PGWWME =NNRE$%HAP

ⲠϪⲰⲰⲘⲈ Ⲛ̅ⲚⲢⲈϤϯϨⲀⲠ

Ⲁⲥϣⲱⲡⲉ ⲇⲉ ⲙⲛ̅ⲛⲥⲁⲧⲣⲉⲒⲏⲥⲟⲩⲥ ⲡϣⲏⲣⲉ ⲛ̅Ⲛⲁⲩⲏ ⲙⲟⲩ. ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩϫⲛⲟⲩⲠϫⲟⲉⲓⲥ ⲉⲩϫⲱ ⲙ̅ⲙⲟⲥ. ϫⲉ ⲛⲓⲙ ⲡⲉⲧⲛⲁⲙⲟⲟϣⲉ ϩⲓϩⲏ ⲙ̅ⲙⲟⲛ ⲉⲣⲁⲧⲟⲩ ⲛ̅ⲛⲉⲬⲁⲛⲁⲛⲁⲓⲟⲥ ⲉⲙⲓϣⲉ ⲛⲙ̅ⲙⲁⲩ. ⲠⲉϫⲉⲠϫⲟⲉⲓⲥ ⲛⲁⲩ ϫⲉ Ⲓⲟⲩⲇⲁⲥ ⲡⲉ ⲡⲉⲧⲛⲁⲙⲟⲟϣⲉ ϩⲓϩⲏ ⲙ̅ⲙⲱⲧⲛ̅ Ⲉⲓⲥ ϩⲏⲏⲧⲉ ⲁⲓϯ ⲙ̅ⲡⲕⲁϩ ⲉϩⲣⲁⲓ ⲉⲧⲟⲟⲧϥ̅. Ⲁⲩⲱ ⲡⲉϫⲉⲒⲟⲩⲇⲁⲥ ⲛ̅Ⲥⲩⲙⲉⲱⲛ ⲡⲉϥⲥⲟⲛ ϫⲉ ⲁⲙⲟⲩ ⲉϩⲣⲁⲓ ⲛⲙ̅ⲙⲁⲓ ϩⲙ̅ⲡⲁⲕⲗⲏⲣⲟⲥ ⲛ̅ⲧⲛ̅ⲙⲓϣⲉ ⲙⲛ̅ⲛⲉⲬⲁⲛⲁⲛⲁⲓⲟⲥ . ⲁⲩⲱ ϯⲛⲁⲉⲓ ⲛⲙ̅ⲙⲁⲕ ϩⲣⲁⲓ ϩⲙ̅ⲡⲉⲕⲕⲗⲏⲣⲟⲥ. Ⲁⲥⲩⲙⲉⲱⲛ ⲃⲱⲕ ⲛⲙ̅ⲙⲁϥ : Ⲓⲟⲩⲇⲁⲥ ⲇⲉ ⲁϥⲃⲱⲕ ⲛⲙ̅ⲙⲁϥ ⲉϩⲣⲁⲓ . ⲁⲩⲱ Ⲡϫⲟⲉⲓⲥ ⲙ̅ⲡⲒⲥⲣⲁⲏⲗ ⲁϥϯ ⲙ̅ⲡⲉⲬⲁⲛⲁⲛⲁⲓⲟⲥ ⲙⲛ̅ⲡⲉⲪⲉⲣⲉⲍⲁⲓⲟⲥ ⲉϩⲣⲁⲓ ⲉⲧⲟⲟⲧⲟⲩ ⲁⲩϩⲱⲧⲃ̅ ⲙ̅ⲙⲟⲟⲩ ϩⲛ̅Ⲃⲉⲍⲉⲕ ⲉⲩⲛⲁⲣ̅ⲟⲩⲧⲃⲁ ⲛ̅ⲣⲱⲙⲉ. Ⲁⲩⲱ ⲁⲩⲧⲁϩⲉⲀⲇⲱⲛⲓⲃⲉⲍⲉⲕ ⲁⲩⲙⲓϣⲉ ϩⲣⲁⲓ ϩⲛ̅Ⲃⲉⲍⲉⲕ. Ⲁⲩϩⲱⲧⲃ̅ ⲇⲉ ⲙ̅ⲡⲉⲬⲁⲛⲁⲛⲁⲓⲟⲥ ⲙⲛ̅ⲡⲉⲪⲉⲣⲉⲍⲁⲓⲟⲥ. ⲁⲩⲱ ⲁϥⲡⲱⲧ ⲛ̅ϭⲓⲀⲇⲱⲛⲓⲃⲉⲍⲉⲕ ⲁ̅ϥⲡⲱⲧ ⲛ̅ⲥⲱϥ ⲁⲩⲧⲁϩⲟϥ . Ⲁⲩϣⲱⲱⲧ ⲛ̅ⲛⲉϩⲧⲏⲩ ⲛ̅ⲛⲉϥϭⲓϫ ⲙⲛ̅ⲛϩⲧⲏⲩ ⲛ̅ⲛⲉϥⲟⲩⲉⲣⲏⲧⲉ : ⲠⲉϫⲉⲀⲇⲱⲛⲓⲃⲉⲍⲉⲕ ϫⲉ ϣⲃⲉ ⲛ̅ⲣ̅ⲣⲟ ⲉⲣⲉϩⲧⲏⲩ ⲛ̅ⲛⲉⲩϭⲓϫ ⲙⲛ̅ⲛⲉⲩⲟⲩⲉⲣⲏⲧⲉ ⲥⲟⲗⲡ ⲉⲃⲟⲗ ⲉⲩⲕⲱⲧϥ̅ ⲛ̅ⲛⲉⲧϩⲁⲣⲟⲥ ⲛ̅ⲧⲁⲧⲣⲁⲡⲉⲍⲁ . Ⲕⲁⲧⲁⲑⲉ ϭⲉ ⲉⲛⲧⲁⲓⲁⲁⲥ ⲛⲁⲩ ⲧⲁⲓ ⲧⲉ ⲑⲉ ⲉⲛⲧⲁⲡⲛⲟⲩⲧⲉ ⲧⲱⲱⲃⲉ ⲛⲁⲓ . Ⲁⲩⲱ ⲁⲩⲛ̅ⲧϥ̅ ⲉϩⲣⲁⲓ ⲉⲐⲓⲉⲣⲟⲩⲥⲁⲗⲏⲙ ⲁϥⲙⲟⲩ ⲙ̅ⲡⲙⲁ ⲉⲧⲙ̅ⲙⲁⲩ ⲁⲩⲱ ⲛ̅ϣⲏⲣⲉ ⲛ̅Ⲓⲟⲩⲇⲁⲥ ⲁⲩⲙⲓϣⲉ ⲙⲛ̅Ⲑⲓⲉⲣⲟⲩⲥⲁⲗⲏⲙ. Ⲁⲩⲙⲓϣⲉ ⲛⲙ̅ⲙⲁⲥ ⲁⲩϫⲓⲧⲥ̅ . ⲁⲩⲡⲁⲧⲁⲥⲥⲉ ⲙ̅ⲙⲟⲥ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ ⲁⲩⲱ ⲧⲡⲟⲗⲓⲥ ⲁⲩⲣⲟⲕϩⲥ̅ ϩⲛ̅ⲟⲩⲥⲁⲧⲉ : Ⲙⲛ̅ⲛ̅ⲥⲁⲛⲁⲓ ⲇⲉ ⲁⲩⲉⲓ ⲉϩⲣⲁⲓ ⲛ̅ϭⲓⲛ̅ϣⲏⲣⲉ ⲛ̅Ⲓⲟⲩⲇⲁⲥ ⲉⲙⲓϣⲉ ⲙⲛ̅ⲡⲉⲬⲁⲛⲁⲛⲁⲓⲟⲥ ⲡⲉⲧⲟⲩⲏϩ ϩⲛ̅ⲧⲟⲣⲓⲛⲏ ⲙⲛ̅ⲡⲥⲁ ⲙ̅ⲡⲣⲏⲥ. ⲙⲛ̅ⲧⲡⲉⲇⲓⲛⲏ. ⲉⲧⲉⲡⲕⲁϩ ⲡⲉ ⲉⲧϩⲓⲡϭⲟⲛ : Ⲁⲩⲱ Ⲓⲟⲩⲇⲁⲥ ⲁϥⲃⲱⲕ ⲉⲣⲁⲧϥ̅ ⲙ̅ⲡⲉⲬⲁⲛⲁⲛⲁⲓⲟⲥ ⲡⲉⲧⲟⲩⲏϩ ϩⲛ̅Ⲭⲉⲃⲣⲱⲛ . Ⲁⲩⲱ Ⲭⲉⲃⲣⲱⲛ ⲁⲥⲉⲓ ⲉⲃⲟⲗ ⲉⲙⲓϣⲉ ⲛⲙ̅ⲙⲁϥ. Ⲡⲣⲁⲛ ⲇⲉ ⲛ̅Ⲭⲉⲃⲣⲱⲛ ⲛ̅ϣⲟⲣⲡ̅ ⲉⲩⲙⲟⲩⲧⲉ ⲉⲣⲟⲥ ϫⲉ Ⲕⲁⲣⲓⲁⲣⲃⲟⲕⲥⲉⲫⲉⲣ. ⲁⲩⲱ ⲁⲩϭⲟϫϭϫ̅ ⲛ̅Ⲥⲉⲥⲓ ⲙⲛ̅Ⲁⲭⲓⲙⲁⲁⲛ . ⲙⲛ̅Ⲑⲟⲗⲙⲉⲓ ⲙ̅ⲡⲉϫⲡⲟ ⲛ̅Ⲉⲛⲁⲕ . ⲁⲩⲱ ⲁⲩⲡⲱⲱⲛⲉ ⲉⲃⲟⲗ ⲙ̅ⲡⲙⲁ ⲉⲧⲙ̅ⲙⲁⲩ ⲉⲣⲁⲧⲟⲩ ⲛ̅ⲛⲉⲧⲟⲩⲏϩ ϩⲛ̅Ⲇⲁⲃⲉⲓⲣ . Ⲡⲣⲁⲛ ⲇⲉ ⲛ̅Ⲇⲁⲃⲉⲓⲣ ⲛ̅ϣⲟⲣⲡ̅ ⲉⲩⲙⲟⲩⲧⲉ ⲉⲣⲟⲥ ϫⲉ Ⲕⲁⲣⲓⲁⲥⲱⲫⲁⲣ ⲉⲧⲉⲧⲡⲟⲗⲓⲥ ⲧⲉ ⲛ̅ⲛⲉⲥϩⲁⲓ: Ⲁⲩⲱ Ⲭⲁⲗⲉⲃ ⲡⲉϫⲁϥ ϫⲉ ⲡⲉⲧⲛⲁⲡⲁⲧⲁⲥⲥⲉ ⲛ̅ⲧⲡⲟⲗⲓⲥ ⲛ̅ⲥϩⲁⲓ ⲛϥ̅ϫⲓⲧⲥ̅. ϯⲛⲁϯ ⲛⲁϥ ⲛ̅Ⲉⲥⲭⲁ ⲧⲁϣⲉⲉⲣⲉ ⲉⲧⲣⲉⲥϣⲱⲡⲉ ⲛⲁϥ ⲛ̅ⲥϩⲓⲙⲉ. Ⲁⲩⲱ Ⲅⲟⲑⲟⲛⲓⲏⲗ ⲡϣⲏⲣⲉ ⲛ̅Ⲅⲉⲛⲉⲍ ⲡⲥⲟⲛ ⲛ̅Ⲭⲁⲗⲉⲃ ⲡⲕⲟⲩⲓ ⲉⲣⲟϥ ⲁϥϫⲓⲧⲡⲟⲗⲓⲥ . ⲁⲩⲱ Ⲭⲁⲗⲉⲃ ⲁϥϯ ⲛⲁϥ ⲛ̅ⲧⲉϥϣⲉⲉⲣⲉ ⲉⲧⲣⲉⲥϣⲱⲡⲉ ⲛⲁϥ ⲛ̅ⲥϩⲓⲙⲉ : Ⲁⲥϣⲱⲡⲉ ⲇⲉ ⲉⲥⲛⲏⲩ ⲉⲃⲟⲗ ⲁϥⲧⲱⲃⲥ ⲙ̅ⲙⲟⲥ ⲉⲧⲣⲉⲥⲁⲓⲧⲉⲓ ⲛ̅ⲟⲩⲥⲱϣⲉ ⲛ̅ⲧⲟⲟⲧϥ̅ ⲙ̅ⲡⲉⲥⲉⲓⲱⲧ. Ⲁⲩⲱ ⲁⲥⲕⲣⲙ̅ⲣⲙ̅ ⲁⲥϫⲓϣⲕⲁⲕ ⲉⲃⲟⲗ ⲉⲥϩⲓϫⲙ̅ⲡϥⲁⲓⲛⲁϩⲃ . ϫⲉ ⲉⲛⲧⲁⲕⲧⲁⲁⲧ ⲉⲡⲕⲁϩ ⲙ̅ⲡⲣⲏⲥ. ⲠⲉϫⲉⲬⲁⲗⲉⲃ ⲛⲁⲥ ϫⲉ ⲁϩⲣⲟ ⲉⲣⲉⲁϩⲉ ⲛ̅ⲟⲩ . ⲠⲉϫⲉⲈⲥⲭⲁ ⲛⲁϥ ϫⲉ ⲙⲁ ⲛⲁⲓ ⲛ̅ⲟⲩⲉⲩⲗⲟⲅⲓⲁ ϫⲉ ⲉⲛⲧⲁⲕⲧⲁⲁⲧ ⲉⲡⲕⲁϩ ⲙ̅ⲡⲣⲏⲥ ⲉⲕⲉϯ ⲛⲁⲓ ⲛ̅ⲟⲩⲥⲱⲧⲉ ⲙ̅ⲙⲱⲟⲩ. ⲁⲩⲱ Ⲭⲁⲗⲉⲃ ⲁϥϯ ⲛⲁⲥ ⲕⲁⲧⲁⲡⲉⲥϩⲏⲧ ⲛ̅ⲟⲩⲥⲱⲧⲉ ⲛ̅ⲛⲉⲧϫⲟⲥⲉ. ⲁⲩⲱ ⲟⲩⲥⲱⲧⲉ ⲛ̅ⲛⲉⲧⲑⲃ̅ⲃⲓⲏⲩ. ⲡⲧⲟⲟⲩ ⲙⲛ̅ⲛⲉⲧⲏⲡ ⲉⲣⲟϥ . ⲁⲩⲱ ⲡⲉⲧϩⲙ̅ⲡⲥⲁ ⲙ̅ⲡⲉⲓⲃⲧ : Ⲁⲩⲱ ⲡϣⲏⲣⲉ ⲛ̅Ⲓⲟⲃⲁ ⲡⲔⲓⲛⲛⲁⲓⲟⲥ ⲡϣⲟⲙ ⲙ̅Ⲙⲱⲟⲩⲥⲏⲥ . ⲁⲩⲉⲓ ⲉϩⲣⲁⲓ ⲉⲧⲡⲟⲗⲓⲥ ⲛ̅ⲛⲉⲪⲟⲓⲛⲓⲝ ⲙⲛ̅ⲛϣⲏⲣⲉ ⲛ̅Ⲓⲟⲩⲇⲁ ⲉⲃⲟⲗ ⲉⲧⲉⲣⲏⲙⲟⲥ ⲧⲉⲧϩⲙ̅ⲡⲣⲏⲥ   ⲛ̅Ⲓⲟⲩⲇⲁ ⲧⲉⲧϩⲛ̅ⲧⲉϩⲓⲏ ⲛⲓ ⲉⲡⲉⲥⲏⲧ ⲛ̅Ⲁⲣⲁⲇ. ⲁⲩⲃⲱⲕ ⲁⲩⲟⲩⲱϩ ⲙⲛ̅ⲡⲗⲁⲟⲥ ⲙ̅ⲡⲀⲙⲁⲗⲏⲕ: Ⲁⲩⲱ Ⲓⲟⲩⲇⲁⲥ ⲁϥⲃⲱⲕ ⲙⲛ̅Ⲥⲩⲙⲉⲱⲛ ⲡⲉϥⲥⲟⲛ ⲁⲩϩⲱⲧⲃ̅ ⲙ̅ⲡⲉⲬⲁⲛⲁⲛⲁⲓⲟⲥ ⲡⲉⲧⲟⲩⲏϩ ϩⲛ̅Ⲥⲉⲫⲉⲕ ⲁⲩⲫⲟⲧⲥ̅ ⲉⲃⲟⲗ ⲁⲩⲁⲁⲥ ⲛ̅ⲁⲛⲁⲑⲏⲙⲁ . Ⲁⲩⲱ ⲁⲩⲙⲟⲩⲧⲉ ⲉⲡⲣⲁⲛ ⲛ̅ⲧⲡⲟⲗⲓⲥ . ϫⲉ Ⲁⲛⲁⲑⲉⲙⲁ . ⲁⲩⲱ Ⲓⲟⲩⲇⲁ ⲁⲥⲡⲁⲧⲁⲥⲥⲉ ⲛ̅Ⲅⲁⲍⲁ ⲛⲉⲙⲛⲉϥⲧⲱϣ ⲧⲏⲣⲟⲩ. ⲟⲩⲇⲉ Ⲁⲕⲕⲁⲣⲱⲛ ⲟⲩⲇⲉ ⲛⲉⲥⲧⲟϣ ⲟⲩⲇⲉ Ⲗⲁⲍⲱⲧⲟⲥ ⲟⲩⲇⲉ ⲛⲉⲥⲧⲟϣ : Ⲁⲩⲱ Ⲡϫⲟⲉⲓⲥ ⲛ̅ⲛⲉϥϣⲟⲟⲡ ⲛ̅ⲛⲒⲟⲩⲇⲁ ⲁϥⲕⲗⲏⲣⲟⲛⲟⲙⲉⲓ ⲙ̅ⲡⲧⲟⲟⲩ. ϫⲉ ⲙ̅ⲡⲟⲩϭⲙ̅ϭⲟⲙ ⲉⲕⲗⲏⲣⲟⲛⲟⲙⲓ ⲛ̅ⲛⲉⲧⲟⲩⲏϩ ϩⲙ̅ⲡⲉⲓⲁ. ϫⲉ Ϩⲣⲏⲭⲁⲁⲃ ⲁⲥ.... ⲛⲁⲩ ⲉⲃⲟⲗ. ⲁⲩⲱ ⲉⲛⲉⲩϣⲟⲟⲡ ⲛⲁⲩ ⲛ̅ϭⲓϩⲉⲛϩⲁⲣⲙⲁ ⲙ̅ⲡⲉⲛⲓⲡⲉ. Ⲁⲩⲱ Ⲭⲁⲗⲉⲃ ⲁϥϯ ⲛⲁϥ ⲛ̅Ⲭⲉⲃⲣⲱⲛ ⲉⲛⲧⲁⲘⲱⲟⲩⲥⲏⲥ ϣⲁϫⲉ ⲛⲙ̅ⲙⲁⲩ . ⲁⲩⲱ ⲁϥⲕⲗⲏⲣⲟⲛⲟⲙⲉⲓ ϫⲓⲛⲡⲙⲁ ⲉⲧⲙ̅ⲙⲁⲩ ⲛ̅ⲧϣⲟⲙⲧⲉ ⲙ̅ⲡⲟⲗⲓⲥ ⲛ̅ⲛϣⲏⲣⲉ ⲛ̅Ⲉⲛⲁⲕ. ⲁⲩⲱ ⲁⲩϥⲓ ⲉⲃⲟⲗ ⲙ̅ⲙⲁⲩ ⲙ̅ⲡϣⲟⲙⲛ̅ⲧ ⲛ̅ϣⲏⲣⲉ ⲛ̅Ⲉⲛⲁⲕ : Ⲁⲩⲱ ⲡⲒⲉⲃⲟⲩⲥⲁⲓⲟⲥ ⲡⲉⲧⲟⲩⲏϩ ϩⲛ̅Ⲑⲓⲉⲣⲟⲩⲥⲁⲗⲏⲙ ⲙ̅ⲡⲉⲛϣⲏⲣⲉ ⲛ̅Ⲃⲉⲛⲓⲁⲙⲓⲛ ⲕⲗⲏⲣⲟⲛⲟⲙⲉⲓ ⲙ̅ⲙⲟϥ . ⲁⲡⲒⲉⲃⲟⲩⲥⲁⲓⲟⲥ ⲇⲉ ⲟⲩⲱϩ ⲙⲛ̅ⲛϣⲏⲣⲉ ⲛ̅Ⲃⲉⲛⲓⲁⲙⲓⲛ ϩⲛ̅Ⲑⲓⲉⲣⲟⲩⲥⲁⲗⲏⲙ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ: Ⲁⲩⲱ ⲛ̅ϣⲏⲣⲉ ⲛ̅Ⲓⲱⲥⲏⲫ ⲁⲩⲉⲓ ⲉϩⲣⲁⲓ ⲉⲂⲁⲓⲑⲏⲗ. ⲁⲩⲱⲠϫⲟⲉⲓⲥ ⲛⲉϥϣⲱⲡⲉ ⲛⲙ̅ⲙⲁⲩ ⲁⲩⲁⲙⲁϩⲧⲉ ⲛ̅Ⲃⲁⲓⲑⲏⲗ . Ⲡⲣⲁⲛ ⲇⲉ ⲛ̅ⲧⲉⲩⲡⲟⲗⲓⲥ ⲛ̅ϣⲟⲣⲡ ⲧⲉ Ⲗⲟⲩⲍⲁ. Ⲁⲩⲱ ⲁⲩϭⲱϣⲧ̅ ⲛ̅ϭⲓⲛⲉⲧⲣⲟⲉⲓⲥ   ⲁⲩⲛⲁⲩ ⲁⲩⲣⲱⲙⲉ ⲉⲁϥⲉⲓ ⲉⲃⲟⲗ ϩⲛ̅ⲧⲡⲟⲗⲓⲥ. Ⲁⲩⲁⲙⲁϩⲧⲉ ⲙ̅ⲙⲟϥ ⲉⲩϫⲱ ⲙ̅ⲙⲟⲥ . ϫⲉ ⲙⲁⲧⲥⲁⲃⲟⲛ ⲉⲧⲉϩⲓⲏ ⲛ̅ⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ⲁⲩⲱ ⲧⲛ̅ⲛⲁⲉⲓⲣⲉ ⲛⲙ̅ⲙⲁⲕ ⲛ̅ⲟⲩⲛⲁ. Ⲁϥⲧⲥⲁⲃⲟⲟⲩ ⲉⲧⲉϩⲓⲏ ⲉϩⲟⲩⲛ ⲉⲧⲡⲟⲗⲓⲥ . Ⲁⲩⲡⲁⲧⲁⲥⲥⲉ ⲛ̅ⲧⲡⲟⲗⲓⲥ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ. Ⲡⲣⲱⲙⲉ ⲇⲉ ⲙⲛ̅ⲧⲉϥⲥⲩⲅⲅⲉⲛⲓⲁ ⲁⲩⲟⲩⲟⲟⲧⲟⲩ ⲉⲃⲟⲗ. Ⲡⲣⲱⲙⲉ ⲇⲉ ⲁϥⲃⲱⲕ ⲉϩⲣⲁⲓ ⲉⲡⲕⲁϩ ⲛ̅ⲛⲬⲉⲧⲧⲓⲙ ⲁϥⲕⲱⲧ ̅ⲛⲟⲩⲡⲟⲗⲓⲥ ⲙ̅ⲡⲙⲁ ⲉⲧⲙ̅ⲙⲁⲩ ⲁϥⲙⲟⲩⲧⲉ ⲉⲡⲉⲥⲣⲁⲛ ϫⲉ Ⲗⲟⲩⲍⲁ . Ⲡⲁⲓ ⲡⲉ ⲡⲉⲥⲣⲁⲛ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ: Ⲁⲩⲱ Ⲙⲁⲛⲁⲥⲥⲏ ⲙ̅ⲡϥ̅ϥⲓ ⲙ̅ⲙⲁⲩ ⲙ̅Ⲃⲁⲓⲑⲥⲁⲛ ⲉⲧⲉⲧⲡⲟⲗⲓⲥ ⲧⲉ ⲛ̅ⲛⲉⲥⲕⲩⲑⲏⲥ ⲟⲩⲇⲉ ⲛⲉⲥⲧⲙⲉ. ⲟⲩⲇⲉ ⲛⲉⲧⲕⲱⲧⲉ ⲉⲣⲟⲥ . ⲟⲩⲇⲉ ⲛⲉⲧⲟⲩⲏϩ ϩⲛ̅Ⲁⲓⲕⲑⲁⲉⲛⲁ . ⲟⲩⲇⲉ ⲛⲉⲧⲕⲱⲧⲉ ⲉⲣⲟⲥ . ⲟⲩⲇⲉ ⲛⲉⲥⲧⲙⲉ . ⲟⲩⲇⲉ ⲛⲉⲧⲟⲩⲏϩ ϩⲛ̅Ⲃⲁⲗⲁⲕ ⲟⲩⲇⲉ ⲛⲉⲧⲕⲱⲧⲉ ⲉⲣⲟⲥ . ⲟⲩⲇⲉ ⲛⲉⲥⲧⲙⲉ . ⲟⲩⲇⲉ ⲛⲉⲧⲟⲩⲏϩ ϩⲙ̅Ⲙⲁⲅⲉⲇⲇⲱ. ⲟⲩⲇⲉ ⲛⲉⲧⲕⲱⲧⲉ ⲉⲣⲟⲥ . ⲟⲩⲇⲉ ⲛⲉⲧⲟⲩⲏϩ ϩⲛ̅Ⲓⲉⲃⲗⲁⲁⲙ . ⲟⲩⲇⲉ ⲛⲉⲧⲕⲱⲧⲉ ⲉⲣⲟⲥ . ⲟⲩⲇⲉ ⲛⲉⲥⲧⲙⲉ. ⲁⲩⲱ ⲁϥⲁⲣⲭⲉ ⲛ̅ϭⲓⲡⲉⲬⲁⲛⲁⲛⲁⲓⲟⲥ ⲉⲟⲩⲱϩ ϩⲙ̅ⲡⲉⲓⲕⲁϩ. Ⲁⲥϣⲱⲡⲉ ϭⲉ ⲛ̅ⲧⲉⲣⲉⲡⲒⲥⲣⲁⲏⲗ ϭⲙ̅ϭⲟⲙ ⲁϥⲕⲱ ⲙ̅ⲡⲉⲬⲁⲛⲁⲛⲁⲓⲟⲥ ⲉⲧⲣⲉϥϯⲫⲟⲣⲟⲥ ⲛⲁϥ . Ⲁⲩⲱ ϩⲛ̅ⲟⲩϥⲓ ⲙ̅ⲡϥ̅ϥⲓⲧϥ̅ ⲙ̅ⲙⲁⲩ ⲁⲩⲱ Ⲉⲫⲣⲁⲓⲙ ⲙⲛ̅ϥϥⲓ ⲙ̅ⲙⲁⲩ ⲙ̅ⲡⲉⲬⲁⲛⲁⲛⲁⲓⲟⲥ ⲡⲉⲧⲟⲩⲏϩ ϩⲛ̅Ⲕⲁⲍⲉⲣ . ⲁⲗⲗⲁ ⲡⲉⲬⲁⲛⲁⲛⲁⲓⲟⲥ ⲁϥⲟⲩⲱϩ ϩⲛ̅ⲧⲉϥⲙⲏⲧⲉ ϩⲛ̅Ⲕⲁⲍⲉⲣ ⲁϥϣⲱⲡⲉ ⲉϥϯⲫⲟⲣⲟⲥ. Ⲁⲩⲱ Ⲍⲁⲃⲟⲩⲗⲱⲛ ⲙ̅ⲡϥ̅ϥⲓ ⲙ̅ⲙⲁⲩ ⲛ̅ⲛⲉⲧⲟⲩⲏϩ ϩⲛ̅Ⲕⲉⲇⲣⲱⲛ ⲟⲩⲇⲉ ⲛⲉⲧⲟⲩⲏϩ   ϩⲙ̅Ⲙⲁⲁⲇⲁⲩⲱ ⲡⲉⲬⲁⲛⲁⲛⲁⲓⲟⲥ ⲁϥⲟⲩⲱϩ ϩⲛ̅ⲧⲉϥⲙⲏⲧⲉ. Ⲁϥϣⲱⲡⲉ ⲛ̅ϭⲓⲡⲉⲬⲁⲛⲁⲛⲁⲓⲟⲥ ⲉϥϯⲫⲟⲣⲟⲥ ⲛⲁϥ . ⲁⲩⲱ Ⲁⲥⲏⲣ ⲙ̅ⲡϥ̅ϥⲓ ⲙ̅ⲙⲁⲩ ⲛ̅ⲛⲉⲧⲟⲩⲏϩ ϩⲛ̅Ⲥⲁⲭⲱ . ⲁⲗⲗⲁ ⲁϥϣⲱⲡⲉ ⲉϥϯⲫⲟⲣⲟⲥ ⲛⲁⲩ. ⲁⲩⲱ ⲛⲉⲧⲟⲩⲏϩ ϩⲛ̅Ⲇⲱⲣ ⲙⲛ̅ⲛⲉⲧⲟⲩⲏϩ ϩⲛ̅Ⲥⲓⲇⲱⲛ   ⲁⲩⲱ ⲛⲉⲧⲟⲩⲏϩ ϩⲛ̅Ⲇⲁⲗⲁⲃ . ⲙⲛ̅Ⲁⲥⲭⲁⲥⲉⲓ. ⲁⲩⲱ Ⲭⲉⲇⲣⲱⲛ . ⲙⲛ̅Ⲁⲥⲭⲁⲥⲉⲓ . ⲁⲩⲱ Ⲭⲉⲇⲣⲱⲛ . ⲙⲛ̅Ⲁⲫⲉⲕ . ⲙⲛ̅Ⲣⲟⲱⲃ . ⲁⲩⲱ Ⲁⲥⲏⲣ ⲁϥⲟⲩⲱϩ ϩⲛ̅ⲧⲙⲏⲧⲉ ⲙ̅ⲡⲉⲬⲁⲛⲁⲛⲁⲓⲟⲥ ⲡⲉⲧⲟⲩⲏϩ ϩⲙ̅ⲡⲕⲁϩ . ⲉⲃⲟⲗϫⲉ ⲙ̅ⲡϥ̅ϣ̅ϭⲙ̅ϭⲟⲙ ⲉϥⲓⲧϥ̅ ⲙ̅ⲙⲁⲩ . Ⲁⲩⲱ ⲁϥϣⲱⲡⲉ ⲉϥϯⲫⲟⲣⲟⲥ ⲛⲁϥ. ⲁⲩⲱ Ⲛⲉⲫⲑⲁⲗⲓⲙ ⲙ̅ⲡϥ̅ϥⲓ ⲙ̅ⲙⲁⲩ ⲛ̅ⲛⲉⲧⲟⲩⲏϩ ϩⲛ̅Ⲃⲁⲓⲑⲥⲁⲙⲩⲥ. ⲟⲩⲇⲉ ⲛⲉⲧⲟⲩⲏϩ ϩⲛ̅Ⲃⲁⲓⲑⲛⲉⲑ ⲁⲩⲱ ⲡⲒⲥⲣⲁⲏⲗ ⲁϥⲟⲩⲱϩ ϩⲛ̅ⲧⲙⲏⲧⲉ ⲙ̅ⲡⲉⲬⲁⲛⲁⲛⲁⲓⲟⲥ ⲡⲉⲧⲟⲩⲏϩ ϩⲙ̅ⲡⲕⲁϩ: ⲛⲉⲧⲟⲩⲏϩ ⲇⲉ ϩⲛ̅Ⲃⲁⲓⲑⲥⲁⲙⲩⲥ ⲙⲛ̅Ⲃⲁⲓⲑⲛⲉⲑ ⲁⲩϣⲱⲡⲉ ⲉⲩϯⲫⲟⲣⲟⲥ ⲛⲁⲩ. Ⲁⲩⲱ ⲡⲀⲙⲟⲣⲣⲁⲓⲟⲥ ⲁϥⲑⲙ̅ⲕⲉⲛ̅ϣⲏⲣⲉ ⲛ̅Ⲇⲁⲛ ⲉϩⲣⲁⲓ ⲉⲡⲧⲟⲟⲩ ⲉⲃⲟⲗϫⲉ ⲙ̅ⲡⲟⲩⲕⲁⲁⲩ ⲉⲉⲓ ⲉⲡⲉⲥⲏⲧ ⲉⲡⲉⲓⲁ. Ⲁⲩⲱ ⲡⲀⲙⲟⲣⲣⲁⲓⲟⲥ ⲁϥϫⲱⲛⲧ ⲉⲉⲓ ⲉⲡⲉⲥⲏⲧ ⲉⲟⲩⲱϩ ϩⲙ̅ⲡⲧⲟⲟⲩ ⲡⲉⲧⲟ ⲙ̅ⲃⲗ̅ⲗϫⲉ ϩⲙ̅ⲡⲉⲧϫⲁϫⲱ. ⲡⲉⲧⲉⲣⲉⲚⲁⲣⲝ ⲛ̅ϩⲏⲧϥ̅. ⲙⲛ̅ⲛⲃⲁϣⲟⲣ. ⲁⲩⲱ ϩⲙ̅ⲡⲘⲩⲣⲥⲓⲛⲱ . ⲏ ϩⲙ̅ⲡⲧⲟⲟⲩ ⲛ̅ⲙⲘⲩⲣⲥⲓⲛⲏ ϩⲛ̅Ⲥⲉⲙ : Ⲁⲩⲱ ⲧϭⲓϫ ⲙ̅ⲡⲏⲓ ⲛ̅Ⲓⲱⲥⲏⲫ ⲁⲥϩⲣⲟϣ ⲉϫⲙ̅ⲡⲀⲙⲟⲣⲣⲁⲓⲟⲥ ⲁϥϣⲱⲡⲉ ⲉϥϯⲫⲟⲣⲟⲥ ⲛⲁⲩ . Ⲁⲩⲱ ⲡⲧⲟⲟⲩ ⲙ̅ⲡⲀⲙⲟⲣⲣⲁⲓⲟⲥ ⲁϥϭⲱⲡⲉ ϫⲓⲛⲧⲁⲛⲁⲃⲁⲥⲓⲥ ⲛ̅Ⲁⲕⲣⲁⲃⲓⲛ ϫⲓⲛⲧⲡⲉⲧⲣⲁ ⲉϩⲣⲁⲓ :

Ⲃ̅. Ⲁⲩⲱ ⲛ̅ⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ⲁϥⲉⲓ ⲉϩⲣⲁⲓ ⲉⲄⲁⲗⲗⲁⲗ ⲉϩⲣⲁⲓ ⲉⲡⲙⲁ ⲙ̅ⲡⲣⲓⲙⲉ ⲁⲩⲱ ⲉϩⲣⲁⲓ ⲉⲂⲁⲓⲑⲏⲗ ⲡⲉϫⲁϥ ⲛ̅ⲛϣⲏⲣⲉ ⲙ̅ⲡⲒⲥⲣⲁⲏⲗ ⲉϥϫⲱ ⲙ̅ⲙⲟⲥ ⲛⲁⲩ. ϫⲉ ⲛⲁⲓ ⲛⲉⲧⲉⲣⲉⲠϫⲟⲉⲓⲥ ϫⲱ ⲙ̅ⲙⲟⲟⲩ ϫⲉ ⲁⲓⲛ̅ⲧⲏⲩⲧⲛ̅ ⲉϩⲣⲁⲓ ⲉⲔⲏⲙⲉ ⲁⲩⲱ ⲁⲓϫⲓⲧⲏⲩⲧⲛ̅ ⲉϩⲟⲩⲛ ⲉⲡⲕⲁϩ ⲡⲉⲛⲧⲁⲓⲱⲣⲕ̅ ⲛ̅ⲛⲉⲧⲛ̅ⲉⲓⲟⲧⲉ ⲉⲧⲃⲏⲏⲧϥ̅ ⲉⲧⲣⲁⲧⲁⲁϥ ⲛⲏⲧⲛ̅ . Ⲁⲩⲱ ⲁⲓϫⲟⲟⲥ ⲛⲏⲧⲛ̅ ϫⲉ ⲛ̅ϯⲛⲁϥⲓ ⲙ̅ⲙⲁⲩ ⲁⲛ ⲉⲃⲟⲗ ⲛ̅ⲧⲁⲇⲓⲁⲑⲏⲕⲏ ⲉⲧⲛⲙ̅ⲙⲏⲧⲛ̅ ϣⲁⲉⲛⲉϩ . Ⲁⲩⲱ ⲛ̅ⲧⲱⲧⲛ̅ ⲛ̅ⲛⲉⲧⲛ̅ⲥⲙⲛ̅ⲇⲓⲁⲑⲏⲕⲏ ⲙⲛ̅ⲛⲉⲧϩⲙⲟⲟⲥ ϩⲓϫⲙ̅ⲡⲉⲓⲕⲁϩ. ⲟⲩⲇⲉ ⲛⲉⲩⲛⲟⲩⲧⲉ ⲛ̅ⲛⲉⲧⲛ̅ⲟⲩⲱϣⲧ̅ ⲛⲁⲩ. ⲁⲗⲗⲁ ⲛⲉⲩⲅⲗⲩⲡⲧⲟⲛ ⲉⲧⲉⲧⲛ̅ⲟⲩⲟϭⲡⲟⲩ ⲁⲩⲱ ⲛⲉⲩⲑⲩⲥⲓⲁⲥⲧⲏⲣⲓⲟⲛ ⲉⲧⲉⲧⲛ̅ϣⲣ̅ϣⲟⲣⲟⲩ. Ⲁⲩⲱ ⲙ̅ⲡⲉⲧⲛ̅ⲥⲱⲧⲙ̅ ⲛ̅ⲥⲁⲡⲁϩⲣⲟⲟⲩ. Ⲁⲩⲱ ⲉⲃⲟⲗϫⲉ ⲛⲁⲓ ⲁⲧⲉⲧⲛ̅ⲁⲁⲩ ⲁⲛⲟⲕ ϩⲱ ⲛ̅ϯⲛⲁⲟⲩⲱϩ ⲁⲛ ⲉⲧⲟⲟⲧ ⲉⲡⲱⲱⲛⲉ ⲉⲃⲟⲗ ⲙ̅ⲡⲗⲁⲟⲥ ⲡⲉⲛⲧⲁⲓϫⲟⲟⲥ ⲉⲧⲃⲏⲏⲧϥ ⲉⲛⲟϫϥ̅ ⲉⲃⲟⲗ ⲛ̅ϯⲛⲁϥⲓⲧϥ̅ ϭⲉ ⲁⲛ ⲙ̅ⲙⲁⲩ ⲙ̅ⲡⲉⲧⲛ̅ⲙ̅ⲧⲟ ⲉⲃⲟⲗ. Ⲁⲗⲗⲁ ⲥⲉⲛⲁϣⲱⲡⲉ ⲛⲏⲧⲛ̅ ⲉϩⲉⲛⲥⲩⲛⲟⲭⲏ ⲙⲛ̅ⲕⲉⲕⲣⲟϥ ⲁⲩⲱ ⲛⲉⲩⲕⲉⲛⲟⲩⲧⲉ ⲥⲉⲛⲁϣⲱⲡⲉ ⲛⲏⲧⲛ̅ ⲉⲩⲥⲕⲁⲛⲇⲁⲗⲟⲛ : Ⲁⲥϣⲱⲡⲉ ⲇⲉ ⲛ̅ⲧⲉⲣⲉⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ⲧⲁⲩⲟ ⲛ̅ⲛⲉⲓϣⲁϫⲉ ⲉⲛϣⲏⲣⲉ ⲙ̅ⲡⲒⲥⲣⲁⲏⲗ . ⲡⲗⲁⲟⲥ ⲁϥϥⲓϩⲣⲁϥ ⲉⲃⲟⲗ ⲁϥⲣⲓⲙⲉ. Ⲉⲧⲃⲉⲡⲁⲓ ⲁⲩⲙⲟⲩⲧⲉ ⲉⲡⲣⲁⲛ ⲙ̅ⲡⲙⲁ ⲉⲧⲙ̅ⲙⲁⲩ ϫⲉ ⲡⲉⲕⲗⲁⲩⲑⲙⲱⲛ ⲉⲧⲉⲡⲙⲁ ⲡⲉ ⲙ̅ⲡⲣⲓⲙⲉ . ⲁⲩⲱ ⲁⲩϣⲱⲱⲧ ⲛ̅ⲟⲩⲑⲩⲥⲓⲁ ⲙ̅Ⲡϫⲟⲓⲥ ⲙ̅ⲡⲙⲁ ⲉⲧⲙ̅ⲙⲁⲩ . Ⲁⲩⲱ Ⲓⲏⲥⲟⲩⲥ ⲁϥϫⲟⲟⲩ ⲉⲃⲟⲗ ⲙ̅ⲡⲗⲁⲟⲥ. Ⲁⲩⲱ ⲁⲩⲃⲱⲕ ⲛ̅ϭⲓⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲡⲟⲩⲁ ⲡⲟⲩⲁ ⲉϩⲣⲁⲓ ⲉⲧⲉϥⲕⲗⲏⲣⲟⲛⲟⲙⲓⲁ ⲉⲧⲣⲉϥⲕⲗⲏⲣⲟⲛⲟⲙⲉⲓ ⲙ̅ⲡⲉϥⲕⲁϩ Ⲁⲩⲱ ⲡⲗⲁⲟⲥ ⲁϥⲣ̅ϩⲙ̅ϩⲁⲗ ⲙ̅Ⲡϫⲟⲉⲓⲥ ⲛ̅ⲛⲉϩⲟⲟⲩ ⲧⲏⲣⲟⲩ ⲛ̅Ⲓⲏⲥⲟⲩⲥ . ⲁⲩⲱ ⲛ̅ⲛⲉϩⲟⲟⲩ ⲧⲏⲣⲟⲩ ⲛ̅ⲛⲉⲡⲣⲉⲥⲃⲩⲧⲉⲣⲟⲥ . ⲛⲁⲓ ⲉⲛⲧⲁⲩⲣ̅ⲟⲩⲛⲟϭ ⲛ̅ⲟⲩⲟⲉⲓϣ ⲙⲛ̅Ⲓⲏⲥⲟⲩⲥ.ⲛⲉⲛⲧⲁⲩⲥⲟⲩⲛ̅ⲡⲛⲟϭ ⲛ̅ϩⲱⲃ ⲙ̅Ⲡϫⲟⲉⲓⲥ ⲡⲁⲓ ⲉⲛⲧⲁϥⲁⲁϥ ϩⲙ̅ⲡⲒⲥⲣⲁⲏⲗ: Ⲁⲩⲱ ⲁϥⲙⲟⲩ ⲛ̅ϭⲓⲒⲏⲥⲟⲩⲥ ⲡϣⲏⲣⲉ ⲛ̅Ⲛⲁⲩⲏ ⲡϩⲙ̅ϩⲁⲗ ⲙ̅Ⲡϫⲟⲉⲓⲥ ⲟⲩⲣⲱⲙⲉ ⲉϥϩⲛ̅ϣⲉⲙⲏⲧⲉ ⲛ̅ⲣⲟⲙⲡⲉ. ⲁⲩⲱ ⲁⲩⲧⲟⲙⲥϥ̅ ϩⲙ̅ⲡⲧⲟϣ ⲛ̅ⲧⲉϥⲕⲗⲏⲣⲟⲛⲟⲙⲓⲁ ϩⲛ̅Ⲑⲁⲙⲛⲁⲥⲁⲭⲁⲣ ϩⲙ̅ⲡⲧⲟⲟⲩ ⲛ̅Ⲉⲫⲣⲁⲓⲙ ⲡⲉⲧϩⲙ̅ⲡⲉⲙϩⲓⲧ ⲙ̅ⲡⲧⲟⲟⲩ ⲛ̅Ⲅⲁⲁⲍ. Ⲁⲩⲱ ⲧⲅⲉⲛⲉⲁ ⲧⲏⲣⲥ̅ ⲉⲧⲙ̅ⲙⲁⲩ ⲁⲥⲙⲟⲩ . ⲁⲩⲟⲩⲁϩⲟⲩ ⲛ̅ⲛⲁϩⲣⲛ̅ⲛⲉⲩⲉⲓⲟⲧⲉ ⲁⲥⲛⲉϩⲥⲉ ⲉϩⲣⲁⲓ ⲛ̅ϭⲓⲕⲉⲅⲉⲛⲉⲁ ⲙⲛ̅ⲛⲥⲱⲟⲩ ⲛⲁⲓ ⲉⲧⲉ ⲙ̅ⲡⲟⲩⲥⲟⲩⲛⲠϫⲟⲉⲓⲥ ⲁⲩⲱ ⲡⲉϥϩⲱⲃ ⲉⲛⲧⲁϥⲁⲁϥ ϩⲙ̅ⲡⲒⲥⲣⲁⲏⲗ. Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲉⲓⲣⲉ ⲙ̅ⲡⲡⲟⲛⲏⲣⲟⲛ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲉⲓⲥ : Ⲁⲩϣⲙ̅ϣⲉ ⲛ̅ⲛⲃⲁϩⲁⲗⲓⲙ. ⲁⲩⲕⲱ ⲛ̅ⲥⲱⲟⲩ ⲙ̅Ⲡϫⲟⲉⲓⲥ ⲡⲛⲟⲩⲧⲉ ⲛ̅ⲛⲉⲩⲉⲓⲟⲧⲉ ⲡⲉⲛⲧⲁϥⲛ̅ⲧⲟⲩ ⲉⲃⲟⲗ ϩⲙ̅ⲡⲕⲁϩ ⲛ̅ⲕⲏⲙⲉ . ⲁⲩⲃⲱⲕ ⲁⲩⲟⲩⲁϩⲟⲩ ⲛ̅ⲥⲁϩⲉⲛⲕⲉⲛⲟⲩⲧⲉ. ⲉⲃⲟⲗ ϩⲛ̅ⲛⲛⲟⲩⲧⲉ ⲛ̅ⲛϩⲉⲑⲛⲟⲥ ⲉⲧⲕⲱⲧⲉ ⲉⲣⲟⲟⲩ. Ⲁⲩⲟⲩⲱϣⲧ ⲛⲁⲩ ⲁⲩϯϭⲱⲛⲧ ⲙ̅Ⲡϫⲟⲉⲓⲥ ⲁⲩⲕⲁⲁϥ ⲛ̅ⲥⲱⲟⲩ ⲁⲩϣⲙ̅ϣⲉ ⲙ̅ⲡⲂⲁϩⲁⲗ ⲙⲛ̅Ⲁⲥⲧⲁⲣⲧⲏ. ⲁⲩⲱ Ⲡϫⲟⲉⲓⲥ ⲁϥⲛⲟⲩϭⲥ̅ ϩⲛ̅ϭⲱⲛⲧ ⲉϫⲛ̅ⲛϣⲏⲣⲉ ⲙ̅ⲡⲒⲥⲣⲁⲏⲗ ⲁϥⲧⲁⲁⲩ ⲉϩⲣⲁⲓ ⲉⲧⲟⲟⲧⲟⲩ ⲛ̅ⲛⲉⲛⲧⲁⲩϣⲟⲗⲟⲩ ⲁⲩϣⲱⲗ ⲙ̅ⲙⲟⲟⲩ . Ⲁⲩⲱ ⲁϥⲧⲁⲁⲩ ⲉϩⲣⲁⲓ ⲉⲧⲟⲟⲧⲟⲩ ⲛ̅ⲛⲉⲩϫⲓϫⲉⲉⲩ ⲉⲧϩⲙ̅ⲡⲉⲩⲕⲱⲧⲉ : Ⲁⲩⲱ ⲙ̅ⲡⲟⲩⲉϣϭⲙ̅ϭⲟⲙ ⲉϥⲓϫⲱⲟⲩ ⲉϩⲣⲁⲓ ⲙ̅ⲡⲉⲙⲧⲟ ⲉⲃⲟⲗ ⲛ̅ⲛⲉⲩϫⲓϫⲉⲉⲩⲉ. Ϩⲛ̅ϩⲱⲃ ⲛⲓⲙ ⲉⲧⲟⲩⲙⲟⲟϣⲉ ⲛ̅ϩⲏⲧⲟⲩ ⲁⲩⲱ ⲧϭⲓϫ ⲙ̅Ⲡϫⲟⲉⲓⲥ ⲛⲉⲥϣⲟⲟⲡ ϩⲓϫⲱⲟⲩ ⲉϩⲉⲛⲡⲉⲑⲟⲟⲩ ⲛⲁⲩ ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ ϣⲁϫⲉ ⲁⲩⲱ ⲕⲁⲧⲁⲑⲉ ⲉⲛⲧⲁⲠϫⲟⲉⲓⲥ ⲱⲣⲕ ⲛⲁⲩ. Ⲁϥⲑⲗⲓⲃⲉ ⲙ̅ⲙⲟⲟⲩ ⲉⲙⲁⲧⲉ. ⲁⲩⲱ Ⲡϫⲟⲉⲓⲥ ⲁϥⲧⲟⲩⲛⲉⲥϩⲉⲛⲕⲣⲓⲧⲏⲥ ⲉϫⲱⲟⲩ. ⲁⲡϫⲟⲉⲓⲥ ⲛⲁϩⲙⲟⲩ ⲛ̅ⲧⲟⲟⲧⲟⲩ ⲛ̅ⲛⲉⲧϣⲱⲗ ⲙ̅ⲙⲟⲟⲩ. Ⲛⲉⲩⲕⲉⲕⲣⲓⲧⲏⲥ ⲟⲛ ⲙ̅ⲡⲟⲩⲥⲱⲧⲙ̅ ⲛ̅ⲥⲱⲟⲩ . ⲉⲃⲟⲗϫⲉ ⲁⲩⲃⲱⲕ ⲁⲩⲡⲟⲣⲛⲉⲩⲉ   ϩⲓⲡⲁϩⲟⲩ ⲛ̅ϩⲉⲛⲕⲉⲛⲟⲩⲧⲉ   ⲁⲩⲱ ⲁⲩⲟⲩⲱϣⲧ ⲛⲁⲩ ⲁⲩϯϭⲱⲛⲧ ⲙ̅Ⲡϫⲟⲉⲓⲥ. Ⲁⲩⲱ ⲁⲩⲣⲁⲕⲧⲟⲩ ⲧⲁⲭⲏ ⲉⲃⲟⲗ ϩⲛ̅ⲧⲉϩⲓⲏ ⲉⲛⲧⲁⲛⲉⲩⲉⲓⲟⲧⲉ ⲙⲟⲟϣⲉ ⲛ̅ϩⲏⲧⲥ̅ ⲉⲥⲱⲧⲙ̅ ⲛ̅ⲥⲁⲛ̅ϣⲁϫⲉ ⲙ̅Ⲡϫⲟⲉⲓⲥ ⲙ̅ⲡⲟⲩⲉⲓⲣⲉ ϩⲓⲛⲁⲓ. Ⲁⲩⲱ ⲁⲠϫⲟⲉⲓⲥ ⲧⲟⲩⲛⲉⲥϩⲉⲛⲕⲣⲓⲧⲏⲥ ⲉϫⲱⲟⲩ . ⲁⲩⲱ Ⲡϫⲟⲉⲓⲥ ⲛ̅ⲛⲉϥϣⲟⲟⲡ ⲙⲛ̅ⲡⲉⲕⲣⲓⲧⲏⲥ ⲁϥⲛⲁϩⲙⲟⲩ ⲛ̅ⲧⲟⲟⲧⲟⲩ ⲛ̅ⲛⲉⲩϫⲓϫⲉⲉⲩ ⲛ̅ⲛⲉϩⲟⲟⲩ ⲧⲏⲣⲟⲩ ⲙ̅ⲡⲉⲕⲣⲓⲧⲏⲥ. ϫⲉ Ⲡϫⲟⲉⲓⲥ ⲁⲩⲥⲉⲡⲥⲱⲡϥ̅ ⲉⲃⲟⲗ ϩⲙ̅ⲡⲉⲩⲁϣⲁϩⲟⲙ ⲙ̅ⲡⲉⲙⲧⲟ ⲉ̅ⲃⲟⲗ ⲛ̅ⲛⲉⲧϯ ⲛⲙ̅ⲙⲁⲩ ⲁⲩⲱ ⲉⲧⲑⲗⲓⲃⲉ ⲙ̅ⲙⲟⲟⲩ. Ⲁⲩⲱ ⲁⲥϣⲱⲡⲉ ϩⲙ̅ⲡⲧⲣⲉⲡⲉⲕⲣⲓⲧⲏⲥ ⲙⲟⲩ ϣⲁⲩⲕⲟⲧⲟⲩ ⲟⲛ ⲛ̅ⲥⲉϫⲱϩⲙ̅ ⲉϩⲟⲩⲉⲛⲉⲩⲉⲓⲟⲧⲉ. ⲉⲧⲣⲉⲩⲃⲱⲕ ⲛ̅ⲥⲉⲟⲩⲁϩⲟⲩ ⲛ̅ⲥⲁϩⲉⲛⲕⲉⲛⲟⲩⲧⲉ ⲉⲧⲣⲉⲩϣⲙ̅ϣⲉ ⲛⲁⲩ ⲁⲩⲱ ⲉⲟⲩⲱϣⲧ ⲛⲁⲩ ⲉⲙⲡⲟⲩⲛ̅ⲟⲩϫⲉ ⲉⲃⲟⲗ ⲙ̅ⲙⲟⲟⲩ ⲛ̅ⲛⲉⲩϩⲓⲟⲟⲩⲉ ⲉⲩⲛⲁϣⲧ ⲙⲛ̅ⲛⲉⲩⲕⲉϩⲃⲏⲩⲉ : Ⲁⲩⲱ Ⲡϫⲟⲉⲓⲥ ⲁϥⲛ̅ⲟⲩϭⲥ̅ ϩⲛ̅ⲟⲩϭⲱⲛⲧ ⲉⲡⲒⲥⲣⲁⲏⲗ ⲡⲉϫⲁϥ . Ϫⲉ ⲉⲃⲟⲗϫⲉ ⲁⲡⲉⲓϩⲉⲑⲛⲟⲥ ⲕⲱ ⲛ̅ⲥⲱϥ ⲛ̅ⲧⲁⲇⲓⲁⲑⲏⲕⲏ. ⲧⲁⲓ ⲉⲛⲧⲁⲓϩⲱⲛ ⲙ̅ⲙⲟⲥ ⲉⲧⲟⲟⲧⲟⲩ ⲛ̅ⲛⲉⲩⲉⲓⲟⲧⲉ ⲁⲩⲱ ⲙ̅ⲡⲟⲩⲥⲱⲧⲙ̅ ⲛ̅ⲥⲁⲡⲁϩⲣⲟⲟⲩ . Ⲁⲛⲟⲕ ϩⲱ ⲛ̅ϯⲛⲁⲟⲩⲱϩ ⲁⲛ ⲉⲧⲟⲟⲧ ⲉⲧⲣⲁϥⲓ ⲙ̅ⲙⲁⲩ ⲛ̅ⲟⲩⲣⲱⲙⲉ ⲛ̅ⲛⲁϩⲣⲁⲩ ⲉⲃⲟⲗ ϩⲛ̅ⲛⲛϩⲉⲑⲛⲟⲥ ⲛⲁⲓ ⲉⲛⲧⲁϥⲕⲁⲁⲩ ⲉⲡⲁϩⲟⲩ ⲛ̅ϭⲓⲒⲏⲥⲟⲩⲥ ⲡϣⲏⲣⲉ ⲛ̅Ⲛⲁⲩⲏ . Ⲁⲩⲱ ⲉⲛⲧⲁϥⲕⲁⲁⲩ ⲉⲡⲁϩⲟⲩ ⲉⲡⲓⲣⲁⲍⲉ ⲙ̅ⲡⲒⲥⲣⲁⲏⲗ ⲛ̅ϩⲏⲧⲟⲩ. ϫⲉ ⲉⲛⲉⲥⲉⲛⲁϩⲁⲣⲉϩ ⲉⲧⲉϩⲓⲏ ⲙ̅Ⲡϫⲟⲉⲓⲥ ⲉⲙⲟⲟϣⲉ ⲛ̅ϩⲏⲧⲥ̅ ⲛ̅ⲑⲉ ⲉⲛⲧⲁⲛⲉⲩⲉⲓⲟⲧⲉ ϩⲁⲣⲉϩ ⲉⲣⲟⲥ ϫⲛ̅ⲙ̅ⲙⲟⲛ. Ⲁⲩⲱ ⲁⲠϫⲟⲉⲓⲥ ⲕⲱ ⲉⲡⲁϩⲟⲩ ⲛ̅ⲛⲉⲓϩⲉⲑⲛⲟⲥ ⲉⲧⲙ̅ϥⲓⲧⲟⲩ ⲙ̅ⲙⲁⲩ ⲛ̅ⲧⲉⲩⲛⲟⲩ. ⲁⲩⲱ ⲙ̅ⲡϥ̅ⲧⲁⲁⲩ ⲉϩⲣⲁⲓ ⲉⲧⲟⲟⲧϥ̅ ⲛ̅Ⲓⲏⲥⲟⲩⲥ :

Ⲅ̅. Ⲁⲩⲱ ⲛⲁⲓ ⲛⲉ ⲛ̅ϩⲉⲑⲛⲟⲥ ⲉⲛⲧⲁⲠϫⲟⲉⲓⲥ ⲕⲁⲁⲩ ⲉⲡⲁϩⲟⲩ ⲉⲡⲓⲣⲁⲍⲉ ⲙ̅ⲡⲒⲥⲣⲁⲏⲗ ⲛ̅ϩⲏⲧⲟⲩ ⲟⲩⲟⲛ ⲛⲓⲙ ⲉⲧⲉ ⲙ̅ⲡϥ̅ⲥⲟⲩⲛⲙ̅ⲡⲟⲗⲉⲙⲟⲥ ϩⲛ̅Ⲭⲁⲛⲁⲁⲛ. ϫⲉⲭⲁⲥ ⲉⲩⲉⲉⲓⲙⲉ ⲛ̅ϭⲓⲛ̅ⲅⲉⲛⲉⲁ ⲛ̅ⲛϣⲏⲣⲉ ⲙ̅ⲡⲒⲥⲣⲁⲏⲗ ⲉⲧⲥⲁⲃⲟⲟⲩ ⲉⲡⲡⲟⲗⲉⲙⲟⲥ.ⲛ̅ⲥⲁⲛⲉⲧϩⲓϩⲏ ⲙ̅ⲙⲟⲟⲩ ⲙ̅ⲡⲟⲩⲉⲓⲙⲉ ⲉⲣⲟⲟⲩⲉⲛ̅ϯⲟⲩ ⲛ̅ⲥⲁⲧⲣⲁⲡⲓⲁ ⲛ̅ⲛⲁⲗⲗⲟⲫⲩⲗⲟⲥ ⲁⲩⲱ ⲡⲉⲬⲁⲛⲁⲛⲁⲓⲟⲥ ⲧⲏⲣϥ. ⲙⲛ̅Ⲥⲓⲇⲱⲛⲓⲟⲥ . ⲙⲛ̅ⲡⲈⲩϩⲁⲓⲟⲥ ⲡⲉⲧⲟⲩⲏϩ ϩⲙ̅ⲡⲖⲓⲃⲁⲛⲟⲥ . ϫⲓⲛⲙ̅ⲡⲧⲟⲟⲩ ⲛ̅Ⲃⲁⲗⲁⲉⲣⲙⲱⲛ ϣⲁϩⲣⲁⲓ ⲉⲤⲱⲃⲓⲙⲁⲑ. Ⲁⲩⲱ ⲁⲥϣⲱⲡⲉ ⲉⲕⲁⲁⲩ ⲉⲡⲁϩⲟⲩ ⲉⲡⲓⲣⲁⲍⲉ ⲙ̅ⲡⲒⲥⲣⲁⲏⲗ ⲛ̅ϩⲏⲧⲟⲩ. ⲉⲉⲓⲙⲉ ϫⲉ ⲥⲉⲛⲁⲥⲱⲧⲙ̅ ⲛ̅ⲥⲁⲛ̅ⲉⲛⲧⲟⲗⲏ ⲙ̅Ⲡϫⲟⲉⲓⲥ ⲛⲁⲓ ⲉⲛⲧⲁϥϩⲱⲛ ⲙ̅ⲙⲟⲟⲩ ⲉⲧⲟⲟⲧⲟⲩ ⲛ̅ⲛⲉⲩⲉⲓⲟⲧⲉ ⲉⲃⲟⲗ ϩⲓⲧⲟⲟⲧϥ̅ ⲙ̅Ⲙⲱⲟⲩⲥⲏⲥ : Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲟⲩⲱϩ ϩⲛ̅ⲧⲙⲏⲧⲉ ⲙ̅ⲡⲉⲬⲁⲛⲁⲛⲁⲓⲟⲥ . ⲙⲛ̅ⲡⲉⲬⲉⲧⲧⲁⲓⲟⲥ . ⲙⲛ̅ⲡⲁⲙⲟⲣⲁⲓⲟⲥ ⲙⲛ̅ⲡⲉⲪⲉⲣⲉⲍⲁⲓⲟⲥ. ⲙⲛ̅ⲡⲈⲩϩⲁⲓⲟⲥ . ⲙⲛ̅ⲡⲒⲉⲃⲟⲩⲥⲥⲁⲓⲟⲥ . ⲁⲩⲱ ⲛⲉⲩϣⲉⲉⲣⲉ ⲁⲩϫⲓⲧⲟⲩ ⲛⲁⲩ ⲛ̅ⲥϩⲓⲙⲉ. ⲛⲉⲩϣⲉⲉⲣⲉ ϩⲱⲟⲩ ⲁⲩⲧⲁⲁⲩ ⲛ̅ⲛⲉⲩϣⲏⲣⲉ ⲉϩⲉⲛϩⲓⲙⲉ ⲛⲁⲩ. ⲁⲩϣⲙ̅ϣⲉ ⲛ̅ⲛⲉⲩⲛⲟⲩⲧⲉ . Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲉⲓⲣⲉ ⲙ̅ⲡⲡⲟⲛⲏⲣⲟⲛ ⲙ̅ⲡⲉⲙⲧⲟ ⲉ̅ⲃⲟⲗ ⲙ̅Ⲡϫⲟⲉⲓⲥ ⲁⲩⲣ̅ⲡⲱⲃϣ ⲙ̅Ⲡϫⲟⲉⲓⲥ ⲡⲉⲩⲛⲟⲩⲧⲉ ⲁⲩϣⲙ̅ϣⲉ ⲛ̅Ⲃⲁϩⲁⲗⲓⲙ . ⲙⲛ̅ⲙ̅ⲙⲁ ⲛϣⲏⲛ . Ⲁⲩⲱ Ⲡϫⲟⲉⲓⲥ ⲁϥⲛⲟⲩϭⲥ̅ ϩⲛ̅ⲟⲩⲑⲩⲙⲱⲥ ⲉⲡⲒⲥⲣⲁⲏⲗ ⲁϥⲧⲁⲁⲩ ⲉϩⲣⲁⲓ ⲉⲧⲟⲟⲧϥ̅ ⲛ̅Ⲭⲟⲩⲥⲁⲣⲥⲁⲑⲁⲓⲙ ⲡⲣ̅ⲣⲟ ⲛ̅ⲧⲥⲩⲣⲓⲁ ⲛ̅ⲧⲙⲉⲥⲟⲡⲟⲧⲁⲙⲓⲁ. ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲣ̅ϩⲙ̅ϩⲁⲗ ⲛ̅Ⲭⲟⲩⲥⲁⲣⲥⲁⲑⲁⲓⲙ ⲛ̅ϣⲙⲟⲩⲛⲉ ⲛ̅ⲣⲟⲙⲡⲉ : Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩϫⲓϣⲕⲁⲕ ⲉⲃⲟⲗ ⲉϩⲣⲁⲓ ⲉⲠϫⲟⲉⲓⲥ. ⲁϥⲧⲟⲩⲛⲉⲥⲟⲩⲥⲱⲧⲏⲣ ⲙ̅ⲡⲒⲥⲣⲁⲏⲗ ⲁϥⲛⲟⲩϩⲙ̅ ⲙ̅ⲙⲟⲟⲩ ⲉⲧⲉⲄⲟⲑⲟⲛⲓⲏⲗ ⲡⲉ ⲡϣⲏⲣⲉ ⲛ̅Ⲅⲉⲛⲉⲍ. ⲡⲥⲟⲛ ⲛ̅Ⲭⲁⲗⲉⲃ ⲡⲕⲟⲩⲓ ⲉⲣⲟϥ. Ⲁⲩⲱ ⲡⲉⲡ̅ⲛ̅ⲁ̅ ⲙ̅Ⲡϫⲟⲉⲓⲥ ⲁϥⲉⲓ ⲉϩⲣⲁⲓ ⲉ̅ϫⲱϥ ⲁϥⲕⲣⲓⲛⲉ ⲙ̅ⲡⲒⲥⲣⲁⲏⲗ . Ⲛ̅ⲧⲉⲣⲉϥⲃⲱⲕ ⲇⲉ ⲉⲃⲟⲗ ⲉⲡⲡⲟⲗⲉⲙⲟⲥ ⲉⲙⲓϣⲉ ⲙⲛ̅Ⲭⲟⲩⲥⲁⲣⲥⲁⲑⲁⲓⲙ. ⲁⲩⲱ Ⲡϫⲟⲉⲓⲥ ⲁϥⲡⲁⲣⲁⲇⲓⲇⲟⲩ ⲉϩⲣⲁⲓ ⲉ̅ⲧⲟⲟⲧϥ̅ ⲛⲬⲟⲩⲥⲁⲣⲥⲁⲑⲁⲓⲙ ⲡⲣ̅ⲣⲟ ⲛ̅ⲧⲘⲩⲥⲟⲡⲟⲧⲁⲙⲓⲁ . ⲁⲧⲉϥϭⲓϫ ⲧⲁϫⲣⲟ ⲉ̅ϩⲣⲁⲓ ⲉϫⲛ̅Ⲭⲟⲩⲥⲁⲣⲥⲁⲑⲁⲓⲙ ⲁⲩⲱ ⲡⲕⲁϩ ⲁϥⲥϭⲣⲉϩⲧ ⲛ̅ⲧⲁⲓⲟⲩ ⲛ̅ⲣⲟⲙⲡⲉ . Ⲁⲩⲱ ⲁϥⲙⲟⲩ ⲛ̅ϭⲓⲄⲟⲑⲟⲛⲓⲏⲗ ⲡϣⲏⲣⲉ ⲛ̅Ⲅⲉⲛⲉⲍ. ⲁⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲟⲩⲱϩ ⲉ̅ⲧⲟⲟⲧⲟⲩ ⲉ̅ⲧⲣⲉⲩⲉⲓⲣⲉ ⲙ̅ⲡ̅ⲡⲟⲛⲏⲣⲟⲛ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲉⲓⲥ : Ⲁⲩⲱ Ⲡϫⲟⲉⲓⲥ ⲁϥⲧⲁϫⲣⲉⲈⲅⲗⲱⲙ ⲡⲣ̅ⲣⲟ ⲙ̅Ⲙⲱⲁⲃ ⲉϫⲙ̅ⲡⲒⲥⲣⲁⲏⲗ ⲉⲧⲃⲉϫⲉ ⲁⲩⲉⲓⲣⲉ ⲙ̅ⲡ̅ⲡⲟⲛⲏⲣⲟⲛ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲉⲓⲥ. ⲁⲩⲱ ⲁϥⲥⲟⲩⲱϩ ⲉ̅ϩⲟⲩⲛ ⲉⲣⲟϥ ⲛ̅ⲛ̅ϣⲏⲣⲉ ⲧⲏⲣⲟⲩ ⲛ̅Ⲁⲙⲙⲱⲛ . ⲙⲛ̅ⲡⲁⲙⲁⲗⲏⲕ ⲁϥⲃⲏⲕ ⲁϥⲡⲁⲧⲁⲥⲥⲉ ⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ. ⲁϥⲕⲗⲏⲣⲟⲛⲟⲙⲓ ⲛ̅ⲧⲡⲟⲗⲓⲥ ⲛ̅ⲛⲉⲫⲟⲓⲛⲓⲝ: Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲣ̅ϩⲙ̅ϩⲁⲗ ⲛ̅Ⲉⲅⲗⲱⲙ ⲡⲣ̅ⲣⲟ ⲙ̅Ⲙⲱⲁⲃ ⲙ̅ⲙⲛⲧ̅ϣⲙⲏⲛⲉ ⲛ̅ⲣⲟⲙⲡⲉ. Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩϫⲓϣⲕⲁⲕ ⲉⲃⲟⲗ ⲉϩⲣⲁⲓ ⲉⲠ̅ϫⲟⲉⲓⲥ. ⲁⲩⲱ ⲁⲠϫⲟⲉⲓⲥ ⲧⲟⲩⲛⲉⲥⲟⲩⲥⲱⲧⲏⲣ ⲛⲁⲩ ⲉⲧⲣⲉϥⲛⲁϩⲙⲟⲩ Ⲁⲱⲑ ⲡ̅ϣⲏⲣⲉ ⲛ̅Ⲕⲏⲣⲁ. Ⲡϣⲏⲣⲉ ⲛ̅Ⲓⲉⲙⲛⲏⲓ. ⲟⲩⲣⲱⲙⲉ ⲉϥⲟ ⲛ̅ⲟⲩⲛⲁⲙ ⲉⲧϭⲓϫ ⲥⲛ̅ⲧⲉ : ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩϫⲟⲟⲩ ⲉⲃⲟⲗ ϩⲓⲧⲟⲟⲧϥ̅ ⲛ̅ϩⲉⲛⲇⲱⲣⲟⲛ ⲛ̅Ⲉⲅⲗⲱⲙ ⲡⲣ̅ⲣⲟ ⲙ̅Ⲙⲱⲁⲃ. ⲁⲩⲱ Ⲁⲱⲑ ⲁϥⲧⲁⲙⲓⲟ ⲛⲁϥ ⲛ̅ⲟⲩϭⲟⲣⲧⲉ ⲉⲥⲧⲏⲙ ⲙ̅ⲡϩⲟ ⲥⲛⲁⲩ ⲉⲥⲛⲁⲣⲟⲩⲣⲧⲱ ⲛ̅ϣⲏⲓ . Ⲁϥⲙⲟⲣⲥ̅ ⲉϫⲛ̅ⲧⲉϥⲉⲛⲍⲱⲛⲏ ⲉϫⲙ̅ⲡⲉϥⲙⲉⲣⲟⲥ ⲛ̅ⲟⲩⲛⲁⲙ   ϩⲁⲧⲉϥϣⲧⲏⲛ ⲛ̅ⲣⲃ̅ⲧ . ⲁⲩⲱ ⲁϥⲥⲟⲟⲩⲧⲛ̅ ⲛ̅ⲛ̅ⲇⲱⲣⲟⲛ ⲉⲈⲅⲗⲱⲙ ⲡⲣ̅ⲣⲟ ⲙ̅Ⲙⲱⲁⲃ. Ⲉⲅⲗⲱⲙ ⲇⲉ ⲛⲉⲩⲣⲱⲙⲉ ⲡⲉ ⲛ̅ⲁⲥⲧⲓⲟⲥ ⲉⲙⲁⲧⲉ : Ⲁⲥϣⲱⲡⲉ ⲇⲉ ⲛ̅ⲧⲉⲣⲉⲀⲱⲑ ⲟⲩⲱ ⲉϥϯ ⲛⲁϥ ⲛ̅ⲛⲇⲱⲣⲟⲛ. ⲁϥϫⲉⲩⲛ̅ⲣⲱⲙⲉ ⲉⲃⲟⲗ ⲛⲁⲓ ⲉⲛⲧⲁⲩⲛⲛ̅ⲛ̅ⲇⲱⲣⲟⲛ ⲛⲙ̅ⲙⲁϥ : ⲁⲩⲱ Ⲉⲅⲗⲱⲙ ⲁϥⲕⲟⲧϥ̅ ⲉⲡⲁϩⲟⲩ ⲉⲃⲟⲗ ϩⲛ̅ⲛⲉⲓⲇⲱⲗⲟⲛ ⲉⲧϣⲟⲟⲡ ϩⲛ̅Ⲅⲁⲗⲅⲁⲗ. ⲠⲉϫⲉⲀⲱⲑ ⲙ̅ⲡⲣ̅ⲣⲟ ϫⲉ ⲟⲩⲛ̅ⲟⲩϣⲁϫⲉ ⲉϥϩⲏⲡ ⲛ̅ⲧⲉⲡⲛⲟⲩⲧⲉ ⲛ̅ⲧⲟⲟⲧ ⲉⲧⲁⲩⲟϥ ⲉⲣⲟⲕ ⲡⲣ̅ⲣⲟ. ⲠⲉϫⲉⲈⲅⲗⲱⲙ ⲛⲁϥ ϫⲉ ⲕⲁⲣⲱⲕ. Ⲁⲩⲱ ⲁϥϫⲟⲟⲩ ⲉⲃⲟⲗ ⲛ̅ⲛⲉⲧⲁϩⲉⲣⲁⲧⲟⲩ ⲙ̅ⲡⲉϥⲙ̅ⲧⲟ ⲉⲃⲟⲗ. Ⲁⲩⲱ Ⲁⲱⲑ ⲁϥⲃⲱⲕ ⲛⲁϥ ⲉϩⲟⲩⲛ . ⲛ̅ⲧⲟϥ ⲇⲉ ⲡⲣ̅ⲣⲟ ⲛⲉϥϩⲙⲟⲟⲥ ⲡⲉ ⲙⲁⲩⲁⲁϥ ϩⲙ̅ⲡⲉϥⲙⲁ ⲉⲧϩⲓⲧⲡⲉ ⲉⲧϯⲕⲃⲟ. Ⲁⲩⲱ Ⲁⲱⲑ ⲡⲉϫⲁϥ ⲛⲁϥ ϫⲉ ⲟⲩⲛ̅ⲟⲩϣⲁϫⲉ ⲛ̅ⲧⲉⲡⲛⲟⲩⲧⲉ ⲛ̅ⲧⲟⲟⲧ ⲉⲧⲁⲩⲟϥ ⲉⲣⲟⲕ ⲡⲣ̅ⲣⲟ: ⲁⲩⲱ Ⲉⲅⲗⲱⲙ ⲁϥⲧⲱⲟⲩⲛ ⲉⲃⲟⲗ ϩⲓϫⲙ̅ⲡⲉϥⲑⲣⲟⲛⲟⲥ ⲁϥϩⲱⲛ ⲉⲣⲟϥ : Ⲁⲥϣⲱⲡⲉ ⲇⲉ ⲉϥⲛⲁⲧⲱⲟⲩⲛ Ⲁⲱⲑ ⲁϥⲥⲟⲩⲧⲛ̅ⲧⲉϥϭⲓϫ ⲛ̅ϩⲃⲟⲩⲣ ⲉⲃⲟⲗ ⲁϥϫⲓ ⲛ̅ⲧϭⲟⲣⲧⲉ ⲉⲧⲙⲏⲣ ⲉ̅ϫⲙ̅ⲡⲉϥⲙⲏⲣⲟⲥ ⲛ̅ⲟⲩⲛⲁⲙ. ⲁϥⲧⲣ̅ⲧⲱⲣⲥ̅ ⲛ̅ϩⲏⲧϥ̅ ⲛ̅Ⲉⲅⲗⲱⲙ. ⲁⲩⲱ ⲧⲕⲉⲧⲱⲣⲉ ⲁϥⲟⲙⲥⲥ̅ ⲛ̅ϩⲏⲧϥ̅ ϩⲙ̅ⲡⲉϥⲱⲧ. Ⲁϥⲧⲣⲉⲡⲱⲧ ϩⲱⲃⲥ̅ ⲉⲃⲟⲗ ⲉϫⲛ̅ⲧϭⲟⲣⲧⲉ. ⲉⲃⲟⲗϫⲉ ⲧϭⲟⲣⲧⲉ ⲙ̅ⲡϥ̅ⲧⲟⲕⲙⲉⲥ ⲉⲃⲟⲗ ⲛ̅ϩⲏⲧϥ̅. ⲁⲩⲱ Ⲁⲱⲑ ⲁϥⲉⲓ ⲉⲃⲟⲗ ϩ̅ⲙ̅ⲡⲙⲁ ⲉⲧϥ̅ⲛϩⲏⲧϥ̅ ⲁⲩⲱ ⲁϥⲉⲓ ⲉⲃⲟⲗ ϩⲓⲧⲟⲟⲧⲟⲩ ⲛ̅ⲛⲉⲧⲣⲟⲉⲓⲥ . ⲉⲁϥϣⲱⲧⲙ̅ ⲛ̅ⲛ̅ⲣⲟ̅ ⲙ̅ⲡⲉϥⲙⲁ ⲛ̅ⲧⲡⲉ ⲁϥⲱⲣϫ̅ ⲙ̅ⲙⲟⲟⲩ . ⲁⲩⲱ ⲛ̅ⲧⲟϥ ⲛ̅ⲧⲉⲣⲉϥⲉⲓ ⲉⲃⲟⲗ ⲉϥⲛⲏϩ ⲁϥⲙⲟⲟϣⲉ: Ⲁⲩⲱ ⲛ̅ϩⲙ̅ϩⲁⲗ ⲙ̅ⲡⲣ̅ⲣⲟ ⲁⲩⲃⲱⲕ ⲉϩⲟⲩⲛ ⲁⲩⲛⲁⲩ ⲉⲛ̅ⲣⲟ̅ ⲙ̅ⲡⲉϥⲙⲁ ⲉⲧϩⲓⲧⲡⲉ ⲉⲩⲟⲣϫ. Ⲡⲉϫⲁⲩ ⲛ̅ⲛⲉⲩⲉⲣⲏⲩ ϫⲉ ⲙⲉϣⲁⲕ ⲉϥⲥⲱⲣ ⲛ̅ⲣⲁⲧϥ̅ ϩⲙ̅ⲡⲧⲁⲙⲓⲟⲛ ⲉⲧϫⲓⲕⲃⲟ. Ⲁⲩⲱ ⲁⲩⲁⲛⲉⲭⲉ ϣⲁⲛⲧⲟⲩϫⲓϣⲓⲡⲉ ⲙ̅ⲙⲟⲥ. ⲁⲩⲱ ⲉⲓⲥ ϩⲏⲏⲧⲉ ⲙ̅ⲡⲉⲗⲁⲁⲩ ⲟⲩⲱ ⲉⲛ̅ⲣⲟ ⲉⲧϩⲓⲧⲡⲉ ⲁⲩϫⲓⲡϣⲟϣⲧ ⲇⲉ ⲛ̅ⲧⲟⲟⲩ ⲁⲩⲟⲩⲱⲛ . ⲁⲩⲱ ⲉⲓⲥ ⲡⲉⲩϫⲟⲓⲥ ⲉϥⲛⲏϫ ϩⲓϫⲙ̅ⲡⲕⲁϩ ⲉϥⲙⲟⲟⲩⲧ: Ⲁⲩⲱ Ⲁⲱⲑ ϩⲙ̅ⲡⲉϣⲧⲟⲣⲧⲣ̅ ⲉⲛⲧⲁⲩϣⲱⲡⲉ ⲛ̅ϩⲏⲧϥ̅ ⲁϥⲟⲩϫⲁⲓ . ⲁⲩⲱ ⲛⲉϥⲛⲏⲩ ⲉⲃⲟⲗ   ϩⲓⲧⲟⲟⲧⲟⲩ ⲧⲏⲣⲟⲩ ⲉⲙⲡⲉⲗⲁⲁⲩ ϩⲩⲡⲟⲡⲧⲉⲩⲉ ⲉ̅ⲣⲟϥ   ϣⲁⲛⲧϥ̅ⲟⲩϫⲁⲓ ⲉϩⲣⲁⲓ ⲉⲤⲓⲣⲱⲑⲁ : Ⲁⲥϣⲱⲡⲉ ⲇⲉ ⲛ̅ⲧⲉⲣⲉϥⲓ ⲁϥⲥⲁⲗⲡⲓⲍⲉ ϩⲙ̅ⲡⲁϣⲧⲁⲡ ϩⲙ̅ⲡⲧⲟⲟⲩ ⲛ̅Ⲉⲫⲣⲁⲓⲙ . ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲉⲓ ⲉϩⲣⲁⲓ ⲛⲙ̅ⲙⲁϥ ⲉⲃⲟⲗ ϩⲙ̅ⲡⲧⲟⲟⲩ. ⲁⲩⲱ ⲛ̅ⲧⲟϥ ⲉ̅ⲛⲉϥⲙⲟⲟϣⲉ ϩⲓϩⲏ ⲙ̅ⲙⲟⲟⲩ : Ⲡⲉϫⲁϥ ⲛⲁⲩ ϫⲉ ⲟⲩⲉϩⲧⲏⲩⲧⲛ̅ ⲛ̅ⲥⲱⲓ. ϫⲉ Ⲡϫⲟⲉⲓⲥ ⲡⲛⲟⲩⲧⲉ ⲁϥⲡⲁⲣⲁⲇⲓⲇⲟⲩ ⲛ̅ⲛⲉⲛϫⲓϫⲉⲉⲩ ⲉⲧⲉⲘⲱⲁⲃ ⲧⲉ ⲉϩⲣⲁⲓ ⲉ̅ⲧⲟⲟⲧⲏⲩⲧⲛ̅. ⲁⲩⲟⲩⲁϩⲟⲩ ⲛ̅ⲥⲱϥ ⲁⲩⲣ̅ϫⲟⲓⲥ ⲉⲙⲙⲁ ⲛ̅ϫⲓⲟⲟⲣ ⲙ̅ⲡⲒⲟⲣⲇⲁⲛⲏⲥ ⲙ̅ⲡⲕⲁϩ ⲙ̅Ⲙⲱⲁⲃ. ⲁⲩⲱ ⲙ̅ⲡⲟⲩⲕⲁⲗⲁⲁⲩ ⲛ̅ⲣⲱⲙⲉ ⲉϫⲓⲟⲟⲣ ⲙ̅ⲡⲙⲁ ⲉⲧⲙ̅ⲙⲁⲩ . Ⲁⲩϭⲟϫϭϫ̅ ⲙ̅Ⲙⲱⲁⲃ ⲙ̅ⲡⲉⲩⲟⲩⲟⲉⲓϣ ⲉ̅ⲧⲙ̅ⲙⲁⲩ ⲉⲩⲛⲁⲣ̅ⲟⲩⲧⲃⲁ ⲛ̅ⲣⲱⲙⲉ ⲛ̅ⲣⲉϥⲙⲓϣⲉ ⲧⲏⲣⲟⲩ ⲉⲧⲛ̅ϩⲏⲧⲥ̅ . Ⲁⲩⲱ ⲣⲱⲙⲉ ⲛⲓⲙ ⲛ̅ⲇⲩⲛⲁⲧⲟⲥ ⲉⲛ̅ⲛⲉⲣⲱⲙⲉ ⲣ̅ⲃⲟⲗ ⲛ̅ϩⲏⲧⲟⲩ. Ⲁⲩⲱ ⲡⲕⲁϩ ⲙ̅Ⲙⲱⲁⲃ ⲁϥⲑⲃ̅ⲃⲓⲟ ⲙ̅ⲡⲉϩⲟⲟⲩ ⲉⲧⲙ̅ⲙⲁⲩ ϩⲁⲧϭⲓϫ ⲙ̅ⲡⲒⲥⲣⲁⲏⲗ. ⲁⲩⲱ ⲡⲕⲁϩ ⲁϥⲥϭⲣⲉϩⲧ ⲛ̅ϥⲧⲟⲩϫⲟⲩⲱⲧⲉ ⲛ̅ⲣⲟⲙⲡⲉ. Ⲁⲩⲱ Ⲁⲱⲑ ⲁϥⲕⲣⲓⲛⲉ ⲙ̅ⲙⲟⲟⲩ ϣⲁ̅ⲧϥ̅ⲙⲟⲩ : Ⲙⲛ̅ⲛⲥⲱϥ ⲇⲉ ⲁϥⲛⲉϩⲥⲉ ⲛ̅ϭⲓⲤⲁⲙⲉⲅⲁⲣ ⲡϣⲏⲣⲉ ⲛ̅Ⲁⲛⲁⲑ. ⲁϥⲡⲁⲧⲁⲥⲥⲉ ⲛ̅ⲛ̅ⲁⲗⲗⲟⲫⲩⲗⲗⲟⲥ ⲉⲩⲛⲁⲣ̅ⲥⲉⲩϣⲉ ⲛ̅ⲣⲱⲙⲉ ϩⲛ̅ⲧⲥⲓⲛⲉ ⲛ̅ⲥⲕⲁⲓ ⲛ̅ⲛⲉϩⲟⲟⲩ. Ⲛ̅ⲧⲟϥ ϩⲱⲱϥ ⲁϥⲧⲟⲩϫ ⲉⲛ̅ϣⲏⲣⲉ   ⲙ̅ⲡⲒⲥⲣⲁⲏⲗ. ⲁⲩⲱ ⲁϥⲙⲟⲩ ⲛ̅ϭⲓⲤⲁⲙⲉⲅⲁⲣ.

