ϩⲁⲛⲫⲟϫⲓ

ⲉⲃⲟⲗϧⲉⲛ ⲛⲓⲥⲁϫⲓ ⲛ̀ⲧⲉⲛⲉⲛⲓⲟϯ ⲉⲑⲟⲩⲁⲃ

ⲁⲩⲉⲣⲙⲉⲛⲉⲩⲓⲛ ⲙ̀ⲙⲱⲟⲩ ⲉⲃⲟⲗϧⲉⲛ ϯⲁⲥⲡⲓ ⲛ̀ⲣⲉⲙⲣⲏⲥ

ⲁϥϫⲟⲥ ⲛ̀ϫⲉⲟⲩϧⲉⲗⲗⲟ ϫⲉϧⲉⲛⲡⲓⲣⲁⲥⲙⲟⲥ ⲛⲓⲃⲉⲛ ⲙ̀ⲡⲉⲣϫⲓⲛⲁⲣⲓⲕⲓ ⲉ̀ⲣⲱⲙⲓ ⲁⲗⲗⲁ ϫⲓⲛⲁⲣⲓⲕⲓ ⲙ̀ⲙⲁⲩⲁⲧⲕ ⲉⲕϫⲱ ⲙ̀ⲙⲟⲥ ϫⲉⲉⲣⲉ ⲛⲁⲓ ϣⲱⲡⲓ ⲙ̀ⲙⲟⲓ ⲉⲑⲃⲉ ⲛⲁⲛⲟⲃⲓ

ⲁⲟⲩⲁⲓ ⲛ̀ⲛⲓϧⲉⲗⲗⲟ ϣⲉⲛⲁϥ ϣⲁ ⲕⲉϧⲉⲗⲗⲟ ⲟⲩⲟϩ ⲡⲉϫⲁϥ ⲙ̀ⲡⲉϥⲙⲁⲑⲏⲧⲏⲥ ⲑⲁⲙⲓⲟ ⲛⲁⲛ ⲛ̀ⲕⲟⲩϫⲓ ⲛ̀ⲁⲣϣⲓⲛ ⲟⲩⲟϩ ⲁϥⲑⲁⲙⲓⲟϥ ⲡⲉϫⲁϥ ϫⲉϩⲉⲣⲡ ϩⲁⲛⲱⲓⲕ ⲛⲁⲛ ⲟⲩⲟϩ ⲁϥϩⲟⲣⲡⲟⲩ ⲛ̀ⲑⲱⲟⲩⲇⲉ ⲁⲩⲙⲟⲩⲛ ⲉⲩⲥⲁϫⲓ ⲉ̀ⲡⲓⲡⲛ̅ⲁ̅ⲧⲓⲕⲟⲛ ⲙ̀ⲡⲓⲉϩⲟⲟⲩ ⲧⲏⲣϥ ⲛⲉⲙⲡⲓⲉϫⲱⲣϩ ⲧⲏⲣϥ

ⲁⲩϫⲟⲥ ⲛ̀ϫⲉ ⲛⲓϧⲉⲗⲗⲟⲓ ϫⲉⲕⲁⲛ ⲛ̀ⲧⲁⲫⲙⲏ ⲁⲉⲣϣⲁⲛ ⲟⲩⲁⲅⲅⲉⲗⲟⲥ ⲟⲩⲱⲛϩ ⲛⲁⲕ ⲉⲃⲟⲗ ⲙ̀ⲡⲉⲣϣⲟⲣⲡϥ ⲉⲣⲟⲕ ⲁⲗⲗⲁ ⲑⲉⲃⲓⲟⲕ ⲛ̀ϫⲟⲥ ϫⲉⲛ̀ϯⲙⲡϣⲁ ⲁⲛ ⲉ̀ⲛⲁⲩ ⲉ̀ⲡⲁⲅⲅⲉⲗⲟⲥ ⲉⲓⲟⲛϧ ϧⲉⲛⲛⲓⲛⲟⲃⲓ

ⲁⲙⲟⲩ ⲉⲃⲟⲗϧⲉⲛⲡⲉⲕⲕⲁϩⲓ ⲛⲉⲙⲉⲃⲟⲗϧⲉⲛⲧⲉⲕⲥ[ⲩ]ⲅⲅⲉⲛⲓⲁ ⲁⲙⲟⲩⲉⲡⲧⲱⲟⲩ ⲙ̀ⲡⲓϩⲟⲥⲉⲙ⳾ ⲉⲧⲉϣⲓⲏⲧⲡⲉⲵ ⲡⲓⲙⲁⲉϣⲁⲩϣⲓ ⲛ̀ⲛⲓϩⲏⲧ ⲛⲉⲙⲛⲓⲙⲉⲩⲓ ⲛ̀ϧⲏⲧϥ ϧⲉⲛⲟⲩⲇⲓⲁ[ⲕ]ⲣⲏⲥⲓⲥ ⲙ̀ⲙⲏⲓ

