⲟⲕ ⲉ̀ϯⲥⲱⲟⲩⲛ ⲙ̀ⲙⲱⲟⲩ ⲉ̀ϧ̀ⲣⲏⲓ ⲛ̀ϧⲏⲧ:ⲛⲏⲉⲧⲁ ⲛⲁⲃⲁⲗ ⲛⲁⲩ ⲉ̀ⲣⲱⲟⲩ ⲟⲩⲟϩ ⲕⲉⲟⲩⲁⲓ ⲁⲛ : ⲁⲩϫⲱⲕ ⲇⲉ ⲉ̀ⲃⲟⲗ ⲧⲏⲣⲟⲩ ⲉ̀ϧ̀ⲣⲏⲓ ϧⲉⲛ ⲕⲉⲛⲧ.
     ⲕ̅ⲏ̅. Ⲓⲥϫⲉ ⲇⲉ ⲧⲉⲧⲉⲛⲛⲁϫⲟⲥ ϫⲉ ⲟⲩ ⲡⲉ ⲉ̀ⲧⲉⲛⲛⲁϫⲟϥ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ : ⲟⲩⲟϩ ⲟⲩⲛⲟⲩⲛⲓ ⲛ̀ⲧⲉ ⲟⲩⲥⲁϫⲓ ⲧⲉⲛⲛⲁϫⲉⲙⲥ ⲛ̀ϧⲏⲧϥ.
     ⲕ̅ⲑ̅. Ⲁⲣⲓϩⲟϯ ϩⲱⲧⲉⲛ ϧⲁⲧ̀ϩⲏ ⲛ̀ⲟⲩⲉⲡⲓⲕⲁⲗⲓⲙⲙⲁ :  ⲟⲩϫⲱⲛⲧ ⲅⲁⲣ ⲉϥⲉ̀ⲓ̀ ⲉ̀ϫⲉⲛ ⲛⲓⲁ̀ⲛⲟⲙⲟⲥ : ⲧⲟⲧⲉ ⲉⲩⲉ̀ⲉ̀ⲙⲓ ϫⲉ ⲁⲥⲑⲱⲛ ⲧⲟⲩϩⲩⲗⲏ.

ⲕⲉⲫ ⲕ̅

    Ϯⲙⲁϩⲃ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲥⲱⲫⲁⲣ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲥⲱⲫⲁⲣ ⲡⲓⲘⲉⲛⲛⲉⲟⲥ ⲟⲩⲟϩ ⲡⲉϫⲁϥ ϫⲉ :
     ⲃ̅. Ⲛⲁⲓⲙⲉⲩⲓ̀ ⲁⲛ ⲡⲉ ϫⲉ ⲭ̀ⲛⲁⲟⲩⲟϩⲉⲙ ⲛⲁⲛ ⲙ̀ⲡⲁⲓⲣⲏϯ ⲟⲩⲟϩ ⲧⲉⲧⲉⲛⲕⲁϯ ⲁⲛ ⲉϩⲟⲧⲉⲣⲟⲓ.
     ⲅ̅. Ⲉⲓⲥⲱⲧⲉⲙ ⲉ̀ⲧ̀ⲥ̀ⲙⲏ ⲛ̀ⲧⲉ ⲡⲁⲥⲟϩⲓ : ⲟⲩⲟϩ ϥ̀ⲛⲁⲉⲣⲟⲩⲱ̀ ⲛⲏⲓ ⲛ̀ϫⲉ ⲟⲩⲡ̅ⲛ̅ⲁ̅ ⲛ̀ⲕⲁϯ.
     ⲇ̅. Ⲙⲏ ⲛⲁⲓ ⲁⲛ ⲁⲕⲥⲟⲑⲙⲟⲩ ⲓⲥϫⲉⲛ ϣⲟⲣⲡ : ⲓⲥϫⲉⲛ ⲉⲧⲁⲩⲭⲁ ⲣⲱⲙⲓ ϩⲓϫⲉⲛ ⲡⲓⲕⲁϩⲓ.
     ⲉ̅. Ⲡ̀ⲟⲩⲛⲟϥ ⲅⲁⲣ ⲛ̀ⲧⲉ ⲛⲓⲁ̀ⲥⲉⲃⲏⲥ ⲟⲩⲛⲓϣϯ ⲛ̀ⲟⲩⲱϫⲡ ⲡⲉ : ⲫ̀ⲣⲁϣⲓ ⲇⲉ ⲛ̀ⲧⲉ ⲛⲓⲡⲁⲣⲁⲛⲟⲙⲟⲥ ⲡ̀ⲧⲁⲕⲟ ⲡⲉ.
     Ⲋ. Ⲁⲩϣⲁⲛϣⲉⲛⲱⲟⲩ ⲅⲁⲣ ⲉ̀ⲡ̀ϣⲱⲓ ⲉ̀ⲧ̀ⲫⲉ ⲛ̀ϫⲉ ⲛⲉϥⲇⲱⲣⲟⲛ : ⲡⲉϥϣⲟⲩϣⲱⲟⲩϣⲓ ⲇⲉ ⲛ̀ⲧⲉϥϭⲓⲛⲉⲙ ⲛⲓϭⲏⲡⲓ.
     ⲍ̅. Ϩⲟⲧⲁⲛ ⲅⲁⲣ ⲁϥϣⲁⲛⲙⲉⲩⲓ̀ ϫⲉ ⲁϥⲧⲁϫⲣⲟ ⲧⲟⲧⲉ ⲉϥⲉ̀ⲧⲁⲕⲟ ϣⲁ ⲉ̀ⲃⲟⲗ : ⲛⲏⲉⲧⲥⲱⲟⲩⲛ ⲙ̀ⲙⲟϥ ⲉⲩⲉ̀ϫⲟⲥ ϫⲉ ⲛⲁϥⲑⲱⲛ ⲡⲉ.
     ⲏ̅. Ⲙ̀ⲫ̀ⲣⲏϯ ⲛ̀ⲟⲩⲣⲁⲥⲟⲩⲓ̀ ⲉ̀ⲁⲥϩⲱⲗ ⲛ̀ⲛⲟⲩϫⲉⲙϥ : ⲉϥⲉ̀ϩⲱⲗ ⲇⲉ ⲙ̀ⲫ̀ⲣⲏϯ ⲛ̀ⲟⲩϩⲟⲣⲧϥ ⲛ̀ⲧⲉ ⲡⲓⲉ̀ϫⲱⲣϩ.
     ⲑ̅. Ⲟⲩⲃⲁⲗ ⲁϥⲓⲟⲣϩϥ ⲟⲩⲟϩ ⲛ̀ⲛⲉϥⲟⲩⲁϩⲧⲟⲧϥ ⲟⲩⲟϩ ⲛ̀ⲛⲉϥⲛⲁⲩ ⲉ̀ⲣⲟϥ ⲛ̀ϫⲉ ⲡⲉϥⲙⲁ.
     ⲓ̅. Ⲛⲉϥϣⲏⲣⲓ ⲉⲩⲉ̀ⲧⲁⲕⲱⲟⲩ ⲛ̀ϫⲉ ϩⲁⲛⲕⲟⲩϫⲓ ⲉ̀ⲣⲟϥ : ⲛⲉϥϫⲓϫ ⲇⲉ ⲉⲩⲉ̀ⲧⲉⲙϩⲟ ⲛ̀ϩⲁⲛⲙ̀ⲕⲁϩⲛ̀ϩⲏⲧ.
     ⲓ̅ⲁ̅. Ⲛⲉϥⲕⲁⲥ ⲁⲩⲥⲓ ⲛ̀ⲧⲉϥⲙⲉⲧⲁ̀ⲗⲟⲩ ⲟⲩⲟϩ ⲉⲩⲉⲛⲕⲟⲧ ⲛⲉⲙⲁϥ ϧⲉⲛ ⲡⲓⲕⲁϩⲓ.
     ⲓ̅ⲃ̅. Ⲁⲥϣⲁⲛϩ̀ⲗⲟϫ ⲛ̀ϫⲉ ϯⲕⲁⲕⲓⲁ ϧⲉⲛ ⲣⲱϥ ⲉϥⲉ̀ⲭⲟⲡⲥ ⲥⲁⲡⲉⲥⲏⲧ ⲙ̀ⲡⲉϥⲗⲁⲥ.
     ⲓ̅ⲅ̅. Ⲛ̀ⲛⲉϥϯⲁ̀ⲥⲟ ⲉ̀ⲣⲟⲥ ⲟⲩⲇⲉ ⲛ̀ⲛⲉϥⲭⲁⲥ ⲛ̀ⲥⲱϥ : ⲟⲩⲟϩ ⲉϥⲉ̀ⲥⲟⲕⲥ ϧⲉⲛ ⲑ̀ⲙⲏϯ ⲛ̀ⲧⲉϥϣ̀ⲃⲱⲃⲓ.
     ⲓ̅ⲇ̅. Ⲟⲩⲟϩ ⲛ̀ⲛⲉⲥϣ̀ϫⲉⲙϫⲟⲙ ⲛ̀ⲉⲣⲃⲟⲏ̀ⲑⲏⲛ ⲉ̀ⲣⲟϥ : ⲟⲩⲭⲟⲗⲏ ⲛ̀ϩⲟϥ ⲉⲧϧⲉⲛ ⲧⲉϥⲛⲉϫⲓ.
     ⲓ̅ⲉ̅. Ⲟⲩⲙⲉⲧⲣⲁⲙⲁⲟ̀ ⲉⲩⲑⲱⲟⲩϯ ⲙ̀ⲙⲟⲥ ϧⲉⲛ ⲟⲩϭⲓⲛ̀ϫⲟⲛⲥ ⲉⲩⲉ̀ϣⲓϯ ⲙ̀ⲙⲟⲥ : ⲉϥⲉ̀ⲥⲱⲕ ⲙ̀ⲙⲟϥ ⲉ̀ⲃⲟⲗϧⲉⲛ ⲑ̀ⲙⲏϯ ⲙ̀ⲡⲉϥⲏⲓ ⲛ̀ϫⲉ Ⲫϯ.
     ⲓ̅Ⲋ. Ⲟⲩϫⲱⲛⲧ ⲇⲉ ⲛ̀ⲧⲉ ⲟⲩⲇ̀ⲣⲁⲕⲱⲛ ⲉⲩⲉ̀ϣⲁⲛⲟⲩϣϥ ⲉ̀ⲣⲟϥ : ⲉϥⲉ̀ϧⲟⲑⲃⲉϥ ⲇⲉ ⲛ̀ϫⲉ ⲫ̀ⲗⲁⲥ ⲛ̀ⲟⲩϩⲟϥ.
     ⲓ̅ⲍ̅. Ⲛ̀ⲛⲉϥⲛⲁⲩ ⲉ̀ⲟⲩϩⲱⲣ ⲛ̀ⲧⲉ ϩⲁⲛⲣⲉϥⲙⲟⲛⲓ : ⲟⲩⲇⲉ ϩⲁⲛⲙⲁ ⲛ̀ⲉ̀ⲃⲓⲱ ⲟⲩⲇⲉ ⲟⲩϭⲉⲗⲓ.
     ⲓ̅ⲏ̅. Ⲉⲧⲁϥϧⲓⲥⲓ ⲉ̀ϩⲁⲛⲡⲉⲧϣⲟⲩⲓⲧ ⲛⲉⲙ ϩⲁⲛⲙⲉⲧⲉⲫⲗⲏⲟⲩ : ⲟⲩⲙⲉⲧⲣⲁⲙⲁⲟ̀ ⲛⲁϥⲛⲁϫⲉⲙϯⲡⲓ ⲁⲛ ⲉ̀ⲃⲟⲗ ⲙ̀ⲙⲟⲥ ⲙ̀ⲫ̀ⲣⲏϯ ⲛ̀ⲟⲩⲥ̀ⲑⲓⲣⲫⲛⲟⲥ ⲙ̀ⲡⲁⲩϣ̀ⲟⲩⲉϫⲟⲩⲱϫϥ ⲟⲩⲇⲉ ⲙ̀ⲡⲁⲩϣ̀ⲟⲙⲕϥ.
     ⲓ̅ⲑ̅. Ϩⲁⲛⲙⲏϣ ⲅⲁⲣ ⲛ̀ⲁⲧϫⲟⲙ ⲁϥϩⲟϫϩⲉϫ ⲛ̀ⲛⲟⲩⲏⲓ : ⲁϥϩⲱⲗⲉⲙ ⲇⲉ ⲙ̀ⲡⲟⲩⲙⲁⲛ̀ϣⲱⲡⲓ ⲟⲩⲟϩ ⲙ̀ⲡⲉϥⲧⲏⲓϥ.
     ⲕ̅. Ⲙ̀ⲙⲟⲛ ⲟⲩϫⲁⲓ ϣⲟⲡ ⲛ̀ⲛⲉϥϩⲩⲡⲁⲣⲭⲟⲛⲧⲁ ϧⲉⲛ ⲧⲉϥⲉ̀ⲡⲓⲑⲩⲙⲓⲁ ⲛ̀ⲛⲉϥⲛⲟϩⲉⲙ.
     ⲕ̅ⲁ̅. Ⲙ̀ⲙⲟⲛ ⲥⲱϫⲡ ϣⲟⲡ ⲛ̀ⲛⲉϥϧ̀ⲣⲏⲟⲩⲓ̀ : ⲉⲑⲃⲉ ⲫⲁⲓ ⲛ̀ⲛⲟⲩⲫⲓⲣⲓ ⲉ̀ⲃⲟⲗ ⲛ̀ϫⲉ ⲛⲉϥⲁ̀ⲅⲁⲑⲟⲛ.
     ⲕ̅ⲃ̅. Ⲉϣⲱⲡ ⲁϥϣⲁⲛⲙⲉⲩⲓ̀ ⲇⲉ ⲁϥϫⲱⲕ ⲉ̀ⲃⲟⲗ ⲉϥⲉ̀ϩⲟϫϩⲉϫ : ⲉⲩⲉ̀ⲓ̀ ⲇⲉ ⲉ̀ϩ̀ⲣⲏⲓ ⲉ̀ϫⲱϥ ⲛ̀ϫⲉ ⲁ̀ⲛⲁⲅⲕⲏ ⲛⲓⲃⲉⲛ.
     ⲕ̅ⲅ̅. Ϩⲟⲡⲱⲥ ⲛ̀ⲧⲉϥⲙⲁϩ ⲧⲉϥⲛⲉϫⲓ : ⲉϥⲉ̀ⲟⲩⲱⲣⲡ ⲉ̀ϩ̀ⲣⲏⲓ ⲉ̀ϫⲱϥ ⲛ̀ⲟⲩϫⲱⲛⲧ ⲛ̀ⲧⲉ ⲟⲩⲙ̀ⲃⲟⲛ : ⲉϥⲉ̀ⲟⲩⲱⲣⲡ ⲛ̀ϩⲁⲛⲙ̀ⲕⲁⲩϩ ⲛ̀ϩⲏⲧ ⲉ̀ϩ̀ⲣⲏⲓ ⲉ̀ϫⲱϥ.
     ⲕ̅ⲇ̅. Ⲟⲩⲟϩ ⲛ̀ⲛⲉϥⲛⲟϩⲉⲙ ⲛ̀ⲧⲟⲧϥ ⲙ̀ⲫ̀ⲃⲉⲛⲓⲡⲓ : ⲉⲥⲉ̀ ϫⲟⲧϩϥ ⲛ̀ϫⲉ ⲟⲩⲫⲓϯ ⲛ̀ϩⲟⲙⲧ.
     ⲕ̅ⲉ̅. Ⲉϥⲉ̀ⲥⲓⲛⲓ ⲇⲉ ⲉ̀ⲃⲟⲗϧⲉⲛ ⲡⲉϥⲥⲱⲙⲁ ⲛ̀ϫⲉ ⲟⲩⲥⲟⲑⲛⲉϥ : ϩⲁⲛⲥⲓⲟⲩ ⲇⲉ ⲉⲩⲉ̀ⲙⲟϣⲓ ϧⲉⲛ ⲡⲉϥⲙⲁⲛ̀ϣⲱⲡⲓ : ϩⲁⲛϩⲟϯ ⲉⲩⲉ̀ⲓ̀ ⲉ̀ϩ̀ⲣⲏⲓ ⲉ̀ϫⲱϥ.
     ⲕ̅Ⲋ. Ⲭⲁⲕⲓ ⲇⲉ ⲛⲓⲃⲉⲛ ⲉⲩⲉ̀ⲟ̀ϩⲓ ⲛⲁϥ : ⲉⲩⲉ̀ⲟⲩⲟⲙϥ ⲛ̀ϫⲉ ⲟⲩⲭ̀ⲣⲱⲙ ⲛ̀ⲁⲧϭⲉⲛⲟ : ⲉϥⲉ̀ⲧ̀ϩⲉⲙⲙⲟ ⲙ̀ⲡⲉϥⲏⲓ ⲛ̀ϫⲉ ⲡⲉⲑⲛⲏⲟⲩ ⲉ̀ϩ̀ⲣⲏⲓ ⲉ̀ϫⲱϥ.
     ⲕ̅ⲍ̅. Ⲛⲉϥⲁ̀ⲛⲟⲙⲓⲁ ⲇⲉ ⲉⲥⲉ̀ⲟⲩⲟⲛϩⲟⲩ ⲉ̀ⲃⲟⲗ ⲛ̀ϫⲉ ⲧ̀ⲫⲉ : ⲡⲓⲕⲁϩⲓ ⲇⲉ ⲉϥⲉ̀ⲧⲱⲛϥ ⲉ̀ϩ̀ⲣⲏⲓ ⲉ̀ϫⲱϥ.
     ⲕ̅ⲏ̅. Ⲉϥⲉ̀ⲥⲱⲕ ⲙ̀ⲡⲉϥⲏⲓ ⲛ̀ϫⲉ ⲡ̀ⲧⲁⲕⲟ ϣⲁ ⲉ̀ⲃⲟⲗ : ⲟⲩⲉ̀ϩⲟⲟⲩ ⲛ̀ϫⲱⲛⲧ ⲉϥⲉ̀ⲓ̀ ⲉ̀ϩ̀ⲣⲏⲓ ⲉ̀ϫⲱϥ.
     ⲕ̅ⲑ̅. Ⲫⲁⲓ ⲡⲉ ⲫ̀ⲙⲉⲣⲟⲥ ⲛ̀ⲟⲩⲣⲱⲙⲓ ⲛ̀ⲁ̀ⲥⲉⲃⲏⲥ ⲉ̀ⲃⲟⲗϩⲓⲧⲉⲛ Ⲡⲟ̅ⲥ̅ ⲛⲉⲙ ⲛⲓϫ̀ⲫⲟ ⲛ̀ⲧⲉ ⲛⲉϥϩⲩⲡⲁⲣⲭⲟⲛⲧⲁ ⲉ̀ⲃⲟⲗϩⲓⲧⲟⲧϥ ⲙ̀ⲡⲓⲉ̀ⲡⲓⲥⲕⲟⲡⲟⲥ.

ⲕⲉⲫ ⲕ̅ⲁ̅

    ϮⲙⲁϩⲊ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲓⲱⲃ ⲡⲉϫⲁϥ ϫⲉ :
     ⲃ̅. Ⲥⲱⲧⲉⲙ ⲉ̀ⲛⲁⲥⲁϫⲓ : ⲥⲱⲧⲉⲙ ϩⲓⲛⲁ ⲛ̀ⲧⲉϣ̀ⲧⲉⲙ ⲧⲁⲛⲟⲙϯ ϣⲱⲡⲓ ⲛⲏⲓ ⲉ̀ⲃⲟⲗϩⲓⲧⲉⲛ ⲑⲏⲛⲟⲩ.
     ⲅ̅. Ϥⲁⲓ ⲙ̀ⲙⲟⲓ : ⲁ̀ⲛⲟⲕ ⲇⲉ ϯⲛⲁⲥⲁϫⲓ : ⲓⲧⲁ ⲛ̀ⲛⲉⲧⲉⲛⲥⲱⲃⲓ ⲙ̀ⲙⲟⲓ.
     ⲇ̅. Ⲟⲩ ⲅⲁⲣ ⲙⲏ ⲡⲁⲥⲟϩⲓ ⲟⲩⲉ̀ⲃⲟⲗϩⲓⲧⲉⲛ ⲣⲱⲙⲓ ⲡⲉ: ⲓⲉ ⲉⲑⲃⲉ ⲟⲩ ϯⲛⲁϫⲱⲛⲧ ⲁⲛ.
     ⲉ̅. Ϫⲟⲩϣⲧ ⲉ̀ⲣⲟⲓ ⲟⲩⲟϩ ⲁⲣⲓϣ̀ⲫⲏⲣⲓ : ⲟⲩⲟϩ ⲭⲱ ⲛ̀ⲧⲉⲧⲉⲛϫⲓϫ ϩⲓ ⲧⲉⲧⲉⲛⲟⲩⲟ̀ϫⲓ .
     Ⲋ. Ⲉϣⲱⲡ ⲅⲁⲣ ⲁⲓϣⲁⲛⲉⲣⲫ̀ⲙⲉⲩⲓ̀ ϣⲁⲓϣ̀ⲑⲟⲣⲧⲉⲣ : ⲥⲉⲁ̀ⲙⲟⲛⲓ ⲇⲉ ⲛ̀ⲛⲁⲥⲁⲣⲝ ⲛ̀ϫⲉ ϩⲁⲛⲉⲙⲕⲁϩⲛ̀ϩⲏⲧ.
     ⲍ̅. Ⲉⲑⲃⲉ ⲟⲩ ⲛⲓⲁ̀ⲥⲉⲃⲏⲥ ⲥⲉⲱⲛϧ : ⲁⲩⲉⲣⲁ̀ⲡⲁⲥ ⲇⲉ ⲟⲛ ϧⲉⲛ ⲟⲩⲙⲉⲧⲣⲁⲙⲁⲟ̀.
     ⲏ̅. Ⲡⲟⲩⲟⲩⲧⲁϩ ϥ̀ϣⲟⲡ ⲕⲁⲧⲁ ⲫ̀ⲟⲩⲱϣ ⲛ̀ⲧⲟⲩⲩⲭⲏ: ⲛⲟⲩϣⲏⲣⲓ ⲇⲉ ⲥⲉ ⲙ̀ⲡⲉⲙ̀ⲑⲟ ⲛ̀ⲛⲟⲩⲃⲁⲗ.
     ⲑ̅. Ⲛⲟⲩⲏⲓ ⲥⲉⲟⲓ ⲛ̀ϩⲉⲛⲟⲩϥⲓ : ⲙ̀ⲙⲟⲛ ϩⲟϯ ⲇⲉ ⲥⲁ ϩ̀ⲗⲓ ⲛ̀ⲥⲁ : ⲙ̀ⲙⲟⲛ ⲙⲁⲥⲧⲓⲅⲅⲟⲥ ⲇⲉ ϩⲓϫⲱⲟⲩ ⲉ̀ⲃⲟⲗϩⲓⲧⲉⲛ Ⲡⲟ̅ⲥ̅.
     ⲓ̅. Ⲧⲟⲩⲉ̀ϩⲉ ⲙ̀ⲡⲉⲥⲙⲓⲥⲓ ϧⲁϫⲉⲛ ⲡⲉⲥⲥⲏⲟⲩ : ⲁⲥⲛⲟϩⲉⲙ ⲇⲉ ⲛ̀ϫⲉ ⲑⲏⲉⲧⲉ ⲙ̀ⲃⲟⲕⲓ ⲛ̀ⲧⲱⲟⲩ ⲟⲩⲟϩ ⲙ̀ⲡⲉⲥϩⲓ ϧⲏⲧⲥ ⲉ̀ⲃⲟⲗ.
     ⲓ̅ⲁ̅. Ⲥⲉϣⲟⲡ ⲇⲉ ⲙ̀ⲫ̀ⲣⲏϯ ⲛ̀ϩⲁⲛⲉ̀ⲥⲱⲟⲩ ⲛ̀ⲉ̀ⲛⲉϩ : ⲛⲟⲩϣⲏⲣⲓ ⲇⲉ ⲥⲉⲥⲱⲃⲓ ⲛⲉⲙ ⲛⲟⲩⲉ̀ⲣⲏⲟⲩ.
     ⲓ̅ⲃ̅. Ⲉⲩⲉ̀ϭⲓ ⲛ̀ⲟⲩⲁⲗⲧⲏⲣⲓⲟⲛ ⲛⲉⲙ ⲟⲩⲕⲩⲑⲁⲣⲁ : ⲟⲩⲟϩ ⲥⲉⲟⲩⲛⲟϥ ϧⲉⲛ ⲟⲩⲥ̀ⲙⲏ ⲙ̀ⲁⲗⲙⲟⲥ.
     ⲓ̅ⲅ̅. Ⲁⲩϫⲉⲕ ⲡⲟⲩⲱⲛϧ ⲉ̀ⲃⲟⲗ ϧⲉⲛ ϩⲁⲛⲁ̀ⲅⲁⲑⲟⲛ: ⲁⲩⲉⲛⲕⲟⲧ ⲇⲉ ϧⲉⲛ ⲟⲩⲙ̀ⲧⲟⲛ ⲛ̀ⲧⲉ ⲁ̀ⲙⲉⲛϯ.
     ⲓ̅ⲇ̅. Ϥ̀ϫⲱ ⲙ̀ⲙⲟⲥ ⲙ̀Ⲡⲟ̅ⲥ̅ : ϫⲉ ϩⲉⲛⲕ ⲉ̀ⲃⲟⲗ ⲙ̀ⲙⲟⲓ : ⲛⲉⲕⲙⲱⲓⲧ ϯⲟⲩⲱϣ ⲉ̀ⲥⲟⲩⲱⲛⲟⲩ ⲁⲛ.
     ⲓ̅ⲉ̅. Ⲟⲩ ⲧⲉ ϯⲙⲉⲧϩⲩⲕⲁⲛⲟⲥ ϫⲉ ⲉⲛⲉ̀ⲉⲣⲃⲱⲕ ⲛⲁϥ:ⲟⲩⲟϩ ⲟⲩ ⲡⲉ ⲡⲓϩⲏⲟⲩ ϫⲉ ⲛ̀ⲧⲉⲛⲉⲣⲁ̀ⲡⲁⲛⲧⲁⲛ ⲛⲁϥ.
     ⲓ̅Ⲋ. Ⲛⲁⲣⲉ ⲛⲟⲩⲁ̀ⲅⲁⲑⲟⲛ ⲅⲁⲣ ⲭⲏ ϧⲉⲛ ⲛⲟⲩϫⲓϫ : ⲛⲓϩ̀ⲃⲏⲟⲩⲓ̀ ⲇⲉ ⲛ̀ⲧⲉ ⲡⲓⲁ̀ⲥⲉⲃⲏⲥ ϥ̀ⲛⲁⲩ ⲉ̀ⲣⲱⲟⲩ ⲁⲛ.
     ⲓ̅ⲍ̅. Ⲙ̀ⲙⲟⲛ ⲇⲉ ⲁⲗⲗⲁ ⲡⲓϧⲏⲃⲥ ⲛ̀ⲛⲓⲁ̀ⲥⲉⲃⲏⲥ ϥ̀ⲛⲁϭⲉⲛⲟ: ⲉϥⲉ̀ⲓ̀ ⲇⲉ ⲉ̀ϩ̀ⲣⲏⲓ ⲉ̀ϫⲱⲟⲩ ⲛ̀ϫⲉ ⲡⲓⲟⲩⲱϫⲡ : ⲉⲩⲉ̀ⲧⲁϩⲱⲟⲩ ⲇⲉ ⲛ̀ϫⲉ ϩⲁⲛⲁ̀ⲛⲁⲅⲕⲏ ⲉ̀ⲃⲟⲗϧⲉⲛ ⲟⲩϫⲱⲛⲧ.
     ⲓ̅ⲏ̅. Ⲉⲩⲉ̀ϣⲱⲡⲓ ⲇⲉ ⲙ̀ⲫ̀ⲣⲏϯ ⲛ̀ⲟⲩⲧⲟϩ ϧⲁϫⲱϥ ⲛ̀ⲟⲩⲑⲏⲟⲩ : ⲓⲉ ⲙ̀ⲫ̀ⲣⲏϯ ⲛ̀ⲟⲩϣⲱϣ ⲉ̀ⲁⲥⲟⲗϥ ⲛ̀ϫⲉ ⲟⲩⲥⲁⲣⲁⲑⲏⲟⲩ.
     ⲓ̅ⲑ̅. Ⲉⲣⲉ ⲛⲟⲩϩⲩⲡⲁⲣⲭⲟⲛⲧⲁ ⲙⲟⲩⲛⲕ ⲛ̀ⲛⲟⲩϣⲏⲣⲓ : ⲉϥⲉ̀ϯϣⲉⲃⲓⲱ ⲛⲁϥ ⲕⲁⲧⲁⲣⲟϥ ⲟⲩⲟϩ ⲉϥⲉ̀ⲉ̀ⲙⲓ.
     ⲕ̅. Ⲛⲉϥⲃⲁⲗ ⲉⲩⲉ̀ⲛⲁⲩ ⲉ̀ⲡⲉϥϧⲟⲗϧⲉⲗ: ⲛ̀ⲛⲉϥⲛⲟϩⲉⲙ ⲇⲉ ⲉ̀ⲃⲟⲗ ⲛ̀ⲧⲟⲧϥ ⲙ̀Ⲡⲟ̅ⲥ̅.
     ⲕ̅ⲁ̅. Ϫⲉ ⲡⲉϥⲟⲩⲱϣ ϣⲟⲡ ϧⲉⲛ ⲡⲉϥⲏⲓ ⲛⲉⲙⲁϥ: ⲟⲩⲟϩ ⲛⲓⲏ̀ⲡⲓ ⲛ̀ⲧⲉ ⲛⲉϥⲉ̀ⲃⲏⲧ ⲁⲩⲫⲁϣⲟⲩ.
     ⲕ̅ⲃ̅. Ⲙⲏ Ⲡⲟ̅ⲥ̅ ⲁⲛ ⲁϥϯⲥ̀ⲃⲱ ⲛ̀ⲟⲩⲕⲁϯ ⲛⲉⲙ ⲟⲩⲉ̀ⲡⲓⲥⲧⲏⲙⲏ : ⲛ̀ⲑⲟϥ ⲇⲉ ⲉⲧϯϩⲁⲡ ⲉ̀ϩⲁⲛϧⲱⲧⲉⲃ.
     ⲕ̅ⲅ̅. Ⲟⲩⲟϩ ⲛ̀ⲑⲟϥ ⲉϥⲉ̀ⲙⲟⲩ ϧⲉⲛ ⲡ̀ⲁ̀ⲙⲁϩⲓ ⲛ̀ⲧⲉ ⲧⲉϥⲙⲉⲧⲁⲧϩⲏⲧ: ϥ̀ⲟⲩⲟϫ ⲧⲏⲣϥ ⲟⲩⲟϩ ⲉϥⲉⲣⲉⲩⲑⲉⲛⲓⲛ.
     ⲕ̅ⲇ̅. Ⲛⲉϥⲙⲁϧⲧ ⲇⲉ ⲁⲩⲙⲟϩ ⲛ̀ⲱⲧ : ⲡⲉϥⲁⲧⲕⲁⲥ ⲇⲉ ⲡⲉⲧⲫⲱⲛ ⲉ̀ⲃⲟⲗ.
     ⲕ̅ⲉ̅. Ⲛ̀ⲑⲟϥ ⲇⲉ ϣⲁϥⲙⲟⲩ ϩⲓⲧⲉⲛ ⲡ̀ϣⲁϣⲓ ⲛ̀ⲧⲉ ⲧⲉϥⲩⲭⲏ : ⲙ̀ⲡⲁⲧⲉϥⲟⲩⲉⲙ ϩ̀ⲗⲓ ⲛ̀ⲁ̀ⲅⲁⲑⲟⲛ.
     ⲕ̅Ⲋ. Ⲥⲉⲉⲛⲕⲟⲧ ⲇⲉ ϩⲓϫⲉⲛ ⲡ̀ⲕⲁϩⲓ ⲉⲩⲥⲟⲡ : ⲡ̀ⲧⲁⲕⲟ ⲇⲉ ⲉϥⲉ̀ϩⲟⲃⲥⲟⲩ .
     ⲕ̅ⲍ̅. Ϩⲱⲥⲧⲉ ϯⲥⲱⲟⲩⲛ ⲙ̀ⲙⲱⲧⲉⲛ ϫⲉ ⲁⲣⲉⲧⲉⲛⲟⲩⲉϩ ⲉ̀ϫⲱⲓ ϧⲉⲛ ⲟⲩⲙⲉⲧⲧⲟⲗⲙⲉⲣⲟⲥ.
     ⲕ̅ⲏ̅. Ϩⲱⲥⲧⲉ ⲧⲉⲧⲉⲛⲛⲁϫⲟⲥ ϫⲉ ⲁϥⲑⲱⲛ ⲡ̀ⲏⲓ ⲛ̀ⲟⲩⲁⲣⲭⲱⲛ : ⲟⲩⲟϩ ϫⲉ ⲁⲥⲑⲱⲛ ϯⲥ̀ⲕⲉⲡⲏ ⲛ̀ⲧⲉ ⲛⲓ
    ⲙⲁⲛ̀ϣⲱⲡⲓ ⲛ̀ⲧⲉ ⲛⲓⲁ̀ⲥⲉⲃⲏⲥ.
     ⲕ̅ⲑ̅. Ϣⲉⲛ ⲛⲏⲉⲧⲥⲓⲛⲓ ϩⲓ ⲡⲓⲙⲱⲓⲧ : ⲟⲩⲟϩ ⲛⲟⲩⲙⲏⲓⲛⲓ ⲙ̀ⲡⲉⲣⲁⲓⲧⲟⲩ ⲛ̀ϣⲉⲙⲙⲟ.
     ⲗ̅. Ϫⲉ ⲁⲩϥⲁⲓ ⲙ̀ⲡⲓⲁ̀ⲥⲉⲃⲏⲥ ⲉ̀ⲟⲩⲉ̀ϩⲟⲟⲩ ⲛ̀ⲧⲉ ⲡ̀ⲧⲁⲕⲟ: ⲉⲩⲉ̀ϭⲓⲧⲟⲩ ⲉ̀ⲡⲓⲉ̀ϩⲟⲟⲩ ⲛ̀ⲧⲉ ⲡ̀ϫⲱⲛⲧ.
     ⲗ̅ⲁ̅. Ⲛⲓⲙ ⲉⲑⲛⲁⲫⲓⲣⲓ ⲉ̀ⲡⲉϥⲙⲱⲓⲧ ⲙ̀ⲡⲉⲙ̀ⲑⲟ ⲙ̀ⲡⲉϥϩⲟ  ⲟⲩⲟϩ ⲛ̀ⲑⲟϥ ⲁϥⲓ̀ⲣⲓ : ⲛⲓⲙ ⲉⲑⲛⲁϯϣⲉⲃⲓⲱ ⲛⲁϥ.
     ⲗ̅ⲃ̅. Ⲛ̀ⲑⲟϥ ⲁⲩϭⲓⲧϥ ⲉ̀ϩⲁⲛⲙ̀ϩⲁⲩ ⲟⲩⲟϩ ⲁϥⲉⲣϣ̀ⲣⲱⲓⲥ ϩⲓϫⲉⲛ ⲛⲟⲩⲥ̀ⲗⲏ.
     ⲗ̅ⲅ̅. Ⲁⲩϩ̀ⲗⲟϫ ⲛⲁϥ ⲛ̀ϫⲉ ϩⲁⲛⲭⲁⲗⲩⲝ ⲛ̀ⲧⲉ ⲡⲓⲭⲓⲙⲁⲣⲣⲟⲥ : ⲟⲩⲟϩ ⲣⲱⲙⲓ ⲛⲓⲃⲉⲛ ⲉϥⲉ̀ϣⲉⲛⲁϥ ϩⲓⲫⲁϩⲟⲩ ⲙ̀ⲙⲟϥ ⲟⲩⲟϩ ϩⲁⲛⲁⲧⲏ̀ⲡⲓ ϧⲁϫⲱϥ.
     ⲗ̅ⲇ̅. Ⲡⲱⲥ ⲧⲉⲧⲉⲛϯⲛⲟⲙϯ ⲛⲏⲓ ⲉ̀ⲡ̀ⲁⲣⲏⲃ : ⲙ̀ⲡⲉⲧⲉⲛϯ ϩ̀ⲗⲓ ⲅⲁⲣ ⲛ̀ⲉⲙⲧⲟⲛ ⲛⲏⲓ ⲁⲛ.

ⲕⲉⲫ ⲕ̅ⲃ̅

    Ϯⲙⲁϩⲅ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲉⲗⲓⲫⲁⲥ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲉⲗⲓⲫⲁⲥ ⲡⲓⲐⲉⲙⲁⲛⲓⲧⲏⲥ ⲟⲩⲟϩ ⲡⲉϫⲁϥ ϫⲉ :
     ⲃ̅. Ⲙⲏ Ⲡⲟ̅ⲥ̅ ⲁⲛ ⲉⲧϯⲥ̀ⲃⲱ ⲛ̀ⲟⲩⲕⲁϯ ⲛⲉⲙ ⲟⲩⲉ̀ⲡⲓⲥⲧⲏⲙⲏ.
     ⲅ̅. Ⲁⲥⲉⲣⲙⲉⲗⲓⲥⲑⲉ ⲅⲁⲣ ⲙ̀Ⲡⲟ̅ⲥ̅ ⲛ̀ⲟⲩ : ⲉϣⲱⲡ ⲛ̀ⲑⲟⲕ ⲟⲩⲁⲧⲁ̀ⲣⲓⲕⲓ ϧⲉⲛ ⲛⲉⲕϩ̀ⲃⲏⲟⲩⲓ̀ : ⲓⲉ ⲟⲩ ⲡⲉ ⲡⲉⲕϩⲏⲟⲩ ϫⲉ ⲭ̀ⲛⲁⲫⲱⲣϣ ⲙ̀ⲡⲉⲕⲙⲱⲓⲧ ⲉ̀ⲃⲟⲗ ⲛⲉⲙⲁϥ.
     ⲇ̅. Ⲓⲉ ⲕⲁⲛ ϥ̀ⲛⲁⲥⲁϩⲱⲕ ⲉϥϥⲓⲱⲡ ⲛⲉⲙⲁⲕ : ϥ̀ⲛⲁⲓ̀ ⲇⲉ ⲉ̀ϧⲟⲩⲛ ⲉⲩϩⲁⲡ ⲛⲉⲙⲁⲕ.
     ⲉ̅. Ⲙⲏⲧⲓ ⲧⲉⲕⲕⲁⲕⲓⲁ ⲁⲛ ⲉⲧⲟϣ : ϩⲁⲛⲁⲧⲏ̀ⲡⲓ ⲛⲉ ⲛⲉⲕⲛⲟⲃⲓ.
     Ⲋ. Ⲛⲉⲕⲱ̀ⲗⲓ ⲛ̀ⲧⲁⲟⲩⲱ̀ ⲛ̀ⲛⲉⲕⲥ̀ⲛⲏⲟⲩ ϧⲉⲛ ⲟⲩⲙⲉⲧⲉ̀ⲡⲁ̀ⲃⲏⲣ : ⲁⲕⲱ̀ⲗⲓ ⲇⲉ ⲛ̀ⲧ̀ϩⲉⲃⲥⲱ ⲛ̀ⲛⲏⲉⲧⲃⲏϣ.
     ⲍ̅. Ⲟⲩⲇⲉ ⲛⲏⲉⲧⲟ̀ⲃⲓ ⲙ̀ⲡⲉⲕⲧ̀ⲥⲱⲟⲩ ⲛ̀ⲟⲩⲙⲱⲟⲩ : ⲛⲏ ⲇⲉ ⲉⲧϩⲟⲕⲉⲣ ⲁⲕϥⲟϫⲟⲩ ⲙ̀ⲡⲟⲩⲱⲓⲕ.
     ⲏ̅. Ⲁⲕⲉⲣϣ̀ⲫⲏⲣⲓ ⲇⲉ ⲙ̀ⲡ̀ϩⲟ  ⲛ̀ϩⲁⲛⲟⲩⲟⲛ : ⲁⲕⲑ̀ⲣⲉ ϩⲁⲛⲟⲩⲟⲛ ⲇⲉ ϣⲱⲡⲓ ⲉⲩⲟⲓ ⲛ̀ϩⲏⲕⲓ ϩⲓϫⲉⲛ ⲡ̀ⲕⲁϩⲓ.
     ⲑ̅. Ϩⲁⲛⲭⲏⲣⲁ ⲁⲕϯ ⲧⲟⲧⲟⲩ ⲉ̀ⲃⲟⲗ ⲉⲩϣⲟⲩⲓⲧ: ⲟⲩⲟϩ ϩⲁⲛⲟⲣⲫⲁⲛⲟⲥ ⲁⲕⲧ̀ϩⲉⲙⲕⲱⲟⲩ.
     ⲓ̅. Ⲉⲑⲃⲉ ⲫⲁⲓ ⲟⲩⲛ ⲁⲩⲕⲱϯ ⲉ̀ⲣⲟⲕ ⲛ̀ϫⲉ ϩⲁⲛϫⲟⲣϫⲥ: ⲟⲩⲟϩ ⲁϥⲓⲏⲥ ⲛ̀ⲥⲱⲕ ⲛ̀ϫⲉ ⲟⲩⲡⲟⲗⲉⲙⲟⲥ ⲉϥⲟⲓ ⲛ̀ϣ̀ⲫⲏⲣⲓ.
     ⲓ̅ⲁ̅. Ⲡⲓⲟⲩⲱⲓⲛⲓ ⲁϥⲉⲣⲭⲁⲓ ⲛⲁⲕ : ⲉⲕⲉⲛⲕⲟⲧ ⲇⲉ ⲟⲩⲙⲱⲟⲩ ⲁϥϩⲱⲃⲥ ⲉ̀ⲃⲟⲗ ϩⲓϫⲱⲕ.
     ⲓ̅ⲃ̅. Ⲙⲏ ϥ̀ⲛⲁⲛⲁⲩ ⲁⲛ ⲛ̀ϫⲉ ⲫⲏⲉⲧϣⲟⲡ ϧⲉⲛ ⲛⲏⲉⲧϭⲟⲥⲓ : ⲛⲏⲉⲑⲙⲟϣⲓ ⲇⲉ ϧⲉⲛ ⲟⲩϣⲱϣ ⲁϥⲑⲉⲃⲓⲱⲟⲩ.
     ⲓ̅ⲅ̅. Ⲟⲩⲟϩ ⲁⲕϫⲟⲥ ϫⲉ ⲟⲩ ⲡⲉ ⲉ̀ⲧⲁϥⲉ̀ⲙⲓ ⲉ̀ⲣⲟϥ ⲛ̀ϫⲉ ⲫⲏⲉⲧϫⲟⲣ : ⲓⲉ ⲁϥⲛⲁϯϩⲁϧⲁ ⲡⲓⲅ̀ⲛⲟⲫⲟⲥ.
     ⲓ̅ⲇ̅. Ϩⲁⲛϭⲏⲡⲓ ⲛⲉⲙ ⲛⲉϥⲙⲁⲛ̀ⲭⲱⲡ ⲟⲩⲟϩ ⲛ̀ⲛⲟⲩⲛⲁⲩ ⲉ̀ⲣⲟϥ ⲁϥⲙⲟϣⲓ ϧⲉⲛ ⲡ̀ⲕⲱϯ ⲛ̀ⲧⲉ ⲧ̀ⲫⲉ.
     ⲓ̅ⲉ̅. Ⲙⲏ ⲭ̀ⲛⲁⲁ̀ⲣⲉϩ ⲉ̀ⲟⲩⲙⲁⲛ̀ⲙⲟϣⲓ ⲛ̀ⲉ̀ⲛⲉϩ : ⲫⲁⲓ ⲉⲧⲁⲩϩⲱⲙⲓ ⲉ̀ϫⲱϥ ⲛ̀ϫⲉ ϩⲁⲛⲣⲱⲙⲓ ⲛ̀ⲑ̀ⲙⲏⲓ.
     ⲓ̅Ⲋ. Ⲛⲏⲉⲧⲁⲩⲧⲁϩⲱⲟⲩ ⲙ̀ⲡⲁⲧⲉⲥⲉⲣⲛⲏⲓ : ⲟⲩⲓⲁⲣⲟ ⲉϥϧⲁϯ ⲡⲉ ⲛⲟⲩⲥⲉⲛϯ.
     ⲓ̅ⲍ̅. Ⲛⲏⲉⲧϫⲱ ⲙ̀ⲙⲟⲥ ϫⲉ ⲟⲩ ⲡⲉ ⲉⲧⲉ Ⲡⲟ̅ⲥ̅ ⲛⲁⲁⲓϥ ⲛⲁⲛ : ⲓⲉ ⲟⲩ ⲡⲉ ⲉⲧⲉ Ⲡⲓⲡⲁⲛⲧⲟⲕⲣⲁⲧⲱⲣ ⲛⲁⲉⲛϥ ⲉ̀ϩ̀ⲣⲏⲓ ⲉ̀ϫⲱⲛ.
     ⲓ̅ⲏ̅. Ⲛ̀ⲑⲟϥ ⲇⲉ ⲁϥⲙⲉϩ ⲛⲟⲩⲏⲓ ⲛ̀ⲁ̀ⲅⲁⲑⲟⲛ : ⲡ̀ⲥⲟϭⲛⲓ ⲇⲉ ⲛ̀ⲧⲉ ⲛⲓⲁ̀ⲥⲉⲃⲏⲥ ϥ̀ⲟⲩⲏⲟⲩ ⲙ̀ⲙⲟϥ.
     ⲓ̅ⲑ̅. Ⲉⲧⲁⲩⲛⲁⲩ ⲛ̀ϫⲉ ⲛⲓⲑ̀ⲙⲏⲓ ⲁⲩⲥⲱⲃⲓ : ⲡⲓⲁⲧⲁ̀ⲣⲓⲕⲓ ⲇⲉ ⲁϥⲉⲗⲕϣⲁⲓ ⲛ̀ⲥⲱⲟⲩ.
     ⲕ̅. Ⲓⲉ ⲉϣⲱⲡ ⲛ̀ⲧⲉϥⲧⲁⲕⲟ ⲛ̀ϫⲉ ⲡⲟⲩϭⲣⲟ:ⲟⲩⲟϩ ⲡⲟⲩⲥⲱϫⲡ ⲉϥⲉ̀ⲟⲩⲟⲙϥ ⲛ̀ϫⲉ ⲟⲩⲭ̀ⲣⲱⲙ.
     ⲕ̅ⲁ̅. Ⲁⲣⲓⲛⲉϣⲧⲉ ⲇⲉ ⲛ̀ⲧⲉⲛⲛⲁⲩ ϫⲉ ⲭ̀ⲛⲁϣ̀ⲉⲣϩⲩⲡⲟⲙⲟⲛⲓⲛ : ⲓⲥϫⲉ ⲡⲉⲕⲟⲩⲧⲁϩ ⲛⲁϣⲱⲡⲓ ϧⲉⲛ ϩⲁⲛⲁ̀ⲅⲁⲑⲟⲛ.
     ⲕ̅ⲃ̅. Ⲁⲣⲓⲉⲭⲗⲁⲙⲃⲁⲛⲓⲛ ⲇⲉ ⲛ̀ϩⲁⲛⲥⲁϫⲓ ⲉ̀ⲃⲟⲗϧⲉⲛ ⲣⲱϥ ⲟⲩⲟϩ ϭⲓ ⲛ̀ⲛⲉϥⲥⲁϫⲓ ϧⲉⲛ ⲡⲉⲕϩⲏⲧ.
     ⲕ̅ⲅ̅. Ⲉϣⲱⲡ ⲛ̀ⲧⲉⲕⲧⲁⲥⲑⲟ ⲟⲩⲟϩ ⲛ̀ⲧⲉⲕⲑⲉⲃⲓⲟ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ : ⲁⲕⲑ̀ⲣⲉ ⲡⲓϭⲓⲛ̀ϫⲟⲛⲥ ⲟⲩⲉⲓ ⲙ̀ⲡⲉⲕⲙⲁⲛ̀ϣⲱⲡⲓ.
     ⲕ̅ⲇ̅. Ⲉⲕⲉ̀ϩⲉⲙⲥⲓ ϩⲓϫⲉⲛ ⲟⲩⲡⲉⲧⲣⲁ ϧⲉⲛ ⲧⲉⲕϧⲁⲉ̀ ⲛⲉⲙ ⲙ̀ⲫ̀ⲣⲏϯ ⲛ̀ⲟⲩⲡⲉⲧⲣⲁ ⲛ̀ⲧⲉ ⲟⲩⲭⲓⲙⲁⲣⲣⲟⲥ ⲛ̀ⲧⲉ Ⲥⲱⲫⲓⲣ.
     ⲕ̅ⲉ̅. Ⲉϥⲉ̀ϣⲱⲡⲓ ⲛⲁⲕ ⲙ̀ⲃⲟⲏ̀ⲑⲟⲥ ⲛ̀ϫⲉ Ⲡⲓⲡⲁⲛⲧⲟⲕⲣⲁⲧⲱⲣ ⲉ̀ⲃⲟⲗ ⲛ̀ⲧⲟⲧⲟⲩ ⲛ̀ⲛⲉⲕϫⲁϫⲓ : ⲉϥⲉ̀ⲧⲟⲩⲃⲟⲕ ⲇⲉ ⲙ̀ⲫ̀ⲣⲏϯ ⲙ̀ⲡⲓϩⲁⲧ ⲉⲧⲫⲟⲥⲓ.
     ⲕ̅Ⲋ. Ⲓⲧⲁ ⲉⲕⲉⲣⲡⲁⲣⲣⲏⲥⲓⲁⲍⲉⲥⲑⲉ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ ⲛ̀ⲧⲉⲕϫⲟⲩϣⲧ ⲉ̀ϩ̀ⲣⲏⲓ ⲉ̀ⲧ̀ⲫⲉ ϧⲉⲛ ⲟⲩⲣⲁϣⲓ.
     ⲕ̅ⲍ̅. Ⲁⲕϣⲁⲛⲧⲱⲃϩ ⲇⲉ ⲙ̀ⲙⲟϥ ⲉϥⲉ̀ⲥⲱⲧⲉⲙ ⲉ̀ⲣⲟⲕ:ⲉϥⲉ̀ⲧⲏⲓⲥ ⲇⲉ ⲛⲁⲕ ⲉⲑⲣⲉⲕϯ ⲛ̀ⲛⲉⲕⲉⲩⲭⲏ.
     ⲕ̅ⲏ̅. Ⲉϥⲉ̀ⲧⲁⲥⲑⲟ ⲇⲉ ⲛⲁⲕ ⲛ̀ⲟⲩⲙⲁⲛ̀ϣⲱⲡⲓ ⲛ̀ⲧⲉ ⲟⲩⲙⲉⲑⲙⲏⲓ : ⲉϥⲉ̀ϣⲱⲡⲓ ⲇⲉ ϩⲓ ⲛⲉⲕⲙⲱⲓⲧ ⲛ̀ϫⲉ ⲟⲩⲟⲩⲱⲓⲛⲓ.
     ⲕ̅ⲑ̅. Ϫⲉ ⲁϥⲑⲉⲃⲓⲟϥ ⲙ̀ⲙⲓⲛ ⲙ̀ⲙⲟϥ ⲟⲩⲟϩ ⲭ̀ⲛⲁϫⲟⲥ ϫⲉ ⲁϥϭⲓⲥⲓ ⲙ̀ⲙⲟϥ : ⲟⲩⲟϩ ϥ̀ⲛⲁⲛⲟϩⲉⲙ ⲙ̀ⲫⲏⲉⲧϭⲱⲧⲥ ⲛ̀ⲛⲉϥⲃⲁⲗ.
     ⲗ̅. Ⲉϥⲉ̀ⲥⲱϯ ⲛ̀ⲟⲩⲁⲑⲛⲟⲃⲓ ⲟⲩⲟϩ ⲛⲟϩⲉⲙ ϧⲉⲛ ⲛⲉⲕϫⲓϫ ϫⲉ ⲉⲕⲧⲟⲩⲃⲏⲟⲩⲧ.