Ⲇ̅. Ⲛ̅ϣⲏⲣⲉ ⲇⲉ ⲙ̅ⲡⲒⲥⲣⲁⲏⲗ ⲁⲩⲟⲩⲱϩ ⲉⲧⲟⲟⲧⲟⲩ ⲉⲉⲓⲣⲉ ⲙ̅ⲡⲡⲟⲛⲏⲣⲟⲛ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲉⲓⲥ. ⲁⲩⲱ Ⲡϫⲟⲉⲓⲥ ⲁϥⲧⲁⲁⲩ ⲉϩⲣⲁⲓ ⲉⲧⲟⲟⲧϥ̅ ⲛ̅Ⲓⲁⲃⲏⲥ ⲡⲣ̅ⲣⲟ ⲛ̅Ⲭⲁⲛⲁⲁⲛ ⲡⲁⲓ ⲉⲛⲧⲁϥⲣ̅ⲣ̅ⲣⲟ ϩⲛ̅Ⲁⲥⲱⲣ . ⲁⲩⲱ ⲡⲁⲣⲭⲱⲛ ⲛ̅ⲧⲉϥϭⲟⲙ ⲉⲡⲉϥⲣⲁⲛ ⲡⲉ Ⲥⲓⲥⲁⲣⲁ : Ⲛ̅ⲧⲟϥ ⲇⲉ ⲛⲉϥⲟⲩⲏϩ ϩⲛ̅Ⲁⲥⲓⲣⲱⲑ ⲧⲁⲛ̅ϩⲉⲑⲛⲟⲥ : Ⲁⲩⲱ ⲛ̅ϣⲏⲣⲉ ⲙ̅Ⲓⲥⲣⲁⲏⲗ ⲁⲩϫⲓϣⲕⲁⲕ ⲉⲃⲟⲗ ⲉϩⲣⲁⲓ ⲉⲠϫⲟⲉⲓⲥ . ⲉⲃⲟⲗϫⲉ ⲛⲉⲣⲉⲯⲓⲥ ⲛ̅ϣⲉ ⲛ̅ϩⲁⲣⲙⲁ ⲙ̅ⲡⲉⲛⲓⲡⲉ ϣⲟⲟⲡ ⲛⲁϥ. Ⲁⲩⲱ ⲡⲁⲓ ⲉⲛⲉϥⲑⲗⲓⲃⲉ ⲙ̅ⲙⲁⲧⲉ ⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲛ̅ϫⲟⲩⲱⲧⲉ ⲛ̅ⲣⲟⲙⲡⲉ : Ⲁⲩⲱ Ⲇⲉⲃⲃⲱⲣⲁ ⲟⲩⲥϩⲓⲙⲉ ⲙ̅ⲡⲣⲟⲫⲏⲧⲏⲥ ⲉⲑⲓⲙⲉⲧⲉ ⲛ̅Ⲗⲁⲙⲫⲓⲇⲱⲑ . Ⲛ̅ⲧⲟⲥ ⲇⲉ ⲛⲉⲥⲕⲣⲓⲛⲉ ⲙ̅ⲡⲒⲥⲣⲁⲏⲗ ⲙ̅ⲡⲉⲩⲟⲩⲟⲉⲓϣ ⲉⲧⲙ̅ⲙⲁⲩ. Ⲁⲩⲱ ⲛ̅ⲧⲟⲥ Ⲇⲉⲃⲃⲱⲣⲁ ⲛⲉⲥϩⲙⲟⲟⲥ ϩⲁⲟⲩⲃⲛ̅ⲛⲉ ⲛ̅ⲧⲙⲏⲧⲉ ⲛ̅Ϩⲣⲁⲙⲁ ⲁⲩⲱ ϩⲛ̅ⲧⲙⲏⲧⲉ ⲛ̅Ⲃⲁⲓⲑⲏⲗ ϩⲙ̅ⲡⲧⲟⲟⲩ ⲛ̅Ⲉⲫⲣⲁⲓⲙ . Ⲁⲩⲱ ⲛⲉⲩⲛⲏⲩ ⲉϩⲣⲁⲓ ⲉⲣⲁⲧⲥ̅ ⲛ̅ϭⲓⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲉⲩϫⲓϩⲁⲡ ϩⲓⲱⲱⲥ : Ⲁⲩⲱ Ⲇⲉⲃⲃⲱⲣⲁ ⲁⲥϫⲟⲟⲩ ⲁⲥⲙⲟⲩⲧⲉ ⲉⲂⲁⲣⲁⲕ ⲡϣⲏⲣⲉ ⲛ̅Ⲁⲃⲓⲛⲉⲉⲙ ⲉⲃⲟⲗ ϩⲛ̅Ⲕⲁⲇⲏⲥ ϩⲙ̅ⲡⲧⲟⲟⲩ ⲛ̅Ⲉⲫⲑⲁⲗⲓⲙ ⲡⲉϫⲁⲥ ⲛⲁϥ . ϫⲉ ⲉⲛⲉⲠϫⲟⲉⲓⲥ ⲡⲛⲟⲩⲧⲉ ⲙ̅ⲡⲒⲥⲣⲁⲏⲗ ϩⲱⲛ ⲉⲧⲟⲟⲧⲕ̅ . ⲉⲕⲉⲃⲱⲕ ϭⲉ ⲉϩⲣⲁⲓ ⲉⲡⲧⲟⲟⲩ ⲛ̅Ⲑⲁⲃⲱⲣ ⲛⲅ̅ϫⲓ ⲛⲙ̅ⲙⲁⲕ ⲛ̅ⲟⲩⲧⲃⲁ ⲛ̅ⲣⲱⲙⲉ ⲉⲃⲟⲗ ϩⲛ̅ⲛϣⲏⲣⲉ ⲛ̅Ⲛⲉⲫⲑⲁⲗⲉⲓ . ⲁⲩⲱ ⲉⲃⲟⲗ ϩⲛ̅ⲛϣⲏⲣⲉ ⲛ̅Ⲍⲁⲃⲟⲩⲗⲱⲛ . ⲁⲩⲱ ⲁⲛⲟⲕ ϯⲛⲁⲉⲓ ϣⲁⲣⲟⲕ ⲉϩⲣⲁⲓ ⲉⲡⲉⲬⲓⲙⲁⲣⲣⲟⲥ ⲛ̅Ⲕⲓⲥⲱⲛ ⲉⲣⲱϥ ⲛ̅Ⲥⲓⲥⲁⲣⲁ ⲡⲁⲣⲭⲱⲛ ⲛ̅ⲧϭⲟⲙ ⲛ̅ⲛⲓⲁⲃⲓⲥ . ⲁⲩⲱ ⲉϫⲛ̅ⲛⲉϥϩⲁⲣⲙⲁ ⲙⲛ̅ⲛⲉϥϩⲧⲱⲱⲣ ⲙⲛ̅ⲡⲉϥⲙⲏⲏϣⲉ . ⲁⲩⲱ Ⲡϫⲟⲉⲓⲥ ϥⲛⲁⲧⲁⲁϥ ⲉϩⲣⲁⲓ ⲉⲧⲟⲟⲧⲕ̅ : ⲠⲉϫⲉⲂⲁⲣⲁⲕ ⲛⲁⲥ ϫⲉ ⲉ̅ϣⲱⲡⲉ ⲉⲣⲉⲛⲁⲉⲓ ⲛⲙ̅ⲙⲁⲓ ϯⲛⲁⲃⲱⲕ . ⲉⲣⲉⲛⲁⲧⲙⲉⲓ ⲇⲉ ⲛ̅ϯⲛⲁⲃⲱⲕ ⲁⲛ . ϫⲉ ⲛ̅ϯⲥⲟⲟⲩⲛ ⲁⲛ ⲙ̅ⲡⲉϩⲟⲟⲩ ⲉⲧⲉⲣⲉⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ⲛⲁⲉⲓ ⲉⲃⲟⲗ ⲛⲙ̅ⲙⲁⲓ ⲛ̅ϩⲏⲧϥ̅ : ⲠⲉϫⲉⲆⲉⲃⲃⲱⲣⲁ ⲛⲁϥ ϫⲉ ϩⲛ̅ⲟⲩⲉⲓ ϯⲛⲁⲉⲓ ⲛⲙ̅ⲙⲁⲕ . Ⲡⲗⲏⲛ ⲉⲓⲙⲉ ϫⲉ ⲛ̅ⲧⲟⲕ ⲁⲛ ⲡⲉⲛⲧⲁⲕⲣ̅ϣⲟⲣⲡ ⲉⲧⲉϩⲓⲏ ⲉⲧⲕ̅ⲛⲁⲙⲟⲟϣⲉ ⲛ̅ϩⲏⲧⲥ̅ . ⲁⲗⲗⲁ ϩⲛ̅ⲧϭⲓϫ ⲛ̅ⲟⲩⲥϩⲓⲙⲉ Ⲡϫⲟⲓⲥ ⲉϥⲛⲁⲡⲁⲣⲁⲇⲓⲇⲟⲩ ⲛ̅Ⲥⲓⲥⲁⲣⲁ . Ⲁⲩⲱ Ⲇⲉⲃⲃⲱⲣⲁ ⲁⲥⲧⲱⲟⲩⲛ ⲁⲥⲙⲟⲟϣⲉ ⲙⲛ̅Ⲃⲁⲣⲁⲕ ⲉⲃⲟⲗ ϩⲛ̅ⲕⲁⲇⲏⲥ ⲧⲁⲚⲉⲫⲑⲁⲗⲉⲓ. Ⲃⲁⲣⲁⲕ ⲁϥⲡⲁⲣⲁⲅⲅⲉⲓⲗⲉ ⲛ̅Ⲍⲁⲃⲟⲩⲗⲱⲛ ⲙⲛ̅Ⲛⲉⲫⲑⲁⲗⲉⲓ ⲉⲃⲟⲗ ϩⲛ̅Ⲕⲁⲇⲏⲥ . ⲁⲩⲉⲓ ⲉϩⲣⲁⲓ ⲉⲣⲁⲧⲟⲩ ⲉⲩⲛⲁⲣ̅ⲟⲩⲧⲃⲁ ⲛ̅ⲣⲱⲙⲉ . Ⲁⲇⲉⲃⲃⲱⲣⲁ ⲃⲱⲕ ⲉϩⲣⲁⲓ ⲛⲙ̅ⲙⲁϥ ⲉⲡⲧⲟⲟⲩ ⲛ̅ⲑⲁⲃⲱⲣ : Ⲁⲩⲱ Ⲭⲁⲃⲉⲣ ⲡⲕⲓⲛⲛⲁⲓⲟⲥ ⲁϥⲡⲱⲣϫ̅ ⲉⲃⲟⲗ ⲛⲛ̅ϣⲏⲣⲉ ⲛ̅Ⲓⲱⲃⲁⲃ ⲡϣⲟⲙ ⲙ̅Ⲙⲱⲟⲩⲥⲏⲥ . ⲁϥⲡⲏⲥⲥⲉ ⲛ̅ⲧⲉϥⲥⲕⲏⲛⲏ ϣⲁϩⲣⲁⲓ ⲉⲡϣⲏⲛ ⲉⲡⲙⲁ ⲛ̅ⲙ̅ⲧⲟⲛ ⲡⲁⲓ ⲉⲧϩⲏⲛ ⲉϩⲟⲩⲛ ⲉⲔⲁⲇⲏⲥ . Ⲁⲩⲧⲁⲙⲉⲥⲓⲥⲁⲣⲁ ϫⲉ ⲁϥⲉⲓ ⲉϩⲣⲁⲓ ⲛ̅ϭⲓⲂⲁⲣⲁⲕ ⲡϣⲏⲣⲉ ⲛ̅Ⲁⲃⲓⲛⲉⲉⲙ ⲉϩⲣⲁⲓ ⲉⲡⲧⲟⲟⲩ ⲛ̅Ⲑⲁⲃⲱⲣ : Ⲁϥⲟⲩⲉϩⲥⲁϩⲛⲉ ⲛ̅ϭⲓⲤⲓⲥⲁⲣⲁ ⲛ̅ⲛⲉϥϩⲁⲣⲙⲁ ⲧⲏⲣⲟⲩ ⲉⲩⲛⲁⲣ̅ⲯⲓⲥ ⲛ̅ϣⲉ ⲛ̅ϩⲁⲣⲙⲁ ⲙ̅ⲡⲉⲛⲓⲡⲉ ⲙⲛ̅ⲡⲉϥⲙⲏⲏϣⲉ ⲧⲏⲣϥ̅ ⲉⲧⲛⲙ̅ⲙⲁϥ ⲉⲃⲟⲗ ϩⲛ̅Ⲥⲓⲣⲱⲑ ⲛ̅ⲛ̅ϩⲉⲑⲛⲟⲥ . ⲉⲡⲉⲥⲏⲧ ϣⲁϩⲣⲁⲓ ⲉⲡⲉⲭⲓⲙⲁⲣⲣⲟⲥ ⲛ̅Ⲕⲓⲥⲱⲛ . ⲠⲉϫⲉⲆⲉⲃⲃⲱⲣⲁ ⲇⲉ ⲉϩⲟⲩⲛ ϩⲛ̅Ⲃⲁⲣⲁⲕ ϫⲉ ⲧⲱⲟⲩⲛ ⲉϩⲣⲁⲓ ϫⲉ ⲡⲁⲓ ⲡⲉ ⲡⲉϩⲟⲟⲩ ⲉⲛⲧⲁⲠϫⲟⲉⲓⲥ ⲡⲁⲣⲁⲇⲓⲇⲟⲩ ⲛ̅ϩⲏⲧϥ̅ ⲛ̅Ⲥⲓⲥⲁⲣⲁ ⲉϩⲣⲁⲓ ⲉⲧⲉⲕϭⲓϫ . Ⲉⲓⲥ Ⲡϫⲟⲉⲓⲥ ϥⲛⲁⲙⲟⲟϣⲉ ⲉⲣⲁⲧϥ̅ ϩⲓϩⲏ ⲙ̅ⲙⲟⲕ . Ⲁⲩⲱ Ⲃⲁⲣⲁⲕ ⲁϥⲉⲓ ⲉϩⲣⲁⲓ ϩⲙ̅ⲡⲧⲟⲟⲩ ⲛ̅Ⲑⲁⲃⲱⲣ ⲉⲣⲉⲟⲩⲧⲃⲁ ⲛ̅ⲣⲱⲙⲉ ⲛⲙ̅ⲙⲁϥ : Ⲁⲩⲱ Ⲡϫⲟⲉⲓⲥ ⲁϥϣⲧⲣ̅ⲧⲣ̅Ⲥⲓⲥⲁⲣⲁ ⲙⲛ̅ⲛⲉϥϩⲁⲣⲙⲁ ⲧⲏⲣⲟⲩ ⲙⲛ̅ⲧⲉϥⲡⲁⲣⲉⲙⲃⲟⲗⲏ ⲧⲏⲣⲥ̅ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ ⲙ̅ⲡⲉⲙⲧⲟ ⲉⲃⲟⲗ ⲛ̅Ⲃⲁⲣⲁⲕ: Ⲁⲩⲱ Ⲥⲓⲥⲁⲣⲁ ⲁϥϥⲱϭⲉ ⲉⲡⲉⲥⲏⲧ ⲙ̅ⲡⲉϥϩⲁⲣⲙⲁ ⲁϥⲡⲱⲧ ϩⲓⲛⲉϥⲟⲩⲉⲣⲏⲧⲉ ⲁⲩⲱ Ⲃⲁⲣⲁⲕ ⲁϥⲉⲓ ⲛ̅ⲥⲁⲛⲉϥϩⲁⲣⲙⲁ . ⲁⲩⲱ ⲛ̅ⲥⲁⲧⲉϥⲡⲁⲣⲁⲙⲃⲟⲗⲏ ϣⲁϩⲣⲁⲓ ⲉⲀⲥⲓⲣⲱⲑ ⲉⲡⲙⲁ ⲛ̅ϣⲏⲛ ⲛ̅ⲛϩⲉⲑⲛⲟⲥ. Ⲁⲩⲱ ⲧⲡⲁⲣⲉⲙⲃⲟⲗⲏ ⲧⲏⲣⲥ̅ ⲛ̅Ⲥⲓⲥⲁⲣⲁ ⲁⲥϩⲉ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ : ⲉⲙⲡⲉⲟⲩⲁ ⲛ̅ⲟⲩⲱⲧ ⲥⲉⲉⲡⲉ ⲛ̅ϩⲏⲧⲟⲩ. Ⲥⲓⲥⲁⲣⲁ ⲇⲉ ⲁϥⲁⲛⲁⲭⲱⲣⲓ ⲉϥⲡⲏⲧ ⲛ̅ⲛⲉϥⲟⲩⲉⲣⲏⲧⲉ ⲉⲧⲉⲥⲕⲏⲛⲏ ⲛ̅Ⲓⲁⲏⲗ ⲑⲓⲙⲉ ⲛ̅Ⲭⲁⲃⲉⲣ ⲡⲕⲓⲛⲛⲁⲓⲟⲥ. ϫⲉ ⲛⲉⲣⲉⲟⲩⲉⲓⲣⲏⲛⲏ ϣⲟⲟⲡ ϩⲛ̅ⲧⲙⲏⲧⲉ ⲛ̅Ⲓⲁⲃⲏⲥ ⲡⲣ̅ⲣⲟ ⲛ̅Ⲁⲥⲱⲣ . ⲁⲩⲱ ϩⲛ̅ⲧⲙⲏⲧⲉ ⲙ̅ⲡⲏⲓ ⲛ̅Ⲭⲁⲃⲉⲣ ⲡⲕⲓⲛⲛⲁⲓⲟⲥ . Ⲁⲩⲱ Ⲓⲁⲏⲗ ⲁⲥⲉⲓ ⲉⲃⲟⲗ ϩⲏⲧϥ̅ ⲛ̅Ⲥⲓⲥⲁⲣⲁ ⲡⲉϫⲁⲥ ⲛⲁϥ ϫⲉ ⲣⲁⲕⲧⲕ̅ ⲉϩⲟⲩⲛ ⲛⲁⲓ Ⲡϫⲟⲉⲓⲥ . ⲣⲁⲕⲧⲕ̅ ⲉϩⲟⲩⲛ ⲛⲁⲓ ⲙ̅ⲡⲣ̅ⲣϩⲟⲧⲉ . Ⲁⲩⲱ ⲁϥⲃⲱⲕ ⲉϩⲟⲩⲛ ϣⲁⲣⲟⲥ ⲉⲧⲉⲥⲕⲏⲛⲏ ⲁⲥϩⲟⲃⲥϥ̅ ⲛ̅ⲟⲩϩⲃ̅ⲥⲱ ⲛ̅ϣⲁⲁⲣ : ⲠⲉϫⲉⲤⲓⲥⲁⲣⲁ ⲛⲁⲥ ϫⲉ ⲙⲁⲧⲥⲓⲟⲩⲕⲟⲩⲓ ⲙ̅ⲙⲟⲟⲩ ϫⲉ ⲁⲓⲉⲓⲃⲉ : Ⲁⲩⲱ ⲁⲥⲟⲩⲱⲛ ⲉⲡⲁⲥⲕⲟⲥ ⲙ̅ⲡⲉⲣⲱⲧⲉ ⲁⲥⲧⲥⲟϥ ⲁⲩⲱ ⲁⲥϩⲟⲃⲥϥ̅ . Ⲡⲉϫⲁϥ ⲛⲁⲥ ϫⲉ ⲁϩⲉⲣⲁⲧⲉ ϩⲓⲣⲙ̅ⲡⲣⲟ ⲛ̅ⲧⲉⲥⲕⲏⲛⲏ ⲁⲩⲱ ⲉⲣϣⲁⲛⲣⲱⲙⲉ ⲉⲓ ⲛⲉ ⲛϥ̅ϫⲛⲟⲩ ϫⲉ ⲛⲉⲟⲩⲛ̅ⲣⲱⲙⲉ ⲙ̅ⲡⲉⲓⲙⲁ ⲉⲣⲉϫⲟⲟⲥ ⲛⲁϥ ϫⲉ ⲙ̅ⲙⲟⲛ. Ⲁⲩⲱ ⲁⲥϩⲟⲃⲥϥ̅ ⲛ̅ⲧⲉⲥⲇⲉⲣⲓⲥ : Ⲁⲩⲱ Ⲓⲁⲏⲗ ⲑⲓⲙⲉ ⲛ̅Ⲭⲁⲃⲉⲣ ⲡⲕⲓⲛⲛⲁⲓⲟⲥ ⲁⲥϫⲓ ⲛ̅ⲧⲉϣⲙⲟⲩ ⲛ̅ⲧⲉⲥⲕⲏⲛⲏ ⲁⲥⲕⲁⲡϩⲁⲧⲏⲣ ϩⲛ̅ⲧⲉⲥϭⲓϫ ⲁⲥⲃⲱⲕ ⲉϩⲟⲩⲛ ⲛⲁϥ ⲛ̅ϩⲱⲡ . Ⲁⲥⲧⲣ̅ⲧⲣ̅ⲧⲉϣⲙⲟⲩ ϩⲙ̅ⲡⲉϥⲥⲙⲁⲩ ⲁϥϩⲉ ⲉϩⲣⲁⲓ ⲉϫⲙ̅ⲡⲕⲁϩ . ⲁⲩⲱ ⲛ̅ⲧⲟϥ ⲁϥⲥⲃⲗ̅ⲧⲉ ϩⲓⲡⲉⲥⲏⲧ ϩⲁⲛⲉⲥⲟⲩⲉⲣⲏⲧⲉ ⲁϥⲕⲁⲡⲧⲏⲩ ⲁϥⲙⲟⲩ : Ⲁⲩⲱ ⲉⲓⲥ Ⲃⲁⲣⲁⲕ ⲁϥⲉⲓ ⲉϥⲡⲏⲧ ⲛ̅ⲥⲁⲤⲓⲥⲁⲣⲁ . Ⲁⲩⲱ Ⲓⲁⲏⲗ ⲁⲥⲉⲓ ⲉⲃⲟⲗ ϩⲏⲧϥ̅ ⲡⲉϫⲁⲥ ⲛⲁϥ ϫⲉ ⲁⲙⲟⲩ ⲧⲁⲧⲥⲁⲃⲟⲕ ⲉⲡⲣⲱⲙⲉ ⲉⲧⲕϣⲓⲛⲉ ⲛ̅ⲥⲱϥ . Ⲁϥⲃⲱⲕ ⲉϩⲟⲩⲛ ⲛⲁⲥ . ⲁⲩⲱ ⲉⲓⲥ Ⲥⲓⲥⲁⲣⲁ ⲉϥⲛⲏϫ ϩⲓⲡⲉⲥⲏⲧ ⲉϥⲙⲟⲟⲩⲧ . ⲉⲣⲉⲧⲉϣⲙⲟⲩ ⲧⲣ̅ⲧⲱⲣ ϩⲙ̅ⲡⲉϥⲥⲙⲁⲩ . ⲁⲩⲱ Ⲡϫⲟⲉⲓⲥ ⲡⲛⲟⲩⲧⲉ ϩⲙ̅ⲡⲉϩⲟⲟⲩ ⲉⲧⲙ̅ⲙⲁⲩ ⲁϥϭⲉⲧⲡ̅Ⲓⲁⲃⲏⲥ ⲡⲣ̅ⲣⲟ ⲛ̅Ⲭⲁⲛⲁⲁⲛ ϩⲁⲑⲏ ⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ. ⲁⲩⲱ ⲧϭⲓϫ ⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲛⲉⲥϯ ⲉⲑⲏ ⲉⲡⲉϩⲟⲩⲟ . ⲉⲥⲛ̅ϣⲟⲧ ⲉϫⲛ̅Ⲓⲁⲃⲏⲥ ⲡⲣ̅ⲣⲟ ⲛ̅Ⲭⲁⲛⲁⲁⲛ ϣⲁⲛⲧⲟⲩϥⲱⲧⲉ ⲉ̅ⲃⲟⲗ ⲛ̅Ⲓⲁⲃⲏⲥ ⲡⲣ̅ⲣⲟ ⲛ̅Ⲭⲁⲛⲁⲁⲛ :

Ⲉ̅. Ⲁⲩⲱ Ⲇⲉⲃⲃⲱⲣⲁ ⲙⲛ̅Ⲃⲁⲣⲁⲕ ⲡϣⲏⲣⲉ ⲛ̅Ⲁⲃⲓⲛⲉⲙ ⲁⲩⲧⲁⲩⲟ ⲛ̅ⲟⲩⲱⲇⲏ ϩⲙ̅ⲡⲉϩⲟⲟⲩ ⲉⲧⲙ̅ⲙⲁⲩ ⲉⲩϫⲱ ⲙ̅ⲙⲟⲥ . ϫⲉ ϩⲙ̅ⲡⲧⲣⲉⲩⲁⲣⲭⲓ ⲛ̅ϭⲓⲛ̅ⲁⲣⲭⲏⲅⲟⲥ ⲙ̅ⲡⲒⲥⲣⲁⲏⲗ ϩⲙ̅ⲡⲟⲩⲱϣ ⲙ̅ⲡⲗⲁⲟⲥ. ϫⲉ ⲁϥϭⲱⲗⲡ ⲉⲃⲟⲗ ⲛ̅ϭⲓⲟⲩϭⲱⲗⲡ ⲉⲃⲟⲗ ϩⲙ̅ⲡⲒⲥⲣⲁⲏⲗ ϩⲙ̅ⲡⲧⲣⲉⲡⲗⲁⲟⲥ ϣⲱⲡⲉ ϩⲙ̅ⲡⲉϥⲟⲩⲱϣ ⲥⲙⲟⲩ ⲉⲠϫⲟⲉⲓⲥ. Ⲥⲱⲧⲙ̅ ⲛ̅ⲉⲣ̅ⲣⲱⲟⲩ ⲛ̅ⲧⲉⲧⲛ̅ϫⲓⲥⲙⲏ ⲛ̅ⲥⲁⲧⲣⲁⲡⲏⲥ ⲛ̅ⲇⲩⲛⲁⲧⲟⲥ . Ⲁⲛⲟⲕ ϯϣⲟⲟⲡ ⲙ̅Ⲡϫⲟⲉⲓⲥ ⲁⲛⲟⲕ ϯϣⲟⲟⲡ ⲛⲁϥ . ϯⲛⲁϫⲱ. ⲧⲁⲯⲁⲗⲗⲓ ⲉⲠϫⲟⲉⲓⲥ ⲡⲛⲟⲩⲧⲉ ⲙ̅ⲡⲒⲥⲣⲁⲏⲗ : Ⲡϫⲟⲉⲓⲥ ϩⲙ̅ⲡⲧⲣⲉⲕⲉⲓ ⲉⲃⲟⲗ ϩⲛ̅ⲥⲏⲉⲓⲣ . ⲁⲩⲱ ϩⲙ̅ⲡⲧⲣⲉⲕⲉⲓ ⲉⲃⲟⲗ ϩⲛ̅ⲧⲥⲱϣⲉ ⲛ̅Ⲉⲇⲱⲙ ⲡⲕⲁϩ ⲁϥⲛⲟⲓⲛ . ⲁⲩⲱ ⲧⲡⲉ ⲁⲥⲁϩⲉⲣⲁⲧⲥ̅ . ⲛ̅ⲕⲉⲕⲗⲟⲟⲗⲉ ⲁⲩϣⲟⲩⲉⲙⲟⲟⲩ ⲉⲡⲉⲥⲏⲧ. Ⲛ̅ⲧⲟⲩⲓⲏ ⲁⲩⲛⲟⲉⲓⲛ ⲙ̅ⲡⲉⲙ̅ⲧⲟ ⲉⲃⲟⲗ ⲙ̅Ⲡϫⲟⲉⲓⲥ ϩⲛ̅Ⲥⲓⲛⲁ . ⲙ̅ⲡⲙ̅ⲧⲟ ⲉⲃⲟⲗ ⲙ̅Ⲡϫⲟⲉⲓⲥ ⲡⲛⲟⲩⲧⲉ ⲙ̅ⲡⲒⲥⲣⲁⲏⲗ . Ϩⲛ̅ⲛ̅ⲉϩⲟⲟⲩ ⲛ̅Ⲥⲁⲙⲉ ⲅⲁⲣ ⲡϣⲏⲣⲉ ⲛ̅Ⲁⲛⲁⲑ . ϩⲛ̅ⲛⲉϩⲟⲟⲩ ⲛ̅Ⲓⲁⲏⲗ . ⲁⲩⲱϫⲛ̅ ⲛ̅ϭⲓⲛ̅ⲉⲣⲣⲱⲟⲩ ⲁⲩⲕⲁⲛⲉϩⲓⲟⲟⲩⲉ ⲉⲃⲟⲗ . ⲁⲩⲱ   ⲁⲩⲙⲟⲟϣⲉ ϩⲛ̅ⲙ̅ⲙⲟⲉⲓⲧ ⲉⲧϭⲟⲟⲩϭ ⲉⲧϭⲟⲟⲙⲉ. Ⲁⲩⲱϫⲛ̅ ⲛ̅ϭⲓⲛⲉⲧⲟⲛϩ . ⲁⲩⲱϫⲛ̅ ⲛ̅ϭⲓⲛ̅ⲇⲩⲛⲁⲧⲟⲥ ϩⲙ̅ⲡⲒⲥⲣⲁⲏⲗ . ⲁⲩⲱϫⲛ̅ ϣⲁⲛⲧⲥ̅ⲛⲉϩⲥⲉ ⲛ̅ϭⲓⲆⲉⲃⲃⲱⲣⲁ . ϣⲁⲛⲧⲥ̅ⲧⲱⲟⲩⲛ ⲛ̅ϭⲓⲟⲩⲙⲁⲩ ϩⲙ̅ⲡⲒⲥⲣⲁⲏⲗ . Ⲁⲩⲥⲱⲧⲡ̅ ⲛⲁⲩ ⲛ̅ϩⲉⲛⲛⲟⲩⲧⲉ ⲙ̅ⲃⲣ̅ⲣⲉ . Ⲧⲟⲧⲉ ⲁⲩⲡⲟⲗⲉⲙⲓ ⲙⲛ̅ⲙⲡⲟⲗⲓⲥ ⲛⲛ̅ⲁⲣⲭⲱⲛ. ⲟⲩⲑⲩⲣⲱⲛ ⲉϥϣⲁⲛⲟⲩⲱⲛϩ ⲉⲃⲟⲗ. ⲁⲩⲱ ⲟⲩϣⲗⲓϭ ⲙ̅ⲡⲉⲛⲓⲡⲉ ⲙⲛ̅ⲟⲩⲗⲟⲅⲭⲏ ϩⲙ̅ⲡⲉϩⲙⲉ ⲛ̅ϣⲟ ϩⲙ̅ⲡⲒⲥⲣⲁⲏⲗ. Ⲡⲁϩⲏⲧ ϥϭⲉⲉⲧ ⲉϫⲛ̅ⲛ̅ϣⲟⲣⲡ ⲙ̅ⲡⲧⲱϣ ⲙ̅ⲡⲒⲥⲣⲁⲏⲗ : Ⲛ̅ⲇⲩⲛⲁⲥⲧⲏⲥ ⲙ̅ⲡⲗⲁⲟⲥ ⲛⲉⲧⲉⲣⲉⲡⲉⲩⲟⲩⲱϣ ϣⲟⲟⲡ ϩⲙ̅ⲡⲗⲁⲟⲥ. Ⲥⲙⲟⲩ ⲉⲠϫⲟⲉⲓⲥ . ⲛⲉⲛⲧⲁⲩϩⲙⲟⲟⲥ ⲉϫⲛ̅ⲟⲩⲉⲓⲁ ⲛ̅ⲥϩⲓⲙⲉ . ⲁⲩⲱ ⲉⲩϩⲙⲟⲟⲥ ⲉϫⲛ̅ϩⲉⲛⲕⲁⲣⲟⲩⲭⲓⲛ. ⲁⲩⲱ ⲙ̅ⲡⲛⲁⲩ ⲙ̅ⲙⲉⲉⲣⲉ ⲉⲩϩⲙⲟⲟⲥ ⲉϫⲙ̅ⲡⲙⲁ ⲛ̅ϯϩⲁⲡ. ⲁⲩⲱ ⲉⲩⲙⲟⲟϣⲉ ⲉϫⲛ̅ⲛϩⲓⲟⲟⲩⲉ ⲉⲩⲟ ⲛ̅ϣⲏⲛ. ⲉⲧⲣⲉⲩϣⲁϫⲉ ϩⲓⲧⲉϩⲓⲏ ⲉⲡⲉϩⲣⲟⲟⲩ ⲛ̅ⲛⲉⲧⲣ̅ⲧⲱⲣⲉ ϩⲛ̅ⲧⲙⲏⲧⲉ ⲛ̅ⲛⲉⲧⲉⲩⲫⲣⲁⲛⲉ . ⲉⲩⲛⲁϯ ⲛ̅ⲟⲩⲇⲓⲕⲁⲓⲟⲥⲩⲛⲏ ⲙ̅ⲡⲙⲁ ⲉⲧⲙ̅ⲙⲁⲩ ⲙ̅Ⲡϫⲟⲉⲓⲥ   ⲁⲩⲝⲁⲛⲉ ⲛ̅ⲇⲓⲕⲁⲓⲟⲥ ⲛ̅ⲧⲉⲧⲛ̅ϭⲙ̅ϭⲟⲙ ϩⲙ̅ⲡⲒⲥⲣⲁⲏⲗ . Ⲧⲟⲧⲉ ⲡⲗⲁⲟⲥ   ⲙ̅Ⲡϫⲟⲉⲓⲥ   ⲁϥⲃⲱⲕ ⲉϩⲣⲁⲓ ⲉⲛⲉϥⲡⲟⲗⲓⲥ : Ⲧⲱⲟⲩⲛⲉ ⲧⲱⲟⲩⲛⲉ Ⲇⲉⲃⲃⲱⲣⲁ. Ⲧⲱⲟⲩⲛⲉ ⲧⲱⲟⲩⲛⲉ ⲛ̅ⲉⲧⲧⲁⲩⲟ ⲛ̅ⲟⲩⲱⲇⲏ ϩⲛ̅ⲟⲩϭⲟⲙ. Ⲧⲱⲟⲩⲛ ⲉϩⲣⲁⲓ Ⲃⲁⲣⲁⲕ ⲛⲅ̅ⲁⲓⲭⲙⲁⲗⲱⲧⲓⲍⲉ ⲛ̅ⲧⲉⲭⲙⲁⲗⲱⲥⲓⲁ ⲡϣⲏⲣⲉ ⲛ̅Ⲁⲃⲓⲛⲉⲉⲙ : Ⲁⲩⲱ Ⲇⲉⲃⲃⲱⲣⲁ ⲁⲥϯϭⲟⲙ ⲛ̅Ⲃⲁⲣⲁⲕ ⲁⲩⲱ ⲁⲥϫⲓⲥⲉ ⲛ̅ⲧⲉϥϭⲟⲙ.Ⲧⲟⲧⲉ ⲥⲉⲛⲁⲉⲓ ⲉⲡⲉⲥⲏⲧ ⲛ̅ϭⲓⲛⲉⲧⲧⲁϫⲣⲏⲩ ⲉⲩⲟ ⲛ̅ϣⲱϫⲡ ⲛ̅ϫⲱⲱⲣⲉ ⲙ̅ⲡⲗⲁⲟⲥ ⲙⲛ̅Ⲡϫⲟⲉⲓⲥ ϥⲛⲁⲉⲓ ⲛⲁϥ ⲉϩⲣⲁⲓ ϩⲛ̅ⲛⲉⲧⲧⲁϫⲣⲏⲩ. ⲡⲗⲁⲟⲥ ⲛ̅Ⲉⲫⲣⲁⲓⲙ ⲁⲩⲧⲓⲙⲱⲣⲓ ⲙ̅ⲙⲟⲟⲩ ϩⲛ̅ⲛⲓⲁ ⲡⲉⲩⲥⲟⲛ Ⲃⲉⲛⲓⲁⲙⲓⲛ. Ⲙⲁⲭⲓⲣ ϥϣⲟⲟⲡ ⲛⲙ̅ⲙⲁⲓ ⲛ̅ϩⲏⲅⲟⲩⲙⲉⲛⲟⲥ . ⲁⲩⲉⲓ ⲉϩⲣⲁⲓ ⲉⲩϯⲟⲩⲟⲓ . ⲁⲩⲱ ⲛ̅ⲉⲃⲟⲗ ϩⲛ̅Ⲍⲁⲃⲟⲩⲗⲱⲛ ⲉⲩⲥⲱⲕ ϩⲙ̅ⲡϭⲉⲣⲱⲃ ⲛ̅ⲧⲉⲥⲃⲱ ⲛ̅ⲟⲩⲅⲣⲁⲙⲙⲁⲧⲉⲩⲥ. Ⲁⲩⲱ ⲛ̅ⲁⲣⲭⲏⲅⲟⲥ ⲛ̅Ⲓⲥⲥⲁⲭⲁⲣ ⲥⲉϣⲟⲟⲡ ⲙⲛ̅Ⲇⲉⲃⲃⲱⲣⲁ. ⲁⲩⲱ Ⲃⲁⲣⲁⲕ ϥϣⲟⲟⲡ ⲙⲛ̅Ⲓⲥⲥⲁⲭⲁⲣ : Ⲧⲁⲓ ⲧⲉ ⲑⲉ ⲉⲛⲧⲁⲂⲁⲣⲁⲕ ϫⲟⲟⲩ ϩⲛ̅ⲛⲉⲓⲁ ϩⲓⲧⲟⲟⲧⲟⲩ ⲛ̅ⲛⲉϥϥⲁⲓϣⲓⲛⲉ ⲉⲃⲟⲗ ϩⲙ̅ⲙⲉⲣⲓⲥ ⲛ̅Ϩⲣⲟⲩⲃⲏⲛ . ⲛ̅ⲛⲟϭ ⲉⲧⲙⲟⲩϣⲧ ⲙ̅ⲡϩⲏⲧ : Ⲉⲧⲃⲉⲟⲩ ⲁⲩϩⲙⲟⲟⲥ ϩⲛ̅ⲧⲙⲏⲧⲉ ⲛ̅ⲧⲉϩⲓⲏ ⲧⲉⲧⲟⲩⲙⲟⲩⲧⲉ ⲉⲣⲟⲥ ϫⲉ ⲧⲆⲓⲅⲟⲙⲓⲁ . ⲉⲧⲣⲉⲩⲥⲱⲧⲙ̅ ⲉⲡⲉϩⲣⲟⲟⲩ ⲛ̅ⲛ̅ⲁⲅⲅⲉⲗⲟⲥ ⲉⲡⲡⲱⲣϫ̅ ⲛ̅Ϩⲣⲟⲩⲃⲏⲛ ϩⲉⲛⲙⲉⲅⲓⲥⲧⲁⲛⲟⲥ ⲁⲩⲙⲟⲩϣⲧ ⲙ̅ⲡϩⲏⲧ ⲛ̅Ⲅⲁⲗⲁⲁⲇ ϩⲙ̅ⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ ϩⲙ̅ⲡⲙⲁ ⲉⲛ̅ⲧⲁϥⲟⲩⲱϩ ⲛ̅ϩⲏⲧϥ̅ : Ⲁⲩⲱ Ⲇⲁⲛ ⲉⲧⲃⲉⲟⲩ ϥϭⲁⲗⲱⲟⲩ ⲉⲛⲉϫⲏⲩ . Ⲁⲥⲏⲣ ⲁϥϩⲙⲟⲟⲥ ϩⲛ̅ⲧⲡⲁⲣϩⲁⲗⲓⲁ ⲛ̅ⲛⲉⲑⲁⲗⲁⲥⲁ . Ⲁⲩⲱ Ⲍⲁⲃⲟⲩⲗⲱⲛ ⲁϥⲟⲩⲱϩ ϩⲓϫⲛ̅ⲛⲉϥⲙⲟⲉⲓⲧ ⲛ̅ⲉⲓ ⲉⲃⲟⲗ . ⲡⲗⲁⲟⲥ ⲉⲛ̅ⲧⲁⲩⲛⲉϭⲛⲉϭⲧⲉϥⲯⲩⲭⲏ ⲉⲃⲟⲗ ϩⲙ̅ⲡⲙⲟⲩ : Ⲁⲩⲱ Ⲛⲉⲫⲑⲁⲗⲉⲓ ϩⲓϫⲙ̅ⲡϫⲓⲥⲉ ⲛ̅ⲧⲥⲱϣⲉ. ⲁⲩⲉⲓ ⲛ̅ϭⲓⲛⲉⲩⲉⲣⲣⲱⲟⲩ ⲁⲩⲥⲱⲣ ⲉⲃⲟⲗ ⲉⲙⲓϣⲉ. Ⲧⲟⲧⲉ ⲁⲩⲡⲟⲗⲉⲙⲓ ⲛ̅ϭⲓⲛⲉⲣⲣⲱⲟⲩ ⲛ̅Ⲭⲁⲛⲁⲁⲛ ϩⲛ̅Ⲑⲁⲛⲁⲁⲕ ϩⲓϫⲙ̅ⲡⲙⲟⲟⲩ ⲙ̅Ⲙⲁⲅⲉⲇⲇⲱ . ⲙ̅ⲡⲟⲩϫⲓⲇⲱⲣⲟⲛ ⲛ̅ϩⲁⲧ. Ⲛ̅ⲥⲓⲟⲩ ⲉⲃⲟⲗ ϩⲛ̅ⲧⲡⲉ ⲁⲩⲁϩⲉⲣⲁⲧⲟⲩ ϩⲛ̅ⲛⲉⲩⲙⲁ ⲙ̅ⲙⲟⲟϣⲉ ⲉⲧⲣⲉⲩⲙⲓϣⲉ ⲙⲛ̅Ⲥⲓⲥⲁⲣⲁ. Ⲡⲉⲭⲓⲙⲁⲣⲣⲟⲥ ⲛ̅Ⲕⲓⲥⲱⲛ ⲁϥⲥⲩⲣⲁ ⲙ̅ⲙⲟⲟⲩ. Ⲡⲉⲭⲓⲙⲁⲣⲣⲟⲥ ⲛ̅ⲁⲣⲭⲁⲓⲟⲥ ⲡⲉⲭⲓⲙⲁⲣⲣⲟⲥ ⲛ̅Ⲕⲓⲥⲱⲛ ⲧⲁⲯⲩⲭⲏ ⲉⲧϭⲙ̅ϭⲟⲙ ⲛⲁⲕⲁⲡⲁⲧⲓ ⲙ̅ⲙⲱⲟⲩ . Ⲧⲟⲧⲉ ⲁϥϫⲱⲣⲡ̅ ⲛ̅ϭⲓⲛ̅ϯⲃⲥ̅   ⲙ̅ⲡⲉϩⲧⲟ ϩⲛ̅ⲟⲩϣⲧⲟⲣⲧⲣ̅ . Ⲁⲩⲱ ⲡⲁϯⲃⲥ ⲛⲁϩⲱⲙ ⲉϩⲣⲁⲓ ⲉϫⲱⲟⲩ ⲉⲩⲛⲁⲡⲱⲧ ⲉⲧⲱⲛ ⲛ̅ϭⲓⲛⲉϥϫⲱⲱⲣⲉ. Ⲥⲁϩⲟⲩ ⲛ̅ⲧⲉⲧⲟⲩⲙⲟⲩⲧⲉ ⲉⲣⲟⲥ ϫⲉ Ⲙⲁⲣⲱⲥ. Ⲡⲉϫⲉⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ϫⲉ ⲥⲁϩⲟⲩ ⲙ̅ⲙⲟⲥ ⲥⲉⲥϩⲟⲩⲟⲣ̅ⲧ ⲛ̅ϭⲓⲛⲉⲧⲟⲩⲏϩ ⲛ̅ϩⲏⲧⲉ ⲉⲃⲟⲗϫⲉ ⲙ̅ⲡⲟⲩⲉⲓ ⲉⲩⲃⲟⲏⲑⲓⲁ. Ⲡϫⲟⲉⲓⲥ ϣⲟⲟⲡ ⲉⲩⲃⲟⲏⲑⲓⲁ ϩⲛ̅ⲛ̅ⲇⲩⲛⲁⲧⲟⲥ : Ⲉⲥⲉϣⲱⲡⲉ ⲉⲥⲥⲙⲁⲙⲁⲁⲧ ϩⲛ̅ⲛⲉϩⲓⲟⲙⲉ ⲛ̅ϭⲓⲒⲁⲏⲗ ⲑⲓⲙⲉ ⲛ̅Ⲭⲁⲃⲉⲣ ⲡⲕⲓⲛⲛⲁⲓⲟⲥ ⲛ̅ⲧⲟⲟⲧⲟⲩ ⲛ̅ⲛⲉϩⲓⲟⲙⲉ.ⲉⲥⲉϣⲱⲡⲉ ⲉⲥⲥⲙⲁⲙⲁⲁⲧ ϩⲛ̅ⲛⲉⲥⲕⲛⲏ. Ⲛ̅ⲧⲁϥⲁⲓⲧⲓ ⲛⲟⲩⲙⲟⲟⲩ ⲁⲥϯⲉⲣⲱⲧⲉ ⲛⲁϥ ϩⲛ̅ⲟⲩⲗⲁⲕⲁⲛⲏ. Ⲛ̅ⲛ̅ⲇⲩⲛⲁⲧⲟⲥ ⲉⲁⲥⲡⲣⲟⲥⲉⲅⲉⲅⲉ ⲛⲁϥ ⲛ̅ⲟⲩⲥⲁⲓⲣⲉ. Ⲧⲉⲥϭⲓϫ ⲛ̅ϩⲃⲟⲩⲣ ⲁⲥⲥⲟⲩⲧⲱⲛⲥ̅ ⲉⲃⲟⲗ ⲉ̅ⲧⲉϣⲙⲟⲩ. ⲁⲩⲱ ⲧⲉⲥϭⲓϫ ⲛ̅ⲟⲩⲛⲁⲙ ⲁⲥⲥⲟⲩⲧⲱⲛⲥ̅ ⲉⲃⲟⲗ ⲉⲡϩⲁⲧⲏⲣ ⲛ̅ⲛⲉⲧϩⲟⲥⲉ. ⲁⲩⲱ ⲁⲥⲧⲣ̅ⲧⲱⲣⲥ̅ ⲉⲡⲉⲥⲙⲁⲩ ⲛ̅Ⲥⲓⲥⲁⲣⲁ . ⲁⲥⲱϥⲧ ⲛ̅ⲧⲉϥⲁⲡⲉ ⲁⲥⲣⲁϩⲧϥ̅ ⲁⲥⲱϥⲧ   ⲙ̅ⲡⲉϥⲥⲙⲁⲩ ⲁϥϩⲉ   ϩⲁⲣⲁⲧⲟⲩ ⲛ̅ⲛⲉⲥⲟⲩⲉⲣⲏⲧⲉ . Ⲁϥⲥⲃⲗ̅ⲧⲉ ⲁϥⲕⲉⲥⲕⲱⲥϥ̅ ⲉⲃⲟⲗ ⲁϥⲛ̅ⲕⲟⲧⲕ̅ ⲟⲩⲧⲉ ⲛⲉⲥⲟⲩⲉⲣⲏⲧⲉ. Ⲁϥⲛⲟϫϥ̅ ⲁϥϭⲱ ⲛ̅ⲑⲉ ⲉⲛⲧⲁϥⲛⲟϫϥ̅ ⲙ̅ⲙⲟⲥ . ⲛ̅ⲧⲁϥϩⲉ ⲙ̅ⲡⲙⲁ ⲉⲧⲙ̅ⲙⲁⲩ ⲉⲁϥⲛⲟϫϥ̅ ⲉⲃⲟⲗ : Ⲁⲧⲙⲁⲁⲩ ⲛ̅Ⲥⲓⲥⲁⲣⲁ ϭⲱϣⲧ ⲉⲃⲟⲗ ϩⲙ̅ⲡϣⲟⲩϣⲧ ⲉⲧⲟ ⲛ̅ⲣⲁ ⲙ̅ⲡⲓⲧⲉ . ⲉⲃⲟⲗϫⲉ ⲁⲩϫⲓϣⲓⲡⲉ ⲛ̅ϭⲓⲛⲉϥϩⲁⲣⲙⲁ ⲉⲉⲓ . ⲁⲩⲣ̅ϩⲁⲉ ⲛ̅ϭⲓⲛ̅ⲟⲩⲉⲣⲏⲧⲉ ⲛ̅ⲛⲉϥϩⲁⲣⲙⲁ ⲉⲉⲓ . Ⲛⲉϩⲓⲟⲙⲉ ⲛ̅ⲥⲁⲃⲏ ⲉⲧⲛⲟⲓ ⲛ̅ⲧⲟⲟⲧⲥ̅ ⲁⲩⲣ̅ⲟⲩⲱ ⲛⲁⲥ. Ⲛ̅ⲧⲟⲥ ϩⲱⲱⲥ ⲁⲥⲕⲧⲉⲛⲉⲥϣⲁϫⲉ ⲉϩⲟⲩⲛ ⲉⲣⲟⲥ. ϫⲉ ⲛ̅ⲥⲉⲛⲁϩⲉ ϭⲉ ⲁⲛ ⲉⲣⲟϥ ⲉϥⲡⲱϣ ⲛ̅ϩⲉⲛϣⲱⲗ. ⲡϣⲁⲛϩⲧⲏϥ ⲛⲁϣⲁⲛϩⲧⲏϥ ⲉϫⲛ̅ⲧⲁⲡⲉ   ⲙ̅ⲡⲣⲱⲙⲉ . Ϩⲉⲛϣⲱⲗ ⲉⲩϫⲏϭ ϩⲉⲛϫⲱϭⲉ ⲛ̅ⲁⲩⲉⲓⲛ ⲁⲩⲁⲛ . Ⲛ̅ⲉⲓⲟⲡⲉ ⲙ̅ⲡⲟⲓⲕⲓⲗⲧⲏⲥ . ⲛ̅ⲧⲟⲟⲩ ⲛ̅ϣⲱⲗ ⲉⲩⲕⲱⲧⲉ ⲉⲛⲉϥⲙⲁⲕϩ . ⲉⲩⲉⲧⲁⲕⲟ ϩⲓⲛⲁⲓ ⲛ̅ϭⲓⲛⲉⲕϫⲓϫⲉⲉⲩ ⲧⲏⲣⲟⲩ Ⲡϫⲟⲉⲓⲥ . ⲁⲩⲱ ⲛⲉⲧⲙⲉ ⲙ̅ⲙⲟϥ ⲉⲩⲉⲣ̅ⲑⲉ ⲉⲙⲡⲓⲉⲃⲟⲗ ⲛ̅ϭⲓⲛ̅ϣⲁ ⲙ̅ⲡⲣⲏ ϩⲛ̅ⲧⲉϥϭⲟⲙ. Ⲁⲩⲱ ⲡⲕⲁϩ ⲁϥⲥϭⲣⲁϩⲧ ⲛ̅ϩⲙⲉ ⲛ̅ⲣⲟⲙⲡⲉ :

