ⲠϪⲰⲰⲘⲈ  Ⲛ̅ϨⲢⲞⲨⲐ


Ⲁⲥϣⲱⲡⲉ  ⲇⲉ ⲛ̅ⲧⲉⲣⲉⲛⲉⲕⲣⲓⲧⲏⲥ  ϩⲙⲟⲟⲥ  ⲉϯϩⲁⲡ̅  ⲁⲩϩⲉⲃⲱⲱⲛ  ϣⲱⲡⲉ  ϩⲙ̅ⲡⲕⲁϩ . ⲁⲩⲱ  ⲁϥⲃⲱⲕ  ⲛ̅ϭⲓⲟⲩⲣⲱⲙⲉ  ⲉⲩⲉⲃⲟⲗ ⲡⲉ  ϩⲛ̅Ⲃⲏⲑⲗⲉⲉⲙ  ⲙ̅ⲡⲕⲁϩ  ⲛ̅Ⲓⲟⲩⲇⲁ ⲉⲧⲣⲉϥϭⲟⲓⲗⲉ  ⲉⲧⲥⲱϣⲉ  ⲙ̅Ⲙⲱⲁⲃ  ⲛ̅ⲧⲟϥ  ⲙⲛ̅ⲧⲉϥⲥϩⲓⲙⲉ  ⲙⲛ̅ⲡⲉϥϣⲏⲣⲉ  ⲥⲛⲁⲩ. ⲃ̅. Ⲁⲩⲱ  ⲡⲣⲁⲛ  ⲙ̅ⲡⲣⲱⲙⲉ  ⲡⲉ  Ⲁⲃⲓⲙⲉⲗⲉⲭ . ⲁⲩⲱ  ⲡⲣⲁⲛ  ⲛ̅ⲧⲉϥⲥϩⲓⲙⲉ  ⲧⲉ  Ⲛⲟⲉⲙⲓⲛ . Ⲡⲣⲁⲛ  ⲇⲉ  ⲙ̅ⲡⲉϥϣⲏⲣⲉ  ⲥⲛⲁⲩ  ⲡⲉ  Ⲙⲁⲁⲗⲱⲛ  ⲙⲛ̅Ⲭⲉⲗⲁⲓⲱⲛ . ϩⲉⲛ̅Ⲉⲫⲣⲁⲑⲁⲓⲟⲥ  ⲉⲃⲟⲗ  ϩⲛ̅Ⲃⲏⲑⲗⲉⲉⲙ̅  ⲙ̅ⲡⲕⲁϩ  ⲛ̅Ⲓⲟⲩⲇⲁ . Ⲁⲩⲱ   ⲁⲩⲉⲓ  ⲉϩⲣⲁⲓ  ⲉⲧⲥⲱϣⲉ  ⲙ̅Ⲙⲱⲁⲃ  ⲁⲩϭⲱ  ⲙ̅ⲡⲙⲁ  ⲉⲧⲙ̅ⲙⲁⲩ.  ⲅ̅. Ⲁⲩⲱ  ⲁϥⲙⲟⲩ  ⲛ̅ϭⲓⲀⲃⲓⲙⲉⲗⲉⲭ  ⲡϩⲁⲓ  ⲛ̅Ⲛⲟⲉⲙⲓⲛ :  ⲁⲥϣⲱϫⲡ̅  ⲇⲉ  ⲛ̅ⲧⲟⲥ  ⲙⲛ̅ⲡⲉⲥϣⲏⲣⲉ  ⲥⲛⲁⲩ. ⲇ̅. Ⲁⲩⲱ  ⲁⲩϫⲓ  ⲛⲁⲩ  ⲛ̅ϩⲉⲛϩⲓⲟⲙⲉ  ⲉⲃⲟⲗ  ϩⲙ̅ⲡⲕⲁϩ  ⲙ̅Ⲙⲱⲁⲃ ⲉⲡⲣⲁⲛ  ⲛ̅ⲧⲟⲩⲓ  ⲙ̅ⲙⲟⲟⲩ  ⲡⲉ  Ⲟⲣⲫⲁ.  ⲁⲩⲱ  ⲡ̅ⲣⲁⲛ  ⲛ̅ⲧⲙ̅ⲉϩⲥⲛ̅ⲧⲉ  ⲧⲉ  Ϩⲣⲟⲩⲑ. Ⲁⲩⲟⲩⲱϩ  ϩⲙ̅ⲡⲙⲁ  ⲉⲧⲙ̅ⲙⲁⲩ  ⲛ̅ⲁⲙⲏⲧⲉ  ⲛ̅ⲣⲟⲙⲡⲉ.  Ⲁⲩⲱ  ⲁⲩⲙⲟⲩ  ⲙ̅ⲡⲉⲥⲛⲁⲩ  Ⲙⲁⲗⲗⲱⲛ  ⲙⲛ̅Ⲭⲁⲓⲗⲉⲱⲛ . ⲧⲉⲥϩⲓⲙⲉ ⲇⲉ  ⲁⲥⲣ̅ⲭⲏⲣⲁ  ⲉⲁⲥⲣ̅ⲁⲧϩⲁⲓ  ⲁⲩⲱ  ⲁⲥⲣ̅ⲁⲧ̅ϣⲏⲣⲉ . Ⲋ.

Ⲁⲥⲧⲱⲟⲩⲛ ⲇⲉ  ⲛ̅ⲧⲟⲥ  ⲙⲛ̅ⲧⲉⲥϣⲉⲗⲉⲉⲧ ⲥⲛ̅ⲧⲉ  ⲁⲩⲕⲧⲟⲟⲩ  ⲉⲃⲟⲗ  ϩⲛ̅ⲧⲥⲱϣⲉ  ⲙ̅Ⲙⲱⲁⲃ . ⲉⲃⲟⲗϫⲉ  ⲁⲩⲥⲱⲧⲙ̅  ϩⲛ̅ⲧⲥⲱϣⲉ ⲙ̅Ⲙⲱⲁⲃ ϫⲉ  ⲁⲠϫⲟⲉⲓⲥ  ϭⲙ̅ⲡϣⲓⲛⲉ ⲙ̅ⲡⲉϥⲗⲁⲟⲥ  ⲉⲧⲣⲉϥϯⲟⲉⲓⲕ ⲛⲁⲩ. ⲍ̅. Ⲁⲩⲱ  ⲁⲥⲉ̅ⲓ  ⲉⲃⲟⲗ  ϩⲙ̅ⲡⲙⲁ  ⲉⲧⲥ̅ⲛ̅ϩⲏⲧϥ̅  ⲛ̅ⲧⲟⲥ ⲙⲛ̅ⲧⲉⲥϣⲉⲗⲉⲉⲧ ⲥⲛ̅ⲧⲉ  ⲛⲙ̅ⲙⲁⲥ   : Ⲁⲩⲙⲟⲟϣⲉ  ϩⲛ̅ⲧⲉϩⲓⲏ  ⲉⲧⲣⲉⲩⲕⲧⲟⲟⲩ  ⲉϩⲣⲁⲓ ⲉⲡⲕⲁϩ ⲛ̅Ⲓⲟⲩⲇⲁ. ⲏ̅. Ⲛⲟⲉⲙⲓⲛ ⲇⲉ ⲡⲉϫⲁⲥ ⲛ̅ⲧⲉⲥϣⲉⲗⲉⲉⲧ ⲥⲛ̅ⲧⲉ . ϫⲉ ⲃⲱⲕ ⲛ̅ⲧⲉⲧⲛ̅ⲕⲧⲉⲧⲏⲩⲧⲛ̅ ⲛ̅ϭⲓⲧⲟⲩⲓ ⲧⲟⲩⲉⲓ ⲙ̅ⲙⲱⲧⲛ̅ ⲉⲡⲏⲓ ⲛ̅ⲧⲉⲥⲙⲁⲁⲩ. ⲑ̅. Ⲁⲩⲱ ⲉⲣⲉⲠϫⲟⲉⲓⲥ  ⲉⲓⲣⲉ  ⲛ̅ⲟⲩⲛⲁ ⲛⲙ̅ⲙⲏⲧⲛ̅  ⲕⲁⲧⲁⲑⲉ  ⲉⲛⲧⲁⲧⲉⲧⲛ̅ⲉ̅ⲓⲣⲉ  ⲙⲛ̅ⲛⲉⲛⲧⲁⲩⲙⲟⲩ  ⲁⲩⲱ ⲛⲙ̅ⲙⲁⲓ ϩⲱ : ⲉⲣⲉⲠϫⲟⲉⲓⲥ ⲧⲱⲱⲃⲉ  ⲛⲏⲧⲛ̅  ⲛ̅ⲧⲉⲧⲟⲩⲓ  ⲧⲟⲩⲉⲓ  ⲙ̅ⲙⲱⲧⲛ̅ ϭⲓⲛⲉ  ⲛ̅ⲟⲩⲁⲛⲁⲡⲁⲩⲥⲓⲥ  ϩⲙ̅ⲡⲏⲓ ⲙ̅ⲡⲉⲥϩⲁⲓ . ⲁⲩⲱ  ⲁⲥϯⲡⲓ ⲉⲣⲱⲟⲩ.  