ⲠϪⲰ Ⲛ̅ⲦⲈⲚⲒϪⲰ Ⲛ̅ⲤⲞⲖⲞⲘⲰⲚ
Ⲡϫⲱ ⲛ̅ⲧⲉⲛⲓϫⲱ ⲉⲧⲉⲡⲁⲤⲟⲗⲟⲙⲱⲛ ⲡⲉ ⲉϥϫⲱ ⲙ̅ⲙⲟⲥ . ϫⲉ ⲃ̅. Ⲙⲁⲣⲉϥϯⲡⲓ ⲉⲣⲱⲓ ⲉⲃⲟⲗ ϩⲛ̅ⲙ̅ⲡⲉⲓ ⲛ̅ⲧⲉⲧⲉϥⲧⲁⲡⲣⲟ. ϫⲉ ⲛⲁⲛⲟⲩⲛⲉⲕⲉⲕⲓⲃⲉ ⲛ̅ϩⲟⲩⲉⲡⲏⲣⲡ. ⲅ̅. Ⲁⲩⲱ ⲡⲉⲥⲧⲟⲓ ⲛ̅ⲛⲉⲕⲥⲟϭⲛ̅ ϥϣⲱϣ ⲉϩⲟⲩⲉⲛ̅ϩⲏⲛⲉ ⲧⲏⲣⲟⲩ. Ⲡⲉⲕⲣⲁⲛ ⲟⲩⲥⲟϭⲛ̅ ⲡⲉ ⲉⲁⲩⲥⲙⲟⲩ ⲉⲣⲟϥ ⲁⲩⲱ ⲉϥⲡⲏⲛ ⲉⲃⲟⲗ . Ⲉⲧⲃⲉⲡⲁⲓ ⲁⲛ̅ϣⲉⲉⲣⲉ ϣⲏⲙ ⲙⲉⲣⲓⲧⲕ̅ ⲁⲩⲥⲟⲕ̅ⲕ̅ ⲛⲁⲩ ⲉⲡⲁϩⲟⲩ. ⲇ̅. ⲉⲛⲛⲁⲡⲱⲧ ⲉⲟⲩⲁϩⲛ̅ ⲛ̅ⲥⲁⲡⲉⲥⲧⲟⲓ ⲛ̅ⲛⲉⲕⲥⲟϭⲛ̅. Ⲁⲡⲣ̅ⲣⲟ ϫⲓ ⲙ̅ⲙⲟⲓ ⲉϩⲟⲩⲛ ⲉⲡⲉϥⲧⲁⲙⲓⲟⲛ. ⲧⲛ̅ⲛⲁⲧⲉⲗⲏⲗ ϭⲉ ⲛ̅ⲧⲛ̅ⲉⲩⲫⲣⲁⲛⲉ ⲛ̅ϩⲏⲧⲉ. ⲧⲛ̅ⲛⲁⲙⲉⲣⲉⲛⲟⲩⲉⲕⲓⲃⲉ ⲉϩⲟⲩⲉⲡⲏⲣⲡ̅ . ϫⲉ ⲁ ⲡⲉⲧⲥⲟⲩⲧⲱⲛ ⲙⲉⲣⲓⲧⲉ. Ⲁⲛⲟⲕ ⲁⲛⲅ̅ⲟⲩⲕⲁⲙⲏ. ⲁⲗⲗⲁ ⲛⲉⲥⲱⲉⲓ ⲉⲛϣⲉⲉⲣⲉ ⲙ̅ⲡⲒ̅ⲏⲗ̅ ⲛ̅ⲑⲉ ⲛ̅ⲛⲉⲥⲕⲏⲛⲏ ⲙⲛ̅ⲛⲕⲏⲇⲁⲣ . ⲛ̅ⲑⲉ ⲇⲉ ⲛ̅ⲛ̅ⲇⲉⲣⲣⲓⲥ ⲛ̅Ⲥⲟⲗⲟⲙⲱⲛ. Ⲋ. Ⲙ̅ⲡⲣ̅ϭⲱϣⲧ ⲉⲣⲟⲓ ϫⲉ ⲁⲛⲅ̅ⲟⲩⲕⲁⲙⲏ ⲁⲛⲟⲕ . Ⲡⲣⲏ ⲡⲉⲛⲧⲁϥⲕⲁⲁⲧ ⲛ̅ⲥⲱϥ ⲛ̅ϣⲏⲣⲉ ⲛ̅ⲧⲁⲙⲁⲁⲩ ⲁⲩⲙⲓϣⲉ ⲛⲙ̅ⲙⲁⲓ ⲁⲩⲕⲁⲁⲧ ⲉⲣⲟⲓⲥ ⲉϩⲉⲛⲙⲁⲛ̅ⲉⲗⲟⲟⲗⲉ . Ⲡⲁⲙⲁⲛ̅ⲉⲗⲟⲟⲗⲉ ⲣⲱ ⲁⲛⲟⲕ ⲙ̅ⲡⲓⲣⲟⲉⲓⲥ ⲉⲣⲟϥ. ⲍ̅. Ⲙⲁⲧⲁⲙⲟⲓ ϭⲉ ⲡⲉⲛⲧⲁⲧⲁⲯⲩⲭⲏ ⲙⲉⲣⲓⲧϥ̅ . ϫⲉ ⲉⲕⲙⲟⲟⲛⲉ ⲧⲱⲛ ⲁⲩⲱ ⲉⲕⲣ̅ϣⲁⲓⲣⲉ ⲧⲱⲛ ⲙ̅ⲡⲛⲁⲩ ⲙ̅ⲙⲉⲉⲣⲉ . Ⲙ̅ⲡⲣ̅ⲧⲣⲁϭⲟⲟⲗⲉⲧ ⲧⲁⲉⲓ ⲉϫⲛ̅ⲛⲁⲅⲉⲗⲏ ⲛ̅ⲛⲉⲕϣⲃⲉⲉⲣ ⲏ̅. ⲉϣⲱⲡⲉ ⲉⲣⲉⲧⲙ̅ⲥⲟⲩⲱⲛⲧ̅ ⲧⲉⲧⲛⲉⲥⲱⲥ ϩⲛ̅ⲛⲉϩⲓⲟⲙⲉ . Ⲉⲓⲥ ⲁⲙⲏ ⲉⲃⲟⲗ ⲛ̅ⲧⲉⲉⲑⲁⲏ ⲛ̅ⲛⲟϩⲉ ⲛ̅ⲧⲉⲙⲟⲟⲛⲉ ⲛ̅ⲛⲟⲩⲃⲁⲁⲙⲡⲉ ϩⲛ̅ⲛ̅ⲥⲕⲏⲛⲏ ⲛ̅ⲛ̅ϣⲱⲱⲥ ⲧⲉⲧϩⲓⲧⲟⲩⲱⲓ. ⲑ̅. Ⲁⲓⲧⲛ̅ⲧⲱⲛⲉ ⲉⲧⲁϩⲧⲱⲣⲉ ϩⲛ̅ⲛ̅ϩⲁⲣⲙⲁ ⲙ̅ⲫⲁⲣⲁⲱ. Ⲛ̅ⲟⲩⲟϭⲉ ⲁⲩⲥⲁ ⲛ̅ⲑⲉ ⲛ̅ϩⲉⲛϭⲣⲁⲙⲡϣⲁⲛ. ⲡⲟⲩⲙⲁⲕϩ ⲁϥⲥⲁ ⲛ̅ⲑⲉ ⲛ̅ϩⲉⲛϩⲟⲣⲙⲓⲥⲕⲟⲥ. ⲓ̅ⲁ̅. ⲡⲓⲛⲉ ⲙ̅ⲡⲛⲟⲩⲃ ⲧⲛ̅ⲛⲁⲧⲁⲙⲓⲟϥ . ⲛⲉⲙⲛ̅ⲙ̅ⲙⲁⲉⲓⲛ ⲙ̅ⲫⲁⲧ. ⲓ̅ⲃ̅. Ϣⲁⲛⲧⲉⲡⲣ̅ⲣⲟ ⲛⲟϫϥ̅ ϩⲙ̅ⲡⲉϥⲙⲁ . ⲧⲁⲛⲁⲣⲇⲟⲥ ⲁⲥϣⲱϣ ⲉⲃⲟⲗ ⲙ̅ⲡⲉⲥⲥⲧⲟⲓ. ⲓ̅ⲅ̅. Ⲟⲩⲙⲁⲓⲣⲉ ⲛ̅ⲧⲉⲧⲉⲥⲧⲁⲕⲧⲏ ⲡⲉ ⲡⲁⲥⲟⲛ ⲛⲁⲓ . ⲉϥⲛⲁϣⲱⲡⲉ ϩⲛ̅ⲧⲙⲏⲧⲉ ⲛ̅ⲛⲁⲉⲕⲓⲃⲉ. ⲓ̅ⲇ̅. Ⲟⲩⲥⲙⲁϩ ⲛ̅ⲕⲟⲩⲡⲣ̅ ⲡⲉ ⲡⲁⲥⲟⲛ ⲉϥϩⲛ̅ⲙ̅ⲙⲁ ⲛ̅ⲉⲗⲟⲟⲗⲉ ⲉⲧϩⲛ̅Ⲅⲁⲇⲇⲉⲓ. Ⲉⲓⲥ ϩⲏⲏⲧⲉ ⲛⲉⲥⲱ ⲧⲁϣⲃⲉⲉⲣⲉ ⲉⲓⲥ ϩⲏⲏⲧⲉ ⲛⲉⲥⲱ . Ⲛ̅ⲟⲩⲃⲁⲗ ϩⲉⲛⲃⲁⲗ ⲛ̅ϭⲣⲟⲟⲙⲡⲉ ⲛⲉ. ⲓ̅Ⲋ. Ⲉⲓⲥ ϩⲏⲏⲧⲉ ⲛⲁⲛⲟⲩⲕ ⲡⲁⲥⲟⲛ ⲁⲩⲱ ⲛⲉⲥⲱⲕ ⲉϭⲱϣⲧ ⲛ̅ⲥⲱⲕ . ⲉⲕⲟ ⲛ̅ϩⲁⲓⲃⲉⲥ ⲉⲃⲟⲗ ⲉϫⲙ̅ⲡⲉⲛⲙⲁⲛ̅ⲛ̅ⲕⲟⲧⲕ̅. ⲓ̅ⲍ̅. Ⲛ̅ⲥⲟⲓ ⲙ̅ⲡⲉⲛⲏⲓ ϩⲉⲛⲉⲃⲟⲗ ⲛⲉ ϩⲛ̅ⲛ̅ϣⲉ ⲙ̅ⲡⲖⲓⲃⲁⲛⲟⲥ . ⲛⲉⲛⲟⲩⲉϩⲥⲟⲓ ϩⲉⲛⲕⲩⲡⲁⲣⲓⲥⲥⲟⲥ ⲛⲉ.