ϩⲁⲛⲙⲏϣⲅⲁⲣ ⲛⲏⲉⲑⲙⲉⲩⲓ ⲛ̀ϧⲏⲧⲟⲩ ⲡⲗⲁⲛⲁⲛ ⲙ̀ⲙⲱⲟⲩ ⲟⲩⲟϩ ⲁⲛⲟⲩⲙⲉⲩⲓ ⲉⲧϩⲱⲟⲩ ϮⲥⲗⲁϮ ⲛ̀ⲛⲟⲩϩⲏⲧ

ⲁϥⲉ̀ⲣⲟⲩⲱ̀ ⲛ̀ϫⲉⲁⲃⲃⲁ ⲡⲓⲥⲟⲩⲣⲁ. ϫⲉⲛⲓⲙ ⲉⲑⲛⲁⲟⲩⲱϣⲧ ⲙ̀ⲫⲣⲏ ⲫⲁⲓ ⲉⲧϣⲟⲡ ϧⲉⲛⲟⲩⲥⲭⲏⲙⲁ ⲉⲧϩⲩⲡⲟⲅⲓⲥⲑⲉ ⲛ̀ⲧⲉⲛⲉⲥⲑⲉⲥⲓⲥ.ⲫⲏⲉⲧϩⲓⲟⲩⲓ̀ ⲉ̀ⲃⲟⲗ ⲛ̀ⲟⲩϧⲙⲟⲙ ϧⲉⲛⲟⲩⲉⲥⲑⲉⲥⲓⲥ ⲛ̀ⲧⲉⲟⲩⲕⲉⲣⲟⲥ ⲉϥϭⲓⲙⲟⲣⲫⲏ ϧⲉⲛϩⲁⲛⲕⲉⲣⲟⲥ ⲫⲏⲉ̀ϣⲁⲣⲉ ⲡⲉϥⲟⲩⲱⲓⲛⲓ ϫⲱϫⲉⲃ ⲫⲏⲉ̀ⲧⲉ ⲙ̀ⲙⲟⲛϣϫⲟⲙⲙ̀ⲙⲟϥ ⲉ̀ⲛⲉϩ ⲉ̀ϣⲓⲃϯ ⲛ̀ⲧⲉϥⲧⲁⲝⲓⲥ ⲛⲉⲙⲧⲉϥⲉ̀ⲛⲉⲣⲅⲓⲁ̀ ⲡⲁⲣⲁⲛⲓⲑⲱϣ ⲛ̀ⲧⲉⲫⲏⲉ̀ⲧⲁϥⲑⲁⲙⲓⲟϥ ⲉϥⲟⲩⲁϩⲥⲁϩⲛⲓ ⲛⲁϥ ⲉ̀ϭⲟϫⲓ ⲉ̀ⲡⲉϥⲙⲱⲓⲧ ⲛⲁⲓⲇⲉ ⲧⲏⲣⲟⲩ ϩⲁⲛϣⲉⲙⲙⲟ ⲛⲉ ⲉ̀ϯⲫⲩⲥⲓⲥ ⲛ̀ϣⲟⲩⲟⲩⲱϣⲧ ⲛⲁⲥ ⲙ̀ⲙⲁⲩⲁⲧⲥ. ⲧⲫⲉⲇⲉ ⲟⲛ ⲉⲛⲟⲩⲱϣⲧ ⲛⲁⲥ ⲛ̀ⲁϣⲛ̀ⲣⲏϯ ϩⲱⲥ ⲛⲟⲩϯ ⲉⲩϩⲱⲃⲥ ⲙ̀ⲙⲟⲥ ⲛ̀ⲟⲩⲙⲏϣ ⲛ̀ⲥⲟⲡ ϩⲓⲧⲉⲛ ϩⲁⲛϭⲏⲡⲓ.ⲑⲁⲓ ⲉ̀ⲧⲁ ⲡⲉⲥⲣⲉϥⲥⲱⲛⲧ ⲫⲟⲣϣⲥ ⲉ̀ⲃⲟⲗ ⲙ̀ⲫⲣⲏϯ ⲛ̀ⲟⲩⲕⲁⲙⲁⲣⲁ ⲁϥⲧⲁϫⲣⲟⲥ ⲙ̀ⲫⲣⲏϯ ⲛ̀ⲟⲩⲭⲏⲡⲓ. ⲉⲛⲛⲁⲟⲩⲱϣⲧⲇⲉ ⲙ̀ⲡⲓⲟϩ ⲛ̀ⲁϣ ⲛ̀ⲣⲏϯ ⲫⲁⲓ ⲉⲧϫⲟϫⲉⲃ ⲟⲩⲟϩ ⲉⲑⲙⲉϩ ⲉϥϭⲛⲟⲛ ⲛ̀ϫⲱϥ ⲛ̀ⲛⲓⲡⲁⲑⲟⲥ ϣⲁϥⲉⲣⲉⲃⲓⲏⲛ ⲛ̀ⲟⲩⲙⲏϣ ⲛ̀ⲥⲟⲡ. ⲁⲗⲗⲁ ⲕϫⲱⲙ̀ⲙⲟⲥ ϫⲉⲥϣⲉ ⲉ̀ⲟⲩⲱϣⲧ ⲙ̀ⲙⲱⲟⲩ ⲉⲑⲃⲉ ⲡⲟⲩⲟⲩⲱⲓⲛⲓ ⲉⲧⲫⲉⲣⲓⲱⲟⲩ. ⲡⲁⲓⲥⲁϫⲓ ⲟⲩⲙⲏⲓ ⲁⲛ ⲡⲉ. ⲉ̀ⲧⲁ ⲡⲓⲇⲏⲙⲓⲟⲩⲣⲅⲟⲥ ϯⲙ̀ⲡⲉϥⲟⲩⲱⲓⲛⲓ ⲉ̀ⲣⲱⲟⲩ ⲁⲛ ⲉ̀ⲑⲣⲟⲩⲟⲩⲱϣⲧ ⲙ̀ⲙⲱⲟⲩ ϩⲱⲥ ⲛⲟⲩϯ ⲁⲗⲗⲁ ⲉ̀ⲑⲣⲟⲩⲉⲣⲟⲩⲱⲓⲛⲓ ⲉ̀ⲛⲓⲣⲱⲙⲓ ⲟⲩⲟϩ ⲛ̀ⲧⲟⲩϯⲁⲓⲁⲓ ⲛ̀ⲛⲓⲕⲁⲣⲡⲟⲥ ⲉ̀ⲑⲣⲟⲩⲫⲟϩ ⲉ̀ⲡⲓⲕⲉⲣⲟⲥ ⲛ̀ⲥⲉⲙⲁϩ ⲡⲓⲉ̀ϩⲟⲟⲩ ⲛ̀ⲟⲩⲉ̀ϩⲟⲟⲩ ⲛⲉⲙⲡⲓⲉ̀ϫⲱⲣϩ ⲛ̀ⲟⲩⲉ̀ϫⲱⲣϩ. ⲛⲓⲥⲓⲟⲩⲇⲉ ⲟⲛ ⲉ̀ⲧⲁϥⲑⲁϣⲟⲩ ⲛ̀ϩⲁⲛⲙⲏⲓⲛⲓ ⲉ̀ⲑⲣⲟⲩⲉⲣⲥⲩⲙⲉⲛⲓⲛ ⲛ̀ⲛⲓⲕⲁⲣⲡⲟⲥ ⲛⲉⲙ ⲛⲓⲕⲉⲣⲟⲥ ⲛⲉⲙⲡϣⲓⲃϯ ⲛ̀ⲛⲓⲥⲏⲟⲩ ⲉ̀ⲑⲣⲟⲩϣⲱⲡⲓ ⲛ̀ϭⲁⲩⲙⲱⲓⲧ ⲛ̀ⲛⲏⲉⲧϣϭⲏⲣ ϧⲉⲛⲫⲓⲟⲙ. ⲙ̀ⲙⲟⲛϩⲗⲓ ϣⲟⲡ ⲉ̀ⲑⲣⲟⲩⲟⲩⲱϣⲧ ⲙ̀ⲙⲟϥ ϩⲱⲥ ⲛⲟⲩϯ ϧⲉⲛⲛⲁⲓ ⲙ̀ⲡⲁⲓⲣⲏϯ ⲟⲩⲇⲉ ⲡⲓⲙⲱⲟⲩ ⲫⲏⲉ̀ⲧⲟⲩⲙⲟⲩϯ ⲉ̀ⲣⲟϥ ϫⲉⲡⲟⲥⲓⲇⲱⲛ. ⲟⲩⲇⲉ ⲡⲓⲭⲣⲱⲙ ⲫⲏⲉ̀ⲧⲟⲩⲙⲟⲩϯ ⲉ̀ⲣⲟϥ ϫⲉⲏ̀ⲣⲁ ⲟⲩⲇⲉ ⲡⲓⲕⲁϩⲓ ⲫⲏⲉⲧⲙⲟⲩϯ ⲉ̀ⲣⲟϥ ϫⲉⲇⲏⲙⲏⲧⲏⲣ.ⲟⲩⲇⲉ ⲛⲓⲕⲁⲣⲡⲟⲥ ⲛⲁⲓⲇⲉ ⲧⲏⲣⲟⲩ ⲕⲁⲛ ⲓⲥϫⲉ ⲁϥⲑⲁⲙⲓⲱⲟⲩ ⲉ̀ⲡⲧⲁϩⲟ ⲉ̀ⲣⲁⲧϥ ⲙ̀ⲡⲉⲛⲱⲛϧ ϩⲁⲛⲣⲉϥϣⲓⲃϯ ⲛⲉ ⲟⲩⲟϩ ϩⲁⲛⲁⲛⲁⲯⲩⲭⲟⲛ ⲛⲉ.

