Ⲁⲟⲩⲥⲟⲛ ϫⲛⲉ ⲟⲩϩⲗ̅ⲗⲟ ϫⲉ ⲡⲁⲉⲓⲱⲧ ⲉⲧⲃⲉ ⲟⲩ ⲁⲛⲟⲕ ⲡⲁϩⲏⲧ ⲛⲁϣⲧ ⲛϥ̅ⲣ̅ϩⲟⲧⲉ ⲁⲛ ⲛ̅ϩⲏⲧϥ ⲙ̅ⲡⲛⲟⲩⲧⲉ , ⲡⲉϫⲉ ⲡϩⲗ̅ⲗⲟ ⲛⲁϥ ϫⲉ ϯⲙⲉⲉⲩⲉ ϫⲉ ⲉⲣϣⲁⲛ ⲡⲣⲱⲙⲉ ⲁⲙⲁϩⲧⲉ ⲙ̅ⲡⲉϫⲡⲓⲟ ϩⲙ̅ ⲡⲉϥϩⲏⲧ ϥ̅ⲛⲁϫⲡⲟ ⲛⲁϥ ⲛ̅ⲑⲟⲧⲉ ⲙ̅ⲡⲛⲟⲩⲧⲉ. ⲡⲉϫⲉ ⲡⲥⲟⲛ ⲛⲁϥ ϫⲉ ⲟⲩ ⲡⲉ ⲡⲉϫⲡⲓⲟ , ⲡⲉϫⲉ ⲡϩⲗ̅ⲗⲟ ϫⲉⲕⲁⲥ ⲉⲣⲉ ⲡⲣⲱⲙⲉ ⲛⲁϫⲡⲓⲉ ⲧⲉϥⲩⲭⲏ ϩⲛ̅ ϩⲱⲃ ⲛⲓⲙ ⲉϥϫⲱ ⲙ̅ⲙⲟⲥ ⲛⲁⲥ ϫⲉ ⲁⲣⲓⲡⲙⲉⲉⲩⲉ ϫⲉ ϩⲁⲡⲥ̅ ⲉⲣⲟⲛ ⲡⲉ ⲉⲧⲣⲉⲛⲁⲡⲁⲛⲧⲁ ⲉⲡⲛⲟⲩⲧⲉ ⲛϥ̅ϫⲟⲟⲥ ⲟⲛ ϫⲉ ⲁϩⲣⲟⲓ ⲁⲛⲟⲕ ⲙⲛ̅ ⲣⲱⲙⲉ , ⲉⲣϣⲁⲛ ⲟⲩⲁ ⲇⲉ ⲙⲟⲩⲛ ⲉⲃⲟⲗ ϩⲛ̅ ⲛⲁⲓ ⲥⲛⲏⲩ ⲛⲁϥ ⲛ̅ϭⲓ ⲑⲟⲧⲉ ⲙ̅ⲡⲛⲟⲩⲧⲉ.

ⲁϥϫⲟⲟⲥ ⲛ̅ϭⲓ ⲁⲡⲁ ⲡⲟⲓⲙⲏⲛ ϫⲉ ⲁⲟⲩⲥⲟⲛ ϫⲟⲟⲥ ⲛ̅ⲁⲡⲁ ⲡⲁⲏⲥⲉ ϫⲉ ⲉⲓⲛⲁⲣ̅ ⲟⲩ ⲙ̅ⲡⲁϩⲏⲧ ⲉϥⲛⲁϣⲧ , ⲛ̅ϯⲣ̅ϩⲟⲧⲉ ⲁⲛ ⲛ̅ϩⲏⲧϥ̅ ⲙ̅ⲡⲛⲟⲩⲧⲉ . ⲡⲉϫⲁϥ ⲛⲁϥ ϫⲉ ⲃⲱⲕ ⲛⲅ̅ⲧⲟϭⲕ̅ ⲉⲩⲥⲟⲛ ⲉϥⲣ̅ϩⲟⲧⲉ ⲛ̅ϩⲏⲧϥ ⲙ̅ⲡⲛⲟⲩⲧⲉ ⲁⲩⲱ ⲉⲃⲟⲗϩⲛ̅ ⲧⲙⲛ̅ⲧⲣⲉϥⲣ̅ϩⲟⲧⲉ ⲙ̅ⲡⲉⲧⲙ̅ⲙⲁⲩ ⲕⲛⲁⲣ̅ϩⲟⲧⲉ ϩⲱⲱⲕ ⲛ̅ϩⲏⲧϥ ⲙ̅ⲡⲛⲟⲩⲧⲉ.

ⲁⲟⲩⲁ ϫⲛⲉ ⲟⲩϩⲗ̅ⲗⲟ ϫⲉ ⲉⲧⲃⲉ ⲟⲩ ⲉⲓϩⲙⲟⲟⲥ ϩⲙ̅ ⲡⲁⲙⲁⲛ̅ϣⲱⲡⲉ ⲡⲁϩⲏⲧ ⲕⲱⲧⲉ ⲥⲁ ⲥⲁ ⲛⲓⲙ , ⲁϥⲟⲩⲱϣⲃ ⲛⲁϥ ⲛ̅ϭⲓ ⲡϩⲗ̅ⲗⲟ ϫⲉ ⲉⲃⲟⲗ ϫⲉ ⲥⲉϣⲱⲛⲉ ⲛ̅ϭⲓ ⲛⲉⲕⲉⲥⲑⲏⲧⲏⲣⲓⲟⲛ ⲉⲧϩⲓⲃⲟⲗ ⲧϭⲓⲛⲛⲁⲩ ⲧϭⲓⲛⲥⲱⲧⲙ̅ ⲧϭⲓⲛϣⲱⲗⲙ̅ ⲧϭⲓⲛϣⲁϫⲉ. ⲛⲁⲓ ϭⲉ ⲉϣⲱⲡⲉ ⲉⲕϣⲁⲛϫⲡⲟ ⲛ̅ⲧⲉⲩⲉⲛⲉⲣⲅⲓⲁ ϩⲛ̅ ⲟⲩⲙⲛ̅ⲧⲕⲁⲑⲁⲣⲟⲥ ϣⲁⲣⲉ ⲛ̅ⲕⲉⲉⲥⲑⲏⲧⲏⲣⲓⲟⲛ ⲉⲧϩⲓϩⲟⲩⲛ ϣⲱⲡⲉ ϩⲛ̅ ⲟⲩⲥϭ̅ⲣⲁϩⲧ ⲙⲛ̅ ⲟⲩⲟⲩϫⲁⲓ.

ⲁⲟⲩⲁ ⲟⲛ ϫⲛⲉ ⲟⲩϩⲗ̅ⲗⲟ ϫⲉ ⲉⲧⲃⲉ ⲟⲩ ϯϩⲙⲟⲟⲥ ϩⲙ̅ ⲡⲁⲙⲁⲛ̅ϣⲱⲡⲉ ϯϩⲗⲡ̅ⲗⲱⲡ , ⲁϥⲟⲩⲱϣⲃ ⲛⲁϥ ϫⲉ ⲉⲃⲟⲗ ϫⲉ ⲙ̅ⲡⲁⲧⲉⲕⲉⲓⲱⲣϩ ⲙ̅ⲡⲙ̅ⲧⲟⲛ ⲉⲧⲛ̅ϩⲉⲗⲡⲓⲍⲉ ⲉⲣⲟϥ ⲟⲩⲇⲉ ⲧⲕⲟⲗⲁⲥⲓⲥ ⲉⲧⲛⲁϣⲱⲡⲉ . ⲉⲛⲉ ⲁⲕⲉⲓⲉⲣϩ ⲛⲁⲓ ϩⲛ̅ ⲟⲩⲱⲣϫ ⲁⲩⲱ ⲛ̅ⲧⲉ ⲡⲉⲕⲙⲁⲛ̅ϣⲱⲡⲉ ⲙⲟⲩϩ ⲛ̅ⲃⲛ̅ⲧ ⲉⲣⲟⲕ ϣⲁⲛⲧⲟⲩⲡⲱϩ ⲉϩⲣⲁⲓ ⲉⲡⲉⲕⲙⲟⲧⲉ ⲛⲉⲕⲛⲁϭⲱ ⲉϩⲣⲁⲓ ⲛ̅ϩⲏⲧⲟⲩ ⲡⲉ ⲛⲅ̅ϥⲓ ϩⲁⲣⲟⲟⲩ ⲛⲅ̅ⲧⲙ̅ϩⲗⲟⲡⲗⲡ̅.

ⲁϥϫⲟⲟⲥ ⲟⲛ ϫⲉ ⲧⲛⲏⲥⲧⲓⲁ ⲡⲉ ⲡⲉⲭⲁⲗⲓⲛⲟⲥ ⲙ̅ⲡⲙⲟⲛⲁⲭⲟⲥ ⲉϥϯ ⲟⲩⲃⲉ ⲡⲛⲟⲃⲉ. ⲡⲉⲧⲛⲟⲩϫⲉ ⲛ̅ⲧⲁⲓ ⲥⲁⲃⲟⲗ ⲙ̅ⲙⲟϥ ⲟⲩϩⲧⲟ ⲛ̅ⲗⲁⲃⲥϩⲓⲙⲉ ⲡⲉ.

ⲁ̅ϥϫⲟⲟⲥ ⲟⲛ ϫⲉ ⲡⲥⲱⲙⲁ ⲉⲧϣⲟⲩⲱⲟⲩ ⲛ̅ⲧⲉ ⲡⲙⲟⲛⲁⲭⲟⲥ ⲉϥⲥⲱⲕ ⲛ̅ⲧⲉⲩⲭⲏ ⲉϩⲣⲁⲓ ϩⲛ̅ ⲛ̅ϣⲓⲕ ⲛ̅ⲧⲉ ⲡⲉⲥⲏⲧ ⲁⲩⲱ ⲛϥ̅ⲧⲣⲉ ⲛ̅ϩⲩⲇⲱⲛⲏ ϣⲟⲟⲩⲉ ϩⲓⲧⲛ̅ ⲧⲛⲏⲥⲧⲓⲁ.

ⲁ̅ϥϫⲟⲟⲥ ⲟⲛ ϫⲉ ⲡⲙⲟⲛⲁⲭⲟⲥ ⲛ̅ϩⲁⲕ ϣⲁⲩϯⲕⲗⲟⲙ ⲉϫⲱϥ ϩⲙ̅ ⲡⲕⲁϩ ⲁⲩⲱ ⲟⲛ ϩⲙ̅ ⲙ̅ⲡⲏⲩⲉ ϣⲁⲩϯⲕⲗⲟⲙ ⲉϫⲱϥ ⲙ̅ⲡⲙ̅ⲧⲟ ⲉⲃⲟⲗ ⲙ̅ⲡⲛⲟⲩⲧⲉ.

ⲁ̅ϥϫⲟⲟⲥ ⲟⲛ ϫⲉ ⲡⲙⲟⲛⲁⲭⲟⲥ ⲉⲧⲁⲙⲁϩⲧⲉ ⲁⲛ ⲙ̅ⲡⲉϥⲗⲁⲥ ⲙⲁⲗⲓⲥⲧⲁ ⲙ̅ⲡⲛⲁⲩ ⲙ̅ⲡϭⲱⲛⲧ ⲙⲉⲣⲉ ⲡⲁⲓ ⲛ̅ⲧⲉⲓⲙⲓⲛⲉ ⲉⲣϫⲟⲉⲓⲥ ⲉⲗⲁⲁⲩ ⲙ̅ⲡⲁⲑⲟⲥ ⲉⲛⲉϩ.

