---

Ⲙ̅ⲠⲀⲢⲢⲞⲒⲘⲒⲀ  Ⲛ̅ⲤⲞⲖⲞⲘⲰⲚ

---

Ⲙ̅ⲡⲁⲣϩⲟⲓⲙⲓⲁ   ⲛ̅Ⲥⲟⲗⲟⲙⲱⲛ  ⲡϣⲏⲣⲉ  ⲛⲆⲁⲩⲉⲓⲇ   ⲡⲉⲛⲧⲁϥⲣ̅ⲣⲣⲟ  ϩⲙⲡⲒⲏ̅ⲗ̅ . ⲃ̅. ⲉⲉⲓⲙⲉ  ⲉⲧⲥⲟⲫⲓⲁ  ⲙⲛ̅ⲧⲉⲥⲃⲱ  ⲉⲛⲟⲓ  ⲛⲛϣⲁϫⲉ  ⲛⲧⲙⲛⲧⲣⲙⲛϩⲏⲧ. ⲅ̅. ⲉϫⲓ  ⲙⲡⲉⲕⲧⲟ  ⲛϩⲉⲛϣⲁϫⲉ  ⲙⲛⲛⲃⲱⲗ  ⲛϩⲉⲛⲁⲓⲛⲓⲅⲙⲁ  ⲉⲛⲟⲓ   ⲛⲟⲩⲇⲓⲕⲁⲓⲟⲥⲩⲛⲏ  ⲙⲙⲉ  ⲁⲩⲱ  ⲉⲥⲟⲩⲧⲛⲟⲩϩⲁⲡ. ⲇ̅. ϫⲉ  ⲉⲓⲉϯ  ⲛⲟⲩⲙⲛⲧⲣⲉⲙⲛϩⲏⲧ  ⲛⲛⲃⲁⲗϩⲏⲧ  ⲁⲩⲱ  ⲟⲩⲁⲓⲥⲑⲏⲥⲓⲥ  ⲙⲛⲟⲩⲙⲉⲉⲩⲉ  ⲛⲟⲩϣⲏⲣⲉ  ϣⲏⲙ.  Ⲡⲥⲟⲫⲟⲥ  ⲅⲁⲣ  ⲉⲧⲛⲁⲥⲱⲧⲙ  ⲉⲛⲁⲓ  ϥⲛⲁⲣϩⲟⲩⲉⲥⲟⲫⲟⲥ  ⲡⲣⲙⲛϩⲏⲧ  ϫⲉ  ⲛⲁϫⲡⲟ  ⲛⲁϥ  ⲛⲟⲩϩⲙⲙⲉ. Ⲋ. ϥⲛⲁⲛⲟⲓ  ⲛⲟⲩⲡⲁⲣⲁⲃⲟⲗⲏ  ⲙⲛⲟⲩϣⲁϫⲉ  ⲉϥϩⲏⲡ  ⲛϣⲁϫⲉ  ⲛⲛⲥⲟⲫⲟⲥ  ⲙⲛⲛⲛⲉⲩⲁⲓⲛⲓⲅⲙⲁ. ⲍ̅. Ⲧⲁⲣⲭⲏ  ⲛ̅ⲧⲥⲟⲫⲓⲁ  ⲧⲉ  ⲑⲟⲧⲉ  ⲙ̅ⲡⲛⲟⲩⲧⲉ . ⲛⲁⲛⲟⲩⲧⲙⲛⲧⲣⲙⲛϩⲏⲧ  ⲇⲉ  ⲛⲟⲩⲟⲛ  ⲛⲓⲙ  ⲉⲧⲛⲁⲁⲁⲥ . Ⲧⲁⲣⲭⲏ  ⲛⲧⲁⲓⲥⲑⲏⲥⲓⲥ  ⲧⲉ  ⲧⲙⲛⲧⲙⲁⲓⲛⲟⲩⲧⲉ  ⲛⲁⲥⲉⲃⲏⲥ  ⲇⲉ  ⲛⲁⲥⲱϣϥ  ⲛⲧⲥⲟⲫⲓⲁ  ⲙⲛⲧⲉⲥⲃⲱ.  ⲏ̅.

Ⲥⲱⲧⲙ  ⲡⲁϣⲏⲣⲉ  ⲉⲧⲉⲥⲃⲱ  ⲙⲡⲉⲕⲉⲓⲱⲧ  ⲁⲩⲱ  ⲙⲡⲣⲕⲱ  ⲛⲥⲱⲕ  ⲛⲛⲁⲛⲥⲙⲙⲉ  ⲛⲧⲉⲕⲙⲁⲁⲩ. ⲑ̅. ⲕⲛⲁϫⲓ  ⲅⲁⲣ  ⲛⲟⲩⲕⲗⲟⲙ  ⲛϩⲙⲟⲧ  ⲉϫⲛⲧⲉⲕⲁⲡⲉ  ⲁⲩⲱ  ⲟⲩⲕⲗⲁⲗ  ⲛⲛⲟⲩⲃ  ⲉⲡⲉⲕⲙⲁⲕϩ. 

Ⲡⲁϣⲏⲣⲉ  ⲙⲡⲣⲧⲣⲉϩⲉⲛⲣⲱⲙⲉ  ⲛⲣⲉϥⲣⲛⲟⲃⲉ  ⲡⲗⲁⲛⲁ  ⲙⲙⲟⲕ  ⲓ̅ⲁ̅. ⲟⲩⲇⲉ  ⲙⲡⲣⲟⲩⲱϣ  ⲉⲩϣⲁⲛⲥⲉⲡⲥⲱⲡⲕ  ⲉⲩϫⲱ  ⲙ̅ⲙⲟⲥ ϫⲉ  ⲁⲙⲟⲩ  ⲛⲙⲙⲁⲛ  ⲛ̅ⲅ̅ⲕⲟⲓⲛⲱⲛⲓ  ⲉⲡⲉⲓϩⲱⲧⲃ̅.  ⲓ̅ⲃ̅. ⲛ̅ⲧⲛ̅ϩⲱⲧⲡ  ⲇⲉ  ⲉⲡⲕⲁⲛⲟⲩⲣⲱⲙⲉ  ⲛⲇⲓⲕⲁⲓⲟⲥ  ϩ̅ⲛ̅ⲟⲩϫⲓⲛ̅ϭⲟⲛⲥ̅. ⲓ̅ⲅ̅. ⲛ̅ⲧⲛ̅ⲟⲙⲕϥ  ⲇⲉ  ⲉϥⲟⲛϩ  ⲛⲑⲉ  ⲛⲁⲙⲛⲧⲉ  ⲁⲩⲱ  ⲛⲧⲛϥⲓ  ⲙⲡⲉϥⲣⲡⲙⲉⲉⲩⲉ  ⲉⲃⲟⲗ  ϩⲓϫⲙⲕⲁϩ  ⲛⲧⲛϫⲡⲟ  ⲛⲁⲛ  ⲛⲛⲉϥⲛⲕⲁ  ⲉⲧⲛⲁϣⲱⲟⲩ  ⲛⲧⲛⲙⲉϩⲛⲉⲛⲏⲓ  ⲛϣⲱⲗ. ⲓ̅ⲇ̅. ⲛ̅ⲅ̅ⲛⲟⲩϫⲉ  ⲙⲡⲉⲕⲕⲗⲏⲣⲟⲥ  ⲛⲙⲙⲁ̅  ⲛⲧⲉⲟⲩⲧⲱⲱⲙⲉ  ⲛ̅ⲟⲩⲱⲧ  ϣⲱⲡⲉ  ⲛⲁⲛ.  Ⲡⲁϣⲏⲣⲉ  ⲙ̅ⲡⲣ̅ⲃⲱⲕ  ϩⲓⲧⲉϩⲓⲏ  ⲛⲙ̅ⲙⲁⲩ  ⲣⲉⲕⲧⲧⲉⲕⲟⲩⲉⲣⲏⲧⲉ  ⲇⲉ  ⲉⲃⲟⲗ  ϩⲛⲛⲉⲩϩⲓⲟⲟⲩⲉ  ⲓ̅Ⲋ. ⲉⲣⲉⲛⲉⲩⲟⲩⲉⲣⲏⲧⲉ  ⲅⲁⲣ  ⲡⲏⲧ  ⲉⲩⲕⲁⲕⲓⲁ. ⲁⲩⲱ  ⲉⲩϭⲉⲡⲏ  ⲉⲡⲛ̅ⲥⲛⲟϥ  ⲉⲃⲟⲗ. ⲓ̅ⲍ̅. ⲛ̅ⲛⲉⲩⲡⲣ̅ϣϣⲛⲉ  ⲅⲁⲣ  ⲁⲛ  ⲉⲃⲟⲗ  ⲉⲛϩⲁⲗⲁⲧⲉ  ⲉⲡⲣⲁ. ⲓ̅ⲏ̅. Ⲛ̅ⲧⲟⲟⲩ  ⲅⲁⲣ  ⲉⲩⲙⲉⲧⲉⲭⲉ  ⲉϩⲉⲛⲥⲛⲟϥ  ⲉⲩⲥⲉⲩϩⲡⲉⲑⲟⲟⲩ  ⲛⲁⲩ  ⲉϩⲟⲩⲛ̅. ⲓ̅ⲑ̅. Ⲛⲁⲓ  ⲛⲉ  ⲛⲉϩⲓⲟⲟⲩⲉ  ⲛⲟⲩⲟⲛ  ⲛⲓⲙ  ⲉⲧϫⲱⲕ  ⲉⲃⲟⲗ  ⲛⲛⲛⲟⲃⲉ  ⲡϣⲟⲣϣⲣ  ⲇⲉ  ⲛⲛⲣⲱⲙⲉ  ⲙⲡⲁⲣⲁⲛⲟⲙⲟⲥ  ϩⲟⲟⲩ  ⲉⲩⲛⲁⲧⲁⲕⲟ  ⲅⲁⲣ  ⲛⲧⲉⲩⲯⲩⲭⲏ  ϩⲛ̅ⲧⲉⲩⲙⲛ̅ⲧⲁⲧϣⲁϥⲧ. 

Ⲥⲉⲥⲙⲟⲩ  ⲉⲧⲥⲟⲫⲓⲁ  ϩ̅ⲛ̅ⲛϩⲓⲣ.  ⲁⲩⲱ  ⲟⲩⲛⲧⲥⲡⲁⲣⲣⲏⲥⲓⲁ  ϩⲛⲛⲉⲡⲗⲁⲧⲓⲁ. ⲥⲉⲧⲁϣⲉⲟⲉⲓϣ  ⲇⲉ  ⲙⲙⲟⲥ  ϩⲓϫⲛⲛⲕⲟⲟϩ  ⲛⲛⲥⲟⲃⲧ̅. ⲕ̅ⲁ̅. ϣⲁⲥϫⲟⲟⲥ  ⲇⲉ  ⲉⲥⲧⲏⲕ  ⲛϩⲏⲧ   ϩⲓϫⲛⲙⲡⲩⲗⲏ  ⲛⲙⲡⲟⲗⲓⲥ. ⲕ̅ⲃ̅. Ϫⲉ  ⲛ̅ⲟⲩⲟⲉⲓϣ  ⲛⲓⲙ  ⲉⲣⲉⲛ̅ⲃⲁⲗϩⲏⲧ  ϭⲟⲗϫ̅  ⲛ̅ⲧⲇⲓⲕⲁⲓⲟⲥⲩⲛⲏ  ⲥⲉⲛⲁϫⲓϣⲓⲡⲉ  ⲁⲛ  ⲛⲁⲑⲏⲧ  ⲇⲉ  ⲉⲩⲟ  ⲛ̅ⲣϥⲉⲡⲓⲑⲩⲙⲓ  ⲉⲡⲥⲱϣ  ⲛ̅ⲧⲉⲣⲟⲩⲣ̅ⲁⲥⲉⲃⲏⲥ  ⲁⲩⲙⲉⲥⲧⲉⲧⲁⲓⲥⲑⲏⲥⲓⲥ  ⲁⲩⲱ  ⲁⲩϣⲱⲡⲉ  ⲉⲩϭⲏⲡ  ⲉϩⲉⲛϫⲡⲓⲟ. ⲕ̅ⲅ̅. Ⲉⲓⲥ  ϩⲏⲏⲧⲉ  ϯⲛⲁϫⲱ  ⲛⲏⲧⲛ  ⲙ̅ⲡϣⲁϫⲉ  ⲛⲧⲁⲡⲛⲟⲏ . ϯⲛⲁⲧⲥⲁⲃⲱⲧⲛ  ⲇⲉ  ⲉⲡⲁϣⲁϫⲉ .  ⲕ̅ⲇ̅.

Ⲉⲡⲉⲓⲇⲏ  ⲁⲓⲙⲟⲩⲧⲉ  ⲉⲣⲱⲧⲛ̅  ⲙ̅ⲡⲉⲧⲛⲥⲱⲧⲙ̅  ⲉⲣⲟⲓ . ⲁⲩⲱ  ⲁⲓⲡⲣϣⲛⲁϣⲁϫⲉ  ⲉⲃⲟⲗ  ⲙ̅ⲡⲉⲧⲛ̅ϯϩⲧⲏⲧⲛ̅.  ⲁⲗⲗⲁ  ⲁⲧⲉⲧⲛ̅ⲧⲥ̅ⲧⲟ  ⲉⲃⲟⲗ  ⲛⲛⲁϣⲟϫⲛⲉ.  ⲁⲩⲱ  ⲁⲧⲉⲧⲛ̅ⲣ̅ⲁⲧⲥⲱⲧⲙ̅  ⲛⲥⲁⲛⲁϫⲡⲓⲟ. ⲕ̅Ⲋ. Ⲉⲧⲃⲉⲡⲁⲓ  ϩⲱ  ϯⲛⲁⲥⲱⲃⲉ  ⲛ̅ⲥⲁⲡⲉⲧⲛⲧⲁⲕⲟ  ϯⲛⲁⲣⲁϣⲉ  ⲇⲉ  ⲙ̅ⲙⲱⲧⲛ̅  ⲉⲣϣⲁⲛⲡⲧⲁⲕⲟ  ⲉⲓ  ⲉϫⲱⲧⲛ̅. ⲕ̅ⲍ̅. ⲁⲩⲱ  ⲉⲣϣⲁⲛⲡⲉϣⲧⲟⲣⲧⲣ̅  ⲧⲁϩⲉⲧⲏⲩⲧⲛ̅   ϩⲛ̅ⲟⲩϣⲥ̅ⲛⲉ . ⲛ̅ⲧⲉⲡϣⲟⲣϣⲣ̅  ⲉⲓ  ⲉϫⲱⲧⲛ̅  ⲛ̅ⲑⲉ  ⲛ̅ⲟⲩϩⲁⲧⲏⲩ . ⲏ̅  ⲉⲣϣⲁⲛⲡⲧⲁⲕⲟ  ⲉⲓ  ⲉϫⲱⲧⲛ̅  ⲁⲩⲱ  ⲉⲣϣⲁⲛⲟⲩⲑⲗⲓⲯⲓⲥ  ⲉⲓ  ⲛⲏⲧⲛ̅  ⲙⲛ̅ⲟⲩⲕⲧⲟ  ⲉⲣⲱⲧⲛ̅. ⲕ̅ⲏ̅. ⲥⲛⲁϣⲱⲡⲉ  ⲅⲁⲣ  ⲛ̅ⲧⲉⲧⲛ̅ⲙⲟⲩⲧⲉ  ⲉϩⲣⲁⲓ  ⲟⲩⲃⲏⲓ  ⲁⲛⲟⲕ  ⲇⲉ  ⲛ̅ⲧⲁⲧⲙ̅ⲥⲱⲧⲙ̅  ⲉⲣⲱⲧⲛ̅   ⲛⲉⲑⲟⲟⲩ  ⲛⲁϣⲓⲛⲉ  ⲛⲥⲱⲓ  ⲛ̅ⲥⲉⲧⲙ̅ϭⲛ̅ⲧ̅.  ⲕ̅ⲑ̅. ⲁⲩⲙⲉⲥⲧⲉⲧⲥⲟⲫⲓⲁ  ⲅⲁⲣ  ⲁⲩⲱ  ⲙⲡⲟⲩⲥⲱⲧⲡ  ⲛⲁⲩ  ⲛ̅ⲧⲙⲛ̅ⲧⲙⲁⲓⲛⲟⲩⲧⲉ.   ⲁⲩⲱ  ⲙ̅ⲡⲟⲩⲉϣϯϩⲧⲏⲩ  ⲉⲛⲁϣⲟϫⲛⲉ  ⲁⲩⲗⲕϣⲁ  ⲇⲉ  ⲛ̅ⲥⲁⲛⲁϫⲡⲓⲟ.  ⲗ̅ⲁ̅. Ⲉⲧⲃⲉⲡⲁⲓ  ϭⲉ  ⲥⲉⲛⲁⲟⲩⲱⲙ  ⲛⲛ̅ⲕⲁⲣⲡⲟⲥ  ⲛ̅ⲧⲉⲩϩⲓⲏ  ⲁⲩⲱ  ⲥⲉⲛⲁⲥⲉⲓ  ⲛ̅ⲧⲉⲩⲙⲛ̅ⲧϣⲁϥⲧⲉ. ⲗ̅ⲃ̅. ⲉⲃⲟⲗ  ⲅⲁⲣ  ϫⲉ  ⲁⲩϫⲓ  ⲛ̅ϩⲉⲛⲕⲟⲩⲓ  ⲛ̅ϭⲟⲛⲥ̅  ⲥⲉⲛⲁϩⲟⲧⲃⲟⲩ . ⲁⲩⲱ  ⲡⲉϫⲛⲟ  ⲛⲁⲧⲁⲕⲉⲛⲁⲥⲉⲃⲏⲥ. ⲗ̅ⲅ̅. Ⲡⲉⲧⲥⲱⲧⲙ̅  ⲇⲉ  ⲉⲣⲟⲓ  ϥⲛⲁⲙ̅ⲧⲟⲛ  ⲙ̅ⲙⲟϥ  ϩⲛ̅ⲟⲩⲉⲓⲣⲏⲛⲏ  ⲉϥⲧⲁϫⲣⲏⲩ . ⲁⲩⲱ  ϥⲛⲁϭⲱ  ⲁϫⲛ̅ϩⲟⲧⲉ  ⲉⲃⲟⲗ  ϩⲙ̅ⲡⲉⲑⲟⲟⲩ  ⲛⲓⲙ.
 
Ⲃ̅. Ⲡⲁϣⲏⲣⲉ  ⲉⲕϣⲁⲛϫⲓ  ⲛ̅ⲛ̅ϣⲁϫⲉ  ⲛ̅ⲧⲁⲉⲛⲧⲟⲗⲏ  ⲛⲅ̅ϩⲟⲡⲟⲩ  ϩⲁⲧⲏⲕ . ⲡⲉⲕⲙⲁⲁϫⲉ  ⲛⲁⲥⲱⲧⲙ̅  ⲛ̅ⲥⲁⲧⲥⲟⲫⲓⲁ  ⲡⲉ. ⲃ̅. ⲁⲩⲱ  ⲕⲛⲁϯ  ⲙ̅ⲡⲉⲕϩⲏⲧ  ⲉⲩⲙⲛ̅ⲧⲥⲁⲃⲉ . ⲛⲅ̅ⲧⲁⲁⲥ  ⲇⲉ  ⲙ̅ⲡⲉⲕϣⲏⲣⲉ  ⲛ̅ⲥⲃⲱ. ⲅ̅. Ⲉϣⲱⲡⲉ  ⲅⲁⲣ  ⲉⲕϣⲁⲛⲙⲟⲩⲧⲉ  ⲟⲩⲃⲉⲧⲥⲟⲫⲓⲁ . ⲛⲅ̅ⲙⲟⲩⲧⲉ  ⲇⲉ  ⲉⲧⲁⲓⲥⲑⲏⲥⲓⲥ ϩⲛ̅ⲟⲩⲛⲟϭ  ⲛ̅ⲥⲙⲏ. ⲇ̅. ⲛⲅ̅ϣⲓⲛⲉ  ⲇⲉ ⲛ̅ⲥⲱⲥ  ⲛ̅ⲑⲉ  ⲛ̅ϩⲉⲛⲁϩⲟ  ⲛ̅ϩⲁⲧ. ⲛⲅ̅ϩⲟⲧϩⲧ̅  ⲛ̅ⲥⲱⲥ  ϩⲛ̅ⲟⲩⲟⲩⲣⲟⲧ.  Ⲧⲟⲧⲉ  ⲕⲛⲁⲛⲟⲓ  ⲛ̅ⲧⲙⲛ̅ⲧⲙⲁⲓⲛⲟⲩⲧⲉ . ⲛⲅ̅ϩⲉ  ⲉⲧⲁⲓⲥⲑⲏⲥⲓⲥ  ⲉⲧⲟⲩⲁⲁⲃ  ⲛ̅ⲧⲉⲧⲉⲕⲟⲩⲉⲣⲏⲧⲉ  ⲧⲙ̅ϫⲓϫⲣⲟⲡ. Ⲋ. Ⲡⲛⲟⲩⲧⲉ  ⲅⲁⲣ  ⲛⲁϯ  ⲛⲁⲕ  ⲛ̅ⲧⲥⲟⲫⲓⲁ  ⲉⲃⲟⲗ  ϩⲛ̅ⲣⲱϥ  ⲙⲛ̅ⲟⲩⲁⲓⲥⲑⲏⲥⲓⲥ  ⲙⲛ̅ⲟⲩⲙⲛ̅ⲧⲣⲙ̅ⲛ̅ϩⲏⲧ. ⲍ̅. ⲁⲩⲱ  ϣⲁϥⲥⲉⲩϩⲃⲟⲏⲑⲓⲁ  ⲉϩⲟⲩⲛ  ⲛ̅ⲛ̅ⲇⲓⲕⲁⲓⲟⲥ . ⲉϥⲣ̅ⲛⲁϣⲧⲉ  ⲉⲛⲉⲩϩⲓⲟⲟⲩⲉ. ⲏ̅. ⲉϥϩⲁⲣⲉϩ  ⲉⲛⲉϩⲓⲟⲟⲩⲉ  ⲛ̅ⲧⲙⲉ . ϣⲁϥϯϩⲧⲏϥ  ⲇⲉ  ⲉⲛⲉϩⲓⲟⲟⲩⲉ  ⲛ̅ⲛ̅ⲛⲁⲏⲧ. ⲑ̅. Ⲧⲁⲓ  ϭⲉ  ⲧⲉ  ⲑⲉ  ⲛ̅ϩⲟⲩⲟ   ⲉⲧⲕ̅ⲛⲁⲛⲟⲓ  ⲛⲧⲇⲓⲕⲁⲓⲟⲥⲩⲛⲏ  ⲙⲛ̅ⲧⲙⲉ . ⲟⲩⲛⲧⲉⲧⲙⲉ  ⲅⲁⲣ  ϩⲉⲛϩⲓⲟⲟⲩⲉ  ⲉⲩⲥⲟⲩⲧⲱⲛ . ⲁⲩⲱ  ϣⲁⲣⲉⲛⲉϩⲓⲟⲟⲩⲉ  ⲙ̅ⲡ̅ⲡⲉⲧⲛⲁⲛⲟⲩϥ  ⲥⲟⲟⲩⲧⲛ̅.  Ⲉⲣϣⲁⲛⲧⲥⲟⲫⲓⲁ  ⲅⲁⲣ  ⲉⲓ  ⲉⲡⲉⲕϩⲏⲧ . ⲁⲩⲱ  ⲛⲅ̅ⲙⲉⲉⲩⲉ  ⲉⲧⲁⲓⲥⲑⲏⲥⲓⲥ  ϫⲉ  ⲛⲁⲛⲟⲩⲥ  ⲛ̅ⲧⲉⲕⲯⲩⲭⲏ.  ⲓ̅ⲁ. Ⲡϣⲟϫⲛⲉ  ⲉⲧⲛⲁⲛⲩⲟϥ  ⲛⲁϩⲁⲣⲉϩ  ⲉⲣⲟⲕ  ⲡⲉ . ⲛ̅ⲧⲉⲡⲙⲉⲉⲩⲉ  ⲉⲧⲟⲩⲁⲁⲃ  ϯϩⲧⲏϥ  ⲉⲣⲟⲕ.  ⲓ̅ⲃ̅.  Ϫⲉ  ⲉϥⲉⲛⲁϩⲙⲉⲕ  ⲉⲩϩⲓⲏ  ⲉⲥϩⲟⲟⲩ. ⲁⲩⲱ  ⲉⲩⲣⲱⲙⲉ  ⲉⲛϥ̅ϫⲉⲗⲁⲁⲩ  ⲁⲛ  ⲙ̅ⲙⲉ. ⲓ̅ⲅ. Ⲱ  ⲛⲉⲧⲕⲱ  ⲛ̅ⲥⲱⲟⲩ   ⲛ̅ⲛⲉϩⲓⲟⲟⲩⲉ  ⲉⲧⲥⲟⲩⲧⲱⲛ . ⲉⲧⲥⲱⲧⲡ̅  ⲛⲁⲩ  ⲛ̅ϩⲉⲛϩⲓⲟⲟⲩⲉ  ⲛ̅ⲕⲁⲕⲉ. ⲓ̅ⲇ. ⲛⲉⲧⲉⲩⲫⲣⲁⲛⲉ  ⲉϫⲛ̅ⲛ̅ⲣⲉϥⲑⲣⲡⲉⲑⲟⲟⲩ. ⲉⲧⲥⲱⲃⲉ  ⲉϫⲛ̅ⲛⲉⲑⲟⲟⲩ.  Ⲛⲁⲓ  ⲉⲣⲉⲛⲉⲩϩⲓⲟⲟⲩⲉ  ϭⲟⲟⲙⲉ. ⲁⲩⲱ  ⲉⲣⲉⲛⲉⲩⲙⲁⲙ̅ⲙⲟⲟϣⲉ  ϫⲏⲩ  ⲛ̅ⲕⲟⲧⲥ̅ . ⲓ̅Ⲋ. ⲉⲧⲣⲉⲕⲟⲩⲉ  ⲁⲩⲱ  ⲉⲁⲁⲕ  ⲛ̅ϣⲙ̅ⲙⲟ  ⲉⲧⲉⲅⲛⲱⲙⲏ  ⲛⲛⲇⲓⲕⲁⲓⲟⲥ. ⲓ̅ⲍ. Ⲡⲁϣⲏⲣⲉ  ⲙ̅ⲡⲣ̅ⲧⲣⲉⲟⲩϣⲟϫⲛⲉ  ⲉϥϩⲟⲟⲩ  ⲧⲁϩⲟⲕ . ⲡⲁⲓ  ⲉⲧⲕⲱ  ⲛ̅ⲥⲱϥ  ⲛ̅ⲧⲉⲥⲃⲱ  ϫⲓⲛⲧⲉϥⲙⲛ̅ⲧⲕⲟⲩⲓ . ⲁⲩⲱ  ⲉⲧⲟⲃϣ̅  ⲉⲧⲇⲓⲁⲑⲏⲕⲏ  ⲉⲧⲟⲩⲁⲁⲃ. ⲓ̅ⲏ. ⲁϥⲕⲁⲡⲉϥⲏⲓ ⲅⲁⲣ  ϩⲁⲧⲙ̅ⲡⲙⲟⲩ . ⲁⲩⲱ  ⲉⲣⲉⲛⲉϥⲙⲁⲙ̅ⲙⲟⲟϣⲉ  ⲙⲛ̅ⲛ̅ⲣⲱⲙⲉ  ϩⲁⲧⲛ̅ⲁⲙⲛ̅ⲧⲉ. ⲓ̅ⲑ. Ⲛⲛⲉⲟⲩⲟⲛ  ⲛⲓⲙ  ⲉⲧⲥⲟⲟⲩϩ  ⲉⲣⲟϥ  ⲕⲟⲧⲟⲩ . ⲁⲩⲱ  ⲛ̅ⲛⲉⲩⲧⲁϩⲉⲛⲉϩⲓⲟⲟⲩⲉ  ⲙ̅ⲡⲱⲛϩ . ⲁⲗⲗⲁ  ⲥⲉⲛⲁⲣ̅ⲡⲕⲉⲣ̅ϩⲧⲏⲩ .  ⲛ̅ⲛⲉⲣⲟⲙⲡⲉ  ⲅⲁⲣ  ⲙ̅ⲡⲱⲛϩ̅  ⲧⲁϩⲟⲟⲩ.  Ⲉⲛⲉⲛⲧⲁⲩⲙⲟⲟϣⲉ  ⲅⲁⲣ  ϩⲓⲛⲉϩⲓⲟⲟⲩⲉ  ⲉⲧⲛⲁⲛⲟⲩⲟⲩ . ⲛⲉⲩⲛⲁϭⲛ̅ⲛⲉϩⲓⲟⲟⲩⲉ  ⲛ̅ⲛ̅ⲇⲓⲕⲁⲓⲟⲥ  ⲉⲩⲥⲗⲉϭⲗⲱϭ  ⲡⲉ. ⲕ̅ⲁ̅. Ⲛⲉⲧⲛⲁⲛⲟⲩⲟⲩ  ⲛⲁⲟⲩⲱϩ  ϩⲓϫⲙ̅ⲡⲕⲁϩ . ⲛ̅ⲃⲁⲗϩⲏⲧ  ⲇⲉ  ⲛⲁϣⲱϫⲡ̅  ϩⲓϫⲱϥ . ϫⲉ  ⲛⲉⲧⲥⲟⲩⲧⲱⲛ  ⲛⲁⲟⲩⲱϩ  ϩⲙ̅ⲡⲕⲁϩ . ⲁⲩⲱ  ⲛⲉⲧⲟⲩⲁⲁⲃ  ⲛⲁϣⲱϫⲡ̅  ϩⲓϫⲱϥ. ⲕ̅ⲃ̅. Ⲥⲉⲛⲁⲱϫⲛ̅  ⲛ̅ⲧⲟⲟⲩⲛ  ⲛ̅ⲁⲥⲉⲃⲏⲥ  ϩⲓϫⲙ̅ⲡⲕⲁϩ . ⲁⲩⲱ  ⲙ̅ⲡⲁⲣⲁⲛⲟⲙⲟⲥ  ⲥⲉⲛⲁϥⲟⲧⲟⲩ  ⲉⲃⲟⲗ  ϩⲓϫⲱϥ.
 
Ⲅ̅. Ⲡⲁϣⲏⲣⲉ   ⲙ̅ⲡⲣ̅ⲣ̅ⲡⲱⲃϣ  ⲛ̅ⲛⲁⲛⲥⲙ̅ⲙⲉ . ⲁⲩⲱ  ⲙⲁⲣⲉⲡⲉⲕϩⲏⲧ  ϩⲁⲣⲉϩ  ⲉⲛⲁϣⲁϫⲉ. ⲃ̅. Ⲥⲉⲛⲁⲟⲩⲱϩ  ⲅⲁⲣ  ⲉⲣⲟⲕ  ⲛ̅ⲟⲩⲛⲟϭ  ⲛ̅ⲁϩⲉ  ⲙⲛ̅ϩⲉⲛⲣⲙ̅ⲡⲟⲟⲩⲉ  ⲛ̅ⲱⲛϩ̅ ⲙⲛ̅ⲟⲩⲉⲓⲣⲏⲛⲏ. ⲅ̅. Ⲙ̅ⲡⲣ̅ⲧⲣⲉⲙ̅ⲙⲛ̅ⲧⲛⲁ ⲇⲉ  ⲕⲁⲁⲕ  ⲙⲛ̅ⲧⲡⲓⲥⲧⲓⲥ  ⲙⲛ̅ⲧⲙⲉ. ⲙⲟⲣⲟⲩ  ⲇⲉ  ⲉⲡⲉⲕⲙⲁⲕϩ̅. ⲇ̅. Ϫⲡⲟ  ⲇⲉ  ⲛⲁⲕ  ⲛ̅ⲟⲩϩⲙⲟⲧ  ⲙⲛ̅ⲟⲩⲙⲉⲉⲩⲉ  ⲉⲛⲁⲛⲟⲩϥ  ⲙ̅ⲡⲉⲙⲧⲟ  ⲉⲃⲟⲗ  ⲙ̅Ⲡϫⲟⲉⲓⲥ  ⲙⲛ̅ⲛ̅ⲣⲱⲙⲉ.  Ϣⲱⲡⲉ  ⲉⲕⲛⲁϩⲧⲉ  ϩⲙ̅ⲡⲉⲕϩⲏⲧ  ⲧⲏⲣϥ̅  ⲉⲡⲛⲟⲩⲧⲉ  ⲁⲩⲱ  ⲙ̅ⲡⲣ̅ϫⲓⲥⲉ  ⲙ̅ⲙⲟⲕ  ⲉϫⲛ̅ⲧⲉⲕⲥⲟⲫⲓⲁ. Ⲋ. Ⲟⲩⲟⲛϩⲥ̅  ⲉⲃⲟⲗ  ϩⲛ̅ⲛⲉⲕϩⲓⲟⲟⲩⲉ  ⲧⲏⲣⲟⲩ . ϫⲉⲕⲁⲥ  ⲉⲥⲉⲥⲟⲟⲩⲧⲛ̅  ⲛ̅ⲛⲉⲕϩⲓⲟⲟⲩⲉ. ⲛ̅ⲧⲉⲧⲉⲕⲟⲩⲉⲣⲏⲧⲉ  ⲧⲙ̅ϫⲓϫⲣⲟⲡ. ⲍ̅. Ⲙ̅ⲡⲣ̅ϣⲱⲡⲉ  ⲛⲁⲕ  ⲛ̅ⲥⲁⲃⲉ  ⲛ̅ⲟⲩⲁⲁⲕ . ⲁⲣⲓϩⲟⲧⲉ  ⲛ̅ⲧⲟϥ  ϩⲏⲧϥ̅  ⲙ̅ⲡⲛⲟⲩⲧⲉ  ⲛⲅ̅ⲣⲁⲧⲕ̅  ⲉⲃⲟⲗ  ⲙ̅ⲡⲉⲑⲟⲟⲩ  ⲛⲓⲙ. ⲏ̅. Ⲧⲟⲧⲉ  ⲟⲩⲛⲟⲩⲧⲁⲗϭⲟ  ⲛⲁϣⲱⲡⲉ  ⲙ̅ⲡⲉⲕⲥⲱⲙⲁ . ⲁⲩⲱ  ⲟⲩϥⲓⲡⲣⲟⲟⲩϣ  ⲛ̅ⲛⲉⲕⲕⲉⲉⲥ : ⲑ̅. Ⲡⲁϣⲏⲣⲉ  ⲙⲁⲧⲁⲓⲉⲡⲛⲟⲩⲧⲉ  ⲉⲃⲟⲗ  ϩⲛ̅ⲛⲉⲕϩⲓⲥⲉ  ⲙ̅ⲙⲉ. ⲁⲩⲱ  ⲛⲅ̅ϯ  ⲛⲁϥ  ⲛ̅ⲛⲉϩⲟⲩⲁⲧⲉ  ⲉⲃⲟⲗ  ϩⲛ̅ⲛⲉⲕⲕⲁⲣⲡⲟⲥ  ⲛ̅ⲧⲉⲧⲇⲓⲕⲁⲓⲟⲥⲩⲛⲏ.  Ϫⲉ  ⲉⲣⲉⲛⲉⲕⲧⲁⲙⲓⲟⲛ  ⲙⲟⲩϩ  ⲛ̅ⲥⲟⲩⲟ. ⲁⲩⲱ  ⲛ̅ⲧⲉⲛⲉⲕⲉⲓⲟⲙ  ⲙⲟⲩϩ  ⲛ̅ⲏⲣⲡ̅ : ⲓ̅ⲁ. Ⲡⲁϣⲏⲣⲉ  ⲙ̅ⲡⲣ̅ⲣⲕⲟⲩⲓ  ⲛ̅ϩⲏⲧ  ϩⲛ̅ⲧⲉⲥⲃⲱ  ⲙ̅Ⲡϫⲟⲉⲓⲥ . ⲟⲩⲇⲉ  ⲙ̅ⲡⲣ̅ϣⲱⲥⲙ̅  ⲉⲩϫⲡⲓⲟ   ⲙ̅ⲙⲟⲕ  ⲉⲃⲟⲗ  ϩⲓⲧⲟⲟⲧϥ̅. ⲓ̅ⲃ. Ϣⲁⲣⲉⲡⲛⲟⲩⲧⲉ  ⲅⲁⲣ  ϯⲥⲃⲱ  ⲙ̅ⲡⲉⲧϥ̅ⲙⲉ   ⲙ̅ⲙⲟϥ. ϣⲁϥⲙⲁⲥⲧⲓⲅⲟⲩ  ⲇⲉ  ⲛ̅ϣⲏⲣⲉ  ⲛⲓⲙ  ⲉⲧϥ̅ⲛⲁϣⲟⲡⲟⲩ  ⲉⲣⲟϥ . ⲛ̅ⲧⲟϥ  ⲅⲁⲣ  ϥⲛⲁⲙⲟⲕ̅ϩ̅ⲕ̅  ⲁⲩⲱ  ⲛ̅ϥ̅ⲧⲁϩⲟⲕ  ⲉⲣⲁⲧⲕ̅  ⲟⲛ.  ⲓ̅ⲅ.

Ⲛⲁⲓⲁⲧϥ̅  ⲙ̅ⲡⲣⲱⲙⲉ  ⲉⲛⲧⲁϥϩⲉ ⲉⲧⲥⲟⲫⲓⲁ . ⲁⲩⲱ  ⲡⲣⲱⲙⲉ  ⲉⲛⲧⲁϥϩⲉ  ⲉⲧⲙⲛ̅ⲧⲥⲁⲃⲉ. ⲓ̅ⲇ. Ⲥ̅ⲥⲟⲧⲡ̅  ⲅⲁⲣ  ⲉⲣ̅ϩⲱⲃ  ⲛ̅ϩⲏⲧⲥ̅  ⲉϩⲟⲩⲉⲛⲁϩⲱⲱⲣ  ⲙⲡⲛⲟⲩⲃ  ⲙ̅ⲛ̅ⲡϩⲁⲧ.   Ⲥⲧⲁⲓⲏⲩ  ⲇⲉ  ⲉⲛⲉⲛⲉ  ⲙ̅ⲙⲉ .  ⲙ̅ⲛ̅ⲗⲁⲁⲩ  ⲙ̅ⲡⲉⲑⲟⲟⲩ  ⲛⲁϯⲟⲩⲃⲏⲥ . Ⲥⲟⲩⲟⲛ̅ϩ̅  ⲇⲉ  ⲉⲃⲟⲗ  ⲛ̅ⲟⲩⲟⲛ  ⲛⲓⲙ  ⲉⲧϩⲏⲛ  ⲉⲣⲟⲥ . ⲛⲉⲧⲧⲁⲓⲏⲩ  ⲇⲉ  ⲧⲏⲣⲟⲩ  ⲙ̅ⲡϣⲁ  ⲙ̅ⲙⲟⲥ  ⲁⲛ. ⲓ̅Ⲋ. Ⲟⲩⲛⲟϭ  ⲅⲁⲣ  ⲛ̅ⲁϩⲉ  ⲙ̅ⲛϩⲉ̅ⲣ̅ⲙ̅ⲡⲟⲟⲩⲉ  ⲛ̅ⲱⲛϩ̅  ⲛⲉⲧϩⲛ̅ⲧⲉⲥⲟⲩⲛⲁⲙ . ⲁⲩⲱ  ⲟⲩⲉⲟⲟⲩ  ⲙⲛ̅ⲟⲩⲙⲛ̅ⲧⲣⲙ̅ⲙⲁⲟ  ⲛⲉⲧϩⲛ̅ⲧⲉⲥϩⲃⲟⲩⲣ.   Ⲉⲣⲉⲧⲇⲓⲕⲁⲓⲟⲥⲩⲛⲏ  ⲛⲏⲩ  ⲉⲃⲟⲗ  ϩⲛ̅ⲣⲱⲥ . ⲥⲫⲟⲣⲓ  ⲇⲉ  ⲙ̅ⲡⲛⲟⲙⲟⲥ   ⲙ̅ⲛ̅ⲡⲛⲁ  ϩⲓⲡⲉⲥⲗⲁⲥ. ⲓ̅ⲍ̅. Ϩⲉⲛϩⲓⲟⲟⲩⲉ   ⲉⲛⲁⲛⲟⲩⲟⲩ  ⲛⲉ  ⲛⲉⲥϩⲓⲟⲟⲩⲉ. ⲁⲩⲱ  ⲛⲉⲥⲛⲙⲁ  ⲙ̅ⲙⲟⲟϣⲉ  ⲧⲏⲣⲟⲩ  ϩⲛ̅ⲟⲩⲉⲓⲣⲏⲛⲏ.  ⲓ̅ⲏ. Ⲟⲩϣⲏⲛ  ⲛ̅ⲱⲛ̅ϩ̅  ⲧⲉ  ⲟⲩⲟⲛ  ⲛⲓⲙ   ⲉⲧⲕⲱ  ⲛ̅ϩⲧⲏⲩ  ⲉⲣⲟⲥ  ⲁⲩⲱ  ⲥⲧⲁϫⲣⲏⲩ  ⲉϫⲛ̅ⲛⲉⲧⲧⲁϫⲣⲟ  ⲙ̅ⲙⲟⲟⲩ  ⲉϫⲱⲥ  ⲛ̅ⲑⲉ  ⲛ̅ⲛⲉⲧⲁϫⲣⲏⲩ  ⲉϫⲙ̅Ⲡϫⲟⲉⲓⲥ. ⲓ̅ⲑ. Ⲁⲡⲛⲟⲩⲧⲉ  ⲥⲙ̅ⲛ̅ⲥⲛ̅ⲧⲉ  ⲙ̅ⲡⲕⲁϩ  ϩⲛ̅ⲧⲥⲟⲫⲓⲁ. ⲁϥⲥⲟⲃⲧⲉ  ⲇⲉ  ⲛⲙⲡⲏⲩⲉ  ϩ̅ⲛ̅ⲧⲉϥⲙ̅ⲛ̅ⲧⲥⲁⲃⲉ.  Ⲁⲛⲛⲟⲩⲛ  ⲇⲉ ⲟⲩⲱⲛ  ϩⲛ̅ⲟⲩⲁⲓⲥⲑⲏⲥⲓⲥ . ⲁⲛⲉⲕⲗⲟⲟⲗⲉ  ⲇⲉ  ϣⲟⲩⲉⲉⲓⲱⲧⲉ  ⲉϩⲣⲁⲓ.  ⲕ̅ⲁ̅.

Ⲡⲁϣⲏⲣⲉ  ⲙ̅ⲡⲣ̅ⲃⲱⲗ  ⲉⲃⲟⲗ . ϩⲁⲣⲉϩ  ⲇⲉ  ⲉⲡⲁϣⲟϫⲛⲉ  ⲙ̅ⲛ̅ⲡⲁⲙⲉⲉⲩⲉ. ⲕ̅ⲃ̅. ϫⲉ  ⲉⲣⲉⲧⲉⲕⲯⲩⲭⲏ  ⲱⲛϩ̅ . ⲛ̅ⲧⲉⲟⲩⲭⲁⲣⲓⲥ  ϣⲱⲡⲉ  ϩⲓⲡⲉⲕⲙⲁⲕϩ̅ . Ⲧⲟⲧⲉ  ⲟⲩⲛⲟⲩⲧⲁⲗϭⲟ  ⲛⲁϣⲱⲡⲉ  ⲛ̅ⲛⲉⲕⲥⲁⲣⲝ̅ . ⲁⲩⲱ  ⲟⲩϥⲓⲡⲣⲟⲟⲩϣ  ⲛ̅ⲛⲉⲕⲕⲉⲉⲥ. ⲕ̅ⲅ̅. Ϫⲉ  ⲉⲕⲉⲙⲟⲟϣⲉ  ⲉⲕⲛⲁϩⲧⲉ  ϩⲛ̅ⲟⲩⲉⲓⲣⲏⲛⲏ  ⲛ̅ⲛⲉⲕϩⲓⲟⲟⲩⲉ  ⲧⲏⲣⲟⲩ . ⲁⲩⲱ  ⲧⲉⲕⲟⲩⲉⲣⲏⲧⲉ  ⲛⲁϫⲓϫⲣⲟⲡ  ⲁⲛ. ⲕ̅ⲇ̅. ⲁⲩⲱ  ⲉⲕϣⲁⲛⲛ̅ⲕⲟⲧⲕ̅  ⲕⲛⲁⲱⲃϣ̅  ⲉⲕⲙⲟⲧⲛ̅.  Ⲁⲩⲱ  ⲛ̅ⲛⲉⲕⲣ̅ϩⲟⲧⲉ  ϩⲏⲧⲥ̅  ⲛ̅ⲟⲩϩⲟⲧⲉ  ⲉⲥⲛⲏⲩ  ⲛⲁⲕ . ⲁⲩⲱ ⲟⲩⲟⲓ  ⲛ̅ⲛ̅ⲁⲥⲉⲃⲏⲥ  ⲉⲧⲛⲏⲩ.  ⲕ̅ⲏ̅.  Ⲡⲛⲟⲩⲧⲉ  ⲅⲁⲣ  ⲛⲁϣⲱⲡⲉ  ϩⲓⲛⲉⲕϩⲓⲟⲟⲩⲉ  ⲧⲏⲣⲟⲩ  ⲛ̅ϥ̅ⲧⲁϫⲣⲉⲛⲉⲕⲟⲩⲉⲣⲏⲧⲉ  ϫⲉ  ⲛ̅ⲛⲉⲕⲕⲓⲙ. ⲕ̅ⲍ̅.

Ⲙ̅ⲡⲣ̅ⲗⲟ  ⲉⲕⲣ̅ⲡⲉⲧⲛⲁⲛⲟⲩϥ  ⲙ̅ⲡⲉⲧⲣ̅ϭⲣⲱϩ  ⲉⲩⲛ̅ⲧⲉⲧⲉⲕϭⲓϫ  ⲉⲃⲟⲏⲑⲓ. ⲕ̅ⲏ̅. Ⲙ̅ⲡⲣ̅ϫⲟⲟⲥ  ϫⲉ  ⲃⲱⲕ  ⲛⲅ̅ⲕⲟⲧⲕ̅  ⲁⲩⲱ  ⲣⲁⲥⲧⲉ  ⲧⲁϯ  ⲛⲁⲕ  ⲉⲩⲛ̅ϭⲟⲙ  ⲙ̅ⲙⲟⲕ  ⲉⲣ̅ⲡⲉⲧⲛⲁⲛⲟⲩϥ . ⲛ̅ⲅ̅ⲥⲟⲟⲩⲛ  ⲅⲁⲣ  ⲁⲛ  ϫⲉ  ⲉⲣⲉⲣⲁⲥⲧⲉ  ⲛⲁϫⲡⲉⲟⲩ. ⲕ̅ⲑ̅.  Ⲙ̅ⲡⲣ̅ⲙⲉⲉⲩⲉ  ⲉϩⲉⲛⲡⲉⲑⲟⲟⲩ  ⲉⲡⲉⲕϣⲃⲏⲣ  ⲉⲧϭⲁⲗⲏⲩ  ⲉⲧⲕⲱ  ⲛ̅ϩⲧⲏϥ  ⲉⲣⲟⲕ.  Ⲙ̅ⲡⲣ̅ⲣ̅ⲙⲁⲓϫⲁϫⲉ  ⲉⲩⲣⲱⲙⲉ  ⲉⲡϫⲓⲛϫⲏ  ϫⲉⲕⲁⲥ  ⲉⲛⲛⲉϥⲣ̅ⲡⲉⲑⲟⲟⲩ  ⲛⲁⲕ. ⲗ̅ⲁ̅. Ⲙ̅ⲡⲣ̅ϫⲡⲟ  ⲛⲁⲕ  ⲛ̅ⲛ̅ⲛⲟϭⲛⲉϭ  ⲛ̅ⲛ̅ⲣⲱⲙⲉ  ⲉⲑⲟⲟⲩ . ⲟⲩⲇⲉ  ⲙ̅ⲡⲣ̅ⲕⲱϩ  ⲉⲛⲉⲩϩⲓⲟⲟⲩⲉ. ⲗ̅ⲃ̅. Ⲟⲩⲁⲕⲁⲑⲁⲣⲧⲟⲥ  ⲅⲁⲣ  ⲙ̅ⲡⲉⲙⲧⲟ  ⲉⲃⲟⲗ  ⲙ̅ⲡⲛⲟⲩⲧⲉ  ⲡⲉ  ⲟⲩⲣⲱⲙⲉ  ⲙ̅ⲡⲁⲣⲁⲛⲟⲙⲟⲥ . ⲁⲩⲱ  ⲛϥ̅ⲥⲱⲟⲩϩ  ⲉϩⲟⲩⲛ  ϩ̅ⲛ̅ⲛⲇⲓⲕⲁⲓⲟⲥ. ⲗ̅ⲅ̅. ⲉⲣⲉⲡⲥⲁϩⲟⲩ  ⲙ̅ⲡⲛⲟⲩⲧⲉ  ϩⲛ̅ⲛⲏⲓ  ⲛⲛⲁⲥⲉⲃⲏⲥ. ⲗ̅ⲇ̅. ⲥⲉⲛⲁⲥⲙⲟⲩ  ⲇⲉ  ⲉⲛⲣ̅ⲥⲟⲟⲩⲉ  ⲛ̅ⲛⲇⲓⲕⲁⲓⲟⲥ . ⲡⲛⲟⲩⲧⲉ  ⲛⲁϯ  ⲟⲩⲃⲉⲛ̅ϫⲁⲥⲓϩⲏⲧ .  ϥⲛⲁϯ  ⲇⲉ  ⲛ̅ⲟⲩϩⲙⲟⲧ  ⲛ̅ⲛⲉⲧⲑⲃ̅ⲃⲓⲏⲩ.   Ⲛ̅ⲥⲟⲫⲟⲥ  ⲛⲁⲕⲗⲏⲣⲟⲛⲟⲙⲉⲓ  ⲙ̅ⲡⲉⲟⲟⲩ . ⲛⲁⲑⲏⲧ  ⲇⲉ  ⲛⲁⲥⲱⲧⲡ̅  ⲛⲁⲩ  ⲛ̅ⲟⲩⲥⲱϣ  ⲉϥϫⲟⲥⲉ :
 
Ⲇ̅. Ⲥⲱⲧⲙ̅  ⲛⲁϣⲏⲣⲉ  ⲉⲧⲉⲥⲃⲱ  ⲙ̅ⲡⲉⲧⲛ̅ⲉⲓⲱⲧ . ⲁⲩⲱ  ϯϩⲧⲏⲧⲛ̅  ⲉⲉⲓⲙⲉ  ⲉⲩⲙⲉⲉⲩⲉ.  ⲃ̅. ⲟⲩⲇⲱⲣⲟⲛ  ⲅⲁⲣ  ⲉⲛⲁⲛⲟⲩϥ  ⲡⲉϯϯ  ⲙ̅ⲙⲟϥ  ⲛⲏⲧⲛ̅ . ⲙ̅ⲡⲣ̅ⲕⲱ  ⲛ̅ⲥⲱⲧⲛ̅  ⲙ̅ⲡⲁϣⲁϫⲉ.  ⲅ̅. ⲁⲓⲣ̅ϣⲏⲣⲉ  ⲅⲁⲣ  ϩⲱ  ⲡⲉ  ⲉⲓⲥⲱⲧⲙ̅  ⲛ̅ⲥⲁⲡⲁⲉⲓⲱⲧ . ⲁⲩⲱ  ⲉⲣⲉⲧⲁⲙⲁⲁⲩ  ⲙ̅ⲉ  ⲙ̅ⲙⲟⲓ. ⲇ̅. Ⲛⲁⲓ  ⲟⲛ ⲉⲩϯⲥⲃⲱ  ⲛⲁⲓ  ⲉⲩϫⲱ  ⲙ̅ⲙⲟⲥ.  ϫⲉ  Ⲙⲁⲣⲉⲡⲉⲛϣⲁϫⲉ  ⲧⲁϫⲣⲟ  ϩ̅ⲙ̅ⲡⲉⲕϩⲏⲧ ϩⲁⲣⲉϩ  ⲉⲛⲁⲉⲛⲧⲟⲗⲏ   ⲛⲅ̅ⲧⲙ̅ⲣ̅ⲡⲉⲩⲱⲃϣ̅ .  ⲁⲩⲱ  ⲙ̅ⲡⲣ̅ⲟⲃϣ̅ ⲉⲛϣⲁϫⲉ  ⲛ̅ⲧⲁⲧⲁⲡⲣⲟ.  Ⲋ. Ⲙ̅ⲡⲣ̅ⲕⲁⲁϥ  ⲛ̅ⲥⲱⲕ  ⲧⲁⲣⲉϥϣⲟⲡⲕ̅  ⲉⲣⲟϥ .  Ⲙⲉⲣⲓⲧϥ̅  ⲧⲁⲣⲉϥϩⲁⲣⲉϩ  ⲉⲣⲟⲕ.  ⲍ̅. Ⲡϣⲱⲣⲡ̅  ⲛ̅ⲧⲙⲛ̅ⲧⲥⲁⲃⲉ  ⲥⲉⲕⲥⲟⲟⲩⲛ  ⲁⲩⲱ  ⲥⲉⲕⲡⲉⲓⲙⲉ  ϩⲁϩⲱⲃ  ⲛⲓⲙ ⲉⲧⲛ̅ⲧⲁⲕ. ⲏ̅. Ⲙⲁⲕⲧⲟⲕ  ⲉⲣⲟϥ  ϫⲉ  ⲉϥⲉϫⲁⲥⲧⲕ̅. Ⲙⲁⲧⲁⲓⲟϥ  ϫⲉ  ⲉϥⲉϣⲟⲡⲕ̅  ⲉⲣⲟϥ :  ⲑ̅. ϫⲉ  ⲉϥⲉϯ  ⲛ̅ⲟⲩⲕⲗⲟⲙ  ⲛϩⲙⲟⲧ  ⲉϫⲛ̅ⲧⲉⲕⲁⲡⲉ. ⲛϥ̅ⲣ̅ⲛⲁϣⲧⲉ  ⲉⲣⲟⲕ  ϩ̅ⲛ̅ⲟⲩⲕⲗⲟⲙ  ⲛ̅ⲧⲣⲩⲫⲏ : 

Ⲥⲱⲧⲙ̅  ⲡⲁϣⲏⲣⲉ  ⲛⲅ̅ϣⲱⲡ  ⲉⲣⲟⲕ  ⲛ̅ⲛⲁϣⲁϫⲉ  ϫⲉⲕⲁⲥ  ⲉⲣⲉϩⲁϩ  ⲛ̅ϩⲓⲏ  ⲛ̅ⲱⲛϩ̅  ϣⲱⲡⲉ  ⲛⲁⲕ. ⲓ̅ⲁ. ⲉⲓϯⲥⲃⲱ  ⲅⲁⲣ  ⲛⲁⲕ  ⲉⲛⲉϩⲓⲟⲟⲩⲉ  ⲛ̅ⲧⲥⲟⲫⲓⲁ . ⲉⲓⲧⲁⲗⲟ  ⲇⲉ  ⲙ̅ⲙⲟⲕ  ⲉϩⲣⲁⲓ  ⲉϫⲛ̅ϩⲉⲛϩⲓⲟⲟⲩⲉ  ⲉⲩⲥⲟⲩⲧⲱⲛ. ⲓ̅ⲃ. Ⲉⲕϣⲁⲛⲙⲟⲟϣⲉ  ⲅⲁⲣ  ⲛⲉⲕϩⲓⲟⲟⲩⲉ   ⲛⲁϣⲧⲁⲙ  ⲉⲣⲱⲕ  ⲁⲛ  ⲉⲕϣⲁⲛⲡⲱⲧ  ⲉⲕϣⲁⲛⲡⲱⲧ  ⲇⲉ  ⲕⲛⲁϩⲓⲥⲉ  ⲁⲛ. ⲓ̅ⲅ. Ⲁⲙⲁϩⲧⲉ  ⲛ̅ⲧⲁⲥⲃⲱ  ⲙ̅ⲡⲣ̅ⲕⲁⲁⲥ  ⲛ̅ⲥⲱⲕ. ϩⲁⲣⲉϩ  ⲉⲣⲟⲥ  ⲛⲁⲕ  ⲉⲡⲉⲕⲁϩⲉ. ⲓ̅ⲇ. Ⲙ̅ⲡⲣ̅ⲙⲟⲟϣⲉ  ϩⲓⲛⲉϩⲓⲟⲟⲩⲉ  ⲛ̅ⲛ̅ⲣⲉϥⲣ̅ⲛⲟⲃⲉ.  Ⲙ̅ⲡⲣ̅ⲃⲱⲕ  ⲉϩⲟⲩⲛ  ⲛⲙ̅ⲙⲁⲩ  ⲉⲡⲙⲁ  ⲉⲧⲟⲩⲥⲟⲟⲩ̅ϩ̅   ⲉⲣⲟϥ . ⲣⲁⲕⲧⲕ̅  ⲉⲃⲟⲗ  ⲛ̅ⲅ̅ϣ̅ⲃⲧⲕⲕ  ⲉⲣⲟⲟⲩ. ⲓ̅Ⲋ. Ⲛ̅ⲛⲉⲩⲱⲃϣ  ⲅⲁⲣ  ⲉⲙⲡⲟⲩⲣ̅ⲡⲉⲑⲟⲟⲩ. ⲁⲡϩⲓⲛⲏⲃ  ⲅⲁⲣ  ⲟⲩⲉ  ⲙ̅ⲙⲟⲟⲩ  ⲁⲩⲱ  ⲙⲉⲩⲱⲃϣ̅. ⲓ̅ⲍ. Ⲛ̅ⲧⲟⲟⲩ  ⲅⲁⲣ  ⲉⲩⲥⲁⲛⲁϣⲧ̅  ϩ̅ⲛ̅ϩⲉⲛϩⲣⲉ  ⲙ̅ⲙⲛ̅ⲧϣⲁϥⲧⲉ . ⲥⲉⲧⲁϩⲉ  ⲇⲉ  ϩⲛ̅ⲟⲩⲏⲣⲡ̅  ⲛ̅ⲣⲉϥⲣ̅ⲛⲟⲃⲉ. ⲓ̅ⲏ. Ⲛⲉϩⲓⲟⲟⲩⲉ  ⲇⲉ  ⲛ̅ⲛ̅ⲇⲓⲕⲁⲓⲟⲥ  ⲥⲉⲣⲟⲩⲟⲓⲛ  ⲛ̅ⲑⲉ  ⲙ̅ⲡⲟⲩⲟⲉⲓⲛ . ⲥⲉⲙⲟⲟϣⲉ  ⲅⲁⲣ  ⲉⲩⲣ̅ⲟⲩⲟⲉⲓⲛ  ϣⲁⲛⲧⲉⲡⲉϩⲟⲟⲩ  ϫⲱⲕ. ⲓ̅ⲑ. Ϩⲉⲛⲕⲁⲕⲉ  ⲇⲉ  ⲛⲉ  ⲛⲉϩⲓⲟⲟⲩⲉ  ⲛ̅ⲛ̅ⲁⲥⲉⲃⲏⲥ . ⲁⲩⲱ  ⲛ̅ⲥⲉⲥⲟⲟⲩⲛ̅  ⲁⲛ  ϫⲉ  ⲉⲩϫⲓϫⲣⲟⲡ   ⲛ̅ⲁϣ  ⲛ̅ϩⲉ. 

