ⲧⲙⲁⲣⲧⲩⲣⲓⲁ ⲙⲡϩⲁⲅⲓⲟⲥ ⲙⲙⲁⲣⲧⲩⲣⲟⲥ ⲙⲡⲉⲭ̅ⲥ̅ ⲓ̅ⲥ̅ ⲁⲩⲱ ⲛⲁⲑⲗⲟⲫⲟⲣⲟⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲧⲁϥϫⲟⲕⲥ ⲉⲃⲟⲗ ⲛⲥⲟⲩϫⲟⲩⲧⲏ ⲙⲡⲉⲃⲟⲧ ϩⲁⲑⲱⲣ ϩⲛ ⲟⲩⲉⲓⲣⲏⲛⲏ ⲛⲧⲉ ⲡⲛⲟⲩⲧⲉ ϩⲁⲙⲏⲛ
Coptic text from the CMCL web site http://rmcisadu.let.uniroma1.it/~cmcl/mercur/0432.html
1. ⲁⲥϣⲱⲡⲉ ⲇⲉ ϩⲛ ⲧⲙⲛⲧⲉⲣⲟ ⲛⲇⲉⲕⲓⲟⲥ ⲙⲡⲉⲩⲟⲉⲓϣ ⲛⲟⲩⲁⲗⲗⲩⲣⲓⲁⲛⲟⲥ ⲉⲩⲟ ⲛⲣⲣⲟ ⲉϫⲛ ⲧⲛⲟϭ ⲙⲡⲟⲗⲓⲥ ϩⲣⲱⲙⲏⲭ ⲁⲩⲕⲱ ⲉϩⲣⲁⲓ ⲛⲟⲩⲇⲱⲅⲙⲁ ⲙⲛ ⲟⲩϣⲟϫⲛⲉ ⲛⲟⲩⲱⲧ ⲉⲧⲣⲉ ⲟⲩⲟⲛ ⲛⲓⲙ ϩⲙ ⲙⲁ ⲛⲓⲙ ⲉⲣ ⲑⲩⲥⲓⲁ ⲛⲛⲉⲩⲛⲟⲩⲧⲉ ⲁⲩⲱ ⲛⲥⲉⲟⲩⲱⲧⲛ ⲛⲁⲩ ⲉⲃⲟⲗ ⲁⲩⲙⲟⲩⲧⲉ ⲉⲛⲥⲩⲅⲕⲗⲏⲧⲓⲕⲟⲥ ⲧⲏⲣⲟⲩ ⲁⲩⲕⲱ ⲛⲁⲩ ⲉϩⲣⲁⲓ ⲛⲛⲉϩⲃⲏⲩⲉ ⲛⲧⲁⲩⲙⲉⲉⲩⲉ ⲉⲣⲟⲟⲩ ϩⲙ ⲡⲉⲓϣⲟϫⲛⲉ ⲛⲟⲩⲱⲧ ⲁⲩⲱ ⲛⲧⲉⲣⲟⲩϩⲉ ⲉⲣⲟⲟⲩ ⲉⲩⲟ ⲛⲟⲩϣⲟϫⲛⲉ ⲛⲟⲩⲱⲧ ⲙⲛ ⲛⲉⲩⲉⲣⲏⲩ ⲉⲩϫⲱ ⲙⲙⲟⲥ ϫⲉ ⲧⲉⲛϣⲡϩⲙⲟⲧ ⲛⲧⲛ ⲛⲛⲟⲩⲧⲉ ⲛⲁⲧⲙⲟⲩ ⲛⲁⲓ ⲛⲧⲁⲩϭⲱⲗⲡ ⲉⲃⲟⲗ ⲛⲟⲩⲟⲛ ⲛⲓⲙ ϩⲛ ⲧⲉⲓⲅⲛⲱⲙⲏ ⲛⲟⲩⲱⲧⲭ ϩⲛ ⲧⲉⲩⲛⲟⲩ ⲉⲧⲙⲙⲁⲩ ⲁⲩⲟⲩⲉϩⲥⲁϩⲛⲉ ⲉⲕⲱ ⲉϩⲣⲁⲓ ⲙⲡⲇⲱⲅⲙⲁ ⲉϥⲥⲏϩ ϩⲛ ⲟⲩⲥϩⲁⲓ ⲛⲧⲉ ⲡⲣⲣⲟ ⲉⲣⲉ ⲛⲥⲩⲅⲕⲗⲏⲧⲓⲕⲟⲥ ⲧⲏⲣⲟⲩ ⲥϩⲁⲓ ϩⲁⲣⲁⲧϥ ⲁⲩⲱ ⲁⲩⲧⲟϭϥ ⲉⲃⲟⲗ ϩⲙ ⲡⲙⲁ ⲛϯϩⲁⲡ ⲙⲡⲣⲣⲟ ⲉϥⲥⲏϩ ϩⲙ ⲡⲉⲓⲧⲩⲡⲟⲥ
2. ⲇⲉⲕⲓⲟⲥ ⲙⲛ ⲟⲩⲁⲗⲗⲩⲣⲓⲁⲛⲟⲥ ⲛⲣⲣⲱⲟⲩ ⲛⲁⲩⲧⲱⲕⲣⲁⲧⲱⲣ ⲛⲣⲉϥϫⲣⲟ ⲛⲉⲩⲥⲉⲃⲏⲥ ⲛⲧⲟⲟⲩ ⲙⲛ ⲛⲉⲩⲥⲩⲅⲕⲗⲏⲧⲓⲕⲟⲥ ⲧⲏⲣⲟⲩ ⲉⲧϩⲛ ⲧⲡⲟⲗⲓⲥ ϩⲣⲱⲙⲏ ⲉⲩⲥϩⲁⲓ ⲛⲟⲩⲟⲛ ⲛⲓⲙ ϫⲉ ⲉⲓⲥ ϩⲏⲏⲧⲉ ⲧⲛⲟⲩⲱⲛϩ ⲛⲏⲧⲛ ⲉⲃⲟⲗ ⲛⲛⲉⲛⲧⲁⲩⲣ ⲁⲛⲁⲛ ⲙⲡⲉⲛⲙⲧⲟ ⲉⲃⲟⲗ ⲉⲡⲓⲇⲏ ⲁⲛϩⲉ ⲉⲣⲟⲥ ϫⲓⲛ ⲉϣⲟⲣⲡ ϫⲉ ⲛⲛⲟⲩⲧⲉ ⲛⲛⲉⲓⲟⲧⲉ ⲛⲧⲟⲟⲩ ⲛⲉⲧⲧⲉⲛϩⲟ ⲛⲧⲙⲛⲧⲉⲣⲟ ⲁⲩⲱ ⲉⲧⲭⲁⲣⲓⲍⲉ ⲛⲛⲉⲧϩⲁ ⲡⲉⲛⲁⲙⲁϩⲧⲉ ⲧⲏⲣⲟⲩⲭ ⲉⲁⲛⲉⲓⲙⲉ ⲇⲉ ⲉⲛⲉⲩⲇⲱⲣⲉⲁⲙⲛ ⲛⲉⲩⲙⲛⲧⲣⲉϥⲉⲣⲡⲉⲧⲛⲁⲛⲟⲩϥ ⲕⲁⲧⲁ ⲡⲉⲛⲧⲁⲛϫⲟⲟϥ ⲙⲁⲗⲗⲟⲛ ⲇⲉ ⲁⲛⲁⲡⲟⲗⲁⲩⲉ ⲙⲡⲉϫⲣⲟ ⲉⲃⲟⲗ ϩⲓⲧⲟⲟⲧⲟⲩ ⲉϩⲟⲩⲛ ⲉϩⲉⲑⲛⲟⲥ ⲛⲓⲙⲭ ⲟⲩⲙⲟⲛⲟⲛ ⲇⲉ ⲁⲗⲗⲁ ⲁⲩϯ ⲛⲁⲛ ⲛϩⲉⲛⲕⲁⲣⲡⲟⲥ ⲙⲙⲓⲛⲉ ⲛⲓⲙ ϩⲓⲧⲛ ⲧⲕⲉⲣⲁⲥⲓⲥ ⲉⲧⲛⲁⲛⲟⲩⲥ ⲛⲧⲉ ⲡⲁⲏⲣⲭ ⲉⲁⲛⲉⲓⲙⲉ ⲇⲉ ϩⲛ ⲟⲩⲱⲣϫ ϫⲉ ⲛⲧⲟⲟⲩ ⲛⲉ ⲛⲣⲉϥⲉⲣⲡⲉⲧⲛⲁⲛⲟⲩϥ ⲁⲩⲱ ⲉⲧⲧⲁϩⲟ ⲉⲣⲁⲧϥ ⲙⲡⲕⲟⲥⲙⲟⲥ ⲧⲏⲣϥⲭ ⲉⲧⲃⲉ ⲡⲁⲓ ⲁⲛⲕⲱ ⲉϩⲣⲁⲓ ⲙⲡⲉⲓⲇⲱⲅⲙⲁ ϩⲛ ⲟⲩϣⲟϫⲛⲉ ⲛⲟⲩⲱⲧⲭ ⲁⲛⲟⲛ ⲙⲛ ⲛⲉⲛⲥⲩⲅⲕⲗⲏⲧⲓⲕⲟⲥ ⲧⲏⲣⲟⲩ ϩⲛ ⲟⲩⲥⲡⲟⲩⲇⲏ ⲉⲛⲁϣⲱⲥ ⲉⲧⲣⲉ ⲣⲱⲙⲉ ⲛⲓⲙ ϩⲙ ⲙⲁ ⲛⲓⲙ ⲛϩⲙϩⲁⲗ ⲙⲛ ⲛⲣⲙϩⲉ ⲛⲣⲉⲙⲅⲙⲁⲟ ⲙⲛ ⲛⲙⲙⲁⲧⲟⲓ ⲙⲛ ⲙⲡⲁⲅⲁⲛⲟⲥ ⲉⲧⲣⲉⲩⲉⲓⲛⲉ ⲉϩⲟⲩⲛ ⲛⲛⲛⲟⲩⲧⲉ ⲛϩⲉⲛⲑⲩⲥⲓⲁ ⲉⲩϣⲏⲡ ⲁⲩⲱ ⲉⲧⲣⲉⲩⲱϣⲧ ⲛⲁⲩ ϩⲛ ϩⲉⲛⲑⲩⲥⲓⲁ ⲙⲛ ϩⲉⲛⲥⲟⲡⲥ ⲉⲣϣⲁⲛ ⲟⲩⲁ ϭⲉ ⲥⲧⲟ ⲉⲃⲟⲗ ⲙⲡⲉⲛⲧⲟⲅⲙⲁ ⲉⲧⲟⲩⲁⲁⲃ ⲡⲁⲓ ⲛⲧⲁⲛⲧⲟϭϥ ⲉⲃⲟⲗ ϩⲛ ⲟⲩϣⲟϫⲛⲉ ⲛⲟⲩⲱⲧⲭ ⲡⲉⲛⲕⲣⲁⲧⲟⲥ ⲕⲉⲗⲉⲩⲉ ⲉⲧⲣⲉⲩⲉⲧⲡ ⲡⲁⲓ ⲛⲧⲉⲓⲙⲓⲛⲉ ⲉϩⲟⲩⲛ ⲉⲡⲉϣⲧⲉⲕⲟ ⲛⲕⲁⲕⲉ ⲛⲥⲉⲧⲁⲁϥ ⲉⲧⲟⲟⲧⲟⲩ ⲛϩⲛⲃⲁⲥⲁⲛⲟⲥ ⲉⲩϣⲟⲃⲉ ⲁⲩⲱ ⲉϣⲱⲡⲉ ⲙⲉⲛ ⲉϥϣⲁⲛⲥⲱⲧⲙ ⲛⲥⲁ ⲡⲉⲛⲕⲣⲁⲧⲟⲥ ⲙⲛ ⲡⲛⲡⲣⲟⲥⲧⲁⲅⲙⲁⲭ ⲉϥⲉϫⲓ ⲉⲃⲟⲗ ϩⲓⲧⲟⲟⲧⲛ ⲛϩⲉⲛⲛⲟϭ ⲛϯⲙⲏ ⲉϣⲱⲡⲉ ⲇⲉ ⲉϥϣⲁⲛⲣ ⲁⲧⲥⲱⲧⲙ ⲙⲛⲛⲥⲁ ⲛⲉⲓⲃⲁⲥⲁⲛⲟⲥ ⲧⲏⲣⲟⲩⲭ ⲉⲩⲉⲡⲁⲣⲁⲇⲓⲇⲟⲩ ⲙⲙⲟϥ ⲉⲧⲟⲟⲧϥ ⲛⲧⲥⲏϥⲉ ⲏ ⲛⲥⲉⲛⲟϫϥ ⲉⲡϣⲓⲕ ⲛⲙⲙⲟⲩⲛⲉⲓⲟⲟⲩⲉ ⲏ ⲛⲥⲉⲧⲁⲁϥ ⲛϩⲣⲉ ⲛⲛⲉⲑⲩⲣⲓⲟⲛ ⲙⲛ ⲛϩⲁⲗⲁⲧⲉ ⲛϩⲟⲩⲟ ⲇⲉ ⲛⲉⲧⲟⲩⲙⲟⲩⲧⲉ ⲉⲣⲟⲟⲩ ϫⲉ ⲛⲉⲭⲣⲏⲥⲧⲓⲁⲛⲟⲥ ⲉⲩⲉϣⲱⲡⲉ ϩⲁ ⲧⲉⲓⲁⲡⲟⲫⲁⲥⲓⲥ ⲛⲧⲉⲓⲙⲓⲛⲉ ⲡⲉⲧⲛⲁⲥⲱⲧⲙ ⲇⲉ ϩⲱⲱϥ ⲛⲥⲁ ⲡⲉⲛⲡⲣⲟⲥⲧⲁⲅⲙⲁ ⲉⲩⲉⲱⲛϩ ϩⲛ ⲟⲩⲙⲛⲧⲙⲁⲕⲁⲣⲓⲟⲥ
3. ⲛⲧⲉⲣⲟⲩⲧⲱϭⲉ ⲇⲉ ⲉⲃⲟⲗ ⲛⲛⲉⲥϩⲁⲓ ⲙⲡⲣⲣⲟ ⲁⲧⲡⲟⲗⲓⲥ ⲧⲏⲣⲥ ϩⲣⲱⲙⲏ ⲇⲙⲟⲩϩ ⲛϩⲟⲧⲉ ϩⲓ ϣⲧⲟⲣⲧⲣⲭ ⲟⲩⲙⲟⲛⲟⲛ ⲇⲉ ϩⲣⲱⲙⲏ ⲁⲗⲗⲁ ⲁⲛⲕⲉⲡⲟⲗⲓⲥ ⲧⲏⲣⲟⲩ ⲙⲟⲩϩ ⲛϩⲟⲧⲉ ϩⲓ ϣⲧⲟⲣⲧⲣ ϫⲉ ⲁⲩϫⲟⲟⲩ ϣⲁⲣⲟⲟⲩ ⲙⲡⲉⲓⲡⲣⲟⲥⲧⲁⲅⲙⲁ ⲛⲟⲩⲱⲧ ⲁⲩⲱ ⲛⲁⲣⲭⲱⲛ ⲕⲁⲧⲁ ⲡⲟⲗⲓⲥ ⲁⲩⲟⲩⲉϩⲥⲁϩⲛⲉ ⲛⲙⲙⲏⲏϣⲉ ⲉⲧⲣⲉⲩϫⲱⲕ ⲉⲃⲟⲗ ⲛⲉⲛⲧⲁⲓⲟⲩⲉϩⲥⲁϩⲛⲉ ⲙⲙⲟⲟⲩ ⲛⲁⲩ ϩⲛ ⲟⲩϭⲉⲡⲏ
4. ⲁⲥϣⲱⲡⲉ ⲇⲉ ⲙⲡⲉⲩⲟⲉⲓϣ ⲉⲧⲙⲙⲁⲩ ⲁⲩⲡⲟⲗⲁⲓⲙⲟⲥ ⲧⲱⲟⲩⲛ ⲉϫⲙ ⲡⲣⲣⲟ ⲛⲛⲉϩⲣⲱⲙⲁⲓⲟⲥ ϩⲓⲧⲛ ⲛⲃⲁⲣⲃⲁⲣⲟⲥ ⲁⲩⲥⲟⲃⲧⲉ ϩⲱⲟⲩ ⲛϭⲓ ⲛⲣⲣⲱⲟⲩ ⲙⲡⲉⲩⲥⲧⲣⲁⲧⲉⲩⲙⲁ ⲉⲧⲣⲉⲩⲡⲟⲗⲩⲙⲉⲓ ⲛⲙⲙⲁⲩ ⲁⲩⲱ ⲁⲩⲟⲩⲉϩⲥⲁϩⲛⲉ ⲉⲧⲣⲉ ⲛⲁⲣⲓⲑⲙⲟⲥ ⲛⲙⲡⲟⲗⲓⲥ ⲉⲓ ⲛⲥⲉϯ ⲧⲟⲟⲧⲟⲩ ⲛⲙⲙⲁⲩ ⲛⲧⲉⲣⲟⲩⲉⲓ ⲇⲉ ⲉⲃⲟⲗ ϩⲛ ⲧⲟⲩⲉⲓ ⲧⲟⲩⲉⲓ ⲛⲙⲡⲟⲗⲓⲥ ⲉⲩⲥⲃⲧⲱⲧ ⲉⲡⲡⲟⲗⲁⲓⲙⲟⲥ ϩⲛ ⲟⲩⲥⲡⲟⲩⲇⲏⲭ ⲁϥⲉⲓ ϩⲱⲱϥ ⲛϭⲓ ⲡⲁⲣⲓⲑⲙⲟⲥ ⲉⲛⲛⲉⲧⲟⲩⲙⲟⲩⲧⲉ ⲉⲣⲟⲟⲩ ϫⲉ ⲙⲁⲣⲧⲩⲥⲓⲟⲛⲭ ⲛⲉⲧϣⲟⲟⲡ ϩⲛ ⲧϣⲟⲣⲡ ⲉⲛϩⲁⲣⲙⲏⲛⲓⲁ ⲉⲩϩⲁⲣⲁⲧϥ ⲛⲟⲩⲧⲣⲓⲃⲟⲩⲛⲟⲥ ⲉⲡⲉϥⲣⲁⲛ ⲡⲉ ⲃⲁⲣⲧⲟⲛⲓⲕⲟⲥ ⲇⲉⲕⲓⲟⲥ ⲇⲉ ⲁϥⲉⲓ ⲉⲃⲟⲗ ⲉⲡⲡⲟⲗⲁⲓⲙⲟⲥⲭ ⲁⲟⲩⲁⲗⲗⲩⲣⲓⲁⲛⲟⲥ ϭⲱ ϩⲛ ⲧⲡⲟⲗⲓⲥ ϩⲣⲱⲙⲏ ⲉϥⲇⲓⲏⲕⲉⲓ ⲛⲛⲉϩⲃⲏⲩⲉ ⲛⲧⲙⲛⲧⲉⲣⲟ.
5. ⲡⲡⲟⲗⲁⲓⲙⲟⲥ ⲇⲉ ⲁϥⲧⲁϫⲣⲟ ϩⲛ ⲧⲙⲏⲧⲉ ⲛⲛⲉⲃⲁⲣⲃⲁⲣⲟⲥ ⲙⲛ ⲛⲉϩⲣⲱⲙⲉⲟⲥ ⲁⲩⲱ ⲁⲩⲁϩⲉⲣⲁⲧⲟⲩ ⲙⲛ ⲛⲉⲩⲉⲣⲏⲩ ⲛⲧⲉⲣⲟⲩⲙⲟⲩⲛ ⲇⲉ ⲉⲃⲟⲗ ⲛⲧⲉⲓϩⲉ ⲛⲟⲩⲙⲏⲏϣⲉ ⲛϩⲟⲟⲩ ⲟⲩⲁ ⲇⲉ ⲉⲃⲟⲗ ϩⲛ ⲛⲙⲙⲁⲧⲟⲓ ⲛⲛⲉⲧⲟⲩⲙⲟⲩⲧⲉ ⲉⲣⲟⲟⲩ ϫⲉ ⲙⲁⲣⲧⲩⲥⲓⲟⲛ ⲉⲡⲉϥⲣⲁⲛ ⲡⲉ ⲙⲉⲣⲕⲟⲩⲣⲓⲟⲥ ⲁϥⲛⲁⲩ ⲉⲩⲣⲱⲙⲉ ⲉϥϫⲟⲥⲉ ⲉⲩⲉⲛ ϩⲉⲛϩⲃⲥⲱ ⲉⲩⲡⲣⲓⲱⲟⲩ ⲧⲟ ϩⲓⲱⲱϥⲭ ⲁϥⲁⲙⲁϩⲧⲉ ⲛⲟⲩⲥⲏϥⲉ ⲉⲥⲧⲟⲕⲙ ϩⲛ ⲧⲉϥϭⲓϫ ⲛⲟⲩⲛⲁⲙ ⲁⲩⲱ ⲛⲉϥϫⲱ ⲙⲙⲟⲥ ⲛⲁϥ ϫⲉ ⲙⲉⲣⲕⲟⲩⲣⲓⲉ ⲙⲡⲉⲣⲣ ϩⲟⲧⲉ ⲟⲩⲇⲉ ⲙⲡⲉⲣϣⲗⲁϩ ⲛⲧⲁⲩⲧⲛⲛⲟⲟⲩⲧ ⲅⲁⲣ ⲉⲃⲟⲏⲑⲉⲓ ⲉⲣⲟⲕ ⲁⲩⲱ ⲉⲟϣⲟⲛϩⲕ ⲉⲃⲟⲗ ⲉⲕⲟ ⲛⲣⲉϥϫⲣⲟ ϫⲓⲊ ϭⲉ ⲛⲁⲕ ⲛⲧⲉⲓⲥⲏϥⲉ ⲉⲃⲟⲗ ϩⲓⲧⲟⲟⲧ ⲛⲅⲃⲱⲕ ⲉⲃⲟⲗ ϣⲁ ⲛⲃⲁⲣⲃⲁⲣⲟⲥ ⲁⲩⲱ ⲉⲕϣⲁⲛϫⲣⲟ ⲙⲡⲣⲉⲣ ⲡⲱⲃϣ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲡⲁⲓ ⲇⲉ ⲛⲧⲉⲣⲉϥϣⲱⲡⲉ ϩⲛ ⲟⲩⲉⲕⲥⲧⲁⲥⲓⲥ ⲛⲉϥⲙⲉⲉⲩⲉ ϫⲉ ⲟⲩⲁ ⲛⲛⲁⲣⲭⲱⲛ ⲛⲧⲉ ⲡⲣⲣⲟ ⲡⲉⲧϣⲁϫⲉ ⲛⲙⲙⲁϥ ⲛⲧⲉⲣⲉϥϫⲓ ⲇⲉ ⲛⲧⲥⲏϥⲉ ⲁϥⲙⲟⲩϩ ⲉⲃⲟⲗ ϩⲙ ⲡⲉⲡⲛⲁ ⲉⲧⲟⲩⲁⲁⲃ ⲁϥⲃⲱϭⲉ ϩⲣⲁⲓ ⲉϫⲛ ⲛⲃⲁⲣⲃⲁⲣⲟⲥ ⲁϥϫⲱⲧⲉ ⲉϩⲟⲩⲛ ϩⲛ ⲧⲉⲩⲙⲏⲧⲉ ⲁϥⲙⲟⲩⲟⲩⲧ ⲙⲡⲛⲟϭ ⲉⲧⲛϩⲏⲧⲟⲩ ⲁⲩⲱ ϩⲛⲙⲏⲏϣⲉ ⲉⲛⲁϣⲱⲟⲩ ϩⲱⲥⲧⲉ ⲛⲧⲉ ⲡⲉϥϭⲃⲟⲓ ϩⲓⲥⲉ ⲉϥϩⲓⲟⲩⲉ ⲁⲩⲱ ϩⲓⲧⲙ ⲡⲉⲥⲛⲟϥ ⲉⲧⲛⲁϣⲱϥ ⲛⲧⲉ ⲧⲉϥϭⲓϫ ⲱϭⲉⲣ ⲉϩⲟⲩⲛ ⲉⲧⲧⲱⲣⲉ ⲛⲧⲥⲏϥⲉ ⲁⲩⲱ ⲧⲁⲓⲧⲉ ⲛⲧⲁ ⲛⲃⲁⲣⲃⲁⲣⲟⲥ ϭⲱⲧⲡ ⲁⲩⲡⲱⲧ ϩⲁⲑⲏ ⲛⲛⲉϩⲣⲱⲙⲁⲓⲟⲥ
6. ⲇⲉⲕⲓⲟⲥ ⲇⲉ ⲡⲣⲣⲟ ⲛⲧⲉⲣϥⲉⲓⲙⲉ ⲉⲧⲙⲛⲧϫⲱⲱⲣⲉ ⲙⲡⲉⲓⲣⲱⲙⲉ ⲛϫⲱⲱⲣⲉ ⲁϥⲙⲟⲩⲧⲉ ⲉⲣⲟϥ ⲁϥϯ ⲛⲁϥ ⲛⲟⲩⲁⲝⲓⲱⲙⲁ ⲁϥⲁⲁϥ ⲛⲥⲧⲣⲁⲧⲉⲗⲁⲧⲏⲥ ⲁⲩⲱ ⲛⲁⲣⲭⲱⲛ ⲉϩⲣⲁⲓ ⲉϫⲙ ⲡⲉⲥⲧⲣⲁⲧⲉⲩⲙⲁ ⲧⲏⲣϥ ⲇⲉⲕⲓⲟⲥ ⲇⲉ ⲛⲉϥⲙⲉⲉⲩⲉ ϫⲉ ⲛⲧⲁϥϫⲣⲟ ϩⲛ ⲍ ⲧϭⲟⲙ ⲛⲛⲉϥⲛⲟⲩⲧⲉ ⲁϥⲣⲁϣⲉ ⲉⲡⲉϩⲟⲩⲟ ⲁⲩⲱ ϩⲛⲭⲣⲏⲙⲁ ⲁϥⲥⲟⲣⲟⲩ ⲉϫⲛ ⲙⲙⲁⲧⲟⲓ ⲁϥϫⲟⲟⲩ ⲙⲡⲟⲩⲁ ⲡⲟⲩⲁ ⲛⲛⲁⲣⲓⲑⲙⲟⲥ ⲉⲡⲉϥⲧⲟⲡⲟⲥ ⲛⲧⲟϥ ⲇⲉ ⲛⲉϣⲁϥⲉⲣ ϣⲁ ϩⲙ ⲡⲟⲗⲓⲥ ⲛⲓⲙ ⲛⲧⲁϥⲡⲁⲣⲁⲅⲉ ⲙⲙⲟⲟⲩ ⲉϥⲃⲏⲕ ⲉϩⲣⲱⲙⲏ
7. ϩⲣⲁⲓ ⲇⲉ ϩⲛ ⲟϣⲟⲩϣⲏ ⲉⲣⲉ ⲡⲉⲥⲧⲣⲁⲧⲉⲩⲙⲁ ⲧⲏⲣϥ ⲟⲃϣ ϩⲁ ⲡϩⲓⲛⲏⲃ ⲁϥⲁϩⲉⲣⲁⲧϥ ϩⲁϫⲛ ⲙⲉⲣⲕⲟⲩⲣⲓⲟⲥ ⲛϭⲓ ⲟⲩⲁⲅⲅⲉⲗⲟⲥ ϩⲙ ⲡⲉⲥⲙⲟⲧ ⲙⲡⲣⲱⲙⲉ ⲛⲧⲁϥⲛⲁⲩ ⲉⲣⲟϥ ϩⲙ ⲡⲡⲟⲗⲁⲓⲙⲟⲥ ⲁⲩⲱ ⲁϥⲧⲉⲃⲥ ⲡⲉϥⲥⲡⲓⲣ ⲁϥⲧⲟⲩⲛⲟⲥϥ ⲛⲧⲉⲣⲉϥⲛⲁⲩ ⲇⲉ ⲉⲣⲟϥ ⲁϥϣⲱⲡⲉ ϩⲛ ⲟⲩϩⲟⲧⲉ ⲁϥϭⲱ ⲉϥⲟⲛϣ ⲡⲉϫⲉ ⲡⲁⲅⲅⲉⲗⲟⲥ ⲇⲉ ⲛⲁϥ ϫⲉ ⲙⲉⲣⲕⲟⲩⲣⲓⲉ ⲉⲛⲉⲕⲉⲓⲣⲉ ⲙⲡⲙⲉⲉⲩⲉ ϫⲉ ⲟⲩ ⲡⲉⲛⲧⲁⲓϫⲟⲟϥ ⲉⲣⲟⲕ ϩⲙ ⲡⲉϩⲟⲟⲩ ⲙⲡⲡⲟⲗⲁⲓⲙⲟⲥ ϭⲱϣⲧ ⲙⲡⲉⲣⲉⲣⲡⲱⲃϣ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ϩⲁⲡⲥ ⲅⲁⲣ ⲉⲣⲟⲕ ⲡⲉ ⲉⲧⲣⲉⲕⲁⲅⲱⲛⲓⲍⲉ ⲉϫⲙ ⲡⲉϥⲣⲁⲛ ⲕⲁⲗⲱⲥ ⲁⲩⲱ ⲛⲅϫⲓ ⲙⲡⲉⲕⲗⲟⲙ ⲏⲙⲡⲉϫⲣⲟ ⲛⲧⲙⲛⲧⲉⲣⲟ ⲛⲙⲡⲏⲩⲉⲭ ⲡⲁⲓ ⲛⲧⲁϥⲥⲃⲧⲱⲧϥ ⲛⲛⲉⲧⲙⲉ ⲙⲙⲟϥ ⲧⲏⲣⲟⲩ ⲡⲙⲁⲕⲁⲣⲓⲟⲥ ⲇⲉ ⲛⲧⲉⲣⲉ ⲡⲉϥϩⲏⲧ ϣⲱⲡⲉ ⲙⲙⲟϥ ⲁϥⲉⲣ ⲡⲙⲉⲉⲩⲉ ⲙⲡϣⲁϫⲉ ⲁⲩⲱ ⲁϥⲣ ϣⲡⲏⲣⲉ ⲛⲧⲙⲛⲧⲙⲁⲓⲣⲱⲙⲉ ⲙⲡⲛⲟⲩⲧⲉ ⲁϥⲥⲱⲧⲉ ⲅⲁⲣ ⲛⲧⲡⲓⲥⲧⲓⲥ ⲛⲛⲉⲭⲣⲏⲥⲧⲓⲁⲛⲟⲥ ϩⲓⲧⲛ ⲛⲉϥⲓⲟⲧⲉ ⲡⲉϥⲓⲱⲧ ⲅⲁⲣ ⲡⲉ ⲕⲟⲣⲧⲓⲁⲛⲟⲥ ⲛⲉϥⲟⲡ ⲉⲙⲡⲣⲓⲙⲓⲕⲓⲣⲓⲟⲥ ⲉⲡⲉⲓⲁⲣⲓⲑⲙⲟⲥ ⲛⲟⲩⲱⲧⲭ ⲡϣⲏⲣⲉ ⲇⲉ ϣⲏⲙ ⲛⲉϥⲛⲁⲣϫⲟⲩⲱⲧⲉ ⲛⲣⲟⲙⲡⲉ ⲛⲉⲁϥⲥⲱⲧⲙ ⲅⲁⲣ ⲉⲃⲟⲗ ϩⲓⲧⲙ ⲡⲉϥⲓⲱⲧ ϫⲉ ⲛⲁⲓⲁⲧϥ ⲙⲡⲉⲧⲛⲁⲉⲣ ⲙⲁⲧⲟⲓ ϩⲁⲣⲁⲧϥ ⲙⲡⲣⲣⲟ ⲛⲧⲡⲉⲭ ϥⲛⲁⲭⲁⲣⲓⲍⲉ ⲛⲁϥ ⲛⲟⲩⲁⲝⲓⲱⲙⲁ ⲉⲙⲉϥⲟⲩⲉⲓⲛⲉ ⲁⲩⲱ ϥⲛⲁⲙⲓϣⲉ ⲉϩⲣⲁⲓ ⲉϫⲱϥ ⲛⲁϩⲣⲛ ⲛⲉϥϫⲓⲛⲁⲉⲉⲩ ⲡⲣⲣⲟ ⲅⲁⲣ ⲉⲧⲙⲙⲁⲩ ⲛⲧⲟϥ ⲡⲉⲛⲧⲁϥⲧⲁⲑⲙⲓⲟ ⲙⲡⲧⲏⲣϥ ϩⲙ ⲡⲉϥϣⲁϫⲉ ⲧⲡⲉ ⲙⲉⲛ ⲁϥⲧⲁϩⲟⲥ ⲉⲣⲁⲧⲥ ⲛⲑⲉ ⲛⲟⲩⲕⲩⲡⲏ ⲉⲁϥⲕⲟⲥⲙⲉⲓ ⲙⲙⲟⲥ ϩⲛ ϩⲛⲥⲓⲟⲩ ⲉⲩⲉⲣⲟⲩⲟⲉⲓⲛⲭ ⲡⲕⲁϩ ⲇⲉ ϩⲛ ϩⲉⲛϩⲣⲏⲣⲉ ⲉⲛⲉⲥⲱⲟⲩ ⲉⲩϣⲉϣ ⲥϯⲛⲟⲩⲃⲉ ⲉⲃⲟⲗ ⲉⲩⲛⲁϣⲱⲡⲉ ⲛⲥⲟⲗⲥⲉⲗ ⲙⲛ ⲟⲩⲧⲁⲗϭⲟ ⲛⲛⲣⲱⲙⲉⲭ ⲑⲁⲗⲁⲥⲥⲁ ⲇⲉ ϩⲱⲱⲥ ⲉⲧⲣⲉ ⲛⲉⲁⲏⲩ ⲥϭⲏⲣ ⲛϩⲏⲧⲥⲭ ⲁⲩⲱ ⲁϥⲕⲁⲁⲥ ⲙⲙⲁⲛⲥⲁⲛϣ ⲛⲛⲧⲃⲧ ⲁⲩⲱ ϫⲉ ⲛⲧⲟϥ ⲡⲉⲧⲛⲏⲩ ⲉⲕⲣⲓⲛⲉ ⲛⲛⲉⲧⲟⲛϩ ⲙⲛ ⲛⲉⲧⲙⲟⲟⲩⲧ ⲛϥϯ ⲙⲡⲟⲩⲁ ⲡⲟⲩⲁ ⲕⲁⲧⲁ ⲛⲉϥϩⲃⲏⲩⲉ ⲛⲧⲉⲣⲉϥⲉⲣ ⲡⲙⲉⲉⲩⲉ ⲇⲉ ⲛϭⲓ ⲡϩⲁⲅⲓⲟⲥ ⲛⲛϣⲁϫⲉ ⲙⲡⲉϥⲉⲓⲱⲧ ϩⲣⲁⲓ ⲛϩⲏⲧϥ ⲁⲩⲱ ⲡϭⲱⲗⲡ ⲉⲃⲟⲗ ⲛⲧⲁϥⲛⲁⲩ ⲉⲣⲟϥⲭ ⲁϥϣⲱⲡⲉ ϩⲛ ⲟⲩⲛⲟϭ ⲛⲧⲱⲃⲥ ⲁϥⲁⲣⲭⲉⲓ ⲛⲣⲓⲙⲉ ⲁⲩⲱ ⲉⲁϣⲁϩⲟⲙ ⲁⲩⲱ ⲡⲉϫⲁϥ ⲛⲧⲉⲓϩⲉ ϫⲉ ⲟⲩⲟⲓ ⲛⲁⲓ ⲁⲛⲟⲕ ⲡⲉⲓⲣⲉϥⲉⲣⲛⲟⲃⲉ ϫⲉ ⲉⲓⲟ ⲛⲑⲉ ⲛⲟⲩⲕⲗⲁⲧⲟⲥ ⲛⲁⲧⲕⲁⲣⲡⲟⲥ ⲉⲁϥϣⲟⲟⲩⲉ ⲉⲃⲟⲗ ϩⲛ ⲟⲩϣⲏⲛ ⲉϥⲟⲧⲡ ⲛⲕⲁⲣⲡⲟⲥ ⲉⲙⲛⲧϥ ⲛⲟⲩⲛⲉ ⲙⲙⲁⲩ ϩⲙ ⲡⲥⲟⲟⲩⲛ ⲛⲧⲉ ⲡⲛⲟⲩⲧⲉ
8. ⲉⲧⲓ ⲇⲉ ⲉϥϣⲁϫⲉ ϩⲙ ⲡⲉⲓϣⲁϫⲉ ⲛⲧⲉⲩⲛⲟⲩ ⲁⲡⲣⲣⲟ ⲧⲛⲛⲟⲟⲩ ⲙⲙⲁⲧⲟⲓ ⲥⲛⲁⲩ ϩⲛ ⲛⲉⲧⲟⲩⲙⲟⲩⲧⲉ ⲉⲣⲟⲟⲩ ϫⲉ ⲥⲉⲗⲉⲛⲧⲓⲁⲣⲓⲟⲥ ⲙⲛ ϩⲉⲛⲕⲟⲟⲩⲉ ⲛⲙⲙⲁⲩ ⲉⲧⲣⲉⲩⲙⲟⲩⲧⲉ ⲉⲣⲟϥⲭ ⲉⲃⲟⲗ ϫⲉ ⲛⲧⲟϥ ⲡⲉⲧⲟ ⲛⲁϥ ⲛⲣⲉϥϫⲓϣⲟϫⲛⲉ ⲁϥⲡⲁⲣⲁⲓⲧⲉⲓ ⲇⲉ ⲉⲧⲙⲃⲱⲕ ⲉϥϫⲱ ⲙⲙⲟⲥ ϫⲉ ⲡⲁⲥⲱⲙⲁ ⲟ ⲛⲁⲧϭⲟⲙ ⲡⲣⲣⲟ ⲇⲉ ⲁϥⲕⲁⲣⲱϥ ⲙⲡⲉϩⲟⲟⲩ ⲉⲧⲙⲙⲁⲩⲭ ⲙⲡⲉϥⲣⲁⲥⲧⲉ ⲇⲉ ⲟⲛ ⲁϥⲁⲟⲟⲩ ⲛⲥⲱϥ ϩⲟⲙⲁⲓⲟⲥ ⲛϭⲓ ⲡⲇⲓⲕⲁⲓⲟⲥ ⲛⲧⲉⲣⲉϥⲉⲓ ⲇⲉ ϣⲁⲣⲟϥ ⲁⲩⲁⲓ ϣⲟϫⲡⲉ ⲙⲛ ⲛⲉⲩⲉⲣⲏⲩ ⲙⲡϩⲱⲃ ⲉⲧⲉⲛⲧⲙⲏⲧⲉ ⲡⲉϫⲉ ⲡⲣⲣⲟ ⲛⲁϥ ϫⲉ ⲙⲁⲣⲟⲛ ⲉϩⲟⲩⲛ ⲉⲡⲉⲣⲡⲉ ⲛⲧⲁⲣⲧⲩⲙⲓⲥ ⲛⲧⲉⲛⲧⲁⲗⲟ ⲛⲁⲥ ⲉϩⲣⲁⲓ ⲛϩⲉⲛⲑⲩⲥⲓⲁ ⲛⲧⲉⲣⲉϥⲙⲟⲟϣⲉ ⲇⲉ ⲛϭⲓ ⲡⲣⲣⲟ ⲁⲩⲛⲟϭ ⲙⲙⲏⲏϣⲉ ⲟⲩⲁϩϥ ⲛⲥⲱϥ ⲁⲡⲙⲁⲕⲁⲣⲓⲟⲥ ⲇⲉ ⲙⲉⲣⲕⲟⲩⲣⲓⲟⲥ ⲕⲟⲧϥ ⲉⲡⲁϩⲟⲩ ⲁϥⲃⲱⲕ ⲁϥϩⲟⲡϥ ϩⲙ ⲡⲉⲡⲣⲉⲧⲱⲣⲓⲟⲛ
9. ⲟⲩⲁ ⲇⲉ ⲉⲃⲟⲗ ϩⲛ ⲛⲉⲛⲟϭ ⲙⲡⲣⲣⲟ ⲁϥⲇⲓⲁⲃⲁⲗⲉ ⲙⲙⲟϥ ⲉϥϫⲱ ⲙⲙⲟⲥ ϫⲉⲡⲛⲟϭ ⲛⲣⲣⲟ ⲛⲣⲉϥϫⲣⲟ ⲁⲩⲱ ⲉⲧⲁⲙⲁϩⲧⲉ ⲁⲩⲱ ⲛⲉⲩⲥⲉⲃⲏⲥ ⲡⲉⲛⲧⲁⲩⲥⲟⲧⲡϥ ⲉⲃⲟⲗ ⲓⲁϩⲓⲧⲛ ⲛⲛⲟⲩⲧⲉ ⲉⲧⲣⲉϥⲇⲓⲏⲕⲉⲓ ⲛⲧⲙⲛⲧⲉⲣⲟ ⲛⲛⲉϩⲣⲱⲙⲁⲓⲟⲥⲭ ⲙⲁϯ ⲑⲉ ⲛⲁⲓ ⲉⲧⲣⲁϣⲁϫⲉ ⲛⲅⲥⲱⲧⲙ ⲉⲣⲟⲓ ϩⲛ ⲟⲩⲙⲛⲧⲣⲙⲣⲁϣ ⲙⲉⲣⲕⲟⲩⲣⲓⲟⲥ ⲡⲁⲓ ⲛⲧⲁ ⲧⲉⲕⲟⲩⲛⲁⲙ ϫⲁⲥⲧϥ ⲁⲩⲱ ⲁⲕϯ ⲉⲟⲟⲩ ⲛⲁϥ ϩⲛ ⲧⲙⲛⲧⲉⲣⲟ ⲛⲛⲉϩⲣⲱⲙⲁⲓⲟⲥ ⲙⲡⲉϥⲉⲓ ⲛⲙⲙⲁⲛ ⲕⲁⲧⲁ ⲡⲉⲕⲟⲩⲉϩⲥⲁϩⲛⲉ ⲉⲧⲣⲉϥⲑⲩⲥⲓⲁⲍⲉ ϩⲙ ⲡⲉⲣⲡⲉ ⲛⲧⲛⲟϭ ⲛⲛⲟⲩⲧⲉ ⲧⲁⲣⲧⲩⲙⲓⲥ ⲛϥⲧⲁⲗⲟ ϩⲁ ⲡⲉⲕⲁⲙⲁϩⲧⲉ ⲁϥⲟⲩⲱϣⲃ ⲛϭⲓ ⲡⲣⲣⲟ ⲡⲉϫⲁϥ ϫⲉ ⲛⲓⲙ ⲡⲉ ⲡⲁⲓ ⲡⲉϫⲁϥ ϫⲉ ⲙⲉⲣⲕⲟⲩⲣⲓⲟⲥ ⲡⲉ ⲡⲁⲓ ⲛⲧⲁⲕϯ ⲛⲁϥ ⲛⲧⲙⲛⲧⲛⲟϭ ⲛⲥⲁϥ ⲙⲛ ϣⲙⲧⲉ ⲡⲟⲟⲩ ⲛϩⲟⲟⲩ ⲁⲩⲱ ⲁⲕϫⲁⲥⲧϥ ϩⲛ ϩⲁϩ ⲛⲁⲝⲓⲱⲙⲁ ⲡⲁⲓ ⲇⲉ ⲟⲩⲙⲟⲛⲟⲛ ϫⲉ ⲁϥⲉⲣ ⲁⲧⲥⲱⲧⲙ ⲛⲥⲁ ⲧⲉⲕⲙⲛⲧⲉⲣⲟⲭ ⲁⲗⲗⲁ ⲁϥⲉⲣ ⲡⲕⲉⲡⲓⲑⲉ ⲛϩⲁϩ ⲉⲧⲙⲧⲣⲉⲩϣⲙϣⲉ ⲛⲛⲛⲟⲩⲧⲉ ⲉⲕϣⲁⲛϫⲛⲟⲩϥ ⲇⲉ ⲕⲛⲁⲉⲓⲙⲉ ⲉⲛⲉⲛⲧⲁⲓϫⲟⲟⲩ ⲛⲁⲕ ⲇⲉⲕⲓⲟⲥ ⲇⲉ ⲡⲉϫⲁϥ ϫⲉ ⲁⲣⲏⲩ ⲛⲧⲁ ⲟⲩⲫⲑⲟⲛⲟⲥ ϣⲱⲡⲉ ϩⲙ ⲡⲉⲕϩⲏⲧ ⲉϩⲟⲩⲛ ⲉⲡⲣⲱⲙⲉⲓⲃ ⲉⲧⲙⲙⲁⲩ ⲁⲕϣⲁϫⲉ ϩⲓⲛⲁⲓⲭ ⲁⲗⲗⲁ ⲛϯⲛⲁⲡⲓⲥⲧⲉⲩⲉ ⲁⲛ ⲉⲓⲙⲏⲧⲉⲓ ⲛⲧⲁⲉⲓⲙⲉ ϩⲛ ⲟⲩⲱⲣϫ ⲁⲩⲱ ⲛⲧⲁⲛⲁⲩ ⲉⲡϩⲱⲃ ⲛϩⲟ ϩⲓ ϩⲟ ⲡⲛⲁⲩ ⲅⲁⲣ ϩⲛ ⲛⲉⲃⲁⲗ ϣⲁⲩⲧⲁⲛϩⲟⲩⲧϥ ⲉϩⲟⲩⲉ ⲡⲥⲱⲧⲙ ⲛⲙⲙⲁⲁϫⲉ ⲕⲁⲣⲱⲕ ϭⲉ ⲧⲉⲛⲟⲩ ⲛⲅⲧⲙⲧⲁⲩⲉ ⲗⲁⲁⲩ ⲛϣⲁ ϫⲉ ⲛⲥⲁ ⲡⲣⲱⲙⲉ ⲉⲧⲙⲙⲁⲩⲭ ⲁⲩⲱ ⲉϣⲱⲡⲉ ⲛⲧⲁⲕⲕⲁⲧⲟⲓⲅⲟⲣⲉⲓ ⲙⲙⲟϥ ϩⲛ ⲟⲩⲫⲑⲟⲛⲟⲥ ⲛⲑⲉ ⲛⲧⲁⲓϫⲟⲟⲥ ⲉⲓⲙⲉ ⲛⲁⲕ ϫⲉ ⲕϭⲏⲡ ⲉϩⲉⲛⲛⲟϭ ⲛⲇⲓⲙⲱⲣⲓⲁ ⲉⲣϣⲁⲛ ⲛⲉⲛⲧⲁⲕϫⲟⲟⲩ ⲇⲉ ⲟⲩⲱⲛϩ ⲉⲃⲟⲗ ⲉⲩⲟ ⲙⲙⲉ ⲉⲓⲙⲉ ⲛⲁⲕ ϫⲉ ⲕⲛⲁϫⲓ ⲛϩⲉⲛⲛⲟϭ ⲛⲧⲁⲓⲟ ⲉⲃⲟⲗ ϩⲓⲧⲟⲟⲧⲭ ϩⲱⲥⲧⲉ ϫⲉ ⲕⲟ ⲛⲟⲩϩⲏⲧ ⲛⲟⲩⲱⲧ ⲙⲛ ⲛⲛⲟⲩⲧⲉ ⲁⲩⲱ ⲉϩⲟⲩⲛ ⲉⲛⲣⲣⲱⲟⲩ
10. ⲁϥⲕⲉⲗⲉⲩⲉ ⲇⲉ ⲉⲧⲣⲉⲩⲉⲓⲛⲉ ⲙⲡⲡⲉⲧⲟⲩⲁⲁⲃ ϩⲛ ⲧϯⲙⲏ ⲉⲧⲉϣϣⲉ ⲛⲑⲉ ⲙⲙⲏⲛⲉ ⲛⲧⲉⲣⲉϥⲉⲓ ⲇⲉ ϣⲁ ⲡⲣⲣⲟ ⲡⲉϫⲁϥ ⲛⲁϥ ⲛϭⲓ ⲡⲣⲣⲟ ϫⲉ ⲙⲉⲣⲕⲟⲩⲣⲓⲉⲭ ⲙⲏ ⲁⲛⲟⲕ ⲁⲛ ⲁⲓϯ ⲛⲁⲕ ⲙⲡⲉⲓⲁⲝⲓⲱⲙⲁ ⲙⲛ ⲡⲉⲓⲧⲁⲓⲟ ⲁⲓⲁⲁⲕ ⲛⲥⲧⲣⲁⲧⲉⲗⲁⲧⲏⲥ ⲓⲅ ϩⲛ ⲧⲙⲏⲧⲉ ⲛⲛⲁⲣⲭⲱⲛ ⲧⲏⲣⲟⲩ ⲉⲧⲃⲉ ⲧⲉⲕⲙⲛⲧⲣⲙⲛϩⲏⲧ ⲙⲛ ⲡⲉϫⲣⲟ ⲛⲧⲁ ⲛⲛⲛⲟⲩⲧⲉ ⲭⲁⲣⲓⲍⲉ ⲙⲙⲟϥ ⲛⲁⲕ ϩⲙ ⲡⲡⲟⲗⲁⲓⲙⲟⲥ ⲁⲩⲱ ⲛⲁϣ ⲛϩⲉ ⲡⲛⲟϭ ⲛⲛⲟⲩⲱϣⲉ ⲛⲉⲟⲩⲛⲧⲁⲓϥ ⲉϩⲟⲩⲛ ⲉⲣⲟⲕ ⲁⲕⲡⲟⲟⲛⲉϥ ⲉϩⲉⲛⲥⲙⲟⲧ ⲉⲩϩⲟⲟⲩ ⲁⲩⲱ ⲛⲉⲓⲛⲟϭ ⲛⲧⲁⲓⲟ ⲁⲕⲁⲡⲟⲩ ⲉⲩⲗⲁⲟⲩ ⲉⲁⲕⲕⲁⲧⲁⲑⲣⲟⲛⲉⲓ ⲛⲛⲛⲟⲩⲧⲉ ⲛⲧⲉⲓϩⲉ ⲧⲏⲣⲥ ⲕⲁⲧⲁ ⲑⲉ ⲛⲧⲁⲩⲧⲥⲁⲃⲉⲓⲁⲧⲥ ⲛⲧⲉⲛⲙⲛⲧⲉⲩⲥⲉⲃⲏⲥ ⲉⲃⲟⲗ ⲧⲟⲧⲉ ⲡⲙⲁⲧⲟⲓ ⲛⲅⲉⲛⲛⲁⲓⲟⲥ ⲛⲁ ⲙⲉ ⲙⲡⲉⲭ̅ⲥ̅ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲕⲁⲁϥ ⲕⲁϩⲏⲩ ⲙⲡⲣⲙⲛⲁⲥ ⲙⲛ ⲛⲉϥϩⲃⲏⲩⲉ ⲕⲁⲧⲁ ⲡϣⲁϫⲉ ⲙⲡⲁⲡⲟⲥⲧⲟⲗⲟⲥ ⲁϥϯ ϩⲓⲱⲱϥ ⲙⲡⲃⲣⲣⲉ ⲡⲁⲓ ⲛⲧⲁⲩⲥⲟⲛⲧϥ ⲕⲁⲧⲁ ⲡⲛⲟⲩⲧⲉ ϩⲓⲧⲙ ⲡⲃⲁⲡⲧⲓⲥⲙⲁⲭ ⲁϥⲟⲩⲱϣⲃ ϩⲛ ⲟⲩⲥⲙⲏ ⲙⲙⲛⲧϫⲁⲣϩⲏⲧ ϫⲉ ⲡⲉⲓⲧⲁⲓⲟ ⲡⲁⲓ ⲙⲁⲣⲉϥϣⲱⲡⲉ ⲛⲁⲕ ⲁⲛⲟⲕ ⲅⲁⲣ ⲉϣϫⲉ ⲁⲓⲃⲱⲕ ⲉⲃⲟⲗ ⲉⲡⲡⲟⲗⲩⲙⲟⲥ ⲁⲓⲙⲓϣⲉ ⲛⲁⲛⲟⲕ ⲁⲛ ⲡⲉⲛⲧⲁⲓϫⲣⲟ ⲉⲛⲃⲁⲣⲃⲁⲣⲟⲥⲭ ⲁⲗⲗⲁ ⲡⲁϫⲟⲉⲓⲥ ⲓ̅ⲥ̅ ⲡⲉⲭ̅ⲥ̅ ⲓⲇ ⲡⲉⲛⲧⲁϥⲭⲁⲣⲓⲍⲉ ⲛⲁⲓ ⲙⲡⲉϫⲣⲟ. ⲡⲗⲏⲛ ϫⲓ ⲛⲁⲕ ⲛⲛⲉⲕⲧⲁⲓⲟ ⲛⲑⲉ ⲛⲧⲁⲕϫⲟⲟⲥ ⲛⲧⲁⲓⲉⲓ ⲅⲁⲣ ⲉⲃⲟⲗ ϩⲛ ϩⲏⲧⲥ ⲛⲧⲁⲙⲁⲁⲩ ⲉⲓⲕⲏⲕ ⲁϩⲏⲩⲭ ⲉⲓⲛⲁⲃⲱⲕ ⲟⲛ ⲉⲃⲟⲗ ϩⲙ ⲡⲉⲓⲕⲟⲥⲙⲟⲥ ⲉⲓⲕⲏⲕ ⲁϩⲏⲩ
11. ⲛⲧⲉⲣⲉϥϫⲉ ⲛⲁⲓ ⲇⲉ ⲁϥⲕⲁⲁϥ ⲕⲁϩⲡⲩ ⲛⲧⲉϥⲭⲗⲁⲙⲩⲥ ⲁϥⲃⲟⲗⲉϥ ⲉⲃⲟⲗ ⲛⲧⲉϥⲉⲛⲍⲱⲛⲏ ⲁϥⲛⲟϫⲟⲩ ϩⲁⲣⲁⲧϥ ⲙⲡⲣⲣⲟ ⲁϥϫⲓ ϣⲕⲁⲕ ⲉⲃⲟⲗ ⲉϥϫⲱ ⲙⲙⲟⲥ ϫⲉ ⲁⲛⲅ ⲟⲩⲭⲣⲓⲥⲧⲓⲁⲛⲟⲥⲭ ⲁⲩⲱ ⲥⲱⲧⲙ ⲛⲏⲧⲛ ⲧⲏⲣⲧⲛ ϫⲉ ⲁⲛⲅ ⲟⲩⲭⲣⲏⲥⲧⲓⲁⲛⲟⲥ ⲧⲟⲧⲉ ⲇⲉⲕⲓⲟⲥ ⲁϥⲣ ⲑⲉ ⲛⲉⲧⲡⲟϣⲥ ⲁϥⲉⲓⲱⲣⲙ ⲉϩⲟⲩⲛ ⲉϩⲣⲁϥ ⲛⲛⲟⲩⲛⲟϭ ⲛⲛⲁⲩ ⲉϥⲟ ⲛϣⲡⲏⲣⲉ ⲉϫⲙ ⲡⲥⲁ ⲛⲧⲉϥⲙⲛⲧⲃⲣⲣⲉ ⲡⲙⲁⲕⲁⲣⲓⲟⲥ ⲇⲉ ⲛⲉⲛⲉⲥⲱϥ ⲉⲙⲁⲧⲉ ⲡⲉ ϩⲙ ⲡⲉϥⲉⲓⲛⲉ ⲉⲣⲉ ⲡⲉϥϩⲟ ⲟ ⲛⲑⲉ ⲛⲛⲉⲓⲟⲩⲏⲣⲧ ϩⲙ ⲡⲉϥⲁⲩⲁⲛⲭ ⲉⲣⲉ ⲡⲉϥⲃⲱ ⲟ ⲙⲙⲉⲣϣ ⲉϥⲕⲟⲥⲙⲉⲓ ⲛⲥⲁ ⲥⲁ ⲛⲓⲙ ϩⲙ ⲙⲛⲧϫⲱⲱⲣⲉ ⲛⲓⲙ ⲛⲉⲛⲧⲁⲩϭⲱϣⲧ ⲛⲥⲱϥ ⲇⲉ ⲛⲉⲩⲣϣⲡⲏⲣⲉ ⲙⲙⲟϥ ⲙⲛⲛⲥⲁ ⲛⲁⲓ ⲇⲉ ⲁⲡⲣⲣⲟ ⲇⲉⲕⲓⲟⲥ ⲕⲓⲙ ⲛⲧⲉϥⲁⲡⲉ ⲁⲩⲱ ⲁϥⲕⲉⲗⲉⲩⲉ ⲉⲛⲟϫϥ ⲉⲡⲉϣⲧⲉⲕⲟ ⲉϥϫⲱ ⲙⲙⲟⲥ ϫⲉ ⲡⲉⲓⲣⲱⲙⲉ ⲉⲡⲉⲓⲇⲏ ⲓⲉ ⲙⲡⲉϥⲥⲟⲩⲉⲛ ⲡⲧⲁⲓⲟ ⲉⲧϥⲛϩⲏⲧϥ ⲙⲁⲣⲉϥϫⲓ ⲡⲓⲣⲁ ⲧⲉⲛⲟⲩ ⲙⲡϭⲁⲉⲓⲟ ⲛⲧⲁϥϫⲉ ⲡⲁⲓ ⲇⲉ ⲉϥⲙⲉⲩⲉ ϫⲉ ϥⲛⲁⲡⲉⲉⲛⲉ ⲡⲉϥⲗⲟⲅⲓⲥⲙⲟⲥ ⲛⲉⲩⲥⲉⲃⲏⲥ ⲡⲙⲁⲕⲁⲣⲓⲟⲥ ⲇⲉ ⲛⲉⲩϫⲓ ⲙⲙⲟϥ ⲉⲡⲉϣⲧⲉⲕⲟ ⲉⲛⲉϥⲣⲁϣⲉ ⲡⲉ ⲁⲩⲱ ⲉⲛⲉϥⲧⲉⲗⲏⲗ ϩⲙ ⲡⲉϥⲡⲛⲁ ⲉϥϯ ⲉⲟⲟⲩ ⲙⲡⲛⲟⲩⲧⲉ
12. ϩⲛ ⲧⲉⲩϣⲏ ⲇⲉ ⲉⲧⲙⲙⲁⲩ ⲁⲩⲁⲅⲅⲉⲗⲟⲥ ⲁϩⲉⲣⲁⲧϥ ϩⲓϫⲱϥ ⲡⲉϫⲁϥ ⲛⲁϥ ϫⲉ ⲙⲉⲣⲕⲟⲩⲣⲓⲉ ⲧⲱⲕ ⲛϩⲏⲧ ⲁⲩⲱ ⲙⲡⲉⲣϭⲱⲧⲡ ϩⲏⲧⲟⲩ ⲛⲛⲁⲡⲓⲗⲏ ⲙⲡⲧⲩⲣⲁⲛⲟⲥ ⲡⲓⲥⲧⲉⲩⲉ ⲉⲡⲉⲭ̅ⲥ̅ ⲛⲧⲁⲕϩⲟⲙⲟⲗⲟⲅⲉⲓ ⲙⲙⲟϥ ϫⲉ ⲟⲩⲛϣ ϭⲟⲙ ⲙⲙⲟϥ ⲉⲧⲟⲩϫⲟⲕ ⲉⲃⲟⲗ ϩⲛ ⲑⲗⲓⲯⲓⲥ ⲛⲓⲙ ⲡⲙⲁⲣⲧⲩⲣⲟⲥ ⲇⲉ ⲁϥϭⲙϭⲟⲙ ⲛϩⲟⲩⲟ ϩⲙ ⲡⲧⲉ ⲡⲁⲅⲅⲉⲗⲟⲥ ⲟⲩⲱⲛϩ ⲉⲣⲟϥ ⲛϥϫⲉ ⲛⲁⲓ ⲛⲁϥ ⲙⲡⲉϥⲣⲁⲥⲧⲉ ⲇⲉ ⲁϥϩⲙⲟⲟⲥ ⲉⲡⲃⲏⲙⲁ ⲛϭⲓ ⲡⲣⲣⲟ ⲇⲉⲕⲓⲟⲥ ⲁϥⲟⲩⲉϩⲥⲁϩⲛⲉ ⲉⲧⲣⲉⲩⲡⲁⲣϩⲓⲥⲧⲁ ⲛⲁϥ ⲙⲡⲙⲁⲕⲁⲣⲓⲟⲥ ⲡⲉⲓⲊ ϫⲁϥ ϫⲉ ⲉⲣⲉ ⲡⲉⲓⲧⲁⲓⲟ ⲛⲧⲉⲓⲙⲓⲛⲉ ⲡⲣⲉⲡⲉⲓ ⲛⲁⲕ ⲛⲧⲁⲕϫⲓⲧϥ ⲉⲃⲟⲗ ϩⲓⲧⲟⲟⲧ ⲉⲡⲉⲓⲧϭⲁⲓⲟ ⲡⲉ ⲛⲧⲁⲕⲥⲟⲧⲡϥ ⲛⲁⲕ ⲙⲁⲩⲁⲁⲕⲭ ⲁϥⲟⲩⲱϣⲃ ⲛϭⲓ ⲡⲡⲉⲧⲟⲩⲁⲁⲃ ϫⲉ ⲥⲉ ϥⲡⲣⲉⲡⲉⲓ ⲛⲁⲓ ⲛϩⲟⲩⲟ ⲁⲓϫⲓ ⲅⲁⲣ ⲛⲟⲩⲁⲝⲓⲱⲙⲁ ⲛⲁⲧⲧⲁⲕⲟ ⲉⲡⲙⲁ ⲙⲡⲱⲕ ⲉϣⲁϥⲧⲁⲕⲟ ⲡⲉϫⲉ ⲡⲣⲣⲟ ⲛⲁϥ ϫⲉ ϫⲱ ⲉⲣⲟⲓ ⲙⲡⲉⲕⲅⲉⲛⲟⲥ ⲙⲛ ⲧⲉⲕⲡⲟⲗⲓⲥ ⲛⲧⲟⲕ ⲅⲁⲣ ϯⲥⲟⲟⲩⲛ ⲙⲙⲟⲕ ϫⲉ ⲉⲕⲏⲡ ⲉⲁϣ ⲛⲇⲁⲝⲓⲥ ⲡⲉϫⲁϥ ⲛϭⲓ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲉ ⲕⲟⲩⲱϣ ⲉⲥⲟⲩⲛ ⲧⲁⲡⲟⲗⲓⲥ ⲙⲛ ⲡⲁⲅⲉⲛⲟⲥ ⲁⲛⲟⲕ ϯⲛⲁⲧⲁⲙⲟⲕ ⲉⲣⲟⲟⲩ ⲡⲁⲉⲓⲱⲧ ⲙⲉⲛ ⲕⲁⲧⲁ ⲥⲁⲣⲝ ⲡⲉ ⲕⲟⲣⲇⲓⲁⲛⲟⲥⲭ ⲟⲩⲉⲃⲟⲗ ⲡⲉ ϩⲛ ⲧⲉⲥⲕⲩⲑⲓⲁ ⲉⲁϥⲉⲣ ⲙⲁⲧⲟⲓ ⲉⲡⲁⲣⲓⲑⲙⲟⲥ ⲛⲛⲉⲧⲟⲩⲙⲟⲩⲧⲉ ⲉⲣⲟⲟⲩ ϫⲉ ⲙⲁⲣⲧⲩⲥⲓⲟⲛ ϩⲙ ⲡⲉⲓⲟϣⲟⲉⲓϣ ⲇⲉ ⲡⲁⲓ ⲁϥⲉⲣ ⲡⲣⲱⲧⲟⲥ ⲉⲡⲉⲓⲁⲣⲓⲑⲙⲟⲥ ⲛⲟⲩⲱⲧ ⲡⲁⲉⲓⲱⲧ ⲇⲉ ϩⲱⲱϥ ⲛⲁⲗⲏⲑⲓⲛⲟⲛ ⲡⲉ ⲡⲛⲟⲩⲧⲉ ⲁⲩⲱ ⲧⲁⲡⲟⲗⲓⲥ ⲛⲁⲗⲏⲑⲓⲛⲟⲛ ⲧⲉⲑⲓⲗⲏⲙ ⲛⲧⲡⲉⲭ ⲧⲡⲟⲗⲓⲥ ⲙⲡⲛⲟϭ ⲛⲣⲣⲟ. ⲡⲉϫⲁϥ ⲛϭⲓ ⲡⲣⲣⲟ ϫⲉ ⲛⲧⲁⲩⲙⲟⲩⲧⲉⲓⲍ ⲉⲣⲟⲕ ⲙⲡⲉⲓⲣⲁⲛ ϫⲉ ⲙⲉⲣⲕⲟⲩⲣⲓⲟⲥ ϩⲓⲧⲛ ⲛⲉⲕⲉⲓⲟⲧⲉ ϫⲉ ⲙⲙⲁⲧⲟⲓ ⲛⲉⲛⲧⲁⲩⲧⲁⲁϥ ⲉⲣⲟⲕ ⲡⲉϫⲁϥ ⲛϭⲓ ⲙⲉⲣⲕⲟⲩⲣⲓⲟⲥ ϫⲉ ⲡⲁⲉⲓⲱⲧ ⲙⲉⲛ ⲛⲧⲁϥⲙⲟⲩⲧⲉ ⲉⲣⲟⲓ ⲙⲡⲁⲣⲁⲛ ϫⲉ ⲫⲓⲗⲟⲡⲁⲧⲏⲣⲭ ⲉⲧⲉ ⲡⲉϥⲟⲩⲱϩⲙ ⲡⲉ ⲡⲙⲁⲓⲛⲉϥⲉⲓⲟⲧⲉ ⲛⲧⲉⲣⲉⲓⲉⲣⲙⲁⲧⲟⲓ ⲇⲉ ⲁⲩⲙⲟⲩⲧⲉ ⲉⲣⲟⲓ ϫⲉ ⲙⲉⲣⲕⲟⲩⲣⲓⲟⲥ ϩⲓⲧⲛ ⲛⲉⲧⲣⲓⲃⲟⲩⲛⲟⲥ ⲙⲡⲁⲁⲣⲓⲑⲙⲟⲥ
