---

ⲠϪⲰⲰⲘⲈ Ⲛ̅ⲒⲤⲞⲨⲤ  ̅Ⲛ̅ⲚⲀⲨⲒ

---

Ⲁⲥϣⲱⲡⲉ  ⲇⲉ  ⲙⲛ̅ⲛⲥⲁⲧⲣⲉϥⲙⲟⲩ ⲛ̅ϭⲓⲘⲟⲩⲥⲏⲥ  ⲡϩⲙ̅ϩⲁⲗ  ⲙ̅Ⲡϫⲟⲉⲓⲥⲭ . ⲠⲉϫⲉⲠϫ̅ⲟⲉⲓⲥ ⲛ̅Ⲓⲏⲥⲟⲩⲥ ⲡϣⲏⲣⲉ  ⲛ̅Ⲛⲁⲩⲏ ⲡϣⲙ̅ϣⲓⲧ ⲙ̅Ⲙⲟⲩⲥⲏⲥ ⲉϥϫⲱ ⲙ̅ⲙⲟⲥ ⲛⲁϥ . Ϫⲉ Ⲙⲱⲟⲩⲥⲏⲥ  ⲡⲁϩⲙ̅ϩⲁⲗ  ⲁϥⲙⲟⲩ. Ⲧⲉⲛⲟⲩ ϭⲉ ⲧⲱⲟⲩⲛ  ⲛⲅ̅ϫⲓⲟⲟⲣ ⲙ̅ⲡⲒⲟⲣⲇⲁⲛⲏⲥ . ⲛ̅ⲧⲟⲕ ⲙⲛ̅ⲡⲉⲓⲗⲁⲟⲥ ⲧⲏⲣϥ̅ ⲉϩⲟⲩⲛ ⲉⲡⲕⲁϩ  ⲡⲁⲓ  ⲁⲛⲟⲕ ⲉϯⲛⲁⲧⲁⲁϥ ⲛⲁⲩ. Ⲙⲁ ⲛⲓⲙ  ⲛ̅ⲧⲉⲣⲉⲛ̅ⲧⲁϭⲥⲉ  ⲛ̅ⲛⲉⲧⲛ̅ⲟⲩⲉⲣⲏⲧⲉ  ⲛⲁϣⲱⲡⲉ  ϩⲓϫⲱϥ  ϯⲛⲁⲧⲁⲁϥ ⲛⲏⲧⲛ̅. ⲕⲁⲧⲁⲑⲉ ⲉⲛⲧⲁⲓϫⲟⲟⲥ  ⲙ̅Ⲙⲱⲟⲩⲥⲏⲥ . ⲧⲉⲣⲏⲙⲟⲥ ⲁⲩⲱ ⲡⲀⲛⲧⲓⲗⲓⲃⲁⲛⲟⲥ . ϣⲁϩⲣⲁⲓ ⲉⲡⲛⲟϭ ⲛ̅ⲉⲓⲉⲣⲟ ⲡⲈⲩⲫⲣⲁⲧⲏⲥ . ⲁⲩⲱ ϣⲁϩⲣⲁⲓ ⲉⲧⲉⲑⲁⲗⲁⲥⲥⲁ ⲛ̅ϩⲁⲏ. ϫⲓⲛⲡⲙⲁⲛ̅ϩⲱⲧⲡ  ⲙ̅ⲡⲣⲏ ⲉⲣⲉⲛⲉⲧⲛ̅ⲧⲟϣ ⲛⲁϣⲱⲡⲉ ⲛⲏⲧⲛ̅ . Ⲛ̅ⲛⲉⲗⲁⲁⲩ ⲛ̅ⲣⲱⲙⲉ  ⲁϩⲉⲣⲁⲧϥ̅ ⲉϯ ⲟⲩⲃⲉⲧⲏⲩⲧⲛ̅ ⲛ̅ⲛⲉϩⲟⲟⲩ ⲧⲏⲣⲟⲩ ⲙ̅ⲡⲉⲕⲱⲛϩ  ⲁⲩⲱ  ⲛ̅ⲑⲉ ⲉⲛⲧⲁⲓϣⲱⲡⲉ  ⲙⲛ̅Ⲙⲱⲟⲩⲥⲏⲥ  ⲧⲁⲓ ⲧⲉ  ⲑⲉ  ⲉϯⲛⲁϣⲱⲡⲉ  ⲛⲙ̅ⲙⲁⲕ ϩⲱⲱⲕ   ⲁⲩⲱ ⲛ̅ϯⲛⲁⲕⲁⲁⲕ ⲛ̅ⲥⲱⲓ ⲁⲛ. ⲟⲩⲇⲉ  ⲛ̅ϯⲛⲁⲱⲃϣ  ⲁⲛ ⲉⲣⲟⲕ. Ⲧⲱⲕ  ⲁⲩⲱ ⲛⲅ̅ⲧⲁϫⲣⲟ  ⲛ̅ⲧⲟⲕ ⲅⲁⲣ ⲡⲉⲧⲛⲁⲡⲱϣ ⲉϫⲙ̅ⲡⲉⲓⲗⲁⲟⲥ ⲙ̅ⲡⲕⲁϩ. ⲡⲁⲓ ⲛ̅ⲧⲁⲓⲱⲣⲕ̅ ⲙ̅ⲙⲟϥ  ⲛ̅ⲛⲉⲧⲛ̅ⲉⲓⲟⲧⲉ  ⲉⲧⲣⲁⲧⲁⲁϥ ⲛⲁⲩ. Ⲧⲱⲕ ϭⲉ  ⲁⲩⲱ ⲛⲅ̅ϭⲙ̅ϭⲟⲙ. ⲉⲧⲣⲉⲕϩⲁⲣⲉϩ  ⲁⲩⲱ ⲛⲅ̅ⲉⲓⲣⲉ  ⲕⲁⲧⲁⲑⲉ  ⲉⲛⲧⲁϥϩⲱⲛ ⲉⲧⲟⲟⲧⲕ̅ ⲛ̅ϭⲓⲘⲱⲟⲩⲥⲏⲥ  ⲡⲁϩⲙ̅ϩⲁⲗ . Ⲁⲩⲱ ⲛ̅ⲛⲉⲕⲣⲁⲕⲧⲕ̅ ⲉⲃⲟⲗ ⲙ̅ⲙⲟⲟⲩ  ⲉⲟⲩⲛⲁⲙ ⲏ ⲉϩⲃⲟⲩⲣ . ϫⲉⲕⲁⲥ ⲉⲕⲉⲉⲓⲙⲉ ⲉϩⲱⲃ ⲛⲓⲙ ⲉⲧⲕ̅ⲛⲁⲁⲁⲩ : Ⲁⲩⲱ ⲛ̅ⲛⲉⲡϫⲱⲱⲙⲉ ⲙ̅ⲡⲉⲓⲛⲟⲙⲟⲥ ⲥⲁϩⲱϥ ⲉⲃⲟⲗ ⲛ̅ⲧⲉⲕⲧⲁⲡⲣⲟ . Ⲁⲩⲱ ⲉⲕⲉⲙⲉⲗⲉⲧⲁ ⲛ̅ϩⲏⲧϥ  ⲙ̅ⲡⲉϩⲟⲟⲩ ⲙⲛ̅ⲧⲉⲩϣⲏ . ϫⲉⲕⲁⲥ ⲉⲕⲉⲉⲓⲙⲉ ⲉⲉⲓⲣⲉ ⲛ̅ϩⲱⲃ ⲛⲓⲙ ⲉⲧⲥⲏϩ ⲛ̅ϩⲏⲧϥ̅ . Ⲁⲩⲱ ⲧⲉⲕϩⲓⲏ ⲛⲁⲥⲟⲟⲩⲧⲛ̅ . ⲛ̅ⲧⲉⲠϫⲟⲉⲓⲥ  ⲥⲟⲟⲩⲧⲛ̅ⲛⲉⲕϩⲓⲟⲟⲩⲉ  ⲧⲏⲣⲟⲩ. Ⲁⲩⲱ ⲧⲟⲧⲉ ⲕⲛⲁⲛⲟⲓ . Ⲉⲓⲥ ϩⲏⲏⲧⲉ ϯϩⲱⲛ ⲉⲧⲟⲟⲧⲕ̅ ⲧⲁϫⲣⲟ  ⲁⲩⲱ ⲛⲅ̅ϭⲙ̅ϭⲟⲙ . Ⲙ̅ⲡⲣ̅ϣⲗⲁϩ ⲁⲩⲱ ⲙ̅ⲡⲣ̅ⲣ̅ϩⲟⲧⲉ . ⲉⲃⲟⲗϫⲉ ϥⲛⲙ̅ⲙⲁⲕ ⲛ̅ϭⲓⲠϫⲟⲉⲓⲥ  ⲡⲉⲕⲛⲟⲩⲧⲉ  ϩⲛ̅ⲙⲁ ⲛⲓⲙ ⲉⲧⲕ̅ⲛⲁⲃⲱⲕ ⲉⲣⲟⲟⲩ :  Ⲁⲩⲱ Ⲓⲏⲥⲟⲩⲥ   ⲁϥϩⲱⲛ ⲉⲧⲟⲟⲧⲟⲩ ⲉⲛⲉⲅⲣⲁⲙⲙⲁⲧⲉⲩⲥ  ⲙ̅ⲡⲗⲁⲟⲥ  ⲉϥϫⲱ ⲙ̅ⲙⲟⲥ ⲛⲁⲩ. ϫⲉ ⲃⲱⲕ ⲉϩⲟⲩⲛ  ⲉⲧⲙⲏⲧⲉ ⲛ̅ⲧⲡⲁⲣⲉⲙⲃⲟⲗⲏ  ⲙ̅ⲡⲗⲁⲟⲥ . ⲁⲩⲱ ⲛ̅ⲧⲉⲧⲛ̅ϩⲱⲛ  ⲉⲧⲟⲟⲧϥ̅  ⲙ̅ⲡⲗⲁⲟⲥ  ⲉⲧⲉⲧⲛ̅ϫⲱ ⲙ̅ⲙⲟⲥ ⲛⲁⲩ. ϫⲉ ⲥⲟⲃⲧⲉ ⲛⲏⲧⲛ̅  ⲙ̅ⲡⲉⲧⲉⲧⲛ̅ⲛⲁⲟⲩⲟⲙⲟⲩ. Ϫⲉ ⲉⲧⲓ ⲕⲉϣⲟⲙⲧ̅ ⲛ̅ϩⲟⲟⲩ ⲛ̅ⲧⲱⲧⲛ̅ ⲧⲉⲧⲛⲁϫⲓⲟⲟⲣ  ⲙ̅ⲡⲒⲟⲣⲇⲁⲛⲏⲥ . ⲛ̅ⲧⲉⲧⲛ̅ⲃⲱⲕ ⲉϩⲟⲩⲛ ⲉⲕⲗⲏⲣⲟⲛⲟⲙⲉⲓ ⲙ̅ⲡⲕⲁϩ . ⲡⲁⲓ ⲉⲧⲉⲣⲉⲠϫⲟⲉⲓⲥ ⲡⲉⲧⲛ̅ⲛⲟⲩⲧⲉ ⲛⲁⲧⲁⲁϥ ⲛⲏⲧⲛ̅ : Ⲁⲩⲱ ⲡⲉϫⲉⲒⲏⲥⲟⲩⲥ  ⲛ̅ⲧⲉⲫⲩⲗⲏ ⲛ̅Ϩⲣⲟⲩⲃⲏⲛ . ⲙⲛ̅ⲧⲉⲫⲩⲗⲏ  ⲛ̅Ⲅⲁⲇ. Ⲙⲛ̅ⲧⲡⲁϣⲉ  ⲛ̅ⲧⲫⲩⲗⲏ ⲙ̅Ⲙⲁⲛⲁⲥⲥⲏ ⲉϥϫⲱ ⲙ̅ⲙⲟⲥ ⲛⲁⲩ. ϫⲉ  ⲁⲣⲓⲡⲙⲉⲉⲩⲉ  ⲙ̅ⲡϣⲁϫⲉ  ⲙ̅Ⲡϫⲟⲉⲓⲥ  ⲡⲁⲓ ⲉⲛⲧⲁⲘⲱⲟⲩⲥⲏⲥ  ⲡϩⲙ̅ϩⲁⲗ ⲙ̅Ⲡϫⲟⲉⲓⲥ  ϩⲱⲛ  ⲙ̅ⲙⲟϥ ⲉⲧⲉⲧⲏⲩⲧⲛ̅  ⲉϥϫⲱ ⲙ̅ⲙⲟⲥ . ϫⲉ  Ⲡϫⲟⲉⲓⲥ ⲡⲉⲧⲛ̅ⲛⲟⲩⲧⲉ  ⲁϥⲙⲉⲧⲉⲧⲏⲩⲧⲛ̅ . ⲁⲩⲱ  ⲁϥϯ  ⲛⲏⲧⲛ̅  ⲙ̅ⲡⲉⲓⲕⲁϩ. Ⲛⲉⲧⲛ̅ϩⲓⲟⲙⲉ  ⲙⲛ̅ⲛⲉⲧⲛ̅ϣⲏⲣⲉ  ⲙⲛ̅ⲛⲉⲧⲛ̅ⲧⲃ̅ⲛⲟⲟⲩⲉ. ⲙⲁⲣⲟⲩⲟⲩⲱϩ  ϩⲙ̅ⲡⲁⲓⲕⲁϩ ⲡⲁⲓ ⲉⲛⲧⲁⲓⲧⲁⲁϥ ⲛⲏⲧⲛ̅ : Ⲛ̅ⲧⲱⲧⲛ̅ ⲇⲉ  ϩⲉⲕⲧⲏⲩⲧⲛ̅ ⲛ̅ⲧⲉⲧⲛ̅ϫⲓⲟⲟⲣ ϩⲓⲑⲏ ⲛ̅ⲛⲉⲧⲛ̅ⲥⲛⲏⲩ . ⲟⲩⲟⲛ ⲛⲓⲙ ⲉⲧϭⲛ̅ⲧϭⲟⲙ . ⲛ̅ⲧⲉⲧⲛ̅ϩⲉⲕⲧⲏⲩⲧⲛ̅. ⲛ̅ⲧⲉⲧⲛ̅ϯⲧⲟⲟⲧⲧⲏⲩⲧⲛ̅  ⲛⲙ̅ⲙⲁⲩ . ⲉⲙⲓϣⲉ  ⲉϩⲣⲁⲓ ⲉϫⲱⲟⲩ.  ϣⲁⲛⲧⲉⲠϫⲟⲓⲥ  ⲡⲉⲧⲛ̅ⲛⲟⲩⲧⲉ  ⲙⲉⲧⲛ̅ⲛⲉⲧⲛ̅ⲥⲛⲏⲩ ⲛ̅ⲧⲉⲧⲛ̅ϩⲉ  ϩⲱⲧⲧⲏⲩⲧⲛ̅ . ⲁⲩⲱ ⲛ̅ⲧⲉⲛⲁⲓ ϩⲱⲟⲩ ⲕⲗⲏⲣⲟⲛⲟⲙⲉⲓ ⲙ̅ⲡⲕⲁϩ . ⲡⲁⲓ ⲉⲧⲉⲠⲉⲛϫⲟⲉⲓⲥ  ⲡⲉⲛⲛⲟⲩⲧⲉ ⲛⲁⲧⲁⲁϥ ⲛⲁⲩ.  Ⲁⲩⲱ ⲛ̅ⲧⲉⲧⲛ̅ⲃⲱⲕ ⲡⲟⲩⲁ ⲡⲟⲩⲁ  ⲙ̅ⲙⲱⲧⲛ̅  ⲉϩⲣⲁⲓ ⲉⲧⲉϥⲕⲗⲏⲣⲟⲛⲟⲙⲓⲁ . ⲧⲁⲓ ⲉⲛⲧⲁⲘⲱⲟⲩⲥⲏⲥ  ⲧⲁⲁⲥ  ⲛⲏⲧⲛ̅  ϩⲙ̅ⲡⲉⲕⲣⲟ  ⲙ̅ⲡⲒⲟⲣⲇⲁⲛⲏⲥ. ϫⲓⲛⲙ̅ⲙⲁ ⲛ̅ϣⲁ  ⲙ̅ⲡⲣⲏ . Ⲁⲩⲱ ⲁⲩⲟⲩⲱϣⲃ̅  ⲛ̅Ⲓⲏⲥⲟⲩⲥ  ⲉⲩϫⲱ ⲙ̅ⲙⲟⲥ ⲛⲁϥ  ϫⲉ ϩⲱⲃ ⲛⲓⲙ ⲉⲧⲕ̅ⲛⲁϩⲟⲛⲟⲩ ⲉⲧⲟⲟⲧⲛ̅ ⲧⲛ̅ⲛⲁⲁⲁⲩ . Ⲁⲩⲱ ⲙⲁ ⲛⲓⲙ ⲉⲧⲕ̅ⲛⲁϫⲟⲟⲩⲛ ⲉⲣⲟⲟⲩ  ⲧⲛ̅ⲛⲁⲃⲱⲕ ⲉϩⲟⲩⲛ ⲉⲣⲟⲟⲩ . ⲕⲁⲧⲁϩⲱⲃ ⲛⲓⲙ  ⲉⲛⲧⲁⲛⲥⲱⲧⲙ̅ ⲛ̅ⲥⲁⲘⲱⲟⲩⲥⲏⲥ  ⲛ̅ϩⲏⲧⲟⲩ . ⲛ̅ⲧⲉⲓϩⲉ  ⲧⲉⲛⲛⲁⲥⲱⲧⲙ̅ ⲛ̅ⲥⲱⲕ ϩⲱⲱⲕ . Ⲡⲗⲏⲛ ⲙⲁⲣⲉⲠϫⲟⲉⲓⲥ  ⲡⲉⲛⲛⲟⲩⲧⲉ  ϣⲱⲡⲉ ⲛⲙ̅ⲙⲁⲕ  ⲕⲁⲧⲁⲑⲉ  ⲉⲛⲧⲁϥϣⲱⲡⲉ  ⲙⲛ̅Ⲙⲱⲟⲩⲥⲏⲥ . Ⲡⲣⲱⲙⲉ ⲇⲉ ⲉⲧⲉⲛϥ̅ⲛⲁϩⲉ ⲁⲛ ⲉⲣⲟⲕ  ⲁⲩⲱ  ⲡⲉⲧⲉⲛϥ̅ⲛⲁⲥⲱⲧⲙ̅  ⲁⲛ  ⲛ̅ⲥⲁⲛⲉⲕϣⲁϫⲉ:  ⲕⲁⲧⲁⲑⲉ ⲉⲧⲕ̅ⲛⲁϩⲱⲛ ⲉⲧⲟⲟⲧϥ̅  ⲙⲁⲣⲉϥⲙⲟⲩ. Ⲁⲗⲗⲁ ⲧⲱⲕ  ⲁⲩⲱ ⲛⲅ̅ϭⲙ̅ϭⲟⲙ:
 
Ⲃ̅. Ⲁⲩⲱ Ⲓⲏⲥⲟⲩⲥ  ⲡϣⲏⲣⲉ ⲛ̅Ⲛⲁⲩⲏ  ⲁϥϫⲟⲟⲩ ⲉⲃⲟⲗ  ϩⲛ̅ⲟⲩⲙⲁ ⲉⲡⲉϥⲣⲁⲛ ⲡⲉ  Ⲥⲁⲧⲧⲓⲛ . ⲛ̅ϩⲣ̅ϣⲏⲣⲉ  ⲥⲛⲁⲩ ⲉⲧⲣⲉⲩⲙⲉϣⲧⲡⲕⲁϩ.  ϩⲛ̅ⲟⲩϩⲱⲡ ⲉϥϫⲱ  ⲙ̅ⲙⲟⲥ ⲛⲁⲩ  ϫⲉ ⲃⲉⲕ ⲉϩⲣⲁⲓ ⲛ̅ⲧⲉⲧⲛ̅ⲙⲉϣⲧⲡⲕⲁϩ . ⲁⲩⲱ ⲧⲕⲉϨⲓⲉⲣⲓⲭⲱ. Ⲁⲩⲱ  ⲛ̅ⲧⲉⲣⲟⲩⲙⲟⲟϣⲉ  ⲛ̅ϭⲓⲛ̅ϩⲣ̅ϣⲏⲣⲉ ⲥⲛⲁⲩ. ⲁⲩⲃⲱⲕ ⲉϩⲟⲩⲛ ⲉϨⲓⲉⲣⲓⲭⲱ . ⲁⲩⲱ ⲁⲩⲃⲱⲕ ⲉϩⲟⲩⲛ ⲉⲡⲏⲓ  ⲛ̅ⲟⲩⲥϩⲓⲙⲉ  ⲙ̅ⲡⲟⲣⲛⲏ. ⲉⲡⲉⲥⲣⲁⲛ  ⲡⲉ  Ϩⲣⲁⲁⲃ ⲁⲩϭⲟⲓⲗⲉ ⲉⲣⲟⲥ :  Ⲁⲩϫⲓⲡⲟⲩⲱ ⲇⲉ  ⲙ̅ⲡⲣ̅ⲣⲟ ⲛ̅Ϩⲓⲉⲣⲓⲭⲱ ⲉⲩϫⲱ  ⲙ̅ⲙⲟⲥ ⲛⲁϥ . Ϫⲉ  ⲁⲩⲉⲓ ⲉϩⲟⲩⲛ ⲉⲡⲉⲓⲙⲁ ⲛ̅ⲧⲉⲓⲟⲩϣⲏ . ⲛ̅ϭⲓϩⲉⲛⲣⲱⲙⲉ ⲛ̅ⲧⲉⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ ⲉⲙⲉϣⲧⲡⲕⲁϩ Ⲁⲩⲱ ⲁϥϫⲱ ⲛ̅ϭⲓⲡⲣ̅ⲣⲟ ⲛ̅Ϩⲓⲉⲣⲓⲭⲱ ⲡⲉϫⲁϥ  ⲛ̅Ϩⲣⲁⲁⲃ ⲉϥϫⲱ  ⲙ̅ⲙⲟⲥ ϫⲉ  ⲁⲛⲓ ⲛ̅ⲣⲱⲙⲉ ⲉⲡⲥⲁ ⲛ̅ⲃⲟⲗ ⲛⲉⲛⲧⲁⲩⲉⲓ ⲉϩⲟⲩⲛ ⲉⲡⲟⲩⲏⲓ ⲛ̅ⲧⲉⲩϣⲏ  ⲛ̅ⲧⲁⲩⲉⲓ ⲅⲁⲣ ⲉⲙⲉϣⲧⲡⲕⲁϩ : Ⲁⲩⲱ ⲧⲉⲥϩⲓⲙⲉ  ⲛ̅ⲧⲉⲣⲉⲥϫⲓ ⲙ̅ⲡⲣⲱⲙⲉ  ⲥⲛⲁⲩ ⲁⲥϩⲟⲡⲟⲩ. Ⲡⲉϫⲁⲥ ⲇⲉ  ⲙ̅ⲡⲣⲱⲙⲉ ⲙ̅ⲡⲣ̅ⲣⲟ ⲉⲥϫⲱ ⲙ̅ⲙⲟⲥ. ϫⲉ Ϩⲛ̅ⲟⲩⲙⲉ  ⲁⲩⲉⲓ ⲙⲉⲛ  ⲉϩⲟⲩⲛ ⲛⲁⲓ  ⲛ̅ϭⲓⲛ̅ⲣⲱⲙⲉ.  Ⲉⲩⲛⲁϣⲱⲧⲙ̅  ⲇⲉ  ⲛ̅ⲧⲡⲩⲗⲏ ⲛ̅ⲧⲉⲣⲉⲡⲕⲁⲕⲉ  ϣⲱⲡⲉ . Ⲛ̅ⲣⲱⲙⲉ  ⲁⲩⲉⲓ ⲉⲃⲟⲗ  ⲁⲩⲃⲱⲕ. Ⲛ̅ϯⲥⲟⲟⲩⲛ ⲁⲛ ϫⲉ  ⲛ̅ⲧⲁⲩⲃⲱⲕ ⲉⲧⲱⲛ . Ⲡⲱⲧ ⲉⲃⲟⲗ ϩⲓⲣⲁⲧⲟⲩ ϫⲉ  ⲙⲉϣⲁⲕ ⲉⲧⲉⲧⲛⲉⲧⲁϩⲟⲟⲩ . Ⲛ̅ⲧⲟⲥ ⲇⲉ  ⲁⲥϫⲓⲧⲟⲥ  ⲉϩⲣⲁⲓ ⲉⲧⲉⲥϫⲉⲛⲉⲡⲱⲣ. ⲁⲩⲱ ⲁⲥϩⲟⲡⲟⲩ ϩⲁⲛⲉⲥⲙⲁϩⲉ ⲉⲧϩⲟⲣϭ ⲛⲁⲥ  ϩⲓⲧⲉⲥϫⲉⲛⲉⲡⲱⲣ : Ⲁⲩⲱ  ⲛ̅ⲣⲱⲙⲉ  ⲙ̅ⲡⲣ̅ⲣⲟ  ⲁⲩⲡⲱⲧ ⲉⲃⲟⲗ ϩⲓⲣⲁⲧⲟⲩ ⲉⲧⲉϩⲓⲏ ⲉⲧϫⲓ ⲉⲃⲟⲗ ⲉϫⲙ̅ⲡⲒⲟⲣⲇⲁⲛⲏⲥ . ϩⲓϫⲙ̅ⲙⲁ  ⲛ̅ϫⲓⲟⲟⲣ  ⲁⲩⲱ ⲧⲡⲩⲗⲏ  ⲁⲩϣⲱⲧⲙ̅  ̅ⲙⲙⲟⲥ : Ⲁⲥϣⲱⲡⲉ ⲇⲉ  ⲛ̅ⲧⲉⲣⲟⲩⲉⲓ ⲉⲃⲟⲗ ⲛ̅ϭⲓⲛⲉⲧⲡⲏⲧ ⲛ̅ⲥⲱⲟⲩ. ⲛ̅ⲧⲟⲟⲩ ⲇⲉ  ϩⲱⲱⲟⲩ ⲉⲙⲡⲁⲧⲟⲩⲛ̅ⲕⲟⲧⲕ̅. Ϩⲣⲁⲁⲃ ⲁⲥⲃⲱⲕ ⲛⲁⲩ ⲉϩⲣⲁⲓ ⲉϫⲛ̅ⲧϫⲉⲛⲉⲡⲱⲣ. ⲡⲉϫⲁⲥ ⲛⲁⲩ ϫⲉ ϯⲥⲟⲟⲩⲛ  ϫⲉ   ⲁⲠϫⲟⲉⲓⲥ ⲡⲉⲧⲛ̅ⲛⲟⲩⲧⲉ ϯ ⲙ̅ⲡⲉⲓⲕⲁϩ ⲉϩⲣⲁⲓ ⲉⲧⲟⲟⲧⲧⲏⲩⲧⲛ̅ . ⲧⲉⲧⲛ̅ϩⲟⲧⲉ ⲅⲁⲣ  ⲁⲥϩⲉ ⲉϩⲣⲁⲓ ⲉϫⲱⲛ . ϫⲉ ⲁⲩⲃⲱⲗ ⲉⲃⲟⲗ ⲛ̅ϭⲓⲛⲉⲧⲟⲩⲏϩ  ϩⲙ̅ⲡⲕⲁϩ  ϩⲁⲑⲏ ⲙ̅ⲡⲧⲛ̅ϩⲟ :  Ⲁⲛⲥⲱⲧⲙ̅ ⲅⲁⲣ ϫⲉ Ⲡϫⲟⲉⲓⲥ ⲡⲉⲧⲛ̅ⲛⲟⲩⲧⲉ  ⲧⲣⲉⲧⲉⲣⲩⲑⲣⲁ ⲑⲁⲗⲁⲥⲥⲁ  ϣⲟⲟⲩⲉ  ϩⲓϩⲏ ⲙ̅ⲙⲱⲧⲛ̅ . ⲛ̅ⲧⲉⲣⲉⲧⲛ̅ⲉⲓ ⲉⲃⲟⲗ ϩⲙ̅ⲡⲕⲁϩ ⲛ̅Ⲕⲏⲙⲉ . ⲁⲩⲱ ⲛⲉⲛⲧⲁϥⲁⲁⲩ ⲙ̅ⲡⲣ̅ⲣⲟ ⲥⲛⲁⲩ ⲛ̅Ⲁⲙⲟⲣⲣⲁⲓⲟⲥ ⲛⲁⲓ ⲉⲛⲉⲩϩⲓⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ. Ⲥⲏⲱⲛ ⲙⲛ̅Ⲱⲅ ⲛⲁⲓ ⲉⲛⲧⲁⲧⲉⲧⲛ̅ϥⲟⲧⲟⲩ ⲉⲃⲟⲗ . ⲁⲩⲱ  ⲁⲛⲟⲛ  ⲛ̅ⲧⲉⲣⲛ̅ⲥⲱⲧⲙ̅  ⲁⲡⲉⲛϩⲏⲧ ⲡⲱϣⲥ̅ ⲉⲣⲟⲛ . Ⲁⲩⲱ ⲙ̅ⲡⲉⲡ̅ⲛ̅ⲁ̅ ϣⲟϫⲡ̅ ϩⲛ̅ⲗⲁⲁⲩ ⲙ̅ⲙⲟⲛ  ϩⲁⲧⲉⲧⲛ̅ϩⲏ. ⲉⲃⲟⲗϫⲉ Ⲡϫⲟⲉⲓⲥ ⲡⲉⲧⲛ̅ⲛⲟⲩⲧⲉ ⲛ̅ⲧⲟϥ ⲡⲉ ⲡⲛⲟⲩⲧⲉ ⲉⲧϩⲓⲧⲡⲉ ⲛ̅ⲧⲡⲉ . ⲁⲩⲱ ⲉⲧϩⲓϫⲙ̅ⲡⲕⲁϩ ⲙ̅ⲡⲉⲥⲏⲧ : Ⲧⲉⲛⲟⲩ ϭⲉ  ⲱⲣⲕ ⲛⲁⲓ  ⲙ̅Ⲡϫⲟⲉⲓⲥ ⲡⲉⲧⲛ̅ⲛⲟⲩⲧⲉ ϫⲉ ϯⲉⲓⲣⲉ ⲛⲙ̅ⲙⲏⲧⲛ̅ ⲛ̅ⲟⲩⲛⲁ . ⲛ̅ⲧⲱⲧⲛ̅ ϩⲱⲧⲧⲏⲩⲧⲛ̅ ⲉⲧⲣⲉⲧⲛ̅ⲉⲓⲣⲉ  ⲛ̅ⲟⲩⲛⲁ  ϩⲙ̅ⲡⲏⲓ  ̅ⲙⲡⲁⲉⲓⲱⲧ  ⲛ̅ⲧⲉⲧⲛ̅ϯ ⲛⲁⲓ ⲛ̅ⲟⲩⲙⲁⲉⲓⲛ ⲙ̅ⲙⲛ̅ⲧⲙⲉ . Ⲁⲩⲱ ⲛ̅ⲧⲉⲧⲛ̅ⲧⲁⲛϩⲉⲡⲏⲓ ⲙ̅ⲡⲁⲉⲓⲱⲧ ⲙⲛ̅ⲧⲁⲙⲁⲁⲩ . ⲙⲛ̅ⲛⲁⲥⲛⲏⲩ ⲙⲛ̅ⲡⲏⲓ ⲧⲏⲣϥ̅ ⲙ̅ⲡⲁⲉⲓⲱⲧ. ⲙⲛ̅ⲛ̅ⲕⲁ ⲛⲓⲙ ⲉⲧϣⲟⲟⲡ ⲛⲁⲩ ⲛ̅ⲧⲉⲧⲛ̅ⲛⲟⲩϩⲙ̅ ⲛ̅ⲛⲉⲛⲯⲩⲭⲏ ⲉⲃⲟⲗϩⲙ̅ⲡⲙⲟⲩ : Ⲁⲩⲱ ⲡⲉϫⲁⲩ ⲛⲁⲥ  ⲛ̅ϭⲓⲛ̅ⲣⲱⲙⲉ ϫⲉ ⲧⲉⲛⲯⲩⲭⲏ ⲧⲛ̅ⲛⲁⲧⲁⲁⲥ  ϩⲁⲣⲱⲧⲛ̅ ϣⲁϩⲣⲁⲓ  ⲉⲡⲙⲟⲩ . Ⲉⲣϣⲁⲛⲧⲙ̅ϭⲉⲗⲡⲛⲉⲛϣⲁϫⲉ  ⲉⲃⲟⲗ  ⲉⲧⲉⲣⲛⲁⲓ ⲛⲉ . ⲁⲩⲱ  ⲉⲣϣⲁⲛⲠϫⲟⲉⲓⲥ  ϯ  ⲛ̅ⲧⲉⲓⲡⲟⲗⲓⲥ  ⲉϩⲣⲁⲓ  ⲉⲧⲟⲟⲧⲛ̅  ⲧⲛ̅ⲛⲁⲉⲓⲣⲉ  ⲛⲙ̅ⲙⲉ  ⲛ̅ⲟⲩⲛⲁ  ⲙⲛ̅ⲟⲩⲙⲉ .  Ⲁⲩⲱ  ⲁⲥⲟⲩⲟⲧⲃⲟⲩ  ⲉⲃⲟⲗ ϩⲛⲟⲩⲛⲟⲩϩ  ϩⲓⲧⲙⲡϣⲟⲩϣⲧ̅  ϫⲉ  ⲛⲉⲣⲉⲡⲉⲥⲏⲓ  ⲕⲏ  ϩⲓϫⲙ̅ⲡⲧⲓⲭⲟⲥ . ⲁⲩⲱ  ⲛ̅ⲧⲟⲥ  ⲛⲉⲥϩⲙⲟⲟⲥ  ⲡⲉ  ϩⲓϫⲙ̅ⲡⲥⲟⲃⲧ̅ . Ⲡⲉϫⲁⲥ  ⲛⲁⲩ . ϫⲉ  ϯϩⲧⲏⲧⲛ̅  ⲉϩⲣⲁⲓ  ⲉⲡⲧⲟⲟⲩ . ϫⲉ  ⲛⲛⲉⲩⲁⲡⲁⲛⲧⲁ  ⲉⲣⲱⲧⲛ̅ . ⲛϭⲓⲛⲉⲧⲡⲏⲧ  ⲛ̅ⲥⲁⲧⲏⲩⲧⲛ̅ . ⲛⲧⲉⲧⲛ̅ϩⲉⲡⲧⲏⲩⲧⲛ̅  ⲙ̅ⲙⲁⲩ  ⲛ̅ϣⲟⲙⲛ̅ⲧ  ⲛ̅ϩⲟⲟⲩ  ϣⲁⲛⲧⲟⲩⲕⲧⲟⲟⲩ  ⲉⲡⲁϩⲟⲩ  ⲛ̅ϭⲓⲛⲉⲧϯⲟⲩⲟⲓ  ⲛ̅ⲥⲁⲧⲏⲩⲧⲛ̅ . Ⲁⲩⲱ  ⲙⲛ̅ⲛ̅ⲥⲁⲛⲁⲓ  ⲉⲧⲉⲧⲛⲁϯⲧⲏⲩⲧⲛ̅  ⲉϩⲣⲁⲓ  ⲉⲧⲉⲧⲛ̅ϩⲓⲏ . Ⲁⲩⲱ  ⲛ̅ⲣⲱⲙⲉ  ⲙ̅ⲡⲒ̅ⲏ̅ⲗ̅ ⲡⲉϫⲁⲩ  ⲛⲁⲥ . ϫⲉ  ⲧⲛ̅ⲟⲩⲁⲁⲃ . ⲁ̅ⲛⲟⲛ ⲉⲡⲟⲩⲁ̅ⲛⲁϣ . ⲡⲁⲓ ⲛ̅ⲧⲁⲣⲧⲁⲣⲕⲟⲛ  ⲛ̅ϩⲏⲧϥ̅ . Ⲉⲓⲥ  ϩⲏⲏⲧⲉ  ⲁⲛⲟⲛ  ⲧⲛ̅ⲛⲁⲉⲓ  ⲉϩⲟⲩⲛ  ⲉⲧⲉⲓⲡⲟⲗⲓⲥ  ⲉⲣⲉⲕⲱ  ⲉϩⲣⲁⲓ  ⲙ̅ⲡⲉ̅ⲓⲙⲁⲉⲓⲛ . ⲡⲉ̅ⲓϩⲱⲥ ⲛ̅ⲕⲟⲕⲕⲟⲥ  ⲉⲣⲉⲙⲟⲣϥ̅  ⲉϩⲟⲩⲛ  ⲉⲡⲉⲓϣⲟⲩϣⲧ̅ . ⲛ̅ⲧⲁⲣⲟⲩⲟⲧⲃⲉⲛ  ⲉⲃⲟⲗ  ϩⲓⲱⲱϥ . Ⲡⲟⲩⲉⲓⲱⲧ  ⲇⲉ  ⲙⲛ̅ⲧⲟⲩⲙⲁⲁⲩ. ⲙⲛ̅ⲛⲟⲩⲥⲛⲏⲩ  ⲧⲏⲣⲟⲩ  ⲙⲛ̅ⲡⲏⲓ  ⲧⲏⲣϥ̅ ⲙ̅ⲡⲟⲩⲉⲓⲱⲧ . ⲉⲣⲉⲥⲟⲩϩⲟⲩ  ⲉϩⲟⲩⲛ  ϣⲁⲣⲟ  ⲉⲡⲟⲩⲏ̅ⲓ . ⲁⲩⲱ̅ ⲟⲩⲟⲛ  ⲛⲓⲙ  ⲉⲧⲛⲁⲣ̅ⲡⲃⲟⲗ  ⲙ̅ⲡⲣⲟ  ⲙ̅ⲡⲟⲩⲏⲓ . ⲉϥⲛⲁϣⲱⲡⲉ  ⲛ̅ⲧⲟϥ  ⲉϥϭⲏⲡ  ⲉⲣⲟϥ  ⲟⲩⲁⲁⲃ . Ⲁⲛⲟⲛ  ⲇⲉ  ⲉⲛⲉϣⲱⲡⲉ  ⲉⲛⲟⲩⲁⲁⲃ  ⲉⲡⲟⲩⲁⲛⲁϣ. ⲛⲉⲧⲛⲁϣⲱⲡⲉ  ⲇⲉ ⲛⲙ̅ⲙⲉ  ⲛ̅ϩⲟⲩⲛ  ⲙ̅ⲡⲟⲩⲏⲓ . ⲁⲛⲟⲛ  ⲧⲛⲛⲁϣⲱⲡⲉ  ⲉⲛϭⲏⲡ  ⲉⲣⲟⲟⲩ .  Ⲡⲉⲧⲛⲁϫⲓⲧⲛ̅ ⲇⲉ  ⲛ̅ϭⲟⲛⲥ̅ . ⲁⲩⲱ ⲛϥ̅ϭⲉⲗⲡⲛⲉ̅ⲛϣⲁϫⲉ  ⲉⲃⲟⲗ  ⲉⲧⲉ  ⲛⲁⲓ  ⲛⲉ . ⲁⲛⲟⲛ  ⲧⲛ̅ⲛⲁϣⲱⲡⲉ  ⲉⲛⲟⲩⲁⲁⲃ  ⲉⲡⲟⲩⲁⲛⲁϣ . ⲡⲁⲓ  ⲛⲧⲁⲧⲁⲣⲕⲟⲛ ⲛϩⲏⲧϥ̅: Ⲡⲉϫⲉⲧⲉⲥϩⲓ̅ⲙⲉ  ⲛⲁⲩ ϫⲉ  ⲕⲁⲧⲁⲡⲉⲧⲛ̅ϣⲁϫⲉ . ⲉⲥⲉϣⲱⲡⲉ  ϩⲓⲛⲁ̅ⲓ . Ⲁⲩⲱ̅  ⲁⲥϫⲟⲟⲩⲥⲟⲩ  ⲉⲃⲟⲗ  ⲁⲩⲃⲱⲕ . Ⲁⲥⲙⲟⲩⲣ  ⲇⲉ  ⲙ̅ⲡⲙⲁⲉⲓⲛ  ⲛⲕⲟⲕⲕⲟⲥ  ⲉⲡϣⲟⲩϣⲧ̅ . ⲁⲩⲉ̅ⲓ  ⲉϩⲣⲁⲓ  ⲉⲡⲧⲟⲟⲩ . ⲁⲩϭⲱ  ⲙ̅ⲙⲁⲩ  ⲛ̅ϣⲟⲙⲛ̅ⲧ  ⲛ̅ϩⲟⲟⲩ . ⲛⲉⲧϯⲟⲩⲟⲓ  ⲇⲉ  ⲛⲥⲱⲟⲩ  ⲁⲩⲙⲟⲩϣⲧ  ⲛⲛⲉϩⲓⲟⲟⲩⲉ  ⲧⲏⲣⲟⲩ . ⲙⲡⲟⲩϩⲉ  ⲉⲣⲟⲟⲩ . Ⲁⲩⲕⲧⲟⲟⲩ  ⲇⲉ  ⲛ̅ϭⲓⲡϩⲣϣⲓⲣⲉ  ⲥⲛⲁⲩ  ⲁⲩⲃⲱⲕ  ⲉⲡⲉⲥⲏⲧ  ⲉⲒⲏⲥⲟⲩⲥ  ⲡϣⲏⲣⲉ  ⲛ̅Ⲛⲁⲩⲓ  ⲁⲩⲧⲁⲙⲓⲉϩⲱⲃ  ⲛⲓⲙ  ⲉⲛⲧⲁϥϣⲱⲡⲉ . ⲁⲩⲱ  ⲁⲩϫⲱ  ⲛ̅Ⲓⲱⲥⲏⲫ :  ⲁⲠϫⲟⲉⲓⲥ  ϯⲡϩⲁϩ  ⲧⲏⲣϥ̅  ⲛ̅ⲧⲟⲟⲧⲛ̅. ⲛⲏⲉⲧⲛ̅ϩⲏⲧⲥ̅  ⲇⲉ  ⲟ  ⲛ̅ϭⲁⲃϩⲏⲧ.

Ⲅ̅. Ⲁⲩⲱ  ⲁⲒⲏⲥⲟⲩⲥ  ⲧⲱⲟⲩⲛ  ⲙ̅ⲡⲉϥⲣⲁⲥⲧⲉ  ⲁϥⲕⲁⲤⲓⲧⲧⲓⲙ  ⲛ̅ⲥⲱⲟⲩ  ⲁϥϩⲱⲗ  ⲉⲡⲣⲟ  ⲙ̅ⲡⲒⲟⲣⲇⲁⲛⲏⲥ  ⲁⲩⲱ  ⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ  ⲁⲩⲕⲱ  ⲙ̅ⲙⲁⲩ  ⲛ̅ϭⲱⲣϩ  ⲙ̅ⲡⲁⲧⲟⲩϫⲓⲟⲟⲣ . ⲛ̅ⲧⲉⲣⲉϣⲟⲙⲧ  ⲛ̅ϩⲟⲟⲩ  ⲥⲓⲛⲓ  ⲁⲙ̅ⲡⲣⲉⲥⲃⲩⲧⲉⲣⲟⲥ  ⲙⲟⲩϣⲧⲧⲡⲁⲣⲉⲙⲃⲟⲗⲏ  ⲉⲩϩⲱⲛ  ⲉϩⲟⲩⲛ  ⲉⲡⲗⲁⲟⲥ. ϫⲉ  Ⲕⲁⲛ  ⲉⲧⲉⲧⲛ̅ⲛⲁⲩ  ⲉⲧⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ⲙ̅Ⲡϫⲟⲉⲓⲥ  ⲉϥⲧⲁⲗⲏⲩⲧ  ϩⲁⲛⲟⲩⲏⲏⲃ  ⲛ̅Ⲗⲉⲩⲓⲧⲏⲥ  ⲧⲱⲟⲩⲛⲧⲏⲩⲧⲛ̅  ⲛ̅ⲧⲉⲧⲛ̅ⲟⲩⲁϩⲧⲏⲩⲧⲛ̅  ⲛ̅ⲥⲱⲥ . Ⲙⲟⲛⲟⲛ  ⲟⲩϣϥⲱ  ⲙⲁⲣⲉⲧⲛ̅ⲕⲁϥ  ⲟⲩⲧⲉ  ⲙ̅ⲙⲟⲥ  ⲟⲩⲧⲉⲧⲏⲩⲧⲛ̅ ⲉϥⲛⲁⲣ̅  ⲛ̅ⲁ̅ⲙⲁϩ  ϣⲟ  ⲥⲛⲁⲩ ⲉⲛⲛⲉⲧⲛ̅ϩⲱⲛⲧ  ⲉϩⲟⲩⲛ .  ϫⲉⲕⲁⲥ  ⲉⲧⲉⲧⲛⲉⲥⲟⲟⲩⲛ  ϫⲉ  ⲉⲧⲉⲧⲛⲁⲙⲟⲟϣⲉ  ϩⲓⲁϣ  ⲛ̅ϩⲓⲏ . ⲓⲥ  ⲙ̅ⲡⲉⲧⲛ̅ⲉⲓ  ⲅⲁⲣ ϩⲓϫⲱⲥ  ⲉⲛⲉϩ.  Ⲁⲩⲱ  Ⲓⲏⲥⲟⲩⲥ  ⲡⲉϫⲁϥ  ⲙ̅ⲡⲗⲁⲟⲥ . ϫⲉ  ⲙⲁⲧⲟⲩⲃⲉⲧⲏⲩⲧⲛ̅  ⲣⲁⲥⲧⲉ ⲉⲣⲉⲠϫⲟⲉⲓⲥ  ⲛⲁⲉⲓⲣⲉ  ⲛ̅ϩⲛ̅ⲛⲟϭ  ⲙ̅ⲙⲁⲉⲓⲛ  ϩⲛ̅ⲧⲉⲧⲛ̅ⲙⲏⲧⲉ . Ⲁⲩⲱ  ⲡⲉϫⲁϥ  ⲛ̅ϭⲓⲒⲏⲥⲟⲩⲥ  ⲛ̅ⲛ̅ⲟⲩⲏⲏⲃ  ϫⲉ  Ⲧⲁⲗⲉⲧⲕⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ⲉϩⲣⲁⲓ  ⲉϫⲱⲧⲛ̅  ⲛ̅ⲧⲉⲧⲛ̅ⲙⲟⲟϣⲉ  ϩⲁⲑⲏ  ⲙ̅ⲡⲗⲁⲟⲥ . Ⲁⲩⲱ  ⲁⲩⲧⲁⲗⲟⲥ  ⲉⲡⲉⲩⲛⲁϩⲃ̅  ⲛ̅ⲧⲕⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ⲙ̅Ⲡϫⲟⲉⲓⲥ ⲁⲩⲙⲟⲟϣⲉ  ϩⲁⲑⲏ ⲙ̅ⲡⲗⲁⲟⲥ :  Ⲁⲩⲱ ⲡⲉϫⲉⲠϫⲟⲉⲓⲥ  ⲛ̅Ⲓⲏⲥⲟⲩⲥ  ϫⲉ  ϩⲙ̅ⲡⲟⲟⲩ ⲛ̅ϩⲟⲟⲩ ϯⲛⲁⲁⲣⲭⲉⲓ ⲛ̅ϫⲓⲥⲉ  ⲙ̅ⲙⲟⲕ ⲙ̅ⲡⲙ̅ⲧⲟ  ⲉⲃⲟⲗ ⲛ̅ⲛϣⲏⲣⲉ  ⲧⲏⲣⲟⲩ  ⲙ̅ⲡⲒⲥⲣⲁⲏⲗ . ϫⲉⲕⲁⲥ  ⲉⲩⲉⲉⲓⲙⲉ   ϫⲉ  ⲕⲁⲧⲁⲑⲉ  ⲉⲛⲧⲁⲓϣⲱⲡⲉ  ⲙⲛ̅Ⲙⲱⲟⲩⲥⲏⲥ  ϯⲛⲁϣⲱⲡⲉ  ⲛⲙ̅ⲙⲁⲕ ϩⲱⲱⲕ . Ⲁⲩⲱ  ⲧⲉⲛⲟⲩ  ϩⲱⲛ ⲉⲧⲟⲟⲧⲟⲩ ⲛ̅ⲛ̅ⲟⲩⲏⲏⲃ ⲉⲧⲧⲱⲟⲩⲛ  ϩⲁⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ ⲉⲕϫⲱ ⲙ̅ⲙⲟⲥ ⲛⲁⲩ . Ϫⲉ ⲉⲧⲉⲧⲛ̅ϣⲁⲛⲃⲱⲕ ⲉϩⲟⲩⲛ ⲉⲩⲙⲉⲣⲟⲥ  ⲙ̅ⲡⲙⲟⲟⲩ ⲙ̅ⲡⲒⲟⲣⲇⲁⲛⲏⲥ . ⲉⲧⲉⲧⲛⲉⲁϩⲉⲣⲁⲧⲧⲏⲩⲧⲛ̅ ϩⲙ̅ⲡⲒⲟⲣⲇⲁⲛⲏⲥ : Ⲁⲩⲱ Ⲓⲏⲥⲟⲩⲥ  ⲡⲉϫⲁϥ  ⲛ̅ⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ ϫⲉ ϯⲡⲉⲧⲛ̅ⲟⲩⲟⲓ ⲉⲡⲉⲓⲙⲁ ⲉϩⲟⲩⲛ ⲉⲣⲟⲓ ⲛ̅ⲧⲉⲧⲛ̅ⲥⲱⲧⲙ̅ ⲉⲡϣⲁϫⲉ  ⲙ̅Ⲡϫⲟⲉⲓⲥ  ⲡⲉⲛⲛⲟⲩⲧⲉ.  Ϩⲙ̅ⲡⲁⲓ ⲧⲉⲧⲛⲁⲉⲓⲙⲉ ϫⲉ ⲡⲛⲟⲩⲧⲉ ⲉⲧⲟⲛϩ ϥϫⲙ̅ϫⲟⲙ ⲛ̅ϩⲏⲧⲧⲏⲩⲧⲛ̅. ⲁⲩⲱ ϩⲛ̅ⲟⲩϥⲱⲧⲉ  ϥⲛⲁϥⲱⲧⲉ ⲉⲃⲟⲗ ⲙ̅ⲡⲉⲬⲁⲛⲁⲛⲁⲓⲟⲥ. ⲙⲛ̅ⲡⲉⲬⲉⲧⲧⲁⲓⲟⲥ. ⲙⲛ̅ⲡⲉⲪⲉⲣⲉⲍⲁⲓⲟⲥ . ⲙⲛ̅ⲡⲈⲩϩⲉⲓⲟⲥ . ⲙⲛ̅ⲡⲀⲙⲟⲣⲣⲁⲓⲟⲥ . ⲙⲛ̅Ⲅⲉⲣⲅⲉⲥⲁⲓⲟⲥ. ⲙⲛ̅ⲡⲈⲩϩⲁⲓⲟⲥ : Ⲉⲓⲥ  ⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ⲙ̅Ⲡϫⲟⲉⲓⲥ  ⲙ̅ⲡⲕⲁϩ ⲧⲏⲣϥ̅  ⲥⲛⲁϫⲓⲟⲟⲣ ⲙ̅ⲡⲒⲟⲣⲇⲁⲛⲏⲥ  ϩⲓϩⲏ  ⲙ̅ⲙⲱⲧⲛ̅. Ⲧⲉⲛⲟⲩ ϭⲉ ⲛⲟⲩϩⲉ  ⲉⲃⲟⲗ ⲛ̅ϩⲏⲧⲧⲏⲩⲧⲛ̅ ⲙⲙⲛ̅ⲧⲥⲛⲟⲟⲩⲥ  ⲛ̅ⲣⲱⲙⲉ ⲉⲃⲟⲗ  ϩⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ. ⲟⲩⲣⲱⲙⲉ ⲕⲁⲧⲁⲫⲩⲗⲏ. Ⲁⲩⲱ ⲉⲣϣⲁⲛⲛ̅ⲟⲩⲏⲏⲃ  ⲁϩⲉⲣⲁⲧⲟⲩ  ⲛⲉⲧⲧⲱⲟⲩⲛ  ϩⲁⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ⲙ̅Ⲡϫⲟⲉⲓⲥ ⲙ̅ⲡⲕⲁϩ ⲧⲏⲣϥ̅ ϩⲙ̅ⲡⲙⲟⲟⲩ ⲙ̅ⲡⲒⲟⲣⲇⲁⲛⲏⲥ  ⲡⲙⲟⲟⲩ  ⲙ̅ⲡⲒⲟⲣⲇⲁⲛⲏⲥ  ⲛⲁⲱϣⲙ̅ . Ⲡⲙⲟⲟⲩ ⲇⲉ ⲉⲧϣⲟⲩⲟ ⲉϩⲣⲁⲓ ϥⲛⲁⲗⲟ ⲉϥϣⲟⲩⲟ : Ⲁⲩⲱ ⲡⲗⲁⲟⲥ  ⲁϥⲧⲱⲟⲩⲛ ⲉⲃⲟⲗ  ϩⲛ̅ⲛⲉⲩⲙⲁⲛ̅ϣⲱⲡⲉ  ⲉⲧⲣⲉⲩϫⲓⲟⲟⲣ ⲙ̅ⲡⲒⲟⲣⲇⲁⲛⲏⲥ . Ⲛ̅ⲟⲩⲏⲏⲃ ⲇⲉ   ⲁⲩⲧⲁⲗⲟ ⲉϫⲱⲟⲩ  ⲛ̅ⲧⲇⲓⲁⲑⲏⲕⲏ  ⲙ̅Ⲡϫⲟⲉⲓⲥ  ϩⲓⲑⲏ  ⲙ̅ⲡⲗⲁⲟⲥ.  Ⲛ̅ⲧⲉⲣⲟⲩϫⲱⲧⲉ ⲇⲉ  ⲉϩⲟⲩⲛ ⲉⲡⲒⲟⲣⲇⲁⲛⲏⲥ   ⲛ̅ϭⲓⲛ̅ⲟⲩⲏⲏⲃ ⲉⲧⲧⲱⲟⲩⲛ  ϩⲁⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ⲙ̅Ⲡϫⲟⲉⲓⲥ  ⲙ̅ⲡⲕⲁϩ ⲧⲏⲣϥ̅ . Ⲁⲩⲱ ⲛ̅ⲟⲩⲉⲣⲏⲧⲉ ⲛ̅ⲟⲩⲏⲏⲃ ⲛⲉⲧϥⲓ  ϩⲁⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ⲙ̅Ⲡϫⲟⲉⲓⲥ  ⲁⲩϩⲱⲣⲡ  ⲁⲩϫⲱⲗⲕ  ϩⲛ̅ⲟⲩⲙⲉⲣⲟⲥ  ⲙ̅ⲡⲙⲟⲟⲩ  ⲙ̅ⲡⲒⲟⲣⲇⲁⲛⲏⲥ. Ⲡⲓⲟⲣⲇⲁⲛⲏⲥ ⲇⲉ ⲉⲛⲉϥⲙⲉϩ  ⲙ̅ⲙⲟⲟⲩ ⲉⲃⲟⲗ ⲉϫⲛ̅ⲧⲉⲥⲧⲱ ⲧⲏⲣⲥ̅  ⲛ̅ⲑⲉ ⲛ̅ⲛⲉϩⲟⲟⲩ ⲙ̅ⲡⲉϩⲥⲥⲟⲩⲟ. Ⲁⲩⲱ ⲡⲙⲟⲟⲩ ⲉⲧⲛⲏⲩ ⲙ̅ⲡϫⲟⲥⲉ  ⲁⲩⲗⲟ ⲉⲩϣⲟⲩⲟ  ⲁⲩⲱ ⲛ̅ⲧⲁⲩϫⲣⲟ ⲉⲙⲁⲧⲉ ⲉⲙⲁⲧⲉ. ϣⲁϩⲣⲁⲓ ⲉⲡⲥⲁ ⲛ̅Ⲕⲁⲣⲓⲁⲑⲓⲁⲣⲓⲙ. Ⲡⲙⲟⲟⲩ ⲇⲉ ⲉⲧϣⲟⲩⲟ ⲉϩⲣⲁⲓ  ⲁϥϩⲁⲧⲉ  ⲉⲃⲟⲗ ⲉⲧⲉⲑⲁⲗⲁⲥⲥⲁ ⲛ̅Ⲁⲣⲁⲃⲁ . ⲧⲉⲑⲁⲗⲁⲥⲥⲁ  ⲙ̅ⲡⲉϩⲙⲟⲩ ϣⲁⲛⲧϥ̅ⲱϫⲛ̅ ⲉⲡⲧⲏⲣϥ̅. Ⲁⲩⲱ  ⲡⲗⲁⲟⲥ ⲛⲉⲧⲁϩⲉⲣⲁⲧϥ̅  ⲙ̅ⲡⲙ̅ⲧⲟ ⲉⲃⲟⲗ ⲛ̅Ϩⲓⲉⲣⲓⲭⲱ . Ⲁⲩⲱ ⲛ̅ⲟⲩⲏⲏⲃ ⲉⲧⲧⲱⲟⲩⲛ  ϩⲁⲧϩⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ⲙ̅Ⲡϫⲟⲉⲓⲥ . ⲁⲩⲁϩⲉⲣⲁⲧⲟⲩ ϩⲓϫⲙ̅ⲡⲡⲉⲧϣⲟⲩⲱⲟⲩ  ϩⲛ̅ⲧⲙⲏⲧⲉ  ⲙ̅ⲡⲒⲟⲣⲇⲁⲛⲏⲥ . ⲁⲩⲱ  ⲛ̅ϣⲏⲣⲉ  ⲧⲏⲣⲟⲩ  ⲙ̅ⲡⲒⲥⲣⲁⲏⲗ  ⲁⲩϫⲓⲟⲟⲣ  ⲉⲩⲙⲟⲟϣⲉ  ϩⲙ̅ⲙⲡⲉⲧϣⲟⲩⲱⲟⲩ ϣⲁⲛⲧⲉⲡⲗⲁⲟⲥ  ⲧⲏⲣϥ̅ ϫⲓⲟⲟⲣ  ⲙ̅ⲡⲒⲟⲣⲇⲁⲛⲏⲥ :
 
Ⲇ̅. Ⲡϫⲟⲉⲓⲥ  ⲁϥϣⲁϫⲉ  ⲙⲛ̅Ⲓⲏⲥⲟⲩⲥ  ⲉϥϫⲱ ⲙ̅ⲙⲟⲥ  ⲛⲁϥ. Ϫⲉ ϫⲓ ⲛ̅ϩⲛ̅ⲣⲱⲙⲉ ⲉⲃⲟⲗ ϩⲙ̅ⲡⲗⲁⲟⲥ ⲟⲩⲣⲱⲙⲉ  ⲕⲁⲧⲁⲫⲩⲗⲏ. ⲛⲅ̅ϩⲱⲛ ⲉⲧⲟⲟⲧⲟⲩ ⲛ̅ⲥⲉϥⲓ ⲉⲃⲟⲗ  ϩⲙ̅ⲡⲉⲓⲙⲁ  ϩ̅ⲛⲧⲙⲏⲧⲉ  ⲙ̅ⲡⲒⲟⲣⲇⲁⲛⲏⲥ. ⲙ̅ⲙⲛ̅ⲧⲥⲛⲟⲟⲩⲥ  ⲛ̅ⲱⲛⲉ  ⲉⲩⲥⲃ̅ⲧⲱⲧ ⲉⲩⲟⲩⲟϫ . Ⲁⲩⲱ ⲛⲁⲓ ⲙⲁⲣⲟⲩⲛ̅ⲧⲟⲩ ⲛ̅ⲧⲉⲧⲛ̅ⲕⲁⲁⲩ ⲉϩⲣⲁⲓ  ϩⲓⲟⲩⲥⲟⲡ  ϩⲙ̅ⲡⲉⲧⲛ̅ⲙⲁⲛ̅ϣⲱⲡⲉ . ⲡⲙⲁ ⲉⲧⲉⲧⲛⲁϯⲧⲏⲩⲧⲛ̅ ⲉⲣⲟϥ ⲛ̅ⲧⲉⲩϣⲏ :  Ⲁⲩⲱ Ⲓⲏⲥⲟⲩⲥ  ⲛ̅ⲧⲉⲣϥ̅ⲙⲟⲩⲧⲉ ⲉⲙⲛ̅ⲧⲥⲛⲟⲟⲩⲥ  ⲛ̅ⲣⲱⲙⲉ  ⲉⲃⲟⲗ  ⲛ̅ⲛⲉⲧⲟⲓ  ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ. ⲟⲩⲣⲱⲙⲉ  ⲕⲁⲧⲁⲫⲩⲗⲏ ⲁϥϣⲁϫⲉ ⲛⲙ̅ⲙⲁⲩ ⲉϥϫⲱ ⲙ̅ⲙⲟⲥ . Ϫⲉ  ϯⲡⲉⲧⲛ̅ⲟⲩⲟⲓ  ϩⲓⲑⲏ ⲙ̅ⲙⲟⲓ  ⲙ̅ⲡⲙ̅ⲧⲟ ⲉⲃⲟⲗ  ⲙ̅Ⲡϫⲟⲉⲓⲥ  ⲉⲧⲙⲏⲧⲉ ⲙ̅ⲡⲒⲟⲣⲇⲁⲛⲏⲥ. ⲁⲩⲱ ⲙⲁⲣⲉⲡⲟⲩⲁ ⲡⲟⲩⲁ  ⲙ̅ⲙⲱⲧⲛ̅  ϥⲓ ⲉⲃⲟⲗ  ϩⲙ̅ⲡⲙⲁ ⲉⲧⲙ̅ⲙⲁⲩ  ⲛ̅ⲟⲩⲱⲛⲉ . ⲛϥ̅ⲧⲁⲗⲟϥ ⲉϫⲧ̅ⲉϥⲛⲁϩⲃ ⲕⲁⲧⲁⲧⲏⲡⲉ  ⲛ̅ⲧⲙⲛ̅ⲧⲥⲛⲟⲟⲩⲥ  ⲙ̅ⲫⲩⲗⲏ  ⲙ̅ⲡⲒⲥⲣⲁⲏⲗ. ϫⲉⲕⲁⲥ ⲛⲁⲓ ⲉⲩⲉϣⲱⲡⲉ  ⲛⲏⲧⲛ̅  ⲉⲩⲙⲁⲉⲓⲛ ⲉⲩⲕⲏ ⲉϩⲣⲁⲓ  ⲛ̅ⲟⲩⲟⲉⲓϣ ⲛⲓⲙ . Ϫⲉⲕⲁⲥ ⲉϥϣⲁⲛϫⲱⲕ ⲛ̅ⲣⲁⲥⲧⲉ ⲛ̅ϭⲓⲡⲉⲕϣⲏⲣⲉ ⲉϥϫⲱ ⲙ̅ⲙⲟⲥ ϫⲉ ϩⲉⲛⲟⲩ ⲛⲏⲧⲛ̅ ⲛⲉ   ⲛⲉⲓⲱⲛⲉ ⲉⲧⲕⲏ ⲉϩⲣⲁⲓ . ⲛ̅ⲧⲟⲕ  ϩⲱⲱⲕ ⲉⲕⲧⲱⲟⲩⲛ  ⲛ̅ⲉⲓⲁⲧϥ̅ ⲉⲃⲟⲗ  ⲙ̅ⲡⲉⲕϣⲏⲣⲉ   ⲉⲕϫⲱ  ⲙ̅ⲙⲟⲥ  ⲛⲁϥ . Ϫⲉ  ⲉⲃⲟⲗϫⲉ  ⲁϥⲱϫⲛ̅  ⲛ̅ϭⲓⲡⲒⲟⲣⲇⲁⲛⲏⲥ ⲡⲓⲉⲣⲟ . ϩⲓⲑⲏ ⲛ̅ⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ⲙ̅Ⲡϫⲟⲉⲓⲥ  ⲙ̅ⲡⲕⲁϩ ⲧⲏⲣϥ̅  ⲛ̅ⲧⲉⲣⲉⲥϫⲓⲟⲟⲣ  ⲙ̅ⲙⲟⲥ . Ⲁⲩⲱ  ⲛⲉⲓⲱⲛⲉ ⲉⲩⲉϣⲱⲡⲉ  ⲛⲏⲧⲛ̅ ⲉⲩⲣ̅ⲡⲙⲉⲉⲩⲉ  ϩⲛ̅ⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ ϣⲁⲉⲛⲉϩ : Ⲁⲩⲱ  ⲁⲩⲉⲓⲣⲉ  ϩⲓⲛⲁⲓ  ⲛ̅ϭⲓⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ  ⲕⲁⲧⲁⲑⲉ  ⲛ̅ⲧⲁⲠϫⲟⲉⲓⲥ  ϩⲱⲛ ⲉⲧⲟⲟⲧϥ̅ ⲛ̅Ⲓⲏⲥⲟⲩⲥ. Ⲁⲩⲱ ⲛ̅ⲧⲉⲣⲟⲩϫⲓ  ⲙ̅ⲙⲛ̅ⲧⲥⲛⲟⲟⲩⲥ  ⲛ̅ⲱⲛⲉ  ⲉⲃⲟⲗ  ϩⲛ̅ⲧⲙⲏⲧⲉ ⲙ̅ⲡⲒⲟⲣⲇⲁⲛⲏⲥ. ⲕⲁⲧⲁⲑⲉ  ⲉⲛⲧⲁⲠϫⲟⲉⲓⲥ ϩⲱⲛ ⲉⲧⲟⲟⲧϥ̅ ⲛ̅Ⲓⲏⲥⲟⲩⲥ . ⲛ̅ⲧⲉⲣⲟⲩⲟⲩⲱ ⲉⲩϫⲓⲟⲟⲣ ⲧⲏⲣⲟⲩ ⲛ̅ϭⲓⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ . ⲁⲩⲉⲓⲛⲉ  ⲙ̅ⲙⲱⲟⲩ ⲛⲙ̅ⲙⲁⲩ ⲉϩⲣⲁⲓ ⲉⲧⲉⲩⲡⲁⲣⲉⲙⲃⲟⲗⲏ  ⲁⲩⲕⲁⲁⲩ  ⲙ̅ⲡⲙⲁ ⲉⲧⲙ̅ⲙⲁⲩ . Ⲓⲏⲥⲟⲩⲥ ⲇⲉ ⲁϥⲧⲁϩⲉ  ⲉⲣⲁⲧⲟⲩ ⲛ̅ⲕⲉⲙⲛ̅ⲧⲥⲛⲟⲟⲩⲥ  ⲱ̅ⲛⲉ  ϩⲙ̅ⲡⲒⲟⲣⲇⲁⲛⲏⲥ . ϩⲙ̅ⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ ϫⲉ ϩⲁⲣⲁⲧⲟⲩ  ⲛ̅ⲛⲟⲩⲉⲣⲏⲧⲉ  ⲛ̅ⲛⲟⲩⲏⲏⲃ . ⲛⲉⲧⲧⲱⲟⲩⲛ  ϩⲁⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ⲙ̅Ⲡϫⲟⲉⲓⲥ . Ⲁⲩⲱ ⲥⲉⲕⲏ ⲉϩⲣⲁⲓ ⲙ̅ⲡⲙⲁ ⲉⲧⲙ̅ⲙⲁⲩ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ.  Ⲛⲉⲩⲁϩⲉ ⲇⲉ ⲉⲣⲁⲧⲟⲩ  ⲛ̅ϭⲓⲛ̅ⲟⲩⲏⲏⲃ ⲉⲧⲧⲱⲟⲩⲛ  ϩⲁⲧϭⲓⲃⲱⲧⲟⲥ  ⲙ̅Ⲡϫⲟⲉⲓⲥ   ϩⲙ̅ⲡⲒⲟⲣⲇⲁⲛⲏⲥ   ϣⲁⲛⲧⲉⲒⲏⲥⲟⲩⲥ ϫⲱⲕ ⲉⲃⲟⲗ ⲛ̅ϩⲱⲃ ⲛⲓⲙ  ⲉⲛⲧⲁⲠϫⲟⲉⲓⲥ  ϩⲱⲛ  ⲙ̅ⲙⲱⲟⲩ ⲉⲧⲟⲟⲧϥ̅ ⲉⲧⲣⲉϥⲧⲁⲩⲟⲟⲩ ⲉⲡⲗⲁⲟⲥ . Ⲡⲗⲁⲟⲥ ⲇⲉ  ⲁⲩϭⲉⲡⲏ  ⲁⲩϭⲓⲟⲟⲣ ⲧⲏⲣⲟⲩ.  Ⲁⲥϣⲱⲡⲉ ⲇⲉ  ̅ⲛⲧⲉⲣⲉⲡⲗⲁⲟⲥ ⲧⲏⲣϥ̅ ⲟⲩⲱ ⲉⲩϫⲓⲟⲟⲣ . ⲧϭⲓⲃⲱⲧⲟⲥ  ϩⲱⲱⲥ  ⲛ̅ⲧⲇⲓⲁⲑⲏⲕⲏ  ⲙ̅Ⲡϫⲟⲉⲓⲥ  ⲁⲥϫⲓⲟⲟⲣ . Ⲁⲩⲱ ⲛ̅ⲱⲛⲉ ⲉⲩϩⲓϩⲏ ⲙ̅ⲙⲱⲟⲩ : Ⲁⲩⲱ ⲛ̅ϣⲏⲣⲉ  ⲛ̅Ϩⲣⲟⲩⲃⲏⲛ̅  ⲙⲛ̅ⲛϣⲏⲣⲉ  ⲛ̅Ⲅⲁⲇ . ⲁⲩⲱ ⲧⲡⲁϣⲉ  ⲙ̅ⲫⲩⲗⲏ ⲙ̅Ⲙⲁⲛⲁⲥⲥⲏ . ⲁⲩϫⲓⲟⲟⲣ ⲉⲩϩⲏⲕ ϩⲓⲑⲏ  ⲙ̅ⲡⲒⲥⲣⲁⲏⲗ. ⲕⲁⲧⲁⲑⲉ  ⲉⲛⲧⲁⲘⲱⲟⲩⲥⲏⲥ  ϩⲱⲛ ⲉⲧⲟⲟⲧⲟⲩ. ⲉⲩⲛⲁⲣ̅ϥⲧⲟⲟⲩ ⲛ̅ⲧⲃⲁ  ⲙ̅ⲙⲏⲏϣⲉ . ⲁⲩϫⲓⲟⲟⲣ ⲙ̅ⲡⲙ̅ⲧⲟ ⲉⲃⲟⲗ ⲙ̅Ⲡϫⲟⲉⲓⲥ  ⲉⲡⲡⲟⲗⲉⲙⲟⲥ ⲉⲣⲱⲥ ⲛ̅Ϩⲓⲉⲣⲓⲭⲱ ⲧⲡⲟⲗⲓⲥ : Ϫⲓⲛⲙ̅ⲡⲉϩⲟⲟⲩ ⲉⲧⲙ̅ⲙⲁⲩ  ⲁⲠϫⲟⲉⲓⲥ  ⲁⲩⲝⲁⲛⲉ : ⲁⲩⲱ  ⲁϥϫⲓⲥⲉ  ⲛ̅Ⲓⲏⲥⲟⲩⲥ  ⲙ̅ⲡⲙ̅ⲧⲟ ⲉⲃⲟⲗ  ⲙ̅ⲡⲅⲉⲛⲟⲥ ⲧⲏⲣϥ̅  ⲙ̅ⲡⲒⲥⲣⲁⲏⲗ . ⲁⲩⲱ ⲛⲉⲩⲣ̅ϩⲟⲧⲉ  ϩⲏⲧϥ̅  ⲕⲁⲧⲁⲑⲉ ⲉⲛⲧⲁⲩⲣ̅ϩⲟⲧⲉ  ϩⲏⲧϥ̅  ⲙ̅Ⲙⲱⲟⲩⲥⲏⲥ   ⲙ̅ⲡⲉⲟⲩⲟⲉⲓϣ  ⲉⲛⲧⲁϥⲁⲁϥ  ⲉϥⲟⲛϩ :  Ⲁⲩⲱ Ⲡϫⲟⲉⲓⲥ  ⲁϥϣⲁϫⲉ  ⲙⲛ̅Ⲓⲏⲥⲟⲩⲥ  ⲉϥϫⲱ  ⲙ̅ⲙⲟⲥ  ⲛⲁϥ . Ϫⲉ  ϩⲱⲛ ⲉⲧⲟⲟⲧⲟⲩ ⲛ̅ⲛⲟⲩⲏⲏⲃ ⲉⲧⲧⲱⲟⲩⲛ  ϩⲁⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ⲙ̅ⲡⲙⲁⲣⲧⲩⲣⲓⲟⲛ  ⲉⲧⲣⲉⲩⲉⲓ ⲉϩⲣⲁⲓ ϩⲙ̅ⲡⲒⲟⲣⲇⲁⲛⲏⲥ : Ⲁⲩⲱ Ⲓⲏⲥⲟⲩⲥ  ⲁϥϩⲱⲛ ⲉⲧⲟⲟⲧⲟⲩ ⲛ̅ⲛⲟⲩⲏⲏⲃ  ⲉϥϫⲱ ⲙ̅ⲙⲟⲥ ⲛⲁⲩ . Ϫⲉ ⲁⲙⲉⲓⲧⲛ̅ ⲉϩⲣⲁⲓ ϩⲙ̅ⲡⲒⲟⲣⲇⲁⲛⲏⲥ : Ⲁⲩⲱ  ⲁⲥϣⲱⲡⲉ  ⲛ̅ⲧⲣⲉⲛ̅ⲟⲩⲏⲏⲃ  ⲛⲉⲧⲧⲱⲟⲩⲛ  ϩⲁⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ⲉⲓ ⲉϩⲣⲁⲓ  ϩⲙ̅ⲡⲒⲟⲣⲇⲁⲛⲏⲥ  ⲁⲩⲱ  ⲁⲩⲁϩⲉⲣⲁⲧⲟⲩ  ϭⲉ  ϩⲓϫⲙ̅ⲡⲕⲁϩ  ⲉⲧϣⲟⲩⲱⲟⲩ.  ⲁϥϯ  ⲙ̅ⲡⲉϥⲟⲩⲟⲓ  ⲛ̅ϭⲓⲡⲙⲟⲟⲩ  ⲙ̅ⲡⲒⲟⲣⲇⲁⲛⲏⲥ  ⲕⲁⲧⲁⲧⲉϥⲭⲱⲣⲁ ⲉⲡⲉϥⲙⲁ . Ⲁⲩⲱ ⲛ̅ⲛⲉϥϩⲁⲧⲉⲡⲉ  ⲛ̅ⲑⲉ  ⲛ̅ⲥⲁϥ ⲙⲛ̅ϣⲙ̅ⲧⲉ ⲛ̅ϩⲟⲟⲩ  ⲉⲃⲟⲗ ϩⲓⲧⲉⲛⲧⲛ̅ⲕⲣⲓⲥⲓⲥ  ⲧⲏⲣⲥ̅ : Ⲁⲩⲱ ⲡⲗⲁⲟⲥ ⲧⲏⲣϥ̅  ⲁϥⲉⲓ ⲉϩⲣⲁⲓ  ϩⲙ̅ⲡⲒⲟⲣⲇⲁⲛⲏⲥ  ⲛⲥⲟⲩⲙⲏⲧ  ⲙ̅ⲡⲉⲃⲟⲧ ⲛ̅ϣⲟⲣⲡ. Ⲁⲩⲱ  ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ  ⲁⲩⲟⲩⲱϩ ϩⲛ̅Ⲅⲁⲗⲅⲁⲗⲁ ϩⲛ̅ⲟⲩⲙⲉⲣⲟⲥ ⲛ̅ⲧⲁⲥ  ⲡⲉⲧϩⲙ̅ⲡⲥⲁ  ⲙ̅ⲙⲁ ⲙ̅ⲡⲉⲓⲣⲉ ⲙ̅ⲡⲣⲏ ⲙ̅ⲡⲙ̅ⲧⲟ ⲛ̅Ϩⲓⲉⲣⲓⲭⲱ.  Ⲁⲩⲱ ⲡⲉⲓⲙⲛ̅ⲧⲥⲛⲟⲟⲩⲥ  ⲛ̅ⲱⲛⲉ  ⲉⲛⲧⲁⲩϫⲓⲧⲟⲩ ⲉⲃⲟⲗ  ϩⲙ̅ⲡⲒⲟⲣⲇⲁⲛⲏⲥ . ⲁⲒⲏⲥⲟⲩⲥ ⲧⲁϩⲟⲟⲩ ⲉⲣⲁⲧⲟⲩ  ϩⲛ̅Ⲅⲁⲗⲅⲁⲗⲁ ⲉϥϫⲱ  ⲙ̅ⲙⲟⲥ  ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ  ϫⲉ ⲉⲩϣⲁⲛϫⲛⲟⲩⲧⲛ̅ ⲣⲁⲥⲧⲉ  ⲛ̅ϭⲓⲛⲉⲧⲛ̅ϣⲏⲣⲉ  ⲉⲩϫⲱ ⲛⲏⲧⲛ̅ ϫⲉ ⲟⲩ ⲛⲉ ⲛⲉⲓⲱⲛⲉ . ⲉⲧⲉⲧⲛⲉⲧⲁⲙⲉⲛⲉⲧⲛ̅ϣⲏⲣⲉ  ⲉⲧⲉⲧⲛ̅ϫⲱ ⲙ̅ⲙⲟⲥ ⲛⲁⲩ . Ϫⲉ ⲉⲃⲟⲗϫⲉ  ⲡⲒⲥⲣⲁⲏⲗ  ⲁϥϫⲓⲟⲟⲣ  ⲙ̅ⲡⲒⲟⲣⲇⲁⲛⲏⲥ  ⲡⲓⲉⲣⲟ ⲉϫⲙ̅ⲡⲉⲧϣⲟⲩⲱⲟⲩ . ⲉⲁⲠϫⲟⲉⲓⲥ ⲡⲉⲛⲛⲟⲩⲧⲉ ⲧⲣⲉⲡⲙⲟⲟⲩ  ⲙ̅ⲡⲒⲟⲣⲇⲁⲛⲏⲥ  ϣⲟⲟⲩⲉ  ϩⲓⲑⲏ  ⲙ̅ⲡⲒⲥⲣⲁⲏⲗ  ϣⲁⲛⲧⲟⲩϫⲓⲟⲟⲣ  ⲧⲏⲣⲟⲩ  ⲙ̅ⲙⲟϥ . ⲕⲁⲧⲁⲑⲉ  ⲉⲛⲧⲁⲠϫⲟⲉⲓⲥ  ⲡⲉⲛⲛⲟⲩⲧⲉ  ⲁⲁⲥ  ⲛ̅ⲧⲉⲣⲩⲑⲣⲁ ⲑⲁⲗⲁⲥⲥⲁ. Ⲧⲁⲓ ⲉⲛⲧⲁϥⲧⲣⲉⲥϣⲟⲟⲩⲉ  ⲛ̅ϭⲓⲠϫⲟⲉⲓⲥ  ⲡⲉⲛⲛⲟⲩⲧⲉ  ϩⲓⲑⲏ ⲙ̅ⲙⲟⲛ  ϣⲁⲛⲧⲛ̅ⲥⲁⲁⲧⲥ̅ . ϫⲉ ⲉⲩⲉⲉⲓⲙⲉ ⲛ̅ϭⲓⲛ̅ϩⲉⲑⲛⲟⲥ ⲧⲏⲣⲟⲩ  ⲙ̅ⲡⲕⲁϩ . ϫⲉ ⲧϭⲟⲙ  ⲙ̅Ⲡϫⲟⲉⲓⲥ  ⲧⲁϫⲣⲏⲩ. ⲁⲩⲱ  ϫⲉⲕⲁⲥ  ⲛ̅ⲧⲱⲧⲛ̅  ⲉⲧⲉⲧⲛⲉϣⲙ̅ϣⲉ  ⲙ̅Ⲡϫⲟⲉⲓⲥ  ⲡⲉⲛⲛⲟⲩⲧⲉ  ⲛ̅ⲟⲩⲟⲉⲓϣ ⲛⲓⲙ:
 
