Ⲡⲓⲣⲱⲙⲉⲟⲥ
Ⲙⲁⲝⲓⲙⲟⲥ ⲛⲉⲙ Ⲇⲟⲙⲉⲧⲓⲟⲥ
Ⲫⲃⲓⲟⲥ ⲛ̀ⲛⲓⲁⲅⲓⲟⲥ ⲛ̀ⲣⲱⲙⲉⲟⲥ Ⲙⲁⲝⲓⲙⲟⲥ ⲛⲉⲙ Ⲇⲟⲙⲉⲧⲓⲟⲥ ⲛⲉⲛϣⲏⲣⲓ ⲛ̀ⲟⲩⲁⲗⲉⲛⲧⲓⲟⲥ ⲡⲟⲩⲣⲟ ⲛ̀ⲛⲓⲣⲱⲙⲉⲟⲥ ⲉⲧⲁⲩϫⲱⲕ ⲙ̀ⲡⲟⲩⲃⲓⲟⲥ ⲉⲑⲛⲁⲛⲉϥ ⲉⲑⲙⲉϩ ⲛ̀ⲁⲣⲉⲧⲏ ⲛⲓⲃⲉⲛ ⲉⲁⲩϫⲱⲕ ⲉⲃⲟⲗ ⲛ̀ⲛⲓⲉⲛⲧⲟⲗⲏ ⲧⲏⲣⲟⲩ ⲛ̀ⲧⲉ ⲡⲓⲉⲩⲁⲅⲅⲉⲗⲓⲟⲛ ⲉ̅ⲑ̅ⲩ̅ ⲡⲓⲟⲩⲁⲓ ⲙⲉⲛ ⲛ̀ϧⲏⲧⲟⲩ ⲉⲧⲉ Ⲙⲁⲝⲓⲙⲟⲥ ⲡⲉ ⲁϥⲙⲧⲟⲛ ⲙ̀ⲙⲟϥ ⲛ̀ⲥⲟⲩⲓ̅ⲇ ⲙ̀ⲡⲓⲁⲃⲟⲧ Ⲧⲱⲃⲓ ⲡⲓⲭⲉⲧ ⲇⲉ ⲉⲧⲉ Ⲇⲟⲙⲉⲧⲓⲟⲥ ⲡⲉ ⲛ̀ⲥⲟⲩⲓ̅ⲍ ⲙ̀ⲡⲁⲓⲁⲃⲟⲧ ⲣⲱ ⲟⲛ ⲉⲁϥϩⲓⲥⲧⲟⲣⲓⲛ ⲙ̀ⲙⲟϥ ⲛ̀ϫⲉ ⲁⲃⲃⲁ Ⲡϣⲱⲓ ⲡⲓⲣⲉⲙⲕⲟⲛⲥⲧⲁⲛⲟⲩⲡⲟⲗⲓⲥ ⲟⲩⲟϩ ⲡⲓϣⲟⲣⲡ ⲛ̀ⲇⲓⲁⲕⲱⲛ ⲉⲧⲁϥϣⲱⲡⲓ ϧⲉⲛ Ϣⲓϩⲏⲧ ⲛⲁϩⲣⲁϥ ⲛ̀ⲁⲃⲃⲁ Ⲙⲁⲕⲁⲣⲓⲟⲥ ⲡⲓⲣⲱⲙⲓ ⲛ̀ⲧⲉ Ⲫϯ ⲛⲉⲙ ⲁⲃⲃⲁ Ⲓⲥⲓⲇⲱⲣⲟⲥ ⲫⲁⲓ ⲉⲧⲁϥⲙⲧⲟⲛ ⲙ̀ⲙⲟϥ ⲉϥⲟⲓ ⲛ̀ⲇⲓⲁⲕⲱⲛ ⲟⲩⲟϩ ⲁϥⲑⲱϣ ⲛ̀ⲁⲃⲃⲁ Ⲙⲱⲥⲏ ⲡⲓⲭⲁⲙⲉ ⲛ̀ⲧⲉϥϣⲉⲃⲓⲱ.
ⲉⲧⲁϥⲥϧⲉ ⲫⲃⲓⲟⲥ ϫⲉ ⲛ̀ⲛⲁⲓⲁⲅⲓⲟⲥ ⲛ̀ⲑⲟϥ ⲁⲃⲃⲁ Ⲡϣⲱⲓ ⲉⲟⲩⲉⲣⲫⲙⲉⲩⲓ ⲁϥⲭⲁϥ ϧⲉⲛ ϯⲉⲕⲕⲗⲏⲥⲓⲁ ⲉⲟⲩϩⲏⲟⲩ ⲛ̀ⲟⲩⲟⲛ ⲛⲓⲃⲉⲛ ⲉⲑⲟⲩⲱϣ ⲉⲱⲛϧ ⲕⲁⲧⲁ Ⲫϯ.
Ⲁⲙⲱⲓⲛⲓ ⲧⲏⲣⲟⲩ ⲙ̀ⲫⲟⲟⲩ ⲱ ⲛⲁⲓⲟϯ ⲉ̅ⲑ̅ⲩ̅ ⲟⲩⲟϩ ⲛ̀ⲑⲉⲟⲫⲟⲣⲟⲥ ⲛ̀ⲧⲉⲧⲉⲛⲑⲱⲟⲩϯ ⲉⲣⲟⲓ ϧⲉⲛ ⲟⲩϯϩⲑⲏϥ ⲛ̀ⲧⲁϫⲱ ⲉⲣⲱⲧⲉⲛ ⲛ̀ⲛⲓⲁⲣⲉⲧⲏ ⲛⲉⲙ ⲛⲓϣⲫⲏⲣⲓ ⲛⲉⲙ ⲛⲓϫⲟⲙ ⲛ̀ⲧⲉ ⲛⲁⲓⲁⲅⲓⲟⲥ ⲛ̀ⲣⲱⲙⲉⲟⲥ Ⲙⲁⲝⲓⲙⲟⲥ ⲛⲉⲙ Ⲇⲟⲙⲉⲧⲓⲟⲥ ⲛⲉⲛϣⲏⲣⲓ ⲛ̀Ⲟⲩⲁⲗⲉⲛⲧⲓⲛⲟⲥ ⲡⲓⲙⲁⲓⲛⲟⲩϯ ⲛ̀ⲟⲩⲣⲟ. ⲁⲥϣⲱⲡⲓ ϧⲉⲛ ⲡⲥⲏⲟⲩ ⲛ̀ⲁⲃⲃⲁ Ⲙⲁⲕⲁⲣ ⲫⲏⲉ̅ⲑ̅ⲩ̅ ⲙ̀ⲡ̅ⲛ̅ⲁ̅ⲧⲟⲫⲟⲣⲟⲥ ⲡⲓⲣⲱⲙⲓ ⲛ̀ⲧⲉ Ⲫϯ ⲉⲧⲁ ⲧⲁⲣⲭⲏ ⲛ̀ⲧⲉ Ϣⲓϩⲏⲧ ϣⲱⲡⲓ ⲉⲃⲟⲗϩⲓⲧⲟⲧϥ ⲛ̀ⲑⲟϥ ⲅⲁⲣ ⲡⲉ ⲉⲧⲁϥⲉⲣϣⲟⲣⲡ ⲛ̀ⲧⲱϫⲓ ⲙ̀ⲡⲁⲓⲓⲁϩⲁⲗⲟⲗⲓ ⲛ̀ⲧⲉ ⲡⲟ̅ⲥ̅ ⲥⲁⲃⲁⲱⲑ ⲉⲧⲉ Ϣⲓϩⲏⲧ ⲡⲉ ϣⲁⲧⲉϥⲭⲱ ⲛ̀ϧⲏⲧϥ ⲙ̀ⲡⲕⲁⲣⲡⲟⲥ ⲛ̀ϯⲙⲉⲧⲁⲛⲟⲓⲁ ⲙ̀ⲙⲏⲓ ϩⲓⲧⲉⲛ Ⲫϯ.
Ⲱ ⲡⲓⲧⲱⲟⲩ ⲉⲧⲥⲙⲁⲣⲱⲟⲩⲧ ⲛ̀ⲧⲉ Ϣⲓϩⲏⲧ ⲡⲓⲧⲱⲟⲩ ⲉⲧⲁ Ⲫϯ ϣⲱⲡⲓ ϩⲓϫⲱϥ ⲛⲉⲙ ⲛⲉϥⲁⲅⲅⲉⲗⲟⲥ ⲱ ⲡⲓⲧⲱⲟⲩ ⲛ̀ⲣⲉϥⲭⲁⲛⲟⲃⲓ ⲉⲃⲟⲗ ⲱ ⲡⲓⲧⲱⲟⲩ ⲉⲧⲁϥⲑⲣⲉ ⲛⲓⲣⲉϥⲉⲣⲛⲟⲃⲓ ⲛⲁⲩ ⲉⲪϯ ⲱ ⲛⲉⲙ ⲡⲁⲓⲧⲱⲟⲩ ⲙ̀ⲡ̅ⲛ̅ⲁ̅ⲧⲓⲕⲟⲛ ⲫⲁⲓ ⲉⲧⲁϥⲑⲣⲉ ⲡⲁⲓⲏⲓ ⲧⲏⲣϥ ⲙⲟϩ ⲛ̀ⲥⲑⲟⲓⲛⲟⲩϥⲓ ϩⲓⲧⲉⲛ ⲛⲓⲉⲩⲭⲏ ⲛ̀ⲧⲉ ⲛⲓⲁⲅⲓⲟⲥ ⲉⲧϣⲟⲡ ⲛ̀ϧⲏⲧϥ. ⲱ ⲛⲉⲙ ⲡⲁⲓⲧⲱⲟⲩ ⲉ̅ⲑ̅ⲩ̅ ⲛ̀ⲧⲉ ⲡⲓϩⲟⲥⲉⲙ ⲫⲁⲓ ⲉⲧⲁϥϣⲱⲡⲓ ⲛ̀ⲟⲩϩⲟⲥⲉⲙ ⲙ̀ⲡ̅ⲛ̅ⲁ̅ⲧⲓⲕⲟⲛ ⲉϥⲓⲱⲓ ⲉⲃⲟⲗ ⲛ̀ⲛⲓⲑⲱⲗⲉⲃ ⲛ̀ⲧⲉ ϯⲯⲩⲭⲏ. ⲁⲓⲛⲁϣⲫⲏⲣⲓ ⲉⲑⲃⲉ ⲡⲓⲧⲁⲓⲟ ⲉⲧⲁϥⲧⲁϩⲟⲕ ⲛ̀ⲁϣ ⲛ̀ⲣⲏϯ ⲱ ⲡⲓⲧⲱⲟⲩ ⲉⲧⲧⲁⲓⲏⲟⲩⲧ ⲛ̀ⲧⲉ ⲡⲓϩⲙⲟⲩ ⲫⲁⲓ ⲉⲧⲁ ⲟⲩⲙⲏϣ ⲛ̀ϩⲙⲟⲩ ⲛ̀ⲧⲉ ⲡⲓⲕⲁϩⲓ ⲛ̀ⲗⲟⲅⲓⲕⲟⲛ ⲫⲓⲣⲓ ⲉⲃⲟⲗⲛ̀ϧⲏⲧϥ ⲕⲁⲧⲁ ϯⲙⲉⲧⲙⲉⲑⲣⲉ ⲛ̀ⲧⲉ ⲡⲉⲛⲥ̅ⲱ̅ⲣ̅. ⲛⲁⲓ ⲉⲧⲁⲩϫⲟⲩⲕⲉⲣ ⲛ̀ⲛⲓⲯⲩⲭⲏ ⲉⲧⲁⲩⲱⲗϥ ϧⲉⲛ ⲛⲁⲓⲁⲛⲟⲙⲓⲁ. ⲱ ⲡⲓⲧⲱⲟⲩ ⲉ̅ⲑ̅ⲩ̅ ⲛ̀ⲧⲉ Ϣⲓϩⲏⲧ ⲫⲙⲁⲛⲑⲱⲟⲩϯ ⲛ̀ⲧⲉ ⲛⲓⲁⲅⲅⲉⲗⲟⲥ ⲛⲉⲙ ⲛⲓⲣⲱⲙⲓ ⲉⲩⲥⲟⲡ ϫⲉ ϩⲓⲛⲁ ⲛ̀ⲧⲁϫⲟⲥ ϧⲉⲛ ⲟⲩϣⲱⲧ ⲉⲃⲟⲗ ⲡⲓⲧⲱⲟⲩ ⲫⲁⲓ ⲉⲧⲁϥⲑⲣⲉ ⲛⲓⲥⲓⲛⲱⲟⲩⲓ ⲛ̀ⲣⲉϥϩⲱⲗⲉⲙ ⲛⲉⲙ ⲛⲏⲉⲧⲁⲩⲓⲣⲓ ⲛ̀ϩⲁⲛⲕⲉϩⲃⲏⲟⲩⲓ ⲉⲩⲧⲁⲥⲑⲏⲟⲩⲧ ⲉⲃⲟⲗ ϣⲱⲡⲓ ⲙ̀ⲡⲣⲟⲫⲏⲧⲏⲥ ⲟⲩⲟϩ ⲛ̀ⲣⲉϥⲥⲁϫⲓ ⲛⲉⲙ Ⲫϯ ⲡⲓⲇⲏⲙⲓⲟⲩⲣⲅⲟⲥ.
Ⲧⲉⲣⲙⲉⲛⲓⲁ ⲅⲁⲣ ⲛ̀Ϣⲓϩⲏⲧ ⲡⲉ ⲫⲙⲁⲛⲑⲱⲟⲩϯ ⲛ̀ⲛⲏⲉⲧⲕⲱϯ ⲛ̀ⲥⲁ Ⲫϯ ϧⲉⲛ ⲡⲟⲩϩⲏⲧ ⲧⲏⲣϥ ⲛⲁⲓ ⲉⲧⲁ Ⲫϯ ⲡⲓⲗⲟⲅⲟⲥ ⲑⲱⲟⲩϯ ⲙ̀ⲙⲱⲟⲩ ⲉϧⲟⲩⲛ ϧⲉⲛ ⲡⲓⲇ̅ ⲛ̀ⲗⲁⲕϩ ⲛ̀ⲧⲉ ⲡⲕⲁϩⲓ ϩⲓⲧⲉⲛ ϯⲥⲙⲏ ⲡⲓⲉⲩⲁⲅⲅⲉⲗⲓⲟⲛ ⲫⲁⲓ ⲉⲧϫⲱ ⲙ̀ⲙⲟⲥ ϫⲉ ⲫⲏⲉⲑⲙⲉⲓ ⲙ̀ⲙⲟϥ ⲙⲁⲣⲉϥϫⲟⲗϥ ⲉⲃⲟⲗ ⲟⲩⲟϩ ⲛ̀ⲧⲉϥⲱⲗⲓ ⲙ̀ⲡⲉϥ⳧ ⲛ̀ⲧⲉϥⲙⲟϣⲓ ⲛ̀ⲥⲱⲓ. ϧⲉⲛ ⲫⲁⲓ ⲅⲁⲣ ⲁϥⲭⲱ ⲛ̀ϧⲏⲧⲟⲩ ⲛ̀ⲛⲓⲙⲕⲁⲩϩ ⲛ̀ⲧⲉ ⲡⲉϥ⳧ ⲉ̅ⲑ̅ⲩ̅ ϩⲓⲧⲉⲛ ⲡⲉϥⲃⲱⲕ ⲁⲃⲃⲁ Ⲙⲁⲕⲁⲣⲓⲟⲥ ⲫⲁⲓ ⲉⲧⲟⲓ ⲛ̀ⲧⲩⲡⲟⲥ ⲛⲱⲟⲩ ϧⲉⲛ ϩⲱⲃ ⲛⲓⲃⲉⲛ ϫⲉ ϩⲓⲛⲁ ϧⲉⲛ ϯϫⲟⲙ ⲛ̀ⲧⲉ ⲡⲓ⳧ ⲉ̅ⲑ̅ⲩ̅ ⲛ̀ⲧⲟⲩϭⲟϫⲓ ⲛ̀ⲥⲁ ϯϫⲟⲙ ⲧⲏⲣⲥ ⲛ̀ⲧⲉ ⲡⲓⲁⲛⲧⲓⲕⲓⲙⲉⲛⲟⲥ ⲉⲃⲟⲗϧⲉⲛ ⲡϣⲁϥⲉ ϩⲓⲛⲁ ϫⲉ ⲛ̀ⲧⲁϣⲧⲉⲙⲱⲥⲕ ϧⲉⲛ ⲡⲁⲓⲥⲁϫⲓ ⲛ̀ⲧⲉ ϯϩⲩⲡⲟⲑⲉⲥⲓⲥ ⲉⲧⲁⲛⲭⲁⲥ ⲉϧⲣⲏⲓ ⲛ̀ϣⲟⲣⲡ ϯⲛⲁⲕⲟⲧⲧ ϩⲓϫⲉⲛ ⲡⲓⲡⲣⲟⲕⲓⲙⲉⲛⲟⲛ ⲛ̀ⲧⲁⲥⲁϫⲓ ⲕⲁⲧⲁ ⲫⲏⲉⲧⲉ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ⲛⲁⲉⲣⲭⲩⲣⲟⲕⲓⲛ ⲙ̀ⲙⲟϥ ⲛⲏⲓ. ⲉⲡⲓⲇⲏ ⲁⲥϣⲁⲛϣⲱⲡⲓ ⲛ̀ⲧⲁⲥⲱⲧⲉⲙ ⲉⲁⲃⲃⲁ Ⲙⲁⲕⲁⲣ ⲡⲓⲣⲱⲙⲓ ⲛ̀ⲧⲉ Ⲫϯ ⲉϥⲥⲁϫⲓ ⲛⲉⲙ ⲛⲓϧⲉⲗⲗⲟⲓ ⲛⲉ ϣⲁϥϫⲟⲥ ⲛⲱⲟⲩ ϫⲉ ⲁⲙⲱⲓⲛⲓ ⲛ̀ⲧⲉⲧⲉⲛⲛⲁⲩ ⲉⲡⲓ⳥ ⲛ̀ⲧⲉ ⲛⲓⲕⲟⲩϫⲓ ⲛ̀ϣⲉⲙⲙⲱⲟⲩ ⲡϩⲱⲃ ϩⲓ ⲁⲛⲁⲅⲕⲏ ⲉⲣⲟⲓ ϧⲉⲛ ⲟⲩⲭⲟϩ ⲛ̀ⲧⲉ Ⲫϯ ⲛ̀ⲧⲁⲟⲩⲱⲛϩ ⲉⲃⲟⲗ ⲛ̀ⲑⲙⲉⲧϫⲱⲣⲓ ⲛ̀ⲛⲁⲓⲁⲅⲓⲟⲥ ⲛⲉⲙ ⲧⲟⲩⲡⲟⲗⲓⲧⲓⲁ ⲉⲑⲛⲁⲛⲉⲥ.
Ⲁⲥϣⲱⲡⲓ ⲇⲉ ⲉϥⲟⲓ ⲛ̀ⲟⲩⲣⲟ ⲛ̀ϫⲉ ⲟⲩⲗⲉⲛⲧⲓⲛⲟⲥ ⲡ̀ϣⲏⲣⲓ ⲙ̀ⲡⲓϣⲁⲙϣⲉⲛⲟⲩϯ ⲡ̀ⲟⲩⲣⲟ ⲓⲟⲩⲃⲓⲁⲛⲟⲥ ⲫⲁⲓ ⲉ̀ⲧⲁϥϣⲟⲣϣⲉⲣ ⲛ̀ⲛⲓⲉⲣⲫⲏⲟⲩⲓ ⲧⲏⲣⲟⲩ ⲛ̀ⲧⲉ ⲛⲓϣⲁⲙϣⲉ ⲓⲇⲱⲗⲟⲛ ⲉⲧⲥⲟϥ ⲁϥⲫⲱⲣⲕ ⲙ̀ⲡⲥⲱϫⲡ ⲛ̀ⲛⲟⲩⲥⲉⲛϯ. ⲛⲉ ⲟⲩⲟⲛ ⲟⲩⲛⲓϣϯ ⲛ̀ϩⲓⲣⲏⲛⲏ ϣⲟⲡ ⲡⲉ ϧⲉⲛ ⲛⲓⲉⲕⲕⲗⲏⲥⲓⲁ ⲛ̀ⲧⲉ Ⲫϯ ⲉⲧϣⲟⲡ ϧⲉⲛ ϯⲟⲓⲕⲟⲩⲙⲉⲛⲏ ϩⲱⲥⲧⲉ ⲛ̀ⲧⲟⲩⲙⲟⲩϯ ⲉⲣⲟϥ ⲛ̀ⲑⲟϥ Ⲟⲩⲁⲗⲉⲛⲧⲓⲟⲥ Ⲕⲱⲥⲧⲁⲛⲧⲓⲛ ⲙ̀ⲃⲉⲣⲓ. ⲗⲟⲓⲡⲟⲛ ⲁϥⲉⲛ ⲛⲉϥϣⲏⲣⲓ ⲉⲡϣⲱⲓ ⲛ̀ⲕⲁⲗⲱⲥ Ⲙⲁⲝⲓⲙⲟⲥ ⲛⲉⲙ Ⲇⲟⲙⲉⲧⲓⲟⲥ ⲧⲟⲩⲕⲟⲩϫⲓ ⲛ̀ⲥⲱⲛⲓ ϧⲉⲛ ⲙⲉⲧϣⲁⲙϣⲉⲛⲟⲩϯ ⲛⲓⲃⲉⲛ ⲛⲉⲙ ϯⲥⲃⲱ ⲉⲑⲛⲁⲛⲉⲥ ϧⲉⲛ ϩⲁⲛⲯⲁⲗⲙⲟⲥ ⲛⲉⲙ ϩⲁⲛⲛⲏⲥⲧⲓⲁ ⲛⲉⲙ ϩⲁⲛϣⲗⲏⲗ ⲛ̀ϫⲱⲣϩ ⲛⲉⲙ ⲙⲉⲣⲓ ⲛⲉⲙ ϩⲁⲛⲙⲉⲗⲉⲧⲏ ⲉⲩⲙⲏⲛ ⲉⲃⲟⲗ ϩⲱⲥⲧⲉ ⲛ̀ⲧⲉ ⲡⲓⲡⲁⲗⲁⲧⲓⲟⲛ ⲉⲣ ⲙ̀ⲫⲣⲏϯ ⲛ̀ⲟⲩⲙⲟⲛⲁⲥⲧⲏⲣⲓⲟⲛ ⲙ̀ⲙⲟⲛⲁⲭⲟⲥ ϧⲉⲛ ⲛⲉϥⲉϩⲟⲟⲩ ⲟⲩⲟϩ ⲛⲁϥⲑⲣⲟ ⲙ̀ⲙⲱⲟⲩ ⲡⲉ ⲉⲉⲣⲁⲥⲕⲓⲛ ⲧⲏⲣⲟⲩ ⲓⲥϫⲉⲛ ⲡⲟⲩⲕⲟⲩϫⲓ ϣⲁ ⲡⲟⲩⲛⲓϣϯ ⲙ̀ⲫⲣⲏϯ ⲛ̀ϩⲁⲛⲥⲱⲧⲡ ⲙ̀ⲙⲟⲛⲁⲭⲟⲥ ⲥⲭⲉⲗⲟⲥ ⲛ̀ⲧⲟⲩⲙⲟⲩϯ ⲛ̀ⲛⲁⲓⲁⲅⲓⲟⲥ ϩⲓⲧⲉⲛ ⲟⲩⲟⲛ ⲛⲓⲃⲉⲛ ⲓⲥϫⲉ ⲉⲩⲟⲓ ⲛ̀ⲕⲟⲩϫⲓ ϫⲉ ⲛⲓϧⲉⲗⲗⲟⲓ ⲉⲑⲃⲉ ⲛⲟⲩϩⲃⲏⲟⲩⲓ ⲉⲑⲛⲁⲛⲉⲩ ⲛⲉⲙ ⲡⲟⲩⲥⲙⲟⲧ ⲛ̀ϣⲁⲙϣⲉⲛⲟⲩϯ.
Ⲗⲟⲓⲡⲟⲛ ϧⲉⲛ ⲡϫⲓⲛⲑⲣⲉ ⲛⲁⲓⲙⲁⲕⲁⲣⲓⲟⲥ. Ⲙⲁⲝⲓⲙⲟⲥ ⲛⲉⲙ Ⲇⲟⲙⲉⲧⲓⲟⲥ ⲁⲓⲁⲓ ⲟⲩⲟϩ ⲛ̀ⲧⲟⲩϭⲓ ⲡⲣⲟⲕⲟⲡⲧⲏ ϧⲉⲛ ⲛⲓϩⲃⲏⲟⲩⲓ ⲉⲑⲛⲁⲛⲉⲩ ⲕⲁⲧⲁ Ⲫϯ ⲁⲩⲕⲱϯ ⲛ̀ⲥⲁ ⲫⲃⲓⲟⲥ ⲛ̀ⲛⲓⲁⲅⲅⲉⲗⲟⲥ ⲉⲧⲉ ϯⲙⲟⲛⲁⲭⲟⲥ ⲧⲉ ⲟⲩⲟϩ ⲛⲁⲩⲥⲟϭⲛⲓ ⲡⲉ ⲛⲉⲙ ⲛⲟⲩⲉⲣⲏⲟⲩ ⲉⲩϫⲱ ⲙ̀ⲙⲟⲥ ϫⲉ ⲁⲛⲛⲁϣⲫⲱⲧ ⲛ̀ⲁϣ ⲛ̀ⲣⲏϯ ⲛ̀ⲧⲉⲛⲉⲣⲙⲟⲛⲁⲭⲟⲥ ⲟⲩⲟϩ ⲡⲉϫⲉ ⲡⲓⲕⲟⲩϫⲓ ⲙ̀ⲡⲓⲛⲓϣϯ ϫⲉ ⲙⲁⲣⲉⲛϫⲉⲙⲗⲱⲓϫⲓ ⲙ̀ⲡⲉⲛⲓⲱⲧ ⲟⲩⲟϩ ⲛ̀ⲧⲉϫⲟⲥ ⲛⲁϥ ϫⲉ ⲁⲛⲛⲁϩⲱⲗ ⲉⲚⲓⲕⲓⲉⲩ ⲛ̀ⲧⲉⲛϣⲗⲏⲗ ϧⲉⲛ ⲡⲧⲟⲡⲟⲥ ⲟⲩⲟϩ ⲁϥϣⲁⲛⲭⲁⲛ ⲉⲃⲟⲗ ⲡⲓⲙⲁ ϫⲉ ⲉⲧⲉⲛⲟⲩⲁϣϥ ⲧⲉⲛⲛⲁϩⲱⲗ ⲉⲣⲟϥ.
Ⲉⲧⲁⲩⲥⲟϭⲛⲓ ⲇⲉ ⲉⲡⲟⲩⲓⲱⲧ ⲁϥⲁⲓⲧⲟⲩ ⲛ̀ⲣⲉⲙϩⲉ ⲛⲉ ⲟⲩⲟⲛ ⲟⲩⲡⲣⲉⲥⲃⲩⲧⲉⲣⲟⲥ ⲇⲉ ⲉϥϣⲟⲡ ϧⲉⲛ ⲡⲧⲟⲡⲟⲥ ⲙ̀ⲡⲓⲧ̅ⲓ̅ⲏ ⲛ̀ⲉⲡⲓⲥⲕⲟⲡⲟⲥ ⲉⲡⲉϥⲣⲁⲛ ⲡⲉ Ⲓⲱ̅ⲁ̅ ⲉⲟⲩⲙⲟⲛⲁⲭⲟⲥ ⲡⲉ ⲟⲩⲟϩ ⲫⲁⲓ ⲛⲁⲣⲉ ⲛⲓⲟⲩⲣⲱⲟⲩ ⲥⲟϭⲛⲓ ⲉⲣⲟϥ ⲡⲉ ⲛ̀ⲟⲩⲙⲏϣ ⲛ̀ⲥⲟⲡ ⲛⲉⲙ ⲛⲓⲉⲡⲓⲥⲕⲟⲡⲟⲥ ⲛ̀ⲧⲉ ⲡⲓⲙⲁ ⲉⲧⲉⲙⲙⲁⲩ. ⲉⲧⲁⲩϫⲓⲙⲓ ⲟⲩⲛ ⲛ̀ⲟⲩⲉϩⲟⲟⲩ ⲉϥⲑⲏϣ ⲛ̀ϫⲉ ⲛⲓⲙⲕⲁⲣⲓⲟⲥ ⲁⲩϯ ϩⲓⲱⲧⲟⲩ ⲛ̀ϩⲁⲛϩⲃⲱⲥ ⲉⲛⲁⲛⲉⲩ ⲟⲩⲟϩ ⲁⲩⲁⲗⲏⲓ ⲉⲛⲟⲩϩⲑⲱⲣ ⲁⲩⲓ ⲉⲃⲟⲗ ϫⲉ ⲁⲩϣⲉⲛⲱⲟⲩ ⲉⲚⲓⲕⲉⲁ ⲉϣⲗⲏⲗ ϧⲉⲛ ⲡⲧⲟⲡⲟⲥ ⲛ̀ⲛⲉⲛⲓⲟϯ ⲉ̅ⲑ̅ⲩ̅ ⲛ̀ⲉⲡⲓⲥⲕⲟⲡⲟⲥ. ⲉⲧⲁⲩϣⲉ ⲇⲉ ⲛⲱⲟⲩ ⲉⲚⲓⲕⲉⲁ ⲉϣⲗⲏⲗ ϧⲉⲛ ⲡⲧⲟⲡⲟⲥ ⲁⲩϫⲓⲙⲓ ⲙ̀ⲡⲓⲡⲣⲉⲥⲃⲩⲧⲉⲣⲟⲥ ⲉ̅ⲑ̅ⲩ̅ Ⲓⲱ̅ⲁ̅ ⲫⲏⲉⲧⲁⲛⲉⲣϣⲟⲣⲡ ⲛ̀ⲫⲓⲣⲓ ⲉⲣⲟϥ ⲟⲩⲟϩ ⲁϥϣⲟⲡⲟⲩ ⲉⲣⲟϥ ϧⲉⲛ ⲟⲩⲙⲉⲧⲉⲣⲙⲣⲁⲩϣ ⲛⲉⲙ ⲟⲩⲧⲓⲙⲏ ⲟⲩⲟϩ ⲁⲩⲧⲁⲙⲟϥ ⲉⲡⲓⲣⲏϯ ⲉⲧⲟⲩⲟⲩⲱϣ ⲉⲉⲣⲙⲟⲛⲁⲭⲟⲥ. ⲛ̀ⲑⲟϥ ⲇⲉ ϩⲓⲧⲉⲛ ⲡⲓϩⲙⲟⲧ ⲛ̀ⲧⲉ Ⲫϯ ⲛⲁϥⲉⲣⲇⲟⲕⲓⲙⲁⲍⲓⲛ ⲙ̀ⲡⲟⲩⲙⲉⲩⲓ ⲡⲉ ϩⲓⲛⲁ ⲛ̀ⲧⲉϥⲉⲙⲓ ⲁⲕⲣⲓⲃⲱⲥ ⲉⲛⲟⲩⲙⲉⲩⲓ ⲙ̀ⲡⲁⲧⲉϥ ϫⲉ ϩⲗⲓ ⲛ̀ⲥⲁϫⲓ ⲛⲱⲟⲩ ϩⲟⲧⲉ ⲇⲉ ⲉⲧⲁϥⲛⲁⲩ ⲉⲧⲟⲩⲡⲣⲟϩⲉⲣⲥⲓⲥ ⲉⲥⲥⲟⲩⲧⲱⲛ ⲉϧⲟⲩⲛ ⲉⲪϯ ⲁϥⲣⲁϣⲓ ⲉⲙⲁϣⲱ ⲟⲩⲟϩ ⲁϥϯⲛⲟⲙϯ ⲛⲱⲟⲩ. ⲛ̀ⲑⲱⲟⲩ ⲇⲉ ⲛⲁⲩϯϩⲟ ⲉⲣⲟϥ ⲡⲉ ϩⲓⲛⲁ ⲛ̀ⲧⲟⲩϣⲱⲡⲓ ϧⲁⲧⲟⲧϥ ⲛ̀ⲑⲟϥ ⲇⲉ ⲙ̀ⲡⲉϥⲉⲣⲁⲛⲉⲭⲉⲥⲑⲉ ⲛⲱⲟⲩ ⲉϥϫⲱ ⲙ̀ⲙⲟⲥ ϫⲉ ϯⲉⲣϩⲟϯ ϧⲁⲧϩⲏ ⲙ̀ⲡⲉⲧⲉⲛⲓⲱⲧ ⲡⲟⲩⲣⲟ ϯⲛⲁϣⲉⲣⲣ ⲡⲁⲓϩⲱⲃ ⲫⲁⲓ ⲁⲛ ⲁⲗⲗⲁ ⲓⲥϫⲉ ⲧⲉⲧⲉⲛⲟⲩⲱϣ ⲉⲉⲣⲙⲟⲛⲁⲭⲟⲥ ⲧⲱⲟⲩⲛ ⲛ̀ⲧⲉⲧⲉⲛϣⲉⲛⲱⲧⲉⲛ ⲉϯⲤⲩⲣⲓⲁ ⲁⲓⲥⲱⲧⲉⲙ ⲉⲑⲃⲉ ⲟⲩⲁⲛⲁⲭⲱⲣⲏⲧⲏⲥ ⲛ̀ⲧⲉ ⲡⲓⲙⲁ ⲉⲧⲉⲙⲙⲁⲩ ⲉϥϣⲟⲡ ϧⲉⲛ ⲟⲩⲡⲉⲧⲣⲁ ϩⲓϫⲉⲛ ⲫⲓⲟⲙ ⲟⲩⲟϩ ⲫⲁⲓ ⲁ ⲡⲉϥⲥⲱⲓⲧ ⲙⲁϩ ϯⲤⲩⲣⲓⲁ ⲧⲏⲣⲥ ⲛⲉⲙ Ⲡⲁⲗⲉⲥⲧⲓⲛⲏ ⲉⲡⲉϥⲣⲁⲛ ⲡⲉ Ⲁⲅⲁⲡⲟⲥ ⲉⲟⲩⲣⲉⲙⲧⲁⲣⲥⲟⲥ ⲡⲉ ⲛ̀ⲧⲉ ϯⲔⲓⲗⲓⲁ. ⲫⲁⲓ ⲛⲁϥⲟⲛⲓ ⲙ̀Ⲡⲁⲩⲗⲟⲥ ϧⲉⲛ ⲡⲉϥⲛⲁϩϯ ⲛⲉⲙ ⲛⲉϥϩⲃⲏⲟⲩⲓ ⲓⲥϫⲉ ⲟⲩⲛ ⲡⲓϩⲱⲃ ⲣⲁⲛⲱⲧⲉⲛ ⲙⲁϣⲉⲛⲱⲧⲉⲛ ⲉⲡⲉϥⲙⲁ ⲉⲧⲁⲩⲥⲱⲧⲉⲙ ⲇⲉ ⲁⲩⲣⲁϣⲓ ⲉⲙϣⲱ ⲟⲩⲟ ϧⲉⲛ ⲫⲁⲓ ⲁϥϣⲗⲏⲗ ⲉϫⲱⲟⲩ ⲁϥⲧⲫⲱⲟⲩ ⲉⲃⲟⲗ ϧⲉⲛ ⲟⲩϩⲓⲣⲏⲛⲏ.
Ⲛⲑⲱⲟⲩ ⲇⲉ ⲁⲩϣⲉⲛⲱⲟⲩ ⲉⲃⲟⲗϩⲓⲧⲟⲧϥ ϧⲉⲛ ⲟⲩⲛⲓϣϯ ⲛ̀ⲣⲁϣⲓ ⲟⲩⲟϩ ⲁⲩϩⲓⲧⲟⲧⲟⲩ ⲉϣⲉ ⲉⲧⲟⲩⲡⲟⲗⲓⲥ ⲉⲛⲁⲩ ⲉⲛⲟⲩⲓⲟϯ ⲁⲗⲗⲁ ⲁⲩϩⲱⲗ ⲉϯⲤⲩⲣⲓⲁ ϧⲉⲛ ⲟⲩⲥⲱⲟⲩⲧⲉⲛ ⲉⲧⲁⲩϣⲓⲛⲓ ⲇⲉ ⲛ̀ⲥⲁ ⲡⲉⲉ̅ⲑ̅ⲩ̅ Ⲁⲅⲁⲡⲟⲥ ⲁⲩⲧⲁⲙⲱⲟⲩ ⲉⲡⲉϥⲙⲁ ⲟⲩⲟϩ ⲉⲧⲁⲩⲉⲣⲁⲡⲁⲛⲧⲁⲛ ⲉⲣⲟϥ ⲁϥϣⲟⲡⲟⲩ ⲉⲣⲟϥ ϧⲉⲛ ⲟⲩⲛⲓϣϯ ⲛ̀ⲣⲁϣⲓ ⲛ̀ⲑⲱⲟⲩ ⲇⲉ ⲁⲩⲧⲁⲙⲟϥ ⲉϩⲱⲃ ⲛⲓⲃⲉⲛ. ⲡⲓϧⲉⲗⲗⲟ ⲟⲩⲛ ⲛ̀ⲑⲉⲟⲫⲟⲣⲟⲥ ⲉⲧⲉⲙⲙⲁⲩ ⲉⲧⲁϥⲛⲁⲩ ⲉⲧⲟⲩⲁⲅⲁⲡⲏ ⲉϧⲟⲩⲛ ⲉⲪϯ ⲥⲁⲧⲟⲧϥ ⲁϥϯ ⲉϫⲱⲟⲩ ⲙ̀ⲡⲓⲥⲭⲏⲙⲁ ⲉ̅ⲑ̅ⲩ̅ ⲛ̀ⲧⲉ ⲛⲓⲙⲟⲛⲁⲭⲟⲥ ⲛ̀ⲧⲉ ϯⲤⲩⲣⲓⲁ ⲛⲓⲙⲟⲛⲁⲭⲟⲥ ⲅⲁⲣ ⲛ̀ⲧⲉ ⲡⲓⲙⲁ ⲉⲧⲉⲙⲙⲁⲩ ⲥⲉⲉⲣⲫⲟⲣⲓⲛ ⲁⲛ ⲙ̀ⲙⲁⲣϭⲛⲁϩ ⲟⲩⲇⲉ ϧⲱⲕ ⲁⲗⲗⲁ ⲟⲩϩⲉⲃⲥⲱ ⲛ̀ⲭⲁⲙⲉ. ⲡⲉⲧⲟⲩⲉⲣⲫⲟⲣⲓⲛ ⲙ̀ⲙⲟⲥ ⲫⲁⲓ ⲅⲁⲣ ⲡⲉ ⲡⲥⲭⲏⲙⲁ ⲛ̀ⲛⲁ ϯⲤⲩⲣⲓⲁ ⲡⲉ. ⲗⲟⲓⲡⲟⲛ ϯⲧⲁⲙⲟ ⲙ̀ⲙⲱⲧⲉⲛ ⲕⲁⲧⲁ ⲫⲣⲏϯ ⲉⲧⲁⲩϫⲟⲥ ⲛⲏⲓ ⲛ̀ⲑⲱⲟⲩ ⲛⲁⲓⲁⲅⲓⲟⲥ ϫⲉ ϩⲟⲧⲉ ⲉⲧⲁϥⲛⲟⲩⲓ ⲉⲉⲙⲧⲟⲛ ⲙ̀ⲙⲟϥ ⲛ̀ϫⲉ ⲡⲓϧⲉⲗⲗⲟ ⲉ̅ⲑ̅ⲩ̅ Ⲁⲅⲁⲡⲟⲥ ⲁⲛϣⲉⲛϥ ϫⲉ ⲁϫⲉ ⲟⲩⲥⲁϫⲓ ⲛⲁⲛ ϫⲉ ⲡⲉⲛⲓⲱⲧ ⲉ̅ⲑ̅ⲩ̅ ⲛ̀ⲧⲉⲛⲱⲛϧ ⲉⲣⲟϥ ⲙⲉⲛⲉⲛⲥⲱⲕ.
Ⲛⲑⲟϥ ⲇⲉ ⲡⲉϫⲁϥ ⲛⲁⲛ ϫⲉ ⲁⲓⲛⲁⲩ ⲉⲣⲟⲓ ϧⲉⲛ ⲡⲁⲓⲉϫⲱⲣϩ ⲉⲓⲟϩⲓ ⲉⲣⲁⲧ ϩⲓϫⲉⲛ ⲧⲁⲓⲡⲉⲧⲣⲁ ⲉⲧⲥⲁⲣⲏⲥ ⲙ̀ⲙⲟⲛ ⲉⲓⲛⲁⲩ ⲉⲟⲩⲙⲟⲛⲁⲭⲟⲥ ⲉϥⲟϩⲓ ⲉⲣⲁⲧϥ ⲙ̀ⲡⲁⲙⲑⲟ ⲉⲃⲏⲗ ⲉⲟⲩⲣⲱⲙⲓ ⲡⲉ ⲉϥϣⲏⲟⲩ ⲉⲣⲉ ⲟⲩⲟⲛ ϩⲁⲛϩⲃⲱⲥ ⲧⲟⲓ ⲉϫⲱϥ ⲉⲩⲟⲓ ⲛ̀ϧⲓⲣϧⲓⲣ ⲛ̀ⲭⲁⲙⲉ ⲛⲉⲙ ⲟⲟⲩⲕⲗⲁϥⲧ ϩⲓϫⲉⲛ ⲧⲉϥⲁⲫⲉ ⲉⲣⲉ ⲟⲩⲟⲛ ϩⲁⲛ⳧ ⲧⲟⲓ ⲉⲣⲟⲥ ⲉⲣⲉ ⲟⲩⲟⲛ ⲟⲩϣⲃⲱⲧ ⲙ̀ⲃⲁⲓ ϧⲉⲛ ⲧⲉϥϫⲓϫ ⲛⲉⲙ ⲟⲩ⳧. ϧⲉⲛ ⲡϫⲓⲛⲑⲣⲓⲛⲁⲩ ⲉⲣⲟϥ ⲁⲓⲉⲣϩⲟϯ ⲛ̀ⲑⲟϥ ⲇⲉ ⲁϥϧⲱⲛⲧ ⲉⲣⲟⲓ ⲁϥⲉⲣⲥⲡⲁⲍⲉⲥⲑⲉ ⲙ̀ⲙⲟⲓ ⲟⲩⲟϩ ⲡⲉϫⲁϥ ⲛⲏⲓ ϫⲉ ⲕⲥⲱⲟⲩⲛ ϫⲉ ⲁⲛⲟⲕ ⲛⲓⲙ ⲡⲉϫⲏⲓ ⲛⲁϥ ϫⲉ ⲙ̀ⲙⲟⲛ ⲡⲁⲓⲱⲧ ⲉ̅ⲑ̅ⲩ̅ ⲡⲉϫⲁϥ ⲛⲏⲓ ϫⲉ ⲁⲛⲟⲕ Ⲙⲁⲕⲁⲣ ⲡⲓⲣⲉⲙⲛ̀ⲭⲏⲙⲓ ⲉⲧⲁⲓⲓ ⲉⲑⲁϩⲉⲙ ⲛⲉⲕϣⲏⲣⲓ ⲛ̀ⲧⲁⲟⲗⲟⲩ ϩⲁⲣⲟⲓ ⲉϧⲣⲏⲓ ⲉⲭⲏⲙⲓ. ⲡⲉϫⲏⲓ ⲛⲁϥ ϫⲉ ⲭⲛⲁⲟⲗⲧ ⲛⲉⲙⲱⲟⲩ ⲁⲛ ⲁⲛⲟⲕ ⲡⲁⲓⲱⲧ. ⲡⲉϫⲁϥ ⲛⲏⲓ ϫⲉ ⲙ̀ⲙⲟⲛ ⲁⲗⲗⲁ ϯⲧⲁⲙⲟ ⲙ̀ⲙⲟⲕ ϫⲉ ⲙⲉⲛⲉⲛⲥⲁ ⲕⲉⲅ̅ ⲛⲉϩⲟⲟⲩ ⲭⲛⲁⲙⲧⲟⲛ ⲙ̀ⲙⲟⲕ ⲟⲩⲟϩ ⲛ̀ⲧⲉⲕϣⲉⲛⲁⲕ ϩⲁ ⲡⲟ̅ⲥ̅ ⲟⲩⲟϩ ⲡⲟⲩⲣⲟ ϥⲛⲁⲟⲩⲱⲣⲡ ⲛ̀ⲥⲁ ⲛⲉϥϣⲏⲣⲓ ⲉⲛⲧⲉϥⲟⲗⲟⲩ ⲉⲔⲱⲥⲧⲁⲛⲧⲓⲛⲟⲩⲡⲟⲗⲓⲥ. ⲗⲟⲓⲡⲟⲛ ⲁⲛⲁⲩ ϩⲟⲛϩⲉⲛ ⲉⲧⲟⲧⲟⲩ ϩⲓⲛⲁ ⲛ̀ⲧⲟⲩⲓ ⲉϧⲣⲏⲓ ⲉⲭⲏⲙⲓ ⲛ̀ⲧⲟⲩϣⲱⲡⲓ ϧⲁⲧⲟⲧ ϫⲉ Ⲫϯ ⲡⲉ ⲉⲧⲁϥⲑⲁϩⲙⲟⲩ ⲛⲏⲓ ⲉϩⲁⲛϣⲏⲣⲓ. ⲓⲥ ϩⲏⲡⲡⲉ ⲟⲩⲛ ⲁⲓϫⲟⲥ ⲛⲁⲕ ⲟⲩⲟϩ ⲛⲁⲓ ⲉⲧⲁϥϫⲟⲧⲟⲩ ⲛⲏⲓ ⲁϥⲉⲣⲁⲑⲟⲩⲱⲛϩ ⲉⲃⲟⲗ ϩⲁⲣⲟⲓ. ϯⲛⲟⲩ ⲛⲁϣⲏⲣⲓ ϯⲧⲁⲙⲟ ⲙ̀ⲙⲱⲧⲉⲛ ϫⲉ ⲓⲥ ⲟⲩⲙⲏϣ ⲛ̀ⲉϩⲟⲟⲩ ϯⲥⲱⲧⲉⲙ ⲉⲡϣⲉⲛⲛⲟⲟⲩϥⲓ ⲙ̀ⲡⲓⲣⲱⲙⲓ ⲉⲧⲉⲙⲙⲁⲩ ⲁⲃⲃⲁ Ⲙⲁⲕⲁⲣ. ⲟⲩⲟϩ ϧⲉⲛ ⲫⲁⲓ ϯϫⲱ ⲙ̀ⲙⲟⲥ ⲛⲱⲧⲉⲛ ϫⲉ ⲉϣⲱⲡ ⲛ̀ⲧⲉ ⲡⲟⲩⲣⲟ ⲉⲙⲓ ⲉⲣⲱⲧⲉⲛ ϥⲛⲁⲭⲁ ⲑⲏⲛⲟⲩ ⲙ̀ⲡⲁⲓⲙⲁ ⲁⲛ ⲗⲟⲓⲡⲟⲛ ⲙⲉⲛⲉⲛⲥⲁ ⲡϫⲱⲕ ⲉⲃⲟⲗ ⲙ̀ⲡⲁⲓⲃⲓⲟⲥ ⲙⲁϣⲉⲛⲱⲧⲉⲛ ⲉϧⲣⲏⲓ ⲉⲭⲏⲙⲓ ϣⲱⲡⲓ ⲛⲱⲧⲉⲛ ϧⲁⲧⲉⲛ ⲫⲏⲉ̅ⲑ̅ⲩ̅ ⲁⲃⲃⲁ Ⲙⲁⲕⲁⲣ ϣⲁⲧⲉ ⲡⲟ̅ⲥ̅ ϫⲉⲙ ⲡⲉⲧⲉⲛϣⲓⲛⲓ. ⲛⲁⲓ ϫⲉ ⲉⲧⲁϥϫⲟⲧⲟⲩ ⲛⲱⲟⲩ ⲛ̀ϫⲉ ⲡⲓϧⲉⲗⲗⲟ Ⲁⲅⲁⲡⲟⲥ ⲁϥⲙⲟⲧⲛ ⲙ̀ⲙⲟϥ ϧⲉⲛ ⲟⲩϩⲓⲣⲏⲛⲏ ⲛⲉ ⲁⲩⲉⲣ Ⲋ̅ ⲅⲁⲣ ⲛ̀ⲣⲟⲙⲡⲓ ⲡⲉ ⲉⲩϣⲟⲡ ⲛⲉⲙⲁϥ ⲟⲩⲟϩ ⲁⲡⲉϥⲡ̅ⲛ̅ⲁ̅ ⲕⲱⲃ ⲉϩⲣⲏⲓ ⲉϫⲱⲟⲩ ⲙ̀ⲫⲣⲏϯ ⲉⲧⲁ ⲡⲓⲡ̅ⲛ̅ⲁ̅ ⲛ̀ⲧⲉ Ⲏⲗⲓⲁⲥ ⲕⲱⲃ ⲉϫⲉⲛ Ⲉⲗⲓⲥⲉⲟⲥ ⲙ̀ⲡⲓⲥⲏⲟⲩ.
Ⲁⲩⲓⲥ ϫⲉ ⲟⲩⲛ ⲛ̀ⲧⲉⲛⲧⲁⲙⲱⲧⲉⲛ ⲉⲛⲓⲙⲏⲓⲛⲓ ⲛⲉⲙ ⲛⲓϣⲫⲏⲣⲓ ⲛⲉⲙ ⲛⲓϩⲙⲟⲧ ⲡⲧⲁⲗϭⲟ ⲉⲧⲁ Ⲫϯ ⲉⲣⲉⲛⲉⲣⲅⲓⲛ ⲙ̀ⲙⲱⲟⲩ ⲉⲃⲟⲗϩⲓⲧⲉⲛ ⲛⲉⲛϫⲓϫ ⲛ̀ⲛⲁⲓⲁⲅⲓⲟⲥ ϩⲱⲥⲧⲉ ⲛ̀ⲧⲉ ⲡⲟⲩⲥⲱⲓⲧ ⲥⲱⲣ ⲉⲃⲟⲗ ϧⲉⲛ ϯⲠⲁⲗⲉⲥⲧⲓⲛⲏ ⲧⲏⲣⲥ ⲛⲉⲙ ⲧⲭⲱⲣⲁ ⲛ̀ⲧⲉ Ⲡⲓⲥⲓⲇⲓⲁ ⲉⲑⲃⲉ ⲛⲓⲧⲁⲗϭⲟ ⲉⲧⲟⲩⲓⲣⲓ ⲙ̀ⲙⲱⲟⲩ ϧⲉⲛ ⲛⲏⲉⲧϣⲱⲛⲓ ϧⲉⲛ ⲫⲣⲁⲛ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲟⲩⲙⲏϣ ⲅⲁⲣ ϧⲉⲛ ⲛⲏⲉⲧⲉ ⲛⲓⲡ̅ⲛ̅ⲁ̅ ⲛ̀ⲕⲁⲑⲁⲣⲧⲟⲛ ⲛⲉⲙⲱⲟⲩ ⲁⲩϣⲁⲛⲥⲱⲧⲉⲙ ⲉⲡⲟⲩⲣⲁⲛ ⲙ̀ⲙⲁⲩⲁⲧϥ ϣⲁⲩⲓ ⲉⲃⲟⲗ ϩⲁⲣⲱⲟⲩ ⲟⲩⲟϩ ⲛ̀ⲧⲟⲩⲟⲩϫⲁⲓ ⲥⲁⲧⲟⲧⲟⲩ ϩⲓⲧⲉⲛ ⲡⲓϩⲙⲟⲧ ⲛ̀ⲧⲉ Ⲫϯ ⲡⲉⲛⲥ̅ⲱ̅ⲣ̅. ⲥⲱⲧⲉⲙ ⲉⲧⲁⲓⲛⲓϣϯ ⲛ̀ϣⲫⲏⲣⲓ ⲉⲧⲁⲥϣⲱⲡⲓ ⲉⲃⲟⲗϩⲓⲧⲟⲧⲟⲩ. ⲁⲩⲉⲛ ⲟⲩⲣⲱⲙⲓ ϣⲁⲣⲱⲟⲩ ⲉⲃⲟⲗϧⲉⲛ ⲁⲥⲕⲁⲗⲱⲛ ⲉⲣⲉ ⲟⲩⲟⲛ ⲟⲩⲡ̅ⲛ̅ⲁ̅ ⲛ̀ⲣⲉϣⲓⲛⲓ ⲛⲉⲙⲁϥ. ⲉⲧⲓ ⲟⲩⲛ ⲉϥⲟⲩⲏⲟⲩ ⲙ̀ⲡⲡⲓⲙⲁⲛϣⲱⲡⲓ ⲛ̀ⲧⲉ ⲛⲁⲓⲁⲅⲓⲟⲥ ⲁϥⲱϣ ⲉⲃⲟⲗ ϧⲉⲛ ⲟⲩⲛⲓϣϯ ⲛ̀ϧⲣⲱⲟⲩ ⲉϥϫⲱ ⲙ̀ⲙⲟⲥ ϫⲉ ⲱⲃⲓⲁ ⲛ̀ⲧⲟⲧⲗ Ⲙⲁⲕⲁⲣ ⲡⲓⲣⲉⲙⲛ̀ⲭⲏⲙⲓ ⲡⲓⲁⲛⲁⲭⲱⲣⲓⲧⲏⲥ ⲁⲛⲭⲁ ⲛⲓϣⲁϥⲉⲩ ⲛ̀ⲧⲉ ⲭⲏⲙⲓ ⲛⲁⲕ ⲁⲕⲓ ⲉⲡⲁⲓⲙⲁ ⲟⲛ ⲟⲩⲟϩ ⲓⲥ ϩⲏⲡⲡⲉ ⲛⲉⲕϣⲗⲏⲗ ⲥⲉϯϧⲓⲥⲓ ⲛⲁⲛ ⲙ̀ⲡⲁⲓⲕⲉⲙⲁ ⲉⲕϯⲛⲧⲟⲧⲕ ⲛⲉⲙ ⲛⲁⲓⲣⲱⲙⲉⲟⲥ. ⲫⲁⲓ ⲇⲉ ⲉⲧⲁϥϫⲟϥ ⲁϥⲓ ⲉⲃⲟⲗϧⲉⲛ ⲡⲓⲣⲱⲙⲓ ⲛ̀ϫⲉ ⲡⲓⲡ̅ⲛ̅ⲁ̅ ⲛ̀ⲁⲕⲁⲑⲁⲣⲧⲟⲛ ⲟⲩⲟϩ ⲟⲩⲟⲛ ⲛⲓⲃⲉⲛ ⲉⲧⲁⲩⲥⲱⲧⲉⲙ ⲁⲩϯⲱⲟⲩ ⲙ̀Ⲫϯ.
Ⲛⲉ ⲟⲩⲟⲛ ⲟⲩⲕⲟϩ ⲛ̀ⲧⲱⲟⲩ ϧⲉⲛ ⲡⲓⲙⲁⲛⲙⲟϣⲓ ⲉⲑⲛⲁ ⲉϧⲟⲩⲛ ⲉⲒⲕⲟⲛⲓⲟⲛ ⲉⲣⲉ ⲟⲩⲛⲓϣϯ ⲛ̀ⲇⲣⲁⲕⲱⲛ ϣⲱⲡ ⲛ̀ϧⲏⲧⲥ ⲟⲩⲟϩ ⲫⲁⲓ ⲛⲉ ϣⲁϥⲧⲁⲕⲉ ⲟⲩⲙⲏϣ ⲛ̀ⲧⲉ ⲛⲓⲣⲱⲙⲓ ⲉⲑⲙⲟϣⲓ ϧⲉⲛ ⲡⲓⲙⲁⲙⲙⲟϣⲓ ⲉⲧⲉⲙⲙⲁⲩ. ϩⲟⲧⲉ ⲉⲧⲁ ⲛⲁ Ⲓⲕⲟⲛⲓⲟⲛ ⲛⲁⲩ ⲉⲡⲓⲧⲁⲕⲟ ⲉⲧϣⲟⲡ ⲁⲩϩⲱⲗ ϣⲁ ⲛⲓⲁⲅⲓⲟⲥ ⲉⲩⲧⲁⲙⲟ ⲙ̀ⲙⲱⲟⲩ ⲉⲡⲧⲁⲕⲟ ⲛ̀ⲧⲉ ⲡⲓⲑⲏⲣⲓⲟⲛ ⲉⲧϩⲱⲟⲩ ⲉⲧⲉⲙⲙⲁⲩ. ⲧⲟⲧⲉ ⲁⲡⲓⲙⲁⲕⲁⲣⲓⲟⲥ Ⲙⲁⲝⲓⲙⲟⲥ ⲥϧⲉ ⲟⲩⲕⲟⲩϫⲓ ⲛ̀ⲥϧⲁⲓ ⲉϥϫⲱ ⲙ̀ⲙⲟⲥ ϫⲉ ϧⲉⲛ ⲫⲣⲁⲛ ⲙ̀ⲡⲟ̅ⲥ̅ ⲥⲁⲃⲁⲱⲑ Ⲫϯ ⲛ̀ⲁⲃⲃⲁ Ⲙⲁⲕⲁⲣ ⲛⲉⲙ ⲁⲃⲃⲁ Ⲁⲅⲁⲡⲟⲥ ⲡⲉⲛⲓⲱⲧ ⲛ̀ⲣⲱⲙⲓ ⲉⲧⲉⲣⲫⲟⲣⲓⲛ ⲙ̀Ⲡⲭ̅ⲥ̅ ⲡⲓⲗⲟⲅⲟⲥ ⲛ̀ⲧⲉ ⲫⲓⲱⲧ ϫⲉ ⲉϣⲱⲡ ⲛ̀ⲧⲟⲩⲉⲛ ⲡⲁⲓⲕⲟⲩϫⲓ ⲛ̀ⲥϧⲁⲓ ⲉⲣⲟⲕ ⲙ̀ⲡⲉⲕⲙⲟϩ ⲛ̀ⲑⲟⲕ ϧⲁ ⲡⲓⲇⲣⲁⲕⲱⲛ ⲉⲕⲉⲓ̀ ⲉⲃⲟⲗ ⲉⲣⲉ ⲣⲱⲕ ϣⲟⲧⲉⲙ ⲛ̀ⲧⲉⲕⲉⲛⲕⲟⲧ ϧⲉⲛ ⲑⲙⲏϯ ⲙ̀ⲡⲓⲙⲁⲙⲙⲟϣⲓ ⲛ̀ⲧⲉⲕϣⲧⲉⲙⲕⲓⲙ ⲉⲣⲟⲕ ⲉⲃⲟⲗϧⲉⲛ ⲡⲓⲙⲁ ⲉⲧⲉⲙⲙⲁⲩ ϣⲁⲧⲉ ⲛⲓϩⲁⲗⲁϯ ⲛ̀ⲧⲉ ⲧⲫⲉ ⲟⲩⲱⲙ ⲛ̀ⲛⲉⲕⲁϥⲟⲩⲓ. ⲉⲧⲁⲩϭⲓ ⲇⲉ ⲙ̀ⲡⲓⲥϧⲁⲓ ⲁⲩⲧⲏⲓϥ ⲛ̀ⲟⲩⲣⲱⲙⲓ ⲉⲁϥⲧⲁⲗⲟϥ ⲉⲟⲩϩⲑⲟ ⲁϥϩⲱⲗ ⲁϥⲭⲱ ⲙ̀ⲡⲓⲥϧⲁⲓ ϩⲓⲣⲱϥ ⲙ̀ⲡⲓⲃⲏⲃ ⲛ̀ⲧⲉ ⲡⲓⲑⲏⲣⲓⲟⲛ ⲟⲩⲟϩ ⲁϥⲫⲱⲧ ⲥⲁⲧⲟⲧϥ.
Ⲱ ⲛⲉⲙ ϯϣⲫⲏⲣⲓ ⲉⲧⲁⲥϣⲱⲡⲓ ⲙ̀ⲡⲓⲛⲁⲩ ⲉⲧⲉⲙⲙⲁⲩ ⲡⲓⲇⲣⲁⲕⲱⲛ ⲅⲁⲣ ⲉⲧϩⲱⲟⲩ ϧⲉⲛ ϯⲟⲩⲛⲟⲩ ⲉⲧⲉⲙⲙⲁⲩ ⲥⲁⲧⲟⲧϥ ⲁϥⲓ ⲉⲃⲟⲗϧⲉⲛ ⲡⲉϥⲃⲏⲃ ⲟⲩⲟϩ ⲛⲁϥⲉⲛⲕⲟⲧ ⲉϥϩⲓⲱⲟⲩⲧ ⲥⲁⲡⲉⲥⲏⲧ ⲛ̀ⲧⲫⲉ ϧⲉⲛ ⲑⲙⲏϯⲙ̀ⲡⲓⲙⲁⲙⲙⲟϣⲓ ⲉⲩⲉⲣⲑⲉⲱⲣⲓⲛ ⲙ̀ⲙⲟϥ ⲛ̀ϫⲉ ⲟⲩⲟⲛ ⲛⲓⲃⲉⲛ ⲛⲏⲉⲑⲟⲩⲏⲟⲩ ⲙ̀ⲙⲟϥ ⲛ̀ⲟⲩⲉϩⲟⲟⲩ ⲙ̀ⲙⲟϣⲓ ⲛ̀ⲧⲟⲩⲓ ϣⲁⲧⲟⲩⲛⲁⲩ ⲉⲣⲟϥ ⲛ̀ϥϣⲕⲓⲙ ⲉⲣⲟϥ ⲁⲛ ϩⲟⲗⲱⲥ ⲉⲃⲟⲗϧⲉⲛ ⲡⲉϥⲙⲁ ⲉⲩϩⲓⲱⲛⲓ ⲉⲣⲟϥ ⲟⲩⲟϩ ⲛⲁⲩϯⲱⲟⲩ ⲙ̀Ⲫϯ ⲫⲏⲉⲧⲓⲣⲓ ⲛ̀ⲛⲓϣⲫⲏⲣⲓ ϧⲉⲛ ⲛⲏⲉ̅ⲑ̅ⲩ̅ ⲛ̀ⲧⲁϥ.
Ⲟⲩⲣⲱⲙⲓ ⲇⲉ ϩⲱϥ ⲁϥⲓ ⲉⲃⲟⲗϧⲉⲛ Ⲗⲩⲥⲧⲣⲁ ⲉⲛⲁⲩ ⲉϯϣⲫⲏⲣⲓ ⲉⲧⲁⲥϣⲱⲡⲓ ⲛⲁⲣⲉ ⲡⲉϥⲥⲱⲙⲁ ⲧⲏⲣϥ ⲕⲏⲕ ⲛ̀ⲥⲉϩⲧ ⲡⲉ ⲟⲩⲟϩ ⲉⲧⲁϥⲓ ϣⲁ ⲛⲏⲉ̅ⲑ̅ⲩ̅ ϧⲉⲛ ⲡⲉϥϫⲓⲛⲛⲁⲩ ⲉⲣⲱⲟⲩ ⲙ̀ⲙⲁⲩⲁⲧϥ ⲉⲃⲟⲗϩⲓⲧⲉⲛ ⲡⲉϥⲛⲓϣϯ ⲛ̀ⲛⲁϩϯ ⲁϥⲧⲟⲩⲃⲟ ⲥⲁⲧⲟⲧϥ ⲉⲃⲟⲗϩⲁ ⲡⲓⲥⲉϩⲧ ⲟⲩⲟϩ ⲛⲁⲣⲉ ⲟⲩⲟⲛ ⲛⲓⲃⲉⲛ ϯⲱⲟⲩ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲉⲑⲃⲉ ⲛⲓⲧⲁⲗϭⲟ ⲉⲧⲉϥⲓⲣⲓ ⲙ̀ⲙⲱⲟⲩ ϧⲉⲛ ⲛⲉⲛϫⲓⲓϫ ⲛ̀ⲛⲁⲓⲙⲁⲕⲁⲣⲓⲟⲥ.
Ⲁⲩⲉⲛ ⲟⲩⲁⲓ ϣⲁⲣⲱⲟⲩ ⲉⲃⲟⲗϧⲉⲛ Ⲙⲁⲕⲇⲁⲗⲁⲛ ⲛ̀ⲧⲉ ϯⲠⲓⲥⲓⲇⲓⲁ ⲉⲣⲉ ⲡⲉϥϩⲟ ⲥⲱⲧⲉⲣ ϩⲓⲫⲁϩⲟⲩ ⲙ̀ⲙⲟϥ ϩⲓⲧⲉⲛ ⲧⲉⲛⲉⲣⲅⲓⲁ ⲛⲟⲩⲇⲉⲙⲱⲛ ⲓⲥ ⲅ̅ϯ ⲛ̀ⲣⲟⲙⲡⲓ ⲟⲩⲟϩ ⲉⲧⲁⲩⲛⲁⲩ ⲉⲣⲟϥ ⲛ̀ϫⲉ ⲛⲏⲉ̅ⲑ̅ⲩ̅ ⲁⲩⲉⲣⲙⲕⲁϩ ⲛ̀ϩⲏⲧ ⲉⲙⲁϣⲱ ⲉⲑⲃⲉ ⲡⲓⲣⲏϯ ⲉⲛⲁϥⲟⲓ ⲙ̀ⲙⲟϥ ⲟⲩⲟϩ ⲉⲧⲁϥϭⲓ ⲛ̀ⲟⲩⲕⲟⲩϫⲓ ⲙ̀ⲙⲱⲟⲩ ⲁⲩⲉⲣⲥⲫⲣⲁⲅⲓⲍⲓⲛ ⲙ̀ⲙⲟϥ ϧⲉⲛ ⲫⲣⲁⲛ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲁⲓϫⲟϣϥ ⲉϫⲱϥ ⲟⲩⲟϩ ϧⲉⲛ ϯⲟⲩⲛⲟⲩ ⲁⲡⲉϥϩⲟ ⲥⲱⲟⲩⲧⲉⲛ.
Ⲱ ⲛⲉⲙ ⲛⲁⲓϩⲙⲟⲧ ⲉⲧⲟⲓ ⲛ̀ⲛⲓϣϯ ⲉⲧⲁ ⲡϣⲏⲣⲓ ⲙⲪϯ ⲁⲓⲧⲟⲩ ⲛⲉⲙ ⲛⲓⲁϣⲏⲣⲓ ⲛ̀ⲟⲩⲣⲟ ⲕⲉ ⲅⲁⲣ ϧⲉⲛ ⲟⲩⲙⲉⲑⲙⲏⲓ ⲛⲏⲉⲧⲉⲣⲁⲅⲁⲡⲁⲛ ⲙ̀Ⲫϯ ϣⲁϥⲉⲣϩⲱⲃ ⲛⲉⲙⲱⲟⲩ ϧⲉⲛ ϩⲱⲃ ⲛⲓⲃⲉⲛ ⲉⲑⲛⲁⲛⲉⲩ. ϯϯϩⲟ ⲇⲉ ⲉⲣⲱⲧⲉⲛ ⲙ̀ⲡⲉⲛⲑⲣⲉϩⲗⲓ ⲉⲣⲁⲑⲛⲁϩϯ ⲉⲛⲏⲉⲧϫⲱ ⲙ̀ⲙⲱⲟⲩ ⲕⲉ ⲅⲁⲣ ⲁⲛⲟⲕ ϩⲱ ϧⲁ ⲡⲓⲉⲗⲁⲭⲓⲥⲧⲟⲥ Ⲡⲓϣⲟⲓ ⲉⲧⲓ ⲉⲓϧⲉⲛ Ⲕⲱⲥⲧⲁⲛⲧⲓⲛⲟⲩⲡⲟⲗⲓⲥ ϧⲁⲧϩⲏ ⲙ̀ⲡⲁϯⲉⲙⲓ ⲣⲱ ⲉⲡⲧⲏⲣϥ ϫⲉ ⲁⲣⲉ Ϣⲓϩⲏⲧ ⲛ̀ⲑⲱⲛ ⲁⲓⲥⲱⲧⲉⲙ ⲉⲃⲟⲗϩⲓⲧⲉⲛ ⲛⲓⲡⲣⲁⲅⲙⲁⲧⲉⲩⲧⲏⲥ ⲉⲑⲃⲉ ⲛⲓⲧⲁⲗϭⲟ ⲉⲧⲉⲣⲉ ⲛⲁⲓⲁⲅⲓⲟⲥ ⲓⲣⲓ ⲙ̀ⲙⲱⲟⲩ ϧⲉⲛ ⲫⲣⲁⲛ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲡⲓⲗⲟⲅⲟⲥ ⲟⲩⲟϩ ⲁⲓϩⲱⲗ ⲉϯⲤⲩⲣⲓⲁ ⲉⲧⲓ ⲉⲓⲟⲓ ⲛ̀ⲕⲟⲥⲙⲓⲕⲟⲥ ϣⲁϯⲛⲁⲩ ϧⲉⲛ ⲛⲁⲃⲁⲗ ⲉⲛⲏⲉⲧⲁⲓⲥⲟⲑⲙⲟⲩ ⲛ̀ⲧⲉ ⲡⲁϩⲏⲧ ⲑⲱⲧ ⲉⲁⲓϫⲟⲥ ϧⲉⲛ ⲛⲁⲙⲉⲩⲓ ϫⲉ ⲛⲁⲛⲉ ⲡⲓϫⲓⲛⲛⲁⲩ ⲛ̀ⲧⲉ ⲛⲓⲃⲁⲗ ⲉϩⲟⲧⲉ ⲡⲓϫⲓⲛⲥⲱⲧⲉⲙ ϧⲉⲛ ⲛⲓⲙⲁϣϫ. ⲓⲥϫⲉⲛ ⲡⲓⲉϩⲟⲟⲩ ⲅⲁⲣ ⲉⲧⲉⲙⲙⲁⲩ ⲉⲧⲁⲓⲛⲁⲩ ⲉⲛⲟⲩϩⲃⲏⲟⲩⲓ ⲉⲑⲛⲁⲛⲉⲩ ⲁⲡⲁϩⲏⲧ ⲑⲱⲧ ⲉⲉⲣⲙⲟⲛⲁⲭⲟⲥ ⲁⲗⲗⲁ ⲙ̀ⲡⲓϣϫⲉⲙϫⲟⲙ ϣⲁ ⲡⲓⲛⲁⲩ ⲉⲧⲁ Ⲫϯ ⲉⲣⲃⲟⲏⲑⲓⲛ ⲉⲣⲟⲓ ⲁϥⲉⲛⲧ ⲉⲃⲟⲗϧⲉⲛ ⲛⲓϥⲓⲣⲱⲟⲩϣ ⲛ̀ⲧⲉ ⲡⲓⲕⲟⲥⲙⲟⲥ ⲁⲓⲓ ⲉϢⲓϩⲏⲧ. ⲗⲟⲓⲡⲟⲛ ϫⲉ ⲛⲏⲉⲧⲁⲓ ⲥⲟⲑⲙⲟⲩ ϧⲉⲛ ϯⲥⲩⲣⲓⲁ ⲛⲉⲙ ⲛⲏⲉⲧⲁⲓ ⲥⲑⲙⲟⲩ ϩⲓ ⲡⲁϫⲱⲙ. ϯⲛⲟⲩ ϫⲉ ⲙⲏⲡⲱⲥ ⲛ̀ⲧⲁⲥⲱⲕ ϧⲉⲛ ⲡⲁⲓⲥⲁϫⲓ ⲙ̀ⲡⲁⲓⲣⲏϯ ⲉⲓⲧⲁϫⲣⲟ ⲛ̀ϯⲙⲉⲧⲙⲉⲑⲣⲉ ⲛ̀ⲧⲁⲉⲣⲡⲱⲃϣ ⲛ̀ⲛⲓϩⲙⲟⲧ ⲉⲑⲛⲁⲛⲉⲩ. ⲗⲟⲓⲡⲟⲛ ⲧⲉⲛⲛⲁⲕⲟⲧⲧⲉⲛ ⲡⲁⲗⲓⲛ ⲉϫⲉⲛ ⲛⲓϩⲙⲟⲧ ⲛ̀ⲧⲁⲗϭⲟ ⲉⲧⲉ Ⲡⲭ̅ⲥ̅ ⲡⲉⲛⲛⲟⲩϯ ⲁⲓⲧⲟⲩ ⲉⲃⲟⲗϩⲓⲧⲉⲛ ⲛⲓⲁϣⲏⲣⲓ ⲛ̀ⲟⲩⲣⲟ ⲛⲁⲓ ⲉⲧⲁⲩϯ ⲙ̀Ⲡⲭ̅ⲥ̅ ϩⲓⲱⲧⲟⲩ ⲙ̀ⲫⲣⲏϯ ⲙ̀Ⲡⲁⲩⲗⲟⲥ ⲛⲉⲙ Ⲧⲓⲙⲟⲉⲑⲉⲟⲥ ⲉⲑⲃⲉ ⲫⲁⲓ ⲁ ϯϫⲟⲙ ⲛ̀ⲧⲉ ⲛⲏⲉⲧⲉⲙⲙⲁⲩ ⲉⲣϩⲱⲃ ϧⲉⲛ ⲛⲁⲓⲕⲉⲭⲱⲟⲩⲛⲓ ⲛ̀ⲧⲁⲓⲙⲁⲓⲏ.
Ⲛⲉ ⲟⲩⲟⲛ ⲟⲩⲡⲣⲉⲥⲃⲩⲧⲉⲣⲟⲥ ⲇⲉ ⲟⲛ ϧⲉⲛ Ⲅⲁⲃⲃⲁⲗⲱⲛ ϯⲃⲁⲕⲓ ⲛ̀ⲧⲉ ⲛⲓⲅⲁⲃⲃⲁⲗⲉⲟⲥ ⲉⲡⲉϥⲣⲁⲛ ⲡⲉ Ⲍⲁⲭⲁⲣⲓⲁⲥ ⲫⲁⲓ ⲇⲉ ⲁⲟⲩⲡ̅ⲛ̅ⲁ̅ ⲛ̀ⲁⲣⲭⲟⲛⲧⲓⲕⲟⲛ ϫⲱⲓⲗⲓ ⲉⲣⲟϥ ⲉϥⲓⲣⲓ ⲛ̀ϩⲁⲛⲙⲏⲓⲛⲓ ⲛⲉⲙ ϩⲁⲛϣⲫⲏⲣⲓ ϩⲓⲧⲉⲛ ⲛⲓⲇⲉⲙⲱⲛ ϩⲱⲥⲧⲉ ⲛ̀ⲧⲉϥⲥⲱⲣⲉⲙ ⲛ̀ⲛⲓⲅⲁⲃⲁⲗⲗⲉⲟⲥ ⲧⲏⲣⲟⲩ ⲟⲩⲟϩ ⲉⲧⲁ ⲡⲓⲉⲡⲓⲥⲕⲟⲡⲟⲥ ⲛ̀ⲧⲉ ⲅⲁⲃⲁⲗⲗⲱⲛ ⲛⲁⲩ ⲉⲡⲧⲁⲕⲟ ⲉⲧⲁϥϣⲱⲡⲓ ϧⲉⲛ ⲡⲓⲑⲱϣ ⲁϥϭⲓ ⲛⲉⲙⲁϥ ⲛ̀ϩⲁⲛⲕⲉⲡⲣⲉⲥⲃⲩⲧⲉⲣⲟⲥ ⲟⲩⲟϩ ⲁϥⲓ ϣⲁ ⲛⲏⲉ̅ⲑ̅ⲩ̅ ⲁϥⲧⲁⲙⲱⲟⲩ ⲉϩⲱⲃ ⲛⲓⲃⲉⲛ ⲉⲧⲁϥϣⲱⲡⲓ. ⲉⲧⲁⲩⲥⲱⲧⲉⲙ ⲇⲉ ⲉⲛⲁⲓⲛ̀ⲧⲟⲧϥ ⲙ̀ⲡⲓⲉⲡⲓⲥⲕⲟⲡⲟⲥ ⲁⲩⲉⲣⲙⲕⲁϩ ⲛ̀ϩⲏⲧ ⲉⲙⲁϣⲱ ⲟⲩⲟϩ ⲡⲉϫⲱⲟⲩ ⲛⲁϥ ϫⲉ ⲡⲱⲥ ⲙ̀ⲡⲉⲕⲉⲛϥ ⲛⲉⲙⲁⲕ ⲛ̀ⲑⲟϥ ⲡⲉϫⲁϥ ⲛⲱⲟⲩ ϫⲉ ⲙ̀ⲡⲉϥⲥⲱⲧⲉⲙ ⲛ̀ⲥⲱⲓ ⲛⲁⲓⲟϯ ⲉ̅ⲑ̅ⲩ̅. ⲁϥⲉⲣⲟⲩⲱ ⲛ̀ϫⲉ ⲡⲡⲓⲉⲡⲓⲥⲕⲟⲡⲟⲥ ⲡⲉϫⲁϥ ⲛⲱⲟⲩ ϫⲉ ϯϯϩⲟⲉⲣⲱⲧⲉⲛ ⲛⲁⲓⲟϯ ⲉ̅ⲑ̅ⲩ̅ ⲛ̀ⲧⲉⲧⲉⲛⲟⲩⲱⲣⲡ ⲛ̀ⲥⲱϥ ⲛ̀ⲑⲱⲧⲉⲛ ⲡⲁⲛⲧⲱⲥ ⲛ̀ⲧⲉϥⲓ. ⲡⲓⲁⲅⲓⲟⲥ ⲇⲉ Ⲙⲁⲝⲓⲙⲟⲥ ⲉⲧⲁϥϭⲓ ⲛ̀ⲟⲩϫⲱⲙ ⲁϥⲥϧⲁⲓ ⲙ̀ⲡⲁⲓⲣⲏϯ ⲉϥϫⲱ ⲙ̀ⲙⲟⲥ ϫⲉ ⲁⲛⲟⲕ ⲡⲉ ⲡⲓϫⲱⲃ Ⲙⲁⲭⲓⲙⲟⲥ ⲡⲓⲃⲱⲕ ⲛ̀ⲧⲉ Ⲡⲭ̅ⲥ̅ ⲉⲓⲥϧⲁⲓ ϧⲉⲛ ⲧⲁϫⲓϫ ⲙ̀ⲙⲟⲛ ⲙ̀ⲙⲟⲓ ϫⲉ ϧⲉⲛ ϯϫⲟⲙ ⲛ̀ⲧⲉ ⲡⲟ̅ⲥ̅ ⲥⲁⲃⲁⲱⲑ Ⲫϯ ⲛ̀ⲧⲉ ⲛⲓⲁⲡⲟⲥⲧⲟⲗⲟⲥ ⲛⲉⲙ ⲛⲓⲡⲣⲟⲫⲏⲧⲏⲥ ⲛⲉⲙ ⲁⲃⲃⲁ Ⲙⲁⲕⲁⲣ ⲡⲓⲣⲉⲙⲛ̀ⲭⲏⲙⲓ ⲫⲁⲓ ⲉⲧⲁ Ⲁⲅⲁⲡⲟⲥ ⲡⲉⲛⲓⲱⲧ ⲛⲁⲩ ⲉⲣⲟϥ ϧⲉⲛ ⲡⲓϩⲟⲣⲁⲙⲁ ⲉⲓⲥϧⲁⲓ ⲛ̀Ⲍⲁⲭⲁⲣⲓⲁⲥ ϫⲉ ⲓⲥϫⲉ ϯⲥⲃⲱ ⲛ̀ⲧⲉ ⲛⲓⲁⲡⲟⲥⲧⲟⲗⲥ ⲡⲉ ⲉⲧⲉⲕϯⲥⲃⲱ ⲛ̀ϧⲏⲧⲥ ⲓⲉ ⲟϩⲓ ⲙ̀ⲡⲉⲣⲏϯ. ⲓⲥϫⲉ ⲑⲁ ⲛⲓⲇⲉⲙⲱⲛ ⲧⲉ ⲟⲩⲟϩ ⲕⲟⲓ ⲛ̀ⲁⲧⲥⲱⲧⲉⲙ ⲛ̀ⲥⲁ ⲡⲉⲕⲉⲡⲓⲥⲕⲟⲡⲟⲥ ⲉϥϯⲥⲃⲱ ⲛⲁⲕ ⲉⲡⲉⲕⲟⲩϫⲁⲓ ⲓⲉ ⲧⲉⲛⲟⲩⲁϩⲥⲁϩⲛⲓ ⲙ̀ⲡⲓⲇⲉⲙⲱⲛ ⲉⲧⲉⲙⲙⲁⲩ ϧⲉⲛ ⲫⲣⲁⲛ ⲛ̀Ⲓⲏ̅ⲥ̅ ⲡⲓⲗⲟⲅⲟⲥ ⲙ̀ⲙⲏⲓ ⲛ̀ⲧⲉ Ⲫϯ ⲉⲣⲉ ⲡⲓⲇⲉⲙⲱⲛ ⲉⲧⲉⲙⲙⲁⲩ ⲓ ⲉϫⲱⲕ ⲛ̀ⲧⲉϥϧⲓϭ ⲙ̀ⲙⲟⲕ ⲟⲩⲟϩ ⲛ̀ⲥⲉⲉⲙⲓ ⲧⲏⲣⲟⲩ ⲉϯⲥⲟⲣⲙⲉⲥ ⲉⲧⲉⲕⲭⲏ ⲛ̀ϧⲏⲧⲥ. ⲧⲟⲧⲉ ⲁϥⲥϧⲉ ⲫⲣⲁⲛ ⲛ̀ⲁⲃⲃⲁ Ⲙⲁⲕⲁⲣ ⲥⲁⲃⲟⲗ ⲛ̀ϯⲉⲡⲓⲥⲧⲟⲗⲏ ⲁϥⲧⲏⲓⲥ ⲙ̀ⲡⲓⲉⲡⲓⲥⲕⲟⲡⲟⲥ ⲟⲩⲟϩ ⲁϥⲧⲫⲟϥ.
