ⲟⲩⲣⲱⲙⲓ ⲃ̅ ⲛ̀ⲥⲁⲙⲁⲣⲓⲧⲏⲥ
Ⲛⲉ ⲟⲩⲟⲛ ⲟⲩⲣⲱⲙⲓ ⲃ̅ ⲛ̀Ⲥⲁⲙⲁⲣⲓⲧⲏⲥ ⲉⲩⲟⲓ ⲛ̀ϣⲫⲏⲣ ⲛⲉⲙ ⲛⲟⲩⲉⲣⲏⲟⲩ ϧⲉⲛ ⲟⲩⲙⲉⲧϣⲱⲧ ⲉⲩϣⲓϯ ϧⲉⲛ ⲣ̅ ⲛ̀ⲗⲟⲩⲕⲟⲩϫⲓ.
Ⲁⲩⲧⲱⲟⲩⲛⲟⲩ ⲁⲩϧⲱⲕ ⲛ̀ⲛⲟⲩⲧⲉⲃⲛⲱⲟⲩⲓ ⲁⲩϭⲓ ⲛ̀ⲟⲩⲛⲟⲩⲃ ⲁⲩⲧⲁⲗⲱⲟⲩ ⲉⲩⲟⲩⲱϣ ⲉϩⲱⲗ ⲉⲆⲁⲙⲁⲥⲕⲟⲥ ⲉϣⲱⲡ ⲛ̀ⲧⲟⲩⲡⲣⲁⲅⲙⲁⲧⲓⲁ ⲁⲣⲟⲩϩⲓ ϣⲱⲡⲓ ⲉⲣⲱⲟⲩ ⲉⲩⲙⲟϣⲓ ϩⲓ ⲫⲙⲱⲓⲧ ⲛⲁⲩⲥⲁϫⲓ ⲛⲉⲙ ⲛⲟⲩⲉⲣⲏⲟⲩ ϩⲓ ⲡⲓⲙⲱⲓⲧ ⲉⲑⲃⲉ ⲛⲓϫⲟⲙ ⲛⲓϣⲫⲏⲣⲓ ⲉⲧⲉⲣ ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ⲓⲣⲓ ⲙ̀ⲙⲱⲟⲩ.
Ⲟⲩⲟϩ ⲁⲥϣⲱⲡⲓ ⲉⲩⲥⲁϫⲓ ⲛⲉⲙ ⲛⲟⲩⲉⲣⲏⲟⲩ ⲁⲩϧⲱⲛⲧ ⲉⲟⲩϯⲙⲓ ϣⲁⲧⲉⲛ ⲙⲓⲗⲓⲟⲛ ⲃ̅ ⲓⲉ ⲅ̅ ϩⲏⲡⲡⲉ ⲁⲩⲓ ⲉϧⲟⲩⲛ ⲉϩⲣⲁⲩ ⲛ̀ϫⲉ ⲙⲟⲩⲓⲃ̅ ⲉⲃⲟⲗϧⲉⲛ ⲛⲓⲓⲁϩϣϣⲏⲛ ⲉⲩϩⲟⲕⲉⲣ ⲉⲩϩⲉⲙϩⲉⲙ ⲉⲩϩⲱⲗⲉⲙ ⲕⲁⲧⲁ ⲫⲣⲏϯ ⲉⲧⲥϧⲏⲟⲩⲧ ϫⲉ ⲁϥⲭⲱ ⲛ̀ⲟⲩⲭⲁⲕⲓ ⲁϥϣⲱⲡⲓ ⲛ̀ϫⲉ ⲟⲩⲉϫⲱⲣϩ ⲉⲩⲉ̀ⲥⲓⲛⲓ ⲛ̀ϧⲏⲧϥ ⲛ̀ϫⲉ ⲛⲓⲑⲏⲣⲓⲟⲛ ⲧⲏⲣⲟⲩ ⲛ̀ⲧⲉ ⲡⲕⲁϩⲓ ϩⲁⲛⲙⲁⲥ ⲙ̀ⲙⲟⲩⲓ ⲉⲩϩⲉⲙϩⲉⲙ ⲉⲩϩⲱⲗⲉⲙ ⲉⲩⲕⲱϯ ⲛ̀ⲥⲁ ⲧⲟⲩϧⲣⲉ