ⲕⲉⲫ ⲕ̅ⲅ̅

    Ϯⲙⲁϩⲍ̅ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲓⲱⲃ ⲡⲉϫⲁϥ ϫⲉ :
     ⲃ̅. Ⲕⲉ ⲅⲁⲣ ϯⲉ̀ⲙⲓ ϫⲉ ⲡⲁⲥⲟϩⲓ ⲟⲩⲉ̀ⲃⲟⲗϩⲓⲧⲟⲧϥ ⲡⲉ ⲟⲩⲟϩ ⲧⲉϥϫⲓϫ ⲁⲥϩ̀ⲣⲟϣ ⲉ̀ϫⲉⲛ ⲡⲁϥⲓⲁ̀ϩⲟⲙ.
     ⲅ̅. Ⲛⲓⲙ ⲅⲁⲣ ⲉⲑⲛⲁⲉ̀ⲙⲓ ϫⲉ ϯⲛⲁϫⲉⲙϥ : ⲟⲩⲟϩ ϫⲉ ⲁⲩϯ ⲛⲉⲙⲏⲓ ϣⲁ ⲡ̀ϫⲱⲕ.
     ⲇ̅. Ⲟⲩⲟϩ ⲁⲛ ϫⲉ ϯⲛⲁϫⲉ ⲟⲩϩⲁⲡ ⲛⲁϩⲣⲁϥ : ⲣⲱⲓ  ⲉϥⲉ̀ⲙⲟϩ ⲛ̀ⲥⲟϩⲓ.
     ⲉ̅. Ⲉⲓⲉ̀ⲙⲓ ⲇⲉ ⲉ̀ⲛⲓⲧⲁϫⲣⲟ ⲛ̀ⲛⲏⲉⲧⲉϥⲛⲁϫⲟⲧⲟⲩ ⲛⲏⲓ :  ⲉⲓⲉ̀ⲉⲣⲉⲥⲑⲁⲛⲉⲥⲑⲉ ⲉ̀ⲛⲏⲉⲧⲉϥⲛⲁⲧⲁⲙⲟⲓ ⲉ̀ⲣⲱⲟⲩ.
     Ⲋ. Ⲟⲩⲟϩ ϫⲉ ⲁⲛ ϥ̀ⲛⲁⲓ̀ ⲉ̀ϩ̀ⲣⲏⲓ ⲉ̀ϫⲱⲓ ϧⲉⲛ ⲟⲩⲛⲓϣϯ ⲛ̀ϫⲟⲙ : ⲓⲧⲁ ϥ̀ⲛⲁⲉⲣⲭ̀ⲣⲁⲥⲑⲉ ⲛⲏⲓ ⲁⲛ ϧⲉⲛ ⲟⲩ
    ⲙ̀ⲃⲟⲛ.
     ⲍ̅. Ϯⲙⲉⲑⲙⲏⲓ ⲅⲁⲣ ⲛⲉⲙ ⲡⲓⲥⲟϩⲓ ϩⲁⲛⲉ̀ⲃⲟⲗϩⲓⲧⲟⲧϥ ⲛⲉ : ⲉϥⲉ̀ⲓ̀ⲛⲓ ⲇⲉ ⲉ̀ⲃⲟⲗ ⲙ̀ⲡⲁϩⲁⲡ ϣⲁ ⲉ̀ⲃⲟⲗ.
     ⲏ̅. Ⲉⲓⲉ̀ϣⲉⲛⲏⲓ ⲇⲉ ϣⲁ ⲛⲓϩⲟⲩⲁϯ:ⲟⲩⲟϩ ⲛ̀ⲛⲁϣⲟⲡ ⲁⲛ ϫⲉ : ⲟⲩ ⲇⲉ ⲡⲉϯⲉ̀ⲙⲓ ⲉ̀ⲣⲟϥ ϧⲉⲛ ⲛⲓϧⲁⲉⲩ.
     ⲑ̅. Ⲁϥⲑⲁⲙⲓⲟ ⲛ̀ϩⲁⲛϫⲁϭⲏ ⲟⲩⲟϩ ⲙ̀ⲡⲓⲁ̀ⲙⲟⲛⲓ : ⲉϥⲉ̀ϩⲱⲃⲥ ⲛ̀ϩⲁⲛⲟⲩⲓ̀ⲛⲁⲙ ⲟⲩⲟϩ ⲛ̀ⲛⲁⲛⲁⲩ.
     ⲓ̅. Ϥ̀ⲥⲱⲟⲩⲛ ⲅⲁⲣ ϩⲏⲇⲏ ⲛ̀ⲑⲟϥ ⲙ̀ⲡⲁⲙⲱⲓⲧ : ⲁϥⲉⲣⲇⲓⲁⲕⲣⲓⲛⲓⲛ ⲅⲁⲣ ⲙ̀ⲙⲟⲓ ⲙ̀ⲫ̀ⲣⲏϯ ⲙ̀ⲡⲓⲛⲟⲩⲃ.
     ⲓ̅ⲁ̅. Ⲉⲓⲉ̀ⲙⲟϣⲓ ⲇⲉ ⲛ̀ϧ̀ⲣⲏⲓ ϧⲉⲛ ⲛⲉϥϩⲟⲛϩⲉⲛ ⲁⲓⲁ̀ⲣⲉϩ ⲅⲁⲣ ⲉ̀ⲛⲉϥⲙⲱⲓⲧ ⲟⲩⲟϩ ⲛ̀ⲛⲁⲣⲓⲕⲓ ⲉ̀ⲃⲟⲗϧⲉⲛ ⲛⲉϥϩⲟⲛϩⲉⲛ ⲟⲩⲟϩ ⲛ̀ⲛⲁⲭⲁⲩ ⲛ̀ⲥⲱⲓ.
     ⲓ̅ⲃ̅. Ⲛⲉϥⲥⲁϫⲓ ⲉⲓⲉ̀ⲭⲟⲡⲟⲩ ϧⲉⲛ ⲕⲉⲛⲧ.
     ⲓ̅ⲅ̅. Ⲓⲥϫⲉ ⲛ̀ⲑⲟϥ ⲁϥϯϩⲁⲡ ⲙ̀ⲡⲁⲓⲣⲏϯ ⲛⲓⲙ ⲡⲉ ⲫⲏⲉⲑⲛⲁⲉⲣⲁⲛϯⲗⲉⲅⲓⲛ ⲛⲁϥ : ⲫⲏ ⲅⲁⲣ ⲉⲧⲁϥⲟⲩⲁϣϥ ⲫⲁⲓ ⲡⲉ ⲉⲧⲁϥⲁⲓϥ.
     ⲓ̅ⲇ̅. Ⲉⲑⲃⲉ ⲫⲁⲓ ⲁⲓⲓⲏⲥ ⲙ̀ⲙⲟⲓ ⲉ̀ϩ̀ⲣⲏⲓ ⲉ̀ϫⲱϥ : ⲉϥⲉ̀ϯⲥ̀ⲃⲱ ⲇⲉ ⲛⲏⲓ ⲁⲓⲉⲣϩⲟϯ ϧⲁⲧⲉϥϩⲏ.
     ⲓ̅ⲉ̅. Ⲉ̀ϩ̀ⲣⲏⲓ ⲉ̀ϫⲉⲛ ⲫⲁⲓ : ⲉⲓⲉ̀ⲓⲏⲥ ϧⲁⲧ̀ϩⲏ ⲙ̀ⲡⲉϥϩⲟ : ⲉⲓⲉ̀ⲥⲟⲙⲥ ⲟⲩⲟϩ ⲉⲓⲉ̀ⲛⲟⲩϣⲡ ⲉ̀ⲃⲟⲗ ⲙ̀ⲙⲟϥ.
     ⲓ̅Ⲋ. Ⲡⲟ̅ⲥ̅ ⲇⲉ ⲁϥⲉⲛ ⲟⲩϣⲱⲛⲓ ⲉ̀ϫⲉⲛ ⲡⲁϩⲏⲧ : ⲟⲩⲟϩ Ⲡⲓⲡⲁⲛⲧⲟⲕⲣⲁⲧⲱⲣ ⲁϥⲓⲏⲥ ⲛ̀ⲥⲱⲓ.
     ⲓ̅ⲍ̅. Ⲛⲁⲓⲉ̀ⲙⲓ ⲅⲁⲣ ⲡⲉ ϫⲉ ϥ̀ⲛⲁⲓ̀ ⲉ̀ϩ̀ⲣⲏⲓ ⲉ̀ϫⲱⲓ ⲛ̀ϫⲉ ⲟⲩⲭⲁⲕⲓ : ⲟⲩⲅ̀ⲛⲟⲫⲟⲥ ⲇⲉ ⲡⲉ ⲉ̀ⲧⲁϥϩⲱⲃⲥ ⲉ̀ⲃⲟⲗ ϧⲁⲧ̀ϩⲏ ⲙ̀ⲡⲁϩⲟ.

ⲕⲉⲫ ⲕ̅ⲇ̅

     ⲁ̅. Ⲉⲑⲃⲉ ⲟⲩ ⲇⲉ ⲁⲩϩⲱⲡ ⲉ̀Ⲡⲟ̅ⲥ̅ ⲛ̀ϫⲉ ϩⲁⲛⲟⲩⲛⲱⲟⲩⲓ̀.
     ⲃ̅. Ⲛⲓⲁ̀ⲥⲉⲃⲏⲥ ⲇⲉ ⲁⲩⲉⲣ ⲥⲁⲃⲟⲗ ⲛ̀ⲛⲟⲩⲑⲱϣ ⲉ̀ⲁⲩϩⲱⲗⲉⲙ ⲛ̀ⲟⲩⲟ̀ϩⲓ ⲛⲉⲙ ⲡⲉϥⲙⲁⲛⲉ̀ⲥⲱⲟⲩ.
     ⲅ̅. Ⲟⲩⲉ̀ⲱ̀ ⲇⲉ ⲛ̀ⲧⲉ ϩⲁⲛⲟⲣⲫⲁⲛⲟⲥ ⲁⲩⲟⲗϥ : ⲟⲩⲟϩ ϯⲉ̀ϩⲉ ⲛ̀ⲧⲉ ⲟⲩⲭⲏⲣⲁ ⲁⲩⲟⲗⲥ ⲛ̀ⲁ̀ⲟⲩⲱ̀.
     ⲇ̅. Ⲁⲩⲑ̀ⲣⲉ ϩⲁⲛⲁⲧϫⲟⲙ ⲣⲓⲕⲓ ⲉ̀ⲃⲟⲗϩⲁ ⲫ̀ⲙⲱⲓⲧ ⲛ̀ⲧⲉ ϯⲙⲉⲑⲙⲏⲓ : ⲁⲩⲭⲟⲡⲟⲩ ⲇⲉ ⲉⲩⲥⲟⲡ ⲛ̀ϫⲉ ⲛⲓⲣⲉⲙⲣⲁⲩϣ ⲛ̀ⲧⲉ ⲡ̀ⲕⲁϩⲓ.
     ⲉ̅. Ⲁⲩϣⲱⲡⲓ ⲇⲉ ⲙ̀ⲫ̀ⲣⲏϯ ⲛ̀ϩⲁⲛⲉ̀ϩⲉⲩ ϧⲉⲛ ⲧ̀ⲕⲟⲓ ⲉ̀ⲁⲩⲥⲉⲛ ⲧⲟⲩⲡ̀ⲣⲁⲝⲓⲥ ⲉ̀ⲃⲟⲗ ⲉ̀ϩ̀ⲣⲏⲓ ⲉ̀ϫⲱⲟⲩ : ⲁⲩϩ̀ⲗⲟϫ ⲛⲁϥ ⲛ̀ϫⲉ ⲟⲩⲱⲓⲕ ⲛ̀ⲧⲉ ϩⲁⲛⲁ̀ⲗⲱⲟⲩⲓ̀.
     Ⲋ. Ⲟⲩⲓⲟϩⲓ ⲙ̀ⲫⲱⲟⲩ ⲁⲛ ⲡⲉ ⲁⲩⲟⲥϧϥ ⲙ̀ⲡⲁⲧⲉ ⲧⲉϥϩⲟϯ ϣⲱⲡⲓ : ϩⲁⲛⲁⲧϫⲟⲙ ⲇⲉ ⲁⲩⲉⲣϩⲱⲃ ⲉ̀ϩⲁⲛⲙⲁⲛ̀ⲁ̀ⲗⲟⲗⲓ ⲛ̀ⲧⲉ ⲛⲓⲁ̀ⲥⲉⲃⲏⲥ ⲛ̀ⲁⲧⲃⲉⲭⲉ ⲟⲩⲟϩ ⲛ̀ⲁⲑⲟⲩⲱⲙ.
     ⲍ̅. Ⲟⲩⲙⲏϣ ⲉⲩⲃⲏϣ ϣⲁⲩⲑ̀ⲣⲟⲩⲉⲛⲕⲟⲧ ⲛ̀ⲁⲧϩ̀ⲃⲱⲥ : ⲁⲩⲱ̀ⲗⲓ ⲛ̀ⲧ̀ϩⲉⲃⲥⲱ ⲛ̀ⲧⲉ ⲧⲟⲩⲩⲭⲏ.
     ⲏ̅. Ⲥⲉϩⲱⲣⲡ ⲇⲉ ⲉ̀ⲃⲟⲗϧⲉⲛ ⲛⲓⲧⲉⲗⲧⲓⲗⲓ ⲛ̀ⲧⲉ ⲛⲓⲧⲱⲟⲩ  ⲉⲑⲃⲉ ϫⲉ ⲙ̀ⲙⲟⲛⲧⲟⲩ ⲥ̀ⲕⲉⲡⲏ ⲙ̀ⲙⲁⲩ : ⲁⲩϫⲟⲗⲟⲩ ⲛ̀ⲟⲩⲡⲉⲧⲣⲁ.
     ⲑ̅. Ⲁⲩϩⲱⲗⲉⲙ ⲇⲉ ⲛ̀ⲟⲩⲟⲣⲫⲁⲛⲟⲥ ⲉ̀ⲃⲟⲗϧⲉⲛ ⲛⲟⲩⲙ̀ⲛⲟϯ : ⲫⲏ ⲇⲉ ⲉⲧⲁϥϩⲉⲓ ⲁⲩⲑⲉⲃⲓⲟϥ.
     ⲓ̅. Ⲁⲩⲑ̀ⲣⲉ ϩⲁⲛⲟⲩⲟⲛ ⲇⲉ ⲉⲛⲕⲟⲧ ⲉⲩⲃⲏϣ ϧⲉⲛ ⲟⲩϭⲓⲛ̀ϫⲟⲛⲥ : ⲛⲏ ⲇⲉ ⲉⲧϩⲟⲕⲉⲣ ⲁⲩⲱ̀ⲗⲓ ⲙ̀ⲡⲟⲩⲱⲓⲕ.
     ⲓ̅ⲁ̅. Ϧⲉⲛ ϩⲁⲛⲙⲁ ⲉⲩϫⲏⲟⲩ ⲁⲩϫⲱⲣϫ ϧⲉⲛ ⲟⲩϭⲓⲛ̀ϫⲟⲛⲥ : ⲫ̀ⲙⲱⲓⲧ ⲇⲉ ⲛ̀ⲧⲉ ϯⲙⲉⲑⲙⲏⲓ ⲙ̀ⲡⲟⲩⲥⲟⲩⲱⲛϥ.
     ⲓ̅ⲃ̅. Ⲛⲏ ⲇⲉ ⲉ̀ⲛⲁⲩϩⲓⲟⲩⲓ̀ ⲙ̀ⲙⲱⲟⲩ ⲉ̀ⲃⲟⲗϧⲉⲛ ⲛⲟⲩⲃⲁⲕⲓ ⲛⲉⲙ ⲛⲟⲩⲏⲟⲩ ⲙ̀ⲡⲟⲩⲥⲟⲩⲱⲛⲟⲩ : ⲧ̀ⲩⲭⲏ ⲇⲉ ⲛ̀ⲧⲉ ϩⲁⲛⲕⲟⲩϫⲓ ⲛ̀ⲁ̀ⲗⲱⲟⲩⲓ̀ ⲁⲥⲉⲣ ϩⲁⲛⲛⲓϣϯ ⲙ̀ϥⲓⲁ̀ϩⲟⲙ.
     ⲓ̅ⲅ̅. Ⲛ̀ⲑⲟϥ ⲇⲉ ⲉⲑⲃⲉ ⲟⲩ ⲙ̀ⲡⲉϥϫⲉⲙⲡ̀ϣⲓⲛⲓ ⲛ̀ⲛⲁⲓ ⲉⲩϣⲟⲡ ϩⲓϫⲉⲛ ⲡⲓⲕⲁϩⲓ ⲟⲩⲟϩ ⲙ̀ⲡⲟⲩⲉ̀ⲙⲓ : ⲫ̀ⲙⲱⲓⲧ ⲇⲉ ⲛ̀ⲧⲉ ϯⲙⲉⲑⲙⲏⲓ ⲙ̀ⲡⲟⲩⲥⲟⲩⲱⲛϥ ⲟⲩⲇⲉ ⲙ̀ⲡⲟⲩⲙⲟϣⲓ ϩⲓ ⲛⲉⲥⲙⲓⲧⲱⲟⲩⲓ̀.
     ⲓ̅ⲇ̅. Ⲉⲧⲁϥⲉ̀ⲙⲓ ⲇⲉ ⲉ̀ⲛⲟⲩϩ̀ⲃⲏⲟⲩⲓ̀ ⲁϥⲧⲏⲓⲧⲟⲩ ⲉ̀ⲡ̀ⲭⲁⲕⲓ : ⲟⲩⲟϩ ϧⲉⲛ ⲡⲓⲉ̀ϫⲱⲣϩ ⲉϥⲉ̀ⲉⲣ ⲙ̀ⲫ̀ⲣⲏϯ ⲛ̀ⲟⲩⲣⲉϥϭⲓⲟⲩⲓ̀.
     ⲓ̅ⲉ̅. Ⲫ̀ⲃⲁⲗ ⲛ̀ⲟⲩⲛⲱⲓⲕ ⲉϥⲁ̀ⲣⲉϩ ⲉ̀ⲣⲟϥ ⲉ̀ⲟⲩⲭⲁⲕⲓ ⲉϥϫⲱ ⲙ̀ⲙⲟⲥ ϫⲉ ⲙ̀ⲙⲟⲛ ⲃⲁⲗ ⲛⲁⲩ ⲉ̀ⲣⲟⲓ : ⲟⲩⲟϩ ⲁϥⲭⲱ ⲛ̀ⲟⲩⲙⲁⲛ̀ⲭⲱⲡ ⲛ̀ⲧⲉ ⲟⲩϩⲟ.
     ⲓ̅Ⲋ. Ⲁⲩϩⲓϣⲁⲧⲥ ⲉ̀ϩⲁⲛⲏⲓ ϧⲉⲛ ⲡⲓⲭⲁⲕⲓ : ϧⲉⲛ ⲡⲓⲉ̀ϩⲟⲟⲩ ⲁⲩϩⲓⲧⲉⲃⲥ ⲉ̀ⲣⲱⲟⲩ ⲙ̀ⲙⲓⲛ ⲙ̀ⲙⲱⲟⲩ: ⲟⲩⲟϩ ⲙ̀ⲡⲟⲩⲥⲟⲩⲉⲛ ⲫ̀ⲟⲩⲱⲓⲛⲓ ϫⲉ ϩⲁⲛⲁ̀ⲧⲟⲟⲩⲓ̀ ⲡⲉ.
     ⲓ̅ⲍ̅. Ⲟⲩϧⲏⲓⲃⲓ ⲛ̀ⲧⲉ ⲫ̀ⲙⲟⲩ ⲡⲉⲑⲛⲁϣⲱⲡⲓ ⲛⲱⲟⲩ ⲉⲩⲥⲟⲡ ϫⲉ ⲉϥⲉ̀ⲥⲟⲩⲉⲛ ϩⲁⲛϣ̀ⲑⲟⲣⲧⲉⲣ ⲛ̀ⲧⲉ ⲧ̀ϧⲏⲓⲃⲓ ⲙ̀ⲫ̀ⲙⲟⲩ.
     ⲓ̅ⲏ̅. Ϥ̀ⲁ̀ⲥⲓⲱⲟⲩ ϩⲓϫⲉⲛ ⲡ̀ϩⲟ ⲛ̀ⲟⲩⲙⲱⲟⲩ : ⲉϥⲉ̀ϣⲱⲡⲓ ⲉϥⲥ̀ϩⲟⲩⲟⲣⲧ ⲛ̀ϫⲉ ⲡⲟⲩⲙⲉⲣⲟⲥ ϩⲓϫⲉⲛ ⲡ̀ⲕⲁϩⲓ.
     ⲓ̅ⲑ̅. Ⲉⲩⲉ̀ⲟⲩⲱⲛϩ ⲇⲉ ⲉ̀ⲃⲟⲗ ⲛ̀ϫⲉ ⲛⲏⲉⲧⲣⲏⲧ ⲛ̀ⲧⲱⲟⲩ ⲉⲩϣⲟⲩⲱⲟⲩ ϩⲓϫⲉⲛ ⲡ̀ⲕⲁϩⲓ : ⲉⲩϩⲱⲗⲉⲙ ⲅⲁⲣ ⲛ̀ϩⲁⲛⲭ̀ⲛⲁⲩ ⲛ̀ⲧⲉ ϩⲁⲛⲟⲣⲫⲁⲛⲟⲥ.
     ⲕ̅. Ⲓⲧⲁ ⲁϥⲉⲣⲫ̀ⲙⲉⲩⲓ̀ ⲙ̀ⲡⲉϥⲛⲟⲃⲓ : ⲁϥϣⲱⲡⲓ ⲇⲉ ⲛ̀ⲁⲑⲟⲩⲱⲛϩ ⲙ̀ⲫ̀ⲣⲏϯ ⲛ̀ⲟⲩⲛⲓϥ ⲛ̀ⲧⲉ ⲟⲩⲓⲱϯ : ⲉⲩⲉ̀ϯϣⲉⲃⲓⲱ ⲛⲁϥ ⲛ̀ⲛⲏⲉⲧⲁϥⲁⲓⲧⲟⲩ: ⲉϥⲉ̀ϧⲟⲙϧⲉⲙ ⲇⲉ ⲛ̀ϫⲉ ⲣⲉϥϭⲓⲛ̀ϫⲟⲛⲥ ⲛⲓⲃⲉⲛ ⲙ̀ⲫ̀ⲣⲏϯ ⲛ̀ⲟⲩϣⲉ ⲛ̀ⲁⲧϣⲁⲩ.
     ⲕ̅ⲁ̅. Ⲟⲩⲁϭⲣⲏⲛ ⲅⲁⲣ ⲙ̀ⲡⲟⲩⲉⲣⲡⲉⲑⲛⲁⲛⲉϥ ⲛⲁⲥ : ⲟⲩⲟϩ ⲟⲩⲁⲧⲥ̀ϩⲓⲙⲓ ⲙ̀ⲡⲟⲩⲛⲁⲓ ⲛⲁϥ.
     ⲕ̅ⲃ̅. Ϧⲉⲛ ⲟⲩϫⲱⲛⲧ ⲅⲁⲣ ⲁϥⲣⲱϧⲧ ⲛ̀ϩⲁⲛⲁⲧϫⲟⲙ : ⲁϥϣⲁⲛⲧⲱⲛϥ ⲅⲁⲣ ⲟⲩⲛ ⲙ̀ⲡⲛⲑ̀ⲣⲉϥⲧⲉⲛϩⲉⲧ ⲡⲉϥⲱⲛϧ.
     ⲕ̅ⲅ̅. Ⲁϥϣⲁⲛϣⲱⲛⲓ ⲇⲉ ⲙ̀ⲡⲉⲛⲑ̀ⲣⲉϥⲉⲣϩⲉⲗⲡⲓⲥ ϫⲉ ϥ̀ⲛⲁⲗⲟϫϥ : ⲁⲗⲗⲁ ⲉϥⲉ̀ϩⲉⲓ ϧⲉⲛ ⲟⲩϣⲱⲛⲓ.
     ⲕ̅ⲇ̅. Ⲟⲩⲙⲏϣ ⲇⲉ ⲁϥⲑⲉⲃⲓⲱⲟⲩ ⲛ̀ϫⲉ ⲡⲉϥϭⲓⲥⲓ : ⲁϥⲗⲱⲙ ⲇⲉ ⲙ̀ⲫ̀ⲣⲏϯ ⲛ̀ⲟⲩⲙⲟⲗⲟⲕⲓ ϧⲉⲛ ⲟⲩⲕⲁⲩⲙⲁ : ⲓⲉ ⲙ̀ⲫ̀ⲣⲏϯ ⲛ̀ⲟⲩϧⲉⲙⲥ ⲉ̀ⲁϥϩⲉⲓ ⲙ̀ⲙⲁⲩⲁⲧϥ ⲉ̀ⲃⲟⲗϧⲉⲛ ϩⲁⲛⲣⲱⲟⲩⲓ̀.
     ⲕ̅ⲉ̅. Ⲓⲥϫⲉ ⲙ̀ⲙⲟⲛ ⲛⲓⲙ ⲡⲉ ⲉⲧⲁϥϫⲟⲥ ⲛⲁϥ ϫⲉ ⲁⲓϫⲉⲙⲉⲑⲛⲟⲩϫ : ⲟⲩⲟϩ ⲛ̀ⲧⲉϥⲭⲱ ⲛ̀ⲛⲁⲥⲁϫⲓ ϫⲉ ϩⲁⲛϩ̀ⲗⲓ ⲛⲉ.

ⲕⲉⲫ ⲕ̅ⲉ̅

    Ϯⲙⲁϩⲅ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲃⲁⲗⲇⲁⲇ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲃⲁⲗⲇⲁⲇ ⲡⲓⲤⲁⲩⲭⲓⲧⲏⲥ ⲡⲉϫⲁϥ ϫⲉ :
     ⲃ̅. Ⲟⲩ ⲅⲁⲣ ⲡⲉ ⲡⲓⲡ̀ⲣⲟⲟⲓⲙⲓⲟⲛ ⲉⲃⲏⲗ ⲉ̀ⲟⲩϩⲟϯ ⲉ̀ⲃⲟⲗϩⲓⲧⲟⲧϥ : ⲫⲏⲉⲧⲁϥⲑⲁⲙⲓⲟ ⲛ̀ⲉⲛⲭⲁⲓ ⲛⲓⲃⲉⲛ ϧⲉⲛ ⲡⲉⲧϭⲟⲥⲓ.
     ⲅ̅. Ⲙ̀ⲡⲉⲛⲑ̀ⲣⲉ ϩ̀ⲗⲓ ⲟⲩⲛ ⲙⲉⲩⲓ̀ ϫⲉ ⲟⲩⲟⲛ ⲟⲩⲙⲟⲩⲛ ⲉ̀ⲃⲟⲗ ⲛⲁϣⲱⲡⲓ ⲛ̀ⲟⲩⲣⲉϥⲉⲣⲭ̀ⲣⲟϥ : ⲛⲓⲙ ⲇⲉ ⲛⲉ ⲛⲏⲉⲧⲉ ⲙ̀ⲙⲟⲛ ϫⲟⲣϫⲥ ⲛⲁⲓ ⲉ̀ϫⲱⲟⲩ ⲉ̀ⲃⲟⲗϩⲓⲧⲟⲧϥ.
     ⲇ̅. Ⲡⲱⲥ ⲅⲁⲣ ⲟⲩⲟⲛ ⲟⲩⲣⲱⲙⲓ ⲛⲁⲉⲣⲑ̀ⲙⲏⲓ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ : ⲓⲉ ⲛⲓⲙ ⲉⲑⲛⲁⲧⲟⲩⲃⲟϥ ⲉ̀ⲁⲩⲙⲁⲥϥ ⲉ̀ⲃⲟⲗϧⲉⲛ ⲟⲩⲥ̀ϩⲓⲙⲓ.
     ⲉ̅. Ⲓⲥϫⲉ ⲡⲓⲓⲟϩ ϣⲁϥⲟⲩⲁϩⲥⲁϩⲛⲓ ⲛⲁϥ ⲟⲩⲟϩ ⲙ̀ⲡⲁϥⲉⲣⲟⲩⲱⲓⲛⲓ : ⲛⲓⲥⲓⲟⲩ ⲇⲉ ⲥⲉⲟⲩⲁⲃ ⲁⲛ ⲙ̀ⲡⲉϥⲙ̀ⲑⲟ.
     Ⲋ. Ⲓⲉ ⲁⲩⲏⲣ ⲡⲉ ⲫ̀ⲣⲱⲙⲓ ⲉⲑⲛⲁⲛⲉϥ ⲁⲛ : ⲟⲩⲟϩ ⲡ̀ϣⲏⲣⲓ ⲙ̀ⲫ̀ⲣⲱⲙⲓ ⲉⲧⲟⲓ ⲙ̀ϥⲉⲛⲧ.

ⲕⲉⲫ ⲕ̅Ⲋ

    Ϯⲙⲁϩⲏ̅ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲓⲱⲃ ⲡⲉϫⲁϥ ϫⲉ :
     ⲃ̅. Ⲁⲕⲟⲩⲉϩ ⲉ̀ⲣⲁⲧϥ ⲛ̀ⲛⲓⲙ : ⲓⲉ ⲁⲕⲛⲁⲉⲣⲃⲟⲏ̀ⲑⲓⲛ ⲉ̀ⲛⲓⲙ : ⲙⲏ ⲫⲏ ⲁⲛ ⲉⲧⲉ ⲑⲱϥ ⲧⲉ ϯⲥⲟⲫⲓⲁ ⲧⲏⲣⲥ.
     ⲅ̅. Ⲓⲉ ⲛⲓⲙ ⲡⲉ ⲉⲧⲉⲕⲛⲁⲙⲟϣⲓ ⲛ̀ⲥⲱϥ ⲙⲏ ⲫⲏ ⲁⲛ ⲉⲧⲉ ⲟⲩⲟⲛⲧⲁϥ ⲙ̀ⲙⲁⲩ ⲛ̀ⲟⲩⲛⲓϣϯ ⲛ̀ϫⲟⲙ.
     ⲇ̅. Ⲉⲧⲁⲕϫⲉ ϩⲁⲛⲥⲁϫⲓ ⲇⲉ ⲛ̀ⲛⲓⲙ : ⲫⲁ ⲛⲓⲙ ⲇⲉ ⲡⲉ ⲡⲓⲛⲓϥⲓ ⲉⲑⲛⲏⲟⲩ ⲉ̀ⲃⲟⲗⲛ̀ϧⲏⲧⲕ.
     ⲉ̅. Ⲙⲏ ⲥⲉⲛⲁⲑ̀ⲙⲉⲥⲓⲉ ϩⲁⲛⲁ̀ⲫⲱⲫ ⲥⲁⲡⲉⲥⲏⲧ ⲛ̀ⲟⲩⲙⲱⲟⲩ ⲛⲉⲙ ⲛⲉϥⲑⲉϣⲉⲩ.
     Ⲋ. Ϥ̀ⲃⲏϣ ⲅⲁⲣ ⲛ̀ϫⲉ ⲁ̀ⲙⲉⲛϯ ⲙ̀ⲡⲉϥⲙ̀ⲑⲟ : ⲙ̀ⲙⲟⲛ ϩⲉⲃⲥⲱ ϣⲟⲡ ⲙ̀ⲡ̀ⲧⲁⲕⲟ.
     ⲍ̅. Ⲫⲏⲉⲧϭⲱⲗⲕ ⲙ̀ⲡⲉⲙϩⲓⲧ ⲉ̀ⲃⲟⲗϩⲓⲧⲉⲛ ϩ̀ⲗⲓ : ⲟⲩⲟϩ ⲉϥⲉ̀ϣⲓ ⲙ̀ⲡ̀ⲕⲁϩⲓ ϩⲓ ϩ̀ⲗⲓ.
     ⲏ̅. Ⲫⲉⲧⲙⲟⲩⲣ ⲛ̀ⲟⲩⲙⲱⲟⲩ ϧⲉⲛ ⲛⲉϥϭⲏⲡⲓ:ⲟⲩⲟϩ ⲙ̀ⲡⲉ ϭⲏⲡⲓ ⲫⲱϧ ⲉ̀ⲃⲟⲗ ⲙ̀ⲙⲟϥ.
     ⲑ̅. Ⲫⲏⲉⲧⲁ̀ⲙⲟⲛⲓ ⲙ̀ⲡ̀ϩⲟ ⲛ̀ⲟⲩⲑ̀ⲣⲟⲛⲟⲥ : ⲉϥⲫⲱⲣϣ ⲉ̀ⲃⲟⲗ ⲉ̀ϫⲱϥ ⲛ̀ⲟⲩϭⲏⲡⲓ ⲛ̀ⲧⲁϥ.
     ⲓ̅. Ⲁϥⲧⲁⲕⲧⲟ ⲛ̀ⲟⲩⲟⲩⲁϩⲥⲁϩⲛⲓ ϩⲓϫⲉⲛ ⲡ̀ϩⲟ ⲛ̀ⲟⲩⲙⲱⲟⲩ ϣⲁ ⲡ̀ϫⲱⲕ ⲉ̀ⲃⲟⲗ ⲛ̀ⲧⲉ ⲡⲓⲟⲩⲱⲓⲛⲓ ⲛⲉⲙ ⲡⲓⲭⲁⲕⲓ.
     ⲓ̅ⲁ̅. Ϩⲁⲛⲥ̀ⲧⲩⲗⲟⲥ ⲛ̀ⲧⲉ ⲧ̀ⲫⲉ ⲁⲩϩⲱⲗ : ⲟⲩⲟϩ ⲁⲩⲧⲱⲙⲧ ϩⲓⲧⲉⲛ ⲧⲉϥⲉ̀ⲡⲓⲑⲩⲙⲓⲁ.
     ⲓ̅ⲃ̅. Ϧⲉⲛ ⲟⲩϫⲟⲙ ⲁϥⲑ̀ⲣⲉ ⲫ̀ⲓⲟⲙ ϩⲉⲣⲓ : ϧⲉⲛ ⲟⲩⲕⲁϯ ⲇⲉ ⲁϥϣ̀ⲧⲟ ⲙ̀ⲡⲓⲕⲏⲧⲟⲥ.
     ⲓ̅ⲅ̅. Ⲛⲓⲱⲧϩ ⲇⲉ ⲛ̀ⲧⲉ ⲧ̀ⲫⲉ ⲥⲉⲉⲣϩⲟϯ ϧⲁⲧⲉϥϩⲏ : ϧⲉⲛ ⲟⲩⲁϩⲥⲁϩⲛⲓ ⲇⲉ ⲁϥϧⲱⲧⲉⲃ ⲙ̀ⲡⲓⲇ̀ⲣⲁⲕⲱⲛ ⲛ̀ⲁ̀ⲡⲟⲥⲧⲁⲧⲏⲥ.
     ⲓⲇ̅. Ϩⲏⲡⲡⲉ ⲓⲥ ⲛⲁⲓ ϩⲁⲛⲙⲉⲣⲟⲥ ⲛ̀ⲧⲉ ⲡⲉϥⲙⲱⲓⲧ ⲛⲉ: ⲟⲩⲟϩ ϩⲓϫⲉⲛ ⲟⲩⲉⲗϩⲱⲃ ⲛ̀ⲧⲉ ⲟⲩⲥⲁϫⲓ ⲉⲛⲉ ⲥⲱⲧⲉⲙ ⲛ̀ϧⲏⲧϥ : ⲧ̀ϫⲟⲙ ⲇⲉ ⲛ̀ⲧⲉ ⲛⲉϥϧⲁⲣⲁⲃⲁⲓ ⲛⲓⲙ ⲉⲧⲉ̀ⲙⲓ ϫⲉ ⲁϥⲛⲁⲁⲓⲥ ⲛ̀ⲑ̀ⲛⲁⲩ.

