ϩⲁⲑⲏ ⲙ̅ⲡⲁϣⲁϫⲉ ⲛⲉⲗⲓⲁⲭⲓⲥⲧⲟⲥ ϯⲡⲣⲟⲥⲕⲩⲛⲏ ⲛⲧⲉⲧⲛⲙⲛ̅ⲧⲓⲱⲧ ⲉⲧⲟⲩⲁⲁⲃ. ⲡⲛⲟⲩⲧⲉ ⲥⲟⲟⲩⲛ ϫⲉ ⲛ̅ⲑⲉ ⲛⲟⲩⲕⲁϩ ⲉϥⲟⲃⲉ ⲉϥϭⲱϣⲧ ϩⲏⲧϥ ⲙ̅ⲡⲙⲟⲟⲩ ⲧⲁⲓ ⲧⲉ ⲑⲉ ⲛⲧⲁⲓⲉⲓⲃⲉ ⲛ̅ⲧⲉⲕⲙⲛ̅ⲧⲡⲉⲧⲟⲩⲁⲁⲃ. ⲕⲁⲓ ⲅⲁⲣ ⲁⲧⲉⲧⲛⲙⲛⲧⲡⲉⲧⲟⲩⲁⲁⲃ ⲧⲗⲙⲟⲓ ϫⲉ ⲉⲕϣⲁⲛⲃⲱⲕ ⲛⲁⲕ ϣⲁⲕϣⲓⲛⲉ ⲛⲥⲱⲓ ⲉⲡⲓⲇⲏ ⲁⲕⲧⲁⲙⲟⲓ ⲉⲧⲃⲉ ⲡⲕⲟⲩⲓ ⲛⲥⲙⲥⲓⲙ ϫⲉ ⲉⲕⲛⲁⲃⲁⲕϥ ⲛⲁⲓ. ⲧⲉⲛⲟⲩ ⲙⲛ̅ ϩⲙⲟⲧ ⲉⲣⲟⲓ ⲉⲣ ϩⲙϩⲁⲗ ⲛⲁⲕ. ⲉⲣϣⲁⲛⲡⲛⲟⲩⲧⲉ ⲧⲱϣ ⲛⲧⲁⲡⲱⲗⲕ ⲉⲃⲟⲗ ϩⲓ ⲧϫⲏⲣⲉ ⲟⲩⲁⲓⲉⲓ ⲉⲣⲏⲥ ⲛⲧⲁⲡⲣⲟⲥⲕⲩⲛⲉ ⲛⲁⲕ. ⲁⲩⲱ ⲙⲁⲣⲉⲓϩⲉ ⲉⲡⲕⲟⲩⲓ ⲛ̅ⲥⲙⲥⲓⲙ ϩⲙ ⲡⲁⲏⲓ ⲛⲧⲛⲁⲛ̅ⲧϥ ⲉⲛϩⲏⲧ ⲛⲧⲟⲟⲧ ⲛⲧⲁⲃⲁⲕϥ ⲛⲁⲕ. ⲟⲩϫⲁⲓ ⲁⲣⲓ ⲡⲁⲙⲉⲉⲩⲉ ϩⲙ ⲡϥⲓ ⲉϩⲣⲁⲓ ⲛⲛⲉⲧⲛϭⲓϫ

ⲧⲁⲁⲥ ⲙⲡⲁⲥⲟⲛ ⲡⲁⲩⲗⲟⲥ ⲡⲁⲓ ⲉⲧⲫⲟⲣⲉⲓ ⲙ̅ⲡⲉⲭ̅ⲥ̅ ϩⲛ ⲟⲩⲙⲉ ϩⲓⲧⲛ ϣⲉⲛⲟⲩⲧⲉ ⲡⲉⲧⲛϩⲙϩⲁⲗ ⲛⲉⲗⲁⲭⲓⲥⲧⲟⲥ

ϩⲁⲑⲏ ⲙ̅ⲡⲁϣⲁϫⲉ ⲛⲉⲗⲓⲁⲭⲓⲥⲧⲟⲥ ϯⲡⲣⲟⲥⲕⲩⲛⲏ ⲛⲧⲉⲧⲛⲙⲛ̅ⲧⲓⲱⲧ ⲉⲧⲟⲩⲁⲁⲃ. ⲡⲛⲟⲩⲧⲉ ⲥⲟⲟⲩⲛ ϫⲉ ⲛ̅ⲑⲉ ⲛⲟⲩⲕⲁϩ ⲉϥⲟⲃⲉ ϩⲁⲑⲏ ⲙⲉⲛ̅ ⲛ̅ϩⲱⲃ ⲛⲓⲙ ϯⲁⲥⲡⲁⲍⲉ ⲛ̅ⲟⲩⲣⲏⲧⲉ ⲛⲧⲉⲧⲛ̅ⲙⲛ̅ⲧⲙⲁⲓⲛⲟⲩⲧⲉ ⲛⲓⲱⲧ ⲉⲧⲟⲩⲁⲁⲃ ⲡⲁⲓⲡⲟⲩⲥ ϩⲓⲧⲛ ⲡⲁⲑⲏⲁⲥ. ⲁⲣⲓ ⲧⲁⲅⲁⲡⲏ ⲡⲛⲁ ⲛ̅ⲧⲁⲧⲉⲧⲛ̅ⲁⲁϥ ⲙⲛ̅ ⲡⲁⲩⲗⲟⲥ ⲛ̅ⲧⲉⲧⲛⲁⲁϥ ⲛⲙ̅ⲙⲁϥ ⲛⲧⲣⲟⲙⲡⲉ ⲟⲛ. ⲡⲉⲧⲉⲧⲛ̅ⲛⲁⲧⲁⲁϥ ⲛⲁϥ ⲁⲛⲟⲕ ⲉⲧϭⲛⲧⲉⲛⲉⲩⲉ ⲛ̅ⲧⲁⲧⲁϥ ⲛⲁⲕ ⲉⲡⲙⲁ ⲛⲧⲉⲧⲉⲛⲁⲕⲉⲗⲉⲩⲉ ⲙ̅ⲙⲟϥ ⲛⲁⲧⲗⲁⲁⲩ ⲛϩⲱⲃ. ⲁⲣⲓ ⲧⲁⲅⲁⲡⲏ ⲛⲅⲣ̅ ⲡⲁⲙⲉⲉⲩⲉ ⲙ̅ⲡϥⲓ ⲉϩⲣⲁⲓ ⲛⲛⲉⲧⲛ̅ϭⲓϫ ⲉⲧⲟⲩⲁⲁⲃ.

