Ⲙⲏⲭⲁⲏⲗ
Ⲁⲛⲟⲕ ϯϫⲓⲙⲓ ⲛ̀ⲧⲁⲣⲭⲏ ⲙ̀ⲡⲓⲥⲁϫⲓ ⲉⲃⲟⲗϧⲉⲛ ⲫⲏⲉⲧⲟⲓ ⲛ̀ⲥⲟⲗⲥⲉⲗ ⲛⲏⲓ ϩⲓ ⲛⲟⲙϯ ϧⲉⲛ ϩⲱⲃ ⲛⲓⲃⲉⲛ ⲫⲏⲉⲧⲥⲱⲟⲩⲛ ⲙ̀ⲡⲓⲕⲁϩⲓ ⲧⲏⲣϥ ⲟⲩⲟϩ ϥϧⲟⲧϧⲉⲧ ⲛ̀ⲛⲓϭⲗⲱⲧ ⲫⲏⲉⲧⲟⲩⲱⲛ ⲙ̀ⲫⲣⲟ ⲙ̀ⲡⲓⲥⲁϫⲓ ⲛ̀ⲟⲩⲟⲛ ⲛⲓⲃⲉⲛ ⲉⲧⲕⲱϯ ϧⲉⲛ ⲟⲩⲥⲡⲟⲩⲇⲏ. ⲛⲓⲙ ⲡⲉ ⲫⲁⲓ. ⲛ̀ⲑⲟϥ ⲡⲉ ⲡⲗⲟⲅⲟⲥ ⲙ̀Ⲫϯ ⲫⲁⲓ ⲉⲧⲉ ⲁⲛⲟⲕ ϯⲫⲱϣ ⲙ̀ⲡⲉϥⲥⲱⲙⲁ ϧⲉⲛ ⲧⲁϫⲓϫ ⲟⲩⲟϩ ϯϫⲱϣ ⲙ̀ⲡⲉϥⲥⲛⲟϥ ⲉⲧⲧⲁⲏⲟⲩⲧ ⲉⲡⲓⲡⲟⲧⲏⲣⲓⲟⲛ ⲟⲩⲟϩ ϯϯ ⲙ̀ⲙⲟϥ ⲛ̀ⲛⲏⲉⲑⲛⲁϩϯ ⲉⲣⲟϥ. ⲛ̀ⲑⲟϥ ⲡⲉ ⲡⲁⲟ̅ⲥ̅ ⲟⲩⲟϩ ⲡⲁⲛⲟⲩϯ Ⲓⲏ̅ⲥ̅ Ⲡⲭ̅ⲥ̅ ⲡⲓⲥ̅ⲱ̅ⲣ̅ ⲙ̀ⲡⲧⲏⲣϥ ⲫⲏⲉⲧⲱϣ ⲉⲃⲟⲗϧⲉⲛ ⲣⲱϥ ⲛ̀ⲁⲗⲏⲑⲓⲛⲟⲛ ⲫⲏⲉⲧϥⲓ ⲫⲣⲱⲟⲩϣ ϧⲁ ϯⲙⲉⲧⲣⲱⲙⲓ ⲧⲏⲣⲥ ⲫⲏⲉⲧⲙⲉϩ ⲛ̀ⲛⲁⲓ ⲛⲉⲙ ⲙⲉⲧϣⲁⲛⲑⲙⲁϧⲧ ⲉϧⲟⲩⲛ ⲉⲧϩⲓⲕⲱⲛ ⲙ̀Ⲫϯ. ⲛⲓⲙ ⲡⲉ ⲁⲣⲭⲏⲁⲅⲅⲉⲗⲟⲥ ⲉ̅ⲑ̅ⲩ̅ Ⲙⲏⲭⲁⲏⲗ ⲡⲁⲣⲭⲏⲅⲟⲩⲥ ⲛ̀ⲧⲉ ⲧϫⲟⲙ ⲛⲛⲓⲫⲏⲟⲩⲓ.