ⲁϥⲱϣ ⲉⲃⲟⲗ ⲉϥϫⲱⲙⲙⲟⲥ ϫⲉⲫⲏⲉⲧϣⲁⲛϣ ⲉⲡⲉϥϫⲁϫⲓ ⲉϥⲉⲣⲛⲟⲃⲓ ⲉⲣⲟϥ ⲙⲙⲓⲛⲙⲙⲟϥ

Ⲉⲩⲉ̀ ⲉϥϫⲱ ⲙ̀ⲙⲟⲥ ϫⲉ ϯⲟⲩⲱϣ ⲉ̀ⲧⲟⲩϫⲟ ⲛ̀ⲧⲁⲯⲩⲭⲏ· ⲛ̀ⲑⲟⲥⲇⲉ ⲁⲥϧⲓⲥⲓ ⲉⲥϣⲟⲩϣⲧ ⲙ̀ⲙⲟϥ ⲙ̀ⲡⲉⲥϣϫⲉⲙϫⲟⲙ ⲉ̀ⲣⲟϥ· ⲙⲉⲛⲉⲛⲥⲱⲥ ⲁⲥⲭⲁϥ ⲉ̀ⲃⲟⲗ· ⲉⲧⲁϥϣⲉⲛⲁϥ ⲇⲉ ⲉϥⲟⲓ ⲙ̀ⲙⲟⲛⲁⲭⲟⲥ ⲁϥϣⲱⲡⲓ ϧⲉⲛ ⲟⲩⲁ̀ⲙⲉⲗⲓⲁ̀· ⲟⲩⲟϩ ⲁϥⲭⲱ ⲙ̀ⲡⲉϥⲁ̀ϩⲓ ⲉ̀ⲃⲟⲗ ⲕⲁⲕⲱⲥ· Ⲁⲥϣⲱⲡⲓⲇⲉ ⲉ̀ⲧⲁ ⲧⲉϥⲙⲁⲩ ⲙⲟⲩ· ⲙⲉⲛⲉⲛⲥⲁ ⲟⲩⲥⲏⲟⲩⲇⲉ ⲁϥϣⲱⲛⲓ ϧⲉⲛⲟⲩⲛⲓϣϯ ⲛ̀ϣⲱⲛⲓ· ϩⲱⲥⲧⲉ ⲛ̀ⲧⲉϥϣⲱⲡⲓ ϧⲉⲛⲟⲩⲉⲝⲉⲥⲧⲁⲥⲓⲥ ⲉⲑⲣⲟⲩⲧⲟⲣⲡϥ ⲉ̀ⲧⲉⲕⲣⲓⲥⲓⲥ· ⲟⲩⲟϩ ⲁϥϫⲓⲙⲓ ⲛ̀ⲧⲉϥⲙⲁⲩ ⲙ̀ⲙⲁⲩ ⲛⲉⲙⲛⲏⲉⲧⲟⲩⲕⲣⲓⲛⲓⲛ ⲙ̀ⲙⲱⲟⲩ· ⲛ̀ⲑⲟⲥⲇⲉ ⲉ̀ⲧⲁⲥⲛⲁⲩ ⲉ̀ⲣⲟϥ ⲁⲥⲫⲱϣ· ⲟⲩⲟϩ ⲡⲉϫⲁⲥ ⲛⲁϥ ϫⲉⲟⲩ ⲡⲉ ⲫⲁⲓ ⲡⲁϣⲏⲣⲓ ⲉⲑⲣⲉⲕⲓ̀ ⲛ̀ⲑⲟⲕ ⲉ̀ⲡⲁⲓⲙⲁ ϩⲱⲥⲧⲉ ⲉⲑⲣⲟⲩⲕⲣⲓⲛⲓⲛ ⲙ̀ⲙⲟⲕ ⲛ̀ⲑⲟⲕ· ⲉⲩⲑⲱⲛ ⲛⲉⲕⲥⲁϫⲓ ⲉⲧⲉⲕϫⲱ ⲙ̀ⲙⲱⲟⲩ ϫⲉ ϯⲟⲩⲱϣ ⲉ̀ⲧⲟⲩϫⲟ ⲛ̀ⲧⲁⲯⲩⲭⲏ· Ⲁϥⲉⲣϣⲫⲏⲣⲓ ⲇⲉ ⲉ̀ϫⲉⲛ ⲛⲏⲉ̀ⲧⲁϥⲥⲟⲑⲙⲟⲩ· Ⲁϥⲟ̀ϩⲓ ⲉ̀ⲣⲁⲧϥ ⲉϥⲟⲕⲉⲙ· ⲙ̀ⲙⲟⲛ ⲛ̀ⲧⲟⲧϥ ⲛ̀ϩⲗⲓ ⲛ̀ⲁ̀ⲡⲟⲗⲟⲅⲓⲁ̀ ⲉ̀ϫⲱ ⲛⲁⲥ· ⲕⲁⲧⲁ ⲟⲩⲟⲓⲕⲟⲛⲟⲙⲓⲁ̀ⲇⲉ ⲛ̀ⲧⲉ ⲫϯ ⲡⲓⲙⲁⲓⲣⲱⲙⲓ· ⲁϥϣⲱⲡⲓ ⲛ̀ⲣⲉϥⲧⲁⲗϭⲟ ⲙ̀ⲡⲓϣⲱⲛⲓ ⲙⲉⲛⲉⲛⲥⲁ ⲉⲑⲣⲉϥⲛⲁⲩ [ⲛ̀ⲟⲓ ϧⲉⲛⲡⲉϥ...] Ⲉ̀ⲧⲁ ⲡⲁⲓϫⲓⲙⲓ ϣⲱⲡⲓ ⲛ[...] ⲉ̀ⲃⲟⲗ ϩⲓⲧⲉⲛ ⲫϯ· ⲁϥⲥⲟⲧⲡϥ ϫⲉ ⲉ̀ϧⲟⲩⲛ ⲙⲁⲩⲁⲧϥ· Ⲙⲉⲛⲉⲛⲥⲱⲥ ⲁϥϩⲉⲙⲥⲓ ⲉ̀ϧⲣⲏⲓ ⲉϥⲙⲉⲩⲓ̀ ⲉ̀ⲡⲉϥⲟⲩϫⲁⲓ· ⲟⲩⲟϩ ⲉϥⲣⲓⲙⲓ ⲉ̀ϫⲉⲛ ⲛⲏⲉ̀ⲧⲁϥⲁⲓⲧⲟⲩ ϧⲉⲛⲟⲩⲙⲉⲧⲁⲧⲁ̀ⲙⲏⲗⲏⲥ ⲛ̀ϣⲟⲣⲡ· Ⲁⲩⲧⲱⲃϩ ϣⲱⲡⲓ ⲛⲁϥ ⲛ̀ⲧⲁⲓϧⲟⲧ· ϩⲱⲥⲧⲉ ⲉⲑⲣⲉ ⲟⲩⲙⲏϣ ϯϩⲟ ⲉ̀ⲣⲟϥ ⲉⲑⲣⲉϥϯ ⲙ̀ⲧⲟⲛ ⲛⲁϥ ⲛ̀ⲟⲩⲕⲟⲩϫⲓ ϧⲉⲛ ⲛⲉϫϣⲱϫⲓ ϩⲓⲧⲉⲛ ⲡⲁϣⲁⲓ ⲙ̀ⲫ̀ⲣⲓⲙⲓ· ⲛ̀ⲑⲟϥⲇⲉ ⲙ̀ⲡⲉϥⲟⲩⲱϣ ⲉⲥⲟⲗⲥⲗϥ ⲉϥϫⲱ ⲙ̀ⲙⲟⲥ ϫⲉ ⲓⲥϫⲉ ⲙ̀ⲡⲓϣ̀ϫⲉⲙϫⲟⲙ ⲉ̀ⲧⲱⲟⲩⲛ ϧⲁ ⲡⲓⲛⲓϣϯ ⲛ̀ⲥⲁϣⲛⲓ ⲛ̀ⲧⲁⲙⲁⲩ· ⲛⲁϣ ⲛ̀ⲣⲏϯ ϯⲛⲁϣ̀ⲧⲱⲟⲩⲛ ϧⲁ ⲡⲓϣ̀ⲫⲏⲣⲓ ⲙ̀ⲡⲓⲉ̀ϩⲟⲟⲩ ⲛ̀ⲧⲉⲧⲉⲕⲣⲓⲥⲓⲥ ϩⲓⲧⲉⲛ Ⲡⲭ̅ⲥ̅ ⲛⲉⲙ ⲛⲉϥⲁⲅⲅⲉⲗⲟⲥ ⲧⲏⲣⲟⲩ·