ⲁϥϫⲟⲟⲥ ⲟⲛ ϫⲉ ⲙ̅ⲡⲣ̅ⲧⲁⲟⲩⲉ ⲗⲁⲁⲩ ⲛ̅ϣⲁϫⲉ ⲉϥϩⲟⲟⲩ ⲉⲃⲟⲗ ϩⲛ̅ⲧⲉⲕⲧⲁⲡⲣⲟ . ⲧⲃⲱ ⲛ̅ⲉⲗⲟⲟⲗⲉ ⲅⲁⲣ ⲙⲉⲥⲧⲁⲟⲩⲉ ϣⲟⲛⲧⲉ ⲉⲃⲟⲗ.

ⲁ̅ϥϫⲟⲟⲥ ⲟⲛ ϫⲉ ⲛⲁⲛⲟⲩ ⲟⲩⲉⲙ ⲁⲃ ⲁⲩⲱ ⲉⲥⲉ ⲏⲣⲡ ⲛⲅ̅ⲧⲙ̅ⲟⲩⲱⲙ ⲇⲉ ⲛ̅ⲛⲥⲁⲣⲝ ⲛ̅ⲛⲉⲕⲥⲛⲏⲩ ϩⲓⲧⲛ̅ ⲧⲕⲁⲧⲁⲗⲁⲗⲓⲁ.

ⲁ̅ϥϫⲟⲟⲥ ⲟⲛ ϫⲉ ⲛ̅ⲧⲁ ⲡϩⲟϥ ⲕⲟⲥⲕⲉⲥ ⲉⲉⲩϩⲁ ϣⲁⲛ ⲧⲟⲩⲛⲟϫⲥ ⲉⲃⲟⲗ ϩⲙ̅ ⲡⲡⲁⲣⲁⲇⲓⲥⲟⲥ. ⲉⲣⲉ ⲡⲉⲧⲕⲁⲧⲁⲗⲁⲗⲓⲁ ⲙ̅ⲡⲉϥⲥⲟⲛ ⲧⲛ̅ⲧⲱⲛ ⲉⲡⲁⲓ.ϣⲁϥⲧⲁⲕⲟ ⲅⲁⲣ ⲛ̅ⲧⲉⲩⲭⲏ ⲙ̅ⲡⲉⲧⲥⲱⲧⲙ̅ ⲁⲩⲱ ⲧⲉϥⲕⲉⲟⲩⲉⲓ ⲙ̅ⲙⲓⲛ ⲙ̅ⲙⲟϥ ⲙⲉϥⲧⲁⲛϩⲟⲥ.

ⲁ̅ⲩϣⲁ ⲇⲉ ϣⲱⲡⲉ ⲛ̅ⲟⲩⲟⲉⲓϣ ϩⲛ̅ϣⲓⲏⲧ ⲁⲩⲱ ⲁⲩϯ ⲛ̅ⲟⲩⲁⲡⲟⲧ ⲛ̅ⲏⲣⲡ ⲛ̅ⲟⲩϩⲗ̅ⲗⲟ . ⲡⲉϫⲁϥ ϫⲉ ϥⲓ ⲉⲃⲟⲗ ⲙ̅ⲙⲟ ⲙ̅ⲡⲓⲙⲟⲩ. ⲛ̅ⲧⲉⲣⲉ ⲡⲕⲉⲥⲉⲉⲡⲉ ⲇⲉ ⲛⲁⲩ ⲉⲧⲟⲩⲱⲙ ⲛⲙ̅ⲙⲁϥ ⲙ̅ⲡⲟⲩϫⲓ.

ⲁ̅ⲩϫⲓ ⲇⲉ ⲟⲛ ⲛ̅ⲟⲩⲥⲁⲓⲇⲓⲟⲛ ⲛ̅ⲏⲣⲡ ⲛ̅ⲁⲡⲁⲣⲭⲏ ϫⲉ ⲉⲩⲉⲧⲁⲁϥ ⲛ̅ⲛⲉⲥⲛⲏⲩ ⲕⲁⲧⲁ ⲟⲩⲁⲡⲟⲧ ⲉⲡⲟⲩⲁ . ⲁⲟⲩⲁ ⲇⲉ ⲛ̅ⲛⲉⲥⲛⲏⲩ ⲃⲱⲕ ⲉϩⲣⲁⲓ ⲉϫⲛ̅ ⲧⲕⲩⲡⲏ ⲁϥⲡⲱⲧ ⲉⲃⲟⲗ ϩⲓϫⲱⲥ ⲁⲩⲱ ⲛ̅ⲧⲉⲩⲛⲟⲩ ⲁⲥϩⲉ ⲉⲡⲥⲟⲛ ⲉϥⲛⲏϫ ϩⲓⲡⲉⲥⲏⲧ. ⲁⲩϩⲓⲧⲟⲟⲧⲟⲩ ⲉⲥⲱϣ ⲙ̅ⲙⲟϥ ⲉⲩϫⲱ ⲙ̅ⲙⲟⲥ ϫⲉ ⲛ̅ⲧⲕ̅ ⲟⲩⲙⲁⲓ ⲉⲟⲟⲩ ⲉϥϣⲟⲩⲉⲓⲧ. ⲕⲁⲗⲱⲥ ⲁⲡⲁⲓ ϣⲱⲡⲉ ⲙ̅ⲙⲟⲕ. ⲁⲡϩⲗ̅ⲗⲟ ⲇⲉ ⲱⲗⲙ ⲉⲣⲟϥ ⲉϥϫⲱ ⲙ̅ⲙⲟⲥ ϫⲉ ⲁⲗⲱⲧⲛ̅ ϩⲁ ⲡⲁϣⲏⲣⲉ. ⲟⲩϩⲱⲃ ⲅⲁⲣ ⲉⲛⲁⲛⲟⲩϥ ⲡⲉ ⲛ̅ⲧⲁϥⲁⲁϥ . ϥ̅ⲟⲛϩ ⲛ̅ϭⲓ ⲡϫⲟⲉⲓⲥ ϫⲉ ⲛ̅ⲛⲉⲩⲕⲉⲧ ⲧⲉⲓⲕⲩⲡⲏ ϩⲙ̅ ⲡⲁⲟⲩⲟⲉⲓϣ ⲧⲁⲣⲉ ⲧⲟⲓⲕⲟⲩⲙⲉⲛⲏ ⲧⲏⲣⲥ ⲉⲓⲙⲉ ϫⲉ ⲁⲩⲕⲏⲡⲏ ϩⲉ ϩⲛ̅ ϣⲓⲏⲧ ⲉⲧⲃⲉ ⲟⲩⲁⲡⲟⲧ ⲛ̅ⲏⲣⲡ.

ⲁ̅ⲩⲥⲟⲛ ⲕⲓⲙ ϩⲙ̅ ⲡⲉϥϭⲱⲛⲧ ⲉϩⲟⲩⲛ ⲉⲟⲩⲁ ⲁϥⲁϩⲉⲣⲁⲧϥ ⲉⲡⲉϥϣⲗⲏⲗ ⲁϥⲁⲓⲧⲉⲓ ⲉϫⲓ ⲛ̅ⲟⲩⲙⲛ̅ⲧϩⲁⲣϣ̅ϩⲏⲧ ⲉϫⲙ̅ ⲡⲉϥⲥⲟⲛ ⲁⲩⲱ ⲉⲡⲁⲣⲁⲅⲉ ⲙ̅ⲡⲡⲓⲣⲁⲥⲙⲟⲥ ⲁϫⲙ̅ ⲡⲱⲗⲁϩ ̅ⲁⲩⲱ ⲛ̅ⲧⲉⲩⲛⲟⲩ ⲁϥⲛⲁⲩ ⲉⲩⲕⲁⲡⲛⲟⲥ ⲉϥⲛⲏⲩ ⲉⲃⲟⲗ ϩⲛ̅ ⲧⲉϥⲧⲁⲡⲣⲟ . ⲛ̅ⲧⲉⲣⲉ ⲡⲁⲓ ⲇⲉ ϣⲱⲡⲉ ⲁϥⲗⲟ ⲉϥϭⲟⲛⲧ.

ⲁ̅ϥⲃⲱⲕ ⲛ̅ⲟⲩⲟⲉⲓϣ ⲛ̅ϭⲓ ⲡⲉⲡⲣⲉⲥⲃⲩⲧⲉⲣⲟⲥ ⲛ̅ϣⲓⲏⲧ ϣⲁ ⲡⲁⲣⲭⲏⲉⲡⲓⲥⲕⲟⲡⲟⲥ ⲛ̅ⲣⲁⲕⲟⲧⲉ ⲁⲩⲱ ⲛ̅ⲧⲉⲣⲉϥⲕⲧⲟϥ ⲉϣⲓⲏⲧ ⲁⲩϫⲛⲟⲩϥ ⲛ̅ϭⲓ ⲛⲉⲥⲛⲏⲩ ϫⲉ ̅ⲉⲣⲉ ⲧⲡⲟⲗⲓⲥ ⲣ̅ ⲟⲩ , ⲛ̅ⲧⲟϥ ⲇⲉ ⲡⲉϫⲁϥ ⲛⲁⲩ ϫⲉ ⲫⲩⲥⲓ ⲛⲁⲥⲛⲏⲩ ⲁⲛⲟⲕ ⲙ̅ⲡⲓⲛⲁⲩ ⲉⲡϩⲟ ⲛ̅ⲗⲁⲁⲩ ⲛ̅ⲣⲱⲙⲉ ⲛ̅ⲥⲁ ⲡⲁⲣⲭⲏⲉⲡⲓⲥⲕⲟⲡⲟⲥ ⲙⲁⲩⲁⲁϥ ⲛ̅ⲧⲟⲟⲩ ⲇⲉ ⲛ̅ⲧⲉⲣⲟⲩⲥⲱⲧⲙ̅ ⲁⲩⲧⲁϫⲣⲟ ⲉⲧⲃⲉ ⲡϣⲁϫⲉ ϫⲉ ⲉⲩⲉϩⲁⲣⲉϩ ⲉⲣⲟⲟⲩ ϩⲁⲃⲟⲗ ϩⲁ ⲡϫⲓϩⲣⲁϥ ⲛ̅ⲛⲃⲁⲗ.

ⲁⲟⲩⲁ ⲛ̅ⲛϩⲗ̅ⲗⲟ ⲃⲱⲕ ϣⲁ ⲕⲉϩⲗ̅ⲗⲟ ⲁⲩⲱ ⲡⲉϫⲁϥ ⲙ̅ⲡⲉϥⲙⲁⲑⲏⲧⲏⲥ ϫⲉ ⲧⲁⲙⲓⲟ ⲛⲁⲛ ⲛ̅ⲟⲩⲕⲟⲩⲓ ⲛ̅ⲁⲣϣⲓⲛ ⲁⲩⲱ ⲁϥⲧⲁⲙⲓⲟϥ. ⲡⲉϫⲁϥ ϫⲉ ̅ϩⲉⲣⲡ ϩⲉⲛⲟⲉⲓⲕ ⲛⲁⲛ ⲁⲩⲱ ⲁϥϩⲟⲣⲡⲟⲩ ̅ⲛ̅ⲧⲟⲟⲩ ⲇⲉ ⲁⲩⲙⲟⲩⲛ ⲉⲃⲟⲗ ⲉⲩϣⲁϫⲉ ⲉⲛⲉⲡ̅ⲛ̅ⲁ̅ⲧⲓⲕⲟⲛ ⲙ̅ⲡⲉϩⲟⲟⲩ ⲧⲏⲣϥ ⲙⲛ̅ ⲧⲉⲩϣⲏ ⲧⲏⲣⲥ.

