ⲦⲈⲤⲞⲪⲒⲀ   Ⲛ̅ⲤⲞⲖⲞⲘⲰⲚ


Ⲙⲉⲣⲉⲧⲇⲓⲕⲁⲓⲟⲥⲩⲛⲏ  ⲛⲉⲧⲕⲣⲓⲛⲉ  ⲙ̅ⲡⲕⲁϩ . ⲁⲣⲓⲡⲙⲉⲉⲩⲉ  ⲙ̅Ⲡϫⲟⲉⲓⲥ  ϩⲛ̅ⲟⲩⲙⲛ̅ⲧⲁⲅⲁⲑⲟⲥ . ⲛ̅ⲧⲉⲧⲛ̅ϣⲓⲛⲉ  ⲛ̅ⲥⲱϥ  ϩⲛ̅ⲟⲩⲙⲛ̅ⲧϩⲁⲡⲗⲟⲩⲥ  ⲛ̅ⲧⲉⲡⲉⲧⲛ̅ϩⲏⲧ.  ⲃ̅.  Ϫⲉ  ϣⲁⲩϩⲉ  ⲉⲣⲟϥ  ⲛ̅ϭⲓⲛⲉⲧⲉⲛ̅ⲥⲉⲡⲉⲓⲣⲁⲍⲉ  ⲙ̅ⲙⲟϥ  ⲁⲛ. ϣⲁϥⲟⲩⲱⲛϩ̅  ⲇⲉ  ⲉⲃⲟⲗ  ⲛ̅ⲛⲉⲧⲉⲛ̅ⲥⲉⲟ  ⲛ̅ⲁⲧⲛⲁϩⲧⲉ  ⲉⲣⲟϥ  ⲁⲛ.  ⲅ̅.  Ϣⲁⲣⲉⲡⲙⲉⲉⲩⲉ  ⲅⲁⲣ  ⲉⲑⲟⲟⲩ  ⲡⲟⲣϫⲟⲩ  ⲉⲡⲛⲟⲩⲧⲉ . ⲁⲩⲱ  ⲧⲉϥϭⲟⲙ  ⲉⲧⲟⲩⲟⲛϩ̅  ⲉⲃⲟⲗ  ϣⲁⲥϫⲡⲉⲓⲉⲛⲁⲑⲏⲧ:  ⲇ̅.  Ϫⲉ  ⲙⲉⲣⲉⲧⲥⲟⲫⲓⲁ  ⲅⲁⲣ  ⲃⲱⲕ  ⲉϩⲟⲩⲛ  ⲉⲩⲯⲩⲭⲏ  ⲉⲥϩⲟⲟⲩ . ⲟⲩⲇⲉ  ⲙⲉⲥⲟⲩⲱϩ  ϩⲛ̅ⲥⲱⲙⲁ  ⲣ̅ⲣⲉϥⲣ̅ⲛⲟⲃⲉ.   Ⲡⲉⲡⲛⲉⲩⲙⲁ  ⲅⲁⲣ  ⲉⲧⲟⲩⲁⲁⲃ  ⲛ̅ⲧⲥⲟⲫⲓⲁ  ϣⲁϥⲡⲱⲧ  ⲉⲃⲟⲗ  ⲛ̅ⲕⲣⲟϥ . ⲁⲩⲱ  ϣⲁϥⲟⲩⲉ  ⲛ̅ⲙ̅ⲙⲟⲕⲙⲉⲕ  ⲛ̅ⲛⲁⲑⲏⲧ . ⲁⲩⲱ  ϣⲁϥϫⲡⲓⲉⲡϫⲓⲛϭⲟⲛⲥ̅  ⲉϥϣⲁⲛⲉⲓ.  Ⲋ.  Ⲟⲩⲙⲁⲉⲓⲣⲱⲙⲉ  ⲅⲁⲣ  ⲡⲉ  ⲡⲉⲡⲛⲉⲩⲙⲁ  ⲛ̅ⲧⲥⲟⲫⲓⲁ . ⲁⲩⲱ  ϥⲛⲁⲧⲙⲁⲓⲉⲡϫⲓⲟⲩⲁ  ⲁⲛ  ϩⲛ̅ⲛⲉϥⲥⲡⲟⲧⲟⲩ :  ϫⲉ  ⲡⲛⲟⲩⲧⲉ  ⲡⲉ  ⲡⲙⲛ̅ⲧⲣⲉ  ⲛ̅ⲛⲉϥϭⲗⲟⲧⲉ . ⲁⲩⲱ  ⲡⲉⲧⲙⲟⲩϣⲧ̅  ⲛⲁⲙⲉ  ⲙ̅ⲡⲉϥϩⲏⲧ . ⲁⲩⲱ  ⲡⲉⲧⲥⲱⲧⲙ̅  ⲉⲡⲉϥⲗⲁⲥ.  ⲍ̅.  Ϫⲉ  ⲡⲉⲡⲛⲉⲩⲁ  ⲙ̅Ⲡϫⲟⲉⲓⲥ  ⲁϥⲙⲉϩⲧⲟⲓⲕⲟⲩⲙⲉⲛⲏ. ⲁⲩⲱ  ⲡⲉⲧϣⲱⲡ  ⲙ̅ⲡⲧⲏⲣϥ̅  ⲉϥⲥⲟⲟⲩⲛ  ⲙ̅ⲡⲉⲩϩⲣⲟⲟⲩ.  ⲏ̅.  Ⲉⲧⲃⲉⲡⲁⲓ  ⲙⲛ̅ⲗⲁⲁⲩ  ⲛⲁϩⲱⲡ  ⲉϥϣⲁϫⲉ  ϩⲛ̅ⲟⲩϫⲓⲛϭⲟⲛⲥ̅ . ⲟⲩⲇⲉ  ⲛϥ̅ⲛⲁⲣ̅ⲃⲟⲗ  ⲁⲛ  ⲉⲧⲉⲕⲣⲓⲥⲓⲥ  ⲉⲧⲛ̅ⲛⲏⲩ.  ⲑ̅.  Ⲥⲉⲛⲁϭⲙ̅ⲡϣⲓⲛⲉ  ⲅⲁⲣ  ⲙ̅ⲡϣⲟϫⲛⲉ  ⲙ̅ⲡⲁⲥⲉⲃⲏⲥ . ⲁⲩⲱ  Ⲡϫⲟⲉⲓⲥ  ⲛⲁⲥⲱⲧⲙ̅  ⲉⲛⲉϥϣⲁϫⲉ . ⲉⲡⲟⲩⲱⲛϩ̅  ⲉⲃⲟⲗ  ⲛ̅ⲛⲉϥⲁⲛⲟⲙⲓⲁ.   Ϫⲉ  ⲡⲙⲁⲁϫⲉ  ⲙ̅ⲡⲉϥⲕⲱϩ  ϣⲁϥⲥⲱⲧⲙ̅  ⲉϩⲱⲃ  ⲛⲓⲙ . ⲁⲩⲱ  ⲡⲉϩⲣⲟⲟⲩ  ⲛ̅ⲛⲉⲕⲣⲙ̅ⲣⲙ̅  ⲛⲁϩⲱⲡ  ⲁⲛ.  ⲓ̅ⲁ.  Ϩⲁⲣⲉϩ  ϭⲉ  ⲉⲣⲱⲧⲛ̅  ⲉⲡⲉⲕⲣ̅ⲙⲣⲙ̅  ⲉⲧϣⲟⲩⲉⲓⲧ . ⲁⲩⲱ  ϯⲥⲟ  ⲉⲡⲉⲧⲛ̅ⲗⲁⲥ  ⲉⲃⲟⲗ  ϩⲛ̅ⲧⲕⲁⲧⲁⲗⲁⲗⲓⲁ : ϫⲉ  ⲙⲛ̅ⲟⲩϣⲁϫⲉ  ⲉϥϣⲟⲩⲉⲓⲧ  ⲛⲁϩⲱⲡ . ⲟⲩⲧⲁⲡⲣⲟ  ⲉⲥϫⲓϭⲟⲗ  ϣⲁⲥⲧⲁⲕⲉⲧⲉⲯⲩⲭⲏ.  ⲓ̅ⲃ.  Ⲙ̅ⲡⲣ̅ⲕⲱϩ  ϭⲉ  ⲉⲡⲙⲟⲩ  ϩⲛ̅ⲧⲉⲡⲗⲁⲛⲏ  ⲙ̅ⲡⲉⲧⲛ̅ⲱⲛϩ̅ . ⲟⲩⲇⲉ  ⲙ̅ⲡⲣ̅ⲥⲱⲕ  ⲛⲏⲧⲛ̅  ⲙ̅ⲡⲧⲁⲕⲟ  ϩⲛ̅ⲛⲉϩⲃⲏⲩⲉ  ⲛ̅ⲛⲉⲧⲛ̅ϭⲓϫ.  ⲓ̅ⲅ.  Ϫⲉ  ⲙ̅ⲡⲉⲡⲛⲟⲩⲧⲉ  ⲧⲁⲙⲓⲉⲡⲙⲟⲩ . ⲟⲩⲇⲉ  ⲛϥ̅ⲣⲁϣⲉ  ⲁⲛ  ⲉϫⲙ̅ⲡⲧⲁⲕⲟ  ⲛ̅ⲛⲉⲧⲟⲛϩ̅.  ⲓ̅ⲇ.  Ⲛ̅ⲧⲁϥⲥⲟⲛⲧⲟⲩ  ⲅⲁⲣ  ⲧⲏⲣⲟⲩ  ⲉⲧⲣⲉⲩϭⲱ  ϣⲁⲃⲟⲗ . ⲁⲩⲱ  ⲉⲧⲣⲉⲩⲟⲩϫⲁⲓ  ⲛ̅ϭⲓⲛ̅ⲥⲱⲛⲧ̅  ⲙ̅ⲡⲕⲟⲥⲙⲟⲥ : ⲙ̅ⲙⲛ̅ⲡⲁϩⲣⲉ  ⲙ̅ⲙⲟⲩ  ϩⲣⲁⲓ  ⲛ̅ϩⲏⲧⲟⲩ . ⲟⲩⲇⲉ  ⲙⲛ̅ⲧⲉⲣⲟ  ⲛ̅ⲁⲙⲛ̅ⲧⲉ  ϩⲓϫⲙ̅ⲡⲕⲁϩ.    Ⲧⲇⲓⲕⲁⲓⲟⲥⲩⲛⲏ  ⲅⲁⲣ  ⲟⲩⲁⲧⲙⲟⲩ  ⲧⲉ.  ⲓ̅Ⲋ.  Ⲛ̅ⲁⲥⲉⲃⲏⲥ  ⲇⲉ  ϩⲛ̅ⲛⲉⲩϭⲓϫ  ⲙⲛ̅ⲛⲉⲩϣⲁϫⲉ  ⲁⲩⲥⲟⲧⲡϥ̅  ⲛⲁⲩ : ⲁⲩⲧⲁⲁϥ  ⲛⲁⲩ  ⲛ̅ϣⲃⲏⲣ  ⲁⲩⲃⲱⲗ  ⲉⲃⲟⲗ . ⲁⲩⲥⲙⲓⲛⲉ  ⲛ̅ⲟⲩⲇⲓⲁⲑⲏⲕⲏ  ⲛⲉⲙⲁϥ . ϫⲉ  ⲥⲉⲙ̅ⲡϣⲁ  ⲛ̅ⲧⲙⲉⲣⲓⲥ  ⲙ̅ⲡⲉⲧⲙ̅ⲙⲁⲩ.
 
Ⲕⲉⲫ.  Ⲃ̅

Ⲁⲩϫⲟⲟⲥ  ⲅⲁⲣ  ⲉⲁⲩⲙⲉⲉⲩⲉ  ϩⲣⲁⲓ  ⲛ̅ϩⲏⲧⲟⲩ  ϩⲛ̅ⲟⲩⲥⲟⲟⲩⲧⲛ̅  ⲁⲛ . ϫⲉ  ⲟⲩⲕⲟⲩⲓ  ⲡⲉ  ⲡⲉⲛⲁϩⲣⲉ  ⲉϥⲙⲉϩ  ⲗ̅ⲗⲩⲡⲏ . ⲁⲩⲱ  ⲙ̅ⲙⲛ̅ⲙ̅ⲧⲟⲛ  ϣⲟⲟⲡ  ϩⲙ̅ⲡⲙⲟⲩ  ⲙ̅ⲡⲣⲱⲙⲉ . ⲟⲩⲇⲉ  ⲙ̅ⲡⲛ̅ⲥⲟⲩⲛⲟⲩⲁ  ⲉⲁϥⲉⲓ  ⲉϩⲣⲁⲓ  ϩⲛ̅ⲁⲙⲛ̅ⲧⲉ.  ⲃ̅.  Ϫⲉ  ⲛ̅ⲧⲁⲛϣⲱⲡⲉ  ⲉⲡⲡⲉⲧϣⲟⲩⲉⲓⲧ . ⲙⲛ̅ⲛ̅ⲥⲱⲥ  ⲉⲛⲛⲁⲣ̅ⲑⲉ  ⲛ̅ⲛⲉⲧⲉⲙ̅ⲡⲟⲩϣⲱⲡⲉ : ϫⲉ  ⲟⲩⲕⲁⲡⲛⲟⲥ  ⲡⲉ  ⲡⲛⲓϥⲉ  ⲉⲧϩⲛ̅ϣⲁⲛⲧⲛ̅ . ⲁⲩⲱ  ⲟⲩϯⲕ̅  ⲡⲉ  ⲡϣⲁϫⲉ  ⲉⲧⲕⲓⲙ  ϩⲙ̅ⲡⲉⲛϩⲏⲧ : ⲅ̅.  Ⲡⲁⲓ  ⲉϥϣⲁⲛϣⲱⲙ  ⲉⲣⲉⲡⲥⲱⲙⲁ  ⲧⲏⲣϥ̅  ⲛⲁⲣ̅ⲑⲉ  ⲛ̅ⲟⲩϫⲃ̅ⲃⲉⲥ . ⲁⲩⲱ  ⲡⲉⲡⲛⲉⲩⲙⲁ  ⲛⲁⲃⲱⲗ  ⲉⲃⲟⲗ  ⲛ̅ⲑⲉ  ⲙ̅ⲡⲁⲏⲣ  ⲉⲧϫⲟⲟⲣⲉ  ⲉⲃⲟⲗ.  ⲇ̅.  Ⲛ̅ⲥⲉⲣ̅ⲡⲱⲃϣ̅  ⲙ̅ⲡⲉⲛⲣⲁⲛ  ϩⲙ̅ⲡⲉⲛⲟⲩⲟⲉⲓϣ . ⲛ̅ⲧⲉⲧⲙ̅ⲗⲁⲁⲩ  ⲉⲣⲡⲙⲉⲉⲩⲉ  ⲛ̅ⲛⲉⲛϩⲃⲏⲩⲉ . ⲁⲩⲱ  ⲡⲉⲛⲁϩⲉ  ⲛⲁⲟⲩⲉⲓⲛⲉ  ⲛ̅ⲑⲉ  ⲛ̅ⲟⲩⲕⲗⲟⲟⲗⲉ . ⲁⲩⲱ  ϥⲛⲁϫⲱⲱⲣⲉ  ⲉⲃⲟⲗ  ⲛ̅ⲑⲉ  ⲛ̅ⲟⲩⲛⲓϥⲉ  ⲉⲁϥⲃⲱⲗ  ⲉⲃⲟⲗ  ϩⲓⲧⲛ̅ⲡⲁⲕⲧⲓⲛ  ⲙ̅ⲡⲣⲏ . ⲁⲩⲱ  ⲉⲁⲧⲉϥϩⲙ̅ⲙⲉ  ϩⲣⲟϣ  ⲉϫⲱϥ.   Ⲟⲩϩⲁⲉⲓⲃⲉⲥ  ⲉⲁⲥⲟⲩⲉⲓⲛⲉ  ⲡⲉ  ⲡⲉⲛⲟⲩⲟⲉⲓϣ . ⲁⲩⲱ  ⲙ̅ⲙⲛ̅ⲕⲧⲟ  ϣⲟⲟⲡ  ⲙ̅ⲡⲉⲛⲙⲟⲩ : ϫⲉ  ⲁⲩⲧⲱⲱⲃⲉ  ⲉⲣⲱⲟⲩ  ⲁⲩⲱ  ⲛ̅ⲛⲉⲗⲁⲁⲩ  ⲕⲟⲧϥ̅.  Ⲋ.  Ⲁⲙⲉⲓⲧⲛ̅  ϭⲉ  ⲛ̅ⲧⲛ̅ⲧⲥⲓⲟⲛ  ⲛ̅ⲛ̅ⲁⲅⲁⲑⲟⲛ  ⲉⲧϣⲟⲟⲡ.  ⲛ̅ⲧⲛ̅ⲭⲣⲱ  ⲛ̅ⲧⲉⲕⲧⲓⲥⲓⲥ  ϩⲛ̅ⲟⲩϭⲉⲡⲏ  ⲛ̅ⲑⲉ  ⲛ̅ⲟⲩⲙⲛ̅ⲧⲃⲣ̅ⲣⲉ.  ⲍ̅.  Ⲙⲁⲣⲛ̅ⲧⲥⲓⲟⲛ  ⲛ̅ⲏⲣⲡ̅  ⲉⲛⲁⲛⲟⲩϥ  ϩⲓⲥⲧⲓⲛⲟⲩϥⲉ . ⲁⲩⲱ  ⲙ̅ⲡⲣ̅ⲧⲣⲉⲩⲥⲁⲁⲧⲛ̅  ⲛ̅ϭⲓⲛ̅ⲕⲁⲣⲡⲟⲥ  ⲙ̅ⲡⲁⲏⲣ.  ⲏ̅.  Ⲙⲁⲣⲛ̅ϯ  ⲉϫⲱⲛ  ⲛ̅ϩⲛ̅ⲕⲗⲟⲙ  ⲉⲙⲡⲁⲧⲟⲩϩⲱϭⲃ̅ :  ⲑ̅.  Ⲙ̅ⲡⲣ̅ⲧⲣⲉⲗⲁⲁⲩ  ⲙ̅ⲙⲟⲛ  ϣⲱⲡⲉ  ⲙ̅ⲡⲃⲟⲗ  ⲛ̅ⲛⲉⲛⲙⲛ̅ⲧϣⲛⲁ : ⲙⲁⲣⲛ̅ⲕⲁⲥⲩⲙⲃⲟⲗⲏ  ⲛ̅ⲟⲩⲛⲟϥ  ϩⲙ̅ⲙⲁ  ⲛⲓⲙ : ϫⲉ  ⲧⲁⲓ  ⲧⲉ  ⲧⲉⲛⲙⲉⲣⲓⲥ  ⲁⲩⲱ  ⲡⲉⲛⲕⲗⲏⲣⲟⲥ.    Ⲟⲩϩⲏⲕⲉ  ⲛ̅ⲇⲓⲕⲁⲓⲟⲥ  ⲙⲁⲣⲛ̅ϫⲓⲧϥ̅  ⲛ̅ϭⲟⲛⲥ̅ : ⲙ̅ⲡⲣ̅ⲧⲣⲉⲛϯⲥⲟ  ⲉⲧⲉⲭⲏⲣⲁ . ⲟⲩⲇⲉ  ⲙ̅ⲡⲣ̅ⲧⲣⲉⲛϣⲓⲡⲉ  ϩⲏⲧⲟⲩ  ⲛ̅ⲛⲉⲥⲕⲓⲙ  ⲛ̅ⲟⲩϩⲗ̅ⲗⲟ  ⲛ̅ⲛⲟϭ  ⲛ̅ⲁϩⲉ.  ⲓ̅ⲁ.  Ⲙⲁⲣⲉⲧⲉⲛϭⲟⲙ  ϣⲱⲡⲉ  ⲛⲁⲛ  ⲛ̅ⲛⲟⲙⲟⲥ  ⲛ̅ⲇⲓⲁⲓⲟⲥⲩⲛⲏ : ⲧⲙⲛ̅ⲧϭⲱⲃ  ⲅⲁⲣ  ⲉϣⲁⲩϫⲡⲓⲟⲥ  ϩⲱⲥ  ⲁⲧϣⲁⲩ.  ⲓ̅ⲃ.  Ⲙⲁⲣⲛ̅ϭⲱⲣϭ̅  ⲉⲡⲇⲓⲕⲁⲓⲟⲥ  ϫⲉ  ϥⲙⲟⲕϩ̅  ⲉⲣ̅ⲭⲣⲏⲥⲧⲟⲥ  ⲛⲁⲛ  ⲁⲩⲱ  ϥϯ  ⲟⲩⲃⲉⲛⲉⲛϩⲃⲏⲩⲉ : ϥⲛⲟϭⲛⲉϭ  ⲙ̅ⲙⲟⲛ  ⲛ̅ⲛⲉⲛⲛⲟⲃⲉ  ϩⲓⲧⲙ̅ⲡⲛⲟⲙⲟⲥ . ⲁⲩⲱ  ϥⲟⲩⲱⲛϩ̅  ⲉⲃⲟⲗ  ⲛ̅ⲛⲉⲛⲛⲟⲃⲉ  ϩⲓⲧⲛ̅ⲧⲉⲥⲃⲱ.  ⲓ̅ⲅ.  Ϥϫⲱ  ⲙ̅ⲙⲟⲥ  ϫⲉ  ϯⲥⲟⲟⲩⲛ  ⲙ̅ⲡⲛⲟⲩⲧⲉ . ⲁⲩⲱ  ϥⲉⲓⲣⲉ  ⲙ̅ⲙⲟϥ  ⲛ̅ϣⲏⲣⲉ  ⲙ̅Ⲡϫⲟⲉⲓⲥ.  ⲓ̅ⲇ̅.  Ϣⲁϥϣⲱⲡⲉ   ⲛⲁⲛ  ⲉⲩϫⲡⲓⲟ  ⲛ̅ⲛⲉⲛⲙⲉⲉⲩⲉ : ϥϩⲟⲣϣ̅  ⲛⲁⲛ  ⲉⲛⲁⲩ  ⲉⲣⲟϥ.    Ϫⲉ  ⲙ̅ⲡⲉϥⲃⲓⲟⲥ  ⲉⲓⲛⲉ  ⲁⲛ  ⲙ̅ⲡⲁⲟⲩⲟⲛ  ⲛⲓⲙ. ⲁⲩⲱ  ⲛⲉϥϩⲓⲟⲟⲩⲉ  ⲥⲉϣⲟⲃⲉ.  ⲓ̅Ⲋ.  Ⲉⲛⲏⲡ  ⲛ̅ⲧⲟⲟⲧϥ̅  ⲉϩⲉⲛϫⲟⲟⲩⲧ . ⲁⲩⲱ  ϥⲥⲁϩⲏⲩ  ⲉⲃⲟⲗ  ⲛ̅ⲛⲉⲛϩⲓⲟⲟⲩⲉ  ⲛ̅ⲑⲉ  ⲛ̅ⲛⲓⲁⲕⲁⲑⲁⲣⲥⲓⲁ : ϥ̅ⲙⲁⲕⲁⲣⲓⲍⲉ  ⲛ̅ⲑⲁⲏ  ⲛ̅ⲛ̅ⲇⲓⲕⲁⲓⲟⲥ . ⲁⲩⲱ  ϥϣⲟⲩϣⲟⲩ  ⲙ̅ⲙⲟϥ  ϫⲉ  ⲡⲁⲓⲱⲧ  ⲡⲉ  ⲡⲛⲟⲩⲧⲉ.  ⲓ̅ⲍ.  Ⲙⲁⲣⲛ̅ⲛⲁⲩ  ϫⲉ  ϩⲙ̅ⲙⲉ  ⲛⲉ  ⲛⲉϥϣⲁϫⲉ . ⲁⲩⲱ  ⲛ̅ⲧⲛ̅ⲡⲉⲓⲣⲁⲍⲉ  ⲛ̅ⲧⲉϥϩⲁⲏ.  ⲓ̅ⲏ.  Ⲉϣϫⲉ  ⲡⲇⲓⲕⲁⲓⲟⲥ  ⲅⲁⲣ  ⲡⲉ  ⲡϣⲏⲣⲉ  ⲙ̅ⲡⲛⲟⲩⲧⲉ  ϥⲛⲁϣⲟⲡϥ̅  ⲉⲣⲟϥ . ⲛϥ̅ⲛⲁϩⲙⲉϥ  ⲛ̅ⲧⲟⲟⲧⲟⲩ  ⲛ̅ⲛⲉⲧϯ  ⲟⲩⲃⲏϥ.  ⲓ̅ⲑ.  Ⲙⲁⲣⲛ̅ϩⲉⲧⲁⲍⲉ  ⲙ̅ⲙⲟϥ  ϩⲛ̅ϩⲉⲛϣⲱϣ  ⲙⲛ̅ϩⲉⲛⲃⲁⲥⲁⲛⲟⲥ . ϫⲉⲕⲁⲥ  ⲉⲛⲉⲉⲓⲙⲉ  ⲉⲧⲉϥⲙⲛ̅ⲧϩⲁⲕ . ⲁⲩⲱ  ⲛ̅ⲧⲛ̅ⲇⲟⲕⲓⲙⲁⲍⲉ  ⲛ̅ⲧⲉϥⲙⲛ̅ⲧϩⲁⲣϣ̅ϩⲏⲧ.    Ⲙⲁⲣⲛ̅ⲧϭⲁⲉⲓⲟϥ  ϩⲛ̅ⲟⲩⲙⲟⲩ  ⲉϥⲥⲏϣ : ⲥⲉⲛⲁϭⲙ̅ⲡⲉϥϣⲓⲛⲉ  ⲅⲁⲣ  ⲕⲁⲧⲁⲛⲉϥϣⲁϫⲉ.  ⲕ̅ⲁ̅.  Ⲛⲁⲓ  ⲁⲩⲙⲉⲉⲩⲉ  ⲉⲣⲟⲟⲩ  ⲁⲩⲱ  ⲁⲩⲥⲱⲣⲙ̅ : ⲁⲧⲉⲩⲕⲁⲕⲓⲁ  ⲅⲁⲣ  ⲧⲱⲙ  ⲙ̅ⲡⲉⲩϩⲏⲧ.  ⲕ̅ⲃ̅.  Ⲁⲩⲱ  ⲙ̅ⲡⲟⲩⲥⲟⲩⲛ̅ⲙ̅ⲙⲩⲥⲧⲏⲣⲓⲟⲛ  ⲙ̅ⲡⲛⲟⲩⲧⲉ . ⲟⲩⲇⲉ  ⲙ̅ⲡⲟⲩⲕⲁϩⲧⲏⲩ  ⲉⲡⲃⲉⲕⲉ  ⲛ̅ⲧⲇⲓⲕⲁⲓⲟⲥⲩⲛⲏ . ⲙ̅ⲡⲟⲩⲡⲓⲥⲧⲉⲩⲉ  ⲉⲡⲧⲁⲓⲟ  ⲛ̅ⲛⲉⲯⲩⲭⲏ  ⲛ̅ⲛⲉⲧⲟⲩⲁⲁⲃ.  ⲕ̅ⲅ̅.  Ϫⲉ  ⲡⲛⲟⲩⲧⲉ  ⲁϥⲥⲱⲛⲧ̅  ⲙ̅ⲡⲣⲱⲙⲉ  ⲉⲩⲙⲛ̅ⲧⲁⲧⲧⲁⲕⲟ . ⲁⲩⲱ  ⲁϥⲧⲁⲙⲓⲟϥ  ϩⲛ̅ⲑⲓⲕⲱⲛ  ⲙ̅ⲡⲉϥⲉⲓⲛⲉ.  ⲕ̅ⲇ̅.  Ϩⲙ̅ⲡⲉⲫⲑⲟⲛⲟⲥ  ⲇⲉ  ⲙ̅ⲡⲇⲓⲁⲃⲟⲗⲟⲥ  ⲁⲡⲙⲟⲩ  ⲉⲓ  ⲉϩⲟⲩⲛ  ⲉⲡⲕⲟⲥⲙⲟⲥ.   Ⲥⲉⲡⲉⲓⲣⲁⲍⲉ  ⲇⲉ  ⲙ̅ⲙⲟϥ  ⲛ̅ϭⲓⲧⲙⲉⲣⲓⲥ  ⲙ̅ⲡⲉⲧⲙ̅ⲙⲁⲩ.
 
Ⲕⲉⲫ.  Ⲅ̅

Ⲛⲉⲯⲩⲭⲏ  ⲇⲉ  ⲛ̅ⲛ̅ⲇⲓⲕⲁⲓⲟⲥ  ⲉⲩϩⲛ̅ⲧϭⲓϫ  ⲙ̅Ⲡϫⲟⲉⲓⲥ . ⲁⲩⲱ  ⲙⲛ̅ⲃⲁⲥⲁⲛⲟⲥ  ⲛ̅ⲧⲉⲡⲙⲟⲩ  ⲛⲁϫⲱϩ  ⲉⲣⲟⲟⲩ.  ⲃ̅.  Ⲁⲩⲣ̅ⲑⲉ  ⲛ̅ⲛⲉⲛⲧⲁⲩⲙⲟⲩ  ⲙ̅ⲡⲉⲙⲧⲟ  ⲉⲃⲟⲗ  ⲛ̅ⲛⲁⲑⲏⲧ . ⲁⲩⲱ  ⲁⲩⲟⲡⲡⲉⲩⲃⲱⲕ  ⲉⲃⲟⲗ  ⲉⲩⲙⲟⲩⲕϩ̅.  ⲅ̅.  Ⲁⲩⲱ  ⲡⲉⲩⲃⲱⲕ  ⲉⲃⲟⲗ  ϩⲓⲧⲟⲟⲧⲛ̅  ⲉϥⲟⲩⲱϣϥ̅ . ⲛ̅ⲧⲟⲟⲩ  ⲇⲉ  ⲥⲉϣⲟⲟⲡ  ϩⲛ̅ⲟⲩⲉⲓⲣⲏⲛⲏ.  ⲇ̅.  Ⲕⲁⲛ  ⲉⲩϣⲁⲛⲕⲟⲗⲁⲍⲉ  ⲙ̅ⲙⲟⲟⲩ   ⲙ̅ⲡⲉⲙⲧⲟ  ⲉⲃⲟⲗ  ⲛ̅ⲣ̅ⲣⲱⲙⲉ . ⲧⲉⲩϩⲉⲗⲡⲓⲥ  ϫⲏⲕ  ⲉⲃⲟⲗ  ⲛ̅ⲱⲛϩ̅ :   Ⲛ̅ⲧⲁⲩϯⲥⲃⲱ  ⲛⲁⲩ  ⲛ̅ϩⲉⲛⲕⲟⲩⲓ  ⲉⲩⲛⲁⲣ̅ϩⲉⲛⲛⲟϭ  ⲛⲁⲩ  ⲙ̅ⲡⲉⲧⲛⲁⲛⲟⲩϥ. ϫⲉ  ⲡⲛⲟⲩⲧⲉ  ⲡⲉⲛⲧⲁϥⲡⲉⲓⲣⲁⲍⲉ  ⲙ̅ⲙⲟⲟⲩ  ⲁϥϩⲉ  ⲉⲣⲟⲟⲩ  ⲉⲩⲙ̅ⲡϣⲁ  ⲙ̅ⲙⲟϥ :  Ⲋ.  Ⲁϥⲇⲓϭⲓⲙⲁⲍⲉ  ⲙ̅ⲙⲟⲟⲩ  ⲛ̅ⲑⲉ  ⲛ̅ⲟⲩⲛⲟⲩⲃ  ϩⲓⲟⲩϩⲣⲱ . ⲁϥϣⲟⲡⲟⲩ  ⲉⲣⲟϥ  ⲛ̅ⲑⲉ  ⲛ̅ϩⲉⲛϭⲗⲓⲗ  ⲛ̅ⲑⲩⲥⲓⲁ.  ⲍ̅.  Ϩⲙ̅ⲡⲉⲟⲩⲟⲉⲓϣ  ⲙ̅ⲡⲉⲩϭⲙ̅ⲡϣⲓⲛⲉ  ⲥⲉⲛⲁⲣ̅ⲟⲩⲟⲉⲓⲛ. ⲥⲉⲛⲁⲡⲱⲧ  ⲛ̅ⲑⲉ  ⲛ̅ϩⲉⲛϯⲕ̅  ϩⲛ̅ⲟⲩⲣⲟⲟⲩⲉ.  ⲏ̅.  Ⲥⲉⲛⲁⲕⲣⲓⲛⲉ  ⲛ̅ϩⲉⲛϩⲉⲑⲛⲟⲥ  ⲛ̅ⲥⲉⲁⲙⲁϩⲧⲉ  ⲉϫⲛ̅ϩⲛ̅ⲗⲁⲟⲥ . ⲁⲩⲱ  Ⲡϫⲟⲉⲓⲥ  ⲛⲁⲣ̅ⲣ̅ⲣⲟ  ⲉϩⲣⲁⲓ  ⲉϫⲱⲟⲩ  ϣⲁⲛⲓⲉⲛⲉϩ.  ⲑ̅.  Ⲛⲉⲧⲛⲁϩⲧⲉ  ⲉⲣⲟϥ  ⲥⲉⲛⲁⲧⲟⲩⲛ̅ⲧⲙⲉ . ⲁⲩⲱ  ⲙ̅ⲡⲓⲥⲧⲟⲥ  ϩⲛ̅ⲧⲁⲅⲁⲡⲏ  ⲛⲁϭⲱϣⲧ̅  ⲉⲃⲟⲗ  ϩⲏⲧϥ̅ : ϫⲉ  ⲟⲩⲛ̅ⲟⲩⲭⲁⲣⲓⲥ  ⲙⲛ̅ⲟⲩⲛⲁ  ⲛⲁϣⲱⲡⲉ  ⲛ̅ⲛⲉϥⲥⲱⲧⲡ̅.    Ⲛ̅ⲁⲥⲉⲃⲏⲥ  ⲇⲉ  ⲛ̅ⲧⲟⲟⲩ  ⲕⲁⲧⲁⲛⲉⲛⲧⲁⲩⲙⲉⲉⲩⲉ  ⲉⲣⲟⲟⲩ  ⲥⲉⲛⲁϫⲓ  ⲛ̅ⲟⲩⲉⲡⲓⲧⲓⲙⲓⲁ . ⲛⲁⲓ  ⲉⲛⲧⲁⲩⲁⲙⲉⲗⲓ  ⲉⲡⲇⲓⲕⲁⲓⲟⲥ  ⲁⲩⲥⲁϩⲱⲟⲩ  ⲉⲃⲟⲗ  ⲙ̅Ⲡϫⲟⲉⲓⲥ.  ⲓ̅ⲁ.  Ⲟⲩⲉⲃⲓⲏⲛ  ⲅⲁⲣ  ⲡⲉ  ⲡⲉⲧⲥⲱϣϥ̅  ⲛ̅ⲧⲥⲟⲫⲓⲁ  ⲙⲛ̅ⲧⲉⲥⲃⲱ : Ⲧⲉⲩϩⲉⲗⲡⲓⲥ  ϣⲟⲩⲉⲓⲧ  ⲁⲩⲱ  ⲛⲉⲩϩⲓⲥⲉ  ⲙⲛ̅ϩⲏⲩ  ⲛ̅ϩⲏⲧⲟⲩ . ⲁⲩⲱ  ⲛⲉⲩϩⲃⲏⲩⲉ  ϩⲉⲛⲁⲧϣⲁⲩ  ⲛⲉ.  ⲓ̅ⲃ.  Ⲛⲉⲩϩⲓⲟⲙⲉ   ϩⲉⲛⲁⲑⲏⲧ  ⲛⲉ  ⲁⲩⲱ  ⲛⲉⲩϣⲏⲣⲉ  ϩⲉⲛⲡⲟⲛⲏⲣⲟⲥ  ⲛⲉ . ⲁⲩⲱ  ϥⲥϩⲟⲩⲟⲣⲧ̅  ⲛ̅ϭⲓⲡⲉⲩϫⲡⲟ.  ⲓ̅ⲅ̅.  Ϫⲉ  ⲛⲁⲓⲁⲧⲥ̅  ⲛ̅ⲟⲩⲁϭⲣⲏⲛ  ⲉⲙⲡⲉⲥⲧⲱⲗⲙ̅ . ⲧⲁⲓ  ⲉⲧⲉ  ⲙ̅ⲡⲥ̅ⲥⲟⲩⲛ̅ⲙⲁ  ⲛ̅ⲛ̅ⲕⲟⲧⲕ̅  ϩⲛ̅ⲟⲩⲛⲟⲃⲉ : ⲥⲛⲁϫⲓ  ⲅⲁⲣ  ⲛ̅ⲟⲩⲕⲁⲣⲡⲟⲥ  ϩⲙ̅ⲡϭⲙ̅ⲡϣⲓⲛⲉ  ⲛ̅ⲛⲉⲯⲩⲭⲏ.  ⲓ̅ⲇ.  Ⲁⲩⲱ  ⲟⲩⲥⲓⲟⲩⲣ  ⲉⲙⲡϥ̅ⲣ̅ⲁⲛⲟⲙⲓⲁ  ϩⲛ̅ⲛⲉϥϭⲓϫ . ⲟⲩⲇⲉ  ⲙ̅ⲡϥ̅ⲙⲉⲉⲩⲉ  ⲉⲡⲉⲑⲟⲟⲩ  ⲉϩⲟⲩⲛ  ⲉⲠϫⲟⲉⲓⲥ : ⲥⲉⲛⲁϯ  ⲅⲁⲣ  ⲛⲁϥ  ⲛ̅ⲟⲩⲭⲁⲣⲓⲥ  ⲛ̅ⲥⲱⲧⲡ̅  ϩⲁⲧⲉϥⲡⲓⲥⲧⲓⲥ . ⲁⲩⲱ  ⲟⲩⲕⲗⲏⲣⲟⲥ  ⲉⲛⲁⲛⲟⲩϥ  ϩⲙ̅ⲡⲉⲣⲡⲉ  ⲙ̅Ⲡϫⲟⲉⲓⲥ.    Ϥⲧⲁⲓⲏⲩ  ⲅⲁⲣ  ⲛ̅ϭⲓⲡⲕⲁⲣⲡⲟⲥ  ⲛ̅ⲛ̅ϩⲓⲥⲉ  ⲉⲧⲛⲁⲛⲟⲩⲟⲩ . ⲁⲩⲱ  ⲥⲧⲁϫⲣⲏⲩ  ⲛ̅ϭⲓⲧⲛⲟⲩⲛⲉ  ⲛ̅ⲧⲙⲛ̅ⲧⲣⲙ̅ⲛ̅ϩⲏⲧ.  ⲓ̅Ⲋⲭ.  Ⲛ̅ϣⲏⲣⲉ  ⲇⲉ  ⲛ̅ⲛ̅ⲛⲟⲉⲓⲕ  ϩⲉⲛϣⲁⲣⲁϩⲉ  ⲛⲉ . ⲁⲩⲱ  ϥⲛⲁϥⲱⲧⲉ  ⲉⲃⲟⲗ  ⲛ̅ϭⲓⲡⲉⲥⲡⲉⲣⲙⲁ  ⲉⲃⲟⲗ  ϩⲛ̅ⲟⲩⲙⲁⲛ̅ⲛ̅ⲕⲟⲧⲕ̅  ⲙ̅ⲡⲁⲣⲁⲛⲟⲙⲟⲥ.  ⲓ̅ⲍ.  Ⲉⲩϣⲁⲛϣⲱⲡⲉ  ⲛ̅ⲛⲟϭ  ⲅⲁⲣ  ⲛ̅ⲁϩⲉ  ⲉⲩⲛⲁⲟⲡⲟⲩ  ⲉⲩⲗⲁⲁⲩ . ⲁⲩⲱ  ⲧⲉⲩϩⲉⲗⲡⲓⲥ  ⲛⲁϣⲱⲡⲉ  ⲉⲥⲥⲏϣ  ϩⲛ̅ⲧⲉⲩϩⲁⲏ.  ⲓ̅ⲏ.  Ⲉϣⲱⲡⲉ  ⲟⲛ  ⲉⲩϣⲁⲛⲙⲟⲩ  ⲉⲩⲟ  ⲛ̅ϣⲁⲣⲁϩⲉ  ⲙⲛ̅ⲧⲟⲩϩⲉⲗⲡⲓⲥ  ⲙ̅ⲙⲁⲩ . ⲟⲩⲇⲉ  ⲟⲩⲥⲟⲗⲥⲗ̅  ϩⲙ̅ⲡⲉϩⲟⲟⲩ  ⲙ̅ⲡϭⲙ̅ⲡϣⲓⲛⲉ :  ⲓ̅ⲑ.  Ⲑⲁⲏ  ⲅⲁⲣ  ϩⲟⲟⲩ  ⲛ̅ⲧⲅⲉⲛⲉⲁ  ⲛ̅ⲣ̅ⲣⲉϥϫⲓⲛϭⲟⲛⲥ̅.