Ⲡⲁϣⲏⲣⲉ  ϯϩⲧⲏⲕ  ⲉⲡⲁϣⲁϫⲉ  ⲣⲉⲕⲧ̅ⲡⲉⲕⲙⲁⲁϫⲉ  ⲇⲉ  ⲉⲛⲁϫⲡⲓⲟ. ⲕ̅ⲁ̅. ϫⲉⲕⲁⲥ  ⲉⲛⲛⲉⲛⲉⲕⲡⲏⲅⲏ  ⲱϫⲛ̅ . Ϩⲁⲣⲉϩⲛⲁⲓ  ϩⲙ̅ⲉⲕϩⲏⲧ. ⲕ̅ⲃ̅. Ⲟⲩⲱⲛϩ̅  ⲅⲁⲣ  ⲡⲉ  ⲛ̅ⲛⲉⲧϭⲟⲗϫ̅  ⲙ̅ⲙⲟⲟⲩ  ⲁⲩⲱ  ⲟⲩⲧⲁⲗϭⲟ ⲡⲉ  ⲙⲡⲥⲱⲙⲁ. ⲕ̅ⲅ̅. Ϩ̅ⲛ̅ϩⲁⲣⲉϩ  ⲛⲓⲙ  ϩⲁⲣⲉϩ  ⲉⲡⲉⲕϩⲏⲧ .  ϩⲉⲛϩⲓⲟⲟⲩⲉ  ⲅⲁⲣ  ⲛ̅ⲱⲛϩ̅  ⲛⲉ  ⲛⲉⲃⲟⲗ  ϩ̅ⲛ̅ⲛⲁⲓ. ⲕ̅ⲇ̅. Ϥⲓ  ⲉⲃⲟⲗ  ⲙ̅ⲙⲟⲕ  ⲛ̅ⲟⲩⲧⲁⲡⲣⲟ  ⲉⲥϭⲟⲟⲙⲉ .  ⲁⲩⲱ  ⲙⲁⲣⲉϩⲉⲛⲥⲡⲟⲧⲟⲩ  ⲛ̅ϫⲓⲛ̅ϭⲟⲛⲥ̅  ⲟⲩⲉ  ⲛ̅ⲥⲁⲃⲟⲗ  ⲙ̅ⲙⲟⲕ.   Ⲙⲁⲣⲉⲛⲉⲕⲃⲁⲕ  ϭⲱϣⲧ̅  ⲉⲛⲉⲧⲥⲟⲩⲧⲱⲛ . ⲛ̅ⲧⲉⲛⲉⲕⲃⲟⲩϩⲉ  ⲉⲓⲱⲣⲙ̅  ⲉⲙⲙⲛ̅ⲧⲙⲉ. ⲕ̅Ⲋ. Ⲥⲟⲩⲧⲛ̅ϩⲉⲛϩⲓⲟⲟⲩⲉ  ⲛ̅ⲛⲉⲕⲟⲩⲉⲣⲏⲧⲉ ⲁⲩⲱ  ⲛⲅ̅ⲥⲟⲟⲩⲧⲛ̅  ⲛ̅ⲛⲉⲕϩⲓⲟⲟⲩⲉ. ⲕ̅ⲍ̅. Ⲙ̅ⲡⲣ̅ⲣⲁⲕⲧⲕ̅  ⲉⲟⲩⲛⲁⲙ  ⲟⲩⲇⲉ  ⲉϩⲃⲟⲩⲣ . ⲕⲧⲟ  ⲇⲉ  ⲉⲃⲟⲗ  ⲛ̅ⲧⲉⲕⲟⲩⲉⲣⲏⲧⲉ  ⲉⲃⲟⲗ  ϩⲓϩⲓⲏ  ⲛⲓⲙ  ⲉⲑⲟⲟⲩ.  ⲡⲛⲟⲩⲧⲉ  ⲅⲁⲣ  ⲥⲟⲟⲩⲛ  ⲛ̅ⲛⲉϩⲓⲟⲟⲩⲉ  ⲉⲧϩⲓⲟⲩⲛⲁⲙ ⲥⲉϭⲟⲟⲙⲉ  ⲇⲉ  ⲛ̅ϭⲓⲛⲉⲧϩⲓϩⲃⲟⲩⲣ . Ⲛ̅ⲧⲟϥ  ⲇⲉ  ϥ̅ⲛⲁⲥⲟⲟⲩⲧⲛ̅  ⲛ̅ⲛⲉⲕϩⲓⲟⲟⲩⲉ . ⲁⲩⲱ   ϥⲛⲁⲉⲓⲛⲉ  ⲉⲃⲟⲗ  ⲛ̅ⲛⲉⲕϩⲓⲏ  ⲙ̅ⲙⲟⲟϣⲉ  ϩ̅ⲛ̅ⲟⲩⲉⲓⲣⲏⲛⲏ :
 
Ⲉ̅. Ⲡⲁϣⲏⲣⲉ  ϯϩⲧⲏⲕ  ⲉⲧⲁⲥⲟⲫⲓⲁ  ⲣⲉⲕⲧⲡⲉⲕⲙⲁⲁϫⲉ  ⲇⲉ  ⲉⲛⲁϣⲁϫⲉ : ⲃ̅. ϫⲉ  ⲉⲕⲉϩⲁⲣⲉϩ  ⲉⲩⲙⲉⲉⲩⲉ  ⲉⲛⲁⲛⲟⲩϥ ⲭ.  ϯϩⲱⲛ  ⲇⲉ  ⲉⲧⲟⲟⲧⲕ̅  ⲉⲧⲁⲓⲥⲑⲏⲥⲓⲥ  ⲛ̅ⲛⲁⲥⲡⲟⲧⲟⲩ . Ⲙ̅ⲡⲣ̅ϯϩⲧⲏⲕ  ⲉⲩⲥϩⲓⲙⲉ  ⲉⲥϩⲟⲟⲩ.  ⲅ̅.  Ⲟⲩⲉⲃⲓⲱ  ⲅⲁⲣ  ⲡⲉⲧⲧⲗ̅ⲧⲕ̅  ⲉⲃⲟⲗ  ϩⲛ̅ⲛⲉⲥⲡⲟⲧⲟⲩ  ⲛⲟⲩⲥϩⲓⲙⲉ  ⲙ̅ⲡⲟⲣⲛⲏ  ⲧⲁⲓ  ⲡⲣⲟⲥ  ⲧⲉⲩⲛⲟⲩ   ⲉⲥⲛⲁϯϩⲗⲟϭ  ⲛⲧⲉⲕϣⲟⲩⲱⲃⲉ.  ⲇ̅. Ⲙ̅ⲛ̅ⲛ̅ⲥⲱⲥ  ⲕⲛⲁϭⲛ̅ⲧⲥ̅   ⲉⲥⲥⲁϣⲉ  ⲉⲩⲥⲓϣⲉ . ⲁⲩⲱ  ⲉⲥⲧⲏⲙ   ⲉϩⲟⲩⲉⲟⲩⲥⲏϥⲉ  ⲛ̅ϩⲟ  ⲥⲛⲁⲩ.  Ϩⲣⲁⲓ  ⲅⲁⲣ  ϩ̅ⲛ̅ⲧⲉⲥⲙⲑⲛⲧⲁⲑⲏⲧ  ⲉⲣⲉⲛⲉⲥⲟⲩⲉⲣⲏⲧⲉ  ϫⲓ  ⲉⲡⲉⲥⲏⲧ  ⲉⲛⲉⲧⲛⲁⲭⲣⲱ  ⲙ̅ⲙⲟⲥ  ⲙ̅ⲡ̅ⲙⲟⲩ   ⲉⲀⲙⲛ̅ⲧⲉ.  Ⲋ. Ⲛⲉⲥϭⲟⲡ  ⲇⲉ ⲧⲁϫⲣⲏⲩ  ⲁⲛ . ⲛ̅ⲥ̅ⲙⲟⲟϣⲉ ⲅⲁⲣ  ⲁⲛ  ϩⲓⲛⲉϩⲓⲟⲟⲩⲉ  ⲙ̅ⲡⲱⲛϩ̅ . ⲛⲉⲥϩⲓⲟⲟⲩⲉ  ⲇⲉ  ϣⲧⲣ̅ⲧⲱⲣ  ⲁⲩⲱ   ⲥⲉϩⲏⲡ.  ⲍ̅. Ⲧⲉⲛⲟⲩ  ϭⲉ  ⲡⲁϣⲏⲣⲉ  ⲥⲱⲧⲙ̅  ⲉⲣⲟⲓ  ⲁⲩⲱ  ⲙ̅ⲡⲣ̅ⲥⲧⲟ  ⲉⲃⲟⲗ  ⲛ̅ⲛⲁϣⲁϫⲉ. ⲏ̅. Ⲙⲁⲣⲉⲧⲉⲕϩⲓⲏ  ⲟⲩⲉ  ⲙ̅ⲙⲟⲥ  ⲁⲩⲱ  ⲙ̅ⲡⲣ̅ϩⲱⲛ  ⲉϩⲟⲩⲛ  ⲉⲛⲣⲟ  ⲙ̅ⲡⲉⲥⲏⲓ. ⲑ̅. ϫⲉ  ⲛ̅ⲛⲉⲕϯ  ⲙ̅ⲡⲉⲕⲱⲛϩ̅  ⲛ̅ϩⲉⲛⲕⲟⲟⲩⲉ. ⲁⲩⲱ  ⲛⲅ̅ϯ  ⲙ̅ⲡⲉⲕⲁϩⲉ  ⲛ̅ϩⲉⲛⲁⲧⲛⲁ.  ϫⲉ ⲛ̅ⲛⲉϩⲉⲛⲕⲟⲩⲉ  ⲥⲓ  ⲛ̅ⲧⲉⲕϭⲟⲙ  ⲛ̅ⲧⲉⲛⲉⲕϩⲓⲥⲉ  ⲃⲱⲕ  ⲉϩⲟⲩⲛ ⲉⲛⲏⲓ  ⲛ̅ϩⲉⲛⲕⲟⲟⲩⲉ. ⲓ̅ⲁ. Ⲙⲛⲛ̅ⲥⲱⲥ  ⲛ̅ⲅ̅ⲣ̅ϩⲧⲏⲕ  ϩ̅ⲛ̅ⲧⲉⲕⲙⲛ̅ⲧϩⲗ̅ⲗⲟ . ⲉⲣϣⲁⲛⲛ̅ⲥⲁⲣⲝ̅  ⲙ̅ⲡⲉⲕⲥⲱⲙⲁ  ϩⲓⲧⲉ.  ⲓ̅ⲃ. ⲙⲛ̅ⲛ̅ⲥⲱⲥ  ⲛ̅ⲅ̅ϫⲟⲟⲥ  ϫⲉ ⲉⲧⲃⲉⲟⲩ  ⲅⲁⲣ  ⲛⲉⲓⲟⲩⲁϣⲟⲩ  ⲁⲛ  ⲡⲉ  ⲉⲩϯⲥⲃⲱ  ⲛⲁⲓ . ⲁⲩⲱ  ⲁⲡⲁϩⲏⲧ ⲣⲓⲕⲉ  ⲉⲃⲟⲗ ⲛ̅ⲛⲉϫⲡⲓⲟ. ⲓ̅ⲇ. ⲛⲅ̅ϫⲟⲟⲥ  ⲇⲉ  ϫⲉ  ⲙ̅ⲡⲓⲥⲱⲧⲙ̅  ⲉⲡⲉϩⲣⲟⲩ  ⲙ̅ⲡⲉⲧϯⲥⲃⲱ  ⲛⲁⲓ . ⲁⲩⲱ  ⲙ̅ⲡⲓⲣⲓⲕⲉ  ⲙ̅ⲡⲁⲙⲁⲁϫⲉ  ⲡⲁⲣⲁⲕⲉϣⲏⲙ  ⲁⲓϣⲱⲡⲉ  ϩ̅ⲙ̅ⲡⲉⲑⲟⲟⲩ  ⲛⲓⲙ  ⲛ̅ⲧⲙⲏⲧⲉ  ⲛ̅ⲛⲓⲥⲟⲟⲩϩⲥ̅  ⲙ̅ⲛ̅ⲛⲓⲙⲏⲏϣⲉ.  Ⲥⲉⲙⲟⲟⲩ  ⲉⲃⲟⲗ  ϩⲛ̅ⲛⲉⲕⲁⲅⲅⲓⲟⲛ . ⲁⲩⲱ ⲉⲃⲟⲗ  ϩ̅ⲛ̅ⲛ̅ϣⲱⲧⲉ  ⲛ̅ⲧⲉⲕⲡⲏⲅⲏ. ⲓ̅Ⲋ. Ⲙⲡⲣ̅ⲧⲣⲉⲛⲉⲕⲙⲟⲟⲩ  ⲡⲱⲛ  ⲉⲃⲟⲗ  ⲡⲃⲟⲗ  ⲛ̅ⲧⲉⲕⲡⲏⲅⲏ. ⲙⲁⲣⲉⲛⲉⲕⲙⲟⲟⲩ  ⲇⲉ  ⲙⲟⲟϣⲉ  ϩ̅ⲛ̅ⲛⲉⲕⲡⲗⲁⲧⲓⲁ. ⲓ̅ⲍ. Ⲙⲁⲣⲉⲥϣⲱⲡⲉ  ⲛⲁⲕ  ⲟⲩⲁⲁⲕ  ⲙ̅ⲡⲣ̅ⲧⲣⲉⲗⲁⲁⲩ  ⲛ̅ϣⲙ̅ⲙⲟ  ⲙⲉⲧⲉⲭⲉ  ⲉⲣⲟⲥ  ⲛ̅ⲙ̅ⲙⲁⲕ.  ⲓ̅ⲏ. Ⲙⲁⲣⲉⲧⲡⲏⲅⲏ  ⲙ̅ⲡⲉⲕⲙⲟⲟⲩ  ϣⲱⲡⲉ  ⲛⲁⲕ  ⲟⲩⲁⲁⲕ. ⲁⲩⲱ  ⲛ̅ⲅ̅ⲉⲩⲫⲣⲁⲛⲉ  ⲙⲛ̅ⲧⲉⲕⲥϩⲓⲙⲉ  ⲛ̅ⲧⲉⲕⲙⲛ̅ⲧϣⲏⲣⲉ  ϣⲏⲙ.  ⲓ̅ⲑ. Ⲡⲉⲓⲟⲩⲗ  ⲛ̅ⲧⲉⲕⲙⲛ̅ⲧϣⲃⲏⲣ . ⲁⲩⲱ ⲡⲥⲏϭ  ⲛ̅ⲛⲉⲕϩⲙⲟⲧ  ⲙⲁⲣⲉϥϣⲁϫⲉ  ⲛⲙ̅ⲙⲁⲕ. Ⲙⲁⲣⲉⲧⲉⲧⲉ  ⲧⲱⲕ  ⲧⲉ  ϫⲓⲥⲉ  ⲉⲣⲟⲕ . ⲁⲩⲱ  ⲛⲥ̅ⲟⲩⲁϩⲥ̅  ⲛ̅ⲥⲱⲕ  ⲛ̅ⲟⲩⲟⲉⲓϣ ⲛⲓⲙ . ⲉⲕⲙⲟⲟϣⲉ  ⲅⲁⲣ  ϩ̅ⲛ̅ⲧⲙⲛ̅ⲧϣⲃⲏⲣ  ⲛ̅ⲧⲁⲓ  ⲕⲛⲁⲁϣⲁⲓ.  Ⲙ̅ⲡⲣ̅ⲧⲁϣⲟⲕ  ⲉⲣⲁⲧⲥ̅  ⲛ̅ⲟⲩϣⲙ̅ⲙⲱ . ⲟⲩⲇⲉ  ⲙ̅ⲡⲣ̅ϯ  ⲙ̅ⲡⲉⲕⲟⲩⲟⲓ  ⲉⲛⲉϭⲃⲟⲓ  ⲛ̅ⲧⲉⲧⲛ̅ⲧⲱⲕ  ⲁⲛ  ⲧⲉ. ⲕ̅ⲁ̅. Ⲛⲉϩⲓⲟⲟⲩⲉ  ⲅⲁⲣ  ⲙ̅ⲡⲣⲱⲙⲉ  ⲙ̅ⲡⲉⲙⲧⲟ  ⲉⲃⲟⲗ  ⲛ̅ⲛ̅ⲃⲁⲗ  ⲙ̅ⲡⲛⲟⲩⲧⲉ . ϥϭⲱϣⲧ̅  ⲇⲉ  ⲉϫⲛ̅ⲛⲉⲩϩⲓⲟⲟⲩⲉ  ⲧⲏⲣⲟⲩ.  ⲕ̅ⲃ̅. Ⲙ̅ⲡⲁⲣⲁⲛⲟⲙⲓⲁ  ϭⲱⲣϭ  ⲉⲡⲣⲱⲙⲉ . ⲉⲩϩⲱⲕ  ⲇⲉ  ⲙ̅ⲡⲟⲩⲁ  ⲙ̅ⲡⲟⲩⲁ  ϩ̅ⲛ̅ⲙ̅ⲙⲣ̅ⲣⲉ  ⲛ̅ⲛⲉϥⲛⲟⲃⲉ. ⲕ̅ⲅ̅. Ⲉⲣⲉⲡⲁⲓ  ⲛⲁⲙⲟⲩ  ⲙⲛ̅ⲛⲓⲙⲏⲏϣⲉ  ⲉⲧⲃⲉⲧⲉϥⲙⲛ̅ⲧⲁⲧⲥⲃⲱ  .  Ⲁⲩⲛⲟϫϥ̅  ⲇⲉ  ⲉⲃⲟⲗ  ϩⲙ̅ⲡⲁϣⲁⲓ  ⲙ̅ⲡⲉϥⲟⲩⲛⲟϥ . ⲁⲩⲱ  ⲁϥⲧⲁⲕⲟ  ⲉⲧⲃⲉⲧⲉϥⲙⲛ̅ⲧⲁⲑⲏⲧ :
 
Ⲋ. Ⲡⲁϣⲏⲣⲉ  ⲉⲕϣⲁⲛϣⲡ̅ⲧⲱⲣⲉ  ⲉⲕⲛⲁϯⲧⲟⲟⲧⲕ̅ ⲙ̅ⲡⲉⲕϫⲁϫⲉ.  ⲃ̅. ⲟⲩϭⲟⲣϭⲥ̅  ⲅⲁⲣ  ⲙ̅ⲡⲣⲱⲙⲉ  ⲉϥⲛⲁϣⲧ  ⲛⲉ  ⲛⲉϥⲥⲡⲟⲧⲟⲩ  ⲙ̅ⲙⲓⲛ  ⲙ̅ⲙⲟϥ . ⲁⲩⲱ  ϣⲁϥⲧⲁⲕⲟ  ϩ̅ⲛ̅ⲛ̅ϣⲁϫⲉ  ⲛ̅ⲣⲱϥ :  ⲅ̅. Ⲡⲁϣⲏⲣⲉ  ⲁⲣⲓⲛⲉϯϩⲱⲛ  ⲙ̅ⲙⲟⲩ  ⲉⲧⲟⲟⲧⲕ̅  ⲧⲁⲣⲉⲕⲱⲛϩ̅ . ⲁⲕⲉⲓ ⲅⲁⲣ  ⲉⲧⲟⲟⲧⲟⲩ  ⲛ̅ϩⲉⲛⲡⲉⲑⲟⲟⲩ  ⲉⲧⲃⲉⲡⲉⲕϣⲃⲏⲣ. ⲙ̅ⲡⲣ̅ϣⲱⲡⲉ  ⲉⲕⲃⲏⲗ  ⲉⲃⲟⲗ . ⲧⲱⲃⲥ̅  ⲇⲉ  ⲙ̅ⲡⲉⲕⲣⲙ̅ⲛ̅ϯⲙⲉ  ⲛ̅ⲧⲁⲕϣⲡ̅ⲧⲱⲣⲉ  ⲙ̅ⲙⲟϥ. ⲇ̅. Ⲙ̅ⲡⲣ̅ϯϩⲓⲛⲏⲃ  ⲛ̅ⲛⲉⲕⲃⲁⲗ . ⲁⲩⲱ  ⲙ̅ⲡⲣ̅ϯⲣⲉⲕⲣⲓⲕⲉ  ⲛ̅ⲛⲉⲕⲃⲟⲩϩⲉ.  Ϫⲉ  ⲉⲕⲉⲣⲃⲟⲗ  ⲛ̅ⲑⲉ  ⲛⲟⲩϭϩⲟⲥ  ⲉⲃⲟⲗ  ϩ̅ⲛ̅ϩⲉⲛϩⲁϭⲉ .  ⲁⲩⲱ  ⲛ̅ⲑⲉ  ⲛ̅ⲟⲩϩⲁⲗⲏⲧ  ⲉⲃⲟⲗ  ϩⲛ̅ⲟⲩⲡⲁϣ.  Ⲋ

Ⲃⲱⲕ  ϣⲁⲡϭⲁϫⲓϥ  ⲱ  ⲡⲣⲉϥϫⲛⲁⲁⲩ . ⲛⲅ̅ⲕⲱϩ  ⲉⲛⲉϥϩⲓⲟⲩⲉ  ⲛⲅ̅ⲣ̅ⲥⲁⲃⲉ  ⲉϩⲟⲩⲉⲣⲟϥ.  ⲍ̅. Ⲉⲙⲛ̅ⲧⲉⲡⲉⲧⲙ̅ⲙⲁⲩ  ⲅⲁⲣ  ⲥⲱϣⲉ. ⲟⲩⲇⲉ  ⲉⲙⲛ̅ⲧϥ̅ⲡⲉⲧⲁⲛⲁⲅⲕⲁⲍⲉ  ⲙ̅ⲙⲟϥ . ⲟⲩⲇⲉ  ⲉⲙⲛ̅ⲧϥ̅ϫⲟⲉⲓⲥ  ϩⲓϫⲱϥ.  ⲏ̅. ⲛⲑⲉ  ⲉϣⲁϥⲥⲃ̅ⲧⲉⲧⲉϥϩⲣⲉ  ⲙ̅ⲡϣⲱⲙ  ⲛϥ̅ⲧⲁϣⲟ  ⲇⲉ  ⲙ̅ⲡⲉϥⲕⲱ  ⲉϩⲣⲁⲓ  ϩ̅ⲙ̅ⲡⲱϩⲥ̅ . ⲏ  ⲛⲅ̅ⲃⲱⲕ  ⲉⲣⲁⲧϥ̅  ⲙ̅ⲡⲁϥ  ⲛ̅ⲉⲃⲓⲱ  ⲛⲅ̅ⲉⲓⲙⲉ  ⲉⲧⲉϥⲙⲛ̅ⲧⲣⲉϥⲑⲣϩⲱⲃ .  ⲁⲩⲱ  ⲉϥⲉⲓⲣⲉ  ⲙ̅ⲡⲉϥϩⲱⲃ  ϩⲱⲥ  ⲙⲛ̅ⲧⲥⲁⲃⲉ . ⲡⲁⲓ  ⲉⲧⲟⲩϯ  ⲛ̅ⲛⲉϥϩⲓⲥⲉ  ⲛ̅ⲛⲉⲣⲣⲱⲟⲩ  ⲙⲛ̅ⲛ̅ⲣⲱⲙⲉ  ⲉⲩⲙ̅ⲧⲟⲛ . ⲉϥⲧⲁⲓⲏⲩ  ⲇⲉ  ⲛ̅ⲛⲁϩⲣⲛ̅ⲟⲩⲟⲛ  ⲛⲓⲙ . ⲁⲩⲱ  ⲉⲩⲟⲩⲁϣϥ̅ . Ⲕⲁⲓⲡⲉⲣ  ⲉⲩϭⲱⲃ  ⲡⲉ  ϩⲛ̅ⲧⲉϥϭⲟⲙ  ⲁϥⲧⲁⲓⲉⲧⲥⲟⲫⲓⲁ  ⲁϥⲉⲓ  ⲉⲃⲟⲗ. ⲑ̅. Ϣⲁⲧⲛⲁⲩ  ⲕⲛⲏϫ  ⲡⲣⲉϥϫⲛⲁⲁⲩ . ⲉⲕⲛⲁⲧⲱⲟⲩⲛ  ⲇⲉ  ϩⲁⲡϩⲓⲛⲏⲃ ⲧⲛⲁⲩ.  ⲉⲕⲟⲃϣ̅  ⲛ̅ⲟⲩⲁⲡⲣⲏⲧⲉ . ⲕϩⲙⲟⲟⲥ  ⲛ̅ⲟⲩⲁⲡⲣⲏⲧⲉ. ⲕϫⲓⲣⲉⲕⲣⲓⲕⲉ  ⲇⲉ  ⲛⲟⲩⲁⲡⲣⲏⲧⲉ  ⲟⲩⲁⲡⲣⲏⲧⲉ  ⲇⲉ  ⲉⲧⲉⲧⲟⲟⲧⲕ̅  ⲟⲗⲕ̅  ϩⲁⲧⲉⲕⲙⲉⲥⲧϩⲏⲧ. ⲓ̅ⲁ. Ⲙⲛ̅ⲛⲥⲱⲥ  ϣⲁⲣⲉⲧⲙⲛ̅ⲧϩⲏⲕⲉ  ⲉⲓ  ⲛⲁⲕ  ⲛ̅ⲑⲉ  ⲛ̅ⲟⲩⲁ  ⲉϥⲙⲟⲟϣⲉ  ⲛ̅ⲙ̅ⲙⲁⲕ  ϩⲓⲟⲩϩⲓⲏ  ⲉϥϩⲟⲟⲩ . ⲁⲩⲱ  ⲡⲉϭⲣⲱϩ  ⲛ̅ⲑⲉ  ⲛⲟⲩⲣⲉϥⲡⲱⲧ  ⲉⲛⲁⲛⲟⲩϥ . Ⲉϣⲱⲡⲉ  ⲇⲉ  ⲙⲉⲕϫⲛⲁⲁⲩ  ⲡⲉⲕⲱϩⲥ̅  ⲛⲏⲩ  ⲛ̅ⲑⲉ  ⲛⲟⲩⲡⲏⲅⲏ . ⲁⲩⲱ  ⲡⲉϭⲣⲱϩ  ⲛⲁⲡⲱⲧ  ⲉⲃⲟⲗ  ⲙ̅ⲙⲟⲕ  ⲛ̅ⲑⲉ ⲛⲟⲩⲣⲱⲙⲉ  ⲉϥϩⲟⲟⲩ. ⲓ̅ⲃ.   Ϣⲁⲣⲉⲟⲩⲣⲱⲙⲉ  ⲛ̅ⲁⲑⲏⲧ  ⲁⲩⲱ  ⲙ̅ⲡⲁⲣⲁⲛⲟⲙⲟⲥ  ⲙⲟⲟϣⲉ  ϩⲓϩⲉⲛϩⲓⲟⲟⲩⲉ  ⲉⲩϩⲟⲟⲩ.  ⲓ̅ⲅ. ⲁⲩⲱ   ϣⲁϥϫⲱⲣⲙ̅  ϩ̅ⲙ̅ⲡⲁϥⲃⲁⲗ  ⲛ̅ϥ̅ⲥⲏⲙⲉⲓⲛ  ϩ̅ⲛ̅ⲧⲉϥⲟⲩⲉⲣⲏⲧⲉ . ⲛϥϯⲥⲃⲱ  ⲇⲉ  ⲛ̅ϩⲉⲛϫⲱⲣⲙ̅  ⲛⲧⲏⲏⲃⲉ. ⲓ̅ⲇ. Ϣⲁⲣⲉⲡⲉϥϩⲏⲧ  ⲉⲧϭⲟⲟⲙⲉ  ⲙⲉⲉⲩⲉ  ⲉϩⲉⲛⲡⲉⲑⲟⲟⲩ ⲛ̅ⲟⲩⲟⲉⲓϣ  ⲛⲓⲙ . ϣⲁⲣⲉⲡⲁⲓ  ⲛ̅ⲧⲉⲓⲙⲓⲛⲉ   ⲣ̅ϩⲉⲛϣⲧⲟⲣⲧⲣ̅  ⲛ̅ϩⲉⲛⲡⲟⲗⲓⲥ.  Ⲉⲧⲃⲉⲡⲁⲓ  ⲡⲉϥⲧⲁⲕⲟ  ⲛⲏⲩ  ϩ̅ⲛ̅ⲟⲩϣⲥ̅ⲛⲉ. ⲟⲩϭⲟϫ̅ϫ̅  ⲙ̅ⲛ̅ⲟⲩⲱϣϥ̅  ⲛⲁⲧⲧⲁⲗϭⲟ . ϫⲉ  ϥⲣⲁϣⲉ  ⲉϫⲛ̅ϩⲱⲃ ⲛⲓⲙ  ⲉⲑⲟⲟⲩ . ⲉⲧⲉⲣⲉⲡⲛⲟⲩⲧⲉ  ⲙⲟⲥⲧⲉ  ⲙ̅ⲙⲟⲟⲩ. ϥⲛⲁⲟⲩⲱϣϥ̅  ⲇⲉ  ⲉⲧⲃⲉⲧⲁⲕⲁⲑⲁⲣⲥⲓⲁ  ⲛ̅ⲧⲉϥⲯⲩⲭⲏ.  ⲓ̅Ⲋ.

Ⲥⲟⲟⲩ  ⲛ̅ϩⲱⲃ  ⲛⲉⲛⲧⲁⲠϫⲟⲉⲓⲥ  ⲙⲁⲥⲧⲟⲩ . ⲁⲩⲱ  ⲥⲁϣϥ  ⲛⲉ  ⲟⲩⲃⲟⲧⲉ  ⲛ̅ⲧⲉϥⲯⲩⲭⲏ :  ⲓ̅ⲍ. ⲡⲃⲁⲗ  ⲛ̅ⲟⲩⲣⲉϥⲥⲱϣ  ⲟⲩⲗⲁⲥ  ⲛ̅ϫⲓⲛ̅ϭⲟⲛⲥ̅ . ϩⲉⲛϭⲓϫ  ⲉⲩⲡⲛ̅ⲥⲛⲟϥ  ⲉⲃⲟⲗ  ⲛⲇⲓⲕⲁⲓⲟⲥ. ⲓ̅ⲏ. ⲟⲩϩⲏⲧ  ⲉϥⲙⲉⲉⲩⲉ  ⲉϩⲉⲛⲙⲉⲉⲩⲉ  ⲉⲩϩⲟⲟⲩ . ϩⲉⲛⲟⲩⲣⲏⲧⲉ  ⲉⲩϭⲉⲡⲏ  ⲉⲣ̅ⲡⲉⲑⲟⲟⲩ. ⲓ̅ⲑ. Ϣⲁⲣⲉⲟⲩⲙⲛ̅ⲧⲣⲉ  ⲛ̅ⲣⲉϥϫⲓⲛ̅ϭⲟⲛⲥ̅  ⲧⲙ̅ϩⲉϩⲉⲛϭⲟⲗ . ⲁⲩⲱ  ϣⲁϥϫⲟⲟⲩ  ⲛ̅ⲟⲩϯⲧⲱⲛ  ⲉϥϩⲟⲟⲩ  ⲛ̅ϩⲉⲛⲥⲛⲏⲩ :  

Ⲡⲁϣⲏⲣⲉ  ϩⲁⲣⲉϩ  ⲉⲛⲛⲟⲙⲟⲥ  ⲙ̅ⲡⲉⲕⲉⲓⲱⲧ . ⲁⲩⲱ  ⲙ̅ⲡⲣ̅ⲕⲱ  ⲛ̅ⲥⲱⲕ ⲛ̅ⲛ̅ⲁⲛⲥ̅ⲙ̅ⲙⲉ  ⲛ̅ⲧⲉⲕⲙⲁⲁⲩ. ⲕ̅ⲁ̅. Ⲙⲟⲣⲟⲩ  ⲇⲉ  ⲉⲧⲉⲕⲯⲩⲭⲏ  ϩⲛ̅ⲟⲩⲱⲣϫ . ⲛⲅ̅ⲁⲁⲩ  ⲛ̅ⲟⲩⲕⲗⲁⲗ  ⲉⲡⲉⲕⲙⲁⲕϩ̅. ⲕ̅ⲃ̅. Ⲉⲕϣⲁⲛⲙⲟⲟϣⲉ  ⲁⲛⲓⲥ  ⲛⲙ̅ⲙⲁⲕ  ⲁⲩⲱ  ⲙⲁⲣⲉⲥϣⲱⲡⲉ  ⲛ̅ⲙ̅ⲙⲁⲕ. ⲉⲕϣⲁⲛⲛ̅ⲕⲟⲧⲕ̅  ⲙⲁⲣⲉⲥϩⲁⲣⲉϩ  ⲉⲣⲟⲕ : ϫⲉⲕⲁⲥ  ⲉⲕϣⲁⲛⲧⲱⲟⲩⲛ  ⲉⲥⲉϣⲁϫⲉ ⲛ̅ⲙ̅ⲙⲁⲕ. ⲕ̅ⲅ̅. Ⲟⲩⲣⲉϥⲣ̅ⲟⲩⲟⲉⲓⲛ  ⲅⲁⲣ  ⲧⲉ  ⲧⲉⲛⲧⲟⲗⲏ  ⲉⲧⲛⲁⲛⲟⲩⲥ . ⲡⲛⲟⲙⲟⲥ  ⲇⲉ  ⲟⲩⲟⲩⲟⲉⲓⲛ  ⲡⲉ  ⲛ̅ϩⲓⲏ . ϣⲁⲣⲉⲧⲉⲥⲃⲱ  ⲅⲁⲣ  ϫⲡⲓⲉⲛⲉϩⲓⲟⲟⲩⲉ  ⲙ̅ⲡⲁϩⲉ.  ⲕ̅ⲇ̅. ϫⲉ ⲉⲥⲉϩⲁⲣⲉϩ  ⲉⲣⲟⲕ  ⲉⲩⲥϩⲓⲙⲉ  ⲉⲛⲧⲱⲕ  ⲁⲛ  ⲧⲉ . ⲁⲩⲱ  ⲉⲩⲇⲓⲁⲃⲟⲗⲏ  ⲛ̅ⲗⲁⲥ  ⲛ̅ϩⲉⲛϣⲙ̅ⲙⲟ.  Ⲙ̅ⲡⲣ̅ⲧⲣⲉⲡⲥⲁ  ⲛ̅ⲟⲩⲉⲡⲓⲑⲩⲙⲓⲁ  ϫⲣⲟ  ⲉⲣⲟⲕ . ⲁⲩⲱ  ⲙ̅ⲡⲣ̅ⲧⲣⲉⲩϭⲱⲣϭ̅  ⲉⲣⲟⲕ  ϩ̅ⲛ̅ⲛⲉⲕⲃⲁⲗ . ⲁⲩⲱ  ⲙ̅ⲡⲣ̅ⲧⲣⲉⲥⲧⲟⲣⲡⲕ̅  ϩⲓⲛⲉⲥⲃⲟⲩϩⲉ.  ⲕ̅Ⲋ. Ⲡⲧⲁⲓⲟ  ⲅⲁⲣ  ⲛ̅ⲟⲩⲥϩⲓⲙⲉ  ⲙ̅ⲡⲟⲣⲛⲏ  ϣⲁⲟⲩⲟⲉⲓⲕ  ⲛ̅ⲟⲩⲱⲧ  ⲡⲉ . ϣⲁⲣⲉⲧⲉⲥϩⲓⲙⲉ  ⲇⲉ  ϭⲱⲣϭ̅  ⲉⲛⲉⲯⲩⲭⲏ  ⲛ̅ⲛ̅ⲣⲱⲙⲉ  ⲉⲧⲧⲁⲓⲏⲩ :  ⲕ̅ⲍ̅. Ⲙⲏ  ⲟⲩⲛ̅ⲟⲩⲁ   ⲛⲁⲙⲣ̅ϩⲉⲛϫⲃ̅ⲃⲉⲥ  ⲛ̅ⲕⲱϩⲧ̅  ϩ̅ⲛ̅ⲕⲟⲩⲛϥ̅  ⲛ̅ϥ̅ⲧⲙⲣⲱⲕϩ̅  ⲛ̅ⲛⲉϥϩⲟⲓⲧⲉ.  ⲕ̅ⲏ̅. ⲏ  ⲟⲩⲛⲁ  ⲛⲁⲙⲟⲟϣⲉ  ϩⲓϫⲛ̅ϩⲉⲛϫⲃ̅ⲃⲉⲥ  ⲛ̅ⲥⲁⲧⲉ  ⲛ̅ϥ̅ⲧⲙ̅ϫⲉϥⲛⲉϥⲟⲩⲉⲣⲏⲧⲉ. ⲕ̅ⲑ̅. Ⲧⲁⲓ  ⲧⲉ  ⲑⲉ  ⲙ̅ⲡⲉⲧⲃⲏⲕ  ⲉϩⲟⲩⲛ̅  ϣⲁⲟⲩⲥϩⲓⲙⲉ  ⲉⲩⲛ̅ⲧⲥ̅ϩⲁⲓ  ⲉⲛϥⲛⲁϣⲱⲡⲉ  ⲁⲛ  ⲉϥⲟⲩⲁⲁⲃ  ⲉⲛⲟⲃⲉ . ⲟⲩⲇⲉ  ⲟⲩⲟⲛ  ⲛⲓⲙ  ⲉⲧϫⲱϩ  ⲉⲣⲟⲥ.   Ⲛ̅ⲟⲩϣⲡⲏⲣⲉ  ⲁⲛ  ⲧⲉ  ⲉⲩϣⲁⲛϭⲉⲡⲟⲩⲁ ⲉϥϫⲓⲟⲩⲉ . ⲉϥϫⲓⲟⲩⲉ  ⲅⲁⲣ  ϫⲉ  ⲉϥⲉⲧⲥⲓⲟ  ⲛ̅ⲧⲉϥⲯⲩⲭⲏ  ⲉⲧϩⲕⲁⲉⲓⲧ. ⲗ̅ⲁ̅. ⲉⲩϣⲁⲛϭⲟⲡϥ̅  ⲅⲁⲣ  ϥⲛⲁⲧⲁⲁⲩ  ⲛ̅ⲥⲁϣϥ̅  ⲛ̅ⲕⲱⲃ  ⲁⲩⲱ  ϥⲛⲁϯ  ⲛ̅ⲛⲉϥϩⲩⲡⲁⲣⲭⲟⲛⲧⲁ  ⲧⲏⲣⲟⲩ  ⲛϥⲧⲟⲩϫⲟϥ. ⲗ̅ⲃ̅. Ⲡⲛⲟⲉⲓⲕ  ⲇⲉ  ⲉⲧⲃⲉⲧⲉϥⲙⲛ̅ⲧⲁⲧϩⲏⲧ  ϥⲛⲁϫⲡⲟ  ⲛ̅ⲟⲩⲧⲁⲕⲟ  ⲛ̅ⲧⲉϥⲯⲩⲭⲏ  ⲙ̅ⲁⲩⲁⲁϥ. ⲗ̅ⲅ̅. Ϥⲛⲁϥⲓ  ⲛϩⲉⲛⲙ̅ⲕⲁϩ  ⲛ̅ϩⲏⲧ  ⲙ̅ⲛ̅ϩⲉⲛⲥⲱϣ . ⲁⲩⲱ  ⲡⲉϥⲛⲟϭⲛⲉϭ  ⲛⲁϥⲱⲧⲉ  ⲉⲃⲟⲗ  ⲁⲛ  ϣⲁⲉⲛⲉϩ. ⲗ̅ⲇ̅. Ⲡϭⲱⲛⲧ̅  ⲅⲁⲣ  ⲙ̅ⲡⲉⲥϩⲁⲓ ⲙⲉϩ  ⲛ̅ⲕⲱϩ . ⲛ̅ϥ̅ⲛⲁϯⲥⲟ  ⲁⲛ  ϩ̅ⲛ̅ⲟⲩϩⲟⲟⲩ  ⲛ̅ⲧⲱⲱⲃⲉ.  Ⲁⲩⲱ  ⲛϥ̅ⲛⲁϩⲱⲧⲡ̅  ⲁⲛ  ⲛ̅ⲧⲉϥⲙⲛ̅ⲧϫⲁϫⲉ  ϩⲁⲗⲁⲁⲩ  ⲛ̅ⲥⲱⲧⲉ . ⲟⲩⲇⲉ  ⲛ̅ⲛⲉϥⲃⲱⲗ  ϩⲁϩⲁϩ  ⲛ̅ⲇⲱⲣⲟⲛ.

  Ⲍ̅. Ⲡⲁϣⲏⲣⲉ  ϩⲁⲣⲉϩ  ⲉⲛⲁϣⲁϫⲉ  ⲁⲩⲱ  ϩⲉⲡⲛⲁⲉⲛⲧⲟⲗⲏ  ϩⲁⲧⲏⲕ .  ⲙⲁⲧⲁⲓⲉⲡⲛⲟⲩⲧⲉ  ⲧⲁⲣⲉⲕϭⲙ̅ϭⲟⲙ . ⲁⲩⲱ  ⲙ̅ⲡⲣ̅ⲣ̅ϩⲟⲧⲉ  ϩⲏⲧϥ̅  ⲛ̅ⲕⲉⲟⲩⲁ  ⲛ̅ⲃⲗ̅ⲗⲁϥ.  ⲃ̅. ϩⲁⲣⲉϩ  ⲇⲉ  ⲉⲛⲁⲉⲛⲧⲟⲗⲏ  ⲛ̅ⲧⲁⲣⲉⲕⲱⲛϩ̅ . ϯ  ⲛ̅ⲛⲁϣⲁϫⲉ  ⲉⲛⲉⲕⲧⲏⲏⲃⲉ ⲛ̅ⲑⲉ  ⲛ̅ϩⲉⲛⲕⲉⲕⲉ  ⲛ̅ⲃⲁⲗ.  ⲅ̅. ⲥϩⲁⲓⲥⲟⲩ  ⲇⲉ  ⲉϫⲙ̅ⲡⲡⲱϫϭ̅  ⲙ̅ⲡⲉⲕϩⲏⲧ. ⲇ̅. Ⲁϫⲓⲥ  ⲛ̅ⲧⲥⲟⲫⲓⲁ  ϫⲉ  ⲧⲉⲕⲥⲱⲛⲉ ⲧⲉ . ⲁⲩⲱ  ϫⲉ  ⲧⲉⲕⲣⲱⲙⲉ  ⲧⲉ  ⲧⲙⲛ̅ⲧⲣⲙ̅ⲛ̅ϩⲏⲧ .  Ϫⲡⲟⲥ  ⲇⲉ  ⲛⲁⲕ.  Ⲉⲥⲉϩⲁⲣⲉϩ  ⲉⲣⲟⲕ   ⲉⲩⲥϩⲓⲙⲉ   ⲉⲛⲧⲱⲕ  ⲁⲛ  ⲁⲩⲱ  ⲉⲥϩⲟⲟⲩ. ⲉⲥϣⲁⲛϣⲁϫⲉ  ϩ̅ⲛ̅ϩⲉⲛϣⲁϫⲉ  ⲛ̅ϩⲙⲟⲧ.  Ⲋ. ⲉⲥϭⲱϣ̅ⲧ̅  ⲅⲁⲣ  ⲉⲃⲟⲗ  ϩⲙ̅ⲡϣⲟⲩϣ̅ⲧ  ⲙ̅ⲡⲉⲥⲏⲓ  ⲉⲛϩⲓⲣ. ⲍ̅. Ⲡϩⲣ̅ϣⲓⲣⲉ  ⲉⲧⲥ̅ⲛⲁⲛⲁⲩ  ⲉⲣⲟϥ  ⲛ̅ⲁⲑⲏⲧ  ⲉϥϣⲁⲁⲧ  ⲛ̅ⲥⲃⲱ.  ⲏ̅. ⲉϥⲙⲟⲟϣⲉ  ϩⲁⲧⲛ̅ⲛⲕⲗ̅ϫⲉ  ⲛ̅ⲛ̅ϩⲓⲣ  ⲙ̅ⲡⲉⲥⲏⲓ.  ⲑ̅. ⲉϥϣⲁϫⲉ  ϩ̅ⲙ̅ⲡⲕⲁⲕⲉ  ⲙ̅ⲡⲛⲁⲩ  ⲛ̅ⲣⲟⲩϩⲉ   ⲉⲣⲉⲡⲙⲁ  ϩⲟⲣⲕ̅  ⲉⲣⲟⲩϩⲉ  ϩⲉⲛⲟⲩⲕⲁⲕⲉ.  Ϣⲁⲣⲉⲧⲉⲥϩⲓⲙⲉ  ⲧⲱⲙⲛ̅ⲧ  ⲉⲣⲟϥ  ϩ̅ⲛ̅ⲟⲩⲥⲙⲟⲧ  ⲙ̅ⲡⲟⲣⲛⲏ. ⲧⲁⲓ  ⲉϣⲁⲥⲧⲣⲉⲡϩⲏⲧ  ⲛ̅ⲛ̅ϣⲏⲣⲉ ϣⲏⲙ  ϫⲓϥⲟϭ̅ⲥ̅.  ⲓ̅ⲁ. Ⲥⲁⲥⲱⲟⲩ  ⲇⲉ  ⲁⲩⲱ  ⲟⲩϣⲛⲁ ⲧⲉ . ⲙⲉⲣⲉⲛⲉⲥⲟⲩⲉⲣⲏⲧⲉ  ⲇⲉ  ϭⲱ  ϩⲙ̅ⲡⲉⲥⲏⲓ.  ⲓ̅ⲃ. Ϣⲁⲥⲣ̅ⲟⲩⲟⲉⲓϣ  ⲅⲁⲣ  ⲉⲥⲕⲱⲧⲉ  ϩⲓⲃⲟⲗ . ⲟⲩⲟⲩⲟⲉⲓϣ  ⲇⲉ  ⲉⲥϭⲟⲣϭ̅  ϩⲁⲧⲛ̅ⲛ̅ⲕⲗ̅ϫⲉ ⲛⲓⲙ  ϩⲛ̅ⲛⲉⲡⲗⲁⲧⲓⲁ.  ⲓ̅ⲅ. Ⲙⲛ̅ⲛⲥⲱⲥ  ϣⲁⲥⲁⲙⲁϩⲧⲉ  ⲙⲙⲟϥ  ⲛ̅ⲥ̅ϯⲡⲓ  ⲉⲣⲱϥ. ϩ̅ⲛ̅ⲟⲩϩⲟ  ⲇⲉ  ⲛⲁⲧϣⲓⲡⲉ  ϣⲁⲥϫⲟⲟⲥ  ⲛⲁϥ. ⲓ̅ⲇ. ϫⲉ  ⲟⲩⲑⲩⲥⲓⲁ  ⲛⲉⲓⲣⲏⲛⲏⲕⲏ  ⲛⲁⲓ  ⲡⲉ  ⲡⲟⲟⲩ . ϯⲛⲁϯ  ⲛ̅ⲛⲁⲉⲣⲁⲧⲉ.  Ⲉⲧⲃⲉⲡⲁⲓ  ⲁⲓⲉⲓ  ⲉⲃⲟⲗ  ⲉⲧⲱⲙⲛ̅ⲧ  ⲉⲣⲟⲕ . ⲉⲓⲟⲩⲉϣⲡⲉⲕϩⲟ  ⲁⲓϩⲉ  ⲉⲣⲟϥ.  ⲓ̅Ⲋ. Ⲁⲓⲥⲱⲙⲛ̅ⲧ  ⲙ̅ⲡⲁϭⲗⲟϭ  ϩ̅ⲛ̅ϩⲉⲛⲕⲉⲣⲉⲁ . ⲁⲓⲡⲟⲣϣϥ̅  ⲇⲉ  ⲛ̅ⲁⲙⲫⲓⲧⲁⲡⲟⲥ  ⲛ̅ⲧⲉⲔⲏⲙⲉ. ⲓ̅ⲍ̅. Ⲁⲓⲛⲟⲩϫϭ̅  ⲙ̅ⲡⲁϭⲗⲟϭ  ϩ̅ⲛ̅ⲟⲩⲕⲣⲟⲕⲟⲥ .  ⲁⲩⲱ  ⲡⲁⲏⲓ  ϩ̅ⲛ̅ⲟⲩⲕⲓⲛⲁⲙⲱⲙⲟⲛ. ⲓ̅ⲏ. Ⲁⲙⲟⲩ  ⲛ̅ⲧⲛ̅ⲙ̅ⲧⲟⲛ  ⲙ̅ⲙⲟⲛ  ϩⲛ̅ⲟⲩⲙⲛ̅ⲧϣⲃⲏⲣ  ϣⲁϩⲧⲟⲟⲩⲉ . Ⲁⲙⲟⲩ  ⲛ̅ⲧⲛ̅ϩⲱⲗϭ̅  ϩⲛⲟⲩⲙⲉ. ⲓ̅ⲑ. Ⲙ̅ⲡⲁϩⲁⲓ  ⲅⲁⲣ  ϩⲙ̅ⲡⲁⲏⲓ  ⲁⲛ. ⲁϥⲃⲱⲕ  ⲉⲩϩⲓⲏ  ⲉⲥⲟⲩⲏⲩ.  ⲉⲣⲉⲟⲩⲧⲱⲱⲙⲉ  ϩⲛ̅ⲛⲉϥϭⲓϫ. ϩⲓⲧⲛ̅ⲟⲩⲙⲏⲏϣⲉ . ⲛ̅ϩⲟⲟⲩ  ⲉϥⲛⲁⲕⲟⲧϥ̅  ⲉⲡⲉϥⲏⲓ. ⲕ̅ⲁ̅. Ⲁⲥⲡⲗⲁⲛⲁ  ⲇⲉ  ⲙ̅ⲙⲟϥ  ϩ̅ⲛ̅ⲟⲩⲛⲟϭ  ⲛ̅ϩⲟⲙⲓⲗⲓⲁ  ⲛϣⲁϫⲉ . ⲁⲥⲙⲟⲣϥ̅  ⲇⲉ  ⲛ̅ϩⲉⲛⲛϩⲁϭⲉ  ⲛⲉ  ⲉⲃⲟⲗ  ϩ̅ⲛ̅ⲛⲉⲥⲥⲡⲟⲧⲟⲩ  ⲁⲥⲑⲓⲟϥ  ⲉⲃⲟⲗ. ⲕ̅ⲃ̅. Ⲛ̅ⲧⲟϥ  ⲇⲉ  ⲁϥⲟⲩⲁϩϥ̅  ⲛ̅ⲥⲱⲥ  ⲉϥϣⲧⲣ̅ⲧⲱⲣ . ⲛ̅ⲑⲉ  ⲛⲟⲩⲙⲁⲥⲉ  ⲉⲩⲛⲁⲛ̅ⲧϥ̅  ⲉⲡⲉϥⲙⲁⲛ̅ⲕⲟⲛⲥϥ̅  . ⲁⲩⲱ  ⲛ̅ⲑⲉ  ⲛⲟⲩⲟⲩϩⲟⲣ  ⲉϥϭⲉⲡⲏ  ⲉⲧⲁⲁϥ ⲉⲡⲉⲕⲗⲁⲗ . ⲏ̅  ⲛ̅ⲑⲉ  ⲛ̅ⲟⲩⲉⲓⲟⲩⲗ. ⲕ̅ⲅ̅. Ⲉⲁⲩϣⲟⲟϭⲉϥ  ⲛ̅ⲟⲩⲥⲟⲧⲉ ⲉⲡⲉϥϩⲏⲡⲁⲣ . Ϥϭⲉⲡⲏ  ⲇⲉ  ⲛ̅ⲑⲉ  ⲛ̅ⲟⲩϩⲁⲗⲏⲧ  ⲉⲩⲡⲁϣ  ⲛϥⲥⲟⲟⲩⲛ  ⲁⲛ ϫⲉ  ⲡⲙⲁ  ⲙⲡⲉϥⲧⲏⲩ  ⲡⲉ.  ⲕ̅ⲇ̅. Ⲧⲉⲛⲟⲩ  ϭⲉ  ⲡⲁϣⲏⲣⲉ   ⲥⲱⲧⲙ̅  ⲉⲣⲟⲓ  ⲛ̅ⲅ̅ϯϩⲧⲏⲕ  ⲉⲛϣⲁϫⲉ  ⲛ̅ⲣⲱⲓ.  Ⲙ̅ⲡⲣ̅ⲧⲣⲉⲡⲉⲕϩⲏⲧ  ⲣⲓⲕⲉ  ⲉⲛⲉⲥϩⲓⲟⲟⲩⲉ. ⲕ̅Ⲋ. Ⲁⲥⲕⲛ̅ⲥⲟⲩⲙⲏⲏϣⲉ  ⲅⲁⲣ  ⲁⲥⲧⲁⲩⲟⲟⲩ  ⲉϩⲣⲁⲓ . ⲁⲩⲱ  ϩⲉⲛⲁⲧⲏⲡⲉ  ⲛⲉ  ⲛ̅ⲧⲁⲥϩⲟⲧⲃⲟⲩ.  ⲕ̅ⲍ̅. Ⲉⲣⲉⲛⲉⲥϩⲓⲟⲟⲩⲉ  ⲃⲏⲕ  ⲉⲛⲏⲓ  ⲛ̅Ⲁⲙⲛ̅ⲧⲉ . ⲉⲩⲃⲏⲕ  ⲇⲉ  ⲉⲡⲉⲥⲏⲧ  ⲉⲛⲧⲁⲙⲓⲟⲛ  ⲙ̅ⲡⲙⲟⲩ.

  ⲏ̅.  Ⲛ̅ⲧⲟⲕ  ⲇⲉ  ⲧⲁϣⲉⲟⲉⲓϣ  ⲛ̅ⲧⲥⲟⲫⲓⲁ  ϫⲉ  ⲉⲣⲉⲧⲙⲛ̅ⲧⲣⲙ̅ⲛ̅ϩⲏⲧ  ⲥⲱⲧⲙ̅  ⲛⲁⲕ .  ⲉⲥϩⲓϫⲛ̅ⲛ̅ⲕⲟⲟϩ  ⲅⲁⲣ  ⲉⲧϫⲟⲥⲉ . Ⲥⲁϩⲉ  ⲇⲉ  ⲉⲣⲁⲧⲥ̅  ϩⲛ̅ⲧⲙⲏⲧⲉ  ⲛ̅ⲛⲉϩⲓⲟⲟⲩⲉ .  Ⲥϭⲟⲣϭ̅  ϩⲁⲧⲛ̅ⲙ̅ⲡⲩⲗⲏ  ⲛ̅ⲛ̅ϫⲱⲱⲣⲉ . ⲁⲩⲱ  ⲥⲉⲥⲙⲟⲩ  ⲉⲣⲟⲥ  ϩ̅ⲛ̅ⲑⲙⲙⲁⲛ̅ⲃⲱⲕ  ⲉϩⲟⲩⲛ . ϫⲉ  ϯⲡⲁⲣⲁⲕⲁⲗⲓ  ⲙ̅ⲙⲱⲧⲛ̅  ⲛ̅ⲣⲱⲙⲉ . ⲁⲩⲱ  ϯϫⲱ  ⲛⲏⲧⲛ̅  ⲛ̅ⲧⲁⲥⲃⲱ  ⲛ̅ϣⲏⲣⲉ  ⲛ̅ⲛ̅ⲣⲱⲙⲉ.  Ⲛ̅ⲃⲁⲗϩⲏⲧ  ⲛ̅ⲟⲓ  ⲛ̅ⲟⲩⲙⲛ̅ⲧⲥⲁⲃⲉ . ⲛⲁⲑⲏⲧ  ϯ  ⲙ̅ⲡⲉⲧⲛ̅ϩⲏⲧ  ⲥⲱⲧⲙ̅  ⲉⲣⲟⲓ  ϫⲉ  ⲉⲓⲛⲁϫⲱ  ⲅⲁⲣ  ⲛ̅ϩⲉⲛⲥⲃⲱ . ⲁⲩⲱ  ⲉⲓⲛⲁⲟⲩⲱⲛ  ⲛ̅ⲛⲉⲧⲥⲟⲩⲧⲱⲛ  ⲉⲃⲟⲗ  ϩⲛ̅ⲛⲁⲥⲡⲟⲧⲟⲩ  ⲉⲣⲉⲣⲱⲓ  ⲅⲁⲣ  ⲙⲉⲗⲉⲧⲁ  ⲛ̅ⲟⲩⲡⲓⲥⲧⲓⲥ .  ⲛⲉⲥⲡⲟⲧⲟⲩ  ⲇⲉ  ⲛ̅ϭⲟⲗ  ϫⲁϩⲙ̅  ⲙ̅ⲡⲁⲙ̅ⲧⲟ  ⲉⲃⲟⲗ . ⲉⲣⲉⲛ̅ϣⲁϫⲉ  ⲧⲏⲣⲟⲩ  ⲛ̅ⲣⲱⲓ  ϩ̅ⲛ̅ⲟⲩⲇⲓⲕⲁⲓⲟⲥⲩⲛⲏ  . ⲙ̅ⲛ̅ⲗⲁⲁⲩ  ⲛ̅ϩⲏⲧⲟⲩ  ⲉϥϭⲟⲟⲙⲉ . ⲟⲩⲇⲉ  ⲉϥϫⲏⲩ  ⲛ̅ⲕⲟⲧⲥ̅.  Ⲥⲉⲙ̅ⲡⲉⲙⲧⲟ  ⲉⲃⲟⲗ  ⲧⲏⲣⲟⲩ  ⲛ̅ⲛⲉⲧⲛ̅ⲟⲓ  . ⲥⲉⲥⲟⲩⲧⲱⲛ  ⲇⲉ  ⲛ̅ⲛⲉⲧⲟⲩⲱϣ  ⲉϫⲓ  ⲛ̅ⲟⲩⲁⲓⲥⲑⲏⲥⲓⲥ.  ϯϩⲏⲩ  ⲛⲟⲩⲥⲃⲱ  ⲛ̅ⲟⲩϩⲁⲧ  ⲁⲛ . ⲁⲩⲱ  ⲟⲩⲥⲟⲟⲩⲛ  ⲉϩⲟⲩⲉⲟⲩⲛⲟⲩⲃ  ⲉϥⲥⲟⲧⲡ̅ . ⲥⲉⲧⲡ̅ⲧⲙⲛ̅ⲧⲣⲙ̅ⲛ̅ϩⲏⲧ  ⲉϩⲟⲩⲉⲡⲛⲟⲩⲃ  ⲉⲧⲧⲁⲓⲏⲩ . Ⲧⲥⲟⲫⲓⲁ ⲅⲁⲣ  ⲥⲟⲧⲡ̅  ⲉϩⲟⲩⲉϩⲉⲛⲉⲛⲉ  ⲙ̅ⲙⲉ . ⲛⲉⲧⲧⲁⲓⲏⲩ  ⲇⲉ  ⲧⲏⲣⲟⲩ  ⲙ̅ⲡϣⲁ  ⲙ̅ⲙⲟⲥ  ⲁⲛ .

Ⲁⲛⲟⲕ  ⲧⲥⲟⲫⲓⲁ  ⲁⲓⲥⲱⲛⲧ̅  ⲙ̅ⲡϣⲟϫⲛⲉ  ⲁⲛⲟⲕ  ⲁⲓⲕⲱ  ⲛⲁⲓ  ⲛⲧⲁⲓⲥⲑⲏⲥⲓⲥ  ⲙ̅ⲛ̅ⲡⲙⲉⲉⲩⲉ .  Ⲧⲙⲛ̅ⲧⲙⲁⲓⲛⲟⲩⲧⲉ  ⲙⲟⲥⲧⲉ  ⲛ̅ⲧⲕⲁⲕⲓⲁ  ⲁⲩⲱ  ⲥⲙⲟⲥⲧⲉ  ⲛ̅ⲟⲩⲥⲱϣ  ⲙ̅ⲛ̅ⲟⲩⲙⲛ̅ⲧϫⲁⲥⲓϩⲏⲧ . ⲙ̅ⲛ̅ϩⲉⲛϩⲓⲟⲟⲩⲉ  ⲉⲩϩⲟⲟⲩ . ⲙⲛ̅ⲟⲩⲧⲁⲡⲣⲟ  ⲛ̅ϭⲟⲗ .   Ⲡⲱⲓ  ⲡⲉ  ⲡϣⲟϫⲛⲉ  ⲙ̅ⲛ̅ⲡⲱⲣϫ  ⲧⲱⲓ  ⲧⲉ ⲧⲙⲛ̅ⲧⲣⲙ̅ⲛ̅ϩⲏⲧ  ⲧⲱⲓ  ⲧⲉ  ⲧϭⲟⲙ.  ⲉⲣⲉⲛ̅ⲉⲣⲣⲱⲟⲩ  ⲟ  ⲛ̅ⲣ̅ⲣⲟ ⲉⲃⲟⲗ  ϩⲓⲧⲟⲟⲧ .  ⲁⲩⲱ  ⲉⲣⲉⲛ̅ϫⲱⲱⲣⲉ  ⲁⲙⲁϩⲧⲉ  ⲡ̅ⲕⲁϩ  ⲉⲃⲟⲗ  ϩⲓⲧⲟⲟⲧ . ⲉⲣⲉⲛ̅ⲛⲟϭ  ⲁⲓⲁⲓ  ⲉⲃⲟⲗ  ϩⲓⲧⲟⲟⲧ . ⲁⲩⲱ  ⲉⲣⲉⲛ̅ⲧⲩⲣⲁⲛⲛⲟⲥ  ⲁⲙⲁϩⲧⲉ  ⲙ̅ⲡⲕⲁϩ  ⲉⲃⲟⲗ  ϩⲓⲧⲟⲟⲧ .  Ⲁⲛⲟⲕ  ⲉⲓⲙⲉ  ⲛ̅ⲛⲉⲧⲙⲉ  ⲙ̅ⲙⲟⲓ . ⲛⲉⲧϣⲓⲛⲉ  ⲇⲉ  ⲛ̅ⲥⲱⲓ  ⲥⲉⲛⲁϭⲛⲧ̅ .  Ⲟⲩⲛ̅ⲧⲁⲓⲧⲙⲛ̅ⲧⲣⲙ̅ⲙⲁⲟ  ⲅⲁⲣ  ⲙⲛ̅ⲡⲉⲟⲩ . ⲁⲩⲱ  ⲟⲩϫⲡⲉϩⲁϩ  ⲙⲛ̅ⲟⲩⲇⲓⲕⲁⲓⲟⲥⲩⲛⲏ . Ⲛⲁⲛⲟⲩϫⲡⲟⲓ  ⲛⲏⲧⲛ̅ⲉϩⲟⲩⲉⲡⲛⲟⲩⲃ  ⲙⲛ̅ⲡⲉⲛⲉ  ⲙ̅ⲙⲉ . ⲁⲩⲱ  ⲛⲁⲛⲟⲩⲛⲁⲅⲉⲛⲏⲙⲁ  ⲉϩⲟⲩⲉⲡϩⲁⲧ  ⲉⲧⲥⲟⲧⲡ̅.  Ⲉⲓⲙⲟⲟϣⲉ  ϩⲛ̅ϩⲉⲛϩⲓⲟⲟⲩⲉ  ⲙ̅ⲙⲛ̅ⲧⲙⲉ . ⲁⲩⲱ  ⲉⲓⲃⲏⲕ  ϩ̅ⲛ̅ⲛⲉϩⲓⲟⲟⲩⲉ  ⲛ̅ⲧⲙⲉ . ϫⲉⲕⲁⲥ  ⲉⲓⲉⲡⲱϣ  ⲉϫⲛ̅ⲛⲉⲧⲙⲉ  ⲙ̅ⲙⲟⲓ  ⲛ̅ⲟⲩⲙⲛ̅ⲧⲣⲙ̅ⲙⲁⲟ . ⲁⲩⲱ  ⲛ̅ⲧⲁⲙⲉϩⲛⲉⲩⲁϩⲱⲱⲣ  ⲛ̅ⲁⲅⲁⲑⲟⲛ . Ⲉⲓϣⲁⲛϫⲱ  ⲛⲏⲧⲛ̅  ⲛ̅ⲛⲉⲧϣⲟⲟⲡ ⲙ̅ⲙⲏⲏⲛⲉ  ϯⲛⲁⲣ̅ⲡⲙⲉⲉⲩⲉ  ⲉⲉⲡ  ϫⲓⲛⲉⲛⲉϩ .

Ⲁⲡⲛⲟⲩⲧⲉ  ⲥⲟⲛⲧ̅  ϩⲛ̅ⲧⲁⲣⲭⲏ  ⲛ̅ⲛⲉϥϩⲓⲟⲟⲩⲉ  ⲉⲛⲉϥϩⲃⲏⲩⲉ . ⲉⲙⲡⲁⲧϥ̅ⲧⲁⲙⲓⲉⲗⲁⲁⲩ. ⲁⲩⲱ  ⲁϥⲥⲙⲛ̅ⲥⲛ̅ⲧⲉ  ⲙ̅ⲙⲟⲓ  ϩⲁⲑⲏ  ⲛ̅ⲛⲉⲛⲉϩ  ϩⲛ̅ⲧⲁⲣⲭⲏ  ⲉⲙⲡⲁⲧϥ̅ⲧⲁⲙⲓⲉⲡⲕⲁϩ .  ⲁϥϫⲡⲟⲓ  ⲇⲉ  ϩⲁⲑⲏ  ⲙ̅ⲡⲛⲟⲩⲛ.  Ⲉⲙⲡⲁⲧⲉⲙ̅ⲡⲏⲅⲏ  ⲙ̅ⲙⲟⲟⲩ  ⲉⲓ  ⲉⲃⲟⲗ . ⲉⲙⲡⲁⲧϥ̅ⲧⲁϫⲣⲉⲛ̅ⲧⲟⲟⲩ . ⲁⲩⲱ  ⲛϥ̅ⲡⲗⲁⲥⲥⲉ  ⲙⲡⲕⲁϩ ⲙ̅ⲛ̅ⲧⲟⲓⲕⲟⲩⲙⲉⲛⲏ . ⲁϥϫⲡⲟⲓ  ⲇⲉ ϩⲁⲑⲏ  ⲛ̅ⲥⲓⲃⲧ  ⲛⲓⲙ . Ⲁⲡⲛⲟⲩⲧⲉ  ⲧⲁⲙⲓⲉⲧⲡⲉ  ⲙ̅ⲛ̅ⲡⲕⲁϩ . ⲁⲩⲱ  ⲁⲣⲏϫϥ  ⲙ̅ⲡⲕⲁϩ  ⲉⲧϭⲟⲣϭ̅  ϩⲁⲧⲡⲉ . ⲉϥⲛⲁⲥⲃ̅ⲧⲉⲧⲡⲉ  ⲛⲉⲓⲛⲙ̅ⲙⲁϥ  ⲡⲉ . ⲁⲩⲱ  ⲉϥⲛⲁⲡⲣ̅ϣⲡⲉϥⲑⲣⲟⲛⲟⲥ  ⲉⲃⲟⲗ  ϩⲓϫⲛ̅ⲛ̅ⲧⲏⲩ . ⲁⲩⲱ  ⲉϥⲛⲁⲱⲣϫ̅  ⲛ̅ⲙ̅ⲡⲏⲅⲏ  ⲉⲧϩⲁⲧⲡⲉ . ⲁⲩⲱ  ⲉϥⲛⲁⲣ̅ϫ̅ⲛ̅ⲥⲛ̅ⲧⲉ  ⲙⲡⲕⲁϩ . ⲉϥⲛⲁⲧⲁϫⲣⲉⲛⲉⲕⲗⲟⲟⲗⲉ  ⲉⲧϩⲣⲁⲓ   ⲛⲉⲓⲛⲙ̅ⲙⲁϥ  ⲡⲉ  ⲉⲓⲥⲟⲃⲧⲉ  ⲛⲁϥ.  Ⲁⲛⲟⲕ  ⲡⲉ  ⲛⲉϥⲣⲁϣⲉ  ⲛ̅ⲙⲙⲁⲓ . ⲛⲉⲓⲉⲩⲫⲣⲁⲛⲉ  ⲇⲉ  ⲙ̅ⲙⲏⲏⲛⲉ  ⲙ̅ⲡⲉϥⲙ̅ⲧⲟ  ⲉⲃⲟⲗ  ⲛ̅ⲟⲩⲟⲉⲓϣ  ⲛⲓⲙ . Ⲁⲩⲱ  ⲉϥⲛⲁⲉⲩⲫⲣⲁⲛⲉ  ⲛ̅ⲧⲉⲣⲉϥϫⲱⲕ  ⲉⲃⲟⲗ  ⲛ̅ⲧⲟⲓⲕⲟⲩⲙⲉⲛⲏ . ⲁⲩⲱ  ⲉϥⲛⲁⲉⲩⲫⲣⲁⲛⲉ  ⲉϫⲛ̅ⲛ̅ϣⲏⲣⲉ  ⲛ̅ⲛ̅ⲣⲱⲙⲉ . ϣⲁⲣⲉⲛⲉϥⲁϩⲱⲣ  ⲇⲉ  ⲧⲣⲉⲛ̅ⲣⲱⲙⲉ  ⲣⲁϣⲉ .

Ⲧⲉⲛⲟⲩ  ϭⲉ  ⲛⲁϣⲏⲣⲉ  ⲥⲱⲧⲙ̅  ⲉⲣⲟⲓ .  ϯϩⲧⲏⲧⲛ̅  ⲉⲡϣⲁϫⲉ  ⲛ̅ⲧⲁⲥⲃⲱ .  ϫⲉ  ⲉⲧⲉⲧⲛ̅ⲣ̅ⲟⲩⲛⲟϭ  ⲛ̅ⲁϩⲉ  ⲁⲩⲱ  ⲛ̅ⲧⲉⲧⲛ̅ⲣ̅ⲥⲟⲫⲟⲥ.  ⲙ̅ⲡⲣ̅ⲣ̅ⲡⲃⲟⲗ  ⲛ̅ⲛⲁϫⲡⲓⲟ . Ⲛⲁⲓⲁⲧϥ̅  ⲙ̅ⲡⲣⲱⲙⲉ  ⲉⲧⲛⲁⲥⲱⲧⲙ̅  ⲉⲣⲟⲓ . ⲁⲩⲱ  ⲡⲣⲱⲙⲉ  ⲉⲧⲛⲁϩⲁⲣⲉϩ  ⲉⲛⲁϩⲓⲟⲟⲩⲉ . ⲉⲧⲟ  ⲛ̅ⲟⲩϣⲏ  ⲛ̅ⲣⲟⲉⲓⲥ  ϩⲓⲣⲛ̅ⲛⲁⲣⲟ  ⲙ̅ⲙⲏⲏⲛⲉ . ⲉϥϩⲁⲣⲉϩ  ⲉⲛⲟⲩⲉϭⲣⲟ  ⲛ̅ⲛⲁⲙⲁ   ⲛ̅ⲉⲓ  ⲉϩⲟⲩⲛ.  Ⲛⲁϩⲓⲟⲟⲩⲉ  ⲅⲁⲣ  ϩⲉⲛϩⲓⲟⲟⲩⲉ  ⲛ̅ⲱⲛϩ̅  ⲛⲉ .  ⲁⲩⲱ  ⲉⲣⲉⲡⲟⲩⲱϣ  ⲥⲟⲃⲧⲉ  ⲉⲃⲟⲗ  ϩⲓⲧⲙ̅Ⲡϫⲟⲉⲓⲥ . ⲉⲣⲉⲡⲟⲩⲣⲟⲧ  ⲇⲉ  ⲛⲏⲩ  ⲉⲃⲟⲗ  ϩⲓⲧⲙ̅ⲡⲛⲟⲩⲧⲉ  ⲙ̅ⲛ̅ϩⲱⲃ  ⲛⲓⲙ  ⲉⲧⲥⲟⲧⲡ̅ . Ⲛⲉⲧⲣ̅ⲛⲟⲃⲉ  ⲇⲉ  ⲉⲣⲟⲓ  ⲥⲉⲛⲁⲃⲗⲁⲡⲧⲉⲓ  ⲛ̅ⲛⲉⲩⲯⲩⲭⲏ . ⲁⲩⲱ  ⲛⲉⲧⲙⲟⲥⲧⲉ  ⲙ̅ⲙⲟⲓ  ⲉⲩⲟ  ⲛ̅ϣⲃⲏⲣ  ⲉⲡⲙⲟⲩ.
 