Ⲉ̅. Ⲁⲩⲱ  ⲁⲥϣⲱⲡⲉ  ⲛ̅ⲧⲉⲣⲟⲩⲥⲱⲧⲙ̅  ⲛ̅ϭⲓⲛⲉⲣ̅ⲣⲱⲱⲟⲩ  ⲛⲛⲀⲙⲟⲣⲣⲁⲓⲟⲥ . ⲛⲁⲓ ⲉⲛⲉⲩϩⲓⲡⲉⲕⲣⲟ  ⲙ̅ⲡⲒⲟⲣⲇⲁⲛⲏⲥ . ⲁⲩⲱ ⲛ̅ⲉⲣⲣⲱⲟⲩ ⲙ̅ⲡⲕⲁϩ ⲛ̅ⲧⲉⲪⲟⲓⲛⲓⲕⲏ . ⲛⲉⲧϩⲁⲧⲉⲑⲁⲗⲁⲥⲥⲁ . ϫⲉ  ⲁⲠϫⲟⲉⲓⲥ  ⲡⲛⲟⲩⲧⲉ  ⲧⲣⲉⲡⲒⲟⲣⲇⲁⲛⲏⲥ ⲡⲓⲉⲣⲟ  ϣⲟⲟⲩⲉ .  ϩⲓⲑⲏ ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ  ⲉⲩϫⲓⲟⲟⲣ ⲙ̅ⲙⲟϥ . ⲁⲛⲉⲩϩⲏⲧ ⲃⲱⲗ ⲉⲃⲟⲗ  ⲁⲩⲣ̅ϭⲱⲃ. ⲁⲩⲱ ⲁⲩϣⲱⲣⲡ̅  ⲁⲩϣⲧⲟⲣⲧⲣ̅  ⲁⲩⲱ   ⲛ̅ⲛⲉⲟⲩⲙⲟⲕⲙⲉⲕ ⲗⲁⲁⲩ ϣⲱϫⲡ   ϩⲣⲁⲓ  ⲛ̅ϩⲏⲧⲟⲩ ϩⲓⲑⲏ ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ : Ϩⲙ̅ⲡⲉⲓⲟⲩⲟⲉⲓϣ ⲇⲉ  ⲡⲁⲓ  ⲡⲉϫⲉⲠϫⲟⲉⲓⲥ  ⲛ̅Ⲓⲏⲥⲟⲩⲥ .  ϫⲉ ⲧⲁⲙⲓⲟ ⲛⲁⲕ ⲛ̅ϩⲉⲛⲥⲏϥⲉ  ⲙ̅ⲡⲉⲧⲣⲁ. ⲉⲃⲟⲗ ϩⲛ̅ⲟⲩⲡⲉⲧⲣⲁ ⲉⲥϫⲟⲥⲉ ⲉⲥⲧⲏⲙ . ⲁⲩⲱ ⲛϥ̅ϩⲙⲟⲟⲥ ⲉϩⲣⲁⲓ  ⲁⲩⲱ ⲛⲅ̅ⲥⲃ̅ⲃⲉ  ⲙ̅ⲡⲙⲉϩⲥⲉⲡⲥⲛⲁⲩ  ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ : Ⲁⲩⲱ  ⲁϥⲧⲁⲙⲓⲟ ⲛⲁϥ  ⲛ̅ϭⲓⲒⲏⲥⲟⲩⲥ  ⲛ̅ⲛⲥⲏϥⲉ  ⲙ̅ⲡⲉⲧⲣⲁ ⲉⲩⲧⲏⲙ . Ⲁϥⲥⲃ̅ⲃⲉ  ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ . ⲙ̅ⲡⲙⲉϩⲥⲉⲡⲥⲛⲁⲩ  ⲁⲩⲱ  ⲁϥⲕⲱ  ⲛ̅ⲛⲉϫⲡⲟⲟⲩ  ⲙ̅ⲙⲛ̅ⲧⲁⲧⲥⲃ̅ⲃⲉ  ϩⲓϫⲙ̅ⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ  ⲧⲉⲛⲟⲩ ϫⲉ ⲡⲙⲁ ⲙ̅ⲡⲃⲟⲩⲛⲟⲥ ⲛⲙ̅ⲙⲛ̅ⲧⲁⲧⲥⲃ̅ⲃⲉ : Ⲓⲏⲥⲟⲩⲥ ⲇⲉ ⲛ̅ⲧⲉⲣϥ̅ⲥⲃ̅ⲃⲉ ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ . ⲛⲉⲛⲧⲁⲩϣⲱⲡⲉ ⲉⲩⲟ ⲛ̅ⲁⲧⲥⲃ̅ⲃⲉ ⲛⲉⲛⲧⲁⲩⲉⲓ ⲉⲃⲟⲗ ϩⲛ̅Ⲕⲏⲙⲉ.  ⲛⲁⲓ ⲧⲏⲣⲟⲩ Ⲓⲏⲥⲟⲩⲥ  ⲁϥⲥⲃ̅ⲃⲏⲧⲟⲩ: ϩⲙⲉ  ⲅⲁⲣ ⲛ̅ⲣⲟⲙⲡⲉ ⲡⲒⲥⲣⲁⲏⲗ  ⲁⲩⲁⲁⲩ  ϩⲛ̅ⲧⲉⲣⲏⲙⲟⲥ. Ⲉⲧⲃⲉⲡⲁⲓ  ⲡⲉϩⲟⲩⲟ ⲛ̅ⲛⲣⲉϥⲙⲓϣⲉ ⲛⲉⲩⲟ ⲛ̅ⲁⲧⲥⲃ̅ⲃⲉ ⲛⲉ . Ⲛⲉⲛⲧⲁⲩⲉⲓ ⲉⲃⲟⲗ ϩⲛ̅Ⲕⲏⲙⲉ ⲉⲧⲉⲛ̅ⲁⲧⲥⲱⲧⲙ̅ ⲛ̅ⲥⲁⲛ̅ⲉⲛⲧⲟⲗⲏ ⲙ̅ⲡⲛⲟⲩⲧⲉ ⲁⲩⲱ ⲁϥϣⲁϫⲉ ⲉⲧⲃⲏⲏⲧⲟⲩ ⲉⲧⲙ̅ⲧⲣⲉⲩⲛⲁⲩ ⲉⲡⲕⲁϩ . ⲡⲁⲓ ⲉⲛⲧⲁⲠϫⲟⲉⲓⲥ ⲱⲣⲕ̅ ⲉⲧⲃⲏⲏⲧϥ̅ ⲛ̅ⲛⲉⲛⲉⲓⲟⲧⲉ ⲉϯ ⲛⲁⲩ ⲛ̅ⲟⲩⲕⲁϩ ⲉϥϣⲟⲩⲉⲉⲣⲱⲧⲉ ⲉⲃⲟⲗ ϩⲓⲉⲃⲓⲱ . Ⲉⲡⲙⲁ ⲇⲉ ⲛ̅ⲛⲁⲓ ⲁϥⲧⲁϩⲟ ⲉⲣⲁⲧⲟⲩ ⲛ̅ⲛⲉⲩϣⲏⲣⲉ ⲛⲁⲓ ⲉⲛⲧⲁⲒⲏⲥⲟⲩⲥ ⲥⲃ̅ⲃⲏⲧⲟⲩ. Ⲉⲃⲟⲗϫⲉ  ⲁⲩϣⲱⲡⲉ  ϩⲓⲧⲉϩⲓⲏ ⲉⲙⲡⲟⲩⲥⲃ̅ⲃⲏⲧⲟⲩ. Ⲛ̅ⲧⲉⲣⲟⲩⲥⲃ̅ⲃⲏⲧⲟⲩ ⲇⲉ  ⲁⲩϭⲱ ⲉⲩⲥϭⲣⲁϩⲧ. Ⲉⲁⲩϩⲙⲟⲟⲥ  ϩⲛ̅ⲡⲁⲣⲁⲙ̅ⲃⲟⲗⲏ ϣⲁⲛⲧⲟⲩⲟⲩϫⲁⲓ: Ⲁⲩⲱ Ⲡϫⲟⲉⲓⲥ ⲡⲉϫⲁϥ ⲛ̅ⲛⲁϩⲣⲙ̅ⲡⲗⲁⲟⲥ  ϫⲉ ϩⲣⲁⲓ ϩⲙ̅ⲡⲟⲟⲩ ⲛ̅ϩⲟⲟⲩ ⲁⲓϥⲓ ⲙ̅ⲙⲁⲩ ⲙ̅ⲡⲛⲟϭⲛⲉϭ . ⲛ̅Ⲕⲏⲙⲉ ⲉⲃⲟⲗ ϩⲓϫⲱⲧⲛ̅ . ⲁⲩⲱ ⲁϥⲙⲟⲩⲧⲉ ⲉⲡⲙⲁ ⲉⲧⲙ̅ⲙⲁⲩ ϫⲉ Ⲅⲁⲗⲅⲁⲗ.  Ⲁⲩⲱ ⲁⲩⲉⲓⲣⲉ ⲛ̅ϭⲓⲛ̅ϣⲏⲣⲉ ⲙ̅ⲡⲒⲥⲣⲁⲏⲗ  ⲙ̅ⲡⲡⲁⲥⲭⲁ ⲛ̅ⲥⲟⲩⲙⲛ̅ⲧⲁϥⲧⲉ ⲙ̅ⲡⲉⲃⲟⲧ ⲙ̅ⲡⲛⲁⲩ ⲛ̅ⲣⲟⲩϩⲉ. ϩⲙ̅ⲡⲥⲁ ⲛⲙ̅ⲙⲁⲛ̅ϩⲱⲧⲡ̅ ⲛ̅Ϩⲓⲉⲣⲓⲭⲱ. ϩⲙ̅ⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ ϩⲛ̅ⲧⲥⲱϣⲉ : Ⲁⲩⲱ ⲁⲩⲟⲩⲱⲙ ⲉⲃⲟⲗ  ϩⲙ̅ⲡⲥⲟⲩⲟ ⲙ̅ⲡⲕⲁϩ ⲛ̅ϩⲉⲛⲑⲁⲃ . ϩⲉⲛⲟⲉⲓⲕ ⲛ̅ⲃⲣ̅ⲣⲉ . ϩⲣⲁⲓ ϩⲙ̅ⲡⲉⲓϩⲟⲟⲩ  ⲁϥⲱϫⲛ̅ ⲛ̅ϭⲓⲡⲙⲁⲛ̅ⲛⲁ . ⲙⲛ̅ⲛⲥⲁⲧⲣⲉⲩⲟⲩⲱⲙ ⲉⲃⲟⲗ ϩⲙ̅ⲡⲉⲥⲟⲩⲟ ⲙ̅ⲡⲕⲁϩ . ⲁⲩⲱ ⲛⲉⲙⲛ̅ⲙⲁⲛⲛⲁ ϣⲟⲟⲡ ⲛ̅ⲛϣⲏⲣⲉ ⲙ̅ⲡⲒⲥⲣⲁⲏⲗ : Ⲁⲩⲱ ⲁⲩϫⲓ ⲛ̅ⲧⲉⲭⲱⲣⲁ ⲛ̅ⲛⲣⲱⲙⲉ ⲛ̅ⲧⲉⲪⲟⲓⲛⲏⲕⲏ ⲛ̅ⲧⲉⲣⲟⲙⲡⲉ ⲉⲧⲙ̅ⲙⲁⲩ. ⲁⲩⲱ ⲁⲥϣⲱⲡⲉ ⲛ̅Ⲓⲏⲥⲟⲩⲥ  ϩⲱⲥ ⲉϥϩⲓⲣⲱⲥ ⲛ̅Ϩⲓⲉⲣⲓⲭⲱ . ⲛ̅ⲧⲉⲣⲉϥϥⲓⲓⲁⲧϥ̅ ⲉϩⲣⲁⲓ ⲁϥⲛⲁⲩ ⲉⲩⲣⲱⲙⲉ ⲉϥⲁϩⲉⲣⲁⲧϥ̅  ⲙ̅ⲡⲉϥⲙ̅ⲧⲟ ⲉⲃⲟⲗ  ⲁⲩⲱ ⲛ̅ⲧⲉⲣⲉⲧⲉϥⲥⲏϥⲉ ⲧⲟⲕⲙ̅  ϩⲉⲛⲧⲉϥϭⲓϫ. Ⲓⲏⲥⲟⲩⲥ ⲇⲉ ⲛⲧⲉⲣϥ̅ϯⲡⲉϥⲟⲩⲟⲓ ⲉϩⲟⲩⲛ ⲉⲣⲁⲧϥ̅ ⲡⲉϫⲁϥ ⲛⲁϥ ϫⲉ ⲉⲕⲏⲡ ⲉⲣⲟⲛ ⲏ ⲛⲅ̅ⲕⲱ ⲉⲛⲉⲧϯ ⲛⲙ̅ⲙⲁⲛ. Ⲛ̅ⲧⲟϥ ⲇⲉ  ⲡⲉϫⲁϥ ⲛⲁϥ ϫⲉ  ⲁⲛⲟⲕ ⲡⲉ  ⲡⲁⲣⲭⲏⲥⲧⲣⲁⲧⲓⲅⲟⲥ  ⲛ̅ⲧϭⲟⲙ ⲙ̅Ⲡϫⲟⲉⲓⲥ ⲛ̅ⲧⲁⲓⲉⲓ ⲧⲉⲛⲟⲩ : Ⲁⲩⲱ ⲛ̅ⲧⲉⲩⲛⲟⲩ Ⲓⲏⲥⲟⲩⲥ ⲁϥⲡⲁϩⲧϥ̅ ⲉϫⲙ̅ⲡⲉϥϩⲟ ⲉϫⲙ̅ⲡⲕⲁϩ ⲁϥⲟⲩⲱϣⲧ̅ . ⲡⲉϫⲁϥ ⲛⲁϥ . ϫⲉ Ⲡϫⲟⲉⲓⲥ ⲟⲩ ⲡⲉⲧⲕ̅ⲟⲩⲁϩⲥⲁϩⲛⲉ ⲙ̅ⲙⲟϥ ⲛⲁⲓ ⲡⲉⲕϩⲙ̅ϩⲁⲗ :  Ⲁⲩⲱ ⲡⲁⲣⲭⲏⲥⲧⲣⲁⲧⲏⲅⲟⲥ  ⲙ̅Ⲡϫⲟⲉⲓⲥ  ⲁϥϣⲁϫⲉ  ⲙⲛ̅Ⲓⲏⲥⲟⲩⲥ ⲉϥϫⲱ  ⲙ̅ⲙⲟⲥ ⲛⲁϥ . ϫⲉ ⲃⲱⲗ ⲉⲃⲟⲗ ⲛ̅ⲛⲉⲧⲟⲟⲩⲉ ⲛ̅ⲛⲉⲕⲟⲩⲉⲣⲏⲧⲉ . ⲡⲙⲁ ⲅⲁⲣ ⲉⲧⲕ̅ⲁϩⲉⲣⲁⲧⲕ̅ ϩⲓϫⲱϥ ⲟⲩⲙⲁ ⲉϥⲟⲩⲁⲁⲃ ⲡⲉ . Ⲓⲏⲥⲟⲩⲥ ⲇⲉ ⲁϥⲉⲓⲣⲉ ϩⲓⲛⲁⲓ :
 
Ⲋ. Ⲁⲩⲱ  Ϩⲓⲉⲣⲓⲭⲱ ⲛⲉⲥϣⲟⲧⲙ̅  ⲁⲩⲱ ⲉⲥⲟⲣϫ . Ⲁⲩⲱ ⲛⲉⲙⲛ̅ⲗⲁⲁⲩ ⲛⲏⲟⲩ ⲉⲃⲟⲗ ⲛ̅ϩⲏⲧⲥ̅. ⲟⲩⲇⲉ ⲛⲉⲙⲛ̅ⲗⲁⲁⲩ ⲃⲱⲕ  ⲉϩⲟⲩⲛ  ⲉⲣⲟⲥ Ⲡϫⲟⲉⲓⲥ ⲇⲉ ⲡⲉϫⲁϥ ⲛ̅Ⲓⲏⲥⲟⲩⲥ ϫⲉ ⲉⲓⲥ ϩⲏⲏⲧⲉ ϯⲛⲁϯ ⲉϩⲣⲁⲓ ⲉⲧⲟⲟⲧⲕ̅ ⲛ̅Ϩⲓⲉⲣⲓⲭⲱ ⲙⲛ̅ⲡⲉⲥⲕⲉⲣ̅ⲣⲟ. ⲉⲧⲛ̅ϩⲏⲧⲥ̅ ⲉⲩⲇⲩⲛⲁⲧⲟⲥ ⲡⲉ  ϩⲛ̅ⲧⲉϥϭⲟⲙ : Ⲛ̅ⲧⲟⲕ ⲇⲉ ⲕⲱ ϩⲓⲣⲱⲥ ⲛ̅ⲛ̅ⲣⲉϥⲙⲓϣⲉ  ⲧⲏⲣⲟⲩ ⲉⲡⲉⲥⲕⲱⲧⲉ. ⲁⲩⲱ ⲉⲧⲉⲧⲛ̅ϣⲁⲛⲥⲁⲗⲡⲓⲍⲉ ϩⲛⲧⲥⲁⲗⲡⲓⲅⲝ . ⲙⲁⲣⲉⲡⲗⲁⲟⲥ ⲧⲏⲣϥ̅ ⲱϣ ⲉⲃⲟⲗ ϩⲓⲟⲩⲥⲟⲡ. Ⲁⲩⲱ ⲉⲩⲱϣ ⲉⲃⲟⲗ ⲛ̅ⲥⲟⲃⲧ ⲛ̅Ϩⲓⲉⲣⲓⲭⲱ ⲥⲉⲛⲁϩⲉ ⲉϩⲣⲁⲓ ⲙⲁⲩⲁⲁⲩ  ⲁⲩⲱ ⲡⲗⲁⲟⲥ ⲧⲏⲣϥ̅  ⲉⲩⲉϯⲡⲉⲩⲟⲩⲟⲓ  ⲛ̅ⲥⲉⲙⲟⲟϣⲉ ⲡⲟⲩⲁ ⲡⲟⲩⲁ ⲉϩⲟⲩⲛ ⲉⲧⲡⲟⲗⲓⲥ : Ⲁⲩⲱ Ⲓⲏⲥⲟⲩⲥ ⲡϣⲏⲣⲉ  ⲛ̅Ⲛⲁⲩⲉ  ⲁϥⲃⲱⲕ ⲉϩⲟⲩⲛ ⲉⲛ̅ⲟⲩⲏⲏⲃ . ⲁϥϣⲁϫⲉ ⲛⲙ̅ⲙⲁⲩ ⲉϥϫⲱ ⲙ̅ⲙⲟⲥ . ϫⲉ  ϩⲱⲛ ⲉⲧⲟⲟⲧϥ̅ ⲙ̅ⲡⲗⲁⲟⲥ ⲉⲧⲣⲉⲩⲃⲱⲕ ϩⲟⲩⲛ ⲛ̅ⲥⲉⲕⲱⲧⲉ ⲉⲧⲡⲟⲗⲓⲥ . ⲁⲩⲱ ⲛ̅ⲣⲉϥⲙⲓϣⲉ ⲙⲁⲣⲟⲩⲙⲟⲟϣⲉ ⲉⲩϩⲏⲕ ⲙ̅ⲡⲙ̅ⲧⲟ ⲉⲃⲟⲗ ⲙ̅Ⲡϫⲟⲉⲓⲥ . ⲁⲩⲱ ⲥⲁϣϥ ⲛ̅ⲟⲩⲏⲏⲃ ⲉⲣⲉⲥⲁϣϥⲉ ⲛ̅ⲥⲁⲗⲡⲓⲅⲝ ⲉⲩⲟⲩⲁⲁⲃ ⲛ̅ⲧⲟⲟⲧⲟⲩ ⲙⲁⲣⲟⲩⲙⲟⲟϣⲉ  ϩⲱⲟⲩ ⲙ̅ⲡⲙ̅ⲧⲟ ⲉⲃⲟⲗ ⲙ̅Ⲡϫⲟⲉⲓⲥ . ⲁⲩⲱ ⲙⲁⲣⲟⲩϯϩⲣⲟⲟⲩ ⲉⲃⲟⲗ ⲙ̅ⲙⲁⲧⲉ . Ⲁⲩⲱ ⲧϭⲓⲃⲱⲧⲟⲥ  ̅ⲛⲇⲓⲁⲑⲏⲕⲏ ⲙ̅Ⲡϫⲟⲉⲓⲥ ⲙⲁⲣⲉⲥⲟⲩⲁϩⲥ̅  ⲛ̅ⲥⲱⲟⲩ : Ⲛ̅ⲣⲉϥⲙⲓϣⲉ ⲇⲉ ⲙⲁⲣⲟⲩⲣ̅ϣⲟⲣⲡ̅  ⲛ̅ⲥⲉⲙⲟⲟϣⲉ ϩⲓⲑⲏ. Ⲁⲩⲱ ⲛ̅ⲟⲩⲏⲏⲃ ⲛⲉⲧⲙⲟⲟϣⲉ  ϩⲓⲡⲁϩⲟⲩ ⲛ̅ⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ ⲙ̅Ⲡϫⲟⲉⲓⲥ  ⲉⲩⲉⲥⲁⲗⲡⲓⲍⲉ  ϩⲱⲱⲟⲩ:  Ⲓⲏⲥⲟⲩⲥ ⲇⲉ  ⲁϥϩⲱⲛ ⲉⲧⲟⲟⲧϥ̅ ⲙ̅ⲡⲗⲁⲟⲥ ⲉϥϫⲱ ⲙ̅ⲙⲟⲥ ⲛⲁⲩ. ϫⲉ ⲙ̅ⲡⲣ̅ⲱϣ ⲉⲃⲟⲗ ⲟⲩⲧⲉ  ⲙ̅ⲡⲣ̅ⲧⲣⲉⲗⲁⲁⲩ ⲥⲱⲧⲙ̅ ⲉϩⲣⲟⲟⲩ ⲛ̅ⲧⲉⲧⲏⲩⲧⲛ̅ ϣⲁⲛⲧϥ̅ⲧⲁⲙⲱⲧⲛ̅ ⲛ̅ⲧⲟϥ ⲉⲡⲉϩⲟⲟⲩ ⲉⲧⲣⲉⲧⲛ̅ⲱϣ ⲉⲃⲟⲗ ⲁⲩⲱ ⲧⲟⲧⲉ ⲧⲉⲧⲛⲁⲱϣ ⲉⲃⲟⲗ. Ⲁⲩⲱ ⲧϭⲓⲃⲱⲧⲟⲥ ⲛ̅ⲧⲇⲓⲁⲑⲏⲕⲏ ⲙ̅ⲡⲛⲟⲩⲧⲉ ⲛ̅ⲧⲉⲣⲉⲥⲕⲱⲧⲉ ⲉⲧⲡⲟⲗⲓⲥ ⲛ̅ⲧⲉⲩⲛⲟⲩ ⲁⲥⲕⲧⲟⲥ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ⲁⲥⲛ̅ⲕⲟⲧⲕ̅  ⲙ̅ⲙⲁⲩ . Ⲁⲩⲱ ⲙ̅ⲡⲉϥⲣⲁⲥⲧⲉ ⲙ̅ⲡⲙⲉϩϩⲟⲟⲩ ⲥⲛⲁⲩ Ⲓⲏⲥⲟⲩⲥ ⲛ̅ⲧⲉⲣⲉϥⲧⲱⲟⲩⲛ ⲛ̅ϩⲧⲟⲟⲩⲉ.  ⲁⲩⲱ ⲛ̅ⲟⲩⲏⲏⲃ  ⲁⲩⲧⲱⲟⲩⲛ  ϩⲁⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ ⲙ̅Ⲡϫⲟⲉⲓⲥ . ⲁⲩⲱ ⲡⲥⲁϣϥ ⲛ̅ⲟⲩⲏⲏⲃ ⲉⲧⲉⲣⲉⲧⲥⲁϣϥⲉ ⲛ̅ⲥⲁⲗⲡⲓⲅⲝ ⲛ̅ⲧⲟⲟⲧⲟⲩ  ⲁⲩⲙⲟⲟϣⲉ ⲛ̅ϣⲟⲣⲡ ⲙ̅ⲡⲙ̅ⲧⲟ ⲉⲃⲟⲗ ⲙ̅Ⲡϫⲟⲉⲓⲥ. ⲁⲩⲱ ⲙⲛ̅ⲛⲥⲱⲟⲩ ⲁⲩⲙⲟⲟϣⲉ ⲛ̅ϭⲓⲛ̅ⲣⲉϥⲙⲓϣⲉ. Ⲡⲕⲉϣⲱϫⲡ̅ ⲇⲉ ⲧⲏⲣϥ̅  ⲙ̅ⲡⲙⲏⲏϣⲉ ⲁⲩⲟⲩⲁϩⲟⲩ ⲛ̅ⲥⲁⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ ⲙ̅Ⲡϫⲟⲉⲓⲥ  ⲛ̅ⲟⲩⲏⲏⲃ ⲇⲉ ⲁⲩⲥⲁⲗⲡⲓⲍⲉ ⲛ̅ⲛⲥⲁⲗⲡⲓⲅⲝ. Ⲁⲩⲱ ⲡⲙⲏⲏϣⲉ ⲧⲏⲣϥ̅ ϩⲓⲟⲩⲥⲟⲡ ⲁⲩⲕⲱⲧⲉ ⲉⲧⲡⲟⲗⲓⲥ ⲛ̅ⲥⲁⲡⲓⲥⲁ  ⲁⲩⲱ ⲛ̅ⲥⲁⲡⲁⲓ . Ⲕⲧⲟⲟⲩ ⲟⲛ ⲉϩⲣⲁⲓ ⲉⲧⲡⲁⲣⲁⲉⲙⲃⲟⲗⲏ . Ⲧⲁⲓ ⲧⲉ ⲑⲉ ⲉⲛⲉⲩⲉⲓⲣⲉ ⲙ̅ⲙⲟⲥ ⲛ̅ⲥⲟⲟⲩ ⲛ̅ϩⲟⲟⲩ:  Ⲁⲩⲱ ϩⲙ̅ⲡⲙⲉϩⲥⲁϣϥ̅ ⲛ̅ϩⲟⲟⲩ  ⲁⲩⲧⲱⲟⲩⲛ  ⲛ̅ϣⲟⲣⲡ  ⲁⲩⲕⲱⲧⲉ  ⲉⲧⲡⲟⲗⲓⲥ ⲛ̅ⲥⲟⲟⲩ ⲛ̅ⲥⲟⲡ . Ϩⲙ̅ⲡⲉϩⲥⲁϣϥ ⲇⲉ ⲛ̅ⲕⲟⲧ ⲛ̅ⲟⲩⲏⲏⲃ ⲁⲩⲥⲁⲗⲡⲓⲍⲉ : Ⲁⲩⲱ ⲡⲉϫⲉⲒⲏⲥⲟⲩⲥ  ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ ϫⲉ ⲱϣ ⲉⲃⲟⲗ ⲉⲙⲁⲧⲉ. ⲁⲠϫⲟⲉⲓⲥ ⲅⲁⲣ ϯ ⲛ̅ⲧⲡⲟⲗⲓⲥ ⲉϩⲣⲁⲓ ⲉⲧⲟⲟⲧⲛ̅ . Ⲁⲩⲱ ⲧⲡⲟⲗⲓⲥ ⲉⲥⲉϣⲱⲡⲉ ⲛ̅ⲁⲛⲁⲑⲉⲙⲁ ⲙ̅Ⲡϫⲟⲉⲓⲥ. Ⲛ̅ⲧⲟⲥ  ⲁⲩⲱ ⲛ̅ⲕⲁ ⲛⲓⲙ ⲉⲧϣⲟⲟⲡ ⲛ̅ϩⲏⲧⲥ̅. ⲉⲧⲣⲉⲩⲱⲡ ⲉⲠϫⲟⲉⲓⲥ ⲛ̅ⲛ̅ϭⲟⲙ Ⲥⲁⲃⲁⲱⲑ. Ⲡⲗⲏⲛ Ϩⲣⲁⲁⲃ ⲧⲡⲟⲣⲛⲏ ⲛⲁϩⲙⲉⲥ ⲛ̅ⲧⲟⲥ ⲙⲛ̅ⲛⲉⲧϩⲙ̅ⲡⲉⲥⲏⲓ ⲧⲏⲣⲟⲩ. ⲉⲃⲟⲗϫⲉ  ⲁⲥϩⲱⲡ ⲛ̅ⲛϥⲁⲓϣⲓⲛⲉ ⲛ̅ⲁⲓ ⲉⲛⲧⲁⲛϫⲟⲟⲩⲥⲉ. Ⲁⲗⲗⲁ ⲛ̅ⲧⲱⲧⲛ̅ ϩⲁⲣⲉϩ ⲉⲣⲱⲧⲛ̅ ⲉⲙⲁⲧⲉ ⲉⲃⲟⲗ ϩⲙ̅ⲡⲁⲛⲁⲑⲉⲙⲁ ⲛ̅ⲧⲉⲧⲛ̅ⲉⲓⲣⲉ ⲛ̅ⲧⲥⲩⲛⲁⲅⲱⲅⲏ ⲧⲏⲣⲥ̅  ⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ  ⲛ̅ⲃⲟⲧⲉ  ⲛ̅ⲧⲉⲧⲛ̅ⲑⲙ̅ⲕⲟ ⲙ̅ⲙⲟⲛ ⲁⲩⲱ ϩⲁⲧ ⲛⲓⲙ ϩⲓⲛⲟⲩⲃ ⲛⲓⲙ ϩⲓϩⲟⲙⲛⲧ ⲛⲓⲙ ϩⲓⲡⲉⲛⲓⲡⲉ ⲛⲓⲙ  ⲉⲩⲉϣⲱⲡⲉ ⲉⲩⲧⲃ̅ⲃⲏⲩ ⲙ̅Ⲡϫⲟⲉⲓⲥ ⲛ̅ⲥⲉϫⲓⲧⲟⲩ ⲉϩⲟⲩⲛ ⲉⲡⲁϩⲟ ⲙ̅Ⲡϫⲟⲉⲓⲥ :  Ⲁⲩⲱ ⲁⲛ̅ⲟⲩⲏⲏⲃ ⲥⲁⲗⲡⲓⲍⲉ ϩⲛ̅ⲛⲉⲩⲥⲁⲗⲡⲓⲅⲝ. Ⲛ̅ⲧⲉⲣⲉⲡⲗⲁⲟⲥ ⲇⲉ ⲥⲱⲧⲙ̅ ⲉⲡϩⲣⲟⲟⲩ ⲛ̅ⲉⲧⲥⲁⲗⲡⲓⲍⲉ. Ⲡⲗⲁⲟⲥ ⲇⲉ ⲧⲏⲣϥ̅ ϩⲓⲟⲩⲥⲟⲡ  ⲁϥⲛⲉϫⲗⲟⲩⲗⲁⲓ ⲉⲃⲟⲗ ϩⲛ̅ⲟⲩⲛⲟϭ ⲛ̅ⲗⲟⲩⲗⲁⲓ ⲉϥⲛⲁϣⲧ . Ⲁⲩⲱ ⲡⲥⲟⲃⲧ ⲛ̅ⲧⲡⲟⲗⲓⲥ ⲧⲏⲣⲥ̅   ⲁϥϩⲉ ⲉϩⲣⲁⲓ ⲉⲡⲕⲱⲧⲉ . Ⲁⲩⲱ ⲡⲗⲁⲟⲥ ⲧⲏⲣϥ̅ ⲁϥϯ ⲙ̅ⲡⲉⲩⲟⲩⲟⲓ ⲡⲟⲩⲁ ⲡⲟⲩⲁ ⲙ̅ⲡⲉϥⲙ̅ⲧⲟ ⲉⲃⲟⲗ ϩⲛ̅ⲟⲩⲥⲟⲟⲩⲧⲛ̅ ⲉϩⲟⲩⲛ ⲉⲧⲡⲟⲗⲓⲥ . Ⲁⲩⲱ  ⲁⲩⲣ̅ϫⲟⲉⲓⲥ ⲉⲧⲡⲟⲗⲓⲥ   ⲁⲩⲁⲁⲥ  ⲛ̅ⲁⲛⲁⲑⲉⲙⲁ. Ⲁⲩⲱ ⲛ̅ⲕⲁ ⲛⲓⲙ ⲉⲧϣⲟⲟⲡ ϩⲛ̅ⲧⲡⲟⲗⲓⲥ ϫⲓⲛⲣⲱⲙⲉ ϣⲁϩⲣⲁⲓ ⲉⲥϩⲓⲙⲉ. ϫⲓⲛⲟⲩⲕⲟⲩⲓ  ϣⲁⲟⲩϩⲗ̅ⲗⲟ. Ⲁⲩⲱ ϣⲁϩⲣⲁⲓ ⲉⲩⲙⲁⲥⲉ  ⲙⲛ̅ⲟⲩⲉⲥⲟⲟⲩ ⲙⲛ̅ⲟⲩϥⲁⲓⲛⲁϩⲃ ⲛⲁⲓ ⲧⲏⲣⲟⲩ ⲁⲩⲙⲟⲟⲩⲧⲟⲩ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ. Ⲁⲩⲱ ⲡϩⲣ̅ϣⲏⲣⲉ ⲥⲛⲁⲩ ⲉⲛⲧⲁⲩⲙⲉϣⲧⲧⲡⲟⲗⲓⲥ . ⲁⲩⲃⲱⲕ ⲉϩⲟⲩⲛ ⲉⲡⲏⲓ ⲛ̅ⲧⲉⲥϩⲓⲙⲉ . ⲁⲩⲉⲓⲛⲉ ⲉⲃⲟⲗ ⲛ̅Ϩⲣⲁⲁⲃ ⲧⲡⲟⲣⲛⲏ  ⲁⲩⲱ ⲡⲉⲥⲓⲉⲱⲧ ⲙⲛ̅ⲧⲉⲥⲙⲁⲁⲩ ⲙⲛ̅ⲛⲉⲥⲥⲛⲏⲩ ⲙⲛ̅ⲧⲉⲥⲣⲁⲓⲧⲉ ⲧⲏⲣⲥ̅ . ⲙⲛ̅ⲛ̅ⲕⲁ ⲛⲓⲙ ⲉⲧϣⲟⲟⲡ ⲛⲁⲥ . ⲁⲩⲧⲁϩⲟⲥ ⲉⲣⲁⲧⲥ̅ ⲙ̅ⲡⲙ̅ⲧⲟ ⲉⲃⲟⲗ ⲛ̅ⲧⲡⲁⲣⲉⲙⲃⲟⲗⲏ ⲙ̅ⲡⲒⲥⲣⲁⲏⲗ ⲁⲩⲱ ⲧⲡⲟⲗⲓⲥ  ⲁⲩϣⲱϥⲉ  ϩⲛ̅ⲟⲩⲕⲣⲱⲙ ⲙⲛ̅ⲛⲉⲧⲛ̅ϩⲏⲧⲥ̅ ⲧⲏⲣⲟⲩ ϣⲁⲧⲛ̅ⲡϩⲁⲧ ⲙⲛ̅ⲡⲛⲟⲩⲃ ⲁⲩⲱ ϩⲟⲙⲛⲧ ⲛⲓⲙ ϩⲓⲃⲉⲛⲓⲡⲉ ⲛⲓⲙ ⲁⲩⲧⲁⲁⲩ ⲉⲧⲣⲉⲩⲉⲛⲧⲟⲩ ⲉϩⲟⲩⲛ ⲉⲡⲁϩⲟ ⲙ̅Ⲡϫⲟⲉⲓⲥ:  Ⲁⲩⲱ Ϩⲣⲁⲁⲃ ⲧⲡⲟⲣⲛⲏ ⲙⲛ̅ⲡⲉⲥⲏⲓ ⲧⲏⲣϥ̅ ⲙⲛ̅ⲡⲉⲥⲉⲓⲱⲧ  ⲁⲒⲏⲥⲟⲩⲥ  ⲧⲁⲛϩⲟⲟⲩ  ⲁⲩⲱ ⲁϥⲧⲣⲉⲩⲟⲩⲟϩ  ϩⲙ̅ⲡⲒⲥⲣⲁⲏⲗ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ. Ⲁⲩⲱ ⲉⲃⲟⲗϫⲉ  Ϩⲣⲁⲁⲃ ⲁⲥϩⲱⲡ ⲛⲉⲛ̅ⲧⲁⲩⲙⲉϣⲧϨⲓⲉⲣⲓⲭⲱ : Ⲁⲩⲱ Ⲓⲏⲥⲟⲩⲥ  ⲁϥⲣ̅ⲁⲛⲁϣ  ⲙ̅ⲡⲉϩⲟⲟⲩ ⲉⲧⲙ̅ⲙⲁⲩ ⲙ̅ⲡⲙ̅ⲧⲟ ⲉⲃⲟⲗ ⲙ̅Ⲡϫⲟⲉⲓⲥ ⲉϥϫⲱ ⲙ̅ⲙⲟⲥ ϫⲉ  ϥⲥϩⲟⲩⲟⲣⲧ ⲛ̅ϭⲓⲡⲣⲱⲙⲉ ⲡⲁⲓ ⲉⲧⲛⲁⲕⲱⲧ ⲛ̅ⲧⲡⲟⲗⲓⲥ ⲉⲧⲙ̅ⲙⲁⲩ . ⲏ ⲛϥ̅ⲥⲙⲛ̅ⲥⲛ̅ⲧⲉ ⲙ̅ⲙⲟⲥ ⲙ̅ⲡⲉϥϣⲣ̅ⲡⲙ̅ⲙⲓⲥⲉ . ⲁⲩⲱ ϩⲙ̅ⲡⲉϥⲕⲟⲩⲓ ⲛ̅ϣⲏⲣⲉ ⲛϥ̅ⲧⲁϩⲟ ⲉⲣⲁⲧⲟⲩ ⲛ̅ⲛⲉⲥⲡⲩⲗⲏ. Ⲁⲩⲱ ⲧⲁⲓ ⲧⲉ ⲑⲉ ⲉⲛⲧⲁϥⲁⲁϥ ⲛ̅ϭⲓⲰⲍⲁ ⲡⲉⲃⲟⲗ  ϩⲛ̅Ⲃⲁⲓⲑⲏⲗ. ϩⲛⲀⲃⲓⲣⲱⲛ ⲡⲉϥϣⲣ̅ⲡⲙ̅ⲙⲓⲥⲉ  ⲁϥⲥⲙⲛ̅ⲥⲛ̅ⲧⲉ  ⲙ̅ⲙⲟⲥ ⲁⲩⲱ ϩⲙ̅ⲕⲟⲩⲓ ⲉⲛⲧⲁϥⲟⲩϫⲁⲓ ⲁϥⲧⲁϩⲟ ⲉⲣⲁⲧⲟⲩ ⲛ̅ⲛⲉⲥⲡⲩⲗⲏ : Ⲁⲩⲱ Ⲡϫⲟⲉⲓⲥ ⲛ̅ⲛⲉϥϣⲟⲟⲡ ⲙⲛ̅Ⲓⲏⲥⲟⲩⲥ . Ⲁⲩⲱ ⲡⲉϥⲣⲁⲛ ⲉϥⲟ ⲛ̅ⲥⲟⲉⲓⲧ ϩⲙ̅ⲡⲕⲁϩ ⲧⲏⲣϥ̅ :
 
Ⲍ̅. Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲣ̅ⲛⲟⲃⲉ ϩⲛ̅ⲟⲩⲛⲟϭ ⲛ̅ⲛⲟⲃⲉ. ⲉⲁⲩϥⲓ ⲁⲩⲗⲱϭⲉ ⲉⲃⲟⲗ ϩⲙ̅ⲡⲁⲛⲁⲑⲉⲙⲁ . ⲁⲩⲱ  ⲁϥϫⲓ ⲛ̅ϭⲓⲀⲭⲁⲣ ⲡϣⲏⲣⲉ  ⲛ̅Ⲭⲁⲣⲙⲓ . ⲡϣⲏⲣⲉ ⲛ̅Ⲍⲁⲙⲃ. ⲡϣⲏⲣⲉ ⲛ̅Ⲍⲁⲣⲁ . ⲉⲃⲟⲗ ϩⲛ̅ⲧⲉⲫⲩⲗⲏ ⲛ̅Ⲓⲟⲩⲇⲁ . Ⲁϥⲕⲱ ⲉⲡⲁϩⲟⲩ ⲉⲃⲟⲗ  ϩⲙ̅ⲡⲁⲛⲁⲑⲉⲙⲁ . Ⲡϫⲟⲉⲓⲥ ⲇⲉ ⲁϥϭⲱⲛⲧ  ϩⲛ̅ⲟⲩⲟⲣⲅⲏ ⲉⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ . ⲁⲩⲱⲒⲓⲏⲥⲟⲩⲥ  ⲡϣⲏⲣⲉ ⲛ̅Ⲛⲁⲩⲏ  ⲁϥϫⲟⲟⲩ ⲛ̅ϩⲉⲛⲣⲱⲙⲉ ⲉϩⲣⲁⲓ ⲉⲄⲁⲓ ⲧⲁⲓ ⲉⲧϣⲟⲟⲡ ϩⲁⲧⲛ̅Ⲃⲁⲓⲑⲏⲗ . ⲉϥϫⲱ ⲙ̅ⲙⲟⲥ ⲛⲁⲩ ϫⲉ ⲃⲱⲕ ⲛ̅ⲧⲉⲧⲛ̅ⲙⲉϣⲧ̅Ⲅⲁⲓ . Ⲁⲩⲱ ⲁⲩⲃⲱⲕ ⲉϩⲣⲁⲓ ⲛ̅ϭⲓⲛ̅ⲣⲱⲙⲉ ⲙ̅ⲡⲒⲥⲣⲁⲏⲗ ⲁⲩⲙⲉϣⲧⲄⲁⲓ . Ⲁⲩⲱ ⲁⲩⲕⲧⲟⲟⲩ ⲉⲣⲁⲧϥ̅ ⲛ̅Ⲓⲏⲥⲟⲩⲥ ⲡⲉϫⲁⲩ ⲛⲁϥ ϫⲉ ⲙ̅ⲡⲣ̅ⲧⲣⲉⲡⲗⲁⲟⲥ ⲧⲏⲣϥ̅ ⲉⲓ ⲉϩⲣⲁⲓ ⲉⲡⲙⲁ ⲉⲧⲙ̅ⲙⲁⲩ ⲁⲗⲗⲁ ϫⲟⲩⲱⲧ ⲛ̅ϣⲉ ⲛ̅ⲣⲱⲙⲉ ⲏ ⲙⲁⲁⲃ ⲛ̅ϣⲉ ⲙⲁⲣⲟⲩⲉⲓ ⲉϩⲣⲁⲓ ⲛ̅ⲥⲉϣⲉϥⲧⲡⲟⲗⲓⲥ . Ⲙ̅ⲡⲣ̅ⲧⲣⲉⲡⲗⲁⲟⲥ ⲧⲏⲣϥ̅ ⲉⲓ ⲉϩⲣⲁⲓ ⲉⲡⲙⲁ ⲉⲧⲙ̅ⲙⲁⲩ . Ⲥⲉⲥⲟⲃⲕ ⲅⲁⲣ ⲛ̅ϭⲓⲛ̅ⲣⲱⲙⲉ ⲛ̅ⲧⲡⲟⲗⲓⲥ . Ⲁⲩⲱ ⲁⲩⲉⲓ ⲉϩⲣⲁⲓ ⲛ̅ϭⲓⲁϣⲙⲛ̅ⲧϣⲟ ⲛ̅ⲣⲱⲙⲉ . Ⲁⲩⲱ ⲁⲩⲡⲱⲧ ϩⲁⲑⲏ ⲛ̅ⲛ̅ⲣⲱⲙⲉ ⲛ̅Ⲅⲁⲓ.  ⲁⲩⲱ ⲁⲩⲙⲟⲩⲟⲩⲧ ⲉⲃⲟⲗ ⲛ̅ϩⲏⲧⲟⲩ ⲛ̅ϭⲓⲛ̅ⲣⲱⲙⲉ ⲛ̅Ⲅⲁⲓ . ⲙ̅ⲙⲁⲁⲃ ⲧⲁⲥⲉ ⲛ̅ⲣⲱⲙⲉ ⲉⲃⲟⲗ ϩⲛ̅ⲛⲣⲱⲙⲉ ⲙ̅ⲡⲒⲥⲣⲁⲏⲗ . Ⲁⲩⲱ ⲁⲩⲡⲱⲧ ⲛ̅ⲥⲱⲟⲩ ϫⲓⲛⲧⲡⲩⲗⲏ  ⲁⲩϩⲓⲟⲩⲉ ⲛ̅ⲥⲱⲟⲩ ϣⲁⲧⲉϩⲓⲏ ⲛ̅ⲉⲓ ⲉϩⲣⲁⲓ  ⲁⲩⲱ  ⲁϥϣⲧⲟⲣⲧⲣ̅  ⲛ̅ϭⲓⲡϩⲏⲧ  ⲙ̅ⲡⲗⲁⲟⲥ. Ⲁϥⲃⲱⲗ ⲉⲃⲟⲗ ⲛ̅ⲑⲉ ⲛ̅ⲟⲩⲙⲟⲟⲩ : Ⲁⲩⲱ Ⲓⲏⲥⲟⲩⲥ  ⲁϥϯⲧⲟⲟⲧϥ̅ ⲛ̅ⲛⲉϥϩⲟⲓⲧⲉ ⲁϥⲡⲁϩⲟⲩ . Ⲁⲩⲱ ⲁϥⲡⲁϩⲧϥ̅ ⲛ̅ϭⲒⲏⲥⲟⲩⲥ  ⲉϫⲙ̅ⲡⲕⲁϩ ⲉϫⲙ̅ⲡⲉϥϩⲟ ⲙ̅ⲡⲙ̅ⲧⲟ ⲉⲃⲟⲗ  ⲙ̅Ⲡϫⲟⲉⲓⲥ ϣⲁⲡⲛⲁⲩ ⲛ̅ⲣⲟⲩϩⲉ . ⲛ̅ⲧⲟϥ ⲁⲩⲱ ⲛⲉⲡⲣⲉⲥⲃⲩⲧⲉⲣⲟⲥ  ⲙ̅ⲡⲒⲥⲣⲁⲏⲗ  ⲁⲩⲱ  ⲁⲩϣⲉϣⲓⲧ ⲉϫⲛ̅ⲛⲉⲩⲁⲡⲏⲩⲉ : Ⲓⲏⲥⲟⲩⲥ ⲇⲉ ⲁϥⲧⲱⲃϩ ⲙ̅Ⲡϫⲟⲉⲓⲥ ⲉϥϫⲱ  ⲙ̅ⲙⲟⲥ . Ϫⲉ ϯⲥⲟⲡⲥ ⲙ̅ⲙⲟⲕ Ⲡϫⲟⲉⲓⲥ ⲉⲧⲃⲉⲟⲩ ⲡⲉⲕϩⲙ̅ϩⲁⲗ ⲉⲧⲉ  ⲁⲛⲟⲕ ⲡⲉ  ⲁϥϫⲓⲟⲟⲣ ⲙ̅ⲡⲉⲓⲗⲁⲟⲥ ⲙ̅ⲡⲒⲟⲣⲇⲁⲛⲏⲥ. ⲉⲧⲁⲁϥ ⲉϩⲣⲁⲓ ⲉⲧⲟⲟⲧϥ̅  ⲙ̅ⲡⲀⲙⲟⲣⲣⲁⲓⲟⲥ ⲉⲧⲣⲉϥϥⲟⲧϥ̅ ⲉⲃⲟⲗ. ⲉⲙⲡⲉⲛϭⲱ ϩⲙ̅ⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ ⲛ̅ⲧⲛ̅ⲟⲩⲟϩ ⲙ̅ⲙⲁⲩ. Ⲁⲩⲱ ⲟⲩ ⲡⲉϯⲛⲁϫⲟⲟⲥ ⲉⲧⲃⲉϫⲉ ⲁⲡⲒⲥⲣⲁⲏⲗ ϭⲱⲧⲡ̅ ⲙ̅ⲡⲙ̅ⲧⲟ ⲉⲃⲟⲗ ⲙ̅ⲡⲉϥϫⲁϫⲉ . Ⲁⲩⲱ ⲡⲉⲬⲁⲛⲁⲛⲁⲓⲟⲥ ⲉϥϣⲁⲛⲥⲱⲧⲙ̅. ⲙⲛ̅ⲛⲉⲧⲟⲩⲏϩ ⲧⲏⲣⲟⲩ ϩⲙ̅ⲡⲕⲁϩ. ⲥⲉⲛⲁⲕⲱⲧⲉ ⲉⲣⲟⲛ ⲛ̅ⲥⲉϥⲟⲧⲛ̅ ⲉⲃⲟⲗ ϩⲓϫⲙ̅ⲡⲕⲁϩ . Ⲁⲩⲱ ⲟⲩ ⲡⲉⲧⲛ̅ⲛⲁⲁⲁϥ ⲉⲧⲃⲉⲡⲉⲕⲛⲟϭ ⲛ̅ⲣⲁⲛ:  Ⲁⲩⲱ Ⲡϫⲟⲉⲓⲥ ⲡⲉϫⲁϥ ⲛ̅Ⲓⲏⲥⲟⲩⲥ ϫⲉ ⲧⲱⲟⲩⲛ . ⲉⲧⲃⲉⲟⲩ ⲛ̅ⲧⲟⲕ ⲁⲕⲡⲁϩⲧⲕ̅ ϩⲓⲛⲁⲓ ⲉⲡⲕⲁϩ ⲉϫⲙ̅ⲡⲉⲕϩⲟ. Ⲁϥⲣ̅ⲛⲟⲃⲉ ⲛ̅ϭⲓⲡⲗⲁⲟⲥ  ⲁⲩⲱ ⲁϥⲡⲁⲣⲁⲃⲁ ⲛ̅ⲧⲇⲓⲁⲑⲏⲕⲏ ⲉⲛⲧⲁⲓⲥⲙⲛ̅ⲧⲥ̅ ⲛⲙ̅ⲙⲁⲩ . Ⲁⲩϥⲓ ⲛ̅ϫⲓⲟⲩⲉ ⲉⲃⲟⲗ ϩⲛ̅ⲡⲁⲛⲁⲑⲉⲙⲁ  ⲁⲩϩⲟⲡϥ̅  ϩⲛ̅ⲛⲉⲩϩⲛⲁⲁⲩ. ⲛ̅ⲥⲉⲛⲁϣϭⲙ̅ϭⲟⲙ  ⲁⲛ ⲛ̅ϭⲓⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ ⲉⲁϩⲉⲣⲁⲧⲟⲩ ⲉⲧⲣⲉⲩϯ ⲙⲛ̅ⲛⲉⲩϫⲁϫⲉ . Ⲥⲉⲛⲁⲕⲧⲟⲟⲩ ⲛ̅ⲥⲉϭⲱⲧⲡ̅ ϩⲓⲑⲏ ⲛ̅ⲛⲉⲩϫⲁϫⲉ. ⲉⲃⲟⲗϫⲉ  ⲁⲩϣⲱⲡⲉ  ⲛ̅ⲃⲟⲧⲉ . Ⲛ̅ϯⲛⲁⲟⲩⲟϩ ⲁⲛ ⲉⲧⲟⲟⲧ ⲉⲧⲣⲁϣⲱⲡⲉ ⲛⲙ̅ⲙⲏⲧⲛ̅. ⲉⲧⲉⲧⲛ̅ϣⲁⲛⲧⲙ̅ϥⲓ ⲛ̅ⲧⲃⲟⲧⲉ ⲉⲃⲟⲗ ϩⲛ̅ⲧⲉⲧⲛ̅ⲙⲏⲧⲉ : Ⲧⲱⲟⲩⲛ ⲛⲅ̅ⲧⲃ̅ⲃⲟ ⲙ̅ⲡⲗⲁⲟⲥ ⲛⲅ̅ϫⲟⲟⲥ ⲉⲧⲣⲉⲩⲧⲃ̅ⲃⲱⲟⲩ ⲛ̅ⲣⲁⲥⲧⲉ.  ϫⲉ  ⲛⲁⲓ ⲉⲧⲉⲣⲉⲠϫⲟⲉⲓⲥ ⲡⲛⲟⲩⲧⲉ ⲙ̅ⲡⲒⲥⲣⲁⲏⲗ ϫⲱ ⲙ̅ⲙⲟⲟⲩ ϫⲉ ⲡⲁⲛⲁⲑⲉⲙⲁ ⲛ̅ϩⲏⲧⲧⲏⲩⲧⲛ̅  ̅ⲛⲧⲉⲧⲛⲁϣϭⲙ̅ϭⲟⲙ ⲁⲛ ⲉⲁϩⲉⲣⲁⲧⲧⲩⲧⲛ̅  ⲙ̅ⲡⲙ̅ⲧⲟ ⲉⲃⲟⲗ ⲛ̅ⲛⲉⲧⲛ̅ϫⲁϫⲉ . ϣⲁⲛⲧⲉⲧⲛ̅ϥⲓ ⲉⲃⲟⲗ ⲙ̅ⲙⲁⲩ ⲙ̅ⲡⲁⲛⲁⲑⲉⲙⲁ ⲉⲃⲟⲗ ϩⲛ̅ⲧⲉⲧⲛ̅ⲙⲏⲧⲉ . Ⲁⲩⲱ ⲉⲧⲉⲧⲛⲉⲥⲟⲩⲱϩ ⲧⲏⲣⲧⲛ̅ ⲉϩⲟⲩⲛ ⲛ̅ϩⲧⲟⲟⲩⲉ ⲕⲁⲧⲁⲫⲩⲗⲏ . ⲁⲩⲱ ⲧⲉⲫⲩⲗⲏ ⲉⲧⲉⲣⲉⲠϫⲟⲉⲓⲥ ⲛⲁⲛⲉϩⲥ̅ ⲉⲃⲟⲗ . ⲉⲧⲉⲧⲛⲉⲧⲁϩⲟⲥ ⲉⲣⲁⲧⲥ̅ ⲕⲁⲧⲁⲇⲏⲙⲟⲥ . Ⲁⲩⲱ ⲡⲇⲏⲙⲟⲥ ⲡⲁⲓ ⲉⲧⲉⲣⲉⲠϫⲟⲉⲓⲥ ⲛⲁⲛⲉϩϥ ⲉⲃⲟⲗ . ⲉⲧⲉⲧⲛⲉⲧⲁϩⲟϥ ⲉⲣⲁⲧϥ̅ ⲕⲁⲧⲁⲏⲓ . Ⲁⲩⲱ ⲡⲏⲓ ⲉⲧⲉⲣⲉⲠϫⲟⲉⲓⲥ ⲛⲁⲛⲉϩϥ ⲉⲃⲟⲗ ⲉⲧⲉⲧⲛⲁⲧⲁϩⲟϥ ⲉⲣⲁⲧϥ̅ ⲕⲁⲧⲁⲣⲱⲙⲉ.  Ⲁⲩⲱ ⲡⲣⲱⲙⲉ  ⲉⲧⲉⲣⲉⲠϫⲟⲉⲓⲥ  ⲛⲁⲛⲉϩϥ ⲉⲃⲟⲗ ⲉⲩⲉⲣⲟⲕϩϥ̅ ϩⲛ̅ⲟⲩⲥⲁⲧⲉ. Ⲁⲩⲱ ⲛ̅ⲕⲁ ⲛⲓⲙ ⲉⲧϣⲟⲟⲡ ⲛⲁϥ ⲉⲃⲟⲗϫⲉ ⲁϥⲡⲁⲣⲁⲃⲁ ⲛ̅ⲧⲇⲓⲁⲑⲏⲕⲏ ⲙ̅Ⲡϫⲟⲉⲓⲥ . Ⲁⲩⲱ ⲁϥⲉⲓⲣⲉ ⲛ̅ⲟⲩⲁⲛⲟⲙⲓⲁ ϩⲙ̅ⲡⲒⲥⲣⲁⲏⲗ. Ⲁⲩⲱ Ⲓⲏⲥⲟⲩⲥ ⲛ̅ⲧⲉⲣϥ̅ϣⲟⲣⲡϥ̅ ⲉϩⲧⲟⲟⲩⲉ . ⲁϥⲧⲁϩⲟ ⲉⲣⲁⲧϥ̅ ⲙ̅ⲡⲗⲁⲟⲥ ⲕⲁⲧⲁⲫⲩⲗⲏ . Ⲁⲩⲱ Ⲡϫⲟⲉⲓⲥ ⲁϥⲛⲟⲩϩⲉ ⲉⲃⲟⲗ ⲛ̅ⲧⲉⲫⲩⲗⲏ ⲛ̅Ⲓⲟⲩⲇⲁ . Ⲁⲩⲱ ⲁϥⲧⲁϩⲟ ⲉⲣⲁⲧⲥ̅  ⲛ̅ⲧⲉⲫⲩⲗⲏ ⲛ̅Ⲓⲟⲩⲇⲁ ⲕⲁⲧⲁⲇⲏⲙⲟⲥ . Ⲁⲡϫⲟⲉⲓⲥ ⲛⲟⲩϩⲉ ⲉⲃⲟⲗ ⲙ̅ⲡⲇⲏⲙⲟⲥ ⲛ̅Ⲍⲁⲣⲁⲓ . Ⲁⲩⲱ ⲁϥⲧⲁϩⲟ ⲉ̅ⲣⲁⲧϥ̅ ⲙⲡⲇⲏⲙⲟⲥ ⲛ̅Ⲍⲁⲣⲁⲓ ⲕⲁⲧⲁⲏⲓ . Ⲁⲩⲱ ⲁⲠϫⲟⲉⲓⲥ ⲛⲟⲩϩⲉ ⲉⲃⲟⲗ ⲙ̅ⲡⲏⲓ ⲛ̅Ⲍⲁⲙⲃⲣⲓ . Ⲁⲩⲱ ⲁϥⲧⲁϩⲟ ⲉⲣⲁⲧϥ̅ ⲙ̅ⲡⲏⲓ ⲛ̅Ⲍⲁⲙⲃⲣⲓ ⲕⲁⲧⲁⲣⲱⲙⲉ . Ⲁⲩⲱ ⲁⲠϫⲟⲉⲓⲥ ⲛⲟⲩϩⲉ ⲉⲃⲟⲗ ⲛ̅Ⲁⲭⲁⲣ ⲡϣⲏⲣⲉ ⲛ̅Ⲭⲁⲣⲙⲓ ⲡϣⲏⲣⲉ ⲛ̅Ⲍⲁⲣⲁ : Ⲁⲩⲱ Ⲓⲏⲥⲟⲩⲥ ⲡⲉϫⲁϥ ⲛ̅Ⲁⲭⲁⲣ ϫⲉ ϯⲉⲟⲟⲩ ⲙ̅ⲡⲛⲟⲩⲧⲉ ⲙ̅ⲡⲟⲟⲩ ⲙ̅ⲡⲒⲥⲣⲁⲏⲗ . ⲛⲅ̅ϯ ⲛ̅ⲉⲝⲟⲙⲟⲗⲟⲅⲏⲥⲓⲥ  ⲙ̅ⲡⲉⲛⲧⲁⲕⲁⲁϥ . Ⲁⲩⲱ ⲛⲅ̅ⲧⲁⲙⲟⲓ ϫⲉ ⲟⲩ ⲡⲉⲛⲧⲁⲕⲁⲁϥ ⲛⲅ̅ⲧⲙ̅ϩⲟⲡϥ̅ ⲉⲣⲟⲓ :  Ⲁⲩⲱ ⲁϥⲟⲩⲱϣⲃ̅  ⲛ̅ϭⲓⲀⲭⲁⲣ ϩⲓⲑⲏ ⲛ̅Ⲓⲏⲥⲟⲩⲥ ⲉϥϫⲱ ⲙ̅ⲙⲟⲥ ϫⲉ ϩⲛ̅ⲟⲩⲙⲉ ⲁⲓⲣ̅ⲛⲟⲃⲉ ⲙ̅ⲡⲙ̅ⲧⲟ ⲉⲃⲟⲗ ⲙ̅Ⲡϫⲟⲉⲓⲥ ⲡⲛⲟⲩⲧⲉ ⲙ̅ⲡⲒⲥⲣⲁⲏⲗ . Ⲉⲓⲥ ⲑⲉ  ⲙⲛ̅ⲑⲉ ⲧⲉ ⲧⲁⲓ ⲉⲛⲧⲁⲓⲁⲁⲥ. Ⲁⲓⲛⲁⲩ ϩⲛ̅ⲧϣⲟⲗⲥ ⲉⲩⲭⲗⲁⲙⲩⲥ ⲉⲛⲁⲛⲟⲩⲥ ⲉⲥⲟ ⲙ̅ⲙⲓⲛⲉ ⲁⲩⲱ ϣⲏⲧ ⲛ̅ⲧⲁⲧⲉⲉⲣⲉ ⲛ̅ϩⲁⲧ . Ⲁⲩⲱ ⲟⲩⲗⲁⲥ  ⲛ̅ⲛⲟⲩⲃ ⲛ̅ⲧⲁⲓⲟⲩ ⲛ̅ⲥⲁⲧⲉⲉⲣⲉ ⲛ̅ϩⲣⲏϣⲉ . Ⲁⲩⲱ ⲛ̅ⲧⲉⲣⲉⲡⲁϩⲏⲧ ⲟⲩⲁϣⲟⲩ ⲁⲓϥⲓⲧⲟⲩ . Ⲁⲩⲱ ⲉⲓⲥ ⲛⲁⲓ ⲥⲉⲗⲏϭ ⲉⲩϩⲏⲡ ϩⲙ̅ⲡⲕⲁϩ ⲛ̅ⲧⲁⲥⲕⲩⲛⲏ . Ⲁⲩⲱ ⲛ̅ϩⲁⲧ ϥⲧⲟⲙⲥ̅ ϩⲁⲣⲟⲟⲩ : Ⲁⲩⲱ Ⲓⲏⲥⲟⲩⲥ  ⲁϥϫⲟⲟⲩ ⲛ̅ϩⲛ̅ϥⲁⲓϣⲓⲛⲉ ⲛ̅ⲥⲱⲟⲩ . Ⲁⲩⲱ ⲁⲩⲡⲱⲧ ⲉϩⲣⲁⲓ ⲉⲧⲉⲥⲕⲩⲛⲏ ⲉⲧⲡⲉⲣⲉⲙⲃⲟⲗⲏ . Ⲁⲩⲱ ⲛⲁⲓ ⲉⲩⲗⲏϭ ϩⲛ̅ⲧⲉⲥⲕⲩⲛⲏ . Ⲁⲩⲱ ⲡϩⲁⲧ ⲉⲛⲉϥϩⲁⲣⲟⲟⲩ . ⲁⲩϥⲓⲧⲟⲩ ⲉⲃⲟⲗ ϩⲛ̅ⲧⲉⲥⲕⲩⲛⲏ ⲁⲩⲛ̅ⲧⲟⲩ ⲉⲣⲁⲧϥ̅ ⲛ̅Ⲓⲏⲥⲟⲩⲥ . Ⲁⲩⲱ ⲉⲣⲁⲧⲟⲩ ⲛ̅ⲛⲉⲡⲣⲉⲥⲃⲩⲧⲉⲣⲟⲥ  ⲙ̅ⲡⲒⲥⲣⲁⲏⲗ . ⲁⲩⲕⲁⲁⲩ ⲉϩⲣⲁⲓ ϩⲓⲑⲏ ⲙ̅Ⲡϫⲟⲉⲓⲥ : Ⲁⲩⲱ Ⲓⲏⲥⲟⲩⲥ ⲁϥϫⲓ ⲛ̅Ⲁⲭⲁⲣ ⲡϣⲏⲣⲉ ⲛ̅Ϩⲁⲣⲙⲉⲓ . ⲡϣⲏⲣⲉ ⲛ̅Ⲍⲁⲙⲃⲣⲓ . ⲡϣⲏⲣⲉ ⲛ̅Ⲍⲁⲣⲁ . ⲁϥⲛ̅ⲧϥ̅ ⲉϩⲣⲁⲓ ⲉⲡⲓⲁⲛⲁϩⲱⲣ . ⲁⲩⲱ ⲛϥ̅ϣⲏⲣⲉ ⲙⲛ̅ⲛⲉϥϣⲉⲉⲣⲉ . ⲁⲩⲱ ⲛⲉϥⲙⲁⲥⲉ ⲙⲛ̅ⲛⲉϥϥⲁⲓⲛⲁϩⲃ . ⲁⲩⲱ ⲛⲉϥⲉⲥⲟⲟⲩ ⲧⲏⲣⲟⲩ . ⲙⲛ̅ⲛ̅ⲕⲁ ⲛⲓⲙ ⲉⲧⲛ̅ⲧⲁϥ . Ⲁⲩⲱ ⲡⲒⲥⲣⲁⲏⲗ ⲧⲏⲣϥ̅ ⲁϥⲉⲓ ⲛⲙ̅ⲙⲁϥ . ⲁϥϫⲓⲧⲟⲩ ⲉϩⲣⲁⲓ ⲉⲀⲙⲉⲕⲁⲭⲱⲣ.  Ⲁⲩⲱ Ⲓⲏⲥⲟⲩⲥ ⲡⲉϫⲁϥ ⲛ̅Ⲁⲭⲁⲣ ϫⲉ ⲉⲧⲃⲉⲟⲩ ⲁⲕϥⲟⲧⲛ̅ ⲉⲃⲟⲗ . ⲉⲣⲉⲠϫⲟⲉⲓⲥ  ϥⲱⲧⲉ ⲙ̅ⲙⲟⲕ ⲉⲃⲟⲗ ϩⲙ̅ⲡⲟⲟⲩ ⲛ̅ϩⲟⲟⲩ. Ⲁⲩⲱ ⲁⲩϩⲓⲱⲛⲉ ⲉⲣⲟϥ  ϩⲛ̅ϩⲉⲛⲱⲛⲉ ⲛ̅ϭⲓⲡⲒⲥⲣⲁⲏⲗ ⲧⲏⲣϥ̅ . Ⲁⲩⲱ ⲁⲩϩⲟⲣϭ̅ ϩⲓϫⲱϥ ⲛ̅ⲟⲩⲛⲟϭ ⲛ̅ⲥⲟⲟⲩⲁϩⲥ̅ ⲛ̅ⲱⲛⲉ : Ⲁⲩⲱ Ⲡϫⲟⲉⲓⲥ ⲁϥϩⲣⲟⲕ ⲉⲃⲟⲗ  ϩⲙ̅ⲡϭⲱⲛⲧ̅ ⲛ̅ⲧⲉϥⲟⲣⲅⲏ. Ⲉⲧⲃⲉⲡⲁⲓ ⲁϥⲙⲟⲩⲧⲉ ⲉⲡⲙⲁ ⲉⲧⲙ̅ⲙⲁⲩ ϫⲉ Ⲁⲙⲉⲕⲁⲭⲱⲣ ϣⲁϩⲁⲓ ⲉⲡⲟⲟⲩ ⲛ̅ϩⲟⲟⲩ :
 