Ⲕⲉⲫ.  Ⲇ̅

Ⲛⲁⲛⲟⲩⲟⲩⲙⲛ̅ⲧⲁⲧϣⲏⲣⲉ  ϩⲛ̅ⲟⲩⲁⲣⲉⲧⲏ :  ⲟⲩⲱⲛϩ̅  ⲅⲁⲣ  ⲡⲉⲧϣⲟⲟⲡ  ϩⲙ̅ⲡⲉⲥⲣ̅ⲡⲙⲉⲉⲩⲉ : ϫⲉ  ⲥⲟⲩⲟⲛϩ̅  ⲉⲃⲟⲗ  ϩⲁⲧⲙ̅ⲡⲛⲟⲩⲧⲉ  ⲙⲛ̅ⲛ̅ⲣⲱⲙⲉ.  ⲃ̅.  Ϣⲁⲩⲧⲛ̅ⲧⲱⲛⲟⲩ  ⲉⲣⲟⲥ  ⲉⲥⲙ̅ⲡⲉⲉⲓⲙⲁ . ⲁⲩⲱ  ϣⲁⲩϣⲓⲛⲉ  ⲛ̅ⲥⲱⲥ  ⲉⲥϣⲁⲛⲃⲱⲕ . ⲁⲩⲱ  ϩⲙ̅ⲡⲕⲉⲁⲓⲱⲛ  ⲥⲛⲁⲡⲟⲙⲛⲉⲩⲉ  ⲉⲣⲉⲡⲉⲕⲗⲟⲙ  ϩⲓϫⲱⲥ.  ⲅ̅.  Ⲡⲙⲏⲏϣⲉ  ⲅⲁⲣ  ⲛ̅ϫⲡⲟ  ⲛ̅ⲁⲥⲉⲃⲏⲥ  ⲛⲁⲣ̅ϣⲁⲩ  ⲁⲛ . ⲁⲩⲱ  ⲛ̅ⲧⲱϭⲉ  ⲛ̅ⲟⲩϫ  ⲛⲁϫⲉⲛⲟⲩⲛⲉ  ⲁⲛ  ⲉⲡϣⲓⲕⲉ . ⲟⲩⲇⲉ ⲛ̅ⲥⲉⲛⲁⲧⲁϫⲣⲟ  ⲁⲛ  ⲛ̅ⲟⲩⲥⲛ̅ⲧⲉ  ⲉⲥⲟⲣϫ̅.  ⲇ̅.  Ⲕⲁⲛ  ⲉⲩϣⲁⲛϯⲟⲩⲱ  ⲅⲁⲣ  ⲛ̅ϩⲉⲛⲕⲗⲁⲇⲟⲥ  ⲡⲣⲟⲥⲟⲩⲟⲓϣ . ⲉⲁⲩⲉⲓ  ⲉϩⲣⲁⲓ  ⲉⲩⲗⲟⲟϥⲉ  ⲥⲉⲛⲁⲕⲓⲙ  ⲉⲣⲟⲟⲩ  ϩⲓⲧⲛ̅ⲟⲩⲧⲏⲟⲩ . ⲛ̅ⲥⲉⲡⲟⲣⲕⲟⲩ  ϩⲓⲧⲛ̅ϩⲉⲛⲧⲏⲩ  ⲉⲩⲛⲁϣⲧ̅.    Ⲥⲉⲛⲁϩⲱⲣⲃ̅  ⲛ̅ϭⲓⲛⲉⲕⲗⲁⲇⲟⲥ  ⲉⲧⲉⲙ̅ⲡⲟⲩϫⲱⲕ . ⲁⲩⲱ  ⲡⲉⲩⲕⲁⲣⲡⲟⲥ  ⲟⲩⲁⲧϣⲁⲩ  ⲡⲉ  ⲉⲙⲡϥ̅ⲡ . . . .  ⲉⲩⲟⲙϥ̅. ⲁⲩⲱ  ⲛϥ̅ⲣ̅ϣⲁⲩ  ⲁⲛ  ⲉⲗⲁⲁⲩ.  Ⲋ.  Ⲛ̅ϣⲏⲣⲉ  ⲅⲁⲣ  ⲛ̅ⲧⲟⲩϫⲡⲟⲟⲩ  ⲉⲃⲟⲗ  ϩⲛ̅ϩⲉⲛⲙⲁⲛ̅ⲛ̅ⲕⲟⲧⲕ̅  ⲙ̅ⲡⲁⲣⲁⲛⲟⲙⲟⲛ . ⲥⲉⲛⲁϣⲱⲡⲉ  ⲙ̅ⲙⲛ̅ⲧⲣⲉ  ⲛ̅ⲧⲡⲟⲛⲏⲣⲓⲁ  ⲛ̅ⲛⲉⲩⲉⲓⲟⲧⲉ  ϩⲙ̅ⲡⲉⲩϭⲙ̅ⲡϣⲓⲛⲉ.  ⲍ̅.  Ⲡⲇⲓⲕⲁⲓⲟⲥ  ⲇⲉ  ⲉϥϣⲁⲛⲙⲟⲩ  ⲉϥⲛⲁϣⲱⲡⲉ  ϩⲛ̅ⲟⲩⲙ̅ⲧⲟⲛ :  ⲏ̅.  Ⲛ̅ⲧⲙⲛ̅ⲧϩⲗ̅ⲗⲟ  ⲅⲁⲣ  ⲁⲛ  ⲉⲧⲧⲁⲉⲓⲏⲩ  ⲡⲉ  ⲟⲩⲛⲟϭ  ⲛ̅ⲁϩⲉ . ⲟⲩⲇⲉ  ⲛ̅ⲟⲩⲁϣⲏ ⲁⲛ  ⲛ̅ⲣⲟⲙⲡⲉ  ⲧⲉ :  ⲑ̅.  Ⲁⲗⲗⲁ  ⲧⲙⲛ̅ⲧⲣⲙ̅ⲛ̅ϩⲏⲧ  ⲡⲉ  ⲡⲉⲥⲕⲓⲙ  ⲛ̅ⲣ̅ⲣⲱⲙⲉ . ⲁⲩⲱ  ⲧⲙⲛ̅ⲧϩⲗ̅ⲗⲟ  ⲡⲉ  ⲟⲩⲁϩⲉ  ⲛ̅ⲁⲧⲛⲟⲃⲉ.    Ⲉⲁϥⲣ̅ⲁⲛⲁϥ  ⲙ̅ⲡⲛⲟⲩⲧⲉ  ⲁϥⲟⲩⲁϣϥ̅ . ⲁⲩⲱ  ⲉϥⲟⲛϩ̅  ⲛ̅ⲧⲙⲏⲧⲉ  ⲛ̅ⲣ̅ⲣⲉϥⲣ̅ⲛⲟⲃⲉ  ⲁⲩⲡⲟⲟⲛⲉϥ  ⲉⲃⲟⲗ.  ⲓ̅ⲁ.  Ⲁⲩⲧⲟⲣⲡϥ̅  ϫⲉ  ⲛ̅ⲛⲉⲧⲕⲁⲕⲓⲁ  ϣⲓⲃⲉ  ⲛ̅ⲧⲉϥⲙⲛ̅ⲧⲣⲙ̅ⲛ̅ϩⲏⲧ .  ⲏ  ⲛ̅ⲧⲉⲡⲉⲕⲣⲟϥ  ⲁⲡⲁⲧⲁ  ⲛ̅ⲧⲉϥⲯⲩⲭⲏ.  ⲓ̅ⲃ.  Ⲧⲙⲛ̅ⲧⲉⲓⲉⲣⲃⲟⲟⲛⲉ  ⲅⲁⲣ  ⲛ̅ⲛⲉⲑⲟⲟⲩ  ϣⲁⲥϣⲓⲃⲉ  ⲛ̅ⲛⲉⲧⲛⲁⲛⲟⲩⲟⲩ . ⲁⲩⲱ  ⲧⲉⲡⲓⲑⲩⲙⲓⲁ  ⲛ̅ⲛ̅ⲣⲉϥⲥⲱⲱⲣⲙ̅  ϣⲁⲥ . . .  ⲡ  ⲉⲫⲏⲧ  ⲛ̅ⲛ̅ⲃⲁⲗϩⲏⲧ.  ⲓ̅ⲅ.  Ⲉⲁϥⲧ̅ⲉⲗⲉⲓⲟⲥ  ϩⲛ̅ⲟⲩⲕⲟⲩⲓ  ϣⲁϥϫⲱⲕ  ⲉⲃⲟⲗ  ϩⲉⲛⲟⲩⲟⲉⲓϣ  ⲉⲛⲁϣⲱⲟⲩ.  ⲓ̅ⲇ.  Ⲛⲉⲥⲣ̅ⲁⲛⲁϥ  ⲅⲁⲣ  ⲙ̅Ⲡϫⲟⲉⲓⲥ  ⲛ̅ϭⲓⲧⲉϥⲯⲩⲭⲏ : ⲉⲧⲃⲉⲡⲁⲓ  ⲁϥⲡⲱⲧ  ⲉⲃⲟⲗ  ⲛ̅ⲧⲙⲏⲧⲉ  ⲛ̅ⲧⲡⲟⲛⲏⲣⲓⲁ . ⲗ̅ⲗⲁⲟⲥ  ⲇⲉ  ⲛ̅ⲧⲉⲣⲟⲩⲛⲁⲩ  ⲙ̅ⲡⲟⲩⲛⲟⲓ . ⲟⲩⲇⲉ  ⲙ̅ⲡⲟⲩⲕⲁⲡⲁⲓ  ϩⲙ̅ⲡⲉⲩϩⲏⲧ.   Ϫⲉ  ⲟⲩⲛⲟⲩⲭⲁⲣⲓⲥ  ⲙⲛ̅ⲟⲩⲛⲁ  ⲛⲁϣⲱⲡⲉ  ⲛ̅ⲛⲉϥⲥⲱⲧⲡ̅ . ⲁⲩⲱ  ⲟⲩϭⲙ̅ⲡϣⲓⲛⲉ  ⲛ̅ⲛⲉϥⲡⲉⲧⲟⲩⲁⲁⲃ.  ⲓ̅Ⲋ.  Ⲡⲇⲓⲕⲁⲓⲟⲥ  ⲇⲉ  ⲉⲧⲁϥⲙⲟⲩ  ϥⲛⲁⲧϭⲁⲓⲉⲛⲁⲥⲉⲃⲏⲥ  ⲉⲧⲟⲛϩ̅ . ⲁⲩⲱ  ⲟⲩϣⲏⲣⲉ  ϣⲏⲙ  ⲉⲁϥϫⲱⲕ  ⲉⲃⲟⲗ  ϩⲛ̅ⲟⲩϭⲉⲡⲏ  ϥⲛⲁⲧϭⲁⲓⲉⲧⲙⲛ̅ⲧϩⲗ̅ⲗⲟ  ⲙ̅ⲡⲣⲉϥϫⲓⲛϭⲟⲛⲥ̅ :  ⲓ̅ⲍ.  Ⲥⲉⲛⲁⲛⲁⲩ  ⲅⲁⲣ  ⲉⲡⲙⲟⲩ  ⲛ̅ⲛ̅ⲥⲟⲫⲟⲥ . ⲛ̅ⲥⲉⲧⲙ̅ⲛⲟⲓ  ϫⲉ  ⲛ̅ⲧⲁϥⲙⲉⲉⲩⲉ  ⲉⲣⲟϥ  ⲉⲟⲩ . ⲁⲩⲱ  ⲉⲧⲃⲉⲟⲩ  ⲁⲠϫⲟⲉⲓⲥ  ⲟⲣϫϥ̅.  ⲓ̅ⲏ.  Ⲥⲉⲛⲁⲛⲁⲩ  ⲛ̅ⲥⲉⲥⲱϣϥ̅ :  ⲛ̅ⲧⲟⲟⲩ  ⲇⲉ  Ⲡϫⲟⲉⲓⲥ  ⲛⲁⲥⲱⲃⲉ  ⲛ̅ⲥⲱⲟⲩ.  ⲓ̅ⲑ.  Ⲙⲛ̅ⲛ̅ⲥⲁⲡⲁⲓ  ⲥⲉⲛⲁϣⲱⲡⲉ  ⲉⲩϩⲧⲟⲡ  ⲉϥⲥⲏϣ . ⲁⲩⲱ  ⲉⲩⲥⲱϣϥ̅  ϩⲛ̅ⲛⲉⲧⲙⲟⲟⲩⲧ  ϣⲁⲉⲛⲉϩ :  ϫⲉ  ϥⲛⲁⲣⲁϩⲧⲟⲩ  ⲉϫⲙ̅ⲡⲉⲩϩⲟ  ⲉⲛⲥⲉϣϣⲁϫⲉ  ⲁⲛ.  ⲛϥ̅ⲕⲓⲙ  ⲉⲣⲟⲟⲩ  ϫⲓⲛⲛⲉⲩⲥⲛ̅ⲧⲉ . ⲁⲩⲱ  ⲥⲉⲛⲁϣⲏϥ  ϣⲁⲑⲁⲏ . ⲛ̅ⲥⲉϣⲱⲡⲉ  ϩⲛ̅ⲟⲩⲙ̅ⲕⲁϩ :  ⲛ̅ⲧⲉⲡⲉⲩⲣ̅ⲡⲙⲉⲉⲩⲉ  ⲧⲁⲕⲟ.    Ⲥⲉⲛⲁⲃⲱⲕ  ⲉⲩⲟ  ⲛ̅ϭⲁⲃϩⲏⲧ  ϩⲙ̅ⲡⲣ̅ⲡⲙⲉⲉⲩⲉ  ⲛ̅ⲛⲉⲩⲛⲟⲃⲉ : ⲛ̅ⲧⲉⲛⲉⲩⲁⲛⲟⲙⲓⲁ  ϫⲡⲓⲟⲟⲩ  ⲙ̅ⲡⲉⲩⲙ̅ⲧⲟ  ⲉⲃⲟⲗ.

Ⲕⲉⲫ.  Ⲉ̅

  Ⲧⲟⲧⲉ  ⲡⲇⲓⲕⲁⲓⲟⲥ  ⲛⲁⲁϩⲉⲣⲁⲧϥ̅  ϩⲛ̅ⲟⲩⲛⲟϭ  ⲙ̅ⲡⲁⲣϩⲏⲥⲓⲁ  ⲉⲛⲁϣⲱⲥ . ⲙ̅ⲡⲉⲙⲧⲟ  ⲉⲃⲟⲗ  ⲛ̅ⲛⲉⲛⲧⲁⲩⲑⲗⲓⲃⲉ  ⲙ̅ⲙⲟϥ . ⲁⲩⲱ  ⲛⲉⲛⲧⲁⲩⲁⲑⲉⲧⲓ  ⲛ̅ⲛⲉϥϩⲓⲥⲉ.  ⲃ̅.  Ⲥⲉⲛⲁⲛⲁⲩ  ⲛ̅ⲥⲉϣⲧⲟⲣⲧⲣ̅  ϩⲛ̅ⲟⲩϩⲟⲧⲉ  ⲉⲥⲛⲁϣⲧ̅ . ⲛ̅ⲥⲉⲡⲱϣⲥ̅  ⲉϫⲛ̅ⲧⲙⲟⲉⲓϩⲉ  ⲙ̅ⲡⲉϥⲟⲩϫⲁⲓ.  ⲅ̅.  Ⲛ̅ⲥⲉϫⲟⲟⲥ  ϩⲣⲁⲓ  ⲛ̅ϩⲏⲧⲟⲩ  ⲉⲩⲙⲉⲧⲁⲛⲟⲓ . ⲁⲩⲱ  ⲉⲩⲁϣⲁϩⲟⲙ  ⲉⲧⲃⲉⲡⲗⲱϫϩ̅  ⲙ̅ⲡⲉⲩⲡⲛⲉⲩⲙⲁ . ϫⲉ  ⲡⲁⲓ  ⲡⲉ  ⲛⲉⲛⲥⲱⲃⲉ  ⲛ̅ⲥⲱϥ  ⲙ̅ⲡⲓⲟⲩⲟⲉⲓϣ . ⲉϥϣⲟⲟⲡ  ⲛⲁⲛ  ⲙ̅ⲡⲁⲣⲁⲃⲟⲗⲏ  ⲛ̅ⲛⲟϭⲛⲉϭ  ⲛ̅ⲛⲓⲁⲑⲏⲧ.  ⲇ̅.  Ⲉⲛⲱⲡ  ⲙ̅ⲡⲉϥⲁϩⲉ  ⲉⲩⲗⲓⲃⲉ  ⲁⲩⲱ  ⲡⲉϥⲙⲟⲩ  ⲉⲩⲥⲱϣ.   Ⲛ̅ⲁϣ  ⲛ̅ⲁϩⲉ  ⲁⲩⲟⲡϥ̅  ϩⲛ̅ⲛ̅ϣⲏⲣⲉ  ⲙ̅ⲡⲛⲟⲩⲧⲉ . ⲁⲩⲱ  ⲡⲉϥⲕⲗⲏⲣⲟⲥ  ϩⲛ̅ⲛⲉⲧⲟⲩⲁⲁⲃⲑ Ⲋ.  Ⲉⲉⲓⲉ  ⲛ̅ⲧⲁⲛⲡⲗⲁⲛⲁ  ⲛ̅ⲧⲟⲟⲩⲛ  ⲉⲃⲟⲗ  ϩⲛ̅ⲛⲉϩⲓⲟⲟⲩⲉ  ⲛ̅ⲧⲙⲉ . ⲁⲩⲱ  ⲙ̅ⲡϥ̅ⲙ̅ⲡϣⲁ  ⲛⲁⲛ  ⲛ̅ϭⲓⲡⲟⲩⲟⲉⲓⲛ  ⲛ̅ⲧⲇⲓⲕⲁⲓⲟⲥⲩⲛⲏ. ⲁⲩⲱ  ⲡⲣⲏ  ⲙ̅ⲡϥ̅ⲡⲉⲓⲣⲉ  ⲛⲁⲛ.  ⲍ̅.  Ⲁⲛⲙⲟⲩϩ  ⲛ̅ⲁⲛⲟⲙⲓⲁ  ϩⲓⲧⲁⲕⲟ  ⲛ̅ⲛⲉⲛϩⲓⲟⲟⲩⲉ : ⲁⲛⲃⲱⲕ  ϩⲓⲧⲛ̅ⲛ̅ϫⲁⲓⲉ  ⲉⲙⲉⲩⲙⲟⲟϣⲉ  ⲛ̅ϩⲏⲧⲟⲩ : ⲧⲉϩⲓⲏ  ⲇⲉ  ⲙ̅Ⲡϫⲟⲉⲓⲥ  ⲙ̅ⲡⲛ̅ⲥⲟⲩⲱⲛⲥ̅.  ⲏ̅.  Ⲛ̅ⲧⲁⲥϯⲟⲩ  ⲙ̅ⲙⲟⲛ  ⲛ̅ⲟⲩ  ⲛ̅ϭⲓⲧⲛ̅ⲙⲛ̅ⲧϫⲁⲥⲓϩⲏⲧ . ⲏ  ⲧⲙⲛ̅ⲧⲣⲙ̅ⲙⲁⲟ  ⲙⲛ̅ⲧⲙⲛ̅ⲧⲃⲁⲃⲉⲣⲱⲙⲉ  ⲛ̅ⲧⲁⲥϯⲟⲩ  ⲛ̅ⲟⲩ  ⲛⲁⲛⲑ   ⲑ̅.  Ⲁⲛⲏ  ⲧⲏⲣⲟⲩ  ⲟⲩⲉⲓⲛⲉ  ⲛ̅ⲑⲉ  ⲛ̅ⲟⲩϩⲁⲓⲃⲉⲥ . ⲁⲩⲱ  ⲛ̅ⲑⲉ  ⲛ̅ⲟⲩⲱ  ⲉⲁϥⲡⲁⲣⲁⲅⲉ.    ⲏ  ⲛ̅ⲑⲉ  ⲛ̅ⲟⲩϫⲟⲓ  ⲉϥⲥϭⲏⲣ  ϩⲛ̅ⲟⲩϩⲟⲉⲓⲙ  ⲙ̅ⲙⲟⲟⲩ . ⲉⲙⲛ̅ⲑⲉ  ⲛ̅ϭⲛ̅ⲛⲉϥⲧⲁϭⲥⲉ . ⲏ  ⲧⲉϩⲓⲏ  ⲙ̅ⲡⲉϥⲧⲟⲡ  ϩⲛ̅ⲛ̅ϩⲟⲉⲓⲙ :  ⲓ̅ⲁ.  ⲏ  ⲛ̅ⲑⲉ  ⲛ̅ⲟⲩϩⲁⲗⲏⲧ  ⲉⲁϥϩⲱⲗ  ⲉⲃⲟⲗ . ⲉⲙⲉⲩϭⲛ̅ⲙⲁⲉⲓⲛ  ⲙ̅ⲉϥϩⲱⲗ  ⲉⲃⲟⲗ . ⲉϥϩⲓⲟⲩⲉ  ⲛ̅ⲛⲉϥⲧⲛ̅ϩ  ⲉⲡⲁⲏⲣ  ⲉⲧⲁⲥⲱⲟⲩ . ⲉϥⲡⲱϩ  ⲙ̅ⲙⲟϥ  ⲛ̅ϭⲟⲛⲥ̅  ϩⲙ̅ⲡⲟⲩⲟⲉⲓ . ⲉϥⲕⲓⲙ  ⲛ̅ⲛⲉϥⲧⲛ̅ϩ  ⲉϥϩⲏⲗ . ⲙⲛ̅ⲛ̅ⲥⲱⲥ  ⲉⲙⲉⲩϭⲛ̅ⲙⲁⲉⲓⲛ  ⲙ̅ⲡⲉϥϩⲱⲗ  ⲉⲃⲟⲗ :  ⲓ̅ⲃ.  ⲏ  ⲛ̅ⲑⲉ  ⲛ̅ⲟⲩⲥⲟⲧⲉ  ⲉⲁⲩⲛⲟϫϥ̅  ⲉⲡⲥⲟⲟⲩⲧⲛ̅ . ⲉⲁϥⲡⲉϩⲡⲁⲏⲣ  ⲛ̅ⲧⲉⲩⲛⲟⲩ  ⲟⲛ  ⲁϥⲧⲱϭⲉ  ⲉⲙⲉⲩⲥⲟⲩⲛ̅ⲧⲉϥϩⲓⲏ.  ⲓ̅ⲅ.  Ⲧⲁⲓ  ⲧⲉ  ⲑⲉ  ϩⲱⲱⲛ  ⲟⲛ  ⲉⲁⲩϫⲡⲟⲛ  ⲁⲛⲱϫⲛ̅ : ⲙ̅ⲡⲛ̅ϩⲉ  ⲉⲩⲙⲁⲉⲓⲛ   ⲛ̅ⲁⲣⲉⲧⲏ  ⲉⲟⲩⲟⲛϩϥ̅  ⲉⲃⲟⲗ.  ⲓ̅ⲇ.  Ϩⲣⲁⲓ  ⲇⲉ  ϩⲛ̅ⲧⲉⲛⲕⲁⲕⲓⲁ  ⲁⲛⲧⲁⲕⲟ.    ϫⲉ  ⲑⲉⲗⲡⲓⲥ  ⲙ̅ⲡⲁⲥⲉⲃⲏⲥ  ⲉⲥⲟ  ⲛ̅ⲑⲉ  ⲛ̅ⲟⲩϣϩⲓϭ  ⲉⲣⲉⲡⲧⲏⲩ  ϥⲓⲧϥ̅ .  ⲁⲩⲱ  ⲛ̅ⲑⲉ  ⲛ̅ⲟⲩϩⲁⲗⲟⲩⲥ  ⲉϥϣⲟⲟⲙⲉ  ⲉⲁⲩⲑⲗⲟϥ  ⲉⲃⲟⲗ  ϩⲓⲧⲛ̅ⲟⲩϩⲁⲧⲏⲩ . ⲏ  ⲛ̅ⲑⲉ  ⲛ̅ⲟⲩⲕⲁⲡⲛⲟⲥ  ⲉⲁⲩϩⲁⲧⲏⲩ  ⲉⲃⲟⲗϥ̅  ⲉⲃⲟⲗ. ⲛ̅ⲑⲉ  ⲙ̅ⲡⲣ̅ⲡⲙⲉⲉⲩⲉ  ⲛ̅ⲟⲩⲣⲙ̅ⲛ̅ϭⲟⲉⲓⲗⲉ  ⲛ̅ⲟⲩϩⲟⲟⲩ  ⲟⲩⲱⲧ  ⲉⲁϥⲡⲁⲣⲁⲅⲉ.  ⲓ̅Ⲋ.  Ⲛ̅ⲇⲓⲕⲁⲓⲟⲥ  ⲇⲉ  ⲛ̅ⲧⲟⲟⲩ  ⲛⲁⲱⲛϩ̅  ϣⲁⲉⲛⲉϩ. ⲁⲩⲱ  ⲉⲣⲉⲡⲉⲩⲃⲉⲕⲉ  ϣⲟⲟⲡ  ϩⲙ̅Ⲡϫⲟⲉⲓⲥ . ⲁⲩⲱ  ⲡⲉⲩⲣⲟⲟⲩϣ  ϩⲁⲧⲙ̅ⲡⲉⲧϫⲟⲥⲉ.  ⲓ̅ⲍ.  Ⲉⲧⲃⲉⲡⲁⲓ  ⲥⲉⲛⲁϫⲓ  ⲙ̅ⲡⲥⲁ  ⲛ̅ⲧⲙⲛ̅ⲧⲉⲣⲟ . ⲁⲩⲱ  ⲟⲩϭⲣⲏⲡⲉ  ⲉⲛⲉⲥⲱⲥ  ⲉⲃⲟⲗ  ϩⲓⲧⲟⲟⲧϥ̅  ⲙ̅Ⲡϫⲟⲉⲓⲥ : ϫⲉ  ϥⲛⲁⲣ̅ϩⲁⲉⲓⲃⲉⲥ  ⲉⲣⲟⲟⲩ  ϩⲛ̅ⲧⲉϥⲟⲩⲛⲁⲙ. ⲛϥ̅ⲣ̅ⲛⲁϣⲧⲉ  ⲛϭⲩ  ϩⲙ̅ⲡⲉϥϭⲃⲟⲓ.  ⲓ̅ⲏ.  Ϥⲛⲁϫⲓ  ⲛ̅ⲧⲡⲁⲛϩⲟⲡⲗⲓⲁ  ⲙ̅ⲡⲉϥⲕⲱϩ . ⲛϥ̅ϩⲟⲕϥ̅  ⲛ̅ⲧⲉⲕⲧⲓⲥⲓⲥ  ⲉⲡϫⲓⲕⲃⲁ  ⲛ̅ⲛ̅ϫⲁϫⲉ.  ⲓ̅ⲑ.  Ϥⲛⲁϯ  ϩⲓⲱⲱϥ  ⲙ̅ⲫⲱⲕ  ⲛ̅ⲧⲇⲓⲕⲁⲓⲟⲥⲩⲛⲏ . ⲛϥ̅ϯ  ⲉϫⲱϥ  ⲛ̅ⲧⲡⲉⲣⲓⲕⲉⲫⲁⲗⲁⲓⲁ  ⲛ̅ⲧⲉⲕⲣⲓⲥⲓ  ⲁϫⲛ̅ϩⲩⲡⲟⲕⲣⲓⲥⲓⲥ.    Ϥⲛⲁϫⲓ  ⲙ̅ⲡϩⲟⲡⲗⲟⲛ  ⲉⲧϫⲟⲟⲣ  ⲙ̅ⲡⲧⲃ̅ⲃⲟ.  ⲕ̅ⲁ̅.  Ϥⲛⲁϫⲟⲟⲣ  ⲛ̅ⲧⲥⲏϥⲉ  ⲛ̅ⲧⲉϥⲟⲣⲅⲏ  ⲉⲧϣⲱⲱⲧ  ⲉⲃⲟⲗ . ⲛ̅ⲧⲉⲡⲕⲟⲥⲙⲟⲥ  ⲛⲙ̅ⲙⲁϥ  ⲙⲓϣⲉ  ⲟⲩⲃⲉⲛⲁⲑⲏⲧ.  ⲕ̅ⲃ̅.  Ⲥⲉⲛⲁⲙⲟⲟϣⲉ  ⲉⲩⲥⲟⲩⲧⲱⲛ  ⲛ̅ϭⲓⲛ̅ⲥⲟⲧⲉ  ⲛ̅ⲛⲉⲃⲣⲏϭⲉ . ⲛ̅ⲥⲉϥⲱϭⲉ  ⲉⲃⲟⲗ  ϩⲛ̅ⲛⲉⲕⲗⲟⲟⲗⲉ  ⲉⲡⲥⲟⲟⲩⲧⲛ̅  ⲛ̅ⲑⲉ  ⲉⲃⲟⲗ  ϩⲛ̅ⲟⲩⲡⲓⲧⲉ  ⲉⲥⲥⲟⲙⲧ̅.  ⲕ̅ⲅ̅.  Ⲥⲉⲛⲁⲛⲟⲩϫⲉ  ⲛ̅ϩⲉⲛⲭⲁⲗⲁⲍⲁ  ⲉⲩⲙⲉϩ  ⲛ̅ϭⲱⲛⲧ̅  ⲛ̅ⲑⲉ  ⲉⲃⲟⲗ  ϩⲛ̅ⲟⲩⲃⲁⲕⲱⲛⲉ . ⲡⲙⲟⲟⲩ  ⲛ̅ⲑⲁⲗⲁⲥⲥⲁ  ⲛⲁϩⲱⲃⲥ̅  ⲉⲃⲟⲗ  ⲉϫⲱⲟⲩ . ⲛ̅ⲉⲓⲉⲣⲱⲟⲩ  ⲛⲁⲟⲙⲥⲟⲩ  ϩⲓⲟⲩⲥⲟⲡ.  ⲕ̅ⲇ̅.  Ⲟⲩⲛⲟⲩⲡⲛⲉⲩⲙⲁ  ⲛ̅ϭⲟⲙ  ⲛⲁϯ  ⲟⲩⲃⲏⲩ . ⲛ̅ⲧⲉⲟⲩϩⲁⲧⲏⲩ  ϣⲁϣⲟⲩ  ⲉⲃⲟⲗ .ⲧⲁⲛⲟⲙⲓⲁ  ⲅⲁⲣ  ⲛⲁⲣ̅ⲡⲕⲁϩ  ⲧⲏⲣϥ̅  ⲛ̅ϫⲁⲉⲓⲉ. ⲁⲩⲱ  ⲡⲛⲟⲃⲉ  ⲛⲁϣⲣ̅ϣⲣ̅ⲛⲉⲑⲣⲟⲛⲟⲥ  ⲛ̅ⲛ̅ⲇⲩⲛⲁⲥⲧⲏⲥ.

Ⲕⲉⲫ.  Ⲝ̅

Ⲥⲱⲧⲙ̅  ϭⲉ  ⲛⲉⲣⲱⲟⲩ  ⲛ̅ⲧⲉⲧⲛⲛⲟⲓ : ϫⲓⲥⲃⲱ  ⲣ̅ⲣⲉϥϯϩⲁⲡ  ⲉⲁⲣⲏϫϥ̅  ⲙ̅ⲡⲕⲁϩ :  ⲃ̅.  Ϫⲓⲥⲙⲏ  ⲛⲉⲧⲁⲙⲁϩⲧⲉ  ⲉϫⲛ̅ⲛⲓϣⲏⲏϣⲉ. ⲛⲉⲧϣⲟⲩϣⲟⲩ  ⲙ̅ⲙⲟⲟⲩ  ⲉϫⲛ̅ⲛⲓⲁϣⲏ  ⲛ̅ϩⲉⲑⲛⲟⲥ :  ⲅ̅.  Ϫⲉ  ⲛ̅ⲧⲁⲩϯⲡⲁⲙⲁϩⲧⲉ  ⲛⲏⲧⲛ̅  ⲉⲃⲟⲗ  ϩⲓⲧⲙ̅Ⲡϫⲟⲉⲓⲥ . ⲁⲩⲱ  ⲧϭⲟⲙ  ⲉⲃⲟⲗ  ϩⲓⲧⲙ̅ⲡⲉⲧϫⲟⲥⲉ.  ⲇ̅.  Ⲡⲁⲓ  ⲉⲧⲛⲁϣⲓⲛⲉ  ⲛ̅ⲥⲁⲛⲉⲧⲛ̅ϩⲃⲏⲩⲉ.  Ⲛϥ̅ϩⲟⲧϩⲧ̅  ⲛ̅ⲥⲁⲛⲉⲧⲛ̅ϣⲟϫⲛⲉ :   Ϫⲉ  ⲉⲧⲉⲧⲛ̅ⲟ  ⲛ̅ϩⲩⲡⲉⲣⲉⲧⲏⲥ  ⲛ̅ⲧⲉϥⲙⲛ̅ⲧⲉⲣⲟ  ⲙ̅ⲡⲉⲧⲛ̅ⲕⲣⲓⲛⲉ ϩⲛ̅ⲟⲩⲥⲟⲟⲩⲧⲛ̅ . ⲟⲩⲇⲉ  ⲙ̅ⲡⲉⲧⲛ̅ⲁⲣⲉϩ  ⲉⲡⲉϥⲛⲟⲙⲟⲥ  ⲟⲩⲇⲉ  ⲙ̅ⲡⲉⲧⲛ̅ⲙⲟⲟϣⲉ  ⲕⲁⲧⲁⲡϣⲟϫⲛⲉ  ⲙ̅ⲡⲛⲟⲩⲧⲉ.  Ⲋ.  Ⲟⲩⲛⲟⲩϩⲟⲧⲉ  ⲛⲏⲩ  ⲉϩⲣⲁⲓ  ⲉϫⲱⲧⲛ̅ . ϫⲉ  ⲟⲩⲛⲟⲩⲕⲣⲓⲥⲓⲥ  ⲉⲥϣⲱⲱⲧ  ⲉⲃⲟⲗ  ⲛⲁϣⲱⲡⲉ  ⲛ̅ⲛ̅ⲛⲟϭ :  ⲍ̅.  Ⲛ̅ⲕⲟⲩⲓ  ⲅⲁⲣ  ⲙ̅ⲡϣⲁ  ⲛ̅ⲟⲩⲛⲁ . ⲛ̅ϫⲱⲱⲣⲉ  ⲇⲉ  ⲛ̅ⲧⲟⲟⲩ  ⲥⲉⲛⲁϩⲉⲧⲁⲍⲉ  ⲙ̅ⲙⲟⲟⲩ  ⲉⲙⲁⲧⲉ.  ⲏ̅.  Ⲡϫⲟⲉⲓⲥ  ⲅⲁⲣ  ⲙ̅ⲡⲧⲏⲣϥ̅  ⲛⲁϫⲓϩⲟ  ⲁⲛ . ⲟⲩⲇⲉ  ⲛϥ̅ⲛⲁϣⲓⲡⲉ  ⲁⲛ  ϩⲏⲧⲟⲩ  ⲛ̅ⲛ̅ⲛⲟϭ : ϫⲉ  ⲛ̅ⲕⲟⲩⲓ  ⲙⲛ̅ⲛ̅ⲛⲟϭ  ⲛ̅ⲧⲟϥ  ⲁϥⲧⲁⲙⲓⲟⲟⲩ . ⲁⲩⲱ  ⲟⲛ  ϥϥⲓⲣⲟⲟⲩϣ  ϩⲁⲣⲟⲟⲩ  ⲧⲏⲣⲟⲩ.  ⲑ̅.  Ⲛⲉⲧϫⲟⲟⲣ  ⲇⲉ  ⲥⲉⲛⲁϩⲉⲧϩⲱⲧⲟⲩ  ⲉⲙⲁⲧⲉ.    Ⲉⲉⲓϣⲁϫⲉ  ϭⲉ  ⲛⲉⲙⲏⲧⲛ̅  ⲛ̅ⲧⲩⲣⲁⲛⲛⲟⲥ ϫⲉⲕⲁⲥ  ⲉⲧⲉⲧⲛ̅ⲉⲥⲃⲟ  ⲉⲧⲥⲟⲫⲓⲁ  ⲛ̅ⲧⲉⲧⲛ̅ⲧⲙ̅ϩⲉ  ⲉⲃⲟⲗ. ⲓ̅ⲁ. Ⲛⲉⲛⲧⲁⲩϩⲁⲣⲉϩ  ⲅⲁⲣ  ⲉⲙⲙⲛ̅ⲧⲙⲉ  ϩⲛ̅ⲟⲩⲟⲩⲟⲡ  ⲥⲉⲛⲁⲧⲙⲁⲓⲟⲟⲩ ⲁⲩⲱ  ⲛⲉⲛⲧⲁⲩⲥⲃⲟ  ⲉⲣⲟⲟⲩ  ⲥⲉⲛⲁϩⲉ  ⲉⲩⲁⲡⲟⲗⲟⲅⲓⲁ.  ⲓ̅ⲃ.  Ⲟⲩⲉϣⲛⲁϣⲁϫⲉ  ϭⲉ  ⲛ̅ⲧⲉⲧⲛ̅ⲙⲉⲣⲓⲧⲟⲩ  ⲧⲁⲣⲉⲧⲛ̅ϫⲓⲧⲉⲥⲃⲱ.  ⲓ̅ⲅ.  Ⲟⲩⲟⲉⲓⲛ  ⲧⲉ  ⲧⲥⲟⲫⲓⲁ  ⲉⲙⲉⲥϩⲱϭⲃ̅ . ⲁⲩⲱ  ϣⲁⲩⲛⲁⲩ  ⲉⲣⲟⲥ  ⲁϫⲛ̅ⲙ̅ⲕⲁϩ  ⲛ̅ϭⲓⲛⲉⲧⲙⲉ  ⲙ̅ⲙⲟⲥ . ϣⲁⲩϩⲉ  ⲉⲣⲟⲥ  ⲛ̅ϭⲓⲛⲉⲧϣⲓⲛⲉ  ⲛ̅ⲥⲱⲥ.  ⲓ̅ⲇ.  Ϣⲁⲥⲣ̅ϣⲟⲣⲡ̅  ⲉⲟⲩⲱⲛϩ̅  ⲛ̅ⲛⲉⲧⲉⲡⲓⲑⲩⲙⲓ  ⲉⲣⲟⲥ.    Ⲡⲉⲧⲛⲁϣⲟⲣⲡϥ̅  ⲉⲣⲟⲥ  ⲛϥ̅ⲛⲁϩⲓⲥⲉ  ⲁⲛ : ϥⲛⲁϩⲉ  ⲅⲁⲣ  ⲉⲣⲟⲥ  ⲉⲥⲁϩⲉⲣⲁⲧⲥ̅  ϩⲓⲣⲛ̅ⲛⲉϥⲣⲟ :  ⲓ̅Ⲋ.  Ⲡⲣ̅ⲡⲙⲉⲉⲩⲉ  ⲅⲁⲣ  ⲉⲣⲟⲥ  ⲟⲩⲙⲛ̅ⲧⲣⲙ̅ⲛ̅ϩⲏⲧ  ⲧⲉ  ⲉⲥϫⲏⲕ  ⲉⲃⲟⲗ . ⲁⲩⲱ  ⲡⲉⲛⲧⲁϥⲣ̅ⲟⲩϣⲏ  ⲛ̅ⲣⲟⲉⲓⲥ  ⲉⲧⲃⲏⲧⲥ̅  ⲛⲁⲣ̅ⲁⲧⲣⲟⲟⲩϣ  ϩⲛ̅ⲟⲩϭⲉⲡⲏ.  ⲓ̅ⲍ.  Ϫⲉ  ⲛ̅ⲧⲟⲥ  ϣⲁⲥⲙⲟⲟϣⲉ  ⲉⲥϣⲓⲛⲉ  ⲛ̅ⲥⲁⲛⲉⲧⲙ̅ⲡϣⲁ  ⲙ̅ⲙⲟⲥ . ⲛⲥ̅ⲟⲩⲱⲛϩ̅  ⲉⲣⲟⲟⲩ  ϩⲓⲛⲉϩⲓⲟⲟⲩⲉ  ⲉⲥⲛⲟⲧⲙ̅ . ⲛⲥ̅ⲧⲱⲙⲛ̅ⲧ  ⲉⲣⲟⲟⲩ  ϩⲛ̅ϣⲟϫⲛⲉ  ⲛⲓⲙ.  ⲓ̅ⲏ.  Ⲧⲉⲥϩⲟⲩⲉⲓⲧⲉ  ⲅⲁⲣ  ⲧⲉ  ⲧⲉⲡⲓⲑⲩⲙⲓⲁ  ⲛ̅ⲧⲉⲥⲃⲱ  ⲙ̅ⲙⲉ.  ⲓ̅ⲑ.  Ⲡⲣⲟⲟⲩϣ  ⲇⲉ  ⲛ̅ⲧⲉⲥⲃⲱ  ⲡⲉ  ⲧⲁⲅⲁⲡⲏ . ⲧⲁⲅⲁⲡⲏ  ⲇⲉ  ⲡⲉ  ⲡϩⲁⲣⲉϩ  ⲉⲡⲉⲥⲛⲟⲙⲟⲥ. ⲡ̅ϯϩⲧⲏⲕ  ⲇⲉ  ⲉⲡⲛⲟⲙⲟⲥ  ⲡⲉ  ⲡⲧⲁϫⲣⲟ  ⲛ̅ⲧⲙⲛ̅ⲧⲁⲧⲧⲁⲕⲟ.    Ⲧⲙⲛ̅ⲧⲁⲧⲧⲁⲕⲟ  ⲇⲉ  ϣⲁⲥⲧⲣⲉⲩϩⲱⲛ  ⲉϩⲟⲩⲛ  ⲉⲡⲛⲟⲩⲧⲉ.  ⲕ̅ⲁ̅.  Ⲧⲉⲡⲓⲑⲩⲙⲓⲁ  ϭⲉ  ⲛ̅ⲧⲥⲟⲫⲓⲁ  ⲛⲁϫⲓⲧⲟⲩ  ⲉϩⲟⲩⲛ  ⲉⲡⲱⲛϩ̅  ⲉϩⲟⲩⲛ  ⲉⲧⲙⲛ̅ⲧⲉⲣⲟ.  ⲕ̅ⲃ̅.  Ⲉϣϫⲉ  ⲧⲉⲧⲛ̅ⲙⲉ  ϭⲉ  ⲛ̅ⲛⲉⲑⲣⲟⲛⲟⲥ  ⲙⲛ̅ⲛⲉϭⲣⲏⲡⲉ  ⲛ̅ⲧⲩⲣⲁⲛⲛⲟⲥ  ⲛ̅ⲗ̅ⲗⲁⲟⲥ.  ⲕ̅ⲅ̅.  Ⲙⲁⲧⲁⲓⲉⲧⲥⲟⲫⲓⲁ  ϫⲉ  ⲉⲧⲉⲧⲛ̅ⲣ̅ⲣ̅ⲣⲟ  ϣⲁⲉⲛⲉϩ.  ⲕ̅ⲇ̅.  Ⲟⲩ  ⲇⲉ  ⲡⲉ  ⲧⲥⲟⲫⲓⲁ  ⲁⲩⲱ  ⲛ̅ⲧⲁⲥϣⲱⲡⲉ  ⲛ̅ⲁϣ  ⲛ̅ϩⲉ  ϯⲛⲁϫⲟⲟⲥ . ⲁⲩⲱ  ⲛ̅ϯⲛⲁϩⲱⲡ  ⲁⲛ  ⲉⲣⲱⲧⲛ̅  ⲙ̅ⲡⲉⲓⲙⲩⲥⲧⲏⲣⲓⲟⲛ . ⲁⲗⲗⲁ  ϯⲛⲁϩⲉⲧϩⲱⲧⲥ̅  ϫⲓⲛⲧⲉϩⲟⲩⲉⲓⲧⲉ  ⲙ̅ⲡⲉⲥⲧⲁⲙⲓⲟ . ⲛ̅ⲧⲁⲟⲩⲱⲛϩ̅  ⲉⲃⲟⲗ  ⲙ̅ⲡⲉⲥⲥⲟⲟⲩⲛ :  ⲛ̅ϯⲛⲁⲣ̅ⲡⲃⲟⲗ  ⲁⲛ  ⲛ̅ⲧⲙⲉ.    ⲟⲩⲇⲉ  ⲛ̅ⲛⲁⲃⲱⲕ  ⲙⲛ̅ⲡⲉⲕⲣⲟϥ  ⲉϫⲱⲟⲩ . ϫⲉ  ⲙ̅ⲡⲁⲓ  ⲕⲟⲓⲛⲱⲛⲓ  ⲁⲛ  ⲙⲛ̅ⲧⲥⲟⲫⲓⲁ.  ⲕ̅Ⲋ̅.  Ⲟⲩⲟⲩϫⲁⲓ  ⲙ̅ⲡⲕⲟⲥⲙⲟⲥ  ⲡⲉ  ⲡⲁϣⲏ  ⲛ̅ⲛ̅ⲥⲟⲫⲟⲥ . ⲁⲩⲱ  ⲟⲩⲣ̅ⲣⲟ  ⲛ̅ⲥⲁⲃⲉ  ⲡⲉ  ⲡⲉⲥⲧⲓⲛⲉ  ⲙ̅ⲡⲉⲙⲏⲏϣⲉ.  ⲕ̅ⲍ̅.  Ϫⲓⲥⲃⲱ  ϭⲉ  ⲉⲛⲁϣⲁϫⲉ  ⲧⲁⲣⲉⲧⲛ̅ϯϩⲏⲟⲩ.
 