Ⲑ̅. Ⲁⲧⲥⲟⲫⲓⲁ  ⲕⲉⲧⲟⲩⲏⲓ  ⲛⲁⲥ  ⲁⲩⲱ  ⲁⲥⲧⲁϫⲣⲟ  ⲛ̅ⲥⲁϣϥ̅  ⲛ̅ⲥⲧⲩⲗⲟⲥ . ⲁⲥⲕⲱⲛⲥ̅  ⲛ̅ⲛⲉⲥϣⲱⲱⲧ. ⲁⲥⲕⲉⲣⲁ  ⲙ̅ⲡⲉⲥⲏⲣⲡ̅  ⲉⲩϩⲛⲁⲁⲩ .  ⲁⲥⲥⲟⲃⲧⲉ  ⲛ̅ⲧⲉⲥⲧⲣⲁⲡⲉⲍⲁ . Ⲁⲥϫⲟⲟⲩ  ⲛ̅ⲛⲉⲥϩⲙ̅ϩⲁⲗ  ⲉⲥⲙⲟⲩⲧⲉ  ϩ̅ⲛ̅ⲟⲩⲛⲟϭ  ⲛ̅ⲧⲁϣⲉⲟⲉⲓϣ  ⲉϫⲙ̅ⲡⲉϩⲛⲁⲁⲩ  ⲉⲥϫⲱ  ⲙ̅ⲙⲟⲥ . ϫⲉ   ⲡⲁⲑⲏⲧ  ⲉⲧⲛ̅ϩⲏⲧⲧⲏⲩⲧⲛ̅  ⲙⲁⲣⲉϥⲣⲁⲕⲧϥ̅  ϣⲁⲣⲟⲓ . ⲁⲩⲱ  ⲡⲉϫⲁⲥ  ⲛ̅ⲛⲉⲧϣⲁⲁⲧ  ⲛ̅ⲥⲃⲱ.  Ϫⲉ  ⲁⲙⲉⲓⲧⲛ̅  ⲛ̅ⲧⲉⲧⲛ̅ⲟⲩⲱⲙ  ⲉⲃⲟⲗ   ϩⲛ̅ⲛⲁⲟⲉⲓⲕ . ⲁⲩⲱ  ⲛ̅ⲧⲉⲧⲛ̅ⲥⲱ  ⲙ̅ⲡⲁⲏⲣⲡ̅  ⲛ̅ⲧⲁⲓⲕⲉⲣⲁ  ⲙ̅ⲙⲟϥ .  Ⲕⲱ  ⲛ̅ⲥⲱⲧⲛ̅  ⲛ̅ⲧⲙⲛ̅ⲧⲁⲑⲏⲧ  ϫⲉ  ⲉⲧⲉⲧⲛⲉⲱⲛϩ̅ .  ⲛ̅ⲧⲉⲧⲛ̅ϣⲓⲛⲉ  ⲛ̅ⲥⲁⲧⲙⲛ̅ⲧⲣⲙ̅ⲛ̅ϩⲏⲧ  ϫⲉ  ⲉⲧⲉⲧⲛⲉⲣ̅ⲁϩⲉ . ⲁⲩⲱ  ϫⲉ  ⲉⲧⲉⲧⲛⲉⲥⲟⲟⲩⲧⲛ̅  ⲛ̅ⲧⲙⲛ̅ⲧⲣⲙ̅ⲛ̅ϩⲏⲧ . ϩⲛ̅ⲟⲩⲥⲟⲟⲩⲧⲛ̅ . Ⲙⲉⲉⲩⲉ  ⲉⲧⲉⲥⲃⲱ  ϩⲛ̅ⲟⲩϩⲓⲏ  ⲉⲥⲥⲟⲩⲧⲱⲛ .

Ⲡⲉⲧϯⲥⲃⲱ  ⲛ̅ⲛⲉⲑⲟⲟⲩ  ⲉϥⲛⲁϫⲓ  ⲛⲁϥ  ⲛ̅ϩⲉⲛⲥⲱϣ . ⲉⲣⲉⲟⲩⲥⲱϣ  ⲇⲉ  ⲛⲏⲩ  ⲉϫⲛ̅ⲛⲉⲑⲟⲟⲩ  ϩ̅ⲙ̅ⲡⲉⲧⲟⲩϭⲱϣⲧ̅  ⲉⲃⲟⲗ  ϩⲏⲧϥ̅. ϩⲉⲛⲉⲗⲉⲗⲕⲏⲙⲉ  ⲛⲉ  ⲛⲉϫⲡⲓⲟ  ⲉⲧϣⲟⲟⲡ  ⲙⲡⲁⲥⲉⲃⲏⲥ . Ⲙ̅ⲡⲣ̅ϫⲡⲓⲉⲛⲉⲑⲟⲟⲩ  ⲇⲉ  ⲛ̅ⲛⲉⲩⲙⲉⲥⲧⲱⲕ . ϫⲡⲓⲉⲟⲩⲥⲁⲃⲉ  ⲧⲁⲣⲉϥⲙⲉⲣⲓⲧⲕ̅ . ϯⲧⲁⲫⲟⲣⲙⲏ  ⲛⲟⲩⲥⲟⲫⲟⲥ  ⲧⲁⲣⲉϥⲣ̅ϩⲟⲩⲉⲥⲟⲫⲟⲥ . Ⲙⲁⲧⲁⲙⲉⲡⲇⲓⲕⲁⲓⲟⲥ  ⲧⲁⲣⲉϥϣⲣ̅ⲡ̅ⲥⲟⲟⲩⲛ  ⲛ̅ϩⲟⲩⲟ.   Ⲧⲁⲣⲭⲏ  ⲛ̅ⲧⲥⲟⲫⲓⲁ  ⲧⲉ  ⲧⲙⲛ̅ⲧⲙⲁⲓⲛⲟⲩⲧⲉ  ⲧⲙⲛ̅ⲧⲣⲙ̅ⲛ̅ϩⲏⲧ  ⲇⲉ  ⲛⲛⲉⲧⲟⲩⲁⲁⲃ  ⲡⲉ  ⲡϣⲣ̅ⲡ̅ⲥⲟⲟⲩⲛ .   Ⲡⲁⲟⲩϩⲏⲧ  ⲇⲉ  ⲉⲛⲁⲛⲟⲩϥ  ⲡⲉ  ⲡⲉⲓⲙⲉ  ⲉⲡⲛⲟⲙⲟⲥ  ϩ̅ⲙ̅ⲡⲉⲓⲥⲙⲟⲧ  ⲅⲁⲣ  ⲉⲕⲛⲁⲣ̅ⲟⲩⲛⲟϭ  ⲛ̅ⲁϩⲉ . ⲁⲩⲱ  ⲥⲉⲛⲁⲟⲩⲱϩ  ⲉⲣⲟⲕ  ⲛ̅ϩⲉⲛⲣⲙ̅ⲡⲟⲟⲩⲉ  ⲛ̅ⲱⲛϩ̅ .  Ⲡⲁϣⲏⲣⲉ  ⲉⲕϣⲁⲛⲣ̅ⲥⲟⲫⲟⲥ  ⲉⲕⲛⲁⲉⲓⲣⲉ  ⲛⲁⲕ  ⲙ̅ⲛ̅ⲡⲉⲧϩⲓⲧⲟⲩⲱⲕ .  Ⲉϣⲱⲡⲉ  ⲇⲉ  ⲉⲕϣⲁⲛⲑⲟ  ⲉⲕⲛⲁⲥⲉⲕⲡⲉⲑⲟⲟⲩ  ⲛⲁⲕ  ⲟⲩⲁⲁⲕ . Ⲡⲉⲧⲧⲁϫⲣⲟ  ⲙ̅ⲙⲟϥ  ⲉϫⲛ̅ϩⲉⲛϭⲟⲗ  ⲡⲁⲓ  ⲉϥⲙⲟⲟⲛⲉ  ⲛ̅ϩⲉⲛⲧⲏⲩ. ⲁⲩⲱ   ⲉϥⲡⲏⲧ  ⲛ̅ⲥⲁϩⲉⲛϩⲁⲗⲁⲧⲉ  ⲉⲩϩⲏⲗ. ⲁϥⲕⲱ  ⲅⲁⲣ  ⲛ̅ⲥⲱϥ  ⲛ̅ⲛⲉϩⲓⲟⲟⲩⲉ  ⲙ̅ⲡⲉϥⲙⲁⲛ̅ⲉⲗⲟⲟⲗⲉ . ⲁⲩⲱ  ⲁϥⲣ̅ⲡⲱⲃϣ̅  ⲛ̅ⲛⲉϩⲓⲟⲟⲩⲉ  ⲛ̅ⲧⲉϥⲥⲱϣⲉ ⲙ̅ⲙⲓⲛ  ⲙ̅ⲙⲟϥ. ⲉϥⲙⲟⲟϣⲉ  ϩⲓⲧⲛ̅ⲟⲩϫⲁⲓⲉ  ⲛ̅ⲁⲧⲙⲟⲟⲩ. ⲁⲩⲱ  ϩⲛ̅ⲟⲩⲕⲁϩ  ⲉϥϣⲏϥ  ϩⲛ̅ⲟⲩⲉⲓⲃⲉ . ⲉϥⲥⲟⲩⲱϩ  ⲇⲉ  ⲉϩⲟⲩⲛ  ⲛ̅ⲛⲉϥϭⲓϫ  ⲑⲛⲟⲩϣⲱⲱⲃⲉ .

Ⲟⲩⲛ̅ⲟⲩⲥϩⲓⲙⲉ  ⲛ̅ⲁϣⲧⲙⲙⲉ  ⲁⲩⲱ  ⲛ̅ⲁⲑⲏⲧ  ⲛⲁⲣ̅ϭⲣⲱϩ  ⲙ̅ⲡⲟⲉⲓⲕ  ⲧⲁⲓ  ⲉⲧⲉ  ⲛⲥⲥⲟⲟⲩⲛ  ⲁⲛ  ⲙ̅ⲡϣⲓⲡⲉ. Ⲁⲥϩⲙⲟⲟⲥ  ϩⲓⲣⲛ̅ⲑⲛⲣⲟ  ⲙ̅ⲡⲉⲥⲏⲓ  ϩⲓⲟⲩⲧⲟϭⲥ̅.  ⲉⲥⲟⲩⲟⲛϩ̅ ⲉⲃⲟⲗ  ϩⲓⲛⲉⲡⲗⲁⲧⲓⲁ.  Ⲉⲥⲙⲟⲩⲧⲉ  ⲉⲛⲉⲧⲡⲁⲣⲁⲅⲉ  ⲁⲩⲱ  ⲛⲉⲧⲥⲟⲩⲧⲱⲛ  ϩⲓⲛⲉⲩϩⲓⲟⲟⲩⲉ  ⲉⲥϫⲱ  ⲙ̅ⲙⲟⲥ . Ϫⲉ  ⲛⲓⲙ  ⲡⲉ  ⲡⲁⲑⲏⲧ  ⲉⲧⲛ̅ϩⲏⲧⲧⲏⲩⲧⲛ̅  ⲙⲁⲣⲉϥⲣⲁⲕⲧϥ̅  ϣⲁⲣⲟⲓ.  ϯⲟⲩⲁϩⲥⲁϩⲛⲉ  ⲇⲉ  ⲛ̅ⲛⲉⲧϣⲁⲁⲧ  ⲛ̅ⲥⲃⲱ  ⲉⲓϫⲱ  ⲙ̅ⲙⲟⲥ . ϫⲉ  ⲟⲩⲱⲙ  ⲛ̅ϩⲉⲛⲟⲉⲓⲕ  ⲉⲩϩⲏⲡ  ϩ̅ⲛ̅ⲟⲩⲟⲩⲣⲟⲧ . ⲙ̅ⲛ̅ⲟⲩⲙⲟⲟⲩ  ⲑⲛϫⲓⲟⲩⲉ  ⲉϥϩⲟⲗϭ̅ .  ⲛ̅ϥ̅ⲥⲟⲟⲩⲛ  ⲇⲉ  ⲁⲛ  ϫⲉ  ⲉⲣⲉⲛⲣⲱⲙⲉ  ⲙⲟⲩ  ϩⲁⲧⲏⲥ . ⲁⲩⲱ ⲉⲥⲧⲱⲙⲛ̅ⲧ  ⲉⲡⲡⲁϣ  ⲛ̅Ⲁⲙⲛ̅ⲧⲉ . ⲁⲗⲗⲁ  ⲡⲱⲧ  ⲉⲡⲟⲩⲉ  ⲛ̅ⲅ̅ⲧⲙ̅ⲱⲥⲕ̅  ϩ̅ⲙ̅ⲡⲉⲥⲙⲁ . ⲁⲩⲱ  ⲙ̅ⲡⲣ̅ⲥⲙⲛ̅ⲛⲉⲕⲃⲁⲗ  ⲉϩⲟⲩⲛ  ⲉϩⲣⲁⲥ . ⲧⲁⲓ  ⲅⲁⲣ  ⲧⲉ  ⲑⲉ  ⲉⲧⲕ̅ⲛⲁϫⲓⲟⲟⲣ  ⲛ̅ⲟⲩⲙⲟⲟⲩ  ⲉⲛⲡⲱⲕ ⲁⲛ  ⲡⲉ . ⲁⲩⲱ  ⲉⲕⲛⲁⲟⲩⲱⲧⲃ̅  ⲛ̅ⲟⲩⲉⲓⲉⲣⲟ  ⲛ̅ϣⲙ̅ⲙⲟ. Ⲥⲁϩⲱⲕ  ⲉⲃⲟⲗ  ⲑⲛⲟⲩⲙⲟⲟⲩ  ⲉⲛⲡⲱⲕ  ⲁⲛ  ⲡⲉ . ⲁⲩⲱ  ⲙ̅ⲡⲣ̅ⲥⲱ  ϩⲛ̅ⲟⲩⲡⲏⲅⲏ  ⲛ̅ϣⲙ̅ⲙⲟ . ϫⲉ  ⲉⲕⲉⲣⲟⲩⲛⲟϭ  ⲛ̅ⲁϩⲉ.  Ⲡⲉⲧϩⲱⲛ  ⲅⲁⲣ  ⲉϩⲟⲩⲛ  ⲉⲧⲁⲓ  ϥⲛⲁⲃⲱⲕ  ⲉⲡⲉⲥⲏⲧ  ⲉⲀⲙⲛ̅ⲧⲉ . ⲡⲉⲧⲛⲁⲥⲁϩⲱϥ  ⲇⲉ  ⲉⲃⲟⲗ  ϥⲛⲁⲟⲩϫⲁⲓ . ⲁⲩⲱ  ϥⲛⲁⲱⲛϩ  ⲉⲩⲟⲩⲟⲉⲓϣ  ⲛ̅ⲁϩⲉ . ⲥⲉⲛⲁⲟⲩⲱϩ ⲇⲉ  ⲉⲣⲟϥ  ⲛ̅ϩⲉⲛⲣⲙ̅ⲡⲟⲟⲩⲉ  ⲛⲱⲛϩ̅ :
 
Ⲓ̅. Ϣⲁⲣⲉⲟⲩϣⲏⲣⲉ  ⲛ̅ⲥⲟⲫⲟⲥ  ⲉⲩⲫⲣⲁⲛⲉ  ⲙ̅ⲡⲉϥⲉⲓⲱⲧ. ⲟⲩⲗⲩⲡⲏ  ⲇⲉ  ⲛ̅ⲧⲉϥⲙⲁⲁⲩ  ⲡⲉ  ⲟⲩϣⲏⲣⲉ  ⲛⲁⲑⲏⲧ . ⲛⲁϩⲱⲱⲣ  ⲛⲁϯϩⲏⲩ  ⲁⲛ  ⲛ̅ⲛ̅ⲁⲛⲟⲙⲟⲥ . ϣⲁⲣⲉⲧⲇⲓⲕⲁⲓⲟⲥⲩⲛⲏ  ⲇⲉ  ⲛⲟⲩϩⲙ  ⲉⲃⲟⲗ  ϩ̅ⲙ̅ⲡⲙⲟⲩ . Ⲡϫⲟⲉⲓⲥ  ⲛⲁⲙⲉⲩⲧⲟⲩⲯⲩⲭⲏ  ⲁⲛ  ⲛ̅ⲇⲓⲕⲁⲓⲟⲥ  ϩⲁⲡⲉϩⲕⲟ . ϥⲛⲁⲟⲩⲱⲗⲥ̅  ⲇⲉ  ⲙ̅ⲡⲱⲛϩ̅  ⲛ̅ⲛ̅ⲁⲥⲉⲃⲏⲥ .  Ϣⲁⲣⲉⲧⲙⲛ̅ⲧϩⲏⲕⲉ  ⲑⲃ̅ⲃⲓⲉⲡⲣⲱⲙⲉ . ϣⲁⲣⲉⲧϫⲓϭ  ⲇⲉ  ⲛ̅ⲛ̅ϫⲱⲱⲣⲉ  ⲣ̅ⲣ̅ⲙ̅ⲙⲁⲟ .  Ⲟⲩⲛⲟⲩϣⲏⲣⲉ  ⲉϥⲧⲥⲁⲃⲏⲩ  ⲛⲁⲣ̅ⲥⲟⲫⲟⲥ .  ϥⲛⲁⲭⲣⲱ  ⲇⲉ  ⲙ̅ⲡⲁⲑⲏⲧ  ϩⲱⲥ  ⲣⲉϥϣⲙ̅ϣⲉ.  ϥⲛⲁⲟⲩϫⲁⲓ  ϩ̅ⲛ̅ⲟⲩⲕⲁⲩⲙⲁ  ⲛ̅ϭⲓⲟⲩϣⲏⲣⲉ  ⲛ̅ⲥⲁⲃⲉ. ⲟⲩⲛⲟⲩϣⲏⲣⲉ  ⲇⲉ  ⲙ̅ⲡⲁⲣⲁⲛⲟⲙⲟⲥ  ⲛⲁϣⲱⲥⲙ̅  ϩ̅ⲙ̅ⲡⲱϩ̅ⲥ̅ . ϥⲛⲁⲥⲟⲩⲱϩ  ⲉϩⲟⲩⲛ  ϩ̅ⲙ̅ⲡϣⲱⲙ . ⲡⲉϫⲡⲓⲏⲧ  ⲇⲉ  ⲛⲁϣⲱⲥⲙ̅  ϩ̅ⲙ̅ⲡⲱϩ̅ⲥ̅ . ⲉⲣⲉⲡⲉⲥⲙⲟⲩ  ⲙ̅ⲡⲛⲟⲩⲧⲉ  ϩⲓϫⲛ̅ⲧⲁⲡⲉ  ⲛ̅ⲛ̅ⲇⲓⲕⲁⲓⲟⲥ .  Ⲟⲩⲛⲟⲩϩⲏⲃⲉ  ⲇⲉ  ⲛ̅ϣⲁⲣⲁϩⲉ  ⲛⲁϩⲱⲃⲥ̅  ⲛ̅ⲧ̅ⲧⲁⲡⲣⲟ  ⲛ̅ⲛ̅ⲁⲥⲉⲃⲏⲥ .  Ⲟⲩⲥⲟⲉⲓⲧ  ⲉⲛⲁⲛⲟⲩϥ  ⲡⲉ  ⲡⲣ̅ⲡⲙⲉⲉⲩⲉ  ⲙ̅ⲡⲇⲓⲕⲁⲓⲟⲥ . ⲡⲣⲁⲛ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲁϫⲉⲛⲁ . ⲡⲥⲟⲫⲟⲥ  ϩ̅ⲙ̅ⲡⲉϥϩⲏⲧ  ⲛⲁϣⲱⲡ  ⲉⲣⲟϥ  ⲛ̅ⲧⲛ̅ⲧⲟⲟⲗⲏ . ⲁⲩⲱ  ⲥⲉⲛⲁϭⲱⲡⲉ  ⲙⲡⲁⲑⲏⲧ  ϩ̅ⲛ̅ⲛⲉϥⲥⲡⲟⲧⲟⲩ . ⲡⲉⲧϣⲧⲣ̅ⲧⲱⲣ  ⲇⲉ  ⲉϥϭⲟⲟⲙⲉ  ϩ̅ⲛ̅ⲛⲉϥⲥⲡⲟⲧⲟⲩ  ϥⲛⲁϩⲉ . Ⲡⲉⲧⲙⲟⲟϣⲉ  ϩ̅ⲛ̅ⲟⲩⲙⲛ̅ⲧⲃⲁⲗϩⲏⲧ  ⲉϥⲙⲟⲟϣⲉ  ϩⲛ̅ⲟⲩⲧⲁϫⲣⲟ  ⲡⲉⲧⲕⲧⲟ ⲇⲉ  ⲉⲃⲟⲗ  ⲛ̅ⲛⲉϥϩⲓⲟⲟⲩⲉ  ϥⲛⲁⲟⲩⲱⲛϩ̅  ⲉⲃⲟⲗ.  Ⲡⲉⲧϫⲱⲣⲙ̅  ⲛ̅ⲛⲉϥⲃⲁⲗ  ϩⲛ̅ⲟⲩⲕⲣⲟϥ  ϥⲛⲁⲥⲉⲩϩⲗⲩⲡⲓ  ⲉϩⲟⲩⲛ  ⲛ̅ⲛ̅ⲣⲱⲙⲉ . Ⲡⲉⲧϫⲡⲓⲟ  ⲇⲉ  ϩ̅ⲛ̅ⲟⲩⲟⲩⲱⲛϩ̅  ⲉⲃⲟⲗ  ϥⲛⲁⲁⲁⲩ  ⲛⲉⲓⲣⲏⲛⲏ .  ⲉⲣⲉⲧⲡⲏⲅⲏ  ⲙ̅ⲡⲱⲛϩ̅  ϩ̅ⲛⲧϭⲓϫ   ⲙ̅ⲡⲇⲓⲕⲁⲓⲟⲥ . ⲡⲧⲁⲕⲟ  ⲇⲉ  ⲛⲁϩⲱⲃⲥ̅  ⲛ̅ⲧⲧⲁⲡⲣⲟ  ⲙ̅ⲡⲁⲥⲉⲃⲏⲥ . Ϣⲁⲣⲉⲡⲙⲟⲥⲧⲉ  ⲧⲟⲩⲛⲉⲥⲟⲩϯⲧⲱⲛ . ⲟⲩⲟⲛ  ⲇⲉ  ⲛⲓⲙ  ⲉⲧⲉⲛ̅ⲥⲉϫⲓ  ⲁⲛ  ⲛ̅ϭⲟⲛⲥ̅  ⲧⲙⲛ̅ⲧ̅ϣⲃⲏⲣ  ⲛⲁϩⲟⲃⲥⲟⲩ .  Ⲡⲉⲧⲉⲓⲛⲉ  ⲛ̅ⲟⲩⲥⲟⲫⲓⲁ  ⲉⲃⲟⲗ  ϩ̅ⲛ̅ⲣⲱϥ . ⲉϥⲣⲱϩ̅ⲧ̅  ⲛ̅ⲟⲩⲣⲱⲙⲉ  ⲛⲁⲑⲏⲧ  ϩ̅ⲛ̅ⲟⲩϭⲉⲣⲱⲃ .  ⲛ̅ⲥⲟⲫⲟⲥ  ⲛⲁϩⲱⲡ  ⲛ̅ϩⲉⲛⲥⲱϣ  ⲧⲧⲁⲡⲣⲟ  ⲇⲉ  ⲛ̅ⲟⲩϣⲧⲣ̅ⲧⲱⲣ  ⲛⲁϩⲱⲛ  ⲉϩⲟⲩⲛ  ⲉⲡⲟⲩⲱϣϥ̅.  Ⲡⲉϫⲡⲟ  ⲛ̅ⲟⲩⲣ̅ⲙⲙⲁⲟ  ⲡⲉ  ⲟⲩⲡⲟⲗⲓⲥ  ⲉⲥⲟⲣϫ̅. ⲡⲟⲩⲱϣϥ̅  ⲇⲉ  ⲛ̅ⲛ̅ⲁⲥⲉⲃⲏⲥ  ⲡⲉ  ⲧⲙⲛ̅ⲧϩⲏⲕⲉ .  Ϣⲁⲣⲉⲛⲉϩⲃⲏⲩⲉ  ⲙ̅ⲡⲇⲓⲕⲁⲓⲟⲥ  ϫⲡⲉⲡⲱⲛϩ̅ . ⲛ̅ⲕⲁⲣⲡⲟⲥ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲉ  ⲛ̅ⲛⲟⲃⲉ . Ϣⲁⲣⲉⲧⲉⲥⲃⲱ  ϩⲁⲣⲉϩ  ⲉⲛⲉϩⲓⲟⲟⲩⲉ  ⲙ̅ⲡⲱⲛϩ̅ . ⲧⲉⲥⲃⲱ  ⲇⲉ  ⲉⲧⲉⲙ̅ⲡⲟⲩϫⲡⲓⲟⲥ  ⲡⲗⲁⲛⲁ . Ϣⲁⲣⲉϩⲉⲛⲥⲡⲟⲧⲟⲩ  ⲙ̅ⲙⲉ  ϩⲉⲡⲟⲩⲙⲛ̅ⲧϫⲁϫⲉ . ϩⲉⲛⲁⲑⲏⲧ  ⲇⲉ  ⲛⲉⲧⲉⲓⲛⲉ  ⲉⲃⲟⲗ  ⲛ̅ϩⲉⲛⲥⲁϩⲟⲩ . ⲉⲃⲟⲗ  ϩⲛ̅ⲧⲙⲛ̅ⲧϩⲁϩ   ⲛ̅ϣⲁϫⲉ  ⲛ̅ⲛⲉⲕⲣ̅ⲃⲟⲗ  ⲉⲛⲟⲃⲉ. ⲉⲕϯⲥⲟ  ⲇⲉ  ⲉⲛⲉⲕⲥⲡⲟⲧⲟⲩ  ⲕⲁⲛⲛⲣ̅ⲣⲙ̅ⲛϩⲏⲧ.  Ⲟⲩϩⲁⲧ  ⲉϥⲥⲟⲧⲡ̅  ⲡⲉ  ⲡⲗⲁⲥ  ⲛ̅ⲛ̅ⲇⲓⲕⲁⲓⲟⲥ . ⲡϩⲏⲧ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲁⲱϫⲛ̅ . Ⲛⲉⲥⲡⲟⲧⲟⲩ  ⲛ̅ⲛ̅ⲇⲓⲕⲁⲓⲟⲥ  ⲥⲟⲟⲩⲛ  ⲛ̅ⲛⲉⲧϫⲟⲥⲉ . ⲉⲣⲉⲛⲁⲑⲏⲧ  ⲇⲉ  ⲛⲁⲙⲟⲩ  ϩⲛⲟⲩϭⲣⲱϩ . Ⲡⲉⲥⲙⲟⲩ  ⲙ̅ⲡⲛⲟⲩⲧⲉ  ⲡⲉ  ⲧⲙⲛ̅ⲧⲣⲙ̅ⲙⲁⲟ . ⲁⲩⲱ  ⲛⲉⲩⲟⲩⲱϩ  ⲉⲣⲟϥ  ⲛⲟⲩⲗⲩⲡⲓ  ϩ̅ⲙ̅ⲡϩⲏⲧ . Ϣⲁⲣⲉⲡⲁⲑⲏⲧ ϩⲙ̅ⲡⲉϥⲥⲱⲃⲉ  ⲉⲓⲣⲉ  ⲛⲟⲩⲙⲛ̅ⲧϣⲁϥⲧⲉ  ϣⲁⲣⲉⲧⲥⲟⲫⲓⲁ  ⲇⲉ  ϫⲡⲉⲧⲙⲛ̅ⲧⲥⲁⲃⲉ  ⲙ̅ⲡⲣⲱⲙⲉ .

Ϣⲁⲣⲉⲡⲁⲥⲉⲃⲏⲥ  ϣⲉⲓ  ϩ̅ⲙ̅ⲡⲧⲁⲕⲟ . ⲑⲟⲧⲉ  ⲇⲉ  ⲙ̅ⲡⲁⲥⲉⲃⲏⲥ  ⲛ̅ⲧⲟⲥ  ⲉⲧⲛⲏⲩ  ⲉϫⲱϥ . ⲛⲉⲡⲓⲑⲩⲙⲓⲁ  ⲇⲉ  ⲛ̅ⲛ̅ⲇⲓⲕⲁⲓⲟⲥ  ⲥⲟⲧⲡ̅.  Ⲡⲁⲥⲉⲃⲏⲥ  ⲛⲁⲧⲁⲕⲟ  ϩ̅ⲛ̅ⲟⲩϩⲁⲧⲏⲩ  ⲉⲥⲙⲟⲟϣⲉ . ⲡⲇⲓⲕⲁⲓⲟⲥ  ⲇⲉ ⲛⲁⲣⲁⲕⲧϥ̅  ⲉⲃⲟⲗ  ⲙ̅ⲙⲟⲥ  ⲛ̅ϥ̅ⲟⲩϫⲁⲓ  ϣⲁⲉⲛⲉϩ . ⲛ̅ⲑⲉ  ⲛ̅ⲟⲩⲉⲗⲉⲗϩⲙ̅ϫ̅  ⲉϣⲁⲣ̅ⲃⲟⲟⲛⲉ  ⲛ̅ⲛ̅ⲛⲁϫϩⲉ . ⲁⲩⲱ  ⲟⲩⲕⲁⲡⲛⲟⲥ  ⲛ̅ⲛ̅ⲃⲁⲗ .  ⲧⲁⲓ  ⲧⲉ  ⲑⲉ   ⲛ̅ⲧⲡⲁⲣⲁⲛⲟⲙⲓⲁ  ⲛ̅ⲛⲉⲧⲉⲓⲣⲉ  ⲙ̅ⲙⲟⲥ .  Ϣⲁⲣⲉⲧⲙⲛ̅ⲧⲙⲁⲓⲛⲟⲩⲧⲉ  ⲟⲩⲱϩ  ϩ̅ⲛ̅ⲟⲩⲛⲟϭ  ⲛ̅ⲁϩⲉ. ⲛ̅ⲣⲟⲙⲡⲉ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲁⲥⲃⲟⲕ . Ϣⲁⲣⲉⲡⲟⲩⲛⲟϥ  ⲱⲥⲕ̅  ⲙ̅ⲛ̅ⲛ̅ⲇⲓⲕⲁⲓⲟⲥ . ⲑⲉⲗⲡⲓⲥ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲁⲧⲁⲕⲟ . Ⲡϫⲓⲥⲉ  ⲙ̅ⲡⲉⲧⲟⲩⲁⲁⲃ  ⲧⲉ  ⲧⲉϩⲓⲏ  ⲙ̅Ⲡϫⲟⲉⲓⲥ .  ⲧⲉϩⲓⲏ  ⲇⲉ ⲙ̅Ⲡϫⲟⲉⲓⲥ  ⲟⲩϩⲟⲧⲉ  ⲧⲉ  ⲛ̅ⲛⲉⲧⲣ̅ϩⲱⲃ  ⲉⲧⲁⲛⲟⲙⲓⲁ .  ⲟⲩⲟⲩⲱϣϥ̅  ⲇⲉ  ⲧⲉ  ⲛ̅ⲛⲉⲧⲣ̅ϩⲱⲃ  ⲉⲡⲉⲑⲟⲟⲩ.  Ⲙ̅ⲉⲣⲉⲡⲇⲓⲕⲁⲓⲟⲥ  ⲉⲓ  ⲉⲡⲁϩⲟⲩ  ϣⲁⲉⲛⲉϩ . ⲛⲁⲥⲉⲃⲏⲥ  ⲇⲉ  ⲛⲁⲟⲩⲱϩ  ⲁⲛ  ϩⲓϫⲙ̅ⲡⲕⲁϩ  ⲧ̅ⲧⲁⲡⲣⲟ  ⲛ̅ⲛ̅ⲇⲓⲕⲁⲓⲟⲥ  ⲛⲁⲧⲁⲩⲟ  ⲉⲃⲟⲗ  ⲛ̅ⲧⲥⲟⲫⲓⲁ . Ⲡⲗⲁⲥ  ⲇⲉ  ⲛ̅ⲛ̅ⲣⲉϥϫⲓⲛ̅ϭⲟⲛⲥ̅  ⲛⲁⲧⲁⲕⲟ . Ⲛⲉⲥⲡⲟⲧⲟⲩ  ⲛ̅ⲛ̅ⲣⲱⲙⲉ  ⲛ̅ⲇⲓⲕⲁⲓⲟⲥ  ⲥⲟⲟⲩⲛ  ⲛ̅ϩⲉⲛⲭⲁⲣⲓⲥ. ⲧ̅ⲧⲁⲡⲣⲟ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲁϣⲟⲣϣⲣ̅ . ⲙ̅ⲛ̅ⲭⲣⲏⲙⲁ  ⲛⲁϯϩⲏⲩ  ⲙ̅ⲡⲉϩⲟⲟⲩ  ⲛ̅ⲧⲟⲣⲅⲏ.  ϣⲁⲣⲉⲧⲇⲓⲕⲁⲓⲟⲥⲩⲛⲏ  ⲇⲉ  ⲧⲟⲩϫⲟ  ⲉⲃⲟⲗ  ϩ̅ⲙ̅ⲡⲙⲟⲩ.
 
Ⲓ̅Ⲁ̅. Ϩⲉⲛⲃⲟⲧⲉ  ⲙ̅ⲡⲉⲙⲧⲟ  ⲉⲃⲟⲗ  ⲙ̅Ⲡϫⲟⲉⲓⲥ  ⲛⲉ  ϩⲉⲛϣⲓ ⲛ̅ⲕⲣⲟϥ. ⲡϣⲓ  ⲇⲉ  ⲙ̅ⲙⲉ  ⲥⲟⲧⲡ̅  ⲛⲁϥ .  Ⲡⲙⲁ ⲉⲧⲉⲣⲉⲡⲥⲱϣ  ⲛⲁⲃⲱⲕ  ⲉϩⲟⲩⲛ  ⲉⲣⲟϥ  ⲉⲣⲉⲡⲕⲉⲥⲱϣϥ̅  ⲙ̅ⲙⲁⲩ . ⲧ̅ⲧⲁⲡⲣⲟ  ⲇⲉ  ⲛ̅ⲛⲉⲧⲑⲃ̅ⲃⲓⲏⲩ  ⲛⲁⲙⲉⲗⲉⲧⲁ  ⲛ̅ⲧⲥⲟⲫⲓⲁ . ⲧⲙ̅ⲛ̅ⲧⲃⲁⲗϩⲏⲧ  ⲇⲉ  ⲛ̅ⲛⲉⲧⲥⲟⲩⲧⲱⲛ  ⲛⲁϫⲓⲙⲟⲉⲓⲧ  ϩⲏⲧⲟⲩ .  Ⲉⲣϣⲁⲛⲡⲇⲓⲕⲁⲓⲟⲥ  ⲙⲟⲩ  ϣⲁⲩⲣ̅ϩⲧⲏⲩ  ⲛ̅ⲥⲱϥ . ϣⲁⲩⲉⲓⲁⲧⲟⲟⲧⲟⲩ  ⲇⲉ  ⲛ̅ⲥⲁⲡⲧⲁⲕⲟ ⲙ̅ⲡⲁⲥⲉⲃⲏⲥ  ⲁⲩⲱ  ϣⲁⲩⲣⲁϣⲉ  ⲙ̅ⲙⲟϥ.  Ⲧⲇⲓⲕⲁⲓⲟⲥⲩⲛⲏ  ⲙ̅ⲡⲉⲧⲟⲩⲁⲁⲃ  ⲛⲁⲥⲟⲟⲩⲧⲛ̅  ⲛ̅ⲛⲉϥϩⲓⲟⲟⲩⲉ . ⲡⲣⲉϥϫⲓⲛ̅ϭⲟⲛⲥ̅  ⲇⲉ  ⲛⲁϩⲉ  ⲉϩⲣⲁⲓ ⲉⲩⲙⲛ̅ⲧϣⲁϥⲧⲉ . Ⲧⲇⲓⲕⲁⲓⲟⲥⲩⲛⲏ  ⲛ̅ⲛ̅ⲣⲱⲙⲉ  ⲉⲧⲥⲟⲩⲧⲱⲛ  ⲛⲁⲧⲟⲩϫⲟⲟⲩ .   ⲉⲣⲉⲙ̅ⲡⲁⲣⲁⲛⲟⲙⲟⲥ  ⲇⲉ  ⲛⲁⲧⲁⲕⲟ  ϩ̅ⲛ̅ⲧⲉⲩⲙⲛ̅ⲧϣⲁϥⲧⲉ . Ⲉⲣϣⲁⲛⲟⲩⲣⲱⲙⲉ  ⲉⲛⲁⲛⲟⲩϥ  ⲙⲟⲩ  ⲙⲉⲣⲉⲧⲉϥϩⲉⲗⲡⲓⲥ  ⲧⲁⲕⲟ  ⲡϣⲟⲩϣⲟⲩ  ⲛ̅ⲛ̅ⲁⲥⲉⲃⲏⲥ  ⲛⲁⲧⲁⲕⲟ . Ⲡⲇⲓⲕⲁⲓⲟⲥ  ϣⲁϥⲉⲓ  ⲉⲃⲟⲗ  ϩⲁϩⲉⲛϣⲛⲏⲩ . ⲥⲉⲛⲁϯ  ⲇⲉ  ⲙ̅ⲡⲣⲉϥⲣ̅ⲛⲟⲃⲉ  ⲉⲡⲉϥⲙⲁ .  Ⲟⲩⲛⲟⲩϭⲟⲣϭⲥ̅  ⲛ̅ⲛ̅ⲣⲙ̅ⲛ̅ϯⲙⲉ  ϩ̅ⲛ̅ⲧ̅ⲧⲁⲡⲣⲟ  ⲛ̅ⲙ̅ⲡⲁⲣⲁⲛⲟⲙⲟⲥ . ⲧⲁⲓⲥⲑⲏⲥⲓⲥ  ⲇⲉ  ⲛ̅ⲛ̅ⲇⲓⲕⲁⲓⲟⲥ  ⲥⲟⲩⲧⲱⲛ.  Ⲉⲣϣⲁⲛⲟⲩⲣⲱⲙⲉ  ⲛⲁⲥⲉⲃⲏⲥ  ⲙⲟⲩ  ϥⲛⲁⲧⲁⲕⲟ . ϣⲁⲣⲉⲙ̅ⲡⲟⲗⲓⲥ  ⲇⲉ  ϫⲓⲥⲉ  ϩ̅ⲛ̅ⲛⲉⲥⲙⲟⲩ  ⲛ̅ⲛ̅ⲇⲓⲕⲁⲓⲟⲥ. Ϣⲁⲩϣⲣ̅ϣⲱⲣⲟⲩ  ⲇⲉ  ϩ̅ⲛ̅ⲧ̅ⲧⲁⲡⲣⲟ  ⲛ̅ⲛ̅ⲁⲥⲉⲃⲏⲥ . Ϣⲁⲣⲉⲡⲁⲑⲏⲧ ⲕⲙ̅ϣ̅ⲛⲉϥⲣⲙ̅ⲛ̅ϯⲙⲉ . ϣⲁⲣⲉⲟⲩⲣⲱⲙⲉ  ⲇⲉ  ⲛ̅ⲥⲁⲃⲉ  ⲕⲁⲣⲱϥ. Ϣⲁⲣⲉⲟⲩⲣⲱⲙⲉ  ⲛ̅ⲗⲁⲥ  ⲥⲛⲁⲩ  ϭⲗ̅ⲡϩⲉⲛϣⲟϫⲛⲉ  ⲉⲃⲟⲗ  ϩ̅ⲛ̅ⲟⲩⲥⲟⲟⲩϩⲥ̅ . ϣⲁⲣⲉⲡ̅ⲡⲓⲥⲧⲟⲥ  ⲇⲉ  ⲑϩⲙ̅ⲡⲉϥϣⲁϫⲉ  ϩⲱⲡ  ⲛ̅ϩⲉⲛϩⲃⲏⲩⲉ . Ϣⲁⲣⲉⲛⲉⲧⲉⲙ̅ⲛ̅ⲧⲟⲩⲡⲣ̅ϩⲙ̅ⲙⲉ ⲥⲣⲟϥⲣⲉϥ  ⲛ̅ⲑⲉ  ⲛ̅ϩⲉⲛϭⲱⲃⲉ.  ⲉⲣⲉⲡⲟⲩϫⲁⲓ  ⲇⲉ  ϩⲛ̅ⲟⲩⲛⲟϭ  ⲛ̅ϣⲟϫⲛⲉ. Ϣⲁⲣⲉⲡⲡⲟⲛⲏⲣⲟⲥ  ⲙⲉⲉⲩⲉ  ⲉⲛⲉⲡⲉⲑⲟⲟⲩ  ⲉϥϣⲁⲛⲧⲱϩ  ⲙ̅ⲛ̅ⲡⲇⲓⲕⲁⲓⲟⲥ . ϥⲙⲟⲥϩⲧⲉ  ⲇⲉ  ⲛ̅ⲛⲉϩⲃⲏⲩⲉ  ⲙ̅ⲡⲱⲣϫ̅. Ϣⲁⲣⲉⲟⲩⲥϩⲓⲙⲉ  ⲉⲩⲐⲛⲧⲥ̅ϩⲙⲟⲧ  ⲧⲟⲩⲛⲉⲥⲟⲩⲉⲟⲟⲩ  ⲙ̅ⲡⲉⲥϩⲁⲓ . ⲟⲩⲑⲣⲟⲛⲟⲥ  ⲇⲉ  ⲛ̅ⲥⲱϣ  ⲡⲉ  ⲟⲩⲥϩⲓⲙⲉ  ⲉⲥⲙⲟⲥⲧⲉ  ⲛ̅ϩⲉⲛⲙⲛ̅ⲧⲙⲉ . ⲛ̅ⲣⲉϥϫⲛⲁⲁⲩ  ⲛⲁⲣϭⲣⲱϩ  ⲛ̅ⲧⲙⲛ̅ⲧⲣⲙ̅ⲙⲁⲟ . ⲛ̅ϫⲱⲱⲣⲉ  ⲇⲉ  ⲛⲁⲧⲁϫⲣⲟ  ϩⲛⲧⲙⲛ̅ⲧⲣⲙ̅ⲙⲁⲟ . ⲉⲣⲉⲟⲩⲣⲱⲙⲉ  ⲛ̅ⲛⲁⲏⲧ  ⲣ̅ⲁⲅⲁⲑⲟⲛ  ⲛ̅ⲧⲉϥⲯⲩⲭⲏ . ⲡⲁⲧⲛⲁ  ⲇⲉ  ⲛⲁⲧⲁⲕⲟ  ⲙ̅ⲡⲉϥⲥⲱⲙⲁ . Ϣⲁⲣⲉⲡⲁⲥⲉⲃⲏⲥ  ⲣ̅ϩⲉⲛϩⲃⲏⲩⲉ  ⲛ̅ϫⲓⲛ̅ϭⲟⲛⲥ̅. ⲉⲣⲉⲡⲉⲧϫⲟ  ⲇⲉ  ⲛ̅ⲧⲇⲓⲕⲁⲓⲟⲥⲩⲛⲏ  ⲣ̅ϩⲱⲃ  ⲉⲧⲡⲓⲥⲧⲓⲥ . Ⲟⲩⲃⲉⲕⲉ  ⲙ̅ⲙⲉ  ⲡⲉ  ⲡⲉⲥⲡⲉⲣⲙⲁ  ⲛ̅ⲛ̅ⲇⲓⲕⲁⲓⲟⲥ .  ⲉⲩϫⲡⲟ  ⲛ̅ⲟⲩϣⲏⲣⲉ  ⲛ̅ⲇⲓⲕⲁⲓⲟⲥ  ⲉⲡⲱⲛϩ̅ . ⲡⲇⲓⲱⲅⲙⲟⲥ  ⲇⲉ  ⲙ̅ⲡⲁⲥⲉⲃⲏⲥ  ⲡⲉ  ⲡⲙⲟⲩ.  Ϩⲉⲛⲁⲕⲁⲑⲁⲣⲧⲟⲥ  ⲛ̅ⲛⲁϩⲣⲙ̅ⲡⲛⲟⲩⲧⲉ  ⲛⲉ  ⲛ̅ⲛⲁϣⲑⲏⲧ. ⲟⲩⲃⲟⲧⲉ  ⲙ̅Ⲡϫⲟⲉⲓⲥ  ⲡⲉ  ⲡⲉⲧϭⲟⲟⲙⲉ  ϩⲓⲧⲉϥϩⲓⲏ . ⲥⲉϣⲏⲡ  ⲇⲉ  ⲛⲁϩⲣⲁϥ  ⲛ̅ϭⲓⲟⲩⲟⲛ  ⲛⲓⲙ  ⲉⲧⲟⲩⲁⲁⲃ  ϩ̅ⲛ̅ⲧⲉⲩϩⲓⲏ. ⲡⲉϥⲟⲩⲱϣ  ⲅⲁⲣ  ⲡⲉ  ⲟⲩⲟⲛ  ⲛⲓⲙ  ⲉϯⲧⲟⲩⲁⲁⲃ  ⲑϩⲛ̅ⲧⲉⲩϩⲓⲏ . Ⲡⲉⲧⲛⲁϣⲡ̅ⲧⲟⲟⲧϥ̅  ⲛ̅ⲟⲩⲁ  ϩ̅ⲛ̅ⲟⲩϫⲓⲛ̅ϭⲟⲛⲥ̅ . ⲛ̅ⲫ̅ⲛⲁϣⲱⲡⲉ  ⲁⲛ  ⲉϥⲟⲩⲁⲁⲃ  ⲉϩⲓⲥⲉ .  ⲡⲉⲧϫⲡⲟ  ⲇⲉ  ϩ̅ⲛ̅ⲟⲩⲇⲓⲕⲁⲓⲟⲥⲩⲛⲏ  ϥⲛⲁϫⲓ  ⲛ̅ⲟⲩⲃⲉⲕⲉ  ⲛ̅ⲧⲡⲓⲥⲧⲓⲥ . ⲛ̅ⲑⲉ  ⲛ̅ⲟⲩϭⲁϫⲉ  ⲉϥϩ̅ⲛ̅ϣⲁⲛⲧⲥ̅  ⲛ̅ⲟⲩⲉϣⲱ . ⲧⲁⲓ  ⲧⲉ  ⲑⲉ  ⲙ̅ⲡⲥⲁ  ⲛ̅ⲟⲩⲥϩⲓⲙⲉ  ⲉⲥⲃⲟⲟⲛⲉ .  Ⲛⲁⲛⲟⲩⲡⲟⲩⲱϣ  ⲧⲏⲣϥ̅  ⲛ̅ⲛ̅ⲇⲓⲕⲁⲓⲟⲥ  ⲑⲉⲗⲡⲓⲥ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲁⲧⲁⲕⲟ . Ⲟⲩⲛⲡⲉⲧϫⲟ  ⲛⲛⲟⲩϥ  ⲙⲙⲓⲛ  ⲙⲙⲟϥ  ⲉⲩⲣ̅ϩⲟⲩⲟ  ⲛⲁϥ  ⲟⲩⲛⲛⲉⲧⲥⲟⲩⲱϩ  ϩⲱⲟⲩ  ⲉϩⲟⲩⲛ  ⲁⲩⲱ  ⲉⲩϣⲁⲁⲧ.  Ⲯⲩⲭⲏ  ⲛⲓⲙ  ⲉⲧⲟⲩⲥⲙⲟⲩ  ⲉⲣⲟⲥ  ⲣⲟⲟⲩⲧ . ⲛⲁⲛⲟⲩⲟⲩⲣⲱⲙⲉ  ⲇⲉ  ⲁⲛ  ⲛ̅ⲣⲉϥϭⲱⲛⲧ̅ . Ⲡⲉⲧⲉⲧⲡ̅ⲥⲟⲩⲟ  ⲉϩⲟⲩⲛ  ϣⲁⲣⲉⲡⲙⲏⲏϣⲉ  ⲥϩⲟⲩⲱⲣϥ̅ .  ⲡⲉⲥⲙⲟⲩ  ⲇⲉ  ⲛⲏⲟⲩ  ⲉϫⲛ̅ⲧⲁⲡⲉ  ⲙⲡⲉⲧϯ .  Ⲡⲉⲧⲙⲉⲉⲩⲉ  ⲉϩⲉⲛⲡⲉⲧⲛⲁⲛⲟⲩ  ⲉϥϣⲓⲛⲉ  ⲛ̅ⲥⲁϩⲉⲛⲭⲁⲣⲓⲥ  ⲉⲛⲁⲛⲟⲩⲟⲩ . ⲙ̅ⲡⲉⲑⲟⲟⲩ  ⲇⲉ  ⲛⲁⲧⲁϩⲉⲛⲉⲧϣⲓⲛⲉ  ⲛⲥⲱⲟⲩ . Ⲡⲉⲧⲕⲱ  ⲛ̅ϩⲧⲏϥ  ⲉⲩⲙⲛ̅ⲧⲣⲙ̅ⲙⲁⲟ  ϥⲛⲁϩⲉ  ⲡⲉⲧⲛⲁ  ⲇⲉ  ⲛⲛϩⲏⲕⲉ  ⲥⲉⲛⲁⲙⲁⲕⲁⲣⲓⲍⲉ   ⲙ̅ⲙⲟϥ . Ⲡⲉⲧⲕⲱⲧ  ⲙ̅ⲡⲉϥⲏⲓ  ϩ̅ⲛ̅ⲟⲩϫⲓⲛ̅ϭⲟⲛⲥ̅ . ⲉϥⲛⲁⲕⲁϩ̅ⲛ̅ⲙⲕⲁϩ  ⲛ̅ⲅϩⲏⲧ  ⲛⲛⲉϥϣⲏⲣⲉ. Ⲡⲉⲧⲉⲛ̅ϥ̅ϣⲉⲉⲓ  ⲇⲉ  ⲁⲛ  ⲙ̅ⲛ̅ⲡⲉϥⲏⲓ  ⲛⲁⲕⲗⲏⲣⲟⲛⲟⲙⲓ  ⲛ̅ϩⲉⲛⲧⲏⲩ . ⲡⲁⲑⲏⲧ  ⲛⲁⲣ̅ϩⲙ̅ϩⲁⲗ  ⲙ̅ⲡⲥⲁⲃⲉ.  Ⲟⲩⲛⲟⲩϣⲏⲛ  ⲛ̅ⲱⲛϩ̅  ⲉⲃⲟⲗ  ϩ̅ⲙ̅ⲡⲕⲁⲣⲡⲟⲥ  ⲛ̅ⲧⲇⲓⲕⲁⲓⲟⲥⲩⲛⲏ .  ⲥⲉⲛⲁⲙⲟⲟⲩⲧ  ⲇⲉ  ⲛⲛⲉⲯⲩⲭⲏ  ⲛ̅ⲙ̅ⲡⲁⲣⲁⲛⲟⲙⲟⲥ  ϩ̅ⲛ̅ⲟⲩⲙⲛ̅ⲧϣⲁⲣⲁϩⲉ . Ⲉϣϫⲉ  ⲙⲟⲅⲓⲥ  ⲉⲣⲉⲡⲇⲓⲕⲁⲓⲟⲥ  ⲛⲁⲟⲩϫⲁⲓ . ⲉⲓⲉ  ⲡⲣⲉϥⲣ̅ⲛⲟⲃⲉ  ⲙ̅ⲛ̅ⲡⲁⲥⲉⲃⲏⲥ  ⲛⲁⲟⲩⲱⲛϩ̅  ⲉⲃⲟⲗ  ⲧⲱⲛ.
 
Ⲓ̅Ⲃ̅. Ϣⲁⲣⲉⲡⲉⲧⲙⲉ  ⲛ̅ⲧⲉⲥⲃⲱ ⲙⲉⲣⲉⲧⲁⲓⲥⲑⲏⲥⲓⲥ . ⲟⲩⲁⲧϩⲏⲧ  ⲇⲉ  ⲡⲉ  ⲡⲉⲧⲙⲟⲥⲧⲉ  ⲛ̅ⲛⲉϫⲡⲓⲟ . Ⲛⲁⲛⲟⲩ  ⲡⲉⲛ̅ⲧⲁϥϩⲉ  ⲉⲩϩⲙⲟⲧ  ⲛ̅ⲛⲁϩⲣⲙ̅ⲡⲛⲟⲩⲧⲉ. ⲉⲣⲉⲟⲩⲣⲱⲙⲉ  ⲇⲉ  ⲛ̅ⲣⲉϥⲙⲉⲉⲩⲉ   ⲉⲡⲡⲉⲑⲟⲟⲩ  ⲡⲁⲣⲁⲛⲟⲙⲓ .  ⲙ̅ⲛ̅ⲣⲱⲙⲉ  ⲛⲁⲥⲟⲟⲩⲧⲛ̅  ⲉⲃⲟⲗ  ϩ̅ⲛ̅ⲟⲩⲁⲛⲟⲙⲟⲥ . ⲛ̅ⲛⲟⲩⲛⲉ  ⲇⲉ  ⲛ̅ⲛ̅ⲇⲓⲕⲁⲓⲟⲥ  ⲛⲁⲡⲱⲣⲕ̅  ⲁⲛ . Ⲟⲩⲕⲗⲟⲙ  ⲙ̅ⲡⲉⲥϩⲁⲓ  ⲡⲉ  ⲟⲩⲥϩⲓⲙⲉ  ⲛ̅ϫⲱⲱⲣⲉ . ⲛ̅ⲑⲉ ⲛ̅ⲟⲩϥⲛ̅ⲧ  ⲉϥϩⲛ̅ⲟⲩϣⲉ . ⲁⲩⲱ  ⲟⲩϩⲟⲟⲗⲉ  ϩ̅ⲛ̅ⲟⲩϣⲧⲏⲛ . ⲧⲁⲓ  ⲧⲉ  ⲑⲉ  ⲉⲧⲉⲣⲉⲟⲩⲥϩⲓⲙⲉ  ⲉⲥⲃⲟⲟⲛⲉ  ⲛⲁⲧⲁⲕⲉⲡⲉⲥϩⲁⲓ.  Ϩⲉⲛϩⲁⲡ  ⲛⲉ  ⲙ̅ⲙⲉⲉⲩⲉ  ⲛ̅ⲛⲇⲓⲕⲁⲓⲟⲥ. ϣⲁⲣⲉⲛ̅ⲁⲥⲉⲃⲏⲥ  ⲇⲉ  ⲣ̅ϩⲙ̅ⲙⲉ  ⲛϩⲉⲛⲕⲣⲟϥ . ⲧ̅ⲧⲁⲡⲣⲟ  ⲛ̅ⲛⲇⲓⲕⲁⲓⲟⲥ  ⲛⲁⲧⲟⲩϫⲟⲟⲩ .  ⲟⲩⲕⲣⲟϥ  ⲇⲉ ⲧⲉ  ⲧⲧⲁⲡⲣⲟ   ⲛ̅ⲛ̅ⲁⲥⲉⲃⲏⲥ . ⲛⲁⲥⲉⲃⲏⲥ  ⲛⲁⲧⲁⲕⲟ  ϩ̅ⲙ̅ⲡⲙⲁ  ⲉⲧϥ̅ⲛⲁⲕⲟⲧϥ̅  ⲉⲣⲟϥ . Ⲛⲏⲓ  ⲇⲉ  ⲛ̅ⲛⲇⲓⲕⲁⲓⲟⲥ  ⲛⲁⲙⲟⲩⲛ  ⲉⲃⲟⲗ.  Ϣⲁⲣⲉⲛ̅ⲣⲙ̅ⲛ̅ϯⲙⲉ  ⲙ̅ⲡⲣⲙ̅ⲛ̅ϩⲏⲧ  ⲥⲙⲟⲩ  ⲉⲧⲉϥⲧⲁⲡⲣⲟ . ϣⲁⲩⲕⲱⲙϣ  ⲇⲉ  ⲛⲥⲁⲡϭⲁⲃϩⲏⲧ . Ⲛⲁⲛⲟⲩⲟⲩⲣⲱⲙⲉ  ⲉϥⲟ  ⲛ̅ϩⲙ̅ϩⲁⲗ  ⲛⲁϥ  ⲟⲩⲁⲁϥ  ⲉϥϩⲛ̅ⲟⲩⲥⲱϣ . ⲉϩⲟⲩⲉⲡⲉⲧϯⲉⲟⲟⲩ  ⲛⲁϥ  ⲟⲩⲁⲁϥ  ⲉϥⲣ̅ϭⲣⲱϩ  ⲙⲡⲟⲉⲓⲕ.  Ϣⲁⲣⲉⲡⲇⲓⲕⲁⲓⲟⲥ  ⲛⲁ  ⲛ̅ⲛⲉⲯⲩⲭⲏ  ⲛⲛⲉϥⲧⲃ̅ⲛⲟⲟⲩⲉ  ϩ̅ⲛ̅ⲁⲧⲛⲁ  ⲇⲉ  ⲛⲉ  ⲙ̅ⲙⲛ̅ⲧϣⲁⲛϩⲧⲏϥ  ⲛ̅ⲛ̅ⲁⲥⲉⲃⲏⲥ  ⲡⲉⲧⲣϩⲱⲃ  ⲉⲡⲉϥⲕⲁϩ  ⲛⲁⲥⲉⲓ  ⲛ̅ⲟⲉⲓⲕ. ⲛⲉⲧⲡⲏⲧ ⲇⲉ  ⲛⲥⲁϩⲉⲛⲡⲉⲧϣⲟⲩⲉⲓⲧ  ϩⲉⲛⲁⲧⲥⲃⲱ  ⲛⲉ .  ⲡⲉⲧⲟⲩⲛⲟϥ  ϩⲣⲁⲓ  ϩ̅ⲛ̅ϩⲉⲛⲙⲁⲛ̅ⲥⲉⲏⲣⲡ̅  ϥⲛⲁⲕⲱ  ⲛ̅ⲟⲩⲥⲱϣ  ϩ̅ⲛ̅ⲛⲉϥⲙⲁⲛ̅ϣⲱⲡⲉ .  Ⲛⲉⲡⲓⲑⲩⲙⲓⲁ  ⲛ̅ⲛ̅ⲁⲥⲉⲃⲏⲥ  ϩⲟⲟⲩ . ⲉⲣⲉⲛ̅ⲛⲟⲩⲛⲉ  ⲇⲉ  ⲛ̅ⲛ̅ⲣⲙ̅ⲡⲛⲟⲩⲧⲉ  ϩ̅ⲛ̅ϩⲉⲛⲧⲁϫⲣⲟ .

Ⲡⲣⲉϥⲣ̅ⲛⲟⲃⲉ  ⲛⲁϩⲉ  ⲉⲩⲡⲁϣ  ⲉⲧⲃⲉⲙ̅ⲙⲛ̅ⲧⲙⲛ̅ⲧⲣⲉ  ⲛⲛⲉϥⲥⲡⲟⲧⲟⲩ . ⲡⲇⲓⲕⲁⲓⲟⲥ  ⲇⲉ  ⲛⲁⲣ̅ⲃⲟⲗ  ⲉⲣⲟⲟⲩ . ⲥⲉⲛⲁⲛⲁ  ⲙ̅ⲡⲉⲧϯ  ⲛ̅ϩⲧⲏϥ  ⲙ̅ⲙⲁⲧⲉ .  ⲡⲉⲧⲧⲱⲙⲛ̅ⲧ  ⲇⲉ  ϩⲓⲣⲛ̅ⲙ̅ⲡⲩⲗⲏ  ⲛⲁⲥⲁⲛϣ̅  ⲛ̅ϩⲉⲛⲯⲩⲭⲏ . ⲧⲉⲯⲩⲭⲏ  ⲙ̅ⲡⲣⲱⲙⲉ  ⲛⲁⲥⲉⲓ  ⲛ̅ϩⲉⲛⲡⲉⲧⲛⲁⲛⲟⲩϥ  ⲉⲃⲟⲗ  ϩⲛ̅ⲛ̅ⲕⲁⲣⲡⲟⲥ  ⲛ̅ⲧⲉϥⲧⲁⲡⲣⲟ .  ⲥⲉⲛⲁϯ  ⲇⲉ  ⲛⲁϥ  ⲙ̅ⲡⲧⲟⲩⲓⲟ  ⲛ̅ⲛⲉϥⲥⲡⲟⲧⲟⲩ.  Ⲛⲉϩⲓⲟⲟⲩⲉ  ⲛ̅ⲛ̅ⲁⲑⲏⲧ  ⲥⲟⲩⲧⲱⲛ  ⲙ̅ⲡⲉⲩⲙ̅ⲧⲟ  ⲉⲃⲟⲗ  ϣⲁⲣⲉⲛ̅ⲥⲟⲫⲟⲥ  ⲇⲉ  ⲥⲱⲧⲙ̅  ⲛ̅ⲥⲁⲟⲩϣⲟϫⲛⲉ . Ϣⲁⲣⲉⲡⲁⲑⲏⲧ  ϫⲉⲧⲉϥⲟⲣⲅⲏ  ⲙ̅ⲙⲏⲛⲉ . ϣⲁⲣⲉⲡⲥⲁⲃⲉ  ⲇⲉ  ϩⲱⲡ  ⲑⲙⲡⲉϥⲥⲱϣ . Ϣⲁⲣⲉⲡⲇⲓⲕⲁⲓⲟⲥ  ϫⲱ  ⲛ̅ⲟⲩⲡⲓⲥⲧⲓⲥ  ⲉⲥⲟⲩⲟⲛϩ̅  ⲉⲃⲟⲗ . ⲟⲩⲕⲣⲟϥ  ⲇⲉ  ⲡⲉ  ⲡⲙⲛ̅ⲧⲣⲉ  ⲛ̅ⲣⲉϥϫⲓⲛ̅ϭⲟⲛⲥ̅. Ⲟⲩⲛⲡⲉⲧϣⲁϫⲉ  ⲉⲩⲟ  ⲛ̅ⲑⲉ  ⲛ̅ⲛⲉⲧⲕⲱⲛⲥ̅  ϩ̅ⲛ̅ⲟⲩⲥⲏϥⲉ . ϣⲁⲣⲉⲛ̅ⲗⲁⲥ  ⲇⲉ  ⲛ̅ⲛ̅ⲥⲟⲫⲟⲥ  ⲧⲁⲗϭⲟ . Ϣⲁⲣⲉϩⲉⲛⲥⲡⲟⲧⲟⲩ  ⲙ̅ⲙⲉ  ⲥⲟⲟⲩⲧⲛ̅  ⲛ̅ⲟⲩⲙⲛ̅ⲧⲙⲛ̅ⲧⲣⲉ . ⲟⲩⲣⲉϥⲙⲛ̅ⲧⲣⲉ  ⲇⲉ  ⲛϭⲉⲡⲏ  ⲟⲩⲛ̅ⲧϥ̅ⲟⲩⲗⲁⲥ  ⲛ̅ϫⲓⲛ̅ϭⲟⲛⲥ̅.  Ⲟⲩⲕⲣⲟϥ  ⲡⲉⲧϩⲙ̅ⲡϩⲏⲧ  ⲙ̅ⲡⲉⲧⲙⲉⲉⲩⲉ  ⲉϩⲉⲛⲡⲉⲑⲟⲟⲩ . ⲛⲉⲧϣⲟϫⲛⲉ  ⲇⲉ  ⲉⲩⲉⲓⲣⲏⲛⲏ  ⲛⲁⲉⲩⲫⲣⲁⲛⲉ  ⲙ̅ⲛ̅ⲗⲁⲁⲩ ⲛϫⲓⲛϭⲟⲛⲥ̅  ⲛⲁⲣ̅ⲁⲛⲁϥ  ⲙ̅ⲡⲇⲓⲕⲁⲓⲟⲥ. ⲛⲁⲥⲉⲃⲏⲥ  ⲇⲉ  ⲛⲁⲙⲟⲩ ϩ̅ⲙ̅ⲡ̅ⲡⲉⲑⲟⲟⲩ . ϩ̅ⲛ̅ⲃⲟⲧⲉ  ⲛ̅ⲛⲁϩⲣⲙ̅Ⲡϫⲟⲉⲓⲥ  ⲛⲉ  ϩⲉⲛⲥⲡⲟⲧⲟⲩ  ⲛ̅ϭⲟⲗ . ⲡⲉⲧⲉⲓⲣⲉ  ⲇⲉ ⲛ̅ⲧⲡⲓⲥⲧⲓⲥ  ϣⲏⲡ  ⲛ̅ⲛⲁϩⲣⲁϥ . Ⲟⲩⲑⲣⲟⲛⲟⲥ  ⲛ̅ⲁⲓⲥⲑⲏⲥⲓⲥ  ⲡⲉ  ⲟⲩⲣⲱⲙⲉ  ⲛ̅ⲥⲁⲃⲉ . ⲡϩⲏⲧ  ⲇⲉ  ⲙⲡⲁⲧϩⲏⲧ  ⲛⲁⲧⲱⲙⲛ̅ⲧ  ⲉϩⲉⲛⲥⲁϩⲟⲩ. Ⲧϭⲓϫ  ⲛ̅ⲛ̅ⲥⲱⲧⲡ̅  ⲛⲁⲁⲙⲁϩⲧⲉ  ⲛ̅ⲟⲩⲧⲁϫⲣⲟ . ⲛⲉⲕⲣⲟϥ  ⲇⲉ  ⲛⲁϣⲱⲡⲉ  ϩ̅ⲛ̅ⲟⲩϣⲱⲗ . ⲡϩⲏⲧ  ⲙ̅ⲡⲁⲑⲏⲧ  ⲛⲁⲧⲱⲙⲛ̅ⲧ  ⲉϩⲉⲛⲡⲉⲑⲟⲟⲩ.  Ϣⲁⲣⲉⲟⲩϣⲁϫⲉ  ⲛ̅ϩⲟⲧⲉ  ϣⲧⲣ̅ⲧⲣ̅ⲡϩⲏⲧ  ⲙ̅ⲡⲣⲱⲙⲉ . ϣⲁⲣⲉⲟⲩⲟⲩⲱ  ⲇⲉ  ⲉⲛⲁⲛⲟⲩϥ  ⲉⲩⲫⲣⲁⲛⲉ  ⲙ̅ⲙⲟϥ. Ϣⲁⲣⲉⲟⲩⲇⲓⲕⲁⲓⲟⲥ  ⲟⲩⲟⲛϩϥ̅  ⲉⲃⲟⲗ  ⲙ̅ⲡⲉϥϣⲃⲏⲣ . ϩⲉⲛⲙⲛ̅ⲧϩⲁⲕ  ⲇⲉ  ⲛⲉ  ⲛ̅ϣⲟϫⲛⲉ   ⲛ̅ⲛ̅ⲣⲙ̅ⲛ̅ⲛⲟⲩⲧⲉ . ⲧⲉϩⲓⲏ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲁⲥⲟⲣⲙⲟⲩ .  Ⲡⲉⲕⲣⲟϥ  ⲛⲁⲁⲙⲁϩⲧⲉ  ⲁⲛ  ⲛ̅ⲟⲩϭⲟⲣϭⲥ̅ . ⲟⲩⲙⲛ̅ⲧⲣⲙ̅ⲙⲁⲟ  ⲇⲉ  ⲉⲥⲧⲁⲓⲏⲩ  ⲡⲉ  ⲟⲩⲣⲱⲙⲉ  ⲉϥⲟⲩⲁⲁⲃ . ⲉⲣⲉⲡⲱⲛϩ̅  ϩⲓⲛⲉϩⲓⲟⲟⲩⲉ  ⲛ̅ⲧⲇⲓⲕⲁⲓⲟⲥⲩⲛⲏ . ⲉⲣⲉⲛⲉϩⲓⲟⲟⲩⲉ  ⲇⲉ  ⲛ̅ⲣⲉϥⲙⲉⲉⲩⲉ  ⲉⲡⲡⲉⲑⲟⲟⲩ  ϣⲟⲟⲡ  ⲉⲡⲙⲟⲩ.
 