ⲕⲉⲫ ⲕ̅ⲍ̅

    Ϯⲙⲁϩⲑ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ

     ⲁ̅. Ⲉⲧⲓ ⲟⲛ ⲁϥⲟⲩⲁϩⲧⲟⲧϥ ⲛ̀ϫⲉ Ⲓⲱⲃ ⲡⲉϫⲁϥ ϧⲉⲛ ⲡⲓⲡ̀ⲣⲟⲟⲓⲙⲓⲟⲛ ϫⲉ :
     ⲃ̅. Ϥ̀ⲟⲛϧ ⲛ̀ϫⲉ Ⲡⲟ̅ⲥ̅ ⲫⲏⲉⲧⲁϥϯϩⲁⲡ ⲉ̀ⲣⲟⲓ ⲙ̀ⲡⲁⲓⲣⲏϯ ⲛⲉⲙ Ⲡⲓⲡⲁⲛⲧⲟⲕⲣⲁⲧⲱⲣ ⲫⲏⲉⲧⲁϥϯⲙ̀ⲕⲁϩ ⲛ̀ⲧⲁⲩⲭⲏ.
     ⲅ̅. Ϫⲉ ϩⲟⲥⲟⲛ ⲉⲣⲉ ⲡⲁⲛⲓϥⲓ ϣⲟⲡ ⲛ̀ϧⲏⲧ ⲟⲩⲟϩ ⲟⲩⲡ̅ⲛ̅ⲁ̅ ⲉϥⲟⲩⲁⲃ ⲉⲧⲓ ⲉϥⲭⲏ ϧⲉⲛ ⲡⲁϣⲁⲓ.
     ⲇ̅. Ⲛ̀ⲛⲉ ⲛⲁⲥ̀ⲫⲟⲧⲟⲩ ϫⲉ ⲟⲩⲥⲁϫⲓ ⲛ̀ⲁ̀ⲛⲟⲙⲓⲁ : ⲟⲩⲇⲉ ⲧⲁⲩⲭⲏ ⲛ̀ⲛⲉⲥⲉⲣⲙⲉⲗⲉⲧⲁⲛ ⲛ̀ϩⲁⲛϭⲓⲛ̀ϫⲟⲛⲥ.
     ⲉ̅. Ⲛ̀ⲛⲉⲥϣⲱⲡⲓ ⲛⲏⲓ ⲉ̀ⲑ̀ⲣⲓϫⲟⲥ ϫⲉ ⲛ̀ⲑⲱⲧⲉⲛ ϩⲁⲛⲑ̀ⲙⲏⲓ : ϣⲁϯⲙⲟⲩ ⲛ̀ⲛⲁⲭⲱ ⲅⲁⲣ ⲛ̀ⲥⲱⲓ ⲛ̀ⲧⲁⲙⲉⲧⲁⲧⲕⲁⲕⲓⲁ.
     Ⲋ. Ⲉⲓⲉ̀ϯϩ̀ⲑⲏⲓ ⲇⲉ ⲉ̀ϯⲙⲉⲑⲙⲏⲓ ⲟⲩⲟϩ ⲛ̀ⲛⲁⲭⲁⲣⲱⲓ : ϯⲥⲱⲟⲩⲛ ⲅⲁⲣ ⲙ̀ⲙⲟⲓ ⲁⲛ ⲉ̀ⲁⲓⲉⲣ ϩ̀ⲗⲓ ⲙ̀ⲡⲉⲧϩⲱⲟⲩ ⲓⲉ ϭⲓⲛ̀ϫⲟⲛⲥ.
     ⲍ̅. Ⲙ̀ⲙⲟⲛ ⲇⲉ ⲁⲗⲗⲁ ⲛⲁϫⲁϫⲓ ⲉⲩⲉ̀ⲉⲣ ⲙ̀ⲫ̀ⲣⲏϯ ⲙ̀ⲫ̀ⲟⲩⲱϫⲡ ⲛ̀ⲛⲓⲁ̀ⲥⲉⲃⲏⲥ : ⲟⲩⲟϩ ⲛⲏⲉⲧⲧⲱⲟⲩⲛ ⲙ̀ⲙⲱⲟⲩ ⲉ̀ϩ̀ⲣⲏⲓ ⲉ̀ϫⲱⲓ ⲙ̀ⲫ̀ⲣⲏϯ ⲙ̀ⲡ̀ⲧⲁⲕⲟ ⲛ̀ⲛⲓⲡⲁⲣⲁⲛⲟⲙⲟⲥ.
     ⲏ̅. Ⲁϣ ⲅⲁⲣ ⲧⲉ ⲧ̀ϩⲉⲗⲡⲓⲥ ⲙ̀ⲡⲓⲁ̀ⲥⲉⲃⲏⲥ ϫⲉ ⲁϥⲁ̀ⲙⲟⲛⲓ ⲛ̀ⲧⲟⲧϥ : ⲁϥϣⲁⲛⲭⲁϩ̀ⲑⲏϥ ⲉ̀Ⲡⲟ̅ⲥ̅ ϩⲁⲣⲁ ϥ̀ⲛⲁⲛⲟϩⲉⲙ ⲓⲉ ϥ̀ⲛⲁⲥⲱⲧⲉⲙ ⲉ̀ⲡⲉϥⲧⲱⲃϩ ⲛ̀ϫⲉ Ⲡⲟ̅ⲥ̅.
     ⲑ̅. Ⲓⲉ ⲁⲥϣⲁⲛⲓ̀ ⲉ̀ϫⲱϥ ⲛ̀ϫⲉ ⲟⲩⲁⲛⲁⲅⲕⲏ ⲙⲏ ϥ̀ⲛⲁϫⲉⲙ ϩ̀ⲗⲓ ⲙ̀ⲡⲁⲣⲣⲏⲥⲓⲁ ⲙ̀ⲡⲉϥⲙ̀ⲑⲟ ⲉ̀ⲃⲟⲗ.
     ⲓ̅. Ⲓⲉ ⲁϥϣⲁⲛⲱϣ ⲟⲩⲃⲏϥ ⲙⲏ ϥ̀ⲛⲁⲥⲱⲧⲉⲙ ⲉ̀ⲣⲟϥ.
     ⲓ̅ⲁ̅. Ⲁⲗⲗⲁ ⲁ̀ⲛⲟⲕ ϯⲛⲁⲧⲁⲙⲱⲧⲉⲛ ϫⲉ ⲟⲩ ⲡⲉⲧϧⲉⲛ ⲛⲉⲛϫⲓϫ ⲙ̀Ⲡⲟ̅ⲥ̅ : ⲟⲩⲟϩ ⲛ̀ⲛⲁϫⲉⲙⲉⲑⲛⲟⲩϫ ⲛ̀ⲛⲏⲉⲧⲉ ⲛ̀ⲧⲟⲧϥ ⲙ̀Ⲡⲓⲡⲁⲛⲧⲟⲕⲣⲁⲧⲱⲣ.
     ⲓ̅ⲃ̅. Ϩⲏⲡⲡⲉ ⲧⲉⲧⲉⲛⲉ̀ⲙⲓ ⲧⲏⲣⲟⲩ ϫⲉ ϩⲁⲛⲡⲉⲧϣⲟⲩⲓⲧ ⲉⲑⲛⲁⲓ̀ ⲉ̀ⲃⲟⲗ ⲛ̀ⲛⲏⲉⲧϣⲟⲩⲓⲧ.
     ⲓ̅ⲅ̅. Ⲫⲁⲓ ⲡⲉ ⲫ̀ⲙⲉⲣⲟⲙ̀ⲡⲓⲣⲱⲙⲓ ⲛ̀ⲁ̀ⲥⲉⲃⲏⲥ ⲉ̀ⲃⲟⲗϩⲓⲧⲉⲛ Ⲡⲟ̅ⲥ̅ : ⲡⲓϫ̀ⲫⲓⲟ ⲇⲉ ⲛ̀ⲧⲉ ⲡⲓϫⲱⲣⲓ ⲉϥⲉ̀ⲓ̀ ⲉ̀ϩ̀ⲣⲏⲓ ⲉ̀ϫⲱϥ ⲉ̀ⲃⲟⲗϩⲓⲧⲟⲧϥ ⲙ̀Ⲡⲓⲡⲁⲛⲧⲟⲕⲣⲁⲧⲱⲣ.
     ⲓ̅ⲇ̅. Ⲁⲩϣⲁⲛⲁ̀ϣⲁⲓ ⲇⲉ ⲛ̀ϫⲉ ⲛⲉϥϣⲏⲣⲓ ⲉⲩⲉ̀ϣⲱⲡⲓ ⲉ̀ⲡ̀ϧⲟⲗϧⲉⲗ : ⲟⲩⲟϩ ⲉϣⲱⲡ ⲁⲩϣⲁⲛϫⲉⲙⲛⲟⲙϯ ⲉⲩⲉ̀ϣⲁⲧⲙⲉⲑⲛⲁⲓ.
     ⲓ̅ⲉ̅. Ⲛⲏ ⲇⲉ ⲉⲧϣⲟⲡ ⲛⲁϥ ⲉⲩⲉ̀ⲙⲟⲩ ⲉ̀ⲫ̀ⲙⲟⲩ : ⲛⲟⲩⲭⲏⲣⲁ ⲇⲉ ⲛ̀ⲛⲉ ϩ̀ⲗⲓ ⲛⲁⲓ ⲛⲱⲟⲩ.
     ⲓ̅Ⲋ. Ⲁⲩⲑⲟⲩⲉⲧ ϩⲁⲧ ⲙ̀ⲫ̀ⲣⲏϯ ⲛ̀ⲟⲩⲕⲁϩⲓ : ⲁⲩⲥⲟⲃϯ ⲇⲉ ⲙ̀ⲫ̀ⲛⲟⲩⲃ ⲙ̀ⲫ̀ⲣⲏϯ ⲛ̀ⲟⲩⲟ̀ⲙⲓ.
     ⲓ̅ⲍ̅. Ⲛⲁⲓ ⲧⲏⲣⲟⲩ ⲛⲓⲑ̀ⲙⲏⲓ ⲉⲑⲛⲁϭⲓⲧⲟⲩ : ⲛⲉϥⲭ̀ⲣⲏⲙⲁ ⲇⲉ ϩⲁⲛⲣⲉⲙⲙ̀ⲙⲏⲓ ⲉⲩⲉ̀ⲁ̀ⲙⲟⲛⲓ ⲙ̀ⲙⲱⲟⲩ.
     ⲓ̅ⲏ̅. Ⲡⲉϥⲏⲓ ⲇⲉ ⲁϥϣⲱⲡⲓ ⲙ̀ⲫ̀ⲣⲏϯ ⲛ̀ϩⲁⲛϩⲟⲗⲓ ⲛⲉⲙ ⲙ̀ⲫ̀ⲣⲏϯ ⲛ̀ⲟⲩⲥ̀ⲧⲁϫⲟⲩⲗ.
     ⲓ̅ⲑ̅. Ⲉϥⲉ̀ⲉⲛⲕⲟⲧ ⲇⲉ ⲛ̀ϫⲉ ⲟⲩⲣⲁⲙⲁⲟ̀ : ⲟⲩⲟϩ ⲛ̀ⲛⲉϥⲟⲩⲁϩⲧⲟⲧϥ ⲉϥⲟⲩⲱⲛ ⲛ̀ⲛⲉϥⲃⲁⲗ ⲟⲩⲟϩ ϥ̀ϣⲟⲡ ⲁⲛ.
     ⲕ̅. Ⲁⲩⲓ̀ ⲉ̀ϧⲟⲩⲛ ⲉ̀ϩ̀ⲣⲁϥ ⲛ̀ϫⲉ ⲛⲓⲙ̀ⲕⲁϩⲛ̀ϩⲏⲧ ⲙ̀ⲫ̀ⲣⲏϯ ⲛ̀ⲟⲩⲙⲱⲟⲩ ϧⲉⲛ ⲟⲩⲉ̀ϫⲱⲣϩ : ⲇⲉ ⲁϥⲟⲗϥ ⲛ̀ϫⲉ ⲟⲩⲅ̀ⲛⲟⲫⲟⲥ.
     ⲕ̅ⲁ̅. Ⲉϥⲉ̀ⲟⲗϥ ⲛ̀ϫⲉ ⲟⲩⲕⲁⲩⲥⲱⲛ ⲟⲩⲟϩ ⲉϥⲉ̀ϣⲉⲛⲁϥ ⲉ̀ⲃⲟⲗ ϧⲉⲛ ⲡⲉϥⲧⲟⲡⲟⲥ.
     ⲕ̅ⲃ̅. Ⲟⲩⲟϩ ⲉϥⲉ̀ⲃⲟⲣⲃⲉⲣ ⲉ̀ϩ̀ⲣⲏⲓ ⲉ̀ϫⲱϥ ⲛ̀ⲛⲉϥϯⲁ̀ⲥⲟ ⲁⲛ : ϧⲉⲛ ⲟⲩⲫⲱⲧ ⲉϥⲉ̀ⲫⲱⲧ ⲉ̀ⲃⲟⲗϧⲉⲛ ⲛⲉϥϫⲓϫ.
     ⲕ̅ⲅ̅. Ⲉϥⲉ̀ⲉⲛ ⲛⲉϥϫⲓϫ ⲉ̀ϩ̀ⲣⲏⲓ ⲉ̀ϫⲱϥ : ⲟⲩⲟϩ ⲉϥⲉ̀ⲱϣϯ ⲙ̀ⲙⲟϥ ⲉ̀ⲃⲟⲗϧⲉⲛ ⲡⲉϥⲙⲁ.

ⲕⲉⲫ ⲕ̅ⲏ̅

     ⲁ̅. Ϥ̀ϣⲟⲡ ⲅⲁⲣ ⲁⲛ ⲛ̀ϫⲉ ⲟⲩⲙⲁ ⲙ̀ⲡⲓϩⲁⲧ ⲫⲏⲉⲧⲟⲩⲑⲁⲙⲓⲟ ⲙ̀ⲙⲟϥ ⲉ̀ⲃⲟⲗⲛ̀ϧⲏⲧϥ ⲛⲉⲙ ⲟⲩⲙⲁ ⲙ̀ⲡⲓⲛⲟⲩⲃ ⲫⲏⲉⲧⲟⲩⲟⲩⲱⲧϩ ⲙ̀ⲙⲟϥ ⲉ̀ⲃⲟⲗ ⲛ̀ϧⲏⲧϥ.
     ⲃ̅. Ⲡⲓⲃⲉⲛⲓⲡⲓ ⲙⲉⲛ ⲅⲁⲣ ⲁⲩⲑⲁⲙⲓⲟ ⲙ̀ⲙⲟϥ ⲉ̀ⲃⲟⲗϧⲉⲛ ⲡ̀ⲕⲁϩⲓ : ⲡⲓϩⲟⲙⲧ ⲇⲉ ⲁⲩⲉⲣϩⲱⲃ ⲉ̀ⲣⲟϥ ⲙ̀ⲫ̀ⲣⲏϯ ⲙ̀ⲡⲓⲱ̀ⲛⲓ.
     ⲅ̅. Ⲁϥⲭⲱ ⲛ̀ⲟⲩⲧⲁⲝⲓⲥ ⲙ̀ⲡⲓⲭⲁⲕⲓ : ⲟⲩⲟϩ ϧⲁⲏ̀ ⲛⲓⲃⲉⲛ ⲛ̀ⲑⲟϥ ⲉⲧϧⲟⲧϧⲉⲧ ⲙ̀ⲙⲱⲟⲩ : ⲟⲩⲟⲩⲱⲓⲛⲓ ⲛⲉⲙ ⲟⲩⲭⲁⲕⲓ ⲉⲧϧⲉⲛ ⲧ̀ϧⲏⲓⲃⲓ ⲙ̀ⲫ̀ⲙⲟⲩ.
     ⲇ̅. Ⲟⲩϣⲱⲧ ⲉ̀ⲃⲟⲗ ⲛ̀ⲧⲉ ⲟⲩⲭⲓⲙⲁⲣⲟⲥ ⲉ̀ⲃⲟⲗϧⲉⲛ ⲟⲩⲕⲱⲛⲓⲁ : ⲛⲏ ⲇⲉ ⲉⲧⲉⲣⲡⲱⲃϣ ⲛ̀ϯⲙⲉⲑⲙⲏⲓ ϣⲁⲩϣⲱⲛⲓ ⲉ̀ⲃⲟⲗϧⲉⲛ ⲛⲓⲣⲱⲙⲓ.
     ⲉ̅. Ⲡⲓⲕⲁϩⲓ ⲟⲩⲱⲓⲕ ⲉϥⲉ̀ⲓ̀ ⲉ̀ⲃⲟⲗ ⲙ̀ⲙⲟϥ : ⲥⲁⲡⲉⲥⲏⲧ ⲙ̀ⲙⲟϥ ⲁϥⲫⲱⲛϩ ⲙ̀ⲫ̀ⲣⲏϯ ⲛ̀ⲟⲩⲭ̀ⲣⲱⲙ.
     Ⲋ. Ⲟⲩⲙⲁ ⲛ̀ⲥⲁⲡⲫⲓⲣⲟⲥ ⲡⲉ ⲡⲉϥⲱ̀ⲛⲓ : ⲟⲩⲟϩ ⲡⲉϥⲕⲁϩⲓ ⲟⲩⲛⲟⲩⲃ ⲡⲉ.
     ⲍ̅. Ⲟⲩⲙⲱⲓⲧ ⲙ̀ⲡⲉ ϩⲁⲗⲏⲧ ⲥⲟⲩⲱⲛϥ : ⲟⲩⲟϩ ⲙ̀ⲡⲉϥⲛⲁⲩ ⲉ̀ⲣⲟϥ ⲛ̀ϫⲉ ⲫ̀ⲃⲁⲗ ⲛ̀ⲟⲩⲛⲟϣⲉⲣ.
     ⲏ̅. Ⲟⲩⲟϩ ⲙ̀ⲡⲟⲩϩⲱⲙⲓ ϩⲓⲱⲧϥ ⲛ̀ϫⲉ ϩⲁⲛϣⲏⲣⲓ ⲛ̀ⲧⲉ ϩⲁⲛⲙⲉⲧϭⲁⲥⲓϩⲏⲧ : ⲙ̀ⲡⲉϥⲥⲓⲛⲓ ⲛ̀ϧⲏⲧϥ ⲛ̀ϫⲉ ⲟⲩⲙⲟⲩⲓ̀.
     ⲑ̅. Ⲁϥⲥⲟⲩⲧⲉⲛ ⲧⲉϥϫⲓϫ ⲉ̀ⲃⲟⲗϧⲉⲛ ⲟⲩϫⲁϫⲗⲁⲕϩ:  ⲁϥⲟⲩⲱϫⲡ ⲇⲉ ⲛ̀ϩⲁⲛⲧⲱⲟⲩ ⲉ̀ⲃⲟⲗϧⲉⲛ ⲛⲟⲩⲥⲉⲛϯ.
     ⲓ̅. Ⲁϥⲫⲱⲛϫ ⲇⲉ ⲛ̀ⲧ̀ϫⲟⲙ ⲛ̀ⲧⲉ ϩⲁⲛⲓⲁⲣⲱⲟⲩ : ϩⲱⲃ ⲇⲉ ⲛⲓⲃⲉⲛ ⲉⲧⲧⲁⲓⲏⲟⲩⲧ ⲁⲩⲛⲁⲩ ⲉ̀ⲣⲟϥ ⲛ̀ϫⲉ ⲛⲁⲃⲁⲗ.
     ⲓ̅ⲁ̅. Ⲛⲓϣⲱⲕ ⲇⲉ ⲛ̀ⲧⲉ ⲛⲓⲓⲁⲣⲱⲟⲩ ⲁϥϭⲟⲣⲡⲟⲩ ⲉ̀ⲃⲟⲗ: ⲁϥⲟⲩⲱⲛϩ ⲇⲉ ⲛ̀ⲧⲉϥϫⲟⲙ ⲉ̀ⲟⲩⲟⲩⲱⲓⲛⲓ.
     ⲓ̅ⲃ̅. Ϯⲥⲟⲫⲓⲁ ⲇⲉ ⲉⲧⲁⲩϫⲉⲙⲥ ⲛ̀ⲑⲱⲛ : ⲁϣ ⲡⲉ ⲫ̀ⲙⲁ ⲛ̀ϯⲉ̀ⲡⲓⲥⲧⲏⲙⲏ.
     ⲓ̅ⲅ̅. Ⲙ̀ⲙⲟⲛ ⲣⲱⲙⲓ ⲥⲱⲟⲩⲛ ⲙ̀ⲡⲉⲥⲙⲱⲓⲧ : ⲟⲩⲇⲉ ⲛ̀ⲛⲟⲩϫⲉⲙⲥ ϧⲉⲛ ⲛⲓⲣⲱⲙⲓ.
     ⲓ̅ⲇ̅. Ⲫ̀ⲛⲟⲩⲛ ⲁϥϫⲟⲥ ϫⲉ ⲥ̀ⲛ̀ϧⲏⲧ ⲁⲛ : ⲟⲩⲟϩ ⲫ̀ⲓⲟⲙ ⲁϥϫⲟⲥ ϫⲉ ⲥ̀ⲛⲉⲙⲏⲓ ⲁⲛ.
     ⲓ̅ⲉ̅. Ⲛ̀ⲛⲉϥϯ ⲛ̀ⲟⲩⲧⲁⲧϩⲟ ⲛ̀ⲧⲉⲥϣⲉⲃⲓⲱ : ⲛ̀ⲛⲟⲩϥⲁⲓ ⲙ̀ⲙⲟⲥ ⲛⲉⲙ ⲟⲩⲛⲟⲩⲃ ⲛ̀ⲧⲉ Ⲥⲱⲫⲓⲣ.
     ⲓ̅Ⲋ. Ϧⲉⲛ ⲟⲩⲓⲉⲃ ⲉϥⲧⲁⲓⲏⲟⲩⲧ ⲛⲉⲙ ⲟⲩⲥⲁⲡⲫⲓⲣⲟⲥ.
     ⲓ̅ⲍ̅. Ⲛ̀ⲛⲟⲩⲉⲣϩⲩⲥⲟⲥ ⲛⲉⲙⲁⲥ ⲛ̀ϫⲉ ⲟⲩⲛⲟⲩⲃ ⲛⲉⲙ ⲟⲩⲁ̀ⲃⲁϫⲏⲓⲛⲓ : ⲟⲩⲟϩ ⲛⲉⲥϣⲉⲃⲓⲱ ⲡⲉ ϩⲁⲛⲥ̀ⲕⲉⲩⲟⲥ ⲛ̀ⲛⲟⲩⲃ.
     ⲓ̅ⲏ̅. Ϩⲁⲛⲣⲱⲟⲩϣ ⲛⲉⲙ ϩⲁⲛⲕⲁⲃⲓⲥ ⲟⲛ ⲛ̀ⲛⲉⲥⲉⲣⲡⲟⲩⲙⲉⲩⲓ̀ : ⲟⲩⲟϩ ⲥ̀ⲥⲱⲕ ⲛ̀ϯⲥⲟⲫⲓⲁ ⲉϩⲟⲧⲉ ⲛⲏⲉⲧⲥⲁϧⲟⲩⲛ.
     ⲓ̅ⲑ̅. Ⲛ̀ⲛⲉϥⲉⲣϩⲩⲥⲟⲥ ⲛⲉⲙⲁⲥ ⲛ̀ϫⲉ ⲡⲓⲧⲟⲡⲁⲇⲓⲟⲛ ⲛ̀ⲧⲉ Ϯⲑⲓⲟⲡⲓⲁ : ⲛ̀ⲛⲟⲩϥⲁⲓ ⲙ̀ⲙⲟⲥ ⲛⲉⲙ ⲟⲩⲛⲟⲩⲃ ⲉϥⲧⲁⲓⲏⲟⲩⲧ.
     ⲕ̅. Ϯⲥⲟⲫⲓⲁ ⲇⲉ ⲉⲧⲁⲩϫⲉⲙⲥ ⲛ̀ⲑⲱⲛ : ⲁϣ ⲇⲉ ⲡⲉ ⲫ̀ⲙⲱⲓⲧ ⲙ̀ⲡⲓⲕⲁϯ.
     ⲕ̅ⲁ̅. Ⲥⲉⲟⲃϣ ⲉ̀ⲣⲟϥ ⲛ̀ϫⲉ ⲣⲱⲙⲓ ⲛⲓⲃⲉⲛ : ⲟⲩⲟϩ ⲁϥϩⲱⲡ ⲉ̀ⲛⲓϩⲁⲗⲁϯ ⲛ̀ⲧⲉ ⲧ̀ⲫⲉ.
     ⲕ̅ⲃ̅. Ⲡ̀ⲧⲁⲕⲟ ⲇⲉ ⲛⲉⲙ ⲫ̀ⲙⲟⲩ ⲁⲩϫⲟⲥ : ϫⲉ ⲁⲛⲥⲱⲧⲉⲙ ⲉ̀ⲡⲉⲥϣⲟⲩϣⲟⲩ.
     ⲕ̅ⲅ̅. Ⲡⲟ̅ⲥ̅ ⲁϥⲉⲣⲥⲩⲛⲓⲥⲧⲁⲛ ⲙ̀ⲡⲉⲥⲙⲱⲓⲧ: ⲛ̀ⲑⲟϥ ⲇⲉ ⲉⲧⲥⲱⲟⲩⲛ ⲙ̀ⲡⲉⲥⲙⲁ.
     ⲕ̅ⲇ̅. Ⲛ̅ⲑⲟϥ ⲅⲁⲣ ⲉⲑⲛⲁⲩ ⲉ̀ⲛⲏⲧⲏⲣⲟⲩ ⲉⲧⲥⲁⲡⲉⲥⲏⲧ ⲛ̀ⲧ̀ⲫⲉ.
     ⲕ̅ⲉ̅. Ϥ̀ⲥⲱⲟⲩⲛ ⲛ̀ⲛⲏⲉⲧϩⲓϫⲉⲛ ⲡ̀ⲕⲁϩⲓ ⲧⲏⲣⲟⲩ ⲉⲧⲁϥⲑⲁⲙⲓⲱⲟⲩ.
     ⲕ̅Ⲋ. Ⲛⲓϣⲓ ⲛ̀ⲧⲉ ⲛⲓⲑⲏⲟⲩ ⲛⲉⲙ ⲛⲓⲑⲟϣ ⲛ̀ⲧⲉ ⲛⲓⲙⲱⲟⲩ ϩⲟⲧⲉ ⲉⲧⲁϥⲑⲁⲙⲓⲱⲟⲩ : ⲉⲧⲁϥⲛⲁⲩ ⲉ̀ⲣⲱⲟⲩ ⲙ̀ⲡⲁⲓⲣⲏϯ ⲁϥϭⲓⲏ̀ⲡⲓ ⲙ̀ⲙⲱⲟⲩ.
     ⲕ̅ⲍ̅. Ⲧⲟⲧⲉ ⲉⲧⲁϥⲛⲁⲩ ⲉ̀ⲣⲟⲥ ⲁϥⲫⲓⲣⲓ ⲉⲑⲃⲏⲧⲥ : ⲉⲧⲁϥⲥⲉⲃⲧⲱⲧⲥ ⲇⲉ ⲁϥϧⲉⲧϧⲱⲧⲥ.
     ⲕ̅ⲏ̅. Ⲁϥϫⲟⲥ ⲇⲉ ⲙ̀ⲫ̀ⲣⲱⲙⲓ ϫⲉ ϩⲏⲡⲡⲉ ⲓⲥ ϯⲙⲉⲧⲑⲉⲟ̀ⲥⲉⲃⲏⲥ ⲡⲉ ϯⲥⲟⲫⲓⲁ : ⲡⲓϩⲉⲛⲕ ⲇⲉ ⲥⲁⲃⲟⲗ ⲙ̀ⲡⲓⲡⲉⲧϩⲱⲟⲩ ⲡⲉ ϯⲉ̀ⲡⲓⲥⲧⲓⲙⲏ.

ⲕⲉⲫ ⲕ̅ⲑ̅

    Ϯⲙⲁϩⲓ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ

     ⲁ̅. Ⲁϥⲟⲩⲁϩⲧⲟⲧϥ ⲟⲛ ⲛ̀ϫⲉ Ⲓⲱⲃ ⲡⲉϫⲁϥ ϧⲉⲛ ⲡⲓⲡ̀ⲣⲟⲟⲓⲙⲓⲟⲛ ϫⲉ :
     ⲃ̅. Ⲛⲓⲙ ⲡⲉⲑⲛⲁϣ̀ϯ ⲛⲏⲓ ⲛ̀ϩⲁⲛⲕⲉⲉ̀ⲃⲏⲧ ⲙ̀ⲫ̀ⲣⲏϯ ⲛ̀ϣⲟⲣⲡ : ⲛⲓⲉ̀ϩⲟⲟⲩ ⲉⲧⲁϥⲁ̀ⲣⲉϩ ⲉ̀ⲣⲟⲓ ⲛ̀ϧⲏⲧⲟⲩ ⲛ̀ϫⲉ Ⲫϯ.
     ⲅ̅. Ϩⲟⲧⲁⲛ ⲛⲁⲣⲉ ⲡⲉϥϧⲏⲃⲥ ⲉⲣⲟⲩⲱⲓⲛⲓ ⲥⲁⲡ̀ϣⲱⲓ ⲛ̀ⲧⲁⲁ̀ⲫⲉ : ϩⲟⲧⲁⲛ ⲁⲓⲙⲟϣⲓ ϧⲉⲛ ⲡ̀ⲭⲁⲕⲓ ⲉ̀ϧ̀ⲣⲏⲓ ϧⲉⲛ ⲡⲉϥⲟⲩⲱⲓⲛⲓ.
     ⲇ̅. Ϩⲟⲧⲉ ⲛⲁⲓⲟⲩⲉⲥⲑⲱⲛ ϩⲁ ⲛⲁⲙⲱⲓⲧ : ϩⲟⲧⲉ ⲉ̀ⲛⲁϥϫⲓⲙⲓ ⲙ̀ⲡ̀ϣⲓⲛⲓ ⲙ̀ⲡⲁⲏⲓ ⲛ̀ϫⲉ Ⲡⲟ̅ⲥ̅.
     ⲉ̅. Ϩⲟⲧⲉ ⲉ̀ⲛⲁⲓⲟⲓ ⲛ̀ϩⲩⲗⲏ ⲉⲙⲁϣⲱ : ⲉⲩⲕⲱϯ ⲇⲉ ⲉ̀ⲣⲟⲓ ⲛ̀ϫⲉ ⲛⲁⲁ̀ⲗⲱⲟⲩⲓ̀.
     Ⲋ. Ϩⲟⲧⲉ ⲛⲁⲩⲫⲉⲛⲫⲱⲛ ⲛ̀ϭⲉⲗⲓ ⲛ̀ϫⲉ ⲛⲁⲙⲱⲓⲧ ⲟⲩⲟϩ ⲛⲁⲧⲱⲟⲩ ⲛⲁⲩⲫⲉⲛⲫⲱⲛ ⲛ̀ⲉ̀ⲣⲱϯ.
     ⲍ̅. Ϩⲟⲧⲉ ⲛⲁⲓⲛⲏⲟⲩ ⲉ̀ⲃⲟⲗ ⲛ̀ϣⲱⲣⲡ ϧⲉⲛ ⲧⲁⲃⲁⲕⲓ ⲉ̀ⲛⲁⲩⲭⲱ ⲇⲉ ⲙ̀ⲡⲁⲧⲟⲧⲥ ϧⲉⲛ ⲛⲉⲥⲡ̀ⲗⲁⲧⲓⲁ.
     ⲏ̅. Ⲁⲩϣⲁⲛⲛⲁⲩ ⲉ̀ⲣⲟⲓ ⲛ̀ϫⲉ ϩⲁⲛϣⲏⲣⲓ ϣⲁⲩⲭⲟⲡⲟⲩ : ⲛⲓϧⲉⲗⲗⲟⲓ ⲇⲉ ⲧⲏⲣⲟⲩ ϣⲁⲩⲟ̀ϩⲓ ⲉ̀ⲣⲁⲧⲟⲩ.
     ⲑ̅. Ⲛⲓϫⲱⲣⲓ ⲇⲉ ϣⲁⲩⲕⲏⲛ ⲉⲩⲥⲁϫⲓ : ⲛ̀ⲥⲉⲭⲱ ⲙ̀ⲡⲟⲩⲟⲩⲧⲏⲃ ϩⲓⲣⲉⲛ ⲣⲱⲟⲩ.
     ⲓ̅. Ⲛⲏⲉⲧⲁⲩⲥⲱⲧⲉⲙ ⲁⲩⲉⲣⲙⲁⲕⲁⲣⲓⲍⲓⲛ ⲙ̀ⲙⲟⲓ : ⲟⲩⲟϩ ⲡⲟⲩⲗⲁⲥ ⲁϥϫⲱⲗϫ ⲛ̀ⲧⲟⲩϣ̀ⲃⲱⲃⲓ.
     ⲓ̅ⲁ̅. Ϫⲉ ⲟⲩⲙⲁϣϫ ⲁϥⲥⲱⲧⲉⲙ ⲟⲩⲟϩ ⲁϥϯⲱ̀ⲟⲩ ⲙ̀ⲃⲁⲗ ⲛⲏⲓ : ⲟⲩⲃⲁⲗ ⲁϥⲛⲁⲩ ⲉ̀ⲣⲟⲓ ⲟⲩⲟϩ ⲁϥⲣⲓⲕⲓ ⲉ̀ⲃⲟⲗϩⲁⲣⲟⲓ.
     ⲓ̅ⲃ̅. Ⲁⲓⲛⲟϩⲉⲙ ⲅⲁⲣ ⲛ̀ⲟⲩϩⲏⲕⲓ ⲛ̀ⲧⲟⲧϥ ⲛ̀ⲟⲩϫⲱⲣⲓ : ⲟⲩⲟϩ ⲟⲩⲟⲣⲫⲁⲛⲟⲥ ⲙ̀ⲙⲟⲛⲧⲉϥ ⲃⲟⲏ̀ⲑⲟⲥ ⲙ̀ⲙⲁⲩ ⲁⲓⲉⲣⲃⲟⲏ̀ⲑⲓⲛ ⲉ̀ⲣⲟϥ.
     ⲓ̅ⲅ̅. Ⲟⲩⲥ̀ⲙⲟⲩ ⲇⲉ ⲛ̀ⲧⲉ ⲟⲩⲁⲓ ⲁϥⲛⲁⲧⲁⲕⲟ ⲁϥⲓ̀ ⲉ̀ϩ̀ⲣⲏⲓ ⲉ̀ϫⲱⲓ : ⲣⲱⲥ ⲇⲉ ⲛ̀ⲟⲩⲭⲏⲣⲁ ⲁⲥⲥ̀ⲙⲟⲩ ⲉ̀ⲣⲟⲓ.
     ⲓ̅ⲇ̅. Ϯⲙⲉⲑⲙⲏⲓ ⲇⲉ ⲛⲁⲥⲧⲟⲓ ϩⲓⲱⲧ ⲡⲉ: ⲁⲓϫⲟⲗⲧ ⲙ̀ⲡ̀ϩⲁⲡ ⲙ̀ⲫ̀ⲣⲏϯ ⲛ̀ⲟⲩⲇⲓⲡⲗⲟⲓⲥ.
     ⲓ̅ⲉ̅. Ⲛⲁⲓⲟⲓ ⲙ̀ⲃⲁⲗ ⲛ̀ⲛⲓⲃⲉⲗⲗⲉⲩ ⲡⲉ : ⲟⲩⲟϩ ⲛⲁⲓⲟⲓ ⲙ̀ⲫⲁⲧ ⲛ̀ⲛⲓϭⲁⲗⲉⲩ.
     ⲓ̅Ⲋ. Ⲁⲛⲟⲕ ⲛⲁⲓⲟⲓ ⲛ̀ⲓⲱⲧ ⲛ̀ⲛⲓⲁⲧϫⲟⲙ : ⲡⲓϩⲁⲡ ⲇⲉ ⲉⲧⲉ ⲛⲁⲓⲥⲱⲟⲩⲛ ⲙ̀ⲙⲟϥ ⲁⲛ ⲁⲓϧⲉⲧϧⲱⲧϥ.
     ⲓ̅ⲍ̅. Ⲁⲓϧⲟⲙϧⲉⲙ ⲇⲉ ⲛ̀ⲛⲓⲛⲁϫϩⲓ ⲛ̀ⲧⲉ ⲛⲓⲣⲉϥϭⲓⲛ̀ϫⲟⲛⲥ ⲟⲩⲟϩ ⲁⲓⲓ̀ⲛⲓ ⲉ̀ⲃⲟⲗ ⲟⲩⲧⲉ ⲛⲓⲛⲁϫϩⲓ ⲛ̀ⲛⲏⲉⲧⲁⲩϩⲟⲗⲙⲟⲩ.
     ⲓ̅ⲏ̅. Ⲁⲓϫⲟⲥ ⲇⲉ ϫⲉ ϯⲛⲁⲉⲣϧⲉⲗⲗⲟ ϧⲉⲛ ⲧⲁⲙⲁⲓⲏ̀ ⲙ̀ⲫ̀ⲣⲏϯ ⲙ̀ⲡ̀ⲭⲁϥ ⲛ̀ⲟⲩⲃⲉⲛⲓ : ϯⲛⲁⲱⲛϧ ⲇⲉ ⲛ̀ⲟⲩⲟⲩⲛⲓϣϯ ⲛ̀ⲭ̀ⲣⲟⲛⲟⲥ.
     ⲓ̅ⲑ̅. Ⲧⲁⲛⲟⲩⲛⲓ ⲁⲥⲟⲩⲱⲛϩ ϩⲓϫⲉⲛ ⲟⲩⲙⲱⲟⲩ : ⲟⲩⲟϩⲟⲩⲓⲱϯ ⲉⲥⲉ̀ϣⲱⲡⲓ ϧⲉⲛ ⲡⲁⲱⲥϧ.
     ⲕ̅. Ⲡⲁⲱ̀ⲟⲩ ⲉϥϣⲟⲩⲓⲧ ⲛⲉⲙⲏⲓ : ⲟⲩⲟϩ ⲧⲁⲫⲓϯ ⲉⲥⲉ̀ϣⲉⲛⲁⲥ ϧⲉⲛ ⲧⲁϫⲓϫ.
     ⲕ̅ⲁ̅. Ⲉⲧⲁⲩⲥⲱⲧⲉⲙ ⲉ̀ⲣⲟⲓ ⲁⲩϯϩ̀ⲑⲏⲟⲩ : ⲁⲩⲭⲁⲣⲱⲟⲩ ⲇⲉ ⲉ̀ϩ̀ⲣⲏⲓ ⲉ̀ϫⲉⲛ ⲡⲁⲥⲟϭⲛⲓ.
     ⲕ̅ⲃ̅. Ⲟⲩⲇⲉ ⲙ̀ⲡⲁⲩⲧⲟⲩϩⲟ ⲉ̀ϫⲉⲛ ⲡⲁⲥⲁϫⲓ : ϣⲁⲩⲣⲁϣⲓ ⲇⲉ ⲉϣⲱⲡ ⲁⲓϣⲁⲛⲥⲁϫⲓ ⲛⲉⲙⲱⲟⲩ : ⲙ̀ⲫ̀ⲣⲏϯ ⲛ̀ⲟⲩⲕⲁϩⲓ ⲉϥⲟ̀ⲃⲓ ⲉϥϫⲟⲩϣⲧ ⲉ̀ⲃⲟⲗ ϧⲁⲧ̀ϩⲏ ⲛ̀ⲟⲩⲙⲟⲩⲛϩⲱⲟⲩ.
     ⲕ̅ⲅ̅. Ⲡⲁⲓⲣⲏϯ ⲛⲁⲓ ϩⲱⲟⲩ ⲛⲁⲩϫⲟⲩϣⲧ ⲉ̀ⲃⲟⲗ ϧⲁⲧ̀ϩⲏ ⲛ̀ⲛⲁⲥⲁϫⲓ.
    ⲕ̅ⲇ̅. Ⲁⲓϣⲁⲛⲥⲱⲃⲓ ⲛⲉⲙⲱⲟⲩ ⲙ̀ⲡⲁⲩⲧⲉⲛϩⲟⲩⲧⲥ: ⲟⲩⲟϩ ⲙ̀ⲡⲁⲣⲉ ⲫ̀ⲟⲩⲱⲓⲛⲓ ϩⲉⲓ ⲉ̀ⲃⲟⲗϧⲉⲛ ⲡⲁϩⲟ.
     ⲕ̅ⲉ̅. Ⲁⲓⲥⲱⲧⲡ ⲙ̀ⲡⲟⲩⲙⲱⲓⲧ ⲟⲩⲟϩ ⲁⲓϩⲉⲙⲥⲓ ⲉⲓⲟⲓ ⲛ̀ⲁⲣⲭⲱⲛ:ⲟⲩⲟϩ ⲛⲁⲓⲟⲩⲉϩ ⲙ̀ⲫ̀ⲣⲏϯ ⲛ̀ⲟⲩⲟⲩⲣⲟ ϧⲉⲛ ϩⲁⲛⲙⲟⲛⲁⲍⲱⲙⲉⲛⲟⲥ : ⲙ̀ⲫ̀ⲣⲏϯ ⲛ̀ϩⲁⲛⲟⲩⲟⲛ ⲉⲩⲉⲣϩⲏⲃⲓ ⲉⲓⲉ̀ϯⲛⲟⲙϯ ⲛⲱⲟⲩ.