Ⲕⲉⲫ.  Ⲍ̅

Ⲁⲛⲅ̅ⲟⲩⲣⲱⲙⲉ  ⲡⲉ  ϩⲱⲱⲧ  ⲛ̅ⲑⲉ  ⲛ̅ⲟⲩⲟⲛ  ⲛⲓⲙ . ⲟⲩϫⲡⲟ  ⲉⲃⲟⲗ  ϩⲙ̅ⲡⲣⲙ̅ⲛ̅ⲕⲁϩ  ⲉⲛⲧⲁⲩⲡⲗⲁⲥⲥⲉ  ⲙ̅ⲙⲟϥ  ⲛ̅ϣⲟⲣⲡ̅. ⲉⲁⲩⲙⲟⲛⲅⲧ̅  ⲛ̅ⲥⲁⲣⲝ̅  ⲛ̅ϩⲏⲧⲥ̅  ⲛ̅ⲧⲁⲙⲁⲁⲩ.  ⲃ̅.  Ⲁⲓⲧⲱⲕ  ϩⲛ̅ⲟⲩⲥⲛⲟϥ  ⲙ̅ⲙⲏⲧ  ⲛ̅ⲉⲃⲟⲧ . ⲉⲃⲟⲗ  ϩⲛ̅ⲟⲩⲥⲡⲉⲣⲙⲁ  ⲣ̅ⲣⲱⲙⲉ  ⲉⲁⲥⲉⲓ  ⲉϩⲟⲩⲛ  ⲉⲣⲟϥ  ϩⲙ̅ⲡⲉⲛⲕⲟⲧⲕ̅  ϩⲛ̅ⲟⲩϩⲩⲇⲛⲏ.  ⲅ̅.  Ⲛ̅ⲧⲉⲣⲓϣⲱⲡⲉ  ⲇⲉ  ⲁⲓϩⲱⲛ  ⲉⲃⲟⲗ  ⲉⲡⲁⲏⲣ . ⲁⲓϩⲉ  ⲉϩⲣⲁⲓ  ⲉϫⲙ̅ⲡⲉⲓⲕⲁϩ  ⲟⲩⲱⲧ . ⲁⲓϯ  ⲛ̅ⲧϣⲟⲣⲡ̅  ⲛ̅ⲥⲙⲏ  ⲉⲓⲣⲓⲙⲉ  ⲛ̅ⲑⲉ  ⲛ̅ⲟⲩⲟⲛ  ⲛⲓⲙ.  ⲇ̅.  Ⲁⲩⲥⲁⲛⲟⲩϣⲧ̅  ϩⲛ̅ϩⲉⲛⲧⲟⲉⲓⲥ  ⲙⲛ̅ϩⲉⲛⲣⲟⲟⲩϣ.    Ⲙⲛ̅ⲗⲁⲁⲩ  ⲅⲁⲣ  ⲛ̅ⲣ̅ⲣⲟ  ⲉⲩⲛ̅ⲧϥ̅ⲕⲉϩⲟⲩⲉⲓⲧⲉ  ⲛ̅ϫⲡⲟ. Ⲋ.  Ⲟⲩϭⲓⲛⲉⲓ  ⲛ̅ⲟⲩⲱⲧ  ⲧⲉ  ⲛ̅ⲟⲩⲟⲛ  ⲛⲓⲙ  ⲉϩⲟⲩⲛ  ⲉⲡⲕⲟⲥⲙⲟⲥ .  ⲁⲩⲱ  ⲟⲩϭⲓⲛⲃⲱⲕ  ⲉⲃⲟⲗ.  ⲍ̅.  Ⲉⲧⲃⲉⲡⲁⲓ  ⲁⲓϣⲗⲏⲗ  ⲁⲩϯ  ⲛⲁⲓ  ⲛ̅ⲟⲩⲙⲛ̅ⲧⲣⲙ̅ⲛ̅ϩⲏⲧ :  ⲁⲓⲉⲡⲓⲕⲁⲗⲉⲓ  ⲁϥⲉⲓ  ⲛⲁⲓ  ⲛ̅ϭⲓⲟⲩⲡⲛⲉⲩⲙⲁ  ⲛ̅ⲥⲟⲫⲓⲁ.  ⲏ̅.  Ⲁⲓⲥⲟⲧⲡⲥ̅  ⲉⲛⲉϭⲣⲏⲡⲉ  ⲙⲛ̅ⲛⲉⲑⲣⲟⲛⲟⲥ : ⲙ̅ⲡⲓⲉⲛⲧⲙⲛ̅ⲧⲣⲙ̅ⲙⲁⲟ  ⲛⲙ̅ⲙⲁⲥ  ⲛ̅ⲑⲉ  ⲛ̅ⲟⲩⲗⲁⲁⲩ.  ⲑ̅.  Ⲟⲩⲇⲉ  ⲡⲱⲛⲉ  ⲙ̅ⲙⲉ  ⲙ̅ⲡⲓⲧⲛ̅ⲧⲱⲛϥ̅  ⲉⲣⲟⲥ . ϫⲉ  ⲡⲛⲟⲩⲃ  ⲧⲏⲣϥ̅  ⲛ̅ⲛⲁϩⲣⲁⲥ  ⲉϥⲟ  ⲛ̅ⲑⲉ  ⲛ̅ⲟⲩϣⲏⲙ  ⲛ̅ϣⲱ . ⲁⲩⲱ  ⲉⲣⲉⲫⲁⲧ  ⲙ̅ⲡⲉⲥⲙ̅ⲧⲟ  ⲉⲃⲟⲗ  ⲛ̅ⲑⲉ  ⲛ̅ⲟⲩⲟⲟⲉ.    Ⲁⲓⲙⲉⲣⲓⲧⲥ̅  ⲉϩⲟⲩⲛ  ⲉⲟⲩϫⲣⲟ  ⲙⲛ̅ⲟⲩⲥⲁ . ⲁⲓⲥⲟⲧⲡⲥ̅  ⲉⲕⲁⲁⲥ  ⲛⲁⲓ  ⲉⲡⲙⲁ  ⲙ̅ⲡⲟⲩⲟⲉⲓⲛ . ϫⲉ  ⲡⲉⲥⲟⲩⲟⲉⲓⲛ  ⲛ̅ⲧⲟⲥ  ⲙⲉϥⲛ̅ⲕⲟⲧⲕ̅.  ⲓ̅ⲁ.  Ⲁⲩⲉⲓ  ⲇⲉ  ⲛⲁⲓ  ⲛⲙ̅ⲙⲁⲥ  ⲛ̅ϭⲓⲛ̅ⲁⲅⲁⲑⲟⲛ  ⲧⲏⲣⲟⲩ  ϩⲓⲟⲩⲥⲟⲡ .ⲁⲩⲱ  ⲟⲩⲙⲛ̅ⲧⲣⲙ̅ⲙⲁⲟ  ⲉⲛⲁϣⲱⲥ  ϩⲛ̅ⲛⲉⲥϭⲓϫ.  ⲓ̅ⲃ.  Ⲁⲓⲣⲁϣⲉ  ⲇⲉ  ⲉϫⲱⲟⲩ  ⲧⲏⲣⲟⲩ  ϫⲉ  ⲧⲥⲟⲫⲓⲁ  ⲧⲉⲧϫⲓⲙⲟⲉⲓⲧ  ϩⲏⲧⲟⲩ. ⲛⲉⲓⲥⲟⲟⲩⲛ  ⲇⲉ  ⲁⲛ  ⲡⲉ  ϫⲉ  ⲛ̅ⲧⲟⲥ  ⲁⲥϫⲡⲟⲟⲩ  ⲧⲏⲣⲟⲩ.  ⲓ̅ⲅ.  Ⲁⲓⲥⲃⲟ  ⲁϫⲛ̅ⲕⲣⲟϥ  ϯⲛⲁϯ  ⲁϫⲛ̅ⲫⲑⲟⲛⲟⲥ . ⲛ̅ϯⲛⲁϩⲱⲡ  ⲁⲛ  ⲛ̅ⲧⲉⲥⲙⲛ̅ⲧⲣⲙ̅ⲙⲁⲟ :  ⲓ̅ⲇ.  Ⲟⲩⲁϩⲟ  ⲅⲁⲣ  ⲛ̅ⲣ̅ⲣⲱⲙⲉ  ⲡⲉ  ⲉⲙⲉϥⲱϫⲛ̅ : ⲛⲉⲛⲧⲁⲩⲭⲣⲱ  ⲙ̅ⲙⲟⲥ  ⲁⲩⲣ̅ϣⲃⲏⲣ  ⲉⲡⲛⲟⲩⲧⲉ. ⲁⲩⲥⲩⲛϩⲓⲥⲧⲁ  ⲙ̅ⲙⲟⲟⲩ  ⲉⲧⲃⲉⲛ̅ⲇⲱⲣⲟⲛ  ⲛ̅ⲧⲉⲥⲃⲱ.    Ⲉⲣⲉⲡⲛⲟⲩⲧⲉ  ⲇⲉ  ϯ  ⲛⲁⲓ  ⲉϫⲟⲟⲩ  ⲕⲁⲧⲁⲧⲁⲅⲛⲱⲙⲏ . ⲁⲩⲱ  ⲉⲙⲉⲉⲩⲉ  ⲕⲁⲧⲁⲡⲉⲙⲡϣⲁ  ⲛ̅ⲛⲉⲧϥ̅ⲛⲁⲧⲁⲁⲩ . ϫⲉ  ⲛ̅ⲧⲟϥ  ⲡⲉⲧϫⲓⲙⲟⲉⲓⲧ  ϩⲏⲧⲥ̅  ⲛ̅ⲧⲥⲟⲫⲓⲁ . ⲁⲩⲱ  ⲡⲉⲧϯⲥⲃⲱ  ⲛ̅ⲛ̅ⲥⲟⲫⲟⲥ.  ⲓ̅Ⲋ.  Ⲉⲛϣⲟⲟⲡ  ⲅⲁⲣ  ϩⲛ̅ⲧⲉϥϭⲓϫ  ⲁⲛⲟⲛ  ⲙⲛ̅ⲛⲉⲛⲕⲉϣⲁϫⲉ . ⲁⲩⲱ  ⲙⲛ̅ⲧⲣⲙ̅ⲛ̅ϩⲏⲧ  ⲛⲓⲙ  ⲧⲉⲥⲃⲱ  ⲛ̅ⲛⲉϩⲃⲏⲩⲉ.  ⲓ̅ⲍ.  Ⲛ̅ⲧⲟϥ  ⲅⲁⲣ  ⲁϥϯ  ⲛⲁⲓ  ⲙ̅ⲡⲥⲟⲟⲩⲛ  ⲙ̅ⲙⲉ  ⲛ̅ⲛⲉⲧϣⲟⲟⲡ . ⲉⲥⲟⲩⲛ̅ⲡⲧⲱϣ  ⲙ̅ⲡⲕⲟⲥⲙⲟⲥ  ⲙⲛ̅ⲧⲉⲛⲉⲣⲅⲉⲓⲁ  ⲛ̅ⲛⲉⲥⲧⲟⲓⲭⲓⲟⲛ.  ⲓ̅ⲏ.  Ⲧⲉϩⲟⲩⲉⲓⲧⲉ  ⲙⲛ̅ⲑⲁⲏ  ⲙⲛ̅ⲧⲙⲏⲧⲉ  ⲛ̅ⲛ̅ⲥⲏⲟⲩ . ⲛ̅ϣⲓⲃⲉ  ⲛ̅ⲛ̅ⲁⲏⲣ  ⲙⲛ̅ⲙ̅ⲙⲉⲧⲁⲃⲟⲗⲏ  ⲛ̅ⲛⲉⲩⲟⲉⲓϣ.  ⲓ̅ⲑ.  ⲛ̅ⲕⲩⲕⲗⲟⲥ  ⲛ̅ⲧⲉⲣⲟⲙⲡⲉ  ⲙⲛ̅ⲛⲉⲥⲙⲓⲛⲉ  ⲛ̅ⲛ̅ⲥⲓⲟⲩ.    Ⲛⲉⲫⲩⲥⲓⲥ ⲛ̅ⲛ̅ⲍⲱⲟⲛ  ⲙⲛ̅ⲡϭⲱⲛⲧ̅  ⲛ̅ⲛⲉⲑⲣⲓⲟⲛ . ⲡⲉⲛϣⲟⲧ  ⲛ̅ⲛ̅ⲧⲏⲩ  ⲙⲛ̅ⲙ̅ⲙⲟⲕⲙⲉⲕ  ⲛ̅ⲛ̅ⲣⲱⲙⲉ. ⲛ̅ϣⲓⲃⲉ  ⲛ̅ⲛ̅ϣⲏⲛ  ⲙⲛ̅ⲧϭⲟⲙ  ⲛ̅ⲛⲉⲛⲧⲏϭ.  ⲕ̅ⲁ̅.  Ⲛⲉⲧϩⲏⲡ  ⲙⲛ̅ⲛⲉⲧⲟⲩⲟⲛϩ̅  ⲉⲃⲟⲗ  ⲁⲓⲥⲟⲩⲱⲛⲟⲩ : ⲧⲥⲟⲫⲓⲁ  ⲅⲁⲣ  ⲉⲛⲧⲁⲥⲧⲁⲙⲓⲟⲟⲩ  ⲧⲏⲣⲟⲩ  ⲁⲥⲧⲥⲁⲃⲟⲓ  ⲉⲣⲟⲟⲩ.  ⲕ̅ⲃ̅.  Ⲟⲩⲛⲟⲩⲡⲛⲉⲩⲙⲁ  ⲅⲁⲣ  ⲛ̅ϩⲏⲧⲥ̅  ⲉϥⲟⲩⲁⲁⲃ  ⲛ̅ⲣⲉϥⲛⲟⲓ . ⲛ̅ⲟⲩⲥⲙⲟⲧ  ⲛ̅ⲟⲩⲱⲧ  ⲛ̅ⲁⲧⲉⲥⲙⲟⲧ  ⲉϥⲁⲥⲱⲟⲩ . ⲣ̅ⲣⲉϥⲣ̅ϩⲱⲃ  ⲉϥϭⲙ̅ϭⲟⲙ  ⲉϥⲟ  ⲛ̅ⲁⲧⲧⲱⲗⲙ̅ . ⲛ̅ⲥⲁⲃⲉ  ⲛ̅ⲁⲧⲛⲟⲃⲉ  ⲙ̅ⲙⲁⲓⲁⲅⲁⲑⲟⲛ  ⲉϥⲧⲟⲣϩ̅ . ⲉⲙⲉⲩϣⲁⲙⲁϩⲧⲉ  ⲙ̅ⲙⲟϥ  ⲣ̅ⲣⲉϥⲣ̅ⲡⲉⲧⲛⲁⲛⲟⲩϥ.  ⲕ̅ⲅ̅.  ⲙ̅ⲙⲁⲓⲣⲱⲙⲉ  ⲉϥⲧⲁϫⲣⲏⲩ . ⲉϥⲟⲣϫ̅  ⲉϥⲟ  ⲛ̅ⲁⲧⲣⲟⲟⲩϣ  ⲉϥϭⲙ̅ϭⲟⲙ  ⲉϩⲱⲃ  ⲛⲓⲙ  ⲉϥϭⲱϣⲧ̅  ⲉϫⲙ̅ⲡⲧⲏⲣϥ̅ . ⲉϥϫⲱⲧⲉ  ϩⲓⲧⲛ̅ⲛⲉⲡⲛⲉⲩⲙⲁ  ⲧⲏⲣⲟⲩ  ⲉⲧⲟⲩⲁⲁⲃ  ⲣ̅ⲣⲉϥⲛⲟⲓ  ⲉⲧϣⲟⲟⲙⲉ.  ⲕ̅ⲇ̅.  Ⲧⲥⲟⲫⲓⲁ  ⲅⲁⲣ  ⲕⲓⲙ  ⲉϩⲟⲩⲉⲛⲉⲧⲕⲓⲙ  ⲧⲏⲣⲟⲩ . ⲥϫⲱⲧⲉ  ⲁⲩⲱ  ⲥⲛⲏⲩ  ⲉⲃⲟⲗ  ϩⲓⲧⲙ̅ⲡⲧⲏⲣϥ̅  ⲉⲧⲃⲉⲡⲉⲥⲧⲃ̅ⲃⲟ :   Ⲉⲥⲛⲏⲩ  ⲅⲁⲣ  ⲉⲃⲟⲗ  ϩⲓⲧⲛ̅ⲧϭⲟⲙ  ⲙ̅ⲡⲛⲟⲩⲧⲉ . ⲁⲩⲱ  ⲉⲃⲟⲗ  ϩⲙ̅ⲡⲉⲟⲟⲩ  ⲉⲧⲟⲩⲁⲁⲃ  ⲛ̅ⲧⲉⲡ̅ⲡⲁⲛⲧⲟⲕⲣⲁⲧⲱⲣ .  Ⲉⲧⲃⲉⲡⲁⲓ  ⲙⲉⲣⲉⲗⲁⲁⲩ  ⲉϥϫⲁϩⲙ̅  ⲧⲱⲙⲛ̅ⲧ  ⲉⲣⲟⲥ.  ⲕ̅Ⲋ̅.  Ⲟⲩⲉⲓⲛⲉ  ⲅⲁⲣ  ⲧⲉ  ⲛ̅ⲧⲉⲡⲟⲩⲟⲉⲓⲛ  ⲛ̅ϣⲁⲉⲛⲉϩ . ⲁⲩⲱ ⲟⲩⲉⲓⲁⲗ  ⲉⲥⲟⲩⲁⲁⲃ  ⲛ̅ⲧⲉⲧⲉⲛⲉⲣⲅⲓⲁ  ⲙ̅ⲡⲛⲟⲩⲧⲉ . ⲁⲩⲱ   ⲑⲓⲕⲱⲛ  ⲛ̅ⲧⲉϥⲙⲛ̅ⲧⲁⲅⲁⲑⲟⲥ.  ⲕ̅ⲍ̅.  Ⲉⲟⲩⲉⲓ  ⲇⲉ  ⲧⲉ  ⲉⲥϭⲙ̅ϭⲟⲙ  ⲉϩⲱⲃ  ⲛⲓⲙ . ⲁⲩⲱ  ⲉⲥϭⲉⲉⲧ  ϩⲁⲣⲓϩⲁⲣⲟⲥ  ⲉⲥⲉⲓⲣⲉ  ⲙ̅ⲡⲧⲏⲣϥ̅  ⲙ̅ⲃⲣ̅ⲣⲉ . ⲁⲩⲱ  ⲕⲁⲧⲁⲅⲉⲛⲉⲁ  ⲥⲃⲏⲕ  ⲉϩⲟⲩⲛ  ⲉⲛⲉⲯⲩⲭⲏ ⲛ̅ⲛⲉⲧⲟⲩⲁⲁⲃ . ⲥⲉⲓⲣⲉ  ⲙ̅ⲙⲟⲟⲩ  ⲛ̅ϣⲃⲏⲣ  ⲉⲡⲛⲟⲩⲧⲉ  ⲁⲩⲱ  ⲙ̅ⲡⲣⲟⲫⲏⲧⲏⲥ.  ⲕ̅ⲏ̅.  Ⲙ̅ⲡⲛⲟⲩⲧⲉ  ⲅⲁⲣ  ⲙⲉ  ⲗ̅ⲗⲁⲁⲩ  ⲁⲛ  ⲉⲓⲙⲏⲧⲓ  ⲡⲉⲧⲟⲩⲏϩ  ϩⲛ̅ⲧⲥⲟⲫⲓⲁ :  ⲕ̅ⲑ̅.  Ⲧⲁⲓ  ⲅⲁⲣ  ⲛⲉⲥⲱⲥ  ⲉϩⲟⲩⲉⲡⲣⲏ . ⲁⲩⲱ  ⲉϩⲟⲩⲉⲡⲉⲥⲙⲓⲛⲉ  ⲛ̅ⲛ̅ⲥⲓⲟⲩ  ⲧⲏⲣⲟⲩ : Ⲉⲩϣⲁⲛⲧⲛ̅ⲧⲱⲛⲥ̅  ⲉⲡⲟⲩⲟⲉⲓⲛ  ⲥⲛⲁⲣ̅ϣⲟⲣⲡ̅  ⲉⲣⲟϥ.    Ⲡⲁⲓ  ⲙⲉⲛ  ⲅⲁⲣ  ϣⲁⲣⲉⲧⲉⲩϣⲏ  ⲉⲓ  ⲉⲡⲉϥⲙⲁ . ⲧⲥⲟⲫⲓⲁ  ⲇⲉ  ⲙⲉⲣⲉⲧⲕⲁⲕⲓⲁ  ϭⲙ̅ϭⲟⲙ  ⲉⲣⲟⲥ.

Ⲕⲉⲫ.  ⲏ̅

Ⲥϫⲱⲧⲉ  ⲇⲉ  ϫⲓⲛⲕⲣⲟ  ⲉⲕⲣⲟ  ϩⲛ̅ⲟⲩⲙⲛ̅ⲧϫⲱⲱⲣⲉ . ⲁⲩⲱ  ⲥⲧⲱϣ  ⲙ̅ⲡⲧⲏⲣϥ̅  ϩⲛ̅ⲟⲩⲙⲛ̅ⲧⲭⲣⲏⲥⲧⲟⲥ.  ⲃ̅.   Ⲧⲁⲓ  ⲇⲉ  ⲛ̅ⲧⲁⲩⲁϣⲥ̅  ⲁⲩⲱ  ⲁⲓϩⲟⲧϩⲧ̅   ⲛ̅ⲥⲱⲥ  ϫⲓⲛⲛ̅ⲧⲁⲙⲛ̅ⲧⲕⲟⲩⲓ . ⲁⲓϣⲓⲛⲉ  ⲛ̅ⲥⲁϫⲓⲧⲥ̅  ⲛⲁⲓ  ⲛ̅ⲑⲉ  ⲛ̅ⲟⲩϣⲉⲗⲉⲉⲧ  ⲉⲁⲓⲙⲉⲣⲉⲡⲉⲥⲥⲁ.  ⲅ̅.  Ⲥϯⲉⲟⲟⲩ  ⲛ̅ⲧⲙⲛ̅ⲧⲉⲩⲅⲉⲛⲏⲥ  ⲉⲩⲛ̅ⲧⲁⲥ  ⲙ̅ⲙⲁⲩ  ⲛ̅ⲟⲩⲙⲛ̅ⲧϣⲃⲏⲣ  ϣⲁⲡⲛⲟⲩⲧⲉ : ϫⲉ  Ⲡϫⲟⲉⲓⲥ  ϩⲱⲱϥ  ⲙ̅ⲡⲧⲏⲣϥ̅  ⲁϥⲙⲉⲣⲓⲧⲥ̅.  ⲇ̅.  Ⲧⲣⲉϥϫⲓϣⲟϫⲛⲉ  ⲅⲁⲣ  ⲧⲉ  ⲛ̅ⲧⲉⲥⲃⲱ  ⲙ̅ⲡⲛⲟⲩⲧⲉ . ⲁⲩⲱ  ⲧⲣⲉϥⲧⲱϣ  ⲧⲉ  ⲛ̅ⲛⲉϥϩⲃⲏⲩⲉ.    Ⲉϣϫⲉ  ⲟⲩⲥⲟⲩⲱϩ  ⲉϩⲟⲩⲛ  ⲛ̅ⲟⲩⲕⲧⲏⲙⲁ  ⲉⲛⲁⲛⲟⲩϥ  ⲡⲉ  ⲧⲙⲛ̅ⲧⲣⲙ̅ⲙⲁⲟ  ϩⲙ̅ⲡⲁϩⲉ . ⲟⲩ  ⲡⲉⲧⲟ  ⲛ̅ⲣⲙ̅ⲙⲁⲟ  ⲉⲧⲥⲟⲫⲓⲁ  ⲧⲁⲓ  ⲉⲧⲣ̅ϩⲱⲃ  ⲉⲛⲕⲁ  ⲛⲓⲙⲑ  Ⲋ.  Ⲉϣϫⲉ  ⲉⲣⲉⲟⲩⲁ  ⲛⲁⲣ̅ϩⲱⲃ  ⲉⲩⲙⲛ̅ⲧⲣⲙ̅ⲛ̅ϩⲏⲧ  ⲟⲩ  ϩⲛ̅ⲛⲉⲧϣⲟⲟⲡ  ⲡⲉⲧⲟ  ⲛ̅ⲧⲉⲭⲛⲓⲧⲏⲥ  ⲉϩⲟⲩⲉⲣⲟⲥⲑ   ⲍ̅.  Ⲉϣϫⲉ  ⲟⲩⲛⲟⲩⲁ  ⲙⲉⲓ  ⲛ̅ⲧⲇⲓⲕⲁⲓⲟⲥⲩⲛⲏ . ⲛⲉⲥϩⲓⲥⲉ  ϩⲛ̅ⲁⲣⲉⲧⲏ  ⲛⲉ : Ϣⲁⲥⲧⲥⲁⲃⲟⲟⲩ  ⲅⲁⲣ  ⲉⲧⲙⲛ̅ⲧⲣⲙ̅ⲛ̅ϩⲏⲧ  ⲁⲩⲱ  ⲧⲙⲛ̅ⲧⲥⲁⲃⲉ. ⲙⲛ̅ⲧⲇⲓⲕⲁⲓⲟⲥⲩⲛⲏ  ⲙⲛ̅ⲧϭⲟⲙ . ⲛⲁⲓ  ⲉⲧⲉⲙⲛ̅ⲡⲉⲧⲥⲟⲧⲡ̅  ⲉⲣⲟⲟⲩ  ϩⲙ̅ⲡⲱⲛϩ̅  ⲛ̅ⲣ̅ⲣⲱⲙⲉ.  ⲏ̅.  Ⲉϣⲱⲡⲉ  ⲇⲉ  ⲉⲣⲉⲟⲩⲁ  ⲟⲩⲉϣⲉⲓⲙⲉ  ⲉϩⲁϩ . ⲉⲥⲟⲟⲩⲛ  ⲛ̅ⲛⲉⲛⲧⲁⲩⲟⲩⲉⲓⲛⲉ  ⲁⲩⲱ  ⲉⲧⲟⲛⲧⲛ̅  ⲛ̅ⲛⲉⲧⲛⲁϣⲱⲡⲉ . ⲙⲛ̅ϩⲉⲛⲕⲟⲧⲥ̅  ⲛ̅ϣⲁϫⲉ  ⲙⲛ̅ϩⲉⲛⲃⲱⲗ  ⲛ̅ⲧⲟⲛⲧⲛ̅ . ⲙ̅ⲙⲁⲉⲓⲛ  ⲙⲛ̅ⲛⲉϣⲡⲏⲣⲉ  ⲉⲥⲉⲓⲙⲉ  ⲉⲣⲟⲟⲩ . ⲁⲩⲱ  ⲛ̅ⲑⲁⲏ  ⲛ̅ⲛⲉⲩⲟⲉⲓϣ  ⲙⲛ̅ⲛ̅ⲥⲏⲩ.  ⲑ̅.  Ⲁⲓⲕⲣⲓⲛⲉ  ⲇⲉ  ⲉϫⲡⲉⲧⲁⲓ  ⲛⲁⲓ  ϩⲙ̅ⲡⲁⲱⲛϩ̅ . ⲉⲓⲥⲟⲟⲩⲛ  ϫⲉ  ⲉⲥϫⲓϣⲟϫⲛⲉ  ⲛⲁⲓ  ⲉⲡⲁⲅⲁⲑⲟⲛ . ⲁⲩⲱ  ⲥⲛⲁⲥⲗ̅ⲥⲱⲗⲧ̅  ⲉⲃⲟⲗ  ϩⲛ̅ⲛⲁⲣⲟⲟⲩϣ  ⲙⲛ̅ⲛⲁⲗⲩⲡⲏ.    ϯⲛⲁϫⲓⲉⲟⲟⲩ  ⲉⲧⲃⲏⲧⲥ̅  ϩⲛ̅ⲛⲓⲙⲏⲏϣⲉ . ⲁⲩⲱ  ⲧⲁⲓⲟ  ϩⲛ̅ⲧⲙⲛ̅ⲧϩⲗ̅ⲗⲟ  ⲉⲁⲛⲅ̅ⲟⲩϣⲏⲣⲉ  ϣⲏⲙ.  ⲓ̅ⲁ.  Ⲥⲉⲛⲁϩⲉ  ⲇⲉ  ⲉⲣⲟⲓ  ⲉⲓⲧⲟⲣϩ̅  ϩⲛ̅ⲟⲩϩⲁⲡ . ⲛ̅ⲥⲉⲣ̅ϣⲡⲏⲣⲉ  ⲙ̅ⲙⲟⲓ  ⲛ̅ϭⲓⲛ̅ⲇⲩⲛⲁⲥⲧⲏⲥ.  ⲓ̅ⲃ.  Ⲉⲓϣⲁⲛⲕⲁⲣⲱⲓ  ⲥⲉⲛⲁϭⲱϣⲧ̅  ⲉⲃⲟⲗ  ϩⲏⲧ : ⲉⲓϣⲁⲛϣⲁϫⲉ  ⲥⲉⲛⲁϯϩⲧⲏⲩ : ⲉⲓϣⲁⲛⲱⲥⲕ̅  ⲉⲓϣⲁϫⲉ  ⲥⲉⲛⲁϯⲧⲉⲩϭⲓϫ  ⲉⲣⲛ̅ⲣⲱⲟⲩ.  ⲓ̅ⲅ.  ϯⲛⲁϫⲓ  ⲛ̅ⲟⲩⲱⲛϩ̅  ⲉⲧⲃⲏⲧⲥ̅ . ⲛ̅ⲧⲁⲕⲱ  ⲛ̅ⲟⲩⲣ̅ⲡⲙⲉⲉⲩⲉ  ⲛ̅ϣⲁⲉⲛⲉϩ  ⲛ̅ⲛⲉⲧⲛⲏⲩ  ⲙⲛ̅ⲛ̅ⲥⲱⲓ.  ⲓ̅ⲇ.  ϯⲛⲁⲧⲱϣ  ⲛ̅ϩⲉⲛⲗⲁⲟⲥ  ⲛ̅ⲧⲉϩⲉⲛϩⲉⲑⲛⲟⲥ  ϩⲩⲡⲟⲧⲁⲥⲥⲉ  ⲛⲁⲓ :   Ⲥⲉⲛⲁⲣ̅ϩⲟⲧⲉ  ϩⲏⲧ  ⲉⲩⲥⲱⲧⲙ̅  ⲉⲣⲟⲓ  ⲛ̅ϭⲓⲛⲓⲛⲟϭ  ⲛ̅ⲧⲩⲣⲁⲛⲛⲟⲥ : ϯⲛⲁⲟⲩⲱⲛϩ̅  ⲉⲃⲟⲗ  ⲛ̅ⲁⲅⲁⲑⲟⲥ  ϩⲛ̅ⲛⲓⲙⲏⲏϣⲉ . ⲁⲩⲱ  ⲛ̅ϫⲱⲱⲣⲉ  ϩⲛ̅ⲟⲩⲡⲟⲗⲉⲙⲟⲥ.  ⲓ̅Ⲋ.  Ⲉⲓϣⲁⲛⲃⲱⲕ  ⲉϩⲟⲩⲛ  ⲉⲡⲁⲏⲓ  ϯⲛⲁⲙ̅ⲧⲟⲛ  ⲙ̅ⲙⲟⲓ  ⲉϩⲣⲁⲓ  ⲉϫⲱⲥ : ⲙⲛ̅ⲧⲉⲧⲉⲥⲕⲟⲓⲛⲱⲛⲓⲁ  ⲅⲁⲣ  ⲥⲓϣⲉ  ⲙ̅ⲙⲁⲩ . ⲟⲩⲇⲉ  ⲙ̅ⲕⲁϩ  ⲛ̅ϩⲏⲧ  ϩⲛ̅ⲧϭⲓⲛⲱⲛϩ̅  ⲛⲙ̅ⲙⲁⲥ . ⲁⲗⲗⲁ  ⲟⲩⲣⲁϣⲉ  ⲧⲉ  ⲙⲛ̅ⲟⲩⲟⲩⲛⲟϥ.  ⲓ̅ⲍ.  Ⲛⲁⲓ  ⲁⲓⲙⲉⲉⲩⲉ  ⲉⲣⲟⲟⲩ  ϩⲣⲁⲓ  ⲛ̅ϩⲏⲧ . ⲁⲓⲙⲉⲕⲙⲟⲩⲕⲧ̅  ϩⲙ̅ⲡⲁϩⲏⲧ : ϫⲉ  ⲟⲩⲛ̅ⲟⲩⲱⲛϩ̅  ϣⲟⲟⲡ  ϩⲛ̅ⲧⲥⲩⲅⲅⲉⲛⲓⲁ  ⲛ̅ⲧⲥⲟⲫⲓⲁ.  ⲓ̅ⲏ.  Ⲁⲩⲱ  ⲟⲩⲧⲉⲣⲯⲓⲥ  ⲉⲛⲁⲛⲟⲩⲥ  ϩⲛ̅ⲧⲉⲥⲙⲛ̅ⲧϣⲃⲏⲣ . ⲁⲩⲱ  ⲟⲩⲙⲛ̅ⲧⲣⲙ̅ⲙⲁⲟ  ⲉⲙⲉⲥⲱϫⲛ̅  ϩⲛ̅ⲛⲉϩⲃⲏⲩⲉ  ⲛ̅ⲛ̅ϩⲓⲥⲉ  ⲛ̅ⲛⲉⲥϭⲓϫ. ⲁⲩⲱ  ⲟⲩⲙⲛ̅ⲧⲣⲙ̅ⲛ̅ϩⲏⲧ  ϩⲛ̅ⲧⲅⲩⲙⲛⲁⲥⲓⲁ  ⲛ̅ⲛⲉⲥϩⲟⲙⲓⲗⲉⲓⲁ . ⲁⲩⲱ  ⲟⲩⲉⲟⲟⲩ  ϩⲛ̅ⲧⲕⲟⲓⲛⲱⲛⲓⲁ  ⲛ̅ⲛⲉⲥϣⲁϫⲉ . ⲛⲉⲉⲓⲙⲟⲟϣⲉ  ⲉⲓϣⲓⲛⲉ  ⲛ̅ⲥⲁϫⲡⲟⲥ  ⲛⲁⲓ :  ⲓ̅ⲑ.  Ϫⲉ ⲁⲛⲅ̅ⲟⲩϣⲏⲣⲉ  ϣⲏⲙ  ⲛ̅ⲉⲩⲫⲩⲏⲥ . ⲉⲩⲛ̅ⲧⲁⲓ  ⲙ̅ⲙⲁⲩ  ⲛ̅ⲟⲩⲯⲩⲭⲏ  ⲉⲛⲁⲛⲟⲩⲥ.    Ⲁⲩⲱ  ⲉⲁⲛⲅ̅ⲟⲩⲁⲅⲁⲑⲟⲥ  ⲉⲓϣⲟⲟⲡ  ϩⲛ̅ⲟⲩⲥⲱⲙⲁ  ⲉϥⲟⲩⲁⲁⲃ.  ⲕ̅ⲁ̅.  Ⲁⲓⲉⲓⲙⲉ  ⲇⲉ  ϫⲉ  ⲛ̅ϯⲛⲁϣⲧⲁϩⲟⲥ  ⲁⲛ  ⲛ̅ϭⲉⲥⲙⲟⲧ   ⲉⲓⲙⲏⲧⲓ  ⲛ̅ⲧⲉⲡⲛⲟⲩⲧⲉ  ⲧⲁⲁⲥ  ⲛⲁⲓ . ⲟⲩⲙⲛ̅ⲧⲣⲙ̅ⲛ̅ϩⲏⲧ  ⲟⲛ  ⲡⲉ  ⲡⲁⲓ  ⲉⲉⲓⲙⲉ  ϫⲉ  ⲡⲁⲛⲓⲙ  ⲡⲉ  ⲡⲉϩⲙⲟⲧ . ⲁⲓϣⲗⲏⲗ  ⲉⲠϫⲟⲉⲓⲥ  ⲁⲩⲱ  ⲁⲓⲥⲉⲡⲥⲱⲡϥ̅  ⲉⲃⲟⲗ  ϩⲙ̅ⲡⲁϩⲏⲧ  ⲧⲏⲣϥ̅.