ⲏ̅.  Ⲁⲩⲱ Ⲡϫⲟⲉⲓⲥ  ⲡⲉϫⲁϥ ⲛ̅Ⲓⲏⲥⲟⲩⲥ  ϫⲉ ⲙ̅ⲡⲣ̅ⲣ̅ϩⲟⲧⲉ ⲁⲩⲱ ⲙ̅ⲡⲣ̅ϣⲗⲁϩ ϫⲓ ⲛⲙ̅ⲙⲁⲕ ⲛ̅ⲛⲣⲱⲙⲉ ⲧⲏⲣⲟⲩ ⲛ̅ⲣⲉϥⲙⲓϣⲉ  ⲁⲩⲱ ⲛⲅ̅ⲧⲱⲟⲩⲛ ⲛⲅ̅ⲃⲱⲕ ⲉϩⲣⲁⲓ ⲉⲄⲁⲓ . Ⲉⲓⲥ ϩⲏⲏⲧⲉ  ⲁⲓϯ ⲙ̅ⲡⲉⲥⲣⲟ ⲉϩⲣⲁⲓ ⲉⲧⲟⲟⲧⲕ̅ ⲙⲛ̅ⲧⲉϥⲡⲟⲗⲓⲥ. ⲙⲛ̅ⲡⲉϥⲕⲉⲕⲁϩ . Ⲁⲩⲱ ⲉⲕⲉⲉⲓ ⲛ̅Ⲅⲁⲓ ⲧⲡⲟⲗⲓⲥ ⲛ̅ⲑⲉ ⲉⲛⲧⲁⲕⲁⲁⲥ ⲛ̅Ϩⲓⲉⲣⲓⲭⲱ : Ⲁⲩⲱ ⲧⲉⲥⲙⲛ̅ⲧⲉⲣⲟ ⲙⲛ̅ⲧϣⲱⲗⲥ ⲛ̅ⲛⲧⲃ̅ⲛⲟⲟⲩⲉ ⲉⲕⲉϣⲟⲗⲟⲩ ⲛⲁⲕ. Ⲕⲱ ⲇⲉ ⲛⲁⲕ ⲛ̅ⲟⲩⲙ̅ⲗⲁϩ ⲉϥⲟ ⲛ̅ⲕⲣⲟϥ ⲉⲧⲡⲟⲗⲓⲥ ϩⲓⲡⲉϩⲟⲩ ⲙ̅ⲙⲟⲥ : Ⲁⲩⲱ ⲁϥⲧⲱⲟⲩⲛ ⲛ̅ϭⲓⲒⲏⲥⲟⲩⲥ ⲙⲛ̅ⲡⲗⲁⲟⲥ ⲧⲏⲣϥ̅ ⲛ̅ⲣⲉϥⲙⲓϣⲉ  ϩⲱⲥⲧⲉ ⲉⲧⲣⲉϥⲃⲱⲕ ⲉϩⲣⲁⲓ ⲉⲣⲟⲥ ⲛ̅Ⲅⲁⲓ : Ⲁⲩⲱ Ⲓⲏⲥⲟⲩⲥ  ⲁϥⲥⲱⲧⲙ̅ ⲙ̅ⲙⲁⲁⲃ ⲛ̅ϣⲉ ⲛ̅ⲣⲱⲙⲉ ⲛ̅ϫⲱⲱⲣⲉ  ϩⲛ̅ⲧⲉⲩϭⲟⲙ  ⲁϥϫⲟⲟⲩⲥⲉ ⲛ̅ⲧⲉⲩϣⲏ . Ⲁⲩⲱ ⲁϥϩⲱⲛ ⲉⲧⲟⲟⲧⲟⲩ ⲉϥϫⲱ ⲙ̅ⲙⲟⲩ ⲛⲁⲩ . Ϫⲉ ⲛ̅ⲧⲱⲧⲛ̅ ϣⲱⲡⲉ ⲉⲧⲉⲧⲛ̅ϩⲟⲣⲕ ϩⲓⲡⲁϩⲟⲩ ⲛ̅ⲧⲡⲟⲗⲓⲥ . Ⲙ̅ⲡⲣ̅ⲟⲩⲉ ⲉⲃⲟⲗ ⲙ̅ⲙⲟⲥ ⲉⲙⲁⲧⲉ . ⲛ̅ⲧⲉⲧⲛ̅ϣⲱⲡⲉ ⲧⲏⲣⲧⲛ̅ ⲉⲧⲉⲧⲛ̅ϩⲏⲕ ⲉⲧⲉⲧⲛ̅ⲥⲃ̅ⲧⲱⲧ.  Ⲁⲛⲟⲕ ⲇⲉ ⲙⲛ̅ⲛⲉⲧⲛⲙ̅ⲙⲁⲓ ⲧⲏⲣⲟⲩ ⲉⲛⲉϯⲡⲉⲛⲟⲩⲟⲓ ⲉⲡⲥⲁ ⲛ̅ⲧⲡⲟⲗⲓⲥ. Ⲁⲩⲱ ⲛⲉⲧⲟⲩⲏϩ ϩⲛ̅Ⲅⲁⲓ ⲉⲩϣⲁⲛⲉⲓ ⲉⲃⲟⲗ ⲉⲧⲱⲙⲛ̅ⲧ ⲉⲣⲟⲛ ⲛ̅ⲑⲉ ⲟⲛ ⲛ̅ⲧⲉϩⲟⲩⲉⲓⲧⲉ ⲧⲛ̅ⲛⲁⲡⲱⲧ ϩⲁⲡⲉⲩϩⲟ. Ⲁⲩⲱ ⲉⲩϣⲁⲛⲧⲁⲁⲩ ⲛ̅ⲥⲱⲛ ⲧⲛ̅ⲛⲁⲧⲣⲉⲩⲟⲩⲉ ⲉⲃⲟⲗ ϩⲛ̅ⲧⲡⲟⲗⲓⲥ . Ⲁⲩⲱ ⲥⲉⲛⲁϫⲟⲟⲥ ϫⲉ ⲉⲓⲥ ⲛⲁⲓ ⲥⲉⲡⲏⲧ ϩⲁⲧⲉⲛϩⲏ ⲉⲩϭⲟⲧⲡ ⲛ̅ⲑⲉ ⲟⲛ ⲛ̅ⲧⲉϩⲟⲩⲉⲓⲧⲉ . Ⲛ̅ⲧⲱⲧⲛ̅ ⲇⲉ ⲧⲱⲟⲩⲛⲧⲏⲩⲧⲛ̅ ⲉⲃⲟⲗ ϩⲙ̅ⲡⲙⲁ ⲉⲧⲉⲧⲛ̅ϩⲟⲣⲕ ⲛ̅ϩⲏⲧϥ̅ . ⲛ̅ⲧⲉⲧⲛ̅ϯⲧⲏⲩⲧⲛ̅ ⲉϩⲟⲩⲛ ⲉⲧⲡⲟⲗⲓⲥ. Ⲉⲓⲣⲉ ϩⲓⲛⲁⲓ ⲕⲁⲧⲁⲑⲉ ⲛ̅ⲛⲉⲓϣⲁϫⲉ . Ⲉⲓⲥ  ϩⲏⲏⲧⲉ  ⲁⲓϩⲱⲛ ⲉⲧⲉⲧⲏⲩⲧⲛ̅ . Ⲁⲩⲱ  ⲁϥϫⲟⲟⲩⲥⲉ ⲛ̅ϭⲓⲒⲏⲥⲟⲩⲥ  ⲁⲩⲃⲱⲕ ⲉϩⲣⲁⲓ ⲉⲡⲙⲁ ⲉⲧⲟⲩⲛⲁϩⲟⲣⲕ ⲛ̅ϩⲏⲧϥ̅  ⲁϥϩⲙⲟⲟⲥ ϩⲛ̅ⲧⲙⲏⲧⲉ ⲛ̅Ⲃⲁⲓⲑⲏⲗ . ⲁⲩⲱ ϩⲛ̅ⲧⲙⲏⲧⲉ ⲛ̅Ⲅⲁⲓ ϫⲓⲛⲧⲉⲑⲁⲗⲁⲥⲥⲁ ⲛ̅Ⲅⲁⲓ :  Ⲁⲩⲱ Ⲓⲏⲥⲟⲩⲥ ⲛ̅ⲧⲉⲧⲉϥϣⲟⲣⲡϥ̅ ⲉϩⲧⲟⲟⲩⲉ ⲁϥϭⲙ̅ⲡϣⲓⲛⲉ ⲙ̅ⲡⲗⲁⲟⲥ . Ⲁⲩⲱ ⲁϥⲙⲟⲟϣⲉ ⲉϩⲣⲁⲓ ⲛ̅ⲧⲟϥ ⲙⲛ̅ⲛⲉⲡⲣⲉⲥⲃⲩⲧⲉⲣⲟⲥ  ϩⲓⲑⲏ ⲙ̅ⲡⲗⲁⲟⲥ ⲉⲣⲟⲥ ⲛ̅Ⲅⲁⲓ ⲧⲡⲟⲗⲓⲥ . Ⲁⲩⲱ ⲡⲗⲁⲟⲥ ⲧⲏⲣϥ̅  ⲛ̅ⲣⲉϥⲙⲓϣⲉ ⲁⲩⲃⲱⲕ ⲉϩⲣⲁⲓ ⲛⲙ̅ⲙⲁϥ . Ⲁⲩⲱ ⲛ̅ⲧⲉⲣⲟⲩⲙⲟⲟϣⲉ ⲁⲩⲉⲓ ⲁⲩⲁϩⲉⲣⲁⲧⲟⲩ ⲙ̅ⲡⲙ̅ⲧⲟ ⲉⲃⲟⲗ ⲛ̅ⲧⲡⲟⲗⲓⲥ ⲕⲁⲧⲁⲙⲁ ⲛ̅ϣⲁ  ⲙ̅ⲡⲣⲏ . Ⲁⲩⲱ ⲛⲉⲙⲗⲁϩ ⲉⲧⲟ ⲛ̅ⲕⲣⲟϥ ⲉⲧⲡⲟⲗⲓⲥ  ⲁⲩϭⲱ ϩⲱⲟⲩ ⲙ̅ⲡⲥⲁ ⲛ̅ⲑⲁⲗⲁⲥⲥⲁ . Ⲁⲥϣⲱⲡⲉ ⲇⲉ ⲛ̅ⲧⲉⲣϥ̅ⲛⲁⲩ ⲉⲣⲟⲟⲩ ⲛ̅ϭⲓⲡⲣ̅ⲣⲟ ⲛ̅Ⲅⲁⲓ. ⲁϥϥⲱϭⲉ ⲛ̅ⲧⲉⲩⲛⲟⲩ ⲁϥⲉⲓ ⲉⲃⲟⲗ ⲉⲧⲱⲙⲛ̅ⲧ ⲉⲣⲟⲟⲩ . Ⲁϥⲁϩⲉⲣⲁⲧⲟⲩ ⲉⲣⲟⲟⲩ ⲉⲡⲡⲟⲗⲉⲙⲟⲥ . Ⲛ̅ⲧⲟϥ  ⲁⲩⲱ ⲡⲉϥⲙⲏⲏϣⲉ ⲧⲏⲣϥ̅ ⲉⲧⲛⲙ̅ⲙⲁϥ. Ⲡⲣ̅ⲣⲟ ⲇⲉ ⲛⲉϥⲥⲟⲟⲩⲛ̅ ⲁⲛ ϫⲉ ⲟⲩⲉⲙⲗⲁϩ ⲟ ⲛ̅ⲕⲣⲟϥ ⲉⲣⲟϥ  ϩⲓⲡⲁϩⲟⲩ ⲛ̅ⲧⲡⲟⲗⲓⲥ :  Ⲓⲏⲥⲟⲩⲥ ⲇⲉ ⲛ̅ⲧⲉⲣⲉϥⲛⲁⲩ : Ⲁϥⲛ̅ⲧⲉϥ ⲙⲛ̅ⲡⲒⲥⲣⲁⲏⲗ ⲛ̅ⲧⲉⲩϩⲏ . Ⲁⲩⲱ ⲛ̅ⲣⲱⲙⲉ ⲛ̅Ⲅⲁⲓ ⲁⲩⲧⲁⲁⲩ ⲉⲩⲡⲏⲧ ⲛ̅ⲥⲁⲡⲒⲥⲣⲁⲏⲗ . Ⲁⲩⲱ ⲛ̅ⲧⲟⲟⲩ ⲁⲩⲟⲩⲉ ⲉⲃⲟⲗ ⲛ̅ⲧⲡⲟⲗⲓⲥ ⲉⲙⲡⲉⲟⲩⲁ ⲛ̅ⲟⲩⲱⲧ ϣⲱϫⲡ ϩⲛ̅Ⲅⲁⲓ ⲧⲡⲟⲗⲓⲥ ⲉⲙⲡϥ̅ⲉⲓ ⲉⲃⲟⲗ . Ⲁⲩⲡⲱⲧ ⲛ̅ⲥⲁⲡⲒⲥⲣⲁⲏⲗ  ⲁⲩⲕⲁⲧⲡⲟⲗⲓⲥ ⲉⲃⲟⲗ ⲉⲥⲟⲩⲏⲛ . Ⲁⲩⲱ  ⲁⲩⲟⲩⲱϩ ⲛ̅ⲥⲁⲡⲒⲥⲣⲁⲏⲗ : Ⲁⲩⲱ Ⲡϫⲟⲉⲓⲥ ⲡⲉϫⲁϥ ⲛ̅Ⲓⲏⲥⲟⲩⲥ  ⲥⲟⲩⲧⲛ̅ⲧⲟⲟⲧⲕ̅ ⲉⲃⲟⲗ  ϩⲓⲧⲥⲏϥⲉ ⲉⲧϩⲛ̅ⲧⲉⲕϭⲓϫ ⲉϫⲛ̅Ⲅⲁⲓ ⲧⲡⲟⲗⲓⲥ  ⲁⲓϯ ⲅⲁⲣ ⲛ̅ⲧⲡⲟⲗⲓⲥ ⲉϩⲣⲁⲓ ⲉⲧⲟⲟⲧⲕ̅.  Ⲁⲩⲱ ⲛⲉⲙⲗⲟⲟϩ ⲉⲧⲛ̅ⲕⲣⲟϥ ⲉⲩⲉⲧⲱⲟⲩⲛ ⲉϩⲣⲁⲓ ⲛ̅ⲧⲉⲩⲛⲟⲩ ⲉⲃⲟⲗϩⲙ̅ⲡⲙⲁ ⲉⲧⲟⲩϩⲟⲣⲕ ⲛ̅ϩⲏⲧϥ̅ . Ⲁⲩⲱ Ⲓⲏⲥⲟⲩⲥ ⲁϥⲥⲟⲩⲧⲛ̅ⲧⲟⲟⲧϥ̅ ⲉⲃⲟⲗ ϩⲛ̅ⲧⲉϥⲥⲏϥⲉ ⲉϫⲛ̅Ⲅⲁⲓ ⲧⲡⲟⲗⲓⲥ. Ⲁⲩⲱ ⲛⲉⲙⲗⲟⲟϩ ⲁⲩⲧⲱⲟⲩⲛ ⲉϩⲣⲁⲓ ⲉⲃⲟⲗ ϩⲙ̅ⲡⲙⲁ ⲉⲧⲟⲩϩⲟⲣⲕ ⲛ̅ϩⲏⲧϥ̅ ⲁⲩⲉⲓ ⲉⲃⲟⲗ . ϫⲉ ⲁϥⲥⲟⲩⲧⲛ̅ⲧⲟⲟⲧϥ̅ ⲉⲃⲟⲗ ⲉϫⲛ̅ⲧⲡⲟⲗⲓⲥ  ⲁϥⲧⲁⲁⲩ ⲉϩⲟⲩⲛ ⲉⲧⲡⲟⲗⲓⲥ  ⲁⲩϫⲓⲧⲥ̅ . Ⲁⲩⲱ ⲛ̅ⲧⲉⲩⲛⲟⲩ ⲁⲩϯⲡⲕⲱϩⲧ ⲉⲧⲡⲟⲗⲓⲥ.  Ⲛ̅ⲣⲱⲙⲉ ⲇⲉ ⲛ̅Ⲅⲁⲓ ⲁⲩϭⲱϣⲧ ⲉⲡⲁϩⲟⲩ ⲙ̅ⲙⲱⲟⲩ ⲁⲩⲛⲁⲩ ⲉⲡⲕⲁⲡⲛⲟⲥ ⲛ̅ⲧⲉⲩⲡⲟⲗⲓⲥ ⲉϥⲃⲏⲕ ⲉϩⲣⲁⲓ ⲉⲧⲡⲉ . Ⲁⲩⲱ ⲙ̅ⲡⲟⲩϩⲉ ⲙ̅ⲙⲁⲙ̅ⲡⲱⲧ ⲉⲣⲟϥ ⲉⲡⲓⲥⲁ ⲏ ⲉⲡⲁⲓ : Ⲁⲩⲱ Ⲓⲏⲥⲟⲩⲥ ⲙⲛ̅ⲡⲒⲥⲣⲁⲏⲗ ⲧⲏⲣϥ̅ ⲁⲩⲛⲁⲩ ϫⲉ  ⲁⲛⲉⲙⲗⲟⲟϩ ⲉⲧⲟ ⲛ̅ⲕⲣⲟϥ ϫⲓⲧⲡⲟⲗⲓⲥ . ⲁⲩⲱ ϫⲉ ⲡⲕⲁⲡⲛⲟⲥ ⲛ̅ⲧⲡⲟⲗⲓⲥ ϫⲓⲥⲉ ⲉϩⲣⲁⲓ ⲉⲧⲡⲉ . Ⲁϥⲕⲧⲟϥ ⲛ̅ϭⲓⲒⲏⲥⲟⲩⲥ ⲙⲛ̅ⲛⲉⲧⲛⲙ̅ⲙⲁϥ  ⲁⲩⲡⲁⲧⲁⲥⲥⲉ  ⲛ̅ⲛⲣⲱⲙⲉ ⲛ̅Ⲅⲁⲓ ⲧⲡⲟⲗⲓⲥ . Ⲁⲩⲱ ⲛⲉⲙⲗⲟⲟϩ ⲙ̅ⲡⲒⲥⲣⲁⲏⲗ ⲁⲩⲉⲓ ⲉⲃⲟⲗ ϩⲛ̅ⲧⲡⲟⲗⲓⲥ ⲁⲩⲙⲟⲟϣⲉ ⲉⲣⲟⲟⲩ . Ⲁⲩⲱ ⲛ̅ⲣⲱⲙⲉ ⲛ̅Ⲅⲁⲓ ⲁⲩϣⲱⲡⲉ  ϩⲛ̅ⲧⲙⲏⲧⲉ ⲛ̅ⲧⲡⲁⲣⲉⲙⲃⲟⲗⲏ ⲙ̅ⲡⲒⲥⲣⲁⲏⲗ  ⲉⲣⲉⲛⲁⲓ ⲛ̅ⲥⲁⲛⲁⲓ  ⲙ̅ⲙⲟⲟⲩ. Ⲁⲩⲱ ⲛⲉⲓⲕⲟⲟⲩⲉ ⲛ̅ⲥⲁⲛⲁⲓ ⲙ̅ⲙⲟⲟⲩ ⲁⲩⲱ ⲁⲩϩⲓⲟⲩⲉ ⲛ̅ⲥⲱⲟⲩ ϣⲁⲛⲧⲟⲩⲧⲙ̅ⲕⲁⲗⲁⲁⲩ ⲉⲡⲁϩⲟⲩ ⲉⲧⲣⲉϥⲟⲩϫⲁⲓ  ⲁⲩⲱ ⲛϥ̅ⲡⲱⲧ :  Ⲁⲩⲱ ⲡⲣ̅ⲣⲟ ⲛ̅Ⲅⲁⲓ ⲁⲩϭⲟⲡϥ̅ ⲉϥⲟⲛϩ ⲁⲩⲉⲛⲧϥ̅ ⲉⲣⲁⲧϥ̅  ⲛ̅Ⲓⲏⲥⲟⲩⲥ  ⲁⲩⲱ ⲛ̅ⲧⲉⲣⲟⲩⲟⲩⲱ ⲛ̅ϭⲓⲛ̅ϣⲏⲣⲉ ⲙ̅ⲡⲒⲥⲣⲁⲏⲗ . ⲉⲩⲙⲟⲟⲩⲧ ⲛ̅ⲛⲉⲧϣⲟⲟⲡ ⲧⲏⲣⲟⲩ ϩⲛ̅Ⲅⲁⲓ. ⲛⲉⲧϩⲛ̅ⲧⲥⲱϣⲉ  ⲙⲛ̅ⲛⲉⲧϩⲙ̅ⲡⲧⲟⲟⲩ ⲛ̅ⲧⲉϩⲓⲏ ⲛ̅ⲉⲓ ⲉϩⲣⲁⲓ ⲛ̅ϩⲏⲧⲥ̅ . ⲉⲡⲙⲁ ⲉⲛⲧⲁⲩⲡⲱⲧ ⲛ̅ⲥⲱⲟⲩ ⲛ̅ϩⲏⲧϥ̅ ⲉⲡⲧⲏⲣϥ̅ . Ⲁⲩⲱ ⲁϥⲕⲧⲟϥ ⲛ̅ϭⲓⲡⲒⲥⲣⲁⲏⲗ ⲉϩⲣⲁⲓ ⲉⲄⲁⲓ ⲁⲩⲡⲁⲧⲁⲥⲥⲉ  ⲙ̅ⲙⲟⲥ  ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ :  Ⲁⲩⲱ ⲁⲥϣⲱⲡⲉ ⲛⲉⲛⲧⲁⲩϩⲉ  ϩⲙⲡⲉϩⲟⲟⲩ ⲉⲧⲙ̅ⲙⲁⲩ ϫⲓⲛⲣⲱⲙⲉ ϣⲁⲥϩⲓⲙⲉ  ⲁⲩⲣ̅ⲙⲛ̅ⲧⲥⲛⲟⲟⲩⲥ  ⲛ̅ϣⲟ ⲉⲩⲟⲩⲏϩ ⲧⲏⲣⲟⲩ ϩⲛ̅Ⲅⲁⲓ . ϣⲁⲧⲛ̅ⲛ̅ϣⲟⲗⲥ ⲉⲧϩⲛ̅ⲧⲡⲟⲗⲓⲥ ⲉⲛⲧⲁⲩϣⲟⲗⲟⲩ ⲛⲁⲩ ⲛ̅ϭⲓⲛ̅ϣⲏⲣⲉ ⲙ̅ⲡⲒⲥⲣⲁⲏⲗ.  ⲕⲁⲧⲁⲡⲟⲩⲉϩⲥⲁϩⲛⲉ  ⲙ̅Ⲡϫⲟⲉⲓⲥ ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ  ϩⲱⲛ ⲉⲧⲟⲟⲧϥ̅  ̅ⲛⲒⲏⲥⲟⲩⲥ  ⲁⲩⲱ Ⲓⲏⲥⲟⲩⲥ  ⲁϥⲣⲱⲕϩ  ⲛ̅ⲧⲡⲟⲗⲓⲥ  ϩⲛ̅ⲟⲩⲥⲁⲧⲉ ⲁϥⲁⲁⲥ  ⲛ̅ϫⲁⲓⲉ  ϣⲁⲉⲛⲉϩ . ⲉⲙ̅ⲧⲣⲉⲟⲩⲟϩ ⲛ̅ϩⲏⲧⲥ̅ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ . Ⲁⲩⲱ ⲡⲣ̅ⲣⲟ ⲛ̅Ⲅⲁⲓ ⲁⲩⲁϣⲧϥ̅ ⲉϫⲛ̅ⲟⲩϣⲉ ⲛ̅ⲧⲁⲣ̅ⲥⲛⲁⲩ . Ⲁⲩⲱ ⲛⲉϥⲁϣⲉ ⲉⲡϣⲉ ϣⲁⲡⲛⲁⲩ ⲛ̅ⲣⲟⲩϩⲉ. Ⲁⲩⲱ ⲡⲣⲏ ⲉϥⲛⲁϯ ⲉⲡϩⲱⲧⲡ̅  Ⲓⲏⲥⲟⲩⲥ  ⲁϥⲟⲩⲉϩⲥⲁϩⲛⲉ  ⲉⲟⲩⲉϩⲡⲉϥⲥⲱⲙⲁ ⲉⲡⲉⲥⲏⲧ ϩⲓϫⲙ̅ⲡϣⲉ . ⲁⲩⲱ ⲁϥⲛⲟϫϥ̅ ⲉϩⲣⲁⲓ ⲉⲡⲉϩⲓⲉⲓⲧ ⲁⲩⲕⲱⲧ ⲉϫⲱϥ ⲛ̅ⲟⲩⲛⲟϭ ⲛ̅ⲥⲟⲟⲩϩⲥ̅  ⲛ̅ⲱⲛⲉ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ :
 
Ⲑ̅. Ⲛ̅ⲧⲉⲣⲟⲩⲥⲱⲧⲙ̅ ⲇⲉ ⲛ̅ϭⲓⲛ̅ⲉⲣⲣⲱⲟⲩ ⲛ̅Ⲁⲙⲟⲣⲣⲁⲓⲟⲥ  ⲛⲁⲓ ⲉⲧϩⲓⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ . ⲛⲉⲧϩⲙ̅ⲡⲧⲟⲟⲩ .  ⲁⲩⲱ ⲛⲉⲧϩⲛ̅ⲧⲥⲱϣⲉ . ⲁⲩⲱ ⲛⲉⲧϩⲛ̅ⲧⲡⲁⲣϩⲁⲗⲓⲁ ⲛ̅ⲧⲉⲑⲁⲗⲁⲥⲥⲁ ⲛⲟϭ . ⲁⲩⲱ ⲛⲉⲧϩⲙ̅ⲡⲙⲁ ⲙ̅ⲡⲖⲓⲃⲁⲛⲟⲥ . ⲁⲩⲱ ⲛ̅Ⲭⲉⲧⲧⲁⲓⲟⲥ. ⲙⲛ̅ⲛⲉⲬⲁⲛⲁⲛⲁⲓⲟⲥ . ⲁⲩⲱ ⲛⲉⲪⲉⲣⲉⲍⲁⲓⲟⲥ . ⲙⲛ̅ⲛⲈⲩϩⲁⲓⲟⲥ ⲁⲩⲱ ⲛⲀⲙⲟⲣⲁⲓⲟⲥ . ⲙⲛ̅ⲛⲄⲉⲣⲅⲉⲍⲁⲓⲟⲥ . ⲁⲩⲱ ⲛⲓⲈⲃⲟⲩⲥⲁⲓⲟⲥ. ⲁⲩⲥⲟⲟⲩϩ ⲉⲛⲉⲩⲉⲣⲏⲩ ⲧⲣⲉⲩⲣ̅ⲡⲟⲗⲉⲙⲟⲥ  ⲙⲛ̅Ⲓⲏⲥⲟⲩⲥ  ⲁⲩⲱ ⲙⲛ̅ⲡⲒⲥⲣⲁⲏⲗ ⲧⲏⲣϥ̅ . Ⲧⲟⲧⲉ Ⲓⲏⲥⲟⲩⲥ ⲁϥⲕⲱⲧ ⲛ̅ⲟⲩⲑⲩⲥⲓⲁⲥⲧⲏⲣⲓⲟⲛ  ⲙ̅Ⲡϫⲟⲉⲓⲥ ⲡⲛⲟⲩⲧⲉ  ⲙ̅ⲡⲒⲥⲣⲁⲏⲗ  ϩⲙ̅ⲡⲧⲟⲟⲩ ⲛ̅Ⲅⲁⲓⲃⲁⲗ. ⲕⲁⲧⲁⲑⲉ ⲉⲛⲧⲁϥϩⲱⲛ ⲛ̅ϭⲓⲘⲱⲟⲩⲥⲏⲥ ⲡϩⲙ̅ϩⲁⲗ ⲙ̅Ⲡϫⲟⲉⲓⲥ ⲉⲧⲟⲟⲧⲟⲩ ⲉⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲕⲁⲧⲁⲡⲉⲧⲥⲏϩ ϩⲙ̅ⲡⲛⲟⲙⲟⲥ ⲙ̅Ⲙⲱⲟⲩⲥⲏⲥ . ⲉⲕⲱⲧ ⲛ̅ⲟⲩⲑⲩⲥⲓⲁⲥⲧⲉⲣⲓⲟⲛ ϩⲛ̅ϩⲉⲛⲱⲛⲉ ⲉⲩⲟⲩⲟϫ ⲉⲙⲡⲟⲩϫⲉⲡⲉⲛⲓⲡⲉ ⲉⲣⲟⲟⲩ . Ⲁⲩⲱ ⲁϥⲧⲁⲗⲟ ⲉϫⲱϥ ⲛ̅ⲟⲩϭⲗⲓⲗ ⲙ̅ⲙⲁⲩ ⲙ̅Ⲡϫⲟⲉⲓⲥ ⲁⲩⲱ ⲟⲩⲑⲩⲥⲓⲁ ⲛ̅ⲟⲩϫⲁⲓ : Ⲁⲩⲱ ⲁⲒⲏⲥⲟⲩⲥ ⲥϩⲁⲓ ⲉϫⲛ̅ⲛⲱⲛⲉ ⲙ̅ⲡⲆⲉⲩⲧⲉⲣⲟⲛⲟⲙⲓⲟⲛ ⲙ̅Ⲙⲱⲟⲩⲥⲏⲥ . ⲉⲛⲧⲁϥⲥⲁϩϥ  ⲙ̅ⲡⲙ̅ⲧⲟ ⲉⲃⲟⲗ ⲛ̅ⲛϣⲏⲣⲉ ⲙ̅ⲡⲒⲥⲣⲁⲏⲗ . Ⲁⲩⲱ ⲡⲒⲥⲣⲁⲏⲗ ⲧⲏⲣϥ̅ ⲙⲛ̅ⲛⲉⲩⲡⲣⲉⲥⲃⲩⲧⲉⲣⲟⲥ . ⲁⲩⲱ ⲛⲉⲩⲁⲣⲭⲱⲛ . ⲁⲩⲱ ⲛⲉⲩⲅⲣⲁⲙⲙⲁⲧⲉⲩⲥ ⲛⲉⲩⲙⲟⲟϣⲉ ⲛ̅ⲥⲁⲡⲓⲥⲁ  ⲁⲩⲱ ⲛ̅ⲥⲁⲡⲁⲓ ⲛ̅ⲧϭⲓⲃⲟⲧⲟⲥ  ϩⲓϩⲏ ⲙ̅ⲙⲟⲥ  ⲁⲩⲱ ⲛ̅ⲟⲩⲏⲏⲃ ⲙⲛ̅ⲛ̅ⲗⲉⲩⲉⲓⲧⲏⲥ . Ⲁⲩⲧⲱⲟⲩⲛ ϩⲁⲧϭⲓⲃⲱⲧⲟⲥ  ⲛ̅ⲧⲇⲓⲁⲑⲏⲕⲏ  ̅ⲙⲠϫⲟⲉⲓⲥ . ⲁⲩⲱ ⲡⲉⲡⲣⲟⲥⲏⲗⲩⲧⲟⲥ ⲙⲛ̅ⲡⲣⲱⲙⲉ ⲙ̅ⲡⲕⲁϩ. ⲧⲉⲩⲡⲁϣⲉ ⲛⲉⲥϩⲏⲛ ⲉⲡⲧⲟⲟⲩ ⲛ̅Ⲅⲁⲣⲁⲍⲉⲓⲛ . Ⲁⲩⲱ ⲛⲉⲥϩⲏⲛ ⲉⲡⲧⲟⲟⲩ ⲛ̅Ⲅⲁⲓⲃⲁⲗ . ⲕⲁⲧⲁⲑⲉ ⲉⲛⲧⲁϥϩⲱⲛ ⲛ̅ϭⲓⲘⲱⲟⲩⲥⲏⲥ ⲡϩⲙ̅ϩⲁⲗ ⲙ̅Ⲡϫⲟⲉⲓⲥ ⲉⲥⲙⲟⲩ ⲉⲡⲗⲁⲟⲥ  ⲛ̅ϣⲱⲣⲡ̅ : Ⲁⲩⲱ ⲙⲛ̅ⲛⲥⲁⲛⲁⲓ ⲧⲁⲓ ⲧⲉ ⲑⲉ ⲉⲛⲧⲁⲒⲏⲥⲟⲩⲥ ⲱϣ ⲛ̅ⲛ̅ϣⲁϫⲉ  ⲙ̅ⲡⲉⲓⲛⲟⲙⲟⲥ ⲛ̅ⲛⲉⲥⲙⲟⲩ ⲙⲛ̅ⲛ̅ⲥⲁϩⲟⲩ . ⲕⲁⲧⲁⲛⲉⲧⲥⲏϩ ⲧⲏⲣⲟⲩ ϩⲙ̅ⲡϫⲱⲱⲙⲉ ⲙ̅ⲡⲛⲟⲙⲟⲥ ⲙ̅Ⲙⲱⲟⲩⲥⲏⲥ.  ⲉⲙⲛ̅ϣⲁϫⲉ ⲉⲃⲟⲗ ϩⲛ̅ⲛⲉⲛⲧⲁϥϩⲱⲛ ⲙ̅ⲙⲱⲟⲩ ⲧⲏⲣⲟⲩ ⲛϭⲓⲘⲱⲟⲩⲥⲏⲥ ⲉⲧⲟⲟⲧϥ̅  ⲛ̅Ⲓⲏⲥⲟⲩⲥ ⲉⲙⲡⲉⲒⲏⲥⲟⲩⲥ ⲟϣϥ̅ ⲉⲙ̅ⲙⲁⲁϫⲉ ⲛ̅ⲧⲉⲕⲕⲗⲏⲥⲓⲁ ⲧⲏⲣⲥ̅  ⲛ̅ⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ . ⲉⲛϩⲟⲟⲩⲧ ⲙⲛ̅ⲛⲉϩⲓⲟⲙⲉ . ⲁⲩⲱ ⲉⲛ̅ϣⲏⲣⲉ ϣⲏⲙ . ⲙⲛ̅ⲛⲉⲡⲣⲟⲥⲏⲗⲩⲧⲟⲥ ⲉⲧⲙⲟⲟϣⲉ ⲙⲛ̅ⲡⲒⲥⲣⲁⲏⲗ. Ⲁⲩⲱ ⲛⲉⲧⲟⲩⲏϩ  ϩⲛ̅Ⲅⲁⲃⲁⲱⲛ  ⲧⲡⲟⲗⲓⲥ  ⲁⲩⲥⲱⲧⲙ̅ ⲉϩⲱⲃ ⲛⲓⲙ ⲉⲛⲧⲁϥⲁⲁⲩ ⲛ̅ϭⲓⲠϫⲟⲉⲓⲥ  ⲛ̅Ϩⲓⲉⲣⲓⲭⲱ ⲙⲛ̅Ⲅⲁⲓ . Ⲁⲩⲱ ⲛ̅ⲧⲟⲟⲩ ⲁⲩⲉⲓⲣⲉ ⲛ̅ⲟⲩⲥⲙⲟⲧ  ϩⲛ̅ⲟⲩⲙⲛ̅ⲧⲕⲣⲟϥ . Ⲁⲩⲧⲱⲟⲩⲛ ⲁⲩⲧⲁⲙⲓⲟ  ⲛ̅ϩⲛ̅ⲥⲟⲟⲩ ⲉⲁⲩⲥⲃ̅ⲧⲱⲧⲟⲩ . Ⲁⲩⲱ  ⲁⲩϫⲓ ⲛ̅ϩⲛ̅ⲥⲟⲟⲕ ⲛⲁⲥ ⲉⲁⲩⲧⲁⲗⲟⲟⲩ ⲉϫⲛ̅ⲛⲉⲩⲛⲁϩⲃ̅ . ⲁⲩⲱ ϩⲉⲛϩⲱⲧ ⲛ̅ⲁⲥ ⲉⲁⲩϩⲓⲧⲉ . ⲁⲩⲱ ⲁⲩϩⲣⲏⲥⲉ ⲁⲩⲙⲁϩⲟⲩ ⲛ̅ⲛ̅ⲏⲣⲡ̅ ⲁⲩⲙⲟⲣⲟⲩ . Ⲁⲩⲱ ⲛ̅ϭⲟⲡ ⲛ̅ⲛⲉⲩⲧⲟⲟⲩⲉ ⲉⲧⲟⲧϩ ⲉⲣⲁⲧⲟⲩ.  ⲙⲛ̅ⲛⲉⲩⲕⲉⲥⲁⲛⲇⲁⲗⲓⲟⲛ ⲉⲁⲩⲣ̅ⲡⲗ̅ϭⲉ . ⲉⲁϩⲓⲗⲁⲧⲃⲥ̅ ⲉⲣⲟⲟⲩ ϩⲛ̅ⲛⲉⲩⲟⲩⲉⲣⲏⲧⲉ . ⲁⲩⲱ ⲛⲉⲩϩⲟⲓⲧⲉ ⲉⲧϩⲓⲟⲟⲩ ⲉⲩⲗⲁϩⲙ̅ ⲁⲩⲱ ⲉⲩⲟ ⲙ̅ⲡⲗ̅ϭⲉ. ⲁⲩⲱ ⲛⲉⲩⲟⲉⲓⲕ ⲉⲛⲧⲁⲩⲧⲁⲙⲓⲟⲟⲩ. ⲉⲩϣⲟⲩⲱⲟⲩ  ⲁⲩⲱ ⲉⲁⲩⲣ̅ϫⲟⲟⲗⲉⲥ. Ⲁⲩⲧⲱⲟⲩⲛ  ⲁⲩⲉⲓ ⲉⲣⲁⲧϥ̅ ⲛ̅Ⲓⲏⲥⲟⲩⲥ  ⲉⲧⲡⲁⲣⲁⲙⲃⲟⲗⲏ  ⲙ̅ⲡⲒⲥⲣⲁⲏⲗ ⲉϩⲣⲁⲓ ⲉⲄⲁⲗⲅⲁⲗⲁ . ⲁⲩⲱ ⲡⲉϫⲁⲩ ⲉϩⲟⲩⲛ ϩⲛ̅Ⲓⲏⲥⲟⲩⲥ  ⲙⲛ̅ⲡⲒⲥⲣⲁⲏⲗ ϫⲉ ⲛ̅ⲧⲁⲛⲉⲓ ⲉⲃⲟⲗ ϩⲛ̅ⲟⲩⲕⲁϩ ⲉϥⲟⲩⲏⲩ . Ⲧⲉⲛⲟⲩ ϭⲉ ⲥⲙⲓⲛⲉ ⲛⲙ̅ⲙⲁⲛ ⲛ̅ⲟⲩⲇⲓⲁⲑⲏⲕⲏ :  Ⲁⲩⲱ ⲡⲉϫⲉⲡⲒⲥⲣⲁⲏⲗ ⲙ̅ⲡⲈⲭⲟⲣⲁⲓⲟⲥ . ϫⲉ ϭⲱϣⲧ ⲙⲉϣⲁⲕ ⲕϩⲏⲛ ⲉⲣⲟⲓ . Ⲁⲩⲱ ⲛ̅ⲁϣ ⲛ̅ϩⲉ ϯⲛⲁⲥⲙⲓⲛⲉ ⲛⲙ̅ⲙⲁⲕ ⲛ̅ⲟⲩⲇⲓⲁⲏⲕⲏ . Ⲡⲉϫⲁⲩ ⲉϩⲟⲩⲛ ⲛ̅Ⲓⲏⲥⲟⲩⲥ ϫⲉ ⲁⲛⲟⲛ ⲛⲉⲕϩⲙ̅ϩⲁⲗ . Ⲁⲩⲱ ⲡⲉϫⲉⲒⲏⲥⲟⲩⲥ ⲛⲁⲩ ϫⲉ ⲉⲧⲉⲧⲛ̅ϩⲉⲛⲉⲃⲟⲗ  ⲧⲱⲛ . ⲁⲩⲱ ⲉⲛⲧⲁⲧⲉⲧⲛ̅ⲉⲓ ⲧⲱⲛ : Ⲡⲉϫⲁⲩ ⲛⲁϥ ϫⲉ ⲁⲛⲟⲛ ⲛⲉⲕϩⲙϩⲁⲗ ⲉⲛⲧⲁⲛⲉⲓ  ϩⲙ̅ⲡⲣⲁⲛ ⲙ̅Ⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲃⲟⲗ  ϩⲛ̅ⲟⲩⲕⲁϩ ⲉϥⲟⲩⲏⲩ ⲉⲙⲁⲧⲉ Ⲁⲛⲥⲱⲧⲙ̅ ⲅⲁⲣ ⲉⲡⲣⲁⲛ ⲙ̅Ⲡϫⲟⲉⲓⲥ ⲡⲉⲕⲛⲟⲩⲧⲉ.  ⲁⲩⲱ ⲛⲉⲛⲧⲁϥⲁⲁⲩ ⲛ̅Ⲕⲏⲙⲉ ⲙⲛ̅ⲛⲉⲛⲧⲁϥⲁⲁⲩ ⲙ̅ⲡⲣ̅ⲣⲟ ⲥⲛⲁⲩ ⲛ̅Ⲁⲙⲟⲣⲣⲁⲓⲟⲥ . ⲛⲁⲓ ⲉⲛⲉⲩϩⲓⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ . Ⲥⲏⲱⲛ ⲡⲣ̅ⲣⲟ ⲛ̅Ⲥⲉⲃⲱⲛ ⲁⲩⲱ Ⲱⲅ ⲡⲣ̅ⲣⲟ ⲛ̅ⲧⲂⲁⲥⲁⲛ ⲡⲁⲓ ⲉⲧϥ̅ⲟⲩⲏϩ ϩⲛ̅Ⲁⲥⲧⲁⲣⲱⲑ . ⲙⲛ̅Ϩⲉⲇⲣⲁⲉⲓⲛ.  ⲁⲩⲱ ⲛⲉⲛⲛⲟϭ ⲙⲛ̅ⲛⲉⲧⲟⲩⲏϩ ⲧⲏⲣⲟⲩ ϩⲛ̅ⲛⲉⲛⲕⲁϩ  ⲁⲩⲕⲟⲧⲟⲩ ⲉⲣⲟⲛ  ⲉⲩϫⲱ ⲙ̅ⲙⲟⲥ  ϫⲉ ϫⲓ ⲛⲙ̅ⲙⲏⲧⲙ̅ ⲛ̅ϩⲉⲛⲟⲉⲓⲕ ⲉⲧⲉϩⲓⲏ. ⲛ̅ⲧⲉⲧⲛ̅ⲙⲟⲟϣⲉ ⲛ̅ⲧⲉⲧⲛ̅ⲃⲱⲕ ⲉⲣⲁⲧϥ̅ . ⲛ̅ⲧⲉⲧⲛ̅ϫⲟⲟⲥ ⲛⲁϥ  ϫⲉ ⲁⲛⲟⲛ ⲛⲉⲕϩⲙ̅ϩⲁⲗ. Ⲧⲉⲛⲟⲩ ϭⲉ ⲥⲙⲓⲛⲉ ⲛⲙ̅ⲙⲁⲛ ⲛ̅ⲟⲩⲇⲓⲁⲑⲏⲕⲏ . Ⲛⲉⲓⲟⲉⲓⲕ ⲁⲛ̅ⲛⲧⲟⲩ ⲉⲃⲟⲗ ⲛⲙ̅ⲙⲁⲛ ⲉⲩϩⲏⲙ . ϫⲓⲛⲡⲉϩⲟⲟⲩ ⲉⲛⲧⲁⲛⲙⲟⲟϣⲉ ⲉⲉⲓ ϣⲁⲣⲱⲧⲛ̅. Ⲧⲉⲛⲟⲩ ϭⲉ  ⲁⲩϣⲟⲟⲩⲉ  ⲁⲩⲱ  ⲁⲩϣⲱⲡⲉ ⲉⲩϣⲏϥ ⲉⲃⲟⲗ  ⲙ̅ⲡⲱⲥⲕ ⲛ̅ⲧⲉϩⲓⲏ. Ⲁⲩⲱ ⲛⲉⲓϩⲱⲧ ⲛ̅ⲏⲣⲡ̅ ⲁⲛⲙⲁϩⲟⲩ ⲉⲩⲟ ⲙ̅ⲃⲣ̅ⲣⲉ. Ⲁⲩⲱ ⲛⲁⲓ ⲁⲩⲡⲱϩ ⲉⲃⲟⲗ ϩⲙ̅ⲡⲱⲥⲕ ⲉⲧⲁϥⲧⲁϩⲟⲛ . Ⲛⲉⲛϩⲟⲉⲓⲧⲉ  ⲙⲛ̅ⲛⲕⲉϩⲧⲟⲟⲩⲉ  ⲁⲩϩⲓⲧⲉ  ⲁⲩⲣ̅ⲡⲗ̅ϭⲉ ϩⲓⲱⲱⲛ  ⲉⲃⲟⲗ ϩⲛ̅ⲧⲉϩⲓⲏ ⲉⲧⲟⲩⲏⲩ ⲉⲙⲁⲧⲉ : Ⲛ̅ⲁⲣⲭⲱⲛ ⲇⲉ ⲁⲩϫⲓ ⲛ̅ⲧⲟⲟⲧⲟⲩ ⲛ̅ⲛⲉⲩⲟⲉⲓⲕ ⲉⲙⲡⲟⲩϫⲛⲉⲠϫⲟⲉⲓⲥ ⲛ̅ϣⲟⲣⲡ.  Ⲁⲩⲱ Ⲓⲏⲥⲟⲩⲥ ⲁϥⲉⲓⲣⲉ ⲛⲙ̅ⲙⲟⲟⲩ ⲛ̅ⲟⲩⲉⲓⲣⲏⲛⲏ . Ⲁⲩⲱ ⲁⲩⲥⲙⲓⲛⲉ ⲛⲙ̅ⲙⲁⲩ ⲛ̅ⲟⲩⲇⲓⲁⲑⲏⲕⲏ ⲉⲧⲟⲩϫⲟⲟⲩ . Ⲁⲩⲱ ⲁⲩⲣ̅ⲁⲛⲁϣ ⲛⲁⲩ ⲛ̅ϭⲓⲛ̅ⲁⲣⲭⲱⲛ ⲛ̅ⲧⲥⲩⲛⲁⲅⲱⲅⲏ : Ⲁⲩⲱ ⲁⲥϣⲱⲡⲉ ⲙⲛ̅ⲛⲥⲁ ϣⲟⲙⲛ̅ⲧ ⲛ̅ϩⲟⲟⲩ . ⲙⲛ̅ⲛⲥⲁ ⲛ̅ⲥⲉⲥⲙⲓⲛⲉ ⲛⲙ̅ⲙⲟⲟⲩ ⲛ̅ⲧⲇⲓⲁⲑⲏⲕⲏ . ⲁⲩⲥⲱⲧⲙ̅ ϫⲉ ⲛ̅ⲥⲉⲟⲩⲏⲩ ⲙ̅ⲙⲟⲟⲩ ⲁⲛ ⲁⲩⲱ ϫⲉ ⲥⲉϩⲏⲛ ⲉⲣⲟⲟⲩ  : Ⲛ̅ϣⲏⲣⲉ ⲇⲉ ⲙ̅ⲡⲒⲥⲣⲁⲏⲗ ⲁⲩⲧⲱⲟⲩⲛ  ⲁⲩⲉⲓ ⲉⲃⲟⲗ ⲉⲛⲉⲩⲡⲟⲗⲓⲥ. ⲛⲉⲩⲡⲟⲗⲓⲥ ϫⲉ ⲛⲉ Ⲅⲁⲃⲁⲱⲛ . ⲙⲛ̅Ⲅⲉⲫⲓⲣⲁ . ⲙⲛ̅Ⲃⲉⲏⲣⲱⲑⲁ . ⲁⲩⲱ ⲧⲡⲟⲗⲓⲥ Ⲉⲓⲁⲣⲉⲓⲙ . ⲛ̅ⲛⲉⲩⲡⲟⲗⲉⲙⲟⲥ ⲛⲙ̅ⲙⲁⲩ ⲛ̅ϭⲓⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ ⲉⲃⲟⲗϫⲉ ⲛ̅ⲁⲣⲭⲱⲛ ⲧⲏⲣⲟⲩ ⲁⲩⲱⲣⲕ̅ ⲛⲁⲩ ⲙ̅Ⲡϫⲟⲉⲓⲥ  ⲡⲛⲟⲩⲧⲉ  ⲙ̅ⲡⲒⲥⲣⲁⲏⲗ . Ⲁⲩⲱ ⲁⲥⲕⲣⲙ̅ⲣⲙ̅ ⲛ̅ϭⲓⲧⲥⲩⲛⲁⲅⲱⲅⲏ ⲧⲏⲣⲥ̅ ⲉϫⲛ̅ⲛ̅ⲁⲣⲭⲱⲛ . Ⲁⲩⲱ ⲡⲉϫⲁⲩ ⲛ̅ϭⲓⲛ̅ⲁⲣⲭⲱⲛ ⲧⲏⲣⲟⲩ ⲛ̅ⲧⲥⲩⲛⲁⲅⲱⲅⲏ  ϫⲉ ⲁⲛⲟⲛ ⲁⲛⲱⲣⲕ̅ ⲛⲁⲩ ⲙ̅Ⲡϫⲟⲉⲓⲥ ⲡⲛⲟⲩⲧⲉ  ⲙ̅ⲡⲒⲥⲣⲁⲏⲗ. Ⲧⲉⲛⲟⲩ ϭⲉ  ⲛ̅ⲧⲛ̅ⲛⲁϭⲙ̅ϭⲟⲙ   ⲁⲛ ⲉϫⲱϩ ⲉⲣⲟⲟⲩ.  Ⲁⲗⲗⲁ ⲡⲁⲓ ⲧⲛ̅ⲛⲁⲁⲁϥ ⲛⲁⲩ ⲉϩⲁⲣⲉϩ ⲉⲣⲟⲟⲩ.  ⲁⲩⲱ ⲧⲛ̅ⲛⲁⲛⲁϩⲙⲟⲩ. ⲏ ⲧⲉⲧⲙ̅ⲟⲣⲅⲏ  ϣⲱⲡⲉ  ϩⲓϫⲱⲛ ⲉⲧⲃⲉⲡⲁⲛⲁϣ ⲉⲛⲧⲁⲛⲁⲁϥ ⲛⲁⲩ ⲉⲩⲟⲩϫⲁⲓ . ⲁⲩⲱ ⲉⲩϣⲱⲡⲉ ⲛ̅ⲣⲉϥⲡⲉϩϣⲉ  ⲁⲩⲱ ⲉⲩⲙⲉϩⲙⲟⲟⲩ ⲛ̅ⲧⲥⲩⲛⲁⲅⲱⲅⲏ ⲧⲏⲣⲥ̅ . Ⲁⲩⲱ ⲁⲩⲉⲓⲣⲉ ⲛ̅ⲧⲥⲩⲛⲁⲅⲱⲅⲏ ⲧⲏⲣⲥ̅ ⲕⲁⲧⲁⲑⲉ ⲉⲛⲧⲁⲛ̅ⲁⲣⲭⲱⲛ ϫⲟⲟⲥ ⲛⲁⲩ : Ⲁⲩⲱ Ⲓⲏⲥⲟⲩⲥ  ⲁϥⲙⲟⲩⲧⲉ ⲉⲣⲟⲟⲩ ⲡⲉϫⲁϥ ⲛⲁⲩ . ϫⲉ ⲉⲧⲃⲉⲟⲩ ⲁⲧⲉⲧⲛ̅ⲣ̅ϩⲁⲗ  ⲙ̅ⲙⲟⲓ ⲉⲧⲉⲧⲛ̅ϫⲱ ⲙ̅ⲙⲟⲥ ϫⲉ ⲧⲛ̅ⲟⲩⲏⲩ ⲉⲃⲟⲗ ⲉⲙⲁⲧⲉ ⲛⲛⲉⲧϩⲏⲛ ⲉⲣⲱⲧⲛ̅ ⲁⲩⲱ ⲛ̅ⲧⲱⲧⲛ̅ ⲧⲉⲛⲟⲩ ⲧⲉⲧⲛ̅ⲥϩⲟⲩⲟⲣⲧ̅ . Ⲛ̅ⲛⲉϥⲱϫⲛ̅ ⲉⲃⲟⲗ  ⲛ̅ϩⲏⲧⲧⲏⲩⲧⲛ̅ ⲉϥⲟ ⲛ̅ϩⲙ̅ϩⲁⲗ . ⲁⲩⲱ ⲉϥⲟ ⲛ̅ⲛ̅ⲣⲉϥⲡⲉϩϣⲉ ⲛⲁⲓ . ⲁⲩⲱ ⲙ̅ⲡⲁⲛⲟⲩⲧⲉ : Ⲛ̅ⲧⲟⲟⲩ ⲇⲉ ⲁⲩⲟⲩⲱϣⲃ̅ ϩⲓⲑⲏ ⲛ̅Ⲓⲏⲥⲟⲩⲥ ⲉⲩϫⲱ ⲙ̅ⲙⲟⲥ . Ϫⲉ  ⲁⲩⲧⲁⲙⲟⲛ ⲛ̅ⲛⲉⲛⲧⲁϥϩⲱⲛ  ⲙ̅ⲙⲟⲟⲩ ⲛ̅ϭⲓⲠϫⲟⲉⲓⲥ ⲡⲛⲟⲩⲧⲉ  ⲉⲧⲟⲟⲧϥ̅  ⲙ̅Ⲙⲱⲟⲩⲥⲏⲥ ⲡⲉϥϩⲙ̅ϩⲁⲗ ⲉϯ ⲛⲏⲧⲛ̅ ϩⲙ̅ⲡⲉⲓⲕⲁϩ . ⲉϥⲟⲧⲛ̅ ⲉⲃⲟⲗ  ⲙⲛ̅ⲟⲩⲟⲛ ⲛⲓⲙ ⲉⲧϣⲟⲟⲡ ϩⲓϫⲱϥ ϩⲓⲑⲏ ⲙ̅ⲙⲱⲧⲛ̅ . Ⲁⲩⲱ ⲁⲛⲣ̅ϩⲟⲧⲉ ⲉⲙⲁⲧⲉ ⲉⲧⲃⲉⲛⲉⲛⲯⲩⲭⲏ ϩⲁⲧⲉⲧⲛ̅ϩⲏ ⲁⲛⲧⲱⲟⲩⲛ ⲁⲛⲉⲓⲣⲉ ⲙ̅ⲡⲉⲓϩⲱⲃ.  Ⲧⲉⲛⲟⲩ ⲉⲓⲥ ϩⲏⲏⲧⲉ ⲧⲛ̅ϩⲁⲧⲟⲟⲧⲧⲏⲩⲧⲛ̅ . ⲛ̅ⲑⲉ ⲉⲧⲥ̅ⲣ̅ⲁⲛⲏⲧⲛ̅ . Ⲁⲩⲱ ⲛ̅ⲑⲉ ⲉⲧⲉⲧⲛ̅ⲟⲩⲁϣⲥ̅  ⲁⲣⲓⲥ ⲛⲁⲛ . Ⲁⲩⲱ  ⲁⲩⲉⲓⲣⲉ ⲛⲁⲩ ⲛ̅ⲧⲉⲓϩⲉ . ⲀⲒⲏⲥⲟⲩⲥ ⲛⲟⲩϩⲙ̅  ⲙ̅ⲙⲟⲟⲩ ⲙ̅ⲡⲉϩⲟⲟⲩ ⲉⲧⲙ̅ⲙⲁⲩ ⲉⲧⲟⲟⲧⲟⲩ ⲛ̅ⲛϣⲏⲣⲉ  ⲙ̅ⲡⲟⲩⲙⲟⲩⲟⲩⲧ  ⲙ̅ⲙⲟⲟⲩ . Ⲁⲩⲱ ⲁⲒⲏⲥⲟⲩⲥ ⲧⲁϩⲟⲟⲩ ⲉⲣⲁⲧⲟⲩ ⲙ̅ⲡⲉϩⲟⲟⲩ ⲉⲧⲙ̅ⲙⲁⲩ ⲉⲧⲣⲉⲩⲣ̅ⲣⲉϥⲡⲉϩϣⲉ . Ⲁⲩⲱ ⲣⲉϥⲙⲉϩⲙⲟⲟⲩ ⲛ̅ⲧⲥⲩⲛⲁⲅⲱⲅⲏ ⲧⲏⲣⲥ̅ . ⲙⲛ̅ⲡⲉⲑⲩⲥⲓⲁⲥⲧⲏⲣⲓⲟⲛ  ⲙ̅ⲡⲛⲟⲩⲧⲉ . Ⲉⲧⲃⲉⲡⲁⲓ  ⲁⲩϣⲱⲡⲉ ⲛ̅ϭⲓⲛⲉⲧⲟⲩⲏϩ ϩⲛ̅Ⲅⲁⲃⲁⲱⲛ ⲉⲩⲟ ⲛ̅ⲣⲉϥⲡⲉϩϣⲉ . Ⲁⲩⲱ ⲛ̅ⲣⲉϥⲙⲉϩⲙⲟⲟⲩ ⲙ̅ⲡⲉⲑⲩⲥⲓⲁⲥⲧⲏⲣⲓⲟⲛ ⲙ̅ⲡⲛⲟⲩⲧⲉ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ . Ⲁⲩⲱ ⲟⲛ......... ⲙⲁ ⲉⲧϥ̅ⲛⲁ........  ⲛⲁϥ.
 