Ⲓ̅Ⲅ̅. Ϣⲁⲣⲉⲟⲩϣⲏⲣⲉ  ⲛ̅ⲥⲁⲃⲉ  ⲥⲱⲧⲙ̅  ⲛ̅ⲥⲁⲡⲉϥⲉⲓⲱⲧ . ⲉⲣⲉⲟⲩϣⲏⲣⲉ  ⲇⲉ ⲛ̅ⲁⲧⲥⲱⲧⲙ̅  ϩ̅ⲙ̅ⲡⲧⲁⲕⲟ . Ⲡⲉⲧⲛⲁⲛⲟⲩϥ  ⲛⲁⲟⲩⲱⲙ  ⲉⲃⲟⲗ  ϩ̅ⲙ̅ⲡⲕⲁⲣⲡⲟⲥ  ⲛ̅ⲧⲇⲓⲕⲁⲓⲟⲥⲩⲛⲏ . ⲛⲉⲯⲩⲭⲏ  ⲇⲉ  ⲛ̅ⲙ̅ⲡⲁⲣⲁⲛⲟⲙⲟⲥ  ⲛⲁⲙⲟⲩ  ⲉⲩⲟ  ⲛ̅ϣⲁⲣⲁϩⲉ . Ⲡⲉⲧϩⲁⲣⲉϩ ⲣⲱϥ  ⲉϥϩⲁⲣⲉϩ  ⲉⲧⲉϥⲯⲩⲭⲏ . ⲡⲉⲧϣⲧⲣ̅ⲧⲱⲣ  ⲇⲉ  ϩ̅ⲛ̅ⲛⲉϥⲥⲡⲟⲧⲟⲩ  ⲛⲁϣⲧⲣ̅ⲧⲱⲣϥ̅  ⲟⲩⲁⲁϥ . Ⲁⲣⲅⲟⲥ  ⲛⲓⲙ  ϩ̅ⲛ̅ϩⲉⲛⲉⲡⲓⲑⲩⲙⲓⲁ. ⲛ̅ϭⲓϫ  ⲇⲉ  ⲛ̅ⲛ̅ϫⲱⲱⲣⲉ  ϩ̅ⲛ̅ⲟⲩⲱⲣϫ̅.  Ⲡⲇⲓⲕⲁⲓⲟⲥ  ⲙⲟⲥϩⲧⲉ  ⲛ̅ⲟⲩϣⲁϫⲉ  ⲛ̅ϫⲓⲛ̅ϭⲟⲛⲥ̅ . ⲡⲁⲥⲉⲃⲏⲥ  ⲇⲉ  ⲛⲁϫⲓϣⲓⲡⲉ  ⲛ̅ϥ̅ⲧⲙ̅ϫⲓ  ⲛ̅ⲟⲩⲡⲁⲣⲣⲏⲥⲓⲁ . Ϣⲁⲣⲉⲧⲇⲓⲕⲁⲓⲟⲥⲩⲛⲏ  ϩⲁⲣⲉϩ  ⲉⲛⲃⲁⲗϩⲏⲧ . ϣⲁⲣⲉⲡⲛⲟⲃⲉ  ⲇⲉ  ⲣ̅ⲁⲥⲉⲃⲏⲥ  ⲛ̅ⲕⲣⲟϥ. Ⲟⲩⲛ̅ⲛⲉⲧⲉⲓⲣⲉ  ⲙ̅ⲙⲟⲟⲩ  ⲛ̅ⲣ̅ⲙ̅ⲙⲁⲟ  ⲉⲙ̅ⲛ̅ⲧⲟⲩⲗⲁⲁⲩ . ⲁⲩⲱ  ⲟⲩⲛⲛⲉⲧⲑⲃ̅ⲃⲓⲟ  ⲙ̅ⲙⲟⲟⲩ  ⲉⲩϩⲛ̅ⲟⲩⲛⲟϭ  ⲙ̅ⲙⲛ̅ⲧⲣⲙ̅ⲙⲁⲟ. Ⲡⲥⲱⲧⲉ  ⲛ̅ⲧⲉⲯⲩⲭⲏ  ⲙ̅ⲡⲣⲱⲙⲉ  ⲧⲉ  ⲧⲉϥⲙⲛ̅ⲧⲣⲙ̅ⲙⲁⲟ . ⲙⲉⲣⲉⲡϩⲏⲕⲉ  ⲇⲉ  ϥⲓ  ϩⲁⲟⲩⲁⲡⲓⲗⲏ . Ⲡⲟⲩⲟⲉⲓⲛ  ϣⲟⲟⲡ  ⲛ̅ⲛ̅ⲇⲓⲕⲁⲓⲟⲥ  ⲛ̅ⲟⲩⲟⲉⲓϣ  ⲛⲓⲙ . ⲡⲟⲩⲟⲉⲓⲛ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲁϫⲉⲛⲁ . Ⲛⲉⲯⲩⲭⲏ  ⲛ̅ⲕⲣⲟϥ  ⲡⲗⲁⲛⲁ  ϩ̅ⲛ̅ϩⲉⲛⲛⲟⲃⲉ. ϣⲁⲣⲉⲛ̅ⲇⲓⲕⲁⲓⲟⲥ  ⲇⲉ  ϣⲛ̅ϩⲧⲏⲩ  ⲛ̅ⲥⲉⲛⲁ.  Ϣⲁⲣⲉⲡ̅ⲡⲉⲑⲟⲟⲩ  ⲣ̅ϩⲉⲛⲡⲉⲑⲟⲟⲩ  ϩ̅ⲛ̅ⲟⲩⲥⲱϣ . ϩⲉⲛⲥⲟⲫⲟⲥ  ⲇⲉ  ⲛⲉ  ⲛⲉⲧⲥⲟⲟⲩⲛ  ⲛ̅ⲧⲇⲓⲕⲁⲓⲟⲥⲩⲛⲏ. Ⲧⲙⲛ̅ⲧⲣ̅ⲙ̅ⲙⲁⲟ  ⲉⲧⲟⲩϭⲉⲡⲏ  ⲉϫⲡⲟⲥ  ϩ̅ⲛ̅ⲟⲩⲁⲛⲟⲙⲓⲁ   ⲛⲁⲣ̅ϭⲣⲱϩ . ⲧⲉⲧⲟⲩⲥⲟⲩⲱϩ  ⲇⲉ  ⲙ̅ⲙⲟⲥ  ⲉϩⲟⲩⲛ̅  ϩ̅ⲛ̅ⲟⲩⲙⲛ̅ⲧⲙⲁⲓⲛⲟⲩⲧⲉ  ⲛⲁⲁϣⲁⲓ . Ϥⲥⲟⲧⲡ̅  ⲛ̅ϭⲓⲡⲉⲧⲣ̅ϣⲟⲣⲡ̅  ⲉⲃⲟⲏⲑⲓ  ϩ̅ⲙ̅ⲡϩⲏⲧ . ⲉϩⲟⲩⲉⲡⲉⲧⲉⲣⲏⲧ  ⲁⲩⲱ  ⲉϥⲣ̅ϩⲧⲏϥ. ϣⲁⲣⲉⲟⲩϣⲏⲛ  ⲅⲁⲣ  ⲛ̅ⲱⲛϩ̅  ϣⲱⲡⲉ  ϩ̅ⲛ̅ⲟⲩⲟⲩⲱϣ  ⲉⲛⲁⲛⲟⲩϥ . Ⲡⲉⲧⲕⲁⲧⲁⲫⲣⲟⲛⲓ  ⲛ̅ⲟⲩϩⲱⲃ  ⲥⲉⲛⲁⲕⲁⲧⲁⲫⲣⲟⲛⲓ  ⲙ̅ⲙⲟϥ. ⲡⲉⲧⲣ̅ϩⲟⲧⲉ  ⲇⲉ  ϩⲏⲧⲥ̅  ⲛ̅ⲧⲉⲛⲧⲟⲗⲏ  ⲡⲁⲓ  ⲡⲉ  ⲉⲧⲟⲩⲟϫ . ⲙ̅ⲛ̅ⲗⲁⲁⲩ  ⲛ̅ⲁⲅⲁⲑⲟⲛ  ⲛⲁϣⲱⲡⲉ  ⲛ̅ⲟⲩϣⲏⲣⲉ  ⲛ̅ⲕⲣⲟϥ. ⲟⲩⲛϩⲉⲛϩⲃⲏⲩⲉ  ⲇⲉ  ⲉⲩⲥⲟⲩⲧⲱⲛ  ⲛⲁϣⲱⲡⲉ ⲛ̅ⲟⲩϩⲙ̅ϩⲁⲗ  ⲛ̅ⲥⲟⲫⲟⲥ . Ⲟⲩⲛⲟⲩⲡⲏⲅⲏ  ⲛ̅ⲱⲛϩ̅  ϩ̅ⲛ̅ⲛⲉϩⲓⲟⲟⲩⲉ  ⲛ̅ⲧⲥⲟⲫⲓⲁ. ⲡⲁⲑⲏⲧ  ⲇⲉ  ⲛⲁⲙⲟⲩ  ϩ̅ⲛ̅ⲟⲩⲡⲁϣ.  Ϣⲁⲣⲉⲟⲩⲙⲛ̅ⲧⲣⲙ̅ⲛ̅ϩⲏⲧ  ⲉⲛⲁⲛⲟⲩⲥ  ϯ  ⲛ̅ⲟⲩϩⲙⲟⲧ . ⲟⲩⲧⲁⲕⲟ  ⲇⲉ  ⲛⲉ  ⲛⲉϩⲓⲟⲟⲩⲉ  ⲛ̅ⲙ̅ⲡⲁⲣⲁⲛⲟⲙⲟⲥ . Ϣⲁⲣⲉⲡⲁⲛⲟⲩⲣⲅⲟⲥ  ⲛⲓⲙ  ⲣ̅ϩⲱⲃ  ϩ̅ⲛ̅ⲟⲩϣⲟϫⲛⲉ . ϣⲁⲣⲉⲡⲁⲑⲏⲧ  ⲇⲉ  ⲡⲣ̅ϣⲧⲉϥⲕⲁⲕⲓⲁ  ⲉⲃⲟⲗ. Ⲟⲩⲛⲟⲩϥⲁⲓϣⲓⲛⲉ  ⲛ̅ⲛⲁϣ̅ⲧⲙ̅ⲙⲉ  ⲛⲁϩⲉ  ⲉϩⲣⲁⲓ  ⲉϩⲉⲛⲡⲉⲑⲟⲟⲩ . ϣⲁⲣⲉⲡϥⲁⲓϣⲓⲛⲉ  ⲇⲉ  ⲉⲧⲛ̅ϩⲟⲧ  ⲧⲁⲗϭⲟ . Ϣⲁⲣⲉⲧⲉⲥⲃⲱ  ϥⲓ  ⲛ̅ⲟⲩⲙⲛ̅ⲧϩⲏⲕⲉ  ⲙ̅ⲛ̅ⲟⲩⲥⲱϣ . ⲡⲉⲧϩⲁⲣⲉϩ  ⲇⲉ  ⲉϩⲉⲛϫⲡⲓⲟ  ⲛⲁϫⲓⲉⲟⲟⲩ . Ϣⲁⲣⲉⲛⲉⲡⲓⲑⲩⲙⲓⲁ  ⲛ̅ⲛ̅ⲣⲙ̅ⲛ̅ⲛⲟⲩⲧⲉ  ϯⲟⲩⲛⲟϥ  ⲛ̅ⲛⲉⲩⲯⲩⲭⲏ . ⲛⲉⲡⲓⲑⲩⲙⲓⲁ  ⲇⲉ  ⲛ̅ⲛ̅ⲁⲥⲉⲃⲏⲥ  ⲟⲩⲏⲩ  ⲉⲃⲟⲗ  ⲙ̅ⲡⲥⲟⲟⲩⲛ . ⲛ̅ϫⲱϩⲙ̅  ⲛ̅ⲛ̅ⲁⲥⲉⲃⲏⲥ  ⲟⲩⲏⲩ  ⲉⲃⲟⲗ  ⲛ̅ⲁⲓⲥⲑⲏⲥⲓⲥ. ⲛⲁⲥⲉⲃⲏⲥ  ⲇⲉ  ⲛⲁⲥⲁϩⲟⲩ  ⲉⲃⲟⲗ  ⲛ̅ⲛ̅ⲣⲙ̅ⲛⲟⲩⲧⲉ.  Ⲉⲕϣⲁⲛⲙⲟⲟϣⲉ  ⲙ̅ⲛ̅ϩⲉⲛⲥⲟⲫⲟⲥ ⲕⲛⲁⲣ̅ⲥⲟⲫⲟⲥ . ⲡⲉⲧⲙⲟⲟϣⲉ  ⲇⲉ  ⲙ̅ⲛ̅ϩⲉⲛⲁⲑⲏⲧ  ϥⲛⲁⲟⲩⲱⲛϩ̅  ⲉⲃⲟⲗ . ⲛ̅ⲇⲓⲕⲁⲓⲟⲥ  ⲛⲁϣⲱⲡⲉ  ϩ̅ⲛ̅ⲟⲩⲉⲓⲣⲏⲛⲏ . Ⲙ̅ⲡⲉⲑⲟⲟⲩ  ⲛⲁⲡⲱⲧ  ⲛ̅ⲥⲁⲛ̅ⲣⲉϥⲣ̅ⲛⲟⲃⲉ. ⲛⲁⲅⲁⲑⲟⲛ  ⲇⲉ  ⲛⲁⲧⲁϩⲉⲛ̅ⲇⲓⲕⲁⲓⲟⲥ .  ⲡⲣⲱⲙⲉ  ⲛ̅ⲇⲓⲕⲁⲓⲟⲥ  ⲛⲁⲡⲱϣ  ⲉϫⲛ̅ⲛ̅ϣⲏⲣⲉ  ⲛⲛⲉϥϣⲏⲣⲉ . ⲉⲩⲥⲟⲩⲱϩ  ⲉϩⲟⲩⲛ  ⲛ̅ⲧⲙⲛ̅ⲧⲣⲙ̅ⲙⲁⲟ  ⲛ̅ⲛ̅ⲁⲥⲉⲃⲏⲥ  ⲛ̅ⲛ̅ⲇⲓⲕⲁⲓⲟⲥ .  Ⲛ̅ϫⲱⲱⲣⲉ  ⲛⲁⲙⲧⲟⲛ ⲙⲙⲟⲟⲩ  ⲛ̅ϩⲁϩ  ⲛ̅ⲣⲟⲙⲡⲉ  ϩ̅ⲛ̅ⲟⲩⲙⲛ̅ⲧⲣⲙ̅ⲙⲁⲟ. ⲁϩⲟⲓⲛⲉ  ⲇⲉ  ⲧⲁⲕⲟ  ⲛ̅ⲧⲉⲩⲛⲟⲩ . Ⲡⲉⲧϯⲥⲟ  ⲉⲡⲉϥϭⲉⲣⲱϥ  ⲉϥⲙⲟⲥϩⲧⲉ  ⲙ̅ⲡⲉϥϣⲏⲣⲉ . ⲡⲉⲧⲙⲉ  ⲇⲉ  ⲙ̅ⲡⲱϥ  ϥⲛⲁϯⲥⲃⲱ  ⲛⲁϥ  ⲉⲙⲁⲧⲉ.  Ⲉⲣⲉⲡⲇⲓⲕⲁⲓⲟⲥ  ⲟⲩⲱⲙ  ϣⲁϥⲧⲥⲓⲟ  ⲛ̅ⲧⲉϥⲯⲩⲭⲏ . ⲛⲉⲯⲩⲭⲏ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲁⲣϭⲣⲱϩ.
 
Ⲓ̅Ⲇ̅. Ϣⲁⲣⲉⲛ̅ⲥⲁⲃⲏ  ⲛ̅ⲥϩⲓⲙⲉ  ⲕⲉⲧϩⲉⲛⲏⲓ . ⲧⲉⲧⲛⲁⲣ̅ⲁⲑⲏⲧ  ⲇⲉ  ⲛⲁϣⲣ̅ϣⲱⲣϥ̅  ϩⲛⲛⲉⲥϭⲓϫ . Ⲡⲉⲧⲙⲟⲟϣⲉ  ϩ̅ⲛ̅ⲟⲩⲥⲟⲟⲩⲧⲛ̅  ⲣ̅ϩⲟⲧⲉ  ϩⲏⲧϥ̅  ⲙ̅ⲡⲛⲟⲩⲧⲉ . ⲡⲉⲧϭⲱⲟⲩϭ  ⲇⲉ  ⲛ̅ⲛⲉϥϩⲓⲟⲟⲩⲉ  ⲛⲁϫⲓⲥⲱϣ . Ⲟⲩϭⲉⲣⲱⲃ  ⲛ̅ⲥⲱϣ  ⲡⲉⲧϩⲛ̅ⲧⲧⲁⲡⲣⲟ  ⲛ̅ⲛⲁⲑⲏⲧ. ⲛⲉⲥⲡⲟⲧⲟⲩ  ⲇⲉ  ⲛ̅ⲛ̅ⲥⲟⲫⲟⲥ  ⲛⲁϩⲁⲣⲉϩ  ⲉⲣϯⲟⲟⲩ . Ⲛ̅ⲟⲩⲟⲙϥ̅  ϣⲟⲩⲉⲓⲧ  ϩ̅ⲙ̅ⲡⲙⲁ  ⲉⲧⲉⲙ̅ⲛ̅ⲉϩⲉ  ⲛ̅ϩⲏⲧϥ̅ . ⲧϭⲟⲙ ⲛ̅ⲧⲉϩⲉ  ⲟⲩⲟⲛϩ̅  ⲉⲃⲟⲗ  ϩ̅ⲙ̅ⲡⲙⲁ  ⲉⲧⲉⲟⲩⲛϩⲁϩ  ⲛ̅ϩⲏⲧϥ̅  ⲛ̅ⲅⲉⲛⲏⲙⲁ.  Ⲙ̅ⲛ̅ⲟⲩⲙⲛ̅ⲧⲣⲉ  ⲙ̅ⲡⲓⲥⲧⲟⲥ  ⲛⲁϫⲓϭⲟⲗ . ϣⲁⲣⲉⲟⲩⲙⲛⲧⲣⲉ  ⲇⲉ  ⲛ̅ϫⲓⲛ̅ϭⲟⲛⲥ̅  ⲧⲙ̅ϩⲉϩⲉⲛϭⲟⲗ . Ⲕⲛⲁϣⲓⲛⲉ  ⲛ̅ⲥⲁⲧⲥⲟⲫⲓⲁ  ⲛ̅ⲧⲛ̅ⲛⲉⲧⲑⲟⲟⲩ  ⲛ̅ⲅ̅ⲧⲙ̅ϭⲛ̅ⲧⲥ̅  ⲧⲁⲓⲥⲑⲏⲥⲓⲥ  ⲇⲉ  ⲥⲃ̅ⲧⲱⲧ  ⲛ̅ⲧⲟⲟⲧⲟⲩ  ⲛⲛⲥⲁⲃⲉ. ϩⲱⲃ  ⲛⲓⲙ  ϯⲟⲩⲃⲉⲡⲣⲱⲙⲉ  ⲛ̅ⲁⲑⲏⲧ . ϩⲉⲛϩⲟⲡⲗⲟⲛ  ⲇⲉ  ⲛ̅ⲁⲓⲥⲑⲏⲥⲓⲥ  ⲛⲉ  ⲛⲉⲥⲡⲟⲧⲟⲩ  ⲛ̅ⲛ̅ⲥⲁⲃⲉ. Ϩⲉⲛϩⲟⲡⲗⲟⲛ  ⲇⲉ  ⲛ̅ⲁⲓⲥⲑⲏⲥⲓⲥ  ⲛⲉ  ⲛⲉⲥⲡⲟⲧⲟⲩ  ⲛ̅ⲛ̅ⲥⲁⲃⲉ . Ⲧⲥⲟⲫⲓⲁ  ⲛ̅ⲛ̅ⲣⲙ̅ⲛ̅ϩⲏⲧ  ⲛⲁⲉⲓⲙⲉ ⲉⲛⲉⲩϩⲓⲟⲟⲩⲉ . ⲧⲙⲛ̅ⲧⲁⲑⲏⲧ  ⲇⲉ  ⲛⲁⲧⲥⲃⲱ  ϩ̅ⲛ̅ⲟⲩⲡⲗⲁⲛⲏ .  Ⲛ̅ⲏⲓ  ⲛ̅ⲙ̅ⲡⲁⲣⲁⲛⲟⲙⲟⲥ  ⲙ̅ⲡϣⲁ  ⲛ̅ⲟⲩⲧⲃ̅ⲃⲟ . ⲛ̅ⲏⲓ  ⲇⲉ  ⲛ̅ⲛ̅ⲇⲓⲕⲁⲓⲟⲥ  ⲥⲟⲧⲡ̅.  Ⲡϩⲏⲧ  ⲛⲟⲩⲣⲱⲙⲉ  ⲛ̅ⲣⲉϥⲁⲓⲥⲑⲁⲛⲉ  ⲟⲩⲗⲩⲡⲏ  ⲡⲉ  ⲛ̅ⲧⲉϥⲯⲩⲭⲏ . ϩⲟⲧⲁⲛ  ⲇⲉ  ⲉϥϣⲁⲛⲉⲩⲫⲣⲁⲛⲉ  ⲙⲉⲣⲉⲧⲗⲩⲡⲏ  ⲧⲱϩ  ⲛ̅ⲙ̅ⲙⲁϥ.  Ⲛ̅ⲏⲓ  ⲛ̅ⲛ̅ⲁⲥⲉⲃⲏⲥ  ⲛⲁⲧⲁⲕⲟ . ⲛⲉⲥⲕⲏⲛⲏ  ⲇⲉ  ⲛ̅ⲛ̅ⲇⲓⲕⲁⲓⲟⲥ  ⲛⲁⲁϩⲉⲣⲁⲧⲟⲩ :  Ⲟⲩⲛⲟⲩϩⲓⲏ  ⲉⲣⲉⲡⲣⲱⲙⲉ  ⲙⲉⲉⲩⲉ  ⲉⲣⲟⲥ  ϫⲉ ⲉⲥⲥⲟⲩⲧⲱⲛ . ⲉⲣⲉⲧⲉⲥϩⲁⲏ  ⲇⲉ  ⲡⲏϩ  ⲉⲡϣⲓⲕ  ⲛ̅Ⲁⲙⲛ̅ⲧⲉ . Ⲙⲉⲣⲉⲧⲗⲩⲡⲏ  ⲧⲱϩ  ⲙ̅ⲛ̅ⲡⲟⲩⲛⲟϥ . ϣⲁⲣⲉⲑⲁⲏ  ⲇⲉ  ⲙ̅ⲡⲣⲁϣⲉ  ⲉⲓ  ⲉⲡϩⲏⲃⲉ . Ⲡⲛⲁϣ̅ⲧϩⲏⲧ  ⲛⲁⲥⲉⲓ  ⲛ̅ⲛⲉϥϩⲓⲟⲟⲩⲉ  ⲙⲁⲩⲁⲁϥ .  ⲡⲣⲱⲙⲉ  ⲇⲉ  ⲉⲧⲟⲩⲁⲁⲃ  ⲉⲃⲟⲗ  ϩ̅ⲛ̅ⲛⲉϥⲙⲉⲉⲩⲉ.  Ϣⲁⲣⲉⲡⲃⲁⲗϩⲏⲧ  ⲧⲁⲛϩⲉⲧϣⲁϫⲉ  ⲛⲓⲙ . ϣⲁⲣⲉⲡⲥⲁⲃⲉ  ⲇⲉ  ⲣ̅ϩⲧⲏϥ . Ⲉⲣϣⲁⲛⲡⲥⲟⲫⲟⲥ  ⲣ̅ϩⲟⲧⲉ  ϣⲁϥⲣⲁⲕⲧϥ̅  ⲉⲃⲟⲗ  ⲙ̅ⲡⲡⲉⲑⲟⲟⲩ . ϣⲁⲣⲉⲡⲁⲑⲏⲧ  ⲇⲉ  ⲧⲱϩ  ⲛⲙ̅ⲙⲁϥ  ϩ̅ⲛ̅ⲟⲩⲧⲁϫⲣⲟ . ϣⲁⲣⲉⲡⲉⲧϭⲉⲡⲏ  ⲉϭⲱⲛⲧ̅  ⲉⲓⲣⲉ  ⲛ̅ⲟⲩⲙⲛ̅ⲧⲁⲧϣⲟϫⲛⲉ. ϣⲁⲣⲉⲟⲩⲣⲱⲙⲉ  ⲇⲉ  ⲛ̅ⲥⲟⲫⲟⲥ  ϥⲓ  ⲉⲣⲟϥ  ⲉⲙⲁⲧⲉ . Ⲛⲁⲑⲏⲧ  ⲛⲁⲡⲱϣ  ⲉϫⲱⲟⲩ  ⲛ̅ⲧⲕⲁⲕⲓⲁ . ϣⲁⲣⲉⲛ̅ⲥⲁⲃⲉ  ⲇⲉ  ⲁⲙⲁϩⲧⲉ  ⲛ̅ⲟⲩⲁⲓⲥⲑⲏⲥⲓⲥ . Ⲛⲉⲑⲟⲟⲩ  ⲛⲁϩⲉ  ⲙ̅ⲡⲉⲙⲧⲟ  ⲉⲃⲟⲗ  ⲛ̅ⲛⲉⲧⲛⲁⲛⲟⲩⲟⲩ . ⲁⲩⲱ  ⲛⲁⲥⲉⲃⲏⲥ  ⲛⲁϣⲙ̅ϣⲉ  ϩⲓⲣ̅ⲛ̅ⲛ̅ⲣⲟ  ⲛ̅ⲛ̅ⲇⲓⲕⲁⲓⲟⲥ.   Ϣⲁⲣⲉϩⲉⲛϣⲃⲏⲣ  ⲙⲉⲥⲧⲉⲛⲩϣⲃⲏⲣ  ⲛ̅ϩⲏⲕⲉ . ⲛⲁϣⲉⲛⲉϣⲃⲉⲉⲣ  ⲇⲉ  ⲛ̅ⲛ̅ⲣ̅ⲙ̅ⲙⲁⲟ . ϣⲁⲣⲉⲡⲣⲉϥⲣ̅ⲛⲟⲃⲉ  ⲕⲙ̅ϣⲛⲉϥϣⲃⲉⲉⲣ. Ⲡⲉⲧⲥⲱϣ  ⲛ̅ⲛ̅ϩⲏⲕⲉ  ⲣ̅ⲛⲟⲃⲉ . ⲟⲩⲙⲁⲕⲁⲣⲓⲟⲥ  ⲇⲉ  ⲡⲉⲧⲛⲁⲛ̅ⲛ̅ϩⲏⲕⲉ . Ⲛⲉⲧⲥⲟⲣⲙ̅  ⲣ̅ϩⲱⲃ  ⲉϩⲉⲛⲡⲉⲑⲟⲟⲩ . ϩⲉⲛⲣⲉϥϫⲓϣⲟϫⲛⲉ  ⲛ̅ⲙ̅ⲡⲉⲧⲛⲁⲛⲟⲩⲟⲩ  ⲛⲉ   ⲛ̅ⲛⲁⲏⲧ . ⲛ̅ⲣⲉϥϫⲓϣⲟϫⲛⲉ  ⲇⲉ  ⲛϫⲓⲛ̅ϭⲟⲛⲥ̅  ⲥⲉⲡⲗⲁⲛⲁ  ϩ̅ⲙ̅ⲡⲉⲩϣⲟϫⲛⲉ . ⲉⲣⲉⲡⲛⲁ  ⲇⲉ  ⲙ̅ⲛ̅ⲧⲙⲉ  ⲛ̅ⲧⲉⲛ̅ⲣⲉϥⲣ̅ⲡⲉⲧⲛⲁⲛⲟⲩϥ . ⲛ̅ⲣⲉϥⲣ̅ⲡⲉⲑⲟⲟⲩ  ⲥⲟⲟⲩⲛ  ⲁⲛ  ⲙ̅ⲡⲛⲁ  ⲙ̅ⲛ̅ⲧⲡⲓⲥⲧⲓⲥ . ⲉⲣⲉⲙⲙⲛ̅ⲧⲛⲁ  ⲇⲉ  ⲙ̅ⲛ̅ⲧⲡⲓⲥⲧⲓⲥ  ⲛ̅ⲧⲟⲟⲧⲟⲩ  ⲛ̅ⲛ̅ⲣⲉϥⲣ̅ⲡⲉⲧⲛⲁⲛⲟⲩϥ . Ⲟⲩⲛⲥⲟⲫⲓⲁ  ϩ̅ⲛ̅ⲟⲩⲟⲛ  ⲛⲓⲙ  ⲉⲧϥⲓⲣⲟⲟⲩϣ . ⲡⲉⲧⲙⲟⲧⲛ̅  ⲇⲉ  ⲙⲛⲡⲉⲧⲉⲙⲉϥⲙⲟⲕϩ̅ϥ̅ . ⲛⲁⲣ̅ϭⲣⲱϩ  ⲛ̅ⲧⲙⲛ̅ⲧⲥⲁⲃⲉ  . Ⲧⲙⲛ̅ⲧⲣⲙ̅ⲙⲁⲟ  ⲡⲉ  ⲡⲉⲕⲗⲟⲙ  ⲛ̅ⲛ̅ⲥⲟⲫⲟⲥ . ⲡⲙⲁⲛ̅ϣⲱⲡⲉ  ⲇⲉ  ⲛ̅ⲛ̅ⲁⲑⲏⲧ  ϩⲟⲟⲩ.  Ϣⲁⲣⲉⲟⲩⲙⲛ̅ⲧⲣⲉ  ⲉϥⲛ̅ϩⲟⲧ  ⲧⲟⲩϫⲉϩⲉⲛⲯⲩⲭⲏ  ⲉϩⲉⲛⲡⲉⲑⲟⲟⲩ . ϣⲁⲣⲉⲡⲉⲕⲣⲟϥ  ⲇⲉ  ⲧⲙ̅ϩⲉϩⲉⲛϭⲟⲗ . ⲉⲣⲉⲑⲉⲗⲡⲓⲥ  ⲛ̅ⲧ̅ϭⲟⲙ  ϩⲛ̅ⲑⲟⲧⲉ  ⲙ̅Ⲡϫⲟⲉⲓⲥ . ⲟⲩⲁⲙⲁϩⲧⲉ  ⲉϥⲧⲁϫⲣⲏⲩ  ⲧⲉ  ⲧⲙⲛ̅ⲧⲙⲁⲓⲛⲟⲩⲧⲉ . ϥⲛⲁⲕⲱ  ⲇⲉ  ⲛ̅ⲟⲩⲧⲁϫⲣⲟ  ⲛⲱⲛϩ̅  ⲛ̅ⲛⲉϥϣⲏⲣⲉ . Ⲟⲩⲡⲏⲅⲏ  ⲛ̅ⲱⲛϩ̅  ⲡⲉ  ⲡⲉⲡⲣⲟⲥⲧⲁⲅⲙⲁ  ⲙ̅Ⲡϫⲟⲉⲓⲥ . ϣⲁϥⲣⲁⲕⲧⲟⲩ  ⲇⲉ  ⲉⲃⲟⲗ  ϩ̅ⲙ̅ⲡⲡⲁϣ  ⲙ̅ⲡⲙⲟⲩ : Ⲉⲣⲉⲡⲉⲟⲟⲩ  ⲛ̅ⲟⲩⲣ̅ⲣⲟ  ϩ̅ⲛ̅ⲟⲩⲛⲟϭ  ⲙ̅ⲙⲏⲏϣⲉ . ⲉⲣⲉⲡⲟⲩⲱϣϥ̅  ⲇⲉ  ⲛ̅ⲟⲩⲇⲩⲛⲁⲥⲧⲏⲥ  ϩ̅ⲙ̅ⲡⲱϫⲛ̅  ⲛ̅ⲛ̅ⲗⲁⲟⲥ . Ⲡϩⲁⲣϣ̅ϩⲏⲧ  ⲛ̅ⲣⲱⲙⲉ  ⲟϣ  ⲙ̅ⲙⲛⲧ̅ⲥⲁⲃⲉ. ⲟⲩⲁⲧⲑⲏⲧ  ⲇⲉ  ⲉⲙⲁⲧⲉ  ⲡⲉ  ⲡϩⲏⲧ  ϣⲏⲙ.  Ⲟⲩⲥⲁⲉⲓⲛ  ϩ̅ⲙ̅ⲡⲉϥϩⲏⲧ  ⲡⲉ  ⲟⲩⲣⲱⲙⲉ  ⲉⲙⲉϥϭⲱⲛⲧ̅ . ⲟⲩϫⲟⲟⲗⲉⲥ  ⲇⲉ  ⲛ̅ⲛ̅ⲕⲉⲉⲥ  ⲡⲉ   ⲟⲩϩⲏⲧ  ⲛ̅ⲣⲉϥⲁⲓⲥⲑⲁⲛⲉ .  ⲉⲣⲉⲡⲉⲧϩⲓⲗⲁ  ⲉⲩϩⲏⲕⲉ  ϯⲛⲟⲩϭⲥ̅  ⲙⲡⲉⲛⲧⲁϥⲧⲁⲙⲓⲟϥ . ϣⲁⲣⲉⲡⲉⲧⲧⲁⲓⲟ  ⲇⲉ  ⲙ̅ⲙⲟϥ  ⲛⲁ  ⲛ̅ⲟⲩϩⲏⲕⲉ . Ⲡⲁⲥⲉⲃⲏⲥ  ⲛⲁⲑ̅ⲃⲃⲓⲟ  ϩ̅ⲛ̅ⲧⲉϥⲕⲁⲕⲓⲁ . ⲟⲩⲇⲓⲕⲁⲓⲟⲥ  ⲇⲉ  ⲡⲉ  ⲡⲉⲧⲛⲁϩⲧⲉ  ⲉⲡⲉϥⲟⲩⲟⲡ. ⲉⲣⲉⲙ̅ⲙⲛ̅ⲧⲙⲉ  ⲁϣⲁⲓ  ϩ̅ⲙ̅ⲡϩⲏⲧ  ⲉⲧⲛⲁⲛⲟⲩϥ  ⲙ̅ⲡⲣⲱⲙⲉ . ⲁⲩⲱ  ⲟⲩⲉⲓⲙⲉ  ⲉⲧⲥⲟⲫⲓⲁ  ⲙⲉⲩⲉⲓⲙⲉ  ⲇⲉ  ⲉⲣⲟⲥ  ϩ̅ⲙ̅ⲡϩⲏⲧ  ⲛ̅ⲛⲁⲑⲏⲧ . Ϣⲁⲣⲉⲧⲇⲓⲕⲁⲓⲟⲥⲩⲛⲏ  ϫⲓⲥⲉ  ⲛ̅ⲟⲩϩⲉⲑⲛⲟⲥ . ϣⲁⲣⲉⲛ̅ⲛⲟⲃⲉ ⲇⲉ  ⲧⲥⲃ̅ⲕⲟ  ⲛ̅ϩⲉⲛⲫⲩⲗⲏ.  Ⲡϩⲩⲡⲉⲣⲉⲧⲏⲥ  ⲛ̅ⲥⲁⲃⲉ  ϣⲏⲡ  ⲛ̅ⲟⲩⲣ̅ⲣⲟ . ϣⲁϥϥⲓ  ⲇⲉ  ⲙ̅ⲡⲉϥⲥⲱϣ  ϩ̅ⲛ̅ⲧⲉϥⲙⲛ̅ⲧⲣⲉϥⲕⲧⲟϥ.
 
Ⲓ̅Ⲉ̅. Ϣⲁⲣⲉⲧⲟⲣⲅⲏ  ⲧⲁⲕⲟ  ⲛ̅ⲛ̅ⲕⲉⲥⲁⲃⲉⲉⲩ. ϣⲁⲣⲉⲟⲩϣⲁϫⲉ  ⲉϥⲙ̅ⲡⲉϥⲙⲁ  ⲕⲧⲟ  ⲉⲃⲟⲗ  ⲛ̅ⲟⲩϭⲱⲛ̅ⲧ̅ . ϣⲁⲣⲉⲟⲩϣⲁϫⲉ  ⲛ̅ⲣⲉϥⲗⲩⲡⲓ  ⲧⲟⲩⲛⲉⲥϩⲉⲛⲟⲣⲅⲏ . Ⲡⲗⲁⲥ  ⲇⲉ  ⲛ̅ⲛ̅ⲥⲁⲃⲉ  ⲥⲟⲟⲩⲛ  ⲛ̅ⲛⲉⲧⲛⲁⲛⲟⲩⲟⲩ . ⲧⲧⲁⲡⲣⲟ  ⲇⲉ  ⲛ̅ⲛⲁⲑⲏⲧ  ⲥⲟⲟⲩⲛ  ⲛ̅ⲛⲉⲑⲟⲟⲩ . Ⲛ̅ⲃⲁⲗ ⲙ̅ⲡⲛⲟⲩⲧⲉ  ϭⲱϣⲧ̅  ϩ̅ⲙ̅ⲙⲁ  ⲛⲓⲙ  ⲉϫ̅ⲛ̅ⲛ̅ⲛⲉⲑⲟⲟⲩ  ⲙ̅ⲛ̅ⲛⲉⲧⲛⲁⲛⲟⲩⲟⲩ . Ⲟⲩϣⲏⲛ  ⲛ̅ⲱⲛϩ̅  ⲡⲉ  ⲡⲧⲁⲗϭⲟ  ⲙ̅ⲡⲗⲁⲥ . ⲡⲉⲧⲉⲓⲣⲉ  ⲇⲉ  ⲙⲙⲟϥ  ⲛⲁⲥⲉⲓ  ⲛ̅ⲛⲉϥⲕⲁⲣⲡⲟⲥ.  Ϣⲁⲣⲉⲡⲁⲑⲏⲧ  ⲕⲙ̅ϣⲧⲉⲥⲃⲱ  ⲙ̅ⲡⲉϥⲉⲓⲱⲧ . ⲟⲩⲥⲁⲃⲉ  ⲇⲉ  ⲛ̅ϩⲟⲩⲟ  ⲡⲉ  ⲡⲉⲧϩⲁⲣⲉϩ  ⲉⲛⲉϫⲡⲓⲟ . Ⲟⲩⲛⲟⲩⲛⲟϭ  ⲛ̅ϭⲟⲙ  ϩ̅ⲛ̅ⲧⲇⲓⲕⲁⲓⲟⲥⲩⲛⲏ  ⲉⲧⲟϣ . ⲙ̅ⲙⲟⲕⲙⲉⲕ  ⲇⲉ  ⲛ̅ⲛⲁⲥⲉⲃⲏⲥ  ⲛⲁⲡⲱⲣⲕ̅  ⲙ̅ⲛ̅ⲛⲉⲩⲛⲟⲩⲛⲉ . Ⲟⲩⲛⲟⲩⲛⲟϭ  ⲛ̅ϭⲟⲙ  ϩ̅ⲛ̅ⲡⲏⲓ  ⲛ̅ⲛ̅ⲇⲓⲕⲁⲓⲟⲥ . ⲛ̅ⲕⲁⲣⲡⲟⲥ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲁⲧⲁⲕⲟ . Ⲛⲉⲥⲡⲟⲧⲟⲩ  ⲛ̅ⲛ̅ⲥⲟⲫⲟⲥ  ⲙⲏⲣ  ⲛ̅ⲟⲩⲁⲓⲥⲑⲏⲥⲓⲥ . ⲛ̅ϩⲏⲧ  ⲇⲉ  ⲛ̅ⲛ̅ⲁⲑⲏⲧ  ⲟⲣϫ̅  ⲁⲛ .  ϩⲉⲛⲃⲟⲧⲉ  ⲙ̅Ⲡϫⲟⲉⲓⲥ  ⲛⲉ  ⲛⲉⲑⲩⲥⲓⲁ  ⲛ̅ⲙ̅ⲡⲁⲣⲁⲛⲟⲙⲟⲥ . ⲛⲉⲑⲩⲥⲓⲁ  ⲇⲉ  ⲛ̅ⲛⲉⲧⲥⲟⲩⲧⲱⲛ  ϣⲏⲡ  ⲛ̅ⲛⲁϩⲣⲁϥ. Ϩⲉⲛⲃⲟⲧⲉ  ⲙ̅Ⲡϫⲟⲉⲓⲥ  ⲛⲉ  ⲛⲉϩⲓⲟⲟⲩⲉ  ⲙ̅ⲡⲁⲥⲉⲃⲏⲥ . ϥⲙⲉ  ⲇⲉ  ⲛ̅ⲛⲉⲧⲡⲏⲧ  ⲛ̅ⲥⲁⲧⲇⲓⲕⲁⲓⲟⲥⲩⲛⲏ.  Ϣⲁⲩⲥⲟⲩⲛⲧⲉⲥⲃⲱ  ⲛ̅ⲛ̅ⲃⲁⲗϩⲏⲧ  ϩⲓⲧⲛ̅ⲛⲉⲧⲡⲁⲣⲁⲅⲉ . ⲛⲉⲧⲙⲟⲥⲧⲉ ⲇⲉ  ⲛ̅ⲛⲉϫⲡⲓⲟ  ⲛⲁⲙⲟⲩ  ϩ̅ⲛ̅ⲟⲩⲥⲱϣ . Ⲉϣϫⲉ  Ⲁⲙⲛ̅ⲧⲉ  ⲙ̅ⲛ̅ⲡⲛⲟⲩⲛ  ⲟⲩⲟⲛϩ̅  ⲉⲃⲟⲗ  ⲙ̅ⲡⲛⲟⲩⲧⲉ . ⲛ̅ⲁϣ  ⲛ̅ϩⲉ  ⲛ̅ⲧⲟⲟⲩ  ⲛ̅ⲛⲕⲉϩⲏⲧ  ⲁⲛ  ⲛ̅ⲛ̅ⲣⲱⲙⲉ . Ⲙⲉⲣⲉⲡⲁⲧⲥⲃⲱ  ⲙⲉⲣⲉⲡⲉⲧϫⲡⲓⲟ  ⲙ̅ⲙⲟϥ . ⲁⲩⲱ  ⲙⲉϥϣⲁϫⲉ  ⲙ̅ⲛ̅ⲛ̅ⲥⲟⲫⲟⲥ .  ϣⲁⲣⲉⲡϩⲏⲧ  ⲉⲧⲉⲩⲫⲣⲁⲛⲉ  ϯⲟⲩⲣⲟⲧ  ⲙ̅ⲡϩⲟ . ϣⲁϥⲱⲕⲙ̅  ⲇⲉ  ⲉϥϩⲛ̅ϩⲉⲛⲗⲩⲡⲉⲓ . Ϣⲁⲣⲉⲡϩⲏⲧ  ⲉⲧⲥⲟⲩⲧⲱⲛ  ϣⲓⲛⲉ  ⲛ̅ⲥⲁⲟⲩⲁⲓⲥⲑⲏⲥⲓⲥ . ⲧ̅ⲧⲁⲡⲣⲟ  ⲇⲉ  ⲛ̅ⲛⲁⲧⲥⲃⲱ  ⲛⲁⲥⲟⲩⲛϩⲉⲛⲡⲉⲑⲟⲟⲩ . ⲡϩⲏⲧ  ⲙ̅ⲡⲁⲑⲏⲧ  ⲥⲟⲟⲩⲛ  ⲛ̅ϩⲉⲛⲡⲉⲑⲟⲟⲩ.  ⲉⲣⲉⲛ̅ⲃⲁⲗ  ⲛ̅ⲛⲉⲑⲟⲟⲩ  ⲛ̅ⲟⲩⲟⲉⲓϣ  ⲛⲓⲙ  ϭⲱϣⲧ  ⲉⲃⲟⲗ  ϩⲏⲧⲟⲩ  ⲛ̅ϩⲉⲛⲡⲉⲑⲟⲟⲩ . Ϣⲁⲣⲉⲛⲉⲧⲛⲁⲛⲟⲩⲟⲩ  ⲇⲉ  ⲕⲁⲣⲱⲟⲩ  ⲛ̅ⲟⲩⲟⲉⲓϣ  ⲛⲓⲙ . Ⲛⲁⲛⲟⲩⲟⲩⲕⲟⲩⲓ  ϩ̅ⲛ̅ⲑⲟⲧⲉ  ⲙ̅Ⲡϫⲟⲉⲓⲥ . ⲉϩⲟⲩⲉⲟⲩⲛⲟϭ  ⲛ̅ⲁϩⲟ  ϩ̅ⲛ̅ⲟⲩⲙⲛ̅ⲧⲁⲧϩⲟⲧⲉ. Ⲛⲁⲛⲟⲩⲟⲩⲙⲛ̅ⲧⲙⲁⲓϣⲙ̅ⲙⲟ  ⲙ̅ⲛ̅ϩⲉⲛⲟⲩⲟⲟⲧⲉ  ⲡⲣⲟⲥ  ⲟⲩⲙⲛⲧϣⲃⲏⲣ  ⲙ̅ⲛ̅ⲟⲩⲭⲁⲣⲓⲥ . ⲉϩⲟⲩⲉϩⲉⲛⲙⲁⲥⲉ  ⲉⲩⲥⲁⲛⲁϣⲧ̅  ϩ̅ⲛ̅ⲟⲩⲙⲛ̅ⲧϫⲁϫⲉ . ϣⲁⲣⲉⲟⲩⲣⲱⲙⲉ ⲛ̅ⲣⲉϥϭⲱⲛⲧ  ⲥⲟⲃⲧⲉ  ⲛ̅ϩⲉⲛⲙⲓϣⲉ . ϣⲁⲣⲉⲡϩⲁⲣϣ̅ϩⲏⲧ   ⲇⲉ  ⲧⲁⲗϭⲉⲏⲛ̅ⲕⲟⲟⲩⲉ  ⲉⲧⲛⲁϣⲱⲛⲉ . ϣⲁⲣⲉⲡϩⲁⲣϣϩⲏⲧ  ⲛ̅ⲣⲱⲙⲉ  ⲱϣⲙ̅  ⲛ̅ϩⲉⲛϩⲁⲡ . ϣⲁⲣⲉⲡⲁⲥⲉⲃⲏⲥ  ⲇⲉ  ⲧⲟⲩⲛⲟⲥⲟⲩ  ⲛ̅ϩⲟⲩⲟ . ⲛⲉϩⲓⲟⲟⲩⲉ  ⲛ̅ⲛ̅ⲁⲣⲅⲟⲥ  ⲡⲟⲣϣ  ⲛ̅ϣⲟⲛⲧⲉ . ⲛⲁⲛ̅ϫⲱⲱⲣⲉ  ⲇⲉ  ⲕⲉϩⲕⲱϩ.  Ϣⲁⲣⲉⲟⲩϣⲏⲣⲉ  ⲛⲥⲟⲫⲟⲥ  ⲉⲩⲫⲣⲁⲛⲉ  ⲙⲡⲉϥⲉⲓⲱⲧ. ϣⲁⲣⲉⲟⲩϣⲏⲣⲉ  ⲇⲉ  ⲛⲁⲑⲏⲧ  ⲕⲙϣ̅ⲧⲉϥⲙⲁⲁⲩ . Ⲛⲉϩⲓⲟⲟⲩⲉ  ⲙ̅ⲡⲁⲑⲏⲧ  ⲣ̅ϭⲣⲱϩ  ⲛⲧⲙⲛ̅ⲧⲥⲁⲃⲉ  ⲟⲩⲣⲱⲙⲉ  ⲇⲉ  ⲛ̅ⲥⲁⲃⲉ  ϣⲁϥⲙⲟⲟϣⲉ  ⲉϥⲥⲟⲩⲧⲱⲛ . Ϣⲁⲣⲉⲛⲉⲧⲉⲛ̅ⲥⲉⲧⲁⲓⲟ  ⲁⲛ  ⲛ̅ϩⲉⲛⲥⲟⲟⲩϩⲥ̅   ⲕⲱ  ⲛ̅ⲥⲱⲟⲩ  ⲛ̅ϩⲉⲛϣⲟϫⲛⲉ . ϣⲁⲣⲉⲡϣⲟϫⲛⲉ  ⲇⲉ  ⲙⲟⲩⲛ  ⲉⲃⲟⲗ  ϩ̅ⲛ̅ⲛ̅ϩⲏⲧ  ⲛ̅ⲛ̅ⲣⲉϥⲙⲉⲉⲩⲉ . ⲛ̅ⲛⲉⲡⲉⲑⲟⲟⲩ  ⲥⲱⲧⲙ̅  ⲛⲥⲱϥ . ⲁⲩⲱ  ⲛ̅ⲛⲉϥϫⲉⲗⲁⲁⲩ  ⲉⲛⲁⲛⲟⲩϥ  ϩ̅ⲙ̅ⲡⲉϥⲟⲩⲟⲉⲓϣ  ⲙ̅ⲡⲙⲏⲏϣⲉ . Ϩⲉⲛϩⲓⲟⲟⲩⲉ  ⲛ̅ⲱⲛϩ̅  ⲛⲉ  ⲙ̅ⲙⲉⲉⲩⲉ  ⲙ̅ⲡⲥⲁⲃⲉ . ϫⲉ  ⲉϥⲉⲣⲁⲕⲧϥ̅  ⲉⲃⲟⲗ  ⲛ̅ⲁⲙⲛ̅ⲧⲉ  ⲛ̅ϥ̅ⲟⲩϫⲁⲓ.  Ⲡⲛⲟⲩⲧⲉ ⲛⲁϣⲟⲣϣⲣ̅  ⲛ̅ⲛ̅ⲏⲓ  ⲛ̅ⲛ̅ⲣⲉϥⲥⲱϣ . ⲁϥⲧⲁϫⲣⲟ  ⲇⲉ  ⲛ̅ⲛ̅ⲧⲟϣ  ⲛ̅ⲧⲉⲭⲏⲣⲁ . Ⲟⲩⲃⲟⲧⲉ  ⲙ̅Ⲡϫⲟⲉⲓⲥ  ⲡⲉ  ⲡⲙⲉⲉⲩⲉ  ⲛ̅ϫⲓⲛ̅ϭⲟⲛⲥ̅. ϩⲉⲛⲙⲛ̅ⲧⲣⲙ̅ⲛ̅ϩⲏⲧ  ⲇⲉ  ⲛⲉ  ⲛ̅ϣⲁϫⲉ  ⲉⲧⲟⲩⲁⲁⲃ . Ⲡⲉⲧϫⲓⲇⲱⲣⲟⲛ  ⲛⲁⲧⲁⲕⲟϥ  ⲟⲩⲁⲁϥ . ⲡⲉⲧⲙⲟⲥⲧⲉ  ⲇⲉ  ⲛ̅ϫⲓⲇⲱⲣⲟⲛ  ⲛⲁⲱⲛϩ̅ . ⲉϣⲁⲩⲕⲱ  ⲉⲃⲟⲗ  ⲛⲛ̅ⲛⲟⲃⲉ  ϩ̅ⲛ̅ϩⲉⲛⲙⲛ̅ⲧⲛⲁ  ⲙ̅ⲛ̅ϩⲉⲛⲡⲓⲥⲧⲓⲥ . ϩ̅ⲛ̅ⲑⲟⲧⲉ  ⲇⲉ  ⲙ̅ⲡⲛⲟⲩⲧⲉ  ⲉⲣⲉⲟⲩⲟⲛ  ⲛⲓⲙ  ⲣⲓⲕⲉ  ⲙ̅ⲙⲟϥ  ⲉⲃⲟⲗ  ⲛ̅ⲙ̅ⲡⲉⲑⲟⲟⲩ . ⲉⲣⲉⲛ̅ϩⲏⲧ  ⲛ̅ⲛ̅ⲇⲓⲕⲁⲓⲟⲥ  ⲙⲉⲗⲉⲧⲁ   ⲛⲧⲡⲓⲥⲧⲓⲥ . ⲉⲣⲉⲧⲧⲁⲡⲣⲟ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲁϫⲱ  ⲛ̅ϩⲉⲛⲡⲉⲑⲟⲟⲩ . Ⲛⲉϩⲓⲟⲟⲩⲉ  ⲙ̅ⲡⲣⲱⲙⲉ  ⲛ̅ⲇⲓⲕⲁⲓⲟⲥ  ⲥⲟⲧⲡ̅  ⲙ̅ⲡⲛⲟⲩⲧⲉ . ⲁⲩⲱ  ⲉϣⲁⲣⲉϩⲉⲛϫⲁϫⲉ  ϩⲱⲧⲡ̅  ⲉⲃⲟⲗ  ϩⲓⲧⲟⲟⲧⲟⲩ. Ⲡⲛⲟⲩⲧⲉ  ⲟⲩⲏⲩ  ⲛ̅ⲛ̅ⲁⲥⲉⲃⲏⲥ . ϣⲁϥⲥⲱⲧⲙ̅  ⲇⲉ  ⲉⲛⲉϣⲗⲏⲗ  ⲛ̅ⲛ̅ⲇⲓⲕⲁⲓⲟⲥ . Ⲛⲁⲛⲟⲩϫⲓⲟⲩⲕⲟⲩⲓ  ϩⲛⲟⲩⲇⲓⲕⲁⲓⲟⲥⲩⲛⲏ. ⲉϩⲟⲩⲉϩⲁϩ  ⲛ̅ⲅⲉⲛⲏⲙⲁ  ϩⲛ̅ⲟⲩϫⲓⲛ̅ϭⲟⲛⲥ̅.
 
Ⲓ̅Ⲋ̅. Ⲡϩⲏⲧ  ⲙ̅ⲡⲣⲱⲙⲉ  ⲙⲁⲣⲉϥⲙⲉⲉⲩⲉ  ⲉϩⲉⲛⲙⲛ̅ⲧⲙⲉ :  ϫⲉ  ⲉⲣⲉⲛⲉϥϩⲓⲟⲟⲩⲉ  ⲥⲟⲟⲩⲧⲛ̅  ⲉⲃⲟⲗ  ϩⲓⲧⲙ̅Ⲡϫⲟⲉⲓⲥ . Ⲡⲃⲁⲗ  ⲉⲧⲛⲁⲩ  ⲉⲡⲡⲉⲧⲛⲁⲛⲟⲩϥ  ϣⲁϥⲉⲩⲫⲣⲁⲛⲉ  ⲙ̅ⲡϩⲏⲧ .  ϣⲁⲣⲉⲡⲥⲟⲉⲓⲧ  ⲇⲉ  ⲉⲧⲛⲁⲛⲟⲩϥ  ϯⲟⲩⲣⲟⲧ  ⲛ̅ⲛ̅ⲕⲉⲉⲥ . Ⲉⲣⲉⲡⲉⲧⲕⲱ  ⲛ̅ⲥⲱϥ  ⲛ̅ⲧⲉⲥⲃⲱ  ⲙⲟⲥϩⲧⲉ  ⲙ̅ⲙⲟϥ  ⲟⲩⲁⲁϥ . ⲡⲉⲧϩⲁⲣⲉϩ  ⲇⲉ  ⲉⲛⲉϫⲡⲓⲟ  ⲙⲉ  ⲛ̅ⲧⲉϥⲯⲩⲭⲏ  ⲙⲁⲩⲁⲁϥ . Ⲑⲟⲧⲉ  ⲙ̅Ⲡϫⲟⲉⲓⲥ  ⲧⲉ  ⲧⲉⲥⲃⲱ  ⲙ̅ⲛ̅ⲧⲥⲟⲫⲓⲁ . ⲁⲩⲱ  ⲧⲁⲣⲭⲏ  ⲙ̅ⲡⲉⲟⲟⲩ  ⲛⲁⲟⲩⲱϣⲃ̅ ⲛⲁⲥ. ⲡⲉⲟⲟⲩ  ⲛⲁⲙⲟⲟϣⲉ  ⲙ̅ⲛ̅ⲛⲉⲧⲑ̅ⲃⲃⲓⲏⲩ . ⲁⲩⲱ  ⲧⲁⲣⲭⲏ  ⲙ̅ⲡⲉⲟⲟⲩ  ⲧⲉ  ⲧⲉϩⲟⲩⲉⲓⲧⲉ  ⲛ̅ⲇⲓⲕⲁⲓⲟⲥⲩⲛⲏ  ⲙ̅ⲡⲛⲟⲩⲧⲉ  ⲉⲧⲥⲟⲩⲧⲱⲛ.  Ⲛⲉϩⲃⲏⲩⲉ  ⲧⲏⲣⲟⲩ  ⲙ̅ⲡⲉⲧⲑⲃ̅ⲃⲓⲏⲩ  ⲟⲩⲟⲛϩ̅  ⲉⲡⲛⲟⲩⲧⲉ . ⲛⲁⲥⲉⲃⲏⲥ  ⲇⲉ  ⲛⲁⲧⲁⲕⲟ  ϩ̅ⲛ̅ⲟⲩϩⲟⲟⲩ  ⲉϥϩⲟⲟⲩ . Ⲟⲩⲃⲟⲧⲉ  ⲛ̅ⲛⲁϩⲣⲙ̅ⲡⲛⲟⲩⲧⲉ  ⲡⲉ  ϫⲁⲥⲓϩⲏⲧ  ⲛⲓⲙ . ⲡⲉⲧⲛⲁϯⲧⲟⲟⲧϥ̅  ⲇⲉ  ⲛ̅ⲟⲩⲁ  ϩ̅ⲛ̅ⲟⲩϫⲓ  ⲛ̅ϭⲟⲛⲥ̅  ⲛ̅ϥ̅ⲛⲁⲑⲣⲃⲟⲗ  ⲁⲛ . Ⲧⲁⲣⲭⲏ  ⲛ̅ⲧⲉϩⲓⲏ  ⲉⲧⲛⲁⲛⲟⲩⲥ  ⲡⲉ  ⲉⲓⲣⲉ   ⲑⲛⲙ̅ⲙⲛ̅ⲧⲙⲉ . ⲧⲇⲓⲕⲁⲓⲟⲥⲩⲛⲏ  ⲅⲁⲣ  ⲥⲟⲧⲡ̅  ⲛ̅ⲁϩⲣⲙ̅ⲡⲛⲟⲩⲧⲉ . ⲉϩⲟⲩⲉⲧⲉⲑⲩⲥⲓⲁ  ⲛ̅ⲛ̅ⲁⲛⲟⲙⲟⲥ . Ⲡⲉⲧϣⲓⲛⲉ  ⲛ̅ⲥⲁⲡⲛⲟⲩⲧⲉ  ⲛⲁϩⲉ  ⲉⲩⲥⲟⲟⲩⲛ  ϩ̅ⲛ̅ⲟⲩⲇⲓⲕⲁⲓⲟⲥⲩⲛⲏ  ⲡⲉⲧϣⲓⲛⲉ  ⲇⲉ  ⲛ̅ⲥⲱϥ  ϩ̅ⲛ̅ⲟⲩⲥⲟⲟⲩⲧⲛ̅  ⲛⲁϩⲉ  ⲉⲩⲉⲓⲣⲏⲛⲏ . ⲉⲣⲉⲛⲉϩⲃⲏⲩⲉ  ⲧⲏⲣⲟⲩ  ⲙ̅ⲡⲛⲟⲩⲧⲉ  ϩ̅ⲛ̅ⲟⲩⲇⲓⲕⲁⲓⲟⲥⲩⲛⲏ . ⲉⲩϩⲁⲣⲉϩ  ⲇⲉ  ⲉⲡⲁⲥⲉⲃⲏⲥ  ⲉⲩϩⲟⲟⲩ  ⲉϥϩⲟⲟⲩ.  Ⲟⲩⲧⲟⲛⲧⲛ̅  ⲡⲉⲧϩⲓⲛⲉⲥⲡⲟⲧⲟⲩ  ⲙ̅ⲡⲣ̅ⲣⲟ . ⲛ̅ⲛⲉⲧⲉϥⲧⲁⲡⲣⲟ  ⲇⲉ  ⲡⲗⲁⲛⲁ  ϩ̅ⲛ̅ⲟⲩϩⲁⲡ  ⲟⲩⲣⲓⲕⲉ  ⲙ̅ⲙⲁϣⲉ  ⲧⲉ  ⲧⲇⲓⲕⲁⲓⲟⲥⲩⲛⲏ  ⲛⲁϩⲣⲙ̅ⲡⲛⲟⲩⲧⲉ . ϣⲓ ⲇⲉ  ⲛⲓⲙ  ⲛ̅ⲧⲟⲟⲧϥ̅  ⲟⲩⲁⲁⲃ  ϩ̅ⲛ̅ϣⲓ  ⲙ̅ⲙⲉ  ⲛⲉ  ⲛⲉϥϩⲃⲏⲩⲉ . ⲉⲣⲉⲠϫⲟⲉⲓⲥ  ⲇⲉ  ⲙⲉ  ⲛ̅ϩⲉⲛϣⲁϫⲉ  ⲉⲩⲥⲟⲩⲧⲱⲛ . Ⲧⲃⲟⲧⲉ  ⲛ̅ⲟⲩⲣ̅ⲣⲟ  ⲡⲉ  ⲡⲉⲧⲉⲓⲣⲉ  ⲛ̅ϩⲉⲛⲡⲉⲑⲟⲟⲩ . ⲉϣⲁⲩⲥⲟⲃⲧⲉ  ⲅⲁⲣ  ⲙ̅ⲡⲉⲑⲣⲟⲛⲟⲥ  ⲛ̅ⲟⲩⲣ̅ⲣⲟ  ϩ̅ⲛ̅ⲟⲩⲇⲓⲕⲁⲓⲟⲥⲩⲛⲏ . Ⲙ̅ⲙⲟⲕⲙⲉⲕ  ⲙ̅ⲙⲉ  ⲥⲟⲧⲡ̅  ⲛ̅ⲟⲩⲣⲣⲟ . ⲉϥⲙⲉ  ⲇⲉ  ⲛ̅ϭⲓⲡⲛⲟⲩⲧⲉ  ⲛ̅ⲛⲉϩⲃⲏⲩⲉ  ⲙ̅ⲙⲉ . Ⲟⲩϥⲁⲓϣⲓⲛⲉ  ⲛ̅ⲧⲉⲡⲙⲟⲩ  ⲡⲉ  ⲡϭⲱⲛⲧ̅  ⲛ̅ⲟⲩⲣ̅ⲣⲟ . ϣⲁⲣⲉⲟⲩⲣⲱⲙⲉ  ⲇⲉ  ⲛ̅ⲥⲟⲫⲟⲥ  ⲟϣⲙⲉϥ :  Ⲉⲣⲉⲛϣⲃⲏⲣ  ⲙ̅ⲡⲣ̅ⲣⲟ ϩⲙ̅ⲡⲟⲩⲟⲉⲓⲛ  ⲙ̅ⲡⲱⲛϩ̅  ⲉⲣⲉⲛⲉⲧϣⲏⲡ  ⲇⲉ  ⲛ̅ⲁϩⲣⲁϥ  ⲟ  ⲛ̅ⲑⲉ  ⲛⲟⲩⲕⲗⲟⲟⲗⲉ  ⲛ̅ϩⲁⲏ . Ⲟⲩⲱⲛϩ̅  ⲡⲉ  ⲡϩⲟ  ⲙ̅ⲡⲣⲣⲟ  ⲉⲧⲣⲟⲟⲩⲧ . ϣⲁϥϯϩⲏⲩ  ⲇⲉ  ⲛ̅ⲛⲉⲧϥ̅ⲛⲁⲣⲁϣⲉ  ⲛⲙ̅ⲙⲁⲩ  ⲛ̅ⲑⲉ  ⲛ̅ⲟⲩⲕⲗⲟⲟⲗⲉ  ⲛ̅ϩⲁⲏ . Ⲙ̅ⲙⲁⲛ̅ϣⲱⲡⲉ  ⲑⲛⲧⲥⲟⲫⲓⲁ  ⲥⲟⲧⲡ̅  ⲉⲡⲛⲟⲩⲃ . ⲁⲩⲱ  ⲙ̅ⲙⲁⲛ̅ϣⲱⲡⲉ  ⲛ̅ⲧⲙⲛ̅ⲧⲣⲙ̅ⲛ̅ϩⲏⲧ  ⲉϩⲟⲩⲉⲡϩⲁⲧ  ⲉⲧⲥⲟⲧⲡ̅ .  Ⲧⲉϩⲓⲏ  ⲙ̅ⲡⲱⲛϩ̅  ⲡⲉ  ⲣⲁⲕⲧⲕ  ⲉⲃⲟⲗ  ⲙ̅ⲡⲡⲉⲑⲟⲟⲩ . ⲟⲩⲛⲟϭ  ⲇⲉ  ⲛ̅ⲁϩⲉ  ⲛⲉ  ⲛⲉϩⲓⲟⲟⲩⲉ  ⲛ̅ⲧⲇⲓⲕⲁⲓⲟⲥⲩⲛⲏ . Ⲡⲉⲛⲧⲁϥⲥⲃⲱ  ⲉⲧⲉⲥⲃⲱ  ϥⲛⲁϣⲱⲡⲉ  ϩⲛϩⲉⲛⲁⲅⲁⲑⲏ . ⲟⲩⲥⲁⲃⲉ  ⲇⲉ  ⲛ̅ϩⲟⲩⲟ  ⲡⲉ  ⲡⲉⲧϩⲁⲣⲉϩ  ⲉϩⲉⲛϫⲡⲓⲟ . ⲉⲣⲉⲡⲉⲧϩⲁⲣⲉϩ  ⲛ̅ⲛⲉϥϩⲓⲟⲟⲩⲉ  ϩⲁⲣⲉϩ  ⲉⲧⲉϥⲯⲩⲭⲏ . Ⲡⲉⲧⲙⲉ  ⲇⲉ  ⲙ̅ⲡⲱⲛϩ̅  ϥⲛⲁϯⲥⲱ  ⲉⲣⲱϥ. ⲉⲣⲉⲡⲥⲱϣ  ⲙⲟⲟϣⲉ  ϩⲁⲑⲏ  ⲙ̅ⲡⲟⲩⲱϣϥ̅ . ϩⲉⲛⲙⲉⲉⲩⲉ  ⲇⲉ  ⲉⲩϩⲟⲟⲩ  ϩⲁⲑⲏ  ⲙ̅ⲡϩⲉ . Ⲛⲁⲛⲟⲩⲟⲩⲣⲱⲙⲉ  ⲉⲙⲉϥϭⲱⲛⲧ̅  ϩ̅ⲛ̅ⲟⲩⲇⲓⲕⲁⲓⲟⲥⲩⲛⲏ  ⲙ̅ⲛ̅ⲟⲩⲑⲃ̅ⲃⲓⲟ . ⲉϩⲟⲩⲉⲡⲉⲧⲛⲁⲡⲱϣ  ⲛ̅ϩⲉⲛϣⲱⲗ  ⲙ̅ⲛ̅ϩⲉⲛⲣⲉϥⲥⲱϣ.  Ⲟⲩⲣⲉϥϭⲛ̅ⲁⲅⲁⲑⲟⲛ  ⲡⲉ  ⲡⲣⲙ̅ⲛ̅ϩⲏⲧ  ϩ̅ⲛ̅ⲛⲉϥϩⲃⲏⲩⲉ . ⲡⲉⲧⲛⲁϩⲧⲉ  ⲇⲉ  ⲉⲠϫⲟⲉⲓⲥ  ⲛⲁⲣ̅ⲙⲁⲕⲁⲣⲓⲟⲥ . Ϣⲁⲩⲙⲟⲩⲧⲉ  ⲉⲛⲥⲟⲫⲟⲥ  ⲙ̅ⲛ̅ⲛ̅ⲥⲁⲃⲉⲉⲩ  ϫⲉ  ⲛⲉⲧⲥⲟϣϥ̅ .  ϣⲁⲩⲥⲱⲧⲙ̅  ⲇⲉ  ⲛ̅ϩⲟⲩⲟ  ⲉⲛⲉⲧⲛⲟⲧⲙ̅  ϩ̅ⲙ̅ⲡⲉⲩϣⲁϫⲉ . Ⲟⲩⲡⲏⲅⲏ  ⲛ̅ⲱⲛϩ̅  ⲡⲉ  ⲡⲙⲉⲉⲩⲉ  ⲉⲧⲛⲁⲛⲟⲩϥ  ⲛⲛⲉⲛⲧⲁⲩϫⲡⲟϥ  ⲛⲁⲩ . ⲧⲉⲥⲃⲱ ⲇⲉ  ⲛ̅ⲛⲁⲑⲏⲧ  ϩⲟⲟⲩ . Ϣⲁⲣⲉⲡϩⲏⲧ  ⲙ̅ⲡⲥⲁⲃⲉ  ⲛⲟⲓ  ⲛ̅ⲛⲉⲧⲛⲏⲩ  ⲉⲃⲟⲗ  ϩ̅ⲛ̅ⲣⲱϥ . Ϥⲛⲁⲫⲟⲣⲓ  ⲇⲉ  ⲛ̅ⲟⲩⲥⲟⲟⲩⲛ  ϩⲓⲛⲉϥⲥⲡⲟⲧⲟⲩ . Ϩⲉⲛⲙⲟⲩⲗϩ̅  ⲛ̅ⲉⲃⲓⲱ  ⲛⲉ  ⲛ̅ϣⲁϫⲉ  ⲛ̅ⲧⲥⲟⲫⲓⲁ . ⲡⲉϩⲗⲟϭ  ⲇⲉ  ⲙ̅ⲡⲉⲩⲥⲱⲧⲙ̅  ⲟⲩⲧⲁⲗϭⲟ  ⲡⲉ  ⲙ̅ⲯⲩⲭⲏ.  Ⲟⲩⲛⲟⲩϩⲓⲏ  ⲉⲣⲉⲡⲣⲱⲙⲉ  ⲙⲉⲉⲩⲉ  ⲉⲣⲟⲥ ϫⲉ  ⲥⲥⲟⲩⲧⲱⲛ . ⲉⲣⲉⲧⲉⲥϩⲁⲏ  ⲇⲉ  ⲛⲏⲩ  ⲉⲡϣⲓⲕ ⲑⲛⲁⲙⲑⲛⲧⲉ. Ϣⲁⲣⲉⲟⲩⲣⲱⲙⲉ  ⲛ̅ϫⲱⲱⲣⲉ  ϣ̅ⲡ̅ϩⲓⲥⲉ  ϩ̅ⲛ̅ϩⲉⲛϩⲓⲥⲉ . ⲁⲩⲱ  ϣⲁϥϫⲓ  ⲛ̅ϫⲛⲁϩ  ϩ̅ⲙ̅ⲡⲉϥⲧⲁⲕⲟ . Ⲡⲉⲧϭⲟⲟⲙⲉ  ⲇⲉ  ⲛ̅ⲧⲟϥ  ⲉⲓⲛⲉ  ⲙ̅ⲡⲉϥⲧⲁⲕⲟ  ϩ̅ⲛ̅ⲧⲉϥⲧⲁⲡⲣⲟ . Ⲉⲣⲉⲡⲣⲱⲙⲉ  ⲛ̅ⲁⲑⲏⲧ  ϣⲓⲕⲉ  ⲛⲁϥ  ⲛ̅ϩⲉⲛⲡⲉⲑⲟⲟⲩ . ⲉϥⲥⲟⲩⲱϩ  ⲇⲉ  ⲉϩⲟⲩⲛ  ⲛ̅ⲟⲩⲕⲱϩⲧ̅  ϩⲓⲛⲉϥⲥⲡⲟⲧⲟⲩ . Ϣⲁⲣⲉⲟⲩⲣⲱⲙⲉ  ⲉϥϭⲟⲟⲙⲉ ϫⲟⲟⲩ ⲛ̅ⲟⲩϯⲧⲱⲛ . ⲁⲩⲱ   ϣⲁϥⲧ̅ⲙ̅ϩⲟ  ⲑⲛⲟⲩϣⲁϩ  ⲛ̅ⲕⲣⲟϥ  ⲛ̅ⲛⲉⲑⲟⲟⲩ . ⲁⲩⲱ  ϣⲁϥⲡⲱⲣϫ̅  ⲛ̅ϩⲉⲛϣⲃⲏⲣ . Ϣⲁⲣⲉⲟⲩⲣⲱⲙⲉ  ⲙ̅ⲡⲁⲣⲁⲛⲟⲙⲟⲥ  ⲣ̅ϩⲁⲗ  ⲛ̅ⲛⲉϥϣⲃⲉⲉⲣ . ⲁⲩⲱ  ϣⲁϥϫⲓⲧⲟⲩ  ⲉϩⲉⲛϩⲓⲟⲟⲩⲉ  ⲛⲛⲁⲛⲟⲩⲟⲩ  ⲁⲛ.  ⲉⲣⲉⲡⲉⲧⲧⲁϫⲣⲟ  ⲛ̅ⲛⲉϥⲃⲁⲗ  ⲙⲉⲉⲩⲉ  ⲉϩⲉⲛⲕⲣⲟϥ . ⲁⲩⲱ  ⲟⲛ  ϣⲁϥⲟⲩⲱⲙ  ⲛ̅ⲛⲉϥⲥⲡⲟⲧⲟⲩ . Ⲡⲁⲓ ϭⲉ  ⲟⲩϩⲣⲱ  ⲛ̅ⲕⲁⲕⲓⲁ  ⲡⲉ . ⲟⲩⲕⲗⲟⲙ  ⲛ̅ⲧⲣⲩⲫⲏ  ⲧⲉ  ⲧⲙⲛ̅ⲧϩⲗ̅ⲗⲟ  ⲉⲧⲛⲁⲛⲟⲩⲥ . Ϣⲁⲩϩⲉ  ⲇⲉ  ⲉⲣⲟϥ  ϩ̅ⲛ̅ⲛⲉϩⲓⲟⲟⲩⲉ  ⲛ̅ⲧⲇⲓⲕⲁⲓⲟⲥⲛⲏ . Ⲛⲁⲛⲟⲩⲟⲩⲣⲱⲙⲉ  ⲛ̅ϩⲁⲣϣ̅ϩⲏⲧ  ⲉⲩϫⲱⲱⲣⲉ . ⲁⲩⲱ  ⲡⲉⲧⲁⲙⲁϩⲧⲉ  ⲛ̅ⲧⲉϥⲟⲣⲅⲏ  ⲉϩⲟⲩⲉⲡⲉⲧⲛⲁϫⲓ  ⲛⲟⲩⲡⲟⲗⲓⲥ . Ⲥⲉⲛⲁⲧⲟⲟⲃⲟⲩ  ⲧⲏⲣⲟⲩ  ⲉⲕⲟⲩⲛⲧⲟⲩ  ⲛ̅ⲛ̅ⲣⲉϥϫⲓⲛ̅ϭⲟⲛⲥ̅ . ⲉⲩⲛⲁϯ  ⲇⲉ  ⲛ̅ⲟⲩⲟⲛ  ⲛⲓⲙ  ⲛ̅ⲙ̅ⲙⲛ̅ⲧⲙⲉ  ⲉⲃⲟⲗ  ϩⲓⲧⲙ̅ⲡⲛⲟⲩⲧⲉ.
 
Ⲓ̅Ⲍ̅. Ⲛⲁⲛⲟⲩⲟⲩⲟⲉⲓⲕ  ϩ̅ⲛⲟⲩⲉⲓⲣⲏⲛⲏ  ⲉϩⲟⲩⲉϩⲉⲛⲏⲓ  ⲉⲩⲙⲉϩ  ⲛ̅ϣⲱⲱⲧ  ϩ̅ⲛ̅ⲟⲩϫⲓⲛ̅ϭⲟⲛⲥ̅ . ϣⲁⲣⲉⲟⲩϩⲑⲙϩⲁⲗ  ⲛ̅ⲥⲁⲃⲉ  ⲁⲙⲁϩⲧⲉ  ⲉϫⲛ̅ϩⲉⲛϫⲓⲥⲟⲟⲩⲉ  ⲛ̅ⲁⲑⲏⲧ . ϣⲁϥⲡⲱϣ  ⲇⲉ  ⲛ̅ϩⲉⲛⲧⲟ  ϩ̅ⲛ̅ϩⲉⲛⲥⲛⲏⲩ . ⲛ̅ⲑⲉ  ⲉϣⲁⲩⲇⲟⲕⲓⲙⲁⲍⲉ  ⲙ̅ⲡⲛⲟⲩⲃ  ⲙ̅ⲛ̅ⲡϩⲁⲧ  ϩ̅ⲛ̅ⲟⲩϩⲣⲱ . ⲧⲁⲓ  ⲧⲉ  ⲑⲉ  ⲉⲧⲉⲣⲉⲡⲛⲟⲩⲧⲉ  ⲥⲱⲧⲡ̅  ⲛ̅ⲛ̅ϩⲏⲧ  ⲛ̅ⲛ̅ⲣⲱⲙⲉ . ϣⲁⲣⲉⲡ̅ⲡⲉⲑⲟⲟⲩ  ⲥⲱⲧⲙ̅  ⲛ̅ⲥⲁⲛ̅ⲗⲁⲥ  ⲛ̅ⲙ̅ⲡⲁⲣⲁⲛⲟⲙⲟⲥ . Ⲙⲉⲣⲉⲡⲇⲓⲕⲁⲓⲟⲥ  ⲇⲉ  ϯϩⲧⲏϥ  ⲉⲥⲡⲟⲧⲟⲩ  ⲛ̅ϭⲟⲗ . ⲡⲁⲡ̅ⲡⲓⲥⲧⲟⲥ  ⲡⲉ  ⲡⲕⲟⲥⲙⲟⲥ  ⲧⲏⲣϥ̅  ⲙⲛ̅ⲛⲉϥⲭⲣⲏⲙⲁ  ⲙ̅ⲙⲛ̅ⲧⲉⲡⲁⲡⲓⲥⲧⲟⲥ  ⲇⲉ  ⲟⲥⲇⲉ  ⲟⲩϩⲟⲃⲟⲗⲟⲥ.  ⲉⲣⲉⲡⲉⲧⲥⲱⲃⲉ  ⲛ̅ⲥⲁⲟⲩϩⲏⲕⲉ  ϯⲛⲟⲩϭⲥ̅   ⲙ̅ⲡⲉⲛⲧⲁϥⲧⲁⲙⲓⲟϥ.  Ⲡⲉⲧⲣⲁϣⲉ  ⲇⲉ  ⲉϫⲛ̅ⲡⲉⲧⲛⲁⲧⲁⲕⲟ  ϥⲛⲁⲣ̅ⲃⲟⲗ  ⲁⲛ  ⲉⲡⲉⲑⲟⲟⲩ . Ⲡⲉⲕⲗⲟⲙ  ⲛ̅ⲛ̅ϩⲗ̅ⲗⲟ  ⲡⲉ  ϩ̅ⲛ̅ϣⲏⲣⲉ  ⲛ̅ϣⲏⲣⲉ . ⲡⲉⲟⲟⲩ  ⲇⲉ  ⲛ̅ⲛ̅ϣⲏⲣⲉ  ⲡⲉ  ⲛⲉⲩⲉⲓⲟⲧⲉ . ⲙ̅ⲛ̅ϩⲉⲛⲥⲡⲟⲧⲟⲩ  ⲉⲩⲛ̅ϩⲟⲧ  ⲣ̅ϣⲁⲩ  ⲛ̅ⲛ̅ⲁⲑⲏⲧ . ⲟⲩⲇⲉ  ⲥⲡⲟⲧⲟⲩ  ⲛ̅ϭⲟⲗ  ⲛ̅ⲛ̅ⲇⲓⲕⲁⲓⲟⲥ . Ⲟⲩⲃⲉⲕⲉ  ⲑⲛϩⲙⲟⲧ  ⲧⲉ  ⲧⲉⲥⲃⲱ  ⲛ̅ⲉⲧⲉⲓⲣⲉ  ⲙ̅ⲙⲟⲥ . ⲡⲙⲁ  ⲉⲧⲥ̅ⲕⲟⲧⲥ̅  ⲉⲣⲟϥ  ϥⲛⲁⲥⲟⲟⲩⲧⲛ̅ . ⲉⲣⲉⲡⲉⲧϩⲱⲡ  ⲛ̅ⲛ̅ϫⲓ  ⲛ̅ϭⲟⲛⲥ̅  ϣⲓⲛⲉ  ⲛ̅ⲥⲁⲟⲩⲙⲛ̅ⲧϣⲃⲏⲣ .  ⲡⲉⲧⲙⲟⲥⲧⲉ  ⲇⲉ  ⲛ̅ϩⲟⲡⲟⲩ  ϣⲁϥⲡⲣ̅ϫϩⲉⲛϣⲃⲏⲣ  ⲙ̅ⲛ̅ϩⲉⲛⲣⲙ̅ⲛ̅ⲏⲓ.  Ϣⲁⲣⲉⲟⲩϭⲱⲛⲧ̅  ⲟⲩⲉϣϥ̅ⲡϩⲏⲧ  ⲙ̅ⲡⲥⲁⲃⲉ . ⲉⲩⲙⲁⲥⲧⲓⲅⲟⲩ  ⲇⲉ  ⲙ̅ⲡⲁⲑⲏⲧ  ⲙⲉϥⲁⲓⲥⲑⲁⲛⲉ . Ϣⲁⲣⲉⲛⲉⲑⲟⲟⲩ ⲧⲏⲣⲟⲩ  ⲧⲟⲩⲛⲉⲥϩⲉⲛⲛⲟⲩϩⲙ̅ . ⲡⲛⲟⲩⲧⲉ ⲇⲉ ⲛⲁⲧⲛ̅ⲛⲟⲟⲩ  ⲛⲁⲩ  ⲛ̅ⲟⲩⲁⲅⲅⲉⲗⲟⲥ  ⲛⲁⲧⲛⲁ . Ⲡⲣⲟⲟⲩϣ  ⲛⲁⲧⲁϩⲉⲟⲩⲣⲱⲙⲉ  ⲛ̅ⲥⲁⲃⲉ. ⲉⲣⲉⲛⲁⲑⲏⲧ  ⲇⲉ  ⲙⲉⲉⲩⲉ  ⲉϩⲉⲛⲡⲉⲑⲟⲟⲩ. Ⲡⲉⲧⲛⲁϯ  ⲛ̅ϩⲉⲛⲡⲉⲑⲟⲟⲩ  ⲉⲡⲙⲁ  ⲛ̅ϩⲉⲛⲡⲉⲧⲛⲁⲛⲟⲩⲟⲩ . ⲙ̅ⲡⲉⲑⲟⲟⲩ  ⲛⲁⲕⲓⲙ  ⲁⲛ ϩ̅ⲙ̅ⲡⲉϥⲏⲓ . Ϣⲁⲣⲉⲧⲁⲣⲭⲏ  ⲛ̅ⲧⲇⲓⲕⲁⲓⲟⲥⲩⲛⲏ  ϯ  ⲛⲟⲩⲉⲝⲟⲩⲥⲓⲁ . ⲡⲉϣⲧⲟⲣⲧⲣ̅  ⲇⲉ  ⲙ̅ⲛ̅ⲡⲙⲓϣⲉ  ⲙⲟⲟϣⲉ  ϩⲏⲧϥ̅  ⲙ̅ⲡⲉϭⲣⲱϩ.  Ⲡⲉⲧⲛⲁⲕⲣⲓⲛⲉ  ⲙ̅ⲡⲇⲓⲕⲁⲓⲟⲥ  ϫⲉ  ⲟⲩⲁⲇⲓⲕⲟⲥ ⲡⲉ . ⲁⲩⲱ  ⲡⲁⲇⲓⲕⲟⲥ  ϫⲉ  ⲟⲩⲇⲓⲕⲁⲓⲟⲥ   ⲡⲉ . Ϩ̅ⲛ̅ⲃⲟⲧⲉ  ⲛⲉ  ⲙ̅ⲡⲉⲥⲛⲁⲩ  ⲛ̅ⲛⲁϩⲣⲙ̅Ⲡϫⲟⲉⲓⲥ.  Ⲉⲧⲃⲉⲟⲩ  ⲟⲩⲛⲧⲉⲡⲁⲑⲏⲧ  ⲭⲣⲏⲙⲁ . ⲙ̅ⲛ̅ϭⲟⲙ  ⲅⲁⲣ  ⲉⲧⲣⲉⲡⲁⲑⲏⲧ  ϫⲡⲉⲧⲥⲟⲫⲓⲁ . ⲉⲣⲉⲡⲉⲧϫⲓⲥⲉ  ⲙ̅ⲡⲉϥⲏⲓ  ϣⲓⲛⲉ  ⲛ̅ⲥⲁⲟⲩⲟⲩⲱϣϥ̅. ⲡⲉⲧϭⲟⲟⲙⲉ  ⲇⲉ  ⲉϫⲓⲥⲃⲱ  ⲛⲁϩⲉ  ⲉϩⲣⲁⲓ  ⲉϩⲉⲛⲡⲉⲑⲟⲟⲩ . Ⲙⲁⲣⲉⲡⲉⲕϣⲃⲏⲣ  ϣⲱⲡⲉ  ⲛⲁⲕ  ϩ̅ⲛ̅ⲙⲁ  ⲛⲓⲙ. ⲁⲩⲱ  ⲛ̅ⲧⲉⲛⲉⲕⲥⲛⲏⲩ  ϣⲱⲡⲉ  ⲛⲁⲕ  ⲛ̅ϣⲁⲩ  ϩ̅ⲛ̅ⲛⲉⲕⲁⲛⲁⲅⲕⲏ . ⲉⲩϫⲡⲟ  ⲅⲁⲣ  ⲙ̅ⲙⲟⲟⲩ  ⲉⲡⲉⲓϩⲱⲃ . Ⲡⲣⲱⲙⲉ  ⲛ̅ⲁⲑⲏⲧ  ϫⲁⲕ. ⲁⲩⲱ  ϥⲣⲁϣⲉ  ⲉϫⲱϥ  ⲟⲩⲁⲁϥ . ⲉϥϣⲡ̅ⲧⲱⲣⲉ  ⲛ̅ⲛⲉϥϣⲃⲉⲉⲣ . ϣⲁⲣⲉⲡⲥⲁⲃⲉ  ⲇⲉ  ⲟⲩⲉ  ⲉⲃⲟⲗ  ⲛ̅ϣⲡ̅ⲧⲱⲣⲉ  ⲛ̅ϥ̅ⲧⲁⲓⲟ. Ϣⲁⲣⲉⲡⲙⲁⲓⲛⲟⲃⲉ  ⲣⲁϣⲉ  ϩ̅ⲛ̅ϩⲉⲛⲙⲓϣⲉ.  ⲡⲛⲁϣⲧϩⲏⲧ  ⲇⲉ  ⲛⲁⲧⲱⲙⲛ̅ⲧ  ⲁⲛ  ⲉⲡⲉⲧⲛⲁⲛⲟⲩϥ . Ⲟⲩⲛⲟⲩⲣⲱⲙⲉ  ⲛ̅ⲣⲉϥⲡⲟⲟⲛⲉϥ  ϩ̅ⲙ̅ⲡⲉϥⲗⲁⲥ  ⲛⲁϩⲉ  ⲉϩⲣⲁⲓ  ⲉϩⲉⲛⲡⲉⲑⲟⲟⲩ . ⲟⲩⲙⲕⲁϩ  ⲇⲉ  ⲛ̅ϩⲏⲧ  ⲡⲉ  ⲟⲩϩⲏⲧ  ⲛⲁⲑⲏⲧ  ⲙ̅ⲡⲉⲧⲛⲁϫⲡⲟϥ  ⲛⲁϥ . ⲙ̅ⲙⲛ̅ⲟⲩⲉⲓⲱⲧ  ⲛⲁⲉⲩⲫⲣⲁⲛⲉ  ⲉϫⲛ̅ⲟⲩϣⲏⲣⲉ  ⲛ̅ⲁⲧⲥⲃⲱ . ⲟⲩϣⲏⲣⲉ  ⲇⲉ  ⲛ̅ⲥⲁⲃⲉ  ϥⲛⲁⲉⲩⲫⲣⲁⲛⲉ . ⲛ̅ⲧⲉϥⲙⲁⲁⲩ. Ϣⲁⲣⲉⲫⲏⲧ  ⲛ̅ⲛⲉⲧⲉⲩⲫⲣⲁⲛⲉ  ϯⲙ̅ⲧⲟⲛ  ⲛⲁⲩ . ⲛ̅ⲕⲉⲉⲥ  ⲇⲉ  ⲙ̅ⲡⲣⲉϥⲗⲩⲡⲓ  ⲛⲁϣⲟⲟⲩⲉ . Ⲟⲩⲁⲥⲉⲃⲏⲥ  ⲡⲉ  ⲡⲉⲧϫⲓⲇⲱⲣⲟⲛ  ⲉⲕⲟⲩⲛϥ̅ . ϥⲛⲁⲣⲓⲕⲉ  ⲅⲁⲣ  ⲉⲃⲟⲗ  ϩⲛ̅ⲛⲉϩⲓⲟⲟⲩⲉ  ⲛ̅ⲧⲇⲓⲕⲁⲓⲟⲥⲩⲛⲏ . Ⲟⲩⲥⲟⲫⲟⲥ  ⲡⲉ  ⲡϩⲟ  ⲙ̅ⲡⲣⲱⲙⲉ  ⲛ̅ⲥⲁⲃⲉ . ⲛ̅ⲃⲁⲗ  ⲇⲉ  ⲙ̅ⲡⲁⲑⲏⲧ  ⲉⲓⲟⲣⲙ̅  ⲉⲛ̅ⲕⲟϩ  ⲙ̅ⲡⲕⲁϩ.  Ⲟⲩⲟⲣⲅⲏ  ⲛ̅ⲟⲩⲉⲓⲱⲧ  ⲡⲉ  ⲟⲩϣⲏⲣⲉ  ⲛ̅ⲁⲑⲏⲧ . ⲁⲩⲱ  ⲟⲩⲙ̅ⲕⲁϩ  ⲛ̅ϩⲏⲧ  ⲡⲉ  ⲛ̅ⲧⲉⲛⲧⲁⲥϫⲡⲟϥ . Ⲛⲁⲛⲟⲩⲧⲣⲉⲟⲩⲣⲱⲙⲉ  ⲁⲛ  ⲛ̅ⲇⲓⲕⲁⲓⲟⲥ  ϯⲟⲥⲉ . ⲁⲩⲱ  ⲛ̅ϣ̅ϣⲉ  ⲁⲛ  ⲉⲉⲡⲓⲃⲟⲩⲗⲉⲩⲉ  ⲉϩⲉⲛⲇⲩⲛⲁⲥⲧⲏⲥ  ⲛⲇⲓⲕⲁⲓⲟⲥ . Ⲟⲩⲥⲁⲃⲉ  ⲡⲉ  ⲡⲉⲧϯⲥⲟ  ⲉⲛⲉϫⲟⲩϣⲁϫⲉ  ⲉⲃⲟⲗ  ⲉϥⲛⲁϣⲧ̅ . ⲟⲩⲥⲁⲃⲉ  ⲇⲉ  ⲡⲉ  ⲡⲣⲱⲙⲉ  ⲛϩⲁⲣϣϩⲏⲧ. Ⲉⲣϣⲁⲛⲡⲁⲑⲏⲧ  ϣⲓⲛⲉ  ⲛⲥⲁⲧⲥⲟⲫⲓⲁ  ⲥⲉⲛⲁⲟⲡϥ̅  ⲉⲥⲟⲫⲟⲥ . ϥⲛⲁϣⲱⲡⲉ   ⲇⲉ  ⲉϥⲟⲛϣ̅ . ⲛⲅ̅ϩⲉ ⲉⲣⲟϥ  ⲉϣϫⲉⲟⲩⲥⲁⲃⲉ  ⲡⲉ.
 
Ⲓ̅ⲏ̅. Ϣⲁⲣⲉⲡⲣⲱⲙⲉ ⲉⲧⲟⲩⲉϣⲡⲱⲣϫ̅  ⲉⲛⲉϥϣⲃⲉⲉⲣ  ϣⲓⲛⲉ  ⲛ̅ⲥⲁⲟⲩⲗⲟⲓϭⲉ . ⲡⲁⲓ  ⲛ̅ⲧⲉⲓⲙⲓⲛⲉ  ⲛⲁϣⲱⲡⲉ  ϩⲁⲛⲟϭⲛⲉϭ  ⲛ̅ⲟⲩⲟⲉⲓϣ  ⲛⲓⲙ . Ⲡⲁⲑⲏⲧ  ⲣ̅ⲭⲣⲓⲁ  ⲛⲛⲧⲥⲟⲫⲓⲁ  ϥⲟⲩⲉϣⲧⲙⲛ̅ⲧⲁⲑⲏⲧ  ⲅⲁⲣ  ⲛϩⲟⲩⲟ . Ⲉⲣϣⲁⲛⲡⲁⲥⲉⲃⲏⲥ  ⲉⲓ  ⲉⲩⲙⲏⲏϣⲉ  ⲙ̅ⲡⲉⲑⲟⲟⲩ  ϣⲁϥⲕⲁⲧⲁⲫⲣⲟⲛⲓ . ϣⲁⲣⲉⲟⲩⲥⲱϣ  ⲇⲉ  ⲉⲓ  ⲉϫⲱϥ  ⲙ̅ⲛ̅ⲟⲩⲛⲟϭⲛⲉϭ . Ⲟⲩⲙⲟⲟⲩ  ⲉϥϣⲏⲕ  ⲡⲉ  ⲡϣⲁϫⲉ  ϩ̅ⲙ̅ⲡϩⲏⲧ  ⲙ̅ⲡⲣⲱⲙⲉ. ϣⲁⲣⲉⲧⲡⲏⲅⲏ  ⲇⲉ  ⲛ̅ⲧⲥⲟⲫⲓⲁ  ⲃⲉⲉⲃⲉ    ⲛ̅ⲥ̅ϥⲱϭⲉ  ⲉϩⲣⲁⲓ  ⲙ̅ⲛ̅ϭⲟⲙ  ⲙ̅ⲙⲟⲥ  ⲉϩⲱⲡ.  Ⲛⲁⲛⲟⲩϫⲓⲡϩⲟ  ⲁⲛ  ⲛ̅ⲟⲩⲁⲥⲉⲃⲏⲥ. ⲁⲩⲱ  ⲛ̅ϣ̅ϣⲉ  ⲁⲛ  ⲉⲥⲧⲉⲟⲩⲇⲓⲕⲁⲓⲟⲥ  ⲉⲃⲟⲗ  ϩ̅ⲛ̅ⲟⲩϩⲁⲡ . ⲛⲉⲥⲡⲟⲧⲟⲩ  ⲙ̅ⲡⲁⲑⲏⲧ  ⲛⲁⲛ̅ⲧϥ̅  ⲉϩⲉⲛⲡⲉⲑⲟⲟⲩ . ⲉⲣⲉⲧⲉϥⲧⲁⲡⲣⲟ ⲇⲉ  ⲉⲧⲛⲁϣⲧ̅  ⲉⲡⲓⲕⲁⲗⲓ  ⲙ̅ⲡⲙⲟⲩ . Ⲧⲧⲁⲡⲣⲟ  ⲙ̅ⲡⲁⲑⲏⲧ  ⲟⲩⲟⲩⲱϣϥ̅  ⲛⲁϥ  ⲧⲉ . ⲁⲩⲱ  ⲟⲩⲡⲁϣ  ⲛ̅ⲧⲉϥⲯⲩⲭⲏ  ⲛⲉ  ⲛⲉϥⲥⲡⲟⲧⲟⲩ . Ϣⲁⲣⲉⲑⲟⲧⲉ  ⲣⲱϩⲧ̅  ⲙ̅ⲡⲣⲉϥϫⲛⲁⲩ . ⲛⲉⲯⲩⲭⲏ  ⲇⲉ  ⲛ̅ⲛ̅ϭⲁⲃϩⲏⲧ  ⲛⲁϩⲕⲟ . Ⲡⲉⲧⲉⲛϥ̅ⲧⲁⲗϭⲟ  ⲙ̅ⲙⲟϥ  ⲁⲛ  ϩ̅ⲛ̅ⲛⲉϥϩⲃⲏⲩⲉ . ⲡⲥⲟⲛ  ⲡⲉ  ⲙ̅ⲡⲉⲧⲧⲁⲕⲟ  ⲙ̅ⲙⲟϥ ⲟⲩⲁⲁϥ .  Ⲟⲩⲁⲑⲏⲧ   ⲉϥϣⲁⲛϣⲓⲡⲉ  ⲥⲛⲁⲱⲡ  ⲉⲣⲟϥ  ⲉⲩⲥⲟⲫⲓⲁ .  ⲁⲩⲱ ⲡⲉⲧⲧⲁⲗϭⲟ  ⲙ̅ⲙⲟϥ  ϩ̅ⲛ̅ⲛⲉϥϩⲃⲏⲩⲉ  ⲑⲙⲙⲓⲛ  ⲙ̅ⲙⲟϥ.  Ⲡⲣⲁⲛ  ⲙ̅Ⲡϫⲟⲉⲓⲥ  ⲟⲩⲟⲩⲟⲛϩ̅  ⲉⲃⲟⲗ  ϩ̅ⲛ̅ⲧⲙⲛ̅ⲧⲛⲟϭ  ⲛ̅ⲧⲉϥϭⲟⲙ. ⲛ̅ⲇⲓⲕⲁⲓⲟⲥ  ⲇⲉ  ⲛⲁϫⲓⲥⲉ  ⲙ̅ⲡⲡⲱⲧ  ⲉⲣⲁⲧϥ̅ . Ⲡⲉϫⲡⲟ  ⲛ̅ⲟⲩⲣⲱⲙⲉ  ⲛ̅ⲣⲙ̅ⲙⲁⲟ  ⲡⲉ  ⲟⲩⲡⲟⲗⲓⲥ  ⲉⲥⲧⲁϫⲣⲏⲩ . ⲡⲉⲥⲉⲟⲟⲩ  ⲇⲉ  ⲣ̅ϩⲁⲓⲃⲉⲥ  ⲉⲙⲁⲧⲉ . Ⲡϩⲏⲧ  ⲙ̅ⲡⲣⲱⲙⲉ  ϫⲓⲥⲉ  ϩⲁⲑⲏ  ⲙ̅ⲡⲟⲩⲱϣϥ̅ . ⲁⲩⲱ  ϣⲁϥⲑⲃ̅ⲃⲓⲟ  ϩⲁⲑⲏ  ⲙ̅ⲡⲉⲟⲟⲩ . Ⲡⲉⲧⲛⲁϣⲁϫⲉ  ⲉⲙⲡⲁⲧϥ̅ⲥⲱⲧⲙ̅  ⲟⲩⲙⲛ̅ⲧⲁⲑⲏⲧ  ⲛⲁϥ  ⲧⲉ  ⲙ̅ⲛ̅ⲟⲩⲛⲟϭⲛⲉϭ . ϣⲁⲣⲉⲟⲩϩⲙ̅ϩⲁⲗ  ⲛ̅ⲥⲁⲃⲉ  ⲧⲁⲗϭⲉⲟⲩϭⲱⲛⲧ̅  ⲛ̅ⲟⲩⲣⲱⲙⲉ .  Ⲛⲓⲙ  ⲇⲉ  ⲡⲉⲧⲛⲁϣϥⲓ  ϩⲁⲟⲩⲣⲱⲙⲉ  ⲛ̅ϩⲏⲧ  ϣⲏⲙ.  Ⲡϩⲏⲧ  ⲙ̅ⲡⲥⲁⲃⲉ  ⲛⲁϫⲡⲟ  ⲛⲁϥ  ⲛ̅ⲟⲩⲁⲓⲥⲑⲏⲥⲓⲥ . ⲉⲣⲉⲙ̅ⲙⲁⲁϫⲉ  ⲇⲉ  ⲛ̅ⲛ̅ⲥⲟⲫⲟⲥ  ϣⲓⲛⲉ  ⲛ̅ⲥⲁⲟⲩⲙⲉⲉⲩⲉ . Ϣⲁⲣⲉⲛ̅ⲧⲁⲓⲟ  ⲙ̅ⲡⲣⲱⲙⲉ  ⲟⲩⲟϣⲥϥ̅  ⲉⲃⲟⲗ . ⲁⲩⲱ  ϣⲁⲩⲥⲩⲛϩⲩⲥⲧⲁ  ⲙ̅ⲙⲟϥ  ⲛ̅ϩⲉⲛⲛⲟϭ. Ϣⲁⲣⲉⲡⲇⲓⲕⲁⲓⲟⲥ  ⲕⲁⲧⲉⲅⲟⲣⲓ  ⲙ̅ⲙⲟϥ  ⲟⲩⲁⲁϥ  ϩ̅ⲙ̅ⲡⲉϥϣⲟⲣⲡ̅  ⲛ̅ϣⲁϫⲉ .  ⲥⲉⲛⲁϫⲡⲓⲉⲡⲉⲧⲟⲩⲃⲏϥ  ⲇⲉ  ϩ̅ⲙ̅ⲡⲉⲧϥ̅ⲛⲁϩⲓⲧⲟⲟⲧϥ̅  ⲉⲣⲟϥ . Ϣⲁⲣⲉⲟⲩⲕⲗⲏⲣⲟⲥ  ⲧⲁⲗϭⲉϩⲉⲛⲟⲩⲱϩⲙ̅ . ⲁⲩⲱ  ϣⲁϥⲡⲱϣ  ϩ̅ⲛ̅ⲛ̅ⲛⲟϭ .  ⲉⲣⲉⲟⲩⲥⲟⲛ  ⲉⲩⲃⲟⲏⲑⲓ  ⲉⲣⲟϥ  ϩⲓⲧⲛ̅ⲟⲩⲥⲟⲛ  ⲟ  ⲛ̅ⲑⲉ  ⲛ̅ⲟⲩⲡⲟⲗⲓⲥ   ⲉⲥⲟⲣϫ̅  ⲁⲩⲱ  ⲉⲥϫⲟⲥⲉ .  ϥϭⲙ̅ϭⲟⲙ  ⲇⲉ  ⲛ̅ⲑⲉ  ⲛ̅ⲟⲩⲙⲛ̅ⲧⲉⲣⲟ  ⲉⲥⲟⲣϫ̅.  Ⲉⲣⲉⲡⲣⲱⲙⲉ  ⲛⲁⲙⲉϩϩⲏⲧϥ̅  ⲉⲃⲟⲗ  ϩ̅ⲛ̅ⲛ̅ⲕⲁⲣⲡⲟⲥ  ⲛ̅ⲣⲱϥ . ⲁⲩⲱ  ⲉϥⲛⲁⲥⲉⲓ  ⲛ̅ⲛ̅ⲕⲁⲣⲡⲟⲥ  ⲛ̅ⲛⲉϥⲥⲡⲟⲧⲟⲩ .  ⲉⲣⲉⲡⲙⲟⲩ  ⲙ̅ⲛ̅ⲡⲱⲛϩ̅  ⲛ̅ⲧϭⲓϫ  ⲙ̅ⲡⲗⲁⲥ. ⲛⲉⲧⲁⲙⲁϩⲧⲉ  ⲇⲉ  ⲙ̅ⲙⲟϥ  ⲛⲁⲟⲩⲱⲙ  ⲛ̅ⲛⲉϥⲕⲁⲣⲡⲟⲥ . Ⲡⲉⲛⲧⲁϥϩⲉ  ⲉⲩⲥϩⲓⲙⲉ  ⲉⲛⲁⲛⲟⲩⲥ  ⲁϥϩⲉ  ⲉⲩϩⲙⲟⲧ . ⲁϥϫⲓ  ⲇⲉ  ⲛ̅ⲟⲩⲟⲩⲣⲟⲧ  ⲉⲃⲟⲗ ϩⲓⲧⲙ̅ⲡⲛⲟⲩⲧⲉ .  Ⲡⲉⲧⲛⲁⲛⲟⲩϫⲉ  ⲉⲃⲟⲗ  ⲛ̅ⲟⲩⲥϩⲓⲙⲉ  ⲉⲛⲁⲛⲟⲩⲥ . ⲉϥⲛⲁⲛⲟⲩϫⲉ  ⲉⲃⲟⲗ  ⲛϩⲉⲛⲁⲅⲁⲑⲟⲛ.  Ⲡⲉⲧⲛⲁϭⲱ  ⲇⲉ  ⲙ̅ⲛ̅ⲟⲩⲥϩⲓⲙⲉ  ⲛ̅ⲛⲟⲉⲓⲕ  ⲟⲩⲁⲑⲏⲧ  ⲡⲉ  ⲁⲩⲱ  ⲟⲩϣⲁϥⲧⲉ  ⲡⲉ . ϧⲁⲣⲉⲧⲙⲛⲧⲁⲑⲏⲧ  ⲙ̅ⲡⲣⲱⲙⲉ  ⲧⲁⲕⲉⲛⲉϥϩⲓⲟⲟⲩⲉ .  ϣⲁϥϭⲛ̅ⲁⲣⲓⲕⲉ  ⲇⲉ  ⲉⲡⲛⲟⲩⲧⲉ.
 
Ⲓ̅Ⲑ̅. Ϣⲁⲣⲉⲧⲙⲛ̅ⲧⲣⲙ̅ⲙⲁⲟ  ϫⲡⲉϩⲁϩ  ⲛ̅ϣⲃⲏⲣ . ϣⲁⲣⲉⲡϩⲏⲕⲉ  ⲇⲉ  ⲡⲱⲣϫ̅  ⲉⲃⲟⲗ  ⲙ̅ⲡⲉϥⲕⲉⲟⲩⲁ . ⲙ̅ⲛ̅ⲙⲛ̅ⲧⲣⲉ  ⲛ̅ϭⲟⲗ  ⲛⲁⲣ̅ⲃⲟⲗ  ⲉⲡⲉⲑⲟⲟⲩ . ⲁⲩⲱ  ⲡⲉⲧⲉⲛⲕⲁⲗⲓ  ϩ̅ⲛ̅ⲟⲩϫⲓⲛ̅ϭⲟⲛⲥ̅  ⲛ̅ⲛⲉϥⲛⲟⲩϩⲙ̅ ϩⲁϩ  ⲛⲉⲧϣⲙ̅ϣⲉ  ⲙ̅ⲡⲉⲙⲧⲟ  ⲉⲃⲟⲗ  ⲛ̅ⲛⲉⲣⲣⲱⲟⲩ .  ⲛⲉⲑⲟⲟⲩ  ⲇⲉ  ⲧⲏⲣⲟⲩ  ⲛⲁϣⲱⲡⲉ  ⲉⲩⲛⲟϭⲛⲉϭ  ⲙⲡⲣⲱⲙⲉ. Ϣⲁⲣⲉⲡⲙⲉⲉⲩⲉ  ⲉⲧⲛⲁⲛⲟⲩϥ  ϩⲱⲛ  ⲉϩⲟⲩⲛ  ⲉⲛⲉⲧⲥⲟⲟⲩⲛ  ⲙ̅ⲙⲟϥ .  ⲡⲣⲱⲙⲉ  ⲇⲉ  ⲛ̅ⲥⲁⲃⲉ  ⲛⲁϩⲉ  ⲉⲣⲟϥ .  Ⲟⲩⲟⲛ  ⲛⲓⲙ  ⲉⲧⲛⲁⲙⲉⲥⲧⲉⲟⲩⲥⲟⲛ  ⲛ̅ϩⲏⲕⲉ  ⲉϥⲛⲁⲟⲩⲉ  ⲟⲛ  ⲛ̅ⲟⲩⲙⲛ̅ⲧϣⲃⲏⲣ . ⲡⲉⲧⲣ̅ϩⲁϩ  ⲙ̅ⲡⲉⲑⲟⲟⲩ  ⲛⲁϫⲱⲕ  ⲉⲃⲟⲗ  ⲛ̅ⲟⲩⲕⲁⲕⲓⲁ.  ⲡⲉⲧⲧⲱⲕ̅ⲥ̅  ⲇⲉ  ⲛ̅ⲛ̅ϣⲁϫⲉ  ⲛⲁⲟⲩϫⲁⲓ  ⲁⲛ.  Ⲡⲉⲧϫⲡⲟ  ⲛⲁϥ  ⲛ̅ⲧⲙⲛ̅ⲧⲣⲙ̅ⲛ̅ϩⲏⲧ  ⲉϥⲙⲉ  ⲙ̅ⲙⲟϥ  ⲟⲩⲁⲁϥ . ⲡⲉⲧϩⲁⲣⲉϩ  ⲇⲉ  ⲉⲧⲙⲛ̅ⲧⲥⲁⲃⲉ  ⲛⲁϩⲉ  ⲉⲡⲡⲉⲧⲛⲁⲛⲟⲩϥ . ⲙ̅ⲙ̅ⲛ̅ⲟⲩⲙ̅ⲛ̅ⲧⲣⲉ  ⲛ̅ϫⲓⲛ̅ϭⲟⲛⲥ̅  ⲛⲁⲣ̅ⲃⲟⲗ  ⲉⲡⲉⲑⲟⲟⲩ . ⲡⲉⲧⲧⲙ̅ϩⲟ  ⲇⲉ  ⲛ̅ⲟⲩⲕⲁⲕⲓⲁ  ϥⲛⲁⲧⲁⲕⲟ  ⲛ̅ϩⲏⲧⲥ̅ . ⲙ̅ⲙ̅ⲛ̅ⲧⲣⲩⲫⲏ  ⲣ̅ⲛⲟϥⲣⲉ  ⲙ̅ⲡⲁⲑⲏⲧ . ⲁⲩⲱ  ⲉⲣϣⲁⲛⲟⲩϩⲙ̅ϩⲁⲗ  ⲁⲣⲭⲓ  ϩ̅ⲛ̅ⲟⲩϩⲱⲃ  ϥⲛⲁϫⲓ  ⲛ̅ϫⲛⲁϩ  ϩ̅ⲛ̅ⲟⲩⲥⲱϣ . Ϣⲁⲣⲉⲡⲣⲱⲙⲉ  ⲛ̅ⲛⲁⲏⲧ  ⲣ̅ϩⲁⲣϣ̅ϩⲏⲧ . ⲉⲣⲉⲡⲉϥϣⲟⲩϣⲟⲩ  ⲇⲉ  ⲛⲏⲩ  ⲉϫⲛ̅ⲙ̅ⲡⲁⲣⲁⲛⲟⲙⲟⲥ . ⲉⲣⲉⲧⲁⲡⲓⲗⲏ  ⲛ̅ⲟⲩⲣ̅ⲣⲟ  ⲟ  ⲛ̅ⲑⲉ  ⲙ̅ⲡⲁϣⲁϩⲟⲩⲙ  ⲛ̅ⲟⲩⲙⲟⲩⲓ . ⲉⲣⲉⲡⲉϥⲟⲩⲣⲟⲧ  ⲇⲉ  ⲟ  ⲛ̅ⲑⲉ  ⲛ̅ⲟⲩⲉⲓⲱⲧⲉ  ϩⲓⲟⲩⲭⲟⲣⲧⲟⲥ . Ⲟⲩϣⲓⲡⲉ  ⲛ̅ⲟⲩⲉⲓⲱⲧ ⲡⲉ  ⲟⲩϣⲏⲣⲉ  ⲛ̅ⲁⲑⲏⲧ . ⲁⲩⲱ  ⲛⲁⲛⲟⲩⲛⲉⲣⲁⲧⲉ  ⲁⲛ  ⲉⲃⲟⲗ  ϩ̅ⲛ̅ⲛⲃⲉⲕⲉ  ⲛⲟⲩϩⲉⲧⲉⲣⲁ . Ϣⲁⲣⲉⲛ̅ⲉⲓⲟⲧⲉ  ⲡⲉϣⲏⲓ  ϩⲓⲛ̅ⲕⲁ  ⲉϫ̅ⲛ̅ⲛϣⲏⲣⲉ . ⲉϣⲁⲩϣⲉⲛϥ̅  ⲟⲩⲥϩⲓⲙⲉ  ⲇⲉ  ⲙ̅ⲡⲣⲱⲙⲉ ⲉⲃⲟⲗ  ϩⲓⲧⲙ̅ⲡⲛⲟⲩⲧⲉ . Ϣⲁⲣⲉⲟⲩⲙ̅ⲛ̅ⲧ̅ϭⲱⲃ  ⲁⲙⲁϩⲧⲉ  ⲙ̅ⲡϭⲁⲃϩⲏⲧ. ⲧⲉⲯⲩⲭⲏ ⲇⲉ  ⲛⲛⲁⲣⲅⲟⲥ  ⲛⲁϩⲕⲟ . ⲡⲉⲧⲛⲁϩⲁⲣⲉϩ  ⲉⲧⲉⲛⲧⲟⲗⲏ  ⲉϥⲛⲁϩⲁⲣⲉϩ  ⲉⲧⲉϥⲯⲩⲭⲏ . ⲡⲉⲧⲕⲁⲧⲁⲫⲣⲟⲛⲓ  ⲇⲉ  ⲛ̅ⲛⲉϥϩⲓⲟⲟⲩⲉ  ϥⲛⲁⲙⲟⲩ .  Ⲉⲣⲉⲡⲉⲧⲛⲁ  ⲛⲟⲩϩⲏⲕⲉ  ϯϩⲁⲧ   ⲉⲙⲏⲥⲉ  ⲙ̅ⲡⲛⲟⲩⲧⲉ . ϥⲛⲁⲧⲱⲱⲃⲉ  ⲇⲉ  ⲛⲁϥ  ⲕⲁⲧⲁⲡⲉϥϯ. ⲉⲣⲉⲡⲟⲩⲁ  ⲅⲁⲣ  ⲡⲟⲩⲁ  ⲛⲁϫⲓ  ⲕⲁⲧⲁⲛⲉϥϩⲃⲏⲩⲉ.  ϯⲥⲃⲱ  ⲙ̅ⲡⲉⲕϣⲏⲣⲉ  ⲉϥⲛⲁⲁⲓⲁⲓ  ⲅⲁⲣ ⲛ̅ⲧⲉⲓϩⲉ . ⲙ̅ⲡⲣ̅ϫⲓⲥⲉ  ⲇⲉ  ⲙ̅ⲙⲟⲕ ϩ̅ⲙ̅ⲡⲉⲕϩⲏⲧ  ⲉⲩⲥⲱϣ .  Ⲡⲣⲉϥⲙⲉⲉⲩⲉ  ⲉⲡⲉⲑⲟⲟⲩ  ϥⲛⲁϯⲟⲥⲉ  ⲉⲙⲁⲧⲉ . ⲉϥϣⲁⲛϫⲱϩⲙ̅  ⲇⲉ  ⲉϥⲛⲁⲟⲩⲉϩⲙ̅ⲧⲉϥⲯⲩⲭⲏ.  Ⲥⲱⲧⲙ̅  ⲡⲁϣⲏⲣⲉ   ⲉⲧⲉⲥⲃⲱ  ⲙ̅ⲡⲉⲕⲉⲓⲱⲧ  ϫⲉ  ⲉⲕⲉⲣ̅ⲥⲟⲫⲟⲥ  ϩ̅ⲛ̅ⲧⲉⲕϩⲁⲏ . Ⲟⲩⲛϩⲁϩ  ⲙ̅ⲙⲉⲉⲩⲉ  ϩ̅ⲙ̅ⲡϩⲏⲧ  ⲙ̅ⲡⲣⲱⲙⲉ. ⲡϣⲟϫⲛⲉ  ⲇⲉ  ⲙ̅ⲡⲛⲟⲩⲧⲉ  ⲡⲉⲧⲟⲣϫ̅ . Ⲟⲩⲕⲁⲣⲡⲟⲥ  ⲛ̅ⲁⲧⲏⲡⲉ  ⲧⲉ  ⲧⲙⲛ̅ⲧⲛⲁ̅ . ⲛⲁⲛⲟⲩⲟⲩϩⲏⲕⲉ  ⲛ̅ⲇⲓⲕⲁⲓⲟⲥ  ⲉⲩⲣⲙ̅ⲙⲁⲟ  ⲛ̅ⲣⲉϥϫⲓϭⲟⲗ.  Ⲉⲣⲉⲑⲟⲧⲉ  ⲙ̅Ⲡϫⲟⲉⲓⲥ  ⲣ̅ϩⲱⲃ  ⲉⲡⲱⲛϩ̅ .  ⲁⲩⲱ  ⲧⲙⲛ̅ⲧⲙⲁⲓⲛⲟⲩⲧⲉ  ⲉⲩⲱⲛϩ̅  ⲙ̅ⲡⲣⲱⲙⲉ. Ⲉⲣⲉⲡⲉⲧⲉⲛϥ̅ⲣ̅ϩⲟⲧⲉ  ⲇⲉ  ⲁⲛ  ⲛⲁϣⲱⲡⲉ  ϩ̅ⲛ̅ϩⲉⲛⲙⲁ  ⲉⲙⲡϣⲁⲉⲛⲉϩ  ϭⲓⲛⲉ  ⲁⲛ  ⲙ̅ⲡⲉⲩϣⲓⲛⲉ . Ⲡⲉⲧⲕⲱⲗϫ̅  ⲛ̅ⲛⲉϥϭⲓϫ  ϩⲁⲕⲟⲩⲛϥ̅  ϩ̅ⲛ̅ⲟⲩϫⲓ  ⲛ̅ϭⲟⲛⲥ̅  ⲛ̅ⲛⲉϥⲛ̅ⲧⲟⲩ  ⲟⲛ  ⲉⲣⲱϥ . Ϩⲣⲁⲓ  ϩ̅ⲛ̅ϩⲉⲛϩⲓⲥⲉ  ϣⲁⲣⲉⲡⲁⲑⲏⲧ  ⲛⲟⲩϣ̅ⲧ  ⲙ̅ⲙⲟϥ  ⲛ̅ϩⲟⲩⲟ. Ⲉⲕϣⲁⲛϫⲡⲓⲟ  ⲇⲉ  ⲛ̅ⲟⲩⲣⲱⲙⲉ  ⲛ̅ⲥⲁⲃⲉ  ϥⲛⲁⲛⲟⲓ  ⲛ̅ⲟⲩⲁⲓⲥⲑⲏⲥⲓⲥ . ⲡϣⲏⲣⲉ  ⲉⲧⲥⲱϣ  ⲙ̅ⲡⲉϥⲉⲓⲱⲧ  ⲁⲩⲱ  ⲉⲧⲕⲱ  ⲛ̅ⲥⲱϥ  ⲛ̅ⲧⲉϥⲙⲁⲁⲩ.  ϥⲛⲁϣⲱⲡⲉ ϩⲁⲛⲟϭⲛⲉϭ  ⲁⲩⲱ  ⲛ̅ϥ̅ϫⲓϣⲓⲡⲉ . Ⲟⲩϣⲏⲣⲉ  ⲉϥⲕⲱ  ⲛ̅ⲥⲱϥ  ⲛ̅ⲧⲉⲥⲃⲱ . ϥⲛⲁϩⲁⲣⲉϩ  ⲉϩⲉⲛⲡⲉⲑⲟⲟⲩ. ϥⲛⲁⲙⲉⲗⲉⲧⲁ  ⲇⲉ  ⲛ̅ϩⲉⲛϣⲁϫⲉ  ⲉⲩⲃⲟⲟⲛⲉ.  Ⲡⲉⲧϣⲡ̅ⲧⲱⲣⲉ  ⲛ̅ⲟⲩϩⲙ̅ϩⲁⲗ  ⲛ̅ⲁⲑⲏⲧ  ⲉϥⲥⲱϣ  ⲙ̅ⲡⲛⲟⲙⲟⲥ . ⲧ̅ⲧⲁⲡⲣⲟ  ⲇⲉ  ⲙ̅ⲡⲁⲥⲉⲃⲏⲥ  ⲛⲁⲱⲙⲕ̅  ⲛ̅ϩⲉⲛⲥⲱϣ . ⲥⲉⲛⲁⲥⲟⲃⲧⲉ  ⲛ̅ϩⲉⲛⲙⲁⲥⲧⲓⲅ̅ⲝ̅   ⲛ̅ϩⲉⲛⲁⲧⲁⲙⲁϩⲧⲉ . ⲁⲩⲱ  ϩⲉⲛⲙⲟⲕϩ̅ⲥ̅  ϩ̅ⲛ̅ⲛⲏⲓ  ⲛ̅ⲛⲁⲑⲏⲧ.
 
