ϩⲉⲛⲥⲩⲛⲅⲣⲁⲙⲙⲁ ⲛ̅ⲧⲉ ϩⲛ̅ⲫⲓⲗⲟⲥⲟⲫⲟⲥ
ⲛⲁⲣⲭⲱⲥⲓⲥ ⲡⲉⲫⲓⲗⲥⲟⲫⲟⲥ ⲡⲉⲧⲏⲡ ⲉⲧⲉⲥⲕⲩⲑⲓⲁ ⲁϥϫⲟⲟⲥ ⲉⲧⲃⲉ ⲧⲃⲱ ⲛ̅ⲉⲗⲟⲟⲗⲉ ϫⲉ ϣⲁⲥⲛⲟⲩϫ ⲉⲃⲟⲗ ⲛ̅ϣⲟⲙⲛ̅ⲧ ⲛ̅ⲥⲙⲁϩ ⲛ̅ϣⲟⲣⲡ ⲙⲉⲛ ⲟⲩⲟⲩϫⲁⲓ ⲡⲉ ⲡⲙⲉϩⲥⲛⲁⲩ ⲟⲩϩⲏⲇⲟⲛⲏ ⲡⲉ ⲡⲙⲉϩϣⲟⲙⲛ̅ⲧ ⲟⲩⲥⲱϣ ⲡⲉ.ⲇⲓⲟⲅⲉⲛⲏⲥ ⲡⲉⲫⲓⲗⲟⲥⲟⲫⲟⲥ ⲁϥⲛⲁⲩ ⲉⲩⲡⲁⲣⲑⲉⲛⲟⲥ ⲉⲩⲧⲥⲁⲃⲟ ⲙ̅ⲙⲟⲥ ⲉⲥϩⲁⲓ ⲡⲉϫⲁϥ ϫⲉ ⲉⲓⲥ ⲟⲩⲥⲏⲃⲉ ⲉⲑϫⲱⲣ ⲙ̅ⲙⲟⲥ
ⲇⲓⲟⲅⲉⲛⲏⲥ ⲡⲉⲫⲓⲗⲟⲥⲟⲫⲟⲥ ⲁⲟⲩⲁⲟ ϫⲛⲟⲩϥ ϫⲉ ⲟⲩ ⲡⲉⲧϫⲏⲣ ⲉⲧϭⲟⲣⲧⲉ. ⲡⲉϫⲁϥ ϫⲉ ⲧⲉⲡⲓⲃⲟⲩⲗⲏ ⲛ̅ⲛ̅ⲣⲱⲙⲉ ⲧⲉ.
ⲁⲕⲉⲫⲓⲗⲟⲥⲟⲫⲟⲥ ϫⲟⲟⲥ ϫⲉ ⲛⲁⲛⲟⲩ ⲉⲣ ⲡⲡⲉⲧⲛⲁⲛⲟⲩϥ ⲛ̅ⲟⲩⲟⲩϩⲟⲟⲣ ⲙⲛ̅ ⲟⲩⲙⲟⲩⲓ ⲉϩⲟⲩⲉ ⲧⲣⲩⲫⲁ ⲛ̅ⲟⲩⲣⲱⲙⲉ ⲛ̅ⲁⲧϣⲉⲡϩⲙⲟⲧ. ⲉϣϫⲉ ⲡⲉⲩϩⲟⲟⲣ ⲙⲛ̅ ⲡⲙⲟⲩⲓ ϣⲁⲩϣⲱϫⲡⲱ ⲛ̅ⲅⲛⲏⲥⲓⲟⲥ ⲉⲩⲁⲣⲉϩ ⲉⲧⲙⲛ̅ⲧϣⲃⲏⲣ ⲙ̅ⲡⲉⲧⲥⲁⲁⲛϣ ⲙ̅ⲙⲟⲩ. ⲡⲁⲇⲓⲁⲑⲏⲧⲟⲥ ⲇⲉ ⲛ̅ⲧⲟϥ ⲟⲩ ⲙⲟⲛⲟⲛ ϫⲉ ⲙⲉϥⲁⲣⲉϩ ⲉⲧⲙ̅ⲛⲧϣⲃⲏⲣ. ⲁⲗⲗⲁ ϣⲁⲕϭⲉⲛⲧϥ ⲉⲕⲣ̅ ⲡⲉⲧⲛⲁⲛⲟⲩϥ ⲛⲁϥ. ⲉϥϣⲓⲛⲉ ⲛ̅ⲥⲁ ⲧⲱⲣⲡ ⲙ̅ⲡⲉⲕⲏⲓ ⲁⲩⲱ ⲉⲧⲁⲁⲕ ⲉϩⲣⲁⲓ ⲛ̅ⲛ̅ϭⲓϫ ⲛ̅ⲛⲉⲕϫⲁϫⲉ.