Ⲉⲧⲁ ⲛⲓⲉⲱ ⲛⲁⲩ ⲉⲛⲓⲑⲏⲣⲓⲟⲛ ⲉⲧⲁⲩⲓ̀ ⲉϧⲟⲩⲛ ⲉϩⲣⲁⲩ ⲁⲩⲛⲟⲩϣⲡ ⲁⲩϩⲉⲓ ⲉⲡⲉⲥⲏⲧ ⲛ̀ϫⲉ ⲛⲓⲣⲱⲙⲓ ⲁⲩⲉⲣⲫⲁϣⲙⲟⲩ ⲟⲩⲟϩ ⲁⲛⲓⲑⲏⲣⲓⲱⲛ ⲟϩⲓ ⲉⲣⲁⲧⲟⲩ ⲥⲁⲡϣⲱⲓ ⲙ̀ⲙⲱⲟⲩ ⲉⲛⲁⲩⲟⲩⲱϣ ⲉⲟⲩⲱⲙ ⲛ̀ⲛⲓⲣⲱⲙⲓ ⲟⲩⲇⲉ ⲙ̀ⲡⲟⲩϣⲉⲛⲱⲟⲩ ⲛⲉⲙ ⲛⲓⲧⲉⲃⲛⲱⲟⲩⲓ ⲟⲩⲇⲉ ⲙ̀ⲡⲟⲩϭⲟϩ ⲉⲣⲱⲟⲩ ⲁⲗⲗⲁ ⲁⲩⲟϩⲓ ⲉⲣⲁⲧⲟⲩ ⲉⲣⲱⲟⲩ ⲉⲩⲑⲱⲣϣ ⲉϩⲣⲏⲓ ⲉϫⲱⲟⲩ.
Ⲛⲓⲣⲱⲙⲓ ⲛⲁⲩⲥⲁϫⲓ ⲛⲉⲙ ⲛⲟⲩⲉⲣⲏⲟⲩ ⲉⲩϫⲱ ⲙ̀ⲙⲟⲥ ϫⲉ ⲉϣⲱⲡ ⲛ̀ⲧⲉ Ⲫϯ ⲛⲉⲙ ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ⲛⲟϩⲉⲙ ⲙ̀ⲙⲟⲛ ⲉⲃⲟⲗϧⲉⲛ ⲣⲱⲟⲩ ⲛ̀ⲛⲁⲓⲑⲏⲣⲓⲟⲛ ⲧⲉⲛⲛⲁϯ ⲙ̀ⲡⲁⲓⲣ̅ ⲛ̀ⲗⲟⲩⲕⲟⲩϫⲓ ⲉϧⲟⲩⲛ ⲉⲡⲉϥⲧⲟⲡⲟⲥ ⲛ̀ⲧⲉⲛϣⲱⲡⲓ ⲛ̀ⲭⲣⲓⲥⲧⲓⲁⲛⲟⲥ.
Ⲁⲥϣⲱⲡⲓ ⲇⲉ ⲉⲧⲁⲩϯ ⲣⲱⲟⲩ ⲙ̀Ⲫϯ ⲙ̀ⲁⲡⲓⲣⲏϯ ⲁⲡⲓⲁⲅⲁⲑⲟⲥ Ⲫϯ ⲫϯ ⲫⲏⲉⲑⲟⲩⲱϣ ⲫⲛⲟϩⲉⲙ ⲛ̀ⲣⲱⲙⲓ ⲛⲓⲃⲉⲛ ⲫⲏⲉⲧⲁϥⲑⲣⲉ ⲛⲓⲙⲟⲩⲓ ⲉⲣϩⲓⲣⲏⲛⲏ ⲛⲉⲙ Ⲇⲁⲛⲓⲏⲗ ⲡⲓⲡⲣⲟⲫⲏⲧⲏⲥ ⲁϥⲧⲏⲓⲥ ⲉⲡϩⲏⲧ ⲛ̀ⲛⲁⲓⲕⲉⲭⲱⲟⲩⲛⲓ ⲁⲓϫⲱⲃⲥ ⲛ̀ϫⲱⲟⲩ ⲉⲡⲉⲥⲏⲧ ⲟⲩⲟϩ ⲁⲩϯ ϫⲱⲟⲩ ⲉϧⲟⲩⲛ ⲉⲡⲡⲓⲓⲁϩϣϣⲏⲛ ⲁⲩϣⲉⲛⲱⲟⲩ.