Ⲱ ϯϣⲫⲏⲣⲓ ⲉⲧⲁⲥϣⲱⲡⲓ ⲙ̀ⲡⲓⲛⲁⲩ ⲉⲧⲁ ⲡⲓⲉⲡⲓⲥⲕⲟⲡⲟⲥ ϯⲛⲁϥ ⲛ̀ϯⲉⲡⲓⲥⲧⲟⲗⲏ ⲉϥϫⲱ ⲙ̀ⲙⲟⲥ ϫⲉ ⲛⲓⲁⲛⲁⲭⲱⲣⲓⲧⲏⲥ ϣⲓⲛⲓ ⲉⲣⲟⲕ. ⲡⲓⲱⲟⲩ ⲛⲁⲕ Ⲡⲭ̅ⲥ̅ ⲡⲓⲗⲟⲅⲟⲥ ⲛ̀ⲧⲉ Ⲫϯ ⲛⲉⲙ ⲛⲓϫⲟⲙ ⲉⲧⲉⲕⲟⲩⲱⲛϩ ⲙ̀ⲙⲱⲟⲩ ⲉⲃⲟⲗϧⲉⲛ ⲛⲏⲉⲧⲟⲓ ⲛⲁⲕ ⲙ̀ⲃⲱⲕ ⲟⲩⲟϩ ⲉⲧϣⲉⲙϣⲓ ⲙ̀ⲡⲉⲕⲣⲁⲛ ⲉ̅ⲑ̅ⲩ̅ ⲟⲩⲇⲉ ⲅⲁⲣ ⲙ̀ⲡⲉ ⲡⲓⲇⲉⲙⲱⲛ ⲉⲧⲉⲙⲙⲁⲩ ⲛ̀ⲣⲉϥⲧⲁⲕⲉ ⲯⲩⲭⲏ ⲭⲁⲣⲱϥ ϣⲁⲧⲉϥⲱϣ ⲛ̀ϯⲉⲡⲓⲥⲧⲟⲗⲏ ⲁⲗⲗⲁ ϧⲉⲛ ϯⲟⲩⲛⲟⲩ ⲁϥϥⲱϫⲓ ⲉϫⲱϥ ⲁϥⲣⲁϧⲧϥ ϩⲓϫⲉⲛ ⲡⲕⲁϩⲓ ϧⲉⲛ ⲑⲙⲏϯ ⲛ̀ⲛⲏⲉⲧⲟϩⲓ ⲉⲣⲁⲧⲟⲩ ⲟⲩⲟϩ ⲁϥϧⲓϯ ⲙ̀ⲙⲟϥ ⲉϥⲉϣ ϧⲣⲱⲟⲩ ⲉⲃⲟⲗ ⲟⲩⲟϩ ⲁϥⲟⲩⲁϩϥ ⲙ̀ⲫⲣⲏϯ ⲛ̀ⲟⲩⲟⲩϩⲟⲣ ϩⲱⲥⲧⲉ ⲛ̀ⲧⲉ ϯⲃⲁⲕⲓ Ⲅⲁⲃⲁⲗⲗⲱⲛ ⲑⲱⲟⲩϯ ⲉϩⲣⲏⲓ ⲉϫⲱϥ ⲛ̀ⲥⲉⲛⲁⲩ ⲉⲣⲟϥ ⲛ̀ⲥⲉⲉⲣϣⲫⲏⲣⲓ ⲙ̀ⲡⲉⲧϣⲟⲩϣⲟⲩ ⲙ̀ⲙⲟϥ ϧⲁϫⲉⲛ ⲟⲩⲕⲟⲩϫⲓ ϫⲉ ⲉⲧⲁϥϣⲱⲡⲓ ⲙ̀ⲙⲟϥ. ⲁϥⲟϩⲓ ⲇⲉ ϧⲉⲛ ⲧⲁⲓⲃⲁⲥⲁⲛⲟⲥ ⲙ̀ⲡⲁⲓⲣⲏϯ ⲙ̀ⲓ̅ⲏ ⲛ̀ⲉϩⲟⲟⲩ ⲧⲟⲧⲉ ⲁⲩⲉⲛϥ ϣⲁ ⲛⲓⲁⲅⲓⲟⲥ ⲉϥⲥⲟⲛϩ ⲙ̀ⲡⲉⲇⲏⲥ: ⲛ̀ⲑⲱⲟⲩ ⲇⲉ ⲉⲧⲁⲩⲛⲁⲩ ⲉⲡⲉⲧϩⲉⲙⲕⲟ ⲁⲩⲉⲣⲙⲕⲁϩ ⲛ̀ϩⲏⲧ ⲉⲙⲁϣⲱ ⲟⲩⲟϩ ⲉⲧⲁⲩϭⲓ ⲛ̀ⲟⲩⲕⲟⲩϫⲓ ⲙ̀ⲙⲱⲟⲩ ⲁⲩⲉⲣⲫⲣⲁⲅⲓⲍⲓⲛ ⲙ̀ⲙⲟϥ ⲁⲩϫⲟϣϥ ⲉϫⲱϥ ϧⲉⲛ ⲫⲣⲁⲛ ⲙ̀Ⲡⲭ̅ⲥ̅ ⲟⲩⲟϩ ⲥⲁⲧⲟⲧϥ ⲁϥⲟⲩϫⲁⲓ ⲉⲃⲟⲗϩⲁ ⲇⲉⲙⲱⲛ ⲁϥϣⲱⲡⲡⲓ ϧⲁⲧⲉⲛ ⲛⲓⲁⲅⲓⲟⲥ ⲛ̀ⲅ̅ ⲛ̀ⲉϩⲟⲟⲩ ϣⲁⲧⲟⲩⲥⲁⲃⲟϥ ⲉⲫⲙⲱⲓⲧ ⲛ̀ⲧⲉ ⲡⲓⲟⲩϫⲁⲓ ⲛ̀ⲥⲉⲧⲫⲟϥ ϧⲉⲛ ⲟⲩϩⲓⲣⲏⲛⲏ ⲉϥϯⲱⲟⲩ ⲙ̀Ⲫϯ.
Ϧⲉⲛ ⲛⲁⲓⲧⲁⲗϭⲟ ⲇⲉ ⲧⲏⲣⲟⲩ ⲉⲧϣⲟⲡ ⲉⲃⲟⲗϩⲓⲧⲉⲛ ⲛⲁⲓⲙⲁⲕⲁⲣⲓⲟⲥ ⲙ̀ⲡⲟⲩϭⲓⲥⲓ ⲛ̀ϩⲏⲧ ⲉⲡⲧⲏⲣϥ ⲟⲩⲇⲉ ⲛⲁⲩϣⲟⲩϣⲟⲩ ⲙ̀ⲙⲱⲟⲩ ⲁⲛ ⲡⲉ ⲟⲩⲇⲉ ⲙ̀ⲡⲟⲩϫⲉ ⲟⲩⲥⲁϫⲓ ⲛ̀ⲟⲩⲣⲱⲙⲓ ϧⲉⲛ ⲟⲩⲉⲣϣⲓϣⲓ ⲁⲗⲗⲁ ⲛⲁⲩⲑⲉⲃⲓⲟ ⲙ̀ⲙⲱⲟⲩ ⲡⲉ ⲥⲁⲡⲉⲥⲏⲧ ⲛ̀ⲥⲟⲛ ⲛⲓⲃⲉⲛ ϩⲱⲥ ⲉⲩϣⲟϣϥ ⲟⲩⲟϩ ⲉⲩⲓⲣⲓ ⲙ̀ⲙⲱⲟⲩ ⲛ̀ⲁⲧⲉⲙⲡϣⲁ ⲉⲩϫⲱ ⲙ̀ⲙⲟⲥ ⲛ̀ⲛⲁⲩ ⲛⲓⲃⲉⲛ ϫⲉ ⲡⲓϩⲙⲟⲧ ⲫⲁ Ⲫϯ ⲡⲉ ⲙ̀ⲙⲁⲩⲁⲧϥ ⲁⲛⲟⲛ ⲇⲉ ⲁⲛⲟⲓ ⲛ̀ϩⲁⲛϫⲱⲃ ⲟⲩⲟϩ ⲛ̀ⲣⲉϥⲉⲣⲛⲟⲃⲓ.
Ⲛⲉ ⲟⲩⲟⲛ ⲟⲩⲡⲣⲉⲥⲃⲩⲧⲉⲣⲟⲥ ⲇⲉ ϧⲉⲛ Ⲥⲉⲗⲉⲩⲕⲓⲁ ⲛ̀ⲧⲉ ϯϨⲓⲥⲁⲩⲣⲓⲁ ⲉϣⲱⲡ ⲛ̀ⲧⲉϥⲕⲏⲛ ⲉϥⲉⲣϩⲱⲃ ϧⲉⲛ ⲛⲓϩⲃⲏⲟⲩⲓ ⲛ̀ⲁⲛⲟⲙⲟⲛ ϣⲁϥϩⲱⲗ ⲛ̀ⲧⲉϥⲟϩⲓ ⲉⲣⲁⲧϥ ⲉⲡⲓⲙⲁⲛⲉⲣϣⲟⲩϣⲱⲟⲩϣⲓ ⲛ̀ⲧⲉ Ⲫϯ. ⲛⲁϥⲧⲁⲕⲏⲟⲩⲧ ⲅⲁⲣ ⲡⲉ ⲛⲉⲙ ⲟⲩⲥϩⲓⲙⲓ ⲛ̀ⲥⲁⲙⲁⲣⲓⲧⲏⲥ ϩⲱⲥ ⲇⲉ ⲉϥⲙⲏⲛ ⲉⲃⲟⲗϧⲉⲛ ⲛⲁⲓⲙⲉⲧⲁⲥⲉⲃⲏⲥ ⲙ̀ⲡⲁⲓⲣⲏϯ ⲁⲪϯ ⲟⲩⲱϣ ⲉϩⲓⲱⲓϣ ⲛ̀ⲛⲏⲉⲧⲉ ⲡⲓⲡⲣⲉⲥⲃⲩⲧⲉⲣⲟⲥ ⲉⲧⲉⲙⲙⲁⲩ ⲓⲣⲓ ⲙ̀ⲙⲱⲟⲩ ϧⲉⲛ ϯϨⲓⲥⲁⲩⲣⲓⲁ ⲧⲏⲣⲥ ϫⲉ ϩⲓⲛⲁ ⲛ̀ⲧⲉ ⲡⲕⲉⲥⲉⲡⲓ ⲛⲁⲩ ⲛ̀ⲧⲟⲩⲉⲣϩⲟϯ. ⲗⲟⲓⲧⲟⲛ ϧⲉⲛ ⲡⲓⲉϩⲟⲟⲩ ⲛ̀ⲧⲉ ⲡⲉϥⲉⲣⲫⲙⲉⲩⲓ ⲙ̀ⲡⲓⲁⲅⲓⲟⲥ Ⲓⲅⲛⲁⲧⲓⲟⲥ ⲁϥϣⲉⲛⲁϥ ⲟⲛ ⲉϯⲉⲕⲕⲗⲏⲥⲓⲁ ϫⲉ ϩⲓⲛⲁ ⲛ̀ⲧⲉϥϣⲉⲙϣⲓ ϩⲟⲧⲉ ⲟⲩⲛ ⲉⲧⲁϥⲕⲏⲛ ⲉϥϫⲱ ⲛ̀ϯⲉⲩⲭⲏ ⲛ̀ⲧⲉ ⲡⲓⲉⲩⲁⲅⲅⲉⲗⲓⲟⲛ ⲙⲉⲛⲉⲛⲥⲁ ⲛⲓⲧⲱⲃϩ ⲁϥϯ ⲙ̀ⲡⲉϥⲟⲩⲟⲓ ⲉⲡⲓⲙⲁⲛⲉⲣϣⲟⲩϣⲱⲟⲩϣⲓ ϫⲉ ⲁϥⲛⲁϣⲉⲙϣⲓ ϧⲉⲛ ⲟⲩⲙⲉⲧⲁⲧϩⲟϯ. ⲥⲁⲧⲟⲧϥ ⲁⲟⲩⲁⲅⲅⲉⲗⲟⲥ ⲛ̀ⲧⲉ ⲡⲟ̅ⲥ̅ ϣⲁⲣⲓ ⲉⲣⲟϥ ϧⲉⲛ ⲟⲩⲛⲓϣϯ ⲛ̀ⲉⲣϧⲟⲧ ⲉϥⲛⲁϣⲧ ⲉⲙⲁϣⲱ ϩⲱⲥⲧⲉ ⲡⲓϣⲁⲣ ⲛ̀ⲧⲉ ⲡⲉϥⲥⲱⲙⲁ ⲛⲟⲩϥⲧ ⲙ̀ⲫⲣⲏϯ ⲛ̀ⲟⲩⲁⲥⲕⲟⲥ ⲟⲩⲟϩ ⲥⲁⲧⲟⲧϥ ⲁϥϩⲉⲓ ⲉϫⲉⲛ ⲡⲓⲕⲁϩⲓ ⲁϥⲉⲣⲫ̀ⲣⲏϯ ⲛ̀ⲟⲩⲣⲉϥⲱⲙⲟⲩⲧ ⲟⲩⲟϩ ⲁⲩϥⲁⲓ ⲙ̀ⲙⲟϥ ⲁⲩϭⲓⲧϥ ⲉⲡⲉϥⲏⲓ ϧⲉⲛ ⲟⲩⲛⲓϣϯ ⲙ̀ⲙⲉⲉⲃⲓⲏⲛ. ⲫⲁⲓ ⲙⲉⲛⲉⲛⲥⲁ ⲓ̅ ⲛ̀ⲉϩⲟⲟⲩ ⲁⲡⲉϥⲥⲱⲙⲁ ⲧⲏⲣϥ ⲉϥⲉⲣϧⲟⲧ ϩⲱⲥⲧⲉ ⲥ̀ⲉⲥⲉⲕ ϥⲉⲛⲧ ⲉⲃⲟⲗϩⲁⲣⲟϥ ⲟⲩⲟϩ ⲛ̀ⲧⲉ ⲛⲉϥⲕⲁⲥ ⲃⲱϣ ⲉⲃⲟⲗ ⲟⲩⲟϩ ⲛⲁϥϯϧⲣⲱⲟⲩ ⲉⲃⲟⲗϧⲉⲛ ⲟⲩⲥⲙⲏ ⲉⲥⲉⲛϣⲁϣⲓ ⲙ̀ⲡⲓⲉϩⲟⲟⲩ ⲛⲉⲙ ⲡⲓⲉϫⲱⲣϩ ⲉⲑⲃⲉ ϯⲟⲩⲁⲙⲉϯ ⲉⲑⲟⲩⲱⲙ ⲛ̀ⲥⲱϥ. ⲛⲁϥⲣⲓⲙⲓⲓ ⲇⲉ ⲉϥⲉⲣⲟⲙⲟⲗⲟⲅⲓⲛ ⲙ̀ⲡⲉⲙⲑⲟ ⲉⲃⲟⲗ ⲛ̀ⲟⲩⲟⲛ ⲛⲓⲃⲉⲛ ⲛ̀ⲛⲓⲙⲉⲧⲁⲥⲉⲃⲏⲥ ⲧⲏⲣⲟⲩ ⲉⲧⲁϥⲁⲓⲧⲟⲩ.
Ⲫⲁⲓ ⲁⲩⲧⲁⲗⲟϥ ⲉϫⲉⲛ ⲟⲩϭⲗⲟϫ ⲁϥϥⲁⲓ ⲙ̀ⲙⲟϥ ϩⲓⲧⲉⲛ ϩⲁⲛⲣⲱⲙⲓ ⲁⲩϭⲓⲧϥ ⲉⲣⲁⲧⲟⲩ ⲛ̀ⲛⲏⲉ̅ⲑ̅ⲩ̅ ⲛⲉⲃⲓⲁⲓⲕ ⲛ̀ⲧⲉ Ⲫϯ ⲉⲧϭⲟⲥⲓ. ⲉⲧⲁⲩⲭⲁϥ ⲇⲉ ⲉϧⲣⲏⲓ ⲙ̀ⲡⲟⲩⲙⲑⲟ ⲁⲩⲉⲣⲙⲕⲁϩⲛ̀ϩⲏⲧ ϧⲉⲛ ⲡϫⲓⲛⲑⲣⲟⲩⲛⲁⲩ ⲉⲡⲉϥⲧϩⲉⲙⲕⲟ ⲟⲩⲟϩ ⲛⲁⲩϫⲱ ⲙ̀ⲙⲟⲥ ⲛⲁϥ ⲡⲉ ϫⲉ ⲟⲩ ⲡⲉ ⲉⲧⲁⲕⲁⲓϥ ϣⲁⲧⲉ ⲫⲁⲓ ϣⲱⲡⲓ ⲙ̀ⲙⲟⲕ. ⲛ̀ⲑⲟϥ ⲇⲉ ⲡⲉϫⲁϥ ⲛⲱⲟⲩ ϫⲉ ⲭⲱ ⲛⲏⲓ ⲉⲃⲟⲗ ⲛⲁⲓⲟϭ ⲉ̅ⲑ̅ⲩ̅ ⲁⲠⲭ̅ⲥ̅ ⲕⲏⲛ ⲉⲉⲣϣⲟⲣⲡ ⲛ̀ⲧⲁⲙⲱⲧⲉⲛ ⲉⲛⲁⲡⲣⲁⲝⲓⲥ ⲉⲧϩⲱⲟⲩ ⲡⲉϫⲱⲟⲩ ⲛⲁϥ ϫⲉ ϩⲁⲣⲁ ⲁⲕⲥⲱⲟⲩⲛ ⲙ̀Ⲡⲭ̅ⲥ̅ ⲛ̀ⲕⲁⲗⲱⲥ ⲟⲩⲟϩ ⲁⲕⲉⲙⲓ ⲇⲉ ϥϣⲟⲡ ⲉϥⲛⲁⲩ ⲉⲛⲉⲕϩⲃⲏⲟⲩⲓ ⲉⲧⲉⲕⲓⲣⲓ ⲙ̀ⲙⲱⲟⲩ. ⲡⲉϫⲁϥ ϫⲉ ⲁϩⲁ ⲛⲁⲟ̅ⲥ̅ ⲛ̀ⲓⲟϯ ⲁϥϯⲥⲃⲱ ⲛⲏⲓ ⲛ̀ⲕⲁⲗⲱⲥ. ⲧⲟⲧⲉ ⲛⲓⲙⲁⲕⲁⲣⲓⲟⲥ ⲛ̀ⲁⲑⲗⲏⲧⲏⲥ ⲛ̀ⲧⲉ Ⲡⲭ̅ⲥ̅ Ⲓⲏ̅ⲥ̅ ⲉⲩⲥⲱⲟⲩⲛ ⲙ̀Ⲫϯ ϫⲉ ϥⲟⲩⲱϣ ⲁⲛ ⲛ̀ⲧⲉ ϩⲗⲓ ⲧⲁⲕⲟ ⲉϥϭⲁϧⲉⲙ ϧⲉⲛ ⲛⲉϥⲛⲟⲃⲓ ⲁⲗⲗⲁ ⲙⲁⲗⲗⲟⲛ ϥⲟⲩⲱϣ ⲉⲑⲣⲟⲩⲕⲟⲧⲟⲩ ϩⲁⲣⲟϥ ⲧⲏⲣⲟⲩ ϧⲉⲛ ⲟⲩⲙⲉⲧⲁⲛⲟⲓⲁ ⲙ̀ⲙⲏⲓ ⲁⲩϭⲓ ⲛ̀ⲟⲩⲕⲟⲟⲩϫⲓ ⲙ̀ⲙⲱⲟⲩ ⲁⲩⲉⲣⲥⲫⲣⲁⲅⲓⲍⲛ ⲙ̀ⲙⲟϥ ϧⲉⲛ ⲫ̀ⲙⲏⲓⲛⲓ ⲙ̀ⲡⲓ⳧ ⲁⲓϫⲟϣϥ ⲉϫⲱϥ ⲉⲩϫⲱ ⲙ̀ⲙⲟⲥ ϫⲉ ⲡⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲡⲓⲥⲏⲓⲛⲓ ⲛ̀ⲁⲗⲏⲑⲓⲛⲟⲥ ⲛ̀ⲧⲉ ⲛⲉⲛⲯⲩⲭⲏ ⲛⲉⲙ ⲛⲉⲛⲥⲱⲙⲁ ⲫⲏⲉⲑⲟⲩⲱϣ ⲁⲛ ⲛ̀ⲧⲉ ϩⲗⲓ ⲧⲁⲕⲟ ϧⲉⲛ ⲛⲏⲉⲧⲁⲩⲥⲱⲣⲉⲙ ⲁⲗⲗⲁ ⲉⲑⲣⲟⲩⲧⲁⲥⲑⲱⲟⲩ ⲧⲏⲣⲟⲩ ⲉϧⲟⲩⲛ ⲉⲧⲉⲕϣⲁⲓⲣⲓ ⲛ̀ⲗⲟⲅⲓⲕⲏ ϩⲓⲧⲉⲛ ϯⲙⲉⲧⲁⲛⲟⲓⲁ ⲟⲩⲟϩ ⲛ̀ⲧⲉⲥⲟⲩϫⲁⲓ ⲛ̀ϫⲉ ⲧⲟⲩⲯⲩⲭⲏ ⲛ̀ⲑⲟⲕ ⲉⲕⲉⲉⲣⲫⲁϧⲣⲓ ⲉⲧⲏⲣⲟⲩ ϩⲓⲧⲉⲛ ⲛⲓⲉⲩⲭⲏ ⲛ̀ⲧⲉ Ⲁⲅⲁⲡⲟⲥ ⲟⲉⲛⲓⲱⲧ ⲛⲉⲙ ⲡⲉⲕⲃⲱⲕ Ⲙⲁⲕⲁⲣ ⲧⲟⲧⲉ ⲉⲧⲁⲁⲩϫⲱϣ ⲙ̀ⲡⲡⲓⲙⲱⲟⲩ ⲉϫⲱϥ ⲟⲩⲟϩ ⲁϥⲟⲩϫⲁⲓ ⲛ̀ϫⲉ ⲡⲉϥⲥⲱⲙⲁ ⲉⲁⲩϣⲱⲟⲩⲓ ⲛ̀ϫⲉ ⲛⲉϥⲉⲣϧⲟⲧ ⲁϥⲧⲁⲗϭⲟ. ⲛⲓⲁⲅⲓⲟⲥ ⲇⲉ ⲁⲩⲧⲫⲟϥ ϧⲉⲛ ⲟⲩϩⲓⲣⲏⲛⲏ ⲉⲩϫⲱ ⲙ̀ⲙⲟⲥ ⲛⲁϥ ϫⲉ ⲓⲥ ϩⲏⲡⲡⲉ ⲁⲕⲟⲩϫⲁⲓ ⲙ̀ⲡⲉⲣⲉⲣⲛⲟⲃⲓ ⲛ̀ⲕⲉⲥⲟⲡ ϫⲉ ⲙⲏⲡⲱⲥ ⲛ̀ⲧⲉ ⲡϫⲱⲛⲧ ⲙ̀Ⲫϯ ⲧⲁϩⲟⲕ ⲟⲛ ⲛ̀ⲧⲉⲕⲙⲟⲩ ⲛ̀ⲕⲁⲕⲱⲥ. ⲗⲟⲓⲡⲟⲛ ⲁϥϣⲉⲛⲁϥ ⲉⲛⲏⲉⲧⲉⲛⲟⲩϥ ⲉϥⲟⲩⲟϫ ⲟⲩⲟϩ ⲁϥϭⲱⲟⲩ ⲙ̀Ⲫϯ ⲛ̀ⲥⲏⲟⲩ ⲛⲓⲃⲉⲛ ⲉⲑⲃⲉ ⲡⲓⲟⲩϫⲁⲓ ⲉⲧⲁϥⲧⲁϩⲟϥ ϩⲓⲧⲉⲛ ⲛⲓϣⲗⲏⲗ ⲛ̀ⲧⲉ ⲛⲓⲁⲅⲓⲟⲥ.
Ⲁⲙⲉⲗⲓ ⲛⲉ ⲟⲩⲟⲛ ⲫⲓⲗⲟⲥⲟⲫⲟⲥ ⲃ̅ ϧⲉⲛ Ⲁⲑⲏⲛⲁⲥ ⲛⲉ ϩⲁⲛϩⲉⲗⲗⲏⲛⲟⲥ ⲅⲁⲣ ⲛⲉ ⲉⲧⲁⲩⲥⲱⲧⲉⲙ ⲉⲑⲃⲉ ⲛⲓⲧⲁⲗϭⲟ ⲉⲧϣⲟⲡ ⲉⲃⲟⲗϩⲓⲧⲉⲛ ⲛⲓⲁⲅⲓⲟⲥ ϧⲉⲛ ϯϫⲟⲙ ⲛ̀ⲧⲉ Ⲡⲭ̅ⲥ̅ Ⲓⲏ̅ⲥ̅ ⲛⲁⲩϯϣⲑⲟⲩⲓⲧ ϧⲁⲣⲱⲟⲩ ⲡⲉ ⲉⲩϫⲱ ⲙ̀ⲙⲟⲥ ⲉⲣⲱⲟⲩ ϫⲉ ⲥⲉϩⲓⲟⲩⲓ ⲛ̀ⲛⲓⲇⲉⲙⲱⲛ ⲉⲃⲟⲗϧⲉⲛ ⲛⲓⲣⲱⲙⲓ ⲁⲩϣⲁⲛϣⲗⲏⲗ ⲉϫⲱⲟⲩ ϧⲉⲛ ⲫⲣⲁⲛ ⲙ̀Ⲡⲭ̅ⲥ̅. ⲙⲏ ⲛⲁⲓ ⲛⲉ ⲛⲓⲛⲟⲩϯ ⲛ̀ⲧⲉ ⲛⲓⲁⲑⲏⲛⲟⲥ. ⲁⲩⲧⲱⲟⲩⲛⲟⲩ ⲇⲉ ⲛ̀ϫⲉ ⲛⲓϣⲁⲙϣⲉ ⲓⲇⲱⲗⲟⲛ ⲉⲧⲉⲙⲙⲁⲩ ϧⲉⲛ ⲟⲩⲡⲛⲁⲟⲣⲅⲓⲁ ⲛ̀ⲭⲣⲟϥ ⲉⲩⲟⲩⲱϣ ⲉⲉⲣⲡⲓⲣⲁⲍⲓⲛ ⲛ̀ⲛⲏⲉ̅ⲑ̅ⲩ̅ ⲁⲩⲱⲗⲕ ⲛ̀ⲛⲟⲩϫⲓϫ ⲉⲣⲱⲟⲩ ⲟⲩⲟϩ ⲁⲩⲙⲟⲣⲟⲩ ⲛ̀ϩⲁⲛⲧⲱⲓⲥ ⲙ̀ⲫⲣⲏϯ ⲛ̀ϩⲁⲛϫⲁϭⲉⲩ ⲛ̀ϫⲉ ⲗⲁⲫⲟⲥ ⲟⲩⲟϩ ⲁⲩⲙⲁϣⲑⲁⲙ ⲛ̀ⲛⲟⲩⲃⲁⲗ ⲙ̀ⲫⲣⲏϯ ⲛ̀ϩⲁⲛⲃⲉⲗⲗⲉⲩ ⲉⲩϫⲱ ⲙ̀ⲙⲟⲥ ⲙ̀ⲡⲁⲓⲣⲏϯ ϫⲉ ⲓⲥϫⲉ ϩⲁⲛⲡⲣⲟⲫⲏⲧⲏⲥ ⲛⲉ ⲟⲩⲟϩ ⲥⲉϩⲓⲟⲩⲓ ⲛ̀ⲛⲓⲇⲉⲙⲱⲛ ⲉⲃⲟⲗ ⲥⲉⲛⲁⲉⲙⲓ ⲉⲡⲉⲛϩⲱⲃ. ⲁⲩϭⲓ ⲇⲉ ⲛ̀ⲕⲉⲟⲩⲁⲓ ⲛⲉⲙⲱⲟⲩ ϩⲱⲥ ⲉϥϭⲓⲙⲱⲓⲧ ϧⲁϫⲱⲟⲩ ϩⲓ ⲫⲙⲱⲓⲧ ⲁⲩⲕⲱⲗϩ ⲉⲡⲡⲓⲣⲟ ⲡⲓⲁⲅⲓⲟⲥ ⲇⲉ Ⲇⲟⲙⲉⲧⲓⲟⲥ ⲁϥⲉⲣⲟⲩⲱ ⲛⲱⲟⲩ ⲉϥϫⲱ ⲙ̀ⲙⲟⲥ ϫⲉ ⲉⲣⲉⲧⲉⲛⲟⲩⲉϣ ⲟⲩ ⲙ̀ⲡⲁⲓⲙⲁ ⲟⲩⲟϩ ⲡⲉϫⲱⲟⲩ ⲛⲁϥ ϫⲉ ⲉⲧⲁⲛⲓ ϣⲁⲣⲱⲧⲉⲛ ⲛⲓⲁⲅⲓⲟⲥⲛ̀ⲧⲉ Ⲫϯ ⲉϯϩⲟ ⲉⲣⲱⲧⲉⲛ ϩⲓⲛⲁ ⲛ̀ⲧⲉ ⲡⲉⲧⲉⲛⲛⲁⲓⲧⲁϩⲟⲛ ⲛ̀ⲧⲉⲧⲉⲛϣⲗⲏⲗ ⲉϫⲱⲛ ⲛ̀ⲧⲉ ⲡⲓⲟⲩϫⲁⲓ ⲧⲁϩⲟⲛ ϫⲉ ⲟⲩⲏⲓ ⲁⲛⲟⲛ ϩⲁⲛϫⲁϭⲟ ⲛ̀ⲕⲉⲗⲁⲫⲟⲥ ⲟⲩⲟϩ ⲙ̀ⲃⲉⲗⲗⲉⲩ ⲓⲥ ϩⲏⲡⲡⲉ ⲭⲛⲁⲩ ⲉⲡⲁⲓⲣⲱⲙⲓ ϫⲉ ⲛ̀ⲑⲟϥ ⲁϥϭⲓⲙⲱⲓⲧ ⲛⲁⲛ ⲁϥⲉⲛⲧⲉⲛ ⲉⲡⲁⲓⲙⲁ. ⲡⲉϫⲉ ⲡⲓⲁⲅⲓⲟⲥ Ⲇⲟⲙⲉⲧⲓⲟⲥ ⲛⲱⲟⲩ ϧⲉⲛ ⲟⲩⲙⲉⲧⲁⲧⲡⲗⲟⲩⲥ ϫⲉ ⲡⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲉϥⲉⲧⲁⲗϭⲉ ⲑⲏⲛⲟⲩ ⲟⲩⲟϩ ⲉⲥⲉϣⲱⲡⲓ ⲛⲱⲧⲉⲛ ⲙ̀ⲫⲣⲏϯ ⲉⲧⲁⲣⲉⲧⲉⲛⲉⲣⲉⲧⲓⲛ.
Ⲛϯⲟⲩⲛⲟⲩ ⲇⲉ ⲁⲩⲉⲣⲕⲉⲗⲁⲫⲟⲥ ⲟⲩⲟϩ ⲁⲩⲉⲣⲃⲉⲗⲗⲉⲩ ⲛⲟⲩϫⲓϫ ⲱⲗⲕ ⲉⲣⲱⲟⲩ ⲉⲁⲩϣⲱⲡ ⲛ̀ϫⲁϭⲟⲥⲁⲧⲟⲧⲟⲩ ⲇⲉ ⲁⲩⲱϣ ⲉⲃⲟⲗϧⲉⲛ ⲟⲩⲛⲓϣϯ ⲛ̀ⲥⲙⲏ ⲉⲩϫⲱ ⲙ̀ⲙⲟⲥ ⲫⲣⲱⲙⲓ ⲙ̀Ⲫϯ ⲛⲁⲓ ⲛⲁⲛ ϫⲉ ⲉⲧⲁⲛⲓ ⲉⲡⲁⲓⲙⲁⲉⲉⲣⲡⲓⲣⲁⲍⲓⲛ ⲙ̀ⲙⲱⲧⲉⲛ. ⲟⲩⲟϩ ⲥⲁⲧⲟⲧⲟⲩ ⲁⲩϩⲓⲧⲟⲩ ϩⲓϫⲉⲛ ϧⲁⲧⲉⲛ ⲛⲉⲛϭⲁⲗⲁⲩϫ ⲛ̀ⲛⲏⲉ̅ⲑ̅ⲩ̅ ϧⲉⲛ ⲟⲩⲛⲓϣϯ ⲛ̀ⲛⲁϩϯ ⲉⲩϫⲱ ⲙ̀ⲙⲟⲥ ϫⲉ ⲧⲉⲛϯϩⲟ ⲉⲣⲱⲧⲉⲛ ⲛⲁⲓ ⲛⲁⲛ ⲁⲣⲓⲃⲟⲏⲑⲓⲛ ⲉⲣⲟⲛ ⲟⲩⲟϩ ⲧⲉⲛⲛⲁϣⲱⲡⲓ ⲛ̀ⲭⲣⲓⲥⲧⲓⲁⲛⲟⲥ ⲓⲥϫⲉⲛ ⲫⲟⲟⲩ ⲉⲃⲟⲗ ⲛ̀ⲧⲉⲛⲉⲣⲃⲱⲕ ⲙ̀Ⲡⲭ̅ⲥ̅. ⲟⲩⲟϩ ⲡⲉϫⲉ ⲡⲓⲉ̅ⲑ̅ⲩ̅ Ⲙⲁⲝⲓⲙⲟⲥ ⲛⲱⲟⲩ ϫⲉ ⲁⲛ ⲧⲉⲧⲉⲛⲛⲁϩϯ ⲧⲁⲫⲙⲏ ϫⲉ Ⲓⲏ̅ⲥ̅ ⲡⲉ ⲡϣⲏⲣⲓ ⲙ̀Ⲫϯ. ⲛ̀ⲑⲱⲟⲩ ⲇⲉ ⲡⲉϫⲱⲟⲩ ϫⲉ ⲥⲉ ⲧⲉⲛⲛⲁϩϯ ϧⲉⲛ ⲡⲉⲛϩⲏⲧ ⲧⲏⲣϥ ⲛⲉⲛϭⲓⲥⲉⲩ ⲉ̅ⲑ̅ⲩ̅ ϫⲉ Ⲓⲏ̅ⲥ̅ ⲡⲉ ⲡϣⲏⲣⲓ ⲙ̀Ⲫϯ ⲟⲩⲟϩ ⲙ̀ⲙⲟⲛ ⲕⲉⲟⲩⲁⲓ ⲉⲃⲏⲗ ⲉⲣⲟϥ. ⲉⲧⲁⲩⲥⲱⲧⲉⲙ ⲇⲉ ⲉⲛⲁⲓⲥⲁϫⲓ ⲛ̀ϫⲉ ⲛⲓⲉⲃⲓⲁⲓⲕ ⲛ̀ⲧⲉ Ⲡⲭ̅ⲥ̅ ⲛ̀ⲧⲟⲧⲟⲩ ⲛ̀ⲛⲏⲉⲧⲉ ⲙ̀ⲙⲁⲩ ⲁⲩϣⲗⲏⲗ ⲉϫⲉⲛ ⲟⲩⲕⲟⲩϫⲓ ⲛ̀ⲛⲉϩ ⲁⲩⲧⲏⲓϥ ⲛⲱⲟⲩ ⲉⲩϫⲱ ⲙ̀ⲙⲟⲥ ϫⲉ ⲙⲁϣⲉⲛⲱⲧⲉⲛ ⲉⲡⲧⲟⲡⲟⲥ ⲙ̀ⲡⲓⲁⲅⲓⲟⲥ Ⲗⲉⲟⲛⲧⲓⲟⲥ ⲟⲩⲟϩ ϫⲱⲕⲉⲙ ϧⲉⲛ ⲧⲉϥⲛⲓϣϯ ⲛ̀ϣⲱϯ ⲟⲩⲟϩ ⲛ̀ⲧⲉⲧⲉⲛⲑⲁϩⲥ ⲑⲏⲛⲟⲩ ϧⲉⲛ ⲡⲁⲓⲕⲟⲩϫⲓ ⲛ̀ⲛⲉϩ ⲟⲩⲟϩ ⲛ̀ⲧⲉⲧⲉⲛⲛⲁϩϯ ϫⲉ ⲡⲓⲟⲩϫⲁⲓ ⲛⲁⲧⲁϩⲉ ⲑⲏⲛⲟⲩ. ⲟⲩⲟϩ ⲁⲩⲓⲣⲓ ⲕⲁⲧⲁ ⲫⲣⲏϯ ⲉⲧⲁ ⲛⲓⲁⲅⲓⲟⲥ ϫⲟⲥ ⲛⲱⲟⲩ ⲟⲩⲟϩ ⲁⲩⲟⲩϫⲁⲓ ϧⲉⲛ ϯϫⲟⲙ ⲛ̀ⲧⲉ Ⲡⲭ̅ⲥ̅. ⲥⲁⲧⲟⲧⲟⲩ ⲇⲉ ⲁⲩϭⲓⲱⲙⲥ ⲉⲫⲣⲁⲛ ⲙ̀ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ⲟⲩⲟϩ ⲁⲩϣⲱⲡⲓ ⲛ̀ⲭⲣⲓⲥⲧⲓⲁⲛⲟⲥ. ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲟⲩⲟϩ ⲁⲩϩⲓⲱⲓϣ ⲛ̀ϯϣⲫⲏⲣⲓ ⲉⲧⲁⲥϣⲱⲡⲓ ⲙ̀ⲙⲱⲟⲩ ϧⲉⲛ Ⲁⲑⲏⲛⲁⲥ ⲑⲃⲁⲕⲓ ⲛ̀ⲛⲓⲁⲏⲛⲛⲉⲟⲥ ⲓⲥϫⲉⲛ ⲡⲓⲉϩⲟⲟⲩ ⲇⲉ ⲉⲧⲉⲙⲙⲁⲩ ⲁⲟⲩⲙⲏϣ ϣⲱⲡⲓ ⲛ̀ⲭⲣⲓⲥⲧⲓⲁⲛⲟⲥ ⲉⲃⲟⲗ ⲛ̀ϧⲏⲧⲟⲩ ⲉⲩϯⲱⲟⲩ ⲙ̀Ⲫϯ ⲡⲓⲗⲟⲅⲟⲥ ⲉⲧⲁϥⲡⲓⲥⲁⲣⲝ. ⲉϣⲱⲡ ⲅⲁⲣ ⲁⲛϣⲁⲛⲟⲩⲱϣ ⲉϫⲱ ⲙ̀ⲡⲁϣⲁⲓ ⲛ̀ⲛⲓϩⲙⲟⲧ ⲛ̀ⲧⲁⲗϭⲟ ⲉⲧⲁ Ⲫϯ ⲉⲣⲉⲛⲉⲣⲅⲓⲛ ⲙ̀ⲙⲱⲟⲩ ϧⲉⲛ ⲛⲉⲛϫⲓϫ ⲛ̀ⲛⲓⲁⲅⲓⲟⲥ ⲡⲓⲥⲏⲟⲩ ⲛⲁⲙⲟⲩⲛⲕ ⲉⲣⲟⲓ ⲉⲓⲥⲁϫⲓ.