ⲡⲉϫⲁϥ ⲛ̅ϭⲓ ⲟⲩⲫⲓⲗⲟⲥⲟⲫⲟⲥ ϫⲉ ⲟⲩⲛ̅ⲧⲁⲓ ⲙ̅ⲙⲁⲩ ⲛ̅ϣⲟⲙⲛ̅ⲧ ⲛ̅ϣⲃⲏⲣ. ⲡϣ̅ⲟⲣⲡ ⲛ̅ϩⲏⲧⲟⲩ ⲛⲉⲓⲟⲩⲁϣϥ̅ ⲡⲉ ϩⲙ̅ ⲡⲁϩⲏⲧ ⲧⲏⲣϥ̅ ⲙⲛ̅ ⲛⲁⲙⲉⲉⲩⲉ ⲧⲏⲣⲟⲩ ⲁⲩⲱ ⲉⲣⲉⲛⲁⲣⲟⲟⲩϣ ⲧⲏⲣⲟⲩ ϣⲟⲟⲡ ϩⲣⲁⲓ ⲛ̅ϩⲏⲧϥ̅. ⲡⲉⲙϩⲥⲁⲛⲩ ⲉⲧⲛ̅ϩⲏⲧⲟⲩ ⲉⲛⲉⲓⲟⲩⲁϣϥ̅ ⲟⲛ ⲡⲉ ⲁⲗⲗⲁ ⲛ̅ⲑⲉ ⲙ̅ⲡϣⲟⲣⲡ ⲁⲛ. ⲡⲙⲉϩϣⲙⲛ̅ⲑ ⲛ̅ϯⲛⲁⲟⲩⲁϣϥ̅ ⲁⲛ ⲡⲉ ⲛ̅ⲑⲉ ⲛ̅ⲟⲩⲁ ϩⲛ̅ ⲛⲁⲓ. ⲁⲡⲣ̅ⲣⲟ ⲧⲛ̅ⲛⲟⲩ ⲛ̅ⲥⲱⲓ. ⲁⲓⲃⲱⲕ ϩⲁϩⲧⲙ̅ ⲡϣⲟⲣⲡ̅ ⲛ̅ϣⲃⲏⲣ ⲁⲓϫⲛⲟⲩϥ ϫⲉ ⲕⲥⲟⲩⲩⲛ̅ ϫⲉ ⲛ̅ⲧⲟⲕ ⲡⲉ ⲡⲁϣⲟⲣⲡ̅ ⲛ̅ϣⲃⲏⲣ ⲁⲩⲱ ⲛ̅ⲛⲟϭ. ⲉⲃⲟⲗ ϫⲉ ⲛ̅ⲧⲁⲡⲣ̅ⲣⲟ ⲧⲛ̅ⲛⲟⲟⲩ ⲛ̅ⲥⲱⲓ. ⲉⲓⲟⲩⲱϣ ⲉⲧⲣⲉⲕⲉⲓ ⲛⲙ̅ⲙⲁⲓ ϣⲁⲛϯⲡⲁⲛⲧⲁ ⲉⲣⲟϥ. ⲡⲉϫⲁϥ ⲛⲁϥ ϫⲉ ⲙⲉⲓⲉⲓ ⲛⲙ̅ⲙⲁⲕ ⲉⲓϣⲟⲟⲡ ⲙⲛ̅ ϩⲉⲛⲕⲟⲟⲩⲉ ⲁϥⲃⲱⲕ ϩⲁϩⲧⲙ̅ ⲡⲉϥⲙⲉϩⲥⲛⲁⲩ ⲛ̅ϣⲃⲏⲣ ⲁϥϫⲛⲟⲩϥ ⲟⲛ ⲕⲁⲧⲁ ϯϩⲉ. ⲡⲉϫⲁϥ ϫⲉ ⲕⲥⲟⲟⲩⲛ̅ ϫⲉ ϯⲟⲩⲁϣⲕ̅ ϩⲛ̅ ⲛⲉϯⲙⲉ ⲙ̅ⲙⲟⲟⲩ. ⲡⲉⲧⲉ ϣⲁⲓⲉϣ ⲁⲁϥ ⲡⲉ ⲡⲁⲓ: ϣⲁⲓⲉϣ ⲛⲙ̅ⲙⲁⲕ ϣⲁ ⲡⲣⲟ ⲙ̅ⲡⲏⲓ ⲙ̅ⲡⲣ̅ⲣⲟ ⲛ̅ⲧⲁⲥⲧⲟⲓ ⲁϥⲃⲱⲕ ϩⲁϩⲧⲙ̅ ⲡⲙⲉϩϣⲟⲙⲛ̅ⲧ ⲛ̅ϣⲃⲏⲣ ϫⲉ ⲉⲓⲟⲩⲱϣ ⲉⲧⲣⲉⲕⲉⲓ ⲛ̅ⲙⲙⲁⲓ ϣⲁ ⲡⲣ̅ⲣⲟ ⲣⲡⲣⲓ ⲛ̅ⲧⲁϥⲧⲛ̅ⲟⲟⲩ ⲛ̅ⲥⲱⲓ. ⲡⲉϫⲁϥ ϫⲉ ⲕⲁⲛ ⲛ̅ϥⲟⲩⲁϣⲧ ⲁⲛ ⲛ̅ⲑⲉ ⲛ̅ⲟⲩⲁ ϩⲛ̅ ⲕⲟⲟⲩⲉ. ⲁⲛⲟⲕ ϣⲁⲓⲉⲓ ⲛⲙ̅ⲙⲁⲕ. ⲛⲁ ⲡⲏⲓ ⲙ̅ⲡⲣ̅ⲣⲟ ϣⲁⲛⲧⲉⲕϫⲓ ⲧⲉⲕⲁⲡⲟⲕⲣⲏⲥⲓⲥ.