Ⲓ̅. Ⲛ̅ⲧⲉⲣⲉϥⲥⲱⲧⲙ̅ ⲇⲉ ⲛ̅ϭⲓⲆⲱⲛⲓⲃⲉⲍⲉⲕ ⲡⲣ̅ⲣⲟ ⲛ̅ⲑⲒⲉⲣⲟⲩⲥⲁⲗⲏⲙ  ϫⲉ  ⲁϥϫⲓ ⲛ̅ϭⲒⲏⲥⲟⲩⲥ  ⲛ̅Ⲅⲁⲓ ⲧⲡⲟⲗⲓⲥ .  Ⲁⲩⲱ ⲁϥϥⲟⲧⲥ̅ ⲉⲃⲟⲗ ⲛ̅ⲑⲉ ⲉⲛⲧⲁϥⲁⲁⲥ  ⲛ̅Ϩⲓⲉⲣⲓⲭⲱ ⲙⲛ̅ⲡⲉⲥⲕⲉⲣ̅ⲣⲟ . ⲁⲩⲱ ⲛ̅ⲑⲉ ⲉⲛⲧⲁϥⲁⲁⲥ ⲛ̅Ⲅⲁⲓ ⲧⲡⲟⲗⲓⲥ ⲙⲛ̅ⲡⲉⲥⲕⲉⲣ̅ⲣⲟ . ⲁⲩⲱ ϫⲉ  ⲛⲉⲧⲟⲩⲏϩ ϩⲛ̅Ⲅⲁⲃⲱⲛ  ⲁⲩⲡⲱⲧ ⲉⲣⲁⲧϥ̅  ⲛ̅Ⲓⲏⲥⲟⲩⲥ . ⲁⲩⲱ ⲉⲣⲁⲧⲟⲩ ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ ⲁⲩⲣ̅ϩⲟⲧⲉ ⲉⲙⲁⲧⲉ : ⲛⲉϥⲥⲟⲟⲩⲛ ⲅⲁⲣ ϫⲉ ⲟⲩⲛⲟϭ  ⲙ̅ⲡⲟⲗⲓⲥ ⲧⲉ Ⲅⲁⲃⲱⲛ ⲛ̅ⲑⲉ ⲛ̅ⲟⲩⲉⲓ ⲛ̅ⲛ̅ⲛⲟϭ ⲙ̅ⲡⲟⲗⲓⲥ ⲉⲙⲁⲧⲉ  ⲁⲩⲱ ⲛⲉⲥⲣⲱⲙⲉ ⲧⲏⲣⲟⲩ ϩⲉⲛⲣⲱⲙⲉ ⲛ̅ϫⲱⲱⲣⲉ ⲛⲉ . Ⲁⲩⲱ ⲁϥϫⲟⲟⲩ ⲛ̅ϭⲓⲆⲱⲛⲓⲃⲉⲍⲉⲕ ⲡⲣ̅ⲣⲟ ⲛ̅ⲑⲒⲉⲣⲟⲩⲥⲁⲗⲏⲙ ⲉⲣⲁⲧϥ̅ ⲛ̅Ⲁⲓⲗⲁⲙ ⲡⲣ̅ⲣⲟ ⲛ̅Ⲭⲉⲃⲣⲱⲛ . ⲁⲩⲱ ⲉⲣⲁⲧϥ̅  ⲛ̅Ⲫⲓⲗⲱⲛ ⲡⲣ̅ⲣⲟ ⲛ̅Ⲓⲉⲣⲓⲙⲟⲩⲑ . ⲁⲩⲱ ⲉⲣⲁⲧϥ̅ ⲛ̅Ⲓⲉⲫⲑⲁ ⲡⲣ̅ⲣⲟ ⲛ̅Ⲗⲁⲭⲓⲥ. ⲁⲩⲱ ⲉⲣⲁⲧϥ̅  ⲛ̅Ⲇⲁⲃⲓ ⲡⲣ̅ⲣⲟ ⲛ̅Ⲟⲇⲟⲗⲁⲙ . ⲉϥϫⲱ ⲙ̅ⲙⲟⲥ ⲛⲁⲩ . ϫⲉ ⲧⲱⲟⲩⲛⲧⲏⲩⲧⲛ̅ ⲁⲙⲓⲧⲛ̅ ⲉϩⲣⲁⲓ ϣⲁⲣⲟⲓ ⲛ̅ⲧⲉⲧⲛ̅ⲃⲟⲏⲑⲉⲓ ⲉⲣⲟⲓ ⲛ̅ⲧⲉⲧⲛ̅ⲙⲓϣⲉ ⲙⲛ̅Ⲅⲁⲃⲁⲱⲛ ⲧⲡⲟⲗⲓⲥ  ⲁⲩⲡⲱⲧ ⲅⲁⲣ ⲉⲣⲁⲧϥ̅  ⲛ̅Ⲓⲏⲥⲟⲩⲥ . ⲁⲩⲱ ⲉⲣⲁⲧⲟⲩ ⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ :  Ⲁⲩⲱ  ⲁⲩⲉⲓ ⲉϩⲣⲁⲓ ⲛ̅ϭⲓⲡϯⲟⲩ ⲛ̅ⲣ̅ⲣⲟ ⲛ̅ⲛⲒⲉⲃⲟⲩⲥⲁⲓⲟⲥ. ⲡⲣ̅ⲣⲟ ⲛ̅ⲑⲒⲉⲣⲟⲩⲥⲁⲗⲏⲙ . ⲡⲣ̅ⲣⲟ ⲛ̅Ⲭⲉⲃⲣⲟⲛ . ⲁⲩⲱ ⲡⲣ̅ⲣⲟ ⲛ̅Ⲓⲉⲣⲓⲙⲟⲩⲑ. ⲁⲩⲱ ⲡⲣ̅ⲣⲟ ⲛ̅Ⲗⲁⲭⲓⲥ . ⲁⲩⲱ ⲡⲣ̅ⲣⲟ ⲛ̅Ⲟⲇⲟⲗⲁⲙ. ⲛ̅ⲧⲟⲟⲩ ⲙⲛ̅ⲡⲉⲩⲙⲏⲏϣⲉ ⲧⲏⲣϥ̅ . Ⲁⲩϩⲙⲟⲟⲥ ϩⲓⲣⲱⲥ ⲛ̅Ⲅⲁⲃⲁⲱⲛ  ⲁⲩϯ ⲛⲙ̅ⲙⲁⲥ . Ⲁⲩⲱ ⲛⲉⲧⲟⲩⲏϩ  ϩⲛ̅Ⲅⲁⲃⲁⲱⲛ ⲁⲩϫⲟⲟⲩ ⲉⲣⲁⲧϥ̅ ⲛ̅Ⲓⲏⲥⲟⲩⲥ  ⲉϩⲣⲁⲓ ⲉⲧⲡⲉⲣⲉⲙⲃⲟⲗⲏ ⲙ̅ⲡⲒⲥⲣⲁⲏⲗ ⲉⲄⲁⲗⲅⲁⲗⲁ. ϫⲱ ⲙ̅ⲙⲟⲥ ϫⲉ ⲙ̅ⲡⲣ̅ⲛ̅ⲧⲟⲟⲧⲕ̅ ⲉⲣⲟⲕ ⲉⲛⲉⲕϩⲙ̅ϩⲁⲗ ⲉⲧⲉⲁⲛⲟⲛ ⲛⲉ . Ⲧⲱⲟⲩⲛ ⲁⲙⲟⲩ ⲛⲁⲛ ⲉϩⲣⲁⲓ ⲧⲁⲭⲏ ⲛⲅ̅ⲛⲁϩⲙⲉⲛ ⲛⲅ̅ⲃⲟⲏⲑⲉⲓ ⲉⲣⲟⲛ . ⲉⲃⲟⲗϫⲉ ⲁⲩⲥⲟⲩⲱϩ ⲉⲣⲟⲛ ⲛ̅ϭⲓⲛ̅ⲣ̅ⲣⲱⲟⲩ ⲧⲏⲣⲟⲩ ⲛ̅Ⲁⲙⲟⲣⲣⲁⲓⲟⲥ ⲉⲧⲟⲩⲏϩ ϩⲙ̅ⲡⲧⲟⲟⲩ . Ⲁⲩⲱ ⲁϥⲧⲱⲟⲩⲛ ⲛ̅ϭⲓⲒⲏⲥⲟⲩⲥ ⲁϥⲉⲓ ⲉϩⲣⲁⲓ ⲉⲃⲟⲗ  ϩⲛ̅Ⲅⲁⲗⲅⲁⲗⲁ . ⲛ̅ⲧⲟϥ ⲁⲩⲱ ⲡⲙⲏⲏϣⲉ ⲧⲏⲣϥ̅ ⲛ̅ⲣⲉϥⲙⲓϣⲉ ⲛⲙ̅ⲙⲁϥ . ϫⲱⲱⲣⲉ ⲛⲓⲙ ϩⲛ̅ⲧⲉϥϭⲟⲙ : Ⲁⲩⲱ Ⲡϫⲟⲉⲓⲥ ⲡⲉϫⲁϥ ϫⲉ  ⲙ̅ⲡⲣ̅ⲣϩⲟⲧⲉ  ϩⲏⲧⲟⲩ ⲁⲓⲧⲁⲁⲩ ⲅⲁⲣ ⲉⲛⲉⲕϭⲓϫ . ⲙⲛ̅ⲟⲩⲁ ⲛ̅ⲟⲩⲱⲧ ⲉⲃⲟⲗ ⲛ̅ϩⲏⲧⲟⲩ ⲙ̅ⲡⲉⲧⲛ̅ⲙ̅ⲧⲟ ⲉⲃⲟⲗ : Ⲁⲩⲱ Ⲓⲏⲥⲟⲩⲥ  ⲁϥⲉⲓ ⲉϩⲣⲁⲓ ⲉϫⲱⲟⲩ ϩⲛ̅ⲟⲩϣⲥ̅ⲛⲉ  ⲛ̅ⲧⲉⲩϣⲏ ⲧⲏⲣⲥ̅ ⲉⲃⲟⲗ  ϩⲛ̅Ⲅⲁⲗⲅⲁⲗⲁ.  Ⲡϫⲟⲉⲓⲥ  ⲁϥⲡⲟϣⲥⲟⲩ  ⲁϥϣⲧⲣ̅ⲧⲱⲣⲟⲩ ϩⲓⲑⲏ ⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ  ⲁⲩⲱ Ⲡϫⲟⲉⲓⲥ  ⲁϥⲑⲃ̅ⲃⲓⲱⲟⲩ ϩⲛ̅ⲟⲩⲛⲟϭ ⲛ̅ⲟⲩⲱϣϥ̅ ⲉⲃⲟⲗ  ϩⲓⲣⲱⲥ ⲛ̅Ⲅⲁⲃⲁⲱⲛ. Ⲁⲩⲱ Ⲓⲏⲥⲟⲩⲥ  ⲁϥⲡⲱⲧ  ⲛ̅ⲥⲱⲟⲩ ⲙⲛ̅ⲡⲒⲥⲣⲁⲏⲗ ⲛ̅ⲧⲉϩⲓⲏ ⲛ̅ⲃⲱⲕ ⲉϩⲣⲁⲓ ⲉⲂⲏⲑⲟⲣⲱⲛ. Ⲁⲩⲱ  ⲁϥϩⲓⲟⲩⲉ  ⲛ̅ⲥⲱⲟⲩ ϣⲁϩⲣⲁⲓ ⲉⲁⲌⲏⲕⲁ  ⲁⲩⲱ ϣⲁϩⲣⲁⲓ ⲉⲘⲁⲕⲏⲇⲁ. ⲛ̅ⲧⲉⲣⲟⲩⲡⲱⲧ ⲇⲉ  ϩⲁⲡϩⲟ ⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ. ⲛ̅ⲧⲉϩⲓⲏ ⲛ̅ⲉⲓ ⲉϩⲣⲁⲓ ⲉⲂⲏⲑⲱⲣⲱⲛ : Ⲡϫⲟⲉⲓⲥ  ⲁϥϩⲓⲟⲟⲩ ⲉϩⲣⲁⲓ ⲉϫⲱⲟⲩ ⲛ̅ϩⲉⲛⲱⲛⲉ ⲛ̅ⲁⲗ ⲙ̅ⲡⲉ ⲉⲃⲟⲗ ϩⲛ̅ⲧⲡⲉ ϣⲁϩⲣⲁⲓ ⲉⲁⲌⲏⲕⲁ ⲁⲩⲙⲟⲩ . Ⲁⲩⲱ ⲁⲩⲁϣⲁⲓ ⲛ̅ϭⲓⲛⲉⲛⲧⲁⲩⲙⲟⲩ ⲉⲃⲟⲗ ϩⲛ̅ⲛⲱⲛⲉ ⲛ̅ⲁⲗ ⲙ̅ⲡⲉ ⲉϩⲟⲩⲉ ⲉⲛⲉⲛⲧⲁⲩⲙⲟⲩⲟⲩⲧⲟⲩ ⲛ̅ϭⲓⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲛ̅ⲧⲥⲏϥⲉ ϩⲙ̅ⲡⲡⲟⲗⲉⲙⲟⲥ : Ⲧⲟⲧⲉ ⲁϥϣⲁϫⲉ ⲉϩⲣⲁⲓ ⲉⲠϫⲟⲉⲓⲥ ⲙ̅ⲡⲉϩⲟⲟⲩ ⲉⲛⲧⲁⲡⲛⲟⲩⲧⲉ ϯ ⲙ̅ⲡⲀⲙⲟⲣⲣⲁⲓⲟⲥ ⲉϩⲣⲁⲓ ⲉⲧⲟⲟⲧⲟⲩ ⲛ̅ⲛϣⲏⲣⲉ ⲙ̅ⲡⲒⲥⲣⲁⲏⲗ ⲛ̅ⲧⲉⲣϥ̅ⲑⲙ̅ⲕⲟⲟⲩ ϩⲛ̅Ⲅⲁⲃⲁⲑⲱⲛ . Ⲁⲩⲱ ⲁⲩⲑⲃ̅ⲃⲓⲟ ϩⲁⲡϩⲟ ⲛ̅ⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ: ⲠⲉϫⲉⲒⲏⲥⲟⲩⲥ ϫⲉ  ⲙⲁⲣⲉⲡⲣⲏ ⲁϩⲉⲣⲁⲧϥ̅ ϩⲓϫⲛ̅Ⲅⲁⲃⲁⲱⲛ.  ⲁⲩⲱ ⲡⲟⲟϩ ϩⲓϫⲙ̅ⲡⲓⲁ ⲛ̅Ⲁⲓⲗⲱⲙ ϣⲁⲛϯⲙⲏⲏϣⲉ ⲙⲛ̅ⲡⲉⲓⲗⲁⲟⲥ . Ⲁⲩⲱ ⲡⲣⲏ ⲁϥⲁϩⲉⲣⲁⲧϥ̅ ⲙⲛ̅ⲡⲟⲟϩ ϩⲛ̅ⲧⲉⲩϩⲓⲏ ⲙ̅ⲙⲟⲟϣⲉ . ϣⲁⲛⲧⲉⲡⲛⲟⲩⲧⲉ ⲧⲱⲱⲃⲉ ⲛ̅ⲛϫⲁϫⲉ . ⲁⲩⲱ ⲡⲣⲏ ⲁϥⲁϩⲉⲣⲁⲧϥ̅ ϩⲛ̅ⲧⲙⲏⲧⲉ ⲛ̅ⲧⲡⲉ . ⲙ̅ⲡϥ̅ⲙⲟⲟϣⲉ ⲉⲑⲏ ⲉⲡϩⲱⲧⲡ ⲉⲡϫⲱⲕ ⲛ̅ⲟⲩϩⲟⲟⲩ ⲧⲏⲣϥ̅ . Ⲁⲩⲱ  ⲙ̅ⲡⲉϩⲟⲟⲩ ⲛ̅ⲧⲉⲓϭⲟⲧ ϣⲱⲡⲉ ⲟⲩⲇⲉ ⲛ̅ϣⲟⲣⲡ ⲟⲩⲇⲉ ⲛ̅ϩⲁⲉ . ϩⲱⲥⲧⲉ ⲛ̅ⲧⲉⲡⲛⲟⲩⲧⲉ ⲥⲱⲧⲙ̅ ⲉⲣⲱⲙⲉ . ϫⲉ Ⲡϫⲟⲉⲓⲥ ⲛⲉϥϯ ⲛ̅ⲧⲟⲟⲧϥ̅ ⲛⲉ ⲙⲛ̅ⲡⲒⲥⲣⲁⲏⲗ :  Ⲧⲟⲧⲉ  ⲁϥⲕⲧⲟϥ  ⲉⲡⲁϩⲟⲩ  ⲛ̅ϭⲓⲒⲏⲥⲟⲩⲥ  ⲉⲧⲡⲁⲣⲉⲙⲃⲟⲗⲏ  ⲁϥⲙⲟⲟϣⲉ ⲉϩⲣⲁⲓ  ⲉⲄⲁⲗⲅⲁⲗⲁ  ⲉⲣⲉⲡⲒⲥⲣⲁⲏⲗ  ⲧⲏⲣⲟⲩ  ⲛⲙ̅ⲙⲁϥ . Ⲁⲩⲱ  ⲁⲩⲡⲱⲧ  ⲛ̅ϭⲓⲡⲉⲓϯⲟⲩ ⲛ̅ⲣ̅ⲣⲟ  ⲁⲩϩⲟⲡⲟⲩ ϩⲙ̅ⲡⲉⲙϩⲁⲁⲩ ⲙ̅Ⲙⲁⲕⲏⲇⲁ. Ⲁⲩⲱ ⲁⲩⲧⲁⲙⲉⲒⲏⲥⲟⲩⲥ ⲉⲩϫⲱ ⲙ̅ⲙⲟⲥ ⲛⲁϥ ϫⲉ ⲁⲩϩⲉ ⲉⲡϯⲟⲩ ⲛ̅ⲣ̅ⲣⲟ ⲉⲩϩⲏⲡ ϩⲙ̅ⲡⲉⲙϩⲁⲁⲩ ⲉⲧϩⲙ̅Ⲙⲁⲕⲏⲇⲁ. ⲠⲉϫⲉⲒⲏⲥⲟⲩⲥ ⲛⲁⲩ ϫⲉ ⲥⲕⲟⲣⲕⲣ̅  ⲛ̅ϩⲉⲛⲱⲛⲉ ⲉⲣⲛ̅ⲧⲧⲁⲡⲣⲟ  ⲙ̅ⲡⲉⲙϩⲁⲁⲩ. ⲁⲩⲱ ⲛ̅ⲧⲉⲧⲛ̅ⲕⲱ ⲛ̅ϩⲉⲛⲣⲱⲙⲉ  ϩⲓⲣⲱⲟⲩ ⲉⲩϩⲁⲣⲉϩ ⲉⲣⲟⲟⲩ. Ⲛ̅ⲧⲱⲧⲛ̅ ⲇⲉ  ⲙ̅ⲡⲣ̅ϭⲱ  ⲁϫⲛ̅ⲡⲱⲧ  ⲛ̅ⲥⲁⲛⲉⲧⲛ̅ϫⲁϫⲉ  ⲛ̅ⲧⲉⲧⲛ̅ⲧⲁϩⲉⲛⲉⲩϩⲁⲉⲉⲩ. ⲛ̅ⲧⲉⲧⲛ̅ⲧⲙ̅ⲕⲁⲁⲩ ⲉⲃⲱⲕ ⲉϩⲟⲩⲛ ⲉⲛⲉⲩⲡⲟⲗⲓⲥ. ⲁⲠϫⲟⲉⲓⲥ ⲅⲁⲣ ⲡⲉⲛⲛⲟⲩⲧⲉ  ⲧⲁⲁⲩ ⲉϩⲣⲁⲓ ⲉⲧⲟⲟⲧⲛ̅ :  Ⲁⲩⲱ ⲁⲥϣⲱⲡⲉ ⲛ̅ⲧⲉⲣϥ̅ⲟⲩⲱ ⲛ̅ϭⲓⲒⲏⲥⲟⲩⲥ ⲙⲛ̅ⲛϣⲏⲣⲉ ⲙ̅ⲡⲒⲥⲣⲁⲏⲗ ⲉⲩϩⲱⲧⲡ̅ ⲙ̅ⲙⲟⲟⲩ ϩⲛ̅ⲟⲩⲛⲟϭ ⲛ̅ⲣⲁϩⲧⲉ ⲉⲙⲁⲧⲉ ⲉⲡⲧⲏⲣϥ̅ ⲁⲩⲱ ⲛⲉⲛⲧⲁⲩⲣ̅ⲃⲟⲗ ⲁⲩⲟⲩϫⲁⲓ ⲉϩⲣⲁⲓ ⲉⲙ̅ⲡⲟⲗⲓⲥ ⲉⲧⲟⲣϫ̅ : ⲁϥⲕⲟⲧϥ̅ ⲛ̅ϭⲓⲡⲗⲁⲟⲥ ⲧⲏⲣϥ̅ ⲉⲣⲁⲧϥ̅  ⲛ̅Ⲓⲏⲥⲟⲩⲥ ⲉϩⲣⲁⲓ ⲉⲘⲁⲕⲏⲇⲁ . ⲉⲩⲟⲩⲟϫ ⲧⲏⲣⲟⲩ . ⲙ̅ⲡⲉⲗⲁⲁⲩ ϩⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ ϯϩⲣⲟⲟⲩ ϩⲙ̅ⲡⲉϥⲗⲁⲥ :  Ⲁⲩⲱ ⲡⲉϫⲉⲒⲏⲥⲟⲩⲥ ⲛⲁⲩ ϫⲉ  ⲁⲩⲱⲛ ⲙ̅ⲡⲉⲓⲙ̅ϩⲁⲁⲩ ⲉⲧⲉⲧⲛ̅ⲉⲓⲛⲉ ⲙ̅ⲡⲉⲓϯⲟⲩ ⲛ̅ⲣ̅ⲣⲟ ⲉⲃⲟⲗ ϩⲙ̅ⲡⲉⲙϩⲁⲁⲩ. Ⲁⲩⲱ ⲁⲩⲉⲓⲛⲉ  ⲙ̅ⲡϯⲟⲩ ⲛ̅ⲣ̅ⲣⲟ ⲉⲃⲟⲗ  ϩⲙ̅ⲡⲉⲙϩⲁⲁⲩ. ⲡⲣ̅ⲣⲟ ⲛ̅ⲑⲒⲉⲣⲟⲩⲥⲁⲗⲏⲙ  ⲙⲛ̅ⲡⲣ̅ⲣⲟ ⲛ̅Ⲭⲉⲃⲣⲱⲛ. ⲙⲛ̅ⲡⲣ̅ⲣⲟ ⲛ̅Ⲓⲉⲣⲓⲙⲟⲩⲑ  ⲙⲛ̅ⲡⲣ̅ⲣⲟ ⲛ̅Ⲗⲁⲭⲓⲥ . ⲙⲛ̅ⲡⲣ̅ⲣⲟ ⲛ̅Ⲟⲇⲟⲗⲁⲙ . ⲁⲩⲉⲓⲛⲉ  ⲙ̅ⲙⲟⲟⲩ ⲉⲃⲟⲗ ⲉⲣⲁⲧϥ̅ ⲛ̅Ⲓⲏⲥⲟⲩⲥ : Ⲁϥⲙⲟⲩⲧⲉ ⲛ̅ϭⲓⲒⲏⲥⲟⲩⲥ ⲉⲡⲒⲥⲣⲁⲏⲗ ⲧⲏⲣϥ̅ . ⲁⲩⲱ ⲛ̅ⲁⲣⲭⲏⲅⲟⲥ  ⲙ̅ⲡⲟⲗⲉⲙⲟⲥ ⲛⲉⲛⲧⲁⲩⲙⲟⲟϣⲉ ⲙⲛ̅Ⲓⲏⲥⲟⲩⲥ . ⲡⲉϫⲁϥ ⲛⲁⲩ ϫⲉ ⲛ̅ⲧⲱⲧⲛ̅ ⲃⲱⲕ ⲛ̅ⲧⲉⲧⲛ̅ⲟⲩⲉϩⲣⲁⲧⲧⲏⲩⲧⲛ̅ ⲉϫⲛ̅ⲙⲙⲕⲁϩ  ⲛ̅ⲧⲉⲧⲛ̅ⲙⲟⲟⲩⲧⲟⲩ.  ⲠⲉϫⲉⲒⲏⲥⲟⲩⲥ  ⲛⲁⲩ . ϫⲉ  ⲙ̅ⲡⲣ̅ⲉⲣϩⲟⲧⲉ  ⲁⲗⲗⲁ  ϫⲣⲟ   ⲁⲩⲱ  ⲛ̅ⲧⲉⲧⲛ̅ϭⲙ̅ϭⲟⲙ  ⲧⲁⲓ  ⲛ̅ⲅⲁⲣ ⲧⲉ  ⲑⲉ   ⲉⲧⲉⲣⲉⲠϫⲟⲉⲓⲥ  ⲡⲛⲟⲩⲧⲉ  ⲛⲁⲁⲥ  ⲛ̅ⲛⲉⲧⲛ̅ϫⲓϫⲉⲟⲩ : ⲛⲁⲓ  ⲉⲧⲉ ⲧⲉⲧⲛ̅ⲛⲁⲙⲓϣⲉ  ⲛⲙ̅ⲙⲁⲩ :  Ⲁⲩⲱ  ⲁⲒⲏⲥⲟⲩⲥ  ⲙⲟⲟⲩⲧⲟⲩ. ⲁϥⲁϣⲧⲟⲩ  ⲉϯⲟⲩ  ⲛ̅ϣⲉ  ϣⲁⲣⲟⲩϩⲉ . Ⲁⲥϣⲱⲡⲉ  ⲇⲉ  ⲙⲛ̅ⲛ̅ⲥⲁⲛⲁⲩ  ⲛ̅ϩⲱⲧⲡ̅  ⲙ̅ⲡⲣⲏ . ⲁⲒⲏⲥⲟⲩⲥ  ϩⲱⲛ  ⲉⲧⲟⲟⲧⲟⲩ  ⲁⲩⲉⲛⲟⲩ  ⲉⲡⲉⲥⲏⲧ  ϩⲓⲡϣⲉ . ⲁⲩⲛⲟϫⲟⲩ  ⲉⲡⲉⲥⲡⲉⲗⲁⲓⲟⲛ . ⲡⲙⲁ  ⲛ̅ⲧⲁⲩⲡⲱⲧ  ⲉⲣⲟϥ  ⲁⲩⲥⲕⲣ̅ⲕⲣ̅ϩⲛ̅ⲱⲛⲉ  ⲉⲣⲛ̅ⲡⲉⲥⲡⲏⲗⲁⲓⲟⲛ  ϣⲁⲡⲟⲟⲩ  ⲛ̅ϩⲟⲟⲩ . ⲀⲩϫⲓⲘⲁⲅⲉⲇⲇⲱ . ϩⲙ̅ⲡϩⲟⲟⲩ  ⲉⲧⲙ̅ⲙⲁⲩ  ⲁⲩϩⲉⲧⲃ̅ⲟⲩⲟⲛ  ⲛⲓⲙ  ⲉⲧⲛ̅ϩⲏⲧⲥ̅  ϩⲛ̅ⲧⲁⲡⲣⲟ  ⲛ̅ⲥⲏϥⲉ : Ⲁⲩⲉⲝⲟⲗⲉⲑⲉⲣⲟⲩ  ⲛ̅ⲟⲩⲟⲛ  ⲛⲓⲙ  ⲉⲧⲛⲓϥⲉ  ⲉϩⲣⲁⲓ  ⲛ̅ϩⲏⲧⲥ̅  ⲁⲩⲱ  ⲙⲛ̅ⲗⲁⲁⲩ  ⲥⲉⲉⲡⲉ  ⲉϥⲟⲛϩ̅  ⲏ  ⲁϥⲡⲱⲧ  ⲛ̅ϩⲣⲁⲓ  ⲛ̅ϩⲏⲧⲥ̅ : Ⲁⲩⲉⲓⲣⲉ  ⲙ̅ⲡⲣ̅ⲣⲟ  ⲙ̅Ⲙⲁⲅⲉⲇⲇⲱ  ⲛ̅ⲑⲉ  ⲛ̅ⲧⲁⲩⲁⲁⲥ  ⲙ̅ⲡⲣ̅ⲣⲟ  ⲛ̅Ϩⲓⲉⲣⲓⲭⲱ :  Ⲁⲩⲱ  ⲁⲒⲏⲥⲟⲩⲥ  ⲃⲱⲕ  ⲛⲙ̅ⲡⲒⲥⲣⲁⲏⲗ  ⲧⲏⲣϥ̅  ⲛⲙ̅ⲙⲁϥ  ⲉⲃⲟⲗ  ϩⲙ̅Ⲙⲁⲅⲉⲇⲇⲱ ⲉⲖⲟⲙⲛⲁ  ⲁⲩⲕⲱⲧⲉ  ⲉⲣⲟⲥ.  ⲁⲠϫⲟⲉⲓⲥ  ⲧⲁⲁⲥ  ⲉⲧϭⲓϫ  ⲙ̅ⲡⲒⲥⲣⲁⲏⲗ :  Ⲁⲩϫⲓⲧⲥ̅  ϩⲛ̅ⲧⲁⲡⲣⲟ  ⲛ̅ⲧⲥⲏϥⲉ  ⲛⲙ̅ⲡⲉⲥⲣⲟ :  ⲁⲩⲉⲝⲟⲗⲉⲩⲑⲉⲣⲟⲩ  ⲛⲟⲩⲟⲛ  ⲛⲓⲙ  ⲉⲧⲛⲓϥⲉ  ⲛ̅ϩⲣⲁⲓ  ⲛ̅ϩⲏⲧⲥ̅  ⲙ̅ⲡⲉⲗⲁⲁⲩ  ⲥⲉⲉⲡⲉ  ⲉϥⲟⲛϩ  ⲏ̅  ⲁϥⲡⲱⲧ   ⲛ̅ϩⲣⲁⲓ  ⲛ̅ϩⲏⲧⲥ̅ :  ⲁⲩⲉⲓⲣⲉ  ⲙ̅ⲡⲉⲥⲣⲟ  ⲛ̅ⲑⲉ  ⲛ̅ⲧⲁⲩⲁⲁⲥ  ⲙ̅ⲡⲣ̅ⲣⲟ  ⲛ̅Ϩⲓⲉⲣⲓⲭⲱ .  Ⲁϥⲃⲱⲕ  ⲛ̅ϭⲓⲒⲏⲥⲟⲩⲥ  ⲛⲙ̅ⲡⲒⲥⲣⲁⲏⲗ  ⲧⲏⲣϥ̅  ⲛⲙ̅ⲙⲁϥ  ⲉⲃⲟⲗ  ϩⲛ̅Ⲗⲟⲙⲛⲁ . ⲉⲖⲁⲭⲉⲓⲥ . ⲁϥϩⲙⲟⲟⲥ  ϩⲓⲣⲱⲥ . ⲁⲩⲱ  ⲁⲩⲕⲱⲧⲉ  ⲉⲣⲟⲥ . ⲁⲩⲱ  ⲁⲠϫⲟⲉⲓⲥ  ϯ  ⲛ̅Ⲗⲁⲭⲉⲓⲥ  ⲉⲧϭⲓϫ  ⲙ̅ⲡⲒⲥⲣⲁⲏⲗ . ⲁⲩⲱ  ϩⲛ̅ⲡⲙⲉϩϩⲟⲟⲩ  ⲥⲛⲁⲩ  ⲁⲩϫⲓⲧⲥ̅  ϩⲛ̅ⲧⲁⲡⲣⲟ  ⲛ̅ⲧⲥⲏϥⲉ .  ⲁⲩⲱ  ⲁϥϥⲟⲧⲥ̅  ⲉⲃⲟⲗ  ⲛ̅ⲑⲉ  ⲛ̅ⲧⲁϥⲁⲁⲥ  ⲛ̅Ⲗⲟⲙⲛⲁ . Ⲧⲟⲧⲉ  ⲁϥⲉⲓ  ⲛ̅ϭⲓⲈⲗⲁⲙ  ⲡⲣ̅ⲣⲟ  ⲛ̅Ⲅⲁⲥⲍⲉⲣ  ⲉⲃⲟⲏⲑⲓ  ⲉⲖⲁⲭⲉⲓⲥ :  Ⲁⲩⲱ  ⲁⲒⲏⲥⲟⲩⲥ  ⲡⲁⲧⲁⲥⲥⲉ  ⲙ̅ⲙⲟϥ  ϩⲛ̅ⲧⲁⲡⲣⲟ  ⲛ̅ⲧⲥⲏϥⲉ  ⲛⲙ̅ⲡⲉϥⲙⲏⲏϣⲉ . ⲉⲧⲙ̅ⲕⲁⲗⲁⲁⲩ  ⲉⲥⲉⲉⲡⲉ  ⲉⲃⲟⲗ  ⲛ̅ϩⲏⲧⲟⲩ  ⲉϥⲟⲛϩ̅ . ⲏ̅  ⲁϥⲡⲱⲧ .  Ⲁϥⲃⲱⲕ  ⲛ̅ϭⲓⲒⲏⲥⲟⲩⲥ  ⲛⲙ̅ⲡⲒⲥⲣⲁⲏⲗ  ⲧⲏⲣϥ̅  ⲛⲙ̅ⲙⲁϥ  ⲉⲃⲟⲗ  ϩⲛ̅Ⲗⲁⲭⲉⲓⲥ  ⲉⲞⲇⲟⲗⲁⲙ  ⲁⲩϩⲙⲟⲟⲥ  ϩⲓⲣⲱⲥ  ⲁⲩⲱ  ⲁⲩⲕⲱⲧⲉ  ⲉⲣⲟⲥ.  Ⲁⲡϫⲟⲉⲓⲥ  ⲧⲁⲁⲥ  ⲉⲧⲟⲟⲧϥ̅  ⲙ̅ⲡⲒ̅ⲥⲣⲁⲏⲗ  ⲁⲩϫⲓⲧⲥ̅  ⲛ̅ⲧⲁⲡⲣⲟ  ⲛ̅ⲧⲥⲏϥⲉ :  Ⲁⲩⲱ ⲟⲩⲟⲛ  ⲛⲓⲙ  ⲉⲧⲛⲓϥⲉ  ⲉϩⲣⲁⲓ  ⲛ̅ϩⲏⲧⲥ̅  ⲁⲩϩⲟⲧⲃⲉϥ  ⲛ̅ⲑⲉ  ⲛ̅ⲧⲁⲩⲁⲁⲥ  ⲛ̅Ⲗⲁⲭⲉⲓⲥ . Ⲁϥⲃⲱⲕ  ⲛ̅ϭⲓⲒⲏⲥⲟⲩⲥ  ⲛⲙ̅ⲡⲒⲥⲣⲁⲏⲗ  ⲧⲏⲣϥ̅  ⲛⲙ̅ⲙⲁϥ  ⲉⲬⲉⲃⲣⲱⲛ  ⲛ̅ⲛⲉⲓⲣ̅ⲣⲱⲟⲩ . ⲁⲩⲱ ⲁⲩⲃⲱⲕ ⲛ̅ϭⲓⲛ̅ⲣⲱⲙⲉ  ⲁⲩⲧⲁⲗⲉⲛⲉⲩⲟⲩⲉⲣⲏⲧⲉ ⲉϩⲣⲁⲓ ⲉϫⲛ̅ⲛⲉⲩⲙⲁⲕϩ. ⲁⲩⲱ Ⲓⲏⲥⲟⲩⲥ ⲡⲉϫⲁϥ ⲛⲙ̅ⲙⲁⲩ ϫⲉ ⲙ̅ⲡⲣ̅ⲣϩⲟⲧⲉ ϩⲏⲧⲟⲩ ⲟⲩⲇⲉ ⲙ̅ⲡⲣ̅ϣⲗⲁϩ ϩⲁⲧⲉⲩϩⲏⲧⲥ̅. Ⲁⲩⲱ ⲁϥⲧⲁⲕⲟⲥ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ ⲁⲩⲱ ⲛ̅ⲕⲁ ⲛⲓⲙ ⲉϥⲟⲛϩ ⲛ̅ϩⲏⲧⲥ̅ . ⲙ̅ⲡⲉⲗⲁⲁⲩ ⲟⲩϫⲁⲓ ⲛ̅ϩⲏⲧⲥ̅ ⲕⲁⲧⲁⲑⲉ ⲉⲛⲧⲁϥⲁⲁⲥ ⲛ̅Ⲟⲇⲟⲗⲁⲙ . ⲉⲁϥϥⲱⲧⲉ ⲉⲃⲟⲗ ⲛ̅ⲛⲉⲧϣⲟⲟⲡ ⲛ̅ϩⲏⲧⲥ̅. Ⲁϥⲕⲧⲟϥ ⲛ̅ϭⲓⲒⲏⲥⲟⲩⲥ ⲙⲛ̅ⲡⲒⲥⲣⲁⲏⲗ ⲧⲏⲣϥ̅ ⲉϩⲣⲁⲓ ⲉⲆⲁⲃⲉⲓⲣ . ⲁⲩϭⲱ ϩⲓⲣⲱⲥ  ⲁⲩϫⲓⲧⲥ̅  ⲙⲛ̅ⲡⲉⲥⲕⲉⲣ̅ⲣⲟ ⲙⲛ̅ⲛⲉⲥⲕⲉⲧⲙⲉ. Ⲁⲩⲱ ⲁⲩϥⲱⲧⲉ ⲙ̅ⲙⲟⲥ ⲉⲃⲟⲗ ⲙⲛ̅ⲛ̅ⲕⲁ ⲛⲓⲙ ⲉⲧⲟⲛϩ ⲛ̅ϩⲏⲧⲥ̅ ⲉⲙⲡⲟⲩⲕⲁⲗⲁⲁⲩ ⲉⲡⲁϩⲟⲩ ⲉⲁϥⲟⲩϫⲁⲓ . ⲕⲁⲧⲁⲑⲉ ⲉⲛⲧⲁϥⲁⲁⲥ ⲛ̅Ⲭⲉⲃⲣⲱⲛ ⲙⲛ̅ⲡⲉⲥⲣ̅ⲣⲟ . ⲁⲩⲱ ⲕⲁⲧⲁⲑⲉ ⲉⲛⲧⲁϥⲁⲁⲥ ⲛ̅Ⲇⲁⲃⲉⲓⲣ. ⲙⲛ̅ⲡⲉⲥⲕⲉⲣ̅ⲣⲟ.  Ⲁⲩⲱ Ⲓⲏⲥⲟⲩⲥ  ⲁϥⲡⲁⲧⲁⲥⲥⲉ  ⲙ̅ⲡⲕⲁϩ ⲧⲏⲣϥ̅ ⲛ̅ⲧⲟⲣⲓⲛⲏ. ⲡⲕⲁϩ ⲉⲧϫⲟⲥⲉ. ⲁⲩⲱ ⲡⲕⲁϩ  ⲙ̅ⲡⲉⲙⲛ̅ⲧ ⲙⲛ̅ⲡⲕⲁϩ ⲛ̅ⲧⲥⲱϣⲉ. ⲡⲕⲁϩ ⲉⲧϩⲛ̅ⲧⲙⲏⲧⲉ . ⲁⲩⲱ Ⲧⲁⲥⲏⲇⲱⲑ ⲙⲛ̅ⲛⲉⲥⲣ̅ⲣⲱⲟⲩ . ⲉⲙⲡⲟⲩⲕⲁⲗⲁⲁⲩ ⲉⲡⲁϩⲟⲩ ⲛ̅ϩⲏⲧⲟⲩ ⲉⲁϥⲟⲩϫⲁⲓ  ⲁⲩⲱ ⲛ̅ⲕⲁ ⲛⲓⲙ ⲉⲟⲩⲛ̅ⲛⲓϥⲉ ⲛ̅ⲱⲛϩ ⲛ̅ϩⲏⲧⲟⲩ ⲁⲩϥⲟⲧⲟⲩ ⲉⲃⲟⲗ . ⲕⲁⲧⲁⲑⲉ ⲉⲛⲧⲁϥⲁⲁϥ ⲛ̅ϭⲓⲠϫⲟⲉⲓⲥ ⲡⲛⲟⲩⲧⲉ ϣⲁϩⲣⲁⲓ ⲉⲔⲁⲇⲉⲥⲃⲁⲣⲛⲏ. ϫⲓⲛⲔⲁⲇⲉⲥⲃⲁⲣⲛⲏ ϣⲁϩⲣⲁⲓ ⲉⲄⲁⲍⲁ. ⲡⲕⲁϩ ⲧⲏⲣϥ̅ ⲛ̅Ⲅⲟⲥⲟⲙ ϣⲁϩⲣⲁⲓ ⲉⲄⲁⲃⲁⲱⲛ . Ⲛⲉⲓⲣ̅ⲣⲱⲟⲩ ⲧⲏⲣⲟⲩ . ⲕⲁⲧⲁⲡⲉⲩⲕⲁϩ  ⲁⲒⲏⲥⲟⲩⲥ ⲁϥϫⲓⲧⲟⲩ ⲛ̅ⲥⲁⲛⲉⲩⲉⲣⲏⲩ . ϫⲉ Ⲡϫⲟⲉⲓⲥ ⲅⲁⲣ ⲡⲛⲟⲩⲧⲉ ⲛⲉϥⲙⲓϣⲉ ⲉϫⲙ̅ⲡⲒⲥⲣⲁⲏⲗ :
 
Ⲓ̅Ⲁ̅. Ⲛ̅ⲧⲉⲣϥ̅ⲥⲱⲧⲙ̅ ⲇⲉ ⲛ̅ϭⲒⲁⲃⲓⲥ ⲡⲣ̅ⲣⲟ ⲛⲀⲥⲱⲣ ⲁϥϫⲟⲟⲩ ⲉⲣⲁⲧϥ̅ ⲛ̅Ⲓⲱⲃⲁⲃ ⲡⲣ̅ⲣⲟ ⲙ̅Ⲙⲣ̅ⲣⲱⲛ . ⲁⲩⲱ ⲉⲣⲁⲧϥ̅ ⲙ̅ⲡⲣ̅ⲣⲟ ⲛ̅Ⲥⲩⲙⲟⲱⲛ  ⲁⲩⲱ ⲉⲣⲁⲧϥ̅ ⲙ̅ⲡⲣ̅ⲣⲟ ⲛ̅Ⲍⲏⲫ . ⲁⲩⲱ ⲉⲣⲁⲧⲟⲩ ⲛ̅ⲛ̅ⲣ̅ⲣⲱⲟⲩ ⲛⲉⲧϩⲁⲧⲛ̅ⲧⲛⲟϭ ⲛ̅Ⲥⲓⲇⲱⲛ ⲉϩⲣⲁⲓ ⲉⲧⲟⲣⲓⲛⲏ ⲡⲕⲁϩ ⲉⲧϫⲟⲥⲉ . ⲁⲩⲱ ⲉϩⲣⲁⲓ ⲉⲢⲁⲃⲁⲁ ⲧⲉⲧⲙ̅ⲡⲙ̅ⲧⲟ ⲉⲃⲟⲗ ⲛ̅Ⲭⲉⲛⲉⲣⲉⲑ . ⲁⲩⲱ ⲉϩⲣⲁⲓ ⲉⲧⲥⲱϣⲉ ⲉⲡⲕⲁϩ ⲉⲧϩⲛ̅ⲧⲙⲏⲧⲉ . ⲁⲩⲱ ⲉϩⲣⲁⲓ ⲉⲪⲉⲛⲁⲉⲛⲇⲱⲣ . ⲁⲩⲱ ⲉϩⲣⲁⲓ ⲉⲧⲡⲉⲣϩⲁⲗⲓⲁ ⲛ̅ⲛⲉⲬⲁⲛⲁⲛⲁⲓⲟⲥ ϫⲓⲛⲙ̅ⲙⲁ ⲛ̅ϣⲁ . ⲁⲩⲱ ⲉϩⲣⲁⲓ ⲉⲛⲁⲧⲕⲉⲡⲁⲣϩⲁⲗⲓⲁ ⲛ̅ⲛⲀⲙⲟⲣⲣⲁⲓⲟⲥ . ⲁⲩⲱ ⲛⲉⲩϩⲁⲓⲟⲥ . ⲙⲛ̅ⲛⲉⲪⲉⲣⲉⲍⲁⲓⲟⲥ . ⲁⲩⲱ ⲛⲓⲈⲃⲟⲩⲥⲁⲓⲟⲥ ⲛⲉⲧϩⲙ̅ⲡⲧⲟⲟⲩ ⲁⲩⲱ ⲛⲉⲬⲉⲧⲧⲁⲓⲟⲥ ⲛⲉⲧϩⲙ̅ⲡⲧⲟⲟⲩ ⲉϩⲣⲁⲓ ⲉⲘⲁⲥⲉⲭⲉⲙ  ⲁⲩⲱ ⲛ̅ⲧⲟⲟⲩ ⲁⲩⲉⲓ ⲉⲃⲟⲗ ⲧⲏⲣⲟⲩ ⲙⲛ̅ⲛⲉⲩⲕⲉⲣ̅ⲣⲱⲟⲩ ⲉⲩⲛⲙ̅ⲙⲁⲩ . ⲉⲩⲱϣ ⲛ̅ⲑⲉ  ⲙ̅ⲡϣⲱ ⲛ̅ⲑⲁⲗⲁⲥⲥⲁ ϩⲁⲧⲉⲩⲁϣⲏ . ⲁⲩⲱ ϩⲉⲛϩⲧⲱⲱⲣ . ⲙⲛ̅ϩⲉⲛϩⲁⲣⲙⲁ ⲉⲛⲁϣⲱⲟⲩ ⲉⲙⲁⲧⲉ.  Ⲁⲩⲱ ⲁⲩⲥⲟⲩⲱϩ ⲉϩⲟⲩⲛ ⲛ̅ϭⲓⲛⲉⲓⲣ̅ⲣⲱⲟⲩ ⲧⲏⲣⲟⲩ ϩⲓⲛⲉⲩⲉⲣⲏⲩ ⲁⲩⲉⲓ ⲉϫⲙ̅ⲡⲙⲟⲟⲩ ⲙ̅Ⲙⲁⲣⲣⲱⲛ ⲉⲣ̅ⲡⲟⲗⲉⲙⲟⲥ ⲙⲛ̅ⲡⲒⲥⲣⲁⲏⲗ : Ⲁⲩⲱ Ⲡϫⲟⲉⲓⲥ ⲡⲉϫⲁϥ ⲛ̅Ⲓⲏⲥⲟⲩⲥ . ϫⲉ ⲙ̅ⲡⲣ̅ⲣϩⲟⲧⲉ ϩⲁⲧⲉⲩϩⲏ. ⲉⲃⲟⲗϫⲉ ⲙ̅ⲡⲓⲛⲁⲩ ⲛ̅ⲣⲁⲥⲧⲉ  ⲁⲛⲟⲕ  ϯⲛⲁⲡⲁⲣⲁⲇⲓⲇⲟⲩ ⲙ̅ⲙⲟⲟⲩ ⲉⲩϭⲟⲧⲡ ϩⲓⲑⲏ ⲙ̅ⲡⲒⲥⲣⲁⲏⲗ ⲛ̅ⲧⲟⲕ ⲇⲉ ⲛⲉⲩϩⲧⲱⲱⲣ ⲉⲕⲉⲃⲗ̅ⲛⲉⲩⲕⲟⲟⲃϩ̅ ⲁⲩⲱ ⲛⲉⲩϩⲁⲣⲙⲁ ⲉⲕⲉⲣⲟⲕϩⲟⲩ ϩⲛ̅ⲟⲩⲥⲁⲧⲉ : Ⲁⲩⲱ Ⲓⲏⲥⲟⲩⲥ  ⲁϥⲉⲓ ⲙⲛ̅ⲡⲗⲁⲟⲥ ⲧⲏⲣϥ̅ ⲛ̅ⲣⲉϥⲙⲓϣⲉ ⲉϩⲣⲁⲓ ⲉϫⲱⲟⲩ ϩⲛ̅ⲟⲩϣⲥ̅ⲛⲉ ⲉϫⲙ̅ⲡⲙⲟⲟⲩ ⲙ̅Ⲙⲁⲣⲣⲱⲛ . ⲁϥⲡⲱⲧ ⲉϩⲣⲁⲓ ⲉϫⲱⲟⲩ ϩⲛ̅ⲧⲟⲣⲓⲛⲏ ⲡⲕⲁϩ ⲉⲧϫⲟⲥⲉ . ⲁⲩⲱ Ⲡϫⲟⲉⲓⲥ  ⲁϥⲧⲁⲁⲩ ⲉϩⲣⲁⲓ ⲉⲧⲟⲟⲧϥ̅  ⲙ̅ⲡⲒⲥⲣⲁⲏⲗ ⲁⲩⲱ ⲁⲩϩⲓⲟⲩⲉ ⲛ̅ⲥⲱⲟⲩ ⲛⲉⲩⲡⲏⲧ ⲛ̅ⲥⲱⲟⲩ ϣⲁϩⲣⲁⲓ ⲉⲤⲓⲇⲱⲛ ⲧⲛⲟϭ . ⲁⲩⲱ ϣⲁϩⲣⲁⲓ ⲉⲘⲁⲣⲥⲉⲙⲱⲙⲁⲛ . ⲁⲩⲱ ϣⲁϩⲣⲁⲓ ⲉⲛ̅ⲥⲱϣⲉ ⲛ̅Ⲗⲟⲛ ⲕⲁⲧⲁⲙ̅ⲙⲁ ⲛ̅ϣⲁ . ⲁⲩⲣⲁϩⲧⲟⲩ ⲉⲧⲙ̅ⲧⲣⲉⲩⲕⲁⲗⲁⲁⲩ ⲉⲡⲁϩⲟⲩ ⲉⲁϥⲟⲩϫⲁⲓ . Ⲁⲩⲱ Ⲓⲏⲥⲟⲩⲥ  ⲁϥⲉⲓⲣⲉ ⲛⲁⲩ ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ ϫⲟⲟⲥ ⲛⲁϥ . Ⲁⲩⲱ ⲛⲉⲩϩⲧⲱⲱⲣ ⲁϥⲃⲗ̅ⲛⲉⲩⲕⲟⲟⲃϩ̅ . ⲁⲩⲱ ⲛⲉⲩϩⲁⲣⲙⲁ ⲁϥⲣⲟⲕϩⲟⲩ ϩⲛ̅ⲟⲩⲥⲁⲧⲉ : Ⲁⲩⲱ Ⲓⲏⲥⲟⲩⲥ ⲁϥⲕⲟⲧϥ̅ ϩⲙ̅ⲡⲉⲩⲟⲩⲟⲉⲓϣ ⲉⲧⲙ̅ⲙⲁⲩ ⲁϥϫⲓ ⲛ̅Ⲁⲥⲱⲣ ⲙⲛ̅ⲡⲉⲥⲕⲉⲣ̅ⲣⲟ. Ⲁ̅ⲥⲱⲣ ⲇⲉ ⲛⲉⲥⲟ ⲛ̅ϣⲟⲣⲡ  ⲉϫⲛ̅ⲛⲉⲓⲙⲛ̅ⲧⲣ̅ⲣⲱⲟⲩ ⲧⲏⲣⲟⲩ. ⲁⲩⲱ  ⲁⲩⲙⲟⲩⲟⲩⲧ ϩⲣⲁⲓ ⲛ̅ϩⲏⲧⲥ̅  ⲛ̅ⲛⲕⲁ ⲛⲓⲙ ⲉⲧⲉⲟⲩⲛ̅ⲛⲓϥⲉ ⲛ̅ⲱⲛϩ ⲛ̅ϩⲏⲧϥ̅ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ . Ⲁⲩⲱ ⲁϥϥⲟⲧⲟⲩ ⲉⲃⲟⲗ ⲧⲏⲣⲟⲩ ⲉⲙⲡⲟⲩⲕⲁⲗⲁⲁⲩ ⲉⲡⲁϩⲟⲩ  ⲛ̅ϩⲏⲧⲟⲩ   ⲁⲩⲱ  Ⲁⲥⲱⲣ  ⲁⲩⲣⲟⲕϩⲥ̅  ϩⲛ̅ⲟⲩⲥⲁⲧⲉ.  Ⲁⲩⲱ ⲛ̅ⲕⲉⲡⲟⲗⲓⲥ ⲧⲏⲣⲟⲩ ⲛ̅ⲛⲣ̅ⲣⲱⲟⲩ  ⲁⲩⲱ  ⲛⲉⲩⲕⲉⲣ̅ⲣⲱⲟⲩ ⲁⲒⲏⲥⲟⲩⲥ  ϫⲓⲧⲟⲩ. ⲁⲩⲱ ⲁϥⲙⲟⲩⲟⲩⲧ ⲙ̅ⲙⲟⲟⲩ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ . Ⲁⲩⲱ ⲁϥϥⲟⲧⲟⲩ ⲉⲃⲟⲗ ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ ϩⲱⲛ ⲉⲧⲟⲟⲧϥ̅ ⲙ̅Ⲙⲱⲟⲩⲥⲏⲥ ⲡϩⲙ̅ϩⲁⲗ  ⲙ̅Ⲡϫⲟⲉⲓⲥ. ⲁⲗⲗⲁ  ⲙ̅ⲡⲟⲗⲓⲥ ⲉⲛⲧⲁⲩϩⲟⲥⲟⲩ ⲙ̅ⲡⲒⲥⲣⲁⲏⲗ ⲣⲟⲕϩⲟⲩ . ϣⲁⲧⲛ̅Ⲁⲥⲱⲣ ⲙⲁⲩⲁⲁⲥ ⲉⲛⲧⲁⲒⲏⲥⲟⲩⲥ ⲣⲟⲕϩⲥ̅ . ⲁⲩⲱ ⲛⲉⲥϣⲟⲗⲥ ⲧⲏⲣⲟⲩ ⲁⲩϣⲟⲗⲟⲩ ⲛⲁⲩ ⲛ̅ϭⲓⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ . Ⲛ̅ⲧⲟⲟⲩ ⲇⲉ ⲧⲏⲣⲟⲩ ⲁⲩϥⲟⲧⲟⲩ ⲉⲃⲟⲗ  ⲁⲩⲱ ϩⲛ̅ⲟⲩⲧⲁⲕⲟ  ⲁϥⲧⲁⲕⲟⲟⲩ ⲛ̅ⲥⲁⲛⲉⲩⲉⲣⲏⲩ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ ⲉⲙⲡϥ̅ⲕⲁⲗⲁⲁⲩ ⲉⲡⲁϩⲟⲩ ⲛ̅ϩⲏⲧⲟⲩ ⲉⲟⲩⲛⲓϥⲉ ⲛ̅ⲱⲛϩ̅ ⲛ̅ϩⲏⲧϥ̅.  ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ ϩⲱⲛ ⲉⲧⲟⲟⲧϥ̅ ⲙ̅Ⲙⲱⲟⲩⲥⲏⲥ  ⲁⲩⲱ Ⲙⲱⲟⲩⲥⲏⲥ  ϩⲱⲱϥ ⲁϥϩⲱⲛ ⲉⲧⲟⲟⲧϥ̅  ̅ⲛⲒⲏⲥⲟⲩⲥ . ⲙ̅ⲡⲉϥⲕⲁⲗⲁⲁⲩ ⲉⲡⲁϩⲟⲩ ϩⲛ̅ⲛⲉⲛⲧⲁϥϩⲟⲛⲟⲩ ⲉⲧⲟⲟⲧϥ̅ ⲛ̅ϭⲓⲘⲱⲟⲩⲥⲏⲥ : Ⲁⲩⲱ Ⲓⲏⲥⲟⲩⲥ ⲁϥϫⲓ ⲙ̅ⲡⲕⲁϩ ⲉⲧϫⲟⲥⲉ ⲁⲩⲱ ⲡⲕⲁϩ ⲧⲏⲣϥ̅ ⲛⲀⲅⲉⲃ. ⲁⲩⲱ ⲡⲕⲁϩ ⲧⲏⲣϥ ⲛ̅Ⲅⲟⲥⲟⲙ . ⲁⲩⲱ ⲧⲡⲉⲇⲓⲛⲏ ⲡⲕⲁϩ ⲉⲧϩⲛ̅ⲙⲏⲧⲉ . ⲁⲩⲱ ⲡⲕⲁϩ ⲉⲧϩⲛ̅ⲙⲙⲁⲛ̅ϩⲱⲧⲡ̅ . ⲁⲩⲱ ⲡⲧⲟⲟⲩ ⲛ̅ⲑⲒⲉⲣⲟⲩⲥⲁⲗⲏⲙ . Ⲁⲩⲱ ⲛ̅ⲕⲉⲙⲁ ⲉⲧϩⲛ̅ⲧⲙⲏⲧⲉ ⲏ ⲛⲉⲧϩⲙ̅ⲡⲥⲁ ⲙ̅ⲡⲧⲟⲟⲩ . ϫⲓⲛⲡⲧⲟⲟⲩ ⲛ̅Ⲁⲭⲉⲗ . Ⲁⲩⲱ ⲉϥⲃⲏⲕ ⲉϩⲣⲁⲓ ⲉⲤⲏⲉⲓⲣ . ⲁⲩⲱ ϣⲁϩⲣⲁⲓ ⲉⲂⲁⲗⲁⲅⲁⲇ . ⲁⲩⲱ ϣⲁϩⲣⲁⲓ ⲉⲧⲥⲱϣⲉ ⲙ̅ⲡⲕⲁϩ ⲙ̅ⲡⲖⲓⲃⲁⲛⲟⲥ. ⲉⲧϩⲙ̅ⲡⲧⲟⲟⲩ ⲛ̅Ⲁⲉⲣⲙⲱⲛ . ⲁⲩⲱ ⲛⲉⲩⲉⲣⲣⲱⲟⲩ ⲧⲏⲣⲟⲩ ⲁϥϫⲓⲧⲟⲩ ⲁϥⲧⲁⲕⲟⲟⲩ . ⲁⲩⲱ ⲁϥⲙⲟⲟⲩⲧⲟⲩ : Ⲁⲩⲱ Ⲓⲏⲥⲟⲩⲥ ⲁϥⲉⲓⲣⲉ ⲛ̅ⲟⲩⲙⲏⲏϣⲉ ⲛ̅ϩⲟⲟⲩ ⲉϥⲣ̅ⲡⲟⲗⲉⲙⲟⲥ . ⲙⲛ̅ⲛⲉⲓⲣ̅ⲣⲱⲟⲩ ⲧⲏⲣⲟⲩ . ⲉⲙⲛ̅ⲟⲩⲡⲟⲗⲓⲥ ⲛ̅ⲟⲩⲱⲧ ⲉⲙ̅ⲡⲉⲠϫⲟⲉⲓⲥ ⲧⲁⲁⲥ ⲉⲧⲟⲟⲧⲟⲩ ⲛ̅ⲛϣⲏⲣⲉ  ̅ⲙⲡⲒⲥⲣⲁⲏⲗ.  Ⲁϥϫⲓⲧⲟⲩ ⲧⲏⲣⲟⲩ ϩⲙ̅ⲡⲡⲟⲗⲉⲙⲟⲥ  ⲉⲃⲟⲗϫⲉ ⲉ̅ⲛⲧⲁⲡⲉⲓⲧⲱϣ ϣⲱⲡⲉ ϩⲓⲧⲙ̅Ⲡϫⲟⲉⲓⲥ. ⲉⲥⲉϭⲡⲉⲩϩⲏⲧ ⲉⲧⲣⲉⲩⲉⲓ ⲉⲃⲟⲗ  ⲉⲣ̅ⲡⲟⲗⲉⲙⲟⲥ  ⲙⲛ̅ⲡⲒⲥⲣⲁⲏⲗ. ϫⲉ ⲉⲩⲉϥⲟⲧⲟⲩ ⲉⲃⲟⲗ ⲁⲩⲱ ⲛ̅ⲥⲉⲧⲙ̅ϯ ⲛⲁⲩ ⲛ̅ⲟⲩⲛⲁ.  ⲁⲗⲗⲁ ϫⲉⲕⲁⲥ ⲉⲩⲉϥⲟⲧⲟⲩ ⲉⲃⲟⲗ. ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ  ϩⲱⲛ ⲉⲧⲟⲟⲧϥ̅  ⲙ̅Ⲙⲱⲟⲩⲥⲏⲥ : Ⲁⲩⲱ  ⲁϥⲉⲓ  ̅ⲙⲡⲉⲩⲟⲉⲓϣ ⲉⲧⲙ̅ⲙⲁⲩ ⲛ̅ϭⲓⲒⲏⲥⲟⲩⲥ  ⲁϥϥⲱⲧⲉ ⲉⲃⲟⲗ ⲛ̅ⲛⲉⲧϩ̅ⲛⲁⲕⲓⲙ  ⲉ̅ⲃⲟⲗϩⲛ̅ⲧⲟⲣⲓⲛⲏ ⲡⲕⲁϩ ⲉⲧϫⲟⲥⲉ . ⲉⲃⲟⲗ  ϩⲛ̅Ⲭⲉⲃⲣⲟⲛ ⲁⲩⲱ ⲉⲃⲟⲗ  ϩⲛ̅Ⲇⲁⲃⲓⲣ . ⲁⲩⲱ ⲉⲃⲟⲗ ϩⲛ̅Ⲧⲁⲛⲁⲃⲱⲑ. ⲁⲩⲱ ⲉⲃⲟⲗ  ϩⲛ̅Ⲁⲃⲱⲑ . ⲁⲩⲱ ⲉⲃⲟⲗ  ϩⲙ̅ⲡⲧⲟⲟⲩ ⲧⲏⲣϥ̅  ⲛ̅Ⲓⲟⲩⲇⲁ  ⲙⲛ̅ⲛⲉⲩⲕⲉⲡⲟⲗⲓⲥ  ⲁ Ⲓⲏⲥⲟⲩⲥ ϥⲟⲧⲟⲩ ⲉⲃⲟⲗ . Ⲙ̅ⲡⲉⲟⲩⲟⲛ ⲥⲉⲉⲡⲉ ϩⲛ̅ⲛⲉⲧϩ̅ⲛⲁⲕⲓⲙ ⲉⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ϣⲁⲧⲛ̅Ⲅⲁⲍⲁ . ⲁⲩⲱ ϩ̅ⲛⲀⲥⲏⲇⲱⲑ ⲛⲁⲓ ⲉⲛⲧⲁⲩϣⲱϫⲡ̅ ⲛ̅ϩⲏⲧⲟⲩ : Ⲁⲩⲱ Ⲓⲏⲥⲟⲩⲥ ⲁϥϫⲓ ⲙ̅ⲡⲕⲁϩ ⲧⲏⲣϥ̅ ⲕⲁⲧⲁⲑⲉ  ⲉⲛⲧⲁⲠϫⲟⲉⲓⲥ  ϩⲱⲛ ⲉⲧⲟⲟⲧϥ̅ ⲙ̅Ⲙⲱⲟⲩⲥⲏⲥ : Ⲁⲩⲱ Ⲓⲏⲥⲟⲩⲥ ⲁϥϯ ⲙ̅ⲡⲕⲁϩ ⲛ̅ⲕⲗⲏⲣⲟⲛⲟⲙⲓⲁ  ⲙ̅ⲡⲒⲥⲣⲁⲏⲗ.  ⲉⲁϥⲡⲱϣ ⲙ̅ⲙⲟϥ ⲕⲁⲧⲁⲛⲉϥⲫⲩⲗⲏ . ⲁⲩⲱ ⲡⲕⲁϩ ⲁϥⲥⲙⲛ̅ⲧϥ̅ ϩⲙ̅ⲡⲡⲟⲗⲉⲙⲟⲥ : 
 
Ⲓ̅Ⲃ̅.  Ⲁⲩⲱ ⲛⲁⲓ ⲛⲉ ⲛ̅ⲣ̅ⲣⲱⲟⲩ ⲙ̅ⲡⲕⲁϩ ⲛⲁⲓ ⲉⲛⲧⲁⲩⲙⲟⲩⲟⲩⲧⲟⲩ ⲛ̅ϭⲓⲛ̅ϣⲏⲣⲉ ⲙ̅ⲡⲒⲥⲣⲁⲏⲗ. Ⲁⲩⲱ  ⲁⲩⲕⲗⲓⲣⲟⲛⲟⲙⲉⲓ ⲙ̅ⲡⲉⲩⲕⲁϩ  ϩⲙ̅ⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ ϫⲓⲛⲙ̅ⲙⲁ ⲛ̅ϣⲁ ⲙ̅ⲡⲣⲏ . ϫⲓⲛⲡⲉⲓⲥⲁ ⲛ̅Ⲁⲣⲛⲱⲛ ϣⲁϩⲣⲁⲓ ⲉⲡⲕⲁϩ ⲛⲁⲈⲣⲙⲱⲛ ⲁⲩⲱ ⲡⲕⲁϩ ⲧⲏⲣϥ̅  ⲛ̅ⲧⲀⲣⲁⲃⲁ ϫⲓⲛⲙ̅ⲙⲁ ⲛ̅ϣⲁ ⲛ̅Ⲥⲏⲉⲓⲣ . Ⲛ̅ⲉⲣⲣⲱⲟⲩ ⲉⲧϣⲟⲟⲡ ϫⲓⲛⲤⲓⲇⲱⲛ ⲛⲁⲓ ⲉⲩⲟ ⲛ̅ϫⲟⲉⲓⲥ ϫⲓⲛⲀⲣⲛⲱⲛ ⲧⲁⲓ ⲉⲧϣⲟⲟⲡ ϩⲙ̅ⲡⲉⲓⲁ. ⲕⲁⲧⲁⲟⲩⲙⲉⲣⲟⲥ  ⲛ̅ⲧⲉⲡⲉⲓⲁ. ⲁⲩⲱ ⲧⲡⲁϣⲉ ⲛ̅Ⲅⲁⲗⲁⲁⲧ  ϣⲁϩⲣⲁⲓ ⲉⲒⲁⲃⲟⲕ . ⲉⲛ̅ⲧⲟϣ ⲛ̅ⲛϣⲏⲣⲉ ⲛ̅Ⲁⲙⲙⲱⲛ . ⲁⲩⲱ ⲧⲀⲣⲁⲃⲁ ϣⲁϩⲣⲁⲓ ⲉⲑⲁⲗⲁⲥⲥⲁ ⲛ̅Ⲭⲉⲛⲉⲣⲉⲑ ⲕⲁⲧⲁⲙ̅ⲙⲁ ⲛ̅ϣⲁ . ⲁⲩⲱ  ϣⲁϩⲣⲁⲓ ⲉⲧⲉⲑⲁⲗⲁⲥⲥⲁ ⲛ̅Ⲁⲣⲁⲃⲁ. ⲧⲉⲑⲁⲗⲁⲥⲥⲁ ⲛ̅ⲛⲉϩⲙⲟⲩ. ϫⲓⲛⲙ̅ⲙⲁ ⲛ̅ϣⲁ  ⲛ̅ⲧⲉϩⲓⲏ ⲉⲧϫⲓ ⲉϩⲣⲁⲓ ⲉⲀⲥⲓⲙⲱⲑ. ϫⲓⲛⲐⲁⲓⲙⲁⲛ ⲧⲉⲧϩⲁⲡⲉⲥⲏⲧ ⲙ̅Ⲙⲏⲇⲱⲑ Ⲫⲁⲥⲅⲁ :  Ⲁⲩⲱ Ⲱⲅ ⲡⲣ̅ⲣⲟ ⲛ̅ⲧⲂⲁⲥⲁⲛ ⲁϥϣⲱϫⲡ̅ ⲉⲃⲟⲗ ϩⲛ̅ⲛⲄⲓⲅⲁⲥ . ⲡⲉⲧⲟⲩⲏϩ ϩⲛ̅Ⲁⲥⲧⲁⲣⲱⲑ ⲁⲩⲱ ϩⲛ̅Ϩⲉⲇⲣⲁⲉⲓⲛ.  ⲉϥⲟ ⲛ̅ⲁⲣⲭⲱⲛ ϫⲓⲛⲡⲧⲟⲟⲩ ⲛⲀⲉⲣⲙⲱⲛ. ⲁⲩⲱ ϫⲓⲛⲀⲥⲉⲭⲁ .  ⲁⲩⲱ ⲧⲂⲁⲥⲁⲛ ⲧⲏⲣⲥ̅ ϣⲁϩⲣⲁⲓ ⲉⲛ̅ⲧⲟϣ ⲛ̅Ⲅⲉⲣⲅⲉⲥⲓⲛ . ⲧⲘⲁⲭⲉⲓ . ⲁⲩⲱ ⲧⲡⲁϣⲉ ⲙ̅ⲡⲧⲟϣ ⲛ̅Ⲅⲁⲗⲁⲁⲧ  ⲡⲧⲟϣ  ⲛ̅Ⲥⲓⲱⲛ ⲡⲣ̅ⲣⲟ ⲛ̅Ⲥⲉⲃⲱⲛ . Ⲙⲱⲟⲩⲥⲏⲥ  ⲡϩⲙ̅ϩⲁⲗ  ⲙ̅Ⲡϫⲟⲉⲓⲥ  ⲁⲩⲱ ⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ  ⲁⲩⲡⲁⲧⲁⲥⲥⲉ ⲙ̅ⲙⲟⲟⲩ . Ⲁⲩⲱ Ⲙⲱⲟⲩⲥⲏⲥ  ⲁϥⲧⲁⲁⲥ  ⲛ̅ⲕⲗⲓⲣⲟⲛⲟⲙⲓⲁ  ⲛ̅Ϩⲣⲟⲩⲃⲏⲛ ⲙⲛ̅Ⲅⲁⲇ . ⲁⲩⲱ ⲧⲡⲁϣⲉ  ⲙ̅ⲫⲩⲗⲏ ⲙ̅Ⲙⲁⲛⲁⲥⲥⲏ . Ⲁⲩⲱ ⲛⲁⲓ ⲛⲉ ⲛ̅ⲣ̅ⲣⲱⲟⲩ ⲛ̅ⲛⲀⲙⲟⲣⲣⲁⲓⲟⲥ . ⲛⲁⲓ ⲉⲛⲧⲁⲘⲱⲟⲩⲥⲏⲥ ⲙⲟⲩⲟⲩⲧⲟⲩ ⲙⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ  ϩⲙ̅ⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ. ϩⲁⲧⲛ̅ⲧⲉⲑⲁⲗⲥⲥⲁ ⲛ̅Ⲃⲁⲗⲁⲅⲁⲇⲁ  ϩⲛ̅ⲧⲥⲱϣⲉ  ⲙ̅ⲡⲕⲁϩ  ⲙ̅ⲡⲖⲓⲃⲁⲛⲟⲥ . ⲁⲩⲱ ϣⲁϩⲣⲁⲓ ⲉⲡⲧⲟⲟⲩ ⲛ̅Ⲭⲗ̅ⲕⲁ  ⲁⲩⲱ ⲉⲩⲃⲏⲕ ⲉϩⲣⲁⲓ ϣⲁⲤⲏⲉⲓⲣ : Ⲁⲩⲱ Ⲓⲏⲥⲟⲩⲥ ⲁϥϯⲡⲕⲁϩ ⲉⲧⲙ̅ⲙⲁⲩ ⲛ̅ⲛⲉⲫⲩⲗⲏ ⲙ̅ⲡⲒⲥⲣⲁⲏⲗ. ⲉⲧⲣⲉⲩⲕⲗⲓⲣⲟⲛⲟⲙⲉⲓ ⲙ̅ⲙⲟϥ ⲕⲁⲧⲁⲡⲉⲩⲕⲗⲏⲣⲟⲥ . ⲁⲩⲱ ϩⲙ̅ⲡⲧⲟⲟⲩ ⲙ̅ⲡⲕⲁϩ ⲉⲧϫⲟⲥⲉ . ⲁⲩⲱ ϩⲛ̅ⲧⲥⲱϣⲉ ⲡⲕⲁϩ ⲉⲧϩⲛ̅ⲧⲙⲏⲧⲉ . ⲁⲩⲱ ϩⲛ̅ⲧⲀⲣⲁⲃⲁ . ⲁⲩⲱ ϩⲛ̅Ⲁⲥⲏⲇⲱⲑ . ⲁⲩⲱ ϩⲛ̅ⲧⲉⲣⲏⲙⲟⲥ. ⲁⲩⲱ ϩⲛ̅Ⲁⲅⲉⲃ ⲡⲉⲬⲉⲧⲧⲁⲓⲟⲥ . ⲙⲛ̅ⲡⲀⲙⲟⲣⲣⲁⲓⲟⲥ . ⲁⲩⲱ ⲡⲉⲬⲁⲛⲁⲛⲁⲓⲟⲥ. ⲙⲛ̅ⲡⲉⲪⲉⲣⲉⲍⲁⲓⲟⲥ . ⲁⲩⲱ ⲡⲈⲩϩⲁⲓⲟⲥ . ⲁⲩⲱ ⲡⲒⲉⲃⲟⲩⲥⲁⲓⲟⲥ . ⲙⲛ̅ⲡⲄⲉⲣⲅⲉⲥⲁⲓⲟⲥ. ⲁⲩⲱ ⲡⲣ̅ⲣⲟ ⲛ̅Ϩⲓⲉⲣⲓⲭⲱ.  ⲁⲩⲱ ⲡⲣ̅ⲣⲟ ⲛ̅Ⲅⲁⲓ. ⲧⲉⲧϩⲓⲧⲟⲩⲱⲥ  ⲛ̅Ⲃⲁⲏⲑⲏⲗ. ⲡⲣ̅ⲣⲟ ⲛ̅Ⲓⲉⲣⲟⲩⲥⲁⲗⲏⲙ . ⲡⲣ̅ⲣⲟ ⲛ̅Ⲭⲉⲃⲣⲱⲛ. ⲡⲣ̅ⲣⲟ ⲛ̅Ⲓⲉⲣⲓⲙⲟⲩⲑ . ⲡⲣ̅ⲣⲟ ⲛ̅Ⲗⲁⲭⲓⲥ . ⲡⲣ̅ⲣⲟ ⲛ̅Ⲁⲓⲗⲁⲙ . ⲡⲣ̅ⲣⲟ ⲛ̅Ⲅⲁⲍⲉⲣ . ⲡⲣ̅ⲣⲟ ⲛ̅Ⲇⲁⲁⲃⲓⲣ . ⲡⲣ̅ⲣⲟ ⲛ̅Ⲅⲁⲓⲥⲉⲓ . ⲡⲣ̅ⲣⲟ ⲛ̅Ⲉⲣⲙⲁⲑ . ⲡⲣ̅ⲣⲟ ⲛ̅Ⲁⲣⲁⲑ.  ⲡⲣ̅ⲣⲟ ⲛ̅Ⲗⲉⲃⲓⲛⲁ. ⲡⲣ̅ⲣⲟ ⲛ̅Ⲟⲇⲟⲗⲁⲙ . ⲡⲣ̅ⲣⲟ ⲙ̅Ⲙⲁⲕⲏⲇⲁ. ⲡⲣ̅ⲣⲟ ⲛ̅Ⲁ.ⲫⲟⲩⲟ . ⲡⲣ̅ⲣⲟ ⲛ̅Ⲟⲫⲉⲣ. ⲡⲣ̅ⲣⲟ ⲛ̅Ⲟⲫⲉⲕ . ⲡⲕⲁϩ ⲛ̅Ⲁⲥⲱⲣ ⲡⲣ̅ⲣⲟ ⲛ̅Ⲁⲥⲟⲙ .  ⲡⲣ̅ⲣⲟ ⲛ̅Ⲥⲩⲙⲟⲱⲛ . ⲡⲣ̅ⲣⲟ ⲙ̅Ⲙⲁⲣⲣⲱⲑ . ⲡⲣ̅ⲣⲟ ⲛ̅Ⲉⲍⲉⲓⲫ . ⲡⲣ̅ⲣⲟ ⲛ̅Ⲕⲁⲇⲏⲥ . ⲡⲣ̅ⲣⲟ ⲛ̅Ⲁⲇⲁⲛⲁⲭ . ⲡⲣ̅ⲣⲟ ⲙ̅Ⲙⲁⲕⲉⲇⲱⲑ. ⲡⲣ̅ⲣⲟ ⲛ̅Ϩⲓⲉⲣⲟⲕⲟⲙ . ⲡⲣ̅ⲣⲟ ⲛ̅Ⲉⲇⲱⲣ . ⲡⲣ̅ⲣⲟ ⲛ̅Ⲁⲅⲱⲓⲙ . ⲡⲕⲁϩ ⲛ̅ⲧⲄⲁⲗⲓⲗⲁⲓⲁ . ⲡⲣ̅ⲣⲟ ⲛ̅Ⲑⲉⲣⲥⲁ . ⲛⲉⲣⲣⲱⲟⲩ ⲧⲏⲣⲟⲩ ⲉⲩⲛⲁⲣ̅ϫⲟⲩⲧⲯⲓⲥ :
 