Ⲃ̅. Ⲁⲛⲟⲕ ⲡⲉ ⲡⲉϩⲣⲏⲣⲉ ⲛ̅ⲧⲥⲱϣⲉ . ⲁⲩⲱ ⲡⲉⲕⲕⲣⲓⲛⲟ̅ⲛ̅ ⲛ̅ⲉⲓⲁ. ⲃ̅. ⲛ̅ⲑⲉ ⲙ̅ⲡⲉⲕⲣⲓⲛⲟⲛ ⲉϥϩⲛ̅ⲧⲙⲏⲧⲉ ⲛ̅ⲛ̅ϣⲟⲛⲧⲉ . ⲧⲁⲓ ⲧⲉ ⲑⲉ ⲛ̅ⲧⲁϣⲃⲉⲉⲣⲉ ⲉⲥϩⲛ̅ⲧⲙⲏⲧⲉ ⲛ̅ⲛ̅ϣⲃⲉⲉⲣⲉ. ⲅ̅. Ⲛ̅ⲑⲉ ⲛ̅ⲟⲩϫⲉⲙⲡⲉϩ ⲉϥϩⲛ̅ⲛ̅ϣⲏⲛ ⲙ̅ⲡⲙⲁⲛ̅ϣⲏⲛ . ⲧⲁⲓ ⲧⲉ ⲑⲉ ⲙ̅ⲡⲁⲥⲟⲛ ⲉϥϩⲛ̅ⲧⲙⲏⲧⲉ ⲛ̅ⲛ̅ϣⲏⲣⲉ . Ⲁⲓⲉⲡⲓⲑⲩⲙⲓ ⲉⲧⲟⲩϩⲁⲓⲃⲉⲥ ⲁⲓϩⲙⲟⲟⲥ ϩⲁⲣⲁⲧⲥ̅ . ⲁⲩⲱ ⲡⲉϥⲕⲁⲣⲡⲟⲥ ϩⲟⲗϭ ϩⲛ̅ⲧⲁϣⲟⲩⲱⲃⲉ. ⲇ̅. Ϫⲓⲧ ⲉϩⲟⲩⲛ ⲙ̅ⲡⲏⲓ ⲙ̅ⲡⲏⲣⲡ̅ ⲥⲙⲓⲛⲉ ⲛⲁⲓ ⲛ̅ⲟⲩⲁⲅⲁⲡⲏ. ⲛ̅ⲧⲉⲧⲛ̅ⲧⲁϫⲣⲟⲓ ϩⲛ̅ϩⲉⲛⲥⲟϭⲛ̅ ⲛ̅ⲧⲉⲧⲛ̅ⲕⲧⲟ ⲉⲣⲟⲓ ⲛ̅ϩⲉⲛϫⲉⲙⲡⲉϩ . ϫⲉ ⲁⲧⲉϥⲁⲅⲁⲡⲏ ⲁⲛⲟⲕ ϫⲓ ⲙ̅ⲙⲟⲓ. Ⲋ.Ⲧⲉϥϭⲓϫ ⲛ̅ϩⲃⲟⲩⲣ ϩⲁⲧⲁⲁⲡⲉ . ⲁⲩⲱ ⲧⲉϥⲟⲩⲛⲁⲙ ⲛⲁϩⲱⲗ̅ϭ ⲉⲣⲟⲓ. ⲍ̅. Ⲁⲓⲧⲁⲣⲕⲉⲧⲏⲩⲧⲛ̅ ⲛ̅ϣⲉⲉⲣⲉ ⲛ̅ⲑⲒⲏ̅ⲙ̅ . ϩⲛ̅ⲛ̅ϭⲟⲙ ⲁⲩⲱ ϩⲛ̅ⲛ̅ⲛⲟⲙⲧⲉ ⲛ̅ⲧⲥⲱϣⲉ . ⲉⲧⲣⲉⲧⲛ̅ⲛⲉϩⲥⲉ ⲛ̅ⲧⲁⲅⲁⲡⲏ . ⲁⲩⲱ ⲛ̅ⲧⲉⲧⲛ̅ⲧⲟⲩⲛⲟⲥⲥ̅ ϣⲁⲛⲧⲉⲥⲣ̅ϩ̅ⲛⲁⲥ. ⲏ̅. Ⲡⲉϩⲣⲟⲟⲩ ⲙ̅ⲡⲁⲥⲟⲛ ⲁϥⲓ ⲉⲣⲟⲓ. Ⲉⲓⲥ ϩⲏⲏⲧⲉ ⲛ̅ⲧⲟϥ ⲁϥⲉⲓ ⲉϥⲡⲏⲧ ϩⲓϫⲛ̅ⲛ̅ⲧⲟⲩⲉⲓⲏ ⲁⲩⲱ ⲉϥϫⲓϥⲟϭⲥ̅ ϩⲓϫⲛ̅ⲛ̅ⲃⲟⲩⲛⲟⲥ. ⲑ̅. ⲉⲣⲉⲡⲁⲥⲟⲛ ⲧⲛ̅ⲧⲱⲛ ⲉⲩϭⲁϩⲥⲉ ⲁⲩⲱ ⲉⲩⲙⲁⲥ ⲛ̅ⲉⲓⲟⲩⲗ ϩⲓϫⲛ̅ⲛ̅ⲧⲟⲟⲩ ⲛ̅Ⲃⲁⲓⲑⲏⲗ. Ⲉⲓⲥ ϩⲏⲏⲧⲉ ⲛ̅ⲧⲟϥ ϥϭⲱϣⲧ ϩⲓⲡⲁϩⲟⲩ ⲛ̅ⲧⲛ̅ϫⲟ . ϥϭⲱϣⲧ ⲉⲃⲟⲗ ϩⲛ̅ⲛ̅ϣⲟⲩϣⲧ̅. Ⲁⲩⲱ ⲡⲁⲥⲟⲛ ⲁϥϣⲁϫⲉ ⲛⲙ̅ⲙⲁⲓ ⲉⲃⲟⲗ ϩⲛ̅ⲛⲉϣⲛⲏⲩ . ⲉϥϫⲱ ⲙ̅ⲙⲟⲥ . ϫⲉ ⲧⲱⲟⲩⲛ ⲁⲙⲏ ⲧⲁϣⲃⲉⲉⲣⲉ ⲧⲁϭⲣⲟⲟⲙⲡⲉ ⲉⲧⲛⲉⲥⲱⲥ. ⲓ̅ⲁ̅. ϫⲉ ⲉⲓⲥ ⲧⲉⲡⲣⲱ ⲁⲥⲟⲩⲉⲓⲛⲉ ⲡϩⲟⲩⲙ̅ⲡⲉ ⲁϥⲙⲟⲟϣⲉ ⲁϥⲃⲱⲕ ⲉⲡⲉϥⲙⲁ. ⲓ̅ⲃ̅. ⲛϯⲟⲩⲱ ⲁⲩⲟⲩⲱⲛϩ̅ ⲉⲃⲟⲗ ϩⲓϫⲙ̅ⲡⲕⲁϩ . ⲡⲉⲟⲩⲟⲉⲓϣ ⲙ̅ⲡϫⲱⲗϩ̅ ⲁϥⲉⲓ . Ⲡⲉϩⲣⲟⲟⲩ ⲙ̅ⲡⲉϭⲣⲙ̅ⲡϣⲁⲛ ⲁⲩⲥⲱⲧⲙ̅ ⲉⲣⲟϥ ϩⲙ̅ⲡⲉⲛⲕⲁϩ. ⲓ̅ⲅ̅. ⲧⲃⲱ ⲛ̅ⲕⲛ̅ⲧⲉ ⲁⲥⲧⲁⲩⲟ ⲉⲃⲟⲗ ⲛ̅ⲛⲉⲥⲃⲉⲉϣ . ⲛ̅ⲃⲱ ⲛ̅ⲉⲗⲟⲟⲗⲉ ⲉⲩⲛⲉϫⲕⲟⲩⲡⲣ̅ ⲁⲩϯ ⲙ̅ⲡⲉⲩⲥⲧⲟⲓ. ⲓ̅ⲇ̅. Ⲧⲱⲟⲩⲛⲉ ⲁⲙⲏ ⲧⲉⲧϩⲓⲧⲟⲩⲱⲓ ⲧⲁϭⲣⲟⲟⲙⲡⲉ ⲉⲧⲛⲁⲛⲟⲩⲥ ⲁⲩⲱ ⲛ̅ⲧⲉⲉⲓ ⲛ̅ⲧⲟ ⲧⲁϭⲣⲟⲟⲙⲡⲉ ϩⲙ̅ⲡⲟⲩⲱϣ ⲛ̅ⲧⲉⲧⲡⲉⲧⲣⲁ ϩⲓⲧⲟⲩⲱϥ ⲙ̅ⲡⲥⲟⲃⲧ ⲉⲧϩⲓⲃⲟⲗ ⲛ̅ⲧⲉⲧⲥⲁⲓⲟ ⲙ̅ⲡⲟⲩϩⲟ . ⲁⲩⲱ ⲛ̅ⲧⲉⲧⲣⲁⲥⲱⲧⲙ̅ ⲉⲡⲟⲩϩⲣⲟⲟⲩ . ϫⲉ ⲡⲟⲩϩⲣⲟⲟⲩ ⲟⲩϩⲣⲟⲟⲩ ⲡⲉ ⲉϥⲛⲟⲧⲙ̅ . ⲁⲩⲱ ⲡⲟⲩϩⲟ ⲛⲉⲥⲱϥ ⲛⲁⲓ. Ϭⲱⲡⲉ ⲛⲁⲓ ⲛ̅ϩⲉⲛⲃⲁϣⲟⲣ . ϩⲉⲛⲃⲁϣⲟⲣ ⲕⲟⲩⲓ ⲉⲩⲧⲁⲕⲟ ⲙ̅ⲙⲁⲛ̅ⲉⲗⲟⲟⲗⲉ . ⲁⲩⲱ ⲛⲉⲛⲃⲱ ⲛ̅ⲉⲗⲟⲟⲗⲉ ⲉⲩⲛⲉϫⲕⲟⲩⲡⲣ̅. ⲓ̅Ⲋ. Ⲡⲁⲥⲟⲛ ⲉϥϣⲟⲟⲡ ⲛⲁⲓ . ⲁⲩⲱ ⲁⲛⲟⲕ ϩⲱ ⲉⲓϣⲟⲟⲡ ⲛⲁϥ. ⲓ̅ⲍ̅. ⲡⲉⲧⲙⲟⲟⲛⲉ ϩⲛ̅ⲛⲉⲕⲣⲓⲛⲟⲛ ϣⲁⲛⲧⲉⲡⲉϩⲟⲟⲩ ϫⲱⲕ . ⲁⲩⲱ ⲛ̅ⲧⲉⲛ̅ϩⲁⲓⲃⲉⲥ ⲕⲙ̅ⲧⲟⲩ . Ⲕⲟⲧⲕ̅ ⲛ̅ⲧⲟⲕ ⲡⲁⲥⲟⲛ ⲛⲅ̅ⲧⲛ̅ⲧⲱⲛⲕ̅ ⲉⲩϭϩⲟⲥ ⲏ ⲉⲩⲙⲁⲥ ⲛ̅ⲉⲓⲟⲩⲗ . ϩⲓϫⲛ̅ⲛ̅ⲧⲟⲩⲓⲏ ⲛ̅ⲉⲓⲁ.
