Ϯⲟⲩⲱϣ ⲇⲉ ⲟⲩⲛ ⲱ ⲛⲓⲥⲛⲏⲟⲩ ⲉϯ ⲙ̀ⲫⲙⲉⲩⲓ ⲛⲱⲧⲉⲛ ⲙ̀ⲡⲉϯϫⲱ ⲙ̀ⲙⲟϥ ⲛⲱⲧⲉⲛ ⲛ̀ⲟⲩⲙⲏϣ ⲛ̀ⲥⲟⲡ: ⲉⲧⲉⲫⲛⲁⲩ ⲡⲉ ⲉⲧⲉⲛϭⲓ ⲉⲃⲟⲗϧⲉⲛ ⲛⲓⲙⲩⲥⲧⲏⲣⲓⲟⲛ ⲉ̅ⲑ̅ⲩ̅ ⲛ̀ⲧⲉ Ⲡⲭ̅ⲥ̅. Ⲁⲓϣⲁⲛⲛⲁⲩ ⲉⲣⲱⲧⲉⲛ ϧⲉⲛ ⲟⲩⲃⲱⲗ ⲉⲃⲟⲗ ⲛⲉⲙ ⲟⲩⲛⲓϣϯ ⲙ̀ⲙⲉⲧⲁⲧϩⲟϯ ⲉⲥⲉⲙⲡϣⲁ ⲛⲛⲉϩⲡⲓ ⲉⲣⲟⲥ ⲛ̀ⲧⲁⲣⲓⲙⲓ ⲉⲣⲟⲓ ⲙ̀ⲙⲓⲛ ⲙⲙⲟⲓ ⲟⲩⲟϩ ⲛ̀ⲧⲁϫⲟⲥ ϧⲉⲛ ⲡⲁⲙⲉⲩⲓ : ϫⲉ ϩⲁⲣⲁ ⲛⲁⲓ ⲥⲉⲥⲱⲟⲩⲛ ϩⲟⲗⲱⲥ ϫⲉ ⲉⲩⲟϩⲓ ⲉⲣⲁⲧⲟⲩ ⲉⲛⲓⲙ: ⲓⲉ ϫⲉ ⲥⲉⲉⲣⲛⲟⲓⲛ ⲉⲧϫⲟⲙ ⲙ̀ⲡⲓⲙⲩⲥⲧⲏⲣⲓⲟⲛ ϫⲉ ⲟⲩⲡⲉ : ⲟⲩⲟϩ ⲡⲁⲓⲣⲏϯ ϣⲁⲓ ⲙ̀ⲃⲟⲛ ϧⲉⲛ ⲡⲁⲟⲩⲱϣ ⲁⲛ : ⲓⲥϫⲉⲕ ⲛⲁⲓ ⲟⲩⲱϣ ⲉⲓ ⲉⲃⲟⲗϧⲉⲛ ⲧⲉⲧⲉⲛⲙⲏϯ ϩⲓⲧⲉⲛ ⲡⲓϩⲟϫϩⲉϫ ⲛ̀ⲧⲉ ⲧⲁⲩⲭⲏ : ⲟⲩⲟϩ ⲁⲥϣⲁⲛϣⲱⲡⲓ ⲛ̀ⲧⲁⲥⲟϩⲓ ⲛ̀ⲟⲩⲁⲓ ⲉⲃⲟⲗϧⲉⲛ ⲑⲏⲛⲟⲩ ⲛⲁϥⲉⲣⲁⲥⲑⲁⲛⲉⲥⲑⲉ ϩⲟⲗⲱⲥ: ⲁⲗⲗⲁ ϣⲁϥⲉⲣ ⲭⲣⲉⲙⲣⲉⲙ ⲛ̀ⲥⲱⲓ ϩⲱⲥ ⲉⲧⲁⲓϭⲓⲧϥ ⲛ̀ϫⲟⲛⲥ. ⲱ ϯⲛⲓϣϯ ⲛ̀ϣⲫⲏⲣⲓ: ⲛⲏⲉⲧϭⲓⲑⲏⲛⲟⲩ ⲛ̀ϫⲟⲛⲥ ⲉⲩⲱⲗⲓ