Ⲕⲉⲫ.  Ⲑ̅

Ϫⲉ  ⲡⲛⲟⲩⲧⲉ  ⲛ̅ⲛⲁⲉⲓⲟⲧⲉ  Ⲡϫⲟⲉⲓⲥ  ⲙ̅ⲡⲛⲁ . ⲡⲉⲛⲧⲁϥⲧⲁⲙⲓⲉⲡⲧⲏⲣϥ̅  ϩⲙ̅ⲡⲉϥϣⲁϫⲉ.  ⲃ̅.  Ⲁⲕⲥⲛ̅ⲧⲡⲣⲱⲙⲉ  ϩⲛ̅ⲧⲉⲕⲥⲟⲫⲓⲁ ϫⲉⲕⲁⲥ  ⲉϥⲉⲣ̅ϫⲟⲉⲓⲥ  ⲉⲛⲉⲕⲥⲱⲛⲧ̅  ⲉⲛⲧⲁⲕⲧⲁⲙⲓⲟⲟⲩ.   ⲅ̅.  ⲛϥ̅ⲣ̅ϩⲙ̅ⲙⲉ  ⲙ̅ⲡⲕⲟⲥⲙⲟⲥ  ϩⲛ̅ⲟⲩⲧⲃ̅ⲃⲟ  ⲙⲛ̅ⲟⲩⲇⲓⲕⲁⲓⲟⲥⲩⲛⲏ. ⲛϥ̅ⲕⲣⲓⲛⲉ  ⲛ̅ⲟⲩϩⲁⲡ  ϩⲙ̅ⲡⲥⲟⲟⲩⲧⲛ̅  ⲛ̅ⲧⲉϥⲯⲩⲭⲏ.  ⲇ̅.  Ⲙⲁ  ⲛⲁⲓ  ⲛ̅ⲧⲥⲟⲫⲓⲁ  ⲧⲁⲓ  ⲉⲧⲁϩⲉⲣⲁⲧⲥ̅  ⲉⲛⲉⲕⲑⲣⲟⲛⲟⲥ . ⲛⲅ̅ⲧⲙ̅ⲥⲧⲟⲉⲓ  ⲉⲃⲟⲗ  ϩⲛ̅ⲛⲉⲕϩⲙ̅ϩⲁⲗ.    Ϫⲉ  ⲁⲛⲅ̅ⲡⲉⲕϩⲙ̅ϩⲁⲗ  ⲁⲩⲱ  ⲡϣⲏⲣⲉ  ⲛ̅ⲧⲉⲕϩⲙ̅ϩⲁⲗ . ⲁⲛⲅ̅ⲟⲩⲣⲱⲙⲉ  ⲛ̅ⲁⲥⲑⲉⲛⲏⲥ  ⲛ̅ⲕⲟⲩⲓ  ⲛ̅ⲁϩⲉ . ⲉⲓϣⲁⲁⲧ  ⲙ̅ⲙⲛ̅ⲧⲣⲙ̅ⲛ̅ϩⲏⲧ  ϩⲛ̅ⲟⲩϩⲁⲡ  ⲙⲛ̅ⲟⲩⲛⲟⲙⲟⲥ.  Ⲋ.  Ⲕⲁⲛ  ⲟⲩⲧⲉⲗⲉⲓⲟⲥ  ⲡⲉ  ⲟⲩⲁ  ϩⲛ̅ⲛ̅ϣⲏⲣⲉ  ⲛ̅ⲣ̅ⲣⲱⲙⲉ  ⲉⲙⲛ̅ⲧⲁϥ  ⲙ̅ⲙⲁⲩ  ⲛ̅ⲧⲉⲕⲥⲟⲫⲓⲁ  ⲉⲩⲛⲁⲟⲡϥ̅  ⲉⲩⲗⲁⲁⲩ.  ⲍ̅.  Ⲛ̅ⲧⲟⲕ  ⲁⲕⲥⲟⲧⲡⲧ̅  ⲉⲩⲣ̅ⲣⲟ  ⲙ̅ⲡⲉⲕⲗⲁⲟⲥ . ⲁⲩⲱ  ⲟⲩⲣⲉϥϯϩⲁⲡ  ⲛ̅ⲛⲉⲕϣⲏⲣⲉ  ⲙⲛ̅ⲛⲉⲕϣⲉⲉⲣⲉ.  ⲏ̅.  Ⲁⲕϫⲟⲟⲥ  ⲉⲕⲱⲧ  ⲛ̅ⲟⲩⲣ̅ⲡⲉ  ϩⲙ̅ⲡⲉⲕⲧⲟⲟⲩ  ⲉⲧⲟⲩⲁⲁⲃ . ⲁⲩⲱ  ⲟⲩⲑⲩⲥⲓⲁⲥⲧⲏⲣⲓⲟⲛ  ϩⲛ̅ⲧⲡⲟⲗⲓⲥ  ⲙ̅ⲡⲉⲕⲙⲁⲛ̅ϣⲱⲡⲉ . ⲡⲉⲓⲛⲉ  ⲛ̅ⲧⲉⲕⲥⲕⲏⲛⲏ  ⲉⲧⲟⲩⲁⲁⲃ  ⲉⲛⲧⲁⲕⲥⲃ̅ⲧⲱⲧϥ̅  ϫⲓⲛⲛ̅ϣⲟⲣⲡ̅.  ⲑ̅.  Ⲁⲩⲱ  ⲉⲣⲉⲧⲥⲟⲫⲓⲁ  ⲛⲉⲙⲁⲕ  ⲧⲉⲧⲥⲟⲟⲩⲛ  ⲛ̅ⲛⲉⲕϩⲃⲏⲩⲉ . ⲁⲩⲱ  ⲛⲉⲥⲁϩⲉⲣⲁⲧⲥ̅  ⲡⲉ  ⲛ̅ⲧⲉⲣⲉⲕⲧⲁⲙⲓⲉⲡⲕⲟⲥⲙⲟⲥ . ⲉⲥⲥⲟⲟⲩⲛ  ϫⲉ  ⲟⲩ  ⲡⲉⲧⲣ̅ⲁⲛⲁⲕ  ⲙ̅ⲡⲉⲕⲙ̅ⲧⲟ  ⲉⲃⲟⲗ . ⲁⲩⲱ  ⲟⲩ  ⲡⲉⲧⲥⲟⲩⲧⲱⲛ  ϩⲛ̅ⲛⲉⲕⲉⲛⲧⲟⲗⲏ.    Ⲙⲁⲧⲛ̅ⲛⲟⲟⲩⲥ  ⲉⲃⲟⲗ  ϩⲛ̅ⲛⲉⲕⲡⲏⲩⲉ  ⲉⲧⲟⲩⲁⲁⲃ . ⲁⲩⲱ  ⲉⲃⲟⲗ  ϩⲙ̅ⲡⲉⲑⲣⲟⲛⲟⲥ  ⲙ̅ⲡⲉⲕⲉⲟⲟⲩ . ϫⲉⲕⲁⲥ  ⲉⲥⲉϣⲡ̅ϩⲓⲥⲉ  ⲛⲙ̅ⲙⲁⲓ  ⲉⲥϩⲁⲧⲏⲓ . ⲛ̅ⲧⲁⲉⲓⲙⲉ  ϫⲉ  ⲟⲩ  ⲡⲉⲧϣⲏⲡ  ⲛ̅ⲛⲁϩⲣⲁⲕ.  ⲓ̅ⲁ.  Ⲥⲥⲟⲟⲩⲛ  ⲅⲁⲣ  ⲛ̅ⲧⲟⲥ  ⲛ̅ϩⲱⲃ  ⲛⲓⲙ  ⲁⲩⲱ  ⲥⲛⲟⲓ  ⲙ̅ⲙⲟⲟⲩ . ⲁⲩⲱ  ⲥⲛⲁϫⲓⲙⲟⲉⲓⲧ  ϩⲏⲧ  ϩⲛ̅ⲛⲁϩⲃⲏⲩⲉ  ϩⲛ̅ⲟⲩⲙⲛ̅ⲧⲣⲙ̅ⲛ̅ϩⲏⲧ . ⲛⲥ̅ϩⲁⲣⲉϩ  ⲉⲣⲟⲓ  ϩⲙ̅ⲡⲉⲥⲉⲟⲟⲩ :  ⲓ̅ⲃ.  Ⲛ̅ⲧⲉⲛⲁϩⲃⲏⲩⲉ  ϣⲱⲡⲉ  ⲉⲩϣⲏⲡ . ⲁⲩⲱ  ϯⲛⲁⲕⲣⲓⲛⲉ  ⲙ̅ⲡⲁⲕⲗⲁⲟⲥ  ϩⲛ̅ⲟⲩⲇⲓⲕⲁⲓⲟⲥⲩⲛⲏ . ⲛ̅ⲧⲁϣⲱⲡⲉ  ⲉⲓⲙ̅ⲡϣⲁ  ⲛ̅ⲛⲉⲑⲣⲟⲛⲟⲥ  ⲙ̅ⲡⲁⲉⲓⲱⲧ.  ⲓ̅ⲅ.  Ⲛⲓⲙ  ⲅⲁⲣ  ⲣ̅ⲣⲱⲙⲉ  ⲡⲉⲧⲛⲁⲥⲟⲩⲛ̅ⲡϣⲟϫⲛⲉ  ⲙ̅ⲡⲛⲟⲩⲧⲉ .  ⲏ  ⲛⲓⲙ  ⲡⲉⲧⲛⲁⲉⲓⲙⲉ  ϫⲉ  ⲟⲩ  ⲡⲉⲧⲉⲣⲉⲠϫⲟⲉⲓⲥ  ⲟⲩⲁϣϥ̅ⲑ  ⲓ̅ⲇ.  Ⲙ̅ⲙⲟⲕⲙⲉⲕ  ⲅⲁⲣ  ⲛ̅ⲣ̅ⲱⲙⲉ  ϭⲟⲟⲃ . ⲁⲩⲱ  ⲥⲉⲗⲟⲟϥⲉ  ⲛ̅ϭⲓⲛⲉⲩⲙⲉⲉⲩⲉ :   Ⲡⲥⲱⲙⲁ  ⲅⲁⲣ  ⲡⲣⲉϥⲧⲁⲕⲟ  ϣⲁϥϩⲣⲟϣ  ⲉϫⲛ̅ⲧⲉⲯⲩⲭⲏ . ⲁⲩⲱ  ⲡⲙⲁⲛ̅ϣⲱⲡⲉ  ⲛ̅ⲧⲉⲡⲕⲁϩ  ϣⲁϥⲣ̅ⲕⲁⲕⲉ  ⲉⲫⲏⲧ  ⲛ̅ϥⲁⲓⲣⲟⲟⲩϣ.  ⲓ̅Ⲋ.  Ⲙⲟⲅⲓⲥ  ⲉⲛⲧⲟⲛⲧⲛ̅  ⲛ̅ⲛⲉⲧϩⲓϫⲙ̅ⲡⲕⲁϩ . ⲉⲛϭⲓⲛⲉ  ⲛⲉⲧϩⲁⲛⲉⲛϭⲓϫ  ϩⲛ̅ⲟⲩϩⲓⲥⲉ : Ⲛⲉⲧϩⲛ̅ⲙ̅ⲡⲏⲩⲉ  ⲇⲉ  ⲛⲓⲙ  ⲡⲉⲛⲧⲁϥϩⲉⲧϩⲱⲧⲟⲩⲑ  ⲓ̅ⲍ.  ⲏ  ⲛⲓⲙ  ⲡⲉⲛⲧⲁϥⲉⲓⲙⲉ  ⲉⲡⲉⲕϣⲟϫⲛⲉ. ⲛ̅ⲥⲁⲃⲏⲗ  ϫⲉ  ⲛ̅ⲧⲟⲕ  ⲁⲕϯ  ⲛ̅ⲧⲥⲟⲫⲓⲁ ⲭ. Ⲁⲕⲧⲛ̅ⲛⲟⲟⲩ  ⲙ̅ⲡⲉⲕⲡⲛⲉⲩⲙⲁ  ⲉⲧⲟⲩⲁⲁⲃ  ⲉⲃⲟⲗ  ϩⲙ̅ⲡϩⲓⲥⲉⲑ  ⲓ̅ⲏ.  Ⲧⲁⲓ  ⲧⲉ  ⲑⲉ  ⲛ̅ⲧⲁⲩⲥⲟⲟⲩⲧⲛ̅  ⲛ̅ϭⲓⲛⲉϩⲓⲟⲟⲩⲉ  ⲛ̅ⲛⲉⲧϩⲓϫⲙ̅ⲡⲕⲁϩ . ⲁⲛ̅ⲣⲱⲙⲉ  ⲥⲃⲱ  ⲉⲛⲉⲧⲣ̅ⲁⲛⲁⲕ . ⲁⲩⲱ  ⲁⲩⲟⲩϫⲁⲓ  ϩⲛ̅ⲧⲥⲟⲫⲓⲁ.

Ⲕⲉⲫ.  Ⲓ̅

Ⲧⲁⲓ  ⲧⲉⲛⲧⲁⲥⲁⲣⲉϩ  ⲉⲡⲉⲛⲧⲁⲩⲡⲗⲁⲥⲥⲉ  ⲙ̅ⲙⲟϥ  ⲛ̅ϣⲟⲣⲡ̅ . ⲡⲓⲱⲧ ⲙ̅ⲡⲕⲟⲥⲙⲟⲥ  ⲡⲉⲛⲧⲁⲩⲥⲟⲛⲧϥ̅  ⲙⲁⲩⲁⲁϥ . ⲁⲥⲛⲁϩⲙⲉϥ  ⲉⲃⲟⲗ  ϩⲙ̅ⲡⲉϥⲛⲟⲃⲉ.  ⲃ̅.  Ⲁⲥϯ  ⲛⲁϥ  ⲛ̅ⲟⲩϭⲟⲙ  ⲉⲁⲙⲁϩⲧⲉ  ⲉϫⲙ̅ⲡⲧⲏⲣϥ̅.  ⲅ̅.  Ⲛ̅ⲧⲉⲣⲉϥⲥⲁϩⲱϥ  ⲇⲉ  ⲉⲃⲟⲗ  ⲙ̅ⲙⲟⲥ  ⲛ̅ϭⲓⲟⲩⲣⲉϥϫⲓⲛϭⲟⲛⲥ̅  ϩⲛ̅ⲧⲉϥⲟⲣⲅⲏ . ⲁϥϩⲱⲧⲃ̅  ⲙ̅ⲡⲉϥⲥⲟⲛ . ⲁϥⲧⲁⲕⲟ  ϩⲙ̅ⲡⲉϥϭⲱⲛⲧ̅.  ⲇ̅.  Ⲡⲁⲓ  ⲉⲛⲧⲁⲡⲕⲁⲧⲁⲕⲗⲩⲥⲙⲟⲥ  ⲉⲙⲥ̅ⲡⲕⲁϩ .  ⲁⲩⲱ  ⲟⲛ  ⲁⲧⲣⲟⲫⲓⲁ  ⲛⲉϩⲙ̅ⲡⲇⲓⲕⲁⲓⲟⲥ . ⲁⲥⲣ̅ϩⲙ̅ⲙⲉ  ⲙ̅ⲙⲟϥ  ϩⲓϫⲛ̅ⲟⲩⲕⲟⲩⲓ  ⲛ̅ϣⲉ.    Ⲧⲁⲓ  ⲁⲥⲥⲟⲩⲛ̅ⲡⲇⲓⲕⲁⲓⲟⲥ  ⲉⲃⲟⲗ  ϩⲛ̅ⲧⲙⲏⲧⲉ  ⲛ̅ⲧⲡⲟⲛⲏⲣⲓⲁ . ⲛ̅ⲛ̅ϩⲉⲑⲛⲟⲥ  ⲉⲁⲩϫⲱⲱⲣⲉ  ⲉⲃⲟⲗ  ϩⲓⲟⲩⲥⲟⲡ . ⲁⲥϩⲁⲣⲉϩ  ⲉⲣⲟϥ  ⲛ̅ⲟⲩⲥⲱⲧⲡ̅  ⲙ̅ⲡⲛⲟⲩⲧⲉ. ⲁⲥⲣ̅ϩⲙ̅ⲙⲉ  ⲙ̅ⲙⲟϥ  ϩⲛ̅ⲟⲩⲙⲛ̅ⲧϣⲁⲛϩⲧⲏϥ  ⲙ̅ⲡⲉϥϣⲏⲣⲉ. Ⲋ.  Ⲧⲁⲓ  ⲁⲥⲛⲉϩⲙ̅ⲡⲇⲓⲕⲁⲓⲟⲥ  ⲉⲃⲟⲗ  ϩⲛ̅ⲛ̅ⲁⲥⲉⲃⲏⲥ  ⲉⲩⲛⲁⲧⲁⲕⲟ. ⲁϥⲣ̅ⲃⲟⲗ  ⲉⲡⲕⲱϩⲧ̅  ⲉⲛⲧⲁϥⲉⲓ  ⲉϫⲛ̅ϯⲟⲩ  ⲙ̅ⲡⲟⲗⲓⲥ : ⲍ̅.  Ⲛⲁⲓ  ⲉϥⲣ̅ⲙⲛ̅ⲧⲣⲉ  ⲛ̅ⲧⲉⲩⲡⲟⲛⲏⲣⲓⲁ  ⲛ̅ϭⲓⲡⲕⲁϩ  ⲉⲧϣⲏϥ  ⲉⲧϯⲕⲁⲣⲡⲟⲥ . ⲙⲛ̅ϩⲉⲛϣⲏⲛ  ⲉⲣⲉⲡⲉⲩⲕⲁⲣⲡⲟⲥ  ϩⲓⲱⲟⲩ  ⲉⲛϥ̅ϫⲏⲕ  ⲉⲃⲟⲗ  ⲁⲛ . ⲁⲩⲱ  ⲡⲙⲁⲉⲓⲛ  ⲛ̅ⲧⲉⲯⲩⲭⲏ  ⲛ̅ⲁⲧⲛⲁϩⲧⲉ  ⲉⲥⲁϩⲉⲣⲁⲧⲥ̅  ⲉⲥⲟ  ⲛ̅ⲟⲩⲟⲉⲓⲧ  ⲛ̅ϩⲙⲟⲩ.  ⲏ̅.  Ⲛⲉⲛⲧⲁⲩⲣ̅ⲡⲃⲟⲗ  ⲅⲁⲣ  ⲛ̅ⲧⲥⲟⲫⲓⲁ  ⲟⲩ  ⲙⲟⲛⲟⲛ  ⲁⲩϯⲟⲥⲉ  ⲉⲉⲓⲙⲉ  ⲉⲡⲥⲟⲟⲩⲛ  ⲛ̅ⲛⲉⲧⲛⲁⲛⲟⲩⲟⲩ . ⲁⲗⲗⲁ  ⲁⲩⲕⲱ  ⲛ̅ⲟⲩⲣ̅ⲡⲙⲉⲉⲩⲉ  ⲛ̅ⲧⲉⲩⲙⲛ̅ⲧⲁⲑⲏⲧ  ϩⲙ̅ⲡⲕⲟⲥⲙⲟⲥ . ϫⲉⲕⲁⲥ  ϩⲛ̅ⲛⲉⲛⲧⲁⲩⲣ̅ϣⲁϥⲧⲉ  ⲛ̅ϩⲏⲧⲟⲩ  ⲛ̅ⲛⲉⲩⲉϣϩⲱⲡ.  ⲑ̅.  Ⲧⲥⲟⲫⲓⲁ  ⲇⲉ  ϣⲁⲥⲛⲉϩⲙ̅ⲛⲉⲧϣⲙ̅ϣⲉ ⲛⲁⲥ  ⲉⲃⲟⲗ  ϩⲛ̅ⲛ̅ϩⲓⲥⲉ.    Ⲧⲁⲓ  ⲉⲛⲧⲁⲥϫⲓⲙⲟⲉⲓⲧ  ϩⲏⲧϥ̅  ⲙ̅ⲡⲇⲓⲕⲁⲓⲟⲥ  ϩⲛ̅ⲛⲉϩⲓⲟⲟⲩⲉ  ⲉⲧⲥⲟⲩⲧⲱⲛ . ⲉϥⲡⲏⲧ  ϩⲏⲧⲥ̅  ⲛ̅ⲧⲟⲣⲅⲏ  ⲙ̅ⲡⲉϥⲥⲟⲛ . ⲁⲥⲧⲥⲁⲃⲟϥ  ⲉⲧⲙⲛ̅ⲧⲉⲣⲟ  ⲙ̅ⲡⲛⲟⲩⲧⲉ.  ⲁⲥϯ  ⲛⲁϥ  ⲙ̅ⲡⲥⲟⲟⲩⲛ  ⲛ̅ⲛⲉⲧⲟⲩⲁⲁⲃ . ⲁⲥⲧⲁϣⲟϥ  ϩⲛ̅ⲛⲉϥϩⲓⲥⲉ . ⲁⲥⲁⲁϥ  ⲣ̅ⲣⲙ̅ⲙⲁⲟ  ϩⲛ̅ⲛⲉϥⲙ̅ⲕⲁϩ.  ⲓ̅ⲁ.  Ⲉⲃⲟⲗ  ϩⲙ̅ⲡϫⲓⲛϫⲛⲁϩ  ⲛ̅ⲛⲉⲧⲟⲩϫⲓ  ⲙ̅ⲙⲟϥ  ⲛ̅ϭⲟⲛⲥ̅ . ⲁⲥϥⲓ  ⲛⲁⲙⲁϥ  ⲁⲥⲁⲁϥ  ⲣ̅ⲣⲙ̅ⲙⲁⲟ :  ⲓ̅ⲃ. Ⲁⲥⲣ̅ϩⲙ̅ⲙⲉ  ⲙ̅ⲙⲟϥ  ⲉⲃⲟⲗ  ϩⲓⲧⲛ̅ⲛⲉϥϫⲓϫⲉⲟⲩ. ⲁⲥⲟⲣϫϥ̅  ⲉⲃⲟⲗ  ϩⲓⲧⲛ̅ⲛⲉⲧϭⲱⲣϭ̅  ⲉⲣⲟϥ . ⲁⲥϯ  ⲛⲁϥ  ⲛ̅ⲟⲩⲁⲅⲱⲛ  ⲙ̅ⲙⲛ̅ⲧϫⲱⲱⲣ . ϫⲉⲕⲁⲁⲥ  ⲉϥⲉⲉⲓⲙⲉ  ϫⲉ  ⲧⲙⲛ̅ⲧⲛⲟⲩⲧⲉ  ϫⲟⲟⲣ  ⲉϩⲱⲃ  ⲛⲓⲙ.  ⲓ̅ⲅ.  Ⲧⲁⲓ  ⲉⲧⲉⲙ̅ⲡⲉⲥⲕⲱ  ⲛ̅ⲥⲱⲥ  ⲙ̅ⲡⲇⲓⲕⲁⲓⲟⲥ ⲉⲛⲧⲁⲩⲧⲁⲁϥ  ⲉⲃⲟⲗ . ⲁⲗⲗⲁ  ⲁⲥⲧⲟⲩϫⲟϥ  ⲉⲡⲛⲟⲃⲉ :  ⲓ̅ⲇ.  Ⲁⲥⲃⲱⲕ  ⲛⲉⲙⲁϥ  ⲉⲡⲉⲥⲏⲧ  ⲉⲡϣⲏⲕ . ⲁⲩⲱ  ⲙ̅ⲡⲥ̅ⲃⲟϣϥ̅  ϩⲛ̅ⲙ̅ⲙⲣ̅ⲣⲉ . ϣⲁⲛⲧⲥ̅ⲉⲓⲛⲉ  ⲛⲁϥ  ⲛ̅ⲟⲩϭⲣⲏⲡⲉ  ⲙ̅ⲙⲛ̅ⲧⲉⲣⲟ . ⲙⲛ̅ⲟⲩⲉⲝⲟⲩⲥⲓⲁ  ⲉϫⲛ̅ⲛⲉⲧϫⲓ  ⲙ̅ⲙⲟϥ  ⲛ̅ϭⲟⲛⲥ̅ : ⲁⲥⲟⲩⲱⲛϩ̅  ⲛ̅ⲛⲉⲧϩⲓⲗⲁ  ⲉⲣⲟϥ  ϫⲉ  ⲉⲩϫⲓϭⲟⲗ. ⲁⲥϯ  ⲛⲁϥ  ⲛ̅ⲟⲩⲉⲟⲟⲩ  ⲛ̅ϣⲁⲉⲛⲉϩ.    Ⲧⲁⲓ  ⲧⲉⲛⲧⲁⲥⲧⲟⲩϫⲉⲡⲗⲁⲟⲥ  ⲉⲧⲟⲩⲁⲁⲃ . ⲁⲩⲱ  ⲡⲉⲥⲡⲉⲣⲙⲁ  ⲛ̅ⲥⲱⲧⲡ̅  ⲉⲃⲟⲗ  ϩⲛ̅ⲟⲩϩⲉⲑⲛⲟⲥ  ⲉϥⲑⲗⲓⲃⲉ  ⲙ̅ⲙⲟⲟⲩ.  ⲓ̅Ⲋ.  Ⲉⲁⲥⲃⲱⲕ  ⲉϩⲟⲩⲛ  ⲉⲧⲉⲯⲩⲭⲏ  ⲙ̅ⲡϩⲙ̅ϩⲁⲗ  ⲙ̅ⲡⲛⲟⲩⲧⲉ . ⲉϥⲁϩⲉⲣⲁⲧϥ̅  ⲉϩⲉⲛⲛⲟϭ  ⲛ̅ⲛⲉⲣⲱⲟⲩ  ϩⲛ̅ϩⲉⲛⲙⲁⲉⲓⲛ  ⲙⲛ̅ϩⲉⲛϣⲡⲏⲣⲉ.  ⲓ̅ⲍ.  Ⲁⲥϯ  ⲛ̅ⲛⲉⲧⲟⲩⲁⲁⲃ  ⲙ̅ⲡⲃⲉⲕⲉ  ⲛ̅ⲛⲉⲩϩⲓⲥⲉ . ⲁⲥϫⲓⲙⲟⲉⲓⲧ  ϩⲏⲧⲟⲩ  ϩⲛ̅ⲟⲩϩⲓⲏ  ⲛ̅ϣⲡⲏⲣⲉ . ⲁⲥϣⲱⲡⲉ  ⲛⲁⲩ  ⲉⲩϩⲁⲉⲓⲃⲉⲥ  ⲙ̅ⲡⲉϩⲟⲟⲩ . ⲁⲩⲱ  ϩⲉⲛⲥⲓⲟⲩ  ⲉⲩⲣ̅ⲟⲩⲟⲉⲓⲛ  ⲛ̅ⲧⲉⲩϣⲏ.  ⲓ̅ⲏ.  Ⲁⲥϫⲓⲟⲟⲣ  ⲙ̅ⲙⲟⲟⲩ  ⲛ̅ⲧⲉⲣⲩⲑⲣⲁ  ⲑⲁⲗⲁⲥⲥⲁ . ⲁⲥⲛ̅ⲧⲟⲩ  ⲉⲃⲟⲗ  ϩⲓⲧⲛ̅ⲟⲩⲙⲟⲟⲩ  ⲉⲛⲁϣⲱϥ.  ⲓ̅ⲑ.  Ⲁⲥϩⲱⲃⲥ̅  ⲉⲃⲟⲗ  ⲉϫⲛ̅ⲛⲉⲩϫⲓϫⲉⲉⲩ. ⲁⲥϩⲃⲣ̅ⲃⲱⲣⲟⲩ  ⲉϩⲣⲁⲓ  ⲉⲡϣⲓⲕ  ⲙ̅ⲡⲛⲟⲩⲛ.    Ⲉⲧⲃⲉⲡⲁⲓ  ⲁⲛⲇⲓⲕⲁⲓⲟⲥ  ϣⲗ̅ⲛ̅ⲁⲥⲉⲃⲏⲥ . ⲁⲩⲱ  ⲁⲩⲥⲙⲟⲩ  ⲉⲡⲉⲕⲣⲁⲛ  ⲉⲧⲟⲩⲁⲁⲃ  Ⲡϫⲟⲉⲓⲥ . ⲁⲩϯⲉⲟⲟⲩ  ϩⲓⲟⲩⲥⲟⲡ  ⲛ̅ⲧⲉⲕϭⲓϫ  ⲉⲧⲙⲓϣⲉ  ⲉϫⲱⲟⲩ.  ⲕ̅ⲁ̅.  Ϫⲉ  ⲧⲥⲟⲫⲓⲁ  ⲁⲥⲟⲩⲱⲛ  ⲉⲧⲧⲁⲡⲣⲟ  ⲛ̅ⲛⲉⲙ̅ⲡⲟ . ⲁⲥϯⲧϭⲟⲙ  ⲙ̅ⲡⲗⲁⲥ  ⲛ̅ⲛ̅ⲕⲟⲩⲓ.
 
Ⲕⲉⲫ.  Ⲓ̅Ⲁ̅

Ⲁⲥⲥⲟⲟⲩⲧⲛ̅ⲛⲉⲩϩⲃⲏⲩⲉ  ϩⲛ̅ⲧϭⲓϫ  ⲙ̅ⲡⲉⲡⲣⲟⲫⲏⲧⲏⲥ  ⲉⲧⲟⲩⲁⲁⲃ.  ⲃ̅.  Ⲁⲩⲃⲱⲕ  ϩⲛ̅ⲟⲩϫⲁⲓⲉ  ⲉⲙⲉⲩⲟⲩⲱϩ  ⲛ̅ϩⲏⲧϥ̅. ⲁⲩⲡⲏⲥⲥⲉ  ⲛ̅ⲛⲉⲩⲥⲕⲏⲛⲏ  ϩⲛ̅ϩⲉⲛⲙⲁ  ⲉⲙⲉⲩⲙⲟⲟϣⲉ  ⲛ̅ϩⲏⲧⲟⲩ.  ⲅ̅.  Ⲁⲩⲁϩⲉⲣⲁⲧⲟⲩ  ⲟⲩⲃⲉⲛⲉⲧϯ  ⲟⲩⲃⲏⲩ . ⲁⲩϫⲣⲟ  ⲉⲛⲉⲩϫⲁϫⲉ.  ⲇ̅.  Ⲁⲩⲉⲓⲃⲉ  ⲁⲩⲱϣ  ⲉϩⲣⲁⲓ  ⲉⲣⲟⲕ : ⲁⲕϯ  ⲛⲁⲩ  ⲛ̅ⲟⲩⲙⲟⲟⲩ  ⲉⲃⲟⲗ  ϩⲛ̅ⲟⲩⲡⲉⲧⲣⲁ  ⲉⲥⲛⲁϣⲧ̅ . ⲟⲩⲧⲁⲗϭⲉ  ⲙ̅ⲡⲓⲃⲉ  ⲉⲃⲟⲗ  ϩⲛ̅ⲟⲩⲱⲛⲉ  ⲉϥⲛⲁϣⲧ̅.   Ϩⲛ̅ⲛⲉⲛⲧⲁⲩⲧⲁⲕⲉⲛⲉⲩϫⲁϫⲉ  ⲅⲁⲣ  ⲛ̅ϩⲏⲧⲟⲩ.  Ⲋ.  Ϩⲛ̅ⲛⲁⲓ  ⲛ̅ⲧⲟⲟⲩ  ⲛ̅ⲧⲁⲩϯⲙ̅ⲧⲟⲛ  ⲛⲁⲩ  ϩⲙ̅ⲡⲉⲩϩⲓⲥⲉ.  ⲍ̅.  Ⲉⲡⲙⲁ  ⲛ̅ⲟⲩⲡⲏⲅⲏ  ⲙ̅ⲙⲟⲟⲩ  ⲉϥⲥⲟⲧϥ̅ . ⲁⲩϣⲧⲣ̅ⲧⲱⲣⲟⲩ  ϩⲛ̅ⲟⲩⲙⲟⲟⲩ  ⲉϥⲧⲣⲉϣⲣⲱϣ.  ⲏ̅.  Ⲉⲩϫⲡⲓⲟ  ⲙ̅ⲡⲟⲩⲉϩⲥⲁϩⲛⲉ  ⲛ̅ⲛⲉⲧⲙⲟⲩⲟⲩⲧ  ⲛ̅ⲛ̅ϣⲏⲣⲉ  ⲕⲟⲩⲓ  ⲁⲕϯ  ⲛⲁⲩ  ⲛ̅ⲟⲩⲙⲟⲟⲩ  ⲉϥⲟϣ  ⲉⲙⲡⲟⲩⲙⲉⲉⲩⲉ  ⲉⲣⲟϥ.  ⲑ̅.  Ⲉⲁⲕⲧⲥⲁⲃⲟⲟⲩ  ϩⲓⲧⲙ̅ⲡⲉⲃⲉ  ⲉⲧⲛⲁⲙⲁⲩ  ⲛ̅ⲑⲉ  ⲉⲛⲧⲁⲕⲑⲙ̅ⲕⲉⲛⲉⲩϫⲁϫⲉ.   Ⲛ̅ⲧⲉⲣⲟⲩϫⲟⲧⲟⲩ  ⲅⲁⲣ  ⲕⲁⲓϭⲉⲣ  ⲉⲩϯⲥⲃⲱ  ⲛⲁⲩ  ϩⲛ̅ⲟⲩⲛⲁ. ⲁⲩⲉⲓⲙⲉ  ⲉⲑⲉ  ⲉⲛⲧⲁⲛⲁⲥⲉⲃⲏⲥ  ⲙ̅ⲕⲁϩ  ⲉⲩⲕⲣⲓⲛⲉ  ⲙ̅ⲙⲟⲟⲩ  ϩⲛ̅ⲟⲩⲟⲣⲅⲏ.  ⲓ̅ⲁ.  Ⲛⲁⲓ  ⲙⲉⲛ  ⲅⲁⲣ  ⲁⲕⲇⲟⲕⲓⲙⲁⲍⲉ  ⲙ̅ⲙⲟⲟⲩ  ϩⲱⲥ  ⲉⲓⲱⲧ  ⲉⲕϯⲥⲃⲱ  ⲛⲁⲩ . ⲛⲏ  ⲇⲉ  ⲛ̅ⲧⲟⲟⲩ  ⲛⲉⲕⲧϭⲁⲓⲟ  ⲙ̅ⲙⲟⲟⲩ  ⲛ̅ⲑⲉ  ⲛ̅ⲟⲩⲣ̅ⲣⲟ  ⲣ̅ⲣⲉϥϣⲱⲱⲧ  ⲉⲃⲟⲗ  ⲉⲕϩⲉⲧⲁⲍⲉ  ⲙ̅ⲙⲟⲟⲩ.  ⲓ̅ⲃ.  Ⲉⲩϩⲁⲧⲏⲩ  ⲇⲉ  ⲁⲩⲱ  ⲉⲩⲙ̅ⲡⲉⲩⲙ̅ⲧⲟ  ⲉⲃⲟⲗ  ⲁⲩⲧⲟⲉⲓⲧ :  ⲓ̅ⲅ.  Ⲁⲩⲗⲩⲡⲏ  ⲅⲁⲣ  ⲧⲁϩⲟⲟⲩ  ⲉⲥⲕⲏⲃ . ⲁⲩⲱ  ⲟⲩⲁϣⲁϩⲟⲙ  ⲙⲛ̅ⲟⲩⲙⲉⲉⲩⲉ  ⲛ̅ϩⲏⲧ  ⲉⲛⲧⲁⲩⲟⲩⲉⲓⲛⲉ.  ⲓ̅ⲇ.  Ⲛ̅ⲧⲉⲣⲟⲩⲥⲱⲧⲙ̅  ⲅⲁⲣ  ϫⲉ  ⲁⲩⲣ̅ⲡⲡⲉⲧⲛⲁⲛⲟⲩϥ  ⲛⲁⲩ  ϩⲓⲧⲛ̅ⲛⲉⲛⲧⲁⲩⲙⲟⲕϩⲟⲩ  ⲛ̅ϩⲏⲧⲟⲩ  ⲛ̅ⲧⲟⲟⲩ  ⲁⲩⲥⲟⲩⲛ̅Ⲡϫⲟⲉⲓⲥ.    Ⲡⲉⲛⲧⲁⲩⲛⲟϫϥ̅  ⲅⲁⲣ  ⲉⲃⲟⲗ  ⲙ̅ⲡⲉⲟⲩⲟⲉⲓϣ  ⲁⲩⲧⲥ̅ⲧⲟϥ  ⲉⲃⲟⲗ  ⲉⲩⲛⲟϭⲛⲉϭ  ⲙ̅ⲙⲟϥ . ϩⲛ̅ⲑⲁⲏ  ⲛ̅ⲛⲉⲩϩⲃⲏⲩⲉ  ⲁⲩⲣ̅ϣⲡⲏⲣⲉ  ⲙ̅ⲙⲟϥ . ⲛ̅ⲧⲁⲩⲉⲓⲃⲉ  ⲛ̅ⲧⲟⲟⲩ  ⲁⲛ  ⲛ̅ⲑⲉ  ⲛ̅ⲛ̅ⲇⲓⲕⲁⲓⲟⲥ.  ⲓ̅Ⲋ.  Ⲉⲡⲙⲁ  ⲛ̅ⲙ̅ⲙⲟⲕⲙⲉⲕ  ⲛ̅ⲛⲁⲑⲏⲧ  ⲙ̅ⲡⲉⲩϫⲓⲛϭⲟⲛⲥ̅ . ϩⲛ̅ⲛⲁⲓ  ⲁⲩⲡⲗⲁⲛⲁ  ⲁⲩϣⲙ̅ϣⲉ  ⲛ̅ϩⲉⲛϫⲁⲧϥⲉ  ⲙⲛ̅ϩⲉⲛⲑⲏⲣⲓⲟⲛ ⲉⲗⲁⲭⲓⲥⲧⲟⲛ . ⲁⲕⲧⲛ̅ⲛⲟⲟⲩ  ⲛⲁⲩ  ⲛ̅ⲟⲩⲁϣⲏ  ⲛ̅ⲍⲱⲟⲛ  ⲛ̅ⲁⲗⲟⲅⲟⲛ  ⲉⲩϫⲓⲕⲃⲁ.  ⲓ̅ⲍ.  Ϫⲉⲕⲁⲥ  ⲉⲩⲉⲉⲓⲙⲉ  ϫⲉ  ⲛⲉⲧⲉⲣⲉⲟⲩⲁ  ⲣ̅ⲛⲟⲃⲉ  ⲛ̅ϩⲏⲧⲟⲩ . ⲉⲩⲕⲟⲗⲁⲍⲉ  ⲙ̅ⲙⲟϥ  ϩⲣⲁⲓ  ⲛ̅ϩⲏⲧⲟⲩ.  ⲓ̅ⲏ.  Ⲛⲉⲥⲁⲡⲟⲣⲓ  ⲅⲁⲣ  ⲁⲛ  ⲛ̅ϭⲓⲧⲉⲕϭⲓϫ  ⲉⲧϭⲙ̅ϭⲟⲙ. ⲧⲉⲛⲧⲁⲥⲥⲛ̅ⲧⲡⲕⲟⲥⲙⲟⲥ  ⲉⲃⲟⲗ  ϩⲛ̅ⲟⲩϩⲩⲗⲏ  ⲛ̅ⲁⲧⲉⲥⲙⲟⲧ . ⲉⲧⲣⲉⲕⲧⲛ̅ⲛⲟⲟⲩ  ⲛⲁⲩ  ⲛ̅ⲟⲩⲁϣⲏ  ⲛ̅ⲁⲣⲁⲝ  ⲏ  ϩⲉⲛⲙⲟⲩⲓ  ⲉⲩⲛⲁϣⲧ̅.  ⲓ̅ⲑ.  ⲏ  ϩⲉⲛⲕⲉⲑⲏⲣⲓⲟⲛ  ⲛ̅ⲥⲱⲛⲧ̅  ⲃ̅ⲃⲣ̅ⲉ  ⲉⲛⲥⲉⲥⲟⲟⲩⲛ  ⲙ̅ⲙⲟⲟⲩ  ⲁⲛ  ⲉⲩⲙⲉϩ  ⲛ̅ϭⲱⲛⲧ̅ . ⲏ  ⲉⲩⲗ̅ϩⲏⲥ  ϩⲛ̅ⲟⲩⲛⲓϥⲉ  ⲛ̅ⲕⲱϩⲧ̅ . ⲏ  ϩⲙ̅ⲡⲉⲩϩⲣⲟⲟⲩ  ⲉⲩϣⲱϣ  ⲛ̅ⲟⲩⲕⲁⲡⲛⲟⲥ . ⲏ  ⲉⲣⲉϩⲉⲛϯⲕ̅  ⲉⲩⲛⲁϣⲧ̅  ϥⲱϭⲉ  ⲉⲃⲟⲗ  ϩⲛ̅ⲛⲉⲩⲃⲁⲗ.    Ⲛⲁⲓ  ⲉⲣⲉⲡⲉⲩⲥⲁϣ  ⲁⲛ  ⲙ̅ⲙⲁⲧⲉ  ⲛⲁϭⲙ̅ϭⲟⲙ  ⲉⲧⲁⲕⲟⲟⲩ . ⲁⲗⲗⲁ  ⲡⲉⲩⲕⲉϩⲟ  ⲉϥϯϩⲟⲧⲉ  ⲛⲁⲩ  ⲉϥⲛⲁⲟϫⲛⲟⲩ :  ⲕ̅ⲁ̅.  Ⲉϫⲛ̅ⲛⲁⲓ  ⲇⲉ  ⲧⲏⲣⲟⲩ  ⲛⲉⲩⲛ̅ϣϭⲟⲙ  ⲛ̅ⲣⲁϩⲧⲟⲩ  ⲉϩⲣⲁⲓ  ϩⲛ̅ⲟⲩⲡⲛⲉⲩⲙⲁ  ⲛ̅ⲟⲩⲱⲧ  ⲁⲡϫⲓⲕⲃⲁ  ⲡⲱⲧ  ⲛ̅ⲥⲱⲟⲩ . ⲁⲩⲱ  ⲛ̅ⲥⲉϣⲁϣⲟⲩ  ⲉⲃⲟⲗ  ϩⲓⲧⲙ̅ⲡⲉⲡⲛⲉⲩⲙⲁ  ⲛ̅ⲧⲉⲕϭⲟⲙ . ⲁⲗⲗⲁ  ⲁⲕⲧⲉϣϩⲱⲃ  ⲛⲓⲙ  ϩⲛ̅ⲟⲩⲣⲱϣⲉ  ⲙⲛ̅ⲟⲩⲏⲡⲉ  ⲙⲛ̅ⲟⲩϣⲓ.  ⲕ̅ⲃ̅.  Ⲧⲛⲟϭ  ⲅⲁⲣ  ⲛ̅ϭⲟⲙ  ϣⲟⲟⲡ  ⲛⲁⲕ  ⲛ̅ⲟⲩⲟⲉⲓϣ  ⲛⲓⲙ . ⲁⲩⲱ  ⲛⲓⲙ  ⲡⲉⲧⲛⲁϯ  ⲟⲩⲃⲉⲡⲁⲙⲁϩⲧⲉ  ⲙ̅ⲡⲉⲕϭⲃⲟⲓⲑ  ⲕ̅ⲅ̅.  Ϫⲉ  ⲉⲣⲉⲡⲕⲟⲥⲙⲟⲥ  ⲧⲏⲣϥ̅  ⲟ  ⲛ̅ⲑⲉ  ⲙ̅ⲡⲣⲓⲕⲉ  ⲛ̅ⲟⲩⲙⲁϣⲉ  ⲙ̅ⲡⲉⲕⲙ̅ⲧⲟ  ⲉⲃⲟⲗ . ⲁⲩⲱ  ⲛ̅ⲑⲉ  ⲛ̅ⲟⲩⲧⲗ̅ϯⲗⲉ  ⲛ̅ⲉⲓⲱⲧⲉ  ⲉⲁⲥⲉⲓ  ⲉϩⲣⲁⲓ  ⲉϫⲙ̅ⲡⲕⲁϩ  ⲙ̅ⲡⲛⲟⲩ  ⲛ̅ϣⲱⲣⲡ̅.   ⲕ̅ⲇ̅. Ⲉⲕⲛⲁ  ⲇⲉ  ⲙ̅ⲡⲧⲏⲣϥ̅  ϫⲉ  ⲟⲩⲛϭⲟⲙ  ⲙ̅ⲙⲟⲕ  ⲉϩⲱⲃ  ⲛⲓⲙ . ⲉⲕⲕⲱ  ⲇⲉ  ⲉⲃⲟⲗ  ⲛ̅ⲛ̅ⲛⲟⲃⲉ  ⲛ̅ⲣ̅ⲣⲱⲙⲉ  ⲉⲩⲙⲉⲧⲁⲛⲟⲓⲁ.    Ⲕⲙⲉ  ⲅⲁⲣ  ⲛ̅ⲛⲉⲧϣⲟⲟⲡ  ⲧⲏⲣⲟⲩ . ⲁⲩⲱ  ⲛⲅ̅ϥⲱⲧⲉ  ⲁⲛ  ⲛ̅ⲗⲁⲁⲩ  ⲛ̅ⲛⲉⲛⲧⲁⲕⲧⲁⲙⲓⲟⲟⲩ : ⲛ̅ⲛⲉⲕⲛⲁⲥⲛ̅ⲧⲛ̅ⲕⲁ  ⲅⲁⲣ  ⲁⲛ  ⲉⲕⲙⲟⲥⲧⲉ  ⲙ̅ⲙⲟϥ.  ⲕ̅Ⲋ̅.  Ⲛ̅ⲁϣ  ⲇⲉ  ⲛ̅ϩⲉ  ⲉⲣⲉⲟⲩϩⲱⲃ  ⲛⲁⲙⲟⲩⲛ  ⲉⲃⲟⲗ  ⲉⲙⲡⲉⲕⲟⲩⲁϣϥ̅ . ⲏ  ⲉϥⲛⲁϭⲱ  ϣⲁⲡⲧⲏⲣϥ̅  ⲛⲓⲙ  ⲡⲉⲧⲉⲙ̅ⲡⲕ̅ϯⲣⲁⲛ  ⲉⲣⲟϥⲑ  ⲕ̅ⲍ̅.  Ⲕ̅ϯⲥⲟ  ⲇⲉ  ⲉⲣⲟⲟⲩ  ⲧⲏⲣⲟⲩ  ϫⲉ  ⲡⲉⲧⲉⲛⲱⲕ ⲛⲉ  Ⲡϫⲟⲉⲓⲥ  ⲙ̅ⲙⲁⲉⲓⲯⲩⲭⲏ.