ⲕⲉⲫ ⲗ̅

     ⲁ̅. Ϯⲛⲟⲩ ⲇⲉ ⲁⲩⲥⲱⲃⲓ ⲙ̀ⲙⲟⲓ ⲛ̀ϫⲉ ϩⲁⲛⲉ̀ⲗⲁⲭⲓⲥⲧⲟⲥ : ϯⲛⲟⲩ ⲇⲉ ⲥⲉϯⲥ̀ⲃⲱ ⲛⲏⲓ ϧⲉⲛ ⲟⲩⲙⲉⲣⲟⲥ ⲛ̀ϫⲉ ⲛⲏⲉ̀ⲛⲁⲓϣⲱϣϥ ⲛ̀ⲛⲟⲩⲓⲟϯ : ⲛⲏⲉ̀ⲛⲁⲓⲭⲱⲙ ⲙⲱⲟⲩ ϫⲉ ⲥⲉⲙ̀ⲡ̀ϣⲁ ⲁⲛ ⲛ̀ⲛⲓⲟⲩϩⲱⲣ ⲛ̀ⲧⲉ ⲛⲁⲉ̀ⲥⲱⲟⲩ .
     ⲃ̅. Ⲕⲉ ⲅⲉ ⲉⲩⲉ̀ⲉⲣ ⲟⲩ ⲛⲏⲓ ⲉ̀ⲧ̀ϫⲟⲙ ⲛ̀ⲧⲉ ⲛⲟⲩϫⲓϫ : ⲧⲟⲩⲥⲩⲛⲧⲉⲗⲓⲁ ⲁⲥⲧⲁⲕⲟ ⲉ̀ϩ̀ⲣⲏⲓ ⲉ̀ϫⲱⲟⲩ.
     ⲅ̅. Ϧⲉⲛ ⲟⲩⲙⲉⲧⲣⲉϥⲉⲣϧⲁⲉ̀ ⲛⲉⲙ ⲟⲩϩ̀ⲃⲱⲛ ⲛ̀ⲁⲧϣⲏⲣⲓ: ⲛⲏⲉⲧⲫⲏⲧ ⲉ̀ⲃⲟⲗϧⲉⲛ ⲟⲩⲙⲁ ⲛ̀ⲁⲑⲙⲱⲟⲩ ⲛ̀ⲥⲁϥ ⲟⲩⲧⲁⲕⲟ ⲛⲉⲙ ⲟⲩⲧⲁⲗⲉⲡⲱⲣⲓⲁ.
     ⲇ̅. Ⲛⲏⲉⲧⲕⲱϯ ⲛ̀ⲥⲁ ϩⲁⲛⲁ̀ⲣⲁⲣⲓⲙ ϧⲉⲛ ⲟⲩⲙⲁ ⲉϥⲥⲉⲛⲥⲉⲛ ⲛⲏⲉⲧⲉ ϩⲁⲛⲁ̀ⲣⲁⲣⲓⲙ ⲛⲉ ⲛⲟⲩϧ̀ⲣⲏⲟⲩⲓ̀ : ⲛⲓⲁ̀ⲇⲟⲕⲓⲙⲟⲥ ⲛ̀ⲥⲁ ⲡⲉⲧϩⲱⲟⲩ ⲉⲩⲉ̀ⲉⲣϧⲁⲉ̀ ⲛ̀ⲁ̀ⲅⲁⲑⲟⲛ ⲛⲓⲃⲉⲛ : ⲛⲏⲉⲧⲉ ϣⲁⲩⲟⲩⲟϫⲟⲩⲉϫ ⲉ̀ϫⲉⲛ ϩⲁⲛⲛⲟⲩⲛⲓ ⲛ̀ⲧⲉ ⲣⲟⲕϩⲟⲩ ϧⲉⲛ ⲟⲩϩ̀ⲃⲱⲛ ⲉϥⲟϣ.
     ⲉ̅. Ⲁⲩⲧⲱⲟⲩⲛⲟⲩ ⲉ̀ϩ̀ⲣⲏⲓ ⲉ̀ϫⲱⲓ ⲛ̀ϫⲉ ϩⲁⲛⲣⲉϥϭⲓⲟⲩⲓ̀.
     Ⲋ. Ⲛⲏⲉⲧⲉ ϩⲁⲛⲭⲟⲗ ⲙ̀ⲡⲉⲧⲣⲁ ⲛⲉ ⲛⲟⲩⲏⲟⲩ.
     ⲍ̅. Ⲉⲩⲱϣ ⲉ̀ⲃⲟⲗ ϧⲉⲛ ⲑ̀ⲙⲏϯ ⲛ̀ϩⲁⲛⲙⲁ ⲉⲩⲥⲉⲛⲥⲉⲛ ⲛ̀ⲕⲁⲗⲱⲥ ⲛⲏⲉ̀ⲛⲁⲩϣⲟⲡ ⲉ̀ϧⲟⲩⲛ ϧⲉⲛ ϩⲁⲛⲗⲉⲃϣ ⲛ̀ⲁⲅⲣⲓⲟⲛ.
     ⲏ̅. Ⲛⲓϣⲏⲣⲓ ⲛ̀ⲧⲉ ⲛⲓⲁⲧⲥ̀ⲃⲱ : ⲛⲁ ⲡⲓⲣⲁⲛ ⲉⲧϣⲏϣ ⲛⲉⲙ ⲡⲓϣⲟⲩϣⲟⲩ ⲉⲧⲁϥϭⲉⲛⲟ ϩⲓϫⲉⲛ ⲡ̀ⲕⲁϩⲓ.
     ⲑ̅. Ϯⲛⲟⲩ ⲇⲉ ϯⲟⲓ ⲛ̀ⲕⲩⲑⲁⲣⲁ ⲛⲱⲟⲩ : ⲟⲩⲟϩ ⲁ̀ⲛⲟⲕ ⲉⲧⲟⲓ ⲛ̀ϣ̀ϫⲏⲓ ⲛ̀ⲧⲟⲧⲟⲩ.
     ⲓ̅. Ⲁⲩⲙⲉⲥⲧⲱⲓ ⲟⲩⲟϩ ⲁⲩⲟⲩⲉⲓ ⲥⲁⲃⲟⲗ ⲙ̀ⲙⲟⲓ : ⲙ̀ⲡⲟⲩϯⲁ̀ⲥⲟ ⲇⲉ : ⲉ̀ϩⲓⲑⲁϥ ⲉ̀ϧⲟⲩⲛ ϧⲉⲛ ⲡⲁϩⲟ.
     ⲓ̅ⲁ̅. Ⲁϥⲟⲩⲱⲛ ⲅⲁⲣ ⲛ̀ⲧⲉϥⲫⲓϯ ⲟⲩⲟϩ ⲁϥϯⲙ̀ⲕⲁϩ ⲛⲏⲓ: ⲟⲩⲟϩ ⲡ̀ⲭⲁⲗⲓⲛⲟⲩⲥ ⲛ̀ⲧⲉ ⲡⲁϩⲟ ⲁϥⲟⲩⲟⲣⲡϥ ⲉ̀ⲃⲟⲗ: ⲁⲩⲧⲱⲟⲩⲛⲟⲩ ⲉ̀ϫⲉⲛ ⲑⲁⲟⲩⲓ̀ⲛⲁⲙ ⲛ̀ⲧⲉ ⲡⲉⲧⲫⲟⲣⲓ ⲉ̀ⲃⲟⲗ.
     ⲓ̅ⲃ̅. Ⲁϥⲥⲟⲩⲧⲉⲛ ⲛⲉϥϭⲁⲗⲁⲩϫ ⲉ̀ⲃⲟⲗ ⲟⲩⲟϩ ⲁϥⲥⲟⲩⲧⲱⲧϥ ⲉ̀ⲃⲟⲗ : ⲁϥⲥⲟⲃϯ ⲉ̀ϩ̀ⲣⲏⲓ ⲉ̀ϫⲱⲓ ⲛ̀ϩⲁⲛⲙⲁⲙⲙⲟϣⲓ ⲛ̀ⲧⲉ ⲟⲩⲧⲁⲕⲟ.
     ⲓ̅ⲅ̅. Ⲁⲩϧⲓϯ ⲉ̀ⲃⲟⲗ ⲛ̀ϫⲉ ⲛⲁⲙⲁⲙⲙⲟϣⲓ ⲁⲩⲃⲁϣⲧ ⲅⲁⲣ ⲛ̀ⲧⲁⲥ̀ⲧⲟⲗⲏ.
     ⲓ̅ⲇ̅. Ⲁϥϩⲓⲟⲩⲓ̀ ⲛ̀ⲛⲉϥⲥⲟⲑⲛⲉϥ ⲉ̀ϧⲟⲩⲛ ⲉ̀ⲣⲟⲓ : ⲁϥⲉⲣⲭ̀ⲣⲁⲥⲑⲉ ⲛⲏⲓ ⲙ̀ⲫ̀ⲣⲏϯ ⲉⲧⲁϥⲟⲩⲱϣ : ϯⲟⲩⲟϣⲉⲙ ϧⲉⲛ ϩⲁⲛⲙ̀ⲕⲁϩⲛ̀ϩⲏⲧ.
     ⲓ̅ⲉ̅. Ⲥⲉⲧⲁⲥⲑⲏⲟⲩⲧ ⲇⲉ ⲛ̀ϫⲉ ⲛⲁⲓⲙ̀ⲕⲁϩⲛ̀ϩⲏⲧ : ⲁⲥϣⲉⲛⲁⲥ ⲇⲉ ⲛ̀ϫⲉ ⲧⲁϩⲉⲗⲡⲓⲥ ⲙ̀ⲫ̀ⲣⲏϯ ⲛ̀ⲟⲩⲡ̅ⲛ̅ⲁ̅ ⲟⲩⲟϩ ⲧⲁⲥⲱⲧⲏⲣⲓⲁ ⲙ̀ⲫ̀ⲣⲏϯ ⲛ̀ⲟⲩϭⲏⲡⲓ.
     ⲓ̅Ⲋ. Ϯⲛⲟⲩ ⲉⲥⲉ̀ⲫⲱⲛ ⲉ̀ⲃⲟⲗ ⲉ̀ϩ̀ⲣⲏⲓ ⲉ̀ϫⲱⲓ ⲛ̀ϫⲉ ⲧⲁⲩⲭⲏ : ϩⲁⲛⲉ̀ϩⲟⲟⲩ ⲇⲉ ⲛ̀ⲉⲙⲕⲁϩⲛ̀ϩⲏⲧ ⲥⲉⲁ̀ⲙⲟⲛⲓ ⲙ̀ⲙⲟⲓ.
     ⲓ̅ⲍ̅. Ϧⲉⲛ ⲡⲓⲉ̀ϫⲱⲣϩ ⲇⲉ ⲁⲩⲣⲱⲕϩ ⲛ̀ϫⲉ ⲛⲁⲕⲁⲥ ⲉ̀ⲃⲟⲗ ⲙ̀ⲙⲟⲓ : ⲛⲁⲙⲟϯ ⲇⲉ ⲁⲩⲃⲱⲗ ⲉ̀ⲃⲟⲗ.
     ⲓ̅ⲏ̅. Ϧⲉⲛ ⲟⲩⲛⲓϣϯ ⲇⲉ ⲛ̀ϫⲟⲙ ⲁϥⲁ̀ⲙⲟⲛⲓ ⲛⲧⲁⲥ̀ⲧⲟⲗⲏ: ⲁⲩⲕⲱϯ ⲉ̀ⲣⲟⲓ ⲙ̀ⲫ̀ⲣⲏϯ ⲛ̀ϩ̀ⲑⲏϥ ⲛ̀ⲧⲁϣ̀ⲑⲏⲛ.
     ⲓ̅ⲑ̅. Ⲁⲩⲓ̀ⲣⲓ ⲇⲉ ⲛⲏⲓ ⲙ̀ⲫ̀ⲣⲏϯ ⲛ̀ⲟⲩⲟ̀ⲙⲓ : ⲁⲣⲉ ⲡⲁⲙⲉⲣⲟⲥ ϣⲱⲡⲓ ϧⲉⲛ ⲟⲩⲕⲁϩⲓ ⲛⲉⲙ ⲟⲩⲕⲉⲣⲙⲓ.
     ⲕ̅. Ϯⲱϣ ⲇⲉ ⲉ̀ⲡ̀ϣⲱⲓ ϩⲁⲣⲟⲕ ⲟⲩⲟϩ ⲕ̀ⲥⲱⲧⲉⲙ ⲉ̀ⲣⲟⲓ ⲁⲛ : ⲁⲩⲟ̀ϩⲓ ⲉ̀ⲣⲁⲧⲟⲩ ⲟⲩⲟϩ ⲁⲩϫⲟⲩϣⲧ ⲉ̀ⲣⲟⲓ.
     ⲕ̅ⲁ̅. Ⲁⲩⲧⲱⲟⲩⲛⲟⲩ ⲇⲉ ⲉ̀ϩ̀ⲣⲏⲓ ⲉ̀ϫⲱⲓ ϧⲉⲛ ⲟⲩⲙⲉⲧⲁⲑⲛⲁⲓ : ⲁⲕⲉⲣⲙⲁⲥⲧⲓⲅⲅⲟⲓⲛ ⲙ̀ⲙⲟⲓ ϧⲉⲛ ⲟⲩϫⲓϫ ⲉⲥϫⲟⲣ.
     ⲕ̅ⲃ̅. Ⲁⲕⲑⲁϣⲧ ⲉ̀ϩⲁⲛⲉⲙⲕⲁϩⲛ̀ϩⲏⲧ : ⲉⲕⲃⲉⲣⲃⲱⲣⲧ ⲉ̀ⲃⲟⲗϩⲁ ⲡⲓⲟⲩϫⲁⲓ.
     ⲕ̅ⲅ̅. Ϯⲉ̀ⲙⲓ ϫⲉ ⲫ̀ⲙⲟⲩ ⲡⲉⲑⲛⲁⲟⲙⲕⲧ : ⲡ̀ⲏⲓ ⲅⲁⲣ ⲛ̀ⲛⲓⲣⲉϥⲉⲣⲛⲟⲃⲓ ⲧⲏⲣⲟⲩ ⲡⲉ ⲡⲓⲕⲁϩⲓ.
    ⲕ̅ⲇ̅. Ⲁⲙⲟⲓ ⲅⲁⲣ ⲉ̀ⲛⲉ ⲟⲩⲟⲛϣ̀ϫⲟⲙ ⲙ̀ⲙⲟⲓ ⲡⲉ ⲉ̀ϧⲟⲑⲃⲉⲧ ⲙ̀ⲙⲁⲩⲁⲧ : ⲓⲉ ⲛ̀ⲧⲁϯϩⲟ ⲉ̀ⲕⲉⲟⲩⲁⲓ ⲛ̀ⲧⲉϥⲉⲣ ⲫⲁⲓ ⲛⲏⲓ.
     ⲕ̅ⲉ̅. Ⲁⲛⲟⲕ ⲇⲉ ⲁⲓⲣⲓⲙⲓ ⲉ̀ϫⲉⲛ ⲁⲧϫⲟⲙ ⲛⲓⲃⲉⲛ : ϣⲁⲓϥⲓⲁ̀ϩⲟⲙ ⲇⲉ ⲁⲓϣⲁⲛⲛⲁⲩ ⲉ̀ⲟⲩⲣⲱⲙⲓ ⲉϥϧⲉⲛ ⲟⲩⲁ̀ⲛⲁⲅⲕⲏ.
    ⲕ̅Ⲋ. Ⲉⲓⲭⲏ ⲁ̀ⲛⲟⲕ ϧⲉⲛ ⲛⲓⲁ̀ⲅⲁⲑⲟⲛ : ϩⲏⲡⲡⲉ ⲁⲩⲓ̀ ⲉ̀ϩ̀ⲣⲏⲓ ⲉ̀ϫⲱⲓ ⲙⲁⲗⲗⲟⲛ ⲛ̀ϫⲉ ϩⲁⲛⲉ̀ϩⲟⲟⲩ ⲛ̀ⲧⲉ ϩⲁⲛⲡⲉⲧϩⲱⲟⲩ.
     ⲕ̅ⲍ̅. Ⲧⲁⲛⲉϫⲓ ⲁⲥⲗⲱϧⲉⲙ ⲟⲩⲟϩ ⲛ̀ⲛⲁⲭⲁⲣⲱⲓ : ⲁⲩⲉⲣϣⲟⲣⲡ ⲛ̀ⲧⲁϩⲟⲓ ⲛ̀ϫⲉ ϩⲁⲛⲉ̀ϩⲟⲟⲩ ⲛ̀ⲧⲉ ⲟⲩⲙⲉⲧϩⲏⲕⲓ.
     ⲕ̅ⲏ̅. Ⲁⲓⲙⲟϣⲓ ⲉⲓϥⲓⲁ̀ϩⲟⲙ ⲛ̀ϯⲭⲱ ⲛ̀ⲣⲱⲓ ⲁⲛ : ⲁⲓⲟ̀ϩⲓ ⲉ̀ⲣⲁⲧ ⲇⲉ ϧⲉⲛ ⲟⲩⲑⲱⲟⲩⲧⲥ ⲉⲓⲱϣ ⲉ̀ⲃⲟⲗ.
     ⲕ̅ⲑ̅. Ⲁⲓⲉⲣⲥⲟⲛ ⲉ̀ⲛⲓⲥⲏⲣⲏⲛⲟⲥ ⲟⲩⲟϩ ⲁⲓⲉⲣϣ̀ⲫⲏⲣ ⲉ̀ⲛⲓⲥⲧⲣⲟⲩⲑⲟⲥ.
     ⲗ̅. Ⲡⲁϣⲁⲣ ⲇⲉ ⲁϥⲉⲣⲭⲁⲕⲓ ⲉⲙⲁϣⲱ ⲟⲩⲟϩ ⲛⲁⲕⲁⲥ ⲉ̀ⲃⲟⲗϧⲉⲛ ⲡⲓⲕⲁⲩⲙⲁ.
     ⲗ̅ⲁ̅. Ⲁⲥϣⲱⲡⲓ ⲇⲉ ⲛⲏⲓ ⲉⲩϩⲏⲃⲓ ⲛ̀ϫⲉ ⲧⲁⲕⲩⲑⲁⲣⲁ : ⲡⲁⲁⲗⲙⲟⲥ ⲇⲉ ⲁϥϣⲱⲡⲓ ⲉⲩⲣⲓⲙⲓ.

ⲕⲉⲫ ⲗ̅ⲁ̅

     ⲁ̅. Ⲁⲓⲥⲉⲙⲛⲓ ⲛ̀ⲟⲩⲇⲓⲁⲑⲏⲕⲏ ⲛ̀ⲛⲁⲃⲁⲗ : ⲟⲩⲟϩ ⲛ̀ⲛⲁⲕⲁϯ ⲉ̀ϫⲉⲛ ϩⲁⲛⲡⲁⲣⲑⲉⲛⲟⲥ.
     ⲃ̅. Ⲟⲩ ⲡⲉ ⲉⲧⲁ Ⲡⲟ̅ⲥ̅ ⲑⲁϣϥ ⲉ̀ⲃⲟⲗ ⲙ̀ⲡ̀ϣⲱⲓ : ⲟⲩⲟϩ ϯⲕⲗⲏⲣⲟⲛⲟⲙⲓⲁ ⲛ̀ⲧⲉ ⲡⲓϩⲩⲕⲁⲛⲟⲟⲩⲉ̀ⲃⲟⲗϧⲉⲛ ⲛⲏⲉⲧϭⲟⲥⲓ ⲧⲉ.
     ⲅ̅. Ⲟⲩⲟⲩⲟⲓ ⲛⲉⲙ ⲟⲩⲧⲁⲕⲟ ⲛ̀ⲧⲉ ⲡⲓⲣⲉϥϭⲓⲛ̀ϫⲟⲛⲥ ⲛⲉⲙ ⲟⲩⲙⲉⲧϣⲉⲙⲙⲟ ⲛ̀ⲛⲏⲉⲧⲉⲣϩⲱⲃ ⲉ̀ϯⲁ̀ⲛⲟⲙⲓⲁ.
     ⲇ̅. Ⲙⲏ ⲛ̀ⲑⲟⲕ ⲁⲛ ⲉⲑⲛⲁⲛⲁⲩ ⲉ̀ⲛⲁⲙⲱⲓⲧ: ⲟⲩⲟϩ ⲉⲑⲛⲁϭⲓⲏ̀ⲡⲓ ⲛ̀ⲛⲁϣⲉⲛⲧⲁⲧⲥⲓ ⲧⲏⲣⲟⲩ.
     ⲉ̅. Ⲓⲥϫⲉ ⲇⲉ ⲁⲓⲙⲟϣⲓ ⲛⲉⲙ ϩⲁⲛⲣⲉϥⲥⲱⲃⲓ : ⲓⲥϫⲉ ⲁⲥⲓⲏⲥ ⲛ̀ϫⲉ ⲧⲁⲫⲁⲧ ⲉ̀ⲟⲩⲭ̀ⲣⲟϥ.
     Ⲋ. Ⲁⲓⲟ̀ϩⲓ ⲅⲁⲣ ⲉ̀ⲣⲁⲧ ϧⲉⲛ ⲟⲩϣⲓ ⲛ̀ⲑ̀ⲙⲏⲓ : ϥ̀ⲥⲱⲟⲩⲛ ⲇⲉ ⲛ̀ϫⲉ Ⲡⲟ̅ⲥ̅ ⲛ̀ⲧⲁⲙⲉⲧⲁⲧⲕⲁⲕⲓⲁ.
     ⲍ̅. Ⲓⲥϫⲉ ⲁⲥⲣⲓⲕⲓ ⲛ̀ϫⲉ ⲧⲁⲫⲁⲧ ⲉ̀ⲃⲟⲗϩⲓ ⲡⲉϥⲙⲱⲓⲧ : ⲓⲥϫⲉ ⲇⲉ ⲁ̀ ⲡⲁϩⲏⲧ ⲟⲩⲁϩϥ ⲛ̀ⲥⲁ ⲡⲁⲃⲁⲗ: ⲓⲥϫⲉ ⲁⲓϭⲟϩ ⲉ̀ⲇⲱⲣⲟⲛ ϧⲉⲛ ⲛⲁϫⲓϫ.
     ⲏ̅. Ⲓⲉ ⲉⲓⲉ̀ϭⲟ ⲁ̀ⲛⲟⲕ ⲟⲩⲟϩ ⲛ̀ⲧⲉ ϩⲁⲛⲕⲉⲭⲱⲟⲩⲛⲓ ⲟⲩⲟⲙⲟⲩ : ⲉⲓⲉ̀ⲉⲣⲁⲑⲛⲟⲩⲛⲓ ⲇⲉ ϩⲓϫⲉⲛ ⲡⲓⲕⲁϩⲓ.
     ⲑ̅. ⲓⲥϫⲉ ⲇⲉ ⲁ ⲡⲁϩⲏⲧ ⲣⲓⲕⲓ ⲛ̀ⲥⲁ ⲧ̀ⲥ̀ϩⲓⲙⲓ ⲛ̀ⲕⲉⲟⲩⲁⲓ : ⲓⲥϫⲉ ⲁⲓϩⲉⲙⲥⲓ ϩⲓⲣⲉⲛ ⲛⲉⲥⲣⲱⲟⲩ.
     ⲓ̅. Ⲓⲉ ϩⲁⲣⲁ ⲉⲣⲉ ⲧⲁⲥ̀ϩⲓⲙⲓ ϩⲱ ⲣⲁⲛⲁϥ ⲛ̀ⲕⲉⲟⲩⲁⲓ : ⲟⲩⲟϩ ⲛⲁⲕⲟⲩϫⲓ ⲛ̀ⲁ̀ⲗⲱⲟⲩⲓ̀ ⲉⲩⲉ̀ϯⲕⲉϩ ⲛⲱⲟⲩ.
     ⲓ̅ⲁ̅. Ⲟⲩϫⲱⲛⲧ ⲅⲁⲣ ⲛ̀ⲧⲉ ⲟⲩⲙ̀ⲃⲟⲛ ⲛ̀ⲁⲧⲁ̀ⲙⲟⲛⲓ ⲙ̀ⲙⲟϥ ⲡⲉ ⲉ̀ⲥⲱϥ ⲉ̀ⲧ̀ⲥ̀ϩⲓⲙⲓ ⲛ̀ⲟⲩⲣⲱⲙⲓ.
     ⲓ̅ⲃ̅. Ⲟⲩⲭ̀ⲣⲱⲙ ⲅⲁⲣ ⲉϥⲟⲩⲱⲙ ⲡⲉ ⲥⲁⲥⲁ ⲛⲓⲃⲉⲛ: ⲫ̀ⲙⲁ ⲅⲁⲣ ⲉ̀ϣⲁϥϩⲉⲓ ⲉ̀ϫⲱϥ ϣⲁϥⲧⲁⲕⲟϥ ⲛⲉⲙ ⲛⲉϥⲛⲟⲩⲛⲓ.
     ⲓ̅ⲅ̅. Ⲓⲥϫⲉ ⲇⲉ ⲁⲓⲕⲉⲗϫ ⲡ̀ϩⲁⲡ ⲛ̀ⲟⲩⲃⲱⲕ ⲛ̀ⲧⲏⲓ ⲓⲉ ⲟⲩⲃⲱⲕⲓ : ⲉϥⲉ̀ϭⲓϩⲁⲡ ⲟⲩⲃⲏⲓ.
     ⲓ̅ⲇ̅. Ⲟⲩ ⲅⲁⲣ ⲡⲉ ⲉ̀ϯⲛⲁⲁⲓϥ ⲉϣⲱⲡ ⲁϥϣⲁⲛϣⲉⲛⲧ ⲛ̀ϫⲉ Ⲡⲟ̅ⲥ̅ : ⲓⲉ ⲁⲓⲛⲁⲟⲩⲟϩⲉⲙ ⲛⲁϥ ⲛ̀ⲁϣ ⲛ̀ⲣⲏϯ ⲉϣⲱⲡ ⲁϥϣⲁⲛϫⲉⲙⲡⲁϣⲓⲛⲓ.
     ⲓ̅ⲉ̅. ⲙⲏ ⲙ̀ⲫ̀ⲣⲏϯ ⲁⲛ ⲉⲧⲁⲓϣⲱⲡⲓ ϧⲉⲛ ⲑ̀ⲛⲉϫⲓ ⲁⲩϣⲱⲡⲓ ϩⲱⲟⲩ : ⲉⲧⲁⲛϣⲱⲡⲓ ⲇⲉ ⲉⲩⲥⲟⲡ ϧⲉⲛ ⲧⲁⲓⲛⲉϫⲓ ⲣⲱ.
     ⲓ̅Ⲋ. Ⲛⲓⲁⲧϫⲟⲙ ⲇⲉ ⲙ̀ⲡⲁⲓⲧⲁⲥⲑⲱⲟⲩ ⲉ̀ⲃⲟⲗ ⲉϣⲱⲡ ⲛ̀ⲧⲟⲩⲉⲣⲭ̀ⲣⲓⲁ : ⲫ̀ⲃⲁⲗ ⲇⲉ ⲛ̀ⲧⲉ ⲟⲩⲭⲏⲣⲁ ⲙ̀ⲡⲁⲓⲡⲁⲓϯⲙ̀ⲕⲁϩ ⲛⲁϥ.
     ⲓ̅ⲍ̅. Ⲓⲥϫⲉ ⲁⲓⲟⲩⲱⲙ ⲙ̀ⲡⲁⲱⲓⲕ ⲙ̀ⲙⲁⲩⲁⲧ ⲙ̀ⲡⲓϯ ⲛ̀ⲟⲩⲟⲣⲫⲁⲛⲟⲥ ⲉ̀ⲃⲟⲗ ⲙ̀ⲙⲟϥ.
     ⲓ̅ⲏ̅. Ⲓⲥϫⲉ ⲇⲉ ⲓⲥϫⲉⲛ ⲧⲁⲙⲉⲧⲁ̀ⲗⲟⲩ ⲛⲁⲓϣⲁⲛϣ ⲙ̀ⲫ̀ⲣⲏϯ ⲛ̀ⲟⲩⲓⲱⲧ : ⲟⲩⲟϩ ⲓⲥϫⲉⲛ ⲉⲓϧⲉⲛ ⲑ̀ⲛⲉϫⲓ ⲛ̀ⲧⲉ ⲧⲁⲙⲁⲩ ⲛⲁⲓϭⲓⲙⲱⲓⲧ.
     ⲓ̅ⲑ̅. Ⲓⲥϫⲉ ⲇⲉ ⲁⲓⲛⲁⲩ ⲉ̀ⲟⲩⲁⲓ ⲉϥⲃⲏϣ ⲉϥⲛⲁⲧⲁⲕⲟ ⲟⲩⲟϩ ⲙ̀ⲡⲓϩⲟⲃⲥϥ.
     ⲕ̅. Ⲛⲓⲁⲧϫⲟⲙ ⲇⲉ ⲓⲥϫⲉ ⲙ̀ⲡⲟⲩⲥ̀ⲙⲟⲩ ⲉ̀ⲣⲟⲓ : ⲁⲩϧ̀ⲙⲟⲙ ⲅⲁⲣ ⲛ̀ϫⲉ ⲟⲩϫ̀ⲫⲟⲓ ⲉ̀ⲃⲟⲗϧⲉⲛ ⲛⲓϧⲱⲕ ⲛ̀ⲧⲉ ⲛⲁϩⲓⲏⲃ.
     ⲕ̅ⲁ̅. Ⲓⲥϫⲉ ⲁⲓϥⲓⲧⲟⲧ ⲉ̀ϫⲉⲛ ⲟⲩⲟⲣⲫⲁⲛⲟⲥ ⲉⲣⲉ ϩ̀ⲑⲏⲓ ϫⲟⲣ ϫⲉ ⲟⲩⲟⲛ ⲟⲩⲛⲓϣϯ ⲙ̀ⲃⲟⲏ̀ⲑⲓⲁ ϣⲟⲡ ⲛⲏⲓ.
     ⲕ̅ⲃ̅. Ⲓⲉ ϩⲁⲣⲁ ⲉⲣⲉ ⲡⲁϣⲱⲃϣ ϩⲉⲓ ⲉ̀ⲃⲟⲗϧⲉⲛ ⲧⲉϥⲕⲉⲗⲓ : ⲟⲩⲟϩ ⲡⲁϫ̀ⲫⲟⲓ ⲉϥⲉ̀ϧⲟⲙϧⲉⲙ ⲉ̀ⲃⲟⲗϧⲉⲛ ⲡⲉϥⲕⲁⲗⲁⲛⲕⲉϩ.
     ⲕ̅ⲅ̅. Ϯϩⲟϯ ⲅⲁⲣ ⲛ̀ⲧⲉ Ⲡⲟ̅ⲥ̅ ⲁⲥⲁ̀ⲙⲟⲛⲓ ⲙ̀ⲙⲟⲓ : ⲟⲩⲟϩ ⲛ̀ⲛⲁϣⲱⲡ ⲉ̀ⲣⲟⲓ ⲉ̀ⲃⲟⲗϩⲁ ⲡⲉϥⲗⲩⲙⲙⲁ.
    ⲕ̅ⲇ̅. Ⲓⲥϫⲉ ⲁⲓⲑⲱϣ ⲛ̀ⲟⲩⲛⲟⲩⲃ ⲉ̀ⲟⲩⲕⲁϩⲓ ⲛ̀ⲧⲏⲓ : ⲓⲥϫⲉ ⲁⲓⲭⲁϩ̀ⲑⲏⲓ ⲉ̀ⲟⲩⲱ̀ⲛⲓ ⲉ̀ⲛⲁϣⲉⲛⲥⲟⲩⲉⲛϥ.
     ⲕ̅ⲉ̅. Ⲓⲥϫⲉ ⲁⲓⲟⲩⲛⲟⲩϥ ⲙ̀ⲙⲟⲓ ⲉⲧⲁ ⲟⲩⲛⲓϣϯ ⲙ̀ⲙⲉⲧⲣⲁⲙⲁⲟ̀ ϣⲱⲡⲓ ⲛⲏⲓ : ⲓⲥϫⲉ ⲁⲓⲣⲁϣⲓ ⲉ̀ϫⲉⲛ ⲡ̀ϩⲉⲓ ⲙ̀ⲡⲁϫⲁϫⲓ : ⲓⲥϫⲉ ⲁⲓⲫⲱⲣϣ ⲛ̀ⲧⲟⲧ ⲉ̀ⲃⲟⲗ ⲉ̀ϫⲉⲛ ϩⲁⲛⲁⲧⲏ̀ⲡⲓ.
    ⲕ̅Ⲋ. Ϣⲁⲛⲧⲉⲛⲛⲁⲩ ⲁⲛ ⲉ̀ⲫ̀ⲣⲏ ⲉⲧⲉⲣⲟⲩⲱⲓⲛⲓ ϫⲉ ϥ̀ⲕⲏⲛ ⲓⲉ ϥ̀ⲭⲱ ⲛ̀ⲧⲟⲧϥ ⲉ̀ⲃⲟⲗ : ⲟⲩⲟϩ ⲡⲓⲓⲟϩ ϥ̀ⲙⲟⲩⲛⲕ ⲉ̀ⲃⲟⲗ ⲉϩⲛⲱⲟⲩ ⲅⲁⲣ ⲁⲛ ⲡⲉ.
     ⲕ̅ⲍ̅. Ⲟⲩⲟϩ ⲓⲥϫⲉ ⲁⲩⲉⲣϩⲁⲗ ⲙ̀ⲡⲁϩⲁⲧ ϧⲉⲛ ⲡⲉⲧϩⲏⲡ ⲓⲉ ⲛ̀ϭⲓⲟⲩⲓ̀ : ⲓⲥϫⲉ ⲇⲉ ⲁⲓⲭⲁ ⲧⲁϫⲓϫ ϩⲓⲣⲉⲛ ⲣⲱⲓ ⲁⲓϯⲫⲓ ⲉ̀ⲣⲟⲥ.
     ⲕ̅ⲏ̅. Ⲟⲩⲟϩ ϩⲁⲣⲁ ⲡⲁⲓⲭⲉⲧ ⲉⲩⲉ̀ⲟⲡϥ ⲛⲏⲓ ⲉ̀ⲟⲩⲛⲓϣϯ ⲛ̀ⲁ̀ⲛⲟⲙⲓⲁ : ϫⲉ ⲁⲓϫⲉⲙⲉⲑⲛⲟⲩϫ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ ⲉⲧϭⲟⲥⲓ.
     ⲕ̅ⲑ̅. Ⲓⲥϫⲉ ⲁⲓⲣⲁϣⲓ ⲉ̀ϫⲉⲛ ⲡ̀ϩⲉⲓ ⲙ̀ⲡⲁϫⲁϫⲓ : ⲟⲩⲟϩ ⲁϥϫⲟⲥ ⲛ̀ϫⲉ ⲡⲁϩⲏⲧ ϫⲉ ⲕⲁⲗⲱⲥ.
     ⲗ̅. Ⲉϥⲉ̀ⲥⲱⲧⲉⲙ ϩⲁⲣⲁ ⲛ̀ϫⲉ ⲡⲁⲙⲁϣϫ ⲉ̀ⲡⲁⲥⲁϩⲟⲩⲓ̀ ϩⲁⲣⲁ ⲇⲉ ⲉⲓⲉ̀ⲉⲣϣ̀ϫⲏⲓ ϧⲉⲛ ⲡⲁⲗⲁⲥ ⲉⲩϯⲙ̀ⲕⲁϩ ⲛⲏⲓ.
     ⲗ̅ⲁ̅. Ⲓⲉ ⲁⲛ ⲙ̀ⲡⲟⲩϫⲟⲥ ⲛ̀ⲟⲩⲙⲏϣ ⲛ̀ⲥⲟⲡ ⲛ̀ϫⲉ ⲛⲁⲃⲱⲕⲓ : ϫⲉ ⲛⲓⲙ ⲉⲑⲛⲁϯ ⲛⲁⲛ ⲛ̀ⲧⲉⲛⲥⲓ ⲉ̀ⲃⲟⲗϧⲉⲛ ⲛⲉϥⲥⲁⲣⲝ : ⲉⲑⲃⲉ ϫⲉ ⲁ̀ⲛⲟⲕ ⲟⲩϩⲉⲗϫⲉ ⲉⲙⲁϣⲱ ⲡⲉ.
     ⲗ̅ⲃ̅. Ⲙ̀ⲡⲁϥⲛ̀ⲕⲟⲧ ⲇⲉ ⲥⲁⲃⲟⲗ ⲙ̀ⲡⲁⲏⲓ ⲛ̀ϫⲉ ⲟⲩϣⲉⲙⲙⲟ: ⲡⲁⲣⲟ ⲇⲉ ⲛⲁϥⲟⲩⲏⲛ ⲡⲉ ⲛ̀ⲟⲩⲟⲛ ⲛⲓⲃⲉⲛ ⲉⲑⲛⲏⲟⲩ.
     ⲗ̅ⲅ̅. Ⲓⲥϫⲉ ⲇⲉ ⲁⲓⲉⲣⲛⲟⲃⲓ ⲛ̀ϯⲉ̀ⲙⲓ ⲁⲛ : ⲟⲩⲟϩ ⲁⲓⲭⲱⲡ ⲙ̀ⲡⲁⲛⲟⲃⲓ.
     ⲗ̅ⲇ̅. Ⲙ̀ⲡⲓϣ̀ⲫⲓⲧ ⲅⲁⲣ ϧⲁⲧ̀ϩⲏ ⲛ̀ⲟⲩⲙⲏϣ ⲉϥⲟϣ ⲉ̀ϣ̀ⲧⲉⲙⲟⲩⲱⲛϩ ⲉ̀ⲃⲟⲗ ⲙ̀ⲡⲟⲩⲙ̀ⲑⲟ : ⲓⲥϫⲉ ⲇⲉ ⲁⲓⲭⲁ ⲟⲩϫⲱⲃ ⲉ̀ⲉⲣⲥⲁⲃⲟⲗ ⲙ̀ⲡⲁⲣⲟ ⲉⲣⲉ ⲕⲉⲛϥ ϣⲟⲩⲓⲧ.
     ⲗ̅ⲉ̅. Ⲛⲓⲙ ⲉⲑⲛⲁϯ ⲙ̀ⲫⲏⲉⲑⲛⲁⲥⲱⲧⲉⲙ ⲉ̀ⲣⲟⲓ:ⲧ̀ϫⲓϫ ⲅⲁⲣ ⲙ̀Ⲡⲟ̅ⲥ̅ ⲛⲁⲓⲉⲣϩⲟϯ ϧⲁⲧⲉⲥϩⲏ.
     ⲗ̅Ⲋ. Ⲓⲉ ⲟⲩⲥ̀ϧⲁⲓ ⲉϥⲉⲛⲧⲟⲧ ⲛ̀ⲧⲉ ⲟⲩⲁⲓ : ⲓⲥϫⲉ ⲛⲁⲓϯ ⲛ̀ⲟⲩⲭ̀ⲗⲟⲙ ⲉ̀ϫⲉⲛ ⲛⲁⲙⲟϯ ⲟⲩⲟϩ ⲛⲁⲓⲱϣ ⲙ̀ⲙⲟϥ.
     ⲗ̅ⲍ̅. Ⲟⲩⲟϩ ⲓⲥϫⲉ ⲙ̀ⲡⲁⲓⲫⲁϧϥ ⲛ̀ⲧⲁⲧⲏⲓϥ ⲛⲁϥ : ⲙ̀ⲡⲁⲓϭⲓ ϩ̀ⲗⲓ ⲛ̀ⲧⲟⲧϥ ⲙ̀ⲫⲏⲉⲧⲉ ⲟⲩⲟⲛⲧⲏⲓ ⲉ̀ⲣⲟϥ.
     ⲗ̅ⲏ̅. Ⲓⲥϫⲉ ⲇⲉ ⲁ ⲡ̀ⲕⲁϩⲓ ϥⲓⲁ̀ϩⲟⲙ ⲉ̀ϩ̀ⲣⲏⲓ ⲉ̀ϫⲱⲓ ⲉ̀ⲛⲉϩ ⲓⲥϫⲉ ⲇⲉ ⲁ ⲛⲉϥⲕⲉⲑ̀ⲗⲱⲙ ⲣⲓⲙⲓ ⲉⲩⲥⲟⲡ ⲉⲑⲃⲏⲧ.
     ⲗ̅ⲑ̅. Ⲓⲥϫⲉ ⲇⲉ ⲁⲓⲟⲩⲱⲙ ⲛ̀ⲧⲉϥϫⲟⲙ ⲙ̀ⲙⲁⲩⲁⲧ ⲛ̀ϫⲓⲛϫⲏ : ⲓⲥϫⲉ ⲁⲓⲉⲣϩⲁⲗ ⲛ̀ⲧ̀ⲩⲭⲏ ⲙ̀Ⲡⲟ̅ⲥ̅ ⲙ̀ⲡⲓⲕⲁϩⲓ ⲟⲩⲟϩ ⲁⲓϯⲙ̀ⲕⲁϩ ⲛⲁⲥ.
     ⲙ. Ϩⲁⲣⲁ ⲛ̀ⲧ̀ϣⲉⲃⲓⲱ ⲛ̀ⲟⲩⲥⲟⲩⲟ̀ ⲉⲩⲉ̀ⲣⲱⲧ ⲛⲏⲓ ⲛ̀ϫⲉ ϩⲁⲛⲉⲛⲧⲏϫ : ⲛ̀ⲧ̀ϣⲉⲃⲓⲱ ⲛ̀ⲟⲩⲓⲱⲧ ⲉϥⲉ̀ⲣⲱⲧ ⲛⲏⲓ ⲛ̀ϫⲉ ⲟⲩⲃⲁⲧⲟⲥ.

ⲕⲉⲫ ⲗ̅ⲃ̅

    Ϯϩⲟⲩⲓϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲉⲗⲓⲟⲩⲥ

     ⲁ̅. Ⲟⲩⲟϩ ⲁϥⲕⲏⲛ ⲛ̀ϫⲉ Ⲓⲱⲃ ⲉϥⲥⲁϫⲓ : ⲁⲩⲭⲁⲣⲱⲟⲩ ⲇⲉ ⲛ̀ϫⲉ ⲡⲉϥⲕⲉⲅ̅ ⲛ̀ϣ̀ⲫⲏⲣ ⲉ̀ϣ̀ⲧⲉⲙⲟⲩⲱϩⲉⲙ ⲛ̀Ⲓⲱⲃ : ϫⲉ ⲛⲁⲣⲉ Ⲓⲱⲃ ⲟⲓ ⲛ̀ⲑ̀ⲙⲏⲓ ⲙ̀ⲡⲟⲩⲙ̀ⲑⲟ ⲉ̀ⲃⲟⲗ.
     ⲃ̅. Ⲁϥϫⲱⲛⲧ ⲇⲉ ⲛ̀ϫⲉ Ⲉⲗⲓⲟⲩⲥ ⲡ̀ϣⲏⲣⲓ ⲙ̀Ⲃⲁⲣⲁⲭⲓⲏⲗ Ⲡⲓⲃⲟⲩⲥⲓⲧⲏⲥ ⲉ̀ⲃⲟⲗϧⲉⲛ ϯⲥⲩⲅⲅⲉⲛⲓⲁ ⲛ̀ⲧⲉ Ⲁⲣⲁⲙ ⲛ̀ⲧⲉ Ϯⲁⲩⲥⲓⲇⲓⲧⲟⲥ ⲛ̀ⲭⲱⲣⲁ : ⲁϥϫⲱⲛⲧ ⲇⲉ ⲉ̀Ⲓⲱⲃ ⲉⲙⲁϣⲱ : ⲉⲑⲃⲉ ϫⲉ ⲁϥϫⲟⲥ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ ϫⲉ ⲁ̀ⲛⲟⲕ ⲟⲩⲑ̀ⲙⲏⲓ.
     ⲅ̅. Ⲟⲩⲟϩ ⲡⲓⲕⲉⲅ̅ ⲛ̀ϣ̀ⲫⲏⲣ ⲛ̀ⲧⲁϥ ⲁϥϫⲱⲛⲧ ⲉ̀ⲣⲱⲟⲩ ⲉⲙⲁϣⲱ : ⲉⲑⲃⲉ ϫⲉ ⲙ̀ⲡⲟⲩϣ̀ϫⲉⲙϫⲟⲙ ⲛ̀ⲟⲩⲟϩⲉⲙ ⲛ̀Ⲓⲱⲃ ⲟⲩⲟϩ ⲉ̀ⲭⲁϥ ϫⲉ ⲟⲩⲁ̀ⲥⲉⲃⲏⲥ ⲡⲉ.
     ⲇ̅. Ⲉⲗⲓⲟⲩⲥ ⲇⲉ ⲁϥⲉⲣϩⲩⲡⲟⲙⲉⲛⲓⲛ ⲛ̀ⲟⲩⲟϩⲉⲙ ⲛ̀Ⲓⲱⲃ : ϫⲉ ⲛⲁϥⲟⲓ ⲛ̀ⲛⲓϣϯ ⲉ̀ⲣⲟϥ ⲡⲉ ⲛ̀ϩⲁⲛⲉ̀ϩⲟⲟⲩ.
     ⲉ̅. Ⲟⲩⲟϩ ⲁϥⲛⲁⲩ ⲛ̀ϫⲉ Ⲉⲗⲓⲟⲩⲥ ϫⲉ ⲙ̀ⲙⲟⲛ ϫⲓⲛⲉⲣⲟⲩⲱ̀ ϧⲉⲛ ⲣⲱϥ ⲙ̀ⲡⲓⲅ̅ ⲛ̀ⲣⲱⲙⲓ ⲟⲩⲟϩ ⲁϥϫⲱⲛⲧ ϧⲉⲛ ⲡⲉϥⲙ̀ⲃⲟⲛ.
     Ⲋ. Ⲁϥⲉⲣⲟⲩⲱ̀ ⲛ̀ϫⲉ Ⲉⲗⲓⲟⲩⲥ ⲡ̀ϣⲏⲣⲓ ⲙ̀Ⲃⲁⲣⲁⲭⲓⲏⲗ Ⲡⲓⲃⲟⲩⲥⲓⲧⲏⲥ ⲟⲩⲟϩ ⲡⲉϫⲁϥ ϫⲉ : ⲁ̀ⲛⲟⲕ ⲟⲩⲕⲟⲩϫⲓ ⲙⲉⲛ ⲁ̀ⲛⲟⲕ ϧⲉⲛ ⲡⲁⲭ̀ⲣⲟⲛⲟⲥ : ⲛ̀ⲑⲱⲧⲉⲛ ⲇⲉ ⲛ̀ⲑⲱⲧⲉⲛ ϩⲁⲛϧⲉⲗⲗⲟⲓ : ⲉⲑⲃⲉ ⲫⲁⲓ ⲁⲓⲭⲁⲣⲱⲓ ⲁⲓⲉⲣϩⲟϯ ⲉ̀ⲧⲁⲙⲱⲧⲉⲛ ⲉ̀ⲧⲁⲉ̀ⲡⲓⲥⲧⲓⲙⲏ.
     ⲍ̅. Ⲁⲓϫⲟⲥ ϫⲉ ⲡⲓⲭ̀ⲣⲟⲛⲟⲥ ⲁⲛ ⲡⲉ ⲉⲧⲥⲁϫⲓ : ⲛⲏ ⲇⲉ ⲁⲛ ⲉⲧϧⲉⲛ ⲟⲩⲙⲏϣ ⲛ̀ⲣⲟⲙⲡⲓ ⲉⲧⲥⲱⲟⲩⲛ ⲛ̀ϯⲥⲟⲫⲓⲁ.
     ⲏ̅. Ⲁⲗⲗⲁ ⲟⲩⲡ̅ⲛ̅ⲁ̅ ⲉⲧϧⲉⲛ ⲛⲓⲣⲱⲙⲓ : ⲫ̀ⲛⲓϥⲓ ⲇⲉ ⲛ̀ⲧⲉ Ⲡⲓⲡⲁⲛⲧⲟⲕⲣⲁⲧⲱⲣ ⲉⲧϯⲥ̀ⲃⲱ ⲛⲏⲓ.
     ⲑ̅. Ⲛⲏ ⲇⲉ ⲁⲛ ⲉⲧϧⲉⲛ ⲟⲩⲛⲓϣϯ ⲛ̀ⲭ̀ⲣⲟⲛⲟⲥ ⲛⲉ ⲛⲓⲥⲁⲃⲉⲩ : ⲟⲩⲇⲉ ⲛⲓϧⲉⲗⲗⲟⲓ ⲁⲛ ⲉⲧⲥⲱⲟⲩⲛ ⲙ̀ⲡ̀ϩⲁⲡ.
     ⲓ̅. Ⲉⲑⲃⲉ ⲫⲁⲓ ⲁⲓϫⲟⲥ ϫⲉ ⲥⲱⲧⲉⲙ ⲉ̀ⲣⲟⲓ : ⲟⲩⲟϩ ⲛ̀ⲧⲁⲧⲁⲙⲱⲧⲉⲛ ⲉ̀ⲛⲏⲉ̀ϯⲉ̀ⲙⲓ ⲉ̀ⲣⲱⲟⲩ.
     ⲓ̅ⲁ̅. Ⲭⲁⲙⲁϣϫ ⲉ̀ⲛⲁⲥⲁϫⲓ ⲉ̀ϯⲛⲁϫⲟⲧⲟⲩ : ⲉⲣⲉⲧⲉⲛⲥⲱⲧⲉⲙ ϣⲁⲧⲉⲧⲉⲛϧⲟⲧϧⲉⲧ ⲛ̀ⲛⲁⲥⲁϫⲓ.
     ⲓ̅ⲃ̅. Ⲉⲓⲉ̀ⲕⲁϯ ϣⲁⲣⲱⲧⲉⲛ ⲟⲩⲟϩ ϩⲏⲡⲡⲉ ⲛⲉ ⲙ̀ⲙⲟⲛ ⲡⲉⲧⲥⲟϩⲓ ⲛ̀Ⲓⲱⲃ : ⲟⲩⲇⲉ ⲫⲏⲉⲧⲉⲣⲟⲩⲱ̀ ⲛⲁϥ ⲛ̀ϩⲁⲛⲥⲁϫⲓ ⲉ̀ⲃⲟⲗϧⲉⲛ ⲑⲏⲛⲟⲩ.
     ⲓ̅ⲅ̅. Ϩⲓⲛⲁ ⲛ̀ⲧⲉⲧⲉⲛϣ̀ⲧⲉⲙϫⲟⲥ ϫⲉ ⲁⲛϫⲓⲙⲓ ⲛ̀ⲟⲩⲥⲟⲫⲓⲁ ⲛ̀ⲧⲉ Ⲡⲟ̅ⲥ̅ ⲉ̀ⲁⲛⲟⲩⲁϩⲧⲟⲧⲉⲛ.
     ⲓ̅ⲇ̅. Ⲁⲧⲉⲧⲉⲛⲭⲁ ⲟⲩⲣⲱⲙⲓ ⲇⲉ ⲉ̀ϫⲉⲛ ϩⲁⲛⲥⲁϫⲓ ⲙ̀ⲡⲁⲓⲣⲏϯ.
     ⲓ̅ⲉ̅. Ⲁⲩⲉⲣϩⲟϯ ⲙ̀ⲡⲟⲩⲉⲣⲟⲩⲱ̀ ⲉⲧⲓ ⲁⲩⲑ̀ⲣⲉ ϩⲁⲛⲥⲁϫⲓ ⲉⲣⲁ̀ⲡⲁⲥ ⲉ̀ⲃⲟⲗ ⲙ̀ⲙⲱⲟⲩ.
     ⲓ̅Ⲋ. Ⲁⲓⲁ̀ⲙⲟⲛⲓ ⲛ̀ⲧⲟⲧ ⲙ̀ⲡⲓⲥⲁϫⲓ ⲅⲁⲣ ϫⲉ ⲁⲩⲟ̀ϩⲓ ⲉ̀ⲣⲁⲧⲟⲩ ⲙ̀ⲡⲟⲩⲉⲣⲟⲩⲱ̀.

