ⲦϬⲒⲚⲰⲚϨ ⲛ̅ⲧⲉ ⲒⲰⲤⲎⲪ ⲠϨⲀⲘϢⲈ
Ϩⲣⲁⲓ ⲇⲉ ϩⲛ̅ ⲧⲙⲉϩⲙⲛ̅ⲧⲁϥⲧⲉ ⲛ̅ⲣⲟⲙⲡⲉ ⲙ̅ⲡⲱⲛϩ ⲙ̅Ⲙⲁⲣⲓⲁ ⲧⲁⲙⲁⲁⲩ ⲁⲓⲉⲓ ϩⲙ̅ ⲡⲁⲟⲩⲱϣ ̅ⲁⲓⲟⲩⲱϩ ⲛ̅ϩⲏⲧⲥ ⲕⲁⲧⲁ ⲡⲉⲧⲉϩⲛⲁⲓⲉ̅ⲁⲛⲟⲕ ⲡⲉ ⲡⲉⲧⲛ̅ⲱⲛϩ. ⲁⲩⲱ ⲛ̅ⲧⲉⲣⲉⲥⲣ̅ ϣⲟⲙⲛ̅ⲧ ⲛ̅ⲉⲃⲟⲧ ⲛ̅ⲱ ⲁ ⲡⲁⲧⲕⲣⲟϥ Ⲓⲱⲥⲏⲫ ⲡⲁⲙⲉⲣⲓⲧ ⲛ̅ⲉⲓⲱⲧ ⲉⲓ ⲉϩⲟⲩⲛ ϩⲱⲱϥ ϩⲛ̅ ⲙ̅ⲙⲁ ⲛ̅ⲕⲱⲧ ⲁϥϭⲛ̅ ⲧⲁⲙⲁⲁⲩ ⲛ̅ⲧⲁⲥⲟⲩⲱⲛϩ ⲉⲃⲟⲗ ϫⲉ ⲥⲉⲉⲧ ⲁϥⲣ̅ϩⲟⲧⲉ ⲁⲩⲱ ⲁϥϣⲧⲟⲣⲧⲣ̅ ̅ⲁϥⲟⲩⲱϣ ⲉⲛⲁϫⲉⲥ ⲉⲃⲟⲗ ⲛ̅ϫⲓⲟⲩⲉ. ⲁⲩⲱ ⲉⲃⲟⲗϩⲛ̅ ⲧⲗⲩⲡⲏ ⲁϥⲛ̅ⲕⲟⲧⲕ ⲙ̅ⲡⲉϥⲟⲩⲉⲙ ⲗⲁⲁⲩ ⲉⲡⲧⲏⲣϥ ϩⲛ̅ ⲧⲉⲣⲟⲩϩⲉ ⲉⲧⲙ̅ⲙⲁⲩ.
Ϩⲛ̅ ⲧⲡⲁϣⲉ ⲇⲉ ⲛ̅ⲧⲉⲩϣⲏ ⲉⲓⲥ ⲡⲁⲣⲭⲁⲅⲅⲉⲗⲟⲥ Ⲅⲁⲃⲣⲓⲏⲗ ⲁϥⲃⲱⲕ ϣⲁⲣⲟϥ ϩⲛ̅ ⲟⲩⲣⲁⲥⲟⲩ ϩⲓⲧⲛ̅ ⲧⲉⲝⲟⲩⲥⲓⲁ ⲙ̅ⲡⲁⲉⲓⲱⲧ ⲛ̅ⲁⲅⲁⲑⲟⲥ ̅ⲡⲉϫⲁϥ ⲛⲁϥ ϫⲉ ⲓⲱⲥⲏⲫ ⲡϣⲏⲣⲉ ⲛ̅ⲇⲁⲩⲉⲓⲇ ⲙ̅ⲡⲣ̅ⲣ̅ϩⲟⲧⲉ ̅ϫⲓ ⲙ̅Ⲙⲁⲣⲓⲁ ⲧⲉⲕⲥϩⲓⲙⲉ ̅ⲡⲉⲧⲉⲥⲛⲁϫⲡⲟϥ ⲅⲁⲣ ⲟⲩⲁⲁⲃ. ⲁⲩⲱ ⲉⲕⲉⲙⲟⲩⲧⲉ ⲉⲡⲉϥⲣⲁⲛ ϫⲉ ⲓ̅ⲥ̅ ̅ⲛ̅ⲧⲟϥ ⲡⲉⲧⲛⲁⲙⲟⲟⲛⲉ ⲙ̅ⲡⲉϥⲗⲁⲟⲥ ϩⲛ̅ ⲟⲩϭⲉⲣⲱⲃ ⲙ̅ⲡⲉⲛⲓⲡⲉ. ⲁϥⲧⲱⲟⲩⲛ ⲇⲉ ⲛ̅ϭⲓ Ⲓⲱⲥⲏⲫ ⲉⲃⲟⲗϩⲙ̅ ⲡϩⲓⲛⲏⲃ ⲁϥⲉⲓⲣⲉ ⲕⲁⲧⲁ ⲑⲉ ⲛ̅ⲧⲁϥϩⲱⲛ ⲉⲧⲟⲟⲧϥ ⲛ̅ϭⲓ ⲡⲁⲅⲅⲉⲗⲟⲥ ⲙ̅Ⲡϫⲟⲉⲓⲥ ̅ⲁϥϩⲁⲣⲉϩ ⲉⲧⲡⲁⲣⲑⲉⲛⲟⲥ ⲉⲧⲟⲩⲁⲁⲃ ⲉϩⲟⲩⲛ ⲉⲡⲉϥⲏⲓ.
Ⲙⲛ̅ⲛ̅ⲥⲁ ⲛⲁⲓ ⲁⲩⲇⲟⲅⲙⲁ ⲉⲓ ⲉⲃⲟⲗ ϩⲓⲧⲙ̅ ⲡⲣ̅ⲣⲟ Ⲁⲩⲅⲟⲩⲥⲧⲟⲥ ⲉⲧⲣⲉ ⲧⲟⲓⲕⲟⲩⲙⲉⲛⲏ ⲧⲏⲣⲥ ⲥϩⲁⲓⲥ ⲛ̅ⲥⲁ ⲛⲉⲥⲧⲙⲉ. ⲁϥⲧⲱⲟⲩⲛ ⲇⲉ ⲛ̅ϭⲓ Ⲓⲱⲥⲏⲫ ⲡⲁ ⲧⲙⲛ̅ⲧϩⲗ̅ⲗⲟ ⲉⲧⲛⲁⲛⲟⲩⲥ ⲁϥϫⲓ ⲛ̅ⲧⲡⲁⲣⲑⲉⲛⲟⲥ ⲛ̅ⲥⲉⲙⲛⲏ ⲁϥⲉⲓⲛⲉ ⲙ̅ⲙⲟⲥ ⲉϩⲣⲁⲓ ⲉⲡⲉϥⲏⲓ ⲙ̅ⲙⲓⲛ ⲙ̅ⲙⲟϥ ⲉⲂⲏⲑⲗⲉⲉⲙ ⲉⲁⲥϩⲱⲛ ⲉϩⲟⲩⲛ ⲉⲙⲓⲥⲉ ̅ⲁϥⲁⲡⲟⲅⲣⲁⲫⲏ ⲙ̅ⲡⲉϥⲣⲁⲛ ϩⲁⲧⲛ̅ ⲛⲉⲅⲣⲁⲙⲁⲧⲉⲩⲥ ⲛ̅Ⲃⲏⲑⲗⲉⲉⲙ ϫⲉ Ⲓⲱⲥⲏⲫ ⲡϣⲏⲣⲉ ⲛ̅Ⲓⲁⲕⲱⲃ ⲙⲛ̅ Ⲙⲁⲣⲓⲁ ⲧⲉϥⲥϩⲓⲙⲉ ⲙⲛ̅ ⲓ̅ⲥ̅ ⲡⲉⲩϣⲏⲣⲉⲉ̅ⲛⲉ ⲉⲃⲟⲗ ⲛⲉ ϩⲙ̅ ⲡⲏⲓ ⲛ̅Ⲇⲁⲩⲉⲓⲇ ⲡⲁ ⲧⲉⲫⲩⲗⲏ ⲛ̅Ⲓⲟⲩⲇⲁ. ⲁⲘⲁⲣⲓⲁ ⲧⲁⲙⲁⲁⲩ ⲙⲓⲥⲉ ⲙ̅ⲙⲟⲓ ⲛ̅ϩⲟⲩⲛ ⲉⲡⲙⲁⲛ̅ϭⲟⲉⲓⲗⲉ ⲛ̅Ⲃⲏⲑⲗⲉⲉⲙ ϩⲓⲧⲟⲩⲱϥ ⲙ̅ⲡⲧⲁⲫⲟⲥ ⲛ̅Ϩⲣⲁⲭⲏⲗ ⲧⲉⲥϩⲓⲙⲉ ⲛ̅Ⲓⲁⲕⲱⲃ ⲡⲡⲁⲧⲣⲓⲁⲣⲭⲏⲥ ⲡⲉⲓⲱⲧ ⲛ̅Ⲓⲱⲥⲏⲫ ⲙⲛ̅ Ⲃⲉⲛⲓⲁⲙⲓⲛ.
Ⲁ ⲡⲥⲁⲧⲁⲛⲁⲥ ⲥⲩⲙⲃⲟⲗⲉⲩⲉ ϩⲙ̅ ⲡϩⲏⲧ ⲛ̅Ϩⲏⲣⲱⲇⲏⲥ ⲡⲛⲟϭ ⲡⲉⲓⲱⲧ ⲛ̅Ⲁⲣⲭⲏⲗⲁⲟⲥ ....