Ⲁⲩϥⲓϩⲣⲁⲩ ⲇⲉ ⲉⲃⲟⲗ  ⲁⲩⲣⲓⲙⲉ  ⲉⲩϫⲱ ⲙ̅ⲙⲟⲥ  ⲛⲁⲥ  ϫⲉ  ⲉⲛⲁⲕⲧⲟⲛ  ⲛⲙ̅ⲙⲉ  ⲉⲣⲁⲧϥ̅  ̅ⲙⲡⲟⲩⲗⲁⲟⲥ : ⲓ̅ⲁ̅. Ⲡⲉϫⲉⲛⲟⲉⲙⲓⲛ ⲛⲁⲩ  ϫⲉ  ⲕⲧⲉⲧⲏⲩⲧⲛ̅ ⲛⲁϣⲉⲉⲣⲉ  ⲛ̅ⲧⲉⲧⲛ̅ⲃⲱⲕ . ⲁⲩⲱ  ⲉⲧⲉⲧⲛⲁⲉ̅ⲓ  ⲛⲙ̅ⲙⲁⲓ  ⲉⲧⲃⲉⲟⲩ  ⲛ̅ϩⲱⲃ . Ⲙⲏ  ⲟⲩⲛ̅ϣⲏⲣⲉ ϭⲉ  ϣⲟⲟⲡ̅  ⲛ̅ϩⲏⲧ̅  ϫⲉ  ⲉⲩⲉⲣ̅ϩⲁⲓ ⲛⲏⲧⲛ̅. ⲓ̅ⲃ̅. Ⲕⲧⲉⲧⲏⲩⲧⲛ̅ ⲛⲁϣⲉⲉⲣⲉ  ⲛ̅ⲧⲉⲧⲛ̅ⲃⲱⲕ  ϫⲉ ⲁⲓⲣ̅ϩⲗ̅ⲗⲱ . ⲉⲧⲙ̅ϭⲙ̅ϭⲟⲙ ⲉϩⲙⲟⲟⲥ  ⲙⲛ̅ⲕⲉϩⲁⲓ ϫⲉ  ⲁⲓϫⲟⲟⲥ  ϫⲉ ⲙⲏ ⲟⲩⲛ̅ϭⲟⲙ ϭⲉ  ϣⲟⲟⲡ̅ ⲛⲁⲓ ⲉⲧⲣⲁϣⲱⲡⲉ  ⲙⲛ̅ⲕⲉϩⲁⲓ ⲛ̅ⲧⲁϫⲡⲉϣⲏⲣⲉ. ⲓ̅ⲅ̅. Ⲙⲏ ⲉⲧⲉⲧⲛⲁϭⲱ ⲉⲧⲉⲧⲛ̅ϭⲱϣⲧ̅ ϩⲏⲧⲟⲩ ϣⲁⲛⲧⲟⲩⲣ̅ⲛⲟϭ . ⲏ ⲉⲧⲉⲧⲛⲁϩⲙⲟⲟⲥ ⲉⲧⲃⲏⲏⲧⲟⲩ ⲉⲧⲙ̅ϫⲓⲕⲉϩⲁⲓ . Ⲙ̅ⲡⲱⲣ ⲛⲁϣⲉⲉⲣⲉ ⲙ̅ⲡⲣ̅ϭⲱ  ϩⲓⲛⲁⲓ ϫⲉ ⲁⲓⲟⲩⲱⲗⲥ̅  ⲛ̅ϩⲏⲧ ⲉϩⲟⲩⲉⲧⲏⲩⲧⲛ̅ . ϫⲉ ⲧϭⲓϫ ⲙ̅ⲡϫⲟⲉⲓⲥ ⲁⲥⲉ̅ⲓ ⲉⲃⲟⲗ ⲉϫⲱⲓ. ⲓ̅ⲇ̅. Ⲁⲩϥⲓϩⲣⲁⲩ ⲇⲉ ⲟⲛ ⲉⲃⲟⲗ  ⲁⲩⲣⲓⲙⲉ : Ⲁⲩⲱ Ⲟⲣ̅ⲫⲁ ⲁⲥⲁⲥⲡⲁⲍⲉ  ⲛ̅ⲧⲉⲥϣⲱⲙⲉ  ⲁⲥⲕⲧⲟⲥ   ⲉϩⲣⲁⲓ  ⲉⲡⲉⲥⲗⲁⲟⲥ .  Ϩⲣⲟⲩⲑ ⲇⲉ  ⲁⲥⲟⲩⲁϩⲥ̅  ⲛ̅ⲥⲁⲧⲉⲥϣⲱⲙⲉ :  

Ⲁⲩⲱ Ⲛⲟⲉⲙⲓⲛ ⲡⲉϫⲁⲥ  ⲛ̅Ϩⲣⲟⲩⲑ ϫⲉ  ⲉⲓⲥ̅ ϩⲏⲏⲧⲉ  ⲧⲟⲩϣⲃⲣ̅ϣⲉⲗⲉⲉⲧ̅  ⲁⲥⲕⲧⲟⲥ ⲉⲣⲁⲧϥ̅  ⲙ̅ⲡⲉⲥⲗⲁⲟⲥ . ⲁⲩⲱ  ⲉⲣⲁⲧⲟⲩ ⲛ̅ⲛⲉⲥⲛⲟⲩⲧⲉ  ⲛ̅ⲧⲟ ϩⲱⲱⲧⲉ  ⲧⲁϣⲉⲉⲣⲉ  ⲕⲧⲟ ⲉⲣⲁⲧⲥ̅  ⲛ̅ⲧⲟⲩϣⲃⲉⲉⲣⲉ : ⲓ̅Ⲋ. Ϩⲣⲟⲩⲑ ⲇⲉ ⲡⲉϫⲁⲥ ⲛⲁⲥ  ϫⲉ  ⲛ̅ⲛⲉⲡⲁⲓ ⲧⲁϩⲟⲓ ⲉⲧⲣⲁⲕⲁⲁⲧⲉ ⲛ̅ⲥⲱⲓ ⲧⲁⲃⲱⲕ ⲧⲁⲗⲟ̅ ϩⲁⲣⲟ. ⲓ̅ⲍ̅. ϫⲉ ⲛ̅ⲧⲟ ⲡⲙⲁ ⲉⲧⲉⲣⲁⲃⲱⲕ̅ ⲉⲣⲟϥ ϯⲛⲏⲩ ⲛⲙ̅ⲙⲉ . ⲁⲩⲱ ⲡⲙⲁ ⲉⲧⲉⲣⲁϭⲱ ⲛ̅ϩⲏⲧϥ̅  ϯⲛⲁϭⲱ  ϩⲱ  ⲛ̅ϩⲏⲧϥ̅  ⲛⲙ̅ⲙⲉ . ⲡⲟⲩⲗⲁⲟⲥ ⲡⲉ ⲡⲁⲗⲁⲟⲥ . ⲁⲩⲱ ⲡⲟⲩⲛⲟⲩⲧⲉ  ⲡⲉ ⲡⲁⲛⲟⲩⲧⲉ . ⲁⲩⲱ ⲡⲙⲁ ⲉⲧⲉⲣⲁⲙⲟⲩ ⲛ̅ϩⲏⲧϥ̅  ⲉⲓⲛⲁⲙⲟⲩ ϩⲱ ⲛ̅ϩⲏⲧϥ̅  ⲛ̅ⲥⲉⲧⲟⲙⲥⲧ̅ ⲙ̅ⲡⲙⲁ ⲉⲧⲙ̅ⲙⲁⲩ . Ⲛⲁⲓ ⲉⲣⲉⲠϫⲟⲉⲓⲥ  ⲁⲁⲩ ⲛⲁⲓ  ⲁⲩⲱ  ⲛⲁⲓ ⲉϥⲉⲟⲩⲁϩⲟⲩ  ⲉϫⲱⲓ. ϫⲉ  ⲡⲙⲟⲩ ⲡⲉⲧⲛⲁⲡⲟⲣ̅ϫⲛ̅ ⲉⲛⲉⲛⲉⲣⲏⲩ. ⲓ̅ⲏ̅. Ⲛ̅ⲧⲉⲣⲉⲚⲟⲉⲙⲓⲛ ⲇⲉ ⲛⲁⲩ  ϫⲉ  ⲁⲥⲧⲁϫⲣⲟⲥ  ⲉⲙⲟⲟϣⲉ  ⲛⲙ̅ⲙⲁⲥ  ⲁⲥⲗⲟ̅ ⲉⲥϣⲁϫⲉ ⲛⲙ̅ⲙⲁⲥ  ⲉⲡⲉⲓϩⲱⲃ . ⲓ̅ⲑ̅.