ϩⲓϫⲉⲛ ⲡⲓⲙϩⲁⲩ ⲫⲁ ⲇⲣⲟⲥⲓⲥ

ⲟⲩⲧⲱϭⲉ ⲛ̅ⲃⲣ̅ⲣⲉ ⲉⲩϣⲁⲛⲧⲁⲁϥ ⲉⲡⲕⲁϣ ⲛ̅ϥⲉⲓ ⲉⲡⲧⲉ ⲛ̅ϯ ⲙ̅ⲡ̅ϥ̅ⲕⲁⲣⲡⲟⲥ ⲁⲩⲱ ⲉⲥϣⲁⲛϣⲱⲡⲉ ⲛ̅ⲧⲉⲕⲁⲣⲡⲟⲥ ⲛ̅ⲧⲁⲛⲁⲃⲁⲥⲓⲥ ϣⲱⲡⲉ ⲛ̅ⲧⲉⲙ̅ⲙⲟⲟⲩ ϫⲓⲥⲉ ⲉⲡ ⲛ̅ⲥⲉⲙⲟ ⲟⲩⲧϥ ϩⲛ̅ ⲟⲩϣⲡⲉⲛ̅ϣⲱⲡ ⲟⲩⲛ ⲟⲩⲗⲩⲡⲉⲓ ⲛⲁϣⲱⲡⲉ ⲛⲡϥ̅ⲣⲱⲙⲉ ⲁⲩⲱ ⲛ̅ϥⲟⲩⲱϩ ⲉⲃⲟⲗ ⲛ̅ⲛϥⲕⲁϣ ϩⲛ̅ ⲟⲩⲙ̅ⲕⲁϩ ⲛ̅ϩⲏⲧ ϫⲉ ⲁⲡⲧⲱϭⲉ ⲃⲱⲕ ϩⲛ̅ ⲧϥ̅ⲙⲛ̅ⲧⲃⲏⲣⲉ ⲙ̅ⲡⲁⲧϥ̅ϯ ⲙ̅ⲡϥ̅ⲕⲁⲣⲡⲟⲥ.

ⲧⲁⲓ ⲧⲉ ⲑⲉ ⲛ̅ⲧⲉⲓϣⲉⲉⲣⲉ ϣⲏⲙ ϩⲙ̅ ⲡⲧⲣⲉⲥⲉⲓ ⲉⲡⲧⲉ ⲛ̅ⲧⲓ ⲕⲁⲣⲡⲟⲥ ϩⲛ̅ ⲟⲩϣⲡⲉⲛ̅ϣⲱⲡ ⲁⲩⲡⲟⲟⲛⲉⲥ ⲉⲃⲟⲗ ⲁⲩϥⲓⲧⲥ ⲉⲥϩⲛ̅ ⲟⲩⲙⲛ̅ⲧⲕⲟⲩⲓ ⲉⲁⲥⲕⲱ ⲛⲁⲥ ϩⲛ̅ ⲡⲉⲥⲕⲱⲧⲉ ⲉⲧⲣϥ̅ⲟϣⲙⲉⲥ ⲛ̅ⲧⲛ̅ⲧⲁⲥϫⲡⲟⲥ ⲙⲛ̅ ⲡⲉ ⲟⲛ ⲉⲧⲉ ⲡⲉⲥⲥⲩⲙⲃⲓⲟⲥ ⲡⲉ. ⲁⲥⲃⲱⲕ ⲉⲣⲁⲧϥ̅ ⲉⲡⲉⲧⲉⲣⲉⲛⲓϥⲉ ⲛⲓⲙ ⲃⲏⲕ ⲉⲣⲁⲧϥ̅ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ. ⲡⲁⲓ ⲧⲉⲛⲟⲩ ⲛ̅ⲥⲟⲡⲥⲡ̅ ⲁⲩⲱ ⲙ̅ⲡⲁⲣⲁⲕⲁⲗⲉⲓ ⲛ̅ⲙⲟϥ ⲉⲧⲣⲉⲡϥ̅ⲛⲁ ⲧⲁϩⲟ ⲧⲛ̅ⲧⲁⲥⲡⲟⲗⲁⲃⲉ ⲉⲧⲉ ⲧⲙⲁⲕⲁⲣⲓⲁ ⲇⲣⲟⲥⲓⲥ ⲧⲉ ⲛ̅ⲟⲩⲛⲟϭ ⲛ̅ⲛⲁ ⲛϥⲕⲁⲁⲥ ϩⲛ̅ ⲡϥ̅ⲡⲁⲣⲁⲇⲓⲥⲟⲥ ⲉⲧⲟⲩⲁⲁⲃ ⲛ̅ⲥϭⲓⲛⲉ ⲛⲟⲩⲁⲛⲁⲡⲁⲩⲥⲓⲥ ⲛ̅ⲱⲛⲁϩ ϣⲁ ⲉⲛⲉϩ

ⲟⲩⲥϧⲁⲓ ⲛ̀ⲧⲉ ⲁⲡⲁ ϣⲉⲛⲟⲩϯ

ⲥⲓⲛⲟⲩⲑⲓⲟⲥ ⲡⲓⲉⲗⲁⲭⲓⲥⲧⲟⲥ ⲡⲉⲧⲥϩⲁⲓ ⲙ̅ⲡⲉⲙⲉⲣⲓⲧ ⲛ̅ⲓⲱⲧ ⲛ̅ⲑⲉⲟⲫⲓⲗⲉⲥⲧⲁⲧⲟⲥ ⲁⲡⲁ ⲧⲓⲙⲟⲑⲉⲟⲥ ⲡⲁⲣⲭⲓⲉⲡⲓⲥⲕⲟⲡⲟⲥ ϩⲙ̅ ⲡϫⲟⲉⲓⲥ. ⲭⲁⲓⲣⲉⲧⲉ