Ⲋ. Ⲙⲛ̅ⲛⲥⲁⲛⲁⲓ ⲛ̅ϣⲏⲣⲉ ⲡ̅Ⲓⲥⲣⲁⲏⲗ ⲁⲩⲉⲓⲣⲉ ⲙ̅ⲡⲡⲟⲛⲏⲣⲟⲛ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲉⲓⲥ. ⲁⲩⲱ Ⲡϫⲟⲉⲓⲥ ⲁϥⲧⲁⲁⲩ ⲉϩⲣⲁⲓ ⲉⲧⲟⲟⲧϥ̅ ⲙ̅Ⲙⲁⲇⲓϩⲁⲙ ⲛ̅ⲥⲁϣϥⲉ ⲛ̅ⲣⲟⲙⲡⲉ . ⲁⲩⲱ ⲧϭⲓϫ ⲙ̅Ⲙⲁⲇⲓϩⲁⲙ ⲁⲥϩⲣⲟϣ ⲉϫⲙ̅ⲡⲒⲥⲣⲁⲏⲗ. Ⲁⲩⲱ ⲁⲩⲧⲁⲙⲉⲓⲟ ⲛⲁⲩ ⲛ̅ϭⲓⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ϩⲁⲡϩⲟ ⲙ̅Ⲙⲁⲇⲓϩⲁⲙ ⲛ̅ⲟⲩⲱϣ ⲉⲧϩⲛ̅ⲛ̅ⲛⲧⲟⲩⲉⲓⲏ. ⲙⲛ̅ⲛⲉⲥⲡⲏⲗⲁⲓⲟⲛ . ⲙⲛ̅ⲛϩⲏ ⲛ̅ϣⲁⲧⲱⲛⲉ : Ϣⲁⲥϣⲱⲡⲉ ⲇⲉ ⲉⲣϣⲁⲛⲛⲉϣⲏⲣⲉ ⲙ̅ⲡⲒⲥⲣⲁⲏⲗ ϫⲉ ⲛⲉⲩⲥⲱϣⲉ . ϣⲁⲣⲉⲘⲁⲇⲓϩⲁⲙ ⲉⲓ ⲉϩⲣⲁⲓ ⲙⲛ̅ⲡⲀⲙⲁⲗⲏⲕ ⲙⲛ̅ⲛϣⲏⲣⲉ ⲉⲧϩⲛ̅ⲙ̅ⲙⲁ ⲛ̅ϣⲁ . ϣⲁⲩⲉⲓ ⲙⲛ̅Ⲙⲁⲇⲓϩⲁⲙ . ⲛ̅ⲥⲉⲡⲱϩⲧ ⲉϩⲣⲁⲓ ⲉϫⲱⲟⲩ. ⲛ̅ⲥⲉⲧⲁⲕⲟ ⲛ̅ⲛ̅ⲕⲁⲣⲡⲟⲥ ⲙ̅ⲡⲕⲁϩ ϣⲁⲛ̅ⲧⲟⲩⲡⲱϩ ⲉϩⲣⲁⲓ ⲉⲄⲁⲍⲁ. Ⲉⲙⲉⲩϣⲉϫⲡ̅ⲗⲁⲁⲩ ⲛ̅ⲥⲙⲟⲧ ⲛ̅ⲱⲛϩ̅ ⲉⲡⲁϩⲟⲩ ϩⲙ̅ⲡⲕⲁϩ ⲙ̅ⲡⲒⲥⲣⲁⲏⲗ . ⲟⲩⲇⲉ ⲟⲩⲙⲁⲥⲉ ⲟⲩⲇⲉ ⲟⲩⲉⲓⲱ ϩⲛ̅ⲛⲉⲩⲟϩⲉ . ϫⲉ ⲛ̅ⲧⲟⲟⲩ ⲙⲛ̅ⲛⲉⲩⲕⲉⲧⲃ̅ⲛⲟⲟⲩⲉ ⲛ̅ⲛⲉϣⲁⲩⲉⲓ ⲉϩⲣⲁⲓ ⲉⲛⲉⲩⲥⲕⲏⲛⲏ . Ⲉϣⲁⲩⲉⲓ ⲛ̅ⲑⲉ ⲛ̅ϩⲉⲛϣϫⲉ ⲉⲛⲁϣⲱⲟⲩ . ⲁⲩⲱ ⲛ̅ⲧⲟⲟⲩ ⲙⲛ̅ⲛⲉⲩⲕⲉϭⲁⲙⲟⲩⲗ ⲛ̅ⲛⲉⲙⲛ̅ⲏⲡⲉ ⲉⲣⲟⲟⲩ . ⲁⲩⲱ ⲉⲛⲉϣⲁⲩⲉⲓ ⲉϩⲣⲁⲓ ⲉⲡⲕⲁϩ ⲙ̅ⲡⲒⲥⲣⲁⲏⲗ ⲛ̅ⲥⲉⲧⲁⲕⲟϥ . ⲁⲩⲱ ⲡⲒⲥⲣⲁⲏⲗ ⲁϥⲣ̅ϩⲏⲕⲉ ⲉⲙⲁⲧⲉ ⲛ̅ⲛⲁϩⲣⲁⲥ ⲙ̅Ⲙⲁⲇⲓϩⲁⲙ. ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲱϣ ⲉⲃⲟⲗ ⲉϩⲣⲁⲓ ⲉⲠϫⲟⲓⲥ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲙⲁⲇⲓϩⲁⲙ : Ⲁⲩⲱ Ⲡϫⲟⲉⲓⲥ ⲁϥϫⲟⲟⲩ ⲛ̅ⲟⲩⲣⲱⲙⲉ ⲙ̅ⲡⲣⲟⲫⲏⲧⲏⲥ ⲉⲣⲁⲧⲟⲩ ⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲡⲉϫⲁϥ ⲛⲁⲩ . Ϫⲉ ⲛⲁⲓ ⲛⲉⲧⲉⲣⲉⲠϫⲟⲉⲓⲥ ⲡ̅ⲛⲟⲩⲧⲉ ⲙ̅ⲡⲒⲥⲣⲁⲏⲗ ϫⲱ ⲙ̅ⲙⲟⲟⲩ. ϫⲉ ⲁⲛⲟⲕ ⲡⲉⲛⲧⲁⲓⲛ̅ⲧⲏⲩⲧⲛ̅ ⲉϩⲣⲁⲓ ⲉⲃⲟⲗ ϩⲙ̅ⲡⲕⲁϩ ⲛ̅Ⲕⲏⲙⲉ. ⲁⲩⲱ ⲁⲓⲛ̅ⲧⲏⲩⲧⲛ̅ ⲉⲃⲟⲗ ϩⲙ̅ⲡⲏⲓ ⲛ̅ⲧⲉⲧⲛ̅ⲙⲛ̅ⲧϩⲙ̅ϩⲁⲗ.ⲁⲩⲱ ⲁⲓⲛⲉϩⲙ̅ⲧⲏⲩⲧⲛ̅ ⲉⲃⲟⲗ ⲛ̅ⲧⲟⲟⲧϥ̅ ⲛ̅ⲛⲉⲧⲑⲗⲓⲃⲉ ⲙ̅ⲙⲱⲧⲛ̅ ⲧⲏⲣⲟⲩ ⲁⲓⲛⲟϫⲟⲩ ⲉⲃⲟⲗ ϩⲓϩⲏ ⲙ̅ⲙⲱⲧⲛ̅ ⲁⲩⲱ ⲁⲓϯ ⲛⲏⲧⲛ̅ ⲙ̅ⲡⲉⲩⲕⲁϩ. Ⲁⲩⲱ ⲁⲓϫⲟⲟⲥ ⲛⲏⲧⲛ̅ ϫⲉ ⲁⲛⲟⲕ ⲡⲉ Ⲡϫⲟⲉⲓⲥ ⲡⲉⲧⲛ̅ⲛⲟⲩⲧⲉ. ⲛ̅ⲛⲉⲧⲛ̅ⲣ̅ϩⲟⲧⲉ ϩⲏⲧⲟⲩ ⲛ̅ⲛ̅ⲛⲟⲩⲧⲉ ⲛ̅ⲁⲙⲙⲟⲣⲁⲓⲟⲥ ⲛⲁⲓ ⲛ̅ⲧⲱⲧⲛ̅ ⲉⲧⲉⲧⲛ̅ϣⲟⲟⲡ ϩⲙ̅ⲡⲉⲩⲕⲁϩ. Ⲁⲩⲱ ⲙ̅ⲡⲉⲧⲛ̅ⲥⲱⲧⲙ̅ ⲛ̅ⲥⲁⲡⲁϩⲣⲟⲟⲩ : Ⲟⲩⲁⲅⲅⲉⲗⲟⲥ ⲇⲉ ⲛ̅ⲧⲉⲠϫⲟⲉⲓⲥ ⲁϥⲉⲓ ⲉϩⲣⲁⲓ ⲁϥϩⲙⲟⲟⲥ ϩⲁⲧⲧⲉⲣⲉⲙⲓⲛⲑⲟⲥ ⲧⲁⲈⲫⲣⲁⲓⲙ ⲉⲧϩⲛ̅Ⲥⲓⲕⲓⲙⲁ ϩⲙ̅ⲡⲕⲁϩ ⲛ̅Ⲓⲱⲁⲥ ⲡⲉⲓⲱⲧ ⲛ̅Ⲉⲥⲧⲣⲓ ⲁⲩⲱ Ⲅⲉⲇⲉⲱⲛ ⲡⲉϥϣⲏⲣⲉ ⲛⲉϥⲟⲩⲉϣⲟⲩⲉϣ ⲛ̅ϩⲉⲛⲥⲟⲩⲟ ϩⲛ̅ⲟⲩϩⲣⲱⲧ ⲉⲧⲣⲉⲩⲡⲱⲧ ϩⲁⲡϩⲟ ⲙ̅Ⲙⲁⲇⲓϩⲁⲙ. Ⲁⲩⲱ ⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ⲁϥⲟⲩⲱⲛϩ ⲉⲣⲟϥ : Ⲡⲉϫⲁϥ ⲛⲁϥ. ϫⲉ Ⲡϫⲟⲉⲓⲥ ⲡϫⲱⲱⲣⲉ ⲛ̅ⲛϭⲟⲙ ϣⲟⲟⲡ ⲛⲙ̅ⲙⲁⲕ. Ⲁⲩⲱ ⲡⲉϫⲉⲄⲉⲇⲉⲱⲛ ⲛⲁϥ ϫⲉ ⲥⲱⲧⲙ̅ ⲉⲣⲟⲓ Ⲡϫⲟⲉⲓⲥ. Ⲉϣϫⲉ Ⲡϫⲟⲉⲓⲥ ϣⲟⲟⲡ ⲛⲙ̅ⲙⲁⲛ ⲉⲧⲃⲉⲟⲩ ⲁⲛⲉⲓϩⲓⲥⲉ ⲧⲏⲣⲟⲩ ⲉⲓ ⲉϩⲣⲁⲓ ⲉϫⲱⲛ . Ⲁⲩⲱ ⲉⲩⲧⲱⲛ ⲛⲉϥϣⲡⲏⲣⲉ ⲧⲏⲣⲟⲩ ⲉⲛⲧⲁⲛⲉⲛⲉⲓⲟⲧⲉ ⲧⲁⲩⲟⲟⲩ ⲉⲣⲟ ⲉⲩϫⲱ ⲙ̅ⲙⲟⲥ . Ϫⲉ ⲙⲏ ⲉⲛⲧⲁⲠϫⲟⲉⲓⲥ ⲛ̅ⲧⲛ̅ ⲁⲛ ⲉϩⲣⲁⲓ ϩⲛ̅Ⲕⲏⲙⲉ . Ⲧⲉⲛⲟⲩ ⲇⲉ ⲁϥⲛⲟϫⲛ̅ ⲉⲃⲟⲗ ⲙ̅ⲙⲟϥ ⲛ̅ϭⲓⲠϫⲟⲓⲥ. ⲁϥⲧⲁⲁⲛ ⲉϩⲣⲁⲓ ⲉⲧⲟⲟⲧⲥ̅ ⲙ̅Ⲙⲁⲇⲓϩⲁⲙ : Ⲁⲩⲱ ⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ⲁϥϭⲱϣⲧ ⲉϫⲱϥ ⲡⲉϫⲁϥ ⲛⲁϥ . Ϫⲉ ⲃⲱⲕ ϩⲛ̅ⲧⲉⲕϭⲟⲙ ⲉⲧⲉⲧⲁⲓ ⲧⲉ ⲁⲩⲱ ⲕⲛⲁⲟⲩⲱϩⲙ̅ ⲙ̅ⲡⲒⲥⲣⲁⲏⲗ ⲛ̅ⲧⲟⲟⲧⲥ̅ ⲙ̅Ⲙⲁⲇⲓϩⲁⲙ . Ⲉⲓⲥ ϩⲏⲏⲧⲉ ⲁⲓϫⲟⲟⲩⲕ ⲉⲧⲣⲉⲕⲃⲱⲕ : ⲠⲉϫⲉⲄⲉⲇⲉⲱⲛ ⲛⲁϥ ϫⲉ ⲥⲱⲧⲙ̅ ⲉⲣⲟⲓ Ⲡⲁϫⲟⲉⲓⲥ ⲡⲒⲥⲣⲁⲏⲗ ⲉⲓⲛⲁⲛⲁϩⲙⲉ ϩⲛ̅ⲟⲩ. Ⲉⲓⲥ ϩⲏⲏⲧⲉ ⲉⲓⲥ ⲧⲁϣⲟ ⲛ̅ⲣⲱⲙⲉ ⲁⲥⲣ̅ϭⲱⲃ ϩⲙ̅Ⲙⲁⲛⲁⲥⲥⲏ. ⲁⲩⲱ ⲁⲛⲟⲕ ⲡⲉ ⲡⲉⲧⲥⲟⲃⲕ ϩⲙ̅ⲡⲏⲓ ⲙ̅ⲡⲁⲉⲓⲱⲧ : Ⲡⲉϫⲉⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ⲛⲁϥ ϫⲉ Ⲡϫⲟⲉⲓⲥ ϥⲛⲁϣⲱⲡⲉ ⲛⲙ̅ⲙⲁⲕ. ⲁⲩⲱ ⲕⲛⲁⲡⲁⲧⲁⲥⲥⲉ ⲛ̅ⲧⲘⲁⲇⲓϩⲁⲙ ⲛ̅ⲑⲉ ⲛ̅ⲟⲩⲣⲱⲙⲉ ⲛ̅ⲟⲩⲱⲧ : Ⲡⲉϫⲉⲅⲉⲇⲉⲱⲛ ⲛⲁϥ ϫⲉ ⲉϣϫⲉ ⲁⲓϭⲛ̅ⲭⲁⲣⲓⲥ ⲛ̅ⲛⲁϩⲣⲁⲕ . ⲁⲩⲱ ⲕⲛⲁⲉⲓⲣⲉ ⲛⲙ̅ⲙⲁⲓ ⲛⲉⲛⲛⲧⲁⲕϫⲟⲟⲩ ⲉⲣⲟⲓ ⲧⲏⲣⲟⲩ ⲙ̅ⲡⲟⲟⲩ . ⲙ̅ⲡⲣ̅ⲣ̅ⲡⲃⲟⲗ ⲙ̅ⲡⲉⲓⲙⲁ ϣⲁⲛⲧⲉⲓ ϣⲁⲣⲟⲕ . ⲛ̅ⲧⲁⲉⲓⲛⲉ ⲉⲃⲟⲗ ⲛ̅ⲧⲁⲑⲩⲥⲓⲁ ⲛ̅ⲧⲁⲕⲁⲁⲥ ⲙ̅ⲡⲉⲕⲙ̅ⲧⲟ ⲉⲃⲟⲗ : Ⲡⲉϫⲉⲡⲁⲅⲅⲉⲗⲟⲥ ⲛⲁϥ ϫⲉ ⲉⲓⲥ ϩⲏⲏⲧⲉ ϯⲛⲁϭⲱ ϣⲁⲛⲧⲕ̅ⲓ . Ⲁⲩⲱ Ⲅⲉⲇⲉⲱⲛ ⲁϥⲃⲱⲕ ⲉϩⲣⲁⲓ ⲉⲡⲉϥⲏⲓ ⲁϥⲧⲁⲙⲓⲟ ⲛ̅ⲟⲩⲙⲁⲥ ⲛ̅ⲃⲁⲁⲙⲡⲉ ⲁⲩⲱ ⲟⲩϣⲓ ⲛ̅ⲛⲟⲉⲓⲧ ⲁϥⲧⲁⲙⲓⲟϥ ⲛ̅ϩⲉⲛⲁⲑⲁⲃ . ⲛⲁϥ ⲁϥⲕⲁⲁⲩ ϩⲛ̅ⲟⲩⲕⲟⲧ ⲁⲩⲱ ⲡⲉⲩⲥⲱⲙⲓⲛ ⲁϥⲡⲁϩⲧϥ̅ ⲉⲧϭⲁⲗⲁϩⲧ ⲁϥⲉⲛ̅ⲧⲟⲩ ⲉⲃⲟⲗ ⲉⲣⲁⲧϥ̅ ϩⲁⲣⲟⲥ ⲛ̅ⲧⲧⲉⲣⲉⲙⲓⲛⲑⲟⲥ ⲁϥⲕⲁⲁⲩ ⲙ̅ⲡⲉϥⲙ̅ⲑⲟ ⲉⲃⲟⲗ. Ⲡⲉϫⲉⲡⲁⲅⲅⲉⲗⲟⲥ ⲙ̅ⲡⲛⲟⲩⲧⲉ ⲛⲁϥ ϫⲉ ϫⲓ ⲛⲁϥ ⲙⲛ̅ⲛⲟⲉⲓⲕ ⲛ̅ⲁⲑⲁⲃ ⲛⲅ̅ⲕⲁⲁⲩ ⲉϩⲣⲁⲓ ϩⲁⲧⲛ̅ⲧⲡⲉⲧⲣⲁ ⲉⲧⲙ̅ⲙⲁⲩ . ⲁⲩⲱ ⲡⲍⲱⲙⲓⲛ ⲛⲅ̅ⲡⲁϩⲧϥ̅ Ⲁϥⲉⲓⲣⲉ ϩⲓⲛⲁⲓ ⲛ̅ϭⲓⲄⲉⲇⲉⲱⲛ : Ⲁⲩⲱ ⲡⲁⲅⲅⲉⲗⲟⲥ ⲙ̅Ⲡϫⲟⲓⲥ ⲁϥⲥⲟⲟⲩⲧⲛ̅ ⲉⲃⲟⲗ ⲛ̅ϩⲏⲧϥ̅ ̅ⲙⲡⲉϥϭⲉⲣⲱⲃ ⲉⲧϩⲛ̅ⲧⲉϥϭⲓϫ ⲁϥϫⲱϩ ⲉⲛⲁϥ ⲙⲛ̅ⲛ̅ⲟⲉⲓⲕ ⲛ̅Ⲁⲑⲁⲃ . Ⲁⲩⲱ ⲟⲩⲕⲱϩⲧ ⲁϥⲉⲓ ⲉⲃⲟⲗ ϩⲛ̅ⲧⲡⲉⲧⲣⲁ ⲁϥⲟⲩⲱⲙ ⲛ̅ⲛⲁϥ ⲙⲛ̅ⲛⲟⲉⲓⲕ ⲛ̅Ⲁⲑⲁⲃ. Ⲁⲩⲱ ⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ⲁϥⲙⲟⲟϣⲉ ⲉϩⲣⲁⲓ ⲛ̅ⲛⲁϩⲣⲛ̅ⲛⲉϥⲃⲁⲗ. ⲁⲩⲱ Ⲅⲉⲇⲉⲱⲛ ⲁϥⲉⲓⲙⲉ ϫⲉ ⲟⲩⲁⲅⲅⲉⲗⲟⲥ ⲛ̅ⲧⲉⲠϫⲟⲉⲓⲥ ⲡⲉ ⲡⲁⲓ : ⲠⲉϫⲉⲄⲉⲇⲉⲱⲛ ϫⲉ ⲟⲩⲟⲓ ⲛⲁⲓ Ⲡϫⲟⲉⲓⲥ ⲡⲛⲟⲩⲧⲉ. ⲉⲃⲟⲗϫⲉ ⲁⲓⲛⲁⲩ ⲉⲡⲁⲅⲅⲉⲗⲟⲥ ⲙ̅ⲡϫⲟⲉⲓⲥ ⲛ̅ϩⲟ ϩⲓϩⲟ : ⲠⲉϫⲉⲠϫⲟⲉⲓⲥ ⲛⲁϥ ϫⲉ ϯⲣⲏⲛⲏ ⲉⲥⲉϣⲱⲡⲉ ⲛⲁⲕ ⲙ̅ⲡⲣ̅ⲣϩⲟⲧⲉ ⲛⲅ̅ⲛⲁⲙⲟⲩ ⲁⲛ : Ⲁⲩⲱ Ⲅⲉⲇⲉⲱⲛ ⲁϥⲕⲱⲧ ⲙ̅ⲡⲙⲁ ⲉⲧⲙ̅ⲙⲁⲩ ⲛ̅ⲟⲩⲑⲩⲥⲓⲁⲥⲧⲏⲣⲓⲟⲛ ⲙ̅Ⲡϫⲟⲉⲓⲥ . ⲁⲩⲱ ⲁϥⲙⲟⲩⲧⲉ ⲉⲣⲟϥ ϫⲉ ϯⲣⲏⲛⲏ ⲙ̅Ⲡϫⲟⲉⲓⲥ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ : Ⲉⲧⲓ ⲛ̅ⲧⲟϥ ⲉϥϣⲟⲟⲡ ϩⲛ̅Ⲉⲫⲣⲁⲑⲁ ⲡⲕⲁϩ ⲙ̅ⲡⲉⲓⲱⲧ ⲛ̅Ⲉⲥⲇⲣⲓ. Ⲁⲥϣⲱⲡⲓ ϩⲛ̅ⲧⲉⲩϣⲏ ⲉ̅ⲧⲙ̅ⲙⲁⲩ ⲡⲉϫⲉⲠϫⲟⲓⲥ ⲛⲁϥ ϫⲉ ϫⲓ ⲙ̅ⲡⲙⲁⲥⲉ ⲉⲧⲉⲡⲧⲁⲩⲣⲟⲥ ⲡⲉ ⲉⲡⲁⲡⲉⲕⲓⲱⲧ ⲡⲉ ⲁⲩⲱ ⲕⲉⲙⲁⲥⲉ ⲛ̅ⲥⲁϣϥⲉ ⲛ̅ⲣⲟⲙⲡⲉ ⲛⲅ̅ϣⲣ̅ϣⲣ̅ⲡⲉⲑⲩⲥⲓⲁⲥⲧⲏⲣⲓⲟⲛ ⲙ̅ⲡⲂⲁϩⲁⲗ. ⲡⲁⲓ ⲉⲧϣⲟⲟⲡ ⲙ̅ⲡⲉⲕⲉⲓⲱⲧ ⲁⲩⲱ ⲡⲙⲁ ⲛ̅ϣⲏⲛ ⲉⲧϩϫⲱϥ ⲛⲅ̅ⲕⲟⲟⲣⲉϥ. ⲛⲅ̅ⲕⲱⲧ ⲛ̅ⲟⲩⲑⲩⲥⲓⲁⲥⲧⲏⲣⲓⲟⲛ ⲙ̅Ⲡϫⲟⲓⲥ ⲡⲉⲕⲛⲟⲩⲧⲉ ⲡⲉⲛ̅ⲧⲁϥⲟⲩⲱⲛϩ ⲉⲣⲟⲕ ⲉϫⲙ̅ⲡⲕⲟⲟϩ ⲙ̅ⲡⲧⲟⲟⲩ ⲙ̅Ⲙⲁⲱⲭ. ⲉⲧⲉⲡⲁⲓ ⲡⲉ ⲉⲧϩⲙ̅ⲡⲙⲁ ⲙ̅ⲙⲓϣⲉ ⲁⲩⲱ ⲉⲕⲉϫⲓ ⲙ̅ⲡⲙⲁⲥⲉ ⲛⲅ̅ⲧⲁⲗⲟϥ ⲉϩⲣⲁⲓ ⲛ̅ϩⲟⲗⲟⲕⲁⲩⲧⲱⲙⲁ ⲉϫⲛ̅ⲛϣⲉ ⲙ̅ⲡⲙⲁ ⲛ̅ϣⲏⲛ ⲡⲁⲓ ⲉⲧⲕ̅ⲛⲁⲕⲟⲟⲣⲉϥ: Ⲁⲩⲱ ⲁϥϫⲓ ⲛ̅ϭⲓⲄⲉⲇⲉⲱⲛ ⲙ̅ⲙⲏⲧ ⲛ̅ⲣⲱⲙⲉ ⲉⲃⲟⲗ ϩⲛ̅ⲛⲉϥϩⲙ̅ϩⲁⲗ ⲁϥⲉⲓⲣⲉ ⲕⲁⲧⲁⲑⲉ ⲉⲛ̅ⲧⲁⲠϫⲟⲉⲓⲥ ϣⲁϫⲉ ⲛⲙ̅ⲙⲁϥ : Ⲁⲥϣⲱⲡⲉ ⲇⲉ ⲉⲧⲣⲉϥⲣ̅ϩⲟⲧⲉ ϩⲏⲧϥ̅ ⲙ̅ⲡⲏⲓ ⲙ̅ⲡⲉϥⲉⲓⲱⲧ. ⲁⲩⲱ ϩⲏⲧⲟⲩ ⲛ̅ⲛ̅ⲣⲱⲙⲉ ⲛ̅ⲧⲡⲟⲗⲓⲥ ⲉⲉⲓⲣⲉ ⲙ̅ⲡⲁⲓ ⲙ̅ⲡⲉϩⲟⲟⲩ ⲁϥⲁⲁϥ ⲛ̅ⲧⲉⲩϣⲏ : Ⲁⲩⲱ ⲁⲩϣⲟⲣⲡⲟⲩ ⲛ̅ϭⲓⲛ̅ⲣⲱⲙⲉ ⲛ̅ⲧⲡⲟⲗⲓⲥ ⲙ̅ⲡⲉϥϩⲧⲟⲟⲩⲉ ⲁⲩⲱ ⲉⲓⲥ ⲡⲉⲑⲩⲥⲓⲁⲥⲧⲏⲣⲓⲟⲛ ⲙ̅ⲡⲂⲁϩⲁⲗ ⲁⲩϣⲣ̅ϣⲱⲣϥ̅ . ⲁⲩⲱ ⲡⲙⲁ ⲛ̅ϣⲏⲛ ⲉⲧϩⲓϫⲱϥ ⲁⲩⲧⲁⲕⲟϥ ⲁⲩⲛⲁⲩ ⲉⲡⲙⲁⲥⲉ ⲉⲧⲥⲁⲛⲁϣⲧ ⲉⲛ̅ⲧⲁϥⲧⲁⲗⲟϥ ⲛ̅ϩⲟⲗⲟⲕⲁⲧⲱⲙⲁ ⲉϫⲙ̅ⲡⲉⲑⲩⲥⲓⲁⲥⲧⲏⲣⲓⲟⲛ ⲉⲛⲧⲁϥⲕⲟⲧϥ : Ⲡⲉϫⲉⲛ̅ⲣⲱⲙⲉ ⲛ̅ⲛⲉⲩⲉⲣⲏⲩ ϫⲉ ⲛⲓⲙ ⲡⲉⲛⲧⲁϥⲉⲓⲣⲉ ⲙ̅ⲡⲉⲓϩⲱⲃ. Ⲁⲩϣⲓⲛⲉ ⲇⲉ ⲁⲩⲱ ⲁⲩϩⲟⲧϩⲧ̅ ⲁⲩⲉⲓⲙⲉ ϫⲉ Ⲅⲉⲇⲉⲱⲛ ⲡϣⲏⲣⲉ ⲛ̅Ⲓⲱⲁⲥ ⲡⲉⲛⲧⲁϥⲉⲓⲣⲉ ⲙ̅ⲡⲉⲓϣⲁϫⲉ : Ⲁⲩⲱ ⲛ̅ⲛⲣⲱⲙⲉ ⲛ̅ⲧⲡⲟⲗⲓⲥ ⲡⲉϫⲁⲩ ⲛ̅Ⲓⲱⲁⲥ ϫⲉ ⲁⲛⲉⲓⲡⲉⲕϣⲏⲣⲉ ⲉⲃⲟⲗ ⲧⲁⲣⲉϥⲙⲟⲩ. ⲉⲃⲟⲗϫⲉ ⲁϥϣⲣ̅ϣⲣ̅ⲡⲉⲑⲩⲥⲓⲁⲥⲧⲏⲣⲓⲟⲛ ⲙ̅ⲡⲂⲁϩⲁⲗ. ⲁⲩⲱ ⲉⲃⲟⲗϫⲉ ⲁϥⲕⲉⲉⲣⲉⲡⲙⲁ ⲛ̅ϣⲏⲛ ⲉⲧϩⲓϫⲱϥ : Ⲁⲩⲱ ⲡⲉϫⲉⲒⲱⲁⲥ ⲛ̅ⲛ̅ⲣⲱⲙⲉ ⲧⲏⲣⲟⲩ ⲉⲛⲧⲁⲩⲧⲱⲟⲩⲛ ⲉϫⲱϥ ⲉϥϫⲱ ⲙ̅ⲙⲟⲥ ⲛⲁⲩ. Ϫⲉ ⲙⲏ ⲛ̅ⲧⲱⲧⲛ̅ ⲧⲉⲛⲟⲩ ⲡⲉⲧⲛⲁⲣ̅ⲡϩⲁⲡ ⲙ̅ⲡⲂⲁϩⲁⲗ ⲏ ⲛ̅ⲧⲱⲧⲛ̅ ⲡⲉⲧⲛⲁⲛⲁϩⲙⲉϥ. Ⲡⲉⲧⲛⲁⲉⲓⲣⲉ ⲙ̅ⲡⲉϥϩⲁⲡ ⲙⲁⲣⲉϥⲙⲟⲩ ϣⲁⲡⲛⲁⲩ ⲛ̅ϩⲧⲟⲟⲩⲉ. Ⲉϣϫⲉⲟⲩⲛⲟⲩⲧⲉ ⲡⲉ ⲙⲁⲣⲉϥϯϩⲁⲡ ⲉⲣⲟϥ ϫⲉ ⲁⲩϣⲣ̅ϣⲣ̅ⲡⲉϥⲑⲩⲥⲓⲁⲥⲧⲏⲣⲓⲟⲛ Ⲁⲩⲱ ⲁϥⲙⲟⲩⲧⲉ ⲉⲣⲟϥ ϩⲙ̅ⲡⲉϥϩⲟⲟⲩ ⲉⲧⲙ̅ⲙⲁⲩ ϫⲉ Ⲓⲉⲣⲟⲃⲟⲁⲗ ⲉϥϫⲱ ⲙ̅ⲙⲟⲥ ϫⲉ ⲙⲁⲣⲉⲡⲂⲁϩⲁⲗ ϯϩⲁⲡ ⲛⲁϥ ⲉⲃⲟⲗϫⲉ ⲡⲉϥⲑⲩⲥⲓⲁⲥⲧⲏⲣⲓⲟⲛ ⲁⲩϣⲣ̅ϣⲱⲣϥ̅ : Ⲁⲩⲱ ⲧⲘⲁⲇⲓϩⲁⲙ ⲧⲏⲣⲥ̅ ⲙⲛ̅ⲡⲀⲙⲁⲗⲏⲕ. ⲁⲩⲱ ⲛ̅ϣⲏⲣⲉ ⲛ̅ⲙ̅ⲙⲁ ⲛ̅ϣⲁ ⲁⲩⲥⲱⲟⲩⲁϩ ⲉⲛⲉⲩⲉⲣⲏⲩ ⲁⲩⲙⲟⲟϣⲉ ⲁⲩⲉⲓ ⲉϩⲣⲁⲓ ⲉⲡⲓⲁ ⲛ̅Ⲓⲥⲣⲁⲏⲗ : Ⲁⲩⲱ ⲟⲩⲡ̅ⲛ̅ⲁ̅ ⲛ̅ⲧⲉⲠϫⲟⲓⲥ ⲁϥⲧⲁϫⲣⲉⲄⲉⲇⲉⲱⲛ. Ⲁϥⲥⲁⲗⲡⲓⲍⲉ ϩⲛ̅ⲟⲩⲥⲁⲗⲡⲓⲅⲝ ⲛ̅ⲧⲁⲡ. Ⲁϥⲙⲟⲩⲧⲉ ⲉ̅Ⲁⲃⲓⲉⲍⲉⲣ ⲉⲧⲣⲉϥⲉⲓ ⲛϥ̅ⲟⲩⲁϩϥ̅ ⲛ̅ⲥⲱϥ : Ⲁⲩⲱ ⲁϥϫⲟⲟⲩ ⲛ̅ϩⲉⲛϥⲁⲓϣⲓⲛⲉ ⲉϩⲣⲁⲓ ⲉⲡⲕⲁϩ ⲙ̅Ⲙⲁⲛⲁⲥⲥⲏ . Ⲁϥⲙⲟⲩⲧⲉ ⲉⲡⲕⲉⲟⲩⲁ ⲉⲧⲣⲉϥⲟⲩⲁϩϥ̅ ⲛ̅ⲥⲱϥ . ⲁⲩⲱ ⲁϥϫⲟⲟⲩ ⲛ̅ϩⲉⲛϥⲁⲓϣⲓⲛⲉ ⲉϩⲣⲁⲓ ⲉⲡⲕⲁϩ ⲛ̅Ⲁⲥⲏⲣ . ⲁⲩⲱ ⲉϩⲣⲁⲓ ⲉⲡⲕⲁϩ ⲛ̅Ⲍⲁⲃⲟⲩⲗⲱⲛ ⲙⲛ̅Ⲛⲉⲫⲑⲁⲗⲓ ⲁⲩⲉⲓ ⲉϩⲣⲁⲓ ⲉⲧⲱⲙⲛ̅ⲧ ⲉⲣⲟϥ. ⲠⲉϫⲉⲄⲉⲇⲉⲱⲛ ⲛ̅ⲛⲁϩⲣⲙ̅ⲡⲛⲟⲩⲧⲉ ϫⲉ ⲉϣϫⲉ ⲛ̅ⲧⲟⲕ ⲡⲉⲧⲛⲁⲛⲟⲩϩⲙ̅ ⲙ̅ⲡⲒⲥⲣⲁⲏⲗ ϩⲓⲧⲟⲟⲧ ⲕⲁⲧⲁⲑⲉ ⲉⲛⲧⲁⲕϫⲟⲟⲥ. ⲉⲓⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲕⲱ ⲉϩⲣⲁⲓ ⲙ̅ⲡⲉⲓⲡⲟⲕϥ̅ ⲛ̅ⲥⲟⲣⲧ ϩⲣⲁⲓ ϩⲛ̅ⲧⲱⲉⲓⲣ ⲉϫⲛⲟⲟⲩ. ⲉⲣϣⲁⲛϯⲱⲧⲉ ⲉ̅ⲓ ⲉϫⲛ̅ⲧⲥⲟⲣⲧ ⲙ̅ⲙⲁⲧⲉ. ⲁⲩⲱ ⲛ̅ⲧⲉⲧⲙ̅ⲙⲟⲟⲟⲩ ⲉ̅ⲓ ⲉϫⲙ̅ⲡⲕⲁϩ ⲧⲏⲣϥ̅. ϯⲛⲁⲉⲓⲙⲉ ϫⲉ ⲕⲛⲁⲛⲟⲩϩⲙ̅ ⲙ̅ⲡⲒⲥⲣⲁⲏⲗ ϩⲓⲧⲟⲟⲧ ⲕⲁⲧⲁⲑⲉ ⲉⲛⲧⲁⲕϣⲁϫⲉ . ⲁⲩⲱ ⲁⲥϣⲱⲡⲉ ϩⲓⲛⲁⲓ. Ⲁϥϣⲟⲣⲡϥ̅ ⲛ̅ϭⲓⲄⲉⲇⲉⲱⲛ ⲙ̅ⲡⲉϥⲣⲁⲥⲧⲉ ⲁϥⲱϥⲉ ⲛ̅ⲧⲥⲟⲣⲧ ⲁⲙ̅ⲙⲟⲩ ⲛ̅ⲉⲓ̅ⲱⲧⲉ ϣⲟⲩⲟ ⲉⲃⲟⲗ ϩⲙ̅ⲡⲡⲟⲕϥ̅ ⲛ̅ⲥⲟⲣⲧ ⲁϥⲙⲉϩⲟⲩⲗⲁⲕⲁⲛⲏ ⲙ̅ⲙⲟⲟⲩ : ⲠⲉϫⲉⲄⲉⲇⲉⲱⲛ ⲉϩⲣⲁⲓ ⲉⲡⲛⲟⲩⲧⲉ ϫⲉ ⲙ̅ⲡⲣ̅ⲧⲣⲉⲡⲉⲕϭⲱⲛⲧ ⲛⲟⲩϭⲥ̅ ⲉⲣⲟⲓ ⲧⲁϣⲁϫⲉ ⲙ̅ⲡⲉⲓⲕⲉⲥⲟⲡ . ϯⲛⲁϫⲱⲛⲧ ⲟⲛ ϩⲙ̅ⲡⲡⲟⲕϥ̅ ⲛ̅ⲥⲟⲣⲧ ⲙ̅ⲡⲣ̅ⲧⲣⲉⲡⲙⲟⲩⲉⲓ ⲉ̅ϫⲛ̅ⲧⲥⲟⲣⲧ ⲙ̅ⲙⲁⲧⲉ . Ⲡⲕⲁϩ ⲇⲉ ⲧⲏⲣϥ̅ ⲙⲁⲣⲉϯⲱⲧⲉ ⲉⲓ ⲉϫⲱϥ : Ⲁⲩⲱ ⲁⲡⲛⲟⲩⲧⲉ ⲉⲓⲣⲉ ϩⲓⲛⲁⲓ ⲛ̅ⲧⲉⲩϣⲏ ⲉⲧⲙ̅ⲙⲁⲩ . ⲉⲙⲡⲉⲙⲟⲟⲩ ⲉⲓ ⲉϫⲛ̅ⲧⲥⲟⲣⲧ ⲙ̅ⲙⲁⲧⲉ . ϯⲱⲧⲉ ⲇⲉ ⲁⲥⲉ̅ⲓ ⲉϫⲙ̅ⲡⲕⲁϩ ⲧⲏⲣϥ̅ :

Ⲍ̅. Ⲁⲩⲱ Ⲓⲉⲣⲟⲃⲟⲁⲗ ⲁϥϣⲟⲣⲡϥ̅ ⲉϩⲧⲟⲟⲩⲉ ⲛ̅ⲧⲟϥ ⲙⲛ̅Ⲅⲉⲇⲉⲱⲛ. ⲁⲩⲱ ⲡⲗⲁⲟⲥ ⲧⲏⲣϥ̅ ⲉⲧⲛⲙ̅ⲙⲁϥ. ⲁⲩⲧⲁⲁⲩ ⲉϩⲣⲁⲓ ⲉⲧⲡⲏⲅⲏ ⲛ̅Ⲁⲣⲁⲇ. ⲧⲡⲁⲣⲉⲙⲃⲟⲗⲏ ⲇⲉ ⲙ̅Ⲙⲁⲇⲓϩⲁⲙ ⲛⲉϥⲥϩⲙⲡⲉⲩⲙ̅ϩⲓⲧ ⲉⲃⲟⲗ ϩⲙ̅ⲡⲃⲟⲩⲛⲟⲥ ⲛ̅Ⲁⲣⲁⲇ ϩ̅ⲙ̅ⲡⲓⲁ . ⲠⲉϫⲉⲠϫⲟⲓⲥ ⲇⲉ ⲛ̅Ⲅⲉⲇⲉⲱⲛ ϫⲉ ⲛⲁϣⲉⲡⲗⲁⲟⲥ ⲉⲧⲛⲙ̅ⲙⲁⲕ ϩⲱⲥⲧⲉ ⲉ̀ⲧⲣⲁϯ ⲙ̅Ⲙⲁⲇⲓϩⲁⲙ ⲉϩⲣⲁⲓ ⲉⲧⲟⲟⲧⲟⲩ. Ⲙⲏⲡⲟⲧⲉ ⲛ̅ⲧⲉⲡⲒⲥⲣⲁⲏⲗ ϣⲟⲩϣⲟⲩ ⲙ̅ⲙⲟϥ ⲉϩⲣⲁⲓ ⲉϫⲱⲓ . ⲉϥϫⲱ ⲙ̅ⲙⲟⲥ ϫⲉ ⲧⲁϭⲓϫ ⲧⲉⲛ̅ⲧⲁⲥⲛⲁϩⲙⲉⲧ. Ⲧⲉⲛⲟⲩ ϭⲉ ϣⲁϫⲉ ⲉϩⲣⲁⲓ ⲉ̀ⲙ̅ⲙⲁⲁϫⲉ ⲙ̅ⲡⲗⲁⲟⲥ ϩⲱⲥⲧⲉ ⲛ̅ⲧⲉⲣⲱⲙⲉ ⲛⲓⲙ ⲥⲟⲧⲙⲉϥ ⲉⲕϫⲱ ⲙ̅ⲙⲟⲥ ϫⲉ ⲡⲉⲧϥ̅ⲣ̅ϩⲟⲧⲉ ⲙⲁⲣϥ̅ⲕⲟⲧϥ̅ ⲉⲡⲁϩⲟⲩ. Ⲅⲓⲇⲉⲱⲛ ϭⲉ ⲁϥⲙⲟⲩϣⲧ ⲙ̅ⲙⲟⲟⲩ. ⲁⲩⲱ ⲁⲩⲕⲟⲧⲟⲩ ⲉⲡⲁϩⲟⲩ ⲛ̅ϭⲓϫⲟⲩⲧⲥⲛⲁⲩ ⲛ̅ϣⲟ. ⲉⲧⲓ ⲙⲏⲧϥⲧⲟⲟⲩ ⲛⲉⲩⲕⲏ ⲛⲙ̅ⲙⲟⲟⲩ. Ⲡϫⲟⲓⲥ ⲇⲉ ⲡⲉϫⲁϥ ⲛ̅Ⲅⲓⲇⲉⲱⲛ ⲉϥϫⲱ ⲙ̅ⲙⲟⲥ ϫⲉ ⲡⲉⲕⲗⲁⲟⲥ ⲉⲛⲁⲁϥ ϩⲛ̅ⲧⲉϥⲏⲡⲉ : Ⲁⲛⲓⲧⲟⲩ ⲉⲡⲉⲥⲏⲧ ⲉⲡⲉⲭⲓⲙⲁⲣⲣⲟⲥ . ⲁⲛⲟⲕ ϩⲱ ⲅⲁⲣ ⲟⲛ ⲉⲓⲛⲁⲥⲟⲧⲡϥ̅ ⲛⲁⲕ. Ⲡⲉϯⲛⲁϫⲟⲟⲥ ⲛⲁⲕ ϫⲉ ⲉϥⲉⲟⲩⲁϩϥ̅ ⲛ̅ⲥⲱⲕ ⲙⲁⲣⲉϥⲟⲥⲁϩϥ̅ ⲛ̅ⲥⲱⲕ. ⲡⲁⲓ ⲇⲉ ⲉϯⲛⲁϫⲟⲟⲥ ⲛⲁⲕ ⲉⲧⲃⲏⲏⲧϥ̅ ϫⲉ ⲙ̅ⲡⲱⲣ ⲛ̅ⲛⲉϥⲉⲓ ⲛⲙ̅ⲙⲁⲕ. Ⲁⲅⲉⲇⲉⲱⲛ ⲁϥⲉⲓⲛⲉ ⲙ̅ⲙⲟⲟⲩ ⲉⲡⲉⲥⲏⲧ ⲉⲡⲙⲟⲟⲩ. ⲁⲩⲱ ⲡⲉϫⲁϥ ⲛ̅ϭⲓⲠϫⲟⲉⲓⲥ ⲛⲁϥ ϫⲉ ⲟⲩⲟⲛ ⲛⲓⲙ ⲛ̅ⲗⲉϫϩ̅ⲙⲟⲟⲩ ⲙ̅ⲡⲗⲁⲥ ϩⲱⲥ ⲟⲩϩⲱⲣ ⲥⲱⲟⲩϩⲟⲩ ⲛ̅ⲟⲩⲁ ⲙⲁ. ⲉⲣⲟϥ ⲉⲕⲉⲙⲁ ⲇⲉ ⲙⲁⲣⲉⲕϯ ⲛ̅ⲛⲉⲧⲕⲗϫ̅ⲡⲁⲧ ⲉⲡⲥⲱ. Ⲛⲉⲧⲗⲉϫϩ̅ⲡⲙⲟⲟⲩ ⲉⲩⲟ ϣⲟⲙⲛ̅ⲧ ϣⲉ ⲛ̅ⲣⲱⲙⲉ. ⲁⲗⲗⲁ ⲛⲉⲧⲥⲉⲉⲡⲉ ⲉⲛⲉⲩⲥⲱ ϩⲙ̅ⲡⲧⲣⲉⲛⲟⲩϭⲓϫ ϩⲱⲛⲧ ⲉⲡⲟⲩⲧⲁⲡⲣⲟ. ⲠⲉϫⲉⲠϫⲟⲉⲓⲥ ⲛ̅Ⲅⲓⲇⲉⲱⲛ ϫⲉ ⲛⲉⲓϣⲟⲙⲛ̅ⲧ ⲛ̅ϣⲟ ⲛⲁⲓ ⲉⲛⲉⲭⲉⲙⲟⲟⲩ ⲉⲣⲱⲟⲩ ⲉⲓⲛⲁⲧⲟⲩϫⲉⲧⲏⲩⲧⲛ̅ . ⲛ̅ⲧⲁϯ ⲙ̅Ⲙⲁⲇⲓϩⲁⲙ ⲉϩⲣⲁⲓ ⲉⲧⲟⲟⲧⲕ . ⲁⲩⲱ ⲡⲗⲁⲟⲥ ⲧⲏⲣϥ̅ ⲙⲁⲣⲉⲡⲟⲩⲁ ⲡⲟⲩⲁ ⲙ̅ⲙⲟⲟⲩ ⲃⲱⲕ ⲉϩⲣⲁⲓ ⲉⲡⲉϥⲙⲁ . Ⲁⲩⲱ ⲁϥϫⲓ ⲛ̅ⲧⲉϩⲣⲉ ⲙ̅ⲡⲗⲁⲟⲥ ⲛ̅ⲧⲟⲟⲧⲟⲩ . ⲁⲩⲱ ⲛⲉⲩⲥⲁⲗⲡⲓⲅⲝ ⲛ̅ⲧⲁⲡ . ⲁⲩⲱ ⲣⲱⲙⲉ ⲛⲓⲙ ⲛ̅ⲧⲉⲡⲒⲥⲣⲁⲏⲗ ⲁⲩϫⲉⲩⲡⲟⲩⲁ ⲡⲟⲩⲁ ⲉϩⲣⲁⲓ ⲉⲧⲉϥⲥⲕⲏⲛⲏ . Ⲡϣⲙⲛ̅ⲧϣⲉ ⲇⲉ ⲛ̅ⲣⲱⲙⲉ ⲁϥⲧⲁϫⲣⲟⲟⲩ . ⲁⲩⲱ ⲧⲡⲁⲣⲉⲙⲃⲟⲗⲏ ⲙ̅Ⲙⲁⲇⲓϩⲁⲙ ⲛ̅ⲛⲉⲩϩⲁⲣⲁⲧϥ̅ ⲡⲉ ⲙ̅ⲡⲓⲁ. Ⲁⲥϣⲱⲡⲉ ⲇⲉ ϩⲛ̅ⲧⲉⲩϣⲏ ⲉⲧⲙ̅ⲙⲁⲩ ⲡⲉϫⲉⲠϫⲟⲉⲓⲥ ⲛⲁϥ ϫⲉ ⲧⲱⲟⲩⲛ ⲛⲅ̅ⲃⲱⲕ ⲉϩⲣⲁⲓ ϩⲙ̅ⲡⲉⲓⲙⲁ ϩⲛ̅ⲟⲩϭⲉⲡⲏ ⲉⲧⲡⲁⲣⲉⲙⲃⲟⲗⲏ . ϫⲉ ⲁⲓⲧⲁⲁⲥ ⲉϩⲣⲁⲓ ⲉⲧⲟⲟⲧⲕ̅ : Ⲉϣϫⲉ ⲕⲣ̅ϩⲟⲧⲉ ⲇⲉ ⲉⲃⲱⲕ ⲉⲙⲁⲩ . ⲃⲱⲕ ⲛ̅ⲧⲟⲕ ⲙⲛ̅Ⲫⲁⲣⲁ ⲡⲉⲕϩⲙ̅ϩⲁⲗ ⲉⲧⲡⲁⲣⲉⲙⲃⲟⲗⲏ ⲧⲁⲣⲉⲕⲥⲱⲧⲙ̅ ϫⲉ ⲉⲩⲛⲁϫⲟⲟⲥ ⲛⲁⲕ ϫⲉ ⲟⲩ. ⲙⲛ̅ⲛⲥⲁⲛⲁⲓ ⲛⲉⲕϭⲓϫ ⲥⲉⲛⲁⲧⲁϫⲣⲟ ⲛⲅ̅ⲃⲱⲕ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ : Ⲁⲩⲱ ⲛ̅ⲧⲟϥ ⲙⲛ̅Ⲫⲁⲣⲁ ⲡⲉϥϩⲙ̅ϩⲁⲗ ⲁⲩⲃⲱⲕ ⲉϩⲣⲁⲓ ⲉⲣⲁⲧϥ̅ ⲙ̅ⲡϣⲟⲣⲡ̅ ⲛ̅ⲧⲁⲅⲙⲁ ⲛ̅ⲛⲁⲛⲧⲁⲓⲟⲩ ⲉⲩϩⲛ̅ⲧⲡⲁⲣⲉⲙⲃⲟⲗⲏ. ⲁⲩⲱ Ⲙⲁⲇⲓϩⲁⲙ ⲙⲛ̅ⲡⲀⲙⲁⲗⲏⲕ . ⲙⲛ̅ⲛ̅ϣⲏⲣⲉ ⲧⲏⲣⲟⲩ ⲛ̅ⲙ̅ⲙⲁ ⲛ̅ϣⲁ ⲛⲉⲩⲛⲏϫ ϩⲣⲁⲓ ϩⲙ̅ⲡⲓⲁ ⲛ̅ⲑⲉ ⲛ̅ϩⲉⲛϣϫⲉ ⲉⲩⲟϣ . ⲁⲩⲱ ⲛⲉⲩϭⲁⲙⲟⲩⲗ ⲛⲉⲙⲛ̅ⲏⲡⲉ ⲉⲣⲟⲟⲩ . Ⲁⲩⲱ ⲛⲉⲩⲛ̅ⲑⲉ ⲙ̅ⲡϣⲱ ⲉⲧⲡⲟⲣϣ ⲉⲃⲟⲗ ⲉϫⲛ̅ⲛⲉⲥⲡⲟⲧⲟⲩ ⲛ̅ⲑⲁⲗⲁⲥⲥⲁ ⲉⲩⲁϣⲏ : Ⲁϥⲉⲓ ⲇⲉ ⲛ̅ϭⲓⲄⲉⲇⲉⲱⲛ . ⲁⲩⲱ ⲓⲥ ⲟⲩⲣⲱⲙⲉ ⲉϥⲧⲁⲩⲟ ⲛ̅ⲟⲩⲣⲁⲥⲟⲩ ⲉⲡⲉⲧϩⲓⲧⲟⲩⲱϥ ⲉ̅ϥϫⲱ ⲙ̅ⲙⲟⲥ. ϫⲉ ⲓⲥ ⲟⲩⲣⲁⲥⲟⲩ ⲁⲓⲡⲟⲟⲣⲉⲥ ⲉⲓⲥ ⲟⲩⲙⲁⲅⲓⲥ ⲛ̅ⲟⲉⲓⲕ ⲛ̅ⲓⲱⲧ ⲉⲥⲕⲧⲟ ⲙ̅ⲙⲟⲥ ϩⲛ̅ⲧⲡⲁⲣⲉⲙⲃⲟⲗⲏ ⲙ̅Ⲙⲁⲇⲓϩⲁⲙ. ⲁⲥⲉⲓ ϣⲁⲧⲡⲁⲣⲉⲙⲃⲟⲗⲏ ⲁⲥⲡⲁⲧⲁⲥⲥⲉ ⲙ̅ⲙⲟⲥ . ⲁⲩⲱ ⲁⲥϩⲉ ⲉⲡⲉⲥⲏⲧ ⲛ̅ϭⲓⲧⲉⲥⲕⲏⲛⲏ : Ⲡⲉⲧϩⲓⲧⲟⲩⲱϥ ⲇⲉ ⲡⲉϫⲁϥ ⲛⲁϥ ⲉϥϫⲱ ⲙ̅ⲙⲟⲥ ϫⲉ ⲛ̅ⲧⲁⲓ ⲁⲛ ⲧⲉ ⲉⲓⲙⲏⲧⲓ ⲧⲥⲏϥⲉ ⲛ̅Ⲅⲉⲇⲉⲱⲛ ⲡϣⲏⲣⲉ ⲛ̅ⲛ̅Ⲓⲱⲁⲥ . Ⲁⲡⲛⲟⲩⲧⲉ ϯ ⲛⲁϥ ⲙ̅Ⲙⲁⲇⲓϩⲁⲙ ⲁⲩⲱ ⲧⲡⲁⲣⲉⲙ̅ⲃⲟⲗⲏ ⲧⲏⲣⲥ̅ ⲉϩⲣⲁⲓ ⲉⲧⲟⲟⲧϥ̅ . Ⲕⲁⲛ ⲉⲣϣⲁⲛⲄⲉⲇⲉⲱⲛ ⲥⲉⲧⲙ̅ⲡⲧⲁⲩⲟ ⲙ̅ⲡⲣⲁⲥⲟⲩ ⲙⲛ̅ⲡⲉϥⲃⲱⲗ ⲉⲃⲟⲗ ⲁϥⲡⲁϩⲧϥ̅ ⲉⲡⲉⲥⲏⲧ ⲉϥⲟⲩⲱϣⲧ . Ⲙⲛ̅ⲛ̅ⲥⲱⲥ ⲁϥⲕⲧⲟϥ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ⲙ̅ⲡⲒⲥⲣⲁⲏⲗ ⲉϥⲁϣⲕⲁⲕ ⲉⲃⲟⲗ ϫⲉ ⲧⲱⲟⲩⲛⲧⲏⲩⲧⲛ̅. Ⲡϫⲟⲉⲓⲥ ⲅⲁⲣ ⲁϥϯ ⲛ̅ⲧⲡⲁⲣⲉⲙⲃⲟⲗⲏ ⲙ̅Ⲙⲁⲇⲓϩⲁⲙ ϩⲣⲁⲓ ⲉⲧⲟⲟⲧⲧⲏⲩⲧⲛ̅. Ⲁⲩⲱ ⲁϥⲡⲉⲣϣⲡϣⲟⲙⲛⲧ̅ϣⲉ ⲛ̅ⲣⲱⲙⲉ ⲉϣⲟⲙⲛⲧ̅ ⲛ̅ⲧⲁⲅⲙⲁ ⲁϥⲧⲁⲁⲩ ⲛ̅ϩⲉⲛⲕⲁⲡ ⲙ̅ⲃⲁⲁⲙⲡⲉ ⲉⲛⲟⲩϭⲓϫ ϩⲓ ⲛⲉⲙⲕⲉϣⲟϣⲟⲩ ⲉⲛⲉⲣⲉϩⲉⲛⲗⲁⲙⲡⲁⲥ ϩⲏⲡ ⲛ̅ϩⲏⲧⲟⲩ . Ⲡⲉϫⲁϥ ⲉϥϫⲱ ⲙ̅ⲙⲟⲥ ⲛⲁⲩ ϫⲉ . ⲁⲛⲁⲩ ⲛⲏⲧⲛ̅ ⲉϩⲟⲩⲛ ⲉⲣⲟⲓ ⲛ̅ⲧⲉⲧⲛ̅ⲣ̅ϩⲱⲃ ⲛⲓⲙ ⲛ̅ⲧⲁϩⲉ . Ⲉⲓⲥ ϩⲏⲏⲧⲉ ⲉⲓⲛⲁⲉⲓ ϯⲛⲟⲩ ⲉⲡⲉⲕⲣⲟ ⲛ̅ⲧⲡⲁⲣⲉⲙⲃⲟⲗⲏ. ⲁⲩⲱ ⲡⲉϯⲛⲁⲁⲁϥ ⲛ̅ⲧⲱⲧⲛ̅ ⲣⲱⲧⲛ̅ ⲉⲧⲉⲧⲛⲉⲁⲁϥ . ⲉⲓϣⲁⲛⲥⲁⲗⲡⲓⲍⲉ ⲙ̅ⲡⲧⲁⲡ ⲙ̅ⲃⲁⲁⲙⲡⲉ ⲙⲛ̅ⲛⲉⲧⲛⲙ̅ⲙⲁⲓ ⲧⲏⲣⲟⲩ . ⲛ̅ⲧⲱⲧⲛ̅ ⲣⲱⲧⲛ̅ ⲉⲧⲉⲧⲛⲉⲥⲁⲗⲡⲓⲍⲉ ϩⲙ̅ⲡⲕⲱⲧⲉ ⲛ̅ⲧⲡⲁⲣⲉⲙⲃⲟⲗⲏ ⲉⲧⲉⲧⲛ̅ϫⲓϣⲕⲁⲕ ⲉⲃⲟⲗ ϫⲉ ⲧⲁⲥⲏϥⲉ ⲧⲁⲠϫⲟⲉⲓⲥ ⲧⲉ ⲁⲩⲱ ⲧⲁⲄⲉⲇⲉⲱⲛ ⲧⲉ . Ⲛⲉⲣⲉⲡⲣⲟⲩϩⲉ ⲉⲧⲉⲡϣⲟⲣⲡ̅ ⲛ̅ⲧⲉⲧⲉⲩϣⲏ ⲛ̅ⲣⲟⲉⲓⲥ ⲡⲉ ⲡⲛⲁⲩ ⲉⲛⲧ ⲁⲩⲡⲱϩ ⲉⲡⲥⲱⲡⲉ ⲛ̅ⲧⲡⲁⲣⲁⲙⲃⲟⲗⲏ ⲛ̅ϭⲓⲄⲉⲇⲉⲱⲛ ⲁⲩⲱ ⲡϣⲉ ⲉⲧⲛⲙ̅ⲙⲁϥ . ⲉⲁⲩⲕⲏⲛ ⲉⲕⲁⲛ̅ⲟⲩⲉⲣϣⲉ ⲉⲛⲉⲩⲙⲁ . ⲁⲩⲱ ⲁⲩⲥⲁⲗⲡⲓⲍⲉ ⲛ̅ⲛ̅ⲧⲁⲡ ⲛ̅ⲃⲁⲁⲙⲡⲉ ⲁⲩⲣⲉϩⲧⲛ̅ϣⲟϣⲟⲩ ⲉⲧϩⲛ̅ⲛⲉⲩϭⲓϫ. Ⲛ̅ⲁⲩⲏⲧ ⲥⲛⲁⲩ ⲇⲉ ⲟⲛ ⲁⲩⲥⲁⲗⲡⲓⲍⲉ ⲛ̅ⲛⲉⲩⲧⲁⲡ ⲁⲩⲣⲉϩⲧⲛ̅ϣⲟϣⲟⲩ. ⲁⲩϫⲓ ⲛ̅ⲛ̅ⲗⲁⲙⲡⲁⲥ ϩⲛ̅ⲛⲉⲩϭⲓϫ ⲛ̅ϩⲃⲟⲩⲣ ⲉⲣⲉ ⲛ̅ⲧⲁⲡ ϩⲛ̅ⲛⲉⲩϭⲓϫ ⲛ̅ⲟⲩⲛⲁⲙ ⲉ̅ⲧⲣⲉⲩⲥⲁⲗⲡⲓⲍⲉ . ⲁⲩⲱ ⲁⲩϫⲓϣⲕⲁⲕ ⲉⲃⲟⲗ ⲉⲩϫⲱ ⲙ̅ⲙⲟⲥ . ϫⲉ ⲧⲥⲏϥⲉ ⲧⲁⲠϫⲟⲉⲓⲥ ⲧⲉ ⲁⲩⲱ ⲧⲁⲄⲉⲇⲉⲱⲛ ⲧⲉ . Ⲁⲩⲱ ⲡⲟⲩⲁ ⲡⲟⲩⲁ ⲁϥⲁϩⲉⲣⲁⲧϥ̅ ⲙ̅ⲡⲉϥⲙⲁ ⲙ̅ⲡⲕⲱⲧⲉ ⲛ̅ⲧⲡⲁⲣⲉⲙⲃⲟⲗⲏ . ⲁⲩⲥⲁⲗⲡⲓⲍⲉ ϩⲛ̅ⲧϣⲙ̅ⲛⲧϣⲉ ⲛ̅ⲥⲁⲗⲡⲓⲅⲝ ⲛ̅ⲧⲁⲡ. ⲁⲩⲱ ⲧⲡⲁⲣⲉⲙⲃⲟⲗⲏ ⲧⲏⲣⲥ̅ ⲁⲥⲡⲱⲧ. Ⲁⲩⲛⲉϫⲗⲟⲩⲗⲁⲓ ⲉⲃⲟⲗ ⲉⲁⲩⲡⲱⲧ. ⲁⲩⲱ ⲁⲠϫⲟⲉⲓⲥ ⲕⲱ ⲛ̅ⲧⲥⲏϥⲉ ⲙ̅ⲡⲟⲩⲁ ⲡⲟⲩⲁ ⲉϫⲙ̅ⲡⲉϥϩⲓⲧⲟⲩⲱϥ ϩⲛ̅ⲧⲡⲁⲣⲉⲙⲃⲟⲗⲏ ⲧⲏⲣⲥ̅ . Ⲁⲩⲱ ⲁⲥⲡⲱⲧ ⲛ̅ϭⲓⲧⲡⲁⲣⲉⲙⲃⲟⲗⲏ ⲧⲏⲣⲥ̅ . ϣⲁϩⲣⲁⲓ ⲉⲂⲏⲑⲉⲉⲧ ⲧⲁⲥⲁⲣⲁⲑⲁ . ϣⲁϩⲣⲁⲓ ⲉⲛⲉⲥⲡⲟⲧⲟⲩ ⲛ̅Ⲃⲁⲉⲗⲙⲁⲟⲩⲗⲁ ⲉϫⲛ̅ⲧⲁⲃⲁⲑ : Ⲁⲩⲱ ⲛ̅ⲣⲱⲙⲉ ⲙ̅ⲡⲒⲥⲣⲁⲏⲗ ⲁⲩⲱϣ ⲉⲃⲟⲗ ⲉⲚⲉⲫⲑⲁⲗⲓ. ⲁⲩⲱ Ⲁⲥⲏⲣ. ⲁⲩⲱ ⲉⲘⲁⲛⲁⲥⲥⲏ ⲧⲏⲣϥ̅ ⲁⲩⲡⲱⲧ ⲛ̅ⲥⲁⲘⲁⲇⲓϩⲁⲙ : Ⲁⲩⲱ ϩⲉⲛϥⲁⲓϣⲓⲛⲉ ⲁⲄⲉⲇⲉⲱⲛ ϫⲟⲟⲩⲥⲟⲩ ⲉϩⲣⲁⲓ ⲉⲡⲧⲟⲟⲩ ⲧⲏⲣϥ̅ ⲛ̅Ⲉⲫⲣⲁⲓⲙ. ⲉϥϫⲱ ⲙ̅ⲙⲟⲥ ⲛⲁⲩ ϫⲉ ⲁⲙⲏⲓⲧⲛ̅ ⲉⲃⲟⲗ ϩⲏⲧϥ̅ ⲙ̅Ⲙⲁⲇⲓϩⲁⲙ ⲛ̅ⲧⲉⲧⲛ̅ϫⲓⲣⲱⲟⲩ ⲉⲡⲙⲟⲟⲩ ϣⲁϩⲣⲁⲓ ⲉⲂⲁⲓⲑⲃⲏⲣⲁ ⲙⲛ̅ⲡⲒⲟⲣⲇⲁⲛⲏⲥ : Ⲁⲩⲱ ⲁⲩⲱϣ ⲉⲃⲟⲗ ⲛ̅ϭⲓⲛ̅ⲣⲱⲙⲉ ⲧⲏⲣⲟⲩ ⲛ̅Ⲉⲫⲣⲁⲓⲙ ⲁⲩϫⲓⲣⲱϥ ⲙ̅ⲡⲙⲟⲟⲩ ϣⲁϩⲣⲁⲓ ⲉ̅Ⲃⲁⲓⲑⲃⲏⲣⲁ ⲙⲛ̅ⲡⲒⲟⲣⲇⲁⲛⲏⲥ. Ⲁⲩⲱ ⲁⲩϭⲱⲡⲉ ̅ⲙⲡⲁⲣⲭⲱⲛ ⲥⲛⲁⲩ ⲙ̅Ⲙⲁⲇⲓϩⲁⲙ ⲉⲧⲉⲰⲣⲏⲃ ⲡⲉ ⲙⲛ̅Ⲍⲏⲃ. ⲁⲩⲱ Ⲱⲣⲏⲃ ⲁⲩⲙⲟⲟⲩⲧϥ̅ ϩⲛ̅Ⲥⲟⲩⲣ. ⲁⲩⲱ Ⲍⲏⲃ ⲁⲩⲙⲟⲟⲩⲧϥ̅ ϩⲙ̅ⲡⲓⲁ ⲛ̅ⲍⲏⲃ. ⲁⲩⲱ ⲁⲩⲡⲱⲧ ⲛ̅ⲥⲁⲘⲁⲇⲓϩⲁⲙ . Ⲧⲁⲡⲉ ⲇⲉ ⲛ̅Ⲱⲣⲏⲃ ⲙⲛ̅Ⲍⲏⲃ ⲁⲩⲛ̅ⲧⲟⲩ ⲉⲣⲁⲧϥ̅ ⲛ̅Ⲅⲉⲇⲉⲱⲛ ⲉⲡⲉⲕⲣⲟ ⲙ̅ⲡⲒⲟⲣⲇⲁⲛⲏⲥ :