Ⲁⲩⲙⲟⲟϣⲉ ⲇⲉ ⲛ̅ⲧⲥⲛ̅ⲧⲉ  ϣⲁⲛ̅ⲧⲟⲩⲉ̅ⲓ  ⲉϩⲣⲁⲓ  ⲉⲂⲏⲑⲗⲉⲉⲙ:  ⲁⲥϣⲱⲡⲉ ⲇⲉ  ⲛ̅ⲧⲉⲣⲟⲩⲉ̅ⲓ ⲉϩⲟⲩⲛ ⲉⲂⲏⲑⲗⲉⲉⲙ . ⲁⲩⲱ ⲧⲡⲟⲗⲓⲥ  ⲧⲏⲣⲥ̅  ⲁⲡⲥⲟⲉⲓⲧ  ⲥⲱⲣ̅ ⲉⲃⲟⲗ ⲛ̅ϩⲏⲧⲥ̅  ⲉⲩϫⲱ  ⲙ̅ⲙⲟⲥ  ϫⲉ  ⲧⲁⲓ ⲧⲉ̅  Ⲛⲟⲉⲙⲓⲛ :  Ⲁⲩⲱ ⲡⲉϫⲁⲥ ⲛⲁⲩ  ϫⲉ  ⲙ̅ⲡⲣ̅ⲙⲟⲩⲧⲉ  ⲉⲣⲟⲓ ϫⲉ Ⲛⲟⲉⲙⲓⲛ : Ⲙⲟⲩⲧⲉ  ⲉⲣⲟⲓ  ϫⲉ ⲧⲉⲧⲥⲁϣⲉ ⲏ̅ ⲧⲉⲛⲧⲁⲥⲥⲓϣⲉ . ϫⲉ  ⲁⲡϩⲓⲕⲁⲛⲟⲥ  ⲙ̅ⲡⲇⲩⲛⲁⲧⲟⲥ  ⲁϥϯⲥⲓϣⲉ  ⲛⲁⲓ ⲉⲙⲁⲧⲉ. ⲕ̅ⲁ̅. Ⲁⲛⲟⲕ ⲁⲓⲃⲱⲕ ⲉⲓⲙⲉϩ. Ⲡϫⲟⲉⲓⲥ ⲇⲉ ⲁϥⲕⲧⲟⲓ ⲉⲓϣⲟⲩⲉⲓⲧ . ⲁⲩⲱ ⲉⲧⲃⲉⲟⲩ ⲧⲉⲧⲛⲁⲙⲟⲩⲧⲉ ⲉⲣⲟⲓ ϫⲉ Ⲛⲟⲉⲙⲓⲛ . ⲁⲩⲱ Ⲡϫⲟⲉⲓⲥ ⲁϥⲑⲃ̅ⲃⲓⲟⲓ ⲁⲩⲱ ⲡϩⲓⲕⲁⲛⲟⲥ ⲁϥⲑⲙ̅ⲕⲟⲓ. ⲕ̅ⲃ̅. Ⲁⲩⲱ ⲁⲥⲕⲧⲟⲥ  ⲛ̅ϭⲓⲚⲟⲉⲙⲓⲛ  ⲁⲩⲱ Ϩⲣⲟⲩⲑ ⲧⲘⲱⲁⲃⲓⲧⲏⲥ ⲧⲉⲥϣⲉⲗⲉⲉⲧ  ⲉⲛⲧⲁⲥⲕⲧⲟⲥ  ⲉⲃⲟⲗ  ϩⲛ̅ⲧⲥⲱϣⲉ  ⲙ̅Ⲙⲱⲁⲃ . ⲛⲁⲓ ⲇⲉ  ⲁⲩⲉⲓ  ⲉϩⲣⲁⲓ  ⲉⲂⲏⲑⲗⲉⲉⲙ  ϩⲛ̅ⲧⲁⲣⲭⲏ ⲙ̅ⲡⲱϩⲥ̅ ⲛ̅ⲉⲓⲱⲧ :
 
 Ⲃ̅.  Ⲁⲩⲱ Ⲛⲟⲉⲙⲓⲛ ⲛⲉϥϣⲟⲟⲡ̅  ⲛⲁⲥ  ⲛ̅ϭⲓⲟⲩⲣⲙ̅ⲛ̅ⲥⲟⲟⲩⲛ  ⲛ̅ⲧⲉⲡⲉⲥϩⲁⲓ . Ⲡⲣⲱⲙⲉ ⲇⲉ ⲉⲧⲙ̅ⲙⲁⲩ ⲛⲉⲩⲇⲩⲛⲁⲧⲟⲥ ⲡⲉ ϩⲛ̅ⲧⲉϥϭⲟⲙ . ⲉⲩⲉⲃⲟⲗ ⲡⲉ  ϩⲛ̅ⲧⲥⲩⲅⲅⲉⲛⲓⲁ ⲛ̅Ⲁⲃⲓⲙⲉⲗⲉⲭ ⲉⲡⲉϥⲣⲁⲛ ⲡⲉ Ⲃⲟⲉⲥ : ⲃ̅. ⲠⲉϫⲉϨⲣⲟⲩⲑ ⲇⲉ  ⲧⲘⲱⲁⲃⲓⲧⲏⲥ ⲛ̅Ⲛⲟⲉⲙⲉⲓⲛ ϫⲉ  ⲧⲁⲃⲱⲕ̅ ⲉⲃⲟⲗ  ⲉⲧⲥⲱϣⲉ  ⲧⲁⲥⲣⲓⲧ  ϩⲛ̅ⲛϩⲙ̅ⲥ  ϩⲁⲣⲁⲧϥ̅  ⲙ̅ⲡⲉ  ϯⲛⲁϭⲛ̅ⲭⲁⲣⲓⲥ  ⲛ̅ⲛⲁϩⲣⲁϥ. ⲠⲉϫⲉⲚⲟⲉⲙⲉⲓⲛ ⲛⲁⲥ  ϫⲉ  ⲃⲱⲕ ⲧⲁϣⲉⲉⲣⲉ : ⲅ̅. Ⲁⲥⲃⲱⲕ ⲇⲉ  ⲁⲥⲥⲣⲓⲧ̅ ϩⲛ̅ⲧⲥⲱϣⲉ  ϩⲓⲡⲁϩⲟⲩ ⲛ̅ⲛϫⲁⲓⲟϩⲥ̅  ⲁⲩⲱ  ⲁⲥⲁⲡⲁⲛⲧⲁ  ⲉⲧⲙⲉⲣⲓⲥ ⲛ̅ⲧⲥⲱϣⲉ ⲛ̅Ⲃⲟⲉⲥ ⲡⲉⲉⲃⲟⲗ ϩⲛ̅ⲧⲥⲩⲅⲅⲉⲛⲓⲁ ⲛ̅Ⲁⲃⲓⲙⲉⲗⲉⲭ. ⲇ̅. Ⲁⲩⲱ ⲉⲓⲥ Ⲃⲟⲉⲥ ⲁϥⲉ̅ⲓ ⲉⲃⲟⲗ ϩⲛ̅Ⲃⲏⲑⲗⲉⲉⲙ. ⲡⲉϫⲁϥ ⲛ̅ⲛⲉϥϫⲁⲓⲟϩⲥ̅  ϫⲉ Ⲡϫⲟⲉⲓⲥ  ⲉϥⲉϣⲱⲡⲉ  ⲛⲙ̅ⲙⲏⲧⲛ̅ . ⲛ̅ⲧⲟⲟⲩ  ϩⲱⲟⲩ  ⲡⲉϫⲁⲩ ⲛⲁϥ  ϫⲉ  ⲉⲣⲉⲠϫⲟⲉⲓⲥ  ⲥⲙⲟⲩ  ⲉⲣⲟⲕ :  

Ⲁⲩⲱ Ⲃⲟⲉⲥ ⲡⲉϫⲁϥ ⲙ̅ⲡϩⲙ̅ϩⲁⲗ ⲡⲉⲧϩⲓϫⲛ̅ⲛⲉⲧⲱϩⲥ̅ ϫⲉ ⲧⲁⲛⲓⲙ ⲧⲉ ⲧⲉⲓϣⲉⲉⲣⲉ ϣⲏⲙ. Ⲋ. Ⲡϩⲙ̅ϩⲁⲗ ⲇⲉ ⲉⲧϩⲓϫⲛ̅ⲛⲉⲧⲱϩⲥ̅ ⲁϥⲟⲩⲱϣⲃ̅ ⲉϥϫⲱ ⲙ̅ⲙⲟⲥ ⲛⲁϥ . ϫⲉ ⲧⲁⲓ ⲧϣⲉⲉⲣⲉ ϣⲏⲙ ⲙ̅Ⲙⲱⲁⲃⲓⲧⲏⲥ ⲧⲉ ⲛ̅ⲧⲁⲥⲕⲧⲟⲥ ⲙⲛ̅Ⲛⲟⲉⲙⲉⲓⲛ ⲉⲃⲟⲗ ϩⲛ̅ⲧⲥⲱϣⲉ  ⲙ̅Ⲙⲱⲁⲃ. ⲍ̅. Ⲉⲁⲥϫⲟⲟⲥ  ϫⲉ  ϯⲛⲁⲃⲱⲕ  ⲧⲁⲥⲣⲓⲧ  ⲛ̅ⲧⲁⲕⲱⲧϥ̅  ⲛ̅ⲛϩⲙ̅ⲥ ϩⲓⲡⲁϩⲟⲩ ⲛ̅ⲛϫⲁⲓⲟ̅ϩⲥ̅. Ⲛ̅ⲧⲉⲣⲉⲥⲉ̅ⲓ ⲇⲉ ⲙ̅ⲡⲥ̅ⲗⲟ  ⲉⲥⲁϩⲉⲣⲁⲧⲥ̅  ϫⲓⲛϩⲧⲟⲟⲩⲉ  ϣⲁⲡⲛⲁⲩ ⲛ̅ⲣⲟⲩϩⲉ ⲉⲙ̅ⲡⲥ̅ⲙ̅ⲧⲟⲛ ⲙ̅ⲙⲟⲥ ⲗⲁⲁⲩ ϩⲛ̅ⲧⲥⲱϣⲉ. ⲏ̅. Ⲁⲩⲱ Ⲃⲟⲉⲥ  ⲡⲉϫⲁϥ ⲛ̅Ϩⲣⲟⲩⲑ ϫⲉ  ⲙ̅ⲡⲉⲥⲱⲧⲙ̅ ⲧⲁϣⲉⲉⲣⲉ ϫⲉ ⲙ̅ⲡⲣ̅ⲃⲱⲕ ⲉϩⲣⲁⲓ ⲉⲕⲉⲓⲱϩⲉ ⲛ̅ϣⲙ̅ⲙⲟ ⲉⲥⲣⲓⲧ̅ ⲛ̅ϩⲏⲧϥ̅ . Ⲛ̅ⲧⲟ ϭⲉ ⲙ̅ⲡⲣ̅ⲣ̅ⲡⲃⲟⲗ ⲙ̅ⲡⲉⲓⲙⲁ ⲁⲗⲗⲁ ⲧⲟϭⲉ ⲉⲛⲁⲕⲉϣⲉⲉⲣⲉ ϣⲏⲙ. ⲑ̅. Ⲁⲩⲱ ⲛ̅ⲟⲩⲃⲁⲗ ⲙⲁⲣⲟⲩϭⲱϣⲧ̅ ⲉⲡⲙⲁ ⲉⲧⲟⲩⲛⲁⲱϩⲥ̅   ⲛ̅ϩⲏⲧϥ̅  ⲛ̅ⲧⲉⲃⲱⲕ ⲛ̅ⲧⲉⲟⲩⲁϩⲉ  ⲛ̅ⲥⲱⲟⲩ. Ⲉⲓⲥ  ϩⲏⲏⲧⲉ  ⲁⲓϩⲱⲛ ⲉⲧⲟⲟⲧⲟⲩ  ⲛ̅ⲛϣⲏⲣⲉ  ϣⲏⲙ ⲉⲧⲙ̅ⲧⲣⲉⲩϫⲱϩ ⲉⲣⲟ . Ⲁⲩⲱ ⲉⲣ̅ϣⲁⲛⲉⲓⲃⲉ  ⲉⲣⲉⲃⲱⲕ  ⲉⲡⲙⲁ  ⲛ̅ⲛⲉⲥⲕⲉⲩⲏ  ⲛ̅ⲧⲉⲥⲱ̅  ϩⲙ̅ⲡⲙⲁ ⲉⲧⲉⲣⲉⲛ̅ϣⲏⲣⲉ  ϣⲏⲙ ⲛⲁⲙⲉϩⲙⲟⲟⲩ ⲉⲣⲟϥ :  

Ⲁⲩⲱ ⲁⲥⲡⲁϩⲧⲥ̅ ⲉϫⲙ̅ⲡⲉⲥϩⲟ ϩⲓϫⲙ̅ⲡⲕⲁϩ ⲁⲥⲟⲩⲱϣⲧ̅ ⲉⲥϫⲱ ⲙ̅ⲙⲟⲥ ⲛⲁϥ . ϫⲉ ⲉⲓⲥ ϩⲏⲏⲧⲉ ⲁⲓϭⲛ̅ⲭⲁⲣⲓⲥ ⲛ̅ⲛⲁϩⲣⲁⲕ ⲉⲧⲣⲉⲕⲥⲟⲩⲱⲛⲧ̅  ⲁⲩⲱ  ⲁⲛⲟⲕ  ⲁⲛⲅ̅ⲟⲩϣⲙ̅ⲙⲱ : ⲓ̅ⲁ̅. Ⲁϥⲟⲩⲱϣⲃ̅  ⲛ̅ϭⲓⲂⲟⲉⲥ  ⲉϥϫⲱ ⲙ̅ⲙⲟⲥ  ⲛⲁⲥ . ϫⲉ  ϩⲛ̅ⲟⲩⲧⲁⲩⲟ ⲁⲩⲧⲁⲩⲟ̅ ⲉⲣⲟⲓ ⲛ̅ⲛⲉϩⲃⲏⲩⲉ ⲉⲛⲧⲁⲁⲁⲩ ⲙⲛ̅ⲧⲟⲩϣⲱⲙⲉ ⲙⲛ̅ⲛⲥⲁⲧⲣⲉⲡⲟⲩϩⲁⲓ ⲙⲟⲩ . Ⲁⲩⲱ ⲛ̅ⲑⲉ ⲉⲛⲧⲁⲕⲱ ⲛ̅ⲥⲱ ⲙ̅ⲡⲟⲩⲉⲓⲱⲧ ⲙⲛ̅ⲧⲟⲩⲙⲁⲁⲩ  ⲙⲛ̅ⲡⲕⲁϩ ⲉⲛ̅ⲧⲁⲩϫⲡⲟ ⲛ̅ϩⲏⲧϥ̅ . Ⲁⲃⲱⲕ ⲉⲣⲁⲧϥ̅  ⲛ̅ⲟⲩⲗⲁⲟⲥ  ⲉⲛ̅ⲧⲉⲥⲟⲟⲩⲛ  ⲙ̅ⲙⲟϥ  ⲁⲛ. Ⲛ̅ⲥⲁϥ ⲙⲛ̅ϣⲙ̅ⲧ ⲉⲡⲟⲟⲩ  ⲛ̅ϩⲟⲟⲩ ⲉⲣⲉⲠϫⲟⲉⲓⲥ  ⲧⲱⲱⲃⲉ  ⲛⲉ  ⲙ̅ⲡⲟⲩϩⲱⲃ. ⲓ̅ⲃ̅. ⲁⲩⲱ  ⲉⲣⲉⲡⲟⲩⲃⲉⲕⲉ  ϣⲱⲡⲉ  ⲉϥϫⲏⲕ̅ ⲉⲃⲟⲗ ⲛ̅ⲧⲟⲟⲧϥ̅  ⲙ̅Ⲡϫⲟⲉⲓⲥ ⲡⲛⲟⲩⲧⲉ  ⲙ̅ⲡⲒⲏ̅ⲗ̅ . ⲡⲉⲛⲧⲁϯⲡⲟⲩⲟⲩⲟⲓ ⲉϩⲟⲩⲛ ⲉⲣⲟϥ ⲉⲧⲣⲉⲛⲁϩⲧⲉ  ϩⲁⲛⲉϥⲧⲛ̅ϩ. ⲓ̅ⲅ̅. Ⲛ̅ⲧⲟⲥ ⲇⲉ ⲡⲉϫⲁⲥ  ϫⲉ ⲡϫⲟⲉⲓⲥ ⲁⲓϭⲛ̅ⲭⲁⲣⲓⲥ  ⲛ̅ⲛⲁϩⲣⲁⲕ ϫⲉ  ⲁⲕⲥⲗ̅ⲥⲱⲗⲧ : ⲁⲩⲱ ϫⲉ  ⲁⲕϣⲁϫⲉ ⲉϩⲣⲁⲓ ⲉⲡϩⲏⲧ̅ ⲛ̅ⲧⲉⲕϩⲙ̅ϩⲁⲗ . Ⲉⲓⲥ ϩⲏⲏⲧⲉ  ⲁⲛⲟⲕ ϯⲛⲁϣⲱⲡⲉ  ⲛⲁⲕ  ⲛ̅ⲑⲉ  ⲛ̅ⲟⲩⲉ̅ⲓ  ⲛ̅ⲛⲉⲕϩⲙ̅ϩⲁⲗ. ⲓ̅ⲇ̅. ⲠⲉϫⲉⲂⲟⲉⲥ  ⲛⲁⲥ  ϫⲉ ⲏⲇⲏ  ⲁⲡⲛⲁⲩ  ⲛ̅ⲟⲩⲱⲙ ϣⲱⲡⲉ. ϯⲡⲟⲩⲟⲩⲟⲓ ⲉϩⲟⲩⲛ  ⲉⲡⲉⲓⲣⲁ  ⲛ̅ⲧⲉⲟⲩⲱⲙ ⲉⲃⲟⲗ  ϩⲛ̅ⲛⲉⲛⲟⲉⲓⲕ : ⲁⲩⲱ  ⲛ̅ⲧⲉⲥⲉⲡⲧⲟⲩⲗⲁⲕⲙ̅  ϩⲙ̅ⲡϩⲙ̅ϫ . Ⲁⲩⲱ Ϩⲣⲟⲩⲑ ⲁⲥϩⲙⲟⲟⲥ ⲉϩⲣⲁⲓ  ⲛ̅ⲥⲁⲥⲡⲓⲣ̅  ⲛ̅ⲛⲉⲧⲟϩⲥ̅ : ⲁⲂⲟⲉⲥ  ⲧⲁⲙⲓⲟ ⲛⲁⲥ  ⲙ̅ⲡⲉⲧⲥ̅ⲛⲁⲟⲩⲟⲙϥ̅ . Ⲁⲥⲟⲩⲱⲙ  ⲁⲥⲥⲉ̅ⲓ  ⲁⲥⲕⲱ  ⲉⲡⲁϩⲟⲩ ⲙ̅ⲡⲥⲉⲉⲡⲉ.  Ⲁⲩⲱ  ⲁⲥⲧⲱⲟⲩⲛ ⲉⲧⲣⲉⲥⲥⲣⲓⲧ . Ⲃⲟⲉⲥ ⲇⲉ  ⲁϥϩⲱⲛ  ⲉⲧⲟⲟⲧⲟ̅ⲩ ⲛ̅ⲛⲉϥϩⲙ̅ϩⲁⲗ ⲉϥϫⲱ ⲙ̅ⲙⲟⲥ ⲛⲁⲩ . ϫⲉ ⲙⲁⲣⲉⲥⲕⲱⲧϥ̅ ϩⲛ̅ⲧⲙⲏⲧⲉ  ⲛ̅ⲛⲉⲕⲛⲁⲁⲩ  ⲛ̅ⲧⲉⲧⲛ̅ⲧⲙ̅ϯϣⲓⲡⲉ  ⲛⲁⲥ.  ⲓ̅Ⲋ. Ⲁⲩⲱ  ϩⲛ̅ⲟⲩⲧⲱⲟⲩⲛ  ⲉⲧⲉⲧⲛⲉⲧⲱⲟⲩⲛ ⲛⲁⲥ . ⲁⲩⲱ̅  ϩⲛ̅ⲟⲩϯ ⲉⲧⲉⲧⲛⲉϯ ⲛⲁⲥ  ⲉⲃⲟⲗ  ϩⲛ̅ⲛⲉⲧⲧⲁⲙⲓⲏⲩ  ⲛ̅ⲥⲟⲩⲱⲙ . ⲁⲩⲱ  ⲛⲥ̅ⲕⲱⲧϥ̅ ⲟⲛ ⲛ̅ⲧⲉⲧⲛ̅ⲧⲙ̅ⲛⲟϣⲡⲥ̅.  ⲓ̅ⲍ̅. Ⲁⲩⲱ  ⲁⲥϭⲱ  ⲉⲥⲕⲱⲧϥ̅  ϩⲛ̅ⲧⲥⲱϣⲉ. ϣⲁⲡⲛⲁⲩ  ⲛ̅ⲣ̅ⲟⲩϩⲉ . ⲁⲩⲱ  ⲛⲉⲛⲧⲁⲥⲕⲟⲧϥ̅ⲟⲩ  ⲁⲥⲟⲩⲉϣⲟⲩⲱϣⲟⲩ  ⲁⲩⲣⲟⲩϣⲓ  ⲛ̅ⲉⲓⲱⲧ.  ⲓ̅ⲏ.