ⲛⲛⲉⲧⲉⲛⲉⲛⲭⲁⲓ ⲧⲉⲧⲉⲛϫⲱⲛⲧ ⲉⲣⲱⲟⲩ ⲁⲛ ⲙ̀ⲫⲣⲏϯ ⲉⲧⲉⲧⲉⲛϫⲱⲛⲧ ⲉⲣⲟⲓ ⲁⲛⲟⲕ ⲉⲑⲟⲩⲱϣ ⲙ̀ⲡⲉⲧⲉⲛⲟⲩϫⲁⲓ ϯⲟⲓ ⲛ̀ϩⲟϯ ⲟⲩⲟϩ ϯⲛⲉϩϣⲉⲗϥ ⲉⲧⲁⲓⲉⲙⲓ ⲙ̀ⲡϯϣⲉⲃⲓⲱ ⲉⲑⲛⲁϣⲱⲡⲓ ⲛⲱⲧⲉⲛ ⲉⲃⲟⲗ ϩⲓⲧⲉⲛ Ⲫϯ : ⲉⲑⲃⲉ ⲡⲓⲣⲏϯ ⲉⲧⲉ ⲧⲉⲛⲉⲣⲕⲁⲧⲁⲫⲣⲟⲛⲓⲛ ⲙ̀ⲡⲁⲓⲛⲓϣϯ ⲙ̀ⲙⲩⲥⲧⲏⲣⲓⲟⲛ ϩⲁⲣⲁ ⲧⲉⲧⲉⲛⲉⲙⲓ ϫⲉ ⲛⲓⲙ ⲡⲉ ⲫⲁⲓ ⲉⲧⲉⲧⲉⲛⲟⲩⲱϣ ⲉϭⲓ ⲉⲃⲟⲗⲛϧⲏⲧϥ:ⲡⲓⲥⲱⲙⲁ ⲉ̅ⲑ̅ⲩ̅ ⲛ̀ⲧⲉ Ⲫϯ ⲡⲓⲗⲟⲅⲟⲥ: ⲛⲉⲙ ⲡⲉϥⲥⲛⲟϥ ⲉⲧⲁϥⲧⲏⲓϥ ϧⲁ ⲡⲉⲛⲟⲩϫⲁⲓ ⲫⲁⲓ ⲁⲣⲉϣⲁⲛ ⲟⲩⲁⲓ ϭⲓ ⲉⲃⲟⲗⲛϧⲏⲧϥ ϧⲉⲛ ⲟⲩⲙⲉⲧⲁⲧⲉⲙⲡϣⲁ: ⲉϥⲉϣⲱⲡⲓ ⲛⲁϥ ⲛ̀ⲟⲩⲭⲣⲓⲙⲁ ⲛⲉⲙ ⲟⲩϫⲱⲣ ⲉⲃⲟⲗ ⲙ̀ⲫ̀ⲣⲏϯ ϩⲱϥ ⲉⲧⲁϣⲱⲡⲓ ⲛ̀Ⲓⲟⲩⲇⲁⲥ ⲫⲏⲉⲧⲁϥϯ ⲙ̀ⲡⲟ̅ⲥ̅ ⲉⲃⲟⲗϧⲉⲛ ⲡϫⲓⲛⲑⲣⲉϥϭⲓ ⲉⲃⲟⲗ ⲛ̀ϧⲏⲧϥ ϧⲉⲛ ⲟⲩⲙⲉⲧⲁⲧⲙⲡϣⲁ

---