ⲁ̅ϥϫⲟⲟⲥ ⲛ̅ϭⲓ ⲁⲡⲁ ⲓⲥⲁⲕ ϫⲉ ̅ⲛⲉⲛⲉⲓⲟⲧⲉ ⲙⲉⲛ ⲙⲛ̅ ⲁⲡⲁ ⲡⲁⲙⲃⲱ ⲛⲉⲩⲫⲟⲣⲉⲓ ⲛ̅ϩⲉⲛϣⲧⲏⲛ ⲙ̅ⲡⲉⲗϭⲉ ⲉⲩϩⲛ̅ ⲛ̅ⲧⲟⲉⲓⲥ ⲙⲛ̅ ϩⲉⲛϣⲧⲏⲛ ⲛ̅ϣⲃ̅ⲃⲛ̅ⲛⲉ . ⲛ̅ⲧⲱⲧⲛ̅ ⲇⲉ ⲧⲉⲛⲟⲩ ⲧⲉⲧⲛ̅ⲫⲟⲣⲉⲓ ϩⲉⲛϣⲧⲏⲛ ⲉⲩⲧⲁⲉⲓⲏⲩ. ⲃⲱⲕ ⲛ̅ⲧⲱⲧⲛ̅ ⲙ̅ⲡⲉⲓⲙⲁ ̅ⲁⲧⲉⲧⲛ̅ⲧⲁⲕⲟϥ.

ⲉ̅ⲩⲛⲁⲃⲱⲕ ⲇⲉ ⲉⲡⲱϩⲥ ⲡⲉϫⲁϥ ⲛⲁⲩ ϫⲉ ̅ⲛ̅ϯⲛⲁⲃⲱⲕ ⲁⲛ ⲉⲕⲟⲧⲧ ⲉϯⲉⲛⲧⲟⲗⲏ ⲛⲏⲧⲛ̅ ⲛ̅ⲧⲉⲧⲛ̅ϩⲁⲣⲉϩ ⲅⲁⲣ ⲁⲛ.

ⲛ̅ⲧⲁϥ ⲟⲛ ⲁϥϫⲟⲟⲥ ϫⲉ ̅ⲁⲁⲡⲁ ⲡⲁⲙⲃⲱ ϫⲟⲟⲥ ϫⲉ ⲧⲁⲓ ⲧⲉ ⲑⲉ ⲉⲧⲉϣϣⲉ ⲉⲡⲙⲟⲛⲁⲭⲟⲥ ⲉⲫⲟⲣⲉⲓ ⲛ̅ⲛⲉϥϩⲟⲓⲧⲉ ϩⲱⲥⲧⲉ ⲉⲛⲉϫ ⲧⲉϥϣⲧⲏⲛ ⲙ̅ⲡⲃⲟⲗ ⲛ̅ⲧⲉϥⲣⲓ ⲛ̅ϣⲟⲙⲛ̅ⲧ ⲛ̅ϩⲟⲟⲩ ⲛ̅ⲧⲉⲧⲙ̅ ⲗⲁⲁⲩ ⲧⲁⲓⲟⲥ ⲉϥⲓⲧⲥ ⲧⲟⲧⲉ ⲉϥⲉⲫⲟⲣⲉⲓ ⲙ̅ⲙⲟⲥ.

ⲁ̅ϥϫⲟⲟⲥ ⲛ̅ϭⲓ ⲁⲡⲁ ⲕⲁⲥⲓⲁⲛⲟⲥ ϫⲉ ̅ⲟⲩⲁ ⲛ̅ⲛⲥⲩⲛⲕⲗⲏⲧⲓⲕⲟⲥ ⲉⲁϥⲁⲡⲟⲥⲧⲁⲥⲥⲉ ⲛ̅ⲛⲉϥⲭⲣⲏⲙⲁ ⲧⲏⲣⲟⲩ ⲁϥⲧⲁⲁϥ ⲛ̅ⲛϩⲏⲕⲉ ̅ⲁϥⲕⲁ ϩⲉⲛⲕⲟⲩⲓ ⲛⲁϥ ⲉⲧⲃⲉ ⲧⲉϥⲭⲣⲓⲁ ⲙⲁⲩⲁⲁϥ ̅ⲙ̅ⲡⲉϥⲟⲩⲱϣ ⲉⲱⲛϩ ϩⲛ̅ ⲟⲩⲙⲛ̅ⲧⲁⲡⲟⲧⲁⲕⲧⲓⲕⲟⲥ ⲉⲧϫⲏⲕ ⲉⲃⲟⲗ ⲛ̅ⲧⲉ ⲡⲉⲑⲃ̅ⲃⲓⲟ ⲛ̅ϩⲏⲧ ̅ⲡⲁⲓ ⲇⲉ ⲁϥϫⲱ ⲛ̅ⲟⲩϣⲁϫⲉ ⲛⲁϩⲣⲁϥ ⲛ̅ϭⲓ ⲃⲁⲥⲓⲙⲟⲥ ⲡⲉⲧϣⲟⲟⲡ ϩⲛ̅ ⲛⲉⲧⲟⲩⲁⲁⲃ ⲉϥϫⲱ ⲙ̅ⲙⲟⲥ ϫⲉ ̅ⲧⲙⲛ̅ⲧⲥⲩⲛⲕⲗⲏⲧⲓⲕⲟⲥ ⲁⲕⲥⲟⲣⲙⲉⲥ ⲁⲩⲱ ⲧⲙⲛ̅ⲧⲙⲟⲛⲁⲭⲟⲥ ⲙ̅ⲡⲉⲕϩⲉ ⲉⲣⲟⲥ.

ⲁ̅ⲟⲩⲁ ⲛ̅ⲛⲉⲥⲛⲏⲩ ϫⲛⲉ ⲁⲡⲁ ⲡⲁⲥⲧⲁⲙⲱⲛ ϫⲉ ̅ⲟⲩ ⲡⲉⲧⲓⲛⲁⲁⲁϥ ϫⲉ ⲥⲉⲑⲗⲓⲃⲉ ⲙ̅ⲙⲟⲓ ⲉⲓϯ ⲙ̅ⲡⲁϩⲱⲃ ⲛ̅ϭⲓϫ ⲉⲃⲟⲗ , ⲁϥ ⲟⲩⲱϣⲃ̅ ⲛ̅ϭⲓ ⲡϩⲗ̅ⲗⲟ ⲡⲉϫⲁϥ ϫⲉ ̅ⲡⲕⲉ ⲁⲡⲁ ϫⲓϫⲱⲓ ⲙⲛ̅ ⲡⲕⲉⲥⲉⲉⲡⲉ ϣⲁⲩϯ ⲡⲉⲩϩⲱⲃ ⲛ̅ϭⲓϫ ⲉⲃⲟⲗ ̅ⲡⲁⲓ ⲛ̅ⲟⲩⲟⲥⲉ ⲁⲛ ⲡⲉ ̅ⲉⲕϣⲁⲛⲛⲟⲩ ⲇⲉ ⲉϯ ⲁϫⲓ ⲧϯⲙⲏ ⲛ̅ⲟⲩⲥⲟⲡ ⲛ̅ⲟⲩⲱⲧ ⲛ̅ⲧⲉ ⲡⲓⲇⲟⲥ ̅ⲉⲕϣⲁⲛⲟⲩⲱϣ ⲇⲉ ⲉⲕⲁ ⲟⲩⲕⲟⲩⲓ ⲉⲃⲟⲗ ϩⲛ̅ ⲥⲟⲩⲛ̅ⲧϥ̅ ⲛ̅ⲧⲟⲕ ⲉⲧⲧⲱϣ ̅ⲧⲁⲓ ⲧⲉ ⲑⲉ ⲉⲧⲉⲕⲛⲁϭⲛ̅ⲙ̅ⲧⲟⲛ. ⲡⲉϫⲉ ⲡⲥⲟⲛ ⲛⲁϥ ϫⲉ ⲉϣⲱⲡⲉ ⲟⲩⲛ̅ⲧⲁⲓ ⲙ̅ⲙⲁⲩ ⲕⲟⲩⲱϣ ⲉⲧⲙ̅ⲧⲣⲁϥⲉⲓⲣⲟⲟⲩϣ ϩⲁ ϩⲱⲃ ⲛ̅ϭⲓϫ , ⲁϥⲟⲩⲱϣⲃ ⲛ̅ϭⲓ ⲡϩⲗ̅ⲗⲟ ϫⲉ ⲕⲁⲛ ⲟⲩⲛ̅ⲧⲁⲕ ϩⲱⲃ ⲛⲓⲙ ⲙ̅ⲡⲣ̅ⲕⲁ ⲡϩⲱⲃ ⲛ̅ϭⲓϫ ⲉⲃⲟⲗ ̅ⲡⲉⲧⲉ ⲟⲩⲛ̅ϭⲟⲙ ⲙ̅ⲙⲟⲕ ⲉⲁⲁϥ ⲁⲣⲓϥ ⲙⲟⲛⲟⲛ ϩⲛ̅ ⲟⲩϣⲧⲟⲣⲧⲣ̅ ⲁⲛ.

ⲁ̅ ⲟⲩⲥⲟⲛ ϫⲛⲉ ⲁⲡⲁ ⲥⲁⲣⲁⲡⲓⲟⲛ ϫⲉ ̅ⲁϫⲓ ⲟⲩϣⲁϫⲉ ⲉⲣⲟⲓ . ⲡⲉϫⲉ ⲡϩⲗ̅ⲗⲟ ⲛⲁϥ ϫⲉ ̅ⲉⲓⲛⲁϫⲉ ⲟⲩ ⲛⲁⲕ , ϫⲉ ⲁⲕϥⲓ ⲛ̅ⲉⲛⲕⲁ ⲛ̅ⲛϩⲏⲕⲉ ⲙⲛ̅ ⲛⲉⲭⲏⲣⲁ ⲙⲛ̅ ⲛ̅ⲟⲣⲫⲁⲛⲟⲥ ⲁⲕⲕⲁⲁⲩ ϩⲙ̅ ⲡϣⲟⲩϣⲧ. ⲁϥⲛⲁⲩ ⲅⲁⲣ ⲉⲡϣⲟⲩϣⲧ ⲉϥⲙⲉϩ ⲛ̅ϫⲱⲱⲙⲉ.