Ⲛⲓⲣⲱⲙⲓ ⲇⲉ ⲉⲧⲁ ⲛⲟⲩϩⲏⲧ ⲥⲉⲙⲛⲓ ⲉⲣⲱⲟⲩ ⲁⲩⲉⲙⲓ ⲉϯⲇⲱⲣⲉⲁ ⲉⲧⲁⲥⲧⲁϩⲱⲟⲩ ϫⲉ ⲑⲁ ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ⲧⲉ ⲁⲩⲧⲱⲟⲩ ⲙ̀Ⲫϯ ⲛⲉⲙ ⲡⲉϥ⳥ ⲉ̅ⲑ̅ⲩ̅ ⲟⲩⲟϩ ⲉⲧⲁⲩⲙⲟϣⲓ ϩⲓⲧϩⲏ ⲛ̀ⲟⲩⲕⲟⲩϫⲓ ⲁⲩϫⲓⲙⲓ ⲛ̀ⲛⲓⲧⲉⲃⲛⲱⲟⲩⲓ ⲉⲩⲙⲟⲛⲓ ⲙ̀ⲡⲉ ϩⲗⲓ ⲙ̀ⲡⲉⲧϩⲱⲟⲩ ϣⲱⲡⲓ ⲙ̀ⲙⲱⲟⲩ.
Ⲛ̀ⲑⲱⲟⲩ ⲇⲉ ⲁⲩⲧⲁⲗⲱⲟⲩ ⲁⲩⲓ̀ ⲉϩⲣⲏⲓ ⲉⲡⲓϯⲙⲓ ⲛⲁⲩⲥⲁϫⲓ ⲛⲉⲙ ⲛⲟⲩⲉⲣⲏⲟⲩ ⲛⲉⲙ ⲛⲓⲣⲱⲙⲓ ⲛ̀ϩⲱⲃ ⲛⲓⲃⲉⲛ ⲉⲧⲁⲩϣⲱⲡⲓ ⲙ̀ⲙⲱⲟⲩ ⲟⲩⲟϩ ⲟⲩⲟⲛ ⲛⲓⲃⲉⲛ ⲉⲧⲁⲩⲥⲱⲧⲉⲙ ⲁⲩⲉⲣϣⲫⲏⲣⲓ ⲛ̀ⲛⲓϫⲟⲙ ⲛⲉⲙ ⲛⲓϣⲫⲏⲣⲓ ⲛ̀ⲧⲉ ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ.
Ⲛⲓⲣⲱⲙⲓ ⲇⲉ ⲛ̀ⲧⲉ ⲡⲓϯⲙⲓ ⲛⲁⲩⲥⲁϫⲓ ϧⲁⲧⲟⲧⲟⲩ ⲡⲉ ⲉⲩϫⲱ ⲙ̀ⲙⲟⲥ ϫⲉ ⲁⲛⲓⲑⲏⲣⲓⲟⲛ ⲉⲧⲉⲙⲙⲁⲩ ⲧⲁⲕⲟ ⲛ̀ϩⲁⲛⲙⲏϣ ⲛ̀ⲣⲱⲙⲓ ⲛⲉⲙ ϩⲁⲛⲕⲉⲙⲏϣ ⲛ̀ⲧⲉⲃⲛⲱⲟⲩⲓ ⲛⲧⲉ ⲧⲁⲓⲭⲱⲣⲁ ⲁⲗⲗⲁ ⲡⲧⲁⲓⲟ ⲙ̀ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ⲡⲉ ⲉⲧⲁϥⲛⲁϩⲉⲙ ⲑⲏⲛⲟⲩ ⲉⲧⲁⲓⲟⲣⲅⲏ.