    Ϯⲙⲁϩⲃ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲉⲗⲓⲟⲩⲥ

     ⲓ̅ⲍ̅. Ⲁϥⲉⲣⲟⲩⲱ̀ ⲛ̀ϫⲉ Ⲉⲗⲓⲟⲩⲥ ⲡⲉϫⲁϥ ϫⲉ ⲡⲁⲗⲓⲛ ϯⲛⲁⲥⲁϫⲓ.
     ⲓ̅ⲏ̅. Ϯⲙⲉϩ ⲅⲁⲣ ⲛ̀ⲥⲁϫⲓ : ϥ̀ⲕⲓⲙ ⲅⲁⲣ ⲉ̀ⲣⲟⲓ ⲛ̀ϫⲉ ⲡⲓⲡ̅ⲛ̅ⲁ̅ ̅ⲛ̀ⲧⲉ ⲧⲁⲛⲉϫⲓ.
     ⲓ̅ⲑ̅. Ⲧⲁⲛⲉϫⲓ ⲇⲉ ⲁⲥⲉⲣ ⲙ̀ⲫ̀ⲣⲏϯ ⲛ̀ⲟⲩⲁⲥⲕⲟⲥ ⲉϥⲙⲉϩ ⲛ̀ⲉⲙⲃⲣⲓⲥ ⲉϥⲃⲉⲣⲃⲉⲣ ⲉⲣⲉ ⲣⲱϥ ⲙⲏⲣ ⲛⲉⲙ ⲙ̀ⲫ̀ⲣⲏϯ ⲛ̀ⲟⲩⲱ̀ϩⲓ ⲛ̀ⲛⲓϥⲓ ⲛ̀ⲧⲉ ⲟⲩⲃⲉⲥⲛⲏⲧ ⲉ̀ⲁϥⲫⲱϧ.
     ⲕ̅. Ϯⲛⲁⲥⲁϫⲓ ⲟⲩⲛ ϩⲓⲛⲁ ⲛ̀ⲧⲁⲙ̀ⲧⲟⲛ ⲙ̀ⲙⲟⲓ : ⲉ̀ⲁⲓⲟⲩⲱⲛ ⲛ̀ⲛⲁⲥ̀ⲫⲟⲧⲟⲩ.
     ⲕ̅ⲁ̅. Ϯⲛⲁϣ̀ⲫⲓⲧ ⲅⲁⲣ ⲁⲛ ϧⲁⲧ̀ϩⲏ ⲛ̀ⲣⲱⲙⲓ ⲟⲩⲇⲉ : ϯⲛⲁϣ̀ⲫⲓⲧ ⲁⲛ ϧⲁⲧ̀ϩⲏ ⲛ̀ⲟⲩⲙⲓⲥⲓ ⲉ̀ⲃⲟⲗϧⲉⲛ ⲟⲩⲥ̀ϩⲓⲙⲓ.
     ⲕ̅ⲃ̅. Ϯⲥⲱⲟⲩⲛ ⲅⲁⲣ ⲁⲛ ⲉ̀ⲉⲣϣ̀ⲫⲏⲣⲓ ⲛ̀ⲟⲩϩⲟ : ⲙ̀ⲙⲟⲛ ⲇⲉ ⲉⲥⲉ̀ⲟⲩⲟⲙⲧ ϩⲱ ⲛ̀ϫⲉ ⲧ̀ϩⲟⲗⲓ.

ⲕⲉⲫ ⲗ̅ⲅ̅

     ⲁ̅. Ⲁⲗⲗⲁ ⲥⲱⲧⲉⲙ Ⲓⲱⲃ ⲉ̀ⲛⲁⲥⲁϫⲓ ⲟⲩⲟϩ ⲭⲁⲙⲁϣϫ ⲉ̀ⲧⲁϫⲓⲛⲥⲁϫⲓ.
     ⲃ̅. Ϩⲏⲡⲡⲉ ⲅⲁⲣ ⲁⲓⲟⲩⲱⲛ ⲛ̀ⲣⲱⲓ ⲟⲩⲟϩ ⲁϥⲥⲁϫⲓ ⲛ̀ϫⲉ ⲡⲁⲗⲁⲥ.
     ⲅ̅. Ϥ̀ⲧⲟⲩⲃⲏⲟⲩⲧ ⲛ̀ϫⲉ ⲡⲁϩⲏⲧ ϧⲉⲛ ϩⲁⲛⲥⲁϫⲓ : ⲡ̀ⲕⲁϯ ⲇⲉ ⲛ̀ⲧⲉ ⲛⲁⲥ̀ⲫⲟⲧⲟⲩ ⲉϥⲉ̀ⲉⲣⲛⲟⲓⲛ ⲛ̀ϩⲁⲛϩ̀ⲃⲏⲟⲩⲓ̀ ⲉⲩⲧⲟⲩⲃⲏⲟⲩⲧ.
     ⲇ̅. Ⲟⲩⲡ̅ⲛ̅ⲁ̅ ⲉϥⲟⲩⲁⲃ ⲡⲉⲧⲁϥⲑⲁⲙⲓⲟⲓ : ⲫ̀ⲛⲓϥⲓ ⲇⲉ ⲛ̀ⲧⲉ Ⲡⲓⲡⲁⲛⲧⲟⲕⲣⲁⲧⲱⲣ ⲡⲉⲧϯⲥ̀ⲃⲱ ⲛⲏⲓ.
     ⲉ̅. Ⲁⲕϣⲁⲛϫⲉⲙϫⲟⲙ ⲁⲣⲓⲟⲩⲱ̀ ⲛⲏⲓ ⲟⲩⲃⲉ ⲛⲁⲓ:ⲁ̀ⲙⲟⲛⲓ ⲛ̀ⲧⲟⲧⲕ ⲟ̀ϩⲓ ⲉ̀ⲣⲁⲧⲕ ⲟⲩⲃⲏⲓ ⲟⲩⲟϩ ⲁ̀ⲛⲟⲕ ϩⲱ ⲟⲩⲃⲏⲕ.
     Ⲋ. Ⲁⲕⲑⲁⲙⲓⲏⲟⲩⲧ ⲉ̀ⲃⲟⲗϧⲉⲛ ⲟⲩⲟ̀ⲙⲓ ⲙ̀ⲡⲁⲣⲏϯ ϩⲱ ⲉⲧⲁⲩⲑⲁⲙⲓⲟⲛ ⲉ̀ⲃⲟⲗϧⲉⲛ ⲫⲁⲓ ⲫⲁⲓ.
     ⲍ̅. Ⲧⲁϩⲟϯ ⲥ̀ⲛⲁϣ̀ⲑⲉⲣⲑⲱⲣⲕ ⲁⲛ : ⲟⲩⲟϩ ⲧⲁϫⲓϫ ⲛ̀ⲛⲉⲥϩ̀ⲣⲟϣ ⲉ̀ϩ̀ⲣⲏⲓ ⲉ̀ϫⲱⲕ.
     ⲏ̅. Ⲡ̀ⲗⲏⲛ ⲁⲕϫⲟⲥ ϧⲉⲛ ⲛⲁⲙⲁϣϫ: ϯⲥ̀ⲙⲏ ⲅⲁⲣ ⲛ̀ⲧⲉ ⲛⲉⲕⲥⲁϫⲓ ⲁⲓⲥⲟⲑⲙⲉⲥ
     ⲑ̅. Ϫⲉ ⲟⲩⲏⲓ ⲁⲕϫⲟⲥ ϫⲉ ϯⲧⲟⲩⲃⲏⲟⲩⲧ ⲙ̀ⲡⲓⲉⲣⲛⲟⲃⲓ : ⲁ̀ⲛⲟⲕ ⲟⲩⲁⲧⲁ̀ⲣⲓⲕⲓ ⲇⲉ ⲙ̀ⲡⲓⲉⲣⲁ̀ⲛⲟⲙⲓⲛ ⲅⲁⲣ.
     ⲓ̅. Ⲟⲩⲁ̀ⲣⲓⲕⲓ ⲇⲉ ⲁϥϫⲉⲙⲥ ⲉ̀ⲣⲟⲓ : ⲁϥⲟⲡⲧ ⲇⲉ ⲙ̀ⲫ̀ⲫ̀ⲣⲏϯ ⲛ̀ⲟⲩϫⲁϫⲓ.
     ⲓ̅ⲁ̅. Ⲧⲁⲫⲁⲧ ⲇⲉ ⲁϥϩⲓⲧⲥ ⲉ̀ⲡ̀ϣ̀ⲛⲉ : ⲁϥⲁ̀ⲣⲉϩ ⲇⲉ ⲉ̀ⲛⲁⲙⲱⲓⲧ ⲧⲏⲣⲟⲩ.
     ⲓ̅ⲃ̅. Ⲡⲱⲥ ⲅⲁⲣ ⲕ̀ϫⲱ ⲙ̀ⲙⲟⲥ ϫⲉ ⲁ̀ⲛⲟⲕ ⲟⲩⲑ̀ⲙⲏⲓ : ⲟⲩⲟϩ ⲙ̀ⲡⲉϥⲥⲱⲧⲉⲙ ⲉ̀ⲣⲟⲓ : ⲟⲩϣⲁⲉ̀ⲛⲉϩ ⲅⲁⲣ ⲡⲉ ⲫⲏⲉⲧⲥⲁⲡ̀ϣⲱⲓ ⲛ̀ⲛⲓⲣⲱⲙⲓ.
     ⲓ̅ⲅ̅. Ⲕ̀ϫⲱ ⲙ̀ⲙⲟⲥ ⲇⲉ ϫⲉ ⲉⲑⲃⲉ ⲟⲩ ⲙ̀ⲡⲉϥⲥⲱⲧⲉⲙ ⲉ̀ⲥⲁϫⲓ ⲛⲓⲃⲉⲛ ⲛ̀ⲧⲉ ⲡⲁϩⲁⲡ.
     ⲓ̅ⲇ̅. Ϧⲉⲛ ⲡ̀ϫⲓⲛⲑ̀ⲣⲉ Ⲡⲟ̅ⲥ̅ ⲅⲁⲣ ⲥⲁϫⲓ ⲛ̀ⲟⲩⲥⲟⲡ : ϧⲉⲛ ⲡⲓⲥⲟⲡ ⲇⲉ ⲙ̀ⲙⲁϩⲃ̅ ⲟⲩⲣⲁⲥⲟⲩⲓ̀.
     ⲓ̅ⲉ̅. Ⲓⲉ ϧⲉⲛ ⲟⲩⲙⲉⲗⲉⲧⲏ ⲛ̀ⲧⲉ ⲡⲓⲉ̀ϫⲱⲣϩ ⲓⲉ ⲙ̀ⲫ̀ⲣⲏϯ ⲉⲧⲉ ⲁⲥϣⲁⲛⲓ̀ ⲛ̀ϫⲉ ⲟⲩϩⲟϯ ⲉⲥⲛⲁϣⲧ ⲉ̀ϫⲉⲛ ⲛⲓⲣⲱⲙⲓ ⲉⲩⲉⲛⲕⲟⲧ ϩⲓϫⲉⲛ ⲡⲟⲩϭⲗⲟϫ.
     ⲓ̅Ⲋ. Ⲧⲟⲧⲉ ϣⲁϥϭⲱⲣⲡ ⲉ̀ⲃⲟⲗ ⲙ̀ⲫ̀ⲛⲟⲩⲥ ⲛ̀ⲛⲓⲣⲱⲙⲓ: ϧⲉⲛ ϩⲁⲛⲥ̀ⲙⲟⲧ ⲛ̀ϩⲟϯ ⲙ̀ⲡⲁⲓⲣⲏϯ ϣⲁϥϩⲓ ϩⲟϯ ⲉ̀ⲣⲱⲟⲩ.
     ⲓ̅ⲍ̅. Ⲉ̀ⲧⲁⲥⲑⲟ ⲛ̀ⲟⲩⲣⲱⲙⲓ ⲉ̀ⲃⲟⲗϩⲁ ⲡ̀ϭⲓⲛ̀ϫⲟⲛⲥ : ⲡⲉϥⲥⲱⲙⲁ ⲇⲉ ⲁϥⲛⲁϩⲙⲉϥ ⲉ̀ⲃⲟⲗϧⲉⲛ ⲟⲩϩⲉⲓ.
     ⲓ̅ⲏ̅. Ⲁϥϯⲁ̀ⲥⲟ ⲇⲉ ⲉ̀ⲧⲉϥⲩⲭⲏ ⲉ̀ⲃⲟⲗϩⲁ ⲫ̀ⲙⲟⲩ ⲟⲩⲟϩ ⲉ̀ϣ̀ⲧⲉⲙⲑ̀ⲣⲉϥϩⲉⲓ ϧⲉⲛ ⲟⲩⲡⲟⲗⲉⲙⲟⲥ.
     ⲓ̅ⲑ̅. Ⲡⲁⲗⲓⲛ ⲇⲉ ⲟⲛ ⲁϥⲥⲟϩⲓ ⲙ̀ⲙⲟϥ ϧⲉⲛ ϩⲁⲛϣⲱⲛⲓ ϩⲓϫⲉⲛ ⲡⲉϥⲙⲁⲛ̀ⲉⲛⲕⲟⲧ : ⲟⲩⲟϩ ⲕⲁⲥ ⲛⲓⲃⲉⲛ ⲛ̀ⲧⲁϥ ⲁϥϯⲙ̀ⲕⲁϩ ⲛⲁϥ.
     ⲕ̅. Ϧ̀ⲣⲉ ⲛⲓⲃⲉⲛ ⲛ̀ⲧⲉ ⲡ̀ⲥⲟⲩⲟ̀ ⲛ̀ⲛⲉϥϣ̀ϫⲉⲙϫⲟⲙ ⲛ̀ϣⲟⲡⲟⲩ ⲉ̀ⲣⲟϥ ⲟⲩⲟϩ ⲧⲉϥⲩⲭⲏ ⲉⲣⲉ̀ⲡⲓⲑⲩⲙⲓⲛ ⲉ̀ⲟⲩϧ̀ⲣⲉ.
     ⲕ̅ⲁ̅. Ϣⲁⲧⲟⲩⲗⲟϥⲗⲉϥ ⲇⲉ ⲛ̀ϫⲉ ⲛⲉϥⲥⲁⲣⲝ : ⲟⲩⲟϩ ⲛ̀ⲥⲉⲟⲩⲱⲛϩ ⲉ̀ⲃⲟⲗ ⲛ̀ϫⲉ ⲛⲉϥⲕⲁⲥ ⲉⲩϣⲟⲩⲱⲟⲩ.
     ⲕ̅ⲃ̅. Ⲁⲥϧⲱⲛⲧ ⲇⲉ ⲉ̀ⲫ̀ⲙⲟⲩ ⲛ̀ϫⲉ ⲧⲉϥⲩⲭⲏ ⲟⲩⲟϩ ⲡⲉϥⲱⲛϧ ⲉ̀ⲁ̀ⲙⲉⲛϯ.
     ⲕ̅ⲅ̅. Ⲉϣⲱⲡ ⲉ̀ⲟⲩⲟⲛ ϣⲟ ⲛ̀ⲁⲅⲅⲉⲗⲟⲥ ⲛ̀ⲧⲉ ⲫ̀ⲙⲟⲩ ⲕⲱϯ ⲉ̀ⲣⲟϥ ⲛ̀ⲛⲉ ⲟⲩⲁⲓ ⲉ̀ⲃⲟⲗ ⲛ̀ϧⲏⲧⲟⲩ ϧⲟⲑⲃⲉϥ : ⲉϣⲱⲡ ⲁϥϣⲁⲛⲕⲁϯ ϧⲉⲛ ⲡⲉϥϩⲏⲧ ⲉ̀ⲧⲁⲥⲑⲟ ϩⲁ Ⲡⲟ̅ⲥ̅ ⲛ̀ⲧⲉϥⲧⲁⲙⲉ ⲟⲩⲣⲱⲙⲓ ⲇⲉ ⲉ̀ⲡⲉϥⲁ̀ⲣⲓⲕⲓ ⲟⲩⲟϩ ⲛ̀ⲧⲉϥⲟⲩⲱⲛϩ ⲉ̀ⲃⲟⲗ ⲛ̀ⲧⲉϥⲁ̀ⲛⲟⲙⲓⲁ.
    ⲕ̅ⲇ̅. Ϥ̀ⲛⲁϯⲧⲟⲧϥ ⲇⲉ ⲉ̀ⲡ̀ϫⲓⲛⲧⲉϥϣ̀ⲧⲉⲙϩⲉⲓ ⲉ̀ⲫ̀ⲙⲟⲩ : ⲉϥⲉ̀ⲉⲣⲃⲉⲣⲓ ⲇⲉ ⲛ̀ϫⲉ ⲡⲉϥⲥⲱⲙⲁ ⲙ̀ⲫ̀ⲣⲏϯ ⲛ̀ⲟⲩϫⲟⲓ ⲉ̀ⲁⲩⲟϣϫⲥ ⲙ̀ⲃⲉⲣⲓ : ⲟⲩⲟϩ ⲛⲉϥⲕⲁⲥ ⲉϥⲉ̀ⲙⲁϩⲟⲩ ⲛ̀ⲁⲧⲕⲁⲥ.
     ⲕ̅ⲉ̅. Ϥ̀ⲛⲁϯⲗⲟⲕⲗⲉⲕ ⲇⲉ ⲛ̀ⲛⲉϥⲕⲁⲥ ⲙ̀ⲫ̀ⲣⲏϯ ⲛ̀ⲛⲁ ⲟⲩⲕⲟⲩϫⲓ ⲛ̀ⲁ̀ⲗⲟⲩ : ⲉϥⲉ̀ⲧⲁϩⲟϥ ⲇⲉ ⲉ̀ⲣⲁⲧϥ ⲉ̀ⲁϥϫⲉⲙⲛⲟⲙϯ ϧⲉⲛ ⲛⲓⲣⲱⲙⲓ.
    ⲕ̅Ⲋ. Ⲁϥϣⲁⲛⲉⲣⲡ̀ⲣⲟⲥⲉⲩⲭⲉⲥⲑⲉ ϩⲁ Ⲡⲟ̅ⲥ̅ ⲉϥⲉ̀ϣⲱⲡⲓ ⲉϥϣⲏⲡ : ⲉϥⲉ̀ϣⲉ ⲇⲉ ⲉ̀ϧⲟⲩⲛ ϧⲉⲛ ⲟⲩϩⲟ ⲉϥⲧⲟⲩⲃⲏⲟⲩⲧ ⲛⲉⲙ ⲟⲩⲟⲩⲱⲛϩ ⲉ̀ⲃⲟⲗ : ⲉϥⲉ̀ϯϣⲉⲃⲓⲱ ⲇⲉ ⲛ̀ⲛⲓⲣⲱⲙⲓ ⲛ̀ⲟⲩⲙⲉⲑⲙⲏⲓ.
     ⲕ̅ⲍ̅. Ⲧⲟⲧⲉ ⲉϥⲉ̀ϫⲉⲙ ⲁ̀ⲣⲓⲕⲓ ⲉ̀ⲣⲟϥ ⲙ̀ⲙⲁⲩⲁⲧϥ ⲛ̀ϫⲉ ⲫ̀ⲣⲱⲙⲓ ⲉϥϫⲱ ⲙ̀ⲙⲟⲥ ⲛ̀ϧ̀ⲣⲏⲓ ⲛ̀ϧⲏⲧϥ ϫⲉ ⲟⲩ ⲛⲉ ⲛⲁⲓ ⲉⲧⲁⲓⲁⲓⲧⲟⲩ ⲟⲩⲟϩ ⲙ̀ⲡⲉϥϯⲙ̀ⲕⲁϩ ⲛⲏⲓ ⲛ̀ⲧ̀ϣⲉⲃⲓⲱⲱ ⲛ̀ⲛⲓⲛⲟⲃⲓ ⲉⲧⲁⲓⲁⲓⲧⲟⲩ.
     ⲕ̅ⲏ̅. Ⲛⲟϩⲉⲙ ⲛ̀ⲧⲁⲩⲭⲏ ⲉ̀ⲡ̀ϫⲓⲛⲧⲉⲥϣ̀ⲧⲉⲙⲓ̀ ⲉ̀ϧ̀ⲣⲏⲓ ⲉ̀ⲡ̀ⲧⲁⲕⲟ ⲟⲩⲟϩ ⲛ̀ⲧⲉ ⲡⲁⲱⲛϧ ⲛⲁⲩ ⲉ̀ⲟⲩⲟⲩⲱⲓⲛⲓ.
     ⲕ̅ⲑ̅. Ϩⲏⲡⲡⲉ ⲛⲁⲓ ⲧⲏⲣⲟⲩ ϣⲁϥⲉⲣϩⲱⲃ ⲉ̀ⲣⲱⲟⲩⲛ̀ϫⲉ ⲡⲓϫⲱⲣⲓ ϣⲟⲙⲧ ⲙ̀ⲙⲱⲓⲧ ⲉⲧⲭⲏ ⲛ̀ⲧⲉ ⲟⲩⲣⲱⲙⲓ.
     ⲗ̅. Ⲁⲗⲗⲁ ⲁϥⲛⲟϩⲉⲙ ⲛ̀ⲧⲁⲩⲭⲏ ⲉ̀ⲃⲟⲗϧⲉⲛ ⲫ̀ⲙⲟⲩ ϩⲓⲛⲁ ⲛ̀ⲧⲉ ⲡⲁⲱⲛϧ ⲥ̀ⲙⲟⲩ ⲉ̀ⲣⲟϥ ϧⲉⲛ ⲫ̀ⲟⲩⲱⲓⲛⲓ.
     ⲗ̅ⲁ̅. Ⲭⲁⲙⲁϣϫ Ⲓⲱⲃ ⲟⲩⲟϩ ⲥⲱⲧⲉⲙ ⲉ̀ⲣⲟⲓ : ⲭⲁⲣⲱⲕ ⲟⲩⲟϩ ⲁ̀ⲛⲟⲕ ϯⲛⲁⲥⲁϫⲓ.
     ⲗ̅ⲃ̅. Ⲓⲥϫⲉ ⲟⲩⲟⲛ ⲥⲁϫⲓ ⲛ̀ϧⲏⲧⲕ ⲁⲣⲓⲟⲩⲱ̀ ⲛⲏⲓ ⲥⲁϫⲓ : ϯⲟⲩⲱϣ ⲅⲁⲣ ⲛ̀ⲧⲉⲕⲑ̀ⲙⲁⲓⲟ.
     ⲗ̅ⲅ̅. Ⲙ̀ⲙⲟⲛ ⲥⲱⲧⲉⲙ ⲉ̀ⲣⲟⲓ : ⲛ̀ⲑⲟⲕ ⲭⲁⲣⲱⲕ ⲟⲩⲟϩ ϯⲛⲁⲧ̀ⲥⲁⲃⲟⲕ ⲉ̀ⲟⲩⲥⲟⲫⲓⲁ.

ⲕⲉⲫ ⲗ̅ⲇ̅

    Ϯⲙⲁϩⲅ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲉⲗⲓⲟⲩⲥ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲉⲗⲓⲟⲩⲥ ⲡⲉϫⲁϥ ϫⲉ :
     ⲃ̅. Ⲥⲱⲧⲉⲙ ⲉ̀ⲣⲟⲓ ⲛⲓⲥⲁⲃⲉⲩ ⲛⲏⲉⲧⲥⲱⲟⲩⲛ ⲉ̀ⲥⲱⲧⲉⲙ ⲉ̀ⲡⲓⲡⲉⲑⲛⲁⲛⲉϥ.
     ⲅ̅. Ϫⲉ ⲡⲓⲛⲟⲩⲥ ⲉⲧⲉⲣⲇⲟⲕⲓⲙⲁⲍⲓⲛ ⲙ̀ⲡⲓⲥⲁϫⲓ ⲟⲩⲟϩ ϯϣ̀ⲃⲱⲃⲓ ⲉⲧϫⲉⲙϯⲡⲓ ⲛ̀ⲛⲓϧ̀ⲣⲏⲟⲩⲓ̀.
     ⲇ̅. Ⲙⲁⲣⲉⲛⲥⲱⲧⲡ ⲛⲁⲛ ⲛ̀ⲟⲩϩⲁⲡ : ⲟⲩⲟϩ ⲙⲁⲣⲉⲛⲉ̀ⲙⲓ ⲟⲩⲧⲱⲛ ⲉ̀ϫⲉⲛ ⲛⲁⲛⲉⲥ.
     ⲉ̅. Ϫⲉ ⲁϥϫⲟⲥ ⲛ̀ϫⲉ Ⲓⲱⲃ ϫⲉ ⲁ̀ⲛⲟⲕ ⲟⲩⲑ̀ⲙⲏⲓ : Ⲡⲟ̅ⲥ̅ ⲁϥϩⲓⲟⲩⲓ̀ ⲙ̀ⲡⲁϩⲁⲡ ⲉ̀ⲃⲟⲗ.
     Ⲋ. Ⲁϥϫⲉⲙⲉⲑⲛⲟⲩϫ ⲇⲉ ⲉ̀ⲡⲁϩⲁⲡ : ⲟⲩϭⲓⲛ̀ϫⲟⲛⲥ ⲡⲉ ⲡⲁⲥⲟⲑⲛⲉϥ ⲙ̀ⲡⲓⲉⲉⲣⲁ̀ⲇⲓⲕⲓⲛ.
     ⲍ̅. Ⲛⲓⲙ ⲛ̀ⲣⲱⲙⲓ ⲙ̀ⲫ̀ⲣⲏϯ ⲛ̀Ⲓⲱⲃ : ⲉϥⲉ̀ⲥⲉⲃ ⲉⲗⲕϣⲁⲓ ⲙ̀ⲫ̀ⲣⲏϯ ⲛ̀ⲟⲩⲙⲱⲟⲩ.
     ⲏ̅. Ⲙ̀ⲡⲓⲉⲣⲛⲟⲃⲓ ⲟⲩⲇⲉ ⲙ̀ⲡⲓⲉⲣⲁ̀ⲥⲉⲃⲏⲥ ⲟⲩⲇⲉ ⲙ̀ⲡⲓⲉⲣϣ̀ⲫⲏⲣ ⲛ̀ⲛⲏⲉⲧⲉⲣϩⲱⲃ ⲉ̀ϯⲁ̀ⲛⲟⲙⲓⲁ ⲉ̀ⲡ̀ϫⲓⲛⲑ̀ⲣⲓⲙⲟϣⲓ ⲛⲉⲙ ⲛⲓⲁ̀ⲥⲉⲃⲏⲥ.
     ⲑ̅. Ⲙ̀ⲡⲉⲣϫⲟⲥ ϫⲉ ⲙ̀ⲙⲟⲛ ϫⲉⲙⲡ̀ϣⲓⲛⲓ ⲛⲁϣⲱⲡⲓ ⲙ̀ⲡⲓⲣⲱⲙⲓ : ϫⲉ ⲟⲩⲟⲛ ϫⲉⲙⲡ̀ϣⲓⲛⲓ ϣⲟⲡ ⲛⲁϥ ⲉ̀ⲃⲟⲗϩⲓⲧⲉⲛ Ⲡⲟ̅ⲥ̅.
     ⲓ̅. Ⲉⲑⲃⲉ ⲫⲁⲓ ⲛⲓⲥⲁⲃⲉⲩ ϧⲉⲛ ⲡⲟⲩϩⲏⲧ ⲥⲱⲧⲉⲙ ⲉ̀ⲣⲟⲓ ⲛ̀ⲛⲉⲥϣⲱⲡⲓ ⲛⲏⲓ ⲉ̀ⲉⲣⲙⲉⲧⲁ̀ⲥⲉⲃⲏⲥ ⲛ̀ⲡⲉⲙ̀ⲑⲟ ⲙ̀Ⲡⲟ̅ⲥ̅: ⲟⲩⲇⲉ ⲉ̀ϣ̀ⲑⲟⲣⲧⲉⲣ ⲛ̀ϯⲙⲉⲑⲙⲏⲓ ⲙ̀ⲡⲉⲙ̀ⲑⲟ ⲙ̀Ⲡⲓⲡⲁⲛⲧⲟⲕⲣⲁⲧⲱⲣ.
     ⲓ̅ⲁ̅. Ⲁⲗⲗⲁ ϥ̀ⲛⲁϯϣⲉⲃⲓⲱ ⲙ̀ⲡⲓⲣⲱⲙⲓ ⲕⲁⲧⲁ ⲛⲏⲉⲧⲁϥⲓ̀ⲣⲓ ⲙ̀ⲙⲱⲟⲩ:ⲟⲩⲟϩ ϥ̀ⲛⲁϫⲉⲙ ⲡⲓⲣⲱⲙⲓ ϧⲉⲛ ⲛⲉϥⲙⲱⲓⲧ.
     ⲓ̅ⲃ̅. Ⲭ̀ⲙⲉⲩⲓ̀ ⲇⲉ ϫⲉ Ⲡⲟ̅ⲥ̅ ⲛⲁⲓ̀ⲣⲓ ⲛ̀ⲟⲩⲙⲉⲧⲟ̀ϫⲓ:ⲓⲉ Ⲡⲓⲡⲁⲛⲧⲟⲕⲣⲁⲧⲱⲣ ⲛⲁϣ̀ⲑⲟⲣⲧⲉⲣ ⲙ̀ⲡⲓϩⲁⲡ ⲫⲏⲉⲧⲁϥⲑⲁⲙⲓⲉ ⲡ̀ⲕⲁϩⲓ.
     ⲓ̅ⲅ̅. Ⲛⲓⲙ ⲇⲉ ⲡⲉ ⲫⲏⲉⲧⲁϥⲑⲁⲙⲓⲉ ⲛⲏⲉⲧⲥⲁⲡⲉⲥⲏⲧ ⲛ̀ⲧ̀ⲫⲉ ⲛⲉⲙ ϩⲱⲃ ⲛⲓⲃⲉⲛ ⲉⲧϣⲟⲡ ⲛ̀ϧⲏⲧⲟⲩ.
     ⲓ̅ⲇ̅. Ⲁϥϣⲁⲛⲟⲩⲱϣ ⲅⲁⲣ ⲉ̀ⲁ̀ⲙⲟⲛⲓ ⲟⲩⲟϩ ⲛ̀ⲧⲉϥⲧⲁϩⲛⲟ ⲙ̀ⲡⲓⲡ̅ⲛ̅ⲁ̅ ϧⲁⲧⲟⲧϥ.
     ⲓ̅ⲉ̅. Ⲥⲉⲛⲁⲙⲟⲩ ⲉⲩⲥⲟⲡ ⲛ̀ϫⲉ ⲥⲁⲣⲝ ⲛⲓⲃⲉⲛ : ⲣⲱⲙⲓ ⲇⲉ ⲛⲓⲃⲉⲛ ⲥⲉⲛⲁⲧⲁⲥⲑⲟ ⲉ̀ⲡ̀ⲕⲁϩⲓ : ⲡⲓⲙⲁ ⲉⲧⲁⲩⲉⲣⲡ̀ⲗⲁⲍⲓⲛ ⲙ̀ⲙⲱⲟⲩ ⲉ̀ⲃⲟⲗ ⲛ̀ϧⲏⲧϥ.
     ⲓ̅Ⲋ. Ⲓⲥϫⲉ ⲇⲉ ⲭ̀ⲛⲁϭⲓⲥ̀ⲃⲱ ⲁⲛ ⲥⲱⲧⲉⲙ ⲉ̀ⲛⲁⲓ : ⲭⲁⲙⲁϣϫ ⲉ̀ⲡ̀ϧ̀ⲣⲱⲟⲩ ⲛ̀ⲧⲉ ⲛⲁⲥⲁϫⲓ.
     ⲓ̅ⲍ̅. Ⲓⲥϫⲉ ⲇⲉ ⲛ̀ⲑⲟⲕ ⲫⲏⲉⲑⲙⲟⲥϯ ⲛ̀ⲛⲓⲁ̀ⲛⲟⲙⲟⲥ ⲟⲩⲟϩ ⲉⲧⲧⲁⲕⲟ ⲛ̀ⲛⲓⲡⲟⲛⲏⲣⲟⲥ : ⲡⲓϣⲁⲉ̀ⲛⲉϩ ⲛ̀ⲑ̀ⲙⲏⲓ ⲟⲩⲁ̀ⲥⲉⲃⲏⲥ ⲡⲉ.
     ⲓ̅ⲏ̅. Ⲫⲏⲉⲧϫⲱ ⲙ̀ⲙⲟⲥ ⲛ̀ⲟⲩⲟⲩⲣⲟ ϫⲉ ⲁⲕⲉⲣⲡⲁⲣⲁⲛⲟⲙⲓⲛ : ⲟⲩⲁ̀ⲥⲉⲃⲏⲥ ⲡⲉ ⲛ̀ⲧⲉ ⲛⲓⲁⲣⲭⲱⲛ.
     ⲓ̅ⲑ̅. Ⲫⲏⲉⲧⲉ ⲙ̀ⲡⲉϥϣ̀ⲫⲓⲧ ϧⲁⲧ̀ϩⲏ ⲙ̀ⲡ̀ϩⲟ ⲛ̀ⲟⲩⲁⲓ ⲉϥⲧⲁⲓⲏⲟⲩⲧ : ⲟⲩⲇⲉ ⲛ̀ϥ̀ⲥⲱⲟⲩⲛ ⲁⲛ ⲉ̀ϯⲧⲁⲓⲟ ⲛ̀ϩⲁⲛϫⲱⲣⲓ : ⲟⲩⲟϩ ⲉ̀ⲉⲣϣ̀ⲫⲏⲣⲓ ⲙ̀ⲡⲟⲩϩⲟ.
     ⲕ̅. Ϩⲁⲛⲡⲉⲧϣⲟⲩⲓⲧ ⲇⲉ ⲥⲉⲛⲁⲧⲁϩⲱⲟⲩ ⲉ̀ⲣⲁⲧⲟⲩ : ⲁⲩϣⲁⲛⲱϣ ⲉ̀ⲃⲟⲗ ⲛ̀ⲥⲉⲧⲱⲃϩ ⲛ̀ⲟⲩⲣⲱⲙⲓ : ⲁⲩⲉⲣⲡⲁⲣⲁⲛⲟⲙⲟⲥ ⲅⲁⲣ ⲁⲩϭⲓ ⲛ̀ⲛⲓⲁⲧϫⲟⲙ ⲛ̀ϫⲟⲛⲥ.
     ⲕ̅ⲁ̅. Ⲛ̀ⲑⲟϥ ⲅⲁⲣ ⲟⲩⲣⲉϥⲛⲁⲩ ⲡⲉ ⲉ̀ⲛⲓϩ̀ⲃⲏⲟⲩⲓ̀ ⲛ̀ⲧⲉ ⲛⲓⲣⲱⲙⲓ : ⲙ̀ⲙⲟⲛ ϩ̀ⲗⲓ ⲇⲉ ϩⲏⲡ ⲉ̀ⲣⲟϥ ϧⲉⲛ ⲛⲏⲉⲧⲟⲩⲓ̀ⲣⲓ ⲙ̀ⲙⲱⲟⲩ.
     ⲕ̅ⲃ̅. Ⲟⲩⲇⲉ ⲙ̀ⲙⲟⲛ ⲙⲁ ⲉⲩⲛⲁⲭⲟⲡⲟⲩ ⲛ̀ϧⲏⲧϥ ⲛ̀ϫⲉ ⲛⲏⲉⲧⲓ̀ⲣⲓ ⲛ̀ϯⲁ̀ⲛⲟⲙⲓⲁ.
     ⲕ̅ⲅ̅. Ϫⲉ ϥ̀ⲛⲁⲭⲁϩ̀ⲑⲏϥ ⲉ̀ⲣⲱⲙⲓ ⲁⲛ : ϫⲉ Ⲡⲟ̅ⲥ̅ ⲅⲁⲣ ⲛⲁⲩ ⲉ̀ⲟⲩⲟⲛ ⲛⲓⲃⲉⲛ : ⲫⲏⲉⲧⲧⲁϩⲟ ⲛ̀ⲛⲓⲁⲧϧⲉⲧϧⲱⲧⲟⲩ.
     ⲕ̅ⲇ̅. Ⲛⲉⲙ ⲛⲓϩ̀ⲃⲏⲟⲩⲓ̀ ⲉⲧⲧⲁⲓⲏⲟⲩⲧ ⲛⲉⲙ ⲛⲓϣ̀ⲫⲏⲣⲓ ⲛⲏⲉⲧⲉ ⲙ̀ⲙⲟⲛ ⲏ̀ⲡⲓ ⲧⲟⲓ ⲉ̀ⲣⲱⲟⲩ.
     ⲕ̅ⲉ̅. Ⲫⲏⲉⲧⲥⲱⲟⲩⲛ ⲛ̀ⲛⲟⲩϩ̀ⲃⲏⲟⲩⲓ̀ ⲟⲩⲟϩ ⲉϥⲫⲱⲛϩ ⲛ̀ⲛⲟⲩⲉ̀ϫⲱⲣϩ ⲟⲩⲟϩ ⲉϥⲉ̀ⲑⲉⲃⲓⲟϥ.
    ⲕ̅Ⲋ. Ⲁϥⲱϣⲉⲙ ⲇⲉ ⲛ̀ⲛⲓⲁ̀ⲥⲉⲃⲏⲥ : ⲥⲉⲟⲩⲱⲛϩ ⲇⲉ ⲉ̀ⲃⲟⲗ ⲙ̀ⲡⲉϥⲙ̀ⲑⲟ.
     ⲕ̅ⲍ̅. Ϫⲉ ⲁⲩⲣⲓⲕⲓ ⲉ̀ⲃⲟⲗϧⲉⲛ ⲫ̀ⲛⲟⲙⲟⲥ ⲙ̀Ⲫϯ : ⲛⲉϥⲙⲉⲑⲙⲏⲓ ⲇⲉ ⲙ̀ⲡⲟⲩⲥⲟⲩⲱⲛⲟⲩ ⲉ̀ⲡ̀ϫⲓⲛⲓ̀ⲛⲓ ⲉ̀ⲣⲟϥ ⲙ̀ⲡ̀ϧⲣⲱⲟⲩ ⲛ̀ⲟⲩϩⲏⲕⲓ.
     ⲕ̅ⲏ̅. Ⲟⲩⲟϩ ⲧ̀ⲥ̀ⲙⲏ ⲛ̀ⲛⲓϩⲏⲕⲓ ⲉϥⲉ̀ⲥⲱⲧⲉⲙ ⲉ̀ⲣⲟⲥ : ⲟⲩⲟϩ ⲛ̀ⲑⲟϥ ⲉϥⲉ̀ϯ ⲛ̀ⲟⲩⲭ̀ⲥⲓⲭⲓⲁ.
     ⲕ̅ⲑ̅. Ⲟⲩⲟϩ ⲛⲓⲙ ⲉⲑⲛⲁϩⲓⲟⲩⲓ̀ ⲙ̀ⲡ̀ϩⲁⲡ: ⲟⲩⲟϩ ⲁϥϣⲁⲛⲭⲱⲡ ⲙ̀ⲡⲉϥϩⲟ ⲛⲓⲙ ⲉⲑⲛⲁⲛⲁⲩ ⲉ̀ⲣⲟϥ.
     ⲗ̅. Ⲟⲩⲟϩ ⲉ̀ϫⲉⲛ ⲟⲩⲉⲑⲛⲟⲥ ⲛⲉⲙ ⲉ̀ϫⲉⲛ ⲟⲩⲣⲱⲙⲓ ⲉⲩⲥⲟⲡ : ⲉϥⲉ̀ⲓ̀ⲣⲓ ⲛ̀ⲟⲩⲣⲱⲙⲓ ⲛ̀ϣⲟⲃⲓ ⲛ̀ⲟⲩⲟⲩⲣⲟ ⲉ̀ⲃⲟⲗϧⲉⲛ ⲟⲩⲙⲉⲧⲇⲓⲥⲕⲟⲗⲟⲥ ⲛ̀ⲧⲉ ⲟⲩⲗⲁⲟⲥ.
     ⲗ̅ⲁ̅. Ϫⲉ ⲫⲏⲉⲧϫⲱ ⲙ̀ⲙⲟⲥ ⲟⲩⲃⲉ ⲡⲓϫⲱⲣⲓ ⲁⲓϭⲓ ⲛ̀ⲛⲁⲉ̀ⲗ ⲁⲟⲩⲱ̀.
     ⲗ̅ⲃ̅. Ⲭⲱⲣⲓⲥ ⲉⲓⲉ̀ⲛⲁⲩ ⲛ̀ⲑⲟⲕ ⲙ̀ⲙⲁⲩⲁⲧⲕ ⲙⲁⲧ̀ⲥⲁⲃⲟⲓ ⲓⲥϫⲉ ⲁⲓⲉⲣϩⲱⲃ ⲉ̀ⲟⲩⲁ̀ⲇⲓⲕⲓⲁ ⲛ̀ⲛⲁⲟⲩⲁϩⲧⲟⲧ ϫⲉ.
     ⲗ̅ⲅ̅. Ⲙⲏ ⲁⲕⲛⲁⲧⲏⲓⲥ ⲛ̀ϣⲉⲃⲓⲱ ⲉ̀ⲃⲟⲗϩⲓⲧⲟⲧⲕ ϫⲉ ⲁⲕϩⲓⲟⲩⲓ̀ ⲉ̀ⲃⲟⲗ : ϫⲉ ⲛ̀ⲑⲟⲕ ⲉⲕⲉ̀ⲥⲱⲧⲡ ⲟⲩⲟϩ ⲁ̀ⲛⲟⲕ ⲁⲛ : ⲟⲩⲟϩ ⲟⲩ ⲡⲉ ⲉⲧⲁⲕⲉ̀ⲙⲓ ⲉ̀ⲣⲟϥ ⲥⲁϫⲓ ⲙ̀ⲙⲟϥ.
     ⲗ̅ⲇ̅. Ⲉⲑⲃⲉ ⲫⲁⲓ ⲛⲓⲥⲁⲃⲉⲩ ϧⲉⲛ ⲡⲟⲩϩⲏⲧ ⲥⲉⲛⲁϫⲉ ⲛⲁⲓ: ⲟⲩⲣⲱⲙⲓ ⲇⲉ ⲛ̀ⲥⲁⲃⲉ ⲁϥⲥⲱⲧⲉⲙ ⲉ̀ⲛⲁⲥⲁϫⲓ.
     ⲗ̅ⲉ̅. Ⲓⲱⲃ ⲇⲉ ⲙ̀ⲡⲉϥⲥⲁϫⲓ ϧⲉⲛ ⲟⲩⲕⲁϯ : ⲛⲉϥⲥⲁϫⲓ ⲇⲉ ⲥⲉϧⲉⲛ ⲟⲩⲉ̀ⲡⲓⲥⲧⲓⲙⲏ ⲁⲛ.
     ⲗ̅Ⲋ. Ⲡⲁⲓⲣⲏϯ ⲇⲉ ⲁⲛ ⲁⲗⲗⲁ ϭⲓⲥ̀ⲃⲱ Ⲓⲱⲃ ⲙ̀ⲡⲉⲣⲟⲩⲱϩⲉⲙ ϫⲉ ⲙ̀ⲫ̀ⲣⲏϯ ⲛ̀ⲛⲓⲁⲧϩⲏⲧ.
     ⲗ̅ⲍ̅. Ϩⲓⲛⲁ ⲛ̀ⲧⲉⲛϣ̀ⲧⲉⲙⲟⲩⲟϩ ⲉ̀ϩ̀ⲣⲏⲓ ⲉ̀ϫⲉⲛ ⲛⲉⲛⲛⲟⲃⲓ ⲥⲉⲛⲁⲉ̀ⲡ ⲟⲩⲁ̀ⲛⲟⲙⲓⲁ ⲇⲉ ⲉ̀ⲣⲟⲛ ⲉⲛϫⲱ ⲛ̀ⲟⲩⲙⲏϣ ⲛ̀ⲥⲁϫⲓ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅.