Ⲁⲥϥⲓⲧⲟⲩ ⲁⲥⲃⲱⲕ̅ ⲉϩⲟⲩⲛ ⲉⲧⲡⲟⲗⲓⲥ : Ⲁⲩⲱ ⲧⲉⲥϣⲱⲙⲉ ⲁⲥⲛⲁⲩ ⲉⲛⲉⲛⲧⲁⲥⲕⲟⲧϥ̅ⲟⲩ . Ⲁⲩⲱ Ϩⲣⲟⲩⲑ ⲁⲥⲉ̅ⲓⲛⲉ ⲉⲃⲟⲗ ϩⲛ̅ⲛⲉⲛⲧⲁⲩⲥⲉⲉⲡⲉ  ⲉⲣⲟⲥ  ϩⲛ̅ⲛⲉⲛⲧⲁⲥⲥⲉⲓ  ⲛ̅ϩⲏⲧⲟⲩ ⲁⲥⲧⲁⲁⲩ ⲛⲁⲥ :  ⲓ̅ⲑ̅. Ⲁⲩⲱ  ⲧⲉⲥϣⲱⲙⲉ  ⲡⲉϫⲁⲥ ⲛⲁⲥ  ϫⲉ ⲛ̅ⲧⲁⲕⲱⲧϥ̅ ⲧⲱⲛ ⲙ̅ⲡⲟⲟⲩ . ⲁⲩⲱ ⲉⲛⲧⲁⲧⲁⲙⲓⲟⲟⲩ ⲧⲱⲛ . ⲉϥⲉϣⲱⲡⲉ ⲛ̅ϭⲓⲡⲉⲛⲧⲁϥⲥⲟⲩⲱⲛⲉ ⲉϥⲥⲙⲁⲙⲁⲁⲧ : Ⲁⲩⲱ Ϩⲣⲟⲩⲑ ⲁⲥⲧⲁⲙⲉⲧⲉⲥϣⲱⲙⲉ  ϫⲉ  ⲉⲛⲧⲁⲥⲧⲁⲙⲓⲟ̅ⲟⲩ ⲧⲱⲛ . Ⲁⲩⲱ ⲡⲉϫⲁⲥ ⲛⲁⲥ  ϫⲉ ⲡⲣⲱⲙⲉ  ⲉⲛⲧⲁϥⲉⲓⲣⲉ ⲛⲙ̅ⲙⲁⲓ  ⲙ̅ⲡⲟⲟⲩ ⲡⲉ Ⲃⲟⲉⲥ.  ⲠⲉϫⲉⲚⲟⲉⲙⲓⲛ ⲛ̅ⲧⲉⲥϣⲉⲗⲉⲉⲧ ϫⲉ ϥⲥⲙⲁⲙⲁⲁⲧ̅ ⲙ̅Ⲡϫⲟⲉⲓⲥ ϫⲉ ⲙ̅ⲡϥ̅ⲕⲱ ⲛ̅ⲥⲱϥ ⲙ̅ⲡⲉϥⲛⲁ ⲙⲛ̅ⲛⲉⲧⲟⲛϩ . ⲁⲩⲱ ⲙⲛ̅ⲛⲉⲧⲙⲟⲟⲩⲧ . Ⲁⲩⲱ Ⲛⲟⲉⲙⲓⲛ ⲡⲉϫⲁⲥ ⲛⲁⲥ  ϫⲉ ⲡ̅ⲣⲱⲙⲉ  ϥ̅ϩⲏⲛ ⲉⲣⲟⲛ ⲟⲩⲉⲃⲟⲗ ϩⲙ̅ⲡⲅⲉⲛⲟⲥ ⲡⲉ ⲉⲧⲛⲁϫⲓⲧⲛ̅. ⲕ̅ⲁ̅. Ϩⲣⲟⲩⲑ ⲇⲉ  ⲡⲉϫⲁⲥ  ⲛ̅ⲧⲉⲥϣⲱⲙⲉ . ϫⲉ  ⲕⲁⲓ  ⲅⲁⲣ  ⲁϥϫⲟⲟⲥ ⲛⲁⲓ . ϫⲉ  ⲧⲟϭⲉ  ⲉⲛⲁⲕⲉϣⲉⲉⲣⲉ ϣⲏⲙ . ϣⲁⲛⲧⲟⲩϫⲱⲕ ⲉⲃⲟⲗ ⲙ̅ⲡⲱϩⲥ̅  ⲧⲏⲣϥ̅  ⲉⲧϣⲟⲟⲡ ⲛⲁⲓ. ⲕ̅ⲃ̅. Ⲁⲩⲱ Ⲛⲟⲉⲙⲓⲛ  ⲡⲉϫⲁⲥ ⲛ̅Ϩⲣⲟⲩⲑ ⲧⲉⲥϣⲉⲗⲉⲉⲧ ϫⲉ  ⲟⲩⲁⲅⲁⲑⲟⲛ ⲛⲉ ⲡⲉ ⲧⲁϣⲉⲉⲣⲉ. ϫⲉ ⲁⲙⲟⲟϣⲉ ⲙⲛ̅ⲛⲉϥϣⲉⲉⲣⲉ ϣⲏⲙ ϫⲉ ⲙⲉⲩⲧⲁϩⲟ ϩⲛ̅ⲕⲉⲥⲱϣⲉ. ⲕ̅ⲅ̅. Ⲁⲩⲱ Ϩⲣⲟⲩⲑ ⲁⲥⲧⲱϭⲉ  ⲙ̅ⲙⲟⲥ ⲉⲛ̅ϣⲉⲉⲣⲉ ϣⲏⲙ̅ ⲛ̅Ⲃⲟⲉⲥ  ⲉⲧⲣⲉⲥⲕⲱⲧϥ̅  ⲛⲙ̅ⲙⲁⲩ  ϣⲁⲛⲧⲟⲩⲟⲩⲱ̅  ⲙ̅ⲡⲱϩⲥ̅  ̅ⲛⲛ̅ⲉⲓⲱⲧ̅ ⲙⲛ̅ⲛⲉⲥⲟⲩⲟ̅ . Ⲁⲩⲱ  ⲁⲥϩⲙⲟⲟⲥ  ⲉϩⲣⲁⲓ  ⲙⲛ̅ⲧⲉⲥϣⲱⲙⲉ :
 
Ⲅ̅. Ⲛⲟⲉⲙⲉⲓⲛ ⲇⲉ  ⲧⲉⲥϣⲱⲙⲉ ⲡⲉϫⲁⲥ  ⲛⲁⲥ . ϫⲉ  ⲧⲁϣⲉⲉⲣⲉ . ⲛ̅ⲛⲁⲕⲱⲧⲉ  ⲛ̅ⲥⲁⲟⲩⲙⲁ  ⲛ̅ⲙ̅ⲧⲟⲛ ⲛⲉ  ϫⲉⲕⲁⲥ ⲉⲣⲉⲡⲉⲧⲛⲁⲛⲟⲩϥ ϣⲱⲡⲉ ⲙ̅ⲙⲟ. ⲃ̅. Ⲧⲉⲛⲟⲩ ϭⲉ ⲉⲓⲥ Ⲃⲟⲉⲥ ⲡⲉⲛⲣⲙ̅ⲛ̅ⲥⲟⲟⲩⲛ ⲡⲉ ⲡⲁⲓ ⲉⲛⲧⲁϭⲱ ⲙⲛ̅ⲛⲉϥϣⲉⲉⲣⲉ ϣⲏⲙ . Ⲁⲩⲱ ⲉⲓⲥ ϩⲏⲏⲧⲉ ⲛ̅ⲧⲟϥ ⲉϥⲛⲁϣⲉϣⲡⲉϫⲛⲟⲟⲩ ⲛ̅ⲛⲉϥⲉⲓⲱⲧ ϩⲛ̅ⲧⲉⲓⲟⲩϣⲏ. ⲅ̅. Ⲛ̅ⲧⲟ̅ ⲇⲉ ϫⲟⲕⲙⲉ ⲛ̅ⲧⲉⲧⲁϩⲥⲉ ⲛ̅ⲧⲉϯ ⲛ̅ⲛⲟⲩϩⲟⲉⲓⲧⲉ ϩⲓⲱⲱⲧⲉ . ⲛ̅ⲧⲉⲃⲱⲕ ⲉⲃⲟⲗ ⲉⲡⲉϫⲛⲟ̅ⲟⲩ ⲛ̅ⲧⲉⲧⲙ̅ⲟⲩⲟⲛϩⲉ ⲉⲡⲣⲱⲙⲉ  ϣⲁⲛⲧϥ̅ⲟⲩⲱ̅ ⲉϥⲟⲩⲱⲙ ⲁⲩⲱ ⲉϥⲥⲱ. ⲇ̅. Ⲁⲩⲱ ⲉϥϣⲁⲛⲧⲁⲁϥ  ⲉⲛ̅ⲕⲟⲧⲕ̅  ⲉⲣⲉⲉⲓⲙⲉ  ⲉⲡⲙⲁ ⲉⲧϥ̅ⲛⲁⲛ̅ⲕⲟⲧⲕ̅ ⲛ̅ϩⲏⲧϥ̅ ⲛ̅ⲧⲉⲃⲱⲕ  ⲛ̅ⲧⲉϭⲱⲗⲡ̅ ⲉⲃⲟⲗ  ϩⲁⲣⲁⲧϥ̅  ⲛ̅ⲧⲉⲛ̅ⲕⲟⲧⲕ̅. Ⲁⲩⲱ  ⲛ̅ⲧⲟϥ  ϥⲛⲁⲧⲁⲙⲟ ⲉⲛⲉϩⲃⲏⲩⲉ  ⲉⲧⲉⲣⲁⲁⲩ :  Ϩⲣⲟⲩⲑ ⲇⲉ  ⲡⲉϫⲁⲥ ⲛⲁⲥ  ϫⲉ  ϩⲱⲃ ⲛⲓⲙ ⲉⲧⲉⲣⲁϫⲟⲟⲩ ⲉⲣⲟⲓ ϯⲛⲁⲁⲁⲩ.  Ⲋ.