Ⲙⲉⲛⲉⲛⲥⲁ ⲛⲁⲓ ⲁⲩⲥⲟϭⲛⲓ ⲛⲉⲙ ⲛⲟⲩⲉⲣⲏⲟⲩ ⲉⲩϫⲱ ⲙ̀ⲙⲟⲥ ϫⲉ ⲫⲏⲉⲧⲁⲛϫⲟϥ ⲧⲉⲛⲛⲁⲁⲓϥ ⲉⲡⲧⲟⲛⲟⲥ ⲙ̀ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ϧⲉⲛ ⲟⲩϣⲉⲡϩⲙⲟⲧ ⲉⲩⲱⲟⲩ ⲙ̀Ⲫϯ ⲛ̀ⲧⲉⲛϣⲱⲡⲓ ⲛ̀ⲭⲣⲓⲥⲧⲓⲁⲛⲟⲥ ϧⲉⲛ ⲟⲩⲙⲉⲑⲙⲏⲓ ⲁⲗⲗⲁ ⲙ̀ⲡⲉⲑⲣⲉⲛⲧⲁⲥⲑⲟⲛ ⲉⲫⲁϩⲟⲩ ϩⲟⲥⲟⲛ ⲁⲛⲓ̀ ϣⲁ ⲡⲁⲓⲙⲁ ⲙⲁⲣⲉⲛϩⲱⲗ ϣⲁ Ⲇⲁⲙⲁⲥⲕⲟⲥ ⲛ̀ⲧⲉⲛϣⲱⲡ ⲛ̀ⲧⲉⲛⲡⲣⲁⲅⲙⲁⲧⲓⲁ ϩⲓⲛⲁ ⲛ̀ⲧⲉⲛϫⲓⲙⲓ ⲛ̀ⲟⲩⲕⲟⲩϫⲓ ⲛ̀ⲧⲉⲛϯ ϧⲉⲛ ⲟⲩⲥⲱⲟⲩⲧⲉⲛ.
Ⲉⲧⲁⲩⲓ̀ ⲇⲉ ⲉⲡⲆⲁⲙⲁⲥⲕⲟⲥ ⲁⲩϫⲓⲙⲓ ⲛϩⲁⲛⲱⲛⲓ ⲛ̀ⲁⲛⲁⲙⲏⲓ ⲉⲩϯ ⲙ̀ⲙⲱⲟⲩ ⲉⲃⲟⲗ ⲛⲏⲉⲧⲟⲩⲙⲟⲩϯ ⲉⲣⲱⲟⲩ ϫⲉ ⲁⲇⲁⲙⲁⲥ ⲁⲩϣⲟⲡⲟⲩ ϧⲉⲛ ⲡⲓⲣ̅ ⲛ̀ⲗⲟⲩⲕⲟⲩϫⲓ ⲉⲧⲩⲓ̀ ⲉϩⲣⲏⲓ Ⲓⲗ̅ⲏ̅ⲙ̅ ⲁⲩⲧⲏⲧⲟⲩ ϧⲁ ⲥ̅ ⲛ̀ⲗⲟⲩⲕⲟⲩϫⲓ.
Ⲙ̀ⲡⲁⲧⲟⲩⲫⲟϩ ⲣⲱ ⲉⲧⲟⲩⲃⲁⲕⲓ ⲛ̀ⲧⲤⲁⲙⲁⲣⲓⲁ ⲁⲩⲥⲁϫⲓ ⲛ̀ϫⲉ ⲛⲓⲣⲱⲙⲓ ⲛⲉⲙ ⲛⲟⲩⲉⲣⲏⲟⲩ ⲉⲩϫⲱ ⲙ̀ⲙⲟⲥ ϫⲉ ⲡϩⲙⲟⲧ ⲙ̀Ⲫϯ ϣⲏⲡ ϫⲉ ⲁ ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ϯ ⲛⲁⲛ ⲉⲑⲣⲉⲛⲉⲣⲡⲉⲙⲡϣⲁ ⲙ̀ⲡⲁⲓⲛⲓϣϯ ⲛ̀ϩⲙⲟⲧ.