Ⲕ̅. Ⲟⲩⲁⲧⲁⲙⲁϩⲧⲉ  ⲡⲉ  ⲡⲏⲣⲡ̅  ⲁⲩⲱ  ⲟⲩⲥⲱϣ  ⲡⲉ  ⲡϯϩⲉ . Ⲟⲩⲟⲛ  ⲇⲉ  ⲛⲓⲙ  ⲉⲧⲧⲱⲗⲙ̅  ϩ̅ⲛ̅ⲛⲁⲓ. ⲛ̅ϥ̅ⲛⲁϣⲱⲡⲉ  ⲁⲛ  ⲛ̅ⲥⲁⲃⲉ. Ⲡⲛⲟⲩϭⲥ̅  ⲛ̅ⲟⲩⲣ̅ⲣⲟ  ϣⲟⲃⲉ  ⲁⲛ  ⲉⲡϭⲱⲛⲧ̅  ⲛ̅ⲟⲩⲙⲟⲩⲓ . ⲡⲉⲧⲧⲱⲃⲥ̅  ⲇⲉ  ⲙ̅ⲙⲟϥ  ⲁⲩⲱ  ⲉⲧⲧⲧⲏϩ  ⲛ̅ⲙ̅ⲙⲁϥ  ⲉϥⲣ̅ⲛⲟⲃⲉ  ⲉⲧⲉϥⲯⲩⲭⲏ  ⲙ̅ⲙⲓⲛ  ⲙ̅ⲙⲟϥ . Ⲡⲉⲟⲟⲩ  ⲙ̅ⲡⲣⲱⲙⲉ  ⲡⲉ  ⲥⲁϩⲱϥ  ⲉⲃⲟⲗ  ⲛ̅ϩⲉⲛⲥⲁϩⲟⲩ . Ⲁⲑⲏⲧ  ⲇⲉ  ⲛⲓⲙ  ϣⲁⲩⲙⲟⲩϫ̅ⲧ̅   ϩ̅ⲛ̅ⲛⲁⲓ . Ⲙⲉⲣⲉⲛ̅ⲣⲉϥϫⲛⲁⲁⲩ  ϣⲓⲡⲉ  ⲉⲩⲛⲟϭⲛⲉϭ  ⲙ̅ⲙⲟϥ . Ⲧⲁⲓ  ⲟⲛ  ⲧⲉ  ⲑⲉ  ⲙ̅ⲡⲉⲧϫⲓⲥⲟⲩⲟ  ⲉⲙⲏⲥⲉ  ϩ̅ⲙ̅ⲡⲱϩⲥ̅.  Ⲟⲩⲙⲟⲟⲩ  ⲉϥϣⲏⲕ  ⲡⲉ  ⲡϣⲟϫⲛⲉ  ϩ̅ⲙ̅ⲡϩⲏⲧ  ⲙⲡⲣⲱⲙⲉ .  ⲡⲣⲱⲙⲉ  ⲇⲉ  ⲛ̅ⲥⲟⲫⲟⲥ  ⲛⲁⲛ̅ⲧ̅ϥ̅  ⲉϩⲣⲁⲓ . Ⲟⲩⲛⲟϭ  ⲡⲉ  ⲟⲩⲣⲱⲙⲉ  ⲁⲩⲱ  ⲡⲣⲱⲙⲉ  ⲑⲛⲛⲁⲏⲧ  ⲧⲁⲓⲏⲩ . ⲟⲩϩⲱⲃ  ⲇⲉ  ⲡⲉ  ⲉϩⲉ  ⲉⲩⲣⲱⲙⲉ  ⲙ̅ⲡⲓⲥⲧⲟⲥ . Ⲡⲉⲧⲙⲟⲟϣⲉ  ⲉϥⲟⲩⲁⲁⲃ  ϩ̅ⲛ̅ⲟⲩⲇⲓⲕⲁⲓⲟⲥⲩⲛⲏ. ϥⲛⲁⲕⲱ  ⲑⲛⲛⲉϥϣⲏⲣⲉ  ⲙ̅ⲙⲁⲕⲁⲣⲓⲟⲥ . Ⲉⲣϣⲁⲛⲟⲩⲣ̅ⲣⲟ  ⲛ̅ⲇⲓⲕⲁⲓⲟⲥ  ϩⲙⲟⲟⲥ  ϩⲓⲟⲩⲑⲣⲟⲛⲟⲥ  ⲙⲉⲣⲉⲗⲁⲁⲩ  ⲙⲡⲉⲑⲟⲟⲩ  ϯⲟⲩⲃⲏϥ . Ⲛⲓⲙ  ⲡⲉⲧⲛⲁϣⲟⲩϣⲟⲩ  ⲙ̅ⲙⲟϥ  ⲉⲣⲉⲡⲉϥϩⲏⲧ  ⲟⲩⲁⲁⲃ . ⲏ̅  ⲛⲓⲙ  ⲡⲉⲧⲛⲁⲡⲁⲣⲣⲏⲥⲓⲁⲍⲉ  ⲙ̅ⲙⲟϥ  ⲉϥϫⲱ  ⲙ̅ⲙⲟⲥ  ϫⲉ  ϯⲟⲩⲁⲁⲃ  ⲉⲛⲟⲃⲉ.  Ⲡⲟⲩⲟⲉⲓⲛ  ⲛⲁⲱϫⲛ̅  ⲙ̅ⲡⲉⲧϫⲉⲡⲉⲑⲟⲟⲩ  ⲛ̅ⲥⲁⲡⲉϥⲉⲓⲱⲧ  ⲙ̅ⲛ̅ⲧⲉϥⲙⲁⲁⲩ  ⲛ̅ⲕⲉⲕⲉ  ⲇⲉ  ⲛ̅ⲛⲉϥⲃⲁⲗ  ⲛⲁⲛⲁⲩ  ⲉⲩⲕⲁⲕⲉ . Ⲟⲩⲙⲉⲣⲓⲥ  ⲉⲩϭⲉⲡⲏ  ⲉϫⲡⲟⲥ  ⲛ̅ϣⲟⲣⲡ̅  ⲥⲛⲁⲥⲟⲟⲩⲧⲛ̅  ⲁⲛ  ϩ̅ⲛ̅ⲧⲉⲥϩⲁⲏ  ⲙ̅ⲡⲣ̅ϫⲟⲟⲥ  ϫⲉ  ϯⲛⲁⲧⲱⲱⲃⲉ  ⲙ̅ⲡⲁϫⲁϫⲉ . ⲁⲗⲗⲁ  ϩⲩⲡⲟⲙⲓⲛⲉ  ⲉⲡⲛⲟⲩⲧⲉ  ϫⲉ  ⲉϥⲉⲃⲟⲏⲑⲓ  ⲉⲣⲟⲕ . Ⲟⲩⲛⲟϭ  ⲛ̅ϣⲓ  ⲙ̅ⲛ̅ⲟⲩⲕⲟⲩⲓ  ⲁⲩⲱ  ⲟⲉⲓⲡⲉ  ⲥⲛ̅ⲧⲉ. ϩⲉⲛⲁⲕⲁⲑⲁⲣⲧⲟⲛ  ⲛⲉ  ⲙ̅ⲡⲉⲙⲧⲟ  ⲉⲃⲟⲗ  ⲙ̅ⲡⲛⲟⲩⲧⲉ  ϩⲓⲟⲩⲥⲟⲡ . ⲁⲩⲱ  ⲡⲉⲧⲉⲓⲣⲉ ⲛ̅ⲛⲁⲓ  ⲥⲉⲛⲁⲥⲟⲛϩ̅ϥ̅  ϩ̅ⲛ̅ⲛⲉϥⲙⲉⲉⲩⲉ. Ⲟⲩϩⲣ̅ϣⲓⲣⲉ  ⲉϥⲙⲟⲟϣⲉ  ⲙ̅ⲛ̅ⲡⲉⲧⲟⲩⲁⲁⲃ ϣⲁⲣⲉⲧⲉϥϩⲓⲏ  ⲥⲟⲟⲩⲧⲛ̅.  Ⲡⲙⲁⲁϫⲉ  ⲡⲉⲧⲥⲱⲧⲙ̅  ⲁⲩⲱ  ⲡⲃⲁⲗ  ⲡⲉⲧⲛⲁⲩ  ⲉⲃⲟⲗ. ⲛⲉϩⲃⲏⲩⲉ  ⲇⲉ  ⲙ̅ⲡⲛⲟⲩⲧⲉ  ⲛⲉ  ⲙ̅ⲡⲉⲥⲛⲁⲩ . Ⲙ̅ⲡⲣ̅ⲙⲉⲣⲉ  ϫⲉ  ⲡⲉⲑⲟⲟⲩ  ⲙⲏⲡⲟⲧⲉ  ⲛ̅ⲅ̅ⲧⲁⲕⲟ. Ⲟⲩⲱⲛ  ⲇⲉ  ⲛ̅ⲛⲉⲕⲃⲁⲗ  ⲛ̅ⲅ̅ϭⲱϣⲧ̅  ⲉⲛⲉⲧⲥⲟⲩⲧⲱⲛ . ⲧⲃⲟⲧⲉ  ⲙ̅Ⲡϫⲟⲉⲓⲥ  ⲡⲉ  ϣⲓ  ⲥⲛⲁⲩ .  ⲁⲩⲱ  ⲛⲁⲛⲟⲩⲟⲩⲙⲁϣⲉ  ⲁⲛ  ⲛ̅ⲕⲣⲟϥ  ⲙ̅ⲡⲉϥⲙ̅ⲧⲟ  ⲉⲃⲟⲗ. ⲉⲣⲉⲛⲉϩⲓⲟⲟⲩⲉ  ⲙ̅ⲡⲣⲱⲙⲉ  ⲥⲟⲩⲧⲱⲛ  ϩⲓⲧⲙ̅ⲡⲛⲟⲩⲧⲉ .  ⲉⲣⲉⲡⲣⲱⲙⲉ  ⲇⲉ  ⲛⲁⲛⲟⲓ  ⲛ̅ⲛⲉϥϩⲓⲟⲟⲩⲉ  ⲛⲁϣ  ⲛ̅ϩⲉ . Ⲟⲩϭⲟⲣϭⲥ̅  ⲙ̅ⲡⲣⲱⲙⲉ  ⲡⲉ  ⲉⲣⲏⲧ  ⲉⲃⲟⲗ  ϩ̅ⲛ̅ⲛⲉϥⲛ̅ⲕⲁ  ϩ̅ⲛ̅ⲟⲩϭⲉⲡⲏ . ⲙ̅ⲛ̅ⲛⲥⲁⲧⲣⲉϥⲉⲣⲏⲧ  ⲅⲁⲣ  ϣⲁⲥϣⲱⲡⲉ  ⲛ̅ϥ̅ⲣ̅ϩⲧⲏϥ.  Ⲡⲣⲉϥϩⲓ  ⲛ̅ⲛⲁⲥⲉⲃⲏⲥ  ⲡⲉ  ⲟⲩⲣ̅ⲣⲟ  ⲛ̅ⲥⲟⲫⲟⲥ . ⲁⲩⲱ  ϣⲁϥⲉⲓⲛⲉ  ⲉϫⲱⲟⲩ  ⲛ̅ⲟⲩⲕⲟⲧ  ⲙ̅ⲡⲉⲑⲟⲟⲩ . Ⲙ̅ⲙⲛ̅ⲧⲛⲁ  ⲙ̅ⲛ̅ⲧⲡⲓⲥⲧⲓⲥ  ⲡⲉ  ⲡϩⲁⲣⲉϩ   ⲛ̅ⲟⲩⲣ̅ⲣⲟ . ⲁⲩⲱ  ϩⲉⲛⲇⲓⲕⲁⲓⲟⲥ  ⲛⲉⲧⲛⲁⲕⲱⲧⲉ  ⲉⲡⲉϥⲑⲣⲟⲛⲟⲥ . Ⲡⲟⲩⲟⲉⲓⲛ  ⲙ̅Ⲡϫⲟⲉⲓⲥ  ⲡⲉ  ⲧⲉⲡⲛⲟⲏ  ⲛ̅ⲛ̅ⲣⲱⲙⲉ . ⲡⲉⲧⲙⲟⲩϣⲧ̅  ⲛ̅ⲛ̅ⲧⲁⲙⲓⲟⲛ  ⲛ̅ⲑⲏ .  Ⲧⲙⲛ̅ⲧⲛⲁ  ⲙ̅ⲛ̅ⲧⲙⲉ  ⲡⲉ  ⲡϩⲁⲣⲉϩ  ⲛ̅ⲟⲩⲣ̅ⲣⲟ . ⲁⲩⲱ  ⲧⲇⲓⲕⲁⲓⲟⲥⲩⲛⲏ  ⲛⲁⲕⲟⲧⲥ̅  ⲉⲡⲉϥⲑⲣⲟⲛⲟⲥ. Ⲡⲕⲟⲥⲙⲟⲥ  ⲛ̅ⲛ̅ϣⲏⲣⲉ  ϣⲏⲙ  ⲡⲉ  ⲧⲥⲟⲫⲓⲁ . ⲡⲉⲟⲟⲩ  ⲇⲉ  ⲛ̅ⲛ̅ϩⲗ̅ⲗⲟ  ⲡⲉ  ⲡⲥⲟⲟⲩⲛ. ϩⲉⲛⲉⲗⲉⲗⲕⲏⲙⲉ  ⲙ̅ⲛ̅ϩ̅ⲛ̅ⲟⲩⲱϣϥ̅  ⲛⲉⲧⲛⲁⲧⲱⲙⲛ̅ⲧ  ⲉⲛⲉⲑⲟⲟⲩ . ϩⲉⲛⲡⲗⲏⲅⲏ  ⲇⲉ  ⲛⲉ  ⲛ̅ⲧⲁⲙⲓⲟⲛ ⲛ̅ϩⲏⲧⲟⲩ.

  Ⲕ̅Ⲁ̅.  Ⲛ̅ⲑⲉ  ⲙ̅ⲡⲟⲩⲟⲓ  ⲛ̅ⲟⲩⲙⲟⲟⲩ .  ⲧⲁⲓ  ⲧⲉ  ⲑⲉ  ⲉⲧⲉⲣⲉⲡϩⲏⲧ  ⲙ̅ⲡⲣ̅ⲣⲟ  ϩ̅ⲛ̅ⲧϭⲓϫ  ⲙ̅ⲛⲟⲩⲧⲉ . ⲁⲩⲱ  ⲡⲙⲁ  ⲉⲧϥ̅ⲟⲩⲉϣⲧⲣⲉϥϭⲱϣⲧ̅  ⲉⲣⲟϥ  ϣⲁϥⲣⲁⲕⲧϥ̅  ⲉⲣⲟϥ . Ⲉⲣⲉⲣⲱⲙⲉ  ⲛⲓⲙ  ⲧⲙⲁⲓⲏⲩ  ⲛⲁϥ  ⲟⲩⲁⲁϥ . ⲡⲛⲟⲩⲧⲉ   ⲇⲉ  ⲡⲉⲧⲥⲟⲟⲩⲧⲛ̅  ⲛ̅ⲛϩⲏⲧ  ⲉⲣ̅ⲧⲙⲉ  ⲁⲩⲱ  ⲉϫⲉⲧⲙⲉ . Ⲥⲉⲥⲟⲧⲡ  ⲛ̅ⲛⲁϩⲣ̅ⲙ̅ⲡⲛⲟⲩⲧⲉ  ⲛ̅ϭⲓⲙ̅ⲙⲛ̅ⲧⲙⲉ  ⲉϩⲟⲩⲉⲟⲩⲥⲛⲟϥ  ⲛ̅ⲑⲩⲥⲓⲁ . Ⲟⲩⲣⲱⲙⲉ  ⲑⲛϫⲁⲥⲓϩⲏⲧ  ⲉϫⲛ̅ⲟⲩⲥⲱϣ  ⲟⲩⲛⲁϣⲧ̅ϩⲏⲧ  ⲡⲉ . ⲛ̅ⲟⲩⲟⲓⲛ  ⲇⲉ ⲛ̅ⲛ̅ⲁⲥⲉⲃⲏⲥ  ⲛⲉ  ⲛ̅ⲛⲟⲃⲉ .  Ⲛⲉⲧϯϭⲟⲙ  ⲛ̅ϩⲉⲛⲥⲟⲟⲩϩⲥ̅  ϩ̅ⲛ̅ⲟⲩⲗⲁⲥ  ⲛ̅ϣⲟⲗ . ⲉϥⲡⲏⲧ  ⲛ̅ⲥⲁϩⲉⲛⲡⲉⲧϣⲟⲩⲉⲓⲧ  ⲁⲩⲱ  ϥⲛⲏⲩ  ⲉϫⲛ̅ⲙⲡⲁϣ  ⲙ̅ⲡⲙⲟⲩ . Ⲡⲧⲁⲕⲟ  ⲛⲁϭⲟⲓⲗⲉ  ⲉⲛⲁⲥⲉⲃⲏⲥ . ⲛ̅ⲥⲉⲟⲩⲱϣ  ⲅⲁⲣ  ⲁⲛ  ⲉⲣ̅ⲧⲙⲉ. Ⲡϫⲟⲉⲓⲥ  ⲛⲁϫⲟⲟⲩ  ⲛ̅ⲛ̅ϩⲓⲟⲟⲩⲉ  ⲉⲩϭⲟⲟⲙⲉ  ⲛ̅ⲛⲉⲧϭⲟⲟⲙⲉ .  ⲛⲉϥϩⲃⲏⲩⲉ  ⲇⲉ  ⲧⲃ̅ⲃⲏⲩ  ⲁⲩⲱ  ⲥⲉⲥⲟⲩⲧⲱⲛ . Ⲛⲁⲛⲟⲩⲟⲩⲱϩ  ϩ̅ⲛ̅ⲟⲩⲕⲗ̅ϫⲉ  ⲛ̅ⲟⲩϫⲉⲛⲉⲡⲱⲣ  ϩ̅ⲛ̅ⲟⲩⲇⲓⲕⲁⲓⲟⲛ  ⲉϩⲟⲩⲉⲟⲩⲱϩ  ϩ̅ⲛ̅ϩⲉⲛⲙⲁ  ⲉⲩϫⲏϩ  ⲙ̅ⲛ̅ⲟⲩⲏⲓ  ⲛ̅ⲃⲑⲣⲣⲉ  ϩ̅ⲛ̅ⲟⲩϣⲟⲛⲧ̅.  ⲙ̅ⲙⲛ̅ⲗⲁⲁⲩ  ⲛⲁⲛⲁ  ⲛ̅ⲧⲉⲯⲩⲭⲏ  ⲙ̅ⲡⲁⲥⲉⲃⲏⲥ  ⲏ̅  ⲛⲉⲧⲛⲁⲛⲁⲩ  ⲉⲣⲟⲥ . ⲉⲣⲉⲡⲉⲧⲁⲙⲁϩⲧⲉ   ϯⲟⲥⲉ ⲡⲃⲁⲗϩⲏⲧ  ⲛⲁⲥⲃⲟ  ⲛ̅ϩⲟⲩⲟ. ⲡⲥⲟⲫⲟⲥ  ⲇⲉ  ⲉⲧⲉⲓⲙⲉ  ⲛⲁϣⲱⲡ  ⲉⲣⲟϥ  ⲙ̅ⲡⲥⲟⲟⲩⲛ . Ⲡⲛⲟⲩⲧⲉ  ⲛⲁⲧⲁⲕⲟ  ⲛ̅ⲛ̅ϩⲏⲧ  ⲛ̅ⲛ̅ⲁⲥⲉⲃⲏⲥ . ⲁⲩⲱ  ϣⲁϥⲥⲱϣϥ̅ ⲛ̅ⲛ̅ⲁⲥⲉⲃⲏⲥ  ϩ̅ⲛ̅ϩⲉⲛⲡⲉⲑⲟⲟⲩ . Ⲡⲉⲧϣⲧⲁⲙ  ⲛ̅ⲛⲉϥⲙⲁⲁϫⲉ  ⲉⲧⲙ̅ⲥⲱⲧⲙ̅  ⲉⲩϩⲏⲕⲉ  ⲡⲁⲓ  ⲛⲁⲱϣ  ⲉϩⲣⲁⲓ  ⲉⲡⲛⲟⲩⲧⲉ  ⲛ̅ϥ̅ⲧⲙ̅ⲥⲱⲧⲙ̅  ⲉⲣⲟϥ . Ϣⲁⲣⲉⲟⲩϯ  ϩ̅ⲛ̅ⲟⲩϩⲱⲡ  ⲕⲧⲟ  ⲉⲃⲟⲗ  ⲛⲛ̅ⲟⲣⲅⲏ . ⲡⲉⲧϯⲥⲟ  ⲇⲉ  ⲉϯⲇⲱⲣⲟⲛ  ⲛⲁⲧⲟⲩⲛⲉⲥⲟⲩϭⲱⲛⲧ̅  ⲉϥⲛⲁϣⲧ̅.  Ⲡⲟⲩⲛⲟϥ  ⲛ̅ⲛ̅ⲇⲓⲕⲁⲓⲟⲥ  ⲡⲉ  ⲣ̅ⲡϩⲁⲡ  ⲡⲉⲧⲧⲃ̅ⲃⲏⲩ  ⲇⲉ  ϫⲁϩⲙ̅  ⲛ̅ⲧⲛ̅ⲛ̅ⲛ̅ⲣⲉϥⲣ̅ⲡⲉⲑⲟⲟⲩ . Ⲡⲣⲱⲙⲉ  ⲙ̅ⲡⲁⲣⲁⲛⲟⲙⲟⲥ  ⲛⲁϩⲉ  ⲉϩⲣⲁⲓ  ⲉϩⲉⲛⲡⲉⲑⲟⲟⲩ . ⲡⲣⲱⲙⲉ  ⲇⲉ ⲉⲧⲥⲟⲣ̅ⲙ̅   ϩ̅ⲛ̅ⲛⲉϩⲓⲟⲟⲩⲉ  ⲛ̅ⲧⲇⲓⲕⲁⲓⲟⲥⲩⲛⲏ .  ϥⲛⲁϣⲱⲡⲉ  ϩ̅ⲛ̅ⲧⲥⲟⲟⲩϩⲥ̅  ⲛ̅ⲛ̅ϫⲱⲱⲣⲉ . Ⲡⲣⲱⲙⲉ  ⲉⲧϣⲁⲁⲧ ⲙⲉ  ⲛ̅ⲟⲩⲟⲩⲛⲟϥ. ⲡⲉⲧⲙⲉ  ⲇⲉ  ⲛ̅ⲟⲩⲇⲱⲣⲟⲛ  ⲙ̅ⲛ̅ⲟⲩⲙⲛ̅ⲧⲣⲙ̅ⲙⲁⲟ  ⲉⲛⲟϫⲥ̅  ⲉⲧⲱⲱⲙⲉ  ⲟⲩⲁⲥⲉⲃⲏⲥ  ⲡⲉ . Ⲙ̅ⲡⲁⲣⲁⲛⲟⲙⲟⲥ  ⲥⲟϣϥ̅  ⲛ̅ⲧ̅ⲙ̅ⲡⲇⲓⲕⲁⲓⲟⲥ . ⲛⲁⲛⲟⲩⲟⲩⲱϩ  ϩⲓⲡϫⲁⲓⲉ  ⲉϩⲟⲩⲉⲟⲩⲱϩ  ⲙ̅ⲛ̅ⲟⲩⲥϩⲓⲙⲉ  ⲛ̅ⲣⲉϥⲙⲓϣⲉ  ⲁⲩⲱ  ⲛ̅ⲣⲉϥϭⲱⲛⲧ̅.  Ⲟⲩⲛⲟⲩⲁϩⲟ  ⲉϥⲥⲟⲧⲡ̅  ⲛⲁϣⲱⲡⲉ  ϩⲓⲣⲛ̅ⲧ̅ⲧⲁⲡⲣⲟ  ⲛ̅ⲛ̅ⲥⲟⲫⲟⲥ . ⲛ̅ⲣⲱⲙⲉ  ⲇⲉ  ⲛⲁⲑⲏⲧ  ⲛⲁⲟⲙⲕϥ̅ . Ⲧⲉϩⲓⲏ ⲛ̅ⲧⲇⲓⲕⲁⲓⲟⲥⲩⲛⲏ  ⲙ̅ⲛ̅ⲧⲙⲛ̅ⲧⲛⲁ  ⲛⲁⲧⲁϩⲉⲡⲱⲛϩ̅  ⲙ̅ⲛ̅ⲡⲉⲟⲟⲩ  ϩ̅ⲛ̅ⲟⲩⲉⲓⲣⲏⲛⲏ . Ⲁⲡⲥⲟⲫⲟⲥ  ⲁⲗⲉ  ⲉϫⲛ̅ⲙ̅ⲡⲟⲗⲓⲥ  ⲉⲧϫⲟⲥⲉ  ⲁⲩⲱ  ⲁϥϣⲟⲣϣⲣ̅  ⲙ̅ⲡϫⲓⲥⲉ  ⲉⲧⲉⲣⲉⲛⲁⲥⲉⲃⲏⲥ  ⲕⲱ  ⲛ̅ϩⲧⲏⲩ  ⲉⲣⲟϥ . Ⲡⲉⲧϩⲁⲣⲉϩ  ⲣⲱϥ  ⲙ̅ⲛ̅ⲡⲉϥⲗⲁⲥ  ⲉϥϩⲁⲣⲉϩ  ⲉⲧⲉϥⲯⲩⲭⲏ . Ⲡⲛⲁϣⲧⲉⲓⲙⲙⲉ  ⲙ̅ⲛ̅ⲡⲃⲁⲃⲉⲣⲱⲙⲉ  ⲡⲗⲟⲓⲙⲟⲥ  ⲉⲣ̅ⲛ̅ⲧϥ̅ . ⲡⲣⲉϥⲙⲉⲥⲡⲉⲑⲟⲟⲩ  ⲇⲉ  ⲟⲩⲡⲁⲣⲁⲛⲟⲙⲟⲥ  ⲡⲉ.  Ϣⲁⲣⲉⲛⲉⲡⲓⲑⲩⲙⲓⲁ  ⲙⲉⲩⲧⲡⲣⲉϥϫⲛⲁⲁⲩ . ⲛ̅ⲛⲉϥⲥⲟⲩⲧⲛ̅ⲧⲟⲟⲧϥ̅  ⲅⲁⲣ ⲉⲃⲟⲗ  ⲉⲣ̅ⲗⲁⲁⲩ . Ⲡⲁⲥⲉⲃⲏⲥ  ⲉⲡⲓⲑⲩⲙⲓ  ⲉϩⲉⲛⲉⲡⲓⲑⲩⲙⲓⲁ  ⲉⲩϩⲟⲟⲩ  ⲙ̅ⲡⲉϩⲟⲟⲩ  ⲧⲏⲣϥ̅ . ⲡⲇⲓⲕⲁⲓⲟⲥ  ⲇⲉ  ⲛⲁ  ⲁⲩⲱ  ϥϣⲛ̅ϩ̅ⲧⲏϥ  ⲁϫⲛ̅ⲱϫⲛ̅ . Ⲧⲃⲟⲧⲉ  ⲙ̅Ⲡϫⲟⲉⲓⲥ  ⲧⲉ  ⲧⲉⲑⲩⲥⲓⲁ ⲛⲛⲁⲥⲉⲃⲏⲥ . ⲕⲁⲓ  ⲅⲁⲣ  ⲉⲩⲧⲁⲗⲟ  ⲙ̅ⲙⲟⲟⲩ  ⲉϩⲣⲁⲓ  ϩ̅ⲛ̅ⲟⲩⲙⲛ̅ⲧⲁⲧϩⲁⲡ . Ⲡⲙⲛ̅ⲧⲣⲉ  ⲛ̅ϭⲟⲗ  ⲛⲁⲧⲁⲕⲟ . ⲡⲣⲱⲙⲉ  ⲇⲉ  ⲛⲥⲙⲏⲧ  ⲛⲁϣⲁϫⲉ  ⲉϥϯϩⲧⲏϥ . Ⲡⲣⲱⲙⲉ  ⲛ̅ⲁⲥⲉⲃⲏⲥ  ϣⲁϥⲧⲁϩⲉⲡⲉϥϩⲟ  ⲉⲣⲁⲧϥ̅  ϩ̅ⲛ̅ⲟⲩⲙⲛ̅ⲧⲁⲧϣⲓⲡⲉ . ⲡⲉⲧⲥⲟⲩⲧⲱⲛ  ⲇⲉ  ⲉⲓⲙⲉ  ⲉⲛⲉϥϩⲓⲟⲟⲩⲉ.  Ⲡⲉⲧⲉⲙⲛ̅ⲧϥ̅ⲧⲥⲟⲫⲓⲁ  ⲟⲩⲇⲉ  ⲙⲛ̅ⲧϥ̅ⲧⲙⲛ̅ⲧϫⲱⲱⲣⲉ . ⲟⲩⲇⲉ  ⲙⲛ̅ⲧϥ̅ϣⲟϫⲛⲉ  ⲉⲃⲟⲗ  ϩⲓⲧⲙ̅ⲡⲛⲟⲩⲧⲉ . ⲉϣⲁⲩⲥⲃ̅ⲧⲉⲟⲩϩⲧⲟ  ⲉⲩϩⲟⲟⲩ ⲑⲙⲡⲟⲗⲉⲙⲟⲥ . ⲉⲣⲉⲧⲃⲟⲏⲑⲓⲁ  ⲇⲉ  ⲛ̅ⲧⲙ̅ⲡⲛⲟⲩⲧⲉ.
 
Ⲕ̅Ⲃ̅. Ⲛⲁⲛⲟⲩⲟⲩⲣⲁⲛ  ⲉⲛⲁⲛⲟⲩϥ  ⲉϩⲟⲩⲉⲟⲩⲙⲛ̅ⲧⲣⲙ̅ⲙⲁⲟ  ⲉⲛⲁϣⲱⲥ .  ⲁⲩⲱ  ϩⲉⲛⲭⲁⲣⲓⲥ  ⲉⲛⲁⲛⲟⲩⲟⲩ  ⲉϩⲟⲩⲉⲟⲩϩⲁⲧ. Ⲡⲛⲟⲩⲃ  ⲙ̅ⲛ̅ⲡϩⲁⲧ  ϩⲉⲛⲁⲡⲁⲧⲏ  ⲛⲉ  ⲛ̅ϩⲏⲇⲟⲛⲏ. Ⲛⲁⲛⲟⲩⲟⲩⲭⲁⲣⲓⲥ  ⲉⲥⲥⲟⲧⲡ̅  ⲉϩⲟⲩⲉⲣⲟⲟⲩ ⲙ̅ⲡⲉⲥⲛⲁⲩ . Ⲁⲡⲣⲙ̅ⲙⲁⲟ  ⲙ̅ⲛ̅ⲡϩⲏⲕⲉ  ⲧⲱⲙⲛ̅ⲧ  ⲉⲛⲉⲩⲉⲣⲏⲩ . ⲡⲛⲟⲩⲧⲉ  ⲇⲉ  ⲁϥⲧⲁⲙⲓⲟⲟⲩ  ⲙ̅ⲡⲉⲥⲛⲁⲩ . Ⲉⲣϣⲁⲛⲡⲥⲁⲃⲉ  ⲛⲁⲩ  ⲉⲡⲉⲑⲟⲟⲩ  ⲉⲩϩⲓⲟⲩⲉ  ⲉⲣⲟϥ  ⲑⲛⲧⲟϥ  ⲇⲉ  ϣⲁϥϫⲓⲥⲃⲱ  ⲛ̅ϩⲟⲩⲟ. ϣⲁⲣⲉⲛⲁⲑⲏⲧ  ⲇⲉ  ⲉⲓ  ⲉⲃⲟⲗ  ϩⲓⲧⲟⲟⲧϥ̅  ⲛ̅ⲥⲉϯⲟⲥⲉ . Ⲧⲅⲉⲛⲉⲁ  ⲛ̅ⲧⲥⲟⲫⲓⲁ  ⲧⲉ  ⲑⲟⲧⲉ ⲙ̅Ⲡϫⲟⲉⲓⲥ. ϣⲁⲥϫⲡⲟ  ⲇⲉ  ⲛ̅ⲟⲩⲙⲛ̅ⲧⲣⲙ̅ⲙⲁⲟ  ⲙ̅ⲛ̅ⲡⲉⲟⲟⲩ  ⲛ̅ⲱⲛϩ̅.  Ϩⲉⲛⲁⲣⲟⲟⲩⲉ ⲙ̅ⲛ̅ϩⲉⲛϭⲟⲣϭⲥ̅  ⲛⲉⲧϩⲓⲛⲉϩⲓⲟⲟⲩⲉ  ⲉⲧϭⲟⲟⲙⲉ. ⲡⲉⲧϩⲁⲣⲉϩ  ⲇⲉ  ⲉⲧⲉϥⲯⲩⲭⲏ  ⲛⲁⲥⲁϩⲱϥ  ⲉⲃⲟⲗ  ⲙ̅ⲙⲟⲟⲩ . Ⲛ̅ϩⲏⲕⲉ  ⲛⲁⲣ̅ϫⲟⲉⲓⲥ  ⲉⲛⲣⲙ̅ⲙⲁⲟ . ⲁⲩⲱ  ⲛ̅ϩⲙ̅ϩⲁⲗ  ⲛⲁϯ  ⲉⲙⲏⲥⲉ  ⲛ̅ⲛⲉⲩϫⲓⲥⲟⲟⲩⲉ  ⲙ̅ⲙⲓⲛ  ⲙ̅ⲙⲟⲟⲩ . Ⲡⲉⲧϫⲟⲛⲉⲧϩⲟⲟⲩ  ⲉϥⲛⲁⲱϩⲥ̅  ⲛ̅ⲛⲉⲧⲃⲟⲟⲛⲉ . ϥⲛⲁϫⲱⲕ  ⲇⲉ  ⲉⲃⲟⲗ  ⲛ̅ⲛⲉϥϩⲃⲏⲩⲉ  ϩ̅ⲛ̅ⲟⲩⲡⲗⲏⲅⲏ . ⲡⲛⲟⲩⲧⲉ ⲛⲁⲥⲙⲟⲩ  ⲉⲡⲣⲱⲙⲉ  ⲉⲧⲣⲟⲟⲩⲧ . ⲁⲩⲱ  ⲛ̅ⲣⲉϥϯ  ϥⲛⲁϫⲱⲕ  ⲇⲉ  ⲉⲃⲟⲗ  ⲛ̅ⲧⲙⲛ̅ⲧⲙⲁⲕⲁⲣⲓⲟⲥ  ⲛ̅ⲛⲉϥϩⲃⲏⲩⲉ . Ⲡⲉⲧⲛⲁ  ⲛ̅ⲟⲩϩⲏⲕⲉ ⲛ̅ⲧⲟϥ  ⲡⲉⲧⲟⲩⲛⲁⲥⲁⲛⲟⲩϣϥ̅ . ⲁϥϯ   ⲅⲁⲣ   ⲙ̅ⲡϩⲏⲕⲉ ⲉⲃⲟⲗ  ϩ̅ⲛ̅ⲛⲉϥⲟⲉⲓⲕ. Ⲡⲉⲧϯⲇⲱⲣⲟⲛ  ⲛⲁϫⲡⲟ  ⲛ̅ⲟⲩϫⲣⲟ  ⲙ̅ⲛ̅ⲟⲩⲧⲁⲓⲟ . ⲧⲉϥⲯⲩⲭⲏ  ⲙ̅ⲛ̅ⲛⲁϣⲱⲱⲧ  ⲛ̅ⲛⲧⲁϥⲧⲁⲁⲩ.  Ⲛⲟⲩϫⲉ  ⲉⲃⲟⲗ  ⲛ̅ⲟⲩⲁ  ⲉϥϩⲟⲟⲩ  ϩ̅ⲛ̅ⲟⲩⲙⲏϣⲉ . ⲧⲁⲣⲉⲡϯⲧⲱⲛ  ⲃⲱⲕ  ⲉⲃⲟⲗ  ⲛ̅ⲙ̅ⲙⲁϥ . Ⲉϥϣⲁⲛϩⲙⲟⲟⲥ  ⲅⲁⲣ  ϩ̅ⲙ̅ⲡⲙⲏⲏϣⲉ  ϣⲁϥⲥⲟϣⲟⲩ  ⲧⲏⲣⲟⲩ. Ⲉⲣⲉⲡⲛⲟⲩⲧⲉ  ⲙⲉ  ⲛ̅ⲛ̅ϩⲏⲧ  ⲉⲧⲟⲩⲁⲁⲃ . ⲟⲩⲟⲛ  ⲇⲉ  ⲛⲓⲙ  ⲉⲧⲟⲩⲁⲁⲃ  ⲥⲟⲧⲡ̅  ⲛⲁϥ . ⲉⲣⲉⲡϣⲱⲥ  ⲙⲟⲟⲛⲉ  ϩⲓⲛⲉϥⲥⲡⲟⲧⲟⲩ. ⲉⲣⲉⲡⲣ̅ⲣⲟ  ⲇⲉ  ϩ̅ⲙ̅ⲡⲉϥⲁⲙⲁϩⲧⲉ . ⲛ̅ⲃⲁⲗ  ⲙ̅ⲡⲛⲟⲩⲧⲉ  ϩⲁⲣⲉϩ  ⲉⲛⲣⲉϥⲁⲓⲥⲑⲁⲛⲉ. ϣⲁⲣⲉⲡⲡⲁⲣⲁⲛⲟⲙⲟⲥ  ⲥⲱϣϥ̅  ⲛ̅ϩⲉⲛϣⲁϫⲉ. Ϣⲁⲣⲉⲡⲣⲉϥϫⲛⲁⲁⲩ  ϭⲛ̅ⲗⲟⲓϭⲉ  ⲛ̅ϥ̅ϫⲓⲟⲩⲱ . ϫⲉ  ⲡⲙⲟⲩⲓ  ϩ̅ⲛ̅ⲛⲉϩⲓⲟⲟⲩⲉ . ⲁⲩⲱ  ⲥⲉϩⲱⲧⲃ̅  ϩ̅ⲛ̅ⲛⲉⲡⲗⲁⲧⲓⲁ . Ⲟⲩϩⲓⲉⲓⲧ  ⲉϥϣⲏⲕ  ⲧⲉ  ⲧ̅ⲧⲁⲡⲣⲟ  ⲛ̅ⲙ̅ⲡⲁⲣⲁⲛⲟⲙⲟⲥ . ⲡⲉⲛ̅ⲧⲁⲩⲙⲉⲥⲧⲱϥ  ⲇⲉ  ϩⲓⲧⲙ̅ⲡⲛⲟⲩⲧⲉ  ϥⲛⲁϩⲉ  ⲉϩⲣⲁⲓ  ⲉⲣⲟϥ . Ⲟⲩⲛϩⲉⲛϩⲓⲟⲟⲩⲉ  ⲉⲩϩⲟⲟⲩ  ⲙ̅ⲡⲉⲙⲧⲟ  ⲉⲃⲟⲗ  ⲙ̅ⲡⲣⲱⲙⲉ . ⲁⲩⲱ  ⲛϥ̅ⲙⲉ  ⲁⲛ  ⲛ̅ⲕⲧⲟϥ  ⲉⲃⲟⲗ  ⲙ̅ⲙⲟⲟⲩ . ϣ̅ϣⲉ  ⲇⲉ  ⲛ̅ⲕⲟⲧⲕ̅  ⲉⲃⲟⲗ  ⲛ̅ϩⲓⲏ  ⲛⲓⲙ  ⲉⲧϭⲟⲟⲩϭ ⲁⲩⲱ  ⲉⲑⲟⲟⲩ.  Ⲁⲡϩⲏⲧ  ⲙ̅ⲡϣⲏⲣⲉ  ⲛ̅ϣⲏⲙ  ϫⲓϥⲟϭⲥ̅  ϩ̅ⲛ̅ⲧⲙⲛ̅ⲧⲁⲑⲏⲧ . ⲡϭⲉⲣⲱⲃ  ⲅⲁⲣ  ⲙⲛ̅ⲧⲉⲥⲃⲱ  ⲟⲩⲏⲩ  ⲙ̅ⲙⲟϥ. Ⲡⲉⲧϩⲓⲗⲁ  ⲉⲩϩⲏⲕⲉ  ⲉϥⲧⲁϣⲟ  ⲛⲛⲉϥⲡⲉⲑⲟⲟⲩ . ϥⲛⲁϯ  ⲇⲉ  ⲙ̅ⲡⲣ̅ⲙⲙⲁⲟ  ⲉϫⲙ̅ⲡⲉⲧⲣ̅ϩⲣⲱϩ .

Ⲣⲓⲕⲉ  ⲙ̅ⲡⲉⲕⲙⲁⲁϫⲉ  ⲉⲛϣⲁϫⲉ  ⲛ̅ⲛ̅ⲥⲟⲫⲟⲥ  . ⲁⲩⲱ  ⲛ̅ⲅ̅ⲥⲱⲧⲙ̅  ⲉⲛⲁϣⲁϫⲉ  ⲛ̅ⲅ̅ⲥⲙⲓⲛⲉ  ⲇⲉ  ⲙ̅ⲡⲉⲕϩⲏⲧ  ϫⲉ  ⲉⲕⲉⲉⲓⲙⲉ  ⲉⲣⲟⲟⲩ  ϫⲉ  ⲛⲁⲛⲟⲩⲟⲩ . Ⲁⲩⲱ  ⲉⲕϣⲁⲛⲕⲁⲁⲩ  ϩ̅ⲙ̅ⲡⲉⲕϩⲏⲧ  ⲕⲛⲁϯϩⲏⲩ . ⲥⲟⲩⲧⲱⲛⲟⲩ  ⲇⲉ  ϩⲓⲟⲩⲥⲟⲡ  ⲉϫⲛ̅ⲛⲉⲕⲥⲡⲟⲧⲟⲩ :  ϫⲉⲕⲁⲥ  ⲉⲣⲉⲟⲩⲧⲱⲕ  ⲛ̅ϩⲏⲧ  ϣⲱⲡⲉ  ⲛⲁⲕ  ⲉϫⲙ̅ⲡⲛⲟⲩⲧⲉ . ⲁⲩⲱ  ⲛ̅ϥ̅ⲧⲁⲙⲟⲕ  ⲉⲧⲉϥϩⲓⲏ.  Ⲛ̅ⲧⲟⲕ  ⲇⲉ  ϩⲱⲕ  ⲥϩⲁⲓⲥⲟⲩ  ⲛⲁⲕ  ⲛ̅ϣⲙ̅ⲧⲥⲟⲡ  ⲉⲩϣⲟϫⲛⲉ  ⲙ̅ⲛ̅ⲟⲩⲥⲟⲟⲩⲛ . ϯⲧⲥⲁⲃⲟ  ⲇⲉ  ⲙ̅ⲙⲟⲕ  ⲉⲥⲟⲩⲛⲧⲙⲉ . ⲁⲩⲱ  ⲉϫⲱ  ⲛ̅ⲛ̅ϣⲁϫⲉ  ⲛ̅ⲧⲭⲙⲉ  ⲛ̅ⲛⲉⲧⲛⲁϫⲛⲟⲩⲕ . ⲡϣⲟϫⲛⲉ  ⲛⲁϣⲧ  ⲉⲡⲟⲩⲟⲓ  ⲛ̅ⲟⲩⲙⲟⲟⲩ . Ⲥⲱⲧⲙ̅  ⲉϫⲓ  ⲛ̅ⲟⲩⲱ  ⲛ̅ⲛⲉⲧⲛⲁϫⲛⲟⲩⲕ. Ⲙ̅ⲡⲣ̅ϫⲓⲟⲩϩⲏⲕⲉ  ⲛϭⲟⲛⲥ̅  ϫⲉ  ϥ̅ⲣ̅ϭⲣⲱϩ  ⲅⲁⲣ . ⲁⲩⲱ  ⲙ̅ⲡⲣ̅ⲥⲉϣϥ̅ⲟⲩⲁⲥⲑⲏⲥⲓⲥ  ϩ̅ⲛ̅ϩⲉⲛⲡⲩⲗⲏ . Ⲡϫⲟⲉⲓⲥ  ⲅⲁⲣ  ⲛⲁⲕⲣⲓⲛⲉ  ⲙ̅ⲡⲉϥϩⲁⲡ  ⲁⲩⲱ  ⲕⲛⲁⲧⲟⲩϫⲟ  ⲛ̅ⲧⲉⲕⲯⲩⲭⲏ  ⲛⲁⲧⲁⲣⲓⲕⲉ. Ⲙ̅ⲡⲣ̅ⲣϣⲃⲏⲣ  ⲉⲩⲣⲱⲙⲉ  ⲛ̅ⲣⲉϥϭⲱⲛⲧ̅ . ⲙ̅ⲡⲣ̅ϣⲱⲡⲉ  ⲙ̅ⲛ̅ⲟⲩϣⲃⲏⲣ  ⲛ̅ⲣⲉϥⲛⲟⲩϭⲥ̅.  ⲙⲏⲡⲟⲧⲉ  ⲛ̅ⲅ̅ϫⲓⲥⲃⲱ  ⲉⲛⲉϥϩⲓⲟⲟⲩⲉ.  ⲛ̅ⲅ̅ϫⲓ  ⲟ̅ⲛⲩϩⲁϭⲉ  ⲉⲧⲉⲕⲯⲩⲭⲏ . Ⲙ̅ⲡⲣ̅ⲧⲁⲁⲕ  ⲛ̅ϣⲡ̅ⲧⲱⲣⲉ  ⲉⲁⲕϣⲓⲡⲉ  ϩⲏⲧϥ̅  ⲛ̅ⲟⲩϩⲟ . Ⲉϣⲱⲡⲉ  ⲅⲁⲣ  ⲉⲙⲛ̅ⲧⲁⲕ  ⲉⲧⲁⲁⲩ  ⲥⲉⲛⲁϥⲓ  ⲙ̅ⲡⲉⲡⲣⲏϣ  ⲉⲧϩⲁⲛⲉⲕⲥⲡⲓⲣⲟⲟⲩⲉ . ⲙ̅ⲡⲣ̅ⲡⲉⲉⲛⲉ  ⲛ̅ⲧⲟϣ  ⲉⲃⲟⲗ  ϣⲁⲉⲛⲉϩ  ⲛ̅ⲧⲁⲛⲉⲕⲉⲓⲟⲧⲉ  ⲥⲙⲛ̅ⲧⲟⲩ . ⲟⲩⲣⲱⲙⲉ  ⲛ̅ⲣⲉϥϯϩⲧⲏϥ  ⲛ̅ⲣⲉϥϭⲉⲡⲏ  ϩ̅ⲛ̅ⲛⲉϥϩⲃⲏⲩⲉ . Ϩⲁⲡⲥ̅  ⲉⲧⲣⲉϥⲁϩⲉⲣⲁⲧϥ̅  ⲉϩⲉⲛⲉⲣⲱⲟⲩ  ⲛ̅ϥ̅ⲧⲙ̅ⲁϩⲉⲣⲁⲧϥ̅  ⲉϩⲉⲛⲣⲱⲙⲉ  ⲛ̅ϭⲱⲃ.
 
Ⲕ̅Ⲅ̅. Ⲉⲕϣⲁⲛϩⲙⲟⲟⲥ  ⲉⲟⲩⲱⲙ  ϩⲓⲧⲉⲧⲣⲁⲡⲉⲍⲁ  ⲛ̅ⲟⲩϫⲱⲱⲣⲉ  ϩ̅ⲛ̅ⲟⲩⲛⲟⲓ  ⲛⲟⲓ  ⲛ̅ⲛⲉⲧⲟⲩⲕⲱ  ⲙ̅ⲙⲟⲟⲩ  ϩⲁⲣⲱⲕ . ⲛ̅ⲅ̅ϩⲓⲧⲟⲟⲧⲕ̅  ⲉⲣⲟⲟⲩ  ⲉⲕⲥⲟⲟⲩⲛ  ϫⲉ  ⲕⲛⲁϫⲡⲓⲥⲟⲃⲧⲉ  ⲛ̅ⲧⲉⲓϩⲉ . Ⲉϣⲱⲡⲉ  ⲛ̅ⲧⲕ̅ⲟⲩⲁⲧⲥⲉⲓ  ⲙ̅ⲡⲣ̅ⲉⲡⲓⲑⲩⲙⲓ  ⲉⲛⲉϥϭⲓⲛⲟⲩⲱⲙ  ⲛⲁⲓ  ⲅⲁⲣ  ϩⲏⲛ  ⲉϩⲟⲩⲛ  ⲉⲩⲱⲛϩ̅  ⲛ̅ⲛⲟⲩϫ . ⲙ̅ⲡⲣ̅ⲥⲟⲩⲧⲛ̅ⲧⲟⲟⲧⲕ̅  ⲉⲃⲟⲗ  ⲙ̅ⲛ̅ⲟⲩⲣ̅ⲙ̅ⲙⲁⲟ  ⲛ̅ⲧ̅ⲕⲟⲩϩⲏⲕⲉ . ⲥⲁϩⲱⲕ  ⲇⲉ  ⲉⲃⲟⲗ  ⲙ̅ⲙⲟϥ  ϩⲙ̅ⲡⲉⲕϩⲏⲧ.  Ⲉϣⲱⲡⲉ  ⲉⲕϣⲁⲛⲥⲙ̅ⲛ̅ⲓⲁⲧⲕ̅  ⲉϫⲱϥ  ⲛ̅ⲛⲉϥⲟⲩⲱⲛϩ̅  ⲉⲃⲟⲗ  ϩ̅ⲛ̅ⲗⲁⲁⲩ  ⲙ̅ⲙⲁ . ⲁϥⲥⲟⲃⲧⲉ  ⲅⲁⲣ  ⲛⲁϥ  ⲛ̅ϩⲉⲛⲧⲛ̅ϩ̅  ⲛ̅ⲑⲉ  ⲛ̅ⲟⲩⲁϩⲱⲙ  ⲉⲃⲟⲗ  ⲉⲡⲁⲏⲣ . Ⲁⲩⲱ  ϥⲛⲁⲕⲧⲟϥ  ⲉⲡⲏⲓ  ⲙ̅ⲡⲉⲧϩⲓϫⲱϥ . ⲡⲱⲛⲉ  ϩⲟⲣϣ̅  ⲁⲩⲱ ⲡϣⲱ  ⲙⲟⲕϩ̅  ⲛϥⲓ  ϩⲁⲣⲟϥ . Ⲧⲟⲣⲅⲏ  ⲇⲉ  ⲙ̅ⲡⲁⲑⲏⲧ  ϩⲟⲣϣ̅  ⲉϩⲟⲩⲉⲣⲟⲟⲩ  ⲙ̅ⲡⲉⲥⲛⲁⲩ . Ⲙ̅ⲡⲣ̅ⲟⲩⲱⲙ  ⲙ̅ⲛ̅ⲟⲩⲣⲱⲙⲉ  ⲛ̅ⲉⲓⲉⲣⲃⲟⲟⲛⲉ . ⲁⲩⲱ  ⲙ̅ⲡⲣ̅ⲉⲡⲓⲩⲙⲓ  ⲉⲛⲉϥϭⲓⲛⲟⲩⲱⲙ . Ⲙ̅ⲡⲣ̅ϫⲓⲧϥ̅  ⲉϩⲟⲩⲛ  ⲉⲡⲉⲕⲏⲓ   ϫⲉ  ⲛ̅ⲛⲉⲕⲟⲩⲱⲙ  ⲛ̅ⲛⲉⲕⲟⲉⲓⲕ  ⲛ̅ⲙ̅ⲙⲁϥ . ⲛ̅ⲑⲉ  ⲅⲁⲣ  ⲛ̅ⲟⲩⲁ  ⲉϥⲛⲁⲉⲙ̅ⲕ̅ⲟⲩϥⲱ  ⲧⲁⲓ  ⲧⲉ  ⲑⲉ  ⲉⲧϥ̅ⲛⲁⲟⲩⲱⲙ  ⲁⲩⲱ  ⲛ̅ⲑϥⲥⲱ . ϥⲛⲁⲕⲁⲃⲟⲗ ⲅⲁⲣ  ⲙ̅ⲙⲟⲟⲟⲩ . ⲛϥ̅ⲧⲁⲕⲉⲛⲉⲕϣⲁϫⲉ  ⲉⲧⲛⲁⲛⲟⲩⲟⲩ . Ⲙ̅ⲡⲣ̅ϫⲉⲗⲁⲁⲩ  ⲉⲙⲙⲁⲁϫⲉ  ⲙ̅ⲡⲁⲑⲏⲧ. ⲙⲏⲡⲟⲧⲉ  ⲛ̅ϥ̅ⲕⲙ̅ϣ̅ⲛⲉⲕϣⲁϫⲉ.  Ⲙ̅ⲡⲣ̅ⲃⲱⲕ  ⲉϩⲟⲩⲛ  ⲉϭⲱⲙ  ⲛ̅ⲟⲣⲫⲁⲛⲟⲥ . Ⲡⲛⲟⲩⲧⲉ  ⲅⲁⲣ  ⲉⲧϫⲟⲟⲣ  ⲡⲉⲧⲥⲱⲧⲉ  ⲙ̅ⲙⲟⲟⲩ. ⲁⲩⲱ  ϥⲛⲁϫⲓϩⲁⲡ  ⲛⲑⲙⲙⲁⲕ  ϩⲁⲣⲟⲟⲩ .

ϯⲡⲉⲕϩⲏⲧ  ⲉⲧⲉⲥⲃⲱ  ⲛ̅ⲅ̅ⲥⲃ̅ⲧⲉⲛⲉⲕⲙⲁⲁϫⲉ  ⲉⲛϣⲁϫⲉ  ⲛ̅ⲧⲁⲓⲥⲑⲏⲥⲓⲥ . Ⲙ̅ⲡⲣ̅ⲗⲟ  ⲉⲕϯⲥⲃⲱ  ⲛ̅ⲟⲩⲕⲟⲩⲓ . ϫⲉ  ⲉⲕϣⲁⲛⲣⲁϩⲧϥ̅  ⲛ̅ⲟⲩϭⲉⲣⲱⲃ  ⲛⲉϥⲛⲁⲙⲟⲩ  ⲁⲛ . Ⲛ̅ⲧⲟⲕ  ⲙ̅ⲛ̅   ⲅⲁⲣ ⲉⲕⲛⲁⲣⲉϩⲧ̅ⲡⲉⲕϣⲏⲣⲉ  ϩ̅ⲛ̅ⲟⲩϭⲉⲣⲱⲃ   ⲕⲛⲁⲧⲟⲩϫⲟ  ⲇⲉ  ⲛ̅ⲧⲉϥⲯⲩⲭⲏ  ⲉⲃⲟⲗ  ϩ̅ⲙ̅ⲡⲙⲟⲩ.  Ⲡⲁϣⲏⲣⲉ  ⲉⲣϣⲁⲛⲡⲉⲕϩⲏⲧ  ⲣ̅ⲥⲟⲫⲟⲥ  ⲕⲛⲁⲉⲩⲫⲣⲁⲛⲉ  ⲙ̅ⲡⲱⲓ  ⲣⲱ . ⲁⲩⲱ ⲛ̅ⲧⲉⲛⲁⲥⲡⲟⲧⲟⲩ  ϣⲁϫⲉ  ⲙ̅ⲛ̅ⲛⲉⲕⲥⲡⲟⲧⲟⲩ . ⲉϣⲱⲡⲉ  ⲉⲩⲥⲟⲩⲧⲱⲛ . ⲙ̅ⲡⲣ̅ⲧⲣⲉⲡⲉⲕϩⲏⲧ  ⲕⲱϩ  ⲉⲛⲣⲉϥⲣ̅ⲛⲟⲃⲉ . ⲁⲗⲗⲁ  ⲙⲁⲧⲁϣⲟⲕ  ⲉⲩⲙⲛ̅ⲧⲙⲁⲓⲛⲟⲩⲧⲉ. ⲁⲩⲱ  ⲛ̅ⲅ̅ϣⲱⲡⲉ  ϩ̅ⲛ̅ⲑⲟⲧⲉ  ⲙ̅Ⲡϫⲟⲉⲓⲥ  ⲙ̅ⲡⲉϩⲟⲟⲩ  ⲧⲏⲣϥ̅. Ⲉⲕϣⲁⲛϩⲁⲣⲉϩ  ⲅⲁⲣ   ⲉⲛⲁⲓ  ⲟⲩⲛϩⲉⲛϫⲡⲟ  ⲛⲁϣⲱⲡⲉ  ⲛⲁⲕ. ⲁⲩⲱ  ⲧⲉⲕϩⲉⲗⲡⲓⲥ  ⲛⲁⲱϫⲛ̅ ⲁⲛ . Ⲥⲱⲧⲙ̅  ⲡⲁϣⲏⲣⲉ  ⲛ̅ⲅ̅ⲣ̅ⲥⲟⲫⲟⲥ .  ⲁⲩⲱ  ⲛ̅ⲅ̅ⲣ̅ϩⲉⲛⲙⲉⲉⲩⲉ  ⲉⲩⲥⲟⲩⲧⲱⲛ  ⲙ̅ⲡⲉⲕϩⲏⲧ.  Ⲙ̅ⲡⲣ̅ⲣⲣⲉϥϯϩⲉ . ⲁⲩⲱ  ⲙ̅ⲡⲣ̅ⲥⲟⲩⲧⲛ̅ⲧⲟⲟⲧⲕ̅  ⲉⲃⲟⲗ  ⲉϩⲉⲛⲥⲩⲙⲃⲟⲗⲏ  ⲉϣⲉⲡⲁϥ . Ⲣⲉϥϯϩⲉ  ⲅⲁⲣ  ⲛⲓⲙ  ϩⲓⲡⲟⲣⲛⲟⲕⲟⲡⲟⲥ  ⲛⲁⲣ̅ϩⲏⲕⲉ . ⲁⲩⲱ  ⲥⲁⲟⲩⲏⲣⲡ̅  ⲛⲓⲙ  ⲛⲁϯ  ϩⲓⲱⲱϥ  ⲛ̅ϩⲉⲛⲧⲟⲉⲓⲥ . Ⲥⲱⲧⲙ̅  ⲡⲁϣⲏⲣⲉ  ⲛ̅ⲥⲁⲡⲉⲕⲉⲓⲱⲧ  ⲛ̅ⲧⲁϥϫⲡⲟⲕ . ⲁⲩⲱ  ⲙ̅ⲡⲣ̅ⲕⲁⲧⲁⲫⲣⲟⲛⲓ  ϫⲉ  ⲁⲧⲉⲕⲙⲁⲁⲩ  ⲣ̅ϩⲗ̅ⲗⲱ. Ϣⲁⲣⲉⲟⲩⲉⲓⲱⲧ  ⲛ̅ⲇⲓⲕⲁⲓⲟⲥ  ϣⲁⲛϣ̅  ⲕⲁⲗⲱⲥ . ϣⲁⲣⲉⲡⲉϥϩⲏⲧ  ⲇⲉ  ⲉⲩⲫⲣⲁⲛⲉ  ⲉϫ̅ⲛ̅ⲟⲩϣⲏⲣⲉ  ⲛ̅ⲥⲁⲃⲉ.  Ⲙⲁⲣⲉⲡⲉⲕⲉⲓⲱⲧ  ⲙ̅ⲛ̅ⲧⲉⲕⲙⲁⲁⲩ  ⲉⲩⲫⲣⲁⲛⲉ  ϩⲣⲁⲓ  ⲉϫⲱⲕ . ⲛ̅ⲧⲉⲧⲉⲛⲧⲁⲥϫⲡⲟⲕ  ⲣⲁϣⲉ Ⲡⲁϣⲏⲣⲉ  ⲙⲁ  ⲛⲁⲓ  ⲙ̅ⲡⲉⲕϩⲏⲧ . ⲙⲁⲣⲉⲛⲉⲕⲃⲁⲗ  ⲇⲉ  ϩⲁⲣⲉϩ  ⲉⲛⲁϩⲓⲟⲟⲩⲉ . Ⲟⲩⲡⲓⲑⲟⲥ   ⲅⲁⲣ  ⲉϥϭⲟⲧϩ̅   ⲡⲉ  ⲟⲩⲏⲓ  ⲉⲛⲡⲱⲕ  ⲁⲛ  ⲡⲉ . ⲁⲩⲱ  ⲟⲩϣⲱⲧⲉ  ⲧⲉ  ⲉⲥⲉⲥϭⲏⲩ  ⲉⲥⲙⲟⲕϩ̅  ⲛ̅ⲉⲓ  ⲉϩⲣⲁⲓ . ⲏ̅ⲇⲏ  ⲅⲁⲣ  ϥⲛⲁⲧⲁⲕⲟ  ⲛ̅ⲧⲉⲩⲛⲟⲩ . ⲁⲩⲱ  ⲡⲁⲣⲁⲛⲟⲙⲟⲥ  ⲛⲓⲙ  ⲛⲁⲱϫⲛ̅

Ⲉⲣⲉⲡⲟⲩⲟⲓ  ⲛⲁϣⲱⲡⲉ   ⲛ̅ⲛⲓⲙ . ⲁⲩⲱ  ⲡⲉϣⲧⲟⲣⲧⲣ̅  ⲛ̅ⲛⲓⲙ . ⲙ̅ⲛ̅ⲡϫⲓϩⲁⲡ  ⲛ̅ⲛⲓⲙ . ⲙ̅ⲛ̅ⲛⲗⲉⲥⲭⲏ  ⲉⲑⲟⲟⲩ ⲛⲓⲙ. ⲉⲣⲉⲛ̅ⲟⲩⲱϣⲥϥ̅  ⲉⲡϫⲓⲛϫⲏ  ϣⲟⲟⲡ  ⲛ̅ⲛⲓⲙ . ⲏ  ⲛⲓⲙ   ⲡⲉⲧⲉⲣⲉⲛⲉϥⲃⲁⲗ  ⲟ  ⲛ̅ⲉⲗⲉⲗⲕⲏⲙⲉ.  Ⲛ̅ⲛⲉⲧⲱⲥⲕ̅  ⲁⲛ  ⲛⲉ  ϩ̅ⲛ̅ⲏⲣⲡ̅.  Ⲛ̅ⲛⲉⲧϣⲓⲛⲉ  ⲁⲛ  ⲛⲉ  ϫⲉ  ⲉⲣⲉⲙ̅ⲙⲁ  ⲛ̅ⲥⲱ  ⲛⲁϣⲱⲡⲉ  ⲧⲱⲛ . Ⲙ̅ⲡⲣ̅ϯϩⲉ  ϩ̅ⲙ̅ⲡⲏⲣⲡ̅ . ⲁⲗⲗⲁ   ϣⲁϫⲉ   ⲙ̅ⲛ̅ⲛ̅ⲣⲱⲙⲉ  ⲁⲩⲱ  ⲛ̅ⲧⲉⲧⲛ̅ϣⲁϫⲉ  ⲙ̅ⲛ̅ⲛⲉⲧⲙⲟⲟϣⲉ . ⲉⲕϣⲁⲛϯⲛⲉⲕⲃⲁⲗ  ⲅⲁⲣ  ⲉⲛⲉⲫⲓⲁⲗⲏ  ⲙ̅ⲛ̅ⲛ̅ϫⲱ . ⲙ̅ⲛ̅ⲛⲥⲱⲥ  ⲕⲛⲁⲙⲟⲟϣⲉ  ⲉⲕⲕⲏⲕⲁϩⲏⲩ  ⲉϩⲟⲩⲉⲟⲩⲥⲁϩⲙⲉⲥ . Ⲛ̅ⲑⲁⲏ  ⲇⲉ  ⲕⲛⲁⲣ̅ⲑⲉ  ⲙ̅ⲡⲉⲛ̅ⲧⲁϥⲙⲟⲩ  ⲉⲁⲩϣⲟⲟϭⲉϥ  ϩⲓⲧⲛ̅ⲟⲩϩⲟϥ . ⲁⲩⲱ  ⲛ̅ⲑⲉ  ⲙ̅ⲡⲉⲛⲧⲁⲟⲩⲕⲉⲣⲁⲥⲧⲏⲥ  ⲗⲟⲕⲥϥ̅  ⲉⲁⲧⲙⲁⲧⲟⲩ  ϣⲱⲗ  ⲉⲣⲟϥ. Ⲉⲣϣⲁⲛⲛⲉⲕⲃⲁⲗ  ⲛⲁⲩ  ⲉⲛⲉⲧⲛ̅ⲛⲟⲩⲕ  ⲁⲛ  ⲛⲉ  ⲧⲉⲕⲧⲁⲡⲣⲟ  ⲛⲁϫⲱ  ⲛ̅ⲛⲉⲧϭⲟⲟⲙⲉ. ⲕⲛⲁⲛⲟϫⲕ̅  ⲛ̅ⲑⲉ  ⲙ̅ⲡⲉⲧϩ̅ⲙ̅ⲡϩⲏⲧ  ⲛ̅ⲑⲁⲗⲁⲥⲥⲁ . ⲁⲩⲱ  ⲛ̅ⲑⲉ  ⲛⲟⲩⲛⲉⲉⲃ  ⲉϥϩ̅ⲛ̅ⲟⲩⲛⲟϭ  ⲛ̅ϩⲟⲉⲓⲙ.  Ⲕⲛⲁϫⲟⲟⲥ  ϫⲉ  ⲛ̅ⲛⲉⲩϩⲓⲟⲩⲉ  ⲉⲣⲟⲓ  ⲁⲩⲱ  ⲙ̅ⲡⲓⲙ̅ⲕⲁϩ . ⲁⲩⲱ  ⲛⲉⲩⲥⲱⲃⲉ  ⲙ̅ⲙⲟⲓ  ⲡⲉ  ⲁⲛⲟⲕ  ⲇⲉ  ⲛⲉⲓⲥⲟⲟⲩⲛ  ⲁⲛ  ⲡⲉ . ⲉⲣⲉϩⲧⲟⲟⲩⲉ  ⲛⲁϣⲱⲡⲉ  ⲧⲛⲁⲩ  ϫⲉ  ⲉⲓⲉⲃⲱⲕ  ⲧⲁϣⲓⲛⲉ  ⲛ̅ⲥⲁⲛⲉϯⲛⲁⲥⲟⲩⲱϩ  ⲛ̅ⲙ̅ⲙⲁⲩ.
 