Ⲁⲩⲱ  ⲁⲥⲃⲱⲕ ⲉϩⲣⲁⲓ  ⲉⲧⲣⲉϫⲛⲟⲟⲩ  ⲁⲥⲉⲓⲣⲉ ⲕⲁⲧⲁϩⲱⲃ ⲛⲓⲙ ⲉⲛⲧⲁⲧⲉⲥϣⲱⲙⲉ  ϩⲱⲛ ⲙ̅ⲙⲟⲟⲩ  ⲉⲧⲟⲟⲧⲥ̅. ⲍ̅. Ⲁⲩⲱ Ⲃⲟⲉⲥ ⲁϥⲟⲩⲱⲙ ⲁⲩⲱ  ⲁϥⲥⲱ̅ ⲁⲡⲉϥϩⲏⲧ̅ ⲟⲩⲛⲟϥ.  ⲁϥⲉ̅ⲓ  ⲉⲧⲣⲉϥⲛ̅ⲕⲟⲧⲕ̅  ϩⲛ̅ⲧⲙⲉⲣⲓⲥ  ⲉⲧϩⲟⲣϭ̅ : Ⲛ̅ⲧⲟⲥ ⲇⲉ  Ϩⲣⲟⲩⲑ ⲁⲥⲉ̅ⲓ  ⲛ̅ϩⲱⲡ ⲁⲥϭⲱⲗⲡ  ϩⲁⲣⲁⲧϥ̅ ⲉⲃⲟⲗ  ⲁⲥⲛ̅ⲕⲟⲧⲕ̅ : ⲏ̅. Ⲁⲥϣⲱⲡⲉ  ⲇⲉ  ϩⲛ̅ⲧⲡⲁϣⲉ ⲛ̅ⲧⲉⲩϣⲏ  ⲡⲣⲱⲙⲉ  ⲁϥⲛ̅ⲉϩⲥ̅ⲉ  ⲉϩⲣⲁⲓ  ⲁϥϣⲧⲟⲣⲧⲣ̅ ⲁⲩⲱ  ⲉⲓⲥ ⲟⲩⲥϩⲓⲙⲉ  ⲉⲥⲛ̅ⲕⲟⲧⲕ̅ ϩⲁⲣⲁⲧϥ̅. ⲑ̅. Ⲡⲉϫⲁϥ ⲇⲉ ⲛⲁⲥ  ϫⲉ  ⲛ̅ⲧⲉⲛⲓⲙ ⲛ̅ⲧⲟ . Ⲛ̅ⲧⲟⲥ ⲇⲉ ⲡⲉϫⲁⲥ ϫⲉ  ⲁⲛⲟⲕ ⲧⲉ Ϩⲣⲟⲩⲑ ⲧⲉⲕϩⲙ̅ϩⲁⲗ . Ⲁⲩⲱ ⲡⲧⲟⲡ ⲙ̅ⲡⲉⲕϩⲟⲓⲧⲉ  ⲉⲕⲉⲛⲟϫϥ̅  ⲉϫⲛ̅ⲧⲉⲕϩⲙ̅ϩⲁⲗ ϫⲉ  ⲛ̅ⲧⲟⲕ ⲡⲉⲧϩⲏⲛ ⲉϩⲟⲩⲛ ϩⲙ̅ⲡⲅⲉⲛⲟⲥ.  Ⲁⲩⲱ ⲡⲉϫⲁϥ ⲛⲁⲥ  ϫⲉ  ⲧⲉⲥⲙⲁⲙⲁⲁⲧ  ⲛ̅ⲧⲟ  ⲛ̅ⲧⲟⲟⲧϥ̅ ⲙ̅Ⲡϫⲟⲉⲓⲥ  ⲧⲁϣⲉⲉⲣⲉ . ϫⲉ  ⲁⲧⲁϣⲉⲡⲟⲩⲛⲁ ⲛ̅ϩⲁⲉ ⲉϩⲟⲩⲉⲡϣⲟⲣⲡ̅ . ⲉⲧⲙ̅ⲧⲣⲉⲟⲩⲁϩⲉ  ⲛ̅ⲥⲁϩⲉⲛϣⲏⲣⲉ ϣⲏⲙ ⲡⲉⲧⲉⲛ̅ⲧⲟϥ ⲡⲉ ⲛ̅ϩⲏⲧⲟⲩ . ⲉϣⲱⲡⲉ ⲟⲩϩⲏⲕⲉ ⲡⲉ ⲏ ⲟⲩⲣⲙ̅ⲙⲁⲟ. ⲓ̅ⲁ̅. Ⲧⲉⲛⲟⲩ ϭⲉ  ⲧⲁϣⲉⲉⲣⲉ  ⲙ̅ⲡⲣ̅ⲣϩⲟⲧⲉ . ϩⲱⲃ ⲛⲓⲙ  ⲉⲧⲉⲣⲁϫⲟⲟⲩ  ⲁⲛⲟⲕ  ϯⲛⲁⲁⲁⲩ . ⲧⲉⲫⲩⲗⲏ  ⲅⲁⲣ ⲧⲏⲣⲥ̅  ⲙ̅ⲡⲗⲁⲟⲥ  ⲥⲟⲟⲩⲛ ϫⲉ ⲛ̅ⲧⲉⲟⲩⲥϩⲓⲙⲉ  ⲛ̅ⲧⲟ ⲛ̅ϫⲱⲱⲣⲉ. ⲓ̅ⲃ̅. Ⲁⲩⲱ ϫⲉ  ⲁⲗⲏⲑⲱⲥ  ⲁⲛⲟⲕ ⲡⲉⲧϩⲏⲛ ⲉϩⲟⲩⲛ  ϩⲙ̅ⲡⲅⲉⲛⲟⲥ  ⲁⲩⲱ  ⲟⲩⲛ̅ⲡⲉⲧϩⲏⲛ ⲉϩⲟⲩⲛ  ⲉⲡ̅ⲅⲉⲛⲟⲥ  ⲉϩⲟⲩⲉⲣⲟⲓ.  ⲓ̅ⲅ̅. Ⲙ̅ⲧⲟⲛ  ⲙ̅ⲙⲟ ⲛ̅ⲧⲉⲓⲩϣⲏ  ϣⲁⲛ̅ⲧⲉϣⲟⲣⲡ̅  ϣⲱⲡⲉ . ⲁⲩⲱ  ⲉⲛ̅ϣⲁⲛⲉ̅ⲓ  ⲉϩⲧⲟⲟⲩⲉ  ⲉⲣ̅ϣⲁⲛⲡⲏ ϫⲓⲧⲉ ⲟⲩⲁⲅⲁⲑⲟⲛ ⲡⲉ ⲙⲁⲣⲉϥϫⲓⲧⲉ ⲉϥϣⲁⲛⲧⲙ̅ⲣ̅ϩ̅ⲛⲁϥ ⲇⲉ ⲉϫⲓⲧⲉ ⲁⲛⲟⲕ ϯⲛⲁϫⲓⲧⲉ ϥⲟⲛϩ ⲛ̅ϭⲓⲠϫⲟⲉⲓⲥ . ⲛ̅ⲕⲟⲧⲕ̅ ϣⲁϩⲧⲟⲟⲩⲉ. ⲓ̅ⲇ. Ⲁⲩⲱ  ⲁⲥⲛ̅ⲕⲟⲧⲕ̅  ϩⲁⲣⲁⲧϥ̅  ϣⲁⲛ̅ⲧⲉϣⲟⲣⲡ̅  ϣⲱⲡⲉ . Ⲛ̅ⲧⲟⲥ ⲇⲉ  ⲁⲥⲧⲱⲟⲩⲛ  ⲉⲙ̅ⲡⲁⲧⲉⲣⲱⲙⲉ  ⲥⲟⲩⲛ̅ⲣⲱⲙⲉ Ⲁⲩⲱ Ⲃⲟⲉⲥ ⲡⲉϫⲁϥ ϫⲉ ⲙ̅ⲡⲣ̅ⲧⲣⲉⲗⲁⲁⲩ ⲉ̅ⲓⲙⲉ ϫⲉ ⲁⲥϩⲓⲙⲉ ⲉ̅ⲓ ⲉϩⲣⲁⲓ ⲉⲡⲉⲓϫⲛⲟⲟⲩ:  Ⲡⲉϫⲁϥ ⲇⲉ ⲛⲁⲥ ϫⲉ  ⲁⲩⲡ̅ⲡⲉⲣⲓⲍⲱⲙⲁ ⲉⲧϩⲓϫⲱ ⲁⲙⲁϩⲧⲉ  ⲙ̅ⲙⲟϥ . Ⲛ̅ⲧⲟⲥ ⲇⲉ ⲛ̅ⲧⲉⲣⲉⲥⲁⲙⲁϩⲧⲉ ⲙ̅ⲙⲟϥ ⲁϥϣⲓ ⲉϩⲣⲁⲓ ⲉⲣⲟϥ ⲛ̅ⲥⲟⲟⲩ ⲛ̅ϣⲓ ⲛ̅ⲉⲓⲱⲧ. ⲁϥⲧⲁⲗⲟⲟⲩ  ⲉϫⲱⲥ  ⲁⲥⲙⲟⲟϣⲉ  ⲉϩⲟⲩⲛ  ⲉⲧⲡⲟⲗⲓⲥ . ⲓ̅Ⲋ.

Ⲁϩⲣⲟⲩⲑ ⲃⲱⲕ ⲉϩⲟⲩⲛ  ϣⲁⲧⲉⲥϣⲱⲙⲉ  ⲛ̅ⲧⲟⲥ  ⲇⲉ  ⲡⲉϫⲁⲥ  ϫⲉ  ⲛ̅ⲧⲉⲛⲓⲙ  ⲧⲁϣⲉⲉⲣⲉ . Ⲡⲉϫⲁⲥ ⲛⲁⲥ  ϫⲉ  ⲁⲛⲟⲕ  ⲧⲉ Ϩⲣⲟⲩⲑ . ⲁⲩⲱ  ⲁⲥⲧⲁⲩⲟ ⲉⲣⲟⲥ   ⲛ̅ϩⲱⲃ ⲛⲓⲙ  ⲉⲛⲧⲁⲡⲣⲱⲙⲉ  ⲁⲁⲩ  ⲛⲙ̅ⲙⲁⲥ : ⲓ̅ⲍ. Ⲡⲉϫⲁⲥ ⲟⲛ̅  ⲛⲁⲥ  ϫⲉ  ⲉⲓⲥ  ⲡⲉⲓⲥⲟⲟⲩ  ⲛ̅ϣⲓ ⲛ̅ⲉⲓⲱⲧ ⲁϥⲧⲁⲁⲩ ⲛⲁⲓ . ⲉⲧⲃⲉϫⲉ  ⲁϥϫⲟⲟⲥ ⲛⲁⲓ  ϫⲉ  ⲙ̅ⲡⲣ̅ⲃⲱⲕ ⲉϩⲟⲩⲛ  ⲉϩⲣⲁⲥ  ⲛ̅ⲧⲟⲩϣⲱⲙⲉ  ⲉⲣⲉϣⲟⲩⲉⲓⲧ : ⲓ̅ⲏ. ̅Ⲛⲧⲟⲥ  ⲇⲉ ⲡⲉϫⲁⲥ ⲛⲁⲥ ϫⲉ  ϩⲙⲟⲟⲥ ⲉϩⲣⲁⲓ  ⲧⲁϣⲉⲉⲣⲉ  ϣⲁⲛⲧⲉⲉⲓⲙⲉ  ϫⲉ  ⲙⲛ̅ⲗⲁⲁⲩ  ⲛ̅ϣⲁϫⲉ  ⲛⲁϩⲉ ⲉⲃⲟⲗ . ⲙ̅ⲡⲣ̅ⲱⲙⲉ  ⲅⲁⲣ ⲛⲁϭⲱ ⲁⲛ  ⲉⲙ̅ⲡϥ̅ϫⲱⲕ̅  ⲉⲃⲟⲗ  ⲙ̅ⲡⲟⲟⲩ  ⲙ̅ⲡϣⲁϫⲉ .
