ⲉⲃⲟⲗϩⲛ̅ ⲛⲓϣⲁϫⲉ ⲛ̅ⲧⲉ ⲛⲉⲛⲓⲟⲧⲉ
ⲁϥϫⲟⲟⲥ ⲛ̅ϭⲓ ⲟⲩϩⲗ̅ⲗⲟ ϫⲉ ϩⲙ̅ ⲡⲓⲣⲁⲥⲙⲟⲥ ⲛⲓⲙ ⲙ̅ⲡⲣ̅ϭⲛⲁⲣⲓⲕⲉ ⲉⲣⲱⲙⲉ ⲁⲗⲗⲁ ϭⲛ̅ⲁⲣⲓⲕⲉ ⲉⲣⲟⲕ ⲙⲁⲩⲁⲁⲕ ⲉⲕϫⲱ ⲙ̅ⲙⲟⲥ ϫⲉ ⲉⲣⲉⲛⲁⲓ ϣⲟⲟⲡ ⲙ̅ⲙⲟⲓ ⲉⲧⲃⲉ ⲛⲁⲛⲟⲃⲉ
ⲁⲟⲩⲁ ⲛ̅ⲛ̅ϩⲗ̅ⲗⲟ ⲃⲱⲕ ϣⲁ ⲕⲉϩⲗ̅ⲗⲟ ⲡⲉϫⲁϥ ⲙ̅ⲡⲉϥⲙⲁⲑⲏⲧⲏⲥ ϫⲉ ⲧⲁⲙⲓⲟ ⲛⲁⲛ ⲛ̅ⲟⲩⲕⲟⲩϫⲓ ⲛ̅ⲁⲣϣⲓⲛ ⲁⲩⲱ ⲁϥⲧⲁⲙⲓⲟϥ. ⲡⲉϫⲁϥ ϫⲉ ϩⲉⲣⲡ ϩⲛ̅ ⲟⲉⲓⲕ ⲛⲁⲛ ⲁⲩⲱ ⲁϥϩⲟⲣⲡⲟⲩ. ⲛ̅ⲧⲟⲟⲩ ⲇⲉ ⲁⲩⲙⲟⲩⲛ ⲉⲃⲟⲗ ⲉⲩϣⲁϫⲉ ⲉⲛⲉⲡ̅ⲛ̅ⲁ̅ⲧⲓⲕⲟⲛ ⲙ̅ⲡⲉϩⲟⲟⲩ ⲧⲏⲣϥ ⲙⲛ̅ ⲧⲉϣⲏ ⲧⲏⲣⲥ
ⲁⲟⲩϫⲟⲟⲥ ⲛ̅ϭⲓ ⲛ̅ϩⲗ̅ⲗⲟ ϫⲉ ⲕⲁⲛ ⲛⲁⲙⲉ̀ ⲉⲣϣⲁⲛ ⲟⲩⲁⲅⲅⲉⲗⲟⲥ ⲟⲩⲱⲛⲁϩ ⲛⲁⲕ ⲉⲃⲟⲗ ⲙ̅ⲡⲣ̅ϣⲟⲡϥ ⲉⲣⲟⲕ ⲁⲗⲗⲁ ⲑⲃ̅ⲃⲓⲟⲕ ⲛ̅ⲅϫⲟⲟⲥ ϫⲉ ⲛ̅ϯⲙ̅ⲡϣⲁ ⲁⲛ ⲉⲛⲁⲩ ⲉⲡⲁⲅⲅⲗⲟⲥ ⲉⲁⲓⲱⲛϩ̅ ϩⲛ̅ ⲛ̅ⲛⲟⲃⲉ
ⲁⲡⲓⲇⲓⲁⲃⲟⲗⲟⲥ ϣⲃ̅ⲧϥ̅ ϩⲛ̅ ⲟⲩⲥⲭⲏⲙⲁ ⲛ̅ⲁⲅⲅⲉⲗⲟⲥ ⲙ̅ⲡⲟⲩⲟⲉⲓⲛ ⲁϥⲟⲩⲱⲛⲁϩ ⲉⲟⲩⲁ ⲛ̅ⲛⲉⲛⲥⲛⲏⲩ ⲁⲩⲱ ⲡⲉϫⲁϥ ⲛⲁϥ ϫⲉ ⲁⲛⲅ ⲡⲉ ⲅⲁⲃⲣⲓⲏⲗ ⲛ̅ⲧⲁⲩ ⲧⲛ̅ⲛⲟⲟⲩⲧ ϣⲁⲣⲟⲕ. ⲡⲉϫⲁϥ ⲇⲉ ⲛⲁϥ ϫⲉ ⲁⲛⲁⲩ ϫⲉ ⲛ̅ⲧⲁⲩ ⲧⲛ̅ⲛⲟⲟⲩⲕ ϣⲁ ⲕⲉⲟⲩⲁ ⲛ̅ⲛⲉⲛⲥⲛⲏⲩ. ⲁⲛⲟⲕ ⲅⲁⲣ ϯⲙ̅ⲡϣⲁ ⲁⲛ. ⲛ̅ⲧⲟϥ ⲇⲉ ⲛ̅ⲧⲉⲩⲛⲟⲩ ⲁϥⲣ̅ ⲁⲧⲟⲩⲱⲛϩ̅ ⲉⲃⲟⲗ.