ⲛⲉⲟⲩⲛ̅ ⲟⲩⲁ ⲇⲉ ⲛ̅ⲧⲉ ⲛⲉⲧⲟⲩⲁⲁⲃ ⲉϣⲁⲩⲙⲟⲩⲧⲉ ⲉⲣⲟϥ ϫⲉ ⲫⲓⲗⲁⲅⲣⲓⲟⲥ ⲉϥⲟⲩⲏϩ ϩⲛ̅ ⲑⲓ̅ⲗ̅ⲏ̅ⲙ̅ ⲉϥⲣ̅ϩⲱⲃ ϩⲛ̅ ⲟⲩϩⲓⲥⲉ ϣⲁⲛⲧⲉϥϫⲡⲟ ⲛⲁϥ ⲙ̅ⲡⲉϥⲟⲉⲓⲕ ⲙ̅ⲙⲓⲛ ⲙ̅ⲙⲟϥ . ⲛ̅ϩⲱⲥⲟⲛ ⲇⲉ ⲉϥⲁϩⲉⲣⲁⲧϥ ϩⲛ̅ ⲧⲁⲅⲱⲣⲁ ⲉϯ ⲙ̅ⲡⲉϥϩⲱⲃ ⲛ̅ϭⲓϫ ⲉⲃⲟⲗ ⲉⲓⲥ ϩⲏⲏⲧⲉ ϩⲛ̅ ⲟⲩϣⲥ̅ⲛⲉ ⲁϥϭⲓⲛⲉ ⲛ̅ⲟⲩⲃⲁⲗⲗⲁⲧⲓⲟⲛ ⲉⲩⲛ̅ ⲙⲏⲧⲛ̅ϣⲉ ⲛ̅ϩⲟⲗⲟⲕⲟⲧⲧⲓⲛⲟⲥ ϩⲓⲱⲱⲥ. ⲁϥⲁϩⲉⲣⲁⲧϥ ⲙ̅ⲡⲉϥⲙⲁ ⲉϥϫⲱ ⲙ̅ⲙⲟⲥ ϫⲉ ϩⲁⲡⲥ̅ ⲡⲉ ⲉⲧⲣⲉ ⲡⲉⲛⲧⲁϥⲥⲟⲣⲙⲉⲥ ⲉⲓ . ⲁⲩⲱ ⲉⲓⲥ ⲡⲉⲧⲙ̅ⲙⲁⲩ ⲁϥⲉⲓ ⲉϥⲣⲓⲙⲉ. ⲁϥϭⲟⲡϥ ⲇⲉ ⲛ̅ϭⲓ ⲡϩⲗ̅ⲗⲟ ⲁϥϫⲓⲧϥ ⲛ̅ⲥⲁ ⲟⲩⲥⲁ ⲁϥⲧⲁⲁⲥ ⲛⲁϥ . ⲡⲉⲧⲙ̅ⲙⲁⲩ ⲇⲉ ⲁϥⲁⲙⲁϩⲧⲉ ⲙ̅ⲙⲟϥ ⲉϥⲟⲩⲱϣ ⲉϯ ⲛ̅ⲟⲩⲟⲩⲱⲛ ⲛⲁϥ ⲡϩⲗ̅ⲗⲟ ⲇⲉ ⲙ̅ⲡⲉϥⲟⲩⲱϣ ⲉϫⲓ . ⲧⲟⲧⲉ ⲁϥϩⲓⲧⲟⲟⲧϥ ⲉϫⲓϣⲕⲁⲕ ⲉⲃⲟⲗ ⲉϥϫⲱ ⲙ̅ⲙⲟⲥ ϫⲉ ⲁⲙⲏⲓⲧⲛ̅ ⲛ̅ⲧⲉⲧⲛ̅ⲛⲁⲩ ⲉⲩⲣⲱⲙⲉ ⲛ̅ⲧⲉ ⲡⲛⲟⲩⲧⲉ ϫⲉ ⲛ̅ⲧⲁϥⲣ̅ ⲟⲩ. ⲡϩⲗ̅ⲗⲟ ⲇⲉ ⲁϥⲡⲱⲧ ⲛ̅ϫⲓⲟⲩⲉ ⲁϥⲉⲓ ⲉⲃⲟⲗ ϩⲛ̅ ⲧⲡⲟⲗⲓⲥ ϫⲉ ⲛ̅ⲛⲉⲩⲥⲟⲩⲱⲛϥ.

ⲁϥⲃⲱⲕ ⲛ̅ϭⲓ ⲁⲡⲁ ⲙⲁⲕⲁⲣⲓⲟⲥ ⲡⲛⲟϭ ϣⲁ ⲁⲡⲁ ⲁⲛⲧⲱⲛⲓⲟⲥ ⲁⲩⲱ ⲛ̅ⲧⲉⲣⲉϥⲕⲱⲗϩ ⲉⲡⲣⲟ ⲁϥⲉⲓ ⲉⲃⲟⲗ ϣⲁⲣⲟϥ ⲡⲉϫⲁϥ ⲛⲁϥ ϫⲉ ⲛ̅ⲧⲕ̅ ⲛⲓⲙ, ⲛ̅ⲧⲟϥ ⲇⲉ ⲁϥⲟⲩⲱϣⲃ̅ ⲉϥϫⲱ ⲙ̅ⲙⲟⲥ ϫⲉ ̅ⲁⲛⲟⲕ ⲡⲉ ⲙⲁⲕⲁⲣⲓⲟⲥ . ⲁⲩⲱ ⲁϥϣⲧⲁⲙ ⲙ̅ⲡⲣⲟ ⲁϥⲃⲱⲕ ⲉϩⲟⲩⲛ ⲁϥⲕⲁⲁϥ. ⲛ̅ⲧⲉⲣⲉϥⲛⲁⲩ ⲉⲧⲉϥϩⲩⲡⲟⲙⲟⲛⲏ ⲁϥⲟⲩⲱⲛ ⲛⲁϥ ⲁⲩⲱ ⲁϥⲟⲩⲣⲟⲧ ⲛⲙ̅ⲙⲁϥ ⲉϥϫⲱ ⲙ̅ⲙⲟⲥ ϫⲉ ⲉⲓⲥ ⲟⲩⲛⲟϭ ⲛ̅ⲟⲩⲟⲉⲓϣ ⲉⲓⲟⲩⲱϣ ⲉⲛⲁⲩ ⲉⲣⲟⲕ ̅ⲁⲓⲥⲱⲧⲙ̅ ⲅⲁⲣ ⲉⲧⲃⲏⲏⲧⲕ. ⲁⲩⲱ ⲁϥϣⲟⲡϥ ⲉⲣⲟϥ ϩⲛ̅ ⲟⲩⲙⲛ̅ⲧⲙⲁⲓⲣⲱⲙⲉ ⲁϥϯⲙ̅ⲧⲟⲛ ⲛⲁϥ ⲛ̅ⲧⲁϥⲉⲓ ⲅⲁⲣ ⲉⲃⲟⲗ ϩⲛ̅ ϩⲉⲛⲛⲟϭ ⲛ̅ϩⲓⲥⲉ. ⲛ̅ⲧⲉⲣⲉ ⲣⲟⲩϩⲉ ⲇⲉ ϣⲱⲡⲉ ⲁ ⲁⲡⲁ ⲁⲛⲧⲱⲛⲓⲟⲥ ϩⲱⲣⲡ ⲛⲁϥ ⲛ̅ϩⲉⲛⲕⲟⲩⲓ ⲛ̅ⲃⲏⲧ. ⲡⲉϫⲉ ⲁⲡⲁ ⲙⲁⲕⲁⲣⲓⲟⲥ ⲛⲁϥ ϫⲉ ⲕⲉⲗⲉⲩⲉ ⲛⲁⲓ ⲧⲁϩⲱⲣⲡ ⲛⲁⲓ ⲙⲁⲩⲁⲁⲧ. ⲛ̅ⲧⲟϥ ⲇⲉ ⲡⲉϫⲁϥ ϫⲉ ϩⲱⲣⲡ. ⲁⲩⲱ ⲁϥⲧⲁⲙⲓⲟ ⲛ̅ⲟⲩⲛⲟϭ ⲛ̅ϣⲟⲗ ⲛ̅ⲃⲏⲧ ⲁϥϩⲟⲣⲡϥ̅. ⲁⲩϩⲙⲟⲟⲥ ⲁⲩϣⲁϫⲉ ⲉⲧⲙⲛ̅ⲧⲣⲉϥϯϩⲏⲩ ⲛ̅ⲧⲉϥⲩⲭⲏ ϫⲓⲛ ⲙ̅ⲡⲛⲁⲩ ⲛ̅ⲣⲟⲩϩⲉ. ⲁⲩⲛⲟⲃⲧⲟⲩ ⲁⲩⲱ ⲧⲛⲏⲃⲧⲉ ⲁⲥⲃⲱⲕ ⲉⲡⲉⲥⲏⲧ ⲉⲡⲉⲥⲡⲩⲗⲏⲟⲛ ⲉⲃⲟⲗ ϩⲓⲧⲙ̅ ⲡϣⲟⲩϣⲧ. ⲁϥⲃⲱⲕ ⲉϩⲟⲩⲛ ⲉϩⲧⲟⲟⲩⲉ ⲛ̅ϭⲓ ⲡⲙⲁⲕⲁⲣⲓⲟⲥ ⲁⲡⲁ ⲁⲛⲧⲱⲛⲓⲟⲥ ⲁϥⲛⲁⲩ ⲉⲡⲁϣⲁⲓ ⲛ̅ⲧⲛⲏⲃⲧⲉ ⲛ̅ⲁⲡⲁ ⲙⲁⲕⲁⲣⲓⲟⲥ ⲁϥⲣ̅ϣⲡⲏⲣⲉ ⲁⲩⲱ ⲁϥϯⲡⲓ ⲉⲛ̅ϭⲓϫ ⲛ̅ⲁⲡⲁ ⲙⲁⲕⲁⲣⲓⲟⲥ ⲉϥϫⲱ ⲙ̅ⲙⲟⲥ ϫⲉ ⲁ ϩⲁϩ ⲛ̅ϭⲟⲙ ⲉⲓ ⲉⲃⲟⲗ ϩⲛ̅ ⲛⲉⲓϭⲓϫ.