Ⲟⲩ ⲡⲣⲁⲅⲙⲁⲧⲉⲩⲥ ⲅⲁⲣ ⲛ̀ⲧⲉ ϯⲃⲁⲕⲓ Ⲁⲛⲧⲟⲭⲓⲁ ⲉϥϩⲏⲗ ϣⲁ ⲛⲁⲓⲙⲁⲕⲁⲣⲓⲟⲥ ⲕⲁⲧⲁ ⲕⲟⲩϫⲓ ⲉϥϭⲓⲥⲙⲟⲩ ⲉⲃⲟⲗϩⲓⲧⲟⲧⲟⲩ ⲉϥⲱⲗⲓ ⲙ̀ⲡⲟⲩϩⲱⲃ ⲛ̀ϫⲓϫ ⲛ̀ⲧⲟⲧⲟⲩ: ⲛⲁⲩⲉⲣϩⲱⲃ ⲅⲁⲣ ⲡⲉ ⲉⲛⲓⲥⲭⲟⲗⲁⲕⲓ ⲧⲉ ⲉⲃⲟⲗ ⲟⲩⲛ ϩⲓⲧⲉⲛ ⲡⲉϥⲛⲁϩϯ ⲉϧⲟⲩⲛ ⲉⲛⲁⲓⲁⲅⲓⲟⲥ ⲉϥⲥϧⲉ ⲡⲟⲩⲣⲁⲛ ⲉⲛⲓⲥⲭⲟⲗⲁⲕⲓ ⲁϥⲁⲓⲧⲟⲩ ⲛ̀⳧ ϧⲉⲛ ⲑⲙⲏϯ ⲙ̀ⲡⲓⲗⲟⲩⲟ ⲛ̀ⲧⲉ ⲡⲉϥϫⲟⲓ ϧⲉⲛ ⲡⲓϣϭⲏⲣ ⲛ̀ⲉⲛ ⲫⲓⲟⲙ.. Ⲁⲥϣⲱⲡⲓ ⲇⲉ ⲉⲣⲉ ⲡⲓϫⲟⲓ ⲭⲏ ϧⲉⲛ Ⲕⲱⲥⲧⲁⲛⲧⲓⲛⲟⲡⲟⲗⲓⲥ ⲛⲉⲙ ⲡⲉϥⲡⲣⲁⲅⲙⲁⲧⲓⲁ ⲉⲡϫⲓⲛⲧⲏⲥ ⲉⲃⲟⲗ ⲙ̀ⲙⲁⲩ ⲉⲡⲓⲇⲏ ⲅⲁⲣ ⲉⲣⲉ ⲡⲓⲗⲩⲙⲏⲛ ⲛ̀ⲧⲉ ϯⲃⲁⲕⲓ ⲉϥⲭⲏ ϧⲉⲛ ⲧⲉⲥⲙⲏϯ ⲥⲁϧⲟⲩⲛ ⲛ̀ⲛⲓⲥⲟⲃⲧ. ⲧⲟⲧⲉ ⲟⲩⲛ ⲉⲧⲁϥⲉⲙⲓ ⲛ̀ϫⲉ ⲡⲟⲩⲣⲟ ϫⲉ ⲥⲉⲛⲁϣⲧ ⲛ̀ϫⲉ ⲛⲓϩⲱⲓⲙⲓ ⲁϥⲟⲩⲁϩⲥⲁϩⲛⲓ ⲉⲑⲣⲟⲩⲭⲱ ⲛ̀ⲛⲓⲉϫⲏⲟⲩ ⲥϧⲟⲩⲛ ⲉⲑⲃⲉ ⲡⲉⲛϣⲟⲧ ⲛ̀ⲛⲓϣⲱⲓⲙⲓ ⲛ̀ⲧⲉ ⲫⲓⲟⲙ ϩⲁⲛϩⲁⲗⲩⲥⲓⲥ ⲅⲁⲣ ⲙ̀ⲃⲉⲛⲓⲡⲓ ⲉⲧϭⲟⲗⲕ ⲉⲡⲓⲙⲁⲛⲓ ⲉϧⲟⲩⲛ ⲗⲟⲓⲡⲟⲛ ⲁⲩⲥⲉⲕ ⲛⲓϩⲁⲗⲩⲥⲓⲥ ⲁⲩⲭⲁ ⲛⲓⲉϫⲏⲟⲩ ⲉϧⲟⲩⲛ ⲉⲑⲣⲟⲩⲙⲟⲛⲓ ϧⲉⲛ ⲡⲓⲗⲩⲙⲏⲛ. ⲉⲧⲓ ⲟⲩⲛ ⲉϥⲟϩⲓ ⲉⲣⲁⲧϥ ⲛ̀ϫⲉ ⲡⲓⲙⲁⲅⲓⲥⲧⲣⲓⲁⲛⲟⲥ ⲛ̀ⲧⲉ ⲡⲟⲩⲣⲟ ⲛⲉⲙ ⲛⲓⲙⲁⲧⲟⲓ ⲛⲁϥϭⲓϩⲣⲁϥ ⲡⲉ ⲛⲉⲙ ⲛⲓⲉϫⲏⲟⲩ ⲉⲑⲙⲟⲛⲓ ⲉϧⲟⲩⲛ ⲉⲧⲁϥϯϩⲑⲏϥ ⲟⲩⲛ ⲁϥⲛⲁⲩ ⲉⲡⲓⲗⲁⲟⲩⲟ ⲛ̀ⲧⲉ ⲡⲓϫⲟⲓ ⲉⲧⲁⲛⲉⲣϣⲟⲣⲡ ⲙ̀ⲫⲓⲣⲓ ⲉⲣⲟϥ ⲉϥⲫⲟⲣϣ ⲉⲃⲟⲗ ϩⲓϫⲉⲛ ⲡⲕⲁϩⲓ ⲉⲣⲉ ⲛⲓⲛⲉϥ ⲑⲱⲣⲡ ⲉⲣⲟϥ ⲕⲁⲧⲁ ⲧⲟⲩⲥⲩⲛⲏⲑⲓⲁ ⲁϥⲛⲁⲩ ⲉⲫⲣⲁⲛ ⲙ̀ⲡⲓⲁⲅⲓⲟⲥ Ⲙⲁⲝⲓⲙⲟⲥ ⲛⲉⲙ Ⲇⲟⲙⲉⲧⲓⲟⲥ ⲉⲩⲥϧⲏⲟⲩⲧ ⲉⲛⲓⲥⲭⲟⲗⲁⲕⲓ ⲉⲧⲧⲟⲓ ⲉⲡⲓⲗⲁⲟⲩⲟ. ⲉⲧⲁϥⲱϣ ⲇⲉ ⲛ̀ⲛⲓⲣⲁⲛ ⲉϥⲉⲣⲕⲉⲗⲉⲩⲓⲛ ⲉⲑⲣⲟⲩⲙⲟⲩϯ ⲛⲁϥ ⲉⲛⲓⲛⲉϥ ⲟⲩⲟϩ ⲡⲉϫⲁϥ ⲛⲱⲟⲩ ϫⲉ ⲟⲩ ⲛⲉ ⲛⲁⲓⲣⲁⲛ ⲉⲧⲥϧⲏⲟⲩⲧ ϩⲓϫⲉⲛ ⲡⲉⲧⲉⲛⲗⲁⲟⲩⲟ. ⲡⲉϫⲱⲟⲩ ⲛⲁϥ ϫⲉ ϩⲁⲛⲣⲱⲙⲓ ⲛⲉ ⲉⲩⲟⲩⲁⲃ ⲉⲧϣⲟⲡ ϧⲉⲛ ⲧⲉⲛⲭⲱⲣⲁ. ⲡⲉϫⲉ ⲡⲓⲙⲁⲅⲓⲥⲧⲣⲓⲁⲛⲟⲥ ⲛⲱⲟⲩ ⲫⲱⲟⲩ ⲡⲉ ⲡⲁⲓϫⲟⲓ ⲡⲉϫⲱⲟⲩ ⲛⲁϥ ϫⲉ ⲙ̀ⲙⲟⲛ ⲁⲗⲗⲁ ⲉⲧⲁⲛⲥϧⲉ ⲛⲟⲩⲣⲁⲛ ⲉⲉⲛ ⲗⲁⲟⲩⲟ ⲉⲑⲃⲉ ⲛⲟⲩϣⲗⲏⲗ ⲉ̅ⲑ̅ⲩ̅ ϩⲓⲛⲁ ⲛ̀ⲧⲉⲛϫⲓⲙⲓ ⲛ̀ⲟⲩⲃⲟⲏⲑⲓⲁ ⲛⲉⲙ ⲡⲉⲛϫⲟⲓ ϧⲉⲉⲛ ⲡⲉⲛϫⲓⲛⲉⲣϩⲱⲧ. ⲡⲉϫⲁϥ ⲛⲱⲟⲩ ϫⲉ ⲧⲉⲧⲉⲛⲥⲱⲟⲩⲛ ⲙ̀ⲡⲟⲩⲙⲁ ⲛ̀ⲕⲁⲗⲱⲥ ϫⲉ ⲉⲩϣⲟⲡ ⲑⲱⲛ. ⲡⲉϫⲱⲟⲩ ⲛⲁϥ ϫⲉ ⲥⲉ ⲡⲉⲛⲟ̅ⲥ̅ ⲉⲩϣⲟⲡ ϧⲉⲛ ϯⲤⲩⲣⲓⲁ.
Ⲧⲟⲧⲉ ⲁⲡⲓⲙⲁⲅⲓⲥⲧⲣⲓⲁⲛⲟⲥ ⲁϥⲟⲩⲁϩⲥⲁϩⲛⲓ ⲉⲥⲱⲛϩ ⲛ̀ⲛⲓⲛⲉϥ ⲛ̀ⲥⲉϭⲓⲧⲟⲩ ϣⲁ ⲡⲟⲩⲣⲟ ⲛ̀ⲑⲟϥ ⲇⲉ ⲡⲓⲙⲁⲅⲓⲥⲧⲣⲓⲁⲛⲟⲥ ⲁϥⲉⲣϣⲟⲣⲡ ⲉⲣⲱⲟⲩ ⲁϥⲧⲁⲙⲉ ⲡⲟⲩⲣⲟ ⲟⲩⲟϩ ⲁϥϫⲟⲥ ⲉⲑⲣⲟⲩⲉⲛⲟⲩ ⲙ̀ⲡⲉϥⲙⲑⲟ ⲫⲣⲁⲛ ⲇⲉ ⲙ̀ⲡⲟⲩⲣⲟ ⲉⲧⲉⲙⲙⲁⲩ ⲡⲉ Ⲑⲉⲟⲇⲱⲥⲓⲟⲥ ⲉⲡⲓⲗⲏ ⲅⲁⲣ Ⲑⲉⲟⲇⲱⲥⲓⲟⲥ ⲛⲉ ⲟⲩⲅⲉⲛⲟⲥ ⲛ̀ⲣⲉⲙⲛ̀ⲭⲏⲙⲓ ⲡⲉ ⲫⲁⲓ ⲇⲉ ⲛⲁϥⲟⲓ ⲛ̀ⲥⲧⲣⲁⲧⲏⲗⲁⲧⲏⲥ ⲛ̀ϣⲟⲣⲡ ⲡⲉ ⲉⲛⲓϣⲑⲱⲣ ⲛ̀ⲧⲉ Ⲟⲩⲁⲗⲉⲛⲧⲓⲛⲟⲥ ⲡⲟⲩⲣⲟ ⲁⲓⲥⲁϫⲓ ⲉⲫⲓⲱⲧ ⲛ̀ⲛⲁⲓⲁⲅⲓⲟⲥ. ⲉⲧⲁϥⲛⲁⲩ ⲅⲁⲣ ⲉⲐⲉⲟⲇⲱⲥⲓⲟⲥ ϫⲉ ⲟⲩⲣⲱⲙⲓ ⲛ̀ϫⲱⲣⲓ ⲡⲉ ⲁϥⲑⲁϣϥ ⲛ̀ⲁⲣⲭⲱⲛ ⲉϫⲉⲛ ⲛⲓⲙⲁⲛϭⲱⲣⲉⲙ ⲧⲏⲣⲟⲩ ⲛ̀ⲧⲉ ⲛⲓϩⲑⲱⲣ ⲉⲧϧⲉⲛ ⲡⲓⲁⲙⲁϩⲓ ⲛ̀ⲧⲉ ⲧⲉϥⲙⲉⲧⲟⲩⲣⲟ. ⲗⲟⲓⲡⲟⲛ ⲁⲛⲁⲓⲁⲅⲓⲟⲥ ⲛⲉ ⲁⲩⲉⲣⲡⲟⲧⲁⲍⲉⲥⲑⲉ ⲙ̀ⲡⲁⲓⲕⲟⲥⲙⲟⲥ ⲉⲧⲓ ⲉϥⲟⲛϧ ⲛ̀ϫⲉ Ⲟⲩⲁⲗⲉⲛⲧⲓⲛⲟⲥ ⲡⲟⲩⲓⲱⲧ ⲛ̀ⲟⲩⲣⲟⲙⲡⲓ ⲛ̀ⲉϩⲟⲟⲩ ⲉⲧⲁϥⲙⲧⲟⲛ ⲇⲉ ⲙ̀ⲙⲟϥ ⲛ̀ϫⲉ Ⲟⲩⲁⲗⲉⲛⲧⲓⲛⲟⲥ ⲡⲟⲩⲣⲟ ⲕⲁⲧⲁ ⲛⲓϩⲁⲡ ⲙ̀ⲙⲏⲓ ⲛ̀ⲁⲧϣϧⲉⲧϧⲱⲧⲟⲩ ⲛ̀ⲧⲉ Ⲫϯ ⲛⲉⲙ ⲡϯⲙⲁϯ ⲛ̀ϯⲟⲩⲛⲕⲗⲏⲧⲟⲥ ⲧⲏⲣⲥ ⲁⲩⲑⲱϣ ⲛ̀Ⲑⲉⲟⲇⲱⲥⲓⲟⲥ ⲡⲓⲥⲧⲣⲁⲧⲓⲗⲁⲧⲏⲥ ⲛ̀ⲟⲩⲣⲟ ⲛ̀ⲧϣⲉⲃⲓⲱ ⲛ̀Ⲟⲩⲁⲗⲉⲛⲧⲓⲛⲟⲥ ⲫⲓⲱⲧ ⲛ̀ⲛⲓⲙⲕⲁⲣⲁⲓⲟⲥ Ⲙⲁⲝⲓⲙⲟⲥ ⲛⲉⲙ Ⲇⲟⲙⲉⲧⲓⲟⲥ ⲕⲁⲧⲁ ⲫⲣⲏϯ ⲙⲁⲕⲁⲣⲓⲟⲥ Ⲙⲁⲝⲓⲙⲟⲥ ⲉⲧⲥϧⲏⲟⲩⲧ ϧⲉⲛ ⲛⲓⲓⲥⲧⲟⲣⲓⲁ ⲛ̀ⲧⲉ ϯⲉⲕⲕⲗⲏⲥⲓⲁ. ⲉⲧⲁϥⲛⲁⲩ ⲇⲉ ⲉⲛⲓⲛⲉϥ ⲉⲩⲥⲟⲛϩ ⲛ̀ϫⲉ ⲡⲓⲟⲩⲣⲟ ⲛ̀ⲉⲩⲥⲉⲃⲏⲥ Ⲑⲉⲟⲇⲱⲥⲓⲟⲥ ⲁϥⲑⲣⲟⲩⲃⲟⲗⲟⲩ ⲉⲃⲟⲗ ⲉϥϫⲱ ⲙ̀ⲙⲟⲥ ϫⲉ ⲛⲁϣⲫⲏⲣⲓ ⲙ̀ⲙⲉⲗⲟⲥ ⲛⲉⲙ ⲙ̀ⲡⲉⲣⲭⲁⲩ ⲉⲩⲥⲟⲛϩ ϫⲉ ϩⲓⲛⲁ ⲙⲏⲡⲟⲧⲉ ⲛ̀ⲧⲉ Ⲡⲭ̅ⲥ̅ ϫⲱⲛⲧ ⲉⲣⲟⲓ. ⲟⲩⲟϩ ⲡⲉϫⲉ ⲡⲓϣⲁⲙϣⲉⲛⲟⲩϯ ⲡⲟⲩⲣⲟ ⲛⲱⲟⲩ ϧⲉⲛ ⲟⲩⲙⲉⲧⲣⲉⲙⲣⲁⲩϣ ϫⲉ ⲛⲓⲙ ⲛⲉ ⲛⲓⲣⲱⲙⲓ ⲛ̀ⲧⲉ Ⲫϯ ⲛ̀ⲧⲉⲛⲥⲱⲟⲩⲛ ⲙ̀ⲙⲱⲟⲩ ⲡⲉϫⲱⲟⲩ ϫⲉ ⲡⲉⲛⲟ̅ⲥ̅ Ⲙⲁⲝⲓⲙⲟⲥ ⲡⲉ ⲡⲓⲟⲩⲁⲓ ⲟⲩⲟϩ Ⲇⲟⲙⲉⲧⲓⲟⲥ ⲡⲉ ⲡⲓⲕⲉⲟⲩⲁⲓ. ⲡⲁⲗⲓⲛ ⲇⲉ ⲟⲛ ⲡⲉϫⲁϥ ⲛⲱⲟⲩ ϫⲉ ϩⲁ ⲛ̀ⲁϣ ⲛ̀ⲣⲏϯ ⲛⲉ ϧⲉⲛ ⲡⲟⲩⲥⲙⲟⲧ. ⲁⲩⲉⲣⲟⲩⲱ ⲡⲉϫⲱⲟⲩ ⲛⲁϥ ϫⲉ ⲡⲓⲟⲩⲁⲓ ⲙⲉⲛ ⲟⲩⲣⲱⲙⲓ ⲉϥⲟⲩⲏⲛ ⲡⲉ ⲉⲁϥⲉⲣⲙⲟⲣⲧ ⲡⲓⲭⲉⲧ ⲇⲉ ⲟⲩⲣⲱⲙⲓ ⲉϥϣⲏⲟⲩ ⲛ̀ⲟⲩⲕⲟⲩϫⲓ ⲉⲁϥϩⲓⲁⲣⲭⲏ ⲙ̀ⲙⲟⲣⲧ. ⲧⲟⲧⲉ ⲁϥⲉⲣⲕⲉⲗⲉⲩⲓⲛ ⲛ̀ϫⲉ ⲡⲟⲩⲣⲟ ⲉⲑⲣⲟⲩϯ ⲛ̀ⲅ̅ ⲛ̀ⲗⲟⲩⲕⲟⲩϫⲓ ⲙ̀ⲫⲟⲩⲁⲓ ⲛ̀ⲛⲓⲛⲉϥ ⲛ̀ⲥⲉⲭⲁⲩ ⲉⲃⲟⲗϧⲉⲛ ⲟⲩϩⲓⲣⲏⲛⲏ.
Ⲙⲉⲛⲉⲛⲥⲁ ⲛⲁⲓ ⲁⲡⲟⲩⲣⲟ ⲙⲟⲩϯ ⲉⲟⲩⲥⲓⲟⲩⲣ ⲛ̀ⲧⲉ ⲡⲓⲡⲁⲗⲁⲧⲓⲟⲛ ⲉⲡⲉϥⲣⲁⲛ ⲡⲉ Ⲙⲁⲣⲕⲉⲗⲗⲟⲥ ⲉⲟⲩⲣⲱⲙⲓ ⲡⲉ ⲉϥϫⲟⲣ ϧⲉⲛ ⲛⲉϥϩⲃⲏⲟⲩⲓ ⲙ̀ⲫⲣⲏϯ ⲛ̀ⲟⲩⲙⲟⲩⲓ ⲁϥϯ ⲛⲁϥ ⲛ̀ⲟⲩϩⲑⲟ ⲉϥϫⲟⲣ ϧⲉⲛ ⲧⲉϥϫⲟⲙ ⲟⲩⲟϩ ⲁϥⲟⲩⲟⲣⲡϥ ⲉϯⲤⲩⲣⲓⲁ ϩⲓⲛⲁ ⲛ̀ⲧⲉϥⲉⲙⲓ ⲉⲡⲧⲁϫⲣⲟ ⲙ̀ⲡⲓϩⲱⲃ ⲙ̀ⲡⲁⲧⲉϥⲧⲁⲙⲉ ϯⲟⲩⲣⲱ. ⲟⲩⲟϩ ⲙⲉⲛⲉⲛⲥⲁ ϩⲁⲛⲕⲟⲩϫⲓ ⲇⲉ ⲛ̀ⲉϩⲟⲟⲩ ⲁϥⲕⲟⲧϥ ⲛ̀ϫⲉ ⲡⲓⲥⲓⲟⲩⲣ ϣⲁ ⲡⲟⲩⲣⲟ ⲉϥϫⲱ ⲙ̀ⲙⲟⲥ ϫⲉ ⲥⲉϣⲓⲛⲓ ⲉⲣⲟⲕ ⲉⲙⲁϣⲱ ⲛ̀ϫⲉ ⲛⲉⲕϣⲏⲣⲓ ⲛⲉⲛⲥⲛⲏⲟⲩ ⲛ̀ϯⲟⲩⲣⲱ. ⲡⲟⲩⲣⲟ ⲇⲉ Ⲑⲉⲟⲇⲱⲥⲓⲟⲥ ⲁϥⲣⲁϣⲓ ⲉⲙⲁϣⲱ ⲟⲩⲟϩ ⲁϥⲧⲁⲙⲉ ϯⲟⲩⲣⲱ ⲛⲉⲙ ⲛⲏⲉⲧⲉⲛⲟⲩϥ ⲧⲏⲣⲟⲩ ⲟⲩⲟϩ ⲁϥϣⲱⲡⲓ ⲛ̀ϫⲉ ⲟⲩⲛⲓϣϯ ⲛ̀ⲣⲁϣⲓ ϧⲉⲛ ⲡⲓⲡⲁⲗⲁⲧⲓⲟⲛ ⲧⲏⲣϥ ⲙ̀ⲡⲓⲉϩⲟⲟⲩ ⲉⲧⲉⲙⲙⲁⲩ. ⲓⲧⲁ ⲙⲉⲛⲉⲛⲥⲁ ϩⲁⲛⲕⲟⲩϫⲓ ⲛ̀ⲉϩⲟⲟⲩ ⲁⲡⲟⲩⲣⲟ ⲟⲩⲱⲣⲡ ⲛ̀ⲧⲟⲩⲙⲁⲩ ⲛⲉⲙ ⲧⲟⲩⲥⲱⲛⲓ ⲉϯⲤⲩⲣⲓⲁ ϫⲉ ⲛ̀ⲧⲟⲩⲛⲁⲩ ⲉⲣⲱⲟⲩ ⲟⲩⲟϩ ⲛ̀ⲧⲉ ⲡⲟⲩϩⲏⲧ ⲑⲱⲧ. ⲟⲩⲟⲡ ⲁⲡⲓⲁⲅⲓⲟⲥ ϯⲛⲟⲙϯ ⲛ̀ⲧⲟⲩⲙⲁⲩ ⲛⲉⲙ ⲧⲟⲩⲥⲱⲛⲓ ⲟⲩⲟϩ ⲛ̀ⲧⲉⲛⲫⲱⲟⲩ ϧⲉⲛ ⲟⲩϩⲓⲣⲏⲛⲏ. ⲓⲥϫⲉⲛ ⲡⲓⲉϩⲟⲟⲩ ⲉⲧⲉⲙⲙⲁⲩ ⲁⲛⲓⲣⲉⲙⲕⲱⲥⲧⲁⲛⲧⲓⲛⲟⲩⲡⲟⲗⲓⲥ ⲉⲣⲡⲓⲙⲱⲓⲧ ϣⲁ ⲛⲓⲁⲅⲓⲟⲥ ⲙ̀ⲙⲁⲙⲟϣⲓ ⲙ̀ⲡⲓⲉϩⲟⲟⲩ ⲛⲉⲙ ⲡⲓⲉϫⲱⲣϩ ⲉⲩⲓⲛⲓ ϣⲁⲣⲱⲟⲩ ⲛ̀ⲟⲩⲟⲛ ⲛⲓⲃⲉⲛ ⲉⲧϣⲱⲛⲓ ⲛ̀ⲟⲩⲙⲏϣ ⲛ̀ⲣⲏϯ ⲛⲉⲙ ⲛⲏⲉⲧⲉ ⲛⲓⲡ̅ⲛ̅ⲁ̅ ⲛ̀ⲁⲕⲁⲑⲁⲣⲧⲟⲛ ⲛⲉⲙⲱⲟⲩ ⲟⲩⲟϩ ⲁⲩϣⲁⲛⲫⲟϩ ϣⲁ ⲛⲁⲓⲙⲁⲕⲁⲣⲓⲟⲥ ⲛ̀ⲧⲟⲩⲧⲱⲃϩ ⲉϫⲱⲟⲩ ϣⲁⲩⲧⲁⲗϭⲟ ϩⲓⲧⲉⲛ ⲡⲓϩⲙⲟⲧ ⲛ̀ⲧⲉ Ⲫϯ ⲡⲉⲛⲥ̅ⲱ̅ⲣ̅.
Ⲙⲉⲛⲉⲛⲥⲁ ⲛⲁⲓ ⲁⲡⲟⲩⲣⲟ Ⲑⲉⲟⲇⲱⲥⲓⲟⲥ ϩⲱⲗ ϣⲁⲣⲱⲟⲩ ϣⲁⲧⲉϥϭⲓ ⲙ̀ⲡⲟⲩⲥⲙⲟⲩ ⲛⲉⲙ ⲡⲟⲩⲥⲟϭⲛⲓ ⲟⲩⲟϩ ⲛ̀ⲧⲟⲩⲧⲥⲁⲃⲟϥ ⲉϩⲁⲛϩⲃⲏⲟⲩⲓ ⲉⲛⲁⲛⲉⲩ ⲟⲩⲟϩ ⲉⲩⲉⲣⲛⲟϥⲣⲓ ⲛ̀ⲧⲉϥⲙⲉⲧⲟⲩⲣⲟ ⲛⲉⲙ ϯⲉⲕⲕⲗⲏⲥⲓⲁ ⲛ̀ⲧⲉ Ⲫϯ ϧⲉⲛ ⲛⲁⲓ ⲇⲉ ⲁⲩⲧⲁϫⲣⲟⲥ ⲛ̀ⲕⲁⲗⲱⲥ ϧⲉⲛ ⲧⲁϫⲣⲟ ⲛⲓⲃⲉⲛ ⲉⲁⲣⲉϩ ⲫⲛⲁϩϯ ⲛ̀Ⲛⲓⲕⲉⲁ ⲟⲩⲟϩ ⲉⲑⲣⲉϥⲭⲁ ⲛⲓϣⲏⲣⲓ ⲛ̀ⲧⲉ ϯⲉⲕⲕⲗⲏⲥⲓⲁ ⲉⲩⲧⲁⲓⲏⲟⲩⲧ ⲛ̀ⲧⲟⲧϥ ϧⲉⲛ ⲧⲓⲙⲏ ⲛⲓⲃⲉⲛ. ⲗⲟⲓⲡⲟⲛ ⲉⲧⲁⲩⲟⲩⲱⲛϩ ⲉⲃⲟⲗ ⲛ̀ϫⲉ ⲛⲁⲓⲙⲁⲕⲁⲣⲓⲟⲥ ⲉⲩϯⲥⲱⲓⲧ ϧⲉⲛ ϯⲤⲩⲣⲓⲁ ⲧⲏⲣⲥ ⲛⲁϥϩⲏⲗ ϣⲁⲣⲱⲟⲩ ⲛ̀ⲑⲟϥ ⲡⲓⲉⲩⲥⲉⲃⲏⲥ ⲛ̀ⲟⲩⲣⲟ Ⲑⲉⲟⲇⲱⲥⲓⲟⲥ ⲉϥⲥⲟϭⲛⲓ ⲉⲣⲱⲟⲩ ⲟⲩⲟϩ ⲉϥⲉⲣⲁⲡⲟⲗⲉⲩⲓⲛ ⲛ̀ⲧⲟⲩⲥⲃⲱ ⲛⲉⲙ ⲡⲟⲩⲥⲙⲟⲩ ϩⲱⲥ ⲉϥⲥⲱⲟⲩⲛ ϫⲉ ⲑⲱⲟⲩ ⲧⲉ ϯⲙⲉⲧⲟⲩⲣⲟ ϫⲉ ⲅⲁⲣ ⲁⲗⲏⲑⲱⲥ ⲁⲡⲉϥϫⲓⲛϩⲓⲕⲟⲧ ϣⲱⲡⲓ ⲛⲁϥ ⲛ̀ϩⲏⲟⲩ ⲛⲉⲙ ⲟⲩⲥⲃⲱ ⲉⲥⲟⲓ ⲛ̀ⲛⲓϣϯ ⲟⲩⲟϩ ϩⲓⲛⲁ ⲛ̀ⲧⲁϫⲟⲥ ϧⲉⲛ ⲟⲩϣⲱⲧ ⲉⲃⲟⲗ ⲉⲧⲁϥϣⲁϣⲛⲓ ⲉⲧⲁⲓⲛⲓϣϯ ⲙ̀ⲙⲉⲧⲙⲁⲓⲛⲟⲩϯ ⲛⲉⲙ ⲧⲁⲓⲧⲓⲙⲏ ⲙ̀ⲡⲁⲓⲣⲏϯ ⲉϧⲟⲩⲛ ⲉⲛⲓⲉⲕⲕⲗⲏⲥⲓⲁ ⲛ̀ⲧⲉ Ⲫϯ ϩⲓⲧⲉⲛ ⲛⲓⲥⲃⲱⲟⲩⲓ ⲛ̀ⲱⲛϧ ⲛ̀ⲧⲉ ⲛⲁⲓⲙⲁⲕⲁⲣⲓⲟⲥ ⲟⲩⲙⲟⲛⲟⲛ ⲛ̀ⲑⲟϥ ⲙ̀ⲙⲁⲩⲁⲧϥ ⲁⲗⲗⲁ ⲛⲉⲙ ⲛⲉϥⲕⲉϣⲏⲣⲓ ⲟⲛ Ⲁⲣⲕⲁⲇⲓⲟⲥ ⲛⲉⲙ Ⲟⲛⲟⲣⲓⲟⲥ ⲉⲧⲁϥⲉⲛⲟⲩ ⲉⲡϣⲱⲓ ϩⲱⲟⲩ ϧⲉⲛ ⲧⲁⲓⲙⲉⲧⲉⲩⲥⲉⲃⲏⲥ ⲙ̀ⲡⲁⲓⲣⲏϯⲉⲃⲟⲗ ϩⲓⲧⲟⲧⲥ ⲛ̀ϯⲥⲃⲱ ⲛⲉⲙ ⲡⲓⲥⲙⲟⲧ ⲉⲑⲛⲁⲛⲉⲩ ⲛ̀ⲧⲉ ⲛⲁⲓⲙⲁⲕⲁⲣⲓⲟⲥ ⲡⲁⲓⲣⲏϯ ⲟⲛ ϯⲕⲉⲕⲟⲩϫⲓ Ⲑⲉⲟⲇⲱⲥⲓⲟⲥ. ⲙⲉⲛⲉⲛⲥⲁ ⲛⲁⲓ ⲇⲉ ⲁϥⲙⲧⲟⲛ ⲙ̀ⲙⲟϥ ⲛ̀ϫⲉ ⲡⲓⲁⲣⲭⲓⲉⲡⲓⲥⲕⲟⲡⲟⲥ ⲛ̀ⲧⲉ Ⲕⲱⲥⲧⲁⲛⲧⲓⲛⲟⲩⲡⲟⲗⲓⲥ ⲟⲩⲟϩ ⲡⲁⲛⲧⲱⲥ ⲉⲃⲟⲗϩⲓⲧⲉⲛ ⲧⲁⲓⲗⲱⲓϫⲓ ⲑⲁⲓ.
Ⲉⲧⲁ Ⲫϯ ⲉⲛ ⲛⲁⲓⲁⲅⲓⲟⲥ ⲉϢⲓϩⲏⲧ ⲙ̀ⲫⲣⲏϯ ⲛ̀Ⲓⲁⲕⲱⲃ ⲡⲓⲡⲁⲧⲣⲓⲁⲭⲏⲥ ⲉⲧⲁϥⲓ ⲉϧⲣⲏⲓ ⲉⲭⲏⲙⲓ ⲙ̀ⲡⲓⲥⲏⲟⲩ ⲛ̀ⲩⲗⲱⲓϫⲓ ⲙ̀ⲡⲓϩⲱⲛ ϣⲁⲧⲉϥⲉⲣⲩⲟⲗⲁⲟⲥ ⲉϥⲟϣ ⲛ̀ⲧⲉϥⲙⲁϩ ⲡϩⲟ ⲙ̀ⲡⲕⲁϩⲓ ⲡⲁⲓⲣⲏϯ ϩⲱⲟⲩ ⲛⲁⲓⲁⲓⲅⲓⲟⲥ Ⲙⲁⲝⲓⲙⲟⲥ ⲛⲉⲙ Ⲇⲟⲙⲉⲧⲓⲟⲥ ⲛⲁⲓϣⲏⲣⲓ ⲛ̀ⲟⲩⲣⲟ ⲛ̀ϯⲛⲁⲕⲏⲛ ⲁⲛ ⲉⲓⲙⲟⲩϯ ⲉⲣⲱⲟⲩ ϫⲉ ϣⲏⲣⲓ ⲛ̀ⲟⲩⲣⲟ ϣⲁⲧⲉ ⲟⲩⲟⲛ ⲛⲓⲃⲉⲛ ⲉⲙⲓ ⲉⲡⲟⲩⲁⲝⲓⲱⲙⲁ ⲛⲉⲙ ⲡⲟⲩⲃⲓⲟⲥ ⲛ̀ⲁⲅⲅⲉⲗⲓⲕⲟⲛ ⲛⲉⲙ ⲛⲟⲩⲡⲟⲗⲏⲧⲓⲁ ⲉⲡⲓⲇⲏ ⲁⲩⲙⲉⲛⲣⲉ Ⲡⲭ̅ⲥ̅ ⲉϩⲟⲧⲉ ⲡⲱⲟⲩ ⲧⲏⲣϥ ⲙ̀ⲡⲁⲓⲕⲟⲥⲙⲟⲥ ⲁⲩⲟⲩⲁϩⲟⲩ ⲛ̀ⲥⲱϥ ϧⲉⲛ ⲡⲟⲩϩⲏⲧ ⲧⲏⲣϥ ⲉⲑⲃⲉ ⲫⲁⲓ ⲛ̀ⲑⲟϥ ϩⲱϥ Ⲡⲭ̅ⲥ̅ Ⲓⲏ̅ⲥ̅ ⲁϥϯⲱⲟⲩ ⲛⲱⲟⲟⲩ ⲁⲗⲏⲑⲱⲥ ϩⲱⲥⲧⲉ ⲉⲑⲣⲉϥⲉⲣⲟⲓⲕⲟⲛⲟⲙⲓⲛ ⲙ̀ⲙⲱⲟⲩ ⲉⲑⲣⲟⲩⲓ ⲉϢⲓϩⲏⲧ ⲡⲓⲧⲱⲟⲩ ⲉ̅ⲑ̅ⲩ̅ ⲛ̀ⲧⲟⲩϫⲱⲕ ⲉⲃⲟⲗⲛ̀ϧⲏⲧϥ ⲟⲩⲟϩ ⲛ̀ⲥⲉⲕⲱⲧ ⲙ̀ⲙⲁⲩ ⲛ̀ⲟⲩⲉⲕⲕⲗⲏⲥⲓⲁ ϧⲉⲛ ⲡⲟⲩⲣⲁⲛ ⲁⲩⲧⲁϫⲣⲟ ⲛ̀ⲧⲉⲥⲥⲉⲛϯⲉϩⲣⲏⲓ ⲉϫⲉⲛ ϯⲡⲉⲧⲣⲁ ⲛ̀ⲁⲧⲕⲓⲙ Ⲡⲭ̅ⲥ̅ ⲉⲁⲥϣⲱⲡⲓ ⲛ̀ⲟⲩⲗⲩⲙⲏⲛ ⲛⲟⲩϫⲁⲓ ⲛ̀ⲟⲩⲟⲛ ⲛⲓⲃⲉⲛ ⲉⲑⲛⲁⲕⲟⲧⲟⲩ ϩⲁ Ⲫϯ ⲉⲑⲃⲉ ⲡⲭⲱ ⲉⲃⲟⲗ ⲛ̀ⲧⲉ ⲛⲟⲩⲛⲟⲃⲓ ⲁⲗⲏⲑⲱⲥ ⲅⲁⲣ ⲁϥⲟⲩⲛⲟϥ ⲛ̀ϫⲉ ⲡⲓⲡⲁⲣⲁⲇⲓⲥⲟⲥ ⲛ̀ⲧⲉ Ⲫϯ ⲡⲓⲥⲱϯ ⲉⲧⲁϥϣⲱⲡⲓ ⲛ̀ϯⲯⲩⲭⲏ ⲛ̀ⲛⲓⲣⲉϥⲉⲣⲛⲟⲃⲓ ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲟⲩⲟϩ ⲟⲛ ϥⲛⲁⲕⲏⲛ ⲁⲛ ⲉϥϣⲟⲡ ⲛ̀ⲗⲩⲙⲏⲛ ⲛ̀ⲧⲉ ⲡⲓⲟⲩϫⲁⲓ ϣⲁ ⲉⲛⲉϩ ⲛ̀ⲧⲉ ⲛⲓⲉⲛⲉϩ. ⲁⲗⲗⲁ ⲙⲁⲣⲉⲛⲧⲁⲥⲑⲟ ⲉϫⲉⲛ ⲧⲙⲟⲣⲫⲏ ⲛ̀ⲧϫⲓⲛⲓ ⲉϢⲓϩⲏⲧ ⲛ̀ⲛⲓⲙⲁⲕⲁⲣⲓⲟⲥ.
Ϩⲟⲧⲉ ⲟⲩⲛ ⲗⲟⲓⲡⲟⲛ ⲉⲧⲁⲩⲕⲱϯ ⲛ̀ⲥⲁ ⲟⲩⲁ ⲉⲑⲣⲟⲩⲫⲱϣⲛⲉϥ ⲛ̀ⲁⲣⲭⲓⲉⲡⲓⲥⲕⲟⲡⲟⲥ ⲉⲑⲃⲁⲕⲓ ⲛ̀ϯⲙⲉⲧⲟⲩⲣⲟ ⲁⲩⲓ ϣⲁ Ⲑⲉⲟⲇⲱⲥⲓⲟⲥ ⲛ̀ϫⲉ ⲡⲓⲇⲏⲙⲟⲥ ⲧⲏⲣϥ ⲛⲉⲙ ⲟⲩⲟⲛ ⲛⲓⲃⲉⲛ ⲉⲩⲥⲟⲡ ⲉⲩⲉⲣⲉⲧⲓⲛ ⲙ̀ⲙⲟϥ ⲉⲑⲣⲟⲩⲧϩⲉⲙⲥⲟ ⲙ̀Ⲙⲁⲝⲓⲙⲟⲥ ⲛ̀ⲁⲣⲭⲓⲉⲡⲓⲥⲕⲟⲡⲟⲥ ⲛ̀ϣⲉⲃⲓⲱ ⲙ̀ⲫⲏⲉⲧⲁϥⲉⲛⲕⲟⲧ. ⲧⲟⲧⲉ ⲁϥⲣⲁϣⲓ ⲉⲙⲁϣⲱ ⲛ̀ϫⲉ Ⲑⲉⲟⲇⲱⲥⲓⲟⲥ ⲡⲟⲩⲣⲟ ⲉϫⲉⲛ ⲡⲁⲓϩⲱⲃ ⲟⲩⲟϩ ⲥⲁⲧⲟⲧϥ ⲁϥⲟⲩⲱⲣⲡ ⲛ̀ⲟⲩⲙⲁⲅⲓⲥⲧⲣⲓⲁⲛⲟⲥ ⲛ̀ⲥⲱϥ ⲛⲉⲙ ⲕⲉ ⲙ̀ⲙⲁⲧⲟⲓ ⲉⲁϥⲥϧⲉ ⲡⲓⲉⲡⲁⲣⲭⲟⲥ ⲛ̀ⲧⲉ ϯⲤⲩⲣⲓⲁ ϫⲉ ϩⲓⲛⲁ ⲛ̀ⲧⲉϥⲧⲁϩⲉ ⲛⲓⲁⲅⲓⲟⲥ ⲛ̀ⲧⲉϥⲣⲱⲓⲥ ⲉⲣⲱⲟⲩ ϣⲁⲧⲟⲩⲑⲱⲟⲩϯ ⲛ̀ⲛⲓⲉⲡⲓⲥⲕⲟⲡⲟⲥ ⲛ̀ⲧⲉ ⲛⲓⲉⲡⲁⲣⲭⲓⲁ. ⲉⲧⲁⲩⲫⲟϩ ⲇⲉ ⲉⲡⲓⲉⲡⲁⲣⲭⲟⲥ ⲛ̀ϫⲉ ⲡⲓⲙⲁⲅⲓⲥⲧⲣⲓⲁⲛⲟⲥ ⲛⲉⲙ ⲛⲓⲙⲁⲧⲟⲓ ⲟⲩⲟϩ ⲉⲧⲁⲩϯ ⲛⲁϥ ⲛ̀ⲛⲓⲥϧⲁⲓ ⲛ̀ⲧⲉ ⲡⲟⲩⲣⲟ ⲁϥⲣⲁϣⲓ ⲡⲉϫⲁϥ ⲛⲱⲟⲩ ϫⲉ ⲙⲁⲣⲉⲛⲉⲣⲁⲣⲓⲥⲧⲟⲛ ⲙ̀ⲫⲟⲟⲩ ϫⲉ ⲁⲣⲉⲧⲉⲛϧⲓⲥⲓ ϩⲓ ⲡⲓⲙⲱⲓⲧ ⲟⲩⲟϩ ⲣⲁⲥϯ ⲧⲉⲛⲛⲁⲉⲛⲟⲩ ϧⲉⲛ ⲫⲟⲩⲱϣ ⲙ̀Ⲫϯ. ⲕⲁⲧⲁ ⲟⲩⲟⲓⲕⲟⲛⲟⲙⲓⲁ ⲟⲩⲛ ⲛ̀ⲧⲉ Ⲫϯ ⲉⲧⲁⲥⲉⲙⲓ ⲉⲫⲁⲓ ⲛ̀ϫⲉ ϯⲥϩⲓⲙⲓ ⲙ̀ⲡⲓⲉⲡⲁⲣⲭⲟⲥ ⲁⲥⲙⲟⲕⲙⲉⲕ ϫⲉ ⲁⲣⲉ ⲡⲟⲩⲣⲟ ⲛⲁⲱⲗⲓ ⲛ̀ⲛⲁⲓⲁⲅⲓⲟⲥ ⲉⲔⲱⲥⲧⲁⲛⲧⲓⲛⲟⲩⲡⲟⲗⲓⲥ ⲁⲥⲉⲣⲙⲕⲁϩⲛ̀ϩⲏⲧ ⲉⲙⲁϣⲱ ϫⲉ ⲟⲩⲏⲓ ⲟⲩⲟⲛ ⲛ̀ⲧⲁⲥ ⲙ̀ⲙⲁⲩ ⲛ̀ⲟⲩⲛⲓϣϯ ⲛ̀ⲛⲁϩϯ ⲉϧⲟⲩⲛ ⲉⲣⲱⲟⲩ ⲟⲩⲟϩ ⲥⲁⲧⲟⲧⲥ ⲁⲥⲟⲩⲱⲣⲡ ⲛ̀ⲛⲉⲥϣⲏⲣⲓ ⲛ̀ⲭⲱⲡ ⲛⲉ ⲕⲉⲥⲓⲟⲟⲩⲣ ⲛ̀ⲧⲁⲥ ⲙ̀ⲡⲓⲉϫⲱⲣϩ ⲁⲥⲧⲁⲙⲉ ⲛⲓⲁⲅⲓⲟⲥ ϫⲉ ⲓⲥ ⲡⲟⲩⲣⲟ ⲁϥⲟⲩⲱⲣⲡ ⲛ̀ⲥⲱⲧⲉⲛ ⲉⲉⲗ ⲑⲏⲛⲟⲩ ⲉⲔⲱⲥⲧⲁⲛⲧⲓⲛⲟⲩⲡⲟⲗⲓⲥ. ⲗⲟⲓⲡⲟⲛ ⲓⲥϫⲉ ⲧⲉⲧⲉⲛⲟⲩⲱϣ ⲁⲣⲓⲁⲛⲭⲱⲣⲓⲛ ⲛⲱⲧⲉⲛ.
Ⲉⲧⲁⲩⲥⲱⲧⲉⲙ ⲇⲉ ⲉⲛⲁⲓⲥⲁϫⲓ ⲛ̀ϫⲉ ⲛⲓⲁⲅⲓⲟⲥ ⲁⲩⲭⲱⲗⲉⲙ ⲙ̀ⲙⲱⲟⲩ ⲥⲁⲧⲟⲧⲟⲩ ⲁⲩⲓ ⲉⲃⲟⲗϧⲉⲛ ⲡⲓⲙⲟⲛⲁⲥⲧⲏⲣⲓⲟⲛ ⲉⲩϫⲱ ⲙ̀ⲙⲟⲥ ϫⲉ ⲫⲁⲓ ⲡⲉ ⲡⲓⲛⲁⲩ ⲉⲧⲁ Ⲫϯ ⲟⲩⲱϣ ⲉⲟⲗⲧⲉⲛ ⲉⲫⲙⲁ ⲙ̀ⲡⲉⲛⲓⲱⲧ ⲁⲃⲃⲁ Ⲙⲁⲕⲁⲣ ⲡⲓⲣⲱⲙⲓ ⲛ̀ⲧⲉ Ⲫϯ ϧⲉⲛ ⲟⲩⲙⲉⲑⲙⲏⲓ ϩⲱⲥ ⲇⲉ ⲉⲩⲙⲟϣⲓ ⲛ̀ϫⲉ ⲛⲁⲓⲁⲅⲓⲟⲥ ⲁⲩϫⲓⲙⲓ ⲛ̀ⲟⲩϧⲉⲗⲗⲟ ⲙ̀ⲙⲁⲛⲉⲥⲱⲟⲩ ⲉϥϩⲉⲙⲥⲓ ϧⲉⲛ ⲟⲩⲕⲁⲗⲓⲃⲓ ϧⲉⲛ ⲟⲩⲙⲁⲛⲉⲣⲏⲙⲟⲥ ⲁⲩⲭⲟⲡⲟⲩ ϧⲁⲧⲟⲧϥ. ⲉⲡⲉϥⲣⲁⲥϯ ϫⲉ ⲁⲡⲓⲙⲁⲅⲓⲥⲧⲣⲓⲁⲛⲟⲥ ⲛⲉⲙ ⲛⲏⲉⲑⲛⲉⲙⲁϥ ϣⲉⲛⲱⲟⲩ ⲉⲡⲓⲙⲟⲛⲁⲥⲧⲏⲣⲓⲟⲛ ⲉⲩⲕⲱϯ ⲛ̀ⲥⲁ ⲛⲓⲙⲁⲕⲁⲣⲓⲟⲥ ⲟⲩⲟϩ ⲙ̀ⲡⲟⲩϫⲉⲙⲟⲩ. ⲧⲟⲧⲉ ⲁⲡⲓⲉⲡⲁⲣⲭⲟⲥ ⲟⲩⲁϩⲥⲁϩⲛⲓ ⲉⲕⲱϯ ⲛ̀ⲥⲱⲟⲩ ϧⲉⲛ ⲟⲩⲧⲁϫⲣⲟ ϧⲉⲛ ⲙⲁⲓ ⲛⲓⲃⲉⲛ ⲛ̀ⲧⲉ ϯⲤⲩⲣⲓⲁ ⲛⲉⲙ ϯⲠⲁⲗⲉⲥⲧⲓⲛⲏ ⲉⲑⲃⲉ ⲫⲁⲓ ⲛⲁⲣⲉ ⲛⲁⲓⲁⲅⲓⲟⲥ ⲭⲏⲡ ⲡⲉ ⲛ̀ϩⲁⲛⲙⲏϣ ⲛ̀ⲉϩⲟⲟⲩ ⲟⲩⲟϩ ⲛⲁⲩϣⲟⲩⲱⲛϩ ⲙ̀ⲙⲱⲟⲩ ⲉⲃⲟⲗ ⲁⲛ ⲉⲡⲧⲏⲣϥ ⲡⲉ ⲉⲑⲃⲉ ϫⲉ ⲛⲁⲩⲥⲱⲟⲩⲛ ⲙ̀ⲙⲱⲟⲩ ⲡⲉ ϩⲓⲧⲉⲛ ⲟⲩⲟⲛ ⲛⲓⲃⲉⲛ ⲛ̀ⲧⲉ ϯⲤⲩⲣⲓⲁ ⲛⲉⲙ ⲛⲏⲉⲧⲭⲏ ⲙ̀ⲡⲉⲥⲕⲱϯ. ⲙⲉⲛⲉⲛⲥⲁ ⲛⲁⲓ ⲁⲩⲧⲱⲟⲩⲛ ϧⲉⲛ ⲟⲩⲥⲟϭⲛⲓ ⲛ̀ⲧⲉ Ⲫϯ ⲛ̀ϫⲉ ⲛⲁⲓⲙⲁⲕⲁⲣⲓⲟⲥ ⲁⲩⲃⲁϣⲟⲩ ⲛ̀ⲛⲓϩⲃⲱⲥ ⲙ̀ⲙⲟⲛⲁⲭⲟⲥ ⲁⲩⲧⲏⲓⲧⲟⲩ ⲉϧⲣⲏⲓ ⲉϩⲁⲛⲥⲟⲕ ⲁⲩⲉⲣⲫⲟⲣⲓⲛ ⲛ̀ϩⲁⲛϩⲃⲱⲥ ⲛ̀ⲕⲟⲥⲙⲓⲕⲟⲛ ⲟⲩⲟϩ ⲁⲩⲙⲟⲩⲣ ⲛ̀ϩⲁⲛⲫⲁⲥⲕⲓⲁ ⲛ̀ⲛⲟⲩⲁⲫⲏⲟⲩⲓ ϫⲉ ϩⲓⲛⲁ ⲛ̀ⲧⲟⲩϣⲧⲉⲙⲥⲱⲟⲩⲛⲟⲩ. ⲧⲟⲧⲉ ⲁⲩⲓ ⲉⲃⲟⲗ ⲗⲟⲓⲡⲟⲛ ⲉⲣⲉ ⲡⲓⲕⲟⲩϫⲓ ⲛ̀ⲥⲟⲕ ⲧⲁⲗⲏⲟⲩⲧ ⲉⲣⲱⲟⲩ ⲉⲣⲉ ⲫⲟⲩⲁⲓ ⲫⲟⲩⲁⲓ ⲉⲣⲫⲟⲣⲓⲛ ⲛ̀ⲛⲓϩⲃⲱⲥ ⲛ̀ⲕⲟⲥⲙⲓⲕⲟⲛ ⲕⲁⲧⲁ ⲛⲓⲥⲩⲣⲟⲥ ⲟⲩⲟϩ ⲛⲁⲩⲙⲟϣⲓ ⲉⲩⲧⲱⲃϩ ⲙ̀Ⲫϯ ⲉⲩϫⲱ ⲙ̀ⲙⲟⲥ ϫⲉ Ⲫϯ ⲙ̀ⲡⲉⲛⲓⲱⲧ ⲁⲃⲃⲁ Ⲙⲁⲕⲁⲣⲓⲟⲥ ⲉⲕⲉϭⲓⲙⲱⲓⲧ ϧⲁϫⲱⲛ ⲛ̀ⲧⲉⲕⲟⲗⲧⲉⲛ ϣⲁⲣⲟϥ ϧⲉⲛ ⲟⲩϩⲓⲣⲏⲛⲏ.
Ⲉⲧⲁⲩⲙⲟϣⲓ ⲇⲉ ⲛ̀ⲉϩⲟⲟⲩ ⲃ̅ ⲉϫⲉⲛ ⲛⲉⲛⲥⲫⲟⲧⲟⲩ ⲙ̀ⲫⲓⲟⲙ ⲡⲉϫⲉ ⲡⲓⲕⲟⲟⲩϫⲓ ⲙ̀ⲡⲓⲛⲓϣϯ ϧⲉⲛ ⲟⲩⲛⲓϣϯ ⲙ̀ⲙⲉⲧϫⲁⲣϩⲏⲧ ϫⲉ ϫⲉⲙⲛⲟⲙϯ ⲡⲁⲟ̅ⲥ̅ ⲛ̀ⲥⲟⲛ ϫⲉ ϧⲉⲛ ⲫⲟⲩⲱϣ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲡⲉⲛⲛⲟⲩϯ ⲛ̀ⲧⲁⲫⲙⲏ ⲛⲉⲙ ⲛⲓⲧⲱⲃϩ ⲛ̀ⲧⲉ ⲡⲓⲁⲅⲓⲟⲥ ⲁⲃⲃⲁ Ⲙⲁⲕⲁⲣ ⲫⲏⲉⲧⲁϥⲛⲁⲩ ⲉⲣⲟϥ ⲡⲓϩⲟⲣⲁⲙⲁ ⲛ̀ϫⲉ ⲡⲉⲛⲙⲁⲕⲁⲣⲓⲟⲥ ⲛ̀ⲓⲱⲧ Ⲁⲅⲁⲡⲟⲥ ⲉⲁϥϫⲟⲥ ⲛⲁϥ ϫⲉϩⲟⲛϩⲉⲛ ⲉⲧⲟⲧⲟⲩ ⲛ̀ⲛⲉⲕϣⲏⲣⲓ ⲙⲉⲛⲉⲛⲥⲱⲕ ⲛ̀ⲧⲟⲩⲓ ⲉϧⲣⲏⲓ ⲉⲭⲏⲙⲓ ⲛⲧⲟⲩϣⲱⲡⲓ ϧⲁⲧⲟⲧ. ⲧⲉⲛⲛⲁϩϯ ϫⲉ ⲛⲉϥϣⲗⲏⲗ ⲛⲁϭⲓⲙⲱⲓⲧ ⲛⲁⲛ ϣⲁⲧⲉⲛϩⲱⲗ ⲉⲢⲁⲕⲟϯ ⲉⲡⲉϥⲙⲁ. ⲙⲁⲣⲉⲙⲟϣⲓ ⲇⲉ ⲟⲩⲛ ⲡⲁⲥⲟⲛ ⲉϫⲉⲛ ⲡⲁⲓⲥⲫⲟⲧⲟⲩ ⲛ̀ⲣⲏⲥ ⲛ̀ⲧⲉ ⲫⲓⲟⲙ ϧⲉⲛ ⲟⲩⲙⲟⲩⲛ ⲉⲃⲟⲗ ϣⲁⲧⲉⲛϩⲱⲗⲉⲢⲁⲕⲟϯ ⲙⲏ ⲙ̀ⲡⲉⲕⲥⲱⲧⲉⲙ ⲉⲡⲓⲡⲣⲁⲅⲙⲁⲧⲉⲩⲧⲏⲥ ⲉⲧⲁϥϫⲟⲥ ⲛⲁⲛ ⲙ̀ⲡⲓⲥⲏⲟⲩ ϫⲉ ⲉⲛϣϭⲏⲣ ⲥⲁ ⲡⲁⲓⲥⲫⲟⲧⲟⲩ ⲛⲉⲣⲏⲥ ⲛ̀ⲧⲉ ⲫⲓⲟⲙ ϣⲁⲧⲉⲛϩⲱⲗ ⲉⲢⲁⲕⲟϯ ⲟⲩⲟϩ ⲡⲉϫⲉ ⲡⲓⲛⲓϣϯ ϫⲉ ⲟⲩⲟϩ ⲁⲛⲛⲁϫⲉⲙ ⲙⲱⲟⲩ ⲛ̀ⲑⲱⲛ ⲛ̀ⲧⲉⲛⲥⲱ. ⲡⲉϫⲉ ⲡⲓⲕⲟⲩϫⲓ ⲛⲁϥ ϧⲉⲛ ⲟⲩⲣⲁϣⲓ ⲛⲉⲙ ⲟⲩϩⲉⲗⲡⲓⲥ ⲉⲥⲧⲁϫⲣⲏⲟⲩⲧ ϫⲉ ⲱ ⲡⲁϭⲟⲓⲥ Ⲓⲏⲥⲟⲩⲥ Ⲡⲓⲭⲣⲓⲥⲧⲟⲥ ⲛ̀ⲧⲉϥⲫⲱⲛϩ ⲙ̀ⲡⲁⲓⲙⲱⲟⲩ ⲛⲉⲙ ⲛⲁⲓⲡⲉⲧⲣⲁ ⲛ̀ϩⲁⲛⲕⲩⲙⲏⲛ ⲙ̀ⲙⲱⲟⲩ. ⲡⲉϫⲉ ⲡⲓⲛⲓϣϯ ⲛⲁϥ ϫⲉ. ⲥⲉ ⲡⲁϭⲟⲓⲥ ϯⲛⲁϩϯ ϫⲉ ⲟⲩⲟⲛϣϫⲟⲙ ⲙ̀ⲙⲟϥ ϧⲉⲛ ϩⲱⲃ ⲛⲓⲃⲉⲛ ⲁⲗⲗⲁ ⲭⲱ ⲛⲏⲓ ⲉⲃⲟⲗ ⲡⲁⲥⲟⲛ ϫⲉ ⲁⲓϣⲱϥⲧ ϩⲱ ϩⲱⲥ ⲣⲱⲙⲓ ⲙⲉⲛⲉⲛⲥⲁ ⲛⲁⲓⲥⲁϫⲓ ⲇⲉ ⲛⲁⲩⲙⲟϣⲓ ⲡⲉ ϧⲉⲛ ⲟⲩⲣⲁϣⲓ ⲛⲉⲙ ⲟⲩⲣⲱⲟⲩⲧϥ ⲛ̀ϩⲏⲧ ⲉⲩⲑⲉⲗⲏⲗ ⲟⲩⲟϩ ⲉⲩⲥⲙⲟⲩ ⲉⲪϯ ⲟⲩⲟϩ ⲛⲁⲩϯⲛⲟⲙϯ ⲛ̀ⲛⲟⲩⲉⲣⲏⲟⲩ ⲡⲉ ϧⲉⲛ ⲟⲩⲙⲟⲩⲛ ⲉⲃⲟⲗ. Ⲫϯ ⲇⲉ ⲉⲧⲁϥϭⲓⲙⲱⲓⲧ ⲙ̀ⲡⲒⲥ̅ⲗ ⲙ̀ⲡⲓⲥⲏⲟⲩ ϩⲓ ⲡϣⲁϥⲉ ⲛⲉⲙ ϧⲉⲛ ⲫⲓⲟⲙ ⲛ̀ⲑⲟϥ ⲟⲛ ⲡⲉ ⲉⲧⲁϥϭⲓⲙⲱⲓⲧ ⲛ̀ⲛⲁⲓⲕⲉⲁⲅⲓⲟⲥ ⲟⲩⲟϩ ⲉϣⲱⲡ ⲁⲩϣⲁⲛⲓⲃⲓ ⲛⲉϣⲁⲩϣⲉⲛⲱⲟⲩ ⲉⲫⲓⲟⲙ ⲛ̀ⲧⲟⲩⲥⲱ ⲉⲃⲟⲗⲛ̀ϧⲏⲧϥ ϣⲁⲩϫⲉⲙϥ ⲉϥϩⲟⲗϫ ⲟⲩⲟϩ ⲛⲁϥϣⲓⲛⲓ ⲛ̀ⲛⲟⲩⲉⲣⲏⲟⲩ ⲁⲛ ⲡⲉ ⲉⲑⲃⲉ ⲫⲁⲓ ϫⲉ ϥϩⲟⲗϫ ⲓⲉ ϥⲉⲛϣⲁϣⲓ.
Ⲉⲧⲁⲩⲙⲟϣⲓ ⲇⲉ ⲁⲩⲓ ⲉϫⲉⲛ ⲟⲩⲕⲟϩ ⲙ̀ⲡⲉⲧⲣⲁ ⲉϥⲟⲓ ⲛ̀ϫⲁϫⲣⲓⲙ ϩⲱⲥⲧⲉ ⲛ̀ⲧⲟⲩⲙⲟϣⲓ ϩⲓϫⲉⲛ ⲛⲟⲩϫⲓϫ ⲛⲉⲙ ⲛⲟⲩϭⲁⲗⲁⲩϫ ⲛ̀ⲟⲩⲙⲏϣ ⲛ̀ⲥⲟⲡ ⲥⲉⲟϣ ⲅⲁⲣ ⲛ̀ϫⲉ ⲛⲓϧⲓⲥⲓ ⲉⲧⲁⲩϣⲟⲡⲟⲩ ⲛ̀ϫⲉ ⲛⲁⲓⲙⲁⲕⲁⲣⲓⲟⲥ ϧⲉⲛ ⲛⲓⲡⲉⲧⲣⲁ ⲉⲧϧⲟⲥⲓ ⲉⲧⲉⲙⲙⲁⲩ ⲕⲉ ⲅⲁⲣ ⲛⲁⲩⲥⲱⲟⲩⲛ ⲁⲛ ⲡⲉ ϫⲉ ⲉⲩⲛⲁ ⲉⲑⲱⲛ ⲁⲗⲗⲁ ⲡⲓⲣⲱⲟⲩⲧϥ ⲛ̀ϩⲏⲧ ⲛ̀ⲧⲉ Ⲡⲭ̅ⲥ̅ ⲛⲉⲙ ϯϩⲉⲗⲡⲓⲥ ⲉⲧϧⲉⲛ ⲡⲟⲩϩⲏⲧ ⲛⲁϥⲑⲣⲟ ⲙ̀ⲡⲓϧⲓⲥⲓ ⲉⲁⲥⲓⲁⲓ ⲛⲁϩⲣⲉⲛ ⲡⲉ. ⲟⲩⲟϩ ⲕⲁⲧⲁ ϯϧⲉ ⲉⲧⲁⲩϫⲟⲥ ⲛⲏⲓ ⲛ̀ⲑⲱⲟⲩ ⲛⲁⲓⲙⲁⲕⲁⲣⲓⲟⲥ ⲉⲧⲁⲩⲙⲟϣⲓ ϣⲁ ⲑ̅ ⲛ̀ⲉϩⲟⲟⲩ ⲁⲩϧⲓⲥⲓ ⲉⲙⲁϣⲱ ⲉⲑⲃⲉ ⲡⲧϩⲉⲙⲕⲟ ⲛ̀ⲛⲟⲩϭⲁⲗⲁⲩϫ ⲉⲑⲃⲉ ϫⲉ ϩⲁⲛⲣⲱⲙⲓ ⲛⲉ ⲉⲩϫⲏⲛ ϧⲉⲛ ⲛⲟⲩⲥⲱⲙⲁ ⲛ̀ⲥⲉⲕⲉϩ ⲁⲛ ⲉⲛⲁⲓϧⲓⲥⲓ ⲙ̀ⲡⲁⲓⲥⲙⲟⲧ. ϩⲟⲧⲉ ⲟⲩⲛ ⲡⲉϫⲱⲟⲩ ⲉⲧⲁⲛⲁⲗⲏⲓ ⲉϩⲣⲏⲓ ⲉϫⲉⲛ ⲟⲩⲡⲉⲧⲣⲁⲛ ⲉⲥϭⲟⲥⲓ ⲉⲡⲓϩⲟⲩⲟ ⲙ̀ⲡⲉⲛϣϫⲉⲙϫⲟⲙ ⲗⲟⲓⲡⲟⲛ ⲉⲙϣⲓ ϫⲉ ⲁⲗⲗⲁ ⲁⲛ ϣⲧⲏⲟⲩⲧ ⲡⲉ ⲉϫⲉⲛ ϯⲡⲉⲧⲣⲁ. ⲉⲛϧⲟⲥⲓ
ⲉⲉⲙⲁϣⲱ ⲁⲧⲉⲧⲉⲛⲛⲁⲛⲁⲩ ⲉⲑⲙⲉⲧϫⲱⲣⲓ ⲛ̀ⲛⲁⲓⲅⲱⲛⲓⲥⲧⲏⲥ ⲟⲩⲟϩ ⲛ̀ⲁⲑⲗⲏⲧⲏⲥ ⲛ̀ⲧⲉ Ⲡⲭ̅ⲥ̅ ⲛⲁⲓⲉⲧⲁⲩⲉⲣ⳥ ⲁⲧϭⲛⲉ ⲫⲉⲛⲥⲛⲟϥ ⲉⲃⲟⲗϩⲓⲧⲉⲛ ⲛⲁⲓⲙⲏϣ ⲛ̀ϧⲓⲥⲓ ⲉⲧⲁⲩϣⲟⲡⲟⲩ. Ⲗⲟⲓⲡⲟⲛ ⲛⲉ ⲁⲩⲉⲣⲕⲉⲉ̅ ⲛⲉϩⲟⲟⲩ ⲡⲉ ⲉⲩⲥⲏϯ ⲉⲃⲟⲗϩⲓϫⲉⲛ ϯⲡⲉⲧⲣⲁ ⲉⲧⲉⲙⲙⲁⲩ ⲛ̀ⲁⲑⲟⲩⲱⲙ ⲟⲩⲟϩ ⲛ̀ⲁⲧⲥⲱ ⲉⲩⲣⲟϫⲡ ⲙ̀ⲫⲣⲏϯ ⲛ̀ϩⲁⲛⲣⲉϥⲱⲙⲟⲩⲧ. Ⲫϯ ⲇⲉ ⲫⲏⲉⲑⲙⲟϩⲉⲙ ⲛ̀ⲛⲏⲉⲧⲉⲣϩⲉⲗⲡⲓⲥ ⲉⲣⲟϥ ⲛ̀ⲥⲏⲟⲩ ⲛⲓⲃⲉⲛ ⲉϥⲧⲟⲩϫⲟ ⲙ̀ⲙⲱⲟⲩ ⲉⲃⲟⲗϧⲉⲛ ⲛⲓⲑⲗⲓⲯⲓⲥ ⲧⲏⲣⲟⲩ ⲫⲏⲉⲧⲉⲣⲫⲙⲉⲩⲓ ⲛ̀Ⲇⲁⲛⲓⲏⲗ ⲙ̀ⲡⲓⲥⲏⲟⲩ ⲁϥⲛⲁϩⲉⲙϥ ⲉⲃⲟⲗϧⲉⲛ ⲣⲱⲟⲩ ⲛ̀ⲛⲓⲙⲟⲩⲓ ⲟⲩⲟϩ ⲁϥⲛⲟϩⲉⲙ ⲛ̀Ⲓⲱⲛⲁ ⲉⲃⲟⲗϧⲉⲛ ⲑⲛⲉϫⲓ ⲛ̀ⲧⲉ ⲡⲓⲕⲏⲧⲟⲥ ⲟⲩⲟϩ ⲉⲧⲁϥⲧⲟⲩϫⲟ ⲛ̀Ⲥⲟⲩⲥⲁⲛⲛⲁ ⲉⲃⲟⲗϧⲉⲛ ⲡⲓϩⲓⲟⲩⲓ ⲉⲡϩⲁⲡ ⲛ̀ⲧⲉ ⲫⲙⲟⲩ ⲛ̀ⲑⲟϥ ⲟⲛ ⲁϥⲛⲟϩⲉⲙ ⲛ̀ⲛⲉϥⲉⲃⲓⲁⲓⲕ ⲛ̀ⲣⲱⲙⲉⲟⲥ ⲉⲃⲟⲗϧⲉⲛ ⲣⲱⲟⲩ ⲛ̀ⲛⲓⲁⲅⲣⲓⲟⲛ ⲛ̀ⲧⲉ ⲡⲓⲙⲁ ⲉⲧⲉⲙⲙⲁⲩ ⲛⲉⲙ ⲛⲓϩⲁⲗⲁϯ ⲛ̀ⲉⲟⲩⲉⲙⲥⲁⲣⲝ ⲉⲧϩⲓϫⲉⲛ ⲛⲉⲛⲥⲫⲟⲧⲟⲩ ⲙ̀ⲫⲓⲟⲙ. Ⲫϯ ⲛ̀ⲧⲉ ⲛⲓϫⲟⲙ ⲫⲏⲉⲧⲁϥⲟⲩⲱⲧⲉⲃⲛ̀Ⲉⲛⲱⲭ ⲉⲃⲟⲗ ⲉϣⲧⲉⲙⲑⲣⲉϥⲛⲁⲩ
ⲉⲫⲙⲟⲩ ⲟⲩⲟϩ ⲉⲧⲁϥⲟⲩⲱⲣⲡ ⲛ̀ϩⲁⲛϩⲁⲣⲙⲁ ⲛ̀ⲭⲣⲱⲙ ϣⲁⲧⲟⲩⲱⲓⲗⲓ ⲉⲡϣⲱⲓ ⲛ̀Ⲏⲗⲓⲁⲥ ⲫⲏⲉⲧⲁϥⲧⲁⲟⲩⲟ ⲙ̀ⲡⲉϥⲁⲅⲅⲉⲗⲟⲥ ⲁϥϥⲁⲓ ⲛ̀ⲁⲃⲃⲁ Ⲕⲟⲩⲙ ⲉⲃⲟⲗϧⲉⲛ ⲡⲓⲁⲏⲣ ⲁⲧϭⲛⲉϧⲓⲥⲓ ϣⲁⲧⲉϥϭⲓⲧϥ ⲉⲑⲂⲁⲃⲩⲗⲱⲛ ⲉϫⲉⲛ ⲡⲓⲗⲁⲕⲕⲟⲥ ⲛ̀ⲧⲉ ⲛⲓⲙⲟⲩⲓ ⲉⲁϥϯ ⲙ̀ⲡⲓⲁⲣⲓⲥⲧⲟⲛ ⲛ̀Ⲇⲁⲛⲓⲏⲗ ⲟⲩⲟϩ ⲡⲁⲗⲓⲛⲁϥⲧⲁⲥⲑⲟϥ ⲉϯⲒⲟⲩⲇⲉⲁ ⲛ̀ⲅ̅ ⲛ̀ⲁⲃⲟⲧ ⲙ̀ⲙⲟϣⲓ ⲛ̀ⲑⲟϥ ⲟⲛ ⲡⲟ̅ⲥ̅ ⲁϥⲟⲩⲱⲣⲡ ⲙ̀ⲡⲉϥⲁⲅⲅⲉⲗⲟⲥ ⲁϥⲧⲱⲟⲩⲛ ⲛ̀ⲛⲁⲓⲁⲅⲓⲟⲥ ϧⲉⲛ ⲡⲓⲁⲏⲣ ⲁⲧϭⲛⲉϧⲓⲥⲓ ϣⲁⲧⲉϥⲉⲛⲟⲩ ⲉϢⲓϩⲏⲧ ⲛ̀ⲧⲉϥⲭⲁⲩ ϩⲓϫⲉⲛ ϯⲛⲓϣϯ ⲙ̀ⲡⲉⲧⲣⲁ ⲉⲧⲉ ⲡⲓϫⲟϣϫⲉϣ ⲙ̀ⲙⲱⲟⲩ ⲥⲁⲣⲏⲥ ⲙ̀ⲙⲟⲥ. ⲑⲁⲓ ⲅⲁⲣ ⲁⲟⲩⲙⲏⲓⲛⲓ ⲛ̀ⲧⲉ Ⲫϯ ϣⲱⲡⲓ ⲛ̀ϧⲏⲧⲥ ⲁϥⲟⲩⲱⲛϩ ⲉⲃⲟⲗ ⲉⲁⲡⲓⲃⲱⲕ ⲛ̀ⲧⲉ Ⲫϯ ⲁⲃⲃⲁ ⲙⲁⲕⲁⲣ ⲙⲟⲩϯ ⲉⲣⲟⲥ ϯⲡⲉⲧⲣⲁ ⲛ̀ⲕⲟⲩⲛⲛⲉϫⲓ ϣⲁ ⲉϧⲟⲩⲛ ⲉⲫⲟⲟⲩ.
Ⲙⲁϩⲑⲏⲧⲉⲧⲉⲛ ⲉⲣⲟⲓ ϧⲉⲛ ⲟⲩϯϩⲑⲏϥ ⲛ̀ⲧⲉⲧⲉⲛⲥⲱⲧⲉⲙⲉⲧⲁⲓϣⲫⲏⲣⲓ ⲉⲧⲁⲥϣⲱⲡⲓ ⲛ̀ⲛⲁⲓⲙⲁⲕⲁⲣⲓⲟⲥ ⲕⲁⲧⲁ ⲫⲣⲏϯ ⲉⲧⲁⲩⲧⲁⲙⲟⲓ ⲛ̀ⲑⲱⲟⲩ. ⲁⲥϣⲱⲡⲓ ⲅⲁⲣ ϧⲉⲛ ⲡⲓⲉϫⲱⲣϩ ⲉⲧⲁ Ⲫϯ ⲓⲛⲓ ⲛ̀ⲛⲁⲓⲙⲁⲕⲁⲣⲓⲟⲥ ⲉϢⲓϩⲏⲧ ⲁⲩⲛⲁⲩ ϧⲉⲛ ⲡⲓⲉϫⲱⲣϩ ⲉⲟⲩⲣⲱⲙⲓ ⲛ̀ⲟⲩⲱⲓⲛⲓ ⲉϥⲭⲏ ϧⲉⲛ ⲧⲟⲩⲙⲏϯ ⲉϥⲁⲙⲟⲛⲓ ⲛ̀ⲧⲟⲩϫⲓϫ ⲉϥⲥⲱⲕ ⲛⲉⲙⲱⲟⲩ ϧⲉⲛ ⲡⲓⲁⲏⲣ ϣⲁⲧⲉϥⲉⲛⲟⲩ ⲉϧⲣⲏⲓ ⲉϫⲉⲛ ϯⲡⲉⲧⲣⲁ ⲉⲧⲁⲛⲉⲣϣⲟⲣⲡ ⲙ̀ⲫⲓⲣⲓ ⲉⲣⲟⲥ. ϩⲟⲧⲉ ⲡⲉϫⲱⲟⲩ ⲉⲧⲁⲛⲧⲱⲟⲩⲛ ϩⲁⲛⲁⲧⲟⲟⲩⲓ ⲟⲩⲛ ⲕⲁⲧⲁ ϯϫⲟⲙ ⲉⲧⲁ Ⲡⲭ̅ⲥ̅ ⲟⲩⲁϩ ⲉⲣⲟⲛ ⲁⲛϫⲉⲙⲧⲉⲛ ϩⲓϫⲉⲛ ϯⲡⲉⲧⲣⲁ ϧⲉⲛ Ϣⲓϩⲏⲧ ⲟⲩⲟϩ ⲉⲧⲁⲛϫⲟⲩϣⲧ ⲉⲃⲟⲗ ⲉϫⲉⲛ ⲡⲓⲧⲱⲟⲩ ⲁⲛⲛⲁⲩ ⲉⲡⲓϩⲉⲗⲟⲥ ⲙ̀ⲙⲱⲟⲩ ⲛⲉⲙ ϩⲁⲛⲕⲟⲩϫⲓ ⲛ̀ⲥⲓⲗⲟⲩⲕⲓ ⲙ̀ⲃⲉⲛⲓ ⲉⲩⲣⲏⲧ ⲛⲉⲙ ϯⲑⲉⲱⲣⲓⲁ ⲛ̀ⲧⲉ ⲡⲓⲧⲱⲟⲩ ⲁⲛⲉⲣϣⲫⲏⲣⲓ ⲟⲩⲟϩ ⲁⲛⲉⲣ ⲙ̀ⲫⲣⲏϯ ⲉⲁⲡⲉⲛϩⲏⲧ ⲥⲓϩⲓ ⲁⲛⲙⲟⲕⲙⲉⲕ ⲉⲃⲟⲗ ⲉⲑⲃⲉ ⲫⲏⲉⲧⲁϥϣⲱⲡⲓ ⲙ̀ⲙⲟⲛ ϫⲉ ⲣⲟⲩϩⲓ ⲙⲉⲛ ⲛⲁⲛⲉⲛⲕⲟⲧ ⲡⲉ ϧⲉⲛ ⲟⲩⲙⲉⲧϫⲱⲃ ϩⲓϫⲉⲛ ⲡⲓⲭⲣⲟ ⲛ̀ⲧⲉ ⲫⲓⲟⲙ ⲉⲛⲥⲱⲧⲉⲙ ⲉⲡⲡⲓϣⲑⲟⲣⲧⲉⲣ ⲛ̀ⲧⲉ ⲛⲓϩⲱⲓⲙⲓ ⲙ̀ⲫⲟⲟⲩ ⲇⲉ ϩⲱϥ ⲧⲉⲛⲟϩⲓ ⲉⲣⲁⲧⲉⲛ ϧⲉⲛ ⲟⲩϫⲁⲙⲏ ⲉⲛϫⲉⲙⲛⲟⲙϯ ⲟⲩⲟϩ ⲉⲛⲛⲁⲩ ⲉϩⲁⲛⲥⲓⲗⲟⲩⲕⲓ ⲙ̀ⲃⲉⲛⲓ ⲛⲉⲙ ϩⲁⲛϣⲏⲓ ⲙ̀ⲙⲱⲟⲩ ⲛⲉⲙ ϩⲁⲛⲕⲉϫⲓⲛⲛⲁⲩ ⲙ̀ⲡⲁⲓⲣⲏϯ ⲛ̀ϩⲱⲃ ⲛ̀ϣⲫⲏⲣⲓ. ⲓⲧⲁ ⲙⲉⲛⲉⲛⲥⲁ ⲟⲩⲕⲟⲩϫⲓ ⲇⲉ ⲉⲛⲥⲟⲙⲥ ⲉⲙⲛⲏ ⲛⲉⲙ ⲙⲛⲁⲓ ⲟⲩⲟϩ ⲉⲧⲁ ⲫⲛⲁⲩ ⲛ̀ⲁϫⲡⲉ̅ ϣⲱⲡⲓ ⲁⲛⲛⲁⲩ ⲉⲟⲩⲣⲱⲙⲓ ⲉϥⲥⲱⲏ ϧⲁϫⲱⲟⲩ ⲛ̀ϩⲁⲛϫⲁⲙⲟⲩⲗ ϧⲉⲛ ϯϧⲉⲗⲗⲟⲧ ⲉⲧϩⲓ ⲫⲣⲏⲥ ⲙ̀ⲙⲟⲛ ⲁⲛⲣⲁϣⲓ ⲉⲙⲁϣⲱ ⲁⲛϫⲉⲙⲛⲟⲙϯ ϧⲉⲛ ⲡⲉⲛϩⲏⲧ ⲛⲉⲙ ⲛⲉⲛⲯⲩⲭⲏ ⲟⲩⲟϩ ⲉⲧⲁⲛⲓ ⲉⲡⲉⲥⲏⲧ ⲉⲃⲟⲗ ϩⲓϫⲉⲛ ϯⲡⲉⲧⲣⲁ ⲛⲁⲛϧⲱⲛⲧ ⲙ̀ⲙⲟⲛ ⲉⲣⲟϥ ⲡⲉ ϫⲉ ⲛ̀ⲧⲉⲛϣⲉⲛϥ ϫⲉ ⲡⲁⲓⲙⲁⲑⲱⲛ ⲡⲉ. ϩⲟⲧⲉ ⲟⲩⲛ ⲉⲧⲁϥⲛⲁⲩ ⲉⲣⲟⲛ ⲉⲣⲉ ⲛⲓϩⲃⲱⲥ ⲛ̀ⲝⲉⲛⲓⲕⲟⲥ ⲧⲟⲓ ϩⲓⲱⲧⲉⲛ ⲟⲩⲟϩ ⲉⲣⲉ ⲡⲓⲗⲉⲛⲧⲓⲟⲛ ⲙⲏⲣ ⲉϫⲉⲛ ⲛⲉⲛⲁⲫⲏⲟⲩⲓ ⲁϥⲉⲣϩⲟϯ ⲉⲙⲁϣⲱ ⲟⲩⲟϩ ⲁϥⲉⲣϩⲏⲧⲥ ⲙ̀ⲫⲱⲧ ⲁϥⲝⲁ ⲛⲓⲧⲉⲃⲛⲱⲟⲩⲓ ⲉⲃⲟⲗ ϫⲉ ⲁⲛϯⲙⲉⲧⲁⲛⲟⲓⲁ ϣⲁⲧⲉϥⲟϩⲓ ⲉⲣⲁⲧϥ. ⲉⲧⲁⲛϧⲱⲛⲧ ⲇⲉ ⲉⲡⲓⲣⲱⲙⲓ ⲁⲛⲥⲁϫⲓ ⲛⲉⲙⲁϥ ⲡⲉ ⲉⲛϣⲓⲛⲓ ⲙ̀ⲙⲟϥ ⲛ̀ⲑⲟϥ ⲇⲉ ⲙ̀ⲡⲉϥⲉⲙⲓ ⲉⲧⲉⲛϫⲓⲛⲥⲁϫⲓ ⲟⲩⲇⲉ ⲁⲛⲟⲛ ϩⲱⲛ ⲙ̀ⲉⲛⲉⲙⲓ ⲉⲑⲱϥ. ⲉⲡϧⲁⲉ ⲇⲉ ⲡⲉϫⲁϥ ⲛⲁⲛ ⲉϥϭⲱⲣⲉⲙ ⲉⲣⲟⲛ ϫⲉ ⲁⲙⲱⲓⲛⲓ ⲛ̀ⲧⲁⲉⲗ ⲑⲏⲛⲟⲩ ⲉⲫⲙⲁ ⲛ̀ⲁⲃⲃⲁ Ⲙⲁⲕⲁⲣ.
Ⲁⲛⲣⲁϣⲓ ⲟⲩⲟϩ ⲁⲛϫⲉⲙⲛⲟⲙϯ ⲉⲙⲁϣⲱ ⲟⲩⲟϩ ⲡⲁⲓⲣⲏϯ ⲁⲛⲟⲟⲩⲁϩⲧⲉⲛ ⲛ̀ⲥⲁ ⲡⲓⲣⲱⲙⲓ ⲉⲛϣⲉⲡϩⲙⲟⲧ ⲛ̀ⲧⲉⲛ Ⲫϯ ⲟⲩⲟϩ ⲉⲛϯⲱⲟⲩ ⲛⲁϥ ϫⲉ ⲁϥϭⲓⲙⲱⲓⲧ ϧⲁϫⲱⲛ ⲉⲫⲙⲁ ⲙ̀ⲡⲉϥⲃⲱⲕ. ϩⲟⲧⲉ ⲟⲩⲛ ⲉⲧⲁⲛⲫⲟϩ ϣⲁ ⲡⲓⲡⲣⲟⲫⲏⲧⲏⲥ ⲛ̀ⲧⲉ Ⲫϯ ⲁϥϣⲟⲡⲧⲉⲛ ⲉⲣⲟϥ ϧⲉⲛ ⲟⲩⲙⲉⲧⲣⲉⲙⲣⲁⲩϣⲟⲩⲟϩ ⲁϥϣⲓⲛⲓ ⲙ̀ⲙⲟⲛ ϫⲉ ⲁⲣⲉⲧⲉⲛⲓ ⲉⲡⲁⲓⲙⲁ ⲉⲑⲃⲉ ⲟⲩ ⲛ̀ϩⲱⲃ. ⲁⲛⲟⲛ ⲇⲉ ⲁⲛⲉⲣⲟⲩⲱ ⲉⲛϫⲱ ⲙ̀ⲙⲟⲥ ϫⲉ ⲁⲛⲥⲱⲧⲉⲙ ⲉⲑⲃⲉ ⲛⲉⲕⲁⲣⲉⲧⲉⲏ ⲛⲉⲙ Ϣⲓϩⲏⲧ ⲁⲛⲓ ϫⲉ ⲛ̀ⲧⲉⲛϣⲱⲡⲓ ϧⲁ ⲡⲉⲕⲥⲕⲉⲡⲓ ⲛ̀ⲧⲉⲕⲁⲓⲧⲉⲛ ⲙ̀ⲙⲟⲛⲁⲭⲟⲥ. ⲛ̀ⲑⲟϥ ⲇⲉ ⲉϥϯⲛⲓⲁⲧϥ ⲙ̀ⲙⲟⲛ ⲛ̀ⲕⲁⲗⲱⲥ ⲡⲉϫⲁϥ ⲛⲁⲛ ϫⲉ ⲧⲉⲛⲛⲁϣϫⲉⲙϫⲟⲙ ⲁⲛ ⲉⲟϩⲓ ϧⲉⲛ ⲡⲁⲓⲙⲁ ϫⲉ ⲟⲩϣⲁϥⲉ ⲡⲉ ⲉϥϧⲟⲥⲓ. ⲁⲛⲟⲛ ⲇⲉ ⲁⲛϯⲙⲉⲧⲁⲛⲟⲓⲁ ⲛⲁϥ ⲉⲛϫⲱ ⲙ̀ⲙⲟⲥ ϫⲉ ⲉϣⲱⲡ ⲁⲛϣⲧⲉⲙϫⲉⲙϫⲟⲙ ⲛ̀ϩⲉⲙⲥⲓ ⲙ̀ⲡⲁⲓⲙⲁ ⲧⲉⲛⲛⲁϩⲱⲗ ⲉⲕⲉⲙⲁ ⲙⲟⲛⲟⲛ ⲉⲑⲃⲉ Ⲫϯ ⲙ̀ⲡⲉⲣϩⲓⲧⲧⲉⲛ ⲉⲃⲟⲗϩⲁⲣⲟⲕ ⲡⲉⲛⲓⲱⲧ ⲉⲑⲛⲁⲛⲉϥ. ⲁϥⲉⲣⲟⲩⲱ ϫⲉ ⲕⲁⲗⲱⲥ ⲓⲥϫⲉ ⲡⲁⲓⲣⲏϯ ⲡⲉ ⲁⲙⲱⲓⲛⲓ ⲛ̀ⲧⲁⲧⲁⲙⲉ ⲑⲏⲛⲟⲩ ⲉⲡⲓⲙⲁ ⲉⲧⲉⲧⲉⲛⲛⲁϣⲱⲡⲓ ⲙ̀ⲙⲁⲩ. ⲟⲩⲟϩ ⲉⲧⲁϥϭⲓⲧⲧⲉⲛ ⲁϥⲉⲛⲧⲉⲛ ⲉϫⲉⲛ ⲟⲩⲡⲉⲧⲣⲁ. ⲁϥⲧⲁⲙⲟⲛ ⲉⲡⲓⲣⲏϯ ⲛ̀ⲕⲱⲧ ⲙ̀ⲡⲓⲥⲡⲏⲗⲉⲟⲛ ⲛⲉⲙ ⲡⲓϩⲱⲃ ⲛ̀ϫⲓϫ ⲕⲁⲧⲁ Ϣⲓϩⲏⲧ. ⲛⲁⲓ ⲇⲉ ⲧⲏⲣⲟⲩ ⲁⲛⲁⲓⲙⲁⲕⲁⲣⲓⲟⲥ ϫⲟⲧⲟⲩ ⲛⲏⲓ ⲁⲩϣⲱⲡⲓ ⲙ̀ⲙⲱⲟⲩ ⲉⲟⲓⲇⲏ ⲁⲛⲟⲕ ⲟⲩⲣⲉⲙⲧⲁⲓⲡⲟⲗⲓⲥ ⲛ̀ⲟⲩⲱⲧ ⲛⲉⲙⲱⲟⲩ Ⲕⲱⲥⲧⲁⲛⲧⲓⲛⲟⲩⲡⲟⲗⲓⲥ ⲟⲩⲟϩ ϧⲉⲛ ⲛⲁⲩ ⲇⲉ ⲛ̀ⲟⲩⲙⲏϣ ⲛ̀ⲥⲟⲡ ⲉⲩϩⲟⲛϩⲉⲛ ⲉⲧⲟⲧ ϫⲉ ⲙ̀ⲡⲉⲣϫⲉ ϩⲗⲓ ϧⲉⲛ ⲛⲏⲉⲧⲁⲛⲧⲁⲙⲟⲕ ⲉⲣⲱⲟⲩ ⲉⲧⲓ ⲉⲛⲟⲛϧ ⲕⲉ ⲅⲁⲣ ⲉⲛⲉ ⲙ̀ⲡⲓⲉⲣϣⲟⲣⲡ ⲛ̀ⲥⲟⲩⲟⲛⲟⲩ ⲡⲉ ⲛⲁⲩⲛⲁϫⲉ ϩⲗⲓ ϧⲉⲛ ⲛⲁⲓ ⲛⲏⲓ ⲁⲛ ⲡⲉ ⲁⲗⲗⲁ ⲁⲓⲥⲟⲩⲟⲛⲟⲩ ⲁⲛⲟⲕ ⲟⲩⲟϩ ⲛ̀ⲑⲱⲟⲩ ϩⲱⲟⲩ ⲁⲩⲥⲟⲩⲟⲛⲧ.