ⲁⲩϫⲛⲉ ⲟⲩϩ̅ⲗⲗⲟ ϫⲉ ⲛ̅ⲁϣ ⲛ̅ϩⲉ ⲟⲩⲛ̅ ϩⲟⲓⲛⲉ ϫⲱ ⲙ̅ⲙⲟⲥ ϫⲉ ϣⲁⲛⲛⲁⲩ ⲉⲡϭⲱⲗⲡ̅ ⲉⲃⲟⲗ ⲛ̅ϩⲛ̅ ⲁⲅⲅⲉⲗⲟⲥ ⲡⲉϫⲁϥ ⲛⲁⲩ ϫⲉ ⲛⲁⲓⲁⲧϥ̅ ⲛ̅ϩⲟⲩⲟ ⲙ̅ⲡⲉⲧⲛⲁⲛⲁⲩ ⲉⲛⲉϥⲛⲟⲃⲉ ⲙ̅ⲙⲓⲛ ⲙ̅ⲙⲟϥ ⲛ̅ⲟⲩⲟⲉⲓϣ ⲛⲓⲙ.
ⲛⲉ ⲟⲩⲛ̅ ⲟⲩⲁ ϩⲛ̅ ⲕⲏⲙⲉ ⲉⲟⲩⲛ̅ⲧⲁϥ ⲙ̅ⲙⲁⲩ ⲛ̅ⲟⲩϣⲏⲣⲉ ⲉϥⲥⲏϭ ⲁⲩⲱ ⲁϥⲉⲓⲛⲉ ⲙ̅ⲙⲟϥ ⲁϥⲕⲁⲁϥ ϩⲛ̅ ⲧⲣⲓ ⲛ̅ⲁⲡⲁ ⲙⲁⲕⲁⲣⲓⲟⲥ ⲁⲩⲱ ⲁϥⲕⲁⲁϥ ⲉϥⲣⲓⲙⲉ ϩⲗϩⲧⲭ̅ ⲡⲣⲟ ⲁϥⲃⲱⲕ ⲉⲡⲟⲩⲉ. ⲡϩⲗ̅ⲗⲟ ⲇⲉ ⲁϥϭⲱϣⲧ̅ ⲉⲃⲟⲗ ⲁϥⲛⲁⲩ ⲉⲡⲕⲟⲩⲓ ⲛ̅ϣⲏⲣⲉ ⲉϥⲣⲓⲙⲉ ⲁⲩⲱ ⲡⲱϫⲁϥ ⲛⲁϥ ϫⲉ ⲛⲓⲙ ⲡⲉⲛⲧⲁϥⲛ̅ⲧⲕ̅ ⲉⲡⲉⲓⲙⲁ. ⲛ̅ⲧⲟϥ ⲇⲉ ⲡⲉϫⲁϥ ϫⲉ ⲡⲁⲉⲓⲱⲧ ⲡⲉ ⲁϥⲛ̅ⲧ ⲁϥⲛⲟϫⲧ̅ ⲉⲃⲟⲗ ⲁϥⲃⲱⲕ. ⲡⲉϫⲉ ⲡϩⲗ̅ⲗⲟ ⲛⲁϥ ϫⲉ ⲧⲱⲟⲩⲛⲅ̅ ⲛ̅ⲅⲡⲱⲧ ⲛ̅ⲅⲧⲁϩⲟϥ ⲁⲩⲱ ⲛ̅ⲧⲉⲩⲛⲟⲩ ⲁϥⲟⲩϫⲁⲓ ⲁⲧⲱⲟⲩⲛ̅ ⲁϥⲧⲁϩⲉ ⲡⲉϥⲉⲓⲱⲧ ⲁⲩⲱ ⲛ̅ⲧⲉⲓϩⲉ ⲁⲩⲃⲱⲕ ⲉⲡⲉⲩⲏⲓ ⲉⲩⲣⲁϣⲉ.