13. ⲡⲣⲣⲟ ⲇⲉ ⲡⲉϫⲁϥ ⲛⲁϥ ϫⲉ ⲕⲛⲁⲉⲓⲣⲉ ⲕⲁⲧⲁ ⲡⲉⲡⲣⲟⲥⲧⲁⲅⲙⲁ ⲛⲧⲁⲩⲧⲟϭϥ ⲉⲃⲟⲗ ϫⲓⲛ ⲉϣⲟⲣⲡ ⲛⲟⲩⲟⲛ ⲛⲓⲙ ⲛⲅⲡⲣⲟⲥⲕⲩⲛⲉⲓ ⲛⲛⲉⲛⲟⲩⲧⲉ ⲛⲅϫⲓ ⲙⲡⲉⲕⲧⲁⲓⲟ ⲛϣⲟⲣⲡ ⲙⲛ ⲡⲉⲕⲛⲟϭ ⲛⲉⲟⲟⲩ ϫⲓⲛ ⲙⲙⲟⲛ ⲟⲩ ⲡⲉⲧⲕϫⲱ ⲙⲙⲟϥ ϭⲉⲡⲏ ⲟⲩⲛ ϩⲱⲥ ⲛⲧⲁⲩⲉⲛⲧⲕ ⲉⲡⲉⲓⲙⲁ ⲉⲡⲉⲓϩⲱⲃ ⲁϥⲟⲩⲱϣⲃ ⲛϭⲓ ⲡⲙⲁⲕⲁⲣⲓⲟⲥ ⲡⲉϫⲁϥ ϫⲉ ⲁⲛⲟⲕ ⲕⲁⲧⲁ ⲑⲉ ⲛⲧⲁⲓϫⲟⲟⲥ ⲛⲧⲁⲓⲉⲓ ⲉⲡⲉⲓⲙⲁ ϫⲉⲕⲁⲥ ⲉⲓⲉϫⲣⲟ ⲉⲣⲟⲕ ⲙⲛ ⲡⲉⲕⲉⲓⲱⲧ ⲡⲥⲁⲧⲁⲛⲁⲥ ⲡⲉⲛⲧⲁ ⲡⲉⲑⲟⲟⲩ ⲛⲓⲙ ϣⲱⲡⲉ ⲉⲃⲟⲗ ϩⲓⲧⲟⲟⲧϥ ⲉⲓϣⲁⲛϫⲣⲟⲓⲏ ⲇⲉ ⲥⲉⲛⲁϯ ⲛⲁⲓ ⲙⲡⲉⲕⲗⲟⲙ ⲛⲁⲧⲧⲁⲕⲟ ϩⲓⲧⲙ ⲡⲁⲅⲟⲛⲟⲑⲉⲧⲏⲥ ⲙⲙⲉ ⲡⲁϫⲟⲓⲥ ⲓ̅ⲥ̅ ⲡⲉⲭ̅ⲥ̅ ⲡⲉⲧⲉϩⲛⲁⲕ ⲁⲣⲓϥ ⲛⲁⲓ ϩⲛ ⲟⲩϭⲉⲡⲏ ⲛⲅⲧⲙⲱⲥⲕ ⲟⲩⲛⲧⲁⲓ ⲇⲉ ⲙⲙⲁⲩ ⲛⲧⲡⲁⲛϩⲟⲡⲗⲓⲁ ⲙⲡⲁⲛⲟⲩⲧⲉ ⲙⲛ ⲡⲉⲑⲩⲣⲱⲛ ⲛⲧⲡⲓⲥⲧⲓⲥ ⲛⲁⲓ ⲉⲃⲟⲗ ϩⲓⲧⲟⲟⲧⲟⲩ ϯⲛⲁϫⲣⲟ ⲉⲛⲉⲕⲙⲉⲉⲩⲉ ⲙⲛ ⲛⲉⲕⲧⲉⲭⲛⲏ ⲧⲏⲣⲟⲩ ⲉⲑⲟⲟⲩ ⲉϩⲟⲩⲛ ⲉⲣⲟⲓ
14. ⲧⲟⲧⲉ ⲡⲣⲣⲟ ⲁϥⲙⲟⲩϩ ⲛϭⲱⲛⲧ ⲡⲉϫⲁϥ ϫⲉ ⲉⲡⲉⲓⲇⲏ ⲡⲁⲓ ϫⲱ ⲙⲙⲟⲥ ϫⲉ ⲟⲩⲛⲧⲁⲓ ⲙⲙⲁⲩ ⲛⲟⲩⲡⲁⲛϩⲟⲡⲗⲓⲁ ⲙⲛ ⲟⲩϩⲱⲕ ⲕⲁⲓⲡⲉⲣ ⲁϥⲁϩⲉⲣⲁⲧϥ ⲉϥⲕⲏⲕ ⲁϩⲏⲩⲭ ϯⲕⲉⲗⲉⲩⲉ ⲉⲧⲣⲉⲩⲧⲁⲥϥ ⲉⲃⲟⲗ ϩⲓⲧⲛ ϥⲧⲟ ⲛϣⲙⲟⲩ ⲛⲥⲉⲁϣⲧϥ ⲙⲡⲉⲧⲡⲉ ⲙⲡⲕⲁϩ ⲛⲟⲩⲙⲁϩⲉ ⲛⲧⲉⲣⲟⲩⲉⲣ ⲡⲁⲓ ⲇⲉ ⲡⲉϫⲉ ⲡⲣⲣⲟ ⲛⲁϥ ϫⲉ ⲉⲩⲧⲱⲛ ⲛⲉⲕⲡⲁⲛϩⲟⲡⲗⲓⲁ ⲧⲉⲛⲟⲩ ⲉⲧⲉⲕⲫⲱⲣⲉⲓ ⲙⲙⲟⲟⲩ ϣⲉ ⲡⲛⲟϭ ⲛⲛⲟⲩⲧⲉ ⲡⲍⲉⲩⲥ ⲁⲩⲧⲟⲥⲕ ⲉⲃⲟⲗ ⲉⲙⲁⲧⲉ ⲡϩⲁⲅⲓⲟⲥ ⲇⲉ ⲙⲉⲣⲕⲟⲩⲣⲓⲟⲥ ⲁϥϭⲱϣⲧ ⲉϩⲣⲁⲓ ⲉⲧⲡⲉ ⲡⲉϫⲁϥ ϫⲉ ⲓⲑ ⲡⲁϫⲟⲉⲓⲥ ⲓ̅ⲥ̅ ⲡⲉⲭ̅ⲥ̅ ⲃⲟⲏⲑⲉⲓ ⲉⲣⲟⲓ ⲁⲛⲟⲕ ⲡⲉⲕϩⲙϩⲁⲗ ⲡⲁⲗⲓⲛ ⲟⲛ ⲁϥⲕⲉⲗⲉⲩⲉ ⲛϭⲓ ⲡⲣⲣⲟ ⲉⲧⲣⲉⲩϣⲱⲗϭ ⲙⲡⲉϥⲥⲱⲙⲁ ϩⲛ ϩⲉⲛϭⲟⲣⲧ ⲉⲩϫⲏⲣ ⲉⲡⲙⲁ ⲛϩⲉⲛⲙⲁⲥⲧⲓⲅⲝⲭ ⲙⲛⲛⲥⲱⲥ ⲛⲥⲉⲡⲱⲣϣ ⲛϩⲉⲛϫⲃⲃⲥ ⲛⲕⲱϩⲧ ϩⲁⲣⲟϥ ⲉⲩⲙⲟⲩϩ ϫⲉⲕⲁⲥ ⲉϥⲉⲣⲱⲕϩ ⲕⲟⲩⲓ ⲕⲟⲩⲓ ⲁⲩⲱ ⲁϥⲱϣⲙ ⲛϭⲓ ⲡⲕⲱϩⲧ ϩⲓⲧⲙ ⲡⲉⲥⲛⲟϥ ⲉⲧⲟϣ ⲉⲧϩⲁⲧⲉ ⲉⲃⲟⲗ ⲡⲡⲉⲧⲟⲩⲁⲁⲃ ⲇⲉ ⲁϥϥⲓ ⲉⲣⲟϥ ϩⲛ ⲟⲩⲛⲟϭ ⲙⲙⲛⲧϫⲱⲱⲣⲉ ϩⲁ ⲧⲉⲓⲛⲟϭ ⲛⲃⲁⲥⲁⲛⲟⲥ
15. ⲇⲉⲕⲓⲟⲥ ⲇⲉ ⲁϥⲟⲩⲉϩⲥⲁϩⲛⲉ ⲉⲧⲣⲉⲩⲃⲟⲗϥ ⲉⲃⲟⲗ ϫⲉⲕⲁⲥ ⲛⲛⲉϥⲙⲟⲩ ϩⲛ ⲟⲩϭⲉⲡⲏ ⲛⲥⲉⲟⲧⲡϥ ⲉϩⲟⲩⲛ ⲉⲩⲙⲁ ⲛⲕⲁⲕⲉ ⲛⲥⲉⲱⲣϫ ⲉⲣⲱϥ ⲙⲙⲁⲧⲟⲓ ⲇⲉ ⲁⲩϥⲓ ⲉϩⲣⲁⲓ ϩⲁⲣⲟϥ ⲉϥⲟ ⲙⲡϣⲙⲟⲩ ⲉⲩⲉⲛ ⲕⲟⲩⲓ ⲛⲛⲓⲃⲉ ϣⲟⲟⲡ ϩⲣⲁⲓ ⲛϩⲏⲧϥ ⲁⲩⲛⲟϫϥ ⲉϩⲟⲩⲛ ⲉⲡⲙⲁ ⲉⲧⲙⲙⲁⲩ ⲉⲩⲙⲉⲉⲩⲉ ϫⲉ ϥⲛⲁⲙⲟⲩ ϩⲛ ⲟⲩϭⲉⲡⲏ ϩⲛ ⲧⲉⲩϣⲏ ⲇⲉ ⲉⲧⲙⲙⲁⲩ ⲁⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲟⲩⲱⲛϩ ⲛⲁϥ ⲉⲃⲟⲗ ⲡⲉϫⲁϥ ⲛⲁϥ ϫⲉ ϯⲕⲣⲏⲛⲏ ⲛⲁⲕ ⲡϣⲟⲉⲓϫ ⲛⲣⲉϥϫⲣⲟ ⲛⲧⲉⲣⲉϥϫⲉ ⲡⲁⲓ ⲇⲉ ⲁϥⲧⲁⲗϭⲉ ⲛⲥⲁϣⲉⲧ ϩⲙ ⲡⲉϥⲥⲱⲙⲁ ⲁⲩⲱ ⲁϥⲧⲁϩⲟϥ ⲉⲣⲁⲧϥ ⲉϥⲟⲩⲟϫ ϩⲱⲥⲧⲉ ⲉⲧⲣⲉϥⲧⲱⲟⲩⲛ ⲛϥϯ ⲉⲟⲟⲩ ⲙⲡⲛⲟⲩⲧⲉ ⲛⲧⲁϥⲧⲁⲙⲓⲟϥ ϫⲉ ⲁϥⲃⲟⲏⲑⲉⲓ ⲉⲣⲟϥ
16. ⲙⲛⲛⲥⲁ ⲛⲁⲓ ⲟⲛ ⲁϥⲕⲉⲗⲉⲩⲉ ⲛϭⲓ ⲡⲣⲣⲟ ⲇⲉⲕⲓⲟⲥ ⲉⲧⲣⲉⲩⲧⲁϩⲟϥ ⲉⲣⲁⲧϥ ⲉⲡⲃⲏⲙⲁ ⲁⲩⲱ ⲛⲧⲉⲣⲉϥⲛⲁⲩ ⲉⲣⲟϥ ⲡⲉϫⲁϥ ⲛⲁϥ ϫⲉ ⲁⲩϥⲓⲧⲕ ⲉⲃⲟⲗ ϩⲓⲧⲟⲟⲧ ⲉⲕⲟ ⲛⲕⲱⲱⲥ ⲛⲁϣ ⲛϩⲉ ⲕⲙⲟⲟϣⲉ ⲧⲉⲛⲟⲩ ⲙⲉϣⲁⲕ ⲣⲱ ⲙⲛⲗⲁⲁⲩ ⲙⲡⲱⲗϩ ϩⲙ ⲡⲉⲕⲥⲱⲙⲁ ⲧⲟⲧⲉ ⲁϥⲕⲉⲗⲉⲩⲉ ⲛⲛⲉⲃⲁⲓⲙⲉⲣⲉϩ ⲉⲧⲁϩⲉⲣⲁⲧⲟⲩ ⲉⲣⲟϥ ⲉⲧⲣⲉⲩⲙⲟⲩϣⲧ ⲙⲡⲉϥⲥⲱⲙⲁ ⲛⲧⲟⲟⲩ ⲇⲉ ⲡⲉϫⲁⲩ ⲙⲡⲣⲣⲟ ϫⲉ ϣⲉ ⲡⲉⲕⲕⲣⲁⲧⲟⲥ ⲛⲉⲩⲥⲉⲃⲏⲥ ⲡⲉⲛϫⲟⲉⲓⲥ ⲡⲣⲣⲟⲭ ⲡⲉϥⲥⲱⲙⲁ ⲧⲏⲣϥ ⲟⲩⲟϫⲭ ⲙⲛⲗⲁⲁⲩ ⲛⲧⲁⲕⲟ ⲛϩⲏⲧϥ ⲛⲑⲉ ⲛⲟⲩⲁ ⲙⲡⲟⲩϫⲱϩ ⲉⲣⲟϥ ⲙⲡⲉⲩⲧⲏⲏⲃⲉ ⲇⲉⲕⲓⲟⲥ ⲇⲉ ⲡⲉϫⲁϥ ϫⲉ ⲡⲁⲛⲧⲟⲥ ϥⲛⲁⲕⲁ ϫⲟⲟϥ ϫⲉ ⲡⲉⲭ̅ⲥ̅ ⲡⲉⲛⲧⲁϥⲧⲁⲗϭⲟϥ ⲙⲏ ⲁⲣⲁ ⲁⲧⲉⲧⲛϥⲓ ⲥⲁⲉⲓⲛ ⲉϩⲟⲩⲛ ⲉⲡⲉϣⲧⲉⲕⲟ ⲁϥⲑⲉⲣⲁⲡⲉⲩⲉ ⲙⲙⲟϥ ⲛⲧⲟⲟⲩ ϭⲉ ⲡⲉϫⲁⲩ ϫⲉ ϣⲉ ⲧⲉⲕⲙⲛⲧⲛⲟϭ ⲉⲧⲁⲙⲁϩⲧⲉ ⲉϫⲛ ⲧⲟⲓⲕⲟⲩⲙⲉⲛⲏ ⲙⲡⲉ ⲗⲁⲁⲩ ⲛⲣⲱⲙⲉ ⲑⲉⲣⲁⲡⲉⲩⲉ ⲙⲙⲟϥ. ⲛⲙⲙⲉⲩⲉ ⲅⲁⲣ ⲡⲉ ϫⲉ ϥⲛⲁⲙⲟⲩⲛⲧⲉⲩⲛⲟⲩ: ⲛⲁϣ ⲇⲉ ⲛϩⲉ ⲧⲉⲛⲟⲩϥⲟⲩⲟϫ ⲏ ⲛⲧⲁϥⲗⲟ ⲛⲁϣ ⲛϩⲉ ⲛⲧⲉⲛⲥⲟⲟⲩⲛ ⲁⲛ ⲡⲉϫⲁϥ ⲇⲉ ⲛⲁⲩ ϫⲉ ⲉⲧⲉⲧⲛϫⲉ ⲟⲩ ϫⲉ ⲟⲩⲁϣ ⲛϭⲟⲧ ⲧⲉ ⲧⲙⲁⲛⲓⲁ ⲛⲛⲉⲭⲣⲏⲥⲧⲓⲁⲛⲟⲥ ⲛⲁϣ ⲛϩⲉ ⲛⲧⲛⲥⲟⲟⲩⲛ ⲁⲛⲭ ⲛⲥⲁϥ ⲙⲉⲛ ⲛⲉⲛⲙⲉⲉⲩⲉ ϫⲉ ⲁϥⲉⲣ ⲕⲱⲱⲥⲙⲡⲟⲟⲩ ⲇⲉ ϥⲁϩⲉⲣⲁⲧϥ ⲉϥⲟⲩⲟϫ
17. ⲁϥⲙⲟⲩϩ ⲇⲉ ⲛϭⲱⲛⲧ ⲛϭⲓ ⲡⲣⲣⲟ ⲡⲉϫⲁϥ ⲛⲁϥ ϫⲉ ⲁϫⲓⲥ ⲉⲣⲟⲓ ϩⲛ ⲟⲩⲙⲉ ϫⲉ ⲛⲓⲙ ⲡⲉⲛⲧⲁϥⲧⲁⲗϭⲟⲕ ⲛϯⲙⲉⲉⲩⲉ ⲅⲁⲣ ⲁⲛ ⲉⲣⲟⲕ ϫⲉ ⲁⲕⲧⲁⲗϭⲟⲕ ⲭⲱⲣⲓⲥ ⲙⲁⲅⲓⲁ ⲁϥⲟⲩⲱϣⲃⲛϭⲓ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲉ ⲡϫⲟⲉⲓⲥ ⲓ̅ⲥ̅ ⲡⲉⲭ̅ⲥ̅ ⲡⲥⲁⲓⲛ ⲙⲙⲉ ⲛⲛⲙⲯⲩⲭⲏ ⲙⲛ ⲛⲉⲛⲥⲱⲙⲁ ⲛⲧⲟϥ ⲁϥⲟⲩϣ ⲁϥⲭⲁⲣⲓⲍⲉ ⲛⲁⲓ ⲕⲃ ⲙⲡⲧⲁⲗϭⲟ ⲕⲁⲧⲁ ⲑⲉ ⲛⲧⲁⲕϫⲟⲟⲥ ⲛⲉⲫⲁⲣⲙⲁⲅⲟⲥ ⲇⲉ ⲙⲛ ⲛⲉⲣⲉϥⲙⲟⲩⲧⲉ ⲙⲛ ⲛⲣⲉϥϫⲓⲙⲁⲉⲓⲛ ⲙⲛ ⲛⲣⲉϥϣⲙϣⲉⲉⲓⲇⲟⲗⲟⲛ ⲥⲉⲟ ⲛϣⲙⲙⲟ ⲉⲣⲟϥⲭ ⲁⲩⲱ ϥⲛⲁⲙⲟⲣⲟⲩ ⲛϩⲛⲙⲣⲣⲉ ⲛⲁⲧⲃⲱⲗ ⲉⲃⲟⲗ ⲛϥⲡⲁⲣⲁⲇⲓⲇⲟⲩ ⲙⲙⲟⲟⲩ ⲉⲡⲕⲱϩⲧ ⲛⲧⲅⲉϩⲉⲛⲛⲁⲭ ⲉⲧⲃⲉ ϫⲉ ⲙⲡⲟⲩⲥⲟⲩⲛ ⲡⲛⲟⲩⲧⲉ ⲛⲧⲁϥⲧⲁⲙⲓⲟⲟⲩ ⲡⲉϫⲁϥ ⲛϭⲓ ⲡⲣⲣⲟ ϫⲉ ϯⲛⲁⲁⲛϩⲁⲗⲓⲥⲕⲉ ⲙⲡⲉⲕⲥⲱⲙⲁ ϩⲛ ϩⲉⲛⲃⲁⲥⲁⲛⲟⲥ ⲉⲩⲛⲁϣⲧ ⲙⲁⲣⲉⲓⲛⲁⲩ ϫⲉ ⲡⲉⲭ̅ⲥ̅ ⲉⲧⲉⲕϣⲁϫⲉ ⲉⲣⲟϥ ⲛⲁϣ ⲧⲁⲗϭⲟⲕ ⲡⲉⲁⲁϥ ⲛϭⲓ ⲡϩⲁⲅⲓⲟⲥ ϫⲉ ϯⲡⲓⲥⲧⲉⲩⲉ ⲉⲡⲁϫⲟⲉⲓⲥ ⲓ̅ⲥ̅ ⲡⲉⲭ̅ⲥ̅ ϫⲉ ⲕⲁⲛ ⲉⲕϣⲁⲛϯ ⲛⲁⲓ ⲛⲟⲩⲙⲏⲏϣⲉ ⲛⲇⲓⲙⲟⲣⲓⲁⲛⲅⲛⲁϣⲧⲉⲣⲧⲱⲣⲉⲧ ⲁⲛ ⲁϥϫⲟⲟⲥ ⲅⲁⲣ ϫⲉ ⲙⲡⲉⲣⲉⲣ ϩⲟⲧⲉ ϩⲏⲧⲟⲩ ⲛⲛⲉⲧⲛⲁⲙⲟⲩⲟⲩⲧ ⲙⲡⲉⲧⲛⲥⲱⲙⲁⲭ ⲙⲛϣ ϭⲟⲙ ⲇⲉ ⲙⲙⲟⲟⲩ ⲉⲙⲟⲩⲟⲩⲧ ⲛⲛⲉⲧⲙⲯⲩⲭⲏⲭ ⲁⲗⲗⲁ ⲁⲣⲓ ϩⲟⲧⲉ ⲛϩⲟⲩⲟ ⲛϩⲏⲧϥ ⲕⲅⲙⲡⲉⲧⲉ ⲟⲩⲛⲧϥ ⲧⲉⲝⲟⲩⲥⲓⲁⲙⲙⲁⲩ ⲉⲧⲁⲕⲟ ⲛⲧⲉⲧⲛⲯⲩⲭⲏ ⲙⲛ ⲡⲉⲧⲛⲥⲱⲙⲁ ϩⲣⲁⲓ ϩⲛ ⲧⲕⲉϩⲉⲛⲛⲁ ⲡⲁⲓ ⲙⲛⲛⲥⲁ ⲧⲣⲉⲛⲙⲟⲩ ⲟⲛ ϥⲛⲁⲧⲟⲩⲛⲟⲥⲛ ϩⲙ ⲡⲉϩⲟⲟⲩ ⲙⲡϩⲁⲡⲙⲙⲉ
18. ⲧⲟⲧⲉ ⲁϥⲕⲉⲗⲉⲩⲉ ⲛϭⲓ ⲡⲣⲣⲟ ⲉⲧⲣⲉⲩⲉⲓⲛⲉ ⲛⲟⲩⲡⲉⲛⲓⲡⲉ ⲉϥⲗⲟϥⲉϣ ϩⲛ ⲟⲩⲕⲱϩⲧ ⲛⲥⲉⲕⲁⲁϥ ϩⲁ ⲛⲉϥⲁⲛⲁⲅⲕⲁⲓⲟⲛ ⲁⲩⲱ ⲙⲛⲛⲥⲁ ⲡⲁⲓ ϩⲛⲗⲁⲙⲡⲁⲥ ⲉⲩⲙⲟⲩϩ ϩⲁ ⲛⲉϥⲥⲡⲓⲣⲟⲟⲩⲉ ⲛⲧⲉⲣⲟⲩⲉⲣ ⲡⲁⲓ ⲇⲉ ⲉⲡⲙⲁ ⲛⲟⲩⲕⲁⲡⲛⲟⲥ ⲁⲩⲟⲩⲛⲟϭ ⲛⲥϯⲛⲟⲩⲃⲉ ⲉⲓ ⲉⲃⲟⲗ ⲁϥϣⲱϣ ⲉⲟⲩⲟⲛ ⲛⲓⲙ ⲉⲧϩⲙ ⲡⲙⲁ ⲉⲧⲙⲙⲁⲩ ⲉⲩⲃⲁⲥⲁⲛⲓⲍⲉ ⲇⲉ ⲙⲙⲟϥ ⲉⲡⲉϩⲟⲩⲟ ⲙⲡⲉϥⲁϣⲁϩⲟⲙ ⲉⲡⲧⲏⲣϥ ⲟⲩⲇⲉ ⲙⲡⲉϥⲣⲓⲙⲉ ⲡⲉϫⲉ ⲇⲉⲕⲓⲟⲥ ⲛⲁϥ ϫⲉ ⲉϥⲧⲱⲛ ⲡⲉⲕⲥⲁⲉⲓⲛ ⲧⲉⲛⲟⲩ ⲙⲁⲣⲉϥⲉⲓ ⲛϥⲑⲉⲣⲁⲡⲉⲩⲉ ⲙⲙⲟⲕ ⲕⲁⲓⲅⲁⲣ ⲁⲕϫⲟⲟⲥ ϫⲉ ⲉⲓϣⲁⲛⲙⲟⲩ ⲟⲩⲛϣ ϭⲟⲙ ⲙⲙⲟϥ ⲛϥⲧⲟⲩⲛⲟⲥⲧ ⲛⲕⲉⲥⲟⲡ ⲡϩⲁⲅⲓⲟⲥ ⲇⲉ ⲙⲉⲣⲕⲟⲩⲣⲓⲟⲥ ⲡⲉϫⲁϥ ⲛⲁϥ ϫⲉ ⲁⲣⲓ ⲡⲉⲧⲉϩⲛⲁⲕ ⲟⲩⲛⲧⲕ ⲉⲝⲟⲩⲥⲓⲁ ⲉⲡⲁⲥⲱⲙⲁⲭ ⲧⲁⲯⲩⲭⲏ ⲇⲉ ⲡⲛⲟⲩⲧⲉ ⲙⲁⲩⲁⲁϥ ⲡⲉⲧⲟ ⲛϫⲟⲉⲓⲥ ⲉⲣⲟⲥ ⲁⲩⲱ ⲡⲁⲥⲱⲙⲁ ⲙⲉⲛ ⲉⲕϣⲁⲛⲧⲁⲕⲟϥ ⲧⲁⲯⲩⲭⲏ ⲛⲁⲙⲟⲩⲛ ⲉⲃⲟⲗ ⲉⲥⲟ ⲛⲁⲧⲧⲁⲕⲟ ⲛⲟⲩⲟⲉⲓϣ ⲛⲓⲙ ⲡⲁⲗⲓⲛ ⲟⲛ ⲁϥⲕⲉⲗⲉⲩⲉ ⲛϭⲓ ⲡⲣⲣⲟ ⲉⲧⲣⲉⲩⲁϣⲧϥ ⲛⲥⲁϫⲱϥ ⲛⲥⲉⲉⲓϣⲉ ⲛⲕⲉⲛⲟϭ ⲛⲱⲛⲉ ⲉϥϩⲟⲣϣ ⲛⲥⲁ ⲡⲉϥⲙⲁϩⲕ ϫⲉⲕⲁⲥ ϩⲙ ⲡⲧⲣⲉϥⲱϭⲧ ⲉϥⲉⲙⲟⲩ ϩⲛ ⲟⲩϭⲉⲡⲏ ⲡⲙⲁⲣⲧⲩⲣⲟⲥ ⲇⲉ ⲉⲧⲟⲩⲁⲁⲃ. ⲁⲧϭⲟⲙ ⲙⲡⲛⲟⲩⲧⲉ ⲟⲩⲱϩ ⲉⲣⲟϥ ⲙⲛ ⲧⲉϥⲭⲁⲣⲓⲥ ⲁϥⲙⲟⲩⲛ ⲉⲃⲟⲗ ϩⲛ ⲧⲉⲓⲃⲁⲥⲁⲛⲟⲥ ⲧⲁⲓ ⲛⲟⲩⲛⲟϭ ⲛⲛⲁⲩ
19. ⲇⲉⲕⲓⲟⲥ ⲇⲉ ⲛⲧⲉⲣⲉϥⲛⲁⲩ ⲉⲡⲙⲁⲕⲁⲣⲓⲟⲥ ϫⲉ ⲁϥϥⲓ ϩⲁ ⲛⲉⲓⲇⲓⲙⲱⲣⲓⲁ ϩⲛ ⲟⲩⲙⲛⲧϫⲱⲱⲣⲉ ⲁⲩⲱ ϫⲉ ⲙⲛⲗⲁⲁⲩ ⲛⲃⲁⲥⲁⲛⲟⲥ ϫⲱϩ ⲉⲣⲟϥ ⲁϥⲕⲉⲗⲉⲩⲉ ⲛⲥⲉϥⲓ ⲡⲱⲛⲉ ⲙⲙⲁⲩ ⲉⲃⲟⲗ ϩⲙ ⲡⲉϥⲙⲁϩⲕ ⲛⲥⲉⲉⲓⲛⲉ ⲛⲟⲩⲙⲁⲥⲧⲓⲅⲝ ⲛⲕⲱϩⲧ ⲉⲥⲟ ⲛϥⲧⲟⲟⲩ ⲛⲕⲱⲃ ⲛⲥⲉ ⲙⲁⲥⲧⲓⲅⲟⲩ ⲙⲙⲟϥ ⲛϩⲏⲧⲥ ϣⲁⲛⲧⲉ ⲡⲕⲁϩ ⲉⲧϩⲁⲣⲁⲧϥ ϩⲱⲣⲡ ϩⲙ ⲡⲉϥⲥⲛⲟϥ ⲡⲉⲓⲅⲉⲛⲛⲁⲓⲟⲥ ⲇⲉ ⲉϥⲟ ⲛⲑⲉ ⲛⲟⲩⲱⲛⲉ ⲛⲁⲇⲁⲙⲁⲥ ⲁϥⲧⲱⲟⲩⲛ ϩⲛ ⲟⲩⲙⲛⲧϫⲱⲱⲣⲉ ϩⲁ ⲧⲉⲓⲁϣⲏ ⲛⲃⲁⲥⲁⲛⲟⲥⲭ ⲡⲉϫⲁϥ ϫⲉ ϯⲉⲩⲭⲁⲣⲓⲥⲧⲉⲓ ⲛⲁⲕ ⲡⲕⲉ ϫⲟⲉⲓⲥ ⲡⲛⲟⲩⲧⲉ ϫⲉ ⲁⲕⲁⲁⲧ ⲛⲙⲡϣⲁ ⲉⲧⲣⲉⲩⲃⲁⲥⲁⲛⲓⲍⲉ ⲙⲙⲟⲓ ⲉϫⲙ ⲡⲉⲕⲣⲁⲛ ⲉⲧⲟⲩⲁⲁⲃ
20. ⲡⲣⲣⲟ ⲇⲉ ⲛⲧⲉⲣⲉϥⲉⲓⲙⲉ ϫⲉ ⲟⲩⲁⲧⲡⲱⲱⲛⲉ ⲡⲉ ϩⲙ ⲡⲉϥⲗⲟⲅⲓⲥⲙⲟⲥ ⲁⲩⲱ ϫⲉ ϥⲛⲁⲡⲓⲑⲉ ⲙⲙⲟϥ ⲁⲛ ⲉⲧⲣⲉϥⲑⲩⲥⲓⲁⲍⲉⲭ ⲁϥϫⲓ ⲛⲟⲩϣⲟϫⲛⲉ ⲉⲛⲉϥϭⲉⲡⲏ ⲅⲁⲣ ⲡⲉ ⲉⲃⲱⲕ ⲉϩⲣⲱⲙⲏ ⲁϥϯ ⲁⲡⲟⲫⲁⲥⲓⲥ ⲉⲣⲟϥ ⲉⲧⲣⲉⲩⲇⲓⲙⲱⲣⲉⲓ ⲙⲙⲟϥ ϩⲛ ⲧⲥⲏϥⲉ ⲉϥϫⲱ ⲙⲙⲟⲥ ϫⲉ ⲙⲉⲣⲕⲟⲩⲣⲓⲟⲥ ⲡⲁⲓ ⲛⲧⲁϥⲥⲱϣ ⲛⲛⲛⲟⲩⲧⲉ ⲁⲩⲱ ⲁϥⲕⲁⲧⲁⲫⲣⲟⲛⲉⲓ ⲙⲡⲇⲟⲅⲙⲁ ⲉⲧⲟⲩⲁⲁⲃ ⲛⲧⲙⲛⲧ ⲣⲙⲣⲁϣ ⲁϥⲟⲡϥ ⲉⲩⲗⲁⲁⲩⲭ ⲡⲉⲛⲕⲣⲁⲧⲟⲥ ⲛⲉⲩⲥⲉⲃⲏⲥ ⲕⲉⲗⲉⲩⲉ ⲉⲧⲣⲉⲩϫⲓⲧϥ ⲉⲧⲕⲁⲡⲡⲁⲗⲱⲕⲓⲁ ⲛⲥⲉϥⲓ ⲛⲧⲉϥⲁⲡⲉ ϩⲙ ⲡⲙⲁ ⲉⲧⲙⲙⲁⲩ ϫⲉⲕⲁⲥ ⲉⲣⲉ ⲟⲩⲟⲛ ⲛⲓⲙ ⲑⲉⲱⲣⲉⲓ ⲙⲙⲟϥ ⲟⲩⲟⲛ ⲅⲁⲣ ⲛⲓⲙ ⲛⲧⲁⲩϫⲓ ⲉⲟⲟⲩ ⲉⲃⲟⲗ ϩⲓⲧⲙ ⲡⲣⲣⲟⲭ ⲉⲩϣⲁⲛⲁⲛⲧⲓⲗⲉⲅⲉ ⲟⲩⲃⲉ ⲡⲉⲛⲟⲩⲉϩⲥⲁϩⲛⲉⲭ ⲥⲉⲛⲁϯ ⲛⲁϥ ⲛϩⲉⲛⲛⲟϭ ⲛⲃⲁⲥⲁⲛⲟⲥ ⲉⲡϩⲁⲉ ⲇⲉ ⲥⲉⲛⲁⲡⲁⲣⲁⲇⲓⲇⲟⲩ ⲙⲙⲟϥ ⲉⲧⲟⲟⲧⲥ ⲛⲧⲥⲏϥⲉ ⲛⲉⲛⲧⲁⲩⲧⲟϣⲟⲩ ⲇⲉ ⲉⲧⲣⲉⲩϥⲓⲧϥ ⲁⲩϥⲓ ϩⲁⲣⲟϥ ⲁⲩⲧⲁⲗⲟϥ ⲉⲩⲧⲃⲛⲏ ⲁⲩⲙⲟⲣϥ ⲉⲕⲊ ϩⲣⲁⲓ ⲉϫⲱϥ ⲉⲃⲟⲗ ϫⲉ ⲁⲡⲥⲱⲙⲁ ⲙⲡⲙⲁⲕⲁⲣⲓⲟⲥ ⲃⲱⲗ ⲉⲃⲟⲗ ⲛⲥⲁ ⲥⲁ ⲛⲓⲙ ⲁⲩⲱ ⲁϥⲣ ⲑⲉ ⲛⲟⲩⲕⲱⲱⲥ ⲧⲏⲣϥ ⲁⲩⲙⲟⲟϣⲉ ⲇⲉ ϩⲛ ⲟⲩϩⲓⲏ ⲉⲥⲟⲩⲏⲩ ⲁⲩⲱ ϩⲓⲧⲛ ϩⲛ ⲕⲟⲩⲓ ⲛϩⲟⲟⲩ ⲁⲩⲡⲱϩ ⲉⲧⲡⲟⲗⲓⲥ ⲕⲁⲓⲥⲁⲣⲓⲁⲭ ⲁⲩⲱ ⲛⲧⲉⲓϩⲉ ⲁⲩⲟⲩⲁϩϥ ⲉⲡⲉⲥⲏⲧ ⲕⲟⲩⲓ ⲕⲟⲩⲓ ⲡϫⲟⲉⲓⲥ ⲇⲉ ⲁϥⲁϩⲉⲣⲁⲧϥ ϩⲓϫⲱϥ ⲡⲉϫⲁϥ ⲛⲁϥ ⲁⲉ ⲙⲉⲣⲕⲟⲩⲣⲓⲉ ⲁⲙⲟⲩ ⲛⲅⲉⲙⲧⲟⲛ ⲙⲙⲟⲕⲭ ⲉⲡⲓⲇⲏ ⲁⲕϫⲉⲕ ⲡⲉⲕⲇⲣⲟⲙⲟⲥ ⲉⲃⲟⲗ ⲁⲕϩⲁⲣⲉϩ ⲉⲧⲡⲓⲥⲧⲓⲥ ϫⲓ ⲇⲉ ⲛⲁⲕ ⲙⲡⲉⲕⲗⲟⲙ ⲛⲧⲙⲛⲧϫⲱⲱⲣⲉ ⲡⲉⲛⲧⲁⲩⲧⲟϣϥ ⲛⲁⲕ ⲉⲕⲗⲏⲣⲟⲛⲟⲙⲉⲓ ⲙⲙⲟϥ
21. ⲡⲙⲁⲣⲧⲩⲣⲟⲥ ⲇⲉ ⲉⲧⲟⲩⲁⲁⲃ ϩⲙ ⲡⲧⲣⲉ ⲡϫⲟⲉⲓⲥ ⲟⲩⲱⲛϩ ⲛⲁϥ ⲉⲃⲟⲗ ⲁϥϭⲙϭⲟⲙ ⲉⲡⲉϩⲟⲩⲟ ⲡⲉϫⲁϥ ⲛⲛⲉⲧϩⲁⲑⲏϥ ϫⲉ ⲁⲣⲓ ⲡⲉⲛⲧⲁⲩⲟⲩⲉϩⲥⲁϩ ⲛⲉ ⲙⲙⲟϥ ⲛⲏⲧⲛ ϩⲛ ⲟⲩϭⲉⲡⲏⲭ ⲉⲣⲉ ⲡϫⲟⲉⲓⲥ ⲇⲉ ⲡⲁⲓ ⲉⲧⲧⲱϩⲙ ⲉⲟⲩⲟⲛ ⲛⲓⲙ ⲉϩⲟⲩⲛ ⲉⲧ ⲙⲉⲧⲁⲛⲓⲁ ⲉϥⲉⲧⲣⲉⲧⲉⲧⲛⲙⲡϣⲁ ⲛⲧⲉϥⲭⲁⲣⲓⲥ ⲟⲩⲣⲙⲙⲁⲟ ⲅⲁⲣ ⲡⲉ ⲁⲩⲱ ϣⲁϥ ⲭⲁⲣⲓⲍⲉ ⲛⲧⲉϥⲇⲱⲣⲉⲁ ⲛⲟⲩⲟⲛ ⲛⲓⲙ ⲉⲧⲛⲁⲡⲓⲥⲧⲉⲩⲉ ⲉⲣⲟϥ ⲁϫⲛ ⲫⲑⲟⲛⲟⲥ ⲛⲧⲉ ⲕⲍ ⲣⲉϥϫⲉ ⲛⲁⲓ ⲇⲉ ⲁⲩϥⲓ ⲛⲧⲉϥⲁⲡⲉ ⲁϥϫⲱⲕ ⲉⲃⲟⲗ ⲛⲑⲟⲙⲟⲗⲟⲅⲓⲁ ⲙⲡⲛⲟⲩⲧⲉ ⲡⲉⲛⲥⲱⲧⲏⲣ ⲛⲥⲟⲩⲁⲟⲩⲧⲏ ⲙⲡⲉⲃⲟⲧ ϩⲁⲑⲱⲣ ⲁⲩⲛⲟϭ ⲅⲁⲣ ⲛϣⲡⲏⲣⲉ ϣⲱⲡⲉ ⲛϣⲟⲩⲉⲣ ⲡⲉⲥⲙⲉⲉⲩⲉ ⲙⲛⲛⲥⲁ ⲧⲣⲉ ⲡⲙⲁⲣⲧⲩⲣⲟⲥ ⲇⲉ ⲁⲱⲕ ⲉⲃⲟⲗ ⲁⲡⲉϥⲥⲱⲙⲁ ⲟⲩⲃⲁϣ ⲛⲑⲉ ⲛⲟⲩⲭⲓⲱⲛ ⲉϥϣⲉϣ ⲥϯⲛⲟⲩⲃⲉ ⲉⲃⲟⲗ ⲛⲑⲉ ⲛϩⲉⲛϩⲏⲛⲉ ⲉⲩⲥⲟⲧⲡ ⲙⲛ ⲟⲩⲥⲟϭⲛ. ⲉⲧⲃⲉ ⲡⲉⲓⲙⲁⲉⲓⲛ ⲇⲉ ⲁϩⲁϩ ⲡⲓⲥⲧⲉⲩⲉ ⲉⲡⲛⲟⲩⲧⲉ ⲁⲩϣⲱⲡⲉ ⲛⲭⲣⲏⲥⲧⲓⲁⲛⲟⲥ ⲡⲡⲉⲧⲟⲩⲁⲁⲃ ⲙⲙⲁⲣⲧⲩⲣⲟⲥ ⲁⲩⲟⲩⲁϩϥ ϩⲡ ⲟⲩⲧⲟⲡⲟⲥ ⲉⲛⲁⲛⲟⲩϥ ⲁⲩⲱ ⲉϥⲟϣⲟⲛϩ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩⲭ ⲁⲩⲱ ⲁϩⲉⲙⲙⲏⲏϣⲉ ⲛⲧⲁⲗϭⲟ ϣⲱⲡⲉ ϩⲙ ⲡⲙⲁ ⲉⲧⲙⲙⲁⲩ ϩⲓⲧⲛ ⲛⲉϭⲟⲙ ⲙⲡⲛⲟⲩⲧⲉ ⲙⲛ ⲡⲉϥⲡⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉⲟⲟⲩ ⲙⲡⲛⲟⲩⲧⲉ ⲡⲉⲓⲱⲧ ⲙⲛ ⲡⲉⲛⲁⲟⲉⲓⲥ ⲓ̅ⲥ̅ ⲡⲉⲭ̅ⲥ̅ ⲙⲛ ⲡⲉⲡⲛⲁ ⲉⲧⲟⲩⲁⲁⲃ ⲛⲣⲉϥⲧⲁⲛϩⲟ ⲧⲉⲛⲟⲩ ⲁⲩⲱ ⲛⲟⲩⲟⲉⲓϣ ⲛⲓⲙ ϣⲁ ⲉⲛⲉϩ ⲛⲉⲛⲉϩ ϩⲁⲙⲏⲛ
ⲟⲩⲉⲛⲅⲱⲙⲓⲟⲛ ⲉⲁϥⲧⲁⲩⲟϥ ⲛϭⲓ ⲡⲡⲉⲧⲟⲩⲁⲁⲃ ⲁⲡⲁ ⲁⲅⲁⲅⲓⲟⲥ ⲡⲉⲡⲓⲥⲕⲟⲡⲟⲥ ⲛⲧⲓⲇ ⲛⲉⲟⲕⲉⲥⲁⲣⲓⲁ ⲛⲧⲕⲁⲡⲡⲁⲇⲱⲕⲓⲁ ϩⲙ ⲡⲙⲁⲣⲧⲏⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉⲥⲧⲣⲁⲧⲉⲗⲁⲧⲏⲥ ⲉⲧⲧⲁⲓⲏⲩ ⲙⲡⲉⲭ̅ⲥ̅ ϩⲙ ⲡⲉϩⲟⲟⲩ ⲙⲡⲉϥϣⲁ ⲉⲧⲟⲩⲁⲁⲃ ⲉⲧⲉ ⲥⲟⲩϫⲟⲩⲧ ⲡⲉ ⲙⲡⲉⲃⲟⲧ ϩⲁⲑⲱⲣ ⲉϥⲉⲛⲅⲱⲙⲓⲁⲍⲉ ⲛⲟⲩⲙⲏⲏϣⲉ ⲛϭⲟⲙ ϩⲓ ϣⲡⲏⲣⲉ ⲉⲁⲩϣⲱⲡⲉ ⲉⲃⲟⲗ ϩⲓⲧⲟⲟⲧϥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲛ ⲟⲩⲉⲓⲣⲏⲛⲏ ⲛⲧⲉ ⲡⲛⲟⲩⲧⲉ ϩⲁⲙⲏⲛ
1. ⲁⲗⲏⲑⲱⲥ ⲁⲡⲟⲩⲟⲉⲓⲛ ϣⲁ ⲛⲛⲇⲓⲕⲁⲓⲟⲥ ⲱ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲕⲁⲧⲁ ⲡϣⲁϫⲉ ⲙⲡⲕⲓⲑⲁⲣⲁⲧⲟⲥ ⲁⲩⲱ ⲡⲣⲉϥϫⲱ ⲉⲡⲛⲟⲩⲧⲉ ⲁⲩⲱ ⲡⲉⲓⲱⲧ ⲙⲡⲉⲭⲥ ⲕⲁⲧⲁ ⲥⲁⲣⲝ ⲡⲣⲣⲟ ⲛⲇⲓⲕⲁⲓⲟⲥ ⲁⲩⲱ ⲡϩⲩⲙⲛⲟⲇⲟⲥ ⲉⲧⲟⲩⲁⲁⲃ ⲇⲁⲇ ⲉϥⲱϣ ⲉⲃⲟⲗ ϩⲛ ⲧⲉϥⲥⲙⲏ ⲉⲧⲛⲟⲧⲙ ⲉϥϫⲱ ϩⲛ ⲧⲉϥⲕⲓⲑⲁⲣⲁ ϩⲙ ⲡⲉⲡⲗⲉⲕⲧⲣⲟⲛ ⲉⲧⲉⲛⲧⲟⲟⲧϥ ⲉϥϫⲱ ⲙⲙⲟⲥ ϫⲉ ⲁⲡⲟⲩⲟⲉⲓⲛ ϣⲁ ϩⲙ ⲡⲕⲁⲕⲉ ⲛⲛⲉⲧⲥⲟⲩⲧⲱⲛ ⲡⲉⲛⲥⲱⲧⲏⲣ ⲇⲉ ϩⲱⲱϥ ⲟⲛ ϫⲱ ⲙⲙⲟⲥ ϩⲙ ⲡⲉⲩⲁⲅⲅⲉⲗⲓⲟⲛ ⲉⲧⲟⲩⲁⲁⲃ ϫⲉ ⲧⲟⲧⲉ ⲛⲛⲇⲓⲕⲁⲓⲟⲥ ⲥⲉⲛⲁⲣ ⲟⲩⲟⲉⲓⲛ ⲛⲑⲉ ⲙⲡⲣⲏ ϩⲛ ⲧⲙⲛⲧⲉⲣⲟ ⲙⲡⲉⲩⲉⲓⲱⲧ
2. ⲟⲛⲧⲱⲥ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲁⲩ ⲉⲡⲟⲩⲟⲉⲓⲛ ⲛⲁⲗⲏⲑⲓⲛⲟⲛ ϫⲓⲛ ⲉϥⲟ ⲛϩⲉⲗⲗⲏⲛ ⲙⲡⲁⲧⲉϥⲥⲟⲩⲛ ⲡⲉⲭⲁⲣⲓⲥⲙⲁ ⲕⲁⲗⲱⲥ ⲁⲩⲱ ⲛⲧⲉⲣⲉϥϩⲟⲕϥ ⲛϥⲃⲱⲕ ⲉⲃⲟⲗ ⲉⲡⲡⲟⲗⲩⲙⲟⲥ ⲛⲛⲃⲁⲣⲃⲁⲣⲟⲥ ⲉϥϩⲓⲑⲏ ⲛⲇⲉⲕⲓⲟⲥ ⲡⲁⲛⲟⲙⲟⲥ ϩⲱⲥ ⲡⲟⲗⲩⲙⲁⲣⲭⲏⲥ ⲁϥⲁⲙⲁϩⲧⲉ ⲛϩⲉⲛⲥⲟⲧⲉ ⲛⲁⲓ ⲉⲧϥⲛⲁϣⲱⲱϭⲉ ⲛⲛⲃⲁⲣⲃⲁⲣⲟⲥ ⲛϩⲏⲧⲟⲩ ⲡⲁⲅⲅⲉⲗⲟⲥ ⲇⲉ ⲙⲡϫⲟⲉⲓⲥ ⲛⲉϥϩⲓⲟⲩⲉ ⲛⲧⲉϥⲥⲏϥⲉ ⲉϥⲱϫⲉⲛ ⲛⲛⲃⲁⲣⲃⲁⲣⲟⲥ ϩⲓϩⲏ ⲙⲙⲟϥ
3. ⲁⲛⲁⲩ ⲇⲉ ⲟⲛ ⲉⲡⲉⲓⲥⲁϩ ⲛⲥⲟⲫⲟⲥ ⲁⲩⲱ ⲙⲡⲣⲟⲫⲏⲧ:ⲥ ⲇⲁⲇ ⲡⲣⲣⲟ ⲛⲇⲓⲕⲁⲓⲟⲥ ⲡⲁⲓ ⲛⲧⲁⲛⲕⲁⲗⲉⲓ ⲙⲙⲟϥ ϩⲛ ⲧⲁⲣⲭⲏ ⲙⲡⲉⲡⲣⲟϩⲟⲓⲙⲓⲟⲛ ⲉⲙⲡⲉϥϭⲱ ⲛⲟⲩⲉϣ ⲟⲛⲟⲙⲁⲍⲉ ⲛⲛⲉⲓⲥⲟⲧⲉ ⲛⲧⲉⲓⲙⲓⲛⲉ ⲙⲛ ⲡⲇⲩⲛⲁⲧⲟⲥ ⲉⲧⲁⲙⲁϩⲧⲉ ⲙⲙⲟⲟⲩ ⲓⲉ ⲡⲉϫⲁϥ ⲅⲁⲣ ϩⲛ ⲟⲩⲁ ⲛⲛⲉϥⲯⲁⲗⲙⲟⲥ ϫⲉ ⲛⲑⲉ ⲛϩⲉⲛⲥⲟⲧⲉ ϩⲛ ⲧϭⲓϫ ⲙⲡⲇⲩⲛⲁⲧⲟⲥⲭ ⲉⲧⲉ ⲡⲁⲓ ⲡⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲗⲗⲁ ⲛⲧⲉⲣⲉϥϫⲉ ⲡⲁⲓ ⲉⲧⲃⲉ ⲧⲉϥⲙⲛⲧϫⲱⲱⲣⲉ ϩⲙ ⲡⲡⲟⲗⲩⲙⲟⲥ ⲁϥⲟⲩⲉϩⲙ ⲡϣⲁϫⲉ ⲟⲛ ⲛⲧⲉⲓϩⲉ ϫⲉ ⲛⲁⲓⲁⲧϥ ⲙⲡⲣⲱⲙⲉ ⲉⲧⲛⲁϫⲉⲕ ⲡⲟⲩⲱϣ ⲙⲡϫⲟⲉⲓⲥ ⲉⲃⲟⲗ
4. ⲁⲗⲏⲑⲱⲥ ⲱ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲡϫⲟⲉⲓⲥ ϫⲉⲕ ⲡⲉⲕⲟⲩⲱϣ ⲉⲃⲟⲗ ⲛⲑⲉ ⲛⲧⲁⲕⲉⲧⲉⲓ ⲙⲙⲟϥ ⲟⲛⲧⲟⲥ ϯⲛⲁϫⲟⲟⲥ ⲛⲁⲕ ϩⲛ ⲟⲩϣⲱⲱⲧ ⲉⲃⲟⲗ ϫⲉ ⲡⲉⲧⲉ ⲙⲡⲉⲕⲥⲟⲩⲱⲛϥ ⲟⲩⲇⲉ ⲙⲡⲉⲕⲉⲓⲙⲉ ⲉⲣⲟϥ ⲁϥϣⲱⲡⲉ ⲙⲙⲟⲕⲭ ⲉⲧⲉ ⲡⲁⲓ ⲡⲉ ⲡⲛⲟⲩⲧⲉ ⲉⲧⲉ ⲛⲅⲥⲟⲟⲩⲛ ⲙⲙⲟϥ ⲁⲛ ⲁⲉ ⲉⲕⲉⲁⲓⲧⲉⲓ ⲙⲙⲟϥ ⲛϥⲧⲟⲩϫⲟⲕ
5. ⲁⲗⲗⲁ ⲛⲧⲉⲣⲓϫⲓ ⲙⲡϫⲱⲱⲙⲉ ⲛⲧⲉⲕⲙⲁⲣⲧⲩⲣⲓⲁ ⲛⲧⲁⲱϣ ⲛϩⲏⲧϥ ⲁⲓϭⲉⲛⲧϥ ⲉϥⲥⲏϩ ⲛⲧⲉⲓϩⲉ ϫⲉ ⲁⲥϣⲱⲡⲉ ⲉⲣⲉ ⲇⲉⲕⲓⲟⲥ ⲟ ⲛⲣⲣⲟ ⲁⲩⲡⲟⲗⲩⲙⲟⲥ ⲉϥⲛⲁϣⲧ ⲧⲱⲟⲩⲛ ⲉϫⲱϥ ϩⲓⲧⲛ ⲟⲩⲉⲓⲕⲟⲛⲟⲙⲓⲁ ⲛⲧⲉ ⲡⲛⲟⲩⲧⲉ ⲉⲃⲟⲗ ϩⲓⲧⲟⲟⲧⲟⲩ ⲛⲛⲃⲁⲣⲃⲁⲣⲟⲥ ⲉⲧⲉⲣⲉ ⲡⲉⲩⲁⲩⲁⲛ ϣⲟⲃⲉ ⲁⲩⲱ ⲉⲩⲟ ⲛⲑⲉ ⲛⲛⲉⲑⲛⲣⲓⲟⲛ ϩⲛ ⲧⲉⲩⲫⲩⲥⲓⲥ ⲇⲉⲕⲓⲟⲥ ⲇⲉ ⲡⲣⲣⲟ ⲁϥϩⲟⲕϥ ⲁϥⲉⲓ ⲉⲃⲟⲗ ⲉⲣⲟⲟⲩ ⲙⲛ ⲡⲉϥⲥⲧⲣⲁⲧⲉⲩⲙⲁ ⲙⲙⲁⲧⲟⲓ ⲙⲛ ⲛⲉϥⲡⲟⲗⲩⲙⲁⲣⲭⲏⲥ ⲉⲣⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲟⲩⲏϩ ⲛⲥⲱⲟⲩ ⲉϥⲟ ⲛⲁⲡⲉ ⲉⲡⲁⲣⲓⲑⲙⲟⲥ ⲉⲧⲟⲩⲙⲟⲩⲧⲉ ⲉⲣⲟϥ ϫⲉ ⲙⲁⲣⲧⲩⲥⲓⲟⲛ
6. ⲛⲧⲉⲣⲟⲩⲁⲣⲭⲉⲓ ⲇⲉ ⲛⲥⲱⲣ ⲉⲃⲟⲗ ⲙⲡⲉⲙⲗⲁϩ ⲁⲩⲙⲓϣⲉ ⲙⲛ ⲛⲉⲩⲉⲣⲏⲩ ⲁⲩⲱ ⲛⲧⲉⲣⲉ ⲡⲡⲟⲗⲩⲙⲟⲥ ⲉⲛϣⲟⲧ ⲉϫⲛ ⲛⲉϩⲣⲱⲙⲉⲟⲥ ⲁⲩϣⲧⲟⲣⲧⲣ ⲉⲩⲛⲁⲩ ⲉⲧⲙⲛⲧⲁⲅⲣⲓⲟⲥ ⲛⲛⲃⲁⲣⲃⲁⲣⲟⲥ ⲉϩⲟⲩⲛ ⲉⲣⲟⲟⲩ ⲁⲩⲱ ϩⲛ ⲟⲩϣⲥⲛⲉ ⲁⲩⲟⲩⲱⲛ ⲛϭⲓ ⲛⲃⲁⲗ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲑⲉ ⲛⲓⲏⲥⲟⲩ ⲡϣⲏⲣⲉ ⲛⲛⲁⲩⲏ ⲙⲡⲉⲓⲟⲩⲟⲉⲓϣ ⲁϥⲛⲁⲩ ⲉⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲉⲣⲉ ⲧⲉϥⲥ:ϥⲉ ⲧⲟⲕⲙ ϩⲛ ⲧⲉϥϭⲓϫ ⲉϥϩⲓⲟⲩⲉ ⲛⲥⲁ ⲛⲃⲁⲣⲃⲁⲣⲟⲥ ϣⲁⲛⲧⲉϥⲁⲁⲩ ⲛϭⲱⲃ ⲁⲗⲗⲁ ⲙⲡⲉϥⲉⲓⲙⲉ ϩⲛ ⲟⲩⲙⲉ ϫⲉ ⲛⲓⲙ ⲡⲉⲧⲙⲓϣⲉ ⲉϫⲱϥ ⲁⲩⲱ ⲙⲡⲉ ⲡⲛⲟⲩⲧⲉ ⲟⲃϣϥ ⲉⲣⲟϥ ⲉⲧⲙⲧⲥⲁⲃⲟϥ ϫⲉ ⲛⲧⲟϥ ⲡⲉⲛⲧⲁϥⲧⲛⲛⲟⲟⲩ ⲙⲡⲉϥⲁⲅⲅⲉⲗⲟⲥ ⲁϥⲧⲟⲩϫⲟϥ ϩⲙ ⲡⲡⲟⲗⲩⲙⲟⲥ ⲛⲛⲃⲁⲣⲃⲁⲣⲟⲥ
7. ⲁⲥϣⲱⲡⲉ ⲇⲉ ⲉϥⲉⲛⲕⲟⲧⲕ ⲛⲟϣⲟⲩϣⲏ ⲉⲓⲥ ⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲁϥⲁⲓⲊ ϩⲉⲣⲁⲧϥ ϩⲓϫⲱϥ ⲙⲡⲉⲥⲙⲟⲧ ⲙⲡⲉⲛⲧⲁϥⲟⲩⲱⲛϩ ⲛⲁϥ ⲉⲃⲟⲗ ⲛϣⲟⲣⲡ ϩⲙ ⲡⲡⲟⲗⲩⲙⲟⲥ ⲁϥϣⲁϫⲉ ⲛⲙⲙⲁϥ ⲁⲩⲱ ⲁϥⲧⲥⲁⲃⲟϥ ⲉⲧⲉϩⲓⲏ ⲙⲡⲟⲩϫⲁⲓⲭ ⲁϥϯ ⲛⲁϥ ⲛϯⲣⲏⲛⲏ ⲁϥⲃⲱⲕ ⲉϩⲣⲁⲓ ⲉⲛⲙⲡⲏⲩⲉ ⲉϥϭⲱϣⲧ ⲛⲥⲱϥ ⲁⲩⲱ ⲙⲡⲁⲧⲉ ⲱⲥⲕ ϣⲱⲡⲉ ⲉϫⲓⲛⲧⲁ ⲡⲁⲅⲅⲉⲗⲟⲥ ⲟⲩⲱⲛϩ ⲉⲣⲟϥ ⲁⲡⲣⲣⲟ ⲛⲁⲛⲟⲙⲟⲥ ⲇⲉⲕⲓⲟⲥ ⲧⲛⲛⲟⲟⲩ ⲛⲥⲱϥ ⲉⲧⲣⲉϥϫⲓ ϣⲟϫⲛⲉ ⲛⲙⲙⲁϥ ⲁⲩⲱ ⲉⲧⲁⲗⲉ ⲑⲩⲥⲓⲁ ⲉϩⲣⲁⲓ ⲛⲧⲁⲣⲧⲩⲙⲓⲥ
8. ⲁⲗⲗⲁ ⲙⲡⲉϥⲡⲓⲑⲉ ⲉⲡⲁⲓ ⲛϭⲓ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲗⲗⲁ ⲁϥϥⲓ ϩⲁ ⲛⲕⲁⲧⲟⲓⲕⲟⲣⲓⲁ ⲛⲛⲉϥϫⲁϫⲉ ⲙⲛ ⲛⲁⲡⲉⲓⲗⲏ ⲙⲡⲣⲣⲟ ⲙⲛ ⲡϩⲓⲥⲉ ⲛⲛⲉⲃⲁⲥⲁⲛⲟⲥ ϣⲁⲛⲧⲉϥϫⲓ ⲙⲡⲉⲓⲛⲟϭ ⲛⲧⲁⲓⲟ ⲛⲧⲉⲓϭⲟⲧ ϩⲱⲥⲧⲉ ⲛϥⲧⲁⲗϭⲉ ⲟⲩⲟⲛ ⲛⲓⲙ ⲉⲧϣⲱⲛⲉ ⲉⲧⲛⲏⲩ ⲉⲡⲉϥⲧⲟⲡⲟⲥ ⲙⲛ ⲛⲉⲧⲛⲁⲥⲉⲡⲥⲱⲡϥ ⲟⲛ ϩⲛ ϩⲛⲙⲁ ⲉⲩⲟⲩⲏⲩ ⲁⲩⲱ ⲟⲛ ⲛⲉⲡⲛⲁ ⲛⲁⲕⲁⲑⲁⲣⲧⲟⲛ ⲛⲉϥⲛⲟⲩϫ ⲙⲙⲟⲟⲩ ⲉⲃⲟⲗ ϩⲓⲧⲛ ⲧⲉⲝⲟⲩⲥⲓⲁ ⲛⲧⲁ ⲡⲣⲣⲟ ⲡⲉⲭⲥ ⲧⲁⲁⲥ ⲛⲁϥ ⲛϣⲃⲃⲓⲱ ⲛⲛⲉϥϩⲓⲥⲉ ⲛⲧⲁϥϣⲟⲡⲟⲩ ⲙⲛ ⲡⲉⲥⲛⲟϥ ⲛⲧⲁϥⲡⲁϩⲧϥ ⲉⲃⲟⲗ ϩⲓϫⲙ ⲡⲉϥⲣⲁⲛ ⲉⲧⲟⲩⲁⲁⲃ
9. ⲉⲓⲛⲁϫⲉ ⲟⲩ ⲏ ⲉⲓⲛⲁⲧⲁⲩⲉ ⲟⲩ ⲉⲧⲃⲉ ⲧⲁϣⲏ ⲛⲛϭⲟⲙ ⲛⲧⲁⲕⲁⲁⲩ ⲱ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲙⲁⲣⲧⲩⲣⲟⲥ ⲛⲁⲙⲉ ⲙⲡⲉⲭⲥ ⲁⲗⲏⲑⲱⲥ ⲟⲩⲛⲟϭ ⲧⲉ ⲧⲉⲕⲙⲁⲣⲧⲩⲣⲓⲁ ⲧⲁⲓ ⲛⲧⲁⲩⲥϩⲁⲓⲥ ϫⲉ ⲁⲕⲟⲩⲟⲛϩⲥ ⲉⲃⲟⲗ ϩⲛ ⲛⲉⲑⲩⲥⲙⲟⲥ ⲛⲧⲉⲕⲕⲗⲏⲥⲓⲁ ⲱ ⲛⲓⲙ ⲡⲉⲧⲛⲁϣ ⲁⲛⲧⲓⲗⲉⲅⲉ ⲏ ⲛϥϫⲟⲟⲥ ϫⲉ ⲟⲩⲁⲅⲅⲉⲗⲟⲥ ⲡⲉⲛⲧⲁϥⲉⲣ ⲡⲁⲓ ϩⲙ ⲡⲉⲡⲣⲟⲥⲟⲡⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲥⲉⲥⲩⲙⲁⲛⲉ ⲛⲁⲛ ⲙⲡⲁⲓ ϩⲛ ⲧⲙⲉϩⲙⲏⲧⲉ ⲙⲛ ⲧⲙⲉϩⲙⲉⲧⲟⲩⲉ ⲛϩⲓⲥⲧⲟⲣⲓⲁ ⲛⲧⲉⲕⲗⲏⲥⲓⲁ ⲉⲣⲉ ϣⲟⲙⲛⲧ ⲛⲉⲡⲓⲥⲕⲟⲡⲟⲥ ⲉⲩⲟ ⲛϩⲟⲧ ⲟ ⲙⲙⲛⲧⲣⲉ ⲙⲡⲉⲓϣⲁϫⲉ ⲉⲟⲩⲁ ⲉⲃⲟⲗ ⲛϩⲏⲧⲟⲩ ⲡⲉ ⲡⲉⲧⲫⲱⲣⲉⲓ ⲙⲡⲛⲟⲩⲧⲉ ⲡⲛⲟϭ ⲃⲁⲥⲓⲗⲓⲟⲥ
10. ⲙⲡⲉϣⲟⲉⲓϣ ⲛⲓⲟⲩⲗⲓⲁⲛⲟⲥ ⲡⲣⲣⲟ ⲛⲁⲛⲟⲙⲟⲥ ⲛⲧⲉⲣⲉϥⲡⲱⲧ ⲉⲡⲡⲟⲗⲩⲙⲟⲥ ϩⲛ ⲧⲡⲉⲣⲥⲓⲥ ⲁϥⲕⲉⲗⲉⲩⲉ ⲉⲱⲧⲡ ⲉϩⲟⲩⲛ ⲙⲡⲛⲟϭ ⲃⲁⲥⲓⲗⲓⲟⲥ ⲙⲛ ⲛⲕⲉⲉⲡⲓⲥⲕⲟⲡⲟⲥ ⲉⲧⲛⲙⲙⲁϥ ⲉⲧⲃⲉ ⲟⲩⲁⲡⲟⲗⲟⲅⲓⲁ ⲛϣⲁϫⲉ ⲛⲧⲁϥⲧⲁⲁⲥ ⲙⲡⲣⲣⲟ ⲛϭⲓ ⲡⲛⲟϭ ⲃⲁⲥⲓⲗⲓⲟⲥ ⲉⲃⲟⲗ ϫⲉ ⲁⲡⲣⲣⲟ ⲁⲣⲭⲉⲓ ⲛⲥⲱⲃⲉ ⲙⲙⲟϥ ⲉϥϫⲱ ⲙⲙⲟⲥ ϫⲉ ⲛⲧⲁⲕⲕⲁ ⲡϣⲏⲣⲉ ⲙⲡϩⲁⲙϣⲉ ⲉⲧⲱⲛ ⲁⲕⲉⲓ ⲉⲡⲉⲓⲙⲁⲭ ⲉϥϣⲁϫⲉ ⲉⲡⲉⲛⲥⲱⲧⲏⲣ ⲁϥⲟⲩⲱϣⲃ ⲛϭⲓ ⲡϩⲁⲅⲓⲟⲥ ⲃⲁⲥⲓⲗⲓⲟⲥ ϫⲉ ⲛⲧⲁⲓⲕⲁⲁϥ ⲉⲧⲣⲉϥⲥⲙⲓⲛⲉ ⲛⲟⲩⲧⲁⲓⲃⲉ ⲉⲧⲣⲉⲩⲛⲉϫ ⲡⲉⲕⲥⲱⲙⲁ ⲉϩⲣⲁⲓ ⲉⲣⲟⲥ ⲁⲩⲱ ⲡⲣⲣⲟ ⲁϥϯ ⲥⲁ ⲉⲡϩⲁⲅⲓⲟⲥ ⲃⲁⲥⲓⲗⲓⲟⲥ ϫⲉ ⲡⲉϥϣⲃⲏⲣ ⲥⲃⲟⲩⲓ ⲡⲉ ⲁⲩⲱ ⲛⲧⲁⲩⲧⲥⲁⲃⲟ ⲉⲥϩⲁⲓ ϩⲛ ⲧⲉⲓⲁⲛⲍⲏⲃ ⲛⲟⲩⲱⲧ ⲙⲛ ⲛⲉⲩⲉⲣⲏⲩ ⲡⲉϫⲉ ⲡⲣⲣⲟ ϫⲉ ⲛⲟⲩϫ ⲛⲃⲁⲥⲓⲗⲓⲟⲥ ⲉⲡⲉϣⲧⲉⲕⲟ ϣⲁⲛϯⲃⲱⲕ ⲉⲧⲡⲉⲣⲥⲓⲥ ⲛⲧⲁⲕⲧⲟⲓ ⲡⲉϫⲉ ⲃⲁⲥⲓⲗⲓⲟⲥ ⲛⲁϩⲣⲙ ⲡⲣⲣⲟ ϫⲉ ⲉⲕϣⲁⲛⲃⲱⲕ ⲉⲕⲧⲟⲕ ⲉⲓⲙⲡⲉ ⲡⲛⲟⲩⲧⲉ ϣⲁϫⲉ ϩⲛ ⲃⲁⲥⲓⲗⲓⲟⲥ
11. ⲧⲟⲧⲉ ⲁⲡⲣⲣⲟ ⲃⲱⲕ ⲉⲧⲡⲉⲣⲥⲓⲥ ⲁⲩⲱ ⲙⲡⲉϥⲕⲧⲟϥ ⲕⲁⲧⲁ ⲡϣⲁϫⲉ ⲙⲡⲛⲟϭ ⲃⲁⲥⲓⲗⲓⲟⲥⲭ ⲁⲗⲗⲁ ⲁⲡⲛⲟⲩⲧⲉ ⲧⲛⲛⲟⲟⲩ ⲙⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲡⲁⲧⲁⲥⲥⲉ ⲛⲓⲟⲩⲗⲓⲁⲛⲟⲥ ⲡⲁⲛⲟⲙⲟⲥ ⲉϫⲛ ⲧⲙⲏⲧⲉ ⲙⲡⲉϥⲁⲛⲕⲉⲫⲁⲗⲟⲥ ϩⲙ ⲡⲕⲟⲛⲧⲁⲣⲓⲟⲛ ⲉⲧⲉⲛⲧⲟⲟⲧϥ ⲁⲩⲱ ⲛⲉϥϫⲓⲟⲩⲁ ⲡⲉ ⲉⲡⲛⲟⲩⲧⲉ ⲉϥⲛⲁ ⲙⲟⲩⲭ ⲉⲁϥⲙⲉϩ ⲧⲟⲟⲧϥ ϩⲙ ⲡⲉϥⲥⲛⲟϥ ⲙⲙⲓⲛ ⲙⲙⲟϥ ⲁϥⲛⲟϫϥ ⲉϩⲣⲁⲓ ⲉⲧⲡⲉ ⲉϥϫⲱ ⲙⲙⲟⲥ ϩⲉⲛ ⲧⲉϥⲙⲛⲧⲣⲉϥϫⲓⲟⲩⲁ ⲉⲡⲛⲟⲩⲧⲉ ϫⲉ ⲁⲕϥⲓ ⲡⲙⲁ ⲧⲏⲣϥ ⲓⲥ ⲁⲩⲱ ⲛⲧⲉⲓϩⲉ ⲁϥⲙⲟⲩ ϩⲛ ⲟⲩϭⲉⲡⲏ ⲙⲛ ⲟⲩϣⲧⲟⲣⲧⲣ ϩⲓⲧⲛ ⲧⲣⲁϩⲧⲥ ⲛⲧⲁ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲧⲁⲁⲥ ⲛⲁϥ ⲕⲁⲧⲁ ⲡⲟⲩⲉϩⲥⲁϩⲛⲉ ⲙⲡⲛⲟⲩⲧⲉ
12. ⲁⲗⲗⲁ ⲙⲉϣⲁⲕ ⲛⲧⲉ ⲟⲩⲁ ϫⲟⲟⲥ ϩⲛ ⲛⲉⲓⲙⲁⲓϯⲧⲱⲛ ϫⲉ ⲉⲣⲉ ⲙⲉⲣⲕⲟⲩⲣⲓⲟⲥ ϭⲓⲛⲉ ⲛⲓⲟⲩⲗⲓⲁⲛⲟⲥ ⲧⲱⲛ ⲥⲱⲧⲙ ⲱ ⲡⲉⲧϫⲛⲟⲩ ⲙⲙⲟⲓ ⲛⲧⲁϣⲁϫⲉ ⲛⲙⲙⲁⲕ ⲛⲧⲁⲛⲏⲫⲉ ⲙⲡⲉⲕⲛⲟⲩⲥ ⲙⲛ ⲡⲉⲕϩⲡⲧ ⲉⲧⲧⲏⲙ ⲁⲩⲱ ⲛⲧⲁϯⲕⲛⲉⲩⲉ ⲛⲁⲕ ϩⲛ ⲟⲩⲥⲟⲟⲩⲧⲛ ⲡϩⲁⲅⲓⲟⲥ ⲙⲉⲛ ⲙⲉⲣⲕⲟⲩⲣⲓⲟⲥ ⲛⲟⲩⲉⲃⲟⲗ ⲁⲛ ⲡⲉ ϩⲛ ⲛⲙⲙⲁⲣⲧⲩⲣⲟⲥ ⲛⲧⲁⲩϣⲱⲡⲉ ϩⲙ ⲡⲇⲓⲟⲅⲙⲟⲥ ⲛⲇⲓⲟⲕⲗⲏⲇⲓⲁⲛⲟⲥ ⲁⲗⲗⲁ ⲁϥⲉⲣ ⲙⲁⲣⲧⲩⲣⲟⲥ ⲛϭⲓ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲓⲛ ⲉⲡⲉⲩⲟⲉⲓϣ ⲛⲇⲉⲕⲓⲟⲥ ⲡⲣⲣⲟ ⲁⲩⲱ ⲛⲧⲁϥϫⲱⲕ ⲉⲃⲟⲗ ϩⲛ ⲧⲉⲓⲡⲟⲗⲓⲥ ⲧⲁⲓ ⲉⲧⲉ ⲧⲕⲁⲓⲥⲁⲣⲓⲁ ⲧⲉⲭ ⲉⲁⲩⲕⲱ ⲙⲡⲉϥⲥⲱⲙⲁ ⲉⲧⲧⲁⲓⲏⲩ ϩⲛ ⲟⲩⲙⲁ ⲉϥϩⲏⲡ ϩⲙ ⲡⲉⲓⲏⲣⲧ ⲛⲧⲡⲟⲗⲓⲥ ϣⲁⲛⲧⲉ ⲟⲩⲛⲟϭ ⲛⲟⲩⲟⲉⲓϣ ⲟⲩⲉⲓⲛⲉ ⲛⲥⲉⲕⲱⲧ ⲉⲣⲟϥ ⲛⲟⲩⲙⲁⲣⲧⲩⲣⲓⲟⲛ ⲁⲩⲱ ⲁⲩⲕⲱⲧ ⲛⲟⲩⲕⲟⲩⲓ ⲛⲕⲟⲓⲙⲏⲧⲏⲣⲓⲟⲛ ⲉϫⲱϥ ⲛⲑⲉ ⲛⲟⲩⲙⲁⲛϭⲟⲓⲗⲉ
13. ⲙⲛⲛⲥⲁ ⲛⲁⲓ ⲁϥⲉⲣ ⲣⲣⲟ ⲛϭⲓ ⲇⲓⲟⲕⲗⲏⲇⲓⲁⲛⲟⲥ ⲁϥϩⲱⲧⲃ ⲛⲟⲩⲙⲏⲏϣⲉ ⲙⲙⲁⲣⲧⲩⲣⲟⲥ ⲕⲁⲧⲁ ⲙⲁ ⲙⲛⲛⲥⲱⲥ ⲟⲛ ⲁⲡⲛⲟⲩⲧⲉ ϥⲓ ⲛⲧⲟⲟⲧϥ ⲛⲧⲙⲛⲧⲉⲣⲟ ⲁⲩⲱ ⲓⲏ ⲁϥⲣ ⲃⲗⲗⲉ ⲙⲡⲉϥⲃⲁⲗ ⲥⲛⲁⲩ ⲁϥϩⲙⲟⲟⲥ ⲁϥϫⲓ ⲙⲛⲧⲛⲁ ϩⲓⲣⲙ ⲡⲣⲟ ⲛⲧⲡⲩⲗⲏ ⲛⲧⲁⲛⲧⲓⲟⲭⲓⲁ ⲧⲡⲟⲗⲓⲥ ⲁⲩⲱ ⲁⲡⲉϥⲗⲁⲥ ⲙⲉϩ ⲣⲱϥ ⲁϥⲙⲟⲩ ϩⲛ ⲟⲩⲛⲟϭ ⲙⲙⲛⲧⲉⲃⲓⲏⲛ ⲡⲁⲣⲁ ⲣⲱⲙⲉ ⲛⲓⲙ ⲁⲩⲱ ⲁⲕⲟⲥⲧⲁⲛⲧⲓⲛⲟⲥ ⲡⲙⲁⲓⲛⲟⲩⲧⲉ ⲣ ⲣⲣⲟ ⲉⲡⲉϥⲙⲁ ⲁⲩⲱ ⲛⲧⲟϥ ⲡⲉⲛⲧⲁϥϭⲱⲗⲡ ⲉⲃⲟⲗ ⲙⲡⲧⲁⲫⲟⲥ ⲙⲛ ⲡⲉⲥ;ⲧⲁⲩⲣⲟⲥ ⲙⲡⲉⲛⲥⲱⲧⲏⲣ ⲉⲁϥⲕⲱⲧ ⲛⲛⲧⲟⲡⲟⲥ ⲛⲧⲁⲛⲁⲥⲧⲁⲥⲓⲥ ⲙⲛ ⲛⲉⲧⲟⲡⲟⲥ ⲉⲧϩⲛ ⲑⲓⲗⲏⲙ ⲁⲩⲱ ⲁϥⲥϩⲁⲓ ⲉⲃⲟⲗ ϩⲛ ⲭⲱⲣⲁ ⲛⲓⲙ ⲉⲧⲣⲉⲩⲕⲱⲧ ⲛϩⲉⲙⲙⲁⲣⲧⲩⲣⲓⲟⲛ ⲉⲡⲣⲁⲛ ⲛⲛⲉⲧⲟⲩⲁⲁⲃ ϩⲛ ⲭⲱⲣⲁ ⲛⲓⲙ ⲙⲛ ⲉⲡⲁⲣⲭⲓⲁ ⲛⲓⲙ ⲁⲩⲱ ⲛⲥⲉⲥϩⲁⲓ ⲛⲛϩⲓⲕⲱⲛ ⲛⲛⲉⲧⲟⲩⲁⲁⲃ ⲉϩⲉⲛⲥⲧⲩⲗⲗⲏ ⲛⲥⲉⲕⲁⲁⲩ ϩⲛ ⲛⲉⲩⲁⲩⲗⲏ ⲙⲛ ⲛⲉⲩⲕⲟⲓⲧⲱⲛ ⲙⲛ ⲛⲉⲩⲉⲣⲅⲁⲥⲧⲏⲣⲓⲟⲛ ⲉⲩⲃⲟⲏⲑⲓⲁ ⲛⲛⲉⲧⲟⲩⲏϩ ⲛϩⲏⲧⲟⲩ ⲙⲛ ⲛⲉⲧⲛⲁϣⲗⲏⲗ ⲛϩⲏⲧⲟⲩⲭ ϫⲉ ⲙⲡⲁⲧⲟⲩⲕⲉⲧ ϩⲁϩ ⲛⲉⲩⲕⲧⲏⲣⲓⲟⲛ ⲡⲉ ϫⲓⲛⲧⲁ ⲇⲓⲟⲕⲗⲏⲧⲓⲁⲛⲟⲥ ϣⲉⲣϣⲱⲣⲟⲩ ⲗⲟⲓⲡⲟⲛ ⲁⲩⲍⲟⲅⲣⲁⲫⲉⲓ ⲙⲡⲗⲟⲓⲙⲏⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲛ ϩⲁϩ ⲙⲙⲁ ϩⲛ ⲧⲡⲟⲗⲓⲥ ϩⲣⲱⲙⲏ ϩⲱⲥ ⲡⲣⲟⲥⲧⲁⲧⲏⲥ ⲛⲁⲩ ⲗⲟⲓⲡⲟⲛ ⲁⲡⲣⲣⲟ ⲕⲟⲥⲧⲁⲛⲧⲓⲛⲟⲥ ⲉⲙⲧⲟⲛ ⲙⲙⲟϥ ⲁⲛⲉϥϣⲏⲣⲉ ϫⲓ ⲛⲧⲙⲛⲧⲉⲣⲟ ⲉⲡⲉϥⲙⲁⲭ ϩⲁⲡⲁⲝ ϩⲁⲡⲗⲱⲥ ⲛⲕⲣⲣⲱⲟⲩ ⲧⲏⲣⲟⲩ ϣⲁⲉϩⲣⲁⲓ ⲉⲡⲣⲣⲟ ⲛⲁⲧⲛⲟⲩⲧⲉ ⲓⲟⲩⲗⲓⲁⲛⲟⲥ ⲡⲁⲛⲟⲙⲟⲥ
14. ⲗⲟⲓⲡⲟⲛ ϯⲥⲟⲟⲩⲛ ϫⲉ ⲁⲓⲧⲁⲩⲉ ϩⲛⲕⲟⲩⲓ ⲉⲣⲱⲧⲛ ⲙⲛ ⲧⲉⲧⲛⲁⲅⲁⲡⲏ ⲉⲧⲃⲉ ⲡⲁⲧⲛⲟⲩⲧⲉ ⲉⲧⲙⲙⲁⲩ ⲛⲑⲉ ⲛⲧⲁϥⲕⲉⲗⲉⲩⲉ ⲉⲱⲧⲡ ⲉϩⲟⲩⲛ ⲙⲡϩⲁⲅⲓⲟⲥ ⲃⲁⲥⲓⲗⲓⲟⲥ ⲡⲛⲟϭ ⲛⲉⲡⲓⲥⲕⲟⲡⲟⲥ ⲙⲛ ⲛⲕⲉⲉⲡⲓⲥⲕⲟⲡⲟⲥ ⲉⲧⲛⲙⲙⲁϥ ⲁⲩⲱ ⲛⲉⲩϣⲗⲏⲗ ⲉϩⲣⲁⲓ ⲉⲡⲛⲟⲩⲧⲉ ⲙⲡⲉϩⲟⲟⲩ ⲙⲛ ⲧⲉⲩϣⲏ ⲉⲩϫⲱ ⲙⲙⲟⲥ ϫⲉ ⲡϫⲟⲉⲓⲥ ⲙⲁⲣⲉ ⲛⲉⲕϫⲁϫⲉ ⲁⲱⲱⲣⲉ ⲉⲃⲟⲗ ϩⲛ ⲟⲩϭⲉⲡⲏ ⲁⲩⲱ ⲛⲧⲉ ⲟⲩⲕⲱϩⲧ ⲟⲩⲟⲙⲟⲩ ⲙⲡⲁⲧⲉ ⲱⲥⲕ ⲇⲉ ϣⲱⲡⲉ ⲁⲡⲛⲟⲩⲧⲉ ⲥⲱⲧⲙ ⲉⲡⲉⲩⲥⲟⲡⲥ ⲁϥⲧⲛⲛⲟⲟⲩ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲡⲁⲧⲁⲥⲥⲉ ⲛⲓⲟⲩⲗⲓⲁⲛⲟⲥ ⲡⲁⲛⲟⲙⲟⲥ ⲁⲩⲱ ⲙⲡⲉϥⲗⲟ ⲉϥⲃⲁⲥⲁⲛⲓⲍⲉ ⲙⲙⲟϥ ϩⲙ ⲡⲉϥⲕⲟⲛⲧⲁⲣⲓⲟⲛ ⲉⲧϩⲛ ⲧⲉϥϭⲓⲁ ϣⲁⲛⲧⲉϥⲙⲟⲩ ϩⲛ ⲟⲩⲙⲟⲩ ⲛϩⲟⲧⲉ
15. ϩⲛ ⲟⲩϣⲥⲛⲉ ⲇⲉ ⲉⲓⲥ ⲟⲩⲁⲅⲅⲉⲗⲟⲥ ⲛⲧⲉ ⲡϫⲟⲉⲓⲥ ⲁϥⲟⲩⲱⲛϩ ⲉⲃⲟⲗ ⲙⲡⲡⲉⲧⲟⲩⲁⲁⲃ ⲃⲁⲥⲓⲗⲓⲟⲥ ϩⲛ ⲟⲩϩⲟⲣⲟⲙⲁ ⲡⲉϫⲁϥ ⲛⲁϥ ϫⲉ ⲃⲁⲥⲓⲗⲓⲟⲥ ⲁⲡⲡⲉⲧϫⲟⲥⲉ ⲥⲱⲧⲙ ⲉⲡⲉⲕⲥⲟⲡⲥ ⲁϥⲧⲛⲛⲟⲟⲩⲧ ϣⲁ ⲡⲉⲓⲍⲟⲧⲓⲟⲛ ⲉⲧⲍⲱⲅⲣⲁⲫⲉⲓ ϩⲙ ⲡⲉⲓⲙⲁ ⲉⲧⲉ ⲡⲗⲩⲙⲏⲛ ⲡⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲧⲣⲉϥϣⲱⲡⲉ ⲛⲁϩⲟⲣⲁⲧⲟⲛ ⲙⲛ ⲡⲉϥϩⲧⲟ ⲉⲧⲉϥⲧⲁⲗⲏⲩ ⲉⲣⲟϥ ⲁϥϩⲱⲗ ⲉⲃⲟⲗ ⲁϥⲃⲱⲕ ⲉⲧⲡⲉⲣⲥⲓⲥ ⲁϥⲧⲱⲝ ⲙⲡⲉϥⲙⲉⲣⲉϩ ϩⲛ ⲧⲁⲡⲉ ⲛⲓⲟⲩⲗⲓⲁⲛⲟⲥ ⲡⲁⲛⲟⲙⲟⲥ ⲁϥⲕⲁⲁϥ ⲉϥⲃⲁⲥⲁⲛⲓⲍⲉ ⲙⲙⲟϥ ⲁⲓⲉⲓ ⲉⲧⲁⲙⲟⲕ ⲉⲡⲧⲱϣ ⲧⲱⲟⲩⲛ ϭⲉ ⲧⲉⲛⲟⲩ ⲙⲛ ⲛⲉⲕϣⲃⲏⲣ ⲛⲉⲡⲓⲥⲕⲟⲡⲟⲥ ⲛⲧⲉⲧⲛⲃⲱⲕ ⲉⲧϫⲟ ⲉⲧϥⲍⲟⲅⲣⲁⲫⲉⲓ ⲛϩⲏⲧⲥ ϫⲉⲕⲁⲥ ⲉⲧⲉⲧⲛⲁⲉⲓⲙⲉ ϫⲉ ϩⲙⲙⲉ ⲛⲉ ⲛⲁϣⲁϫⲉ ⲛⲧⲉⲩⲛⲟⲩ ⲁⲡϩⲁⲅⲓⲟⲥ ⲃⲁⲥⲓⲗⲓⲟⲥ ⲛⲉϩⲥⲉ ⲉϩⲣⲁⲓ ϩⲙ ⲡϩⲟⲣⲟⲙⲁ ⲡⲉϫⲁϥ ⲛⲛⲉϥϣⲃⲏⲣ ⲛⲉⲡⲓⲥⲕⲟⲡⲟⲥ ϫⲉ ⲧⲱⲟⲩⲛ ⲛⲧⲉⲧⲛⲃⲱⲕ ⲉⲡⲙⲁ ⲉⲣⲉ ⲧⲉⲥⲧⲩⲗⲗⲏ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲍⲟⲅⲣⲁⲫⲉⲓ ⲛϩⲏⲧϥ ⲉϣⲱⲡⲉ ⲙⲉⲧⲉⲧⲛϩⲉ ⲉⲣⲟϥ ⲉϥⲍⲟⲅⲣⲁⲫⲉⲓ ⲉⲓⲉ ⲁϥⲃⲱⲕ ⲉⲧ ⲡⲉⲣⲥⲓⲥ ⲕⲁⲧⲁ ⲑⲉ ⲛⲧⲁⲩϫⲟⲟⲥ ⲛⲁⲓ ⲧⲉⲛⲟⲩ ϩⲙ ⲡϩⲟⲣⲟⲙⲁ ⲁⲩⲱ ϯⲡⲓⲥⲧⲉⲩⲉ ⲉⲡⲛⲟⲩⲧⲉ ϫⲉ ⲁⲓⲟⲩⲗⲓⲁⲛⲟⲥ ⲙⲟⲩ ϩⲛ ⲟⲩⲙⲟⲩ ⲛⲉⲃⲓⲏⲛ ⲁⲩⲧⲱⲟⲩⲛ ⲇⲉ ⲛϭⲓ ⲛⲉⲉⲡⲓⲥⲕⲟⲡⲟⲥ ⲁⲩⲃⲱⲕ ⲉⲡⲙⲁ ⲉⲧϥⲍⲱⲅⲣⲁⲫⲉⲓ ⲛϩⲏⲧϥ ⲙⲡⲟⲩϭⲛⲧϥ ⲟⲩⲇⲉ ⲡⲉϥϩⲧⲟ ⲉⲧϥⲧⲁⲗⲏⲩ ⲉⲣⲟϥ ⲁⲡⲁ ⲃⲁⲥⲓⲗⲓⲟⲥ ⲇⲉ ⲁϥϫⲱ ⲛϩⲱⲃ ⲛⲓⲙ ⲛⲧⲁϥⲛⲁⲩ ⲉⲣⲟⲟⲩ ϩⲙ ⲡϩⲟⲣⲟⲙⲁ ⲉⲛⲉⲉⲡⲓⲥⲕⲟⲡⲟⲥ ⲁⲩⲱ ⲁⲩⲉⲛⲕⲟⲧⲕ ϣⲁ ϩⲧⲟⲟⲩⲉ ⲁⲩⲱ ⲛⲧⲉⲣⲉ ⲡⲟⲩⲟⲉⲓⲛ ϣⲁ ⲁⲩⲧⲱⲟⲩⲛ ⲛⲕⲉⲥⲟⲡ ⲁⲩⲃⲱⲕ ⲉⲡⲙⲁ ⲉⲧϥⲍⲟⲅⲣⲁⲫⲉⲓ ⲛϩⲏⲧϥ ⲁⲩⲱ ⲁⲩϭⲓⲛⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
16. ⲉϥⲧⲁⲗⲏⲩ ⲉⲡⲉϥϩⲧⲟ ⲉⲣⲉ ⲡⲉϥⲕⲟⲛⲧⲁⲣⲓⲟⲛ ϩⲛ ⲧⲉϥϭⲓϫ ⲉϥⲍⲟⲅⲣⲁⲫⲉⲓ ⲛⲧⲉϥϩⲉ ⲁⲩⲱ ⲛⲉⲣⲉ ⲡⲉϥⲕⲟⲛⲧⲁⲣⲓⲟⲛ ϫⲁⲕⲙ ⲛⲥⲛⲟϥ ⲉϥϣⲟⲩⲉ ⲥⲛⲟϥ ⲉⲡⲉⲥⲏⲧ ⲉϫⲙ ⲡⲕⲁϩ ⲁⲩⲱ ⲟⲩⲟⲛ ⲛⲓⲙ ⲉⲧⲛⲁⲩ ⲉⲣⲟϥ ⲁⲩⲉⲣ ϣⲡⲏⲣⲉ ⲁⲩϯ ⲉⲟⲟⲩ ⲙⲡⲛⲟⲩⲧⲉ ⲙⲛ ⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲙⲡⲁⲧⲉ ⲱⲥⲕ ⲇⲉ ϣⲱⲡⲉ ⲁⲡⲥⲟⲉⲓⲧ ⲉⲓ ⲉϩⲟⲩⲛ ⲉⲧⲡⲟⲗⲓⲥ ϩⲣⲱⲙⲏ ⲁⲉ ⲁⲩϩⲱⲧⲃ ⲛⲓⲟⲩⲗⲓⲁⲛⲟⲥ ⲡⲁⲛⲟⲙⲟⲥ ⲁⲩⲱ ⲁⲡⲣⲁⲛ ⲙⲡⲉⲭⲥ ϫⲓ ⲉⲟⲟⲩ ϩⲙ ⲙⲁ ⲛⲓⲙ
17. ⲱ ⲡⲁϫⲟⲉⲓⲥ ⲛⲉⲓⲱⲧ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥⲭ ⲛⲓⲙ ⲡⲉⲧⲛⲁϣ ϫⲱ ⲙⲡⲉⲕⲉⲟⲟⲩ ⲙⲛ ⲡⲉⲕⲕⲁⲓⲅⲁⲣ ⲁⲡⲁⲅⲅⲉⲗⲟⲥ ⲙⲡϫⲟⲉⲓⲥ ϣⲁϫⲉ ⲛⲙⲙⲁⲕ ⲛⲧⲁⲡⲣⲟ ϩⲓ ⲧⲁⲡⲣⲟ ⲙⲡⲁⲧⲉⲕⲥⲟⲩⲉⲛ ⲡⲛⲟⲩⲧⲉ ⲛⲅⲡⲓⲥⲧⲉⲩⲉ ⲉⲣⲟϥ ⲁⲩⲱⲟⲛ ⲛⲧⲉⲣⲉⲕⲉⲣ ⲙⲁⲣⲧⲩⲣⲟⲥ ⲁⲩⲍⲟⲅⲣⲁⲫⲉⲓ ⲙⲡⲉⲕⲗⲓⲙⲏⲛ ϩⲛ ⲛⲉϫⲟ ϩⲛ ϩⲉⲛⲡⲁϩⲣⲉ ⲛϩⲱⲃ ⲛϭⲓϫ ⲛⲣⲱⲙⲉ ⲁⲧⲉⲕⲥⲧⲩⲗⲗⲏ ϩⲱⲧⲃ ⲛⲟⲩⲣⲣⲟ ⲛⲁⲛⲟⲙⲟⲥ ⲉⲁϥϫⲓ ⲟⲩⲁ ⲉⲡⲛⲟⲩⲧⲉ ⲛⲧⲡⲉ ⲙⲛ ⲡⲕⲁϩ ⲉⲓϣⲁⲛⲟⲩⲱϣ ⲅⲁⲣ ⲉϫⲱ ⲛⲛϭⲟⲙ ⲙⲛ ⲛⲉϣⲡⲏⲣⲉ ⲛⲧⲁⲩϣⲱⲡⲉ ϩⲙ ⲡⲉⲕⲧⲟⲡⲟⲥ ⲉⲧⲟⲩⲁⲁⲃ ⲡϣⲁϫⲉ ⲛⲁⲁϣⲁⲓ ⲉⲡⲉϩⲟⲩⲟ ⲡⲗⲏⲛ ⲥⲱⲧⲙ ⲛⲧⲁϫⲱ ⲉⲣⲱⲧⲛ ⲛϩⲉⲛⲕⲟⲩⲓ ⲉⲃⲟⲗ ϩⲛ ⲧⲁϣⲏ ⲛⲛϭⲟⲙ ⲙⲛ ⲛⲉϣⲡⲏⲣⲉ ⲛⲧⲁ ⲡⲛⲟⲩⲧⲉ ⲁⲁⲩ ⲉⲃⲟⲗϩⲓⲧⲙ ⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲧϣⲟⲣⲡ ⲉⲛϭⲟⲙ ⲛⲧⲁⲥϣⲱⲡⲉ ⲉⲃⲟⲗ ϩⲓⲧⲟⲟⲧϥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲥϣⲱⲡⲉ ⲇⲉ ⲛⲧⲉⲣⲉ ⲡⲛⲟⲩⲧⲉ ⲉⲣ ⲁⲛⲁϥ ⲉⲟⲩⲱⲛϩ ⲉⲃⲟⲗ ⲛⲛⲕⲉⲉⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲉⲕⲁⲥ ⲉⲣⲉ ⲡⲉϥⲣⲁⲛ ϫⲓ ⲉⲟⲟⲩ ϩⲙ ⲡⲕⲁϩ ⲧⲏⲣϥ ⲛⲉⲩⲛ ⲟⲩⲥϩⲓⲙⲉ ⲛⲉⲩⲅⲉⲛⲏⲥ ϩⲛ ⲧⲡⲟⲗⲓⲥ ⲉⲩϩⲉⲗⲗⲏⲛ ⲧⲉ ⲉⲥϣⲙϣⲉ ⲛⲟⲩⲧⲟⲩⲱⲧ ⲛⲛⲟⲩϥ ⲉϥⲉⲓⲛⲉ ⲛⲟⲩϩⲟ ⲛϩⲓⲃⲱⲓ ⲁⲥϣⲱⲡⲉ ⲇⲉ ⲛⲟⲩϩⲟⲟⲩ ⲉⲥϩⲙⲟⲟⲥ ⲛϩⲟⲩⲛ ⲉⲡⲉⲥⲏⲧ ⲙⲛ ⲧⲉⲥϣⲉⲉⲣⲉ ⲉⲛⲉⲁⲥⲉⲣ ⲭⲏⲣⲁ ⲅⲁⲣ ⲙⲡⲁⲧⲉ ⲱⲥⲕ ϣⲱⲡⲉ ⲁⲩⲱⲛⲉⲩⲛⲧⲁⲥ ⲙⲙⲁⲩ ⲛⲟⲩⲁϣⲏ ⲛⲭⲣⲏⲙⲁ ϩⲛ ⲧⲡⲁϣⲉ ⲇⲉ ⲙⲡⲉϩⲟⲟⲩ ⲉⲣⲉ ⲡⲣⲏ ⲁϩⲉⲣⲁⲧϥ ϩⲛ ⲧⲙⲏⲧⲉ ⲛⲧⲡⲉ ϩⲛ ⲟⲩϣⲥⲛⲉ ⲇⲉ ⲁⲡⲉϩⲗⲟⲥⲧⲛ ϣⲟⲩⲟ ⲉⲡⲉⲥⲏⲧ ϩⲙ ⲡⲉⲥⲁⲛⲕⲉⲫⲁⲗⲟⲥ ⲛⲑⲉ ⲛϩⲉⲛⲣⲉⲙⲉⲓⲏ ϣⲁⲛⲧⲉϥϩⲱⲃⲥ ⲛⲛⲉⲥⲃⲁⲗ ⲛⲥⲉⲣ ⲃⲗⲗⲉ ⲙⲡⲉⲥⲃⲁⲗ ⲥⲛⲁⲩ ⲁⲩⲱ ⲛⲉⲥϭⲟⲙϭⲙ ϩⲛ ⲛⲉϫⲟ ⲙⲡⲉⲥⲕⲟⲓⲧⲱⲛ ⲉⲥⲣⲓⲙⲉ ⲉⲥⲱϣ ⲉⲃⲟⲗ ⲉⲥϫⲱ ⲙⲙⲟⲥ ϫⲉ ⲟⲩⲟⲓ ⲛⲁⲓ ⲱ ⲧⲁϣⲉⲉⲣⲉ ⲱ ϫⲉ ⲟⲩⲛⲟϭ ⲧⲉ ⲧⲁⲙⲛⲧⲉⲃⲓⲏⲛ ⲙⲡⲟⲟⲩ ⲉⲁⲓϣⲱⲡⲉ ⲛⲃⲗⲗⲉ ⲛⲑⲉ ⲛⲛⲉⲧⲙⲡⲟⲩⲛⲁⲩ ⲉⲃⲟⲗ ⲉⲛⲉϩ ⲧⲱⲟⲩⲛ ⲧⲉⲛⲟⲩ ⲱ ⲧⲁϣⲉⲉⲣⲉ ⲛⲧⲉⲃⲱⲕ ⲛⲧⲉⲉⲓⲛⲉ ⲛⲁⲓ ⲙⲡⲉⲛⲛⲟⲩⲧⲉ ⲛⲧⲁⲡⲁⲣⲁⲕⲁⲗⲉⲓ ⲙⲙⲟϥ ⲁⲣⲏⲩ ⲛⲧⲁⲛⲕⲁⲧⲁⲫⲣⲟⲛⲉⲓ ⲙⲙⲟϥ ⲏ ⲉϥⲟⲩⲉϣ ϩⲉⲛⲕⲉⲑⲩⲥⲓⲁ ⲛⲧⲟⲟⲧⲛ ⲛϩⲟⲩⲟ ⲉⲧⲃⲉ ⲡⲁⲓ ⲁϥϭⲱⲛⲧ ⲉⲣⲟⲛ ⲁϥⲧⲣⲉ ⲡⲁⲓ ϣⲱⲡⲉ ⲙⲙⲟⲓ
18. ⲁⲥⲧⲱⲟⲩⲛ ⲇⲉ ⲛϭⲓ ⲧϣⲉⲉⲣⲉ ϣⲏⲙ ⲁⲥⲃⲱⲕ ⲉⲡⲙⲁ ⲙⲡⲇⲓⲥⲕⲟⲥ ⲉⲧⲉⲣⲉ ⲡⲉⲧⲟⲩⲱⲧ ⲛϩⲏⲧϥ ⲁⲥϫⲓⲧϥ ⲁⲥⲧⲁⲗⲟϥ ⲉϫⲱⲥ ⲁⲥⲉⲓⲛⲉ ⲙⲙⲟϥ ⲛⲧⲉⲥⲙⲁⲁⲩ ⲧⲉⲥⲙⲁⲁⲩ ⲇⲉ ⲁⲥϫⲓⲧϥ ⲁⲥⲧⲁⲗⲟϥ ⲉϫⲛ ⲛⲉⲥⲡⲁⲧ ⲁⲥⲣⲓⲙⲉ ⲉⲥϫⲱ ⲙⲙⲟⲥ ϫⲉ ⲡⲛⲟⲩⲧⲉ ⲛⲛⲁⲉⲓⲟⲧⲉ ⲁϣ ⲡⲉ ⲡⲛⲟⲃⲉ ⲛⲧⲁⲓⲁⲁϥ ϣⲁⲛⲧⲉ ⲧⲉⲓⲛⲟϭ ⲙⲙⲛⲧⲉⲃⲓⲏⲛ ϣⲱⲡⲉ ⲙⲙⲟⲓ ⲛⲧⲉⲓϩⲉ ⲧⲏⲣⲥ ϩⲛ ⲟⲩϭⲉⲡⲏ ⲁⲗⲗⲁ ϥⲟⲛϩ ⲛϭⲓ ⲡⲉⲕⲡⲛⲁ ϫⲉ ⲉⲓⲧⲉ ⲧⲉⲩϣⲏ ⲉⲓⲧⲉ ⲡⲉϩⲟⲟⲩ ⲛⲅⲛⲁⲡⲱⲣϫ ⲉⲣⲟⲓ ⲁⲛ ⲉⲓⲣⲓⲙⲉ ⲉϩⲟⲩⲛ ⲉⲣⲟⲕ ϣⲁⲛⲧⲉⲕⲭⲁⲣⲓⲍⲉ ⲛⲁⲓ ⲙⲡⲧⲁⲗϭⲟ ⲛⲑⲉ ⲛϣⲟⲣⲡ ⲁⲩⲱ ⲁⲥⲕⲁ ⲡⲉⲓⲇⲟⲗⲱⲛ ⲉϥⲟⲗⲙ ⲉϩⲟⲩⲛ ⲉⲣⲟⲥ ⲉⲥⲅⲓⲙⲉ ⲉϩⲟⲩⲛ ⲉⲣⲟϥ ⲙⲡⲉϩⲟⲟⲩ ⲙⲛ ⲧⲉⲩϣⲏ ⲁⲩⲥⲱⲧⲙ ⲇⲉ ⲛϭⲓ ⲛⲉⲥⲉⲓⲟⲧⲉ ⲙⲛ ⲛⲉⲥⲛⲏⲩ ⲙⲛ ⲛⲉⲥⲥⲩⲅⲅⲉⲛⲏⲥ ⲙⲛ ⲛⲉⲥⲣⲙⲣⲁⲩⲏ ⲙⲛ ⲛⲉⲥϩⲙϩⲁⲗ ⲛϩⲟⲟⲩⲧ ⲙⲛ ⲛⲉⲥϩⲙϩⲁⲗ ⲛⲥϩⲓⲙⲉⲭ ⲁⲩⲉⲓ ⲧⲏⲣⲟⲩ ⲁⲩⲛⲏϩⲡⲉ ⲉⲣⲟⲥ ⲛⲟⲩⲛⲟϭ ⲛⲛⲁⲩ ⲉⲩⲛⲁⲩ ⲉⲣⲟⲥ ϩⲙ ⲡⲉⲓⲛⲟϭ ⲛⲑⲃⲃⲓⲟ ⲛⲧⲉⲓϭⲟⲧ ⲉⲃⲟⲗ ϫⲉ ⲛⲉⲥⲃⲁⲗ ⲟⲩⲏⲛ ⲛⲑⲉ ⲛⲟⲩⲟⲛ ⲛⲓⲙ ⲁⲩⲱ ⲛⲥⲛⲁⲩ ⲉⲃⲟⲗ ⲁⲛ ⲱ ⲟⲩⲛⲟϭ ⲧⲉ ⲧⲉⲑⲉⲱⲣⲓⲁ ⲙⲡⲛⲁⲩ ⲉⲧⲙⲙⲁⲩ ⲉⲃⲟⲗ ϫⲉ ⲛⲉⲧⲉ ⲙⲡⲟⲩⲛⲁⲩ ⲉⲣⲟⲥ ⲉⲛⲉϩ ϫⲉ ⲛⲉⲟⲩⲡⲗⲟⲩⲥⲓⲟⲥ ⲉⲙⲁⲧⲉ. ⲧⲉ ⲙⲛ ⲡⲉⲥϩⲁⲓ ⲙⲛ ⲛⲉⲥⲉⲓⲟⲧⲉ ⲡⲁⲣⲁ ⲟⲩⲟⲛ ⲛⲓⲙ ⲉⲧϩⲛ ⲧⲡⲟⲗⲓⲥⲭ ⲉⲙⲉⲥⲁⲛⲓⲭⲉ ⲛⲉⲓ ⲉⲃⲟⲗ ϩⲙ ⲡⲉⲥⲏⲓ ⲉⲡⲧⲏⲣϥ ⲟⲩⲇⲉ ⲉϣⲁϫⲉ ⲙⲛ ⲗⲁⲁⲩ ⲛϩⲟⲟⲩⲧ ⲛϣⲙⲙⲟ ϣⲁⲉϩⲣⲁⲓ ⲉⲛⲉⲥϩⲙϩⲁⲗ ⲉⲁⲩⲟⲩⲟⲛ ⲛⲓⲙ ⲉⲓ ⲁϥⲑⲉⲱⲣⲉⲓ ⲙⲙⲟⲥ ⲙⲡⲛⲁⲩ ⲉⲧⲙⲙⲁⲩ ⲉⲛⲉⲁϥⲙⲟⲩ ⲅⲁⲣ ⲛϭⲓ ⲡⲉⲥϩⲁⲓ ⲁⲩⲱ ⲁϥϣⲱϫⲡ ⲛⲁⲥ ⲉⲡⲁϩⲟⲩ ⲛⲟⲩⲛⲟϭ ⲙⲙⲛⲧⲣⲙⲙⲁⲟ ⲉⲛⲁϣⲱⲥ ⲉⲙⲁⲧⲉ
19. ⲙⲛⲛⲥⲁ ⲛⲁⲓ ⲇⲉ ⲛⲧⲉⲣⲉ ⲟⲩⲙⲏⲏϣⲉ ⲛϩⲟⲟⲩ ⲟⲩⲉⲓⲛⲉ ⲉⲣⲉ ⲡⲉⲧⲟⲩⲱⲧ ⲉⲛⲕⲟⲧⲕ ϩⲁϩⲧⲏⲥ ⲛⲧⲉⲩϣⲏ ⲙⲛ ⲡⲉϩⲟⲟⲩ ⲁⲩⲱ ⲙⲡⲉ ⲗⲁⲁⲩ ⲛⲧⲁⲗϭⲟ ϣⲱⲡⲉ ⲛⲁⲥ ⲉⲃⲟⲗ ϩⲓⲧⲟⲟⲧϥ ⲁⲗⲗⲁ ⲛⲧⲁⲥⲉⲓ ⲉⲑⲟ ⲉⲡⲉϩⲟⲩⲟ ⲁⲥϣⲱⲡⲉ ⲇⲉ ⲛⲟⲩⲟⲩϣⲏ ⲉⲥⲉⲛⲕⲟⲧⲕ ⲉⲣⲉ ⲡⲉⲧⲟⲩⲱⲧ ϩⲙ ⲡⲉⲥϩⲁⲙⲏⲣ ⲛⲉⲣⲉ ⲛⲉⲥⲉⲓⲟⲧⲉ ⲙⲛ ⲛⲉⲥⲥⲩⲅⲅⲉⲛⲏⲥ ⲙⲛ ⲛⲉⲥⲛⲏⲩ ⲉⲛⲕⲟⲧⲕ ϩⲁϩⲧⲏⲥ ⲉⲣⲉ ⲟⲩⲙⲏⲏϣⲉ ⲉⲛⲕⲁⲛⲇⲏⲗⲟⲛ ϣⲁ ⲉⲣⲟⲟⲩⲭ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲟⲕϥ ⲛⲑⲉ ⲛⲟⲩⲥⲧⲣⲁⲧⲉⲗⲁⲧⲏⲥ ⲉⲣⲉ ⲟⲩϩⲣⲁⲃⲇⲟⲥ ⲛⲛⲟⲩⲃ ϩⲛ ⲧⲉϥϭⲓϫ ⲁϥⲃⲱⲕ ϣⲁ ⲟⲩⲣⲱⲙⲉ ⲛϩⲏⲕⲉ ⲛⲉⲣⲅⲁⲧⲏⲥ ⲉϥϩⲓⲧⲟⲩⲱⲥ ⲛⲧⲉⲥϩⲓⲙⲉ ⲛⲧⲁⲥⲉⲣⲃⲗⲗⲉ ⲡⲉϫⲁϥ ⲛⲁϥ ϩⲛ ⲟⲩϩⲟ ⲉϥⲛⲟⲧⲙ ⲛⲥⲱⲃⲉ ϫⲉ ⲭⲁⲓⲣⲉ ⲡⲥⲟⲛ ⲛⲉⲣⲅⲁⲧⲏⲥ ⲁⲡⲣⲱⲙⲏ ⲟⲩⲱϣⲃ ⲡⲉϫⲁϥ ϫⲉ ⲕⲩⲣⲉ ⲭⲁⲓⲣⲉ ⲡⲉⲥⲧⲣⲁⲧⲉⲗⲁⲧⲏⲥ ⲉⲧⲧⲁⲓⲏⲩ ⲁⲩⲱ ⲁϥⲃⲟϭϥ ⲉϩⲣⲁⲓ ϩⲛ ⲟⲩⲛⲟϭ ⲛϣⲧⲟⲣⲧⲣ ⲉⲧⲃⲉ ϫⲉ ⲙⲛⲗⲁⲁⲩ ⲛⲣⲱⲙⲉ ϩⲁϩⲧⲏϥ ⲡⲉ ⲁⲩⲱ ⲁϥϣⲱⲗⲙ ⲉⲩⲛⲟϭ ⲛⲥϯⲛⲟⲩⲃⲉ ⲉⲛⲁϣⲉ ⲥⲟⲩⲉⲛⲧϥ ⲁϥⲕⲟⲧϥ ⲇⲉ ⲁϥⲛⲁⲩ ⲉⲡϩⲁⲅⲓⲟⲥ ⲉϥϩⲙⲟⲟⲥ ⲉϩⲣⲁⲓ ϩⲓⲧⲟⲩⲱϥ ⲁϥⲉⲣ ϣⲡⲏⲣⲉ ⲉⲙⲁⲧⲉ ⲁⲩⲱ ⲁϥⲱⲕⲙ ⲛϩⲏⲧ ϩⲁ ⲑⲟⲧⲉ ⲡϩⲁⲅⲓⲟⲥ ⲇⲉ ⲙⲉⲣⲕⲟⲩⲣⲓⲟⲥ ⲁϥϯ ⲧⲱⲕ ⲛϩⲏⲧ ⲛⲁϥ ⲉϥⲁⲱ ⲙⲙⲟⲥ ϫⲉ ⲙⲡⲉⲣⲣ ϩⲟⲧⲉ ⲡⲉϫⲁϥ ⲛⲁϥ ϫⲉ ⲉⲕⲛⲁϩⲓⲥⲉ ⲛⲟⲩ ⲧⲉⲛⲟⲩⲭ ⲉⲕϣⲁⲛⲧⲱⲟⲩⲛ ⲛⲅⲉⲣ ⲟⲩϩⲟⲟⲩ ⲛⲉⲣϩⲱⲃ ⲛⲁⲓ ⲁⲩⲱ ϯⲛⲁϯ ⲛⲁⲕ ⲙⲡⲉⲕⲃⲉⲕⲏ ⲁϥⲟⲩⲱϣⲃ ⲛϭⲓ ⲡⲣⲱⲙⲉ ϫⲉ ⲡⲁϫⲟⲉⲓⲥ ⲡⲉⲥⲧⲣⲁⲧⲏⲗⲁⲧⲏⲥ ⲛϯⲥⲟⲟⲩⲛ ⲙⲙⲟⲕ ⲁⲛ ϫⲉ ⲉⲓⲉⲣ ϩⲱⲃ ⲛⲁⲕ ⲟⲩⲇⲉ ⲛⲧⲟⲕ ⲡⲁ ⲧⲉⲓⲡⲟⲗⲓⲥ ⲁⲛ ⲟⲩⲇⲉ ⲙⲡⲉⲓⲛⲁⲩ ⲉⲣⲟⲕ ⲉⲛⲉϩ ⲉⲓⲙⲏⲧⲉⲓ ⲧⲉⲓⲟⲩⲛⲟⲩ
20. ⲁϥⲟⲩⲱϣⲃ ⲛϭⲓ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉϥϫⲱ ⲙⲙⲟⲥ ⲛⲁϥ ϫⲉ ϯϫⲱ ⲙⲙⲟⲥ ⲛⲁⲕ ϫⲉ ⲉⲣⲉ ⲡⲁⲥⲱⲙⲁ ϩⲛ ⲧⲉⲓⲡⲟⲗⲓⲥ ⲁⲩⲱ ⲡⲁⲏⲓ ⲉϥⲛⲁϣⲱⲡⲉ ⲟⲛ ⲛϩⲏⲧⲥ ϣⲁ ⲉⲛⲉϩ ⲡⲗⲏⲛ ⲉⲕϣⲁⲛⲧⲱⲟⲩⲛ ⲛϩⲧⲟⲟⲩⲉ ⲡⲱⲧ ⲉⲃⲟⲗ ⲉϫⲛ ⲧⲉϩⲓⲏ ⲙⲡⲣⲣⲟ ⲛⲅϥⲓ ⲛⲙⲙⲁⲕ ⲛⲟⲩⲥⲕⲉⲩⲥ ⲛϣⲓⲕⲉ ⲛⲅⲃⲱⲕ ⲉϩⲟⲩⲛ ⲉⲡⲉⲓⲙⲁⲛϭⲟⲓⲗⲉ ⲛⲧⲁϥϣⲟⲣϣⲣ ⲛⲅϣⲓⲕⲉ ⲙⲡⲥⲁ ⲙⲡⲣⲏⲥ ⲛⲧϫⲟ ⲛⲙϩⲓⲧ ⲛⲛⲁⲁϣⲟⲙⲛⲧ ⲙⲙⲁϩⲉ ⲉⲡⲉⲥⲏⲧ ⲕⲛⲁϭⲓⲛⲉ ⲙⲡⲁⲥⲱⲙⲁ ⲉϥⲥⲟⲩⲗⲱⲗ ⲛϩⲉⲛⲃⲱⲱⲥ ⲛⲟⲩⲱⲃϣ ⲉϥⲟⲩⲟⲃϣ ⲛⲑⲉ ⲛⲟⲩⲭⲓⲱⲛⲭ ⲉⲃⲟⲗ ϫⲉ ⲛⲧⲉⲣⲟⲩϥⲓ ⲛⲧⲁⲁⲡⲉ ⲉϫⲙ ⲡⲣⲁⲛ ⲙⲡⲉⲭⲥ ⲁⲡⲁⲥⲱⲙⲁ ⲙⲟⲩϩ ϩⲙ ⲡⲟⲩⲟⲉⲓⲛ ⲛⲧⲉϥⲙⲛⲧⲛⲟⲩⲧⲉ ⲁⲓⲟⲩⲃⲁϣ ⲧⲏⲣⲧ ⲛⲑⲉ ⲛⲟⲩⲉⲣⲱⲧⲉ ⲁⲩⲱ ⲙⲡⲁⲥⲱⲙⲁ ⲛⲁⲗⲟ ⲁⲛ ⲉϥⲟ ⲛⲟⲩⲟⲉⲓⲛ ϣⲁ ⲉⲛⲉϩ ⲁⲩⲱ ⲙⲉⲣⲕⲟⲩⲣⲓⲟⲥ ⲡⲉ ⲡⲁⲣⲁⲛ ⲁⲩⲱ ⲡⲣⲁⲛ ⲛⲧⲁⲡⲟⲗⲓⲥ ⲡⲉ ϩⲣⲱⲙⲏ ⲁⲩⲱ ⲛⲧⲁⲩϩⲱⲧⲃ ⲙⲙⲟⲓ ⲉϫⲙ ⲡⲣⲁⲛ ⲙⲡⲉⲭⲥ ⲓⲥ ϫⲓⲛ ⲉⲡⲉⲩⲟⲉⲓϣ ⲛⲇⲉⲕⲓⲟⲥ ⲡⲣⲣⲟ ⲛⲁⲛⲟⲙⲟⲥ ⲡⲉϫⲉ ⲡⲣⲱⲙⲉ ⲛⲁϥ ϫⲉ ϯⲛⲁⲉⲣ ⲡⲁⲓ ϩⲛ ⲟⲩⲣⲁϣⲉ ⲱ ⲡⲁϫⲟⲉⲓⲥ ⲛⲉⲓⲱⲧ ⲉⲧⲟⲩⲁⲁⲃ ⲉϣⲱⲡⲉ ⲡⲉⲓⲁⲣⲭⲱⲛ ⲉⲧⲉⲓⲣ ϩⲱⲃ ⲛⲁϥ ⲛⲁⲁⲛⲓⲭⲉ ⲙⲙⲟⲓ ⲡⲉϫⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲁϥ ϫⲉ ϯⲛⲁⲧⲣⲉⲕⲛⲁⲩ ⲉⲡⲉⲛⲕⲁ ⲛⲟⲙⲉ ⲉϥⲧⲁⲗⲏⲩ ⲉⲡⲉⲧⲙⲙⲁⲩ ⲙⲡⲁⲧⲉⲱⲥⲕ ϣⲱⲡⲉ ⲉϥⲉⲣ ϩⲱⲃ ⲉⲡⲁⲧⲟⲡⲟⲥ ⲡⲗⲏⲛ ⲡⲙⲁⲉⲓⲛ ⲉⲧⲉⲕⲛⲁⲉⲓⲙⲉ ⲉⲣⲟϥ ⲡⲉ ⲡⲁⲓ ϯⲛⲁⲃⲱⲕ ⲧⲉⲛⲟⲩ ⲛⲧⲁⲟⲩⲱϭⲡ ⲙⲡⲉⲓⲇⲱⲗⲟⲛ ⲉⲧϥϣⲙϣⲉ ⲛⲁϥ ⲁⲩⲱ ⲧⲉϥϣⲉⲉⲣⲉ ϩⲱⲱⲥ ⲉⲧⲟ ⲛⲃⲗⲗⲉ ϯⲛⲁⲕⲁⲣⲓⲍⲉ ⲛⲁⲥ ⲙⲡⲟⲩⲟⲉⲓⲛ ⲛⲛⲉⲥⲃⲁⲗ ⲛⲥⲛⲁⲩ ⲉⲃⲟⲗ ⲁⲩⲱ ⲛϯⲛⲁⲱⲥⲕ ⲁⲛ ⲉⲉⲓ ϣⲁⲣⲟⲕ ⲁⲗⲗⲁ ⲙⲡⲉⲣⲁⲙⲉⲗⲉⲓ ⲉⲡϩⲱⲃ
21. ⲛⲁⲓ ⲇⲉ ⲛⲧⲉⲣⲉϥⲁⲟⲟⲩ ⲛⲁϥ ⲛϭⲓ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲥⲙⲟⲩ ⲉⲣⲟϥ ⲁϥⲉⲓ ⲉⲃⲟⲗ ϩⲓⲧⲟⲟⲧϥ ⲙⲡⲣⲱⲙⲉ ⲁϥⲃⲱⲕ ⲁϥⲟⲩⲱϭⲡ ⲙⲡⲉⲓⲇⲱⲗⲟⲛ ⲁϥⲁⲁϥ ⲛϣⲏⲙ ϣⲏⲙ ⲉϥⲉⲛⲕⲟⲧⲕ ⲉϩⲣⲁⲓ ⲙⲛ ⲧⲉⲥⲥϩⲓⲙⲉ ⲙⲡⲉⲥⲉⲓⲙⲉ ⲉⲡϩⲱⲃ ⲁϥⲕⲁⲁϥ ⲉϥⲛⲏϫ ⲉⲃⲟⲗ ϩⲓϫⲙ ⲡⲉⲥ ⲙⲁ ⲛⲉⲛⲕⲟⲧⲕ ⲉϥⲟ ⲙⲡⲁϣⲉ ⲡⲁϣⲉ ⲁϥⲃⲱⲕ ⲉϩⲣⲁ ⲉⲙⲡⲏⲩⲉ ϩⲛ ⲟⲩⲉⲟⲟⲩ ⲛϣⲱⲣⲡ ⲇⲉ ⲛⲧⲉⲣⲉϥϣⲱⲡⲉ ⲁⲧⲉⲥϩⲓⲙⲉ ϭⲟⲙϭⲙ ϩⲓⲧⲟⲩⲱⲥ ⲁⲥϭⲓⲛⲉ ⲙⲡⲉⲧⲟⲩⲱⲧ ⲉϥⲟⲩⲟϭⲡ ⲧⲏⲣϥ ⲉϥⲟ ⲙⲡⲁϣⲉ ⲡⲁϣⲉ ϩⲓϫⲙ ⲡⲉⲥⲙⲁ ⲛⲉⲛⲕⲟⲧⲕ ⲁⲥⲉⲣ ϩⲃⲁ ⲁⲩⲱ ⲁⲥϫⲓ ϣⲕⲁⲕ ⲉⲃⲟⲗ ⲉⲥϫⲱ ⲙⲙⲟⲥ ϫⲉ ⲟⲩⲟⲓ ⲛⲁⲓ ⲛⲓⲙ ⲡⲉ ⲛⲧⲁϥⲟⲩⲱϭⲡ ⲙⲡⲁⲛⲟⲩⲧⲉ ⲛⲧⲉⲓϩⲉ ⲧⲏⲣⲥ ⲉⲙⲡⲉⲓⲉⲓⲙⲉⲑ ⲛⲉⲥⲣⲱⲙⲉ ⲇⲉ ⲁⲩⲧⲱⲟⲩⲛ ⲁⲩⲛⲁⲩ ⲉⲡⲉⲛⲧⲁϥϣⲱⲡⲉ ⲁⲩⲗⲩⲡⲏ ⲉⲙⲁⲧⲉ ⲉⲧⲃⲉ ⲡⲉⲩⲛⲟⲩⲧⲉ ϫⲉ ⲛⲉϩⲉⲛϩⲉⲗⲗⲏⲛ ⲛⲉ ⲛⲉⲭⲣⲡⲥⲧⲓⲁⲛⲟⲥ ⲇⲉ ⲉⲧϩⲛ ⲧⲡⲟⲗⲓⲥ ⲛⲧⲉⲣⲟⲩⲥⲱⲧⲙ ⲉⲡⲉⲛⲧⲁϥϣⲱⲡⲉ ⲁⲩⲥⲱⲃⲉ ⲛⲥⲁ ⲛϩⲉⲗⲗⲏⲛ ⲙⲛ ⲛⲉⲩⲛⲟⲩⲧⲉ ⲉⲧϣⲟⲩⲉⲓⲧ ⲡⲣⲱⲙⲉ ⲇⲉ ⲛⲉⲣⲅⲁⲧⲏⲥ ⲛⲧⲉⲣⲉϥⲥⲱⲧⲙ ⲉⲣⲟⲟⲩ ⲁϥⲉⲓⲙⲉ ϫⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉⲛⲧⲁϥⲉⲣ ⲡⲁⲓ ⲕⲁⲧⲁ ⲑⲉ ⲛⲧⲁϥϫⲟⲟⲥ ⲛⲁϥ ϩⲙ ⲡϩⲟⲣⲟⲙⲁ ⲁϥⲧⲱⲟⲩⲛ ⲇⲉ ⲛⲧⲉⲩⲛⲟⲩ ⲁϥⲃⲱⲕ ⲁϥϣⲓⲕⲉ ϩⲙ ⲡⲙⲁ ⲛⲧⲁ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲟⲟⲥ ⲛⲁϥ ⲁⲩⲱ ⲁϥϣⲱⲗⲙ ⲉⲩⲛⲟϭ ⲛⲥϯⲛⲟⲩⲃⲉ ⲕⲁⲧⲁ ⲡⲉⲛⲧⲁϥϣⲱⲗⲙ ⲉⲣⲟϥ ϩⲙ ⲡϩⲟⲣⲟⲙⲁ ⲁⲩⲱ ⲛⲧⲉⲣⲉϥϣⲓⲕⲉ ⲉⲡⲉⲥⲡⲧ ϩⲙ ⲡⲕⲁϩ ⲛⲁⲁϣⲟⲙⲛⲧ ⲙⲙⲁϩⲉ ⲉⲡⲉⲥⲏⲧ ⲁϥϭⲓⲛⲉ ⲙⲡⲗⲓⲯⲁⲛⲟⲛ ⲙⲡⲡⲉⲧⲟⲩⲁⲁⲃ ⲁϥⲣⲁϣⲉ ⲉⲙⲁⲧⲉ ⲁⲩⲱ ⲁϥⲱⲗⲉⲙ ⲉϩⲟⲩⲛ ⲉⲡⲥⲱⲙⲁ ⲙⲡⲡⲉⲧⲟⲩⲁⲁⲃ ⲛⲟⲩⲛⲟϭ ⲛⲛⲁⲩ
22. ⲛⲧⲉⲩⲛⲟⲩ ⲉⲓⲥ ⲡⲛⲟϭ ⲛϣⲏⲣⲉ ⲙⲡⲣⲱⲙⲉ ⲉⲧⲉⲣⲉ ⲧⲉϥϣⲉⲉⲣⲉ ⲟ ⲛⲃⲗⲗⲉ ⲁϥⲉⲓ ⲉϥⲡⲁⲣⲁⲅⲉ ⲉϥⲧⲁⲗⲏⲩ ⲉⲩⲙⲟⲩⲗⲗⲁ ⲁϥⲛⲁⲩ ⲉⲡⲣⲱⲙⲉ ⲛϩⲏⲕⲉ ⲉϥⲟⲗⲙ ⲉϩⲟⲩⲛ ⲉⲡⲥⲱⲙⲁ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉϫⲁϥ ⲛⲁϥ ϩⲛ ⲟⲩⲁⲡⲓⲗⲏ ϫⲉ ⲛⲧⲟⲕ ⲡⲉ ⲡⲣⲱⲙⲉ ⲛⲧⲁⲓϯ ⲛⲁϥ ⲙⲡⲁⲧⲉⲣⲙⲏⲥⲉ ⲉⲧⲣⲉⲕⲉⲣ ϩⲱⲃ ⲛⲁⲓ ϩⲁⲣⲟϥ ⲛⲟⲩⲟⲡⲥ ⲛϩⲟⲟⲩ ⲉⲓⲥ ϩⲏⲏⲧⲉ ⲧⲉⲛⲟⲩ ⲁⲕⲁⲙⲡⲟⲧⲁⲥⲥⲉ ⲙⲙⲟⲓ ⲁⲕⲃⲱⲕ ⲁⲕⲃⲉⲣⲃⲱⲣ ⲕⲱⲱⲥ ⲁⲗⲗⲁ ⲁⲛⲟⲕ ϯⲛⲁⲡⲉⲇⲉⲩⲉ ⲙⲙⲟⲕ ⲧⲉⲛⲟⲩ ⲁⲩⲱ ⲛⲧⲉⲣⲉϥⲉⲓ ϫⲉ ⲉϥⲛⲁⲃⲟϭϥ ⲉⲃⲟⲗ ϩⲓϫⲙ ⲡⲧⲃⲛⲏ ⲛϥϩⲓⲟⲩⲉ ⲉⲡⲣⲱⲙⲉ ⲛϩⲏⲕⲉ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲕⲓⲙ ⲙⲙⲟϥ ϩⲛ ⲧⲕⲁⲓⲥⲉ ⲁⲡⲙⲟⲩⲗⲗⲁ ⲃⲟϭϥ ⲛⲥⲁⲡⲁϩⲟⲩ ⲁⲧⲟⲩⲉⲣⲏⲧⲉ ⲙⲡⲣⲱⲙⲉ ⲱϭⲉⲣ ⲉϩⲟⲩⲛ ⲉⲧⲁⲡⲉ ⲛⲧⲥⲩⲗⲗⲁ ⲛⲑⲉ ⲛⲟⲩⲥⲟⲛⲧⲉ ⲁⲩⲱ ⲁⲡⲙⲟⲩⲗⲗⲁ ⲡⲱⲧ ⲛⲙⲙⲁϥ ⲉϥⲁϣⲉ ⲉϩⲣⲁⲓ ⲛⲧⲉϥ ⲟⲩⲉⲣⲏⲧⲉ ⲛⲟⲩⲱⲧ ⲟⲩⲇⲉ ⲧⲡⲉ ⲙⲛ ⲡⲕⲁϩ ϣⲁⲛⲧⲉϥⲡⲱϩ ⲉⲣⲉⲙ ⲡⲏⲓ ⲛⲧⲉϥⲥⲱⲛⲉ ⲉⲧⲟ ⲛⲃⲗⲗⲉ ⲁⲩⲱ ⲁⲡⲙⲟⲩⲗⲗⲁ ϫⲓ ⲛⲁϥ ⲛⲟⲩⲥⲙⲏ ⲛⲣⲱⲙⲉ ϩⲓⲧⲛ ⲧϭⲟⲙ ⲙⲡⲛⲟⲩⲧⲉ ⲁϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉ ⲱ ⲛⲉⲧⲥⲟⲣⲉⲙ ⲁⲩⲱ ⲛϩⲉⲗⲗⲏⲛ ⲉⲧϫⲁϩⲙ ⲛⲁⲓ ⲛⲧⲁ ⲡⲉⲭⲥ ⲟⲩⲱϭⲡ ⲙⲡⲉⲩⲉⲓⲇⲱⲗⲟⲛ ⲛⲧⲉⲓⲟⲩϣⲏ ϩⲓⲧⲙ ⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥⲭ ⲁⲙⲏⲓⲧⲛ ⲉⲃⲟⲗ ⲛⲧⲉⲧⲛⲁⲡⲁⲛⲧⲁ ⲉⲡⲉⲥⲧⲣⲁⲧⲉⲗⲁⲧⲏⲥ ⲉⲧⲧⲁⲓⲏⲩ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲩⲱ ⲛⲧⲉⲧⲛⲑⲉⲱⲣⲉⲓ ⲛⲧⲇⲓⲙⲱⲣⲓⲁ ⲙⲡⲉⲧⲛϣⲏⲅⲉ ⲛⲧⲉⲧⲛⲡⲓⲥⲧⲉⲩⲉ ⲉⲡⲉⲭⲥ ⲓⲥ ⲡϫⲟⲉⲓⲥ ⲛⲧⲡⲉ ⲙⲛ ⲡⲕⲁϩⲭ ⲡⲛⲟⲩⲧⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲩⲱ ⲁⲡⲙⲟⲩⲗⲗⲁ ⲡⲱⲧ ⲛⲙⲙⲁϥ ϣⲁⲛⲧⲉϥⲕⲱⲧⲉ ⲉⲧⲡⲟⲗⲓⲥ ⲧⲏⲣⲥ ⲉϥⲡⲏⲧ ⲛⲙⲙⲁϥ ⲉϥⲁϣⲉ ⲉϩⲣⲁⲓ ⲛⲥⲁ ⲧⲥⲩⲗⲗⲁ ϩⲛ ⲧⲉϥⲟⲩⲉⲣⲏⲧⲉ ⲛⲟⲩⲱⲧ ⲙⲛⲛⲥⲱⲥ ⲁϥⲉⲓⲛⲉ ⲙⲙⲟϥ ⲉⲡⲙⲁ ⲉⲧⲉⲣⲉ ⲡⲥⲱⲙⲁ ⲙⲡⲡⲉⲧⲟⲩⲁⲁⲃ ⲕⲏ ⲛϩⲏⲧϥ ⲁⲩⲱ ϫⲉ ⲟⲩⲏⲣ ⲡⲉ ⲡⲙⲏⲏϣⲉ ⲛϩⲟⲟⲩⲧ ϩⲓ ⲥϩⲓⲙⲉ ⲛⲧⲁϥⲥⲱⲟⲩϩ ⲉⲧⲉⲑⲉⲱⲣⲓⲁ ⲙⲡⲛⲁⲩ ⲉⲧⲙⲙⲁⲩ ⲉⲙⲡⲉ ⲟⲩⲣⲱⲙⲉ ⲛⲟⲩⲱⲧ ⲥⲉⲉⲡⲉ ϩⲛ ⲧⲡⲟⲗⲓⲥ ⲧⲏⲣⲥ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲉⲓⲧⲉ ⲛⲟϭ ⲉⲓⲧⲉ ⲕⲟⲩⲓⲭ ⲉⲉⲁⲩⲥⲱⲟⲩϩ ⲧⲏⲣⲟⲩ ⲁⲩⲉⲓ ⲉⲡⲙⲁ ⲉⲧⲉⲣⲉ ⲛⲕⲉⲉⲥ ⲙⲡⲡⲉⲧⲟⲩⲁⲁⲃ ⲛϩⲏⲧϥ
23. ⲡⲣⲱⲙⲉ ⲇⲉ ⲛϩⲉⲗⲗⲏⲛ ⲙⲛ ⲧⲉϥⲥϩⲓⲙⲉ ⲙⲛ ⲛⲉϥϣⲏⲣⲉ ⲛⲉⲩⲡⲏⲧ ⲉⲡⲉⲓⲥⲁ ⲙⲛ ⲡⲁⲓ ⲉⲩϣⲧⲉⲣⲧⲱⲣ ⲉⲩⲟⲩⲏϩ ⲛⲥⲁ ⲡⲙⲟⲩⲗⲗⲁ ϣⲁⲛⲧⲟⲩⲉⲓ ⲉϫⲙ ⲡⲗⲓⲯⲁⲛⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲧⲉⲥϩⲓⲙⲉ ⲇⲉ ϩⲱⲱⲥ ⲉⲧⲟ ⲛⲃⲗⲗⲉ ⲉⲧⲉ ⲧⲉϥⲥⲱⲛⲉ ⲧⲉ ⲁⲥϫⲓ ⲙⲡⲉⲧⲟⲩⲱⲧ ⲛⲛⲟⲩⲃ ⲉⲧⲥϣⲙϣⲉ ⲛⲁϥ ⲉϥⲟ ⲙⲡⲁϣⲉ ⲡⲁϣⲉ ⲁⲥⲉⲓ ⲉⲃⲟⲗ ϩⲛ ⲧⲙⲏⲧⲉ ⲛⲧⲡⲟⲗⲓⲥ ⲧⲏⲣⲥ ⲉⲣⲉ ⲟⲩⲟⲛ ⲛⲓⲙ ⲑⲉⲱⲣⲉⲓ ⲙⲙⲟⲥ ⲉⲣⲉ ⲧⲉⲥϣⲉⲉⲣⲉ ϫⲓ ⲙⲟⲓⲧ ϩⲏⲧⲥ ⲛⲑⲉ ⲛⲛⲉⲧϫⲓ ⲙⲛⲧⲛⲁ ⲉⲥⲱϣ ⲉⲃⲟⲗ ⲉⲥϫⲱ ⲙⲙⲟⲥ ϫⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉⲥⲧⲣⲁⲧⲉⲗⲁⲧⲏⲥ ⲛϫⲱⲱⲣⲉ ⲉⲕⲉϭⲱϣⲧ ⲉϫⲙ ⲡⲁⲑⲃⲃⲓⲟ ⲛⲅⲛⲁ ⲛⲁⲓ ⲛⲧⲉⲣⲉⲥⲉⲓ ⲇⲉ ⲉⲃⲟⲗ ϣⲁ ⲡⲙⲁ ⲉⲧⲉⲣⲉ ⲡⲥⲱⲙⲁ ⲙⲡⲡⲉⲧⲟⲩⲁⲁⲃ ⲛϩⲏⲧϥ ⲁⲧⲉⲥϣⲉⲉⲣⲉ ⲧⲁⲙⲟⲥ ϫⲉ ⲉⲓⲥ ⲡⲥⲱⲙⲁ ⲙⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲙⲉⲣⲕⲟⲩⲣⲓⲟⲥ ⲁⲩⲱ ⲛⲧⲉⲩⲛⲟⲩ ⲁⲡⲙⲏⲏϣⲉ ⲟⲗⲉϥ ⲉϩⲣⲁⲓ ⲛⲟⲩⲕⲟⲩⲓ ⲁⲥϩⲙⲟⲟⲥ ⲉϩⲣⲁⲓ ⲛϭⲓ ⲧⲉⲥϩⲓⲙⲉ ⲁⲥⲁⲙⲁϩⲧⲉ ⲛⲧⲕⲁⲓⲥⲉ ⲙⲡⲡⲉⲧⲟⲩⲁⲁⲃ ⲁⲥⲱϣ ⲉⲃⲟⲗ ⲉⲥⲁⲱ ⲙⲙⲟⲥ ϫⲉ ⲉⲓⲥ ⲡⲟⲩⲟⲉⲓⲛ ⲙⲙⲉⲭ ⲛⲁ ⲛⲁⲓ ⲁⲩⲱ ϯⲛⲁⲡⲓⲥⲧⲉⲩⲉ ⲉⲡⲉⲕⲣⲁⲛ ⲉⲧⲟⲩⲁⲁⲃ ⲡⲁⲓ ⲉⲧⲉⲓⲙⲡϣⲁ ⲁⲛ ⲉϫⲟⲟϥ ⲉⲃⲟⲗ ϩⲛ ⲧⲁⲧⲁⲡⲣⲟ ⲉⲧϫⲁϩⲙ ⲛⲧⲉⲩⲛⲟⲩ ⲁⲩⲙⲏⲏϣⲉ ⲛⲣⲉⲙⲉⲓⲏ ϩⲉ ⲉⲃⲟⲗ ϩⲛ ⲛⲉⲥⲃⲁⲗ ϩⲱⲥ ϫⲉ ⲉⲧⲉⲓ ⲉⲥⲣⲓⲙⲉ ⲁⲩⲱ ⲁⲥⲛⲁⲩ ⲉⲃⲟⲗ ⲛⲧⲉⲩⲛⲟⲩ ⲁⲧⲉⲥϩⲱⲣⲁⲥⲓⲥ ⲥⲙⲓⲛⲉ ⲕⲁⲗⲱⲥ ⲁⲩⲱ ⲁⲥϭⲱⲡⲉ ⲛⲛⲉⲗⲁⲕⲙ ⲙⲡⲉⲓⲇⲱⲗⲟⲛ ⲁⲥⲟⲩⲟϭⲡⲟⲩ ⲉⲁⲛ ⲛⲉⲩⲉⲣⲏⲩ ⲁⲥⲱϣ ⲉⲃⲟⲗ ⲉⲥϫⲱ ⲙⲙⲟⲥ ϫⲉ ⲁⲡⲁⲡⲟⲗⲗⲱⲛ ϫⲓ ϣⲓⲡⲉ ⲁⲡⲉⲭⲥ ϫⲓ ⲉⲟⲟⲩ ⲛⲉⲓⲟⲧⲉ ⲇⲉ ⲛⲧϣⲉⲉⲣⲉ ϣⲏⲙ ⲛⲧⲉⲣⲟⲩⲛⲁⲩ ⲉⲡⲧⲁⲗϭⲟ ⲛⲧⲁϥϣⲱⲡⲉ ⲛⲧⲉⲩϣⲉⲉⲣⲉ ⲁⲩⲱϣ ⲉⲃⲟⲗ ⲉⲩϫⲱ ⲙⲙⲟⲥ ϫⲉ ⲁⲛⲟⲛ ϩⲉⲛⲭⲣⲏⲥⲧⲓⲁⲛⲟⲥ ⲉⲛⲏⲡ ⲉⲡⲛⲟⲩⲧⲉ ⲛⲧⲡⲉ ⲡⲉⲭⲥ ⲓⲥ ⲡⲛⲟⲩⲧⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲁⲓ ⲡⲉⲟⲟⲩ ⲛⲁϥ ϣⲁ ⲉⲛⲉϩ ⲛⲉⲛⲉϩ ϩⲁⲙⲏⲛ ⲧⲙⲉϩⲥⲛⲧⲉ ⲛϭⲟⲙ ⲛⲧⲁⲥϣⲱⲡⲉ ⲉⲃⲟⲗ ϩⲓⲧⲟⲟⲧϥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
24. ⲁⲥϣⲱⲡⲉ ⲇⲉ ⲙⲛⲛⲥⲁ ⲛⲁⲓ ⲁⲡⲗⲁⲟⲥ ⲛⲛⲉⲭⲣⲏⲥⲧⲓⲁⲛⲟⲥ ϣⲁϫⲉ ⲙⲛ ⲛⲉⲩⲉⲣⲏⲩ ϫⲉ ⲙⲁⲣⲉⲛϫⲓ ⲙⲡⲥⲱⲙⲁ ⲙⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲉϩⲟⲩⲛ ⲉⲧⲡⲟⲗⲓⲥ ϩⲉⲛⲕⲟⲟⲩⲉ ⲇⲉ ⲁⲩⲟⲩⲱϣⲃ ⲁⲉ ⲁⲣⲏⲩ ⲙⲡϩⲏⲧ ⲙⲡⲇⲓⲕⲁⲓⲟⲥ ⲙⲟⲧⲛ ⲁⲛ ⲉⲡⲁⲓ ⲁⲩⲁⲣⲭⲉⲓ ⲇⲉ ⲙⲙⲓϣⲉ ⲙⲛ ⲛⲉⲩⲉⲣⲏⲩ ⲛⲧⲉⲩⲛⲟⲩ ⲁⲡⲇⲓⲕⲁⲓⲟⲥ ⲕⲓⲙ ⲙⲙⲟϥ ⲙⲁⲩⲁⲁϥ ⲉⲁϥⲣⲁⲕⲧϥ ⲉⲧⲉϩⲓⲏ ⲉⲧϫⲓ ⲙⲟⲉⲓⲧ ⲉϩⲟⲩⲛ ⲉⲧⲡⲟⲗⲓⲥ ⲁⲩⲱ ⲛⲧⲉⲓϩⲉ ⲁⲩⲉⲓⲛⲉ ⲙⲡⲙⲟⲩⲗⲗⲁ ⲛⲧⲁϥϩⲉⲃⲣⲓⲍⲉ ⲙⲡⲣⲱⲙⲉ ⲛⲧⲁϥⲟⲩⲱϣ ⲉϩⲓⲟⲩⲉ ⲉⲡϩⲏⲕⲉ ⲛⲉⲣⲅⲁⲧⲏⲥ ⲛⲧⲁϥϭⲓⲛⲉ ⲙⲡⲥⲱⲙⲁ ⲙⲡⲡⲉⲧⲟⲩⲁⲁⲃ ⲁⲩⲥⲧⲉⲫⲁⲛⲟⲩ ⲙⲙⲟϥ ⲁⲩⲧⲁⲗⲟ ⲉϫⲱϥ ⲙⲡⲥⲱⲙⲁ ⲙⲡⲡⲉⲧⲟⲩⲁⲁⲃ ⲁⲩⲱ ⲁⲡⲙⲟⲩⲗⲗⲁ ⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉ ⲯⲁⲗⲗⲉⲓ ϩⲓϩⲏ ⲙⲡⲇⲓⲕⲁⲓⲟⲥ ⲁⲩⲱ ⲁⲡⲉⲓⲱⲧ ⲙⲡϣⲏⲣⲉ ϣⲏⲙ ⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉ ϯⲥⲟⲡⲥ ⲙⲙⲟⲕ ⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲙⲡⲉⲭⲥⲭ ⲛⲑⲉ ⲛⲧⲁⲕϯ ⲙⲡⲟⲩⲟⲉⲓⲛ ⲉⲛⲃⲁⲗ ⲛⲧⲁϣⲉⲉⲣⲉ ⲉⲧⲟ ⲛⲃⲗⲗⲉⲭ ⲙⲁⲣⲉ ⲡⲉⲕⲛⲁ ⲧⲁϩⲉ ⲡⲁϣⲏⲣⲉ ⲟⲛ ϫⲉ ⲁϥϩⲓⲥⲉ ⲉϥⲁϣⲉ ⲉϩⲣⲁⲓ ⲛⲧⲉϥⲟⲩⲉⲣⲏⲧⲉ ⲛⲟⲩⲱⲧ ⲁⲩⲱ ⲛⲧⲉⲓϩⲉ ⲁⲡⲡⲉⲧⲟⲩⲁⲁⲃ ⲕⲁⲁϥ ⲉⲡⲉⲥⲏⲧ ⲉϫⲙ ⲡⲕⲁϩ ⲉϥⲁϣⲉ ⲉϩⲣⲁⲓ ⲛⲥⲁϫⲱϥ ⲁⲩⲱ ⲛⲧⲉⲩⲛⲟⲩ ⲁϥⲁϩⲉⲣⲁⲧϥ ⲉⲙⲛⲗⲁⲁⲩ ⲙⲡⲱⲗϩ ϩⲙ ⲡⲉϥⲥⲱⲙⲁ ⲟⲩⲇⲉ ⲛϥⲉⲥⲑⲁⲛⲉ ⲁⲛ ⲙⲡⲧⲏⲣϥ ⲛⲉⲕⲗⲏⲣⲓⲕⲟⲥ ⲇⲉ ⲛⲉⲩ ⲯⲁⲗⲉⲓ ϩⲓⲑⲏ ⲙⲡⲗⲓⲯⲁⲛⲟⲛ ⲙⲡⲡⲉⲧⲟⲩⲁⲁⲃ ϣⲁⲛⲧⲟⲩϫⲓⲧϥ ⲉϩⲟⲩⲛ ⲉⲧⲡⲟⲗⲓⲥ ⲡⲣⲱⲙⲉ ⲇⲉ ⲛⲧⲁ ⲡⲧⲁⲗϭⲟ ϣⲱⲡⲉ ⲛⲁϥ ⲁϥⲟⲩⲱϣ ⲉϫⲓⲧϥ ⲉϩⲟⲩⲛ ⲉⲡⲉϥⲏⲓ ⲁⲩⲱ ⲁⲡⲇⲓⲕⲁⲓⲟⲥ ϩⲣⲟϣ ⲙⲙⲟϥ ⲛⲑⲉ ⲛⲟⲩⲧⲁϩⲧ ⲙⲡⲟⲩⲉϣ ϭⲙϭⲟⲙ ⲉϫⲓⲧϥ ⲉϩⲟⲩⲛ ⲉⲡⲏⲓ ⲙⲡⲣⲱⲙⲉ ⲁⲩⲱ ⲛⲧⲉⲓϩⲉ ⲁⲩⲉⲓⲙⲉ ⲧⲏⲣⲟⲩ ϫⲉ ⲙⲡⲇⲓⲕⲁⲓⲟⲥ ⲟⲩⲱϣ ⲁⲛ ⲉⲃⲱⲕ ⲉϩⲟⲩⲛ ⲉⲡⲏⲓ ⲙⲡⲣⲱⲙⲉ ⲁⲩϫⲓⲧϥ ⲉϩⲟⲩⲛ ⲉⲧⲉⲕⲕⲗⲏⲥⲓⲁ ⲛⲧⲡⲟⲗⲓⲥ ⲁⲩⲕⲁⲁϥ ϩⲙ ⲡⲙⲁ ⲉⲧⲙⲙⲁⲩ ϣⲁⲛⲧⲟⲩⲕⲱⲧ ⲉⲣⲟϥ ⲛⲟⲩⲙⲁⲣⲧⲩⲣⲓⲟⲛ ⲕⲁⲧⲁ ⲡⲉϥⲉⲙⲡϣⲁ ⲡⲉⲟⲟⲩ ⲙⲡⲛⲟⲩⲧⲉ ⲡⲉⲓⲱⲧ ϣⲁ ⲉⲛⲉϩ ϩⲁⲙⲏⲛ ⲧⲙⲉϩϣⲟⲙⲧⲉ ⲛϭⲟⲙ ⲛⲧⲁϥⲁⲁⲥ ⲛϭⲓ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
25. ⲁⲥϣⲱⲡⲉ ⲇⲉ ⲙⲛⲛⲥⲁ ⲥⲁϣϥ ⲛϩⲟⲟⲩ ⲉⲩⲟⲩⲱⲙ ⲉⲩⲥⲱ ⲙⲙⲏⲛⲉ ϩⲛ ⲟⲩⲣⲁϣⲉ ⲉⲩⲉⲣ ϣⲁ ϩⲛ ⲟⲩⲟⲩⲛⲟϥ ⲉⲧⲃⲉ ⲡⲟⲩⲱⲛϩ ⲉⲃⲟⲗ ⲙⲡⲥⲱⲙⲁ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡϫⲱⲱⲣⲉ ⲛⲁⲙⲉ ⲉⲧⲧⲁⲓⲏⲩⲭ ⲁⲡⲉⲓⲱⲧ ⲛⲧⲉⲥϩⲓⲙⲉ ⲛⲧⲁ ⲡⲡⲉⲧⲟⲩⲁⲁⲃ ϯⲡⲟⲩⲟⲉⲓⲛ ⲛⲁⲥ ⲧⲱⲟⲩⲛ ⲁϥⲃⲱⲕ ϣⲁ ⲡⲉⲡⲓⲥⲕⲟⲡⲟⲥ ⲛⲧⲡⲟⲗⲓⲥ ⲁϥⲡⲁⲣⲁⲕⲁⲗⲉⲓ ⲙⲙⲟϥ ⲁϥⲉⲧⲓ ⲉⲃⲟⲗ ϩⲓⲧⲟⲟⲧϥ ⲙⲡⲃⲁⲡⲧⲓⲥⲙⲁ ⲉⲧⲟⲩⲁⲁⲃ ⲁⲩⲱ ⲁⲡⲉⲡⲓⲥⲕⲟⲡⲟⲥ ϩⲱⲣⲓⲍⲉ ⲛⲁϥ ⲛϩⲉⲛϩⲟⲟⲩ ⲛⲛⲏⲥⲧⲓⲁ ⲕⲁⲧⲁ ⲡⲕⲁⲛⲱⲛ ⲛⲧⲉⲕⲕⲗⲏⲥⲓⲁ ⲙⲛⲛⲥⲱⲥ ⲁϥⲃⲁⲡⲧⲓⲍⲉ ⲙⲙⲟϥ ⲙⲛ ⲡⲉϥⲏⲓ ⲧⲏⲣϥ ϩⲙ ⲡⲣⲁⲛ ⲙⲡⲉⲓⲱⲧ ⲙⲛ ⲡϣⲏⲣⲉ ⲙⲛ ⲡⲉⲡⲛⲁ ⲉⲧⲟⲩⲁⲁⲃ ⲁⲩⲱ ⲁⲩϫⲓ ⲏⲡⲉ ⲙⲡⲉϥⲅⲉⲛⲟⲥ ⲙⲛ ⲛⲉⲧⲉ ⲛⲟⲩϥ ⲛⲉ ⲧⲏⲣⲟⲩ ⲛⲧⲁⲩⲉⲣ ⲭⲣⲏⲥⲧⲓⲁⲛⲟⲥ ⲛⲙⲙⲁϥ ⲁⲩⲱ ⲁⲩϫⲓ ⲉⲃⲟⲗ ϩⲙ ⲡⲟⲩⲟⲉⲓⲛ ⲙⲙⲉⲭ ⲥⲉⲉⲓⲣⲉ ⲛⲧⲁⲓⲟⲩ ⲙⲛ ϣⲟⲙⲧⲉ ⲙⲯⲩⲭⲏ ⲛⲧⲁⲩϫⲓ ⲙⲡⲃⲁⲡⲧⲓⲥⲙⲁ ⲉⲧⲟⲩⲁⲁⲃ
26. ⲙⲛⲛⲥⲁ ⲛⲁⲓ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲟⲩⲟⲛϩϥ ⲉⲡⲣⲱⲙⲉ ⲛϩⲏⲕⲉ ⲛⲑⲉ ⲟⲛ ⲛϣⲟⲣⲡ ⲡⲉϫⲁϥ ⲛⲁϥ ⲁⲉ ⲉⲧⲃⲉ ⲟⲩ ⲕⲉⲛⲕⲟⲧⲕ ⲉⲕⲟ ⲛⲁⲙⲉⲗⲏⲥ ⲉⲙⲡⲉⲕⲧⲱⲟⲩⲛ ⲛⲅⲡⲁⲡⲱ ⲧⲱⲃⲉ ⲉⲡⲁⲧⲟⲡⲟⲥ ⲡⲉϫⲉ ⲡⲣⲱⲙⲉ ⲛⲁϥ ϫⲉ ⲡⲁϫⲟⲉⲓⲥ ⲁⲛⲅ ⲟⲩϩⲏⲕⲉ ⲁⲩⲱ ⲙⲛⲧⲁⲓ ⲣⲱⲙⲉ ⲙⲙⲁⲩ ⲟⲩⲇⲉ ⲧⲃⲛⲏ ⲟⲩⲇⲉ ⲧⲁⲡⲁⲛⲏ ⲡⲉϫⲉ ⲡⲡⲉⲧⲟⲩⲁⲁϥ ⲛⲁϥ ϫⲉ ϯⲛⲁϯ ⲛⲁⲕ ⲛⲧⲉⲕⲭⲣⲓⲁ ⲧⲏⲣⲥ ⲁⲗⲗⲁ ϣⲱⲡⲉ ⲛⲧⲟⲕ ⲉⲕϩⲏⲛ ⲉϩⲟⲩⲛ ⲉⲡϩⲱⲃ ⲙⲡⲁⲏⲓ ⲉⲕϣⲁⲛⲧⲱⲟⲩⲛ ϭⲉ ⲛϩⲧⲟⲟⲩⲉ ⲁⲙⲟⲩ ⲉⲡⲉⲓⲏⲃⲧ ϩⲙ ⲡϣⲟⲣⲡ ⲛϩⲓⲣ ⲛⲧⲉ ⲧⲡⲟⲗⲓⲥ ⲁⲩⲱ ⲕⲛⲁϩⲉ ⲉⲡⲣⲱⲙⲉ ⲛⲧⲁⲓⲧⲣⲉ ⲡⲙⲟⲩⲗⲗⲁ ⲡⲉⲣⲓⲁⲅⲉ ⲙⲙⲟϥ ⲉⲧⲃⲉ ϫⲉ ⲁϥⲟⲩⲱϣ ⲉϩⲓⲟⲩⲉ ⲉⲣⲟⲕ ⲉⲧⲃⲉ ⲡⲁⲥⲱⲙⲁ ⲁϫⲓⲥ ⲛⲁϥ ϫⲉ ⲡⲉⲧⲉⲛⲧⲟⲟⲧⲕ ⲧⲁⲁϥ ⲛⲁⲓ ϫⲉ ϯⲁϩⲉ ⲛⲁϥ ⲁⲩⲱ ϥⲛⲁϯ ⲛⲁⲕ ⲛϣⲟⲙⲛⲧ ⲛϩⲟⲗⲟⲕⲟⲧⲧⲓⲛⲟⲥ ⲛⲧⲁϥⲓ ⲉϥⲟⲩⲱϣ ⲉⲧⲁⲁⲩ ⲛⲁⲅⲁⲡⲏ ⲉϥϣⲁⲛϫⲟⲟⲥ ⲛⲁⲕ ϫⲉ ⲛⲧⲁⲕⲉⲓⲙⲉ ⲛⲁϣ ⲛϩⲉ ϫⲉ ⲟⲩⲛⲗⲁⲁⲩ ⲛⲧⲟⲟⲧ ⲁϫⲓⲥ ⲛⲁϥ ϫⲉ ⲙⲉⲣⲕⲟⲩⲣⲓⲟⲥ ⲡⲉⲛⲧⲁϥϫⲟⲟⲥ ⲛⲁⲓ ⲁϫⲓⲥ ⲛⲁϥ ⲟⲛ ϫⲉ ϫⲟⲟⲥ ⲙⲡⲉⲕⲉⲓⲱⲧ ϫⲉ ⲕⲥⲟⲟⲩⲛ ϫⲉ ⲙⲡⲛⲁⲩ ⲛⲧⲁⲕⲉⲧⲓ ⲙⲙⲟⲓ ⲁⲓϭⲉⲡⲏ ⲁⲓⲥⲱⲧⲙ ⲉⲣⲟⲕ ⲁⲓϯ ⲙⲡⲟⲩⲟⲉⲓⲛ ⲉⲛⲃⲁⲗ ⲛⲧⲉⲕϣⲉⲉⲣⲉ ⲁⲩⲱ ⲁⲓⲭⲁⲣⲓⲍⲉ ⲛⲁⲕ ⲙⲡⲉⲕϣⲡⲣⲉ ⲉϥⲟⲩⲟϫ ⲛⲕⲉⲥⲟⲡ ⲗⲟⲓⲡⲟⲛ ⲉϣⲱⲡⲉ ⲟⲩⲛⲗⲁⲁⲩ ⲙⲙⲛⲧⲥⲟⲛ ϣⲟⲟⲡ ⲁⲓⲣ ϣⲁⲩ ⲉⲓϩⲓϫⲙ ⲡⲁϣⲃⲏⲣ ⲙⲙⲁⲣⲧⲩⲣⲟⲥ ⲉⲃⲟⲗ ϫⲉ ⲡⲧⲁⲓⲟ ⲛⲟⲩϣⲃⲏⲣ ⲉϥϩⲓⲁⲛ ⲟⲩϣⲃⲏⲣ ⲉϥϣⲁⲛⲉⲣ ϩⲟⲩⲟ ϫⲓⲛ ⲣⲟⲩϩⲉ ⲡⲉ ϣⲁ ϩⲧⲟⲟⲩⲉ ⲡⲉϩⲟⲩⲟ ⲇⲉ ⲉⲛⲁⲓ ⲟⲩϩⲣⲟϣ ⲡⲉ ⲛⲥⲁ ⲥⲁ ⲛⲓⲙ ⲗⲟⲓⲡⲟⲛ ⲉϥϣⲁⲛϯ ϩⲱⲃ ⲛⲁⲕ ⲁⲣⲓⲣⲉⲭ ⲉϥϣⲁⲛⲧⲙⲥⲱⲧⲙ ⲇⲉ ⲛⲥⲱⲕ ⲟⲩⲱⲙ ⲛⲁⲕ ϩⲙ ⲡⲉⲓϣⲟⲙⲛⲧ ⲛϩⲟⲗⲟⲕⲟⲧⲧⲓⲛⲟⲥ ϣⲁⲛϯⲉⲓ ⲛⲁⲕ ϩⲙ ⲡⲟⲩⲱϣ ⲙⲡⲛⲟⲩⲧⲉ ⲁⲩⲱ ϯⲛⲏⲩ ⲛⲁⲕ ⲙⲡⲁⲧⲉ ⲱⲥⲕ ϣⲱⲡⲉ ⲛⲧⲉⲣⲉϥϫⲉ ⲛⲁⲓ ⲇⲉ ⲛⲁϥ ⲁϥϯ ⲛⲁϥ ⲛϯⲣⲏⲛⲏ ⲁϥⲃⲱⲕ ⲉⲃⲟⲗ ϩⲓⲧⲟⲟⲧϥ
27. ϩⲧⲟⲟⲩⲉ ⲇⲉ ⲛⲧⲉⲣⲉϥϣⲱⲡⲉ ⲁⲡⲣⲱⲙⲉ ⲧⲱⲟⲩⲛ ⲁϥⲙⲟⲟϣⲉ ϩⲙ ⲡϣⲟⲣⲡ ⲛϩⲓⲣ ⲁϥⲉⲓ ⲉⲁⲙ ⲡϣⲏⲣⲉ ϣⲏⲙ ⲁⲩⲱ ϣⲁϫⲉ ⲛⲓⲙ ⲛⲧⲁ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲟⲟⲩ ⲛⲁϥ ⲁϥϫⲟⲟⲩ ⲉⲣⲟϥ ⲁⲩⲱ ⲁϥϯ ⲛⲁϥ ⲙⲡϣⲟⲙⲛⲧ ⲛϩⲟⲗⲟⲕⲟⲧⲧⲓⲛⲟⲥ ⲡϣⲏⲣⲉ ⲇⲉ ϣⲏⲙ ⲁϥⲧⲱⲟⲩⲛ ⲁϥⲃⲱⲕ ⲁϥϫⲱ ⲉⲡⲉϥⲉⲓⲱⲧ ⲛϩⲱⲃⲛⲓⲙⲛⲧⲁⲩϣⲱⲡⲉ ⲡⲉϥⲉⲓⲱⲧ ⲇⲉ ⲛⲧⲉⲣⲉϥⲥⲱⲧⲙ ⲉⲛⲁⲓ ⲁϥϯ ⲉⲟⲟⲩ ⲙⲡⲛⲟⲩⲧⲉ ⲁⲩⲱ ⲙⲡⲉϥϣⲱⲡⲉ ⲛⲁⲙⲉⲗⲏⲥ ⲁⲗⲗⲁ ⲁϥϩⲱⲕ ⲛⲛⲉϥϭⲁⲙⲟⲩⲗ ⲙⲛ ⲟⲩⲙⲏⲏϣⲉ ⲛϫⲁⲓⲃⲉⲕⲏ ⲁϥⲥⲱⲟⲩϩ ⲉϩⲟⲩⲛ ⲛϩⲩⲗⲏ ⲛⲓⲙ ⲁϥⲧⲁⲁⲩ ⲉⲧⲟⲟⲧϥ ⲙⲡⲣⲱⲙⲉ ⲛϩⲏⲕⲉ ⲉⲧⲣⲉϥⲡⲁⲡⲱ ⲧⲱⲃⲉ ⲁⲩⲱ ⲁϥϯ ⲛⲁϥ ⲙⲡϩⲏⲃⲃⲉ ⲙⲛ ⲛⲉⲧⲃⲛⲟⲟⲩⲉ ⲉⲧⲣⲉϥⲥⲕⲁⲓ ⲙⲡⲕⲁϩ ⲛⲧⲉⲣⲉϥϩⲓ ⲧⲟⲟⲧϥ ⲇⲉ ⲛⲉⲣ ϩⲱⲃ ⲁⲟⲩⲁ ϩⲛ ⲛⲉⲧⲃⲛⲟⲟⲩⲉ ⲃⲟϭϥ ⲉϫⲙ ⲡⲕⲉⲟⲩⲁ ⲁϥⲡⲉϩ ϩⲏⲧϥ ϩⲛ ⲛⲉϥⲧⲁⲡ ⲡⲣⲱⲙⲉ ⲇⲉ ⲛϩⲏⲕⲉ ⲛⲧⲉⲣⲉϥⲛⲁⲩ ⲉⲡⲉⲛⲧⲁϥϣⲱⲡⲉ ⲁϥⲗⲩⲡⲏ ⲉⲙⲁⲧⲉ ⲁⲩⲱ ⲡⲉϫⲁϥ ϫⲉ ⲟⲩⲟⲓ ⲛⲁⲓ ⲙⲡⲉⲓⲥⲟⲡ ϩⲁⲙⲟⲓ ⲉⲛⲉ ⲙⲡⲉⲓϫⲉ ⲡϩⲟⲣⲟⲙⲁ ⲉⲡϩⲉⲣϣⲓⲣⲉ ϩⲟⲗⲟⲥ ϫⲉ ⲉϥⲉϫⲟⲟⲥ ⲉⲛⲉϥⲉⲓⲟⲧⲉ ϫⲉ ⲉⲩⲉⲧⲁⲛϩⲟⲩⲧ ⲉⲡⲉⲓϩⲱⲃ ⲛⲧⲉ ⲡⲓⲛⲟϭ ⲛⲟⲥⲉ ⲧⲁϩⲟⲓ ⲛⲁⲓ ⲇⲉ ⲉϥϫⲱ ⲙⲙⲟⲟⲩ ⲛϭⲓ ⲡⲣⲱⲙⲉ ⲛϩⲏⲕⲉ ⲉⲓⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥϫⲓ ⲙⲡⲓⲛⲉ ⲛⲛⲟⲩⲛⲟϭ ⲛⲁⲣⲭⲱⲛ ⲛⲧⲉ ⲧⲡⲟⲗⲓⲥ ⲁϥⲉⲓ ⲉϥⲡⲁⲣⲁⲅⲉ ⲁϥⲛⲁⲩ ⲉⲡⲣⲱⲙⲉ ⲁϥⲙⲟⲟϣⲉ ⲉϩⲟⲩⲛ ⲉⲣⲟϥ ⲁϥⲉⲣ ⲡⲉⲥⲙⲟⲧ ⲛⲛⲉⲧⲉⲣ ϣⲡⲏⲣⲉ ⲡⲉϫⲁϥ ϫⲉ ⲱ ⲡⲣⲱⲙⲉ ⲉⲧⲃⲉ ⲟⲩ ⲁⲕⲕⲁ ⲛⲧⲃⲛⲟⲟⲩⲉ ⲉⲛⲉⲩⲉⲣⲏⲩ ϣⲁⲛⲧⲉ ⲟⲩⲁ ⲡⲗⲩⲅⲏ ⲛⲟⲩⲁⲑ ⲡⲉϥϫⲟⲉⲓⲥ ⲅⲁⲣ ⲛⲁϣⲁⲧⲕ ⲙⲙⲟϥ ⲁϥⲗⲩⲡⲏ ⲉⲙⲁⲧⲉ ⲛϭⲓ ⲡⲣⲱⲙⲉ ⲛⲉⲣⲅⲁⲧⲏⲥ ⲁϥϯ ⲉⲟⲟⲩ ⲙⲡⲛⲟⲩⲧⲉ ⲁⲩⲥⲱⲧⲙ ⲇⲉ ⲛϭⲓ ⲛⲣⲱⲙⲉ ⲉⲧⲉ ⲡⲱⲟⲩ ⲡⲉ ⲡⲧⲃⲛⲏ ⲁⲩⲉⲓ ⲉⲛⲁⲩ ⲉⲡⲉⲛⲧⲁϥϣⲱⲡⲉ ⲁⲩⲱ ⲁⲩⲙⲕⲁϩ ⲛϩⲏⲧ ⲉⲙⲁⲧⲉ ϫⲉ ⲉⲛⲉⲥⲱϥ ϩⲙ ⲡⲉϥⲥⲁ ⲙⲛ ⲧⲉϥⲙⲛⲧϫⲱⲱⲣⲉ ⲁⲩⲱ ⲛⲉⲣⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲙⲡⲟⲩⲉ ⲉϥϩⲙⲟⲟⲥ ⲁⲩⲱ ⲉⲙⲛⲗⲁⲁⲩ ⲛⲁⲩ ⲉⲣⲟϥ ⲉⲓⲙⲏⲧⲉⲓ ⲡⲣⲱⲙⲉ ⲛϩⲏⲕⲉⲭ ⲁⲩⲥⲱⲟⲩϩ ⲛⲟⲩⲙⲏⲏϣⲉ ⲛⲣⲱⲙⲉ ⲉⲡⲧⲃⲛⲏ ⲁⲩϫⲓⲧϥ ⲉϩⲟⲩⲛ ⲉⲧⲡⲟⲗⲓⲥ ⲉⲩⲙⲁ ⲙⲁⲩⲁⲁϥ ⲁⲩϯ ⲧⲣⲟⲫⲏ ⲛⲁϥ ⲉⲧⲣⲉϥⲟⲩⲱⲙ ⲛⲧⲟϥ ⲇⲉ ⲙⲡⲉϥϫⲓ ϯⲡⲉ ⲛⲗⲁⲁⲩ ⲛⲧⲣⲟⲫⲏ ⲉⲡⲧⲏⲣϥ ⲁⲩⲱ ⲛⲉⲩⲗⲩⲡⲏ ⲉϫⲙ ⲡⲉⲛⲧⲁϥϣⲱⲡⲉ ⲙⲙⲟϥ ϫⲉ ⲛⲉⲟⲩϫⲱⲱⲣⲉ ⲡⲉ
28. ⲛⲧⲉⲣⲉ ⲛⲣⲱⲙⲉ ⲇⲉ ⲃⲱⲕ ⲛⲁⲩ ⲉⲛⲉⲩⲏⲓ ⲁⲡϩⲏⲕⲉ ⲛⲣⲱⲙⲉ ϭⲱ ⲉϥϩⲙⲟⲟⲥ ϩⲓⲡⲁϩⲟⲩ ⲙⲡⲧⲃⲛⲏ ⲙⲁⲩⲁⲁϥ ⲉϥⲗⲩⲡⲏ ⲉⲙⲁⲧⲉ ⲁⲩⲱ ⲉⲛⲉϥⲙⲉⲉⲩⲉ ⲉⲃⲟⲗ ⲛⲧⲉϥⲙⲛⲧϩⲏⲕⲉ ⲁⲩⲱ ⲛⲧⲉⲩⲛⲟⲩ ⲉⲓⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲉⲓ ⲉϩⲟⲩⲛ ⲉϥⲥⲱⲃⲉ ϩⲛ ⲟⲩⲥⲱⲃⲉ ⲉϥⲛⲟⲧⲙ ⲁϥⲁϩⲉⲣⲁⲧϥ ϩⲁⲧⲙ ⲡⲣⲱⲙⲉ ⲛϩⲏⲕⲉⲭ ⲉⲃⲟⲗ ϫⲉ ⲛⲉϣⲁϥⲟⲩⲱⲛϩ ⲉⲣⲟϥ ⲛϩⲁϩ ⲛⲥⲟⲡ ⲛϩⲟ ϩⲓ ϩⲟ ⲡⲉϫⲁϥ ⲛⲁϥ ⲉϥⲥⲱⲃⲉ ϫⲉ ⲙⲡⲉⲕⲱⲥⲕ ⲉϯⲟⲩⲱ ⲙⲡⲟⲟⲩ ⲱ ⲡⲥⲟⲛ ⲡⲉϫⲉ ⲡⲣⲱⲙⲉ ⲛⲁϥ ϫⲉ ⲁⲙⲟⲩ ⲡⲁϫⲟⲉⲓⲥ ⲛⲅⲛⲁⲩ ⲉⲡⲉⲛⲧⲁϥϣⲱⲡⲉ ⲡϩⲁⲅⲓⲟⲥ ⲇⲉ ⲙⲉⲣⲕⲟⲩⲣⲓⲟⲥ ⲁϥϯ ⲙⲡⲉϥⲟⲩⲟⲓ ⲁϥϫⲱϩ ⲉⲡⲙⲁⲥⲉ ⲛⲧⲉϥⲟⲩⲉⲣⲏⲧⲉ ⲡⲉϫⲁϥ ⲛⲁϥ ϫⲉ ϩⲙ ⲡⲣⲁⲛ ⲙⲡⲁϫⲟⲉⲓⲥ ⲓⲥ ⲡⲉⲭⲥ ⲉⲕⲉⲧⲱⲟⲩⲛ ⲉϩⲣⲁⲓ ⲛⲟⲩⲉϣ ⲉⲛϣⲱⲛⲉ ⲁⲩⲱ ⲛⲧⲉⲩⲛⲟⲩ ⲁϥⲧⲱⲟⲩⲛ ⲉϩⲣⲁⲓ ϩⲛ ⲟⲩⲛⲟϭ ⲛϭⲟⲙ ϩⲱⲥ ⲉϣϫⲉ ⲙⲡⲟⲩⲡⲗⲩⲅⲏ ⲙⲙⲟϥ ⲉⲡⲧⲏⲣϥ ⲁⲩⲱ ⲛⲧⲉⲩⲛⲟⲩ ⲁϥⲟⲩⲱⲙ ϩⲙ ⲡⲉⲭⲟⲣⲧⲟⲥ ⲉⲧⲕⲏ ϩⲁⲣⲱϥ ⲁⲩⲱ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲡⲓⲧⲓⲙⲁ ⲙⲡⲙⲁⲥⲉ ⲛⲣⲉϥϯⲧⲃⲏⲣ ⲉⲃⲟⲗ ⲉϥϫⲱ ⲙⲙⲟⲥ ϫⲉ ⲉⲣⲉ ⲛⲉⲕⲧⲁⲡ ϣⲱϣ ⲉⲃⲟⲗ ⲙⲛ ⲧⲉⲕⲁⲡⲉ ⲛⲛⲉⲕⲉϣ ϭⲙϭⲟⲙ ⲉⲣⲁϩⲧ ⲗⲁⲁⲩ ⲛⲣⲱⲙⲉ ⲛϩⲏⲧⲟⲩ ⲟⲩⲇⲉ ⲧⲃⲛⲏ ϣⲁ ⲉⲛⲉϩ ⲛⲟⲩⲟⲉⲓϣ ⲁⲗⲗⲁ ⲉⲕⲉϣⲱⲡⲉ ϩⲛ ⲟⲩⲙⲛⲧϩⲩⲙⲉⲣⲟⲥ ⲛⲛⲉϩⲟⲟⲩ ⲧⲏⲣⲟⲩ ⲙⲡⲉⲕⲱⲛϩ ⲁⲩⲱ ⲛⲧⲉⲩⲛⲟⲩ ⲁⲛⲉϥⲧⲁⲡ ϩⲉ ⲁⲩϣⲱϣ ⲉⲃⲟⲗ ⲙⲛ ⲧⲉϥⲁⲡⲉ ⲁⲩⲱ ⲁϥϣⲱⲡⲉ ϩⲛ ⲟⲩⲙⲛⲧⲥⲁⲃⲉ ⲛⲛⲉϥϩⲟⲟⲩ ⲧⲏⲣⲟⲩ ⲡⲣⲱⲙⲉ ⲇⲉ ⲛϩⲏⲕⲉ ⲁϥⲡⲁϩⲧϥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉϥϫⲱ ⲙⲙⲟⲥ ϫⲉ ⲡⲉⲕϩⲙⲟⲧ ϣⲉⲡ ⲡⲁϫⲟⲉⲓⲥ ⲓⲥ ⲡⲉⲭⲥ ⲡⲉⲕϩⲙϩⲁⲗ ⲙⲙⲁⲣⲧⲩⲣⲟⲥ ⲉⲧⲧⲁⲓⲏⲩ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲩⲱ ⲛⲧⲉⲩⲛⲟⲩ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲟⲡϥ ⲉⲣⲟϥ ⲡⲣⲱⲙⲉ ⲇⲉ ⲛϩⲏⲕⲉ ⲁϥⲓ ⲉⲃⲟⲗ ϩⲛ ⲧⲡⲟⲗⲓⲥ ⲧⲏⲣⲥ ⲉϥⲣⲁϣⲉ ⲉϥⲁⲱ ⲙⲙⲟⲥ ϫⲉ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲟⲩⲱⲛϩ ⲉⲣⲟⲓ ⲁϥⲧⲁⲗϭⲟ ⲙⲡⲙⲁⲥⲉ ⲁⲩⲱ ⲁϥⲉⲡⲓⲧⲓⲙⲁ ⲙⲡⲙⲁⲥⲉ ⲛⲣⲉϥϯ ⲧⲃⲏⲣ ⲉⲃⲟⲗ ⲁⲩⲉⲓ ⲇⲉ ⲛϭⲓ ⲟⲩⲙⲏⲏϣⲉ ⲛⲣⲱⲙⲉ ⲉⲧⲣⲉⲩⲛⲁⲩ ⲉⲡⲉⲛⲧⲁϥϣⲱⲡⲉ ⲁⲩⲱ ⲁⲩⲱϣ ⲉⲃⲟⲗ ⲧⲏⲣⲟⲩ ϫⲉ ⲟⲩⲁ ⲡⲉ ⲡⲛⲟⲩⲧⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉⲭⲥ ⲓⲥ ⲡⲉⲟⲟⲩ ⲛⲁϥ ϣⲁ ⲉⲛⲉϩ ⲛⲉⲛⲉϩ ϩⲁⲙⲏⲛ ⲧⲙⲉϩϥⲧⲟ ⲛϭⲟⲙ ⲛⲧⲁⲥϣⲱⲡⲉ ⲉⲃⲟⲗ ϩⲓⲧⲟⲟⲧϥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
29. ⲁⲥϣⲱⲡⲉ ⲇⲉ ⲙⲛⲛⲥⲁ ⲉⲧⲣⲉⲩⲁⲣⲭⲉⲓ ⲙⲡⲁⲡⲱ ⲧⲱⲃⲉ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲟⲩⲁⲣⲭⲱⲛ ⲛϩⲉⲗⲗⲏⲛ ⲉⲓ ϩⲱⲱϥ ϩⲓⲧⲟⲩⲱϥ ⲛⲛⲉⲣⲅⲁⲧⲏⲥ ⲉⲧⲡⲁⲡⲉ ⲧⲱⲃⲉ ⲉⲡⲧⲟⲡⲟⲥ ⲙⲡⲡⲉⲧⲟⲩⲁⲁⲃ ⲁⲩⲱ ⲁϥⲥⲙⲓⲛⲉ ⲙⲡⲉϥⲙⲁ ⲙⲡⲁⲡⲉ ⲧⲱⲃⲉ ϩⲁϩⲧⲏⲩ ⲉϥⲟⲩⲱϣ ϩⲱⲱϥ ⲉⲕⲱⲧ ⲛⲟⲩⲛⲟϭ ⲛⲁⲩⲗⲏ ϩⲙ ⲡⲉϥⲏⲓ ⲁϥⲉⲓ ⲇⲉ ⲉⲃⲟⲗ ⲛⲟⲩϩⲟⲟⲩ ⲁϥϩⲙⲟⲟⲥ ϩⲁⲧⲏⲛ ⲛⲉⲣⲅⲁⲧⲏⲥ ⲉⲧⲉⲣ ϩⲱⲃ ⲁϥⲧⲱⲟⲩⲛ ⲇⲉ ⲁϥⲙⲟⲩϣⲧ ϩⲛ ⲛⲉⲧⲱⲃⲉ ϣⲁⲛⲧⲉϥⲉⲓ ⲉϫⲛ ⲛⲉⲧⲱⲃⲉ ⲙⲡⲡⲉⲧⲟⲩⲁⲁⲃ ⲁⲩⲱ ⲁϥⲉⲡⲓⲑⲩⲙⲉⲓ ⲉⲣⲟⲟⲩ ⲉϩⲟⲩⲉ ⲛⲟⲩϥ ⲧⲏⲣⲟⲩ ⲡⲉϫⲁϥ ⲛⲧⲉⲓϩⲉ ϩⲙ ⲡⲉϥϩⲏⲧ ϫⲉ ϯⲛⲁϥⲓ ⲛϣⲉ ⲛⲁⲡⲉ ⲛⲧⲱⲃⲉ ϩⲛ ⲛⲉⲧⲱⲃⲉ ⲛⲛⲉⲭⲣⲏⲥⲧⲓⲁⲛⲟⲥ ⲛⲧⲁϫⲟⲟⲥ ϫⲉ ⲛⲁⲉⲣⲅⲁⲧⲏⲥ ⲁⲩⲥⲙⲏⲛⲧⲟⲩ ⲁⲩⲱ ⲉⲩϣⲁⲛϫⲟⲟⲥ ϫⲉ ⲛϯⲛⲁⲧⲁⲁⲩ ⲛⲁⲕ ⲁⲛⲭ ϯⲛⲁϩⲓⲟⲩⲉ ⲉⲣⲟⲟⲩ ⲛⲧⲁϥⲓⲧⲟⲩ ⲉⲛϩⲛⲁⲩ ⲁⲛ ⲧⲁⲛⲁⲩ ϫⲉ ⲉⲣⲉ ⲡⲁⲓ ϫⲉ ⲙⲉⲣⲕⲟⲩⲣⲓⲟⲥ ⲛⲁⲉⲣ ⲟⲩ ⲛⲁⲓ ⲁⲩⲱ ⲁϥⲃⲱⲕ ⲉⲡⲉϥⲏⲓ ⲙⲡⲉϩⲟⲟⲩ ⲉⲧⲙⲙⲁⲩ ⲙⲛⲛⲥⲁ ϩⲉⲛⲕⲟⲩⲓ ⲇⲉ ⲟⲛ ⲛϩⲟⲟⲩ ⲁϥⲉⲓ ⲉⲃⲟⲗ ⲁϥⲛⲁⲩ ⲉⲛⲉⲧⲱⲃⲉ ⲙⲡⲡⲉⲧⲟⲩⲁⲁⲃ ⲉⲁⲩⲁϣⲁⲓ ⲉⲙⲁⲧⲉⲭ ⲉⲃⲟⲗ ϫⲉ ⲁⲛⲕⲟⲩⲓ ⲙⲛ ⲛⲉⲛⲟϭ ⲛⲧⲡⲟⲗⲓⲥ ϫⲟⲟⲩ ⲛⲟⲩⲉⲣⲅⲁⲧⲏⲥ ⲉⲡⲟⲩⲁ ⲁⲩⲉⲣ ⲟⲩϩⲉⲃⲇⲟⲙⲁⲥ ⲉⲩⲉⲣ ϩⲱⲃ ⲉⲡⲧⲟⲡⲟⲥⲭ ⲉⲃⲟⲗ ϫⲉ ⲛⲉⲩⲉⲡⲓⲑⲩⲙⲉⲓ ⲉⲕⲱⲧ ⲉⲣⲟϥ ⲛⲟⲩⲙⲁⲣⲧⲩⲣⲓⲟⲛ ⲗⲟⲓⲡⲟⲛ ⲁⲡⲣⲱⲙⲉ ⲛϩⲉⲑⲛⲓⲕⲟⲥ ⲉⲧⲙⲙⲁⲩ ⲕⲱϩ ⲉⲛⲧⲏⲃⲉ ⲙⲡⲇⲓⲕⲁⲓⲟⲥ ⲉⲧⲣⲉϥϥⲓⲧⲟⲩ ϩⲓⲧⲙ ⲡⲕⲱϩ ⲙⲡⲇⲓⲁⲃⲟⲗⲟⲥ ⲉⲧⲉⲛϩⲏⲧϥ ⲁϥⲙⲟⲩⲧⲉ ⲉⲡⲣⲱⲙⲉ ⲛϩⲏⲕⲉ ⲡⲉϫⲁϥ ⲛⲁϥ ⲡⲁⲓ ⲉⲧⲉⲣⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲟⲩⲟⲛϩ ⲉⲣⲟϥ ϫⲉ ⲁⲙⲟⲩ ⲛⲅⲧⲥⲁⲃⲟⲓ ⲉⲡⲧⲟϣ ⲛⲛⲁⲧⲱⲃⲉ ⲉⲡⲓⲇⲏ ϯⲟⲩⲱϣ ⲉⲕⲱⲧ ⲙⲡⲁⲏⲓ ⲡⲉϫⲉ ⲡⲣⲱⲙⲉ ⲛϩⲏⲕⲉ ⲛⲁϥ ϫⲉ ⲉⲓⲥ ⲛⲉⲕⲣⲱⲙⲉ ⲥⲟⲟⲩⲛ ⲉⲧ:ⲡⲉ ⲛⲛⲉⲕⲧⲱⲃⲉ ⲡⲉϫⲁϥ ⲛⲁϥ ϫⲉ ⲛϯⲁⲓ ⲁⲛ ⲛⲗⲁⲁⲩ ⲛⲣⲱⲙⲉ ⲛⲥⲁⲃⲗⲗⲁⲓ ⲛⲙⲙⲁⲕ ⲁⲩⲱ ⲕⲁⲧⲁ ⲡⲁⲙⲉⲉⲩⲉ ⲛⲟⲩⲓ ⲛⲉ ⲛⲁⲓ ϣⲁ ⲡⲉⲓⲙⲁ ⲡⲣⲱⲙⲉ ⲇⲉ ⲛϩⲏⲕⲉ ⲁϥⲉⲣ ϣⲡⲏⲣⲉ ⲉⲙⲁⲧⲉ ⲡⲉϫⲁϥ ⲛⲁϥ ϫⲉ ⲱ ⲡⲣⲱⲙⲉ ⲥⲁϩⲟ ⲉⲃⲟⲗ ⲙⲡⲉⲣϫⲱϩ ⲉⲛⲧⲱⲃⲉ ⲙⲡⲇⲓⲕⲁⲓⲟⲥ ϫⲉ ⲛⲛⲉ ⲟⲩϫⲣⲟⲡ ⲧⲁϩⲟⲕ ⲡⲣⲱⲙⲉ ⲇⲉ ⲛϩⲉⲗⲗⲏⲛ ⲁϥϯ ⲛⲟⲩϣⲥⲛⲁⲁⲥ ⲙⲡⲣⲱⲙⲉ ⲉϥϫⲱ ⲙⲙⲟⲥ ϫⲉ ⲉⲫⲟⲥⲟⲛ ⲁⲕϫⲟⲟⲥ ϫⲉ ⲡⲣⲱⲙⲉ ⲉⲧⲙⲙⲁⲩ ⲛⲁⲡⲗⲩⲅⲏ ⲙⲙⲟⲕⲭ ϯⲛⲁϥⲓ ⲛϩⲟϣⲟ ⲉⲛⲁⲓ ϣⲁⲛϯⲉⲓⲙⲉ ⲉⲧⲉⲕϭⲟⲙ ⲛⲙⲙⲁϥ ⲡⲉϫⲉ ⲡⲣⲱⲙⲉ ⲛⲁϥ ϫⲉ ⲛⲑⲉ ⲉⲧⲕⲟⲩⲁϣⲥ ⲁⲣⲓⲥ ⲉⲓⲥ ⲡⲛⲟⲩⲧⲉ ⲙⲛ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϭⲱϣⲧ ⲉⲁⲱⲕ