Ⲉⲡⲓⲇⲏ ⲟⲩⲛ ⲁⲡⲓⲡⲣⲟⲫⲏⲧⲏⲥ ⲛ̀ⲧⲉ ⲡⲟ̅ⲥ̅ ⲁⲃⲃⲁ Ⲙⲁⲕⲁⲣ ⲥⲱⲕ ϧⲁϫⲱⲟⲩ ⲛ̀ⲛⲉϥϣⲏⲣⲓ ⲙ̀ⲡⲣⲟⲫⲏⲧⲏⲥ ⲙⲁⲗⲗⲟⲛ ⲇⲉ ⲛ̀ϩⲟⲩⲟ ⲡⲣⲟⲫⲏⲧⲏⲥ ⲁϥⲉⲛⲟⲩ ⲉϯⲡⲉⲧⲣⲁ ⲁϥⲧⲁⲙⲱⲟⲩ ⲉⲡⲓⲙⲁ ⲛ̀ϫⲁϫⲱⲛⲓ ⲟⲩⲟϩ ⲁϥϯ ⲛⲱⲟⲩ ⲛ̀ⲛⲓⲥⲕⲉⲩⲟⲥ ⲛ̀ϣⲓⲕⲓ ⲟⲩⲟϩ ⲁϥⲧⲥⲁⲃⲱⲟⲩ ⲉⲧⲁⲣⲭⲏ ⲛ̀ϭⲛⲉⲃϯ ⲛⲉⲙ ⲡⲓⲣⲏϯ ⲛ̀ϣⲱⲗⲕ ⲟⲩⲟϩ ⲁϥϯ ⲉⲧⲟⲧⲟⲩ ⲛ̀ⲛⲓⲕⲉⲉⲛⲧⲟⲗⲏ ⲧⲏⲣⲟⲩ ⲉⲁϥⲧⲁⲥⲑⲟ ⲉⲡⲉϥⲙⲁⲛϣⲱⲡⲓ ϧⲉⲛ ⲟⲩϩⲓⲣⲏⲛⲏ. ⲛⲓⲁⲅⲓⲟⲥ ⲇⲉ ⲁⲩⲱⲗⲓ ⲉⲃⲟⲗ ϩⲓϫⲱⲟⲩ ⲛ̀ⲛⲓϩⲃⲱⲥ ⲛ̀ⲝⲉⲛⲓⲕⲟⲥ ⲛ̀ⲧⲉ ϯⲤⲩⲣⲓⲁ ⲁⲩⲉⲣⲫⲟⲣⲓⲛ ⲙ̀ⲡⲓⲥⲭⲏⲙⲁ ⲛ̀ⲧⲉ ⲛⲓⲙⲟⲛⲁⲭⲟⲥ ⲛ̀ⲧⲉ ⲡⲓⲙⲁ ⲉⲧⲉⲙⲙⲁⲩ ⲟⲩⲟϩ ⲛⲁⲩϫⲱ ⲙ̀ⲙⲟⲥ ⲛ̀ⲛⲟⲩⲉⲣⲏⲟⲩ ϫⲉ ⲁⲛⲁⲩ ⲙ̀ⲡⲉⲛⲑⲣⲉ ϩⲗⲓ ⲉⲙⲓ ⲙ̀ⲡⲉⲛⲣⲁⲛ ⲟⲩⲇⲉ ϫⲉ ⲛⲁⲛⲟⲓ ⲙ̀ⲙⲟⲛⲁⲭⲟⲥ ⲛ̀ϣⲟⲣⲡ ϫⲉ ⲟⲩⲏⲓ ⲡⲁⲓⲙⲁ ϧⲉⲛ ⲡⲟⲩϩⲟ ⲉϩⲟⲧⲉ ϯⲤⲩⲣⲓⲁ. ⲗⲟⲓⲡⲟⲛ ⲁⲩⲓⲣⲓ ⲛ̀ⲧⲟⲩⲥⲡⲟⲩⲇⲏ ⲧⲏⲣⲥ ⲡⲉ ⲉϣⲧⲉⲙⲥⲁϫⲓ ⲛⲉⲙ ϩⲗⲓ ⲛ̀ⲣⲱⲙⲓ ⲟⲩⲇⲉ ⲉϩⲓⲕⲟⲧ ⲉⲟⲩⲟⲛ ⲉⲡⲧⲏⲣϥ ⲥⲁⲃⲟⲗ ⲙ̀ⲡⲟⲩⲙⲁⲛϣⲱⲡⲓ ⲛⲉⲙ ϯⲉⲕⲕⲗⲏⲥⲓⲁ. ⲧⲟⲩⲧⲣⲟⲫⲏ ⲇⲉ ⲛⲉ ⲡⲓⲱⲓⲕ ⲡⲉ ⲛⲉⲙ ⲡⲓϩⲙⲟⲩ ⲛ̀ⲥⲏⲟⲩ ⲛⲓⲃⲉⲛ ⲓⲥϫⲉⲛ ⲉⲧⲁⲩⲓ ⲉϧⲟⲩⲛ ⲉⲫⲃⲓⲟⲥ ⲛ̀ϯⲙⲉⲧⲙⲟⲛⲁⲭⲟⲥ ⲙ̀ⲡⲟⲩϫⲉⲙϯⲡⲓ ⲛ̀ⲟⲩⲁϥ ⲉⲡⲧⲏⲣϥ ⲟⲩⲇⲉ ⲟⲩⲏⲣⲡ ⲟⲩⲇⲉ ⲧⲉⲃⲧ ⲟⲩⲟⲟϩ ⲛⲁⲩⲥⲉⲕ ⲃ̅ ⲃ̅ ⲛ̀ⲥⲏⲟⲩ ⲛⲓⲃⲉⲛ. ⲟⲩⲟϩ ⲛⲁⲩⲓⲣⲓ ⲛ̀ϩⲁⲛⲧⲱⲃϩ ⲉⲩⲟϣ ⲛⲁⲩϫⲱ ⲇⲉ ⲛ̀ⲛⲟⲩⲯⲁⲗⲙⲟⲥ ⲕⲁⲧⲁ Ⲋ̅ Ⲋ̅ ⲛ̀ⲗⲉⲝⲓⲥ ⲛⲉⲙ ⲟⲩⲥⲧⲁⲩⲣⲟⲥ ⲕⲁⲧⲁ ⲡⲉⲑⲟⲥ ⲛ̀ⲛⲁϯⲤⲩⲣⲓⲁ.
Ⲁⲩϣⲱⲡⲓ ⲇⲉ ϧⲉⲛ Ϣⲓϩⲏⲧ ⲙ̀ⲡⲟⲩⲛⲁⲩ ⲉⲡϩⲟ ⲛ̀ϩⲗⲓ ⲛ̀ⲣⲱⲙⲓ ⲉⲡⲧⲏⲣϥ ⲓⲙⲏϯ ⲉⲟⲩϧⲉⲗⲗⲟ ⲛ̀ⲟⲩⲣⲓⲧ ⲉϥⲣⲱⲓⲥ ⲉⲛⲓϩⲟⲥⲉⲙ ⲉϥⲱⲗⲓ ⲙ̀ⲡⲟⲟⲩϩⲱⲃ ⲛ̀ϫⲓϫ ⲟⲩⲟϩ ⲉϥⲓⲛⲓ ⲛⲱⲟⲩ ⲙ̀ⲡⲓⲕⲟⲩϫⲓ ⲛ̀ⲱⲓⲕ ⲫⲁⲓ ⲣⲱ ⲟⲛ ⲛⲁϥⲉⲣⲇⲓⲁⲕⲟⲛⲓⲛ ⲡⲉ ⲉⲡⲓⲕⲉⲁⲃⲃⲁ Ⲙⲁⲕⲁⲣ ⲉⲑⲃⲉ ϫⲉ ⲛⲁϥⲥⲱⲟⲩⲛ ⲙ̀ⲙⲟϥ ⲣⲱ ⲡⲉ ⲓⲥϫⲉⲛ ϣⲟⲣⲡ ⲉϥϩⲏⲗ ϣⲁⲣⲟϥ ⲛ̀ⲟⲩⲙⲏϣ ⲛ̀ⲥⲟⲡ ⲉϥϭⲓ ⲙ̀ⲡⲉϥⲥⲙⲟⲩ. ⲉϣⲱⲡ ⲇⲉ ⲁⲣⲉϣⲁⲛ ⲛⲁⲓⲁⲅⲓⲟⲥ ⲓ ⲉϯⲉⲕⲕⲗⲏⲥⲓⲁ ⲛⲁⲩϥⲁⲓ ⲛ̀ⲛⲟⲩⲃⲁⲗ ⲉⲡϣⲱⲓ ⲁⲛ ⲉⲡⲧⲏⲣϥ ⲉⲛⲁⲩ ⲉⲡϩⲟ ⲛ̀ϩⲗⲓ ⲁⲗⲗⲁ ⲁⲣⲉ ⲡⲟⲩϩⲟ ⲫⲁϧⲧ ⲉⲡⲉⲥⲏⲧ ⲉϥⲙⲏⲛ ϣⲁⲧⲟⲩϩⲱⲗ ⲉⲡⲓⲥⲡⲏⲗⲉⲟⲛ ϧⲉⲛ ⲟⲩⲭⲱⲗⲉⲙ ⲛⲉⲙ ⲟⲩϯϩⲑⲏϥ ⲕⲉ ⲅⲁⲣ ⲁⲗⲏⲑⲱⲥ ⲁⲕϣⲁⲛⲛⲁⲩ ⲉⲣⲱⲟⲩ ϧⲉⲛ ⲧⲁⲓⲕⲁⲧⲁⲥⲧⲁⲥⲓⲥ ⲙ̀ⲡⲁⲓⲣⲏϯ ⲭⲛⲁϫⲟⲥ ϫⲉ ⲟⲛⲧⲱⲥ Ⲫϯ ϣⲟⲡ ϧⲉⲛ ⲛⲁⲓⲣⲱⲙⲓ ⲕⲉ ⲅⲁⲣ ⲁⲗⲏⲑⲱⲥ ϥϣⲟⲡ ⲛ̀ϧⲏⲧⲟⲩ ⲙ̀ⲫⲣⲏϯ ⲛ̀Ⲏⲗⲓⲁⲥ ⲛⲉⲙ Ⲓⲱ̅ⲁ̅ ⲡⲁⲓⲣⲏϯ ϩⲱⲟⲩ ⲛⲁⲓⲁⲅⲓⲟⲥ ⲛⲁⲣⲉ ⲡⲓⲭⲣⲱⲙ ⲛ̀ⲧⲉ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ϣⲟⲡ ⲛ̀ϧⲣⲏⲓ ⲛ̀ϧⲏⲧⲟⲩ ⲡⲉ ⲉϥⲣⲱⲕϩ ⲛ̀ⲛⲓⲉⲛⲉⲣⲅⲓⲁ ⲉⲧϩⲱⲟⲩ ⲛ̀ⲧⲉ ⲡⲓⲡ̅ⲛ̅ⲁ̅ ⲙ̀ⲡⲟⲛⲏⲣⲟⲛ ⲛⲁⲓⲉⲧⲉⲣⲡⲟⲗⲉⲙⲓⲛ ⲛⲉⲙ ⲡⲉⲛϣⲗⲟⲗ ⲛ̀ⲥⲏⲟⲩ ⲛⲓⲃⲉⲛ ϧⲉⲛ ⲟⲩⲙⲉⲧⲁⲧϣⲓⲡⲓ ⲁⲛⲟⲕ ⲅⲁⲣ ⲁⲛ ⲡⲉ ⲉⲧϫⲱ ⲙ̀ⲙⲟⲥ ⲁⲗⲗⲁ ⲁⲃⲃⲁ Ⲙⲁⲕⲁⲣ ⲡⲉ ⲡⲓⲡ̅ⲛ̅ⲁ̅ⲧⲟⲫⲟⲣⲟⲥ. ϩⲟⲧⲉ ⲡⲉϫⲁϥ ⲉⲧⲁⲓϩⲓⲕⲟⲧ ⲉⲣⲱⲟⲩ ⲙⲉⲛⲉⲛⲥⲁ ⲅ̅ϯ ⲛ̀ⲣⲟⲙⲡⲓ ϩⲓⲛⲁ ⲛ̀ⲧⲁⲉⲙⲓ ⲉⲡⲟⲩϫⲓⲛϩⲉⲙⲥⲓ ⲟⲩⲟϩ ⲉⲧⲁ ⲣⲟⲩϩⲓ ϣⲱⲡⲓ ⲡⲉϫⲱⲟⲩ ⲛⲏⲓ ϫⲉ ⲭⲛⲁϩⲱⲗ. ⲁⲛⲟⲕ ⲇⲉ ⲡⲉϫⲏⲓ ⲛⲱⲟⲩ ϫⲉ ⲙ̅ⲙⲟⲛ ⲁⲗⲗⲁ ⲁⲓⲛⲁⲉⲛⲕⲟⲧ ⲙ̀ⲡⲁⲓⲙⲁ ⲟⲩⲟϩ ⲁⲩⲭⲱ ⲛⲏⲓ ⲉϧⲣⲏⲓ ⲛ̀ⲟⲩⲑⲟⲙ ⲥⲁⲟⲩⲥⲁ ⲛ̀ⲧⲉ ⲡⲓⲥⲡⲏⲗⲉⲟⲛ ⲟⲩⲟϩ ⲁⲩⲉⲛⲕⲟⲧ ϩⲓ ⲟⲩⲙⲁ ⲟⲩⲟϩ ⲁⲩⲱⲗⲓ ⲛ̀ⲛⲟⲩϧⲱⲕ ⲙ̀ⲡⲁⲙⲑⲟ ⲁⲩⲭⲁⲩ ⲉϧⲣⲏⲓ ⲟⲩⲟϩ ⲛⲁⲩⲭⲱ ⲛ̀ⲣⲱⲟⲩ ⲡⲉ ⲉⲧⲁⲩⲉⲣ ⲫⲁⲓ ⲅⲁⲣ ⲉⲑⲃⲉ ⲁϣ ⲛ̀ⲉⲧⲓⲁ ⲉⲡⲓⲇⲏ ⲅⲁⲣ ⲡⲓⲥⲭⲏⲙⲁ ⲛ̀ⲧⲉ ⲛⲁϯⲤⲩⲣⲓⲁ ⲟⲩⲟⲛ ⲙⲁⲣϭⲛⲁϩ ⲉⲣⲱⲟⲩ ⲁⲛ ⲁⲗⲗⲁ ϩⲁⲛϩⲃⲱⲥ ⲛ̀ⲭⲁⲙⲉ ⲉⲡ ⲉⲧⲟⲩⲉⲣⲭⲟⲣⲓⲛ ⲙ̀ⲙⲱⲟⲩ. ϩⲟⲧⲉ ⲗⲟⲓⲡⲟⲛ ⲉⲧⲁ ⲛⲁⲓⲙⲁⲕⲁⲣⲓⲟⲥ ⲛⲁⲩ ⲉⲡⲟⲩⲓⲱⲧ ⲙ̀ⲡ̅ⲛ̅ⲁ̅ⲧⲟⲫⲟⲣⲟⲥ ⲁⲃⲃⲁ Ⲙⲁⲕⲁⲣ ⲉϥⲉⲣⲫⲟⲣⲓⲛ ⲙ̀ⲡⲓϧⲱⲕ ⲛⲉⲙ ϯⲙⲁⲣϭⲛⲁϩ ⲁⲩⲟⲩⲱϣ ϩⲱⲟⲩ ⲉⲙⲟϣⲓ ⲕⲁⲧⲁ ⲡⲟⲩⲓⲱⲧ ⲉⲑⲣⲟⲩⲙⲟⲣⲟⲩ ⲕⲁⲧⲁ ⲡⲉϥⲥⲙⲟⲧ ⲉⲑⲃⲉ ⲫⲁⲓ ⲁⲩⲓⲛⲓ ⲛ̀ⲛⲟⲩϧⲱⲕ ⲙ̀ⲡⲉϥⲙⲑⲟ ⲉⲃⲟⲗ ⲁⲩⲭⲁⲩ ⲉⲡⲉⲥⲏⲧ ⲉⲩⲓⲣⲓ ⲇⲉ ⲙ̀ⲫⲁⲓ ⲉⲑⲣⲉϥϣⲗⲏⲗ ⲉϫⲱⲟⲩ ϩⲓⲛⲁ ⲁⲩϣⲁⲛⲧⲱⲟⲩⲛⲟⲩ ⲛ̀ⲧⲟⲩⲙⲟⲣⲟⲩ ⲙ̀ⲙⲱⲟⲩ ⲥⲁⲧⲟⲧϥ ϫⲉ ⲁϥⲉⲙⲓ ⲉⲫⲁⲓ ϩⲓⲧⲉⲛ ⲡⲓⲡ̅ⲛ̅ⲁ̅ ⲙ̀ⲡⲣⲟⲫⲏⲧⲓⲕⲟⲛ ⲉⲧϣⲟⲡ ⲛ̀ϧⲏⲧϥ ⲛ̀ϫⲉ ⲫⲏⲉ̅ⲑ̅ⲩ̅ ⲁⲃⲃⲁ Ⲙⲁⲕⲁⲣ ⲟⲩⲟϩ ⲁϥϣⲗⲏⲗ ⲉϫⲱⲟⲩ.
Ⲁⲓⲧⲱⲃϩ ⲇⲉ ⲙ̀Ⲫϯ ⲡⲉϫⲁϥ ϩⲓⲛⲁ ⲛ̀ⲧⲉϥϭⲱⲣⲡ ⲛⲏⲓ ⲉⲃⲟⲗ ⲛ̀ⲧⲟⲩϫⲓⲛⲉⲣϩⲱⲃ ⲁⲥⲟⲩⲱⲛ ⲛ̀ϫⲉ ϯⲟⲩⲁϩⲥⲟⲓ ⲟⲩⲟϩ ⲁϥϣⲱⲡⲓ ⲛ̀ϫⲉ ⲟⲩⲱⲓⲛⲓ ⲙ̀ⲫⲣⲏϯ ⲙ̀ⲡⲓⲉϩⲟⲟⲩ. ⲛ̀ⲑⲱⲟⲩ ⲇⲉ ⲛⲁⲩⲛⲁⲩ ⲁⲛ ⲡⲉ ⲉⲡⲓⲟⲩⲱⲓⲛⲓ. ϩⲱⲥ ⲉⲓⲙⲉⲩⲓ ⲛ̀ⲑⲱⲟⲩ ϫⲉ ⲛⲁⲓⲉⲛⲟⲕⲧ ⲡⲉ ⲁⲡⲓⲛⲓϣϯ ⲕⲓⲙ ⲉⲡⲡⲓⲕⲟⲩϫⲓ ⲁⲩⲧⲱⲟⲩⲛⲟⲩ ⲁⲩⲙⲟⲣⲟⲩ ⲁⲛⲟⲕ ⲙⲉⲛ ⲛⲁⲓⲛⲁⲩ ⲉⲣⲱⲟⲩ ⲡⲉ ⲛ̀ⲑⲱⲟⲩ ⲛⲁⲩⲛⲁⲩ ⲉⲣⲟⲓ ⲁⲛ ⲡⲉ ⲁⲩϭⲱⲗⲕ ⲛ̀ⲛⲟⲩϫⲓϫ ⲉⲡϣⲱⲓ ⲉⲧⲫⲉ ⲟⲩⲟϩ ⲁⲓⲛⲁⲩ ⲉⲛⲓⲇⲉⲙⲱⲛ ⲉⲩⲛⲏⲟⲩ ⲉϫⲉⲛ ⲡⲓⲕⲟⲩϫⲓ ⲙ̀ⲫⲣⲏϯ ⲛ̀ϩⲁⲛⲁϥ ϩⲁⲛⲟⲩⲟⲛ ⲙⲉⲛ ⲉⲩⲛⲏⲟⲩ ⲉϫⲉⲛ ⲛⲉϥⲃⲁⲗ ⲛⲉⲙ ⲣⲱϥ ⲟⲩⲟϩ ⲁⲓⲛⲁⲩ ⲉⲟⲩⲁⲅⲅⲉⲗⲟⲥ ⲛ̀ⲧⲉ ⲡⲟ̅ⲥ̅. ⲉⲣⲉ ⲟⲩⲟⲛ ⲟⲩⲥⲏϥⲓ ⲛ̀ⲭⲣⲱⲙ ⲛ̀ⲧⲟⲧϥ ⲉϥⲧⲁⲕⲧⲉϭⲗⲟ ⲉⲣⲱϥ ⲉϥϭⲟϫⲓ ⲛ̀ⲥⲁ ⲛⲓⲇⲉⲙⲱⲛ ⲛⲁⲩϣⲉⲣⲧⲟⲗⲙⲁⲛ ⲁⲛ ⲡⲉ ⲉϧⲱⲛⲧ ⲉⲡⲓⲛⲓϣϯ ⲉⲡⲧⲏⲣϥ. ⲉⲣⲉ ϣⲱⲣⲡ ⲇⲉ ⲛⲁϣⲱⲡⲓ ⲁⲩⲭⲁⲩ ⲉϧⲣⲏⲓ ⲟⲛ ϩⲱⲥ ϫⲉ ⲉⲩⲛⲁⲉⲛⲕⲟⲧ. ⲁⲛⲟⲕ ⲇⲉ ϩⲱ ⲁⲓⲁⲓⲧ ⲙ̀ⲫⲣⲏϯ ϫⲉ ⲉⲓϩⲟⲣⲡ ⲛ̀ⲑⲱⲟⲩ ϩⲱⲟⲩ ⲙ̀ⲡⲁⲓⲣⲏϯ. ⲟⲩⲟϩ ⲁⲡⲓⲛⲓϣϯ ϫⲱ ⲙ̀ⲡⲁⲓⲥⲁϫⲓ ⲛ̀ⲟⲩⲱⲧ ⲛⲏⲓ ϫⲉ ⲭⲟⲩⲱϣ ⲛ̀ⲧⲉⲛϫⲱ ⲙ̀ⲡⲓⲓ̅ⲃ̅ ⲙ̀ⲯⲁⲗⲙⲟⲥ. ⲡⲉϫⲏⲓ ϫⲉ ⲥⲉ ⲟⲩⲟϩ ⲁⲡⲡⲓⲕⲟⲟⲩϫⲓ ϫⲱ ⲛ̀Ⲋ̅ ⲙ̀ⲯⲁⲗⲙⲟⲥ ⲛ̀Ⲋ̅ Ⲋ̅ ⲛ̀ⲗⲉⲝⲓⲥ ⲫⲟⲩⲁⲓ ⲛⲉⲙ ⲟⲩⲁⲗ ⲟⲩⲟϩ ⲕⲁⲧⲁ ⲗⲉⲝⲓⲥ ⲛⲁϥⲛⲏⲟⲩ ⲉⲃⲟⲗϧⲉⲛ ⲣⲱϣ ⲛ̀ϫⲉ ⲟⲩϣⲁϩ ⲛ̀ⲭⲣⲱⲙ ⲟⲩⲟϩ ⲛⲁϥⲛⲁ ⲉⲡϣⲱⲓ ⲉⲧⲫⲉ. ⲡⲁⲓⲣⲏϯ ⲟⲛ ⲡⲓⲛⲓϣϯ ϩⲱⲥⲧⲉ ⲉⲧⲁⲛⲟⲩⲱⲛ ⲛ̀ⲣⲱϥ ⲉⲉⲣⲯⲁⲗⲓⲛ ⲛⲁϥⲛⲏⲟⲩ ⲉⲃⲟⲗϧⲉⲛ ⲣⲱϥ ⲙ̀ⲫⲣⲏϯ ⲛ̀ⲟⲩⲛⲟϩ ⲛ̀ⲭⲣⲱⲙ ⲟⲩⲟϩ ⲉϥⲛⲁ ⲛ̀ⲟⲩⲕⲟⲩϫⲓ ⲛ̀ⲁⲡⲟ ⲉⲡϣⲱⲓ ⲉⲧⲫⲉ. ⲁⲛⲟⲕ ⲇⲉ ϩⲱ ⲁⲓϫⲱ ⲛ̀ⲟⲩⲕⲟⲩϫⲓ ⲛ̀ⲁⲡⲟⲥⲧⲏⲑⲏⲥ ⲉⲧⲁⲓⲛⲁⲩ ⲇⲉ ⲉⲧⲟⲩⲕⲁⲧⲁⲥⲧⲁⲥⲓⲥ ⲛⲉⲙ ⲧⲟⲩϫⲓⲛⲉⲣϩⲱⲃ ⲉⲑⲛⲁⲛⲉⲥ ⲛⲉⲙ ⲡⲓⲛⲓϣϯ ⲛ̀ϧⲙⲟⲙ ⲉⲧϣⲟⲡ ⲛ̀ϧⲏⲧⲟⲟⲩ ⲉϧⲟⲩⲛ ⲉⲪϯ ⲁⲓϫⲉⲙϩⲏⲟⲩ ⲉⲣⲱⲟⲩ ⲉⲙⲁϣⲱ ⲟⲩⲟϩ ⲥⲉⲛⲏⲟⲩ ⲉⲃⲟⲗ ⲁⲓϫⲟⲥ ϫⲉ ⲧⲱⲃϩ ⲉϫⲱⲓ. ⲛ̀ⲑⲱⲟⲩ ⲇⲉ ⲁⲩϯϩⲟ ⲉⲣⲟⲓ ⲉⲑⲣⲓϯ ⲉϫⲱⲟⲩ ⲙ̀ⲡⲓⲥⲭⲏⲙⲁ ⲟⲩⲟϩ ⲡⲁⲓⲣⲏϯ ⲁⲓⲑⲉⲧ ⲡⲟⲩϩⲏⲧ ⲁⲓⲧⲏⲓϥ ⲉϫⲱⲟⲩ ⲁⲓⲓ ⲉⲃⲟⲗ ϩⲓⲧⲟⲧⲟⲩ ϧⲉⲛ ⲟⲩϩⲓⲣⲏⲛⲏ.
Ⲓⲥ ϩⲏⲡⲡⲉ ⲟⲩⲛ ⲁⲛⲥⲱⲧⲉⲙ ⲉⲡⲓⲛⲓϣϯ ⲁⲃⲃⲁ Ⲙⲁⲕⲁⲣ ⲉϥⲧⲁⲙⲟ ⲙ̀ⲙⲟⲛ ⲣⲏⲧⲱⲥ ϫⲉ ⲁⲛⲁⲓⲙⲁⲕⲁⲣⲓⲟⲥ ⲉⲣⲡⲉⲙⲡϣⲁ ⲙ̀ⲡⲓϩⲙⲟⲧ ⲛ̀ⲧⲉ ⲡⲓⲡ̅ⲛ̅ⲁ̅ ⲙ̀ⲡⲁⲣⲁⲕⲗⲏⲧⲟⲛ ⲙ̀ⲫⲣⲏϯ ⲛ̀ⲟⲩⲭⲣⲱⲙ ⲅⲁⲣ ϧⲉⲛ ⲟⲩⲙⲉⲑⲙⲏⲓ ⲉϣⲱⲡ ⲛ̀ⲧⲁϩⲓⲧⲟⲧ ⲉϫⲉⲛ ⲛⲏⲉⲧⲁ ⲡⲓⲛⲓϣϯ ⲉⲧⲉⲙⲙⲁⲩ ϫⲟⲧⲟⲩ ⲛⲏⲓ ⲉⲑⲃⲏⲧⲟⲩ ⲛⲉⲙ ⲛⲏⲉⲧⲁⲩⲛⲁⲩ ⲉⲣⲱⲟⲩ ϩⲱ ϧⲉⲛ ⲛⲁⲃⲁⲗ ⲡⲓⲥⲁϫⲓ ⲛⲁϥⲁϣⲁⲓ ⲉⲡⲓϩⲟⲩⲟ ⲉⲑⲃⲉ ⲫⲁⲓ ⲁⲓⲭⲱ ⲛ̀ⲥⲱⲓ ⲙ̀ⲡⲓϩⲟⲩⲟ ⲉⲑⲃⲉ ⲛⲏⲉⲧⲟⲓ ⲛ̀ⲕⲟⲩϫⲓ ϧⲉⲛ ⲡⲓⲛⲁϩϯ ⲛ̀ⲧⲟⲩϣⲧⲉⲙⲉⲩⲓ ⲉϯⲙⲉⲑⲙⲏⲓ ϫⲉ ⲟⲩⲙⲉⲑⲛⲟⲩϫ ⲧⲉ ϯⲛⲁϫⲱ ⲛ̀ϩⲁⲛⲕⲟⲩϫⲓ ⲉⲃⲟⲗϧⲉⲛ ϩⲁⲛⲙⲏϣ ⲛ̀ⲧⲁϯ ⲑⲱϣ ⲉⲡⲓⲥⲁϫⲓ.
Ⲡⲓϧⲉⲗⲗⲟ ⲅⲁⲣ ⲛ̀ⲣⲱⲙⲓ ⲱⲧⲁⲛⲉⲣϣⲟⲣⲡ ⲙ̀ⲫⲓⲣⲓ ⲉⲣⲟϥ ϫⲉ ϥⲉⲣⲇⲓⲁⲕⲟⲛⲓⲛ ⲉⲛⲁⲓⲁⲅⲓⲟⲥ ⲛⲉ ⲟⲩⲙⲁⲓⲛⲟⲩϯ ⲡⲉ ⲉⲡⲓϩⲟⲩⲟ ⲟⲩⲟϩ ⲛⲉ ⲟⲩⲟⲛ ⲛ̀ⲧⲁϥ ⲛ̀ⲟⲩⲛⲓϣϯ ⲛ̀ⲛⲁϩϯ ⲉϧⲟⲩⲛ ⲉⲣⲱⲟⲩ ⲫⲁⲓ ⲟⲩⲛ ⲉⲧⲁ ⲟⲩⲙⲁⲧⲟⲓ ⲱⲗⲓ ⲛ̀ⲛⲉϥϭⲁⲙⲟⲩⲗ ⲛ̀ⲟⲩⲥⲟⲡ ⲛ̀ⲭⲃⲁ ⲟⲩⲟϩ ⲉⲧⲁ ⲡⲓⲙⲁⲧⲟⲓ ⲉⲣⲉⲡⲓⲭⲣⲓⲛ ⲉⲡⲓϧⲉⲗⲗⲟ ⲁϥⲥⲱⲟⲩⲧⲉⲛ ⲁϥϯ ⲛ̀ⲟⲩⲕⲟⲩⲣ ϧⲉⲛ ⲧⲉϥⲟⲩⲟϫⲓ ⲛ̀ⲟⲩⲓⲛⲁⲙ ⲡⲓϧⲉⲗⲗⲟ ⲇⲉ ⲙ̀ⲙⲁⲓⲛⲟⲩϯ ⲥⲁⲧⲟⲧϥ ⲁϥⲫⲱⲛϩ ⲛ̀ϯⲭⲉⲧ ⲉⲣⲟϥ ⲉϥϫⲱⲕ ⲉⲃⲟⲗ ⲛ̀ϯⲉⲛⲧⲟⲗⲏ ⲛ̀ⲧⲉ ⲡⲓⲉⲩⲁⲅⲅⲉⲗⲓⲟⲛ. ⲧⲟⲧⲉ ⲡⲓⲧⲩⲣⲁⲛⲟⲥ ⲙ̀ⲙⲁⲧⲟⲓ ⲁϥⲟⲩⲁϩⲧⲟⲧϥ ⲁϥⲥⲱⲟⲩⲧⲉⲛ ϧⲉⲛ ⲡⲓⲥⲕⲉⲩⲟⲥ ⲉⲧϧⲉⲛ ⲧⲉϥϫⲓϫ ⲉϧⲟⲩⲛ ϧⲉⲛ ⲡϩⲟ ⲙ̀ⲡⲓϧⲉⲗⲗⲟ ⲁϥⲫⲱⲣⲕ ⲛ̀ⲡⲉϥⲃⲁⲗ ⲛ̀ϫⲁϭⲉ. ⲡⲓϧⲉⲗⲗⲟ ⲇⲉ ⲁϥϣⲉⲡϩⲙⲟⲧ ⲛ̀ⲧⲉⲛ Ⲫϯ ϫⲉ ⲁϥⲙ̀ⲡϣⲁ ⲣⲱ ⲁⲩϣⲱϥ ⲙ̀ⲡⲉϥⲃⲁⲗ ⲉⲑⲃⲉ ϯⲉⲛⲧⲟⲗⲏ ⲛ̀ⲧⲉ ⲡⲓⲉⲩⲁⲅⲅⲉⲗⲓⲟⲛ ⲛ̀ⲧⲉ ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅.
Ⲁⲥϣⲱⲡⲓ ⲇⲉ ⲛⲁϥ ⲟⲛ ⲛ̀ⲟⲩⲥⲟⲡ ⲉⲑⲣⲉϥⲱⲗⲓ ⲛ̀ⲛⲓⲕⲟⲩϫⲓ ⲛ̀ϩⲱⲃ ⲛ̀ϫⲓϫ ⲛ̀ⲧⲉ ⲛⲁⲓⲙⲁⲕⲁⲣⲓⲟⲥ ⲉⲬⲏⲙⲓ. ϫⲉ ϩⲓⲛⲁ ⲛ̀ⲧⲉϥⲑⲁⲙⲓⲟ ⲙ̀ⲡⲓⲕⲟⲟⲩϫⲓ ⲛ̀ⲱⲓⲕ ⲛⲱⲟⲩ ⲕⲁⲧⲁ ⲧⲉϥⲥⲩⲛⲏⲑⲓⲁ ⲫⲁⲓ ⲇⲉ ⲛⲉ ⲟⲩⲣⲉⲙϫⲉⲡⲣⲟⲙⲉⲛⲥⲓⲛ ϧⲉⲛ ⲡⲑⲟϣ Ⲁⲣⲃⲁⲧ ⲉϥϣⲟⲡ ϧⲉⲛ ⲡⲓϯⲙⲓ ⲉⲧⲟⲩⲙⲟⲩϯ ⲉⲣⲟϥ ϫⲉ Ⲡⲓⲛⲟⲩⲃ. ⲙⲉⲛⲉⲛⲥⲁ ⲑⲣⲉϥⲑⲁⲙⲓⲟ ⲇⲉ ⲙ̀ⲡⲓⲕⲟⲩϫⲓ ⲛ̀ⲱⲓⲕ ⲛ̀ⲧⲉ ⲛⲓⲁⲅⲓⲟⲥ ⲁϥⲉⲡⲧ ⲛⲓϫⲁⲙⲟⲩⲗ ⲁϥⲓ ⲉϢⲓϩⲏⲧ ⲉⲧⲁϥⲫⲟϩ ⲇⲉ ⲉⲡⲓⲙⲁⲛⲓ ⲉⲡⲉⲥⲏⲧ ⲉϧⲣⲏⲓ ⲉⲡⲓϩⲉⲗⲟⲥ ⲟⲩⲟϩ ϩⲱⲥ ⲉϥⲙⲟϣⲓ ⲛⲉⲙ ⲡⲓϫⲁⲙⲟⲩⲗ ⲁϥⲫⲟϩ ⲉⲟⲩⲙⲁ ⲉϥⲟⲓ ⲛ̀ϩⲁⲗⲙⲓ ⲟⲩⲟϩ ⲕⲁⲧⲁ ⲟⲩⲥⲩⲛⲁⲛⲧⲏⲙⲁ ⲛ̀ⲧⲉ ⲡⲓϫⲁϫⲓ ⲙ̀ⲙⲟⲥϯ ⲡⲉⲑⲛⲁⲛⲉϥ ⲛⲓⲃⲉⲛ ⲁϥⲥⲗⲁϯ ⲛ̀ϫⲉ ⲡⲓϫⲁⲙⲟⲩⲗ
ⲁϥϩⲉⲓ ⲟⲩⲟϩ ⲁⲧⲉϥⲫⲁⲧ ⲃ̅ϯⲕⲱϣ ⲉⲡⲡⲓϣⲁⲣ ⲙ̀ⲙⲁⲩⲁⲧϥ ⲉⲑⲙⲟⲛⲓ. ϧⲉⲛ ⲡϫⲓⲛⲑⲣⲉ ⲫⲁⲓ ϣⲱⲡⲓ ⲁⲡⲓϧⲉⲗⲗⲟ ⲣⲓⲙⲓ ϧⲉⲛ ⲟⲩⲉⲛϣⲁϣⲓ ⲛⲉⲙ ⲟⲩⲛⲓϣϯ ⲛ̀ⲙⲕⲁϩ ⲛ̀ϩⲏⲧ ϩⲱⲥⲧⲉ ⲛ̀ⲧⲉϥⲫⲱϧ ⲛ̀ⲛⲉϥϩⲃⲱⲥ ⲟⲩⲟϩ ⲛ̀ⲧⲉϥⲧⲁⲗⲉ ⲕⲁϩⲓ ⲉϫⲉⲛ ⲧⲉϥⲁⲫⲉ ⲉⲑⲃⲉ ϫⲉ ⲛⲉ ⲡⲓϫⲁⲙⲟⲩⲗ ⲫⲱϥ ⲁⲛ ⲡⲉ ⲉⲑⲃⲉ ⲫⲁⲓ ⲁϥⲉⲣⲙⲕⲁϩⲛ̀ϩⲏⲧ ⲟⲩⲟϩ ⲁϥⲣⲓⲙⲓ. ⲓⲧⲁ ⲁϥϣⲉⲡϩⲙⲟⲧ ⲛ̀ⲧⲉⲛ Ⲫϯ ⲉϥϫⲱ ⲙ̀ⲙⲟⲥ ϫⲉ ϯϣⲉⲡϩⲙⲟⲧ
ⲛ̀ⲧⲟⲧⲕ ⲡⲁϭⲟⲓⲥ Ⲓⲏⲥⲟⲩⲥ Ⲡⲓⲭⲣⲓⲥⲧⲟⲥ Ⲫϯ ⲛ̀ⲛⲓⲁⲅⲓⲟⲥ. ⲟⲩⲟϩ ⲉⲧⲁϥⲭⲁ ⲡⲓϫⲁⲙⲟⲩⲗ ⲇⲉ ⲉϥⲥⲏϯ ⲉⲃⲟⲗ ϩⲓϫⲉⲛ ⲡⲕⲁϩⲓ ⲁϥϩⲱⲗ ⲉⲡⲓⲥⲡⲏⲗⲉⲟⲛ ⲛ̀ⲧⲉ ⲛⲁⲓⲙⲁⲕⲁⲣⲓⲟⲥ ⲁϥⲧⲁⲙⲱⲟⲩ ⲉⲫⲏⲉⲧⲁϥϣⲱⲡⲓ ⲙ̀ⲙⲟϥ ⲛⲉⲙ ⲡⲓϫⲁⲙⲟⲩⲗ. ⲉⲡⲓⲇⲏ ⲟⲩⲛ ⲙ̀ⲡⲟⲩⲉⲙⲓ ⲉⲡⲧⲁϫⲣⲟ ⲙ̀ⲡⲓⲥⲁϫⲓ ⲁⲗⲗⲁ ϧⲉⲛ ⲡⲡⲓϫⲓⲛⲑⲣⲟⲩⲛⲁⲩ ⲉⲣⲟϥ ⲉϥⲉⲣⲧⲁⲗⲉⲡⲱⲣⲓⲛ ⲁⲩⲙⲟϣⲓ ⲛⲉⲙⲁϥ. ⲉⲧⲁⲩⲫⲟϩ ⲉⲡⲓⲙⲁ ⲉⲧⲓ ⲉⲩϩⲓ ⲫⲟⲩⲉⲓ ⲙ̀ⲡⲓϫⲁⲙⲟⲩⲗ ⲛ̀ⲟⲩⲕⲟⲩϫⲓ ⲁⲡⲓϧⲉⲗⲗⲟ ⲣⲓⲙⲓ ⲉⲁϥⲛⲁⲩ ⲉⲣⲟϥ. ⲛ̀ⲑⲱⲟⲩ ⲇⲉ ϩⲱⲟⲩ ⲛⲏⲉⲑⲟⲩⲁⲃ ϧⲉⲛ ⲡϫⲓⲛⲑⲣⲟⲩⲛⲁⲩ ⲉⲡⲓϫⲁⲙⲟⲩⲗ
ⲉϥⲣⲁϧⲧ ⲉⲡⲉⲥⲏⲧ ϩⲓϫⲉⲛ ⲡⲕⲁϩⲓ ⲁⲩⲟϩⲓ ⲉⲣⲁⲧⲟⲩ ⲁⲩⲧⲱⲃϩ ⲙ̀Ⲫϯ ⲟⲩⲟϩ ϧⲉⲛ ⲡϫⲓⲛⲑⲣⲟⲩϧⲱⲛⲧ ⲉⲣⲟϥ ⲁϥⲉⲣϩⲟϯ ⲁϥⲉϣϧⲣⲱⲟⲩ ⲉⲃⲟⲗ ⲁϥⲧⲉⲙⲣⲱϥ ⲉⲡⲓⲕⲁϩⲓ ϩⲱⲥ ⲉϥⲟⲩⲱϣⲧ ⲛ̀ⲛⲓⲁⲅⲓⲟⲥ ⲡⲉϫⲱⲟⲩ ⲇⲉ ⲙ̀ⲡⲓϫⲁⲙⲟⲩⲗ ϫⲉ ⲙ̀ⲡⲉⲣⲉⲣϩⲟϯ ⲁⲗⲗⲁ ⲧⲱⲛⲕ ⲟϩⲓ ⲉⲣⲁⲧⲕ ϧⲉⲛ ϯϫⲟⲙ ⲛ̀ⲧⲉ ⲫⲏⲉⲧⲁϥⲧⲱⲛϥ ⲉⲃⲟⲗϧⲉⲛ ⲛⲏⲉⲑⲙⲱⲟⲩⲧ Ⲓⲏⲥⲟⲩⲥ Ⲡⲓⲭⲣⲓⲥⲧⲟⲥ Ⲫϯ ⲛ̀ⲛⲓⲭⲣⲓⲥⲧⲓⲁⲛⲟⲥ.