Ⲕⲉⲫ.  Ⲓ̅Ⲃ̅

Ⲡⲉⲡⲛⲉⲩⲙⲁ  ⲅⲁⲣ  ⲛ̅ⲁⲧⲧⲁⲕⲟ  ⲛ̅ϩⲏⲧⲟⲩ  ⲧⲏⲣⲟⲩ :  ⲃ̅.  Ⲉⲧⲃⲉⲡⲁⲓ  ⲛⲉⲧⲁϩⲉ  ⲉⲩϫⲡⲓⲟ  ⲙ̅ⲙⲟⲟⲩ  ϣⲏⲙ  ϣⲏⲙ . ⲁⲩⲱ  ϩⲛ̅ⲛⲉⲧⲟⲩⲣ̅ⲛⲟⲃⲉ  ⲛ̅ϩⲏⲧⲟⲩ  ⲉⲕϯⲥⲃⲱ  ⲛⲁⲩ  ⲉⲧⲣⲉⲩⲣ̅ⲡⲙⲉⲉⲩⲉ . ϫⲉⲕⲁⲁⲥ  ⲉⲩⲉⲗⲟ  ϩⲛ̅ⲧⲕⲁⲕⲓⲁ  ⲛ̅ⲥⲉⲡⲓⲥⲧⲉⲩⲉ  ⲉⲣⲟⲕ  Ⲡϫⲟⲉⲓⲥ.  ⲅ̅.  Ⲕⲁⲓ  ⲅⲁⲣ  ⲛ̅ϣⲟⲣⲡ̅  ⲉⲧⲟⲩⲏϩ  ϩⲙ̅ⲡⲉⲕⲕⲁϩ  ⲉⲧⲟⲩⲁⲁⲃ  ⲁⲕⲙⲉⲥⲧⲱⲟⲩ.  ⲇ̅.  Ⲉⲧⲃⲉⲛ̅ⲃⲟⲧⲉ  ⲉⲧⲟⲩⲉⲓⲣⲉ  ⲙ̅ⲙⲟⲟⲩ. ϩⲛ̅ϩⲃⲏⲩⲉ  ⲙ̅ⲙⲛ̅ⲧⲣⲉϥⲣ̅ⲡⲁϩⲣⲉ  ⲙⲛ̅ϩⲉⲛϣⲙ̅ϣⲉ  ⲉⲩϫⲁϩⲙ̅.    ⲉⲩϩⲱⲧⲃ̅  ⲛ̅ⲛⲉⲩϣⲏⲣⲉ  ϩⲛ̅ⲟⲩⲙⲛ̅ⲧⲟⲩⲁϩⲓⲏⲧ . ⲉⲩⲟⲩⲱⲙ  ⲛ̅ⲛⲉⲥⲡⲗⲁⲅⲭⲛⲟⲛ  ⲛⲥⲁⲣⲝ̅  ϩⲓⲥⲛⲟϥ  ⲣ̅ⲣⲱⲙⲉ . ⲉⲩⲟ  ⲛ̅ⲧⲙⲏⲧⲉ  ⲛ̅ⲛⲉⲧⲟⲩϣⲙ̅ϣⲉ  ⲛⲁⲩ.  Ⲋ.  Ϩⲉⲛⲉⲓⲟⲧⲉ  ⲉⲙⲡⲟⲩⲛⲁ  ϩⲁⲛⲉⲯⲩⲭⲏ  ⲛ̅ⲛⲉⲩϣⲏⲣⲉ . ⲛⲁⲓ  ⲁⲕⲟⲩⲱϣ  ⲉⲧⲁⲕⲟⲟⲩ  ϩⲓⲧⲛ̅ⲛ̅ϭⲓϫ  ⲛ̅ⲛⲉⲛⲉⲓⲟⲧⲉ.  ⲍ̅.  Ϫⲉⲕⲁⲥ  ⲉϥⲉⲙ̅ⲡϣⲁ  ⲉⲧⲣⲉⲛ̅ϣⲏⲣⲉ  ⲙ̅ⲡⲛⲟⲩⲧⲉ  ⲟⲩⲱϩ  ⲛ̅ϩⲏⲧϥ̅ . ⲛ̅ϭⲓⲡⲕⲁϩ  ⲉⲧⲧⲁⲓⲏⲩ  ⲛ̅ⲧⲟⲟⲧⲕ̅  ⲉϩⲟⲩⲉⲕⲁϩ  ⲛⲓⲙ.  ⲏ̅.  Ⲁⲗⲗⲁ  ⲛⲉⲓⲕⲟⲟⲩⲉ  ⲟⲛ  ϩⲱⲥ ⲣⲱⲙⲉ  ⲁⲕϯⲥⲟ . ⲉⲁⲕⲧⲛ̅ⲛⲟⲟⲩ  ⲛⲁⲩ  ⲛ̅ϩⲉⲛⲁⲙⲏⲙ  ⲡⲣⲟⲇⲣⲟⲙⲟⲥ  ϩⲁⲑⲏ  ⲙ̅ⲡⲉⲕⲥⲧⲣⲁⲧⲉⲩⲙⲁ . ϫⲉⲕⲁⲥ  ⲉⲩⲉⲙⲟⲟⲩⲧⲟⲩ  ϣⲏⲙ  ϣⲏⲙ.  ⲑ̅.  Ⲉⲕⲟ  ⲛ̅ⲁⲧϭⲟⲙ  ⲁⲛ  ⲉϯ  ⲛ̅ⲛ̅ⲁⲥⲉⲃⲏⲥ  ⲉϩⲣⲁⲓ  ⲉⲛϭⲓϫ  ⲛ̅ⲛ̅ⲇⲓⲕⲁⲓⲟⲥ  ϩⲛ̅ⲡⲡⲟⲗⲉⲙⲟⲥ . ⲏ  ⲛ̅ϩⲛ̅ⲑⲏⲣⲓⲟⲛ  ⲉⲩⲛⲁϣⲧ̅. ⲏ  ϩⲛ̅ⲟⲩϣⲁϫⲉ  ⲛ̅ⲟⲩⲱⲧ  ⲉⲟⲩⲟϣϥⲟⲩ  ϩⲛ̅ⲟⲩϣⲥⲛⲉ.    Ⲉⲕⲕⲣⲓⲛⲉ  ⲇⲉ  ⲙ̅ⲙⲟⲟⲩ  ϣⲏⲙ  ϣⲏⲙ  ⲉⲕϯⲙⲁ  ⲛⲁⲩ  ⲙ̅ⲙⲉⲧⲁⲛⲟⲓⲁ.  ⲉⲕⲥⲟⲟⲩⲛ  ϫⲉ  ⲟⲩⲡⲟⲛⲏⲣⲟⲛ  ⲡⲉ  ⲡⲉⲩϫⲡⲟ . ⲁⲩⲱ  ⲁⲧⲉⲩⲕⲁⲕⲓⲁ  ϫⲉⲛⲟⲩⲛⲉ  ⲉⲃⲟⲗ . ϫⲉ  ⲙ̅ⲡⲉⲩϩⲏⲧ  ⲛⲁϣⲓⲃⲉ  ⲁⲛ  ⲉⲛⲉϩ.  ⲓ̅ⲁ.  Ⲟⲩⲥⲡⲉⲣⲙⲁ  ⲅⲁⲣ  ⲡⲉ  ⲉϥⲥϩⲟⲩⲟⲣⲧ̅  ϫⲓⲛⲛ̅ϣⲟⲣⲡ̅ . ⲟⲩⲇⲉ  ⲛ̅ⲛⲉⲕⲥⲛⲁⲧ  ⲁⲛ  ϩⲏⲧϥ̅  ⲛ̅ⲟⲩⲁ  ⲉⲕϩⲟⲣϣ̅  ⲛ̅ϩⲏⲧ  ⲉϩⲣⲁⲓ  ⲉϫⲱⲟⲩ  ⲉⲩⲣ̅ⲛⲟⲃⲉ.  ⲓ̅ⲃ.  Ⲛⲓⲙ  ⲅⲁⲣ  ⲡⲉⲧⲛⲁϫⲟⲟⲥ  ⲛⲁⲕ  ϫⲉ  ⲟⲩ  ⲡⲉⲛⲧⲁⲕⲁⲁϥ . ⲏ  ⲛⲓⲙ  ⲡⲉⲧⲛⲁⲁϩⲉⲣⲁⲧϥ̅  ⲟⲩⲃⲉⲡⲉⲕϩⲁⲡⲑ  ⲏ  ⲛⲓⲙ  ⲡⲉⲧⲛⲁⲉⲅⲕⲁⲗⲓ  ⲛⲁⲕ  ⲉⲧⲃⲉⲡⲧⲁⲕⲟ  ⲛ̅ⲛ̅ϩⲉⲑⲛⲟⲥ . ⲉⲛⲧⲟⲕ  ⲁⲕⲧⲁⲙⲓⲟⲟⲩ . ⲏ  ⲛⲓⲙ  ⲡⲉⲧⲛⲁϫⲓϩⲁⲡ  ⲛⲙ̅ⲙⲁⲕ  ⲉⲕϫⲓ  ⲙ̅ⲡⲉⲕⲃⲁ  ⲛ̅ϩⲛ̅ⲣⲱⲙⲉ  ⲛ̅ⲣⲉϥϫⲓⲛϭⲟⲛⲥ̅ⲑ  ⲓ̅ⲅ.  Ⲙ̅ⲙⲛ̅ⲕⲉⲛⲟⲩⲧⲉ  ⲅⲁⲣ  ⲛ̅ⲃⲗ̅ⲗⲁⲕ  ⲉϥϥⲓⲣⲟⲟⲩϣ  ϩⲁⲡⲧⲏⲣϥ̅ . ϫⲉⲕⲁⲥ  ⲉⲕⲉⲧⲥⲁⲃⲟⲟⲩ  ϫⲉ  ⲛ̅ⲧⲁⲕⲕⲣⲓⲛⲉ  ⲙ̅ⲙⲟⲟⲩ  ⲁⲛ  ⲁⲇⲓⲕⲱⲥ :  ⲓ̅ⲇ.  Ⲟⲩⲇⲉ  ⲙⲛ̅ⲟⲩⲣ̅ⲣⲟ  ⲏ  ⲟⲩⲇⲉ  ⲧⲩⲣⲁⲛⲛⲟⲥ  ⲁϩⲉⲣⲁⲧϥ̅  ⲉⲣⲟⲕ  ϩⲁⲛⲉⲧⲁⲕⲕⲟⲗⲁⲍⲉ  ⲙ̅ⲙⲟⲟⲩ.    Ⲛ̅ⲧⲕ̅ⲟⲩⲇⲓⲕⲁⲓⲟⲥ  ⲇⲉ  ⲕⲣ̅ϩⲙ̅ⲙⲉ  ⲙ̅ⲙⲟⲟⲩ  ⲧⲏⲣⲟⲩ  ⲇⲓⲕⲁⲓⲱⲥ . ⲉⲕⲱⲡ  ⲙ̅ⲡⲁⲓ  ϫⲉ  ⲟⲩϣⲙ̅ⲙⲟ  ⲡⲉ  ⲉⲧⲉⲕϭⲟⲙ . ⲉⲕⲟⲗⲁⲍⲉ  ⲛ̅ⲟⲩⲁ  ⲉⲛϥ̅ⲙ̅ⲡϣⲁ  ⲁⲛ  ⲛ̅ⲧϭⲁⲓⲟϥ.  ⲓ̅Ⲋ.  Ⲧⲉⲕϭⲟⲙ  ⲅⲁⲣ  ⲧⲉ  ⲧⲉϩⲟⲩⲉⲓⲧⲉ  ⲛ̅ⲧⲇⲓⲕⲁⲓⲟⲥⲩⲛⲏ . ⲁⲩⲱ  ⲧⲉⲕⲙⲛ̅ⲧϫⲟⲉⲓⲥ  ⲉⲧϩⲓϫⲙ̅ⲡⲧⲏⲣϥ̅  ⲉⲧⲣⲉⲕϯⲥⲟ  ⲉⲣⲟⲟⲩ  ⲧⲏⲣⲟⲩ.  ⲓ̅ⲍ.  Ⲕⲟⲩⲱⲛϩ̅  ⲅⲁⲣ  ⲉⲃⲟⲗ  ⲛ̅ⲧⲉⲕϭⲟⲙ  ⲉⲧⲉⲛ̅ⲥⲉⲛⲁϩⲧⲉ  ⲉⲣⲟⲥ  ⲁⲛ . ϩⲣⲁⲓ  ϩⲛ̅ⲧⲙⲛ̅ⲧⲧⲉⲗⲉⲓⲟⲥ  ⲛ̅ⲧⲉⲕⲛⲟⲙⲧⲉ . ⲉⲕⲧⲁⲙⲟ  ⲙ̅ⲙⲟⲟⲩ  ⲉⲡⲉⲕⲁⲙⲁϩⲧⲉ  ϩⲛ̅ⲛⲉⲧⲥⲟⲟⲩⲛ  ⲙ̅ⲙⲟⲕ.  ⲓ̅ⲏ.  Ⲛ̅ⲧⲟⲕ  Ⲡϫⲟⲉⲓⲥ  ⲛ̅ⲛ̅ϭⲟⲙ  ⲉⲕⲕⲣⲓⲛⲉ  ⲛ̅ⲟⲩϩⲁⲕ . ⲁⲩⲱ  ⲉⲕⲣ̅ϩⲙ̅ⲙⲉ  ⲙ̅ⲙⲟⲛ  ϩⲛ̅ⲟⲩⲛⲟϭ  ⲛ̅ϯⲥⲟ : ⲧⲉⲩⲛⲟⲩ  ⲉⲧⲉϩⲛⲁⲕ  ⲟⲩⲛ̅ϭⲟⲙ  ⲙ̅ⲙⲟⲕ  ⲉⲣ̅ⲡⲉⲧⲕ̅ⲟⲩⲁϣϥ̅.  ⲓ̅ⲑ.  Ⲁⲕⲧⲥⲁⲃⲟ  ⲙ̅ⲡⲉⲕⲗⲁⲟⲥ  ⲉⲃⲟⲗ  ϩⲓⲧⲛ̅ⲛⲉⲓϩⲃⲏⲩⲉ . ϫⲉ  ϣϣⲉ  ⲉⲡⲇⲓⲕⲁⲓⲟⲥ  ⲉⲣ̅ⲙⲁⲉⲓⲣⲱⲙⲉ . ⲁⲩⲱ  ⲁⲕϯⲧⲱⲕ  ⲛ̅ϩⲏⲧ  ⲛ̅ⲛⲉⲕϣⲏⲣⲉ . ϫⲉ  ⲁⲕϯⲙⲉⲧⲁⲛⲟⲓⲁ  ⲛ̅ⲛⲉⲛⲧⲁⲩⲣ̅ⲛⲟⲃⲉ.    Ⲉϣϫⲉ  ⲛ̅ϫⲓϫⲉⲉⲩ  ⲅⲁⲣ  ⲛ̅ⲛⲉⲕϣⲏⲣⲉ  ⲛⲁⲓ  ⲉⲧⲙ̅ⲡϣⲁ  ⲙ̅ⲡⲙⲟⲩ . ⲛ̅ⲧⲁⲕⲧⲓⲙⲱⲣⲓ  ⲙ̅ⲙⲟⲟⲩ  ϩⲛ̅ⲟⲩϯⲥⲟ  ⲙⲛ̅ⲟⲩⲙⲛ̅ⲧϩⲁⲣϣ̅ϩⲏⲧ  ⲉⲛⲁϣⲱⲥ . ⲉⲕϯⲙⲁ  ⲛⲁⲩ  ϩⲓⲟⲩⲟⲉⲓϣ  ⲉⲧⲣⲉⲩⲗⲟ  ϩⲛ̅ⲧⲉⲩⲕⲁⲕⲓⲁ.  ⲕ̅ⲁ̅.  Ⲉⲉⲓⲉ  ϩⲛ̅ⲟⲩⲏⲣ  ⲙ̅ⲙⲛ̅ⲧϩⲁⲣϣ̅ϩⲏⲧ  ⲉⲕⲕⲣⲓⲛⲉ  ⲛ̅ⲛⲉⲕϣⲏⲣⲉ . ⲛⲁⲓ  ⲉⲛⲧⲁⲕⲥⲙⲓⲛⲉ  ⲙⲛ̅ⲛⲉⲩⲉⲓⲟⲧⲉ  ⲛ̅ϩⲉⲛⲁⲛⲁⲩϣ  ⲙⲛ̅ϩⲉⲛⲇⲓⲁⲑⲏⲕⲏ  ⲙⲛ̅ϩⲉⲛⲉⲣⲏⲧ  ⲉⲛⲁⲛⲟⲩⲟⲩⲑ  ⲕ̅ⲃ̅.  Ⲉⲕϯⲥⲃⲱ  ϭⲉ  ⲛⲁⲛ  ⲉⲕⲙⲁⲥⲧⲓⲅⲟⲩ  ⲛ̅ⲛⲉⲛϫⲁϫⲉ  ⲛ̅ⲟⲩⲧⲃⲁ  ⲛ̅ⲕⲱⲃ . ϫⲉⲕⲁⲁⲥ  ⲉⲛⲉⲣ̅ⲡⲙⲉⲉⲩⲉ  ⲛ̅ⲧⲉⲕⲙⲛ̅ⲧⲁⲅⲁⲑⲟⲥ  ⲉⲛϯϩⲁⲡ  ⲉⲕⲕⲣⲓⲛⲉ  ⲇⲉ  ⲙ̅ⲙⲟⲛ  ⲧⲛ̅ⲛⲁϭⲱϣⲧ̅  ⲉⲃⲟⲗ  ϩⲏⲧϥ̅  ⲛ̅ⲟⲩⲛⲁ.  ⲕ̅ⲅ̅.  Ⲉⲧⲃⲉⲡⲁⲓ  ⲟⲛ  ⲛⲉⲛⲧⲁⲩϣⲱⲡⲉ  ϩⲛ̅ⲟⲩϭⲓⲛⲱⲛϩ̅  ⲛ̅ⲛⲁⲑⲏⲧ  ⲙⲛ̅ⲟⲩϫⲓⲛϭⲟⲛⲥ̅ . ⲛ̅ⲧⲁⲕⲃⲁⲥⲁⲛⲓⲍⲉ  ⲙ̅ⲙⲟⲟⲩ  ϩⲓⲧⲛ̅ⲛⲉⲩⲃⲟⲧⲉ  ⲙ̅ⲙⲓⲛ  ⲙ̅ⲙⲟⲟⲩ.  ⲕ̅ⲇ̅.  Ⲕⲁⲓ  ⲅⲁⲣ  ⲁⲩⲥⲱⲣⲙ̅  ⲙ̅ⲡⲟⲩⲉⲓ  ⲉϩⲣⲁⲓ  ϩⲛ̅ⲛⲉϩⲓⲟⲟⲩⲉ  ⲛ̅ⲧⲉⲡⲗⲁⲛⲏ . ⲉⲩⲙⲉⲉⲩⲉ  ϫⲉ  ϩⲛ̅ⲛⲟⲩⲧⲉ  ⲛⲉ  ⲛⲁⲓ  ⲉⲧⲥⲏϣ  ⲛ̅ⲛ̅ⲍⲱⲟⲛ  ⲛ̅ⲛ̅ⲕⲉϩⲉⲑⲛⲟⲥ. ⲉⲁⲩⲣ̅ϩⲁⲗ  ⲙ̅ⲙⲟⲟⲩ  ⲛ̅ⲑⲉ  ⲛ̅ϩⲉⲛϣⲏⲣⲉ  ⲕⲟⲩⲓ  ⲛ̅ⲛⲁⲑⲏⲧ.    Ⲉⲧⲃⲉⲡⲁⲓ  ⲟⲛ  ⲁⲕⲧⲛ̅ⲛⲟⲟⲩ  ⲛⲁⲩ  ⲛ̅ⲟⲩϩⲁⲡ  ⲛ̅ⲥⲱⲃⲉ  ⲛ̅ⲥⲱⲟⲩ. ⲛ̅ⲑⲉ  ⲛ̅ϩⲉⲛϣⲏⲣⲉ  ⲛ̅ⲁⲧⲛⲟⲓ.  ⲕ̅Ⲋ̅.  Ⲛ̅ⲧⲟⲟⲩ  ⲇⲉ  ⲙ̅ⲡⲟⲩϫⲓⲥⲃⲱ  ϩⲓⲧⲛ̅ⲧⲉⲡⲓⲧⲓⲙⲓⲁ  ⲙⲛ̅ⲥⲱⲃⲉ  ⲛ̅ⲥⲱⲟⲩ . ⲥⲉⲛⲁⲙ̅ⲡϣⲁ  ⲛ̅ϫⲓⲡⲓⲣⲁ  ⲛ̅ⲧⲉⲕⲣⲓⲥⲓⲥ  ⲙ̅ⲡⲛⲟⲩⲧⲉ.  ⲕ̅ⲍ̅.  Ϩⲛ̅ⲛⲉⲛⲧⲁⲩϭⲱⲛⲧ̅  ⲅⲁⲣ  ⲛ̅ϩⲏⲧⲟⲩ  ⲉⲩⲑⲙ̅ⲕⲟ  ⲙ̅ⲙⲟⲟⲩ . ⲛ̅ⲧⲁⲩⲕⲟⲗⲁⲍⲉ  ⲙ̅ⲙⲟⲟⲩ  ϩⲛ̅ⲛⲉⲛⲟⲩⲙⲉⲉⲩⲉ  ⲉⲣⲟⲟⲩ  ϫⲉ  ϩⲛ̅ⲛⲟⲩⲧⲉ  ⲛⲉ . Ⲧⲟⲧⲉ  ⲁⲩⲥⲟⲩⲛ̅ⲡⲛⲟⲩⲧⲉ  ⲙ̅ⲙⲉ  ⲡⲉⲧⲉⲛⲉⲩⲁⲣⲛⲁ  ⲙ̅ⲙⲟϥ  ⲛ̅ϣⲟⲣⲡ̅  ϫⲉ  ⲛ̅ⲧⲛ̅ⲥⲟⲟⲩⲛ  ⲙ̅ⲙⲟϥ  ⲁⲛ.  ⲕ̅ⲏ̅.  Ⲉⲧⲃⲉⲡⲁⲓ  ⲁⲑⲁⲏ  ⲙ̅ⲡⲧⲁⲕⲟ  ⲉⲓ  ⲉϩⲣⲁⲓ  ⲉϫⲱⲟⲩ.

Ⲕⲉⲫ.  Ⲓ̅Ⲅ̅
 
Ϩⲛ̅ⲡⲉⲧϣⲟⲩⲉⲓⲧ  ⲅⲁⲣ  ⲛⲉ  ⲣⲱⲙⲉ  ⲛⲓⲙ  ⲉⲧⲟ  ⲛ̅ⲁⲧⲥⲟⲟⲩⲛ  ⲙ̅ⲡⲛⲟⲩⲧⲉ : ⲙ̅ⲡⲟⲩⲉϣⲥⲟⲩⲛ̅ⲡⲉⲧϣⲟⲟⲡ  ⲅⲁⲣ  ϩⲓⲧⲛ̅ⲛⲁⲅⲁⲑⲟⲛ  ⲉⲧⲟⲩⲛⲁⲩ  ⲉⲣⲟⲟⲩ . ⲟⲩⲇⲉ  ⲙ̅ⲡⲟⲩϯϩⲧⲏⲩ  ⲉⲛⲉϩⲃⲏⲩⲉ  ⲛ̅ⲥⲉⲥⲟⲩⲛ̅ⲡⲣⲉϥⲥⲱⲛⲧ̅ : ⲃ̅.  Ⲁⲗⲗⲁ  ⲛ̅ⲧⲁⲩⲙⲉⲉⲩⲉ  ⲉⲩⲕⲱϩⲧ̅  ⲏ  ⲟⲩⲡⲛⲉⲩⲙⲁ  ⲏ  ⲙ̅ⲡⲁⲏⲣ  ⲉⲧⲁⲥⲱⲟⲩ . ⲏ  ⲛ̅ⲥⲓⲟⲩ  ⲉⲧⲕⲱⲧⲉ  ⲏ  ⲙ̅ⲡⲙⲟⲟⲩ  ⲉⲧⲥⲱⲕ . ⲏ  ⲛⲉⲫⲱⲥⲧⲏⲣ  ⲛ̅ⲧⲡⲉ  ⲉⲧⲣ̅ⲟⲩⲟⲉⲓⲛ  ⲉⲡⲕⲟⲥⲙⲟⲥ  ϫⲉ  ⲛⲁⲓ  ⲛⲉ  ⲛ̅ⲛⲟⲩⲧⲉ.  ⲅ̅.  Ⲉϣϫⲉ  ⲛ̅ⲧⲁⲩⲣ̅ϣⲡⲏⲣⲉ  ⲙ̅ⲡⲉⲩⲥⲁ  ⲁⲩⲙⲉⲉⲩⲉ  ⲉⲣⲟⲟⲩ  ϫⲉ  ϩⲉⲛⲛⲟⲩⲧⲉ  ⲛⲉ. ⲙⲁⲣⲟⲩⲉⲓⲙⲉ  ϫⲉ  Ⲡ̅ϫⲟⲉⲓⲥ  ⲛ̅ⲛⲁⲓ  ⲉⲉⲓⲉ  ⲛⲉⲥⲱϥ  ⲉⲣⲟⲟⲩ  ⲛ̅ⲛⲁⲟⲩⲏⲣ  ⲛ̅ϩⲟⲩⲟ :  Ⲡⲁⲣⲭⲱⲛ  ⲅⲁⲣ  ⲙ̅ⲡⲧⲁⲙⲓⲟ  ⲙ̅ⲡⲉⲩⲥⲁ ⲡⲉⲛⲧⲁϥⲥⲟⲛⲧⲟⲩ  ⲧⲏⲣⲟⲩ.  ⲇ̅.  Ⲉϣϫⲉ  ⲛ̅ⲧⲁⲩⲡⲱϣⲥ̅  ⲉϩⲣⲁⲓ  ⲉϫⲛ̅ⲧⲉⲩϭⲟⲙ  ⲙⲛ̅ⲧⲉⲩⲉⲛⲉⲣⲅⲉⲓⲁ . ⲙⲁⲣⲟⲩⲛⲟⲓ  ϭⲉ  ⲉⲃⲟⲗ  ⲛ̅ϩⲏⲧⲟⲩ  ϫⲉ  ⲡⲉⲛⲧⲁϥⲥⲃ̅ⲧⲱⲧⲟⲩ  ⲉⲉⲓⲉ  ϥϭⲙ̅ϭⲟⲙ  ⲉⲣⲟⲟⲩ  ⲛ̅ⲟⲩⲏⲣ  ⲛ̅ϩⲟⲩⲟ.    Ⲉⲩⲧⲟⲛⲧⲛ̅  ⲅⲁⲣ  ⲉⲡⲁⲛⲁⲓ  ⲙⲛ̅ⲧⲛⲟϭ  ⲙ̅ⲡⲣⲉϥⲥⲱⲛⲧ̅ . ⲉⲩⲛⲁⲩ  ⲉⲃⲟⲗ  ⲙ̅ⲙⲟⲟⲩ  ⲉⲡⲣⲉϥⲣ̅ϩⲱⲃ  ⲙ̅ⲡⲉⲩϫⲡⲟ.  Ⲋ.  Ⲁⲗⲗⲁ  ⲛⲉⲓⲕⲟⲟⲩⲉ  ⲟⲛ  ⲟⲩⲛⲁⲣⲓⲕⲉ  ⲉⲣⲟⲟⲩ : ⲕⲁⲓ  ⲅⲁⲣ  ⲛ̅ⲧⲟⲟⲩ  ϩⲱⲟⲩ  ⲟⲛ  ⲥⲉⲡⲗⲁⲛⲁ . ⲉⲩϣⲓⲛⲉ  ⲛ̅ⲥⲁⲡⲛⲟⲩⲧⲉ  ⲉⲩⲟⲩⲉϣϩⲉ  ⲉⲣⲟϥ.  ⲍ̅.  Ⲉⲩϣⲟⲟⲡ  ⲅⲁⲣ  ϩⲛ̅ⲛⲉϥϩⲃⲏⲩⲉ  ⲁⲩⲱ  ⲉⲩϩⲟⲧϩⲧ̅ : ⲥⲉⲡⲓⲑⲉ  ⲅⲁⲣ  ⲉϫⲛ̅ⲛⲉⲧⲟⲩⲛⲁⲩ  ⲉⲣⲟⲟⲩ  ϫⲉ  ⲛⲉⲥⲱⲟⲩ.  ⲏ̅.  Ⲛⲉⲓⲕⲟⲟⲩⲉ  ⲟⲛ  ⲛ̅ⲥⲉⲧⲙⲁⲓⲏⲩ  ⲁⲛ.  ⲑ̅.  Ⲉϣϫⲉ  ⲁⲩⲉϣⲛⲟⲓ  ⲟⲛ  ⲛ̅ⲧⲉⲓϩⲉ  ϩⲱⲥⲧⲉ  ⲉⲧⲟⲛⲧⲛ̅  ⲉⲛⲁⲡⲕⲟⲥⲙⲟⲥ . ⲉⲉⲓⲉ  Ⲡϫⲟⲉⲓⲥ  ⲛ̅ⲛⲁⲓ  ⲉⲧⲃⲉⲟⲩ  ⲛ̅ⲧⲟϥ  ⲙ̅ⲡⲟⲩϩⲉ  ⲉⲣⲟϥ  ϩⲛ̅ⲟⲩϭⲉⲡⲏⲑ    Ϩⲉⲛⲉⲃⲓⲏⲛ  ⲛⲉ  ⲉⲣⲉⲧⲉⲩϩⲉⲗⲡⲓⲥ  ϩⲓⲛⲉⲧⲙⲟⲟⲩⲧ : ⲉⲩⲙⲟⲩⲧⲉ  ⲉⲛⲉϩⲃⲏⲩⲉ  ⲛ̅ⲣ̅ⲣⲱⲙⲉ  ϫⲉ  ϩⲛ̅ⲛⲟⲩⲧⲉ  ⲛⲉ. Ⲟⲩⲛⲟⲩⲃ  ⲙⲛ̅ⲟⲩϩⲁⲧ  ϩⲛ̅ⲙⲉⲉⲩⲉ  ⲛ̅ⲧⲉⲭⲛⲏ  ⲙⲛ̅ϩⲛ̅ϩⲣ̅ⲃ  ⲛ̅ⲛ̅ⲍⲱⲟⲛ . ⲏ  ⲟⲩⲱⲛⲉ  ⲛ̅ⲁⲧϣⲁⲩ  ⲛ̅ϩⲱⲃ  ⲛ̅ⲁⲣⲭⲁⲓⲟⲥ.  ⲓ̅ⲁ.  Ⲟⲩϩⲁⲙϣⲉ  ⲅⲁⲣ  ⲣ̅ⲣⲉϥⲕⲱⲱⲣⲉ  ⲙ̅ⲙ̅ⲙⲁ  ⲛ̅ϣⲏⲛ  ⲁϥϣⲉⲧⲟⲩϣⲏⲛ  ⲉⲛⲁⲛⲟⲩϥ . ⲁϥⲕⲉⲕⲧⲉϥⲕⲟⲩⲕⲉ  ⲧⲏⲣⲥ̅  ϩⲛ̅ⲧⲉϥⲥⲃⲱ. ⲁϥⲣ̅ϩⲉⲛⲧⲉⲭⲛⲏ  ⲉⲣⲟϥ  ⲉⲛⲉⲥⲱⲟⲩ . ⲁϥⲧⲁⲙⲓⲟϥ  ⲛ̅ϩⲛ̅ⲥⲕⲉⲩⲟⲥ  ⲛ̅ϣⲁⲩ  ⲛ̅ⲑⲩⲡⲏⲣⲉⲥⲓⲁ  ⲙ̅ⲡⲉϥⲱⲛϩ̅ :  ⲓ̅ⲃ.  Ⲛⲉⲛⲧⲁⲩⲥⲉⲉⲡⲉ  ⲇⲉ  ⲉⲧⲉϥⲉⲓⲟⲡⲉ  ⲁϥⲥⲁϩⲧⲉ  ⲙ̅ⲙⲟⲟⲩ  ⲁϥⲥⲃ̅ⲧⲉⲧⲉϥϩⲣⲉ  ⲁϥⲧⲥⲓⲟϥ:  ⲓ̅ⲅ.  Ⲡⲉⲑⲟⲟⲩ  ⲇⲉ  ⲛ̅ϩⲏⲧⲟⲩ  ⲉⲧⲉⲛϥ̅ⲣ̅ϣⲁⲩ  ⲁⲛ  ⲉⲗⲁⲁⲩ . ⲡϣⲉ  ⲉⲧϭⲟⲟⲙⲉ  ⲉⲧⲣⲏⲧ  ⲉⲃⲟⲗ  ⲛ̅ⲉⲓⲃ . ⲁϥϫⲓⲧϥ̅  ⲁϥⲙⲟⲛⲅϥ̅  ϩⲙ̅ⲡⲣⲟⲟⲩϣ  ⲛ̅ⲧⲉϥⲉⲓⲟⲡⲉ . ⲁϥⲧⲁⲙⲓⲟϥ  ϩⲓⲧⲛ̅ⲧⲙⲛ̅ⲧⲣⲙ̅ⲛ̅ϩⲏⲧ  ⲛ̅ⲧⲉϥⲥⲃⲱ . ⲁϥⲧⲛ̅ⲧⲱⲛϥ̅  ⲉⲩϩⲓⲕⲱⲛ  ⲛ̅ⲣⲱⲙⲉ.  ⲓ̅ⲇ.  ⲏ  ⲁϥⲧⲣⲉϥⲉⲓⲛⲉ  ⲛ̅ⲟⲩⲧⲃ̅ⲛⲏ  ⲛ̅ⲉⲗⲁⲭⲓⲥⲧⲟⲛ. ⲁϥϫⲁϩϥ̅  ⲙ̅ⲡⲏⲣϣ̅  ⲁϥⲧⲣⲉⲡⲉϥⲁⲩⲁⲛ  ⲧⲣⲟϣⲣⲉϣ:  ⲛⲉϫⲃⲓⲛ  ⲧⲏⲣⲟⲩ  ⲉⲧⲛ̅ϩⲏⲧϥ̅  ⲁϥⲥⲟⲗϭⲟⲩ  ⲛ̅ⲟⲙⲉ.    Ⲁϥⲧⲁⲙⲓⲉⲟⲩⲏⲓ  ⲛⲁϥ  ⲉϥⲙ̅ⲡϣⲁ  ⲙ̅ⲙⲟϥ . ⲁϥⲧⲁϩⲟϥ  ⲉⲣⲁⲧϥ̅  ⲉⲧⲟⲩⲛ̅ⲟⲩϫⲟ  ⲁϥⲟⲣϫϥ̅  ϩⲛ̅ⲟⲩⲡⲉⲛⲓⲡⲉ.  ⲓ̅Ⲋ.  Ⲁϥϥⲓⲡⲉϥⲣⲟⲟⲩϣ  ϫⲉⲕⲁⲥ  ⲛ̅ⲛⲉϥϩⲉ:  ϥⲥⲟⲟⲩⲛ  ϫⲉ  ⲙⲛ̅ϣϭⲟⲙ  ⲙ̅ⲙⲟϥ  ⲉⲃⲟⲏⲑⲓ  ⲉⲣⲟϥ .  Ⲟⲩϩⲓⲕⲱⲛ  ⲅⲁⲣ  ⲧⲉ  ⲉⲥⲣ̅ⲭⲣⲓⲁ  ⲛ̅ϥⲓⲡⲉⲥⲣⲟⲟⲩϣ.  ⲓ̅ⲍ.  Ⲉϥϣⲗⲏⲗ  ⲇⲉ  ⲉⲧⲃⲉⲛ̅ⲕⲁ  ϩⲓϣⲉⲗⲉⲉⲧ  ϩⲓϣⲏⲣⲉ . ⲛϥϣⲓⲡⲉ  ⲁⲛ  ⲉϥϣⲁϫⲉ  ⲙⲛ̅ⲛⲉⲧⲙⲟⲟⲩⲧ .  ⲉⲧⲃⲉⲡⲉϥⲟⲩϫⲁⲓ  ⲙⲉⲛ  ⲛϥ̅ⲱϣ  ⲉϩⲣⲁⲓ  ⲉⲡⲁⲧϭⲟⲙ.  ⲓ̅ⲏ. Ⲉⲧⲃⲉⲡⲉϥⲱⲛϩ̅  ⲉϥⲥⲟⲡⲥ̅  ⲙ̅ⲡⲉⲧⲙⲟⲟⲩⲧ . ⲉⲧⲃⲉⲧⲉϥⲃⲟⲏⲑⲓⲁ  ⲉϥⲧⲱⲃϩ̅  ⲙ̅ⲡⲉⲧⲉⲛϥ̅ⲁⲓⲥⲑⲁⲛⲓ  ⲁⲛ . ⲙⲛ̅ⲡⲉⲧⲉⲛϥ̅ⲉϣⲁϩⲉⲣⲁⲧϥ̅  ⲉⲧⲃⲉⲧⲉϥϩⲓⲏ  ⲉⲧϥ̅ⲛⲁ  ⲙ̅ⲙⲟⲥ.  ⲓ̅ⲑ.  Ⲉⲧⲃⲉⲟⲩϩⲏⲩ  ⲇⲉ  ⲙⲛ̅ϯⲟⲡⲉ  ⲙ̅ⲡⲙⲁⲧⲉ  ⲛ̅ⲛⲉϥϭⲓϫ. ⲁϥⲁⲓⲧⲓ  ⲛ̅ⲟⲩϭⲟⲙ  ⲃⲟⲗ  ϩⲓⲧⲙ̅ⲡⲉⲧⲟⲩⲱϣϥ̅  ϩⲛ̅ⲛⲉϥϭⲓϫ.