30. ⲡⲣⲱⲙⲉ ⲇⲉ ⲛϩⲉⲗⲗⲏⲛ ⲁϥⲧⲛⲛⲟⲟⲩ ⲛⲧⲉⲩⲛⲟⲩ ϩⲁ ⲟⲩⲛⲟϭ ⲙⲙⲛⲧϫⲁⲥⲓϩⲏⲧ ⲛⲟⲩϩⲙϩⲁⲗ ⲉⲡⲱϥ ⲡⲉ ⲁϥⲉⲓⲛⲉ ⲛⲛⲉϭⲁⲙⲟⲩⲗ ⲁⲩⲱ ⲁϥⲙⲟⲟϣⲉ ϩⲏⲧⲟⲩ ⲛⲛⲉϭⲁⲙⲟⲩⲗ ⲁϥⲁⲣⲭⲉⲓ ⲛⲧⲁⲗⲟ ϩⲛ ⲛⲉⲧⲱⲃⲉ ⲙⲡⲡⲉⲧⲟⲩⲁⲁⲃ ⲁⲩⲱ ⲁϥⲁϩⲉⲣⲁⲧϥ ϩⲓⲑⲏ ⲛⲟⲩⲛⲟϭ ⲛϭⲁⲙⲟⲩⲗ ⲛϩⲟⲟⲩⲧ ⲉⲡⲱϥ ⲡⲉ ⲁϥⲟⲩⲉϩⲥⲁϩⲛⲉ ⲛⲛⲉϥϩⲙϩⲁⲗ ⲉⲧⲣⲉⲩⲧⲁⲗⲟ ⲧⲱⲃⲉ ⲉⲛⲉϭⲁⲙⲟⲩⲗ ⲡⲉϫⲁϥ ϫⲉ ⲙⲁⲣⲉⲓⲛⲁⲩ ⲧⲉⲛⲟⲩ ⲉⲧϭⲟⲙ ⲙⲡⲁⲓ ϫⲉ ⲙⲉⲣⲕⲟⲩⲣⲓⲟⲥ ϫⲉ ⲉϥⲛⲁⲉⲣ ⲟⲩ ⲛⲁⲓ ⲛⲧⲉⲩⲛⲟⲩ ⲛⲧⲁϥϫⲉ ⲡⲁⲓ ⲁⲡϭⲁⲙⲟⲩⲗ ⲉⲧϥⲁϩⲉⲣⲁⲧϥ ϩⲁϩⲧⲏϥ ⲟⲩⲱⲛ ⲉⲣⲱϥ ⲁϥⲁⲙⲁϩⲧⲉ ⲙⲡⲁⲣⲭⲱⲛ ⲛϩⲏⲗⲗⲏⲛ ⲁϥⲛⲟϫϥ ⲉϩⲟⲩⲛ ϩⲁ ϩⲏⲧϥ ⲁϥⲉⲛⲕⲟⲧⲕ ⲉϫⲱϥ ⲁⲩⲱ ⲛⲧⲉⲩⲛⲟⲩ ⲉⲓⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲉⲓ ⲉϥⲧⲁⲗⲏⲩ ⲉⲡⲉϥϩⲧⲟ ⲁϥⲁϩⲉⲣⲁⲧϥ ϩⲁϩⲧⲉⲛ ⲡϭⲁⲙⲟⲩⲗ ⲉⲧⲁⲙⲁϩⲧⲉ ⲉϫⲙ ⲡⲣⲱⲙⲉ ⲁϥⲣⲁϩⲧϥ ϩⲙ ⲡⲉϥⲕⲟⲛⲧⲁⲣⲓⲟⲛ ⲉⲧⲉϥⲟⲩⲉⲣⲏⲧⲉ ⲛϩⲃⲟⲩⲣ ⲁⲩⲱ ⲛⲧⲉⲩⲛⲟⲩ ⲁⲛⲃⲁⲗ ⲙⲡⲣⲱⲙⲉ ⲟⲩⲱⲛ ⲁϥⲛⲁⲩ ⲉⲡϩⲁⲅⲓⲟⲥ ⲙⲉⲣⲕⲟⲩⲅⲓⲟⲥ ⲛϩⲟϩⲓ ϩⲟ ⲉϥⲕⲟⲛⲧⲁⲣⲓⲍⲉ ⲙⲙⲟϥ ⲉⲧⲉϥⲟⲩⲉⲣⲏⲧⲉ ⲛϩⲃⲟⲩⲣ ⲁⲩⲱ ⲡⲉϫⲉ ⲡⲡⲉⲧⲟⲩⲁⲁⲃ ⲛⲁϥ ϫⲉ ⲱ ⲡⲣⲱⲙⲉ ⲛⲥⲛⲟϥ ⲁⲩⲱ ⲛⲁⲧϣⲁⲩ ⲉⲓⲥ ⲟⲩ ⲙⲏⲏϣⲉ ⲛϩⲟⲟⲩ ϯⲧⲱⲟⲩⲛ ϩⲁⲣⲟⲕ ϫⲉ ⲕⲛⲁⲥⲁϩⲱⲱⲕ ⲉⲃⲟⲗ ⲙⲙⲟⲓ ⲁⲩⲱ ⲙⲡⲉⲕⲟⲩⲱϣ ⲁⲗⲗⲁ ϯⲛⲁⲡⲉⲇⲉⲩⲉ ⲙⲙⲟⲕ ⲙⲡⲟⲟⲩ ⲡϣⲟⲣⲡ ⲅⲁⲣ ⲛⲥⲟⲡ ⲁⲕϩⲓⲟⲩⲉ ⲉⲡⲁⲉⲡⲓⲧⲣⲟⲡⲟⲥ ⲁⲩⲱ ⲁⲕϥⲓ ϣⲏ ⲛⲁⲡⲏ ⲛⲧⲱⲃⲉ ϩⲛ ⲛⲁⲧⲱⲃⲉ ⲁⲩⲱ ⲡⲉϫⲁⲕ ⲟⲛ ϫⲉ ⲙⲙⲉⲣⲕⲟⲩⲣⲓⲟⲥ ⲛⲁⲉϣ ϭⲙϭⲟⲙ ⲉⲣⲟⲓ ⲁⲛ ⲙⲛⲛⲥⲱⲥ ⲁⲕⲥⲱⲟⲩϩ ⲛⲛⲉⲕϩⲙϩⲁⲗ ⲙⲛ ⲛⲉⲕϭⲁⲙⲟⲩⲗ ⲁⲕⲉⲓ ⲉⲕⲥⲉⲃⲧⲱⲧ ⲉϥⲓ ⲛⲛⲧⲱⲃⲉ ⲙⲡⲁⲙⲁⲣⲧⲩⲣⲓⲟⲛ ϩⲛ ⲟⲩϫⲓⲛϭⲟⲛⲥ ϩⲱⲥ ⲉⲁⲛⲅ ⲟⲩⲁⲧϭⲟⲙ ⲉⲧⲙⲉⲓⲣⲉ ⲙⲡⲁⲕⲃⲁ ⲛⲙⲙⲁⲕ ⲁⲗⲗⲁ ⲡⲛⲟⲩⲧⲉ ⲡⲉⲧⲛⲁϯ ϩⲁⲡ ⲉⲣⲟⲕ ϫⲉ ⲉⲫⲟⲥⲟⲛ ⲁⲡⲉⲓⲛⲟϭ ⲙⲙⲏⲏϣⲉ ⲥⲱⲟⲩϩ ⲉⲡⲉⲓⲙⲁ ⲙⲡⲟⲟⲩ ⲉⲛⲁⲩ ⲉⲡⲉⲕϣⲓⲡⲉ ⲉⲡⲙⲁ ⲙⲡⲧⲱϩ ⲉⲧⲟⲩⲛⲁⲥⲟⲣϥ ⲉⲃⲟⲗ ⲉⲧⲥⲛⲧⲉ ⲙⲡⲁⲙⲁⲣⲧⲩⲣⲓⲟⲛ ϯⲛⲁⲧⲣⲉ ⲧⲉⲕⲁⲡⲉ ⲙⲛ ⲡⲕⲁⲥ ⲛⲧⲉⲕϫⲓⲥⲉ ϯ ⲙⲁⲉⲓⲛ ⲙⲡⲉⲓⲗⲁⲟⲥ ⲧⲏⲣϥ ⲉⲡⲕⲱ ⲉϩⲣⲁⲓ ⲙⲡⲁⲧⲟⲡⲟⲥ ⲉⲧⲉϥϣⲓⲏ ⲙⲛ ⲧⲉϥⲟⲩⲁϣⲥⲉ ϩⲓ ⲟⲩⲥⲟⲡ ⲛⲁⲓ ⲇⲉ ⲉϥϫⲱ ⲙⲙⲟⲟⲩ ⲛⲁϥ ⲛϭⲓ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲉⲙⲛ ⲗⲁⲁⲩ ⲛⲁⲩ ⲉⲣⲟϥ ϩⲙ ⲡⲙⲏⲏϣⲉ ⲧⲏⲣϥ ⲛⲥⲁ ⲡⲣⲱⲙⲉ ⲛϩⲉⲗⲗⲏⲛ ⲁⲩⲱ ⲛⲧⲉⲓϩⲉ ⲁⲛⲉϥϩⲙϩⲁⲗ ⲧⲁⲣⲁⲥⲥⲉ ⲛⲧⲡⲟⲗⲓⲥ ⲧⲏⲣⲥ ⲉⲩⲣⲓⲙⲉ ⲁⲩⲱ ⲉⲩϫⲓ ϣⲕⲁⲕ ⲉⲃⲟⲗ ⲉⲧⲃⲉ ⲡⲁⲓ ⲁⲙⲙⲏⲏϣⲉ ⲥⲱⲟⲩϩ ⲉⲛⲁⲩ ⲉⲧⲉⲑⲉⲱⲣⲓⲁ ⲛⲧⲁⲥϣⲱⲡⲉ
31. ⲛⲧⲉⲣⲉ ⲡⲙⲏⲏϣⲉ ⲇⲉ ⲥⲱⲟⲩϩ ⲛⲧⲉⲩⲛⲟⲩ ⲁⲡϭⲁⲙⲟⲩⲗ ⲧⲱⲟⲩⲛ ⲉϩⲣⲁⲓ ϩⲓϫⲛ ⲡⲣⲱⲙⲉ ⲁϥⲁⲙⲁϩⲧⲉ ⲛⲧⲉϥⲟⲩⲉⲣⲏⲧⲉ ⲛⲟⲩⲱⲧ ϩⲛ ⲧⲉϥⲧⲁⲡⲣⲟ ⲡⲣⲱⲙⲉ ⲇⲉ ⲛϩⲉⲗⲗⲏⲛ ⲁϥⲱϣ ⲉⲃⲟⲗ ⲉⲣⲉ ⲡϭⲁⲙⲟⲩⲗ ⲡⲏⲧ ⲛⲙⲙⲁϥ ϫⲉ ⲟⲩⲉϩ ⲧⲏⲩⲧⲛ ⲉⲥⲱⲓ ⲱ ⲛⲁⲥⲛⲏⲩ ⲛⲧⲉⲧⲛⲛⲁⲩ ⲉⲡⲉⲧⲛⲁϣⲱⲡⲉ ⲙⲙⲟⲓⲭ ⲉⲃⲟⲗ ϫⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉⲧⲉⲓⲣⲉ ⲛⲛⲁⲓ ⲧⲏⲣⲟⲩ ⲛⲁⲓⲭ ⲉⲃⲟⲗ ϫⲉ ⲁⲓⲡⲱⲧ ⲉⲛⲉϥⲧⲱⲃⲉ ⲁⲓⲃⲓⲧⲟⲩ ⲁⲇⲓⲕⲟⲥ ⲁⲙⲏⲓⲧⲛ ⲛⲙⲙⲁⲓ ⲱ ⲛⲁⲥⲛⲏⲩ ⲛⲧⲁⲧⲥⲁⲃⲉ ⲧⲏⲩⲧⲛ ⲉⲡⲙⲁ ⲉⲧⲉⲧⲛⲁⲕⲱⲧ ⲙⲡⲙⲁⲣⲧⲩⲣⲓⲟⲛ ⲛϩⲏⲧϥ ⲕⲁⲛ ϯⲛⲁⲙⲟⲩ ⲕⲁⲛ ϯⲛⲁⲱⲛϩ ⲉⲓ ⲛⲧⲉⲧⲛⲛⲁⲩ ⲁⲛ ⲱ ⲛⲁⲥⲛⲏⲩ ⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉϥⲗⲟⲅⲭⲓⲍⲉ ⲙⲙⲟⲓ ⲁⲩⲱ ⲉϥⲁⲡⲓⲗⲏ ⲉⲣⲟⲓ ⲉⲙⲁⲧⲉ ϫⲉ ⲛⲧⲟⲕ ⲡⲉⲧⲛⲁⲟⲩⲱϩ ⲛⲧⲥⲛⲧⲉ ⲙⲡⲁⲧⲟⲡⲟⲥ ⲉⲕⲁϣⲉ ⲉϩⲣⲁⲓ ⲙⲁⲩⲁⲁⲕ ⲛⲥⲁϫⲱⲕ ⲁⲩⲱ ⲁⲙⲙⲏⲏϣⲉ ⲟⲩⲁϩⲟⲩ ⲛⲥⲱϥ ϩⲛ ⲟⲩϩⲟⲧⲉ ⲙⲛ ⲟⲩⲥⲧⲱⲧ ϣⲁⲛⲧⲉϥⲱⲣϥ ⲉϩⲟⲩⲛ ⲛⲧⲉⲓⲕⲟⲇⲟⲙⲏ ⲙⲡⲧⲟⲡⲟⲥ ⲉϥⲁϣⲉ ⲉϩⲣⲁⲓ ⲛⲥⲁϫⲱϥ ⲁⲩⲱ ⲁϥⲱϣ ⲉⲃⲟⲗ ϩⲛ ⲟⲩⲛⲟϭ ⲛⲥⲙⲏ ϫⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲛⲁ ⲛⲁⲓ ⲛⲅⲕⲱ ⲛⲁⲓ ⲉⲃⲟⲗ ⲉⲧⲃⲉ ⲧⲁⲙⲛⲧⲁⲧⲥⲟⲟⲩⲛ ⲁⲩⲱ ⲛⲁⲧⲱⲃⲉ ⲧⲏⲣⲟⲩ ϯⲛⲁⲧⲁⲁⲩ ⲉⲧⲉⲓⲕⲟⲇⲟⲙⲏ ⲙⲡⲉⲕⲧⲟⲡⲟⲥ ⲙⲛ ϣⲏ ⲛⲓⲙ ⲉϯⲛⲁϩⲉ ⲉⲣⲟϥ ⲁⲩⲱ ϯⲛⲁϣⲱⲡⲉ ⲛⲭⲣⲏⲥⲧⲓⲁⲛⲟⲥ ⲙⲛ ⲡⲁⲏⲓ ⲧⲏⲣϥ ⲁⲩⲱ ⲛⲁϩⲙϩⲁⲗ ⲧⲏⲣⲟⲩ ϯⲛⲁⲕⲁⲁⲩ ⲉⲃⲟⲗ ⲉⲩⲟ ⲛⲣⲉⲙϩⲉ ⲁⲩⲱ ϯⲛⲁϣⲱⲡⲉ ⲛϩⲙϩⲁⲗ ⲉⲡⲉⲕⲧⲟⲡⲟⲥ ϣⲁ ⲡⲉϩⲟⲟⲩ ⲙⲡⲁⲙⲟⲩ
32. ⲛⲧⲉⲣⲉϥϫⲉ ⲛⲁⲓ ⲇⲉ ⲁⲡϭⲁⲙⲟⲩⲗ ⲕⲁⲁϥ ⲉⲡⲉⲥⲏⲧ ⲉϥⲁϣⲉ ⲉϩⲣⲁⲓ ⲛⲥⲁϫⲱϥ ⲛⲧⲉϥⲟⲩⲉⲣⲏⲧⲉ ⲛⲟⲩⲱⲧ ⲁⲩⲱ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲱϩ ⲉⲛⲉϥⲥⲁϣ ⲁϥⲧⲁⲗϭⲟϥ ⲁϥⲕⲁⲁϥ ⲉⲃⲟⲗ ⲉⲙⲛⲗⲁⲁⲩ ⲙⲡⲱⲗϩ ϩⲙ ⲡⲉϥⲥⲱⲙⲁ ⲉⲡⲧⲏⲣϥ ⲁⲩⲱ ⲁⲩⲛⲟϭ ⲛϩⲟⲧⲉ ϩⲉ ⲉϩⲣⲁⲓ ⲉϫⲛ ⲟⲩⲟⲛ ⲛⲓⲙ ⲉⲧⲁϩⲉⲣⲁⲧⲟⲩ ⲉⲩⲛⲁⲩ ⲉⲑⲉ ⲛⲧⲁ ⲡϭⲁⲙⲟⲩⲗ ⲡⲗⲩⲅⲏ ⲙⲙⲟϥ ⲁⲩⲱ ⲉϥϩⲟⲙⲟⲗⲟⲅⲉⲓ ⲛⲁⲩ ϫⲉ ⲉⲓⲥ ϩⲏⲏⲧⲉ ⲉϥⲗⲟⲅⲭⲓⲍⲉ ⲙⲙⲟⲓ ⲛϭⲓ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲗⲟⲓⲡⲟⲛ ⲁⲩⲙⲟⲩϣⲧ ⲙⲡⲉϥⲥⲱⲙⲁ ⲙⲡⲟⲩϭⲛ ⲗⲁⲁⲩ ⲙⲡⲱⲗϩ ⲛϩⲏⲧϥ ⲉⲡⲧⲏⲣϥ ⲡⲉϫⲁⲩ ⲛⲁϥ ϫⲉ ⲉⲩⲧⲱⲛ ⲛⲙⲡⲱⲗϩ ⲉⲧϩⲙ ⲡⲉⲕⲥⲱⲙⲁⲭ ⲙⲁⲗⲓⲥⲧⲁ ⲉⲕⲉⲣ ⲡⲕⲉⲱϣ ⲉⲃⲟⲗ ϫⲉ ⲉⲓⲥ ⲡⲇⲓⲕⲁⲓⲟⲥ ⲡⲗⲩⲅⲏ ⲙⲙⲟⲓ ⲉⲧⲁⲟⲩⲉⲣⲏⲧⲉ ϩⲙ ⲡⲉϥⲕⲟⲛⲧⲁⲣⲓⲟⲛ ⲡⲉϫⲉ ⲡⲣⲱⲙⲉ ⲛⲁⲩ ϫⲉ ⲱ ⲛⲁⲥⲛⲏⲩ ϫⲓⲛ ⲧⲉⲩⲛⲟⲩ ⲛⲧⲁϥⲧⲣⲉ ⲡϭⲁⲙⲟⲩⲗ ⲕⲁⲁⲧ ⲉⲃⲟⲗ ⲁϥϫⲉϩ ⲧⲉϥϭⲓϫ ⲉⲃⲟⲗ ϩⲙ ⲡⲁⲥⲱⲙⲁ ⲧⲏⲣϥ ⲁⲓⲟⲩϫⲁⲓ ⲛⲧⲉⲩⲛⲟⲩ ⲉⲧⲙⲙⲁⲩ ⲁⲩⲱ ⲛⲧⲉⲩⲛⲟⲩ ⲁϥⲡⲱⲧ ⲉⲣⲁⲧϥ ⲙⲡⲉⲡⲓⲥⲕⲟⲡⲟⲥ ⲁϥⲃⲁⲡⲧⲓⲍⲉ ⲙⲙⲟϥ ⲙⲛ ⲡⲉϥⲏⲓ ⲧⲏⲣϥ ϩⲙ ⲡⲣⲁⲛ ⲙⲡⲉⲓⲱⲧ ⲙⲛ ⲡϣⲏⲣⲉ ⲙⲛ ⲡⲉⲡⲛⲁ ⲉⲧⲟⲩⲁⲁⲃ ⲁⲩⲱ ⲛⲉϥϩⲙϩⲁⲗ ⲧⲏⲣⲟⲩ ⲁϥⲕⲁⲁⲩ ⲉⲃⲟⲗ ⲉⲩⲟ ⲛⲉⲗⲉⲩⲑⲉⲣⲟⲥ ⲁϥϯ ⲛⲛⲉϩⲩⲗⲏ ⲧⲏⲣⲟⲩ ⲛⲧⲁϥⲥⲟⲟⲩϩ ⲉϩⲟⲩⲛ ⲉⲡⲕⲱⲧ ⲙⲡⲉϥⲏⲓ ⲛϣⲏ ⲙⲛ ⲛⲱⲛⲉ ⲁⲩⲱ ⲧⲱⲃⲉ ⲛⲓⲙ ⲉⲡⲱϥ ⲡⲉ ⲁϥⲧⲁⲁⲩ ⲉϩⲟⲩⲛ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲩⲱ ⲛⲉϥⲉⲣ ϩⲱⲃ ⲉⲡⲧⲟⲡⲟⲥ ϩⲛ ⲛⲉϥϭⲓϫ ⲛⲑⲉ ⲛⲛⲉⲉⲣⲅⲁⲧⲏⲥ ⲁϥⲙⲟⲩ ⲇⲉ ⲕⲁⲧⲁ ⲡⲧⲱϣ ⲛⲣⲱⲙⲉ ⲛⲓⲙ ⲙⲡⲁⲧⲟⲩϫⲉⲕ ⲡⲧⲟⲡⲟⲥ ⲉⲃⲟⲗⲭ ϩⲛ ⲟⲩⲉⲓⲣⲏⲛⲏ ⲛⲧⲉ ⲡⲛⲟⲩⲧⲉ ϩⲁⲙⲏⲛ ⲧⲙⲉϩϯ ⲛϭⲟⲙ ⲛⲧⲁⲥϣⲱⲡⲉ ⲉⲃⲟⲗ ϩⲓⲧⲟⲟⲧϥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
33. ⲁⲥϣⲱⲡⲉ ⲇⲉ ⲛⲧⲉⲣⲟⲩⲁⲣⲭⲉⲓ ⲛⲕⲱⲧ ⲙⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲛ ⲟⲩⲛⲟϭ ⲙⲙⲛⲧⲉⲡⲓⲕⲏⲥⲭ ϫⲉ ⲛⲉⲩⲟϣ ⲡⲉ ⲛϭⲓ ⲛⲣⲱⲙⲉ ⲉⲧⲉⲣ ϩⲱⲃ ⲉⲡⲧⲟⲡⲟⲥⲭ ⲁⲩⲟⲩⲣⲱⲙⲉ ⲛⲧⲉ ⲧⲡⲟⲗⲓⲥ ⲉⲓ ⲉϥⲡⲁⲣⲁⲅⲉ ⲁϥⲛⲁⲩ ⲉⲩϣⲏ ⲉϥⲛⲏϫ ⲉⲃⲟⲗ ϩⲓⲣⲙ ⲡⲣⲟ ⲙⲡⲧⲟⲡⲟⲥ ⲁϥⲉⲡⲓⲑⲩⲙⲉⲓ ⲉⲣⲟϥ ⲡⲉϫⲁϥ ϫⲉ ⲟⲛⲧⲟⲥ ϯⲉⲣ ⲭⲣⲓⲁ ⲙⲡⲉⲓϣⲏ ⲁⲩⲱ ϯⲛⲁϥⲓⲧϥ ⲁⲩⲱ ⲁϥϯ ⲙⲡⲉϥⲟⲩⲟⲓ ⲉϩⲟⲩⲛ ⲉⲡϣⲏ ⲁϥⲃⲓⲧϥ ⲁϥⲧⲁⲗⲟϥ ⲉϫⲱϥ ⲁϥⲙⲟⲟϣⲉ ⲛⲙⲙⲁϥ ϣⲁⲛⲧⲉϥⲉⲣ ⲡⲃⲟⲗ ⲙⲡⲧⲟⲡⲟⲥ ⲛⲟⲩⲕⲟⲩⲓ ⲡⲣⲱⲙⲉ ⲇⲉ ⲁϥⲥⲱⲣⲙ ⲛⲧⲉⲩⲛⲟⲩ ⲙⲡⲉϥⲉⲓⲙⲉ ϫⲉ ⲉϥⲙⲟⲟϣⲉ ⲉⲧⲱⲛ ϣⲁⲛⲧⲉϥⲓ ⲛϥⲁϩⲉⲣⲁⲧϥ ϩⲓⲣⲙ ⲡⲣⲟ ⲙⲡⲏⲓ ⲙⲡⲣⲱⲙⲉ ⲛϩⲏⲕⲉ ⲡⲁⲓ ⲉⲧⲉⲣⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲟⲩⲟⲛϩ ⲛⲁϥ ⲉⲃⲟⲗ ⲉϥϣⲁϫⲉ ⲛⲙⲙⲁϥⲭ ⲉⲃⲟⲗ ϫⲉ ⲛⲧⲟϥ ⲡⲉⲧⲟ ⲛⲁϥ ⲛⲉⲡⲓⲧⲣⲟⲡⲟⲥ ϩⲛ ϩⲱⲃ ⲛⲓⲙ ⲉⲡⲁ ⲡⲧⲟⲡⲟⲥ ⲡⲉ ⲡϩⲁⲅⲓⲟⲥ ⲇⲉ ⲙⲉⲣⲕⲟⲩⲣⲓⲟⲥ ⲁϥⲟⲩⲱⲛϩ ⲉⲃⲟⲗ ⲙⲡⲉϥⲉⲡⲓⲧⲣⲟⲡⲟⲥ ⲡⲉϫⲁϥ ⲛⲁϥ ϫⲉ ⲧⲱⲟⲩⲛ ⲛⲅⲃⲱⲕ ⲉⲣⲙ ⲡⲣⲟ ⲙⲡⲉⲕⲏⲓ ⲁⲩⲱ ⲕⲛⲁϭⲓⲛⲉ ⲙⲡⲉⲓⲣⲱⲙⲉ ⲉⲧⲥⲟⲣⲙ ⲛϥⲥⲟⲟⲩⲛⲁⲛ ⲁⲉ ⲉϥⲃⲏⲕ ⲉⲧⲱⲛⲭ ⲉⲃⲟⲗ ϫⲉ ⲁⲛⲟⲕ ⲡⲉⲛⲧⲁⲓⲥⲟⲣⲙϥ ⲙⲡⲉⲓⲕⲁⲁϥ ⲉⲉⲓⲙⲉ ϫⲉ ⲉϥⲃⲏⲕ ⲉⲧⲱⲛ ϣⲁⲛⲧⲉϥⲉⲓ ⲉⲡⲉⲓⲙⲁ ⲛⲅⲛⲁⲩ ⲉⲣⲟϥ ⲉϥⲁϩⲉⲣⲁⲧϥ ⲉⲣⲉ ⲡⲉⲓϣⲏ ⲧⲁⲗⲏⲩ ⲉⲣⲟϥ ⲉϥⲱϣ ⲉⲃⲟⲗ ϫⲉ ⲡⲛⲟⲩⲧⲉⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲁ ⲛⲁⲓ ϫⲉ ⲁⲓⲉⲣ ⲛⲟⲃⲉ ⲉⲣⲟⲕⲭ ⲁⲩⲱ ⲉⲕⲉϫⲟⲟⲥ ⲛⲁϥ ⲛⲧⲉⲓϩⲉ ϫⲉ ⲙⲡⲉⲕⲉⲓ ⲛⲅⲉⲓⲣⲉ ⲛⲟⲩϩⲟⲟⲩ ⲛⲉⲣ ϩⲱⲃ ⲉⲡⲁⲧⲟⲡⲟⲥⲭ ⲡⲕⲉϣⲏ ⲛⲧⲁⲩⲧⲁⲁϥ ⲉϩⲟⲩⲛ ⲉⲡⲁⲧⲟⲡⲟⲥ ⲛⲥⲱⲧⲉ ϩⲁ ⲧⲉⲩⲯⲩⲭⲏ ⲁⲕⲃⲱⲕ ⲁⲕⲃⲓⲧϥ ϩⲛ ⲟⲩϫⲓⲛϭⲟⲛⲥ ⲁⲗⲗⲁ ⲉⲧⲃⲉ ⲙⲙⲛⲧϣⲁⲛⲁϩⲧⲏϥ ⲙⲡⲛⲟⲩⲧⲉ ϥⲓ ⲡϣⲏ ⲉⲡⲉϥⲙⲁ ⲛⲅⲃⲱⲕ ⲉⲡⲉⲕⲏⲓ ⲉⲕⲟⲩⲟϫ ⲁⲩⲱ ⲉϥϣⲁⲛⲧⲱⲟⲩⲛ ⲛϣⲱⲣⲡ ⲙⲁⲣⲉϥⲧⲁϣⲉⲟⲉⲓϣ ⲙⲡⲉⲛⲧⲁϥⲁⲁϥ ϫⲉⲕⲁⲥ ⲉⲣⲉ ⲡⲕⲉⲥⲉⲉⲡⲉ ⲉⲣ ϩⲟⲧⲉ ⲛⲥⲉⲧⲙⲕⲟⲧⲟⲩ ⲛⲕⲉⲥⲟⲡ ⲉϫⲓⲟⲩⲉ ⲉⲑⲩⲗⲏ ⲙⲡⲁⲧⲟⲡⲟⲥ ϫⲉ ⲛⲛⲉ ⲟⲩϫⲣⲟⲡ ⲧⲁϩⲟⲟⲩ ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲛϭⲓ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥϩⲟⲡϥ ⲉⲣⲟϥ
34. ⲡⲣⲱⲙⲉ ⲇⲉ ⲁϥⲧⲱⲟⲩⲛ ⲁϥⲉⲓ ⲉⲃⲟⲗ ⲛⲧⲉⲩⲛⲟⲩ ⲁϥϩⲉ ⲉⲡⲣⲱⲙⲉ ⲉϥⲁϩⲉⲣⲁⲧϥ ϩⲓⲣⲙ ⲡⲣⲟ ⲙⲡⲏⲓ ⲉⲛϥⲥⲟⲟⲩⲛ ⲁⲛ ϫⲉ ⲉϥϣⲟⲟⲡ ⲧⲱⲛⲭ ⲁⲗⲗⲁ ⲛⲉϥϫⲱ ⲙⲙⲟⲥ ⲛⲧⲉⲓϩⲉ ϫⲉ ⲡⲛⲟⲩⲧⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϣⲁⲛϩⲧⲏⲕ ϩⲁⲣⲟⲓ ⲛⲅⲛⲁ ⲛⲁⲓ ϫⲉ ⲁⲓⲉⲣ ⲛⲟⲃⲉ ⲉⲣⲟⲕ ⲱ ⲡⲁϫⲟⲉⲓⲥ ⲁⲩⲱ ⲁⲡⲣⲱⲙⲉ ⲛϩⲏⲕⲉ ϣⲁϫⲉ ⲛⲙⲙⲁϥ ⲉϥϫⲱ ⲙⲙⲟⲥ ϫⲉ ⲱ ⲡⲁⲙⲉⲣⲓⲧ ⲛⲥⲟⲛ ⲉⲕⲛⲏⲩ ⲉⲧⲱⲛ ⲛⲧⲉⲓϩⲉ ⲙⲛ ⲡⲉⲓϣⲏ ⲉⲧⲧⲁⲗⲏⲩ ⲉⲣⲟⲕ ϯϫⲱ ⲙⲙⲟⲥ ⲛⲁⲕ ϫⲉ ⲡⲁ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉ ⲡⲉⲓϣⲏ ⲗⲟⲓⲡⲟⲛ ⲁϫⲓ ⲡⲉⲛⲧⲁϥϣⲱⲡⲉ ⲙⲙⲟⲕ ⲧⲏⲣϥ ⲉⲣⲟⲓ ⲡⲣⲱⲙⲉ ⲇⲉ ⲁϥⲧⲁⲙⲟϥ ⲉⲑⲉ ⲛⲧⲁϥϥⲓ ⲙⲡϣⲏ ⲙⲛ ⲑⲉ ⲛⲧⲁ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲥⲱⲣⲙ ⲙⲡⲉϥⲛⲟⲩⲥ ϣⲁⲛⲧⲉϥⲉⲓ ⲉⲣⲙ ⲡⲣⲟ ⲙⲡⲏⲓ ⲉϥⲟ ⲛⲁⲧⲥⲟⲟⲩⲛ ⲡⲣⲱⲙⲉ ⲇⲉ ϩⲱⲱϥ ⲛⲧⲁ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲟⲩⲟⲛϩϥ ⲉⲣⲟϥ ⲁϥⲁⲡⲁⲅⲅⲓⲗⲉ ⲉⲡⲣⲱⲙⲉ ⲛϣⲁϫⲉ ⲛⲓⲙ ⲛⲧⲁ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲟⲟⲩ ⲛⲁϥ ⲁⲩⲱ ⲛⲧⲉⲣⲉ ⲡⲣⲱⲙⲉ ⲥⲱⲧⲙ ⲉⲛⲁⲓ ⲁϥⲉⲣ ϣⲡⲏⲣⲉ ⲉⲙⲁⲧⲉ ⲡⲉϫⲁϥ ϫⲉ ⲟⲩⲙⲟⲛⲟⲛ ϫⲉ ⲟⲩϩⲟⲟⲩ ⲛⲟⲩⲱⲧ ⲙⲙⲁⲧⲉ ⲛⲉⲣϩⲱⲃ ⲉⲡⲉⲕⲧⲟⲡⲟⲥ ⲱ ⲡⲁϫⲟⲉⲓⲥ ⲛⲉⲓⲱⲧⲭ ⲁⲗⲗⲁ ⲉⲣϣⲁⲛ ⲡⲛⲟⲩⲧⲉ ⲭⲁⲣⲓⲍⲉ ⲛⲁⲓ ⲙⲡⲧⲁⲗϭⲟ ⲛϯⲛⲁⲗⲟ ⲁⲛ ⲉⲓⲉⲣ ϩⲱⲃ ⲉⲡⲉⲕⲧⲟⲡⲟⲥ ϣⲁⲛⲧⲟⲩϫⲟⲕϥ ⲉⲃⲟⲗ ⲁⲩⲱ ϯⲛⲁⲧⲁϣⲉⲟⲉⲓϣ ⲛⲧⲉⲓϭⲟⲙ ⲧⲁⲓ ϩⲙ ⲙⲁ ⲛⲓⲙ ⲉϯⲛⲁⲃⲱⲕ ⲉⲣⲟϥ ⲁⲩⲱ ⲛⲧⲉⲩⲛⲟⲩ ⲁⲡⲉϥϩⲏⲧ ϣⲱⲡⲉ ⲙⲙⲟϥ ⲁϥⲃⲱⲕ ⲉⲡⲉϥⲏⲓ ⲁϥⲉⲛⲕⲟⲧⲕ ϣⲁⲛⲧⲉ ⲡⲟϣⲟⲉⲓⲛ ⲉⲓ ⲉϩⲣⲁⲓ ⲛⲧⲉⲣⲉ ϩⲧⲟⲟⲩⲉ ⲇⲉ ϣⲱⲡⲉ ⲁϥⲧⲱⲟⲩⲛ ⲁϥⲃⲱⲕ ⲉⲡⲙⲁ ⲉⲧⲉⲣⲉ ⲡϣⲏⲛϩⲏⲧϥ ⲁϥⲧⲁⲗⲟϥ ⲉϫⲱϥ ⲉⲣⲉ ⲟⲩⲟⲛ ⲛⲓⲙ ⲑⲉⲱⲣⲉⲓ ⲙⲙⲟϥ ⲁϥϫⲓⲧϥ ⲉⲡⲧⲟⲡⲟⲥ ⲙⲡⲡⲉⲧⲟⲩⲁⲁⲃ ⲁϥⲕⲁⲁϥ ϩⲙ ⲡⲙⲁ ⲛⲧⲁϥϭⲉⲛⲧϥ ⲛϩⲏⲧϥ ⲁⲩⲱ ⲁϥⲧⲁϣⲉⲟⲉⲓϣ ⲙⲡⲉⲛⲧⲁϥϣⲱⲡⲉ ⲙⲙⲟϥ ϩⲛ ⲧⲡⲟⲗⲓⲥ ⲧⲏⲣⲉ ⲁⲩⲱ ⲁⲩⲟⲩⲛⲟϭ ⲛϩⲟⲧⲉ ϩⲉ ⲉϩⲣⲁⲓ ⲉϫⲛ ⲟⲩⲟⲛ ⲛⲓⲙ ⲛⲧⲁⲩⲥⲱⲧⲙ ⲁⲩⲱ ⲙⲡⲟⲩⲕⲟⲧⲟⲩ ⲛⲕⲉⲥⲟⲡ ⲉϫⲱϩ ⲉⲕⲉⲉⲓⲇⲟⲥ ⲉⲡⲁ ⲡⲧⲟⲡⲟⲥ ⲡⲉ ϣⲁⲛⲧⲟⲩϫⲟⲕϥ ⲉⲃⲟⲗ ⲁⲩⲱ ⲙⲡⲉ ⲡⲣⲱⲙⲉ ⲗⲟ ⲉϥⲉⲣ ϩⲱⲃ ⲉⲡⲧⲟⲡⲟⲥ ϣⲁⲛⲧⲟⲩϫⲟⲕϥ ⲉⲃⲟⲗ ⲉⲩⲉⲟⲟⲩ ⲙⲡⲛⲟⲩⲧⲉ ⲙⲛ ⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ϣⲁ ⲉⲛⲉϩ ⲛⲉⲛⲉϩ ϩⲁⲙⲏⲛ ⲧⲙⲉϩⲥⲟ ⲛϭⲟⲙ ⲛⲧⲁⲥϣⲱⲡⲉ ⲉⲃⲟⲗ ϩⲓⲧⲟⲟⲧϥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
35. ⲥⲱⲧⲙ ⲟⲛ ⲉⲧⲉⲓⲕⲉⲛⲟϭ ⲛϣⲡⲏⲣⲉ ⲛⲧⲁⲥϣⲱⲡⲉ ⲉⲃⲟⲗ ϩⲓⲧⲟⲟⲧϥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲩⲉⲟⲟⲩ ⲙⲡⲛⲟⲩⲧⲉ ⲙⲛ ⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲁⲥϣⲱⲡⲉ ⲇⲉ ⲛⲧⲉⲣⲟⲩⲥⲙⲓⲛⲉ ⲙⲡⲧⲟⲡⲟⲥ ⲕⲁⲗⲱⲥ ⲁⲩⲧⲁϩⲟ ⲉⲣⲁⲧϥ ⲛⲟⲩⲕⲁⲅⲅⲉⲗⲟⲥ ⲛϣⲏ ⲛϣⲟⲩⲏ ⲉⲧⲃⲉ ϫⲉ ⲛⲉⲣⲉ ϣⲟⲙⲛⲧ ⲛⲛⲟϭ ⲛϣⲟⲩⲉ ϣⲟⲟⲡ ⲛⲧⲉⲥϩⲓⲙⲉ ⲛⲧⲁ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϯ ⲡⲟⲩⲟⲉⲓⲛ ⲛⲛⲉⲥⲃⲁⲗ ⲉⲛⲁ ⲡⲉⲥϩⲁⲓ ⲛⲉⲭ ⲛⲧⲁϥⲟⲩⲱϣ ϩⲁⲑⲏ ⲙⲡⲁⲧⲉϥⲙⲟⲩ ⲉⲧⲣⲉϥⲧⲁⲙⲓⲟ ⲛⲟⲩⲛⲟϭ ⲛϭⲓⲛⲟⲩⲏⲗ ϩⲛ ⲑⲁⲗⲁⲥⲥⲁ ⲗⲟⲓⲡⲟⲛ ⲁ ⲡϭⲙⲡϣⲓⲛⲉ ⲧⲁϩⲟϥ ⲕⲁⲧⲁ ⲡⲟⲩⲱϣ ⲙⲡⲛⲟⲩⲧⲉ ⲁⲩⲱ ⲕⲁⲧⲁ ⲡⲧⲱϣ ⲛⲣⲱⲙⲉ ⲛⲓⲙ ⲁϥⲉⲓ ⲉⲃⲟⲗ ϩⲛ ⲥⲱⲙⲁ ⲁϥⲕⲁ ⲟⲩⲛⲟϭ ⲛⲅⲧⲏⲥⲓⲥ ⲉⲧⲉϥⲥϩⲓⲙⲉ ⲗⲟⲓⲡⲟⲛ ⲁⲩⲧⲁⲙⲓⲟ ⲛⲧϩⲁⲯⲓⲥ ⲧⲏⲣⲥ ⲛϣⲏ ⲛϣⲟⲩⲉ ⲉⲛⲁⲛⲟⲩϥ ⲉⲙⲁⲧⲉ ⲁⲩⲱ ⲛⲧⲉⲣⲟⲩⲥⲱⲟⲩϩ. ⲛⲙⲙⲏⲏϣⲉ ⲁⲩⲧⲁϩⲟϥ ⲉⲣⲁⲧϥ ⲛⲕⲟⲩⲓ ⲇⲉ ⲛⲉⲣⲅⲁⲧⲏⲥ ⲉⲧⲣ ϩⲱⲃ ⲉⲡⲧⲟⲡⲟⲥ ⲡⲉϫⲁⲩ ⲛⲧⲉⲓϩⲉ ⲛⲑⲉ ⲛⲛⲉⲧⲥⲱⲃⲉ ϫⲉ ϩⲁⲙⲟⲓ ⲉϣⲱⲡⲉ ⲡϩⲏⲧ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲙⲟⲧⲛ ⲛⲙⲙⲁⲛ ϫⲉ ⲧⲉⲛⲕⲱⲧ ⲉⲡⲉϥⲙⲁⲣⲧⲩⲣⲓⲟⲛ ⲛϥⲧⲣⲉ ⲧⲉⲓϩⲁⲯⲓⲥ ⲛϣⲏ ⲧⲁϣⲟ ⲉⲃⲟⲗ ⲛⲟⲩⲕⲁⲣⲡⲟⲥ ⲛⲧⲉⲛⲟⲩⲱⲙ ⲉⲃⲟⲗ ⲛϩ:ⲧϥ ϩⲱⲥ ⲉϣϫⲉ ⲉϥⲣⲏⲧ ⲟⲛ ⲙⲡⲟⲩⲕⲟⲟⲣϥ ϩⲱⲗⲟⲥ ϩⲛ ⲟⲩϣⲥⲛⲉ ⲇⲉ ⲁⲡϣⲏⲛ ⲧⲁⲩⲟ ⲉⲃⲟⲗ ⲛϩⲉⲛⲕⲗⲁⲧⲟⲥ ⲛⲧⲉⲩⲛⲟⲩ ⲁϥⲱⲧⲡ ⲛⲗⲩⲕⲏ ⲉⲛⲁⲛⲟⲩϥ ⲁⲩⲱ ⲉϥⲗⲏⲕ ⲁⲩⲱ ⲛⲧⲉⲣⲉ ⲙⲙⲏⲏϣⲉ ⲛⲁⲩ ⲉⲡⲉⲛⲧⲁϥϣⲱⲡⲉ ⲁⲩϯ ⲉⲟⲟⲩ ⲙⲡⲛⲟⲩⲧⲉ ⲙⲛ ⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲁⲓ ⲉⲧⲉⲓⲣⲉ ⲛⲟⲩⲙⲏⲏϣⲉ ⲛϭⲟⲙ ϩⲓ ϣⲡⲏⲣⲉ ⲉⲛⲁϣⲱⲟⲩ ⲁⲩⲱ ⲁⲩⲉⲓⲛⲉ ⲛϭⲓ ⲛⲉⲥⲡⲟⲩⲇⲉⲟⲥ ⲉⲧⲉⲛϩⲏⲧⲟⲩ ⲉⲃⲟⲗ ϩⲛ ⲛⲉⲕⲁⲣⲡⲟⲥ ⲉⲧⲙⲙⲁⲩ ⲁⲩⲕⲁⲁⲩ ⲛⲧⲟⲟⲧⲟⲩ ϩⲱⲥ ⲫⲩⲗⲁⲕⲧⲩⲣⲓⲟⲛ ⲱ ϫⲉ ⲟⲩⲏⲣ ⲛⲧⲁⲗϭⲟ ⲁⲩϣⲱⲡⲉ ⲉⲃⲟⲗ ϩⲙ ⲡⲕⲁⲣⲡⲟⲥ ⲙⲡϣⲏⲛ ⲉⲧⲙⲙⲁⲩ ⲁⲩⲱ ⲁⲙⲙⲏⲏϣⲉ ⲟⲩⲱⲙ ⲉⲃⲟⲗ ⲛϩⲏⲧⲟⲩ ⲁⲩⲥⲉⲓ ⲁⲩϯ ⲉⲟⲟⲩ ⲙⲡⲛⲟⲩⲧⲉ ⲁⲩⲱ ⲁⲩⲉⲩⲭⲁⲣⲓⲥⲧⲉⲓ ⲛⲁϥ ⲙⲛ ⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
36. ⲁⲩⲥⲱⲧⲙ ⲛϭⲓ ⲟⲩⲟⲛ ⲛⲓⲙ ⲉⲧϩⲉⲛ ⲧⲡⲟⲗⲓⲥ ⲉⲧⲉⲓⲛⲟϭ ⲛϣⲡⲏⲣⲉ ⲛⲧⲁⲥϣⲱⲡⲉⲭ ⲁⲩⲉⲓ ⲧⲏⲣⲟⲩ ϩⲓ ⲟⲩⲥⲟⲡ ⲛϩⲟⲟⲩⲧ ⲙⲛ ⲛⲉϩⲓⲟⲙⲉ ⲉⲧⲣⲉⲩⲑⲉⲱⲣⲉⲓ ⲛⲧⲉⲓⲛⲟϭ ⲛϣⲡⲏⲣⲉ ⲛⲉⲩⲛ ⲟⲩⲣⲱⲙⲉ ⲇⲉ ⲛⲓⲟⲩⲇⲁⲓ ϩⲛ ⲧⲡⲟⲗⲓⲥ ⲉⲩⲙⲟⲩⲧⲉ ⲉⲣⲟϥ ϫⲉ ⲕⲁⲙⲡⲟⲥⲭ ⲉϥⲟ ⲛⲁⲅⲣⲓⲟⲥ ⲉⲡⲉϩⲟⲩⲟ ⲉϩⲟⲩⲛ ⲉⲣⲱⲙⲉ ⲛⲓⲙⲭ ⲛϩⲟⲩⲟ ⲇⲉ ⲉϩⲟⲩⲛ ⲉⲛⲉⲭⲣⲏⲥⲧⲓⲁⲛⲟⲥ ⲁϥⲥⲱⲧⲙ ϩⲱⲱϥ ⲉⲧⲃⲉ ⲧⲉⲓⲛⲟϭ ⲛϣⲡⲏⲣⲉ ⲛⲧⲁⲥϣⲱⲡⲉ ⲁϥⲟⲩⲉϩⲥⲁϩⲛⲉ ⲛⲟⲩϩⲙϩⲁⲗ ⲉⲡⲱϥ ⲡⲉ ⲉⲧⲣⲉϥϩⲱⲕ ⲛⲁϥ ⲛⲟⲩⲙⲟⲩⲗⲗⲁ ⲛⲥϩⲓⲙⲉ ⲛⲗⲉⲩⲕⲱⲛ ⲁⲩⲱ ⲁϥⲁⲗⲉ ⲉⲣⲟⲥ ⲡⲉϫⲁϥ ⲙⲡⲉϥϩⲙϩⲁⲗ ϫⲉ ⲁⲙⲟⲩ ⲛⲧⲉⲛⲃⲱⲕ ⲛⲧⲉⲛⲛⲁⲩ ⲉⲡⲥⲱⲃⲉ ⲛⲛⲉⲭⲣⲏⲥⲧⲓⲁⲛⲟⲥ ⲉⲧⲟⲩⲉⲓⲣⲉ ⲙⲙⲟϥ ⲙⲡⲟⲟⲩ ⲁⲩⲱ ⲁⲩⲙⲟⲟϣⲉ ⲙⲛ ⲛⲉⲩⲉⲣⲏⲩ ϣⲁⲛⲧⲟⲩⲉⲓ ⲉⲡⲧⲟⲡⲟⲥ ⲙⲡⲡⲉⲧⲟⲩⲁⲁⲃ ⲡⲣⲱⲙⲉ ⲇⲉ ⲛⲓⲟⲩⲇⲁⲓ ⲁϥⲃⲱⲕ ⲉϩⲟⲩⲛ ⲉⲡⲧⲟⲡⲟⲥ ⲉϥⲧⲁⲗⲏⲩ ⲉⲡⲉϥⲧⲃⲛⲏ ⲡⲉϫⲉ ⲟⲩⲁ ⲛⲁϥ ϩⲛ ⲛⲉϣⲏⲣⲉ ϣⲏⲙ ⲉⲧⲡⲉⲅⲕ ⲟⲙⲉ ⲉⲡⲧⲟⲡⲟⲥ ϫⲉ ⲉⲕⲃⲏⲕ ⲉⲧⲱⲛ ⲉⲧⲉⲓϩⲉⲙⲛ ⲡⲉⲓⲧⲃⲛⲏ ⲉϩⲟⲩⲛ ⲉⲧⲉⲕⲕⲗⲏⲥⲓⲁ ⲙⲡⲛⲟⲩⲧⲉ ⲁⲩⲱ ⲙⲡⲉ ⲡⲣⲱⲙⲉ ⲛⲓⲟⲩⲇⲁⲓ ϭⲱϣⲧ ⲛⲥⲱϥ ⲉⲡⲧⲏⲣϥ ⲁⲗⲗⲁ ⲁϥⲃⲱⲕ ⲉϩⲟⲩⲛ ⲉϥⲧⲁⲗⲏⲩ ⲉⲡⲉϥⲧⲃⲛⲏ ⲁϥⲁϩⲉⲣⲁⲧϥ ⲁϥϭⲱ ⲉϥϭⲱϣⲧ ⲛⲥⲁⲑⲁⲯⲓⲥ ⲉⲥⲟⲧⲡ ⲛϭⲱⲃⲉ ⲉⲙⲁⲧⲉ ϩⲱⲥ ⲉϣϫⲉ ⲉϥⲣⲏⲧ ⲟⲛ ϩⲓϫⲙ ⲡⲕⲁϩ ⲁⲩⲱ ⲡⲉϫⲁϥ ⲛⲁⲩ ⲛϭⲓ ⲡⲣⲱⲙⲉ ⲛⲓⲟⲩⲇⲁⲓ ϫⲉ ⲛⲓⲙ ⲡⲉⲛⲧⲁϥϯ ⲛⲛⲉⲓϭⲱⲃⲉ ⲛⲁⲗⲗⲟⲧⲣⲓⲟⲛ ⲉⲡⲉⲓⲕⲗⲟⲙ ⲉⲧⲉⲧⲛϫⲉ ⲙⲛⲧⲛⲟⲩϫ ϫⲉ ⲡⲡⲉⲧⲟⲩⲁⲁⲃ ⲡⲉⲛⲧⲁϥⲉⲓⲣⲉ ⲙⲡⲁⲓ ⲁϥⲟⲩⲱϣⲃ ⲛϭⲓ ⲡϣⲏⲣⲉ ϣⲏⲙ ⲛⲁⲫⲑⲁⲣⲧⲟⲥ ⲡⲁⲓ ⲛⲧⲁϥϣⲁϫⲉ ⲛⲙⲙⲁϥ ⲉⲧⲃⲉ ⲡⲉⲧϥⲧⲁⲗⲏⲩ ⲉⲣⲟϥ ⲡⲉϫⲁϥ ⲛⲁϥ ϫⲉ ⲡⲉⲧⲛⲁⲡⲁⲧⲁⲥⲥⲉ ⲙⲙⲟⲕ ⲧⲉⲛⲟⲩ ⲛⲧⲟϥ ⲡⲉⲛⲧⲁϥⲉⲓⲣⲉ ⲛⲛⲉⲓϣⲡⲏⲣⲉ ⲧⲏⲣⲟⲩ ⲛⲧⲉⲩⲛⲟⲩ ⲁϥⲙⲟⲩϩ ⲛⲟⲣⲅⲏ ϩⲓ ϭⲱⲛⲧ ⲛϭⲓ ⲡⲣⲱⲙⲉ ⲛⲓⲟⲩⲇⲁⲓ ⲁϥⲕⲁ ⲡⲧⲃⲛⲏ ⲉϫⲙ ⲡϣⲏⲣⲉ ϣⲏⲙ ⲉϥⲟⲩⲱϣ ⲉϩⲓⲟⲩⲉ ⲉⲣⲟϥ ⲁⲩⲱ ⲛⲧⲉⲩⲛⲟⲩ ⲁⲛⲟⲩⲉⲣ:ⲧⲉ ⲙⲡⲙⲟⲩⲗⲗⲁ ⲉⲧϥⲧⲁⲗⲏⲩ ⲉⲣⲟϥ ⲃⲱⲕ ⲉⲡⲉⲥⲏⲧ ϩⲙ ⲡⲕⲁϩ ⲛⲑⲉ ⲛⲟⲩⲟⲙⲉ
37. ⲁⲡⲣⲱⲙⲉ ⲛⲓⲟⲩⲇⲁⲓ ϩⲉ ⲉϫⲙ ⲡⲕⲁϩ ⲉϫⲙ ⲡⲉϥϩⲟ ⲁϥⲡⲗⲩⲅⲏ ⲙⲙⲟϥ ϩⲛ ⲛⲉⲧⲱⲃⲉ ⲙⲛ ⲛⲱⲛⲉ ⲉⲧⲛⲏⲁ ⲉⲃⲟⲗ ϩⲙ ⲡⲙⲁⲛⲕⲱⲧ ⲁⲩⲱ ⲛⲧⲉⲩⲛⲟⲩ ⲉⲓⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲉⲓ ⲉϩⲟⲩⲛ ϩⲙ ⲡⲣⲟ ⲛⲧⲉⲕⲕⲗⲏⲥⲓⲁ ⲉⲣⲉ ⲟⲩⲁⲅⲅⲉⲗⲟⲥ ⲛⲟⲩⲟⲓⲛ ⲙⲟⲟϣⲉ ⲛⲙⲙⲁϥ ⲉⲣⲉ ⲡⲉϥⲕⲟⲛⲧⲁⲣⲓⲟⲛ ⲛⲧⲟⲟⲧϥ ⲡⲉϫⲁϥ ⲙⲡⲣⲱⲙⲉ ⲛⲓⲟⲩⲇⲁⲓ ϫⲉ ⲉⲕⲉⲣ ⲟⲩ ⲙⲡⲉⲓⲙⲁ ⲱ ⲡⲣⲱⲙⲉ ⲉⲧⲥⲧⲏⲩ ⲉⲃⲟⲗ ⲡⲙⲁ ⲛⲭⲗⲉⲩⲁⲍⲉ ⲡⲉ ⲡⲁⲓ ϫⲉ ⲙⲙⲟⲛ ⲛⲧⲁⲕⲉⲓ ⲉⲡⲁⲅⲱⲛ ⲉⲕⲁ ⲉϩⲧⲟ ⲉⲃⲟⲗ ⲟⲩⲕⲟⲩⲛ ϩⲉⲛϭⲱⲃⲉ ⲛⲁⲗⲗⲱⲧⲣⲓⲟⲛ ⲛⲉ ⲛⲁⲓ ⲙⲛ ⲛⲉⲓⲕⲁⲣⲡⲟⲥ ⲁⲗⲗⲁ ⲁⲕⲉⲓ ⲟⲛ ϫⲉ ⲕⲛⲁϩⲓⲟⲩⲉ ⲉⲛⲉⲣⲱⲙⲉ ⲉⲧⲉⲣ ϩⲱⲃ ⲉⲡⲁⲧⲟⲡⲟⲥ ⲟⲩⲇⲉ ⲛⲧⲟⲕ ⲙⲡⲉⲕⲉⲣ ϩⲱⲃ ⲉⲡⲁⲧⲟⲡⲟⲥ ⲁⲩⲱ ⲛⲕⲟⲟⲩⲉ ⲟⲛ ⲉⲧⲉⲣ ϩⲱⲃ ⲙⲡⲉⲕⲕⲁⲁⲩ ⲉⲉⲓⲣⲉ ⲁⲩⲱⲛⲧⲉⲩⲛⲟⲩ ⲁϥⲣⲁϩⲧϥ ⲙⲡⲕⲟⲛⲧⲁⲣⲓⲟⲛ ⲛⲧⲙⲏⲧⲉ ⲛϩⲏⲧϥ ϩⲱⲥⲧⲉ ⲛⲧⲉ ⲛⲉϥⲙⲁϩⲧ ϩⲱⲛ ⲉⲉⲓ ⲉⲃⲟⲗ ⲙⲙⲟϥ ⲁⲩⲱ ⲛⲉⲙⲛⲗⲁⲁⲩ ⲛⲁⲩ ⲉⲡⲡⲉⲧⲟⲩⲁⲁⲃ ⲉⲓⲙⲏⲧⲉⲓ ⲡⲣⲱⲙⲉ ⲛⲓⲟⲩⲇⲁⲓ ⲛⲧⲁ ⲡⲡⲉⲧⲟⲩⲁⲁⲃ ⲡⲁⲧⲁⲥⲥⲉ ⲙⲙⲟϥ ⲁⲗⲗⲁ ⲟⲩⲟⲛ ⲛⲓⲙ ⲉⲧⲉⲣ ϩⲱⲃ ⲛⲉⲩⲛⲁⲩ ⲉⲡⲣⲱⲙⲉ ⲉϥⲛⲏϫ ⲉⲃⲟⲗ ⲉϥⲟ ⲛⲑⲉ ⲛⲛⲉⲧⲙⲟⲟⲩⲧ ⲙⲛⲛⲥⲱⲥ ⲁϥⲱϣ ⲉⲃⲟⲗ ϩⲛ ⲟⲩⲛⲟϭ ⲛⲥⲙⲛ ⲉϥϫⲱ ⲙⲙⲟⲥ ϫⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲃⲟⲏⲑⲉⲓ ⲉⲣⲟⲓ ϩⲛ ⲧⲉⲓⲟⲩⲛⲟⲩ ⲛⲁⲛⲁⲅⲕⲏ ⲁⲩⲱ ⲛⲛⲁⲟⲩⲱϩ ⲉⲧⲟⲟⲧ ⲉⲓⲥⲕⲟⲡⲧⲉⲓ ⲛⲥⲁ ⲗⲁⲁⲩ ⲙⲡⲉⲧⲟⲩⲁⲁⲃ ϣⲁ ⲉⲛⲉϩ ⲛⲟⲩⲟⲉⲓϣ ⲁⲩⲱ ⲉⲕϣⲁⲛⲕⲁⲁⲧ ⲉⲃⲟⲗ ⲙⲡⲉⲓⲥⲟⲡ ϯⲛⲁϣⲱⲡⲉ ϩⲱ ⲛⲭⲣⲏⲥϯⲁⲛⲟⲥ ⲁⲩⲱ ⲛϩⲙϩⲁⲗ ⲙⲡⲉⲭⲥ ϣⲁ ⲡⲉϩⲟⲟⲩ ⲙⲡⲁⲙⲟⲩ ⲁⲩⲱ ϯⲛⲁⲥⲙⲓⲛⲉ ⲙⲡⲉⲕⲗⲟⲓⲙⲏⲛ ⲛⲑⲉ ⲉϯⲛⲁⲩ ⲉⲣⲟⲕ ⲧⲉⲛⲟⲩ ⲉⲕⲧⲁⲗⲏⲩ ⲉⲡⲉⲕⲉϩⲧⲟ ⲉⲣⲉ ⲡⲉⲕⲕⲟⲛⲧⲁⲣⲓⲟⲛ ⲧⲟⲕⲥ ⲙⲙⲟⲓ ⲁⲩⲱ ϯⲛⲁⲥⲙⲓⲛⲉ ⲙⲡⲁⲗⲓⲙⲏⲛ ϩⲱ ⲉⲓⲛⲏϫ ϩⲁⲣⲁⲧⲟⲩ ⲛⲛⲉⲕⲟⲩⲉⲣⲏⲧⲉ ϩⲛ ⲟⲩϯⲓⲡⲉ ⲙⲛ ⲟⲩⲙⲛⲧⲁⲧϭⲟⲙ ⲧⲁⲕⲣⲩⲥⲟⲩ ⲙⲙⲟⲕ ϩⲛ ⲟⲩⲛⲟⲩⲃ ⲉϥⲥⲟⲧⲡ ϩⲓ ⲱⲛⲉ ⲛⲁⲩⲁⲛ ⲛⲕⲱϩⲧⲉⲧⲉ ⲡⲉⲭⲣⲩⲥⲟⲗⲩⲛⲑⲟⲥ ⲡⲉ ⲁⲩⲱ ⲡⲧⲩⲡⲟⲥ ⲙⲡⲉⲕⲕⲟⲛⲧⲁⲣⲓⲟⲛ ϯⲛⲁⲧⲣⲉⲩⲥⲙⲏⲛⲧϥ ⲛⲱⲛⲉ ⲛⲁⲇⲁⲙⲁⲥ ⲃⲟⲏⲑⲉⲓ ⲉⲣⲟⲓ ⲧⲉⲛⲟⲩ ⲱ ⲡⲁϫⲟⲉⲓⲥ ⲛⲉⲓⲱⲧ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
38. ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲛϭⲓ ⲡⲣⲱⲙⲉ ⲛⲓⲟⲩⲇⲁⲓ ⲁⲡⲁⲅⲅⲉⲗⲟⲥ ⲙⲡϫⲟⲓⲥ ϯⲁϫⲉ ⲙⲛ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉϥϫⲱ ⲙⲙⲟⲥ ϫⲉ ⲛⲉϩ ⲡⲉⲕⲕⲟⲛⲧⲁⲣⲓⲟⲛ ⲛϩⲏⲧϥ ⲉϣϫⲉ ϥⲛⲁⲡⲓⲥⲧⲉⲩⲉ ⲉⲡⲣⲣⲟ ⲙⲙⲉ ⲓⲥ ⲡⲉⲭⲥ ⲛⲁⲛⲟⲩ ⲟⲩⲣⲉϥⲉⲣⲛⲟⲃⲉ ⲅⲁⲣ ⲉϥϯⲁⲛⲙⲉⲧⲁⲛⲟⲓ ⲉϩⲟⲩⲉ ⲟⲩⲇⲓⲕⲁⲓⲟⲥ ⲉϥⲛⲁⲣ ⲛⲟⲉϣⲁⲣⲉ ⲟⲩⲣⲁϣⲉ ⲅⲁⲣ ϣⲱⲡⲉ ϩⲛ ⲧⲙⲏⲧⲉ ⲛⲁⲅⲅⲉⲗⲟⲥ ⲙⲡⲛⲟⲩⲧⲉ ⲉϫⲛ ⲟⲩⲣⲉϥⲣⲛⲟⲃⲉ ⲉϥϣⲁⲛⲙⲉⲧⲁⲛⲟⲓ ⲉϩⲟⲩⲉ ⲡⲓⲡⲥⲧⲁⲓⲟⲩⲯⲓⲥ ⲛⲇⲓⲕⲁⲓ̅ⲏ̅ⲥ̅ⲟⲥ ⲛⲁⲓ ⲉⲧⲉ ⲛⲥⲉⲣ ⲭⲣⲓⲁ ⲁⲛ ⲙⲙⲉⲧⲁⲛⲟⲓⲁ ⲕⲁⲧⲁ ⲑⲉ ⲛⲧⲁ ⲡⲉⲛⲥⲱⲧⲏⲣ ⲧⲁⲙⲉ ⲛⲉϥⲁⲡⲟⲥⲧⲟⲗⲟⲥ ϫⲓⲛ ⲉϥϣⲟⲟⲡ ⲛⲙⲙⲁⲩ ⲧⲉⲛⲟⲩ ϭⲉ ⲙⲁⲣⲉ ⲡⲉⲕⲛⲁ ⲧⲁϩⲟϥ ϫⲉ ⲟⲩⲁⲧⲥⲟⲟⲩⲛ ⲡⲉ ⲁⲩⲱ ⲛⲧⲉⲩⲛⲟⲩ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲕⲁⲁϥ ⲉⲃⲟⲗ ⲁⲩⲱ ⲛⲧⲉⲣⲉ ⲡⲉϥϩⲏⲧ ϣⲱⲡⲉ ⲙⲙⲟϥ ⲁϥϫⲉ ϩⲱⲃ ⲛⲓⲙ ⲛⲧⲁⲩϣⲱⲡⲉ ⲙⲙⲟϥ ⲉⲡⲙⲏⲏϣⲉ ⲉⲧⲥⲟⲟⲩϩ ⲉⲣⲟϥ ⲁⲩⲱ ⲛⲧⲉⲣⲟⲩⲥⲱⲧⲙ ⲁⲩϯ ⲉⲟⲟⲩ ⲙⲡⲛⲟⲩⲧⲉ ⲡⲉⲧⲉⲓⲣⲉ ⲛⲛⲉⲓϭⲟⲙ ⲛⲧⲉⲓⲙⲓⲛⲉ ⲉⲃⲟⲗ ϩⲓⲧⲟⲟⲧϥ ⲙⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
39. ⲙⲛⲛⲥⲁ ⲛⲁⲓ ⲁⲡⲣⲱⲙⲉ ⲛⲓⲟⲩⲇⲁⲓ ⲧⲱⲟⲩⲛ ⲁϥⲃⲱⲕ ⲉⲡⲉϥⲉⲓ ⲁϥϫⲱ ⲛϩⲱⲃ ⲛⲓⲙ ⲛⲧⲁⲩϣⲱⲡⲉ ⲙⲙⲟϥ ⲉⲧⲉϥⲥϩⲓⲙⲉ ⲙⲛ ⲛⲉϥϩⲙϩⲁⲗ ⲉⲃⲟⲗ ϫⲉ ⲛⲉⲙⲛⲧⲁϥ ⲙⲙⲁⲩ ⲛϣⲏⲣⲉ ⲉⲡⲧⲏⲣϥⲭ ⲉⲃⲟⲗ ϫⲉ ⲟⲩⲧⲁϭⲣⲏⲛ ⲧⲉ ⲧⲉϥⲥϩⲓⲙⲉ ⲙⲡⲉϥⲣⲁⲥⲧⲉ ⲇⲉ ⲡⲉϫⲁϥ ⲛⲧⲉϥⲥϩⲓⲙⲉ ⲁⲉ ⲡⲉⲧⲟⲩⲉϣ ⲡⲛⲟⲩⲧⲉ ⲙⲁⲣⲉϥⲟⲩⲁϩϥ ⲛⲥⲱⲓ ⲁⲩⲱ ⲁϥϫⲓ ⲛⲧⲉϥⲥϩⲓⲙⲉ ⲙⲛ ⲛⲉϥϩⲙϩⲁⲗ ⲁϥⲃⲱⲕ ⲉⲣⲁⲧϥ ⲙⲡⲉⲡⲓⲥⲕⲟⲡⲟⲥ ⲁϥⲃⲁⲡⲧⲓⲍⲉ ⲙⲙⲟⲟⲩ ⲉⲡⲣⲁⲛ ⲙⲡⲉⲓⲱⲧ ⲙⲛ ⲡϣⲏⲣⲉ ⲙⲛ ⲡⲉⲡⲛⲁ ⲉⲧⲟⲩⲁⲁⲃ ⲁⲩⲱ ⲁϥⲙⲟⲩⲧⲉ ⲉⲡⲣⲁⲛ ⲙⲡⲣⲱⲙⲉ ϫⲉ ⲍⲁⲕⲁⲣⲓⲁⲥⲭ ⲁⲩⲱ ⲧⲉϥⲥϩⲓⲙⲉ ⲁϥⲙⲟⲩⲧⲉ ⲉⲡⲉⲥⲣⲁⲛ ϫⲉ ⲉⲗⲓⲥⲁⲃⲉⲑ ⲁⲩⲱ ⲁϥⲕⲁⲁⲩ ⲉⲃⲟⲗ ϩⲛ ⲟⲩⲉⲓⲣⲏⲛⲏ ϩⲁⲙⲏⲛ ⲁⲩⲱ ⲛⲧⲉⲣⲉϥⲃⲱⲕ ⲉⲡⲉϥⲏⲓ ⲛϭⲓ ⲡⲣⲱⲙⲉ ⲉⲙⲡⲁⲧⲉ ⲱⲥⲕ ϣⲱⲡⲉ ⲁϥⲥⲟⲩⲉⲛ ⲧⲉϥⲥϩⲓⲙⲉ ⲁⲥⲱ ⲛϣⲏⲣⲉ ⲥⲛⲁⲩ ⲛϩⲟⲟⲩⲧ ⲛⲟⲩⲥⲟⲡ ⲛⲟⲩⲱⲧ ⲁⲩⲱ ⲛⲧⲉⲣⲉ ⲛⲉϩⲟⲟⲩ ϫⲱⲕ ⲉⲃⲟⲗ ⲁⲥϫⲡⲟ ⲛϣⲏⲣⲉ ⲥⲛⲁⲩ ⲛϩⲁⲧⲣⲉⲩⲉ ⲁⲥⲙⲟⲩⲧⲉ ⲉⲡⲣⲁⲛ ⲙⲡϣⲣⲡⲙⲓⲥⲉ ϫⲉ ⲙⲉⲣⲕⲟⲩⲣⲓⲟⲥ ⲕⲁⲧⲁ ⲡⲣⲁⲛ ⲙⲡⲡⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥⲭ ⲉⲃⲟⲗ ϫⲉ ⲛⲧⲁⲩⲙⲁⲧⲉ ⲙⲡⲉⲓⲟⲩϫⲁⲓ ⲉⲃⲟⲗ ϩⲓⲧⲟⲟⲧϥ ⲡⲙⲉϩⲥⲛⲁⲩ ⲇⲉ ⲁⲩⲙⲟⲩⲧⲉ ⲉⲡⲉϥⲣⲁⲛ ϫⲉ ⲓⲱϩⲁⲛⲛⲏⲥ ⲕⲁⲧⲁ ⲡⲣⲁⲛ ⲙⲡⲡⲉⲧⲟⲩⲁⲁⲃ ⲓⲱϩⲁⲛⲛⲏⲥ ⲡⲃⲁⲡⲧⲓⲥⲧⲏⲥ ⲙⲛⲛⲥⲁ ⲛⲁⲓ ⲁϥⲙⲟⲩⲧⲉ ⲛϭⲓ ⲡⲣⲱⲙⲉ ⲉⲩⲥⲁϩ ⲛⲧⲉⲭⲛⲓⲧⲏⲥ ⲁϥϯ ⲛⲁϥ ⲙⲙⲏⲧⲉ ⲛⲗⲓⲧⲣⲁ ⲛⲛⲟⲩϥ ⲉⲩⲥⲟⲧⲡ ⲙⲛ ϩⲉⲛⲓ̅ⲏ̅ⲗ̅ⲙ̅ⲛ̅ⲧ̅ⲉ ⲙⲙⲉ ⲉⲩⲧⲁⲓⲏⲩ ⲉⲛⲁϣⲉ ⲥⲟⲩⲛⲧⲟⲩ ⲁϥⲥⲙⲓⲛⲉ ⲙⲡⲗⲟⲓⲙⲏⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲣⲉ ⲡⲉϥⲕⲟⲛⲧⲁⲣⲓⲟⲛ ϩⲛ ⲧⲉϥϭⲓϫ ⲛⲟⲩⲛⲁⲙ ⲁϥⲧⲣⲉⲩⲧⲟϭⲥϥ ⲛⲱⲛⲉ ⲛⲁⲇⲁⲙⲁⲥ ⲁⲩⲱ ⲁϥⲧⲣⲉⲩⲥⲙⲓⲛⲉ ϩⲱⲱϥ ⲙⲡⲉϥϩⲓⲥⲟⲛ ⲛⲛⲟⲩⲃ ϩⲓ ⲱⲛⲉ ⲛⲭⲣⲩⲥⲟⲗⲓⲛⲑⲟⲥ ⲉϥⲥⲁⲡⲉⲥⲏⲧ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉϥⲡⲁⲧⲁⲥⲥⲉ ⲙⲙⲟϥ ⲉϫⲛ ϩⲏⲧϥ ϩⲙ ⲡⲉϥⲕⲟⲛⲧⲁⲣⲓⲟⲛ ⲁⲩⲱ ⲛⲧⲉⲣⲉϥⲧⲁⲙⲓⲟ ⲛⲑⲓⲕⲱⲛ ⲁϥⲧⲁⲗⲟⲥ ⲁϥⲉⲛⲧⲥ ⲉⲧⲉⲕⲕⲗⲏⲥⲓⲁ ⲙⲛⲛⲥⲁ ⲡϩⲁⲅⲓⲁⲥⲙⲟⲥ ⲙⲡⲧⲟⲡⲟⲥ ⲁϥⲕⲁⲁⲥ ϩⲓⲑⲏ ⲙⲡϩⲓⲉⲣⲁⲧⲓⲟⲛ ϣⲁ ⲉϩⲣⲁⲓ ⲉⲡⲟⲟⲩ ⲛϩⲟⲟⲩ ⲁⲩⲱ ⲥϣⲟⲟⲡ ⲧⲉⲛⲟⲩ ϩⲙ ⲡⲧⲟⲡⲟⲥ ⲉⲩⲙⲛⲧⲙⲛⲧⲣⲉ ⲛⲛⲉϭⲟⲙ ⲙⲛ ⲛⲉϣⲡⲏⲣⲉ ⲙⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲛ ⲟⲩⲉⲓⲣⲏⲛⲏ ⲛⲧⲉ ⲡⲛⲟⲩⲧⲉ ϩⲁⲙⲏⲛ ⲧⲙⲉϩⲥⲁϣϥ ⲉⲛϭⲟⲙ ⲛⲧⲁⲥϣⲱⲡⲉ ⲉⲃⲟⲗ ϩⲓⲧⲟⲟⲧϥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲛ ⲟⲩⲉⲓⲣ:ⲛⲏ ϩⲁⲙⲏⲛ
40. ⲁⲥϣⲱⲡⲉ ⲇⲉ ⲙⲛⲛⲥⲁ ⲉⲧⲣⲉⲩϩⲁⲅⲓⲁⲍⲉ ⲙⲡⲧⲟⲡⲟⲥ ⲁⲡⲥⲟⲉⲓⲧ ⲛⲛϭⲟⲙ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲱϩ ϣⲁ ⲙⲁ ⲛⲓⲙ ⲁⲩⲱ ⲛⲉⲣⲉ ϩⲉⲛⲛⲟϭ ⲙⲙⲏⲏϣⲉ ⲡⲏⲧ ⲉⲣⲁⲧϥ ⲙⲡⲉϥⲗⲩⲡⲯⲁⲛⲟⲛ ⲉⲧⲟⲩⲁⲁⲃ ⲉⲩⲟⲩⲱϣⲧ ⲉϫⲱϥ ϩⲛ ⲟⲩⲛⲟϭ ⲙⲡⲓⲥⲧⲓⲥ ⲁⲩⲱ ⲟⲩⲟⲛ ⲛⲓⲙ ⲉⲧϣⲱⲛⲉ ϩⲛ ϩⲉⲛϣⲱⲛⲉ ⲉⲩϣⲟⲃⲉ ⲉⲩϣⲁⲛⲟⲩⲱϣⲧ ⲉϫⲙ ⲡⲉϥⲥⲱⲙⲁ ⲉⲧ ⲟⲩⲁⲁⲃ ϣⲁⲩⲙⲁⲧⲉ ⲙⲡⲧⲁⲗϭⲟ ⲛⲧⲉⲩⲛⲟⲩ ⲛⲥⲉⲃⲱⲕ ⲉⲡⲉⲩⲏⲓ ϩⲛ ⲟⲩⲉⲓⲣⲏⲛⲏ ⲛⲇⲁⲓⲙⲟⲛⲓⲟⲛ ⲇⲉ ⲟⲛ ⲛⲉϥⲛⲟⲩϫ ⲙⲙⲟⲟⲩ ⲉⲃⲟⲗ ϩⲁⲡⲁⲝ ϩⲁⲡⲗⲟⲥ ⲛⲉϥϣⲟⲟⲡ ⲛⲃⲟⲏⲑⲟⲥ ⲛⲟⲩⲟⲛ ⲛⲓⲙ ⲉⲧⲛⲏⲩ ⲉⲣⲁⲧϥ ⲙⲛ ⲛⲉⲧⲛⲁⲉⲡⲓⲕⲁⲗⲉⲓ ⲙⲙⲟϥ ⲙⲡⲟⲩⲉ ⲁⲩⲱ ϩⲁϩ ⲛⲉⲣⲏⲧ ϩⲓ ⲡⲣⲟⲥⲫⲱⲣⲁ ⲛⲉⲩϯ ⲙⲙⲟⲟⲩ ⲉϩⲟⲩⲛ ⲉⲡⲉϥⲧⲟⲡⲟⲥ ⲉⲧⲟⲩⲁⲁⲃ
41. ⲛⲉⲩⲛ ⲟⲩⲁⲣⲭⲱⲛ ⲇⲉ ϩⲛ ⲟⲩⲭⲱⲣⲓⲟⲛ ϩⲓⲧⲟⲩⲱϥ ⲙⲙⲁⲓⲟⲩⲙⲁ ⲛⲅⲁⲍⲁ ⲉⲩⲙⲟⲩⲧⲉ ⲉⲡⲣⲁⲛ ⲙⲡⲁⲣⲭⲱⲛ ⲉⲧⲙⲙⲁⲩ ϫⲉ ⲡⲕⲩⲣⲓⲥ ϩⲉⲣⲙⲁⲡⲟⲗⲗⲱⲛ ⲉⲛⲉⲟⲩⲛⲧⲁϥ ⲙⲙⲁⲩ ⲛⲟⲩϣⲉⲉⲣⲉ ⲛⲟⲩⲱⲧ ⲛⲥϩⲓⲙⲉ ⲙⲙⲟⲛⲟⲅⲉⲛⲏⲥ ⲉⲙⲡⲉϥ ϫⲡⲉ ϣⲏⲣⲉ ⲉⲛⲉϩ ⲛⲥⲁⲃⲗⲗⲁⲥ ⲁⲩⲱ ⲧⲉⲓⲕⲉⲧⲉ ⲛⲧⲁϥϫⲡⲟⲥ ⲁⲛ ⲁⲗⲗⲁ ⲛⲧⲁϥⲃⲓⲧⲥ ⲉⲥⲟ ⲛⲕⲟⲩⲓ ⲛⲟⲣⲫⲁⲛⲟⲥ ⲁϥⲁⲁⲥ ⲛⲁϥ ⲛϣⲉⲉⲣⲉ ⲁⲩⲱ ⲛⲉϥϭⲱϣⲧ ⲉⲣⲟⲥ ϩⲱⲥ ⲉϥϭⲱϣⲧ ⲉⲡⲛⲟⲩⲧⲉ ⲁϥⲥⲱⲧⲙ ⲇⲉ ⲉⲧⲃⲉ ⲛⲉϭⲟⲙ ⲙⲛ ⲛⲉϣⲡⲏⲣⲉ ⲉⲧϣⲟⲟⲡ ϩⲙ ⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲧⲱⲟⲩⲛ ⲁϥϥⲓ ⲛⲟⲩⲕⲟⲩⲓ ⲛⲉⲩⲗⲟⲅⲓⲁ ϣⲁ ⲙⲁⲁⲃ ⲛϩⲟⲗⲟⲕⲟⲧⲧⲓⲛⲟⲥ ⲁϥⲃⲱⲕ ⲉⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥϣⲗⲏⲗ ⲛϩⲏⲧϥ ⲁⲩⲱ ⲁϥϯ ⲛⲧⲙⲁⲁⲃⲉ ⲛϩⲟⲗⲟⲕⲟⲧⲧⲓⲛⲟⲥ ⲙⲡⲟⲓⲕⲟⲛⲟⲙⲟⲥ ⲙⲡⲧⲟⲡⲟⲥ ⲁⲩⲱ ⲁⲡⲟⲓⲕⲟⲛⲟⲙⲟⲥ ⲙⲛ ⲛⲉⲕⲗⲏⲣⲓⲕⲟⲥ ⲉⲣ ⲟⲩⲛⲟϭ ⲛϣⲟⲡⲥ ⲉⲡⲁⲣⲭⲱⲛⲭ ⲉⲃⲟⲗ ϫⲉ ϩⲛⲙⲁⲓⲣⲱⲙⲉ ⲛⲉ ⲛⲉⲕⲗⲏⲣⲓⲕⲟⲥ ⲉⲧⲙⲙⲁⲩ ⲗⲟⲓⲡⲟⲛ ⲁⲩⲥⲱ ⲛⲟⲩⲁ̅ⲏ̅ⲙ̅ⲏⲏϣⲉ ⲛⲏⲣⲡ ⲁⲩⲱ ⲁϣⲟⲩⲱⲙ ⲛϩⲁϩ ⲛϭⲓⲛⲟⲩⲱⲙ ⲁⲩⲱ ⲛⲉⲩϯ ϯⲙⲏ ⲙⲡⲁⲣⲭⲱⲛ ⲉⲧⲙⲙⲁⲩ ⲉⲙⲁⲧⲉ ⲗⲟⲓⲡⲟⲛ ⲁⲧⲥⲩⲛⲧⲉⲭⲓⲁ ⲉⲓ ⲉⲧⲙⲏⲧⲉ ⲡⲉϫⲉ ⲡⲁⲣⲭⲱⲛ ⲛⲁⲩ ϫⲉ ⲙⲁⲧⲁⲙⲟⲓ ϫⲉ ⲉⲧⲉⲧⲛⲉⲣ ⲭⲣⲓⲁ ⲛⲟⲩ ⲉⲡⲉⲓⲧⲟⲡⲟⲥ ⲧⲁⲣⲓⲥⲡⲟⲩⲇⲁⲍⲉ ⲉⲡϩⲱⲃ ⲛⲉⲕⲗⲏⲣⲓⲕⲟⲥ ⲇⲉ ⲁⲩⲱ ⲡⲟⲓⲕⲟⲛⲟⲙⲟⲥ ⲡⲉϫⲁⲩ ⲛⲁϥ ϫⲉ ⲉⲛⲟⲩⲉϣ ⲟⲩⲙⲁ ⲛⲉⲛⲕⲟⲧⲕ ⲉⲛⲁⲛⲟⲩϥ ⲛⲧⲉⲛⲧⲁⲗⲟ ⲙⲡⲥⲱⲙⲁ ⲙⲡⲙⲁⲣⲧⲩⲣⲟⲥ ⲉϫⲱϥ ⲁⲡⲁⲣⲭⲱⲛ ⲟⲩⲱϣⲃ ⲉϥⲁⲱ ⲙⲙⲟⲥ ϫⲉ ⲉⲣϣⲁⲛ ⲡⲛⲟⲩⲧⲉ ⲙⲛ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲟⲩⲱϣ ⲛⲧⲉ ⲡⲁⲁⲓⲧⲏⲙⲁ ϫⲱⲕ ⲛⲁⲓ ⲉⲃⲟⲗⲭ ϯⲛⲁⲥⲙⲓⲛⲉ ⲛⲟⲩϭⲗⲟϭ ⲙⲡⲙⲁⲣⲧⲩⲣⲟⲥ ⲕⲁⲧⲁ ⲡⲉϥⲉⲙⲡϣⲁ ⲛⲧⲁϣⲉⲧϣⲱⲧϥ ⲛⲉⲗⲉⲫⲁⲛⲧⲓⲛⲟⲛ ⲉϥⲧⲁⲓⲏⲩ ⲛⲑⲉ ⲙⲡⲁ ⲛⲣⲣⲱⲟⲩ ⲛⲛⲉϩⲣⲱⲙⲁⲓⲟⲥ ⲙⲛⲛⲥⲁ ⲛⲁⲓ ⲁϥⲉⲛⲕⲟⲧⲕ ⲛϭⲓ ⲡⲁⲣⲭⲱⲛ ⲉⲧⲣⲉϥⲁⲛⲁⲡⲉⲩⲉ ⲙⲙⲟϥ ⲁⲩⲱ ⲉⲓⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲟⲩⲱⲛϩ ⲉⲃⲟⲗ ⲙⲡⲁⲣⲭⲱⲛ ⲉϥⲟ ⲙⲡⲉⲥⲙⲟⲧ ⲛⲟⲩⲥⲧⲣⲁⲧⲉⲗⲁⲧⲏⲥ ⲡⲉϫⲁϥ ⲛⲁϥ ϫⲉ ⲉⲕϣⲁⲛⲧⲱⲟⲩⲛ ⲛϩⲧⲟⲟⲩⲉ ⲁⲗⲏ ⲉⲡⲉⲕⲧⲃⲛⲏ ⲛⲅⲃⲱⲕ ⲛⲁⲕ ⲉⲡⲉⲕⲏⲓ ⲁⲩⲱ ⲙⲡⲉⲣⲕⲁⲧⲓⲭⲉ ϯⲥⲟⲟⲩⲛ ⲅⲁⲣ ⲁⲉ ⲟⲩⲛ ⲟⲩⲕⲟⲩⲓ ⲛⲁⲙⲉⲗⲓⲁ ⲛⲁϣⲱⲡⲉ ⲙⲙⲟⲕ ⲉⲧⲃⲉ ⲡⲧⲱϣ ⲙⲡⲙⲁ ⲛⲉⲛⲕⲟⲧⲕ ⲛⲧⲁ ⲛⲉⲕⲗⲏⲣⲓⲕⲟⲥ ϫⲟⲟⲥ ⲛⲁⲕ ⲉⲧⲃⲏⲏⲧϥ ϩⲓ ⲣⲟⲩϩⲉⲭ ⲁⲗⲗⲁ ⲛϯⲛⲁϥⲓ ⲱⲡ ⲛⲙⲙⲁⲕ ⲁⲛ ϯⲥⲟⲟⲩⲛ ⲅⲁⲣ ϫⲉ ⲙⲛⲛⲥⲁ ⲛⲁⲩ ⲛⲓⲙ ⲕⲛⲁⲉⲓ ⲉⲡⲁⲧⲟⲡⲟⲥ ⲛⲧⲁⲛⲁ ⲛⲁⲕ ⲡⲁⲣⲭⲱⲛ ⲇⲉ ⲁϥⲛⲉϩⲥⲉ ⲉϩⲣⲁⲓ ϩⲙ ⲡϩⲟⲣⲟⲙⲁ ⲁϥⲣ ϣⲡⲏⲣⲉ ⲉⲙⲁⲧⲉ ϩⲧⲟⲟⲩⲉ ⲇⲉ ⲛⲧⲉⲣⲉϥϣⲱⲡⲉ ⲁϥⲧⲱⲟⲩⲛ ⲁϥⲃⲱⲕ ⲉϩⲟⲩⲛ ⲉⲧⲉⲕⲕⲗⲏⲥⲓⲁ ⲁϥⲟⲩⲱϣⲧ ⲉϫⲛ ⲛⲉⲕⲉⲉⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲉⲓ ⲉⲃⲟⲗ ⲁϥⲁⲗⲉ ⲉⲛⲉϥⲧⲃⲛⲟⲟⲩⲉ ⲁϥⲃⲱⲕ ⲉⲡⲉϥⲏⲓ ϩⲛ ⲟⲩⲉⲓⲣⲏⲛⲏ
42. ⲛⲧⲉⲣⲉ ⲟⲩϩⲟⲟⲩ ⲇⲉ ⲟⲩⲉⲓⲛⲉ ϫⲓⲛⲧⲁ ⲡⲁⲣⲭⲱⲛ ⲉⲓ ϩⲙ ⲡⲙⲁⲣⲧⲩⲣⲓⲟⲛⲭ ⲁⲩⲛⲟϭ ⲛⲁⲣⲭⲱⲛ ⲛⲧⲉ ⲧⲡⲟⲗⲓⲥ ⲥⲱⲧⲙ ⲉⲧⲃⲉ ⲧⲉϥϣⲉⲉⲣⲉ ⲙⲡⲁⲣⲑⲉⲛⲟⲥ ϫⲉ ⲉⲛⲉⲥⲱⲥ ⲉⲙⲁⲧⲉ ⲁϥⲧⲛⲛⲟⲟⲩ ⲛϩⲉⲛⲥϩⲓⲙⲉ ⲛⲉⲩⲅⲉⲛⲏⲥ ⲛⲧⲉ ⲧⲡⲟⲗⲓⲥ ⲉⲩⲧⲁⲓⲏⲩ ⲉⲙⲁⲧⲉ ϣⲁⲣⲟϥ ⲁⲩⲱ ϩⲛⲛⲟϭ ⲛⲉ ϩⲙ ⲡⲉⲩⲅⲉⲛⲟⲥ ⲉϥϫⲱ ⲙⲙⲟⲥ ⲛⲁϥ ⲁⲉ ⲉⲓⲟⲩⲱϣ ⲉϫⲓ ϩⲱⲛ ⲛⲧⲉⲕϣⲉⲉⲣⲉ ⲙⲡⲁϣⲏⲣⲉⲭ ⲁⲩⲱ ϯⲛⲁⲧⲁϣⲟ ⲛⲧⲉⲥϭⲣⲏϭⲉ ϩⲙ ⲡⲛⲟⲩⲃ ⲙⲛ ⲡϩⲁⲧ ⲁⲩⲱ ϩⲉⲛϩⲙϩⲁⲗ ⲛϩⲟⲟⲩⲧ ⲙⲛ ϩⲉⲛϩⲙϩⲁⲗ ⲛⲥϩⲓⲙⲉ ⲁⲩⲱ ϩⲉⲛϭⲓⲛⲟⲩⲏⲗ ⲉⲩⲡⲗⲉⲁ ϩⲛ ⲑⲁⲗⲁⲥⲥⲁⲭ ⲕⲁⲧⲁ ⲡⲧⲁⲓⲟ ⲛⲧⲉⲛⲙⲛⲧⲛⲟϭ ϩⲓ ⲟⲩⲥⲟⲡ ⲧⲟⲧⲉ ⲧⲙⲁⲁⲩ ⲛⲧϣⲉⲉⲣⲉ ϣⲏⲙ ⲉⲧⲉ ⲧⲉⲥϩⲓⲙⲉ ⲧⲉ ⲙⲡⲁⲣⲭⲱⲛ ⲁⲥⲧⲁⲙⲟϥ ⲉⲑⲉ ⲛⲧⲁⲩⲧⲛⲛⲟⲟⲩ ⲛⲁⲩ ⲉⲧⲃⲉ ⲧⲉⲩϣⲉⲉⲣⲉ ⲡⲉϫⲉ ⲡⲁⲣⲭⲱⲛ ϫⲉ ⲉϣⲱⲡⲉ ⲙⲉⲓϩⲉ ⲉⲩϣⲏⲣⲉ ϣ:ⲙ ⲛⲧⲁⲉⲛⲧϥ ⲉϩⲟⲩⲛ ⲉⲡⲁⲏⲓ ⲛⲧⲁⲥϩⲁⲓ ⲛⲁϥ ⲛⲧⲁⲡⲣⲟⲥϩⲟⲇⲟⲥ ⲧⲏⲣⲥ ⲛⲧⲁⲁϥ ⲛⲁⲓ ⲛϣⲏⲣⲉⲭ ⲙⲛϣ ϭⲟⲙ ⲙⲙⲟⲓ ⲉⲡⲟⲣϫⲥ ⲉⲣⲟⲓ ⲛϣⲁ ⲉⲛⲉϩ ⲁⲩⲱ ⲧⲉⲥⲟⲟⲩⲛ ϫⲉ ⲙⲛⲧⲁⲛ ⲛⲥⲁⲃⲗⲗⲁⲥ ⲉⲛϭⲱϣⲧ ⲉⲡⲛⲟⲩⲧⲉ ⲉⲛϭⲱϣⲧ ⲉⲣⲟⲥ ⲧⲟⲧⲉ ⲁⲧⲉⲥϩⲓⲙⲉ ⲙⲡⲁⲣⲭⲱⲛ ϫⲉ ϩⲱⲃ ⲛⲓⲙ ⲉⲛⲉϩⲓⲟⲙⲉ ⲛⲧⲁⲩⲉⲓ ⲁⲩⲱ ⲁⲩⲡⲱⲧ ⲉⲩⲗⲩⲡⲏ ⲁⲩϫⲉ ϩⲱⲃ ⲛⲓⲙ ⲉⲡϣⲏⲣⲉ ϣⲏⲙ ⲙⲛ ⲛⲉϥⲉⲓⲟⲧⲉ ⲁⲩⲱ ⲁⲩⲙⲕⲁϩ ⲉⲙⲁⲧⲉ ⲉϫⲙ ⲡϣⲁϫⲉ
43. ⲣⲟⲩϩⲉ ⲇⲉ ⲛⲧⲉⲣⲉϥϣⲱⲡⲉ ⲁⲩⲙⲟⲩⲧⲉ ⲉⲡⲉⲩϣⲏⲣⲉ ⲁⲩⲟⲩⲱⲙ ⲁⲩⲱ ⲁⲩⲥⲱ ⲛⲟⲩⲏⲣⲡ ⲉⲛⲁⲛⲟⲩϥⲭ ⲁⲩⲱ ⲁⲩϣⲁϫⲉ ⲛⲙⲙⲁϥ ⲉⲧⲃⲉ ⲟⲩⲙⲏⲏϣⲉ ⲛϣⲉⲉⲣⲉ ϣⲏⲙ ⲛⲧⲉ ⲧⲡⲟⲗⲓⲥ ⲁⲩⲱ ⲙⲡⲟⲩⲣ ⲁⲛⲁϥ ⲛⲛⲉϥⲃⲁⲗ ⲁⲩⲱ ⲛⲉϥⲙⲟⲕϩ ⲛϩⲏⲧ ⲉⲙⲁⲧⲉ ⲉⲧⲃⲉ ϫⲉ ⲛⲉϥⲥⲟⲟⲩⲛ ⲛⲧϣⲉⲉⲣⲉ ϣⲏⲙ ϫⲉ ⲛⲉⲥⲱⲥ ⲉⲙⲁⲧⲉ ϫⲓⲛ ⲉϥⲟ ⲛⲕⲟⲩⲓ ⲉϥϩⲛ ⲧⲁⲛⲍⲏⲃ ϩⲁⲧⲙ ⲡⲉϥⲥⲁϩ ⲉϣⲁⲣⲉ ⲡⲥⲁϩ ⲧⲛⲛⲟⲟⲩϥ ⲙⲙⲏⲛⲉ ⲛϥⲁⲡⲁⲅⲅⲉⲓⲗⲉ ⲛⲧϣⲉⲉⲣⲉ ϣ:ⲙ ⲛⲛⲉⲧⲉⲣⲉ ⲡⲥⲁϩ ⲛⲁⲥϩⲁⲓⲥⲟⲩ ⲛⲁⲥ ⲉⲧⲉⲥⲡⲉⲛⲁⲅⲓⲥ ⲗⲟⲓⲡⲟⲛ ⲁⲡϣⲏⲣⲉ ϣⲏⲙ ⲉⲣ ⲧⲉⲩϣⲏ ⲧⲏⲣⲥ ⲉϥⲉⲛⲕⲟⲧⲕ ⲉϥⲙⲉⲉⲩⲉ ⲉⲃⲟⲗ ϫⲉ ⲟⲩ ⲁⲣⲁ ⲡⲉⲧϥⲛⲁⲁⲁϥ ϣⲁⲛⲧⲉϥⲁⲡⲁⲛⲧⲁ ⲉⲧϣⲉⲉⲣⲉ ϣⲏⲙ ⲏ ϩⲉⲛ ⲟⲩϩⲱⲧⲣ ⲛⲅⲁⲙⲟⲥ ⲏ ϩⲉⲛ ⲟⲩⲡⲟⲣⲛⲓⲁⲭ ⲉⲧⲃⲉ ⲡⲉϥⲛⲟϭ ⲙⲙⲉ ⲉϩⲟⲩⲛ ⲉⲣⲟⲥ ϩⲁⲡⲁⲝ ϩⲁⲡⲗⲱⲥ ⲁϥϭⲱ ⲉϥⲗⲩⲡⲏ ⲉⲙⲁⲧⲉ ⲁⲩⲱ ⲙⲡⲉϥⲧⲁⲙⲉ ⲗⲁⲁⲩ ⲛⲣⲱⲙⲉ ⲉⲧⲉϥⲗⲩⲡⲏ ⲉⲓⲙⲏⲧⲉⲓ ⲛⲧⲟϥ ⲙⲁⲩⲁⲁϥ ⲁⲩⲱ ⲙⲡϩⲟⲩⲛ ⲛⲟⲩⲉⲃⲟⲧ ⲛϩⲟⲟⲩ ϫⲓⲛⲧⲁ ⲛⲁⲓ ϣⲱⲡⲉ ⲁⲧⲙⲁⲁⲩ ⲙⲡϣⲏⲣⲉ ϣⲏⲙ ⲉⲙⲧⲟⲛ ⲙⲙⲟⲥⲭ ⲁⲩⲱ ϩⲓⲧⲛ ⲧⲗⲩⲡⲏ ⲛⲧⲉϥⲙⲁⲁⲩ ⲙⲡⲉ ⲡⲉϥⲉⲓⲱⲧ ϣⲓⲛⲉ ⲛⲥⲁ ⲥϩⲓⲙⲉ ⲛⲁϥ ⲛⲕⲉⲥⲟⲡ
44. ⲡϣⲏⲣⲉ ϣⲏⲙ ⲇⲉ ϩⲱⲱϥ ⲁⲡⲙⲉⲉⲩⲉ ⲛⲧⲉⲥϩⲓⲙⲉ ϭⲱ ⲉϥⲉⲛⲱⲭⲗⲉⲓ ⲛⲁϥ ⲉϥϯ ϩⲓⲥⲉ ⲛⲁϥ ⲙⲡⲉϩⲟⲟⲩ ⲙⲛ ⲧⲉⲩϣⲏ ⲁⲩⲱ ⲛⲉϥϯ ⲉⲡⲁϩⲟⲩ ⲙⲙⲏⲛⲉ ϣⲁⲛⲧⲉϥϩⲱⲱⲙⲉ ⲉⲃⲟⲗ ⲁⲩⲱ ⲛϥϩⲱⲛ ⲉϩⲟⲩⲛ ⲉⲡⲙⲟⲩⲭ ⲁⲩⲱ ϩⲁϩ ⲙⲙⲁⲅⲟⲥ ⲁϥⲡⲱⲧ ⲉⲣⲁⲧⲟⲩ ⲉϥⲟⲩⲱϣ ⲉⲥⲉⲕ ⲡⲛⲟⲩⲥ ⲛⲛⲉⲥⲉⲓⲟⲧⲉ ⲛϥϥⲓⲧⲥ ⲉⲛϩⲛⲁⲩ ⲁⲛ ⲁⲩⲱ ⲙⲡⲉϥⲙⲁⲧⲉ ⲙⲡⲁⲓ ⲉⲡϩⲁⲉ ⲇⲉ ⲁϥϭⲓⲛⲉ ⲛⲟⲩⲥⲁϩ ⲙⲙⲁⲅⲟⲥ ⲡⲉϫⲁϥ ⲛⲁϥ ϫⲉ ϯⲛⲁⲧⲣⲉⲕⲛⲁⲩ ⲉⲣⲟⲥ ⲁⲩⲱ ⲛⲅϣⲁϫⲉ ⲛⲙⲙⲁⲥ ⲛⲧⲁⲡⲣⲟ ϩⲓ ⲧⲁⲡⲣⲟ ⲛⲟⲩⲙⲏⲏϣⲉ ⲛⲥⲟⲡ ⲡϣⲏⲣⲉ ⲇⲉ ϣⲏⲙ ϩⲓⲧⲛ ⲡϫⲟⲩϥ ⲙⲡⲉϥϩⲏⲧ ⲉⲧⲣⲟⲕϩ ⲉϩⲟⲩⲛⲉⲧϣⲉⲉⲣⲉ ϣⲏⲙ ⲁϥⲉⲣⲏⲧ ⲙⲙⲁⲅⲟⲥ ⲉϥϫⲱ ⲙⲙⲟⲥ ϫⲉ ⲉⲓϣⲁⲛⲙⲁⲧⲉ ⲙⲡⲁⲓ ⲉⲃⲟⲗ ϩⲓⲧⲟⲟⲧⲕ ϯⲛⲁϯ ⲛⲁⲕ ⲙⲙⲏⲧ ⲛϩⲟⲗⲟⲕⲟⲧⲧⲓⲛⲟⲥ ⲧⲟⲧⲉ ⲡⲣⲱⲙⲉ ⲙⲙⲁⲅⲟⲥ ⲁϥⲥⲙⲓⲛⲉ ⲙⲡⲉⲥⲍⲟⲇⲓⲟⲛ ⲕⲁⲧⲁ ⲑⲉ ⲛⲧⲁϥϯ ⲙⲁⲉⲓⲛ ⲛⲁϥ ⲉⲣⲟⲥ ⲁϥⲧⲣⲉ ⲟⲩϯⲧⲕⲁⲥ ϣⲱⲡⲉ ϩⲙ ⲡⲟⲩⲁ ⲛⲥⲁ ⲛⲧⲉⲥⲁⲡⲉⲭ ⲁⲥϩⲓⲥⲉ ⲉⲙⲁⲧⲉ ϩⲙ ⲡϣⲱⲛⲉ ⲉⲧⲙⲙⲁⲩ ⲡⲁⲓ ⲉⲧⲟⲩⲙⲟⲩⲧⲉ ⲉⲣⲟϥ ϩⲓⲧⲛ ⲛⲉⲥⲁⲉⲓⲛ ϫⲉ ϩⲩⲙⲉⲕⲣⲁⲛⲓⲟⲛ
45. ⲗⲟⲓⲡⲟⲛ ⲁⲥϭⲱ ϩⲛ ⲑⲩⲡⲟⲙⲟⲛⲏ ⲙⲡϣⲱⲛⲉ ⲛⲥⲟⲟⲩ ⲛⲉⲃⲟⲧ ⲙⲛⲛⲥⲟⲥⲡⲉϫⲉ ⲧⲉⲥⲙⲁⲁⲩ ⲙⲡⲉⲥⲉⲓⲱⲧ ϫⲉ ⲁⲣⲏⲩ ⲕⲛⲁⲧⲱⲟⲩⲛ ⲛⲧⲉⲛϫⲓⲧⲥ ⲉⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲩⲱ ϯⲡⲓⲥⲧⲉⲩⲉ ϫⲉ ⲡⲧⲁⲗϭⲟ ⲛⲁϣⲱⲡⲉ ⲛⲁⲥ ⲉⲃⲟⲗ ϩⲓⲧⲟⲟⲧϥ ⲡⲉϫⲉ ⲡⲉⲥⲉⲓⲱⲧ ϫⲉ ⲧⲛⲛⲁⲉϣ ⲃⲱⲕ ⲛⲙⲙⲁⲥ ⲉⲧⲙⲏⲧⲉ ⲙⲡⲉⲓⲙⲏⲏϣⲉ ⲛⲧⲉⲓϭⲟⲧ ⲡⲉϫⲉ ⲧⲉⲥⲙⲁⲁⲩ ϫⲉ ⲉⲛϣⲁⲛⲃⲱⲕ ⲉϩⲟⲩⲛ ⲉⲧⲉⲕⲕⲗⲏⲥⲓⲁⲭ ⲙⲛϩⲟⲟⲩⲧ ϩⲓ ⲥϩⲓⲙⲉ ⲡⲟⲣϫ ⲉⲃⲟⲗ ϩⲙ ⲡⲉⲭⲥ ⲁⲩϯ ⲡⲧⲱϣ ⲇⲉ ⲉⲧⲣⲉⲩⲃⲱⲕ ⲛϩⲟⲥⲟⲛ ⲇⲉ ⲉϥⲉⲛⲕⲟⲧⲕ ⲉϥⲙⲉⲉⲩⲉ ⲉⲃⲟⲗ ⲉⲑⲉ ⲉⲧⲉϥⲛⲁⲃⲱⲕ ⲙⲙⲟⲥ ⲙⲛ ⲧⲉϥⲥϩⲓⲙⲉ ⲙⲛ ⲧⲉϥϣⲉⲉⲣⲉ ⲉⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲉⲣ ⲡⲙⲉⲉⲩⲉ ⲛⲧⲉⲩⲛⲟⲩ ⲛⲑⲉ ⲛⲧⲁ ⲛⲉⲕⲗⲏⲣⲓⲕⲟⲥ ⲧⲁⲙⲟϥ ⲉⲧⲃⲉ ⲡⲙⲁ ⲛⲉⲛⲕⲟⲧⲕ ⲙⲡⲡⲉⲧⲟⲩⲁⲁⲃ ⲙⲛ ⲑⲉ ⲛⲧⲁ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲟⲟⲥ ⲛⲁϥ ϫⲉ ⲟⲩⲛ ⲟⲩⲕⲟⲩⲓ ⲛⲁⲙⲉⲗⲓⲁ ⲛⲁϣⲱⲡⲉ ⲙⲙⲟⲕ ⲉⲧⲃⲉ ⲡⲧⲱϣ ⲙⲡⲙⲁ ⲛⲉⲛⲕⲟⲧⲕ ⲛⲧⲁ ⲛⲉⲕⲗⲏⲣⲓⲕⲟⲥ ⲧⲁⲙⲟⲕ ⲉⲧⲃⲏⲏⲧϥ ⲉⲧⲣⲉⲩⲕⲱ ⲙⲡⲁⲥⲱⲙⲁ ϩⲓϫⲱϥⲭ ⲁⲗⲗⲁ ⲛϯⲛⲁϥⲓ ⲱⲡ ⲛⲙⲙⲁⲕ ⲁⲛ ⲉⲓⲥⲟⲟⲩⲛ ϫⲉ ⲙⲛⲛⲥⲁ ⲛⲁⲩ ⲛⲓⲙ ϣⲁⲕⲉⲣ ⲭⲣⲓⲁ ⲛⲁⲓ ⲛⲅⲉⲓ ⲉⲡⲁⲧⲟⲡⲟⲥ ⲁϥⲛⲉϩⲥⲉ ⲛⲧⲉϥⲥϩⲓⲙⲉ ⲁϥⲧⲁⲙⲟⲥ ϫⲉ ⲟⲩⲛⲟϭ ⲡⲉ ⲡⲁⲛⲟⲃⲉ ⲙⲡⲟⲟⲩ ⲱ ⲧⲁⲥⲱⲛⲉⲭ ⲁⲩⲱ ⲁϥϫⲱ ⲉⲣⲟⲥ ⲛϩⲱⲃ ⲛⲓⲙ ⲛⲧⲁⲩϣⲱⲡⲉ ⲙⲙⲟϥ ⲙⲛ ⲡϩⲟⲣⲟⲙⲁ ⲛⲧⲁϥⲛⲁⲩ ⲉⲣⲟϥⲭ ⲁⲩⲱ ⲁⲩⲛⲟϭ ⲛϩⲟⲧⲉ ϩⲉ ⲉϩⲣⲁⲓ ⲉϫⲱⲟⲩ ⲙⲡⲉⲥⲛⲁⲩ ϣⲱⲣⲡ ⲇⲉ ⲛⲧⲉⲣⲉϥϣⲱⲡⲉ ⲁϥⲧⲛⲛⲟⲟⲩ ⲁϥⲙⲟⲩⲧⲉ ⲉⲩⲙⲏⲏϣⲉ ⲛⲥⲁϩ ⲛⲧⲟⲣⲛⲓⲥⲧⲏⲥ ⲛⲣⲉϥⲧⲟⲣⲛⲓⲍⲉ ⲁϥⲓⲛⲉ ⲛⲁⲩ ⲛϩⲉⲛϣⲏ ⲛⲧⲉⲧⲣⲁⲕⲟⲛⲟⲛ ⲉⲩⲥⲟⲧⲡ ⲁⲩⲧⲁⲙⲓⲟ ⲛⲧⲉϥⲧⲟ ⲛⲟⲩⲉⲣⲏⲧⲉ ⲙⲡⲙⲁ ⲛⲉⲛⲕⲟⲧⲕ ⲙⲁⲩⲁⲁⲩ ⲁⲩϣⲉⲧϣⲱⲧⲟⲩ ⲛⲉⲗⲉⲫⲁⲛⲧⲓⲛⲟⲛ ⲁⲩⲱ ⲁϥⲉⲓⲛⲉ ⲛⲟⲩϣⲉⲛⲥⲧⲣⲟⲃⲓⲗⲗⲟⲥ ⲉϥⲥⲟⲧⲡ ⲁⲩⲧⲁⲙⲓⲟ ⲛⲧⲁⲡⲉ ⲙⲡⲙⲁ ⲛⲉⲛⲕⲟⲧⲕ ⲁⲩⲱ ⲁϥⲥⲙⲓⲛⲉ ⲛϩⲉⲛⲡⲁϭⲉ ⲉⲡⲡⲱⲣϣ ⲙⲡⲙⲁ ⲛⲉⲛⲕⲟⲧⲕ ⲁϥϣⲉⲧϣⲱⲧⲟⲩ ⲙⲡⲉⲧⲁⲗⲟⲛ ϩⲓ ⲉⲗⲉⲫⲁⲛⲧⲓⲛⲟⲛ ⲁⲩⲱ ⲧⲁⲡⲉ ⲙⲡⲙⲁ ⲛⲉⲛⲕⲟⲧⲕ ⲁϥⲱϥⲧ ⲉϩⲟⲩⲛ ⲉⲣⲟⲥ ⲛϩⲉⲛϩⲓⲕⲱⲛ ⲙⲛ ϩⲉⲛⲱⲛⲉ ⲛⲁⲩⲁⲛ ⲛⲏϭⲉ ⲙⲛ ϣⲟⲙⲛⲧ ⲛⲥ;ⲧⲁⲩⲣⲑⲟⲥ ⲛⲛⲟⲩⲃ ⲙⲛ ϣⲟⲙⲧⲉ ⲛⲥⲫⲣⲁⲅⲓⲥ ⲛϩⲁⲧ ⲁⲩϫⲟⲕϥ ⲉⲃⲟⲗ ⲕⲁⲗⲱⲥ ϩⲛ ⲟⲩⲛⲟϭ ⲙⲙⲛⲧⲉⲡⲓⲕⲏⲥ
46. ⲁϥⲧⲁⲗⲟ ⲙⲡⲉϭⲗⲟϭ ⲉϫⲛ ⲛⲉϥⲧⲃⲛⲟⲟⲩⲉ ⲛⲧⲉⲩϣⲏ ⲙⲛ ⲧⲉϥⲥϩⲓⲙⲉ ⲙⲛ ⲧⲉϥϣⲉⲉⲣⲉ ⲉⲧϣⲱⲛⲉ ⲁⲩⲱ ⲛⲉϥϩⲙϩⲁⲗ ϣⲁⲛⲧⲟⲩⲉⲓ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲙⲛ ⲡⲙⲁ ⲛⲛⲕⲟⲧⲕ ϩⲁⲑⲏ ⲛ:ⲟⲙⲛⲧ ⲛϩⲟⲟⲩ ⲉⲡϣⲁⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥⲭ ⲉⲧⲉ ⲥⲟⲩϫⲟⲩⲧⲏ ⲡⲉ ⲙⲡⲉⲃⲟⲧ ϩⲁⲑⲱⲣ ⲛⲧⲉⲣⲟⲩⲛⲁⲩ ⲇⲉ ⲉⲣⲟϥ ⲛϭⲓ ⲛⲉⲕⲗⲏⲣⲓⲕⲟⲥ ⲁⲩⲑⲁⲩⲙⲁⲍⲉ ⲉⲙⲁⲧⲉ ⲉⲩⲣ ϣⲡⲏⲣⲉ ⲛⲧⲉϥⲛⲟϭ ⲙⲙⲛⲧⲥⲁⲓⲉⲭ ⲁⲩⲱ ⲁⲩⲯⲁⲗⲗⲉⲓ ϩⲓⲑⲏ ⲙⲙⲟϥ ϣⲁⲛⲧⲟⲩϫⲓⲧϥ ⲉϩⲟⲩⲛ ⲉⲧⲉⲕⲕⲗⲏⲥⲓⲁ ⲁⲩⲱ ⲁⲡⲁⲣⲭⲱⲛ ⲙⲛ ⲧⲉϥⲥϩⲓⲙⲉ ⲙⲛ ⲧⲉϥϣⲉⲉⲣⲉ ⲃⲱⲕ ⲉϩⲟⲩⲛ ⲉⲡⲙⲁⲣⲧⲩⲣⲓⲟⲛ ⲁⲩⲟⲩⲱϣⲧ ⲉϫⲙ ⲡⲥⲱⲙⲁ ⲙⲡⲡⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲛ ⲟⲩⲛⲟϭ ⲛⲣⲁϣⲉⲭ ⲁⲩⲱ ⲁⲡⲟⲓⲕⲟⲛⲟⲙⲟⲥ ϫⲓⲧⲟⲩ ⲉⲡⲙⲁ ⲙⲡⲡⲏ ⲙⲁⲩⲁⲁⲩ ⲉⲧⲣⲉⲩⲁⲛⲁⲡⲉⲩⲉ ⲙⲙⲟⲟⲩ ⲉⲧⲃⲉ ⲡϩⲓⲥⲉ ⲛⲛⲉϩⲓⲟⲟⲩⲉⲭ ⲁⲩⲱ ⲛⲉⲣⲉ ⲧϣⲉⲉⲣⲉ ϣⲏⲙ ϣⲟⲟⲡ ϩⲁ ⲃⲁⲥⲁⲛⲟⲥ ⲉⲧⲃⲉ ϫⲉ ⲟⲩⲙⲁⲥⲧⲉ ⲉⲕⲕⲗⲏⲥⲓⲁ ⲡⲉ ⲡϣⲱⲛⲉ ⲉⲧⲙⲙⲁⲩⲭ ϫⲉ ⲟⲩϩⲓⲥⲱⲛ ϩⲱⲱϥ ⲡⲉ ⲛⲇⲁⲓⲙⲱⲛ ⲡⲉ ⲡϩⲩⲙⲉⲕⲣⲁⲛⲓⲟⲛ
