ⲛ̅ⲛⲉⲗⲁⲁⲩ ⲡⲣ̅ϣ ⲉⲓⲇⲟⲥ
ⲉⲡⲉϥϣⲁⲁϥ ⲉⲓⲙⲏⲧⲓ ⲉⲩⲧⲟⲙ ⲙ̅ⲙⲁⲧⲉ.
ⲛ̅ⲛⲉⲗⲁⲁⲩ ⲃⲱⲕ ⲉϩⲟⲩⲛ
ⲉⲧⲣⲉⲓ ⲙ̅ⲡⲉⲧϩⲓⲧⲟⲩⲱϥ ⲉⲓⲙⲏⲧⲓ ⲛ̅ϥⲕⲱⲗϩ̅ ⲛ̅ϣⲟⲣⲡ̅
ⲟⲩⲧⲉ ⲛ̅ⲛⲉϥⲉϣ ⲃⲱⲕ ⲣⲱ ⲉϩⲟⲩⲛ ⲙ̅ⲡⲁⲧⲟⲩⲕⲱⲗϩ̅ ⲉⲡⲟⲩⲱⲙ
ⲙ̅ⲙⲉⲉⲣⲉ ⲟⲩⲧⲉ ⲛ̅ⲛⲉⲕⲱⲧⲉ ⲉϩⲟⲩⲛ ⲉⲃⲟⲗ ϩⲙ̅ ⲡϯⲙⲉ
ⲉⲙⲡⲁⲧⲟⲩⲕⲱⲗϩ̅
ⲛ̅ⲛⲉⲣⲱⲙⲉ ⲧⲉϩⲥ̅ ⲣⲱⲙⲉ
ⲉϥϣⲱⲛⲉ ⲏ ⲉϫⲟⲕⲙⲉϥ ⲉⲙⲡⲟⲩⲧⲟϣϥ̅.
ⲛ̅ⲛⲉⲗⲁⲁⲩ ϣⲁϫⲉ ⲙⲛ̅
ⲉϥⲉⲣⲏⲩ ϩⲙ̅ ⲡⲕⲁⲕⲉ ⲟⲩⲧⲉ ⲛ̅ⲛⲉⲧⲛ̅ϩⲙⲟⲟⲥ ⲉⲧⲟⲙ
ⲉⲧⲉⲧⲛ̅ⲣ̅ ⲥⲛⲁⲩ ⲟⲩⲧⲉ ⲟⲩⲧⲙⲏ
ⲛ̅ⲛⲉⲣⲱⲙⲉ ⲁⲙⲁϩⲧⲉ
ⲛ̅ⲧϭⲓϫ ⲙ̅ⲡⲉϥϣⲃⲏⲣ ⲟⲩⲧⲉ ⲕⲉⲗⲁⲁⲩ ⲛ̅ⲉⲓⲇⲟⲥ ⲛ̅ⲧⲁϥ
ⲁⲗⲗⲁ ⲉⲕⲛⲁⲕⲁ ⲟⲩⲙⲁϩⲉ ⲉϩⲣⲁⲓ ⲟⲩⲧⲱⲕ ⲛⲙ̅ⲙⲁϥ ⲉⲓⲧⲉ
ⲉⲕϩⲙⲟⲟⲥ ⲉⲓⲧⲉ ⲉⲕⲁϩⲉⲣⲁⲧⲕ̅ ⲉⲓⲧⲉ ⲉⲕⲙⲟⲟϣⲉ.
ⲛ̅ⲛⲉⲗⲁⲁⲩ ⲛ̅ ⲥⲟⲩⲣⲉ
ⲉⲃⲟⲗ ⲛ̅ⲣⲁⲧϥ̅ ⲛ̅ⲣⲱⲙⲉ ⲉⲓⲙⲏⲧⲓ ⲉⲡⲣⲙ̅ⲛ̅ⲏⲓ ⲙⲛ̅
ⲡⲙⲉϩⲥⲛⲁⲩ ⲏ ⲡⲉⲧⲟⲩⲛⲁⲟⲩⲉϩⲥⲁϩⲛⲉ ⲛⲁϥ.