ⲁⲟⲩⲁ ⲛ̅ⲛⲉⲛⲉⲓⲟⲧⲉ ⲧⲛ̅ⲛⲟⲟⲩ ⲙ̅ⲡⲉϥⲙⲁⲑⲏⲧⲏⲥ ⲉⲙⲉϩ. ⲛⲉⲣⲉⲧϣⲱⲧⲉ ⲇⲉ ⲡⲉ ⲟⲩⲏⲩ ⲛ̅ⲧⲣⲓ ⲙ̅ⲙⲁⲧⲉ. ⲁϥⲣ̅ⲡⲱⲃϣ ⲇⲉ ⲱϫⲓ ⲡⲛⲟⲩϩ ⲛⲙ̅ⲙⲁϥ. ⲛ̅ⲧⲉⲣⲉⲣⲉϥⲉⲓ ⲇⲉ ⲉϫⲛ̅ ⲧϣⲱⲧⲉ ⲁϥⲉⲓⲙⲓ ϫⲉ ⲙ̅ⲡⲉϥⲉⲓⲛⲓ ⲛⲙ̅ⲙⲁϥ ⲙ̅ⲡⲛⲟⲩϩ. ⲁϥⲉⲓⲣⲉ ⲛ̅ⲟⲩϣⲗⲏⲗ ⲁϥⲙⲟⲩⲧⲉ ⲁϥϫⲱ ⲙ̅ⲙⲟⲥ ϫⲉ ⲡϣⲏⲓ ⲡⲁⲉⲓⲱⲧ ⲡⲉⲧϫⲱ ⲙ̅ⲙⲟⲥ ϫⲉ ⲙⲟⲩϩ ⲙ̅ⲡⲁⲅⲅⲓⲟⲥ ⲙ̅ⲙⲟⲟⲩ. ⲁⲩⲱ ⲛ̅ⲧⲉⲩⲛⲟⲩ ⲁⲡⲙⲟⲟⲩ ⲉⲓ ⲉⲡϣⲱⲓ ⲁⲡⲥⲟⲛ ⲛⲟⲩϩ ⲙ̅ⲡⲉϥϣⲟⲩϣⲟⲩ ⲁⲩⲱ ⲁⲡⲙⲟⲟⲩ ϩⲙⲟⲟⲥ ⲟⲛ ⲡⲉϥⲙⲁ.
ⲁϥϫⲟⲟⲥ ⲛ̅ϭⲓ ⲁⲡⲁ ⲓⲱⲥⲏϥ ϫⲉ ⲉⲛϩⲙⲟⲟⲥ ⲙⲛ̅ ⲁⲡⲁ ⲡⲟⲓⲙⲏⲛ ⲁϥⲁⲛⲟ̀ⲙⲁⲍⲉ ⲛ̅ⲁⲡⲁ ⲁⲅⲁⲑⲟⲛ ⲁⲩⲱ ⲛⲉⲛϫⲱ ⲙ̅ⲙⲟⲥ ⲛⲁϥ ϫⲉ ⲟⲩⲃⲣ̅ⲣⲉ ⲡⲉ ⲁⲩⲱ ⲉⲧⲃⲉ ⲟⲩ ⲕⲙⲟⲩⲧⲉ ⲉⲣⲟϥ ϫⲉ ⲁⲡⲁ. ⲁⲩⲱ ⲡⲉϫⲁϥ ⲛ̅ϭⲓ ⲁⲡⲁ ⲡⲟⲓⲙⲏⲛ ϫⲉ ⲧⲉϥⲧⲁⲡⲣⲟ ⲧⲛ̅ⲧⲁⲥⲧⲣⲉⲩⲙⲟⲩⲧⲉ ⲉⲣⲟϥ ϫⲉ ⲁⲡⲁ.
ⲁⲥϫⲟⲟⲥ ⲛ̅ϭⲓ ⲧⲙⲁⲕⲁⲣⲓⲁ ⲥⲩⲅⲕⲗⲓⲧⲓⲕⲏ ϫⲉ ⲛ̀ⲑⲉ ⲉⲧⲉ ⲙⲛ̅ ϭⲟⲙ ⲛ̅ϫⲟⲓ ⲉⲧⲁϩⲟ ⲉⲣⲁⲧϥ̅ ⲁϫⲛ̅ ⲉⲓϥⲧ. ⲧⲁⲓ ⲧⲉ ⲑⲉ ⲟⲩⲁⲧϭⲟⲙ ⲡⲉ ⲟⲩϫⲁⲓ ⲭⲱⲣⲓⲥ ⲡⲉⲑⲃ̅ⲃⲓⲟ ⲛ̅ϩⲏⲧ.