Ⲁⲗⲗⲁ ϯϯϩⲟ ⲉⲣⲱⲧⲉⲛ ⲛⲁⲙⲉⲛⲣⲁϯ ⲛⲉⲙ ⲛⲁϣⲏⲣⲓ ⲙ̀ⲙⲉⲛⲣⲓⲧ ⲛ̀ⲧⲉ ⲡⲓⲥⲁϫⲓ ϩⲓⲛⲁ ⲉⲑⲣⲉⲧⲉⲛϯⲧⲟⲧⲉⲛ ⲛⲉⲙⲏⲓ ϧⲉⲛ ⲧⲁⲓⲛⲓϣϯ ⲛ̀ⲁⲣⲭⲏ ⲙⲏⲡⲟⲧⲉ ⲛ̀ⲧⲁϩⲓⲧⲟⲧ ⲉⲡⲁⲓⲛϣϯ ⲙ̀ⲡⲉⲗⲁⲅⲟⲥ ⲫⲏⲉⲧⲉ ⲙ̀ⲙⲟⲛ ⲁⲩⲣⲏϫϥ ⲛ̀ⲧⲁϥ ⲟⲩⲟϩ ⲙ̀ⲙⲟⲛ ϣ̀ϫⲟⲙ ⲙ̀ⲙⲟⲓ ⲉⲥⲱⲕ ⲛ̀ⲧⲁⲕⲟⲩϫⲓ ⲛ̀ⲕⲩⲃⲱⲧⲟⲥ ⲉⲡⲓⲭⲣⲟ ϫⲉ ⲟⲩⲏⲓ ⲧⲉⲧⲉⲛⲥⲱⲟⲩⲛ ⲛ̀ⲧⲁⲙⲉⲧϩⲏⲕⲓ ⲧⲏⲣⲟⲩ ⲟⲩⲟϩ ϫⲉ ⲙ̀ⲙⲟⲛⲧⲏⲓ ⲛ̀ϩⲗⲓ ϧⲉⲛ ⲧⲁⲙⲉⲧⲓⲉⲃϣⲱⲧ ϩⲓⲛⲁ ⲛ̀ⲧⲁⲱⲡⲧ ⲛ̀ⲟⲩⲛⲓϣϯ ⲛ̀ⲕⲩⲃⲱⲧⲟⲥ ⲉⲟⲩⲟⲛϣϫⲟⲙ ⲙ̀ⲙⲟⲥ ⲉⲉⲣϫⲓⲛⲓⲟⲣ ϧⲉⲛ ⲫⲓⲟⲙ ⲉⲙⲁϣⲱ ⲟⲩⲟϩ ⲛ̀ⲧⲉⲥϥⲁⲓ ϧⲁ ⲧϧⲣⲉϣⲓ ⲛ̀ⲛⲓⲑⲏⲟⲩ. ⲁⲗⲗⲁ ⲟⲩⲕⲟⲩϫⲓ ⲡⲉ ⲡⲓⲁⲃⲓⲛ ⲟⲩⲟϩ ⲟⲩⲕⲟⲩϫⲓ ⲡⲉ ϯⲕⲩⲃⲱⲧⲟⲥ ⲟⲩⲛ ⲉⲧⲉ ⲛ̀ⲧⲏⲓ ϯⲉⲣϩⲟϯ ⲙⲏⲡⲟⲧⲉ ⲛ̀ⲧⲁⲓ̀ ⲉⲃⲟⲗϧⲉⲛ ⲧⲁⲓⲗⲩⲙⲛⲏ ⲉⲧⲉ ⲙ̀ⲙⲟⲛ ⲗⲩⲙⲛⲏ ⲛ̀ⲧⲁⲥ ϣⲁ ⲕⲉⲗⲩⲙⲛⲏ ⲉⲥϣⲑⲉⲣⲑⲱⲣ ⲛ̀ⲧⲉⲛⲓⲥⲏⲟⲩⲧⲱⲟⲩⲛ ⲉϫⲱⲓ ⲟⲩⲟϩ ⲛ̀ⲧⲉ ⲛⲓϩⲱⲓⲙⲓ ⲛⲉⲙ ⲛⲓϫⲟⲗ ϩⲓⲧ ⲑⲁⲗⲁⲥⲥⲁ ⲛ̀ϯⲥⲱⲟⲩⲛ ⲛ̀ⲛⲏⲃⲓ ⲁⲛ ϫⲉ ϩⲓⲛⲁ ⲛ̀ⲧⲁⲛⲟϩⲉⲙ ⲛ̀ⲧⲁⲯⲩⲭⲏ ⲙ̀ⲙⲁⲩⲁⲧⲥ ⲉⲡⲓⲭⲣⲟ.