ⲉⲣⲙⲉⲛⲓⲁ: ⲡϣⲟⲣⲡ̅ ⲛ̅ϣⲃⲏⲣ ⲙ̅ⲡⲣⲱⲙⲉ ⲡⲉ ⲡⲉⲓⲕⲟⲥⲙⲟⲥ. ⲉϥⲟⲩⲁϣϥ̅ ϩⲙ̅ ⲡⲉϥϩⲏⲧ ⲧⲏⲣϥ̅ ⲙⲛ̅ ⲧⲉϥⲯⲩⲭⲏ ⲧⲏⲣⲥ̅ ⲁⲩⲱ ϥⲡⲉⲣⲓ̀ⲥⲡⲁ ϩⲓⲱⲱϥ ⲙ̅ⲡⲉϩⲟⲟⲩ ⲙⲛ̅ ⲧⲉⲩϣⲏ. ⲡⲣ̅ⲣⲟ ⲛ̅ⲧⲁϥⲧⲛ̅ⲛⲟⲟⲩ ⲛ̅ⲥⲱϥ ⲡⲉ ⲡⲛⲟⲩⲧⲉ ⲛ̅ⲧⲁϥϣⲓⲛⲉ ⲛ̅ⲥⲱϥ. ⲙⲉⲣⲉⲡⲉⲓⲕⲟⲥⲙⲟⲥ ⲡⲁ ⲱ ⲫⲉⲗⲉⲓ ⲙ̅ⲙⲟϥ ⲗⲁⲁⲩ ⲁⲗⲗⲁ ⲉϥϣⲟⲟⲡ ⲙⲛ̅ ϩⲉⲛⲕⲟⲟⲩⲉ. ⲡⲙⲉϩⲥⲛⲁⲩ ⲛ̅ϣⲃⲏⲣ ⲡⲉ ⲧⲙⲁⲁⲩ ⲙ̅ⲡⲣⲱⲙⲉ. ⲉⲟⲩⲁϣϥ̅ ⲥⲙⲉ ⲙ̅ⲙⲟϥ. ⲁⲗⲗⲁ ⲡⲉⲧⲉ ϣⲁⲥⲉϣ ⲁⲁϥ ⲙ̅ⲙⲁⲧⲉ ⲡⲉ ⲡⲁⲓ: ϣⲁⲥⲃⲱⲕ ⲛⲙ̅ⲙⲁϥ ⲉⲡⲧⲁⲫⲟⲥ ϣⲁⲥⲥⲟⲧⲥ ⲉⲡⲉⲥⲏⲓ. ⲡⲉⲙϩϣⲟⲙⲛ̅ⲧ ⲛ̅ϣⲃⲏⲣ ⲙ̅ⲡⲣⲱⲙⲉ ⲡⲉ ⲛⲉϩⲃⲏⲩⲉ ⲙ̅ⲡⲛⲟⲩⲧⲉ. ⲉϣⲱⲡⲉ ⲟⲩⲛ̅ ϩⲉⲛⲕⲟⲩⲓ ϩⲓⲱⲟⲩ. ϣⲁⲩⲙⲟⲟϣⲉ ⲛⲙ̅ⲙⲁϥ ⲙ̅ⲡⲉⲙⲧⲟ ⲉⲃⲟⲗⲙ̅ⲡⲛⲟⲩⲧⲉ ϣⲁⲛⲧⲉϥϫⲓ ⲛ̅ⲧⲉϥⲁⲡⲟⲫⲁⲥⲓⲥ.