47. ϩⲛ ⲧⲡⲁϣⲉ ⲇⲉ ⲛⲧⲉⲩϣⲏ ⲉⲓⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥϩⲟⲕϥ ⲛⲑⲉ ⲛⲟⲩⲥⲧⲣⲁⲧⲉⲗⲁⲧⲏⲥ ⲛⲧⲉ ⲡⲣⲣⲟ ⲁϥⲃⲱⲕ ⲉⲧⲡⲟⲗⲓⲥ ⲙⲡⲁⲣⲭⲱⲛ ⲁϥⲃⲱⲕ ⲉϩⲟⲩⲛ ⲉⲡⲏⲓ ⲙⲡϩⲉⲣϣⲓⲣⲉ ⲛⲧⲁϥⲛ ⲡϣⲱⲛⲉ ⲉⲧϩⲟⲥⲉ ⲉϫⲛ ⲧϣⲉⲉⲣⲉ ϣⲏⲙ ⲁϥⲟⲩⲱⲛϩ ⲉⲣⲟϥ ϩⲛ ⲟⲩⲛⲟϭ ⲙⲫⲟⲃⲟⲥ ⲉⲣⲉ ⲧⲉϥⲥⲏϥⲉ ⲧⲟⲕⲙ ⲛⲧⲟⲟⲧϥ ⲁⲩⲱ ⲁϥϩⲓⲟⲩⲉ ⲉϫⲱϥ ⲙⲡⲡⲱϫⲕ ⲛⲧⲥⲏϥⲉ ⲛϣⲟⲙⲛⲧ ⲛⲥⲟⲡ ⲉϥϭⲟⲛⲧ ⲁⲩⲱ ⲁϥⲟⲛⲅϥ ⲉϩⲣⲁⲓ ϩⲁ ⲡϩⲓⲛⲏⲃ ⲛϭⲓ ⲡϩⲉⲣϣⲏⲣⲉ ⲁϥⲛⲁⲩ ⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛϩⲟ ϩⲓ ϩⲟ ⲉϥⲁϩⲉⲣⲁⲧϥ ϩⲓϫⲱϥ ⲁⲩⲱ ⲁϥⲃⲟϭϥ ⲉϩⲣⲁⲓ ϩⲓϫⲙ ⲡⲙⲁ ⲛⲉⲛⲕⲟⲧⲕ ⲉϥⲟⲩⲱϣ ⲉⲧⲱⲟⲩⲛ ⲛϥⲡⲱⲧⲭ ⲁⲩⲱ ⲁϥϩⲉ ⲛⲧⲉⲩⲛⲟⲩ ⲉϫⲙ ⲡⲉϥϩⲟ ϩⲁ ⲛⲉⲩⲉⲣⲏⲧⲉ ⲙⲡⲡⲉⲧⲟⲩⲁⲁⲃ ⲁϥϭⲱ ⲉϥⲙⲁⲥⲧⲓⲅⲟⲩ ⲙⲙⲟϥ ϩⲛ ⲟⲩⲛⲟϭ ⲛⲁⲡⲓⲗⲏ ⲁⲩⲱ ⲁⲡϣⲏⲣⲉ ϣⲏⲙ ϭⲱ ⲉϥϯ ⲡⲓ ⲉϫⲛ ⲛⲟⲩⲉⲣⲏⲧⲉ ⲙⲡⲡⲉⲧⲟⲩⲁⲁⲃ ⲉϥⲣⲓⲙⲉ ⲉϥⲱϣ ⲉⲃⲟⲗ ϫⲉ ⲟⲩⲟⲓ ⲛⲁⲓ ⲁⲛⲟⲕ ⲡⲉⲓⲣⲉϥⲣⲛⲟⲃⲉⲭ ⲟⲩ ⲡⲉ ⲡⲛⲟⲃⲉ ⲛⲧⲁⲓⲁⲁϥ ⲱ ⲡⲁϫⲟⲉⲓⲥ ⲡⲉⲁⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲁϥ ϫⲉ ⲙⲡⲉⲕⲥⲱⲧⲙ ⲛⲧⲟⲕ ϫⲉ ⲛⲛⲉⲕⲥⲁϩⲟⲩ ⲙⲡⲁⲣⲭⲱⲛ ⲙⲡⲉⲕⲗⲁⲟⲥ ⲟⲩⲇⲉ ⲛⲛⲉⲕⲉⲛ ⲧⲟⲟⲧⲕ ⲉϫⲙ ⲡⲉⲭⲥ ⲙⲡϫⲟⲉⲓⲥ ⲡⲉϫⲁϥ ϫⲉ ϥⲥⲏϩ ⲡⲁϫⲟⲓⲥ ⲁⲗⲗⲁ ⲙⲁⲧⲁⲙⲟⲓ ϫⲉ ⲛⲧⲕ ⲛⲓⲙ ⲁⲩⲱ ⲛⲓⲙ ⲡⲉ ⲡⲉⲕⲣⲁⲛ ⲁⲩⲱ ⲛⲅϫⲉ ⲡⲁⲛⲟⲃⲉ ⲉⲣⲟⲓ ϫⲉⲕⲁⲥ ⲉⲓⲉⲙⲉⲧⲁⲛⲟⲓ ϩⲁ ⲡⲁⲛⲟⲃⲉ ϯⲥⲟⲟⲩⲛ ⲅⲁⲣ ⲁⲉ ⲟⲩⲛ ⲙⲉⲧⲁⲛⲟⲓⲁ ϣⲟⲟⲡ ⲡⲉϫⲉ ⲡⲡⲉⲧⲟⲩⲁⲁⲃ ⲛⲁϥ ϫⲉ ⲁⲛⲟⲕ ⲡⲉ ⲙⲉⲣⲕⲟⲩⲣⲓⲟⲥ ⲡⲉⲧⲉⲓⲣⲉ ⲛⲛⲉⲓϭⲟⲙ ϩⲛ ⲧⲡⲟⲗⲓⲥ ⲕⲁⲓⲥⲁⲣⲓⲁ ⲛⲧⲁⲓⲉⲓ ⲅⲁⲣ ϫⲉ ⲉⲓⲛⲁⲡⲁⲧⲁⲥⲥⲉ ⲙⲙⲟⲕ ⲙⲛ ⲡⲕⲉⲙⲁⲅⲟⲥ ⲡⲁⲓ ⲛⲧⲁϥϯ ⲡⲉⲓⲛⲟϭ ⲛϯⲧⲕⲁⲥ ⲉϩⲟⲩⲛ ⲉⲡⲟⲩⲁ ⲛⲥⲁ ⲛⲧⲁⲡⲉ ⲛⲧϣⲉⲉⲣⲉ ⲛϩⲉⲣⲙⲁⲡⲟⲗⲗⲱⲛ ⲡⲁⲣⲭⲱⲛ ⲛⲧⲡⲟⲗⲓⲥ ϩⲛ ⲟⲩϫⲓⲛϭⲟⲛⲥ ⲁⲗⲗⲁ ⲛϩⲟⲥⲱⲛ ⲁⲓϭⲉⲛ ⲙⲉⲧⲁⲛⲟⲓⲁ ⲛϩⲏⲧⲕ ⲛϯⲛⲁⲉⲣ ⲗⲁⲁⲩ ⲙⲡⲉⲑⲟⲟⲩ ⲛⲁⲕ ⲁⲛ ⲁⲗⲗⲁ ⲉⲕϣⲁⲛⲧⲱⲟⲩⲛ ⲛϩⲧⲟⲟⲩⲉ ⲙⲡⲉⲣⲁⲙⲉⲗⲓ ⲉⲃⲱⲕ ⲉⲡⲙⲁ ⲙⲡⲣⲱⲙⲉ ⲙⲙⲁⲅⲟⲥ ⲡⲁⲓ ⲛⲧⲁϥⲧⲣⲉⲕⲉⲓⲣⲉ ⲙⲡⲉⲓⲛⲟϭ ⲛⲛⲟⲃⲉ ⲛⲧⲉⲧⲛⲉⲓ ⲉⲡⲁⲧⲟⲡⲟⲥⲭ ⲁⲩⲱ ⲡⲉⲕⲣⲁϣⲉ ⲛⲁϫⲱⲕ ⲉⲃⲟⲗ ϩⲛ ϩⲱⲃ ⲛⲓⲙ ⲡⲉϫⲉ ⲡⲣⲱⲙⲉ ⲛⲁϥ ϫⲉ ⲡⲁϫⲟⲉⲓⲥ ϯⲛⲏⲩ ⲁⲛⲟⲕ ϩⲛ ⲟⲩⲣⲁϣⲉⲭ ⲁⲗⲗⲁ ⲡⲁⲛⲧⲟⲥ ⲛϥⲧⲙⲉⲓ ⲛⲙⲙⲁⲓ ⲛϭⲓ ⲡⲣⲱⲙⲉ ⲙⲙⲁⲅⲟⲥ ⲟⲩ ⲡⲉϯⲛⲁⲁⲁϥ ⲡⲉϫⲉⲡⲡⲉⲧⲟⲩⲁⲁⲃ ⲛⲁϥ ϫⲉ ⲧⲟⲩϫⲟⲕ ⲛⲧⲟⲕ ⲁⲩⲱ ϯⲛⲁⲧⲣⲉ ⲡⲉⲧⲙⲙⲁⲩ ⲉⲓ ⲉϥⲥⲭⲏⲙⲁⲧⲓⲍⲉ ⲧⲟⲧⲉ ⲁⲡⲡⲉⲧⲟⲩⲁⲁⲃ ϩⲟⲡϥ ⲉⲣⲟϥ
48. ϩⲧⲟⲟⲩⲉ ⲇⲉ ⲛⲧⲉⲣⲉϥϣⲱⲡⲉ ⲁⲡϣⲏⲣⲉ ϣⲏⲙ ϯ ⲡⲉϥⲟⲩⲟⲓ ⲉⲡⲉϥⲉⲓⲱⲧ ⲉϥⲁⲱ ⲙⲙⲟⲥ ϫⲉ ⲡⲁⲉⲓⲱⲧ ⲃⲟⲏⲑⲉⲓ ⲉⲣⲟⲓ ⲁⲓⲉⲡⲉⲑⲩⲙⲉⲓ ⲉⲃⲱⲕ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲧⲁϣⲗⲏⲗ ⲛϩⲏⲧϥ ⲁⲩⲱ ⲛⲉⲣⲉ ⲡⲉϥⲉⲓⲱⲧ ⲑⲁⲗⲡⲉⲓ ⲙⲙⲟϥ ⲉⲙⲁⲧⲉ ϫⲉ ⲛⲉⲙⲛⲧϥ ϣⲏⲣⲉ ⲙⲙⲁⲩ ⲛⲥⲁⲃⲗⲗⲁϥ ⲡⲉϫⲁϥ ⲛⲁϥ ϫⲉ ⲃⲱⲕ ⲡⲁϣⲏⲣⲉⲭ ⲁⲗⲗⲁ ⲙⲡⲉⲣⲱⲥⲕ ⲉⲉⲓ ϫⲉ ⲛⲁⲥⲡⲗⲁⲕⲛⲟⲛ ⲣⲱⲕϩ ⲙⲙⲟⲓ ⲉⲧⲃⲏⲏⲧⲕⲭ ⲱ ⲡⲟⲩⲟⲉⲓⲛ ⲛⲛⲁⲃⲁⲗ ⲁⲩⲱ ⲁϥϯ ⲛⲁϥ ⲛⲟⲩⲙⲏⲏϣⲉ ⲛϩⲁⲛϩⲟⲗⲟⲙⲁ ⲁⲩⲱ ϣⲟⲙⲛⲧ ⲛϩⲙϩⲁⲗ ⲉⲧⲣⲉⲩϩⲩⲡⲉⲣⲉⲧⲉⲓ ⲙⲙⲟϥ ⲁϥⲧⲱϩⲙ ⲇⲉ ϩⲛ ⲟⲩⲛⲟϭ ⲛϫⲱⲗⲕ ⲉⲃⲟⲗ ⲁϥⲉⲓ ⲉⲧⲡⲟⲗⲓⲥ ⲧⲁⲓ ⲉⲧⲉⲣⲉ ⲡⲣⲱⲙⲉ ⲙⲙⲁⲅⲟⲥ ⲛϩⲏⲧⲥ ⲡⲉϫⲁϥ ⲛⲁϥ ϫⲉ ⲧⲱⲟⲩⲛ ⲡⲁⲥⲟⲛ ⲙⲁⲣⲟⲛ ⲛⲧⲉⲛⲃⲱⲕ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲧⲉⲛϣⲗⲏⲗ ⲛϩⲏⲧϥ ⲁⲩⲱ ϩⲱⲃ ⲛⲓⲙ ⲛⲧⲁⲩϣⲱⲡⲉ ⲙⲙⲟϥ ⲙⲛ ϣⲁϫⲉ ⲛⲓⲙ ⲛⲧⲁ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲟⲟⲩ ⲛⲁϥ ⲁϥϫⲟⲟⲩ ⲉⲡⲣⲱⲙⲉ ⲙⲙⲁⲅⲟⲥ ⲁⲩⲱ ⲛⲧⲉⲣⲉϥⲥⲱⲧⲙ ⲛϭⲓ ⲡⲣⲱⲙⲉ ⲙⲙⲁⲅⲟⲥ ϫⲉ ⲡⲁⲣⲭⲱⲛ ϩⲙ ⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲉⲣ ϩⲟⲧⲉ ⲁⲩⲱ ⲁϥϣⲧⲟⲣⲧⲣ ⲉⲡⲉϩⲟⲩⲟ ⲡⲉϫⲁϥ ⲙⲡϣⲏⲣⲉ ϣⲏⲙ ϫⲉ ⲉⲥϣⲁⲛϣⲱⲡⲉ ⲉⲧⲣⲁⲙⲟⲩ ⲛϯⲛⲏⲩ ⲁⲛ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥⲭ ⲙⲏⲡⲟⲧⲉ ⲛϥⲟⲩⲟⲛϩⲧ ⲉⲃⲟⲗ ⲛⲧⲉ ⲡⲓⲱⲧ ⲛⲧϣⲉⲉⲣⲉ ϣⲏⲙ ⲙⲟⲩⲟⲩⲧ ⲙⲙⲟⲓ ⲉⲧⲃⲉ ⲧⲉϥϣⲉⲉⲣⲉ ⲛⲧⲁⲓⲙⲁⲅⲉⲩⲉ ⲙⲙⲟⲥ ⲉⲧⲃⲏⲏⲧⲕ
49. ⲁⲩⲱ ⲛⲧⲉⲣⲉ ⲡϣⲏⲣⲉ ϣⲏⲙ ⲥⲱⲧⲙ ⲉⲛⲁⲓ ⲛⲧⲟⲟⲧϥ ⲙⲡⲣⲱⲙⲉ ⲙⲙⲁⲅⲟⲥⲭ ⲁϥⲧⲱϩⲙ ϩⲛ ⲟⲩⲛⲟϭ ⲛϭⲟⲙ ϣⲁⲛⲧⲉϥⲉⲓ ⲉⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲩⲱ ⲁϥⲃⲱⲕ ⲉϩⲟⲩⲛ ⲉⲡⲙⲁⲣⲧⲩⲣⲓⲟⲛ ϩⲛ ⲟⲩⲛⲟϭ ⲛϩⲟⲧⲉⲭ ⲁϥⲟⲩⲱϣⲧ ⲉⲁⲛ ⲛⲕⲉⲉⲥ ⲙⲡⲡⲉⲧⲟⲩⲁⲁⲃ ⲁⲩⲱ ⲁϥⲛⲁⲩ ⲉⲧϣⲉⲉⲣⲉ ϣⲏⲙ ϩⲱⲱⲥ ⲉⲥⲡⲁϩⲧ ⲉϫⲙ ⲡⲥⲱⲙⲁ ⲙⲡⲡⲉⲧⲟⲩⲁⲁⲃ ⲙⲛ ⲡⲉⲥⲉⲓⲱⲧ ⲙⲛ ⲧⲉⲥⲙⲁⲁⲩ ⲉⲩⲡⲁⲣⲁⲕⲁⲗⲉⲓ ⲙⲙⲟϥ ⲉⲩⲃⲱⲏⲑⲓⲁ ⲛⲁⲥ ⲁⲩⲱ ⲛⲉⲣⲉ ⲡⲡⲉⲧⲟⲩⲁⲁⲃ ⲕⲱ ⲙⲙⲟⲥ ⲉⲩⲕⲁⲓⲣⲟⲥ ⲉⲛⲁⲛⲟⲩϥ ⲁⲡϣⲏⲣⲉ ϣⲏⲙ ⲙⲟⲩⲧⲉ ⲉⲡⲟⲓⲕⲟⲛⲟⲙⲟⲥ ⲙⲡⲧⲟⲡⲟⲥ ⲁϥϯ ⲛⲁϥ ⲙⲙⲏⲧ ⲉⲛϩⲟⲗⲟⲕⲟⲧⲧⲓⲛⲟⲥ ⲁⲩⲱ ⲁⲡⲁⲣⲭⲱⲛⲭ ⲉⲧⲉ ⲡⲉⲓⲱⲧ ⲡⲉ ⲛⲧϣⲉⲉⲣⲉ ϣⲏⲙⲭ ϭⲱϣⲧ ⲉⲁⲙ ⲡⲙⲏⲏϣⲉ ⲁϥⲛⲁⲩ ⲉⲡϣⲏⲣⲉ ϣⲏⲙ ⲁϥⲥⲟⲩⲱⲛϥ ⲁϥⲙⲟⲟϣⲉ ⲉϩⲟⲩⲛ ⲉⲣⲟϥ ⲛϥⲥⲟⲟⲩⲛ ⲁⲛ ⲉⲗⲁⲁⲩ ⲛϩⲱⲃ ⲁϥⲁⲥⲡⲁⲍⲉ ⲙⲙⲟϥ ⲁϥϣⲓⲛⲉ ⲛⲥⲁ ⲡⲟⲩϫⲁⲓ ⲙⲡⲉϥⲉⲓⲱⲧ ⲛⲧⲟⲟⲧϥ ⲙⲛ ⲛⲁ ⲡⲉϥⲏⲓ ⲧⲏⲣⲟⲩ ⲛⲧⲉⲣⲟⲩϣⲗⲗ ⲇⲉ ⲁϥⲡⲣⲟⲧⲣⲉⲡⲉⲓ ⲙⲡϣⲏⲣⲉ ϣⲏⲙ ⲁϥϫⲓⲧϥ ⲉⲡⲙⲁⲛⲧⲡⲉ ⲉⲧϥⲉⲛϩⲏⲧϥ ⲙⲛ ⲧⲉϥⲥϩⲓⲙⲉ ⲙⲛ ⲧⲉϥϣⲉⲉⲣⲉⲭ ⲁⲩⲟⲩⲱⲙ ⲁⲩⲥⲱ ⲙⲛ ⲛⲉⲩⲉⲣⲏⲩ ⲁϥⲛⲁⲩ ⲉⲧϣⲉⲉⲣⲉ ϣⲏⲙ ⲁϥⲣⲁϣⲉ ⲉⲙⲁⲧⲉ ⲁⲗⲗⲁ ⲛⲉϥⲗⲩⲡⲏ ⲟⲛ ⲉⲧⲃⲏⲏⲧⲥ ϫⲉ ϥⲛⲁⲩ ⲉⲣⲟⲥ ⲉⲥϣⲟⲟⲡ ϩⲛ ⲟⲩⲛⲟϭ ⲛⲃⲁⲥⲁⲛⲟⲥⲭ ⲁⲩⲱ ⲛⲉϥϣⲓⲡⲉ ϩⲏⲧⲟⲩ ⲛⲛⲉⲥⲟⲓⲟⲧⲉ ϫⲉ ⲛⲧⲟϥ ⲡⲉ ⲡⲉⲧⲓⲟⲥ ⲙⲡⲉⲥϣⲱⲛⲉ ⲛⲉϥⲉⲣ ϩⲟⲧⲉ ⲇⲉ ⲟⲛ ϫⲉ ⲛⲛⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲟⲩⲟⲛϩϥ ⲉⲃⲟⲗ ϩⲁⲡⲁⲝ ϩⲁⲡⲗⲱⲥ ⲟⲩⲙⲏⲏϣⲉ ⲛⲣⲟⲟⲩϣ ⲉⲩⲉⲛⲱⲭⲗⲉⲓ ⲙⲡϣⲏⲣⲉ ϣⲏⲙ
50. ⲛⲧⲉⲣⲟⲩⲟⲩⲛⲟϥ ⲇⲉ ⲙⲙⲟⲟⲩ ϩⲙ ⲡⲏⲣⲡ ⲁⲩⲉⲛⲕⲟⲧⲕ ⲁⲩⲱ ⲉⲓⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲟⲩⲱⲛϩ ⲉⲃⲟⲗ ⲙⲡⲉⲓⲱⲧ ⲛⲧϣⲉⲉⲣⲉ ϣⲏⲙ ⲁϥⲧⲟⲩⲛⲟⲥϥ ⲁϥϫⲓⲧϥ ⲛⲥⲁⲃⲟⲗ ⲙⲡⲣⲟ ⲙⲡⲙⲁ ⲉⲛⲉϥⲕⲟⲧⲕ ⲛϩⲏⲧϥ ⲁⲩⲱ ⲁϥϣⲁϫⲉ ⲛⲙⲙⲁϥ ⲉϥϫⲱ ⲙⲙⲟⲥ ϫⲉ ϯ ⲛⲧⲉⲕϣⲉⲉⲣⲉ ⲙⲡⲉⲓϩⲉⲣϣⲓⲣⲉ ⲉⲧϩⲁϩⲧⲏⲕⲭ ⲉϣⲱⲡⲉ ⲕⲟⲩⲱϣ ⲉⲧⲣⲁⲧⲁⲗϭⲟⲥ ⲁⲩⲱ ⲙⲡⲉⲣϣⲓⲛⲉ ⲛⲥⲁ ⲡⲉⲑⲟⲟⲩ ⲉϩⲟⲩⲛ ⲉⲣⲟϥ ϫⲉ ⲛⲛⲉ ⲟⲩϩⲟⲩⲉ ⲡⲁⲓ ⲧⲁϩⲟⲥ ⲁⲩⲱ ⲁϥⲧⲁⲙⲟϥ ϫⲉ ⲕⲉϣⲟⲙⲛⲧ ⲛⲉⲃⲟⲧ ⲛⲉ ϣⲁⲛⲧⲉ ⲡⲉϥⲉⲓⲱⲧ ⲙⲟⲩⲭ ϫⲉ ⲁⲡⲉϥⲁϩⲉ ϫⲱⲕ ⲉⲃⲟⲗ ⲁⲩⲱ ⲙⲡⲉⲣⲁⲙⲉⲗⲉⲓ ⲉϫⲓ ϩⲱⲛ ⲛⲁϥ ⲛⲧϣⲉⲉⲣⲉ ϣⲏⲙⲭ ϫⲉ ϥⲛⲁϣⲱⲡⲉ ⲛⲁⲕ ⲛϣⲏⲣⲉ ⲙⲛⲛⲥⲁ ⲡⲙⲟⲩ ⲙⲡⲉϥⲉⲓⲱⲧ ⲁⲩⲱ ⲁϥⲧⲁⲙⲟϥ ⲉⲑⲉ ⲛⲧⲁϥⲙⲁⲅⲉⲩⲉ ⲙⲙⲟⲥ ϣⲁⲛⲧⲉⲥϣⲱⲛⲉ ⲉⲧⲃⲉ ⲡⲉϥⲛⲟϭ ⲛⲟⲩⲱϣ ⲉϩⲟⲩⲛ ⲉⲣⲟⲥ ⲁⲩⲱ ⲟⲛ ⲉⲧⲃⲉ ⲑⲉ ⲛⲧⲁϥⲟⲩⲱⲛϩ ⲉⲡϣⲏⲣⲉ ϣⲏⲙ ⲉϥⲁⲡⲓⲗⲏ ⲛⲁϥ ϩⲛ ⲧⲥⲏϥⲉ ⲉⲧⲉⲛⲧⲟⲟⲧϥ ⲁⲩⲱ ⲉⲧⲃⲉ ϩⲱⲃ ⲛⲓⲙ ⲛⲧⲁⲩϣⲱⲡⲉ ⲙⲙⲟϥ ϣⲁⲛⲧⲉϥⲉⲓ ⲉⲡⲙⲁⲣⲧⲩⲣⲓⲟⲛ ⲙⲡⲡⲉⲧⲟⲩⲁⲁⲃ ⲛⲁⲓ ⲇⲉ ⲛⲧⲉⲣⲉ ⲡϩⲁⲅⲓⲟⲥ ϫⲟⲟⲩ ⲛⲁϥ ⲁϥϩⲟⲡϥ ⲉⲣⲟϥ
51. ⲡⲁⲣⲭⲱⲛ ⲇⲉ ⲛⲧⲉⲣⲉϥⲛⲉϩⲥⲉ ⲉϩⲣⲁⲓ ϩⲙ ⲡϩⲟⲣⲟⲙⲁ ⲁϥϣⲱⲗⲙ ⲉⲩⲛⲟϭ ⲛⲥϯⲛⲟⲩⲃⲉ ⲉϥⲥⲟⲧⲡⲭ ⲡⲉϫⲁϥ ϫⲉ ⲁⲗⲏⲑⲟⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉ ⲡⲁⲓ ⲛⲧⲁϥⲟⲩⲱⲛϩ ⲛⲁⲓ ⲉⲃⲟⲗ ⲁⲩⲱ ⲁϥϭⲱ ⲉϥⲙⲉⲉⲩⲉ ⲉⲃⲟⲗ ⲉⲡⲉⲛⲧⲁ ⲡϩⲉⲣϣⲓⲣⲉ ⲁⲁϥ ⲉⲧⲉϥϣⲉⲉⲣⲉ ⲉⲧⲃⲉ ⲡⲉϥⲟⲩⲱϣ ⲉϩⲟⲩⲛ ⲉⲣⲟⲥ ⲁϥϭⲱ ⲉϥⲙⲟⲕⲙⲉⲕ ⲙⲙⲟϥ ϫⲉ ⲁⲣⲁ ⲛⲉⲡⲟⲩⲱϣ ⲙⲡⲛⲟⲩⲧⲉ ⲡⲉ ⲙⲛ ⲡⲡⲉⲧⲟⲩⲁⲁⲃ ⲛⲧⲁϭⲱⲗⲡ ⲉⲃⲟⲗ ⲙⲡⲉⲓⲙⲩⲥⲧⲩⲣⲓⲟⲛ ϫⲓⲛ ⲙⲙⲟⲛ ⲛⲧⲁⲕⲁⲁϥ ⲉϥϩⲏⲡ ⲛϩⲟⲥⲟⲛ ⲇⲉ ⲉϥⲙⲉⲉⲩⲉ ⲉⲃⲟⲗ ⲉⲛⲁⲓ ⲁⲩⲥⲁⲗⲡⲓⲍⲉ ϫⲉⲕⲁⲥ ⲉⲣⲉ ⲟⲩⲟⲛ ⲛⲓⲙ ⲉⲧⲛⲕⲟⲧⲕ ⲛⲁⲧⲱⲟⲩⲛ ⲛⲥⲉⲉⲓ ⲉⲧⲉⲕⲕⲗⲏⲥⲓⲁ ⲛⲥⲉϩⲩⲙⲛⲉⲩⲉ ⲙⲛ ⲛⲉⲫⲓⲗⲟⲡⲟⲛⲟⲥⲭ ϫⲉ ⲛⲉⲡⲛⲟϭ ⲛϣⲁ ⲡⲉ ⲙⲡⲡⲉⲧⲟⲩⲁⲁⲃⲭ ⲉⲧⲉ ⲥⲟⲩϫⲟⲩⲧⲏ ⲛϩⲁⲑⲱⲣ ⲡⲉ ⲁⲩⲱ ⲁⲩⲧⲱⲟⲩⲛ ⲛϭⲓ ⲙⲙⲏⲏϣⲉ ⲁⲩⲗⲉⲩⲕⲟⲫⲟⲣⲉⲓ ⲙⲙⲟⲟⲩ ϩⲛ ⲟⲩⲣⲁϣⲉ ⲁⲩⲉⲓ ⲉⲧⲉⲕⲕⲗⲏⲥⲓⲁ ⲁⲩϭⲱ ⲉⲩϩⲩⲙⲛⲉⲩⲉ ϣⲁⲛⲧⲉ ⲡⲟϣⲟⲉⲓⲛ ϣⲁ ⲁϥⲧⲱⲟⲩⲛ ϩⲱⲱϥ ⲛϭⲓ ⲡⲁⲣⲭⲱⲛ ⲙⲛ ⲧⲉϥⲥϩⲓⲙⲉ ⲙⲛ ⲧⲉϥϣⲉⲉⲣⲉ ⲁⲩⲉⲓ ⲉⲡⲧⲟⲡⲟⲥ ⲉⲣⲉ ⲛⲉⲩϩⲙϩⲁⲗ ⲟⲩⲏϩ ⲛⲥⲱⲟⲩ
52. ⲁⲩⲱ ⲡϣⲏⲣⲉ ϣⲏⲙ ϩⲱⲱϥ ⲁϥⲉⲓ ⲙⲛ ⲛⲉϥϩⲙϩⲁⲗ ⲁⲩⲃⲱⲕ ⲁⲩⲡⲁϩⲧⲟⲩ ⲉϫⲙ ⲡⲥⲱⲙⲁ ⲙⲡⲡⲉⲧⲟⲩⲁⲁⲃ ⲉⲩⲣⲁϣⲉⲭ ⲁⲩⲱ ⲁⲡϣⲏⲣⲉ ϣⲏⲙ ⲙⲟⲩϣⲧ ⲙⲡⲕⲱⲧⲉ ⲙⲡⲙⲁ ⲛⲛⲕⲟⲧⲕ ⲁϥϭⲓⲛⲉ ⲙⲡⲣⲱⲙⲉ ⲙⲙⲁⲅⲟⲥ ⲉϥⲥⲟⲛϩ ⲉϩⲟⲩⲛ ⲉⲡⲙⲁ ⲛⲛⲕⲟⲧⲕ ⲙⲡⲡⲉⲧⲟⲩⲁⲁⲃ ⲛⲑⲉ ⲛⲟⲩϩⲟⲣ ⲉϥⲕⲱ ⲛⲣⲱϥ ⲛϥϣⲁϫⲉ ⲁⲛ ⲁⲩⲱ ⲛⲧⲉⲣⲉϥⲛⲁⲩ ⲉⲡϩⲉⲣϣⲓⲣⲉ ⲁϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉ ⲟⲩⲟⲓ ⲛⲁⲓ ⲡⲁϫⲟⲉⲓⲥ ⲛⲥⲟⲛⲭ ⲁⲙⲟⲩ ⲛⲅⲛⲁⲩ ⲉⲡⲁⲑⲃⲃⲓⲟ ⲙⲛ ⲡⲁⲛⲟϭ ⲛϩⲓⲥⲉⲭ ⲉⲃⲟⲗ ϫⲉ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲓ ⲁϥϯ ⲛⲟⲩⲭⲁⲙⲟⲥ ⲉⲣⲱⲓ ⲁϥⲉⲓⲛⲉ ⲙⲙⲟⲓ ⲉⲓⲥⲟⲛϩ ⲁϥⲙⲟⲣⲧ ⲉϩⲟⲩⲛ ⲉⲡⲉⲓⲙⲁ ⲛⲛⲕⲟⲧⲕ ⲉⲩϣⲓⲡⲉ ⲛⲁⲓ ⲛⲧⲉⲩⲛⲟⲩ ⲁϥⲱϣ ⲉⲃⲟⲗ ⲉⲡⲉϩⲟⲩⲟ ⲛϭⲓ ⲡⲙⲁⲅⲟⲥ ⲉϥϫⲱ ⲙⲙⲟⲥ ϫⲉ ⲃⲟⲏⲑⲉⲓ ⲉⲣⲟⲓ ⲱ ⲡⲁⲥⲟⲛⲭ ϫⲉ ⲛϩⲟⲥⲟⲛ ⲉⲓϣⲁϫⲉ ⲛⲙⲙⲁⲕ ⲉⲓⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲉⲓ ⲁϥϯ ⲛⲟⲩϣⲥⲛⲁⲁⲥ ⲉϩⲟⲩⲛ ϩⲙ ⲡⲁϩⲟⲭ ⲁⲓⲁⲥⲭⲩⲙⲟⲛⲉⲓ ⲉⲙⲁⲧⲉⲭ ⲡⲉϫⲁϥ ⲛⲁⲓ ϫⲉ ⲟⲩⲙⲩⲥⲧⲏⲣⲓⲟⲛ ⲙⲡⲟⲩⲧⲁⲙⲟⲕ ⲉⲧⲃⲏⲏⲧϥ ϫⲉ ⲟⲩⲟⲛϩϥ ⲉⲃⲟⲗⲭ ⲉⲧⲃⲉ ⲟⲩ ⲁⲕϣⲓⲛⲉ ⲛⲥⲁ ⲟⲩⲟⲛϩϥ ⲉⲃⲟⲗ ⲁⲩⲱ ⲛⲧⲉⲩⲛⲟⲩ ⲉⲓⲥ ⲟⲩⲇⲁⲓⲙⲟⲛⲓⲟⲛ ⲁϥⲃⲱϭⲉ ⲉϫⲙ ⲡⲣⲱⲙⲉ ⲙⲙⲁⲅⲟⲥ ⲁϥⲣⲁϩⲧϥ ⲉⲡⲕⲁϩ ⲁϥϩⲓⲧⲉ ⲙⲙⲟϥ ⲁⲩⲱ ⲛⲉϥⲱϣ ⲉⲃⲟⲗ ϫⲉ ⲕⲁⲁⲧ ⲉⲣⲟϥ ⲛⲧⲁⲡⲁⲓⲇⲉⲩⲉ ⲙⲙⲟϥⲭ ⲱ ⲡϩⲁⲅⲓⲟⲥ ⲙⲉⲣⲕⲟⲱ ⲟⲩⲏⲣ ⲛⲉ ⲛⲉⲃⲗⲁⲥⲫⲩⲙⲓⲁ ⲛⲧⲁ ⲡⲁⲓ ϫⲟⲟⲩ ⲉⲡⲛⲟⲩⲧⲉ ⲛⲧⲁϥⲧⲁⲙⲓⲟϥ
53. ⲁⲩⲱ ⲉⲓⲥ ⲕⲉⲥϩⲓⲙⲉ ⲟⲛ ⲉⲥⲁϩⲉⲣⲁⲧⲥ ϩⲁⲧⲙ ⲡⲥⲱⲙⲁ ⲙⲡⲙⲁⲣⲧⲩⲣⲟⲥ ⲁⲩⲇⲁⲓⲙⲟⲛⲓⲟⲛ ⲣⲁϩⲧⲥ ⲁϥϩⲓⲧⲉ ⲙⲙⲟⲥ ⲁⲩⲱ ⲛⲧⲉⲣⲟⲩⲕⲁ ⲧⲥⲩⲛⲁⲝⲓⲥ ⲉⲃⲟⲗ ⲁⲡⲙⲏⲏϣⲉ ⲧⲏⲣϥ ⲥⲱⲟⲩϩ ⲉⲛⲁⲩ ⲉⲑⲉ ⲛⲧⲁ ⲡⲙⲁⲣⲧⲩⲣⲟⲥ ϩⲉⲃⲣⲓⲍⲉ ⲛⲛⲇⲁⲓⲙⲟⲛⲓⲟⲛ ⲁⲩⲱ ⲁⲡⲁⲣⲭⲱⲛ ⲉⲓ ϩⲱⲱϥ ⲁϥϩⲙⲟⲟⲥ ⲁⲧⲉⲥϩⲓⲙⲉ ⲉⲧⲟ ⲛⲇⲁⲓⲙⲟⲛⲓⲟⲛ ⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉ ⲱ ϩⲉⲣⲙⲁⲡⲟⲗⲗⲱⲛ ⲙⲛ ⲧⲉϥⲥϩⲓⲙⲉⲭ ⲙⲡⲉⲣⲉⲣ ⲗⲁⲁⲩ ⲙⲡⲉⲑⲟⲟⲩ ⲙⲡⲓⲣⲱⲙⲉ ⲙⲙⲁⲅⲟⲥⲭ ⲉⲃⲟⲗ ϫⲉ ⲛⲧⲟϥ ⲡⲉⲛⲧⲁϥⲙⲁⲅⲉⲩⲉ ⲛⲧⲉⲕϣⲉⲉⲣⲉ ⲁⲩⲱ ⲟⲛ ϯ ⲛⲧⲉⲕϣⲉⲉⲣⲉ ⲙⲡⲉⲓϩⲉⲣϣⲓⲣⲉ ⲕⲁⲧⲁ ⲑⲉ ⲛⲧⲁⲓⲧⲁⲙⲟⲕ ϩⲙ ⲡϩⲟⲣⲟⲙⲁ ⲁⲩⲱ ⲉⲓⲥ ϩⲏⲏⲧⲉ ⲁⲓⲭⲁⲣⲓⲍⲉ ⲙⲡⲧⲁⲗϭⲟ ⲛⲧⲉⲕϣⲉⲉⲣⲉ ⲁⲩⲱ ⲙⲡⲉⲣⲉⲣ ⲁⲙⲉⲗⲏⲥ ⲉⲁⲓ ϩⲱⲛ ⲛⲧⲉⲕϣⲉⲉⲣⲉⲭ ⲉⲧⲃⲉ ⲡⲧⲱϣ ⲙⲡϣⲟⲙⲛⲧ ⲛⲉⲃⲟⲧ ⲉⲧⲉ ⲟⲩⲛⲧⲁϥⲥⲟⲩ ⲙⲡⲉϥⲉⲓⲱⲧ ⲁⲩⲱ ⲙⲛⲛⲥⲁ ⲛⲁⲓ ⲡⲉⲕϩⲏⲧ ⲛⲁⲙⲧⲟⲛ ⲧⲉϥⲥϩⲓⲙⲉ ⲇⲉ ⲁⲡⲉⲥϩⲏⲧ ⲥⲱⲣⲙ ⲉⲃⲟⲗ ⲉⲧⲃⲉ ⲛⲉⲧⲉⲥⲥⲱⲧⲙ ⲉⲣⲟⲟⲩ ⲁⲩⲱ ⲁⲧⲉⲥϣⲉⲉⲣⲉ ⲉⲙⲧⲟⲛ ⲛⲧⲉⲩⲛⲟⲩ ⲉⲃⲟⲗ ϩⲛ ⲧⲉⲥⲃⲁⲥⲁⲛⲟⲥ ϩⲱⲥ ⲉϣϫⲉ ⲙⲡⲉⲥϣⲱⲛⲉ ⲉⲛⲉϩ ⲁⲩⲱ ⲡⲉϫⲁⲥ ⲙⲡⲣⲱⲙⲉ ⲉⲧⲟ ⲙⲙⲁⲅⲟⲥ ⲛϭⲓ ⲧⲉⲥϩⲓⲙⲉ ⲉⲧⲉⲣⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϣⲁϫⲉ ⲉⲃⲟⲗ ⲛϩⲏⲧⲥ ϫⲉ ϫⲓⲛ ⲧⲉⲛⲟⲩ ⲛⲛⲉⲕⲟⲩⲱϩ ⲙⲛ ⲣⲱⲙⲉ ⲁⲗⲗⲁ ⲉⲕⲉⲃⲱⲕ ⲉⲛⲧⲟⲩⲓⲏ ⲛⲅϣⲱⲡⲉ ⲙⲙⲟⲟⲩ ⲉⲕⲁⲥⲕⲉⲓ ϣⲁ ⲡⲉϩⲟⲟⲩ ⲙⲡⲉⲕⲙⲟⲩ ⲁⲩⲱ ⲁϥⲉⲡⲓⲧⲓⲙⲁ ⲙⲡⲉⲡⲛⲁ ⲉⲧⲉⲛϩⲏⲧϥ ⲁϥⲛⲟϫϥ ⲉⲃⲟⲗⲭ ⲁⲧⲉϥϩⲟⲣⲁⲥⲓⲥ ⲥⲙⲓⲛⲉ ⲕⲁⲗⲱⲥ ⲛⲧⲟϥ ⲇⲉ ϩⲱⲱϥ ⲁϥⲃⲱⲕ ⲉⲧⲉⲣⲏⲙⲟⲥ ⲁϥⲁⲛⲁⲕⲱⲣⲉⲓ ϣⲁ ⲡⲉϩⲟⲟⲩ ⲙⲡⲉϥⲙⲟⲩ
54. ⲁⲩⲱ ⲛⲧⲉⲣⲉ ⲡⲉϩⲟⲟⲩ ⲙⲡϣⲁ ⲟⲩⲉⲓⲛⲉ ⲁϩⲉⲣⲙⲁⲡⲟⲗⲗⲱⲛ ⲁⲗⲉ ⲉⲛⲉⲧⲃⲛⲟⲟⲩⲉ ⲙⲛ ⲧⲉϥⲥϩⲓⲙⲉ ⲙⲛ ⲧⲉϥϣⲉⲉⲣⲉ ⲁⲩⲃⲱⲕ ⲉⲡⲉⲩⲏⲓ ϩⲛ ⲟⲩⲉⲓⲣⲏⲛⲏ ⲁⲩⲱ ⲡϩⲉⲣϣⲓⲣⲉ ⲙⲛ ⲛⲉϥϩⲙϩⲁⲗ ⲁⲩⲃⲱⲕ ϩⲱⲟⲩ ⲉⲧⲉⲩⲡⲟⲗⲓⲥ ⲁⲩⲱ ⲁⲡⲁⲣⲭⲱⲛ ϫⲱ ⲉⲧⲉϥⲥϩⲓⲙⲉ ⲛϣⲁϫⲉ ⲛⲓⲙⲛⲧⲁ ⲡⲡⲉⲧⲟⲩⲁⲁⲃ ϫⲟⲟⲩⲛⲁϥ ϩⲙ ⲡϩⲟⲣⲟⲙⲁ ⲁⲩⲱⲛⲧⲉⲣⲉⲥⲉⲓⲙⲉ ϫⲉ ⲕⲁⲧⲁ ⲑⲉ ⲛⲧⲁ ⲡⲁⲣⲭⲱⲛ ϫⲱ ⲉⲣⲟⲥ ⲙⲡϩⲟⲣⲟⲙⲁ ⲧⲁⲓ ⲧⲉ ⲑⲉ ⲛⲧⲁ ⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ϫⲟⲟⲥ ϩⲛ ⲧⲧⲁⲡⲣⲟ ⲛⲧⲉⲥϩⲓⲙⲉ ⲉⲧⲟ ⲛⲇⲉⲙⲟⲛⲓⲟⲛ ⲉⲣⲉ ⲡⲗⲁⲟⲥ ⲧⲏⲣϥ ⲥⲱⲧⲙⲭ ⲁⲥⲣⲁϣⲉ ⲉⲙⲁⲧⲉ ⲁⲩⲱ ⲁⲩⲟⲩⲛⲟϭ ⲛⲧⲱⲧ ⲛϩ:ⲧ ⲉⲓ ⲉⲧⲉⲩⲙⲏⲧⲉ ⲁⲩⲧⲛⲛⲟⲟⲩ ⲁⲩⲙⲟⲩⲧⲉ ⲉⲡϩⲉⲣϣⲓⲣⲉ ⲁⲩⲟⲩⲱⲙ ⲁⲩⲱ ⲁⲩⲥⲱ ⲛⲙⲙⲁϥ ⲁⲩⲧⲁⲙⲟϥ ϫⲉ ϥⲓ ⲡⲉⲕⲣⲟⲟⲩϣ ⲛⲧⲉⲛⲉⲓⲣⲉ ⲛⲧϣⲉⲗⲉⲉⲧ ⲕⲁⲧⲁ ⲡϣⲁϫⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲩⲱ ⲛⲧⲉⲣⲉϥⲥⲱⲧⲙ ⲛϭⲓ ⲡϣⲏⲣⲉ ϣⲏⲙ ⲁϥⲣⲁϣⲉ ⲉⲙⲁⲧⲉ ⲁⲩⲱ ⲛⲧⲉⲣⲉ ⲡⲇⲓⲡⲛⲟⲛ ⲁⲱⲕ ⲉⲃⲟⲗ ⲁⲡϩⲉⲣϣⲓⲣⲉ ⲃⲱⲕ ⲉⲡⲉϥⲏⲓ ⲁϥϫⲉ ϩⲱⲃ ⲛⲓⲙ ⲛⲧⲁⲩϣⲱⲡⲉ ⲉⲡⲉϥⲓⲱⲧ ⲁⲩⲱ ⲁⲡⲉϥⲉⲓⲱⲧ ϩⲱⲱϥ ⲟⲛ ⲣⲁϣⲉ ⲉⲡⲉϩⲟⲩⲟ
55. ϣⲱⲣⲡ ⲇⲉ ⲛⲧⲉⲣⲉϥϣⲱⲡⲉ ⲁⲡⲉⲓⲱⲧ ⲙⲡϣⲏⲣⲉ ϣⲏⲙ ⲥⲱⲟⲩϩ ⲛⲛⲉⲛⲟϭ ⲧⲏⲣⲟⲩ ⲛⲧⲡⲟⲗⲓⲥ ⲙⲛ ⲛⲉⲡⲗⲟⲩⲥⲓⲟⲥ ⲁⲩⲉⲓ ⲉⲣⲙ ⲡⲣⲟ ⲙⲡⲏⲓ ⲛϩⲉⲣⲙⲁⲡⲟⲗⲗⲱⲛ ⲁⲩϣⲁϫⲉ ⲛⲙⲙⲁϥ ⲉⲧⲃⲉ ⲧⲉϥϣⲉⲉⲣⲉ ⲁⲩⲱ ⲁⲩⲧⲱⲧ ⲛϩⲏⲧ ⲙⲛ ⲛⲉⲩⲉⲣⲏⲩ ⲁⲩⲱ ⲁⲩϯ ⲛⲁⲥ ⲛⲟⲩⲙⲏⲏϣⲉ ⲛⲛⲟⲩⲃ ϩⲓ ϩⲁⲧ ⲙⲛ ϩⲉⲛϩⲙϩⲁⲗ ⲛϩⲟⲟⲩⲧ ϩⲓ ⲥϩⲓⲙⲉ ⲁⲩⲱ ϩⲉⲛⲕⲟⲥⲙⲏⲥⲓⲥ ⲉⲛⲁϣⲱⲟⲩ ⲙⲛ ϩⲉⲛϭⲓⲛⲟⲩⲏⲗ ⲉⲩⲡⲗⲉⲁ ϩⲛ ⲑⲁⲗⲁⲥⲥⲁ ⲁⲩⲱ ⲁⲩⲉⲓⲛⲉ ⲛϩⲉⲛⲇⲓⲙⲟⲧⲏⲥ ⲙⲛ ϩⲉⲛⲕⲟⲩⲃⲓⲛⲁⲧⲱⲣⲙⲛ ϩⲉⲛⲙⲓⲙⲙⲁⲣⲓⲟⲛ ⲙⲛ ϩⲉⲛϣⲟⲉⲓϫ ⲁⲩⲉⲓⲣⲉ ⲙⲡϫⲓϩⲱⲛ ⲛⲧϣⲉⲗⲉⲉⲧ ϩⲛ ⲟⲩⲛⲟϭ ⲙⲙⲛⲧⲗⲁⲙⲡⲣⲟⲥ ⲁⲩⲱ ⲙⲛⲛⲥⲁ ⲕⲉϩⲉⲃⲇⲟⲙⲁⲥ ⲁⲩⲧⲱϩⲙ ⲛⲟⲩⲙⲏⲏϣⲉ ⲙⲡⲗⲟⲩⲥⲓⲟⲥ ⲙⲛ ⲟⲩⲙⲏⲏϣⲉ ⲛⲁⲣⲭⲱⲛ ⲁⲩⲉⲓⲣⲉ ⲛⲧϣⲉⲗⲉⲉⲧ ϩⲛ ⲟⲩⲛⲟϭ ⲙⲙⲛⲧⲉⲡⲓⲕⲏⲥⲭ ⲁⲩⲱ ⲁϥⲣⲁϣⲉ ⲉⲙⲁⲧⲉ ⲛϭⲓ ⲡϣⲏⲣⲉ ϣⲏⲙ ⲁⲩⲱ ⲙⲡϩⲟⲩⲛ ⲙⲡϣⲟⲙⲛⲧ ⲛⲉⲃⲟⲧ ⲁϥⲙⲟⲩ ⲛϭⲓ ⲡⲉⲓⲱⲧ ⲙⲡϣⲏⲣⲉ ϣⲏⲙ ϩⲛ ⲟⲩⲙⲛⲧϩⲗⲗⲟ ⲉⲥⲕⲓⲱⲟⲩⲭ ⲕⲁⲧⲁ ⲡϣⲁϫⲉ ⲛⲧⲁ ⲡⲡⲉⲧⲟⲩⲁⲁⲃ ϫⲟⲟϥ ⲙⲡⲉⲓⲱⲧ ⲛⲧϣⲉⲉⲣⲉ ϣⲏⲙ ⲁⲩⲱ ⲛⲧⲉⲣⲉ ⲛⲉϩⲟⲟⲩ ⲙⲡϩⲏⲏⲃⲉ ϫⲱⲕ ⲉⲃⲟⲗ ⲁⲡϩⲉⲣϣⲓⲣⲉ ϫⲓ ⲙⲡⲉϥⲛⲟⲩⲃ ⲙⲛ ⲡⲉϥϩⲁⲧ ⲙⲛ ⲧⲉϥⲁⲡⲟⲥⲕⲏⲩⲉ ⲧⲏⲣⲥ ⲙⲛ ⲛⲉϥϩⲙϩⲁⲗ ⲁϥⲛⲧⲟⲩ ⲉⲡⲏⲓ ⲙⲡⲉϥϣⲟⲙ ⲁⲩⲱ ⲁⲩϭⲱ ⲙⲛ ⲛⲉⲩⲉⲣⲏⲩ ϣⲁ ⲡⲉϩⲟⲟⲩ ⲙⲡⲉⲩⲙⲟⲩ ⲁⲩⲱ ⲛⲉⲩⲛⲏⲩ ⲧⲉⲣⲟⲙⲡⲉ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲙ ⲡⲉϩⲟⲟⲩ ⲙⲡⲉϥϣⲁ ⲉⲧⲟⲩⲁⲁⲃ ⲉⲩϣⲗⲏⲗ ⲁⲩⲱ ⲉⲩⲭⲁⲣⲓⲥⲧⲉⲓ ⲛⲧⲟⲟⲧϥ ⲙⲡⲛⲟⲩⲧⲉ ⲡⲁⲓ ⲉⲧⲉⲓⲣⲉ ⲛⲉⲓϭⲟⲙ ⲙⲛ ⲛⲉⲓϣⲡⲏⲣⲉ ⲉⲃⲟⲗ ϩⲓⲧⲙ ⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥⲭ ⲛϣⲁ ⲉⲛⲉϩ ⲛⲉⲛⲉϩ ϩⲁⲙⲏⲛ
56. ⲁⲧⲉⲧⲛⲛⲁⲩ ⲧⲉⲛⲟⲩ ⲱ ⲛⲁⲙⲉⲣⲁⲧⲉ ⲉⲛⲉⲓⲛⲟϭ ⲛϩⲙⲟⲧ ⲉⲧⲉⲣⲉ ⲡⲛⲟⲩⲧⲉ ⲉⲓⲣⲉ ⲙⲙⲟⲟⲩ ⲙⲛ ⲛⲉϥⲥⲱⲧⲡ ⲕⲁⲧⲁ ⲕⲁⲓⲣⲟⲥ ⲛⲉⲓⲟⲩⲱϣ ⲙⲉⲛ ⲡⲉ ⲉϫⲱ ⲉⲣⲱⲧⲛ ⲡⲉ ⲛϩⲉⲛⲕⲉⲁϣⲏ ⲛϭⲟⲙ ϩⲓ ϣⲡⲏⲣⲉ ⲉⲁⲡⲛⲟⲩⲧⲉ ⲉⲛⲉⲣⲅⲉⲓ ⲙⲙⲟⲟⲩ ϩⲓⲧⲙ ⲡⲉϥⲙⲁⲣⲧⲩⲣⲟⲥ ⲛϫⲱⲱⲣⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲗⲗⲁ ϯⲥⲟⲟⲩⲛ ϫⲉ ⲙⲛϣ ϭⲟⲙ ⲛⲗⲁⲁⲩ ⲉϭⲙ ⲡϫⲱⲕ ⲛⲛϭⲟⲙ ⲛⲛⲉⲧⲟⲩⲁⲁⲃ ⲁⲩⲱ ϫⲉ ⲛⲁⲛⲟⲩ ⲡϣⲓ ϩⲛ ϩⲱⲃ ⲛⲓⲙ ⲱ ⲛⲁⲓⲁⲧⲟⲩ ⲛⲛⲉⲧⲛⲁⲱϣ ⲛⲛϩⲓⲥⲉ ⲛⲙⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲙⲛ ⲛⲉⲧⲛⲁⲥⲱⲧⲙ ⲉⲣⲟⲟⲩ ϩⲛ ⲟⲩⲡⲓⲥⲧⲓⲥ ⲛⲥⲉⲧⲙⲉⲣ ⲁⲡⲓⲥⲧⲟⲥ ⲉⲣⲟⲟⲩ ⲛϭⲓ ⲛⲉⲧⲛⲁⲥⲟⲧⲙⲟⲩⲭ ⲁⲗⲗⲁ ⲛⲥⲉⲡⲓⲥⲧⲉⲩⲉ ⲉⲣⲟⲟⲩ ϩⲙ ⲡⲉⲩϩⲏⲧ ⲧⲏⲣϥ ⲁⲩⲱ ⲛⲥⲉⲉⲓⲣⲉ ⲕⲁⲧⲁ ⲛⲕⲁⲛⲟⲛ ⲛⲛⲉⲛⲉⲓⲟⲧⲉ ⲉⲧⲟⲩⲁⲁⲃ ⲛⲁⲡⲟⲥⲧⲟⲗⲟⲥ ⲛϣⲟⲣⲡ ⲙⲉⲛ ⲙⲁⲣⲉ ⲛⲉⲡⲣⲉⲥⲃⲩⲧⲉⲣⲟⲥ ⲙⲛ ⲛⲇⲓⲁⲕⲟⲛⲟⲥ ⲧⲃⲃⲟⲟⲩ ⲕⲁⲗⲱⲥ ⲉⲃⲟⲗ ϩⲛ ⲛⲟⲃⲉ ⲛⲓⲙ ⲙⲡⲁⲧⲟⲩⲃⲱⲕ ⲉϩⲣⲁⲓ ⲉϫⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲉⲧⲟⲩⲁⲁⲃ ⲙⲡⲛⲟⲩⲧⲉⲭ ϫⲉ ⲛⲛⲉ ⲡⲕⲱϩⲧ ⲛⲧⲙⲉⲛⲧⲛⲟⲩⲧⲉ ⲣⲟⲕϩⲟⲩⲭ ⲛⲉⲡⲣⲉⲥⲃⲩⲧⲉⲣⲟⲥ ⲙⲉⲛ ⲉⲩϭⲟⲟⲗⲉ ⲛⲛⲉⲩⲫⲩⲗⲟⲛⲓⲟⲥ ⲛⲥⲟⲣⲧⲭ ⲛⲇⲓⲁⲕⲟⲛⲟⲥ ⲇⲉ ϩⲱⲟⲩ ⲉⲩϭⲁⲗⲉ ⲛϩⲉⲛⲉⲡⲱⲙⲓⲥ ⲛⲉⲓⲁⲁⲩ ⲛⲁⲛⲁⲅⲛⲟⲥⲧⲏⲥ ⲇⲉ ⲟⲛ ⲙⲁⲣⲟⲩⲉⲍⲩⲭⲁⲥⲉ ⲙⲙⲟⲟⲩ ⲛⲥⲉⲁⲡⲟⲥⲑⲩⲧⲏⲍⲉ ⲛⲛⲉⲅⲣⲁⲫⲏ ⲉⲧⲟⲩⲁⲁⲃⲭ ⲛⲉⲫⲓⲗⲟⲡⲟⲛⲟⲥ ⲇⲉ ⲟⲛ ⲉⲧⲣⲉⲩϣⲱⲡⲉ ⲉⲩⲙⲏⲣ ⲉϩⲟⲩⲛ ⲉⲛⲥⲩⲛⲁⲝⲓⲥ ⲛⲧⲉⲕⲕⲗⲏⲥⲓⲁ ⲛϩⲧⲟⲟⲩⲉ ⲙⲛ ⲣⲟⲩϩⲉ ⲙⲙⲏⲛⲉⲭ ⲡⲗⲁⲟⲥ ⲇⲉ ϩⲱⲱϥ ⲛⲥⲉⲥⲱⲧⲙ ⲛⲥⲁ ⲛⲉⲧⲟⲩⲱϣ ⲙⲙⲟⲟⲩ ⲉⲣⲟⲟⲩ ϩⲛ ⲧⲉⲕⲕⲗⲏⲥⲓⲁ ⲛⲥⲉⲁⲁⲩⲭ ⲛⲉϩⲓⲟⲙⲉ ⲇⲉ ⲟⲛ ⲉⲣⲉ ϫⲱⲟⲩ ϩⲟⲃⲥ ⲉⲩϣⲟⲟⲡ ϩⲛ ⲟⲩⲉⲡⲓⲥⲧⲏⲙⲉⲓ ϩⲁⲡⲁⲝ ϩⲁⲡⲗⲱⲥ ⲉⲩⲧⲥⲁⲛⲏⲩ ⲧⲏⲣⲟⲩ ⲡⲟⲩⲁ ⲡⲟⲩⲁ ⲕⲁⲧⲁ ⲡⲉϥϩⲱⲃⲭ ϫⲉⲕⲁⲥ ϩⲙ ⲡⲧⲣⲉⲛⲙⲟⲟϣⲉ ⲛⲧⲉⲓϩⲉ ϩⲛ ⲟⲩⲧⲃⲃⲟ ⲙⲛ ⲟⲩⲙⲛⲧⲁⲧⲛⲟⲃⲉ ⲙⲛ ⲟⲩⲙⲛⲧⲙⲁⲓⲛⲉⲛⲉⲣⲏⲩ ϩⲛ ⲟⲩⲁⲅⲁⲡⲏ ⲁϫⲛ ϩⲩⲡⲟⲕⲣⲓⲛⲉ ⲙⲛ ⲡⲕⲉⲥⲉⲉⲡⲉ ⲛⲛⲁⲣⲉⲧⲏ ⲛⲧⲡⲓⲥⲧⲓⲥⲭ ⲉⲛⲛⲁϣⲱⲡⲉ ⲛϣⲏⲣⲉ ⲛⲛⲉⲧⲟⲩⲁⲁⲃ ⲁⲩⲱ ⲛⲧⲉⲛⲕⲗⲏⲣⲟⲛⲟⲙⲉⲓ ⲛⲙⲙⲁⲩ ⲛⲛⲁⲅⲁⲑⲟⲛ ⲉⲧⲉ ⲙⲉⲩϣⲱⲱⲧ ⲉⲛⲉϩ ϩⲛ ⲧⲙⲛⲧⲉⲣⲟ ⲙⲡⲉⲛϫⲟⲉⲓⲥ ⲓⲥ ⲡⲉⲭⲥ ⲡⲉⲛⲥⲱⲧⲏⲣ ϩⲓⲧⲛ ⲛⲉⲥⲟⲡⲥ ⲙⲛ ⲛⲉⲡⲣⲉⲥⲃⲓⲁ ⲙⲡⲁⲑⲗⲟⲫⲟⲣⲟⲥ ⲙⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲁⲩⲱ ⲡⲉⲥⲧⲣⲁⲧⲉⲗⲁⲧⲏⲥ ⲉⲧⲧⲁⲓⲏⲩ ⲙⲡⲉⲭⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲁⲓ ⲉⲧⲉⲛⲉⲣϣⲁ ⲛⲁϥ ⲙⲡⲟⲟⲩⲭ ϩⲓⲧⲛ ⲧⲉⲭⲁⲣⲓⲥ ⲙⲛ ⲧⲙⲛⲧⲙⲁⲓⲣⲱⲙⲉ ⲙⲡⲉⲛϫⲟⲉⲓⲥ ⲁⲩⲱ ⲡⲉⲛⲛⲟⲩⲧⲉ ⲡⲉⲛⲥⲱⲧⲏⲣ ⲓⲥ ⲡⲉⲭⲥ ⲡⲁⲓ ⲡⲉⲟⲟⲩ ⲛⲁϥ ⲙⲛ ⲡⲧⲁⲓⲟ ⲙⲛ ⲡⲁⲙⲁϩⲧⲉ ⲙⲛ ⲡⲉϥⲉⲓⲱⲧ ⲛⲁⲅⲁⲑⲟⲥ ⲙⲛ ⲡⲉⲡⲛⲁ ⲉⲧⲟⲩⲁⲁⲃ ⲛⲣⲉϥⲧⲁⲛϩⲟ ⲁⲩⲱ ⲛϩⲟⲙⲟⲟⲩⲥⲓⲟⲛ ⲧⲉⲛⲟⲩ ⲁⲩⲱ ⲛⲟⲩⲟⲉⲓϣ ⲛⲓⲙ ϣⲁ ⲉⲛⲉϩ ⲛⲉⲛⲉϩ ϩⲁⲙⲏⲛ
ϩⲟⲙⲁⲓⲟⲥ ⲡⲙⲉϩⲥⲛⲁⲩ ⲛⲉⲅⲕⲱⲙⲓⲟⲛ ⲉⲁϥⲧⲁⲩⲟϥ ⲛϭⲓ ⲡⲛⲟϭ ⲃⲁⲥⲓⲗⲓⲟⲥ ⲡⲉⲡⲓⲥⲕⲟⲡⲟⲥ ⲛⲧⲕⲁⲓⲥⲁⲣⲓⲁ ⲛⲧⲕⲁⲡⲡⲁⲇⲱⲕⲓⲁ ⲉⲡⲁⲑⲗⲟⲫⲟⲣⲟⲥ ⲉⲧⲥⲙⲁⲙⲁⲁⲧ ⲁⲩⲱ ⲡⲙⲁⲣⲧⲩⲣⲟⲥ ⲉⲧⲧⲁⲓⲏⲩ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲙ ⲡⲉϩⲟⲟⲩ ⲙⲡⲉϥⲣⲡⲙⲉⲉⲩⲉ ⲉⲧⲟⲩⲁⲁⲃ ⲉⲧⲉ ⲥⲟⲩϫⲟⲩⲧⲏ ⲡⲉ ⲙⲡⲉⲃⲟⲧ ϩⲁⲑⲱⲣ ϩⲛ ⲟⲩⲉⲓⲣⲏⲛⲏ ⲛⲧⲉ ⲡⲛⲟⲩⲧⲉ ϩⲁⲙⲏⲛ
ⲙ̅ⲛ̅ⲧ̅ⲉⲧϩⲁⲑⲏⲛ ⲙⲉⲛ ⲛⲥⲁϥ ⲁⲩⲧⲉⲣⲡⲉⲥⲑⲉ ⲙⲙⲟⲛ ⲉⲙⲁⲧⲉ ϯⲙⲉⲉⲩⲉ ⲅⲁⲣ ϫⲉ ⲁⲩⲥⲉⲓ ⲉⲃⲟⲗ ϩⲛ ⲛⲁⲅⲁⲑⲟⲛ ⲛⲧⲉⲧⲣⲁⲡⲉⲍⲁ ⲙⲡⲛⲓⲕⲏ ⲉⲧⲕⲏ ϩⲁⲣⲱⲛ ⲉⲁⲩϯϩⲉ ϩⲙⲡϯϩⲉ ⲙⲡⲏⲣⲡ ⲙⲡⲛⲓⲕⲟⲛ ⲟⲩ ⲅⲁⲣ ⲡⲉⲧⲟ ⲛⲛⲟϭ ⲉⲡϣⲁϫⲉ ⲙ̅ⲡϫⲟⲉⲓⲥ ⲕⲁⲧⲁ ⲡⲉⲧⲥⲏϩ ϫⲉ ⲁⲛⲉⲕϣⲁϫⲉ ϩⲗⲟϭ ϩⲛ ⲧⲁϣⲟⲩⲱⲃⲉ ⲉϩⲟⲩⲉ ⲟⲩⲉⲃⲓⲱ ϩⲛ ⲣⲱⲓ