Ⲅ̅. Ⲉⲓϩⲓϫⲛ̅ⲡⲁⲙⲁⲛ̅ⲛ̅ⲕⲟⲧⲕ̅ ⲛ̅ⲧⲉⲩϣⲏ . ⲁⲓϣⲓⲛⲉ ⲛ̅ⲥⲁⲡⲉⲛⲧⲁⲧⲁⲯⲩⲭⲏ ⲙⲉⲣⲓⲧϥ . Ⲁⲓϣⲓⲛⲉ ⲛ̅ⲥⲱϥ ⲙ̅ϩⲉ ⲉⲣⲟϥ . ⲁⲓⲙⲟⲩⲧⲉ ⲉⲣⲟϥ ⲁⲩⲱ ⲙ̅ⲡⲉϥⲥⲱⲧⲙ̅ ⲉⲣⲟⲓ. ⲃ̅. ϯⲛⲁⲧⲱⲟⲩⲛ ϭⲉ ⲧⲁⲕⲱⲧⲉ ϩⲛ̅ⲧⲡⲟⲗⲓⲥ ϩⲛ̅ⲛ̅ⲁⲅⲱⲣⲁ ⲁⲩⲱ ϩⲛ̅ⲛⲉⲡⲗⲁⲧⲓⲁ. ⲧⲁⲕⲱⲧⲉ ⲛ̅ⲥⲁⲡⲉⲛⲧⲁⲧⲁⲯⲩⲭⲏ ⲙⲉⲣⲓⲧϥ̅ . Ⲁⲓⲕⲱⲧⲉ ϭⲉ ⲛ̅ⲥⲱϥ ⲁⲩⲱ ⲙ̅ⲡⲓϩⲉ ⲉⲣⲟϥ. ⲅ̅. Ⲁⲩϩⲉ ⲉⲣⲟⲓ ⲛ̅ϭⲓⲛⲉⲧⲣⲟⲉⲓⲥ ⲛⲉⲧϯⲟⲩⲟⲓ ϩⲛ̅ⲧⲡⲟⲗⲓⲥ . ⲁⲓϫⲛⲟⲩⲟⲩ ϫⲉ ⲙⲏ ⲁⲧⲉⲧⲛ̅ⲛⲁⲩ ⲉⲡⲉⲛⲧⲁⲧⲁⲯⲩⲭⲏ ⲙⲉⲣⲓⲧϥ̅. ⲇ̅. Ⲛ̅ⲧⲉⲣⲓⲥⲁⲁⲧⲟⲩ ϭⲉ ⲛ̅ⲟⲩⲕⲟⲩⲓ ⲁⲓⲣ̅ⲡⲉⲩⲃⲟⲗ . ⲁⲓϩⲉ ⲉⲡⲉⲛⲧⲁⲧⲁⲯⲩⲭⲏ ⲙⲉⲣⲓⲧϥ̅ . ⲁⲓⲁⲙⲁϩⲧⲉ ⲙ̅ⲙⲟϥ ⲙ̅ⲡⲓⲕⲁⲁϥ ⲉⲃⲟⲗ . ϣⲁⲛⲧⲁⲛ̅ⲧϥ̅ ⲉϩⲟⲩⲛ ⲉⲡⲏⲓ ⲛ̅ⲧⲁⲙⲁⲁⲩ . ⲁⲩⲱ ⲉϩⲟⲩⲛ ⲉⲡⲧⲁⲙⲓⲟⲛ ⲛ̅ⲧⲉⲛⲧⲁⲥⲱ ⲙ̅ⲙⲟⲓ. Ⲁⲓⲧⲁⲣⲕⲉⲧⲏⲩⲧⲛ̅ ⲛ̅ϣⲉⲉⲣⲉ ⲛ̅ⲑⲒⲗ̅ⲏ̅ⲙ̅ . ϩⲛ̅ⲛϭⲟⲙ ⲁⲩⲱ ϩⲛ̅ⲛ̅ⲛⲟⲙⲧⲉ ⲛ̅ⲧⲥⲱϣⲉ ⲉⲧⲣⲉⲧⲛ̅ⲛⲉϩⲥⲉ ⲛ̅ⲧⲁⲅⲁⲡⲏ ⲁⲩⲱ ⲛ̅ⲧⲉⲧⲛ̅ⲧⲟⲩⲛⲟⲥⲥ̅ ϣⲁⲛⲧⲉⲥⲣ̅ϩ̅ⲛⲁⲥ. Ⲋ. Ⲛⲓⲙ ⲧⲉ ⲧⲁⲓ ⲉⲧⲛⲏⲩ ⲉϩⲣⲁⲓ ϩⲙ̅ⲡϫⲁⲓⲉ ⲉⲃⲟⲗϩⲛ̅ⲧⲙⲏⲧⲉ ⲛⲓⲁ ...........ⲱ̅ ⲙⲛ̅ⲙⲏⲁ............. ⲉⲣⲉⲧⲟⲟⲧϥ̅ ...........ⲓⲧ ⲉⲡⲉⲥⲡⲁ ........... ⲉⲧⲛ̅ⲑⲉ ⲛ̅ⲟⲩϣⲁⲩ ⲛ̅ϣⲟⲩϩⲏⲛⲉ ⲉⲁⲩⲧⲁⲗⲟϥ ⲉϩⲣⲁⲓ ⲉϥϯⲕⲁⲡⲛⲟⲥ ⲛ̅ⲥⲧⲟⲓ ⲉⲃⲟⲗ ϩⲛ̅ⲟⲩϣⲁⲗ . ⲙⲛ̅ⲟⲩⲗⲓⲃⲁⲛⲟⲥ ⲉⲃⲟⲗ ϩⲛ̅ⲛ̅ϩⲏⲛⲉ ⲧⲏⲣⲟⲩ ⲙ̅ⲡⲣⲉϥⲡⲉⲥⲥⲟϭⲛ̅. ⲍ̅. Ⲉⲓⲥ ϩⲏⲏⲧⲉ ⲉⲓⲥ ⲡⲉϭⲗⲟϭ ⲛ̅Ⲥⲟⲗⲟⲙⲱⲛ ⲉⲣⲉⲥⲉ ⲛ̅ⲇⲩⲛⲁⲧⲟⲥ ⲕⲱⲧⲉ ⲉⲣⲟϥ ⲉⲃⲟⲗ. ϩⲛ̅ⲛ̅ⲇⲩⲛⲁⲧⲟⲥ ⲙ̅ⲡⲒ̅ⲏ̅ⲗ̅ ⲉⲣⲉⲛⲉⲩⲥⲏϥⲉ ⲧⲏⲣⲟⲩ ⲛ̅ⲧⲟⲟⲧⲟⲩ. ⲏ̅. ⲉⲩⲧⲥⲁⲃⲏⲩ ⲉⲡⲡⲟⲗⲉⲙⲟⲥ ⲡⲣⲱⲙⲉ ⲉⲣⲉⲧⲉϥⲥⲏϥⲉ ϩⲓϫⲛ̅ⲡⲉϥⲙⲏⲣⲟⲥ ⲉⲧⲃⲉⲑⲟⲧⲉ ⲉⲧϣⲱⲡⲉ ⲛ̅ⲧⲉⲩϣⲏ. ⲑ̅. Ⲁⲡⲣ̅ⲣⲟ Ⲥⲟⲗⲟⲙⲱⲛ ⲧⲁⲙⲓⲟ ⲛⲁϥ ⲛ̅ⲟⲩⲙⲁⲛ̅ϩⲙⲟⲟⲥ ⲉⲃⲟⲗ ϩⲛ̅ⲛ̅ϣⲉ ⲙ̅ⲡⲖⲓⲃⲁⲛⲟⲥ. Ⲛⲉϥⲥⲧⲩⲗⲗⲟⲥ ⲁϥⲧⲁⲙⲓⲟⲟⲩ ⲛ̅ϩⲁⲧ . ⲁⲩⲱ ⲡⲉϥⲁⲛⲁⲅⲗⲓⲧⲟⲛ ⲟⲩⲛⲟⲩⲃ ⲡⲉ . Ⲛⲉϥⲧⲱⲣⲧⲣ̅ ϩⲉⲛϫⲏϭⲉ ⲛⲉ . ⲡⲉϥϩⲟⲩⲛ ⲉϥⲧⲟϭⲥ̅ ⲛ̅ⲛ̅ⲱⲛⲉ . ⲟⲩⲁⲅⲁⲡⲏ ⲛ̅ⲧⲉⲛ̅ϣⲉⲉⲣⲉ ⲛ̅ⲑⲒⲗ̅ⲏ̅ⲙ̅. ⲓ̅ⲁ̅. Ⲁⲙⲏⲧⲛ̅ ⲉⲃⲟⲗ ⲛ̅ϣⲉⲉⲣⲉ ⲛ̅Ⲥⲓⲱⲛ. ⲛ̅ⲧⲉⲧⲛ̅ⲛⲁⲩ ⲉⲡⲣ̅ⲣⲟ Ⲥⲟⲗⲟⲙⲱⲛ ϩⲙ̅ⲡⲉⲕⲗⲟⲙ ⲛ̅ⲧⲁⲧⲉϥⲙⲁⲁⲩ ⲥⲧⲉⲫⲁⲛⲟⲩ ⲙ̅ⲙⲟϥ ⲛ̅ϩⲏⲧϥ̅ ϩⲙ̅ⲡⲉϩⲟⲟⲩ ⲛ̅ⲧⲉϥϣⲉⲗⲉⲉⲧ . Ⲁⲩⲱ ϩⲙ̅ⲡⲉϩⲟⲟⲩ ⲙ̅ⲡⲟⲩⲛⲟϥ ⲙ̅ⲡⲉϥϩⲏⲧ.