 
Ⲇ̅. Ⲁⲩⲱ Ⲃⲟⲉⲥ  ⲁϥⲃⲱⲕ̅  ⲉϩⲣⲁⲓ ⲉⲣⲛ̅ⲧⲡⲩⲗⲏ ⲁϥϩⲙⲟⲟⲥ ϩⲙ̅ⲡⲙⲁ ⲉⲧⲙ̅ⲙⲁⲩ . ⲁⲩⲱ ⲉⲓⲥ ⲡⲉⲧϩⲏⲛ ⲉϩⲟⲩⲛ ⲉⲡⲅⲉⲛⲟⲥ ⲛ̅ϩⲟⲩⲟ̅ ⲙ̅ⲙⲟϥ ⲛⲉϥⲙⲟⲟϣⲉ ⲡⲁⲓ ⲛ̅ⲧⲁⲂⲟⲉⲥ  ϫⲟⲟⲥ ⲉⲧⲃⲏⲏⲧϥ̅ : Ⲡⲉϫⲁϥ ⲉϩⲟⲩⲛ ⲉϩⲣⲁϥ ⲛ̅ϭⲓⲂⲟⲉⲥ  ϫⲉ  ⲁⲙⲟⲩ ⲛⲅ̅ϩⲙⲟⲟⲥ ϩⲙ̅ⲡⲉⲓⲙⲁ. ⲡⲉⲧϩⲏⲡ ⲏ̅ ⲡⲉⲧⲉⲛ̅ⲥⲉⲉⲓⲙⲉ ⲉⲣⲟϥ ⲁⲛ . Ⲁϥⲃⲱⲕ ⲁϥϩⲙ̅ⲟⲟⲥ. ⲃ̅. Ⲁⲩⲱ̅ Ⲃⲟⲉⲥ ⲁϥϫⲓⲙⲏⲧ ⲛ̅ⲣⲱⲙⲉ ⲉⲃⲟⲗ ϩⲛ̅ⲛⲉⲡⲣⲉⲥⲃⲩⲧⲉⲣⲟⲥ  ⲛ̅ⲧⲡⲟⲗⲓⲥ  ⲡⲉϫⲁϥ ⲛⲁⲩ ϫⲉ ϩⲙⲟⲟⲥ ⲛⲏⲧⲛ̅ ⲙ̅ⲡⲉⲓⲙⲁ ⲁⲩϩⲙⲟⲟⲥ.  ⲅ̅. Ⲁⲩⲱ  Ⲃⲟⲉⲥ  ⲡⲉϫⲁϥ  ⲙ̅ⲡⲉⲧϩⲏⲛ  ⲉϩⲟⲩⲛ  ⲉⲡⲅⲉⲛⲟⲥ : ϫⲉ  ⲉⲧⲃⲉⲧⲙⲉⲣⲓⲥ  ⲛ̅ⲧⲥⲱϣⲉ  ⲉⲧⲁⲡⲉⲛⲥⲟⲛ  ⲧⲉ Ⲁⲃⲓⲙⲉⲗⲉⲭ . ⲧⲁⲓ  ⲉⲛⲧⲁⲩⲧⲁⲁⲥ  ⲛ̅Ⲛⲟⲉⲙⲓⲛ  ⲧⲉⲛⲧⲁⲥⲕⲧⲟⲥ  ⲉⲃⲟⲗ  ϩⲛ̅ⲧⲥⲱϣⲉ  ⲙ̅Ⲙⲱⲁⲃ: ⲇ̅. Ⲁⲛⲟⲕ  ϩⲱ  ⲁⲓϫⲟⲟⲥ   ϫⲉ  ϯⲛⲁⲧⲁⲩⲉⲡϣⲁϫⲉ  ⲉⲛⲉⲕⲙⲁⲁϫⲉ. ⲉⲓϫⲱ  ⲙ̅ⲙⲟⲥ  ⲛⲁⲕ  ϫⲉ  ϫⲓ  ⲛⲁⲕ  ⲛ̅ⲧⲙⲉⲣⲓⲥ  ⲙ̅ⲡⲉⲙ̅ⲧⲟ  ⲉⲃⲟⲗ  ⲛ̅ⲛⲉⲧϩⲙⲟⲟⲥ . ⲁⲩⲱ  ⲙ̅ⲡⲉⲙ̅ⲧⲟ  ⲉⲃⲟⲗ  ⲛ̅ⲛⲉⲡⲣⲉⲥⲃⲩⲧⲉⲣⲟⲥ  ⲙ̅ⲡⲗⲁⲟⲥ . Ⲉϣⲱⲡⲉ  ϭⲉ  ⲕⲛⲁⲟⲡⲕ̅  ⲉⲣⲟⲥ  ϫⲓⲧⲥ̅ . ⲉϣⲱⲡⲉ  ⲇⲉ  ⲛ̅ⲅⲛⲁϫⲓⲧⲥ̅  ⲁⲛ̅  ⲙⲁⲧⲁⲙⲟⲓ . ⲁⲩⲱ  ϯⲛⲁⲉⲓⲙⲉ  ϫⲉ  ⲙⲛ̅  ϭⲉ  ⲛ̅ⲃⲗ̅ⲗⲁⲕ̅  ⲉⲧⲣⲉϥϫⲓⲧⲥ̅ :  Ⲁⲩⲱ  ⲁⲛⲟⲕ ⲡⲉⲧⲛⲏⲩ  ⲙⲛ̅ⲛ̅ⲥⲱⲕ . Ⲛ̅ⲧⲟϥ  ⲇⲉ  ⲡⲉϫⲁϥ  ϫⲉ  ⲁⲛⲟⲕ̅  ⲡⲉⲉⲧⲛⲁϫⲓⲧⲥ̅ :  Ⲁⲩⲱ  Ⲃⲟⲉⲥ  ⲡⲉϫⲁϥ  ⲛⲁϥ  ϫⲉ  ϩⲙ̅ⲡⲉϩⲟⲟⲩ  ⲉⲧⲕ̅ⲛⲁϫⲓ  ⲛ̅ⲧⲥⲱϣⲉ  ⲛ̅ⲧⲟⲟⲧⲥ̅  ⲛ̅Ⲛⲟⲉⲙⲓⲛ  ⲁⲩⲱ  ⲛ̅ⲧⲟⲟⲧⲥ̅  ⲛ̅Ϩⲣⲟⲩⲑ̅  ⲧⲘⲱⲁⲃⲓⲧⲓⲥ  ⲑⲓⲙⲉ  ⲙ̅ⲡⲉⲛⲧⲁϥⲙⲟⲩ  ⲛ̅ⲧⲟⲥ  ϩⲱⲱⲥ  Ϩⲣⲟⲩⲑ̅  ⲕⲛⲁϫⲡⲓϫⲓⲧⲥ̅  ϩⲱⲥⲧⲉ  ⲉⲧⲟⲩⲛⲉⲥⲡⲣⲁⲛ  ⲙ̅ⲡⲉⲛⲧⲁϥⲙⲟⲩ  ⲉϫⲛ̅ⲧⲉϥⲕⲗⲏⲣⲟⲛⲟⲙⲓⲁ : Ⲋ. Ⲁⲩⲱ  ⲡⲉⲧϩⲏⲛ  ⲉϩⲟⲩⲛ  ⲉⲡⲅⲉⲛⲟⲥ  ⲡⲉϫⲁϥ  ϫⲉ  ⲛ̅ϯⲛⲁϣϫⲓⲧⲥ̅  ⲁⲛ  ⲛⲁⲓ . ⲙⲏⲡⲟⲧⲉ  ⲛ̅ⲧⲁⲧⲁⲕⲟ  ⲛ̅ⲧⲁⲕⲗⲏⲣⲟⲛⲟⲙⲓⲁ : Ⲛ̅ⲧⲟⲕ  ϫⲓ  ⲛⲁⲕ  ⲙ̅ⲙⲟⲥ  ⲉⲡⲁⲙⲁ : ϫⲉ  ⲁⲛⲟⲕ  ⲛ̅ϯⲛⲁϣϫⲓⲧⲥ̅  ⲁⲛ. ⲍ̅. Ⲁⲩⲱ  ⲡⲁⲓ  ⲡⲉ  ⲡⲇⲓⲕⲁⲓⲱⲙⲁ  ϫⲓⲛⲛ̅ϣⲟⲣⲡ̅  ϩⲙ̅ⲡⲒⲏ̅ⲗ̅.  ⲉⲧⲃⲉⲡⲉⲧϫⲓ  ⲉϩⲟⲩⲛ  ⲉⲡⲅⲉⲛⲟⲥ . ⲁⲩⲱ  ⲉⲧⲃⲉⲧϣⲃ̅ⲓⲱ̅  ⲉⲧⲁϩⲟ  ⲉⲣⲁⲧⲟⲩ  ⲛ̅ⲛ̅ϣⲁϫⲉ  ⲛⲓⲙ : Ⲁⲩⲱ  ⲡⲣⲱⲙⲉ  ⲁϥⲃⲱⲗ  ⲉⲃⲟⲗ  ⲙ̅ⲡⲉϥϩⲩⲡⲟⲙⲁ  ⲉⲧⲣⲉϥⲧⲁⲁϥ  ⲙ̅ⲡⲉⲧϩⲓⲧⲟⲩⲱϥ . ⲁⲩⲱ  ⲡⲁⲓ  ⲡⲉ  ⲡⲙⲁⲣⲧⲩⲣⲓⲟⲛ  ⲉⲧϩⲙ̅ⲡⲒⲏ̅ⲗ̅. ⲏ̅. Ⲡⲉⲧϫⲓ  ⲇⲉ  ⲉϩⲟⲩⲛ  ⲉⲡⲅⲉⲛⲟⲥ  ⲡⲉϫⲁϥ  ⲛ̅Ⲃⲟⲉⲥ  ϫⲉ  ϫⲓ  ⲛⲁⲕ  ⲉⲡⲁⲙⲁ . ⲁⲩⲱ  ⲁϥⲃⲱⲗ  ⲉⲃⲟⲗ  ⲙ̅ⲡⲉϥϩⲩⲡⲟⲇⲏⲙⲁ  ⲁϥⲧⲁⲁϥ  ⲛⲁϥ. ⲑ̅. Ⲃⲟⲉⲥ  ⲇⲉ ⲡⲉϫⲁϥ  ⲛ̅ⲛⲉⲡⲣⲉⲥⲃⲩⲧⲉⲣⲟⲥ  ⲙⲛ̅ⲡⲗⲁⲟⲥ  ⲧⲏⲣϥ̅  ϫⲉ  ⲛ̅ⲧⲱⲧⲛ̅  ⲧⲉⲧⲛ̅ⲟ̅  ⲙ̅ⲙⲛ̅ⲧⲣⲉ  ⲙ̅ⲡⲟⲟⲩ : ϫⲉ  ⲁⲓϫⲓ  ⲛ̅ⲛⲁⲀⲃⲓⲙⲉⲗⲉⲭ  ⲧⲏⲣⲟⲩ .  