ⲁϩⲟⲓⲛⲉ ⲉⲓ ⲛ̅ⲟⲩⲟⲉⲓϣ ϩⲛ̅ ⲑⲏⲃⲁⲓⲥ ϣⲁ ⲟⲩϩⲗ̅ⲗⲟ ⲉⲩⲛ̅ⲧⲁⲩ ⲛ̅ⲟⲩⲁ ⲉϥⲟ ⲛ̅ⲇⲓⲁⲙⲟⲛⲓⲟⲛ ϫⲉ ⲕⲁⲥ ⲉϥⲉⲧⲁⲗϭⲟϥ ⲡϩ̅ⲗⲗⲟ ⲇⲉ ⲛ̅ⲧⲉⲣⲟⲩⲕⲱⲣϣ̅ ⲉⲣⲟϥ ⲙ̅ⲙⲁⲧⲉ ⲡⲉϫⲁϥ ⲙ̅ⲡⲇⲁⲓⲙⲱⲛ ϫⲉ ⲁⲙⲟⲩ ⲉⲃⲟⲗ ϩⲙ̅ ⲡⲉⲡⲗⲁⲥⲙⲁ ⲙ̅ⲡⲛⲟⲩⲧⲉ. ⲡⲉϫⲉ ⲡⲇⲓⲁⲙⲱⲛ ⲙ̅ⲡϩⲗ̅ⲗⲟ ϫⲉ ϯⲛⲏⲩ ⲉⲃⲟⲗ. ϯⲛⲁϫⲛⲟⲩⲕ ⲇⲉ ⲉⲩϣⲁϫⲉ ⲛ̅ⲟⲩⲱⲧ. ⲛⲓⲙ ⲛⲉ ⲛ̅ⲃⲁⲁⲙⲡⲉ ⲙⲉⲛ ⲁⲛⲟⲕ ⲡⲉ. ⲛⲉⲥⲟⲟⲩ ⲇⲉ ⲡⲛⲟⲩⲧⲉ ⲡⲉⲧⲥⲟⲟⲩⲛ̅ ⲙ̅ⲙⲟⲟⲩ ⲛ̅ⲧⲉⲣⲉⲣⲡⲇⲁⲓⲙⲱⲛ ⲇⲉ ⲥⲱⲧⲙ̅ ⲉⲛⲁⲓ ⲡⲉϫⲁϥ ϫⲉ ⲉⲓⲥ ϩⲏⲏⲧⲉ ⲉⲧⲃⲉ ⲡⲉⲕⲑⲃ̅ⲃⲓⲟ ⲛ̅ϩⲏⲧ ϯⲛⲏⲩ ⲉⲃⲟⲗ.
ⲁⲩϫⲟⲟⲥ ⲉⲧⲃⲉ ⲟⲩⲁ ⲛ̅ⲛⲉⲥⲛⲏⲩ ϫⲉ ⲁϥⲧⲁⲙⲓⲟ ⲛ̅ⲛ̅ⲃⲓⲣ ⲛ̅ϥϯ ⲙⲁⲁϫⲉ ⲉⲣⲟⲟⲩ. ⲁϥⲥⲱⲧⲙ̅ ⲇⲉ ⲉⲡⲉⲧϩⲓⲧⲟⲩⲱϥ ⲉϥϫⲱ ⲙ̅ⲙⲟⲥ ϫⲉ ⲟⲩ ⲡⲉϯⲛⲁⲁⲁϥ ϫⲉ ⲁⲡϩⲱⲃ ϩⲱⲛ ⲉϩⲟⲩⲛ ⲁⲩⲱ ⲙⲛ̅ⲧⲁⲓ ⲙⲁⲁϫⲉ ⲙ̅ⲙⲁⲩ ⲉϯ ⲉⲛⲁⲃⲓⲣ. ⲁϥⲃⲱⲕ ⲇⲉ ⲁϥⲃⲱⲗ ⲉⲃⲟⲗ ⲛ̅ⲙ̅ⲙⲁⲁϫⲉ ⲛ̅ⲧⲁϥⲧⲁⲁⲩ ⲉⲛⲉϥⲃⲓⲣ ⲁϥⲛ̅ⲧⲟⲩ ⲙ̅ⲡⲥⲟⲛ ϫⲉ ⲉⲓⲥ ⲛⲁⲓ ⲟⲩⲛ̅ⲧⲁⲓⲥⲟⲩ ⲉⲩⲣ̅ ϩⲟⲩⲟ ⲉⲣⲟⲓ. ϫⲓⲧⲟⲩ ⲧⲁⲁⲩ ⲉⲛⲉⲕⲃⲓⲣ. ⲁⲩⲱ ⲁϥⲧⲣⲉⲡϩⲱⲃ ⲙ̅ⲡⲉϥⲥⲟⲛ ⲡⲣⲱⲭⲱⲣⲓ ⲁϥⲕⲱ ⲛ̅ⲥⲱϥ ⲙ̅ⲡⲱϥ.