ⲕⲉⲫ ⲗ̅ⲉ̅

    Ϯⲙⲁϩⲇ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲉⲗⲓⲟⲩⲥ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲉⲗⲓⲟⲩⲥ ⲡⲉϫⲁϥ ϫⲉ :
     ⲃ̅. Ⲡⲁⲓⲣⲏϯ ⲟⲩ ⲡⲉ ⲉⲧⲁⲕⲙⲉⲩⲓ̀ ⲉ̀ⲣⲟϥ ϧⲉⲛ ⲟⲩϩⲁⲡ : ⲛ̀ⲑⲟⲕ ⲛⲓⲙ ϫⲉ ⲁⲕϫⲟⲥ ⲙ̀ⲡⲉⲙ̀ⲑⲟ ⲙ̀Ⲡⲟ̅ⲥ̅ ϫⲉ ⲁ̀ⲛⲟⲕ ⲟⲩⲑ̀ⲙⲏⲓ.
     ⲅ̅. Ⲓⲉ ⲭ̀ⲛⲁϫⲟⲥ ϫⲉ ⲟⲩ ⲡⲉϯⲛⲁⲁⲓϥ ⲓⲥϫⲉ ⲁⲓⲉⲣⲛⲟⲃⲓ.
     ⲇ̅. Ⲁⲛⲟⲕ ⲇⲉ ϯⲛⲁⲟⲩⲱϩⲉⲙ ⲛⲁⲕ ⲛⲉⲙ ⲡⲉⲕⲕⲉϣⲟⲙⲧ ⲛ̀ϣ̀ⲫⲏⲣ.
     ⲉ̅. Ϫⲟⲩϣⲧ ⲉ̀ⲡ̀ϣⲱⲓ ⲉ̀ⲧ̀ⲫⲉ ⲟⲩⲟϩ ⲁ̀ⲛⲁⲩ : ⲙⲁⲓⲁⲧⲕ ⲇⲉ ⲛ̀ⲛⲓϭⲏⲡⲓ ϫⲉ ⲁⲩϭⲟⲥⲓ ⲉ̀ⲣⲟⲕ ⲛ̀ⲁϣ ⲛ̀ⲣⲏϯ.
     Ⲋ. Ⲓⲥϫⲉ ⲁⲕⲉⲣⲛⲟⲃⲓ ⲟⲩ ⲡⲉⲧⲉⲕⲛⲁϣ̀ⲁⲓϥ : ⲟⲩⲟϩ ⲓⲥϫⲉ ⲁⲕⲉⲣ ⲟⲩⲙⲏϣ ⲛ̀ⲁ̀ⲛⲟⲙⲓⲁ ⲟⲩ ⲡⲉ ⲉ̀ⲧⲉⲕⲛⲁϣ̀ϫⲉⲙϫⲟⲙ ⲛ̀ⲑⲁⲙⲓⲟϥ.
     ⲍ̅. Ⲉⲡⲓⲇⲏ ⲟⲩⲛ ⲛ̀ⲑⲟⲕ ⲟⲩⲑ̀ⲙⲏⲓ : ⲟⲩ ⲡⲉ ⲉ̀ⲧⲉⲕⲛⲁϣ̀ⲧⲏⲓϥ ⲛⲁϥ : ⲟⲩ ⲡⲉ ⲉ̀ⲧⲉϥⲛⲁϭⲓⲧϥ ⲉ̀ⲃⲟⲗϧⲉⲛ ⲛⲉⲕϫⲓϫ.
     ⲏ̅. Ⲁⲣⲉ ⲧⲉⲕⲙⲉⲧⲁ̀ⲥⲉⲃⲏⲥ ⲛⲁϣⲱⲡⲓ ⲛ̀ⲟⲩⲣⲱⲙⲓ ⲉϥⲟ̀ⲛⲓ ⲙ̀ⲙⲟⲕ : ⲟⲩⲟϩ ⲧⲉⲕⲇⲓⲕⲉⲟⲥⲩⲛⲏ ⲁⲥⲛⲁϣⲱⲡⲓ ⲛ̀ⲟⲩϣⲏⲣⲓ ⲛ̀ⲣⲱⲙⲓ.
     ⲑ̅. Ⲉⲩⲱϣ ⲉ̀ⲃⲟⲗ ⲛ̀ⲧⲉⲛ ⲟⲩⲙⲏϣ ⲛ̀ϫⲉ ⲛⲏⲉⲧⲟⲩϭⲓ ⲙ̀ⲙⲱⲟⲩ ⲛ̀ϫⲟⲛⲥ : ⲉⲩⲉ̀ⲱϣ ⲉ̀ⲃⲟⲗ ⲛ̀ⲧⲉⲛ ⲡ̀ϫ̀ⲫⲟ ⲛ̀ⲟⲩⲙⲏϣ.
     ⲓ̅. Ⲟⲩⲟϩ ⲙ̀ⲡⲉϥϫⲟⲥ ϫⲉ ⲁϥⲑⲱⲛ Ⲫϯ ⲫⲏⲉⲧⲁϥⲑⲁⲙⲓⲟⲓ : ⲫⲏⲉⲧⲑⲱϣ ⲛ̀ⲛⲓⲟⲩⲉⲣϣⲓ ⲛ̀ⲧⲉ ⲡⲓⲉ̀ϫⲱⲣϩ.
     ⲓ̅ⲁ̅. Ⲫⲏⲉⲧⲁϥⲫⲟⲣϫⲧⲉⲛ ⲉ̀ⲃⲟⲗ ϧⲉⲛ ⲛⲓⲧⲉⲃⲛⲱⲟⲩⲓ̀ ⲛ̀ⲧⲉ ⲡ̀ⲕⲁϩⲓ ⲛⲉⲙ ⲉ̀ⲃⲟⲗϩⲁ ⲛⲓϩⲁⲗⲁϯ ⲛ̀ⲧⲉ ⲧ̀ⲫⲉ.
     ⲓ̅ⲃ̅. Ⲉⲩⲱϣ ⲉ̀ⲃⲟⲗ ⲙ̀ⲙⲁⲩ ⲟⲩⲟϩ ⲛ̀ⲛⲉϥⲥⲱⲧⲉⲙ ⲉ̀ⲣⲱⲟⲩ: ⲛⲉⲙ ⲉ̀ⲃⲟⲗϩⲁ ⲡ̀ϣⲱϣ ⲛ̀ⲧⲉ ⲛⲓⲡⲟⲛⲏⲣⲟⲥ.
     ⲓ̅ⲅ̅. Ⲡⲟ̅ⲥ̅ ⲅⲁⲣ ϥ̀ⲟⲩⲱϣ ⲁⲛ ⲉ̀ⲛⲁⲩ ⲉ̀ϩⲁⲛⲙⲉⲧⲟ̀ϫⲓ : ⲛ̀ⲑⲟϥ ⲅⲁⲣ ⲡⲉ Ⲡⲓⲡⲁⲛⲧⲟⲕⲣⲁⲧⲱⲣ.
     ⲓ̅ⲇ̅. Ϥ̀ⲛⲁⲩ ⲉ̀ⲛⲏⲉⲧϫⲱⲕ ⲛ̀ⲛⲓⲁ̀ⲛⲟⲙⲓⲁ ⲉ̀ⲃⲟⲗ ⲟⲩⲟϩ ϥ̀ⲛⲁⲛⲁϩⲙⲉⲧ : ϭⲓϩⲁⲡ ⲇⲉ ⲙ̀ⲡⲉϥⲙ̀ⲑⲟ ⲉ̀ⲃⲟⲗ : ⲓⲥϫⲉ ⲭ̀ⲛⲁϣ̀ϫⲉⲙϫⲟⲙ ⲛ̀ϩⲱⲥ ⲉ̀ⲣⲟϥ ⲙ̀ⲫ̀ⲣⲏϯ ⲉⲧⲥ̀ϣⲉ.
     ⲓ̅ⲉ̅. Ⲟⲩⲟϩ ϯⲛⲟⲩ ϫⲉ ϥ̀ϣⲟⲡ ⲁⲛ ⲛ̀ϫⲉ ⲫⲏⲉⲧϫⲉⲙⲡ̀ϣⲓⲛⲓ ⲙ̀ⲡⲉϥϫⲱⲛⲧ : ⲟⲩⲟϩ ⲙ̀ⲡⲉ ϩ̀ⲗⲓ ⲉ̀ⲙⲓ ⲉ̀ⲟⲩⲡⲁⲣⲁⲡⲧⲱⲙⲁ ⲉⲙⲁϣⲱ.
     ⲓ̅Ⲋ. Ⲟⲩⲟϩ Ⲓⲱⲃ ⲁϥⲟⲩⲱⲛ ⲛ̀ⲣⲱϥ ϧⲉⲛ ⲟⲩⲙⲉⲧⲉⲫⲗⲏⲟⲩ: ⲁϥⲑ̀ⲣⲉ ⲛⲉϥⲥⲁϫⲓ ϩ̀ⲣⲟϣ ϧⲉⲛ ⲟⲩⲙⲉⲧⲁⲧⲉ̀ⲙⲓ.

ⲕⲉⲫ ⲗ̅Ⲋ

    Ϯⲙⲁϩⲉ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲉⲗⲓⲟⲩⲥ

     ⲁ̅. Ⲉⲧⲓ ⲟⲛ ⲁϥⲟⲩⲁϩⲧⲟⲧϥ ⲛ̀ϫⲉ Ⲉⲗⲓⲟⲩⲥ ⲟⲩⲟϩ ⲡⲉϫⲁϥ ϫⲉ :
     ⲃ̅. Ⲟ̀ϩⲓ ⲛⲏⲓ ⲛ̀ⲟⲩⲕⲟⲩϫⲓ ⲛ̀ⲧⲁⲧ̀ⲥⲁⲃⲟⲕ : ⲉⲧⲓ ⲅⲁⲣ ⲟⲩⲟⲛ ⲥⲁϫⲓ ϣⲟⲡ ⲛ̀ϧⲏⲧ.
     ⲅ̅. Ϯⲛⲁϭⲓ ⲇⲉ ⲙ̀ⲡⲁⲕⲁϯ ϩⲓ ⲫ̀ⲟⲩⲉⲓ : ϧⲉⲛ ⲛⲁϩ̀ⲃⲏⲟⲩⲓ̀ ϯⲛⲁⲭⲱ ⲛ̀ⲟⲩⲙⲉⲑⲙⲏⲓ.
     ⲇ̅. Ϧⲉⲛ ⲟⲩⲙⲉⲑⲙⲏⲓ ⲟⲩⲟϩ ϩⲁⲛⲥⲁϫⲓ ⲛ̀ⲟ̀ϫⲓ ⲁⲛ ⲁⲕⲕⲁϯ ϧⲉⲛ ⲟⲩⲁ̀ⲇⲓⲕⲓⲁ.
     ⲉ̅. Ⲁⲣⲓⲉ̀ⲙⲓ ϫⲉ Ⲡⲟ̅ⲥ̅ ⲛⲁⲭⲱ ⲛ̀ⲥⲱϥ ⲁⲛ ⲙ̀ⲡⲓⲁⲧⲕⲁⲕⲓⲁ.
     Ⲋ. Ⲫⲏⲉⲧϫⲟⲣ ϧⲉⲛ ⲧⲉϥϫⲟⲙ ⲛ̀ⲛⲉϥⲧⲁⲛϧⲉ ⲛⲓϩⲏⲧ ⲛ̀ⲧⲉ ⲛⲓⲁ̀ⲥⲉⲃⲏⲥ : ⲟⲩⲟϩ ⲡ̀ϩⲁⲡ ⲛ̀ⲛⲓϩⲏⲕⲓ ⲉϥⲉ̀ⲧⲏⲓϥ.
     ⲍ̅. Ⲛ̀ⲛⲉϥⲱ̀ⲗⲓ ⲛ̀ⲛⲉϥⲃⲁⲗ ⲉ̀ⲃⲟⲗϩⲁ ⲡⲓⲑ̀ⲙⲏⲓ ⲟⲩⲟϩ ⲉϥⲉ̀ⲑ̀ⲣⲟⲩϩⲉⲙⲥⲓ ϩⲓ ⲟⲩⲑ̀ⲣⲟⲛⲟⲥ ⲛⲉⲙ ϩⲁⲛⲟⲩⲣⲱⲟⲩ ⲉⲩϫⲟⲣ ⲟⲩⲟϩ ⲉⲩϭⲟⲥⲓ.
     ⲏ̅. Ⲛⲏⲉⲧⲥⲟⲛϩ ϧⲉⲛ ϩⲁⲛⲡⲉⲇⲏⲥ ⲛ̀ϫⲓϫ ⲉⲩⲉ̀ⲧⲁϩⲱⲟⲩ ϧⲉⲛ ⲟⲩⲛⲟϩ ⲛ̀ⲧⲉ ⲟⲩⲙⲉⲧϩⲏⲕⲓ.
     ⲑ̅. Ⲟⲩⲟϩ ϥ̀ⲛⲁⲧⲁⲙⲱⲟⲩ ⲉ̀ⲛⲟⲩϩ̀ⲃⲏⲟⲩⲓ̀ ⲛⲉⲙ ⲛⲟⲩⲡⲁⲣⲁⲡⲧⲱⲙⲁ ϫⲉ ⲥⲉⲛⲁϫⲉⲙϫⲟⲙ.
     ⲓ̅. Ⲁⲗⲗⲁ ⲉϥⲉ̀ⲥⲱⲧⲉⲙ ⲉ̀ⲡⲓⲑ̀ⲙⲏⲓ : ⲟⲩⲟϩ ⲁϥϫⲟⲥ ϫⲉ ⲥⲉⲛⲁⲧⲁⲥⲑⲟ ⲉ̀ⲃⲟⲗϩⲁ ⲟⲩⲁ̀ⲇⲓⲕⲓⲁ.
     ⲓ̅ⲁ̅. Ⲉϣⲱⲡ ⲁⲩϣⲁⲛⲥⲱⲧⲉⲙ ⲟⲩⲟϩ ⲛ̀ⲧⲟⲩⲉⲣⲃⲱⲕ : ⲥⲉⲛⲁϫⲱⲕ ⲛ̀ⲛⲟⲩⲉ̀ϩⲟⲟⲩ ⲉ̀ⲃⲟⲗ ϧⲉⲛ ϩⲁⲛⲁ̀ⲅⲁⲑⲟⲛ ⲛⲉⲙ ⲛⲟⲩⲣⲟⲙⲡⲓ ϧⲉⲛ ϩⲁⲛⲙⲉⲧⲥⲁⲓⲉ̀.
     ⲓ̅ⲃ̅. Ⲛⲓⲁ̀ⲥⲉⲃⲏⲥ ⲇⲉ ϥ̀ⲛⲁⲛⲁϩⲙⲟⲩ ⲁⲛ : ⲉⲑⲃⲉ ϫⲉ ⲥⲉⲟⲩⲱϣ ⲁⲛ ⲉ̀ⲡ̀ⲥⲟⲩⲉⲛ Ⲡⲟ̅ⲥ̅ : ⲟⲩⲟϩ ⲉⲑⲃⲉ ϫⲉ ⲁⲩϯⲥ̀ⲃⲱ ⲛⲱⲟⲩ ⲥⲉⲟⲓ ⲛ̀ⲁⲧⲥⲱⲧⲉⲙ.
     ⲓ̅ⲅ̅. Ⲟⲩⲟϩ ⲛⲓϣⲟⲃⲓ ϧⲉⲛ ⲡⲟⲩϩⲏⲧ ⲉⲩⲉ̀ⲑⲱϣ ⲛ̀ⲟⲩϫⲱⲛⲧ : ⲛ̀ⲛⲟⲩⲱϣ ⲉ̀ⲃⲟⲗ ϫⲉ ⲁϥⲥⲟⲛϩⲟⲩ.
     ⲓ̅ⲇ̅. Ϯⲛⲟⲩ ⲟⲩⲛ ⲉⲥⲉ̀ⲙⲟⲩⲛⲕ ⲛ̀ϫⲉ ⲧⲟⲩⲩⲭⲏ ϧⲉⲛ ⲟⲩⲙⲉⲧⲉⲫⲗⲏⲟⲩ : ⲟⲩⲟϩ ⲡⲟⲩⲱⲛϧ ⲉⲩⲉ̀ϧⲟⲑⲃⲉϥ ⲛ̀ϫⲉ ϩⲁⲛⲁⲅⲅⲉⲗⲟⲥ.
     ⲓ̅ⲉ̅. Ⲛ̀ⲧ̀ϣⲉⲃⲓⲱ ϫⲉ ⲁⲩϩⲟϫϩⲉϫ ⲛ̀ⲟⲩⲁⲥⲑⲉⲛⲏⲥ ⲛⲉⲙ ⲟⲩⲁⲧϫⲟⲙ.
     ⲓ̅Ⲋ. Ⲡⲓϩⲁⲡ ⲇⲉ ⲛ̀ⲧⲉ ⲛⲓⲣⲉⲙⲣⲁⲩϣ ϥ̀ⲛⲁⲉ̀ⲛϥ ⲉ̀ⲃⲟⲗ ⲟⲩⲟϩ ⲁϥⲉⲣϩⲁⲗ ⲙ̀ⲙⲟⲕ ⲟⲛ ⲉ̀ⲃⲟⲗϧⲉⲛ ⲣⲱϥ ⲛ̀ⲟⲩϫⲁϫⲓ : ⲫ̀ⲛⲟⲩⲛ ⲟⲩϫⲟϣϫⲉϣ ⲥⲁⲡⲉⲥⲏⲧ ⲙ̀ⲙⲟϥ : ⲟⲩⲟϩ ⲁⲥⲓ̀ ⲉ̀ⲡⲉⲥⲏⲧ ⲛ̀ϫⲉ ⲧⲉⲕⲧ̀ⲣⲁⲡⲉⲍⲁ ⲥⲁⲡⲉⲥⲏⲧ ⲙ̀ⲙⲟⲕ ⲉⲥⲙⲉϩ ⲛ̀ⲕⲉⲛⲓ.
     ⲓ̅ⲍ̅. Ⲟⲩⲟϩ ⲡⲓⲑ̀ⲙⲏⲓ ⲛ̀ⲛⲉϥϣⲱⲡⲓ ⲉϥϫⲁⲓⲱⲟⲩ ϧⲉⲛ ⲟⲩϩⲁⲡ.
     ⲓ̅ⲏ̅. Ⲛⲓⲁ̀ⲥⲉⲃⲏⲥ ⲇⲉ ⲉϥⲉ̀ϣⲱⲡⲓ ϩⲓϫⲱⲟⲩ ⲛ̀ϫⲉ ⲟⲩϫⲱⲛⲧ : ⲉⲑⲃⲉ ϯⲙⲉⲧⲁⲥⲑⲉⲛⲏⲥ ⲛ̀ⲧⲉ ⲛⲓⲇⲱⲣⲟⲛ ⲉⲧⲁⲩϭⲓⲧⲟⲩ ϧⲉⲛ ⲟⲩⲙⲉⲧϭⲓⲛ̀ϫⲟⲛⲥ.
     ⲓ̅ⲑ̅. Ⲙ̀ⲡⲉⲛⲑ̀ⲣⲉ ⲡⲉⲕϩⲏⲧ ⲣⲓⲕⲓ ⲉ̀ⲃⲟⲗ ⲉⲕⲉ̀ⲙⲓ ⲥⲁⲃⲟⲗ ⲙ̀ⲡ̀ⲧⲱⲃϩ ⲛ̀ϩⲁⲛⲁⲧϫⲟⲙ ⲉⲧⲭⲏ ϧⲉⲛ ϩⲁⲛⲁⲛⲁⲅⲕⲏ.
     ⲕ̅. Ⲟⲩⲟϩ ⲛⲏⲧⲏⲣⲟⲩ ⲉⲧⲧⲁϫⲣⲟ ⲛ̀ⲟⲩϫⲟⲙ ⲙ̀ⲡⲉⲣⲥⲟⲕⲟⲩ ⲉ̀ⲃⲟⲗ ϧⲉⲛ ⲡⲓⲉ̀ϫⲱⲣϩ.
     ⲕ̅ⲁ̅. Ⲉⲑⲣⲉ ϩⲁⲛⲗⲁⲟⲥ ⲓ̀ ⲉ̀ⲡ̀ϣⲱⲓ ⲛ̀ⲧⲟⲩϣⲉⲃⲓⲱ ⲁⲗⲗⲁ ⲁ̀ⲣⲉϩ ⲉ̀ⲣⲟⲕ ⲙ̀ⲡⲉⲣⲓ̀ⲣⲓ ⲛ̀ϩⲁⲛⲙⲉⲧⲟ̀ϫⲓ : ⲉ̀ⲃⲟⲗ ⲅⲁⲣ ϧⲉⲛ ⲛⲁⲓ ⲁⲕⲛⲟϩⲉⲙ ⲉ̀ⲃⲟⲗϧⲉⲛ ⲟⲩⲙⲉⲧϩⲏⲕⲓ.
     ⲕ̅ⲃ̅. Ϩⲏⲡⲡⲉ ⲓⲥ ⲫⲏⲉⲧⲉ ⲟⲩⲟⲛϣ̀ϫⲟⲙ ⲙ̀ⲙⲟϥ ϥ̀ⲛⲁⲁ̀ⲙⲁϩⲓ ϧⲉⲛ ⲟⲩϫⲟⲙ: ⲛⲓⲙ ⲅⲁⲣ ⲉⲧⲟⲓ ⲛ̀ϫⲱⲣⲓ ⲙ̀ⲡⲉϥⲣⲏϯ.
     ⲕ̅ⲅ̅. Ⲓⲉ ⲛⲓⲙ ⲡⲉ ⲫⲏⲉⲑⲛⲁϣ̀ϧⲟⲧϧⲉⲧ ⲛ̀ⲛⲉϥϩ̀ⲃⲏⲟⲩⲓ̀ : ⲓⲉ ⲛⲓⲙ ⲡⲉ ⲫⲏⲉⲧⲁϥϫⲟⲥ ϫⲉ ⲁϥⲓ̀ⲣⲓ ⲛ̀ⲟⲩⲙⲉⲧϭⲓⲛ̀ϫⲟⲛⲥ.
    ⲕ̅ⲇ̅. Ⲁⲣⲓⲫ̀ⲙⲉⲩⲓ̀ ϫⲉ ϩⲁⲛⲛⲓϣϯ ⲛⲉ ⲛⲉϥϩ̀ⲃⲏⲟⲩⲓ̀ : ⲛⲏⲉⲧⲁⲩⲉⲣⲁⲣⲭⲱⲛ ⲉ̀ⲣⲱⲟⲩ ⲛ̀ϫⲉ ϩⲁⲛⲣⲱⲙⲓ.
     ⲕ̅ⲉ̅. Ⲣⲱⲙⲓ ⲛⲓⲃⲉⲛ ⲁϥⲛⲁⲩ ⲛ̀ϧⲏⲧϥ : ⲛⲏⲧⲏⲣⲟⲩ ⲉⲧϫⲟⲧϩ ϩⲁⲛⲣⲱⲙⲓ ⲛⲉ.
    ⲕ̅Ⲋ. Ϩⲏⲡⲡⲉ ⲛⲁϣⲱϥ ⲛ̀ϫⲉ ⲡⲓϫⲱⲣⲓ : ⲟⲩⲟϩ ⲛ̀ⲛⲉⲛⲉ̀ⲙⲓ ⲉ̀ⲧ̀ⲏ̀ⲡⲓ ⲛ̀ⲧⲉ ⲛⲉϥⲙⲱⲓⲧ ϩⲁⲛⲁⲧⲁⲩⲣⲏϫⲟⲩ ⲛⲉ.
     ⲕ̅ⲍ̅. Ⲛⲓⲧⲉⲗⲧⲓⲗⲓ ⲇⲉ ⲛ̀ⲧⲉ ⲛⲓⲙⲟⲩⲛϩⲱⲟⲩ ⲥⲉⲏⲡ ⲛ̀ⲧⲟⲧϥ : ⲟⲩⲟϩ ⲉⲩⲉ̀ϫⲟϣϫⲉϣ ⲛ̀ⲟⲩⲙⲟⲩⲛϩⲱⲟⲩ ϧⲉⲛ ⲟⲩϭⲏⲡⲓ.
     ⲕ̅ⲏ̅. Ⲉⲩⲉ̀ϣⲟⲣϣⲉⲣ ⲛ̀ϫⲉ ϩⲁⲛⲙⲉⲧⲁ̀ⲡⲁⲥ : ⲁϥⲑ̀ⲣⲉ ϩⲁⲛϭⲏⲡⲓ ϩⲱⲃⲥ ⲉ̀ⲃⲟⲗ ⲉ̀ϫⲉⲛ ϩⲁⲛⲁⲧⲏ̀ⲡⲓ ⲛ̀ⲣⲱⲙⲓ.
     ⲕ̅ⲑ̅. Ⲟⲩⲟϩ ⲉϣⲱⲡ ⲁϥϣⲟⲡ ⲛ̀ϫⲉ ⲟⲩϭⲱⲗⲕ ⲉ̀ⲃⲟⲗ ⲛ̀ⲧⲉ ϩⲁⲛϭⲏⲡⲓ ⲟⲩⲙⲉⲧϩⲩⲥⲟⲥ ⲛ̀ⲧⲉ ⲧⲉϥⲥ̀ⲕⲩⲛⲏ.
     ⲗ̅. Ϩⲏⲡⲡⲉ ⲛ̀ⲧⲉϥⲥⲱⲟⲩⲧⲉⲛ ⲉ̀ϩ̀ⲣⲏⲓ ⲉ̀ϫⲱⲥ ⲓⲉⲃ ⲛ̀ⲫⲓϯ : ⲟⲩⲟϩ ⲛⲓⲛⲟⲩⲛⲓ ⲛ̀ⲧⲉ ⲫ̀ⲓⲟⲙ ⲁϥϩⲟⲃⲥⲟⲩ.
     ⲗ̅ⲁ̅. Ⲁϥϯϩⲁⲡ ⲅⲁⲣ ⲉ̀ϩⲁⲛⲗⲁⲟⲥ ⲛ̀ϧⲏⲧⲟⲩ : ⲉϥⲉ̀ϯ ⲛ̀ⲟⲩϧ̀ⲣⲉ ⲙ̀ⲫⲏⲉⲧⲉ ⲟⲩⲟⲛϣ̀ϫⲟⲙ ⲙ̀ⲙⲟϥ.
     ⲗ̅ⲃ̅. Ⲁϥϩⲱⲃⲥ ⲛ̀ⲟⲩⲟⲩⲱⲓⲛⲓ ⲉ̀ϫⲉⲛ ⲛⲉϥϫⲓϫ : ⲟⲩⲟϩ ⲁϥϩⲟⲛϩⲉⲛ ⲉⲑⲃⲏⲧϥ ⲛ̀ϫⲉ ⲫⲏⲉⲧⲉⲣⲁ̀ⲡⲁⲛⲧⲁⲛ.
     ⲗ̅ⲅ̅. Ⲉϥⲉ̀ⲧⲁⲙⲟ ⲛ̀ⲟⲩϣ̀ⲫⲏⲣ ⲛ̀ⲧⲁϥ ⲉⲑⲃⲏⲧϥ : ⲟⲩϫ̀ⲫⲟ ⲛ̀ⲧⲉ Ⲡⲟ̅ⲥ̅ ⲟⲩⲟϩ ⲉⲑⲃⲉ ⲟⲩϭⲓⲛ̀ϫⲟⲛⲥ.

ⲕⲉⲫ ⲗ̅ⲍ̅

     ⲁ̅. Ⲟⲩⲟϩ ⲡⲁⲓⲭⲉⲧ ⲁϥϣ̀ⲑⲟⲣⲧⲉⲣ ⲛ̀ϫⲉ ⲡⲉϥϩⲏⲧ:ⲟⲩⲟϩ ⲁϥⲃⲟⲣⲃⲉⲣ ⲉ̀ⲃⲟⲗϧⲉⲛ ⲡⲉϥⲙⲁ.
     ⲃ̅. Ⲥⲱⲧⲉⲙ ⲉ̀ⲟⲩⲥ̀ⲙⲏ ϧⲉⲛ ⲟⲩϫⲱⲛⲧ ⲛⲉⲙ ⲟⲩⲙ̀ⲃⲟⲛ ⲛ̀ⲧⲉ Ⲡⲟ̅ⲥ̅ : ⲟⲩⲟϩ ⲟⲩⲙⲉⲗⲉⲧⲏ ⲉⲥⲉ̀ⲓ̀ ⲉ̀ⲃⲟⲗ ϧⲉⲛ ⲣⲱϥ.
     ⲅ̅. Ⲧⲉϥⲁⲣⲭⲏ ⲁⲥⲥⲁⲡⲉⲥⲏⲧ ⲛ̀ⲧ̀ⲫⲉ ⲧⲏⲣⲥ:ⲟⲩⲟϩ ⲡⲉϥⲟⲩⲱⲓⲛⲓ ⲁϥϩⲓϫⲉⲛ ⲛⲓⲧⲉⲛϩ ⲛ̀ⲧⲉ ⲡ̀ⲕⲁϩⲓ.
     ⲇ̅. Ⲥⲁⲫⲁϩⲟⲩ ⲙ̀ⲙⲟϥ ⲉϥⲉ̀ⲱϣ ⲉ̀ⲃⲟⲗ ϧⲉⲛ ⲟⲩⲥ̀ⲙⲏ : ⲉϥⲉ̀ⲉⲣϧⲁⲣⲁⲃⲁⲓ ϧⲉⲛ ⲧ̀ⲥ̀ⲙⲏ ⲛ̀ⲟⲩϣⲱϣ ⲛ̀ⲧⲁϥ: ⲟⲩⲟϩ ⲛ̀ⲛⲉϥϣⲉⲃⲓⲏⲧⲟⲩ.
     ⲉ̅. Ϫⲉ ⲭ̀ⲛⲁⲥⲱⲧⲉⲙ ⲉ̀ⲧⲉϥⲥ̀ⲙⲏ : ⲉϥⲉ̀ⲉⲣϧⲁⲣⲁⲃⲁⲓ ⲛ̀ϩⲁϣ̀ⲫⲏⲣⲓ ϧⲉⲛ ⲧⲉϥⲥ̀ⲙⲏ ⲛ̀ϫⲉ ⲡⲓϫⲱⲣⲓ:ⲁϥⲑⲱϣ ⲛ̀ⲟⲩⲟⲩⲛⲟⲩ ⲛ̀ⲛⲓⲧⲉⲃⲛⲱⲟⲩⲓ̀ : ⲥⲉⲥⲱⲟⲩⲛ ⲇⲉ ⲛ̀ϯⲧⲁⲝⲓⲥ ⲛ̀ⲧⲉ ⲧⲟⲩϣⲁⲓⲣⲓ : ⲉ̀ϫⲉⲛ ⲛⲁⲓ ⲧⲏⲣⲟⲩ ⲡⲉⲕⲕⲁϯ ⲧⲟⲙⲧ ⲁⲛ ⲟⲩⲇⲉ ϥ̀ⲛⲁϣⲟⲃⲧ ⲁⲛ ⲛ̀ϫⲉ ⲡⲉⲕϩⲏⲧ ⲉ̀ⲃⲟⲗϩⲁ ⲡⲉⲕⲥⲱⲙⲁ : ⲁϥⲑⲁⲙⲓⲟ ⲅⲁⲣ ⲛ̀ϩⲁⲛⲛⲓϣϯ : ⲛⲁⲓ ⲉ̀ⲛⲁⲛⲉ̀ⲙⲓ ⲉ̀ⲣⲱⲟⲩ ⲁⲛ.
     Ⲋ. Ⲁϥϩⲟⲛϩⲉⲛ ⲛ̀ⲟⲩⲭⲓⲱⲛ ϫⲉ ϣⲱⲡⲓ ϩⲓϫⲉⲛ ⲡⲓⲕⲁϩⲓ : ⲛⲉⲙ ⲟⲩⲭⲓⲱⲛ ⲛ̀ⲧⲉ ϩⲁⲛⲙⲟⲩⲛϩⲱⲟⲩ ⲛ̀ⲧⲉ ⲧⲉϥⲙⲉⲧϫⲱⲣⲓ.
     ⲍ̅. Ⲁϥϩⲓⲧⲉⲃⲥ ϧⲉⲛ ⲧⲉϥϫⲓϫ ⲉ̀ⲣⲱⲙⲓ ⲛⲓⲃⲉⲛ ϩⲓⲛⲁ ⲛ̀ⲧⲟⲩⲥⲟⲩⲉⲛ ⲧⲟⲩⲙⲉⲧⲁⲥⲑⲉⲛⲓⲥ ⲛ̀ϫⲉ ⲣⲱⲙⲓ ⲛⲓⲃⲉⲛ.
     ⲏ̅. Ⲛⲓⲑⲏⲣⲓⲟⲛ ⲇⲉ ⲉⲧⲁⲩϣⲉⲛⲱⲟⲩ ⲉ̀ϧⲟⲩⲛ ϩⲁ ⲟⲩⲥ̀ⲕⲉⲡⲏ ⲁⲩⲉⲣⲏ̀ⲥⲓⲭⲁⲍⲓⲛ ⲇⲉ ϩⲓϫⲉⲛ ⲧⲟⲩϣⲁⲓⲣⲓ.
     ⲑ̅. Ⲛⲓⲙ̀ⲕⲁϩⲛ̀ϩⲏⲧ ⲁⲩⲛⲏⲟⲩ ⲉ̀ⲃⲟⲗϧⲉⲛ ⲛⲓⲧⲁⲙⲓⲟⲛ ⲟⲩⲟϩ ⲡⲓϫⲁϥ ϣⲁϥⲓ̀ ⲉ̀ⲃⲟⲗ ϧⲉⲛ ⲛⲓⲧⲱⲟⲩ ⲉⲧϭⲟⲥⲓ.
     ⲓ̅. Ⲟⲩⲟϩ ⲉ̀ⲃⲟⲗϧⲉⲛ ⲫ̀ⲛⲓϥⲓ ⲛ̀ⲟⲩϫⲱⲣⲓ ⲉϥⲉ̀ϯ ⲛ̀ⲟⲩⲱϫⲉⲃ : ϥ̀ⲉⲣϩⲉⲙⲓ ⲇⲉ ⲙ̀ⲡⲓⲙⲱⲟⲩ ⲙ̀ⲫ̀ⲣⲏϯ ⲉⲧⲉϥⲟⲩⲱϣ.
     ⲓ̅ⲁ̅. Ⲟⲩⲟϩ ⲫⲏⲉⲧⲥⲟⲧⲡ ϥ̀ⲛⲁⲫⲁϣϥ ⲛ̀ⲟⲩϭⲏⲡⲓ : ⲟⲩϭⲏⲡⲓ ⲉⲥⲛⲁϫⲉⲣ ⲡⲉϥⲟⲩⲱⲓⲛⲓ ⲉ̀ⲃⲟⲗ.
     ⲓ̅ⲃ̅. ⲟⲩⲟϩ ⲛ̀ⲑⲟϥ ⲉⲑⲛⲁⲫⲱⲛϩ ⲛ̀ϩⲁⲛϫⲓⲛⲕⲱϯ ϧⲉⲛ ⲑⲉⲃⲟⲩⲗⲁⲑⲱⲑ ⲛ̀ⲛⲉϥϩ̀ⲃⲏⲟⲩⲓ̀ ⲛⲏⲧⲏⲣⲟⲩ ⲉⲧⲉϥⲛⲁϩⲉⲛϩⲱⲛⲟⲩ ⲉ̀ⲣⲱⲟⲩ: ⲛⲁⲓ ⲇⲉ ⲁⲩⲑⲏϣ ϩⲓϫⲉⲛ ⲡ̀ⲕⲁϩⲓ ⲉ̀ⲃⲟⲗϩⲓⲧⲟⲧϥ.
     ⲓ̅ⲅ̅. Ⲓⲧⲉ ⲟⲩϭⲓⲥ̀ⲃⲱ ⲓⲧⲉ ϩⲓϫⲉⲛ ⲡⲉϥⲕⲁϩⲓ ⲓⲧⲉ ⲟⲩⲛⲁⲓ ⲉⲑⲣⲉϥϫⲉⲙϥ : ⲛⲁⲓ ⲇⲉ ⲁⲩⲑⲏϣ ϩⲓϫⲉⲛ ⲡⲓⲕⲁϩⲓ ⲉ̀ⲃⲟⲗϩⲓⲧⲟⲧϥ.
     ⲓ̅ⲇ̅. Ⲭⲁⲙⲁϣϫ ⲉ̀ⲛⲁⲓ Ⲓⲱⲃ : ⲟ̀ϩⲓ ⲉ̀ⲣⲁⲧⲕ ⲉⲕϭⲓⲥ̀ⲃⲱ ⲉ̀ⲧ̀ϫⲟⲙ ⲙ̀Ⲡⲟ̅ⲥ̅.
     ⲓ̅ⲉ̅. Ⲧⲉⲛⲥⲱⲟⲩⲛ ⲇⲉ ϫⲉ ⲁ Ⲡⲟ̅ⲥ̅ ⲥⲉⲙⲛⲓ ⲛ̀ⲛⲉϥϩ̀ⲃⲏⲟⲩⲓ̀ ⲉ̀ⲁϥⲑⲁⲙⲓⲟ ⲛ̀ⲟⲩⲟⲩⲱⲓⲛⲓ ⲉ̀ⲃⲟⲗϧⲉⲛ ⲟⲩⲭⲁⲕⲓ.
     ⲓ̅Ⲋ. Ϥ̀ⲥⲱⲟⲩⲛ ⲇⲉ ⲛ̀ⲛⲓϫⲓⲛⲟⲩⲱϯ ⲉ̀ⲃⲟⲗ ⲛ̀ⲧⲉ ⲛⲓϭⲏⲡⲓ : ϩⲁⲛϣ̀ⲫⲏⲣⲓ ⲇⲉ ⲛⲉ ⲛⲓⲟⲩⲱϫⲡ ⲛ̀ⲧⲉ ⲛⲓⲡⲟⲛⲏⲣⲟⲥ.
     ⲓ̅ⲍ̅. Ⲛ̀ⲑⲟⲕ ⲇⲉ ⲥ̀ϧⲏⲙ ⲛ̀ϫⲉ ⲧⲉⲕⲥ̀ⲧⲟⲗⲏ : ⲁⲥϩⲉⲣⲓ ⲇⲉ ϩⲓϫⲉⲛ ⲡ̀ⲕⲁϩⲓ.
     ⲓ̅ⲏ̅. Ϩⲁⲛⲧⲁϫⲣⲟ ⲥⲉⲛⲉⲙⲁϥ ⲉ̀ϩⲁⲛⲙⲉⲧⲁ̀ⲡⲁⲥ ⲉⲩϫⲟⲣ ⲙ̀ⲫ̀ⲣⲏϯ ⲛ̀ⲟⲩϩⲟⲣⲁⲥⲓⲥ ϩⲓϫⲉⲛ ⲟⲩϫⲟⲙ.
     ⲓ̅ⲑ̅. Ⲉⲑⲃⲉ ⲟⲩ ⲙⲁⲧⲁⲙⲟⲓ ⲟⲩ ⲡⲉ ⲉⲧⲉⲛⲛⲁϫⲟϥ ⲛⲁϥ : ⲟⲩⲟϩ ⲧⲉⲛⲛⲁⲕⲏⲛ ⲉⲛⲓ̀ⲣⲓ ⲛ̀ⲟⲩⲙⲏϣ ⲛ̀ⲥⲁϫⲓ.
     ⲕ̅. Ⲙⲏ ⲟⲩⲟⲛ ⲟⲩϫⲱⲙ ⲓⲉ ⲟⲩⲥⲁϧ ⲟ̀ϩⲓ ⲉ̀ⲣⲁⲧϥ ⲙ̀ⲡⲁⲕⲱϯ : ϩⲓⲛⲁ ⲛ̀ⲧⲁⲑ̀ⲣⲉ ⲟⲩⲣⲱⲙⲓ ⲭⲁⲣⲱϥ ⲉ̀ⲟ̀ϩⲓ ⲉ̀ⲣⲁⲧ.
     ⲕ̅ⲁ̅. Ⲡⲓⲟⲩⲱⲓⲛⲓ ⲇⲉ ⲙⲏ ⲥⲉⲛⲁⲩ ⲉ̀ⲣⲟϥ ⲁⲛ ⲛ̀ϫⲉ ⲟⲩⲟⲛ ⲛⲓⲃⲉⲛ : ϥ̀ⲟⲩⲱⲛϩ ⲉ̀ⲃⲟⲗ ϩⲓϫⲉⲛ ⲛⲓⲙⲉⲧⲁ̀ⲡⲁⲥ ⲙ̀ⲫ̀ⲣⲏϯ ⲙ̀ⲫⲏⲉⲧⲉϥⲟⲩⲱⲣⲡ ⲙ̀ⲙⲟϥ ⲉ̀ϫⲉⲛ ⲛⲓϭⲏⲡⲓ.
     ⲕ̅ⲃ̅. Ⲛⲓϭⲏⲡⲓ ⲇⲉ ⲉⲧⲥⲁ ⲡⲉⲙϩⲓⲧ ⲉⲧϯⲙⲟⲩⲉ̀ ⲛ̀ⲁ̀ⲟⲩⲁⲛ ⲛ̀ⲛⲟⲩⲃ : ⲉ̀ϫⲉⲛ ⲛⲁⲓ ⲧⲏⲣⲟⲩ ⲟⲩⲛⲓϣϯ ⲡⲉ ⲡⲓⲱ̀ⲟⲩ ⲛⲉⲙ ⲡⲓⲧⲁⲓⲟ ⲛ̀ⲧⲉ Ⲡⲓⲡⲁⲛⲧⲟⲕⲣⲁⲧⲱⲣ.
     ⲕ̅ⲅ̅. Ⲟⲩⲟϩ ⲧⲉⲧⲉⲛⲛⲁϫⲉⲙ ⲕⲉⲟⲩⲁⲓ ⲁⲛ ⲉϥⲧⲉⲛⲑⲱⲛⲧ ⲉ̀ⲧⲉϥϫⲟⲙ : ⲫⲏⲉⲧϯϩⲁⲡ ⲉ̀ⲛⲓⲑ̀ⲙⲏⲓ : ⲭ̀ⲙⲉⲩⲓ̀ ⲁⲛ ϫⲉ ϥ̀ⲥⲱⲧⲉⲙ ⲉ̀ⲣⲟⲛ.
    ⲕ̅ⲇ̅. Ⲉⲑⲃⲉ ⲫⲁⲓ ⲉⲩⲉ̀ⲉⲣϩⲟϯ ϧⲁⲧⲉϥϩⲏ ⲛ̀ϫⲉ ϩⲁⲛⲣⲱⲙⲓ ⲉⲩⲉ̀ⲉⲣϩⲟϯ ϧⲁⲧⲉϥϩⲏ ⲛ̀ϫⲉ ⲛⲓⲕⲉⲥⲁⲃⲉⲩ ϧⲉⲛ ⲡⲟⲩϩⲏⲧ.