Ⲕ̅Ⲇ̅. Ⲙ̅ⲡⲣ̅ⲕⲱϩ  ⲉⲛⲣⲱⲙⲉ  ⲉⲑⲟⲟⲩ . ⲁⲩⲱ  ⲙ̅ⲡⲣ̅ⲟⲩⲉϣϣⲱⲡⲉ  ⲛ̅ⲙ̅ⲙⲁⲩ . ⲉⲣⲉⲡⲉⲩϩⲏⲧ  ⲙⲉⲗⲉⲧⲁ   ⲙ̅ⲡϭⲟⲗ . ⲁⲩⲱ  ⲉⲣⲉⲛⲉⲩⲥⲡⲟⲧⲟⲩ  ϫⲱ  ⲛ̅ⲛ̅ϩⲓⲥⲉ . Ⲉϣⲁⲩⲕⲉⲧⲟⲩⲏⲓ  ϩ̅ⲛ̅ⲟⲩⲥⲟⲫⲓⲁ . ⲁⲩⲱ  ⲉϣⲁⲩⲥⲁϩⲱϥ   ⲉⲣⲁⲧϥ̅  ϩ̅ⲛ̅ⲟⲩⲙⲑⲛⲧⲥⲁⲃⲉ . ϩ̅ⲛ̅ⲟⲩⲁⲓⲥⲑⲏⲥⲓⲥ  ⲉϣⲁⲩⲙⲉϩⲛ̅ⲧⲁⲙⲓⲟⲛ  ⲙ̅ⲙⲑⲛⲧⲣⲙ̅ⲙⲁⲟ   ⲛⲓⲙ  ⲉⲧⲧⲁⲓⲏⲩ  ⲁⲩⲱ  ⲉⲛⲁⲛⲟⲩⲟⲩ.  Ⲛⲁⲛⲟⲩⲟⲩⲥⲟⲫⲟⲥ  ⲉϩⲟⲩⲉⲟⲩϫⲱⲱⲣⲉ . ⲁⲩⲱ  ⲟⲩⲣⲱⲙⲉ  ⲛ̅ⲣ̅ⲙ̅ⲛ̅ϩⲏⲧ ⲉϩⲟⲩⲉⲟⲩⲛⲟϭ   ⲛ̅ⲥⲱϣⲉ. Ⲉϣⲁⲩⲣ̅ⲟⲩⲡⲟⲗⲉⲙⲟⲥ  ϩ̅ⲛ̅ⲟⲩⲣ̅ϩⲙ̅ⲙⲉ  ⲉⲣⲉⲧⲃⲟⲏⲑⲓⲁ  ⲇⲉ  ϩ̅ⲛ̅ⲫⲏⲧ  ⲛ̅ⲛ̅ⲣⲉϥϫⲓϣⲟϫⲛⲉ . ⲉⲣⲉⲧⲥⲟⲫⲓⲁ  ⲇⲉ  ⲙ̅ⲛ̅ⲡⲙⲉⲉⲩⲉ  ⲉⲧⲛⲁⲛⲟⲩϥ  ϩ̅ⲛ̅ⲙ̅ⲡⲩⲗⲏ  ⲛ̅ⲛ̅ⲥⲟⲫⲟⲥ . Ⲙⲉⲣⲉⲛ̅ⲥⲟⲫⲟⲥ  ϫⲉⲛⲉⲩⲙⲉⲉⲩⲉ  ⲉⲃⲟⲗ  ϩ̅ⲛ̅ⲣⲱⲟⲩ  ϩ̅ⲛ̅ⲟⲩⲙⲏⲏϣⲉ . Ⲡⲙⲟⲩ  ⲛⲁⲧⲱⲙⲛ̅ⲧ  ⲉⲛⲁⲧⲥⲃⲱ . Ⲡⲁⲑⲏⲧ  ⲇⲉ  ⲛⲁⲙⲟⲩ  ϩ̅ⲛ̅ϩⲉⲛⲛⲟⲃⲉ.  Ⲛⲁⲕⲁⲑⲁⲣⲥⲓⲁ  ⲛⲁⲧⲱⲗⲙ̅  ⲉⲩⲣⲱⲙⲉ  ⲛ̅ⲗⲟⲓⲙⲟⲥ  ϩ̅ⲛ̅ⲟⲩϩⲟⲟⲩ  ⲉϥϩⲟⲟⲩ  ⲙ̅ⲛ̅ⲟⲩϩⲟⲟⲩ  ⲛ̅ⲑⲗⲓⲯⲓⲥ  ϣⲁⲛⲧϥ̅ⲱϫⲛ̅  ⲛⲉϩⲙ̅ⲛⲉⲧⲟⲩϫⲓ ⲙ̅ⲙⲟⲟⲩ  ⲉⲡⲙⲟⲩ . ⲁⲩⲱ  ⲙ̅ⲡⲣ̅ϯⲥⲟ  ⲉⲥⲉⲧⲛⲉⲧⲟⲩⲙⲟⲩⲟⲩⲧ  ⲙ̅ⲙⲟⲟⲩ. Ⲉⲕϣⲁⲛϫⲟⲟⲥ  ⲇⲉ  ϫⲉ  ⲛ̅ϯⲥⲟⲟⲩⲛ̅  ⲁⲛ  ⲙ̅ⲡⲁⲓ . ⲉⲓⲙⲉ  ϫⲉ  Ⲡϫⲟⲉⲓⲥ  ⲥⲟⲟⲩⲛ  ⲙ̅ⲡϩⲏⲧ  ⲛ̅ⲟⲩⲟⲛ  ⲛⲓⲙ .  ⲁⲩⲱ  ⲡⲉⲛⲧⲁϥⲡⲗⲁⲥⲥⲉ  ⲙ̅ⲡⲛⲓϥⲉ  ⲛ̅ⲟⲩⲟⲛ  ⲛⲓⲙ  ⲥⲟⲟⲩⲛ  ⲙ̅ⲙⲟⲟⲩ  ⲧⲏⲣⲟⲩ . ⲡⲉⲧⲛⲁϯ  ⲙ̅ⲡⲟⲩⲁ   ⲡⲟⲩⲁ  ⲕⲁⲧⲁⲛⲉϥϩⲃⲏⲩⲉ. Ⲡⲁϣⲏⲣⲉ  ⲟⲩⲉⲙⲉⲃⲓⲱ  ⲛⲁⲛⲟⲩⲡⲙⲟⲩⲗ̅ϩ̅  ⲅⲁⲣ  ϫⲉ  ⲉⲣⲉⲧⲉⲕϣⲟⲩⲱⲃⲉ  ⲕ̅ⲛ̅ⲛⲉ . ⲉⲕⲛⲁⲁⲓⲥⲑⲁⲛⲉ  ⲅⲁⲣ  ⲛ̅ⲧⲉⲓϩⲉ  ⲉⲧⲥⲟⲫⲓⲁ  ϩ̅ⲙ̅ⲡⲉⲕϩⲏⲧ . Ⲉⲕϣⲁⲛϩⲉ  ⲇⲉ  ⲉⲣⲟⲥ  ⲡⲉⲕⲙⲟⲩ  ⲛⲁⲣⲁⲛⲁⲓ . ⲁⲩⲱ  ⲧⲉⲕϩⲉⲗⲡⲓⲥ  ⲛⲁⲱϫⲛ̅  ⲁⲛ.  Ⲙ̅ⲡⲣ̅ϩⲛ̅ⲟⲩⲁⲥⲉⲃⲏⲥ  ⲉϩⲟⲩⲛ  ⲉⲧⲉⲕⲥⲕⲩⲛⲏ  ⲛ̅ⲛ̅ⲇⲓⲕⲁⲓⲟⲥ . ⲁⲩⲱ  ⲙ̅ⲡⲣ̅ⲧⲣⲉⲩⲁⲡⲁⲧⲁ  ⲙ̅ⲙⲟⲕ  ϩ̅ⲛ̅ⲟⲩⲥⲓ  ⲛ̅ϩⲏ . Ⲡⲇⲓⲕⲁⲓⲟⲥ  ⲅⲁⲣ  ⲛⲁϩⲉ  ⲛ̅ⲥⲁϣϥ̅  ⲛ̅ⲥⲟⲡ  ⲁⲩⲱ  ⲛϥ̅ⲧⲱⲟⲩⲛ .  ⲛⲁⲥⲉⲃⲏⲥ  ⲇⲉ  ⲛⲁϩⲉ  ϩ̅ⲛ̅ϩⲉⲛⲡⲉⲑⲟⲟⲩ . Ⲉⲣϣⲁⲛⲡⲉⲕϫⲁϫⲉ  ϩⲉ  ⲙ̅ⲡⲣ̅ⲣⲁϣⲉ  ⲙ̅ⲙⲟϥ . ⲁⲩⲱ  ⲙ̅ⲡⲣ̅ϫⲓⲥⲉ  ⲙ̅ⲙⲟⲕ  ϩ̅ⲙ̅ⲡⲉϥⲥⲗⲁⲁⲧⲉ . ϫⲉ  ⲛ̅ⲛⲉⲠϫⲟⲉⲓⲥ  ⲛⲁⲩ  ⲛϥ̅ⲧ̅ⲙ̅ⲣ̅ⲁⲛⲁϥ . ⲁⲩⲱ  ⲛϥ̅ⲕⲱⲧⲉⲡⲉϥϭⲱⲛⲧ̅  ⲉⲃⲟⲗ  ⲙ̅ⲙⲟϥ. Ⲙ̅ⲡⲣ̅ⲣⲁϣⲉ  ⲉϫⲛ̅ⲡⲣⲉϥⲣ̅ⲡⲉⲑⲟⲟⲩ . ⲁⲩⲱ  ⲙ̅ⲡⲣ̅ⲕⲱϩ  ⲉⲛⲣⲉϥⲣ̅ⲛⲟⲃⲉ.  ⲛⲛⲉϫⲡⲟ  ⲅⲁⲣ  ϣⲱⲡⲉ  ⲛ̅ⲙ̅ⲡⲟⲛⲏⲣⲟⲥ . ⲡⲟⲩⲟⲉⲓⲛ  ⲇⲉ  ⲛ̅ⲛ̅ⲁⲥⲉⲃⲏⲥ  ⲛⲁϫⲉⲛⲁ  ϣⲁⲉⲛⲉϩ . Ⲡⲁϣⲏⲣⲉ  ⲁⲣⲓϩⲟⲧⲉ  ϩⲏⲧϥ̅  ⲙ̅ⲡⲛⲟⲩⲧⲉ  ⲙ̅ⲛ̅ⲡⲣ̅ⲣⲟ  ⲁⲩⲱ  ⲙ̅ⲡⲣ̅ⲣⲛⲟⲃⲉ  ⲉⲟⲩⲟⲛ  ⲙ̅ⲙⲟⲟⲩ. ⲥⲉⲛⲁϫⲓⲕⲃⲁ  ⲅⲁⲣ  ⲛ̅ⲛ̅ⲁⲥⲉⲃⲏⲥ  ϩ̅ⲛ̅ⲟⲩϣⲥ̅ⲛⲉ . Ⲛⲓⲙ  ⲇⲉ ⲡⲉⲧⲛⲁⲉⲓⲙⲉ  ⲉⲛⲉⲧⲓⲙⲟⲣⲓⲁ  ⲙ̅ⲡⲉⲥⲛⲁⲩ . Ⲡϣⲏⲣⲉ  ⲉⲧϩⲁⲣⲉϩ  ⲉⲩϣⲁϫⲉ  ϥⲛⲁⲟⲩϫⲁⲓ  ⲉⲡⲧⲁⲕⲟ . ⲡⲉⲧϣⲱⲡ  ⲇⲉ  ⲉⲣⲟϥ  ⲙ̅ⲡⲧⲁⲕⲟ  ⲁϥϫⲓⲧϥ  ⲛⲁϥ . Ⲡⲉⲧⲉⲛϥ̅ⲧⲁⲙⲟ  ⲇⲉ  ⲁⲛ  ⲙ̅ⲡⲉϥϣⲏⲣⲉ  ⲛ̅ϣⲟⲣⲡ̅  ⲉⲧⲣⲉϥϩⲁⲣⲉϩ  ⲉⲣⲟϥ  ⲉⲡⲉⲑⲟⲟⲩ  ϥⲛⲁⲗⲩⲡⲓ  ϩ̅ⲛ̅ⲟⲩϣⲥ̅ⲛⲉ . ⲙ̅ⲡⲣ̅ϫⲓϭⲟⲗ  ⲗⲁⲁⲩ  ϩ̅ⲙ̅ⲡⲉⲕⲗⲁⲥ  ⲉⲡⲣ̅ⲣⲟ . ⲁⲩⲱ  ⲛ̅ⲛⲉⲗⲁⲁⲩ  ⲛ̅ϭⲟⲗ  ⲉⲓ  ⲉⲃⲟⲗ  ϩ̅ⲙ̅ⲡⲉⲕⲗⲁⲥ . Ⲟⲩⲥⲏϥⲉ  ⲅⲁⲣ  ⲡⲉ  ⲡⲗⲁⲥ  ⲛ̅ⲛⲟⲩⲣ̅ⲣⲟ  ⲁⲩⲱ  ⲛ̅ⲟⲩⲥⲁⲣⲝ  ⲁⲛ  ⲡⲉ  ⲡⲉⲧⲟⲩⲛⲁⲧⲁⲁϥ  ⲛⲁϥ  ϥⲛⲁⲟⲩⲟϣϥ̅ϥ̅ .  Ⲉⲩϣⲁⲛⲧⲱⲃⲥ̅  ⲅⲁⲣ  ⲙ̅ⲡⲉϥϭⲱⲛⲧ̅  ϥⲛⲁⲱϫⲛ̅  ⲛ̅ⲛ̅ϣⲏⲣⲉ  ⲛ̅ⲛ̅ⲣⲱⲙⲉ . ϥⲛⲁⲟⲩⲱⲙ  ⲇⲉ  ⲛ̅ϩⲉⲛⲕⲉⲉⲥ  ⲛ̅ⲣⲱⲙⲉ . ⲁⲩⲱ  ⲛ̅ϥⲣⲟⲕϩⲟⲩ  ⲛ̅ⲑⲉ  ⲛ̅ⲟⲩⲕⲱϩⲧ̅ . ϩⲱⲥⲧⲉ  ⲉⲧⲙ̅ⲧⲣⲉⲛ̅ϣⲏⲣⲉ  ⲛⲁϩⲱⲙⲉ  ⲟⲩⲟⲙⲟⲩ . Ⲡⲁϣⲏⲣⲉ  ⲁⲣⲓϩⲟⲧⲉ  ϩⲏⲧⲟⲩ  ⲛⲛⲁϣⲁϫⲉ  ⲉⲁⲕϣⲟⲡⲟⲩ  ⲇⲉ  ⲉⲣⲟⲕ  ⲙⲉⲧⲁⲛⲟⲓ . ⲛⲁⲓ  ⲛⲉϣⲁⲣⲉⲡⲣⲱⲙⲉ  ϫⲟⲟⲩ  ⲛ̅ⲛⲉⲧⲡⲓⲥⲧⲉⲩⲉ  ⲉⲡⲛⲟⲩⲧⲉ  ϫⲉ  ϯⲛⲁⲗⲟ.  Ⲁⲛⲅ̅ⲟⲩⲥⲁⲃⲉ  ⲛ̅ⲣⲱⲙⲉ  ⲁⲛ  ⲧⲉⲧⲛ̅ϩⲏⲧ . ⲡⲛⲟⲩⲧⲉ  ⲡⲉⲛ̅ⲧⲁϥⲧⲥⲁⲃⲟⲓ  ⲉⲧⲥⲟⲫⲓⲁ . ⲁⲩⲱ  ⲁⲛⲟⲕ  ⲁⲓⲥⲟⲩⲛⲡⲥⲟⲟⲩⲛ  ⲛⲛⲉⲧⲟⲩⲁⲁⲃ . Ⲛⲓⲙ  ⲡⲉⲛⲧⲁϥⲃⲱⲕ  ⲉϩⲣⲁⲓ  ⲉⲧⲡⲉ  ⲁϥⲉⲓ  ⲉⲡⲉⲥⲏⲧ . Ⲛⲓⲙ  ⲡⲉⲛⲧⲁϥⲥⲉⲩϩⲛ̅ⲧⲏⲩ  ⲉϩⲟⲩⲛ  ϩ̅ⲛ̅ⲕⲟⲩⲛϥ̅ . Ⲛⲓⲙ  ⲡⲉⲛ̅ⲧⲁϥⲥⲉⲩϩⲡⲙⲟⲟⲩ  ⲉϩⲟⲩⲛ  ϩ̅ⲛ̅ⲧⲉϥϣⲧⲏⲛ . Ⲛⲓⲙ  ⲡⲉⲛ̅ⲧⲁϥⲁⲙⲁϩⲧⲉ  ⲛ̅ⲁⲣⲏϫ̅ϥ  ⲙ̅ⲡⲕⲁϩ . Ⲛⲓⲙ  ⲡⲉ  ⲡⲉϥⲣⲁⲛ  ⲏ̅  ⲡⲣⲁⲛ  ⲛ̅ⲛⲉϥϣⲏⲣⲉ . Ⲛ̅ϣⲁϫⲉ  ⲧⲏⲣⲟⲩ  ⲙ̅ⲡⲛⲟⲩⲧⲉ  ⲥⲟⲧⲡ̅  ⲁⲩⲱ  ⲥⲉⲡⲟⲥⲉ . ⲡⲉⲓⲙⲉ  ⲇⲉ  ⲉⲡⲛⲟⲙⲟⲥ  ⲡⲁⲟⲩⲙⲉⲉⲩⲉ  ⲡⲉ  ⲉⲛⲁⲛⲟⲩϥ . Ϣⲁϥⲣ̅ⲛⲁϣⲧⲉ  ⲇⲉ  ⲛ̅ⲧⲟϥ  ⲉⲛⲉⲧⲣ̅ϩⲟⲧⲉ  ϩⲏⲧϥ̅ . Ⲙ̅ⲡⲣ̅ⲟⲩⲱϩ  ⲉⲛⲉϥϣⲁϫⲉ  ϫⲉ  ⲛⲛⲉϥϫⲡⲓⲟⲕ ⲛ̅ⲅ̅ⲣ̅ⲣⲉϥϫⲓϭⲟⲗ.  Ϩⲱⲃ  ⲥⲛⲁⲩ  ⲛⲉⲧⲓⲁⲓϯ  ⲙ̅ⲙⲟⲟⲩ  ⲛ̅ⲧⲟⲟⲧⲕ̅ ⲙ̅ⲡⲣ̅ϥⲓ  ⲛ̅ⲧⲉⲭⲁⲣⲓⲥ  ⲉⲃⲟⲗ  ⲛ̅ϩⲏⲧ  ⲉⲙⲡⲁϯⲙⲟⲩ. Ⲙⲁⲣⲉⲟⲩϣⲁϫⲉ  ⲉϥϣⲟⲩⲉⲓⲧ  ⲁⲩⲱ  ⲛ̅ϭⲟⲗ  ⲟⲩⲉ  ⲙ̅ⲙⲟⲓ . ⲙ̅ⲡⲣ̅ϯ  ⲇⲉ  ⲛⲁⲓ  ⲛ̅ⲟⲩⲙⲛ̅ⲧⲣⲙ̅ⲙⲁⲟ  ⲙ̅ⲛ̅ⲟⲩⲙⲛ̅ⲧϩⲏⲕⲉ .  Ⲧⲱϣ  ⲛⲁⲓ  ⲛ̅ⲛⲉϯⲁϩⲉ  ⲛⲁⲩ ⲙ̅ⲛ̅ⲡⲁⲣⲱϣⲉ . ϫⲉ  ⲛ̅ⲛⲁⲥⲉⲓ  ⲛ̅ⲧⲁⲣ̅ⲣⲉϥϫⲓϭⲟⲗ  ⲛ̅ⲧⲁϫⲟⲟⲥ  ϫⲉ  ⲛⲓⲙ  ⲡⲉⲧⲛⲁⲩ  ⲉⲣⲟⲓ .  ⲏ̅  ⲧⲁⲣ̅ϩⲏⲕⲉ  ⲛ̅ⲧⲁϫⲓⲟⲩⲉ  ⲛ̅ⲧⲁⲱⲣⲕ ⲙ̅ⲡⲣⲁⲛ  ⲙ̅ⲡⲁⲛⲟⲩⲧⲉ . ⲙ̅ⲡⲣ̅ϯ  ⲛ̅ⲟⲩϩ̅ⲙ̅ϩⲁⲗ  ⲉⲧⲟⲟⲧϥ̅  ⲙ̅ⲡⲉϥϫⲟⲉⲓⲥ . ⲙⲏⲡⲟⲧⲉ  ⲛ̅ϥ̅ⲥϩⲟⲩⲱⲣⲕ̅  ⲛ̅ⲅ̅ⲧⲁⲕⲟ .  Ϣⲁⲣⲉⲟⲩϣⲏⲣⲉ  ⲉϥϩⲟⲟⲩ  ⲥⲁϩⲟⲩ  ⲙ̅ⲡⲉϥⲉⲓⲱⲧ  ⲁⲩⲱ  ⲙⲉϥⲥⲙⲟⲩ  ⲉⲧⲉϥⲙⲁⲁⲩ.  Ϣⲁⲣⲉⲡϣⲣ̅ⲃⲱⲱⲛ  ⲕⲣⲓⲛⲉ  ⲙ̅ⲙⲟϥ  ϩⲱⲥ  ⲇⲓⲕⲁⲓⲟⲥ . ⲧⲉϥϩⲓⲏ  ⲇⲉ  ⲙ̅ⲡϥ̅ⲧⲃ̅ⲃⲟⲥ . Ⲟⲩϫⲁⲥⲓⲃⲁⲗ  ⲡⲉ  ⲟⲩϣⲏⲣⲉ  ⲉϥϩⲟⲟⲩ . ⲛⲉϥⲉⲛⲧⲟⲗⲏ  ⲇⲉ  ⲙ̅ⲙⲓⲛ  ⲙ̅ⲙⲟϥ  ⲛⲁⲛⲟⲩⲟⲩ  ⲛⲁϩⲣⲁϥ . ⲁⲩⲱ  ϣⲁϥϫⲓⲥⲉ  ⲙ̅ⲙⲟϥ  ϩ̅ⲛ̅ⲛⲉϥⲟⲩϩⲉ . Ϩⲉⲛⲥⲏϥⲉ  ⲛⲉⲛⲟⲃϩⲉ ⲙ̅ⲡϣⲏⲣⲉ  ⲉⲑⲟⲟⲩ . ⲁⲩⲱ  ϩⲉⲛⲣⲉϥϣⲱⲱⲧ  ⲛⲉ  ⲛⲉϥⲛⲁϫϩⲉ . ϩⲱⲥⲧⲉ  ⲉⲧⲁⲕⲟ  ⲛ̅ⲛⲉⲧⲑⲃ̅ⲃⲓⲏⲩ  ⲙ̅ⲡⲕⲁϩ . ⲁⲩⲱ  ⲛⲉⲩϩⲏⲕⲉ  ⲉⲃⲟⲗ  ϩ̅ⲛ̅ⲛ̅ⲣⲱⲙⲉ .  Ⲉⲓϫⲱ  ϭⲉ  ⲛ̅ⲛⲁⲓ  ⲛⲏⲧⲛ̅  ⲛ̅ⲥⲟⲫⲟⲥ  ⲉⲧⲣⲉⲧⲛ̅ⲛⲟⲓ . Ⲛⲁⲛⲟⲩϫⲓϩⲟ  ⲁⲛ  ϩ̅ⲛ̅ⲟⲩϩⲁⲡ . ⲟⲩⲇⲉ  ⲉⲡⲓⲃⲟⲩⲗⲉⲩⲉ  ⲟⲩⲁⲁⲃ  ⲁⲛ .  Ⲡⲉⲧⲛⲁϫⲟⲥ  ϫⲉ  ⲟⲩⲇⲓⲕⲁⲓⲟⲥ  ⲡⲉ  ⲡⲁⲥⲉⲃⲏⲥ . ϥⲛⲁϣⲱⲡⲉ  ⲉϥⲥϩⲟⲩⲟⲣ̅ⲧ̅  ϩ̅ⲛ̅ⲛ̅ⲗⲁⲟⲥ . ⲁⲩⲱ  ⲙ̅ⲙⲉⲥⲧⲉ  ϩ̅ⲛ̅ⲛ̅ϩⲉⲑⲛⲟⲥ.  Ⲥⲉⲛⲁⲧⲁⲓⲟ  ⲇⲉ  ⲛ̅ⲛⲉⲧϫⲡⲓⲟ . ⲡⲉⲥⲙⲟⲩ  ⲇⲉ  ⲉⲧⲛⲁⲛⲟⲩϥ ⲛⲏⲩ  ⲉϫⲱⲟⲩ . Ⲥⲉⲛⲁⲙⲉⲣⲉⲛⲉⲥⲡⲟⲧⲟⲩ  ⲇⲉ  ⲉⲧϫⲱ  ⲛ̅ⲛ̅ϣⲁϫⲉ  ⲉⲧⲛⲁⲛⲟⲩⲟⲩ.  ⲥⲃ̅ⲧⲉⲛⲉⲕϩⲃⲏⲩⲉ  ⲉⲧⲉⲕϩⲓⲏ . ⲁⲩⲱ  ⲛⲅ̅ⲥⲃ̅ⲧⲱⲧ̅ⲕ̅  ⲉⲧⲉⲕⲥⲱϣⲉ  ⲛ̅ⲅ̅ⲟⲩⲁϩⲕ̅  ⲛ̅ⲥⲱⲓ . ⲁⲩⲱ  ⲕⲛⲁⲕⲱⲧ  ⲙ̅ⲡⲉⲕⲏⲓ . ⲙ̅ⲡⲣ̅ⲣⲙⲛ̅ⲧⲣⲉ  ⲛ̅ⲛⲟⲩϫ  ⲉⲡⲉⲕⲣⲙ̅ⲛ̅ϯⲙⲉ . ⲁⲩⲱ  ⲙ̅ⲡⲣ̅ⲟⲩⲱϣⲥ̅  ⲙ̅ⲙⲟⲕ  ϩⲓⲛⲉⲕⲥⲡⲟⲧⲟⲩ . Ⲙ̅ⲡⲣ̅ϫⲟⲟⲥ  ϫⲉ  ϯⲛⲁⲉⲓⲣⲉ  ⲛⲁϥ  ⲕⲁⲧⲁⲑⲉ  ⲉⲛⲧⲁϥⲉⲓⲣⲉ  ⲛⲁⲓ . ⲧⲁⲧⲱⲱⲃⲉ  ⲛⲁϥ  ⲛ̅ⲛⲉϥϫⲓⲛ̅ϭⲟⲛⲥ̅  ⲉⲛⲧⲁϥⲁⲁⲩ  ⲛⲁⲓ.  ⲉⲣⲉⲡⲣⲱⲙⲉ  ⲛ̅ⲁⲑⲏⲧ  ⲟ  ⲛ̅ⲑⲉ  ⲛⲟⲩⲉⲓⲱϩⲉ. ⲁⲩⲱ  ⲡⲣⲱⲙⲉ  ⲛ̅ⲁⲧⲥⲃⲱ  ⲛ̅ⲑⲉ  ⲛ̅ⲟⲩϭⲱⲙ . Ⲉⲕϣⲁⲛⲕⲁⲁϥ  ϥⲛⲁⲣ̅ϣⲛⲁ . ⲁⲩⲱ  ⲛⲉϥⲣ̅ⲛ̅ⲧⲏϭ  ⲧⲏⲣϥ̅  ⲛ̅ϥ̅ⲣ̅ϫϩⲓⲙ . ⲛ̅ⲥⲉⲧⲁⲩⲟ  ⲉϩⲣⲁⲓ  ⲛ̅ⲛ̅ϫⲟⲗϫⲗ̅  ⲛ̅ⲛⲉϥⲱⲛⲉ .  Ⲙ̅ⲛ̅ⲛ̅ⲥⲱⲥ  ⲁⲛⲟⲕ  ⲁⲓⲙⲉⲧⲁⲛⲟⲉⲓ . ⲁⲓϭⲱϣⲧ̅  ⲉⲥⲉⲧⲡ̅ⲧⲉⲥⲃⲱ . ϣⲁⲧⲛⲁⲩ  ⲕⲛⲉϫⲡⲣⲉϥϫⲛⲁⲁⲩ. ⲉⲕⲛⲁⲧⲱⲟⲩⲛ  ⲇⲉ  ϩⲁⲡϩⲓⲛⲏⲃ  ⲧⲛⲁⲩ . Ⲟⲩⲁⲡⲣⲏⲧⲉ  ⲙ̅ⲛ̅  ⲕϫⲓⲣⲉⲕⲣⲓⲕⲉ . ⲕ̅ⲛ̅ⲕⲟⲧⲕ̅  ⲛ̅ⲟⲩⲁⲡⲣⲏⲧⲉ. Ⲕ̅ⲕⲱⲗϫ̅  ⲛ̅ⲛⲉⲕϭⲓϫ  ϩⲁⲕⲟⲩⲛⲅ̅  ⲛ̅ⲟⲩⲁⲡⲣⲏⲧⲉ . Ⲉϣⲱⲡⲉ  ⲇⲉ  ⲉⲕϣⲁⲛⲣ̅ⲡⲁⲓ . ⲧⲙⲛ̅ⲧϩⲏⲕⲉ  ⲛⲏⲩ ⲛⲁⲕ  ⲉⲥⲙⲟⲟϣⲉ . ⲁⲩⲱ  ⲡⲉϭⲣⲱϩ  ⲛ̅ⲑⲉ  ⲛ̅ⲟⲩⲇⲣⲟⲙⲉⲩⲉ  ⲉⲛⲁⲛⲟⲩϥ.  Ⲟⲩⲛⲧⲉⲧⲉⲃⲇⲉⲗⲗⲏ  ϣⲙ̅ⲧ̅  ϣⲉⲉⲣⲉ  ⲉⲥⲙⲉ  ⲙ̅ⲙⲟⲟⲩ  ϩ̅ⲛⲟⲩⲙⲉ .  ⲁⲩⲱ  ⲧⲉⲓϣⲟⲙⲧⲉ  ⲙ̅ⲡⲟⲩⲧⲥⲓⲟⲥ .  Ⲁⲙⲛ̅ⲧⲉ  ⲙ̅ⲛ̅ⲡⲙⲉ  ⲛ̅ⲥϩⲓⲙⲉ . ⲙ̅ⲛ̅ⲡⲧⲁⲣⲧⲁⲣⲟⲥ  ⲙ̅ⲛ̅ⲡⲕⲁϩ  ⲉⲙⲉϥⲥⲓ  ⲙ̅ⲙⲟⲟⲩ . ⲙ̅ⲛ̅ⲡⲙⲟⲟⲩ  ⲙ̅ⲛ̅ⲡⲕⲱϩ̅ⲧ̅  ⲉⲛⲛⲉⲩϫⲟⲟⲥ  ϫⲉ  ϩⲱ . ⲁⲩⲱ  ⲧⲙⲉϩϥⲧⲟⲉ  ⲙ̅ⲡⲟⲩϩⲉ  ⲉⲣⲟⲥ  ⲉⲥϫⲟⲟⲥ  ϫⲉ  ϥⲣⲱϣⲉ . Ⲡⲃⲁⲗ  ⲉⲧⲥⲱⲃⲉ  ⲛ̅ⲥⲁⲡⲉϥⲉⲓⲱⲧ  ⲁⲩⲱ  ⲉⲧⲥⲱϣ  ⲛ̅ⲧⲙⲛ̅ⲧϩⲗ̅ⲗⲟ  ⲛ̅ⲧⲉϥⲙⲁⲁⲩ . ⲉⲣⲉⲛⲁⲃⲟⲟⲕⲉ  ϣⲉⲕϣⲱⲕϥ̅  ⲉⲃⲟⲗ  ϩ̅ⲛ̅ⲛ̅ⲉⲓⲁ . ⲁⲩⲱ  ⲛⲧⲉ  ⲙⲙⲁⲥ  ⲛ̅ⲁϩⲱⲙⲉ  ⲟⲩⲟⲙϥ̅ Ϣⲟⲙⲛ̅ⲧ  ⲇⲉ  ⲛⲉⲧⲙⲟⲕϩ̅  ⲛⲁⲓ  ⲉⲛⲟⲓ  ⲙ̅ⲙⲟⲟⲩ . ⲁⲩⲱ  ⲛ̅ϯⲥⲟⲟⲩⲛ  ⲁⲛ  ⲙ̅ⲡⲙⲉϩϥⲧⲟⲟⲩ.  Ⲧⲉϩⲓⲏ  ⲛ̅ⲟⲩⲁϩⲱⲙⲉ  ⲉϥϩⲏⲗ. ⲁⲩⲱ  ⲛⲉϩⲓⲟⲟⲩⲉ  ⲛ̅ⲟⲩϩⲟϥ  ϩⲓⲟⲩⲡⲉⲧⲣⲁ . ⲙ̅ⲛ̅ⲛⲉϩⲓⲟⲟⲩⲉ  ⲛ̅ⲟⲩϫⲟⲓ  ⲉϥⲣ̅ϩⲱⲧ . ⲁⲩⲱ  ⲛⲉϩⲓⲟⲟⲩⲉ  ⲛ̅ⲟⲩⲣⲱⲙⲉ  ⲉϥϩ̅ⲛ̅ⲧⲉϥⲙⲛ̅ⲧⲕⲟⲩⲓ.  Ⲟⲩⲧⲉⲓⲙⲓⲛⲉ  ⲧⲉ  ⲧⲉϩⲓⲏ ⲛ̅ⲟⲩⲥϩⲓⲙⲉ  ⲛⲛⲟⲉⲓⲕ . ⲧⲁⲓ  ⲉⲧⲥⲛⲁⲣ̅ⲡⲉⲧⲥ̅ⲛⲁⲁϥ  ⲛ̅ⲥⲉⲓⲁⲁⲥ  ⲛ̅ⲥ̅ϫⲟⲟⲥ  ϫⲉ  ⲙ̅ⲡⲓⲣ̅ⲗⲁⲁⲩ  ⲛ̅ⲛⲟⲃⲉ . ⲉⲣⲉⲡⲕⲁϩ  ⲕⲓⲙ  ϩ̅ⲛ̅ϣⲙ̅ⲧ  ϩⲱⲃ .  ⲁⲩⲱ  ⲙ̅ⲛ̅ϭⲟⲙ  ⲙ̅ⲙⲟϥ  ⲉϥⲓ  ϩⲁⲡⲙⲉϩϥⲧⲟⲟⲩ. ⲡϩⲙ̅ϩⲁⲗ  ⲉϥϣⲁⲛⲣ̅ⲣⲣⲟ . ⲁⲩⲱ  ⲛⲧⲉⲟⲩⲁⲑⲏⲧ ⲥⲉⲓ  ⲛ̅ⲟⲉⲓⲕ . ⲁⲩⲱ  ⲛ̅ⲧⲉⲟⲩϩⲙ̅ϩⲁⲗ  ⲛⲉϫⲧⲉⲥϫⲟⲉⲓⲥ  ⲉⲃⲟⲗ. ⲁⲩⲱ  ⲛ̅ⲧⲉⲟⲩⲥϩⲓⲙⲉ  ⲙ̅ⲙⲉⲥⲧⲏ  ⲙⲁⲧⲉ  ⲛ̅ⲟⲩϩⲁⲓ  ⲉⲛⲁⲛⲟⲩϥ . Ϥⲧⲟⲟⲩ  ⲇⲉ  ⲛ̅ⲉⲗⲁⲭⲓⲥⲧⲟⲛ  ⲛⲉⲧϩⲓϫⲙ̅ⲡⲕⲁϩ . Ⲛⲁⲓ  ⲇⲉ  ϩⲉⲛⲥⲁⲃⲉ  ⲛⲉ  ⲉϩⲟⲩⲉⲛⲥⲟⲫⲟⲥ.  ⲛ̅ϭⲁϫⲓϥ  ⲉⲧⲉⲙ̅ⲛ̅ⲧⲟⲩϭⲟⲙ  ⲉⲧⲉϣⲁⲩⲥⲃ̅ⲧⲉⲛⲉⲩϩⲣⲏⲩⲉ  ⲙ̅ⲡϣⲱⲙ . ⲁⲩⲱ  ⲛ̅ⲥⲁⲣⲁϭⲱⲟⲩϣ  ⲉⲩϩⲉⲑⲛⲟⲥ  ⲡⲉ  ⲛ̅ϭⲱⲃ  ⲛⲁⲓ  ⲛ̅ⲧⲁⲩⲧⲁⲙⲓⲉⲛⲉⲩⲏⲓ  ϩ̅ⲛ̅ⲙ̅ⲡⲉⲧⲣⲁ . ⲙ̅ⲛ̅ⲣ̅ⲣⲟ  ϩⲓϫ̅ⲙ̅ⲡⲉϣϫⲉ  ⲁⲩⲱ  ϣⲁⲩϩⲱⲗ  ⲉⲃⲟⲗ  ϩ̅ⲛ̅ⲟⲩⲉϩⲥⲁϩⲛⲉ  ⲛⲟⲩⲱⲧ  ⲉⲩⲧⲏϣ . ⲁⲩⲱ  ⲡϩⲁⲕⲗϥ̅  ⲉϥⲧⲁϫⲣⲏⲩ  ⲉϫⲛ̅ⲛⲉϥϭⲓϫ . ⲁⲩⲱ  ⲉϥⲙⲟⲧⲛ̅  ⲛ̅ⲧⲁⲕⲟϥ  ϥⲟⲩⲏϩ  ϩⲛⲛⲏⲓ  ⲛ̅ⲛⲣ̅ⲣⲱⲟⲩ . Ϣⲟⲙⲛ̅ⲧ̅  ⲇⲉ  ⲛⲉⲧⲙⲟⲟϣⲉ  ⲕⲁⲗⲱⲥ . ⲁⲩⲱ  ⲡⲙⲉϩϥⲧⲟⲟⲩ  ϣⲁϥⲉⲓ  ⲉⲃⲟⲗ  ⲉϥⲧⲏϣ.  Ⲟⲩⲙⲁⲥ  ⲙ̅ⲙⲟⲩⲓ  ⲉϥϫⲟⲟⲣ  ⲉⲛⲧⲃ̅ⲛⲟⲟⲩⲉ . ⲡⲁⲓ  ⲉⲙⲉϥⲕⲧⲟϥ  ⲟⲩⲇⲉ  ⲙⲉⲣⲉⲧⲃ̅ⲛⲏ  ⲛⲟϣⲡ̅ . ⲁⲩⲱ  ⲟⲩⲁⲗⲉⲕⲧⲱⲣ  ⲉϥⲙⲟⲟϣⲉ  ϩ̅ⲛ̅ϩⲉⲛⲥϩⲓⲙⲉ  ⲉϥⲣⲟⲟⲩⲧ . ⲁⲩⲱ  ⲟⲩϭⲓⲉ  ⲉϥⲥⲱⲕ  ϩⲏⲧϥ̅  ⲙ̅ⲡⲟϩⲉ  ⲛ̅ⲃⲁⲙⲡⲉ . ⲁⲩⲱ  ⲟⲩⲣ̅ⲣⲟ  ⲉϥϣⲁϫⲉ  ϩ̅ⲛ̅ⲟⲩⲛⲟϭ  ⲙ̅ⲙⲏⲏϣⲉ . Ⲡⲁϣⲏⲣⲉ  ⲉⲕϣⲁⲛⲕⲁⲁⲕ  ⲉϩⲣⲁⲓ  ⲉⲩⲟⲩⲛⲟϥ . ⲁⲩⲱ  ⲛⲅ̅ⲥⲟⲩⲧⲛ̅ⲧⲉⲕϫⲓϫ  ⲉⲃⲟⲗ  ⲉⲣⲱⲕ . ϩ̅ⲛ̅ⲟⲩⲙⲓϣⲉ . ⲕⲛⲁϫⲓⲥⲱϣ  ϩⲉⲛⲉⲣⲱⲧⲉ  ⲧⲁⲣⲉⲕϭⲛ̅ⲥⲁⲉⲓⲣⲉ. Ⲉⲕϣⲁⲛⲟϥⲟⲩ  ⲇⲉ  ⲡⲉⲥⲛⲟϥ  ⲛⲏⲩ  ⲉⲃⲟⲗ . Ⲉⲕϣⲁⲛⲥⲱⲕ  ⲇⲉ  ⲛ̅ϩⲉⲛϣⲁϫⲉ  ϣⲁⲣⲉϩⲉⲛϩⲁⲡ  ⲙ̅ⲛ̅ϩⲉⲛⲙⲓϣⲉ  ⲉⲓ  ⲉⲃⲟⲗ.  ⲛ̅ⲧⲁⲩϫⲉⲛⲁϣⲁϫⲉ  ϩⲓⲧ̅ⲙ̅ⲡⲛⲟⲩⲧⲉ . ⲡϣⲁϫⲉ  ⲙ̅ⲡⲣ̅ⲣⲟ  ⲛ̅ⲧⲁⲧⲉϥⲙⲁⲁⲩ  ⲧⲥⲁⲃⲟϥ  ⲉⲣⲟϥ.  Ⲟⲩ  ⲡⲉⲧⲕ̅ⲛⲁϩⲁⲣⲉϩ  ⲉⲣⲟϥ  ⲡⲁϣⲏⲣⲉ . ⲛ̅ϣⲁϫⲉ  ⲙ̅ⲡⲛⲟⲩⲧⲉ  ⲛⲉ . ϯⲛⲁϫⲱ  ⲛⲁⲕ  ⲙ̅ⲡϣⲣ̅ⲡⲛ̅ϣⲱⲡⲉ  ⲡⲁϣⲏⲣⲉ . Ⲟⲩ  ⲡⲉ  ⲡϣⲏⲣⲉ  ⲛ̅ϩⲏⲧ  ⲟⲩ  ⲡⲉ  ⲡϣⲏⲣⲉ  ⲛ̅ⲛⲁⲉⲩⲭⲏ . Ⲙ̅ⲡⲣ̅ϯ  ⲛ̅ⲧⲉⲕⲙⲛ̅ⲧⲣⲙ̅ⲙⲁⲟ  ⲛ̅ⲛⲉϩⲓⲟⲙⲉ . ⲁⲩⲱ  ⲛⲉⲕⲭⲣⲏⲙⲁ  ⲉⲩϣⲟϫⲛⲉ  ⲛ̅ϩⲁⲉ. Ⲁⲣⲓϩⲱⲃ  ⲛⲓⲙ  ϩ̅ⲛ̅ⲟⲩϣⲟϫⲛⲉ  ⲙ̅ⲛ̅ⲟⲩⲧⲱϣ . Ⲥⲉⲏⲣⲡ̅  ϩⲛⲟⲩϣⲟϫⲛⲉ  ϩⲉⲛⲣⲉϥϭⲱⲛⲧ̅   ⲛⲉ  ⲛⲉⲓⲛⲟϭ . ⲙ̅ⲡⲣ̅ⲧⲣⲉⲩⲥⲉⲏⲣⲡ̅ ϫⲉ  ⲛ̅ⲛⲉⲩⲥⲱ  ⲛ̅ⲥⲉⲣ̅ⲡⲱⲃϣ̅  ⲛ̅ⲧⲥⲟⲫⲓⲁ . ⲁⲩⲱ  ⲛ̅ⲥⲉⲧ̅ⲙ̅ⲉϣϭ̅ⲙ̅ϭⲟⲙ  ⲉⲕⲣⲓⲛⲉ  ⲛ̅ⲛ̅ϭⲱⲃ  ϩ̅ⲛ̅ⲟⲩⲥⲟⲟⲩⲧⲛ̅ . ϯⲡϯϩⲉ  ⲛ̅ⲛⲉⲧϩ̅ⲛ̅ϩⲉⲛⲗⲩⲡⲏ . ⲁⲩⲱ  ⲡⲥⲉⲏⲣⲡ̅  ⲛ̅ⲛⲉⲧϩ̅ⲛϩⲉⲛⲙ̅ⲕⲁϩ  ⲛ̅ϩⲏⲧ.  ϫⲉ  ⲉⲩⲣ̅ⲡⲱⲃϣ̅  ⲛ̅ⲧⲉⲩⲙⲛ̅ⲧϩⲏⲕⲉ . ⲁⲩⲱ  ⲛ̅ⲥⲉⲧⲙ̅ⲣ̅ⲡⲙⲉⲉⲩⲉ  ⲛ̅ⲛⲉⲩϩⲓⲥⲉ  ϫⲓⲛⲧⲉⲛⲟⲩ.  Ⲁⲟⲩⲱⲛ  ⲛ̅ⲣⲱⲕ  ⲉⲡϣⲁϫⲉ  ⲙ̅ⲡⲛⲟⲩⲧⲉ . ⲛⲅ̅ⲕⲣⲓⲛⲉ  ⲙ̅ⲙⲟⲟⲩ  ⲧⲏⲣⲟⲩ  ϩ̅ⲛ̅ⲟⲩⲟⲩϫⲁⲓ .  ⲛ̅ⲅ̅ⲇⲓⲁⲕⲣⲓⲛⲉ  ⲇⲉ  ⲙ̅ⲡϩⲏⲕⲉ  ⲙ̅ⲛ̅ⲡϭⲱⲃ.
 
Ⲕ̅Ⲉ̅. Ⲛⲁⲓ  ⲛⲉ  ⲛⲉⲥⲃⲟⲟⲩⲉ  ⲛ̅Ⲥⲟⲗⲟⲙⲱⲛ  ⲁϫ̅ⲛ̅ⲙⲉⲉⲩⲉ .  ⲛⲁⲓ  ⲛ̅ⲧⲁⲛⲉϣⲃⲉⲉⲣ  ⲛ̅Ⲉⲍⲉⲕⲓⲁⲥ  ⲡⲣ̅ⲣⲟ  ⲛ̅ϯⲟⲩⲇⲁⲓⲁ  ⲥϩⲁⲓⲥⲟⲩ .  Ⲡⲉⲟⲟⲩ  ⲙ̅ⲡⲛⲟⲩⲧⲉ  ⲡⲉϩⲱⲡ  ⲛ̅ⲟⲩϣⲁϫⲉ . ⲡⲉⲟⲟⲩ  ⲇⲉ  ⲙ̅ⲡⲣ̅ⲣⲟ  ⲡⲉ  ⲧⲁⲓⲉⲛⲉϥϩⲃⲏⲩⲉ . Ⲧⲡⲉ  ϫⲟⲥⲉ  ⲡⲕⲁϩ  ϣⲏⲕ . ϩⲉⲛⲁⲧⲉⲓⲙⲉ  ⲇⲉ ⲉⲣⲟⲟⲩ  ⲛⲉ  ⲛ̅ϩⲏⲧ  ⲛ̅ⲛⲉⲣⲣⲱⲟⲩ . Ⲣⲉϩⲧ̅ⲟⲩϩⲁⲧ  ⲉϥϩⲟⲟⲩ  ⲧⲁⲣⲉϥⲧⲃ̅ⲃⲟ  ⲧⲏⲣϥ̅.  Ⲙⲉⲩⲧⲡⲁⲥⲉⲃⲏⲥ  ⲙ̅ⲡⲉⲙⲧⲟ  ⲉⲃⲟⲗ  ⲙⲡⲣ̅ⲣⲟ . ⲁⲩⲱ  ⲡⲉϥⲑⲣⲟⲛⲟⲥ  ⲛⲁⲥⲟⲟⲩⲧⲛ  ϩ̅ⲛ̅ⲟⲩⲇⲓⲕⲁⲓⲟⲥⲩⲛⲏ . Ⲙ̅ⲡⲣ̅ϫⲓⲥⲉ  ⲙ̅ⲙⲟⲕ  ⲙ̅ⲡⲉⲙⲧⲟ  ⲉⲃⲟⲗ  ⲛ̅ⲟⲩⲣ̅ⲣⲟ . ⲁⲩⲱ  ⲙ̅ⲡⲣ̅ⲁϩⲉⲣⲁⲧⲕ̅  ⲉⲡⲙⲁ  ⲛϩⲉⲛϫⲱⲱⲣⲉ. Ⲛⲁⲛⲟⲩⲥ  ⲅⲁⲣ  ⲛ̅ⲥⲉϫⲟⲟⲥ  ⲛⲁⲕ  ϫⲉ  ⲁⲙⲟⲩ  ⲉϩⲣⲁⲓ ⲛⲁⲓ . ⲉϩⲟⲩⲉ  ⲛ̅ⲅ̅ⲑⲃ̅ⲃⲓⲟ  ⲙ̅ⲡⲉⲙⲧⲟ  ⲉⲃⲟⲗ  ⲛ̅ⲛ̅ϫⲱⲱⲣⲉ .

Ⲁϫⲓⲛⲉⲛ̅ⲧⲁⲛⲉⲕⲃⲁⲗ  ⲛⲁⲩ  ⲉⲣⲟⲟⲩ  ⲛ̅ⲥⲉⲧⲙ̅ϩⲉ  ⲉⲣⲟⲕ  ϩ̅ⲛ̅ⲟⲩⲙⲓϣⲉ  ϩ̅ⲛ̅ⲟⲩϭⲉⲡⲏ. ϫⲉⲕⲁⲥ ⲛⲛⲉⲕⲣ̅ϩⲧⲏⲕ  ϩ̅ⲛ̅ⲧⲉⲕϩⲁⲏ . Ⲉⲣϣⲁⲛⲡⲉⲕϣⲃⲏⲣ  ⲛⲉϭⲛⲟⲩϭⲕ̅  ⲥⲁϩⲱⲕ  ϩⲏⲧ̅ϥ̅ . Ⲙ̅ⲡⲣ̅ⲕⲁⲧⲁⲫⲣⲟⲛⲉⲓ  ϫⲉ  ⲛⲛⲉⲡⲉⲕϣⲃⲏⲣ  ⲙⲉⲛ  ⲛⲉϭⲛⲟⲩϭⲕ̅ . Ⲡⲙⲓϣⲉ  ⲇⲉ  ⲙ̅ⲛ̅ⲧⲙⲛ̅ⲧϫⲁϫⲉ  ⲛⲁⲥⲁϩⲱⲥ  ⲁⲛ  ⲉⲃⲟⲗ  ⲙ̅ⲙⲟⲕ . ⲁⲗⲗⲁ  ⲉⲥⲛⲁⲣ̅ⲑⲉ  ⲛⲁⲕ  ⲙ̅ⲡⲙⲟⲩ . Ϩⲁⲣⲉϩ  ⲛⲁⲕ  ⲉⲩⲭⲁⲣⲓⲥ  ⲙ̅ⲛ̅ⲟⲩⲙⲛ̅ⲧϣⲃⲏⲣ  ϩ̅ⲛ̅ⲟⲩⲙⲛ̅ⲧⲣⲙ̅ϩⲉ . ϫⲉ  ⲛ̅ⲛⲉⲕϣⲱⲡⲉ  ϩⲁⲛⲟϭⲛⲉϭ . ⲁⲗⲗⲁ  ϩⲁⲣⲉϩ  ⲉⲛⲉⲕϩⲓⲟⲟⲩⲉ  ⲉⲩⲥⲙⲟⲛ̅ⲧ̅ . ⲛ̅ⲑⲉ  ⲛ̅ⲟⲩϫ̅ⲙ̅ⲡⲉϩ  ⲛ̅ⲛⲟⲩⲃ  ϩ̅ⲛ̅ⲟⲩϩⲟⲣⲙⲓⲥⲕⲟⲥ  ⲛ̅ⲥⲁⲣⲇⲓⲟⲛ . Ⲧⲁⲓ  ⲧⲉ  ⲑⲉ  ⲛ̅ⲟⲩϣⲁϫⲉ  ⲉϥⲧⲁⲓⲏⲩ  ⲉϫⲟⲟϥ  ⲉⲩⲙⲁⲁϫⲉ  ⲛ̅ⲥ̅ⲧⲙⲏⲧ.   Ⲟⲩϭⲁϫⲉ  ⲛ̅ⲛⲟⲩⲃ  ⲉⲣⲉⲟⲩⲥⲁⲣⲇⲓⲟⲛ  ⲉϥⲧⲁⲓⲏⲩ  ⲧⲟ  ⲉⲣⲟϥ .  ⲧⲁⲓ  ⲧⲉ  ⲑⲉ  ⲛ̅ⲛϣⲁϫⲉ  ⲛ̅ⲛ̅ⲥⲟⲫⲟⲥ  ⲉⲩⲙⲁⲁϫⲉ  ⲛ̅ⲣⲉϥⲥⲱⲧⲙ̅. ⲛ̅ⲑⲉ  ⲙ̅ⲡⲓ  ⲉⲃⲟⲗ  ⲛ̅ⲟⲩⲭⲓⲱⲛ  ϩ̅ⲙ̅ⲡⲱϩⲥ̅  ⲉϣⲁϥϯⲙ̅ⲧⲟⲛ  ⲛⲟⲩϫⲟⲩϥ .  Ⲧⲁⲓ  ⲧⲉ  ⲑⲉ  ⲛ̅ⲟⲩϥⲁⲓϣⲓⲛⲉ  ⲉϥⲛ̅ϩⲟⲧ  ⲛ̅ⲛⲉⲧⲛⲁϫⲟⲟⲩϥ . ϣⲁϥⲱⲫⲉⲗⲓ  ⲅⲁⲣ  ⲛ̅ⲛⲉⲯⲩⲭⲏ  ⲛ̅ⲛⲉⲧϥ̅ⲛⲁϫⲓⲟⲩⲱ  ⲛⲁⲩ . ⲛ̅ⲑⲉ  ⲛϩⲉⲛⲧⲏⲩ  ⲙ̅ⲛ̅ϩⲉⲛⲕⲗⲟⲟⲗⲉ  ⲙ̅ⲛ̅ϩⲉⲛϩⲱⲟⲩ  ⲉⲩⲟⲩⲛ̅ϩ̅  ⲉⲃⲟⲗ . Ⲧⲁⲓ  ⲧⲉ  ⲑⲉ  ⲛ̅ⲛⲉⲧϣⲟⲩϣⲟⲩ  ⲙ̅ⲙⲟⲟⲩ  ϩ̅ⲛ̅ⲟⲩϯ  ⲛ̅ⲛⲟⲩϫ.  ⲉⲣⲉⲡⲥⲟⲟⲩⲧⲛ̅  ϣⲟⲟⲡ  ⲛ̅ⲛⲉⲣⲣⲱⲟⲩ  ϩ̅ⲛ̅ⲟⲩⲙⲛ̅ⲧϩⲁⲣϣ̅ϩⲏⲧ. ϣⲁⲣⲉⲟⲩⲗⲁⲥ  ⲇⲉ  ⲛ̅ϭⲱⲛⲧ̅  ⲟⲩⲉϣϥ̅ϩⲉⲛⲕⲉⲉⲥ . Ⲉⲕϣⲁⲛϩⲉ  ⲉⲉⲃⲓⲱ  ⲟⲩⲉⲙⲡⲉⲕⲣⲱϣⲉ. ⲙⲏⲡⲟⲧⲉ  ⲛⲅ̅ⲥⲉⲓ  ⲛⲅ̅ⲕⲁⲃⲟⲗ. Ⲙ̅ⲡⲣ̅ⲧⲁϣⲉⲃⲱⲕ  ⲉϩⲟⲩⲛ  ⲙⲡⲉⲕϣⲃⲏⲣ . ⲙⲏⲡⲟⲧⲉ  ⲛ̅ϥⲥⲉⲓ  ⲙ̅ⲙⲟⲕ  ⲛϥ̅ⲙⲉⲥⲧⲱⲕ . Ⲛ̅ⲑⲉ  ⲛⲟⲩϭⲉⲣⲱⲃ  ⲙⲛⲟⲩⲥⲏϥⲉ  ⲙ̅ⲛ̅ⲟⲩⲥⲟⲧⲉ   ⲛⲁⲕⲓⲥ . ⲧⲁⲓ  ⲧⲉ  ⲑⲉ  ⲛ̅ⲟⲩⲣⲱⲙⲉ  ⲉϥⲣ̅ⲙ̅ⲛ̅ⲧⲣⲉ  ⲉⲡⲉϥϣⲃⲏⲣ  ⲛ̅ⲟⲩⲙⲛ̅ⲧⲙⲛ̅ⲧⲣⲉ  ⲛ̅ⲛⲟⲩϫ .  Ⲧⲉϩⲓⲏ  ⲙ̅ⲡⲡⲉⲑⲟⲟⲩ  ⲙ̅ⲛ̅ⲧⲟⲩⲉⲣⲏⲧⲉ   ⲙⲡ̅ⲡⲁⲣⲁⲛⲟⲙⲟⲥ . ⲛⲁⲧⲁⲕⲟ  ϩ̅ⲛ̅ⲟⲩϩⲟⲟⲩ  ⲉϥϩⲟⲟⲩ.  Ⲛ̅ⲑⲉ  ⲉϣⲁⲣⲉⲟⲩϩⲙ̅ϫ̅  ⲣ̅ⲃⲟⲟⲛⲉ  ⲛ̅ⲟⲩⲥⲁϣ . ⲧⲁⲓ  ⲧⲉ  ⲑⲉ  ⲛ̅ⲟⲩϣⲱⲛⲉ  ϩ̅ⲙ̅ⲡⲥⲱⲙⲁ . Ⲉϣⲁϥⲗⲩⲡⲓ  ⲙ̅ⲡϩⲏⲧ  ⲛ̅ⲑⲉ  ⲛ̅ⲟⲩϩⲟⲟⲗⲉ  ϩ̅ⲛ̅ⲟⲩϩⲟⲓⲧⲉ . ⲁⲩⲱ  ⲟⲩϥⲛ̅ⲧ̅  ϩ̅ⲛ̅ⲟⲩϣⲉ . ⲧⲁⲓ  ⲧⲉ  ⲑⲉ  ⲉϣⲁⲣⲉⲧⲗⲩⲡⲓ  ⲙ̅ⲡⲣⲱⲙⲉ  ⲃⲗⲁⲡⲧⲉ  ⲙ̅ⲡⲉϥϩⲏⲧ . Ⲉⲣϣⲁⲛⲡⲉⲕϫⲁϫⲉ  ϩⲕⲟ  ⲙⲁⲧ̅ⲙ̅ⲙⲟϥ . ⲁⲩⲱ  ⲉϥϣⲁⲛⲉⲓⲃⲉ  ⲙⲁⲧⲥⲟϥ. ⲉⲕⲉⲓⲣⲉ  ⲅⲁⲣ  ⲙ̅ⲡⲁⲓ  ⲕⲛⲁⲡⲣ̅ϣ̅ϩⲉⲛϫⲃ̅ⲃⲉⲥ  ⲛ̅ⲕⲱϩⲧ̅  ⲉϫⲛ̅ⲧⲉϥⲁⲡⲉ. ⲡⲛⲟⲩⲧⲉ  ⲇⲉ  ⲛⲁⲧⲱⲱⲃⲉ  ⲛⲁⲕ  ⲛ̅ⲙ̅ⲙⲛ̅ⲧⲙⲉ.  Ϣⲁⲣⲉⲟⲩⲧⲏⲩ  ⲛ̅ⲙ̅ϩⲓⲧ  ⲧⲟⲩⲛⲉⲥϩⲉⲛⲕⲗⲟⲟⲗⲉ . ⲟⲩϩⲟ  ⲇⲉ  ⲛⲁⲧϣⲓⲡⲉ  ϣⲁϥϯⲛⲟⲩϭⲥ  ⲛ̅ϩⲉⲛⲗⲁⲥ . Ⲛⲁⲛⲟⲩⲟⲩⲱϩ  ϩⲓⲟⲩⲕⲗ̅ϫⲉ  ⲛⲟⲩϫⲉⲛⲉⲡⲱⲣ  ⲉϩⲟⲩⲉⲟⲩⲱϩ  ϩ̅ⲛ̅ⲟⲩⲏⲓ  ⲛ̅ⲃⲣ̅ⲣⲉ  ⲙ̅ⲛ̅ⲟⲩⲥϩⲓⲙⲉ  ⲛ̅ⲣⲉϥⲥⲁϩⲟⲩ.  Ⲛⲁⲛⲟⲩⲟⲩⲙⲟⲟⲩ  ⲉϥⲕⲏⲃ  ⲛⲟⲩⲯⲩⲭⲏ  ⲉⲥⲟⲃⲉ . ⲁⲩⲱ  ⲟⲩⲟⲩⲱ  ⲉⲛⲁⲛⲟⲩϥ  ⲙ̅ⲡⲟⲩⲉ . ⲛ̅ⲑⲉ  ⲙ̅ⲡⲉⲧⲛⲁⲧⲱⲙ  ⲉⲣⲛⲟⲩⲡⲏⲅⲏ  ⲙ̅ⲙⲟⲟⲩ . ⲁⲩⲱ  ⲡⲉⲧⲛⲁⲧⲁⲕⲉⲟⲩⲙⲟⲟⲩ  ⲉϥⲥⲱⲕ  ϥϫⲓ  ⲛ̅ϭⲟⲛⲥ̅ . ⲧⲁⲓ  ⲧⲉ  ⲑⲉ  ⲙ̅ⲡⲉⲧⲛⲁⲥⲉϣⲟⲩⲣⲱⲙⲉ  ⲛ̅ⲇⲓⲕⲁⲓⲟⲥ  ⲙ̅ⲡⲉⲙⲧⲟ  ⲉⲃⲟⲗ  ⲛ̅ⲟⲩⲁⲥⲉⲃⲏⲥ .  Ⲛⲁⲛⲟⲩⲟⲩⲉⲙϩⲁϩ  ⲁⲛ  ⲛ̅ⲉⲃⲓⲱ . ϣϣⲉ  ⲇⲉ  ⲉⲧⲁⲓⲉⲛ̅ϣⲁϫⲉ  ⲉⲧⲧⲁⲓⲏⲩ . Ⲛ̅ⲑⲉ  ⲛⲟⲩⲡⲟⲗⲓⲥ  ⲉⲣⲉⲛⲉⲥⲥⲟⲃⲧ̅  ϣⲣϣⲱⲣ . ⲧⲁⲓ  ⲧⲉ  ⲑⲉ  ⲙ̅ⲡⲣⲱⲙⲉ  ⲉⲧⲉ  ⲛϥ̅ⲣ̅ϩⲱⲃ  ⲁⲛ  ϩ̅ⲛ̅ⲟⲩϣⲟϫⲛⲉ.
 
Ⲕ̅Ⲋ̅.  Ⲛ̅ⲑⲉ  ⲛⲟⲩⲉⲓⲱⲧⲉ  ϩⲙⲡⲱϩ̅ⲥ̅  ⲁⲩⲱ  ⲟⲩϩⲱⲟⲩ  ϩ̅ⲙ̅ⲡϣⲱⲙ . ⲉⲛⲥⲉⲧⲁⲓⲏⲩ  ⲁⲛ . ⲧⲁⲓ  ⲧⲉ  ⲑⲉ  ⲉⲧⲉ  ⲙⲛⲧⲉⲁⲑⲏⲧ  ⲧⲁⲓⲟ . ⲛ̅ⲑⲉ  ⲛ̅ϩⲉⲛϩⲁⲗⲁⲧⲉ  ⲙ̅ⲛ̅ϩⲉⲛϫⲁϫ  ⲉⲩϩⲏⲗ  ⲧⲁⲓ  ⲧⲉ  ⲑⲉ  ⲛ̅ⲟⲩⲥⲁϩⲟⲩ  ⲉϥϣⲟⲩⲉⲓⲧ  ⲉⲛϥⲛⲏⲩ  ⲁⲛ  ⲉϫⲛ̅ⲗⲁⲁⲩ . Ⲟⲩⲙⲁⲥⲧⲓⲅ̅ⲝ̅  ⲛ̅ⲟⲩϩⲧⲟ  ⲁⲩⲱ   ⲟⲩϫⲟⲟⲕⲉϥ  ⲛ̅ⲟⲩⲉⲓⲱ   ⲟⲩϭⲉⲣⲱⲃ  ⲇⲉ  ⲛ̅ⲟⲩϩⲉⲑⲛⲟⲥ  ⲛ̅ⲁⲑⲏⲧ  ⲙ̅ⲡⲣ̅ⲟⲩⲱϣⲃ̅  ⲛ̅ⲟⲩⲁⲑⲏⲧ  ⲕⲁⲧⲁⲧⲙⲛ̅ⲧ̅ⲁⲑⲏⲧ  ⲙ̅ⲡⲉⲧⲙ̅ⲙⲁⲩ  ϫⲉ  ⲛ̅ⲛⲉⲕⲣ̅ⲧⲏϥϩⲉ.  ⲁⲗⲗⲁ  ⲟⲩⲱϣⲃ̅  ⲛ̅ⲟⲩⲁⲑⲏⲧ  ⲟⲩⲃⲉⲧⲉϥⲙⲛ̅ⲧⲁⲑⲏⲧ  ϫⲉ  ⲛ̅ⲛⲉϥⲟⲩⲱⲛ̅ϩ̅  ⲉⲃⲟⲗ  ⲛⲥⲟⲫⲟⲥ  ⲛⲁϩⲣⲁϥ  ⲙⲁⲩⲁⲁϥ . Ⲁⲩⲱ  ϣⲁϥϫⲡⲟ  ⲛ̅ⲟⲩⲛⲟϭⲛⲉϭ  ⲉⲃⲟⲗ  ϩ̅ⲛ̅ⲛⲉϥϣⲁϫⲉ . ⲉⲕϣⲁⲛϫⲟⲟⲩ  ⲛⲟⲩϣⲁϫⲉ  ϩⲓⲧ̅ⲛ̅ⲟⲩϥⲁⲓϣⲓⲛⲉ  ⲛ̅ⲁⲑⲏⲧ  ϥⲓ ⲙ̅ⲙⲁⲩ  ⲛ̅ⲧⲉϩⲓⲏ  ⲛ̅ⲧⲉϥⲟⲩⲉⲣⲏⲧⲉ . ⲁⲩⲱ  ⲟⲩⲡⲁⲣϩⲟⲓⲙⲓⲁ  ⲉⲃⲟⲗ  ϩ̅ⲛ̅ⲣⲱⲟⲩ  ⲛ̅ⲛ̅ⲁⲑⲏⲧ . Ⲛ̅ⲑⲉ  ⲙ̅ⲡⲉⲧⲛⲁⲙⲟⲩⲣ  ⲛ̅ⲟⲩⲱⲛⲉ  ϩ̅ⲛ̅ⲟⲩⲥⲫⲉⲛⲇⲟⲛⲏ  ⲧⲁⲓ  ⲧⲉ  ⲑⲉ  ⲙ̅ⲡⲉⲧϯⲉⲟⲟⲩ ⲛⲟⲩⲁⲑⲏⲧ . Ϣⲁⲣⲉϩⲉⲛϣⲟⲛⲧⲉ  ⲣⲱⲧ  ϩ̅ⲛ̅ⲛ̅ϭⲓϫ  ⲙ̅ⲡⲣⲉϥϯϩⲉ . ⲁⲩⲱ  ⲟⲩⲙⲛ̅ⲧ̅ϩ̅ⲙ̅ϩⲁⲗ  ϩ̅ⲛ̅ⲛ̅ϭⲓϫ  ⲛ̅ⲛⲁⲑⲏⲧ.  Ϣⲁⲣⲉⲣⲱⲙⲉ  ⲛⲓⲙ  ⲥⲱⲃⲉ  ⲛ̅ⲥⲁⲛⲁⲑⲏⲧ . ⲧⲉⲩϩⲓⲏ  ⲅⲁⲣ  ⲛⲁⲧⲁⲕⲟ . ⲛ̅ⲑⲉ  ⲛ̅ⲟⲩⲟⲩϩⲟⲣ  ⲉϣⲁϥⲕⲟⲧ̅ϥ̅  ⲉⲡⲉϥⲕⲁⲃⲟⲗ  ⲛ̅ⲥⲉⲙⲉⲥⲧⲱϥ . ⲧⲁⲓ  ⲧⲉ  ⲑⲉ  ⲙ̅ⲡⲁⲑⲏⲧ  ϩ̅ⲛ̅ⲧⲉϥⲕⲁⲕⲓⲁ . ⲉϣⲁϥⲕⲟⲧϥ̅  ⲉⲡⲉϥⲛⲟⲃⲉ.  Ⲟⲩⲛⲟⲩϣⲓⲡⲉ  ⲉϣⲁϥϫⲡⲉⲡⲛⲟⲃⲉ . ⲁⲩⲱ  ⲟⲩⲛⲟⲩϣⲓⲡⲉ  ⲉⲩⲉⲟⲟⲩ  ⲡⲉ   ⲙ̅ⲛ̅ⲟⲩⲭⲁⲣⲓⲥ .  Ⲁⲓⲛⲁⲩ  ⲉⲩⲣⲱⲙⲉ  ⲉⲣⲟϥ  ⲟⲩⲁⲁϥ  ϫⲉ  ⲟⲩⲥⲁⲃⲉ  ⲡⲉ. ⲟⲩⲛⲧⲉⲡⲁⲑⲏⲧ  ⲇⲉ  ϩⲉⲗⲡⲓⲥ  ⲉϩⲟⲩⲉⲣⲟϥ .