Ⲁⲥϣⲱⲡⲉ ⲇⲉ ⲛ̅ⲧⲉⲣⲉϥϫⲉ ⲛⲁⲓ ⲁϥⲧⲱⲟⲩⲛ ⲁϥⲉⲓ ⲉⲡⲉϥⲏⲓ Ⲛⲁⲍⲁⲣⲉⲑ ⲧⲡⲟⲗⲓⲥ ⲉⲧⲉϥⲟⲩⲏϩ ⲛ̅ϩⲏⲧⲥ ̅ⲁⲩⲱ ⲛ̅ⲧⲉⲓϩⲉ ⲁϥϫⲧⲟ ⲉⲡϣⲱⲛⲉ ⲉⲧⲉϥⲛⲁⲙⲟⲩ ⲛ̅ϩⲏⲧϥ̅ ⲡⲣⲟⲥ ⲡⲉⲧⲕⲏ ⲉϩⲣⲁⲓ ⲛ̅ⲣⲱⲙⲉ ⲛⲓⲙ. ⲁⲩⲱ ⲉⲓⲥ ϩⲏⲏⲧⲉ ⲛⲉⲣⲉ ⲡⲉϥϣⲱⲛⲉ ϩⲟⲣϣ ⲉⲙⲁⲧⲉ ⲛ̅ϩⲟⲩⲟ ⲉⲥⲟⲡ ⲛⲓⲙ ⲛ̅ⲧⲁϥϣⲱⲛⲉ ϫⲓⲛⲧⲁⲩϫⲡⲟϥ ⲉⲡⲕⲟⲥⲙⲟⲥ. ⲧⲁⲓ ⲧⲉ ⲧⲁⲛⲁⲥⲧⲣⲟⲫⲏ ⲙ̅ⲡⲁⲙⲉⲣⲓⲧ ⲛ̅ⲉⲓⲱⲧ Ⲓⲱⲥⲏⲫ . ⲁϥⲣ̅ ϩⲙⲉ ⲛ̅ⲣⲟⲙⲡⲉ ⲙ̅ⲡⲁⲧⲟⲩϫⲓ ⲥϩⲓⲙⲉ ⲛⲁϥ ⲁⲩⲱ ⲕⲉⲓⲧⲉ ⲛ̅ⲣⲟⲙⲡⲉ ⲁϥⲁⲁⲩ ϩⲙ̅ ⲡⲕⲟⲥⲙⲟⲥ ⲙⲛ̅ ⲧⲉϥⲥϩⲓⲙⲉ ⲁⲩⲱ ⲛ̅ⲧⲉⲣⲉⲥⲙⲟⲩ ⲁϥⲣ̅ ⲕⲉⲣⲟⲙⲡⲉ ⲉϥϭⲉⲉⲧ ⲙⲁⲩⲁⲁϥ . ⲁ ⲧⲁⲙⲉⲣⲓⲧ ⲙ̅ⲙⲁⲁⲩ ⲣ̅ ⲕⲉⲥⲛ̅ⲧⲉ ⲛ̅ⲣⲟⲙⲡⲉ ϩⲙ̅ ⲡⲉϥⲏⲓ ϫⲓⲛⲧⲁⲩϣⲡ̅ⲧⲟⲟⲧⲥ ⲛⲁϥ ⲛ̅ⲥϩⲓⲙⲉ ⲉⲁⲩϩⲱⲛ ⲉⲧⲟⲟⲧϥ ϩⲓⲧⲛ̅ ⲛ̅ⲟⲩⲏⲏⲃ ϫⲉ ϩⲁⲣⲉϩ ⲉⲣⲟⲥ ϣⲁ ⲡⲉⲟⲩⲟⲉⲓϣ ⲛ̅ⲧϣⲉⲗⲉⲉⲧ . ⲁⲩⲱ ⲁ Ⲙⲁⲣⲓⲁ ⲧⲁⲙⲁⲁⲩ ϫⲡⲟⲓ ϩⲛ̅ ⲧⲁⲣⲭⲏ ⲛ̅ⲧⲙⲉϩϣⲟⲙⲧⲉ ⲛ̅ⲣⲟⲙⲡⲉ ⲉⲥϩⲙ̅ ⲡⲏⲓ ⲛ̅Ⲓⲱⲥⲏⲫ ̅ϩⲛ̅ ⲧ̅ⲙⲉϩ ⲛ̅ⲣⲟⲙⲡⲉ ⲛ̅ⲧⲁ Ⲙⲁⲣⲓⲁ ⲧⲁⲙⲁⲁⲩ ϫⲡⲟⲓ ϩⲛ̅ ⲟⲩⲥⲡⲉⲗⲁⲓⲟⲛ ⲉⲛⲁⲧϣⲁϫⲉ ⲉⲣⲟϥ ⲟⲩⲇⲉ ⲛ̅ⲁⲧϩⲉⲧϩⲱⲧϥ ⲟⲩⲇⲉ ⲙⲛ̅ ⲗⲁⲁⲩ ⲛ̅ⲣⲱⲙⲉ ϩⲙ̅ ⲡⲥⲱⲛⲧ ⲧⲏⲣϥ ⲛⲁⲉⲓⲙⲉ ⲉⲣⲟϥ ⲉⲓⲙⲏⲧⲓ ⲁⲛⲟⲕ ⲙⲛ̅ ⲡⲁⲉⲓⲱⲧ ⲙⲛ̅ ⲡⲉⲡ̅ⲛ̅ⲁ̅ ⲉⲧⲟⲩⲁⲁⲃ.
Ⲛⲉϩⲟⲟⲩ ⲇⲉ ⲧⲏⲣⲟⲩ Ⲓⲱⲥⲏⲫ ⲡⲁ ⲧⲙⲛ̅ⲧϩⲗ̅ⲗⲟ ⲉⲧⲥⲙⲁⲙⲁⲁⲧ ⲥⲉⲉⲓⲣⲉ ⲛ̅ϣⲉ ⲙⲛ̅ ⲧⲟⲩⲉⲓ ⲛ̅ⲣⲟⲙⲡⲉ ⲕⲁⲧⲁ ⲡⲟⲩⲉϩⲥⲁϩⲛⲉ ⲙ̅ⲡⲁⲉⲓⲱⲧ
ⲁⲡⲉϩⲟⲟⲩ ⲙ̅ⲡⲉϥϭⲙ̅ⲡϣⲓⲛⲉ ⲉⲓ ⲛⲁϥ ⲉⲧⲉ ⲥⲟⲩ ϫⲟⲩⲧⲁⲥⲉ ⲡⲉ ⲙ̅ⲡⲉⲃⲟⲧ Ⲉⲡⲏⲫ. ⲁⲩⲱ ⲁϥⲁⲣⲭⲉⲓ ⲛ̅ϣⲓⲃⲉ ⲛ̅ϭⲓ ⲡⲛⲟⲩⲃ ⲉⲧⲥⲟⲧⲡ ⲉⲧⲉ ⲧⲥⲁⲣⲝ ⲧⲉ ⲙ̅ⲡⲁⲉⲓⲱⲧ Ⲓⲱⲥⲏⲫ ⲁⲩⲱ ⲁⲡϩⲁⲧ ⲡⲱⲱⲛⲉ ⲉⲧⲉ ⲡⲛⲟⲩⲥ ⲡⲉ ⲙⲛ̅ ⲧⲥⲟⲫⲓⲁ . ⲁϥⲡⲱⲱⲛⲉ ⲉⲡⲕⲉⲁⲓⲱⲛ ⲁϥⲣ̅ⲡⲱⲃϣ ⲙ̅ⲡⲟⲩⲱⲙ ⲙⲛ̅ ⲡⲥⲱ ̅ⲉⲁ ⲧⲥⲟⲫⲓⲁ ⲙⲛ̅ ⲧⲙⲛ̅ⲧⲧⲉⲭⲛⲓⲧⲏⲥ ⲕⲟⲧⲥ ⲉⲩⲥⲟⲣⲙⲉⲥ ⲙⲛ̅ ⲟⲩⲙⲛ̅ⲧⲁⲧⲟⲡⲟⲛ. ⲁⲥϣⲱⲡⲉ ⲇⲉ ⲛ̅ⲧⲉⲣⲉ ⲡⲟⲩⲟⲉⲓⲛ ⲁⲣⲭⲉⲓ ⲛ̅ⲥⲱⲣ ⲉⲃⲟⲗ ⲙ̅ⲡⲉϩⲟⲟⲩ ⲉⲧⲙ̅ⲙⲁⲩ ⲁ ⲡⲁⲙⲉⲣⲓⲧ ⲛ̅ⲉⲓⲱⲧ Ⲓⲱⲥⲏⲫ ⲁⲣⲭⲉⲓ ⲛ̅ϣⲧⲟⲣⲧⲣ̅ ⲉⲙⲁⲧⲉ ϩⲓϫⲙ̅ ⲡⲉϥⲙⲁⲛ̅ⲕⲟⲧⲕ ⲁⲩⲱ ⲛ̅ⲧⲉⲓϩⲉ ⲁϥⲉϣ ⲡⲉⲓⲛⲟϭ ⲛ̅ⲁϣⲁϩⲟⲙ ⲁⲩⲱ ⲁϥⲣⲱϩⲧ ⲛ̅ⲛⲉϥϭⲓϫ ⲉϫⲛ̅ ⲛⲉⲩⲉⲣⲏⲩ ⲛ̅ϣⲟⲙⲛ̅ⲧ ⲛ̅ⲥⲟⲡ ⲁϥⲱϣ ⲉⲃⲟⲗ ϩⲛ̅ ⲟⲩⲛⲟϭ ⲛ̅ϣⲧⲟⲣⲧⲣ̅ ⲙⲛ̅ ⲟⲩⲛⲟϭ ⲛ̅ϩⲃⲁ ϫⲉ
Ⲟⲩⲟⲓ ⲛⲁⲓ ⲙ̅ⲡⲟⲟⲩ ̅ⲟⲩⲟⲓ ⲙ̅ⲡⲉϩⲟⲟⲩ ⲛ̅ⲧⲁ ⲧⲁⲙⲁⲁⲩ ϫⲡⲟⲓ ⲛ̅ϩⲏⲧϥ . ⲟⲩⲟⲓ ⲛ̅ⲛⲉⲕⲓⲃⲉ ⲛ̅ⲧⲁⲓⲧⲥⲛ̅ⲕⲟ ⲛ̅ϩⲏⲧⲟⲩ . ⲟⲩⲟⲓ ⲛ̅ⲙⲡⲁⲧ ⲛ̅ⲧⲁⲓϩⲙⲟⲟⲥ ϩⲓϫⲱⲟⲩ . ⲟⲩⲟⲓ ⲛ̅ⲛⲉϭⲗⲟⲟⲧⲉ ⲛ̅ⲧⲁⲩϩⲗⲟⲟⲗⲉ ⲙ̅ⲙⲟⲓ ϣⲁⲛⲧⲉⲓⲉⲓ ⲉⲡⲧⲉ ⲛ̅ⲧⲁⲙⲉⲧⲉⲭⲉ ⲉⲡⲛⲟⲃⲉ. ⲟⲩⲟⲓ ⲙ̅ⲡⲗⲁⲁⲥ ⲙⲛ̅ ⲛⲁⲥⲡⲟⲧⲟⲩ ϫⲉ ⲁⲩϭⲗⲟⲙⲗⲙ̅ ⲛ̅ⲟⲩⲙⲏⲏϣⲉ ⲛ̅ⲥⲟⲡ ϩⲙ̅ ⲡϫⲓⲛϭⲟⲛⲥ ⲙⲛ̅ ⲧⲕⲁⲧⲁⲗⲁⲗⲓⲁ ⲙⲛ̅ ⲧⲙⲛ̅ⲧⲗⲁⲥ ⲥⲛⲁⲩ ⲙⲛ̅ ϣⲁϫⲉ ⲛⲓⲙ ⲛ̅ⲃⲱⲗ ⲉⲃⲟⲗ. ⲟⲩⲟⲓ ⲛ̅ⲛⲁⲃⲁⲗ ϫⲉ ⲁⲩϭⲱϣⲧ ϩⲛ̅ ⲟⲩⲥⲕⲁⲛⲇⲁⲗⲟⲛ ⲁⲩⲱ ⲁⲩⲙⲉⲣⲉ ⲧⲙⲛ̅ⲧⲣⲉϥⲉⲓⲣ̅ⲃⲟⲟⲛⲉ. ⲟⲩⲟⲓ ⲛ̅ⲛⲁⲙⲁⲁϫⲉ ϫⲉ ⲁⲩⲙⲉⲣⲉ ⲛ̅ϣⲁϫⲉ ⲛ̅ⲕⲁⲥⲕⲥ̅ ⲙⲛ̅ ⲛ̅ϣⲁϫⲉ ⲧⲏⲣⲟⲩ ⲙ̅ⲡⲱⲙⲥ. ⲟⲩⲟⲓ ⲛ̅ⲛϭⲓϫ ϫⲉ ⲁⲩϩⲱⲃⲧ̅ ⲛ̅ⲛⲉⲧⲉⲛⲟⲩⲓ ⲁⲛ ⲛⲉ. ⲟⲩⲟⲓ ⲛ̅ⲙ̅ⲙⲁϩⲧ̅ ⲙⲛ̅ ⲑⲏ ⲛⲁⲓ ⲉⲧ ⲉⲡⲓⲑⲩⲙⲉⲓ ⲉϩⲉⲛⲧⲣⲟⲫⲏ ⲛ̅ⲛⲟⲩⲓ ⲁⲛ ⲛⲉ ⲁⲩⲱ ϩⲟⲇⲁⲛ ⲉⲩϣⲁⲛϭⲛ̅ ⲛ̅ⲕⲁ ⲛⲓⲙ ϣⲁⲩⲣⲟⲕϩⲟⲩ ⲛ̅ϩⲟⲩⲟ ⲉⲩⲧⲣⲓⲣ ⲛ̅ⲕⲱϩⲧ. ⲉⲓⲛⲁⲣ̅ ⲟⲩ ⲧⲉⲛⲟⲩ, ⲁⲓⲉⲣⲃ ⲉϩⲟⲩⲛ ⲛ̅ⲥⲁⲥⲁ ⲛⲓⲙ. ⲁⲗⲏⲑⲱⲥ ⲟⲩⲟⲓ ⲟⲩⲟⲓ ⲛ̅ⲣⲱⲙⲉ ⲛⲓⲙ ⲉⲧⲛⲁⲣ̅ⲛⲟⲃⲉ . ϯϫⲱ ⲙ̅ⲙⲟⲥ ⲛⲏⲧⲛ̅ ⲱ ⲛⲁϣⲏⲣⲉ ⲙⲛ̅ ⲛⲁϣⲉⲉⲣⲉ ϫⲉ ⲡⲛⲟϭ ⲛ̅ϩⲃⲁ ⲛ̅ⲧⲁⲓⲛⲁⲩ ⲉⲣⲟϥ ϩⲓⲧⲙ̅ ⲡⲁⲉⲓⲱⲧ Ⲓⲁⲕⲱⲃ ⲉϥⲛⲏⲩ ⲉⲃⲟⲗ ϩⲛ̅ ⲥⲱⲙⲁ ⲛ̅ⲧⲟϥ ⲡⲉ ⲡⲁⲓ ⲛ̅ⲧⲁϥⲧⲱⲙⲛ̅ⲧ ⲉⲣⲟⲓ ϩⲱ ⲙ̅ⲡⲟⲟⲩ ⲁⲛⲟⲕ ⲡⲉⲓⲉⲃⲓⲏⲛ ⲛ̅ⲧⲁⲗⲁⲓⲡⲱⲣⲟⲥ ⲁⲩⲱ ⲛ̅ϩⲏⲕⲉ , ⲁⲗⲗⲁ ⲡϫⲟⲉⲓⲥ ⲡⲁⲛⲟⲩⲧⲉ ⲡⲉ ⲡⲙⲉⲥⲓⲧⲏⲥ ⲛ̅ⲧⲁⲩⲭⲏ ⲙⲛ̅ ⲡⲁⲥⲱⲙⲁ ⲙⲛ̅ ⲡⲁⲡ̅ⲛ̅ⲁ̅.
Ⲛⲁⲓ ⲇⲉ ⲉϥϫⲱ ⲙ̅ⲙⲟⲟⲩ ⲛ̅ϭⲓ ⲡⲁⲙⲉⲣⲓⲧ ⲛ̅ⲉⲓⲱⲧ Ⲓⲱⲥⲏⲫ ̅ⲁⲓⲧⲱⲟⲩⲛ ⲁⲓⲙⲟⲟϣⲉ ⲉⲣⲟϥ ⲉϥⲛ̅ⲕⲟⲧⲕ ⲉϥϣⲧⲣ̅ⲧⲱⲣ ϩⲛ̅ ⲧⲉϥⲩⲭⲏ ⲙⲛ̅ ⲡⲉϥⲡ̅ⲛ̅ⲁ̅ ̅ⲡⲉϫⲁⲓ ⲛⲁϥ ϫⲉ ⲭⲁⲓⲣⲉ ⲡⲁⲙⲉⲣⲓⲧ ⲛ̅ⲉⲓⲱⲧ ⲡⲁ ⲧⲙⲛ̅ⲧϩⲗ̅ⲗⲟ ⲉⲧⲛⲁⲛⲟⲩⲥ. ⲁϥⲧⲁϣⲉ ⲟⲩⲱϣⲃ̅ ⲛⲁⲓ ϩⲛ̅ ⲟⲩⲛⲟϭ ⲛ̅ϣⲧⲟⲣⲧⲣ̅ ⲙⲛ̅ ⲟⲩϩⲃⲁ ⲙⲛ̅ ⲟⲩϩⲟⲧⲉ ⲛ̅ⲧⲉ ⲡⲙⲟⲩ ⲉϥϫⲱ ⲙ̅ⲙⲟⲥ ϫⲉ ⲭⲁⲓⲣⲉ ⲛ̅ⲟⲩⲙⲏⲏϣⲉ ⲛ̅ⲥⲟⲡ ⲡⲁⲙⲉⲣⲓⲧ ⲛ̅ϣⲏⲣⲉ ̅ⲁⲧⲁⲩⲭⲏ ⲙ̅ⲧⲟⲛ ⲉⲣⲟⲓ ⲛ̅ⲟⲩⲕⲟⲩⲓ ⲛ̅ⲧⲉⲣⲉ ⲧⲉⲕⲥⲙⲏ ⲉⲧⲛⲟⲧⲙ̅ ⲧⲁϩⲟⲓ. ⲓ̅ⲥ̅ ⲡⲁϫⲟⲉⲓⲥ ⲓ̅ⲥ̅ ⲡⲁⲣ̅ⲣⲟ ⲙ̅ⲙⲉ ̅ⲓ̅ⲥ̅ ⲡⲁⲥⲱⲧⲏⲣ ⲓ̅ⲥ̅ ⲡⲁⲣⲉϥⲧⲟⲩϫⲟ ⲓ̅ⲥ̅ ⲡⲁⲣⲉϥⲛⲟⲩϩⲙ̅ ̅ⲱ ⲓ̅ⲥ̅ ⲡⲉⲧⲥⲕⲉⲡⲁⲍⲉ ⲙ̅ⲡⲧⲏⲣϥ ̅ⲱ ⲓ̅ⲥ̅ ⲡⲉⲧⲁⲙⲁϩⲧⲉ ⲙ̅ⲡⲧⲏⲣϥ ϩⲙ̅ ⲡⲟⲩⲱϣ ⲛ̅ⲧⲉϥⲙⲛ̅ⲧⲁⲅⲁⲑⲟⲥ ̅ⲱ ⲓ̅ⲥ̅ ⲡⲉⲧⲉⲣⲉ ⲡⲉϥⲣⲁⲛ ⲕⲛ̅ⲛⲉ ⲁⲩⲱ ⲉϥⲕⲓⲱⲟⲩ ⲉⲙⲁⲧⲉⲱ̅ ⲓ̅ⲥ̅ ⲡⲉⲓⲃⲁⲗ ⲉⲧⲛⲁⲩ ⲡⲓⲙⲁⲁϫⲉ ⲉⲧⲥⲱⲧⲙ̅ ⲥⲱⲧⲙ̅ ⲉⲣⲟⲓ ϩⲱⲱⲧ ⲙ̅ⲡⲟⲟⲩ ̅ⲁⲛⲟⲕ ⲡⲉⲕϩⲙ̅ϩⲁⲗ ⲉⲓⲥⲟⲡⲥ ⲙ̅ⲙⲟⲕ ⲁⲩⲱ ⲉⲓⲡⲱϩⲧ ⲛ̅ⲛⲁⲣ̅ⲙⲟⲟⲩⲉ ⲙ̅ⲡⲉⲕⲙ̅ⲧⲟ ⲉⲃⲟⲗ.ϫⲉ ⲛ̅ⲧⲟⲕ ⲡⲉ Ⲡⲛⲟⲩⲧⲉ ϩⲛ̅ ⲟⲩⲙⲉ ⲙⲛ̅ ⲟⲩϫⲱⲕ ⲕⲁⲧⲁ ⲑⲉ ⲛ̅ⲧⲁ ⲡⲉⲕⲁⲅⲅⲉⲗⲟⲥ ⲧⲟⲩⲛⲓⲁⲧ ⲉⲃⲟⲗ ⲛ̅ϩⲁϩ ⲛ̅ⲥⲟⲡ ⲛ̅ϩⲟⲩⲟ ⲇⲉ ⲡⲉϩⲟⲟⲩ ⲛ̅ⲧⲁ ⲡⲁϩⲏⲧ ⲙ̅ⲕⲁϩ ⲉⲣⲟⲓ ⲉⲧⲃⲉ ⲟⲩⲙⲉⲉⲩⲉ ⲙ̅ⲙⲛ̅ⲧⲣⲱⲙⲉ ⲉⲧⲃⲉ ⲧⲉⲧⲥⲙⲁⲙⲁⲁⲧ Ⲙⲁⲣⲓⲁ ⲧⲡⲁⲣⲑⲉⲛⲟⲥ ⲁⲓⲡⲉⲣⲉⲉⲓⲕⲁⲍⲉ ϫⲉ ⲁⲥⲱⲱ ⲁⲩⲱ ⲛⲉⲓϫⲱ ⲙ̅ⲙⲟⲥ ϫⲉ ⲉϩⲣⲁⲓ ϩⲛ̅ ⲧⲉⲓⲟⲩϣⲏ