Ⲁⲥϣⲱⲡⲓ ⲇⲉ ⲉⲧⲁⲩⲓ̀ ⲉⲧⲟⲩⲃⲁⲕⲓ ⲁⲩⲧⲁⲙⲉ ⲟⲩⲟⲛ ⲛⲓⲃⲉⲛ ⲛⲉⲙ ⲛⲟⲩⲥⲏⲛⲅⲉⲛⲏⲥ ⲉⲛⲓϫⲟⲙ ⲛⲉⲙ ⲛⲓϣⲫⲏⲣⲓ ⲉⲧⲁ Ⲫϯ ⲁⲓⲧⲟⲩ ⲛⲉⲙⲱⲟⲩ ⲟⲩⲟϩ ⲁⲩⲧⲱⲟⲩⲛⲟⲩ ⲁⲩϭⲓ ⲙ̀ⲡⲓⲣ̅ ⲛ̀ⲗⲟⲩⲕⲟⲩϫⲓ ⲉⲧⲁⲩⲱϣ ⲙ̀ⲙⲱⲟⲩ ⲉⲧⲏⲓⲧⲟⲩ ⲙ̀ⲡⲧⲟⲡⲟⲥ ⲙ̀ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ⲟⲩⲟϩ ⲁⲩϩⲓⲱⲓϣ ϧⲉⲛ ϯⲃⲁⲕⲓ ⲧⲏⲣⲥ ⲉⲩϫⲱ ⲙ̀ⲙⲟⲥ ϫⲉ ⲫⲏⲉⲑⲟⲩⲱϣ ⲙⲁⲣⲉϥⲓ̀ ⲉⲡⲧⲟⲡⲟⲥ ⲙ̀ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ⲛⲉⲙⲁⲛ.
Ϩⲁⲛⲙⲏϣ ⲛ̀ⲣⲱⲙⲓ ⲛⲉⲙ ϩⲁⲛⲥϩⲓⲙⲓ ⲁⲩⲓ̀ ⲉⲃⲟⲗ ⲛⲉⲙⲱⲟⲩ ϧⲉⲛ ⲧⲤⲁⲙⲁⲣⲓⲁ ⲉⲧⲁⲩⲓ̀ ⲇⲉ ⲉⲡⲧⲟⲡⲟⲥ ⲉ̅ⲑ̅ⲩ̅ ⲁⲩϯ ⲛ̀ⲛⲟⲩⲇⲱⲣⲟⲛ ⲉϧⲟⲩⲛ ⲁⲩⲛⲁⲩ ⲉϩⲁⲛⲛⲓϣϯ ⲛ̀ϣⲫⲏⲣⲓ ⲛⲉⲙ ϩⲁⲛⲧⲁⲗϭⲟ ⲉⲩⲟϣ ⲛ̀ⲛⲏⲉⲧϣⲱⲛⲓ.
Ⲟⲩⲙⲏϣ ⲛ̀ⲇⲉⲙⲟⲛ ⲁϥϩⲓⲧⲟⲩ ⲉⲃⲟⲗ ⲁⲩⲧⲱⲟⲩⲛⲟⲩ ⲧⲏⲣⲟⲩ ⲁⲩϭⲓⲱⲙⲥ ⲉⲫⲣⲁⲛ ⲙ̀ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ⲁⲩϣⲱⲡⲓ ⲛ̀ⲭⲣⲓⲥⲧⲓⲁⲛⲟⲥ ⲛ̀ϫⲉ ⲣ̅ⲛ̅ⲅ̅ ⲙ̀ⲯⲩⲭⲏ ϧⲉⲛ ⲡⲓⲉϩⲟⲟⲩ ⲉⲧⲉⲙⲙⲁⲩ ϧⲉⲛ ⲡⲧⲟⲡⲟⲥ ⲙ̀ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ϧⲉⲛ ⲟⲩϩⲓⲣⲏⲛⲏ ⲛ̀ⲧⲉ Ⲫϯ ⲁⲙⲏⲛ.