Ⲧⲟⲧⲉ ⲟⲩⲟⲛ ⲛⲓⲃⲉⲛ ⲛⲁϫⲟⲥ ϫⲉ ⲁⲫⲁⲓ ϫⲓⲙⲓ ⲛ̀ⲟⲩϩⲙⲟⲧ ϧⲁⲧⲉⲛ Ⲫϯ ϫⲉ ⲁϥⲛⲟϩⲉⲙ ϫⲉ ⲟⲩⲏⲓ ⲧⲯⲩⲭⲏ ⲙ̀ⲡⲓⲣⲱⲙⲓ ⲛ̀ⲧⲟⲧϥ ⲥⲧⲁⲓⲏⲟⲩⲧ ⲉϩⲟⲧⲉ ⲡⲓⲕⲟⲥⲙⲟⲥ ⲧⲏⲣϥ ⲉⲧⲙⲉϩ ⲛ̀ⲛⲟⲩⲃ ϩⲓ ϩⲁⲧ. ⲉⲑⲃⲉ ⲫⲁⲓ ϯⲉⲣϩⲟϯ ⲙⲏⲡⲱⲥ ⲛ̀ⲧⲁϩⲓⲟⲩⲓ ⲛ̀ⲧⲁⲯⲩⲭⲏ ⲟⲩⲟϩ ϯⲉⲙⲓ ϫⲉ ⲧⲁⲕⲩⲃⲱⲧⲟⲥ ϫⲱϫⲉⲃ ⲟⲩⲟϩ ⲧⲁⲓⲉⲃϣⲱⲧ ⲟⲩⲕⲟⲩϫⲓ ⲡⲉ ⲟⲩⲟϩ ϯⲉⲙⲓ ⲁⲛⲟⲕ ⲛ̀ⲛⲏⲃⲓ ⲁⲛ ⲙⲏⲡⲟⲧⲉ ⲛ̀ⲧⲁϩⲓⲧⲟⲧ ⲉⲑⲁⲗⲁⲥⲥⲁ ⲛ̀ⲧⲁϣⲧⲉⲙⲁⲥⲑⲟⲓ ϧⲉⲛ ⲟⲩϩⲓⲣⲏⲛⲏ. ⲟⲩⲟϩ ⲁⲛⲟⲕ ⲁⲓϣⲁⲛϥⲁⲓ ⲁⲛ ϧⲁ ⲟⲩϣⲫⲓⲧ ⲛ̀ⲧⲉ ⲫⲏⲉⲑⲛⲁϯϣⲱϣ ⲛⲏⲓ ⲛ̀ⲥⲉϫⲟⲥ ϫⲉ ⲱ ⲡⲓⲁⲧⲉⲙⲓ ⲛ̀ⲣⲱⲙⲓ ⲛⲓⲙ ⲡⲉ ⲫⲏⲉⲧⲁϥⲉⲣⲁⲛⲁⲅⲕⲁⲍⲓⲛ ⲙ̀ⲙⲟⲕ ⲉⲑⲣⲉⲕⲓ̀ ⲥⲁⲡϣⲱⲓ ⲛ̀ⲧⲉϫⲟⲙ ⲟⲥϫⲉ ⲕⲉⲙⲓ ϫⲉ ⲕⲟⲓ ⲛ̀ⲏⲕⲓ ⲟⲩⲟϩ ⲙ̀ⲙⲟⲛ ϩⲗⲓ ⲛ̀ⲧⲟⲧⲕ ⲙ̀ⲡⲉⲣⲓ̀ⲣⲓ ⲥⲁⲡϣⲱⲓ ⲛ̀ⲧⲉⲕϫⲟⲙ. ⲁⲗⲗⲁ ϩⲁⲛⲙⲏϣ ⲛⲉ ⲛⲓϣⲱⲧ ⲡⲱⲥ ⲙ̀ⲡⲉⲕϯ ⲛⲱⲟⲩ ⲛ̀ⲧⲉⲕⲕⲟⲩϫⲓ ⲙ̀ⲡⲉⲕⲓⲉⲃϣⲱⲧ ⲉⲑⲣⲟⲩⲉⲣϣⲱⲧ ⲛ̀ϧⲏⲧⲥ ϩⲓⲛⲁ ⲛ̀ⲧⲉⲕϭⲓ ⲙ̀ⲡⲓϫⲫⲟ ⲛⲉⲙ ϯⲙⲉⲧⲓⲉⲃϣⲱⲧ ⲛⲉⲙ ϯⲕⲩⲃⲱⲧⲟⲥ ⲟⲩⲛ ⲟⲩⲟϩ ⲁⲕⲛⲟϩⲉⲙ ⲛ̀ⲧⲉⲯⲩⲭⲏ ⲛⲉⲙ ϯⲕⲩⲃⲱⲧⲟⲥ ⲛⲉⲙ ⲡⲉⲧⲉⲛⲧⲁⲕ ⲟⲩⲛ ϧⲉⲛ ⲟⲩϩⲓⲣⲏⲛⲏ ⲉϣⲱⲡ ⲕⲉⲙⲓ ⲛ̀ⲛⲏⲃⲓ ⲁⲛ.
Ⲁⲛⲟⲕ ⲇⲉ ϯⲛⲁⲧⲁⲙⲱⲧⲉⲛ ⲱ ⲛⲁⲥⲛⲏⲟⲩ ϫⲉ ⲁϣ ⲧⲉ ϯⲕⲩⲃⲱⲧⲟⲥ ⲇⲉ ⲧⲥⲁⲣⲝ ⲛ̀ⲣⲉϥⲉⲣⲛⲟⲃⲓ ⲁⲓ ⲉⲧⲉ ⲙ̀ⲡⲓⲉⲣⲟⲕⲟⲓⲛⲟⲙⲓⲛ ⲙ̀ⲙⲟⲥ ⲛ̀ⲕⲁⲗⲱⲥ. ⲛⲓⲁⲃⲓⲛ ⲇⲉ ⲡⲉ ⲡⲁϩⲏⲧ ⲫⲁⲓ ⲉⲧⲉ ⲙ̀ⲙⲟⲛ ⲉⲙⲓ ⲛ̀ϧⲏⲧϥ ⲟⲩⲇⲉ ⲛⲏⲃⲓ ⲉⲡϣⲱⲓ ⲟⲩⲟϩ ⲡⲓⲛⲏⲃⲓ ⲉⲡϣⲱⲓ ⲉϯⲥⲱⲟⲩⲛ ⲙ̀ⲙⲟϥ ⲁⲛ ⲛⲁⲓ ⲛⲉ ⲛⲓⲅⲣⲁⲫⲏ ⲉⲧⲉ ⲙ̀ⲡⲓⲥⲟⲩⲟⲛⲟⲩ. ⲉⲑⲃⲉ ⲫⲁⲓ ⲛ̀ⲑⲱⲧⲉⲛ ⲧⲉⲧⲉⲛⲥⲁϫⲓ ⲛⲉⲙⲏⲓ ⲙ̀ⲫⲟⲟⲩ ϩⲓⲛⲁ ⲉⲑⲣⲓⲉⲣⲥⲁⲡϣⲱⲓ ⲛ̀ⲧⲁϫⲟⲙ ⲙⲁⲗⲓⲥⲧⲁ ⲫⲏⲉⲧⲉⲧⲉⲛⲣⲁⲛⲁⲅⲕⲁⲍⲓⲛ ⲙ̀ⲙⲟⲓ ⲉⲑⲣⲓⲥⲁϫⲓ ⲉⲡⲉϥⲧⲁⲓⲟ ⲛⲉⲙ ⲫⲁ ⲡⲉ ⲡⲉϥⲟ̅ⲥ̅ ⲟⲩⲉⲃⲟⲗϧⲉⲛ ⲧⲫⲉ ⲡⲉ. ⲛ̀ⲟⲩⲥⲁⲣⲕⲓⲛⲟⲛ ⲁⲛ ⲡⲉ ⲁⲗⲗⲁ ⲟⲩⲁⲥⲱⲙⲁⲧⲟⲥ ⲡⲉ ⲟⲩⲟⲩⲱⲓⲛⲓ ⲡⲉ. ⲟⲩⲑⲁⲙⲓⲟ ⲁⲛ ⲡⲉ ⲉⲃⲟⲗϧⲉⲛ ⲡⲓⲟⲙⲓ ⲁⲗⲗⲁ ⲟⲩⲡ̅ⲛ̅ⲁ̅ ⲉϥⲟⲩⲁⲃ ⲡⲉ ⲛ̀ⲟⲩⲉⲃⲟⲗϧⲉⲛ ⲛⲓⲇⲓⲁⲕⲱⲛ ⲛ̀ⲧⲉ ⲡⲕⲁϩⲓ ⲁⲛ ⲡⲉ ⲁⲗⲗⲁ ⲟⲩⲇⲓⲁⲕⲱⲛ ⲉⲃⲟⲗϧⲉⲛ ⲟⲩϣⲁϩ ⲛ̀ϩⲣⲱⲙ.
Ⲟⲩⲁⲣⲭⲱⲛ ⲛ̀ⲧⲉ ⲡⲕⲁϩⲓ ⲁⲛ ⲡⲉ ⲁⲗⲗⲁ ⲟⲩⲁⲣⲭⲏⲁⲅⲅⲉⲗⲟⲥ ⲛ̀ⲧⲉ ⲧϫⲟⲙ ⲛ̀ⲧⲉ ⲛⲓⲫⲏⲟⲩⲓ ⲡⲉ. ⲛ̀ⲟⲩⲁⲣⲭⲏⲥⲧⲣⲁⲧⲩⲅⲟⲩⲥ ⲛ̀ⲧⲉ ⲡⲕⲁϩⲓ ⲁⲛ ⲡⲉ ⲫⲁⲓ ⲉⲧⲉϥⲛⲁⲕⲟⲣϥϥ ⲛ̀ϫⲉ ⲡⲉϥⲟⲩⲣⲟ ϧⲉⲛ ⲡⲓⲛⲁⲩ ⲉⲧⲉϥⲟⲩⲱϣ ⲁⲗⲗⲁ ⲟⲩⲁⲣⲭⲏⲥⲧⲣⲁⲧⲩⲅⲟⲥ ⲛ̀ⲧⲉ ⲧϫⲟⲙ ⲛ̀ⲛⲓⲫⲏⲟⲩⲓ ϥⲙⲏⲛ ⲉⲃⲟⲗ ⲛⲉⲙ ⲡⲉϥⲟⲩⲣⲟ ϣⲁ ⲉⲛⲉϩ. ⲁϥⲥⲁϫⲓ ⲁⲛ ϧⲁ ⲡⲧⲁⲕⲟ ⲛ̀ⲛⲓⲯⲩⲭⲏ ⲁⲗⲗⲁ ⲟⲩⲣⲉϥⲉⲣⲡⲉⲣⲥⲃⲉⲩⲓⲛ ϧⲁ ⲡⲛⲟϩⲉⲙ ⲛ̀ⲛⲉⲛⲯⲩⲭⲏ ⲛⲉⲙ ⲛⲉⲛⲥⲱⲙⲁ ⲛ̀ⲥⲏⲟⲩ ⲛⲓⲃⲉⲛ ϧⲁⲧⲉⲛ Ⲫϯ ⲡⲉⲛⲣⲉϥⲑⲁⲙⲓⲟ. ⲛ̀ⲟⲩⲣⲉϥⲥⲉⲙⲛⲓ ⲁⲛ ⲁⲗⲗⲁ ⲟⲩϥⲁⲓⲣⲱⲟⲩϣ ϧⲁ ⲡⲧⲏⲣϥ. ⲛ̀ⲟⲩⲙⲁⲥⲧⲉⲣⲱⲙⲓ ⲁⲛ ⲁⲗⲗⲁ ⲟⲩⲙⲉⲛⲣⲓⲧ ⲛ̀ⲧⲉ ϩⲓⲕⲱⲛ ⲙ̀Ⲫϯ ⲧⲏⲣⲟⲩ. ⲛ̀ⲟⲩϫⲁϫⲓ ⲛ̀ⲧⲁⲛ ⲁⲛ ⲡⲉ ⲁⲗⲗⲁ ϥⲟⲓ ⲛ̀ϩⲓⲣⲏⲛⲏ ⲛⲉⲙ ⲟⲩⲟⲛ ⲛⲓⲃⲉⲛ. ⲛ̀ⲟⲩⲁⲧⲛⲁⲓ ⲁⲛ ⲡⲉ ⲁⲗⲗⲁ ⲟⲩⲣⲉϥϣⲉⲛϩⲏⲧ ⲡⲉ ⲉⲣⲉ ⲑⲙⲉⲧⲛⲁⲏⲧ ⲙ̀Ⲫϯ ϣⲟⲡ ⲛ̀ϧⲏⲧϥ ϫⲉ ⲫⲏⲉⲧⲉⲣⲧⲓⲛ ϣⲁϥϭⲓ ⲫⲏⲉⲧⲕⲱϯ ϣⲁϥϫⲓⲙⲓ ⲟⲩⲟϩ ⲫⲏⲉⲧⲕⲱⲗϩ ⲥⲉⲛⲁⲟⲩⲱⲛ ⲛⲁϥ.
Ⲟⲩⲟϩ ⲁⲛⲟⲕ ϩⲱ ⲉⲧⲁⲓⲛⲁⲩ ⲉⲧϫⲓⲛϯ ⲙ̀ⲡⲁⲟ̅ⲥ̅ ϧⲉⲛ ⲟⲩⲣⲁϣⲓ ⲁⲓϩⲓⲧⲟⲧ ⲟⲩⲛ ⲉⲣⲟϥ ⲙ̀ⲫⲟⲟⲩ ⲁⲧϭⲛⲉ ⲙⲉⲧⲁⲣⲕⲟⲥ. ⲉⲓⲉⲣⲉⲧⲓⲛ ϩⲓⲛⲁ ⲛ̀ⲧⲁϭⲓ ⲛ̀ⲟⲩⲙⲏϣ ⲟⲩⲟϩ ⲉⲓⲕⲱⲗϩ ϩⲓⲛⲁ ⲛ̀ⲥⲉⲁⲟⲩⲱⲛ ⲛⲏⲓ ⲁⲗⲗⲁ ϥⲛⲁϫⲟⲥ: ⲛ̀ⲑⲟⲕ ⲱ ⲫⲏⲉⲑⲙⲉϩ ⲛ̀ⲁⲣⲧⲏ ⲟⲩⲟϩ ϥⲙⲉⲓ ⲛ̀ϯⲥⲃⲱ ϫⲉ ⲟⲩ ϩⲁⲣⲁ ⲡⲉ ⲉⲧⲉⲕϣⲓⲛⲓ ⲛ̀ⲥⲱϥ ⲛ̀ⲧⲟⲧϥ ⲙ̀ⲫⲟⲟⲩ ⲙⲉⲛⲉⲛⲥⲁ ⲑⲣⲉⲕⲉⲣϣⲟⲣⲡ ⲛ̀ⲧⲉⲕϫⲱ. ⲁⲕⲕⲏⲛ ⲛ̀ϫⲱ ⲛ̀ⲟⲩⲉⲩⲉⲣⲅⲕⲱⲙⲓⲟⲛ ⲉϫⲉⲛ ϯⲣⲟⲙⲡⲓ ⲙ̀ⲃⲉⲣⲓ ⲛⲉⲙ ⲧⲁⲣⲭⲏ ⲛ̀ⲛⲓϣⲁⲓ ⲛ̀ⲧⲉ ⲡⲟ̅ⲥ̅ ⲧⲏⲣⲟⲩ ⲟⲩⲟϩ ⲡⲁⲓⲣⲏϯ ⲟⲩⲛ ⲁⲕϫⲱ ⲛ̀ⲕⲉⲗⲟⲅⲟⲥ ⲉϫⲉⲛ ⲫⲏⲉⲧⲉ ⲙ̀ⲡⲉ ⲟⲩⲟⲛ ⲧⲱⲛϥ ϧⲉⲛ ⲛⲓⲙⲓⲥⲓ ⲛ̀ⲧⲉ ⲛⲓϩⲓⲟⲙⲓ ⲉⲛⲁⲁϥ ⲉϩⲟⲧⲉⲣⲟϥ ⲡⲥⲩⲅⲅⲉⲛⲏⲥ ⲙ̀Ⲡⲭ̅ⲥ̅ ⲡⲓⲁⲅⲓⲟⲥ Ⲓⲱ̅ⲁ̅ ⲡⲓⲣⲉϥϯⲱⲙⲥ ⲡϣⲫⲏⲣ ⲙ̀ⲡⲓⲡⲁϣⲉⲗⲉⲧ ⲉ̅ⲑ̅ⲩ̅. ⲙⲏ ⲕⲉⲙⲓ ⲁⲛ ⲱ ⲡⲁⲓⲱⲧ ϫⲉ ⲛⲁⲛⲉ ⲡⲓϣⲓ ϧⲉⲛ ϩⲱⲃ ⲛⲓⲃⲉⲛ ⲙ̀ⲫⲣⲏϯ ⲉⲁⲕⲟⲩⲱⲙ ⲓⲉ ⲛ̀ⲧⲉⲕⲥⲱ ⲛ̀ⲧⲉⲕϣⲗⲏⲗ ⲭⲁⲟⲩⲁϣ ⲡⲓϣⲓ ϧⲉⲛ ϩⲱⲃ ⲛⲓⲃⲉⲛ ⲙ̀ⲫⲣⲏϯ ⲉⲧⲉϥϫⲱ ⲙ̀ⲙⲟⲥ ϫ̀ⲉ ⲡⲉⲛⲥⲁϧ ⲛ̀ⲁⲡⲟⲥⲧⲟⲗⲟⲥ Ⲡⲁⲩⲗⲟⲥ ϫⲉ ϯⲁⲥⲕⲩⲥⲓⲥ ⲛ̀ⲧⲉ Ⲫϯ ⲟⲩⲛⲓϣϯ ⲡⲉ ϧⲉⲛ ⲡⲓϩⲏⲟⲩ ⲁⲕϣⲁⲛϫⲱⲕ ⲉⲃⲟⲗ ⲛ̀ⲧⲉⲕⲧⲱⲟⲩⲛ ϧⲁⲣⲟⲥ.
Ⲁⲛⲟⲕ ⲇⲉ ϯⲛⲁⲉⲣⲟⲩⲱ ⲛⲁⲕ ⲟⲩⲟϩ ⲛ̀ⲧⲁϫⲟⲥ ⲛⲁⲕ ⲱ ⲡⲁⲙⲉⲛⲣⲓⲧ ϫⲉ ⲁⲕⲥⲁϫⲓ ⲛ̀ⲕⲁⲗⲱⲥ ⲟⲩⲟϩ ⲁⲕⲟⲩⲱⲛϩ ⲛ̀ⲟⲩϥⲓⲣⲱⲟⲩϣ ⲉⲃⲟⲗ ⲁⲗⲗⲁ ϯⲛⲁⲉⲣⲧⲟⲗⲙⲁⲛ ⲟⲩⲟϩ ⲛ̀ⲧⲁϫⲟⲥ ⲙ̀ⲫⲣⲏϯ ⲙ̀ⲡϣⲫⲏⲣ ⲙ̀ⲡⲟ̅ⲥ̅ Ⲁⲃⲣⲁⲁⲙ ⲡⲁⲣⲭⲱⲛ ⲛ̀ⲛⲓⲡⲁⲧⲣⲓⲁⲣⲭⲏⲥ ⲫⲏⲉⲧⲁϥⲉⲣⲓⲱⲧ ⲛ̀ⲟⲩⲙⲏϣ ⲛ̀ⲉⲑⲛⲟⲥ ⲉⲧⲁϥϫⲟⲥ ⲙ̀Ⲫϯ ϫⲉ ⲓⲥϫⲉ ⲟⲩⲟⲛ ϣϫⲟⲙ ⲛ̀ⲥⲁϫⲓ ⲛⲉⲙ ⲡⲁⲟ̅ⲥ̅ ⲙ̀ⲡⲁⲓⲕⲉⲥⲟⲛ ⲟⲩⲟⲛ ⲕⲁⲛ ⲫⲁⲓ ⲟⲩϩⲟⲩⲥⲁϫⲓ ⲛ̀ⲧⲏⲓ ⲉⲑⲣⲓⲧⲉⲛⲑⲱⲛⲧ ⲉⲡϣⲫⲏⲣ ⲙ̀Ⲫϯ ⲁⲗⲗⲁ ⲁⲛⲟⲕ ⲁⲓⲉⲣⲧⲟⲗⲙⲁⲛ ϣⲁ ⲅ̅ ⲛ̀ⲥⲟⲡ ϩⲱⲗⲟⲥ ⲟⲩⲟϩ ϥⲛⲁⲧⲁⲥⲑⲟⲓ ⲁⲛ. ϫⲉ ⲟⲩⲏⲓ ⲛ̀ⲑⲟϥ ⲡⲉ ⲟⲩⲛⲟⲩϯ ⲛ̀ⲟⲩⲱⲧ ⲟⲩⲟϩ ⲟⲩⲟ̅ⲥ̅ ⲛ̀ⲟⲩⲱⲧ ⲟⲩⲟϩ ⲑⲱϥ ⲧⲉ ϯⲙⲉⲧϣⲁϩⲛⲁϩⲑⲏϥ ⲉⲑⲙⲏⲛ ⲉⲃⲟⲗ ϣⲁ ⲉⲛⲉϩ. ϧⲉⲛ ⲫⲁⲓ ϯⲑⲱⲧ ⲙ̀ⲡⲉⲕϩⲏⲧ ϫⲉ Ⲫϯ ⲫⲏⲉⲧⲁϥϩⲟⲛϩⲉⲛ ⲛⲁⲛ ϫⲉ ⲛ̀ⲧⲉⲛⲉⲣⲉⲧⲓⲛ ⲙ̀ⲙⲟⲓ ⲉⲑⲣⲓⲣⲁⲃⲱ ϧⲉⲛ ⲧⲉⲧⲉⲛⲙⲏϯ ϧⲉⲛ ⲡⲁⲓⲛⲓϣϯ ⲛ̀ϣⲁⲓ ⲉⲧⲫⲱⲣϣ ⲉⲃⲟⲗϧⲉⲛ ⲡⲓⲕⲟⲥⲙⲟⲥ ⲧⲏⲣϥ ⲙ̀ⲙⲁⲩⲁⲧϥ ⲁⲛ ⲁⲗⲗⲁ ⲛⲉⲙ ϧⲉⲛ ⲛⲓⲫⲏⲟⲩⲓ. ⲟⲩⲟϩ ⲛ̀ⲑⲱⲧⲉⲛ ⲧⲉⲧⲉⲛⲱϣ ⲉⲃⲟⲗ ⲉϫⲱⲓ ⲛⲓⲕⲟⲩϫⲓ ⲛⲉⲙ ⲛⲓⲛⲓϣϯ ⲛⲓϩⲱⲟⲩⲧ ⲛⲉⲙ ⲛⲓϩⲓⲟⲙ ⲉⲣⲉⲧⲉⲛϫⲱ ⲙ̀ⲙⲟⲥ ϫⲉ ⲧⲉⲛϯϩⲟ ⲉⲣⲟⲕ ⲙ̀ⲡⲉⲣⲭⲁⲣⲱⲕ ⲉⲃⲟⲗϩⲁ ⲡⲁⲓⲛⲓϣϯ ⲛ̀ϣⲓⲛⲓ ⲟⲩⲟϩ ⲛ̀ⲧⲉⲕⲧⲁⲙⲟⲛ ⲉⲡⲁⲓⲛⲓϣϯ ⲛ̀ϣⲁⲓ ⲛⲉⲙ ⲡⲧⲁⲓⲟ ⲙ̀ⲫⲏⲉⲧⲟⲩⲉⲣϣⲁⲓ ⲛⲁϥ ⲛ̀ϧⲏⲧϥ ⲫⲁⲓ ⲉⲧⲉⲣⲡⲣⲉⲥⲃⲉⲩⲓⲛ ϧⲁⲣⲟⲛ ⲧⲏⲣⲉⲛ ϧⲁⲧⲉⲛ Ⲫϯ.