ⲁϥϫⲟⲥ ⲛ̀ϫⲉⲟⲩϧⲉⲗⲗⲟ ϫⲉⲉⲛⲉϣⲱⲡ ⲛ̀ⲧⲉⲛⲓⲯⲩⲭⲏ ⲛ̀ⲧⲉⲛⲓⲣⲱⲙⲓ ⲓ̀ ⲉ̀ⲃⲟⲗ ⲡⲉ ϧⲉⲛϯϩⲟϯ ⲙⲉⲛⲉⲛⲥⲁ ϯⲁ̀ⲛⲁⲥⲧⲁⲥⲓⲥ ϧⲉⲛϯⲡⲁⲣⲟⲩⲥⲓⲁ̀ ⲛ̀ⲧⲉⲫϯ· ⲛⲁⲣⲉ ⲡⲓⲕⲟⲥⲙⲟⲥ ⲡⲉ ⲛⲁⲙⲟⲩ ϧⲉⲛⲟⲩⲥⲑⲉⲣⲧⲉⲣ · ϩⲓ ⲥⲧⲱⲧ· ⲟⲩⲅⲁⲣ ⲡⲉ ⲛⲁⲩ ⲉ̀ⲛⲓⲫⲏⲟⲩⲓ̀ ⲉⲩⲛⲁⲫⲱϩ· ⲟⲩⲟϩ ⲫϯ ⲉϥⲟⲩⲱⲛϩ ⲙ̀ⲙⲟϥ ⲉ̀ⲃⲟⲗ ϧⲉⲛⲟⲩⲟⲣⲅⲏ ⲛⲉⲙ ⲟⲩⲁ̀ⲡⲓⲗⲏ· [ⲁⲟⲩ] ⲙⲏϣ ⲛ̀ⲧⲁⲅⲙⲁ ⲛ̀ⲁⲅⲅⲉⲗⲟⲥ ⲙ̀ⲙⲟⲛ ⲏⲡ [ⲓ ⲛⲱⲟⲩ] ⲉⲑⲣⲉ ϯⲙⲉⲑⲣⲱⲙⲓ ⲧⲏⲣⲥ ⲛⲁⲩ ⲉ̀ⲛⲁⲓ ϩⲓ ⲟⲩⲥⲟⲡ· ⲉⲑⲃⲉ ⲫⲁⲓ ⲥ̀ⲉⲣⲛⲟϥⲣⲓ ⲛⲁⲛ ⲉ̀ⲙⲉⲩⲓ̀ ⲙ̀ⲡⲁⲓⲣⲏϯ ϩⲱⲥ ⲉⲛⲛⲁϯ ⲗⲟⲅⲟⲥ ⲙ̀ⲫϯ ⲙ̀ⲙⲏⲛⲓ· ϫⲉ ⲉⲩⲛⲁϣⲱⲧⲉⲛ ϧⲁ ⲛⲏⲉ̀ⲧⲁⲛⲁⲓⲧⲟⲩ ϧⲉⲛ ⲡⲉⲛϫⲓⲛ̀ⲱⲛϧ· ⲁϥϫⲟⲥ ⲛ̀ϫⲉ ⲁⲃⲃⲁ ⲡⲟⲓⲙⲏⲛ· ϫⲉ ⲁⲟⲩⲥⲟⲛ ϫⲟⲥ ⲛ̀ⲁⲃⲃⲁ ⲡⲁⲏⲥⲉ· ϫⲉⲁⲓⲛⲁⲉⲣ ⲟⲩⲙ̀ⲡⲁϩⲏⲧ ⲉϥⲛⲁϣⲧ· ⲛ̀ϯⲉⲣϩⲟϯ ⲁⲛ ⲛ̀ϧⲏⲧϥ ⲙ̀ⲫϯ· ⲡⲉϫⲁϥ ⲛⲁϥ ϫⲉⲙⲟϣⲓ ⲛ̀ⲧⲉⲕⲧⲱϫⲓ ⲉ̀ⲟⲩⲥⲟⲛ ⲉϥⲉⲣϩⲟϯ ⲛ̀ϧⲏⲧϥ ⲙ̀ⲫϯ· ⲟⲩⲟϩ ⲉ̀ⲃⲟⲗ ϧⲉⲛϯⲙⲉⲧⲣⲉϥⲉⲣϩⲟϯ ⲙ̀ⲫⲏⲉⲧⲉⲙⲙⲁⲩ ⲭⲛⲁⲉⲣϩⲟϯ ⲛ̀ⲑⲟⲕ ⲛ̀ϧⲏⲧϥ ⲙ̀ⲫϯ·