Ⲓ̅Ⲅ̅. Ⲁⲩⲱ Ⲓⲏⲥⲟⲩⲥ ⲁϥⲣ̅ϩⲗ̅ⲗⲟ ⲁϥⲁⲗⲉ ⲉϩⲣⲁⲓ ϩⲛ̅ⲛⲉϥϩⲟⲟⲩ. ⲁⲩⲱ Ⲡϫⲟⲉⲓⲥ ⲡⲉϫⲁϥ  ⲛ̅Ⲓⲏⲥⲟⲩⲥ ϫⲉ  ⲉⲓⲥ ϩⲏⲏⲧⲉ ⲛ̅ⲧⲟⲕ  ⲁⲕⲁⲓⲁⲓ  ϩⲛ̅ⲛⲉⲕϩⲟⲟⲩ . Ⲁⲩⲱ ⲟⲛ ⲛⲁϣⲉⲡⲕⲁϩ ⲉⲛⲧⲁϥϣⲱϫⲡ ⲉⲩⲕⲗⲓⲣⲟⲛⲟⲙⲓⲁ . Ⲁⲩⲱ ⲡⲁⲓ ⲡⲉ ⲡⲕⲁϩ ⲉⲛⲧⲁϥϣⲱϫⲡ̅ ⲛ̅ⲧⲟϣ ⲛ̅ⲛⲪⲩⲗⲓⲥⲧⲓⲉⲓⲙ . ⲡⲄⲉⲥⲓⲣⲉⲓ ⲁⲩⲱ ⲡⲉⲬⲁⲛⲁⲛⲁⲓⲟⲥ ϫⲓⲛⲡⲕⲁϩ ⲉⲧⲉⲙⲉⲩⲟⲩⲟⲩⲱϩ ⲛ̅ϩⲏⲧϥ̅ ⲙ̅ⲡⲙ̅ⲧⲟ ⲉⲃⲟⲗ ⲛ̅Ⲕⲏⲙⲉ. ϣⲁϩⲣⲁⲓ ⲉⲛ̅ⲧⲟϣ ⲛ̅Ⲁⲕⲕⲁⲣⲱⲛ ⲛ̅ⲥⲁϩⲃⲟⲩⲣ ⲛ̅ⲛⲉⲬⲁⲛⲁⲛⲁⲓⲟⲥ . ⲉⲩⲱⲡ  ⲙ̅ⲙⲟⲟⲩ ⲉϯ ⲙ̅ⲙⲛ̅ⲧⲥⲁⲧⲣⲁⲡⲏⲥ  ⲛ̅ⲛⲉⲪⲩⲗⲓⲥⲧⲓⲉⲓⲙ. ⲡⲄⲁⲍⲁⲓⲟⲥ  ⲁⲩⲱ ⲡⲀⲥⲱⲧⲓⲟⲥ . ⲁⲩⲱ  ⲡⲀⲥⲕⲁⲗⲱⲛⲓⲧⲏⲥ ⲁⲩⲱ ⲡⲄⲉⲑⲑⲁⲓⲟⲥ . ⲁⲩⲱ ⲡⲈⲩϩⲁⲓⲟⲥ  ϩⲛ̅Ⲑⲁⲓⲙⲁⲛ. ⲁⲩⲱ ⲡⲀⲕⲕⲁⲣⲱⲛ. ⲁⲩⲱ ⲡⲕⲁϩ ⲧⲏⲣϥ̅ ⲛ̅Ⲭⲁⲛⲁⲁⲛ  ⲙ̅ⲡⲙ̅ⲧⲟ ⲉⲃⲟⲗ ϫⲓⲛⲄⲁⲍⲁ .  ⲁⲩⲱ ⲛⲁⲤⲓⲇⲱⲛ ϣⲁϩⲣⲁⲓ ⲉⲀⲫⲉⲕ . ϣⲁϩⲣⲁⲓ ⲉⲛ̅ⲧⲟϣ ⲛ̅ⲛⲀⲙⲟⲣⲣⲁⲓⲟⲥ.  ⲁⲩⲱ ⲡⲕⲁϩ ⲧⲏⲣϥ̅ ⲛ̅Ⲅⲁⲗⲁⲃⲁⲑ ⲛ̅ⲧⲉⲪⲩⲗⲓⲥⲧⲓⲉⲓⲙ . ⲕⲁⲧⲁⲡⲕⲁϩ ⲧⲏⲣϥ̅  ⲙ̅ⲡⲖⲓⲃⲁⲛⲟⲥ  ϫⲓⲛⲙ̅ⲙⲁ ⲛ̅ϣⲁ  ⲙ̅ⲡⲏϣ ϣⲁϩⲣⲁⲓ ⲉⲄⲁⲗⲅⲁⲗⲁ  ϩⲁⲣⲁⲧϥ̅  ⲙ̅ⲡⲧⲟⲟⲩ ⲛⲀⲉⲣⲙⲱⲛ ϣⲁⲧⲉϩⲓⲏ ⲛ̅ⲃⲱⲕ ⲉϩⲟⲩⲛ ⲉⲈⲙⲁⲑ. ⲟⲩⲟⲛ ⲛⲓⲙ ⲉⲧⲟⲩⲏϩ ϩⲛ̅ⲧⲟⲣⲓⲛⲏ ⲡⲕⲁϩ ⲉⲧϫⲟⲥⲉ . ϫⲓⲛⲡⲖⲓⲃⲁⲛⲟⲥ ϣⲁϩⲣⲁⲓ ⲉⲘⲁⲥⲥⲓⲉⲫⲱⲉ . Ⲙⲁⲉⲓⲙ ⲛ̅Ⲥⲓⲇⲱⲛⲓⲟⲥ ⲧⲏⲣⲟⲩ ⲁⲛⲟⲕ ⲉⲧⲛⲁⲏⲟⲧⲟⲩ ⲉⲃⲟⲗ  ϩⲁⲑⲏ  ⲙ̅ⲡⲒⲥⲣⲁⲏⲗ . ⲕⲁⲧⲁⲑⲉ ⲉⲛⲧⲁⲓϩⲱⲛ ⲉⲧⲟⲟⲧⲕ̅ : Ⲧⲉⲛⲟⲩ ϭⲉ ⲡⲱϣ  ⲙ̅ⲡⲉⲓⲕⲁϩ ⲉⲧⲉⲯⲓⲧⲉ ⲙ̅ⲫⲩⲗⲏ . ⲁⲩⲱ ⲧⲡⲁϣⲉ  ⲛ̅ⲧⲫⲩⲗⲏ ⲙ̅Ⲙⲁⲛⲁⲥⲥⲏ . ϫⲓⲛⲡⲒⲟⲣⲇⲁⲛⲏⲥ ϣⲁϩⲣⲁⲓ ⲉⲧⲉⲑⲁⲗⲁⲥⲥⲁ ⲛⲟϭ . ⲕⲁⲧⲁⲙ̅ⲙⲁ ⲛ̅ϩⲱⲧⲡ̅ ⲙ̅ⲡⲣⲏ ⲉⲕⲉⲧⲁⲁϥ ⲛⲁⲩ. ⲧⲉⲑⲁⲗⲁⲥⲥⲁ ⲛⲟϭ  ⲛ̅ⲧⲟⲥ ⲧⲉⲧⲛⲁⲣ̅ⲧⲟϣ ⲛ̅ⲧⲥⲛ̅ⲧⲉ  ⲙ̅ⲫⲩⲗⲏ . Ⲁⲩⲱ ⲧⲡⲁϣⲉ  ⲛ̅ⲧⲫⲩⲗⲏ ⲙ̅Ⲙⲁⲛⲁⲥⲥⲏ ⲛⲉⲧϣⲟⲟⲡ ⲙⲛ̅Ϩⲣⲟⲩⲃⲏⲛ  ⲁⲩⲱ ⲙⲛ̅Ⲅⲁⲇ . ⲁⲘⲱⲟⲩⲥⲏⲥ ϯ ⲛⲁⲩ ϩⲓⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ ⲕⲁⲧⲁⲙ̅ⲙⲁ ⲛ̅ϣⲁ ⲙ̅ⲡⲣⲏ . ⲁϥϯ ⲛⲁⲩ  ⲛ̅ϭⲓⲘⲱⲟⲩⲥⲏⲥ ⲡϩⲙ̅ϩⲁⲗ  ⲙ̅Ⲡϫⲟⲉⲓⲥ ϫⲓⲛⲀⲣⲟⲏⲣ ⲧⲁⲓ ⲉⲧϩⲓϫⲙ̅ⲡⲉⲥⲡⲟⲧⲟⲩ ⲙ̅ⲡⲉⲬⲓⲙⲁⲣⲣⲟⲥ ⲛ̅ⲁⲣⲛⲱⲛ. ⲁⲩⲱ ⲧⲡⲟⲗⲓⲥ ⲉⲧϩⲛ̅ⲧⲙⲏⲧⲉ ⲙ̅ⲡⲓⲁ . ⲁⲩⲱ ⲧⲘⲓⲥⲟⲣ ⲧⲏⲣⲥ̅ ϫⲓⲛⲘⲉⲧⲁⲃⲁⲛ.  ⲙ̅ⲡⲟⲗⲓⲥ ⲧⲏⲣⲟⲩ ⲛ̅Ⲥⲓⲱⲛ ⲡⲣ̅ⲣⲟ ⲛ̅ⲛⲀⲙⲟⲣⲣⲁⲓⲟⲥ  ⲡⲁⲓ ⲉⲛⲧⲁϥⲣ̅ⲣ̅ⲣⲟ ϩⲛ̅ⲛⲈⲥⲉⲃⲱⲛ. ϣⲁϩⲣⲁⲓ ⲉⲛ̅ⲧⲟϣ ⲛ̅ⲛϣⲏⲣⲉ ⲛ̅Ⲁⲙⲙⲱⲛ . ⲁⲩⲱ ⲡⲕⲁϩ ⲧⲏⲣϥ̅ ⲛ̅Ⲅⲁⲗⲁⲁⲧ. ⲁⲩⲱ ⲛ̅ⲧⲟϣ ⲛⲄⲉⲥⲓⲣⲉⲓ . ⲁⲩⲱ ⲙ̅Ⲙⲁⲭⲁⲧⲉⲓ . ⲡⲧⲟⲟⲩ ⲧⲏⲣϥ̅ ⲛⲀⲉⲣⲙⲱⲛ. ⲁⲩⲱ ⲡⲕⲁϩ ⲧϣⲣϥ̅  ⲛ̅ⲧⲂⲁⲥⲁⲛ  ϣⲁϩⲣⲁⲓ ⲉⲈⲗⲭⲁ. ⲧⲙⲛ̅ⲧⲣ̅ⲣⲟ ⲧⲏⲣⲥ̅  ⲛ̅Ⲱⲅ ϩⲙ̅ⲡⲕⲁϩ ⲛ̅Ⲃⲁⲥⲁⲛ . ⲡⲁⲓ ⲉⲛⲧⲁϥⲣ̅ⲣⲟ ϩⲛ̅Ϩⲉⲇⲣⲁⲉⲓⲛ . ⲁⲩⲱ ϩⲛ̅Ⲁⲥⲧⲁⲣⲱⲑ . ⲡⲁⲓ ⲁϥϣⲱϫⲡ̅  ⲛ̅Ⲅⲓⲅⲁⲥ. Ⲙⲱⲟⲩⲥⲏⲥ ⲇⲉ ⲁϥⲡⲁⲧⲁⲥⲥⲉ ⲙ̅ⲙⲟϥ . ⲁⲩⲱ ⲁϥϥⲟⲧϥ̅ ⲉⲃⲟⲗ : Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲙ̅ⲡⲟⲩϥⲱⲧⲉ  ⲉⲃⲟⲗ ⲙ̅ⲡⲄⲉⲥⲓⲣⲉⲓ. ⲁⲩⲱ Ⲙⲁⲭⲁⲧⲓⲉⲓⲙ . ⲁⲩⲱ ⲡⲉⲬⲁⲛⲁⲛⲁⲓⲟⲥ . ⲁⲩⲱ  ⲁϥⲟⲩⲟϩ ⲛ̅ϭⲓⲡⲣ̅ⲣⲟ ⲛ̅Ⲅⲉⲥⲓⲣⲉⲓ . ⲁⲩⲱ ⲟⲛ Ⲙⲁⲭⲁⲧⲓⲉⲓⲙ ⲙⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ ϣⲁϩⲣⲁⲓ ⲉⲡⲟⲟⲩ  ⲛ̅ϩⲟⲟⲩ . Ⲡⲗⲏⲛ ⲧⲉⲫⲩⲗⲏ ⲛ̅Ⲗⲉⲩⲉⲓ ⲙ̅ⲡⲟⲩϯⲕⲗⲏⲣⲟⲛⲟⲙⲓⲁ ⲛⲁⲥ . ⲉⲃⲟⲗϫⲉ Ⲡϫⲟⲉⲓⲥ ⲡⲛⲟⲩⲧⲉ ⲙ̅ⲡⲒⲥⲣⲁⲏⲗ  ⲛ̅ⲧⲟϥ ⲡⲉ ⲧⲉⲩⲕⲗⲏⲣⲟⲛⲟⲙⲓⲁ ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ ϫⲟⲟⲥ ⲛⲁⲩ :  Ⲁⲩⲱ ⲡⲁⲓ ⲡⲉ ⲡⲡⲱϣ  ⲙ̅ⲡⲕⲁϩ ⲉⲛⲧⲁⲘⲱⲟⲩⲥⲏⲥ ⲡⲟϣϥ̅ ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ  ϩⲛ̅Ⲁⲣⲁⲃⲱⲑ ⲛ̅ⲧⲉⲘⲱⲁⲃ ϩⲙ̅ⲡⲉⲕⲣⲟ  ⲙ̅ⲡⲒⲟⲣⲇⲁⲛⲏⲥ  ⲙ̅ⲡⲙ̅ⲧⲟ ⲉⲃⲟⲗ ⲛ̅Ϩⲓⲉⲣⲓⲭⲱ: Ⲁⲩⲱ Ⲙⲱⲟⲩⲥⲏⲥ   ⲁϥϯ ⲛ̅ⲧⲉⲫⲩⲗⲏ ⲛ̅Ϩⲣⲟⲩⲃⲏⲛ  ⲕⲁⲧⲁⲛⲉⲩⲇⲏⲙⲟⲥ . Ⲁⲩⲱ ⲛⲉⲩⲧⲟϣ  ⲁⲩϣⲱⲡⲉ ϫⲓⲛⲀⲣⲟⲏⲣ ⲧⲉⲧⲙ̅ⲡⲙ̅ⲧⲟ ⲉⲃⲟⲗ ⲙ̅ⲡⲓⲁ ⲛ̅Ⲁⲣⲛⲱⲛ . ⲁⲩⲱ ⲡⲕⲁϩ ⲧⲏⲣϥ̅  ⲙ̅Ⲙⲓⲥⲱⲣ . ⲁⲩⲱ Ⲇⲁⲓⲃⲱⲛ . ⲙⲛ̅Ⲃⲁⲙⲱⲑ. ⲙⲛ̅Ⲙⲁⲁⲃⲁⲗⲁⲥⲥⲁ. ⲙⲛ̅Ⲙⲁⲕⲉⲇⲙⲱⲑ . ⲁⲩⲱ Ⲙⲁⲓⲫⲁⲁⲑ . ⲁⲩⲱ Ⲕⲁⲣⲓⲁⲑⲉⲓⲙ . ⲁⲩⲱ Ⲥⲉⲃⲁⲙⲁ . ⲁⲩⲱ Ⲥⲉⲣⲁⲇⲁ . ⲁⲩⲱ Ⲥⲓⲱⲛ ϩⲙ̅ⲡⲧⲟⲟⲩ ⲛ̅Ⲉⲛⲁⲃ.  ⲁⲩⲱ Ⲃⲁⲓⲑⲫⲟⲅⲟⲣ . ⲁⲩⲱ  Ⲁⲥⲏⲇⲱⲑⲫⲁⲥⲅⲁ . ⲁⲩⲱ Ⲃⲁⲓⲥⲓⲙⲱⲑ . ⲁⲩⲱ ⲙ̅ⲡⲟⲗⲓⲥ ⲧⲏⲣⲟⲩ ⲙ̅Ⲙⲓⲥⲱⲣ. ⲁⲩⲱ ⲧⲙⲛ̅ⲧⲣ̅ⲣⲟ ⲧⲏⲣⲥ̅  ⲛ̅Ⲥⲓⲱⲛ . ⲡⲣ̅ⲣⲟ ⲛ̅Ⲁⲙⲟⲣⲣⲁⲓⲟⲥ  ⲡⲁⲓ ⲉⲛⲧⲁⲘⲱⲟⲩⲥⲏⲥ  ⲡⲁⲧⲁⲥⲥⲉ ⲙ̅ⲙⲟϥ . ⲛ̅ⲧⲟϥ ⲁⲩⲱ ⲛ̅ⲛⲟϭ ⲙ̅Ⲙⲁⲇⲓϩⲁⲙ . ⲁⲩⲱ Ⲡⲉⲩⲉⲓⲙ . ⲙⲛ̅Ⲣⲟⲕⲟⲙ . ⲙⲛ̅Ⲥⲟⲩⲣ . ⲙⲛ̅Ⲟⲩⲣ . ⲙⲛ̅Ϩⲣⲟⲃⲉⲕ . ⲡⲁⲣⲭⲱⲛ ⲛ̅ⲙ̅Ⲡⲁⲣⲁⲥⲓⲟⲥ ⲛⲉⲧⲟⲩⲏϩ ϩⲛ̅Ⲥⲓⲱⲛ . ⲁⲩⲱ Ⲃⲁⲗⲁϩⲁⲙ ⲡϣⲏⲣⲉ  ⲛ̅Ⲃⲁⲓⲟⲣ ⲡⲣⲉϥϣⲓⲛⲉ  ⲁⲩⲙⲟⲩⲟⲩⲧⲉϥ  ϩⲙ̅ⲡⲡⲟⲗⲉⲙⲟⲥ : Ⲁⲩϣⲱⲡⲉ ⲇⲉ ⲛ̅ϭⲓⲛⲧⲟϣ  ⲛ̅Ϩⲣⲟⲩⲃⲏⲛ ⲉⲡⲒⲟⲣⲇⲁⲛⲏⲥ  ⲡⲉⲧⲟ ⲛⲁⲩ ⲛ̅ⲧⲟϣ . Ⲧⲁⲓ ⲧⲉ ⲧⲕⲗⲏⲣⲟⲛⲟⲙⲓⲁ ⲛ̅ⲛϣⲏⲣⲉ ⲛ̅Ϩⲣⲟⲩⲃⲏⲛ . ⲕⲁⲧⲁⲛⲉⲩⲇⲏⲙⲟⲥ . ⲁⲩⲱ ⲛⲉⲩⲡⲟⲗⲓⲥ ⲙⲛ̅ⲛⲉⲩⲣ̅ⲥⲟⲟⲩⲉ .  Ⲙⲱⲟⲩⲥⲏⲥ  ⲇⲉ  ⲁϥϯ  ⲛ̅ⲛϣⲏⲣⲉ  ⲛ̅Ⲅⲁⲇ ⲕⲁⲧⲁⲛⲉⲩⲇⲏⲙⲟⲥ.  ⲁⲩⲱ  ⲁⲩϣⲱⲡⲉ  ⲛ̅ϭⲓⲛⲉⲩⲧⲟϣ ⲉⲒⲁⲥⲏⲣ. ⲉⲧⲉⲙ̅ⲡⲟⲗⲓⲥ ⲧⲏⲣⲟⲩ ⲛ̅Ⲅⲁⲗⲁⲁⲇ. ⲁⲩⲱ ⲧⲡⲁϣⲉ  ⲙ̅ⲡⲕⲁϩ ⲛ̅ⲛϣⲏⲣⲉ ⲛ̅Ⲁⲙⲙⲱⲛ . ϣⲁϩⲣⲁⲓ ⲉⲀⲣⲁⲇ ⲉⲧⲙ̅ⲡⲙ̅ⲧⲟ ⲉⲃⲟⲗ ⲛ̅Ⲁⲣⲁⲃⲁ . ⲁⲩⲱ  ϫⲓⲛⲈⲥⲉⲃⲱⲛ  ϣⲁϩⲣⲁⲓ ⲉⲀⲣⲁⲃⲱⲑ ⲕⲁⲧⲁⲙ̅ⲡⲟⲗⲓⲥ ⲛ̅Ⲁⲣⲁⲇ . Ⲁⲩⲱ ⲟⲛ ϫⲓⲛⲈⲥⲉⲃⲱⲛ ϣⲁϩⲣⲁⲓ ⲉⲀⲣⲁⲃⲱⲑ ⲙ̅ⲡⲙ̅ⲧⲟ ⲉⲃⲟⲗ ⲙ̅Ⲙⲁⲥⲥⲏⲫⲁ . ⲁⲩⲱ ⲧⲘⲁⲥⲥⲏⲫⲁ ϣⲁⲧⲂⲟⲧⲁⲛⲉⲓ. ⲁⲩⲱ Ⲙⲁⲁⲙ . ϣⲁϩⲣⲁⲓ ⲉⲛⲧⲟϣ ⲛ̅Ⲇⲁⲓⲃⲱⲛ. ⲁⲩⲱ ⲉⲚⲁⲇⲁⲉⲓⲙ . ⲁⲩⲱ ⲡⲈⲑⲁⲣⲕⲁⲉⲓ . ⲁⲩⲱ Ⲃⲁⲓⲛⲁⲑⲁⲃⲁⲣⲁ . ⲁⲩⲱ Ⲥⲟⲕⲭⲱⲑⲁ ⲁⲩⲱ Ⲥⲁⲫⲁⲛ . ⲁⲩⲱ ⲡⲕⲉϣⲱϫⲡ̅ ⲛ̅ⲧⲙⲛ̅ⲧⲉⲣⲟ ⲛ̅Ⲥⲓⲱⲛ ⲡⲣ̅ⲣⲟ ⲛ̅Ⲉⲥⲉⲃⲱⲛ . ⲁⲩⲱ ⲡⲒⲟⲣⲇⲁⲛⲏⲥ ⲛ̅ⲧⲟϥ ⲡⲉⲧⲛⲁⲣ̅ⲧⲟϣ ϣⲁϩⲣⲁⲓ ⲉⲩⲙⲉⲣⲟⲥ ⲛ̅ⲧⲉⲑⲁⲗⲁⲥⲥⲁ ⲛ̅Ⲭⲉⲛⲉⲣⲉⲑ . ϩⲙ̅ⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ ⲕⲁⲧⲁⲙ̅ⲙⲁ ⲛ̅ϣⲁ . ⲧⲁⲓ ⲧⲉ ⲧⲉⲕⲗⲏⲣⲟⲛⲟⲙⲓⲁ ⲛ̅ⲛϣⲏⲣⲉ ⲛ̅Ⲅⲁⲇ ⲕⲁⲧⲁⲛⲉⲩⲇⲏⲙⲟⲥ ⲛⲉⲩⲡⲟⲗⲓⲥ ⲛ̅ⲛⲉⲩⲕⲉⲧⲙⲉ : Ⲙⲱⲟⲩⲥⲏⲥ  ⲇⲉ  ⲁϥϯ  ⲛ̅ⲧⲡⲁϣⲉ  ⲙ̅ⲫⲩⲗⲏ ⲙ̅Ⲙⲁⲛⲁⲥⲥⲏ ⲕⲁⲧⲁⲛⲉⲩⲇⲏⲙⲟⲥ . ⲁⲩⲱ ⲛⲉⲩⲧⲟϣ ⲁⲩϣⲱⲡⲉ ϫⲓⲛⲙⲁⲛⲁ.  ⲁⲩⲱ ⲧⲙⲛ̅ⲧⲉⲣⲟ ⲧⲏⲣⲥ̅  ⲙ̅ⲡⲂⲁⲥⲁⲛⲉⲓ ⲁⲩⲱ ⲧⲙⲛ̅ⲧⲉⲣⲟ ⲧⲏⲣⲥ̅  ⲛ̅Ⲱⲅ ⲡⲣ̅ⲣⲟ ⲛ̅Ⲃⲁⲥⲁⲛ . ⲁⲩⲱ ⲛⲉⲧⲙⲉ ⲧⲏⲣⲟⲩ ⲛⲁⲉⲓⲣ ⲛⲁⲓ ⲉⲧϩⲙ̅ⲡⲕⲁϩ ⲛ̅ⲧⲂⲁⲥⲁⲛ ϣⲙⲛ̅ⲧϫⲟⲩⲧⲉ ⲙ̅ⲡⲟⲗⲓⲥ . ⲁⲩⲱ ⲧⲡⲁϣⲉ ⲙ̅ⲡⲕⲁϩ ⲛ̅Ⲅⲁⲗⲁⲁⲇ . ⲁⲩⲱ ϩⲛ̅Ⲁⲥⲇⲣⲁⲣⲱⲑ . ⲁⲩⲱ ϩⲛ̅Ⲉⲇⲣⲁⲉⲓⲛ. ⲙ̅ⲡⲟⲗⲓⲥ ⲛ̅ⲧⲙⲛ̅ⲧⲉⲣⲟ ⲛ̅Ⲱⲅ  ϩⲙ̅ⲡⲕⲁϩ  ⲛ̅ⲧⲂⲁⲥⲁⲛ  ⲁϥⲧⲁⲁⲩ ⲛ̅ⲛϣⲏⲣⲉ  ⲙ̅Ⲙⲁⲭⲉⲓⲣ ⲡϣⲏⲣⲉ  ⲙ̅Ⲙⲁⲛⲁⲥⲥⲏ  ⲕⲁⲧⲁⲛⲉⲩⲇⲏⲙⲟⲥ : Ⲛⲁⲓ ⲛⲉⲛⲧⲁⲘⲱⲟⲩⲥⲏⲥ ⲧⲁⲁⲩ ⲛ̅ⲕⲗⲏⲣⲟⲛⲟⲙⲓⲁ ⲛⲁⲩ ϩⲙ̅ⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ  ϩⲛ̅Ⲁⲣⲁⲃⲱⲑ ⲛ̅ⲧⲉⲡⲕⲁϩ  ⲙ̅Ⲙⲱⲁⲃ. ϩⲙ̅ⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ ⲙ̅ⲡⲙ̅ⲧⲟ ⲉⲃⲟⲗ ⲛ̅Ϩⲓⲉⲣⲓⲭⲱ ⲕⲁⲧⲁⲙ̅ⲙⲁ ⲛ̅ϣⲁ :
 
Ⲓ̅ⲇ̅. Ⲁⲩⲱ ⲛⲁⲓ  ϩⲱⲟⲩ ⲛⲉⲛ̅ⲧⲁⲩⲕⲗⲏⲣⲟⲛⲟⲙⲉⲓ  ϩⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ  ϩⲙ̅ⲡⲕⲁϩ ⲛ̅Ⲕⲁⲛⲁⲁⲛ. ⲛⲁⲓ ⲉⲛⲧⲁϥϯⲕⲗⲏⲣⲟⲛⲟⲙⲓⲁ ⲛⲁⲩ ⲛ̅ϭⲓⲈⲗⲉⲁⲍⲁⲣ ⲡⲟⲩⲏⲏⲃ . ⲁⲩⲱ Ⲓⲏⲥⲟⲩⲥ ⲡϣⲏⲣⲉ  ⲛ̅Ⲛⲁⲩⲏ . ⲙⲛ̅ⲛⲁⲣⲭⲱⲛ ⲛⲙ̅ⲙⲛ̅ⲧⲉⲓⲱⲧ ⲛ̅ⲛⲉⲫⲩⲗⲏ ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ ⲕⲁⲧⲁⲛⲉⲩⲇⲏⲙⲟⲥ . Ⲁⲩⲕⲗⲏⲣⲟⲛⲟⲙⲉⲓ ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ ⲟⲩⲉϩⲥⲁϩⲛⲉ  ⲛ̅ⲧϫϭⲓϫ ⲛ̅Ⲓⲏⲥⲟⲩⲥ. ⲛ̅ⲧⲉⲯⲓⲧⲉ ⲙ̅ⲫⲩⲗⲏ ⲁⲩⲱ ⲧⲡⲁϣⲉ  ⲙ̅ⲫⲩⲗⲏ ⲙ̅Ⲙⲁⲛⲁⲥⲥⲏ ϫⲓⲛⲡⲉⲕⲣⲟ ⲙ̅ⲡⲓⲟⲣⲇⲁⲛⲏⲥ . ⲁⲩⲱ ⲛ̅Ⲗⲉⲩⲉⲓⲧⲏⲥ  ⲙ̅ⲡϥ̅ϯⲕⲗⲏⲣⲟⲛⲟⲙⲓⲁ ⲛⲁⲩ ϩⲣⲁⲓ ⲛ̅ϩⲏⲧⲟⲩ ⲉⲃⲟⲗϫⲉ ⲛ̅ϣⲏⲣⲉ ⲛ̅Ⲓⲱⲥⲏϫ ⲛⲉⲩⲟ ⲙ̅ⲫⲩⲗⲏ ⲥⲛ̅ⲧⲉ . Ⲙⲁⲛⲁⲥⲥⲉ  ⲙⲛ̅Ⲉⲫⲣⲁⲓⲙ . ⲁⲩⲱ ⲙ̅ⲡⲟⲩϯⲙⲉⲣⲓⲥ ⲛ̅ⲛ̅ⲗⲉⲩⲉⲓⲧⲏⲥ ϩⲙ̅ⲡⲕⲁϩ. ⲁⲗⲗⲁ ϩⲉⲛⲡⲟⲗⲓⲥ ⲉⲧⲣⲉⲩⲟⲩⲟϩ ⲛ̅ϩⲏⲧⲟⲩ . ⲁⲩⲱ ⲛⲉⲩⲕⲉⲥⲱϣⲉ ⲉⲧⲏⲡ ⲉⲣⲟⲟⲩ ⲙⲛ̅ⲛⲉⲩⲧⲃ̅ⲛⲟⲟⲩⲉ.  ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ ϩⲱⲛ ⲉⲧⲟⲟⲧϥ̅ ⲙ̅Ⲙⲱⲟⲩⲥⲏⲥ .  ⲧⲁⲓ  ⲧⲉ  ⲑⲉ  ⲉⲛⲧⲁⲩⲁⲁⲥ  ⲛ̅ϭⲓⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ . ⲁⲩⲱ  ⲁⲩⲡⲉϣⲡⲕⲁϩ ⲉϫⲱⲟⲩ : Ⲛ̅ϣⲏⲣⲉ ⲇⲉ  ⲛ̅Ⲓⲟⲩⲇⲁ  ⲁⲩϯⲡⲉⲩⲟⲩⲟⲓ ⲉϩⲟⲩⲛ ⲉⲒⲏⲥⲟⲩⲥ  ϩⲛ̅Ⲅⲁⲗⲅⲁⲗⲁ . Ⲁⲩⲱ ⲡⲉϫⲁϥ ⲛⲁϥ ⲛ̅ϭⲓⲬⲁⲗⲉⲃ ⲡϣⲏⲣⲉ  ⲛ̅Ⲉⲓⲉⲫⲟⲛⲏ  ⲡⲔⲉⲛⲉⲍⲁⲓⲟⲥ ⲉϥϫⲱ ⲙ̅ⲙⲟⲥ ϫⲉ ⲛ̅ⲧⲟⲕ ⲕⲥⲟⲟⲩⲛ ⲙ̅ⲡϣⲁϫⲉ  ⲉⲛⲧⲁⲠϫⲟⲉⲓⲥ ϫⲟⲟϥ  ⲙ̅Ⲙⲱⲟⲩⲥⲏⲥ  ⲡⲣⲱⲙⲉ  ⲙ̅ⲡⲛⲟⲩⲧⲉ ⲉⲧⲃⲏⲏⲧ  ϩⲛ̅Ⲕⲁⲇⲏⲥ Ⲃⲁⲣⲛⲏ. ⲛⲉⲓϩⲛ̅ϩⲙⲉ ⲛ̅ⲡⲟⲙⲡⲉ ⲛ̅ⲧⲉⲣⲉϥϫⲟⲟⲩⲧ ⲛ̅ϭⲓⲘⲱⲟⲩⲥⲏⲥ  ⲡϩⲙ̅ϩⲁⲗ ⲙ̅ⲡⲛⲟⲩⲧⲉ ⲉⲃⲟⲗ  ϩⲛ̅Ⲕⲁⲇⲏⲥ  Ⲃⲁⲣⲛⲏ ⲉⲙⲉϣⲧⲡⲕⲁϩ . Ⲁⲩⲱ ⲁⲓⲧⲁⲩⲟ ⲉⲣⲟϥ ⲛ̅ⲟⲩϣⲁϫⲉ ⲕⲁⲧⲁⲡⲉϥϩⲏⲧ. Ⲛⲁⲥⲛⲏⲩ ⲇⲉ ⲉⲛⲧⲁⲩⲉⲓ ⲉϩⲣⲁⲓ ⲛⲙ̅ⲙⲁⲓ ⲁⲩⲡⲉϣⲥ̅ⲡϩⲏⲧ ⲙ̅ⲡⲗⲁⲟⲥ ⲁⲛⲟⲕ ⲇⲉ ⲁⲓⲧⲁⲁⲧ ⲉⲧⲣⲁⲟⲩⲁϩⲧ̅ ⲛ̅ⲥⲁⲠϫⲟⲉⲓⲥ ⲡⲁⲛⲟⲩⲧⲉ . Ⲁⲩⲱ Ⲙⲱⲟⲩⲥⲏⲥ  ⲁϥⲱⲣⲕ  ⲙ̅ⲡⲉϩⲟⲟⲩ ⲉⲧⲙ̅ⲙⲁⲩ ⲉϥϫⲱ ⲙ̅ⲙⲟⲥ ϫⲉ ⲡⲕⲁϩ ⲉⲛ̅ⲧⲁⲕⲃⲱⲕ ⲉϩⲟⲩⲛ ⲉⲣⲟϥ ⲉϥⲛⲁϣⲱⲡⲉ ⲛⲁⲕ ⲉⲩⲕⲗⲏⲣⲟⲥ ⲙⲛ̅ⲛⲉⲕϣⲏⲣⲉ ϣⲁⲉⲛⲉϩ . ⲉⲃⲟⲗϫⲉ  ⲁⲕⲧⲁⲁⲕ ⲉⲧⲣⲉⲕⲟⲩⲁϩⲕ̅  ⲛ̅ⲥⲁⲠϫⲟⲉⲓⲥ ⲡⲉⲕⲛⲟⲩⲧⲉ  ⲁⲩⲱ ⲧⲉⲛⲟⲩ Ⲡⲉⲛϫⲟⲉⲓⲥ ⲁϥⲥⲁⲛⲟⲩϣⲧ  ⲕⲁⲧⲁⲑⲉ ⲉⲛⲧⲁϥϫⲟⲟⲥ:  Ⲧⲙⲉϩϩⲙⲉⲧⲏ ⲛ̅ⲡⲟⲙⲡⲉ ⲧⲉ ⲧⲁⲓ ϫⲓⲛⲡⲉϩⲟⲟⲩ ⲉⲛⲧⲁⲠϫⲟⲉⲓⲥ ϫⲱ ⲙ̅ⲡⲉⲓϣⲁϫⲉ ⲉⲘⲱⲟⲩⲥⲏⲥ . ⲁⲩⲱ ⲁϥⲙⲟⲟϣⲉ ⲛ̅ϭⲓⲡⲒⲥⲣⲁⲏⲗ ϩⲛ̅ⲧⲉⲣⲏⲙⲟⲥ . Ⲧⲉⲛⲟⲩ ϭⲉ  ⲉⲓⲥ ϩⲏⲏⲧⲉ  ⲁⲛⲟⲕ ϯϩⲛ̅ϥⲧⲟⲩϫⲟⲩⲱⲧⲉ  ⲙⲛ̅ϯ  ⲛ̅ⲣⲟⲙⲡⲉ ⲉϩⲟⲩⲛ ⲉⲡⲟⲟⲩ . ⲁⲩⲱ ⲟⲩⲛ̅ϣϭⲟⲙ ⲙ̅ⲙⲟⲓ ⲟⲛ ⲙ̅ⲡⲟⲟⲩ ⲕⲁⲧⲁⲡⲓⲟⲩⲟⲉⲓϣ ⲛ̅ϣⲟⲣⲡ ⲉⲛⲧⲁϥϫⲟⲟⲩⲧ ⲛ̅ϭⲓⲘⲱⲟⲩⲥⲏⲥ . ϯⲉϣϭⲙ̅ϭⲟⲙ ⲟⲛ  ⲧⲉⲛⲟⲩ ⲉⲃⲱⲕ ⲉⲃⲟⲗ ⲉⲡⲡⲟⲗⲉⲙⲟⲥ  ⲁⲩⲱ ⲉϩⲟⲩⲛ : Ⲧⲉⲛⲟⲩ ϭⲉ  ϯⲁⲓⲧⲓ ⲙ̅ⲙⲟⲕ ⲙ̅ⲡⲉⲓⲧⲟⲟⲩ  ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ ϫⲟⲟⲥ  ⲙ̅ⲡⲉϩⲟⲟⲩ ⲉⲧⲙ̅ⲙⲁⲩ. ⲉⲃⲟⲗϫⲉ ⲛ̅ⲧⲟⲕ ⲡⲉⲛⲧⲁⲕⲥⲱⲧⲙ̅ ⲉⲡⲉⲓϣⲁϫⲉ ⲙ̅ⲡⲉϩⲟⲟⲩ ⲉⲧⲙ̅ⲙⲁⲩ ⲧⲉⲛⲟⲩ ϭⲉ ⲛⲉⲧϩⲛⲁⲕⲓⲙ ϩⲉⲛⲛⲟϭ ⲙ̅ⲡⲟⲗⲓⲥ ⲉⲩⲟⲣϫ̅ ⲉⲣϣⲁⲛⲠϫⲟⲉⲓⲥ  ϭⲉ ϣⲱⲡⲉ ⲛⲙ̅ⲙⲁⲓ ϯⲛⲁϥⲟⲧⲟⲩ ⲉⲃⲟⲗ ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ ϫⲟⲟⲥ ⲛⲁⲓ :Ⲁⲩⲱ Ⲓⲏⲥⲟⲩⲥ  ⲁϥⲥⲙⲟⲩ ⲉⲣⲟϥ . Ⲁⲩⲱ ⲧⲡⲟⲗⲓⲥ Ⲭⲉⲃⲣⲱⲛ ⲁϥⲧⲁⲁⲥ  ⲛ̅Ⲭⲁⲗⲉⲃ ⲡϣⲏⲣⲉ ⲛ̅Ⲉⲓⲉⲫⲟⲛⲏ ⲡϣⲣⲉ ⲛ̅Ⲕⲉⲛⲉⲍⲁⲓⲟⲥ  ⲉⲩⲕⲗⲏⲣⲟⲥ  ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ ⲉⲃⲟⲗϫⲉ  ⲁϥⲟⲩⲁϩϥ̅  ⲛ̅ⲥⲁⲡⲟⲩⲉϩⲥⲁϩⲛⲉ  ⲙ̅Ⲡϫⲟⲉⲓⲥ ⲡⲛⲟⲩⲧⲉ ⲙ̅Ⲓⲥⲣⲁⲏⲗ.  Ⲡⲣⲁⲛ  ⲇⲉ  ⲛ̅Ⲭⲉⲃⲣⲱⲛ ⲛ̅ϣⲟⲣⲡ ⲉⲩⲙⲟⲩⲧⲉ ⲉⲣⲟⲥ ϫⲉ ⲧⲡⲟⲗⲓⲥ  Ⲁⲣⲅⲟⲃ . ⲧⲛⲟϭ ⲙ̅ⲡⲟⲗⲓⲥ ⲧⲉ ⲧⲁⲓ ⲛ̅ⲛⲉⲧϩⲛⲁⲕⲓⲙ . ⲁⲩⲱ ⲡⲕⲁϩ  ⲁϥⲥⲙⲛ̅ⲧϥ̅  ϩⲙ̅ⲡⲡⲟⲗⲉⲙⲟⲥ:
 
Ⲓ̅Ⲉ̅. Ⲛ̅ⲧⲟϣ ⲇⲉ  ⲛ̅ⲧⲉⲫⲩⲗⲏ ⲛ̅Ⲓⲟⲩⲇⲁⲥ  ⲕⲁⲧⲁⲛⲉⲩⲇⲏⲙⲟⲥ  ⲁⲩϣⲱⲡⲉ  ⲛⲁⲩ ϫⲓⲛⲛ̅ⲧⲟϣ   ⲛ̅ϯⲆⲟⲩⲙⲁⲓⲁ. ϫⲓⲛⲧⲉⲣⲏⲙⲟⲥ  ⲛ̅Ⲥⲓⲛ ϣⲁϩⲣⲁⲓ ⲉⲔⲁⲇⲏⲥ  ⲉⲡⲥⲁ  ⲙ̅ⲡⲉⲙⲛ̅ⲧ . Ⲁⲩⲱ ⲛⲉⲩⲧⲟϣ ⲁⲩϣⲱⲡⲉ ϫⲓⲛⲡⲉⲙⲛ̅ⲧ ϣⲁϩⲣⲁⲓ ⲉⲩⲙⲉⲣⲟⲥ ⲛ̅ⲑⲁⲗⲁⲥⲥⲁ ⲙ̅ⲙⲗ̅ϩ ϫⲓⲛⲙ̅ⲡⲕⲟⲟϩ ⲙ̅ⲡⲧⲟⲟⲩ ⲉⲧⲛⲏⲩ ⲉϩⲣⲁⲓ ⲉⲡⲉⲙⲛ̅ⲧ . ⲁⲩⲱ ϥⲏⲕ ϣⲁⲡⲙ̅ⲧⲟ ⲉ̅ⲃⲟⲗ ⲛ̅ⲧⲉϩⲓⲏ ⲛ̅ⲃⲱⲕ ⲉϩⲣⲁⲓ ⲉⲀⲕⲣⲁⲃⲓⲛ . ⲁⲩⲱ ϥⲛⲟⲩϫⲉ ⲉⲃⲟⲗ ⲉⲀⲕⲥⲉⲛ̅ⲁⲭⲓⲙ . ⲁⲩⲱ ϥⲃⲏⲕ ⲉϩⲣⲁⲓ ϫⲓⲛⲡⲉⲙⲛ̅ⲧ ⲉϫⲛ̅Ⲕⲁⲇⲏⲥ  Ⲃⲁⲣⲛⲏ. ⲁⲩⲱ ϥⲛⲏⲩ ⲉⲃⲟⲗ ⲉⲀⲥⲱⲣⲱⲛ  ⲁⲩⲱ ⲉⲀⲥⲁⲣⲁⲇⲁ .  ⲁⲩⲱ ϥⲛⲏⲩ ⲉϩⲣⲁⲓ ⲉϫⲛ̅Ⲕⲁⲇⲏⲥ  ⲕⲁⲧⲁⲙ̅ⲙⲁ ⲛ̅ϩⲱⲧⲡ̅ . ⲁⲩⲱ ϥⲃⲏⲕ ⲉϩⲣⲁⲓ ⲉϫⲛ̅Ⲥⲉⲗⲙⲱⲛⲁ . ⲁⲩⲱ ϥⲛⲏⲩ ⲉⲃⲟⲗ ϣⲁϩⲣⲁⲓ ⲉⲡⲓⲁ ⲛ̅Ⲕⲏⲙⲉ . ⲁⲩⲱ ⲡⲉⲓⲉⲃⲟⲗ ⲛ̅ⲛⲉϥⲧⲟϣ ϥⲛⲏⲩ ⲉϫⲛ̅ⲧⲉⲑⲁⲗⲁⲥⲥⲁ . ⲛⲁⲓ ⲛⲉ ⲛⲉⲩⲧⲟϣ ϫⲓⲛⲡⲉⲙⲛ̅ⲧ. Ⲁⲩⲱ ⲛⲉⲩⲧⲟϣ ϫⲓⲛⲙ̅ⲙⲁ ⲛ̅ⲑⲁⲗⲁⲥⲥⲁ ⲙ̅ⲙⲗ̅ϩ ϣⲁϩⲣⲁⲓ ⲉⲩⲙⲉⲣⲟⲥ ⲙ̅ⲡⲒⲟⲣⲇⲁⲛⲏⲥ . ⲁⲩⲱ ⲛⲉⲩⲧⲟϣ ⲛⲏⲩ ⲉϩⲣⲁⲓ ⲉϫⲙ̅ⲡⲉⲙ̅ϩⲓⲧ . ⲁⲩⲱ ϫⲓⲛⲙ̅ⲡⲕⲟⲟϩ ⲉⲧϫⲟⲥⲉ ⲙ̅ⲡⲧⲟⲟⲩ ⲛ̅ⲧⲉⲑⲁⲗⲁⲥⲥⲁ . ⲁⲩⲱ ϫⲓⲛⲟⲩⲙⲉⲣⲟⲥ ⲙ̅ⲡⲓⲟⲣⲇⲁⲛⲏⲥ . ⲛⲉⲩⲧⲟϣ ⲥⲉⲛⲏⲩ ⲉϩⲣⲁⲓ ⲉϫⲛ̅Ⲃⲁⲓⲑⲁⲅ . Ⲗⲁⲁⲙ . ⲁⲩⲱ ⲥⲉⲛⲟⲩϫⲉ ϫⲓⲛⲡⲉⲙϩⲓⲧ ⲉϩⲣⲁⲓ ⲉⲂⲁⲓⲑⲁⲣⲁⲃⲁ . ⲁⲩⲱ ⲛ̅ⲧⲟϣ ⲥⲉⲃⲏⲕ ⲉϩⲣⲁⲓ ⲉϫⲙ̅ⲡⲱⲛⲉ  ⲛ̅Ⲃⲁⲓⲱⲛ ⲡϣⲏⲣⲉ  ⲛ̅Ϩⲣⲟⲩⲃⲏⲛ . ⲁⲩⲱ ⲛ̅ⲧⲟϣ ⲥⲉϫⲓ ⲉϩⲣⲁⲓ ⲉϫⲛ̅ⲡⲟⲩⲛ ⲛ̅ϥⲧⲟⲟⲩ ⲙ̅ⲡⲓⲁ  ⲛ̅Ⲁⲭⲱⲣ . ⲁⲩⲱ ⲥⲉⲛⲏⲩ ⲉϩⲣⲁⲓ ⲉϫⲛ̅Ⲅⲁⲗⲅⲁⲗ . ⲧⲁⲓ ⲉⲧⲙ̅ⲡⲙ̅ⲧⲟ ⲉⲃⲟⲗ ⲙ̅ⲡϫⲓⲥⲉ ⲛ̅Ⲁⲇⲁⲙⲓⲛ. ⲧⲁⲓ ⲉⲧⲥⲁⲉⲙⲛ̅ⲧ ⲙ̅ⲡⲓⲁ . ⲁⲩⲱ ⲥⲉⲛⲏⲩ ⲉⲃⲟⲗ ⲉϫⲙ̅ⲡⲙⲟⲟⲩ ⲛ̅ⲧⲡⲏⲅⲏ ⲙ̅ⲡⲣⲏ . ⲁⲩⲱ ⲡⲉϥⲉⲓ ⲉⲃⲟⲗ ⲉϥⲉϣⲱⲡⲉ ⲧⲉ  ⲧⲡⲏⲅⲏ  ⲛ̅Ϩⲣⲱⲅⲏⲗ . ⲁⲩⲱ ⲛⲉϥⲧⲟϣ ⲥⲉⲃⲏⲕ ⲉϩⲣⲁⲓ ⲉⲡⲓⲁ  ⲛ̅Ⲟⲛⲱⲙ ⲉϫⲙ̅ⲡⲣⲏⲥ ⲙ̅ⲡⲒⲉⲃⲟⲩ. ϫⲓⲛⲡⲉϥⲉⲙⲛ̅ⲧ  ⲧⲁⲓ ⲧⲉ Ⲑⲓⲉⲣⲟⲩⲥⲁⲗⲏⲙ  ⲁⲩⲱ ⲛ̅ⲧⲟϣ ⲥⲉⲛⲟⲩϫⲉ  ⲉⲃⲟⲗ ⲉϫⲙ̅ⲡⲕⲟⲟϩ  ⲙ̅ⲡⲧⲟⲟⲩ . ⲡⲁⲓ ⲉⲧⲙ̅ⲡⲙ̅ⲧⲟ ⲉⲃⲟⲗ  ⲙ̅ⲡⲓⲁ ⲛ̅Ⲟⲛⲱⲙ . ϩⲁⲧⲛ̅ⲑⲁⲗⲁⲥⲥⲁ . ⲧⲁⲓ ⲉⲧⲥⲁⲟⲩⲥⲁ  ⲙ̅ⲡⲕⲁϩ  ⲛ̅Ϩⲣⲁⲫⲁⲉⲓⲛ ⲉϫⲙ̅ⲡⲉⲙϩⲓⲧ. ⲁⲩⲱ ⲡⲧⲟϣ  ϥⲛⲟⲩϫⲉ ⲉⲃⲟⲗ  ϫⲓⲛⲛ̅ϫⲱϥ  ⲙ̅ⲡⲧⲟⲟⲩ ⲉϫⲛ̅ⲧⲡⲏⲅⲏ ⲡⲙⲟⲟⲩ ⲛ̅Ⲁⲭⲑ.ⲥ.  Ⲁⲩⲱ ϥⲛⲏⲩ ⲉⲃⲟⲗ ⲉⲡⲧⲟⲟⲩ ⲛ̅Ⲉⲫⲣⲱⲛ  ⲁⲩⲱ ⲡⲧⲟϣ  ϥⲛⲁⲉⲓⲛⲉ ⲉϫⲛ̅Ⲓⲉⲃⲁⲁⲗ ⲧⲁⲓ ⲧⲉ ⲧⲡⲟⲗⲓⲥ Ⲓⲁⲣⲓⲙ . ⲁⲩⲱ ⲡⲧⲟϣ  ϥⲛⲁⲕⲱⲧⲉ  ⲉϫⲛ̅Ⲃⲁⲁⲗ. ⲉϫⲛ̅ⲧⲉⲑⲁⲗⲁⲥⲥⲁ . ⲁⲩⲱ ϥⲛⲁⲉⲓ ⲉϩⲣⲁⲓ ⲉⲡⲧⲟⲟⲩ ⲛ̅Ⲁⲥⲁⲓⲣⲓⲟⲥ . ⲛ̅ⲥⲁⲥⲡⲓⲣ ⲛ̅ⲧⲡⲟⲗⲓⲥ Ⲓⲁⲣⲓⲙ. ϫⲓⲛⲙ̅ⲡⲉⲙϩⲓⲧ ⲧⲁⲓ ⲧⲉ Ⲭⲁⲥⲇⲱⲛ . ⲁⲩⲱ ϥⲛⲁⲉⲓ ⲉϫⲛ̅ⲧⲡⲟⲗⲓⲥ  ⲙ̅ⲡⲣⲏ . ⲁⲩⲱ ϥⲛⲁⲕⲱⲧⲉ ⲉⲡⲉⲙⲛ̅ⲧ . ⲁⲩⲱ ⲡⲧⲟϣ ϥⲛⲁⲛⲟⲩϫⲉ ⲉⲃⲟⲗ ⲛ̅ⲥⲁⲥⲡⲓⲣ ⲛ̅Ⲁⲕⲕⲁⲣⲱⲛ . ⲉϫⲙ̅ⲡⲉⲙ̅ϩⲓⲧ . ⲁⲩⲱ ⲛ̅ⲧⲟϣ  ⲥⲉⲛⲟⲩϫⲉ ⲉϩⲣⲁⲓ ⲉⲤⲟⲭⲱⲑ . ⲁⲩⲱ ⲛ̅ⲧⲟϣ ⲥⲉⲛⲁⲉⲓ ⲉⲃⲟⲗ ⲉϫⲙ̅ⲡⲉⲙⲛ̅ⲧ . ⲁⲩⲱ ⲥⲉⲛⲁⲛⲟⲩϫⲉ  ⲉⲃⲟⲗ ⲉϫⲛ̅Ⲗⲉⲙⲛⲁ . ⲁⲩⲱ ⲡⲉⲓⲉⲃⲟⲗ ⲛ̅ⲛ̅ⲧⲟϣ ⲉϥⲛⲏⲩ ⲉϫⲛ̅ⲧⲉⲑⲁⲗⲁⲥⲥⲁ. ⲁⲩⲱ ⲛⲉⲩⲧⲟϣ ⲉⲩⲛⲁϣⲱⲡⲉ ϫⲓⲛⲧⲉⲑⲁⲗⲁⲥⲥⲁ ⲛⲟϭ ⲧⲉⲧⲛⲁⲡⲱⲣϫ̅ ⲉⲃⲟⲗ ⲙ̅ⲡⲧⲟϣ. Ⲛⲁⲓ ⲛⲉ ⲛ̅ⲧⲟϣ ⲉⲧⲕⲱⲧⲉ ⲛ̅ⲛ̅ϣⲏⲣⲉ ⲛ̅Ⲓⲟⲩⲇⲁ ⲕⲁⲧⲁⲛⲉⲩⲇⲏⲙⲟⲥ : Ⲁⲩⲱ ⲁϥϯ ⲛ̅Ⲭⲁⲗⲉⲃ ⲡϣⲏⲣⲉ ⲛ̅Ⲓⲉⲫⲟⲛⲏ ⲛ̅ⲟⲩⲙⲉⲣⲓⲥ  ϩⲛ̅ⲧⲙⲏⲧⲉ ⲛ̅ⲛϣⲏⲣⲉ  ⲛ̅Ⲓⲟⲩⲇⲁ. ϩⲓⲧⲙ̅ⲡⲟⲩⲉϩⲥⲁϩⲛⲉ  ⲙ̅ⲡⲛⲟⲩⲧⲉ. ⲁⲩⲱ Ⲓⲏⲥⲟⲩⲥ  ⲁϥϯ ⲛⲁϥ  ⲛ̅Ⲁⲣⲁⲃⲱⲕ ⲧⲡⲟⲗⲓⲥ . ⲧⲛⲟϭ ⲙ̅ⲡⲟⲗⲓⲥ ⲛⲉⲙⲁⲕ ⲉⲧⲉ ⲧⲁⲓ ⲧⲉ Ⲭⲉⲃⲣⲱⲛ . Ⲁⲭⲁⲗⲉⲃ ⲡϣⲏⲣⲉ  ⲛ̅Ⲓⲉⲫⲟⲛⲏ ⲁϥϥⲱⲧⲉ ⲉⲃⲟⲗ  ⲙ̅ⲡϣⲁ ⲉⲧⲙ̅ⲙⲁⲩ ⲙ̅ⲡϣⲱⲙⲛ̅ⲧ ⲛ̅ϣⲉⲉⲣⲉ Ⲛⲉⲛⲁⲕ. Ⲥⲟⲩⲥⲓ. ⲁⲩⲱ ⲙ̅Ⲡⲁⲱⲑ Ⲗⲙⲉⲓ. ⲙⲛ̅Ⲁⲭⲓⲙⲁ:  Ⲭⲁⲗⲉⲃ ⲇⲉ  ⲁϥⲉⲓ ⲉϩⲣⲁⲓ  ⲉⲃⲟⲗ  ϩⲙ̅ⲡⲙⲁ ⲉⲧⲙ̅ⲙⲁⲩ  ⲉϫⲛ̅ⲛⲉⲧⲟⲩⲏϩ  ϩⲛ̅ⲇⲁⲃⲓⲣ. Ⲇⲁⲃⲓⲣ ⲇⲉ ⲛⲉⲩⲙⲟⲩⲧⲉ ⲉⲡⲉⲥⲣⲁⲛ ⲛ̅ϣⲟⲣⲡ  ϫⲉ ⲧⲡⲟⲗⲓⲥ  ⲛ̅ⲛⲉⲥϩⲁⲓ: Ⲁⲩⲱ Ⲭⲁⲗⲉⲃ ⲡⲉϫⲁϥ ϫⲉ  ⲡⲉⲧⲛⲁϫⲓ ⲛ̅ⲧⲡⲟⲗⲓⲥ ⲛ̅ⲛⲉⲥϩⲁⲓ ⲛϥ̅ⲧⲁⲕⲟⲥ. ϯⲛⲁϯ  ⲛⲁϥ ⲛ̅Ⲉⲥⲭⲁ ⲧⲁϣⲉⲉⲣⲉ ⲛ̅ⲥϩⲓⲙⲉ . Ⲁⲩⲱ ⲁϥϫⲓ  ⲛ̅ⲧⲡⲟⲗⲓⲥ  ⲛ̅ϭⲓⲄⲟⲑⲟⲛⲓⲏⲗ  ⲡϣⲏⲣⲉ  ⲛ̅Ⲅⲉⲛⲉⲍⲡⲥⲟⲛ ⲛ̅Ⲭⲁⲗⲉⲃ . ⲁⲩⲱ ⲁϥϯ ⲛⲁϥ ⲛ̅ⲉⲥⲭⲁ ⲧⲉϥϣⲉⲉⲣⲉ ⲛ̅ⲥϩⲓⲙⲉ . Ⲁⲥϣⲱⲡⲉ ⲇⲉ ⲉⲥⲛⲏⲩ ⲉⲃⲟⲗ  ⲁϥϫⲓϣⲟϫⲛⲉ ⲛⲙ̅ⲙⲁⲥ  ⲉϥϫⲱ ⲙ̅ⲙⲟⲥ . ϫⲉ ⲁⲓⲧⲓ  ⲙ̅ⲡⲟⲩⲓⲱⲧ ⲛ̅ⲟⲩⲥⲱϣⲉ . ⲁⲩⲱ ⲁⲥⲱϣ ⲉⲃⲟⲗ ϩⲓϫⲙ̅ⲡⲓⲱ . Ⲡⲉϫⲁϥ ⲇⲉ ⲛⲁⲥ  ⲛ̅ϭⲓⲬⲁⲗⲉⲃ ϫⲉ ⲁϩⲣⲟ ⲧⲉⲱϣ ⲉⲃⲟⲗ . Ⲡⲉϫⲁⲥ  ⲛⲁϥ  ϫⲉ ⲙⲁ ⲛⲁⲓ ⲛ̅ⲟⲩⲥⲙⲟⲩ ⲉⲃⲟⲗϫⲉ ⲁⲕⲧⲁⲁⲧ ⲉⲡⲕⲁϩ ⲛ̅Ⲁⲅⲉⲃ ⲟⲩⲕⲁϩ ⲉϥⲟⲩⲏⲩ . ⲙⲁ ⲛⲁⲓ ⲛ̅ⲧⲂⲁⲓⲑⲑⲓⲁⲛⲓⲥ . ⲁⲩⲱ ⲁϥϯ ⲛⲁⲥ  ⲛ̅ⲧⲄⲟⲛⲁⲓⲑⲗⲁⲁⲙ ⲉⲧϩⲙ̅ⲡϩⲃ̅ⲃⲉ :  Ⲧⲁⲓ ⲧⲉ ⲧⲉⲕⲗⲏⲣⲟⲛⲟⲙⲓⲁ ⲛ̅ⲧⲉⲫⲩⲗⲏ ⲛ̅ⲛϣⲏⲣⲉ ⲛ̅Ⲓⲟⲩⲇⲁ. Ⲁⲩϣⲱⲡⲉ ⲇⲉ ⲛ̅ϭⲓⲛⲉⲩⲡⲟⲗⲓⲥ  ⲛ̅ⲧⲉⲫⲩⲗⲏ ⲛ̅ⲛϣⲏⲣⲉ ⲛ̅Ⲓⲟⲩⲇⲁⲥ  ϩⲓϫⲙ̅ⲡⲧⲟϣ ⲛ̅Ⲉⲇⲱⲙ ϩⲓⲧⲉⲣⲏⲙⲟⲥ . ⲁⲩⲱ Ⲃⲉⲥⲉⲗⲏⲉⲓⲛ  . ⲁⲩⲱ  Ⲁⲣⲁ . ⲙⲛ̅Ⲁⲥⲱⲣ . ⲁⲩⲱ Ⲓⲅⲙⲁ. ⲙⲛ̅Ⲣⲉⲅⲙⲁ . ⲁⲩⲱ Ⲁⲣⲟⲩⲏⲗ  ⲙⲛ̅Ⲕⲁⲇⲏⲥ .  ⲁⲩⲱ Ⲁⲓⲥⲟⲣⲓⲛⲱⲛⲁⲉⲓⲙ ⲁⲩⲱ Ⲙⲉⲙⲁⲛ . ⲁⲩⲱ Ⲃⲁⲗⲙⲁⲑ . ⲙⲛ̅ⲛⲉⲩⲧⲙⲉ.  ⲁⲩⲱ ⲧⲡⲟⲗⲓⲥ Ⲉⲥⲣⲱⲙ ⲧⲁⲓ ⲧⲉ  Ⲁⲥⲱⲣ . ⲁⲩⲱ Ⲥⲏⲙ  ⲙⲛ̅Ⲁⲥⲁⲗⲙⲁ.  ⲁⲩⲱ ⲙⲛ̅Ⲱⲗⲙⲁⲇⲁ . ⲙⲛ̅Ⲥⲉⲣⲅⲁⲣⲉⲓ . ⲁⲩⲱ Ⲃⲉⲫⲁⲗⲁⲑ . ⲙⲛ̅Ⲭⲟⲗⲁ . ⲁⲩⲱ Ⲥⲉⲱⲗⲁ. ⲙⲛ̅Ⲃⲉⲣⲥⲏⲃⲉⲉ ⲁⲩⲱ ⲛⲉⲩⲧⲙⲉ ⲙⲛ̅ⲛⲉⲩⲡⲟⲗⲓⲥ . ⲏ ⲛⲉⲩⲣ̅ⲥⲟⲟⲩⲉ . Ⲃⲁⲗⲁⲕ . ⲁⲩⲱ Ⲁⲕⲟⲕ . Ⲁⲥⲟⲙ  ⲙⲛ̅Ⲉⲗⲑⲉⲩⲇⲁⲇ . ⲁⲩⲱ Ⲃⲁⲓⲑⲏⲗ . ⲙⲛ̅Ϩⲉⲣⲙⲁ . ⲁⲩⲱ Ⲥⲉⲗⲁⲇⲁⲇ . ⲙⲛ̅Ⲙⲁⲭⲁⲣⲓⲙ . ⲁⲩⲱ Ⲥⲉⲑⲉⲛⲛⲁ. ⲙⲛ̅Ⲡⲉⲗⲁⲃⲱⲥ . ⲁⲩⲱ Ⲥⲁⲗⲱ . ⲙⲛ̅Ⲉⲣⲉⲙⲱⲑ . ϫⲟⲩⲧⲯⲓⲧⲉ ⲙ̅ⲡⲟⲗⲓⲥ  ⲙⲛ̅ⲛⲉⲩⲧⲙⲉ  Ϩⲛ̅ⲧⲥⲱϣⲉ ⲡⲕⲁϩ ⲉⲧϩⲛ̅ⲧⲙⲏⲧⲉ. Ⲁⲥⲧⲁⲱⲗ . ⲙⲛ̅Ⲁⲥⲁⲣⲁ . ⲁⲩⲱ Ⲉⲥⲥⲁ . ⲙⲛ̅Ϩⲉⲣⲁⲙ̅ⲙⲉ . ⲁⲩⲱ Ⲧⲁⲛⲱ.  ⲙⲛⲒⲁⲣⲓⲙⲟⲩⲑ . ⲁⲩⲱ Ⲟⲇⲟⲗⲗⲁⲙ ⲙⲛ̅Ⲗⲉⲙⲉⲣⲁ. ⲁⲩⲱ Ⲥⲁⲱⲭⲱ . ⲙⲛ̅Ⲁⲍⲏⲕⲁ . ⲁⲩⲱ Ⲥⲁⲣⲅⲁⲣⲓⲙ . ⲙⲛ̅Ⲇⲁⲣⲅⲏⲣⲁ. ⲙⲛ̅ⲛⲉⲩⲣ̅ⲥⲟⲟⲩⲉ . ⲙⲛ̅ⲧⲁϥⲧⲉ  ⲙ̅ⲡⲟⲗⲓⲥ ⲙⲛ̅ⲛⲉⲩⲧⲙⲉ : Ⲥⲉⲛⲛⲁ . ⲁⲩⲱ Ⲁⲇⲁⲥⲁⲛ . ⲁⲩⲱ Ⲙⲁⲅⲁⲇⲁⲅⲁⲇ . ⲙⲛ̅Ⲧⲁⲗⲁⲗ . ⲁⲩⲱ Ⲙⲁⲥⲥⲓⲁ . ⲙⲛ̅Ⲓⲕⲁⲣⲉⲏⲗ . ⲁⲩⲱ Ⲗⲁⲭⲏⲥ. ⲙⲛ̅Ⲃⲁⲥⲏⲇⲱⲑ . ⲁⲩⲱ Ⲉⲛⲉⲇⲉⲗⲉⲁ.  ⲙⲛ̅Ⲭⲁⲃⲣⲁ . ⲁⲩⲱ Ⲙⲁⲭⲟⲉⲥ. ⲙⲛ̅Ⲅⲁⲗⲉⲛⲟⲥ . ⲁⲩⲱ Ⲅⲉⲇⲇⲱⲣ . ⲙⲛ̅Ⲃⲁⲅⲁⲇⲓⲏⲗ. ⲁⲩⲱ Ⲉⲛⲱⲙⲁⲛ ⲙⲛ̅Ⲙⲁⲕⲏⲇⲁⲛ . ⲙⲛ̅ⲧⲁⲥⲉ ⲙ̅ⲡⲟⲗⲓⲥ ⲙⲛ̅ⲛⲉⲩϯⲙⲉ. Ⲗⲉⲙⲛⲁ . ⲁⲩⲱ Ⲓⲁⲑⲁⲕⲁⲛⲱⲭ . ⲙⲛ̅Ⲓⲁⲛⲁ . ⲁⲩⲱ Ⲛⲁⲥⲓⲙ. ⲙⲛ̅Ⲕⲓⲗⲁⲙ . ⲁⲩⲱ Ⲁⲙⲉϩⲉⲓ ⲙⲛ̅Ⲕⲉⲥⲉⲓⲃ . ⲁⲩⲱ Ⲃⲁⲣⲏⲥⲁ. ⲙⲛ̅Ⲉⲗⲱⲙ . ⲙⲏⲧⲉ ⲙ̅ⲡⲟⲗⲓⲥ ⲙⲛ̅ⲛⲉⲩⲧⲙⲉ:  Ⲁⲕⲕⲁⲣⲱⲛ ⲙⲛ̅ⲛⲉⲥⲧⲙⲉ. ⲁⲩⲱ ⲛⲉⲩⲣ̅ⲥⲟⲟⲩⲉ. ϫⲓⲛⲀⲕⲕⲁⲣⲱⲛ Ⲓⲉⲣⲉⲙⲛⲁ. ⲙⲛ̅ⲛⲕⲉⲙⲁ . ⲏ ⲛ̅ⲕⲉⲡⲟⲗⲓⲥ ⲧⲏⲣⲟⲩ ϩⲓⲧⲟⲩⲱⲥ  ⲛ̅Ⲁⲥⲏⲇⲱⲑ ⲙⲛ̅ⲛⲉⲩⲕⲉⲧⲙⲉ . Ⲁⲥⲓⲇⲱⲑ ⲙⲛ̅ⲛⲉⲥⲧⲙⲉ . ⲙⲛ̅ⲛⲉⲥⲕⲉⲣ̅ⲥⲟⲟⲩⲉ. ϣⲁϩⲣⲁⲓ ⲉⲡⲉⲭⲓⲙⲁⲣⲣⲟⲥ  ⲡⲙⲟⲩ ⲛ̅ⲥⲱⲣⲙ̅ ⲛ̅Ⲕⲏⲙⲉ  ⲁⲩⲱ ⲧⲉⲑⲁⲗⲁⲥⲥⲁ ⲛⲟϭ  ⲛ̅ⲧⲟⲥ ⲧⲉⲧⲛⲁⲡⲱⲣϫ̅ ⲛⲁⲩ ⲉⲃⲟⲗ . Ⲁⲩⲱ ϩⲛ̅ⲧⲟⲣⲓⲛⲏ ⲡⲕⲁϩ ⲉⲧϫⲟⲥⲉ : Ⲥⲁⲙⲉⲓⲣ . ⲙⲛ̅Ⲓⲉⲑⲉⲣ . ⲁⲩⲱ Ⲥⲱⲭⲁ . ⲙⲛ̅Ⲣⲉⲛⲛⲁ . ⲧⲡⲟⲗⲓⲥ ⲛ̅ⲛⲉⲥϩⲁⲓ ⲧⲁⲓ ⲧⲉ Ⲧⲁⲃⲓⲣ.  ⲁⲩⲱ Ⲁⲛⲱⲣ ⲙⲛ̅Ⲁⲥⲑⲁⲙⲁ . ⲁⲩⲱ Ⲁⲓⲥⲁⲙ . ⲙⲛ̅Ⲅⲟⲥⲟⲙ. ⲁⲩⲱ Ⲭⲁⲗⲟⲩ . ⲙⲛ̅Ⲗⲁⲛⲟⲩ . ⲙⲛ̅ⲧⲟⲩⲉ  ⲙ̅ⲡⲟⲗⲓⲥ  ⲙⲛ̅ⲛⲉⲩⲧⲙⲉ . Ⲉⲣⲉⲙ ⲙⲛ̅Ⲣⲉⲙⲛⲁ . ⲁⲩⲱ Ⲥⲟⲙⲁ . ⲙⲛ̅Ⲓⲁⲙⲉⲑ. ⲁⲩⲱ Ⲃⲁⲓⲑⲁϩⲟⲩ. ⲙⲛ̅Ⲫⲁⲕⲟⲩⲁ . ⲁⲩⲱ Ⲉⲩⲁ . ⲙⲛ̅ⲧⲡⲟⲗⲓⲥ ⲛ̅Ⲁⲣⲃⲟⲕ ⲧⲁⲓ ⲧⲉ Ⲭⲉⲃⲣⲱⲛ . ⲙⲛ̅Ⲥⲱⲣⲁⲓⲑ . ⲯⲓⲧⲉ  ⲙ̅ⲡⲟⲗⲓⲥ  ⲙⲛ̅ⲛⲉⲩⲣ̅ⲥⲟⲟⲩⲉ.  ⲙⲛ̅Ⲙⲁⲓⲱⲣ . ⲙⲛ̅Ⲭⲉⲣⲙⲉⲗ . ⲁⲩⲱ Ⲟⲍⲉⲓⲃ . ⲙⲛ̅Ⲓⲧⲁⲛ . ⲁⲩⲱ Ⲁⲣⲓⲏⲗ . ⲙⲛ̅Ⲁⲣⲓⲕⲁⲙ . ⲁⲩⲱ Ⲥⲉⲛⲁⲕⲓⲙ . ⲙⲛ̅Ⲅⲁⲃⲁⲁ . ⲁⲩⲱ Ⲑ̅ⲁⲙⲛⲁ. ⲯⲓⲧⲉ ⲙ̅ⲡⲟⲗⲓⲥ ⲙⲛ̅ⲛⲉⲩⲧⲙⲉ . Ⲁⲗⲟⲩⲁ . ⲁⲩⲱ Ⲃⲁⲓⲑⲥⲟⲩⲣ . ⲙⲛ̅Ⲅⲉⲇⲇⲱⲣ . ⲁⲩⲱ Ⲙⲁⲕⲕⲁⲣⲱⲑ . ⲙⲛ̅Ⲃⲁⲓⲑⲁⲛⲁⲙ. ⲁⲩⲱ Ⲉⲑⲉⲕⲟⲩⲙ . Ⲥⲟ ⲙ̅ⲡⲟⲗⲓⲥ ⲙⲛ̅ⲛⲉⲩⲕⲉⲧⲙⲉ : Ⲉ̅ⲕⲕⲱ ⲙⲛ̅Ⲉⲫⲣⲁⲑⲁ ⲧⲁⲓ ⲧⲉ Ⲃⲏⲑⲗⲉⲉⲙ . ⲁⲩⲱ Ⲫⲁⲅⲱⲣ . ⲙⲛ̅Ⲉⲧⲁⲙ. ⲁⲩⲱ Ⲥⲱⲃⲏⲥ . ⲙⲛ̅Ⲕⲉⲉ . ⲁⲩⲱ Ⲕⲁⲗⲓⲙ . ⲙⲛ̅Ⲑⲉⲏⲣ . ⲁⲩⲱ Ⲙⲁⲛⲟⲭⲱ . ⲙⲛ̅ⲧⲟⲩⲉ  ⲙ̅ⲡⲟⲗⲓⲥ ⲙⲛ̅ⲛⲉⲩⲕⲉϯⲙⲉ.  Ⲕⲁⲣⲓⲁⲑⲃⲁⲗ ⲧⲁⲓ ⲧⲉ ⲧⲡⲟⲗⲓⲥ  Ⲁⲣⲓⲙ . ⲁⲩⲱ Ⲥⲱⲑⲏⲃⲁ. ⲥⲛ̅ⲧⲉ ⲙ̅ⲡⲟⲗⲓⲥ ⲙ̅ⲛ̅ⲛⲉⲩⲣ̅ⲥⲟⲟⲩⲉ . Ⲇⲁⲃⲇⲁⲃⲁⲣⲅⲓⲥ ⲁⲩⲱ Ⲑⲁⲣⲁⲃⲁⲙ  ⲙⲛ̅Ⲙⲁⲣⲱⲛ  ⲁⲩⲱ Ⲥⲟⲭⲟⲍⲁ . ⲙⲛ̅Ⲛⲁⲫⲗⲁⲍⲱ . ⲁⲩⲱ Ⲥⲁⲇⲱⲙ. ⲙⲛ̅Ⲁⲅⲕⲁⲇⲏⲥ . ⲥⲁϣϥⲉ  ⲙ̅ⲡⲟⲗⲓⲥ  ⲙⲛ̅ⲛⲉⲩⲕⲉϯⲙⲉ . Ⲁⲩⲱ ⲡⲒⲉⲃⲟⲩⲥⲁⲓⲟⲥ . ⲡⲁⲓ ⲉⲛⲉϥⲟⲩⲏϩ ϩⲛ̅Ⲑⲓⲉⲣⲟⲩⲥⲁⲗⲏⲙ . ⲛ̅ϣⲏⲣⲉ ⲛ̅Ⲓⲟⲩⲇⲁⲥ  ⲙ̅ⲡⲟⲩϣϭⲙ̅ϭⲟⲙ ⲉⲧⲁⲕⲟⲟⲩ . ⲁⲩⲱ ⲛ̅Ⲓⲉⲃⲟⲩⲥⲁⲓⲟⲥ  ⲁⲩⲟⲩⲱϩ  ϩⲛ̅Ⲑⲓⲉⲣⲟⲩⲥⲁⲗⲏⲙ  ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ :
 
Ⲓ̅Ⲋ. Ⲛ̅ⲧⲟϣ ⲇⲉ ⲛ̅ⲛϣⲏⲣⲉ ⲛ̅Ⲓⲱⲥⲏϥ  ⲁⲩϣⲱⲡⲉ  ϫⲓⲛⲡⲒⲟⲣⲇⲁⲛⲏⲥ . ⲡⲉⲧⲙ̅ⲡⲙ̅ⲧⲟ ⲉⲃⲟⲗ ⲛ̅Ϩⲓⲉⲣⲓⲭⲱ ϫⲓⲛⲙ̅ⲙⲁ ⲛ̅ϣⲁ . ⲁⲩⲱ ⲥⲉⲛⲁⲉⲓ ⲉϩⲣⲁⲓ ϫⲓϨⲓⲉⲣⲓⲭⲱ . ⲉⲧⲟⲣⲓⲛⲏ ⲉⲧⲉⲣⲏⲙⲟⲥ ⲡⲕⲁϩ ⲉⲧϫⲟⲥⲉ . ⲉϩⲣⲁⲓ ⲉⲂⲁⲓⲑⲓⲏⲗⲗⲟⲩⲍⲁ . ⲁⲩⲱ ⲥⲉⲛⲁⲉⲓ ⲉⲃⲟⲗ ⲉⲂⲁⲓⲑⲏⲗ. ⲁⲩⲱ ⲥⲉⲛⲁⲛⲟⲩϫⲉ ⲉϫⲛ̅ⲛⲧⲟϣ ⲛ̅Ⲁⲕⲕⲁⲣⲱⲛ. ⲁⲩⲱ  ⲥⲉⲛⲁϫⲱⲧⲉ ⲉϫⲛ̅ⲑⲁⲗⲁⲥⲥⲁ . ⲉϫⲛ̅ⲛ̅ⲧⲟϣ ⲙ̅Ⲡⲧⲁⲗⲁⲓⲙ ϣⲁϩⲣⲁⲓ ⲉⲛ̅ⲧⲟϣ ⲛ̅Ⲃⲁⲓⲑⲟⲣⲱⲛ ⲧⲉⲧϩⲙ̅ⲡϩⲃ̅ⲃⲉ . ⲁⲩⲱ ⲡⲉⲩⲉⲓ ⲉⲃⲟⲗ ⲉϫⲛ̅ⲑⲁⲗⲁⲥⲥⲁ : Ⲁⲩⲱ  ⲁⲩⲕⲗⲏⲣⲟⲛⲟⲙⲉⲓ  ⲛ̅ϭⲓⲛ̅ϣⲏⲣⲉ ⲛ̅Ⲓⲱⲥⲏⲫ Ⲉⲫⲣⲁⲓⲙ  ⲙⲛ̅Ⲙⲁⲛⲁⲥⲥⲏ ⲕⲁⲧⲁⲛⲉⲩⲇⲏⲙⲟⲥ.  Ⲁⲩϣⲱⲡⲉ ⲛ̅ϭⲓⲛ̅ⲧⲟϣ ⲛ̅ⲧⲉⲩⲕⲗⲏⲣⲟⲛⲟⲙⲓⲁ  ⲕⲁⲧⲁⲙⲁⲛ̅ϣⲁ. Ⲁⲧⲇⲁⲣⲱⲑ ⲙⲛ̅Ⲟⲣⲟⲭ. ϣⲁϩⲣⲁⲓ ⲉⲂⲉⲑⲟⲣⲱⲛ ⲧⲉⲧϩⲓⲧⲡⲉ . ⲁⲩⲱ Ⲅⲁⲍⲁⲣⲁ  ⲁⲩⲱ ⲥⲉⲛⲁϫⲱⲧⲉ  ⲛ̅ϭⲓⲛⲧⲟϣ ⲉϫⲛ̅ⲑⲁⲗⲁⲥⲥⲁ ⲉϩⲣⲁⲓ ⲉⲒⲕⲁⲑⲙⲱⲛ  ϫⲓⲛⲙ̅ⲡⲉⲙϩⲓⲧ ⲛ̅Ⲑⲉⲣⲅⲁⲙ . ⲥⲉⲛⲁⲟⲩⲱⲧⲃ̅ ⲉⲙⲙⲁ ⲛ̅ϣⲁ  ⲉϩⲣⲁⲓ ⲉⲐⲏⲛⲁⲥⲁ . ⲙⲛ̅Ⲥⲉⲗⲗⲏⲥⲁ. ⲁⲩⲱ ⲥⲉⲛⲁϫⲱⲧⲉ ϫⲓⲛⲙ̅ⲙⲁ ⲛ̅ϣⲁ ⲉϩⲣⲁⲓ ⲉⲚⲁⲛⲱⲑⲁ . ⲁⲩⲱ ⲉϩⲣⲁⲓ ⲉⲘⲁⲣⲁⲭⲱ . ⲁⲩⲱ ⲉⲦⲁⲣⲱⲑ . ⲙⲛ̅ⲛⲉⲩⲕⲉⲧⲙⲉ . ⲁⲩⲱ ⲥⲉⲛⲁⲉⲓ ⲉⲃⲟⲗ ϫⲓⲛϨⲓⲉⲣⲓⲭⲱ. ⲁⲩⲱ ⲥⲉⲛⲁⲛⲟⲩϫⲉ ⲉⲃⲟⲗ ϫⲓⲛⲡⲒⲟⲣⲇⲁⲛⲏⲥ . ⲁⲩⲱ ϫⲓⲛⲦⲁⲫⲟⲩ ⲥⲉⲛⲁⲱⲥⲕ ⲛ̅ϭⲓⲛ̅ⲧⲟϣ ⲉϫⲛ̅ⲑⲁⲗⲁⲥⲥⲁ. ⲁⲩⲱ ⲉϫⲛ̅Ⲭⲉⲗⲕⲁⲛⲁ. ⲭⲁⲩⲱ ⲡⲉⲩⲉⲓ ⲉⲃⲟⲗ ⲉϫⲛ̅ⲑⲁⲗⲁⲥⲥⲁ . Ⲧⲁⲓ ⲧⲉ ⲧⲉⲕⲗⲏⲣⲟⲛⲟⲙⲓⲁ ⲛ̅ⲧⲉⲫⲩⲗⲏ ⲛ̅Ⲉⲫⲣⲁⲓⲙ ⲕⲁⲧⲁⲛⲉⲩⲇⲏⲙⲟⲥ . ⲁⲩⲱ ⲙ̅ⲡⲟⲗⲓⲥ ⲉⲛⲧⲁⲩⲡⲟⲣϫⲟⲩ ⲉⲃⲟⲗ ⲛ̅ⲛ̅ϣⲏⲣⲉ ⲛ̅Ⲉⲫⲣⲁⲓⲙ . ϩⲛ̅ⲧⲙⲏⲧⲉ ⲛ̅ⲧⲉⲕⲗⲏⲣⲟⲛⲟⲙⲓⲁ ⲛ̅ⲛϣⲏⲣⲉ  ⲙ̅Ⲙⲁⲛⲁⲥⲥⲏ . ⲙ̅ⲡⲟⲗⲓⲥ ⲧⲏⲣⲟⲩ  ⲙⲛ̅ⲛⲉⲩⲕⲉⲧⲙⲉ.  Ⲁⲩⲱ ⲙ̅ⲡⲈⲉⲫⲣⲁⲓⲙ ⲧⲁⲕⲟ ⲙ̅ⲡⲉⲬⲁⲛⲁⲛⲁⲓⲟⲥ ⲡⲉⲧⲟⲩⲏϩ ϩⲛ̅Ⲅⲁⲍⲉⲣ. ⲁϥⲟⲩⲟϩ ⲙⲛ̅Ⲉⲫⲣⲁⲓⲙ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ . ϣⲁⲛⲧϥ̅ⲉⲓ ⲉϩⲣⲁⲓ ⲛ̅ϭⲓⲫⲁⲣⲁⲱ ⲡⲣ̅ⲣⲟ ⲛ̅Ⲕⲏⲙⲉ . ⲛϥ̅ϫⲓⲧⲥ̅ ⲛϥ̅ⲣⲟⲕϩⲥ̅ ϩⲛ̅ⲟⲩⲥⲁⲧⲉ . ⲁⲩⲱ ⲛⲉⲬⲁⲛⲁⲛⲁⲓⲟⲥ ⲙⲛ̅ⲛⲉⲪⲉⲣⲉⲍⲁⲓⲟⲥ . ⲛⲉⲧⲟⲩⲏϩ ϩⲛ̅Ⲅⲁⲍⲉⲣ ⲁϥⲧⲁⲕⲟⲟⲩ . ⲁⲩⲱ ⲁϥⲧⲁⲁⲥ ⲛ̅ϭⲓⲫⲁⲣⲁⲱ ⲛ̅ϭⲣⲏϭⲉ ⲛ̅ⲧⲉϥϣⲉⲉⲣⲉ :
 
Ⲓ̅Ⲍ̅. Ⲁⲩϣⲱⲡⲉ ⲛ̅ϭⲓⲛ̅ⲧⲟϣ ⲛ̅ⲧⲉⲫⲩⲗⲏ ⲛ̅ⲛϣⲏⲣⲉ  ⲙ̅Ⲙⲁⲛⲁⲥⲥⲏ . ⲉⲃⲟⲗϫⲉ ⲡⲁⲓ ⲡⲉ  ⲡϣⲣ̅ⲡ̅ⲙ̅ⲙⲓⲥⲉ  ⲛ̅Ⲓⲱⲥⲏⲫ . Ⲙⲁⲭⲓⲣ ⲡϣⲣ̅ⲡ̅ⲙ̅ⲙⲓⲥⲉ  ⲙ̅Ⲙⲁⲛⲁⲥⲥⲏ . ⲡⲓⲱⲧ ⲛ̅Ⲅⲁⲗⲁⲁⲧ . ⲛⲉⲩⲣⲱⲙⲉ ⲅⲁⲣ ⲛⲉ ⲛ̅ⲣⲉϥⲙⲓϣⲉ  ϩⲙ̅ⲡⲕⲁϩ ⲛ̅Ⲅⲁⲗⲁⲁⲇ . ⲁⲩⲱ  ⲡⲕⲁϩ ⲛ̅ⲧⲂⲁⲥⲁⲛ . ⲁⲩⲱ ⲁⲩϣⲱⲡⲉ  ⲛ̅ⲛϣⲏⲣⲉ  ⲙ̅Ⲙⲁⲛⲁⲥⲥⲏ . ⲛ̅ϣⲱϫⲡ̅ ⲕⲁⲧⲁⲛⲉⲩⲇⲏⲙⲟⲥ . ⲛ̅ϣⲏⲣⲉ ⲛ̅Ⲓⲉⲇⲟⲩⲣ ⲁⲩⲱ ⲡϣⲏⲣⲉ ⲛ̅Ⲭⲁⲗⲉⲃ ⲙⲛ̅ⲛϣⲏⲣⲉ  ⲛ̅Ⲓⲉⲣⲓⲏⲗ . ⲁⲩⲱ ⲛ̅ϣⲏⲣⲉ  ⲛ̅Ⲥⲉⲭⲉⲙ . ⲙⲛ̅ⲛϣⲏⲣⲉ ⲛ̅Ⲥⲟⲩⲙⲁⲣⲓⲙ . Ⲁⲩⲱ ⲛ̅ϣⲏⲣⲉ ⲛ̅Ⲟⲫⲉⲣ . ⲛⲁⲓ ⲛⲉ ⲛ̅ϣⲣ̅ϩⲟⲟⲩⲧ  ⲕⲁⲧⲁⲛⲉⲩⲇⲏⲙⲟⲥ : Ⲁⲩⲱ Ⲥⲁⲗⲡⲁⲁⲇ ⲡϣⲏⲣⲉ  ⲛ̅Ⲟⲫⲉⲣ . ⲛⲉⲙⲛ̅ϣⲣ̅ϩⲟⲟⲩⲧ ϣⲟⲟⲡ ⲛⲁϥ  ⲛ̅ⲥⲁϩⲉⲛϣⲉⲉⲣⲉ ⲛ̅ⲥϩⲓⲙⲉ. Ⲁⲩⲱ ⲛⲁⲓ ⲛⲉ ⲛ̅ⲣⲁⲛ ⲛ̅ⲛϣⲉⲉⲣⲉ ⲛ̅Ⲥⲁⲗⲡⲁⲁⲇ . Ⲙⲁⲁⲗⲁ . ⲁⲩⲱ Ⲛ̅ⲟⲩⲁ . ⲁⲩⲱ Ⲉⲅⲗⲁ . ⲙⲛ̅Ⲙⲉⲗⲭⲁ . ⲙⲛ̅Ⲑⲉⲣⲥⲁ.  Ⲁⲩⲱ ⲛⲁⲓ ⲁⲩⲁϩⲉⲣⲁⲧⲟⲩ ⲙ̅ⲡⲙ̅ⲧⲟ ⲉⲃⲟⲗ ⲛ̅Ⲉⲗⲉⲁⲍⲁⲣ ⲡⲟⲩⲏⲏⲃ . ⲁⲩⲱ  ⲙ̅ⲡⲙ̅ⲧⲟ ⲉⲃⲟⲗ ⲛ̅Ⲓⲏⲥⲟⲩⲥ . ⲁⲩⲱ  ⲙ̅ⲡⲙ̅ⲧⲟ ⲉⲃⲟⲗ ⲛ̅ⲛⲁⲣⲭⲱⲛ ⲉⲩϫⲱ  ⲙ̅ⲙⲟⲥ ϫⲉ  ⲡⲛⲟⲩⲧⲉ  ⲁϥⲟⲩⲉϩⲥⲁϩⲛⲉ  ⲉⲃⲟⲗ  ϩⲓⲧⲟⲟⲧϥ̅  ⲙ̅Ⲙⲱⲟⲩⲥⲏⲥ  ⲉϯ ⲛⲁⲛ ⲛ̅ⲟⲩⲕⲗⲏⲣⲟⲛⲟⲙⲓⲁ  ϩⲛⲧⲙⲏⲧⲉ  ⲛ̅ⲛⲉⲛⲥⲛⲏⲩ . Ⲁⲩⲱ ⲕⲁⲧⲁⲡⲟⲩⲉϩⲥⲁϩⲛⲉ  ⲙ̅Ⲡϫⲟⲉⲓⲥ  ⲁⲩϯ  ⲛⲁⲩ ⲛ̅ⲟⲩⲕⲗⲏⲣⲟⲥ  ϩⲛ̅ⲛⲉⲥⲛⲏⲩ ⲙ̅ⲡⲉⲩⲓⲱⲧ . Ⲁⲩⲱ ⲁϥⲁϩⲉⲣⲁⲧϥ̅  ⲛ̅ϭⲓⲥⲕⲛⲟⲩϩ  ⲙ̅ⲡⲉⲩⲧⲟϣ ϫⲓⲛⲀⲥⲁ . ⲁⲩⲱ ⲧⲥⲱϣⲉ ⲛ̅Ⲙⲁⲁⲗⲉⲁ . ⲉⲃⲟⲗ ϩⲙ̅ⲡⲕⲁϩ  ⲛ̅Ⲅⲁⲗⲁⲁⲇ ⲡⲁⲓ ⲉⲧϩⲙ̅ⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ . ⲉⲃⲟⲗϫⲉ  ⲛ̅ϣⲉⲉⲣⲉ ⲛ̅ⲛϣⲏⲣⲉ  ⲙ̅Ⲙⲁⲛⲁⲥⲥⲏ  ⲁⲩⲕⲗⲏⲣⲟⲛⲟⲙⲉⲓ ⲛ̅ⲟⲩⲕⲗⲏⲣⲟⲥ ϩⲛ̅ⲧⲙⲏⲧⲉ ⲛ̅ⲛⲉⲩⲥⲛⲏⲩ. Ⲡⲕⲁϩ ⲇⲉ ⲛ̅Ⲅⲁⲗⲁⲁⲇ ⲁϥϣⲱⲡⲉ ⲛ̅ⲛ̅ϣⲏⲣⲉ ⲙ̅Ⲙⲁⲛⲁⲥⲥⲏ ⲛⲉⲛⲧⲁⲩϣⲱϫⲡ̅ : Ⲁⲩⲱ  ⲁⲩϣⲱⲡⲉ  ⲛ̅ϭⲓⲛ̅ⲧⲟϣ ⲛ̅ⲛ̅ϣⲏⲣⲉ  ⲙ̅Ⲙⲁⲛⲁⲥⲥⲏ . Ⲇⲏⲗⲁⲛⲁⲇ . ⲧⲁⲓ ⲉⲧⲙ̅ⲡϩⲟⲧ ⲉⲃⲟⲗ ⲛ̅ⲛϣⲏⲣⲉ ⲛ̅Ⲱⲛⲁⲑ . ⲁⲩⲱ ⲥⲉⲃⲏⲕ ⲉϩⲣⲁⲓ ⲉϫⲛ̅ⲛⲧⲟϣ ⲉϫⲛ̅Ⲓⲁⲙⲓⲛ . ⲁⲩⲱ ⲉϩⲣⲁⲓ ⲉⲒⲁⲥⲏⲃ. ⲉϫⲛ̅ⲧⲡⲏⲅⲏ ⲛ̅Ⲑⲁⲫⲉⲑ . ⲥⲉⲛⲁϣⲱⲡⲉ ⲙ̅Ⲙⲁⲛⲁⲥⲥⲏ . ⲁⲩⲱ Ⲑⲁⲫⲉⲑ ⲉⲥϩⲓϫⲛ̅ⲛⲧⲟϣ  ⲙ̅Ⲙⲁⲛⲁⲥⲥⲏ : ⲛ̅ⲛϣⲏⲣⲉ ⲛ̅Ⲉⲫⲣⲁⲓⲙ . Ⲁⲩⲱ ⲛ̅ⲧⲟϣ ⲥⲉⲛⲁⲉⲓ ⲉϩⲣⲁⲓ ⲉϫⲙ̅ⲡⲓⲁ ⲛ̅Ⲕⲁⲣⲁⲛⲁ . ⲉⲡⲉⲙⲛ̅ⲧ ⲙ̅ⲡⲙ̅ⲧⲟ ⲉⲃⲟⲗ ⲙ̅ⲡⲓⲁ ⲛ̅Ⲛⲁⲣⲓⲏⲗ ⲡϣⲏⲛ ⲛ̅ⲧⲧⲉⲣⲉⲙⲓⲛⲑⲟⲥ . ⲙⲛ̅ⲛϣⲏⲣⲉ ⲛ̅Ⲉⲫⲣⲁⲓⲙ ⲉϥϩⲛ̅ⲧⲙⲏⲧⲉ ⲛ̅ⲧⲡⲟⲗⲓⲥ ⲙ̅Ⲙⲁⲛⲁⲥⲥⲏ . ⲉⲡⲉⲙϩⲓⲧ ⲉϩⲣⲁⲓ ⲉⲡⲉⲬⲓⲙⲁⲣⲣⲟⲥ . ⲁⲩⲱ ⲡⲉϥⲉⲓ ⲉⲃⲟⲗ ⲉϥⲛⲁϣⲱⲡⲉ ⲉⲧⲉⲑⲁⲗⲁⲥⲥⲁ ⲧⲉ.  ϫⲓⲛⲡⲉⲙⲛ̅ⲧ ⲛ̅Ⲉⲫⲣⲁⲓⲙ . ⲁⲩⲱ ⲉϫⲙ̅ⲡⲉⲙϩⲓⲧ ⲙ̅Ⲙⲁⲛⲁⲥⲥⲏ  ⲁⲩⲱ ⲧⲉⲑⲁⲗⲁⲥⲥⲁ  ⲛ̅ⲧⲟⲥ ⲧⲉⲧⲛⲁϣⲱⲡⲉ ⲇⲉ ⲛⲁⲩ ⲛ̅ⲧⲟϣ. Ⲁⲩⲱ ⲥⲉⲛⲁϩⲱⲛ ⲉϩⲟⲩⲛ ⲉⲀⲥⲏⲣ ⲉⲡⲉⲙϩⲓⲧ. Ⲁⲩⲱ Ⲓⲥⲥⲁⲭⲁⲣ ϫⲓⲛⲙ̅ⲙⲁ ⲛ̅ϣⲁ. ⲁⲩⲱ Ⲙⲁⲛⲁⲥⲥⲏ ⲉϥⲉϣⲱⲡⲉ  ϩⲛ̅Ⲓⲥⲥⲁⲭⲁⲣ ⲁⲩⲱ ϩⲛ̅Ⲁⲥⲏⲣ . Ⲃⲁⲓⲑⲥⲁⲛ ⲙⲛ̅ⲛⲉⲩⲕⲉⲧⲙⲉ . ⲁⲩⲱ ⲛⲉⲧⲟⲩⲏϩ ϩⲛ̅Ⲇⲱⲣ ⲙⲛ̅ⲛⲉⲥⲕⲉⲧⲙⲉ . ⲁⲩⲱ ⲛⲉⲧⲟⲩⲏϩ ϩⲛ̅Ⲙⲁⲅⲉⲇⲇⲱⲛ ⲙⲛ̅ⲛⲉⲥⲕⲉⲧⲙⲉ ⲁⲩⲱ ⲡⲟⲩⲛ ⲛ̅ϣⲟⲙⲛ̅ⲧ ⲙ̅Ⲙⲁⲫⲉⲇⲁⲛ ⲙⲛ̅ⲛⲉⲥⲕⲉⲧⲙⲉ . Ⲙ̅ⲡⲟⲩϣ̅ϭⲙ̅ϭⲟⲙ ⲛ̅ϭⲓⲛ̅ϣⲏⲣⲉ ⲙ̅Ⲙⲁⲛⲁⲥⲥⲏ ⲉϥⲱⲧⲉ ⲉⲃⲟⲗ ⲛ̅ⲛⲉⲓⲡⲟⲗⲓⲥ. Ⲁⲩⲱ ⲉⲛⲉϣⲁϥⲉⲓ ⲛ̅ϭⲓⲡⲉⲬⲁⲛⲁⲛⲁⲓⲟⲥ ⲉⲧⲣⲉϥⲟⲩⲱϩ ϩⲙ̅ⲡⲉⲓⲕⲁϩ . Ⲁⲩⲱ ⲁⲥϣⲱⲡⲉ ⲉⲃⲟⲗϫⲉ ⲁⲛϣⲏⲣⲉ ⲙ̅ⲡⲒⲥⲣⲁⲏⲗ ϭⲙ̅ϭⲟⲙ  ⲁⲩⲧⲱⲟⲩⲛ ⲉϫⲛ̅ⲛⲉⲬⲁⲛⲁⲛⲁⲓⲟⲥ . ⲁⲩⲑⲃ̅ⲃⲓⲟⲟⲩ . ϩⲛ̅ⲟⲩϥⲱⲧⲉ  ⲇⲉ  ⲙ̅ⲡⲟⲩϥⲟⲧⲟⲩ ⲉⲃⲟⲗ . Ⲛ̅ϣⲏⲣⲉ ⲇⲉ ⲛ̅Ⲓⲱⲥⲏⲫ ⲁⲩⲁϩⲉⲣⲁⲧⲟⲩ ⲉⲒⲏⲥⲟⲩⲥ ⲉⲩϫⲱ ⲙ̅ⲙⲟⲥ ⲛⲁϥ . ϫⲉ ⲉⲧⲃⲉⲟⲩ ⲟⲩⲕⲗⲏⲣⲟⲥ ⲛ̅ⲟⲩⲱⲧ ⲡⲉⲛⲧⲁⲕⲁⲁϥ ⲛⲁⲛ ⲉⲟⲩⲕⲗⲏⲣⲟⲛⲟⲙⲓⲁ. ⲁⲩⲱ  ⲟⲩⲥⲕⲛⲟⲩϩ  ⲛ̅ⲟⲩⲱⲧ  ⲡⲉⲛⲧⲁⲕⲧⲁⲁϥ  ⲛⲁⲛ.  Ⲁⲛⲟⲕ ⲇⲉ  ⲁⲛⲅ̅ⲟⲩⲗⲁⲟⲥ  ⲉϥⲟϣ  ⲁⲩⲱ ⲡⲛⲟⲩⲧⲉ  ⲁϥⲥⲙⲟⲩ ⲉⲣⲟⲓ:  ⲠⲉϫⲉⲒⲏⲥⲟⲩⲥ ⲛⲁⲩ. ϫⲉ ⲉϣϫⲉ ⲛ̅ⲧⲕ̅ⲟⲩⲗⲁⲟⲥ ⲉϥⲟϣ  ⲃⲱⲕ ⲉϩⲣⲁⲓ ⲉⲡⲙⲁ ⲛ̅ϣⲏⲛ ⲛⲅ̅ⲧⲃ̅ⲃⲟϥ ⲛⲁⲕ . Ⲉϣϫⲉ ⲧⲡⲟⲗⲓⲥ ⲛ̅Ⲉⲫⲣⲁⲓⲙ ϭⲱⲟⲩ ⲙ̅ⲙⲟⲕ ⲡⲉϫⲁⲩ ⲛⲁϥ ϫⲉ ⲛϥ̅ⲛⲁⲣⲁϣⲧⲛ̅ ⲁⲛ ⲛ̅ϭⲓⲡⲧⲟⲟⲩ ⲛ̅Ⲉⲫⲣⲁⲓⲙ . ⲁⲩⲱ ϩⲉⲛϩⲧⲱⲱⲣ ⲉⲩⲥⲟⲧⲡ . Ⲁⲩⲱ ⲟⲩⲡⲉⲛⲓⲡⲉ ⲉⲛⲁϣⲱϥ ⲥⲉϣⲟⲟⲡ  ⲙ̅ⲡⲉⲬⲁⲛⲁⲛⲁⲓⲟⲥ  ⲡⲉⲧⲟⲩⲏϩ  ϩⲛ̅ⲉ.ⲕⲇⲱ . ϩⲛ̅Ⲃⲁⲓⲑⲁⲓⲥⲁⲛ .  ⲁⲩⲱ ϩⲛ̅ⲛⲉⲥⲧⲙⲉ  ϩⲙ̅ⲡⲓ̅ⲁ̅  ⲙ̅ⲡⲒ̅ⲏ̅ⲗ̅ . Ⲁⲩⲱ  Ⲓⲏⲥⲟⲩⲥ  ⲡⲉϫⲁϥ  ⲛ̅ⲛ̅ϣⲏⲣⲉ  ⲛ̅Ⲓⲱⲥⲏⲫ . ϫⲉ  ⲉϣϫⲉ  ⲛ̅ⲧⲕ̅ⲟⲩⲗⲁⲟⲥ  ⲉϥⲟϣ . ⲁⲩⲱ  ⲟⲩⲛ̅ⲧⲁⲕ  ⲙ̅ⲙⲁⲩ  ⲛ̅ⲟⲩⲛⲟϭ  ⲛ̅ϭⲟⲙ . ⲛ̅ⲛⲉⲟⲩⲗⲕⲏⲣⲟⲥ  ⲛ̅ⲟⲩⲱⲧ  ϣⲱⲡⲉ  ⲛⲁⲕ . ⲁⲩⲱ  ⲉⲕⲉⲧⲃ̅ⲃⲟϥ . ⲛϥ̅ⲱⲡ  ⲉⲣⲟⲕ . ⲁⲩⲱ  ⲉⲕϣⲁⲛϥⲱⲧⲉ  ⲉⲃⲟⲗ  ⲙ̅ⲡⲉⲬⲁⲛⲁⲛⲁⲓⲟⲥ . ϩⲛ̅ϩⲉⲛϩⲧⲱⲱⲣ  ⲉⲩⲥⲟⲧⲡ̅ . ⲥⲉⲟϣ  ⲅⲁⲣ  ⲛⲁϥ . ⲛ̅ⲧⲟⲕ  ⲅⲁⲣ  ⲕϭⲙ̅ϭⲟⲙ  ⲛ̅ϩⲟⲩⲟ  ⲉⲣⲟϥ .
 
Ⲓ̅ⲏ̅. Ⲁⲩⲱ  ⲧⲥⲩⲛⲁⲅⲱⲅⲏ  ⲧⲏⲣⲥ̅  ⲛ̅ⲛ̅ϣⲏⲣⲉ  ⲙ̅Ⲓ̅ⲏ̅ⲗ̅  ⲁⲩⲥⲟⲩⲱϩ  ⲉϩⲟⲩⲛ  ⲉⲤⲏⲗⲱ . ⲁⲩⲥⲙⲓⲛⲉ  ϩⲙ̅ⲡⲙⲁ  ⲉⲧⲙ̅ⲙⲁⲩ  ⲛ̅ⲧⲉⲥⲕⲏⲛⲏ  ⲙ̅ⲡⲙⲁⲣⲧⲩⲣⲓⲟⲛ  ⲙ̅Ⲡϫⲟⲉⲓⲥ . ⲁⲩⲱ  ⲡⲕⲁϩ  ⲉϥⲛ̅ⲧⲟⲟⲧⲟⲩ :  ⲭⲤⲁϣϥⲉ  ⲇⲉ  ⲙ̅ⲫⲩⲗⲏ  ⲁⲩⲥⲟϫⲡ  ϩⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ  ⲉⲙⲡⲟⲩϯⲕⲗⲏⲣⲟⲛⲟⲙⲓⲁ  ⲛⲁⲩ . ⲠⲉϫⲉⲒⲏⲥⲟⲩⲥ  ⲛ̅ⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ. ϫⲉ  Ⲉⲧⲉⲧⲛⲉϫⲛⲁⲁⲩ  ϣⲁⲧⲛⲁⲩ  ⲉⲧⲉⲧⲛ̅ⲧⲙ̅ⲃⲱⲕ  ⲉϩⲙⲟⲟⲥ  ϩⲙ̅ⲡⲕⲁϩ  ⲉⲛⲧⲁⲠϫⲟⲉⲓⲥ  ⲡⲉⲛⲛⲟⲩⲧⲉ  ⲧⲁⲁϥ  ⲛⲏⲧⲛ̅.  Ⲙⲁ  ⲛⲁⲓ  ⲛ̅ϣⲟⲙⲛ̅ⲧ  ⲛ̅ⲣⲱⲙⲉ  ⲛ̅ⲫⲩⲗⲏ  ⲛⲓⲙ  ⲕⲁⲧⲁⲛⲉⲩⲇⲏⲙⲟⲥ . ⲁⲩⲱ  ϯⲛⲁϫⲟⲟⲩⲥⲟⲩ  ⲉⲧⲣⲉⲩⲃⲱⲕ  ⲉⲩⲙⲟⲟϣⲉ  ⲉⲙⲉϣⲧⲡⲕⲁϩ  ⲉⲩⲥⲉϩⲛⲉϥⲧⲟϣ  ⲛ̅ⲧⲉⲧⲉⲩⲕⲗⲏⲣⲟⲛⲟⲙⲓⲁ  ⲛ̅ⲧⲟⲩⲧⲥ̅ⲧⲟ :  Ⲙⲛ̅ⲛⲥⲱⲥ  ⲡⲱⲣϣ̅  ⲙ̅ⲙⲟϥ  ⲉⲃⲟⲗ  ⲛ̅ϩⲏⲧⲧⲏⲩⲧⲛ̅  ⲉϣⲁϣϥⲉ  ⲛ̅ⲧⲟ  ⲉⲣⲉⲛ̅Ⲓⲟⲩⲇⲁⲓ  ⲕⲏ  ϩⲙ̅ⲡⲉⲩⲙⲁ  ⲉⲧϩⲙ̅ⲡⲥⲁⲣⲏⲥ . ⲡⲏⲓ  ⲇⲉ  ⲛ̅Ⲓⲱⲥⲏϥ  ϥϩⲙ̅ⲡⲧⲟϣ  ⲛ̅ⲙ̅ϩⲓⲧ. Ⲛ̅ⲧⲱⲧⲛ̅  ⲇⲉ  ⲥⲉϩⲛⲉⲧⲛ̅ⲧⲟϣ  ⲛ̅ⲥⲁϣϥⲉ  ⲛ̅ⲧⲟ  ⲛ̅ϫⲱⲱⲙⲉ  ⲛ̅ⲧⲉⲧⲛ̅ⲉⲛⲧϥ  ⲉϩⲣⲁⲓ  ⲉⲣⲟⲓ . ⲁⲩⲱ  ϯⲛⲁⲛⲉϫⲕⲗⲏⲣⲟⲥ  ⲛⲏⲧⲑⲛ  ⲙ̅ⲡⲉⲙⲧⲟ  ⲙ̅Ⲡϫⲟⲉⲓⲥ  ⲡⲉⲛⲛⲟⲩⲧⲉ . ⲛ̅Ⲗⲉⲩⲓⲧⲏⲥ  ⲅⲁⲣ  ⲙⲛ̅ⲧⲟ ϩⲓⲟⲟⲩ . ⲁⲗⲗⲁ  ⲧⲙⲛ̅ⲧⲟⲩⲏⲏⲃ  ⲙ̅Ⲡϫⲟⲉⲓⲥ  ⲧⲉ  ⲧⲟⲩⲕⲗⲏⲣⲟⲛⲟⲙⲓⲁ .  Ⲅⲁⲇ  ⲇⲉ  ⲙⲛ̅Ϩⲣⲟⲩⲃⲏⲛ  ⲙⲛ̅ⲧⲡⲁϣⲉ  ⲛ̅ⲧⲫⲩⲗⲏ  ⲙ̅Ⲙⲁⲛⲁⲥⲥⲉ  ⲛ̅ⲧⲁⲩϯⲕⲗⲏⲣⲟⲛⲟⲙⲓⲁ  ⲛⲁⲩ   ⲉⲙⲏⲣ  ⲙ̅ⲡⲒⲟⲣⲇⲁⲛⲏⲥ  ⲕⲁⲧⲁⲡⲙⲁ ⲛ̅ϣⲁ . ⲧⲁⲓ  ⲉⲛⲧⲁϥⲧⲁⲁⲥ ⲛⲁⲩ  ⲛ̅ϭⲓⲘⲱⲟⲩⲥⲏⲥ  ⲡϩⲙ̅ϩⲁⲗ  ⲙ̅Ⲡϫⲟⲉⲓⲥ. Ⲁⲩⲱ ⲛ̅ⲧⲉⲣⲟⲩⲧⲱⲛⲟⲩ ⲛ̅ϭⲓⲛ̅ⲣⲱⲙⲉ ⲁⲩⲙⲟⲟϣⲉ : Ⲁⲩⲱ Ⲓⲏⲥⲟⲩⲥ  ⲁϥϩⲱⲛ ⲉⲧⲟⲟⲧⲟⲩ ⲛ̅ⲛⲣⲱⲙⲉ  ⲛⲉⲧⲛⲁⲃⲱⲕ ⲉⲙⲉϣⲧⲡⲕⲁϩ . ⲉϥϫⲱ ⲙ̅ⲙⲟⲥ ⲛⲁⲩ  ϫⲉ ⲃⲱⲕ ⲛ̅ⲧⲉⲧⲛ̅ⲙⲉϣⲧⲡⲕⲁϩ ⲕⲁⲧⲁⲛⲉϥⲧⲟϣ. ⲁⲩⲱ ⲛ̅ⲧⲉⲧⲛ̅ⲉⲓ ϣⲁⲣⲟⲓ . ⲁⲩⲱ  ⲙ̅ⲡⲉⲓⲙⲁ  ϯⲛⲁⲛⲟⲩϩⲉ  ⲛⲏⲧⲛ̅ ⲉⲃⲟⲗ  ⲙ̅Ⲡϫⲟⲉⲓⲥ ⲛ̅ⲟⲩⲕⲗⲏⲣⲟⲥ  ϩⲛ̅Ⲥⲓⲗⲱ : Ⲁⲩⲱ  ⲁⲩⲃⲱⲕ ⲁⲩⲙⲉϣⲧⲡⲕⲁϩ  ⲁⲩϯϩⲧⲏⲩ ⲉⲣⲟϥ   ⲁⲩⲥⲉϩⲛⲉϥⲧⲟϣ ⲕⲁⲧⲁⲡⲟⲗⲓⲥ  ⲉⲥⲁϣϥⲉ  ⲛ̅ⲧⲟ ⲉⲩϫⲱⲱⲙⲉ  ⲁⲩⲛ̅ⲧϥ̅ ⲉⲣⲁⲧϥ̅  ⲛ̅Ⲓⲏⲥⲟⲩⲥ ⲉϩⲣⲁⲓ ⲉⲤⲓⲗⲱ:  Ⲁⲩⲱ Ⲓⲏⲥⲟⲩⲥ ⲁϥⲛⲟⲩϫⲉ  ⲛⲁⲩ ⲛ̅ⲟⲩⲕⲗⲏⲣⲟⲥ  ϩⲛ̅Ⲥⲓⲗⲱ  ⲙ̅ⲡⲙ̅ⲧⲟ ⲉⲃⲟⲗ ⲙ̅Ⲡϫⲟⲉⲓⲥ . Ⲁⲩⲱ ⲁϥⲉⲓ ⲉⲃⲟⲗ ⲛ̅ϣⲟⲣⲡ̅ ⲛ̅ϭⲓⲡⲉⲕⲗⲏⲣⲟⲥ ⲛ̅ⲧⲉⲫⲩⲗⲏ ⲛ̅Ⲃⲉⲛⲓⲁⲙⲉⲓⲛ  ⲕⲁⲧⲁⲛⲉⲩⲇⲏⲙⲟⲥ  ⲁⲩⲱ  ⲁⲩⲉⲓ ⲉⲃⲟⲗ  ⲛ̅ϭⲓⲛ̅ⲧⲟϣ  ⲛ̅ⲛⲉⲩⲕⲗⲏⲣⲟⲥ  ϩⲛ̅ⲧⲙⲏⲧⲉ ⲛ̅Ⲓⲟⲩⲇⲁ . ⲁⲩⲱ ϩⲛ̅ⲧⲙⲏⲧⲉ ⲛ̅ⲛ̅ϣⲏⲣⲉ ⲛ̅Ⲓⲱⲥⲏⲫ  ⲁⲩⲱ ⲛⲉⲩⲧⲟϣ   ⲁⲩϣⲱⲡⲉ ϫⲓⲛⲡⲉⲙϩⲓⲧ  ϫⲓⲛⲡⲒⲟⲣⲇⲁⲛⲏⲥ.  ⲁⲩⲱ ⲛⲉⲩⲧⲟϣ ⲥⲉⲛⲁϫⲓ ⲉϩⲣⲁⲓ ⲕⲁⲧⲁⲛ̅Ⲥⲁⲥⲡⲓⲣ ⲉϫⲛ̅Ϩⲓⲉⲣⲓⲭⲱ ϫⲓⲛⲡⲉⲙϩⲓⲧ . ⲁⲩⲱ ⲥⲉⲛⲁⲃⲱⲕ ⲉϩⲣⲁⲓ ⲉⲡⲧⲟⲟⲩ ⲉϫⲛ̅ⲑⲁⲗⲁⲥⲥⲁ.  Ⲁⲩⲱ  ⲡⲉⲓⲉⲃⲟⲗ  ϩⲛ̅ⲛⲉϥⲧⲟϣ ⲛⲁϣⲱⲡⲉ ⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ ϫⲉ Ⲙⲁⲃⲇⲁⲣⲓⲧⲓⲥ Ⲃⲁⲓⲑⲱⲛ . ⲁⲩⲱ ⲥⲉⲛⲁⲕⲧⲟⲟⲩ ⲉⲃⲟⲗ  ϩⲙ̅ⲡⲙⲁ ⲉⲧⲙ̅ⲙⲁⲩ  ⲛ̅ϭⲓⲛ̅ⲧⲟϣ ⲉⲖⲟⲩⲍⲁ . ⲛ̅ⲥⲁⲥⲡⲓⲣ ⲛ̅Ⲗⲟⲩⲍⲁ ϫⲓⲛⲡⲉⲥⲉⲙⲛ̅ⲧ ⲧⲁⲓ ⲧⲉ Ⲃⲁⲓⲑⲏⲗ . ⲁⲩⲱ  ⲛ̅ⲧⲟϣ ⲥⲁⲛⲁⲉⲓ ⲉϩⲣⲁⲓ ⲉⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ ϫⲉ...  ⲉⲀⲣⲱⲑⲟⲣⲉⲕ ⲉϩⲣⲁⲓ ⲉⲧⲟⲣⲓⲛⲏ . ⲧⲁⲓ ⲉⲧϩⲙ̅ⲡⲥⲁ  ⲙ̅ⲡⲉⲙⲛ̅ⲧ ⲛ̅Ⲃⲁⲓⲑⲟⲣⲱⲛ ⲧⲉ ⲧⲉⲧϩⲙ̅ⲡϩⲃ̅ⲃⲉ. Ⲁⲩⲱ ⲥⲉⲛⲁⲕⲧⲟⲟⲩ  ⲛ̅ϭⲓⲛ̅ⲧⲟϣ ⲥⲉⲛⲁϫⲱⲧⲉ  ⲉϫⲙ̅ⲡⲙⲁ  ⲉⲧϭⲱϣⲡ̅  ⲉϫⲙ̅ⲡⲥⲁ ⲛ̅ⲑⲁⲗⲁⲥⲥⲁ  ϫⲓⲛⲡⲉⲙⲛ̅ⲧ. ⲁⲩⲱ ⲡⲉⲓⲉⲃⲟⲗ  ⲙ̅ⲡⲉϥⲧⲟϣ ⲛⲁϣⲱⲡⲉ  ⲉϩⲣⲁⲓ ⲉⲔⲁⲣⲓⲁⲑⲃⲁⲁⲗ. ⲧⲁⲓ ⲧⲉ Ⲕⲁⲣⲓⲁⲑⲓⲁⲣⲓⲙ ⲧⲡⲟⲗⲓⲥ  ⲛ̅ⲛϣⲏⲣⲉ ⲛ̅Ⲓⲟⲩⲇⲁ . Ⲡⲁⲓ ⲡⲉ ⲡⲙⲉⲣⲟⲥ ⲉⲧⲛⲟⲩϫⲉ ⲉⲡⲥⲁ ⲛ̅ⲑⲁⲗⲁⲥⲥⲁ . ⲁⲩⲱ  ⲡⲙⲉⲣⲟⲥ  ⲉⲧⲛⲟⲩϫⲉ ⲉⲡⲥⲥⲁ  ⲙ̅ⲡⲉⲙⲛ̅ⲧ . ϫⲓⲛⲡⲙⲉⲣⲟⲥ ⲛ̅Ⲕⲁⲣⲓⲁⲑⲃⲁⲁⲗ . ⲁⲩⲱ ⲛ̅ⲧⲟϣ ⲥⲉⲛⲁϫⲱⲧⲉ ⲉϩⲣⲁⲓ ⲉⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ ϫⲉ Ⲅⲁⲍⲉⲓⲛ . ⲉϫⲛ̅ⲧⲡⲏⲅⲏ ⲙ̅ⲡⲙⲟⲟⲩ ⲛ̅Ⲁⲫⲑⲱ . Ⲁⲩⲱ ⲛ̅ⲧⲟϣ ⲥⲉⲛⲁⲉⲓ ⲉϩⲣⲁⲓ  ⲉϫⲛ̅ⲟⲩⲙⲉⲣⲟⲥ  ⲡⲁⲓ ⲉⲧⲙ̅ⲡⲙ̅ⲧⲟ ⲉⲃⲟⲗ  ⲙ̅ⲡⲙⲁ ⲛ̅Ϣⲏⲛⲛⲟⲛⲛⲁⲙ . ⲉϥϣⲟⲟⲡ ⲛ̅ⲥⲁⲟⲩⲙⲁ  ⲙ̅Ⲙⲉⲕⲣⲁⲫⲁⲉⲓⲛ . ϫⲓⲛⲡⲥⲁ  ⲙ̅ⲡⲉⲙϩⲓⲧ . ⲁⲩⲱ ⲥⲁⲛⲁⲉⲓ ⲉϩⲣⲁⲓ ⲉⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ ϫⲉ Ⲟⲛⲛⲁⲙ . ⲉ....ⲡ...ⲛ̅Ⲓⲉⲃⲟⲩⲥⲁ  ⲁⲩⲱ  ϫⲓⲛⲡⲉⲙϩⲓⲧ  ⲥⲉⲛⲁⲉⲓ ⲉϩⲣⲁⲓ ⲉϫⲛ̅ⲧⲡⲏⲅⲏ ⲛ̅Ϩⲣⲱⲅⲏⲗ . Ⲁⲩⲱ ⲥⲉⲛⲁϫⲱⲧⲉ ⲉϫⲛ̅ⲧⲡⲏⲅⲏ ⲛ̅Ⲃⲁⲓⲑⲥⲁⲙⲟⲩⲥ . ⲁⲩⲱ ⲥⲁⲛⲁⲕⲧⲟⲟⲩ ⲉϫ̅ⲙⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ ϫⲉ Ⲅⲁⲗⲓⲁⲱⲑ . ⲡⲁⲓ ⲉⲧⲙ̅ⲡⲙ̅ⲧⲟ ⲉⲃⲟⲗ ⲛ̅ⲧⲉϩⲓⲏ ⲛ̅ⲃⲱⲕ ⲉϩⲣⲁⲓ ⲉⲀⲓⲑⲁⲙⲓⲛ  ⲁⲩⲱ ⲥⲉⲛⲁⲉⲓ ⲉϩⲣⲁⲓ ⲉϫⲙ̅ⲡⲱⲛⲉ ⲛ̅Ⲃⲁⲓⲱⲛ. ⲛ̅ⲛ̅ϣⲏⲣⲉ ⲛ̅Ϩⲣⲟⲩⲃⲏⲛ. ⲁⲩⲱ ⲥⲉⲛⲁⲕⲟⲧⲟⲩ ⲛ̅ⲥⲁⲥⲡⲓⲣ ⲛ̅Ⲃⲁⲓⲑⲁⲣⲁ ϫⲓⲛⲙ̅ⲡⲉⲙϩⲓⲧ . ⲁⲩⲱ  ⲥⲉⲛⲁⲉⲓ ⲉϩⲣⲁⲓ ⲉϫⲛ̅ⲛⲧⲟϣ ⲛ̅ⲥⲁⲥⲡⲓⲣ ⲛ̅ⲧⲉⲑⲁⲗⲁⲥⲥⲁ ϫⲓⲛⲛ̅ⲥⲁ  ⲙ̅ⲡⲉⲙϩⲓⲧ . ⲁⲩⲱ ⲡⲉⲓⲉⲃⲟⲗ  ϩⲙ̅ⲡⲧⲟϣ ⲉϥⲛϥⲏⲩ ⲉϫⲙ̅ⲡⲕⲟⲟϩ ⲉⲧϫⲟⲥⲉ ⲛ̅ⲧⲉⲑⲁⲗⲁⲥⲥⲁ ⲛ̅ⲛⲉϩⲙⲟⲩ . ⲉϫⲙ̅ⲡⲉⲙϩⲓⲧ  ⲉⲩⲙⲉⲣⲟⲥ  ⲛ̅ⲧⲉⲡⲒⲟⲣⲇⲁⲛⲏⲥ  ϫⲓⲛⲡⲉⲙⲛ̅ⲧ.  Ⲁⲩⲱ ⲡⲒⲟⲣⲇⲁⲛⲏⲥ ⲡⲉⲧⲛⲁⲛⲉϩⲛ̅ⲧⲟϣ ⲉⲃⲟⲗ  ϩⲛ̅ⲟⲩⲙⲉⲣⲟⲥ  ϫⲓⲛⲙ̅ⲙⲁ ⲛ̅ϣⲁ.  Ⲧⲁⲓ ⲧⲉ ⲧⲉⲕⲗⲏⲣⲟⲛⲟⲙⲓⲁ ⲛ̅ⲛϣⲏⲣⲉ  ⲛ̅Ⲃⲉⲛⲓⲁⲙⲓⲛ . ⲉⲧⲉ ⲛⲉⲥⲧⲟϣ ⲛⲉ ⲉⲩⲕⲱⲧⲉ  ⲕⲁⲧⲁⲛⲉⲩⲇⲏⲙⲟⲥ : Ⲁⲩⲱ  ⲁⲩϣⲱⲡⲉ  ⲛ̅ϭⲓⲙ̅ⲡⲟⲗⲓⲥ  ⲛ̅ⲛϣⲏⲣⲉ  ⲛ̅Ⲃⲉⲛⲓⲁⲙⲓⲛ  ⲕⲁⲧⲁⲛⲉⲩⲇⲏⲙⲟⲥ. Ϩⲓⲉⲣⲓⲭⲱ. ⲁⲩⲱ Ⲃⲁⲓⲑⲁⲅⲗⲁ . ⲁⲩⲱ Ⲁⲙⲉⲣⲅⲁⲥⲓⲥ . ⲁⲩⲱ Ⲃⲁⲓⲑⲁⲣⲁ . ⲁⲩⲱ Ⲛⲁⲙⲃⲣⲁ . ⲁⲩⲱ Ⲃⲁⲓⲥⲁⲛⲉ. ⲁⲩⲱ Ⲁⲓⲉⲓⲙ . ⲁⲩⲱ Ⲫⲁⲣⲁ. ⲁⲩⲱ Ⲉⲩⲣⲁⲑⲁ . ⲁⲩⲱ Ⲕⲁⲣⲫⲁ . ⲁⲩⲱ Ⲕⲁⲓⲫⲓⲣⲁ . ⲁⲩⲱ Ⲙⲟⲛⲉⲓ ⲁⲩⲱ Ⲅⲁⲃⲁⲁ . ⲙⲛ̅ⲧⲥⲛⲟⲟⲩⲥ  ⲙ̅ⲡⲟⲗⲓⲥ ⲙⲛ̅ⲛⲉⲩⲕⲉⲧⲙⲉ.  ⲁⲩⲱ Ⲅⲁⲃⲁⲱⲛ ⲙⲛ̅Ⲣⲁⲙⲁ . ⲁⲩⲱ Ⲃⲁⲓⲏⲣⲱⲑ . ⲁⲩⲱ Ⲙⲁⲥⲥⲏⲙⲁ  ⲁⲩⲱ Ⲃⲓⲣⲱⲛ . ⲁⲩⲱ Ⲧⲁⲙⲱⲕⲏ  ⲁⲩⲱ Ⲕⲉⲫⲁⲣⲁⲁ  ⲁⲩⲱ Ⲕⲁⲫⲁⲛ . ⲁⲩⲱ Ⲛⲁⲕⲁⲛ . ⲁⲩⲱ Ⲕⲉⲣⲥⲏⲁ  ⲁⲩⲱ Ⲥⲉⲗⲁⲥⲉⲕ  ⲁⲩⲱ Ⲓⲉⲃⲟⲩⲥ ⲧⲁⲓ ⲧⲉ  Ⲑⲓⲉⲣⲟⲩⲥⲁⲗⲏⲙ . ⲁⲩⲱ Ⲃⲁⲙⲱⲑⲓⲁⲣⲓⲙ : ⲙⲛ̅ⲧϣⲟⲙⲧⲉ  ⲙ̅ⲡⲟⲗⲓⲥ ⲙⲛ̅ⲛⲉⲩⲕⲉⲧⲙⲉ . Ⲧⲁⲓ ⲧⲉ ⲧⲉⲕⲗⲏⲣⲟⲛⲟⲙⲓⲁ ⲛ̅ⲛϣⲏⲣⲉ ⲛ̅Ⲃⲉⲛⲓⲁⲙⲓⲛ ⲕⲁⲧⲁⲛⲉⲩⲇⲏⲙⲟⲥ :
 
Ⲓ̅Ⲑ̅. Ⲁⲩⲱ  ⲁϥⲉⲓ ⲉⲃⲟⲗ  ⲛ̅ϭⲓⲡⲙⲉϩⲥⲛⲁⲩ  ⲛ̅ⲕⲗⲏⲣⲟⲥ  ⲛ̅ⲛϣⲏⲣⲉ  ⲛ̅Ⲥⲩⲙⲉⲱⲛ ⲕⲁⲧⲁⲛⲉⲩⲇⲏⲙⲟⲥ . ⲁⲩⲱ ⲁⲥϣⲱⲡⲉ ⲛ̅ϭⲓⲧⲉⲩⲕⲗⲏⲣⲟⲛⲟⲙⲓⲁ  ϩⲛ̅ⲧⲙⲏⲧⲉ  ⲛ̅ⲛϣⲏⲣⲉ  ⲛ̅Ⲓⲟⲩⲇⲁ . ⲁⲩⲱ  ⲡⲉⲩⲕⲗⲏⲣⲟⲥ  ⲁϥϣⲱⲡⲉ  ⲛ̅Ⲃⲏⲣⲥⲁⲃⲉⲉ . ⲙⲛ̅ⲡⲤⲁⲙⲁⲁ . ⲁⲩⲱ Ⲕⲱⲗⲁⲇⲁⲁⲙ . ⲁⲩⲱ Ⲁⲣⲥⲱⲗⲁ . ⲁⲩⲱ Ⲃⲱⲗⲁ . ⲁⲩⲱ Ⲓⲁⲥⲟⲛ. ⲁⲩⲱ Ⲉⲗⲑⲟⲩⲗⲁ . ⲁⲩⲱ Ⲃⲟⲩⲗⲁ . ⲁⲩⲱ Ϩⲉⲣⲙⲁ.  ⲁⲩⲱ Ⲥⲓⲕⲉⲗⲁ . ⲁⲩⲱ Ⲃⲉⲛⲑⲁⲭⲉⲃⲉⲃ . ⲁⲩⲱ Ⲥⲁⲣⲟⲩⲥⲓⲙ . ⲁⲩⲱ Ⲃⲁⲑⲁⲣⲱⲑ. ⲙⲛ̅ⲛⲉⲩⲥⲱϣⲉ : ⲙⲛ̅ⲧϣⲟⲙⲧⲉ ⲙ̅ⲡⲟⲗⲓⲥ ⲙⲛ̅ⲛⲉⲩⲕⲉⲧⲙⲉ . Ⲉⲣⲉⲙⲙⲱⲛ . ⲁⲩⲱ Ⲑⲁⲗⲕ ⲁⲩⲱ Ⲓⲉⲑⲉⲣ .  ⲁⲩⲱ Ⲁⲥⲁⲛ ϥⲧⲟ ⲙ̅ⲡⲟⲗⲓⲥ ⲙⲛ̅ⲛⲉⲩⲕⲉⲧⲙⲉ. ⲉⲧⲕⲱⲧⲉ  ⲉⲛⲉⲓⲡⲟⲗⲓⲥ  ϣⲁϩⲣⲁⲓ ⲉⲂⲁⲗⲉⲕ ⲉⲩⲛⲁⲃⲱⲕ ⲉϩⲣⲁⲓ ⲉⲒⲉⲛⲉⲑ ⲕⲁⲧⲁⲡⲥⲁ ⲙ̅ⲡⲉⲙⲛ̅ⲧ. Ⲧⲁⲓ ⲧⲉ  ⲧⲉⲕⲗⲏⲣⲟⲛⲟⲙⲓⲁ ⲛ̅ⲛ̅ϣⲏⲣⲉ  ⲛ̅Ⲥⲩⲙⲉⲱⲛ  ⲕⲁⲧⲁⲛⲉⲩⲇⲏⲙⲟⲥ . ϫⲓⲛⲡⲉⲕⲗⲏⲣⲟⲥ ⲛ̅Ⲓⲟⲩⲇⲁ. ⲉⲥⲛⲏⲩ ⲛ̅ϭⲓⲧⲉⲕⲗⲏⲣⲟⲛⲟⲙⲓⲁ ⲛ̅ⲧⲉⲫⲩⲗⲏ ⲛ̅ⲛ̅ϣⲏⲣⲉ ⲛ̅Ⲥⲩⲙⲉⲱⲛ ⲕⲁⲧⲁⲛⲉⲩⲇⲏⲙⲟⲥ ⲉⲛ̅ⲧⲱϣ ⲛⲉ  ⲡⲁⲓ  ⲛ̅ⲧⲉⲕⲗⲏⲣⲟⲛⲟⲙⲓⲁ ⲛ̅ⲧⲉⲫⲩⲗⲏ ⲛ̅ⲛ̅ϣⲏⲣⲉ ⲛ̅Ⲥⲩⲙⲉⲱⲛ ϫⲓⲛⲡⲉⲕⲗⲏⲣⲟⲥ ⲛ̅Ⲓⲟⲩⲇⲁ ⲉⲛⲁⲁⲥ ⲉⲧⲱⲟⲩ. ⲁⲩⲱ  ⲁⲩⲕⲗⲏⲣⲟⲛⲟⲙⲉⲓ  ⲛ̅ϭⲓⲛ̅ϣⲏⲣⲉ  ⲛ̅Ⲥⲩⲙⲉⲱⲛ ϩⲛ̅ⲧⲙⲏⲧⲉ ⲙ̅ⲡⲉⲩⲕⲗⲏⲣⲟⲥ:  Ⲁⲩⲱ ⲁϥⲉⲓ ⲉⲃⲟⲗ ⲛ̅ϭⲓⲡⲙⲉϩϣⲟⲙⲧ  ⲛ̅ⲕⲗⲏⲣⲟⲥ  ⲛ̅Ⲍⲁⲃⲟⲩⲗⲱⲛ  ⲕⲁⲧⲁⲛⲉⲩⲇⲏⲙⲟⲥ. ⲉⲩⲛⲁϣⲱⲡⲉ  ⲛ̅ϭⲓⲛ̅ⲧⲟϣ ⲛ̅ⲧⲉⲩⲕⲗⲏⲣⲟⲛⲟⲙⲓⲁ. ⲉⲤⲉⲇⲉⲕⲅⲱⲗⲁⲛⲉ ⲛⲉⲩⲧⲟϣ . ⲁⲩⲱ ⲧⲉⲑⲁⲗⲁⲥⲥⲁ. ⲁⲩⲱ Ⲙⲁⲣⲅⲉⲗⲁ . ⲁⲩⲱ  ⲥⲉⲛⲁⲧⲟϭⲟⲩ ⲉⲂⲁⲓⲑⲁⲣⲁⲃⲁ . ⲉϩⲣⲁⲓ ⲉⲡⲓⲁ  ⲡⲁⲓ ⲉⲧⲙ̅ⲡⲙ̅ⲧⲟ ⲉⲃⲟⲗ  ⲛ̅Ⲉⲓ̅ⲉⲕⲙⲁⲛ. Ⲁⲩⲱ ⲥⲁⲛⲁⲕⲧⲟⲟⲩ ⲉϫⲛ̅Ⲥⲉⲇⲇⲟⲩⲕ. ⲙ̅ⲡⲙ̅ⲧⲟ ⲉⲃⲟⲗ  ϫⲓⲛⲛ̅ⲙⲙⲁ  ⲛ̅ϣⲁ ⲛ̅Ⲃⲁⲓⲑⲥⲁⲙⲩⲥ. ⲉϫⲛ̅ⲛ̅ⲧⲟϣ ⲛ̅Ⲭⲁⲥⲉⲗⲱⲑⲁⲓⲁⲓ . ⲁⲩⲱ ⲥⲉⲛⲁϫⲱⲧⲉ ⲉϫⲛ̅Ⲇⲁⲃⲁⲓⲣⲱⲑ. ⲁⲩⲱ ⲥⲉⲛⲁⲃⲱⲕ ⲉϩⲣⲁⲓ ⲉϫⲛ̅Ⲛⲁⲫⲁⲣ . ⲁⲩⲱ ⲉⲃⲟⲗ  ϩⲙ̅ⲡⲙⲁ ⲉⲧⲙ̅ⲙⲁⲩ  ⲥⲉⲛⲁⲕⲧⲟⲟⲩ  ⲙ̅ⲡⲙ̅ⲧⲟ ⲉⲃⲟⲗ  ϫⲓⲛⲙ̅ⲙⲁ ⲛ̅ϣⲁ  ⲉϩⲣⲁⲓ ⲉϫⲛ̅Ⲅⲉⲑⲑⲏ .ⲉϫⲛ̅ⲧⲡⲟⲗⲓⲥ Ⲕⲁⲥⲉⲓ.  ⲁⲩⲱ ⲥⲉⲛⲁϫⲱⲧⲉ ⲉϫⲛ̅Ⲣⲉⲙⲙⲱⲛⲁ . Ⲁⲙⲁⲑⲁⲣ . Ⲁⲟⲍⲁ . ⲁⲩⲱ ⲥⲉⲛⲁⲕⲧⲟⲟⲩ ⲛ̅ϭⲓⲛ̅ⲧⲟϣ ⲉⲡⲥⲁ  ⲙ̅ⲡⲉⲙϩⲓⲧ. ⲉϩⲣⲁⲓ ⲉϫⲛ̅Ⲁⲙⲱⲑ. ⲁⲩⲱ  ⲡⲉⲩⲉⲓ ⲉⲃⲟⲗ ⲉϥⲛⲁϣⲱⲡⲉ  ⲉϫⲛ̅Ⲅⲉⲫⲏⲗ . ⲁⲩⲱ Ⲕⲁⲧⲁⲛⲁⲑ . ⲁⲩⲱ Ⲛⲁⲃⲁⲁⲗ . ⲁⲩⲱ Ⲥⲩⲙⲟⲱⲛ . ⲁⲩⲱ Ⲓⲉⲙⲧⲁ. ⲁⲩⲱ Ⲃⲁⲓⲑⲙⲁⲛ . Ⲧⲁⲓ ⲧⲉ ⲧⲉⲕⲗⲏⲣⲟⲛⲟⲙⲓⲁ  ⲛ̅ⲧⲉⲫⲩⲗⲏ  ⲛ̅ⲛϣⲏⲣⲉ  ⲛ̅Ⲍⲁⲃⲟⲩⲗⲱⲛ  ⲕⲁⲧⲁⲛⲉⲩⲇⲏⲙⲟⲥ. Ⲛⲉⲩⲡⲟⲗⲓⲥ  ⲙⲛ̅ⲛⲉⲩⲕⲉⲧⲙⲉ : Ⲁⲩⲱ Ⲓⲥⲥⲁⲭⲁⲣ ⲁⲡⲉϥⲕⲗⲏⲣⲟⲥ  ⲉⲓ ⲉⲃⲟⲗ ⲙ̅ⲙⲉϩϥⲧⲟⲟⲩ. ⲁⲩⲱ ⲛⲉⲩⲧⲟϣ  ⲁⲩϣⲱⲡⲉ Ⲓⲁⲍⲏⲣ  ⲁⲩⲱ Ⲭⲁⲥⲥⲁⲗⲱⲑ.  ⲁⲩⲱ Ⲥⲟⲩⲛⲁⲛ . ⲁⲩⲱ  Ⲁⲣⲓⲛ . ⲁⲩⲱ Ⲥⲉⲛⲛⲁ . ⲁⲩⲱ Ⲣⲉⲏⲑⲁ . ⲁⲩⲱ Ⲁⲛⲁⲭⲉⲣⲉⲑ.  ⲁⲩⲱ Ⲇⲁⲃⲓⲣⲱⲑ . ⲁⲩⲱ Ⲕⲓⲥⲱⲛ . ⲁⲩⲱ Ⲣⲉⲃⲉⲥ . ⲁⲩⲱ Ϩⲉⲣⲙ̅ⲙⲁⲥ . ⲁⲩⲱ Ⲓⲉⲱⲛ . ⲁⲩⲱ Ⲃⲁⲓⲑⲫⲁⲓⲥⲏⲥ . ⲁⲩⲱ ⲛⲉⲩⲧⲟϣ ⲥⲉⲧⲱϭⲉ ⲉⲐⲁⲓⲑⲱⲙ . ⲁⲩⲱ ⲉⲤⲁⲗⲏⲙ ⲕⲁⲧⲁⲧⲉⲑⲁⲗⲁⲥⲥⲁ . ⲁⲩⲱ Ⲃⲁⲓⲑⲥⲁⲙⲩⲥ . ⲁⲩⲱ  ⲡⲉⲓⲉⲃⲟⲗ  ⲛ̅ⲛⲉϥⲧⲟϣ  ⲡⲉ  ⲡⲒⲟⲣⲇⲁⲛⲏⲥ. Ⲧⲁⲓ ⲧⲉ  ⲧⲉⲕⲗⲏⲣⲟⲛⲟⲙⲓⲁ  ⲛ̅ⲧⲉⲫⲩⲗⲏ ⲛ̅ⲛϣⲏⲣⲉ  ⲛ̅Ⲓⲥⲥⲁⲭⲁⲣ  ⲕⲁⲧⲁⲛⲉⲩⲇⲏⲙⲟⲥ. ⲛⲉⲩⲡⲟⲗⲓⲥ ⲙⲛ̅ⲛⲉⲩⲕⲉⲧⲙⲉ: Ⲁⲩⲱ  ⲁϥⲉⲓ ⲉⲃⲟⲗ  ⲛ̅ϭⲓⲡⲉⲕⲗⲏⲣⲟⲥ ⲛ̅Ⲁⲥⲏⲣ  ⲙ̅ⲙⲉϩϯⲟⲩ.  ⲁⲩⲱ ⲛⲉⲩⲧⲟϣ ⲁⲩϣⲱⲡⲉ ⲉⲖⲉⲗⲉⲕⲉⲑ . ⲁⲩⲱ Ⲁⲗⲉⲕ. ⲁⲩⲱ Ⲃⲁⲓⲑⲟⲕ . ⲁⲩⲱ  Ⲁⲕⲁⲫ . ⲁⲩⲱ Ⲉⲗⲓⲙⲉⲗⲉⲭ .  ⲁⲩⲱ  Ⲁⲙⲓⲏⲗ . ⲁⲩⲱ Ⲙⲁⲁⲥⲁ . ⲁⲩⲱ  ϥⲛⲁⲧⲱϭⲉ  ⲉϩⲟⲩⲛ  ⲉⲡⲔⲁⲣⲙⲏⲣⲟⲥ  ⲕⲁⲧⲁⲧⲉⲑⲁⲗⲁⲥⲥⲁ . ⲁⲩⲱ ⲉⲤⲉⲓⲱⲣ . ⲁⲩⲱ Ⲗⲁⲃⲁⲛⲁⲑ . ⲁⲩⲱ Ⲥⲁⲛ . ⲁⲩⲱ  ϥⲛⲁⲕⲧⲟϥ ϫⲓⲛⲙ̅ⲙⲁ ⲛ̅ϣⲁ ⲙ̅ⲡⲣⲏ . ⲁⲩⲱ Ⲃⲁⲓⲑⲁⲓⲅⲉⲛⲉⲑ . ⲁⲩⲱ ϥⲛⲁⲧⲱϭⲉ  ⲉⲌⲁⲃⲟⲩⲗⲱⲛ . ⲁⲩⲱ ⲉⲒⲧⲁⲫⲏⲉⲑⲁ . ⲁⲩⲱ  ⲕⲁⲧⲁⲧⲉⲑⲁⲗⲁⲥⲥⲁ  ⲙ̅ⲡⲉⲙϩⲓⲧ. ⲁⲩⲱ ⲛ̅ⲧⲟϣ ⲥⲉⲛⲁϫⲱⲧⲉ ⲉⲤⲁⲫⲑⲁ . ⲁⲩⲱ Ⲃⲉⲑⲉⲕ. ⲁⲩⲱ Ⲓⲛⲁⲏⲗ . ⲁⲩⲱ  ⲥⲉⲛⲁⲕⲧⲟⲟⲩ ⲉϩⲣⲁⲓ ⲉⲬⲱⲃⲁⲙⲁⲥⲟⲙⲉⲗ . ⲁⲩⲱ Ⲭⲉⲃⲣⲱⲛ.  ⲁⲩⲱ Ⲣⲁⲁⲫ . ⲁⲩⲱ Ⲉⲙⲁⲱⲛ . ⲁⲩⲱ  Ⲕⲁⲛⲑⲁⲛ  ϣⲁϩⲣⲁⲓ ⲉⲤⲓⲇⲱⲛ ⲧⲛⲟϭ. Ⲁⲩⲱ  ⲛ̅ⲧⲟϣ ⲥⲉⲛⲁⲕⲧⲟⲟⲩ ⲉϩⲣⲁⲓ ⲉⲢⲁⲙⲁ. ⲁⲩⲱ ϣⲁϩⲣⲁⲓ ⲉⲧⲡⲏⲅⲏ  ⲙ̅Ⲙⲁⲥⲫⲁⲥⲥⲁⲧ  ⲙⲛ̅ⲛⲁⲦⲩⲣⲟⲥ. ⲁⲩⲱ ⲥⲉⲛⲁⲕⲧⲟⲟⲩ ⲛ̅ϭⲓⲛ̅ⲧⲟϣ ⲉϫⲛ̅Ⲓⲁⲥⲏⲫ . ⲁⲩⲱ ⲡⲉϥⲉⲓ ⲉⲃⲟⲗ ⲧⲉ ⲧⲉⲑⲁⲗⲁⲥⲥⲁ . ⲁⲩⲱ ϫⲓⲛⲖⲉⲃ   ⲁⲩⲱ Ⲉⲭⲟⲥⲟⲃ  ⲁⲩⲱ  Ⲁⲣⲭⲱⲃ  ⲁⲩⲱ Ⲁⲫⲉⲕ  ⲁⲩⲱ  Ϩⲣⲁⲁⲕ: Ⲧⲁⲓ ⲧⲉ  ⲧⲉⲕⲗⲏⲣⲟⲛⲟⲙⲓⲁ  ⲛ̅ⲧⲉⲛ̅ϣⲏⲣⲉ  ⲛ̅Ⲁⲥⲏⲣ  ⲕⲁⲧⲁⲛⲉⲩⲇⲏⲙⲟⲥ  ⲛⲉⲩⲡⲟⲗⲓⲥ  ⲙⲛ̅ⲛⲉⲩⲕⲉⲧⲙⲉ :  Ⲁⲩⲱ Ⲛⲉⲫⲑⲁⲗⲉⲓⲙ ⲡⲉϥⲕⲗⲏⲣⲟⲥ ⲁϥⲉⲓ ⲉⲃⲟⲗ ⲙ̅ⲙⲉϩⲥⲟⲟⲩ  ⲁⲩⲱ  ⲁⲩϣⲱⲡⲉ  ⲛ̅ϭⲓⲛⲉⲩⲧⲟϣ Ⲙⲟⲟⲗⲁⲙ . ⲁⲩⲱ Ⲙⲱⲗⲁⲓ . ⲁⲩⲱ Ⲃⲉⲥⲉⲙⲓⲉⲓ . ⲁⲩⲱ Ⲕⲁⲣⲙⲁⲓ . ⲁⲩⲱ Ⲛⲁⲃⲱⲕ. ⲁⲩⲱ Ⲓⲉⲫⲑⲁⲛ  ϣⲁϩⲣⲁⲓ ⲉⲆⲱⲇⲁⲛ  ⲁⲩⲱ ⲡⲓⲉⲃⲟⲗ ⲛ̅ⲛⲉϥⲧⲟϣ ⲡⲉ ⲡⲉⲒⲟⲣⲇⲁⲛⲏⲥ. ⲁⲩⲱ ⲛⲉϥⲧⲟϣ ⲥⲉⲛⲁⲕⲧⲟⲟⲩ ⲉϫⲛ̅ⲧⲉⲑⲁⲗⲁⲥⲥⲁ ⲉⲛⲁ . Ⲑⲁⲃⲱⲣ ⲁⲩⲱ ⲥⲉⲛⲁϫⲱⲧⲉ ⲉⲃⲟⲗϩⲙ̅ⲡⲙⲁ ⲉⲧⲙ̅ⲙⲁⲩ ⲉⲀⲓⲕⲁ .  ⲁⲩⲱ ⲥⲉⲛⲁⲧⲱϭⲉ ⲉⲌⲁⲃⲟⲩⲗⲱⲛ ϫⲓⲛⲙ̅ⲡⲣⲏⲥ . ⲁⲩⲱ ϥⲛⲁⲧⲱϭⲉ ⲉⲀⲥⲏⲣ ⲕⲁⲧⲁⲡⲥⲁ ⲛ̅ⲧⲉⲑⲁⲗⲁⲥⲥⲁ . ⲁⲩⲱ ⲡⲒⲟⲣⲇⲁⲛⲏⲥ ⲉϥⲛⲁϣⲱⲡⲉ ϫⲓⲛⲙ̅ⲙⲁ ⲛ̅ϣⲁ ⲙ̅ⲡⲣⲏ.  Ⲁⲩⲱ  ⲙ̅ⲡⲟⲗⲓⲥ  ⲙ̅ⲡⲁⲦⲩⲣⲟⲥ  ϩⲉⲛⲡⲟⲗⲓⲥ ⲛⲉ ⲉⲩⲕⲧⲏⲩ ⲛ̅ⲥⲟⲃⲧ . Ⲧⲩⲣⲟⲥ . ⲁⲩⲱ  Ⲱⲙⲁⲁⲑⲁ .  Ⲁⲩⲱⲇ.  ⲁⲩⲱ Ⲕⲉⲛⲉⲣⲉⲧ. ⲁⲩⲱ Ⲁⲣⲙⲁⲑ . ⲁⲩⲱ Ⲁⲣⲁⲏⲗ . ⲁⲩⲱ Ⲁⲥⲱⲣ . ⲁⲩⲱ Ⲕⲁⲇⲉⲥ . ⲁⲩⲱ Ⲥⲁⲣⲁⲉ . ⲁⲩⲱ ⲧⲡⲏⲅⲏ ⲛ̅Ⲁⲥⲱⲣ . ⲁⲩⲱ Ⲕⲉⲣⲱⲑ . ⲁⲩⲱ Ⲙⲁⲅⲁⲗⲁⲁⲣⲓⲙ  ⲁⲩⲱ Ⲃⲁⲓⲑⲁⲙ . ⲁⲩⲱ Ⲃⲁⲓⲑⲥⲁⲙⲩⲥ : Ⲧⲁⲓ ⲧⲉ ⲧⲉⲕⲗⲏⲣⲟⲛⲟⲙⲓⲁ  ⲛ̅ⲧⲉⲫⲩⲗⲏ ⲛ̅ⲛϣⲏⲣⲉ  ⲛ̅Ⲛⲉⲫⲑⲁⲗⲓⲙ :  Ⲁⲩⲱ Ⲇⲁⲛ  ⲁⲡⲉⲕⲗⲏⲣⲟⲥ  ⲉⲓ ⲉⲃⲟⲗ  ⲙ̅ⲙⲉϩⲥⲁϣϥ  ⲁⲩⲱ ⲛⲉⲩⲧⲟϣ ⲁⲩϣⲱⲡⲉ: Ⲥⲁⲣⲁⲑ . ⲁⲩⲱ  Ⲁⲥⲁ . ⲧⲡⲟⲗⲓⲥ Ⲥⲁⲙⲩⲥ. ⲁⲩⲱ Ⲥⲁⲗⲁⲃⲓⲛ . ⲁⲩⲱ Ⲥⲁⲗⲁⲓⲟⲛ .  ⲁⲩⲱ Ⲥⲉⲓⲗⲁⲇⲁ .  ⲁⲩⲱ Ⲉⲗⲱⲛ . ⲁⲩⲱ Ⲑⲁⲙⲛⲁⲑⲁ . ⲁⲩⲱ Ⲁⲕⲕⲁⲣⲱⲛ . ⲁⲩⲱ Ⲁⲗⲕⲁⲑⲁ . ⲁⲩⲱ Ⲥⲉⲃⲃⲉⲧⲟⲛ . ⲁⲩⲱ . Ⲃⲁⲗⲁⲁⲛ . ⲁⲩⲱ Ⲁⲍⲱⲣ . ⲁⲩⲱ Ⲃⲁⲛⲃⲁⲣⲁⲕ . ⲁⲩⲱ ...... ⲁⲩⲱ ⲛⲏ ϫⲓⲛⲧⲉⲑⲁⲗⲁⲥⲥⲁ  ⲛ̅ⲛⲉⲧⲟⲩⲙⲟⲩⲧⲉ ⲉⲣⲟⲟⲩ  ϫⲉ ⲛ̅ϩⲓⲉⲣⲁⲕⲱⲛ . ⲡⲧⲟⲟⲩ ⲉⲧϩⲏⲛ ⲉϩⲟⲩⲛ ⲉⲒⲟⲡⲡⲏ . Ⲧⲁⲓ ⲧⲉ  ⲧⲉⲕⲗⲏⲣⲟⲛⲟⲙⲓⲁ  ⲛ̅ⲉⲫⲩⲗⲏ ⲛ̅ⲛϣⲏⲣⲉ ⲛ̅Ⲇⲁⲩⲉⲓⲇ  ⲕⲁⲧⲁⲛⲉⲩⲇⲏⲙⲟⲥ  ⲛⲉⲩⲡⲟⲗⲓⲥ ⲙⲛ̅ⲛⲉⲩⲕⲉⲧⲙⲉ : Ⲁⲩⲱ ⲛ̅ϣⲏⲣⲉ  ⲛ̅Ⲇⲁⲛ  ⲙ̅ⲡⲟⲩϩⲉϫϩϫ̅ⲡⲀⲙⲟⲣⲣⲁⲓⲟⲥ  ⲡⲉⲧϩⲟϫϩϫ̅  ⲙ̅ⲙⲟⲟⲩ ϩⲙ̅ⲡⲧⲟⲟⲩ . ⲁⲩⲱ Ⲁ̅ⲙⲙⲟⲣⲁⲓⲟⲥ ⲛⲉⲩⲕⲱ ⲙ̅ⲙⲟⲟⲩ ⲁⲛ ⲉⲓ ⲉϩⲣⲁⲓ ⲉⲡⲓⲁ. ⲁⲩⲱ ⲁⲩϭⲱⲟⲩ ⲛ̅ⲧⲟⲟⲧⲟⲩ ⲙ̅ⲡⲧⲟϣ ⲛ̅ⲧⲉⲩⲙⲉⲣⲓⲥ :   ⲁⲩⲱ ⲁⲩⲃⲱⲕ ⲛ̅ϭⲓⲛ̅ϣⲏⲣⲉ ⲛ̅Ⲇⲁⲛ  ⲁⲩⲙⲓϣⲉ ⲙⲛ̅Ⲗⲁⲙⲉⲭ ⲧⲡⲟⲗⲓⲥ  ⲁⲩϫⲓⲧⲥ̅ . Ⲁⲩⲱ ⲁⲩⲡⲁⲧⲁⲥⲥⲉ ⲙ̅ⲙⲟⲥ  ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ . Ⲁⲩⲱ ⲁⲩⲟⲩⲱϩ ⲛ̅ϩⲏⲧⲥ̅ . Ⲁⲩⲙⲟⲩⲧⲉ ⲉⲡⲉⲥⲣⲁⲛ ϫⲉ Ⲗⲁⲥⲉⲛⲇⲁⲕ . Ⲁⲩⲱ ⲡⲀⲙⲟⲣⲣⲁⲓⲟⲥ ⲁϥϭⲱ ⲉⲧⲣⲉϥⲟⲩⲱϩ ϩⲛ̅Ⲉⲗⲱⲙ ⲁⲩⲱ ϩⲛ̅Ⲥⲁⲗⲁⲙⲉⲓⲛ . ⲁⲩⲱ ⲧϭⲓϫ ⲛ̅Ⲉⲫⲣⲁⲓⲙ  ⲁⲥⲛ̅ϣⲟⲧ ⲉϩⲣⲁⲓ ⲉϫⲱⲟⲩ . Ⲁⲩⲱ ⲁⲩⲃⲱⲕ ⲉⲙⲉϣⲧⲡⲕⲁϩ ⲙⲛ̅ⲡⲉⲩⲧⲟϣ . Ⲁⲩⲱ ⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ  ⲁⲩϯ  ⲛ̅ⲟⲩⲕⲗⲏⲣⲟⲥ  ⲛ̅Ⲓⲏⲥⲟⲩⲥ  ⲡϣⲏⲣⲉ  ⲛ̅Ⲛⲁⲩⲏ  ϩⲣⲁⲓ ⲛ̅ϩⲏⲧⲟⲩ.  ϩⲓⲧⲛ̅ⲡⲟⲩⲉϩⲥⲁϩⲛⲉ  ⲙ̅ⲡⲛⲟⲩⲧⲉ . ⲁⲩⲱ  ⲁⲩϯ ⲛⲁϥ ⲛ̅ⲧⲡⲟⲗⲓⲥ  ⲧⲁⲓ ⲉⲛⲧⲁϥⲁⲓⲧⲓ  ⲙ̅ⲙⲟⲥ ⲛ̅ⲧⲟⲟⲧⲟⲩ . ⲉⲧⲉⲐⲁⲙⲛⲁⲥⲁⲩⲁⲣ  ⲧⲉ  ⲧⲁⲓ  ⲉⲥϣⲟⲟⲡ  ϩⲙⲡⲧⲟⲟⲩ ⲛ̅Ⲉⲫⲣⲁⲓⲙ . ⲁⲩⲱ ⲁϥⲕⲱⲧ ⲛ̅ⲧⲡⲟⲗⲓⲥ  ⲁϥⲟⲩⲱϩ  ⲛ̅ϩⲏⲧⲥ̅ . Ⲛⲁⲓ  ⲛⲉ  ⲙ̅ⲡⲱϣ  ⲛⲧⲁϥⲧⲁⲁⲩ  ⲛⲕⲗⲏⲣⲟⲛⲟⲙⲓⲁ ⲛ̅ϭⲓⲈⲗⲉⲁⲍⲁⲣ  ⲡⲟⲩⲏⲏⲃ . ⲁⲩⲱ  Ⲓⲏⲥⲟⲩⲥ  ⲡϣⲏⲣⲉ  ⲛ̅Ⲛⲁⲩⲏ  ⲙⲛ̅ⲛ̅ⲁⲣⲭⲱⲛ  ⲛ̅ⲙ̅ⲙ̅ⲛ̅ⲧ̅ⲉⲓⲱⲧ  ⲛ̅ⲧⲉⲫⲩⲗⲏ  ⲙ̅ⲡⲓ̅ⲏ̅ⲗ̅ . ⲕⲁⲧⲁⲛⲉⲩⲕⲗⲏⲣⲟⲥ . ϩⲛ̅Ⲥⲓⲗⲱ  ⲙ̅ⲡⲙ̅ⲧⲟ  ⲉⲃⲟⲗ  ⲙ̅Ⲡϫⲟⲉⲓⲥ . ϩⲁϩⲧⲛⲛⲣⲟ  ⲛⲧⲉⲥⲕⲩⲛⲏ  ⲙ̅ⲡⲙⲁⲣⲧⲩⲣⲓⲟⲛ . ⲁⲩϫⲱⲕ  ⲉⲃⲟⲗ  ⲙ̅ⲡⲡⲟⲣϣ̅  ⲉⲃⲟⲗ  ⲙ̅ⲕⲁϩ.
 
Ⲕ̅. Ⲁⲩⲱ  Ⲡϫⲟⲉⲓⲥ  ⲁϥϣⲁϫⲉ  ⲙⲛ̅Ⲓⲏⲥⲟⲩⲥ ⲉϥϫⲱ  ⲙ̅ⲙⲟⲥ .ϫⲉ  Ϣⲁϫⲉ  ⲙⲛ̅ⲡϣⲏⲣⲉ  ⲙ̅ⲡⲒⲥⲣⲁⲏⲗ. ⲉϥϫⲱ  ⲙ̅ⲙⲟⲥ  ϫⲉ  ϯ  ⲉⲙⲡⲟⲗⲓⲥ  ⲛⲉ  ⲙ̅ⲙⲁⲙ̅ⲡⲱⲧ ⲉⲣⲟⲟⲩ . ⲛⲁⲓ  ⲉⲛⲧⲁⲓϫⲟⲟⲥ  ⲉⲧⲃⲏⲏⲧⲟⲩ . ⲉⲃⲟⲗϩⲓⲧⲟⲟⲧϥ̅  ⲙ̅Ⲙⲱⲟⲩⲥⲏⲥ . Ⲟⲩⲙⲁⲙ̅ⲡⲱⲧ  ⲉⲣⲟϥ  ⲙ̅ⲡⲣⲉϥϩⲱⲧⲃ̅ . ⲡⲉⲛⲧⲁϥⲣⲱϩⲧ  ⲛⲟⲩⲯⲩⲭⲏ  ⲉϩⲛⲁϥ  ⲁⲛ . ⲁⲩⲱ  ⲛⲉⲓ̅ⲡⲟⲗⲓⲥ  ⲉⲩⲉϣⲱⲡⲉ  ⲛⲏⲧⲛ̅  ⲙⲙⲁⲙⲡⲱⲧ  ⲉⲣⲟⲟⲩ . ⲛϥⲧⲙⲙⲟⲩ  ⲛϭⲓⲡⲉⲧⲛⲁϩⲱⲧⲃ̅  ϩⲁⲧϭⲓϫ  ⲙ̅ⲡⲉⲧϫⲓ  ⲉϩⲟⲩⲛ ⲉⲡⲉⲥⲛⲟϥ. ϣⲁⲛⲧⲉϥⲁϩⲉⲣⲁⲧϥ̅  ϩⲓⲑⲏ ⲛⲧⲥⲩⲛⲁⲅⲱⲅⲏ  ⲉϯϩⲁⲡ  ⲉⲣⲟϥ . ⲉⲓⲉ  ϣⲁⲛⲧⲉϥⲙⲟⲩ  ⲛ̅ϭⲓⲡⲁⲣⲭⲓⲉⲣⲉⲩⲥ  ⲉⲧϩⲙ̅ⲡⲉϥϩⲟⲟⲩ :  Ⲧⲟⲧⲉ  ⲡⲉⲓⲣⲉϥϩⲱⲧⲃ̅  ⲉϥⲉⲕⲧⲟϥ  ⲉⲧⲉϥⲡⲟⲗⲓⲥ  ⲁⲩⲱ  ⲉⲡⲉϥⲏⲓ  ⲉϥⲉⲃⲱⲕ  ⲟⲛ  ⲉϩⲟⲩⲛ  ⲉⲧⲡⲟⲗⲓⲥ  ⲛ̅ⲧⲁϥ ⲉⲛⲧⲁϥⲡⲱⲧ  ⲉⲃⲟⲗ  ⲛ̅ϩⲏⲧⲥ̅ . Ⲁⲩⲱ  ⲁⲩⲡⲱⲣϫ  ⲉⲃⲟⲗ  ⲛ̅Ⲕⲁⲇⲉⲥ  ϩⲛ̅ⲧⲄⲁⲗⲓⲗⲁⲓⲁ ⲡⲧⲟⲟⲩ  ⲛ̅Ⲛⲉⲫⲧⲁⲗⲉⲓⲙ  ⲁⲩⲱ  Ⲥⲩⲭⲉⲙ  ⲉⲧϩⲙ̅ⲡⲧⲟⲟⲩ  ⲛ̅Ⲉⲫⲣⲁⲓⲙ  ⲁⲩⲱ  Ⲕⲁⲣⲓⲁⲑⲁⲃⲟⲕ  ⲉⲧⲉ  ⲧⲁⲓ  ⲧⲉ  Ⲭⲉⲃⲣⲱⲛ  ϩⲙ̅ⲡⲧⲟⲟⲩ  ⲛ̅Ⲓⲟⲩⲇⲁ . Ⲁⲩⲱ  ϩⲙ̅ⲡⲉⲕⲣⲟ  ⲙ̅ⲡⲒⲟⲣⲇⲁⲛⲏⲥ  ⲁⲩϯ ⲛ̅ⲧⲡⲟⲗⲓⲥ Ⲃⲟⲥⲟⲣ  ϩⲛ̅ⲧⲉⲣⲏⲙⲟⲥ  ϩⲛⲧⲥⲱϣⲉ. ⲉⲃⲟⲗ  ϩⲛ̅ⲧⲉⲫⲩⲗⲏ  ⲛ̅Ϩⲣⲟⲩⲃⲏⲛ   ⲁⲩⲱ ⲧⲡⲟⲗⲓⲥ Ⲣⲁⲙⲙⲱⲑ  ⲛ̅ⲧⲉⲄⲁⲗⲁⲁⲇ  ⲉⲃⲟⲗ  ϩⲛ̅ⲧⲉⲫⲩⲗⲏ  ⲛ̅Ⲅⲁⲇ . ⲁⲩⲱ ⲧⲡⲟⲗⲓⲥ Ⲅⲁⲩⲣⲱⲛ  ϩⲛ̅ⲧⲂⲁⲥⲁⲛ  ⲉⲃⲟⲗ  ϩⲛ̅ⲧⲉⲫⲩⲗⲏ  ⲙ̅Ⲙⲁⲛⲁⲥⲥⲏ .  Ⲛⲁⲓ  ⲛⲉ  ⲙ̅ⲡⲟⲗⲓⲥ  ⲉⲛⲧⲁⲩϯⲣⲉⲛⲟⲩ  ⲉⲣⲟⲟⲩ ⲛϭⲓⲛϣⲏⲣⲉ  ⲙ̅ⲡⲒⲥⲣⲁⲏⲗ ⲁⲩⲱ  ⲡⲉⲡⲣⲟⲥⲉⲗⲩⲧⲟⲥ . ⲡⲉⲧϣⲟⲟⲡ  ϩⲣⲁ̅ⲓ  ⲛ̅ϩⲏⲧⲟⲩ. ⲉⲧⲣⲉⲩⲡⲱⲧ  ⲉϩⲣⲁⲓ  ⲉⲣⲟⲟⲩ . ⲛ̅ϭⲓⲟⲩⲟⲛ  ⲛⲓⲙ  ⲉⲧⲛⲁⲣⲱϩⲧ̅  ⲛⲟⲩⲯⲩⲭⲏ  ⲉϩⲛⲁϥ  ⲁⲛ . ϫⲉⲕⲁⲥ ⲛ̅ⲛⲉϥⲙⲟⲩ  ϩⲁⲧϭⲓϫ  ⲙ̅ⲡⲉⲧϫⲓ  ⲉ̅ϩⲟⲩⲛ  ⲉⲡⲉⲥⲛⲟϥ. ϣⲁⲛⲧⲉϥⲁϩⲉⲣⲁⲧϥ̅  ⲉⲧⲥⲩⲛⲁⲅⲱⲅⲏ. ⲉⲧⲛⲁϯϩⲁⲡ  ⲉⲣⲟϥ. 
 
Ⲕ̅Ⲁ̅. Ⲁⲩϯ  ⲙ̅ⲡⲉⲩⲟⲩⲟⲓ ⲛ̅ϭⲓⲛⲁⲣⲭⲱⲛ   ⲛ̅ⲛ̅Ⲗⲉⲩⲓⲧⲏⲥ  ⲁⲩⲉⲓ  ⲉⲈⲗⲉⲁⲍⲁⲣ  ⲡⲁⲣⲭⲓⲉⲣⲉⲩⲥ  ⲁⲩⲱ  ⲉⲒⲏⲥⲟⲩⲥ  ⲡϣⲏⲣⲉ  ⲛ̅Ⲛⲁⲩⲏ . ⲁⲩⲱ  ⲉⲛ̅ⲁⲣⲭⲱⲛ  ⲛ̅ⲛⲉⲫⲩⲗⲏ  ⲛ̅ⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ. ⲁⲩϣⲁϫⲉ  ⲛⲙ̅ⲙⲁⲩ  ϩⲛ̅ⲧⲡⲟⲗⲓⲥ  Ⲥⲓⲗⲱ  ⲙ̅ⲡⲕⲁϩ  ⲛ̅Ⲕⲁⲛⲁⲁⲛ  ⲉⲩϫⲱ  ⲙ̅ⲙⲟⲥ . ϫⲉ  ⲁⲠϫⲟⲉⲓⲥ  ϩⲱⲛ  ⲉϩⲟⲩⲛ  ϩⲓⲧⲙ̅Ⲙⲱⲟⲩⲥⲏⲥ  ⲉⲧⲣⲉⲩϯⲙⲁⲛ̅ⲟⲩⲱϩ  ⲛⲁⲛ  ⲧⲁⲣⲉⲛⲟⲩⲱϩ  ⲛ̅ϩⲏⲧⲟⲩ  ⲙⲛ̅ⲛⲙⲁ  ⲉⲧⲏⲡ  ⲉⲣⲟⲟⲩ  ⲉⲛ̅ⲉⲛⲧⲃ̅ⲛⲟⲟⲩⲉ . Ⲁⲩⲱ  ⲛ̅Ⲗⲉⲩⲓⲧⲏⲥ  ⲁⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ  ϯ  ⲛⲁⲩ  ⲛ̅ⲧⲉⲩⲕⲗⲏⲣⲟⲛⲟⲙⲓⲁ  ⲕⲁⲧⲁⲡϣⲁϫⲉ  ⲙ̅Ⲡϫⲟⲉⲓⲥ . Ⲁⲩⲱ  Ⲕⲁⲑⲁⲑ  ⲁⲡⲕⲗⲏⲣⲟⲥ  ⲉⲓ  ⲉⲃⲟⲗ  ⲁⲩⲱ  ⲛ̅ⲧⲟϣ  ⲉⲛⲧⲁⲩϣⲱⲡⲉ  ⲛⲛϣⲏⲣⲉ  ⲛ̅Ⲗⲉⲩⲉⲓ  ϩⲓⲧⲙ̅ⲡⲕⲗⲏⲣⲟⲥ  ⲛ̅Ⲁⲁⲣⲟⲛ  ⲡⲁⲣⲭⲓⲉⲣⲉⲩⲥ  ⲉⲃⲟⲗ  ϩⲛ̅ⲧⲉⲫⲩⲗⲏ  ⲛ̅Ⲓⲟⲩⲇⲁ  ⲁⲩⲱ  ⲧⲉⲫⲩⲗⲏ  ⲛ̅Ⲥⲓⲙⲉⲱⲛ   ⲁⲩⲱ  ⲧⲉⲫⲩⲗⲏ  ⲙ̅Ⲃⲉⲛⲓⲁⲙⲓⲛ :  ⲙⲏⲧϣⲟⲙⲧⲉ  ⲙ̅ⲡⲟⲗⲓⲥ.  Ⲛ̅ϣⲏⲣⲉ  ⲛ̅Ⲕⲁⲑⲁⲑ  ⲉⲩⲥⲟϫⲡ̅  ⲁⲩϯⲕⲗⲓⲣⲟⲛⲟⲙⲓⲁ  ⲛⲁⲩ  ⲉⲃⲟⲗ  ϩⲛ̅ⲛϣⲏⲣⲉ  ⲛ̅Ⲉⲫⲣⲁⲓⲙ  ⲁⲩⲱ  ϩⲛ̅ⲧⲉⲫⲩⲗⲏ  ⲛ̅Ⲇⲁⲛ  ⲁⲩⲱ  ⲧⲡⲁϣⲉ  ⲛ̅ⲧⲉⲫⲩⲗⲏ  ⲙ̅Ⲙⲁⲛⲁⲥⲥⲏ :  ⲙⲏⲧ  ⲙ̅ⲡⲟⲗⲓⲥ  ⲕⲁⲧⲁⲛⲉⲩⲇⲏⲙⲟⲥ.  Ⲁⲩⲱ  ⲛ̅ϣⲏⲣⲉ  ⲛ̅Ⲅⲉⲣⲥⲟⲛ  ⲁⲩϯ  ⲛⲁⲩ  ⲙ̅ⲙⲛ̅ⲧϣⲟⲙⲧⲉ  ⲙ̅ⲡⲟⲗⲓⲥ  ⲕⲁⲧⲁⲛⲉⲩⲇⲏⲙⲟⲥ . ⲉⲃⲟⲗ  ϩⲛ̅ⲧⲉⲫⲩⲗⲏ  ⲛ̅Ⲓⲥⲥⲁⲭⲁⲣ . ⲁⲩⲱ  ⲧⲉⲫⲩⲗⲏ  ⲛ̅Ⲁⲥⲉⲣ  ⲙⲛ̅ⲧⲉⲫⲩⲗⲏ  ⲛ̅Ⲛⲁⲫⲧⲁⲗⲓ  ⲁⲩⲱ  ⲧⲡⲁϣⲉ  ⲛ̅ⲧⲉⲫⲩⲗⲏ  ⲙ̅Ⲙⲁⲛⲁⲥⲥⲉ. Ⲁⲩⲱ  ⲛ̅ϣⲏⲣⲉ  ⲙ̅Ⲙⲉⲣⲁⲣⲓ  ⲁⲩϯ  ⲛⲁⲩ ⲙⲛ̅ⲧⲥⲛⲟⲟⲩⲥ  ⲙ̅ⲡⲟⲗⲓⲥ  ⲕⲁⲧⲁⲛⲉⲩⲇⲏⲙⲟⲥ .  ⲉⲃⲟⲗ  ϩⲛ̅ⲧⲉⲫⲩⲗⲏ  ⲛ̅Ϩⲣⲟⲩⲃⲏⲛ  ⲙⲛ̅ⲧⲉⲫⲩⲗⲏ  ⲛ̅Ⲅⲁⲇ  ⲁⲩⲱ  ⲧⲉⲫⲩⲗⲏ ⲛ̅Ⲍⲁⲃⲟⲩⲗⲱⲛ. ⲕⲁⲧⲁⲟⲩⲕⲗⲏⲣⲟⲥ  ⲙ̅ⲙⲛ̅ⲧⲥⲛⲟⲟⲩⲥ  ⲙ̅ⲡⲟⲗⲓⲥ: Ⲁⲩⲱ  ⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ  ⲁⲩϯ  ⲛ̅ⲛⲖⲉⲩⲉⲓⲧⲏⲥ  ⲛ̅ⲛⲉⲓⲡⲟⲗⲓⲥ  ⲙⲛ̅ⲛⲉⲩⲙⲁ ⲉⲧⲏⲡ ⲉⲣⲟⲟⲩ ϩⲛ̅ⲟⲩⲕⲗⲏⲣⲟⲥ. ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ  ϩⲱⲛ ⲉⲧⲟⲧϥ̅ ⲙ̅Ⲙⲱⲟⲩⲥⲏⲥ:  Ⲁⲩⲱ ⲧⲉⲫⲩⲗⲏ ⲛ̅ⲛϣⲏⲣⲉ ⲛ̅Ⲓⲟⲩⲇⲁ . ⲁⲩⲱ ⲧⲉⲫⲩⲗⲏ ⲛ̅ⲛϣⲏⲣⲉ  ⲛ̅Ⲥⲩⲙⲉⲱⲛ.  ⲁⲩⲱ ⲧⲉⲫⲩⲗⲏ ⲛ̅ⲛϣⲏⲣⲉ ⲙ̅Ⲃⲉⲛⲓⲁⲙⲓⲛ. ⲁⲩϯ ⲛⲁⲩ ⲛ̅ⲛⲉⲓⲡⲟⲗⲓⲥ . ⲁⲩⲱ ⲁⲩⲙⲟⲩⲧⲉ ⲉⲣⲟⲟⲩ ϫⲉ ⲛⲁϣⲏⲣⲉ  ⲛ̅Ⲁⲁⲣⲱⲛ ⲉⲃⲟⲗ ϩⲙ̅ⲡⲇⲏⲙⲟⲥ  ⲛ̅Ⲕⲁⲁⲑ  ⲛ̅ⲛϣⲏⲣⲉ ⲛ̅Ⲗⲉⲩⲉⲓ . ⲉⲃⲟⲗϫⲉ ⲛ̅ⲧⲁⲡⲉⲕⲗⲏⲣⲟⲥ  ϣⲱⲡⲉ ⲛ̅ⲛⲁⲓ . Ⲁⲩⲱ  ⲁⲩϯ ⲛⲁⲩ ⲛ̅ⲧⲡⲟⲗⲓⲥ  Ⲕⲁⲣⲓⲁⲑⲁⲃⲟⲕ ⲉⲧⲉⲧⲛⲟϭ ⲧⲉ  ⲙ̅ⲡⲟⲗⲓⲥ  ⲛ̅ⲙ̅ⲡⲟⲗⲓⲥ Ⲛⲉⲛⲁⲕ . ⲉⲧⲉⲧⲁⲓ ⲧⲉ  Ⲭⲉⲃⲣⲱⲛ  ϩⲙ̅ⲡⲧⲟⲟⲩ ⲛ̅Ⲓⲟⲩⲇⲁ. ⲛⲉⲧⲏⲡ  ⲇⲉ  ⲉⲣⲟⲥ  ϩⲙ̅ⲡⲉⲥⲕⲱⲧⲉ. ⲁⲩⲱ  ⲧⲥⲱϣⲉ  ⲛ̅ⲧⲡⲟⲗⲓⲥ  ⲙⲛ̅ⲛⲉⲥⲕⲉⲧⲙⲉ  ⲁϥⲧⲁⲁⲩ  ⲛ̅ϭⲓⲒⲏⲥⲟⲩⲥ  ⲛ̅ⲛϣⲏⲣⲉ  ⲛ̅Ⲭⲁⲗⲉⲃ ⲡϣⲏⲣⲉ  ⲛ̅Ⲓⲏⲫⲟⲛⲏ  ϩⲛ̅ⲟⲩⲕⲗⲏⲣⲟⲛⲟⲙⲉⲓⲁ . Ⲁⲩⲱ ⲛ̅ϣⲏⲣⲉ  ⲛ̅Ⲁⲁⲣⲱⲛ  ⲁϥϯ  ⲛⲁⲩ  ⲛ̅ⲧⲡⲟⲗⲓⲥ  ⲙ̅ⲙⲁ  ⲙ̅ⲡⲱⲧ  ⲙ̅ⲡⲉⲛⲧⲁϥϩⲱⲧⲃ̅ ⲉⲧⲉⲬⲉⲃⲣⲟⲛ ⲧⲉ . ⲁⲩⲱ  ⲧⲡⲟⲗⲓⲥ  Ⲁⲧ..  ⲙⲛ̅ⲛⲉⲧⲏⲡ  ⲉⲣⲟⲥ. ⲁⲩⲱ ⲧⲡⲟⲗⲓⲥ  Ⲗⲉⲙⲛⲁ  ⲙⲛ̅ⲛⲉⲧⲏⲡ  ⲉⲣⲟⲥ.  ⲁⲩⲱ ⲧⲡⲟⲗⲓⲥ  Ⲁⲓⲗⲱⲙ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ⲧⲡⲟⲗⲓⲥ Ⲧⲁⲙⲉ ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ. ⲁⲩⲱ ⲧⲡⲟⲗⲓⲥ Ⲧⲉⲗⲗⲁ  ⲙⲛ̅ⲛⲕⲉⲙⲁ  ⲉⲧⲏⲡ ⲉⲣⲟⲥ . ⲁⲩⲱ ⲧⲡⲟⲗⲓⲥ  Ⲇⲁⲩⲉⲓⲣ ⲙⲛ̅ⲛⲕⲉⲙⲁ  ⲉⲧⲏⲡ ⲉⲣⲟⲥ . ⲁⲩⲱ  ⲧⲡⲟⲗⲓⲥ  Ⲁⲥⲁⲛ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ. ⲁⲩⲱ ⲧⲡⲟⲗⲓⲥ Ⲃⲁⲓⲑⲥⲁⲙⲩⲥ  ⲙⲛ̅ⲛⲕⲉⲙⲁ ⲉⲧⲏⲡ  ⲉⲣⲟⲥ. ⲯⲓⲧⲉ  ⲙ̅ⲡⲟⲗⲓⲥ  ⲛ̅ⲧⲟⲟⲧⲟⲩ ⲛ̅ⲧⲉⲫⲩⲗⲏ ⲥⲛ̅ⲧⲉ. ⲁⲩⲱ  ⲛ̅ⲧⲟⲟⲧⲟⲩ ⲛ̅ⲛⲉⲓⲫⲩⲗⲏ : Ⲁⲩⲱ ⲛ̅ⲧⲟⲟⲧⲥ̅  ⲛ̅ⲧⲉⲫⲩⲗⲏ ⲙ̅Ⲃⲉⲛⲓⲁⲙⲓⲛ . ⲧⲡⲟⲗⲓⲥ Ⲅⲁⲃⲁⲱⲛ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ. ⲁⲩⲱ  ⲧⲡⲟⲗⲓⲥ Ⲧⲉⲑⲉ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ. ⲁⲩⲱ ⲧⲡⲟⲗⲓⲥ  Ⲁⲛⲁⲑⲱⲑ ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ⲁⲩⲱ  ⲧⲡⲟⲗⲓⲥ Ⲅⲁⲙⲁⲗⲁ  ⲙⲛ̅ⲛⲕⲉⲙⲁ  ⲉⲧⲏⲡ ⲉⲣⲟⲥ . ϥⲧⲟ ⲙ̅ⲡⲟⲗⲓⲥ. Ⲙ̅ⲡⲟⲗⲓⲥ ⲧⲏⲣⲟⲩ ⲛ̅ⲛϣⲏⲣⲉ  ⲛ̅Ⲁⲁⲣⲱⲛ  ⲛ̅ⲟⲩⲏⲏⲃ : ⲙⲛ̅ⲧϣⲟⲙⲧⲉ  ⲙ̅ⲡⲟⲗⲓⲥ.  Ⲁⲩⲱ  ⲛ̅ⲇⲏⲙⲟⲥ  ⲛ̅ⲛϣⲏⲣⲉ  ⲛ̅Ⲕⲁⲁⲑ. Ⲁⲩⲱ  ⲁⲥϣⲱⲡⲉ  ⲛ̅ϭⲓⲧⲡⲟⲗⲓⲥ  ⲛ̅ⲟⲩⲏⲏⲃ ⲉⲃⲟⲗ  ϩⲛ̅ⲧⲉⲫⲩⲗⲏ ⲛ̅Ⲉⲫⲣⲁⲓⲙ ⲧⲉ. Ⲁⲩⲱ  ⲁⲩϯ ⲛⲁⲩ ⲛ̅ⲧⲡⲟⲗⲓⲥ . ⲙ̅ⲡⲙⲁ  ⲙ̅ⲡⲱⲧ  ⲙ̅ⲡⲣⲉϥϩⲱⲧⲃ̅. ⲧⲡⲟⲗⲓⲥ  Ⲥⲩⲭⲉⲙ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ⲁⲩⲱ ⲧⲡⲟⲗⲓⲥ Ⲓⲉⲍⲁⲣⲁ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ⲁⲩⲱ ⲧⲡⲟⲗⲓⲥ Ⲅⲉⲑⲉⲃⲁⲛ ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ .  ⲁⲩⲱ ⲧⲡⲟⲗⲓⲥ Ⲅⲉⲃⲥⲓⲛ ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ⲁⲩⲱ  ⲧⲡⲟⲗⲓⲥ Ⲃⲁⲓⲑⲟⲣⲱⲛ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ⲁⲩⲱ ⲧⲡⲟⲗⲓⲥ Ⲃⲁⲓⲑⲟⲣⲱⲛ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ϥⲧⲟ ⲙ̅ⲡⲟⲗⲓⲥ :  ⲁⲩⲱ ⲉⲃⲟⲗ ϩⲛ̅ⲧⲉⲫⲩⲗⲏ ⲛ̅Ⲇⲁⲛ. ⲧⲡⲟⲗⲓⲥ Ⲉⲗⲕⲱⲑⲁⲓⲙ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ. ⲁⲩⲱ ⲧⲡⲟⲗⲓⲥ Ⲅⲉⲑⲉⲃⲁⲛ ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ⲁⲩⲱ  ⲧⲡⲟⲗⲓⲥ  Ⲁⲓⲗⲱⲛ  ⲙⲛ̅ⲛⲕⲉⲙⲁ  ⲉⲧⲏⲡ  ⲉⲣⲟⲥ . ⲁⲩⲱ  ⲧⲡⲟⲗⲓⲥ Ⲅⲉⲑⲉⲣⲉⲙⲙⲱⲛ  ⲙⲛ̅ⲛⲕⲉⲙⲁ  ⲉⲧⲏⲡ ⲉⲣⲟⲥ  ϥⲧⲟ ⲙ̅ⲡⲟⲗⲓⲥ.  Ⲁⲩⲱ ⲉⲃⲟⲗ  ϩⲛ̅ⲧⲉⲫⲩⲗⲏ ⲙ̅Ⲙⲁⲛⲁⲥⲥⲏ. ⲧⲡⲟⲗⲓⲥ  ⲛ̅Ⲁⲛⲁⲭ  ⲙⲛ̅ⲛⲕⲉⲙⲁ  ⲉⲧⲏⲡ ⲉⲣⲟⲥ . ⲁⲩⲱ  ⲧⲡⲟⲗⲓⲥ Ⲃⲁⲓⲑⲁⲣⲁ ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ. ⲡⲟⲗⲓⲥ ⲥⲛ̅ⲧⲉ . Ⲙ̅ⲡⲟⲗⲓⲥ  ⲧⲏⲣⲟⲩ  ⲉⲩⲛⲁⲣ̅ⲙⲏⲧⲉ  ⲙⲛ̅ⲛⲕⲉⲙⲁ ⲧⲏⲣⲟⲩ  ⲉⲧⲏⲡ ⲉⲣⲟⲟⲩ. Ⲛ̅ⲇⲏⲙⲟⲥ ⲛ̅ϣⲏⲣⲉ  ⲛ̅Ⲅⲁⲁⲑ ⲛⲉⲛⲧⲁⲩϣⲱϫⲡ  : Ⲁⲩⲱ  ⲛ̅ϣⲏⲣⲉ ⲛ̅Ⲅⲉⲇⲥⲱⲛ ⲛ̅Ⲗⲉⲩⲉⲓⲧⲏⲥ  ⲁⲩϯ ⲛⲁⲩ ⲉⲃⲟⲗ  ϩⲛ̅ⲧⲡⲁϣⲉ  ⲙ̅ⲫⲩⲗⲏ ⲙ̅Ⲙⲁⲛⲁⲥⲥⲏ. ⲛⲙ̅ⲡⲟⲗⲓⲥ ⲉⲛⲧⲁⲩⲛⲉϩⲟⲩ ⲉⲃⲟⲗ ⲛ̅ⲛⲉⲛⲧⲁⲩϩⲱⲧⲃ̅: Ⲧⲡⲟⲗⲓⲥ Ⲅⲁⲩⲗⲱⲛ  ϩⲙ̅ⲡⲕⲁϩ  ⲛ̅Ⲅⲁⲥⲁⲛ  ⲁⲩⲱ  ⲛ̅ⲕⲉⲙⲁ ⲉⲧⲏⲡ ⲉⲣⲟⲥ. ⲁⲩⲱ  ⲧⲡⲟⲗⲓⲥ  Ⲃⲟⲥⲟⲣⲣⲁⲛ  ⲙⲛ̅ⲛⲕⲉⲙⲁ  ⲉⲧⲏⲡ ⲉⲣⲟⲥ . ⲁⲩⲱ ⲧⲡⲟⲗⲓⲥ ⲧⲡⲏⲅⲏ ⲛ̅ⲛⲉϭϩⲁⲓ  ⲙ̅ⲛⲛⲕⲉⲙⲁ ⲉⲧⲏⲡ ⲉⲣⲟⲥ . ϥⲧⲟ ⲙ̅ⲡⲟⲗⲓⲥ :  Ⲁⲩⲱ ⲉⲃⲟⲗ ϩⲛ̅ⲧⲉⲫⲩⲗⲏ ⲛ̅Ⲁⲥⲏⲣ . ⲧⲡⲟⲗⲓⲥ Ⲃⲁⲥⲉⲗⲗⲁⲛ ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ⲁⲩⲱ ⲧⲡⲟⲗⲓⲥ   Ⲁⲃⲇⲱⲛ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ⲁⲩⲱ ⲧⲡⲟⲗⲓⲥ  Ⲭⲉⲗⲕⲁⲑ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ⲁⲩⲱ  ⲧⲡⲟⲗⲓⲥ Ⲣⲁⲁⲃ ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ. ϥⲧⲟ ⲙ̅ⲡⲟⲗⲓⲥ. ⲁⲩⲱ ⲉⲃⲟⲗ ϩⲛ̅ⲧⲉⲫⲩⲗⲏ ⲛ̅Ⲉⲫⲁⲗⲓⲙ. ⲁⲩⲱ ⲧⲡⲟⲗⲓⲥ ⲉⲛⲧⲁⲩⲛⲉϩⲥ̅ ⲉⲃⲟⲗ  ⲙ̅ⲡⲉⲛⲧⲁϥϩⲱⲧⲃ̅ Ⲕⲁⲇⲉⲥ  ϩⲛ̅ⲧⲄⲁⲗⲓⲗⲁⲓⲁ . ⲁⲩⲱ  ⲛ̅ⲕⲉⲙⲁ ⲉⲧⲏⲡ ⲉⲣⲟⲥ . ⲁⲩⲱ  ⲧⲡⲟⲗⲓⲥ  Ⲑⲉⲙⲙⲱⲛ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ϣⲟⲙⲧⲉ ⲙ̅ⲡⲟⲗⲓⲥ . Ⲙ̅ⲡⲟⲗⲓⲥ ⲧⲏⲣⲟⲩ ⲛ̅Ⲕⲉⲇⲥⲟⲛ ⲕⲁⲧⲁⲛⲉⲩⲇⲏⲙⲟⲥ. ⲙⲛ̅ⲧϣⲟⲙⲧⲉ  ⲙ̅ⲡⲟⲗⲓⲥ . Ⲁⲩⲱ ⲛ̅ϣⲏⲣⲉ  ⲙ̅Ⲙⲉⲣⲁⲣⲓ ⲛ̅Ⲗⲉⲩⲉⲓⲧⲏⲥ  ⲛⲉⲧϣⲟϫⲡ̅  ⲁⲩϫⲓ ⲉⲃⲟⲗ  ϩⲛ̅ⲧⲉⲫⲩⲗⲏ ⲛ̅Ⲍⲁⲃⲟⲩⲗⲱⲛ  ⲛ̅ⲧⲡⲟⲗⲓⲥ Ⲙⲁⲁⲛ  ⲁⲩⲱ ⲛ̅ⲕⲉⲙⲁ ⲉⲧⲏⲡ ⲉⲣⲟⲥ ⲁⲩⲱ Ⲕⲁⲇⲏⲥ  ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ.  ⲁⲩⲱ Ⲥⲉⲗⲗⲁ ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ϣⲟⲙⲧⲉ ⲙ̅ⲡⲟⲗⲓⲥ : Ⲁⲩⲱ  ϩⲙ̅ⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ  ⲛ̅ⲧⲉϨⲓⲉⲣⲓⲭⲱ. ⲁⲩϫⲓ ⲉⲃⲟⲗ  ϩⲛ̅ⲧⲉⲫⲩⲗⲏ  ⲛ̅Ϩⲣⲟⲩⲃⲏⲛ  ⲛ̅ⲧⲡⲟⲗⲓⲥ ⲙ̅ⲡⲙⲁ  ⲙ̅ⲡⲱⲧ  ⲙ̅ⲡⲉⲛⲧⲁϥϩⲱⲧⲃ̅  ⲉⲧⲉⲂⲟⲥⲟⲣ  ⲧⲉ  ϩⲛ̅ⲧⲉⲣⲏⲙⲟⲥ . ⲁⲩⲱ ⲧⲡⲟⲗⲓⲥ  Ⲙⲓϭⲟⲣ ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ⲁⲩⲱ ⲧⲡⲟⲗⲓⲥ Ⲅⲉⲇⲇⲱⲣ ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲥ . ⲁⲩⲱ ⲧⲡⲟⲗⲓⲥ   Ⲫⲁⲙⲁ ⲉⲧⲏⲡ ⲉⲣⲟⲥ . ϥⲧⲟ  ⲙ̅ⲡⲟⲗⲓⲥ : Ⲁⲩⲱ  ⲉⲃⲟⲗ  ϩⲛ̅ⲧⲉⲫⲩⲗⲏ ⲛ̅Ⲅⲁⲇ . ⲧⲡⲟⲗⲓⲥ  ⲙ̅ⲙⲁ ⲙ̅ⲡⲱⲧ ⲙ̅ⲡⲉⲛⲧⲁϥϩⲱⲧⲃ̅. ⲉⲧⲉⲢⲁⲙⲱⲑ ⲧⲉ  ϩⲙ̅ⲡⲕⲁϩ ⲛ̅Ⲅⲁⲗⲁⲁⲇ. ⲙⲛ̅ⲛⲕⲉⲙⲁ ⲉⲧⲕⲱⲧⲉ ⲉⲣⲟⲥ . ⲁⲩⲱ ⲧⲡⲟⲗⲓⲥ  Ⲕⲁⲙⲁⲛⲙⲉⲓⲛ ⲙⲛ̅ⲛⲕⲉⲙⲁ ⲉⲧⲕⲱⲧⲉ  ⲉⲣⲟⲥ . ⲁⲩⲱ  ⲧⲡⲟⲗⲓⲥ  Ⲉⲥⲉⲃⲱⲛ  ⲙⲛ̅ⲛⲕⲉⲙⲁ ⲉⲧⲕⲱⲧⲉ ⲉⲣⲟⲥ . ⲁⲩⲱ   ⲧⲡⲟⲗⲓⲥ  Ⲓⲁⲍⲏⲣ  ⲙⲛ̅ⲛⲕⲉⲙⲁ  ⲉⲧⲕⲱⲧⲉ  ⲉⲣⲟⲥ . ⲙ̅ⲡⲟⲗⲓⲥ ⲧⲏⲣⲟⲩ ⲉⲩⲛⲁⲣ̅ϥⲧⲟ.  Ⲙ̅ⲡⲟⲗⲓⲥ ⲧⲏⲣⲟⲩ ⲉⲛⲧⲁⲩⲧⲁⲁⲩ  ⲛ̅ⲛϣⲏⲣⲉ  ⲙ̅Ⲙⲉⲣⲁⲣⲉⲓ  ⲕⲁⲧⲁⲛⲉⲩⲇⲏⲙⲟⲥ . Ⲛⲉⲛⲧⲁⲩϣⲱϫⲡ  ⲉⲃⲟⲗ  ϩⲛ̅ⲧⲉⲫⲩⲗⲏ ⲛ̅Ⲗⲉⲩⲉⲓ . ⲁⲩⲱ ⲛⲉⲩⲧⲟϣ  ⲙⲛ̅ⲧⲥⲛⲟⲟⲥ  ⲙ̅ⲡⲟⲗⲓⲥ . Ⲙ̅ⲡⲟⲗⲓⲥ ⲧⲏⲣⲟⲩ  ⲛ̅ⲛⲖⲉⲩⲉⲓⲧⲏⲥ  ⲛⲉⲛ̅ⲧⲁⲩϣⲱⲡⲉ  ϩⲛ̅ⲧⲙⲏⲧⲉ  ⲛ̅ⲧⲉⲕⲗⲏⲣⲟⲛⲟⲙⲓⲁ ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ . ϩⲙⲉϣⲙⲏⲛⲉ ⲙ̅ⲡⲟⲗⲓⲥ ⲙⲛ̅ⲛⲉⲩⲕⲉⲙⲁ ⲉⲧⲏⲡ ⲉⲣⲟⲟⲩ ϩⲙ̅ⲡⲕⲱⲧⲉ ⲛ̅ⲛⲉⲓⲡⲟⲗⲓⲥ . Ⲙ̅ⲡⲟⲗⲓⲥ ⲙⲛ̅ⲛⲕⲉⲙⲁ ⲉⲧⲏⲡ ⲉⲣⲟⲟⲩ ϩⲙ̅ⲡⲉⲩⲕⲱⲧⲉ ⲧⲏⲣϥ̅ : Ⲁⲩⲱ Ⲓⲏⲥⲟⲩⲥ  ⲁϥϫⲱⲕ ⲉⲃⲟⲗ ⲉϥⲡⲱϣ ⲙ̅ⲡⲕⲁϩ ⲕⲁⲧⲁⲛⲉϥⲧⲟϣ  ⲉϫⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ : Ⲁⲩⲱ ⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ  ⲁⲩϯ  ⲛ̅ⲟⲩⲙⲉⲣⲓⲥ  ⲛ̅Ⲓⲏⲥⲟⲩⲥ  ⲕⲁⲧⲁⲡⲟⲩⲉϩⲥⲁϩⲛⲉ  ⲙ̅Ⲡϫⲟⲉⲓⲥ . ⲁⲩⲱ  ⲁⲩϯ ⲛⲁϥ  ⲛ̅ⲧⲡⲟⲗⲓⲥ ⲉⲛⲧⲁϥⲟⲩⲁϣⲥ̅ ⲉϫⲓⲧⲥ̅  ⲉⲧⲉⲐⲁⲙⲛⲁⲥⲁⲭⲁⲣ ⲧⲉ . ⲧⲁⲓ  ⲁⲩⲧⲁⲁⲥ ⲛⲁϥ  ϩⲙ̅ⲡⲧⲟⲟⲩ ⲛ̅Ⲉⲫⲣⲁⲓⲙ . ⲁⲩⲱ Ⲓⲏⲥⲟⲩⲥ  ⲁϥⲕⲱⲧ  ⲛ̅ⲧⲡⲟⲗⲓⲥ  ⲁϥⲟⲩⲱϩ  ⲛ̅ϩⲏⲧⲥ̅ . Ⲁⲩⲱ Ⲓⲏⲥⲟⲩⲥ   ⲁϥϫⲓ ⲛ̅ⲛⲥⲏϥⲉ   ⲙ̅ⲡⲉⲧⲣⲁ ⲛⲁⲓ  ⲉⲛⲧⲁϥⲥⲃ̅ⲃⲉ  ⲛ̅ϩⲏⲧⲟⲩ ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ . Ⲛⲉⲛⲧⲁⲩϣⲱⲡⲉ  ϩⲛ̅ⲧⲉϩⲓⲏ  ϩⲛ̅ⲧⲉⲣⲏⲙⲟⲥ  ⲁϥⲕⲁⲁⲩ  ϩⲛ̅Ⲑⲁⲙ ⲛ̅Ⲁⲥⲁⲭⲁⲣ . Ⲁⲩⲱ Ⲡϫⲟⲉⲓⲥ ⲁϥϯ  ⲙ̅ⲡⲒⲥⲣⲁⲏⲗ   ⲙ̅ⲡⲕⲁϩ ⲧⲏⲣϥ̅  ⲉⲛⲧⲁϥⲱⲣⲕ ⲉⲧⲃⲏⲏⲧϥ̅  ⲉⲧⲁⲁϥ  ⲛ̅ⲛⲉⲩⲉⲓⲟⲧⲉ . ⲁⲩⲱ  ⲁⲩⲕⲗⲏⲣⲟⲛⲟⲙⲉⲓ ⲙ̅ⲙⲟϥ  ⲁⲩⲟⲩⲱϩ  ⲛ̅ϩⲏⲧϥ̅ :  Ⲁⲩⲱ  Ⲡϫⲟⲉⲓⲥ   ⲁϥϯⲙ̅ⲧⲟⲛ ⲛⲁⲩ  ϩⲙ̅ⲡⲉⲩⲕⲱⲧⲉ  ⲧⲏⲣϥ̅ . ⲕⲁⲧⲁⲑⲉ  ⲉⲛⲧⲁϥⲱⲣⲕ̅  ⲛ̅ⲛⲉⲩⲉⲓⲟⲧⲉ . Ⲙ̅ⲡⲉⲗⲁⲁⲩ ⲁϩⲉⲣⲁⲧϥ̅  ⲉϯ  ⲟⲩⲃⲏⲩ ⲉⲃⲟⲗ  ϩⲛ̅ⲛⲉⲩϫⲁϫⲉ ⲧⲏⲣⲟⲩ . Ⲛⲉⲩϫⲁϫⲉ ⲧⲏⲣⲟⲩ  ⲁⲠϫⲟⲉⲓⲥ  ⲧⲁⲁⲩ ⲉϩⲣⲁⲓ ⲉⲧⲟⲟⲧⲟⲩ.  Ⲁⲩⲱ  ⲙ̅ⲡⲉⲗⲁⲁⲩ  ϩⲉ ⲉⲡⲁϩⲟⲩ ⲉⲃⲟⲗ  ϩⲛ̅ⲛϣⲁϫⲉ  ⲧⲏⲣⲟⲩ  ⲉⲧⲛⲁⲛⲟⲩⲟⲩ . Ⲛⲁⲓ  ⲉⲛⲧⲁⲠϫⲟⲉⲓⲥ  ϫⲟⲟⲩ ⲉⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ . ⲁⲗⲗⲁ  ⲁⲩϣⲱⲡⲉ ⲙ̅ⲙⲉ ⲧⲏⲣⲟⲩ :
 
Ⲕ̅Ⲃ̅.  Ⲙⲛ̅ⲛⲥⲁⲛⲁⲓ Ⲓⲏⲥⲟⲩⲥ  ⲁϥⲙⲟⲩⲧⲉ ⲉⲛ̅ϣⲏⲣⲉ ⲛ̅Ϩⲣⲟⲩⲃⲏⲛ. ⲁⲩⲱ ⲉⲛ̅ϣⲏⲣⲉ ⲛ̅Ⲅⲁⲇ. ⲁⲩⲱ ⲧⲡⲁϣⲉ  ⲛ̅ⲛϣⲏⲣⲉ  ⲛ̅ⲧⲉⲧⲉⲫⲩⲗⲏ  ⲙ̅Ⲙⲁⲛⲁⲥⲥⲏ  ⲁϥϣⲁϫⲉ  ⲛⲙ̅ⲙⲁⲩ  ⲉϥϫⲱ  ⲙ̅ⲙⲟⲥ . Ϫⲉ  ⲛ̅ⲧⲱⲧⲛ̅  ⲁⲧⲉⲧⲛ̅ⲥⲱⲧⲙ̅  ⲛ̅ⲥⲁϣⲁϫⲉ  ⲛⲓⲙ  ⲉⲛⲧⲁϥϩⲱⲛ  ⲙ̅ⲙⲟⲟⲩ ⲉⲧⲉⲧⲏⲩⲧⲛ̅  ⲛ̅ϭⲓⲘⲱⲟⲩⲥⲏⲥ  ⲡϩⲙ̅ϩⲁⲗ  ⲙ̅Ⲡϫⲟⲉⲓⲥ. ⲁⲩⲱ  ⲁⲧⲉⲧⲛ̅ⲥⲱⲧⲙ̅  ⲛ̅ⲥⲁⲡⲁϩⲣⲟⲟⲩ.  ⲁⲩⲱ ϩⲱⲃ ⲛⲓⲙ ⲉⲛⲧⲁϥϩⲱⲛ ⲉⲧⲉⲧⲏⲩⲧⲛ̅ ⲙ̅ⲡⲉⲧⲛ̅ⲕⲱ ⲛ̅ⲥⲱⲧⲛ̅  ⲛ̅ⲛⲉⲧⲛ̅ⲥⲛⲏⲩ ⲛ̅ⲛⲉⲓϩⲟⲟⲩ . Ⲁⲩⲱ  ⲛ̅ϩⲟⲩⲟ ⲉⲣⲟⲟⲩ   ϣⲁϩⲣⲁⲓ ⲉⲡⲟⲟⲩ  ⲛ̅ϩⲟⲟⲩ  ⲁⲗⲗⲁ  ⲁⲧⲉⲧⲛ̅ϩⲁⲣⲉϩ  ⲉⲛ̅ⲉⲛⲧⲟⲗⲏ  ⲙ̅Ⲡϫⲟⲉⲓⲥ  ⲡⲉⲛⲛⲟⲩⲧⲉ . Ⲧⲉⲛⲟⲩ ⲇⲉ  ⲁⲠϫⲟⲉⲓⲥ  ⲡⲉⲛⲛⲟⲩⲧⲉ  ϯⲙ̅ⲧⲟⲛ. ⲛ̅ⲛⲉⲧⲛ̅ⲥⲛⲏⲩ ⲕⲁⲧⲁⲑⲉ ⲉⲛⲧⲁϥϫⲟⲟⲥ  ⲛⲁⲩ. Ⲧⲉⲛⲟⲩ ϭⲉ ⲕⲧⲉⲧⲏⲩⲧⲛ̅ ⲛ̅ⲧⲉⲧⲛ̅ⲃⲱⲕ ⲉϩⲣⲁⲓ ⲉⲛⲉⲧⲛ̅ⲏⲓ. ⲁⲩⲱ  ⲉϩⲣⲁⲓ ⲉⲡⲕⲁϩ  ⲛ̅ⲧⲉⲧⲛ̅ⲕⲗⲏⲣⲟⲛⲟⲙⲓⲁ . ⲡⲁⲓ ⲉⲛⲧⲁⲘⲱⲟⲩⲥⲏⲥ  ⲧⲁⲁϥ ⲛⲏⲧⲛ̅  ϩⲙ̅ⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ.  Ⲁⲗⲗⲁ  ϩⲁⲣⲉϩ ⲉⲧⲣⲉⲧⲛ̅ⲉⲓⲣⲉ ⲉⲙⲁⲧⲉ  ⲛ̅ⲛⲉⲛⲧⲟⲗⲏ  ⲁⲩⲱ  ⲡⲛⲟⲙⲟⲥ  ⲡⲁⲓ ⲉⲛⲧⲁϥϩⲱⲛ  ⲙ̅ⲙⲟϥ ⲛ̅ⲧⲟⲟⲧⲛ̅ ⲉⲧⲣⲉⲛⲁⲁϥ  ⲛ̅ϭⲓⲘⲱⲟⲩⲥⲏⲥ  ⲡϩⲙ̅ϩⲁⲗ  ⲙ̅Ⲡϫⲟⲉⲓⲥ. ⲉⲧⲣⲉⲛⲙⲉⲣⲉⲠϫⲟⲉⲓⲥ  ⲡⲉⲛⲛⲟⲩⲧⲉ  ⲁⲩⲱ ⲛ̅ⲧⲛ̅ⲙⲟⲟϣⲉ  ϩⲛ̅ⲛⲉϥϩⲓⲟⲟⲩⲉ ⲧⲏⲣⲟⲩ. ⲛ̅ⲧⲛ̅ϩⲁⲣⲉϩ ⲉⲛⲉϥⲉⲛⲧⲟⲗⲏ. ⲁⲩⲱ ⲛ̅ⲧⲛ̅ⲣⲁⲕⲧⲛ̅ ⲉⲣⲟϥ. ⲛ̅ⲧⲉⲧⲛ̅ϣⲙ̅ϣⲉ  ⲛⲁϥ ⲉⲃⲟⲗ  ϩⲛ̅ⲛⲉⲧⲛ̅ⲯⲩⲭⲏ ⲧⲏⲣⲥ̅. Ⲁⲩⲱ  ⲁϥⲥⲙⲟⲩ ⲉⲣⲟⲟⲩ  ⲛ̅ϭⲓⲒⲏⲥⲟⲩⲥ  ⲁϥⲟⲩⲟⲟⲧⲟⲩ ⲉⲧⲣⲉⲩⲃⲱⲕ.  ⲁⲩⲙⲟⲟϣⲉ  ⲉϩⲣⲁⲓ ⲉⲛⲉⲩⲏⲓ :  Ⲁⲩⲱ ⲧⲡⲁϣⲉ  ⲛ̅ⲧⲉⲫⲩⲗⲏ ⲛ̅ⲛϣⲏⲣⲉ  ⲙ̅Ⲙⲁⲛⲁⲥⲥⲏ  ⲁⲘⲱⲟⲩⲥⲏⲥ  ϯⲕⲗⲏⲣⲟⲛⲟⲙⲓⲁ  ⲛⲁⲩ  ϩⲙ̅ⲡⲕⲁϩ  ⲛ̅ⲧⲉⲧⲂⲁⲥⲁⲛ . Ⲁⲩⲱ  ⲧⲕⲉⲡⲁϣⲉ   ⲙ̅ⲫⲩⲗⲏ ⲙ̅Ⲙⲁⲛⲁⲥⲥⲏ . ⲁⲒⲏⲥⲟⲩⲥ  ϯⲕⲗⲏⲣⲟⲛⲟⲙⲓⲁ  ⲛⲁⲩ ⲙⲛ̅ⲛⲉⲩⲥⲛⲏⲩ  ϩⲁⲧⲛ̅ⲧⲉⲑⲁⲗⲁⲥⲥⲁ. Ⲁⲩⲱ  ⲛ̅ⲧⲉⲣⲉⲒⲏⲥⲟⲩⲥ  ϫⲟⲟⲩⲥⲉ  ⲉϩⲣⲁⲓ ⲉⲛⲉⲩⲏⲓ   ⲁϥⲥⲙⲟⲩ ⲉⲣⲟⲟⲩ . ⲁⲩⲱ  ϩⲛ̅ⲛⲉⲭⲣⲏⲙⲁ  ⲉⲛⲁϣⲱⲟⲩ  ⲁⲩⲃⲱⲕ  ⲉϩⲣⲁⲓ ⲉⲛⲉⲩⲏⲓ . ⲙⲛ̅ⲧⲃ̅ⲛⲟⲟⲩⲉ  ⲉⲛⲁϣⲱⲟⲩ ⲉⲙⲁⲧⲉ . ⲁⲩⲱ ⲟⲩϩⲁⲧ  ⲙⲛ̅ⲟⲩⲛⲟⲩⲃ. ⲙⲛ̅ⲟⲩⲡⲉⲛⲓⲡⲉ . ⲙⲛ̅ϩⲉⲛϩⲟⲓⲧⲉ  ⲉⲛⲁϣⲱⲟⲩ  ⲧϣⲟⲗⲥ  ⲧⲏⲣⲥ̅   ⲛ̅ⲛⲉⲩϫⲁϫⲉ  ⲁⲩⲡⲟϣⲥ̅  ⲉϫⲱⲟⲩ ⲙⲛ̅ⲛⲉⲩⲕⲉⲥⲛⲏⲩ : Ⲁⲩⲱ  ⲁⲩⲙⲟⲟϣⲉ  ⲛ̅ϭⲓⲛ̅ϣⲏⲣⲉ  ⲛ̅Ϩⲣⲟⲩⲃⲏⲛ. ⲁⲩⲱ  ⲛ̅ϣⲏⲣⲉ  ⲛ̅Ⲅⲁⲇ . ⲁⲩⲱ  ⲧⲡⲁϣⲉ  ⲙ̅ⲫⲩⲗⲏ  ⲛ̅ⲛϣⲏⲣⲉ  ⲙ̅Ⲙⲁⲛⲁⲥⲥⲏ . ⲉⲃⲟⲗ  ϩⲓⲧⲟⲟⲧⲟⲩ  ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ. ϩⲛ̅Ⲥⲏⲗⲱ ϩⲙ̅ⲡⲕⲁϩ ⲛ̅Ⲕⲁⲛⲁⲁⲛ ⲉⲧⲣⲉⲩⲃⲱⲕ ⲉϩⲣⲁⲓ ⲉⲡⲕⲁϩ ⲛ̅Ⲅⲁⲗⲁⲁⲇ. ⲉⲡⲕⲁϩ ⲛ̅ⲧⲉⲩⲕⲗⲏⲣⲟⲛⲟⲙⲓⲁ. ⲡⲁⲓ ⲉⲛⲧⲁⲩⲕⲗⲏⲣⲟⲛⲟⲙⲉⲓ  ⲙ̅ⲙⲟϥ  ϩⲓⲧⲙ̅ⲡⲟⲩⲉϩⲥⲁϩⲛⲉ  ⲙ̅Ⲡϫⲟⲉⲓⲥ  ϩⲛ̅ⲧϭⲓϫ  ⲙ̅Ⲙⲱⲟⲩⲥⲏⲥ.  Ⲁⲩⲱ ⲁⲩⲉⲓ ⲉϩⲣⲁⲓ ⲉⲄⲁⲗⲅⲁⲗⲁ  ⲛ̅ⲧⲉⲡⲒⲟⲣⲁⲛⲏⲥ  ⲧⲁⲓ ⲉⲧϩⲙ̅ⲡⲕⲁϩ  ⲛ̅Ⲕⲁⲛⲁⲁⲛ   ⲁⲩⲱ  ⲛ̅ϣⲏⲣⲉ ⲛ̅Ⲅⲁⲇ . ⲁⲩⲱ   ⲛ̅ϣⲏⲣⲉ  ⲛ̅Ϩⲣⲟⲩⲃⲏⲛ   ⲁⲩⲱ   ⲧⲡⲁϣⲉ  ⲙ̅ⲫⲩⲗⲏ  ⲙ̅Ⲙⲁⲛⲁⲥⲥⲏ . ⲁⲩⲕⲱⲧ  ⲛ̅ⲟⲩϣⲏⲩⲉ  ⲙ̅ⲡⲙⲁ  ⲉⲧⲙ̅ⲙⲁⲩ ϩⲓϫⲙ̅ⲡⲒⲟⲣⲇⲁⲛⲏⲥ . ⲟⲩⲛⲟϭ  ⲛ̅ϣⲏⲩⲉ  ⲉⲧⲣⲉϥⲛⲁⲩ ⲉⲣⲟⲥ :  Ⲁⲩⲱ  ⲁⲩⲥⲱⲧⲙ̅  ⲛ̅ϭⲓⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ  ⲉⲛⲉⲧϫⲱ  ⲙ̅ⲙⲟⲥ  ϫⲉ  ⲉⲓⲥ  ϩⲏⲏⲧⲉ  ⲁⲩⲕⲱⲧ   ⲛ̅ϭⲓⲛ̅ϣⲏⲣⲉ   ⲛ̅Ⲅⲁⲇ . ⲁⲩⲱ   ⲛ̅ϣⲏⲣⲉ   ⲛ̅Ϩⲣⲟⲩⲃⲏⲛ . ⲁⲩⲱ  ⲧⲡⲁϣⲉ  ⲙ̅ⲫⲩⲗⲏ   ⲙ̅Ⲙⲁⲛⲁⲥⲥⲏ   ⲛ̅ⲟⲩϣⲏⲩⲉ   ϩⲓϫⲛ̅ⲛⲧⲟϣ  ⲙ̅ⲡⲕⲁϩ ⲛ̅Ⲭⲁⲛⲁⲁⲛ. ϩⲓϫⲙ̅ⲡⲕⲁϩ   ⲛ̅Ⲅⲁⲗⲁⲁⲇ  ⲛ̅ⲧⲉⲡⲒⲟⲣⲇⲁⲛⲏⲥ  ϩⲙ̅ⲡⲉⲕⲣⲟ  ⲛ̅ⲛϣⲏⲣⲉ   ⲙ̅ⲡⲒⲥⲣⲁⲏⲗ :  Ⲁⲩⲱ   ⲁⲩⲥⲟⲩⲱϩ  ⲉϩⲟⲩⲛ   ⲛ̅ϭⲓⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ ⲉϩⲣⲁⲓ ⲉⲤⲏⲗⲱ  ϩⲱⲥⲧⲉ ⲉⲃⲱⲕ ⲉϩⲣⲁⲓ  ⲉⲙⲓϣⲉ ⲛⲙ̅ⲙⲁⲩ . Ⲁⲩⲱ  ⲁⲩϫⲟⲟⲩ  ⲛ̅ϭⲓⲛ̅ϣⲏⲣⲉ ⲛ̅Ϩⲣⲟⲩⲃⲏⲛ . ⲁⲩⲱ ⲉⲣⲁⲧⲟⲩ ⲛ̅ⲛϣⲏⲣⲉ ⲛ̅Ⲅⲁⲇ . ⲁⲩⲱ  ⲧⲡⲁϣⲉ  ⲙ̅ⲫⲩⲗⲏ ⲙ̅Ⲙⲁⲛⲁⲥⲥⲏ . ⲉϩⲣⲁⲓ ⲉⲡⲕⲁϩ ⲛ̅Ⲅⲁⲗⲁⲁⲇ  ⲙ̅Ⲫⲓⲛⲉⲉⲥ ⲡϣⲏⲣⲉ  ⲛ̅Ⲉⲗⲉⲁⲍⲁⲣ ⲡϣⲏⲣⲉ ⲛ̅Ⲁⲁⲣⲱⲛ ⲡⲟⲩⲏⲏⲃ . ⲁⲩⲱ ⲕⲉⲙⲏⲧ  ϩⲛ̅ⲛⲁⲣⲭⲱⲛ ⲛⲙ̅ⲙⲁϥ . ⲉⲣⲉⲡⲟⲩⲁⲓ  ⲡⲟⲩⲁⲓ  ⲙ̅ⲙⲟⲟⲩ  ⲟ  ⲛ̅ⲁⲣⲭⲱⲛ  ⲛ̅ⲧⲉⲫⲩⲗⲏ  ϩⲛⲧⲙⲏⲧⲉ  ⲛ̅ⲛϣⲟ  ϩⲓϣⲟ  ⲛ̅ⲧⲉⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ.  Ⲁⲩⲱ  ⲛ̅ⲧⲁⲩⲉⲓ  ⲉϩⲣⲁⲓ  ⲉⲡⲕⲁϩ  ⲛ̅Ⲅⲁⲗⲁⲁⲇ  ⲉⲣⲁⲧⲟⲩ  ⲛ̅ⲛϣⲏⲣⲉ  ⲛ̅Ϩⲣⲟⲩⲃⲏⲛ  ⲁⲩⲱ  ⲛ̅ϣⲏⲣⲉ  ⲛ̅Ⲅⲁⲇ  ⲁⲩⲱ  ⲧⲡⲁϣⲏ  ⲛ̅ⲧⲫⲩⲗⲏ  ⲙ̅Ⲙⲁⲛⲁⲥⲥⲉ  ⲁⲩϣⲁϫⲉ  ⲛⲙ̅ⲙⲁⲩ  ⲉⲩϫⲱ  ⲙ̅ⲙⲟⲥ . ϫⲉ  Ⲛⲁⲓ  ⲛⲉ  ⲛϣⲁϫⲉ  ⲛ̅ⲧⲥⲩⲛⲁⲅⲱⲅⲏ  ⲧⲏⲣⲥ̅  ⲙ̅Ⲡϫⲟⲓⲥ .  Ⲟⲩⲁϣ  ⲛ̅ⲁⲡⲓⲥⲧⲓⲁ  ⲡⲉ  ⲡⲉⲛⲧⲁⲧⲉⲧⲛ̅ⲁⲁϥ . ⲉⲧⲉⲧⲛ̅ⲕⲧⲉⲧⲏⲩⲧⲛ̅  ⲉⲃⲟⲗ  ⲙ̅ⲡϩⲟ  ⲙ̅Ⲡϫⲟⲉⲓⲥ  . ϩⲓⲧⲙ̅ⲡⲕⲱⲧ  ⲛ̅ⲟⲩⲑⲩⲥⲓⲁⲥⲧⲏⲣⲓⲟⲛ  ⲁⲩⲱ  ⲛ̅ⲧⲉⲧⲛ̅ϥⲱϭⲥ̅  ϩⲓⲛⲁⲓ  ⲙ̅ⲡⲉϥⲉⲙⲧⲟ .  Ⲙⲏⲧⲓ  ϥⲕⲏⲛ  ⲉⲣⲟⲕ  ⲁⲛ  ⲛ̅ϭⲓ   ⲙ̅Ⲡⲉⲱⲣ  ⲉⲛⲧⲁⲧⲉⲧⲛ̅ⲧⲟⲩⲃⲟⲛ  ⲁⲛ  ⲙ̅ⲙⲟϥ  ϣⲁϩⲣⲁⲓ  ⲉⲡⲟⲟⲩ  ⲛ̅ϩⲟⲟⲩ . ⲁⲩⲱ  ⲉⲣⲉⲡϩⲓⲥⲉ  ⲉⲓ  ⲉⲧⲃⲏⲏⲧϥ̅  ⲉϫⲛ̅ⲧⲥⲩⲛⲁⲅⲱⲅⲏ  ⲧⲏⲣⲥ̅  ⲙ̅Ⲡϫⲟⲉⲓⲥ .  Ⲗⲟⲓⲡⲟⲛ  ⲙⲏ  ⲉⲧⲉⲧⲛ̅ⲟⲩⲉϣⲕⲧⲉⲧⲏⲩⲧⲛ̅  ⲉⲃⲟⲗ  ⲛ̅Ⲡϫⲟⲉⲓⲥ  ⲙ̅ⲉⲓϩⲟⲟⲩ . Ⲉϣⲱⲡⲉ  ⲅⲁⲣ ⲉⲧⲉⲉⲧⲛ̅ϥⲱϭⲥ̅  ⲉⲣⲟϥ  ⲙ̅Ⲡϫⲟⲉⲓⲥ  ⲙ̅ⲡⲟⲟⲩ  ⲛ̅ϩⲟⲟⲩ  ⲣⲁⲥⲧⲉ  ⲧⲥⲩⲛⲁⲅⲱⲅⲏ  ⲧⲏⲣⲥ̅ ⲟⲛ ⲙ̅ⲡⲒⲥⲣⲁⲏⲗ  ⲉϥⲉϭⲱⲛⲧ̅  ⲉⲣⲟⲥ.  Ⲉϣϫⲉⲡⲕⲁϩ  ⲇⲉ  ⲉⲧⲛ̅ⲧⲟⲟⲧⲛ̅  ϫⲁϩⲙ̅ ⲁⲙⲉⲓⲧⲛ̅  ⲛ̅ⲧⲉⲧⲛ̅ⲉⲓ  ⲉⲡⲕⲁϩ  ⲉⲧϩⲛ̅ⲧϭⲓϫ  ⲙ̅Ⲡϫⲟⲉⲓⲥ  ⲉⲣⲉⲡⲉϥⲙⲁⲛ̅ⲟⲩⲱϩ  ϣⲟⲟⲡ  ⲛ̅ϩⲏⲧϥ̅  ⲁⲩⲱ  ⲛ̅ⲧⲉⲧⲛ̅ϩⲙⲟⲟⲥ  ⲙ̅ⲙⲁⲩ . Ⲙⲟⲛⲟⲛ  ⲙ̅ⲡⲣ̅ϥⲱϭⲥ̅  ⲉϩⲣⲁⲓ  ⲉⲠϫⲟⲉⲓⲥ  ⲟⲩⲧⲉ  ⲉⲣⲟⲛ  ⲙⲁⲩⲁⲁⲛ  ϩⲙ̅ⲡⲧⲣⲉⲧⲉⲧⲛ̅ⲕⲉⲧⲟⲩⲑⲩⲥⲓⲁⲥⲧⲏⲣⲓⲟⲛ  ⲙ̅ⲡⲥⲁ  ⲙ̅ⲡⲉⲑⲩⲥⲓⲁⲥⲧⲏⲣⲓⲟⲛ  ⲙ̅Ⲡϫⲟⲉⲓⲥ ⲡⲉⲛⲛⲟⲩⲧⲉ :  Ⲙⲏ  ⲛ̅ⲟⲩϭⲱⲛⲧ̅  ⲁⲛ  ⲡⲉ  ⲉⲛⲧⲁϥⲉⲓ  ⲉϩⲣⲁⲓ    ⲉⲧⲃⲉⲀⲭⲁⲛ  ⲡϣⲏⲣⲉ  ⲛ̅Ⲥⲁⲣⲣⲁ  ϩⲙ̅ⲡⲧⲣⲉϥⲉⲓⲛⲉ  ⲛ̅ⲧⲉϥϭⲓϫ  ⲉϩⲣⲁⲓ  ⲉϫⲛ̅ⲡⲉⲧⲟ  ⲛ̅ⲁⲛⲁⲑⲏⲙⲁ  ⲉϥⲉⲓ  ⲉϫⲛ̅ⲧⲥⲩⲛⲁⲅⲱⲅⲏ ⲧⲏⲣⲥ̅ ⲙ̅ⲡⲒⲥⲣⲁⲏⲗ. ⲁⲩⲱ  Ⲁⲭⲁⲣ ⲉⲩⲣⲱⲙⲉ  ⲛ̅ⲟⲩⲱⲧ  ⲡⲉ. Ⲙⲏ ⲛ̅ⲧⲟϥ ⲙⲁⲩⲁⲁϥ ⲡⲉⲛⲧⲁϥⲙⲟⲩ ϩⲙ̅ⲡⲉϥⲛⲟⲃⲉ :  Ⲁⲩⲱ ⲁⲩⲟⲩⲱϣⲃ̅  ⲛ̅ϭⲓⲛ̅ϣⲏⲣⲉ  ⲛ̅Ϩⲣⲟⲩⲃⲏⲛ. ⲁⲩⲱ  ⲛ̅ϣⲏⲣⲉ  ⲛ̅Ⲅⲁⲇ. ⲁⲩⲱ  ⲧⲡⲁϣⲉ  ⲙ̅ⲫⲩⲗⲏ ⲙ̅Ⲙⲁⲛⲁⲥⲥⲏ. ⲁⲩϣⲁϫⲉ  ⲙ̅ⲛⲛⲬⲓⲗⲓⲁⲣⲭⲟⲥ  ⲙ̅ⲡⲒⲥⲣⲁⲏⲗ ⲉⲩϫⲱ  ⲙ̅ⲙⲟⲥ  ⲛⲁⲩ. Ϫⲉ  ⲡⲛⲟⲩⲧⲉ  ⲛ̅ⲧⲟϥ ⲟⲛ  ⲡⲉ  ⲡⲛⲟⲩⲧⲉ . Ⲛ̅ⲧⲟϥ ⲡⲉ  Ⲡϫⲟⲉⲓⲥ  ⲡⲛⲟⲩⲧⲉ . ⲁⲩⲱ  ⲛ̅ⲧⲟϥ ⲡⲛⲟⲩⲧⲉ  ϥⲥⲟⲟⲩⲛ . Ⲁⲩⲱ  ⲡⲒⲥⲣⲁⲏⲗ  ⲛ̅ⲧⲟϥ  ϩⲱⲱϥ  ϥⲛⲁⲉⲓⲙⲉ. ϫⲉ  ⲉϣⲱⲡⲉ  ⲉⲧⲃⲉⲟⲩ  ⲁⲛⲥⲁϩⲱⲛ  ⲉⲃⲟⲗ   ⲙ̅Ⲡϫⲟⲉⲓⲥ .  ⲁⲛⲣ̅ⲛⲟⲃⲉ  ⲙ̅ⲡⲉϥⲙ̅ⲧⲟ  ⲉⲃⲟⲗ  ⲛ̅ⲛⲉⲠϫⲟⲉⲓⲥ   ⲛⲁϩⲙⲛ̅ ϩⲙ̅ⲡⲁⲓ. Ⲁⲩⲱ ⲉϣⲱⲡⲉ  ⲛ̅ⲧⲁⲛⲕⲱⲧ  ⲛⲁⲛ  ⲛ̅ⲟⲩϣⲏⲩⲉ ⲉⲥⲁϩⲱⲛ ⲉⲃⲟⲗ  ⲙ̅ⲡⲉⲛⲛⲟⲩⲧⲉ  ⲏ ⲉⲧⲁⲗⲉⲑⲩⲥⲓⲁ ⲉϩⲣⲁⲓ  ϩⲓϫⲱⲥ  ⲛ̅ϭⲓⲗⲓⲗ. ⲏ  ϣⲟⲩϩⲓⲛⲉ . ⲏ ⲉⲉⲓⲣⲉ  ⲉϫⲱⲥ  ⲛ̅ⲟⲩⲑⲩⲥⲓⲁ  ⲛ̅ⲟⲩϫⲁⲓ. Ⲡϫⲟⲉⲓⲥ  ⲉϥⲉϣⲓⲛⲉ  ⲛ̅ⲥⲁⲛⲁⲓ. ⲁⲗⲗⲁ  ⲉⲧⲃⲉⲑⲟⲧⲉ ⲛ̅ⲟⲩϣⲁϫⲉ  ⲁⲛⲉⲓⲣⲉ  ⲙ̅ⲡⲁⲓ ⲉⲛϫⲱ  ⲙ̅ⲙⲟⲥ. ϫⲉⲕⲁⲥ  ⲉⲛⲛⲉⲧⲛ̅ϣⲏⲣⲉ  ϫⲟⲟⲥ   ⲛ̅ⲣⲁⲥⲧⲉ   ⲛ̅ⲛⲉϣⲏⲣⲉ  ϫⲉ  ⲉⲧⲉⲧⲛⲟ̅  ⲛⲟⲩ  ⲙⲛ̅Ⲡϫⲟⲉⲓⲥ.  Ⲁϥⲥⲙⲓⲛⲉ  ⲛ̅ϩⲉⲛⲧⲟϣ  ϩⲛ̅ⲧⲉⲧⲛ̅ⲙⲏⲧⲉ.  ⲁⲩⲱ ϩⲛ̅ⲧⲉⲧⲛ̅ⲙⲏⲧⲉ  ⲉⲧⲉⲡⲒⲟⲣⲇⲁⲛⲏⲥ  ⲡⲉ. ⲁⲩⲱ  ⲙⲛ̅ⲙⲉⲣⲓⲥ  ⲛ̅ⲧⲉⲠϫⲟⲉⲓⲥ  ϣⲟⲟⲡ ⲛⲏⲧⲛ̅. ⲛ̅ⲧⲉⲧⲛ̅ϣⲏⲣⲉ ⲉⲣⲛⲉⲛϣⲏⲣⲉ  ⲛ̅ϣⲙ̅ⲙⲟ ϫⲉ ⲛ̅ⲛⲉⲩϣⲙ̅ϣⲉ  ⲙ̅Ⲡϫⲟⲉⲓⲥ . Ⲉⲧⲃⲉⲡⲁⲓ  ⲁⲛϫⲟⲟⲥ  ⲉⲉⲓⲣⲉ   ϩⲓⲛⲁⲓ  ⲉⲕⲱⲧ   ⲛ̅ⲧⲉⲓϣⲏⲩⲉ  ⲛ̅ⲉⲧⲃⲉϩⲉⲛⲑⲩⲥⲓⲁ  ⲁⲛ. ⲟⲩⲇⲉ   ⲛ̅ⲉⲧⲃⲉϩⲉⲛϭⲗⲓⲗ  ⲁⲛ .   ⲁⲗⲗⲁ ϫⲉⲕⲁⲥ  ⲛ̅ⲧⲟϥ  ⲡⲉⲓϩⲱⲃ  ⲉϥⲉϣⲱⲡⲉ  ⲛ̅ⲟⲩⲙⲛ̅ⲧⲙⲛ̅ⲧⲣⲉ  ⲛ̅ⲧⲉⲛⲙⲏⲧⲉ ⲛⲙ̅ⲙⲏⲧⲛ̅. ⲁⲩⲱ ϩⲛ̅ⲧⲙⲏⲧⲉ ⲛ̅ⲛⲉⲛⲅⲉⲛⲉⲁ . ⲙⲛ̅ⲛⲥⲱⲛ ⲉⲧⲣⲉⲛϣⲙ̅ϣⲉ  ⲙ̅Ⲡϫⲟⲉⲓⲥ ⲙ̅ⲡⲉϥⲙ̅ⲧⲟ ⲉⲃⲟⲗ  ϩⲛ̅ϩⲉⲛϭⲗⲓⲗ. ⲁⲩⲱ ϩⲛ̅ϩⲉⲛⲑⲩⲥⲓⲁ ⲁⲩⲱ ϩⲛ̅ⲛⲕⲉⲑⲩⲥⲓⲁ  ⲁⲩⲱ  ϩⲛ̅ⲛⲕⲉⲑⲩⲥⲓⲁ  ⲛ̅ⲛⲉⲛⲟⲩϫⲁⲓ  ⲁⲩⲱ ⲛⲉⲧⲛ̅ϣⲏⲣⲉ  ⲛ̅ⲥⲉⲛⲁϫⲟⲟⲥ   ⲁⲛ  ⲡⲉ ⲛ̅ⲛⲉⲛϣⲏⲣⲉ  ⲛ̅ⲣⲁⲥⲧⲉ  ϫⲉ  ⲙⲛ̅ⲙⲉⲣⲓⲥ  ⲛ̅ⲧⲉⲠϫⲟⲉⲓⲥ  ϣⲟⲟⲡ ⲛⲏⲧⲛ̅. Ⲁⲩⲱ ⲁⲛϫⲟⲟⲥ  ϫⲉ  ⲉⲣϣⲁⲛⲡⲁⲓ  ϣⲱⲡⲉ ⲗⲁⲁⲩ  ⲁⲩⲱ  ⲛ̅ⲥⲉϣⲁϫⲉ  ⲛⲙ̅ⲙⲁⲛ  ⲛ̅ⲧⲉⲓϩⲉ . ⲏ  ⲙⲛ̅ⲛⲉⲛϫⲱⲙ ⲛ̅ⲣⲁⲥⲧⲉ . ⲧⲛ̅ⲛⲁϫⲟⲟⲥ  ⲡⲉ  ⲉϩⲟⲩⲛ  ⲉϩⲣⲁⲩ ϫⲉ  ⲁⲛⲁⲩ ⲉⲡⲓⲛⲉ  ⲙ̅ⲡⲉⲑⲩⲥⲓⲁⲥⲧⲏⲣⲓⲟⲛ  ⲙ̅Ⲡϫⲟⲉⲓⲥ. ⲙ̅ⲡⲉⲛⲧⲁⲩⲧⲁⲙⲓⲟϥ  ⲛ̅ϭⲓⲛⲉⲛⲉⲓⲟⲧⲉ. ⲛ̅ⲉⲧⲃⲉϩⲉⲛϭⲗⲓⲗ  ⲁⲛ. ⲟⲩⲇⲉ  ⲛ̅ⲉⲧⲃⲉϩⲉⲛⲑⲩⲥⲓⲁ ⲁⲛ. ⲁⲗⲗⲁ ⲉϥⲕⲏ ⲉϩⲣⲁⲓ ⲉⲩⲙⲛ̅ⲧⲙⲛ̅ⲧⲣⲉ ϩⲛ̅ⲧⲉⲧⲛ̅ⲙⲏⲧⲉ. ⲁⲩⲱ ϩⲛ̅ⲧⲉⲧⲛ̅ⲙⲏⲧⲉ ⲛ̅ⲛⲕⲉϣⲏⲣⲉ: Ⲛ̅ⲛⲉⲥϣⲱⲡⲉ ϭⲉ  ⲙ̅ⲙⲟⲛ ⲉⲥⲁϩⲟⲩⲛ ⲉⲃⲟⲗ  ⲙ̅Ⲡϫⲟⲉⲓⲥ  ⲛ̅ⲉⲓϩⲟⲟⲩ ⲛⲁⲓ ⲉⲧⲣⲉⲛⲕⲱⲧ ⲛⲁⲛ  ⲛ̅ⲟⲩⲑⲩⲥⲓⲁⲥⲧⲏⲣⲓⲟⲛ  ⲛ̅ⲛⲉⲛϭⲗⲓⲗ . ⲙⲛ̅ⲛⲉⲛⲑⲩⲥⲓⲁ  ⲛ̅ⲟⲩϫⲁⲓ. ⲡⲃⲟⲗ  ⲙ̅ⲡⲉⲑⲩⲥⲓⲁⲥⲧⲏⲣⲓⲟⲛ  ⲙ̅Ⲡϫⲟⲉⲓⲥ. ⲡⲁⲓ ⲉⲧⲙ̅ⲡⲙ̅ⲧⲟ ⲉⲃⲟⲗⲛ̅ⲧⲉϥⲥⲕⲏⲛⲏ :  Ⲁⲩⲱ   ⲛ̅ⲧⲉⲣⲉϥⲥⲱⲧⲙ̅  ̅ⲛϭⲓⲪⲓⲛⲉⲉⲥ  ⲡⲟⲩⲏⲏⲃ  ⲁⲩⲱ   ⲛ̅ⲁⲣⲭⲱⲛ ⲧⲏⲣⲟⲩ  ⲛ̅ⲧⲥⲩⲛⲁⲅⲱⲅⲏ   ⲙ̅ⲡⲒⲥⲣⲁⲏⲗ . ⲛⲉⲧⲛ̅ⲙⲙⲁϥ  ⲉⲛϣⲁϫⲉ   ⲛⲁⲓ ⲉⲛ̅ⲧⲁⲩϫⲟⲟⲩ ⲛ̅ϭⲓⲛ̅ϣⲏⲣⲉ ⲛ̅Ϩⲣⲟⲩⲃⲏⲛ. ⲁⲩⲱ ⲛ̅ϣⲏⲣⲉ  ⲛ̅Ⲅⲁⲇ. ⲁⲩⲱ ⲧⲡⲁϣⲉ  ⲙ̅ⲫⲩⲗⲏ  ⲙ̅Ⲙⲁⲛⲁⲥⲥⲏ . ⲁⲩⲣ̅ⲁⲛⲁⲩ : Ⲁⲩⲱ Ⲫⲓⲛⲉⲉⲥ ⲡⲟⲩⲏⲏⲃ ⲡⲉϫⲁϥ  ⲛ̅ⲛϣⲏⲣⲉ  ⲛ̅Ϩⲣⲟⲩⲃⲏⲛ. ⲛ̅ⲛϣⲏⲣⲉ   ⲛ̅Ⲅⲁⲇ . ⲙⲛ̅ⲧⲡⲁϣⲉ  ⲙ̅ⲫⲩⲗⲏ  ⲙ̅Ⲙⲁⲛⲁⲥⲥⲏ . ⲉϥϫⲱ  ⲙ̅ⲙⲟⲥ  ⲛⲁⲩ  ϫⲉ  ⲙ̅ⲡⲟⲟⲩ  ⲁⲛⲉⲓⲙⲉ  ϫⲉ Ⲡϫⲟⲉⲓⲥ  ⲛⲙ̅ⲙⲁⲛ. ⲉⲃⲟⲗϫⲉ  ⲛ̅ⲧⲉⲧⲛ̅ⲣ̅ⲛⲟⲃⲉ  ⲙ̅ⲡⲉⲙ̅ⲧⲟ ⲉⲃⲟⲗ  ⲙ̅Ⲡϫⲟⲉⲓⲥ  ϩⲛ̅ⲟⲩⲛⲟⲃⲉ . ⲁⲩⲱ ϫⲉ  ⲁⲧⲉⲧⲛ̅ⲟⲩⲱϩⲙ̅  ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ  ⲛ̅ⲧⲟⲟⲧϥ̅  ⲙ̅Ⲡϫⲟⲉⲓⲥ : Ⲁⲩⲱ ⲁϥⲕⲧⲟϥ ⲛ̅ϭⲓⲪⲓⲛⲉⲉⲥ  ⲡⲟⲩⲏⲏⲃ  ⲙⲛ̅ⲛⲁⲣⲭⲱⲛ ⲉⲧⲛⲙ̅ⲙⲁϥ ⲉⲃⲟⲗ ϩⲓⲧⲟⲟⲧⲟⲩ  ⲛ̅ⲛϣⲏⲣⲉ ⲛ̅Ϩⲣⲟⲩⲃⲏⲛ. ⲙⲛ̅ⲛϣⲏⲣⲉ  ⲛ̅Ⲅⲁⲇ .  ⲁⲩⲱ  ⲧⲡⲁϣⲉ  ⲙ̅ⲫⲩⲗⲏ  ⲙ̅Ⲙⲁⲛⲁⲥⲥⲏ   ⲉⲃⲟⲗ  ϩⲙ̅ⲡⲕⲁϩ  ⲛ̅Ⲅⲁⲗⲁⲁⲇ  ⲉϩⲣⲁⲓ   ⲉⲡⲕⲁϩ  ⲛ̅Ⲭⲁⲛⲁⲁⲛ  ⲉⲣⲁⲧⲟⲩ   ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ  ⲁⲩⲧⲁⲩⲟ  ⲉⲣⲟⲟⲩ ⲛ̅ⲛϣⲁϫⲉ   ⲁⲩⲣ̅ⲁⲛⲁⲩ  ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ .  ⲁⲩⲱ  ⲁⲩϣⲁϫⲉ  ⲙⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ   ⲁⲩⲱ   ⲁⲩⲥⲙⲟⲩ ⲉⲡⲛⲟⲩⲧⲉ ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ. Ⲁⲩⲱ  ⲁⲩϫⲟⲟⲥ  ⲉⲧⲙ̅ⲧⲱϣ ϭⲉ   ⲉⲃⲱⲕ ⲉϩⲣⲁⲓ ⲉⲣⲟⲟⲩ  ⲉⲩⲡⲟⲗⲉⲙⲟⲥ . ⲉϥⲱⲧⲉ ⲉⲃⲟⲗ ⲙ̅ⲡⲕⲁϩ ⲛ̅ⲛϣⲏⲣⲉ ⲛ̅Ϩⲣⲟⲩⲃⲏⲛ . ⲙⲛ̅ⲛϣⲏⲣⲉ  ⲛ̅Ⲅⲁⲇ . ⲙⲛ̅ⲧⲡⲁϣⲉ  ⲙ̅ⲫⲩⲗⲏ  ⲙ̅Ⲙⲁⲛⲁⲥⲥⲏ  ⲡⲁⲓ  ⲉⲛⲧⲁⲩⲟⲩⲱϩ ϩⲓϫⲱϥ :  Ⲁⲩⲱ Ⲓⲏⲥⲟⲩⲥ  ⲁϥⲙⲟⲩⲧⲉ  ⲉⲧϣⲏⲩⲉ  ⲛ̅ⲛϣⲏⲣⲉ  ⲛ̅Ϩⲣⲟⲩⲃⲏⲛ. ⲙⲛ̅ⲛϣⲏⲣⲉ ⲛ̅Ⲅⲁⲇ . ⲁⲩⲱ ⲧⲡⲁϣⲉ  ⲙ̅ⲫⲩⲗⲏ  ⲛ̅ⲛϣⲏⲣⲉ  ⲙ̅Ⲙⲁⲛⲁⲥⲥⲏ ⲉϥϫⲱ  ⲙ̅ⲙⲟⲥ  ϫⲉ  ⲧⲉⲓϣⲏⲩⲉ  ⲉⲥⲕⲏ  ⲉϩⲣⲁⲓ ⲉⲩⲙⲛ̅ⲧⲙⲛ̅ⲧⲣⲉ  ⲛ̅ⲧⲉⲩⲙⲏⲧⲉ . ⲉⲃⲟⲗϫⲉ  ⲡⲱⲟⲩ ϩⲱⲟⲩ  ⲡⲉ Ⲡϫⲟⲉⲓⲥ  ⲡⲛⲟⲩⲧⲉ :
 