ⲁⲓⲣⲁϣⲉ ⲉⲙⲁⲧⲉ ⲛ̅ⲧⲉⲣⲓϫⲓ ⲛ̅ⲛⲉⲥϩⲁⲓ ⲛ̅ⲧⲉⲕⲙⲛ̅ⲧⲉⲓⲱⲧ ⲉⲧⲟⲩⲁⲁⲃ ϩⲓⲧⲙ̅ ⲡⲣⲉϥϣⲙ̅ϣⲉ ⲛⲟⲩⲧⲉ ⲛ̅ⲥⲟⲛ ⲛⲉⲥϩⲁⲓ ⲛ̅ⲧⲁⲩϣⲱⲡⲉ ⲛⲁⲛ ⲛ̅ⲥⲟⲗⲥⲗ̅ ϩⲓ ⲡⲁⲣⲁⲙⲩⲑⲓⲁ. ⲁⲛⲣ̅ ⲑⲉ ϩⲱⲥ ⲉⲁⲛⲟⲩⲱϣⲧ̅ ⲉⲃⲟⲗ ϩⲓⲧⲟⲟⲧⲟⲩ ⲛ̅ⲧⲉⲕϩⲓⲕⲱⲛ ⲉⲧⲫⲟⲣⲓ ⲙ̅ⲡⲉⲭ̅ⲥ̅ ⲁⲩⲱ ⲁⲛⲧⲱⲕ ⲛ̅ϩⲏⲧ ⲛ̅ⲧⲉⲣⲛ̅ⲥⲱⲧⲙ̅ ⲉⲛϣⲁϫⲉ ⲛ̅ⲧⲥⲫⲟⲣⲁ ⲙ̅ⲡⲛⲟⲩⲧⲉ ⲉⲧⲛ̅ϩⲏⲧⲕ̅ ⲧⲁⲓ ⲉⲧⲉⲣⲉⲧⲇⲓⲕⲁⲓⲟⲥⲩⲛⲏ ⲛⲏⲩ ⲉⲃⲟⲗ ⲛ̅ϩⲏⲧⲥ̅ ⲁⲩⲱ ⲟⲩⲉⲟⲟⲩ ⲙⲛ̅ ⲟⲩⲙⲛ̅ⲣⲙ̅ⲙⲁⲟ ⲛⲉⲧϩⲓ ⲟⲩⲛⲁⲙ ⲁⲩⲱ ϩⲓϩⲃⲟⲩⲣ ⲙ̅ⲙⲟⲥ ⲉⲥⲫⲟⲣⲓ ⲇⲉ ⲟⲛ ⲙ̅ⲡⲛⲟⲙⲟⲥ ⲙⲛ̅ ⲡⲛⲁ ϩⲓ ⲡⲉⲥⲗⲁⲥ ⲉⲧⲣⲉⲛϫⲟⲟⲥ ϩⲱⲱⲛ ⲛ̅ⲑⲉ ⲛ̅ⲧⲁⲡⲡⲉⲧⲟⲩⲁⲁⲃ ϫⲟⲟⲥ ϫⲉ ⲁⲛⲅ ⲛⲓⲙ ⲁⲛⲟⲕ ⲡϫⲟⲉⲓⲥ ⲡⲉ ⲡⲁϫⲟⲉⲓⲥ ϫⲉ ⲁⲕⲙⲉⲣⲓⲧ ϣⲁ ϩⲣⲁⲓ ⲉⲛⲉⲓϣⲓ ⲉⲣⲉⲡϫⲟⲉⲓⲥ ⲭⲁⲣⲓⲍⲉ ⲛⲁⲛ ⲙ̅ⲡⲓⲛⲟϭ ⲛ̅ⲇⲱⲣⲟⲛ ⲉⲧⲉ ⲧⲁⲅⲁⲡⲏ ⲧⲉ ⲛ̅ⲧⲉⲕϩⲁⲅⲓⲱⲥⲩⲛⲏ ⲉⲕⲟ ⲛⲁⲛ ⲛ̅ϣⲱⲥ ⲉⲕⲙⲟⲟⲛⲉ ⲙ̅ⲙⲟⲛ ⲁⲩⲱ ⲉⲕⲕⲩⲃⲉⲣⲛⲁ ⲙ̅ⲙⲟⲛ ϩⲛ̅ ϩⲱⲃ ⲛⲓⲙ ⲉⲕⲡⲣⲉⲥⲃⲉⲩⲉ ϩⲁⲣⲟⲛ ϩⲛ̅ ⲛⲉⲕϣⲗⲗ̅ ⲉⲧⲟⲩⲁⲁⲃ ⲁⲩⲱ ⲉⲧϣⲏⲡ ⲛ̅ⲛⲁϩⲣⲙ̅ ⲡⲛⲟⲩⲧⲉ.

ⲟⲩϫⲁⲓ ϩⲙ̅ ⲡϫⲟⲉⲓⲥ. ⲡⲉⲛⲙⲣⲉⲓⲧ ⲛ̅ⲉⲓⲱⲧ ⲛ̅ϩⲁⲅⲓⲱⲧⲁⲧⲟⲥ.

ϯϩⲟⲙⲟⲗⲟⲅⲉⲓ ⲙ̅ⲡⲉⲙⲧⲟ ⲉⲃⲟⲗ ⲙ̅ⲡⲛⲟⲩⲧⲉ ϩⲙ̅ ⲡⲉϥⲙⲁ ⲉⲧⲟⲩⲁⲁⲃ ⲉⲣⲉⲡϣⲁϫⲉ ⲛ̅ⲧⲁⲓϫⲟⲟϥ ϩⲛ̅ ⲧⲁⲧⲁⲡⲣⲟ ⲟ ⲙ̅ⲙⲛ̅ⲧⲣⲉ ⲉⲣⲟⲓ ϫⲉ ⲛ̅ⲛⲉⲓϫⲓⲟⲩⲉ ⲛ̅ⲛⲉⲓⲣ̅ ⲙⲛ̅ⲧⲣⲉ ⲛ̅ⲛⲩϫ. ⲛ̅ⲛⲉⲓϫⲓ ϭⲟⲗ. ⲛ̅ⲛⲉⲓⲣ̅ ⲗⲁⲁⲩ ⲛ̅ⲕⲣⲟϥ ϩⲛ̅ ⲟⲩϩⲱⲡ. ⲉϣⲱⲡⲉ ⲉⲓϣⲁⲛⲡⲁⲣⲁⲃⲁ ⲙ̅ⲡⲉⲛⲧⲁⲓϩⲟⲙⲟⲗⲟⲅⲉⲓ ⲙ̅ⲙⲟϥ. ⲉⲓⲉⲛⲁⲩ ⲉⲧⲙⲛ̅ⲧⲉⲣⲟ ⲛ̅ⲙ̅ⲡⲏⲩⲉ ⲛ̅ⲧⲁⲧⲙ̅ⲃⲱⲕ ⲉϩⲟⲩⲛ ⲉⲣⲟⲥ ⲉⲣⲉⲡⲛⲟⲩⲧⲉ ⲛ̅ⲧⲁⲓⲥ̅ⲙⲛ̅ ⲇⲓⲁⲑⲏⲕⲏ ⲙ̅ⲡⲉϥⲙ̅ⲧⲟ ⲉⲃⲟⲗ ⲛⲁⲧⲁⲕⲟ ⲛ̅ⲧⲁⲯⲩⲭⲏ ⲙⲛ̅ ⲡⲁⲥⲱⲙⲁ ϩⲣⲁⲓ ϩⲛ̅ ⲧⲅⲉϩⲛⲛⲁ ⲛ̅ⲕⲱϩⲧ ϫⲉ ⲁⲓⲡⲁⲣⲁⲃⲁ ⲛ̅ⲧⲇⲓⲁⲑⲏⲕⲏ ⲛ̅ⲧⲁⲓⲥⲙⲛ̅ⲧⲥ̅ ⲙ̅ⲡⲉϥⲙ̅ⲧⲟ ⲉⲃⲟⲗ.