ⲛⲉⲟⲩⲛ̅ ⲟⲩⲥⲟⲛ ⲁϫⲛ̅ ⲥϭ̅ⲣⲁϩⲧ ϩⲛ̅ ⲟⲩϩⲉⲛⲉⲉⲧⲉ. ϩⲁϩ ⲇⲉ ⲛ̅ⲥⲟⲡ ϣⲁϥⲕⲓⲙ ⲉⲩⲟⲣⲅⲏ. ⲡⲉϫⲁϥ ϭⲉ ϩⲣⲁⲓ ⲛ̅ϩⲏⲧϥ̅ ϫⲉ ̅ϯⲛⲁⲃⲱⲕ ⲧⲁϭⲱ ⲙⲁⲩⲁⲁⲧ ⲉⲓⲁⲛⲁⲭⲱⲣⲉⲓ. ⲁⲩⲱ ϩⲙ̅ⲡⲧⲣⲁⲧⲙ̅ϭⲛ̅ ϩⲱⲃ ⲙⲛ̅ ⲗⲁⲁⲩ ϯⲛⲁⲥϭ̅ⲣⲁϩⲧ ⲁⲩⲱ ⲡⲡⲁⲑⲟⲥ ⲛⲁⲗⲟ ⲛ̅ϩⲏⲧ. ⲁϥⲉⲓ ⲇⲉ ⲉⲃⲟⲗ ⲁϥⲟⲩⲱϩ ⲙⲁⲩⲁⲁϥ ϩⲛ̅ ⲟⲩⲥⲡⲩⲗⲁⲓⲟⲛ. ϩⲛ̅ ⲟⲩⲥⲟⲡ ⲇⲉ ⲁϥⲙⲉϩ ⲡⲉϥⲕⲉⲗⲱⲗ ⲙ̅ⲙⲟⲟⲩ ⲁϥⲟⲩⲁϩϥ ⲉⲡⲕⲁϩ ⲁⲩⲱ ⲛ̅ⲧⲉⲩⲛⲟⲩ ⲁϥⲥⲕⲟⲣⲕⲣ̅. ⲛ̅ⲧⲉⲣⲉϥϭⲱⲛⲧ ⲇⲉ ⲁϥϥⲓⲧϥ ⲁϥⲟⲩⲟϭⲡϥ̅. ⲁ ⲡⲉϥϩⲏⲧ ⲇⲉ ⲉⲓ ⲉⲣⲟϥ ⲁϥⲉⲓⲙⲉ ϫⲉ ⲡⲇⲉⲙⲱⲛ ⲡⲉⲧϯ ⲛⲙ̅ⲙⲁϥ ⲁⲩⲱ ⲡⲉϫⲁϥ ϫⲉ ⲉⲓⲥ ϩⲏⲏⲧⲉ ⲟⲛ ϯⲁⲛⲁⲭⲱⲣⲉⲓ ⲙⲁⲩⲁⲁⲧ ⲁⲩⲱ ϯϭⲟⲛⲧ ⲉⲓⲛⲁⲃⲱⲕ ⲛ̅ⲧⲟⲟⲩⲛ ⲉⲑⲉⲛⲉⲉⲧⲉ . ⲥ̅ⲣⲭⲣⲓⲁ ⲅⲁⲣ ⲉⲙⲓϣⲉ ⲉⲣⲟϥ ⲙ̅ⲙⲁ ⲛⲓⲙ ⲁⲩⲱ ⲛ̅ϩⲟⲩⲟ ϩⲩⲡⲟⲙⲓⲛⲉ ⲉⲧⲃⲟⲏⲑⲓⲁ ⲙ̅ⲡⲛⲟⲩⲧⲉ. ⲁϥⲕⲧⲟϥ ⲇⲉ ⲁϥⲃⲱⲕ ⲉⲡⲉϥⲙⲁ.

ⲁⲟⲩⲥⲟⲛ ϫⲓ ⲙ̅ⲡⲉⲥⲭⲏⲙⲁ ⲁϥⲁⲛⲁⲭⲱⲣⲉⲓ ⲛ̅ⲧⲉⲩⲛⲟⲩ ⲉϥϫⲱ ⲙ̅ⲙⲟⲥ ϫⲉ ⲁⲛⲅ̅ ⲟⲩⲁⲛⲁⲭⲱⲣⲓⲧⲏⲥ. ⲁⲩⲥⲱⲧⲙ̅ ⲇⲉ ⲛ̅ϭⲓ ⲛ̅ϩⲗ̅ⲗⲟ ⲁⲩⲃⲱⲕ ⲁⲩϯⲧⲟⲟⲧⲟⲩ ⲙ̅ⲙⲟϥ ⲁⲩⲱ ⲁⲩⲧⲣⲉϥⲕⲱⲧⲉ ⲉⲛ̅ⲣⲓ ⲛ̅ⲛⲉⲥⲛⲏⲩ ⲉϥⲙⲉⲧⲁⲛⲟⲓ ⲉϥϫⲱ ⲙ̅ⲙⲟⲥ ⲕⲱ ⲛⲁⲓ ⲉⲃⲟⲗ ⲁⲛⲅ̅ ⲟⲩⲁⲛⲁⲭⲱⲣⲓⲧⲏⲥ ⲁⲛ ⲁⲗⲗⲁ ⲁⲛⲅ̅ ⲟⲩⲣⲱⲙⲉ ⲛ̅ⲣⲉϥⲣ̅ⲛⲟⲃⲉ ⲁⲩⲱ ⲛ̅ⲃⲣ̅ⲣⲉ.

ⲡⲉϫⲁⲩ ⲇⲉ ⲛ̅ϭⲓ ⲛ̅ϩⲗ̅ⲗⲟ ϫⲉ ̅ⲉⲕϣⲁⲛⲛⲁⲩ ⲉⲩϣⲏⲣⲉ ϣⲏⲙ ⲉϥⲃⲏⲕ ⲉϩⲣⲁⲓ ⲉⲧⲡⲉ ϩⲙ̅ ⲡⲉϥⲟⲩⲱϣ ⲙ̅ⲙⲓⲛ ⲙ̅ⲙⲟϥ ϭⲉⲡ ⲧⲉϥⲟⲩⲉⲣⲏⲧⲉ ⲥⲟⲕϥ ⲉⲡⲉⲥⲏⲧ ⲙ̅ⲙⲁⲩ ⲥ̅ⲣⲛⲟⲃⲣⲉ ⲅⲁⲣ ⲛⲁϥ ⲁⲛ.

ⲉ̅ⲣⲉ ⲁⲡⲁ ⲙⲁⲕⲁⲣⲓⲟⲥ ⲙⲟⲟϣⲉ ⲛ̅ⲟⲩⲟⲉⲓϣ ⲙ̅ⲡⲕⲱⲧⲉ ⲙ̅ⲡϩⲉⲗⲟⲥ ⲉϥⲧⲱⲟⲩⲛ ⲛ̅ϩⲉⲛⲃⲏⲧ ⲁⲩⲱ ⲉⲓⲥ ⲡⲇⲓⲁⲃⲟⲗⲟⲥ ⲁϥⲧⲱⲙⲛ̅ⲧ ⲉⲣⲟϥ ϩⲛ̅ ⲧⲉϥϩⲓⲏ ⲉⲣⲉ ⲟⲩⲟϩⲥ̅ ⲛ̅ⲧⲟⲟⲧϥ ⲁⲩⲱ ⲉⲛⲉϥⲟⲩⲱϣ ⲡⲉ ⲉⲣⲁϩⲧϥ̅ ⲙ̅ⲡⲉϥϭⲙ̅ϭⲟⲙ . ⲁⲩⲱ ⲡⲉϫⲁϥ ⲛⲁϥ ϫⲉ ̅ⲟⲩⲛⲟϭ ⲡⲉ ⲡⲁϫⲓⲛϭⲟⲛⲥ ⲉⲃⲟⲗ ⲙ̅ⲙⲟⲕ ϫⲉ ⲙⲛ̅ϭⲟⲙ ⲙ̅ⲙⲟⲓ ⲉⲣⲟⲕ . ⲉⲓⲥ ϩⲏⲏⲧⲉ ⲅⲁⲣ ϩⲱⲃ ⲛⲓⲙ ⲉⲧⲉⲕⲉⲓⲣⲉ ⲙ̅ⲙⲟⲟⲩ ϯⲉⲓⲣⲉ ⲙ̅ⲙⲟⲟⲩ ϩⲱ ⲛ̅ⲧⲟⲕ ϣⲁⲕⲛⲏⲥⲧⲉⲩⲉ ⲛ̅ϩⲉⲛϩⲟⲟⲩ ⲁⲛⲟⲕ ⲇⲉ ⲙⲉⲓⲟⲩⲱⲙ ⲉⲡⲧⲏⲣϥ ϣⲁⲕⲣ̅ ⲟⲩϣⲏ ⲛ̅ⲣⲟⲉⲓⲥ ⲛ̅ϩⲉⲛⲥⲟⲡ ⲁⲛⲟⲕ ⲇⲉ ⲙⲉⲓⲛ̅ⲕⲟⲧⲕ ⲉⲛⲉϩ. ⲟⲩϩⲱⲃ ⲛ̅ⲟⲩⲱⲧ ⲡⲉⲧⲉⲕϫⲣⲁⲉⲓⲧ ⲉⲣⲟⲓ ⲛ̅ϩⲏⲧϥ . ⲡⲉϫⲉ ⲁⲡⲁ ⲙⲁⲕⲁⲣⲓⲟⲥ ϫⲉ ⲟⲩ ⲡⲉ , ⲛ̅ⲧⲟϥ ⲇⲉ ⲡⲉϫⲁϥ ⲛⲁϥ ϫⲉ ⲡⲉⲕⲑⲃ̅ⲃⲓⲟ ⲡⲉ. ⲁⲛⲟⲕ ⲇⲉ ⲙⲉⲓϭⲙ̅ϭⲟⲙ ⲉⲑⲃ̅ⲃⲓⲟⲓ ⲉⲛⲉϩ.ⲉⲧⲃⲉ ⲡⲁⲓ ⲙ̅ⲡⲓϭⲙ̅ϭⲟⲙ ⲉⲣⲟⲕ.

ⲁ̅ϥϫⲟⲟⲥ ⲛ̅ϭⲓ ⲁⲡⲁ ϩⲱⲣⲥⲓⲏⲥⲓ ϫⲉ ⲟⲩⲧⲱⲱⲃⲉ ⲛ̅ⲟⲙⲉ ⲉⲩϣⲁⲛⲛⲟϫⲥ ⲉⲩⲥⲛ̅ⲧⲉ ϩⲁⲧⲙ̅ ⲡⲓⲉⲣⲟ ⲛⲥ̅ⲛⲁϩⲩⲡⲟⲙⲓⲛⲉ ⲁⲛ ⲛ̅ϩⲟⲟⲩ ⲛ̅ⲟⲩⲱⲧ . ⲧⲧⲉⲣⲡⲟⲥⲉ ⲇⲉ ϣⲁⲥⲙⲟⲩⲛ ⲉⲃⲟⲗ ⲛ̅ⲑⲉ ⲙ̅ⲡⲱⲛⲉ . ⲧⲁⲓ ⲧⲉ ⲑⲉ ⲙ̅ⲡⲣⲱⲙⲉ ⲉⲟⲩⲛ̅ⲧⲁϥ ⲙ̅ⲙⲁⲩ ⲙ̅ⲡⲉϥⲙⲉⲉⲩⲉ ⲙ̅ⲙⲛ̅ⲧⲕⲟⲥⲙⲓⲕⲟⲛ. ⲛϥ̅ⲡⲟⲥⲉ ⲁⲛ ϩⲛ̅ ⲑⲟⲧⲉ ⲙ̅ⲡⲛⲟⲩⲧⲉ. ⲉϥϣⲁⲛⲉⲓ ⲉϩⲣⲁⲓ ⲉⲩⲙⲛ̅ⲧⲛⲟϭ ϣⲁϥⲃⲱⲗ ⲉⲃⲟⲗ . ϩⲁϩ ⲅⲁⲣ ⲛⲉ ⲙ̅ⲡⲓⲣⲁⲥⲙⲟⲥ ⲛ̅ⲛⲁ ⲧⲉⲓⲙⲓⲛⲉ ⲙⲁⲗⲓⲥⲧⲁ ⲉⲩϣⲟⲟⲡ ϩⲛ̅ ⲧⲙⲏⲧⲉ ⲛ̅ⲛⲣⲱⲙⲉ. ⲛⲁⲛⲟⲩⲥ ⲇⲉ ⲉⲧⲣⲉ ⲡⲣⲱⲙⲉ ⲥⲟⲩⲉⲛ ⲡⲉϥϣⲓ ⲙ̅ⲙⲓⲛ ⲙ̅ⲙⲟϥ ⲉⲧⲣⲉϥⲡⲱⲧ ⲇⲉ ⲉⲃⲟⲗ ⲙ̅ⲡⲉϩⲣⲟϣ ⲛ̅ⲧⲙⲛ̅ⲧⲛⲟϭ . ⲛⲉⲧⲧⲁϫⲣⲏⲩ ⲇⲉ ϩⲓⲧⲛ̅ ⲧⲡⲓⲥⲧⲓⲥ ϩⲉⲛⲁⲧⲕⲓⲙ ⲉⲣⲟⲟⲩ ⲛⲉ.