ⲕⲉⲫ ⲗ̅ⲏ̅

    Ϯϩⲟⲩⲓϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲡⲟ̅ⲥ̅

     ⲁ̅. Ⲙⲉⲛⲉⲛⲥⲁ ⲑ̀ⲣⲉ Ⲉⲗⲓⲟⲩⲥ ⲕⲏⲛ ⲉϥⲥⲁϫⲓ ⲡⲉϫⲉ Ⲡⲟ̅ⲥ̅ ⲛ̀Ⲓⲱⲃ ⲉ̀ⲃⲟⲗϩⲓⲧⲉⲛ ⲟⲩⲥⲁⲣⲁⲑⲏⲟⲩ ⲛⲉⲙ ⲟⲩϭⲏⲡⲓ ϫⲉ:
     ⲃ̅. Ⲛⲓⲙ ⲡⲉ ⲫⲏⲉⲧϩⲱⲡ ⲉ̀ⲣⲟⲓ ⲛ̀ⲟⲩⲥⲟϭⲛⲓ ⲉϥⲁ̀ⲙⲟⲛⲓ ⲇⲉ ⲛ̀ϩⲁⲛⲥⲁϫⲓ ϧⲉⲛ ⲡⲉϥϩⲏⲧ : ⲟⲩⲟϩ ⲉϥⲙⲉⲩⲓ̀ ϫⲉ ⲉϥⲛⲁϩⲱⲡ ⲉ̀ⲣⲟⲓ.
     ⲅ̅. Ⲙⲟⲣⲕ ⲉ̀ϫⲉⲛ ⲧⲉⲕϯⲡⲓ ⲙ̀ⲫ̀ⲣⲏϯ ⲛ̀ⲟⲩϫⲱⲣⲓ ϯⲛⲁϣⲉⲛⲕ : ⲛ̀ⲑⲟⲕ ⲇⲉ ⲟⲩⲟϩⲉⲙ ⲛⲏⲓ.
     ⲇ̅. Ⲛⲁⲕⲑⲱⲛ ⲡⲉ ⲉ̀ⲛⲓⲁϩⲓⲥⲉⲛϯ ⲙ̀ⲡ̀ⲕⲁϩⲓ : ⲙⲁⲧⲁⲙⲟⲓ ϫⲉ ⲓⲥϫⲉ ⲕ̀ⲥⲱⲟⲩⲛ ⲛ̀ⲟⲩⲕⲁϯ.
     ⲉ̅. Ⲛⲓⲙ ⲁϥⲭⲱ ⲛ̀ⲛⲉϥϣⲓ ⲓⲥϫⲉ ⲕ̀ⲥⲱⲟⲩⲛ : ⲓⲉ ⲛⲓⲙ ⲡⲉ ⲉⲧⲁϥⲉⲛ ⲟⲩⲛⲟϩ ⲛ̀ϣⲓ ⲉ̀ϩ̀ⲣⲏⲓ ⲉ̀ϫⲱϥ.
     Ⲋ. Ⲁⲩⲧⲁϫⲣⲏⲟⲩⲧ ⲉ̀ϫⲉⲛ ⲟⲩ ⲛ̀ϫⲉ ⲛⲉϥⲕ̀ⲣⲓⲕⲟⲥ : ⲛⲓⲙ ⲡⲉ ⲉⲧⲁϥⲭⲱ ⲛ̀ⲟⲩⲱ̀ⲛⲓ ⲛ̀ⲗⲁⲕϩ ⲉ̀ϩ̀ⲣⲏⲓ ⲉ̀ϫⲱϥ.
     ⲍ̅. Ϩⲟⲧⲉ ⲉⲧⲁⲩϣⲱⲡⲓ ⲛ̀ϫⲉ ⲛⲓⲥⲓⲟⲩ ⲁⲩϩⲱⲥ ⲉ̀ⲣⲟⲓ ϧⲉⲛ ⲟⲩⲛⲓϣϯ ⲛ̀ⲥ̀ⲙⲏ ⲛ̀ϫⲉ ⲛⲓⲁⲅⲅⲉⲗⲟⲥ ⲧⲏⲣⲟⲩ.
     ⲏ̅. Ⲫ̀ⲓⲟⲙ ⲇⲉ ⲁⲩⲙⲁϣⲑⲁⲙ ⲉ̀ⲣⲱϥ ϧⲉⲛ ϩⲁⲛⲡⲩⲗⲏ ϩⲟⲧⲉ ⲛⲁϥⲥ̀ⲑⲉⲣⲧⲱⲣ ⲉϥⲛⲏⲟⲩ ⲉ̀ⲃⲟⲗ ϧⲉⲛ ⲑ̀ⲛⲉϫⲓ ⲛ̀ⲧⲉ ⲧⲉϥⲙⲁⲩ.
     ⲑ̅. Ⲁⲓⲭⲱ ⲇⲉ ⲛ̀ⲟⲩϭⲏⲡⲓ ⲛⲁϥ ⲛ̀ϩⲉⲃⲥⲱ : ⲁⲓⲕⲟⲩⲗⲱⲗ ⲇⲉ ⲛ̀ⲟⲩⲛⲓϥ ⲛ̀ⲓⲱϯ.
     ⲓ̅. Ⲁⲓⲥⲉⲙⲛⲓ ⲇⲉ ⲛⲁϥ ⲛ̀ϩⲁⲛⲑⲟϣ ⲉ̀ⲁⲓⲧⲁⲕⲟ ⲉ̀ⲣⲟϥ ⲛ̀ϩⲁⲛⲕⲉⲗⲗⲓ ⲛⲉⲙ ϩⲁⲛⲡⲩⲗⲏ.
     ⲓ̅ⲁ̅. Ⲁⲓϫⲟⲥ ⲇⲉ ⲛⲁϥ ϫⲉ ⲉⲕⲉ̀ⲫⲟϩ ϣⲁ ⲙ̀ⲛⲁⲓ ⲟⲩⲟϩ ⲛ̀ⲛⲉⲕⲉⲣ ⲥⲁⲃⲟⲗ ⲁⲗⲗⲁ ⲁⲣⲉ ⲛⲉⲕϫⲟⲗ ⲉⲩⲉ̀ϧⲟⲙⲉ̀ϧⲟⲙϧⲉⲙ ⲛ̀ϧ̀ⲣⲏⲓ ⲛ̀ϧⲏⲧⲕ.
     ⲓ̅ⲃ̅. Ⲙⲏ ⲛⲁⲕ ⲙ̀ⲙⲁⲩ ⲡⲉ ⲉ̀ⲛⲁⲓⲑⲁⲙⲓⲟ ⲙ̀ⲡⲓⲟⲩⲱⲓⲛⲓ ⲛ̀ⲧⲉ ϩⲁⲛⲁ̀ⲧⲟⲟⲩⲓ̀ : ⲡⲓⲥⲓⲟⲩ ⲇⲉ ⲛ̀ⲧⲉ ϩⲁⲛⲁ̀ⲧⲟⲟⲩⲓ̀ ⲁϥⲥⲟⲩⲉⲛ ⲧⲉϥⲧⲁⲝⲓⲥ ⲉϥϣⲁⲓⲱⲟⲩ ϣⲁ ⲁⲩⲣⲏϫϥ ⲙ̀ⲡ̀ⲕⲁϩⲓ.
     ⲓ̅ⲅ̅. Ⲉϩⲓⲟⲩⲓ̀ ⲛ̀ⲛⲓⲁ̀ⲥⲉⲃⲏⲥ ⲉ̀ⲃⲟⲗϩⲓϫⲱϥ.
     ⲓ̅ⲇ̅. Ⲙⲏ ⲛ̀ⲑⲟⲕ ⲁⲕⲉⲗ ⲟⲩⲕⲁϩⲓ ⲛ̀ⲟ̀ⲙⲓ : ⲁⲕⲉⲣⲡ̀ⲗⲁⲍⲓⲛ ⲙ̀ⲙⲟϥ ⲛ̀ⲟⲩⲍⲱⲟⲛ : ⲟⲩⲟϩ ⲁⲕⲭⲁϥ ⲉϥⲥⲁϫⲓ ϩⲓϫⲉⲛ ⲡⲓⲕⲁϩⲓ.
     ⲓ̅ⲉ̅. Ⲁⲕⲱ̀ⲗⲓ ⲇⲉ ⲙ̀ⲫ̀ⲟⲩⲱⲓⲛⲓ ⲛ̀ⲧⲉ ⲛⲓⲁ̀ⲥⲉⲃⲏⲥ:ⲁⲕϧⲟⲙϧⲉⲙ ⲇⲉ ⲙ̀ⲡ̀ϣⲱⲃϣ ⲛ̀ⲧⲉ ⲛⲓⲣⲉϥϩⲓⲡ̀ϩⲟ.
     ⲓ̅Ⲋ. Ⲁⲕⲓ̀ ⲇⲉ ⲉ̀ϧ̀ⲣⲏⲓ ϣⲁ ⲛⲓⲙⲟⲩⲙⲓ ⲛ̀ⲧⲉ ⲫ̀ⲓⲟⲙ : ⲁⲕⲙⲟϣⲓ ⲇⲉ ϩⲓϫⲉⲛ ⲙⲱⲓⲧ ⲛ̀ⲧⲉ ⲫ̀ⲛⲟⲩⲛ.
     ⲓ̅ⲍ̅. Ⲙⲏ ⲥⲉⲛⲁⲟⲩⲱⲛ ⲛⲁⲕ ϧⲉⲛ ⲟⲩϩⲟϯ ⲛ̀ϫⲉ ⲛⲓⲡⲩⲗⲏ ⲛ̀ⲧⲉ ⲫ̀ⲙⲟⲩ : ⲥⲉⲛⲁⲉⲣϩⲟϯ ⲇⲉ ⲁⲩϣⲁⲛⲛⲁⲩ ⲉ̀ⲣⲟⲕ ⲛ̀ϫⲉ ⲛⲓⲙ̀ⲛⲟⲩⲧ ⲛ̀ⲧⲉ ⲁ̀ⲙⲉⲛϯ.
     ⲓ̅ⲏ̅. Ⲙⲏ ⲕ̀ⲥⲱⲟⲩⲛ ⲛ̀ϯⲟⲩⲏϣⲥⲓ ⲛ̀ⲧⲉ ⲥⲁⲡⲉⲥⲏⲧ ⲛ̀ⲧ̀ⲫⲉ: ⲙⲁⲧⲁⲙⲟⲓ ⲇⲉ ϫⲉ ⲟⲩⲏⲣ ⲧⲉ.
     ⲓ̅ⲑ̅. Ⲁϣ ⲇⲉ ⲡⲉ ⲡⲓⲕⲁϩⲓ ⲉⲧⲉ ⲡⲓⲟⲩⲱⲓⲛⲓ ϣⲟⲡ ⲛ̀ϧⲏⲧϥ : ⲟⲩⲟϩ ⲁϣ ⲡⲉ ⲡⲓⲙⲁ ⲛ̀ⲧⲉ ⲡ̀ⲭⲁⲕⲓ.
     ⲕ̅. Ⲁⲛ ⲭ̀ⲛⲁϣ̀ⲟⲗⲧ ϣⲁ ⲛⲟⲩⲑⲟϣ:ⲓⲥϫⲉ ⲕ̀ⲥⲱⲟⲩⲛ ⲛ̀ⲛⲟⲩⲙⲁⲙ̀ⲙⲟϣⲓ.
     ⲕ̅ⲁ̅. Ⲕ̀ⲥⲱⲟⲩⲛ ϩⲁⲣⲁ ϫⲉ ⲉⲧⲁⲩⲙⲁⲥⲕ ⲙ̀ⲡⲓⲥⲏⲟⲩ ⲉⲧⲉⲙ̀ⲙⲁⲩ : ⲧ̀ⲏ̀ⲡⲓ ⲇⲉ ⲛ̀ⲧⲉ ⲛⲉⲕⲣⲟⲙⲡⲓ ⲛⲁϣⲱⲥ.
     ⲕ̅ⲃ̅. Ⲙⲏ ⲁⲕⲓ̀ ⲉ̀ϫⲉⲛ ⲛⲓⲁ̀ϩⲱⲣ ⲛ̀ⲧⲉ ⲡⲓⲭⲓⲱⲛ : ⲛⲓⲁ̀ϩⲱⲣ ⲇⲉ ⲛ̀ⲧⲉ ⲡⲓⲁⲗ ⲙ̀ⲫⲉ ⲁⲕⲛⲁⲩ ⲉ̀ⲣⲱⲟⲩ.
     ⲕ̅ⲅ̅. Ⲥⲉⲭⲏ ⲇⲉ ⲛⲁⲕ ⲉ̀ⲟⲩⲙⲟⲩ ⲛ̀ϩⲁⲛϫⲁϫⲓ ⲛⲉⲙ ⲟⲩⲉ̀ϩⲟⲟⲩ ⲙ̀ⲡⲟⲗⲉⲙⲟⲥ ⲛⲉⲙ ⲟⲩϯ.
    ⲕ̅ⲇ̅. Ⲁⲥⲛⲏⲟⲩ ⲉ̀ⲃⲟⲗⲑⲱⲛ ⲛ̀ϫⲉ ϯⲡⲁⲭⲛⲏ ⲑⲏⲉⲧⲥⲏⲣ ⲉ̀ⲃⲟⲗ ⲥⲁⲡⲉⲥⲏⲧ ⲛ̀ⲧ̀ⲫⲉ.
     ⲕ̅ⲉ̅. Ⲛⲓⲙ ⲇⲉ ⲡⲉ ⲉⲧⲁϥⲥⲉⲙⲛⲉ ⲡⲓⲙⲟⲩⲛϩⲱⲟⲩ ⲉⲧⲟϣ ⲛⲉⲙ ⲡⲉϥϫⲟϣϫⲉϣ ⲛⲉⲙ ⲡⲉϥⲙⲱⲓⲧ.
     ⲕ̅Ⲋ. Ⲉ̀ⲡ̀ϫⲓⲛⲑ̀ⲣⲉ ⲟⲩⲙⲟⲩⲛ̀ⲱ̀ϣⲓ ϣⲱⲡⲓ ϧⲉⲛ ⲟⲩⲕⲁϩⲓ ⲙ̀ⲙⲟⲛ ⲣⲱⲙⲓ ϣⲟⲡ ⲛ̀ϧⲏⲧϥ ⲛⲉⲙ ϧⲉⲛ ⲟⲩϣⲁϥⲉ ⲫⲏⲉⲧⲉ ⲙ̀ⲙⲟⲛ ⲣⲱⲙⲓ ϣⲟⲡ ⲛ̀ϧⲏⲧϥ.
     ⲕ̅ⲍ̅. Ⲉ̀ⲡ̀ϫⲓⲛⲧ̀ⲥⲓⲟ ⲛ̀ⲟⲩⲙⲁ ⲛ̀ⲁⲧϩⲱⲙⲓ ϩⲓⲱⲧϥ ⲟⲩⲟϩ ⲛ̀ⲁⲧϣⲱⲡⲓ ⲛ̀ϧⲏⲧϥ : ⲟⲩⲟϩ ⲉ̀ⲡ̀ϫⲓⲛⲑ̀ⲣⲉϥⲫⲓⲣⲓ ⲛ̀ϫⲉ ⲟⲩⲙⲱⲓⲧ ⲉ̀ⲃⲟⲗ ⲛ̀ⲧⲉ ⲟⲩⲃⲟⲧⲃⲉⲧ.
     ⲕ̅ⲏ̅. Ⲛⲓⲙ ⲇⲉ ⲡⲉ ⲫ̀ⲓⲱⲧ ⲙ̀ⲡⲓⲙⲟⲩⲛϩⲱⲟⲩ : ⲛⲓⲙ ⲇⲉ ⲡⲉ ⲉⲧⲁϥⲙⲉⲥ ⲛⲓϭⲗⲁⲡ ⲛ̀ⲓⲱϯ.
     ⲕ̅ⲑ̅. Ⲡⲓⲭ̀ⲣⲓⲥⲧⲁⲗⲗⲟⲥ ⲇⲉ ⲁϥⲛⲏⲟⲩ ⲉ̀ⲃⲟⲗ ϧⲉⲛ ⲑ̀ⲛⲉϫⲓ ⲛ̀ⲛⲓⲙ : ϯⲡⲁⲭⲛⲏ ⲇⲉ ⲛⲓⲙ ⲡⲉⲧⲁϥⲑⲁϣⲥ ϧⲉⲛ ⲧ̀ⲫⲉ.
     ⲗ̅. Ⲑⲏⲉⲑⲛⲏⲟⲩ ⲉ̀ⲡⲉⲥⲏⲧ ⲙ̀ⲫ̀ⲣⲏϯ ⲛ̀ⲟⲩⲙⲱⲟⲩ ⲉϥⲟϣ ⲉϥϣⲟⲩⲟ̀ : ⲡ̀ϩⲟ ⲇⲉ ⲛ̀ⲛⲓⲁ̀ⲥⲉⲃⲏⲥ ⲛⲓⲙ ⲡⲉ ⲉⲧⲁϥⲑ̀ⲣⲉϥⲧⲱⲙⲧ.
     ⲗ̅ⲁ̅. Ⲕ̀ⲥⲱⲟⲩⲛ ⲙ̀ⲡⲓⲥ̀ⲛⲁⲩϩ ⲛ̀ⲧⲉ Ϭⲓⲙⲟⲩⲧ : ⲓⲉ ⲁⲕⲛⲁⲟⲩⲱⲛ ⲙ̀ⲡⲓⲫ̀ⲣⲁⲅⲙⲟⲥ ⲛ̀ⲧⲉ ⲡⲓⲞⲩⲣⲓⲱⲛ.
     ⲗ̅ⲃ̅. Ⲓⲉ ⲭ̀ⲛⲁⲟⲩⲱⲛ ⲉ̀ⲟⲩⲘⲁⲥⲟⲩⲣⲱⲧ ϧⲉⲛ ⲡⲉϥⲥⲏⲟⲩ : ⲟⲩⲟϩ ⲡⲓⲥⲓⲟⲩ ⲛ̀ⲧⲉ ⲣⲟⲩϩⲓ ⲭ̀ⲛⲁⲉⲛϥ ⲉ̀ϫⲉⲛ ⲡⲉϥⲙⲟϩ.
     ⲗ̅ⲅ̅. Ⲕ̀ⲥⲱⲟⲩⲛ ⲇⲉ ⲛ̀ⲛⲓϫⲓⲛϣⲓⲃϯ ⲛ̀ⲧⲉ ⲧ̀ⲫⲉ ⲓⲉ ⲛⲏⲧⲏⲣⲟⲩ ⲉⲧϣⲟⲡ ⲥⲁⲡⲉⲥⲏⲧ ⲛ̀ⲧ̀ⲫⲉ ⲉⲩⲥⲟⲡ.
     ⲗ̅ⲇ̅. Ⲙⲏ ⲭ̀ⲛⲁⲙⲟⲩϯ ⲉ̀ⲟⲩϭⲏⲡⲓ ϧⲉⲛ ⲟⲩⲥ̀ⲙⲏ ⲟⲩⲟϩ ⲛ̀ⲧⲉⲥⲥⲱⲧⲉⲙ ⲛⲁⲕ ϧⲉⲛ ⲟⲩⲥ̀ⲑⲉⲣⲧⲉⲣ ⲛ̀ⲧⲉ ⲟⲩⲙⲱⲟⲩ ⲉϥⲟϣ.
     ⲗ̅ⲉ̅. ⲭ̀ⲛⲁⲟⲩⲱⲣⲡ ⲇⲉ ⲛ̀ϩⲁⲛⲕⲉⲣⲁⲩⲛⲟⲥ ⲟⲩⲟϩ ⲛ̀ⲧⲟⲩϣⲉⲛⲱⲟⲩ : ⲙⲏ ⲥⲉⲛⲁϫⲟⲥ ⲛⲁⲕ ϫⲉ ⲡⲓϩⲱⲃ ⲟⲩ ⲡⲉ.
     ⲗ̅Ⲋ. Ⲛⲓⲙ ⲡⲉ ⲉⲧⲁϥϯ ⲛ̀ⲛⲓϩⲓⲟⲙⲓ ⲛ̀ⲟⲩⲥⲟⲫⲓⲁ ⲛ̀ⲧⲉ ⲟⲩⲥⲱϧⲓ ⲛⲉⲙ ⲟⲩⲉ̀ⲡⲓⲥⲧⲓⲙⲏ ⲛ̀ⲧⲉ ⲟⲩⲙⲉⲧⲡⲟⲓⲕⲗⲓⲧⲏⲥ.
     ⲗ̅ⲍ̅. Ⲛⲓⲙ ⲇⲉ ⲡⲉ ⲉⲧϭⲓⲏ̀ⲡⲓ ⲛ̀ⲛⲓϭⲏⲡⲓ ϧⲉⲛ ⲟⲩⲥⲟⲫⲓⲁ : ⲧ̀ⲫⲉ ⲇⲉ ⲁϥⲑ̀ⲣⲉⲥⲣⲓⲕⲓ ⲉ̀ⲡ̀ⲕⲁϩⲓ.
     ⲗ̅ⲏ̅. Ⲥ̀ϫⲏϣ ⲇⲉ ⲙ̀ⲫ̀ⲣⲏϯ ⲛ̀ⲟⲩⲕⲁϩⲓ ⲉϥϫⲏϣ ⲛ̀ⲕⲟⲛⲓⲁ : ⲁⲓⲧⲟⲙⲥ ⲇⲉ ⲙ̀ⲫ̀ⲣⲏϯ ⲛ̀ⲟⲩⲕⲩⲡⲟⲥ ⲉ̀ⲟⲩⲱ̀ⲛⲓ.
     ⲗ̅ⲑ̅. Ⲙⲏ ⲭ̀ⲛⲁϣ̀ϫⲱⲣϫ ⲛ̀ⲟⲩϧ̀ⲣⲉ ⲛ̀ⲟⲩⲙⲟⲩⲓ̀ : ⲓⲉ ⲭ̀ⲛⲁⲧ̀ⲥⲓⲟ ⲛ̀ⲟⲩⲩⲭⲏ ⲛ̀ⲧⲉ ⲟⲩⲇ̀ⲣⲁⲕⲱⲛ.
     ⲙ̅. Ⲥⲉⲉⲣϩⲟϯ ⲅⲁⲣ ϧⲉⲛ ⲟⲩⲙⲁⲛ̀ⲉⲛⲕⲟⲧ: ⲥⲉϩⲉⲙⲥⲓ ⲇⲉ ϧⲉⲛ ⲛⲓⲡⲩⲗⲏ ⲉⲩϫⲱⲣϫ.
     ⲙ̅ⲁ̅. Ⲛⲓⲙ ⲇⲉ ⲡⲉ ⲉⲧⲁϥⲥⲟⲃϯ ⲛⲟⲩϧ̀ⲣⲉ ⲛ̀ⲧⲉ ⲡⲓⲁ̀ⲃⲱⲕ: ⲛⲉϥⲙⲁⲥ ⲅⲁⲣ ⲥⲉⲱϣ ⲉ̀ⲡ̀ϣⲱⲓ ϩⲁ Ⲡⲟ̅ⲥ̅ ⲉⲩⲥⲟⲣⲉⲙ ⲉⲩⲕⲱϯ ⲛ̀ⲥⲁ ⲛⲟⲩϧ̀ⲣⲉ.

ⲕⲉⲫ ⲗ̅ⲑ̅

     ⲁ̅. Ⲁⲛ ⲁⲕⲉ̀ⲙⲓ ⲉ̀ⲡ̀ⲥⲏⲟⲩ ⲙ̀ⲙⲓⲥⲓ ⲛ̀ⲟⲩⲃⲁⲉⲙⲡⲓ ⲛⲉⲙ ⲟⲩⲉ̀ⲓⲟⲩⲗ ⲛ̀ⲧⲉ ⲟⲩⲡⲉⲧⲣⲁ : ⲁⲕⲁ̀ⲣⲉϩ ⲇⲉ ⲉ̀ⲛⲓⲛⲁⲕϩⲓ ⲛ̀ⲧⲉ ⲛⲓⲉ̀ⲓⲟⲩⲗ.
     ⲃ̅. Ⲁⲕϭⲓⲏ̀ⲡⲓ ⲇⲉ ⲛ̀ⲛⲟⲩⲉⲃⲏⲧ ⲙ̀ⲙⲓⲥⲓ : ⲛⲟⲩⲛⲁⲕϩⲓ ⲇⲉ ⲁⲕϯⲟⲩⲱ̀ ⲙ̀ⲙⲱⲟⲩ.
     ⲅ̅. Ⲁⲕϣⲁⲛⲉϣ ⲛⲟⲩϣⲏⲣⲓ ⲇⲉ ⲛ̀ⲟⲩⲉϣⲉⲛ ϩⲟϯ  : ⲛⲟⲩⲛⲁⲕϩⲓ ⲇⲉ ⲭ̀ⲛⲁϯⲧⲟⲧⲟⲩ ⲉ̀ⲃⲟⲗ.
     ⲇ̅. Ⲟⲩⲟϩ ⲉⲩⲉ̀ⲫⲱϫⲓ ⲛ̀ⲛⲟⲩϣⲏⲣⲓ : ϧⲉⲛ ⲡⲟⲩⲟⲩⲧⲁϩ ⲉⲩⲉ̀ⲁ̀ϣⲁⲓ : ⲉⲩⲉ̀ⲓ̀ ⲉ̀ⲃⲟⲗ ⲟⲩⲟϩ ⲛ̀ⲛⲟⲩⲧⲁⲥⲑⲟ ⲉ̀ⲣⲱⲟⲩ.
     ⲉ̅. Ⲛⲓⲙ ⲇⲉ ⲡⲉ ⲉⲧⲁϥⲭⲁ ⲟⲩⲓⲁⲛ̀ⲧⲱⲟⲩ ⲉ̀ⲃⲟⲗ ⲉϥⲟⲓ ⲛ̀ⲣⲉⲙϩⲉ : ⲛⲉϥⲥ̀ⲛⲁⲩϩ ⲇⲉ ⲛⲓⲙ ⲡⲉ ⲉⲧⲁϥϯⲟⲩⲱ̀ ⲙ̀ⲙⲱⲟⲩ.
     Ⲋ. ⲡ̀ϣⲁϥⲉ ⲇⲉ ⲁⲓⲭⲁϥ ⲛⲁϥ ⲙ̀ⲙⲁⲛ̀ϣⲱⲡⲓ : ⲟⲩⲟϩ ⲛⲉϥⲙⲁⲛ̀ⲟⲩⲱϩ ⲛ̀ⲟⲩⲙⲁⲛ̀ϩⲁⲁ̀ⲙⲓ.
     ⲍ̅. Ϣⲁϥⲥⲱⲃⲓ ⲇⲉ ⲛ̀ⲥⲁ ⲟⲩⲙⲏϣ ⲉϥⲟϣ ⲛ̀ⲧⲉ ⲟⲩⲃⲁⲕⲓ: ⲡ̀ⲁ̀ⲣⲓⲕⲓ ⲇⲉ ⲛ̀ⲟⲩⲫⲟⲣⲟⲗⲟⲅⲟⲥ ⲙ̀ⲡⲁϥⲥⲱⲧⲉⲙ ⲉ̀ⲣⲟϥ.
     ⲏ̅. Ⲉϥⲉ̀ϫⲉⲙⲡ̀ϣⲓⲛⲓ ⲛ̀ϩⲁⲛⲧⲱⲟⲩ ⲛ̀ⲟⲩⲙⲁⲙ̀ⲙⲟⲛⲓ ⲛⲁϥ: ⲟⲩⲟϩ ϥ̀ⲕⲱϯ ⲛ̀ⲥⲁ ⲟⲩⲉⲙϩ̀ⲑⲏϥ ⲛ̀ⲉⲛⲭⲁⲓ ⲛⲓⲃⲉⲛ ⲉⲧⲟⲩⲉⲧⲟⲩⲱⲧ.
     ⲑ̅. Ⲓⲉ ϥ̀ⲛⲁⲉⲛⲕⲟⲧ ϩⲓϫⲉⲛ ⲡⲉⲕⲟⲩⲟⲛϩϥ.
     ⲓ̅. Ⲭ̀ⲛⲁⲙⲟⲩⲣ ⲇⲉ ⲙ̀ⲡⲉϥⲛⲁϩⲃⲉϥ ϧⲉⲛ ϩⲁⲛⲥ̀ⲛⲁⲩϩ: ⲓⲉ ϥ̀ⲛⲁⲥ̀ⲭⲁⲓ ⲛ̀ⲛⲉⲕⲑ̀ⲗⲱⲙ ϧⲉⲛ ⲧ̀ⲕⲟⲓ.
     ⲓ̅ⲁ̅. Ⲭ̀ⲛⲁⲭⲁϩ̀ⲑⲏⲕ ⲇⲉ ⲉ̀ⲣⲟϥ ϫⲉ ⲟⲩⲛⲓϣϯ ⲧⲉ ⲧⲉϥϫⲟⲙ : ⲓⲉ ⲭ̀ⲛⲁⲧⲉⲛϩⲟⲩⲧϥ ⲉ̀ⲛⲉⲕϩ̀ⲃⲏⲟⲩⲓ̀.
     ⲓ̅ⲃ̅. Ⲭ̀ⲛⲁⲧⲉⲛϩⲟⲩⲧϥ ⲇⲉ ϫⲉ ⲭ̀ⲛⲁϯ ⲛⲁϥ ⲛ̀ⲛⲏⲉⲧⲁⲕⲥⲁⲧⲟⲩ ⲓⲉ ϥ̀ⲛⲁⲉⲛ ⲧⲉⲕϩⲟⲓ ⲉ̀ϧⲟⲩⲛ ϧⲉⲛ ⲡⲓϭⲛⲱⲟⲩ.
     ⲓ̅ⲅ̅. Ⲟⲩⲧⲉⲛϩ ⲛ̀ⲧⲉ ϩⲁⲛⲛⲉⲗⲁⲥⲥⲁ ⲉⲩⲉ̀ⲟⲩⲛⲟϥ ⲉϣⲱⲡ ⲛ̀ⲧⲉϥⲧⲁϩⲉ ⲟⲩⲁⲥⲓⲧⲁ ⲛⲉⲙ ⲟⲩⲛⲉⲥⲥⲁ.
     ⲓ̅ⲇ̅. Ϫⲉ ⲥ̀ⲛⲁⲭⲱ ⲛ̀ⲛⲉⲥⲥⲱⲟⲩϩⲓ ϩⲓϫⲉⲛ ⲡⲓⲕⲁϩⲓ : ⲟⲩⲟϩ ⲥ̀ⲛⲁⲉⲣⲑⲁⲗⲡⲓⲛ ⲙ̀ⲙⲱⲟⲩ ϧⲉⲛ ⲟⲩⲕⲁϩⲓ.
     ⲓ̅ⲉ̅. Ⲟⲩⲟϩ ⲁⲥⲉⲣⲡⲱⲃϣ ϫⲉ ⲁⲥϫⲟⲣⲟⲩ ⲉ̀ⲃⲟⲗ ⲛ̀ⲑⲱⲛ ⲟⲩⲟϩ ϩⲁⲛⲑⲏⲣⲓⲟⲛ ⲛ̀ⲧⲉ ⲧ̀ⲕⲟⲓ ⲉⲩⲉ̀ϩⲱⲙⲓ ⲉ̀ϫⲱⲟⲩ.
     ⲓ̅Ⲋ. Ⲁⲥⲑ̀ⲣⲉ ⲛⲉⲥϧ̀ⲣⲟϯ ⲉⲛϣⲟⲧ ⲉϩⲟⲧⲉ ⲡⲉⲥⲣⲏϯ : ⲁⲥϭⲓϧⲓⲥⲓ ϧⲉⲛ ⲟⲩⲡⲉⲧϣⲟⲩⲓⲧ ⲛ̀ⲟⲩⲉϣⲉⲛ ϩⲟϯ.
     ⲓ̅ⲍ̅. Ϫⲉ ⲁ Ⲫϯ ⲭⲁⲣⲱϥ ⲉ̀ϣ̀ⲧⲉⲙϯ ⲥⲟⲫⲓⲁ ⲛⲁⲥ: ⲟⲩⲟϩ ⲙ̀ⲡⲉϥϯ ⲧⲟⲓ ⲛⲁⲥ ϧⲉⲛ ⲡⲓⲕⲁϯ.
     ⲓ̅ⲏ̅. Ⲟⲩⲟϩ ⲕⲁⲧⲁ ϩⲁⲛⲥⲏⲟⲩ ϧⲉⲛ ⲟⲩϭⲓⲥⲓ ⲉⲥⲉ̀ϭⲓⲥⲓ : ⲉⲥⲉ̀ⲥⲱⲃⲓ ⲛ̀ⲟⲩϩ̀ⲑⲟ ⲛⲉⲙ ⲫⲏⲉⲧⲧⲁⲗⲏⲟⲩⲧ ⲉ̀ⲣⲟϥ.
     ⲓ̅ⲑ̅. Ⲙⲏ ⲛ̀ⲑⲟⲕ ⲁⲕϯⲛⲟⲙϯ ⲛ̀ⲟⲩϩ̀ⲑⲟ : ⲁⲕϯ ⲇⲉ ⲛ̀ⲟⲩϩⲟϯ ϩⲓ ⲡⲉϥϧⲁϧ.
     ⲕ̅. Ⲁⲕⲧⲁⲕⲧⲟ ⲇⲉ ⲛ̀ⲟⲩⲡⲁⲛⲟⲡⲗⲓⲁ ⲉ̀ⲣⲟϥ ⲛⲉⲙ ⲡ̀ⲱ̀ⲟⲩ ⲛ̀ⲧⲉ ⲧⲉϥⲙⲉⲥⲧⲉⲛϩⲏⲧ ϧⲉⲛ ⲟⲩⲙⲉⲧⲧⲟⲗⲙⲏⲣⲟⲥ.
     ⲕ̅ⲁ̅. Ⲉϥϣⲓⲕⲓ ϧⲉⲛ ⲧ̀ⲕⲟⲓ ϣⲁⲧⲉϥϭⲓⲥⲓ ⲙ̀ⲙⲟϥ : ϣⲁϥⲓ̀ ⲇⲉ ⲉ̀ⲃⲟⲗ ⲉ̀ⲧ̀ⲕⲟⲓ ϧⲉⲛ ⲟⲩϫⲟⲙ.
     ⲕ̅ⲃ̅. Ⲉϥⲛⲁⲓ̀ ⲉ̀ⲃⲟⲗ ⲉ̀ϩ̀ⲣⲁϥ ⲛ̀ⲟⲩⲟⲩⲣⲟ: ϣⲁϥⲥⲱⲃⲓ ⲙ̀ⲙⲟϥ ⲟⲩⲟϩ ⲛ̀ⲛⲉϥⲧⲁⲥⲑⲟ ⲉ̀ⲫⲁϩⲟⲩ ϧⲁⲧ̀ϩⲏ ⲛ̀ⲟⲩⲃⲉⲛⲓⲡⲓ.
     ⲕ̅ⲅ̅. Ϣⲁⲩϣⲟⲩϣⲟⲩ ⲙ̀ⲙⲱⲟⲩ ⲉ̀ϫⲱϥ ⲛ̀ϫⲉ ⲟⲩⲫⲓϯ ⲛⲉⲙ ⲟⲩⲥⲏϥⲓ.
    ⲕ̅ⲇ̅. Ⲟⲩⲟϩ ϧⲉⲛ ⲟⲩϫⲱⲛⲧ ϣⲁϥⲧⲁⲕⲟ ⲙ̀ⲡⲓⲕⲁϩⲓ: ⲟⲩⲟϩ ⲙ̀ⲡⲁϥⲧⲉⲛϩⲟⲩⲧⲥ ϣⲁⲧⲉⲥⲱϣ ⲛ̀ϫⲉ ϯⲥⲁⲗⲡⲓⲅⲝ ϣⲁϥϫⲟⲥ ϫⲉ ⲕⲁⲗⲱⲥ.
     ⲕ̅ⲉ̅. Ⲓⲥϫⲉⲛ ϩⲓⲫ̀ⲟⲩⲉⲓ ϣⲁϥϣⲱⲗⲉⲙ ⲉ̀ⲡⲓⲥ̀ⲑⲟⲓ ⲛ̀ⲟⲩⲡⲟⲗⲉⲙⲟⲥ ϧⲉⲛ ⲟⲩⲟⲩⲟⲓ ⲛⲉⲙ ⲟⲩϩⲉⲙϩⲉⲙ.
     ⲕ̅Ⲋ. Ⲙⲏ ⲉ̀ⲃⲟⲗϧⲉⲛ ⲡⲉⲕⲕⲁϯ ϣⲁϥⲟ̀ϩⲓ ⲉ̀ⲣⲁⲧϥ ⲛ̀ϫⲉ ⲟⲩⲃⲏϫ ⲉⲣⲉ ⲡⲉϥⲧⲉⲛϩ ⲫⲟⲣϣ ⲉ̀ⲃⲟⲗ ⲛ̀ⲟⲩⲉϣⲉⲛ ⲕⲓⲙ ⲉϥϫⲟⲩϣⲧ ⲉ̀ⲛⲓⲥⲁ ⲛ̀ⲧⲉ ⲫ̀ⲣⲏⲥ.
     ⲕ̅ⲍ̅. Ⲓⲉ ϧⲉⲛ ⲡⲉⲕⲟⲩⲁϩⲥⲁϩⲛⲓ ϣⲁϥϭⲓⲥⲓ ⲛ̀ϫⲉ ⲡⲉϥⲟⲩⲁϩⲥⲁϩⲛⲓ.
     ⲕ̅ⲏ̅. Ⲡⲓⲛⲟϣⲉⲣ ⲇⲉ ⲉϥϩⲉⲙⲥⲓ ϩⲓϫⲉⲛ ⲛⲉϥⲙⲁⲥ : ϥ̀ⲙ̀ⲧⲟⲛ ⲙ̀ⲙⲟϥ ϩⲓϫⲉⲛ ⲟⲩⲙⲁ ⲉϥⲁ̀ϣⲓ ⲉ̀ⲃⲟⲗ ⲛ̀ⲧⲉ ⲟⲩⲡⲉⲧⲣⲁ ⲟⲩⲟϩ ⲉϥϩⲏⲡ.
     ⲕ̅ⲑ̅. Ⲉϥⲙ̀ⲙⲁⲩ ⲇⲉ ⲁϥⲕⲱϯ ⲛ̀ⲥⲁ ⲧⲉϥϧ̀ⲣⲉ : ⲛⲉϥⲃⲁⲗ ⲇⲉ ⲥⲉϫⲟⲩϣⲧ ⲓⲥϫⲉⲛ ϩⲓⲫ̀ⲟⲩⲉⲓ.
     ⲗ̅. Ⲛⲉϥⲙⲁⲥ ⲇⲉ ⲥⲉⲟⲩⲟϣⲉⲙ ϧⲉⲛ ⲟⲩⲥ̀ⲛⲟϥ:ⲡⲓⲙⲁ ⲉⲧⲉ ⲟⲩⲟⲛ ϣⲟⲗϩⲥ ⲙ̀ⲙⲁⲩ ϣⲁⲩϫⲉⲙⲟⲩ ⲥⲁⲧⲟⲧⲟⲩ ⲙ̀ⲙⲁⲩ.

ⲕⲉⲫ ⲙ̅

    Ϯⲙⲁϩⲃ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲡⲟ̅ⲥ̅

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲡⲟ̅ⲥ̅ ⲡⲉϫⲁϥ ⲛ̀Ⲓⲱⲃ ϫⲉ :
     ⲃ̅. Ⲙⲏ ⲭ̀ⲛⲁϯϩⲁⲡ ⲉⲩϩⲁⲡ ⲛⲉⲙ ⲟⲩϩⲩⲕⲁⲛⲟⲥ : ⲉⲕⲥⲟϩⲓ ⲇⲉ ⲙ̀Ⲫϯ ⲉϥⲉⲣⲟⲩⲱ̀ ⲙ̀ⲙⲟϥ.

    Ϯⲙⲁϩⲓ̅ⲁ̅ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ

     ⲅ̅. Ⲁϥⲉⲣⲟⲩⲱ̀ ⲛ̀ϫⲉ Ⲓⲱⲃ ⲡⲉϫⲁϥ ⲙ̀Ⲡⲟ̅ⲥ̅ :
     ⲇ̅. Ⲁϧⲟⲓ ϫⲉ ⲁ̀ⲛⲟⲕ ϯϭⲓϩⲁⲡ ⲉⲩϯⲥ̀ⲃⲱ ⲛⲏⲓ ⲟⲩⲟϩ ⲉⲓⲥⲟϩⲓ ⲙ̀Ⲡⲟ̅ⲥ̅:ⲉⲓⲥⲱⲧⲉⲙ ⲇⲉ ⲉ̀ϩⲁⲛⲥⲁϫⲓ ⲙ̀ⲡⲁⲓⲣⲣⲏϯ ⲉ̀ⲁ̀ⲛⲟⲕ ϩ̀ⲗⲓ:ⲁ̀ⲛⲟⲕ ⲇⲉ ⲟⲩ ⲡⲉ ⲉ̀ϯⲛⲁⲉⲣⲟⲩⲱ̀ ⲙ̀ⲙⲟϥ ⲟⲩⲃⲉ ⲛⲁⲓ : ⲁⲓⲛⲁϯ ⲛ̀ⲧⲁϫⲓϫ ϩⲓⲣⲉⲛ ⲣⲱⲓ.
     ⲉ̅. Ⲁⲓⲥⲁϫⲓ ⲛ̀ⲟⲩⲥⲟⲡ:ⲡⲓⲥⲟⲡ ⲇⲉ ⲙ̀ⲙⲁϩⲃ̅ ⲛ̀ⲛⲁⲟⲩⲁϩⲧⲟⲧ ϫⲉ.