ⲉⲃⲟⲗϧⲉⲛ ⲛⲓⲙⲏⲓⲛⲓ ⲛ̀ⲧⲉ ⲁⲡⲁ ϣⲉⲛⲟⲩϯ

ⲁⲥϣⲱⲡⲉ ⲇⲉ ⲛ̅ⲟⲩⲉⲓϣ ⲉⲧⲣⲉⲟⲩⲇⲓⲝ ⲛ̅ϩⲉⲗⲗⲏⲛ ⲉⲓ ⲉⲁⲛⲧⲓⲛⲱⲟⲩ ⲁⲛⲉϩⲉⲗⲗⲏⲛ ⲧⲏⲣⲟⲩ ⲉⲧϩⲙ̅ ⲡⲗⲉⲩⲉⲓⲧ ⲙⲛ̅ ϣⲙⲓⲛ ⲥⲱⲟⲩϩ ⲁⲩⲥⲉⲙⲙⲉ ⲉⲡⲉⲛⲉⲓⲱⲧ ⲉⲧⲟⲩⲁⲁⲃ ⲉⲧⲃⲉ ⲛⲉⲣⲡⲏⲩⲉ ⲛ̅ⲧⲁϥϣⲉⲣϣⲱⲣⲟⲩ ⲙⲛ̅ ⲛ̅ⲓⲇⲱⲗⲟⲛ ⲛ̅ⲧⲁϥⲣⲟⲕϩⲟⲩ. ⲁϥϫⲟⲟⲩ ⲁϥⲧⲉⲣⲩⲉⲛⲧϥ̅ ⲉⲁⲛⲧⲓⲛⲱⲟⲩ. ⲁⲩⲙⲟⲟⲛⲉ ϩⲓ ⲟⲩⲙⲟⲩⲉ ⲙ̅ⲡⲉⲙⲛ̅ⲧ ⲉⲁⲛⲧⲓⲛⲱⲟⲩ ϣⲁ ϩⲓⲧⲟⲟⲩⲉ ⲕⲁⲧⲁ ⲑⲉ ⲛ̅ⲧⲁϥⲥϩⲁⲓ ⲛ̅ⲧⲟϥ. ⲁϥⲃⲱⲕ ⲇⲉ ⲉⲡⲉⲕⲣⲟ ⲁϥϣⲗⲏⲗ ϩⲁ ⲟⲩⲃⲱ ⲛⲉⲗⲟⲟⲗⲉ ⲉϥⲥⲟⲡⲥ̅ ⲙ̅ⲡϫⲟⲉⲓⲥ ⲉⲧⲣⲉϥⲧⲁⲙⲟϥ ⲉⲛⲉⲧⲛⲁϣⲱⲡⲉ ⲙ̅ⲙⲟϥ. ⲁⲡⲛⲟⲩⲧⲉ ⲇⲉ ⲥⲱⲧⲙ̅ ⲉⲡⲉϥⲥⲟⲡⲥ̅ ⲁϥⲧⲁⲙⲟϥ ϫⲉ ⲉⲡⲙⲁ ⲉⲧⲣⲉⲕϩⲉⲣⲁⲧⲕ̅ ϩⲓ ⲡⲃⲏⲙⲁ ⲛ̅ⲧⲉⲡⲁⲣⲭⲱⲛ ϣⲁϫⲉ ⲉⲡⲉⲥⲏⲧ ⲉⲣⲟⲕ ⲉⲕⲛⲁⲁϩⲉⲣⲁⲧⲕ̅ ⲛ̅ⲧⲟϥ ϩⲓ ⲧⲡⲉ ⲙ̅ⲡⲃⲏⲙⲁ ⲛ̅ϥϣⲁϫⲉ ⲉϩⲣⲁⲓ ⲉⲣⲟⲕ.