ⲁ̅ϥϣⲱⲡⲉ ϩⲛ̅ ⲛⲉⲡⲣⲱⲁⲥⲧⲓⲟⲛ ⲛ̅ⲕⲱⲥⲧⲁⲛⲧⲓⲛⲟⲩⲡⲟⲗⲓⲥ ⲛ̅ϭⲓ ⲟⲩⲙⲟⲛⲁⲭⲟⲥ ⲛ̅ⲣⲙ̅ⲛⲕⲏⲙⲉ ϩⲓ ⲑⲉⲱⲇⲟⲥⲓⲟⲥ ⲡⲣ̅ⲣⲟ . ⲡⲣ̅ⲣⲟ ⲇⲉ ⲉϥⲃⲏⲕ ϩⲛ̅ ⲧⲉϩⲓⲏ ⲉⲧⲙ̅ⲙⲁⲩ ⲁϥⲕⲁ ⲡⲙⲏⲏϣⲉ ⲛ̅ⲥⲱϥ ⲁϥⲉⲓ ⲙⲁⲑⲁⲁϥ ⲁϥⲧⲱϩⲙ̅ ⲉϩⲟⲩⲛ ⲉⲡⲙⲟⲛⲁⲭⲟⲥ. ⲁⲩⲱ ⲁϥⲥⲟⲩⲱⲛϥ ⲙⲉⲛ ϫⲉ ⲛⲓⲙ ⲡⲉ ⲁϥϣⲟⲡϥ ⲇⲉ ⲉⲣⲟϥ ⲛ̅ⲑⲉ ⲛ̅ⲟⲩⲁ ⲉⲃⲟⲗϩⲛ̅ ⲧⲧⲁⲝⲓⲥ. ⲛ̅ⲧⲉⲣⲟⲩⲃⲱⲕ ⲇⲉ ⲉϩⲟⲩⲛ ⲁⲑϣⲗⲏⲗ ⲁⲩϩⲙⲟⲟⲥ. ⲁϥⲁⲣⲭⲉⲓ ⲛ̅ϭⲓ ⲡⲣ̅ⲣⲟ ⲛ̅ϩⲟⲧϩⲧ̅ ⲙ̅ⲙⲟϥ ⲉϥϫⲱ ⲙ̅ⲙⲟⲥ ϫⲉ ⲛⲉⲛⲉⲓⲟⲧⲉ ⲉⲧϩⲛ̅ ⲕⲏⲙⲉ ⲣ̅ ⲟⲩ , ⲛ̅ⲧⲟϥ ⲇⲉ ⲡⲉϫⲁϥ ϫⲉ ⲥⲉϣⲗⲏⲗ ⲧⲏⲣⲟⲩ ⲉϫⲙ̅ ⲡⲉⲕⲟⲩϫⲁⲓ. ⲁⲩⲱ ⲁϥϫⲟⲟⲥ ⲛⲁϥ ⲉⲧⲣⲉϥⲟⲩⲱⲙ ⲛ̅ⲟⲩⲕⲟⲩⲓ ⲛ̅ⲟⲉⲓⲕ. ⲁϥϯ ⲟⲩϣⲏⲙ ⲛ̅ⲛⲉϩ ϩⲓ ϩⲙⲟⲩ ⲛⲁϥ ⲁϥⲟⲩⲱⲙ . ⲁⲩⲱ ⲁϥϯ ⲟⲩϣⲏⲙ ⲙ̅ⲙⲟⲟⲩ ⲛⲁϥ ⲁϥⲥⲱ. ⲡⲉϫⲁϥ ⲇⲉ ⲛⲁϥ ⲛ̅ϭⲓ ⲡⲣ̅ⲣⲟ ϫⲉ ̅ⲕⲥⲟⲟⲩⲛ ϫⲉ ⲁⲛⲅ̅ ⲛⲓⲙ , ⲛ̅ⲧⲟϥ ⲇⲉ ⲡⲉϫⲁϥ ϫⲉ ̅ⲡⲛⲟⲩⲧⲉ ⲥⲟⲟⲩⲛ ⲙ̅ⲙⲟⲕ. ⲧⲟⲧⲉ ⲡⲉϫⲁϥ ϫⲉ ̅ⲁⲛⲅ̅ ⲡⲉ ⲑⲉⲱⲇⲱⲥⲓⲟⲥ ⲡⲣ̅ⲣⲟ . ⲁⲩⲱ ⲛ̅ⲧⲉⲩⲛⲟⲩ ⲁϥⲡⲁϩⲧϥ̅ ⲛⲁϥ ⲛ̅ϭⲓ ⲡϩⲗ̅ⲗⲟ . ⲡⲉϫⲁϥ ⲛⲁϥ ⲛ̅ϭⲓ ⲡⲣ̅ⲣⲟ ϫⲉ ⲛⲁⲓⲁⲧ ⲧⲏⲩⲧⲛ̅ ϫⲉ ⲧⲉⲧⲛ̅ⲟ ⲛ̅ⲁⲧⲣⲟⲟⲩϣ ϩⲙ̅ ⲡⲉⲓⲕⲟⲥⲙⲟⲥ. ϩⲛ̅ ⲟⲩⲙⲉ ⲛ̅ϫⲓⲛⲧⲁⲩϫⲡⲟⲓ ϩⲛ̅ ⲧⲙⲛ̅ⲧⲣ̅ⲣⲟ ⲙ̅ⲡⲓⲙⲉϩ ϩⲏⲧ ⲛ̅ⲟⲉⲓⲕ ⲉⲛⲉϩ ⲟⲩⲇⲉ ⲙⲟⲟⲩ ⲛ̅ⲑⲉ ⲙ̅ⲡⲟⲟⲩ ⲟⲩⲇⲉ ⲙ̅ⲡⲓⲉⲓⲙⲉ ϫⲉ ⲥⲉϩⲟⲗϭ ⲛ̅ⲧⲉⲓϩⲉ ϫⲓⲛ ⲡⲉϩⲟⲟⲩ ⲉⲧⲙ̅ⲙⲁⲩ . ⲁϥⲁⲣⲭⲉⲓ ⲛ̅ϯⲉⲟⲟⲩ ⲛⲁϥ ⲛ̅ϭⲓ ⲡⲣ̅ⲣⲟ . ⲡϩⲗ̅ⲗⲟ ⲇⲉ ⲁϥⲧⲱⲟⲩⲛ ⲁϥⲡⲱⲧ ⲁϥⲕⲧⲟϥ ⲟⲛ ⲉⲕⲏⲙⲉ.