ⲡⲁⲛⲧⲟⲥ ⲛⲧⲉⲧⲛⲟ ⲁⲛ ⲛⲁⲧⲥⲟⲟⲩⲛ ϫⲉ ⲛⲧⲁⲛⲕⲁ ⲡϣⲁϫⲉ ⲧⲱⲛ ⲛⲥⲁϥ ⲉⲧⲃⲉ ⲡⲉϩⲟⲩⲟ ⲙⲡⲙⲏⲏϣⲉ ⲛⲧⲁϥϣⲟⲩⲉⲟ ⲉϫⲱⲛ ⲉⲥⲱⲧⲙ ⲉⲡϣⲁϫⲉ ⲙⲡⲛⲟⲩⲧⲉ ⲉⲁⲡϣⲁϫⲉ ⲛⲧⲁ ⲡⲉⲩⲁⲅⲅⲉⲗⲓⲥⲧⲏⲥ ⲉⲣⲏⲧ ⲙⲙⲟϥ ⲛⲁⲛ ϫⲱⲕ ⲉⲃⲟⲗ ϫⲉ ϩⲙ ⲡⲧⲣⲉ ⲛⲉⲧⲃⲁ ⲙⲙⲏⲏϣⲉ ⲥⲱⲟⲩϩ ϩⲱⲥⲧⲉ ⲛⲥⲉϩⲉ ⲙⲛ ⲛⲉⲩⲉⲣⲏⲩ ⲁϥⲁⲣⲭⲉⲓ ⲛϣⲁϫⲉ ⲙⲛ ⲛⲉϥⲙⲁⲑⲏⲧⲏⲥ ⲛϣⲟⲣⲡ ϫⲉ ϩⲁⲣⲉϩ ⲉⲣⲱⲧⲛ ⲉⲡⲉⲑⲁⲃ ⲉⲧⲉ ⲧⲁⲓ ⲧⲉ ⲧϩⲩⲡⲟⲕⲣⲩⲥⲓⲥ ⲛⲛⲉⲫⲁⲣⲓⲥⲥⲁⲓⲟⲥ
ⲁⲕⲛⲁⲩ ⲉⲑⲩⲡⲟⲕⲣⲩⲥⲓⲥ ϫⲉ ⲟⲩⲁϣ ⲙⲙⲓⲛⲉ ⲧⲉ ϣⲁⲣⲉ ⲑⲩⲡⲟⲕⲣⲩⲥⲓⲥ ⲅⲁⲣ ⲡⲣⲟⲧⲣⲉⲡⲉⲓ ⲙⲡⲣⲱⲙⲉ ⲉⲛⲁ ⲙⲙⲁⲧⲉ ⲛⲛⲉⲧⲛⲁⲧⲁⲓⲟϥ ⲁⲩⲱ ⲉⲣⲉ ⲡⲡⲉⲧⲛⲁⲛⲟⲩϥ ⲛⲛⲉⲧⲛⲁⲥⲙⲟⲩ ⲉⲣⲟϥ ⲙⲡⲉⲩⲁⲅⲅⲉⲗⲓⲟⲛ ⲅⲁⲣ ⲟⲩⲱⲉϥⲉⲣⲙⲛⲧⲣⲉ ϩⲁ ⲛⲁⲓ ⲛⲧⲉⲓⲙⲓⲛⲉ ϫⲉ ⲁⲩⲟⲩⲱ ⲉⲩϫⲓ ⲙⲡⲉⲩⲃⲉⲕⲏ ϯⲡⲁⲣⲁⲕⲁⲗⲉⲓ ⲇⲉ ⲙⲙⲱⲧⲛ ⲱ ⲛⲁⲥⲛⲏⲩ ⲛⲁⲙⲉⲣⲁⲧⲉ ⲙⲁⲣⲉ ⲡⲟⲩⲁⲡⲟⲩⲁ ⲙⲙⲱⲧⲛ ⲥⲡⲟⲩⲇⲁⲍⲉ ⲉⲡⲁⲣϩⲓⲥⲧⲁ ⲙⲡⲉϥⲥⲱⲙⲁ ⲛⲟⲩⲑⲩⲥⲓⲁ ⲉⲥⲟⲛϩ ⲉⲥⲟⲩⲁⲁⲃ ⲉⲥⲉⲣⲁⲛⲁϥ ⲙⲡⲛⲟⲩⲧⲉ ⲛⲧⲉⲧⲛⲧⲙϫⲓ ϩⲣⲃ ϩⲙ ⲡⲉⲓⲁⲓⲱⲛ
ⲛⲉϩⲃⲏⲩⲉ ⲅⲁⲣ ⲙⲡⲉⲓⲁⲓⲱ ̅ⲉⲩⲛⲑⲉ ⲛⲟⲩϩⲁⲓⲃⲥ ⲙⲛ ⲟⲩⲧⲩⲡⲟⲥ ⲙⲛ ϩⲉⲛϭⲓⲛⲟⲩⲱⲙ ⲙⲛ ϩⲉⲛϭⲓⲛⲥⲱ ⲙⲛ ⲛϩⲩⲇⲟⲛⲏ ⲙⲡⲃⲓⲟⲥ ⲉⲧⲉⲓⲉⲕⲉ ⲛϩⲏⲧⲟⲩ ⲙⲉⲕⲥⲉⲓ ⲙⲟⲟⲩ ⲉⲛⲉϩ ⲁⲗⲗⲁ ϣⲁⲕⲉⲡⲓⲑⲩⲙⲉⲓ ⲉⲣⲟⲟⲩ ⲛϩⲟⲩⲟ ⲉϣⲱⲡⲉ ⲇⲉ ⲉⲕϣⲁⲛⲙⲉⲥⲧⲉ ⲡⲛⲟⲃⲉ ⲁⲩⲱ ⲛⲅⲡⲱⲧ ⲉⲃⲟⲗ ⲙⲙⲟϥ ⲉⲧⲙⲕⲟⲧⲕ ⲉⲣⲟϥ ⲛⲕⲉⲥⲟⲡ ⲧⲟⲧⲉ ⲕⲛⲁⲛⲁⲩ ⲉⲧⲃⲟⲏⲑⲉⲓ ⲙⲡⲛⲟⲩⲧⲉ ⲉⲥⲥⲕⲩⲡⲁⲍⲉ ⲙⲙⲟⲕ ⲛϩⲟϩⲓϩⲟ ⲛⲉⲓⲟⲩⲱϣ ⲙⲉⲛ ⲁⲛ ⲡⲉ ⲉⲧⲣⲁϩⲱ ⲉⲣⲟⲓ ϩⲛ ⲛⲁⲓ
ⲁⲗⲗⲁ ϫⲉⲕⲁⲥ ⲛⲛⲉⲓⲧⲁϣⲉⲡϣⲁϫⲉ ⲉⲡⲉϩⲟⲩⲟ ⲛⲧⲁⲣ ⲡⲱⲃϣ ⲛⲛϭⲟⲙ ⲙ̅ⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲁⲓ ⲉⲧⲉⲛⲉⲣ ϣⲁ ⲛⲁϥ ⲙⲡⲟⲟⲩ ⲭⲟⲣⲏⲅⲉⲓ ⲛⲁⲛ ⲡⲉⲡ̅ⲛ̅ⲁ̅ⲉⲧⲟⲩⲁⲁⲃ ⲛⲧⲉⲛϫⲱ ⲉⲣⲱⲧⲛ ⲛϩⲉⲛⲕⲟⲩⲓ ⲉⲃⲟⲗ ϩⲛ ⲧⲁϣⲏ ⲛ̅ⲛϭⲟⲙ ⲙⲛ ⲛⲉϣⲡⲏⲣⲉ ⲛⲧⲁ ⲡⲛⲟⲩⲧⲉ ⲉⲛⲉⲣⲅⲉⲓ ⲙⲙⲟⲟⲩ ⲉⲃⲟⲗ ϩⲓⲧⲟⲟⲧϥ ⲙⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲁⲩⲱ ⲛⲥⲧⲣⲁⲧⲉⲗⲁⲧⲏⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲁⲓ ⲉⲧⲥⲱⲕ ⲙⲙⲟⲛ ϣⲁⲣⲟϥ ⲉϥⲡⲣⲟⲧⲣⲉⲡⲉⲓ ⲛⲛⲁⲕⲣⲟⲁⲧⲏⲥ ⲙⲙⲁⲓⲗⲟⲅⲟⲥ ⲉⲧⲣⲉⲩϣⲱⲡⲉⲣⲟⲟⲩ ⲙⲡϣⲁϫⲉ ϩⲛ ⲟⲩⲟⲩⲣⲟⲧ
ⲁϩⲉⲛⲛⲟϭ ⲅⲁⲣ ⲛϭⲟⲙ ⲙⲛ ϩⲉⲛⲧⲁⲗϭⲟ ϣⲱⲡⲉϩⲙ ⲡⲉϥⲙⲁⲣⲧⲩⲣⲓⲟⲛ ⲉⲧⲟⲩⲁⲁⲃ ⲛⲧⲉⲛⲛⲁϣ ϫⲓ ⲏⲡⲉⲙⲙⲟⲟⲩ ⲁⲛ ⲁⲩⲱ ϩⲟⲓⲛⲉⲛⲛⲉⲧⲉⲣⲉ ⲛⲉⲡ̅ⲛ̅ⲁ̅ⲛⲁⲕⲁⲑⲁⲣⲧⲟⲛ ϩⲓⲱⲟⲩ ⲁⲩⲱ ⲛⲉⲩⲱϣ ⲉⲃⲟⲗ ϩⲛ ⲟⲩⲛⲟϭ ⲛϩⲣⲟⲟⲩ ⲉⲩⲛϩⲩ ⲉⲃⲟⲗ ⲛϩⲏⲧⲟⲩ ⲁⲩⲱ ϩⲁϩ ⲟⲛ ⲉⲩⲥⲟⲣⲙ ϩⲛ ⲛⲉϩⲃⲏⲩⲉ ⲙⲡⲇⲓⲁⲃⲟⲗⲟⲥ ⲉⲩⲟ ⲛⲁϣϩⲏⲧ ⲉϣⲁϥⲓⲛⲉ ⲉϫⲱⲟⲩ ⲛϩⲉⲛⲙⲁⲥⲧⲓⲅⲝ ⲛϥⲡⲉⲇⲉⲩⲉ ⲙⲙⲟⲟⲩ ϩⲛϩⲉⲛⲃⲁⲥⲁⲛⲟⲥ ϣⲁⲛⲧⲉ ⲡⲉⲩϩⲏⲧ ⲕⲧⲟϥ ⲉⲩⲙⲉⲧⲁⲛⲟⲓⲁ ⲛⲥⲉϫⲓ ⲛⲁⲩ ⲛⲟⲩⲇⲓⲟⲣⲑⲱⲥⲓⲥ ⲛⲥⲁⲑⲏ
ⲟⲩⲣⲱⲙⲉ ⲇⲉ ϫⲉ ⲁⲕⲁⲑⲟⲛⲓⲕⲟⲥ ⲉⲩⲡⲣⲁⲕⲙⲁⲧⲉⲩⲧⲏⲥ ⲡⲉ ⲛⲧⲉ ⲧⲡⲟⲗⲓⲥ ⲕⲁⲓⲥⲁⲣⲓⲁ ⲡⲁⲓ ⲁϥⲉⲣⲏⲧ ⲉⲕⲱⲧ ⲙⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲩⲱ ⲉⲟⲩⲟϣⲥϥ ⲉⲃⲟⲗ ⲡⲗⲏⲛ ⲛⲉⲣⲉ ⲛⲉⲣⲟⲟⲩϣ ⲙⲡⲉⲟⲩⲱⲙ ⲙⲛ ⲡⲥⲱ ⲥⲱⲕ ⲙⲙⲟϥ ⲡⲣⲱⲙⲉ ⲇⲉ ⲉⲧⲙⲙⲁⲩ ⲛⲉⲩⲣⲙⲙⲁⲟ ⲉⲙⲁⲧⲉ ⲡⲉ ϩⲁϩ ⲇⲉ ⲟⲛ ⲉⲥⲟⲡ ⲛⲉⲣⲉ ⲧⲙⲛⲧⲙⲁⲓϩⲟⲙⲛⲧ ⲕⲱⲗⲩ ⲙⲙⲟϥ ⲡⲉ
ϩⲛ ⲟⲩⲥϣⲛⲉ ⲇⲉ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲓ ϣⲁⲣⲟϥ ⲛⲧⲉⲩϣⲏ ⲁϥϣⲁϫⲉ ⲛⲙⲙⲁϥ ϩⲛ ⲟⲩϩⲟⲣⲟⲙⲁ ⲉϥϫⲱ ⲙⲙⲟⲥ ϫⲉ ⲡⲣⲱⲙⲉ ⲛⲁⲛⲟⲩⲥ ⲛⲁⲕ ⲉⲙ ⲡⲉⲕⲉⲣⲏⲧ ⲛϩⲟⲩⲉ ⲉⲣⲟⲥ ⲉⲁⲕⲉⲣⲏⲧ ⲁⲕⲕⲟⲧⲕ ⲉⲡϩⲟⲩ ϩⲙ ⲡⲉⲕⲉⲣⲏⲧ ⲧⲉⲛⲟⲩ ϭⲉ ⲃⲱⲕ ⲛⲅⲉⲣ ϩⲱⲃ ⲉⲡⲁⲙⲁⲣⲧⲩⲣⲓⲟⲛ ϫⲉ ⲛⲛⲉ ⲡϫⲟⲓⲥ ϭⲱⲛⲧ ⲉⲣⲟⲕ ⲛϥⲉⲓⲛⲉ ⲉϫⲱⲕ ⲛⲟⲩⲛⲟϭ ⲛϩⲓⲥⲉ ⲛⲁⲓ ⲇⲉ ⲛⲧⲉⲣⲉϥϫⲟⲟⲩⲛϭⲓ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥϩⲟⲡϥ ⲉⲣⲟϥ
ⲁⲥϣⲱⲡⲉ ⲇⲉ ⲛⲧⲉⲣⲉ ⲡⲛⲟⲩⲟⲉⲓⲛ ⲉⲓ ⲉϩⲣⲁⲓ ⲁ ⲡⲣⲱⲙⲉ ⲉⲥⲑⲁⲛⲉ ⲛⲧⲉⲩⲛⲟⲩ ϫⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉⲛⲧⲁϥⲟⲩⲱⲛϩ ⲉⲣⲟϥ ⲁⲩⲱ ⲙⲛⲛⲥⲁ ⲛⲁⲓ ⲁϥⲁⲣⲭⲉⲓ ⲉϫⲙ ⲡⲕⲱⲧ ⲛϭⲓ ⲡⲣⲱⲙⲉ ⲉⲣⲉ ⲛⲣⲣⲱⲟⲩ ⲛⲉⲩⲥⲉⲃⲏⲥ ϯ ⲛⲧⲟⲟⲧϥ ⲉⲃⲟⲗ ϫⲉ ⲛⲉ ⲡⲕⲁⲓⲣⲟⲥ ⲡⲉⲛⲓⲟⲩⲃⲓⲁⲛⲟⲥ ⲡⲣⲣⲟ ⲛⲉⲩⲥⲉⲃⲏⲥ
ⲁ ⲕⲉϣⲡⲏⲣⲉ ⲇⲉ ⲟⲛ ϣⲱⲡⲉ ϩⲙ̅ ⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛϯⲛⲁϣ ⲕⲁⲣⲱⲓ ⲉⲣⲟⲥ ⲁⲛ ⲉⲧⲉⲓ ⲇⲉ ⲉⲣⲉ ⲡⲁⲣⲭⲓⲧⲉⲕⲧⲱⲛ ϩⲓϫⲛ ⲧⲥⲛⲧⲉ ⲉϥϯ ⲧⲱⲃⲉ ⲉⲡⲕⲱⲧ ⲙⲡⲉ ⲡⲇⲓⲁⲃⲟⲗⲟⲥ ⲉϣ ϥⲓ ⲉⲣⲟϥ ⲉϥⲛⲁⲩ ⲉⲛⲧⲁⲓⲟ ⲉⲧⲟⲩϯ ⲙⲙⲟⲟⲩ ⲙⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲩⲱ ⲛⲧⲉⲓϩⲉ ⲁⲡⲇⲓⲁⲃⲟⲗⲟⲥ ⲛⲉϫ ⲡⲣⲱⲙⲉ ⲉⲡⲉⲥⲏⲧ ⲉϫⲙ ⲡⲕⲱⲧ ⲁϥⲟⲩⲱϣϥ ⲙⲡⲉϥⲥⲱⲙⲁ ⲧⲏⲣϥ ⲡⲗⲁⲟⲥ ⲇⲉ ⲧⲏⲣϥ ⲁϥⲁϣⲕⲁⲕ ⲉⲃⲟⲗ ϩⲛ ⲟⲩⲛⲟϭ ⲛⲥⲙⲏ ⲉⲩⲣⲓⲙⲉ ⲁⲩⲱ ⲡⲕⲉ ⲁⲅⲁⲑⲟⲛⲓⲕⲟⲥ ⲁϥⲡⲉϩ ⲛⲉϥϩⲟⲓⲧⲉ ⲉϥϫⲱ ⲙⲙⲟⲥ ϫⲉ ⲟⲩⲟⲓ ⲛⲁⲓ ϫⲉ ⲉⲣⲉ ⲟⲩⲫⲑⲟⲛⲟⲥ ⲛⲁϣⲱⲡⲉ ⲛⲁⲓ ⲉⲡⲙⲁ ⲛⲟⲩⲧⲁⲓⲟ ⲟⲩⲟⲓ ⲛⲁⲓ ϫⲉ ⲛⲁⲓ ⲛⲉ ⲛϣⲃⲃⲓⲱ ⲉⲧⲉⲕϯ ⲙⲙⲟⲟⲩ ⲛⲁⲓ ⲱ ⲡⲁⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲙⲡⲉⲭ̅ⲥ̅
ⲡⲉⲓⲱⲧ ⲇⲉ ⲙⲡϣⲏⲣⲉ ϣⲏⲙ ⲛⲉⲁϥⲧⲁϫⲣⲟ ⲡⲉ ϩⲛ ⲧⲡⲓⲥⲧⲓⲥ ⲙⲡⲛⲟⲩⲧⲉ ⲙⲛ ⲛⲉϭⲟⲙ ⲙⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁϥⲱϣ ⲉⲃⲟⲗ ϩⲛ ⲧⲙⲏⲧⲉ ⲙⲡⲙⲏⲏϣⲉ ⲉϥϫⲱ ⲙⲙⲟⲥ ϫⲉ ⲙⲡⲉⲣⲗⲩⲡⲏ ⲱ ⲛⲁⲥⲛⲏⲩ ⲟⲩⲛ̅ ϭⲟⲙ ⲙⲡⲛⲟⲩⲧⲉ ϩⲛ ϩⲱⲃ ⲛⲓⲙ ⲕⲁⲓ ⲅⲁⲣ ⲁϥⲧⲟⲩⲛⲉⲥ ⲛⲉⲧⲙⲟⲟⲩⲧ ⲉⲟⲩⲁ ⲉⲃⲟⲗ ⲛϩⲏⲧⲟⲩ ⲡⲉ ⲗⲁⲍⲁⲣⲟⲥ ⲉⲁϥⲧⲟⲩⲛⲟⲥϥ ⲉⲃⲟⲗ ϩⲛ ⲛⲉⲧⲙⲟⲟⲩⲧ ⲉϥϩⲙ ⲡⲙⲉϩϥⲧⲟⲟⲩ ⲛϩⲟⲟⲩ ⲛⲁⲓ ⲇⲉ ⲟⲛ ⲉϥⲧⲁⲩⲱ ⲙⲙⲟⲟⲩ ⲛϭⲓ ⲡⲉⲓⲱⲧ ⲙⲡϣⲏⲣⲉ ϣⲏⲙ ⲁϥϭⲱϣⲧ ⲛϭⲓ ⲡⲉⲓϣⲱⲛⲉ ⲉϥⲛⲏϫ ⲉⲃⲟⲗ ⲛⲑⲉ ⲛⲛⲉⲧⲙⲟⲟⲩⲧ ⲁϥⲛⲁⲩ ⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲁϥⲉⲓ ⲉϩⲟⲩⲛ ϩⲙ ⲡⲙⲏⲏϣⲉ ⲧⲏⲣϥ ⲁϥⲥⲫⲣⲁⲅⲓⲍⲉ ⲙⲙⲟϥ ⲁϥⲧⲱⲟⲩⲛ ⲁϥⲉⲓ ⲉⲃⲟⲗ ϩⲙ ⲡⲙⲏⲏϣⲉ ⲧⲏⲣϥ ⲛⲕⲉⲥⲟⲡ ⲛⲑⲉ ⲛⲟⲩⲇⲣⲟⲙⲉⲩⲥ ⲉⲛⲁⲛⲟⲩϥ
ⲁⲕⲛⲁⲩ ⲉⲑⲩⲡⲟⲙⲟⲛⲏ ϫⲉ ⲉⲥϫⲏⲕ ⲉⲃⲟⲗ ⲛⲁϣ ⲛϩⲉ ⲁⲕⲉⲓⲙⲉ ϫⲉ ⲡϫⲟⲉⲓⲥ ⲛⲥⲁϥ ⲛⲧⲟϥ ⲟⲛ ⲙⲡⲟⲟⲩ ⲡⲉ ⲁⲩⲱ ⲛⲧⲟϥ ⲟⲛ ⲡⲉ ϣⲁ ⲛⲓⲉⲛⲉϩ ⲡⲉⲛⲧⲁϥⲧⲁⲗϭⲟ ⲡⲃⲁⲥⲓⲗⲓⲕⲟⲥ ⲅⲁⲣ ⲡⲉ ϩⲓⲧⲛ ⲧⲉϥⲡⲓⲥⲧⲓⲥ ⲛⲧⲟϥ ⲟⲛ ⲡⲉⲧⲉⲛⲉⲣⲅⲉⲓ ⲛⲛⲉϥϣⲡⲏⲣⲉ ϩⲛ ⲛⲧⲟⲡⲟⲥ ⲛⲙⲙⲁⲣⲧⲩⲣⲟⲥ
ⲁⲕⲉϣⲡⲏⲣⲉ ⲇⲉ ⲟⲛ ϣⲱⲡⲉ ϩⲙ ⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛϯⲛⲁⲕⲁⲣⲱⲓ ⲁⲛ ⲉⲣⲟⲥ ⲛⲟⲩⲉϣ ⲛⲧⲁⲩⲟⲥ ⲉⲛⲉⲧⲛⲙⲁⲁϫⲉ ⲁⲥϣⲱⲡⲉ ⲇⲉ ⲟⲛ ⲛⲧⲉⲣⲟⲩⲱ ⲉⲩⲕⲱⲧ ⲙⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲛⲉⲉⲡⲓⲥⲕⲟⲡⲟⲥ ⲥⲱⲟⲩϩ ⲉⲛⲉⲩⲉⲣⲏⲩ ⲁⲩⲉⲓ ⲉⲣⲟϥ ⲉⲧⲣⲉⲩⲉⲓⲣⲉ ⲙⲡϫⲓⲁⲉⲓⲕ ⲁⲩⲱ ⲟⲛ ⲁⲩⲥⲱⲟⲩϩ ⲛϭⲓ ϩⲛⲛⲟϭ ⲙⲙⲏⲏϣⲉ ⲉⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
ⲉⲧⲉⲓ ⲟⲛ ⲉⲣⲉ ⲧⲥⲩⲛⲁⲝⲓⲥ ⲥⲏⲣ ⲉⲃⲟⲗ ⲉⲓⲧⲉ ⲡⲇⲓⲁⲃⲟⲗⲟⲥ ⲡⲉⲛⲧⲁϥⲉⲛⲉⲣⲅⲉⲓ ϩⲓⲧⲛ ⲟⲩϩⲉⲑⲛⲟⲥ ⲉⲓⲧⲉ ⲡⲛⲟⲩⲧⲉ ⲡⲉ ⲛⲁⲧϥⲥⲩⲛⲭⲱⲣⲉⲓ ϩⲁⲡⲗⲟⲩⲥ ϩⲉⲛ ⲟⲩⲥ ϣⲛⲉ ⲇⲉ ⲁⲩⲃⲱϭⲉ ⲛϭⲓ ⲛⲃⲁⲣⲃⲁⲣⲟⲥ ⲉⲧⲟⲩⲙⲟⲩⲧⲉ ⲉⲣⲟⲟⲩ ϫⲉ ⲛⲥⲁⲣⲙⲁⲧⲏⲥ ⲛⲁⲓ ⲉⲧⲉⲩⲥⲩⲛⲏⲑⲓⲁ ⲡⲉ ⲃⲱϭⲉ ⲉϫⲛ ⲛⲉⲣⲱⲙⲉ ⲛⲥⲉⲁⲓⲭⲙⲁⲗⲱⲧⲓⲍⲉ ⲙⲙⲟⲟⲩ ⲗⲟⲓⲡⲟⲛ ⲁⲩⲉⲭⲙⲁⲗⲱⲧⲉⲩⲉ ⲛⲟⲩⲟⲛ ⲛⲓⲙ ⲛⲧⲁⲩϩⲉ ⲉⲣⲟⲟⲩ ⲙⲡⲃⲟⲗ ⲙⲡⲣⲟ ⲙⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
ⲛⲃⲁⲣⲃⲁⲣⲟⲥ ⲇⲉ ⲙⲡⲟⲩⲉϣ ⲃⲱⲕ ⲉϩⲟⲩ ̅ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲃⲟⲗ ϫⲉ ⲁⲩ ⲛⲟϭ ⲛ̅ϩⲟⲧⲉ ϩⲉ ⲉϫⲱⲟⲩ ⲡⲕⲉⲥⲉⲉⲡⲉ ⲇⲉ ⲟⲛ ⲛ̅ⲛ̅ⲣⲱⲙⲉ ⲛⲧⲁⲩϣⲱϫⲡ ⲁⲩϭⲱ ϩⲙ ⲡⲙⲁⲣⲧⲩⲣⲓⲟⲛ ⲉⲩⲟⲩⲟⲗⲥ ⲛϩⲏⲧ ⲛⲑⲉ ⲛⲛⲉϩⲟⲟⲩ ⲛⲇⲁⲇ ⲡⲣⲣⲟ ⲡⲟⲩⲁ ⲡⲟⲩⲁ ⲉϫⲙ ⲡⲉϥϣⲏⲣⲉ ⲁⲩⲱ ⲧⲟⲩⲉⲓ ⲧⲟⲩⲉⲓ ⲉϫⲛ ⲧⲉⲥϣⲉⲉⲣⲉ ϩⲁⲡⲗⲱⲥ ⲙⲛⲛⲥⲁ ϣⲟⲙⲛⲧ ⲛϩⲟⲟⲩ ⲉⲩⲙⲟⲟϣⲉ ⲙⲛ ⲛⲉⲭⲙⲁⲗⲱⲧⲟⲥ ⲛϭⲓ ⲛⲃⲁⲣⲃⲁⲣⲟⲥ
ⲧⲉϣⲡⲏⲣⲉ ⲇⲉ ⲛⲧⲁⲥϣⲱⲡⲉ ⲟⲩⲟⲧⲃ ⲉⲧⲁ ϩⲉⲗⲓⲥⲥⲁⲓⲟⲥ ⲡⲉⲡⲣⲟⲫⲏⲧⲏⲥ ⲛⲉⲧⲙⲙⲁⲩ ⲙⲉⲛ ⲛⲧⲁ ⲡϫⲟⲉⲓⲥ ⲧⲣⲉⲩⲥⲱⲧⲙ ⲉⲡⲉϩⲣⲟⲟⲩ ⲛϩⲉⲛϩⲁⲣⲙⲁ ⲙⲛ ϩⲉⲛⲉϩⲧⲱⲱⲣ ⲙⲛ ϩⲉⲛⲛⲟϭ ⲙⲙⲏⲏϣⲉ ⲉⲛⲁϣⲱⲟⲩ ⲛⲁⲓ ⲇⲉ ⲛⲧⲟⲟⲩ ⲛⲧⲁ ⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲧⲣⲉⲩⲛⲁⲩ ⲉⲣⲟϥ ⲛϩⲟϩⲓϩⲟ ⲉⲧⲓ ⲅⲁⲣ ⲉⲣⲉ ⲡⲁⲏⲣ ⲥⲙⲟⲛⲧ ϩⲛ ⲟⲩⲥϣⲛⲉ ⲇⲉ ⲁⲧⲡⲉ ⲟⲩⲙⲟⲧ ⲛⲕⲗⲟⲟⲗⲉ ⲁⲩϭⲱϣⲧ ⲛϭⲓ ⲛⲃⲁⲣⲃⲁⲣⲟⲥ ⲉϩⲣⲁⲓ ⲉⲧⲡⲉ ⲁⲩⲛⲁⲩ ⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲁϥⲓ ⲉⲃⲟⲗ ϩⲛ ⲧⲡⲉ ⲉϥⲧⲁⲗⲏⲩ ⲉⲩϩⲧⲟ ⲛⲟⲩⲱⲃϣ ⲉⲣⲉ ϩⲉⲛⲙⲏⲏϣⲉ ⲙⲙⲁⲧⲟⲓ ⲧⲁⲗⲏⲩ ⲉϩⲉⲛϩⲧⲟ ⲛⲟⲩⲱⲃϣ ⲛⲙⲙⲁϥ ⲁⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲉⲧ ⲡⲉϥⲙⲉⲣⲉϩ ⲉϩⲟⲩⲛ ϩⲙ ⲧⲙⲏⲧⲉ ⲛ̅ⲛ̅ⲃⲁⲣⲃⲁⲣⲟⲥ ⲁⲩⲙⲟⲩ ⲛϭⲓ ⲟⲩⲙⲏⲏϣⲉ ⲉⲃⲟⲗ ⲛϩⲏⲧⲟⲩ
ⲧⲟⲧⲉ ⲡⲡⲉⲧⲟⲩⲁⲁⲃ ⲁϥⲟⲩⲱⲛϩ ⲉⲃⲟⲗ ⲉⲛⲉⲭⲙⲁⲗⲱⲧⲟⲥ ⲡⲉϫⲁϥ ⲛⲁⲩ ϫⲉ ⲧⲱⲕ ⲛϩⲏⲧ ⲙⲡⲉⲣⲉⲣ ϩⲟⲧⲉ ⲁⲛⲟⲕ ⲡⲉ ⲙⲉⲣⲕⲟⲩⲣⲓⲟⲥ ⲉⲡⲉⲓⲇⲏ ⲁⲧⲁⲧⲛⲉⲓ ⲉⲃⲟⲗ ϩⲛ ⲧⲉⲕⲕⲗⲏⲥⲓⲁ ⲁⲧⲉⲧⲛϫⲱ ⲛϩⲉⲛϣⲁϫⲉ ⲛⲕⲁⲧⲁⲗⲁⲗⲓⲁ ⲉⲙⲛ ϩⲏⲩ ⲛϩⲏⲧⲟⲩ ⲙⲡⲉⲧⲉⲛϭⲱ ⲛϩⲟⲩⲛ ⲉⲧⲉⲕⲕⲗⲏⲥⲓⲁ ⲛⲧⲉⲧⲛⲥⲙⲟⲩ ⲉⲡⲛⲟⲩⲧⲉ ⲙⲛⲛⲉϥ ⲁⲅⲅⲉⲗⲟⲥ ⲉⲧⲃⲉ ⲡⲁⲓ ⲛⲧⲁ ⲛⲉⲓϩⲓⲥⲉ ⲧⲏⲣⲟⲩ ϣⲱⲡⲉ ⲙⲙⲱⲧⲛ ⲁⲗⲗⲁ ϩⲙ ⲡⲧⲣⲉⲧⲉⲧⲛⲱϣ ⲉϩⲣⲁⲓ ⲉⲡⲛⲟⲩⲧⲉ ϩⲙ ⲡⲉⲧⲛϩⲏⲧ ⲧⲏⲣϥ ⲉⲧⲉⲧⲛⲁⲝⲓⲟⲩ ⲙⲙⲟϥ ⲉⲩⲃⲟⲏⲑⲓⲁ ⲛⲏⲧⲛ ⲉⲧⲃⲉ ⲡⲁⲓ ⲁϥⲧⲛⲛⲟⲟⲩⲧ ϣⲁⲣⲱⲧⲛ ⲉⲧⲣⲁⲃⲟⲏⲑⲓⲁ ⲉⲣⲱⲧⲛ
ⲁⲩⲱ ϫⲉⲕⲁⲥ ⲛⲛⲉ ⲛⲃⲁⲣⲃⲁⲣⲟⲥ ⲕⲧⲟⲟⲩ ⲛⲕⲉ ⲥⲟⲡ ⲉⲁⲓⲭⲙⲁⲗⲱⲧⲓⲍⲉ ⲛⲣⲱⲙⲉ ϩⲙ ⲡⲁⲙⲁⲣⲧⲩⲣⲓⲟⲛ ϣⲁ ⲉⲛⲉϩ ⲁⲩⲱ ⲧⲁⲓⲧⲉⲑⲉ ⲛⲧⲁϥϫⲓ ⲙⲟⲉⲓⲧ ϩⲏⲧⲟⲩ ⲁϥⲉⲛⲧⲟⲩ ⲉⲡⲧⲟⲡⲟⲥ ⲛⲧⲁⲩⲁⲓⲭⲙⲁⲗⲟⲧⲓⲥⲉ ⲙⲙⲟⲟⲩ ⲛϩⲏⲧϥ ⲛⲕⲉⲥⲟⲡ ⲡⲕⲉⲥⲉⲉⲡⲉ ⲇⲉ ⲛⲛⲃⲁⲣⲃⲁⲣⲟⲥ ⲛⲧⲁⲩϣⲱϫⲡ ⲉⲧⲉⲡⲗⲩⲅⲏ ⲛⲧⲁⲥⲉⲓ ⲉϫⲱⲟⲩ ⲁⲩϫⲟⲟⲩ ⲉⲩⲡⲁⲣⲁⲕⲁⲗⲉⲓ ⲁⲩⲱ ⲉⲩⲁⲝⲓⲟⲩ ⲉⲧⲙⲡⲁⲣⲁⲅⲉ ⲙⲡⲧⲟⲡⲟⲥ ⲉⲧⲙⲙⲁⲩ ϣⲁ ⲉⲛⲉϩ ⲛⲟⲩⲉⲓϣ ⲁⲩⲱ ⲧⲁⲓⲧⲉⲑⲉ ⲛⲧⲁⲛⲉⲧϩⲙ ⲡⲧⲟⲡⲟⲥ ⲉⲧⲙⲙⲁⲩ ⲟⲩϫⲁⲓ ⲙⲛ ⲛⲉⲩⲧⲃⲛⲟⲟⲩⲉ ϣⲁ ⲉϩⲟⲩⲛ ⲉⲡⲟⲟⲩ ⲛϩⲟⲟⲩ
ⲁⲗⲗⲁ ⲙⲉϣⲁⲕ ⲛⲧⲉ ⲟⲩⲁ ϫⲟⲟⲥ ϩⲛ ⲛⲉⲓⲙⲁⲓϯⲧⲱⲛ ϫⲉ ϣⲁⲣⲉ ⲡⲇⲓⲁⲃⲟⲗⲟⲥ ⲉⲣ ϩⲁϩ ⲛϩⲱⲃ ⲡⲁⲣⲁ ⲡⲟⲩⲱϣ ⲙⲡⲛⲟⲩⲧⲉ ⲕⲁⲓ ⲅⲁⲣ ⲛⲕⲉⲣⲓⲣ ⲙⲡⲉ ⲛⲇⲁⲓⲙⲱⲛ ⲉϣ ⲃⲱⲕ ⲉϩⲟⲩ ̅ⲉⲣⲟⲟⲩ ⲁϫⲙ ⲡⲟⲩⲉϩⲥⲁϩⲛⲉ ⲙⲡϫⲟⲉⲓⲥ ϯⲛⲁϫⲛⲟⲩϥ ϩⲱ ⲉⲓϫⲱ ⲙⲙⲟⲥ ϫⲉ ϣⲁⲣⲉ ⲡⲛⲟⲩⲧⲉ ⲥⲩⲛⲭⲱⲣⲉⲓ ⲉⲧⲃⲉ ϩⲱⲃ ⲥⲛⲁⲩ ⲟⲩⲁ ⲉⲧⲃⲉ ⲟⲩⲇⲟⲕⲓⲙⲏ ⲛⲛⲥⲱⲧⲡ ⲟⲩⲁ ⲉⲧⲃⲉ ⲛⲉⲛⲟⲃⲉ ⲛⲛⲗⲁⲟⲥ
ⲙⲛⲛⲥⲁ ⲛⲁⲓ ⲇⲉ ⲟⲛ ⲛⲉⲩⲛ ⲟⲩⲥϩⲓⲙⲉ ϩⲙ ⲡⲕⲱⲧⲉ ⲙⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲟⲩⲁϩⲓϩⲏⲧ ⲉⲙⲁⲧⲉ ⲧⲉ ⲧⲉⲥϩⲓⲙⲉ ⲉⲧⲙⲙⲁⲩ ⲉⲙⲉⲥⲣ̅ ⲡⲙⲉⲉⲩⲉ ⲉϯ ⲡⲣⲟⲥⲫⲟⲣⲁ ⲉⲧⲉⲕⲕⲗⲏⲥⲓⲁ ⲟⲩⲇⲉ ⲉⲣⲙⲛⲧⲛⲁ ⲉⲡⲧⲏⲣϥ ⲧⲁⲓ ⲧⲉ ⲛⲉⲁⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲟⲩⲱϣ ⲉⲡⲉⲇⲉⲩⲉ ⲙⲙⲟⲥ ⲧⲁⲣⲉⲥⲟⲩϫⲁⲓⲁⲩⲱ ⲛⲧⲉⲓϩⲉ ⲁϥⲧⲣⲉ ⲟⲩⲡⲁⲑⲟⲥ ⲛϣⲱⲛⲉ ϣⲱⲡⲉ ϩⲙ ⲡⲉⲥⲥⲱⲙⲁ ⲉⲙⲡⲉⲣⲱⲙⲉ ⲉϣ ⲧⲁⲗϭⲟⲥ ⲉⲡϩⲁⲉ ⲇⲉ ⲁⲥⲡⲱⲧ ⲉⲣⲁⲧⲟⲩ ⲛ̅ⲛⲉϭⲟⲙ ⲙⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
ⲁⲩⲱ ⲛⲧⲉⲓϩⲉ ⲁⲥⲓ ⲉⲡⲉϥ ⲙⲁⲣⲧⲩⲣⲓⲟⲛ ⲉⲥⲱϣ ⲉⲃⲟⲗ ⲉⲥϫⲱ ⲙⲙⲟϭ ϫⲉ ⲡⲛⲟⲩⲧⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲃⲟⲏⲑⲉⲓ ⲉⲣⲟⲓ ⲁⲩⲱ ⲛⲧⲉⲣⲟⲩⲧⲁϩⲥⲥ ⲙⲡⲛⲉϩ ⲉⲧⲟⲩⲁⲁⲃ ⲁⲥⲱⲃϣ ⲛⲟⲩⲕⲟⲩⲓ ⲁⲩⲱ ⲛⲧⲉⲩⲛⲟⲩ ⲁⲥϭⲱϣⲧ ⲁⲥⲛⲁⲩ ⲉⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲁϥⲉⲓ ⲉⲃⲟⲗ ϩⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲁϥⲁⲙⲁϩⲧⲉ ⲛⲧⲉⲥϭⲓϫ ⲡⲉϫⲁϥ ⲛⲁⲥ ϫⲉ ⲧⲉⲥϩⲓⲙⲉ ⲥⲟⲟⲩⲧⲛ ⲛⲧⲟⲩϭⲓϫ ⲉⲛϩⲏⲕⲉ ⲁⲩⲱ ⲛⲧⲉⲃⲱⲕ ⲛⲧⲉⲕⲕⲗⲏⲥⲓⲁ ⲧⲉⲣⲛⲁⲉⲙⲧⲟⲛ ⲛⲧⲉⲣⲉⲥϩⲟⲙⲟⲗⲟⲅⲉⲓ ⲙⲡⲁⲓ ⲙⲛⲛⲥⲁ ϣⲟⲙⲛⲧ ⲛϩⲟⲟⲩ ⲁⲥⲗⲟ ⲉⲃⲟⲗ ϩⲙ ⲡϣⲱⲛⲉ
ⲁⲥϣⲱⲡⲉ ⲇⲉ ⲟⲛ ⲛⲟⲩϩⲟⲟⲩ ⲁϩⲉⲛⲗⲓⲥⲧⲏⲥ ⲃⲱⲕ ⲉϩⲟⲩⲛ ⲉⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲩϥⲓ ⲛϩⲉⲛⲕⲟⲓⲙⲏⲗⲓⲟⲛ ⲛϫⲓⲟⲩⲉ ⲉⲧⲓ ⲇⲉ ⲉⲩⲙⲟⲟϣⲉ ⲛⲙⲙⲁⲩ ⲁⲡⲉⲛⲧⲁϥϣⲱⲡⲉ ϩⲓ ⲉ ⲗⲓⲥⲥⲁⲓⲟⲥ ⲡⲉⲡⲣⲟⲫⲏⲧⲏⲥ ⲧⲱⲙⲛⲧ ⲉⲣⲟⲟⲩ ⲁⲛⲉⲩⲃⲁⲗ ⲣ ⲃⲗⲗⲉ ⲙⲡⲟⲩⲉⲓⲙⲉ ϫⲉ ⲉⲩⲃⲏⲕ ⲉⲧⲱⲛ ϣⲁⲛⲧⲟⲩⲕⲧⲟⲟⲩ ⲛⲕⲉⲥⲟⲡ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲣⲉ ⲛⲕⲟⲓⲙⲏⲗⲓⲟⲛ ⲛⲧⲁⲩϥⲓⲧⲟⲩ ⲛϫⲓⲟⲩⲉ ⲧⲁⲗⲏⲩ ⲉⲣⲟⲟⲩ ⲉⲁⲩⲁⲡⲁⲛⲧⲁ ⲉⲡⲟⲓⲕⲟⲛⲟⲙⲟⲥ ⲙⲡⲧⲟⲡⲟⲥ ⲡⲉϫⲁⲩ ⲛⲁϥ ϫⲉ ⲡⲣⲱⲙⲉ ⲁϣ ⲡⲉ ⲡⲉⲓⲧⲟⲡⲟⲥ ⲕⲟⲩⲉϣ ⲛⲉⲓⲕⲟⲓⲙⲏⲗⲓⲟ ̅ⲛⲅϣⲟⲡⲟⲩ
ⲛⲧⲟϥ ⲇⲉ ⲛⲧⲉⲣⲉϥⲛⲁⲩ ⲉⲣⲟⲟⲩ ⲁϥⲥⲟⲩⲱⲛⲟⲩ ⲡⲉϫⲁϥ ⲛⲁⲩ ϫⲉ ⲛⲟⲩⲓ ⲛⲉ ⲛⲉⲓⲕⲟⲓⲙⲓⲗⲓⲟⲛ ⲕⲁⲓ ⲅⲁⲣ ⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉ ⲡⲁⲓ ⲁⲩⲱ ⲛⲧⲉⲩⲛⲟⲩ ⲛⲧⲁⲩⲥⲉⲧⲙ ⲡⲣⲁⲛ ⲙⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲁⲛⲉⲩⲃⲁⲗ ⲟⲩⲱⲛ ⲁⲩⲥⲟⲩⲉⲛ ⲡⲧⲟⲡⲟⲥ ϫⲉ ⲡⲁⲓ ⲡⲉ ⲡⲙⲁ ⲛⲧⲁⲛϥⲓ ⲛⲛⲉⲕⲟⲓⲙⲏⲗⲓⲟ ̅ⲛϩⲏⲧϥ ⲁⲩⲱ ⲛⲧⲉⲩⲛⲟⲩ ⲁⲩⲡⲁϩⲧⲟⲩ ⲉϫⲙ ⲡⲉⲩϩⲟ ⲁⲩⲟⲩⲱϣϥ ⲙⲡⲛⲟⲩⲧⲉ ⲙⲛ ⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲁⲩⲱ ⲁⲩϭⲱ ⲉⲩⲥⲟⲡⲥ ⲙⲡⲟⲓⲕⲟⲛⲟⲙⲟⲥ ⲉⲧⲙⲙⲁⲩ ⲉⲧⲙ ⲧⲣⲉϥⲡⲁⲣⲁⲇⲓⲇⲟⲩ ⲙⲙⲟⲟⲩ ⲉⲧⲟⲟⲧⲟⲩ ⲛⲛⲉⲛⲟⲙⲟⲥ ⲛⲥⲉ ⲧⲁⲕⲟⲟⲩ ⲇⲓⲕⲁⲓⲟⲥ ⲅⲁⲣ ⲧⲉⲅⲣⲁⲫⲏ ⲉⲧⲟⲩⲁⲁⲃ ϫⲱ ⲙⲙⲟⲥ ϫⲉ ⲡⲉⲧⲛⲁϯ ⲉⲟⲟⲩ ⲛⲁⲓ ϯⲛⲁϯ ⲉⲟⲟⲩ ⲛⲁϥ ⲡⲉⲧⲛⲁϯ ⲥⲱϣ ⲛⲁⲓ ϯⲛⲁϯ ⲥⲱϣ ⲛⲁϥ
ⲡⲁⲛⲧⲟⲥ ⲛⲧⲉⲧⲛⲟ ⲁⲛ ⲛⲁⲧⲥⲟⲟⲩⲛ ⲙⲡⲉⲩⲟⲉⲓϣ ⲛⲧⲁⲓⲃⲱⲕ ⲙⲛ ⲛⲉⲡⲓⲥⲕⲟⲡⲟⲥ ⲉϫⲡⲓⲉ ⲓⲟⲩⲗⲓⲁⲛⲟⲥ ⲡⲡⲁⲣⲁⲛⲟⲙⲟⲥ ⲉⲧⲃⲉ ⲛϩⲓⲥⲉ ⲉⲧϩⲓϫⲱⲛ ⲛⲑⲉ ⲛⲧⲁϥⲕⲁⲁⲛ ϩⲙ ⲡⲉϣⲧⲉⲕⲟ ⲁϥⲃⲱⲕ ⲉⲧⲡⲉⲣⲥⲓⲥ ⲁⲛⲟⲛ ⲇⲉ ⲛⲉⲛϣⲟⲟⲡ ⲡⲉ ϩⲛ ⲟⲩⲛⲟϭ ⲛϩⲟϫϩⲉϫ ⲉⲙⲛⲗⲁⲁⲩ ⲛϩⲉⲗⲡⲓⲥ ϣⲟⲟⲡ ⲛⲁⲛ ⲉⲧⲣⲉⲛⲟⲩϫⲁⲓ ⲛⲥⲁ ⲡⲛⲟⲩⲧⲉ ⲙⲁⲩⲁⲁϥ ⲁⲟⲩⲁ ⲛϩⲏⲧⲛ ⲉⲩϣⲟⲩⲡⲓⲥⲧⲉⲩⲉ ⲛⲁϥ ⲡⲉ ⲁϥϭⲱϣⲧ ⲁϥⲛⲁⲩ ⲉⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟϭ ⲙⲉⲣⲕⲟⲩⲣⲓⲟⲥ ⲛⲧⲉⲩϣⲏ ⲉⲁϥⲧⲉⲕⲙ ⲡⲉϫⲙⲉⲣⲉϩ ⲉⲃⲟⲗ ϩⲙ ⲡⲉϥⲙⲁ ⲉϥϫⲱ ⲙⲙⲙⲟⲥ ϫⲉ ⲉⲓⲛⲁⲕⲁ ⲡⲉⲓⲁⲛⲟⲙⲟⲥ ⲛⲧⲉⲓϩⲉ ⲉϥϫⲓ ⲟⲩⲁ ⲉⲡⲛⲟⲩⲧⲉ ⲁⲩⲱ ⲙⲡϩⲟⲩⲛ ⲛϣⲟⲙⲛⲧ ⲛϩⲟⲟⲩ ⲁⲩⲛ ⲡⲟⲩⲱ ⲛⲁⲛ ϫⲉ ⲁϥⲙⲟⲩ ⲛϭⲓ ⲡⲁⲥⲉⲃⲏⲥ ⲓⲟⲩⲗⲓⲁⲛⲟⲥ ⲉⲧⲓ ⲇⲉ ⲉⲛⲡⲗⲏⲥⲥⲉ ⲉϫⲛ ⲧⲉϣⲡⲏⲣⲉ ⲛⲧⲁⲥϣⲱⲡⲉ ⲁⲛϭⲱϣⲧ ⲉϩⲣⲁⲓ ⲉⲧⲡⲉ ⲁⲛⲛⲁⲩ ⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲣⲉ ⲡⲉϥ ⲙⲉⲣⲉϩ ⲧⲟⲗⲙ ϩⲙ ⲡⲉϥⲥⲛⲟϥ ϩⲱⲥ ⲉϣϫⲉ ⲛⲧⲁϥⲗⲟ ⲉϥⲡⲁⲧⲁⲥⲥⲉ ⲙⲙⲟϥ ⲛⲥⲟⲟⲩⲧⲛ ⲗⲟⲓⲡⲟ
ⲱ ⲛⲁϣⲏⲣⲉ ⲙⲙⲉⲣⲓⲧ ⲙⲡⲣϣⲱⲡⲉ ⲛⲁⲡⲓⲥⲧⲟⲥ ⲉⲛϭⲟⲙ ⲙⲛ ⲛⲉϣⲡⲏⲣⲉ ⲛⲧⲁ ⲡⲛⲟⲩⲧⲉ ⲭⲁⲣⲓⲍⲉ ⲙⲙⲟⲟⲩ ⲙⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲙⲛϭⲟⲙ ⲙⲡⲁⲗⲁⲥ ⲛⲥⲁⲣⲝ ⲉϫⲟⲟⲩ ⲟⲩⲁ ⲟⲩⲁ ⲉⲃⲟⲗ ϫⲉ ⲛⲉⲥⲱⲟⲩ ⲙⲙⲁⲧⲉ ⲛϭⲓ ⲛϭⲟⲙ ⲙⲛ ⲛⲉϣⲡⲏⲣⲉ ⲉⲧⲉⲣⲉ ⲡⲛⲟⲩⲧⲉ ⲉⲛⲉⲣⲅⲓⲐ ⲙⲙⲟⲟⲩ ⲉⲃⲟⲗ ϩⲓⲧⲟⲟⲧϥ ⲙⲙⲏⲛⲉ ⲁⲩⲱ ϣⲁⲉⲛⲉϩ ⲁⲩⲱ ⲛϥⲛⲁⲗⲟ ⲁⲛ ⲉϥⲓⲣⲉ ⲙⲙⲟⲟⲩ ⲟⲩⲁⲧⲉⲣϩⲗⲗⲟ ⲅⲁⲣ ⲛⲉ ⲛϭⲟⲙ ⲛⲧⲁ ⲡⲛⲟⲩⲧⲉ ⲭⲁⲣⲓⲍⲉ ⲙⲙⲟⲟⲩ ⲙⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲃⲟⲗ ϫⲉ ⲥⲉⲡⲟⲣϣ ⲉⲃⲟⲗ ⲉⲩⲛⲧⲟⲓⲕⲟⲩⲙⲉⲛⲏ ⲧⲏⲣⲥ ⲛⲑⲉ ⲛⲁⲕⲧⲓⲛ ⲙⲡⲣⲏ ⲉⲧⲙⲟⲩϣⲧ ⲙⲡⲕⲁϩ ⲧⲏⲣϥ ⲧⲁⲓ ⲟⲛ ⲧⲉ ⲑⲉ ⲛⲛⲉϭⲟⲙ ⲙⲡⲉⲓⲙⲁⲣⲧⲩⲣⲟⲥ ⲉⲩⲙⲟⲩϣⲧ ⲙⲡⲕⲁϩ ⲧⲏⲣϥ ⲡⲉϫⲁϥ ⲅⲁⲣ ⲛϭⲓ ⲡⲉⲛϫⲟⲉⲓⲥ ϩⲙ ⲡⲉⲩⲁⲅⲅⲉⲗⲓⲟⲛ ϫⲉ ⲧⲟⲧⲉ ⲛⲇⲓⲕⲁⲓⲟⲥ ⲥⲉⲛⲁⲣ ⲟⲩⲟⲓⲛ ⲛⲑⲉ ⲙⲡⲣⲏ ϩⲛ ⲧⲙⲛⲧⲉⲣⲟ ⲙⲡⲉⲩⲉⲓⲱⲧ ⲁⲩⲱ ⲟⲛ ϫⲉ ⲛⲉϩⲃⲏⲩⲉ ⲁⲛⲟⲕ ⲉϣⲉⲓⲣⲉ ⲙⲙⲟⲟⲩ
ⲛⲁⲓ ϩⲱⲟⲩ ⲟⲛ ⲛⲁⲁⲁⲩ ⲉⲣⲟⲟⲩ ⲛⲉⲓⲟⲩⲱϣ ⲙⲉⲛ ⲱ ⲛⲁⲙⲉⲣⲁⲧⲉ ⲉϫⲱ ⲉⲣⲱⲧⲛ ⲛϩⲉ ⲛⲁϣⲏ ⲛϭⲟⲙ ⲉⲃⲟⲗ ϫⲉ ⲁⲡⲛⲁⲩ ⲡⲣⲟⲕⲟⲡⲧⲉⲓ ⲛⲧⲟⲟⲧⲛ ⲁⲩⲱ ⲟⲛ ⲉⲧⲃⲉ ⲡϩⲟϫϩⲉϫ ⲛⲙⲙⲏⲏϣⲉ ⲁⲗⲗⲁ ϯⲛⲁⲣⲟⲉⲓⲥ ⲉⲡⲕⲉⲥⲉⲉⲡⲉ ⲙⲡⲇⲓⲏⲅⲏ ϣⲁ ⲡⲉϥⲣⲁⲥⲧⲉ ϫⲉⲕⲁⲥ ⲉϥⲉⲡⲣⲉⲥⲃⲉⲩⲉ ϩⲁⲣⲟⲛ ⲛϭⲓ ⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲁⲓ ⲉⲧⲉⲛⲉⲣϣⲁ ⲛⲁϥ ⲙⲡⲟⲟⲩ ϫⲉⲕⲁⲥ ⲉⲛⲛⲁⲙⲁⲧⲉ ⲛⲟⲩⲕⲱ ⲉⲃⲟⲗ ⲛⲛⲉⲛⲛⲟⲃⲉ ϩⲙ ⲡⲉϩⲟⲟⲩ ⲉⲧⲉⲣⲉ ⲡϣⲏⲣⲉ ⲙⲡⲛⲟⲩⲧⲉ ⲛⲁⲕⲣⲓⲛⲉ ⲛⲧⲟⲓⲕⲟⲩⲙⲉⲛⲏ ⲧⲏⲣⲥ
ⲡⲁⲓ ⲉϥⲉϣⲱⲡⲉ ⲉⲧⲣⲛⲙⲁⲧⲉ ⲙⲙⲟϥ ⲧⲏⲣⲉⲛ ϩⲓⲧⲛ ⲧⲉⲭⲁⲣⲓⲥ ⲙⲛ ⲧⲙⲛⲧⲙⲁⲓⲣⲱⲙⲉ ⲙⲡⲉⲛϫⲟⲉⲓⲥ ⲓ̅ⲥ̅ ⲡⲉⲭ̅ⲥ̅ ⲡⲉⲛⲥⲱⲧⲏⲣ ⲁⲩⲱ ⲡⲉⲛⲛⲟⲩⲧⲉ ⲡⲁⲓ ⲉⲃⲟⲗ ϩⲓⲧⲟⲟⲧϥ ⲉⲣⲉ ⲉⲟⲟⲩ ⲛⲓⲙ ⲡⲣⲉⲡⲉⲓ ⲛⲁϥ ⲙⲛ ⲡⲉϥⲉⲓⲱⲧ ⲛⲁⲅⲁⲑⲟⲥ ⲙⲛ ⲡⲉⲡ̅ⲛ̅ⲁ̅ ⲉⲧⲟⲩⲁⲁⲃ ⲛⲣⲉϥⲧⲁⲛϩⲟ ⲁⲩⲱ ⲛϩⲟⲙⲟⲟⲩⲥⲓⲟⲛ ⲧⲉⲛⲟⲩ ⲁⲩⲱ ⲛⲟⲩⲟⲉⲓϣ ⲛⲓⲙ ϣⲁ ⲉⲛⲉϩ ⲛⲉⲛⲉϩ ϩⲁⲙⲏⲛ