ⲁⲥϣⲱⲡⲉ ⲇⲉ ⲙ̅ⲡⲉϥⲣⲁⲥⲧⲉ ⲁⲩⲙⲟⲟⲛⲉ ⲉⲁⲛⲧⲓⲛⲱⲟⲩ. ⲁⲡⲇⲟⲩⲝ ⲟⲩⲉϩⲥⲁϩⲛⲉ ⲉⲧⲣⲉⲩⲧⲁϩⲟϥ ⲉⲣⲁⲧϥ̅ ⲙ̅ⲡⲃⲏⲙⲁ. ⲁⲡⲙⲏⲏϣⲉ ⲧⲏⲣϥ̅ ⲛ̅ⲁⲛⲧⲓⲛⲱⲟⲩ ⲥⲱⲟⲩϩ̅ ⲛ̅ϩⲟⲟⲩⲧ ⲙⲛ̅ ⲛⲉϩⲓⲟⲙⲉ ⲉⲩⲟⲩⲱϣ ⲉⲉⲓⲙⲉ ϫⲉ ⲟⲩⲡⲧⲛⲁϣⲱⲡⲉ. ⲛⲉⲩⲥⲟⲟⲩⲛ̅ ⲅⲁⲣ ⲧⲏⲣⲟⲩ ϫⲉ ⲟⲩⲣⲱⲙⲉ ⲛ̅ⲧⲉ ⲡⲛⲟⲩⲧⲉ ⲡⲉ. ⲛ̅ⲧⲉⲣⲉϥⲁϩⲉ ⲇⲉ ⲉⲣⲁⲧϥ̅ ⲉⲡⲃⲏⲙⲁ. ⲁⲡⲇⲟⲩⲝ ⲁⲣⲭⲉⲓ ⲛ̅ϣⲁϫⲉ ⲛⲙ̅ⲙⲁϥ ϩⲛ̅ ⲟⲩⲙⲛ̅ⲧⲁϫⲁⲥⲓϩⲏⲧ ⲙⲛ̅ ⲟⲩⲁⲡⲓⲗⲏ. ⲉⲧⲓ ⲇⲉ ⲉⲣⲉⲡⲉⲛⲉⲓⲱⲧ ⲉⲧⲟⲩⲁⲁⲃ ⲟⲩⲱϣ ⲉⲁⲡⲟⲗⲟⲅⲓⲍⲉ ⲛ̅ⲧⲉⲩⲛⲟⲩ ⲁⲩϩⲁⲣⲡⲁⲍⲉ ⲙ̅ⲙⲟϥ ⲁⲩⲧⲁϩⲟϥ ⲉⲣⲁⲧϥ̅ ⲙ̅ⲡⲉⲧⲡⲉ ⲙ̅ⲃⲏⲙⲁ ϣⲁ ⲡϣⲁⲩ ⲛ̅ⲧⲉⲣⲱⲙⲉ ϣⲁϫⲉ ⲛ̅ⲥⲉⲥⲱⲧⲙ̅ ⲉⲣⲟϥ ϩⲓϫⲙ̅ ⲡⲕⲁϩ ⲕⲁⲧⲁ ⲑⲉ ⲛ̅ⲧⲁϥⲣ̅ ⲙⲛ̅ⲧⲣⲉ ϩⲛ̅ ⲧⲉϥⲧⲁⲡⲣⲟ ⲛ̅ⲧⲁϫⲓ ϭⲟⲗ. ⲡⲙⲏⲏϣⲉ ⲇⲉ ⲧⲏⲣϥ̅ ⲉⲧⲥⲟⲟⲩϩ̅ ⲁⲩⲱϣ ⲉⲃⲟⲗ ϫⲉ ⲉⲓⲥ ⲑⲉⲟⲥ. ⲟⲩⲁ ⲡⲉ ⲡⲛⲟⲩⲧⲉ ⲙ̅ⲡⲉⲛⲉⲓⲱⲧ ⲛ̅ⲇⲓⲕⲁⲓⲟⲥ ⲁⲡⲁ ϣⲉⲛⲟⲩⲧⲉ ⲁⲩⲱ ⲛⲉⲩⲙⲏⲛ ⲉⲃⲟⲗ ⲛ̅ⲟⲩⲛⲟϭ ⲛ̅ⲁⲡⲣⲏⲧⲉ ⲉⲩⲁϣⲕⲁⲕ ⲉⲃⲟⲗ ⲉⲩϯ ⲉⲟⲟⲩ ⲙ̅ⲡⲛⲟⲩⲧⲉ ⲉϥⲁϩⲉⲣⲁⲧϥ̅ ϩⲙ̅ ⲡⲁⲏⲣ ⲛ̅ϭⲓ ⲡⲉⲛⲉⲓⲱⲧ ⲉⲧⲟⲩⲁⲁⲃ. ⲙⲛ̅ⲛ̅ⲥⲁ ⲟⲩⲟⲕⲟⲩⲓ ⲇⲉ ⲁⲩⲭⲁⲗⲁ ⲙ̅ⲙⲟϥ ⲉⲡⲉⲥⲏⲧ ⲕⲟⲩⲓ ⲕⲟⲩⲓ ϣⲁⲛⲧⲉϥⲡⲱϩ ⲱⲡⲕⲁϩ. ⲛ̅ⲧⲉⲩⲛⲟⲩ ⲁⲡⲙⲏⲏϣⲉ ⲧⲏⲣϥ̅ ϩⲁⲣⲡⲁⲍⲉ ⲙ̅ⲙⲟϥ ⲁⲩϫⲓⲧϥ̅ ⲉϩⲟⲩⲛ ⲉⲧⲉⲕⲕⲗⲏⲥⲓⲁ.