Ⲟⲩⲟϩ ⲫⲁⲓ ⲉⲧⲁⲩϫⲟϥ ⲁⲩϥⲁⲓ ⲛ̀ⲛⲟⲩⲃⲁⲗ ⲉⲡϣⲱⲓ ⲉⲧⲫⲉ ⲉⲩϫⲱ ⲙ̀ⲙⲟⲥ ϫⲉ Ⲫϯ ⲙ̀ⲡⲉⲛⲓⲱⲧ ⲁⲃⲃⲁ Ⲙⲁⲕⲁⲣ ⲥⲱⲧⲉⲙ ⲉⲣⲟⲛ ⲉⲛⲧⲱⲃϩ ⲙ̀ⲙⲟⲕ ⲡⲓⲙⲁⲓⲣⲱⲙⲓ ϧⲉⲛ ⲟⲩⲉⲝⲁⲡⲓⲛⲁ ⲇⲉ ⲁϥϥⲟϫϥ ⲉⲡϣⲱⲓ ⲛ̀ϫⲉ ⲡⲓϫⲁⲙⲟⲩⲗ ⲉϥⲟϩⲓ ⲉⲣⲁⲧϥ ⲉϫⲉ ⲛⲉϥϭⲁⲗⲁⲩϫ ⲉϥⲟⲩⲟϫ ⲙ̀ⲫⲣⲏϯ ⲓⲥϫⲉⲕ ⲙ̀ⲡⲉϥϩⲉⲓ ⲉⲡⲧⲏⲣϥ ⲡⲓϧⲉⲗⲗⲟ ⲇⲉ ⲉϥⲟⲩⲱϣⲧ ⲛ̀ⲛⲓⲁⲅⲓⲟⲥ ⲉϥϫⲱ ⲙ̀ⲙⲟⲥ ϫⲉ ϥⲥⲙⲁⲣⲱⲟⲩⲧ ⲛ̀ϫⲉ Ⲓⲏ̅ⲥ̅ Ⲡⲭ̅ⲥ̅ ⲫⲏⲉⲧϣⲟⲡ ϧⲉⲛ ⲑⲏⲛⲟⲩ. ⲟⲩⲟϩ ⲉⲧⲓ ⲉⲩⲙⲟϣⲓ ⲉⲡⲓⲙⲁⲛϣⲱⲡⲓ ⲉⲩⲥⲟⲡ ⲁ ⲫⲏⲉ̅ⲑ̅ⲩ̅ Ⲇⲟⲙⲉⲧⲓⲟⲥ ⲛⲁⲩ ⲉⲡϩⲟ ⲙ̀ⲡⲡⲓϧⲉⲗⲗⲟ ⲉϥⲙⲉϩ ⲛ̀ⲓⲧⲉⲛ ⲉⲑⲃⲉ ⲡⲓⲛⲁⲩ ⲉⲧⲁϥⲧⲁⲗⲉ ⲕⲁϩⲓ ⲉϫⲉⲛ ⲧⲉϥⲁⲫⲉ ϧⲉⲛ ⲡϫⲓⲛⲑⲣⲉ ⲡⲓϫⲁⲙⲟⲩⲗ ϩⲉⲓ ⲛ̀ⲧⲟⲧϥ. ⲁⲡⲓⲁⲅⲓⲟⲥ Ⲇⲟⲙⲉⲧⲓⲟⲥ ⲁⲙⲟⲛⲓ ⲙ̀ⲡⲓⲗⲁⲕϩ ⲛ̀ⲧⲉ ⲡⲓⲫⲣⲟⲕ ⲉⲧⲧⲟⲓ ⲉϫⲱϥ ϩⲱⲥ ⲉϥϥⲱϯ ⲛ̀ⲥⲁ ⲡϩⲟ ⲙ̀ⲡⲓϧⲉⲗⲗⲟ ⲛ̀ⲑⲟϥ ⲇⲉ ϩⲱϥ ⲉⲃⲟⲗϩⲓⲧⲉⲛ ⲡⲉϥⲛⲓϣϯ ⲛ̀ⲛⲁϩϯ ⲉϧⲟⲩⲛ ⲉⲣⲱⲟⲩ ⲛⲉⲙ ϯϣⲫⲏⲣⲓ ⲉⲧⲁⲩⲛⲁⲩ ⲉⲣⲟⲥ ⲉⲧⲁⲥϣⲱⲡⲓ ⲉⲃⲟⲗϩⲓⲧⲉⲛ ⲛⲓⲁⲅⲓⲟⲥ ⲉ̅ⲑ̅ⲩ̅ ⲁϥⲁⲙⲟⲛⲓ ⲛ̀ϫⲓϫ ⲙ̀ⲡⲓⲙⲁⲕⲁⲣⲓⲟⲥ ⲁϥⲭⲁⲥ ⲉϫⲉⲛ ⲡⲉϥⲃⲁⲗ ⲉⲑⲙⲟⲕϩ ϩⲱⲥ ⲉϥⲛⲁϭⲓ ⲉⲡⲉϥⲥⲙⲟⲩ ⲟⲩⲟϩ ⲉⲧⲁ ⲧϫⲓϫ ⲙ̀ⲫⲏⲉ̅ⲑ̅ⲩ̅ ϭⲟϩ ⲉⲡⲉϥⲃⲁⲗ ⲥⲁⲧⲟⲧϥ ⲁϥⲛⲁⲩ ⲙ̀ⲃⲟⲗ.
Ⲡⲓϧⲉⲗⲗⲟ ⲇⲉ ⲛ̀ⲟⲩⲣⲓⲧ ⲉⲧⲉ ⲡⲓⲙⲁⲛϫⲁⲙⲟⲩⲗ ⲡⲉ ⲁϥⲉⲣϣⲫⲏⲣⲓ ⲙ̀ⲫⲏⲉⲧⲁϥϣⲱⲡⲓ ⲟⲩⲙⲟⲛⲟⲛ ϫⲉ ⲁⲩⲧⲟⲩϫⲉ ⲡⲓϫⲁⲙⲟⲩⲗ ⲁⲗⲗⲁ ϫⲉ ⲁϥⲛⲁⲩ ⲙ̀ⲃⲟⲗ ⲥⲁⲧⲟⲧϥ ϧⲉⲛ ⲡϫⲓⲛⲑⲣⲉϥϩⲓ ⲧϫⲓϫ ⲙ̀ⲡⲓⲁⲅⲓⲟⲥ ⲉϫⲉⲛ ⲡⲉϥⲃⲁⲗ ⲟⲩⲟϩ ⲁϥϯⲱⲟⲩ ⲙ̀Ⲫϯ ⲉⲙⲁϣⲱ ⲉϩⲣⲏⲓ ϯⲇⲱⲣⲉⲁ ⲉⲧⲁⲥⲧⲁϩⲟϥ ⲉⲩϫⲱ ⲙ̀ⲙⲟⲥ ϫⲉ ⲁⲛⲁⲩ ⲙ̀ⲡⲉⲣⲧⲁⲙⲉ ϩⲗⲓ ⲉⲫⲁⲓ ⲟⲩⲟϩ ⲟⲛ ⲡⲉϫⲱⲟⲩ ⲛⲁϥ ϫⲉ ⲙ̀ⲡⲉⲣⲙⲉⲩⲓ ϫⲉ ⲉⲧⲁ ⲡⲓⲟⲩϫⲁⲓ ⲧⲁϩⲟⲕ ⲉⲑⲃⲏⲧⲉⲛ ⲁⲛⲟⲛ ⲅⲁⲣ ⲁⲛⲟⲛ ϩⲁⲛⲣⲱⲙⲓ ⲛ̀ⲣⲉϥⲉⲣⲛⲟⲃⲓ ⲁⲗⲗⲁ ⲉⲧⲁ ⲫⲁⲓ ϣⲱⲡⲓ ⲉⲃⲟⲗϩⲓⲧⲉⲛ ⲧϫⲟⲙ ⲙ̀Ⲡⲭ̅ⲥ̅. ⲛ̀ⲑⲟϥ ⲇⲉ ⲉⲛⲁϥ ⲟⲩⲟϩ ⲛⲓⲕⲟⲩϫⲓ ⲛ̀ⲱⲓⲕ ⲉⲃⲟⲗ ⲛⲱⲟⲩ ⲁϥⲧⲁⲥⲑⲟ ⲙ̀ⲡⲉϥⲙⲁⲛⲉⲣϩⲱⲃ ϧⲉⲛ ⲡⲓϩⲟⲥⲉⲙ ⲟⲩⲟϩ ⲉⲧⲁ ⲛⲉϥϣⲫⲏⲣ ⲛⲁⲩ ⲉⲣⲟϥ ⲉⲧⲁ ⲡⲉϥⲃⲁⲗ ⲟⲩⲱⲛ ⲁⲩⲉⲣϣⲫⲏⲣⲓ ⲉⲙⲁϣⲱ ⲟⲩⲟϩ ⲛⲁⲩϣⲓⲛⲓ ⲙ̀ⲙⲟϥ ⲡⲉϫⲉ ⲡⲱⲥ ⲁⲕⲛⲁⲩ ⲙ̀ⲃⲟⲗ. ⲛ̀ⲑⲟϥ ⲇⲉ ⲁϥⲧⲁⲙⲱⲟⲩ ϫⲉ ⲛⲓⲙⲁⲑⲏⲧⲏⲥ ⲛ̀ⲧⲉ ⲁⲃⲃⲁ Ⲙⲁⲕⲁⲣ ⲛⲉ ⲉⲧⲁⲩⲧⲁⲗϭⲟⲓ ⲟⲩⲟϩ ⲟⲩⲟⲛ ⲛⲓⲃⲉⲛ ⲉⲧⲁⲩⲥⲱⲧⲉⲙ ⲁⲩϯⲱⲟⲩ ⲙ̀Ⲫϯ. ⲁⲛⲟⲕ ⲅⲁⲣ ϩⲱ ϧⲉⲛ ⲡϫⲓⲛⲑⲣⲓⲥⲱⲧⲉⲙ ⲉⲡⲁⲓⲥⲁϫⲓ ⲙⲉⲛⲉⲛⲥⲁ ⲑⲣⲟⲩⲕⲏⲛ ⲉⲙⲧⲟⲛ ⲙ̀ⲙⲱⲟⲩ ⲁⲓϣⲓⲛⲓ ⲛ̀ⲧⲟⲧϥ ⲙ̀ⲡⲓⲛⲓϣϯ ⲁⲃⲃⲁ Ⲙⲁⲕⲁⲣ ϩⲓⲛⲁ ⲛ̀ⲧⲁⲉⲙⲓ ⲉⲡⲓⲧⲁϫⲣⲟ ⲉⲓϫⲱ ⲙ̀ⲙⲟⲥ ⲛⲁϥ ⲙ̀ⲡⲁⲓⲣⲏϯ ϫⲉ ⲡⲁⲓⲱⲧ ⲉ̅ⲑ̅ⲩ̅ ⲁⲓⲥⲱⲧⲉⲙ ⲉⲑⲃⲉ ⲛⲁⲓⲙⲁⲕⲁⲣⲓⲟⲥ ϫⲉ ⲁⲩⲟⲩⲱⲛ ⲙ̀ⲫⲃⲁⲗ ⲛ̀ⲟⲩⲃⲉⲗⲗⲉ ⲁⲛ ⲧⲁⲫⲙⲏ ⲧⲉ ⲡⲉϫⲁϥ ⲛⲏⲓ ϫⲉ ⲁϩⲁ ⲟⲩⲙⲉⲑⲙⲏⲓ ⲡⲉ. ⲁⲛⲟⲕ ⲇⲉ ⲡⲉϫⲏⲓ ⲛⲁϥ ϩⲱⲥ ⲉⲓⲉⲣϣⲫⲏⲣⲓ ϫⲉ ⲟⲛⲧⲱⲥ ⲡⲁⲓϩⲱⲃ ⲟⲩⲛⲓϣϯ ⲡⲉ ⲁϥⲉⲣⲟⲩⲱ ⲇⲉ ⲡⲉϫⲁϥ ⲛⲏⲓ ϫⲉ ⲙ̀ⲙⲟⲛ ⲡⲁϣⲏⲣⲓ ⲫⲁⲓ ⲟⲩⲛⲓϣϯ ⲛ̀ϩⲱⲃ ⲡⲉ ⲕⲁⲧⲁ ⲑⲙⲁⲓⲏ ⲙ̀ⲡⲓⲛⲓϣϯ ⲛ̀ϩⲙⲟⲧ ⲉⲧⲁⲩϭⲓⲧϥ ⲉⲃⲟⲗϩⲓⲧⲉⲛ Ⲫϯ ⲕⲉ ⲅⲁⲣ ⲁⲩⲉⲣⲡⲉⲙⲡϣⲁ ⲛ̀ϯϫⲟⲙ ⲉⲧⲭⲏ ⲛⲉⲙ Ⲏⲗⲓⲁⲥ ⲛⲉⲙ Ⲓⲱ̅ⲁ̅ ⲁⲠⲭ̅ⲥ̅ ϯⲙⲡⲉϥⲉⲣϣⲓϣⲓ ⲛⲱⲟⲩ ⲙ̀ⲫⲣⲏϯ ⲛ̀ⲛⲉⲇⲁⲡⲟⲥⲧⲟⲗⲟⲥ ⲉⲑⲃⲉ ϫⲉ ⲙ̀ⲡⲟⲩⲕⲱϯ ⲛ̀ⲥⲁ ⲡⲱⲟⲩ ⲧⲏⲣϥ ⲛ̀ⲧⲉ ⲡⲁⲓⲕⲟⲥⲙⲟⲥ ⲉⲑⲛⲁⲧⲁⲕⲟ ⲉⲑⲃⲉ ⲡⲱⲟⲩ ⲙ̀ⲫⲏⲉⲧⲁⲩⲉⲣϩⲉⲗⲡⲓⲥ ⲉⲣⲟϥ Ⲡⲭ̅ⲥ̅ ⲕⲉ ⲅⲁⲣ ⲁⲩⲉⲣ ⲙ̀ⲫⲣⲏϯ ⲛ̀ⲟⲩϣⲁϩ ⲛ̀ⲭⲣⲱⲙ ⲉϥϯⲙⲟⲩⲉ ⲉⲙⲁϣⲱ ϩⲱⲥ ⲇⲉ ϣⲁ ⲉϧⲣⲏⲓ ⲉⲡⲓⲕⲉⲛⲓϥⲓ ⲉⲑⲛⲏⲟⲩ ⲉⲃⲟⲗϧⲉⲛ ⲣⲱⲟⲩ ⲟⲩⲭⲣⲱⲙ ⲉϥⲙⲟϩ ⲡⲉ ϩⲱⲥⲧⲉ ⲁⲩϣⲁⲛⲟⲩⲱⲛ ⲛ̀ⲣⲱⲟⲩ ⲉⲉⲣⲡⲣⲟⲥⲉⲩⲭⲉⲥⲑⲉ ⲉⲣⲉ ⲡⲓϣⲁϩ ⲛⲏⲟⲩ ⲉⲃⲟⲗϧⲉⲛ ⲣⲱⲟⲩ ⲙ̀ⲫⲣⲏϯ ⲛ̀ⲟⲩⲥⲉⲧⲉⲃⲣⲏϫ ⲉϥⲉⲣⲟⲩⲱⲓⲛⲓ ϣⲁ ⲉϩⲣⲏⲓ ⲉⲧⲫⲉ. ⲗⲟⲓⲡⲟⲛ ⲡⲁϣⲏⲣⲓ ⲙ̀ⲡⲉⲣⲉⲣⲁⲑⲛⲁϩϯ ⲉⲛⲏ ⲧⲏⲣⲟⲩ ⲉⲧⲁⲕⲥⲟⲑⲙⲟⲩ ⲉⲑⲃⲏⲧⲟⲩ. ⲁⲛⲟⲕ ⲇⲉ ⲁⲟⲩⲱϣⲧ ⲛ̀ⲛⲉϥϫⲓϫ ⲉ̅ⲑ̅ⲩ̅ ⲉⲓϯⲱⲟⲩ ⲙ̀Ⲡⲭ̅ⲥ̅ ⲫⲏⲉⲧⲓⲣⲓ ⲛ̀ⲛⲓϣⲫⲏⲣⲓ ϧⲉⲛ ⲛⲏⲉⲧⲓⲣⲓ ⲙ̀ⲡⲉϥⲟⲩⲱϣ.
Ⲓⲧⲁ ⲙⲉⲛⲉⲛⲥⲁ ⲛⲁⲓ ⲁⲥⲣⲁⲛⲁⲥ ⲛ̀ϯⲙⲉⲧⲙⲁⲓⲣⲱⲙⲓ ⲛ̀ⲧⲉ Ⲫϯ ⲉϯⲙⲧⲟⲛ ⲛ̀ⲛⲉϥⲉⲃⲓⲁⲓⲕ ⲟⲩⲟϩ ⲉⲟⲩⲟⲑⲃⲟⲩ ⲉⲃⲟⲗϧⲉⲛ ⲡⲁⲓⲕⲟⲥⲙⲟⲥ ⲛ̀ⲉⲫⲗⲏⲟⲩ ⲛⲉⲙ ⲛⲉϥϩⲟϫϩⲉϫ ⲙ̀ⲡⲣⲟⲥⲟⲩⲥⲏⲟⲩ ⲟⲩⲟϩ ⲛ̀ⲧⲉϭⲓⲧⲟⲩ ⲉϧⲟⲩⲛ ⲉⲛⲓⲙⲁⲓ ⲙ̀ⲙⲧⲟⲛ ⲛ̀ⲉⲡⲟⲩⲣⲁⲛⲓⲟⲛ ⲉⲑⲟⲩⲟϣⲥ ⲉⲃⲟⲗ ϧⲉⲛ ⲡⲓⲟⲩⲛⲟϥ ⲛⲉⲙ ⲡⲓⲑⲉⲗⲏⲗ ⲡⲓⲙⲁ ⲉⲧⲁϥⲫⲱⲧ ⲉⲃⲟⲗⲛ̀ϧⲏⲧϥ ⲛ̀ϫⲉ ⲛ̀ⲓⲙⲕⲁϩⲛ̀ϩⲏⲧ ⲛⲉⲙ ϯⲗⲩⲧⲏ ⲛⲉⲙ ⲡⲓϥⲓⲁϩⲟⲙ. ϧⲉⲛ ⲡⲓⲉϩⲟⲟⲩ ⲟⲩⲛ ⲉ̅ⲑ̅ⲩ̅ ⲛ̀ⲧⲉ ⲡϣⲁⲓ ⲛ̀ⲧⲉ ⲡⲓⲫⲁⲛⲓⲁ ⲉⲧⲉ ⲡⲁϣⲁⲓ ⲛ̀Ⲧⲱⲃⲓ ⲡⲉ ⲁϥⲉⲣϩⲏⲧⲥ ⲛ̀ϫⲉ ⲡⲓⲙⲁⲕⲁⲣⲓⲟⲥ Ⲙⲁⲝⲓⲙⲟⲥ ⲛ̀ⲉⲛⲕⲟⲧ ⲁϥϣⲱⲛⲓ ⲁϥⲁⲙⲟⲛⲓ ⲙ̀ⲙⲟϥ ⲛ̀ϫⲉ ⲟⲩϧⲙⲟⲙ ⲉϥⲟϣ ϩⲟⲧⲉ ⲟⲩⲛ ⲉⲧⲁϥϩⲣⲟϣ ϧⲉⲛ ⲡⲓϣⲱⲛⲓ ⲡⲉϫⲁϥ ϫⲉ ⲁⲣⲓ ϯⲁⲅⲁⲡⲏ ⲙⲟⲩϯ ⲛⲏⲓ ⲉⲡⲉⲛⲓⲱⲧ ⲁⲃⲃⲁ Ⲙⲁⲕⲁⲣ. ⲁⲛⲟⲕⲇⲉ ⲁⲓϣⲉⲛⲏⲓ ⲁⲓⲙⲟⲩϯ ⲉⲣⲟϥ. ⲓⲧⲁ ⲙⲉⲛⲉⲛⲥⲁ ⲑⲣⲉϥϩⲱⲧⲡ ⲛ̀ϫⲉ ⲫⲣⲏ ⲡⲉϫⲁϥ ⲛⲁⲛ ϫⲉ ⲁϣⲛ̀ⲛⲁⲩⲡⲉ ⲫⲁⲓ. ⲁⲛⲟⲛ ⲇⲉ ⲁⲛⲧⲁⲙⲟϥ ϫⲉ ⲡϫⲱⲕ ⲙ̀ⲡⲓⲉϩⲟⲟⲩ ⲡⲉ. ⲛ̀ⲑⲟϥ ⲇⲉ ⲡⲉϫⲁϥ ⲛⲁⲛ ϫⲉ ⲉⲧⲓ ⲕⲉⲕⲟⲩϫⲓ ϯⲛⲁϣⲉⲛⲏⲓ ⲉⲡⲁⲙⲁⲙⲙⲧⲟⲛ. ⲉⲣⲉ ⲡⲓⲉϫⲱⲣϩ ⲇⲉ ⲛⲁϣⲡⲓ ⲡⲉϫⲉ ⲡⲉⲛⲓⲱⲧ ⲁⲃⲃⲁ Ⲙⲁⲕⲁⲣ ⲛⲁⲛ ϫⲉ ϭⲉⲣⲟ ⲡⲓϧⲏⲃⲥ ⲟⲩⲟϩ ⲁⲛϭⲉⲣⲱϥ. ⲧⲟⲧⲉ ⲡⲓⲙⲁⲕⲁⲣⲓⲟⲥ Ⲙⲁⲝⲓⲙⲟⲥ ⲁⲩϩⲱⲗⲉⲙ ⲡⲉϥⲛⲟⲩⲥ ⲉϩⲣⲏⲓ ⲉⲧⲫⲉ ⲟⲩⲟϩ ⲛⲁϥϫⲱ ⲙ̀ⲙⲟⲥ ⲡⲉϫⲉ ⲟⲩⲱⲣⲡ ⲙ̀ⲡⲉⲕⲟⲩⲱⲓⲛⲓ ⲛⲉⲙ ⲧⲉⲕⲙⲉⲑⲙⲏⲓ ⲱ ⲡⲁⲛⲟⲩϯ ⲛ̀ⲧⲟⲩϭⲓⲙⲱⲓⲧ ϧⲁϫⲱⲓ ϩⲓ ⲡⲓⲙⲱⲓⲧ ϫⲉ ⲟⲩⲏⲓ ϯⲛⲁϩϯ ϫⲉ .ⲛⲁⲥⲟⲩⲧⲉⲛ ⲡⲁⲙⲱⲓⲧ ⲟⲩⲟϩ ⲛ̀ⲧⲉⲕⲛⲁϩⲙⲉⲧ ⲛ̀ⲧⲟⲧⲟⲩ ⲛ̀ⲧⲉ ⲛⲓⲝⲟⲩⲥⲓⲁ ⲛ̀ⲧⲉ ⲡⲭⲁⲕⲓ ⲙ̀ⲡⲁⲏⲣ ⲛ̀ⲧⲉ ⲛⲓⲡ̅ⲛ̅ⲁ̅. ⲥⲟⲃϯ ⲛ̀ⲛⲁⲛⲁⲩⲃⲉⲛ ϩⲓ ⲡⲉⲕⲙⲱⲓⲧ ⲡⲁⲛⲟⲩϯ ϩⲓⲛⲁ ⲛ̀ⲧⲁⲓ ϣⲁⲣⲟⲕ ⲁⲧϭⲛⲉ ⲕⲱⲗⲩⲥⲓⲥ ϣⲱⲡⲓ ⲛⲏⲓ ⲛ̀ⲟⲩϩⲉⲗⲡⲡⲓⲥ ⲛ̀ⲧⲉ ⲟⲩϫⲟⲙ Ⲓⲏ̅ⲥ̅ ⲡⲁⲛⲟⲩϯ ϫⲉ ⲛⲑⲟⲕ ⲡⲉ ⲡⲁⲟⲩⲱⲓⲛⲓ ⲛⲉⲙ ⲡⲁⲛⲟϩⲉⲙ ⲁⲓⲛⲁⲉⲣϩⲟϯ ⲁⲛⲟⲕ ϧⲁⲧϩⲏ ⲛ̀ⲛⲓⲙ. ⲙⲉⲛⲉⲛⲥⲁ ⲛⲁⲓ ⲁϥⲭⲁⲣⲱϥ ⲛ̀ⲟⲩⲕⲟⲩϫⲓ ⲟⲩⲟϩ ⲡⲁⲗⲓⲛ ⲡⲁϫϥ ϫⲉ ⲧⲉⲛⲑⲏⲛⲟⲩ ⲙⲁⲣⲟⲛ ⲉⲃⲟⲗ ⲧⲁⲓ ϩⲏⲡⲡⲉ ⲓⲥ ⲛⲓⲁⲡⲟⲥⲧⲟⲗⲟⲥ ⲛⲉⲙ ⲛⲓⲡⲣⲟⲫⲏⲧⲏⲥ ⲁⲩⲓ ⲉⲟⲗⲧ ⲉⲃⲟⲗ ⲧⲁⲓ. ⲗⲟⲓⲡⲟⲛ ⲁϥⲭⲁⲣⲱϥ ⲙⲉⲛⲉⲛⲥⲁ ⲕⲉⲕⲟⲩϫⲓ ⲁⲫⲏⲉ̅ⲑ̅ⲩ̅ ⲁⲃⲃⲁ Ⲙⲁⲕⲁⲣ ⲛⲁⲩ ⲉⲡⲭⲱⲣⲁ ⲛ̀ⲧⲉ ⲛⲏⲉ̅ⲑ̅ⲩ̅ ⲁⲩⲓ ⲛ̀ⲥⲱϥ ⲥⲁⲧⲟⲧϥ ⲁϥⲧⲱⲛϥ ⲛ̀ϫⲉ ⲁⲃⲃⲁ Ⲙⲁⲕⲁⲣ ⲁϥⲟϩⲓ ⲉⲣⲁⲧϥ ⲉϥⲭⲱ ⲛ̀ⲣⲱϥ.
Ⲉⲧⲁⲓⲛⲁⲩ ⲇⲉ ⲟⲛ ⲉⲡⲓϧⲏⲃⲥ ⲛ̀ⲭⲉⲇⲟⲛ ⲁϥϭⲉⲛⲟ ⲡⲉϫⲏⲓ ⲙ̀ⲡⲓϧⲉⲗⲗⲟ ⲁⲃⲃⲁ Ⲙⲁⲕⲁⲣ ϫⲉ ⲭⲟⲩⲱϣ ⲛ̀ⲧⲁⲑⲁⲙⲓⲟ ⲡⲓϧⲏⲃⲥ ⲕⲁⲗⲱⲥ. ⲡⲉϫⲁϥ ⲛⲏⲓ ⲙ̀ⲙⲟⲛ ⲁⲗⲗⲁ ⲭⲁϥ ⲙ̀ⲡⲁⲓⲣⲏϯ. ⲁⲛⲟⲕ ⲇⲉ ⲁⲓϯϩⲟ ⲉⲣⲟϥ ⲉⲓϫⲱ ⲙ̀ⲙⲟⲥ ϫⲉ ⲁⲣⲓ ϯⲁⲅⲁⲡⲏ ⲡⲁⲓⲱⲧ ⲙⲟⲧⲛ ⲙ̀ⲙⲟⲕ ⲉϫⲉⲛ ϯϭⲗⲟⲃⲓ ⲛ̀ⲟⲩⲕⲟⲟⲩϫⲓ ⲛⲑⲟϥ ⲇⲉ ⲁϥⲉⲣⲟⲩⲱ ϫⲉ ⲭⲁⲣⲱⲕ ⲡⲁϣⲏⲣⲓ ϫⲉ ⲡⲥⲏⲟⲩ ⲛ̀ⲥⲁϫⲓ ⲁⲛ ⲡⲉ ⲁⲗⲗⲁ ⲙⲁⲗⲗⲟⲛⲟⲩⲥⲏⲟⲩ ⲛ̀ⲭⲁⲣⲱϥ ⲡⲉ. ⲟⲩⲟϩ ⲛⲁⲣⲉ ⲡⲓⲙⲁⲕⲁⲣⲓⲟⲥ Ⲙⲁⲝⲓⲙⲟⲥ ⲥⲁϫⲓ ⲛⲉⲙ ⲟⲩⲁⲓ ϧⲉⲛ ⲛⲏⲉ̅ⲑ̅ⲩ̅ ⲉϥϣⲓⲛⲓ ⲙ̀ⲙⲟϥ ⲉⲫⲣⲁⲛ ⲛ̀ⲛⲓⲁⲅⲓⲟⲥ ⲉⲧⲉ ⲙ̀ⲡⲉϥⲕⲱϯ ⲁⲛⲟⲛ ⲇⲉ ⲙ̀ⲡⲉⲛⲉⲙⲓ ⲉⲫⲏⲉⲧⲉϥϫⲱ ⲙ̀ⲙⲟϥ ⲁⲗⲗⲁ ⲡⲓⲡ̅ⲛ̅ⲁ̅ⲧⲟⲫⲟⲣⲟⲥ ⲁⲃⲃⲁ Ⲙⲁⲕⲁⲣ ⲁϥⲧⲁⲙⲟⲛ ϫⲉ ⲛⲁⲩⲧⲁⲙⲟ ⲙ̀ⲙⲟϥ ⲡⲉ ⲉⲫⲣⲁⲛ ⲛ̀ⲛⲓⲁⲅⲓⲟⲥ ⲉⲧⲉ ⲙ̀ⲡⲉϥⲕⲱϯ ⲟⲩⲟϩ ⲉⲧⲁⲥⲉⲣϩⲩⲇⲟⲛⲉⲥⲑⲉ ⲛ̀ϫⲉ ⲧⲉϥⲯⲩⲭⲏ ⲉⲧⲡⲁⲣⲟⲩⲥⲓⲁ ⲛ̀ⲛⲏⲉ̅ⲑ̅ⲩ̅ ⲥⲁⲧⲟⲧⲥ ⲁϥϫⲟⲥ ⲉⲃⲟⲗϧⲉⲛ ⲡⲓⲥⲱⲙⲁ ϧⲉⲛ ⲟⲩⲣⲁϣⲓ. ⲫⲁⲓ ⲡⲓⲣⲏϯ ⲉⲧⲁϥϫⲱⲕ ⲉⲃⲟⲗ ⲛ̀ϫⲉ ⲡⲁⲓⲙⲁⲕⲁⲣⲓⲟⲥ ϧⲉⲛ ⲟⲩϩⲓⲣⲏⲛⲏ ⲉⲁϥⲙⲧⲟⲛ ⲙ̀ⲙⲟϥ ⲛⲉⲙ ⲛⲏⲉ̅ⲑ̅ⲩ̅ ⲧⲏⲣⲟⲩ ⲛ̀ⲥⲟⲩⲓ̅ⲇ ⲛ̀Ⲧⲱⲃⲓ. ϩⲟⲧⲉ ⲟⲩⲛ ⲉⲧⲁⲛⲑⲱⲙⲥ ⲙ̀ⲡⲉϥⲁⲩⲯⲁⲛⲟⲛ ⲉ̅ⲑ̅ⲩ̅ ⲟⲩⲟϩ ⲉⲧⲁⲛⲓ ⲉⲡⲉϥⲣⲁⲥϯ ⲁϥⲉⲛⲕⲟⲧ ⲛ̀ϫⲉ ⲡⲉϥⲙⲁⲕⲁⲣⲓⲟⲥ ⲛ̀ⲥⲟⲛ Ⲇⲟⲙⲉⲧⲓⲟⲥ ⲁϥⲁⲙⲟⲛⲓ ⲉϫⲱϥ ⲛ̀ϫⲉ ⲟⲩⲛⲓϣϯ ⲛ̀ϧⲙⲟⲙ. ⲉⲧⲁϥⲛⲁⲩⲇⲉ ⲉⲣⲟϥ ⲛ̀ϫⲉ ⲡⲓⲛⲓϣϯ ⲁⲃⲃⲁ Ⲙⲁⲕⲁⲣ ϫⲉ ⲁϥϣⲱⲛⲓ ⲡⲉϫⲁϥ ⲛⲏⲓ ϫⲉ ϩⲉⲙⲥⲓ ⲡⲁϣⲏⲣⲓ ⲛ̀ⲧⲉⲕϣⲉⲙϣⲓ ⲙ̀ⲡⲓⲥⲟⲛ ϣⲁⲧⲉⲕϭⲓ ⲙ̀ⲡⲉϥⲥⲙⲟⲩ. ⲁⲛⲟⲕ ⲇⲉ ⲁⲓϯⲫⲓ ⲉⲛⲉϥϭⲁⲗⲁⲩϫ ⲉⲓϫⲱ ⲙ̀ⲙⲟⲥ ⲛⲁϥ ϫⲉ ⲧⲱⲃϩ ⲉϫⲱⲓ ⲡⲁⲓⲱⲧ ⲉ̅ⲑ̅ⲩ̅. ⲉⲡⲉϥⲣⲁⲥϯ ⲇⲉ ⲁϥϩⲣⲟϣ ϧⲉⲛ ⲡⲓϣⲱⲛⲓ ⲛ̀ϫⲉ ⲡⲓⲁⲅⲓⲟⲥ Ⲇⲟⲙⲉⲧⲓⲟⲥ ⲟⲩⲟϩ ⲉⲧⲁϥⲫⲟϩ ⲉⲡⲓⲉϫⲱⲣϩ ⲙ̀ⲙⲁϩⲅ̅ ⲁⲓⲛⲁⲩ ⲉⲣⲟϥ ⲉϥϧⲟⲥⲓ ⲡⲉϫⲏⲓ ⲛⲁϥ ϫⲉ ⲭⲟⲩⲱϣ ⲛ̀ⲧⲁⲙⲟⲩϯ ⲉⲡⲉⲛⲓⲱⲧ ⲁⲃⲃⲁ Ⲙⲁⲕⲁⲣ. ⲡⲉϫⲁϥ ϫⲉ ⲥⲉ. ⲁⲛⲟⲕ ⲇⲉ ⲁⲓϣⲉⲛⲏⲓ ⲁⲓⲙⲟⲟⲩϯ ⲉⲣⲟϥ ⲟⲩⲟϩ ⲉⲧⲓ ⲉⲓⲙⲟϣⲓ ⲛⲉⲙⲁϥ ϩⲓ ⲡⲓⲙⲓⲱⲓⲧ ⲁϥⲟϩⲓ ⲉⲣⲁⲧϥ ⲛ̀ⲟⲩⲛⲓϣϯ ⲛ̀ⲛⲁⲩ ⲉϥϫⲟⲩϣⲧ ⲉⲡⲥⲁ ⲙ̀ⲡⲓⲥⲡⲏⲗⲉⲟⲛ. ⲟⲩⲟϩ ⲙⲉⲛⲉⲛⲥⲱⲥ ⲁϥⲫⲟⲛϩϥ ⲉⲡⲥⲁ ⲛ̀ϯⲁⲛⲁⲧⲗⲟⲏ. ⲛⲁⲓⲙⲉⲩⲓ ⲁⲛⲟⲕ ⲡⲉϫⲉ ⲁⲣⲏⲟⲩ ⲉϥⲧⲱⲃϩ ⲁⲗⲁ ⲛⲁϥⲥⲟⲙⲥ ⲉⲡⲭⲱⲣⲟⲥ ⲛ̀ⲛⲏⲉ̅ⲑ̅ⲩ̅ ⲉⲩⲥⲱⲕ ϧⲁϫⲱⲥ ⲛ̀ϯⲙⲁⲕⲁⲣⲓⲟⲥ ⲙ̀ⲯⲩⲭⲏ ⲛ̀ⲧⲉ ⲡⲓⲁⲅⲓⲟⲥ Ⲇⲟⲙⲉⲧⲓⲟⲥ. ⲁϥⲥⲟⲙⲥ ⲇⲉ ⲉⲡϣⲱⲓ ⲉⲧⲫⲉ ⲁϥϥⲓⲁϩⲟⲙ ⲟⲩⲟϩ ⲁϥⲣⲓⲙⲓ ⲉϥⲕⲱⲗϩ ⲙ̀ⲙⲟⲥ ϫⲉ ⲟⲩⲟⲓ ⲛⲏⲓ ⲁⲛⲟⲕ ϫⲉ ⲙ̀ⲡⲉⲣⲙⲟⲛⲁⲭⲟⲥ ⲉⲡⲧⲏⲣϥ ⲛⲁⲓⲓ ⲅⲁⲣ ⲛⲉⲙ ⲛⲓⲙⲟⲛⲁⲭⲟⲥ ⲛ̀ⲧⲁⲫⲙⲏ ϫⲉ ϧⲉⲛ ⲟⲩⲕⲟⲩϫⲓ ⲛ̀ⲥⲏⲟⲩ ⲛ̀ϩⲓϫϩⲉϫ ⲁⲩϫⲓⲙⲓ ⲙ̀ⲡⲓⲙⲱⲓⲧ ⲛ̀ⲭⲱⲗⲉⲙ. ⲁⲛⲟⲕ ⲇⲉ ⲉⲧⲁⲓⲛⲁⲩ ⲉⲣⲟϥ ⲉϥⲣⲓⲙⲓ ⲙ̀ⲡⲁⲓⲣⲏϯ ⲁⲓⲧⲱⲙⲧ ⲟⲩⲟϩ ⲡⲉϫⲏⲓ ⲛⲁϥ ϫⲉ ⲟⲩ ⲡⲉ ⲉⲧϣⲟⲡ ⲱ ⲡⲁⲓⲱⲧ ⲉ̅ⲑ̅ⲩ̅ ⲛⲑⲟϥ ⲇⲉ ⲡⲉϫⲁϥ ⲛⲏⲓ ϫⲉ ⲙⲁⲣⲟⲛ ⲡⲁϣⲏⲣⲓ ϫⲉ ⲁⲡⲓⲁⲅⲓⲟⲥ Ⲇⲟⲙⲉⲧⲓⲟⲥ ⲁϥⲙⲟⲧⲛ ⲙ̀ⲙⲟϥ.ⲉⲧⲁⲛⲓ ⲇⲉ ⲉϧⲟⲩⲛ ⲉⲡⲓⲥⲡⲏⲗⲉⲟⲛ ⲁⲛϫⲉⲙϥ. ⲉϥϩⲉⲙⲥⲓ ⲉϥⲟⲩⲉϩ ⲉϧⲟⲩⲛ ⲉϯϫⲟⲟⲓ ⲉⲣⲉ ⲧⲉϥϫⲓϫ ⲃ̅ ϭⲟⲗⲕ ⲉϩⲣⲏⲓ ⲉⲧⲫⲉ. ⲉⲧⲁϥϫⲱⲕ ⲉⲃⲟⲗ ⲙ̀ⲡⲁⲓⲣⲏϯ ⲛ̀ⲥⲟⲩⲓ̅ⲍ ⲛ̀Ⲧⲱⲃⲓ ⲁⲛϭⲓ ⲙ̀ⲡⲉϥⲥⲱⲙⲁ ⲉ̅ⲑ̅ⲩ̅ ⲁⲛϣⲧⲟϥ ⲉϫⲉⲛ ϯϭⲗⲟⲃⲓ ⲁⲫⲏⲉ̅ⲑ̅ⲩ̅ ⲁⲃⲃⲁ Ⲙⲁⲕⲁⲣ ⲉⲣⲙⲉⲑⲣⲉ ⲛ̀ⲁⲃⲃⲁ Ⲓⲥⲏⲇⲱⲣⲟⲥ ϫⲉ ⲛⲓⲧⲁⲝⲓⲥ ⲉⲧⲁⲩⲓ ⲛ̀ⲥⲁ ⲧⲯⲩⲭⲏ ⲙ̀ⲡⲓⲛⲓϣϯ ⲛⲁⲓ ⲟⲛ ⲛⲉ ⲉⲧⲁⲩⲓ ⲛ̀ⲥⲁ ⲧⲯⲩⲭⲏ ⲙ̀ⲡⲉϥⲥⲟⲛ ⲉϥⲭⲏ ⲛⲉⲙⲱⲟⲩ ϩⲱϥ.