Ⲡⲓⲟⲩⲟⲉⲓϣ ϫⲉ ϯⲛⲟⲩ ⲡⲉ ⲉⲑⲣⲉⲛϯ ⲙ̀ⲡⲉⲛⲟⲩⲟⲓ ⲉϧⲟⲩⲛ ⲉⲧⲁⲓⲧⲣⲁⲡⲉⲍⲁ ⲉⲧⲟⲓ ⲛ̀ϩⲟϯ ⲙⲁⲣⲉⲛϯⲟⲩⲟⲓ ϫⲉ ⲉⲣⲟⲥ ⲧⲏⲣⲉⲛ ϧⲉⲛ ⲟⲩⲧⲟⲩⲃⲟ ⲙ̀ⲡⲉⲣⲑⲣⲉⲗⲁⲁⲩ ϣⲱⲡⲓ ⲙ̀ⲙⲁⲩ ⲉϥⲟ ⲙ̀ⲡⲟⲛⲏⲣⲟⲛ ⲛ̀ⲑⲉ ⲛⲓⲟⲩⲇⲁⲥ ⲉϥⲥⲉϩ ⲅⲁⲣ ϫⲉ ⲛ̀ⲧⲉ ⲣⲉϥϭⲓ ⲙ̀ⲡⲓⲱⲓⲕ ⲁⲡⲥⲁⲧⲁⲛⲁⲥ ⲃⲱⲕ ⲉϧⲟⲩⲛ ⲉⲣⲟϥ ⲁϥⲡⲁⲣⲁⲇⲓⲇⲟⲩ ⲙ̀ⲡⲟ̅ⲥ̅ ⲙ̀ⲡⲓⲱⲟⲩ ⲙⲁⲣⲉ ⲡⲓⲟⲩⲁⲓ ⲡⲓⲟⲩⲁⲓ ⲙ̀ⲙⲟⲛ ⲙⲟϣⲧ ⲙ̀ⲙⲓⲛ ⲙ̀ⲙⲟϥ ⲙ̀ⲡⲁⲧⲉϥ ⲙ̀ⲡⲉϥⲟⲩⲟⲓ ⲉϧⲟⲩⲛ ⲉⲡⲥⲱⲙⲁ ⲛⲉⲙ ⲡⲥⲛⲟϥ ⲙ̀Ⲡⲭ̅ⲥ̅ ϫⲉ ⲛⲛⲉϥϣⲱⲡⲓ ⲛⲁϥ ⲉⲩⲉⲕⲣⲓⲙⲁ ⲛⲟⲁⲛ ⲡⲉⲧϯ ⲙ̀ⲡⲱⲓⲕ ⲛⲉⲙ ⲡⲥⲛⲟϥ ⲁⲗⲗⲁ Ⲡⲭ̅ⲥ̅ ⲫⲁⲓ ⲛⲧⲁⲩ⳧ ⲟⲩ ⲙ̀ⲙⲟϥ ϧⲁⲣⲟⲛ ⲫⲏⲉⲧⲟϩⲓ ⲉⲣⲁⲧϥ ϩⲓϫⲉⲛ ⲧⲁⲓⲧⲣⲁⲡⲉⲍⲁ ϧⲉⲛ ⲟⲩⲙⲩⲥⲧⲏⲣⲓⲟⲛ ⲫⲁⲓ ⲉⲧⲉ ⲑⲱϥ ⲧⲉ ⲧϫⲟⲙ ⲛⲉⲙ ϯⲭⲁⲣⲓⲥ ⲉϥϫⲱ ⲙ̀ⲙⲟⲥ ϫⲉ ⲫⲁⲓ ⲡⲉ ⲡⲁⲥⲱⲙⲁ ⲛ̀ⲑⲟϥ ⲅⲁⲣ ⲙ̀ⲡⲓⲥⲁϫⲓ ⲛ̀ⲧⲁϥϫⲟϥ ⲛ̀ⲟⲩⲥⲟⲡ ⲛ̀ⲟⲩⲱⲧ ϭⲓⲛ ϯϩⲟⲩⲓϯ ϫⲉ ⲁϣⲁⲓ ⲧⲉⲧⲉⲛⲁⲓⲁⲓ ⲛ̀ⲧⲉⲧⲉⲛⲙⲁϩ ⲡⲕⲁϩⲓ ⲉϥⲙⲏⲛ ⲉⲃⲟⲗ ⲛ̀ⲥⲏⲟⲩ ⲛⲓⲃⲉⲛ ⲉϥϯϫⲟⲙ ⲛ̀ϯⲫⲩⲥⲓⲥ ⲙ̀ⲡⲓϩⲱⲃ ⲉⲑⲃⲉ ⲡⲁϣⲁⲓ ⲛⲉⲛϣⲏⲣⲓ ϣⲱⲡⲓ ⲑⲁⲓ ⲧⲉ ⲙ̀ⲡⲓⲥⲁϫⲓ ⲛ̀ⲧⲉ ⲡⲉⲛⲥ̅ⲱ̅ⲣ̅ ϫⲟϥ ⲛ̀ⲟⲩⲥⲟⲡ ϩⲓϫⲉⲛ ϯⲧⲣⲁⲡⲉⲍⲁ ⲉⲧⲉⲙⲙⲁⲩ ⲏⲛ ⲉⲃⲟⲗϧⲉⲛ ⲛⲓⲉⲕⲕⲗⲏⲥⲓⲁ ϣⲁ ϩⲣⲏⲓ ⲉⲫⲟⲟⲩ ⲟⲩⲟϩ ϣⲁ ⲉϩⲣⲏⲓ ⲉⲧⲉϥⲡⲁⲣⲟⲥⲓⲁ ⲉϥϫⲱⲕ ⲉⲃⲟⲗ ⲛϯⲑⲩⲥⲓⲁ ⲙⲡⲓϩⲱⲃ

---

ϯⲛⲁⲩ ⲅⲁⲣ ⲉⲟⲩⲙⲏϣ ⲙ̀ⲡⲓⲥⲧⲟⲥ ⲙ̀ⲫⲟⲟⲩ ⲉⲩⲓⲏⲥ ⲙ̀ⲙⲱⲟⲩ ⲉⲉⲣⲕⲟⲓⲛⲱⲛⲓⲛ ⲉⲡⲁⲓⲙⲩⲥⲧⲏⲣⲓⲟⲛ ⲉⲑⲙⲉϩ ⲛ̀ϩⲟϯ ϩⲓⲛⲉϩϣⲉⲗϥ: ϫⲉ ⲭⲁⲥ ⲉϥⲉϣⲱⲡⲓ ⲛ̀ϫⲉ ⲟⲩϩⲏⲟⲩ ⲕⲁⲧⲁ ⲡⲓϩⲱⲃ ⲃ̅: ⲁⲓⲛⲁϭⲓⲙⲱⲓⲧ ϧⲁϫⲱⲧⲉⲛ ⲛϣⲟⲣⲡ ⲉⲃⲟⲗϩⲓⲧⲉⲛ ⲛⲁⲥⲁϫⲓ: ⲉⲑⲣⲉⲧⲉⲛⲙⲟϣⲓ ϧⲉⲛ ⲟⲩϩⲟϯ ⲛⲉⲙ ⲟⲩⲥⲑⲉⲣⲧⲉⲣ ⲛⲉⲙ ⲟⲩⲛⲉϩϣⲉⲗϥ : ⲕⲁⲧⲁ ⲡⲉⲧⲥϣⲉ ⲉϧⲟⲩⲛ ⲉϯⲕⲟⲓⲛⲱⲛⲓⲁ ⲛ̀ⲧⲉ ⲛⲁⲓⲙⲩⲥⲧⲏⲣⲓⲟⲛ ⲉ̅ⲑ̅ⲩ̅ Ⲕⲉ ⲅⲁⲣ ⲉⲧⲁⲩϯ ⲙ̀Ⲡⲟ̅ⲥ̅ ⲙ̀ⲫⲟⲟⲩ ⲱ ⲛⲁⲙⲉⲛⲣⲁϯ: ⲁⲗⲗⲁ ⲁⲣⲉⲧⲉⲛϣⲁⲛⲥⲱⲧⲉⲙ ϫⲉ ⲁⲩϯ ⲙ̀Ⲡⲭ̅ⲥ̅ ⲙ̀ⲡⲉⲛⲑⲣⲉⲡⲉⲧⲉⲛϩⲟ ⲱⲕⲉⲙ: ⲙⲁⲗⲗⲟⲛ ⲇⲉ ⲙⲁⲣⲉϥⲱⲕⲉⲙ ⲉⲡⲓϩⲟⲩⲟ: ⲟⲩⲟϩ ⲣⲓⲙⲓ ⲉⲙⲁϣⲱ ⲉϫⲉⲛ ⲫⲏⲉⲧⲁⲩⲧⲏⲓϥ ⲁⲛ: ⲁⲗⲗⲁ ⲉϫⲉⲛ ⲫⲏⲉⲧⲁϥⲧⲏⲓϥ ⲉⲧⲉ Ⲓⲟⲩⲇⲁⲥ ⲡⲉ: ⲫⲏⲉⲧⲁϥⲧⲏⲓϥ ⲙⲉⲛ ⲁϥϩⲉⲙⲥⲓ ⲥⲁⲟⲩⲓⲛⲁⲙ ⲙ̀Ⲫϯ ⲫⲓⲱⲧ ϧⲉⲛ ⲛⲓⲫⲏⲟⲩⲓ: ⲟⲩⲟϩ ϥⲟⲓ ⲛ̀ⲟⲩⲣⲟ ⲉϫⲉⲛ ⲡⲧⲏⲣϥ ϧⲉⲛ ⲟⲩⲙⲉⲧⲟⲩⲣⲟ ⲛ̀ⲁⲑⲙⲟⲩⲛⲕ: ⲫⲏ ϩⲱϥ ⲉⲧⲁϥⲧⲏⲓϥ ⲁϥϣⲉ ⲉϧⲣⲏⲓ ⲉⲁⲙⲉⲛϯ: ⲟⲩⲟϩ ϥⲙⲏⲛ ϯⲛⲟⲩ ϧⲉⲛ ⲁⲙⲉⲛϯ ⲉϥϫⲟⲩϣⲧ ⲉⲃⲟⲗϧⲁⲧϩⲏ ⲛ̀ⲟⲩⲕⲟⲗⲁⲥⲓⲥ ⲉⲥⲟϣ ⲫⲓⲁϩⲟⲙ ϫⲉ ⲉⲑⲃⲉ ⲫⲁⲓ ⲛ̀ⲧⲉⲧⲉⲛⲣⲓⲙⲓ: ⲉⲑⲃⲉ ϫⲉ ⲉⲧⲁ Ⲡⲟ̅ⲥ̅ ⲉⲣⲉⲙⲕⲁϩ ⲛ̀ϩⲏⲧ ⲉⲑⲃⲉⲫⲁⲓ ⲉϥⲧⲁⲙⲟ ⲙ̀ⲙⲟⲛ ϫⲉ ⲥϣⲉ ⲡⲉ ⲉⲛⲉϩⲡⲓ ⲉϫⲉⲛ ⲫⲏⲉⲧⲁϥ ⲉⲣⲙⲕⲁϩ ⲁⲛ: ⲁⲗⲗⲁ ⲉϫⲉⲛ ⲫⲏⲉⲧⲉⲣⲡⲉⲧϩⲱⲟⲩ : ⲟⲩⲇⲓⲕⲉⲟⲛ ⲡⲉ ⲉⲛⲉϩ ϧⲉⲛ ⲙⲁⲓⲛⲓⲃⲉⲛ : ⲫⲏⲉⲧⲉⲣⲡⲉⲧϩⲱⲟⲩ ⲅⲁⲣ ⲉϥϩⲱⲟⲩ ⲉϩⲟⲧⲉ ⲫⲏⲉⲧϭⲓ ⲙ̀ⲕⲁϩ ⲕⲉ ⲅⲁⲣ ⲁⲗⲏⲑⲱⲥ ϥϩⲱⲟⲩ ⲁⲛ ⲛ̀ϫⲉ ⲫⲏⲉⲧϭⲓⲙⲕⲁϩ:ⲁⲗⲗⲁ ⲫⲏⲉⲧⲉⲣ ⲡⲉⲧϩⲱⲟⲩ ϧⲉⲛ ⲟⲩⲙⲉⲑⲙⲏⲓ ⲛⲑⲟϥ ⲉⲧϩⲱⲟⲩ ϯⲙⲉⲧⲣⲉϥϣⲉⲡⲙⲕⲁϩ ⲅⲁⲣ ⲉⲧⲥⲱⲕ ϧⲁϫⲱⲛ ⲉϧⲟⲩⲛ ⲉⲑⲙⲉⲧⲟⲩⲣⲟ ⲛ̀ⲛⲓⲫⲏⲟⲩⲓ: ϯⲙⲉⲧⲣⲉϥⲉⲣⲡⲉⲧϩⲱⲟⲩ ⲇⲉ ⲛ̀ⲑⲟⲥ ϣⲁⲥϣⲱⲡⲓ ⲛⲁⲛ ⲛ̀ⲗⲱⲓϫⲓ ⲉϧⲟⲩⲛ ⲉϯⲅⲉⲉⲛⲛⲁ ⲛⲉⲙ ⲛⲓⲕⲟⲗⲁⲥⲓⲥ Ⲱⲟⲩⲛⲓⲁⲧⲟⲩ ⲡⲉϫⲁϥ ⲛⲛⲏⲉⲧⲁⲩϭⲟϫⲓ ⲛ̀ⲥⲱⲟⲩ ⲉⲑⲃⲉ ϯⲙⲉⲑⲙⲏⲓ : ϫⲉ ⲑⲱⲟⲩ ⲧⲉ ϯⲙⲉⲧⲟⲩⲣⲟ ⲛⲧⲉ ⲛⲓⲫⲏⲟⲩⲓ : ϯⲙⲉⲧⲣⲉϥⲉⲣⲡⲉⲧϩⲱⲟⲩ ⲇⲉ ⲛⲑⲟⲥ ⲟⲩⲟⲛ ⲛⲧⲁⲥ ⲙⲙⲁⲩ ⲛⲟⲩⲕⲟⲗⲁⲥⲓⲥ ⲛⲉⲙ ⲟⲩⲇⲓⲙⲱⲣⲓⲁ

Ⲓⲥ ϩⲏⲡⲡⲉ ϫⲉ ⲟⲛ ϯⲛⲟⲩ ⲱⲛⲓ ⲥⲛⲏⲟⲩ ⲧⲉⲛⲛⲁϯ ⲙⲫⲙⲉⲩⲓ ⲛⲱⲧⲉⲛ ⲉⲑⲃⲉ ⲧⲉⲙⲏ ⲉⲑⲛⲁϣⲱⲡⲓ ⲉϫⲉⲛ ⲛⲓⲣⲉϥⲉⲣⲛⲟⲃⲓ: ⲛⲉⲙ ⲛⲏⲉⲧϫⲱⲗ ⲙ̀ⲡⲓⲛⲟⲙⲟⲥ ⲉⲃⲟⲗ ⲛⲉⲙ ⲛⲓⲉⲛⲧⲟⲗⲏ ⲛⲧⲉ ⲡⲱⲛ: Ⲡⲉϫⲁϥ ⲅⲁⲣ ϫⲉ ϧⲉⲛ ⲑⲏⲛⲟⲩ ⲥⲁⲃⲟⲗ ⲙ̀ⲙⲟⲓ ⲛⲏⲉⲧⲥϩⲟⲩⲟⲣⲧ ⲉⲡⲓⲭⲣⲱⲙ ⲛ̀ⲉⲛⲉϩ: ⲉⲣⲉ ⲛⲁⲓ ⲅⲁⲣ ⲛⲁϫⲟⲩϣⲧ ϧⲁϫⲱϥ ⲛ̀ⲁϣ ⲛ̀ⲥⲟⲗⲥⲉⲗ ⲛ̀ⲕⲉⲥⲟⲡ: ⲑⲁⲓ ⲧⲉ ϧⲉⲛ ⲟⲩⲙⲉⲑⲙⲏⲓ ⲡⲉϯϧⲉⲗⲗⲟⲧ ⲛ̀ⲧⲉ ⲫⲣⲓⲙⲓ ⲡⲓⲙⲁ ⲉⲧⲉ ϩⲁⲛⲉⲣⲙⲱⲟⲩⲓ ⲛⲁϣⲱⲡⲓ ⲙⲙⲟϥ: ⲛⲁⲓ ⲛⲉ ⲛⲓⲉⲣⲙⲱⲟⲩⲓ ⲉⲧⲉ ⲙ̀ⲙⲟⲛ ϩⲗⲓ ⲛ̀ⲥⲟⲗⲥⲉⲗ ⲛⲁϣⲱⲡⲓ ⲙⲉⲛⲉⲛⲥⲱⲟⲩ: ⲉⲣⲉ ⲛⲓⲙ ⲛⲁϣϯϩⲟ ⲉϫⲉⲛ ⲛⲓⲣⲉϥⲉⲣⲛⲟⲃⲓ ⲙ̀ⲡⲓⲉϩⲟⲟⲩ ⲉⲧⲉⲙⲙⲁⲩ: ⲉⲩⲉⲭⲁⲣⲱⲟⲩ ⲅⲁⲣ ⲛϫⲉ ⲛⲓⲁⲅⲅⲉⲗⲟⲥ: ⲛⲉⲙ ⲛⲓⲭⲉⲣⲟⲩⲃⲓⲙ ⲛⲉⲙ ⲛⲓⲥⲉⲣⲁⲫⲓⲙ: ⲛⲉⲙ ⲛⲓⲑⲙⲏⲓ ⲛⲉⲙ ⲛⲏⲉ̅ⲑ̅ⲩ̅ ⲧⲏⲣⲟⲩ : ⲙ̀ⲙⲟⲛ ⲟⲩⲁⲓ ⲛ̀ⲟⲩⲱⲧ ⲛⲁϣϯϩⲟ ⲉϫⲉⲛ ϯⲙⲉⲧⲣⲱⲙⲓ ⲙ̀ⲡⲓⲉϩⲟⲟⲩ ⲉⲧⲉⲙⲙⲁⲩ: ⲛⲓⲑⲁⲙⲓⲟ ⲧⲏⲣⲟⲩ ⲉⲩⲉⲟϩⲓ ⲉⲣⲁⲧⲟⲩ ϧⲉⲛ ⲟⲩⲭⲁⲣⲱϥ: ⲛ̀ⲧⲉ ⲡⲓⲕⲟⲥⲙⲟⲥ ⲧⲏⲣϥ ϣⲱⲡⲓ ϧⲁ ⲡⲓϩⲁⲡ ⲙ̀ⲙⲏⲓ ⲛ̀ⲧⲉ Ⲫϯ ⲫⲁⲓ ⲡⲉ ⲡⲥⲏⲟⲩ ⲙ̀ⲡⲱⲥϧ: ⲫⲁⲓ ⲡⲉ ⲡⲥⲏⲟⲩ ⲉⲧⲉ ϣⲁⲩⲥⲱⲕ ⲙ̀ⲡⲓϣⲛⲉ ⲉⲡⲓⲭⲣⲟ: ⲛ̀ⲥⲉ ⲫⲱⲣϫ ⲛⲛⲓⲧⲉⲃⲧ ⲉⲧϩⲱⲟⲩ ⲉⲃⲟⲗϧⲉⲛ ⲛⲓⲉⲑⲛⲁⲛⲉⲩ: ⲫⲁⲓ ⲡⲉ ⲡⲓⲉϩⲟⲟⲩ ⲉⲧⲟⲩⲛⲁϫⲟⲥ ⲛ̀ⲛⲓⲣⲉϥⲉⲣⲛⲟⲃⲓ ⲛ̀ϧⲏⲧϥ ⲛ̀ⲥⲉⲕⲟⲧⲟⲩ ⲉⲁⲙⲉⲛϯ ⲡⲟⲩⲏⲓ ϣⲁⲉⲛⲉϩ

---