ⲁⲩⲥⲟⲛ ϫⲛⲉ ⲟⲩϩⲗ̅ⲗⲟ ϫⲉ ⲟⲩ ⲡⲉ ⲡⲉⲑⲃ̅ⲃⲓⲟ ⲛ̅ϩⲏⲧ. ⲡⲉϫⲉ ⲡϩⲗ̅ⲗⲟ ⲛⲁϥ ϫⲉ ⲉⲧⲣⲉⲣ̅ ⲡⲡⲉⲧⲛⲁⲛⲟⲩϥ ⲡⲉ ⲛⲛ̅ⲉⲧⲣ̅ ⲡⲉⲑⲟⲟⲩ ⲛⲁⲕ. ⲡⲉϫⲉ ⲡⲥⲟⲛ ⲛⲁϥ ϫⲉ ⲉⲣϣⲁⲛⲧⲙ̅ⲟⲩⲁ ⲡⲱϩ ⲉⲡⲉⲓϣⲓ. ⲟⲩ ⲡⲉⲧⲉϥⲛⲁⲁⲁϥ. ⲡⲉϫⲉ ⲡϩ̅ⲗⲗⲟ ⲙⲁⲣⲉϥⲥⲱⲧⲡ̅ ⲛⲁϥ ⲙ̅ⲡⲕⲁ ⲣⲱϥ.
ⲁⲩϫⲛⲉ ⲟⲩϩⲗ̅ⲗⲟ ϫⲉ ⲛ̅ⲁϣ ⲛ̅ϩⲉ ⲉϥⲛⲁⲥⲕⲁⲛⲇⲁⲗⲓⲍⲉ ⲁⲛ ⲛ̅ϭⲓ ⲟⲩⲥⲟⲛ ⲛ̅ⲥⲡⲟⲩⲇⲁⲓⲟⲥ ⲉϥϣⲁⲛⲛⲁⲩ ⲉϩⲟⲓⲛⲉ ⲉⲩⲕⲧⲟ ⲙ̅ⲙⲟⲟⲩ ⲉⲡⲕⲟⲥⲙⲟⲥ. ⲡⲉϫⲁϥ ⲛⲁⲩ ϫⲉ ⲉⲣϣⲁⲛⲛⲁⲩ ⲉⲛⲉⲩϩⲟⲟⲣ ⲛⲁⲓ ⲉϣⲁⲩϭⲱⲣϭ̅ ϩⲏⲧⲟⲩ ⲉⲛⲥⲁⲣⲁϭⲱⲟⲩϣ. ⲁⲩⲱ ⲛ̅ⲑⲉ ⲉϣⲁⲣⲉⲟⲩⲁ ⲛ̅ϩⲏⲧⲟⲩ ϭⲱϣⲧ̅ ⲉⲡⲥⲁⲣⲁϭⲱⲟⲩϣ ⲉϥϣⲁⲛⲛⲁⲩ ⲉⲣⲟϥ ϣⲁϥⲡⲱⲧ ⲛ̅ⲥⲱϥ. ϣⲁⲣⲉⲡⲉⲕⲥⲉⲉⲡⲉ ⲇⲉ ⲛⲁⲩ ⲉⲡⲧⲡⲏⲧ ⲛ̅ⲥⲉⲡⲱⲧ ⲛ̅ⲥⲱϥ. ⲁⲩⲱ ⲛ̅ϩⲱⲥⲟⲛ ⲥⲉⲡⲏⲧ ⲙⲛ̅ ⲡⲕⲉⲟⲩⲁ ⲉⲡϩⲁⲉ ⲇⲉϣⲩⲕⲁ ⲧⲟⲟⲧⲟⲩ ⲉⲃⲟⲗ ⲛ̅ⲥⲉⲕⲟⲧⲟⲩ ⲉⲡⲁ̀ϩⲟⲩ. ⲡⲏ ⲇⲉ ⲙⲁⲩⲁⲁϥ ⲡⲉⲛⲧⲁϥⲛⲁⲩ ⲉⲣⲟϥ ϣⲁϥϭⲱ ⲉϥⲡⲏⲧ ⲙⲉϥⲕⲁ ⲧⲟⲟⲧϥ̅ ⲉⲃⲟⲗ ϩⲙ̅ ⲡϩⲓⲥⲉ ⲟⲩⲇⲉ ⲉⲧⲃⲉ ⲛⲉⲛⲧⲁⲩⲕⲟⲧⲟⲩ ⲉⲡⲁ̀ϩⲟⲩ ⲉⲙⲉϥⲣ̅ⲣⲟⲟⲩϣ ⲛⲁϥ ⲉⲧⲃⲉ ⲛ̅ⲥⲟⲩⲣⲉ ⲟⲩⲇⲉ ⲉⲧⲃⲉ ⲛ̅ϣⲟⲛⲧⲉ ⲉϥⲡⲏⲧ ϩⲛ̅ ⲧⲉⲩⲙⲏⲧⲉ. ⲧⲁⲓ ⲧⲉ ⲑⲉ ⲙ̅ⲡⲉⲧϣⲓⲛⲉ ⲛ̅ⲥⲁ ⲡϫⲟⲉⲓⲥ ⲓ̅ⲥ̅ ⲡⲉⲭ̅ⲥ̅ ⲉϥϯ ⲛ̅ϩⲏⲧϥ ⲉⲡⲉⲥⲣⲟ̅ⲥ̅ ⲁϫⲛ̅ ⲱϫⲛ. ϣⲁϥⲣ̅ ⲡⲉⲧⲡⲉ ⲛ̅ⲥⲕⲁⲛⲇⲁⲗⲟⲛ ⲛⲓⲙ ⲉⲧⲛⲁⲧⲱⲙⲛ̅ⲧ ⲉⲣⲟⲛ ϣⲁⲛⲧⲉϥⲡⲱϩ ⲉⲡⲉⲛⲧⲁⲩⲣⲟ̅ⲩ̅ ⲙ̅ⲙⲟϥ.
ⲁⲩⲥⲟⲛ ϫⲛⲉ ⲟⲩϩⲗ̅ⲗⲟ ϫⲉ ⲟⲩ ⲡⲉⲑⲃ̅ⲃⲓⲟ. ⲡⲉϫⲁϥ ϫⲉ ⲉⲣϣⲁⲛⲡⲉⲕⲥⲟⲛ ⲣ̅ⲛⲟⲃⲉ ⲉⲣⲟⲕ ⲡⲉ ⲛ̅ⲅⲕⲱ ⲛⲁϥ ⲉⲃⲟⲗ ⲙ̅ⲡⲁⲧⲉϥⲙⲉⲧⲁⲛⲟⲓ.
ⲁϥϫⲟⲟⲥ ⲛ̅ϭⲓ ⲁⲡⲁ ⲙⲱⲩⲥⲏⲥ ϩⲛ̅ ϣⲓⲏⲧ ϫⲉ ⲉⲛϣⲁⲛϩⲁⲣⲉ̀ϩ ⲉⲛⲉⲛⲧⲟⲗⲏ ⲛ̅ⲛⲉⲛⲓⲟⲧⲉ ⲁⲛⲟⲕ ϯⲛⲁϣⲡ̅ ⲧⲱⲣⲉ ⲙ̅ⲙⲱⲧⲛ̅ ϩⲁϩⲧⲙ̅ ⲡⲛⲟⲩⲧⲉ ϫⲉ ⲙⲛ̅ ⲃⲁⲣⲃⲁⲣⲟⲥ ⲛⲁⲉⲓ ⲉⲡⲉⲓⲙⲁ. ⲉⲛⲁϣⲛⲧⲙ̅ϩⲁⲣⲉϩ ⲇⲉ ⲡⲧⲟⲡⲟⲥ ⲛⲁϣⲱϥ. ⲉⲣⲉⲛⲉⲥⲛⲏⲩ ⲇⲉ ϩⲙⲟⲟⲥ ϩⲁϩⲧⲏϥ ⲛ̅ⲟⲩⲥⲏⲩ ⲁϥϫⲟⲟⲥ ⲛⲁⲩ ϫⲉ ⲉⲓⲥ ⲛ̅ⲃⲁⲣⲃⲁⲣⲟⲥ ⲛⲏⲩ ⲉϣⲓⲏⲧ ⲙ̅ⲡⲟⲟⲩ. ⲧⲱⲟⲩⲛ̅ ⲛ̅ⲧⲉⲧⲛ̅ⲡⲱⲧ ⲛ̅ⲧⲟⲟⲩ ⲇⲉ ⲡⲉϫⲁⲩ ⲛⲁϥ ϫⲉ ⲛ̅ⲧⲟⲕ ⲕⲛⲁⲡⲱⲧ ⲁⲛ. ⲡⲉϫⲁϥ ⲛⲁⲩ ϫⲉ ⲉⲓⲥ ⲛⲉⲓⲣⲟⲙⲡⲉ ⲧⲏⲣⲟⲩ ϯϭⲱϣⲧ ⲉⲃⲟⲗ ϩⲏⲧϥ ⲙ̅ⲡⲟⲟⲩ ⲛ̅ϩⲟⲟⲩ ϫⲉ ⲕⲁⲥ ⲉϥⲉϫⲱⲕ ⲉⲃⲟⲗ ⲛ̅ϭⲓ ⲡϣⲁϫⲉ ⲙ̅ⲡⲉⲭ̅ⲥ̅ ⲉϥϫⲱ ⲙ̅ⲙⲟⲥ ϫⲉ ⲟⲩⲟⲛ ⲛⲓⲙ ⲛ̅ⲧⲁϫⲓ ⲥⲏϥⲉ ⲉⲩⲛⲁϩⲉ ⲟⲛ ⲉⲃⲟⲗ ϩⲛ̅ ⲧⲥⲏϥⲉ. ⲡⲉϫⲁⲩ ⲛⲁϥ ϫⲉ ⲟⲩⲇⲉ ⲁⲛⲟⲛ ϩⲱⲱⲛ ⲛ̅ⲧⲛ̅ⲛⲁⲡⲱⲧ ⲁⲛ ⲁⲗⲗⲁ ⲧⲛ̅ⲛⲁⲙⲟⲩ ⲛⲛ̅ⲙⲁⲕ. ⲛ̅ⲧⲟϥ ⲇⲉ ⲡⲉϫⲁϥ ⲛⲁⲩ ϫⲉ ⲁⲛⲟⲕ ⲙⲛ̅ⲧⲁⲓ ϩⲱⲃ. ⲡⲟⲩⲁ ⲡⲟⲩⲁ ⲙⲁⲣⲉϭⲱϣⲧ̅ ϫⲉ ⲉϥϩⲙⲟⲟⲥ ⲛ̅ⲁϣ ⲛ̅ϩⲉ. ⲛⲉⲩⲉⲓⲣⲉ ⲇⲉ ⲛ̅ⲥⲁϣϥ ⲛ̅ⲥⲟⲛ. ⲁⲩⲱ ⲡⲱϫⲁϥ ⲛⲁⲩ ϫⲉ ⲉⲓⲥ ⲛ̅ⲃⲁⲣⲃⲁⲣⲟⲥ ⲁⲩϩⲱⲛ ⲉϩⲟⲩⲛ ⲉⲡⲣⲟ. ⲁⲩⲃⲱⲕ ⲇⲉ ⲉϩⲟⲩⲛ ϩⲁ ϩⲛ̅ⲛⲏⲃⲧⲉ ⲁⲩⲱ ⲁϥⲛⲁⲩ ⲉⲥⲁϣϥ ⲛ̅ⲕⲗⲟⲙ ⲉⲩⲛⲏⲩ ⲉⲡⲉⲥⲏⲧ ⲉⲃⲟⲗ ϩⲛ̅ ⲧⲡⲉ ⲁⲩⲥⲧⲉⲫⲁⲛⲟⲩ ⲙ̅ⲙⲟⲩ ⲙ̅ⲡⲥⲁϣϥ.
ⲁϥϫⲟⲟⲥ ⲛ̅ϭⲓ ⲁⲡⲁ ⲓⲱϩⲁⲛⲛⲏⲥ ⲡⲉⲛⲧⲁⲩⲉⲝⲱⲣⲓⲍⲉ ⲙ̅ⲙⲟϥ ϩⲓⲧⲛ̅ ⲙⲁⲣⲕⲓⲁⲛⲟⲥ ϫⲉ ⲁⲛⲉⲓ ⲛ̅ⲟⲩⲟⲉⲓϣ ϣⲁ ⲁⲡⲁ ⲡⲟⲓⲙⲏⲛ ⲉⲃⲟⲗ ϩⲛ̅ ⲧⲥⲩⲣⲓⲁ ⲁⲩⲱ ⲉⲛⲟⲩⲱϣ ⲉϫⲛⲟⲩϥ ⲉⲧⲃⲉ ⲧⲙⲛ̅ⲧⲁϣⲧϩⲏⲧ. ⲡ̅ϩⲗ̅ⲗⲟ ⲇⲉ ⲛⲉϥⲥⲟⲟⲩⲛ̅ ⲁⲛ ⲡⲉ ⲙ̅ⲙⲛ̅ⲧⲟⲩⲉⲉⲓⲉⲛⲓⲛ ⲁⲩⲱ ⲛⲉⲙⲛ̅ ϩⲉⲣⲙⲉⲛⲉⲩⲧⲏⲥ ⲙ̅ⲙⲁⲩ ⲁⲛ ⲡⲉ. ⲡϩⲗⲗ̅ⲟ ⲇⲉ ⲁϥⲛⲁⲩ ⲉⲣⲟⲛ ⲉⲛⲑⲗⲓⲃⲉ ⲁϥⲁⲣⲭⲉⲓ ⲛ̅ϣⲁϫⲉ ⲙ̅ⲙⲛ̅ⲧⲟⲩⲉⲉⲓⲛⲓⲛ.