ϯⲛⲁⲛⲟϫⲥ ⲉⲃⲟⲗ ⲛ̅ϫⲓⲟⲩⲉ. ⲛⲁⲓ ⲇⲉ ⲉⲓⲙⲉⲉⲩⲉ ⲉⲣⲟⲟⲩ ⲁ ⲡⲁⲅⲅⲉⲗⲟⲥ ⲟⲩⲱⲛϩ ⲛⲁⲓ ⲉⲃⲟⲗ ϩⲛ̅ ⲟⲩⲣⲁⲥⲟⲩ ⲉϥϫⲱ ⲙ̅ⲙⲟⲥ ⲛⲁⲓ ϫⲉ Ⲓⲱⲥⲏⲫ ⲡϣⲏⲣⲉ ⲛ̅Ⲇⲁⲩⲉⲓⲇ ⲙ̅ⲡⲣ̅ⲣϩⲟⲧⲉ ⲉϫⲓ ⲙ̅Ⲙⲁⲣⲓⲁ ⲧⲉⲕⲥϩⲓⲙⲉ ⲟⲩⲇⲉ ⲙ̅ⲡⲣ̅ϯⲥⲧⲁⲍⲉ ⲉϫⲛ̅ ⲧⲉⲥϭⲓⲛⲱⲱ ϫⲉ ⲛ̅ⲧⲁⲥⲱⲱ ⲅⲁⲣ ⲉⲃⲟⲗϩⲛ̅ ⲟⲩⲡ̅ⲛ̅ⲁ̅ ⲉϥⲟⲩⲁⲁⲃ. ⲥⲛⲁϫⲡⲟ ⲇⲉ ⲛ̅ⲟⲩϣⲏⲣⲉ ⲛⲅ̅ⲙⲟⲩⲧⲉ ⲉⲡⲉϥⲣⲁⲛ ϫⲉ ⲓ̅ⲥ̅. ⲧⲉⲛⲟⲩ ⲇⲉ ⲡⲁϫⲟⲉⲓⲥ ⲡⲥⲱⲧⲏⲣ ⲛ̅ⲧⲁⲩⲭⲏ ⲙⲛ̅ ⲡⲁⲡ̅ⲛ̅ⲁ̅ ⲙ̅ⲡⲣ̅ϭⲛ̅ⲁⲣⲓⲕⲉ ⲉⲣⲟⲓ ⲁⲛⲟⲕ ⲁⲛⲅ̅ ⲡⲉⲕϩⲙ̅ϩⲁⲗ ⲁⲩⲱ ⲡϩⲱⲃ ⲛ̅ⲛⲉⲕϭⲓϫ ̅ⲛ̅ⲧⲁⲓⲡⲉⲣⲉⲓⲉⲣⲕⲁⲍⲉ ⲁⲛ ⲱ ⲡⲁϫⲟⲉⲓⲥ ̅ⲁⲗⲗⲁ ⲙ̅ⲡⲁϯⲥⲟⲩⲛ̅ ⲡⲉⲟⲟⲩ ⲙ̅ⲡⲉⲓⲛⲟϭ ⲙ̅ⲙⲩⲥⲧⲏⲧⲏⲣⲓⲟⲛ ⲉⲧⲉ ⲡⲉⲕϫⲡⲟ ⲉⲧⲟⲩⲁⲁⲃ ⲡⲉ ⲟⲩⲇⲉ ⲟⲛ ⲙ̅ⲡⲉⲓⲥⲱⲧⲙ̅ ⲉⲛⲉϩ ϫⲉ ϣⲁⲣⲉ ⲥϩⲓⲙⲉ ⲱⲱ ⲁϫⲛ̅ ϩⲟⲟⲩⲧ ̅ⲱ ⲡⲁϫⲟⲉⲓⲥ ⲁⲩⲱ ⲡⲁⲛⲟⲩⲧⲉ ⲉⲛⲉ ⲡⲧⲱϣ ⲙ̅ⲡⲉⲓⲛⲟϭ ⲙ̅ⲙⲩⲥⲧⲏⲣⲓⲟⲛ ⲁⲛ ⲡⲉ ⲛ̅ⲧⲉⲓⲛⲁⲡⲓⲥⲧⲉⲩⲉ ⲉⲣⲟⲕ ⲁⲛ ⲡⲉ ⲙⲛ̅ ⲡⲉⲕϫⲡⲟ ⲉⲧⲟⲩⲁⲁⲃ ⲧⲁϯⲉⲟⲟⲩ ⲛ̅ⲧⲉⲛⲧⲁⲥϫⲡⲟⲕ Ⲙⲁⲣⲓⲁ ⲧⲉⲓϩⲁⲓⲃⲉ ⲙ̅ⲙⲉϯ̅ⲉⲓⲣⲉ ⲙ̅ⲡⲙⲉⲉⲩⲉ ⲙ̅ⲡϩⲟⲟⲩ ⲛ̅ⲧⲁ ⲧⲕⲉⲣⲁⲥⲧⲏⲥ ⲟⲩⲱⲙ ⲙ̅ⲡϣⲏⲣⲉ ϣⲏⲙ ⲉⲧⲉϥⲟⲩⲉⲣⲏⲧⲉ ⲁϥⲙⲟⲩ ̅ⲁ ⲛⲉⲣⲱⲙⲉ ⲥⲱⲟⲩϩ ⲉⲣⲟⲕ ⲉⲩⲟⲩⲱϣ ⲉϭⲟⲡⲕ ⲛ̅ⲥⲉⲧⲁⲁⲕ ⲛ̅ϩⲏⲣⲱⲇⲏⲥ ⲡⲡⲁⲣⲁⲛⲟⲙⲟⲥ ̅ⲁⲩⲱ ⲁⲓϩⲉ ⲉⲣⲟⲥ ⲁⲧⲉⲕⲙⲛ̅ⲧⲛⲟⲩⲧⲉ ⲧⲁⲛϩⲟϥ ⲁϥⲱⲛϩ ⲁⲩⲱ ϩⲙ̅ ⲡⲧⲣⲉⲕⲧⲟⲩⲛⲟⲥϥ ⲉⲛⲉϥⲉⲓⲟⲧⲉ ⲁⲩⲛⲟϭ ⲛ̅ⲣⲁϣⲉ ϣⲱⲡⲉ ⲛⲁⲩ ̅ⲁⲓϫⲛⲟⲩⲕ ⲇⲉ ⲱ ⲡⲁⲙⲉⲣⲓⲧ ⲛ̅ϣⲏⲣⲉ ϫⲉ ⲏⲥⲩⲭⲁⲍⲉ ⲙ̅ⲙⲟⲕ ϩⲛ̅ ϩⲱⲃ ⲛⲓⲙ ̅ⲁⲓⲁⲙⲁϩⲧⲉ ⲙ̅ⲡⲉⲕⲙⲁⲁϫⲉ ⲛ̅ⲟⲩⲛⲁⲙ ⲁⲓⲥⲟⲕϥ ̅ⲁⲕⲟⲩⲱϣⲃ ⲉⲕϫⲱ ⲙ̅ⲙⲟⲥ ⲛⲁⲓ ϫⲉ ⲛ̅ⲥⲁⲃⲏⲗ ϫⲉ ⲛ̅ⲧⲟⲕ ⲡⲉ ⲡⲁⲉⲓⲱⲧ ⲕⲁⲧⲁ ⲥⲁⲣⲝ ⲛⲉⲓⲛⲁⲉⲡⲉⲓϯⲙⲉ ⲛⲁⲕ ϫⲉ ⲁⲕⲥⲉⲕⲥⲉⲕ ⲡⲁⲙⲁⲁϫⲉ ⲛ̅ⲟⲩⲛⲁⲙ ̅ⲧⲉⲛⲟⲩ ⲇⲉ ⲱ ⲡⲁⲙⲉⲣⲓⲧ ⲛ̅ϣⲏⲣⲉ ⲡⲁϫⲟⲉⲓⲥ ⲁⲩⲱ ⲡⲁⲛⲟⲩⲧⲉ ⲉϣⲱⲡⲉ ⲛ̅ⲧⲁⲕϥⲓⲗⲟⲅⲟⲥ ⲛⲙ̅ⲙⲁⲓ ⲉⲧⲃⲉ ⲡⲉϩⲟⲟⲩ ⲉⲧⲙ̅ⲙⲁⲩ ⲁⲕⲧⲣⲉ ⲛⲉⲓⲙⲁⲉⲓⲛ ⲛ̅ϩⲟⲧⲉ ⲉⲓ ⲉϩⲣⲁⲓ ⲉϫⲱⲓϯ̅ⲡⲁⲣⲁⲕⲁⲗⲉⲓ ⲙ̅ⲙⲟⲕ ⲱ ⲡⲁϫⲟⲉⲓⲥ ⲛ̅ⲁⲅⲁⲑⲟⲥ ⲕⲱ ⲛⲁⲓ ⲉⲃⲟⲗ ⲛⲅ̅ⲧⲙ̅ϥⲓⲱⲡ ⲛⲙ̅ⲙⲁⲓ ̅ⲁⲛⲟⲕ ⲅⲁⲣ ⲁⲛⲅ̅ ⲡⲉⲕϩⲙ̅ϩⲁⲗ ⲁⲛⲟⲕ ⲡϣⲏⲣⲉ ⲛ̅ⲧⲉⲕϩⲙ̅ϩⲁⲗ ̅ⲉⲕϣⲁⲛⲥⲱⲗⲡ ⲛ̅ⲛⲁⲙⲉⲣⲣⲉ ϯⲛⲁϣⲱⲱⲧ ⲛⲁⲕ ⲛ̅ⲟⲩⲑⲩⲥⲓⲁ ⲛ̅ⲥⲙⲟⲩⲉ̅ⲧⲉ ⲧⲁⲓ ⲧⲉ ⲧϩⲟⲙⲟⲗⲟⲅⲓⲁ ⲛ̅ⲧⲉⲕⲙⲛ̅ⲧⲛⲟⲩⲧⲉ ϫⲉ ⲛ̅ⲧⲕ̅ ⲟⲩⲛⲟⲩⲧⲉ
ϩⲛ̅ ⲟⲩⲙⲉ ⲁⲩⲱ ⲛ̅ⲧⲕ̅ ⲟⲩϫⲟⲉⲓⲥ ϩⲛ̅ ⲟⲩϫⲱⲕ.