Ⲇ̅. Ⲉⲓⲥ ϩⲏⲏⲧⲉ ⲛⲁⲛⲟⲩⲧⲁϣⲃⲉⲉⲣⲉ ⲉⲓⲥ ϩⲏⲏⲧⲉ ⲛⲉⲥⲱ . ⲛⲟⲩⲃⲁⲗ ⲛ̅ⲑⲉ ⲛ̅ⲛⲁϩⲉⲛϭⲣⲟⲟⲙⲡⲉ ⲛⲉ ⲡⲃⲟⲗ ⲛ̅ⲧⲟⲩⲧⲁⲡⲣⲟ. Ⲡⲟⲩϥⲱ ⲉϥⲟ ⲛ̅ⲑⲉ ⲛ̅ⲛⲓⲁⲅⲉⲗⲏ ⲛ̅ⲃⲁⲁⲙⲡⲉ ⲉⲁⲩⲟⲩⲱⲛϩ̅ ⲉⲃⲟⲗ ϩⲛ̅Ⲅⲁⲗⲁⲁⲇ. ⲃ̅. Ⲛⲟⲩⲟⲃϩⲉ ⲉⲩⲟ ⲛ̅ⲑⲉ ⲛⲛⲁⲅⲉⲗⲏ ⲛ̅ⲛⲉⲛⲧⲁⲩϩⲟⲟⲕⲟⲩ ⲉⲁⲩⲉ̅ⲓ ⲉϩⲣⲁⲓ ϩⲙ̅ⲡⲙⲟⲟⲩ ⲉⲣⲉϩⲉⲛϣⲏⲣⲉ ⲛ̅ϩⲁⲧⲣⲉⲉⲩ ϣⲟⲟⲡ ⲛⲁⲩ ⲧⲏⲣⲟⲩ. ⲁⲩⲱ ⲙⲙⲛ̅ⲙⲛ̅ⲧⲁⲧϣⲏⲣⲉ ⲛ̅ϩⲏⲧⲟⲩ. ⲅ̅. ⲉⲣⲉⲛⲟⲩⲥⲡⲟⲧⲟⲩ ⲟ ⲛ̅ⲑⲉ ⲛ̅ⲟⲩϩⲱⲥ ⲛ̅ⲕⲟⲕⲕⲟⲥ ⲧⲁϣⲉⲗⲉⲉⲧ . ⲁⲩⲱ ⲧⲟⲩϭⲓⲛϣⲁϫⲉ ⲛⲉⲥⲱⲥ . Ⲛ̅ⲟⲩⲟϭⲉ ⲉⲩⲟ ⲛ̅ⲑⲉ ⲛ̅ϩⲉⲛⲕⲟⲩⲕⲉ ⲛ̅ϩⲉⲣⲙⲁⲛ . ⲡⲃⲟⲗ ⲛ̅ⲧⲟⲩⲧⲁⲡⲣⲟ. ⲇ̅. Ⲡⲟⲩⲙⲁⲕϩ̅ ⲉϥⲁϩⲉⲣⲁⲧϥ̅ ⲛ̅ⲑⲉ ⲙ̅ⲡⲡⲩⲣⲅⲟⲥ ⲛ̅Ⲇⲁⲩⲉⲓⲇ ⲉⲁⲩⲕⲟⲧϥ̅ ϩⲛ̅Ⲑⲁⲗⲡⲓⲱⲑ . ⲉⲣⲉϣⲟ ⲛ̅ⲑⲩⲣⲱⲛ ⲁϣⲉ ⲉⲣⲟϥ ⲁⲩⲱ ⲛ̅ⲥⲟⲧⲉ ⲧⲏⲣⲟⲩ ⲛ̅ⲛ̅ⲇⲩⲛⲁⲧⲟⲥ. ⲉⲣⲉⲧⲟⲩⲉⲕⲓⲃⲉ ⲥⲛ̅ⲧⲉ ⲟ̅ ⲛ̅ⲑⲉ ⲙ̅ⲙⲁⲥ ⲥⲛⲁⲩ ⲛ̅ϩⲁⲧⲣⲉⲉⲩ ⲛ̅ϭⲁϩⲥⲉ ⲉⲩⲙⲟⲟⲛⲉ ϩⲛ̅ⲛⲉⲕⲣⲓⲛⲟⲛ. Ⲋ. ϣⲁⲛⲧⲉⲡⲉϩⲟⲟⲩ ϫⲱⲕ ⲛⲧⲉⲛ̅ϩⲁⲓⲃⲉⲥ ⲣⲓⲕⲉ. ⲍ̅. Ⲛⲁⲛⲟⲩ ⲧⲏⲣⲉ ⲧⲁϣⲃⲉⲉⲣⲉ ⲁⲩⲱ ⲙⲛ̅ⲗⲁⲁⲩ ⲛ̅ϫⲃⲓⲛ ⲛ̅ϩⲏⲧⲉ. ⲏ̅. Ⲁⲙⲏ ⲉⲃⲟⲗ ϩⲙ̅ⲡⲖⲓⲃⲁⲛⲟⲥ ⲧⲁϣⲉⲗⲉⲉⲧ ⲁⲙⲏ ⲉⲃⲟⲗ ϩⲙ̅ⲡⲖⲓⲃⲁⲛⲟⲥ . Ⲧⲉⲛⲁⲉ̅ⲓ ⲁⲩⲱ ⲛ̅ⲧⲉⲕⲧⲟ ⲉⲃⲟⲗ ϩⲛ̅ⲧⲁⲣⲭⲏ ⲛ̅ⲧⲡⲓⲥⲧⲏⲥ ⲉⲃⲟⲗ ϩⲓϫⲛ̅ⲧⲁⲡⲉ ⲛ̅Ⲥⲁⲛⲉⲓⲣ ⲙⲛ̅Ϩⲉⲣⲙⲱⲛ . ⲉⲃⲟⲗ ϩⲛ̅ⲛ̅ⲃⲏⲃ ⲛ̅ⲙ̅ⲙⲟⲩⲓ ⲁⲩⲱ ⲉⲃⲟⲗ ϩⲛ̅ⲛ̅ⲧⲟⲩⲉⲓⲏ ⲛ̅ⲙ̅Ⲡⲁⲣⲇⲁⲗⲓⲥ. ⲑ̅. Ⲁⲣϥⲓⲡⲉⲛϩⲏⲧ ⲧⲁⲥⲱⲛⲉ ⲧⲁϣⲉⲗⲉⲉⲧ ⲁⲣϥⲓⲡⲉⲛϩⲏⲧ ϩⲛ̅ⲟⲩⲁ ⲛ̅ⲧⲉⲛⲟⲩⲃⲁⲗ . ⲁⲩⲱ̅ ϩⲛ̅ⲛⲉⲓⲉⲡⲥⲁ ⲛ̅ⲧⲉⲡⲟⲩⲙⲁⲕϩ. ϫⲉ ⲁⲛⲟⲩⲉⲕⲓⲃⲉ ⲥⲁ ⲉⲃⲟⲗ ϩⲙ̅ⲡⲏⲣⲡ̅ . ⲁⲩⲱ ⲡⲉⲥⲧⲟⲓ ⲛ̅ⲛⲟⲩϩⲟⲓⲧⲉ ϥϣⲱϣ ⲉϩⲟⲩⲉⲛ̅ϩⲏⲛⲉ ⲧⲏⲣⲟⲩ. ⲓ̅ⲁ̅. Ⲛⲟⲩⲥⲡⲟⲧⲟⲩ ⲧⲁϣⲉⲗⲉⲉⲧ ⲉⲩϣⲟⲩⲉⲙⲟⲩⲗϩ ⲉⲡⲉⲥⲏⲧ . ⲁⲩⲱ ⲟⲩⲉⲃⲓⲱ ⲙⲛ̅ⲟⲩⲉⲣⲱⲧⲉ ⲉϥϣⲟⲟⲡ ϩⲙ̅ⲡⲟⲩⲗⲁⲥ . ⲁⲩⲱ ⲡⲉⲥⲧⲟⲓ ⲛ̅ⲛⲟⲩϩⲟⲓⲧⲉ ⲉϥⲟ ⲛ̅ⲑⲉ ⲙ̅ⲡⲉⲥⲧⲟⲓ ⲙ̅ⲡⲗⲓⲃⲁⲛⲟⲥ. ⲓ̅ⲃ̅. Ⲧⲁⲥⲱⲛⲉ ⲧⲁϣⲉⲗⲉⲉⲧ ⲉⲥⲟ ⲛ̅ⲑⲉ ⲛ̅ⲟⲩⲕⲏⲡⲟⲥ ⲉϥϣⲟⲧⲙ̅ ⲟⲩⲕⲏⲡⲟⲥ ⲉϥϣⲟⲧⲙ̅ ⲟⲩⲡⲏⲅⲏ ⲉⲥⲧⲟⲟⲃⲉ. ⲓ̅ⲅ̅. ⲛⲉⲛⲧⲁⲧⲛ̅ⲛⲟⲟⲩⲥⲉ ⲛⲁⲛ ⲉⲩⲟ̅ ⲛ̅ⲑⲉ ⲛ̅ⲟⲩⲡⲁⲣⲁⲇⲓⲥⲟⲥ ⲙⲛ̅ⲡⲕⲁⲣⲡⲟⲥ ⲛ̅ⲛ̅ϣⲏⲛ ⲉⲧⲗⲉⲉⲗⲉ ϩⲉⲛ̅ⲕⲟⲩⲡⲣ̅ ⲙⲛ̅ϩⲉⲛⲛⲁⲣⲇⲟⲥ. ⲓ̅ⲇ̅. Ⲟⲩⲛⲁⲣⲇⲟⲥ ⲙⲛ̅ⲟⲩⲕⲣⲟⲕⲟⲥ ⲁⲩⲱ ⲟⲩⲕⲁϣ ⲙⲛ̅ⲟⲩⲕⲓⲛⲛⲁⲙⲱⲙⲟⲛ ⲙⲛ̅ⲛ̅ϣⲏⲛ ⲧⲏⲣⲟⲩ ⲙ̅ⲡⲖⲓⲃⲁⲛⲟⲥ . Ⲟⲩϣⲁⲗ ⲙⲛ̅ⲟⲩⲁⲗⲗⲱⲓ ⲙⲛ̅ⲛ̅ϩⲏⲛⲉ ⲧⲏⲣⲟⲩ ⲉⲧⲥⲟⲧⲡ̅. ⲉⲩⲟ ⲛ̅ⲑⲉ ⲛ̅ⲟⲩⲡⲏⲅⲏ ⲛ̅ⲕⲁⲣⲡⲟⲥ ⲁⲩⲱ ⲟⲩϣⲱⲧⲉ ⲙ̅ⲙⲟⲟⲩ ⲉϥⲟⲛϩ̅ ⲉϥϣⲟⲩⲟ ⲉⲃⲟⲗ ϩⲙ̅ⲡⲖⲓⲃⲁⲛⲟⲥ. ⲓ̅Ⲋ. Ⲧⲱⲟⲩⲛⲅ̅ ⲡⲧⲟⲩⲙ̅ϩⲓⲧ ⲁⲩⲱ ⲁⲙⲟⲩ ⲡⲧⲟⲩⲣⲏⲥ ⲛⲅ̅ⲛⲓϥⲉ ⲉϩⲟⲩⲛ ⲉⲡⲁⲕⲏⲡⲟⲥ ⲛ̅ⲧⲉⲛⲁϩⲏⲛⲉ ϯ ⲙ̅ⲡⲉⲩⲥⲧⲟⲓ . Ⲙⲁⲣⲉⲡⲁⲥⲟⲛ ⲃⲱⲕ ⲉϩⲣⲁⲓ ⲉⲡⲉϥⲕⲏⲡⲟⲥ ⲛϥ̅ⲟⲩⲱⲙ ⲙ̅ⲡⲕⲁⲣⲡⲟⲥ ⲛ̅ⲛⲉϥϣⲏⲛ.