ⲁⲥϣⲱⲡⲉ ⲇⲉ ⲛ̅ⲟⲩⲥⲟⲡ ⲉⲧⲣⲉⲛ̅ⲃⲁⲣⲃⲁⲣⲟⲥ ⲛⲁ ⲛⲟⲩⲃⲁ ⲙⲛ̅ ⲛ̅ⲃⲁⲗⲉϩⲙⲟⲩ ⲃⲱⲕ ⲉⲏⲧ ⲁⲩϫⲓ ⲛ̅ⲟⲩⲡⲟⲗⲓⲥ ⲉⲩⲟⲩⲱϣ ⲉⲉⲣ ⲡⲟⲗⲉⲙⲟⲥ ⲙⲛ̅ ⲛⲉⲭⲣⲓⲥⲧⲓⲁⲛⲟⲥ. ⲉϥⲃⲏⲕ ⲇⲉ ⲉⲡⲡⲟⲗⲉⲙⲟⲥ ⲛ̅ϭⲓ ⲡⲇⲟⲩⲝ ϩⲏⲣⲁⲕⲗⲓⲟⲥ ⲁϥⲉⲓ ϣⲁ ⲡⲉⲛⲉⲓⲱⲧ ⲉⲧⲟⲩⲁⲁⲃ ⲁⲡⲁ ϣⲉⲛⲟⲩⲧⲉ ⲁϥⲥⲉⲡⲥⲱⲡϥ̅ ⲉⲧⲣⲉϥϣⲗⲏⲗ ⲉϫⲱϥ ⲁⲩⲱ ⲁϥⲡⲁⲣⲁⲕⲁⲗⲉⲓ ⲙ̅ⲙⲟϥ ⲉⲧⲣⲉⲇⲧⲁⲙⲓⲟ ⲛⲁϥ ⲛ̅ⲟⲩ⳧ ⲛ̅ϣⲉ ϩⲛ̅ ⲛⲉϥϭⲓϫ ⲙ̅ⲙⲓⲛ ⲙ̅ⲙⲟϥ ⲁⲩⲱ ⲁϥⲧⲣⲉⲩⲧⲟⲕϥ̅ ⲉⲩⲕⲟⲛⲧⲟⲥ ⲛ̅ϣⲉ ⲁϥⲕⲁⲁϥ ⲁϥϩⲉⲓ ⲑⲏ ⲙ̅ⲙⲟϥ ⲉϥⲃⲏⲕ ⲉⲡⲡⲟⲗⲉⲙⲟⲥ ⲁⲩⲱ ⲁϥⲁⲡⲁⲧⲁⲥⲥⲉ ⲛ̅ⲛⲉⲃⲁⲣⲃⲁⲣⲟⲥ ⲉⲧⲙ̅ⲙⲁⲩ ϩⲛ̅ ⲟⲩⲛⲟϭ ⲛ̅ⲗⲩⲡⲉⲓ ϩⲱⲥⲧⲉ ⲛ̅ⲥⲉϣⲁϫⲉ ⲉⲡⲡⲟⲗⲉⲙⲟⲥ ⲉⲧⲙ̅ⲙⲁⲩ ϣⲁ ⲉϩⲣⲁⲓ ⲉⲡⲟⲟⲩ ⲛ̅ϩⲟⲟⲩ ⲉⲃⲟⲗ ϫⲉ ⲙ̅ⲡⲉϭⲟⲧⲡⲥ ⲛ̅ⲧⲉⲓϩⲉ ⲧⲁϩⲟⲟⲩ ϫⲓⲛⲧⲁⲡⲇⲟⲩⲝ ⲁⲣⲭⲉⲓ ⲉⲑⲏⲃⲁⲉⲓⲥ. ⲁϥⲉⲣ ⲙⲉⲛⲧⲣⲉ ⲇⲉ ⲟⲛ ⲛ̅ϭⲓ ⲡⲇⲟⲩⲝ ϩⲏⲣⲁⲕⲗⲓⲟⲥ ϫⲉ ⲛ̅ⲧⲉⲣⲉⲓⲃⲱⲕ ⲱϩⲟⲩⲛ ϩⲛ̅ ⲧⲙⲏⲧⲉ ⲛ̅ⲛⲉⲃⲁⲣⲃⲁⲣⲟⲥ. ⲁⲓⲛⲁⲩ ⲉⲩⲣⲱⲙⲉ ⲛ̅ⲟⲩⲟⲉⲓⲛ ⲉϥⲉⲓⲛⲉ ⲙ̅ⲡⲉⲛⲉⲓⲱⲧ ⲁⲡⲁ ϣⲉⲛⲟⲩⲧⲉ ⲁⲩⲱ ⲁϥϩⲱⲃⲥ̅ ⲉⲃⲟⲗ ⲉϫⲱⲓ ⲙ̅ⲧⲉϥⲥⲧⲟⲗⲏ ⲛ̅ⲟⲩⲟⲉⲓⲛ ⲁϥϩⲱⲃⲥ̅ ⲙ̅ⲡⲁⲥⲱⲙⲁ ⲙ̅ⲡⲉⲗⲁⲁⲩ ⲙ̅ⲡⲉⲑⲟⲟⲩ ϣⲱⲡⲉ ⲙ̅ⲙⲟⲓ. ⲁⲩⲱ ⲛ̅ⲧⲉⲣⲉϥϫⲓ ⲛ̅ⲧⲉⲃⲓⲕⲧⲱⲣⲓⲁ ϩⲛ̅ ⲟⲩⲉⲟⲟⲩ ⲁϥⲉⲓⲛⲉ ⲛ̅ⲛⲉⲇⲱⲣⲟⲛ ⲛ̅ⲧⲁⲡⲁⲣⲭⲏ ⲛ̅ⲛⲉϣⲱⲗ ⲉⲣⲁⲧϥ̅ ⲙ̅ⲡϫⲟⲉⲓⲥ ⲁⲩⲱ ⲁϥϩⲟⲙⲟⲗⲟⲅⲉⲓ ⲛ̅ⲧⲥⲱⲧⲏⲣⲓⲁ ⲙ̅ⲡⲉϫⲣⲟ ϫⲉ ⲛ̅ⲧⲁⲥϣⲱⲡⲉ ⲉⲃⲟⲗ ϩⲓⲧⲙ̅ ⲡⲛⲟⲩⲧⲉ ⲙⲛ̅ ⲛⲉϣⲗⲏⲗ ⲙ̅ⲡⲉⲛⲉⲓⲱⲧ ⲉⲧⲟⲩⲁⲁⲃ ⲁⲡⲁ ϣⲉⲛⲟⲩⲧⲉ

ϩⲁⲛⲫⲟϫⲓ

ⲁⲛⲟⲕ ⲥⲁⲙⲟⲩⲏⲗ ⲙⲛ̅ ⲓⲁⲕⲱⲃ ⲙⲛ̅ ⲁⲣⲱⲛ ⲛⲥϩⲁⲓ ⲙ̅ⲡⲉⲛⲉⲓⲱⲧ ⲉⲧⲟⲩⲁⲁⲃ ⲁⲡⲁ ⲁⲃⲣⲁϩⲁⲙ ⲡⲉⲡⲓⲥⲕ ϫⲉ ⲉⲡⲓⲇⲏ ⲁⲛⲡⲁⲣⲁⲕⲁⲗⲉⲓ ⲛ̅ⲧⲉⲕⲙⲛⲉⲓⲱⲧ ⲉⲧⲣⲉⲕⲭⲉⲓⲣⲟⲇⲟⲛⲉⲓ ⲙ̅ⲙⲟⲛ ⲛ̅ⲇⲓⲁⲕ ⲧⲛⲟ ⲛϩⲉⲧⲟⲓⲛⲓⲙⲱⲥ ⲛⲧⲛϩⲁⲣⲉϩ ⲉⲛⲉⲛⲧⲟⲗⲏ ⲙⲛ̅ ⲛⲕⲁⲛⲱⲛ ⲁⲩⲱ ⲛⲧⲛⲥⲱⲧⲙ ⲛ̅ⲥⲁ ⲛ̅ⲛⲟϭ ⲉⲣⲟⲛ ⲁⲩⲱ ⲛⲧⲛϩⲩⲡⲟⲧⲁⲥⲉ ⲛ̅ⲛⲟϭ ⲉⲣⲟⲛ ⲁⲩⲱ ⲛ̅ⲧⲛⲣⲟⲉⲓⲥ ⲉⲡⲉⲛⲙⲁ ⲛ̅ⲛⲕⲟⲧⲕ ϩⲛ̅ ⲛⲉϩⲟⲟⲩ ⲛⲥⲩⲛⲁⲅⲉ ⲁⲩⲱ ⲛ̅ⲧⲛϫⲱⲣ ⲡⲉⲩⲁⲅⲅⲉⲗⲓⲟⲛ ⲛ̅ⲕⲁⲧⲁ ⲓⲱϩⲁⲛⲛⲏⲥ ⲛ̅ⲧⲛⲁⲡⲟⲥⲧⲏⲑⲓⲍⲉ ⲙ̅ⲙⲟϥ ϣⲁ ⲡϫⲱⲕ ⲙ̅ⲡⲧⲁⲓⲟⲩ ⲉⲛⲧⲙⲁⲡⲟⲥⲧⲏⲑⲓⲍⲉ ⲙ̅ⲙⲟϥ ⲛ̅ⲧⲛⲕⲁⲁϥ ⲛ̅ⲧⲟⲟⲧⲛ ⲛⲛ̅ⲙⲉⲗⲉⲧⲁ ⲙ̅ⲙⲟϥ ⲙⲛ̅ ϭⲓϫ ϩⲓϫⲱⲛ ⲁⲩⲱ ⲛ̅ⲛⲉⲛⲣ ⲉϣⲱⲧ ⲛ̅ⲛⲉϫⲓ ⲙⲏⲥⲉ ⲁⲩⲱ ⲙⲁⲛⲃⲱⲕ ⲉⲡϣⲙⲙⲟ ⲁϫⲛ ϣⲓⲛⲉ.