Ⲛⲁⲓ ⲇⲉ ⲉϥϫⲱ ⲙ̅ⲙⲟⲟⲩ ⲛ̅ϭⲓ ⲡⲁ ⲧⲙⲛ̅ⲧϩⲗ̅ⲗⲟ ⲉⲥⲕⲓⲱⲟⲩ ⲡⲁⲉⲓⲱⲧ Ⲓⲱⲥⲏⲫ ⲙ̅ⲡⲉⲓⲉϣϭⲱ ⲛ̅ⲟⲩⲉϣ ⲣⲓⲙⲉ ⲉⲓⲛⲁⲩ ⲉⲣⲟϥ ⲉⲁϥⲟⲩⲱ ⲉϥϫⲏⲩ ϩⲛ̅ ⲛ̅ϩⲁϭⲉ ⲙ̅ⲡⲙⲟⲩ ⲁⲩⲱ ⲉⲓⲥⲱⲧⲙ̅ ⲉⲛ̅ϣⲁϫⲉ ⲙ̅ⲙⲛ̅ⲧⲉⲃⲓⲏⲛ ⲉⲧⲉϥϫⲱ ⲙ̅ⲙⲟⲟⲩ ⲛⲁⲓ. ⲙⲛ̅ⲛ̅ⲥⲁ ⲛⲁⲓ ⲁⲓⲣ̅ⲡⲙⲉⲉⲩⲉ ⲙ̅ⲡⲉϩⲟⲟⲩ ⲙ̅ⲡⲁⲙⲟⲩ ⲙ̅ⲡⲛⲁⲩ ⲉⲧⲉⲣⲉ ⲛ̅ⲉⲓⲟⲩⲇⲁⲓ ⲛⲁⲧⲁⲗⲟⲓ ⲉⲡⲉⲥⲧⲁⲩⲣⲟⲥ ϩⲁ ⲡⲟⲩϫⲁⲓ ⲙ̅ⲡⲕⲟⲥⲙⲟⲥ ⲧⲏⲣϥ. ⲛ̅ⲧⲉⲩⲛⲟⲩ ⲁⲓⲃⲱⲕ ⲉⲡⲉⲑⲣⲓⲟⲛ ⲉⲧϩⲓⲃⲟⲗ ⲁⲩⲱ ⲁⲥⲧⲱⲟⲩⲛ ⲛ̅ϭⲓ Ⲙⲁⲣⲓⲁ ⲧⲁⲙⲁⲁⲩ ⲁⲥⲉⲓ ⲉⲃⲟⲗ ⲉⲡⲙⲁ ⲉⲧⲉⲓ ⲛ̅ϩⲏⲧϥ ⲡⲉϫⲁⲥ ⲛⲁⲓ ϩⲛ̅ ⲟⲩⲛⲟϭ ⲛ̅ⲗⲩⲡⲏ ⲙⲛ̅ ⲟⲩⲱⲗⲥⲛ̅ϩⲏⲧ ϫⲉ ⲟⲩⲟⲓ ⲛⲁⲓ ⲡⲁⲙⲉⲣⲓⲧ ⲛ̅ϣⲏⲣⲉ ⲁⲣⲏⲩ ⲉϥⲛⲁⲙⲟⲩ ⲛ̅ϭⲓ ⲡⲁ ⲧⲙⲛ̅ⲧϩⲗ̅ⲗⲟ ⲉⲧⲛⲁⲛⲟⲩⲥ Ⲓⲱⲥⲏⲫ ⲡⲉⲕⲉⲓⲱⲧ ⲕⲁⲧⲁ ⲥⲁⲣⲝ . ⲡⲉϫⲁⲓ ⲛⲁⲥ ϫⲉ ⲱ ⲧⲁⲙⲉⲣⲓⲧ ⲙ̅ⲙⲁⲁⲩ ⲛⲓⲙ ⲉⲛⲉϩ ϩⲙ̅ ⲡⲅⲉⲛⲟⲥ ⲛ̅ⲛⲣⲱⲙⲉ ⲛ̅ⲧⲁⲩⲫⲟⲣⲉⲓ ⲛ̅ϯⲥⲁⲣⲝ ⲡⲉⲧⲛⲁϭⲱ ⲛ̅ⲟⲩⲉϣ ⲙⲟⲩ , ⲡⲙⲟⲩ ⲅⲁⲣ ⲡⲉ ⲡⲁⲣⲭⲱⲛ ⲙ̅ⲡⲕⲟⲥⲙⲟⲥ ⲧⲏⲣϥ ⲙⲉⲭⲣⲓ ⲛ̅ⲧⲟ ⲱ Ⲙⲁⲣⲓⲁ ⲧⲁⲙⲁⲁⲩ ⲉⲧⲥⲙⲁⲙⲁⲁⲧ ̅ⲧⲁⲛⲁⲅⲅⲏ ⲧⲉ ⲉⲣⲟ ⲛ̅ⲧⲉⲙⲟⲩ ϩⲱⲱⲧⲉ ⲛ̅ⲑⲉ ⲛ̅ⲣⲱⲙⲉ ⲛⲓⲙ ̅ⲁⲗⲗⲁ ⲉⲓⲧⲉ ⲡⲁⲙⲉⲣⲓⲧ ⲛ̅ⲉⲓⲱⲧ Ⲓⲱⲥⲏⲫ ⲉⲓⲧⲉ ⲛ̅ⲧⲟ ⲱ ⲧⲁⲙⲉⲣⲓⲧ ⲙ̅ⲙⲁⲁⲩ ⲛ̅ⲟⲩⲙⲟⲩ ⲁⲛ ⲡⲉ ⲡⲉⲧⲛ̅ⲙⲟⲩ ⲁⲗⲗⲁ ⲟⲩⲱⲛϩ ϣⲁⲉⲛⲉϩ ⲡⲉ ̅ⲁⲗⲗⲁ ⲁⲛⲟⲕ ϩⲱⲱⲧ ϯⲛⲁϫⲡⲓ ⲙⲟⲩ ϩⲁ ⲡⲧⲏⲣϥ ⲉⲧⲃⲉ ⲧⲥⲁⲣⲝ ⲛ̅ⲧⲁⲓⲫⲟⲣⲉⲓ ⲙ̅ⲙⲟⲥ ̅ⲧⲉⲛⲟⲩ ϭⲉ ⲱ ⲧⲁⲙⲉⲣⲓⲧ ⲙ̅ⲙⲁⲁⲩ ⲧⲱⲟⲩⲛ ⲛ̅ⲧⲉⲃⲱⲕ ⲉϩⲟⲩⲛ ϩⲁϩⲧⲛ̅ ⲡϩⲗ̅ⲗⲟ ⲉⲧⲥⲙⲁⲙⲁⲁⲧ ⲛ̅ⲧⲉⲛⲁⲩ ⲉⲡⲧⲱϣ ⲡⲉ ⲉⲃⲟⲗϩⲛ̅ ⲧⲡⲉ.
Ⲁⲩⲱ ⲁⲓⲧⲱⲟⲩⲛ ⲁⲓⲃⲱⲕ ⲉϩⲟⲩⲛ ⲉⲡⲉⲑⲣⲓⲟⲛ ⲉⲧϥ̅ⲛⲕⲟⲧⲕ ⲛ̅ϩⲏⲧϥ ⲁⲓϩⲉ ⲉⲣⲟϥ ⲉⲁ ⲡⲙⲁⲉⲓⲛ ⲙ̅ⲡⲙⲟⲩ ⲟⲩⲱⲛϩ ⲉⲃⲟⲗ ⲛ̅ϩⲏⲧϥ. ⲁⲛⲟⲕ ⲇⲉ ⲁⲓϩⲙⲟⲟⲥ ϩⲁϩⲧⲛ̅ ⲧⲉϥⲁⲡⲉ ⲁ ⲧⲁⲙⲉⲣⲓⲧ ⲙ̅ⲙⲁⲁⲩ ϩⲙⲟⲟⲥ ϩⲁϩⲧⲛ̅ ⲛⲉϥⲟⲩⲉⲣⲏⲧⲉ. ⲁϥϥⲓ ⲛ̅ⲛⲉϥⲃⲁⲗ ⲉϩⲣⲁⲓ ϩⲁ ⲡⲁϩⲟ ⲙ̅ⲡⲉϥϭⲙ̅ϭⲟⲙ ⲉϣⲁϫⲉ ⲛⲙ̅ⲙⲁⲓ ⲉⲃⲟⲗ ϫⲉ ⲁⲧⲙⲛ̅ⲧⲙ̅ⲡⲟ ⲙ̅ⲡⲙⲟⲩ ⲣ̅ϫⲟⲉⲓⲥ ⲉϩⲣⲁⲓ ⲉϫⲱϥ. ⲁϥϥⲓ ⲛ̅ⲧⲉϥϭⲓϫ ⲛ̅ⲟⲩⲛⲁⲙ ⲁϥⲉϣ ⲡⲉⲓⲛⲟϭ ⲛ̅ⲁϣⲁϩⲟⲙ ⲉϥⲛⲁϣⲧ ̅ⲁϥϭⲱ ⲉϥⲁⲙⲁϩⲧⲉ ⲛ̅ⲧⲁϭⲓϫ ⲛ̅ⲟⲩⲛⲁⲙ ⲉϥⲉⲓⲟⲣⲙ̅ ⲛ̅ⲥⲱⲓ ⲛ̅ⲟⲩⲛⲟϭ ⲛ̅ⲛⲁⲩ ϩⲱⲥ ⲉϥⲕⲱⲣϣ ⲉⲣⲟⲓ ϫⲉ ̅ⲱ ⲡⲁϫⲟⲉⲓⲥ ⲙ̅ⲡⲣ̅ⲕⲁⲁⲩ ⲉϥⲓⲧ. ⲁⲓⲧⲉⲓ ⲛ̅ⲧⲁϭⲓϫ ⲉϩⲟⲩⲛ ϩⲁ ⲡⲉϥⲥⲧⲏⲑⲟⲥ ⲁⲓϩⲉ ⲉⲧⲉϥⲩⲭⲏ ⲉⲁⲥⲧⲁϩⲉ ⲧⲉϥϣⲟⲩⲱⲃⲉ ϫⲉ ⲉⲩⲛⲁⲉⲛⲧⲥ̅ ⲉϩⲣⲁⲓ ⲁⲩⲱ ⲉⲣⲉ ⲛⲉⲃⲁⲓϣⲓⲛⲉ ⲙ̅ⲡⲙⲟⲩ ϭⲱϣⲧ ⲉⲃⲟⲗ ϩⲏⲧϥ ⲉⲧⲣⲉϥⲉⲓ ⲉⲃⲟⲗ ϩⲛ̅ ⲥⲱⲙⲁ ⲁⲗⲗⲁ ⲙ̅ⲡⲉ ⲑⲁⲏ ⲛ̅ⲟⲩⲛⲟⲩ ϫⲱⲕ ⲉⲃⲟⲗ ϫⲉ ⲉϥϣⲁⲛⲉⲓ ⲛ̅ϭⲓ ⲡⲙⲟⲩ ⲙ̅ⲙⲛ̅ⲧϥ̅ ⲁⲛⲟⲭⲏ ⲙ̅ⲙⲁⲩ ϫⲉ ⲉⲣⲉ ⲡⲉϣⲧⲟⲣⲧⲣ̅ ⲟⲩⲏϩ ⲛ̅ⲥⲱϥ ⲁⲩⲱ ⲡⲣⲓⲙⲉ ⲙⲛ̅ ⲡⲧⲁⲕⲟ ⲛ̅ⲛⲉⲧⲙⲟⲟϣⲉ ϩⲁ ⲧⲉϥϩⲓⲏ.