ⲁ̅ϥϫⲟⲟⲥ ⲟⲛ ⲛ̅ϭⲓ ⲁⲡⲁ ⲇⲁⲛⲓⲏⲗ ϫⲉ ̅ⲁ ⲡⲉⲛⲉⲓⲱⲧ ⲁⲡⲁ ⲁⲣⲥⲉⲛⲓⲟⲥ ϫⲟⲟⲥ ⲉⲧⲃⲉ ⲟⲩⲁ ϩⲛ̅ ϣⲓⲏⲧ ϫⲉ ⲟⲩⲛⲟϭ ⲙ̅ⲙⲁⲧⲉ ⲡⲉ ⲛ̅ⲣⲉϥⲣ̅ϩⲱⲃ ⲉϥⲟ ⲇⲉ ⲛ̅ⲁⲫⲉⲗⲗⲏⲥ ϩⲛ̅ ⲧⲡⲓⲥⲧⲓⲥ ⲁⲩⲱ ⲛⲉϥϣⲟⲃⲧ ⲡⲉ ⲉⲧⲃⲉ ⲧⲙⲛ̅ⲧϩⲓⲇⲓⲱⲧⲏⲥ. ⲁⲩⲱ ⲛⲉϥϫⲱ ⲙ̅ⲙⲟⲥ ϫⲉ ⲡⲟⲉⲓⲕ ⲉⲧⲛ̅ϫⲓ ⲙ̅ⲙⲟϥ ϩⲓϫⲙ̅ ⲡⲙⲁ ⲛ̅ⲧⲟϥ ⲁⲛ ⲡⲉ ⲡⲥⲱⲙⲁ ⲙ̅ⲡⲉⲭ̅ⲥ̅ ⲫⲩⲥⲓ ⲁⲗⲗⲁ ⲡⲉϥⲥⲙⲟⲧ ⲡⲉ . ⲁⲩⲥⲱⲧⲙ̅ ⲇⲉ ⲛ̅ϭⲓ ϩⲗ̅ⲗⲟ ⲥⲛⲁⲩ ϫⲉ ⲁϥϫⲉ ⲡⲉⲓϣⲁϫⲉ ⲁⲩⲱ ⲉⲩⲥⲟⲟⲩⲛ ⲙ̅ⲙⲟϥ ϫⲉ ⲟⲩⲛⲟϭ ⲡⲉ ϩⲙ̅ ⲡⲉϥⲃⲓⲟⲥ ⲁⲩⲉⲓⲙⲉ ϫⲉ ⲉϥϫⲱ ⲙ̅ⲡⲁⲓ ϩⲛ̅ ⲟⲩⲙⲛ̅ⲧⲃⲁⲗϩⲏⲧ ⲙⲛ̅ ⲟⲩⲙⲛ̅ⲧⲁⲧⲛⲟⲓ.ⲁⲩⲱ ⲁⲩⲉⲓ ϣⲁⲣⲟϥ ⲁⲩϫⲟⲟⲥ ⲛⲁϥ ϫⲉ ⲁⲡⲁⲑ ⲁⲛⲥⲱⲧⲙ̅ ⲉⲧⲃⲉ ⲟⲩϣⲁϫⲉ ⲛ̅ⲁⲡⲓⲥⲧⲟⲛ ϫⲉ ⲁ ⲟⲩⲁ ϫⲟⲟⲥ ϫⲉ ⲡⲟⲉⲓⲕ ⲉⲧⲛ̅ϫⲓ ⲙ̅ⲙⲟϥ ϩⲱⲥ ϫⲉ ⲛ̅ⲧⲟϥ ⲛⲁⲙⲉ ⲁⲛ ⲡⲉ ⲡⲥⲱⲙⲁ ⲙ̅ⲡⲉⲭ̅ⲥ̅ ⲁⲗⲗⲁ ⲡⲉϥⲥⲙⲟⲧ ⲡⲉ. ⲡϩⲗ̅ⲗⲟ ⲇⲉ ⲡⲉϫⲁϥ ϫⲉ ⲁⲛⲟⲕ ⲁⲓϫⲉ ⲡⲁⲓ. ⲛ̅ⲧⲟⲟⲩ ⲇⲉ ⲁⲩⲕⲱⲣϣ ⲉⲣⲟϥ ⲉⲩϫⲱ ⲙ̅ⲙⲟⲥ ϫⲉ ⲙ̅ⲡⲱⲣ ⲙ̅ⲡⲣ̅ⲧⲁϫⲣⲟⲕ ϩⲙ̅ ⲡⲁⲓⲑ ⲁⲡⲁⲑ ⲁⲗⲗⲁ ⲕⲁⲧⲁ ⲑⲉ ⲉⲧⲉⲣⲉ ⲧⲕⲁⲑⲟⲗⲓⲕⲏ ⲉⲕⲕⲗⲏⲥⲓⲁ ϫⲱ ⲙ̅ⲙⲟⲥ ⲡⲓⲥⲧⲉⲩⲉ ϫⲉ ⲡⲟⲉⲓⲕ ⲉⲧⲛ̅ϫⲓ ⲙ̅ⲙⲟϥ ⲛ̅ⲧⲟϥ ⲡⲉ ⲡⲥⲱⲙⲁ ⲙ̅ⲡⲉⲭ̅ⲥ̅ ϩⲛ̅ ⲟⲩⲙⲉ ⲁⲩⲱ ϩⲛ̅ ⲟⲩⲥⲙⲟⲧ ⲁⲛ. ⲁⲩⲱ ⲡⲉⲓⲡⲟⲧⲏⲣⲓⲟⲛ ⲡⲉϥⲥⲛⲟϥ ⲡⲉ ϩⲛ̅ ⲟⲩⲙⲉ ⲁⲩⲱ ϩⲛ̅ ⲟⲩⲥⲭⲏⲙⲁ ⲁⲛ. ⲁⲗⲗⲁ ⲛ̅ⲑⲉ ⲛ̅ⲧⲁⲣⲭⲏ ⲉⲁϥϫⲓ ⲛ̅ⲟⲩⲕⲁϩ ⲉⲃⲟⲗ ϩⲙ̅ ⲡⲕⲁϩ ⲁϥⲡⲗⲁⲥⲥⲉ ⲙ̅ⲡⲣⲱⲙⲉ ⲕⲁⲧⲁ ⲧⲉϥϩⲓⲕⲱⲛ ⲁⲩⲱ ⲙⲛ̅ϭⲟⲙ ⲛ̅ⲗⲁⲁⲩ ⲛ̅ϫⲟⲟⲥ ϫⲉ ⲑⲓⲕⲱⲛ ⲙ̅ⲡⲛⲟⲩⲧⲉ ⲁⲛ ⲧⲉ ⲧⲁⲓ . ⲕⲁⲓⲧⲟⲓ ⲟⲩⲁⲕⲁⲧⲁⲗⲩⲙⲡⲧⲟⲥ ⲡⲉ ⲛ̅ⲁⲧⲧⲁϩⲟϥ. ⲧⲁⲓ ⲟⲛ ⲧⲉ ⲑⲉ ⲙ̅ⲡⲟⲉⲓⲕ ⲛ̅ⲧⲁϥϫⲟⲟⲥ ϫⲉ ⲡⲁⲓ ⲡⲉ ⲡⲁⲥⲱⲙⲁ. ⲧⲛ̅ⲡⲓⲥⲧⲉⲩⲉ ϫⲉ ϩⲛ̅ ⲟⲩⲙⲉ ⲡⲁⲓ ⲡⲉ ⲡⲥⲱⲙⲁ ⲙ̅ⲡⲉⲭ̅ⲥ̅.ⲡⲉϫⲁϥ ⲛ̅ϭⲓ ⲡϩⲗ̅ⲗⲟ ϫⲉ ̅ⲉⲧⲉⲧⲛ̅ⲧⲙ̅ⲡⲓⲑⲉ ⲙ̅ⲙⲟⲓ ⲛ̅ϯⲛⲁⲧⲱⲧ ⲉⲃⲟⲗϩⲙ̅ ⲡϩⲱⲃ ⲁⲛ ⲛ̅ϩⲏⲧ. ⲛ̅ⲧⲟⲟⲩ ⲇⲉ ⲡⲉϫⲁⲩ ϫⲉ ⲙⲁⲣⲉⲛⲧⲱⲃϩ ⲙ̅ⲡⲛⲟⲩⲧⲉ ϩⲛ̅ ⲧⲉⲓϩⲉⲃⲇⲱⲙⲁⲥ ⲉⲧⲃⲉ ⲡⲉⲓⲙⲩⲥⲧⲏⲣⲓⲟⲛ ⲁⲩⲱ ⲧⲛ̅ⲡⲓⲥⲧⲉⲩⲉ ϫⲉ ⲡⲛⲟⲩⲧⲉ ⲛⲁϭⲟⲗⲡϥ ⲛⲁⲛ ⲉⲃⲟⲗ. ⲡϩⲗ̅ⲗⲟ ⲇⲉ ⲁϥϣⲡ̅ ⲡϣⲁϫⲉ ⲉⲣⲟϥ ϩⲛ̅ ⲟⲩⲣⲁϣⲉ ⲁⲩⲱ ⲁϥⲥⲟⲡⲥ̅ ⲙ̅ⲡⲛⲟⲩⲧⲉ ⲉϥϫⲱ ⲙ̅ⲙⲟⲥ ϫⲉ ⲡϫⲟⲉⲓⲥ ⲛ̅ⲧⲟⲕ ⲉⲧⲥⲟⲟⲩⲛ ϫⲉ ⲛ̅ⲉⲓⲟ ⲛ̅ⲁⲡⲓⲥⲧⲟⲥ ⲕⲁⲧⲁ ⲟⲩⲕⲁⲕⲓⲁ ⲁⲗⲗⲁ ϫⲉ ⲛ̅ⲛⲉⲓⲡⲗⲁⲛⲁ ϩⲛ̅ ⲟⲩⲙⲛ̅ⲧⲁⲡⲓⲥⲧⲟⲥ ⲙⲛ̅ ⲟⲩⲙⲛ̅ⲧⲁⲧⲥⲟⲟⲩⲛ. ϭⲱⲗⲡ ⲛⲁⲓ ⲉⲃⲟⲗ ⲡϫⲟⲉⲓⲥ ⲓ̅ⲥ̅ ⲡⲉⲭ̅ⲥ̅. ⲛ̅ϩⲗ̅ⲗⲟ ⲇⲉ ⲟⲛ ⲁⲩⲃⲱⲕ ⲉⲛⲉⲩⲣⲓ ⲁⲩⲧⲱⲃϩ ⲙ̅ⲡⲛⲟⲩⲧⲉ ⲉⲩϫⲱ ⲙ̅ⲙⲟⲥ ϫⲉ ̅ⲓ̅ⲥ̅ ⲡⲉⲭ̅ⲥ̅ ⲉⲕⲉϭⲱⲗⲡ ⲉⲃⲟⲗ ⲙ̅ⲡⲉⲓϩⲗ̅ⲗⲟ ⲙ̅ⲡⲉⲓⲙⲩⲥⲧⲏⲣⲓⲟⲛ ϫⲉ ⲉϥⲉⲡⲓⲥⲧⲉⲩⲉ ⲁⲩⲱ ⲛϥ̅ⲧⲙ̅ϯⲟⲥⲉ ⲙ̅ⲡⲉϥϩⲓⲥⲉ . ⲁ ⲡⲛⲟⲩⲧⲉ ⲇⲉ ⲥⲱⲧⲙ̅ ⲉⲣⲟⲟⲩ ϩⲓ ⲟⲩⲥⲟⲡ . ⲛ̅ⲧⲉⲣⲉ ⲑⲃ̅ⲇⲱⲙⲁⲥ ⲇⲉ ϫⲱⲕ ⲉⲃⲟⲗ ⲁⲩⲉⲓ ⲉⲧⲉⲕⲕⲗⲏⲥⲓⲁ ⲛ̅ⲧⲕⲩⲣⲓⲁⲕⲏ ⲁⲩϩⲙⲟⲟⲥ ⲙ̅ⲡϣⲟⲙⲛ̅ⲧ ⲙⲁⲩⲁⲁⲩ ϩⲓ ⲟⲩⲟⲩⲣⲱ ⲛ̅ⲟⲩⲟⲩⲱⲧ . ⲛⲉⲣⲉ ⲡϩⲗ̅ⲗⲟ ⲇⲉ ϩⲛ̅ ⲧⲉⲩⲙⲏⲧⲉ. ⲁⲩⲟⲩⲱⲛ ⲛ̅ϭⲓ ⲛⲉⲩⲃⲁⲗ ⲉⲧϩⲓ ϩⲟⲩⲛ ⲁⲩⲱ ⲛ̅ⲧⲉⲣⲟⲩⲕⲱ ⲉϩⲣⲁⲓ ⲙ̅ⲡⲟⲉⲓⲕⲉϫⲛ̅ ⲧⲉⲧⲣⲁⲡⲉⲍⲁ ⲉⲧⲟⲩⲁⲁⲃ ⲁϥⲟⲩⲱⲛϩ ⲉⲃⲟⲗ ⲙ̅ⲡϣⲟⲙⲛ̅ⲧ ⲙⲁⲩⲁⲁⲩ ⲛ̅ⲑⲉ ⲛ̅ⲟⲩϣⲏⲣⲉ ⲕⲟⲩⲓ ⲁⲩⲱ ⲛ̅ⲧⲉⲣⲉ ⲡⲉⲡⲣⲉⲥⲃⲩⲧⲉⲣⲟⲥ ⲥⲟⲟⲩⲧⲛ̅ ⲉⲃⲟⲗ ⲛ̅ⲧⲉϥϭⲓϫ ⲉϫⲓ ⲙ̅ⲡⲟⲉⲓⲕ ⲉⲡⲟϣϥ ⲉⲓⲥ ⲟⲩⲁⲅⲅⲉⲗⲟⲥ ⲁϥⲉⲓ ⲉⲃⲟⲗϩⲛ̅ ⲙ̅ⲡⲏⲩⲉ ⲉⲟⲩⲛ̅ ⲟⲩϭⲟⲣⲧⲉ ⲛ̅ⲧⲟⲟⲧϥ ⲁⲩⲱ ⲁϥϣⲱⲱⲧ ⲙ̅ⲡⲕⲟⲩⲓ ⲛ̅ϣⲏⲣⲉ ⲁϥⲡⲱϩⲧ ⲙ̅ⲡⲉϥⲥⲛⲟϥ ⲉⲡⲡⲟⲧⲏⲣⲓⲟⲛ. ⲛ̅ⲧⲉⲣⲉ ⲡⲉⲡⲣⲉⲥⲃⲩⲧⲉⲣⲟⲥ ⲇⲉ ⲉⲣ ⲡⲟⲉⲓⲕ ⲛ̅ⲅⲗⲁⲥⲙⲁ ⲕⲗⲁⲥⲙⲁ ⲛⲉⲣⲉ ⲡⲁⲅⲅⲉⲗⲟⲥ ϩⲱⲱϥ ⲡⲱϣ ⲙ̅ⲡϣⲏⲣⲉ ⲕⲟⲩⲓ ϣⲏⲙ ϣⲏⲙ. ⲁⲩⲱ ⲛ̅ⲧⲉⲣⲟⲩϯ ⲙ̅ⲡⲉⲩⲟⲩⲟⲓ ⲉϫⲓ ⲉⲃⲟⲗϩⲛ̅ ⲛⲉⲧⲟⲩⲁⲁⲃ ⲁϥϫⲓ ⲛ̅ϭⲓ ⲡϩⲗ̅ⲗⲟ ⲛ̅ⲟⲩⲕⲗⲁⲥⲙⲁ ⲛⲁϥ ⲉϥⲡⲏϣ ⲛ̅ⲥⲛⲟϥ ⲁⲩⲱ ⲛ̅ⲧⲉⲣⲉϥⲛⲁⲩ ⲁϥⲣ̅ϩⲟⲧⲉ ⲁϥϫⲓϣⲕⲁⲕ ⲉⲃⲟⲗ ϫⲉ ̅ϯⲡⲓⲥⲧⲉⲩⲉ ⲡϫⲟⲉⲓⲥ ϫⲉ ⲡⲟⲉⲓⲕ ⲡⲉ ⲡⲉⲕⲥⲱⲙⲁ ⲁⲩⲱ ⲡⲡⲟⲧⲏⲣⲓⲟⲛ ⲡⲉ ⲡⲉⲕⲥⲛⲟϥ . ⲁⲩⲱ ⲛ̅ⲧⲉⲩⲛⲟⲩ ⲁⲡⲁϥ ⲉⲧϩⲛ̅ ⲧⲉϥϭⲓϫ ⲣ̅ⲟⲉⲓⲕ ⲕⲁⲧⲁ ⲡⲉⲟⲟⲩ ⲙ̅ⲡⲙⲩⲥⲧⲏⲣⲓⲟⲛ . ⲁϥⲛⲟϫϥ ⲉϩⲟⲩⲛ ⲉⲣⲱϥ ⲁⲩⲱ ⲁϥϫⲓ ⲉϥⲉⲩⲭⲁⲣⲓⲥⲧⲓ ⲙ̅ⲡϫⲟⲉⲓⲥ. ⲡⲉϫⲁⲩ ⲛⲁϥ ⲛ̅ϭⲓ ⲛ̅ϩⲗ̅ⲗⲟ ϫⲉ ⲡⲛⲟⲩⲧⲉ ⲥⲟⲟⲩⲛ ⲛ̅ⲧⲉⲫⲩⲥⲓⲥ ⲛ̅ⲛⲣⲱⲙⲉ ϫⲉ ⲙⲛ̅ϭⲟⲙ ⲙ̅ⲙⲟⲟⲩ ⲉⲟⲩⲉⲙ ⲁⲃ ⲉϥⲟⲩⲱⲧ. ⲉⲧⲃⲉ ⲡⲁⲓ ϣⲁϥⲧⲣⲉ ⲡⲉϥⲥⲱⲙⲁ ϣⲱⲡⲉ ⲛ̅ⲟⲉⲓⲕ ⲁⲩⲱ ⲡⲉϥⲥⲛⲟϥ ⲛ̅ⲏⲣⲡ ⲛ̅ⲛⲉⲧϫⲓ ⲙ̅ⲙⲟϥ ϩⲛ̅ ⲟⲩⲡⲓⲥⲧⲓⲥ . ⲁⲩⲱ ⲁⲩϣⲡ̅ϩⲙⲟⲧ ⲛ̅ⲧⲙ̅ ⲡⲛⲟⲩⲧⲉ ϩⲓϫⲙ̅ ⲡⲉⲛⲧⲁϣⲱⲡⲉ ϫⲉ ⲙ̅ⲡⲉϥⲕⲁ ⲡϩⲗ̅ⲗⲟ ⲛ̅ⲣⲱⲙⲉ ⲉϯⲟⲥⲉ ⲙ̅ⲡⲉϥϩⲓⲥⲉ ⲁⲩⲱ ⲁⲩⲃⲱⲕ ⲙ̅ⲡϣⲟⲙⲛ̅ⲧ ⲉⲛⲉⲩⲣⲓ ϩⲛ̅ ⲟⲩⲣⲁϣⲉ.