Ⲕⲉⲫ.  Ⲓ̅Ⲇ̅
 
Ⲟⲩⲁ  ⲟⲛ  ⲉϥⲛⲁⲥϭⲏⲣ  ϩⲓⲧⲛ̅ⲛⲟϭ  ⲛ̅ϩⲟⲉⲓⲙ . ⲉϥⲱϣ  ⲉϩⲣⲁⲓ  ⲉⲩϣⲉ  ⲉϥϩⲟⲟⲩ  ⲉⲡϫⲟⲓ  ⲉⲧϥ̅ⲁⲗⲉ  ⲉⲣⲟϥ.  ⲃ̅.  Ⲡⲏ  ⲅⲁⲣ  ⲛ̅ⲧⲁⲩⲙⲉⲉⲩⲉ  ⲉⲣⲟϥ  ⲉⲧⲃⲉⲧⲉⲡⲓⲑⲩⲙⲓⲁ  ⲙ̅ⲡϩⲏⲩ . ⲧⲥⲟⲫⲓⲁ  ⲇⲉ  ⲉⲧⲛⲉⲥⲃⲱⲱⲥ  ⲧⲉⲛⲧⲁⲥⲙⲟⲛⲕϥ̅.  ⲅ̅.  ⲛ̅ⲧⲟⲕ  ⲇⲉ  ⲡⲉⲛⲉⲓⲱⲧ  ⲧⲉⲕⲡⲣⲟⲛⲟⲓⲁ  ⲧⲉⲧⲣ̅ϩⲙ̅ⲙⲉ  ⲙ̅ⲙⲟϥ . ϫⲉ  ⲁⲕϯϩⲓⲏ  ⲟⲛ  ⲛ̅ⲑⲁⲗⲁⲥⲥⲁ . ⲁⲩⲱ  ϩⲓⲏ   ⲙ̅ⲙⲟⲟϣⲉ  ⲉϥⲟⲣϫ̅  ϩⲛ̅ⲛ̅ϩⲟⲉⲓⲙ.  ⲇ̅.  Ⲉⲕⲧⲁⲙⲟ  ⲙ̅ⲙⲟⲛ  ϫⲉ  ⲟⲩⲛϭⲟⲙ  ⲙ̅ⲙⲟⲕ   ⲉⲧⲟⲩϫⲟ  ⲉⲃⲟⲗ  ϩⲙ̅ⲙⲁ  ⲛⲓⲙ . ϫⲉⲕⲁⲁⲥ  ϩⲱⲟⲩ  ⲟⲛ  ⲉⲩⲉⲁⲗⲉ  ⲛ̅ϭⲓⲛⲉⲧⲉⲛ̅ⲥⲉⲥⲟⲟⲩⲛ  ⲁⲛ  ⲛ̅ⲛⲏⲏⲃⲉ.   Ⲕⲟⲩⲱϣ  ⲉⲧⲙ̅ⲧⲣⲉⲩϣⲱⲡⲉ  ⲉⲩⲟ  ⲛ̅ⲁⲣⲅⲟⲛ  ⲛ̅ϭⲓⲛⲉϩⲃⲏⲩⲉ  ⲛ̅ⲧⲉⲕⲥⲟⲫⲓⲁ :  Ⲉⲧⲃⲉⲡⲁⲓ  ⲡⲣⲱⲙⲉ  ⲡⲓⲥⲧⲉⲩⲉ  ⲛ̅ⲛⲉⲯⲩⲭⲏ  ⲛ̅ⲉⲗⲁⲭⲓⲥⲧⲟⲛ  ⲛ̅ϣⲉ . ⲁⲩⲱ  ⲥⲉⲟⲩϫⲁⲓ  ⲉⲡϩⲟⲉⲓⲙ  ⲉⲩϫⲓⲟⲟⲣ  ⲛ̅ⲛⲉⲩⲉϫⲏⲩ.  Ⲋ.  Ϩⲛ̅ⲧⲉϩⲟⲩⲉⲓⲧⲉ  ⲅⲁⲣ  ⲉⲩϣⲁⲛϥⲱⲧⲉ  ⲉⲃⲟⲗ  ⲛ̅ⲛ̅ⲅⲓⲅⲁⲥ  ⲛ̅ϫⲁⲥⲓϩⲏⲧ . ⲛ̅ⲧⲁⲑⲉⲗⲡⲓⲥ  ⲙ̅ⲡⲕⲟⲥⲙⲟⲥ  ⲟⲩϫⲁⲓ  ⲉⲃⲟⲗ  ϩⲓⲧⲛ̅ⲟⲩϫⲟⲓ  ⲁⲥϣⲱϫⲡ̅  ⲛ̅ⲟⲩⲥⲡⲉⲣⲙⲁ  ⲙ̅ⲡϫⲡⲟ  ⲙ̅ⲡⲕⲟⲥⲙⲟⲥ  ⲉⲁⲧⲉⲕϭⲓϫ  ⲣ̅ϩⲙ̅ⲙⲉ  ⲙ̅ⲙⲟⲥ.  ⲍ̅.  Ⲁⲩⲥⲙⲟⲩ  ⲅⲁⲣ  ⲉⲡϣⲉ  ⲉⲧⲉⲣⲉⲧⲇⲓⲕⲁⲓⲟⲥⲩⲛⲏ  ⲛⲁϣⲱⲡⲉ  ⲉⲃⲟⲗ  ϩⲓⲧⲟⲟⲧϥ̅.  ⲏ̅.  Ϥⲥϩⲟⲩⲟⲣⲧ̅  ⲇⲉ  ⲛ̅ⲧⲟϥ  ⲛ̅ϭⲓⲡⲙⲟⲩⲛⲅ̅  ⲛ̅ϭⲓϫ  ϣⲟⲟⲡ  ⲙⲛ̅ⲡⲉⲛⲧⲁϥⲣ̅ϩⲱⲃ  ⲉⲣⲟϥ :  ϫⲉ  ⲡⲁⲓ  ⲙⲉⲛ  ⲁϥⲣ̅ϩⲱⲃ  ⲡⲏ  ⲇⲉ  ⲁⲩⲙⲟⲩⲧⲉ  ⲉⲣⲟϥ  ϫⲉ  ⲛⲟⲩⲧⲉ  ⲉⲩϣⲉ  ⲉϥⲧⲁⲕⲏⲟⲩ  ⲡⲉ.  ⲑ̅.  Ⲡⲁⲥⲉⲃⲏⲥ  ⲅⲁⲣ  ⲁⲩⲱ  ⲧⲉϥⲕⲉⲙⲛ̅ⲧϣⲁϥⲧ̅  ⲡⲛⲟⲩⲧⲉ  ⲙⲟⲥⲧⲉ  ⲙ̅ⲙⲟⲟⲩ  ϩⲓⲟⲩⲥⲟⲡ :    Ⲕⲁⲓ  ⲅⲁⲣ  ⲡⲉⲛⲧⲁϥⲙⲟⲛⲅϥ̅  ⲥⲉⲛⲁⲕⲟⲗⲁⲍⲉ  ⲙ̅ⲙⲟϥ  ⲙⲛ̅ⲡⲉⲛⲧⲁϥⲧⲁⲙⲓⲟϥ.  ⲓ̅ⲁ.  Ⲉⲧⲃⲉⲡⲁⲓ  ⲥⲉⲛⲁϭⲙ̅ⲡϣⲓⲛⲉ  ⲛ̅ⲛ̅ⲕⲉⲉⲓⲇⲱⲗⲟⲛ  ⲛ̅ⲛ̅ϩⲉⲑⲛⲟⲥ . ϫⲉ ϩⲙ̅ⲡⲥⲱⲛⲧ̅  ⲙ̅ⲡⲛⲟⲩⲧⲉ  ⲁⲩϣⲱⲡⲉ  ⲉϩⲛ̅ⲃⲟⲧⲉ . ⲁⲩⲱ  ϩⲛ̅ⲥⲕⲁⲛⲇⲁⲗⲟⲛ  ⲛ̅ⲛⲉⲯⲩⲭⲏ  ⲛ̅ⲣ̅ⲣⲱⲙⲉ . ⲁⲩⲱ  ⲉⲩϭⲟⲣϭⲥ̅  ⲛ̅ⲛ̅ⲟⲩⲉⲣⲏⲧⲉ  ⲛ̅ⲛⲁⲑⲏⲧ.  ⲓ̅ⲃ.  Ⲧⲁⲣⲭⲏ  ⲛ̅ⲧⲡⲟⲣⲛⲓⲁ  ⲡⲉ  ⲡⲧⲁⲙⲓⲟ  ⲛ̅ⲛ̅ⲉⲓⲇⲱⲗⲟⲛ . ⲁⲩⲱ  ⲡⲉⲩⲙⲟⲩⲛⲅ̅  ⲡⲉ  ⲡⲧⲁⲕⲟ  ⲙ̅ⲡⲉⲩⲱⲛϩ̅.  ⲓ̅ⲅ.  Ⲟⲩⲇⲉ  ⲅⲁⲣ  ⲛⲉⲩϣⲟⲟⲡ  ⲁⲛ  ϫⲓⲛⲛ̅ϣⲟⲣⲡ̅ . ⲟⲩⲇⲉ  ⲛ̅ⲥⲉϣⲟⲟⲡ  ⲁⲛ  ⲛ̅ϣⲁⲉⲛⲉϩ.  ⲓ̅ⲇ.  Ϩⲛ̅ⲧⲙⲛ̅ⲧϣⲟⲩϣⲟⲩ  ⲅⲁⲣ  ⲛ̅ⲣ̅ⲣⲱⲙⲉ  ⲉⲛⲧⲁⲩⲉⲓ  ⲉϩⲟⲩⲛ  ⲉⲡⲕⲟⲥⲙⲟⲥ : ⲉⲧⲃⲉⲡⲁⲓ  ⲁⲩⲧⲟϣⲧ̅  ϩⲛ̅ⲧⲉⲩϩⲁⲡ  ϩⲛ̅ⲟⲩϣⲱⲱⲧ  ⲉⲃⲟⲗ.    Ⲟⲩⲉⲓⲱⲧ  ⲅⲁⲣ  ⲉϥⲗⲩⲡⲓ  ⲉϫⲛ̅ⲫⲏⲃⲉ  ⲙ̅ⲡⲉϥϣⲏⲣⲉ  ⲛ̅ⲧⲁⲩϥⲓⲧϥ̅  ϩⲛ̅ⲟⲩϭⲉⲡⲏ  ⲉϥⲟ  ⲛ̅ϣⲁⲣⲁϩⲉ . ⲁϥⲧⲁⲙⲓⲉⲟⲩϩⲓⲕⲱⲛ  ⲛⲁϥ  ⲉⲩⲣⲱⲙⲉ  ⲉϥⲙⲟⲟⲩⲧ  ⲙ̅ⲡⲓⲟⲩⲟⲉⲓϣ  ⲡⲉ  ⲧⲉⲛⲟⲩ  ⲁϥⲧⲁⲙⲓⲟϥ  ⲛ̅ⲑⲉ  ⲛ̅ⲟⲩⲛⲟⲩⲧⲉ . ⲁϥϯ  ⲉⲧⲟⲟⲧⲟⲩ  ⲛ̅ϩⲉⲛⲙⲩⲥⲧⲏⲣⲓⲟⲛ  ⲙⲛ̅ϩⲉⲛϣⲙ̅ϣⲉ  ⲛ̅ⲛⲉⲧϩⲁⲣⲁⲧϥ̅.  ⲓ̅Ⲋ.  Ⲉⲓⲧⲁ  ϩⲙ̅ⲡⲉⲟⲩⲟⲉⲓϣ  ⲁϥϭⲙ̅ϭⲟⲙ  ⲛ̅ϭⲓⲡⲉⲓⲥⲱⲛⲧ̅  ⲛ̅ϣⲁϥⲧ̅ . ⲉⲩⲁⲣⲉϩ  ⲉⲣⲟϥ  ⲛ̅ⲑⲉ  ⲛ̅ⲟⲩⲛⲟⲙⲟⲥ . ⲁⲩⲱ  ϩⲙ̅ⲡⲟⲩⲉϩⲥⲁϩⲛⲉ  ⲛ̅ⲛ̅ⲧⲩⲣⲁⲛⲛⲟⲥ  ⲁⲩⲟⲩⲱϣⲧ̅  ⲛ̅ⲙ̅ⲙⲟⲩⲛⲅ̅  ⲛ̅ϭⲓϫ :  ⲓ̅ⲍ.  Ⲛ̅ⲕⲉⲣⲱⲙⲉ  ⲇⲉ  ⲉⲧⲟⲩⲏⲩ  ⲙ̅ⲙⲟⲟⲩ  ⲙ̅ⲡⲟⲩⲉϣⲧⲁⲓⲟⲟⲩ  ⲙ̅ⲡⲉⲩⲙ̅ⲧⲟ  ⲉⲃⲟⲗ . ⲁⲩϥⲓⲡⲧⲟⲛⲧⲛ̅  ⲙ̅ⲫⲟ  ⲉⲧⲟⲩⲏⲟⲩ  ⲙ̅ⲙⲟⲟⲩ  ⲁⲩⲧⲁⲙⲓⲉⲟⲩϩⲓⲕⲱⲛ  ⲉⲛⲉⲥⲱⲥ  ⲙ̅ⲡⲣ̅ⲣⲟ  ⲉⲩⲧⲁⲉⲓⲟ  ⲙ̅ⲙⲟϥ . ϫⲉⲕⲁⲥ  ⲉⲩⲉⲣ̅ⲁⲧⲟⲟⲧⲟⲩ  ⲉⲕⲱⲣϣ̅  ⲉⲡⲉⲧⲟⲩⲏϩ  ⲛ̅ⲑⲉ  ⲛ̅ⲟⲩⲁ  ⲉϥϩⲁⲧⲏⲩ.  ⲓ̅ⲏ.  Ⲁⲩⲱ  ⲧⲙⲛ̅ⲧⲣⲉϥⲣ̅ⲧⲱⲣⲉ  ⲙ̅ⲡⲣⲉϥⲣ̅ⲉⲓⲟⲡⲉ  ⲁⲥⲥⲉⲕⲛ̅ⲕⲟⲟⲩⲉ  ⲉⲩⲟ  ⲛ̅ⲁⲧⲥⲟⲟⲩⲛ  ⲙⲛ̅ⲛ̅ⲥⲱⲥ  ⲉϣⲱⲡⲉ  ⲛⲁϥ  ⲉⲩⲙⲏⲛ  ⲉⲃⲟⲗ.  ⲓ̅ⲑ.  Ⲛ̅ⲧⲟϥ  ⲅⲁⲣ  ⲉϥⲟⲩⲉϣⲁⲣⲉⲥⲕⲉ  ⲙ̅ⲡⲣ̅ⲣⲟ : ϩⲣⲁⲓ  ⲅⲁⲣ  ϩⲛ̅ⲧⲉϥⲧⲉⲭⲛⲏ  ⲁϥⲣ̅ⲁⲛⲁϥ  ⲁϥⲧⲁⲙⲓⲟϥ  ⲉⲛⲉⲥⲱϥ  ⲉϩⲟⲩⲟ  ⲙ̅ⲡⲉϥⲉⲓⲛⲉ :    Ⲡⲙⲏⲏϣⲉ  ⲉⲩⲥⲱⲕ  ⲙ̅ⲙⲟϥ  ⲉⲧⲃⲉⲫⲱⲃ  ⲉⲧⲛⲉⲥⲱϥ  ⲛ̅ϯⲟⲡⲉ .  ⲡⲣⲱⲙⲉ  ⲛ̅ⲧⲁⲩⲧⲁⲙⲓⲟϥ  ϩⲁⲑⲏ  ⲛ̅ⲟⲩⲕⲟⲩⲓ  ⲧⲉⲛⲟⲩ  ⲁⲩⲙⲉⲉⲩⲉ  ϫⲉ  ⲟⲩⲛⲟⲩⲧⲉ  ⲡⲉ.  ⲕ̅ⲁ̅.  Ⲁⲡⲁⲓ  ϣⲱⲡⲉ  ⲉⲩϭⲟⲣϭⲥ̅  ϩⲙ̅ⲡⲉⲩⲱⲛϩ̅ . ϫⲉ  ⲛ̅ⲣⲱⲙⲉ  ⲛ̅ⲧⲁⲩⲣ̅ϩⲙ̅ϩⲁⲗ  ⲙ̅ⲫⲏⲃⲉ  ⲛ̅ⲣ̅ⲣⲱⲟⲩ . ⲡⲣⲁⲛ  ⲉⲛϣⲟⲩⲧⲁⲁϥ  ⲁⲛ  ⲉϭⲉⲗⲁⲁⲩ  ⲁⲩⲧⲁⲁϥ  ⲉϩⲉⲛⲱⲛⲉ  ⲙⲛ̅ϩⲉⲛϣⲉ.  ⲕ̅ⲃ̅.  Ⲉⲓⲧⲁ  ⲙ̅ⲡϥ̅ⲣⲱϣⲉ  ⲛⲁⲩ  ⲉⲥⲱⲣⲙ̅  ⲉⲃⲟⲗ  ϩⲙ̅ⲡϣⲟϫⲛⲉ  ⲙ̅ⲡⲛⲟⲩⲧⲉ . ⲁⲗⲗⲁ  ⲁⲩⲣ̅ⲡⲕⲉⲱⲛϩ̅  ϩⲛ̅ⲟⲩⲛⲟϭ  ⲙ̅ⲡⲟⲗⲉⲙⲟⲥ  ⲙ̅ⲙⲛ̅ⲧⲁⲧⲥⲟⲟⲩⲛ . ⲛⲉⲉⲓⲡⲉⲑⲟⲟⲩ  ⲧⲏⲣⲟⲩ  ⲥⲉⲙⲟⲩⲧⲉ  ⲉⲣⲟⲟⲩ  ϫⲉ  ϯⲣⲏⲛⲏ.  ⲕ̅ⲅ̅.  ⲏ  ⲅⲁⲣ  ⲥⲉϣⲱⲱⲧ  ⲛ̅ⲛⲉⲩϣⲏⲣⲉ  ϩⲛ̅ⲛⲉⲩϣⲁ . ⲏ  ⲥⲉⲉⲓⲣⲉ  ⲛ̅ϩⲛ̅ⲙⲩⲥⲧⲏⲣⲓⲟⲛ  ⲉⲩϩⲏⲡ. ⲏ  ⲉⲩⲟ  ⲛ̅ϣⲟⲉⲓⲧ  ϩⲛ̅ϩⲉⲛⲙⲁ  ⲛ̅ⲥⲱ  ⲉⲃⲟⲗ  ϩⲛ̅ϩⲉⲛⲕⲉⲥⲱⲛⲧ̅  ⲉⲩϣⲟⲃⲉ.  ⲕ̅ⲇ̅.  Ⲁⲩⲗⲟ  ϭⲉ  ⲉⲩϩⲁⲣⲉϩ  ⲉⲡⲃⲓⲟⲥ  ⲙⲛ̅ⲡⲅⲁⲙⲟⲥ  ⲉϥⲧⲃ̅ⲃⲏⲩ . ⲡⲟⲩⲁ  ⲇⲉ  ⲡⲟⲩⲁ  ⲉϥϭⲱⲣϭ̅  ⲉⲛⲉϥⲉⲣⲏⲩ  ⲉϩⲱⲧⲃ̅  ⲙ̅ⲙⲟϥ . ⲏ  ⲉⲣ̅ⲕⲣⲟϥ  . . . .  ⲛϥ̅ⲑⲙ̅ⲕⲟ  ⲙ̅ⲙⲟϥ.    Ⲁⲙⲁ  ⲛⲓⲙ  ⲙⲟⲩϩ  ⲛ̅ⲕⲣⲟϥ  ϩⲓϩⲱⲧⲃ̅  ϩⲓⲥⲛⲟϥ  ϩⲓϫⲓⲟⲩⲉ . ⲧⲁⲕⲟ  ϩⲓⲁⲡⲓⲥⲧⲓⲁ . ϣⲧⲟⲣⲧⲣ̅ . ⲱⲣⲕ̅  ⲛ̅ⲛⲟⲩϫ . ⲡⲣ̅ⲱⲃϣ̅  ⲛ̅ⲛ̅ⲁⲅⲁⲑⲟⲛ.  ⲕ̅Ⲋ̅.  Ⲧⲙⲛ̅ⲧⲁⲧϩⲙⲟⲧ . ⲡⲥⲱϣϥ̅  ⲛ̅ⲛⲉⲯⲩⲭⲏ . ⲡϣⲓⲃⲉ  ⲙ̅ⲡⲥⲱⲛⲧ̅  ⲙⲛ̅ⲡⲅⲁⲙⲟⲥ  ⲉϥϣⲧⲣ̅ⲧⲱⲣ . ⲧⲙⲛ̅ⲧⲛⲟⲉⲓⲕ  ⲁⲩⲱ  ⲡϫⲱϩⲙ̅.  ⲕ̅ⲍ̅.  Ⲡϣⲙ̅ϣⲉ  ⲅⲁⲣ  ⲛ̅ⲛ̅ⲉⲓⲇⲱⲗⲟⲛ  ⲉⲧⲉⲛ̅ϩⲛ̅ϣⲟⲩⲧⲁⲩⲉⲣⲓⲛⲟⲩ  ⲁⲛ . ⲛ̅ⲧⲟϥ  ⲡⲉ  ⲧⲁⲣⲭⲏ  ⲙ̅ⲡⲉⲑⲟⲟⲩ  ⲛⲓⲙ  ⲙⲛ̅ⲧⲁⲓⲧⲓⲁ  ⲙⲛ̅ⲑⲁⲏ.  ⲕ̅ⲏ̅.  ⲏ  ⲅⲁⲣ  ⲥⲉⲗⲟⲃⲉ  ϩⲁⲡ̅ϯϩⲉ . ⲏ  ⲥⲉⲡⲣⲟⲫⲏⲧⲉⲩⲉ  ⲛ̅ⲛⲟⲩϫ  ⲥⲉⲟⲛϩ̅  ϩⲛ̅ⲟⲩϫⲓⲛϭⲟⲛⲥ̅ . ⲏ  ⲥⲉϭⲉⲡⲏ  ⲉⲱⲣⲕ̅  ⲛ̅ⲛⲟⲩϫ.  ⲕ̅ⲑ̅.  Ⲉⲩⲕⲱ  ⲅⲁⲣ  ⲛ̅ϩⲧⲏⲩ  ⲉϩⲛ̅ⲉⲓⲇⲱⲗⲟⲛ  ⲉⲩⲙⲟⲟⲩⲧ . ⲥⲉⲱⲣⲕ̅  ⲕⲁⲕⲱⲥ  ⲛ̅ⲥⲉⲣ̅ϩⲟⲧⲉ  ⲁⲛ  ϫⲉ  ⲛ̅ⲛⲉⲡⲉⲑⲟⲟⲩ  ⲧⲁϩⲟⲟⲩ.    Ⲫⲁⲡ  ⲛⲁⲧⲁϩⲟⲟⲩ  ⲙ̅ⲡⲉⲙⲡϣⲁ  ⲙ̅ⲫⲱⲃ  ⲥⲛⲁⲩ . ϫⲉ  ⲁⲩⲙⲉⲉⲩⲉ  ⲕⲁⲕⲱⲥ  ⲉϩⲟⲩⲛ  ⲉⲡⲛⲟⲩⲧⲉ  ⲉⲩⲕⲱ  ⲛ̅ϩⲧⲏⲩ  ⲉϩⲛ̅ⲉⲓⲇⲱⲗⲟⲛ . ⲁⲩⲱ  ⲉⲩⲱⲣⲕ̅  ⲕⲁⲕⲱⲥ  ϩⲛ̅ⲟⲩϫⲓⲛϭⲟⲛⲥ̅  ⲙⲛ̅ⲟⲩⲕⲣⲟϥ  ⲉⲁⲩⲕⲁⲧⲁⲫⲣⲟⲛⲉⲓ  ⲛ̅ⲧⲉⲕⲣⲓⲥⲓⲥ.  ⲗ̅ⲁ̅.  Ⲛ̅ⲛⲉⲧⲟⲩⲱⲙ  ⲙ̅ⲙⲟⲟⲩ  ⲁⲗⲗⲁ  ⲫⲁⲡ ⲛ̅ⲛⲉⲧⲣ̅ⲛⲟⲃⲉ  ⲡⲉ  ⲉϣⲁϥⲉⲓ  ⲛ̅ⲥⲟⲡ  ⲛⲓⲙ  ⲉϫⲛ̅ⲧⲡⲁⲣⲁⲃⲁⲥⲓⲥ  ⲛ̅ⲣ̅ⲣⲉϥϫⲓⲛϭⲟⲛⲥ̅.
 
Ⲕⲉⲫ.  Ⲓ̅Ⲉ̅
 
Ⲛ̅ⲧⲟⲕ  ⲇⲉ  ⲡⲛⲟⲩⲧⲉ  ⲛ̅ⲧⲕ̅ⲟⲩⲭⲣⲏⲥⲧⲟⲥ  ⲁⲩⲱ  ⲛ̅ⲧⲕ̅ⲟⲩⲙⲉ . ⲛ̅ⲧⲕ̅ⲟⲩϩⲁⲣϣ̅ϩⲏⲧ  ⲉⲕⲥⲙⲓⲛⲉ  ⲙ̅ⲡⲧⲏⲣϥ̅  ϩⲛ̅ⲧⲱϣ  ϩⲓⲛⲁ.  ⲃ̅.  Ⲕⲁⲛ  ⲉⲛϣⲁⲛⲣ̅ⲛⲟⲃⲉ  ⲁⲛⲟⲛ  ⲡⲉⲧⲉⲛⲱⲕ  ⲛⲉ  ⲉⲛⲥⲟⲟⲩⲛ  ⲛ̅ⲧⲉⲕⲁⲙⲁϩⲧⲉ :  ⲛ̅ⲧⲛ̅ⲛⲁⲣ̅ⲛⲟⲃⲉ  ⲁⲛ  ⲉⲛⲥⲟⲟⲩⲛ  ϫⲉ  ⲉⲛⲏⲡ  ⲉⲣⲟⲕ.  ⲅ̅.  Ⲟⲩⲇⲓⲕⲁⲓⲟⲥⲩⲛⲏ  ⲅⲁⲣ  ⲉⲥϫⲏⲕ  ⲉⲃⲟⲗ  ⲡⲉ  ⲡⲥⲟⲩⲱⲛⲅ̅ . ⲁⲩⲱ  ⲧⲛⲟⲩⲛⲉ  ⲙ̅ⲡⲱⲛϩ̅  ⲡⲉ  ⲡⲥⲟⲟⲩⲛ  ⲙ̅ⲡⲉⲕⲁⲙⲁϩⲧⲉ.  ⲇ̅.  Ⲟⲩⲧⲉ  ⲅⲁⲣ  ⲙ̅ⲡⲥ̅ⲡⲗⲁⲛⲁ  ⲙ̅ⲙⲟⲛ  ⲛ̅ϭⲓⲧⲉϩⲓⲏ  ⲉⲑⲟⲟⲩ  ⲙⲛ̅ⲡⲙⲉⲉⲩⲉ  ⲛ̅ⲣ̅ⲣⲱⲙⲉ . ⲟⲩⲧⲉ  ⲡϩⲓⲥⲉ  ⲛ̅ⲁⲧⲕⲁⲣⲡⲟⲥ  ⲛ̅ⲣ̅ⲣⲉϥⲥⲉϩϩⲁⲉⲓⲃⲉⲥ . ⲙⲛ̅ⲛⲉⲥⲙⲟⲧ  ⲉⲧϫⲏϩ  ϩⲛ̅ϩⲉⲛⲁⲩⲁⲛ  ⲉⲩϣⲟⲃⲉ.    Ⲛⲁⲓ  ⲉⲧⲉϣⲁⲣⲉⲛⲁⲑⲏⲧ  ⲉⲡⲓⲑⲩⲙⲓ  ⲉⲣⲟⲟⲩ . ⲉⲩⲙⲉ  ⲙ̅ⲡⲓⲛⲉ  ⲛ̅ⲑⲓⲕⲱⲛ  ⲉⲧⲙⲟⲟⲩⲧ  ⲉⲧⲉⲙⲛ̅ⲡⲛⲉⲩⲙⲁ  ⲛ̅ϩⲏⲧⲥ̅.  Ⲋ.  Ⲉⲩⲟ  ⲙ̅ⲙⲁⲓⲛⲉⲑⲟⲟⲩ . ⲉⲩⲙ̅ⲡϣⲁ  ⲛ̅ⲛ̅ϩⲉⲗⲡⲓⲥ  ⲛ̅ⲧⲉⲓⲙⲓⲛⲉ  ⲛ̅ϭⲓⲛⲉⲧⲧⲁⲙⲓⲟ  ⲙ̅ⲙⲟⲟⲩ  ⲙⲛ̅ⲛⲉⲧϣⲙ̅ϣⲉ  ⲛⲁⲩ.  ⲍ̅.  Ⲕⲁⲓ  ⲅⲁⲣ  ⲟⲩⲕⲉⲣⲁⲙⲉⲩⲥ  ⲉϥϩⲓⲥⲉ  ⲙ̅ⲙⲟϥ  ⲉϥⲟⲩⲱϣⲙ̅  ⲙ̅ⲡⲟⲙⲉ. ϥ̅ⲡⲗⲁⲥⲥⲉ  ⲙ̅ⲡⲟⲩⲁ  ⲡⲟⲩⲁ  ⲛ̅ⲛⲉϩⲛⲁⲁⲩ  ⲙ̅ⲡⲉⲛϣⲙ̅ϣⲉ :  ϩⲟⲉⲓⲛⲉ  ⲙⲉⲛ  ⲉⲛⲉϩⲃⲏⲩⲉ  ⲉⲧⲧⲁⲓⲏⲩ  ⲧⲏⲣⲟⲩ . ϩⲟⲉⲓⲛⲉ  ⲇⲉ  ⲉⲛⲉⲧⲥⲏϣ  ⲉⲃⲟⲗ  ϩⲙ̅ⲡⲓⲟⲙⲉ  ⲛ̅ⲟⲩⲱⲧ :  ⲡⲉⲧⲣ̅ϩⲱⲃ  ⲇⲉ  ⲙ̅ⲙⲟⲟⲩ  ⲡⲉⲧⲥⲟⲟⲩⲛ  ϫⲉ  ⲟⲩ  ⲧⲉ  ⲧⲉⲟⲣⲓⲁ  ⲙ̅ⲡⲟⲩⲁ  ⲡⲟⲩⲁ.  ⲏ̅.  Ⲁⲩⲱ  ⲡⲣⲉϥϩⲁⲥⲧϥ̅  ⲉⲡⲡⲉⲑⲟⲩ  ⲉⲃⲟⲗ  ϩⲙ̅ⲡⲓⲟⲙⲉ  ⲛ̅ⲟⲩⲱⲧ  ⲁϥⲡⲗⲁⲥⲥⲉ  ⲛ̅ⲟⲩⲛⲟⲩⲧⲉ . ⲡⲁⲓ  ⲉⲛⲧⲁⲩⲧⲁⲙⲓⲟϥ  ⲉⲃⲟⲗ  ϩⲙ̅ⲡⲕⲁϩ  ϩⲁⲑⲏ  ⲛ̅ⲟⲩⲕⲟⲩⲓ . ⲙⲛ̅ⲛ̅ⲥⲁⲕⲉⲕⲟⲩⲓ  ⲉϥⲛⲁⲃⲱⲕ  ⲉⲡⲙⲁ  ⲛ̅ⲧⲁϥⲉⲓ  ⲉⲃⲟⲗ  ⲛ̅ϩⲏⲧϥ̅  ⲉⲁⲩϥⲓⲧⲉϥⲯⲩⲭⲏ  ⲛ̅ⲧⲟⲟⲧϥ̅.  ⲑ̅.  Ⲁⲗⲗⲁ  ⲛⲉϥϥⲓⲣⲟⲟⲩϣ  ⲁⲛ  ϫⲉ  ⲉϥⲛⲁⲙⲟⲩ  ⲏ  ϫⲉ  ⲟⲩⲕⲟⲩⲓ  ⲡⲉ  ⲡⲉϥⲁϩⲉ . ⲁⲗⲗⲁ  ⲉϥⲉϯⲧⲱⲛ  ⲙⲛ̅ⲛ̅ϩⲁⲩⲛⲟⲩⲃ  ⲙⲛ̅ⲛ̅ⲣⲉϥⲣ̅ϩⲁⲧ  ⲙⲛ̅ⲛ̅ⲥⲁⲛ̅ϩⲟⲙⲛ̅ⲧ . ⲉϥϣⲟⲩϣⲟⲩ  ⲙ̅ⲙⲟϥ  ϫⲉ  ⲉϥⲧⲁⲙⲓⲉⲥⲙⲟⲧ  ⲃ̅ⲃⲗ̅ϫⲉ.    Ⲉⲩⲕⲣ̅ⲙⲉⲥ  ⲡⲉ  ⲡⲉϥϩⲏⲧ  ⲁⲩⲱ  ⲧⲉϥϩⲉⲗⲡⲓⲥ  ⲥⲟϣϥ̅  ⲉⲩⲕⲁϩ . ⲁⲩⲱ  ⲡⲉϥⲱⲛϩ̅  ⲥⲏϣ  ⲉⲩⲟⲙⲉ.  ⲓ̅ⲁ.  Ⲉⲃⲟⲗϫⲉ  ⲙ̅ⲡϥ̅ⲥⲟⲩⲛ̅ⲡⲉⲛⲧⲁϥⲡⲗⲁⲥⲥⲉ  ⲙ̅ⲙⲟϥ. ⲡⲉⲛⲧⲁϥⲛⲓϥⲉ  ⲉϩⲟⲩⲛ  ⲉϩⲣⲁϥ  ⲛ̅ⲟⲩⲯⲩⲭⲏ  ⲉⲥⲉⲛⲉⲣⲅⲉⲓ . ⲁⲩⲱ  ⲡⲉⲛⲧⲁϥϯ  ⲛⲁϥ  ⲛ̅ⲟⲩⲡⲛⲉⲩⲙⲁ  ⲛ̅ⲱⲛϩ̅ :  ⲓ̅ⲃ̅.  Ⲁⲗⲗⲁ  ⲛ̅ⲧⲁϥⲙⲉⲉⲩⲉ  ϫⲉ  ⲟⲩϣⲟⲩⲥⲱⲃⲉ  ⲙ̅ⲙⲟϥ  ⲡⲉ  ⲡⲉⲛⲱⲛϩ̅ . ⲁⲩⲱ  ⲡⲉⲛⲁϩⲉ  ⲛ̅ⲑⲉ  ⲛ̅ⲟⲩϣⲁ  ⲛ̅ϯϩⲏⲩ : ⲉϥϫⲱ . . . . ϩⲏⲩ  ⲛ̅ϩⲱⲃ  ⲛⲓⲙ  ⲕⲁⲧⲁⲡⲉⲑⲟⲟⲩ.  ⲓ̅ⲅ.  Ⲡⲁⲓ  ⲅⲁⲣ  ⲥⲟⲟⲩⲛ  ⲉϩⲟⲩⲟ  ⲛ̅ⲟⲩⲟⲛ  ⲛⲓⲙ  ϫⲉ  ϥⲣ̅ⲛⲟⲃⲉ . ⲉϥⲧⲁⲙⲓⲟ  ⲛ̅ϩⲛ̅ⲙⲟⲩⲛⲅ̅ . . .  ⲉⲩⲛⲁⲟⲩⲱϭⲡ̅  ⲉⲃⲟⲗ  ϩⲛ̅ⲑⲩⲗⲏ  ⲙ̅ⲡⲕⲁϩ.  ⲓ̅ⲇ.  Ϩⲛ̅ⲉⲃⲓⲏⲛ  ⲛⲉ  ⲁⲩⲱ  ⲛⲁⲑⲏⲧ  ⲛⲉ  ⲉϩⲟⲩⲉⲟⲩⲯⲩⲭⲏ  ⲛ̅ϣⲏⲣⲉ  ϣⲏⲙ. ⲛ̅ϫⲓϫⲉⲉⲩ  ⲙ̅ⲡⲉⲕⲗⲁⲟⲥ  ⲉⲧϫⲓ  ⲙ̅ⲙⲟϥ  ⲛ̅ϭⲟⲛⲥ̅.    Ϫⲉ  ⲛ̅ⲉⲓⲇⲱⲗⲟⲛ  ⲧⲏⲣⲟⲩ  ⲛ̅ⲛⲉⲉⲑⲛⲟⲥ  ⲉⲩⲙⲉⲉⲩⲉ  ϫⲉ  ϩⲛ̅ⲛⲟⲩⲧⲉ  ⲛⲉ. ⲛⲁⲓ  ⲉⲧⲉⲛ̅ⲥⲉⲛⲁⲩ  ⲉⲃⲟⲗ  ⲁⲛ  ϩⲛ̅ⲛⲉⲩⲃⲁⲗ . ⲟⲩⲧⲉ  ⲛ̅ⲥⲉϣⲱⲗⲙ̅  ⲁⲛ  ϩⲛ̅ϣⲁⲁⲛⲧⲟⲩ . ⲟⲩⲧⲉ  ⲛ̅ⲥⲉⲥⲱⲧⲙ̅  ⲁⲛ  ϩⲛ̅ⲛⲉⲩⲙⲁⲁϫⲉ.  Ⲟⲩⲧⲉ  ⲛ̅ⲥⲉϭⲙ̅ϭⲟⲙ  ⲁⲛ  ϩⲛ̅ⲛ̅ⲧⲏⲏⲃⲉ  ⲛ̅ⲛⲉⲩϭⲓϫ : ⲛⲉⲩⲕⲉⲟⲩⲉⲣⲏⲧⲉ  ϩⲉⲛⲁⲣⲅⲟⲛ  ⲛⲉ  ⲉⲙⲉⲩⲙⲟⲟϣⲉ.  ⲓ̅Ⲋ.  Ⲟⲩⲣⲱⲙⲉ  ⲅⲁⲣ  ⲉⲣⲉⲡⲉϥⲡⲛⲉⲩⲙⲁ  ⲉⲣⲟϥ  ⲡⲉⲛⲧⲁϥⲧⲁⲙⲓⲟⲟⲩ . ⲙⲛ̅ϣϭⲟⲙ  ⲇⲉ  ⲗ̅ⲗⲁⲁⲩ  ⲛ̅ⲣⲱⲙⲉ  ⲉⲡⲗⲁⲥⲥⲉ  ⲛ̅ⲟⲩⲛⲟⲩⲧⲉ  ⲉϥⲉⲓⲛⲉ  ⲙ̅ⲙⲟϥ.  ⲓ̅ⲍ.  Ⲟⲩⲣⲉϥⲙⲟⲩⲧⲉ  ⲇⲉ  ϥⲣ̅ϩⲱⲃ  ⲟⲛ  ⲉⲡⲉⲧⲙⲟⲟⲩⲧ  ϩⲛ̅ⲛⲉϥϭⲓϫ  ⲛ̅ⲁⲛⲟⲙⲟⲛ : ⲛ̅ⲧⲟϥ  ⲅⲁⲣ  ϥⲥⲟⲧⲡ̅  ⲉⲛⲉⲧϥ̅ϣⲙ̅ϣⲉ  ⲙ̅ⲙⲟⲟⲩ . ϫⲉ  ⲛ̅ⲧⲟϥ  ⲙⲉⲛ  ϥⲟⲛϩ̅  ⲛⲏ  ⲇⲉ  ⲙ̅ⲡⲟⲩⲱⲛϩ̅  ⲉⲛⲉϩ.  ⲓ̅ⲏⲭ.  Ⲛ̅ⲕⲉⲧⲃ̅ⲛⲟⲟⲩⲉ  ⲉⲧⲥⲏϣ  ⲥⲉⲟⲩⲱϣⲧ̅  ⲙ̅ⲙⲟⲟⲩ  ϩⲛ̅ⲉ . . . . :  ⲉⲩⲧⲟⲛⲧⲛ̅  ⲅⲁⲣ  ⲙ̅ⲙⲟⲟⲩ  ⲥⲉϩⲟⲟⲩ  ⲉⲡⲕⲉⲥⲉⲉⲡⲉ.  ⲓ̅ⲑ.  Ⲟⲩⲇⲉ  ⲛ̅ⲛⲉⲥⲱⲟⲩ  ⲁⲛ  ϩⲙ̅ⲡⲉⲩϩⲟ  ⲉⲧⲣⲉⲩⲟⲩⲁϣⲟⲩ  ϩⲛ̅ⲛ̅ⲍⲱⲟⲛ . ⲥⲉⲟ  ⲇⲉ  ⲛ̅ϣⲙ̅ⲙⲟ  ⲉⲡⲧⲁⲓⲟ  ⲙ̅ⲡⲛⲟⲩⲧⲉ  ⲙⲛ̅ⲡⲉⲥⲙⲟⲩ.