Ⲁⲧⲁⲙⲁⲁⲩ ⲛ̅ⲃⲁⲗϩⲏⲧ ⲛⲁⲩ ⲉⲣⲟⲓ ⲉⲓϭⲟⲙϭⲙ̅ ⲉⲡⲉϥⲥⲱⲙⲁ ⲁⲥϭⲟⲙϭⲙ̅ ϩⲱⲱⲥ ⲉⲛ̅ϭⲟⲡ ⲛ̅ⲛⲉϥⲟⲩⲉⲣⲏⲧⲉ ⲁⲩⲱ ⲁⲥϩⲉ ⲉⲣⲟⲟⲩ ⲉⲁ ⲡⲛⲓⲃⲉ ⲙ̅ⲡⲉϩⲙⲟⲙ ⲕⲁⲁⲩ. ⲡⲉϫⲁⲥ ⲛⲁⲓ ϩⲛ̅ ⲟⲩⲙⲛ̅ⲧⲁⲧⲥⲟⲟⲩⲛ ϫⲉ ⲡⲉⲕϩⲙⲟⲧ ϣⲏⲡ ⲧⲉⲛⲟⲩ ⲱ ⲡⲁⲙⲉⲣⲓⲧ ⲛ̅ϣⲏⲣⲉ ϫⲉ ϫⲓⲛ ⲧⲉⲛⲟⲩ ⲛ̅ⲧⲁⲕϫⲉ ⲧⲉⲕϭⲓϫ ⲉⲃⲟⲗϩⲙ̅ ⲡⲉϥⲥⲱⲙⲁ ⲁ ⲡⲕⲱϩⲧ ⲉⲣϩⲟⲧⲉ ⲁϥⲁⲛⲁⲭⲱⲣⲉⲓ ⲛⲁϥ ̅ⲉⲓⲥ ⲛⲉϥϭⲟⲧ ⲙⲛ̅ ⲛ̅ⲥⲏⲃⲉ ⲛ̅ⲣⲁⲧϥ ⲁⲩⲱϭⲃ ⲁⲩⲱ ⲁⲩⲕⲃⲟ ⲛ̅ⲑⲉ ⲛ̅ⲟⲩⲕⲣⲩⲥⲧⲁⲗⲗⲟⲥ ⲙⲛ̅ ⲟⲩⲭⲓⲱⲛ. ⲁⲓⲕⲓⲙ ⲉⲧⲁⲁⲡⲉ ⲁⲩⲱ ⲁⲓⲙⲟⲩⲧⲉ ⲉⲛⲉϥϣⲏⲣⲉ ⲉⲓϫⲱ ⲙ̅ⲙⲟⲥ ϫⲉ ⲧⲱⲟⲩⲛ ⲛ̅ⲧⲉⲧⲛ̅ϣⲁϫⲉ ⲙⲛ̅ ⲡⲉⲧⲛ̅ⲉⲓⲱⲧ ⲉⲧⲥⲙⲁⲙⲁⲁⲧ ϫⲉ ⲡⲉⲟⲩⲟⲉⲓϣ ⲛ̅ϣⲁϫⲉ ⲡⲉ ⲡⲁⲓ ⲙ̅ⲡⲁⲧⲉ ⲧⲧⲁⲡⲣⲟ ⲉⲧϣⲁϫⲉ ⲉⲃⲟⲗϩⲛ̅ ⲧⲥⲁⲣⲝ ⲛ̅ⲉⲃⲓⲏⲛ ⲧⲱⲙ. ⲧⲟⲧⲉ ⲁⲩⲧⲱⲟⲩⲛ ⲛ̅ϭⲓ ⲛ̅ϣⲏⲣⲉ ⲙⲛ̅ ⲛ̅ϣⲉⲉⲣⲉ ⲙ̅ⲡⲁⲙⲉⲣⲓⲧ ⲛ̅ⲉⲓⲱⲧ Ⲓⲱⲥⲏⲫ ⲁⲩⲉⲓ ϣⲁ ⲡⲉⲩⲉⲓⲱⲧ ⲁⲩϩⲉ ⲉⲣⲟϥ ⲉϥⲕⲓⲛⲇⲩⲛⲉⲩⲉ ⲉⲡⲙⲟⲩ ⲉⲁϥϩⲱⲛ ⲉϩⲟⲩⲛ ⲉⲡⲱⲗϭ ⲉⲃⲟⲗ ⲙ̅ⲡⲓⲃⲓⲟⲥ. ⲁⲥⲟⲩⲱϣⲃ ⲛ̅ϭⲓ Ⲗⲩⲥⲓⲁ ⲧⲉϥⲛⲟϭ ⲛ̅ϣⲉⲉⲣⲉ ⲉⲧⲉ ⲧⲥⲁⲛ̅ϫⲏϭⲉ ⲧⲉ ⲡⲉϫⲁⲥ ⲛ̅ⲛⲉⲥⲥⲛⲏⲩ ϫⲉ ̅ⲟⲩⲟⲓ ⲛⲁⲓ ⲛⲁⲥⲛⲏⲩ ⲡⲁⲓ ⲡⲉ ⲡϣⲱⲛⲉ ⲛ̅ⲧⲁϥϣⲱⲡⲉ ⲛ̅ⲧⲁⲙⲉⲣⲓⲧ ⲙ̅ⲙⲁⲁⲩ ⲁⲩⲱ ϣⲁ ⲧⲉⲛⲟⲩ ⲙ̅ⲡⲉⲛⲕⲟⲧⲛ̅ ⲉⲛⲁⲩ ⲉⲣⲟⲥ ̅ⲡⲁⲓ ⲟⲛ ⲧⲉⲛⲟⲩ ⲡⲉⲧⲛⲉϣⲉⲉⲛⲉ ⲡⲉⲛⲉⲓⲱⲧ ⲉⲣⲟⲛ ⲉⲧⲙ̅ⲛⲁⲩ ⲉⲣⲟϥ ϣⲁⲉⲛⲉϩ. ⲧⲟⲧⲉ ⲁⲩϥⲓϩⲣⲁⲩ ⲉⲃⲟⲗ ⲁⲩⲣⲓⲙⲉ ϩⲓ ⲟⲩⲥⲟⲡ ⲛ̅ϭⲓ ⲛ̅ϣⲏⲣⲉ ⲙⲛ̅ ⲛ̅ϣⲉⲉⲣⲉ ⲙ̅ⲡⲁⲉⲓⲱⲧ Ⲓⲱⲥⲏⲫ ⲁⲩⲱ ⲁⲛⲟⲕ ϩⲱⲱⲧ ⲟⲛ ⲙⲛ̅ Ⲙⲁⲣⲓⲁ ⲧⲁⲙⲁⲁⲩ ⲙ̅ⲡⲁⲣⲑⲉⲛⲟⲥ ⲛⲉⲛⲣⲓⲙⲉ ⲛⲙ̅ⲙⲁⲩ ⲡⲉ ⲉⲛⲥⲟⲟⲩⲛ ϫⲉ ⲁ ⲧⲉⲩⲛⲟⲩ ⲙ̅ⲡⲙⲟⲩ ⲉⲓ.
Ⲧⲟⲧⲉ ⲁⲓϭⲱϣⲧ̅ ⲙ̅ⲡⲥⲁ ⲙ̅ⲡⲣⲏⲥ ⲙ̅ⲡⲣⲟ ⲁⲓⲛⲁⲩ ⲉⲡⲙⲟⲩ ⲁϥⲉⲓ ⲉⲣⲉ ⲁⲙⲛ̅ⲧⲉ ⲟⲩⲏϩ ⲛ̅ⲥⲱϥ ⲉⲧⲉ ⲡⲁⲓ ⲡⲉ ⲡⲉⲧⲟ ⲛ̅ⲥⲩⲙⲃⲟⲩⲗⲟⲥ ⲁⲩⲱ ⲡⲡⲁⲛⲟⲩⲣⲅⲟⲥ ⲡⲇⲓⲁⲃⲟⲗⲟⲥ ϫⲓⲛ ⲧⲉϩⲟⲩⲉⲓⲧⲉ ̅ⲉⲣⲉ ⲟⲩⲙⲏⲏϣⲉ ⲛ̅ϣⲁⲃⲛ̅ϩⲟ ⲛ̅ⲧⲉⲕⲁⲛⲟⲥ ⲟⲩⲏϩ ⲛ̅ⲥⲱϥ ⲉⲩϫⲓϩⲱⲕ ⲛ̅ⲕⲱϩⲧ ⲧⲏⲣⲟⲩ ⲉⲙⲛ̅ ⲏⲡⲉ ⲉⲣⲟⲟⲩ ⲉⲣⲉ ⲟⲩⲑⲏⲛ ⲙⲛ̅ ⲟⲩⲕⲁⲡⲛⲟⲥ ⲛ̅ⲕⲱϩⲧ ⲛⲏⲩ ⲉⲃⲟⲗ ϩⲛ̅ ⲧⲉⲩⲧⲁⲡⲣⲟ. ⲁⲡⲁⲉⲓⲱⲧ Ⲉⲓⲱⲥⲏⲫ ϭⲱϣⲧ ⲁϥⲛⲁⲩ ⲉⲛⲉⲛⲧⲁⲩⲉⲓ ⲛ̅ⲥⲱϥ ⲉⲩⲟ ⲛ̅ⲑⲩⲙⲟⲥ ⲉⲙⲁⲧⲉ ⲕⲁⲧⲁ ⲑⲉ ⲉϣⲁⲩⲙⲟⲩϩ ⲉⲛⲟⲣⲅⲏ ϩⲓ ϭⲱⲛⲧ ⲉϩⲟⲩⲛ ⲉⲩⲭⲏ ⲛⲓⲙ ⲛ̅ⲣⲱⲙⲉ ⲉⲧⲛⲏⲩ ⲉⲃⲟⲗ ϩⲛ̅ ⲥⲱⲙⲁ ̅ⲛ̅ϩⲟⲩⲟ ⲇⲉ ⲛ̅ⲣⲉϥⲣ̅ⲛⲟⲃⲉ ⲉϣⲱⲡⲉ ⲉⲩϣⲁⲛϭⲓⲛⲉ ⲛ̅ⲟⲩⲙⲁⲉⲓⲛ ⲉⲡⲱⲟⲩ ⲡⲉ ⲛ̅ϩⲏⲧϥ , ⲛ̅ⲧⲉⲣⲉ ⲡⲁ ⲧⲙⲛ̅ⲧϩⲗ̅ⲗⲟ ⲉⲧⲛⲁⲛⲟⲩⲥ ⲛⲁⲩ ⲉⲛⲉⲛⲧⲁⲩⲉⲓ ⲛ̅ⲥⲱϥ ⲁϥϣⲧⲟⲣⲧⲣ̅ ⲁⲩⲱ ⲁⲛⲉϥⲃⲁⲗ ϯⲣ̅ⲙⲉⲓⲏ ̅ⲁⲧⲉⲩⲭⲏ ⲙ̅ⲡⲁⲉⲓⲱⲧ Ⲓⲱⲥⲏⲫ ⲟⲩⲱϣ ⲉⲉⲓ ⲉⲃⲟⲗ ϩⲛ̅ ⲟⲩⲛⲟϭ ⲛ̅ϩⲃⲁ ⲁⲩⲱ ⲉⲥϣⲓⲛⲉ ⲛ̅ⲥⲁ ⲙⲁ ⲛ̅ϩⲟⲡⲥ ⲛ̅ϩⲏⲧϥ ⲙ̅ⲡⲉⲥϩⲉ ⲙⲁ ̅ⲛ̅ⲧⲉⲣⲉⲓⲛⲁⲩ ⲇⲉ ⲉⲡⲛⲟϭ ⲛ̅ϣⲧⲟⲣⲧⲣ̅ ⲛ̅ⲧⲁϥϩⲉ ⲧⲉⲩⲭⲏ ⲙ̅ⲡⲁⲉⲓⲱⲧ Ⲓⲱⲥⲏⲫ ⲁⲩⲱ ϫⲉ ⲁϥⲑⲉⲱⲣⲉⲓ ⲛ̅ϩⲉⲛⲙⲟⲣⲫⲏ ⲉⲩϣⲟⲃⲉ ⲉⲙⲁⲧⲉ ⲉⲟⲩϩⲟⲧⲉ ⲡⲉ ⲛⲁⲩ ⲉⲣⲟⲟⲩ ⲁⲓⲧⲱⲟⲩⲛ ⲛ̅ⲧⲉⲩⲛⲟⲩ ⲁⲓⲉⲡⲉⲓϯⲙⲁ ⲙ̅ⲡⲉⲧⲟ ⲛ̅ⲟⲣⲅⲁⲛⲟⲛ ⲙ̅ⲡⲇⲓⲁⲃⲟⲗⲟⲥ ⲙⲛ̅ ⲛ̅ⲧⲁⲝⲓⲥ ⲉⲧⲟⲩⲏϩ ⲛ̅ⲥⲱϥ ̅ⲁⲩⲡⲱⲧ ϩⲛ̅ ⲟⲩⲛⲟϭ ⲛ̅ϣⲓⲡⲉ ⲁⲩⲱ ⲙ̅ⲡⲉ ⲗⲁⲁⲩ ⲛ̅ⲣⲱⲙⲉ ϩⲛ̅ ⲛⲉⲧⲥⲟⲟⲩϩ ⲉⲡⲁⲉⲓⲱⲧ Ⲓⲱⲥⲏⲫ ⲉⲓⲙⲉ ⲟⲩⲇⲉ Ⲙⲁⲣⲓⲁ ⲧⲁⲙⲁⲁⲩ ̅ⲛ̅ⲧⲉⲣⲉϥⲛⲁⲩ ⲇⲉ ⲛ̅ϭⲓ ⲡⲙⲟⲩ ϫⲉ ⲁⲓⲉⲡⲉⲓϯⲙⲁ ⲛ̅ⲛⲉⲝⲟⲩⲥⲓⲁ ⲙ̅ⲡⲕⲁⲕⲉ ⲉⲧⲟⲩⲏϩ ⲛ̅ⲥⲱϥ ⲁⲓⲛⲟϫⲟⲩ ⲉⲃⲟⲗ ⲁⲩⲱ ϫⲉ ⲙⲛ̅ⲧⲁⲩ ⲗⲁⲁⲩ ⲛ̅ⲉⲝⲟⲩⲥⲓⲁ ⲉϩⲟⲩⲛ ⲉⲡⲁⲙⲉⲣⲓⲧ ⲛ̅ⲉⲓⲱⲧ Ⲓⲱⲥⲏⲫ ⲁϥⲣ̅ϩⲟⲧⲉ ⲛ̅ϭⲓ ⲡⲙⲟⲩ ⲁϥⲡⲱⲧ ⲁϥϩⲟⲡϥ ϩⲓ ⲡⲁϩⲟⲩ ⲙ̅ⲡⲣⲟ ̅ⲁⲓⲧⲱⲟⲩⲛ ⲛ̅ⲧⲉⲩⲛⲟⲩ ⲁⲓϫⲱ ⲛ̅ⲟⲩⲡⲣⲟⲥⲉⲩⲭⲏ ⲉⲡⲁⲉⲓⲱⲧ ⲛ̅ⲁⲅⲁⲑⲟⲥ ⲉⲓϫⲱ ⲙ̅ⲙⲟⲥ ϫⲉ
Ⲡⲁⲉⲓⲱⲧ ⲧⲛⲟⲩⲛⲉ ⲧⲏⲣⲥ ⲛ̅ⲧⲙⲛ̅ⲧⲁⲅⲁⲑⲟⲥ ⲡⲉⲓⲱⲧ ⲛ̅ⲧⲙⲉ ⲡⲃⲁⲗ ⲛ̅ⲣⲉϥⲛⲁⲩ ⲡⲙⲁⲁϫⲉ ⲛ̅ⲣⲉϥⲥⲱⲧⲙ̅ ⲥⲱⲧⲙ̅ ⲉⲡⲉⲕϣⲏⲣⲉ ⲙ̅ⲙⲉⲣⲓⲧ ⲉⲧⲉ ⲁⲛⲟⲕ ⲡⲉ ̅ⲉⲓⲥⲟⲡⲥ ⲙ̅ⲙⲟⲕ ⲉⲧⲃⲉ ⲡϩⲱⲃ ⲛ̅ⲛⲉⲕϭⲓϫ ⲉⲧⲉ ⲡⲁⲉⲓⲱⲧ Ⲓⲱⲥⲏⲫ ⲡⲉ ̅ⲛⲅ̅ⲧⲛ̅ⲛⲟⲟⲩ ⲛⲁⲓ ⲛ̅ⲟⲩⲛⲟϭ ⲛ̅ⲭⲁⲓⲣⲟⲩⲃⲓⲙ ⲙⲛ̅ ⲡⲉⲭⲟⲣⲟⲥ ⲛ̅ⲛⲁⲅⲅⲉⲗⲟⲥ ⲙⲛ̅ Ⲙⲓⲭⲁⲏⲗ ⲡⲟⲓⲕⲟⲛⲟⲙⲟⲥ ⲛ̅ⲛⲁⲅⲁⲑⲟⲛ ⲙⲛ̅ Ⲅⲁⲃⲣⲓⲏⲗ ⲡⲃⲁⲓϣⲙ̅ⲛⲟⲩϥⲉ ⲛ̅ⲛⲁⲓⲱⲛ ⲉⲡⲟⲩⲟⲉⲓⲛ ⲛ̅ⲥⲉⲣⲟⲉⲓⲥ ⲉⲧⲉⲩⲭⲏ ⲙ̅ⲡⲁⲉⲓⲱⲧ Ⲉⲓⲱⲥⲏⲫ ⲛ̅ⲥⲉϫⲓⲙⲟⲉⲓⲧ ϩⲁⲧⲉⲥϩⲏ ϣⲁⲛⲧⲉⲥⲟⲩⲱⲧⲃ̅ ⲙ̅ⲡⲥⲁϣϥ ⲛ̅ⲁⲓⲱⲛ ⲛ̅ⲕⲁⲕⲉ ⲁⲩⲱ ⲛ̅ⲥⲉⲡⲁⲣⲁⲅⲉ ⲛ̅ⲛⲉϩⲓⲟⲟⲩⲉ ⲉⲧϩⲧⲙ̅ⲧⲱⲙ ⲛⲁⲓ ⲟⲩⲛⲟϭ ⲛ̅ϩⲟⲧⲉ ⲡⲉ ⲙⲟⲟϣⲉ ⲛ̅ϩⲏⲧⲟⲩ ⲁⲩⲱ ⲟⲩⲛⲟϭ ⲛ̅ϩⲃⲁ ⲡⲉ ⲛⲁⲩ ⲛ̅ⲇⲩⲙⲓⲟⲥ ⲉⲧϩⲓϫⲱⲟⲩ ̅ⲙⲁⲣⲉ ⲡⲉⲓⲉⲣⲟ ⲛ̅ⲕⲱϩⲧ ⲉⲣ ⲑⲉ ⲛ̅ⲟⲩⲙⲟⲟⲩ ⲁⲩⲱ ⲛ̅ⲧⲉ ⲑⲁⲗⲁⲥⲥⲁ ⲛ̅ⲣⲉϥϣⲁⲁⲣ ⲟⲩⲱ ⲉⲥⲉⲛⲟⲭⲗⲉⲓ ̅ⲙⲁⲣⲉϥϣⲱⲡⲉ ϩⲛ̅ ⲟⲩⲙⲛ̅ⲧϩⲏⲙⲉⲣⲟⲥ ⲉϩⲟⲩⲛ ⲉⲧⲉⲩⲭⲏ ⲙ̅ⲡⲁⲉⲓⲱⲧ Ⲓⲱⲥⲏⲫ ϫⲉ ⲧⲁⲓ ⲧⲉ ⲧⲉⲩⲛⲟⲩ ⲉⲧϥ̅ⲣ̅ⲭⲣⲓⲁ ⲙ̅ⲡⲛⲁ ⲛ̅ϩⲏⲧⲥ. ϯϫⲱ ⲙ̅ⲙⲟⲥ ⲛⲏⲧⲛ̅ ⲱ ⲛⲁⲙⲉⲣⲟⲥ ⲉⲧⲟⲩⲁⲁⲃ ⲛⲁⲁⲡⲟⲥⲧⲟⲗⲟⲥ ⲉⲧⲥⲙⲁⲙⲁⲁⲧ ϫⲉ ⲣⲱⲙⲉ ⲛⲓⲙ ⲉⲧⲟⲩⲛⲁϫⲡⲟϥ ⲉⲡⲕⲟⲥⲙⲟⲥ ⲁϥⲉⲓⲙⲉ ⲉⲡⲡⲉⲧⲛⲁⲛⲟⲩϥ ⲙⲛ̅ ⲡⲡⲉⲑⲟⲟⲩⲉ̅ϥϣⲁⲛⲣ̅ ⲡⲉϥⲟⲩⲟⲉⲓϣ ⲧⲏⲣϥ ⲉϥⲁϣⲉ ⲉϩⲣⲁⲓ ⲛ̅ⲥⲁ ⲛⲉⲗⲟⲟⲗⲉ ⲛ̅ⲛⲉϥⲃⲁⲗ ⲉϥϣⲁⲛⲉⲓ ⲉϥⲛⲁⲙⲟⲩ ϥ̅ⲣⲭⲣⲓⲁ ⲙ̅ⲡⲛⲁ ⲙ̅ⲡⲁⲉⲓⲱⲧ ⲉⲧϩⲛ̅ ⲙ̅ⲡⲏⲩⲉ ⲉⲧⲉⲩⲛⲟⲩ ⲙ̅ⲡⲙⲟⲩ ⲙⲛ̅ ⲧϭⲓⲛⲡⲁⲣⲁⲅⲉ ⲛ̅ⲛⲉϩⲓⲟⲟⲩⲉ ⲁⲩⲱ ⲧϭⲓⲛⲁⲡⲟⲗⲟⲅⲓⲍⲉ ϩⲙ̅ ⲡⲃⲩⲙⲁ ⲉⲧϩⲁ ϩⲟⲧⲉ ̅ⲡⲗⲏⲛ ϯⲛⲁⲕⲧⲟⲓ
ⲉϩⲣⲁⲓ ⲉϫⲛ̅ ⲧϭⲓⲛϫⲱⲕ ⲉⲃⲟⲗ ⲙ̅ⲡⲁⲉⲓⲱⲧ Ⲉⲓⲱⲥⲏⲫ ⲡⲁ ⲡⲉⲓⲣ̅ⲡⲙⲉ
ⲉⲩⲉ ⲉⲧⲛⲁⲛⲟⲩϥ.