Ⲓⲥ ϩⲏⲡⲡⲉ ⲟⲩⲛ ⲁⲛⲧⲁⲙⲱⲧⲉⲛ ⲉⲡⲓⲣⲏϯ ⲉⲧⲁ ⲛⲁⲓⲙⲁⲕⲁⲣⲓⲟⲥ ϫⲱⲕ ⲉⲃⲟⲗ ⲙ̀ⲡⲟⲩⲇⲣⲟⲙⲟⲥ ϧⲉⲛ ⲟⲩⲃⲓⲟⲥ ⲛ̀ⲁⲅⲅⲉⲗⲓⲕⲟⲛ ⲉⲁⲩⲙⲉⲛⲣⲉ ⲛⲓϧⲓⲥⲓ ⲛ̀ⲧⲉ ⲛⲓⲡⲟⲗⲓⲧⲓⲁ ⲛⲉⲙ ⲛⲓϩⲟϫϩⲉϫ ⲙ̀ⲡⲣⲟⲥⲟⲩⲥⲏⲟⲩ ⲁⲩⲁⲙⲟⲛⲓ ⲛ̀ⲧⲟⲧⲟⲩ ϧⲉⲛ ϯϩⲩⲡⲟⲙⲟⲛⲏ. ⲉⲁⲩⲉⲣⲁⲅⲱⲛⲓⲍⲉⲥⲑⲉ ⲛ̀ⲕⲁⲗⲱⲥ ⲉⲩϭⲟϫⲓ ϧⲉⲛ ⲡⲓⲥⲧⲁⲇⲓⲟⲥ ⲛ̀ⲧⲉ ϯⲁⲣⲉⲧⲏ ⲉⲩⲥⲱⲟⲩⲧⲉⲛ ⲙ̀ⲙⲱⲟⲩ ⲉⲛⲁⲧϩⲏ ⲕⲁⲧⲁ ⲡⲥⲁϫⲓ ⲙ̀ⲫⲏⲉ̅ⲑ̅ⲩ̅ ⲛ̀ⲁⲡⲟⲥⲧⲟⲗⲟⲥ Ⲡⲁⲩⲗⲟⲥ ϣⲁⲛⲧⲟⲩϣⲱⲡⲓ ⲛⲉⲙ ⲫⲏⲉⲧⲟⲩϭⲓϣϣⲱⲟⲩ ⲙ̀ⲙⲟϥ Ⲡⲭ̅ⲥ̅ ⲛ̀ⲟⲩⲅⲱⲛⲟⲑⲉⲧⲏⲥ ⲙ̀ⲙⲏⲓ ⲉⲁⲩⲙⲉⲥⲧⲉ ⲡⲱⲟⲩ ⲛ̀ⲧⲉ ⲡⲁⲓⲕⲟⲥⲙⲟⲥ ⲙ̀ⲡⲣⲟⲥⲟⲩⲥⲏⲟⲩ ⲛⲉⲙ ⲛⲓⲁⲡⲟⲗⲁⲩⲥⲓⲥ ⲧⲏⲣⲟⲩ ⲛ̀ⲉⲫⲗⲏⲟⲩ ⲉⲑⲛⲁⲕⲱⲣϥ ⲁⲩⲟⲡⲟⲩ ⲉϩⲁⲛⲗⲉⲃϣ ⲟⲩⲟϩ ⲁⲩϣⲱⲡⲓ ⲉⲩⲙⲟⲥϯ ⲙ̀ⲡⲁⲓⲕⲟⲥⲙⲟⲥ ⲙ̀ⲫⲣⲏϯ ⲛ̀ⲟⲩϣⲧⲉⲕⲟ. ⲁⲥϣⲱⲡⲓ ⲇⲉ ⲛ̀ⲟⲩⲥⲟⲡ ϩⲱⲥ ⲉⲓϭⲓ ⲛ̀ϩⲣⲁⲓ ⲛⲉⲙⲱⲟⲩ ⲡⲉϫⲏⲓ ⲛⲱⲟⲩ ϫⲉ ⲛⲁⲣⲉⲧⲉⲛⲭⲏ Ⲕⲱⲥⲧⲁⲛⲓⲛⲟⲩⲡⲟⲗⲓⲥ ⲡⲉ ⲛⲁⲓⲟϯ ⲡⲟⲗⲗⲁⲕⲓⲥ ⲧⲉⲧⲉⲛⲁϫⲉⲙ ⲑⲏⲛⲟⲩ ⲡⲉ ⲉⲣⲉⲧⲉⲛⲟⲓ ⲛ̀ⲟⲩⲣⲟ ϯⲛⲟⲩ ⲡⲉ ⲛⲑⲱⲟⲩ ⲇⲉ ⲁⲩⲕⲉⲧ ⲡⲟⲩϩⲟ ⲉⲣⲟⲓ ⲡϫⲉⲱⲟⲩ ⲛⲏⲓ ϧⲉⲛ ⲟⲩⲙⲉⲧⲣⲉⲙⲣⲁⲩϣ ϫⲉ ⲁⲣⲉ ⲡⲉⲕⲛⲟⲩⲥ ⲭⲏ ⲛⲑⲱⲛ ⲱ ⲡⲓⲥⲟⲛ ⲉⲧⲁⲕϫⲉ ⲡⲁⲓⲥⲁϫⲓ ⲫⲁⲓ ⲁⲣⲏⲟⲩ ⲡⲁⲛⲧⲱⲥ ⲉϥϧⲉⲛ ⲡⲓⲙⲁ ⲉⲧⲁⲕⲫⲓⲣⲓ ⲉⲣⲟϥ. ⲁⲛⲟⲩⲱ ⲉⲛϫⲱ ⲙ̀ⲙⲟⲥ ⲛⲁⲕ ⲛ̀ⲟⲩⲙⲏϣ ⲛ̀ⲥⲟⲡ ⲱ ⲡⲓⲥⲟⲛ Ⲡϣⲱⲓ ϫⲉ ⲉⲕϩⲉⲙⲥⲓ ⲛⲉⲙⲁⲛ ⲓⲧⲉ ⲉⲕⲭⲏ ϧⲉⲛ ⲟⲉⲕⲙⲁⲛϣⲱⲡⲓ ⲁⲙⲟⲛⲓ ⲙ̀ⲡⲓⲣⲁⲛ ⲛ̀ⲟⲩϫⲁⲓ ⲛ̀ⲧⲉ ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ϧⲉⲛ ⲟⲩⲙⲉⲧⲁⲑⲙⲟⲩⲛⲕ ⲕⲉ ⲅⲁⲣ ⲁⲗⲏⲑⲱⲥ ⲉⲛⲁⲣⲉ ⲡⲓⲣⲁⲛ ⲉ̅ⲑ̅ⲩ̅ ϧⲉⲛ ⲡⲉⲕϩⲏⲧ ⲡⲉ ⲛⲁⲕⲛⲁϫⲉ ⲡⲁⲓⲥⲁϫⲓ ⲁⲛ ⲡⲉ ⲉⲧⲁⲕϫⲟⲧⲟⲩ. ⲗⲟⲓⲡⲟⲛ ⲙⲁϩⲑⲏⲕ ⲉⲣⲟⲕ ϧⲉⲛ ⲟⲩⲧⲁϫⲣⲟ ⲙ̀ⲡⲉⲣⲉⲣⲁⲙⲗⲉⲏⲥ ⲉⲡⲡⲓⲣⲁⲛ ⲛ̀ⲟⲟⲩϫⲁⲓ ⲛ̀ⲧⲉ ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲁⲗⲗⲁ ⲁⲙⲟⲛⲓ ⲙ̀ⲙⲟϥ ϧⲉⲛ ⲡⲉⲕϩⲏⲧ ⲧⲏⲣϥ ϧⲉⲛ ⲟⲩⲙⲟⲩⲛ ⲉⲃⲟⲗϧⲉⲛ ⲟⲩⲙⲉⲧⲣⲉϥϣⲉⲡϧⲓⲥⲓ ϫⲉ ⲟⲩⲏⲓ ⲉϣⲱⲡ ⲛ̀ⲧⲉⲛⲉⲣⲁⲙⲉⲗⲏⲥ ⲉⲫⲁⲓ ⲓⲉ ⲁⲛⲙⲏⲛ ⲧⲉⲛⲙⲱⲟⲩⲧ ϧⲉⲛ ⲛⲉⲛⲡⲁⲣⲁⲡⲧⲱⲙⲁ. ⲗⲟⲓⲡⲟⲛ ⲙ̀ⲡⲉⲛⲑⲣⲉⲙⲉⲛⲣⲉ ϯⲡⲁⲣⲣⲏⲥⲓⲁ ⲛⲉⲙ ⲡⲓϭⲓϩⲣⲁϥ ⲛⲉⲙ ⲛⲓⲥⲁϫⲓ ⲛ̀ⲉⲫⲗⲏⲟⲩ ⲛⲁⲓ ⲛⲉ ⲉⲧⲧⲁⲕⲟ ⲙ̀ⲡⲟⲩⲟⲩⲧⲁϩ ⲧⲏⲣϥ ⲙ̀ⲡⲓⲙⲟⲛⲁⲭⲟⲥ ⲕⲁⲧⲁ ϯϧⲉ ⲉⲧⲁⲛⲉⲙⲓ ⲉⲫⲁⲓ ⲉⲧⲓ ⲉⲛϣⲟⲡ ϧⲉⲛ ϯⲤⲩⲣⲓⲁ ϩⲟⲧⲉ ⲉⲧⲁ ϯⲙⲉⲧⲣⲱⲙⲓ ⲁⲓⲧⲉⲛ ⲛ̀ϭⲓϩⲣⲁϥ ⲙ̀ⲡⲟⲟⲩⲭⲁⲛ ⲉⲉⲣⲫⲙⲉⲩⲓ ⲛ̀ⲛⲉⲛⲟⲃⲓ ϯⲙⲉⲧϣⲉⲙⲙⲟ ⲇⲉ ⲛⲉⲙ ⲡⲓⲭⲁⲣⲱϥ ϧⲉⲛ ⲟⲩⲉⲙⲓ ⲛⲉⲙ ⲡⲓϩⲟϫϩⲉϫ ϩⲁⲛⲥⲓⲑⲃⲁⲓ ⲛ̀ⲧⲉ ⲡⲉⲛϣⲗⲟⲗ ⲛⲉ ⲡⲓϩⲟϫϩⲉϫ ⲉⲧⲙⲓⲥⲓ ⲙ̀ⲡⲓⲧⲱⲃϩ ϧⲉⲛ ⲟⲩⲧⲟⲩⲃⲟ ⲡⲓⲧⲱⲃϩ ⲉⲑⲙⲓⲥⲓ ⲛ̀ϯϩⲟϯ ⲛ̀ⲧⲉ Ⲫϯ ⲛⲉⲙ ϯⲁⲅⲁⲡⲏ ⲟⲩⲟϩ ⲛⲁⲓ ⲛⲉ ⲉⲑⲙⲓⲥⲓ ⲙ̀ⲡⲓⲣⲱⲙⲓ ϫⲉ ⲟⲩⲏⲓ ⲙ̀ⲙⲟⲛ ⲁⲝⲓⲱⲙⲁ ⲟⲩⲇⲉ ⲙⲉⲧⲣⲁⲙⲁⲟ ⲟⲩⲇⲉ ⲙⲉⲧϫⲱⲣⲓ ⲧⲁⲓⲏⲟⲩⲧ ϧⲁⲧⲉⲛ Ⲫϯ ⲁⲗⲗⲁ ⲟⲩⲯⲩⲭⲏ ⲉⲥⲟⲩⲁⲃ ⲧⲉ ⲉⲧⲉϥⲕⲱϯ ⲛ̀ⲥⲱⲥ ⲟⲩⲟϩ ⲧⲉϥⲑⲩⲥⲓⲁ ⲛⲉⲙ ⲡⲉϥϭⲗⲓⲗ ⲡⲉ ⲡⲉⲛⲟⲩϫⲁⲓ. ⲁⲛⲟⲕ ⲁⲓϣⲉⲡ ⲛⲟⲩⲥⲁϫⲓ ⲉⲣⲟⲓ ϧⲉⲛ ⲟⲩⲣⲱⲟⲩⲧϥ ⲛ̀ϩⲏⲧ ⲉⲁⲓϯⲙⲉⲧⲁⲛⲟⲓⲁ ⲉⲓϫⲱ ⲙ̀ⲙⲟⲥ ϫⲉ ⲭⲱ ⲛⲏⲓ ⲉⲃⲟⲗ ⲛⲁⲓⲟϯ ⲧⲱⲃϩ ⲉϫⲱⲓ.
Ⲗⲟⲓⲡⲟⲛ ⲙⲉⲛⲉⲛⲥⲁ ⲟⲩⲣⲟⲙⲡⲓ ⲛ̀ⲉϩⲟⲟⲩ ⲛ̀ⲧⲉ ⲫⲟⲩⲱⲧⲉⲃ ⲉⲃⲟⲗ ⲛⲁⲓⲙⲁⲕⲁⲣⲓⲟⲥ ⲁⲡⲓϣⲁϥⲉ ϫⲱⲣϫ ⲛ̀ⲕⲁⲗⲱⲥ ⲓⲧⲉ ⲛ̀ⲧⲉ ⲡⲓⲧⲱⲟⲩ ⲛ̀ⲧⲉ Ⲡⲉⲣⲛⲟⲩϫ ⲓⲧⲉ ⲛ̀ⲧⲉ ⲙⲟⲩⲛⲱⲟⲩⲓ ⲉⲧⲥⲏⲣ ⲉⲃⲟⲗϧⲉⲛ ⲭⲏⲙⲓ ⲁⲡⲁⲝ ⲁⲡⲗⲱⲥ ⲁⲡⲓϣⲁϥⲉ ϫⲱⲣϫ ⲁⲩⲕⲱⲧ ⲛⲱⲟⲩ ⲛ̀ⲟⲩⲛⲓϣϯ ⲛ̀ⲉⲕⲕⲗⲥⲓⲁ ⲟⲩⲟϩ ⲁⲩⲏⲱϣ ⲛ̀ⲁⲃⲃⲁ Ⲓⲥⲏⲇⲱⲣⲟⲥ ⲙ̀ⲡⲣⲉⲥⲃⲩⲧⲉⲣⲟⲥ. ⲁⲛⲟⲕ ⲇⲉ ϩⲱ ϧⲁ ⲡⲓⲁⲧⲉⲙⲡϣⲁ ⲁⲩⲁⲓⲧ ⲛ̀ⲇⲓⲁⲕⲱⲛ. ⲙⲉⲛⲉⲛⲥⲁ ⲛⲁⲓ ⲁⲡⲓⲛⲓϣϯ ⲁⲃⲃⲁ Ⲙⲁⲕⲁⲣ ⲙⲟⲩϯ ⲉⲃⲟⲗϧⲉⲛ ϯⲉⲕⲕⲗⲏⲥⲓⲁ ⲉϥϩⲟⲛϩⲉⲛ ⲉϥϫⲱ ⲙ̀ⲙⲟⲥ ϫⲉ ⲙⲟⲩϯ ⲉⲡⲁⲓⲧⲟⲡⲟⲥ ϫⲉ ⲟⲩⲣⲁⲟⲩⲏ ⲛ̀ⲛⲓⲣⲱⲙⲉⲟⲥ. ⲁⲩⲉⲣⲟⲩⲱ ⲛ̀ϫⲉ ⲅ̅ ⲛ̀ⲛⲓϣϯ ⲛ̀ϧⲉⲗⲗⲟ ⲛ̀ⲧⲉ ⲡⲧⲱⲟⲩ ⲙ̀Ⲡⲉⲣⲛⲟⲩϫ ⲉⲧⲁⲩϣⲱⲡⲓ ϧⲁⲧⲟⲧⲉⲛ ⲉⲧⲉ ⲁⲡⲁ Ⲡⲁⲙⲱ ⲡⲱ. ⲁⲡⲁ Ⲡⲓϩⲱⲣ ⲛⲉⲙ ⲁⲡⲁ Ⲁⲑⲣⲉ ⲡⲉϫⲱⲟⲩ ⲙ̀ⲡⲓⲉⲑⲟⲩⲁⲃ ⲁⲃⲃⲁ Ⲙⲁⲕⲁⲣ ϫⲉ ⲙ̀ⲡⲉⲕⲉⲙⲓ ⲉⲛⲟⲩⲣⲁⲛ ⲡⲉⲛⲓⲱⲧ ⲉⲧⲥⲙⲁⲣⲱⲟⲩⲧ ⲡⲉϫⲁϥ ⲛⲱⲟⲩ ϫⲉ ⲁϩⲁ ⲁⲗⲗⲁ ⲡⲉⲧⲉϣⲉ ⲁⲛ ⲡⲉ ⲉⲑⲣⲉⲛⲙⲟⲩϯ ⲉⲫⲣⲁⲛ ⲛ̀ⲟⲩⲁⲓ ⲛ̀ϧⲏⲧⲟⲩ ⲉϫⲉⲛ ⲡⲓⲧⲟⲡⲟⲥ ⲛ̀ⲧⲉⲛⲭⲁ ⲡⲓⲟⲩⲁⲓ ⲉⲡⲓⲇⲏ ⲁⲩϫⲱⲕ ⲉⲃⲟⲗϧⲉⲛ ⲟⲩϩⲟⲩⲡⲟⲙⲟⲛⲏ ⲛ̀ⲟⲩⲱⲧ ⲛ̀ϧⲏⲧϥ ⲛⲉⲙ ⲛⲟⲩⲉⲣⲏⲟⲩ ⲟⲩⲟϩ ⲟⲛ ϫⲉ ϩⲁⲛⲥⲛⲏⲟⲩ ⲛⲉ ⲉⲑⲃⲉ ⲫⲁⲓ ⲁⲛⲛⲁⲉⲣⲟⲛⲟⲙⲁⲍⲓⲛ ⲙ̀ⲙⲱⲟⲩ ⲉⲩⲥⲟⲡ ⲛⲉⲙ ⲛⲟⲩⲉⲣⲏⲟⲩ ⲛ̀ⲧⲉⲛⲙⲟⲩϯ ⲉⲡⲟⲩⲧⲟⲡⲟⲥ ϫⲉ ⲡⲓⲣⲱⲙⲉⲟⲥ ⲙⲉⲛⲉⲛⲥⲁ ⲡⲟⲩϫⲱⲕ ⲉⲃⲟⲗ. ⲡⲁⲓⲣⲏϯ ⲣⲱ ⲟⲛ ⲡⲉ ⲉⲧⲁⲩⲑⲣⲟⲩⲥϧⲉ ⲛⲟⲩⲣⲁⲛ ⲉⲡⲓⲇⲏ ⲧⲓⲭⲟⲛ ϫⲉ ⲛⲉⲛⲓⲟϯ ⲛ̀ⲣⲱⲙⲉⲟⲥ ϣⲁ ⲉϧⲟⲩⲛ ⲉⲫⲟⲟⲩ ⲕⲁⲧⲁ ⲫⲣϯ ⲉⲧⲁⲩⲟⲩⲁϩⲥⲁϩⲛⲓ ⲛⲁϥ ⲉⲃⲟⲗϩⲓⲧⲉⲛ Ⲫϯ. ⲁϥⲉⲣⲙⲉⲑⲣⲉ ⲇⲉ ⲛⲁⲛ ⲟⲛ ⲙ̀ⲫⲁⲓ ⲛ̀ϫⲉ ⲁⲃⲃⲁ Ⲡⲁⲫⲛⲟⲩϯ ⲡⲓⲙⲁⲑⲏⲧⲏⲥ ⲛ̀ⲧⲉ ⲁⲃⲃⲁ Ⲙⲁⲕⲁⲣ ⲫⲏⲉⲧⲁϥⲉⲣⲓⲱⲧ ⲛ̀Ϣⲓϩⲏⲧ ⲙⲉⲛⲉⲛⲥⲱⲥ ϫⲉ ϩⲟⲧⲉ ⲡⲉϫⲁϥ ⲉⲧⲁⲛⲕⲱⲧ ⲉϯⲉⲕⲕⲗⲏⲥⲓⲁ ⲁⲪϯ ⲟⲩⲁϩⲥⲁϩⲛⲓ ⲙ̀ⲡⲉⲛⲓⲱⲧ ϩⲓⲧⲉⲛ ⲟⲩⲭⲉⲣⲟⲩⲃⲓⲙ ⲛ̀ⲟⲩⲱⲓⲛⲓ ϫⲉ ⲙⲟⲩϯ ⲉⲡⲁⲓⲙⲁ ⲑⲣⲁⲟⲩⲏ ⲛ̀ⲛⲓⲣⲱⲙⲉⲟⲥ ⲟⲩⲟϩ
ⲛⲑⲟⲕ ϩⲱⲕ ⲡⲉϫⲁϥ ⲟⲩⲁϩⲕ ⲛ̀ⲥⲱⲓ ⲛ̀ⲧⲁⲧⲁⲙⲟⲕ ⲉⲡⲓⲙⲁ ⲉⲧⲟⲩⲙⲟⲩϯ ⲉⲡⲉⲕⲣⲁⲛ ⲉϩⲣⲏⲓ ⲉϫⲱⲕ
Ⲗⲟⲓⲡⲟⲛ ⲁⲡⲓⲭⲉⲣⲟⲩⲃⲓⲙ ⲥⲱⲕϧⲁϫⲱϥ ⲁϥⲉⲛϥ ⲙ̀ⲡⲓⲁⲗⲟⲕ ⲛⲉⲣⲏⲥ ⲛ̀ⲧⲉ ⲡⲓϩⲉⲗⲟⲥ ⲉⲫⲙⲁ ⲙ̀ⲡⲓϣⲏⲓ ⲁϥⲟϩⲓ ⲉⲣⲁⲧϥ ⲉϫⲉⲛ ϯⲡⲉⲧⲣⲁ ⲉⲧⲥⲁⲡⲉⲙⲉⲛⲧ ⲁϥⲱϣ ⲉϥϫⲱ ⲙ̀ⲙⲟⲥ ϫⲉ ⲫⲁⲓ ⲡⲉ ⲡⲓⲙⲁ ⲉⲧⲟⲩⲛⲁⲙⲟⲩϯ ⲙ̀ⲡⲉⲕⲣⲁⲛ ⲉϩⲣⲏⲓ ⲉϫⲱϥ ⲡⲓⲙⲁ ⲉⲧⲏⲏ ⲉⲧⲁⲕⲕⲟⲧϥ ⲁⲩⲛⲁⲧⲏⲓϥ ⲛ̀ⲛⲛⲓⲣⲱⲙⲉⲟⲥ ϣⲁ ⲉⲛⲉϩ ⲉⲑⲃⲉ ϫⲉ ⲛⲑⲱⲟⲩ ⲛⲉ ⲛⲓϣⲟⲣⲡ ⲉⲧⲁⲩⲭⲁ ⲥⲱⲙⲁ ⲉϧⲣⲏⲓ ϧⲉⲛ ⲡⲁⲓⲧⲱⲟⲩ ⲉ̅ⲑ̅ⲩ̅ ⲉⲁⲩϣⲱⲡⲓ ⲛ̀ϣⲟⲣⲡ ⲛ̀ⲁⲡⲁⲣⲭⲏ ⲛ̀ⲧⲉ ⲛⲉⲕϧⲓⲥⲓ ϧⲉⲛ ⲡⲁⲓⲓⲁϩⲁⲗⲟⲗⲓ ⲛ̀ⲧⲉ ⲡⲟ̅ⲥ̅ ⲥⲁⲃⲁⲱⲑ ⲫⲁⲓ ⲉⲧⲁⲩⲑⲁϣⲕ ⲛ̀ⲟⲩⲱⲓ ⲉⲣⲟϥ ⲟⲩⲟϩ ⲛ̀ⲁⲣⲭⲓⲅⲟⲥ ⲉⲧⲉ ⲫⲁⲓ ⲡⲉ ⲡⲓϣⲗⲟⲗ ⲉⲧⲧⲁⲓⲏⲟⲩⲧ ⲛ̀ⲧⲉ ⲛⲓⲙⲟⲛⲁⲭⲟⲥ ⲡⲓⲗⲁⲟⲥ ⲉⲧⲓⲣⲓ ⲙ̀ⲫⲟⲩⲱϣ ⲙ̀Ⲫϯ ⲟⲩⲟϩ ⲉⲧⲥⲱⲕ ⲛ̀ⲛⲉϥⲙⲉⲧϣⲉⲛϩⲏⲧ ⲉϩⲣⲏⲓ ⲉϫⲉⲛ ⲡⲅⲉⲛⲟⲥ ⲛ̀ⲛⲓⲣⲱⲙⲓ ⲉⲑⲃⲉ ⲛⲟⲩⲡⲁⲗⲏⲧⲓⲁ ⲛⲉⲙ ⲛⲟⲩϣⲗⲏⲗ ⲛⲉⲙ ⲛⲟⲩⲉⲣⲙⲱⲟⲩⲓ ⲉⲧⲟⲩⲫⲱⲛ ⲙ̀ⲙⲱⲟⲩ ⲉⲃⲟⲗ ⲙ̀ⲡⲓⲉϩⲟⲟⲩ ⲛⲉⲙ ⲡⲓⲉϫⲱⲣϩ ϧⲉⲛ ⲟⲩⲙⲉⲧⲁⲑⲙⲟⲩⲛⲕ ⲉⲑⲃⲉ ⲛⲓⲣⲉϥⲉⲣⲣⲛⲟⲃⲓ ϫⲉ ϩⲓⲛⲁ ⲛ̀ⲧⲟⲩⲥⲁⲑⲱⲟⲩ ϩⲁ Ⲫϯ ϧⲉⲛ ⲡⲟⲩϩⲏⲧ ⲧⲏⲣϥ ⲛ̀ⲧⲉϥⲭⲱ ⲛⲱⲟⲩ ⲉⲃⲟⲗ ⲕⲁⲧⲁ ⲛⲉϥⲙⲉⲧϣⲉⲛϩⲏⲧ ⲉϧⲟⲩⲛ ⲉⲡⲉϥⲑⲁⲙⲓⲟ. ⲓⲥ ϩⲏⲡⲡⲉ ϫⲉ ⲛⲁⲓⲟϯ ⲉ̅ⲑ̅ⲩ̅ ⲓⲥ ⲛⲏⲉⲧⲁⲓⲛⲁⲩ ⲉⲣⲱⲟⲩ ⲛⲉⲙ ⲛⲏⲉⲧⲁⲓⲥⲑⲙⲟⲩ ⲁⲓⲧⲁⲙⲱⲧⲉⲛ ⲉⲣⲱⲟⲩ. ⲗⲟⲓⲡⲟⲛ ⲁⲛⲁⲩ ⲙ̀ⲡⲉⲛⲑⲣⲉ ϩⲗⲓ ⲉⲣⲁⲑⲛⲁϩϯ ⲉⲛⲏⲉⲧⲁⲩϫⲟⲧⲟⲩ ⲧⲏⲣⲟⲩ ⲉⲑⲃⲉ ⲛⲁⲓⲁⲅⲓⲟⲥ ⲁⲗⲗⲁ ϣⲱⲡ ⲛ̀ⲛⲏⲉⲧⲁⲓϫⲟⲧⲟⲩ ⲉⲑⲃⲏⲧⲟⲩ ϩⲓⲛⲁ ⲛ̀ⲧⲉⲧⲉⲛϣⲧⲉⲙϭⲓ ⲛ̀ⲟⲩϩⲁⲡ ⲙⲁⲗⲓⲥⲧⲁ ⲛⲏⲉⲧⲁⲩϫⲟⲧⲟⲩ ⲛ̀ϫⲉ ⲡⲉⲛⲓⲱⲧ ⲙ̀ⲡⲓⲡ̅ⲛ̅ⲁ̅ⲧⲟⲫⲟⲣⲟⲥ ⲡⲓⲛⲓϣϯ ⲁⲃⲃⲁ Ⲙⲁⲕⲁⲣ ⲡⲓⲣⲱⲙⲓ ⲉⲧⲉⲣⲫⲟⲣⲓⲛ ⲙ̀Ⲫϯ ⲟⲩⲟϩ ⲉⲣⲉ Ⲫϯ ⲙⲉⲓ ⲙ̀ⲙⲟϥ ⲉⲑⲃⲉ ⲡⲉϥⲧⲟⲩⲃⲟ.
Ⲥⲥϧⲏⲟⲩⲧ ⲅⲁⲣ ϫⲉ ⲁⲣⲉϣⲁⲛ ⲛⲓϧⲉⲗⲗⲟⲓ ϩⲓⲕⲟⲕ ⲉⲁⲃⲃⲁ Ⲙⲁⲕⲁⲣ ϣⲁⲩϭⲓⲧⲟⲩ ⲉⲡⲟⲩⲥⲡⲏⲗⲉⲟⲛ ⲉϥϫⲱ ⲙ̀ⲙⲟⲥ ϫⲉ ⲁⲙⲱⲓⲛⲓ ⲛ̀ⲧⲉⲛⲛⲁⲩ ⲙ̀ⲡⲓⲙⲁⲣⲧⲩⲣⲓⲟⲛ ⲛ̀ⲧⲉ ⲛⲓⲕⲟⲩϫⲓ ⲛ̀ϣⲉⲙⲙⲱⲟⲩ ϩⲟⲡⲱⲥ ⲛ̀ⲧⲉ ⲛ̀ⲑⲱⲧⲉⲛ ϩⲱⲧⲉⲛ ⲛ̀ⲧⲉⲧⲉⲛⲉⲣⲡⲣⲟⲕⲟⲡⲧⲓⲛ ϧⲉⲛ ⲛⲓⲁⲣⲉⲧⲏ ⲛ̀ⲧⲉ ⲛⲏⲉⲧⲉⲙⲙⲁⲩ ⲛⲁⲓⲁⲅⲓⲟⲥ ⲉⲧⲥⲙⲁⲣⲱⲟⲩⲧ ⲟⲩⲟϩ ⲛ̀ⲧⲉⲧⲉⲛⲉⲣⲡⲉⲙⲡϣⲁ ⲛ̀ϯⲙⲉⲣⲟⲥ ⲛⲉⲙ ⲡⲓⲕⲗⲏⲣⲟⲥ ⲛ̀ⲧⲱⲟⲩ ϧⲉⲛ ⲑⲙⲉⲧⲟⲩⲣⲟ ⲛ̀ⲉⲛⲉϩ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲁⲛⲁⲩ ϫⲉ ⲁⲡⲓⲛⲓϣϯ ⲁⲃⲃⲁ Ⲙⲁⲕⲁⲣ ⲭⲛⲁⲩ ⲛ̀ⲧⲟⲧϥ ϩⲱⲥ ⳥ ϧⲉⲛ ⲡϫⲓⲛⲑⲣⲉϥϩⲱⲗ ⲉⲡⲓⲥⲡⲏⲗⲉⲟⲛ ⲛⲉⲙ ⲛⲓϧⲉⲗⲗⲟⲓ ⲛ̀ⲧⲟⲩϣⲗⲏⲗ ϧⲉⲛ ⲟⲩⲛⲁϩϯ ⲕⲉ ⲅⲁⲣ ⲁⲩⲉⲣ⳥ ϧⲉⲛ ⲧⲟⲩⲡⲣⲟϩⲉⲣⲉⲥⲓⲥ ⲁϭⲛⲉ ⲫⲉⲛ ⲥⲛⲟϥ ⲉⲃⲟⲗϧⲉⲛ ⲡϫⲓⲛⲑⲣⲟⲩⲉⲣⲕⲁⲧⲁⲫⲣⲟⲛⲓⲛ ⲛ̀ⲑⲙⲉⲧⲟⲩⲣⲟ ⲙ̀ⲡⲟⲩⲓⲱⲧ ⲉⲑⲛⲁⲧⲁⲕⲟ ⲉⲑⲃⲉ ϯⲙⲉⲧⲟⲩⲣⲟ ⲛ̀ⲧⲉ ⲛⲓⲫⲏⲟⲩⲓ ⲛⲉⲙ ⲛⲉⲥⲁⲅⲁⲑⲟⲥ ⲟⲩⲟϩ ⲫⲙⲉⲩⲓ ⲙ̀ⲡⲓⲡⲁⲗⲁⲧⲓⲟⲛ ⲉⲧⲁⲩⲉⲣⲡⲉϥⲱⲃϣ ⲛⲉⲙ ⲛⲓϫⲓⲛⲟⲩⲱⲙ ⲉⲧⲗⲉⲕⲗⲱⲕ ⲛ̀ⲟⲩⲙⲏϣ ⲛ̀ⲣⲏϯ ⲛⲉⲙ ⲛⲓϩⲟϫϩⲉϫ ϩⲱⲟⲩ ⲉⲧⲁⲩⲉⲣϩⲩⲡⲟⲙⲟⲛⲓⲛ ⲉⲣⲱⲟⲩ ϩⲓ ⲛⲓⲙⲁⲙⲙⲟϣⲓ ⲉⲧϧⲟⲥⲓ ⲛ̀ⲧⲉ ⲫⲓⲟⲙ ⲛⲉⲙ ⲡⲕⲩⲛⲇⲓⲛⲟⲥ ⲛ̀ⲛⲓϭⲁⲧϥⲓ ⲛ̀ⲧⲉ ⲡⲓⲙⲁ ⲉⲧⲉⲙⲙⲁⲩ ϣⲁⲧⲉ Ⲫϯ ϭⲓⲙⲱⲓⲧ ⲛⲱⲟⲩ ϩⲓⲧⲉⲛ ⲧⲉϥⲃⲟⲏⲑⲓⲁ ⲉⲧⲥⲱⲕ ϧⲁϫⲱⲟⲩ ϣⲁⲧⲉϥⲉⲛⲟⲩ ⲉⲡⲓⲧⲱⲟⲩ ⲛ̀ⲧⲉ Ϣⲓϩⲏⲧ ⲉⲫⲙⲁ ⲙ̀ⲡⲉ̅ⲑ̅ⲩ̅ ⲁⲃⲃⲁ Ⲙⲁⲕⲁⲣ ⲛ̀ⲧⲟⲩϫⲱⲕ ⲉⲃⲟⲗ ⲙ̀ⲙⲁⲩ ⲉⲑⲃⲉ ⲫⲁⲓ ⲁⲓϫⲟⲥ ϫⲉ ⲁⲩⲉⲣ⳥ ⲁϭⲛⲉ ⲥⲏϥⲓ.
Ⲁⲛϣⲁⲛⲭⲱ ⲅⲁⲣ ⲛⲁⲛ ⲙ̀ⲡⲉⲣⲫⲙⲉⲩⲓ ⲛ̀ⲧⲁⲛⲁⲥⲧⲣⲟⲫⲏ ⲛ̀ⲛⲉⲛⲓⲟϯ ⲉ̅ⲑ̅ⲩ̅ ⲧⲉⲛⲛⲁϣⲓⲃϯ ϩⲱⲛ ⲉⲃⲟⲗϩⲁ ⲛⲓⲥⲩⲛⲏⲑⲓⲁ ⲛ̀ⲕⲟⲥⲙⲓⲕⲟⲥ ⲟⲩⲟϩ ⲧⲉⲛⲛⲁϭⲓ ϧⲉⲣⲉⲃ ⲛ̀ⲟⲩⲱⲓⲛⲓ ϧⲉⲛ ⲛⲓⲙⲓⲧⲱⲟⲩⲓ ⲛ̀ⲧⲉ ⲛⲉⲛⲓⲟϯ ⲙ̀ⲙⲁⲕⲁⲣⲓⲟⲥ ⲉⲁⲛⲭⲱ ⲛ̀ⲥⲱⲛ ⲛ̀ⲛⲁⲭⲁϩⲟⲩ ⲉⲛⲥⲱⲟⲩⲧⲉⲛ ⲙ̀ⲙⲟⲛ ⲉⲛⲁⲓⲧϩⲏ ϧⲉⲛ ⲟⲟⲩⲑⲉⲃⲓⲟ ⲙ̀ⲙⲏⲓ ⲛⲉⲙ ⲟⲩⲁⲅⲁⲡⲏ ⲉⲛⲙⲟϣⲓ ϩⲓ ⲛⲟⲩϣⲉⲛⲧⲁⲧⲥⲓ ⲛ̀ⲁⲧⲥⲱⲣⲉⲙ ⲉⲛϫⲱⲕ ⲉⲃⲟⲗ ⲛ̀ⲛⲓⲛⲟⲙⲟⲥ ⲛ̀ⲧⲉ Ⲡⲭ̅ⲥ̅ Ⲓⲏ̅ⲥ̅ ⲛⲉⲙ ⲛⲓⲉⲛⲧⲟⲗⲏ ⲛ̀ⲁⲅⲅⲉⲗⲓⲕⲟⲛ ⲛ̀ⲧⲉ ϯⲙⲉⲧⲙⲟⲛⲁⲭⲟⲥ ⲛⲁⲓⲉⲧϭⲓⲙⲱⲓⲧ ⲛⲁⲛ ϣⲁ Ⲫϯ ϧⲉⲛ ⲟⲩⲥⲱⲟⲩⲧⲉⲛ ⲛⲉⲙ ϯϫⲓⲛϣⲁϣⲛⲓ ⲉⲛⲓⲁⲅⲁⲑⲟⲛ ϧⲉⲛ ⲡⲓⲡⲁⲣⲁⲇⲓⲥⲟⲥ ⲕⲉ ⲅⲁⲣ ⲁⲛⲉⲛⲓⲟϯ ⲭⲁ ⲡⲓⲕⲟⲩϫⲓ ⲙ̀ⲙⲁⲛϣⲱⲡⲓ ⲛ̀ⲧⲉ ⲛⲁⲓⲁⲅⲓⲟⲥ ⲛ̀ⲧⲟⲧⲟⲩ ⲙ̀ⲫⲣⲏϯ ⲛ̀ⲟⲩⲉⲕⲕⲗⲏⲥⲓⲁ ⲉⲩϩⲏⲗ ⲉⲙⲁⲩ ⲕⲁⲧⲁ ⲕⲟⲩϫⲓ ⲉⲩϣⲗⲏⲗ ϧⲉⲛ ⲟⲩⲛⲁϩϯ ⲟⲩⲟϩ ϩⲁⲛⲙⲏϣ ⲛ̀ⲧⲉ ⲛⲏⲉⲧϣⲱⲛⲓ ⲉⲧϩⲟⲣϣ ϧⲉⲛ ⲛⲟⲩⲥⲱⲙⲁ ⲛⲉⲙ ⲧⲟⲩⲯⲩⲭⲏ ⲓⲧⲉ ϧⲉⲛ Ϣⲓϩⲏⲧ ⲓⲧⲉ ⲛⲁ ⲡⲧⲱⲟⲩ ⲙ̀Ⲡⲉⲣⲛⲟⲩϫ ⲓⲧⲉ ⲙⲁⲓ ⲛⲓⲃⲉⲛ ⲁⲩϣⲁⲛⲓ ⲉⲡⲟⲩⲙⲁⲣⲧⲩⲣⲓⲟⲛ ⲛ̀ⲥⲉϣⲗⲏⲗ ϣⲁⲩϭⲓ ⲙ̀ⲡⲓⲧⲁⲗϭⲟ ⲥⲁⲧⲟⲧⲟⲩ ⲉⲃⲟⲗϩⲓⲧⲉⲛ ⲡⲓϩⲙⲟⲧ ⲛ̀ⲧⲉ ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲫⲁⲓ ⲉⲧϯ ⲙ̀ⲡⲓⲧⲁⲗϭⲟ ⲛ̀ⲛⲏⲉⲧϣⲱⲛⲓ ⲓⲧⲉ ⲛⲉ ⲡⲓⲥⲱⲙⲁ ⲓⲧⲉ ⲛⲁ ϯⲯⲩⲭⲏ ϩⲓⲧⲉⲛ ⲛⲓⲡⲣⲉⲥⲃⲓⲁ ⲛ̀ⲧⲉ ⲛⲉⲛⲓⲟϯ ⲉ̅ⲑ̅ⲩ̅ ⲛ̀ⲣⲱⲙⲉⲟⲥ Ⲙⲁⲝⲓⲙⲟⲥ ⲛⲉⲙ Ⲇⲟⲙⲉⲧⲓⲟⲥ ⲉⲧⲉ ⲡⲥⲱⲧⲏⲣ ⲛ̀ⲟⲩⲟⲛ ⲛⲓⲃⲉⲛ ⲡⲉ ⲡⲉⲛⲟ̅ⲥ̅ ⲟⲩⲟϩ ⲡⲉⲛⲛⲟⲩϯ ⲟⲩⲟϩ ⲡⲉⲛⲥ̅ⲱ̅ⲣ̅ Ⲓⲏ̅ⲥ̅ Ⲡⲭ̅ⲥ̅ ⲫⲁⲓ ⲉⲧⲉ ⲉⲃⲟⲗϩⲓⲧⲟⲧϥ ⲱⲟⲩ ⲛⲓⲃⲉⲛ ⲛⲉⲙ ⲧⲁⲓⲟ ⲛⲓⲃⲉⲛ ⲛⲉⲙ ⲡⲣⲟⲥⲕⲩⲛⲉⲥⲓⲥ ⲛⲓⲃⲉⲛ ⲉⲣⲡⲣⲉⲡⲓ ⲙ̀ⲫⲓⲱⲧ ⲛⲉⲙⲁϥ ⲛⲉⲙ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ⲛ̀ⲣⲉϥⲧⲁⲛϧⲟ ⲟⲩⲟϩ ⲛ̀ⲟⲙⲟⲟⲩⲥⲓⲟⲥ ⲛⲉⲙⲁϥ ϯⲛⲟⲩ ⲛⲉⲙ ϣⲁ ⲉⲛⲉϩ ⲛ̀ⲧⲉ ⲛⲓⲉⲛⲉϩ ⲧⲏⲣⲟⲩ
ⲁⲙⲏⲛ