ⲁ̅ⲁⲡⲁ ⲥⲁⲣⲁⲡⲓⲱⲛ ⲛⲁⲩ ⲉⲩⲡⲟⲣⲛⲏ. ⲡⲉϫⲁϥ ϫⲉ ̅ϯⲛⲏⲩ ϣⲁⲣⲟ ⲙ̅ⲡⲛⲁⲩ ⲛ̅ⲣⲟⲩϩⲉⲑ ⲥⲃ̅ⲧⲱⲧⲉ ⲉⲃⲟⲗ. ⲁⲩⲱ ⲛ̅ⲧⲉⲣⲉϥⲉⲓ ⲛⲁⲥ ⲉϩⲟⲩⲛ ⲡⲉϫⲁϥ ⲛⲁⲥ ϫⲉ ϭⲱ ⲉⲣⲟⲓ ⲛ̅ⲟⲩⲕⲟⲩⲓ ϫⲉ ⲟⲩⲛ̅ⲧⲁⲓ ⲟⲩⲛⲟⲙⲟⲥ ⲙ̅ⲙⲁⲩ ϣⲁⲛϯϫⲟⲕϥ ⲉⲃⲟⲗ. ⲛ̅ⲧⲟⲥ ⲡⲉϫⲁⲥ ϫⲉ ⲕⲁⲗⲱⲥ ⲡⲁⲉⲓⲱⲧ. ⲛ̅ⲧⲟϥ ⲇⲉ ⲁϥⲁⲣⲭⲉⲓ ⲙ̅ⲁⲗⲗⲉⲓ ϫⲓⲛ ⲡϣⲟⲣⲡ ⲙ̅ⲁⲗⲙⲟⲥ ϣⲁⲛⲧⲉϥϫⲱⲕ ⲉⲃⲟⲗ ⲙ̅ⲡϣⲉⲧⲁⲓⲟⲩ ⲙ̅ⲁⲗⲙⲟⲥ ⲁⲩⲱ ⲕⲁⲧⲁ ⲥⲟⲡ ⲛ̅ⲕⲁⲣⲱϥ ⲉⲃⲟⲗ ϣⲁϥⲉⲓⲣⲉ ⲛ̅ϣⲟⲙⲛ̅ⲧ ⲛ̅ⲕⲗ̅ϫⲡⲁⲧ. ⲛ̅ⲧⲟⲥ ϩⲱⲱⲥ ⲁⲥϭⲱ ⲉⲥϣⲗⲏⲗ ϩⲓ ⲡⲁϩⲟⲩ ⲙ̅ⲙⲟϥ ϩⲛ̅ ⲟⲩϩⲟⲧⲉ ⲙⲛ̅ ⲟⲩⲥⲧⲱⲧ. ⲁϥⲙⲟⲩⲛ ⲇⲉ ⲉⲃⲟⲗ ⲉϥϣⲗⲏⲗ ϩⲁⲣⲟⲥ ⲧⲁⲣⲉⲥⲟⲩϫⲁⲓ ⲁⲩⲱ ⲁ ⲡⲛⲟⲩⲧⲉ ⲥⲱⲧⲙ̅ ⲉⲣⲟϥ. ⲧⲉⲥϩⲓⲙⲉ ⲇⲉ ⲁⲥⲡⲁϩⲧⲥ ϩⲁⲣⲁⲧⲟⲩ ⲛ̅ⲛⲉϥⲟⲩⲉⲣⲏⲧⲉ ⲉⲥⲣⲓⲙⲉ ⲉⲥϫⲱ ⲙ̅ⲙⲟⲥ ϫⲉ ⲁⲣⲓ ⲧⲁⲅⲁⲡⲏ ⲡⲁⲉⲓⲱⲧⲑ ⲡⲙⲁ ⲉⲧⲉⲕⲥⲟⲟⲩⲛ ⲉϯⲛⲁⲟⲩϫⲁⲓⲓ ⲛ̅ϩⲏⲧϥ ϫⲓⲧ ⲉⲙⲁⲩ ⲛ̅ⲧⲁ ⲡⲛⲟⲩⲧⲉ ⲅⲁⲣ ⲧⲛ̅ⲛⲟⲟⲩⲕ ϣⲁⲣⲟⲓ ⲉⲡⲁⲓ. ⲁⲩⲱ ⲁϥϫⲓⲧⲥ ⲉⲩϩⲉⲛⲉⲉⲧⲉ ⲙ̅ⲡⲁⲣⲑⲉⲛⲟⲥ.ⲡⲉϫⲁϥ ⲇⲉ ⲛ̅ⲧⲙⲁⲁⲩ ⲛ̅ⲑⲉⲛⲉⲉⲧⲉ ϫⲉ ϫⲓ ⲛ̅ⲧⲉⲓⲥⲱⲛⲉ ⲁⲩⲱ ⲙ̅ⲡⲣ̅ⲧⲁⲗⲉ ⲛⲁϩⲃ̅ ⲉϫⲱⲥ ⲏ ⲉⲛⲧⲟⲗⲏ ⲁⲗⲗⲁ ⲛ̅ⲑⲉ ⲉⲧⲉⲥⲟⲩⲁϣⲥ ⲙⲁⲣⲉⲥⲁⲁⲥ. ⲕⲁⲁⲥ ϩⲙ̅ ⲡϫⲟⲉⲓⲥ. ⲁⲩⲱ ⲙⲛ̅ⲛ̅ⲥⲁ ϩⲉⲛⲕⲟⲩⲓ ⲛ̅ϩⲟⲟⲩ ⲡⲉϫⲁⲥ ϫⲉ ⲁⲛⲟⲕ ⲟⲩⲣⲉϥⲣ̅ⲛⲟⲃⲉ ⲉⲓⲟⲩⲱϣ ⲉⲟⲩⲱⲙ ⲛ̅ⲟⲩⲥⲟⲡ ⲙ̅ⲙⲏⲛⲉ . ⲙⲛ̅ⲛ̅ⲥⲁ ⲕⲉⲟⲩⲟⲉⲓϣ ⲟⲛ ⲡⲉϫⲁⲥ ϫⲉ ⲉⲓⲟⲩⲱϣ ⲉⲟⲩⲱⲙ ⲛ̅ⲟⲩⲥⲟⲡ ⲕⲁⲧⲁ ⲥⲁⲃⲃⲁⲧⲟⲛ. ⲙⲛ̅ⲛ̅ⲥⲱⲥ ⲟⲛ ⲡⲉϫⲁⲥ ϫⲉ ⲉⲡⲓⲇⲏ ⲁⲓⲣ̅ ϩⲁϩ ⲛ̅ⲛⲟⲃⲉ ⲟⲡⲧ̅ ⲉϩⲟⲩⲛ ⲉⲩⲣⲓ ⲁⲩⲱ ⲡⲉϯⲛⲁⲟⲩⲟⲙϥ ⲧⲁⲁϥ ⲛⲁⲓ ϩⲛ̅ ⲟⲩϣⲟⲩϣⲧ ⲙⲛ̅ ⲡϩⲱⲃ ⲛ̅ϭⲓϫ . ⲁⲩⲱ ⲁⲩⲉⲓⲣⲉ ϩⲓ ⲛⲁⲓ ⲁⲩⲱ ⲁⲥⲣ̅ⲁⲛⲁϥ ⲙ̅ⲡⲛⲟⲩⲧⲉ ⲁⲥⲛ̅ⲕⲟⲧⲕ ⲇⲉ ϩⲙ̅ ⲡ̅ⲙⲁ ⲉⲧⲙ̅ⲙⲁⲩ ϩⲙ̅ ⲡϫⲟⲉⲓⲥ.

---