    Ϯⲙⲁϩⲅ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲡⲟ̅ⲥ̅

     Ⲋ. Ⲉⲧⲓ ⲇⲉ ⲁϥⲉⲣⲟⲩⲱ̀ ⲛ̀ϫⲉ Ⲡⲟ̅ⲥ̅ ⲟⲩⲟϩ ⲡⲉϫⲁϥ ⲛ̀Ⲓⲱⲃ ⲉ̀ⲃⲟⲗϧⲉⲛ ϯϭⲏⲡⲓ ϫⲉ :
     ⲍ̅. Ⲙ̀ⲫⲱⲣ ⲁⲗⲗⲁ ⲙⲟⲣⲕ ⲉ̀ϫⲉⲛ ⲧⲉⲕϯⲡⲓ ⲙ̀ⲫ̀ⲣⲏϯ ⲛ̀ⲟⲩϫⲱⲣⲓ : ϯⲛⲁϣⲉⲛⲕ : ⲛ̀ⲑⲟⲕ ⲇⲉ ⲁⲣⲓⲟⲩⲱ̀ ⲛⲏⲓ.
     ⲏ̅. Ⲙⲏ ⲁⲕϩⲓⲟⲩⲓ̀ ⲙ̀ⲡⲁϩⲁⲡ ⲉ̀ⲃⲟⲗ: ⲭ̀ⲙⲉⲩⲓ̀ ⲇⲉ ϫⲉ ⲉⲧⲁⲓⲉⲣ ⲛⲁⲓ ⲛⲁⲕ ⲛ̀ⲕⲉⲣⲏϯ ⲉⲃⲏⲗ ϫⲉ ⲛ̀ⲧⲉⲕⲟⲩⲱⲛϩ ⲉ̀ⲃⲟⲗ ϫⲉ ⲛ̀ⲑⲟⲕ ⲟⲩⲑ̀ⲙⲏⲓ.
     ⲑ̅. Ⲙⲏ ⲡⲉⲕϫ̀ⲫⲟⲓ ⲛⲁϣ̀ϯ ⲟⲩⲃⲉ Ⲡⲟ̅ⲥ̅ : ⲓⲉ ϧⲉⲛ ⲟⲩϧ̀ⲣⲱⲟⲩ ⲕ̀ⲉⲣϧⲁⲣⲁⲃⲁⲓ ⲙ̀ⲡⲉϥⲣⲏϯ.
     ⲓ̅. ϭⲓ ⲛⲁⲕ ⲛ̀ⲟⲩϭⲓⲥⲓ ⲛⲉⲙ ⲟⲩϫⲟⲙ:ⲟⲩⲱ̀ⲟⲩ ⲇⲉ ⲛⲉⲙ ⲟⲩⲧⲁⲓⲟ ⲙⲏⲓⲧⲟⲩ ϩⲓⲱⲧⲕ.
     ⲓ̅ⲁ̅. Ⲟⲩⲱⲣⲡ ⲇⲉ ⲛ̀ϩⲁⲛⲁⲅⲅⲉⲗⲟⲥ ϧⲉⲛ ⲟⲩϫⲱⲛⲧ:ⲙⲁⲑⲉⲃⲓⲟ ⲇⲉ ⲛ̀ⲛⲓⲣⲉϥϯϣⲱϣ ⲧⲏⲣⲟⲩ : ⲱϣⲉⲙ ⲇⲉ ⲛ̀ⲛⲓⲣⲉϥϩⲓⲡ̀ϩⲟ.
     ⲓ̅ⲃ̅. Ⲛⲓⲁ̀ⲥⲉⲃⲏⲥ ⲇⲉ ⲭⲟⲡⲟⲩ ⲛ̀ⲟⲩϩⲟϯ ϧⲉⲛ ⲟⲩϩⲟϯ:ⲙⲁⲣⲟⲩⲗⲟϥⲗⲉϥ ⲇⲉ ⲉⲩⲥⲟⲡ ϧⲉⲛ ⲡⲓⲕⲁϩⲓ ⲥⲁⲃⲟⲗ.
     ⲓ̅ⲅ̅. Ⲛⲟⲩϩⲟ ⲇⲉ ⲙⲁϩⲟⲩ ⲛ̀ϣⲱϣ : ⲙⲁⲣⲟⲩⲭⲟⲡⲟⲩ ⲇⲉ ϧⲉⲛ ⲟⲩⲕⲁϩⲓ ⲥⲁⲃⲟⲗ ⲉⲩⲥⲟⲡ.
     ⲓ̅ⲇ̅. Ⲟⲩⲟϩ ϯⲛⲁⲟⲩⲱⲛϩ ⲉ̀ⲃⲟⲗ ϫⲉ ⲟⲩⲟⲛϣ̀ϫⲟⲙ ⲛ̀ⲧⲉⲕⲟⲩⲓ̀ⲛⲁⲙ ⲉ̀ⲛⲟϩⲉⲙ.
     ⲓ̅ⲉ̅. Ⲁⲗⲗⲁ ϩⲏⲡⲡⲉ ⲓⲥ ⲟⲩⲑⲏⲣⲓⲟⲛ ϩⲁⲣⲟⲕ ϥ̀ⲟⲩⲉⲙ ⲥⲱⲟⲩⲃⲉⲛ ⲙ̀ⲫ̀ⲣⲏϯ ⲛ̀ⲛⲓⲉ̀ϩⲱⲟⲩ.
     ⲓ̅Ⲋ. Ϩⲏⲡⲡⲉ ⲓⲥ ⲧⲉϥϫⲟⲙ ϧⲉⲛ ⲧⲉϥϯⲡⲓ : ⲧⲉϥⲛⲟⲙϯ ⲇⲉ ϧⲉⲛ ϯϧⲉⲗⲡⲓ ⲛ̀ⲧⲉ ⲧⲉϥⲛⲉϫⲓ.
     ⲓ̅ⲍ̅. Ⲁϥⲧⲁϩⲟ ⲙ̀ⲡⲉϥⲥⲏⲧ ⲉ̀ⲣⲁⲧϥ ⲙ̀ⲫ̀ⲣⲏϯ ⲛ̀ⲟⲩⲕⲩⲡⲁⲣⲓⲥⲥⲟⲥ : ⲛⲉϥⲙⲟϯ ⲇⲉ ⲥⲉϭⲗⲉⲙⲗⲱⲙ.
     ⲓ̅ⲏ̅. Ⲛⲉϥⲥ̀ⲫⲓⲣⲱⲟⲩⲓ̀ ⲇⲉ ϩⲁⲛⲥ̀ⲫⲓⲣⲱⲟⲩⲓ̀ ⲛ̀ϩⲟⲙⲧ ⲛⲉ : ⲟⲩⲟϩ ⲡⲉϥⲥⲟⲓ ⲟⲩⲃⲉⲛⲓⲡⲓ ⲉϥϫⲏϣ ⲡⲉ.
     ⲓ̅ⲑ̅. Ⲫⲁⲓ ⲡⲉ ⲡⲓϩⲟⲩⲓⲧ ⲙ̀ⲡ̀ⲗⲁⲥⲙⲁ ⲛ̀ⲧⲉ Ⲡⲟ̅ⲥ̅ : ⲉ̀ⲁϥⲑⲁⲙⲓⲟϥ ⲉⲑⲣⲟⲩⲥⲱⲃⲓ ⲙ̀ⲙⲟϥ ⲛ̀ϫⲉ ⲛⲉϥⲁⲅⲅⲉⲗⲟⲥ.
     ⲕ̅. Ⲁϥϣⲉⲛⲁϥ ⲇⲉ ⲉ̀ϫⲉⲛ ⲟⲩⲧⲱⲟⲩ ⲉϥϭⲟⲥⲓ:ⲁϥⲓ̀ⲣⲓ ⲇⲉ ⲛ̀ⲟⲩⲣⲁϣⲓ ⲛ̀ⲛⲓϥ̀ⲧⲉⲫⲁⲧ ⲉⲧϧⲉⲛ ⲡⲓⲧⲁⲣⲧⲁⲣⲟⲥ.
     ⲕ̅ⲁ̅. Ⲁϥⲉⲛⲕⲟⲧ ϧⲁⲣⲁⲧⲟⲩ ⲛ̀ϩⲁⲛϣ̀ϣⲏⲛ ⲛ̀ⲟⲩⲑⲟ ⲛ̀ⲣⲏϯ ϧⲁⲣⲁⲧϥ ⲛ̀ⲟⲩϭⲟⲛϥ ⲛⲉⲙ ⲟⲩⲕⲁϣ ⲛⲉⲙ ⲟⲩⲃⲉϫⲏⲛ.
     ⲕ̅ⲃ̅. Ⲥⲉⲉⲣϧⲏⲓⲃⲓ ⲇⲉ ⲉ̀ϫⲱϥ ⲛ̀ϫⲉ ϩⲁⲛⲛⲓϣϯ ⲛ̀ϣ̀ϣⲏⲛ ⲛⲉⲙ ϩⲁⲛⲣⲁⲇⲁⲙⲛⲟⲥ ⲛⲉⲙ ϩⲁⲛϫⲁⲗ ⲛ̀ⲧⲉ ⲧ̀ⲕⲟⲓ.
     ⲕ̅ⲅ̅. Ⲁϥϣⲁⲛϣⲱⲡⲓ ⲛ̀ϫⲉ ⲟⲩⲛⲓϣϯ ⲙ̀ⲙⲱⲟⲩ ⲛ̀ⲛⲉϥⲉⲣⲁⲥⲑⲁⲛⲉⲥⲑⲉ : ⲡⲉϥϩⲏⲧ ⲇⲉ ϫⲟⲣ ϫⲉ ⲡⲓⲒⲟⲣⲇⲁⲛⲏⲥ ⲛⲁⲕⲱⲗϩ ⲉ̀ϧⲟⲩⲛ ϧⲉⲛ ⲣⲱϥ.
     ⲕ̅ⲇ̅. Ϥ̀ⲛⲁϣⲟⲡϥ ⲉ̀ⲣⲟϥ ϧⲉⲛ ⲛⲉϥⲃⲁⲗ : ⲉϥϫⲱⲗϫ ⲙ̀ⲙⲟϥ ⲉϥⲉ̀ϫⲱⲧϩ ⲇⲉ ⲙ̀ⲡⲉϥϣⲁⲓ.
     ⲕ̅ⲉ̅. Ⲉⲕⲉ̀ⲓ̀ⲛⲓ ⲇⲉ ⲙ̀ⲡⲓⲇ̀ⲣⲁⲕⲱⲛ ϧⲉⲛ ⲟⲩⲱⲓⲙⲓ : ⲓⲉ ⲭ̀ⲛⲁϯ ⲇⲉ ⲛ̀ⲟⲩⲧⲁⲧϩⲟ ⲉ̀ⲡⲉϥϣⲁⲓ.
     ⲕ̅Ⲋ. Ⲓⲉ ⲭ̀ⲛⲁⲟⲩⲱⲧⲉⲛ ⲙ̀ⲡⲉϥⲥ̀ⲫⲟⲧⲟⲩ ϧⲉⲛ ⲟⲩϩⲁⲗⲁⲕ.
     ⲕ̅ⲍ̅. Ϥ̀ⲛⲁⲥⲁϫⲓ ⲇⲉ ⲛⲉⲙⲁⲕ ϧⲉⲛ ⲟⲩϯϩⲟ ⲛⲉⲙ ⲟⲩⲧⲱⲃϩ ⲛⲉⲙ ⲟⲩϭⲛⲟⲛ.
     ⲕ̅ⲏ̅. Ϥ̀ⲛⲁⲥⲉⲙⲛⲓ ⲇⲉ ⲛⲉⲙⲁⲕ ⲛ̀ⲟⲩⲇⲓⲁⲑⲏⲕⲏ ϥ̀ⲛⲁϣⲱⲡⲓ ⲇⲉ ⲛⲁⲕ ⲙ̀ⲃⲱⲕ ϣⲁ ⲉ̀ⲛⲉϩ : ⲭ̀ⲛⲁⲥⲱⲃⲓ ⲇⲉ ⲙ̀ⲙⲟϥ ⲙ̀ⲫ̀ⲣⲏϯ ⲛ̀ⲟⲩϩⲁⲗⲏⲧ.
    ⲕ̅ⲑ̅. Ⲭ̀ⲛⲁⲙⲟⲣϥ ⲇⲉ ⲙ̀ⲫ̀ⲣⲏϯ ⲛ̀ⲟⲩϭⲁϫ ⲛ̀ⲧⲟⲧϥ ⲛ̀ⲟⲩⲁ̀ⲗⲟⲩ.
     ⲗ̅. Ⲁⲩϣⲁⲛⲉⲩϣ ⲛ̀ϧⲏⲧϥ ⲛ̀ϫⲉ ϩⲁⲛϣ̀ⲗⲱⲗ : ⲥⲉⲫⲱϣ ⲇⲉ ⲙ̀ⲙⲟϥ ⲉ̀ϩ̀ⲣⲁⲩ ⲛ̀ϫⲉ ⲛⲓⲉⲑⲛⲟⲥ ⲛ̀ⲧⲉ ϯⲪⲟⲓⲛⲓⲕⲏ.
    ⲗ̅ⲁ̅. Ⲁⲩϣⲁⲛⲓ̀ ⲇⲉ ⲉⲩⲙⲁ ⲛ̀ϫⲉ ⲛⲓⲉ̀ϫⲏⲟⲩ ⲧⲏⲣⲟⲩ ⲛ̀ⲛⲟⲩϣ̀ϥⲁⲓ ϧⲁ ⲟⲩⲃⲉⲣⲥⲁ ⲛ̀ⲟⲩⲱⲧ ⲛ̀ⲧⲉ ⲡⲉϥⲥⲏⲧ : ⲟⲩⲟϩ ⲧⲉϥⲁ̀ⲫⲉ ϧⲉⲛ ⲛⲓⲉ̀ϫⲏⲟⲩ ⲛ̀ⲧⲉ ⲛⲓⲟⲩⲟ̀ϩⲓ.
     ⲗ̅ⲃ̅. Ⲭ̀ⲛⲁⲭⲱ ⲇⲉ ⲛ̀ⲧⲉⲕϫⲓϫ ϩⲓϫⲱϥ : ⲉⲕⲉ̀ⲓ̀ⲣⲓ ⲙ̀ⲫ̀ⲙⲉⲩⲓ̀ ⲙ̀ⲡⲓⲡⲟⲗⲉⲙⲟⲥ ⲉⲧⲭⲏ ϧⲉⲛ ⲡⲉⲕⲥⲱⲙⲁ: ⲟⲩⲟϩ ⲙ̀ⲡⲉⲛⲑ̀ⲣⲉϥϣⲱⲡⲓ ϫⲉ.

ⲕⲉⲫ. ⲙ̅ ⲁ̅

     ⲁ̅. Ⲙⲏ ⲙ̀ⲡⲉⲕⲛⲁⲩ ⲉ̀ⲣⲟϥ ⲟⲩⲇⲉ ⲙ̀ⲡⲉⲕⲉⲣϣ̀ⲫⲏⲣⲓ ⲉ̀ϫⲉⲛ ⲛⲏⲉ̀ϯϫⲱ ⲙ̀ⲙⲱⲟⲩ.
     ⲃ̅. Ⲕ̀ⲉⲣϩⲟϯ ⲇⲉ ⲁⲛ ϫⲉ ϥ̀ⲥⲉⲃⲧⲱⲧ ⲛⲏⲓ : ⲛⲓⲙ ⲅⲁⲣ ϥ̀ϯ ⲉ̀ϧⲟⲩⲛ ⲉ̀ϩ̀ⲣⲁⲓ: ⲓⲉ ⲛⲓⲙ ⲡⲉ ⲉⲧⲁϥⲟ̀ϩⲓ ⲉ̀ⲣⲁⲧϥ ⲟⲩⲃⲏⲓ: ⲟⲩⲟϩ ⲁϥⲉⲣϩⲩⲡⲟⲙⲉⲛⲓⲛ ⲓⲥϫⲉ ⲉⲛⲭⲁⲓ ⲛⲓⲃⲉⲛ ⲉⲧⲥⲁⲡⲉⲥⲏⲧ ⲛ̀ⲧ̀ⲫⲉ ⲛⲟⲩⲓ̀ ⲛⲉ.
     ⲅ̅. Ⲛ̀ⲛⲁⲭⲁⲣⲱⲓ ⲉⲑⲃⲏⲧϥ ⲟⲩⲟϩ ⲟⲩⲥⲁϫⲓ ⲛ̀ϫⲟⲙ ⲉϥⲉ̀ⲛⲁⲓ ⲙ̀ⲙⲟϥ ⲙ̀ⲫⲏⲉⲧⲟⲓ ⲛ̀ϩⲩⲥⲟⲥ ⲉ̀ⲣⲟϥ.
     ⲇ̅. Ⲛⲓⲙ ⲉⲑⲛⲁϣ̀ϭⲱⲣⲡ ⲉ̀ⲃⲟⲗ ⲙ̀ⲡ̀ϩⲟ ⲛ̀ⲧⲉ ⲧⲉϥϩⲉⲃⲥⲱ : ⲓⲉ ⲛⲓⲙ ⲡⲉ ⲉⲑⲛⲁϣ̀ϣⲉ ⲉ̀ϧⲟⲩⲛ ϧⲉⲛ ⲛⲓⲥ̀ⲛⲁⲩϩ ⲛ̀ⲧⲉ ⲧⲉϥϧⲉⲗⲓⲃϣ.
     ⲉ̅. Ⲛⲓⲡⲩⲗⲏ ⲇⲉ ⲛ̀ⲧⲉ ⲡⲉϥϩⲟ ⲛⲓⲙ ⲉⲑⲛⲁϣ̀ⲟⲩⲱⲛ ⲉ̀ⲣⲱⲟⲩ : ⲟⲩϩⲟϯ ⲉⲧⲕⲱϯ ⲉ̀ⲛⲉϥϣⲟⲗ.
     Ⲋ. Ⲟⲩⲟϩ ⲛⲉϥⲙⲁϧⲧ ϩⲁⲛϩⲟϥ ⲛ̀ϩⲟⲙⲧ ⲛⲉ : ⲡⲉϥⲙⲟⲩⲣ ⲇⲉ ⲁϥ ⲙ̀ⲫ̀ⲣⲏϯ ⲛ̀ⲟⲩⲱ̀ⲛⲓ ⲛ̀ⲥ̀ⲙⲓⲣⲓⲧⲏⲥ.
     ⲍ̅. Ⲡⲓⲟⲩⲁⲓ ⲧⲱⲙⲓ ⲉ̀ⲡⲓⲟⲩⲁⲓ : ⲟⲩⲡ̅ⲛ̅ⲁ̅ ⲇⲉ ⲛ̀ⲛⲉϥⲟⲩⲟⲑⲃⲉϥ.
     ⲏ̅. Ⲟⲩⲣⲱⲙⲓ ⲧⲱⲙⲓ ⲉ̀ⲡⲉϥⲥⲟⲛ ⲥⲉⲑⲟⲩⲏⲧ ⲟⲩⲟϩ ⲛ̀ⲛⲟⲩⲫⲱⲣϫ.
     ⲑ̅. Ϣⲁⲣⲉ ⲟⲩⲟⲩⲱⲓⲛⲓ ϣⲱⲡⲓ ϧⲉⲛ ⲡⲉϥⲁⲛⲑⲁϣ : ⲛⲉϥⲃⲁⲗ ⲇⲉ ⲥⲉⲟⲓ ⲙ̀ⲫ̀ⲣⲏϯ ⲙ̀ⲡⲓⲥⲓⲟⲩ ⲛ̀ⲧⲉ ϩⲁⲛⲁ̀ⲧⲟⲟⲩⲓ̀.
     ⲓ̅. Ϣⲁⲩⲓ̀ ⲉ̀ⲃⲟⲗ ϧⲉⲛ ⲣⲱϥ ⲛ̀ϫⲉ ϩⲁⲛⲗⲁⲙⲡⲁⲥ ⲛ̀ⲭ̀ⲣⲱⲙ ⲉⲩⲙⲟϩ : ⲟⲩⲟϩ ϣⲁⲩⲙⲟϩ ⲉ̀ⲃⲟⲗ ⲛ̀ϫⲉ ϩⲁⲛϫⲉⲃⲥ ⲛ̀ⲭ̀ⲣⲱⲙ.
     ⲓ̅ⲁ̅. Ϣⲁϥⲓ̀ ⲉ̀ⲃⲟⲗ ϧⲉⲛ ⲡⲉϥϣⲁⲓ ⲛ̀ϫⲉ ⲟⲩⲭ̀ⲣⲉⲙⲧⲥ ⲛ̀ⲧⲉ ⲟⲩϩ̀ⲣⲱ ⲉⲥⲙⲟϩ ϧⲉⲛ ϩⲁⲛϫⲉⲃⲥ ⲛ̀ⲭ̀ⲣⲱⲙ.
     ⲓ̅ⲃ̅. Ⲧⲉϥⲩⲭⲏ ⲇⲉ ϩⲁⲛϫⲉⲃⲥ ⲛⲉ : ⲟⲩϣⲁϩ ⲉⲑⲛⲏⲟⲩ ⲉ̀ⲃⲟⲗ ϧⲉⲛ ⲣⲱϥ.
     ⲓ̅ⲅ̅. Ⲟⲩϫⲟⲙ ⲇⲉ ⲉⲧϣⲟⲡ ϩⲓ ⲧⲉϥⲛⲁϩⲃⲓ : ϥ̀ϭⲟϫⲓ ϧⲁϫⲱϥ ⲛ̀ϫⲉ ⲡ̀ⲧⲁⲕⲟ.
     ⲓ̅ⲇ̅. Ⲛⲓⲥⲁⲣⲝ ⲇⲉ ⲛ̀ⲧⲉ ⲡⲉϥⲥⲱⲙⲁ ⲥⲉⲧⲱⲙⲓ: ϥ̀ⲛⲁⲫⲱⲛ ⲉ̀ϫⲱϥ ⲟⲩⲟϩ ϥ̀ⲛⲁⲕⲓⲙ ⲁⲛ.
     ⲓ̅ⲉ̅. Ⲡⲉϥϩⲏⲧ ⲇⲉ ϭⲏⲥ ⲙ̀ⲫ̀ⲣⲏϯ ⲛ̀ⲟⲩⲱ̀ⲛⲓ : ⲁϥⲟ̀ϩⲓ ⲉ̀ⲣⲁⲧϥ ⲙ̀ⲫ̀ⲣⲏϯ ⲛ̀ⲟⲩⲁ̀ⲙⲏϣ ⲛ̀ⲁⲧⲕⲓⲙ.
     ⲓ̅Ⲋ. Ⲁϥϣⲁⲛⲫⲟⲛϩϥ ⲇⲉ ϣⲁⲣⲉ ⲟⲩϩⲟϯ ϣⲱⲡⲓ ⲛ̀ⲛⲓⲑⲏⲣⲓⲟⲛ ⲛ̀ϥ̀ⲧⲉⲫⲁⲧ ⲉⲧϭⲓⲫⲉⲓ ϩⲓϫⲉⲛ ⲡⲓⲕⲁϩⲓ.
     ⲓ̅ⲍ̅. Ⲁⲩϣⲁⲛⲑⲟⲛⲧⲉⲛ ⲛ̀ϩⲁⲛⲗⲟⲅⲭⲏ ⲉ̀ⲣⲟϥ ⲙ̀ⲡⲁⲩⲉⲣ ϩ̀ⲗⲓ ⲛⲁϥ: ⲟⲩⲛⲁϩⲃⲓ ⲉϥⲧⲁⲓⲏⲟⲩⲧ ⲉ̀ⲣⲁⲧϥ ⲛⲉⲙ ⲟⲩϧⲉⲗⲓⲃϣ.
     ⲓ̅ⲏ̅. Ⲡⲓⲃⲉⲛⲓⲡⲓ ⲅⲁⲣ ⲁϥⲏⲡ ⲛ̀ⲧⲟⲧϥ ⲙ̀ⲫ̀ⲣⲏϯ ⲙ̀ⲡⲓⲧⲟϩ : ⲡⲓϩⲟⲙⲧ ⲇⲉ ⲙ̀ⲫ̀ⲣⲏϯ ⲛ̀ⲟⲩϣⲉ ⲛ̀ⲁⲧⲛⲟⲙϯ.
     ⲓ̅ⲑ̅. Ⲛ̀ⲛⲉⲥϫⲟⲧϩϥ ⲛ̀ϫⲉ ⲟⲩⲫⲓϯ ⲛ̀ϩⲟϯ : ⲁⲩⲏⲡ ⲛ̀ⲧⲟⲧϥ ⲛ̀ϫⲉ ⲛⲓⲡⲉⲧⲣⲁ ⲉⲧϩⲓⲟⲩⲓ̀ ⲙ̀ⲫ̀ⲣⲏϯ ⲛ̀ⲟⲩⲭⲟⲣⲧⲟⲥ.
     ⲕ̅. Ⲛⲓⲁ̀ⲑⲏⲣ ⲇⲉ ⲙ̀ⲫ̀ⲣⲏϯ ⲛ̀ϩⲁⲛⲣⲱⲟⲩⲓ̀: ϣⲁϥⲥⲱⲃⲓ ⲇⲉ ⲛ̀ⲥⲁ ⲟⲩⲙⲟⲛⲙⲉⲛ ⲉϥⲟⲓ ⲛ̀ϣⲁϩ ⲛ̀ⲭ̀ⲣⲱⲙ.
     ⲕ̅ⲁ̅. Ⲡⲉϥⲫ̀ⲣⲏϣ ⲇⲉ ϩⲁⲛⲟ̀ⲗⲟⲃⲓⲥⲕⲟⲥ ⲉⲩϣⲉⲡϣⲱⲡ ⲛⲉ : ⲡⲓⲛⲟⲩⲃ ⲛ̀ⲧⲉ ⲫ̀ⲓⲟⲙ ⲧⲏⲣϥ ⲁϥⲭⲏ ϧⲁⲧⲟⲧϥ ⲙ̀ⲫ̀ⲣⲏϯ ⲛ̀ⲟⲩⲱ̀ⲛⲓ ⲛ̀ⲁⲧⲏ̀ⲡⲓ.
     ⲕ̅ⲃ̅. Ϣⲁϥⲑ̀ⲣⲉ ⲫ̀ⲛⲟⲩⲛ ⲃⲉⲣⲃⲉⲣ ⲙ̀ⲫ̀ⲣⲏϯ ⲛ̀ⲟⲩⲭⲁⲗⲕⲓⲟⲛ ⲁⲣⲉ ⲫ̀ⲓⲟⲙ ⲇⲉ ϧⲁⲧⲟⲧϥ ⲙ̀ⲫ̀ⲣⲏϯ ⲛ̀ⲟⲩⲧⲁⲕⲟ.
     ⲕ̅ⲅ̅. Ⲟⲩⲟϩ ⲡⲓⲧⲁⲣⲧⲁⲣⲟⲥ ⲛ̀ⲧⲉ ⲫ̀ⲛⲟⲩⲛ ⲙ̀ⲫ̀ⲣⲏϯ ⲛ̀ⲟⲩⲉⲭⲙⲁⲗⲱⲧⲟⲥ ⲁϥⲭⲁ ⲫ̀ⲛⲟⲩⲛ ⲛ̀ⲧⲟⲧϥ ⲙ̀ⲫ̀ⲣⲏϯ ⲛ̀ⲟⲩⲙⲱⲓⲧⲙ̀ⲙⲟϣⲓ.
    ⲕ̅ⲇ̅. Ⲙ̀ⲙⲟⲛ ϩ̀ⲗⲓ ϩⲓϫⲉⲛ ⲡ̀ⲕⲁϩⲓ ⲉϥⲧⲉⲛⲑⲱⲛⲧ ⲉ̀ⲣⲟϥ ⲉϥⲑⲁⲙⲓⲏⲟⲩⲧ ϫⲉ ⲛ̀ⲥⲉⲥⲱⲃⲓ ⲙ̀ⲙⲟϥ ⲛ̀ϫⲉ ϩⲁⲛⲁⲅⲅⲉⲗⲟⲥ.
     ⲕ̅ⲉ̅. Ϥ̀ⲛⲁⲩ ⲇⲉ ⲉ̀ⲛⲏⲉⲧϭⲟⲥⲓ ⲧⲏⲣⲟⲩ : ⲛ̀ⲑⲟϥ ⲇⲉ ⲉⲧⲟⲓ ⲛ̀ⲟⲩⲣⲟ ⲉ̀ⲛⲏⲧⲏⲣⲟⲩ ⲉⲧϧⲉⲛ ⲛⲓⲙⲱⲟⲩ.

ⲕⲉⲫ ⲙ̅ⲃ̅

    Ϯⲙⲁϩⲓ̅ⲃ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ

     ⲁ̅. Ⲁϥⲉⲣⲟⲩⲱ̀ ⲛ̀ϫⲉ Ⲓⲱⲃ ⲡⲉϫⲁϥ ⲙ̀Ⲡⲟ̅ⲥ̅ ϫⲉ :
     ⲃ̅. Ϯⲉ̀ⲙⲓ ϫⲉ ⲟⲩⲟⲛϣ̀ϫⲟⲙ ⲙ̀ⲙⲟⲕ ϧⲉⲛ ϩⲱⲃ ⲛⲓⲃⲉⲛ: ⲟⲩⲟϩ ⲙ̀ⲙⲟⲛ ϩ̀ⲗⲓ ⲟⲓ ⲛ̀ⲁⲧϫⲟⲙ ⲛ̀ⲧⲟⲧⲕ.
     ⲅ̅. Ⲛⲓⲙ ⲅⲁⲣ ⲉⲧϩⲱⲡ ⲉ̀ⲣⲟⲕ ⲛ̀ⲟⲩⲥⲟϭⲛⲓ ⲉϥϯⲁ̀ⲥⲟ ⲇⲉ ⲉ̀ϩⲁⲛⲥⲁϫⲓ ⲟⲩⲟϩ ⲉϥⲙⲉⲩⲓ̀ ϫⲉ ϥ̀ⲛⲁϩⲱⲡ ⲉ̀ⲣⲟⲕ: ⲛⲓⲙ ⲅⲁⲣ ⲉⲑⲛⲁⲧⲁⲙⲟⲓ ⲉ̀ⲛⲏⲉⲧⲉ ⲛ̀ϯⲥⲱⲟⲩⲛ ⲙ̀ⲙⲱⲟⲩ ⲁⲛ : ϩⲁⲛⲛⲓϣϯ ⲛⲉⲙ ϩⲁⲛϣ̀ⲫⲏⲣⲓ ⲛⲁⲓ ⲉⲧⲉ ⲛⲁⲓⲉ̀ⲙⲓ ⲉ̀ⲣⲱⲟⲩ ⲁⲛ.
     ⲇ̅. Ⲥⲱⲧⲉⲙ ⲉ̀ⲣⲟⲓ Ⲡⲟ̅ⲥ̅ ϩⲓⲛⲁ ⲛ̀ⲧⲁⲥⲁϫⲓ ϩⲱ : ϯⲛⲁϣⲉⲛⲕ ⲛ̀ⲑⲟⲕ ⲇⲉ ⲙⲁⲧ̀ⲥⲁⲃⲟⲓ.
     ⲉ̅. Ϧⲉⲛ ⲟⲩⲥ̀ⲙⲏ ⲙⲉⲛ ⲙ̀ⲙⲁϣϫ ⲁⲓⲥⲱⲧⲉⲙ ⲉ̀ⲣⲟⲕ ⲛ̀ϣⲟⲣⲡ : ϯⲛⲟⲩ ⲇⲉ ⲁϥⲛⲁⲩ ⲉ̀ⲣⲟⲕ ⲛ̀ϫⲉ ⲡⲁⲃⲁⲗ.
     Ⲋ. Ⲉⲑⲃⲉ ⲫⲁⲓ ⲁⲓϯϣⲱϣ ⲛⲏⲓ ⲙ̀ⲙⲁⲩⲁⲧ ⲟⲩⲟϩ ⲁⲓⲃⲱⲗ ⲉ̀ⲃⲟⲗ : ⲁⲓⲟⲡⲧ ⲇⲉ ϫⲉ ⲁ̀ⲛⲟⲕ ⲟⲩⲕⲁϩⲓ ⲛⲉⲙ ⲟⲩⲕⲉⲣⲙⲓ.

    Ϯⲙⲁϩⲇ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲡⲟ̅ⲥ̅

     ⲍ̅. Ⲁⲥϣⲱⲡⲓ ⲇⲉ ⲙⲉⲛⲉⲛⲥⲁ ⲑ̀ⲣⲉ Ⲓⲱⲃ ⲥⲁϫⲓ ⲛ̀ⲛⲁⲓ ⲧⲏⲣⲟⲩ ⲡⲉϫⲉ Ⲡⲟ̅ⲥ̅ ⲛ̀Ⲉⲗⲓⲫⲁⲥ ⲡⲓⲐⲉⲙⲁⲛⲓⲧⲏⲥ : ϫⲉ ⲁⲕⲉⲣⲛⲟⲃⲓ ⲛ̀ⲑⲟⲕ ⲛⲉⲙ ⲡⲉⲕϣ̀ⲫⲏⲣⲃ̅ : ⲙ̀ⲡⲉⲧⲉⲛϫⲉ ϩ̀ⲗⲓ ⲅⲁⲣ ⲛ̀ⲥⲁϫⲓ ⲙ̀ⲙⲉⲑⲙⲏⲓ ⲙ̀ⲡⲁⲙ̀ⲑⲟ ⲉ̀ⲃⲟⲗ ⲙ̀ⲫ̀ⲣⲏϯ ⲙ̀ⲡⲁⲁ̀ⲗⲟⲩ Ⲓⲱⲃ.
     ⲏ̅. Ϯⲛⲟⲩ ⲇⲉ ϭⲓ ⲛⲱⲧⲉⲛ ⲛ̀ⲍ̅ ⲙ̀ⲙⲁⲥⲓ ⲛⲉⲙ ⲍ̅ ⲛ̀ⲱⲓⲗⲓ ⲟⲩⲟϩ ⲙⲁϣⲉⲛⲱⲧⲉⲛ ϩⲁ ⲡⲁⲁ̀ⲗⲟⲩ Ⲓⲱⲃ ⲟⲩⲟϩ ⲉϥⲉ̀ⲓ̀ⲣⲓ ⲛ̀ⲟⲩϣⲟⲩϣⲱⲟⲩϣⲓ ⲉ̀ϩ̀ⲣⲏⲓ ⲉ̀ϫⲉⲛ ⲑⲏⲛⲟⲩ : Ⲓⲱⲃ ⲇⲉ ⲡⲁⲃⲱⲕ ⲉϥⲉ̀ⲧⲱⲃϩ ⲉ̀ϩ̀ⲣⲏⲓ ⲉ̀ϫⲉⲛ ⲑⲏⲛⲟⲩ: ϫⲉ ⲟⲩⲏⲓ ⲛⲉ ⲙ̀ⲡⲓϭⲓ ⲙ̀ⲡⲉϥϩⲟ ⲡⲉ : ⲉⲃⲏⲗ ⲅⲁⲣ ⲉⲑⲃⲏⲧϥ ⲙ̀ⲙⲟⲛ ⲛⲁⲓⲛⲁⲧⲁⲕⲉ ⲑⲏⲛⲟⲩ ⲡⲉ : ⲙ̀ⲡⲉⲧⲉⲛⲥⲁϫⲓ ⲅⲁⲣ ⲙ̀ⲙⲉⲑⲙⲏⲓ ϧⲁ ⲡⲁⲁ̀ⲗⲟⲩ Ⲓⲱⲃ.
     ⲑ̅. Ⲁϥϣⲉⲛⲁϥ ⲛ̀ϫⲉ Ⲉⲗⲓⲫⲁⲥ ⲡⲓⲑⲁⲙⲉⲛⲓⲧⲏⲥ ⲛⲉⲙ Ⲃⲁⲗⲇⲁⲇ ⲡⲓⲥⲁⲩⲭⲓⲧⲏⲥ ⲛⲉⲙ Ⲥⲱⲫⲁⲣ ⲡⲓⲙⲉⲛⲛⲉⲟⲥ ⲟⲩⲟϩ ⲁⲩⲓ̀ⲣⲓ ⲙ̀ⲫ̀ⲣⲏϯ ⲉⲧⲁ Ⲡⲟ̅ⲥ̅ ϫⲟⲥ ⲛⲱⲟⲩ : ⲟⲩⲟϩ ⲁⲩⲭⲁ ⲡⲟⲩⲛⲟⲃⲓ ⲛⲱⲟⲩ ⲉ̀ⲃⲟⲗ ⲉⲑⲃⲉ Ⲓⲱⲃ.
     ⲓ̅. Ⲡⲟ̅ⲥ̅ ⲇⲉ ⲁϥϭⲓⲥⲓ ⲛ̀Ⲓⲱⲃ ⲉⲙⲁϣⲱ ⲉⲧⲁϥⲧⲱⲃϩ ⲇⲉ ⲉ̀ϩ̀ⲣⲏⲓ ⲉ̀ϫⲉⲛ ⲡⲉϥⲕⲉ ⲅ̅ ⲛ̀ϣ̀ⲫⲏⲣ ⲁϥⲭⲁ ⲡⲟⲩⲛⲟⲃⲓ ⲛⲱⲟⲩ ⲉ̀ⲃⲟⲗ : ⲟⲩⲟϩ ⲁ Ⲡⲟ̅ⲥ̅ ⲕⲱⲃ ⲛ̀ⲉⲛⲭⲁⲓ ⲛⲓⲃⲉⲛ ⲛ̀Ⲓⲱⲃ ⲉ̀ⲛⲁⲩ ⲛ̀ⲧⲁϥ ⲛ̀ϣⲟⲣⲡ ⲁϥⲧⲏⲓⲧⲟⲩ ⲛⲁϥ ⲟⲛ ⲉⲩⲕⲏⲃ.
     ⲓ̅ⲁ̅. Ⲁⲩⲥⲱⲧⲉⲙ ⲇⲉ ⲧⲏⲣⲟⲩ ⲛ̀ϫⲉ ⲛⲉϥⲥ̀ⲛⲏⲟⲩ ⲛⲉⲙ ⲛⲉϥⲥⲱⲛⲓ ⲉⲑⲃⲉ ϩⲱⲃ ⲛⲓⲃⲉⲛ ⲉⲧⲁⲩϣⲱⲡⲓ ⲙ̀ⲙⲟϥ ⲟⲩⲟϩ ⲁⲩⲓ̀ ϩⲁⲣⲟϥ ⲛⲉⲙ ⲟⲩⲟⲛ ⲛⲓⲃⲉⲛ ⲉ̀ⲛⲁⲩⲥⲱⲟⲩⲛ ⲙ̀ⲙⲟϥ ⲛ̀ϣⲟⲣⲡ : ⲉⲧⲁⲩⲟⲩⲱⲙ ⲇⲉ ⲟⲩⲟϩ ⲁⲩⲥⲱ ϧⲁⲧⲟⲧϥ ⲁⲩϯⲛⲟⲙϯ ⲛⲁϥ : ⲟⲩⲟϩ ⲉⲧⲁⲩⲉⲣϣ̀ⲫⲏⲣⲓ ⲉ̀ϫⲉⲛ ϩⲱⲃ ⲛⲓⲃⲉⲛ ⲉⲧⲁ Ⲡⲟ̅ⲥ̅ ⲉ̀ⲛⲟⲩ ⲉ̀ϫⲱϥ ⲟⲩⲟϩ ⲁⲩϯ ⲛⲁϥ ⲛ̀ϫⲉ ⲫ̀ⲟⲩⲁⲓ ⲫ̀ⲟⲩⲁⲓ ⲙ̀ⲙⲱⲟⲩ ⲛ̀ϩⲓⲉⲃⲓ ⲛ̀ⲉ̀ⲥⲱⲟⲩ ⲛⲉⲙ ⲇ̅ ⲛ̀ⲕⲓϯ ⲛ̀ⲛⲟⲩⲃ ⲉⲩⲥⲟⲧⲡ.
     ⲓ̅ⲃ̅. Ⲡⲟ̅ⲥ̅ ⲇⲉ ⲁϥⲥ̀ⲙⲟⲩ ⲉ̀ⲛⲓϧⲁⲉⲩ ⲛ̀ⲧⲉ Ⲓⲱⲃ ⲉϩⲟⲧⲉ ⲛⲉϥϩⲟⲩⲁϯ : ⲟⲩⲟϩ ⲛⲉϥⲧⲉⲃⲛⲱⲟⲩⲓ̀ ⲛⲁⲩⲟⲓ ⲛ̀ⲟⲩⲑ̀ⲃⲁ ⲛ̀ⲉ̀ⲥⲱⲟⲩ ⲛⲉⲙ ϥ̀ⲧⲟⲩ ⲛ̀ϣⲟ : ⲛⲉⲙ Ⲋ ⲛ̀ϣⲟ ⲛ̀ϫⲁⲙⲟⲩⲗ : ⲛⲉⲙ ϣⲟ ⲛ̀ϩⲉⲃⲓ ⲛ̀ⲉ̀ϩⲉ : ⲛⲉⲙ ϣⲟ ⲛ̀ⲉ̀ⲱ̀ ⲙ̀ⲙⲉⲥⲓⲱϯ.
     ⲓ̅ⲅ̅. Ⲟⲩⲟϩ ⲁⲩⲙⲓⲥⲓ ⲛⲁϥ ⲛ̀ⲍ̅ ⲛ̀ϣⲏⲣⲓ ⲛⲉⲙ ⲅ̅ϯ ⲛ̀ϣⲉⲣⲓ.
     ⲓ̅ⲇ̅. Ⲟⲩⲟϩ ⲁϥϯⲣⲉⲛ ⲫ̀ⲣⲁⲛ ⲛ̀ϯϩⲟⲩⲓϯ ϫⲉ Ⲡⲓⲉ̀ϩⲟⲟⲩ: ϯⲙⲁϩⲥ̀ⲛⲟⲩϯϯ ⲇⲉ ϫⲉ Ⲕⲁⲥⲓⲁ : ϯⲙⲁϩϣⲟⲙϯ ϫⲉ Ⲙⲉⲗⲑⲓⲁⲥⲕⲉⲣⲁⲥ.
     ⲓ̅ⲉ̅. Ⲟⲩⲟϩ ⲙ̀ⲡⲟⲩϫⲉⲙ ϩ̀ⲗⲓ ⲉϥⲥⲱⲧⲡ ⲙ̀ⲫ̀ⲣⲏϯ ⲛ̀ⲛⲓϣⲉⲣⲓ ⲛ̀ⲧⲉ Ⲓⲱⲃ ϧⲉⲛ ⲛⲏⲧⲏⲣⲟⲩ ⲉⲧⲥⲁⲡⲉⲥⲏⲧ ⲛ̀ⲧ̀ⲫⲉ: ⲟⲩⲟϩ ⲁϥϯ ⲛⲱⲟⲩ ⲛ̀ϫⲉ ⲡⲟⲩⲓⲱⲧ ⲛ̀ⲟⲩⲕ̀ⲗⲏⲣⲟⲛⲟⲙⲓⲁ ϧⲉⲛ ⲛⲟⲩⲥ̀ⲛⲏⲟⲩ.
     ⲓ̅Ⲋ. Ⲁϥⲱⲛϧ ⲇⲉ ⲛ̀ϫⲉ Ⲓⲱⲃ ⲙⲉⲛⲉⲛⲥⲁ ⲡⲓⲉⲣϧⲟⲧ ⲛ̀ⲕⲉϣⲉ ⲛⲉⲙ ϩ̀ⲙⲉ ⲛ̀ⲣⲟⲙⲡⲓ : ⲛⲉϥⲣⲟⲙⲡⲓ ⲇⲉ ⲧⲏⲣⲟⲩ ⲉⲧⲁϥⲁⲓⲧⲟⲩ ⲥ̀ⲛⲁⲩϣⲉ ⲛⲉⲙ ϩ̀ⲙⲉ ⲛ̀ⲣⲟⲙⲡⲓ ⲛⲉ : ⲟⲩⲟϩ ⲁϥⲛⲁⲩ ⲛ̀ϫⲉ Ⲓⲱⲃ ⲉ̀ⲛⲉϥϣⲏⲣⲓ ⲛⲉⲙ ⲛⲓϣⲏⲣⲓ ⲛ̀ⲧⲉ ⲛⲉϥϣⲏⲣⲓ ϣⲁ ⲫ̀ⲙⲁϩϥ̀ⲧⲟⲩ ⲛ̀ϫⲱⲟⲩ.
     ⲓ̅ⲍ̅. Ⲟⲩⲟϩ ⲁϥⲙⲟⲩ ⲛ̀ϫⲉ Ⲓⲱⲃ ⲉϥⲟⲓ ⲛ̀ϧⲉⲗⲗⲟ ⲟⲩⲟϩ ⲉϥⲙⲉϩ ⲉ̀ⲃⲟⲗϧⲉⲛ ϩⲁⲛⲉ̀ϩⲟⲟⲩ.

     Ⲥ̀ϧⲏⲟⲩⲧⲇⲉ ⲟⲛ ⲉⲑⲃⲏⲧϥ ⲉⲑⲣⲉϥⲧⲱⲛϥ ⲛⲉⲙ ⲛⲏⲉⲧⲉ Ⲡⲟ̅ⲥ̅ ⲛⲁⲧⲟⲩⲛⲟⲥⲟⲩ.

    Ⲫⲁⲓ ⲙⲉⲛ ϣⲁⲩⲟⲩⲁϩⲙⲉϥ ϧⲉⲛ ⲡⲓϫⲱⲙ ⲛ̀ⲧⲉ ϯⲤⲩⲣⲓⲁⲕⲏ ⲉϥϣⲟⲡ ⲙⲉⲛ ϧⲉⲛ ⲡ̀ⲕⲁϩⲓ ⲛ̀ⲧⲉ ϯⲀⲩⲥⲓⲧⲓⲧⲟⲥ ϧⲉⲛ ⲛⲓϭⲓⲏ̀ ⲛ̀ⲧⲉ ϯϨⲩⲇⲟⲩⲙⲉⲁ̀ ⲛⲉⲙ ϯⲀⲣⲁⲃⲓⲁ: ⲛⲉ ⲡⲉϥⲣⲁⲛ ⲇⲉ ⲛ̀ϣⲟⲣⲡ ⲡⲉ Ⲓⲱⲃⲁⲃ ⲁϥϭⲓ ⲇⲉ ⲛ̀ⲟⲩⲥ̀ϩⲓⲙⲓ ⲛ̀Ⲁⲣⲁⲃⲟⲥ : ⲁⲥⲙⲟⲥⲓ ⲇⲉ ⲛⲁϥ ⲛ̀ⲟⲩϣⲏⲣⲓ ⲉ̀ⲡⲉϥⲣⲁⲛ ⲡⲉ Ⲉⲛⲱⲛ : ⲡⲉϥⲓⲱⲧ ⲇⲉ ⲛ̀ⲑⲟϥ ⲡⲉ Ⲍⲁⲣⲁ ⲉ̀ⲟⲩⲉ̀ⲃⲟⲗ ⲡⲉ ϧⲉⲛ ⲛⲓϣⲏⲣⲓ ⲛ̀ⲧⲉ Ⲏⲥⲁⲩ:ⲧⲉϥⲙⲁⲩ ⲇⲉ ⲉⲧⲉ Ⲃⲟⲍⲟⲣⲁ ϩⲱⲥⲧⲉ ⲛⲁϥⲟⲓ ⲙ̀ⲙⲁϩⲉ̅ ⲙⲉⲛⲉⲛⲥⲁ Ⲁⲃⲣⲁⲁⲙ ⲟⲩⲟϩ ⲛⲁⲓ ⲛⲉ ⲛⲓⲟⲩⲣⲱⲟⲩ ⲛⲁⲓ ⲉⲧⲁⲩⲉⲣⲟⲩⲣⲟ ϧⲉⲛ Ⲉⲇⲱⲙ ϯⲭⲱⲣⲁ ⲉⲧⲁϥⲉⲣⲁⲣⲭⲱⲛ ⲉ̀ϫⲱⲥ ϩⲱϥ ⲡⲓϩⲟⲩⲓⲧ ⲡⲉ Ⲃⲁⲗⲁⲕ ⲡ̀ϣⲏⲣⲓ ⲛ̀Ⲃⲉⲱⲣ ⲟⲩⲟϩ ⲫ̀ⲣⲁⲛ ⲛ̀ⲧⲉϥⲃⲁⲕⲓ ⲡⲉ Ⲧⲉⲛⲛⲁⲃⲁ : ⲙⲉⲛⲉⲛⲥⲁ Ⲃⲁⲗⲁⲕ Ⲓⲱⲃⲁⲃ ⲡⲉⲧⲉⲩⲙⲟⲩϯ ⲉ̀ⲣⲟϥ ϫⲉ Ⲓⲱⲃ : ⲙⲉⲛⲉⲛⲥⲁ ⲫⲁⲓ Ⲁⲥⲟⲙ ⲡⲓϩⲏⲅⲉⲙⲱⲛ ⲡⲓⲉ̀ⲃⲟⲗϧⲉⲛ ϯⲐⲉⲙⲁⲛⲓⲧⲏⲥ ⲛ̀ⲭⲱⲣⲁ:ⲙⲉⲛⲉⲛⲥⲁ ⲫⲁⲓ ⲇⲉ Ⲁⲧⲁⲇ ⲡ̀ϣⲏⲣⲓ ⲛ̀Ⲁⲣⲁⲇ ⲫⲏⲉⲧⲁϥϫⲱϫⲓ ⲙ̀Ⲙⲁⲇⲓⲁⲙ ϧⲉⲛ ⲧ̀ⲕⲟⲓ ⲙ̀Ⲙⲱⲁⲃ : ⲟⲩⲟϩ ⲫ̀ⲣⲁⲛ ⲛ̀ⲧⲉϥⲃⲁⲕⲓ ⲡⲉ Ⲕⲉⲑⲑⲉⲙ.

    Ⲛⲉϥϣ̀ⲫⲏⲣ ⲇⲉ ⲉⲧⲁⲩⲓ̀ ϩⲁⲣⲟϥ :
    Ⲉⲗⲓⲫⲁⲥ ⲟⲩϣⲏⲣⲓ ⲛ̀ⲧⲉ ⲟⲩⲁⲓ ⲛ̀ⲛⲉⲛϣⲏⲣⲓ ⲛ̀Ⲏⲥⲁⲩ ⲡ̀ⲟⲩⲣⲟ ⲛ̀ⲧⲉ ⲛⲓⲐⲉⲙⲁⲛⲱⲛ : ⲛⲉⲙ Ⲃⲁⲗⲇⲁⲇ ⲡⲓⲦⲩⲣⲁⲛⲛⲟⲥ ⲛ̀ⲧⲉ ⲛⲓⲤⲁⲩⲭⲉⲱⲛ : ⲛⲉⲙ Ⲥⲱⲫⲁⲣ ⲡ̀ⲟⲩⲣⲟ ⲛ̀ⲧⲉ ⲛⲓⲘⲉⲛⲛⲉⲟⲥ.
    Ⲛⲓϫⲓⲛⲉⲣⲟⲩⲱ̀ ⲉⲧϧⲉⲛ Ⲓⲱⲃ :
    Ⲟⲩⲟⲛ ⲓ̅ⲃ̅ϯ ⲛ̀ϫⲓⲛⲉⲣⲟⲩⲱ̀ ⲛ̀ⲧⲉ Ⲓⲱⲃ.
    ⲅ̅ϯ ⲛϫⲓⲛⲉⲣⲟⲩⲱ̀ ⲛ̀ⲧⲉ Ⲉⲗⲓⲫⲁⲥ.
    ⲅ̅ϯ ⲛϫⲓⲛⲉⲣⲟⲩⲱ̀ ⲛ̀ⲧⲉ Ⲃⲁⲗⲇⲁⲇ.
    ⲃ̅ϯ ⲛϫⲓⲛⲉⲣⲟⲩⲱ̀ ⲛ̀ⲧⲤⲱⲫⲁⲣ.
    ⲉ̅ ⲛϫⲓⲛⲉⲣⲟⲩⲱ̀ ⲛ̀ⲧⲉ Ⲉⲗⲓⲟⲩⲥ.
    Ⲛⲓϫⲓⲛⲣⲟⲩⲱ̀ ⲛ̀ⲧⲉ Ⲫϯ ⲉϥⲥⲁϫⲓ ⲛⲉⲙ Ⲓⲱⲃ ⲇ̅.
    Ⲛⲁⲓ ⲧⲏⲣⲟⲩ.

---