Ⲕ̅Ⲅ̅. Ⲁⲥϣⲱⲡⲉ ⲇⲉ  ⲙⲛ̅ⲛⲥⲁϩⲉⲛϩⲟⲟⲩ  ⲉⲛⲁϣⲱⲟⲩ ⲙⲛ̅ⲛⲥⲁ  ⲛ̅ⲧⲉⲠϫⲟⲉⲓⲥ  ϯⲙ̅ⲧⲟⲛ  ⲙ̅ⲡⲒⲥⲣⲁⲏⲗ ⲉⲃⲟⲗ  ϩⲛ̅ⲛⲉϥϫⲁϫⲉ  ⲧⲏⲣⲟⲩ ϩⲙ̅ⲡⲉϥⲕⲱⲧⲉ : Ⲁⲩⲱ Ⲓⲏⲥⲟⲩⲥ  ⲁϥⲣ̅ϩⲗ̅ⲗⲟ ⲉⲁϥⲁⲗⲉ  ⲉϩⲣⲁⲓ ϩⲛ̅ⲛⲉϥϩⲟⲟⲩ : Ⲁⲩⲱ ⲁϥⲙⲟⲩⲧⲉ ⲛ̅ϭⲓⲒⲏⲥⲟⲩⲥ ⲉⲛ̅ϣⲏⲣⲉ ⲧⲏⲣⲟⲩ ⲙ̅ⲡⲒⲥⲣⲁⲏⲗ . ⲁⲩⲱ ⲛⲉⲩϩⲗ̅ⲗⲟⲓ. ⲁⲩⲱ ⲛⲉⲩⲁⲣⲭⲱⲛ. ⲙⲛ̅ⲛⲉⲩⲅⲣⲁⲙⲙⲁⲧⲉⲩⲥ . ⲁⲩⲱ ⲛⲉⲩⲣⲉϥϯϩⲁⲡ  ⲡⲉϫⲁϥ ⲛⲁⲩ . ϫⲉ  ⲁⲛⲟⲕ ⲁⲓⲣ̅ϩⲗ̅ⲗⲟ ⲁⲩⲱ ⲁⲓⲁⲗⲉ ⲉϩⲣⲁⲓ  ϩⲛ̅ⲛⲁϩⲟⲟⲩ . Ⲛ̅ⲧⲱⲧⲛ̅ ⲇⲉ  ⲁⲧⲉⲧⲛ̅ⲛⲁⲩ ⲉⲛⲉⲛⲧⲁϥⲁⲁⲩ  ⲛ̅ϭⲓⲠϫⲟⲉⲓⲥ ⲡⲉⲛⲛⲟⲩⲧⲉ  ⲛ̅ⲛⲉⲓϩⲉⲑⲛⲟⲥ  ⲧⲏⲣⲟⲩ ϩⲓϩⲏ  ⲙ̅ⲙⲟⲛ ⲉⲃⲟⲗϫⲉ Ⲡϫⲟⲉⲓⲥ  ⲡⲉⲛⲛⲟⲩⲧⲉ ⲛ̅ⲧⲟϥ ⲡⲉⲛⲧⲁϥⲙⲓϣⲉ ⲛⲙ̅ⲙⲁⲩ ⲉϫⲱⲛ . Ⲁⲧⲉⲧⲛ̅ⲛⲁⲩ ϫⲉ ⲛ̅ⲑⲉ ⲉⲛⲧⲁⲓϫⲟⲟⲥ ⲛⲏⲧⲛ̅ ϫⲉ ⲛⲓⲉⲑⲛⲟⲥ ⲉⲛⲧⲁⲩϣⲱϫⲡ̅ ⲉⲣⲱⲧⲛ̅  ϩⲛ̅ⲛⲉⲕⲗⲏⲣⲟⲥ ϩⲛⲛⲉⲫⲩⲗⲏ ϫⲓⲛⲙ̅ⲡⲒⲟⲣⲇⲁⲛⲏⲥ. Ⲛ̅ϩⲉⲑⲛⲟⲥ ⲧⲏⲣⲟⲩ ⲉⲛⲧⲁⲓϥⲟⲧⲟⲩ ⲉⲃⲟⲗ. ⲁⲩⲱ ϫⲓⲛⲧⲉⲑⲁⲗⲁⲥⲥⲁ ⲛⲟϭ ⲥϯⲱϣ ⲛⲏⲧⲛ̅ ⲉϩⲣⲁⲓ ⲉⲙ̅ⲙⲁ ⲙ̅ϩⲱⲧⲡ̅ ⲙ̅ⲡⲣⲏ.  Ⲡϫⲟⲉⲓⲥ ⲇⲉ  ⲡⲉⲛⲛⲟⲩⲧⲉ  ⲛ̅ⲧⲟϥ ⲡⲉⲧⲛⲁϥⲟⲧⲟⲩ ⲉⲃⲟⲗ  ϩⲓϩⲏ ⲙ̅ⲙⲟⲛ  ϣⲁⲛⲧⲟⲩⲱϫⲛ̅  ⲁⲩⲱ ϥⲛⲁϫⲟⲟⲩ ⲉϩⲟⲩⲛ ⲉⲣⲟⲟⲩ ⲛ̅ⲛⲉⲑⲏⲣⲓⲟⲛ ⲛ̅ⲁⲅⲣⲓⲟⲛ  ϣⲁⲛⲧϥ̅ϥⲟⲧⲟⲩ ⲉⲃⲟⲗ  ⲁⲩⲱ ⲛⲉⲩⲣ̅ⲣⲱⲟⲩ ϩⲓϩⲏ ⲙ̅ⲙⲱⲧⲛ̅ . ⲛ̅ⲧⲉⲧⲛ̅ⲕⲗⲏⲣⲟⲛⲟⲙⲓ ⲙ̅ⲡⲉⲩⲕⲁϩ ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ ⲡⲛⲟⲩⲧⲉ  ϣⲁϫⲉ ⲛⲙ̅ⲙⲏⲧⲛ̅ . Ϭⲙ̅ϭⲟⲙ ⲉⲙⲁⲧⲉ  ⲉϩⲁⲣⲉϩ  ⲁⲩⲱ ⲉⲉⲓⲣⲉ  ⲛ̅ⲛⲉⲧⲥⲏϩ ⲧⲏⲣⲟⲩ  ϩⲙ̅ⲡⲛⲟⲙⲟⲥ  ⲙ̅Ⲙⲱⲟⲩⲥⲏⲥ . ϫⲉ ⲛ̅ⲛⲉⲧⲛ̅ⲣⲓⲕⲉ ⲉⲃⲟⲗ ⲉⲩⲛⲁⲙ ⲏ ⲉϩⲃⲟⲩⲣ . ϫⲉⲕⲁⲥ ⲉⲛⲛⲉⲧⲛ̅ⲃⲱⲕ ⲉϩⲟⲩⲛ ⲉⲛ̅ϩⲉⲑⲛⲟⲥ ⲉⲛⲧⲁⲩϣⲱϫⲡ̅ ⲉⲣⲱⲧⲛ̅  ⲁⲩⲱ ⲛ̅ⲣⲁⲛ ⲛ̅ⲛⲉⲩⲛⲟⲩⲧⲉ ⲛ̅ⲛⲉⲩⲧⲁⲩⲉⲣⲓⲛⲟⲩ ⲛ̅ϩⲏⲧⲧⲏⲩⲧⲛ̅ ⲟⲩⲇⲉ  ⲛ̅ⲛⲉⲧⲛ̅ⲟⲩϣⲧ  ⲛⲁⲩ ⲟⲩⲇⲉ  ⲛ̅ⲛⲉⲧⲛ̅ϣⲙ̅ϣⲉ ⲛⲁⲩ ⲁⲗⲗⲁ Ⲡϫⲟⲉⲓⲥ ⲡⲉⲛⲛⲟⲩⲧⲉ ⲉⲧⲉⲧⲛ̅ⲉⲧⲉϭⲧⲏⲩⲧⲛ̅ ⲉⲣⲟϥ . ⲕⲁⲧⲁⲑⲉ ⲉⲛ̅ⲧⲁⲧⲉⲧⲛ̅ⲁⲁⲥ   ϣⲁϩⲣⲁⲓ ⲉⲡⲉϩⲟⲟⲩ ⲡⲁⲓ . ⲁⲩⲱ Ⲡϫⲟⲉⲓⲥ  ϥⲛⲁϥⲱⲧⲉ  ⲉⲃⲟⲗ ϩⲓϩⲏ ⲙ̅ⲙⲱⲧⲛ̅ ⲛ̅ϩⲉⲛⲛⲟϭ  ⲛ̅ϩⲉⲑⲛⲟⲥ  ⲁⲩⲱ ⲉⲩⲧⲁϫⲣⲏⲩ.  ⲁⲩⲱ  ⲙ̅ⲡⲉⲗⲁⲁⲩ ⲁϩⲉⲣⲁⲧϥ̅ ⲟⲩⲃⲏⲛ ϣⲁϩⲣⲁⲓ ⲉⲡⲉⲓϩⲟⲟⲩ ⲡⲁⲓ.  Ⲟⲩⲁ ⲉⲃⲟⲗ ⲛ̅ϩⲏⲧⲧⲏⲩⲧⲛ̅  ⲁϥⲡⲱⲧ  ⲛ̅ⲥⲁϣⲟ ⲛ̅ⲣⲱⲙⲉ ⲉⲃⲟⲗϫⲉ Ⲡϫⲟⲉⲓⲥ ⲡⲉⲛⲛⲟⲩⲧⲉ ⲛⲉϥⲙⲓϣⲉ ⲉϩⲣⲁⲓ ⲉϫⲱⲛ ⲕⲁⲧⲁⲑⲉ ⲉⲛⲧⲁϥϫⲟⲟⲥ ⲛⲁⲛ :  Ⲁⲩⲱ ⲉⲧⲉⲧⲛⲉϩⲁⲣⲉϩ ⲉⲙⲁⲧⲉ ⲉⲧⲣⲉⲧⲛ̅ⲙⲉⲣⲉⲠϫⲟⲉⲓⲥ  ⲡⲉⲛⲛⲟⲩⲧⲉ : Ⲉⲧⲉⲧⲛ̅ϣⲁⲛⲕⲧⲉⲧⲏⲩⲧⲛ̅ ⲅⲁⲣ ⲉⲃⲟⲗ ⲙ̅ⲙⲟϥ . ⲛ̅ⲧⲉⲧⲛ̅ⲣⲉⲕⲧⲧⲏⲩⲧⲛ̅ ⲉⲛⲉϩⲉⲑⲛⲟⲥ ⲛⲁⲓ ⲉⲛⲧⲁⲩϣⲱϫⲡ̅ ⲉⲧⲛⲙ̅ⲙⲏⲧⲛ̅ . ⲁⲩⲱ ⲛ̅ⲧⲉⲧⲛ̅ϫⲓⲥϩⲓⲙⲉ ⲉⲃⲟⲗ  ⲛ̅ϩⲏⲧⲟⲩ. ⲁⲩⲱ ⲛ̅ⲧⲉⲧⲛ̅ⲧⲱϩ ⲛⲙ̅ⲙⲁⲩ . ⲛ̅ⲧⲟⲟⲩ ϩⲱⲟⲩ ⲟⲛ ⲛ̅ⲥⲉⲧⲱϩ ⲛⲙ̅ⲙⲏⲧⲛ̅ . Ⲉⲓⲙⲉ ϫⲉ Ⲡϫⲟⲉⲓⲥ  ⲛϥ̅ⲛⲁⲟⲩⲱϩ  ⲁⲛ ⲉⲧⲟⲟⲧϥ̅ ⲉϥⲱⲧⲉ ⲉⲃⲟⲗ  ⲛ̅ⲛⲉⲓϩⲉⲑⲛⲟⲥ  ϩⲁⲧⲉⲧⲛ̅ϩⲏ . Ⲁⲩⲱ ⲛ̅ⲧⲟⲟⲩ ⲥⲉϣⲟⲟⲡ ⲛⲏⲧⲛ̅ ⲉϩⲉⲛϭⲟⲣϭⲥ̅ . ⲁⲩⲱ ϩⲉⲛⲥⲕⲁⲛⲇⲁⲗⲟⲛ . ⲁⲩⲱ ϩⲉⲛⲉⲓⲉⲃⲧ  ϩⲛ̅ⲛⲉⲧⲛ̅ϯⲃⲥ  ⲁⲩⲱ  ϩⲉⲛⲥⲟⲧⲉ ϩⲛ̅ⲛⲉⲧⲛ̅ⲃⲁⲗ  ϣⲁⲛⲧⲉⲧⲛ̅ⲧⲁⲕⲟ ⲉⲃⲟⲗ  ϩⲓϫⲙ̅ⲡⲉⲓⲕⲁϩ ⲉⲧⲛⲁⲛⲟⲩϥ ⲡⲁⲓ ⲉⲛⲧⲁϥⲧⲁⲁϥ ⲛⲏⲧⲛ̅ ⲛ̅ϭⲓⲠϫⲟⲉⲓⲥ  ⲡⲉⲛⲛⲟⲩⲧⲉ :  Ⲁⲛⲟⲕ ⲇⲉ ⲉⲓⲛⲁⲃⲱⲕ ϩⲓⲧⲉϩⲓⲏ ⲕⲁⲧⲁⲡⲧⲱϣ  ⲛ̅ⲣⲱⲙⲉ  ⲛⲓⲙ ⲉⲧϩⲓϫⲙ̅ⲡⲕⲁϩ . Ⲁⲩⲱ ⲧⲉⲧⲛⲁⲉⲓⲙⲉ  ϩⲙ̅ⲡⲉⲧⲛ̅ϩⲏⲧ  ⲙⲛ̅ⲧⲉⲧⲛ̅ⲯⲩⲭⲏ . ϫⲉ  ⲙ̅ⲡⲉⲟⲩϣⲁϫⲉ  ⲛ̅ⲟⲩⲱⲧ ⲉⲓ ⲉⲡⲁϩⲟⲩ ⲉⲃⲟⲗ  ϩⲛ̅ⲛϣⲁϫⲉ ⲧⲏⲣⲟⲩ ⲉⲛⲧⲁϥϫⲟⲟⲩ ⲛ̅ϭⲓⲠϫⲟⲉⲓⲥ  ⲡⲉⲛⲛⲟⲩⲧⲉ  ⲕⲁⲧⲁϩⲱⲃ ⲛⲓⲙ  ⲉⲧϫⲓ ⲉϩⲟⲩⲛ ⲉⲣⲟⲛ. Ⲙ̅ⲡⲉⲟⲩϣⲁϫⲉ  ⲛ̅ⲟⲩⲱⲧ  ⲣ̅ϭⲟⲗ ⲛ̅ϩⲏⲧⲟⲩ.  Ⲁⲩⲱ  ⲕⲁⲧⲁⲑⲉ  ⲉⲛⲧⲁⲩⲉⲓ ⲉϫⲛ̅ⲧⲏⲩⲧⲛ̅  ⲛ̅ϭⲓⲛ̅ϣⲁϫⲉ  ⲧⲏⲣⲟⲩ ⲉⲧⲛⲁⲛⲟⲩⲟⲩ ⲛⲁⲓ ⲉⲛⲧⲁⲠϫⲟⲉⲓⲥ ϫⲟⲟⲩ  ⲉⲣⲟⲛ . ⲧⲁⲓ ⲧⲉ ⲑⲉ ⲉⲧⲉⲣⲉⲠϫⲟⲉⲓⲥ  ⲡⲛⲟⲩⲧⲉ  ⲛⲁⲉⲓⲛⲉ ⲉϫⲛ̅ⲧⲏⲩⲧⲛ̅ ⲛ̅ⲛϣⲁϫⲉ ⲧⲏⲣⲟⲩ ⲉⲑⲟⲟⲩ ϣⲁⲛⲧϥ̅ϥⲉⲧⲧⲏⲩⲧⲛ̅ ⲉⲃⲟⲗ  ϩⲓϫⲙ̅ⲡⲉⲓⲕⲁϩ ⲉⲧⲛⲁⲛⲟⲩϥ ⲡⲁⲓ ⲉⲛⲧⲁⲠϫⲟⲉⲓⲥ ⲧⲁⲁϥ ⲛⲏⲧⲛ̅ ϩⲛ̅ⲡⲧⲣⲉⲧⲛ̅ⲕⲱ ⲛ̅ⲥⲱⲧⲛ̅ ⲛ̅ⲧⲇⲓⲁⲑⲏⲕⲏ ⲙ̅Ⲡϫⲟⲉⲓⲥ ⲡⲉⲛⲛⲟⲩⲧⲉ ⲧⲁⲓ ⲉⲛⲧⲁϥϩⲱⲛ ⲙ̅ⲙⲟⲥ ⲉⲧⲟⲟⲧⲛ̅  . ⲁⲩⲱ ⲛ̅ⲧⲉⲧⲛ̅ⲃⲱⲕ ⲛ̅ⲧⲉⲧⲛ̅ϣⲙ̅ϣⲉ ⲛ̅ϩⲉⲛⲕⲉⲛⲟⲩⲧⲉ . ⲁⲩⲱ ⲛ̅ⲧⲉⲧⲛ̅ⲟⲩⲱϣⲧ ⲛⲁⲩ:
 
Ⲕ̅Ⲇ̅. Ⲁⲩⲱ Ⲓⲏⲥⲟⲩⲥ   ⲁϥⲥⲟⲩⲱϩ ⲉϩⲟⲩⲛ  ⲛ̅ⲛⲉⲫⲩⲗⲏ ⲧⲏⲣⲟⲩ ⲙ̅ⲡⲒⲥⲣⲁⲏⲗ  ⲉϩⲣⲁⲓ  ⲉⲤⲏⲗⲱ. Ⲁⲩⲱ ⲁϥⲙⲟⲩⲧⲉ ⲉⲛⲉⲩⲡⲣⲉⲥⲃⲩⲧⲉⲣⲟⲥ. ⲙⲛ̅ⲛⲉⲩⲅⲣⲁⲙⲙⲁⲧⲉⲩⲥ . ⲁⲩⲱ ⲛⲉⲩⲣⲉϥϯϩⲁⲡ . ⲁϥⲧⲁϩⲟⲟⲩ ⲉⲣⲁⲧⲟⲩ ⲙ̅ⲡⲉⲙⲧⲟ ⲉⲃⲟⲗ ⲙ̅ⲡⲛⲟⲩⲧⲉ. Ⲁⲩⲱ ⲡⲉϫⲉⲒⲏⲥⲟⲩⲥ  ⲙ̅ⲡⲗⲁⲟⲥ ⲧⲏⲣϥ̅  ⲙ̅Ⲡϫⲟⲉⲓⲥ . ϫⲉ ⲛⲁⲓ ⲛⲉⲧϥ̅ϫⲱ  ⲙ̅ⲙⲟⲟⲩ ⲛ̅ϭⲓⲠϫⲟⲉⲓⲥ  ⲡⲛⲟⲩⲧⲉ  ⲙ̅ⲡⲒⲥⲣⲁⲏⲗ . ϫⲉ ⲛⲉⲧⲛ̅ⲉⲓⲟⲧⲉ ⲁⲩⲟⲩⲱϩ ϫⲓⲛⲧⲉϩⲟⲩⲉⲓⲧⲉ  ϩⲙ̅ⲡⲉⲕⲣⲟ ⲙ̅ⲡⲓⲉⲣⲟ . ⲉⲧⲉⲐⲁⲣⲁ ⲡⲉ ⲡⲉⲓⲱⲧ ⲛ̅Ⲁⲃⲣⲁϩⲁⲙ . ⲁⲩⲱ ⲡⲉⲓⲱⲧ  ⲛ̅Ⲁⲭⲱⲣ. ⲁⲩⲱ ⲁⲩϣⲙ̅ϣⲉ ⲛ̅ϩⲉⲛⲕⲉⲛⲟⲩⲧⲉ . ⲁⲩⲱ ⲡⲛⲟⲩⲧⲉ  ⲁϥϫⲓⲙⲟⲉⲓⲧ  ϩⲁⲧⲉϥϩⲏ  ⲙ̅ⲡⲕⲁϩ ⲧⲏⲣϥ̅ . Ⲁⲩⲱ ⲁϥⲧⲁⲙϣⲟ ⲙ̅ⲡⲉϥⲥⲡⲉⲣⲙⲁ . ⲁⲩⲱ  ⲁϥϯ ⲛⲁϥ ⲛ̅Ⲓⲥⲁⲁⲕ. Ⲁⲩⲱ Ⲓⲥⲁⲁⲕ ⲁϥϯ ⲛⲁϥ  ⲛ̅Ⲓⲁⲕⲱⲃ ⲙⲛ̅ⲏⲥⲁⲩ . ⲁⲩⲱ ⲡⲧⲟⲟⲩ ⲛ̅Ⲥⲏⲉⲓⲣ ⲁϥⲧⲁⲁϥ  ⲛ̅ⲏⲥⲁⲩ ⲉⲧⲣⲉϥⲕⲗⲏⲣⲟⲛⲟⲙⲉⲓ ⲙ̅ⲙⲟϥ.  Ⲁⲩⲱ Ⲓⲁⲕⲱⲃ ⲙⲛ̅ⲛⲉϥϣⲏⲣⲉ  ⲁϥⲉⲓ ⲉϩⲣⲁⲓ ⲉⲔⲏⲙⲉ . ⲁⲩϣⲱⲡⲉ ϩⲙ̅ⲡⲙⲁ ⲉⲧⲙ̅ⲙⲁⲩ ⲉⲩⲛⲟϭ ⲛ̅ϩⲉⲑⲛⲟⲥ ⲉⲛⲁϣⲱϥ  ⲁⲩⲱ ⲉϥϫⲟⲟⲣ . ⲁⲩⲱ ⲛ̅Ⲣⲙ̅ⲛ̅ⲕⲏⲙⲉ ⲁⲩⲑⲙ̅ⲕⲟϥ  ⲁⲩⲱ Ⲡϫⲟⲉⲓⲥ  ⲁϥⲡⲁⲧⲁⲥⲥⲉ  ⲛ̅Ⲕⲏⲙⲉ  ϩⲛ̅ⲛⲉⲛⲧⲁϥⲁⲁⲩ ⲛ̅ϩⲏⲧⲟⲩ. Ⲁⲩⲱ ⲙⲛ̅ⲛⲥⲁ ⲛⲁⲓ  ⲁϥⲉⲓⲛⲉ  ⲛ̅ⲛⲉⲛⲉⲓⲟⲧⲉ ⲉⲃⲟⲗ  ϩⲛ̅Ⲕⲏⲙⲉ ⲁⲩⲱ ⲁⲧⲉⲧⲛ̅ϫⲱⲧⲉ ⲉϩⲟⲩⲛ ⲉⲧⲉⲑⲁⲗⲁⲥⲥⲁ ⲁϥϩⲱⲃⲥ̅ ⲉⲃⲟⲗ ⲉϫⲱⲟⲩ. Ⲁⲩⲱ ⲛⲉⲛⲃⲁⲗ  ⲁⲩⲛⲁⲩ ⲉⲛⲉⲛⲧⲁⲠϫⲟⲉⲓⲥ  ⲁⲁⲩ ϩⲙ̅ⲡⲕⲁϩ ⲛ̅Ⲕⲏⲙⲉ. ⲁⲩⲱ ϩⲛ̅ⲧⲉⲣⲏⲙⲟⲥ  ϩⲛ̅ϩⲉⲛϩⲟⲟⲩ ⲉⲛⲁϣⲱⲟⲩ. Ⲁⲩⲱ  ⲁϥⲛ̅ⲧⲛ̅ ⲉϩⲣⲁⲓ ⲉⲡⲕⲁϩ ⲛ̅ⲛⲀⲙⲟⲣⲣⲁⲓⲟⲥ ⲛⲉⲧⲟⲩⲏϩ ϩⲙ̅ⲡⲉⲕⲣⲟ ⲙ̅Ⲓⲟⲣⲇⲁⲛⲏⲥ : Ⲁⲩⲱ Ⲙⲱⲟⲩⲥⲏⲥ  ⲁϥⲙⲓϣⲉ ⲛⲙ̅ⲙⲁⲩ. Ⲁⲡϫⲟⲉⲓⲥ ⲧⲁⲁⲩ ⲉϩⲣⲁⲓ ⲉⲧⲟⲟⲧⲛ̅ ⲁⲩⲱ  ⲁⲧⲉⲧⲛ̅ⲕⲗⲏⲣⲟⲛⲟⲙⲉⲓ ⲙ̅ⲡⲉⲩⲕⲁϩ . ⲁⲩⲱ  ⲁⲧⲉⲧⲛ̅ϥⲟⲧⲟⲩ ⲉⲃⲟⲗ ϩⲓⲑⲏ ⲙ̅ⲙⲱⲧⲛ̅ : Ⲁⲩⲱ ⲁϥⲧⲱⲟⲩⲛ  ⲛ̅ϭⲓⲂⲁⲗⲁⲕ ⲡϣⲏⲣⲉ ⲛ̅Ⲥⲉⲡϥⲱⲣ ⲡⲣ̅ⲣⲟ ⲙ̅Ⲙⲱⲁⲃ  ⲁϥϯ  ⲙⲛ̅ⲡⲒⲥⲣⲁⲏⲗ . Ⲁⲩⲱ ⲁϥϫⲟⲟⲩ ⲁϥⲙⲟⲩⲧⲉ ⲉⲂⲁⲗⲁϩⲁⲙ ⲉⲧⲣⲉϥⲥⲁϩⲟⲩ  ⲙ̅ⲙⲱⲧⲛ̅.  Ⲁⲩⲱ ⲙ̅ⲡϥ̅ⲣ̅ϩ̅ⲛⲁϥ  ⲛ̅ϭⲓⲠϫⲟⲉⲓⲥ  ⲡⲉⲕⲛⲟⲩⲧⲉ  ⲉϥⲟⲧⲕ̅ ⲉⲃⲟⲗ. ⲁⲩⲱ ϩⲛ̅ⲟⲩⲥⲙⲟⲩ ⲁϥⲥⲙⲟⲩ ⲉⲣⲟⲛ . Ⲁⲩⲱ  ⲁϥⲛⲁϩⲙⲛ̅  ⲛ̅ⲧⲟⲟⲧⲟⲩ  ⲁϥⲧⲁⲁⲩ ⲉⲧⲟⲟⲧⲛ̅ . ⲁⲩⲱ  ⲁⲧⲉⲧⲛ̅ϫⲓⲟⲟⲣ  ⲙ̅ⲡⲒⲟⲣⲇⲁⲛⲏⲥ  ⲁⲧⲉⲧⲛ̅ⲉⲓ ⲉϩⲣⲁⲓ ⲉϨⲓⲉⲣⲓⲭⲱ. Ⲁⲩⲱ ⲁⲩⲙⲓϣⲉ ⲛⲙ̅ⲙⲁⲛ ⲛ̅ϭⲓⲛⲉⲧⲟⲩⲏϩ  ϩⲛ̅Ϩⲓⲉⲣⲓⲭⲱ . Ⲡⲁⲙⲟⲣⲣⲁⲓⲟⲥ  ⲙⲛ̅ⲡⲉⲬⲁⲛⲁⲛⲁⲓⲟⲥ . ⲁⲩⲱ ⲡⲉⲪⲉⲣⲉⲥⲁⲓⲟⲥ . ⲁⲩⲱ ⲡⲒⲉⲃⲟⲩⲥⲁⲓⲟⲥ. ⲙⲛ̅ⲡⲉⲬⲉⲧⲧⲁⲓⲟⲥ . ⲁⲩⲱ ⲡⲄⲉⲣⲅⲉⲥⲁⲓⲟⲥ . Ⲁⲩⲱ ⲛⲁⲓ  ⲁⲠϫⲟⲉⲓⲥ ⲧⲁⲁⲩ ⲉϩⲣⲁⲓ ⲉⲧⲟⲟⲧⲛ̅ . ⲁⲩⲱ ⲁϥϫⲟⲟⲩ  ϩⲁⲧⲛ̅ϩⲏ  ⲙ̅ⲡⲁⲙⲏ  ⲁϥⲛⲟϫⲟⲩ ⲉⲃⲟⲗ  ϩⲓϩⲏ ⲙ̅ⲙⲱⲧⲛ̅ ⲙ̅ⲙⲛ̅ⲧⲥⲛⲟⲟⲩⲥ  ⲛ̅ⲣ̅ⲣⲟ  ⲛ̅ⲛⲀⲙⲟⲣⲣⲁⲓⲟⲥ. ϩⲛ̅ⲧⲉⲕⲥⲏϥⲉ ⲁⲛ . ⲟⲩⲇⲉ  ϩⲛ̅ⲧⲉⲕⲡⲓⲧⲉ ⲁⲛ . ⲁⲩⲱ ⲁϥϯ ⲛⲏⲧⲛ̅ ⲛ̅ⲟⲩⲕⲁϩ ⲡⲁⲓ  ⲉⲧⲉⲙ̅ⲡⲉⲧⲙ̅ϣⲡ̅ϩⲓⲥⲉ ⲉϫⲱϥ . ⲁⲩⲱ ϩⲉⲛⲡⲟⲗⲓⲥ ⲉⲙ̅ⲡⲉⲧⲛ̅ⲕⲟⲧⲟⲩ ⲁⲧⲉⲧⲛ̅ⲟⲩⲱϩ  ϩⲣⲁⲓ ⲛ̅ϩⲏⲧⲟⲩ . ⲁⲩⲱ ⲥⲉⲛⲁⲉⲓⲉϩⲉⲗⲟⲟⲗⲉ. ⲙⲛ̅ϩⲉⲛϣⲛⲏ  ⲛ̅ϫⲟⲉⲓⲧ ⲉⲙⲡⲉⲧⲛ̅ⲧⲟϭⲟⲩ ⲛ̅ⲧⲱⲧⲛ̅  ⲁⲧⲉⲧⲛ̅ⲟⲩⲟⲙⲟⲩ . Ⲧⲉⲛⲟⲩ ⲁⲣⲓϩⲟⲧⲉ  ϩⲏⲧϥ̅  ⲙ̅Ⲡϫⲟⲉⲓⲥ  ⲁⲩⲱ  ⲛ̅ⲧⲉⲧⲛ̅ϣⲙ̅ϣⲉ  ⲛⲁϥ ϩⲛ̅ⲟⲩⲥⲟⲟⲩⲧⲛ̅ . ⲁⲩⲱ ϩⲛ̅ⲟⲩⲇⲓⲕⲁⲓⲟⲥⲩⲛⲏ . Ⲁⲩⲱ ⲧⲉⲛⲟⲩ ϥⲓ  ⲙ̅ⲙⲁⲩ ⲛ̅ⲛⲟⲩⲧⲉ  ⲛ̅ϣⲙ̅ⲙⲟ ⲉⲃⲟⲗ  ⲙ̅ⲙⲱⲧⲛ̅ . ⲛⲁⲓ ⲉⲛⲧⲁⲩϣⲙ̅ϣⲉ ⲛⲁⲩ ⲛ̅ϭⲓⲛⲉⲧⲛ̅ⲉⲓⲟⲧⲉ  ϩⲙ̅ⲡⲉⲕⲣⲟ ⲙ̅ⲡⲓⲉⲣⲟ. ⲁⲩⲱ  ϩⲛ̅Ⲕⲏⲙⲉ. ⲛ̅ⲧⲉⲧⲛ̅ϣⲙ̅ϣⲉ  ⲙ̅Ⲡϫⲟⲉⲓⲥ  ⲙⲁⲩⲁⲁϥ:  Ⲉϣⲱⲡⲉ ⲇⲉ ⲙ̅ⲡⲁⲓ ⲣⲁⲛⲏⲧⲛ̅ ⲁⲛ ⲉϣⲙ̅ϣⲉ  ⲙ̅Ⲡϫⲟⲉⲓⲥ. ⲉⲓⲉⲥⲱⲧⲡ̅ ⲛⲏⲧⲛ̅ ⲛ̅ⲧⲱⲧⲛ̅ ⲙ̅ⲡⲟⲟⲩ ϫⲉ ⲛⲓⲙ ⲡⲉⲧⲉⲧⲛⲁϣⲙ̅ϣⲉ ⲛⲁϥ . ⲏ ⲛ̅ⲛⲟⲩⲧⲉ  ⲛ̅ⲛⲉⲧⲛ̅ⲉⲓⲟⲧⲉ ⲛⲉⲧϩⲙ̅ⲡⲉⲕⲣⲟ ⲙ̅ⲡⲓⲉⲣⲟ. ⲛ̅ⲛⲟⲩⲧⲉ ⲛ̅ⲛⲀⲙⲟⲣⲣⲁⲓⲟⲥ  ⲛⲁⲓ ⲛ̅ⲧⲱⲧⲛ̅ ⲉⲧⲉⲧⲛ̅ⲟⲩⲏϩ ϩⲓϫⲙ̅ⲡⲉⲩⲕⲁϩ . Ⲁⲛⲟⲕ ⲇⲉ ⲙⲛ̅ⲡⲁⲏⲓ ⲉⲛⲛⲁϣⲙ̅ϣⲉ  ⲙ̅Ⲡϫⲟⲉⲓⲥ ϫⲉ ϥⲟⲩⲁⲁⲃ : Ⲁⲩⲱ ⲡⲗⲁⲟⲥ   ⲁϥⲟⲩⲱϣⲃ̅ ⲉϥϫⲱ  ⲙ̅ⲙⲟⲥ  ϫⲉ ⲛ̅ⲛⲉⲥϣⲱⲡⲉ  ⲙ̅ⲙⲟⲛ ⲉⲧⲣⲉⲛⲕⲁⲠϫⲟⲉⲓⲥ  ⲛ̅ⲥⲱⲛ. ⲉⲧⲣⲉⲛⲃⲱⲕ ⲉϣⲙ̅ϣⲉ ⲛ̅ⲕⲉⲛⲟⲩⲧⲉ Ⲡϫⲟⲉⲓⲥ ⲅⲁⲣ ⲡⲉⲛⲛⲟⲩⲧⲉ  ⲛ̅ⲧⲟϥ ⲡⲉ ⲡⲛⲟⲩⲧⲉ . Ⲛ̅ⲧⲟϥ  ⲡⲉⲛⲧⲁϥⲉⲓⲛⲉ  ⲙ̅ⲙⲟⲛ ⲉϩⲣⲁⲓ ⲙⲛ̅ⲛⲕⲉⲉⲓⲟⲧⲉ  ⲉⲃⲟⲗ ϩⲛ̅Ⲕⲏⲙⲉ. Ⲁⲩⲱ ⲁϥϩⲁⲣⲉϩ ⲉⲣⲟⲛ ϩⲛ̅ⲧⲉϩⲓⲏ ⲧⲏⲣⲥ̅ ⲉⲛⲧⲁⲛⲙⲟⲟϣⲉ ⲛ̅ϩⲏⲧⲥ̅ . Ⲁⲩⲱ  ϩⲛ̅ⲛⲕⲉϩⲉⲑⲛⲟⲥ ⲧⲏⲣⲟⲩ ⲛⲁⲓ ⲉⲛⲧⲁⲛⲡⲁⲣⲁⲅⲉ  ⲙ̅ⲙⲟⲟⲩ  ⲁⲩⲱ Ⲡϫⲟⲉⲓⲥ ⲛ̅ⲧⲟϥ ⲡⲉⲛⲧⲁϥⲛⲟⲩϫⲉ ⲉⲃⲟⲗ ⲙ̅ⲡⲀⲙⲟⲣⲣⲁⲓⲟⲥ . ⲙⲛ̅ⲛⲕⲉϩⲉⲑⲛⲟⲥ  ⲧⲏⲣⲟⲩ ⲉⲧⲟⲩⲏϩ ϩⲙ̅ⲡⲕⲁϩ  ϩⲁⲧⲉⲛϩⲏ  ⲁⲛⲟⲛ ϭⲉ  ϩⲱⲱⲛ ⲧⲛ̅ⲛⲁϣⲙ̅ϣⲉ  ⲙ̅Ⲡϫⲟⲉⲓⲥ ⲡⲁⲓ ⲅⲁⲣ ⲡⲉ ⲡⲉⲛⲛⲟⲩⲧⲉ : Ⲁⲩⲱ Ⲓⲏⲥⲟⲩⲥ ⲡⲉϫⲁϥ  ⲙ̅ⲡⲗⲁⲟⲥ ϫⲉ  ⲛ̅ⲧⲉⲧⲛ̅ⲁϣϭⲙ̅ϭⲟⲙ  ⲁⲛ ⲉϣⲙ̅ϣⲉ ⲙ̅Ⲡϫⲟⲉⲓⲥ  ⲉⲃⲟⲗϫⲉ ⲟⲩⲛⲟⲩⲧⲉ ⲉϥⲟⲩⲁⲁⲃ ⲡⲉ. ⲁⲩⲱ ⲉϥϣⲁⲛⲕⲱϩ ⲉⲣⲱⲧⲛ̅ ⲛϥ̅ⲛⲁⲕⲱ  ⲁⲛ ⲛⲏⲧⲛ̅ ⲉⲃⲟⲗ  ⲛ̅ⲛⲉⲧⲛ̅ⲛⲟⲃⲉ . ⲙⲛ̅ⲛⲉⲧⲛ̅ⲁⲛⲟⲙⲓⲁ.  ϩⲙ̅ⲡⲧⲣⲉⲧⲛ̅ⲕⲱ ⲛ̅ⲥⲱⲧⲛ̅  ⲙ̅Ⲡϫⲟⲉⲓⲥ ⲛ̅ⲧⲉⲧⲛ̅ϣⲙ̅ϣⲉ ⲛ̅ϩⲉⲛⲕⲉⲛⲟⲩⲧⲉ . Ⲁⲩⲱ ⲉϥϣⲁⲛⲉⲓ ⲉϫⲛ̅ⲧⲏⲩⲧⲛ̅ ϥⲛⲁⲑⲙ̅ⲕⲉⲧⲏⲩⲧⲛ̅ ⲁⲩⲱ ϥⲛⲁϥⲉⲧⲧⲏⲩⲧⲛ̅ ⲉⲃⲟⲗ ⲉⲧⲃⲉϫⲉ  ⲁϥⲉⲓⲣⲉ ⲛⲏⲧⲛ̅ ⲙ̅ⲡⲡⲉⲧⲛⲁⲛⲟⲩϥ : Ⲁⲩⲱ ⲡⲗⲁⲟⲥ  ⲡⲉϫⲁⲩ ⲛ̅Ⲓⲏⲥⲟⲩⲥ  ϫⲉ ⲛ̅ⲧⲉⲓϩⲉ  ⲁⲛ  ⲁⲗⲗⲁ Ⲡϫⲟⲉⲓⲥ ⲡⲉⲛⲛⲟⲩⲧⲉ  ⲡⲉⲧⲛ̅ⲛⲁϣⲙ̅ϣⲉ ⲛⲁϥ : Ⲁⲩⲱ Ⲓⲏⲥⲟⲩⲥ  ⲡⲉϫⲁϥ  ⲙ̅ⲡⲗⲁⲟⲥ ϫⲉ ⲛ̅ⲧⲱⲧⲛ̅ ⲡⲉⲧⲟ ⲙ̅ⲙⲛ̅ⲧⲣⲉ ⲉⲣⲱⲧⲛ̅ . ⲉⲃⲟⲗϫⲉ  ⲛ̅ⲧⲱⲧⲛ̅  ⲁⲧⲉⲧⲛ̅ⲥⲱⲧⲡ̅ ⲛⲏⲧⲛ̅  ⲙ̅Ⲡϫⲟⲉⲓⲥ ⲉⲧⲣⲉⲧⲛ̅ϣⲙ̅ϣⲉ ⲛⲁϥ : Ⲧⲉⲛⲟⲩ ϭⲉ  ϥⲓ ⲙ̅ⲙⲁⲩ ⲉⲃⲟⲗ  ⲛ̅ϩⲏⲧⲧⲏⲩⲧⲛ̅  ⲛ̅ⲛⲟⲩⲧⲉ ⲛ̅ϣⲙ̅ⲙⲟ  ⲉⲧⲛⲙ̅ⲙⲏⲧⲛ̅. ⲁⲩⲱ  ⲛ̅ⲧⲉⲧⲛ̅ⲥⲟⲩⲧⲛ̅ⲡⲉⲧⲛ̅ϩⲏⲧ  ⲉϩⲟⲩⲛ ⲉⲠϫⲟⲉⲓⲥ  ⲡⲛⲟⲩⲧⲉ  ⲙ̅ⲡⲒⲥⲣⲁⲏⲗ: Ⲁⲩⲱ ⲡⲗⲁⲟⲥ  ⲡⲉϫⲁϥ ⲛ̅Ⲓⲏⲥⲟⲩⲥ . ϫⲉ Ⲡϫⲟⲉⲓⲥ  ⲡⲉⲧⲛ̅ⲛⲁϣⲙ̅ϣⲉ ⲛⲁϥ . ⲁⲩⲱ ⲛ̅ⲧⲟϥ ⲡⲉⲧⲛ̅ⲛⲁⲥⲱⲧⲙ̅ ⲛ̅ⲥⲁⲡⲉϥϩⲣⲟⲟⲩ :  Ⲁⲩⲱ Ⲓⲏⲥⲟⲩⲥ  ⲁϥⲥⲙⲓⲛⲉ ⲛ̅ⲟⲩⲇⲓⲁⲑⲏⲕⲏ ⲙⲛ̅ⲡⲗⲁⲟⲥ  ϩⲙ̅ⲡⲉϩⲟⲟⲩ ⲉⲧⲙ̅ⲙⲁⲩ  ⲁⲩⲱ  ⲁϥϯ ⲛⲁⲩ  ⲛ̅ⲟⲩⲛⲟⲙⲟⲥ  ⲙⲛ̅ⲟⲩϩⲁⲡ ϩⲛ̅Ⲥⲏⲗⲱ  ⲙ̅ⲡⲙ̅ⲧⲟ ⲉⲃⲟⲗ ⲛ̅ⲧⲉⲥⲕⲏⲛⲏ  ⲙ̅ⲡⲛⲟⲩⲧⲉ  ⲙ̅ⲡⲒⲥⲣⲁⲏⲗ : Ⲁⲩⲱ ⲁϥⲥϩⲁⲓ ⲛ̅ⲛⲉⲓϣⲁϫⲉ ⲉⲩϫⲱⲱⲙⲉ ⲛ̅ⲟⲩⲛⲟⲙⲟⲥ ⲙ̅ⲡⲛⲟⲩⲧⲉ . ⲁⲩⲱ ⲁϥϫⲓ ⲛ̅ⲟⲩⲛⲟϭ ⲛ̅ⲱⲛⲉ  ⲁϥⲧⲁϩⲟϥ ⲉⲣⲁⲧϥ̅ ⲛ̅ϭⲓⲒⲏⲥⲟⲩⲥ  ϩⲁⲣⲟⲥ  ⲛ̅ⲧⲧⲉⲣⲉⲙⲓⲛⲑⲟⲥ  ⲙ̅ⲡⲙ̅ⲧⲟ ⲉⲃⲟⲗ ⲙ̅Ⲡϫⲟⲉⲓⲥ : Ⲁⲩⲱ Ⲓⲏⲥⲟⲩⲥ  ⲡⲉϫⲁϥ ⲙ̅ⲡⲗⲁⲟⲥ ϫⲉ ⲉⲓⲥ  ⲡⲉⲓⲱⲛⲉ ⲉϥⲛⲁϣⲱⲡⲉ  ϩⲣⲁⲓ ⲛ̅ϩⲏⲧⲧⲏⲩⲧⲛ̅ ⲉⲩⲙⲛ̅ⲧⲙⲛ̅ⲧⲣⲉ . ϫⲉ ⲛ̅ⲧⲟϥ ⲡⲉⲛⲧⲁϥⲥⲱⲧⲙ̅ ⲉⲛ̅ϣⲁϫⲉ ⲧⲏⲣⲟⲩ ⲉⲛⲧⲁⲠϫⲟⲉⲓⲥ ϫⲟⲟⲩ ⲉⲣⲱⲧⲛ̅ . ⲉⲃⲟⲗϫⲉ ⲛ̅ⲧⲟϥ  ⲁϥϣⲁϫⲉ ⲛⲙ̅ⲙⲏⲧⲛ̅ ⲙ̅ⲡⲟⲟⲩ. ⲁⲩⲱ ⲡⲁⲓ ϥⲛⲁϣⲱⲡⲉ ⲉϩⲣⲁⲓ  ⲛ̅ϩⲏⲧⲧⲏⲩⲧⲛ̅ ⲉⲩⲙⲛ̅ⲧⲙⲛ̅ⲧⲣⲉ ⲛ̅ⲛⲉϩⲟⲟⲩ ⲛ̅ϩⲁⲉ  . ⲉⲧⲉⲧⲛ̅ϣⲁⲛϫⲓϭⲟⲗ ⲉⲠϫⲟⲉⲓⲥ  ⲡⲉⲛⲛⲟⲩⲧⲉ. Ⲁⲩⲱ Ⲓⲏⲥⲟⲩⲥ  ⲁϥϫⲟⲟⲩ  ⲙ̅ⲡⲗⲁⲟⲥ ⲧⲏⲣϥ̅  ⲁϥⲃⲱⲕ  ⲛ̅ϭⲓⲡⲟⲩⲁ  ⲡⲟⲩⲁ ⲉϩⲣⲁⲓ ⲉⲡⲉϥⲙⲁ . ⲁⲩⲱ ⲁϥϣⲙ̅ϣⲉ  ⲛ̅ϭⲓⲡⲒⲥⲣⲁⲏⲗ  ⲙ̅Ⲡϫⲟⲉⲓⲥ  ⲛ̅ⲛⲉϩⲟⲟⲩ ⲧⲏⲣⲟⲩ  ⲛ̅Ⲓⲏⲥⲟⲩⲥ . ⲁⲩⲱ  ⲛ̅ⲛⲉϩⲟⲟⲩ ⲧⲏⲣⲟⲩ  ⲛ̅ⲛⲉⲡⲣⲉⲥⲃⲩⲧⲉⲣⲟⲥ. ⲛ̅ⲛⲉⲛⲧⲁⲩⲉⲓⲣⲉ  ⲙ̅ⲡⲉⲩⲟⲩⲟⲉⲓϣ  ⲙⲛ̅Ⲓⲏⲥⲟⲩⲥ. Ⲁⲩⲱ ⲛ̅ⲕⲟⲟⲩⲉ ⲉⲛ̅ⲧⲁⲩⲛⲁⲩ ⲉⲛⲉϩⲃⲏⲩⲉ ⲧⲏⲣⲟⲩ  ⲙ̅Ⲡϫⲟⲉⲓⲥ ⲛⲁⲓ ⲉⲛⲧⲁϥⲁⲁⲩ ⲙⲛ̅ⲡⲒⲥⲣⲁⲏⲗ. Ⲁⲩⲱ  ⲁⲥϣⲱⲡⲉ  ⲙⲛ̅ⲛⲥⲁ ⲛ̅ⲉϩⲟⲟⲩ ⲉⲧⲙ̅ⲙⲁⲩ  ⲁϥⲙⲟⲩ ⲛ̅ϭⲓⲒⲏⲥⲟⲩⲥ  ⲡϣⲏⲣⲉ ⲛ̅Ⲛⲁⲩⲏ  ⲡϩⲙ̅ϩⲁⲗ  ⲙ̅Ⲡϫⲟⲉⲓⲥ  ⲉϥϩⲛ̅ϣⲉⲙⲏⲧⲉ  ⲛ̅ⲣⲟⲙⲡⲉ.  ⲁⲩⲱ ⲁⲩⲟⲙⲥϥ̅ ϩⲛ̅ⲛⲧⲟϣ  ⲙ̅ⲡⲉϥⲕⲗⲏⲣⲟⲥ  ϩⲛ̅Ⲑⲁⲙⲛⲁⲥⲁⲭⲁⲣ  ϩⲙ̅ⲡⲧⲟⲟⲩ ⲛ̅Ⲉⲫⲣⲁⲓⲙ  ⲛ̅ⲥⲁⲡⲉⲙϩⲓⲧ ⲙ̅ⲡⲧⲟⲟⲩ ⲛ̅Ⲅⲁⲗⲁⲁⲇ . ⲁⲩⲱ  ⲁϥⲕⲱ ϩⲁϩⲧⲏϥ ϩⲙ̅ⲡⲉⲙ̅ϩⲁⲁⲩ ⲉⲛⲧⲁⲩⲧⲟⲙⲥϥ̅  ⲛ̅ϩⲏⲧϥ̅ ⲛ̅ⲛⲥⲏϥⲉ  ⲙ̅ⲡⲉⲧⲣⲁ ⲛⲉⲛⲧⲁϥⲥⲃ̅ⲃⲉ ⲛ̅ϩⲏⲧⲟⲩ ⲛ̅ⲛϣⲏⲣⲉ  ⲙ̅ⲡⲒⲥⲣⲁⲏⲗ  ϩⲛ̅Ⲅⲁⲗⲅⲁⲗⲁ ⲛⲧⲉⲣϥ̅ⲛ̅ⲧⲟⲩ ⲉⲃⲟⲗ  ϩⲙ̅ⲡⲕⲁϩ  ⲛ̅Ⲕⲏⲙⲉ ⲕⲁⲧⲁⲑⲉ ⲛ̅ⲧⲁⲠϫⲟⲉⲓⲥ  ϩⲱⲛ ⲉⲧⲟⲟⲧⲟⲩ ⲁⲩⲱ ⲥⲉϩⲙ̅ⲡⲙⲁ ⲉⲧⲙ̅ⲙⲁⲩ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ : Ⲁⲩⲱ ⲛ̅ⲕⲉⲉⲥ  ⲛ̅Ⲓⲱⲥⲏⲫ ⲁⲩⲛ̅ⲧⲟⲩ ⲉϩⲣⲁⲓ ⲛ̅ϭⲓⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ  ⲉⲃⲟⲗ ϩⲛ̅Ⲕⲏⲙⲉ. ⲁⲩⲧⲟⲙⲥⲟⲩ ϩⲛ̅Ⲥⲓⲕⲓⲙⲁ  ϩⲛ̅ⲧⲙⲉⲣⲓⲥ  ϩⲛ̅ⲧⲥⲱϣⲉ ⲧⲁⲓ ⲉⲛⲧⲁϥϣⲟⲡⲥ  ⲛ̅ϭⲓⲒⲁⲕⲟⲃ ⲛ̅ⲧⲟⲟⲧⲟⲩ ⲛ̅ⲛⲀⲙⲟⲣⲣⲁⲓⲟⲥ  ⲛⲉⲧⲟⲩⲏϩ  ϩⲙ̅ⲡⲕⲁϩ ⲛ̅Ⲥⲓⲕⲓⲙⲁ  ϩⲁϣⲉ ⲛ̅ϩⲓⲉⲓⲃ ⲛ̅ⲛⲉⲥⲟⲟⲩ. ⲁⲩⲱ ⲁϥⲧⲁⲁⲥ  ⲛ̅Ⲓⲱⲥⲏⲫ ϩⲛ̅ⲟⲩⲧⲟ ⲛ̅ⲕⲗⲏⲣⲟⲛⲟⲙⲓⲁ : Ⲁⲩⲱ  ⲁⲥϣⲱⲡⲉ  ⲙⲛ̅ⲛⲥⲁⲛⲁⲓ Ⲉⲗⲉⲁⲍⲁⲣ ⲡϣⲏⲣⲉ ⲛ̅Ⲁⲁⲣⲱⲛ ⲡⲁⲣⲭⲓⲉⲣⲉⲩⲥ  ⲁϥⲙⲟⲩ . ⲁⲩⲱ  ⲁⲩⲧⲟⲙⲥϥ̅ ϩⲛ̅Ⲅⲁⲃⲁⲁⲣ  ⲛ̅ϭⲓⲪⲓⲛⲉⲉⲥ ⲡⲉϥϣⲏⲣⲉ . ⲧⲁⲓ ⲉⲛⲧⲁϥⲧⲁⲁⲥ ⲛⲁϥ ϩⲙⲡⲧⲟⲟⲩ ⲛ̅Ⲉⲫⲣⲁⲓⲙ : Ϩⲛ̅ⲛⲉϩⲟⲟⲩ ⲉⲧⲙ̅ⲙⲁⲩ ⲁⲩϫⲓ ⲛ̅ϭⲓⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲛ̅ⲧϭⲓⲃⲱⲧⲟⲥ  ⲙ̅ⲡⲛⲟⲩⲧⲉ  ⲁⲩⲕⲱⲧⲉ ⲛⲙ̅ⲙⲁⲥ  ϩⲣⲁⲓ ⲛ̅ϩⲏⲧⲟⲩ . ⲁⲩⲱ Ⲫⲓⲛⲉⲉⲥ  ⲁϥϫⲓ ⲛ̅ⲧⲙⲛ̅ⲧⲟⲩⲏⲏⲃ ⲉⲡⲙⲁ ⲛ̅Ⲉⲗⲉⲁⲍⲁⲣ ⲡⲉϥⲉⲓⲱⲧ ϣⲁⲛⲧϥ̅ⲙⲟⲩ . ⲁⲩⲱ ⲁⲩⲧⲟⲙⲥϥ̅ ϩⲛ̅Ⲅⲁⲃⲁⲁⲣ ⲛ̅ⲧⲉⲡⲉϥⲕⲁϩ : Ⲛ̅ϣⲏⲣⲉ ⲇⲉ ⲙ̅ⲡⲒⲥⲣⲁⲏⲗ  ⲁⲩⲃⲱⲕ ⲡⲟⲩⲁ ⲡⲟⲩⲁ  ⲙ̅ⲙⲟⲟⲩ ⲉϩⲣⲁⲓ ⲉⲡⲉϥⲙⲁ  ⲁⲩⲱ ⲉϩⲣⲁⲓ ⲉⲧⲉϥⲡⲟⲗⲓⲥ . Ⲁⲩⲱ ⲛ̅ϣⲏⲣⲉ  ⲙ̅ⲡⲒⲥⲣⲁⲏⲗ  ⲁⲩϣⲙ̅ϣⲉ ⲛ̅ⲧⲀⲥⲧⲁⲣⲧⲏ . ⲁⲩⲱ Ⲁⲥⲧⲁⲣⲱⲑ ⲁⲩⲱ ⲛ̅ⲛⲟⲩⲧⲉ ⲛ̅ⲛϩⲉⲑⲛⲟⲥ ⲉⲧϩⲙ̅ⲡⲉⲩⲕⲱⲧⲉ . Ⲁⲩⲱ Ⲡϫⲟⲓⲥ  ⲁϥⲧⲁⲁⲩ ⲉϩⲣⲁⲓ ⲉⲧⲟⲟⲧϥ̅ ⲛ̅Ⲉⲅⲗⲱⲙ ⲡⲣ̅ⲣⲟ ⲙ̅Ⲙⲱⲁⲃ . Ⲁⲩⲱ ⲁϥⲣ̅ϫⲟⲉⲓⲥ ⲉϫⲱⲟⲩ ⲙ̅ⲙⲏⲧϣⲙⲏⲛⲉ ⲛ̅ⲣⲟⲙⲡⲉ               :
 

ⲡϫⲱⲱⲙⲉ ⲛ̅ⲓⲏⲥⲟⲩⲥ ⲡϣⲏⲣⲉ ⲛ̅ⲛⲁⲩⲏ

---