ⲁⲟⲩⲁⲓ ϣⲓⲛⲓ ⲛ̀ⲟⲩϧⲉⲗⲗⲟ ϫⲉⲉⲑⲃⲉ ⲟⲩ ϯϩⲉⲙⲥⲓ ϧⲉⲛⲡⲁⲙⲁⲛ̀ϣⲱⲡⲓⲡⲁϩⲏⲧ ⲕⲱϯ ⲛ̀ⲥⲁⲥⲁ ⲛⲓⲃⲉⲛ· ⲁϥⲉ̀ⲣⲟⲩⲱ̀ ⲛⲁϥ ⲛ̀ϫⲉ ⲡⲓϧⲉⲗⲗⲟ ϫⲉⲉⲑⲃⲉ ϫⲉⲥⲉϣⲱⲛⲓ ⲛ̀ϫⲉⲛⲉⲕⲉ̀ⲥⲑⲏⲧⲏⲣⲓⲟⲛ ⲉⲧⲥⲁⲃⲟⲗ· ⲡϫⲓⲛⲛⲁⲩ· ⲡϫⲓⲛⲥⲱⲧⲉⲙ· ⲡϫⲓⲛϣⲱⲗⲉⲙ· ⲡϫⲓⲛⲥⲁϫⲓ· ⲛⲁⲓ ⲟⲩⲛ ⲉϣⲱⲡ ⲁⲕϣⲁⲛϫⲫⲟ ⲛ̀ⲧⲟⲩⲉⲛⲉⲣⲅⲓⲁ̀ ϧⲉⲛⲟⲩⲙⲉⲧⲕⲁⲑⲁⲣⲟⲥ· ϣⲁⲣⲉ ⲛⲉⲕⲉ̀ⲥⲑⲏⲧⲏⲣⲓⲟⲛ ⲉⲧⲥⲁϧⲟⲩⲛ ϣⲱⲡⲓ ϧⲉⲛⲟⲩⲥϭⲣⲁϩⲧ· ⲛⲉⲙⲟⲩⲟⲩϫⲁⲓ·