ⲁⲛⲟⲕ ϩⲏⲙⲁⲓ ⲙⲛ̅ ⲁⲡⲁ ⲓⲁⲕⲱⲃ ⲛ̅ⲓⲱⲃ ⲧⲛϣⲧⲱⲣⲉ ⲛ̅ⲥⲁⲙⲟⲩⲏⲗ ⲁⲛⲟⲕ ⲥⲩⲙⲉⲱⲛ ⲙⲛ̅ ⲁⲧⲣⲉ ⲧⲛϣⲧⲱⲣⲉ ⲛ̅ⲓⲁⲕⲱⲃ. ⲁⲛⲟⲕ ⲡⲁⲑⲉⲣ ⲡⲡⲣⲉⲥⲃ ⲙⲛ̅ ⲙⲱⲩⲥⲏⲥ ⲙⲛ̅ ⲗⲁⲥⲥⲁ ⲧⲛϣⲧⲱⲣⲉ ⲛ̅ϩⲁⲣⲱⲛ.

ⲡⲁⲧⲉⲣⲙⲟⲩⲧⲉ ⲡⲉⲓⲉⲗⲁⲭ ⲙⲡⲣⲉ ⲁⲩⲁⲓⲧⲓ ⲙ̅ⲙⲟⲓ ⲁⲓⲥϩⲁⲓ ⲡⲓⲡⲗⲁⲝ ⲁⲩⲱ ϯⲟ ⲙ̅ⲙⲛⲧⲣⲉ

ⲁⲛⲟⲕ ⲕⲟⲗⲗⲟⲩⲑ ⲡϣⲛ ⲡⲙⲁⲕ ⲕⲟⲛⲥⲧⲁ ⲡⲗⲁϣ ⲉϥⲥϩⲁⲓ ⲛ̅ⲥⲉⲛⲟⲩⲑ ⲡϣⲏⲣⲉ ⲛ̅ⲅⲉⲣⲙⲁⲛⲟⲛ ⲙⲛ̅ ⲕⲟⲥⲙⲁ ⲡϣⲏⲣⲉ ⲛ̅ⲡⲉⲗⲓⲥ ϫⲉ ⲉⲡⲓⲇⲏ ⲁⲧⲉⲧⲛⲥⲙⲛ ⲟⲩⲉⲅⲅⲩⲁ ⲛⲁⲓ ⲓⲉⲥⲁⲕ ⲁⲧⲉⲧⲛⲧⲛⲟⲩⲩϥ ⲉϩⲏⲧ. ⲗⲟⲓⲡⲟⲛ ⲛ̅ⲧⲉⲣⲉⲓϣⲓⲛⲉ ⲛ̅ⲥⲟⲩ ϩⲓⲧⲟⲟⲧ ⲧⲏⲩⲧⲛ. ⲁⲧⲉⲧⲉⲛⲧⲟⲩ ⲁⲧⲉⲧⲛⲡⲁⲣⲁⲕⲁⲥⲕⲉⲩⲉⲍⲉ ⲙ̅ⲙⲟⲟⲩ ⲛⲁⲓ ⲉϩⲟⲩⲛ ⲉⲧⲉⲫⲩⲗⲗⲁⲕⲏ ⲙ̅ⲡⲕⲁⲥⲧⲣⲟ ϫⲏⲙⲉ. ⲁⲧⲉⲧⲛϣⲓⲛⲉ ⲛ̅ⲥⲁ ⲧⲉⲧⲛⲉⲛⲅⲩⲗⲁ ϩⲓⲧⲟⲟⲧ. ⲙ̅ⲡⲉⲓϩⲉ ⲉⲣⲟⲥ ⲛⲏⲧⲛ. ⲧⲉⲛⲟⲩ ⲧⲓϩⲟⲙⲟⲗⲟⲅⲉⲓ ϫⲉ ⲙⲛⲧⲁⲓ ⲗⲁⲁⲩⲉ ⲛ̅ϩⲱⲃ ⲛⲙ̅ⲙⲏⲧⲛ ϩⲁⲣⲟⲟⲩ ϣⲁ ⲉⲛⲉϩ. ⲁⲩⲱ ⲉⲓϣⲁⲛ ⲉⲛⲅⲩⲁ ⲉⲃⲟⲗ ⲉⲣⲱⲧⲛ̅ ⲉⲓⲥⲛⲁϣⲱⲡⲉ ⲛⲁⲅⲉⲣⲟⲛ.

ⲉⲩⲟⲣϫ ⲛⲏⲧⲛ ⲁⲓⲥⲙⲛ ⲡⲉⲓⲉⲛⲅⲣⲁⲫⲟⲛ. ϥⲟⲣϫ ϥϭⲙϭⲟⲙ ϩⲙ̅ ⲙⲁ ⲛⲓⲙ ⲉⲩⲛⲁⲙⲫⲁⲛⲓⲍⲉ ⲙ̅ⲙⲟϥ ⲛⲁⲩ ⲛ̅ϩⲏⲧϥ. ⲛ̅ⲥⲉϫⲛⲟⲩⲓ ⲛ̅ⲧⲁⲁϩⲟⲙⲟⲗⲟⲅⲉⲓ.

ⲁⲛⲟⲕ ⲅⲉⲱⲣⲅ ⲡϣⲏⲣⲉ ⲛ̅ⲕⲟⲥⲙⲁ ϯⲱ ⲙⲛ̅ⲧⲣⲉ.

ⲁⲛⲟⲕ ⲃⲓⲕⲧⲱⲣ ⲡϣⲏⲣⲉ ⲙⲡⲧⲏⲣⲙⲟⲩⲧⲉ ϯⲟ ⲙⲙⲛⲧⲣⲉ ⲡϣⲏⲣⲉ ⲛⲓⲱϩⲁⲛⲛⲏⲥ ⲁϥⲏⲧⲉⲓ ⲙ̅ⲙⲟⲓ ⲁⲓⲥϩⲁⲓ ϩⲁⲣⲟϥ ϫⲉ ⲙⲉϥⲛⲟⲓ ⲛ̅ⲥϩⲁⲓ ⲁⲩⲱ ϯⲱ ⲙⲛⲧⲣⲉ

ⲁⲛⲟⲕ ⲁⲣⲓⲥⲧⲟⲫⲁⲛⲏⲥ ⲓⲱⲁⲛⲛⲏⲥ ⲧⲓⲟ ⲙ̅ⲙⲧⲣⲉ.