Ⲉ̅. Ⲁⲓⲃⲱⲕ ⲉϩⲟⲩⲛ ⲉⲡⲁⲕⲏⲡⲟⲥ ⲧⲁⲥⲱⲛⲉ ⲧⲁϣⲉⲗⲉⲉⲧ ⲁⲓϫⲱⲱⲗⲉ ⲙ̅ⲡⲁϣⲁⲗ ⲙⲛ̅ⲡⲁϣⲟⲩϩⲏⲛⲉ . ⲁⲓⲟⲩⲱⲙ ⲙ̅ⲡⲁⲟⲉⲓⲕ ⲙⲛ̅ⲡⲁⲉⲃⲓⲱ ⲁⲓⲥⲱ ⲙ̅ⲡⲁⲏⲣⲡ̅ ⲙⲛ̅ⲡⲁⲉⲣⲱⲧⲉ . Ⲟⲩⲱⲙ ϩⲱⲧⲧⲏⲩⲧⲛ̅ ⲛⲁϣⲃⲉⲉⲣ ⲛ̅ⲧⲉⲧⲛ̅ⲥⲱ ⲛ̅ⲧⲉⲧⲛ̅ϯϩⲉ ⲛⲁⲥⲛⲏⲩ. ⲃ̅. Ⲁⲛⲟⲕ ϯⲟ̅ⲃϣ̅ ⲁⲩⲱ ⲡⲁϩⲏⲧ ⲣⲏⲥ . Ⲉⲓⲥ ⲡⲉϩⲣⲟⲟⲩ ⲙ̅ⲡⲁⲥⲟⲛ ⲉϥⲧⲱϩⲙ̅ ⲉⲡⲣⲟ . ϫⲉ ⲁⲟⲩⲱⲛ ⲛⲁⲓ ⲧⲁⲥⲱⲛⲉ ⲧⲁϣⲃⲉⲉⲣⲉ ⲧⲁϭⲣⲟⲟⲙⲡⲉ ⲉⲧϫⲏⲕ ⲉⲃⲟⲗ. ϫⲉ ⲁⲧⲁⲁⲡⲉ ⲙⲟⲩϩ ⲛ̅ⲉ̅ⲓⲱⲧⲉ ⲁⲩⲱ ⲡⲁϥⲱ ⲉⲧⲟⲗⲙ̅ ⲁϥⲙⲟⲩϩ ⲛ̅ϫⲁϥ. ⲅ̅. Ⲁⲓⲕⲁⲁⲧⲕⲁϩⲏⲩ ⲛ̅ⲧⲁϣⲧⲏⲛ ϩⲛ̅ⲧⲉⲩϣⲏ ⲉⲓⲛⲁⲧⲁⲁⲥ ϩⲓⲱⲱⲧ ⲟⲛ ⲛ̅ⲁϣ ⲛ̅ϩⲉ. Ⲁⲓⲉ̅ⲓⲱ ⲛ̅ⲛⲁⲟⲩⲉⲣⲏⲧⲉ ⲉⲓⲛⲁⲧⲟⲗⲙⲟⲩ ⲛ̅ⲁϣ ⲛ̅ϩⲉⲑ ⲇ̅. Ⲡⲁⲥⲟⲛ ⲁϥϫⲉⲩⲧⲟⲟ̅ⲧϥ̅ ⲉϩⲟⲩⲛ ϩⲙ̅ⲡⲟⲩⲱϣ ⲙ̅ⲡⲣⲟ ⲁⲩⲱ ⲁⲡⲁϩⲏⲧ ϣⲧⲟⲣⲧⲣ̅ ⲛ̅ⲥⲱϥ. Ⲁⲓⲧⲱⲟⲩⲛ ⲁⲛⲟⲕ̅ ⲉⲓⲛⲁⲟⲩⲱⲛ ⲙ̅ⲡⲁⲥⲟⲛ ⲁⲩⲱ ⲛⲁϭⲓϫ ⲁⲩϣⲟⲩⲉϣⲁⲗ ⲉⲡⲉⲥⲏⲧ . ⲛⲁⲧⲏⲏ̅ⲃⲉ ⲁⲩϣⲟⲩⲉϣⲁⲗ ⲉϥⲥⲟⲧⲡ̅ . Ⲁⲓⲥⲟⲩⲧⲛ̅ⲧⲟⲟⲧ ⲁⲛⲟⲕ ⲉⲃⲟⲗ ⲉⲧⲕⲁ̅ⲗⲗⲉ. Ⲋ. Ⲁⲩⲱ ⲁⲓⲟⲩⲱⲛ ⲙ̅ⲡⲁⲥⲟⲛ . Ⲡⲁⲥⲟⲛ ⲁϥⲥⲁⲁⲧ . ⲁⲩⲱ ⲁⲧⲁⲯⲩⲭⲏ ⲟⲩⲁϩⲥ̅ ⲛ̅ⲥⲁⲡⲉϥϣⲁϫⲉ. Ⲁⲓⲕⲱⲧⲉ ⲛ̅ⲥⲱϥ ⲁⲩⲱ ⲙ̅ⲡⲓϩⲉ ⲉⲣⲟϥ ⲁⲓⲙⲟⲩⲧⲉ ⲉⲣⲟϥ ⲁⲩⲱ ⲙ̅ⲡϥ̅ⲥⲱⲧⲙ̅ ⲉⲣⲟⲓ. ⲍ̅. Ⲁⲩϩⲉ ⲉⲣⲟⲓ ⲛ̅ϭⲓⲛⲉⲧⲣⲟⲉⲓⲥ ϩⲛ̅ⲧⲡⲟⲗⲓⲥ ⲉⲩⲕⲱⲧⲉ ⲉⲣⲟⲥ . ⲁⲩⲣⲁϩⲧ ⲁⲩⲱ ⲁⲩⲡⲗⲏⲅⲏ ⲙ̅ⲙⲟⲓ. Ⲁⲩϥⲓ ⲙ̅ⲡⲁⲣ̅ϣⲱⲛ ⲛ̅ⲧⲟⲟⲧ ⲛ̅ϭⲓⲛⲉⲧⲣⲟⲉⲓⲥ ⲉⲥⲟⲃⲧ̅. ⲏ̅. Ⲁⲓⲧⲁⲣⲕⲉⲧⲏⲩⲧⲛ̅ ⲛ̅ϣⲉⲉⲣⲉ ⲛ̅ⲑⲒⲗ̅ⲏ̅ⲙ̅ . ϩⲛ̅ⲛ̅ϭⲟⲙ ⲁⲩⲱ ϩⲛ̅ⲛⲛⲟⲙⲧⲉ ⲛ̅ⲧⲥⲱϣⲉ . ϫⲉ ⲉⲧⲉⲧⲛ̅ϣⲁⲛϩⲉ ⲉⲡⲁⲥⲟⲛ ⲟⲩ ⲡⲉⲧⲉⲧⲛⲁϫⲟⲟϥ ⲛⲁϥ . ⲉⲧⲉⲧⲛⲁϫⲟⲟⲥ ⲛⲁϥ ϫⲉ ϯϫⲛ̅ϫⲏⲩ ⲁⲛⲟⲕ ⲛ̅ⲧⲟⲟⲧⲥ̅ ⲛ̅ⲧⲁⲅⲁⲡⲏ. ⲑ̅. Ⲟⲩⲟⲩ ⲡⲉ ⲡⲟⲩⲥⲟⲛ ⲉⲃⲟⲗ ϩⲙ̅ⲡⲧⲟⲛⲧⲛ̅ ⲛ̅ⲟⲩⲥⲟⲛ ⲧⲉⲧⲛⲉⲥⲱⲥ ϩⲛ̅ⲉϩⲓⲟⲙⲉ. Ⲟⲩⲁϣ ⲙ̅ⲙⲓⲛⲉ ⲡⲉ ⲡⲟⲩⲥⲟⲛ ⲉⲃⲟⲗ ϩⲙ̅ⲡⲧⲟⲛⲧⲛ̅ ⲛ̅ⲟⲩⲥⲟⲛ ϫⲉ ⲁⲧⲁⲣⲕⲟⲛ ϩⲓⲛⲁⲓ. Ⲡⲉⲥⲙⲟⲧ ⲙ̅ⲡⲁⲥⲟⲛ ⲡⲉ ⲡⲁⲓ ⲉϥⲟⲩⲟⲃϣ̅ ⲁⲩⲱ ⲉϥⲧⲣⲉϣⲣⲱϣ ⲉϥⲣⲁϩⲉ ⲧⲏⲣϥ̅ ⲉⲃⲟⲗ ⲉⲧⲉⲟⲩⲧⲃⲁ. ⲓ̅ⲁ̅. Ⲉⲣⲉⲧⲉϥⲁⲡⲉ ⲟ ⲛ̅ⲑⲉ ⲛ̅ⲟⲩⲛⲟⲩⲃ ⲛ̅ⲕⲉⲫⲁⲥ ⲛⲉϥϥⲱ ⲉⲧⲟⲗⲙ̅ ⲥⲉⲥⲏⲕ ⲉⲩⲕⲏⲙ ⲛ̅ⲑⲉ ⲛ̅ϩⲉⲛⲁⲃⲟⲟⲕⲉ. ⲓ̅ⲃ̅. Ⲛⲉϥⲃⲁⲗ ⲉⲩⲟ ⲛ̅ⲑⲉ ⲙ̅ⲡⲓⲛⲉ ⲛ̅ϩⲉⲛϭⲣⲟⲟⲙⲡⲉ . ⲉⲩϩⲓϫⲛ̅ⲙ̅ⲙⲟⲟⲩ ⲉⲩⲃⲟⲟⲣⲉ ⲉⲁⲩϫⲟⲕⲙⲟⲩ ϩⲙ̅ⲡⲉⲣⲱⲧⲉ . ⲉⲩϩⲙⲟⲟⲥ ϩⲓϫⲛ̅ϩⲉⲛⲙⲟⲟⲩ ⲉⲩⲃⲟⲟⲣⲉ ⲉⲃⲟⲗ. ⲓ̅ⲇ̅. Ϩⲏⲧϥ ⲉϥⲟ ⲛ̅ⲑⲉ ⲛ̅ⲟⲩⲡⲩⲝⲓⲟⲛ ⲛ̅ⲉⲗⲉⲫⲁⲛⲧⲓⲛⲟⲛ ⲉϥϩⲓϫⲛ̅ⲟⲩⲱⲛⲉ ⲛ̅ⲥⲁⲡⲡⲓⲣⲟⲛ ⲛ̅ⲁⲩⲁⲛ ⲛ̅ϫⲏϭⲉ. ⲓ̅ⲅ̅. Ⲛⲉϥⲟⲩⲟϭⲉ ⲉⲩⲟ ⲛ̅ⲑⲉ ⲛ̅ϩⲉⲛⲫⲓⲁⲗⲏ ⲛ̅ϩⲏⲛⲉ ⲉⲩϣⲉϣⲥϯⲁⲛ ⲉⲃⲟⲗ . ⲛⲉϥⲥⲡⲟⲧⲟⲩ ⲉⲩⲟ ⲛ̅ⲑⲉ ⲛ̅ϩⲉⲛⲕⲣⲓⲛⲟⲛ ⲉⲩϣⲟⲩⲉϣⲁⲗ ⲉⲃⲟⲗ ⲉϥⲥⲟⲧⲡ̅. ⲓ̅ⲇ̅. Ⲛⲉϥϭⲓϫ ⲛⲉⲥⲱⲟⲩ ⲉⲩⲟ ⲛ̅ⲉⲓⲉⲡⲥⲁ ⲛ̅ⲑⲉ ⲙ̅ⲡⲛⲟⲩⲃ ⲉⲧⲥⲟⲧⲡ̅ ⲉⲃⲟⲗ ϩⲛ̅Ⲑⲁⲣⲥⲓⲥ. Ⲛ̅ⲥⲏϥⲉ ⲛ̅ⲣⲁⲧϥ̅ ϩⲉⲛⲥⲧⲩⲗⲟⲥ ⲛⲉ ⲙ̅ⲙⲁⲣⲙⲁⲣⲟⲛ ⲉⲩⲧⲁϫⲣⲏⲩ ⲉϫⲛ̅ϩⲉⲛⲃⲁⲥⲓⲥ ⲛ̅ⲛⲟⲩⲃ. Ⲡⲉϥⲉⲓⲛⲉ ⲉϥⲟ ⲛ̅ⲑⲉ ⲛ̅ⲟⲩⲗⲓⲃⲁⲛⲟⲥ ⲉϥⲥⲟⲧⲡ̅ . ⲛ̅ⲑⲉ ⲛ̅ⲛ̅ⲕⲉⲇⲣⲟⲥ ⲙ̅ⲡⲖⲓⲃⲁⲛⲟⲥ. ⲓ̅Ⲋ. Ⲧⲉϥϣⲟⲩⲱⲃⲉ ⲉⲥϯϩⲗⲏϭⲉ . ⲁⲩⲱ ⲟⲩⲉⲡⲓⲑⲩⲙⲓⲁ ⲧⲏⲣϥ ⲡⲉ . Ⲉⲓⲥ ⲡⲁⲓ ⲡⲉ ⲡⲁⲥⲟⲛ ⲁⲩⲱ ⲡⲁⲓ ⲡⲉ ⲡⲉⲧϩⲓⲧⲟⲩⲱⲓ ⲛ̅ϣⲉⲉⲣⲉ ⲛ̅ⲑⲒⲗ̅ⲏ̅ⲙ̅.
Ⲋ. Ⲛ̅ⲧⲁⲡⲁⲥⲟⲛ ⲃⲱⲕ ⲉⲧⲱⲛ ⲧⲉⲧⲛⲉⲥⲱⲥ ϩⲛ̅ⲛⲉϩⲓⲟⲙⲉ . Ⲛ̅ⲧⲁⲡⲟⲩⲥⲟⲛ ⲃⲱⲕ ⲉⲧⲱⲛ ⲧⲁⲣⲉⲛⲕⲱⲧⲉ ⲛ̅ⲥⲱϥ ⲛ̅ⲙ̅ⲙⲉ . ⲃ̅. Ⲡⲁⲥⲟⲛ ⲁϥⲃⲱⲕ ⲉϩⲣⲁⲓ ⲉⲡⲉϥⲕⲏⲡⲟⲥ ⲉⲛⲉⲫⲓⲁⲗⲏ ⲙ̅ⲡϣⲟⲩϩⲏⲛⲉ ⲉⲧⲣⲉϥⲙⲟⲟⲛⲉ ϩⲛ̅ⲛ̅ⲕⲏⲡⲟⲥ ⲁⲩⲱ ⲛϥ̅ⲕⲱⲧϥ̅ ϩⲛ̅ⲛⲉⲕⲣⲓⲛⲟⲛ. ⲅ̅. Ⲁⲛⲟⲕ ϯϣⲟⲟⲡ ⲙ̅ⲡⲁⲥⲟⲛ ⲁⲩⲱ ⲡⲁⲥⲟⲛ ϣⲟⲟⲡ ⲛⲁⲓ . ⲡⲉⲧⲙⲟⲟⲛⲉ ϩⲛ̅ⲛⲉⲕⲣⲓⲛⲟⲛ. ⲇ̅. Ⲛⲁⲛⲟⲩⲧⲁϣⲃⲉⲉⲣⲉ ⲛ̅ⲑⲉ ⲙ̅ⲡⲟⲩⲱϣ . ⲛⲉⲥⲱ ⲛ̅ⲑⲉ ⲑⲒⲗ̅ⲏ̅ⲙ̅ ⲉⲣⲉϯϩⲟⲧⲉ ⲛ̅ⲑⲉ ⲛ̅ⲛ̅ϭⲟⲙ ⲉⲧⲁϩⲉⲣⲁⲧⲟⲩ. Ⲛⲟⲩⲃⲁⲗ ⲙⲁⲣⲟⲩⲗⲟ ⲉⲩϭⲱϣⲧ ⲙ̅ⲡⲁⲙ̅ⲧⲟ ⲉⲃⲟⲗ . ϫⲉ ⲛ̅ⲧⲟⲟⲩ ⲁⲩϥⲓⲡⲁϩⲏⲧ . ⲡⲟⲩϥⲱ ⲉϥⲟ ⲛ̅ⲑⲉ ⲛ̅ⲛ̅ⲁⲅⲉⲗⲏ ⲛ̅ⲛ̅ⲃⲁⲁⲙⲡⲉ ⲉⲁⲩⲟⲩⲱⲛϩ̅ ⲉⲃⲟⲗ ϩⲛ̅Ⲅⲁⲗⲁⲁⲇ. Ⲋ. Ⲛ̅ⲟⲩⲟⲃϩⲉ ⲉⲩⲟ ⲛ̅ⲑⲉ ⲛ̅ⲛⲁⲅⲉⲗⲏ ⲛ̅ⲛⲉⲛⲧⲁⲩϩⲟⲟⲕⲟⲩ ⲉⲁⲩⲉⲓ ⲉϩⲣⲁⲓ ϩⲙ̅ⲡⲙⲟⲟⲩ ⲉϩⲉⲛϩⲁⲧⲣⲉⲉⲩ ⲧⲏⲣⲟⲩ ⲛⲉ ⲉⲙⲛ̅ⲗⲁⲁⲩ ⲛ̅ⲁⲧϣⲏⲣⲉ ⲛ̅ϩⲏⲧⲟⲩ. Ⲛ̅ⲟⲩⲥⲡⲟⲧⲟⲩ ⲉⲩⲟ ⲛ̅ⲑⲉ ⲛ̅ⲟⲩϩⲱⲥ ⲛ̅ⲕⲟⲕⲕⲟⲥ . ⲁⲩⲱ ⲧⲟⲩϭⲓⲛ̅ϣⲁϫⲉ ⲛⲉⲥⲱⲥ ⲍ̅. Ⲧⲡⲉ ⲛ̅ⲟⲩⲟϭⲉ ⲉϥⲟ ⲛ̅ⲑⲉ ⲛ̅ⲟⲩⲕⲟⲩⲕⲉ ⲛ̅ϩⲣ̅ⲙⲁⲛ . ⲡⲃⲟⲗ ⲛ̅ⲧⲟⲩⲧⲁⲡⲣⲟ. ⲏ̅. Ⲥⲉ ⲛ̅ⲉⲣⲱ ⲛⲉ ⲁⲩⲱ ϥⲧⲉⲩϫⲟⲩⲧⲉ ⲙ̅ⲡⲁⲗⲗⲁⲕⲏ . ⲁⲩⲱ ϩⲉⲛϣⲉⲉⲣⲉ ϣⲏⲙ ⲉⲙⲛ̅ⲏⲡⲉ ⲛ̅ⲧⲟⲟⲩ ⲉⲣⲟⲟⲩ. ⲑ̅. Ⲟⲩⲉⲓ ⲇⲉ ⲧⲉ ⲧⲁϭⲣⲟⲟⲙⲡⲉ ⲉⲧϫⲏⲕ ⲉⲃⲟⲗ . ⲟⲩⲉⲓ ⲧⲉ ⲛ̅ⲧⲟⲟⲧⲥ̅ ⲛ̅ⲧⲉⲥⲙⲁⲁⲩ . ⲉⲥⲥⲟⲧⲡ̅ ⲛ̅ⲧⲟⲟⲧⲥ̅ ⲛ̅ⲧⲉⲛⲧⲁⲥϫⲡⲟⲥ. ⲛ̅ϣⲉⲉⲣⲉ ⲁⲩⲛⲁⲩ ⲉⲣⲟⲥ . Ⲉⲧⲃⲉⲡⲁⲓ ⲛ̅ⲉⲣⲱ ⲥⲉⲛⲁⲙⲁⲕⲁⲣⲓⲍⲉ ⲙ̅ⲙⲟⲥ ⲛ̅ⲧⲉⲙ̅ⲡⲁⲗⲗⲁⲕⲏ ⲧⲙⲁⲓⲟⲥ. Ⲛⲓⲙ ⲧⲉ ⲧⲁⲓ ⲉⲧϭⲱϣⲧ ⲉⲃⲟⲗ ⲛ̅ⲑⲉ ⲙ̅ⲡⲛⲁⲩ ⲛ̅ϣⲱⲣⲡ̅. ⲉⲛⲉⲥⲱⲥ ⲛ̅ⲑⲉ ⲙ̅ⲡⲟⲟϩ ⲉⲥⲥⲟⲧⲡ̅ ⲛ̅ⲑⲉ ⲙ̅ⲡⲣⲏ . ⲉⲥϯϩⲟⲧⲉ ⲛ̅ⲑⲉ ⲛ̅ⲛ̅ϭⲟⲙ ⲉⲧⲁϩⲉⲣⲁⲧⲟⲩ. ⲓ̅ⲁ. Ⲁⲓⲃⲱⲕ ⲉϩⲣⲁⲓ ⲉⲡⲕⲏⲡⲟⲥ ⲛ̅Ⲕⲁⲣⲟⲓⲁ ⲉⲧⲣⲁⲛⲁⲩ ϩⲙ̅ⲡⲅⲉⲛⲏⲙⲁ ⲙ̅ⲡⲉⲭⲓⲙⲁⲣⲣⲟⲥ ⲉⲛⲁⲩ ϫⲉ ⲛⲉⲁⲧⲃⲱ ⲛ̅ⲉⲗⲟⲟⲗⲉ ϯⲟⲩⲱ̅ ⲁⲩⲱ ⲉⲛⲉⲁⲛϥ̅ⲱ ⲛ̅ϩⲉⲣⲙⲁⲛ ϯⲟⲩⲱ ⲉⲃⲟⲗ . ⲉⲓⲛⲁϯⲛⲁⲉⲕⲓⲃⲉ ⲛⲁⲕ ϩⲙ̅ⲡⲙⲁ ⲉⲧⲙ̅ⲙⲁⲩ . ⲙ̅ⲡⲉⲧⲁⲯⲩⲭⲏ ⲉⲓⲙⲉ ⲁϥⲕⲁⲁⲧ ϩⲛ̅ⲛϩⲁⲣⲙⲁ ⲛ̅Ⲁⲙⲓⲛⲁⲇⲁⲃ.