ⲛ̅ⲛⲉⲣⲱⲙⲉ ϣⲃ̅ ⲧⲉϥⲁⲡⲉ
ⲁϫⲛ̅ ⲡⲉϥⲣⲙ̅ⲛ̅ⲏⲓ ⲟⲩⲧⲉ ⲟⲛ ⲛ̅ⲛⲉⲣⲱⲙⲉ ϣⲃ̅ ⲣⲱⲙⲉ
ⲉⲩϩⲙⲟⲟⲥ
ⲛ̅ⲛⲉⲣⲱⲙⲉ ⲃⲱⲕ
ⲱⲡⲥⲱⲟⲩϩ̅ ⲏ ⲉⲡⲙⲁ ⲛ̅ⲟⲩⲱⲙ ⲉⲣⲉⲡⲉϥⲧⲟⲟⲩⲉ ⲛ̅ⲣⲁⲧϥ̅ ⲏ
ⲉⲣⲉⲡⲉϥⲡⲣⲏϣ ϭⲟⲟⲗⲉ ⲙ̅ⲙⲟϥ ⲉⲓⲧⲉ ϩⲙ̅ ⲡϯⲙⲉ ⲉⲓⲧⲉ ϩⲛ̅
ⲧⲥⲱϣⲉ.
ⲛ̅ⲛⲉⲣⲱⲙⲓ ⲕⲁ ⲡⲉϥⲣⲏϣ
ⲙ̅ⲡⲣⲏ ϣⲁⲛⲧⲟⲩⲕⲱⲗϩ̅ ⲉⲡⲟⲩⲱⲙ ⲙ̅ⲙⲉⲉⲣⲉ.
ⲛⲁⲓ ⲧⲏⲣⲟⲩ
ⲡⲉⲧⲛⲁⲙⲉⲗⲉⲓ ⲉⲣⲟⲟⲩ ⲉϥⲛⲁϫⲓ ⲉⲡⲓⲧⲓⲙⲓⲁ ϩⲁⲣⲟⲟⲩ.
ⲉⲣϣⲁⲛ ⲟⲩⲥⲟⲛ ⲇⲉ
ϣⲟϭⲉϥ ⲛϥ̅ⲧⲙ̅ⲛ̅ⲕⲟⲧⲕ̅ ⲁⲗⲗⲁ ⲉϥⲙⲟⲟϣⲉ ⲉϩⲟⲩⲛ ⲉⲃⲟⲗ
ⲛ̅ϥ̅ⲣ̅ⲭⲣⲓⲁ ⲛ̅ⲟⲩϣⲧⲏⲛ ⲏ ⲟⲩⲕⲟⲩⲓ ⲛ̅ⲛⲉϩ ⲉⲣⲉ
ⲡⲉϥⲣⲙ̅ⲛ̅ⲏ̅ⲓ ⲃⲱⲕ ⲉⲡⲙⲁ ⲛ̅ⲛ̅ⲟⲓⲕⲟⲛⲟⲙⲟⲥ ⲛϥ̅ϫⲓⲧⲟⲩ ⲟⲛ
ⲉⲡⲉⲩⲙⲁ.
ⲛ̅ⲛⲉⲗⲁⲁⲩ ϫⲓ ⲗⲁⲁⲩ
ⲛ̅ⲉⲓⲇⲟⲥ ⲛ̅ⲧⲛ̅ ⲣⲱⲙⲉ ⲁϫⲙ̅ ⲡⲉϥⲣⲙ̅ⲛ̅ⲏⲓ.
ⲛ̅ⲛⲉⲗⲁⲁⲩ ⲃⲱⲕ ⲉϩⲟⲩⲛ
ⲉⲣ̅ⲃⲉ ⲉⲙⲡⲟⲩϫⲟⲟⲩϥ ϣⲁ ϩⲣⲁⲓ ⲉⲛⲟⲩⲉⲉⲓⲏ ⲉⲓⲙⲏⲧⲓ
ⲉⲛⲁⲙⲏⲩ ⲙ̅ⲙⲁⲧⲉ. ⲉⲕⲧⲁⲗⲏⲩ ⲉⲩⲉⲓⲱ ⲉⲕϣⲁⲛⲡⲱϩ
ⲉⲧⲥⲟⲟⲩϩⲥ̅ ⲭⲱⲣⲓⲥ ⲁⲛⲁⲅⲕⲏ ⲉⲕⲛⲁϥⲱϭⲉ ⲉⲃⲟⲗ ⲛ̅ⲅⲥⲱⲕ
ϩⲏⲧϥ̅.
ⲛ̅ⲛⲉⲗⲁⲁⲩ ϫⲓ ⲉⲓⲇⲟⲥ
ⲛ̅ⲧⲛ̅ ⲣⲱⲙⲉ ⲉϭⲟⲉⲓⲗⲉ ⲉⲣⲟϥ ϣⲁ ⲉϩⲣⲁⲓ ⲉⲡⲉϥⲥⲟⲛ.
ⲛ̅ⲛⲉⲗⲁⲁⲩ ⲛ̅ⲣⲱⲙⲉ
ⲟⲩⲙ̅ ⲛ̅ⲕⲁ ⲛ̅ϩⲟⲩⲛ ⲛ̅ⲧⲉϥⲣⲓ.
ⲉϣⲱⲡⲉ ⲟⲩϣⲧⲏⲛ ⲉⲥⲡⲟⲣϣ
ⲛ̅ⲧⲉⲡⲙⲉϩϣⲟⲙⲧ ⲛ̅ⲣⲏ ϣⲁ ⲉϫⲱⲥ ⲡⲉⲧⲉ ⲧⲱϥ ⲧⲉ ⲉϥⲉϫⲓ
ⲉⲡⲓⲧⲓⲙⲓⲁ ⲉϫⲱⲥ ⲛ̅ϥⲙⲉⲧⲁⲛⲟⲉⲓ ϩⲛ̅ ⲧⲥⲩⲛⲁⲝⲓⲥ
ⲛ̅ϥⲁϩⲉⲣⲁⲧϥ̅ ϩⲙ̅ ⲡⲙⲁ ⲛ̅ⲟⲩⲱⲙ. ⲟⲩϣⲁⲁⲣ ⲏ ⲟⲩⲧⲟⲟⲩⲉ ⲏ
ⲟⲩⲙⲟϫϩ̅ ⲏ ⲕⲉⲉⲓⲇⲟⲥ ⲉⲩⲛⲁⲉⲓⲣⲉ ⲛⲁϥ ⲟⲛ ⲕⲁⲧⲁ
ⲛⲉⲓϩⲁⲡⲉⲣϣⲁⲛⲟⲩⲁ ϥⲓ ⲟⲩⲉⲓⲇⲟⲥ ⲉⲙ̅ⲡⲱϥ ⲁⲛ ⲡⲉ
ⲉⲩⲉⲧⲁⲗⲟϥ ⲉⲧⲉϥⲛⲁϩⲃ̅ ϩⲛ̅ ⲧⲥⲩⲛⲁⲝⲓⲥ ⲛ̅ⲟⲩⲥⲟⲡ ⲛ̅ϣⲗⲗ̅
ⲛ̅ϥⲙⲉⲧⲁⲛⲟⲉⲓ ⲛ̅ϥⲁϩⲉⲣⲁⲧϥ̅ ϩⲙ̅ ⲡⲙⲁ ⲛ̅ⲟⲩⲱⲙ.
ⲉⲩϣⲁⲛϭⲛ̅ ⲟⲩⲁ ⲉϥϯⲧⲱⲛ
ⲏ ⲛ̅ϥⲟⲩⲱϩⲙ̅ ⲡⲁⲣⲁ ⲡϣⲓ ⲉⲩⲛⲁⲉⲣⲡⲓⲧⲓⲙⲁ ⲛⲁϥ ⲕⲁⲧⲁ
ⲡⲉⲙⲡϣⲁ ⲙ̅ⲡⲉϥϩⲱⲃ.