ⲏ̅. Ⲁⲩⲱ ⲛ̅ⲣⲱⲙⲉ ⲛ̅Ⲉⲫⲣⲁⲓⲙ ⲡⲉϫⲁⲩ ⲉϩⲟⲩⲛ ⲉϩⲣⲁϥ. ϫⲉ ⲟⲩ ⲡⲉ ⲡⲓϣⲁϫⲉ ⲉⲛⲧⲁⲕⲁⲁϥ ⲛⲁⲛ ⲉⲧⲙ̅ⲧⲣⲉⲕⲙⲟⲩⲧⲉ ⲉⲣⲟⲛ ϩⲱⲱⲛ ⲛ̅ⲧⲉⲣⲉⲕⲃⲱⲕ ⲉⲙⲓϣⲉ ⲙⲛ̅Ⲙⲁⲇⲓϩⲁⲙ. ⲁⲩⲱ ⲁⲩⲁϩⲉⲣⲁⲧⲟⲩ ⲉⲣⲟϥ ⲉⲙⲁⲧⲉ : Ⲅⲉⲇⲉⲱⲛ ⲇⲉ ⲡⲉϫⲁϥ ⲛⲁⲩ ϫⲉ ⲟⲩ ⲡⲉⲛⲧⲁⲓⲁⲁϥ ⲧⲉⲛ̅ⲟⲩ ⲕⲁⲧⲁⲡⲉⲛⲧⲁⲧⲉⲧⲛ̅ⲁⲁϥ ⲛ̅ⲧⲱⲧⲛ̅ . Ⲙⲏ ⲛ̅ⲧϫⲗ̅ⲗⲉ ⲛ̅ⲛⲈⲫⲣⲁⲓⲙ ⲥⲟⲧⲡ̅ ⲁⲛ ⲉⲡϫⲱⲱⲗⲉ ⲛ̅Ⲁⲃⲓⲉⲍⲉⲣ. ⲉⲛⲧⲁⲡⲛⲟⲩⲧⲉ ϯ ⲉⲧⲟⲟⲧⲧⲏⲩⲧⲛ̅ ⲛ̅ⲛ̅ⲁⲣⲭⲱⲛ ⲙ̅Ⲙⲁⲇⲓϩⲁⲙ Ⲱⲣⲏⲃ ⲙⲛ̅Ⲍⲏⲃ. Ⲁⲩⲱ ⲟⲩ ⲡⲉⲛⲧⲁⲓⲉϣⲁⲁϥ ⲕⲁⲧⲁⲡⲉⲛⲧⲁⲧⲉⲧⲛ̅ⲁⲁϥ ⲛ̅ⲧⲱⲧⲛ̅. Ⲧⲟⲧⲉ ⲁⲡⲉⲩⲡ̅ⲛ̅ⲁ̅ ϩⲣⲟⲕ ⲉⲃⲟⲗ ϩⲙ̅ⲡⲉⲩϭⲱⲛⲧ ⲉϩⲟⲩⲛ ⲉⲣⲟϥ ⲛ̅ⲧⲉⲣⲉϥⲧⲁⲩⲟ ⲉⲣⲟⲟⲩ ⲛ̅ⲛⲉⲓϣⲁϫⲉ : Ⲁⲩⲱ Ⲅⲉⲇⲉⲱⲛ ⲁϥⲉⲓ ⲉϫⲙ̅ⲡⲒⲟⲣⲇⲁⲛⲏⲥ ⲁϥϫⲓⲟⲟⲣ. ⲛ̅ⲧⲟϥ ⲙⲛ̅ⲡⲉϥⲕⲉϣⲙⲛ̅ⲧϣⲉ ⲛ̅ⲣⲱⲙⲉ ⲉⲧⲛⲙ̅ⲙⲁϥ ⲉⲩϩⲕⲁⲉⲓⲧ ⲁⲩⲱ ⲉⲩⲡⲏⲧ ⲛ̅ⲥⲁⲘⲁⲇⲓϩⲁⲙ : Ⲡⲉϫⲁϥ ⲛ̅ⲛ̅ⲣⲱⲙⲉ ⲛ̅Ⲥⲟⲕⲭⲱⲑ ϫⲉ ϯ ⲛ̅ϩⲉⲛⲟⲉⲓⲕ ⲙ̅ⲡⲉⲓⲙⲏⲏϣⲉ ⲉⲧⲟⲩⲏϩ ⲛ̅ⲥⲱⲓ ⲉⲧⲣⲉⲩⲟⲩⲟⲙⲟⲩ ϫⲉ ⲥⲉϣⲟⲥⲙ̅. ⲁⲩⲱ ⲉⲓⲥ ϩⲏⲏⲧⲉ ⲁⲛⲟⲕ ⲉⲓⲡⲏⲧ ⲛ̅ⲥⲁⲌⲉⲃⲉⲉ ⲙⲛ̅Ⲥⲁⲗⲙⲁⲛⲁ ̅ⲛⲉⲣⲱⲟⲩ ⲙ̅Ⲙⲁⲇⲓϩⲁⲙ: Ⲁⲩⲱ ⲛ̅ⲁⲣⲭⲱⲛ ⲛ̅Ⲥⲟⲕϩⲱⲑ ⲡⲉϫⲁⲩ ⲛⲁϥ ϫⲉ ⲙⲏ ⲧⲁⲡⲉ ⲛ̅Ⲍⲁⲃⲉⲉ ⲙⲛ̅Ⲥⲁⲗⲙⲁⲛⲁ ⲧⲉⲛ̅ⲟⲩ ϩⲣⲁⲓ ϩⲛ̅ⲧⲉⲕϭⲓϫ ϫⲉ ⲉⲛⲉϯⲟⲉⲓⲕ ⲙ̅ⲡⲉⲕⲙⲏⲏϣⲉ. Ⲁⲩⲱ Ⲅⲉⲇⲉⲱⲛ ⲡⲉϫⲁϥ ⲛⲁⲩ ϫⲉ ⲉⲧⲃⲉⲡⲁⲓ ϩⲙ̅ⲡⲧⲣⲉⲠϫⲟⲉⲓⲥ ⲡⲁⲣⲁⲇⲓⲇⲟⲩ ⲛ̅Ⲍⲉⲃⲉⲉ ⲙⲛ̅Ⲥⲁⲗⲙⲁⲛⲁ ⲉϩⲣⲁⲓ ⲉⲧⲟⲟⲧ. ⲁⲛⲟⲕ ϩⲱ ϯⲛⲁϩⲓ ⲛ̅ⲛⲉⲧⲛ̅ⲥⲁⲣⲝ̅ ϩⲛ̅ⲛ̅ϣⲟⲛⲧⲉ ⲙ̅ⲡϫⲁⲓⲉ ⲙⲛ̅ⲛⲁⲣⲟⲟⲩⲉ : Ⲁⲩⲱ ⲁϥⲡⲱⲱⲛⲉ ⲉⲃⲟⲗ ϩⲙ̅ⲡⲙⲁ ⲉⲧⲙ̅ⲙⲁⲩ ⲉϩⲣⲁⲓ ⲉⲪⲁⲛⲟⲩⲏⲗ ⲁϥϣⲁϫⲉ ⲛⲙ̅ⲙⲁⲩ ⲕⲁⲧⲁⲛⲉⲓϣⲁϫⲉ . ⲛ̅ⲣⲱⲙⲉ ϩⲱⲟⲩ ⲙ̅Ⲫⲁⲛⲟⲩⲏⲗ ⲁⲩⲣ̅ⲟⲩⲱ ⲛⲁϥ ⲕⲁⲧⲁⲑⲉ ⲉⲛⲧⲁⲩⲣ̅ⲟⲩⲱ ϩⲁⲣⲱϥ ⲛ̅ϭⲓⲛ̅ⲣⲱⲙⲉ ⲛ̅Ⲥⲟⲕⲭⲱⲑ : Ⲁⲩⲱ Ⲅⲉⲇⲉⲱⲛ ⲡⲉϫⲁϥ ⲛ̅ⲛ̅ⲣⲱⲙⲉ ⲙ̅Ⲫⲁⲛⲟⲩⲏⲗ. ϫⲉ ϩⲙ̅ⲡⲧⲣⲁⲕⲧⲟⲓ ϩⲛ̅ⲟⲩⲉⲓⲣⲏⲛⲏ ⲡⲉⲓⲡⲩⲣⲅⲟⲥ ϯⲛⲁϣⲣ̅ϣⲱⲣϥ̅ : Ⲁⲩⲱ Ⲍⲉⲃⲉⲉ ⲙⲛ̅Ⲥⲁⲗⲙⲁⲛⲁ ⲛⲉⲩϩⲛ̅Ⲕⲁⲣⲭⲁⲣ. ⲉⲣⲉⲧⲉⲩⲡⲁⲣⲉⲙⲃⲟⲗⲏ ⲛⲙ̅ⲙⲁⲩ ⲉⲩⲛⲁⲣ̅ⲟⲩⲧⲃⲁ ⲟⲩϭⲟⲥ ⲛ̅ⲣⲱⲙⲉ. ⲛ̅ϭⲓⲛⲉⲛⲧⲁⲩⲥⲉⲉⲡⲉ ⲧⲏⲣⲟⲩ ⲉⲃⲟⲗϩⲛ̅ⲧⲡⲁⲣⲁⲉⲙⲃⲟⲗⲏ ⲧⲏⲣⲥ̅ ⲛ̅ⲛ̅ϣⲏⲣⲉ ⲛ̅ⲙ̅ⲙⲁ ⲛ̅ϣⲁ. ⲁⲩⲱ ⲛⲉⲛⲧⲁⲩϩⲉ ⲛⲉⲩⲛⲁⲣ̅ⲙⲛ̅ⲧⲥⲛⲟⲟⲩⲥ ⲛ̅ⲧⲃⲁ ⲛ̅ⲣⲱⲙⲉ. Ⲅⲉⲇⲉⲱⲛ ⲇⲉ ⲁϥⲙⲟⲟϣⲉ ⲁϥϣⲉ ⲛⲁϥ ⲛ̅ⲧⲉϩⲓⲏ ⲉⲧϩⲙ̅ⲡⲓⲉⲃⲧ ⲛ̅Ⲛⲟⲃⲁⲭ ⲙⲛ̅Ⲓⲟⲧⲃⲟϩⲁ ⲁϥⲡⲁⲧⲁⲥⲥⲉ ⲙ̅ⲡⲗⲁⲟⲥ. ⲁⲩⲱ Ⲍⲉⲃⲉⲉ ⲙⲛ̅Ⲥⲁⲗⲙⲁⲛⲁ ⲁⲩⲡⲱⲧ. Ⲛ̅ⲧⲟϥ ⲇⲉ Ⲅⲉⲇⲉⲱⲛ ⲡϣⲏⲣⲉ ⲛ̅Ⲓⲱⲁⲥ ⲁϥⲕⲧⲟϥ ⲛ̅ⲥⲱⲟⲩ ⲁϥϭⲱⲡⲉ ⲙ̅ⲙⲟⲟⲩ ϩⲛ̅ⲟⲩϭⲱⲡⲉ ⲁϥϫⲟⲟⲣⲟⲩ ⲉⲃⲟⲗ ⲙⲛ̅ⲡⲉϥⲗⲁⲟⲥ ⲧⲏⲣϥ̅. Ⲉⲁϥⲕⲧⲟϥ ⲇⲉ ⲉⲃⲟⲗ ϩⲙ̅ⲡⲙⲓϣⲉ ⲛ̅Ⲙⲁⲗⲉ Ϩⲉⲣⲉⲥ ⲁϥϩⲉ ⲉⲩϩⲣ̅ϣⲓⲣⲉ ⲁϥⲁⲙⲁϩⲧⲉ ⲙ̅ⲙⲟϥ ⲉⲡⲁⲛ̅ⲣⲱⲙⲉ ⲛ̅Ⲥⲟⲕⲭⲱⲑ ⲡⲉ. Ⲁϥⲥⲟⲧⲙϥ̅ ⲁϥⲧⲣⲉϥⲥϩⲁⲓ ⲛ̅ⲛ̅ϩⲣⲁⲓ ⲁⲩⲱ ⲛ̅ⲁⲣⲭⲱⲛ ⲛ̅Ⲥⲟⲕⲭⲱⲑ ⲕⲁⲧⲁⲛⲉⲩⲣⲁⲛ ⲛⲉⲩⲛⲁⲣ̅ϣϥⲉⲥⲁϣϥⲉ ⲛ̅ⲣⲱⲙⲉ. Ϩⲟⲧⲁⲛ ⲉⲁϥⲉⲓ ⲉϩⲟⲩⲛ ⲉⲛ̅ⲣⲱⲙⲉ ⲛ̅Ⲥⲟⲕⲭⲱⲑ. ⲁϥϣⲁϫⲉ ⲛⲙ̅ⲙⲁⲩ ⲉϥϫⲱ ⲙ̅ⲙⲟⲥ ϫⲉ ⲁⲩⲉⲓⲥ Ⲍⲉⲃⲉⲉ ⲙⲛ̅ⲥⲁⲗⲙⲁⲛⲁ ⲉⲁⲧⲉⲧⲛ̅ⲥⲱⲃⲉ ⲛ̅ⲥⲱⲓ ⲉⲧⲃⲏⲏⲧⲟⲩ ϫⲉ ⲙⲏ ⲧⲁⲡⲉ ⲛ̅Ⲍⲁⲃⲉⲉ ⲙⲛ̅Ⲥⲁⲗⲙⲁⲛⲁ ⲧⲉⲛ̅ⲟⲩ ϩⲣⲁⲓ ϩⲛ̅ⲧⲉⲕϭⲓϫ ϫⲉ ⲉⲛⲉϯⲟⲉⲓⲕ ⲙ̅ⲡⲉⲕⲙⲏⲏϣⲉ. Ⲧⲟⲧⲉ ⲁϥⲁⲙⲁϩⲧⲉ ⲛ̅ⲛ̅ⲁⲣⲭⲱⲛ ⲛ̅ⲧⲡⲟⲗⲓⲥ ⲛ̅ⲧⲉⲛ̅ⲣⲱⲙⲉ ⲛ̅Ⲥⲟⲕⲭⲱⲑ ⲁϥϩⲓ ⲛ̅ⲧⲉⲩⲥⲁⲣⲝ̅ ϩⲛ̅ⲛ̅ϣⲟⲛⲧⲉ ⲙ̅ⲡϫⲁⲓⲉ ⲙⲛ̅ⲛ̅ⲁⲣⲟⲟⲩⲉ. Ⲡⲡⲩⲣⲅⲟⲥ ⲇⲉ ⲙ̅Ⲫⲁⲛⲟⲩⲏⲗ ⲁϥϣⲣ̅ϣⲱⲣϥ̅ ⲁⲩⲱ ⲛ̅ⲣⲱⲙⲉ ⲛ̅ⲧⲡⲟⲗⲓⲥ ⲁϥⲙⲟⲟⲩⲧⲟⲩ. Ⲡⲉϫⲁϥ ⲛ̅Ⲍⲉⲃⲉⲉ ⲙⲛ̅Ⲥⲁⲗⲙⲁⲛⲁ ⲉϥϫⲱ ⲙ̅ⲙⲟⲥ ϫⲉ ⲛⲉⲩⲟ ⲛ̅ⲁϣ ⲛ̅ϩⲉ ⲛ̅ϭⲓⲛ̅ⲣⲱⲙⲉ ϩⲛ̅Ⲧⲁⲃⲱⲣ ⲉⲧⲁⲧⲉⲧⲛ̅ⲙⲟⲟⲩⲧⲟⲩ. Ⲡⲉϫⲁⲩ ⲛⲁϥ ϫⲉ ⲉⲁⲩⲣ̅ⲧⲉⲕϩⲉ ⲛ̅ⲑⲉ ⲛ̅ⲟⲩϣⲏⲣⲉ ⲛ̅ⲣ̅ⲣⲟ Ⲁϥⲣ̅ⲟⲩⲱ ⲡⲉϫⲁϥ ϫⲉ ϩⲁⲙⲟⲓ ⲛⲉⲣⲉⲧⲉⲛϯⲥⲟ ⲙ̅ⲙⲟⲟⲩ. ⲛⲉⲣⲉⲛⲁⲓ ⲛⲁⲥⲛⲏⲩ ⲛ̅ϣⲏⲣⲉ ⲛ̅ⲧⲁⲙⲁⲁⲩ ⲅⲁⲣ ⲛ . ϥⲟⲛϩ ⲛ̅ϭⲓⲠϫⲟⲉⲓⲥ ⲉⲛⲉⲧⲛⲁϯⲥⲟ ⲙ̅ⲙⲟⲟⲩ ⲛ̅ⲧⲱⲧⲛ̅ ⲛ̅ϯⲛⲁⲙⲟⲟⲩⲧⲛ̅ ⲁⲛ ⲡⲉ. Ⲡⲉϫⲁϥ ⲛ̅Ⲓⲉⲑⲉⲣ ⲡⲉϥϣⲣ̅ⲡ̅ ⲙ̅ⲙⲓⲥⲉ ϫⲉ ⲧⲱⲟⲩⲛ̅ ⲛⲅ̅ⲙⲟⲟⲩⲧⲟⲩ . ⲁⲩⲱ ⲙ̅ⲡⲉⲡϣⲏⲣⲉ ϣⲏⲙ ⲧⲉⲕⲙ̅ⲧⲉϥⲥⲏϥⲉ ⲉϩⲣⲁⲓ ⲉϫⲟⲟⲩ. Ⲁϥⲣ̅ϩⲟⲧⲉ ⲅⲁⲣ ϫⲉ ⲟⲩϣⲏⲣⲉ ⲛ̅ϣⲏⲙ ⲡⲉ : ⲡⲉϫⲉⲌⲉⲃⲉⲉ ⲙⲛ̅Ⲥⲁⲗⲙⲁⲛⲁ ⲛ̅Ⲅⲉⲇⲉⲱⲛ. ϫⲉ ⲧⲱⲟⲩⲛ ⲛ̅ⲧⲟⲕ ⲛⲅ̅ⲛ̅ⲧⲟⲟⲧⲕ̅ ⲉϩⲣⲁⲓ ⲉϫⲱⲛ ϫⲉ ⲉⲣⲉⲧⲉⲕϭⲟⲙ ⲟ ⲛ̅ⲑⲉ ⲛ̅ⲧϭⲟⲙ ⲛ̅ⲟⲩϫⲱⲱⲣⲉ. Ⲁⲩⲱ Ⲅⲉⲇⲉⲱⲛ ⲁϥⲧⲱⲟⲩⲛ ⲁϥⲙⲟⲩⲟⲩⲧ ⲛ̅Ⲍⲉⲃⲉⲉ ⲙⲛ̅Ⲥⲁⲗⲙⲁⲛⲁ . Ⲁⲩⲱ ⲁϥϫⲓ ⲛⲙ̅ⲙⲏⲛⲓⲥⲕⲟⲥ ⲉⲧϩⲛ̅ⲛⲉⲩⲙⲁⲕϩ ⲙⲛ̅ⲙⲙⲁⲕϩ ⲛ̅ⲛⲉⲩϭⲁⲙⲟⲩⲗ : Ⲡⲉϫⲉⲛ̅ⲣⲱⲙⲉ ⲙ̅ⲡⲒⲥⲣⲁⲏⲗ ⲉ̅ϩⲟⲩⲛ ϩⲛ̅Ⲅⲉⲇⲉⲱⲛ ⲉⲩϫⲱ ⲙ̅ⲙⲟⲥ ⲛⲁϥ. Ϫⲉ Ⲡϫⲟⲉⲓⲥ ⲁⲣⲓⲁⲣⲭⲱⲛ ⲉϫⲱⲛ ⲛ̅ⲧⲟⲕ ⲙⲛ̅ⲡⲉⲕϣⲣⲉ ⲙⲛ̅ⲡϣⲏⲣⲉ ⲙ̅ⲡⲉⲕϣⲏⲣⲉ . ϫⲉ ⲛ̅ⲧⲟⲕ ⲡⲉⲛⲧⲁⲕⲛⲁϩⲙⲛ̅ ⲛ̅ⲧⲟⲟⲧⲥ̅ ⲙ̅Ⲙⲁⲇⲓϩⲁⲙ : ⲠⲉϫⲉⲄⲉⲇⲉⲱⲛ ⲛⲁⲩ ϫⲉ ⲟⲩⲇⲉ ⲁⲛⲟⲕ ⲛ̅ϯⲛⲁⲣ̅ⲁⲣⲭⲱⲛ ⲉϫⲱⲧⲛ̅ . ⲟⲩⲇⲉ ⲙ̅ⲡⲁⲕⲉϣⲏⲣⲉ ⲛⲁⲉⲓⲣⲉ ⲁⲛ ⲉⲣⲱⲧⲛ̅. Ⲡϫⲟⲓⲥ ⲡⲉⲧⲛⲁⲣ̅ⲁⲣⲭⲱⲛ ⲉϫⲱⲧⲛ̅ : Ⲁⲩⲱ Ⲅⲉⲇⲉⲱⲛ ⲡⲉϫⲁϥ ⲛⲁⲩ ϫⲉ ϯⲁⲓⲧⲉⲓ ⲛ̅ⲟⲩⲁⲓⲇⲏⲙⲁ ⲛ̅ⲧⲟⲧⲧⲏⲩⲧⲛ̅. ⲉⲧⲣⲉⲡⲟⲩⲁ ⲡⲟⲩⲁ ⲙ̅ⲙⲱⲧⲛ̅ ϯ ⲛⲁⲓ ⲛ̅ⲟⲩⲗⲉⲟⲛⲏ ⲟⲩϭⲁϫⲉ ⲉⲃⲟⲗ ϩⲛ̅ⲛⲉⲧⲛ̅ϣⲱⲗ. ϫⲉ ⲛⲉⲣⲉϩⲉⲛϭⲁϫⲉ ⲛ̅ⲛⲟⲩⲃ ϣⲟⲟⲡ ⲛⲁⲩ ⲉⲛⲁϣⲱⲟⲩ. ⲉⲃⲟⲗϫⲉ ϩⲉⲛⲒⲥⲙⲁⲉⲗⲓⲧⲏⲥ ⲛⲉ : Ⲡⲉϫⲁⲩ ⲛⲁϥ ϫⲉ ϩⲛ̅ⲟⲩϯ ⲧⲛ̅ⲛⲁⲧⲁⲁⲩ . Ⲁⲩⲱ Ⲅⲉⲇⲉⲱⲛ ⲁϥⲡⲱⲣϣ̅ ⲉⲃⲟⲗ ⲙ̅ⲡⲉϥϩⲟⲓⲧⲉ . ⲁⲩⲱ ⲡⲟⲩⲁ ⲡⲟⲩⲁ ⲁϥⲛⲟⲩϫⲉ ⲉⲣⲟϥ ⲛ̅ⲟⲩϭⲁϫⲉ ⲛ̅ⲛⲟⲩⲃ ⲉⲃⲟⲗ ϩⲛ̅ⲛⲉϥϣⲱⲗ . ⲁⲩⲱ ⲡϣⲓ ⲛ̅ⲛϭⲁϫⲉ ⲛ̅ⲛⲟⲩⲃ ⲉⲛⲧⲁϥⲁⲓⲧⲓ ⲙ̅ⲙⲟⲟⲩ . ⲁϥⲣ̅ⲙⲛ̅ⲧⲥⲁϣϥⲉ ⲛ̅ϣⲉ ⲛ̅ⲭⲣⲩⲥⲟⲩⲥ ⲭⲱⲣⲓⲥ ⲙⲉⲛⲓⲥⲕⲟⲥ. ⲁⲩⲱ ⲛⲉⲥⲫⲣⲁⲅⲓⲥ ⲙⲛ̅ⲛϩⲟⲓⲧⲉ. ⲛⲉⲩⲟ ⲛ̅ⲉⲓⲉⲡϫⲏϭⲉ ⲉϣⲁⲣⲉⲡⲣ̅ⲣⲟ ⲙ̅Ⲙⲁⲇⲓϩⲁⲙ ⲧⲁⲁⲩ ϩⲓⲱⲱϥ . ⲁⲩⲱ ⲡⲃⲟⲗ ⲛ̅ⲙ̅ⲡⲉⲣⲓⲑⲉⲙⲁⲧⲁ ⲛ̅ⲛⲟⲩⲃ ⲉⲧⲉ ⲙ̅ⲡⲉⲓⲉⲡⲥⲁ ⲛⲉ ⲉⲧϩⲛ̅ⲙ̅ⲙⲁⲕϩ ⲛⲉⲩϭⲁⲙⲟⲩⲗ. ⲁⲩⲱ Ⲅⲉⲇⲉⲱⲛ ⲁϥ ⲁϥⲉⲓⲣⲉ ⲛ̅ⲟⲩⲉⲫⲟⲇ ⲛ̅ϩⲏⲧϥ̅ ⲁϥⲧⲱⲟⲩⲛϥ̅ ϩⲛ̅ⲧⲉϥⲡⲟⲗⲓⲥ Ⲟⲫⲣⲁ. Ⲁⲩⲱ ⲡⲒⲥⲣⲁⲏⲗ ⲧⲏⲣϥ̅ ⲁϥⲡⲟⲣⲛⲉⲩⲉ ⲛⲙ̅ⲙⲁϥ. Ⲡⲁⲓ ⲇⲉ ⲁϥⲧⲣⲉⲄⲉⲇⲉⲱⲛ ϩⲉ ⲉⲡⲉⲥⲏⲧ ⲙⲛ̅ⲡⲉϥⲏⲓ. Ⲙⲁⲇⲓϩⲁⲙ ⲁⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲑⲃ̅ⲃⲓⲟϥ ϩⲱⲥⲧⲉ ⲛ̅ⲧⲉϥϣϭⲟⲙ ⲁⲛ ⲉⲧⲱⲟⲩⲛⲧⲉϥⲁⲡⲉ . Ⲁⲩⲱ ⲡⲕⲁϩ ⲁϥⲥϭⲣⲁϩⲧ ⲙ̅ⲡⲁϩⲟ ⲛ̅Ⲅⲉⲇⲉⲱⲛ ⲛ̅ϩⲙⲉ ⲛ̅ⲣⲟⲙⲡⲉ. Ⲁϥⲕⲧⲟϥ ⲟⲛ ⲉⲡⲉϥⲏⲓ ⲛ̅ϭⲓⲒⲉⲣⲟⲃⲟⲁⲗ ⲡϣⲏⲣⲉ ⲛ̅Ⲓⲱⲛⲁⲑⲁⲛ ⲁϥϭⲱ ⲙⲛ̅ⲛⲉϥⲣⲙ̅ⲛ̅ⲏⲓ. Ⲛⲉⲟⲩⲛ̅ⲧⲉⲄⲉⲇⲉⲱⲛ ⲛ̅ϣϥⲉ ⲛ̅ϣⲏⲣⲉ ⲛ̅ⲧⲉϥⲥⲁⲣⲝ̅ ⲉⲛⲉⲣⲉϩⲉⲛⲥϩⲓⲙⲉ ⲅⲁⲣ ϣⲟⲟⲡ ⲛⲙ̅ⲙⲁϥ ⲉⲩⲱϣ. Ⲁⲩⲱ ⲧⲉϥⲡⲁⲗⲁⲕⲏ ⲟⲛ ⲉⲧϩⲛ̅Ⲥⲓⲕⲓⲙⲁ ⲁⲥϫⲡⲟ ⲛ̅ⲟⲩϣⲏⲣⲉ ⲛⲁϥ ⲁⲥⲙⲟⲩⲧⲉ ⲉⲡⲉϥⲣⲁⲛ ϫⲉ Ⲁⲃⲓⲙⲉⲗⲉⲕ. Ⲅⲉⲇⲉⲱⲛ ⲇⲉ ⲡϣⲏⲣⲉ ⲛ̅Ⲓⲱⲁⲥ ⲛ̅ⲧⲉⲣⲉϥⲁⲓⲁⲓ ϩⲛ̅ⲛⲉϥⲣⲟⲙⲡⲉ ⲁϥⲙⲟⲩ ⲁⲩⲧⲟⲙⲥϥ̅ ϩ̅ⲙⲡⲙ̅ϩⲁⲩ ⲛ̅Ⲓⲱⲁⲥ ⲡⲉϥⲉⲓⲱⲧ ⲉⲧϩⲛ̅Ⲟⲫⲣⲁ ⲧⲡⲟⲗⲓⲥ ⲛ̅Ⲁⲃⲓⲥⲓⲣⲁⲓⲟⲥ. Ⲙⲛⲛ̅ⲥⲁⲡⲙⲟⲩ ⲛ̅Ⲅⲉⲇⲉⲱⲛ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲟⲩⲱϩⲙ̅ ⲉⲩⲡⲟⲣⲛⲉⲩⲉ ⲙⲛ̅ⲛ̅Ⲃϩⲁⲗ ⲁⲩⲣ̅Ⲃⲁⲗⲁⲃⲉⲣⲓⲑ ⲛⲁⲩ ⲛ̅ⲛⲟⲩⲧⲉ Ⲡϫⲟⲉⲓⲥ ⲇⲉ ⲉⲧⲉⲡⲉⲩⲛⲟⲩⲧⲉ ⲡⲉⲛⲧⲁϥⲛⲁϩⲙⲟⲩ ⲉⲃⲟⲗ ϩⲛ̅ⲧϭⲓϫ ⲛ̅ⲛⲉⲩϫⲁϫⲉ ⲙ̅ⲡⲉⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲙⲉⲉⲩⲉ ⲉⲣⲟϥ : Ⲁⲩⲱ ⲉⲣⲟϥ ⲙ̅ⲡⲏⲓ ⲛ̅Ⲓⲉⲣⲟⲃⲟⲁⲗ ⲙⲛ̅Ⲅⲉⲇⲉⲱⲛ ⲙ̅ⲡⲟⲩⲣ̅ⲭⲁⲣⲓⲥ.

Ⲑ̅. Ⲁⲃⲓⲙⲉⲗⲉⲕ ⲡϣⲏⲣⲉ ⲛ̅Ⲓⲉⲣⲟⲃⲟⲁⲗ ⲁϥⲙⲟⲟϣⲉ ϩⲣⲁⲓ ⲉⲤⲓⲕⲓⲙⲁ ⲁϥϣⲉ ⲛⲁϥ ⲉⲛⲉⲥⲛⲏⲩ ⲛ̅ⲧⲉϥⲙⲁⲁⲩ ⲡⲉϫⲁϥ ⲛⲁⲩ ⲙⲛ̅ⲡⲏⲓ ⲛ̅ⲧⲉϥⲙⲁⲁⲩ ⲉϥϫⲱ ⲙ̅ⲙⲟⲥ. Ϫⲉ ϣⲁϫⲉ ϭⲉ ⲉϩⲟⲩⲛ ⲉⲛ̅ⲣⲱⲙⲉ ⲧⲏⲣⲟⲩ ⲛ̅Ⲥⲓⲕⲓⲙⲁ ϫⲉ ⲟⲩⲡⲉⲧϥ̅ⲣ̅ⲡⲉⲧⲛⲁⲛⲟⲩϥ ⲛⲏⲧⲛ̅ ϫⲛ̅ⲉⲣⲉⲛ̅ϣⲏⲣⲉ ⲧⲏⲣⲟⲩ ⲛ̅ⲧⲉⲒⲉⲣⲟⲃⲟⲁⲗ ⲣ̅ⲁⲣⲭⲱⲛ ⲉⲣⲱⲧⲛ̅ ϫⲛ̅ⲟⲩⲣⲱⲙⲉ ⲛ̅ⲟⲩⲱⲧ ⲉϥⲉⲣ̅ⲁⲣⲭⲱⲛ. Ⲙⲟⲕⲙⲕ̅ ⲛ̅ϩⲏⲧϥ̅ ϫⲉ ⲁⲛⲅ̅ⲟⲩⲉⲃⲟⲗ ϩⲛ̅ⲛⲉⲧⲛ̅ⲥⲁⲣⲝ̅ ⲙⲛ̅ⲛⲉⲧⲛ̅ⲕⲉⲉⲥ : Ⲁⲛⲉⲥⲛⲏⲩ ⲛ̅ⲧⲉϥⲙⲁⲁⲩ ϭⲉ ϣⲁϫⲉ ⲙⲛ̅ⲛ̅ⲣⲱⲙⲉ ⲛ̅Ⲥⲓⲕⲓⲙⲁ ⲧⲏⲣⲟⲩ ⲕⲁⲧⲁⲛⲉϥϣⲁϫⲉ ⲉⲧⲣⲉⲡⲉⲩϩⲏⲧ ⲕⲧⲟϥ ⲉⲀⲃⲓⲙⲉⲗⲉⲕ. Ⲁⲩϯϣϥⲉ ⲛ̅ϩⲁⲧ ⲛⲁϥ ⲁⲩⲱ Ⲁⲃⲓⲙⲉⲗⲉⲕ ⲁϥⲥⲩⲛⲁⲅⲉ ⲛ̅ⲟⲩⲙⲏⲏϣⲉ ⲛ̅ⲛⲟϣⲧϥ̅ ⲛ̅ⲛⲁϣⲧϩⲣⲁϥ ⲁⲩⲙⲟⲟϣⲉ ⲛ̅ⲥⲱϥ. Ⲧⲟⲧⲉ ⲁⲩⲣ̅ⲡϩⲟⲩⲛ ⲙ̅ⲡⲏⲓ ⲙ̅ⲡⲉϥⲉⲓⲱⲧ ⲉⲧϩⲛ̅Ⲟⲫⲣⲁ ⲁⲩⲙⲟⲟⲩⲧ ⲛ̅ⲛⲉϥⲥⲛⲏⲩ ⲛ̅ϣⲏⲣⲉ ⲛ̅Ⲓⲉⲣⲟⲃⲟⲁⲗ ⲛⲉⲩⲛⲁⲣ̅ϣϥⲉⲥⲁϣϥⲉ ⲛ̅ⲣⲱⲙⲉ. ⲙⲟⲛⲟⲛ Ⲓⲱⲧⲁⲙ ⲁϥⲥⲉⲉⲡⲉ ⲡϣⲏⲣⲉ ⲛ̅Ⲓⲉⲣⲟⲃⲟⲁⲗ ⲉϥⲥⲟⲃⲕ ⲛⲉϥϩⲏⲡ ⲅⲁⲣ ⲡⲉ . Ⲧⲟⲧⲉ ⲁⲩⲥⲟⲩⲱϩ ⲉϩⲟⲩⲛ ⲛ̅ϭⲓⲛ̅ⲣⲱⲙⲉ ⲛ̅Ⲥⲓⲕⲓⲙⲁ ⲙⲛ̅ⲡⲏⲓ ⲙ̅Ⲙⲁⲁⲗⲗⲱⲛ ⲁⲩⲙⲟⲟϣⲉ ⲁⲩϣⲉ ⲛⲁⲩ ϩⲣⲁⲓ ⲉⲡϣⲏⲛ ⲛ̅ⲛ̅ϣⲟⲟⲥ ⲉⲧϩⲁⲧⲛ̅Ⲥⲓⲕⲓⲙⲁ ⲁⲩⲣ̅ⲡⲀⲃⲓⲙⲉⲗⲉⲕ ⲛ̅ⲣ̅ⲣⲟ. Ⲛ̅ⲧⲉⲣⲟⲩⲧⲁⲩⲉⲡⲁⲓ ⲛ̅Ⲓⲱⲧⲁⲙ ⲁϥⲧⲱⲟⲩⲛ ⲁϥⲁϩⲉⲣⲁⲧϥ̅ ⲉϫⲙ̅ⲡⲧⲟⲟⲩ ⲛ̅Ⲅⲁⲣⲓⲍⲓⲙ ⲁϥⲱϣ ⲉⲃⲟⲗ ⲉⲣⲟⲟⲩ ⲉϥϫⲱ ⲙ̅ⲙⲟⲥ ϫⲉ : Ⲥⲱⲧⲙ̅ ⲉⲣⲟⲓ ⲛ̅ⲣⲱⲙⲉ ⲛ̅Ⲥⲓⲕⲓⲙⲁ ⲁⲩⲱ ⲡⲛⲟⲩⲧⲉ ⲛⲁⲥⲱⲧⲙ̅ ⲉⲣⲱⲧⲛ̅. ϩⲛ̅ⲟⲩⲃⲱⲕ ⲁⲩⲃⲱⲕ ⲛ̅ϭⲓⲛ̅ϣⲏⲛ ⲉⲧⲱϩⲥ̅ ⲛ̅ⲟⲩⲣ̅ⲣⲟ ⲉϫⲱⲟⲩ ⲁⲩⲱ ⲡⲉϫⲁⲩ ⲛ̅ⲧⲃⲱ ⲛ̅ϫⲟⲉⲓⲧ. ϫⲉ ⲁⲙⲏ ⲛ̅ⲧⲉⲣ̅ⲣ̅ⲣⲟ ⲉϫⲱⲛ. Ⲡⲉϫⲉⲧⲃⲱ ⲛ̅ϫⲟⲉⲓⲧ ⲛⲁⲩ ϫⲉ ⲉⲓⲛⲁⲕⲱ ⲙ̅ⲡⲁⲕⲛ̅ⲛⲉ ⲛ̅ⲥⲱⲓ. ⲉϣⲁⲣⲉⲛ̅ⲣⲱⲙⲉ ϯⲉⲟⲟⲩ ⲙ̅ⲡⲛⲟⲩⲧⲉ ϩⲣⲁⲓ ⲛ̅ϩⲏⲧϥ̅ ⲧⲁⲃⲱⲕ ⲧⲁⲣ̅ⲣ̅ⲣⲟ ⲉϫⲛ̅ϩⲉⲛϣⲏⲛ: Ⲁⲩⲱ ⲡⲉϫⲉⲛ̅ϣⲏⲛ ⲧⲏⲣⲟⲩ ⲉϩⲟⲩⲛ ϩⲛ̅ⲧⲃⲱ ⲛ̅ⲕⲛ̅ⲧⲉ ϫⲉ ⲁⲙⲏ ⲛ̅ⲧⲉⲣ̅ⲣⲣⲟ ⲉϫⲱⲛ. Ⲡⲉϫⲉⲧⲃⲱ ⲛ̅ⲕⲛ̅ⲧⲉ ⲛⲁⲩ ϫⲉ ⲉⲓⲛⲁⲕⲱ ⲛ̅ⲥⲱⲓ ⲙ̅ⲡⲁϩⲗⲟϭ ⲙⲛ̅ⲛⲁⲁⲅⲁⲑⲟⲛ ⲛ̅ⲅⲉⲛⲏⲙⲁ ⲛ̅ⲧⲁⲃⲱⲕ ⲛ̅ⲧⲁⲣ̅ⲣⲣⲟ ⲉϫⲛ̅ϩⲉⲛϣⲏⲛ: Ⲁⲩⲱ ⲛ̅ⲙϣⲏⲛ ⲡⲉϫⲁⲩ ⲛ̅ⲧⲃⲱ ⲛ̅ⲉⲗⲟⲟⲗⲉ ϫⲉ ⲁⲙⲏ ⲛ̅ⲧⲟ ⲛ̅ⲧⲉⲣ̅ⲣⲣⲟ ⲉϫⲱⲛ. Ⲡⲉϫⲉⲧⲃⲱ ⲛ̅ⲉⲗⲟⲟⲗⲉ ⲛⲁⲩ ϫⲉ ⲉⲓ̅ⲛⲁⲕⲱ ⲛ̅ⲥⲱⲓ ⲙ̅ⲡⲁⲏⲣⲡ̅ ⲡⲉⲧⲉⲉⲩⲫⲣⲁⲛⲏ ⲛ̅ⲛ̅ⲣⲱⲙⲉ. ⲡⲁⲓ ϣⲁⲩϯⲉⲟⲟⲩ ⲙ̅ⲡⲛⲟⲩⲧⲉ ϩⲣⲁⲓ ⲛ̅ϩⲏⲧϥ̅ ⲙⲛ̅ⲛ̅ⲣⲱⲙⲉ. ⲧⲁⲃⲱⲕ ⲧⲁϭⲱ ϩⲓϫⲛ̅ϩⲉⲛϣⲏⲛ ⲉⲣ̅ⲣⲣⲟ ⲉϫⲱⲟⲩ: Ⲁⲩⲱ ⲛ̅ϣⲏⲛ ⲧⲏⲣⲟⲩ ⲡⲉϫⲁⲩ ⲛ̅ⲧⲉϩⲣⲁⲙⲛⲟⲥ ϫⲉ ⲁⲙⲏ ⲛ̅ⲧⲟ ⲛ̅ⲧⲉⲣ̅ⲣⲣⲟ ⲉϫⲱⲛ. Ⲡⲉϫⲉⲧⲉϩⲣⲁⲙⲛⲟⲥ ⲉϩⲟⲩⲛ ϩⲛ̅ⲛϣⲏⲛ . ϫⲉ ⲉϣϫⲉ ϩⲛ̅ⲟⲩⲙⲉ ⲛ̅ⲧⲱⲧⲛ̅ ⲉⲧⲉⲧⲛⲁⲧⲁϩⲥⲧ̅ ⲛ̅ⲣ̅ⲣⲟ ⲉϫⲛ̅ⲧⲏⲩⲧⲛ̅ ⲁⲙⲏⲓⲧⲛ̅ ⲁϩⲉⲣⲁⲧⲧⲏⲩⲧⲛ̅ ϩⲁⲧⲁϩⲁⲓⲃⲉⲥ. ⲉⲣⲉⲧⲙ̅ⲟⲩⲥⲁⲧⲉ ⲉ̅ⲓ ⲉⲃⲟⲗ ⲙ̅ⲙⲟⲓ ⲛⲥ̅ⲟⲩⲱⲙ ⲛ̅ⲥⲁⲛ̅ⲕⲉⲇⲣⲟⲥ ⲙ̅ⲡⲖⲓⲃⲁⲛⲟⲥ : Ⲧⲉⲛⲟⲩ ϭⲉ ⲉϣϫⲉ ϩⲛ̅ⲟⲩⲙⲉ ⲙⲛ̅ⲟⲩⲧⲃ̅ⲃⲟ ⲁⲧⲉⲧⲛ̅ⲉⲓⲣⲉ ⲙ̅ⲡⲁⲓ. ⲉⲁⲧⲉⲧⲛ̅ⲣ̅Ⲁⲃⲓⲙⲉⲗⲉⲭ ⲛ̅ⲣ̅ⲣⲟ ⲉϫⲛ̅ⲧⲏⲩⲧⲛ̅ . Ⲁⲩⲱ ⲉϣⲱⲡⲉ ⲁⲧⲉⲧⲛ̅ⲉⲓⲣⲉ ⲛ̅ⲟⲩⲁⲅⲁⲑⲟⲛ ⲙⲛ̅Ϩⲓⲉⲣⲟⲃⲟⲁⲗ . ⲁⲩⲱ ⲙⲛ̅ⲡⲉϥⲏⲓ . ⲁⲩⲱ ⲉϣϫⲉ ⲁⲧⲉⲧⲛ̅ⲉⲓⲣⲉ ⲛⲁϥ ⲕⲁⲧⲁⲡⲧⲱⲱⲃⲉ ⲛ̅ⲉϥϭⲓϫ . ⲛ̅ⲑⲉ ⲉⲛ̅ⲧⲁⲡⲁⲉⲓⲱⲧ ⲙⲓϣ ⲉϫⲛ̅ⲧⲏⲩⲧⲛ̅ . ⲉⲁϥⲛⲟⲩϫⲉ ⲉⲃⲟⲗ ⲛ̅ⲧⲉϥⲯⲩⲭⲏ ⲛ̅ⲛⲁϩⲣⲛ̅ⲛⲉⲛϫⲁϫⲉ. ⲁⲩⲱ ⲁϥⲛⲉϩⲙ̅ⲧⲏⲩⲧⲛ̅ ⲛ̅ⲧⲟⲟⲧⲥ̅ ⲙ̅Ⲙⲁⲇⲓϩⲁⲙ . Ⲁⲩⲱ ⲛ̅ⲧⲱⲧⲛ̅ ⲁⲧⲉⲧⲛ̅ⲧⲱⲟⲩⲛ ⲙ̅ⲙⲟⲟⲩ ⲉϫⲙ̅ⲡⲏⲓ ⲙ̅ⲡⲁⲉⲓ̅ⲱⲧ. ⲁⲧⲉⲧⲛ̅ⲙⲟⲩⲟⲩⲧ ⲛ̅ⲛⲉϥϣⲏⲣⲉ ⲉⲩⲛⲁⲣ̅ϣⲃⲉ ⲛ̅ⲣⲱⲙⲉ ϩⲓϫⲛ̅ⲟⲩⲱⲛⲉ ⲛ̅ⲟⲩⲱⲧ . Ⲁⲩⲱ Ⲁⲃⲓⲙⲉⲗⲉⲭ ⲡϣⲏⲣⲉ ⲛ̅ⲧⲉϥϩⲙ̅ϩⲁⲗ ⲁⲧⲉⲧⲛ̅ⲁⲁϥ ⲛ̅ⲣ̅ⲣⲟ ⲉϫⲛ̅ⲛⲣⲱⲙⲉ ⲛ̅Ⲥⲓⲕⲓⲙⲁ ⲉⲃⲟⲗϫⲉ ⲡⲉⲧⲛ̅ⲥⲟⲛ ⲡⲉ . Ⲁⲩⲱ ⲉϣⲱⲡⲉ ϩⲛ̅ⲟⲩⲙⲉ ⲙⲛ̅ⲟⲩⲧⲃ̅ⲃⲟ ⲁⲧⲉⲧⲛ̅ⲉⲓⲣⲉ ⲙⲛ̅Ⲓⲉⲣⲟⲃⲟⲁⲗ. ⲁⲩⲱ ⲙⲛ̅ⲡⲉϥⲏⲓ ϩⲙ̅ⲡⲟⲟⲩ ⲛ̅ϩⲟⲟⲩ ⲉⲧⲉⲧⲛⲉⲉⲩⲣⲁⲛⲉ ϩⲛ̅Ⲁⲃⲓⲙⲉⲗⲉⲭ. ⲁⲩⲱ ⲉϥⲉⲉⲩⲫⲣⲁⲛⲉ ϩⲱⲱϥ ⲉϫⲛ̅ⲧⲏⲩⲧⲛ̅. Ⲉϣⲱⲡⲉ ⲇⲉ ⲙ̅ⲙⲟⲛ ⲉⲣⲉⲟⲩⲥⲁⲧⲉ ⲉⲓ ⲉⲃⲟⲗ ϩⲛ̅Ⲁⲃⲓⲙⲉⲗⲉⲭ ⲛⲥ̅ⲟⲩⲱⲙ ⲛ̅ⲛ̅ⲣⲱⲙⲉ ⲛ̅Ⲥⲓⲕⲓⲙⲁ. ⲁⲩⲱ ⲡⲏⲓ ⲙ̅Ⲙⲁⲁⲗⲗⲱⲛ. Ⲁⲩⲱ ⲉⲣⲉⲟⲩⲥⲁⲧⲉ ⲉⲓ ⲉⲃⲟⲗ ϩⲛ̅ⲛ̅ⲣⲱⲙⲉ ⲛ̅Ⲥⲓⲕⲓⲙⲁ. ⲁⲩⲱ ⲉⲃⲟⲗ ϩⲙ̅ⲡⲏⲓ ⲙ̅Ⲙⲁⲁⲗⲗⲱⲛ ⲛ̅ⲥⲟⲩⲱⲙ ⲛ̅Ⲁⲃⲓⲙⲉⲗⲉⲭ : Ⲁⲩⲱ Ⲓⲱⲛⲁⲑⲁⲛ ⲁϥⲡⲱⲧ ⲁϥⲃⲱⲕ ⲉϩⲣⲁⲓ ⲉⲃⲏⲣⲁ ⲁϥϭⲱ ⲙ̅ⲡⲙⲁ ⲉⲧⲙ̅ⲙⲁⲩ. Ⲉⲁϥⲗⲟ̅ ϩⲁⲡϩⲟ ⲛ̅Ⲁⲃⲓⲙⲉⲗⲉⲭ ⲁϥⲣ̅ⲁⲣⲭⲱⲛ ⲉϫⲙ̅ⲡⲒⲥⲣⲁⲏⲗ ⲛ̅ϣⲟⲙⲧⲉ ⲛ̅ⲣⲟⲙⲡⲉ : Ⲁⲩⲱ ⲁⲡⲛⲟⲩⲧⲉ ϫⲟⲟⲩ ⲛ̅ⲟⲩⲡ̅ⲛ̅ⲁ̅ ⲙ̅ⲡⲟⲛⲏⲣⲟⲛ ⲉⲧⲙⲏⲧⲉ ⲛ̅Ⲁⲃⲓⲙⲉⲗⲉⲭ ⲁⲩⲱ ⲉⲧⲙⲏⲧⲉ ⲛ̅ⲛ̅ⲣⲱⲙⲉ ⲛ̅Ⲥⲓⲕⲓⲙⲁ. ⲁⲩⲱ ⲛ̅ⲣⲱⲙⲉ ⲛ̅Ⲥⲓⲕⲓⲙⲁ ⲁⲩⲁϩⲉ ⲉⲃⲟⲗ ⲉⲡⲏⲓ ⲛ̅Ⲁⲃⲓⲙⲉⲗⲉⲭ. ⲉⲉⲓ̅ⲛⲉ ⲙ̅ⲡϫⲓⲛϭⲟⲛⲥ ⲙ̅ⲡⲉϣⲃⲉ ⲛ̅ϣⲏⲣⲉ ⲛ̅Ⲓⲉⲣⲟⲃⲟⲁⲗ. ⲙⲛ̅ⲛⲉⲩⲥⲛⲱⲱϥ ⲉϫⲛ̅Ⲁⲃⲓⲙⲉⲗⲉⲭ ⲡⲉⲩⲥⲟⲛ. Ⲁⲩⲱ ⲉϫⲛ̅ⲛ̅ⲣⲱⲙⲉ ⲛ̅Ⲥⲓⲕⲓⲙⲁ ⲉⲃⲟⲗϫⲉ ⲁⲩⲧⲁϫⲣⲉⲛⲉϥϭⲓϫ ⲉⲧⲣⲉϥⲙⲟⲩⲟⲩⲧ ⲛ̅ⲛⲉϥⲥⲛⲏⲩ : Ⲁⲩⲱ ⲛ̅ⲣⲱⲙⲉ ⲛ̅Ⲥⲓⲕⲓⲙⲁ ⲁⲩⲕⲱ ⲛ̅ϩⲉⲛⲣⲱⲙⲉ ⲉⲩϫⲓⲕⲣⲟϥ ϩⲓϫⲛ̅ⲛⲁⲡⲏⲩⲉ ⲛ̅ⲛ̅ⲧⲟⲩⲉⲓⲏ. ⲁⲩⲱ ⲉⲛⲉⲩϩⲁⲣⲡⲁⲍⲉ ⲛ̅ⲣⲱⲙⲉ ⲛⲓⲙ ⲉⲧⲙⲟⲟϣⲉ ϩⲓⲧⲉϩⲓⲏ. ⲉⲩϣⲁⲛⲡⲱϩ ⲉⲣⲟⲟⲩ . ⲁⲩⲱ ⲁⲩⲧⲁⲙⲉⲀⲃⲓⲙⲉⲗⲉⲭ. Ⲁϥⲉⲓ ⲇⲉ ⲛ̅ϭⲓⲄⲁⲁⲇ ⲡϣⲏⲣⲉ ⲛ̅Ⲱⲃⲏⲗ ⲙⲛ̅ⲛⲉϥⲥⲛⲏⲩ ⲁⲩⲡⲁⲣⲁⲅⲉ ⲛ̅Ⲥⲓⲕⲓⲙⲁ . ⲁⲩⲱ ⲛ̅ⲣⲱⲙⲉ . ⲁⲩⲱ ⲛ̅ⲣⲱⲙⲉ ⲛ̅Ⲥⲓⲕⲓⲙⲁ ⲁⲩϯⲡⲉⲩⲛⲁϩⲧⲉ ⲛⲙ̅ⲙⲁϥ ⲁⲩⲱ ⲁⲩⲉⲓ̅ ⲉⲃⲟⲗ ⲉⲧⲥⲱϣⲉ ⲁⲩϫⲱⲱⲗⲉ ⲛ̅ⲛⲉⲩⲙⲁ ⲛ̅ⲉⲗⲟⲟⲗⲉ ⲁⲩϩⲟⲙⲟⲩ ⲛⲁⲩ. Ⲁⲩⲧⲁⲙⲓⲟ ⲛ̅ⲟⲩⲉⲗⲱⲉⲓⲙ ⲉⲧⲉⲟⲩⲏⲣⲡ ⲡⲉ ⲁⲩⲃⲱⲕ ⲉϩⲟⲩⲛ ⲉⲡⲏⲓ ⲙ̅ⲡⲉⲩⲛⲟⲩⲧⲉ. ⲁⲩⲟⲩⲱⲙ ⲁⲩⲱ ⲁⲩⲥⲱ ⲁⲩⲥⲁϩⲟⲩ ⲛ̅Ⲁⲃⲓⲙⲉⲗⲉⲭ : ⲠⲉϫⲉⲄⲁⲁⲇ ⲡϣⲏⲣⲉ ⲛ̅Ⲱⲃⲏⲗ ϫⲉ ⲛⲓⲙ ⲡⲉ Ⲁⲃⲓⲙⲉⲗⲉⲭ. Ⲁⲩⲱ ⲛⲓⲙ ⲡⲉ ⲡϣⲏⲣⲉ ⲛ̅Ⲥⲉⲭⲉⲙ ϫⲉ ⲉⲛⲉⲣ̅ϩⲙ̅ϩⲁⲗ ⲛⲁϥ. ⲙⲏ ⲙ̅ⲡⲁⲓ ⲁⲛ ⲡⲉ ⲡϣⲏⲣⲉ ⲛ̅Ⲓⲉⲣⲟⲃⲟⲁⲗ ⲁⲩⲱ Ⲍⲉⲃⲟⲩⲗ ⲡⲉϥϩⲙ̅ϩⲁⲗ ⲛ̅ⲧⲟϥ ⲁⲛ ⲡⲉ ⲡⲉϥⲉⲡⲓⲥⲕⲟⲡⲟⲥ. ⲙⲛ̅ⲛ̅ⲣⲱⲭⲙⲉ ⲛ̅Ⲉⲙⲱⲣ ⲡⲓⲱⲧ ⲛ̅Ⲥⲉⲭⲉⲙ. Ⲁⲩⲱ ⲁⲛⲟⲛ ⲉⲛⲁⲣ̅ϩⲙ̅ϩⲁⲗ ⲛⲁϥ ⲉⲧⲃⲉⲟⲩ. Ⲁⲩⲱ ⲛⲓⲙ ⲡⲉⲧⲛⲁϯ ⲙ̅ⲡⲓⲗⲁⲟⲥ ⲉϩⲣⲁⲓ ⲉⲧⲟⲟⲧ ⲛ̅ⲧⲁⲡⲱⲱⲛⲉ ⲉⲃⲟⲗ ⲛ̅ⲛ̅Ⲁⲃⲓⲙⲉⲗⲉⲭ. ⲛ̅ⲧⲁϫⲟⲟⲥ ⲉϩⲟⲩⲛ ⲉϩⲣⲁϥ ϫⲉ ⲧⲁϣⲟ ⲛ̅ⲧⲕϭⲟⲙ ⲛⲅ̅ⲉⲓ ⲉⲃⲟⲗ : Ⲁⲩⲱ Ⲍⲉⲃⲟⲩⲗ ⲡⲁⲣⲭⲱⲛ ⲛ̅ⲧⲡⲟⲗⲓⲥ ⲁϥⲥⲱⲧⲙ̅ ⲉⲛ̅ϣⲁϫⲉ ⲛ̅Ⲅⲁⲁⲇ ⲡϣⲏⲣⲉ ⲛ̅Ⲱⲃⲏⲗ ⲁϥⲛⲟⲩϭⲥ̅ ϩⲙ̅ⲡⲉϥⲑⲩⲙⲟⲥ: Ⲁⲩⲱ ⲁϥϫⲟⲟⲩ ⲛ̅ϩⲉⲛϥⲁⲓϣⲓⲛⲉ ⲉⲣⲁⲧϥ̅ ⲛ̅Ⲁⲃⲓⲙⲉⲗⲉⲭ ϩⲛ̅ⲟⲩϩⲱⲡ ⲉϥϫⲱ ⲙ̅ⲙⲟⲥ ⲛⲁϥ. ϫⲉ ⲉⲓⲥ Ⲅⲁⲁⲇ ⲡϣⲏⲣⲉ ⲛ̅Ⲱⲃⲏⲗ ⲁⲩⲱ ⲛⲉϥⲥⲛⲏⲩ ⲥⲉⲛⲏⲩ ⲉϩⲣⲁⲓ ⲉⲤⲓⲕⲓⲙⲁ . ⲁⲩⲱ ⲉⲓⲥ ϩⲏⲏⲧⲉ ⲛ̅ⲧⲟⲟⲩ ⲥⲉⲛⲁϭⲱ ϩⲓⲣⲛ̅ⲧⲡⲟⲗⲓⲥ ⲉⲣⲟⲕ. Ⲧⲉⲛⲟⲩ ϭⲉ ⲧⲱⲟⲩⲛ ⲛ̅ⲧⲉⲩϣⲏ ⲛ̅ⲧⲟⲕ ⲙⲛ̅ⲡⲗⲁⲟⲥ ⲧⲏⲣϥ̅ ⲉⲧⲛⲙ̅ⲙⲁⲕ ⲛⲅ̅ⲣ̅ⲕⲣⲟϥ ϩⲛ̅ⲧⲥⲱϣⲉ . Ⲁⲩⲱ ⲙ̅ⲡⲛⲁⲩ ⲛ̅ϩⲧⲟⲟⲩⲉ ⲉⲣⲉⲡⲣⲏ ⲛⲁϣⲁ ⲉⲕⲉϣⲟⲣⲡ̅ ⲛⲅ̅ⲉⲓ ⲉⲃⲟⲗ ⲉⲣⲛ̅ⲧⲡⲟⲗⲓⲥ . Ⲁⲩⲱ ⲉⲓⲥ ϩⲏⲏⲧⲉ ⲛ̅ⲧⲟϥ ⲙⲛ̅ⲡⲗⲁⲟⲥ ⲉⲧⲛⲙ̅ⲙⲁϥ ⲥⲉⲛⲏⲩ ⲉⲃⲟⲗ ⲉⲣⲟⲕ . ⲁⲩⲱ ⲉⲕⲉⲉⲓ̅ⲣⲉ ⲛⲁϥ ⲕⲁⲧⲁⲑⲉ ⲉⲧⲉⲣⲉⲧⲉⲕϭⲓϫ ⲛⲁϣϭⲙ̅ϭⲟⲙ : Ⲁⲩⲱ Ⲁⲃⲓⲙⲉⲗⲉⲭ ⲁϥⲧⲱⲟⲩⲛ ⲛ̅ⲧⲉⲩϣⲏ ⲛ̅ⲧⲟϥ ⲙⲛ̅ⲡⲗⲁⲟⲥ ⲧⲏⲣϥ̅ ⲉⲧⲛⲙ̅ⲙⲁϥ ⲁⲩⲣ̅ⲕⲣⲟϥ ⲉⲣⲛ̅Ⲥⲓⲕⲓⲙⲁ ϩⲛ̅ϥⲧⲟⲟⲩ ⲛ̅ⲙ̅ⲗⲁϩ: Ⲁⲩⲱ ϣⲱⲣⲡ ⲛ̅ⲧⲉⲣⲉϥϣⲱⲡⲉ Ⲅⲁⲁⲇ ⲡϣⲏⲣⲉ ⲛ̅Ⲱⲃⲏⲗ ⲁϥⲉⲓ ⲉ̅ⲃⲟⲗ ⲁϥⲁϩⲉⲣⲁⲧϥ̅ ϩⲁⲧⲙ̅ⲡⲣⲟ ⲛ̅ⲧⲡⲩⲗⲏ ⲛ̅ⲧⲡⲟⲗⲓⲥ : Ⲁⲩⲱ Ⲁⲃⲓⲙⲉⲗⲉⲭ ⲙⲛ̅ⲡⲙⲏⲏϣⲉ ⲉⲧⲛⲙ̅ⲙⲁϥ ⲁϥⲧⲱⲟⲩⲛ ⲉⲃⲟⲗ ϩⲙ̅ⲡⲙⲁ ⲉⲧϥ̅ⲣ̅ⲕⲣⲟϥ ⲛ̅ϩⲏⲧϥ. Ⲅⲁⲁⲇ ⲇⲉ ⲡϣⲏⲣⲉ ⲛ̅Ⲱⲃⲏⲗ ⲁϥⲛⲁⲩ ⲉⲡⲙⲏⲏϣⲉ ⲡⲉϫⲁϥ ⲛ̅Ⲍⲉⲃⲟⲩⲗ ϫⲉ ⲉⲓⲥ ⲟⲩⲗⲁⲟⲥ ⲉϥⲛⲏⲩ ⲉⲡⲉⲥⲏⲧ ⲉⲃⲟⲗ ϩⲛ̅ⲛ̅ⲕⲟⲟϩ ⲛ̅ⲛ̅ⲧⲟⲩⲉⲓⲏ : ⲠⲉϫⲉⲌⲉⲃⲟⲩⲗ ⲛⲁϥ ϫⲉ ⲑⲁⲓⲃⲉⲥ ⲛ̅ⲛ̅ⲧⲟⲩⲉⲓ̅ⲏ ⲧⲉⲧⲕ̅ⲛⲁⲩ ⲉⲣⲟⲥ ⲛ̅ⲑⲉ ⲙ̅ⲡⲉⲥⲙⲟⲧ ⲛ̅ϩⲉⲛⲣⲱⲙⲉ. Ⲁⲩⲱ Ⲅⲁⲁⲇ ⲁϥⲟⲩⲱϩ ⲟⲛ ⲉⲧⲟⲟⲧϥ̅ ⲉϥϫⲱ ⲙ̅ⲙⲟⲥ. ϫⲉ ⲓⲥ ⲟⲩⲙⲏⲏϣⲉ ⲉϥⲛⲏⲩ ⲉⲡⲉⲥⲏⲧ ⲙ̅ⲡⲥⲁ ⲛ̅ⲑⲁⲗⲁⲥⲥⲁ ϩⲓⲧⲱⲟⲩϥ ⲙ̅ⲡⲙⲁ ⲉⲧϩⲏⲛ ⲉ̅ϩⲟⲩⲛ ⲉⲡⲟⲙⲫⲗⲟⲥ ⲙ̅ⲡⲕⲁϩ ⲁⲩⲱ ⲉⲓⲥ ⲟⲩⲙⲏⲏϣⲉ ⲉϥⲛⲏⲩ ϩⲓⲧⲉϩⲓⲏ ⲙ̅ⲡϣⲏⲛ ⲛ̅ⲛ̅ϣⲟⲟⲥ: ⲠⲉϫⲉⲌⲉⲃⲟⲩⲗ ⲛⲁϥ ϫⲉ ⲁⲩⲱ ⲉⲥⲧⲱⲛ ⲧⲉⲕⲧⲁⲡⲣⲟ ⲧⲉⲛⲟⲩ. ⲛ̅ⲑⲉ ⲉⲛⲧⲁⲕϣⲁϫⲉ. Ϫⲉ ⲛⲓⲙ ⲡⲉ Ⲁⲃⲓⲙⲉⲗⲉⲭ ϫⲉ ⲉⲛⲉⲣ̅ϩⲙ̅ϩⲁⲗ ⲛⲁϥ . Ⲙⲏ ⲙ̅ⲡⲁⲓ ⲁⲛ ⲡⲉ ⲡⲗⲁⲟⲥ ⲉⲛⲧⲁⲕⲥⲟϣϥ̅. Ⲃⲱⲕ ϭⲉ ⲉⲃⲟⲗ ⲧⲉⲛⲟⲩ ⲛⲅ̅ⲙⲓϣⲉ ⲛⲙ̅ⲙⲁϥ. Ⲁⲩⲱ Ⲅⲁⲁⲇ ⲁϥⲃⲱⲕ ⲉⲃⲟⲗ ⲙ̅ⲡⲉⲙ̅ⲧⲟ ⲉⲃⲟⲗ ⲛ̅ⲛ̅ⲣⲱⲙⲉ ⲛ̅Ⲥⲓⲕⲓⲙⲁ ⲁϥⲁϩⲉⲣⲁⲧϥ̅ ⲉⲙⲓϣⲉ ⲙⲛ̅Ⲁⲃⲓⲙⲉⲗⲉⲭ. ⲁⲩⲱ ⲁϥⲡⲱⲧ ⲛ̅ⲥⲱϥ ⲛ̅ϭⲓⲀⲃⲓⲙⲉⲗⲉⲭ ⲁϥⲡⲱⲧ ϩⲁⲡⲉϥϩⲟ. Ⲁⲩⲱ ⲟⲩⲙⲏⲏϣⲉ ⲁⲩϣⲟϭⲟⲩ ϣⲁⲡⲣⲟ ⲛ̅ⲧⲡⲩⲗⲏ : Ⲁⲩⲱ Ⲁⲃⲓⲙⲉⲗⲉⲭ ⲁϥⲃⲱⲕ ⲉϩⲟⲩⲛ ⲉⲀⲣⲏⲙⲁ . ⲁⲩⲱ ⲁϥⲛⲟⲩϫⲉ ⲉⲃⲟⲗ ⲛ̅ϭⲓⲌⲉⲃⲟⲩⲗ ⲛ̅Ⲅⲁⲁⲇ ⲙⲛ̅ⲛⲉϥⲥⲛⲏⲩ ⲉⲧⲙ̅ⲧⲣⲉⲩⲟⲩⲱϩ ϩⲛ̅Ⲥⲓⲕⲓⲙⲁ . Ⲁⲥϣⲱⲡⲉ ⲙ̅ⲡⲉϥⲣⲁⲥⲧⲉ ⲡⲗⲁⲟⲥ ⲁϥⲉⲓ ⲉⲃⲟⲗ ⲉⲧⲥⲱϣⲉ. ⲀⲩⲧⲁⲙⲉⲀⲃⲓⲙⲉⲗⲉⲭ ⲁϥϫⲓ ⲙ̅ⲡⲗⲁⲟⲥ ⲁϥⲡⲟⲣϫⲟⲩ ⲉϣⲟⲙⲛ̅ⲧ ⲛ̅ⲧⲁⲅⲙⲁ ⲁϥⲣ̅ⲕⲣⲟϥ ϩⲛ̅ⲧⲥⲱϣⲉ. Ⲁϥⲛⲁⲩ ⲇⲉ ⲁⲩⲱ ⲉⲓⲥ ⲡⲗⲁⲟⲥ ⲁϥⲉⲓ ⲉⲃⲟⲗ ϩⲛ̅ⲧⲡⲟⲗⲓⲥ. Ⲁⲩⲱ ⲁϥⲧⲱⲟⲩⲛ ⲉϫⲱⲟⲩ ⲁϥⲡⲁⲧⲁⲥⲥⲉ ⲙ̅ⲙⲟⲟⲩ ⲛ̅ϭⲓⲀⲃⲓⲙⲉⲗⲉⲭ ⲙⲛ̅ⲡⲧⲁⲅⲙⲁ ⲉⲧⲛⲙ̅ⲙⲁϥ . ⲁⲩⲱ ⲁϥⲥⲟⲣⲟⲩ ⲉⲃⲟⲗ ⲁⲩⲁϩⲉⲣⲁⲧⲟⲩ ϩⲓⲣⲙ̅ⲡⲣⲟ ⲛ̅ⲧⲡⲩⲗⲏ ⲛ̅ⲧⲡⲟⲗⲓⲥ. Ⲁⲩⲱ ⲡⲕⲉⲧⲁⲅⲙⲁ ⲥⲛⲁⲩ ⲁⲩⲥⲱⲣ ⲉⲃⲟⲗ ⲉϫⲛ̅ⲟⲩⲟⲛ ⲛⲓⲙ ⲉⲧϩⲛ̅ⲧⲥⲱϣⲉ ⲁⲩⲡⲁⲧⲁⲥⲥⲉ ⲙ̅ⲙⲟⲟⲩ. Ⲁⲩⲱ Ⲁⲃⲓⲙⲉⲗⲉⲭ ⲁϥⲥⲣ̅ⲙ̅ⲗⲁϩ ⲉⲃⲟⲗ ϩⲛ̅ⲧⲡⲟⲗⲓⲥ ⲙ̅ⲡⲉϩⲟⲟⲩ ⲧⲏⲣϥ̅ ⲉⲧⲙ̅ⲙⲁⲩ ⲁϥϫⲓⲧⲡⲟⲗⲓⲥ ⲁⲩⲱ ⲡⲙⲏⲏϣⲉ ⲉⲧⲛ̅ϩⲏⲧⲥ̅ ⲁϥⲙⲟⲟⲩⲧⲟⲩ. ⲁⲩⲱ ⲧⲡⲟⲗⲓⲥ ⲁϥϣⲣ̅ϣⲱⲣⲥ̅ ⲁϥⲕⲁⲁⲥ ⲛ̅ⲕⲁϩ ⲙ̅ⲙⲗ̅ϩ. Ⲁⲩⲱ ⲛ̅ⲣⲱⲙⲉ ⲧⲏⲣⲟⲩ ⲙ̅ⲡ̅ⲡⲡⲩⲣⲅⲟⲥ ⲛ̅Ⲥⲓⲕⲓⲙⲁ ⲁⲩⲥⲱⲧⲙ̅ ⲁⲩⲉⲓ̅ ⲉϩⲣⲁⲓ ⲉⲡⲙⲁ ⲉⲧⲟⲣϫ̅ ⲙ̅ⲡⲏⲓ ⲛ̅Ⲃⲁⲗⲁⲃⲉⲣⲓⲑ. ⲁⲩⲧⲁⲙⲉⲀⲃⲓⲙⲉⲗⲉⲭ ϫⲉ ⲛ̅ⲣⲱⲙⲉ ⲧⲏⲣⲟⲩ ⲙ̅ⲡ̅ⲡⲩⲣⲅⲟⲥ ⲛ̅Ⲥⲓⲕⲓⲙⲁ ⲁⲩⲥⲟⲩⲱϩ ⲉϩⲟⲩⲛ. ⲁⲩⲱ Ⲁⲃⲓⲙⲉⲗⲉⲭ ⲁϥⲃⲱⲕ ⲉϩⲣⲁⲓ ⲉⲡⲧⲟⲟⲩ ⲛ̅Ϩⲉⲣⲙⲱⲛ ⲛ̅ⲧⲟϥ ⲙⲛ̅ⲡⲉϥⲙⲏⲏϣⲉ ⲧⲏⲣϥ̅ ⲉⲧⲛⲙ̅ⲙⲁϥ. ⲁϥϫⲓ ⲛ̅ϭⲓⲀⲃⲓⲙⲉⲗⲉⲭ ⲛ̅ⲟⲩⲕⲉⲗⲉⲃⲓⲛ ϩⲛ̅ⲧⲉϥϭⲓϫ ⲁϥϣⲱⲱⲧ ⲛ̅ⲟⲩⲧⲁⲣ ⲛ̅ϣⲉ ⲁϥϥⲓⲧϥ̅ ⲁϥⲧⲁⲗⲟϥ ⲉϫⲛ̅ⲧⲉϥⲛⲁϩⲃ: Ⲡⲉϫⲁϥ ⲙ̅ⲡⲗⲁⲟⲥ ⲉⲧⲛⲙ̅ⲙⲁϥ ϫⲉ ⲡⲉⲧⲉⲧⲛⲁⲛⲁⲩ ⲉⲣⲟⲓ ⲉⲁⲓⲁⲁϥ ⲛ̅ⲧⲱⲧⲛ̅ ϩⲱⲧⲧⲏⲩⲧⲛ̅ ⲁⲣⲓϥ ⲧⲁⲭⲩ ⲛ̅ⲧⲁϩⲉ. ⲁⲩⲱ ⲁⲡⲟⲩⲁ ⲡⲟⲩⲁ ϣⲱⲱⲧ ⲛ̅ⲟⲩⲧⲁⲣ ϩⲙ̅ⲡⲗⲁⲟⲥ ⲧⲏⲣϥ̅ ⲁⲩϥⲓⲧϥ̅ ⲁⲩⲟⲩⲁϩⲟⲩ ⲛ̅ⲥⲁⲀⲃⲓⲙⲉⲗⲉⲭ. ⲁⲩⲕⲁⲁⲩ ϩⲓⲣⲙ̅ⲡⲙⲁ ⲉⲛⲧⲁⲛⲏ ⲥⲱⲟⲩϩ ⲉϩⲟⲩⲛ ⲉⲣⲟϥ. ⲁⲩⲱ ⲁϥⲣⲉⲕϩⲡⲙⲁ ϩⲁⲣⲟⲟⲩ ϩⲛ̅ⲟⲩⲥⲁⲧⲉ. Ⲁⲩⲙⲟⲩ ⲛ̅ϭⲓⲛ̅ⲣⲱⲙⲉ ⲧⲏⲣⲟⲩ ⲙ̅ⲡⲡⲩⲣⲅⲟⲥ ⲛ̅Ⲥⲓⲕⲓⲙⲁ ⲉⲩⲛⲁⲣ̅ϣⲟ ⲛ̅ⲣⲱⲙⲉ ⲙⲛ̅ϩⲉⲛϩⲓⲟⲙⲉ. Ⲁⲩⲱ Ⲁⲃⲓⲙⲉⲗⲉⲭ ⲁϥⲃⲱⲕ ⲉϩⲣⲁⲓ ⲉⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ ϫⲉ Ⲑⲏⲃⲁⲓⲥ. ⲁϥϩⲙⲟⲟⲥ ϩⲓⲣⲱⲥ ⲁϥϫⲓⲧⲥ̅ . ⲁⲩⲱ ⲛⲉⲣⲉⲟⲩⲛⲟϭ ⲙ̅ⲡ̅ⲩⲣⲅⲟⲥ ϩⲛ̅ⲧⲙⲏⲧⲉ ⲛ̅ⲧⲡⲟⲗⲓⲥ. Ⲁⲛ̅ⲣⲱⲙⲉ ⲧⲏⲣⲟⲩ ⲛ̅ⲧⲡⲟⲗⲓⲥ . ⲙⲛ̅ⲛⲉϩⲓⲟⲙⲉ ⲡⲱⲧ ⲉⲡⲙⲁ ⲉⲧⲙ̅ⲙⲁⲩ ⲙⲛ̅ⲛⲉⲧⲟⲩⲏϩ ⲧⲏⲣⲟⲩ ϩⲛ̅ⲧⲡⲟⲗⲓⲥ ⲁⲩϣⲱⲧⲙ̅ ⲉⲣⲱⲟⲩ . ⲁⲩⲱ ⲁⲩⲃⲱⲕ ⲉϩⲣⲁⲓ ⲉϫⲛ̅ⲧϫⲉⲛⲉⲡⲱⲣ ⲙ̅ⲡ̅ⲡⲩⲣⲅⲟⲥ. ⲁⲩⲱ Ⲁⲃⲓⲙⲉⲗⲉⲭ ⲁϥⲓ ϣⲁⲣⲱϥ ⲙ̅ⲡⲡⲩⲣⲅⲟⲥ ⲁϥⲙⲓϣⲉ ⲛⲙ̅ⲙⲁϥ. Ⲁⲃⲓⲙⲉⲗⲉⲭ ⲇⲉ ⲁϥϯⲡⲉϥⲟⲩⲟⲓ ⲉⲡⲥⲁ ⲙ̅ⲡⲣⲟ ⲙ̅ⲡⲡⲩⲣⲅⲟⲥ ⲉⲣⲟⲕϩϥ̅ ϩⲛ̅ⲟⲩⲥⲁⲧⲉ. ⲁⲩⲱ ⲟⲩⲥϩⲓⲙⲉ ⲁⲥⲛⲟⲩϫⲉ ⲛ̅ⲟⲩⲗⲁⲕⲙ̅ ⲛ̅ⲱⲛⲉ ⲛ̅ⲥⲓⲕⲉ ⲉϫⲛ̅ⲧⲁⲡⲉ ⲛ̅Ⲁⲃⲓⲙⲉⲗⲉⲭ ⲁⲥⲟⲩⲉϭⲡ̅ⲡⲉϥⲁⲛⲧⲏⲗⲙ̅. Ⲁⲩⲱ ⲁϥⲱϣ ⲉⲃⲟⲗ ⲛ̅ⲧⲉⲩⲛⲟⲩ ⲉⲡⲉϥϩⲙ̅ϩⲁⲗ ⲉⲧϥⲓ ⲛⲛ̅ⲉϥⲥⲕⲉⲩⲏ ⲉϥϫⲱ ⲙ̅ⲙⲟⲥ ⲛⲁϥ ϫⲉ ⲧⲱⲕⲙ̅ ⲛ̅ⲧⲉⲕⲥⲏϥⲉ ⲛⲅ̅ⲙⲟⲩⲟⲩⲧ ⲙ̅ⲙⲟⲓ. ⲙⲏⲡⲟⲧⲉ ⲛ̅ⲥⲉϫⲟⲟⲥ ϫⲉ ⲟⲩⲥϩⲓⲙⲉ ⲧⲉⲛ̅ⲧⲁⲥⲙⲟⲟⲩⲧϥ̅. Ⲁⲩⲱ ⲡⲉϥϩⲙ̅ϩⲁⲗ ⲁϥⲕⲟⲛⲥϥ̅ ⲛ̅ⲧⲉϥⲥⲏϥⲉ ⲁϥⲙⲟⲩ ⲙ̅ⲡⲙⲁ ⲉ̅ⲧⲙ̅ⲙⲁⲩ. Ⲁⲩⲱ ⲛ̅ⲣⲱⲙⲉ ⲙ̅ⲡⲒⲥⲣⲁⲏⲗ ⲁⲩⲛⲁⲩ ϫⲉ Ⲁⲃⲓⲙⲉⲗⲉⲭ ⲁϥⲙⲟⲩ. ⲁⲡⲟⲩⲁ ⲡⲟⲩⲁ ⲃⲱⲕ ⲉϩⲣⲁⲓ ⲉⲡⲉϥⲙⲁ . ⲁⲩⲱ ⲁⲡⲛⲟⲩⲧⲉ ⲕⲧⲟ ⲛ̅ⲧⲕⲁⲕⲓⲁ ⲛ̅Ⲁⲃⲓⲙⲉⲗⲉⲭ ⲧⲁⲓ ⲉⲛⲧⲁϥⲁⲁⲥ ⲙ̅ⲡⲉϥⲉⲓⲱⲧ ⲉⲧⲣⲉϥⲙⲟⲩⲟⲩⲧ ⲙ̅ⲡⲉϥϣⲃⲉ ⲛ̅ⲥⲛⲏⲩ ⲁⲩⲱ ⲧⲕⲁⲕⲓⲁ ⲧⲏⲣⲥ̅ ⲛ̅ⲛ̅ⲣⲱⲙⲉ ⲛ̅Ⲥⲓⲕⲓⲙⲁ ⲁⲡⲛⲟⲩⲧⲉ ⲕⲧⲟⲥ ⲉϫⲛ̅ⲧⲉⲩⲁⲡⲉ ⲁⲩⲱ ⲁϥⲉ̅ⲓ ⲉϫⲱⲟⲩ ⲛ̅ϭⲓⲡⲥⲁϩⲟⲩ ⲛ̅Ⲓⲱⲛⲁⲑⲁⲛ ⲡϣⲏⲣⲉ ⲛ̅Ⲓⲉⲣⲟⲃⲟⲁⲗ:

Ⲓ̅. Ⲁϥⲧⲱⲟⲩⲛ ⲇⲉ ⲙⲛ̅ⲛⲥⲁ Ⲁⲃⲓⲙⲉⲗⲉⲭ ⲉⲧⲣⲉϥⲛⲟⲩϩⲙ̅ ⲙ̅ⲡⲒⲥⲣⲁⲏⲗ ⲛ̅ϭⲓⲐⲟⲩⲗⲁ ⲡϣⲏⲣⲉ ⲙ̅Ⲫⲟⲩⲉ . ⲡϣⲏⲣⲉ ⲙ̅ⲡⲥⲟⲛ ⲙ̅ⲡⲉϥⲉⲓⲱⲧ. ⲉⲩⲣⲱⲙⲉ ⲉⲃⲟⲗ ϩⲛ̅Ⲓⲥⲥⲁⲭⲁⲣ ⲡⲉ. ⲁⲩⲱ ⲛ̅ⲧⲟϥ ⲛⲉϥⲟⲩⲏϩ ϩⲛ̅ⲧⲤⲁⲙⲁⲣⲓⲁ ⲙ̅ⲡⲧⲟⲟⲩ ⲛ̅Ⲉⲫⲣⲁⲓⲙ . ⲁⲩⲱ ⲁϥⲕⲣⲓⲛⲉ ⲙ̅ⲡⲒⲥⲣⲁⲏⲗ ⲛ̅ϫⲟⲩⲧϣⲟⲙⲧⲉ ⲛ̅ⲣⲟⲙⲡⲉ. Ⲁϥⲙⲟⲩ ⲇⲉ ⲁⲩⲱ ⲁϥⲧⲟⲙⲥϥ̅ ϩⲛ̅ⲧⲤⲁⲙⲁⲣⲓⲁ : Ⲁⲩⲱ ⲁϥⲧⲱⲟⲩⲛ ⲙⲛ̅ⲛⲥⲱϥ ⲛ̅ϭⲓⲒⲁⲉⲓⲣ ⲡⲉⲃⲟⲗ ϩⲛ̅Ⲅⲁⲗⲁⲁⲇ . ⲁⲩⲱ ⲁϥⲕⲣⲓⲛⲉ ⲙ̅ⲡⲒⲥⲣⲁⲏⲗ ⲛ̅ϫⲟⲩⲧⲥⲛⲟⲟⲩⲥ ̅ⲛⲣⲟⲙⲡⲉ . ⲛⲉⲣⲉⲙⲁⲁⲃ ⲇⲉ ⲛ̅ϣⲏⲣⲉ ϣⲟⲟⲡ ⲛⲁϥ ⲉⲩⲧⲁⲗⲏⲩ ⲉϫⲛ̅ⲙⲁⲁⲃ ⲛ̅ⲥⲏϭ. ⲉⲩⲛ̅ⲧⲁⲩ ⲙ̅ⲙⲁⲩ ⲙ̅ⲙⲁⲁⲃⲉ ⲙ̅ⲡⲟⲗⲓⲥ . Ⲁⲩⲱ ⲛⲉⲩⲙⲟⲩⲧⲉ ⲉⲣⲟⲟⲩ ϫⲉ ⲙ̅ⲡⲟⲗⲓⲥ ⲛ̅Ⲓⲁⲉⲓⲣ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ ⲛⲁⲓ ⲉⲧϣⲟⲟⲡ ϩⲛ̅Ⲅⲁⲗⲁⲁⲇ ⲁⲩⲱ ⲁϥⲙⲟⲩ ⲛ̅ϭⲓⲒⲁⲉⲓⲣ ⲁⲩⲧⲟⲙⲥϥ̅ ϩⲛ̅Ϩⲣⲁⲙⲛⲱⲛ : Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲟⲩⲱϩ ⲉⲧⲟⲟⲧⲟⲩ ⲉⲉⲓⲣⲉ ⲙ̅ⲡⲡⲟⲛⲏⲣⲟⲛ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲓⲥ . ⲁⲩⲣ̅ϩⲙ̅ϩⲁⲗ ⲛ̅ⲙ̅ⲃⲁϩⲁⲗⲉⲓⲙ . ⲛ̅ⲛ̅ⲁⲥⲧⲁⲣⲱⲑ . ⲙⲛ̅ⲛⲛⲟⲩⲧⲉ ⲛ̅ⲧⲤⲩⲣⲓⲁ ⲙⲛ̅ⲛ̅ⲛⲟⲩⲧⲉ ⲛ̅Ⲥⲓⲇⲱⲛ ⲙⲛ̅ⲛⲛⲟⲩⲧⲉ ⲙ̅Ⲙⲱⲁⲃ ⲙⲛ̅ⲛ̅ⲛⲟⲩⲧⲉ ⲛ̅ⲛ̅Ⲁⲙⲙⲱⲛⲁⲓⲟⲥ ⲙⲛ̅ⲛ̅ⲛⲟⲩⲧⲉ ⲛ̅ⲛ̅Ⲫⲓⲗⲓⲥⲧⲓⲉⲓⲙ . Ⲡϫⲟⲉⲓⲥ ⲇⲉ ⲁⲩⲕⲁⲁⲩ ⲛ̅ⲥⲱⲟⲩ ⲛ̅ⲛⲟⲩϣⲙ̅ϣⲉ ⲙ̅ⲙⲟϥ . Ⲁⲩⲱ Ⲡϫⲟⲉⲓⲥ ⲁϥⲛⲟⲩϭⲥ̅ ϩⲛ̅ϭⲱⲛⲧ̅ ⲉϫⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁϥⲧⲁⲁⲩ ⲉϩⲣⲁⲓ ⲉⲧϭⲓϫ ⲛ̅ⲛ̅Ⲫⲓⲗⲓⲥⲧⲓⲉⲓⲙ ⲙⲛ̅ⲛ̅Ⲁⲙⲟⲣⲣⲁⲓⲟⲥ . ⲁⲩⲑⲗⲓⲃⲉ ⲙ̅ⲙⲟⲟⲩ ⲛⲟⲩϩⲟϫϩϫ̅ ⲛ̅ⲙⲏⲧϣⲙⲓⲛⲉ ⲛ̅ⲣⲟⲙⲡⲉ. ⲉⲧⲉⲛ̅Ⲓⲥⲣⲁⲓⲗⲓⲧⲏⲥ ⲧⲏⲣⲟⲩ ⲙ̅ⲙⲏⲣ ⲙ̅ⲡⲒⲟⲣⲇⲁⲛⲏⲥ ⲉⲧϩⲙ̅ⲡⲕⲁϩ ⲛ̅ⲛ̅Ⲁⲙⲱⲣⲣⲁⲓⲟⲥ ⲉⲩⲟⲩⲏϩ ϩⲛ̅Ⲅⲁⲗⲁⲁⲇ. Ⲁⲩⲱ ⲛ̅ϣⲏⲣⲉ ⲛ̅Ⲁⲙⲙⲱⲛ ⲁⲩⲉⲓ ⲉϫⲙ̅ⲡⲒⲟⲣⲇⲁⲛⲏⲥ ⲉⲡⲟⲗⲉⲙⲉⲓ ⲙⲛ̅Ⲓⲟⲩⲇⲁ ⲁⲩⲱ ⲙⲛ̅Ⲃⲉⲛⲓⲁⲙⲓⲛ ϩⲓ ⲙⲛ̅ⲡⲏⲓ ⲛ̅Ⲉⲫⲣⲁⲓⲙ. Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲱϣ ⲉⲃⲟⲗ ⲉϩⲣⲁⲓ ⲉⲠϫⲟⲉⲓⲥ ⲡⲉϫⲁⲩ ⲉⲩϫⲱ ⲙ̅ⲙⲟⲥ . ϫⲉ ⲁⲛⲣ̅ⲛⲟⲃⲉ ⲁⲛⲕⲁⲡⲉⲛⲛⲟⲩⲧⲉ ⲅⲁⲣ ⲛ̅ⲥⲱⲛ ⲁⲛϣⲙ̅ϣⲉ ⲛ̅ⲛ̅Ⲃⲁϩⲁⲗⲉⲓⲙ . Ⲁϥⲟⲩⲱϣⲃ̅ ⲇⲉ ⲛ̅ϭⲓⲠϫⲟⲉⲓⲥ ⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ . ϫⲉ Ⲙⲏⲧⲓ ⲙ̅ⲡⲟⲩⲑⲗⲓⲃⲉ ⲙ̅ⲙⲱⲧⲛ̅ ⲛ̅ϭⲓⲛ̅Ⲁⲓⲅⲩⲡⲧⲓⲟⲥ ⲙⲛ̅ⲛ̅Ⲁⲙⲟⲣⲣⲁⲓⲟⲥ ⲁⲩⲱ ⲛ̅Ⲁⲙⲙⲱⲛⲁⲓⲟⲥ ⲙⲛ̅ⲛ̅Ⲫⲓⲗⲓⲥⲧⲓⲉⲓⲙ ⲁⲩⲱ ⲛ̅ⲣⲱⲙⲉ ⲛ̅Ⲥⲓⲇⲱⲛ ⲙⲛ̅ⲛ̅Ⲁⲙⲁⲗⲓⲕⲓⲧⲏⲥ ⲁⲩⲱ ⲙ̅Ⲙⲓⲇⲁⲛⲓⲧⲏⲥ . ⲁⲛⲟⲕ ⲇⲉ ⲉⲧⲉⲧⲛ̅ϣⲁⲛϫⲓϣⲕⲁⲕ ⲉϩⲣⲁⲓ ⲉϫⲱⲓ ⲙⲏ ⲁⲛⲟⲕ ⲁⲛ ⲁⲓⲛⲉϩⲛ̅ⲧⲏⲩⲧⲛ̅ ⲛ̅ⲧⲟⲟⲧⲟⲩ ⲑ Ⲁⲗⲗⲁ ⲛ̅ⲧⲱⲧⲛ̅ ⲛⲉⲧⲁⲧⲉⲧⲛ̅ⲕⲁⲁⲧ ⲛ̅ⲥⲱⲧⲧⲛ̅ ⲛ̅ⲧⲉⲧⲛ̅ⲣ̅ϩⲙ̅ϩⲁⲗ ⲛ̅ⲕⲉⲛⲟⲩⲧⲉ : ⲉⲧⲃⲉⲡⲁⲓ ⲁⲛⲟⲕ ⲛ̅ⲛⲉⲓⲛⲉϩⲙ̅ⲧⲏⲩⲧⲛ̅. Ⲁⲙⲉⲓⲧⲛ̅ ⲛ̅ⲧⲉⲧⲛ̅ⲟⲩⲁϩⲧⲏⲩⲧⲛ̅ ⲛ̅ⲥⲁⲛ̅ⲛⲟⲩⲧⲉ ⲉⲧⲁⲧⲉⲧⲛ̅ⲥⲟⲧⲡⲟⲩ ⲙⲁⲣⲟⲩⲛⲁϩⲛ̅ⲧⲏⲩⲧⲛ̅ ⲛ̅ⲧⲟⲟⲩ ⲉⲃⲟⲗ ⲙ̅ⲡⲛⲁⲩ ⲛ̅ⲧⲉⲧⲛ̅ⲧⲑⲓⲯⲓⲥ. Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲡⲉϫⲁⲩ ⲉϩⲣⲁⲓ ⲉⲠϫⲟⲉⲓ̅ⲥ ϫⲉ ⲁⲛⲣ̅ⲛⲟⲃⲉ. Ⲛ̅ⲧⲟⲕ ⲉⲓ̅ⲣⲉ ⲛⲙ̅ⲙⲁⲛ ⲕⲁⲧⲁⲡⲁⲅⲁⲑⲟⲛ ⲧⲏⲣϥ̅ ⲉⲧϩⲁⲛⲉⲕⲃⲁⲗ. ⲡⲗⲏⲛ ⲛⲁϩⲙⲛ̅ ϩⲙ̅ⲡⲉⲓⲕⲉϩⲟⲟⲩ. ⲁⲩⲱ ⲛ̅ⲛⲟⲩⲧⲉ ⲛ̅ϣⲙ̅ⲙⲟ ⲁⲩϥⲓⲧⲟⲩ ⲉⲃⲟⲗ ϩⲛ̅ⲧⲉⲩⲙⲏⲧⲉ . ⲁⲩⲣ̅ϩⲙ̅ϩⲁⲗ ⲙ̅Ⲡϫⲟⲉⲓⲥ ⲙⲁⲩⲁⲁϥ . ⲁⲩⲱ ⲡⲒⲥⲣⲁⲏⲗ ⲁϥϣⲱⲥⲙ̅ ⲛ̅ϩⲏⲧ ϩⲙ̅ⲡⲉϥϩⲓⲥⲉ : Ⲁⲩⲱ ⲛ̅ϣⲏⲣⲉ ⲛ̅Ⲁⲙ̅ⲙⲱⲛ ⲁⲩⲧⲁⲁⲩ ⲉϩⲣⲁⲓ ⲉⲄⲁⲗⲁⲁⲇ . ⲛ̅ϣⲏⲣⲉ ϩⲱⲟⲩ ⲙ̅ⲡⲒⲥⲣⲁⲏⲗ ⲁⲩⲧⲁⲁⲩ ⲉ̅ϩⲣⲁⲓ ⲉⲡⲙⲁ ⲛ̅ϭⲱϣⲧ̅ ⲉⲃⲟⲗ ⲉⲧⲉⲡϫⲓⲥⲉ ⲡⲉ: Ⲁⲩⲱ ⲡⲉϫⲉⲛ̅ⲁⲣⲭⲱⲛ ⲙ̅ⲡⲗⲁⲟⲥ ⲛ̅Ⲅⲁⲗⲁⲁⲇ ⲡⲟⲩⲁ ⲡⲟⲩⲁ ⲉϩⲟⲩⲛ ϩⲙ̅ⲡⲉⲧϩⲓⲧⲟⲩⲱϥ ⲉⲩϫⲱ ⲙ̅ⲙⲟⲥ . ϫⲉ ⲛⲓⲙ ⲡⲉ ⲡⲣⲱⲙⲉ ⲉⲧⲛⲁⲧⲁⲁϥ ⲉⲙⲓϣⲉ ⲙⲛ̅ⲛϣⲏⲣⲉ ⲛ̅Ⲁⲙ̅ⲙⲱⲛ ⲛϥ̅ϣⲱⲡⲉ ⲛ̅ⲁⲣⲭⲱⲛ ⲉϫⲛ̅ⲛⲉⲧⲟⲩⲏϩ ⲧⲏⲣⲟⲩ ϩⲛ̅Ⲅⲁⲗⲁⲁⲇ :

Ⲓ̅Ⲁ̅. Ⲁⲩⲱ Ⲓⲉⲫⲑⲁⲉ ⲡⲄⲁⲗⲁⲁⲇⲓⲧⲏⲥ ⲁϥⲧⲁϫⲣⲏⲩ ϩⲛ̅ⲟⲩϭⲟⲙ . ⲁⲩⲱ ⲛ̅ⲧⲟϥ ⲛⲉⲟⲩϣⲏⲣⲉ ⲡⲉ ⲛ̅ⲟⲩⲥϩⲓⲙⲉ ⲙ̅ⲡⲟⲣⲛⲏ ⲉⲁⲥϫⲡⲉⲒⲉⲫⲑⲁⲉ ⲛ̅Ⲅⲁⲗⲁⲁⲇ . ⲁⲩⲱ ⲑⲓⲙⲉ ⲛ̅Ⲅⲁⲗⲁⲁⲇ ⲁⲥϫⲡⲟ ⲛⲁϥ ⲛ̅ϩⲉⲛϣⲏⲣⲉ . ⲁⲩⲱ ⲛ̅ϣⲏⲣⲉ ⲛ̅ⲧⲉⲥϩⲓⲙⲉ ⲁⲩϫⲁⲧⲉ. Ⲁⲩⲛⲟⲩϫⲉ ⲉⲃⲟⲗ ⲛ̅Ⲓⲉⲫⲁⲑⲉ ⲉⲩϫⲱ ⲙ̅ⲙⲟⲥ ⲛⲁϥ. ϫⲉ ⲛⲅ̅ⲛⲁⲕⲗⲓⲣⲟⲛⲟⲙⲓ ⲁⲛ ⲙ̅ⲡⲏⲓ ⲙ̅ⲡⲉⲛⲉⲓⲱⲧ. ⲛ̅ⲧⲟⲕ ⲛⲧⲅ̅ⲟⲩϣⲏⲣⲉ ⲛ̅ⲥϩⲓⲙⲉ ⲙ̅ⲡⲟⲣⲛⲏ Ⲁⲩⲱ Ⲓⲉⲫⲑⲁⲉ ⲁϥⲡⲱⲧ ⲛⲁϥ ϩⲁⲡϩⲟ ⲛ̅ⲛⲉϥⲥⲛⲏⲩ ⲁϥⲟⲩⲱϩ ϩⲙ̅ⲡⲕⲁϩ ⲉⲧⲟⲩⲙⲟⲩⲧⲉ ⲉⲣⲟϥ ϫⲉ Ⲧⲱⲃ. ⲁⲩⲱ ϩⲉⲛⲣⲱⲙⲉ ⲉⲩϣⲟⲩⲉⲓⲧ ⲁⲩⲥⲟⲩⲱϩ ⲉⲒⲉⲫⲑⲁⲉ ⲁⲩⲃⲱⲕ ⲉⲃⲟⲗ ⲛⲙ̅ⲙⲁϥ : Ⲁⲥϣⲱⲡⲉ ⲇⲉ ⲙⲛ̅ⲛⲥⲁ ϩⲉ̅ⲛϩⲟⲟⲩ ⲁⲛ̅ϣⲏⲣⲉ ⲛ̅Ⲁⲙⲙⲱⲛ ⲡⲟⲗⲉⲙⲓ ⲙⲛ̅ⲡⲒⲥⲣⲁⲏⲗ. ⲁⲩⲃⲱⲕ ⲛ̅ϭⲓⲛⲉⲡⲣⲉⲥⲃⲩⲧⲉⲣⲟⲥ ⲛ̅Ⲅⲁⲗⲁⲁⲇ ⲉϫⲓ ⲛ̅Ⲓⲉⲫⲑⲁⲉ ⲉⲃⲟⲗ ϩⲙ̅ⲡⲕⲁϩ ⲛ̅Ⲧⲱⲃ : ⲁⲩⲱ ⲡⲉϫⲁⲩ ⲛ̅Ⲓⲉⲃⲑⲁⲉ ϫⲉ ⲁⲙⲟⲩ ⲛⲅ̅ⲣ̅ⲛⲟϭⲉ ⲉϫⲱⲛ ⲛ̅ⲧⲛ̅ⲙⲓϣⲉ ⲙⲛ̅ⲛ̅ϣⲏⲣⲉ ⲛ̅Ⲁⲙⲙⲱⲛ: ⲠⲉϫⲉⲒⲉⲫⲑⲁⲉ ⲛ̅ⲛⲉⲡⲣⲉⲥⲃⲩⲧⲉⲣⲟⲥ ⲛ̅Ⲅⲁⲗⲁⲁⲇ. ϫⲉ ⲙⲏ ⲛ̅ⲧⲱⲧⲛ̅ ⲁⲛ ⲁⲧⲉⲧⲛ̅ⲙⲉⲥⲧⲱⲓ ⲁⲩⲱ ⲁⲧⲉⲧⲛ̅ⲛⲟϫⲧ̅ ⲉⲃⲟⲗ ⲙ̅ⲙⲱⲧⲛ̅ . ⲁⲩⲱ ⲁⲧⲉⲧⲛ̅ⲛⲟϫⲧ̅ ⲉⲃⲟⲗ ϩⲙ̅ⲡⲏⲓ ⲙ̅ⲡⲁⲉⲓⲱⲧ . ⲁⲩⲱ ⲉⲧⲃⲉⲟⲩ ⲧⲉⲛⲟⲩ ⲁⲧⲉⲧⲛ̅ⲉⲓ ⲉⲣⲁⲧ ⲉⲃⲟⲗϫⲉ ⲁⲧⲉⲧⲛ̅ⲑⲗⲓⲃⲉ. Ⲁⲩⲱ ⲛⲉⲡⲣⲉⲥⲃⲩⲧⲉⲣⲟⲥ ⲛ̅Ⲅⲁⲗⲁⲁⲇ ⲡⲉϫⲁⲩ ⲛ̅Ⲓⲉⲃⲑⲁⲉ. ϫⲉ ⲉⲧⲃⲉⲡⲉⲓϩⲱⲃ ⲧⲉⲛⲟⲩ ⲉⲛⲧⲁⲛⲉⲓ ⲉⲣⲁⲧⲕ̅. Ⲁⲙⲟⲩ ϭⲉ ⲛⲙ̅ⲙⲁⲛ ⲛⲅ̅ⲙⲓϣⲉ ⲙⲛ̅ⲛ̅ϣⲏⲣⲉ ⲛ̅Ⲁⲙⲙⲱⲛ ⲛⲅ̅ⲣ̅ⲁⲣⲭⲱⲛ ⲉϫⲛ̅ⲛⲉⲧⲟⲩⲏϩ ⲧⲏⲣⲟⲩ ϩⲛ̅Ⲅⲁⲗⲁⲁⲇ : ⲠⲉϫⲉⲒⲉⲫⲑⲁⲉ ⲛ̅ⲛⲉⲡⲣⲉⲥⲃⲩⲧⲉⲣⲟⲥ ⲛ̅Ⲅⲁⲗⲁⲁⲇ. ϫⲉ Ⲉϣϫⲉ ⲛ̅ⲧⲱⲧⲛ̅ ⲉⲧⲉⲧⲛⲁϫⲓⲧ ⲉⲧⲣⲁⲙⲓϣⲉ ⲙⲛ̅ⲛϣⲏⲣⲉ ⲛ̅Ⲁⲙⲙⲱⲛ. ⲁⲩⲱ ⲛ̅ⲧⲉⲠϫⲟⲉⲓⲥ ⲡⲁⲣⲁⲇⲓⲇⲟⲩ ⲙ̅ⲙⲟⲟⲩ ⲉϩⲣⲁⲓ ⲉⲧⲟⲟⲧ . ⲁⲛⲟⲕ ϯⲛⲁϣⲱⲡⲉ ⲛ̅ⲁⲣⲭⲱⲛ ⲉϫⲛ̅ⲧⲏⲩⲧⲛ̅ : Ⲡⲉϫⲉⲛⲉⲡⲣⲉⲥⲃⲩⲧⲉⲣⲟⲥ ⲛ̅Ⲅⲁⲗⲁⲁⲇ ⲛ̅Ⲓⲉⲫⲑⲁⲉ ϫⲉ ⲙⲁⲣⲉⲠϫⲟⲓⲥ ϣⲱⲡⲉ ⲉϥⲥⲱⲧⲙ̅ ⲉⲡⲉⲓϣⲁϫⲉ ⲟⲩⲧⲱⲛ ϩⲓⲟⲩⲥⲟⲡ ⲉϣⲱⲡⲉ ⲛ̅ⲧⲛⲁⲉⲓⲣⲉ ⲁⲛ ⲕⲁⲧⲁⲡⲉⲓϣⲁϫⲉ : Ⲁⲩⲱ Ⲓⲉⲫⲑⲁⲉ ⲁϥⲃⲱⲕ ⲙⲛ̅ⲛⲉⲡⲣⲉⲥⲃⲩⲧⲉⲣⲟⲥ ⲛ̅Ⲅⲁⲗⲁⲁⲇ. ⲁⲡⲗⲁⲟⲥ ⲕⲁⲑⲓⲥⲧⲁ ⲙ̅ⲙⲟϥ ⲛ̅ϩⲏⲅⲟⲩⲙⲉⲛⲟⲥ ⲁⲩⲱ ⲛ̅ⲁⲡⲉ ⲉϩⲣⲁⲓ ⲉϫⲱⲟⲩ : Ⲁⲩⲱ Ⲓⲉⲫⲑⲁⲉ ⲁϥⲧⲁⲩⲟ ⲛ̅ⲉϥϣⲁϫⲉ ⲧⲏⲣⲟⲩ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲉⲓ̅ⲥ ϩⲙ̅Ⲙⲁⲥⲏⲫⲁ : Ⲁⲩⲱ Ⲓⲉⲫⲑⲁⲉ ⲁϥϫⲟⲟⲩ ⲛ̅ϩⲉⲛϥⲁⲓϣⲓⲛⲉ ⲉⲣⲁⲧϥ̅ ⲙ̅ⲡⲣ̅ⲣⲟ ⲛ̅ⲛ̅ϣⲏⲣⲉ ⲛ̅Ⲁⲙ̅ⲙⲱⲛ ⲉϥϫⲱ ⲙ̅ⲙⲟⲥ ⲛⲁϥ ϫⲉ ⲟⲩ ⲡⲉ ⲡⲉⲕϩⲱⲃ ⲛⲙ̅ⲙⲁⲓ ϫⲉ ⲁⲕⲉⲓ ⲉⲣⲱⲓ ⲉⲙⲓϣⲉ ϩⲙ̅ⲡⲁⲕⲁϩ: ⲁⲩⲱ ⲡⲣ̅ⲣⲟ ⲛ̅ⲛ̅ϣⲏⲣⲉ ⲛ̅Ⲁⲙⲙⲱⲛ ⲡⲉϫⲁϥ ⲛ̅ⲛ̅ϥⲁⲓϣⲓⲛⲉ ⲛ̅Ⲓⲉⲫⲑⲁⲉ ϫⲉ ⲉⲃⲟⲗϫⲉ ⲁⲡⲒⲥⲣⲁⲏⲗ ϫⲓⲡⲁⲕⲁϩ ϩⲙ̅ⲡⲧⲣⲉϥⲉ̅ⲓ ⲉⲃⲟⲗ ϩⲛ̅Ⲕⲏⲙⲉ. ϫⲓⲛⲀⲣⲛⲱⲛ ϣⲁⲈⲓ̅ⲁⲃⲟⲕ. ⲁⲩⲱ ϣⲁⲡⲒⲟⲣⲇⲁⲛⲏⲥ . ⲧⲉⲛⲟⲩ ϭⲉ ⲧⲁⲁⲩ ⲛⲁⲓ ϩⲛ̅ⲟⲩⲉⲓⲣⲏⲛⲏ : ⲁⲩⲱ ⲁⲩⲕⲧⲟⲟⲩ ⲛ̅ϭⲓⲛ̅ϥⲁⲓϣⲓⲛⲉ ⲉⲣⲁⲧϥ̅ ⲛ̅Ⲓⲉⲫⲑⲁⲉ : ⲁⲩⲱ Ⲓⲉⲫⲑⲁⲉ ⲁϥⲟⲩⲱϩ ⲉⲧⲟⲟⲧϥ̅ ⲉϫⲟⲟⲩ ⲛ̅ϩⲉⲛϥⲁⲓϣⲓⲛⲉ ⲉⲣⲁⲧϥ̅ ⲙ̅ⲡⲣ̅ⲣⲟ ⲛ̅ⲛ̅ϣⲏⲣⲉ ⲛ̅Ⲁⲙⲙⲱⲛ. ⲉϥϫⲱ ⲙ̅ⲙⲟⲩ ⲛⲁϥ ϫⲉ ⲛⲁⲓ ⲛⲉⲧⲉⲣⲉⲒⲉⲫⲑⲁⲉ ϫⲱ ⲙ̅ⲙⲟⲟⲩ ϫⲉ ⲡ̅Ⲓ̅ⲏⲗ ϫⲓⲡⲕⲁϩ ⲙ̅Ⲙⲱⲁⲃ . ⲁⲩⲱ ⲡⲕⲁϩ ⲛ̅ⲛ̅ϣⲏⲣⲉ ⲛ̅Ⲁⲙⲙⲱⲛ ϩⲛ̅ⲡⲧⲣⲉⲩⲉ̅ⲓ ⲉϩⲣⲁⲓ ϩⲛ̅Ⲕⲏⲙⲉ. ⲁⲗⲗⲁ ⲉ̅ⲧⲁⲡⲒ̅ⲏⲗ̅ ⲙⲟⲟϣⲉ ϩⲛ̅ⲧⲉⲣⲏⲙⲟⲥ ϣⲁϩⲣⲁⲓ ⲉⲧⲉⲣⲩⲑⲣⲁ ⲑⲁⲗⲁⲥⲥⲁ. ⲁⲩⲱ ϣⲁϩⲣⲁⲓ ⲉⲔⲁⲇⲏⲥ : ⲁⲩⲱ ⲡⲒⲥⲣⲁⲏⲗ ⲁϥϫⲟⲟⲩ ⲛ̅ϩⲉⲛϥⲁⲓϣⲓⲛⲉ ⲉⲣⲁⲧϥ̅ ⲙ̅ⲡⲣ̅ⲣⲟ ⲛ̅ⲛ̅ϣⲏⲣⲉ ⲛ̅ⲛⲈⲇⲱⲙ ⲉϥϫⲱ ⲙ̅ⲙⲟⲥ ⲛⲁϥ. ϫⲉ ⲉⲓⲟⲩⲉϣⲉⲓ ⲉⲃⲟⲗ ϩⲙ̅ⲡⲉⲕⲕⲁϩ. ⲁⲩⲱ ⲙ̅ⲡϥ̅ⲥⲱⲧⲙ̅ ⲛ̅ϭⲓⲡⲣ̅ⲣⲟ ⲛ̅ⲛ̅Ⲉⲇⲱⲙ . Ⲁϥϫⲟⲟⲩ ⲟⲛ ⲉⲣⲁⲧϥ̅ ⲙ̅ⲡⲣ̅ⲣⲟ ⲙ̅Ⲙⲱⲁⲃ ⲙ̅ⲡⲉⲡⲕⲉⲣ̅ϩⲛⲁϥ : ⲁⲩⲱ ⲡⲒⲥⲣⲁⲏⲗ ⲁϥϩⲙⲟⲟⲥ ϩⲛ̅Ⲕⲁⲇⲏⲥ ⲁⲩⲱ ⲁϥⲙⲟⲟϣⲉ ϩⲙ̅ⲡⲕⲁϩ ⲛ̅ϫⲁⲓⲉ ⲁϥⲕⲱⲧⲉ ⲉⲡⲕⲁϩ ⲛ̅Ⲉⲇⲱⲙ . ⲁⲩⲱ ⲡⲕⲁϩ ⲙ̅Ⲙⲱⲁⲃ. ⲁϥⲉⲓ ϫⲓⲛⲙ̅ⲙⲁ ⲙ̅ⲡⲣⲏ ϩⲙ̅ⲡⲕⲁϩ ⲙ̅Ⲙⲱⲁⲃ ⲁⲩⲧⲁⲁⲩ ⲉϩⲣⲁⲓ ⲉⲡⲉⲕⲣⲟ ⲛ̅Ⲁⲣⲛⲱⲛ : ⲁⲩⲱ ⲙ̅ⲡⲟⲩⲃⲱⲕ ⲉϩⲟⲩⲛ ⲉⲛⲧⲟϣ ⲙ̅Ⲙⲱⲁⲃ ϫⲉ Ⲁⲣⲛⲱⲛ ⲡⲉ ⲡⲧⲟϣ ⲙ̅Ⲙⲱⲁⲃ : ⲁⲩⲱ ⲡⲒⲥⲣⲁⲏⲗ ⲁϥϫⲟⲟⲩ ⲛ̅ϩⲉⲛϥⲁⲓϣⲓⲛⲉ ⲉⲣⲁⲧϥ̅ ⲛ̅Ⲥⲏⲱⲛ ⲡⲀⲙⲟⲣⲣⲁⲓⲟⲥ ⲡⲣ̅ⲣⲟ ⲛ̅Ⲉⲥⲉⲃⲱⲛ ⲉⲣⲉⲡⲒⲥⲣⲁⲏⲗ ϫⲱ ⲙ̅ⲙⲟⲥ ⲛⲁϥ. ϫⲉ ⲕⲁⲁⲧ ⲧⲁⲡⲁⲣⲁⲅⲉ ⲙ̅ⲡⲉⲕⲕⲁϩ ϣⲁϩⲣⲁⲓ ⲉⲡⲁⲙⲁ. Ⲁⲩⲱ ⲙ̅ⲡⲉⲤⲏⲱⲛ ⲧⲁⲛϩⲉⲧⲡⲒⲥⲣⲁⲏⲗ ⲉ̅ⲧⲣⲉϥⲡⲁⲣⲁⲅⲉ ⲉⲃⲟⲗ ϩⲙ̅ⲡⲉϥⲧⲟϣ . Ⲁⲩⲱ Ⲥⲏⲱⲛ ⲁϥⲥⲟⲩⲱϩ ⲉϩⲟⲩⲛ ⲙ̅ⲡⲉϥⲗⲁⲟⲥ ⲧⲏⲣϥ̅ ⲁⲩⲧⲁⲁⲩ ⲉϩⲣⲁⲓ ⲉⲓⲁⲥⲁ ⲁⲩⲙⲓϣⲉ ⲙⲛ̅ⲡⲒⲥⲣⲁⲏⲗ. ⲁⲩⲱ Ⲡϫⲟⲉⲓⲥ ⲡⲛⲟⲩⲧⲉ ⲙ̅ⲡⲒⲥⲣⲁⲏⲗ ⲁϥⲡⲁⲣⲁⲇⲓⲇⲟⲩ ⲛ̅Ⲥⲏⲱⲛ ⲙⲛ̅ⲡⲉϥⲙⲏⲏϣⲉ ⲧⲏⲣϥ̅ ⲉϩⲣⲁⲓ ⲉⲧⲟⲟⲧϥ̅ ⲙ̅ⲡⲒⲥⲣⲁⲏⲗ ⲁϥⲡⲁⲧⲁⲥⲥⲉ ⲙ̅ⲙⲟϥ. ⲁⲩⲱ ⲡⲒⲥⲣⲁⲏⲗ ⲁϥⲕⲗⲏⲣⲟⲛⲟⲙⲓ ⲙ̅ⲡⲕⲁϩ ⲧⲏⲣϥ̅ ⲙ̅ⲡⲀⲙⲟⲣⲣⲁⲓⲟⲥ ϫⲓⲛⲀⲣⲛⲱⲛ ϣⲁⲒⲁⲃⲟⲕ . ⲁⲩⲱ ϫⲓⲛⲧⲉⲣⲏⲙⲟⲥ ϣⲁϩⲣⲁⲓ ⲉⲡⲒⲟⲣⲇⲁⲛⲏⲥ : Ⲧⲉⲛⲟⲩ ⲇⲉ Ⲡϫⲟⲉⲓⲥ ⲡⲛⲟⲩⲧⲉ ⲙ̅ⲡⲒⲥⲣⲁⲏⲗ ⲛ̅ⲧⲟϥ ⲡⲉⲛⲧⲁϥϥⲓ ⲙ̅ⲙⲁⲩ ⲙ̅ⲡⲀⲙⲟⲣⲣⲁⲓⲟⲥ ϩⲁⲡϩⲟ ⲙ̅ⲡⲉϥⲗⲁⲟⲥ ⲡⲒⲥⲣⲁⲏⲗ. ⲁⲩⲱ ⲛ̅ⲧⲟⲕ ⲉⲕⲛⲁⲕⲗⲏⲣⲟⲛⲟⲙⲓ ⲙ̅ⲙⲟϥ. ⲛⲉⲛⲧⲁⲬⲁⲙⲱⲥ ⲡⲉⲕⲛⲟⲩⲧⲉ ⲧⲁⲁⲩ ⲛⲁⲕ ⲉⲕⲗⲏⲣⲟⲛⲟⲙⲓ ⲙ̅ⲙⲟⲟⲩ ⲁⲛ ⲛⲉ ⲉⲧⲕⲛⲁⲕⲗⲏⲣⲟⲛⲟⲙⲓ ⲙ̅ⲙⲟⲟⲩ . ⲛ̅ⲕⲟⲟⲩⲉ ϩⲱⲱϥ ⲧⲏⲣⲟⲩ ⲉⲛⲧⲁⲠϫⲟⲉⲓⲥ ⲡⲉⲛⲛⲟⲩⲧⲉ ⲧⲁⲕⲟⲟⲩ ⲙ̅ⲡⲉⲛⲙ̅ⲧⲟ ⲉⲃⲟⲗ . ⲛ̅ⲧⲟⲟⲩ ⲛⲉⲧⲛⲛⲁⲕⲗⲏⲣⲟⲛⲟⲙⲓ ⲙ̅ⲙⲟⲟⲩ. Ⲧⲉⲛⲟⲩ ϭⲉ ⲙⲏ ϩⲛ̅ⲟⲩⲡⲉⲧⲛⲁⲛⲟⲩϥ ⲛⲁⲛⲟⲩⲕ ⲛ̅ⲧⲟⲕ ⲉⲂⲁⲗⲁⲕ ⲡϣⲏⲣⲉ ⲛ̅Ⲥⲉⲫⲱⲣ ⲡⲣ̅ⲣⲟ ⲙ̅Ⲙⲱⲁⲃ . ⲙⲏ ϩⲛ̅ⲟⲩⲙⲓϣⲉ ⲁϥⲙⲓϣⲉ ⲛⲙ̅ⲡⲒⲥⲣⲁⲏⲗ. ⲏ ϩⲛ̅ⲟⲩⲡⲟⲗⲉⲙⲟⲥ ⲁϥⲡⲟⲗⲉⲙⲓ ⲛⲙ̅ⲙⲁϥ ϩⲙ̅ⲡⲧⲣⲉϥⲟⲩⲱϩ ⲛ̅ϭⲓⲡⲒⲥⲣⲁⲏⲗ ϩⲛ̅Ⲉⲥⲉⲃⲱⲛ. ⲁⲩⲱ ϩⲛ̅ⲛⲉⲥⲧⲟϣ . ⲁⲩⲱ ϩⲙ̅ⲡⲕⲁϩ ⲛⲀⲣⲟⲏⲣ ⲙⲛ̅ⲛⲉⲥⲧⲟϣ. ⲁⲩⲱ ϩⲛ̅ⲛⲕⲉⲡⲟⲗⲓⲥ ⲧⲏⲣⲟⲩ ⲉⲧϩⲁⲧⲙ̅ⲡⲒⲟⲣⲇⲁⲛⲏⲥ ⲉⲓⲉϣⲙⲛ̅ⲧϣⲉ ⲙⲁⲁⲃ ⲛ̅ⲣⲟⲙⲡⲉ. Ⲁⲩⲱ ⲉⲧⲃⲉⲟⲩ ⲙ̅ⲡⲕ̅ⲧⲟⲩϫⲟⲟⲩ ⲙ̅ⲙ̅ⲡⲟⲩⲟⲉⲓϣ ⲉⲧⲙ̅ⲙⲁⲩ. Ⲁⲛⲟⲕ ⲇⲉ ⲙ̅ⲡⲓⲣ̅ⲛⲟⲃⲉ ⲉⲣⲟⲕ. ⲁⲩⲱ ⲛ̅ⲧⲟⲕ ⲉⲕⲛⲁⲉⲓⲣⲉ ⲛ̅ⲟⲩⲡⲟⲛⲏⲣⲓⲁ ⲛⲙ̅ⲙⲁⲓ ⲉⲧⲣⲉⲕⲙⲓϣⲉ ⲛⲙ̅ⲙⲁⲓ . Ϩⲛ̅ⲟⲩⲕⲣⲓⲛⲉ ⲉⲣⲉⲡⲛⲟⲩⲧⲉ ⲕⲣⲓⲛⲉ ⲙ̅ⲙⲟⲟⲩ ϩⲛ̅ⲧⲙⲏⲧⲉ ⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ . ⲁⲩⲱ ϩⲛ̅ⲧⲙⲏⲧⲉ ⲛ̅ⲛ̅ϣⲏⲣⲉ ⲛ̅Ⲁⲙⲙⲱⲛ . Ⲁⲩⲱ ⲙ̅ⲡϥ̅ⲥⲱⲧⲙ̅ ⲛ̅ϭⲓⲡⲣ̅ⲣⲟ ⲛ̅ⲛ̅ϣⲏⲣⲉ ⲛ̅Ⲁⲙⲙⲱⲛ . ⲛ̅ⲥⲁⲛ̅ϣⲁϫⲉ ⲛ̅Ⲓⲉⲫⲑⲁⲉ ⲛⲁⲓ ⲉⲛⲧⲁϥϫⲟⲟⲩⲥⲟⲩ ⲉⲣⲁⲧϥ̅. Ⲁⲩⲱ ⲡⲉⲡ̅ⲛ̅ⲁ ⲙ̅Ⲡϫⲟⲉⲓⲥ ⲁϥⲓ ⲉϫⲛ̅Ⲓⲉⲫⲑⲁⲉ. ⲁϥⲡⲁⲣⲁⲅⲉ ⲛ̅Ⲅⲁⲗⲁⲁⲇ ⲙⲛ̅Ⲙⲁⲛⲁⲥⲥⲏ. ⲁⲩⲱ ⲁϥⲡⲁⲣⲁⲅⲉ ⲙ̅ⲡⲙⲁ ⲛ̅ϭⲱϣⲧ̅ ⲉⲃⲟⲗ ⲛ̅Ⲅⲁⲗⲁⲁⲇ . ⲉⲡⲉⲕⲣⲟ ⲛ̅ⲛϣⲏⲣⲉ ⲛ̅Ⲁⲙⲙⲱⲛ. Ⲁⲩⲱ Ⲓⲉⲫⲑⲁⲉ ⲁϥⲉⲣⲏⲧ ⲛ̅ⲟⲩⲉⲣⲏⲧ ⲙ̅Ⲡϫⲟⲉⲓⲥ ⲉϥϫⲱ ⲙ̅ⲙⲟⲥ. ϫⲉ Ϩⲛ̅ⲟⲩϯ ⲉⲕϣⲁⲛϯ ⲛ̅ⲛ̅ϣⲏⲣⲉ ⲛ̅Ⲁⲙⲙⲱⲛ ⲉϩⲣⲁⲓ ⲉⲧⲟⲟⲧ . ⲁⲩⲱ ⲡⲉⲧⲛⲁⲣ̅ⲡⲃⲟⲗ ⲙ̅ⲡⲣⲟ ⲙ̅ⲡⲁⲏⲓ ⲛ̅ϣⲟⲣⲡ̅ . ⲉⲉⲓ ⲉⲃⲟⲗ ϩⲏⲧ . ϩⲙ̅ⲡⲧⲣⲁⲕⲧⲟⲓ ϩⲛ̅ⲟⲩⲉⲓⲣⲏⲛⲏ ⲛ̅ⲧⲟⲟⲧⲟⲩ ⲛ̅ⲛ̅ϣⲏⲣⲉ ⲛ̅Ⲁⲙⲙⲱⲛ ϯⲛⲁⲧⲁⲗⲟϥ ⲉϩⲣⲁⲓ ⲙ̅Ⲡϫⲟⲉⲓⲥ : ⲁⲩⲱ Ⲓⲉⲫⲑⲁⲉ ⲁϥⲃⲱⲕ ⲉⲣⲁⲧⲟⲩ ⲛ̅ⲛ̅ϣⲏⲣⲉ ⲛ̅Ⲁⲙⲙⲱⲛ ⲉⲙⲓϣⲉ ⲛⲙ̅ⲙⲁⲩ ⲁⲩⲱ Ⲡϫⲟⲉⲓⲥ ⲁϥⲧⲁⲁⲩ ⲉϩⲣⲁⲓ ⲉⲧⲟⲟⲧϥ̅ ⲁϥⲣⲱϩⲧ̅ ⲙ̅ⲙⲟⲟⲩ ϫⲓⲛⲀⲣⲟⲏⲣ ϣⲁⲛⲧϥ̅ⲉ̅ⲓ ⲉϩⲣⲁⲓ ⲉⲀⲣⲛⲱⲛ ⲉⲩⲛⲁⲣ̅ϫⲟⲩⲧⲱⲧⲉ ⲙ̅ⲡⲟⲗⲓⲥ ⲛ̅ⲏⲡⲉ . ⲁⲩⲱ ϣⲁϩⲣⲁⲓ ⲉ̅ⲙⲙⲁ ⲛ̅ⲉⲗⲟⲟⲗⲉ ⲛ̅ⲉⲃⲟⲗ ϩⲛ̅ⲟⲩⲛⲟϭ ⲉⲙⲁⲧⲉ ⲙ̅ⲡⲗⲏⲅⲏ. Ⲁⲩⲱ ⲛ̅ϣⲏⲣⲉ ⲛ̅Ⲁⲙ̅ⲙⲱⲛ ⲁⲩⲑ̅ⲃⲃⲓⲟ ϩⲁⲡϩⲟ ⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ : Ⲁⲩⲱ Ⲓⲉⲫⲑⲁⲉ ⲁϥⲉⲓ ⲉϩⲣⲁⲓ ⲉⲡⲉϥⲏⲓ ⲉⲘⲁⲥⲥⲏⲫⲁ . ⲁⲩⲱ ⲓⲥ ⲧⲉϥϣⲉⲉⲣⲉ ⲁⲥⲉⲓ ⲉⲃⲟⲗ ϩⲏⲧϥ̅ ϩⲛ̅ϩⲉⲛⲕⲟⲩⲕⲙ̅ ⲙⲛ̅ϩⲉⲛⲭⲟⲣⲟⲥ . ⲁⲩⲱ ⲛ̅ⲧⲟⲥ ⲟⲩⲉⲉⲣⲉ ⲛ̅ⲟⲩⲟⲟⲧⲥ̅ ⲛⲁϥⲧⲉ ⲙ̅ⲙⲉⲣⲓⲧ . ⲉⲙⲛ̅ⲧϥ̅ⲕⲉϣⲏⲣⲉ ⲙ̅ⲙⲁⲩ ⲟⲩⲇⲉ ⲕⲉϣⲉⲉⲣⲉ ⲛ̅ⲥⲁⲃⲗ̅ⲗⲁⲥ. Ⲁⲥϣⲱⲡⲉ ⲇⲉ ⲛ̅ⲧⲉⲣⲉϥⲛⲁⲩ ⲉ̅ⲣⲟⲥ ⲁϥⲡⲱϩ ⲛ̅ⲛⲉϥϩⲟⲓⲧⲉ . ⲡⲉϫⲁϥ ⲛⲁⲥ ϫⲉ ⲟⲩⲟⲓ ⲛⲁⲓ ⲧⲁϣⲉⲉⲣⲉ ϩⲛ̅ⲟⲩϣⲧⲟⲣⲧⲣ̅ ⲁϣⲧⲣ̅ⲧⲱⲣⲧ̅ . ⲁⲩⲱ ⲛ̅ⲧⲟ ⲧⲉϣⲟⲟⲡ ϩⲙ̅ⲡⲁϣⲧⲟⲣⲧⲣ̅ : Ⲁⲛⲟⲕ ⲇⲉ ⲁⲓⲟⲩⲱⲛ ⲛ̅ⲣⲱⲓ ⲉϩⲣⲁⲓ ⲉⲠϫⲟⲉⲓⲥ ⲉⲧⲃⲏⲏⲧⲉ ⲉⲛϯⲛⲁϭⲙ̅ϭⲟⲙ ⲁⲛ ⲉⲕⲧⲟⲓ ⲉⲡⲁϩⲟⲩ : Ⲁⲩⲱ ⲡⲉϫⲁⲥ ⲛⲁⲥ ⲛ̅ϭⲓⲧϣⲉⲉⲣⲉ ϣⲏⲙ ϫⲉ ⲡⲁⲉⲓⲱⲧ ⲉϣϫⲉ ⲁⲕⲟⲩⲱⲛ ⲛ̅ⲣⲱⲕ ⲉⲧⲃⲏⲏⲧ ⲉϩⲣⲁⲓ ⲉⲠϫⲟⲉⲓⲥ ⲉⲓⲣⲉ ⲛⲁⲓ ⲕⲁⲧⲁⲡⲉⲛⲧⲁϥⲉ̅ⲓ ⲉⲃⲟⲗ ϩⲛ̅ⲧⲉⲕⲧⲁⲡⲣⲟ ϩⲙ̅ⲡⲧⲣⲉⲠϫⲟⲉ̅ⲓⲥ ⲉⲓⲣⲉ ⲛ̅ⲟⲩϫⲓⲕⲃⲁ ⲉϫⲛ̅ⲛⲉⲕϫⲓϫⲉⲉⲩ ⲉⲧⲉⲛ̅ϣⲏⲣⲉ ⲛ̅Ⲁⲙⲙⲱⲛ : Ⲛ̅ⲧⲟⲥ ⲇⲉ ⲟⲛ ⲡⲉϫⲁⲥ ⲙ̅ⲡⲉⲥⲉⲓⲱⲧ ϫⲉ ⲙⲁⲣⲉⲡⲁⲉⲓⲱⲧ ⲉ̅ⲓⲣⲉ ⲛⲁⲓ ⲙ̅ⲡⲉⲓϣⲁϫⲉ ⲕⲁⲁⲧ ⲛ̅ⲉⲃⲟⲧ ⲥⲛⲁⲩ ⲛ̅ⲧⲁⲕⲧⲟⲓ ⲧⲁⲃⲱⲕ ⲉϩⲣⲁⲓ ⲉϫⲛ̅ⲛⲧⲟⲩⲉⲓⲏ. ⲛ̅ⲧⲁⲣⲓⲙⲉ ⲉϫⲛ̅ⲡⲉⲥⲙⲟⲧ ⲛ̅ⲧⲁⲙⲛ̅ⲧϣⲉⲉⲣⲉ ϣⲏⲙ ⲁⲛⲟⲕ ⲙⲛ̅ⲛⲁϣⲃⲉⲉⲣⲉ ⲡⲉϫⲁϥ ⲛⲁⲥ ϫⲉ ⲃⲱⲕ. Ⲁⲩⲱ ⲁϥϫⲟⲟⲩⲥ ⲛ̅ⲉⲃⲟⲧ ⲥⲛⲁⲩ ⲁⲥⲃⲱⲕ ⲛ̅ⲧⲟⲥ ⲙⲛ̅ⲛⲉⲥϣⲃⲉⲉⲣⲉ ⲁⲩⲣⲓⲙⲉ ⲉϫⲙ̅ⲡⲉⲥⲙⲟⲧ ⲛ̅ⲧⲉⲥⲙⲛ̅ⲧϣⲉⲉⲣⲉ ϣⲏⲙ ϩⲓϫⲛ̅ⲛ̅ⲧⲟⲩⲉⲓⲏ. Ⲁⲩⲱ ⲁⲥϣⲱⲡⲉ ⲙⲛ̅ⲛⲥⲁⲡϫⲱⲕ ⲉⲃⲟⲗ ⲙ̅ⲡⲉⲃⲟⲧ ⲥⲛⲁⲩ ⲁⲥⲕⲧⲟⲥ ⲉⲣⲁⲧϥ̅ ⲙ̅ⲡⲉⲥⲉⲓⲱⲧ . ⲁⲩⲱ ⲁϥⲉⲓⲣⲉ ⲛⲁⲥ ⲕⲁⲧⲁⲡⲉⲣⲏⲧ ⲉⲛⲧⲁϥⲉⲣⲏⲧ ⲙ̅ⲙⲟϥ. ⲁⲩⲱ ⲛ̅ⲧⲟⲥ ⲙ̅ⲡⲥ̅ⲥⲟⲩⲛ̅ϩⲟⲟⲩⲧ . Ⲁⲩⲱ ⲡⲁⲓ ⲁϥϣⲱⲡⲉ ⲉⲩⲡⲣⲟⲥⲧⲁⲅⲙⲁ ϩⲙ̅ⲡⲒⲥⲣⲁⲏⲗ ϫⲓⲛϩⲉⲛϩⲟⲟⲩ ⲉϩⲉⲛϩⲟⲟⲩ. ⲉⲩⲃⲏⲕ ⲛ̅ϭⲓⲛ̅ϣⲉⲉⲣⲉ ⲙ̅ⲡⲒⲥⲣⲁⲏⲗ ⲉⲣϩⲏⲃⲉ ⲛ̅ⲧϣⲉⲉⲣⲉ ⲛ̅Ⲓⲉⲫⲑⲁⲉ ⲡⲉⲃⲟⲗ ϩⲛ̅Ⲅⲁⲗⲁⲁⲇ ⲛ̅ϥⲧⲟⲟⲩ ⲛ̅ϩⲟⲟⲩ ⲧⲣⲣⲟⲙⲡⲉ.

Ⲓ̅Ⲃ̅. Ⲁⲩⲱ ⲁⲩⲥⲟⲩⲱϩ ⲛ̅ϭⲓⲛ̅ϣⲏⲣⲉ ⲛ̅Ⲉⲫⲣⲁⲓⲙ ⲁⲩⲉⲓ ⲉϩⲣⲁⲓ ⲉⲤⲉⲫⲓⲛⲁ . ⲡⲉϫⲁⲩ ⲛ̅Ⲓⲉⲫⲑⲁⲉ ϫⲉ ⲉⲧⲃⲉⲟⲩ ⲁⲕⲃⲱⲕ ⲉⲙⲓϣⲉ ⲙⲛ̅ⲛ̅ϣⲏⲣⲉ ⲛ̅Ⲁⲙⲙⲱⲛ . ⲁⲩⲱ ⲁⲛⲟⲛ ⲙ̅ⲡⲕ̅ⲙⲟⲩⲧⲉ ⲉⲣⲟⲛ ⲉⲧⲣⲉⲛⲉ̅ⲓ ⲛⲙ̅ⲙⲁⲕ ⲡⲉⲕⲏⲓ ⲧⲛ̅ⲛⲁⲣⲟⲕϩϥ̅ ⲉϫⲱⲕ ϩⲛ̅ⲟⲩⲥⲁⲧⲉ . Ⲁⲩⲱ Ⲓⲉⲫⲑⲁⲉ ⲡⲉϫⲁⲩ ⲛⲁϥ ϫⲉ ⲁⲛⲟⲕ ⲁⲛⲅ̅ⲟⲩⲣⲱⲙⲉ ⲛ̅ⲣⲉϥⲙⲓϣⲉ ⲙⲛ̅ⲡⲁⲕⲉⲗⲁⲟⲥ. ⲁⲩⲱ ⲛ̅ϣⲏⲣⲉ ⲛ̅Ⲁⲙⲙⲱⲛ ⲁⲩⲑⲗⲓⲃⲉ ⲙ̅ⲙⲟⲓ ⲉⲙⲁⲧⲉ. Ⲁⲓⲱϣ ⲉⲃⲟⲗ ⲉⲣⲱⲧⲛ̅ ⲁⲩⲱ ⲙ̅ⲡⲉⲧⲛ̅ⲧⲟⲩϫⲟⲓ ⲛ̅ⲧⲟⲟⲧⲟⲩ. Ⲁⲓⲛⲁⲩ ϫⲉ ⲙ̅ⲡⲉⲟⲩϫⲁⲓ ⲧⲁϩⲟⲓ ⲁⲓⲕⲱ ⲛ̅ⲧⲁⲯⲩⲭⲏ ϩⲛ̅ⲧⲁϭⲓϫ ⲁⲓⲃⲱⲕ ⲉⲣⲁⲧⲟⲩ ⲛ̅ⲛ̅ϣⲏⲣⲉ ⲛ̅Ⲁⲙⲙⲱⲛ ⲁⲠϫⲟⲉⲓⲥ ⲧⲁⲁⲩ ⲉϩⲣⲁⲓ ⲉⲧⲟⲟⲧ . Ⲁⲩⲱ ⲉⲧⲃⲉⲟⲩ ⲁⲧⲉⲧⲛ̅ⲉⲓ ⲉϩⲣⲁⲓ ⲉϫⲱⲓ ϩⲙ̅ⲡⲟⲟⲩ ⲛ̅ϩⲟⲟⲩ ⲉⲙⲓϣⲉ ⲛⲙ̅ⲙⲁⲓ . Ⲁⲩⲱ Ⲓⲉⲫⲑⲁⲉ ⲁϥⲥⲟⲩⲱϩ ⲉϩⲟⲩⲛ ⲛ̅ⲛ̅ⲣⲱⲙⲉ ⲧⲏⲣⲟⲩ ⲛ̅Ⲅⲁⲗⲁⲁⲇ ⲁⲩⲙⲓϣⲉ ⲙⲛ̅Ⲉⲫⲣⲁⲓⲙ . ⲁⲩⲱ ⲛ̅ⲣⲱⲙⲉ ⲛ̅Ⲅⲁⲗⲁⲁⲇ ⲁⲩⲡⲁⲧⲁⲥⲥⲉ ⲛ̅Ⲉⲫⲣⲁⲓⲙ ⲉⲃⲟⲗϫⲉ ⲁⲩϫⲟⲟⲥ ⲛ̅ϭⲓⲛⲉⲛⲧⲁⲩⲟⲩϫⲁⲓ ϩⲛ̅Ⲉⲫⲣⲁⲓⲙ. ϫⲉ ⲛ̅ⲧⲱⲧⲛ̅ Ⲅⲁⲗⲁⲁⲇ ⲉⲧⲉⲧⲛ̅ϩⲛ̅ⲧⲙⲏⲧⲉ ⲛ̅Ⲉⲫⲣⲁⲓⲙ. ⲁⲩⲱ ϩⲛ̅ⲧⲙⲏⲧⲉ ⲙ̅Ⲙⲁⲛⲁⲥⲥⲏ. Ⲁⲩⲱ ⲛ̅ⲣⲱⲙⲉ ⲛ̅Ⲅⲁⲗⲁⲁⲇ ⲁⲩϫⲓⲣⲱⲟⲩ ⲛ̅ⲙ̅ⲙⲁ ⲛ̅ϫⲓⲟⲟⲣ ⲙ̅ⲡⲒⲟⲣⲇⲁⲛⲏⲥ ⲛ̅ⲧⲉⲈⲫⲣⲁⲓⲙ . ⲁⲩⲱ ⲛⲉⲧⲧⲟⲩϫⲏⲩ ⲛ̅ⲧⲉⲈⲫⲣⲁⲓⲙ ⲡⲉϫⲁⲩ ϫⲉ ⲙⲁⲣⲉⲛϫⲓⲟⲟⲣ . Ⲡⲉϫⲉⲛ̅ⲣⲱⲙⲉ ⲛ̅Ⲅⲁⲗⲁⲁⲇ ⲛⲁⲩ ϫⲉ ⲙⲏ ⲛ̅ⲧⲱⲧⲛ̅ ⲛ̅ⲧⲉⲧⲛ̅ϩⲉⲛⲉⲃⲟⲗ ϩⲛ̅Ⲉⲫⲣⲁⲓⲙ . Ⲡⲉϫⲁⲩ ϫⲉ ⲙ̅ⲙⲟⲛ. Ⲡⲉϫⲁⲩ ⲛⲁⲩ ϫⲉ Ⲁϫⲓⲥ ϫⲉ ⲧⲁⲭⲩ ⲁⲩⲱ ⲙ̅ⲡⲟⲩⲥⲟⲟⲩⲧⲛ̅ ⲉϣⲁϫⲉ ϩⲓⲛⲁⲓ . Ⲁⲩⲁⲙⲁϩⲧⲉ ⲙ̅ⲙⲟⲟⲩ ⲁⲩⲕⲟⲛⲥⲟⲩ ϩⲁⲧⲉⲙ̅ⲙⲁ ⲛ̅ϫⲓⲟⲟⲣ ⲙ̅ⲡⲒⲟⲣⲇⲁⲛⲏⲥ . ⲁⲩⲱ ⲁⲩϩⲉ ϩⲙ̅ⲡⲉⲟⲩⲟⲉⲓϣ ⲉⲧⲙ̅ⲙⲁⲩ ⲉⲃⲟⲗ ϩⲛ̅Ⲉⲫⲣⲁⲓⲙ ⲛ̅ϭⲓϥⲧⲟⲟⲩ ⲛ̅ⲧⲃⲁ ⲙⲛ̅ϫⲟⲩⲱⲧ ⲛ̅ⲉ. ⲁⲩⲱ Ⲓⲉⲫⲑⲁⲉ ⲁϥⲕⲣⲓⲛⲉ ⲙ̅ⲡⲒⲥⲣⲁⲏⲗ ⲛ̅ⲥⲟ ⲛ̅ⲣⲟⲙⲡⲉ ⲁⲩⲱ Ⲓⲉⲫⲑⲁⲉ ⲡⲄⲁⲗⲁⲇⲓⲧⲏⲥ ⲁϥⲙⲟⲩ ⲁⲩⲧⲟⲙⲥϥ̅ ϩⲛ̅ⲧⲉϥⲡⲟⲗⲓⲥ Ⲅⲁⲗⲁⲁⲇ : Ⲁⲩⲱ ⲙⲛ̅ⲛⲥⲱϥ ⲁϥⲕⲣⲓⲛⲉ ⲙ̅ⲡⲒⲥⲣⲁⲏⲗ ⲛ̅ϭⲓⲀⲃⲓⲥⲁ ⲡⲉⲃⲟⲗ ϩⲛ̅Ⲃⲉⲑⲗⲉⲉⲙ . ⲁⲩⲱ ⲛⲉⲩϣⲟⲟⲡ ⲛⲁϥ ⲛ̅ϭⲓⲙⲁⲁⲃ ⲛ̅ϣⲏⲣⲉ . ⲙⲛ̅ⲙⲁⲁⲃ ⲛ̅ϣⲉⲉⲣⲉ ⲉⲛⲧⲁϥϫⲟⲟⲩⲥⲟⲩ ⲉⲃⲟⲗ . ⲁⲩⲱ ⲕⲉⲙⲁⲁⲃⲉ ⲛ̅ϣⲉⲉⲣⲉ ϩⲓⲃⲟⲗ ⲁϥⲛ̅ⲧⲟⲩ ⲉϩⲟⲩⲛ ⲛ̅ⲛⲉϥϣⲏⲣⲉ . ⲁⲩⲱ ⲁϥⲕⲣⲓⲛⲉ ⲙ̅ⲡⲒⲥⲣⲁⲏⲗ ⲛ̅ⲥⲁϣϥⲉ ⲛ̅ⲣⲟⲙⲡⲉ. Ⲁϥⲙⲟⲩ ⲇⲉ ⲛ̅ϭⲓⲀⲃⲓⲥⲁ ⲁⲩⲱ ⲁⲩⲧⲟⲙⲥϥ̅ ϩⲛ̅Ⲃⲏⲑⲗⲉⲉⲙ : Ⲁⲩⲱ ⲙⲛ̅ⲛⲥⲱϥ ⲁϥⲧⲱⲟⲩⲛ ⲛ̅ϭⲓⲀⲓⲗⲱⲙ ⲡⲤⲁⲃⲟⲩⲗⲱⲛⲓⲧⲏⲥ . ⲁϥⲕⲣⲓⲛⲉ ⲙ̅ⲡⲒⲥⲣⲁⲏⲗ ⲙ̅ⲙⲏⲧⲉ ⲛ̅ⲣⲟⲙⲡⲉ . ⲁⲩⲱ ⲁϥⲙⲟⲩ ⲛ̅ϭⲓⲀⲓⲗⲱⲙ ⲡⲤⲁⲟⲩⲗⲱⲛⲓⲧⲏⲥ. ⲁⲩⲧⲟⲙⲥϥ̅ ϩⲛ̅Ⲁⲓⲗⲉ̅ⲓⲙ ϩⲙ̅ⲡⲕⲁϩ ⲛ̅Ⲍⲁⲃⲟⲩⲗⲱⲛ : ⲁⲩⲱ ⲙⲛ̅ⲛⲥⲱϥ ⲁϥⲕⲣⲓⲛⲉ ⲙ̅ⲡⲒⲥⲣⲁⲏⲗ ⲛ̅ϭⲓⲀⲃⲇⲱⲛ ⲡϣⲏⲣⲉ ⲛ̅Ⲥⲉⲗⲗⲏⲙ ⲫⲁⲣⲁⲑⲱⲛⲓⲧⲏⲥ . ⲁⲩⲱ ⲛⲉⲩϣⲟⲟⲡ ⲛⲁϥ ⲛ̅ϭⲓϩⲙⲉ ⲛ̅ϣⲏⲣⲉ . ⲁⲩⲱ ⲙⲁⲁⲃⲉ ⲛ̅ϣⲉⲉⲣⲉ ⲛ̅ⲧⲉⲛⲉϥϣⲏⲣⲉ ⲉⲩⲧⲁⲗⲏⲩ ⲉϫⲛ̅ϣϥⲉ ⲛ̅ⲥⲏϭ ⲁⲩⲱ ⲁϥⲕⲣⲓⲛⲉ ⲙ̅ⲡⲒⲥⲣⲁⲏⲗ ⲛ̅ϣⲙⲟⲩⲛⲉ ⲛ̅ⲣⲟⲙⲡⲉ. Ⲁϥⲙⲟⲩ ⲇⲉ ⲛ̅ϭⲓⲀⲃⲇⲱⲛ ⲡϣⲏⲣⲉ ⲛ̅Ⲥⲉⲗⲗⲏⲙ ⲡⲪⲁⲣⲁⲑⲱⲛⲓⲧⲏⲥ ⲁⲩⲧⲟⲙⲥϥ̅ ϩⲙ̅Ⲫⲁⲣⲁⲑⲱⲙ ϩⲙ̅ⲡⲕⲁϩ ⲛ̅Ⲉⲫⲣⲁⲓⲙ ϩⲙ̅ⲡⲧⲟⲟⲩ ⲛ̅Ⲗⲁⲛⲁⲕ.

Ⲓ̅Ⲅ̅. Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲟⲩⲱϩ ⲉⲧⲟⲟⲧⲟⲩ ⲉⲉⲓⲣⲉ ⲙ̅ⲡⲡⲟⲛⲏⲣⲟⲛ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲓⲥ . ⲁⲩⲱ ⲁⲠϫⲟⲉⲓⲥ ⲧⲁⲁⲩ ⲉϩⲣⲁⲓ ⲉⲧⲟⲟⲧⲟⲩ ⲛ̅ⲛⲈⲫⲩⲗⲓⲥⲧⲓⲉⲓⲙ ⲙ̅ϩⲙⲉ ⲛ̅ⲣⲟⲙⲡⲉ : ⲛⲉⲩⲛ̅ⲟⲩⲣⲱⲙⲉ ⲇⲉ ⲉⲩⲉⲃⲟⲗ ⲡⲉ ϩⲛ̅Ⲥⲁⲣⲁⲁ . ⲉⲃⲟⲗ ϩⲛ̅ⲧⲉⲫⲩⲗⲏ ⲛ̅Ⲇⲁⲛ ⲉⲡⲉϥⲣⲁⲛ ⲡⲉ Ⲙⲁⲛⲱⲉ . ⲁⲩⲱ ⲧⲉϥⲥϩⲓⲙⲉ ⲛⲉⲩⲁϭⲣⲏⲛ ⲧⲉ ⲉⲙⲡⲥ̅ⲙⲓⲥⲉ : ⲁⲩⲱ ⲟⲩⲁⲅⲅⲉⲗⲟⲥ ⲛ̅ⲧⲉⲠϫⲟⲉⲓⲥ ⲁϥⲟⲩⲱϩ ⲉⲧⲉϥⲥϩⲓⲙⲉ ⲡⲉϫⲁϥ ⲛⲁⲥ ϫⲉ ⲉ̅ⲓⲥ ϩⲏⲏⲧⲉ ⲛ̅ⲧⲟ ⲛ̅ⲧⲉⲟⲩⲥⲧⲓⲣⲁ ⲁⲩⲱ ⲙ̅ⲡⲉⲙⲓⲥⲉ . ⲧⲉⲛⲁⲱϭⲉ ⲛ̅ⲧⲉϫⲡⲟ ⲛ̅ⲟⲩϣⲏⲣⲉ . Ⲁⲩⲱ ⲧⲉⲛⲟⲩ ϩⲁⲣⲉϩ ⲉⲣⲟ ⲉⲧⲙ̅ⲥⲉⲏⲣⲡ̅ ϩⲓⲥⲓⲕⲓⲣⲁ . ⲁⲩⲱ ⲉⲧⲙⲟⲩⲙⲗⲁⲁⲩ ⲛⲁⲅⲁⲑⲁⲣⲧⲟⲛ . Ϫⲉ ⲉⲓⲥ ϩⲏⲏⲧⲉ ⲛ̅ⲧⲟ ⲧⲉⲣⲁⲱ ⲛ̅ⲧⲉϫⲡⲟ ⲛ̅ⲟⲩϣⲏⲣⲉ ⲛ̅ⲧⲉⲧⲙ̅ⲡⲉⲛⲓⲡⲉ ⲃⲱⲕ ⲉϫⲛ̅ⲧⲉϥⲁⲡⲉ . ϫⲉ ϥⲛⲁϣⲱⲡⲉ ⲉϥⲟ ⲛ̅Ⲛ̅ⲁⲍⲓⲣⲁⲓⲟⲥ ⲙ̅ⲡⲛⲟⲩⲧⲉ ⲛ̅ϭⲓⲡϣⲏⲣⲉ ⲕⲟⲩⲓ ϫⲓⲛⲙ̅ⲡⲉϥⲙⲓⲥⲉ ⲁⲩⲱ ⲛ̅ⲧⲟϥ ⲡⲉⲧⲛⲁϩⲓⲧⲟⲟⲧϥ̅ ⲉⲧⲟⲩϫⲉⲡⲒⲥⲣⲁⲏⲗ ⲛ̅ⲧⲟⲟⲧⲟⲩ ⲛ̅ⲛⲉⲪⲩⲗⲓⲥⲧⲓⲉⲓⲙ : Ⲁⲩⲱ ⲧⲉⲥϩⲓⲙⲉ ⲁⲥⲃⲱⲕ ⲉϩⲟⲩⲛ ⲁⲥⲧⲁⲙⲉⲡⲉⲥϩⲁⲓ ⲉⲥϫⲱ ⲙ̅ⲙⲟⲥ ϫⲉ ⲟⲩⲣⲱⲙⲉ ⲛ̅ⲧⲉⲡⲛⲟⲩⲧⲉ ⲁϥⲉⲓ ϣⲁⲣⲟⲓ . ⲁⲩⲱ ⲡⲉϥⲉⲓⲛⲉ ⲉϥⲟ ⲛ̅ⲑⲉ ⲙ̅ⲡⲓⲛⲉ ⲛ̅ⲟⲩⲁⲅⲅⲉⲗⲟⲥ ⲛ̅ⲧⲉⲡⲛⲟⲩⲧⲉ ⲉϥⲟ ⲛ̅ϩⲟⲧⲉ ⲉⲙⲁⲧⲉ. ⲁⲩⲱ ⲙ̅ⲡⲓϫⲛⲟⲩϥ ϫⲉ ⲟⲩⲉⲃⲟⲗ ⲧⲱⲛ ⲡⲉ . ⲁⲩⲱ ⲡⲉϥⲣⲁⲛ ϩⲱⲱϥ ⲙ̅ⲡϥ̅ⲧⲁⲩⲟϥ ⲉⲣⲟⲓ. Ⲡⲉϫⲁϥ ⲛⲁⲓ ϫⲉ ⲉⲓⲥ ϩⲏⲏⲧⲉ ⲛ̅ⲧⲟ ⲧⲉⲣⲁⲱ ⲛ̅ⲧⲉϫⲡⲟ ⲛ̅ⲟⲩϣⲏⲣⲉ ⲧⲉⲛⲟⲩ ϭⲉ ⲙ̅ⲡⲣ̅ⲥⲉⲏⲣⲡ̅ ϩⲓⲥⲓⲕⲓⲣⲁ . ⲁⲩⲱ ⲙ̅ⲡⲣⲟⲩⲉⲙⲗⲁⲁⲩ ⲛ̅ⲁⲕⲁⲑⲁⲣⲧⲟⲛ ϫⲉ ϥⲛⲁϣⲱⲡⲉ ⲛ̅Ⲛⲁⲍⲓⲣⲁⲓⲟⲥ ⲙ̅ⲡⲛⲟⲩⲧⲉ ⲛ̅ϭⲓⲡϣⲏⲣⲉ ⲕⲟⲩⲓ ϫⲓⲛⲡⲉϩⲟⲟⲩ ⲙ̅ⲡⲉϥⲙⲓⲥⲉ ϣⲁⲡⲉϩⲟⲟⲩ ⲙ̅ⲡⲉϥⲙⲟⲩ: Ⲁⲩⲱ Ⲙⲁⲛⲱⲉ ⲁϥϣⲗⲏⲗ ⲉϩⲣⲁⲓ ⲉⲠϫⲟⲉⲓⲥ ⲉϥϫⲱ ⲙ̅ⲙⲟⲥ ϫⲉ ⲥⲱⲧⲙ̅ ⲉⲣⲟⲓ Ⲡϫⲟⲉⲓⲥ ⲁⲇⲱⲛⲁⲓ ⲡⲣⲱⲙⲉ ⲙ̅ⲡⲛⲟⲩⲧⲉ ⲉⲛⲧⲁⲕⲧⲛ̅ⲛⲟⲟⲩϥ . ⲙⲁⲣⲉϥⲉⲓ ⲟⲛ ⲛϥ̅ⲧⲱⲟⲩⲛⲉⲓⲁⲧⲛ̅ ⲉⲃⲟⲗϫⲉ ⲟⲩ ⲡⲉⲧⲟⲩⲛⲁⲁϥ ⲙ̅ⲡϣⲏⲣⲉ ⲕⲟⲩⲓ ⲉⲧⲟⲩⲛⲁϫⲡⲟϥ. Ⲁⲩⲱ ⲡⲛⲟⲩⲧⲉ ⲁϥⲥⲱⲧⲙ̅ ⲉⲡⲉϩⲣⲟⲟⲩ ⲙ̅Ⲙⲁⲱⲛⲉ . ⲁⲡⲁⲅⲅⲉⲗⲟⲥ ⲙ̅ⲡⲛⲟⲩⲧⲉ ⲉⲓ ⲟⲛ ϣⲁⲧⲉϥⲥϩⲓⲙⲉ . ⲁⲩⲱ ⲛ̅ⲧⲟⲥ ⲛ̅ⲉⲥϩ̅ⲙⲟⲟⲥ ϩⲛ̅ⲧⲥⲱϣⲉ . ⲁⲩⲱ Ⲙⲁⲛⲱⲉ ⲡⲉⲥⲥⲁⲓ ⲛⲉϥϩⲁⲧⲏⲥ ⲁⲛ. Ⲧⲉⲥϩⲓⲙⲉ ⲇⲉ ⲁⲥⲡⲱⲧ ⲛ̅ⲧⲉⲩⲛⲟⲩ ⲁⲥⲧⲁⲙⲉⲡⲉⲥϩⲁⲓ ⲉⲥϫⲱ ⲙ̅ⲙⲟⲥ ⲛⲁϥ ϫⲉ ⲉ̅ⲓⲥ ⲡⲣⲱⲙⲉ ⲁϥⲟⲩⲱⲛϩ ⲉⲣⲟⲓ ⲡⲉⲛⲧⲁϥⲉⲓ ⲛⲁⲓ ⲙ̅ⲡⲓϩⲟⲟⲩ : Ⲁϥⲧⲱⲟⲩⲛ ⲇⲉ ⲛ̅ϭⲓⲘⲁⲛⲱⲉ ⲡⲉⲥϩⲁⲓ ⲁϥⲟⲩⲁϩϥ̅ ⲛ̅ⲥⲁⲧⲉϥⲥϩⲓⲙⲉ ⲁϥⲉ̅ⲓ ⲉⲣⲁⲧϥ̅ ⲙ̅ⲡⲣⲱⲙⲉ . Ⲡⲉϫⲁϥ ⲛⲁϥ ϫⲉ ⲛ̅ⲧⲟⲕ ⲡⲉ ⲡⲣⲱⲙⲉ ⲉⲛ̅ⲧⲁⲕϣⲁϫⲉ ⲙⲛ̅ⲧⲉⲥϩⲓⲙⲉ. Ⲡⲉϫⲉⲡⲁⲅⲅⲉⲗⲟⲥ ϫⲉ ⲁⲛⲟⲕ ⲡⲉ : ⲠⲉϫⲉⲘⲁⲛⲱⲉ ⲛⲁϥ ϫⲉ ⲧⲉⲛ̅ⲟⲩ ⲉⲣϣⲁⲛⲡⲉⲕϣⲁϫⲉ ϣⲱⲡⲉ . Ⲟⲩ ⲡⲉ ⲡⲧⲱϣ ⲉⲧⲛⲁⲧⲁϩⲉⲡϣⲏⲣⲉ ⲕⲟⲩⲓ ⲙⲛ̅ⲡⲉϥϩⲱⲃ : Ⲡⲉϫⲉⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ⲙ̅Ⲙⲁⲛⲱⲉ ϫⲉ ⲛⲉⲛⲧⲁⲓϫⲟⲟⲩ ⲧⲏⲣⲟⲩ ⲉⲧⲉⲕⲥϩⲓⲙⲉ ⲙⲁⲣⲉⲥϩⲁⲣⲉϩ ⲉⲣⲟⲟⲩ . Ⲛ̅ⲕⲁ ⲛⲓⲙ ⲉϣⲁϥⲉⲓ ⲉⲃⲟⲗ ϩⲛ̅ⲧⲃⲱ ⲛ̅ⲉⲗⲟⲟⲗⲉ ⲛ̅ⲛⲉⲥⲟⲩⲟⲙϥ̅ . ⲁⲩⲱ ⲟⲩⲏⲣⲡ̅ ⲙⲛ̅ⲟⲩⲥⲓⲕⲓⲣⲁ ⲛ̅ⲉⲥⲥⲟⲟⲩ. ⲁⲩⲱ ⲛ̅ⲛⲉⲥⲟⲩⲉⲙⲗⲁⲁⲩ ⲛ̅ⲁⲕⲁⲑⲁⲣⲧⲟⲛ . ⲛⲉⲛⲧⲁⲓϩⲱⲛ ⲙ̅ⲙⲟⲟⲩ ⲧⲏⲣⲟⲩ ⲉⲧⲟⲟⲧⲥ̅ ⲉⲥⲉϩⲁⲣⲉϩ ⲉⲣⲟⲟⲩ : Ⲁⲩⲱ Ⲙⲁⲛⲱⲉ ⲡⲉϫⲁϥ ⲙ̅ⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ϫⲉ ⲙⲁⲣⲉⲥϩⲁⲣⲉϩ Ⲡϫⲟⲉⲓⲥ . ⲉⲛⲛⲁⲁⲙⲁϩⲧⲉ ⲇⲉ ⲙ̅ⲙⲟⲕ ⲙ̅ⲡⲉⲓⲙⲁ ⲛ̅ⲧⲛ̅ⲧⲁⲙⲉⲓⲟ ⲛ̅ⲟⲩⲙⲁⲥ ⲛ̅ⲃⲁⲁⲙⲡⲉ ⲙ̅ⲡⲉⲕⲙ̅ⲧⲟ ⲉⲃⲟⲗ. Ⲡⲉϫⲉⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ⲙⲘⲁⲛⲱⲉ ϫⲉ ⲉⲕϣⲁⲛⲁⲙⲁϩⲧⲉ ⲙ̅ⲙⲟⲓ ⲛ̅ⲛⲁⲟⲩⲱⲙ ⲉⲃⲟⲗ ϩⲙ̅ⲡⲉⲕⲟⲉⲓⲕ . ⲁⲩⲱ ⲉⲕϣⲁⲛⲧⲁⲙⲓⲟ ⲛ̅ⲟⲩϩⲟⲗⲟⲕⲁⲩⲧⲱⲙⲁ ⲉⲕⲛⲁⲧⲁⲗⲟϥ ⲉϩⲣⲁⲓ ⲙ̅Ⲡϫⲟⲉⲓⲥ . ⲉⲃⲟⲗϫⲉ Ⲙⲁⲛⲱⲉ ⲙ̅ⲡϥ̅ⲉⲓⲙⲉ ϫⲉ ⲟⲩⲁⲅⲅⲉⲗⲟⲥ ⲛ̅ⲧⲉⲠϫⲟⲉ̅ⲓⲥ ⲡⲉ : Ⲁⲩⲱ Ⲙⲁⲛⲱⲉ ⲡⲉϫⲁϥ ⲙ̅ⲡⲁⲅⲅⲉⲗⲟⲥ ϫⲉ ⲛⲓⲙ ⲡⲉ ⲡⲉⲕⲣⲁⲛ . ϫⲉⲕⲁⲥ ⲉⲣϣⲁⲛⲡⲉⲕϣⲁϫⲉ ϣⲱⲡⲉ ⲉⲛⲛⲉϯⲉⲟⲟⲩ ⲛⲁⲕ : Ⲁⲩⲱ ⲡⲁⲅⲅⲉⲗⲟⲥ ⲙ̅Ⲡϫⲟⲓⲥ ⲡⲉϫⲁϥ ⲛⲁϥ ϫⲉ ⲉⲧⲃⲉⲟⲩ ⲛ̅ϩⲱⲃ ⲉⲕϣⲓⲛⲉ ⲛ̅ⲥⲁⲡⲁⲣⲁⲛ . Ⲁⲩⲱ ⲡⲁⲓ ⲟⲩϣⲡⲏⲣⲉ ⲡⲉ : Ⲁⲩⲱ Ⲙⲁⲛⲱⲉ ⲁϥϫⲓ ⲙ̅ⲡⲙⲁⲥ ⲛ̅ⲃⲁⲁⲙⲡⲉ ⲙⲛ̅ⲧⲉⲑⲩⲥⲓⲁ ⲁϥϫⲓⲧⲟⲩ ⲉϩⲣⲁⲓ ⲉϫⲛ̅ⲧⲡⲉⲧⲣⲁ ⲙ̅Ⲡϫⲟⲉⲓⲥ . ⲁⲩⲱ ⲁϥⲛⲉϩϥ ⲉⲃⲟⲗ ⲉⲧⲣⲉϥⲁⲁⲥ. Ⲙⲁⲛⲱⲉ ⲇⲉ ⲙⲛ̅ⲧⲉϥⲥϩⲓⲙⲉ ⲛⲉⲩϭⲱϣⲧ ⲛ̅ⲥⲱϥ : Ⲁⲥϣⲱⲡⲉ ⲇⲉ ⲛ̅ⲧⲉⲣⲉⲡϣⲁϩ ⲙ̅ⲡⲕⲱϩⲧ ⲙⲟⲟϣⲉ ⲉϩⲣⲁⲓ ⲉϫⲙ̅ⲡⲉⲑⲩⲥⲓⲁⲥⲧⲏⲣⲓⲟⲛ ϣⲁϩⲣⲁⲓ ⲉⲧⲡⲉ. ⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ⲁϥⲙⲟⲟϣⲉ ⲉⲧⲡⲉ ϩⲙ̅ⲡϣⲁϩ ⲙ̅ⲡⲉⲑⲩⲥⲓⲁⲥⲧⲏⲣⲓⲟⲛ : Ⲁⲩⲱ Ⲙⲁⲛⲱⲉ ⲙⲛ̅ⲧⲉϥⲥϩⲓⲙⲉ ⲛ̅ⲛⲉⲩϭⲱϣⲧ ⲛ̅ⲥⲱϥ. ⲁⲩⲡⲁϩⲧⲟⲩ ⲉϫⲙ̅ⲡⲕⲁϩ ⲉϫⲙ̅ⲡⲉⲩϩⲟ. ⲙ̅ⲡⲉⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ⲟⲩⲱϩ ⲉⲧⲟⲟⲧϥ̅ ⲉ̅ⲟⲩⲱⲛϩ ⲉⲘⲁⲛⲱⲉ ⲙⲛ̅ⲧⲉϥⲥϩⲓⲙⲉ. Ⲧⲟⲧⲉ ⲁⲘⲁⲛⲱⲉ ⲉ̅ⲓⲙⲉ ϫⲉ ⲟⲩⲁⲅⲅⲉⲗⲟⲥ ⲛ̅ⲧⲉⲠϫⲟⲉⲓⲥ ⲡⲉ : ⲡⲉϫⲉⲘⲁⲛⲱⲉ ⲉϩⲟⲩⲛ ϩⲛ̅ⲧⲉϥⲥϩⲓⲙⲉ ϫⲉ ϩⲛ̅ⲟⲩⲙⲟⲩ ⲧⲛ̅ⲛⲁⲙⲟⲩ ⲉⲃⲟⲗϫⲉ ⲁⲛⲛⲁⲩ ⲉⲡⲛⲟⲩⲧⲉ. Ⲡⲉϫⲉⲧⲉϥⲥϩⲓⲙⲉ ⲛⲁϥ ϫⲉ ⲉⲛⲉⲣⲉⲠϫⲟⲉⲓⲥ ⲟⲩⲉϣⲙⲟⲟⲩⲧⲛ̅ ⲛ̅ⲛⲉϥⲛⲁϫⲓ ⲁⲛ ϭⲉ ⲛ̅ⲧⲟⲧⲛ̅ ⲡⲉ ⲙ̅ⲡϩⲟⲗⲟⲕⲁⲩⲧⲱⲙⲁ ⲙⲛ̅ⲧⲉⲑⲩⲥⲓⲁ ⲁⲩⲱ ⲛⲉϥⲛⲁⲧⲁⲙⲟⲛ ⲁⲛ ⲡⲉ ⲉⲛⲁⲓ ⲧⲏⲣⲟⲩ . ⲁⲩⲱ ⲕⲁⲧⲁⲡⲉⲩⲕⲁⲓⲣⲟⲥ ⲛ̅ⲛⲉϥⲛⲁⲧⲣⲉⲛⲥⲱⲧⲙ̅ ⲁⲛ ⲡⲉ ⲉⲛⲁⲓ : Ⲧⲉⲥϩⲓⲙⲉ ⲇⲉ ⲁⲥϫⲡⲉⲡϣⲏⲣⲉ ⲁⲩⲱ ⲁⲥⲙⲟⲩⲧⲉ ⲉⲡⲉϥⲣⲁⲛ ϫⲉ Ⲥⲁⲙⲯⲱⲛ . ⲁⲩⲱ ⲡϣⲏⲣⲉ ⲕⲟⲩⲓ ⲁϥϫⲁⲧⲉ ⲁⲠϫⲟⲉⲓⲥ ⲥⲙⲟⲩ ⲉⲣⲟϥ. Ⲁⲩⲱ ⲡⲉⲡ̅ⲛ̅ⲁ̅ ⲙ̅Ⲡϫⲟⲉⲓⲥ ⲁϥϫⲱⲛⲧ ⲉⲙⲟⲟϣⲉ ⲉⲃⲟⲗ ⲛⲙ̅ⲙⲁϥ ϩⲛ̅ⲧⲡⲁⲣⲉⲙⲃⲟⲗⲏ ⲛ̅Ⲇⲁⲛ ϩⲛ̅ⲧⲙⲏⲧⲉ ⲛ̅Ⲥⲁⲣⲁⲁ ⲁⲩⲱ ϩⲛ̅ⲧⲙⲏⲧⲉ ⲛ̅Ⲉⲥⲑⲁⲟⲗ :

̅ⲒⲆ̅. Ⲥⲁⲙⲯⲱⲛ ⲇⲉ ⲁϥⲃⲱⲕ ⲉϩⲣⲁⲓ ⲉⲐⲁⲙⲛⲁⲑⲁ . ⲁϥⲛⲁⲩ ⲉⲩⲥϩⲓⲙⲉ ϩⲛ̅Ⲑⲁⲙⲛⲁⲑⲁ ⲉⲃⲟⲗ ϩⲛ̅ⲛϣⲉⲉⲣⲉ ⲛ̅ⲛⲉⲪⲩⲗⲓⲥⲧⲓⲉⲓⲙ ⲁⲥⲣ̅ⲁⲛⲁϥ ⲙ̅ⲡⲉϥⲙ̅ⲧⲟ ⲉⲃⲟⲗ . ⲁⲩⲱ ⲁϥⲃⲱⲕ ⲉϩⲣⲁⲓ ⲁϥⲧⲁⲙⲉⲡⲉϥⲉⲓⲱⲧ ⲙⲛ̅ⲧⲉϥⲙⲁⲁⲩ ⲉϥϫⲱ ⲙ̅ⲙⲟⲥ ⲛⲁⲩ . ϫⲉ ⲁⲓⲛⲁⲩ ⲉⲩⲥϩⲓⲙⲉ ϩⲛ̅Ⲑⲁⲙⲛⲁⲑⲁ ⲉⲃⲟⲗ ϩⲛ̅ⲛ̅ϣⲉⲉⲣⲉ ⲛ̅ⲛⲉⲪⲩⲗⲓⲥⲧⲓⲉⲓⲙ ⲧⲉⲛⲟⲩ ϭⲉ ϫⲓⲧⲥ̅ ⲛⲁⲓ ⲛ̅ⲥϩⲓⲙⲉ : Ⲁⲩⲱ ⲡⲉϥⲉ̅ⲓⲱⲧ ⲙⲛ̅ⲧⲉϥⲙⲁⲁⲩ ⲡⲉϫⲁⲩ ⲛⲁϥ ϫⲉ ⲉⲧⲉⲙⲛ̅ϣⲉⲉⲣⲉ ϣⲟⲟⲡ ⲉⲃⲟⲗ ϩⲛ̅ⲛⲉⲕⲥⲛⲏⲩ ⲁⲩⲱ ⲉⲃⲟⲗ ϩⲙ̅ⲡⲗⲁⲟⲥ ⲧⲏⲣϥ̅ ⲉⲧⲣⲉⲥϣⲱⲡⲉ ⲛⲁⲕ ⲛ̅ⲥϩⲓⲙⲉ . ϫⲉ ⲉⲕⲛⲁⲃⲱⲕ ⲛ̅ⲧⲟⲕ ⲉ̅ϫⲓⲥϩⲓⲙⲉ ⲛⲁⲕ ⲉⲃⲟⲗ ϩⲛ̅ⲛ̅ⲁⲗⲟⲫⲩⲗⲗⲟⲥ ⲛⲁⲓ ⲉⲧⲟ ⲛ̅ⲁⲧⲥⲃ̅ⲃⲉ : Ⲁⲩⲱ Ⲥⲁⲙⲯⲱⲛ ⲡⲉϫⲁϥ ⲙ̅ⲡⲉϥⲉ̅ⲓⲱⲧ ϫⲉ ϫⲓⲧⲁⲓ ⲛⲁⲓ . ϫⲉ ⲧⲁⲓ ⲧⲉⲛⲧⲁⲥⲣ̅ⲁⲛⲁⲓ ϩⲛ̅ⲁⲃⲁⲗ . Ⲁⲩⲱ ⲡⲉϥⲉⲓⲱⲧ ⲙⲛ̅ⲧⲉϥⲙⲁⲁⲩ ⲙ̅ⲡⲟⲩⲉⲓⲙⲉ ϫⲉ ⲡⲉⲓⲧⲱϣ ⲟⲩⲉⲃⲟⲗ ϩⲓⲧⲙ̅Ⲡϫⲟⲉⲓⲥ ⲡⲉ ϫⲉ ⲛ̅ⲧⲟϥ ⲉϥⲕⲱⲧⲉ ⲛ̅ⲥⲁⲟⲩⲕⲃⲁ ⲉⲃⲟⲗ ϩⲛ̅ⲛ̅ⲁⲗⲗⲟⲫⲩⲗⲗⲟⲥ . ϩⲙ̅ⲡⲉⲩⲟⲉⲓϣ ⲉⲧⲙ̅ⲙⲁⲩ. ⲛ̅ⲁⲗⲗⲟⲫⲩⲗⲗⲟⲥ ⲉⲛⲉⲩⲟ ⲛ̅ϫⲟⲉⲓⲥ ⲉⲡⲒⲥⲣⲁⲏⲗ : Ⲁⲩⲱ Ⲥⲁⲙⲯⲱⲛ ⲁϥⲉⲓ ⲉϩⲣⲁⲓ ⲙⲛ̅ⲡⲉϥⲉ̅ⲓⲱⲧ ⲁⲩⲱ ⲧⲉϥⲙⲁⲁⲩ ⲁⲩⲉ̅ⲓ ⲉϩⲣⲁⲓ ⲉⲐⲁⲙⲛⲁⲑⲁ. ⲁⲩⲉⲓ ϣⲁϩⲣⲁⲓ ⲉⲙⲙⲁ ⲛ̅ⲉⲗⲟⲟⲗⲉ ⲛ̅Ⲑⲁⲙⲛⲁⲑⲁ . ⲁⲩⲱ ⲉⲓⲥ ⲟⲩⲙⲁⲥ ⲙ̅ⲙⲟⲩⲓ ⲉϥϩⲙ̅ϩⲙ̅ ⲁϥⲉⲓ ⲉⲃⲟⲗ ϩⲏⲧϥ̅ . ⲁⲩⲱ ⲡⲉⲡ̅ⲛ̅ⲁ̅ ⲙ̅Ⲡϫⲟⲉ̅ⲓⲥ ⲁϥϥⲱϭⲉ ⲉ̅ϫⲱϥ . Ⲁϥⲡⲁϩⲡⲙⲁⲥ ⲙ̅ⲙⲟⲩⲓ ⲛ̅ⲑⲉ ⲛ̅ⲟⲩⲁ ⲉϥⲛⲁⲙⲟⲩⲟⲩⲧ ⲛ̅ⲟⲩⲙⲁⲥ ⲛ̅ⲃⲁⲁⲙⲡⲉ . ⲁⲩⲱ ⲛⲉⲙⲛ̅ⲗⲁⲁⲩ ⲛ̅ⲧⲟⲟⲧϥ̅ ϩⲛ̅ⲧⲉϥϭⲓϫ. ⲙ̅ⲡⲉϥⲧⲁⲙⲉⲡⲉϥⲉⲓⲱⲧ ⲇⲉ ⲙⲛ̅ⲧⲉϥⲙⲁⲁⲩ ⲉⲡⲉⲛⲧⲁϥⲁⲁϥ . ⲁⲩⲱ ⲁⲩⲉⲓ ⲉϩⲣⲁⲓ ⲁⲩϣⲁϫⲉ ⲙⲛ̅ⲧⲉⲥϩⲓⲙⲉ . ⲁⲡϩⲱⲃ ⲥⲟⲟⲩⲧⲛ̅ ⲙ̅ⲡⲉⲙ̅ⲧⲟ ⲉⲃⲟⲗ ⲛ̅Ⲥⲁⲙⲯⲱⲛ : Ⲁϥⲕⲧⲟϥ ⲇⲉ ⲙⲛ̅ⲛⲥⲁϩⲉⲛϩⲟⲟⲩ ⲉϫⲓⲧⲥ̅ ⲁⲩⲱ ⲁϥⲣ̅ⲁⲕⲧϥ̅ ⲉⲛⲁⲩ ⲉⲡⲉⲡⲧⲱⲙⲁ. ⲏ̅ ⲉⲡⲥⲱⲙⲁ ⲙ̅ⲡⲙⲟⲩⲓ ⲁⲩⲱ ⲉⲓⲥ ϩⲏⲏⲧⲉ ⲛⲉⲣⲉⲟⲩⲥⲟⲟⲩϩⲥ̅ ⲛⲁϥ ⲛ̅ⲉⲃⲓⲱ ϩⲛ̅ⲣⲱϥ ⲙ̅ⲡⲙⲟⲩⲓ ⲙⲛ̅ⲟⲩⲉⲃⲓⲱ . Ⲁⲩⲱ ⲁϥϥⲓ ⲙ̅ⲡⲉⲃⲓⲱ ⲉϩⲣⲁⲓ ⲉⲧⲟⲟⲧϥ̅ ⲁϥⲙⲟⲟϣⲉ ⲉϥⲟⲩⲱⲙ ⲁⲩⲱ ⲁϥⲃⲱⲕ ⲉ̅ⲣⲁⲧϥ̅ ⲙ̅ⲡⲉϥⲉⲓⲱⲧ ⲙⲛ̅ⲧⲉϥⲙⲁⲁⲩ ⲁⲩⲱ ⲁϥϯ ⲛⲁⲩ ⲁⲩⲟⲩⲱⲙ . ⲙ̅ⲡϥ̅ⲧⲁⲙⲟⲟⲩ ⲇⲉ ϫⲉ ⲛ̅ⲧⲁϥϥⲓⲡⲉⲃⲓⲱ ⲉⲃⲟⲗ ϩⲛ̅ⲧⲧⲁⲡⲣⲟ ⲙ̅ⲡⲙⲟⲩⲓ : ⲁⲩⲱ ⲡⲉϥⲉⲓⲱⲧ ⲁϥⲓ ⲉⲣⲁⲧⲥ̅ ⲛ̅ⲧⲉⲥϩⲓⲙⲉ. Ⲁⲩⲱ Ⲥⲁⲙⲯⲱⲛ ⲁϥⲓⲣⲉ ⲛ̅ⲟⲩϩⲟⲟⲡ ⲙ̅ⲡⲙⲁ ⲉⲧⲙ̅ⲙⲁⲩ ⲛ̅ⲥⲁϣϥ̅ ⲛ̅ϩⲟⲟⲩ. ϫⲉ ⲧⲁⲓ ⲧⲉ ⲑⲉ ⲉϣⲁⲣⲉⲛ̅ϩⲣ̅ϣⲓⲣⲉ ⲁⲁⲥ . Ⲁⲩⲱ ⲁⲥϣⲱⲡⲉ ⲛ̅ⲧⲉⲣⲟⲩⲛⲁⲩ ⲉⲣⲟϥ ⲁⲩϫⲓ ⲙ̅ⲙⲁⲁⲃ ⲛ̅ϩⲣ̅ϣⲓⲣⲉ ⲁⲩⲱ ⲛ̅ⲛⲉⲩⲛⲙ̅ⲙⲁϥ : ⲠⲉϫⲉⲤⲁⲙⲯⲱⲛ ⲛⲁⲩ ϫⲉ ϯⲛⲁⲧⲁⲩⲟ ⲉⲣⲱⲧⲛ̅ ⲛ̅ⲟⲩⲡⲣⲟⲃⲗⲏⲙⲁ . ⲁⲩⲱ ϩⲛ̅ⲟⲩⲃⲱⲗ ⲉⲧⲉⲧⲛ̅ϣⲁⲛⲃⲟⲗϥ̅ ⲉⲣⲟⲓ ϩⲙ̅ⲡⲥⲁϣϥ̅ ⲛ̅ϩⲟⲟⲩ ⲙ̅ⲡϩⲟⲟⲡ ⲛ̅ⲧⲉⲧⲛ̅ϩⲉ ⲉⲣⲟϥ. ϯⲛⲁϯ ⲛⲏⲧⲛ̅ ⲙ̅ⲙⲁⲁⲃ ⲛ̅Ⲥⲓⲛⲇⲱⲛ . ⲁⲩⲱ ⲙ̅ⲙⲁⲁⲃ ⲛ̅ⲥⲧⲟⲗⲏ ⲛ̅ϩⲟⲓⲧⲉ. ⲉⲧⲉⲧⲛ̅ϣⲁⲛⲧⲙ̅ϭⲙ̅ϭⲟⲙ ⲇⲉ ⲉⲧⲁⲩⲟϥ ⲉⲣⲟⲓ ⲛ̅ⲧⲱⲧⲛ̅ ⲉⲧⲉⲧⲛⲉϯ ⲛⲁⲓ ⲙ̅ⲙⲁⲁⲃ ⲛ̅Ⲥⲓⲇⲱⲛ ⲁⲩⲱ ⲙ̅ⲙⲁⲁⲃ ⲛ̅ⲥⲧⲟⲗⲏ ⲛ̅ϩⲟⲓⲧⲉ : Ⲡⲉϫⲁⲩ ⲛⲁϥ ϫⲉ ⲧⲁⲩⲟ̅ ⲉⲣⲟⲛ ⲙ̅ⲡⲉⲕⲡⲣⲟⲃⲗⲏⲙⲁ ⲛ̅ⲧⲛ̅ⲥⲱⲧⲙ̅ ⲉ̅ⲣⲟϥ : Ⲡⲉϫⲁϥ ⲛⲁⲩ ϫⲉ ⲟⲩ ⲡⲉϣⲁⲩⲟⲩⲟⲙϥ̅ ⲛ̅ⲧⲁϥⲉ̅ⲓ ⲉⲃⲟⲗ ϩⲙ̅ⲡⲉϣⲁϥⲟⲩⲱⲙ . ⲁⲩⲱ ⲟⲩ ⲡⲉⲧϩⲟⲗϭ ⲉⲛⲧⲁϥⲉ̅ⲓ ⲉⲃⲟⲗ ϩⲙ̅ⲡϫⲱⲱⲣⲉ . Ⲁⲩⲱ ⲙ̅ⲡⲟⲩⲉϣϭⲙ̅ϭⲟⲙ ⲉⲧⲁⲩⲉⲡⲉⲡⲣⲟⲃⲗⲏⲙⲁ ϣⲁⲡⲙⲉϩⲟⲙⲛ̅ⲧ ⲛ̅ϩⲟⲟⲩ. Ⲁⲥϣⲱⲡⲉ ⲇⲉ ϩⲙ̅ⲡⲙⲉϩϥⲧⲟⲟⲩ ⲛ̅ϩⲟⲟⲩ ⲡⲉϫⲁⲩ ⲛ̅ⲑⲓⲙⲉ ⲛ̅Ⲥⲁⲙⲯⲱⲛ . ϫⲉ ⲁⲣⲓϩⲁⲗ ⲙ̅ⲡⲟⲩϩⲁⲓ ⲁⲩⲱ ⲙⲁⲣⲉϥⲧⲁⲩⲟ ⲉⲣⲟ ⲙ̅ⲡⲉϥⲡⲣⲟⲃⲗⲏⲙⲁ . ⲙⲏⲡⲱⲥ ⲛ̅ⲧⲛ̅ⲣⲟⲕϩⲉ ⲙⲛ̅ⲡⲏⲓ ⲙ̅ⲡⲟⲩⲉⲓⲱⲧ ϩⲛ̅ⲟⲩⲥⲁⲧⲉ . ⲏ̅ ⲉⲛ̅ⲧⲁⲧⲉⲧⲛ̅ⲧⲁϩⲙⲛ̅ ⲉⲁⲁⲛ ⲛ̅ϩⲏⲕⲉ : Ⲁⲩⲱ ⲑⲓⲙⲉ ⲛ̅Ⲥⲁⲙⲯⲱⲛ ⲁⲥⲣⲓⲙⲉ ⲉϩⲟⲩⲛ̅ ⲉϩⲣⲁϥ ⲉⲥϫⲱ ⲙ̅ⲙⲟⲥ ⲛⲁϥ . ϫⲉ ⲁϩⲣⲟⲕ ⲁⲕⲙⲉⲥⲧⲱⲓ ϩⲓⲛⲁⲓ ⲁⲩⲱ ⲙ̅ⲡⲕ̅ⲙⲉⲣⲓⲧ ⲉⲧⲃⲉⲟⲩ ⲡⲉⲕⲡⲣⲟⲃⲗⲏⲙⲁ ⲉⲛⲧⲁⲕⲧⲁⲩⲟϥ ⲉⲛ̅ϣⲏⲣⲉ ⲙ̅ⲡⲁⲗⲁⲟⲥ ⲙ̅ⲡⲕ̅ⲧⲁⲩⲟϥ ⲉⲣⲟⲓ: ⲠⲉϫⲉⲤⲁⲙⲯⲱⲛ ⲛⲁⲥ ϫⲉ ⲉϣϫⲉⲡⲁⲉ̅ⲓⲱⲧ ⲙⲛ̅ⲧⲁⲙⲁⲁⲩ ⲙ̅ⲡⲓⲧⲁⲩⲟϥ ⲉⲣⲟⲟⲩ ⲧⲁϫⲟⲟϥ ⲛ̅ⲧⲟ ⲉⲣⲟ . ⲁⲩⲱ ⲁⲥϭⲱ ⲉⲥⲣⲓⲙⲉ ⲉϩⲟⲩⲛ̅ ⲉϩⲣⲁϥ ⲙ̅ⲡⲥⲁϣϥ̅ ⲛ̅ϩⲟⲟⲩ ⲉ̅ⲣⲉⲡϩⲟⲟⲡ ϣⲟⲟⲡ ⲛ̅ϩⲏⲧⲟⲩ : Ⲁⲩⲱ ⲁⲥϣⲱⲡⲉ ϩⲙ̅ⲡⲉⲥⲙⲉϩⲥⲁϣϥ̅ ⲛ̅ϩⲟⲟⲩ ⲁϥⲧⲁⲩⲟϥ ⲉⲣⲟⲥ ⲉⲃⲟⲗ ϫⲉ ⲁⲥϭⲱ ⲉⲥⲉⲛ̅ⲱⲭⲗⲓ ⲛⲁϥ. ⲛ̅ⲧⲟⲥ ϩⲱⲱⲥ̅ ⲁⲥϫⲟⲟϥ ⲉⲛ̅ϣⲏⲣⲉ ⲙ̅ⲡⲉⲥⲗⲁⲟⲥ : Ⲁⲩⲱ ⲡⲉϫⲁⲩ ⲛⲁϥ ⲛ̅ϭⲓⲛ̅ⲣⲱⲙⲉ ⲛ̅ⲧⲡⲟⲗⲓⲥ ϩⲙ̅ⲡⲉϥⲙⲉϩⲥⲁϣϥ̅ ⲛ̅ϩⲟⲟⲩ ⲉⲙⲡⲁⲧⲉⲡⲣⲏ ϩⲱⲧⲡ̅ ⲉⲩϫⲱ ⲙ̅ⲙⲟⲥ . ϫⲉ ⲟⲩ ⲡⲉⲧϩⲟⲗϭ ⲉⲡⲉⲃⲓⲱ ⲁⲩⲱ ⲟⲩ ⲡⲉⲧϫⲟⲟⲣ ⲉⲡⲙⲟⲩⲓ : ⲠⲉϫⲉⲤⲁⲙⲯⲱⲛ ⲛⲁⲩ ϫⲉ ⲉⲛⲉⲙ̅ⲡⲉⲧⲛ̅ⲥⲕⲁⲓ ϩⲛ̅ⲧⲁⲃⲁϩⲥⲉ . ⲉⲛⲉⲧⲉⲧⲛⲁⲉ̅ⲓⲙⲉ ⲁⲛ ⲡⲉ ⲉⲡⲁⲡⲣⲟⲃⲗⲏⲙⲁ ⲁⲩⲱ ⲡⲉⲡ̅ⲛ̅ⲁ̅ ⲙ̅Ⲡϫⲟⲉⲓⲥ ⲁϥⲉⲓ ⲉϩⲣⲁⲓ ⲉϫⲱϥ ⲁϥⲧⲱⲟⲩⲛ ⲁϥⲉⲓ ⲉϩⲣⲁⲓ ⲉⲀⲥⲕⲁⲗⲱⲛ ⲁϥⲙⲟⲩⲟⲩⲧ ⲉⲃⲟⲗ ⲛ̅ϩⲏⲧⲟⲩ ⲙ̅ⲙⲁⲁⲃ ⲛ̅ⲣⲱⲙⲉ . ⲁϥϫⲓ ⲛ̅ⲛⲉⲩϩⲟⲓⲧⲉ ⲁϥϯⲛⲉⲩⲥⲧⲟⲗⲏ ⲛ̅ⲛⲉⲛⲧⲁⲩⲧⲁⲩⲟ ⲙ̅ⲡⲉⲡⲣⲟⲃⲗⲏⲙⲁ : Ⲁⲩⲱ Ⲥⲁⲙⲯⲱⲛ ⲁϥⲛⲟⲩϭⲥ̅ ϩⲛ̅ⲟⲩϭⲱⲛⲧ ⲁϥⲧⲱⲟⲩⲛ ⲁϥⲉⲓ ⲉϩⲣⲁⲓ ⲉⲡⲏⲓ ⲙ̅ⲡⲉϥⲉⲓⲱⲧ : Ⲁⲩⲱ ⲑⲓⲙⲉ ⲛ̅Ⲥⲁⲙⲯⲱⲛ ⲁⲥϩⲙⲟⲟⲥ ⲙⲛ̅ⲟⲩⲁ ⲛ̅ⲛⲉϥϣⲃⲉⲉⲣ ⲉⲛ̅ⲧⲁϥⲣ̅ϣⲃⲏⲣ ⲉⲣⲟⲟⲩ.

Ⲓ̅Ⲉ̅. Ⲁⲥϣⲱⲡⲉ ⲙⲛ̅ⲛⲥⲁϩⲉⲛϩⲟⲟⲩ ⲛ̅ⲛⲉϩⲟⲟⲩ ⲛⲉϩⲥ̅ⲥⲟⲩⲟ . Ⲥⲁⲙⲯⲱⲛ ⲁϥϭⲙ̅ⲡϣⲓⲛⲉ ⲛ̅ⲧⲉϥⲥϩⲓⲙⲉ ϩⲛ̅ⲟⲩⲙⲁⲥ ⲛ̅ⲃⲁⲁⲙⲡⲉ ⲉϥϫⲱ ϫⲉ ϯⲛⲁⲃⲱⲕ ⲉϩⲟⲩⲛ ϣⲁⲧⲁⲥϩⲓⲙⲉ ⲉⲡⲧⲁⲙⲓⲟⲛ . ⲁⲩⲱ ⲙ̅ⲡⲉⲡⲉⲥⲉ̅ⲓⲱⲧ ⲕⲁⲁϥ ⲉⲧⲣⲉϥⲃⲱⲕ ⲉϩⲟⲩⲛ ⲛⲁⲥ . ⲁⲩⲱ ⲡⲉⲥⲉ̅ⲓⲱⲧ ⲡⲉϫⲁϥ ⲛⲁϥ ϫⲉ ⲛ̅ⲧⲁⲓϫⲟⲟⲥ ϫⲉ ϩⲛ̅ⲟⲩⲙⲟⲥⲧⲉ ⲁⲕⲙⲉⲥⲧⲱⲥ ⲁⲓⲧⲁⲁⲥ ⲛ̅ⲟⲩⲁ ⲛ̅ⲛⲉⲕϣⲃⲉⲉⲣ . Ⲙⲏ ⲛ̅ⲧⲉⲥⲕⲟⲩⲓ ⲛ̅ⲥⲱⲛⲉ ⲛⲁⲛⲟⲩⲥ ⲁⲛ ⲉ̅ⲣⲟⲥ ϫⲓⲧⲥ̅ ⲉⲡⲙⲁ ⲛ̅ⲧⲏ : ⲠⲉϫⲉⲤⲁⲙⲯⲱⲛ ⲛⲁⲩ ϫⲉ ⲙⲛ̅ⲛⲟⲃⲉ ⲉⲣⲟⲓ ⲧⲉⲛⲟⲩ ⲛ̅ⲧⲟⲟⲧⲟⲩ ⲛ̅ⲛⲁⲗⲗⲟⲫⲩⲗⲗⲟⲥ ϫⲉ ⲁⲛⲟⲕ ϯⲛⲁⲉ̅ⲓⲣⲉ ⲛⲙ̅ⲙⲁⲩ ⲛ̅ϩⲉⲛⲡⲉⲑⲟⲟⲩ . Ⲁϥϭⲱⲡⲉ ⲛ̅ϣⲙ̅ⲧϣⲉ ⲛ̅ⲃⲁϣⲟⲣ ⲁϥϫⲓ ⲛ̅ϩⲉⲛⲗⲁⲙ̅ⲡⲁⲥ ⲁϥⲙⲟⲩⲣ ⲛ̅ⲟⲩⲥⲁⲧ ⲉϩⲟⲩⲛ ⲉⲩⲥⲁⲧ . ⲁϥⲕⲱ ⲛ̅ⲟⲩⲗⲁⲙⲡⲁⲥ ϩⲛ̅ⲧⲙⲏⲧⲉ ⲙ̅ⲡⲥⲁⲧ ⲥⲛⲁⲩ ⲉ̅ⲁϥⲙⲟⲣⲥ̅ ⲉϩⲟⲩⲛ ⲉⲣⲟⲟⲩ. Ⲁϥϫⲉⲣⲉⲟⲩⲕⲱϩⲧ ϩⲛ̅ⲛ̅ⲗⲁⲙⲡⲁⲥ ⲁϥϫⲟⲟⲩⲥⲟⲩ ⲉϩⲟⲩⲛ ⲉⲛ̅ϩⲙ̅ⲥ ⲛ̅ⲁⲗⲗⲟⲫⲩⲗⲗⲟⲥ . ⲁⲩⲣⲱⲕϩ ϫⲓⲛⲟⲩϫⲛⲟⲟⲩ ϣⲁϩⲉⲛϩⲙ̅ⲥ ⲉⲩⲣⲏⲧ . ⲁⲩⲱ ϣⲁⲙ̅ⲙⲁ ⲛ̅ⲉⲗⲟⲟⲗⲉ ⲙⲛ̅ⲛ̅ⲃⲱ ⲛ̅ϫⲟⲉⲓⲧ : Ⲛ̅ⲁⲗⲗⲟⲫⲩⲗⲗⲟⲥ ⲇⲉ ⲡⲉϫⲁⲩ ⲛ̅ⲛⲉⲩⲉⲣⲏⲩ ϫⲉ ⲛⲓⲙ ⲡⲉⲛⲧⲁϥⲣ̅ⲛⲁⲓ ⲛⲁⲛ . ⲡⲉϫⲁⲩ ϫⲉ Ⲥⲁⲙⲯⲱⲛ ⲡⲉⲛⲧⲁϥϫⲓⲧ ϣⲉⲉⲣⲉ ⲛ̅Ⲑⲁⲙⲛⲓ ⲡⲉ . ⲉⲃⲟⲗϫⲉ ⲁϥϫⲓⲧⲉϥⲥϩⲓⲙⲉ ⲁϥⲧⲁⲁⲥ ⲛ̅ⲟⲩⲁ ⲛ̅ⲛⲉϥϣⲃⲉⲉⲣ . ⲁⲩⲱ ⲛ̅ⲁⲗⲗⲟⲫⲩⲗⲗⲟⲥ ⲁⲩⲃⲱⲕ ⲉϩⲣⲁⲓ ⲁⲩⲣⲟⲕϩⲥ̅ ⲙⲛ̅ⲡⲉⲥⲕⲉⲓⲱⲧ ϩⲛ̅ⲟⲩⲕⲱϩⲧ : ⲠⲉϫⲉⲤⲁⲙⲯⲱⲛ ⲛⲁⲩ ϫⲉ ⲉⲧⲉⲧⲛ̅ϣⲁⲛⲉⲓⲣⲉ ϩⲓⲛⲁⲓ ⲙ̅ⲡⲁⲟⲩⲱϣ ⲁⲛ ⲡⲉ . ⲁⲗⲗⲁ ⲁⲛⲟⲕ ϯⲛⲁⲉⲓⲣⲉ ⲙ̅ⲡⲁⲕⲃⲁ ϩⲙ̅ⲡⲟⲩⲁ ⲡⲟⲩⲁ ⲙ̅ⲙⲱⲧⲛ̅ ⲙⲛ̅ⲛ̅ⲥⲱⲥ ⲛ̅ⲧⲁⲱⲗ ⲉⲃⲟⲗ . ⲁⲩⲱ ⲁϥⲡⲁⲧⲁⲥⲥⲉ ⲙ̅ⲙⲟⲟⲩ ⲉⲁϥϩⲓⲟⲩⲉ ⲛ̅ⲥⲁⲛⲉⲩⲥⲏϥⲉ ⲉϫⲛ̅ⲛⲉⲩⲙⲏⲣⲟⲥ ⲛ̅ⲟⲩⲛⲟϭ ⲉⲙⲁⲧⲉ ⲙ̅ⲡⲗⲏⲅⲏ . Ⲁⲩⲱ Ⲥⲁⲙⲯⲱⲛ ⲁϥⲉ̅ⲓ ⲉϩⲣⲁⲓ ⲁϥϩⲙⲟⲟⲥ ϩⲁⲧⲉⲧⲡⲉⲧⲣⲁ ⲛ̅Ⲁⲓⲇⲁⲙ . Ⲛ̅ⲁⲗⲗⲟⲫⲩⲗⲗⲟⲥ ⲇⲉ ⲁⲩⲉ̅ⲓ ⲉϩⲣⲁⲓ ⲁⲩⲃⲱⲕ ⲉⲙⲓϣⲉ ⲙⲛ̅Ⲓⲟⲩⲇⲁ . ⲁⲩϭⲱ ϩⲙ̅ⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ ϫⲉ Ⲙ̅ⲣⲟⲩⲟϭⲉ. Ⲡⲉϫⲉⲛ̅ⲣⲱⲙⲉ ⲛ̅Ⲓⲟⲩⲇⲁⲥ ⲛⲁⲩ ϫⲉ ⲉⲧⲃⲉⲟⲩ ⲁⲧⲉⲧⲛ̅ⲉⲓ ⲉϩⲣⲁⲓ ⲉⲙⲓϣⲉ ⲛⲙ̅ⲙⲁⲛ. Ⲡⲉϫⲉⲛ̅ⲁⲗⲗⲟⲫⲩⲗⲗⲟⲥ ⲛⲁⲩ ϫⲉ ⲛ̅ⲧⲁⲛⲉⲓ ⲉϩⲣⲁⲓ ⲉⲙⲟⲩⲣ ⲛ̅Ⲥⲁⲙⲯⲱⲛ . ⲁⲩⲱ ⲉⲉⲓⲣⲉ ⲛⲁϥ ⲕⲁⲧⲁⲑⲉ ⲉⲛ̅ⲧⲁϥⲁⲁⲥ ⲛⲁⲛ : ⲁⲩⲱ ⲙⲁⲁⲃ ⲛ̅ϣⲉ ⲛ̅ⲣⲱⲙⲉ ⲉⲃⲟⲗ ϩⲛ̅Ⲓⲟⲩⲇⲁ ⲁⲩⲉⲓ ⲉϩⲣⲁⲓ ⲉⲡⲟⲩⲱϣ ⲛ̅ⲧⲡⲉⲧⲣⲁ ⲛ̅Ⲁⲓⲇⲁⲙ . Ⲡⲉϫⲁⲩ ⲛ̅Ⲥⲁⲙⲯⲱⲛ ϫⲉ ⲛⲅ̅ⲥⲟⲟⲩⲛ ⲁⲛ ϫⲉ ⲛ̅ⲁⲗⲗⲟⲫⲩⲗⲗⲟⲥ ⲥⲉⲟ ⲛ̅ϫⲟⲉⲓⲥ ⲉⲣⲟⲛ . ⲁⲩⲱ ⲟⲩ ⲡⲉ ⲡⲉⲓϩⲱⲃ ⲉⲛ̅ⲧⲁⲕⲁⲁϥ ⲛⲁⲛ . ⲠⲉϫⲉⲤⲁⲙⲯⲱⲛ ⲛⲁⲩ ϫⲉ ⲕⲁⲧⲁⲑⲉ ⲉⲛⲧⲁⲩⲁⲁⲥ ⲛⲁⲓ ⲧⲁⲓ ⲧⲉ ⲑⲉ ⲉⲛⲧⲁⲓⲁⲁⲥ ⲛⲁⲩ . ⲁⲩⲱ ⲡⲉϫⲁⲩ ⲛⲁϥ ϫⲉ ⲉⲛⲧⲁⲛⲉⲓ ⲉϩⲣⲁⲓ ⲉⲙⲟⲣⲕ̅ ⲉ̅ⲧⲁⲁⲕ ⲉϩⲣⲁⲓ ⲉⲧⲟⲟⲧⲟⲩ ⲛ̅ⲁⲗⲗⲟⲫⲩⲗⲗⲟⲥ : ⲠⲉϫⲉⲤⲁⲙⲯⲱⲛ ⲛⲁⲩ ϫⲉ ⲱⲣⲕ ⲛⲁⲓ ϫⲉ ⲛ̅ⲧⲱⲧⲛ̅ ⲛ̅ⲧⲉⲧⲛⲁⲙⲟⲩⲟⲩⲧ ⲁⲛ ⲙ̅ⲙⲟⲓ . ⲁⲗⲗⲁ ⲉⲧⲉⲧⲛⲁⲧⲁⲁⲧ ⲉϩⲣⲁⲓ ⲉⲧⲟⲟⲧⲟⲩ : Ⲁⲩⲱ ⲁⲩⲱⲣⲕ ⲛⲁϥ ⲉⲩϫⲱ ⲙ̅ⲙⲟⲥ ϫⲉ ⲛ̅ⲧⲛ̅ⲛⲁⲙⲟⲟⲩⲧⲕ̅ ⲁⲛ . ⲁⲗⲗⲁ ⲉⲛⲁⲥⲟⲛϩⲕ̅ ⲛ̅ⲧⲛ̅ⲧⲁⲁⲕ ⲉ̅ϩⲣⲁⲓ ⲉⲧⲟⲟⲧⲟⲩ . ϩⲛ̅ⲟⲩⲙⲟⲩ ⲇⲉ ⲛ̅ⲧⲛⲁⲙⲟⲟⲩⲧⲕ̅ ⲁⲛ . Ⲁⲩⲱ ⲁⲩⲥⲟⲛϩϥ̅ ϩⲛ̅ⲛⲟⲩϩ ⲥⲛⲁⲩ ⲛ̅ⲃⲣ̅ⲣⲉ ⲁⲩⲛ̅ⲧϥ̅ ⲉϩⲣⲁⲓ ϩⲛ̅ⲧⲡⲉⲧⲣⲁ ⲉⲧⲙ̅ⲙⲁⲩ . ⲁϥⲉⲓ ϣⲁϩⲣⲁⲓ ⲉⲡⲙⲁ ⲉⲧⲟⲩⲙⲟⲩⲧⲉ ⲉⲣⲟϥ ϫⲉ Ⲙⲣⲟⲩⲟϭⲉ : Ⲁⲩⲱ ⲛ̅ⲁⲗⲗⲟⲫⲩⲗⲗⲟⲥ ⲁⲩⲛⲉϫⲗⲟⲩⲗⲁⲓ ⲉⲃⲟⲗ ⲁⲩⲡⲱⲧ ⲉϩⲟⲩⲛ̅ ⲉⲣⲟϥ : Ⲡⲉⲡ̅ⲛ̅ⲁ̅ ⲇⲉ ⲙ̅Ⲡϫⲟⲉⲓⲥ ⲁϥⲉ̅ⲓ ⲉϩⲣⲁⲓ ⲉϫⲱϥ ⲁⲩⲱ ⲛ̅ⲛⲟⲩϩ ⲉⲧⲙⲏⲣ ⲉⲛⲉϭⲃⲟⲓ ⲁⲩⲣ̅ⲑⲉ ⲛ̅ⲟⲩⲗⲁⲥ ⲉϣⲁϥⲙⲟⲩϩ ϩⲛ̅ⲟⲩⲕⲱϩⲧ . ⲁⲛ̅ⲛⲟⲩϩ ⲃⲱⲗ ⲉⲃⲟⲗ ϩⲛ̅ⲛⲉϥϭⲃⲟⲓ. Ⲁϥϩⲉ ⲉⲩⲙⲣⲟⲩⲟϭⲉ ⲛ̅ⲓⲱ ⲉⲥⲛⲏϫ ϩⲓⲡⲉⲥⲏⲧ. ⲁϥⲥⲟⲩⲧⲛ̅ⲧⲟⲟⲧϥ̅ ⲉⲃⲟⲗ ⲁϥϫⲓⲧⲥ̅ . ⲁⲩⲱ ⲁϥⲣⲱϩⲧ̅ ⲛ̅ϩⲏⲧⲥ̅ ⲙ̅ⲙⲏⲧ ⲛ̅ϣⲉ ⲛ̅ⲣⲱⲙⲉ . ⲠⲉϫⲉⲤⲁⲙⲯⲱⲛ ϫⲉ ϩⲛ̅ⲟⲩⲙⲣⲟⲩⲟϭⲉ ⲛ̅ⲓⲱ ϩⲛ̅ⲟⲩϥⲱⲧⲉ ⲁⲓϥⲱⲧⲉ ⲉⲃⲟⲗ ⲛ̅ⲛ̅ⲁⲗⲗⲟⲫⲩⲗⲗⲟⲥ . ϫⲉ ϩⲛ̅ⲧⲙ̅ⲣ̅ⲟⲩⲟϭⲉ ⲙ̅ⲡⲉⲓⲱ ⲁⲓⲡⲁⲧⲁⲥⲥⲉ ⲛ̅ϣⲟ ⲛ̅ⲣⲱⲙⲉ. Ⲁⲩⲱ ⲛ̅ⲧⲉⲣϥ̅ⲟⲩⲱ ⲉϥϣⲁϫⲉ ⲁϥⲛⲟⲩϫⲉ ⲛ̅ⲧⲙⲣ̅ⲟⲩⲟϭⲉ ⲉⲃⲟⲗ ϩⲛ̅ⲧⲉϥϭⲓϫ . ⲁϥⲙⲟⲩⲧⲉ ⲉⲡⲙⲁ ⲉⲧⲙ̅ⲙⲁⲩ ϫⲉ Ⲧⲁⲛϩⲁⲓⲣⲉⲥⲓⲥ ⲏ Ⲑⲁⲧⲃⲉⲥ ⲛ̅ⲧⲙ̅ⲣⲟⲩⲟϭⲉ : Ⲁϥⲉⲓⲃⲉ ⲇⲉ ⲉⲙⲁⲧⲉ ⲁⲩⲱ ⲁϥⲱϣ ⲉϩⲣⲁⲓ ⲉⲠϫⲟⲓⲥ ⲉϥϫⲱ ⲙ̅ⲙⲟⲥ . ϫⲉ ⲛ̅ⲧⲟⲕ ⲡⲉⲛ̅ⲧⲁⲕϯ ⲙ̅ⲡⲉⲓⲛⲟϭ ⲛ̅ⲟⲩϫⲁⲓ ϩⲛ̅ⲧϭⲓϫ ⲙ̅ⲡⲉⲕϩⲙ̅ϩⲁⲗ . ⲁⲩⲱ ⲧⲉⲛⲟⲩ ⲉⲓⲛⲁⲙⲟⲩ ϩⲁⲡⲉ̅ⲓⲃⲉ ⲛ̅ⲧⲁϩⲉ ⲉϩⲣⲁⲓ ⲉⲧⲟⲟⲧⲟⲩ ⲛ̅ⲛⲉⲓⲁⲧⲥⲃ̅ⲃⲉ : Ⲁⲩⲱ ⲡⲛⲟⲩⲧⲉ ⲁϥⲟⲩⲱⲛ ⲙ̅ⲡϩⲁⲧ ⲉⲧϩⲙ̅ⲡⲙⲁ ⲛ̅ⲧⲙ̅ⲣⲟⲩⲟϭⲉ . ⲁⲩⲙⲟⲟⲩ ⲉ̅ⲓ ⲉ̅ⲃⲟⲗ ⲛ̅ϩⲏⲧⲥ̅ ⲁϥⲥⲱ ⲁⲡⲉϥⲡ̅ⲛ̅ⲁ̅ ⲥⲙⲛ̅ⲧϥ̅ ⲁϥⲱⲛϩ . Ⲉⲧⲃⲉⲡⲁⲓ ⲁϥⲙⲟⲩⲧⲉ ⲉⲡⲉⲥⲣⲁⲛ ϫⲉ ⲧⲡⲏⲅⲏ ⲙ̅ⲡⲉⲧⲉⲡⲓⲕⲁⲗⲓ ⲧⲁⲓ ⲉⲥϣⲟⲟⲡ ϩⲙ̅ⲡⲙⲁ ⲉⲧⲙ̅ⲙⲁⲩ ⲉⲧⲉⲡⲙⲁ ⲛ̅ⲧⲙ̅ⲣⲟⲩⲟϭⲉ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ. Ⲁⲩⲱ ⲁϥⲕⲣⲓⲛⲉ ⲙ̅ⲡⲒⲥⲣⲁⲏⲗ ϩⲛ̅ⲛⲉϩⲟⲟⲩ ⲛ̅ⲛ̅ⲁⲗⲗⲟⲫⲩⲗⲗⲟⲥ ⲛ̅ϫⲟⲩⲧⲏ ⲛ̅ⲣⲟⲙⲡⲉ.

Ⲓ̅Ⲋ̅. Ⲁⲩⲱ Ⲥⲁⲙⲯⲱⲛ ⲁϥⲃⲱⲕ ⲉϩⲣⲁⲓ ⲉⲄⲁⲍⲁ ⲁϥⲛⲁⲩ ϩⲙ̅ⲡⲙⲁ ⲉⲧⲙ̅ⲙⲁⲩ ⲉⲩⲥϩⲓⲙⲉ ⲙ̅ⲡⲟⲣⲛⲏ ⲁϥⲃⲱⲕ ⲉϩⲟⲩⲛ ϣⲁⲣⲟⲥ. ⲁⲩⲧⲁⲙⲉⲛ̅ⲣⲱⲙⲉ ⲇⲉ ⲛ̅Ⲅⲁⲍⲁ ⲉⲩϫⲱ ⲙ̅ⲙⲟⲥ ⲛⲁⲩ ϫⲉ ⲁⲤⲁⲙⲯⲱⲛ ⲉⲓ ⲉϩⲣⲁⲓ ⲉⲡⲉⲓⲣⲁ ⲁⲩⲕⲱⲧⲉ ⲉⲡⲏⲓ ⲁⲩϭⲱⲣϭ̅ ⲉⲣⲟϥ ⲛ̅ⲧⲉⲩϣⲏ ⲧⲏⲣⲥ̅ ϩⲛ̅ⲧⲡⲩⲗⲏ ⲛ̅ⲧⲡⲟⲗⲓⲥ. Ⲁⲩⲱ ⲙ̅ⲡⲟⲩϣⲁϫⲉ ⲛ̅ⲧⲉⲩϣⲏ ⲧⲏⲣⲥ̅ ⲉⲩϫⲱ ⲙ̅ⲙⲟⲥ . ϫⲉ ⲉⲣϣⲁⲛⲡⲥⲟⲩ ⲛ̅ⲧⲟⲟⲩⲉ ⲉⲓ ⲉϩⲣⲁⲓ ⲙⲁⲣⲉⲛⲧⲱⲟⲩⲛ ⲛ̅ⲧⲛ̅ϩⲟⲧⲃⲉϥ : Ⲁⲩⲱ Ⲥⲁⲙⲯⲱⲛ ⲁϥⲛ̅ⲕⲟⲧⲕ̅ ϣⲁⲧⲡⲁϣⲉ ⲛ̅ⲧⲉⲩϣⲏ . ⲁϥⲧⲱⲟⲩⲛ ⲇⲉ ϩⲛ̅ⲧⲡⲁϣⲉ ⲛ̅ⲧⲉⲩϣⲏ ⲁϥϯⲧⲟⲟⲧϥ ⲛ̅ⲛⲣⲟ ⲛ̅ⲧⲡⲩⲗⲏ ⲛ̅ⲧⲡⲟⲗⲓⲥ ⲙⲛ̅ⲧⲟⲩⲉϭⲣⲟ ⲥⲛ̅ⲧⲉ . ⲁϥϥⲓⲧⲟⲩ ⲙⲛ̅ⲡⲉⲩⲙⲟⲭⲗⲟⲥ ⲁϥⲧⲁⲗⲟⲟⲩ ⲉϫⲙ̅ⲡⲉϥⲛⲁϩⲃ . ⲁϥⲛ̅ⲧⲟⲩ ⲉϫⲙ̅ⲡⲕⲟⲟϩ ⲙ̅ⲡⲧⲟⲟⲩ ⲡⲉⲧⲙ̅ⲡϩⲟ ⲉⲃⲟⲗ ⲛ̅Ⲭⲉⲃⲣⲱⲛ ⲁϥⲕⲁⲁⲧ ⲙ̅ⲡⲙⲁ ⲉⲧⲙ̅ⲙⲁⲩ . Ⲁⲥϣⲱⲡⲉ ⲇⲉ ⲙⲛ̅ⲛⲥⲁ ⲛⲁⲓ ⲁϥⲙⲉⲣⲉⲟⲩⲥϩⲓⲙⲉ ϩⲙ̅ⲡⲉⲭⲓⲙⲁⲣⲣⲟⲥ ⲛ̅Ⲥⲱⲣⲏⲭ ⲉⲡⲉⲥⲣⲁⲛ ⲡⲉ Ⲇⲁⲗⲓⲗⲁ : Ⲁⲩⲱ ⲛ̅ⲁⲣⲭⲱⲛ ⲛ̅ⲛ̅ⲁⲗⲗⲟⲫⲩⲗⲗⲟⲥ ⲁⲩⲃⲱⲕ ⲛⲁⲥ ⲉϩⲣⲁⲓ ⲡⲉϫⲁⲩ ⲛⲁⲥ . ϫⲉ ⲁⲣⲓϩⲁⲗ ⲙ̅ⲙⲟϥ ⲛ̅ⲧⲉⲛⲁⲩ ϫⲉ ⲉⲣⲉⲧⲉϥⲛⲟϭ ⲛ̅ϭⲟⲙ ϣⲟⲟⲡ ϩⲛ̅ⲟⲩ. ⲁⲩⲱ ⲉⲛⲛⲁϭⲙ̅ϭⲟⲙ ⲉϫⲱϥ ϩⲛ̅ⲟⲩ .ⲛ̅ⲧⲛ̅ⲙⲟⲣϥ̅ ϩⲱⲥⲧⲉ ⲛ̅ⲧⲛ̅ⲑⲃ̅ⲃⲓⲟϥ . ⲁⲩⲱ ⲁⲛⲟⲛ ⲧⲛ̅ⲛⲁϯ ⲛⲉ ⲛ̅ϣⲟ ⲛ̅ϩⲓⲉⲓⲃ . ⲁⲩⲱ ϣⲉ ⲛ̅ϩⲁⲧ : ⲠⲉϫⲉⲆⲁⲗⲓⲗⲁ ⲛ̅Ⲥⲁⲙⲯⲱⲛ ϫⲉ ⲙⲁⲧⲁⲙⲟⲓ ϫⲉ ⲉⲣⲉⲧⲉⲕⲛⲟϭ ⲛ̅ϭⲟⲙ ϩⲛ̅ⲟⲩ . ⲁⲩⲱ ⲉⲩⲛⲁⲙⲟⲣⲕ̅ ϩⲛ̅ⲟⲩ ⲉⲧⲣⲉⲕⲑⲃ̅ⲃⲓⲟ: ⲠⲉϫⲉⲤⲁⲙⲯⲱⲛ ⲛⲁⲥ ϫⲉ ⲉⲩϣⲁⲛⲙⲟⲣⲧ̅ ⲛ̅ⲥⲁϣϥ̅ ⲛ̅ⲕⲱⲃϩ ⲉⲩⲗⲏϭ ⲉⲙⲡⲟⲩⲃⲟⲕⲟⲩ ϯⲛⲁⲣ̅ϭⲱⲃ ⲛ̅ⲧⲁⲣ̅ⲑⲉ ⲛ̅ⲟⲩⲁ ⲛ̅ⲛ̅ⲣⲱⲙⲉ. ⲁⲩⲱ ⲛ̅ⲥⲁⲧⲣⲁⲡⲏⲥ ⲛ̅ⲛ̅ⲁⲗⲗⲟⲫⲩⲗⲗⲟⲥ ⲁⲩⲉⲓⲛⲉ ⲛⲁⲥ ⲙ̅ⲡⲥⲁϣϥ ⲛ̅ⲕⲱⲃϩ ⲉⲙⲡⲁⲧⲟⲩⲃⲟⲕⲟⲩ ⲁⲥⲥⲟⲛϩϥ̅ ⲛ̅ϩⲏⲧⲟⲩ ⲡⲉⲙⲗⲁϩ ⲇⲉ ⲛⲉϥϩⲙⲟⲟⲥ ϩⲙ̅ⲡⲧⲁⲙⲓⲟⲛ : Ⲡⲉϫⲁⲥ ⲛⲁϥ ϫⲉ ⲛ̅ⲁⲗⲗⲟⲫⲩⲗⲗⲟⲥ ⲁⲩⲓ ⲉϫⲱⲕ Ⲥⲁⲙⲯⲱⲛ . ⲁⲩⲱ ⲁϥⲥⲱⲗⲡ ⲛ̅ⲛ̅ⲕⲱⲃϩ ⲛ̅ⲑⲉ ⲛ̅ⲟⲩⲁ ⲉϥⲛⲁⲥⲱⲗⲡ ⲉⲣϣⲁⲛⲟⲩⲕⲱϩⲧ ⲧⲁϩⲟϥ . ⲁⲩⲱ ⲙ̅ⲡⲟⲩⲉⲓⲙⲉ ⲉⲧⲉϥϭⲟⲙ : ⲠⲉϫⲉⲆⲁⲗⲓⲗⲁ ⲉϩⲟⲩⲛ ϩⲛ̅Ⲥⲁⲙⲯⲱⲛ ϫⲉ ⲉⲓⲥ ϩⲏⲏⲧⲉ ⲁⲕⲣ̅ϩⲁⲗ ⲙ̅ⲙⲟⲓ ⲁⲩⲱ ⲁⲕϣⲁϫⲉ ⲛⲙ̅ⲙⲁⲓ ⲉⲕϫⲓϭⲟⲗ ⲙ̅ⲙⲟⲓ . Ⲧⲉⲛⲟⲩ ϭⲉ ⲙⲁⲧⲁⲙⲟⲓ ϫⲉ ⲉⲩⲛⲁⲙⲟⲣⲕ̅ ϩⲛ̅ⲟⲩ : Ⲡⲉϫⲁϥ ⲛⲁⲥ ϫⲉ ϩⲛ̅ⲟⲩ ⲥⲱⲛϩ ⲉⲩϣⲁⲛⲥⲟⲛϩⲧ̅ ⲛ̅ⲥⲁϣϥ̅ ⲛ̅ⲛⲟⲩϩ ⲛ̅ⲃⲣ̅ⲣⲉ ⲉⲙⲡⲁⲧⲟⲩⲣ̅ⲁⲁⲩ ⲛ̅ϩⲱⲃ ⲛ̅ϩⲏⲧⲟⲩ . ϯⲛⲁⲣ̅ϭⲱⲃ ϩⲱ ⲡⲉ ⲛ̅ⲧⲁⲣ̅ⲑⲉ ⲛ̅ⲟⲩⲁ ⲛ̅ⲛ̅ⲣⲱⲙⲉ : Ⲁⲩⲱ Ⲇⲁⲗⲓⲗⲁ ⲁⲥϫⲓⲛⲛ̅ⲟⲩϩ ⲛ̅ⲃⲣ̅ⲣⲉ ⲁⲥⲥⲟⲛϩϥ̅ ⲛ̅ϩⲏⲧⲟⲩ . Ⲡⲉϫⲁⲥ ⲛⲁϥ ϫⲉ ⲛ̅ⲁⲗⲗⲟⲫⲩⲗⲗⲟⲥ ⲁⲩⲉ̅ⲓ ⲉϫⲱⲕ Ⲥⲁⲙⲯⲱⲛ . ⲡⲉⲙⲗⲁϩ ⲇⲉ ⲛⲉϥϩⲙⲟⲟⲥ ϩⲙ̅ⲡⲧⲁⲙⲓⲟⲛ. Ⲁⲩⲱ ⲁϥⲥⲟⲗⲡⲟⲩ ⲉⲃⲟⲗ ϩⲛ̅ⲛⲉϥϭⲃⲟⲓ ⲛ̅ⲑⲉ ⲛ̅ⲟⲩϩⲱⲥ: ⲠⲉϫⲉⲆⲁⲗⲓⲗⲁ ⲉϩⲟⲩⲛ ϩⲛ̅Ⲥⲁⲙⲯⲱⲛ ϫⲉ ⲉⲓⲥ ϩⲏⲏⲧⲉ ⲟⲛ ⲁⲕⲣ̅ϩⲁⲗ ⲙ̅ⲙⲟⲓ : ⲁⲩⲱ ⲁⲕϣⲁϫⲉ ⲛⲙ̅ⲙⲁⲓ ϩⲛ̅ϩⲉⲛϣⲁϫⲉ ⲛ̅ϭⲟⲗ . Ⲧⲁⲙⲟⲓ ϭⲉ ⲧⲉⲛⲟⲩ ϫⲉ ⲉⲩⲛⲁⲙⲟⲣⲕ ϩⲛ̅ⲟⲩ : Ⲡⲉϫⲁϥ ⲛⲁⲥ ϫⲉ ⲉⲣϣⲁⲛϫⲓ ⲛ̅ⲧⲉ ϣⲱⲛⲧ̅ ⲙ̅ⲡⲥⲁϣϥ ⲛ̅ⲗⲟⲟⲩ ⲛ̅ϥⲱ ⲛ̅ⲧⲁⲁⲡⲉ ⲙⲛ̅ⲧⲕⲉϣⲛ̅ⲧⲉ . ⲁⲩⲱ ⲛ̅ⲧⲉⲕⲟⲗϩⲟⲩ ϩⲛ̅ⲧⲉϣⲙⲟⲩ ⲉϩⲟⲩⲛ ⲉⲧϫⲟ ϯⲛⲁⲣ̅ϭⲱⲃ ⲛ̅ⲧⲁⲣ̅ⲑⲉ ⲛ̅ⲟⲩⲁ ⲛ̅ⲛ̅ⲣⲱⲙⲉ : Ⲁⲥϣⲱⲡⲉ ⲇⲉ ⲛ̅ⲧⲉⲣϥⲧⲁⲁϥ ⲉⲛⲕⲟⲧⲕ̅ ⲁⲆⲁⲗⲓⲗⲁ ⲁⲥϫⲓ ⲙ̅ⲡⲥⲁϣϥ̅ ⲛ̅ⲗⲟⲟⲩ ⲛ̅ⲧⲉϥⲁⲡⲉ ⲁⲥϣⲟⲛ̅ⲧⲟⲩ ⲉϩⲟⲩⲛ ⲉⲧϣⲛ̅ⲧⲉ . ⲁⲥⲕⲟⲗϩⲟⲩ ⲛ̅ⲧⲉϣⲙⲟⲩ ⲉϩⲟⲩⲛ ⲉⲧϫⲟ : Ⲡⲉϫⲁⲥ ⲇⲉ ⲛ̅ⲁⲗⲗⲟⲫⲩⲗⲗⲟⲥ ⲁⲩⲉⲓ ⲉϫⲱⲕ Ⲥⲁⲙⲯⲱⲛ . Ⲁⲩⲱ ⲁϥⲛⲉϩⲥⲉ ⲉϩⲣⲁⲓ ϩⲙ̅ⲡⲉϥϩⲓⲛⲏⲃ ⲁϥⲧⲉⲕⲙ̅ⲧⲉϣⲙⲟⲩ ⲉⲃⲟⲗ ϩⲛ̅ⲧϫⲟ ⲉⲣⲉⲧϣⲛ̅ⲧⲉ ⲙⲏⲣ ⲉϩⲟⲩⲛ ⲉⲣⲟⲥ : ⲁⲩⲱ ⲙ̅ⲡⲟⲩⲉⲓⲙⲉ ⲉⲧⲉϥϭⲟⲙ : ⲠⲉϫⲉⲆⲁⲗⲓⲗⲁ ⲛ̅Ⲥⲁⲙⲯⲱⲛ ϫⲉ ⲡⲱⲥ ⲉⲕϫⲱ ⲙ̅ⲙⲟⲥ ϫⲉ ⲁⲓⲙⲉⲣⲓⲧⲉ . ⲁⲩⲱ ⲙ̅ⲡⲉⲕϩⲏⲧ ⲟⲩⲏⲛ ⲁⲛ ⲉϩⲟⲩⲛ ⲉⲣⲟⲓ . ⲉⲓⲥ ⲡⲙⲉϩϣⲙ̅ⲧⲥⲱⲱⲡ ⲡⲉ ⲉⲕⲣ̅ϩⲁⲗ ⲙ̅ⲙⲟⲓ . ⲁⲩⲱ ⲙ̅ⲡⲕ̅ⲧⲁⲙⲟⲓ ϫⲉ ⲉⲣⲉⲧⲉⲕⲛⲟϭ ⲛ̅ϭⲟⲙ ϩⲛ̅ⲟⲩ : Ⲁⲥϣⲱⲡⲉ ⲇⲉ ⲛ̅ⲧⲉⲣⲉⲥⲑⲗⲓⲃⲉ ⲙ̅ⲙⲟϥ ⲛ̅ⲧⲉⲩϣⲏ ⲧⲏⲣⲥ̅ ϩⲛ̅ⲛⲉⲥϣⲁϫⲉ . ⲁⲩⲱ ⲁⲥϩⲉϫϩⲱϫϥ̅ ⲁϥⲡⲁⲕⲉ ⲛ̅ϩⲏⲧ ⲉⲙⲟⲩ. ⲁϥⲟⲩⲱⲛϩ ⲉⲣⲟⲥ ⲙ̅ⲡⲉϥϩⲏⲧ ⲧⲏⲣϥ̅ ⲉϥϫⲱ ⲙ̅ⲙⲟⲥ ⲛⲁⲥ . ϫⲉ ⲙ̅ⲡⲉⲡⲉⲛⲓⲡⲉ ⲗⲁⲁⲩ ⲉⲓ ⲉϫⲛ̅ⲧⲁⲁⲡⲉ . ϫⲉ ⲁⲛⲅ̅ⲟⲩⲛⲁⲍⲉⲓⲣⲁⲓⲟⲥ ⲁⲛⲟⲕ ⲛ̅ⲧⲉⲡⲛⲟⲩⲧⲉ ϫⲓⲛⲉⲓⲛ̅ϩⲏⲧⲥ̅ ⲛ̅ⲧⲁⲙⲁⲁⲩ . ⲉⲓϣⲁⲛϩⲉⲉⲕⲉ ⲉϫⲱⲓ ϭⲉ ⲧⲁϭⲟⲙ ⲛⲁⲥⲁϩⲱⲥ ⲉⲃⲟⲗ ⲙ̅ⲙⲟⲓ . ⲧⲁⲣ̅ϭⲱⲃ ϩ̅ⲱ ⲧⲁⲣ̅ⲑⲉ ⲛ̅ⲟⲩⲁ ⲛ̅ⲣ̅ⲣⲱⲙⲉ ⲧⲏⲣⲟⲩ : Ⲁⲩⲱ Ⲇⲁⲗⲓⲗⲁ ⲁⲥⲉⲓⲙⲉ ϫⲉ ⲁϥⲟⲩⲱⲛϩ̅ ⲉⲣⲟⲥ ⲙ̅ⲡⲉϥϩⲏⲧ ⲧⲏⲣϥ̅ . ⲁⲥϫⲟⲟⲩ ⲁⲥⲙⲟⲩⲧⲉ ⲉⲛ̅ⲁⲣⲭⲱⲛ ⲛ̅ⲛ̅ⲁⲗⲗⲟⲫⲩⲗⲗⲟⲥ. ⲉⲥϫⲱ ⲙ̅ⲙⲟⲥ ⲛⲁⲩ ϫⲉ ⲁⲙⲓⲧⲛ̅ ⲛⲁⲓ ϩⲣⲁⲓ ⲙ̅ⲡⲓⲕⲉⲥⲟⲡ ϫⲉ ⲁϥⲟⲩⲱⲛϩ ⲉⲣⲟⲓ ⲙ̅ⲡⲉϥϩⲏⲧ ⲧⲏⲣϥ̅ . Ⲁⲩⲉⲓ ⲛ̅ϭⲓⲛ̅ⲁⲣⲭⲱⲛ ⲛ̅ⲛ̅ⲁⲗⲗⲟⲫⲩⲗⲗⲟⲥ ⲁⲩⲛ̅ⲡϩⲁⲧ ⲛⲙ̅ⲙⲁⲩ. Ⲁⲥϣⲱⲡⲉ ⲇⲉ ⲛ̅ⲧⲟⲥ ⲛ̅ⲧⲉⲣⲉⲥⲧⲁⲁϥ ⲉⲛ̅ⲕⲟⲧⲕ̅ ϩⲟⲩⲛ ⲛ̅ⲕⲟⲩⲛⲥ̅ ⲁⲥⲙⲟⲩⲧⲉ ⲉⲩⲣⲱⲙⲉ ⲉⲧⲣⲉϥϩⲉⲉⲕⲉ ⲙ̅ⲡⲥⲁϣϥ̅ ⲛ̅ⲗⲟⲟⲩ ⲛ̅ⲧⲉϥⲁⲡⲉ . ⲁϥⲉⲓⲛⲉ ⲉϥⲣ̅ϭⲱⲃ ⲉϥⲣ̅ⲑⲉ ⲛ̅ⲟⲩⲁ ⲛ̅ⲛ̅ⲣⲱⲙⲉ . ⲁⲩⲱ ⲧⲉϥϭⲟⲙ ⲁϥⲥⲁϩⲱⲥ ⲉⲃⲟⲗ ⲙ̅ⲙⲟϥ. Ⲡⲉϫⲁⲥ ⲛⲁϥ. ϫⲉ Ⲛ̅ⲁⲗⲗⲟⲫⲩⲗⲗⲟⲥ ⲁⲩⲉⲓ ⲉϩⲣⲁⲓ ⲉϫⲱⲕ Ⲥⲁⲙⲯⲱⲛ . Ⲁⲩⲱ ⲁϥⲛⲉϩⲥⲉ ⲉϩⲣⲁⲓ ϩⲙ̅ⲡⲉϥϩⲓⲛⲏⲃ ⲡⲉϫⲁϥ ⲉϩⲟⲩⲛ ϩⲙ̅ⲡⲉϥϩⲏⲧ . ϫⲉ ϯⲛⲁⲃⲱⲗ ⲙ̅ⲙⲟⲓ ⲉⲃⲟⲗ ⲛ̅ⲑⲉ ⲛ̅ⲥⲟⲡ ⲛⲓⲙ ⲛ̅ⲧⲁⲣ̅ⲣⲙ̅ϩⲉ. ⲙ̅ⲡϥ̅ⲥⲟⲟⲩⲛ̅ ⲅⲁⲣ ϫⲉ ⲁϥⲥⲁϩⲱϥ ⲉⲃⲟⲗ ⲙ̅ⲙⲟϥ ⲛ̅ϭⲓⲠϫⲟⲉⲓⲥ . Ⲛⲉⲫⲓⲗⲓⲥⲧⲓⲉⲓⲙ ⲇⲉ ⲁⲩⲁⲙⲁϩⲧⲉ ⲙ̅ⲙⲟϥ ⲁⲩⲱ ⲁⲩⲥⲣⲙ̅ⲣⲱⲙϥ̅ . ⲁⲩⲛ̅ⲧϥ̅ ⲉϩⲣⲁⲓ ⲉⲄⲁⲍⲁ : Ⲁⲩⲙⲟⲩⲣ ⲙ̅ⲙⲟϥ ϩⲛ̅ⲟⲩⲙⲟⲩⲣ ⲙ̅ⲃⲉⲛⲓⲡⲉ ϩⲙ̅ⲡⲉϣⲉⲕⲟ ⲁⲩϫⲓⲕⲃⲁ ⲉⲧⲣⲉϥⲥⲉⲕϩⲟⲓ ⲉⲡϩⲟⲓ . Ⲡϥⲱ ⲇⲉ ⲛ̅ⲧⲉϥⲁⲡⲉ ⲉⲛⲧⲁⲩϩⲉⲉⲕⲉ ⲙ̅ⲙⲟϥ ⲓⲥ   ⲁϥϣⲣⲡ̅ⲣⲱⲧ ⲟⲛ . Ⲁⲩⲥⲟⲩⲱϩ ⲉϩⲟⲩⲛ ⲛ̅ϭⲓⲛ̅ⲁⲣⲭⲱⲛ ⲛ̅ⲛⲉⲪⲓⲗⲓⲥⲧⲓⲉⲓⲙ ⲉⲧⲣⲟⲩⲟⲩⲱⲧⲛ̅ ⲛ̅Ⲇⲁⲅⲟⲛ ⲡⲉⲩⲛⲟⲩⲧⲉ . ⲁⲩⲱ ⲛ̅ⲥⲉⲟⲩⲛⲟϥ ⲙ̅ⲙⲟⲟⲩ ⲛ̅ϩⲏⲧϥ̅ . ⲡⲉϫⲁⲩ ⲉⲩϫⲱ ⲙ̅ⲙⲟⲥ ϫⲉ ⲁϥⲧⲁⲁϥ ⲛ̅ϭⲓⲡⲛⲟⲩⲧⲉ ϩⲣⲁⲓ ⲉⲧⲟⲟⲧⲛ̅ Ⲥⲁⲙⲯⲱⲛ ⲡⲉⲛϫⲁϫⲉ . Ⲁⲩⲱ ⲉⲧⲓ ⲉⲩϩⲗⲟϭ ⲉⲓⲥ ϩⲏⲏⲧⲉ ⲡⲉϫⲁⲩ . ϫⲉ ⲙⲟⲩⲧⲉ ⲉⲤⲁⲙⲯⲱⲛ ⲧⲁⲣⲉⲛⲟⲩⲛⲟϥ ⲙ̅ⲙⲟⲛ ⲛ̅ϩⲏⲧϥ̅. ⲁⲩⲱ ⲁⲩⲙⲟⲩⲧⲉ ⲉⲣⲟϥ ⲉⲃⲟⲗ ϩⲙ̅ⲡⲉϣⲧⲉⲕⲟ ϩⲱⲥⲧⲉ ⲛ̅ⲧⲉϥϯϫⲏⲣ ⲛⲁⲩ. Ⲁⲩⲱ ⲕⲁⲛ ⲉⲣϣⲁⲛⲡⲗⲁⲟⲥ ⲛⲁⲩ ⲉⲣⲟϥ ⲁϥϯⲉⲟⲟⲩ ⲉⲡⲛⲟⲩⲧⲉ ⲉⲩϫⲱ ⲙ̅ⲙⲟⲥ . ϫⲉ ⲁϥϯ ⲛ̅ϭⲓⲡⲛⲟⲩⲧⲉ ⲛ̅Ⲥⲁⲙⲯⲱⲛ ϩⲣⲁⲓ ⲉⲧⲟⲟⲧⲛ̅ ⲡⲉⲛϫⲁϫⲉ . ⲡⲉⲛⲧⲁϥϣⲉⲣϣⲉⲣⲡⲉⲛⲕⲁϩ . ⲁⲩⲱ ⲁϥϩⲉⲧⲡⲣⲱⲙⲉ ⲛ̅ⲧⲁⲛ ⲉⲛⲁϣⲱⲟⲩ . Ⲡⲉϫⲁϥ ⲛ̅ϭⲓⲤⲁⲙⲯⲱⲛ ⲙ̅ⲡϩⲣ̅ϣⲓⲣⲉ ⲉⲧⲉϥⲕⲁⲁϥ ϩⲣⲁⲓ ⲉⲧⲟⲟⲧϥ: Ⲕⲱ ⲙ̅ⲙⲟⲓ ϫⲉⲕⲁⲥ ⲉⲓⲉϫⲱϩ ⲉⲛ̅ⲥⲧⲩⲗⲗⲟⲥ ⲉⲣⲉⲡⲉⲓⲏⲓ ⲡⲁⲓ ⲕⲏⲧ ⲉϫⲱⲟⲩ ⲁⲩⲱ ⲛ̅ⲧⲁⲟⲩⲱⲗⲥ̅ ⲉϩⲟⲩⲛ ⲉⲣⲟⲟⲩ . Ⲡⲏⲓ ⲇⲉ ⲛⲁϥⲙⲟϩ ⲡⲉ ⲛ̅ⲛ̅ⲣⲱⲙⲉ ⲙⲛ̅ⲛ̅ⲥϩⲓⲙⲉ ⲛⲉⲧϭⲱϣⲧ ⲉⲣⲟϥ ⲉⲣⲉⲛ̅ⲁⲣⲭⲱⲛ ⲧⲏⲣⲟⲩ ⲛ̅ⲛ̅Ⲫⲓⲗⲓⲥⲧⲓⲉⲓⲙ ⲙ̅ⲡⲙⲁ ⲉⲧⲙ̅ⲙⲁⲩ : ⲁⲩⲱ ⲡⲉϥϫⲉⲛⲉⲡⲱⲣ ϩⲱⲱϥ ⲉⲣⲉϣⲟⲙⲛ̅ⲧ ⲛ̅ϣⲟ ⲛ̅ⲣⲱⲙⲉ ⲕⲏ ⲉϫⲱϥ ⲙⲛ̅ⲛⲉⲩⲕⲉⲥϩⲓⲙⲉ . Ⲧⲉⲛⲟⲩ ⲇⲉ Ⲥⲁⲙⲯⲱⲛ ⲁϥⲱϣ ⲉϩⲣⲁⲓ ⲉⲠϫⲟⲉⲓⲥ ⲡⲉϫⲁϥ ϩⲙ̅ⲡⲉϥϩⲏⲧ ϫⲉ . Ⲁⲣⲓⲡⲁⲙⲉⲉⲩⲉ   ⲛⲅ̅ⲧⲁϫⲣⲟⲓ ⲙ̅ⲡⲉⲓⲥⲟⲡ ⲛ̅ϩⲁⲉ . ⲉⲧⲣⲉⲧⲱⲱⲃⲉ ⲉⲛⲪⲓⲗⲓⲥⲧⲓⲉⲓⲙ ⲁⲩⲱ ⲛ̅ⲧⲁϫⲓ ⲉϩⲟⲩⲛ ⲙ̅ⲡⲉⲩⲥⲛⲟϥ   ⲉⲧⲃⲉⲛⲁⲃⲁⲗ . Ⲁⲩⲱ ⲁϥⲉⲗⲙ̅ⲛ̅ⲥⲧⲩⲗⲗⲟⲥ ⲃ̅ ⲉⲧⲉⲣⲉⲡⲏⲓ ⲕⲏⲧ ⲉϫⲱⲟⲩ ⲁϥⲱⲗⲕ̅ ⲉⲃⲟⲗ ⲉⲣⲟⲟⲩ ϩⲛ̅ⲧⲉϥϭⲟⲙ ⲧⲏⲣⲥ̅.    ⲉϥϫⲱ ⲙ̅ⲙⲟⲥ . ϫⲉ Ⲛ̅ⲁⲗⲗⲟⲫⲩⲗⲗⲟⲥ ⲁⲛⲟⲕ ⲙⲁⲣⲓⲙⲟⲩ ⲛⲙ̅ⲙⲁⲩ . ⲁϥⲣⲁⲕⲧϥ̅ ⲉⲡⲥⲁ ϩⲛ̅ⲧⲉϥϭⲟⲙ ⲧⲏⲣⲥ̅ . Ⲁⲩⲱ ⲁϥϩⲉ ⲉⲡⲉⲥⲏⲧ ⲛ̅ϭⲓⲡⲏⲓ ⲉⲛ̅ⲁⲣⲭⲱⲛ ⲁⲩⲱ ⲉⲡⲗⲁⲟⲥ ⲧⲏⲣϥ̅ ⲉⲧⲛ̅ϩⲏⲧϥ̅ . ϩⲱⲥⲧⲉ ⲛ̅ⲧⲉⲛⲉⲛⲧⲁϥⲙⲟⲟⲩⲧⲟⲩ ϩⲣⲁⲓ ϩⲙ̅ⲡⲉϥⲙⲟⲩ ⲉⲩⲛⲁⲣ̅ϩⲟⲩⲟ ⲉⲡⲉϥⲟⲛϩ. Ⲁⲩⲱ ⲛⲉϥⲥⲛⲏⲩ ⲙⲛ̅ⲛⲉϥⲣⲙ̅ⲛ̅ⲏⲓ ⲧⲏⲣⲟⲩ ⲁⲩⲉⲓ ⲉϩⲣⲁⲓ ⲁⲩⲧⲁⲗⲟϥ ⲁⲩϥⲓⲧϥ̅ ⲉϩⲣⲁⲓ ⲁⲩⲱ ⲁⲩⲧⲟⲙⲥϥ̅ ⲟⲩⲧⲉⲌⲱⲣⲉⲁ ⲙⲛ̅Ⲉⲥⲑⲁⲱⲗ ϩⲙ̅ⲡⲙϩⲁⲁⲩ ⲛ̅Ⲙⲁⲛⲱⲉ ⲡⲉϥⲉⲓⲱⲧ. Ⲁϥⲕⲣⲓⲛⲉ ⲇⲉ ⲙ̅ⲡⲒⲥⲣⲁⲏⲗ ⲛ̅ϫⲟⲩⲧⲏ ⲛ̅ⲣⲟⲙⲡⲉ.