ⲉⲛ ⲟⲛⲟⲙⲁⲧⲓ ⲧϩⲫ ⲁⲅⲓⲁⲫ ⲕⲁⲓ ⲍⲟⲟⲡⲓⲟⲩ ⲟⲙⲟⲟⲩϣⲓⲟⲩ ⲧⲣⲓⲁⲧⲟⲫ ⲡⲁⲧⲣⲟⲫ ⲕⲁⲓ ⲧⲟⲩ ⲩⲓⲟ ⲕⲁⲓ ⲧⲟⲩ ⲁⲅⲓⲟⲩ ⲡⲛⲉⲩⲙⲁⲧⲓ
ⲁⲛⲟⲕ ⲥⲉⲛⲟⲩⲑ ⲡϣⲏⲣⲉ ⲛⲡⲙⲁⲕ ⲫⲓⲗⲟⲑ ⲡⲟⲓⲕⲟⲛⲟⲙⲟⲥ ⲙ̅ⲡϩⲁⲅⲓⲟⲥ ⲁⲡⲁ ⲯⲁⲧⲉ ⲙ̅ⲡⲧⲟⲟⲩ ⲛ̅ϫⲏⲙⲉ ⲉⲓⲥϩⲁⲓ ⲛ̅ⲕⲱⲙⲟⲥ ⲡϣⲏⲣⲉ ⲙ̅ⲡⲙⲁⲕ ⲇⲁⲙⲓⲁⲛⲟⲥ ⲡⲣⲙ ⲡⲓⲕⲁⲥⲧⲣⲟⲛ ⲛ̅ⲟⲩⲱⲧ ϫⲏⲙⲉ ⲙ̅ⲡⲛⲟⲙⲟⲥ ⲛ̅ⲧⲉⲓⲡⲟⲗⲉⲓⲥ ⲛ̅ⲟⲩⲱⲧ ⲉⲣⲙⲟⲛⲉⲧ ϫⲉ ϩⲁⲡϩⲟⲃ ⲙ̅ⲡⲧⲉⲣⲙⲏⲥⲓⲟⲛ ⲛ̅ⲧⲁⲧⲥⲩⲣⲟⲥ ⲧϣⲏⲣⲉ ⲛ̅ⲧⲁⲕⲟⲩⲙ ⲧⲁⲁϥ ⲉⲡϩⲁⲅⲓⲟⲥ ⲁⲡⲁ ⲯⲁⲧⲉ ⲉⲓⲥ ϩⲏⲏⲧⲉ ⲁϥⲉⲓ ⲉⲧⲟⲟⲧ ϩⲓ ⲧⲟⲟⲧⲉⲕ ⲛ̅ⲧⲟⲕ ⲕⲱⲙⲟⲥ ⲡϣⲛ ⲇⲁⲙⲓⲁⲛⲟⲛ.

ϫⲓⲛ ⲧⲉⲛⲟⲩ ⲇⲉ ⲛ̅ⲛⲉⲗⲁⲁⲩ ⲛ̅ⲣⲱⲙⲉ ⲉⲡⲁ ⲡⲧⲟⲡⲟⲥ ⲉⲧⲟⲩⲁⲁⲃ ⲉⲧⲙ̅ⲙⲁⲩ ⲡⲉ ⲉⲓⲧⲉ ⲁⲛⲟⲕ ⲟⲩⲇⲉ ⲥⲟⲛ ⲟⲩⲇⲉ ϣⲏⲣⲉ ⲟⲩⲇⲉ ϣⲓⲛ ϣ.ⲣⲉ ⲟⲩⲇⲉ ⲗⲁⲁⲩ ⲉⲃⲟⲗ ⲉⲣⲟⲕ ⲟⲩⲇⲉ ⲣⲱⲙⲉ ⲉⲡⲟⲓ ⲡⲉ ϣⲁ ⲉⲛⲉϩ. ⲉⲩⲱⲣⲉϫ ⲛⲁⲕ ⲁⲓⲥⲙⲛ ⲡⲓⲉⲅⲅⲣⲁⲫⲟⲛ. ϯⲥⲧⲉⲭⲉ ⲉⲣⲟϥ. ϥⲟⲣⲉϫ ϥϭⲙϭⲟⲙ ϩⲙ̅ ⲙⲁ ⲛⲓⲙ ⲉⲩⲛⲁⲙⲫⲁⲛⲓⲍⲉ ⲙ̅ⲙⲟⲥ ⲛ̅ⲏⲧⲉϥ. ⲛ̅ⲥⲉϫⲛⲟⲩⲓ ⲧⲁϩⲟⲙⲟⲗⲟⲅⲉⲓ.

ⲁⲛⲟⲕ ⲕⲟⲥⲙⲁ ⲡϣⲏⲣⲉ ⲙ̅ⲙⲉⲛⲁ ⲧⲓⲱ ⲙⲉⲛⲧⲣⲉ. ⲁⲛⲟⲟⲕ ⲓⲥⲁⲕ ⲡϣⲏⲣⲉ ⲛ̅ⲕⲟⲥⲧⲁⲛⲧⲓⲛⲉ ⲁⲓⲥϩⲁⲓ ϩⲁⲣⲟϥ ϫⲉ ⲙⲉϥⲛⲟⲓ. ⲁⲛⲟⲕ ⲕⲟⲥⲧⲁⲛⲧⲓⲛⲉ ⲡϣⲏⲣⲉ ⲛ̅ⲓⲥⲁⲕ ⲧⲓⲱ ⲙⲉⲛⲧⲣⲉ. ⲓⲥⲁⲕ ⲁⲓⲥϩⲁⲓ ϩⲁⲣⲟⲩ ϫⲉ ⲙⲉⲩⲛⲟⲓ ⲁⲩⲱ ⲧⲓⲟ ⲙⲉⲛⲧⲣⲉ.

ⲉⲅⲟ ⲥⲛⲟⲩⲑ ⲩⲟⲓ ⲙⲁⲕ. ⲭⲙⲧⲥⲛⲏⲩ ⲉⲗⲁⲭ ⲡⲣⲉⲣⲉ ⲉⲅⲣⲁⲯⲁⲥⲓ