Ϣⲁⲣⲉⲡⲣⲉϥϫⲛⲁⲁⲩ  ϫⲟⲟⲥ  ⲉⲩⲛⲁϫⲟⲟϥ  ⲉⲩϩⲓⲏ  ϫⲉ  ⲡⲙⲟⲩⲓ  ϩ̅ⲛ̅ⲛⲉϩⲓⲟⲩⲉ . ⲁⲩⲱ  ⲥⲉϩⲱⲧⲃ̅  ⲙ̅ⲙⲟⲟⲩ  ϩ̅ⲛ̅ⲛⲉⲡⲗⲁⲧⲓⲁ . ⲛ̅ⲑⲉ  ⲛ̅ⲟⲩⲣⲟ  ⲉϥⲕⲱⲧⲉ  ϩⲓϫⲙ̅ⲡⲉϥⲙⲉϣϯⲃⲥ̅ . ⲧⲁⲓ  ⲧⲉ  ⲑⲉ  ⲛⲟⲩⲣⲉϥϫⲛⲁⲁⲩ  ϩⲓⲡⲉϥϭⲗⲟϭ.  Ϣⲁⲣⲉⲡⲣⲉϥϫⲛⲁⲁⲩ  ⲕⲗ̅ϫⲛⲉϥϭⲓϫ  ϩⲁⲕⲟⲩⲛϥ̅  ⲛ̅ϥ̅ⲧ̅ⲙ̅ⲉϣ̅ⲛ̅ⲧⲟⲩ  ⲉⲣⲱϥ .  Ⲟⲩⲥⲁⲃⲉ  ⲡⲉ  ⲡⲣⲉϥϫⲛⲁⲁⲩ  ⲛⲁϥ  ⲟⲩⲁⲁϥ . ⲉϩⲟⲩⲉ  ⲡⲉⲧⲧⲥⲓⲏⲩ  ⲉⲧⲥⲧⲟ  ⲉⲃⲟⲗ  ⲛⲟⲩⲟⲩⲱ .

Ⲛ̅ⲑⲉ  ⲙ̅ⲡⲉⲧⲁⲙⲁϩⲧⲉ  ⲛ̅ⲟⲩⲟⲩϩⲟⲣ . ⲧⲁⲓ  ⲧⲉ  ⲑⲉ  ⲙ̅ⲡⲉⲧⲁϩⲉⲣⲁⲧϥ̅  ⲙ̅ⲡⲃⲟⲗ  ⲛ̅ⲟⲩⲙⲓⲏⲉ  ⲉⲙⲡⲱϥ  ⲁⲛ  ⲡⲉ .  Ⲛ̅ⲑⲉ  ⲛ̅ⲛⲉⲧϫⲱⲛⲧ̅  ⲉⲧⲛⲟⲩϫⲉ  ⲉϩⲟⲩⲛ  ⲛ̅ϩⲉⲛϣⲁϫⲉ  ⲛϣⲟⲣ̅ⲡ̅  ⲛⲁⲥⲗⲁⲁⲧⲉ . ⲧⲁⲓ  ⲧⲉ  ⲑⲉ  ⲛ̅ⲟⲩⲟⲛ  ⲛⲓⲙ  ⲉⲧϭⲱⲣ̅ϭ̅  ⲉⲛⲉⲩϣⲃⲉⲉⲣ  ⲉⲩϣⲁⲛⲧⲁϩⲟⲟⲩ  ⲇⲉ  ϣⲁⲩϫⲟⲟⲥ  ϫⲉ  ⲛⲧⲁⲓⲁⲁⲥ  ⲉⲓⲥⲱⲃⲉ.  Ϣⲁⲣⲉⲡⲕⲱϩⲧ̅  ⲙⲟⲩϩ  ϩⲛϩⲁϩ  ⲛ̅ϣⲉ . ⲡⲙⲓϣⲉ  ⲇⲉ  ⲛⲁϭⲱ  ϩ̅ⲙ̅ⲡⲙⲁ  ⲉⲧⲉⲙ̅ⲛ̅ⲣⲉϥϭⲱⲛⲧ̅  ⲛ̅ϩⲏⲧϥ̅ . Ϩⲉⲛϫⲃ̅ⲃⲉⲥ  ⲛ̅ⲟⲩⲉⲥⲭⲁⲣⲁ  ⲁⲩⲱ  ϩⲉⲛϣⲉ  ⲙ̅ⲡⲕⲱϩⲧ̅ . ⲟⲩⲣⲱⲙⲉ  ϩⲱⲱϥ  ⲛ̅ⲣⲉϥⲥⲁϩⲟⲩ  ⲉϥϣⲧⲟⲣⲧⲣ̅  ⲛ̅ⲟⲩⲙⲓϣⲉ . ⲛ̅ϣⲁϫⲉ  ⲙ̅ⲡⲕⲟⲣϣϥ̅  ϭⲏⲛ .  Ⲛⲁⲓ  ⲇⲉ  ⲣⲱϩ̅ⲧ̅   ⲉϩⲟⲩⲛ  ⲉⲛⲧⲁⲙⲓⲟⲛ  ⲛ̅ⲑⲏ .  Ⲛ̅ⲑⲉ  ⲛ̅ϩⲉⲛⲃⲗ̅ϫⲉ ⲡⲉ  ⲟⲩϩⲁⲧ  ⲉⲩϯ  ⲙ̅ⲙⲟϥ  ϩ̅ⲛ̅ⲟⲩⲕⲣⲟϥ. ϣⲁⲣⲉϩⲉⲛⲥⲡⲟⲧⲟⲩ  ⲛⲕⲣⲟϥ  ϩⲃ̅ⲥ̅ⲟⲩϩⲏⲧ  ⲛ̅ⲣⲉϥⲗⲩⲡⲓ .  Ϣⲁⲣⲉⲡϫⲁϫⲉ  ⲟⲩⲱϣⲃ̅  ⲉϥϫⲱⲣ̅ⲙ̅   ⲉⲟⲩⲟⲛ  ⲛⲓⲙ . ϩⲓⲛⲉϥⲥⲡⲟⲧⲟⲩ. Ϥⲙⲉⲉⲩⲉ  ⲇⲉ  ϩ̅ⲙ̅ⲡⲉϥϩⲏⲧ  ⲉϩⲉⲛⲕⲣⲟϥ.  Ⲉⲣϣⲁⲛⲡⲉⲕϫⲁϫⲉ  ⲥⲉⲡⲥⲱⲡ̅ⲕ̅  ⲉϥⲕⲱⲣ̅ϣ̅  ϩ̅ⲛ̅ⲧⲉϥⲥⲙⲏ  ⲙ̅ⲡⲣ̅ⲥⲱⲧ̅ⲙ̅  ⲛ̅ⲥⲱϥ. ⲟⲩⲛⲥⲁϣϥⲉ  ⲅⲁⲣ  ⲙⲡⲟⲛⲏⲣⲓⲁ  ϩ̅ⲙ̅ⲡⲉϥϩⲏⲧ . Ⲡⲉⲧϩⲱⲡ  ⲛ̅ⲟⲩⲙⲛⲧϫⲁϫⲉ  ϣⲁϥⲧⲟⲩⲛⲉⲥⲟⲩⲡⲟⲛⲏⲣⲓⲁ . ϣⲁⲣⲉⲟⲩⲥⲁⲃⲉ  ⲇⲉ  ϭⲱⲗⲡ̅  ⲉⲃⲟⲗ  ⲛ̅ⲛⲉϥⲛⲟⲃⲉ  ϩ̅ⲛ̅ⲟⲩⲙⲏⲏϣⲉ . Ⲡⲉⲧϣⲓⲕⲉ  ⲛ̅ⲟⲩϩⲓⲉⲓⲧ  ⲉⲡⲉⲧϩⲓⲧⲟⲩⲱϥ . ϥⲛⲁϩⲉ  ⲉϩⲣⲁⲓ  ⲉⲣⲟϥ . ⲡⲉⲧⲥⲕⲟⲣⲕⲣ̅  ⲇⲉ  ⲛⲟⲩⲱⲛⲉ  ⲉϥⲛⲁϩⲉ  ⲉϫⲱϥ .  Ⲡⲗⲁⲥ  ⲛ̅ⲛⲟⲩϫ  ⲙⲟⲥϩⲧⲉ  ⲛ̅ⲧⲙⲉ . ⲧⲧⲁⲡⲣⲟ  ⲇⲉ  ⲉⲧϣⲧⲣ̅ⲧⲱⲣ  ⲛⲁⲉⲓⲣⲉ  ⲛ̅ϩⲉⲛϣⲧⲟⲣⲧ̅ⲣ̅.
 
Ⲕ̅Ⲍ̅. Ⲙ̅ⲡⲣ̅ϣⲟⲩϣⲟⲩ  ⲙ̅ⲙⲟⲕ  ⲉⲡⲉϥⲣⲁⲥⲧⲉ . ⲛ̅ⲅ̅ⲥⲟⲟⲩⲛ  ⲅⲁⲣ  ⲁⲛ  ϫⲉ  ⲉⲣⲉⲣⲁⲥⲧⲉ  ⲛⲁϫⲡⲉⲟⲩ . Ⲙⲁⲣⲉⲕⲉⲧⲁⲡⲣⲟ  ⲧⲁⲓⲟⲕ  ⲉⲛⲧⲱⲕ  ⲁⲛ  ⲧⲉ . ⲟⲩϣⲙ̅ⲙⲟ  ⲁⲩⲱ  ⲛⲉⲕⲥⲡⲟⲧⲟⲩ  ⲁⲛ . Ⲡⲱⲛⲉ  ϩⲟⲣϣ̅  ⲁⲩⲱ  ⲡϣⲱ  ⲙⲟⲕϩ̅  ⲛ̅ϥⲓⲧϥ̅ . ⲧⲟⲣⲅⲏ  ⲇⲉ  ⲙ̅ⲡⲁⲑⲏⲧ  ϩⲟⲣ̅ϣ̅  ⲉϩⲟⲩⲉⲣⲟⲟⲩ  ⲙ̅ⲡⲉⲥⲛⲁⲩ . Ⲡϭⲱⲛⲧ̅  ⲟⲩⲁⲧⲛⲁ  ⲡⲉ  ⲁⲩⲱ  ⲧⲟⲣⲅⲏ  ⲛⲁϣ̅ⲧ̅  ⲁⲗⲗⲁ  ⲙⲉⲣⲉⲗⲁⲁⲩ  ϥⲓ  ϩⲁⲡⲕⲱϩ.   Ⲛⲁⲛⲟⲩϩⲉⲛϫⲡⲓⲟ  ⲉⲩϭⲟⲗⲡ̅  ⲉⲃⲟⲗ  ⲉϩⲟⲩⲉⲟⲩⲙⲛ̅ⲧϣⲃⲏⲣ  ⲉⲥϩⲏⲡ . Ⲛⲁⲛⲟⲩⲙ̅ⲡⲱⲗϩ̅  ⲛ̅ⲟⲩϣⲃⲏⲣ  ⲉϩⲟⲩⲉⲙ̅ⲡⲓ  ⲛ̅ⲟⲩϫⲁϫⲉ. Ϣⲁⲣⲉⲧⲉⲯⲩⲭⲏ ⲉⲧⲧⲥⲓⲏ  ϫⲏⲣ  ⲛ̅ⲧ̅ⲉⲥⲧⲉⲡⲉⲃⲓⲱ  ⲉⲃⲟⲗ . ϣⲁⲣⲉⲛ̅ⲕⲉⲡⲉⲧⲥⲁϣⲉ  ⲇⲉ  ϩⲗⲟϭ  ⲛ̅ⲧⲉⲯⲩⲭⲏ  ⲉⲧⲣ̅ϭⲣⲱϩ . Ⲛ̅ⲑⲉ  ⲛ̅ⲟⲩϩⲁⲗⲏⲧ  ⲉϥϣⲁⲛϩⲱⲗ  ⲉⲃⲟⲗ  ϩ̅ⲙ̅ⲡⲉϥⲙⲁϩ  ⲧⲁⲓ  ⲧⲉ  ⲑⲉ  ⲉϣⲁⲣⲉⲡⲣⲱⲙⲉ  ⲣ̅ϩ̅ⲙ̅ϩⲁⲗ  ⲉϥϣⲁⲛⲣ̅ϣⲙ̅ⲙⲟ  ⲉⲛⲉϥⲙⲁ.  Ϣⲁⲣⲉⲡϩⲏⲧ  ⲟⲩⲛⲟϥ  ϩ̅ⲛ̅ϩⲉⲛⲥⲟϭⲛ̅  ⲙⲛϩⲉⲛⲏⲣⲡ̅  ⲙ̅ⲛ̅ϩⲉⲛϣⲟⲩϩⲏⲛⲉ . ϣⲁⲣⲉⲡϩⲏⲧ  ⲇⲉ  ϩⲉ  ϩ̅ⲛ̅ⲟⲩϣⲱⲛⲉ. Ⲙ̅ⲡⲣ̅ⲕⲱ  ⲛ̅ⲥⲱⲕ  ⲛ̅ⲟⲩϣⲃⲏⲣ  ⲛ̅ⲥⲁⲃⲉ . ⲁⲩⲱ  ⲟⲩϣⲃⲏⲣ  ⲛ̅ⲧⲉⲡⲉⲕⲉⲓⲱⲧ . ⲙ̅ⲡⲣ̅ⲃⲱⲕ  ⲇⲉ  ⲉϩⲟⲩⲛ  ⲉⲡⲏⲓ  ⲙ̅ⲡⲉⲕⲥⲟⲛ  ⲉⲕⲙⲟⲕϩ̅ . ⲛⲁⲛⲟⲩ  ⲟⲩϣⲃⲏⲣ  ⲉϥϩⲏⲛ  ⲉϩⲟⲩⲛ . ⲉϩⲟⲩⲉⲟⲩⲥⲟⲛ  ⲉϥⲟⲩⲏⲩ  ⲙ̅ⲙⲟⲕ . Ⲁⲣⲓⲥⲁⲃⲉ  ⲡⲁϣⲏⲣⲉ  ϫⲉ  ⲉⲣⲉⲡⲁϩⲏⲧ  ⲟⲩⲛⲟϥ .  ⲁⲩⲱ  ⲛ̅ⲅ̅ⲕⲧⲟ  ⲉⲃⲟⲗ  ⲙ̅ⲙⲟⲕ  ⲛ̅ϩⲉⲛϣⲁϫⲉ  ⲛ̅ⲛⲟϭⲛⲉϭ . Ϣⲁⲣⲉⲡⲥⲁⲃⲉ  ϩⲟⲡϥ̅ ⲉϩⲉⲛⲡⲉⲑⲟⲟⲩ  ⲉⲩⲛⲏⲩ . ⲛⲁⲑⲏⲧ  ⲇⲉ  ⲛⲏⲩ  ⲉϫⲱϥ  ⲛ̅ⲥⲉϯⲟⲥⲉ . Ϥⲓⲧⲉⲕϣⲧⲏ̅ⲁ  ⲡⲣⲉϥⲥⲱϣ  ⲅⲁⲣ  ⲥⲁⲁⲧⲕ̅ . ⲉϥⲥⲱϣ  ⲅⲁⲣ  ⲛ̅ϩⲉⲛⲕⲟⲟⲩⲉ . Ⲡⲉⲧⲛⲁⲥⲙⲟⲩ  ⲉⲡⲉϥϣⲃⲏⲣ  ϩ̅ⲛ̅ⲟⲩⲛⲟϭ  ⲛ̅ⲥⲙⲏ  ⲉϩⲧⲟⲟⲩⲉ . ⲉϣϫⲉ  ⲛ̅ϥ̅ϣⲟⲃⲉ  ⲁⲛ  ⲉⲡⲉⲧⲥⲁϩⲟⲩ  ⲙ̅ⲙⲟϥ.  Ϣⲁⲣⲉⲡϩⲱⲟⲩ  ⲛⲉϫⲡⲣⲱⲙⲉ  ⲉⲃⲟⲗ  ϩ̅ⲙ̅ⲡⲉϥⲏⲓ  ⲛ̅ⲛⲉϩⲟⲟⲩ  ⲛ̅ⲧⲉⲡⲣⲱ . ⲧⲁⲓ  ⲧⲉ  ⲑⲉ  ⲛ̅ⲟⲩⲥϩⲓⲙⲉ  ⲛ̅ⲣⲉϥⲥⲁϩⲟⲩ  ⲉⲃⲟⲗ  ϩ̅ⲙ̅ⲡⲉⲕⲏⲓ  ⲙ̅ⲙⲓⲛ  ⲙ̅ⲙⲟⲕ . Ⲡⲧⲏⲩ  ⲙ̅ⲡⲉⲙϩⲓⲧ  ⲛⲁϣ̅ⲧ̅  ⲉϣⲁⲩⲙⲟⲩⲧⲉ  ⲉⲣⲟϥ  ϫⲉ  ⲡⲉⲧⲥⲟⲩⲧⲱⲛ . Ⲡ̅ⲡⲉⲛⲓⲡⲉ  ϣⲁϥⲧⲱⲙ  ⲙ̅ⲡ̅ⲡⲉⲛⲓⲡⲉ . ⲡⲣⲱⲙⲉ  ⲇⲉ  ⲡⲉϣⲁϥⲧⲃ̅ⲥ̅ⲡϩⲟ  ⲙ̅ⲡⲉϥϣⲃⲏⲣ. ⲡⲉⲧⲛⲁⲧⲱϭⲉ  ⲛ̅ⲟⲩⲃⲱ  ⲛ̅ⲕⲛ̅ⲧⲉ  ϥⲛⲁⲥⲉⲓ  ⲛ̅ⲛⲉⲥⲕⲁⲣⲡⲟⲥ .  ⲡⲉⲧϩⲁⲣⲉϩ  ⲇⲉ  ⲉⲡⲉϥϫⲟⲉⲓⲥ  ⲛⲁϫⲓⲧⲁⲓⲟ . Ⲛ̅ⲑⲉ  ⲉⲧⲉⲣⲉⲛ̅ϩⲟ  ⲉⲓⲛⲉ  ⲁⲛ  ⲛ̅ⲛⲉⲩⲉⲣⲏⲩ . ⲧⲁⲓ  ⲧⲉ  ⲑⲉ  ⲉⲧⲉⲣⲉⲛ̅ⲕⲉϩⲏⲧ  ⲛ̅ⲛ̅ⲣⲱⲙⲉ  ⲉⲓⲛⲉ  ⲁⲛ  ⲛ̅ⲛⲉⲩⲉⲣⲏⲩ.  ⲘⲉⲣⲉⲀⲙⲛ̅ⲧⲉ  ⲙ̅ⲛ̅ⲡⲧⲁⲕⲟ  ⲥⲉⲓ  ⲧⲁⲓ  ⲧⲉ  ⲑⲉ  ⲉϩⲉⲛⲁⲧⲥⲉⲓ  ⲛⲉ  ⲛ̅ⲃⲁⲗ  ⲛ̅ⲛ̅ⲣⲱⲙⲉ  ⲛ̅ⲣⲉϥϫⲓⲛ̅ϭⲟⲛⲥ̅ . Ⲧⲃⲟⲧⲉ  ⲙ̅Ⲡϫⲟⲉⲓⲥ  ⲡⲉ   ⲛ̅ϫⲁⲣⲃⲁⲗ . ⲁⲩⲱ  ⲛ̅ⲁⲧⲥⲃⲱ  ⲉⲧⲉⲙⲉⲩⲁⲙⲁϩⲧⲉ  ⲙ̅ⲡⲉⲩⲗⲁⲥ . Ⲧⲇⲟⲕⲓⲙⲏ  ⲙ̅ⲡϩⲁⲧ  ⲙ̅ⲛ̅ⲡⲛⲟⲩⲃ  ⲡⲉ  ⲡⲁⲥⲧⲟⲩ . ⲉϣⲁⲩⲇⲟⲕⲓⲙⲁⲍⲉ  ⲇⲉ  ⲙ̅ⲡⲣⲱⲙⲉ  ⲉⲃⲟⲗ  ϩ̅ⲛ̅ⲣⲱⲟⲩ  ⲛ̅ⲛⲉⲧϣⲁϫⲉ  ⲉⲣⲟϥ . ⲡϩⲏⲧ  ⲙ̅ⲡⲁⲛⲟⲙⲟⲥ  ϣⲁϥϣⲓⲛⲉ  ⲛ̅ⲥⲁϩⲉⲛⲡⲉⲑⲟⲟⲩ . ϣⲁⲣⲉⲡϩⲏⲧ  ⲇⲉ  ⲉⲧⲥⲟⲩⲧⲱⲛ  ϣⲓⲛⲉ  ⲛ̅ⲥⲁⲟⲩⲥⲟⲟⲩⲛ . Ⲉⲕϣⲁⲛⲙⲁⲥⲧⲓⲅⲟⲩ  ⲛⲟⲩⲁⲑⲏⲧ  ⲛ̅ⲧⲙⲏⲧⲉ  ⲛ̅ⲟⲩⲙⲏⲏϣⲉ  ⲉⲕⲥⲱϣ  ⲙ̅ⲙⲟϥ . ⲛ̅ⲛⲉⲕϥⲓ  ⲛ̅ⲧⲉϥⲙⲛ̅ⲧⲁⲑⲏⲧ. Ϩ̅ⲛ̅ⲟⲩⲉⲓⲙⲉ  ⲉⲕⲉⲉⲓⲙⲉ  ⲉⲛⲉⲯⲩⲭⲏ  ⲙ̅ⲡⲉⲕⲟϩⲉ . ⲛ̅ⲅ̅ⲥⲙ̅ⲛ̅ⲡⲉⲕϩⲏⲧ  ⲉⲛⲉⲕⲁⲅⲉⲗⲏ . ϫⲉ  ⲧϭⲟⲙ  ⲙ̅ⲛ̅ⲡⲁⲙⲁϩⲧⲉ  ϣⲟⲟⲡ  ⲁⲛ  ⲙ̅ⲡⲣⲱⲙⲉ  ϣⲁⲉⲛⲉϩ . ⲟⲩⲇⲉ  ⲙⲉⲩⲧⲁⲁϥ  ϫⲓⲛϫⲱⲙ  ϣⲁϫⲱⲙ.  Ϥⲓⲡⲣⲟⲟⲩϣ  ⲛ̅ⲟⲩⲟⲩⲟⲧⲟⲩⲉⲧ  ⲉⲧⲣⲏⲧ  ϩ̅ⲛ̅ⲧⲥⲱϣⲉ  ⲧⲁⲣⲉⲕⲑⲓⲟⲟⲩ  ⲛ̅ϣⲟⲣ̅ⲡ̅ . ⲛ̅ⲅ̅ⲥⲱⲟⲩϩ  ⲉϩⲟⲩⲛ  ⲛ̅ⲟⲩⲭⲟⲣⲧⲟⲥ  ⲙ̅ⲡⲉϥⲧⲉ . ϫⲉ  ⲉⲕⲉϩⲉ  ⲉⲉⲥⲟⲟⲩ  ⲉϩⲟⲓⲧⲉ . Ϥⲓⲡⲣⲟⲟⲩϣ   ⲛ̅ⲧⲉⲥⲱϣⲉ  ϫⲉ  ⲉⲕⲉϩⲉ  ⲉϩⲓⲉⲓⲃ . Ⲡⲁϣⲏⲣⲉ  ⲁⲓⲧⲕ̅ϩⲉⲛⲛⲟϭ  ⲛ̅ϣⲁϫⲉ  ⲉⲡⲉⲕⲱⲛϩ̅ . ⲁⲩⲱ  ⲉⲩⲱⲛ̅ϩ̅  ⲛ̅ⲛⲉⲕϩⲙ̅ϩⲁⲗ .
 
Ⲕ̅ⲏ̅. Ϣⲁⲣⲉⲡⲁⲥⲉⲃⲏⲥ  ⲡⲱⲧ  ⲉⲙ̅ⲛ̅ⲡⲉⲧⲡⲏⲧ  ⲛ̅ⲥⲱϥ . ⲉⲣⲉⲡⲇⲓⲕⲁⲓⲟⲥ  ⲇⲉ  ⲧⲁϫⲣⲏⲩ  ⲛ̅ⲑⲉ  ⲛ̅ⲛⲓⲙⲟⲩⲓ . Ϣⲁⲣⲉϩⲉⲛϩⲁⲡ  ⲛⲉϩⲥⲉ  ⲉⲧⲃⲉⲛ̅ⲛⲟⲃⲉ  ⲛ̅ⲛ̅ⲁⲥⲉⲃⲏⲥ .  Ⲡⲣⲱⲙⲉ  ⲇⲉ  ⲛ̅ⲥⲁⲃⲉ  ⲛⲁⲱϣⲙ̅  ⲛ̅ⲛ̅ⲟⲣⲅⲏ  ϣⲁⲣⲉⲡⲉⲧⲧⲏⲕ  ϩ̅ⲛ̅ⲧⲉϥⲙⲛ̅ⲧϣⲁϥⲧⲉ  ϩⲓⲗⲁ  ⲉⲩϩⲏⲕⲉ . ⲛ̅ⲑⲉ  ⲛ̅ⲟⲩϩⲱⲟⲩ  ⲉϥⲟϣ  ⲉⲛ̅ϥ̅ⲣ̅ⲛⲟϥⲣⲉ  ⲁⲛ .  Ⲧⲁⲓ  ⲧⲉ  ⲑⲉ  ⲛ̅ⲛⲉⲧⲕⲱ  ⲛ̅ⲥⲱⲟⲩ  ⲙ̅ⲡⲛⲟⲙⲟⲥ  ⲉⲩⲧⲁⲓⲟ  ⲛ̅ⲙⲛⲧϣⲁϥⲧⲉ . ⲛⲉⲧⲙⲉ  ⲇⲉ  ⲙ̅ⲡⲛⲟⲙⲟⲥ  ⲉⲩⲕⲧⲟ  ⲉⲣⲟⲟⲩ  ⲛ̅ⲟⲩⲥⲟⲃⲧ̅.  Ⲛ̅ⲣⲱⲙⲉ  ⲉⲑⲟⲟⲩ  ⲛⲁⲛⲟⲓ ⲁⲛ  ⲛ̅ⲟⲩϩⲁⲡ . ⲛⲉⲧϣⲓⲛⲉ  ⲇⲉ  ⲛ̅ⲥⲁⲠϫⲟⲉⲓⲥ  ⲛⲁⲛⲟⲓ  ϩ̅ⲛ̅ⲁⲅⲁⲑⲟⲛ  ⲛⲓⲙ . Ⲛⲁⲛⲟⲩⲟⲩϩⲏⲕⲉ  ⲉϥⲙⲟⲟϣⲉ  ϩ̅ⲛ̅ⲧⲉϥⲙⲛ̅ⲧⲙⲉ . ⲉϩⲟⲩⲉⲟⲩⲣⲙ̅ⲙⲁⲟ  ⲛ̅ⲣⲉϥϫⲓϭⲟⲗ . Ϣⲁⲣⲉⲡϣⲏⲣⲉ  ⲛ̅ⲥⲁⲃⲉ  ϩⲁⲣⲉϩ  ⲉⲡⲛⲟⲙⲟⲥ . ⲡⲉⲧϣⲟⲟⲡ  ⲇⲉ  ϩ̅ⲛ̅ⲟⲩⲙⲛⲧϣⲛⲁ  ⲉϥϯϣⲓⲡⲉ  ⲙ̅ⲡⲉϥⲉⲓⲱⲧ.  Ⲡⲉⲧⲧⲁϣⲟ  ⲛ̅ⲧⲉϥⲙⲛ̅ⲧⲣⲙ̅ⲙⲁⲟ  ϩ̅ⲛ̅ⲟⲩϫⲓⲙⲏⲥⲉ . ⲛⲉⲧⲛⲁ  ⲛ̅ⲛ̅ϩⲏⲕⲉ  ⲛⲉⲧⲛⲁⲧⲥⲓⲟⲟⲩ  ⲙ̅ⲙⲟⲥ . Ⲡⲉⲧⲛⲁⲣⲓⲕⲉ ⲉⲃⲟⲗ  ⲙ̅ⲡⲉϥⲙⲁⲁϫⲉ  ⲉⲧⲙ̅ⲥⲱⲧⲙ̅  ⲉⲡⲛⲟⲙⲟⲥ  ⲡⲉϣⲗⲏⲗ  ⲙ̅ⲡⲁⲓ  ⲃⲏⲧ.  Ⲡⲉⲧⲥⲱⲣ̅ⲙ̅  ⲛ̅ⲛⲉⲧⲥⲟⲩⲧⲱⲛ  ϩ̅ⲛ̅ⲟⲩϩⲓⲏ  ⲉⲥϩⲟⲟⲩ. ⲉϥⲛⲁϩⲉ  ⲛ̅ⲧⲟϥ  ⲉϩⲣⲁⲓ  ⲉϩⲉⲛⲡⲉⲑⲟⲟⲩ . ⲛⲉⲧⲟⲩⲁⲁⲃ  ⲇⲉ  ⲛⲁⲡⲱϣ  ⲉϫⲱⲟⲩ  ⲛ̅ⲙ̅ⲡⲉⲧⲛⲁⲛⲟⲩⲟⲩ . Ⲡⲣⲱⲙⲉ  ⲛ̅ⲣⲙ̅ⲙⲁⲟ  ⲟ  ⲛ̅ⲥⲁⲃⲉ  ⲛⲁϥ  ⲟⲩⲁⲁϥ . ⲡϩⲏⲕⲉ  ⲇⲉ  ⲛ̅ⲥⲁⲃⲉ  ⲛⲁϭ̅ⲛ̅ⲁⲣⲓⲕⲉ  ⲉⲣⲟϥ . Ϣⲁⲣⲉⲟⲩⲛⲟϭ  ⲛ̅ⲉⲟⲟⲩ  ϣⲱⲡⲉ  ⲉⲧⲃⲉⲧⲃⲟⲏⲑⲓⲁ  ⲛ̅ⲛ̅ⲇⲓⲕⲁⲓⲟⲥ . ϣⲁⲣⲉⲛ̅ⲣⲱⲙⲉ  ⲇⲉ  ⲧⲁⲕⲟ  ϩ̅ⲛ̅ⲙ̅ⲙⲁ  ⲛ̅ⲛ̅ⲁⲥⲉⲃⲏⲥ . Ⲡⲉⲧϩⲱⲃⲥ̅  ⲇⲉ  ⲛ̅ⲧⲉϥⲙⲛ̅ⲧϣⲁϥⲧⲉ  ⲛⲁⲥⲟⲟⲩⲧ̅ⲛ̅  ⲁⲛ. ⲡⲉⲧϫⲱ  ⲇⲉ  ⲙ̅ⲙⲟⲥ  ⲁⲩⲱ  ⲉⲧϫⲡⲓⲟ  ⲥⲉⲛⲁⲙⲉⲣⲓⲧϥ̅ . Ⲛⲁⲓⲁⲧϥ̅  ⲙ̅ⲡⲣⲱⲙⲉ  ⲉⲧϯⲥⲟ  ⲉⲟⲩⲟⲛ  ⲛⲓⲙ  ⲉⲧⲃⲉⲑⲟⲧⲉ . ⲡⲛⲁϣ̅ⲧ̅ϩⲏⲧ  ⲇⲉ  ⲛ̅ⲧⲟϥ . ⲛⲁϩⲉ  ⲉϩⲣⲁⲓ  ⲉϩⲉⲛⲡⲉⲑⲟⲟⲩ.  Ⲟⲩⲙⲟⲩⲓ  ⲡⲉ  ⲉϥϩⲕⲁⲉⲓⲧ  ⲁⲩⲱ  ⲟⲩⲱⲛϣ̅  ⲉϥⲟⲃⲉ  ⲡⲉ  ⲟⲩϩⲏⲕⲉ  ⲉϥⲛⲁⲣ̅ϫⲟⲉⲓⲥ  ⲉⲩⲙⲏⲏϣⲉ  ⲛ̅ϩⲏⲕⲉ . Ⲟⲩⲣ̅ⲣⲟ  ⲉϥϣⲁⲁⲧ  ⲛ̅ⲭⲣⲏⲙⲁ  ⲟⲩⲛⲟϭ  ⲛ̅ⲣⲉϥϫⲓⲛ̅ϭⲟⲛⲥ̅  ⲡⲉ . Ⲛⲉⲧⲙⲟⲥⲧⲉ  ⲇⲉ  ⲛ̅ϫⲓⲛϭⲟⲛⲥ̅ . ⲛⲁⲱⲛϩ̅  ϩ̅ⲛ̅ⲟⲩⲛⲟϭ  ⲛ̅ⲟⲩⲟⲉⲓϣ .  Ⲡⲉⲧⲛⲁϣⲡ̅ⲧⲱⲣⲉ  ⲛ̅ⲟⲩⲣⲱⲙⲉ  ⲉϥϩ̅ⲛ̅ⲟⲩⲗⲟⲓϭⲉ  ⲛ̅ϩⲱⲧⲃ̅  ϥⲛⲁⲡⲱⲧ  ⲁⲩⲱ  ⲛ̅ϥ̅ⲧⲁϫⲣⲏⲩ  ⲁⲛ. Ⲡⲉⲧⲙⲟⲟϣⲉ  ⲇⲓⲕⲁⲓⲱⲥ  ⲥⲉⲛⲁⲃⲟⲏⲑⲓ  ⲉⲣⲟϥ . ⲡⲉⲧⲙⲟⲟϣⲉ  ⲇⲉ  ϩⲓϩⲉⲛϩⲓⲟⲟⲩⲉ  ⲉⲩϭⲟⲟⲙⲉ  ⲛⲁϭⲗⲟⲙⲗⲙ̅ .  Ⲡⲉⲧⲣ̅ϩⲱⲃ  ⲉⲡⲉϥⲕⲁϩ  ⲛⲁⲥⲉⲓ  ⲛ̅ⲟⲉⲓⲕ . ⲡⲉⲧⲡⲏⲧ  ⲇⲉ  ⲛ̅ⲥⲁⲟⲩⲱⲥϥ̅  ⲛⲁⲥⲉⲓⲧⲙⲛ̅ⲧϩⲏⲕⲉ .  Ⲡⲣⲱⲙⲉ  ⲛ̅ⲥⲁⲃⲉ  ⲛⲁϫⲓⲥⲙⲟⲩ  ⲉⲙⲁⲧⲉ. ⲡⲣⲉϥⲣ̅ⲡⲉⲑⲟⲟⲩ  ⲇⲉ  ⲛⲁⲣ̅ⲃⲟⲗ  ⲁⲛ  ⲉⲡⲉⲑⲟⲟⲩ .  Ⲡⲉⲧϣⲓⲡⲉ  ϩⲏⲧⲟⲩ  ⲛ̅ⲛ̅ϩⲟ  ⲛ̅ⲛ̅ⲣⲉϥϫⲓⲛϭⲟⲛⲥ̅  ⲛⲁⲥⲟⲟⲩⲧⲛ̅  ⲁⲛ . ⲡⲁⲓ  ⲅⲁⲣ  ⲛ̅ⲧⲉⲓⲙⲓⲛⲉ  ⲛⲁϯⲟⲩⲣⲱⲙⲉ  ϩⲁⲟⲩⲟⲉⲓⲕ . Ϣⲁϥϭⲉⲡⲏ  ⲉⲣ̅ⲣ̅ⲙ̅ⲙⲁⲟ  ⲛ̅ϭⲓⲟⲩⲣⲱⲙⲉ  ⲛ̅ⲉⲓⲉⲣⲃⲟⲟⲛⲉ . ⲁⲩⲱ  ⲛ̅ϥ̅ⲥⲟⲟⲩⲛ  ⲁⲛ  ϫⲉ  ⲟⲩⲛⲁⲏⲧ  ⲡⲉⲧⲛⲁⲣ̅ϫⲟⲉⲓⲥ  ⲉϫⲱϥ .  Ⲡⲉⲧⲧⲁϣⲟ  ⲛ̅ⲧⲉϥⲙⲛ̅ⲧⲣ̅ⲙ̅ⲙⲁⲟ  ϩⲛⲟⲩϫⲓⲙⲏⲥⲉ . ⲉϥⲛⲁⲥⲟⲟⲩϩⲥ̅  ⲉϩⲟⲩⲛ  ⲙ̅ⲡⲉⲧⲛⲁ  ⲛ̅ⲛ̅ϩⲏⲕⲉ . Ⲡⲉⲧϫⲡⲓⲟ  ⲛⲟⲩⲣⲱⲙⲉ  ϩ̅ⲛ̅ⲛⲉϩⲓⲟⲟⲩⲉ  ϥⲛⲁϭⲛ̅ϩⲙⲟⲧ  ⲉϩⲟⲩⲉⲡⲉⲧϯϩⲙⲟⲧ  ϩ̅ⲙ̅ⲡⲉϥⲗⲁⲥ . Ⲡⲉⲧϫⲓ  ⲙ̅ⲡⲉϥⲉⲓⲱⲧ  ⲛ̅ϭⲟⲛ̅ⲥ̅   ⲙ̅ⲛ̅ⲧⲉϥⲙⲁⲁⲩ  ⲉϥⲙⲉⲉⲩⲉ  ϫⲉ  ⲛ̅ϯⲣ̅ⲛⲟⲃⲉ  ⲁⲛ . ⲟⲩⲕⲟⲓⲛⲱⲛⲟⲥ  ⲡⲉ  ⲡⲁⲓ  ⲛ̅ⲟⲩⲣⲱⲙⲉ  ⲛ̅ⲁⲥⲉⲃⲏⲥ.  Ϣⲁⲣⲉⲟⲩⲣⲱⲙⲉ  ⲛ̅ⲁⲧⲥⲉⲓ  ⲕⲣⲓⲛⲉ  ⲉⲓⲕⲏ . ⲡⲉⲧⲕⲱ  ⲇⲉ  ⲛ̅ϩⲏⲧϥ  ⲉⲠϫⲟⲉⲓⲥ  ⲛⲁϣⲱⲡⲉ  ϩ̅ⲛ̅ⲟⲩϩⲁⲣⲉϩ . Ⲡⲉⲧⲕⲱ  ⲛ̅ϩ̅ⲧⲏϥ  ⲉⲩⲙⲛ̅ⲧ̅ⲛⲁϣ̅ⲧ̅ϩⲏⲧ  ⲡⲁⲓ  ⲟⲩⲁⲑⲏⲧ  ⲡⲉ . ⲡⲉⲧⲙⲟⲟϣⲉ  ⲇⲉ  ϩ̅ⲛ̅ⲟⲩⲥⲟⲫⲓⲁ  ⲛⲁⲟⲩϫⲁⲓ .  Ⲡⲉⲧϯ  ⲛ̅ⲛϩⲏⲕⲉ  ⲛⲁϭⲣⲱϩ  ⲁⲛ . Ⲡⲉⲧⲕⲧⲟ  ⲇⲉ  ⲛ̅ⲛⲉϥⲃⲁⲗ  ⲉⲃⲟⲗ  ⲙ̅ⲙⲟⲟⲩ  ⲛⲁϣⲱⲱⲧ  ⲉⲙⲁⲧⲉ . Ϣⲁⲣⲉⲛ̅ⲇⲓⲕⲁⲓⲟⲥ  ϩⲟϫϩϫ̅  ϩ̅ⲛ̅ⲙⲁ  ⲛ̅ⲛ̅ⲁⲥⲉⲃⲏⲥ . ϣⲁⲩⲁϣⲁⲓ  ⲇⲉ  ϩ̅ⲙ̅ⲡⲧⲁⲕⲟ  ⲛ̅ⲛⲉⲧ̅ⲙ̅ⲙⲁⲩ.
 
Ⲕ̅Ⲑ̅. Ⲛⲁⲛⲟⲩⲟⲩⲣⲱⲙⲉ  ⲉϥϫⲡⲓⲟ  ⲉⲩⲛⲁϣ̅ⲧ̅ⲙⲁⲕϩ̅ . ϥⲛⲁϫⲉⲣⲟ  ⲅⲁⲣ  ϩ̅ⲛ̅ⲟⲩϣⲥ̅ⲛⲉ  ⲛ̅ϥ̅ⲧⲙ̅ⲧⲁⲗϭⲟ. Ⲛ̅ⲗⲁⲟⲥ  ⲛⲁⲉⲩⲫⲣⲁⲛⲉ  ⲉⲩϣⲁϫⲉ  ⲉⲛⲇⲓⲕⲁⲓⲟⲥ . ⲛ̅ⲣⲱⲙⲉ  ⲇⲉ  ⲛⲁϩⲟϫϩ̅ϫ  ϩ̅ⲛ̅ⲧⲙⲛ̅ⲧϫⲟⲉⲓⲥ  ⲛ̅ⲛ̅ⲁⲥⲉⲃⲏⲥ . Ⲡⲓⲱⲧ  ⲙ̅ⲡⲣⲱⲙⲉ  ⲉⲧϣⲓⲛⲉ  ⲛ̅ⲥⲁⲧⲥⲟⲫⲓⲁ  ⲛⲁⲉⲩⲫⲣⲁⲛⲉ . ⲡⲉⲧⲙⲟⲟϣⲉ  ⲇⲉ  ϩ̅ⲛ̅ⲟⲩⲡⲟⲣⲛⲓⲁ  ⲛⲁⲧⲁⲕⲉⲧⲉϥⲙⲛ̅ⲧⲣⲙ̅ⲙⲁⲟ. Ϣⲁⲣⲉⲟⲩⲣ̅ⲣⲟ  ⲛ̅ⲇⲓⲕⲁⲓⲟⲥ  ⲧⲟⲩⲛⲉⲥⲟⲩⲭⲱⲣⲁ .  ⲛ̅ⲧⲉⲟⲩⲣⲱⲙⲉ  ⲇⲉ  ⲙⲡⲁⲣⲁⲛⲟⲙⲟⲥ  ϣⲣ̅ϣⲱⲣⲥ.  Ⲡⲉⲧⲥⲟⲃⲧⲉ  ⲛⲟⲩϣⲛⲉ   ⲛ̅ⲛⲁϩⲣ̅ⲙⲡⲉϥϣⲃⲏⲣ . ⲉϥⲛⲁⲥⲟⲣϥ̅  ⲉⲃⲟⲗ  ⲉⲛⲉϥⲟⲩⲉⲣⲏⲧⲉ  ⲙⲙⲓⲛ  ⲙ̅ⲙⲟϥ .  Ⲟⲩⲛⲟⲩⲛⲟϭ  ⲛ̅ϭⲟⲣϭⲥ  ϣⲟⲟⲡ  ⲉⲡⲣⲱⲙⲉ  ⲛ̅ⲣⲉϥⲣ̅ⲛⲟⲃⲉ . ⲡⲇⲓⲕⲁⲓⲟⲥ  ⲇⲉ  ⲛⲁϣⲱⲡⲉ  ϩ̅ⲛ̅ⲟⲩⲣⲁϣⲉ  ⲙ̅ⲛ̅ⲟⲩⲟⲩⲛⲟϥ . Ⲡⲇⲓⲕⲁⲓⲟⲥ  ⲥⲟⲟⲩⲛ  ⲉⲕⲣⲓⲛⲉ  ⲛ̅ⲛ̅ϩⲏⲕⲉ . ⲡⲁⲥⲉⲃⲏⲥ  ⲇⲉ  ⲛⲁⲉⲓⲙⲉ  ⲁⲛ  ⲉⲡⲥⲟⲟⲩⲛ . ⲁⲩⲱ  ⲙ̅ⲛ̅ⲧⲉⲡϩⲏⲕⲉ  ϩⲏⲧ  ⲛ̅ⲥⲟⲟⲩⲛ . Ϣⲁⲣⲉϩⲉⲛⲣⲱⲙⲉ  ⲉⲩϩⲟⲟⲩ  ⲣⲉⲕϩ̅ⲟⲩⲡⲟⲗⲓⲥ.  ϣⲁⲣⲉⲛ̅ⲥⲟⲫⲟⲥ  ⲇⲉ  ⲕⲧⲟ  ⲉⲃⲟⲗ  ⲛ̅ⲟⲩⲟⲣⲅⲏ .  Ⲡⲣⲱⲙⲉ  ⲛ̅ⲥⲟⲫⲟⲥ  ⲛⲁⲕⲣⲓⲛⲉ  ⲛ̅ⲛ̅ϩⲉⲑⲛⲟⲥ . ϣⲁⲩⲥⲱⲃⲉ  ⲇⲉ  ⲛ̅ⲥⲁⲡⲣⲉϥⲣ̅ⲛⲟⲃⲉ  ⲉϥϣⲁⲛϭⲱⲛⲧ̅.  Ϣⲁⲣⲉⲛ̅ⲣⲱⲙⲉ  ⲛ̅ⲥⲛⲟϥ  ⲙⲉⲥⲧⲉⲡⲉⲧⲟⲩⲁⲁⲃ . ϣⲁⲣⲉⲛⲉⲧⲥⲟⲩⲧⲱⲛ  ⲇⲉ  ϣⲓⲛⲉ  ⲛ̅ⲥⲁⲧⲉϥⲯⲩⲭⲏ.  Ϣⲁⲣⲉⲡⲁⲑⲏⲧ  ⲡⲉϩ̅ⲧ̅ⲡⲉϥϭⲱⲛ̅ⲧ̅  ⲉⲃⲟⲗ  ⲧⲏⲣϥ̅ . ⲡⲥⲟⲫⲟⲥ  ⲇⲉ  ϣⲁϥⲛ̅ⲧϥ̅  ⲉⲃⲟⲗ  ϣⲏⲙ  ϣⲏⲙ . Ⲟⲩⲣ̅ⲣⲟ  ⲏϥⲥⲱⲧⲙ̅  ⲉⲩϣⲁϫⲉ  ⲛ̅ϫⲓⲛϭⲟⲛⲥ̅ . ϩⲉⲛⲡⲁⲣⲁⲛⲟⲙⲟⲥ  ⲧⲏⲣⲟⲩ  ⲛⲉⲧϣⲙ̅ϣⲉ  ⲛⲁϥ . Ⲡⲉⲧϯⲉⲙⲏⲥⲉ  ⲙⲛⲡⲉⲧϫⲓ  ⲁⲩⲧⲱⲙⲛ̅ⲧ̅  ⲉⲛⲉⲩⲉⲣⲏⲩ. Ⲡⲛⲟⲩⲧⲉ  ⲇⲉ  ⲛⲁϭⲙ̅ⲡⲉⲩϣⲓⲛⲉ  ⲙ̅ⲡⲉⲥⲛⲁⲩ . Ⲟⲩⲣ̅ⲣⲟ  ⲉϥⲕⲣⲓⲛⲉ  ⲛ̅ⲛ̅ϩⲏⲕⲉ  ϩ̅ⲛ̅ⲟⲩⲙⲉ . ⲡⲉϥⲑⲣⲟⲛⲟⲥ  ⲛⲁϣⲱⲡⲉ  ⲉⲩⲙⲛ̅ⲧⲙ̅ⲛ̅ⲧⲣⲉ.  Ϣⲁⲣⲉⲛⲥⲏϣⲉ  ⲙ̅ⲛ̅ⲛⲉϫⲡⲓⲟ  ϯ  ⲛ̅ⲟⲩⲥⲟⲫⲓⲁ . ⲡϣⲏⲣⲉ  ⲇⲉ  ⲉⲧⲡⲗⲁⲛⲁ  ⲛⲁϯϣⲓⲡⲉ  ⲙ̅ⲡⲉϥⲉⲓⲱⲧ. Ϣⲁⲣⲉⲛ̅ⲛⲟⲃⲉ  ⲁϣⲁⲓ  ϩ̅ⲙ̅ⲡⲁϣⲁⲓ  ⲛⲛ̅ⲁⲥⲉⲃⲏⲥ . ⲉⲣϣⲁⲛⲛⲏ  ⲇⲉ  ϩⲉ  ϣⲁⲣⲉⲛ̅ⲇⲓⲕⲁⲓⲟⲥ  ⲣ̅ϩⲟⲧⲉ . ϯⲥⲃⲓⲟ  ⲙ̅ⲡⲉⲕϣⲏⲣⲉ  ⲧⲁⲣⲉϥϯⲟⲩⲛⲟϥ  ⲛⲁⲕ . ⲁⲩⲱ  ⲛ̅ϥ̅ϯ  ⲛ̅ⲟⲩⲧⲣⲩⲫⲏ  ⲛ̅ⲧⲉⲕⲯⲩⲭⲏ . Ⲙ̅ⲛ̅ⲛⲟϭ  ⲛⲁϣⲱⲡⲉ  ⲙ̅ⲡϩⲉⲑⲛⲟⲥ  ⲙ̅ⲡⲁⲣⲁⲛⲟⲙⲟⲥ.  ⲛⲁⲓⲁⲧϥ  ⲇⲉ  ⲙ̅ⲡⲉⲧϩⲁⲣⲉϩ  ⲉⲡⲛⲟⲙⲟⲥ .  Ⲙ̅ⲛ̅ⲟⲩϩⲙ̅ϩⲁⲗ  ⲉϥⲛⲁϣ̅ⲧ̅  ⲛⲁϫⲓⲥⲃⲱ  ϩ̅ⲛ̅ϩⲉⲛϣⲁϫⲉ . ⲉϥϣⲁⲛⲛⲟⲓ  ⲟⲛ  ⲛ̅ϥ̅ⲛⲁⲥⲱⲧⲙ̅  ⲁⲛ.  Ⲉⲕϣⲁⲛⲛⲁⲩ  ⲉⲩⲣⲱⲙⲉ  ⲉϥϭⲉⲡⲏ  ⲉϣⲁϫⲉ  ⲉⲓⲙⲉ  ϫⲉ  ⲟⲩⲛⲧⲉⲡⲁⲑⲏⲧϩⲉⲗⲡⲓⲥ  ⲉϩⲟⲩⲉⲣⲟϥ. Ⲡⲉⲧⲥⲡⲁⲧⲁⲗⲁ  ϫⲓⲛⲧⲉϥⲙⲛ̅ⲧⲕⲟⲩⲓ  ⲛⲁⲣ̅ϩ̅ⲙ̅ϩⲁⲗ . ⲙ̅ⲛ̅ⲛ̅ⲥⲱⲥ  ⲇⲉ  ϥⲛⲁⲙ̅ⲕⲁϩ  ⲛ̅ϩⲏⲧ  ⲉϫⲱϥ  ⲟⲩⲁⲁϥ . Ϣⲁⲣⲉⲟⲩⲣⲱⲙⲉ  ⲛ̅ⲣⲉϥϭⲱⲛ̅ⲧ̅  ⲧⲟⲩⲛⲉⲥⲟⲩϯⲧⲱⲛ . ϣⲁⲣⲉⲡⲣⲱⲙⲉ  ⲇⲉ  ⲛ̅ϩⲁⲕ  ⲑ̅ⲙ̅ⲥⲉⲡⲛⲟⲃⲉ . Ϣⲁⲣⲉⲡⲥⲱϣ  ⲇⲉ  ⲑⲃ̅ⲃⲓⲉⲡⲣⲱⲙⲉ . ⲡⲉⲟⲟⲩ  ⲇⲉ  ⲛⲁⲧⲟⲩⲛⲉⲥⲡⲉⲧⲑⲃ̅ⲃⲓⲏⲩ .   Ⲡⲉⲧϫⲓⲧⲟ  ⲙ̅ⲛ̅ⲟⲩⲣⲉϥϫⲓⲟⲩⲉ  ⲉϥⲙⲟⲥϩⲧⲉ  ⲛ̅ⲧⲉϥⲯⲩⲭⲏ . ⲉⲩϣⲁⲛⲥⲙⲓⲛⲉ  ⲇⲉ  ⲛ̅ⲟⲩⲁⲛⲁϣ  ⲛ̅ⲥⲉⲧ̅ⲙ̅ⲟⲩⲱⲛϩ̅.  Ⲥⲉⲛⲁϩⲉ  ⲛ̅ⲥⲉϫⲓϣⲓⲡⲉ  ϫⲉ  ⲁⲩⲣ̅ϩⲟⲧⲉ  ϩⲏⲧⲟⲩ   ⲛ̅ⲛ̅ⲣⲱⲙⲉ . ⲛⲁⲓⲁⲧϥ  ⲇⲉ  ⲙⲡⲉⲧⲣ̅ϩⲟⲧⲉ  ϩⲏⲧϥ̅  ⲙ̅ⲡⲛⲟⲩⲧⲉ . ⲧⲙ̅ⲛ̅ⲧ̅ϣⲁϥⲧⲉ  ⲛⲁϯ  ⲛ̅ⲟⲩⲥⲗⲁⲁⲧⲉ  ⲙⲡⲣⲱⲙⲉ . ⲡⲉⲧⲛⲁϩⲧⲉ  ⲇⲉ  ⲉⲠϫⲟⲉⲓⲥ  ⲛⲁⲟⲩϫⲁⲓ .  Ϩⲁϩ  ⲛⲉⲧϣⲙ̅ϣⲉ ⲛ̅ⲛⲁϩⲣ̅ⲙ̅ⲡϩⲟ  ⲛ̅ⲛⲛⲟϭ . ⲉⲣⲉⲧⲙⲛ̅ⲧⲙⲉ  ⲇⲉ  ⲙ̅ⲡⲣⲱⲙⲉ  ⲛⲏⲩ  ⲉⲃⲟⲗ  ϩⲓⲧ̅ⲙ̅ⲡⲛⲟⲩⲧⲉ . Ⲟⲩⲃⲟⲧⲉ  ⲙ̅ⲡⲣⲉϥϫⲓⲛ̅ϭⲟⲛⲥ̅  ⲡⲉ  ⲡⲇⲓⲕⲁⲓⲟⲥ . ⲟⲩⲃⲟⲧⲉ  ⲇⲉ  ⲙ̅ⲡⲇⲓⲕⲁⲓⲟⲥ  ⲧⲉ  ⲧⲉϩⲓⲏ  ⲛ̅ⲛ̅ⲣⲉϥⲣ̅ⲛⲟⲃⲉ . ⲟⲩⲁⲕⲁⲑⲁⲣⲧⲟⲥ  ⲡⲉ  ⲡⲣⲱⲙⲉ  ⲛ̅ⲣⲉϥϫⲓⲛ̅ϭⲟⲛⲥ̅  ⲛ̅ⲛⲁϩⲣ̅ⲙ̅ⲡⲇⲓⲕⲁⲓⲟⲥ . ϥⲥⲟϣϥ̅  ⲛ̅ⲛⲁϩⲣ̅ⲙ̅ⲡⲁⲥⲉⲃⲏⲥ  ⲛ̅ϭⲓⲡⲣⲱⲙⲉ  ⲛ̅ⲇⲓⲕⲁⲓⲟⲥ :

Ⲛⲓⲙ  ⲡⲉⲧⲛⲁϩⲉ  ⲉⲩⲥϩⲓⲙⲉ  ⲛ̅ϫⲱⲱⲣⲉ . ⲧⲁⲓ  ⲇⲉ  ⲛⲧⲉⲓⲙⲓⲛⲉ  ⲧⲁⲓⲏⲩ   ⲉϩⲉⲛⲉⲛⲉ  ⲙ̅ⲙⲉ . Ⲡϩⲏⲧ  ⲙ̅ⲡⲉⲥϩⲁⲓ  ⲧⲏⲕ  ⲉϩⲣⲁⲓ  ⲉϫⲱⲥ . ⲧⲁⲓ  ⲛⲁϭⲣⲱϩ  ⲁⲛ  ⲙ̅ⲡⲟⲉⲓⲕ. Ⲥⲉⲓⲣⲉ  ⲅⲁⲣ  ⲙⲡⲉⲥϩⲁⲓ  ⲛ̅ϩⲉⲛⲡⲉⲧⲛⲁⲛⲟⲩⲟⲩ . ⲛ̅ϩⲉⲛⲡⲉⲑⲟⲟⲩ  ⲁⲛ . ⲛ̅ⲟⲩⲟⲉⲓϣ  ⲅⲁⲣ  ⲛⲓⲙ  ⲉⲥϭⲛ̅ⲥⲟⲣⲧ̅  ϩⲓⲙⲁϩⲉ  ϣⲁⲥⲧⲁⲙⲓⲟⲟⲩ  ⲛ̅ⲛⲉⲥϭⲓϫ ⲛ̅ϣⲁⲩ . Ⲁⲥⲉⲣⲑⲉ  ⲛ̅ⲛⲓϫⲟⲓ  ⲛ̅ⲉϣⲱⲧ  ⲉϩⲟⲩⲛ  ⲛ̅ⲛⲉⲛⲕⲁ  ⲛⲁⲥ  ⲙ̅ⲡⲟⲩⲉ . ⲁⲩⲱ  ϣⲁⲥⲧⲱⲟⲩⲛ  ⲛ̅ϭⲱⲣ̅ϩ̅  ⲛ̅ⲥ̅ϯϩⲣⲉ  ⲛ̅ⲛⲁⲡⲏⲓ . ⲁⲩⲱ  ϩⲱⲃ  ⲛ̅ⲛⲉⲥϩⲙ̅ϩⲁⲗ  ⲉⲥϣⲁⲛⲛⲁⲩ  ⲉⲩⲥⲱϣⲉ  ϣⲁⲥϣⲟⲡ̅ⲥ̅ . Ϣⲁⲥⲧⲱϭⲉ  ⲇⲉ  ⲛ̅ϩⲉⲛⲙⲁⲛⲉⲗⲟⲟⲗⲉ  ⲉⲃⲟⲗ  ϩⲛⲛⲕⲁⲣⲡⲟⲥ  ⲛ̅ⲛⲉⲥϭⲓϫ.  ⲉⲁⲥⲙⲟⲩⲣ  ⲛ̅ⲧⲉⲥϯⲡⲉ  ⲉⲙⲁⲧⲉ  ϩ̅ⲛ̅ⲟⲩϭⲟⲙ  ⲁⲥⲧⲁϫⲣⲉⲛⲉⲥϭⲃⲟⲓ  ⲉⲡⲉⲥϩⲱⲃ  ⲁⲥϫⲓϯⲡⲉ  ϫⲉ  ⲛⲁⲛⲟⲩⲡⲣ̅ϩⲱⲃ . ⲁⲩⲱ  ⲙⲉⲣⲉⲡⲉⲥϩⲏⲃⲥ̅  ϫⲉⲛⲁ  ⲛⲧⲉⲩϣⲏ  ⲧⲏⲣⲥ̅ . ⲁⲥⲥⲟⲩⲧ̅ⲛ̅ⲧⲉⲥϭⲓϫ  ⲉⲛⲉⲧⲉϣϣⲉ . ⲁⲩⲱ  ⲛⲉⲥϩⲓⲱⲙⲉ  ϣⲁⲥⲧⲁϫⲣⲟⲟⲩ  ⲉⲡⲉⲙⲛⲁⲓ . Ϣⲁⲥⲟⲩⲱⲛ  ⲛ̅ⲧⲟⲟⲧⲥ  ⲉⲩϩⲏⲕⲉ . ⲛ̅ⲥ̅ⲥⲟⲩⲧⲛⲟⲩⲕⲁⲣⲡⲟⲥ  ⲙ̅ⲡⲉⲧϣⲁⲁⲧ . Ⲙⲉⲣⲉⲡⲉⲥϩⲁⲓ  ϥⲓⲣⲟⲟⲩϣ  ϩⲁⲛⲁⲡⲏⲓ . ⲉϥϣⲁⲛⲱⲥⲕ  ϩⲛ̅ⲟⲩⲙⲁ  ⲛⲉⲧϩⲁϩⲧⲏⲥ  ⲅⲁⲣ  ⲧⲏⲣⲟⲩ  ϩⲟⲃⲥ.  Ⲁⲥⲧⲁⲙⲓⲉϩⲃⲥⲱ  ⲥ̅ⲛ̅ⲧⲉ  ⲙⲡⲉⲥϩⲁⲓ . ⲁⲩⲱ  ϩⲉⲛϩⲟⲓⲧⲉ  ⲛⲁⲥ  ⲉⲃⲟⲗ  ϩ̅ⲙ̅ⲡϣⲛⲥ  ⲙ̅ⲛ̅ⲡϫⲏϭⲉ .  Ϣⲁⲩϭⲱϣ̅ⲧ̅  ⲇⲉ  ⲛ̅ⲥⲁⲡⲉⲥϩⲁⲓ  ϩⲛⲙⲡⲩⲗⲏ  ⲉϥϣⲁⲛϩⲙⲟⲟⲥ  ϩⲛⲟⲩⲥⲟⲟⲩϩ̅ⲥ̅  ⲙ̅ⲛ̅ⲛ̅ϩⲗ̅ⲗⲟ . ⲁⲩⲱ  ⲛⲉⲧⲟⲩⲏϩ  ϩ̅ⲙ̅ⲡⲕⲁϩ . Ⲁⲥⲧⲁⲙⲓⲉϩⲉⲛⲥⲓⲛⲇⲱⲛ  ⲁⲥⲧⲁⲁⲩ  ⲉⲃⲟⲗ  ⲁⲩⲱ  ϩⲉⲛⲡⲉⲣⲓⲍⲱⲙⲁ  ⲛ̅ⲛⲉⲫⲟⲓⲛⲓⲝ .  Ⲁⲥϯ  ϩⲓⲱⲱⲥ  ⲛ̅ⲟⲩϭⲟⲙ  ⲙ̅ⲛ̅ⲟⲩⲉⲟⲟⲩ  ⲙ̅ⲡⲥ̅ⲟⲩⲱⲙ  ⲇⲉ  ⲛⲟⲉⲓⲕ  ⲙⲙⲛⲧⲣⲉϥϫⲛⲁⲁⲩ . ⲛⲉϩⲓⲟⲟⲩⲉ  ⲙⲡⲉⲥⲏⲓ  ϭⲏⲩ  ⲁⲩⲱ  ⲥⲛⲁⲉⲩⲫⲣⲁⲛⲉ  ⲛ̅ⲛⲉϩⲟⲟⲩ  ⲛϩⲁⲉ . Ⲥⲛⲁⲟⲩⲱⲛ  ⲛⲣⲱⲥ  ϩⲛⲟⲩⲙⲛⲧⲥⲁⲃⲉ  ⲁⲩⲱ  ϩⲙⲡⲛⲟⲙⲟⲥ . ⲛⲁⲛⲥⲙⲙⲉ  ⲙⲛⲙ̅ⲙⲛⲧⲛⲁ  ϩⲓⲡⲉⲥⲗⲁⲥ.  Ⲁⲥϯ  ϩⲓⲱⲱⲥ  ⲛⲟⲩϭⲟⲙ  ⲙⲛⲟⲩⲥⲁ . Ⲁⲛⲉⲥϣⲏⲣⲉ  ⲧⲱⲟⲩⲛ  ⲁⲩⲧⲙⲁⲓⲟⲥ . ⲁⲩⲱ  ⲁⲡⲉⲥϩⲁⲓ  ⲉⲧⲛⲁⲛⲟⲩϥ  ϯⲡⲉⲥⲥⲟⲉⲓⲧ . Ⲁϩⲁϩ  ⲛⲥϩⲓⲙⲉ  ϫⲡⲉⲟⲩⲙⲛⲧⲣⲙⲙⲁⲟ  ⲁϩⲁϩ  ⲣϩⲉⲛⲙⲛⲧϫⲱⲱⲣⲉ . ⲛⲧⲟ  ⲇⲉ  ⲁⲣϫⲓⲥⲉ  ⲉⲣⲟⲟⲩ  ⲧⲏⲣⲟⲩ . Ϩⲉⲛⲁⲣⲓⲥⲕⲉ  ⲛⲛⲟⲩϫ . ⲁⲩⲱ  ⲟⲩⲡⲉⲧϣⲟⲩⲉⲓⲧ  ⲡⲉ  ⲡⲥⲁ  ⲛⲟⲩⲥϩⲓⲙⲉ . ⲥⲉⲛⲁⲥⲙⲟⲩ  ⲅⲁⲣ ⲉⲩⲥϩⲓⲙⲉ  ⲙⲙⲁⲓⲛⲟⲩⲧⲉ. Ⲙⲁⲣⲉⲥⲥⲙⲟⲩ  ⲇⲉ  ⲛⲧⲟⲥ  ⲉⲑⲟⲧⲉ  ⲙⲠϫⲟⲉⲓⲥ .  ϯ  ⲛⲁⲥ  ⲉⲃⲟⲗ  ϩⲛⲛⲕⲁⲣⲡⲟⲥ ⲛⲛⲉⲥϭⲓϫ . ϫⲉ  ⲉⲩⲉϫⲱ  ⲙⲡⲥⲟⲉⲓⲧ  ⲛⲛⲉⲥϩⲃⲏⲩⲉ  ϩⲛⲙⲙⲁ  ⲛⲃⲱⲕ  ⲉϩⲟⲩⲛ  ⲛⲛⲥⲟⲟⲩϩ̅ⲥ̅ . ⲁⲩⲱ  ⲙⲁⲣⲟⲩⲥⲙⲟⲩ  ⲉⲡⲉⲥϩⲁⲓ  ϩⲛⲙⲡⲩⲗⲏ            :
 

ⲙ̅ⲡⲁⲣⲣⲟⲓⲙⲓⲁ  ⲛ̅ⲥⲟⲗⲟⲙⲱⲛ

---