Ⲕⲉⲫ.  Ⲓ̅Ⲝ̅
 
Ⲉⲧⲃⲉⲡⲁⲓ  ⲉⲁⲩⲕⲟⲗⲁⲍⲉ  ⲙ̅ⲙⲟⲟⲩ  ϩⲛ̅ⲟⲩⲙ̅ⲡϣⲁ . .  ϩⲓⲧⲛ̅ϩⲟⲉⲓⲛⲉ  ⲛ̅ⲧⲉⲓⲙⲓⲛⲉ . ⲁⲩⲱ  ⲉⲩⲃⲁⲥⲁⲛⲓⲍⲉ  ⲙ̅ⲙⲟⲟⲩ  ϩⲓⲧⲛ̅ⲟⲩⲁϣⲏ  ⲛ̅ⲍⲱⲟⲛ.  ⲃ̅.  Ⲉⲡⲙⲁ  ⲛ̅ⲧⲉⲓⲕⲟⲗⲁⲥⲓⲥ  ⲁⲕⲣ̅ⲡⲉⲧⲛⲁⲛⲟⲩϥ  ⲙ̅ⲡⲉⲕⲗⲁⲟⲥ :  Ⲁⲕⲥⲟⲃⲧⲉ  ⲛⲁⲩ  ⲛ̅ⲟⲩϩⲏ  ⲙ̅ⲡⲏⲣⲁ  ⲛ̅ϩⲣⲉ  ϩⲛ̅ⲟⲩϯⲡⲉ  ⲃ̅ⲃⲣ̅ⲣⲉ  ⲉⲥϫⲱⲕ  ⲉⲃⲟⲗ  ⲛ̅ⲧⲉⲩⲉⲡⲓⲑⲩⲙⲓⲁ.  ⲅ̅.  Ϫⲉⲕⲁⲁⲥ  ⲛⲏ  ⲙⲉⲛ  ⲉⲩⲉⲡⲓⲑⲩⲙⲓ  ⲉⲟⲩⲱⲙ  ⲛ̅ⲥⲉⲧⲙ̅ϭⲙ̅ϭⲟⲙ  ⲉϫⲓ  ⲛ̅ⲧⲉⲩϩⲣⲉ  ⲉⲧⲃⲉⲛⲉⲛⲧⲁⲩⲧⲛ̅ⲛⲟⲟⲩⲥⲟⲩ  ⲉϫⲱⲟⲩ . ⲛⲁⲓ  ⲇⲉ  ⲛ̅ⲧⲟⲟⲩ  ⲁⲩϣⲡ̅ϩⲓⲥⲉ  ⲛ̅ⲟⲩϣⲏⲙ  ⲁⲩϫⲓϯⲡⲉ  ⲛ̅ⲟⲩϩⲣⲉ  ⲃ̅ⲃⲣ̅ⲣⲉ.  ⲇ̅.   Ϣϣⲉ   ⲅⲁⲣ  ⲉⲧⲣⲉⲟⲩϩⲕⲟ  ⲉϥⲛⲁϣⲧ̅  ⲉⲓ  ⲉϩⲣⲁⲓ  ⲉϫⲛ̅ⲛⲏ  ⲉⲧⲟ  ⲣ̅ⲣⲉϥϫⲓϫⲛⲁϩ . ⲛⲁⲓ  ⲇⲉ  ⲉⲧⲁⲙⲟⲟⲩ  ⲙ̅ⲙⲁⲧⲉ  ⲉⲑⲉ  ⲉⲛⲧⲁⲩⲃⲁⲥⲁⲛⲓⲍⲉ  ⲛ̅ⲛⲉⲩϫⲁϫⲉ.    Ⲕⲁⲓ  ⲅⲁⲣ  ⲛ̅ⲧⲉⲣⲉϥⲉⲓ  ⲟⲛ  ⲉϩⲣⲁⲓ  ⲉϫⲱⲟⲩ  ⲛ̅ϭⲓⲡϭⲱⲛⲧ̅  ⲛ̅ⲛⲉⲑⲏⲣⲓⲟⲛ . ⲁⲩⲗⲱⲕⲥ̅  ⲙ̅ⲙⲟⲟⲩ  ϩⲓⲧⲛ̅ϩⲛ̅ϩⲟϥ  ⲉⲩⲛⲁϣⲧ̅ . ⲙ̅ⲡⲉⲧⲉⲕⲟⲣⲅⲏ  ⲙⲟⲩⲛ  ⲉⲃⲟⲗ  ϣⲁⲡⲧⲏⲣϥ̅.  Ⲋ.  Ⲛ̅ⲧⲁⲕϣⲧⲣ̅ⲧⲱⲣⲟⲩ  ⲇⲉ  ⲡⲣⲟⲥⲟⲩⲕⲟⲩⲓ  ⲉⲕϯⲥⲃⲱ  ⲛⲁⲩ . ⲉⲁⲩϫⲓ  ⲛ̅ⲟⲩⲙⲁⲉⲓⲛ  ⲛ̅ⲟⲩϫⲁⲓ  ϩⲙ̅ⲡⲣ̅ⲡⲙⲉⲉⲩⲉ  ⲛ̅ⲉⲛⲧⲟⲗⲏ  ⲙ̅ⲡⲉⲕⲛⲟⲙⲟⲥ.  ⲍ̅.  Ⲡⲉⲛⲧⲁⲕⲧⲟϣϥ̅  ⲅⲁⲣ  ⲉϣⲁϥⲛⲟⲩϩⲙ̅  ⲁⲛ  ⲉⲧⲃⲉⲡⲉⲧϥ̅ⲛⲁⲩ ⲙ̅ⲙⲟϥ . ⲁⲗⲗⲁ  ⲉⲧⲃⲏⲧⲕ̅  ⲡⲥⲱⲧⲏⲣ  ⲛ̅ⲟⲩⲟⲛ  ⲛⲓⲙ. ⲏ̅.  Ϩⲙ̅ⲡⲁⲓ  ⲇⲉ  ⲁⲕⲧⲁⲙⲉⲛⲉⲛϫⲁϫⲉ . ϫⲉ  ⲛ̅ⲧⲟⲕ  ⲡⲉϣⲁⲕⲧⲟⲩϫⲟ  ⲉⲃⲟⲗ  ϩⲙ̅ⲡⲉⲑⲟⲟⲩ  ⲛⲓⲙ.  ⲑ̅.  Ⲛⲏ  ⲙⲉⲛ  ⲁϩⲉⲛϣϫⲉ  ⲙⲛ̅ϩⲉⲛⲁϥ  ⲛ̅ⲟⲩϩⲟⲣ  ⲙⲟⲟⲩⲧⲟⲩ  ⲉⲩⲗⲱⲕⲥ̅  ⲙ̅ⲙⲟⲟⲩ . ⲁⲩⲱ  ⲙ̅ⲡⲟⲩϩⲉ  ⲉⲧⲁⲗϭⲟ  ⲛ̅ⲛⲉⲩⲯⲩⲭⲏ . ϫⲉ  ⲛⲉⲩⲙ̅ⲡϣⲁ  ⲛ̅ⲕⲟⲗⲁⲍⲉ  ⲙ̅ⲙⲟⲟⲩ  ϩⲓⲧⲛ̅  ϩⲛ̅ⲧⲉⲉⲓⲙⲓⲛⲉ :    Ⲛⲉⲕϣⲏⲣⲉ  ⲇⲉ  ⲛ̅ⲧⲟⲟⲩ  ⲙ̅ⲡⲟⲩϫⲣⲟ  ⲉⲣⲟⲟⲩ  ⲛϭⲓⲛ̅ⲟⲃϩⲉ  ⲛ̅ⲛ̅ϩⲟϥ  ⲛ̅ⲃⲁⲕⲙⲁⲧⲟⲩ : Ⲡⲉⲕⲛⲁ  ⲅⲁⲣ  ⲁϥⲉⲓ  ⲉϫⲱⲟⲩ  ⲁϥⲧⲁⲗϭⲟⲟⲩ.  ⲓ̅ⲁ.  Ⲛ̅ⲧⲁⲩⲧⲟⲃⲥⲟⲩ  ⲅⲁⲣ  ⲉⲧⲣⲉⲩⲣ̅ⲡⲙⲉⲉⲩⲉ  ⲛ̅ⲛⲉⲕϣⲁϫⲉ  ⲁⲩⲱ  ⲛ̅ⲧⲉⲩⲛⲟⲩ  ⲁⲩⲟⲩϫⲁⲓ . ϫⲉ  ⲛ̅ⲛⲉⲟⲩⲛⲟϭ  ⲛ̅ⲱⲃϣ̅  ⲧⲁϩⲟⲟⲩ  ⲛ̅ⲥⲉⲣ̅ⲡⲱⲃϣ̅  ⲛ̅ⲛⲉⲕⲡⲉⲧⲛⲁⲛⲟⲩⲟⲩ.  ⲓ̅ⲃ.  Ⲟⲩⲧⲉ  ⲅⲁⲣ  ⲛ̅ⲟⲩⲛ̅ⲧⲏϭ  ⲁⲛ  ⲟⲩⲧⲉ  ⲛ̅ⲟⲩⲡⲁϩⲣⲉ  ⲁⲛ  ⲧⲉⲛⲧⲁⲥⲧⲁⲗϭⲟⲟⲩ . ⲁⲗⲗⲁ  ⲡⲉⲕⲁϫⲉ  ⲡⲉ  Ⲡϫⲟⲉⲓⲥ  ⲉⲧⲧⲟⲩϫⲟ  ⲛ̅ⲟⲩⲟⲛ  ⲛⲓⲙ.  ⲓ̅ⲅ.  Ⲧⲱⲕ  ⲅⲁⲣ  ⲧⲉ  ⲧⲉⲝⲟⲩⲥⲓⲁ  ⲙ̅ⲡⲱⲛϩ̅  ⲙⲛ̅ⲡⲙⲟⲩ :  Ⲉⲕϫⲓ  ⲉϩⲣⲁⲓ  ⲉⲙⲡⲩⲗⲏ  ⲛ̅ⲁⲙⲛ̅ⲧⲉ  ⲁⲩⲱ  ⲉⲕⲉⲓⲛⲉ  ⲉϩⲣⲁⲓ . . .  ⲓ̅ⲇ.  Ⲡⲣⲱⲙⲉ  ⲇⲉ  ϣⲁϥⲙⲟⲩⲟⲩⲧ  ϩⲛ̅ⲧⲉϥⲕⲁⲕⲓⲁ . ⲉⲣⲉϣⲁⲛⲡⲉⲡⲛⲉⲩⲙⲁ  ⲉ  ⲉⲃⲟⲗ  ⲁⲩⲱ  ⲧⲉϥⲯⲩⲏ  ⲙⲉⲥⲕⲟⲧⲥ̅  ⲉⲣⲟϥ.    Ⲙⲛ̅ⲗⲁⲁⲩ  ⲛⲁϣϭⲙ̅ϭⲟⲙ  ⲉⲡⲱⲧ  ⲉⲛⲉⲕϭⲓϫ.  ⲓ̅Ⲋ.  Ⲛ̅ⲧⲉⲣⲟⲩ . . .  ⲅⲁⲣ  ⲛ̅ϭⲓⲛ̅ⲁⲥⲉⲃⲏⲥ  ϫⲉ  ⲛ̅ⲥⲉⲥⲟⲟⲩⲛ  ⲙ̅ⲙⲟⲕ  ⲁⲛ . ⲁⲕⲙⲁⲥⲧⲓⲅⲟⲩ  ⲙ̅ⲙⲟⲟⲩ  ϩⲛ̅ⲧϭⲟⲙ  ⲙ̅ⲡⲉⲕϭⲃⲟⲓ . ⲉⲩⲇⲓⲱⲕⲉ  ⲛ̅ⲥⲱⲟⲩ  ϩⲛ̅ϩⲉⲛϩⲱⲟⲩ  ⲉⲩⲛⲁϣⲧ̅ . ⲙⲛ̅ⲟⲩⲛⲟϭ  ⲛ̅ⲁⲗⲙ̅ⲡⲉ  ⲙⲛ̅ⲟⲩⲕⲱϩⲧ̅  ⲉϥⲱϫⲛ̅  ⲙ̅ⲙⲟⲟⲩ.  ⲓ̅ⲍ.  Ⲧⲉϣⲡⲏⲣⲉ  ⲅⲁⲣ  ⲧⲉ  ϫⲉ  ⲛⲉⲣⲉⲡⲕⲱϩⲧ̅  ⲉⲛⲉⲣⲅⲉⲓ  ⲛ̅ϩⲟⲩⲟ  ⲉⲡⲙⲟⲟⲩ  ⲉⲧⲱϣⲙ̅  ⲙ̅ⲡⲧⲏⲣϥ̅ :  ⲡⲕⲟⲥⲙⲟⲥ  ⲅⲁⲣ  ϣⲁϥⲙⲓϣⲉ  ⲉϫⲛ̅ⲛ̅ⲇⲓⲕⲁⲓⲟⲥ.  ⲓ̅ⲏ.  Ϩⲉⲛⲥⲟⲡ  ⲙⲉⲛ  ⲛ̅ⲧⲉⲡⲕⲱϩⲧ̅  ⲁⲣⲟϣ  ⲛϥ̅ⲧⲙ̅ⲣⲱⲕϩ̅  ⲛ̅ⲛ̅ⲍⲱⲟⲛ  ⲛ̅ⲧⲁⲩⲛ̅ⲧⲟⲩ  ⲉϫⲛ̅ⲛ̅ⲥⲁⲉⲃⲏⲥ . ϫⲉⲕⲁⲁⲥ  ⲉⲩⲉⲛⲁⲩ  ⲛ̅ⲥⲉⲉⲓⲙⲉ  ϫⲉ  ⲉⲩⲑⲙ̅ⲕⲟ  ⲙ̅ⲙⲟⲟⲩ  ϩⲓⲧⲛ̅ⲧⲉⲕⲣⲓⲥⲓⲥ  ⲙ̅ⲡⲛⲟⲩⲧⲉ :  ⲓ̅ⲑ. Ϩⲛ̅ⲥⲟⲡ  ⲇⲉ  ϩⲛ̅ⲧⲉⲙⲏⲧⲉ  ⲙ̅ⲡⲙⲟⲟⲩ. ⲛϥ̅ⲣⲱⲕϩ̅  ⲙ̅ⲙⲟⲟⲩ  ⲉϩⲟⲩⲉⲧϭⲟⲙ  ⲛ̅ⲧⲥⲁⲧⲉ . ϫⲉⲕⲁⲁⲥ  ⲉϥⲉⲧⲁⲕⲉⲛ̅ⲕⲁⲣⲡⲟⲥ  ⲙ̅ⲡⲕⲁϩ  ⲛ̅ⲣ̅ⲣⲉϥϫⲓⲛϭⲟⲛⲥ̅.    Ⲉⲡⲙⲁ  ⲛ̅ⲛⲁⲓ  ⲁⲕⲧⲙ̅ⲙⲉⲡⲉⲕⲗⲁⲟⲥ  ϩⲛ̅ⲧⲉϩⲣⲉ  ⲛ̅ⲛ̅ⲁⲅⲅⲉⲗⲟⲥ . ⲁⲕⲧⲛ̅ⲛⲟⲟⲩ  ⲛⲁⲩ  ⲉⲃⲟⲗ  ϩⲛ̅ⲧⲡⲉ  ⲛ̅ⲟⲩⲟⲉⲓⲕ  ⲉϥⲥⲃ̅ⲧⲱⲧ  ⲛⲁⲩ  ⲁϫⲛ̅ϩⲓⲥⲉ. ⲉϥϭⲙ̅ϭⲟⲙ  ⲉϩⲗⲟϭ  ⲛⲓⲙ  ⲁⲩⲱ  ⲉϥⲛⲏⲩ  ⲉϩⲛ̅ϯⲡⲉ  ⲛⲓⲙ.  ⲕ̅ⲁ̅.  Ⲧϭⲟⲙ  ⲅⲁⲣ  ⲙ̅ⲡⲉⲕϩⲗⲟϭ  ⲁⲥⲟⲩⲱⲛϩ̅  ⲉⲃⲟⲗ  ⲉϩⲟⲩⲛ  ⲉⲛⲉⲕϣⲏⲣⲉ : ⲉϥϣⲙ̅ϣⲉ  ⲅⲁⲣ  ⲙ̅ⲡⲟⲩⲱϣ  ⲛ̅ⲛⲉⲧϫⲓ  ⲙ̅ⲙⲟϥ . ⲛⲉϥϣⲓⲃⲉ  ⲡⲉ  ϩⲙ̅ⲡⲉⲧⲉⲣⲉⲡⲟⲩⲁ  ⲡⲟⲩⲁ  ⲉⲡⲓⲑⲩⲙⲉⲓ  ⲉⲣⲟϥ.  ⲕ̅ⲃ̅.  Ⲡⲭⲓⲱⲛ  ⲁⲩⲱ  ⲡⲉⲕⲣⲩⲥⲧⲁⲗⲟⲥ  ⲁⲩϥⲓ  ϩⲁⲡⲕⲱϩⲧ̅  ⲙ̅ⲡⲟⲩⲃⲱⲗ  ⲉⲃⲟⲗ . ϫⲉⲕⲁⲥ  ⲉⲩⲉⲉⲓⲙⲉ  ϫⲉ  ⲡⲕⲱϩⲧ̅  ⲁϥⲧⲁⲕⲉⲛ̅ⲕⲁⲣⲡⲟⲥ  ⲛ̅ⲛ̅ϫⲁϫⲉ . ⲉϥϫⲉⲣⲟ  ϩⲛ̅ⲧⲉⲭⲁⲗⲁⲍⲁ  ⲁⲩⲱ  ⲉϥⲙⲟⲩϩ  ⲛ̅ⲛ̅ϩⲱⲟⲩ . ⲁⲩⲱ  ⲁϥⲣ̅ⲡⲱⲃϣ̅  ⲛ̅ⲧⲉϥⲕⲉϭⲟⲙ :  ⲕ̅ⲅ̅.  Ⲡⲁⲓ  ⲇⲉ  ⲟⲛ  ϫⲉⲕⲁⲥ  ⲉⲣⲉⲛ̅ⲇⲓⲕⲁⲓⲟⲥ  ⲥⲁⲁⲛϣ̅.  ⲕ̅ⲇ̅.  Ⲧⲉⲕⲧⲓⲥⲓⲥ  ⲅⲁⲣ  ⲉⲥϣⲙ̅ϣⲉ  ⲛⲁⲕ  ⲡⲉⲛⲧⲁϥⲧⲁⲙⲓⲟⲥ . ϩⲛ̅ⲥⲟⲡ  ⲙⲉⲛ  ⲛⲥ̅ⲛ̅ϣⲟⲧ  ⲉⲩⲕⲟⲗⲁⲥⲓⲥ  ⲛ̅ⲣ̅ⲣⲉϥϫⲓⲛϭⲟⲛⲥ̅ . ϩⲛ̅ⲥⲟⲡ  ⲇⲉ  ⲟⲛ  ⲛⲥ̅ⲃⲱϣ  ⲉⲩⲙ̅ⲧⲟⲛ  ⲛ̅ⲛⲉⲧⲛⲁϩⲧⲉ  ⲉⲣⲟⲕ.    Ⲉⲧⲃⲉⲡⲁⲓ  ⲟⲛ  ⲙ̅ⲡⲉⲩⲟⲉⲓϣ  ⲉⲧⲙ̅ⲙⲁⲩ  ⲛⲉⲥϣⲓⲃⲉ  ⲉϩⲱⲃ  ⲛⲓⲙ . ⲉⲥϣⲙ̅ϣⲉ  ⲛ̅ⲧⲉⲕⲇⲱⲣⲉⲁ  ⲉⲥⲁⲁⲛϣ̅  ⲙ̅ⲡⲧⲏⲣϥ̅  ⲛ̅ⲛⲁϩⲣⲛ̅ⲡⲟⲩⲱϣ  ⲛ̅ⲛⲉⲧϩⲕⲁⲉⲓⲧ.  ⲕ̅Ⲋ̅.  Ϫⲉⲕⲁⲥ  ⲉⲩⲉⲉⲓⲙⲉ  ⲛ̅ϭⲓⲛⲉⲕϣⲏⲣⲉ  ⲛ̅ⲧⲁⲕⲙⲉⲣⲓⲧⲟⲩ  Ⲡϫⲟⲉⲓⲥ  ϫⲉ  ⲛ̅ⲕⲁⲣⲡⲟⲥ  ⲁⲛ  ⲉⲧⲣⲏⲧ  ⲛⲉⲧⲥⲁⲁⲛϣ̅  ⲙ̅ⲡⲣⲱⲙⲉ . ⲁⲗⲗⲁ  ⲡⲉⲕϣⲁϫⲉ  ⲡⲉⲧϩⲁⲣⲉϩ  ⲉⲛⲉⲧⲕⲱ  ⲛ̅ϩⲧⲏⲩ  ⲉⲣⲟⲕ.  ⲕ̅ⲍ̅.  Ⲡⲉⲧⲉⲙⲉϥⲃⲱⲗ  ⲅⲁⲣ  ⲉⲃⲟⲗ  ϩⲙ̅ⲡⲕⲱϩⲧ̅  ϩⲁⲡⲗⲱⲥ  ϩⲓⲧⲛ̅ⲟⲩⲕⲟⲩⲓ  ⲛ̅ⲁⲕⲧⲓⲛ  ⲙ̅ⲡⲣⲏ  ϣⲁϥϩⲙⲟⲙ  ⲛϥ̅ⲃⲱⲗ  ⲉⲃⲟⲗ.  ⲕ̅ⲏ̅.  Ϫⲉⲕⲁⲥ  ⲉⲩⲉⲉⲓⲙⲉ  ϫⲉ  ϣ̅ϣⲉ  ϩⲁⲑⲏ  ⲛ̅ϣⲁ  ⲙ̅ⲡⲣⲏ  ⲉϣⲡ̅ϩⲙⲟⲧ  ⲛ̅ⲧⲟⲟⲧⲕ̅ . ⲁⲩⲱ  ⲉϣⲗⲏⲗ  ⲉⲡⲉⲉⲓⲃⲧ̅  ⲉⲣⲟⲕ.  ⲕ̅ⲑ̅.  Ⲑⲉⲗⲡⲓⲥ  ⲅⲁⲣ  ⲙ̅ⲡⲁⲧϩⲙⲟⲧ  ⲛⲁⲃⲱⲗ  ⲉⲃⲟⲗ  ⲛ̅ⲑⲉ  ⲙ̅ⲡϫⲁϥ  ⲛ̅ⲧⲉⲡⲣⲱ . ⲁⲩⲱ  ⲥⲛⲁϩⲁⲧⲉ  ⲛ̅ⲑⲉ  ⲛ̅ⲟⲩⲙⲟⲟⲩ  ⲛ̅ⲁⲧϣⲁⲩ.    
 
Ⲕⲉⲫ.  Ⲓ̅Ⲍ̅

Ϩⲛ̅ⲛⲟϭ  ⲅⲁⲣ  ⲛⲉ  ⲛⲉⲕϩⲁⲡ  ⲛ̅ⲛⲉⲩϣⲧⲁϩⲟⲟⲩ :  ⲉⲧⲃⲉⲡⲁⲓ  ⲁⲩⲥⲱⲣⲙ̅  ⲛ̅ϭⲓⲛⲉⲯⲩⲭⲏ  ⲛ̅ⲛⲁⲧⲥⲃⲱ.  ⲃ̅.  Ⲉⲩⲙⲉⲉⲩⲉ  ⲅⲁⲣ  ⲛ̅ϭⲓⲛ̅ⲁⲛⲟⲙⲟⲥ  ⲉϫⲓ  ⲛ̅ⲟⲩϩⲉⲑⲛⲟⲥ  ⲉϥⲟⲩⲁⲁⲃ ⲛ̅ϭⲟⲛⲥ̅ . ⲉⲁⲩⲙⲟⲣⲟⲩ  ϩⲛ̅ⲟⲩⲕⲁⲕⲉ  ⲙⲛ̅ⲟⲩⲛⲟϭ ⲛ̅ⲉⲓⲛⲉ  ⲛ̅ϩⲟⲙⲛ̅ⲧ  ⲛ̅ⲧⲉⲩϣⲏ. ⲉⲁⲩϩⲟⲧⲡⲟⲩ  ⲉϩⲟⲩⲛ  ⲉⲩⲏⲉⲓ  ⲁⲩϣⲱⲡⲉ  ⲉⲩⲧϭⲁⲉⲓⲏⲩ  ϩⲓⲧⲛ̅ⲧⲉⲡⲣⲟⲛⲟⲓⲁ  ϣⲁⲉⲛⲉϩ.  ⲅ̅.  Ⲉⲩⲣ̅ⲛⲟⲃⲉ  ⲅⲁⲣ  ⲉⲩⲙⲉⲉⲩⲉ  ϫⲉ  ⲉⲩⲛⲁϣϩⲱⲡ . ⲁϥⲑⲙ̅ⲕⲟⲟⲩ  ϩⲛ̅ⲟⲩϩⲃ̅ⲥ  ⲛ̅ⲕⲁⲕⲉ  ⲙⲛ̅ⲟⲩⲱⲃϣ̅  ⲉⲩⲑⲣ̅ϣⲟ  ⲙ̅ⲙⲟⲟⲩ  ⲉⲙⲁⲧⲉ . ⲁⲩⲱ  ⲉⲩϣⲧⲟⲣⲧⲣ̅  ⲙ̅ⲙⲟⲟⲩ  ϩⲓⲧⲛ̅ϩⲛ̅ϩⲣ̅ⲃ.  ⲇ̅.  Ⲛ̅ⲕⲉⲏⲓ  ⲅⲁⲣ  ⲉⲧⲟⲩⲟⲧⲡ̅  ⲉϩⲟⲩⲛ  ⲉⲣⲟⲟⲩ  ⲙ̅ⲡⲟⲩϣⲱⲡⲉ  ⲛ̅ϩⲏⲧⲟⲩ  ⲁϫⲛ̅ϩⲟⲧⲉ : ⲁⲗⲗⲁ  ⲛⲉⲩⲑⲣ̅ϣⲟ  ⲙ̅ⲙⲟⲟⲩ  ϩⲓⲧⲛ̅ϩⲉⲛⲛⲟϭ  ⲛ̅ϩⲣⲟⲟⲩ  ⲙⲛ̅ϩⲉⲛⲣⲁⲥⲟⲩ  ⲛ̅ⲥⲙⲟⲧ  ⲛ̅ϩⲟ . ⲉⲩⲟⲕⲙ̅  ⲉⲩⲛⲏⲩ  ⲙ̅ⲡⲉⲩⲙ̅ⲧⲟ  ⲉⲃⲟⲗ  ⲉⲛⲥⲉⲛⲟⲧϥ̅  ⲁⲛ.    Ⲧⲕⲉϭⲟⲙ  ⲙ̅ⲡⲕⲱϩⲧ̅  ⲙ̅ⲡⲉⲥⲣ̅ⲟⲩⲟⲉⲓⲛ  ⲉⲣⲟⲟⲩ . ⲟⲩⲧⲉ  ⲡϣⲁϩ  ⲙ̅ⲡⲟⲩⲟⲉⲓⲛ  ⲛ̅ⲛ̅ⲥⲓⲟⲩ  ⲙ̅ⲡϥ̅ϩⲩⲡⲟⲙⲓⲛⲉ  ⲉⲙⲟⲩϩ  ⲛ̅ⲧⲉⲩϣⲏ  ⲉⲧⲙ̅ⲙⲁⲩ  ⲉⲧⲟ  ⲛ̅ϩⲟⲧⲉ.  Ⲋⲭ.  Ⲛⲉⲥⲟⲩⲱⲛϩ̅  ⲇⲉ  ⲛⲁⲩ  ⲉⲃⲟⲗ  ⲙ̅ⲙⲁⲧⲉ  ⲛ̅ϭⲓⲟⲩⲥⲁⲧⲉ  ⲉⲥϫⲉⲣⲟ  ⲙⲁⲩⲁⲁⲥ  ⲉⲥⲙⲉϩ  ⲛ̅ϩⲟⲧⲧⲉ :  Ⲛⲉⲧⲟⲩⲛⲁⲩ  ⲇⲉ  ⲉⲣⲟⲟⲩ  ⲛⲉⲩⲛⲁϣⲧ̅  ⲛⲁⲩ  ⲡⲉ  ⲉϩⲟⲩⲉⲛⲉⲧⲑⲣ̅ϣⲟ  ⲙ̅ⲙⲟⲟⲩ  ⲉⲛⲥⲉⲛⲁⲩ  ⲉⲣⲟⲟⲩ  ⲁⲛ.  ⲍ̅.  Ⲛⲉⲣⲉⲛⲁⲓ  ⲇⲉ  ϣⲟⲟⲡ  ⲛ̅ⲛⲟϭⲛⲉϭ  ⲛ̅ⲧ̅ⲧⲉⲭⲛⲏ  ⲛ̅ⲣ̅ⲣⲉϥⲣ̅ϩⲓⲕ . ⲁⲩⲱ  ⲛ̅ϫⲡⲓⲟ  ϩⲓⲥⲱϣ  ⲛ̅ⲧⲉⲙⲛ̅ⲧⲃⲁⲃⲉⲣⲱⲙⲉ  ⲛ̅ⲧⲉⲩⲥⲟⲫⲓⲁ.  ⲏ̅.  Ⲉϣⲁⲩⲉⲣⲏⲧ  ⲅⲁⲣ  ⲛ̅ϩⲉⲛⲕⲟⲟⲩⲉ  ⲛ̅ⲛⲟⲩϫ  ⲉⲃⲟⲗ  ϩⲛ̅ⲛ̅ϩⲟⲧⲉ  ⲙⲛ̅ⲛⲉϣⲧⲟⲣⲧⲣ̅  ⲛ̅ⲛⲉⲯⲩⲭⲏ  ⲉⲧϣⲱⲛⲉ . ⲛ̅ⲧⲟⲟⲩ  ϩⲱⲟⲩ  ⲟⲛ  ⲛⲉⲩϣⲱⲛⲉ  ⲡⲉ  ϩⲛ̅ⲟⲩϩⲟⲧⲉ  ⲛ̅ⲥⲱⲃⲉ.  ⲑ̅.  Ⲉⲛⲉⲙⲛ̅ⲗⲁⲁⲩ  ⲅⲁⲣ  ⲛ̅ϩⲟⲧⲉ  ⲑⲣ̅ϣⲟ  ⲙ̅ⲙⲟⲟⲩ . ⲁⲗⲗⲁ  ⲛⲉⲩⲃⲱⲗ  ⲉⲃⲟⲗ  ϩⲁⲡⲉⲥⲧⲱⲧ  ϩⲓⲧⲛ̅ϩⲉⲛϩⲣⲟⲟⲩ  ⲛ̅ⲑⲏⲣⲓⲟⲛ  ϩⲓϫⲁⲧϥⲉ  ⲉⲩⲥⲱⲣ  ⲉⲃⲟⲗ  ϩⲓⲧⲟⲟⲧⲟⲩ . ⲉϩⲛⲁⲩ  ϭⲉ  ⲁⲛ  ⲉϭⲱϣⲧ̅  ⲉⲡⲁⲏⲣ  ⲡⲁⲓ  ⲉⲧⲉⲙⲛ̅ϩⲓⲏ  ⲛ̅ⲣ̅ⲃⲟⲗ  ⲉⲣⲟϥ  ⲛ̅ⲥⲁⲗⲁⲁⲩ  ⲛ̅ⲥⲁ.    Ⲧⲡⲟⲛⲏⲣⲓⲁ  ⲅⲁⲣ  ⲉⲩⲕⲟⲗⲁⲍⲉ  ⲙ̅ⲙⲟⲥ  ϣⲁⲥⲣ̅ⲙⲛ̅ⲧⲣⲉ  ⲙ̅ⲙⲟⲥ  ⲛ̅ϩⲉⲛⲕⲉⲡⲉⲑⲟⲟⲩ  ⲉⲧⲣⲉⲩⲧⲁϩⲟⲥ . ⲁⲩⲱ  ϣⲁⲥϭⲱϣⲧ̅  ⲉⲃⲟⲗ  ϩⲏⲧⲟⲩ  ⲛ̅ϩⲉⲛⲕⲟⲟⲩⲉ  ⲉⲩⲛⲁϣⲧ̅  ⲛ̅ⲟⲩⲟⲉⲓϣ  ⲛⲓⲙ  ⲉⲩⲣⲱϩⲧ̅  ⲙ̅ⲙⲟϥ  ϩⲓⲧⲛ̅ⲧⲥⲩⲛⲉⲓⲇⲏⲥⲓⲥ.  ⲓ̅ⲁ.   Ⲟⲩⲗⲁⲁⲩ  ⲅⲁⲣ  ⲧⲉ  ⲑⲟⲧⲉ  ⲉⲧⲣⲉⲟⲩⲁ  ⲛⲁⲧⲁⲁϥ  ⲛ̅ϭⲃⲟⲓ  ⲉⲁϥⲥⲟⲩⲛ̅ⲧⲛⲁϣⲧⲉ  ⲉⲧϥ̅ϭⲱϣⲧ̅  ϩⲏⲧⲥ̅.  ⲓ̅ⲃ.  Ⲑⲉⲗⲡⲓⲥ  ⲇⲉ  ⲁⲥϭⲃ̅ⲃⲉ  ϩⲓϩⲟⲩⲛ  ϣⲁⲥⲙ̅ⲕⲁϩ  ⲛ̅ϩⲏⲧ  ⲛ̅ⲧⲙⲛ̅ⲧⲁⲧⲥⲟⲟⲩⲛ  ⲉϩⲟⲩⲉⲧⲉⲧⲓⲁ  ⲉⲧⲉⲓⲣⲉ  ⲛⲁⲥ  ⲛ̅ⲧⲃⲁⲥⲁⲛⲟⲥ.  ⲓ̅ⲅ.  Ⲛ̅ⲧⲟⲟⲩ  ϩⲱⲟⲩ  ⲟⲛ  ⲉⲩⲛ̅ⲕⲟⲧⲕ̅  ϩⲛ̅ϯⲟⲩϣⲏ  ⲟⲩⲱⲧ  ⲉⲧⲛⲁϣⲧ̅  ⲛ̅ⲧⲁⲥⲉⲓ  ⲉϩⲣⲁⲓ  ϩⲛ̅ⲙ̅ⲙⲁ  ⲛ̅ⲕⲁⲕⲉ  ⲛ̅ⲁⲙⲛ̅ⲧⲉ.  ⲓ̅ⲇ.  Ⲡⲁⲓ  ⲙⲉⲛ  ⲉϥϣⲧⲟⲣⲧⲣ̅  ⲙ̅ⲙⲟⲟⲩ  ϩⲓⲧⲛ̅ⲛ̅ϩⲣ̅ⲃ  ⲉⲧⲟⲩⲛⲁⲩ  ⲉⲣⲟⲟⲩ . ⲡⲁⲓ  ⲇⲉ  ⲛⲉⲩⲃⲱⲗ  ⲉⲃⲟⲗ  ϩⲓⲧⲙ̅ⲡϭⲃ̅ⲃⲉ  ⲛ̅ⲧⲉⲯⲩⲭⲏ :  ϩⲛ̅ⲟⲩϣⲥ̅ⲛⲉ  ⲁⲥⲉⲓ  ⲉϩⲣⲁⲓ  ⲉϫⲱⲟⲩ  ⲛ̅ϭⲓⲑⲟⲧⲉ  ⲉⲛⲥⲉϭⲱϣⲧ̅  ϩⲏⲧⲥ̅  ⲁⲛ.    Ⲟⲩⲟⲛ  ⲇⲉ  ⲛⲓⲙ  ⲉⲧⲛⲁⲧⲱⲙⲧ̅  ⲉⲡⲙⲁ  ⲉⲧⲙ̅ⲙⲁⲩ  ⲛⲉⲩⲁⲣⲉϩ  ⲉⲣⲟϥ  ⲡⲉ  ⲉϥⲟⲧⲡ̅  ⲉⲩⲉϣⲧⲉⲕⲟ  ⲛ̅ⲕⲁⲕⲉ.  ⲓ̅Ⲋ.  Ⲉⲓⲧⲉ  ⲟⲩⲟⲉⲓ  ⲡⲉ  ⲏ  ⲟⲩϣⲱⲥ  ⲏ  ⲟⲩⲉⲣⲅⲁⲧⲏⲥ  ⲉϥϩⲛ̅ⲥⲱϣⲉ . ⲉⲁⲧⲁⲛⲁⲅⲕⲏ  ⲉⲧⲙ̅ⲙⲁⲩ  ⲧⲁϩⲟϥ  ⲙ̅ⲡϥ̅ⲣ̅ⲃⲟⲗ  ⲉⲣⲟⲥ.  ⲓ̅ⲍ.  Ⲛ̅ⲧⲟⲟⲩ  ⲅⲁⲣ  ⲁⲩⲙⲟⲣⲟⲩ  ϩⲛ̅ⲟⲩϩⲁⲗⲩⲥⲓⲥ  ⲛ̅ⲟⲩⲱⲧ  ⲛ̅ⲧⲉⲡⲕⲁⲕⲉ : ⲉⲓⲧⲉ  ⲟⲩⲡⲛⲉⲩⲙⲁ  ⲡⲉ  ⲉϥⲱϣ  ⲉⲃⲟⲗ  ϩⲛ̅ϩⲉⲛⲕⲗⲁⲇⲟⲥ  ⲛ̅ϣⲏⲛ  ⲉϥⲟϣ  ⲛ̅ϭⲱⲃⲉ . ⲏ  ⲟⲩⲥⲙⲏ  ⲛ̅ϩⲁⲗⲏⲧ . ⲏ  ⲡⲉϩⲣⲟⲟⲩ  ⲛ̅ⲟⲩⲙⲟⲟⲩ  ⲉϥⲥⲱⲕ  ϩⲛ̅ⲟⲩⲛ̅ϣⲟⲧ . ⲏ  ⲟⲩϩⲣⲟⲟⲩ  ⲉϥⲥⲱϣⲉ  ⲛ̅ϩⲛ̅ⲛⲟϭ  ⲛ̅ⲱⲛⲉ  ⲉⲩϩⲃⲟⲣⲃⲣ̅  ⲙ̅ⲙⲟⲟⲩ.  ⲓ̅ⲏ.  ⲏ  ϩⲛ̅ⲍⲱⲟⲛ  ⲉⲩⲡⲏⲧ  ⲉⲛⲥⲉⲛⲁⲩ  ⲉⲣⲟⲟⲩ  ⲁⲛ . ⲏ  ⲧⲉⲥⲙⲏ  ⲛ̅ϩⲛ̅ⲑⲏⲣⲓⲟⲛ  ⲉⲩⲛⲁϣⲧ̅  ⲉⲩⲗ̅ϩⲏⲙ . ⲏ  ⲡⲉϩⲣⲟⲟⲩ  ⲛ̅ϩⲛ̅ϩⲁⲗⲁⲧⲉ  ⲉⲩⲟⲩⲱϩ  ⲉⲡⲉⲥⲏⲧ  ⲉⲩϩⲏⲩ  ⲉϩⲣⲁⲓ  ⲉⲩⲉⲉⲓⲁ . ⲛⲁⲓ  ⲧⲏⲣⲟⲩ  ⲁⲩⲟϫⲛⲟⲩ  ⲉⲩⲑⲣ̅ϣⲟ  ⲙ̅ⲙⲟⲟⲩ.  ⲓ̅ⲑ.  Ⲡⲕⲟⲥⲙⲟⲥ  ⲅⲁⲣ  ⲧⲏⲣϥ̅  ⲉϥϣⲟⲟⲡ  ϩⲛ̅ⲟⲩⲟⲉⲓⲛ  ⲉϥⲧⲃ̅ⲃⲏⲩ . ⲁⲩⲱ  ⲛⲉϥⲥⲓⲧⲉ  ⲉϩⲣⲁⲓ  ϩⲛ̅ⲛⲉϩⲃⲏⲩⲉ  ⲉⲧⲙⲏⲛ  ⲉⲃⲟⲗ.    Ⲛⲏ  ⲇⲉ  ⲙⲁⲩⲁⲁⲩ  ⲛⲉⲩϩⲟⲧⲡ̅  ⲉϩⲟⲩⲛ  ϩⲛ̅ⲧⲉⲩϣⲏ  ⲉⲧϩⲟⲣϣ̅ . ⲛ̅ⲧⲟⲥ  ⲇⲉ  ⲑⲓⲕⲱⲛ  ⲙ̅ⲡⲕⲁⲕⲉ  ⲉⲧⲟⲩⲛⲁⲃⲱⲕ  ⲉⲣⲟϥ:  ⲛ̅ⲧⲟⲟⲩ  ⲇⲉ  ⲛⲉⲩϩⲟⲣϣ̅  ⲉⲣⲟⲟⲩ  ⲙⲁⲩⲁⲁⲩ  ⲉϩⲟⲩⲉⲡⲕⲁⲕⲉ.