Ⲍ̅. Ⲕⲧⲟ ⲕⲧⲟ ⲧⲟⲇⲟⲗⲗⲁⲙⲓⲧⲏⲥ . ⲕⲧⲟ ⲛ̅ⲧⲉⲕⲧⲟ ⲟⲛ ϫⲉ ⲉⲛⲉⲛⲁⲩ ⲉⲣⲟ . ⲉⲧⲉⲧⲛⲁⲉⲓ ⲉⲛⲁⲩ ⲟⲩ ϩⲛ̅Ⲧⲟⲇⲟⲗⲗⲁⲙⲓⲧⲓⲥ. ⲧⲁⲓ ⲉⲥⲛⲏⲩ ⲛ̅ⲑⲉ ⲛ̅ⲛ̅ⲭⲟⲣⲟⲥ ⲛ̅ⲙ̅ⲡⲁⲣⲉⲙⲃⲟⲗⲏ ⲧϣⲉⲉⲣⲉ ⲛ̅ⲛ̅Ⲁⲙⲓⲛⲁⲇⲁⲃ. ⲃ̅. Ⲁⲛⲟⲩⲧⲁϭⲥⲉ ⲥⲁϩⲛ̅ⲛ̅ⲧⲟⲟⲩⲉ ⲛ̅ⲧⲱϣ ⲛ̅ⲛⲟⲩⲕⲉϩⲧⲉ ⲉⲩⲧⲛ̅ⲧⲱⲛ ⲉϩⲉⲛϩⲟⲣⲙⲓⲥⲕⲟⲥ ⲉⲁⲩⲧⲁⲙⲓⲟⲟⲩ ϩⲓⲧⲛ̅ⲛ̅ϭⲓϫ ⲛ̅ⲟⲩⲧⲉⲭⲛⲓⲧⲏⲥ. ⲅ̅. Ⲧⲟⲩϩⲗ̅ⲡⲉ ⲉⲥⲟ ⲛ̅ⲑⲉ ⲛ̅ⲟⲩⲕⲣⲁⲧⲏⲣ ⲉϥϣⲉⲧϣⲱⲧ ⲉϥⲙⲉϩ ⲛ̅ⲏ̅ⲣⲡ̅ ⲉϥⲥⲟⲧⲡ̅ . Ϩⲏⲧⲉ ⲉϥⲟ ⲛ̅ⲑⲉ ⲛ̅ⲟⲩϫⲁⲧⲙⲉ ⲛ̅ⲥⲟⲩⲟ̅ ⲉⲥⲧⲟⲟⲃⲉ ⲛ̅ϩⲉⲛⲕⲣⲓⲛⲟⲛ. ⲇ̅. ⲉⲣⲉⲧⲟⲩⲉⲕⲓⲃⲉ ⲥⲛ̅ⲧⲉ ⲟ ⲛ̅ⲑⲉ ⲙ̅ⲙⲁⲥ ⲥⲛⲁⲩ ⲛ̅ϩⲁⲧⲣⲉⲉⲩ ⲛ̅ϭⲁϩⲥⲉ. Ⲡⲟⲩⲙⲁⲕϩ̅ ⲉϥⲟ ⲛ̅ⲑⲉ ⲛ̅ⲟⲩⲡⲩⲣⲅⲟⲥ ⲛ̅ⲉⲗⲉⲫⲁⲛⲧⲓⲛⲟⲛ. Ⲛⲟⲩⲃⲁⲗ ⲉⲩⲟ ⲛ̅ⲑⲉ ⲛ̅ⲛⲓⲗⲓⲙⲏⲛ ⲛ̅ⲉⲥⲉⲃⲱⲛ ϩⲛ̅ⲙ̅ⲡⲩⲗⲏ ⲛ̅ⲧϣⲉⲉⲣⲉ ⲛ̅ⲟⲩⲙⲏⲏϣⲉ. Ⲛⲟⲩϭⲃ̅ϣⲁ ⲉⲩⲟ ⲛ̅ⲑⲉ ⲙ̅ⲡⲩⲣⲅⲟⲥ ⲙ̅ⲡⲖⲓⲃⲁⲛⲟⲥ ⲉϥϭⲱϣⲧ̅ ⲉϩⲟⲩⲛ ⲉϩⲣⲁⲥ ⲛ̅Ⲇⲁⲙⲁⲥⲕⲟⲥ . Ⲧⲟⲩⲁⲡⲉ ⲉⲥⲟ ⲛ̅ⲑⲉ ⲙ̅ⲡⲔⲁⲣⲙⲏⲗⲟⲥ ϩⲓϫⲱ. Ⲋ. ⲁⲩⲱ ⲡϥⲱ ⲛ̅ⲧⲟⲩⲁⲡⲉ ⲉϥⲟ ⲛ̅ⲑⲉ ⲛ̅ⲟⲩϫⲏϭⲉ ⲟⲩⲣⲟ ⲉⲁⲩⲕⲁⲁϥ ϩⲛ̅ⲙ̅ⲡⲁⲣⲁⲧⲣⲟⲙⲓⲥ. ⲍ̅. Ⲧⲁⲅⲁⲡⲏ ⲁⲥⲁ ϩⲓⲛⲁⲓ ⲁⲩⲱ ⲁⲧⲁϫⲣⲟ ⲉⲧⲟⲩⲙⲛ̅ⲧⲛⲟϭ ⲧⲉ ⲧⲁⲓ ϩⲛ̅ⲟⲩⲧⲣⲩⲫⲏ. ⲏ̅. ⲉⲁⲥϣⲱⲡⲉ ⲉⲥⲧⲛ̅ⲧⲱⲛ ⲉⲧⲃⲛ̅ⲛⲉ . ⲁⲩⲱ ⲛ̅ⲟⲩⲉⲕⲓⲃⲉ ⲉⲛⲉⲥⲙⲁϩ. ⲑ̅. Ⲁⲩⲱ ⲁⲓϫⲟⲟⲥ . ϫⲉ ϯⲛⲁⲁⲗⲉ ⲉϩⲣⲁⲓ ⲉⲧⲃⲛ̅ⲛⲉ ⲧⲁⲁⲙⲁϩⲧⲉ ⲛ̅ⲛⲉⲥⲙⲁ ⲉⲧϫⲟⲥⲉ . ⲁⲩⲱ ⲛⲟⲩⲉⲕⲓⲃⲉ ⲥⲉⲛⲁⲣ̅ⲑⲉ ⲛ̅ⲛⲉⲥⲙⲁϩ ⲛ̅ⲧⲃⲱ ⲛ̅ⲉⲗⲟⲟⲗⲉ . ⲁⲩⲱ ⲡⲉⲥⲧⲟⲓ ⲛ̅ϣⲁⲁⲛⲧⲉ ⲉϥⲟ ⲛ̅ⲑⲉ ⲙ̅ⲡⲉⲥⲧⲟⲓ ⲛ̅ⲟⲩϫⲙ̅ⲡⲉϩ. Ⲁⲩⲱ ⲧⲟⲩϣⲟⲩⲱⲃⲉ ⲉⲥⲟ ⲛ̅ⲑⲉ ⲙ̅ⲡⲏⲣⲡ̅ ⲉⲧⲛⲁⲛⲟⲩϥ . ⲉϥⲙⲟⲟϣⲉ ⲉⲣⲁⲧϥ̅ ⲉⲡⲁⲥⲟⲛ ⲉⲩⲥⲟⲟⲩⲧⲛ̅ ⲉϥⲛⲟⲧⲙ̅ ϩⲛ̅ⲛⲁⲥⲡⲟⲧⲟⲩ ⲙⲛ̅ⲛⲁⲟⲃϩⲉ. ⲓ̅ⲁ̅. Ⲁⲛⲟⲕ ϯϣⲟⲟⲡ ⲙ̅ⲡⲁⲥⲟⲛ . ⲁⲩⲱ ⲛ̅ⲧⲟϥ ϥⲛⲁⲕⲧⲟϥ ⲉⲣⲟⲓ. ⲓ̅ⲃ̅. Ⲁⲙⲟⲩ ⲛⲁⲓ ⲡⲁⲥⲟⲛ ⲛ̅ⲧⲛ̅ⲃⲱⲕ ⲉⲃⲟⲗ ⲉⲧⲥⲱϣⲉ ⲛ̅ⲧⲛ̅ⲟⲩⲱϩ ϩⲛ̅ⲛ̅ⲕⲱⲙⲏ . ⲛ̅ⲧⲛ̅ϣⲟⲣⲡⲛ ⲉⲃⲟⲗ ⲉⲛⲉⲛⲙⲁⲛ̅ⲉⲗⲟⲟⲗⲉ. ⲓ̅ⲅ̅. ⲉⲧⲣⲉⲛⲛⲁⲩ ϫⲉ ⲛⲉⲁⲧⲃⲱⲛ̅ⲉⲗⲟⲟⲗⲉ ϯⲟⲩⲱ . ⲁⲩⲱ ⲉⲛⲉⲁⲛ̅ⲕⲟⲩⲡⲣ̅ ϯⲟⲩⲱ . ⲁⲩⲱ ⲛϥ̅ⲱ ⲛ̅ϩⲉⲣⲙⲁⲛ ⲛⲉ ⲁⲩϯⲟⲩⲱ̅ . ⲉⲓⲛⲁϯⲛⲁⲉⲕⲓⲃⲉ ⲛⲁⲕ ϩⲙ̅ⲡⲙⲁ ⲉⲧⲙ̅ⲙⲁⲩ. ⲓ̅ⲇ̅. Ⲛⲉⲛⲙⲁⲛⲇⲣⲁⲅⲟⲣⲟⲥ ⲁⲩϯ ⲙ̅ⲡⲉⲩⲥⲧⲟⲓ ⲁⲩⲱ ⲛ̅ϣⲏⲛ ⲧⲏⲣⲟⲩ ⲉⲧϯⲕⲁⲣⲡⲟⲥ ⲉⲧϩⲓⲣⲛ̅ⲛⲉⲛⲣⲟ . ϩⲉⲛⲃⲣ̅ⲣⲉ ⲉⲣⲁⲧⲟⲩ ⲛ̅ϩⲉⲛⲁⲥ ⲁⲓϩⲁⲣⲉϩ ⲉⲣⲟⲟⲩ ⲛⲁⲕ ⲡⲁⲥⲟⲛ.