Ⲓ̅Ⲍ̅. Ⲛⲉⲩⲛ̅ⲟⲩⲣⲙ̅ⲛ̅ⲧⲟⲩⲓⲏ ⲛ̅ⲧⲉⲈⲫⲣⲁⲓⲙ ⲉⲡⲉϥⲣⲁⲛ ⲡⲉ Ⲙⲓⲭⲁ . Ⲡⲁⲓ ⲁϥϫⲟⲟⲥ ⲛ̅ⲧⲉϥⲙⲁⲁⲩ : ϫⲉ ⲛⲉⲓⲙⲛ̅ⲧⲟⲩⲉ ⲛ̅ϣⲉ ⲛ̅ϩⲁⲧ ⲉⲛⲧⲁⲩϫⲓ ⲉⲃⲟⲗ ⲛ̅ⲧⲟⲟⲧⲉ . ⲁⲣⲥⲁϩⲟⲩ ⲙ̅ⲙⲟⲥ ϩⲛ̅ⲟⲩⲥⲁϩⲟⲩ ϩⲁⲧⲏⲓ ⲁⲛⲟⲕ ⲁⲓϫⲓⲧϥ̅ . Ⲁⲩⲱ ⲧⲉϥⲙⲁⲁⲩ ⲡⲉϫⲁⲥ ϫⲉ ⲡⲁϣⲏⲣⲉ ϥⲥⲙⲁⲙⲁⲁⲧ ⲛ̅ⲧⲟⲟⲧϥ̅ ⲙ̅Ⲡϫⲟⲉⲓⲥ. ⲁⲩⲱ ⲁϥϯⲙⲛ̅ⲧⲟⲩⲉ ⲛ̅ϣⲉ ⲛ̅ϩⲁⲧ ⲛ̅ⲧⲉϥⲙⲁⲁⲩ . Ⲡⲉϫⲉⲧⲉϥⲙⲁⲁⲩ ϫⲉ ϩⲛ̅ⲟⲩⲧⲃ̅ⲃⲟ ⲙ̅ⲡϩⲁⲧ ⲙ̅Ⲡϫⲟⲉⲓⲥ ⲉⲃⲟⲗ ϩⲛ̅ⲧⲁϭⲓϫ. Ⲉⲧⲣⲁⲧⲁⲙⲓⲟ ⲙ̅ⲡⲁϣⲏⲣⲉ ⲛ̅ⲟⲩⲅⲗⲩⲡⲧⲟⲛ ⲙⲛ̅ⲟⲩⲭⲱⲛⲉⲩⲧⲟⲛ. Ⲁⲩⲱ ⲧⲉⲛⲟⲩ ϯⲛⲁⲧⲁⲁϥ ⲛⲁⲕ ⲁϥϯⲡϩⲁⲧ ⲛ̅ⲧⲉϥⲙⲁⲁⲩ. Ⲁⲩⲱ ⲧⲉϥⲙⲁⲁⲩ ⲁⲥϫⲓ ⲛ̅ϣⲏⲧ ⲛ̅ϩⲁⲧ ⲛ̅ϩⲣ̅ϣⲏⲣⲉ . ⲁⲥⲧⲁⲁⲩ ⲙ̅ⲡⲣⲉϥⲣ̅ϩⲁⲧ . Ⲁϥⲧⲁⲙⲓⲟ ⲛ̅ⲟⲩⲭⲱⲛⲉⲩⲧⲟⲛ ⲙⲛ̅ⲟⲩⲅⲗⲩⲡⲧⲟⲛ ⲁϥⲱϣ ⲡⲉ ϩⲙ̅ⲡⲏⲓ ⲙ̅Ⲙⲓⲭⲁ. Ⲁⲩⲱ ⲡⲣⲱⲙⲉ Ⲙⲓⲭⲁ ⲛⲉϥⲟ ⲛⲁϥ ⲛ̅ⲟⲩⲏⲏⲃ ⲙ̅ⲡⲛⲟⲩⲧⲉ. ⲁⲩⲱ ⲁϥⲧⲁⲙⲓⲟ ⲛ̅ⲟⲩⲉⲫⲟⲩⲇ ⲙⲛ̅ⲟⲩⲑⲉⲣⲁⲫⲓⲙ . ⲁⲩⲱ ⲟⲩⲁ ⲉⲃⲟⲗ ϩⲛ̅ⲛⲉϥϣⲏⲣⲉ ⲁϥϩⲉⲛⲅ̅ⲧⲉϥϭⲓϫ ⲁϥϣⲱⲡⲉ ⲛⲁϥ ⲛ̅ⲟⲩⲏⲏⲃ : Ϩⲛ̅ⲛⲉϩⲟⲟⲩ ⲇⲉ ⲉⲧⲙ̅ⲙⲁⲩ ⲉⲛⲉⲙⲛ̅ⲣ̅ⲣⲟ ϩⲙ̅ⲡⲒⲥⲣⲁⲏⲗ. Ⲡⲣⲱⲙⲉ ⲛⲉϥⲉⲓⲣⲉ ⲙ̅ⲡⲉⲧⲥⲟⲩⲧⲱⲛ ⲛ̅ⲛⲁϩⲣⲁϥ : Ⲁⲩⲱ ⲁϥϣⲱⲡⲉ ⲛ̅ϭⲓⲟⲩϣⲏⲣⲉ ϣⲏⲙ ⲉⲃⲟⲗ ϩⲛ̅Ⲃⲏⲑⲗⲉⲉⲙ ⲧⲡⲟⲗⲓⲥ ⲛ̅Ⲓⲟⲩⲇⲁ ⲉⲧⲣⲉϥϭⲟⲓⲗⲉ ⲉⲡⲙⲁ ⲉⲧϥ̅ⲛⲁϩⲉ ⲉⲣⲟϥ . ⲁϥⲉⲓ ϣⲁϩⲣⲁⲓ ⲉⲡⲧⲟⲟⲩ ⲛ̅Ⲉⲫⲣⲁⲓⲙ ⲉⲧⲣⲉϥϭⲟⲓⲗⲉ ⲉⲡⲏⲓ ⲙ̅Ⲙⲓⲭⲁ ⲉⲧⲣⲉϥⲥⲟⲩⲧⲛ̅ⲧⲉϥϩⲓⲏ . ⲠⲉϫⲉⲘⲓⲭⲁ ⲛⲁϥ ϫⲉ ⲉⲕⲛⲏⲩ ⲧⲱⲛ. Ⲡⲉϫⲁϥ ⲛⲁϥ ϫⲉ ⲁⲛⲅ̅ⲟⲩⲖⲉⲩⲉ̅ⲓⲧⲏⲥ ⲉⲃⲟⲗ ϩⲛ̅Ⲃⲏⲑⲗⲉⲉⲙ ⲛ̅ⲧⲉⲒⲟⲩⲇⲁ ⲁⲩⲱ ⲁⲛⲟⲕ ⲉⲓⲙⲟⲟϣⲉ ⲉϭⲟⲓⲗⲉ ⲉⲡⲙⲁ ⲉϯⲛⲁϩⲉ ⲉⲣⲟϥ : ⲠⲉϫⲉⲘⲓⲭⲁ ⲛⲁϥ ϫⲉ ϭⲱ ϩⲁⲧⲏⲓ ⲛⲅ̅ϣⲱⲡⲉ ⲛⲁⲓ ⲉⲩⲉⲓⲱⲧ . ⲁⲩⲱ ⲉⲩⲟⲩⲏⲏⲃ . ⲁⲩⲱ ⲁⲛⲟⲕ ϯⲛⲁϯ ⲛⲁⲕ ⲙ̅ⲙⲏⲧ ⲛ̅ϩⲁⲧ ⲙ̅ⲙⲏⲛⲉ ⲙⲛ̅ⲟⲩⲥⲧⲟⲗⲏ ⲛ̅ϩⲟⲓⲧⲉ . ⲙⲛ̅ⲛⲉⲕ̅ⲛⲁϫⲓⲧⲟⲩ ⲉⲣⲟⲕ ⲉⲡⲉⲕⲱⲛϩ . Ⲁⲩⲱ ⲡⲖⲉⲩⲉ̅ⲓⲧⲏⲥ ⲁϥⲃⲱⲕ ⲁϥⲧⲱϣ ⲉϭⲟⲓⲗⲉ ⲉⲡⲣⲱⲙⲉ . ⲁⲡϣⲏⲣⲉ ϣⲏⲙ ϭⲱ ϩⲁⲧⲏϥ ⲛ̅ⲑⲉ ⲛ̅ⲟⲩⲁ ⲛ̅ⲛⲉϥϣⲏⲣⲉ . Ⲁⲩⲱ Ⲙⲓⲭⲁ ⲁϥⲧⲃ̅ⲃⲉⲧϭⲓϫ ⲙ̅ⲡⲖⲉⲩⲉⲓⲧⲏⲥ ⲁϥϣⲱⲡⲉ ⲛ̅ϭⲓⲡϩⲣ̅ϣⲓⲣⲉ ⲉⲩⲟⲩⲏⲏⲃ ⲁϥϭⲱ ϩⲙ̅ⲡⲏⲓ ⲙ̅Ⲙⲓⲭⲁ. ⲠⲉϫⲉⲘⲓⲭⲁ ϫⲉ ⲧⲉⲛⲟⲩ ⲉⲓⲉ̅ⲓⲙⲉ ϫⲉ Ⲡϫⲟⲉⲓⲥ ϥⲛⲁⲣ̅ⲡⲡⲉⲧⲛⲁⲛⲟⲩϥ ⲛⲁⲓ . ⲉⲃⲟⲗϫⲉ ⲟⲩⲖⲉⲩⲉⲓⲧⲏⲥ ⲁϥϣⲱⲡⲉ ⲛⲁⲓ ⲉⲩⲟⲩⲏⲏⲃ.

Ⲓ̅ⲏ̅. Ⲁⲩⲱ ϩⲛ̅ⲛⲉϩⲟⲟⲩ ⲉⲧⲙ̅ⲙⲁⲩ ⲉⲛⲉⲙⲛ̅ⲡⲣ̅ⲣⲟ ϩⲙ̅ⲡⲒⲥⲣⲁⲏⲗ . ⲁⲩⲱ ϩⲛ̅ⲛⲉϩⲟⲟⲩ ⲉⲧⲙ̅ⲙⲁⲩ ⲧⲉⲫⲩⲗⲏ ⲛ̅Ⲇⲁⲛ ⲛⲉⲥⲕⲱⲧⲉ ⲡⲉ ⲛ̅ⲥⲁⲟⲩⲕⲗⲏⲣⲟⲛⲟⲙⲓⲁ ⲉⲟⲩⲱϩ ⲛ̅ϩⲏⲧⲥ̅ ⲉⲃⲟⲗϫⲉ ⲙ̅ⲡⲉⲟⲩⲟⲛ ϣⲱⲡⲉ ⲛⲁⲥ ϣⲁⲡⲉϩⲟⲟⲩ ⲉⲧⲙ̅ⲙⲁⲩ ϩⲛ̅ⲧⲙⲏⲧⲉ ⲛ̅ⲛⲉⲫⲩⲗⲏ ⲙ̅ⲡⲒⲥⲣⲁⲏⲗ : Ⲁⲩⲱ ⲛ̅ϣⲏⲣⲉ ⲛ̅Ⲇⲁⲛ ⲁⲩϫⲟⲟⲩ ⲉⲃⲟⲗ ϩⲛ̅ⲛⲉⲩⲥⲩⲅⲅⲉⲛⲓⲁ ⲛ̅ϯⲟⲩ ⲛ̅ⲣⲱⲙⲉ . ϩⲉⲛⲣⲱⲙⲉ ⲛ̅ⲇⲩⲛⲁⲧⲟⲥ . ⲉⲃⲟⲗ ϩⲛ̅ⲛⲉⲩⲧⲟϣ ϫⲓⲛⲤⲁⲣⲁⲁ . ⲁⲩⲱ ϫⲓⲛⲈⲥⲑⲁⲟⲗ ⲉⲙⲉϣⲧⲡⲕⲁϩ ⲁⲩⲱ ⲉϩⲉⲧϩⲱⲧϥ̅ ⲉⲩϫⲱ ⲙ̅ⲙⲟⲥ ⲛⲁⲩ ϫⲉ ⲃⲱⲕ ⲛ̅ⲧⲉⲧⲛ̅ⲙⲉϣⲧⲡⲕⲁϩ . ⲁⲩⲱ ⲁⲩⲉⲓ ϣⲁϩⲣⲁⲓ ⲉⲡⲧⲟⲟⲩ ⲛ̅Ⲉⲫⲣⲁⲓⲙ ⲉϩⲣⲁⲓ ⲉⲡⲏⲓ ⲙ̅Ⲙⲓⲭⲁ ⲁⲩϭⲟⲓⲗⲉ ⲉⲡⲙⲁ ⲉⲧⲙ̅ⲙⲁⲩ . Ⲛ̅ⲧⲟⲟⲩ ⲇⲉ ⲉⲩϣⲟⲟⲡ ϩⲙ̅ⲡⲏⲓ ϩⲁⲧⲙ̅Ⲙⲓⲭⲁ . ⲁⲩⲱ ⲛ̅ⲧⲟⲟⲩ ⲁⲩⲥⲟⲩⲛⲧⲉⲥⲙⲏ ⲙ̅ⲡϣⲏⲣⲉ ϣⲏⲙ ⲡⲗⲉⲩⲉⲓⲧⲏⲥ . Ⲡⲉϫⲁⲩ ⲛⲁϥ ϫⲉ ⲛⲓⲙ ⲡⲉⲛⲧⲁϥⲛ̅ⲧⲕ̅ ⲉⲡⲉⲓⲙⲁ ⲁⲩⲱ ⲉⲕⲣ̅ⲟⲩ ⲛ̅ⲧⲟⲕ ⲙ̅ⲡⲉⲓⲙⲁ ⲁⲩⲱ ⲟⲩ ⲡⲉⲧⲉⲟⲩⲛ̅ⲧⲁⲕϥ̅ ⲙ̅ⲡⲉⲓⲙⲁ : Ⲡⲉϫⲁϥ ⲛⲁⲩ ϫⲉ ⲉⲓⲥ ⲑⲉ ⲙⲛ̅ⲑⲉ ⲉⲛⲧⲁϥⲁⲁⲥ ⲛⲁⲓ ⲛ̅ϭⲓⲘⲓⲭⲁ. ⲉⲁϥⲙⲓⲥⲑⲟⲩ ⲙ̅ⲙⲟⲓ ⲁⲓϣⲱⲡⲉ ⲛⲁϥ ⲛ̅ⲟⲩⲏⲏⲃ : Ⲡⲉϫⲁⲩ ⲛⲁϥ ϫⲉ ϣⲓⲛⲉ ⲛⲁⲛ ϩⲙ̅ⲡⲛⲟⲩⲧⲉ ⲛ̅ⲧⲛ̅ⲉⲓⲙⲉ ϫⲉ ⲧⲉⲛϩⲓⲏ ⲥ̅ⲥⲟⲟⲩⲧⲛ̅ ⲧⲁⲓ ⲁⲛⲟⲛ ⲉⲧⲛ̅ⲛⲁⲙⲟⲟϣⲉ ⲛ̅ϩⲏⲧⲥ̅ : Ⲡⲉϫⲉⲡϩⲓⲉⲣⲉⲩⲥ ⲛⲁⲩ ϫⲉ ⲙⲟⲟϣⲉ ϩⲛ̅ⲟⲩⲉⲓⲣⲏⲛⲏ ⲧⲉⲧⲛ̅ϩⲓⲏ ⲉⲧⲉⲧⲛⲁⲙⲟⲟϣⲉ ⲛ̅ϩⲏⲧⲥ̅ ⲥ̅ⲥⲟⲩⲧⲱⲛ ⲙ̅ⲡⲙ̅ⲧⲟ ⲉⲃⲟⲗ ⲙ̅Ⲡϫⲟⲓⲥ ⲁⲩⲱ ⲡϯⲟⲩ ⲛ̅ⲣⲱⲙⲉ ⲁⲩⲙⲟⲟϣⲉ ⲁⲩⲉⲓ ⲉϩⲣⲁⲓ ⲉⲖⲁⲓⲥⲁ ⲁⲩⲛⲁⲩ ⲉⲡⲗⲁⲟⲥ ⲉⲧϩⲛ̅ⲧⲉⲥⲙⲏⲧⲉ ⲉⲩⲟⲛϩ̅ ⲛ̅ϩⲓⲣⲓⲛⲓⲕⲟⲥ ⲁⲩⲱ ⲛ̅ⲁⲙⲉⲗⲏⲥ ⲛ̅ⲑⲉ ⲛ̅ⲛⲉⲧⲟⲩⲏϩ ϩⲛ̅Ⲥⲓⲇⲱⲛ. ⲛ̅ⲛⲉⲩϣⲧⲁ ϩⲛ̅ϩⲱⲃ ⲛⲓⲙ ⲉⲧϩⲙ̅ⲡⲕⲁϩ ⲁⲗⲗⲁ ⲡⲁⲛⲧⲱⲥ ⲉⲩϩⲉⲙⲥⲓ ⲛ̅ⲧⲙⲏⲧⲉ ⲛ̅ⲛⲉⲩⲁϩⲱⲱⲣ ⲉⲩⲟⲩⲏⲩ ⲉⲃⲟⲗ ⲛ̅ⲛ̅ⲣⲙ̅Ⲥⲓⲇⲱⲛ ⲉⲙⲁⲩϫⲓϯ ⲟⲛ ⲙⲛ̅ⲧⲤⲩⲣⲓⲁ . Ϩⲟⲧⲁⲛ ⲉⲩⲧⲥ̅ⲧⲟ ⲉⲛⲉⲩⲥⲛⲏⲩ ⲉⲧϩⲛ̅Ⲍⲟⲣⲉⲁ ⲙⲛ̅Ⲉⲥⲑⲁⲱⲗ ⲡⲉϫⲉⲛⲉⲩⲥⲛⲏⲩ ⲛⲁⲩ . ϫⲉ ⲟⲩ ⲡⲉⲛⲧⲁⲧⲉⲧⲛ̅ⲁⲁϥ ⲛⲁⲛ . Ⲡⲉϫⲁⲩ ϫⲉ ⲙⲁⲣⲟⲛ . ⲛ̅ⲧⲛ̅ⲃⲱⲕ ⲉϩⲣⲁⲓ ⲉⲣⲟⲟⲩ. ⲁⲛⲉⲓⲱⲣⲙ̅ ⲅⲁⲣ ⲙ̅ⲡⲉⲩⲧⲱϣ ⲉⲧⲛⲁⲥⲱϥ ⲙ̅ⲙⲉ ⲉⲙⲁⲧⲉ . Ⲛ̅ⲧⲱⲧⲛ̅ ⲇⲉ ⲙⲏ ⲉⲧⲉⲧⲛⲉϭⲱ ⲙ̅ⲛⲁⲓ . Ⲙ̅ⲡⲣ̅ϫⲛⲁⲁⲩ ⲁⲩⲱ ⲛ̅ⲧⲉⲧⲛ̅ⲃⲱⲕ ⲉϩⲣⲁⲓ ⲉⲖⲁⲓⲥⲁ ⲉⲡⲁⲧⲁⲥⲥⲉ ⲙ̅ⲡⲉϥⲧⲱϣ . ⲡⲛⲟⲩⲧⲉ ⲅⲁⲣ ⲁϥⲧⲁⲁϥ ⲉϩⲣⲁⲓ ⲉⲛⲉⲧⲛ̅ϭⲓϫ. Ⲉⲧⲉⲧⲛⲁⲉⲓ ⲅⲁⲣ ⲉⲩⲗⲁⲟⲥ ⲛ̅ⲁⲙⲉⲗⲏⲥ ⲉⲣⲉⲡⲧⲱϣ ⲟⲩⲱϣⲥ ⲉⲃⲟⲗ ⲉⲥⲁ ⲛⲓⲙ ⲉⲩⲙⲁ ⲡⲉ ⲙⲙⲛ̅ϭⲣⲱϩ ⲛ̅ϩⲏⲧϥ̅ ϩⲛ̅ϩⲱⲃ ⲛⲓⲙ ⲉⲧϣⲟⲟⲡ ϩⲙ̅ⲡⲕⲁϩ ⲧⲏⲣϥ̅. Ⲁⲩⲧⲱⲟⲩⲛ̅ ϭⲉ ⲁⲩⲉⲓ ⲉⲃⲟⲗ ϩⲛ̅Ⲍⲟⲣⲉⲁ ⲙⲛ̅Ⲉⲥⲑⲁⲱⲗ ⲉⲩⲛⲁⲣ̅ⲥⲟⲟⲩ ⲛ̅ϣⲉ ⲛ̅ϫⲱⲱⲣⲉ ⲉⲃⲟⲗ ϩⲛ̅ⲛ̅ϣⲏⲣⲉ ⲛ̅Ⲇⲁⲛ . ⲁⲩⲱ ⲁⲩⲃⲱⲕ ⲉϩⲣⲁⲓ ⲉⲣⲛ̅Ⲕⲁⲣⲓⲁⲑⲉⲁⲣⲓⲙ ⲛ̅ⲧⲉⲒⲟⲩⲇⲁ . Ⲉⲧⲃⲉⲡⲁⲓ ⲥⲉⲙⲟⲩⲧⲉ ⲉⲡⲣⲁⲛ ⲙ̅ⲡⲉⲓⲙⲁ ϫⲉ ⲧⲡⲁⲣⲉⲙⲃⲟⲗⲏ ⲛ̅Ⲇⲁⲛ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ. ⲉⲧⲥⲁⲡⲉⲙϩⲓⲧ ⲛ̅Ⲕⲁⲣⲓⲁⲑⲉⲁⲣⲓⲙ . ⲁⲩⲃⲱⲕ ⲉⲃⲟⲗ   ϩⲙ̅ⲡⲙⲁ ⲉⲧⲙ̅ⲙⲁⲩ ⲉϩⲣⲁⲓ ⲉⲡⲧⲟⲟⲩ ⲛ̅Ⲉⲫⲣⲁⲓⲙ ⲁⲩⲉⲓ ⲉⲡⲏⲓ ⲙ̅Ⲙⲓⲭⲁ. Ⲁⲩⲱ ⲛ̅ⲣⲱⲙⲉ ⲉ̅ ⲉⲛⲧⲁⲩⲃⲱⲕ ⲉⲙⲉϣⲧⲡⲕⲁϩ ⲡⲉϫⲁⲩ ⲛ̅ⲛⲉⲩⲥⲛⲏⲩ . ϫⲉ Ⲙⲏ ⲉⲧⲉⲧⲛ̅ⲥⲟⲟⲩⲛ̅ ϫⲉ ⲟⲩⲛ̅Ⲉⲫⲟⲇ ϩⲛ̅ⲛⲉⲓⲏⲓ ⲙⲛ̅ⲑⲉⲣⲁⲫⲓⲙ ⲙⲛ̅ⲛ̅ⲅⲗⲩⲡⲧⲟⲛ ⲁⲩⲱ ⲛ̅ⲭⲱⲛⲉⲩⲧⲟⲛ . Ⲡⲗⲏⲛ ⲙⲁⲣⲛ̅ⲉⲓⲙⲉ ⲙ̅ⲡⲉⲧⲉⲧⲛⲁⲁⲁⲩ . ⲁⲩⲱ ⲁⲩⲕⲧⲟⲟⲩ ⲉⲡⲁⲓⲙⲁ ⲁⲩⲉⲓ ⲉϩⲟⲩⲛ ⲉⲡⲏⲓ ⲙ̅ⲡϩⲣ̅ϣⲓⲣⲉ ⲉⲧⲉⲘⲓⲭⲁ ⲡⲖⲉⲩⲓⲧⲏⲥ ⲁⲩⲁⲥⲡⲁⲍⲉ ⲙ̅ⲙⲟϥ . ⲛ̅ⲥⲟⲟⲩ ⲇⲉ ⲛ̅ϣⲉ ⲛ̅ϫⲱⲱⲣⲉ ⲉⲃⲟⲗ ϩⲛ̅ⲛ̅ϣⲏⲣⲉ ⲛ̅Ⲇⲁⲛ ⲁⲩⲁϩⲉⲣⲁⲧⲟⲩ ϩⲁⲧⲙ̅ⲡⲣⲟ . Ⲧⲟⲧⲉ ⲁⲛ̅ⲣⲱⲙⲉ ⲉ̅ ⲉⲛⲧⲁⲩⲃⲱⲕ ⲉⲙⲉϣⲧⲡⲕⲁϩ ⲉⲓ ⲉϩⲣⲁⲓ ⲉⲩϣⲟϥϣⲉϥ ⲙ̅ⲙⲁⲩ . ⲁⲩϫⲓⲡⲅⲗⲩⲡⲧⲟⲛ ⲁⲩⲱ ⲙⲛ̅ⲡⲉⲫⲟⲇ ⲁⲩⲱ ⲡⲉⲑⲉⲣⲁⲫⲓⲙ ⲙⲛ̅ⲡⲭⲱⲛⲉⲩⲧⲟⲛ ⲉⲣⲉⲡⲟⲩⲏⲏⲃ ⲁϩⲉⲣⲁⲧϥ̅ ϩⲁⲧⲙ̅ⲡⲣⲟ ⲛ̅ⲧⲡⲩⲗⲏ ⲛⲙ̅ⲙⲁⲩ ⲛ̅ⲛ̅ϫⲱⲱⲣⲉ ⲉⲩⲧⲉⲕⲙ̅ⲥⲏϥⲉ . Ϩⲟⲧⲁⲛ ⲁⲩϣⲟϥϣⲉϥ ⲉϩⲟⲩⲛ ⲛ̅ϭⲓⲛⲏ ⲉⲡⲏⲓ ⲙ̅Ⲙⲓⲭⲁ ⲁⲩⲱ ⲁⲩϫⲓ ⲭ̅ⲙⲡⲉⲫⲟⲇ ⲙ̅ⲛⲡⲉⲅⲗⲩⲡⲧⲟⲛ ⲁⲩⲱ ⲡⲉⲑⲉⲣⲁⲫⲓⲙ ⲙⲛ̅ⲡⲭⲱⲛⲉⲩⲧⲟⲛ. ⲡⲉϫⲉⲡⲟⲩⲏⲏⲃ ⲛⲁϥ . ϫⲉ ⲟⲩ ⲡⲉⲧⲛ̅ⲁⲁϥ. Ⲡⲉϫⲁⲩ ⲛⲁϥ ⲉⲩⲟⲩⲱϣⲃ̅ : Ⲕⲁⲣⲱⲕ ⲁⲩⲱ ⲙⲟⲟϣⲉ ⲛⲙ̅ⲙⲁⲛ. Ⲉⲕⲉϣⲱⲡⲉ ⲛⲁⲛ ⲛ̅ⲉⲓⲱⲧ ⲁⲩⲱ ⲛ̅ⲟⲩⲏⲏⲃ . Ⲟⲩ ϭⲉ ⲡⲉⲧⲣ̅ⲛⲟϥⲣⲉ ⲛⲁⲕ ⲛ̅ϩⲟⲩⲟ . ⲉⲕⲟ ⲛ̅ⲟⲩⲏⲏⲃ ⲙ̅ⲡⲏⲓ ⲛ̅ⲟⲩⲣⲱⲙⲉ ⲛ̅ⲟⲩⲱⲧ ⲏ ⲟⲩⲫⲩⲗⲏ ⲧⲏⲣⲥ̅. Ⲁⲩⲱ ⲁϥⲙ̅ⲧⲟⲛ ⲛ̅ϭⲓⲡⲟⲩⲏⲏⲃ ⲁϥϫⲓⲡⲉⲫⲟⲇ ⲙⲛ̅ⲡⲉⲑⲉⲣⲁⲫⲓⲙ ⲁⲩⲱ ⲡⲉⲅⲗⲩⲡⲧⲟⲛ ⲁϥⲉⲓ ⲉⲧⲙⲏⲧⲉ ⲛ̅ⲛ̅ⲣⲱⲙⲉ . Ⲙⲛ̅ⲛ̅ⲥⲱⲥ ⲁϥⲕⲟⲧⲟⲩ ⲛ̅ⲥⲱϥ ⲁⲩⲱⲣⲉⲃ ⲙ̅ⲙⲟⲟⲩ ⲉⲩⲙⲟⲟϣⲉ ϩⲁⲧⲉϥϩⲏ ⲛ̅ϭⲓⲛ̅ϣⲏⲣⲉ ⲙⲛ̅ⲛ̅ⲧⲃ̅ⲛⲟⲟⲩⲉ ⲁⲩⲱ ⲛ̅ⲁϩⲱⲱⲣ. Ⲉⲧⲓ ⲇⲉ ⲁⲩⲣ̅ⲡⲃⲟⲗ ⲙ̅ⲡⲏⲓ ⲙ̅Ⲙⲓⲭⲁ ⲁⲛ̅ⲣⲱⲙⲉ ⲉⲧⲟⲩⲏϩ ϩⲙ̅ⲡⲏⲓ ⲙ̅Ⲙⲓⲭⲁ. ⲁⲩⲱ ⲉⲓⲥ Ⲙⲓⲭⲁ ⲙⲛ̅ⲛ̅ⲣⲱⲙⲉ ⲉⲧϩⲙ̅ⲡⲏⲓ ⲙ̅Ⲙⲓⲭⲁ ⲁⲩⲱϣ ⲉⲃⲟⲗ ⲁⲩⲡⲱⲧ ⲛ̅ⲥⲁⲛ̅ϣⲏⲣⲉ ⲛ̅Ⲇⲁⲛ: ⲁⲩⲕⲧⲉⲡⲉⲩϩⲟ ⲉⲡⲁϩⲟⲩ ⲡⲉϫⲁⲩ ⲙ̅Ⲙⲓⲭⲁ ϫⲉ ⲛ̅ⲧⲁⲩϣⲱⲡⲉ ⲙ̅ⲙⲟⲕ ϫⲉ ⲁⲕⲱϣ ⲉⲃⲟⲗ : ⲠⲉϫⲉⲘⲓⲭⲁ ⲛⲁⲩ ϫⲉ ⲉⲃⲟⲗϫⲉ ⲁⲧⲉⲧⲛ̅ϥⲓ ⲛ̅ⲛⲁⲛⲟⲩⲧⲉ ⲉⲛⲧⲁⲓⲧⲁⲙⲓⲟⲟⲩ ⲛⲁⲓ. ⲁⲩⲱ ⲡⲟⲩⲏⲏⲃ ⲁⲧⲉⲧⲛ̅ⲃⲱⲕ . ⲁⲩⲱ ⲟⲩ ⲡⲉ ⲡⲁϩⲏⲩ ϫⲓⲛⲙ̅ⲡⲉⲓⲛⲁⲩ . Ⲁⲩⲱ ⲛ̅ⲧⲱⲧⲛ̅ ⲧⲉⲧⲛ̅ϫⲱ ⲙ̅ⲙⲟⲥ ⲛⲁⲓ ϫⲉ ⲁϩⲣⲟⲕ ⲕϫⲓϣⲕⲁⲕ ⲉⲃⲟⲗ : Ⲡⲉϫⲉⲛ̅ϣⲏⲣⲉ ⲛ̅Ⲇⲁⲛ ⲛⲁϥ ϫⲉ ⲧⲉⲛⲟⲩ ⲙ̅ⲡⲣ̅ⲧⲣⲉⲩⲥⲱⲧⲙ̅ ⲉⲡⲉⲕϩⲣⲟⲟⲩ ϩⲛ̅ⲧⲉⲛⲙⲏⲧⲉ   ⲙⲏⲡⲱⲥ ⲛ̅ⲧⲉϩⲉⲛⲣⲱⲙⲉ ⲛ̅ϩⲏⲧⲛ̅ ⲉⲣⲉⲧⲉⲩⲯⲩⲭⲏ ϭⲟⲛⲧ ⲛ̅ⲥⲉⲛ̅ⲧⲟⲟⲩ ⲉⲣⲟⲕ ⲛ̅ⲥⲉⲧⲁⲕⲉⲧⲉⲕⲯⲩⲭⲏ . ⲁⲩⲱ ⲧⲉⲯⲩⲭⲏ ⲙ̅ⲡⲉⲕⲏⲓ . Ⲁⲩⲱ ⲛ̅ϣⲏⲣⲉ ⲛ̅Ⲇⲁⲛ ⲁⲩⲧⲁⲁⲩ ⲉϩⲣⲁⲓ ⲉⲧⲉⲩϩⲓⲏ Ⲙⲓⲭⲁ ⲇⲉ ⲛ̅ⲧⲉⲣⲉϥⲛⲁⲩ ⲥⲉϫⲟⲟⲣ ⲉⲣⲟϥ ⲁϥⲕⲧⲟϥ ⲉϩⲣⲁⲓ ⲉⲡⲉϥⲏⲓ . Ⲁⲩⲱ ⲛ̅ϣⲏⲣⲉ ⲛ̅Ⲇⲁⲛ ⲁⲩϫⲓⲡⲉⲛⲧⲁⲘⲓⲭⲁ ⲧⲁⲙⲓⲟϥ ⲙⲛ̅ⲡⲟⲩⲟⲩⲏⲏⲃ ⲉⲧϣⲟⲟⲡ ⲛⲁϥ ⲁⲩⲉⲓ ⲉϩⲣⲁⲓ ⲉⲖⲁⲓⲥⲁ. ⲟⲩⲗⲁⲟⲥ ⲉϥⲥϭⲣⲁϩⲧ̅ ⲁⲩⲱ ⲉϥⲥⲙⲟⲛⲧ ϩⲛ̅ⲟⲩϩⲉⲗⲡⲓⲥ . ⲁⲩⲡⲁⲧⲁⲥⲥⲉ ⲙ̅ⲙⲟⲟⲩ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ. Ⲁⲩⲱ ⲧⲡⲟⲗⲓⲥ ⲁϥⲣⲟⲕϩⲥ̅ ϩⲛ̅ⲟⲩⲥⲁⲧⲉ. ⲉⲙⲛ̅ⲡⲉⲧⲛⲁⲛⲁϩⲙⲥ̅ ϫⲉ ⲥⲟⲩⲏⲩ ⲉⲃⲟⲗ ⲛ̅ⲛ̅ⲣⲱⲙⲉ ⲛ̅Ⲥⲓⲇⲱⲛ. ⲁⲩⲱ ϫⲉ ⲙⲛ̅ⲧⲟⲩⲗⲁⲁⲩ ⲛ̅ϩⲱⲃ ⲙⲛ̅ⲛ̅ⲣⲱⲙⲉ ⲛ̅ⲧⲤⲩⲣⲓⲁ . ⲁⲩⲱ ⲛ̅ⲧⲟⲥ ⲧⲡⲟⲗⲓⲥ ⲛⲉⲥϩⲙ̅ⲡⲓⲁ ⲙ̅ⲡⲏⲓ ⲛ̅Ϩⲣⲟⲩⲃ . ⲁⲩⲱ ⲁⲩⲕⲱⲧ ⲛ̅ⲧⲡⲟⲗⲓⲥ ⲁⲩⲟⲩⲱϩ ⲛ̅ϩⲏⲧⲥ̅. ⲁⲩⲙⲟⲩⲧⲉ ⲉⲡⲣⲁⲛ ⲛ̅ⲧⲡⲟⲗⲓⲥ ϫⲉ Ⲇⲁⲛ ⲕⲁⲧⲁⲡⲣⲁⲛ ⲛ̅Ⲇⲁⲛ ⲡⲉⲩⲉⲓⲱⲧ ⲡⲁⲓ ⲉⲛⲧⲁⲩϫⲡⲟϥ ⲙ̅ⲡⲒⲥⲣⲁⲏⲗ . Ⲁⲩⲱ ⲡⲣⲁⲛ ⲛ̅ⲧⲡⲟⲗⲓⲥ ⲛ̅ϣⲟⲣⲡ̅ ⲉⲩⲙⲟⲩⲧⲉ ⲉⲣⲟⲥ ϫⲉ Ⲟⲩⲗⲁⲙⲉⲓⲥ : Ⲁⲩⲱ ⲛ̅ϣⲏⲣⲉ ⲛ̅Ⲇⲁⲛ ⲁⲩⲧⲁϩⲟ ⲉⲣⲁⲧϥ̅ ⲛⲁⲩ ⲙ̅ⲡⲉⲅⲗⲩⲡⲧⲟⲛ ⲙ̅Ⲙⲓⲭⲁ . ⲁⲩⲱ Ⲓⲱⲛⲁⲑⲁⲛ ⲡϣⲏⲣⲉ ⲛ̅Ⲅⲏⲣⲥⲁⲙ ⲡϣⲏⲣⲉ ⲙ̅Ⲙⲁⲛⲁⲥⲥⲏ ⲛ̅ⲧⲟϥ ⲙⲛ̅ⲛⲉϥϣⲏⲣⲉ ⲛⲉⲩⲟ ⲛ̅ⲟⲩⲏⲏⲃ ⲛ̅ⲧⲉⲫⲩⲗⲏ ⲛ̅Ⲇⲁⲛ . ϣⲁϩⲣⲁⲓ ⲉⲡⲉϩⲟⲟⲩ ⲙ̅ⲡⲱⲱⲛⲉ ⲉⲃⲟⲗ ⲙ̅ⲡⲕⲁϩ . ⲁⲩⲱ ⲁⲩⲕⲱ ⲛⲁⲩ ⲙ̅ⲡⲉⲅⲗⲩⲡⲧⲟⲛ ⲉⲛ̅ⲧⲁⲘⲓⲭⲁ ⲧⲁⲙⲓⲟϥ ⲛⲁϥ. ⲕⲁⲧⲁⲛⲉϩⲟⲟⲩ ⲧⲏⲣⲟⲩ ⲉⲛⲉⲣⲉⲡⲏⲓ ⲙ̅ⲡⲛⲟⲩⲧⲉ ϣⲟⲟⲡ ϩⲛ̅Ⲥⲏⲗⲱ : Ⲁⲩⲱ ⲁⲥϣⲱⲡⲉ ϩⲛ̅ⲛⲉϩⲟⲟⲩ ⲉⲧⲙ̅ⲙⲁⲩ ⲉⲛⲉⲙⲛ̅ⲣ̅ⲣⲟ ϩⲙ̅ⲡⲒⲥⲣⲁⲏⲗ.

Ⲓ̅Ⲑ̅. Ⲛⲉⲩⲛ̅ⲟⲩⲣⲱⲙⲉ ⲇⲉ ⲛ̅Ⲗⲉⲩⲉⲓⲧⲏⲥ ⲉϥⲟⲩⲏϩ ϩⲛ̅ⲛⲧⲟϣ ⲙ̅ⲡⲧⲟⲟⲩ ⲛ̅Ⲉⲫⲣⲁⲓⲙ ⲁⲩⲱ ⲁϥϫⲓ ⲛⲁϥ ⲛ̅ⲟⲩⲥϩⲓⲙⲉ ⲙ̅ⲡⲁⲗⲁⲕⲏ ⲉⲃⲟⲗ ϩⲛ̅Ⲃⲏⲑⲗⲉⲉⲙ ⲛ̅ⲧⲉⲒⲟⲩⲇⲁ. Ⲧⲡⲁⲗⲁⲕⲏ ⲇⲉ ⲁⲥⲥⲁϩⲱⲥ ⲉⲃⲟⲗ ⲙ̅ⲙⲟϥ   ⲁⲥⲃⲱⲕ ⲉϩⲣⲁⲓ ⲉⲡⲏⲓ ⲙ̅ⲡⲉⲥⲉ̅ⲓⲱⲧ ⲉⲂⲏⲑⲗⲉⲉⲙ ⲛ̅ⲧⲉⲒⲟⲩⲇⲁ . ⲁⲩⲱ ⲛⲉⲥⲙ̅ⲙⲁⲩ ⲛ̅ϥⲧⲟⲟⲩ ⲛ̅ⲉⲃⲟⲧ ⲛ̅ϩⲟⲟⲩ : Ⲡⲉⲥϩⲁⲓ ⲇⲉ ⲁϥⲧⲱⲟⲩⲛ ⲁϥⲃⲱⲕ ⲉϩⲣⲁⲓ ⲉϣⲁϫⲉ ⲉϩⲣⲁⲓ ⲉⲡⲉⲥϩⲏⲧ ⲉⲕⲧⲟⲥ ⲛⲁϥ ⲟⲛ ⲉⲡⲉϥⲏⲓ . Ⲁⲩⲱ ⲛⲉⲣⲉⲟⲩϣⲏⲣⲉ ϣⲏⲙ ⲛ̅ϩⲙ̅ϩⲁⲗ ⲛⲙ̅ⲙⲁϥ ⲙⲛ̅ⲉⲓⲱ ⲥⲛⲁⲩ . ⲁⲩⲱ ⲁϥⲉⲓ ϣⲁϩⲣⲁⲓ ⲉⲡⲏⲓ ⲙ̅ⲡⲉⲥⲉⲓⲱⲧ . Ⲛ̅ⲧⲟⲥ ⲇⲉ ⲁⲥϫⲓⲧϥ̅ ⲉϩⲟⲩⲛ ⲉⲡⲏⲓ ⲙ̅ⲡⲉⲥⲉⲓⲱⲧ . ⲁⲩⲱ ⲡⲉⲓⲱⲧ ⲛ̅ⲧϣⲉⲉⲣⲉ ϣⲏⲙ ⲁϥⲛⲁⲩ ⲉⲣⲟϥ   ⲁϥⲧⲱⲟⲩⲛ   ⲁϥⲁⲥⲡⲁⲍⲉ ⲙ̅ⲙⲟϥ ϩⲛ̅ⲟⲩⲟⲩⲛⲟϥ. Ⲁⲩⲱ ⲡⲉϥϣⲟⲙ ⲡⲉⲓⲱⲧ ⲛ̅ⲧϣⲉⲉⲣⲉ ϣⲏⲙ ⲁϥϩⲙⲟⲟⲥ ϩⲁⲧⲏϥ ⲛ̅ϣⲟⲙⲛ̅ⲧ ⲛ̅ϩⲟⲟⲩ . ⲁⲩⲟⲩⲱⲙ ⲁⲩⲥⲱ   ⲁⲩϭⲱ ⲙ̅ⲡⲙⲁ ⲉⲧⲙ̅ⲙⲁⲩ. Ⲁⲥϣⲱⲡⲉ ⲇⲉ ϩⲙ̅ⲡⲙⲉϩϥⲧⲟⲟⲩ ⲛ̅ϩⲟⲟⲩ ⲁⲩϣⲟⲣⲡⲟⲩ ⲉϩⲧⲟⲟⲩⲉ ⲁⲩⲧⲱⲟⲩⲛ̅ ⲉⲙⲟⲟϣⲉ . Ⲁⲩⲱ ⲡⲉ̅ⲓⲱⲧ ⲛ̅ⲧϣⲉⲉⲣⲉ ϣⲏⲙ ⲡⲉϫⲁϥ ⲙ̅ⲡϩⲁⲓ ⲛ̅ⲧⲉϥϣⲉⲉⲣⲉ ϫⲉ ⲥⲙⲛ̅ⲡⲉⲕϩⲏⲧ ⲛ̅ⲟⲩⲕⲟⲩⲓ ⲛ̅ⲟⲉⲓⲕ   ⲙⲛ̅ⲛⲥⲁ ⲡⲁⲓ ⲇⲉ ⲛ̅ⲧⲉⲧⲛ̅ⲙⲟⲟϣⲉ . Ⲁⲩⲱ ⲁϥϩⲙⲟⲟⲥ ⲁⲩⲟⲩⲱⲙ ⲙ̅ⲡⲉⲥⲛⲁⲩ ϩⲓⲟⲩⲥⲟⲡ ⲁⲩⲥⲱ . Ⲁⲩⲱ ⲡⲉ̅ⲓⲱⲧ ⲛ̅ⲧϣⲉⲉⲣⲉ ϣⲏⲙ ⲡⲉϫⲁϥ ⲙ̅ⲡⲉⲥϩⲁⲓ ϫⲉ ϭⲱ ⲙ̅ⲡⲕⲉⲡⲟⲟⲩ ⲙ̅ⲡⲉⲓⲙⲁ ⲛ̅ⲧⲉⲡⲉⲕϩⲏⲧ ⲟⲩⲛⲟϥ ⲉⲣⲟⲕ . Ⲁⲩⲱ ⲡⲣⲱⲙⲉ ⲁϥⲧⲱⲟⲩⲛ ⲉⲙⲟⲟϣⲉ ⲁⲡⲉϥϣⲟⲙ ⲁⲛⲁⲅⲕⲁⲍⲉ ⲙ̅ⲙⲟϥ ⲁϥϩ̅ⲙⲟⲟⲥ ⲟⲛ ⲛ̅ϭⲱ ⲛⲙ̅ⲁϥ ϣⲁϩⲧⲟⲟⲩⲉ : ⲁⲩⲱ ⲉⲣⲉⲡⲣⲏ ϣⲁ ⲙ̅ⲡⲉϥⲙⲉϩⲉ̅ ⲛ̅ⲥⲟⲡ ⲉϥⲧⲱⲟⲩⲛ̅ ⲙ̅ⲡⲉϥⲣⲁⲥⲧⲉ ⲁⲩⲱ ⲛ̅ⲧⲉϥϫⲱⲱⲃⲉ . Ⲡⲉϫⲁϥ ⲛ̅ϭⲓⲡⲉⲓⲱⲧ ⲛ̅ⲧϣⲉⲉⲣⲉ ϣⲏⲙ . ϫⲉ ⲙⲁⲧⲥⲓⲟⲕ ⲛ̅ϣⲟⲣⲡ̅ ⲁⲩⲱ ⲁϥⲥⲉⲕϩⲧⲏϥ ⲉⲧⲣⲉϥϭⲱ ϣⲁⲛⲧⲉⲡⲉϩⲟⲩ ϫⲱⲕ . Ⲁⲩⲟⲩⲱⲙ ϩⲓⲟⲩⲥⲟⲡ . ⲙⲛ̅ⲛ̅ⲥⲱⲥ ⲁⲡⲣⲱⲙⲉ ⲧⲟⲩⲛⲟⲥϥ̅ ⲙⲛ̅ⲧⲉϥⲡⲁⲗⲗⲁⲕⲏ ϩⲓ ⲙⲛ̅ⲡⲉϥϩⲙ̅ϩⲁⲗ ϩⲱⲥⲧⲉ ⲛ̅ⲧⲉϥⲃⲱⲕ ϩⲓⲧⲉϥϩⲓⲏ . ⲙⲟⲛⲟⲛ ⲡⲉϥϣⲟⲙ ⲉⲧⲉⲡⲉⲓⲱⲧ ⲡⲉ ⲛ̅ⲧϣⲉⲉⲣⲉ ϣⲏⲙ ⲡⲉϫⲁϥ ⲛ̅ⲕⲉⲥⲟⲡ ⲉϥϫⲱ ⲙ̅ⲙⲟⲥ ⲛⲁϥ . ϫⲉ ⲁⲛⲁⲩ ⲉⲡⲣⲏ ⲏⲇⲏ ⲉϥϩⲟⲧⲡ . ⲉⲧⲓ ⲕⲉⲕⲟⲩⲓ ⲁⲩⲱ ϥⲛⲁϩⲱⲛ ⲛ̅ϭⲓⲡⲉϭⲱⲣϩ. Ⲙⲁⲣⲉⲧⲛ̅ϭⲟⲓⲗⲉ ⲟⲛ ϣⲁϩⲧⲟⲟⲩⲉ ⲛⲙ̅ⲙⲁⲓ ϩⲙ̅ⲡⲉⲓⲙⲁ ⲛ̅ⲧⲉⲉⲧⲛ̅ⲟⲩⲛⲟϥ ⲛ̅ⲣⲁⲥⲧⲉ ϫⲉⲕⲁⲥ ⲉⲧⲉⲧⲛⲉⲧⲱⲟⲩⲛⲧⲏⲩⲧⲛ̅ ⲛ̅ⲧⲉⲧⲛ̅ϫⲓⲡⲉⲧⲛ̅ⲙⲟⲉⲓⲧ ϩⲏⲧⲛ̅. Ⲡⲣⲱⲙⲉ ⲇⲉ ⲙ̅ⲡϥ̅ⲟⲩⲱϣ ⲉϭⲱ ⲛⲙ̅ⲙⲁϥ ⲛ̅ϩⲟⲩⲟ . ⲁⲗⲗⲁ ⲁϥⲃⲱⲕ ⲉϥⲙⲟⲟϣⲉ ⲉⲧⲉⲭⲱⲣⲁ ⲛ̅Ⲓⲉⲃⲟⲩⲥⲁⲓⲟⲥ ⲉⲧⲉⲧⲁⲓ ⲧⲉ Ⲑⲗ̅ⲏ̅ⲙ̅ . ⲉⲣⲉⲟⲩϩⲁⲧⲣⲉ ⲛ̅ⲉⲓⲱ ϩⲏⲕ ϩⲛ̅ⲧⲉϥϭⲓϫ ⲉⲩⲟⲩⲏϩ ⲛ̅ⲥⲱϥ ⲛ̅ϭⲓⲧⲉϥⲡⲁⲗⲗⲁⲕⲏ ⲙⲛ̅ⲡⲉϥⲕⲉϩⲙ̅ϩⲁⲗ .Ϩⲟⲧⲁⲛ ⲁⲩⲉⲓ ⲉϩⲣⲁⲓ ⲉⲒⲉⲃⲟⲩⲥ ⲡⲉϩⲟⲟⲩ ⲁϥϫⲱⲕ ⲉⲃⲟⲗ . Ⲁⲩⲱ ⲡⲉϫⲉⲡϩⲙ̅ϩⲁⲗ ⲙ̅ⲡⲉϥϫⲟⲉⲓⲥ ϩⲁⲣⲟⲥ . ϫⲉ ⲁⲙⲟⲩ ⲛ̅ⲧⲛ̅ϭⲟⲉⲓⲗⲉ ϩⲛ̅ⲧⲡⲟⲗⲓⲥ ⲛ̅ⲛ̅Ⲓⲉⲃⲟⲩⲥⲁⲓⲟⲥ ϣⲁⲛⲧⲉⲡⲣⲏ ϣⲁ. Ⲁϥⲉⲣⲟⲩⲱ ⲇⲉ ⲛⲁϥ ⲛ̅ϭⲓⲡⲉϥϫⲟⲉⲓⲥ . Ⲛ̅ⲛⲉⲛⲃⲱⲕ ⲉϩⲟⲩⲛ ⲉⲩⲡⲟⲗⲓⲥ ⲛ̅ϣⲙ̅ⲙⲱ ⲉⲛⲧⲁⲙ̅ⲫⲩⲗⲏ ⲁⲛ ⲧⲉ ⲙ̅ⲡⲒⲏ̅ⲗ̅ . ⲁⲗⲗⲁ ⲙⲁⲣⲛ̅ⲉⲓ ϣⲁϩⲣⲁⲓ ⲉⲄⲁⲃⲁⲁ . Ⲁⲩⲱ ⲡⲉϫⲁϥ ⲙ̅ⲡⲉϥϩⲙ̅ϩⲁⲗ ⲟⲛ ϫⲉ ⲁⲙⲟⲩ ⲛⲁⲕ ⲛ̅ⲧⲛ̅ⲉⲓ ⲉⲡⲙⲁ ⲉⲧⲙ̅ⲙⲁⲩ ⲧⲁⲣⲛ̅ϭⲟⲓⲗⲉ ⲛ̅ϩⲏⲧϥ̅ ϩⲛ̅Ⲅⲁⲃⲁⲁ ⲏ ϩⲛ̅Ⲣⲁⲙⲁ . ⲁⲩⲙⲟⲟϣⲉ ϩⲓⲧⲟⲩϩⲓⲏ. Ⲁⲩⲱ ⲉⲣⲉⲡⲉϩⲟⲟⲩ ϫⲱⲕ ⲉⲓⲥ ⲉⲩϩⲁⲧⲛ̅Ⲅⲁⲃⲁⲁ ⲛ̅ⲧⲉⲂⲉⲛⲓⲁⲙⲓⲛ . ⲁⲩⲱ ⲁⲩⲕⲧⲟⲟⲩ ⲉⲄⲁⲃⲁⲁ ⲉⲧⲣⲉⲩϭⲟⲉⲓⲗⲉ ⲛ̅ϩⲏⲧⲥ̅ . ⲁⲩⲱ ⲛ̅ⲧⲉⲣⲉϥⲃⲱⲕ ⲉϩⲟⲩⲛ ⲉⲛⲉⲥⲡⲩⲗⲏ ⲁϥⲁϩⲉⲣⲁⲧϥ̅ ϩⲛ̅ⲧⲁⲅⲱⲣⲁ . ⲙⲛ̅ⲣⲱⲙⲉ ⲇⲉ ⲉⲧⲙ̅ⲙⲁⲩ ⲟⲩⲱϣ ⲉϫⲓⲧⲟⲩ ⲛⲙ̅ⲙⲁϥ ⲉⲡⲉϥⲏⲓ . Ⲉⲓⲥ ϩⲏⲏⲧⲉ ⲛⲉⲩⲛ̅ⲟⲩϩⲗ̅ⲗⲟ ⲧⲥ̅ⲧⲟ ⲉⲃⲟⲗ ϩⲙ̅ⲡϩⲱⲃ ⲛ̅ⲧⲉϥⲟⲩⲟⲉⲓⲉ ⲛⲉⲩⲉⲃⲟⲗ ⲡⲉ ϩⲛ̅Ⲉⲫⲣⲁⲓⲙ. ⲉⲛⲉϥⲟⲩⲏϩ ⲇⲉ ⲡⲉ ϩⲛ̅Ⲅⲁⲃⲁⲁ ϩⲱⲥ ⲁⲗⲗⲟⲫⲩⲗⲗⲟⲥ . ⲉⲣⲉⲛⲉⲧⲟⲛϩ̅ ⲛ̅ϩⲏⲧⲥ̅ ⲟ ⲛ̅ϣⲏⲣⲉ ⲙ̅Ⲃⲉⲛⲓⲁⲙⲓⲛ . Ⲁⲩⲱ ⲉⲓⲥ ⲟⲩⲣⲱⲙⲉ ⲛ̅ϩⲉⲗ̅ⲗⲟ ⲉⲁϥⲉ̅ⲓ ⲉϩⲣⲁⲓ ϩⲛ̅ⲧⲉϥⲥⲱϣⲉ . ⲉⲁϥϯⲟⲩⲱ ⲉⲃⲟⲗ ϩⲛ̅ⲛⲉϥϩⲃⲏⲩⲉ ⲙ̅ⲡⲛⲁⲩ ⲛ̅ⲣⲟⲩϩⲉ : Ⲁⲩⲱ ⲡⲣⲱⲙⲉ ⲛ̅ϩⲗ̅ⲗⲟ ⲛⲉⲩⲉⲃⲟⲗ ⲡⲉ ϩⲙ̅ⲡⲧⲟⲟⲩ ⲛ̅Ⲉⲫⲣⲁⲓⲙ . ⲁⲩⲱ ⲛ̅ⲧⲟϥ ⲛⲉϥϭⲁⲗⲱⲟⲩ ⲉⲄⲁⲃⲁⲁ . Ⲛ̅ⲣⲱⲙⲉ ⲇⲉ ⲙ̅ⲡⲙⲁ ⲉⲧⲙ̅ⲙⲁⲩ ⲛ̅ϣⲏⲣⲉ ⲛⲉ ⲛ̅Ⲃⲉⲗⲓⲁⲣ : ⲁⲩⲱ ⲁϥϥⲓⲉⲓⲁⲧϥ̅ ⲉϩⲣⲁⲓ ⲁϥⲛⲁⲩ ⲉⲡⲣⲱⲙⲉ ⲉⲛⲧⲁϥⲉⲓ ⲉⲃⲟⲗ ϩⲛ̅ⲧⲉϩⲓⲏ ⲉϥϩⲛ̅ⲧⲉⲡⲗⲁⲧⲓⲁ ⲛ̅ⲧⲡⲟⲗⲓⲥ . Ⲁⲩⲱ ⲡⲣⲱⲙⲉ ⲛ̅ϩⲗ̅ⲗⲟ ⲡⲉϫⲁϥ ⲛⲁϥ ϫⲉ ⲉⲕⲛⲁ ⲉⲧⲱⲛ ⲁⲩⲱ ⲛ̅ⲧⲁⲕⲉⲓ ⲧⲱⲛ . Ⲡⲉϫⲁϥ ⲛⲁϥ ϫⲉ ⲛ̅ⲧⲁⲛⲉⲓ ⲁⲛⲟⲛ ⲉⲃⲟⲗ ϩⲛ̅Ⲃⲏⲑⲗⲉⲉⲙ ⲛ̅ⲧⲉⲒⲟⲩⲇⲁ ⲉⲃⲱⲕ ⲉϩⲣⲁⲓ ⲉⲛ̅ⲧⲟϣ ⲙ̅ⲡⲧⲟⲟⲩ ⲛ̅ⲛⲈⲫⲣⲁⲓⲙ . Ⲁⲛⲅ̅ⲟⲩⲉⲃⲟⲗ ⲙ̅ⲙⲁⲩ ⲁⲛⲟⲕ ⲛ̅ⲧⲁⲓⲃⲱⲕ ϣⲁⲂⲏⲑⲗⲉⲉⲙ ⲛ̅ⲧⲉⲒⲟⲩⲇⲁ . ⲁⲩⲱ ⲁⲛⲟⲕ ⲉⲓⲛⲁⲃⲱⲕ ⲉϩⲣⲁⲓ ⲉⲡⲁⲏⲓ ⲙ̅ⲡⲉⲣⲱⲙⲉ ⲇⲉ ϫⲓⲧ ⲉϩⲟⲩⲛ̅ ⲉⲡⲉϥⲏⲓ . ⲉⲟⲩⲧⲱϩ ϩⲓϩⲣⲉ ϣⲟⲟⲡ ⲛ̅ⲛ̅ⲧⲃ̅ⲛⲟⲟⲩⲉ . ⲉⲛⲉⲩⲛ̅ⲟⲉⲓⲕ ϩⲓⲏⲣⲡ̅ ϣⲟⲟⲡ ⲛⲁⲓ ⲙⲛ̅ⲧⲉⲕϩⲙ̅ϩⲁⲗ ⲙⲛ̅ⲡⲕⲉϣⲏⲣⲉ ϣⲏⲙ . ⲛⲉⲕϩⲙ̅ϩⲁⲗ ⲛ̅ⲥⲉϣⲁⲁⲧ ⲁⲛ ⲛ̅ⲗⲁⲁⲩ ⲛ̅ϩⲱⲃ : Ⲁⲩⲱ ⲡϩⲗ̅ⲗⲟ ⲛ̅ⲣⲱⲙⲉ ⲡⲉϫⲁϥ ⲛⲁϥ ϫⲉ ϯⲣⲏⲛⲏ ⲉⲥⲉϣⲱⲡⲉ ⲛⲁⲕ . Ⲡⲗⲏⲛ ⲡⲉⲕϣⲱⲱⲧ ⲧⲏⲣϥ̅ ⲉϥϩⲓϫⲱⲓ. Ⲛ̅ϯⲛⲁⲕⲁⲁⲕ ⲁⲛ ⲉϭⲱ ϩⲛ̅ⲧⲉⲡⲗⲁⲧⲓⲁ. ⲁⲩⲱ ⲁϥϫⲓⲧⲟⲩ ⲉϩⲟⲩⲛ ⲉⲡⲉϥⲏⲓ . Ⲁϥϥⲓⲡⲣⲟⲟⲩϣ ⲛ̅ⲛ̅ⲧⲃ̅ⲛⲟⲟⲩⲉ ⲁϥⲛⲉϫϩⲣⲉ ϩⲁⲣⲱⲟⲩ . Ⲛ̅ⲧⲟⲟⲩ ϩⲱⲟⲩ ⲁϥⲉⲓⲁⲣⲁⲧⲟⲩ . ⲁⲩⲟⲩⲱⲙ ⲇⲉ ⲁⲩⲱ ⲁⲩⲥⲱ . Ⲛ̅ⲧⲉⲣⲉⲡⲉⲩϩⲏⲧ ⲇⲉ ⲟⲩⲛⲟϥ ⲉⲣⲟⲟⲩ . ⲉⲓⲥ ⲛ̅ⲣⲱⲙⲉ ⲛ̅ⲧⲡⲟⲗⲓⲥ ⲉϩⲉⲛϣⲏⲣⲉ ⲙ̅ⲡⲁⲣⲁⲛⲟⲙⲟⲥ ⲛⲉ ⲁⲩⲕⲱⲧⲉ ⲉⲡⲏⲓ ⲉⲩⲧⲱϩⲙ̅ ⲉⲡⲣⲟ . ⲁⲩⲱ ⲡⲉϫⲁⲩ ⲙ̅ⲡⲣⲱⲙⲉ ⲛ̅ϩⲗ̅ⲗⲟ ⲉⲧⲉⲡϫⲟⲉⲓⲥ ⲡⲉ ⲙ̅ⲡⲏⲓ ⲉⲩϫⲱ ⲙ̅ⲙⲟⲥ ⲛⲁϥ . ϫⲉ ⲁⲛⲓⲡⲣⲱⲙⲉ ⲉⲃⲟⲗ ⲉⲛⲧⲁϥⲉ̅ⲓ ⲉϩⲟⲩⲛ ⲉⲡⲉⲕⲏⲓ ϫⲉ ⲉⲛⲉϣⲱⲡⲉ ⲛⲙ̅ⲙⲁϥ . Ⲁⲩⲱ ⲡⲣⲱⲙⲉ ⲉⲧⲉⲡϫⲟⲉⲓⲥ ⲡⲉ ⲙ̅ⲡⲏⲓ ⲁϥⲉ̅ⲓ ⲉⲃⲟⲗ ⲉϥϫⲱ ⲙ̅ⲙⲟⲥ ⲛⲁⲩ ϫⲉ ⲙ̅ⲡⲱⲣ ⲛⲁⲥⲛⲏⲩ ⲙ̅ⲡⲣ̅ⲣ̅ϩⲱⲃ ⲉϥϩⲟⲟⲩ ⲙ̅ⲡⲉⲓⲣⲱⲙⲉ . ⲙⲛ̅ⲛⲥⲁⲧⲣⲉϥⲉⲓ ⲉϩⲟⲩⲛ ⲉⲡⲁⲏⲓ ⲧⲉⲓⲙⲛ̅ⲧⲁⲑⲏⲧ ⲙ̅ⲡⲣ̅ⲁⲁⲥ . Ⲉⲓⲥ ⲧⲁϣⲉⲉⲣⲉ ⲙ̅ⲡⲁⲣⲑⲉⲛⲟⲥ ⲁⲩⲱ ⲧⲉϥⲡⲁⲗⲗⲁⲕⲏ ϯⲛⲁⲛ̅ⲧⲟⲩ ⲉⲃⲟⲗ ⲛⲏⲧⲛ̅ ⲛ̅ⲧⲉⲧⲛ̅ⲉⲓⲣⲉ ⲛⲁⲩ ⲙ̅ⲡⲁⲅⲁⲑⲟⲛ ⲛ̅ⲛ̅ⲁϩⲣⲏⲧⲛ̅. Ⲡⲉⲓⲣⲱⲙⲉ ⲇⲉ ⲙ̅ⲡⲣ̅ⲉ̅ⲓⲣⲉ ⲙ̅ⲡⲉⲓϣⲁϫⲉ ⲙ̅ⲙⲛ̅ⲧⲁⲑⲏⲧ ⲛⲙ̅ⲙⲁϥ. Ⲁⲩⲱ ⲛ̅ⲣⲱⲙⲉ ⲙ̅ⲡⲟⲩⲟⲩⲱϣ ⲉⲥⲱⲧⲙ̅ ⲛ̅ⲥⲱϥ. ⲁⲩⲱ ⲡⲣⲱⲙⲉ ⲁϥⲁⲙⲁϩⲧⲉ ⲛ̅ⲧⲉϥⲡⲁⲗⲗⲁⲕⲏ ⲁϥⲛ̅ⲧⲥ̅ ⲉⲃⲟⲗ ⲛⲁⲩ ⲉⲡⲥⲁ ⲛ̅ⲃⲟⲗ ⲁⲩϣⲱⲡⲉ ⲛⲙ̅ⲙⲁⲥ . Ⲁⲩⲱ ⲁⲩϣⲱⲡⲉ ⲛⲙ̅ⲙⲁⲥ ⲛ̅ⲧⲉⲩϣⲏ ⲧⲏⲣⲥ̅ ϣⲁⲡⲛⲁⲩ ⲛ̅ϩⲧⲟⲟⲩⲉ. Ⲁⲩⲱ ⲁⲩⲕⲁⲁⲥ ⲉⲃⲟⲗ ⲛ̅ⲧⲉⲣⲉⲡⲟⲩⲟⲉⲓⲛ ⲉⲓ ⲉϩⲣⲁⲓ . ⲁⲩⲱ ⲧⲉⲥϩⲓⲙⲉ ⲁⲥⲉⲓ ⲙ̅ⲡⲛⲁⲩ ⲛ̅ϣⲱⲣⲡ̅ ⲉⲣⲁⲧϥ̅ ⲙ̅ⲡⲣⲱⲙⲉ . ⲁⲥϩⲉ ϩⲁⲧⲙ̅ⲡⲣⲟ ⲙ̅ⲡⲏⲓ ⲉⲧⲉⲣⲉⲡⲉⲥϫⲟⲉⲓⲥ ⲛ̅ϩⲏⲧϥ̅ . ⲁⲩⲱ ⲛⲉⲥⲙ̅ⲙⲁⲩ ϣⲁⲛⲧⲉⲡⲟⲩⲟⲉⲓⲛ ⲥⲱⲣ . ⲁⲩⲱ ⲡⲉⲥϫⲟⲉⲓⲥ   ⲁϥⲟⲩⲱⲛ ⲉⲛ̅ⲣⲟ ⲙ̅ⲡⲏⲓ ⲁϥⲉⲓ ⲉⲃⲟⲗ ⲉⲙⲟⲟϣⲉ ⲉⲧⲉϥϩⲓⲏ . Ⲁⲩⲱ ⲉⲓⲥ ⲧⲉϥⲥϩⲓⲙⲉ ⲙ̅ⲡⲁⲗⲗⲁⲕⲏ ⲉⲥⲛⲏϫ ϩⲁⲧⲉⲡⲣⲟ ⲙ̅ⲡⲏⲓ ⲉⲣⲉⲛⲉⲥϭⲓϫ ϩⲓϫⲛ̅ⲧⲡⲛⲏ. Ⲡⲉϫⲁϥ ⲛⲁⲥ ϫⲉ ⲧⲱⲟⲩⲛⲉ ⲙⲁⲣⲟⲛ. Ⲁⲩⲱ ⲙ̅ⲡⲥ̅ⲣ̅ⲟⲩⲱ ϩⲁⲣⲱϥ ⲗⲁⲁⲩ ⲛⲉⲥⲙⲟⲟⲩⲧ ⲅⲁⲣ ⲡⲉ . Ⲁⲩⲱ ⲁϥⲧⲁⲗⲟⲥ ⲉϩⲣⲁⲓ ⲉϫⲙ̅ⲡⲉϥⲓⲱ ⲁϥⲙⲟⲟϣⲉ ⲉϩⲣⲁⲓ ⲉⲡⲉϥⲙⲁ . Ⲁϥⲃⲱⲕ ⲇⲉ ⲉϩⲟⲩⲛ ⲉⲡⲉϥⲏⲓ ⲁϥϫⲓ ⲛ̅ⲧϭⲟⲣⲧⲉ ⲁϥⲁⲙⲁϩⲧⲉ ⲛ̅ⲧⲉϥⲡⲁⲗⲗⲁⲕⲏ . ⲁϥⲁⲁⲥ ⲙ̅ⲙⲉⲗⲟⲥ ⲙⲉⲗⲟⲥ ⲕⲁⲧⲁⲛⲉⲥⲕⲉⲉⲥ ⲉⲙⲛ̅ⲧⲥⲛⲟⲟⲩⲥ ⲙ̅ⲙⲉⲗⲟⲥ. ⲁϥϫⲟⲟⲩⲥⲟⲩ ⲉ̅ⲃⲟⲗ ⲉⲛⲉⲫⲩⲗⲏ ⲧⲏⲣⲟⲩ ⲙ̅ⲡⲒⲥⲣⲁⲏⲗ . Ⲁⲩⲱ ⲟⲩⲟⲛ ⲛⲓⲙ ⲉϥⲛⲁⲩ ⲉⲣⲟⲟⲩ ⲛⲉϥϫⲱ ⲙ̅ⲙⲟⲥ ϫⲉ ⲙ̅ⲡⲉⲟⲩⲟⲛ ⲛ̅ⲧⲉⲓϩⲉ ϣⲱⲡⲉ. ⲁⲩⲱ ⲙ̅ⲡⲟⲩⲛⲁⲩ ⲉⲥⲙⲟⲧ ⲛ̅ⲧⲉⲓϩⲉ ϫⲓⲛⲛⲉϩⲟⲟⲟⲩ ⲉⲛ̅ⲧⲁⲛϣⲏⲣⲉ ⲙ̅ⲡⲒⲥⲣⲁⲏⲗ ⲉ̅ⲓ ⲉϩⲣⲁⲓ ϩⲛ̅Ⲕⲏⲙⲉ ϣⲁϩⲣⲁⲓ ⲉⲡⲟⲟⲩ ⲛ̅ϩⲟⲟⲩ. Ⲁⲩⲱ ⲁϥϩⲱⲛ ⲉⲧⲟⲟⲧⲟⲩ ⲛ̅ⲛ̅ⲣⲱⲙⲉ ⲛⲁⲓ ⲉⲛⲧⲁϥϫⲟⲩⲥⲟⲩ ⲉϥϫⲱ ⲙ̅ⲙⲟⲥ . ϫⲉ ⲛⲁⲓ ⲛⲉⲧⲉⲧⲛⲉϫⲟⲟⲩ ⲛ̅ⲛⲁϩⲣⲛ̅ⲛ̅ⲣⲱⲙⲉ ⲧⲏⲣⲟⲩ ⲙ̅ⲡⲒⲥⲣⲁⲏⲗ . ϫⲉ ⲉⲛⲉⲁϣⲁϫⲉ ϣⲱⲡⲉ   ⲛ̅ⲧⲉⲓϩⲉ ϫⲓⲛⲡⲉϩⲟⲟⲩ   ⲉⲛⲧⲁⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲉ̅ⲓ ⲉϩⲣⲁⲓ ϩⲙ̅ⲡⲕⲁϩ ⲛ̅Ⲕⲏⲙⲉ ϣⲁϩⲣⲁⲓ ⲉⲡⲟⲟⲩ . Ⲛ̅ⲧⲱⲧⲛ̅ ⲕⲱ ⲉϩⲣⲁⲓ ⲛ̅ⲟⲩϣⲟϫⲛⲉ ϩⲓⲡⲉⲓϩⲱⲃ ⲉⲧⲃⲏⲏⲧⲥ̅ ⲛ̅ⲧⲉⲧⲛ̅ϣⲁϫⲉ ⲉⲣⲟϥ :