Ⲕⲉⲫ.  Ⲓ̅ⲏ̅
 
Ⲛⲉⲕⲡⲉⲧⲟⲩⲁⲁⲃ  ⲇⲉ  ⲛ̅ⲧⲟⲟⲩ  ⲛⲉⲣⲉⲟⲩⲛⲟϭ  ⲛ̅ⲟⲩⲟⲉⲓⲛ  ⲡⲉ  ϣⲟⲟⲡ  ⲛⲁⲩ :  ⲉⲣⲉⲛⲏ  ⲙⲉⲛ  ⲥⲱⲧⲙ̅  ⲉⲩⲥⲙⲏ  ⲉⲛⲥⲉⲛⲁⲩ  ⲇⲉ  ⲉⲣⲟⲟⲩ  ⲁⲛ . ⲛⲉⲩⲙⲁⲕⲁⲣⲓⲍⲉ  ⲙ̅ⲙⲟⲟⲩ  ϫⲉ  ⲙ̅ⲡⲟⲩⲃⲱⲕ  ϩⲛ̅ⲛⲉⲓϩⲓⲥⲉ.  ⲃ̅.  Ⲁⲩⲱ  ⲉⲩϣⲡ̅ϩⲙⲟⲧ  ⲛ̅ⲧⲟⲟⲧⲟⲩ  ϫⲉ  ⲛ̅ⲥⲉⲧⲱⲱⲃⲉ  ⲁⲛ  ⲛ̅ⲛ̅ϫⲓⲛϭⲟⲛⲥ̅  ⲛ̅ⲧⲁⲩⲁⲁⲩ . . .  ⲁⲩⲱ  ⲛⲉⲩ . . . ⲙⲟⲟⲩ  ⲉⲧⲃⲉⲑⲉ  ⲛ̅ⲧⲁⲩ . . . . . ⲩ  ⲛ̅ϫⲁϫⲉ.  ⲅ̅.  Ⲉⲡⲙⲁ  ⲛ̅ⲛⲁⲓ  ⲁⲕⲧⲛ̅ⲛⲟⲟⲩ  ⲛⲁⲩ  ⲛ̅ⲟⲩⲥⲧⲩⲗⲟⲥ  ⲛ̅ⲕⲱϩⲧ̅ . ⲉⲧⲥⲁⲃⲟ  ⲙ̅ⲙⲟⲟⲩ  ⲉⲧⲉϩⲓⲏ  ⲉⲧⲉⲛ̅ⲥⲉⲥⲟⲟⲩⲛ  ⲙ̅ⲙⲟⲥ  ⲁⲛ . ⲙⲛ̅ⲟⲩⲣⲏ  ⲉⲙⲉϥⲣⲱⲕϩ̅  ⲁⲛ  ⲉϥϫⲓⲙⲟⲉⲓⲧ  ϩⲏⲧⲟⲩ  ⲙ̅ⲡⲉϩⲟⲟⲩ.  ⲇ̅.  Ⲛⲏ  ⲅⲁⲣ  ⲙ̅ⲡϣⲁ  ⲉⲧⲣⲉⲩϥⲓⲡⲟⲩⲟⲉⲓⲛ  ⲛ̅ⲧⲟⲟⲧⲟⲩ  ⲛ̅ⲥⲉⲟⲧⲡⲟⲩ  ⲉϩⲟⲩⲛ  ⲉⲡⲕⲁⲕⲉ . ⲛⲉⲛⲧⲁⲩϩⲁⲣⲉϩ  ⲉⲛⲉⲕϣⲏⲣⲉ  ⲉⲩⲟⲧⲡ̅  ⲉϩⲟⲩⲛ .  ⲛⲁⲓ  ⲉⲩⲛⲁϯ  ⲙ̅ⲡⲟⲩⲟⲉⲓⲛ  ⲛ̅ⲁⲧⲧⲁⲕⲟ  ⲙ̅ⲡⲕⲟⲥⲙⲟⲥ  ⲉⲃⲟⲗ  ϩⲓⲧⲟⲟⲧⲟⲩ.   ⲛ̅ⲧⲉⲣⲉϥϫⲓϣⲟϫⲛⲉ  ⲅⲁⲣ  ⲉⲙⲟⲩⲟⲩⲧ  ⲛ̅ⲛ̅ϣⲏⲣⲉ  ⲛ̅ⲛⲉⲕⲡⲉⲧⲟⲩⲁⲁⲃ . ⲉⲁⲩⲛⲟⲩϫⲉ  ⲉⲃⲟⲗ  ⲛ̅ⲟⲩϣⲏⲣⲉ  ⲉϥⲟⲩⲁⲁⲃ  ⲁⲩⲱ  ⲁϥⲟⲩϫⲁⲓ . ⲉⲡⲉⲩϫⲡⲓⲟ  ⲇⲉ  ⲁⲕϥⲓⲡⲙⲏⲏϣⲉ  ⲛ̅ⲛⲉⲩϣⲏⲣⲉ .  ⲁⲩⲱ  ⲁⲕϥⲟⲧⲟⲩ  ⲉⲃⲟⲗ  ϩⲓⲟⲩⲥⲟⲡ  ϩⲛ̅ⲟⲩⲙⲟⲟⲩ  ⲉⲛⲁϣⲱϥ.  Ⲋ.  Ⲧⲉⲩϣⲏ  ⲉⲧⲙ̅ⲙⲁⲩ  ⲁⲕⲧⲁⲙⲉⲛⲉⲛⲉⲓⲟⲧⲉ  ⲉⲣⲟⲥ . ϫⲉⲕⲁⲥ  ⲉⲩⲉⲉⲓⲙⲉ  ⲉⲛⲁⲛⲁⲩϣ  ⲛ̅ⲥⲉⲛⲁⲩⲩ  ϫⲉ  ⲛ̅ⲧⲁⲩⲛⲁϩⲧⲉ  ⲉⲣⲟⲕ  ⲛ̅ⲥⲉⲧⲱⲕ  ⲛ̅ϩⲏⲧ.  ⲍ̅.  Ⲛ̅ⲧⲉⲟⲩⲟⲩϫⲁⲓ  ⲙⲉⲛϣⲱⲡⲉ  ⲙ̅ⲡⲉⲕⲗⲁⲟⲥ  ϩⲙ̅ⲡⲕⲟⲥⲙⲟⲥ  ⲛ̅ⲛ̅ⲇⲓⲕⲁⲓⲟⲥ . ⲟⲩⲧⲁⲕⲟ  ⲇⲉ  ⲛ̅ⲛⲉⲛϫⲁϫⲉ  ⲛ̅ⲑⲉ  ⲛ̅ⲧⲁⲕⲧϩⲙ̅ⲕⲉⲛ̅ⲛ̅ϣⲁϫⲉ.  ⲏ̅.  Ϩⲙ̅ⲡⲁⲓ  ⲁ . . . .  ⲛⲓϫⲁϫⲉ  ⲅⲁⲣ  ϩⲣⲁⲓ  ⲛ̅ϩⲏⲧϥ̅  ⲁⲕϯⲉⲟⲟⲩ  ⲛⲁⲛ.  ⲑ̅.  Ⲛ̅ϣⲏⲣⲉ  ⲅⲁⲣ  ⲉⲧⲟⲩⲁⲁⲃ  ⲛ̅ⲣ̅ⲣⲱⲙⲉ  ⲛ̅ⲁⲅⲁⲑⲟⲥ  ⲛⲉⲩⲧⲁⲗⲉⲑⲩⲥⲓⲁ  ⲉϩⲣⲁⲓ  ϩⲙ̅ⲫⲱⲡ . ⲉⲩⲥⲙⲓⲛⲉ  ϩⲓⲟⲩⲥⲟⲡ  ⲙ̅ⲡⲛⲟⲙⲟⲥ  ⲙ̅ⲡⲧⲃ̅ⲃⲟ. ⲉⲧⲣⲉⲛⲉⲧⲟⲩⲁⲁⲃ  ⲙⲉⲧⲉⲭⲉ  ⲙⲛ̅ⲛⲉⲩⲉⲣⲏⲩ  ⲉⲛⲓⲁⲅⲁⲑⲟⲛ  ⲙⲛ̅ⲛⲓ . . .   ⲟⲩⲱⲧ . ⲁⲩⲱ  ⲛⲉⲩϫⲟⲟⲩ  ⲉϩⲣⲁⲓ  ⲛ̅ϩⲛ̅ⲥⲙⲟⲩ  ⲙ̅ⲡⲓⲱⲧ.    Ⲡⲉϩⲣⲟⲟⲩ  ϩⲱⲟⲩ  ⲛ̅ⲛ̅ϫⲁϫⲉ  ⲛⲉϥⲱϣ  ⲉⲃⲟⲗ  ⲉϥϣⲟⲃⲉ . ⲁⲩⲱ  ⲟⲩⲥⲙⲏ  ⲛ̅ⲣⲓⲙⲉ  ⲉⲩⲧⲟⲉⲓⲧ  ⲉⲛⲉⲩϣⲏⲣⲉ.  ⲓ̅ⲁ.  Ⲟⲩϩⲙ̅ϩⲁⲗ  ⲇⲉ  ⲙⲛ̅ⲡⲉϥϫⲟⲉⲓⲥ  ⲉⲩⲕⲟⲗⲁⲍⲉ  ⲙ̅ⲙⲟⲟⲩ  ϩⲙ̅ⲡⲓϩⲁⲡ  ⲛ̅ⲟⲩⲱⲧ : ⲟⲩϩⲏⲕⲉ  ⲙⲛ̅ⲟⲩⲣ̅ⲣⲟ  ⲉⲩϣⲱⲡ  ⲛ̅ⲛⲓϩⲓⲥⲉ  ⲟⲩⲱⲧ.  ⲓ̅ⲃ.  Ⲛ̅ⲧⲟⲟⲩ  ⲧⲏⲣⲟⲩ  ϩⲓⲟⲩⲥⲟⲡ  ⲉⲩϩⲙ̅ⲡⲓⲙⲟⲩ  ⲛ̅ⲟⲩⲱⲧ  ⲛⲉ . ⲙⲛ̅ⲏⲡⲉ  ⲛ̅ⲛⲉⲩⲣⲉϥⲙⲟⲟⲩⲧ : Ⲛⲉⲧⲟⲛϩ̅  ⲅⲁⲣ  ⲛⲉⲩⲣⲱϣⲉ  ⲁⲛ  ⲡⲉ  ⲉⲧⲱⲙⲥ̅  ⲛ̅ⲛⲉⲧⲙⲟⲟⲩⲧ . ⲉⲧⲃⲉϫⲉ  ⲡⲉⲩϫⲡⲟ  ⲉⲧⲧⲁⲉⲓⲏⲩ  ⲁϥⲧⲁⲕⲟ  ϩⲛ̅ⲟⲩϣⲡ̅ⲛ̅ϣⲱⲡ.  ⲓ̅ⲅ.  Ⲉⲩⲟ  ⲅⲁⲣ  ⲛ̅ⲁⲧⲛⲁϩⲧⲉ  ⲉϩⲱⲃ  ⲛⲓⲙ  ⲉⲧⲃⲉⲛⲉⲩⲙⲛ̅ⲧⲣⲉϥⲣ̅ⲡⲁϩⲣⲉ . ϩⲙ̅ⲡⲧⲣⲉⲛⲉⲩϣⲣ̅ⲡⲙ̅ⲙⲓⲥⲉ  ⲧⲁⲕⲟ  ⲁⲩϩⲟⲙⲟⲗⲟⲅⲉⲓ  ϫⲉ  ⲟⲩϣⲏⲣⲉ  ⲛ̅ⲧⲉⲡⲛⲟⲩⲧⲉ  ⲡⲉ  ⲡⲉⲓⲗⲁⲟⲥ.  ⲓ̅ⲇ.  Ⲉⲣⲉⲟⲩⲛⲟϭ  ⲅⲁⲣ  ⲛ̅ⲥϭⲣⲁϩⲧ̅ . . . . . . . . .   ⲛⲓⲙ  ⲥⲙⲟⲛⲧ̅  ϩⲣⲁⲓ  ϩⲛ̅ . . . .   Ⲡⲉⲕϣⲁϫⲉ  ⲉⲧϭⲙ̅ϭⲟⲙ  ⲉϩⲱⲃ  ⲛⲓⲙ  ⲁϥⲉⲓ  ⲉⲃⲟⲗ  ϩⲛ̅ⲙ̅ⲡⲏⲩⲉ  ϩⲓⲧⲛ̅ⲛⲉⲑⲣⲟⲛⲟⲥ  ⲛ̅ⲧⲉⲕⲙⲛ̅ⲧⲉⲣⲟ . ⲛ̅ⲑⲉ  ⲛ̅ⲟⲩⲣⲉϥⲙⲓϣⲉ  ⲉϥϣⲱⲱⲧ  ⲉⲃⲟⲗ  ⲁϥϥⲱϭⲉ  ⲉϩⲣⲁⲓ  ⲉⲧⲙⲏⲧⲉ  ⲙ̅ⲡⲕⲁϩ  ⲛ̅ⲛ̅ϫⲁϫⲉ.  ⲓ̅Ⲋ.  Ⲉⲩⲛ̅ⲟⲩⲥⲏϥⲉ  ⲛ̅ⲧⲟⲟⲧϥ̅  ⲉⲥⲧⲏⲙ  ϩⲙ̅ⲡⲉⲕⲟⲩⲉϩⲥⲁϩⲛⲉ  ⲁϫⲛ̅ϩⲩⲡⲟⲕⲣⲓⲛⲉ . ⲁϥⲁϩⲉⲣⲁⲧϥ̅  ⲁϥⲙⲉϩⲙⲁ  ⲛⲓⲙ  ⲙ̅ⲙⲟⲩ  ⲉϥϫⲱϩ  ⲉⲧⲡⲉ . ⲉⲣⲉⲣⲁⲧϥ̅  ϩⲓϫⲙ̅ⲡⲕⲁϩ.  ⲓ̅ⲍ.  Ⲛ̅ⲧⲉⲩⲛⲟⲩ  ⲇⲉ  ⲁⲩϣⲧⲣ̅ⲧⲱⲣⲟⲩ  ⲛ̅ϭⲓϩⲛ̅ⲫⲁⲛⲧⲁⲥⲓⲁ  ⲛ̅ⲣⲁⲥⲟⲩ  ⲉⲩⲛⲁϣⲧ̅ . ⲙⲛ̅ϩⲉⲛϩⲟⲧⲉ  ⲉⲩⲛⲏⲩ  ⲉϩⲣⲁⲓ  ⲉϫⲱⲟⲩ  ⲉⲛⲥⲉⲙⲉⲉⲩⲉ  ⲉⲣⲟⲟⲩ  ⲁⲛ.  ⲓ̅ⲏ.  Ⲉⲣⲉⲡⲟⲩⲁ  ⲡⲟⲩⲁ  ⲛⲏϫ  ⲛ̅ⲥⲁⲟⲩⲥⲁ  ⲉϥⲟ  ⲙ̅ⲡϣⲙⲟⲩ . ⲉⲩⲧⲁⲙⲟ  ⲙ̅ⲙⲟⲟⲩ  ⲉⲧⲗⲟⲉⲓϭⲉ  ⲉⲧⲟⲩⲙⲟⲩ  ⲉⲧⲃⲏⲧⲥ̅.  ⲓ̅ⲑ.  Ⲣ̅ⲣⲁⲥⲟⲩ  ⲅⲁⲣ  ⲉⲧϣⲧⲟⲣⲧⲣ̅  ⲙ̅ⲙⲟⲟⲩ  ⲛⲉⲩⲟⲩⲱⲛϩ̅  ⲛⲁⲩ  ⲉⲃⲟⲗ  ⲙ̅ⲡⲁⲓ . ϫⲉ  ⲛⲉⲩⲣ̅ⲁⲧⲥⲟⲟⲩⲛ  ⲙ̅ⲡⲉⲧⲟⲩϣⲱⲡ  ⲛ̅ⲛⲉⲓⲡⲉⲑⲟⲟⲩ  ⲉⲧⲃⲏⲧϥ̅  ⲛ̅ⲥⲉϥⲱⲧⲉ  ⲉⲃⲟⲗ  ⲧⲏⲣⲟⲩ.    Ⲁⲩϫⲛ̅ⲧⲛ̅ⲇⲓⲕⲁⲓⲟⲥ  ϩⲱⲟⲩ  ⲟⲛ  ⲙ̅ⲡⲙⲟⲩ  ⲛ̅ⲟⲩⲟⲉⲓϣ . ⲁⲩⲱ  ⲁⲩⲙⲏⲏϣⲉ  ϩⲉ  ⲉⲃⲟⲗ  ϩⲙ̅ⲡϫⲁⲉⲓⲉ . ⲉϥⲧⲱⲃϩ̅  ϩⲓⲧⲛ̅ⲟⲩϣⲗⲏⲗ  ⲙⲛ̅ⲟⲩϣⲟⲩϩⲏⲛⲉ  ⲉϥⲁϩⲉⲣⲁⲧϥ̅  ⲟⲩⲃⲉⲡϭⲱⲛⲧ̅.  ⲕ̅ⲁ̅.  . . . ⲟⲩⲣⲱⲙⲉ  ⲛ̅ⲥⲱⲧⲡ̅  ⲁϥⲙⲓϣⲉ . . . :  ⲁϥϫⲓ  ⲙ̅ⲡϩⲟⲡⲗⲟⲛ  ⲙ̅ⲡⲉϥϣⲙ̅ϣⲉ  ⲉϥⲧⲱⲃϩ̅  ϩⲓⲧⲛ̅ⲟⲩϣⲗⲏⲗ  ⲙⲛ̅ⲟⲩϣⲟⲩϩⲏⲛⲉ  ⲉϥⲁϩⲉⲣⲁⲧϥ̅  ⲟⲩⲃⲉⲡϭⲱⲛⲧ̅ . ⲁⲩⲱ  ⲁϥⲧⲁⲗϭⲉⲧⲉⲑ . . . . . . . . . .   ⲉϥⲟⲩⲱⲛϩ̅  ⲙ̅ⲙⲟϥ  ⲉⲃⲟⲗ  ϫⲉ  ⲡⲉⲕϩⲙ̅ϩⲁⲗ  ⲡⲉ.  ⲕ̅ⲃ̅.  Ⲁϥϫⲣⲟ  ⲉⲡⲙⲏⲏϣⲉ  ϩⲛ̅ⲟⲩϭⲟⲙ  ⲁⲛ  ⲛ̅ⲥⲱⲙⲁ  ⲟⲩⲇⲉ  ϩⲛ̅ⲟⲩⲛⲁϣⲧⲉ  ⲁⲛ  ⲛ̅ϩⲟⲡⲗⲟⲛ . ⲁⲗⲗⲁ  ⲙ̅ⲡⲉϥϣⲁϫⲉ  ⲁϥⲥⲉⲡⲥ̅ⲡⲉⲧⲕⲟⲗⲁⲍⲉ  ⲙ̅ⲙⲟⲟⲩ . ⲉⲁϥⲧⲣⲉϥⲣ̅ⲡⲙⲉⲉⲩⲉ  ⲛ̅ⲁⲛⲁⲩϣ  ⲛ̅ⲛ̅ⲉⲓⲟⲧⲉ  ⲙⲛ̅ⲧⲇⲓⲁⲑⲏⲕⲏ.  ⲕ̅ⲅ̅.  Ⲛ̅ⲧⲉⲣⲟⲩϣⲱⲡⲉ  ⲅⲁⲣ  ⲛ̅ϭⲓⲛ̅ⲣⲉϥⲙⲟⲟⲩⲧ  ⲉⲩϩⲏⲩ  ⲉϩⲣⲁⲓ  ⲉϫⲛ̅ⲛⲉⲩⲉⲣⲏⲩ . ⲁϥⲁϩⲉⲣⲁⲧϥ̅  ϩⲛ̅ⲧⲉⲩⲙⲏⲧⲉ  ⲁϥⲧⲁⲗϭⲉⲧⲟⲣⲅⲏ . ⲁϥⲡⲣ̅ϫⲧⲉϩⲓⲏ  ⲟⲩⲧⲱⲟⲩ  ⲙⲛ̅ⲛⲉⲧⲟⲛϩ̅.  ⲕ̅ⲇ̅.  Ⲛⲉⲣⲉⲡⲕⲟⲥⲙⲟⲥ  ⲅⲁⲣ  ⲧⲏⲣϥ̅  ⲡⲟϩⲧ̅  ϩⲓⲧⲡⲟⲇⲏⲣⲏ  ⲛ̅ⲧⲉϥϩⲃ̅ⲥⲱ . ⲁⲩⲱ  ⲡⲉⲟⲟⲩ  ⲛ̅ⲛ̅ⲉⲓⲟⲧⲉ  ⲛ̅ϥⲧⲟⲟⲩ  ⲛ̅ⲥⲧⲉⲓⲭⲟⲥ  ⲉϥϣⲉⲧϣⲱⲧ  ϩⲛ̅ϩⲉⲛⲱⲛⲉ . ⲁⲩⲱ  ⲧⲉⲕⲙⲛ̅ⲧⲛⲟϭ  ϩⲓϫⲛ̅ⲧⲉϭⲣⲏⲡⲉ  ⲛ̅ⲧⲉϥⲁⲡⲉ.   Ⲛⲁⲓ  ⲛⲉⲛⲧⲁϥϣⲓⲡⲉ   ϩⲏⲧⲟⲩ  ⲛ̅ϭⲓⲡⲉⲧⲧⲁⲕⲟ  ⲛⲁⲓ  ⲛⲉ  ⲛ̅ⲧⲁϥⲣ̅ϩⲟⲧⲉ  ϩⲏⲧⲟⲩ .  . .ⲣⲱϣⲉ  . . . . . . . .  ⲙⲁⲧⲉ  ⲛ̅ⲧ . . . . . .    
 
Ⲕⲉⲫ.  Ⲓ̅Ⲑ̅
 
Ⲛⲁⲥⲉⲃⲏⲥ  ⲇⲉ . . . . . . . . .  ⲛⲁⲉⲓ  ⲉϩⲣⲁⲓ   . . . .ⲩ  ⲛ̅ϣⲁⲃⲟⲗ : ⲛⲉϥⲥⲟⲟⲩⲛ  ⲅⲁⲣ  ⲛ̅ⲛⲉⲧⲟⲩⲛⲁⲁⲁⲩ.  ⲃ̅.  Ϫⲉ  ⲙⲛ̅ⲛ̅ⲥⲁⲧ . . .ⲁⲩ  ⲉⲃⲟⲗ  ⲉⲃⲱⲕ  ⲁⲩⲱ  ⲛ̅ⲥⲉ . . .  ⲉⲃⲟⲗ  ϩⲛ̅ⲟⲩϭⲉⲡⲏ  ⲥⲉⲛⲁⲣ̅. . . .  ⲛ̅ⲥⲉⲡⲱⲧ  ⲛ̅ⲥⲱⲟⲩ.  ⲅ̅.  Ⲉⲧⲓ  ⲅⲁⲣ  ⲉⲣⲉⲫⲏⲃⲉ  ϩⲛ̅ⲧⲉⲩⲙⲏⲧⲉ. ⲉⲩⲧⲟⲉⲓⲧ  ϩⲓⲣⲛ̅ⲛ̅ⲧⲁⲫⲟⲥ  ⲛ̅ⲛ̅ⲕⲱⲱⲥ . ⲁⲩϫⲡⲟ  ⲛⲁⲩ  ⲛ̅ⲕⲉⲙⲉⲉⲩⲉ  ⲛ̅ⲁⲑⲏⲧ . ⲁⲩⲱ  ⲛⲏ  ⲛ̅ⲧⲁⲩⲛⲟϫⲟⲩ  ⲉⲃⲟⲗ ⲉⲩⲥⲟⲡⲥ̅  ⲙ̅ⲙⲟⲟⲩ:  ⲛⲁⲓ  ⲇⲉ  ⲁⲩⲡⲱⲧ  ⲛ̅ⲥⲱⲟⲩ  ⲛ̅ⲑⲉ  ⲛ̅ⲛⲉⲧⲡⲏⲧ  ⲛ̅ϫⲓⲟⲩⲉ.  ⲇ̅.  Ⲛⲉⲣⲉⲧⲁⲛⲁⲅⲕⲏ  ⲥⲱⲕ  ⲙ̅ⲙⲟⲟⲩ  ⲛ̅ⲧⲉⲉⲓϩⲁⲏ  ⲉⲧⲟⲩⲙ̅ⲡϣⲁ  ⲙ̅ⲙⲟⲥ . ⲉⲁⲥⲧⲣⲉⲩⲣ̅ⲡⲱⲃϣ̅  ⲛ̅ⲛⲉⲛⲧⲁⲩϣⲱⲡⲉ  ⲙ̅ⲙⲟⲟⲩ . ϫⲉⲕⲁⲥ  ⲉⲩⲉϫⲱⲕ  ⲉⲃⲟⲗ  ⲛ̅ⲧⲕⲟⲗⲁⲥⲓⲥ  ⲛ̅ⲧⲃⲁⲥⲁⲛⲟⲥ  ⲉⲧⲟⲩⲙ̅ⲡϣⲁ  ⲙ̅ⲙⲟⲥ.    ⲛ̅ⲧⲉⲡⲉⲕⲗⲁⲟⲥ  ϫⲓⲟⲟⲣ  ϩⲛ̅ⲟⲩϩⲓⲏ  ⲛ̅ϣⲡⲏⲣⲉ . ⲛⲏ  ⲇⲉ  ⲛ̅ⲧⲟⲟⲩ  ⲛ̅ⲥⲉⲃⲱⲕ  ϩⲛ̅ⲟⲩⲙⲟⲟⲩ  ⲉϥϣⲟⲃⲉ.  Ⲋ.  Ⲧⲉⲕⲧⲓⲥⲓⲥ  ⲅⲁⲣ  ⲧⲏⲣⲥ̅  ϩⲙ̅ⲡⲉⲥⲥⲙⲟⲧ  ⲁⲥϣⲃ̅ⲧⲡⲉⲥⲥⲱⲛⲧ . ⲉⲥϣⲙ̅ϣⲉ  ⲙ̅ⲡⲉⲕⲟⲩⲉϩⲥⲁϩⲛⲉ . ϫⲉⲕⲁⲥ  ⲉⲥⲉⲁⲣⲉϩ  ⲉⲛⲉⲕϣⲏⲣⲉ  ⲁϫⲛ̅ⲙ̅ⲕⲁϩ .  Ⲧⲉⲕⲕⲗⲟⲟⲗⲉ  ⲅⲁⲣ  ⲁⲥⲣ̅ϩⲁⲓⲃⲉⲥ  ⲉⲧⲡⲁⲣⲉⲙⲃⲟⲗⲏ  ⲁⲩⲱ  ⲟⲩⲕⲁϩ.  ⲍ̅.  Ⲉϥϣⲟⲩⲱⲟⲩ  ⲁϥⲟⲩⲱⲛϩ̅  ⲉⲃⲟⲗ  ϩⲛ̅ⲟⲩⲙⲟⲟⲩ  ⲉⲛⲁϣⲱϥ . ⲙⲛ̅ⲟⲩϩⲓⲏ  ⲉⲥⲥⲟⲩⲧⲱⲛ  ⲉⲃⲟⲗ  ϩⲛ̅ⲧⲉⲣⲩⲑⲣⲁ  ⲑⲁⲗⲁⲥⲥⲁ . ⲙⲛ̅ⲟⲩⲥⲱϣⲉ  ⲉϣⲁϥϯⲟⲩⲱ  ⲉⲃⲟⲗ  ϩⲛ̅ϩⲟⲉⲓⲙ  ⲉⲩⲛⲁϣⲧ̅.  ⲏ̅.  Ⲧⲁⲓ  ⲛ̅ⲧⲁⲩⲉⲓ  ⲉⲃⲟⲗ  ϩⲓⲧⲟⲟⲧⲥ̅  ϩⲓⲧⲛ̅ϩⲉⲑⲛⲟⲥ  ⲛⲓⲙ . ⲉⲣⲉⲧⲉⲕϭⲓϫ  ⲣ̅ϩⲁⲉⲓⲃⲉⲥ  ⲉⲣⲟⲟⲩ. ⲉⲁⲩⲛⲁⲩ  ⲉϩⲉⲛⲙⲁⲉⲓⲛ  ⲙⲛ̅ϩⲛ̅ϣⲡⲏⲣⲉ.  ⲑ̅.  Ⲁⲩⲙⲟⲟⲛⲉ  ⲅⲁⲣ  ⲙ̅ⲙⲟⲟⲩ  ⲛ̅ⲑⲉ  ⲛ̅ϩⲛ̅ϩⲧⲱⲣ . ⲁⲩⲱ  ⲛⲉⲩⲥⲛⲁⲉⲓⲛ  ⲛ̅ⲑⲉ  ⲛ̅ϩⲛ̅ⲟⲉⲓⲗⲉ . ⲉⲩⲥⲙⲟⲩ  ⲧⲏⲣⲟⲩ  ⲉⲣⲟⲕ  Ⲡϫⲟⲉⲓⲥ  ⲡⲉⲧⲛⲟⲩϩⲙ̅  ⲙ̅ⲙⲟⲟⲩ.    Ⲛⲉⲩⲣ̅ⲡⲙⲉⲉⲩⲉ  ⲅⲁⲣ  ⲛ̅ⲛⲉⲛⲧⲁⲩϣⲱⲡⲉ  ϩⲙ̅ⲡⲉⲩⲙⲁ  ⲛ̅ϭⲟⲉⲓⲗⲉ . ⲛ̅ⲑⲉ  ⲛ̅ⲧⲁⲡⲕⲁϩ  ⲧⲁⲟⲩⲟ  ⲉⲃⲟⲗ  ⲛ̅ϩⲉⲛϫⲉⲕⲕⲓϫ  ⲉⲡⲙⲁ  ⲛ̅ϩⲛ̅ⲧⲃ̅ⲛⲟⲟⲩⲉ . ⲁⲩⲱ  ⲡⲓⲉⲣⲟ  ⲁϥⲧⲁⲩⲟ  ⲉϩⲣⲁⲓ  ⲛ̅ϩⲉⲛⲁϣⲏ  ⲛ̅ⲕⲣⲟⲩⲣ  ⲉⲡⲙⲁ  ⲛ̅ϩⲉⲛⲧⲃ̅ⲧ.  ⲓ̅ⲁ.  Ⲙⲛ̅ⲛ̅ⲥⲱⲥ  ⲇⲉ  ⲟⲛ  ⲁⲩⲛⲁⲩ  ⲉⲕⲉϫⲡⲟ  ⲛ̅ϩⲁⲗⲏⲧ  ⲉϥϣⲟⲃⲉ :  ⲛ̅ⲧⲉⲣⲟⲩⲉⲡⲓⲑⲩⲙⲓ  ⲁⲩⲁⲓⲧⲓ  ⲛ̅ϩⲉⲛϭⲓⲛⲟⲩⲟⲟⲙ  ⲛ̅ⲧⲣⲩⲫⲏ.  ⲓ̅ⲃ.  Ⲉⲃⲟⲗ  ⲅⲁⲣ  ϩⲛ̅ⲧⲉⲣⲩⲑⲣⲁ  ⲑⲁⲗⲁⲥⲥⲁ  ⲁⲥⲉⲓ ⲛⲁⲩ  ⲛ̅ϭⲓⲟⲩϩⲏ  ⲙ̅ⲡⲏⲣⲁ  ⲉⲧⲥⲓⲟⲟⲩ .  . . .. . ⲉⲓ  ⲉϩⲣⲁⲓ  ⲉ. . . .  ⲁϫⲛ̅ⲙ̅ⲙⲁⲉⲓⲛ  . . . ⲁⲛ  ⲉⲱⲛ . . .  ⲛⲁϣⲧ̅ :  ⲛⲉⲩⲙ̅ⲡϣⲁ  ⲅⲁⲣ  ⲛ̅ϣⲉⲡⲛⲁⲓ  ⲉⲧⲃⲉⲛⲉⲩⲡⲟⲣⲛⲓⲁ.  ⲓ̅ⲅ.  Ⲕⲁⲓ  ⲅⲁⲣ  ⲁⲩ . . ⲩ  ϩⲱⲟⲩ  ⲟⲛ  ⲉⲩⲙⲛ̅ⲧⲙⲁⲥⲧϣⲙ̅ⲙⲟ  ⲉⲥϩⲟⲟⲩ  ⲛ̅ϩⲟⲩⲟ : ⲛⲏ  ⲙⲉⲛ  ⲅⲁⲣ  ⲙ̅ⲡⲟⲩϣⲱⲡ  ⲉⲣⲟⲟⲩ  ⲛ̅ⲛⲉⲧⲛⲏⲩ  ⲉⲣⲁⲧⲟⲩ  ϩⲛ̅ⲟⲩⲙⲛ̅ⲧⲁⲧⲥⲟⲟⲩⲛ . ⲛⲁⲓ  ⲇⲉ  ⲛ̅ⲧⲟⲟⲩ  ϩⲉⲛϣⲙ̅ⲙⲟ  ⲛ̅ⲣⲉϥⲣ̅ⲡⲉⲧⲛⲁⲛⲟⲩϥ  ⲁⲩⲁⲁⲩ  ⲛⲁⲩ  ⲛ̅ϩⲙ̅ϩⲁⲗ.  ⲓ̅ⲇ.  Ⲛⲁⲓ  ⲇⲉ  ⲙⲙⲁⲧⲉ  ⲁⲛ  ⲁⲗⲗⲁ  ⲛ̅ⲕⲉϭⲙ̅ⲡϣⲓⲛⲉ  ⲉϥⲛⲁϣⲱⲡⲉ  ⲛⲁⲩ . ϫⲉ  ⲁⲩⲭⲣⲁⲥⲑⲁⲓ  ⲕⲁⲕⲱⲥ  ⲛ̅ⲛ̅ϣⲙ̅ⲙⲟ.    Ⲛⲁⲓ  ⲇⲉ  ⲛ̅ⲧⲟⲟⲩ  ⲁⲩϣⲱⲡ  ⲉⲣⲟⲟⲩ  ϩⲛ̅ⲟⲩⲣⲁϣⲉ . ⲛⲁⲓ  ⲉⲧⲉⲩⲛ̅ⲧⲟⲩ  ⲡⲓϩⲁⲡ  ⲛ̅ⲟⲩⲱⲧ . ⲁⲩⲑⲙ̅ⲕⲟⲟⲩ  ϩⲛ̅ⲛ̅ϩⲓⲥⲉ  ⲉⲩⲛⲁϣⲧ̅.  ⲓ̅Ⲋ.  Ⲁⲩⲡⲁⲧⲁⲥⲥⲉ  ϩⲱⲟⲩ  ⲟⲛ  ⲙ̅ⲙⲟⲟⲩ  ⲛ̅ⲑⲉ  ⲛ̅ⲛⲏ  ϩⲛ̅ⲟⲩⲕⲁⲕⲉ  ϩⲓⲣⲛ̅ⲛ̅ⲣⲟ  ⲙ̅ⲡⲇⲓⲕⲁⲓⲟⲥ. ⲉⲁⲩϩⲟⲃⲥⲟⲩ  ϩⲓⲧⲛ̅ⲟⲩⲕⲁⲕⲉ  ⲉϥⲛⲁϣⲧ̅ . ⲁⲡⲟⲩⲁ  ⲡⲟⲩⲁ  ϭⲟⲙϭⲙ̅  ⲛ̅ⲥⲁⲧⲉϩⲓⲏ  ⲙ̅ⲡⲉϥⲣⲟ.  ⲓ̅ⲍ.  Ⲛⲉⲥⲧⲟⲓⲭⲓⲟⲛ  ⲅⲁⲣ  ⲥⲉϣⲓⲃⲉ  ϩⲁⲣⲓϩⲁⲣⲟⲟⲩ . ⲛ̅ⲑⲉ  ⲛ̅ⲟⲩⲕⲓⲑⲁⲣⲁ  ⲉⲥϣⲓⲃⲉ  ⲙ̅ⲡⲉⲥϩⲣⲟⲟⲩ  ϩⲛ̅ⲟⲩⲗ̅ⲗⲉ  ⲛ̅ⲕⲱⲃϩ̅ .   . .  . . . . . . . . . . . . . . .. . . .. . . . . . .  ⲓ̅ⲏ.   . . . . . . . ⲧⲟⲩⲉ  ⲛⲉⲧϩⲙ̅ . . . . . .  ⲁⲩⲱ  ⲛⲉⲧϩⲙ̅ⲡⲙⲟⲟⲩ  ⲉⲩⲕⲟⲧⲟⲩ  ⲉⲛⲉⲧϩⲓⲡⲉⲕⲣⲟ.  ⲓ̅ⲑ.  Ⲡⲕⲱϩⲧ̅  ⲇⲉ  ⲁϥϭⲙ̅ϭⲟⲙ  ϩⲙ̅ⲡⲙⲟⲟⲩ  ⲧϭⲟⲙ  ⲉϣⲁⲥⲟϣⲙⲉϥ . ⲁⲩⲱ  ⲡⲙⲟⲟⲩ  ⲁϥⲣ̅ⲡⲱⲃϣ̅  ⲛ̅ⲧⲉϥⲫⲩⲥⲓⲥ  ⲣ̅ⲣⲉϥⲱϣⲙ̅.    Ⲡϣⲁϩ  ⲛ̅ⲧⲥⲁⲧⲉ  ⲙ̅ⲡϥ̅ . . .   ⲛ̅ⲛ̅ⲥⲁⲣⲝ̅  ⲛ̅ⲛ̅ⲍⲱⲟⲛ  ⲉⲩⲙⲟⲟϣⲉ  ⲉⲩⲙⲟⲧⲛ̅  ⲛ̅ⲧⲁⲕⲟⲟⲩ.  Ⲟⲩⲧⲉ  ⲧⲉϩⲣⲉ  ⲉⲃⲟⲗ  ϩⲓⲧⲙ̅ⲡⲛⲟⲩⲧⲉ  ⲉⲧⲉⲓⲛⲉ  ⲙ̅ⲡⲉⲕⲣⲩⲥⲧⲁⲗⲗⲟⲥ  ⲛ̅ⲃⲟⲗϥ̅  ⲉⲃⲟⲗ.  ⲕ̅ⲁ̅.  Ϩⲛ̅ϩⲱⲃ  ⲅⲁⲣ  ⲛⲓⲙ  Ⲡϫⲟⲉⲓⲥ  ⲁⲕϫⲓⲥⲉ  ⲁⲩⲱ  ⲁⲕϯⲉⲟⲟⲩ  ⲙ̅ⲡⲉⲕⲣⲁⲛ : ⲙ̅ⲡⲉⲕⲟⲃϣⲕ̅  ⲉⲣⲟⲟⲩ  ⲛ̅ⲟⲩⲟⲉⲓϣ  ⲛⲓⲙ  ⲉⲕⲙⲟⲟϣⲉ  ⲛⲙ̅ⲙⲁⲩ  ϩⲙ̅ⲙⲁ  ⲛⲓⲙ.
 

ⲧⲥⲟⲫⲓⲁ  ⲛ̅Ⲥⲟⲗⲟⲙⲱⲛ

ⲧⲉⲗⲟⲥ.  ⲡⲁⲡⲟⲅⲣⲁⲫⲟⲛ  ⲛ̅ⲛⲉⲓϫⲱⲱⲙⲉ  ⲁⲩⲁⲁⲩ
ϩⲓⲧⲛ̅Ⲥⲁⲛⲇⲣⲁ  Ϩⲟⲓⲉⲣ  ⲧⲣⲉϥϫⲓⲥⲃⲱ  ⲛ̅ⲧⲁⲓⲅⲩⲡⲧⲟⲗⲟⲅⲓⲁ.
ⲧⲏⲩ  ⲉⲡⲓⲣⲉⲙϩⲉ  ⲧⲁϩⲉⲗⲡⲓⲥ  ⲡⲁⲟⲩⲱⲓⲛⲓ.  ϣⲗⲏⲗ  ⲉϫⲱⲓ