ⲏ̅. Ⲛⲓⲙ ⲡⲉⲧⲛⲁⲧⲁⲁⲕ ⲛⲁⲓ ⲡⲁⲥⲟⲛⲑ ⲉⲕⲥⲱⲛⲅ̅ ⲛ̅ⲛⲉⲕⲓⲃⲉ ⲛ̅ⲧⲁⲙⲁⲁⲩ . ⲉⲓϣⲁⲛϩⲉ ⲉⲣⲟⲕ ϩⲓⲃⲟⲗ ⲛ̅ϯⲛⲁϯⲥⲟ ⲁⲛ ⲉϯⲡⲓ ⲉⲣⲱⲕ . ⲁⲩⲱ ⲛ̅ⲥⲉⲛⲁⲥⲟϣⲧ̅ ⲁⲛ ⲡⲉ. ⲃ̅. ϯⲛⲁⲁⲙⲁϩⲧⲉ ⲙ̅ⲙⲟⲕ . ⲧⲁϫⲓⲧⲕ̅ ⲉϩⲟⲩⲛ ⲉⲡⲏⲓ ⲛ̅ⲧⲁⲙⲁⲁⲩ . ⲁⲩⲱ ⲉϩⲟⲩⲛ ⲉⲡⲧⲁⲙⲓⲟⲛ ⲛ̅ⲧⲛ̅ⲧⲁⲥⲱ ⲙ̅ⲙⲟⲓ . ϯⲛⲁⲧⲥⲟⲕ ⲉⲃⲟⲗ ϩⲙ̅ⲡⲏⲣⲡ̅ ⲉⲧⲟ ⲛⲥϯ ⲛ̅ϩⲏⲛⲉ : ⲁⲩⲱ ⲉⲃⲟⲗ ϩⲙ̅ⲡⲏⲣⲡ̅ ⲛ̅ⲛⲉⲕⲃⲱ ⲛ̅ϩⲉⲣⲙⲁⲛ. ⲅ̅. Ⲧⲉϥϭⲓϫ ⲛ̅ϩⲃⲟⲩⲣ ϩⲁⲧⲁⲁⲡⲉ . ⲁⲩⲱ ⲧⲉϥⲟⲩⲛⲁⲙ ⲛⲁϩⲱⲗϭ̅ ⲉⲣⲟⲓ : ⲇ̅. Ⲁⲓⲧⲁⲣⲕⲉⲧⲏⲩⲧⲛ̅ ⲛ̅ϣⲉⲉⲣⲉ ⲛ̅ⲑⲒⲗ̅ⲏ̅ⲙ̅ ϩⲛ̅ⲛ̅ϭⲟⲙ ⲁⲩⲱ ϩⲛ̅ⲛ̅ⲛⲟⲙⲧⲉ ⲛ̅ⲧⲥⲱϣⲉ ⲉⲧⲣⲉⲧⲛ̅ⲛⲉϩⲥⲉ ⲛ̅ⲧⲁⲅⲁⲡⲏ ⲁⲩⲱ ⲛ̅ⲧⲉⲧⲛ̅ⲧⲟⲩⲛⲟⲥ̅ⲥ ϣⲁⲛⲧⲥ̅ⲣ̅ϩⲛⲁⲥ. Ⲛⲓⲙ ⲧⲉ ⲧⲁⲓ ⲉⲧⲛⲏⲩ ⲉϩⲣⲁⲓ ⲉⲥⲟⲩⲟⲃϣ ⲧⲏⲣⲥ̅ : ⲉⲥϣⲟⲩϣⲟⲩ ⲙ̅ⲙⲟⲥ ⲉϫⲙ̅ⲡⲉⲥⲥⲟⲛ . Ⲁⲓⲧⲟⲩⲛⲟⲥⲕ̅ ϩⲁⲣⲟⲥ ⲛ̅ⲧⲃⲱ ⲛ̅ϫⲙ̅ⲡⲉϩ ⲉⲓⲛⲁϯⲛⲁⲉⲕⲓⲃⲉ ⲛⲁⲕ ϩⲙ̅ⲡⲙⲁ ⲉⲧⲙ̅ⲙⲁⲩ. Ⲋ. Ⲕⲁⲁⲧ ⲛ̅ⲑⲉ ⲛ̅ⲟⲩⲥⲫⲣⲁⲅⲓⲥ ϩⲓϫⲙ̅ⲡⲉⲕϭⲃⲟⲓ . ⲛ̅ⲑⲉ ⲛ̅ⲟⲩⲥⲫⲣⲁⲅⲓⲥ ϩⲓϫⲙ̅ⲡⲉⲕϩⲏⲧ . ϫⲉ ⲧⲁⲅⲁⲡⲏ ⲧⲁϫⲣⲏⲩ ⲛ̅ⲑⲉ ⲙ̅ⲡⲙⲟⲩ . ⲁⲩⲱ ⲡⲕⲱϩ ⲛⲁϣⲧ̅ ⲛ̅ⲑⲉ ⲛⲁⲙⲛ̅ⲧⲉ . Ⲛⲉⲥⲙⲁ ⲉⲧⲕⲏⲧ ⲉⲧϩⲙ̅ⲡϫⲓⲥⲉ . ⲉⲩⲟ ⲛ̅ⲑⲉ ⲛ̅ϩⲉⲛϣⲁϩ ⲛ̅ⲕⲱϩⲧ̅. ⲍ̅. Ⲟⲩⲙⲟⲟⲩ ϭⲉ ⲉⲛⲁϣⲱϥ ⲛϥ̅ⲛⲁϣⲱϣⲙ̅ ⲁⲛ ⲛ̅ⲧⲁⲅⲁⲡⲏ . ⲁⲩⲱ ϩⲉⲛⲉⲓⲉⲣⲣⲱⲟⲩ ⲛ̅ⲥⲉⲛⲁϣⲟⲙⲥ̅ⲥ ⲁⲛ . Ⲉⲣϣⲁⲛⲡⲣⲱⲙⲉ ϯⲡⲉϥⲃⲓⲟⲥ ⲧⲏⲣϥ ⲉⲧⲃⲉⲧⲁⲅⲁⲡⲏ : ϩⲛ̅ⲟⲩⲥⲱϣϥ̅ ⲥⲉⲛⲁⲥⲟϣ̅ϥϥ̅ⲑ ⲏ̅. Ⲧⲉⲛⲥⲱⲛⲉ ⲟⲩⲕⲟⲩⲓ ⲧⲉ ⲁⲩⲱ ⲙⲛ̅ⲉⲕⲓⲃⲉ ⲙ̅ⲙⲟⲥ . Ⲟⲩ ϭⲉ ⲡⲉⲧⲛ̅ⲛⲁⲁⲁϥ ⲛ̅ⲧⲛ̅ⲥⲱⲛⲉ ϩⲙ̅ⲡⲉϩⲟⲟⲩ ⲉⲧⲟⲩⲛⲁϣⲁϫⲉ ⲉⲧⲃⲏⲏⲧⲥ̅ⲭⲑ ⲑ̅. Ⲉϣϫⲉ ⲟⲩⲥⲟⲃⲧ̅ ⲧⲉ ⲧⲛ̅ⲛⲁⲕⲱⲧⲉ ⲉⲣⲟⲥ ⲛ̅ϩⲉⲛⲉϫⲏ ⲛ̅ϩⲁⲧ . ⲁⲩⲱ ⲉϣϫⲉ ⲟⲩⲣⲟ ⲧⲉ ⲧⲛ̅ⲛⲁϯ ⲉⲣⲟⲥ ⲛ̅ϩⲉⲛⲥⲁⲛⲓⲥ ⲛ̅ϣⲉ ⲛ̅ⲕⲉⲇⲣⲟⲥ. Ⲉⲓⲥ ϩⲏⲏⲧⲉ ⲁⲛⲟⲕ ⲁⲛⲅ̅ⲟⲩⲥⲟⲃⲧ̅ . ⲁⲩⲱ ⲛⲁⲉⲕⲓⲃⲉ ϩⲉⲛⲡⲩⲣⲅⲟⲥ ⲛⲉ . Ⲁⲛⲟⲕ ⲉⲓϩⲁⲛⲉϥⲃⲁⲗ . ϩⲱⲥ ⲉⲓⲛⲁϩⲉ ⲉϯⲣⲏⲛⲏ. ⲓ̅ⲁ̅. Ⲟⲩⲙⲁⲛ̅ⲉⲗⲟⲟⲗⲉ ⲁϥϣⲱⲡⲉ ⲛ̅Ⲥⲟⲗⲟⲙⲱⲛ ϩⲛ̅ⲟⲩⲙⲁ ϫⲉ Ⲃⲉⲉⲗⲁⲙⲱⲛ. ⲁϥϯ ⲙ̅ⲡⲉϥⲙⲁⲛ̅ⲉⲗⲟⲟⲗⲉ ⲛ̅ⲛⲉⲧⲛⲁϩⲁⲣⲉϩ ⲉⲣⲟϥ . Ⲡⲣⲱⲙⲉ ⲛⲁⲉⲓⲛⲉ ϩⲁⲡⲉϥⲕⲁⲣⲡⲟⲥ ⲙ̅ⲙⲏⲧ ⲛ̅ϣⲉ ⲛ̅ϩⲁⲧ. ⲓ̅ⲃ̅. Ⲡⲁⲙⲁⲛ̅ⲉⲗⲟⲟⲗⲉ ⲙ̅ⲡⲁⲙ̅ⲧⲟ ⲉⲃⲟⲗ . ⲛ̅ϣⲟ ⲛⲁⲤⲟⲗⲟⲙⲱⲛ ⲛⲉ . ⲁⲩⲱ ⲛ̅ϣⲏⲧ̅ ⲛⲁⲛⲉⲧⲣⲟⲉⲓⲥ ⲛⲉ ⲉⲡⲉϥⲕⲁⲣⲡⲟⲥ. ⲓ̅ⲅ̅. ⲡⲉⲧϩⲙⲟⲟⲥ ϩⲛ̅ⲛ̅ⲕⲏⲡⲟⲥ ⲉⲣⲉⲛⲉⲕϣⲃⲉⲉⲣ ϯ ⲛ̅ϩⲧⲏⲩ ⲉⲡⲉⲕϩⲣⲟⲟⲩ . Ⲁⲛⲟⲕ ϩⲱ ⲙⲁⲣⲓⲥⲱⲧⲙ̅ ⲉⲣⲟϥ. ⲓ̅ⲇ̅. Ⲡⲱⲧ ⲡⲁⲥⲟⲛ ⲛⲅ̅ⲣ̅ⲡⲉⲥⲙⲟⲧ ⲛ̅ⲟⲩϭⲁϩⲥⲉ ⲏ̅ ⲡⲙⲁⲥ ⲛ̅ⲉⲓⲟⲩⲗ ϩⲓϫⲛ̅ⲛ̅ⲧⲟⲩⲓⲏ ⲛ̅ϣⲟⲩϩⲓⲛⲉ :
ⲡϫⲱ ⲛ̅ⲧⲉⲛⲓϫⲱ ⲛ̅Ⲥⲟⲗⲟⲙⲱⲛ