ⲁⲩⲱ  ⲛⲉⲧϣⲟⲟⲡ  ⲧⲏⲣⲟⲩ  ⲛ̅Ⲭⲁⲓⲗⲉⲱⲛ  ⲙⲛ̅Ⲙⲁⲁⲗⲱⲛ  ⲛ̅ⲧⲟⲟⲧⲥ̅  ⲛ̅Ⲛⲟⲉⲙⲓⲛ.  Ⲁⲩⲱ  Ϩⲣⲟⲩⲑ̅  ⲧⲘⲱⲁⲃⲓⲧⲓⲥ  ⲑⲓⲙⲉ  ⲙ̅Ⲙⲁⲁⲗⲱⲛ .  ⲁⲓϫⲓⲧⲥ̅  ⲉⲩⲥϩⲓⲙⲉ  ⲛⲁⲓ :  Ⲁⲓⲧⲟⲩⲛⲉⲥⲡⲣⲁⲛ  ⲙ̅ⲡⲉⲛⲧⲁϥⲙⲟⲩ  ⲉϫⲛ̅ⲧⲉϥⲕⲗⲏⲣⲟⲛⲟⲙⲓⲁ . ⲛϥ̅ⲧⲙ̅ϥⲱⲧⲉ ⲉⲃⲟⲗ  ⲛ̅ϭⲓⲡⲣⲁⲛ  ⲙ̅ⲡⲉⲛⲧⲁϥⲙⲟⲩ  ⲉⲃⲟⲗ  ϩⲛ̅ⲛⲉϥⲥⲛⲏⲩ . ⲁⲩⲱ ⲉⲃⲟⲗ  ϩⲛ̅ⲧⲉⲫⲩⲗⲏ ⲙ̅ⲡⲉϥⲗⲁⲟⲥ  ⲛ̅ⲧⲱⲧⲛ̅  ⲧⲉⲧⲛ̅ⲟ ⲙ̅ⲙⲛ̅ⲧⲣⲉ  ⲙ̅ⲡⲟⲟⲩ.  ⲓ̅ⲁ̅. Ⲁⲩⲱ ⲡⲗⲁⲟⲥ ⲧⲏⲣϥ̅  ⲉⲧϩⲛ̅ⲧⲡⲩⲗⲏ ⲡⲉϫⲁⲩ ϫⲉ ⲧⲉⲛⲟ ⲙ̅ⲙⲛ̅ⲧⲣⲉ . Ⲁⲩⲱ  ⲛⲉⲡⲣⲉⲥⲃⲩⲧⲉⲣⲟⲥ  ⲡⲉϫⲁⲩ ⲛⲁϥ  ϫⲉ  ⲉⲣⲉⲠϫⲟⲉⲓⲥ  ϯ ⲛ̅ⲧⲉⲕⲥϩⲓⲙⲉ  ⲉⲧⲛⲁⲉⲓ  ⲉϩⲟⲩⲛ ⲉⲡⲉⲕⲏⲓ . ⲛ̅ⲑⲉ ⲛ̅Ϩⲣⲁⲭⲏⲗ  ⲁⲩⲱ ⲛ̅ⲑⲉ  ⲛ̅Ⲗⲓⲁ̅  ⲛ̅ⲁⲓ  ϩⲓⲟⲩⲥⲟⲡ  ⲉⲛⲧⲁⲩⲕⲉⲧ̅ⲡⲏⲓ ⲙ̅ⲡⲒⲏ̅ⲗ̅ . ⲁⲩⲱ ⲥⲉⲉⲓⲣⲉ ⲛ̅ⲟⲩϭⲟⲙ ϩⲛ̅ⲛ̅Ⲉⲫⲣⲁⲑⲁ. ⲛ̅ⲧⲉⲟⲩⲣⲁⲛ ϣⲱⲡⲉ ϩⲛ̅Ⲃⲏⲑⲗⲉⲉⲙ. ⲓ̅ⲃ̅. Ⲁⲩⲱ ⲛ̅ⲧⲉⲡⲉⲕⲏⲓ ϣⲱⲡⲉ ⲛ̅ⲑⲉ ⲙ̅ⲡⲏⲓ ⲙ̅Ⲫⲁⲣⲉⲥ ⲡⲁⲓ ⲉⲛⲧⲁⲐⲁⲙⲁⲣ̅ ϫⲡⲟϥ ⲛ̅Ⲓⲟⲩⲇⲁⲥ ⲉⲃⲟⲗ ϩⲙ̅ⲡⲉⲕⲥⲡⲉⲣⲙⲁ ⲉⲧⲉⲣⲉⲠϫⲟⲉⲓⲥ  ⲛⲁⲧⲁⲁϥ  ⲛⲁⲕ  ⲉⲃⲟⲗ  ϩⲛ̅ⲧⲉⲓϣⲉⲉⲣⲉ  ϣⲏⲙ . ⲓ̅ⲅ̅.

Ⲁⲩⲱ Ⲃⲟⲉⲥ  ⲁϥϫⲓ  ⲛ̅Ϩⲣⲟⲩⲑ ⲁⲥϣⲱⲡⲉ ⲛⲁϥ  ⲛ̅ⲥϩⲓⲙⲉ . Ⲁϥⲃⲱⲕ  ⲉϩⲟⲩⲛ ϣⲁⲣⲟⲥ . ⲁⲠϫⲟⲉⲓⲥ ⲇⲉ  ϯⲑⲉ  ⲛⲁⲥ  ⲉⲧⲣⲉⲥⲙⲓⲥⲉ  ⲁⲥϫⲡⲉⲟⲩϣⲏⲣⲉ. ⲓ̅ⲇ̅. Ⲁⲩⲱ ⲛⲉϩⲓⲟⲙⲉ  ⲡⲉϫⲁⲩ ⲛ̅Ⲛⲟⲉⲙⲓⲛ . ϫⲉ Ⲡϫⲟⲉⲓⲥ ⲥⲙⲁⲙⲁⲁⲧ. ⲉⲧⲉⲙ̅ⲡϥ̅ⲛⲟⲩϫⲉ  ⲙ̅ⲡⲟⲟⲩ ⲉⲃⲟⲗ  ⲙ̅ⲙⲟ̅  ⲙ̅ⲡⲉⲧϩⲏⲛ ⲉϩⲟⲩⲛ ⲉⲡⲅⲉⲛⲟⲥ ⲉⲧⲣⲉⲩⲧⲁⲩⲉⲡⲟⲩⲣⲁⲛ ϩⲙ̅ⲡⲒⲏ̅ⲗ̅.  Ⲁⲩⲱ ⲉϥⲛⲁϣⲱⲡⲉ ⲛⲉ ⲉⲧⲣⲉϥⲕⲧⲉⲯⲩⲭⲏ . ⲁⲩⲱ ⲉⲥⲁⲛ̅ϣⲧⲟⲩⲡⲟⲗⲓⲥ . ⲉⲃⲟⲗϫⲉ  ⲧⲟⲩϣⲉⲗⲉⲉⲧ ⲉⲛⲧⲁⲥⲙⲉⲣⲓⲧⲉ  ⲛ̅ⲧⲟⲥ  ⲧⲉⲛⲧⲁⲥϫⲡⲟϥ  ⲛⲉ  ⲉⲛⲁⲛⲟⲩⲥ  ⲛⲉ ⲉⲥⲁϣ̅ϥ ⲛ̅ϣⲏⲣⲉ. ⲓ̅Ⲋ. Ⲁⲩⲱ Ⲛⲟⲉⲙⲓⲛ  ⲁⲥϫⲓ ⲙ̅ⲡ̅ϣⲏⲣⲉ ⲕⲟⲩⲓ  ⲁⲥⲕⲁⲁϥ  ϩⲛ̅ⲕⲟⲩⲛⲥ̅  ⲁⲥϣⲱⲡⲉ  ⲉⲥϩⲗⲟⲟⲗⲉ  ⲙ̅ⲙⲟϥ. ⲓ̅ⲍ̅. Ⲁⲩⲱ  ⲛⲉⲥⲣⲙ̅ⲣⲁⲩⲏ ⲡⲉϫⲁⲩ ϫⲉ  ⲁⲩϫⲡⲉⲟⲩϣⲏⲣⲉ  ⲛ̅Ⲛⲟⲉⲙⲓⲛ . ⲁⲩⲱ  ⲁⲩⲙⲟⲩⲧⲉ ⲉⲡⲉϥⲣⲁⲛ  ϫⲉ Ⲓⲱⲃⲏⲇ . Ⲡⲁⲓ ⲡⲉ ⲡⲉⲓⲱⲧ  ⲛⲈⲓⲉⲥⲥⲁⲓ ⲡⲓⲱⲧ̅ ⲛ̅Ⲇⲁⲩⲉⲓⲇ.  ⲓ̅ⲏ̅. Ⲁⲩⲱ  ⲛⲁⲓ ⲛⲉ  ⲛⲉϫⲡⲟ ⲙ̅Ⲫⲁⲣⲉⲥ . Ⲫⲁⲣⲉⲥ  ⲁϥϫⲡⲉⲈⲥⲣⲱⲙ. ⲓ̅ⲑ̅. ⲁⲩⲱ  Ⲉⲥⲣⲱⲙ  ⲁϥϫⲡⲉⲀⲣⲁⲙ . Ⲁⲣⲁⲙ ⲇⲉ  ⲁϥϫⲡⲉⲀⲙⲉⲓⲛⲁⲇⲁⲃ.  Ⲁⲙⲉⲓⲛⲁⲇⲁⲃ  ⲇⲉ  ⲁϥϫⲡⲟ  ⲛ̅Ⲁⲁⲥⲥⲱⲛ . Ⲛⲁⲁⲥⲥⲱⲛ ⲇⲉ  ⲁϥϫⲡⲉⲤⲁⲗⲙⲱⲛ. ⲕ̅ⲁ̅. Ⲥⲁⲗⲙⲱⲛ ⲇⲉ  ⲁϥϫⲡⲉⲂⲟⲉⲥ . Ⲃⲟⲉⲥ  ⲇⲉ  ⲁϥϫⲡⲉⲒⲱⲃⲏⲇ. ⲕ̅ⲃ̅. Ⲓⲱⲃⲏⲇ ⲇⲉ  ⲁϥϫⲡⲉⲒⲉⲥⲥⲁⲓ . Ⲓⲉⲥⲥⲁⲓ  ⲇⲉ  ⲁϥϫⲡⲉⲆⲁⲩⲉⲓⲇ :
 

ⲡϫⲱⲱⲙⲉ  ⲛ̅Ⲣⲟⲩⲑ