ⲁⲟⲩⲁⲓ ⲟⲛ ϣⲉⲛⲟⲩϩⲉⲗⲗⲟ ϫⲉⲉⲑⲃⲉ ⲟⲩ ϯϩⲉⲙⲥⲓ ϧⲉⲛⲡⲁⲙⲁ ⲛ̀ϣⲱⲡⲓ ϯϩⲗⲟⲡⲗⲉⲡ· ⲁϥⲉ̀ⲣⲟⲩⲱ̀ ⲛⲁϥ ϫⲉⲉⲃⲟⲗϫⲉ ⲙ̀ⲡⲁⲧⲕⲉⲓ ⲱⲣϩ ⲙ̀ⲡⲓⲙ̀ⲧⲟⲛ ⲉⲧⲉⲛϩⲉⲗⲡⲓⲍⲓⲛ ⲉ̀ⲣⲟϥ· ⲟⲩⲇⲉ ϯⲕⲟⲗⲁⲥⲓⲥ ⲉⲑⲛⲁϣⲱⲡⲓ· ⲉⲛⲉⲁⲕⲛⲁⲩ ⲉ̀ⲣⲱⲟⲩ ϧⲉⲛⲟⲩⲱⲣϫ· ⲟⲩⲟϩ ⲛ̀ⲧⲉⲡⲉⲕⲙⲁⲛ̀ϣⲱⲡⲓ ⲙⲟϩ ⲛ̀ϥⲉⲛⲧ ⲉⲣⲟⲕ ϣⲁⲧⲟⲩⲫⲟϩ ⲉ̀ϩⲣⲏⲓ ⲉ̀ⲡⲉⲕⲙⲟϯ ⲛⲉⲕⲛⲁⲭⲏ ⲉ̀ ⲛϧⲣⲏⲓ ⲛ̀ϧⲏⲧⲟⲩ ⲡⲉ ⲛ̀ⲧⲉⲕϥ ϧⲁⲣⲱⲟⲩ ⲛ̀ⲧϣⲧⲉⲙϩⲗⲟⲡⲗⲉⲡ·

ⲁϥϫⲟⲥ ⲟⲛ ϫⲉϯⲛⲏⲥⲧⲓⲁ̀ⲡⲉ ⲡⲓⲭⲁⲗⲓⲛⲟⲥ ⲙ̀ⲡⲓⲙⲟⲛⲁⲭⲟⲥ ⲉϥϯ ⲟⲩⲃⲉ ⲡⲓⲛⲟⲃⲓ· ⲫⲏⲉⲧⲛⲟⲩϫ ⲛ̀qⲁⲓ ⲥⲁⲃⲟⲗ ⲙ̀ⲙⲟϥ· ⲟⲩϩⲑⲟⲛⲗⲁⲃϩⲓⲙⲓⲡⲉ·

ⲁϥϫⲟⲥ ⲟⲛ ϫⲉⲛⲁⲛⲉ ⲟⲩⲟⲩⲉⲙⲁϥ ⲟⲩⲟϩ ⲉⲥⲉ̀ⲣⲏⲡ ⲛ̀ⲛⲉⲕϣⲧⲉⲙⲉⲙⲟⲩⲱⲙ·ⲇⲉ ⲛ̀ⲛⲓⲥⲁⲣⲝ ⲛ̀ⲧⲉ ⲛⲉⲕⲥ̀ⲛⲏⲟⲩ ϩⲓⲧⲉⲛϯⲕⲁⲧⲁⲗⲁⲗⲓⲁ̀·

ⲉⲧⲁ ⲫⲙⲁⲕⲁⲣⲓⲟⲥ ⲉⲫⲣⲏⲙ ⲟⲓ ⲛ̀ⲕⲟⲩϫⲓ ⲛ̀ϣⲏⲣⲓ ⲁϥⲛⲁⲩ ⲉⲟⲩⲣⲁⲥⲟⲩⲓ ⲓⲉ ⲟⲩϭⲱⲣⲡ ⲉⲃⲟⲗ ϫⲉⲁⲟⲩⲃⲱⲛ̀ⲁⲗⲟⲗⲓ ⲣⲱⲧ ϧⲉⲛⲡⲉϥⲗⲁⲥ ⲟⲩⲟϩ ⲁⲥⲁⲩⲝⲁⲛⲉ ⲁⲥⲙⲉϩ ⲡⲕⲁϩⲓ ⲧⲏⲣϥ ϧⲁⲧⲫⲉ ϫⲉⲛⲁⲛⲉ ⲡⲉⲥⲕⲁⲣⲡⲟⲥ ⲉⲙⲁϣⲱ ⲟⲩⲟϩ ⲁⲩⲓ̀ ⲛ̀ϫⲉⲛⲓϩⲁⲗⲁϯ ⲧⲏⲣⲟⲩ ⲛ̀ⲧⲫⲉ ⲁⲩⲟⲩⲱⲙ ϧⲉⲛⲡⲉⲥⲕⲁⲣⲡⲟⲥ ⲟⲩⲟϩ ⲡⲉⲧⲟⲩⲛⲁⲟⲩⲟⲙϥ ϧⲉⲛⲧⲃⲱ ⲛ̀ⲁⲗⲟⲗⲓ ϣⲁⲥϯⲟⲩⲱ ⲙ̀ⲙⲟϥ ⲛ̀ⲕⲉⲥⲟⲡ ⲛ̀ϩⲟⲩⲟ