ⲉⲛⲟⲩⲣⲱⲙⲉ ⲁⲛ ⲡⲉ ⲉϥⲟ
ⲛ̅ⲕⲣⲟϥ ϩⲛ̅ ⲛⲉϥⲙⲉⲉⲩⲉ. ⲉⲙⲉϥⲟⲃϣϥ̅ ⲉⲡϭⲱϫϥ̅
ⲛ̅ⲧⲉϥⲯⲩⲭⲏ. ⲉⲙⲉϥⲃⲱⲗ ⲉⲃⲟⲗ ϩⲓⲧⲛ̅ ⲛⲉϩⲃⲏⲩⲉ ⲛ̅ⲧⲥⲁⲣⲝ.
ⲉⲙⲉϥⲙⲟⲟϣⲉ ϩⲛ̅ ⲟⲩⲙⲛ̅ⲧⲁⲙⲉⲗⲏⲥ. ⲉⲙⲉϥϭⲉⲡⲏ ⲉϫⲉ ϣⲁϫⲉ
ⲛⲓⲙ ⲛ̅ⲁⲣⲅⲟⲛ. ⲉⲙⲉϥⲡⲉϩⲧ̅ ⲥⲓϣⲉ ⲉⲃⲟⲗ ϩⲁⲣⲱϥ
ⲛ̅ⲟⲩⲃⲗ̅ⲗⲉ ⲉⲙⲉϥⲧⲥⲁⲃⲉ ⲉⲧϥⲯⲩⲭⲏ ⲉϫⲏⲣ. ⲉⲙⲉϥⲃⲱⲗ ⲉⲃⲟⲗ
ϩⲓⲧⲛ̅ ϩⲉⲛⲥⲃⲉ ⲉⲙⲉⲩⲁⲡⲁⲧⲁ ⲛ̅ⲧⲉϥⲯⲩⲭⲏ ϩⲛ̅ ⲟⲩⲇⲱⲣⲟⲛ.
ⲉⲙⲉϥⲃⲱⲗ ⲉⲃⲟⲗ ϩⲛ̅ ⲧϭⲓⲛϣⲁϫⲉ ⲛ̅ⲟⲩϣⲏⲣⲉ ϣⲏⲙ.
ⲉⲙⲉϥⲟⲩⲱϣϥ̅ ϩⲛ̅ ⲟⲩⲑⲗⲩⲯⲓⲥ. ⲉⲙⲉϥⲣ̅ ϩⲟⲧⲉ ϩⲏⲧϥ̅
ⲙ̅ⲡⲙⲟⲩ ⲁⲗⲗⲁ ϩⲏⲧϥ̅ ⲙ̅ⲡⲛⲟⲩⲧⲉ. ⲉⲙⲉϥⲁⲣⲛⲁ ⲉⲧⲃⲉ
ⲑⲟⲧⲉ. ⲉⲙⲉϥⲕⲁ ⲡⲟⲩⲟⲉⲓⲛ ⲛ̅ⲥⲁϥ ⲉⲧⲃⲉ ⲟⲩϩⲣⲉ ⲉⲛϥϣⲟⲟⲡ
ⲁⲛ ϩⲛ̅ ⲟⲩⲙⲛ̅ⲧⲃⲗ̅ⲗⲉ ϩⲙ̅ ⲡⲥⲟⲟⲩⲛ̅ ⲛ̅ⲛⲉⲧⲟⲩⲁⲁⲃ.
ⲉⲛϥϫⲓ ⲛ̅ϭⲟⲛⲥ̅ ⲁⲛ ϩⲛ̅ ⲟⲩⲙⲛ̅ⲧϫⲁⲥⲓϩⲏⲧ
ⲙ̅ⲡⲉⲧϩⲓⲧⲟⲩⲱϥ.