Ⲕ̅. Ⲁⲩⲱ ⲁⲩⲉⲓ ⲉⲃⲟⲗ ⲛ̅ϭⲓⲛ̅ϣⲏⲣⲉ ⲧⲏⲣⲟⲩ ⲙ̅ⲡⲒⲥⲣⲁⲏⲗ ⲁⲩⲱ ⲧⲥⲩⲛⲁⲅⲱⲅⲏ ⲧⲏⲣⲥ̅ ⲁⲥⲥⲟⲩⲱϩ ⲉⲛⲉⲥⲉⲣⲏⲩ ⲛ̅ⲑⲉ ⲛ̅ⲟⲩⲣⲱⲙⲉ ⲛ̅ⲟⲩⲱⲧ. ϫⲓⲛⲛ̅Ⲇⲁⲛ ϣⲁϩⲣⲁⲓ ⲉⲂⲏⲣⲥⲁⲃⲉⲉ . ⲁⲩⲱ ⲡⲕⲁϩ ⲛ̅Ⲅⲁⲗⲁⲁⲇ ⲉⲣⲁⲧϥ̅ ⲙ̅Ⲡϫⲟⲉⲓⲥ ⲉϩⲣⲁⲓ ⲉⲘⲁⲥⲥⲏⲫⲁ . Ⲁⲩⲱ   ⲁⲩϩⲉⲣⲁⲧⲟⲩ   ⲙ̅ⲡⲉⲙ̅ⲧⲟ ⲉⲃⲟⲗ ⲙ̅Ⲡϫⲟⲉⲓⲥ ⲛ̅ϭⲓⲛⲉⲫⲩⲗⲏ ⲧⲏⲣⲟⲩ ⲙ̅ⲡⲒⲥⲣⲁⲏⲗ ϩⲛ̅ⲧⲉⲕⲕⲗⲏⲥⲓⲁ ⲙ̅ⲡⲗⲁⲟⲥ ⲙ̅ⲡⲛⲟⲩⲧⲉ . ⲛⲉⲩⲛⲁⲣ̅ϩⲙⲉ ⲛ̅ⲧⲃⲁ ⲛ̅ⲣⲱⲙⲉ ⲛ̅ⲣⲙ̅ⲛ̅ⲣⲁⲧⲟⲩ ⲉⲩⲧⲉⲕⲙ̅ⲥⲏϥⲉ ⲁⲩⲱ ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ ⲁⲩⲥⲱⲧⲙ̅ ϫⲉ ⲁⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲉⲓ ⲉϩⲣⲁⲓ ⲉⲘⲁⲥⲥⲏⲫⲁ . ⲁⲩⲱ ⲡⲉϫⲉⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ϫⲉ ⲛ̅ⲧⲁⲧⲉⲡⲟⲛⲏⲣⲓⲁ ϣⲱⲡⲉ ⲧⲱⲛ . Ⲁⲩⲱ ⲡⲣⲱⲙⲉ ⲉⲧⲉⲡⲖⲉⲩⲉⲓⲧⲏⲥ ⲡⲉ ⲡϩⲁⲓ ⲛ̅ⲧⲉⲥϩⲓⲙⲉ ⲉⲛⲧⲁⲩϩⲟⲧⲃⲉⲥ ⲁϥⲟⲩⲱϣⲃ̅ ⲉϥϫⲱ ⲙ̅ⲙⲟⲥ ⲛⲁⲩ. Ϫⲉ ⲁⲓⲉⲓ ⲉϩⲣⲁⲓ ⲉⲄⲁⲃⲁⲁ ⲧⲡⲟⲗⲓⲥ ⲛ̅Ⲃⲉⲛⲓⲁⲙⲓⲛ ⲁⲛⲟⲕ ⲙⲛ̅ⲧⲁⲡⲁⲗⲗⲁⲕⲏ ⲉⲧⲣⲉⲛϭⲱⲓⲗⲉ ⲉⲙⲁⲩ. ⲁⲩⲱ ⲛ̅ⲣⲱⲙⲉ ⲛ̅Ⲅⲁⲃⲁⲁ ⲁⲩⲧⲱⲟⲩⲛⲟⲩ ⲉϫⲱⲓ. Ⲁⲩⲕⲱⲧⲉ ⲉⲣⲟⲓ ϩⲙ̅ⲡⲏⲓ ⲛ̅ⲧⲉⲩϣⲏ ⲁⲩⲟⲩⲱϣ ⲉϩⲟⲧⲃⲉⲧ ⲁⲛⲟⲕ . ⲁⲩⲱ ⲧⲁⲡⲁⲗⲗⲁⲕⲏ ⲁⲩⲑⲃ̅ⲃⲓⲟⲥ ⲁⲩⲥⲱⲃⲉ ⲙ̅ⲙⲟⲥ ⲁⲥⲙⲟⲩ. ⲁⲓϫⲟⲟⲩⲥ ⲉⲃⲟⲗ ⲉⲛⲧⲟϣⲟ ⲧⲏⲣⲟⲩ ⲛ̅ⲧⲉⲕⲗⲏⲣⲟⲛⲟⲙⲓⲁ ⲙ̅ⲡⲒⲥⲣⲁⲏⲗ ⲉⲃⲟⲗϫⲉ ⲁⲩⲉⲓⲣⲉ ⲛ̅ⲟⲩⲙⲛ̅ⲧⲁⲑⲏⲧ ϩⲙ̅ⲡⲒⲥⲣⲁⲏⲗ . Ⲉⲓⲥ ϩⲏⲏⲧⲉ ⲛ̅ⲧⲱⲧⲛ̅ ⲧⲏⲣⲧⲛ̅ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲧⲉⲧⲛ̅ϩⲙ̅ⲡⲉⲓⲙⲁ . Ⲧⲁⲩⲉⲟⲩϣⲁϫⲉ ⲙⲛ̅ⲟⲩϣⲟϫⲛⲉ ⲉⲧⲣⲉϥⲡⲱϩ ϣⲁⲡⲙⲁ ⲉⲧⲙ̅ⲙⲁⲩ : Ⲁⲩⲱ ⲡⲗⲁⲟⲥ ⲧⲏⲣϥ̅ ⲁⲩⲧⲱⲟⲩⲛⲟⲩ ⲛ̅ⲑⲉ ⲛ̅ⲟⲩⲣⲱⲙⲉ ⲛ̅ⲟⲩⲱⲧ ⲉⲩϫⲱ ⲙ̅ⲙⲟⲥ . Ϫⲉ ⲙⲛ̅ⲗⲁⲁⲩ ⲙ̅ⲙⲟⲛ ⲛⲁⲃⲱⲕ ⲉϩⲣⲁⲓ ⲉⲡⲉϥⲙⲁ ⲛ̅ϣⲱⲡⲉ . ⲁⲩⲱ ⲙⲛ̅ⲣⲱⲙⲉ ⲛⲁⲕⲧⲟϥ ⲉϩⲣⲁⲓ ⲉⲡⲉϥⲏⲓ. Ⲧⲉⲛⲟⲩ ϭⲉ ⲡⲁⲓ ⲡⲉ ⲡϣⲁϫⲉ ⲉⲧⲛⲁϣⲱⲡⲉ ⲛ̅Ⲅⲁⲃⲁⲁ. Ⲧⲛ̅ⲛⲁⲃⲱⲕ ⲉϩⲣⲁⲓ ⲉⲣⲟⲥ ϩⲛ̅ⲟⲩⲕⲗⲏⲣⲟⲥ. Ⲡⲗⲏⲛ ⲧⲛ̅ⲛⲁⲕⲁⲙⲏⲧ ⲛ̅ⲣⲱⲙⲉ ⲉϫⲛ̅ϣⲉ ⲉⲛⲉⲫⲩⲗⲏ ⲙ̅ⲡⲒⲥⲣⲁⲏⲗ ⲁⲩⲱ ϣⲉ ⲉϫⲛ̅ϣⲟ. ⲁⲩⲱ ϣⲟ ⲉⲩⲧⲃⲁ ⲉⲧⲣⲉⲩϫⲓϩⲣⲉ ⲙ̅ⲡⲗⲁⲟⲥ. ⲉⲧⲣⲉⲩⲃⲱⲕ ⲉϩⲣⲁⲓ ⲉⲄⲁⲃⲁⲁ ⲧⲡⲟⲗⲓⲥ ⲛ̅Ⲃⲉⲛⲓⲁⲙⲓⲛ ⲉⲉⲓⲣⲉ ⲛⲁⲩ ⲕⲁⲧⲁⲧⲙⲛ̅ⲧⲁⲑⲏⲧ ⲧⲏⲣⲥ̅ ⲧⲁⲓ ⲉⲛⲧⲁⲩⲁⲁⲥ ϩⲙ̅ⲡⲒⲥⲣⲁⲏⲗ . Ⲁⲩⲱ ⲛ̅ⲣⲱⲙⲉ ⲧⲏⲣⲟⲩ ⲙ̅ⲡⲒⲥⲣⲁⲏⲗ ⲁⲩⲥⲟⲩⲱϩ ⲉⲧⲡⲟⲗⲓⲥ ⲛ̅ⲑⲉ ⲛ̅ⲟⲩⲣⲱⲙⲉ ⲛ̅ⲟⲩⲱⲧ : Ⲁⲩⲱ ⲛⲉⲫⲩⲗⲏ ⲙ̅ⲡⲒⲥⲣⲁⲏⲗ ⲁⲩϫⲟⲟⲩ ⲛ̅ϩⲉⲛⲣⲱⲙⲉ ⲉϩⲣⲁⲓ ⲉⲧⲉⲫⲩⲗⲏ ⲧⲏⲣⲥ̅ ⲛ̅Ⲃⲉⲛⲓⲁⲙⲓⲛ ⲉⲩϫⲱ ⲙ̅ⲙⲟⲥ ⲛⲁⲩ. ϫⲉ Ⲟⲩ ⲧⲉ ⲧⲉⲓⲡⲟⲛⲏⲣⲓⲁ ⲉⲛⲧⲁⲥϣⲱⲡⲉ ⲛ̅ϩⲏⲧⲧⲏⲩⲧⲛ̅ . Ⲧⲉⲛⲟⲩ ⲙⲁ ⲛⲁⲛ ⲛ̅ⲛ̅ⲣⲱⲙⲉ ⲛ̅ⲁⲥⲉⲃⲏⲥ ⲉⲧⲉⲛ̅ϣⲏⲣⲉ ⲛ̅Ⲃⲉⲗⲓⲁⲣ ⲛⲉ ⲉⲧϩⲛ̅Ⲅⲁⲃⲁⲁ ⲛ̅ⲧⲛ̅ⲙⲟⲟⲩⲧⲟⲩ . ⲛ̅ⲧⲛ̅ϥⲓ ⲛ̅ⲧⲡⲟⲛⲏⲣⲓⲁ ⲉⲃⲟⲗ ϩⲙ̅ⲡⲒⲥⲣⲁⲏⲗ . Ⲁⲩⲱ ⲙ̅ⲡⲟⲩⲣ̅ϩⲛⲁⲩ ⲛ̅ϭⲓⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ ⲉⲥⲱⲧⲙ̅ ⲛ̅ⲥⲁⲡⲉϩⲣⲟⲟⲩ ⲛ̅ⲛⲉⲩⲥⲛⲏⲩ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ. Ⲁⲩⲱ ⲁⲩⲥⲟⲩⲱϩ ⲉϩⲟⲩⲛ ⲛ̅ϭⲓⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ ⲉⲃⲟⲗ ϩⲛ̅ⲛⲉⲩⲡⲟⲗⲓⲥ ⲉϩⲟⲩⲛ ⲉⲄⲁⲃⲁⲁ. ⲉⲧⲣⲉⲩⲃⲱⲕ ⲉⲃⲟⲗ ⲉⲙⲓϣⲉ ⲙⲛ̅ⲛⲉⲩⲥⲛⲏⲩ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ. Ⲁⲩⲱ ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ ⲁⲩϭⲙ̅ⲡⲉⲩϣⲓⲛⲉ ϩⲙ̅ⲡⲉϩⲟⲟⲩ ⲉⲧⲙ̅ⲙⲁⲩ ⲉⲃⲟⲗ ϩⲛ̅ⲛⲉⲩⲡⲟⲗⲓⲥ ⲉⲩⲛⲁⲣ̅ⲧⲃⲁ ⲥⲛⲁⲩ ⲛ̅ⲣⲱⲙⲉ ⲙⲛ̅ϯⲟⲩ ⲛ̅ϣⲉ ⲉⲩⲧⲉⲕⲙ̅ⲥⲏϥⲉ . ⲭⲱⲣⲓⲥ ⲛ̅ⲣⲱⲙⲉ ⲛ̅Ⲅⲁⲃⲁⲁ. Ⲛⲉⲩⲛ̅ⲥⲁϣϥ ⲛ̅ϣⲉ ⲇⲉ ⲛ̅ⲣⲱⲙⲉ ⲉⲩⲥⲟⲧⲡ̅ ϩⲛ̅ⲧⲉⲩⲙⲏⲧⲉ ⲉⲩⲟ ⲛ̅ϭⲓϫ ⲥⲛ̅ⲧⲉ. ⲛⲁⲓ ⲧⲏⲣⲟⲩ ⲁⲩⲛⲉϫⲱⲛⲉ . ⲉⲩⲉⲓ ⲉϩⲟⲩⲛ ϩⲙ̅ⲡⲃⲱ ⲙ̅ⲡⲣⲱⲙⲉ ⲉ̅ⲙⲟⲩϣⲱⲃⲧ: Ⲁⲩⲱ ⲛ̅ⲣⲱⲙⲉ ⲙ̅ⲡⲒⲏ̅ⲗ̅. ⲁⲩϭⲙ̅ⲡⲉⲩϣⲓⲛⲉ ⲭⲱⲣⲓⲥ ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ . ⲁⲩⲣ̅ϩⲙⲉ ⲛ̅ⲧ̅ⲃⲁ ⲛ̅ⲣⲱⲙⲉ ⲉⲩⲧⲉⲕⲙ̅ⲥⲏⲃⲉ . ⲛⲁⲓ ⲧⲏⲣⲟⲩ ⲉ̅ϩⲉⲛⲣⲱⲙⲉ ⲛ̅ⲣⲉϥⲙⲓ̅ϣⲉ ⲛⲉ : Ⲁⲩⲧⲱⲟⲩⲛ̅ ⲁⲩⲃⲱⲕ ⲉϩⲣⲁⲓ ⲉⲂⲁⲓⲑⲏⲗ . ⲁⲩϣⲓⲛⲉ ϩⲙ̅ⲡⲛⲟⲩⲧⲉ ⲛ̅ϭⲓⲛ̅ϣⲏⲣⲉ ⲙ̅ⲡⲒⲏ̅ⲗ̅ . ⲉⲩϫⲱ ⲙ̅ⲙⲟⲥ . Ⲛⲓⲙ ⲡⲉⲧⲛⲁⲙⲟⲟϣⲉ ϩⲓϩⲏ ⲙ̅ⲙⲟⲛ ⲉⲡⲡⲟⲗⲉⲙⲟⲥ . ⲙⲛ̅ⲛ̅ϣⲏⲣⲉ ⲛ̅Ⲃⲉⲛⲓ̅ⲁⲙⲓⲛ : ⲠⲉϫⲉⲠ̅ϫⲟⲉ̅ⲓⲥ ⲛⲁⲩ ϫⲉ Ⲓⲟⲩⲇⲁⲥ ⲡⲉⲧⲛⲁⲙⲟⲟϣⲉ ϩⲓϩⲏ ⲙ̅ⲙⲱⲧⲛ̅ : ⲁⲩⲱ ⲁⲩⲧⲱⲟⲩⲛ̅ ⲛ̅ϭⲓⲛ̅ϣⲏⲣⲉ ⲙ̅ⲡⲒⲏ̅ⲗ̅ ⲙ̅ⲡⲉϥϩ̅ⲧⲟⲟⲩⲉ̅ . ⲁⲩⲃⲱⲕ ⲉ̅ⲣⲉⲛⲄⲁⲃⲁⲁ : Ⲁⲩⲱ̅ ⲁⲩⲉⲓ ⲉ̅ⲃⲟⲗ ⲛ̅ϭⲓⲛ̅ϣⲏⲣⲉ ⲧⲏⲣⲟⲩ ⲙ̅ⲡⲒ̅ⲏ̅ⲗ̅ ⲉ̅ⲙⲓϣⲉ ⲙⲛ̅ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ . ⲁⲩϭⲱ ϩⲓⲣⲱⲟⲩ ⲛ̅ϭⲓⲛ̅ϣⲏⲣⲉ ⲧⲏⲣⲟⲩ ⲙ̅ⲡⲒⲏ̅ⲗ̅ ⲉⲡⲟⲗⲩⲙⲉⲓ ⲛⲙ̅ⲙⲁⲩ ϩⲛ̅Ⲅⲁⲃⲁⲁ . Ⲁⲩⲱ̅ ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ ⲁⲩⲉⲓ ⲉ̅ⲃⲟⲗ ϩⲛ̅Ⲅⲁⲃⲁⲁ. Ⲁⲩⲧⲁⲕⲟ ⲉ̅ⲃⲟⲗ ϩⲙ̅ⲡⲒⲏ̅ⲗ̅ ⲙ̅ⲡⲉϩⲟⲟⲩ ⲉ̅ⲧⲙ̅ⲙⲁⲩ ⲛ̅ⲧ̅ⲃⲁ ⲥ̅ⲛⲁⲩ ⲛ̅ⲣⲱⲙⲉ . ⲙⲛ̅ϫϫⲟⲩⲱⲧ ⲛ̅ϣⲉ ⲉⲁⲩⲣⲁϩⲧⲟⲩ ϩⲙ̅ⲡⲕⲁϩ . Ⲁⲩⲱ ⲛ̅ϣⲏⲣⲉ ⲙ̅ⲡⲒ̅ⲏⲗ̅ ⲁⲩϭⲙ̅ϭⲟⲙ . ⲁⲩⲟⲩⲱϩ ⲉⲧⲟⲟⲧⲟⲩ ⲉⲉⲓⲣⲉ ⲛ̅ⲙⲓϣⲉ ϩⲙ̅ⲡⲙⲁ ⲛ̅ⲧⲁⲩⲱ̅ϣⲉ ⲛ̅ϩⲏⲧϥ̅ ⲙ̅ⲡϣⲟⲣⲡ̅ ⲛ̅ϩⲟⲟⲩ: Ⲁⲩⲱ̅ ⲛ̅ϣⲏⲣⲉ ⲙ̅ⲡⲒⲏ̅ⲗ̅ ⲁⲩⲉⲓ ⲉϩⲣⲁⲓ ⲁⲩⲣⲓⲙⲉ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲉⲓⲥ ϣⲁⲡⲛⲁⲩ ⲛ̅ⲣⲟⲩϩⲉ : Ⲁⲩⲱ̅ ⲁⲩϣⲓⲛⲉ ϩⲙ̅Ⲡϫⲟⲉ̅ⲓⲥ ⲉⲩϫⲱ̅ ⲙⲙⲟⲥ . ϫⲉ ⲉ̅ⲛⲉⲧⲁⲣⲉⲛⲟⲩⲱϩ ⲉ̅ⲧⲟⲟⲧⲛ̅ ⲉⲃⲱⲕ ⲉ̅ⲙⲓϣⲉ ⲙⲛ̅ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ . ⲛⲉⲛⲥⲛⲏⲩ ⲠⲉϫⲉⲠϫⲟⲉⲓⲥ ⲛⲁⲩ ϫⲉ ⲃⲱⲕ ⲉ̅ⲣⲱⲟⲩ Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲃⲱⲕ ⲉⲣⲛ̅Ⲃⲉⲛⲓⲁⲙⲓⲛ ⲙ̅ⲡⲙⲉϩϩⲟⲟⲩ ⲥⲛⲁⲩ. Ⲁⲩⲱ ⲁϥⲉⲓ ⲉⲃⲟⲗ ⲛ̅ϭⲓⲂⲉⲛⲓⲁⲙⲓⲛ ⲉⲧⲣⲉϥⲧⲱⲙⲛ̅ⲧ ⲉⲣⲟⲟⲩ ⲉⲃⲟⲗ ϩⲛ̅Ⲅⲁⲃⲁⲁ . ⲙ̅ⲡⲙⲉϩϩⲟⲟⲩ ⲥⲛⲁⲩ . Ⲉⲧⲓ ⲁⲩⲣⲱϩⲧ ⲉϫⲙ̅ⲡⲕⲁϩ ⲉⲃⲟⲗ ϩⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ. ⲙ̅ⲙⲛ̅ⲧϣⲙⲏⲛ ⲛ̅ϣⲟ ⲛ̅ⲣⲱⲙⲉ ⲛⲁⲓ ⲧⲏⲣⲟⲩ ⲉⲩⲧⲉⲕⲙ̅ⲥⲏϥⲉ : Ⲁⲩⲱ ⲛ̅ϣⲏⲣⲉ ⲧⲏⲣⲟⲩ ⲙ̅ⲡⲒⲥⲣⲁⲏⲗ ⲙⲛ̅ⲡⲕⲉⲗⲁⲟⲥ ⲧⲏⲣϥ̅ ⲁⲩⲧⲱⲟⲩⲛⲟⲩ ⲁⲩⲉⲓ ⲉϩⲣⲁⲓ ⲉⲂⲁⲓⲑⲏⲗ ⲁⲩⲣⲓⲙⲉ ϩⲙ̅ⲡⲙⲁ ⲉⲧⲙ̅ⲙⲁⲩ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲉⲓⲥ. ⲁⲩⲱ ⲁⲩⲛⲏⲥⲧⲉⲩⲉ ϩⲙ̅ⲡⲉϩⲟⲟⲩ ⲉⲧⲙ̅ⲙⲁⲩ. ⲁⲩⲱ ⲁⲩⲧⲁⲗⲟ ⲉϩⲣⲁⲓ ⲛ̅ϩⲉⲛϩⲟⲗⲟⲕⲁⲩⲧⲱⲙⲁ ⲛ̅ⲟⲩϫⲁⲓ ⲙ̅ⲡⲉⲙⲧⲟ ⲉⲃⲟⲗ ⲙ̅Ⲡϫⲟⲉⲓⲥ ⲁⲩⲱ ⲁⲩϣⲓⲛⲉ ⲙ̅Ⲡϫⲟⲉⲓⲥ ⲛ̅ϭⲓⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲉⲃⲟⲗϫⲉ ⲛⲉⲥⲙ̅ⲙⲁⲩ ⲛ̅ϭⲓⲧϭⲓⲃⲱⲧⲟⲥ ⲛ̅ⲧⲇⲓⲁⲑⲏⲕⲏ ⲙ̅Ⲡϫⲟⲉⲓⲥ ϩⲛ̅ⲛⲉϩⲟⲟⲩ ⲉⲧⲙ̅ⲙⲁⲩ . Ⲁⲩⲱ Ϥⲓⲛⲉⲉⲥ ⲡϣⲏⲣⲉ ⲛ̅Ⲉⲗⲉⲁⲍⲁⲣ ⲡϣⲏⲣⲉ ⲛ̅Ⲁⲁⲣⲱⲛ ⲛⲉϥⲁϩⲉⲣⲁⲧϥ̅ ⲙ̅ⲡⲉⲥⲙ̅ⲧⲟ ⲉⲃⲟⲗ . ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩϣⲓⲛⲉ ϩⲙ̅Ⲡϫⲟⲉⲓⲥ ⲉⲩϫⲱ ⲙ̅ⲙⲟⲥ . ϫⲉ ⲉⲛⲉⲧⲁⲉⲟⲩⲱϩ ⲉⲧⲟⲟⲧⲛ̅ ⲉⲃⲱⲕ ⲉⲃⲟⲗ ⲉⲙⲓϣⲉ ⲙⲛ̅Ⲃⲉⲛⲓⲁⲙⲓⲛ ⲡⲁⲥⲟⲛ ϫⲛ̅ ⲧⲁⲣⲉⲛϭⲱ : ⲠⲉϫⲉⲠϫⲟⲉⲓⲥ ⲛⲁⲩ ϫⲉ ⲃⲱⲕ ⲉϩⲣⲁⲓ ⲉⲣⲱⲟⲩ ϫⲉ ⲣⲁⲥⲧⲉ ϯⲛⲁⲧⲁⲁⲩ ⲉϩⲣⲁⲓ ⲉⲧⲟⲟⲧⲧⲏⲩⲧⲛ̅. Ⲁⲩⲱ ⲡⲒⲥⲣⲁⲏⲗ ⲁϥⲕⲱ ⲛ̅ⲟⲩⲙ̅ⲗⲁϩ ⲉϥⲟ ⲛ̅ⲕⲣⲟϥ ϩⲙ̅ⲡⲕⲱⲧⲉ ⲛ̅Ⲅⲁⲃⲁⲁ: Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲃⲱⲕ ⲉϩⲣⲁⲓ ⲉⲣⲱⲟⲩ ⲛ̅ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ ϩⲙ̅ⲡⲙⲉϩϣⲟⲙⲛ̅ⲧ ⲛ̅ϩⲟⲟⲩ ⲁⲩⲱ ⲁⲩⲙⲓϣⲉ ⲙⲛ̅Ⲅⲁⲃⲁⲁ ⲛ̅ⲑⲉ ⲛⲓⲥⲟⲡⲥⲟⲡ ⲉϣⲁⲩⲁⲁⲥ. Ⲁⲩⲱ ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ ⲁⲩⲉ̅ⲓ ⲉⲃⲟⲗ ⲁⲩⲁϩⲉⲣⲁⲧⲟⲩ ⲉⲡⲗⲁⲟⲥ ⲁⲩⲟⲩⲉ ⲉⲃⲟⲗ ⲛ̅ⲧⲡⲟⲗⲓⲥ ⲁⲩϫⲱⲛⲧ ⲟⲛ ⲉⲡⲁⲧⲁⲥⲥⲉ ⲉⲃⲟⲗ ϩⲙ̅ⲡⲗⲁⲟⲥ ⲛ̅ⲑⲉ ⲛ̅ϣⲟⲣⲡ̅ ϩⲛ̅ⲛⲉϩⲓⲟⲟⲩⲉ . Ⲧⲟⲩⲓ ⲙ̅ⲙⲟⲟⲩ ⲉⲥⲃⲏⲕ ⲉϩⲣⲁⲓ ⲉⲂⲁⲓⲑⲏⲗ . ⲁⲩⲱ ⲧⲕⲉⲟⲩⲉ̅ⲓ ⲉⲥⲃⲏⲕ ⲉⲄⲁⲃⲁⲁ ϩⲛ̅ⲧⲥⲱϣⲉ . ⲁⲩⲣⲱϩⲧ ⲉⲃⲟⲗ ϩⲙ̅ⲡⲒⲥⲣⲁⲏⲗ ⲙ̅ⲙⲁⲁⲃ ⲛ̅ⲣⲱⲙⲉ . Ⲁⲩⲱ ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ ⲡⲉϫⲁⲩ ⲛ̅ⲛⲉⲩⲉⲣⲏⲩ. ϫⲉ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲥⲉⲛⲁϩⲉ ⲛ̅ⲛⲁϩⲣⲁⲛ ⲛ̅ⲑⲉ ⲟⲛ ⲛ̅ⲧⲉϩⲟⲩⲓⲧⲉ. ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲡⲉϫⲁⲩ ϫⲉ ⲙⲁⲣⲉⲛⲡⲱⲧ ⲉⲡⲁϩⲟⲩ ⲛ̅ⲧⲛ̅ⲧⲣⲉⲩⲟⲩⲉ ⲉⲃⲟⲗ ⲛ̅ⲧⲡⲟⲗⲓⲥ ⲉⲛⲉϩⲓⲟⲟⲩⲉ . Ⲁⲩⲱ ⲛ̅ⲣⲱⲙⲉ ⲧⲏⲣⲟⲩ ⲙ̅ⲡⲒⲥⲣⲁⲏⲗ ⲁⲩⲧⲱⲟⲩⲛⲟⲩ ⲉⲃⲟⲗ ϩⲙ̅ⲡⲒⲥⲣⲁⲏⲗ ⲁⲩⲙⲓϣⲉ ϩⲛ̅Ⲃⲁⲁⲗⲑⲁⲙⲁⲣ. Ⲁⲩⲱ ⲡⲉⲙⲗⲁϩ ⲙ̅ⲡⲒⲥⲣⲁⲏⲗ ⲉⲧⲟ̅ ⲛ̅ⲕⲣⲟϥ ⲁϥⲉ̅ⲓ ⲉⲃⲟⲗ ϩⲙ̅ⲡⲉϥⲙⲁ ϩⲛ̅ⲙⲙⲁ ⲛ̅ϩⲱⲧⲡ̅ ⲛ̅Ⲅⲁⲃⲁⲁ. Ⲁⲩⲉ̅ⲓ ⲉⲃⲟⲗ ⲙ̅ⲡⲉⲙⲧⲟ ⲉⲃⲟⲗ ⲛ̅Ⲅⲁⲃⲁⲁ ⲉⲛⲁⲣ̅ⲟⲩⲧⲃⲁ ⲛ̅ⲣⲱⲙⲉ ⲛ̅ⲥⲱⲧⲡ̅ ⲉⲃⲟⲗ ϩⲙ̅ⲡⲒⲥⲣⲁⲏⲗ ⲧⲏⲣϥ̅ ⲁⲩⲛⲟϭ ⲛ̅ⲙ̅ⲗⲁϩ ϣⲱⲡⲉ . Ⲛ̅ⲧⲟⲟⲩ ⲇⲉ ⲙ̅ⲡⲟⲩⲉ̅ⲓⲙⲉ ϫⲉ ⲧⲕⲁⲕⲓⲁ ⲛⲁⲉⲓ ⲉϩⲣⲁⲓ ⲉϫⲱⲟⲩ. Ⲁⲩⲱ Ⲡϫⲟⲉⲓⲥ ⲁϥⲡⲁⲧⲁⲥⲥⲉ ⲛ̅Ⲃⲉⲛⲓⲁⲙⲓⲛ ⲙ̅ⲡⲉⲙⲧⲟ ⲉⲃⲟⲗ ⲙ̅ⲡⲒⲥⲣⲁⲏⲗ. Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲣⲱϩⲧ̅ ⲉⲃⲟⲗ ϩⲛ̅Ⲃⲉⲛⲓⲁⲙⲓⲛ ϩⲙ̅ⲡⲉϩⲟⲟⲩ ⲉⲧⲙ̅ⲙⲁⲩ ⲛ̅ⲧⲃⲁ ⲥⲛⲁⲩ ⲟⲩϭⲟⲥ ⲙⲛ̅ϣⲉ ⲛ̅ⲣⲱⲙⲉ . ⲛⲁⲓ ⲧⲏⲣⲟⲩ ⲉⲩⲧⲉⲕⲙ̅ⲥⲏϥⲉ. Ⲁⲩⲱ ⲁϥⲛⲁⲩ ⲛ̅ϭⲓⲂⲉⲛⲓⲁⲙⲓⲛ ϫⲉ ⲁⲩⲡⲗⲏⲅⲏ. Ⲁⲩⲱ ⲛ̅ⲛ̅ⲣⲱⲙⲉ ⲙ̅ⲡⲒⲥⲣⲁⲏⲗ ⲁⲩϯⲟⲩⲙⲁ ⲛ̅ⲟⲩⲱϣ ⲛ̅ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ ϫⲉ ⲁⲩⲕⲁϩⲧⲏⲩ ⲉⲡⲉⲙⲗⲁϩ ⲉⲧⲟ ⲛ̅ⲕⲣⲟϥ ⲡⲉⲛⲧⲁⲩⲕⲁⲁϥ ϩⲓⲣⲛ̅Ⲅⲁⲃⲁⲁ. ⲁⲩⲱ ⲡⲉⲙⲗⲁϩ ⲉⲧⲟ ⲛ̅ⲕⲣⲟϥ ⲁϥⲛⲉϩⲥⲉ ⲉϩⲣⲁⲓ ⲁⲩⲧⲁⲁⲩ ⲉⲣⲛ̅Ⲅⲁⲃⲁⲁ. Ⲁⲡⲉⲙⲗⲁϩ ⲡⲱⲣϣ̅ ⲉⲃⲟⲗ ⲁⲩⲡⲁⲧⲁⲥⲥⲉ ⲛ̅ⲧⲡⲟⲗⲓⲥ ⲧⲏⲣⲥ̅ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ . ⲁⲩⲱ ⲛⲉⲣⲉⲟⲩⲙⲁⲉⲓⲛ ϣⲟⲟⲡ ⲟⲩⲧⲱⲟⲩ ⲛ̅ⲛ̅ⲣⲱⲙⲉ ⲙ̅ⲡⲒⲥⲣⲁⲏⲗ. ⲙⲛ̅ⲡⲉⲙⲗⲁϩ ⲉⲧⲟ ⲛ̅ⲕⲣⲟϥ ⲉⲧⲣⲉⲩⲛⲉϩⲥⲉ ⲉϩⲣⲁⲓ ⲛ̅ⲟⲩⲕⲱϩⲧ ⲛ̅ⲕⲁⲡⲛⲟⲥ   ⲉⲃⲟⲗ ϩⲛ̅ⲧⲡⲟⲗⲓⲥ ⲛ̅ⲟⲩⲙⲁⲉⲓⲛ . ⲁⲩⲱ ⲛ̅ⲧⲉⲣⲟⲩⲛⲁⲩ ⲛ̅ϭⲓⲛ̅ⲣⲱⲙⲉ ⲙ̅ⲡⲒⲥⲣⲁⲏⲗ ϫⲉ ⲡⲉⲙⲗⲁϩ ⲛ̅ⲕⲣⲟϥ ⲁϥⲧⲱⲟⲩⲛ ⲁϥϫⲓⲄⲁⲃⲁⲁ . Ⲁⲩⲁϩⲉⲣⲁⲧⲟⲩ ϩⲙ̅ⲡⲙⲁ ⲙ̅ⲙⲓϣⲉ . ⲁⲩⲱ ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ ⲁⲩϫⲱⲛⲧ ⲉⲣⲱϩⲧ ϩⲙ̅ⲡⲒⲥⲣⲁⲏⲗ ⲙ̅ⲙⲁⲁⲃ ⲛ̅ⲣⲱⲙⲉ. Ⲁⲩⲱ ⲛ̅ⲧⲟⲟⲩ ⲡⲉϫⲁⲩ ϫⲉ ⲡⲁⲗⲓⲛ ⲥⲉϩⲏⲩϩⲓⲏ ⲙ̅ⲙⲟⲛ ⲛ̅ⲑⲉ ⲙ̅ⲡⲉⲙⲗⲁϩ ⲛ̅ϣⲟⲣⲡ ⲉⲛⲧⲁϥϣⲱⲡⲉ. Ⲁⲩⲱ ⲡⲙⲁⲓⲛ ⲙ̅ⲡⲕⲱϩⲧ ⲁϥⲁⲣⲭⲓ ⲛ̅ϫⲓⲥⲉ ⲉⲡⲉϩⲟⲩⲟ ⲉⲃⲟⲗ ϩⲓϫⲛ̅ⲧⲡⲟⲗⲓⲥ   ⲛ̅ⲑⲉ ⲛ̅ⲟⲩⲥⲧⲩⲗⲟⲥ ⲛ̅ⲕⲁⲡⲛⲟⲥ : Ⲁⲩⲱ ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ ⲁⲩϭⲱϣⲧ ⲉⲡⲁϩⲟⲩ ⲙ̅ⲙⲟⲟⲩ ⲁⲩⲱ ⲉⲓⲥ ⲡϣⲱϥ ⲛ̅ⲧⲡⲟⲗⲓⲥ   ⲁϥⲙⲟⲟϣⲉ ⲉϩⲣⲁⲓ ϣⲁⲧⲡⲉ . ⲁⲩⲱ ⲛ̅ⲣⲱⲙⲉ ⲙ̅ⲡⲒⲥⲣⲁⲏⲗ ⲁⲩⲕⲟⲧⲟⲩ ⲛ̅ⲣⲱⲙⲉ ϩⲱⲟⲩ ⲛ̅Ⲃⲉⲛⲓⲁⲙⲓⲛ ⲁⲩϣⲧⲟⲣⲧⲣ̅ ⲉⲃⲟⲗϫⲉ ⲁⲩⲛⲁⲩ ϫⲉ ⲁⲧⲕⲁⲕⲓⲁ ⲉⲛⲧⲁⲩⲁⲁⲥ ⲉⲓ ⲉϩⲣⲁⲓ ⲉϫⲱⲟⲩ. Ⲁⲩⲱ ⲁⲩⲕⲧⲉⲉⲓⲁⲧⲟⲩ ⲙ̅ⲡⲉⲙⲧⲟ ⲉⲃⲟⲗ ⲛ̅ⲛ̅ⲣⲱⲙⲉ ⲙ̅ⲡⲒⲥⲣⲁⲏⲗ ⲉⲧⲉϩⲓⲏ ⲉⲧϫⲓ ⲉⲃⲟⲗ ⲉⲧⲉⲣⲏⲙⲟⲥ. ⲁⲩⲡⲱⲧ ⲉⲡⲙⲁ ⲉⲧⲙ̅ⲙⲁⲩ. Ⲁⲩⲱ ⲡⲉⲙⲗⲁϩ ⲁϥⲧⲁϩⲟⲟⲩ ⲙⲛ̅ⲛⲉⲧϩⲛ̅ⲧⲡⲟⲗⲓⲥ ⲁⲩⲧⲁⲕⲟ ⲙ̅ⲙⲟⲟⲩ ϩⲛ̅ⲧⲉⲩⲙⲏⲧⲉ. ⲁⲩⲱ ⲁⲩⲣⲱϩⲧ ⲛ̅Ⲃⲉⲛⲓⲁⲙⲓⲛ ⲁⲩϯϩⲣⲟⲕ ⲛⲁϥ. ⲁⲩⲡⲱⲧ ⲛ̅ⲥⲱϥ ϫⲓⲛⲡⲉⲙⲧⲟ ⲉⲃⲟⲗ ⲛ̅Ⲅⲁⲃⲁⲁ ϣⲁⲙ̅ⲙⲁ ⲛ̅ϣⲁ ⲙ̅ⲡⲣⲏ ⲁⲩⲱ ⲁⲩϩⲉ ⲉⲃⲟⲗ ϩⲛ̅Ⲃⲉⲛⲓⲁⲙⲓⲛ ⲛ̅ϭⲓⲟⲩⲧⲃⲁ ⲙⲛ̅ϣⲙⲟⲩⲛ ⲛ̅ϣⲟ ⲛ̅ⲣⲱⲙⲉ . ⲛⲁⲓ ⲧⲏⲣⲟⲩ ⲉϩⲉⲛⲣⲱⲙⲉ ⲛⲉ ⲛ̅ⲇⲩⲛⲁⲧⲟⲥ . ⲁⲩⲱ ⲁⲩⲕⲧⲟⲟⲩ ⲉⲃⲟⲗ ⲁⲩⲡⲱⲧ ⲉ̅ⲧⲉⲣⲏⲙⲟⲥ ⲉⲧⲡⲉⲧⲣⲁ ⲛ̅ϩⲣⲉⲙⲙⲱⲛ . Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲡⲱⲧ ⲛ̅ⲥⲱⲟⲩ . ⲁⲩⲱ ⲁⲩⲧⲁⲕⲟ ⲉⲃⲟⲗ ⲛ̅ϩⲏⲧⲟⲩ ⲛ̅ⲟⲩϭⲓⲥⲧⲃⲁ ⲛ̅ⲣⲱⲙⲉ . Ⲁⲩⲱ ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲁⲩⲡⲱⲧ ⲛ̅ⲥⲱⲟⲩ ⲁⲩⲥⲣⲓⲧ ⲙ̅ⲙⲟⲟⲩ ϩⲛ̅ⲛⲉϩⲓⲟⲟⲩⲉ ϣⲁϩⲣⲁⲓ ⲉ̅Ⲅⲁⲗⲁⲁⲇ ⲁⲩⲣⲱϩⲧ ⲉⲃⲟⲗ ⲛ̅ϩⲏⲧⲟⲩ ⲛ̅ϣⲟ ⲥⲛⲁⲩ ⲛ̅ⲣⲱⲙⲉ. ⲁⲩⲱ ⲛⲉⲛⲧⲁⲩϩⲉ ⲧⲏⲣⲟⲩ ⲉⲃⲟⲗ ϩⲛ̅Ⲃⲉⲛⲓⲁⲙⲓⲛ ⲛⲉⲩⲛⲁⲣ̅ⲧⲃⲁ ⲥⲛⲁⲩ ⲟⲩϭⲟⲥ ⲛ̅ⲣⲱⲙⲉ ⲉⲩⲧⲉⲕⲙ̅ⲥⲏϥⲉ ϩⲙ̅ⲡⲉϩⲟⲟⲩ ⲉ̅ⲧⲙ̅ⲙⲁⲩ . ⲛⲁⲓ ⲧⲏⲣⲟⲩ ⲉϩⲉⲛⲣⲱⲙⲉ ⲛ̅ϫⲱⲱⲣⲉ ⲛⲉ . Ⲁⲩⲱ ⲛ̅ϣⲱϫⲡ ⲁⲩⲕⲧⲟⲟⲩ ⲁⲩⲡⲱⲧ ϣⲁϩⲣⲁⲓ ⲉⲧⲡⲉⲧⲣⲁ ⲛ̅Ⲣⲓⲙⲙⲱⲛ. ⲉⲩⲛⲁⲣ̅ⲥⲟⲟⲩ ⲛ̅ϣⲉ ⲛ̅ⲣⲱⲙⲉ. Ⲁⲩⲕⲱ ϥⲧⲟⲟⲩ ⲛ̅ⲉⲃⲟⲧ ϩⲁⲧⲡⲉⲧⲣⲁ ⲛ̅Ⲣⲓⲙⲙⲱⲛ. ⲁⲩⲱ ⲛ̅ⲣⲱⲙⲉ ⲙ̅ⲡⲒⲥⲣⲁⲏⲗ ⲁⲩⲥⲱⲧ ⲉⲛ̅ϣⲏⲣⲉ ⲙ̅Ⲃⲉⲛⲓⲁⲙⲓⲛ ⲁⲩⲡⲁⲧⲁⲥⲥⲉ ⲙ̅ⲙⲟⲥ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ . ⲛ̅ⲣⲱⲙⲉ ⲙⲛ̅ⲛ̅ⲧⲃ̅ⲛⲟⲟⲩⲉ ⲙⲛ̅ϩⲱⲃ ⲛⲓⲙ ⲉϥⲟⲛϩ̅ ⲛ̅ϩⲏⲧϥ̅ . ⲁⲩⲱ ⲁⲩⲣⲱⲕϩ̅ ⲛ̅ⲛ̅ⲡⲟⲗⲓⲥ ⲧⲏⲣⲟⲩ ⲉⲧⲙ̅ⲙⲁⲩ.

Ⲕ̅Ⲁ̅. Ⲁⲛ̅ⲣⲱⲙⲉ ⲇⲉ ⲙ̅ⲡⲒⲥⲣⲁⲏⲗ ⲁⲩⲉⲣⲏⲧ ⲛ̅ⲟⲩⲉⲣⲏⲧ ⲙ̅Ⲙⲁⲥⲥⲓⲫⲁ : Ϫⲉ ⲛ̅ⲛⲉⲟⲩⲁⲓ ⲉⲃⲟⲗ ⲛ̅ϩⲏⲧⲛ̅ ϯ ⲛ̅ⲧⲉϥϣⲉⲉⲣⲉ ⲉⲩⲂⲉⲛⲓⲁⲙⲓⲧⲏⲥ. Ⲡⲗⲁⲟⲥ ⲁϥⲃⲱⲕ ϭⲉ ⲉϩⲣⲁⲓ ⲁϥⲕⲱ ⲙ̅ⲙⲁⲩ ϣⲁⲡⲛⲁⲩ ⲛ̅ⲣⲟⲩϩⲉ ⲉⲩⲣⲓⲙⲉ ⲉⲩϫⲱ ⲙ̅ⲙⲟⲥ . ϫⲉ ⲉⲧⲁϥϣⲱⲡⲉ ⲛ̅ⲁϣ ⲛ̅ϩⲉ ⲱ Ⲡϫⲟⲉⲓⲥ ⲡⲛⲟⲩⲧⲉ ⲙ̅ⲡⲒⲥⲣⲁⲏⲗ ⲉϥϣⲟϫⲡ̅ ⲛ̅ϭⲓⲟⲩⲫⲩⲗⲏ ⲙ̅ⲡⲒⲥⲣⲁⲏⲗ ⲑ Ⲁϥϣⲱⲡⲉ ⲙ̅ⲡⲉϥⲣⲁⲥⲧⲉ ⲁⲡⲗⲁⲟⲥ ϩⲱⲱϥ ⲕⲉⲧⲟⲩⲑⲩⲥⲓⲁⲥⲧⲏⲣⲓⲟⲛ ⲁϥⲧⲁⲗⲉϩⲟⲗⲟⲕⲁⲧⲁⲩⲙⲁ ⲛ̅ⲟⲩϫⲁⲓ ⲉϩⲣⲁⲓ ⲉϫⲱϥ. Ⲁⲩⲱ ⲡⲉϫⲉⲛ̅Ⲓⲥⲣⲁⲓⲗⲓⲧⲏⲥ ⲉⲩϫⲱ ⲙ̅ⲙⲟⲥ .ϫⲉ ⲛⲓⲙ ⲉⲃⲟⲗ ϩⲛ̅ⲛⲉⲫⲩⲗⲏ   ⲙ̅ⲡⲒⲥⲣⲁⲏⲗ ⲡⲉⲧⲉⲙ̅ⲡϥ̅ⲉⲓ ⲉϩⲣⲁⲓ ⲉⲣⲁⲧϥ̅ ⲙ̅Ⲡϫⲟⲉⲓⲥ ⲉⲘⲁⲥⲥⲏⲫⲁⲑ ϩⲛ̅ⲟⲩⲉⲣⲏⲧ ⲅⲁⲣ ⲁⲩⲉⲣⲏⲧ ⲉⲧⲃⲉⲡⲉⲧⲉⲙ̅ⲡⲉϥϣⲱⲡⲉ ⲉⲘⲁⲥⲥⲏⲫⲁ ϫⲉ ⲉϥⲉⲙⲟⲩ. Ⲁⲩⲱ ⲡⲒⲥⲣⲁⲏⲗ ⲁϥϣⲱⲥⲙ̅ ⲛ̅ϩⲏⲧ ⲉⲧⲃⲉⲡϩⲓⲥⲉ ⲙ̅Ⲃⲉⲛⲓⲁⲙⲓⲛ ⲡⲉⲩⲥⲟⲛ ⲡⲉϫⲁⲩ ϫⲉ ⲁⲩϭⲁϫⲉⲟⲩⲫⲩⲗⲏ ⲉⲃⲟⲗ ϩⲙ̅ⲡⲒⲥⲣⲁⲏⲗ . Ⲧⲉⲛⲟⲩ ⲟⲩ ⲡⲉⲧⲛ̅ⲛⲁⲁⲁϥ ⲉⲧⲃⲉⲛ̅ⲕⲟⲟⲩⲉ ⲉⲧⲟ ⲛ̅ϩⲟⲩⲟ ⲉⲛⲧⲁⲩϣⲱϫⲡ̅ ⲉⲧⲃⲉϯⲥϩⲓⲙⲉ ⲛⲁⲩ . ⲁⲩⲱ ⲁⲛⲟⲛ ⲁⲛⲱⲣⲕ ⲙ̅Ⲡϫⲟⲉⲓⲥ ⲉⲧⲙ̅ϯϩⲓⲙⲉ ⲛⲁⲩ ⲉⲃⲟⲗ ϩⲛ̅ⲛⲉⲛϣⲉⲉⲣⲉ : Ⲁⲩⲱ ⲡⲉϫⲁⲩ ϫⲉ ⲛⲓⲙ ⲉⲃⲟⲗ ϩⲛ̅ⲛⲉⲫⲩⲗⲏ ⲙ̅ⲡⲒⲥⲣⲁⲏⲗ ⲡⲉⲧⲙ̅ⲡϥ̅ⲉⲓ ⲉϩⲣⲁⲓ ⲉⲣⲁⲧϥ̅ ⲙ̅Ⲡϫⲟⲉⲓⲥ ⲉⲘⲁⲥⲥⲏⲫⲁ. Ⲁⲩⲱ ⲉⲓⲥ ϩⲏⲏⲧⲉ ⲙ̅ⲡⲟⲩⲉⲓ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ⲛ̅ϭⲓⲛ̅ⲣⲱⲙⲉ ⲛ̅ⲉⲃⲟⲗ ϩⲛ̅Ⲓⲁⲃⲓϭ. ⲛ̅ⲧⲉⲄⲁⲗⲁⲁⲇ ⲉⲧⲉⲕⲕⲗⲏⲥⲓⲁ . ⲁⲩⲱ ⲡⲗⲁⲟⲥ ⲁⲩⲙⲟϣⲧϥ̅ ⲙ̅ⲡⲟⲩϩⲉ ⲉⲣⲱⲙⲉ ⲛ̅ϩⲏⲧⲟⲩ ⲉⲃⲟⲗ ϩⲛ̅ⲛⲉⲧⲟⲩⲏϩ ϩⲛ̅Ⲓⲁⲃⲏⲥ ⲛ̅ⲧⲉⲄⲁⲗⲁⲁⲇ : Ⲁⲩⲱ ⲧⲥⲩⲛⲁⲅⲱⲅⲏ ⲁⲥϫⲟⲟⲩ ⲉⲡⲙⲁ ⲉⲧⲙ̅ⲙⲁⲩ ⲙ̅ⲙⲛ̅ⲧⲥⲛⲟⲟⲩⲥ ⲛ̅ϣⲟ ⲛ̅ⲣⲱⲙⲉ ⲉⲃⲟⲗ ϩⲛ̅ⲛ̅ϣⲏⲣⲉ ⲙ̅ⲡⲒⲥⲣⲁⲏⲗ ⲛ̅ϣⲏⲣⲉ ⲛ̅ϫⲱⲱⲣⲉ . ⲁⲩⲱ ⲁⲩϩⲱⲛ ⲉⲧⲟⲟⲧⲟⲩ ⲉⲩϫⲱ ⲙ̅ⲙⲟⲥ ϫⲉ ⲃⲱⲕ ⲛ̅ⲧⲉⲧⲛ̅ⲡⲁⲧⲁⲥⲥⲉ ⲛ̅ⲛⲉⲧⲟⲩⲏϩ ϩⲛ̅Ⲓⲁⲃⲏⲥ ⲛ̅ⲧⲉⲄⲁⲗⲁⲁⲇ ϩⲛ̅ⲟⲩⲧⲁⲡⲣⲟ ⲛ̅ⲥⲏϥⲉ . ⲁⲩⲱ ⲛⲉϩⲓⲟⲙⲉ ⲙⲛ̅ⲡⲗⲁⲟⲥ ⲁⲩⲱ ⲡⲉⲓϣⲁϫⲉ ⲉⲧⲉⲧⲛⲉⲁⲁϥ ϩⲟⲟⲩⲧ ⲛⲓⲙ ⲁⲩⲱ ⲥϩⲓⲙⲉ ⲛⲓⲙ ⲉⲁⲥⲥⲟⲩⲛⲙⲁ ⲛ̅ⲛ̅ⲕⲟⲧⲕ̅ ⲛ̅ϩⲟⲟⲩⲧ ⲁⲣⲓⲥⲟⲩ ⲛ̅ⲁⲛⲁⲑⲉⲙⲁ ⲏ ⲛⲃⲟⲧⲉ. Ⲙ̅ⲡⲁⲣⲑⲉⲛⲟⲥ ⲇⲉ ϩⲁⲣⲉϩ ⲉⲣⲟⲟⲩ. ⲁⲩⲱ ⲁⲩⲉⲓⲣⲉ ϩⲓⲛⲁⲓ . ⲁⲩϭⲓⲛⲉ ⲉⲃⲟⲗ ϩⲛ̅ⲛⲉⲧⲟⲩⲏϩ ϩⲛ̅ⲛ̅Ⲓⲁⲃⲓⲥ ⲛ̅ⲧⲉⲄⲁⲗⲁⲁⲇ ⲛ̅ϥⲧⲟⲩϣⲉ ⲛ̅ϣⲉⲉⲣⲉ ϣⲏⲙ ⲙⲡⲁⲣⲑⲉⲛⲟⲥ ⲛⲁⲓ ⲉⲧⲉⲙ̅ⲡⲟⲩⲥⲟⲩⲛ̅ϩⲟⲟⲩⲧ̅   ⲉⲛ̅ⲕⲟⲧⲕ̅ ⲛⲙⲙⲁⲩ . Ⲁⲩⲛⲧⲟⲩ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ϩⲛ̅Ⲥⲏⲗⲱ ⲧⲁⲓ ⲉⲧϩⲙ̅ⲡⲕⲁϩ ⲛ̅Ⲭⲁⲛⲁⲁⲛ . ⲁⲩⲱ ⲁⲥϫⲟⲟⲩ ⲛ̅ϭⲓⲧⲥⲩⲛⲁⲅⲱⲅⲏ ⲧⲏⲣⲥ̅ ⲁⲩϣⲁϫⲉ ⲙⲛ̅ⲛϣⲏⲣⲉ ⲛ̅Ⲃⲉⲛⲓⲁⲙⲓⲛ ϩⲛⲧⲡⲉⲧⲣⲁ ⲛ̅Ϩⲣⲉⲙⲙⲱⲛ. ⲁⲩⲙⲟⲩⲧⲉ̅   ⲉⲣⲟⲟⲩ ⲉⲩⲉⲓⲣⲏⲛⲏ ⲛⲙ̅ⲙⲁⲩ . Ⲁⲩⲱ ⲛ̅ϣⲏⲣⲉ ⲛ̅Ⲃⲉⲛⲓⲁⲙⲓⲛ ⲁⲩⲕⲧⲟⲟⲩ ⲉⲣⲁⲧⲟⲩ ⲛⲛϣⲏⲣⲉ ⲙⲡⲒⲥⲣⲁⲏⲗ ⲛⲉⲩⲥⲛⲏⲩ ⲙⲡⲟⲩⲟⲉ̅ⲓϣ ⲉⲧⲙⲙⲁⲩ . ⲁⲩⲱ ⲛ̅ϣⲏⲣⲉ ⲙⲡⲒⲥⲣⲁⲏⲗ ⲁⲩϯ ⲛⲁⲩ ⲛ̅ⲛⲉϩⲓⲟⲙⲉ ⲛⲁⲓ ⲉⲛⲧⲁⲩϥⲓⲧⲟⲩ ⲉⲃⲟⲗ ϩⲛⲛϣⲉⲉⲣⲉ ⲛ̅Ⲓⲁⲃⲓⲥ ⲛ̅ⲧⲉⲄⲁⲗⲁⲁⲇ ⲛⲁⲓ ⲉⲛⲧⲁⲩϯⲁⲥⲟ ⲉⲣⲟⲟⲩ . ⲙ̅ⲡⲉⲩⲣⲱϣⲉ ⲇⲉ ⲉⲣⲟⲟⲩ ⲧⲏⲣⲟⲩ . Ⲡⲗⲁⲟⲥ ⲇⲉ ⲁϥⲙ̅ⲕⲁϩ ⲉⲧⲃⲉⲂⲉⲛⲓⲁⲙⲓⲛ ⲉⲙⲁⲧⲉ . ϫⲉ ⲁⲠϫⲟⲉⲓⲥ ⲡⲣ̅ϫ̅ⲛⲉⲫⲩⲗⲏ ⲙ̅ⲡⲒⲏ̅ⲗ̅ . ⲁⲩⲱ ⲡⲉϫⲁⲩ ⲛ̅ϭⲓⲛⲉⲡⲣⲉⲥⲃⲩⲧⲉⲣⲟⲥ ⲛ̅ⲧⲥⲩⲛⲁⲅⲱⲅⲏ . ϫⲉ ⲟⲩ ⲡⲉⲧⲛ̅ⲛⲁⲁⲁϥ ϫⲉⲕⲁⲥ ⲛⲉⲧⲥⲟϫⲡ̅ ⲉⲩⲉϫⲓⲥϩⲓⲙⲉ ⲛⲁⲩ . ⲉⲣⲉⲛⲁⲂⲉⲛⲓⲁⲙⲓⲛ ϥⲟⲧⲉ ⲉⲃⲟⲗ . Ⲡⲉϫⲁⲩ ⲟⲛ ⲉⲩϫⲱ ⲙ̅ⲙⲟⲥ . ϫⲉ ⲛ̅ⲁϣ ⲛ̅ϩⲉ ⲧⲉⲛⲛⲁϩⲁⲣⲉϩ ⲉⲛ̅ϣⲏⲣⲉ ⲙ̅Ⲃⲉⲛⲓⲁⲙⲓⲛ ⲉⲧⲃⲉϫⲉ ⲙⲁⲛϯⲛⲉⲛϣⲉⲉⲣⲉ ⲛⲁⲩ ⲛ̅ⲥϩⲓⲙⲉ. ⲁⲩⲉⲣⲏⲧ ⲅⲁⲣ ⲛ̅ϭⲓⲛ̅ϣⲏⲣⲉ ⲙ̅ⲡⲒⲏ̅ⲗ̅ . ϫⲉ ⲥⲁϩⲱϥ ⲉⲡⲉⲧϯⲧⲉϥϣⲉⲉⲣⲉ ⲉⲩϣⲏⲣⲉ ⲙ̅Ⲃⲉⲛⲓⲁⲙⲓⲛ . Ⲁⲩⲱ ⲧⲟⲧⲉ ⲡⲉϫⲁⲩ . ϫⲉ ϣⲁⲩⲣ̅ⲡϣⲁ ⲙ̅Ⲡϫⲟⲉⲓⲥ ⲧⲉⲣⲟⲙⲡⲉ ϩⲛ̅Ⲥⲏⲗⲱ ⲉⲧⲥⲁⲡⲉⲙϩⲓⲧ ⲙ̅Ⲃⲁⲓⲑⲓⲏⲗ ϩⲙ̅ⲡⲙⲁⲛ̅ϣⲁ ⲛ̅ⲧⲉϩⲓⲏ ⲙ̅ⲃⲱⲕ ⲉϩⲟⲩⲛ ⲉⲤⲩⲭⲉⲙ . ⲁⲩⲱ ⲉⲧϩⲙ̅ⲡⲣⲏⲥ ⲛ̅Ⲗⲉⲃⲟⲛⲁ. ⲁⲩⲱ ϥϩⲱⲛ ⲉⲛ̅ϣⲏⲣⲉ ⲙ̅Ⲃⲉⲛⲓⲁⲙⲓⲛ . ϫⲉ ⲁⲙⲟⲩ ⲛ̅ⲧⲉⲧⲛ̅ϩⲱⲡ ⲛ̅ϩⲟⲩⲛ ϩⲛ̅ⲙⲙⲁⲛ̅ⲉⲗⲟⲟⲗⲉ . Ⲕⲁⲛ ⲉϣϫⲉ ⲉⲧⲉⲧⲛ̅ⲛⲁⲩ ⲉⲣⲟⲩ ⲉⲩⲃⲱⲕ ⲉⲃⲟⲗ ⲛ̅ⲛ̅ϣⲉⲉⲣⲉ ⲛ̅Ⲥⲓⲗⲱ ⲉⲧⲣⲉⲩϭⲟⲥϭⲉⲥ ⲁⲙⲉⲓⲧⲛ̅ ⲉⲃⲟⲗ ⲡⲟⲩⲁ ⲡⲟⲩⲁ ⲛ̅ⲧⲉⲧⲛ̅ϭⲉⲡⲥϩⲓⲙⲉ ⲛⲏⲧⲛ̅ ⲉⲃⲟⲗ ϩⲛ̅ⲛ̅ϣⲉⲉⲣⲉ ⲛ̅ⲧⲉⲧⲛ̅ⲃⲱⲕ ⲉⲡⲧⲟϣ ⲙ̅Ⲃⲉⲛⲓⲁⲙⲓⲛ . Ⲉϣⲱⲡⲉ ⲛⲉⲩϣⲏⲣⲉ ⲉⲩⲉⲓ ⲛⲏⲧⲛ̅ ⲏ ⲛⲉⲩⲥⲛⲏⲩ ⲉϯ ⲛⲙ̅ⲙⲏⲧⲛ̅ ⲁⲣⲓⲧⲛ̅ⲟⲩⲱ ϩⲓⲛⲁⲓ . ϫⲉ Ⲕⲱ ⲙ̅ⲟⲛ ⲉⲃⲟⲗ ⲙ̅ⲉⲣⲱⲙⲉ ⲅⲁⲣ ⲛⲓⲙ ⲉⲃⲟⲗ ⲛ̅ϩⲏⲧⲛ̅ ⲉⲛⲥϩⲓⲙⲉ ⲛⲁϥ ⲉⲃⲟⲗ ϩⲙ̅ⲡⲡⲟⲗⲉⲙⲟⲥ . Ⲉⲡⲓⲇⲏ ⲅⲁⲣ ⲛ̅ⲧⲱⲧⲛ̅ ⲙ̅ⲡⲉⲧⲛ̅ⲧⲁⲁⲩ ⲛⲁⲛ ⲧⲱⲛ ⲁⲛ ⲛⲉ ϫⲉⲕⲁⲥ ⲉⲛⲟ ⲉⲣⲟⲛ. Ⲁⲩⲱ ⲛ̅ϣⲏⲣⲉ ⲙ̅Ⲃⲉⲛⲓⲁⲙⲓⲛ ⲁⲩⲉⲓⲣⲉ ϩⲓⲛⲁⲓ ⲁⲩϫⲓⲥϩⲓⲙⲉ ⲕⲁⲧⲁⲧⲉⲩⲏⲡⲉ ⲉⲃⲟⲗ ϩⲛ̅ⲛⲉⲧϭⲟⲥϭⲉⲥ ⲁⲩⲃⲱⲕ ⲉⲡⲁϩⲟⲩ ⲉⲧⲉⲩⲕⲗⲏⲣⲟⲛⲟⲙⲓⲁ. Ⲙⲛ̅ⲛ̅ⲥⲱⲥ ⲇⲉ ⲁⲩⲟⲩⲉϩⲙ̅ⲛⲉⲩⲡⲟⲗⲓⲥ ⲁⲩⲟⲩⲱϩ ⲛ̅ϩⲏⲧⲟⲩ . Ⲧⲟⲧⲉ ⲁⲩⲃⲱⲣϭ ⲉⲃⲟⲗ ⲙ̅ⲙⲁⲩ ⲛ̅ϭⲓⲛ̅ϣⲏⲣⲉ ⲙ̅ⲡⲒⲏ̅ⲗ̅ ⲡⲟⲩⲁ ⲡⲟⲩⲁ ⲙ̅ⲙⲟⲟⲩ ⲉⲧⲉⲫⲩⲗⲏ ⲁⲩⲱ   ⲉⲡⲉϥⲏⲓ ⲉⲩⲃⲱⲕ ⲉϩⲣⲁⲓ ⲉⲧⲉⲩⲕⲗⲏⲣⲟⲛⲟⲙⲓⲁ. ⲛⲉⲙⲛ̅ⲣ̅ⲣⲟ ⲅⲁⲣ ⲙ̅ⲙⲁⲩ ⲙ̅ⲡⲉⲓⲛⲁⲩ ϩⲙ̅ⲡⲒⲏ̅ⲗ̅. ⲁⲗⲗⲁ ⲉϣⲁⲣⲉⲣⲱⲙⲉ ⲛⲓⲙ ⲣ̅ⲡⲉⲧϩ̅ⲛⲁϥ.           :

ⲡϫⲱⲱⲙⲉ ⲛ̅ⲛⲣⲉϥϯϩⲁⲡ