Ⲁⲥϣⲱⲡⲉ ⲇⲉ ⲛ̅ⲧⲉⲣⲉⲓϫⲱ ⲙ̅ⲡϩⲁⲙⲏⲛ ⲉⲣⲉ Ⲙⲁⲣⲓⲁ ⲧⲁⲙⲉⲣⲓⲧ ⲙ̅ⲙⲁⲁⲩ ⲟⲩⲱϩⲙ̅ ⲛ̅ⲥⲱⲓ ⲛ̅ⲧⲁⲥⲡⲉ ⲛ̅ⲛⲁ ⲙ̅ⲡⲏⲩⲉ ̅ⲁⲩⲱ ⲛ̅ⲧⲉⲩⲛⲟⲩ ⲉⲓⲥ Ⲙⲓⲭⲁⲏⲗ ⲙⲛ̅ Ⲅⲁⲃⲣⲓⲏⲗ ⲙⲛ̅ ⲡⲭⲟⲣⲟⲥ ⲛ̅ⲛⲁⲅⲅⲉⲗⲟⲥ ⲁⲩⲉⲓ ⲉⲃⲟⲗϩⲛ̅ ⲧⲡⲉ ⲁⲩⲉⲓ ⲁⲩⲁϩⲉⲣⲁⲧⲟⲩ ⲉϫⲙ̅ ⲡⲥⲱⲙⲁ ⲙ̅ⲡⲁⲉⲓⲱⲧ Ⲉⲓⲱⲥⲏⲫ ̅ⲁⲩⲱ ⲛ̅ⲧⲉⲩⲛⲟⲩ ⲁⲧϩⲉⲗϩⲓⲗⲉ ⲙⲛ̅ ⲡⲉϫⲉⲗϩⲏⲥ ⲧⲱⲟⲩⲛ ⲉϫⲱϥ ⲉⲙⲁⲧⲉ ⲁⲩⲱ ⲁⲓⲉⲓⲙⲉ ϫⲉ ⲁⲧⲉⲩⲛⲟⲩ ⲉⲧϫⲏϥ ⲉⲓ ̅ⲁⲩⲱ ⲁϥϭⲱ ⲉϥϯⲛⲁⲁⲅⲉ ⲛ̅ⲑⲉ ⲛ̅ⲧⲉⲧⲛⲁⲙⲓⲥⲉ ⲉⲣⲉ ⲡϩⲁϫ ϯ ⲛ̅ⲥⲱϥ ⲛ̅ⲑⲉ ⲛ̅ⲟⲩⲧⲏⲩ ⲉϥⲛⲁϣⲧ ⲙⲛ̅ ⲟⲩⲕⲱϩⲧ ⲉϥⲟϣ ⲉϥⲟⲩⲱⲙ ⲛ̅ⲥⲁ ⲟⲩϩⲏⲗⲏ ⲉⲥⲟϣ ̅ⲡⲙⲟⲩ ⲇⲉ ϩⲱⲱϥ ⲙ̅ⲡⲉ ⲑⲟⲧⲉ ⲕⲁⲁϥ ⲛ̅ⲉⲓ ⲉϩⲟⲩⲛ ⲉϫⲙ̅ ⲡⲥⲱⲙⲁ ⲙ̅ⲡⲁⲙⲉⲣⲓⲧ ⲛ̅ⲉⲓⲱⲧ Ⲉⲓⲱⲥⲏⲫ ⲛϥ̅ⲡⲟⲣϫϥ̅ ⲉⲃⲟⲗ ϫⲉ ⲉϥϭⲱϣⲧ ⲉϩⲟⲩⲛ ⲉϥⲛⲁⲩ ⲉⲣⲟⲓ ⲉⲓϩⲙⲟⲟⲥ ϩⲁϩⲧⲛ̅ ⲧⲉϥⲁⲡⲉ ⲉⲓⲁⲙⲁϩⲧⲉ ⲉϫⲛ̅ ⲛⲉϥⲥⲙⲁⲩ ̅ⲁⲩⲱ ⲛ̅ⲧⲉⲣⲉⲓⲉⲓⲙⲉ ϫⲉ ⲁϥⲣ̅ϩⲟⲧⲉ ⲛ̅ϭⲓ ⲡⲙⲟⲩ ⲛ̅ⲉⲓ ⲉϩⲟⲩⲛ ⲉⲧⲃⲏⲏⲧ ⲁⲓⲧⲱⲟⲩⲛ ⲁⲓⲃⲱⲕ ⲉⲡⲥⲁ ⲛ̅ⲃⲟⲗ ⲙ̅ⲡⲙⲁ ⲙ̅ⲡⲣⲟ ⲁⲓϭⲛ̅ⲧϥ̅ ⲉϥϭⲉⲉⲧ ⲙⲁⲩⲁⲁϥ ϩⲛ̅ ⲟⲩⲛⲟϭ ⲛ̅ϩⲟⲧⲉ ̅ⲁⲩⲱ ⲛ̅ⲧⲉⲩⲛⲟⲩ ⲡⲉϫⲁⲓ ⲛⲁϥ ϫⲉ ⲱ ⲡⲉⲛⲧⲁϥⲉⲓ ⲉⲃⲟⲗ ϩⲛ̅ ⲛ̅ⲧⲟⲡⲟⲥ ⲙ̅ⲡⲥⲁ ⲙ̅ⲡⲣⲏⲥ ⲃⲱⲕ ⲛⲁⲕ ⲉϩⲟⲩⲛ ⲧⲁⲭⲏ ⲛⲅ̅ϫⲱⲕ ⲉⲃⲟⲗ ⲙ̅ⲡⲉⲛⲧⲁ ⲡⲁⲉⲓⲱⲧ ⲟⲩⲉϩⲥⲁϩⲛⲉ ⲙ̅ⲙⲟϥ ⲛⲁⲕⲁ̅ⲗⲗⲁ ⲣⲟⲉⲓⲥ ⲉⲣⲟϥ ⲛ̅ⲑⲉ ⲙ̅ⲡⲟⲩⲟⲉⲓⲛ ⲛ̅ⲛⲉⲕⲃⲁⲗ ϫⲉ ⲛ̅ⲧⲟϥ ⲡⲉ ⲡⲁⲉⲓⲱⲧ ⲕⲁⲧⲁ ⲥⲁⲣⲝ ⲁⲩⲱ ⲁϥϣⲡ̅ϩⲓⲥⲉ ⲛⲙ̅ⲙⲁⲓ ϩⲛ̅ ⲛⲉϩⲟⲟⲩ ⲛ̅ⲧⲁⲙⲛ̅ⲧϣⲏⲣⲉ ϣⲏⲙ ⲉϥⲡⲏⲧ ⲛⲙ̅ⲙⲁⲓ ⲉⲃⲟⲗϩⲛ̅ ⲟⲩⲙⲁ ⲉⲩⲙⲁ ⲉⲧⲃⲉ ⲧⲉⲡⲉⲓⲃⲟⲩⲗⲏ ⲛ̅Ϩⲩⲣⲱⲇⲏⲥ ⲁⲩⲱ ⲁⲓϫⲓⲥⲃⲱ ⲛ̅ⲧⲟⲟⲧϥ ⲛ̅ⲑⲉ ⲛ̅ⲛϣⲏⲣⲉ ⲧⲏⲣⲟⲩ ⲉϣⲁⲣⲉ ⲛⲉⲩⲉⲓⲟⲧⲉ ⲧⲓⲥⲃⲱ ⲛⲁⲩ ⲉⲧⲉⲩⲱⲫⲉⲗⲓⲁ .ⲧⲟⲧⲉ ⲁⲃⲃⲁⲧⲟⲛ ⲁϥⲃⲱⲕ ⲉϩⲟⲩⲛ ⲁϥϫⲓ ⲛ̅ⲧⲉⲩⲭⲏ ⲙ̅ⲡⲁⲉⲓⲱⲧ Ⲉⲓⲱⲥⲏⲫ ⲁϥⲉⲓⲛⲉ ⲙ̅ⲙⲟⲥ ⲉⲃⲟⲗ ϩⲛ̅ ⲥⲱⲙⲁ ⲙ̅ⲡⲛⲁⲩ ⲙ̅ⲡⲣⲏ ⲉϥⲛⲁϣⲁ ϩⲛ̅ ⲧⲉϥⲃⲁⲥⲓⲥ ⲛ̅ⲥⲟⲩ ϫⲟⲩⲧⲁⲥⲉ ⲛ̅ⲉⲃⲟⲧ Ⲉⲡⲏⲡ ϩⲛ̅ ⲟⲩⲉⲓⲣⲏⲛⲏ . ⲛⲉϩⲟⲟⲩ ⲧⲏⲣⲟⲩ ⲙ̅ⲡⲱⲛϩ ⲙ̅ⲡⲁⲙⲉⲣⲓⲧ ⲛ̅ⲉⲓⲱⲧ Ⲉⲓⲱⲥⲏⲫ ⲥⲉⲉⲓⲣⲉ ⲛ̅ϣⲉ ⲙⲛ̅ ⲧⲟⲩⲉⲓ ⲛ̅ⲣⲟⲙⲡⲉ.ⲁ Ⲙⲓⲭⲁⲏⲗ ⲁⲙⲁϩⲧⲉ ⲙ̅ⲡⲧⲟⲡ ⲥⲛⲁⲩ ⲛ̅ⲟⲩⲙⲁⲡⲡⲁ ⲛ̅ϩⲟⲗⲟⲥⲓⲗⲓⲕⲟⲛ ⲉⲥⲧⲁⲉⲓⲏⲩⲁ̅ Ⲅⲁⲃⲣⲓⲏⲗ ⲁⲙⲁϩⲧⲉ ⲙ̅ⲡⲕⲉⲧⲟⲡ ⲥⲛⲁⲩ ̅ⲁⲩⲁⲥⲡⲁⲍⲉ ⲛ̅ⲧⲉⲩⲭⲏ ⲙ̅ⲡⲁⲙⲉⲣⲓⲧ ⲛ̅ⲉⲓⲱⲧ Ⲉⲓⲱⲥⲏⲫ ⲁⲩⲧⲁⲁⲥ ⲉⲡⲉⲥⲏⲧ ⲉⲧⲙⲁⲡⲡⲁ ̅ⲙ̅ⲡⲉ ⲗⲁⲁⲩ ⲇⲉ ϩⲛ̅ ⲛⲉⲧϩⲙⲟⲟⲥ ϩⲁϩⲧⲏϥ ⲉⲓⲙⲉ ϫⲉ ⲁϥⲙⲟⲩ ⲟⲩⲇⲉ ⲧⲕⲉⲘⲁⲣⲓⲁ ⲧⲁⲙⲁⲁⲩ ⲙ̅ⲡⲉⲥⲉⲓⲙⲉ ̅ⲁⲩⲱ ⲁⲓⲧⲣⲉ Ⲙⲓⲭⲁⲏⲗ ⲙⲛ̅ Ⲅⲁⲃⲣⲓⲏⲗ ⲣⲟⲉⲓⲥ ⲉⲧⲉⲩⲭⲏ ⲙ̅ⲡⲁⲙⲉⲣⲓⲧ ⲛ̅ⲉⲓⲱⲧ Ⲉⲓⲱⲥⲏⲫ ⲉⲧⲃⲉ ⲛ̅ⲣⲉϥⲧⲱⲣⲡ ⲉⲧϩⲓ ⲛⲉϩⲓⲟⲟⲩⲉ ̅ⲁⲩⲱ ⲁⲓⲧⲣⲉ ⲛ̅ⲁⲅⲅⲉⲗⲟⲥ ⲛ̅ⲁⲥⲱⲙⲁⲧⲟⲥ ϭⲱ ⲉⲩϩⲩⲙⲛⲉⲩⲉ ϩⲁ ⲧⲉϥϩⲏ ϣⲁⲛⲧⲟⲩϫⲓⲧϥ ⲉⲙ̅ⲡⲏⲩⲉ ϣⲁ ⲡⲁⲉⲓⲱⲧ ⲛ̅ⲁⲅⲁⲑⲟⲥ.
Ⲁⲩⲱ ⲁⲓⲕⲧⲟⲓ ⲉϫⲙ̅ ⲡⲥⲱⲙⲁ ⲉϥⲛⲏϫ ⲉⲃⲟⲗ ⲛ̅ⲑⲉ ⲛ̅ⲟⲩⲕⲟⲩⲫⲟⲛ ̅ⲁⲓϩⲙⲟⲟⲥ ⲁⲓⲉⲓⲛⲉ ⲛ̅ⲛⲉϥⲃⲁⲗ ⲉⲡⲉⲥⲏⲧ ⲁⲓϭⲱϣⲧ̅ ⲉⲡⲉⲥⲏⲧ ⲉϫⲱϥ ⲛ̅ⲟⲩⲛⲟϭ ⲛ̅ⲛⲁⲩ ⲉⲓⲣⲓⲙⲉ ⲉⲣⲟϥ ⲡⲉϫⲁⲓ...