ⲉⲛⲉⲟⲩⲛ̅ ⲟⲩϩⲗ̅ⲗⲟ ⲉϥⲟⲩⲏϩ ϩⲓϫⲙ̅ ⲡⲓⲟⲣⲇⲁⲛⲏⲥ ⲉϥⲁⲛⲁⲭⲱⲣⲉⲓ ⲁⲩⲱ ⲁϥⲃⲱⲕ ⲉϩⲟⲩⲛ ⲉⲩⲥⲡⲏⲗⲁⲓⲟⲛ ϩⲙ̅ ⲡⲕⲁⲩⲙⲁ ⲁϥϭⲓⲛⲉ ⲛ̅ⲟⲩⲙⲟⲩⲓ ϩⲙ̅ ⲡⲙⲁ ⲉⲧⲙ̅ⲙⲁⲩ ⲁⲩⲱ ⲁϥⲁⲣⲭⲉⲓ ⲛ̅ϩⲣⲟϫⲣϫ̅ ⲛ̅ⲛⲉϥⲃⲟϩⲉ ⲉϩⲟⲩⲛ ⲉⲣⲟϥ ⲁⲩⲱ ⲁϥⲉⲗϩⲏⲙ. ⲡⲉϫⲉ ⲡϩⲗ̅ⲗⲟ ⲛⲁϥ ϫⲉ ⲉⲧⲃⲉ ⲟⲩ ⲕϩⲏϣ. ⲟⲩⲛ̅ ⲙⲁ ⲙ̅ⲙⲁⲩ ⲛ̅ϥϣⲟⲡⲧ ⲁⲩⲱ ⲛ̅ϥϣⲟⲡⲕ ⲟⲛ. ⲉϣⲱⲡⲱ ⲇⲉ ⲛ̅ⲕⲟⲩⲱϣ ⲁⲛ ⲉⲟⲩⲱϩ ⲛⲙ̅ⲙⲁⲓ. ⲧⲱⲟⲩⲛ̅ ⲛ̅ⲅⲃⲱⲕ ⲉⲃⲟⲗ. ⲡⲓⲙⲟⲩⲓ ⲇⲉ ⲙ̅ⲡⲉϥϥⲉⲓ ⲉⲣⲟϥ ⲁϥⲉⲓ ⲉⲃⲟⲗ.
ⲁⲩϫⲟⲟⲥ ⲉⲧⲃⲉ ⲟⲩϩⲗ̅ⲗⲟ ⲉⲧⲃⲉ ⲟⲩϩⲗ̅ⲗⲟ ϩⲛ̅ ϣⲓⲏⲧ ϫⲉ ⲁϥⲉⲓ ⲉⲃⲟⲗ ⲉϥⲛⲁⲃⲱⲕ ⲉⲡϩⲥ̅. ⲁϩⲛⲥⲛⲏⲩ ⲉⲓϩⲱⲟⲩ ⲉⲩⲙⲟⲟϣⲉ ⲁⲩⲉⲓ ⲉϫⲛ̅ ⲟⲩⲫⲟⲛⲟⲥ ⲁⲩⲁϩⲉⲣⲁⲧⲟⲩ ϩⲓϫⲱϥ. ⲁϥϩⲛ̅ⲕⲟⲟⲩⲉ ⲇⲉ ⲉⲓ ⲉⲃⲟⲗ ⲁⲩⲁⲙⲁϩⲧⲉ ⲙ̅ⲙⲟⲟⲩ ϩⲱⲥ ⲛ̅ⲧⲟⲟⲩ ⲡⲉⲛⲧⲁⲩⲙⲟⲟⲩⲧ ⲡⲣⲱⲙⲉ. ϩⲱⲥⲟⲛ ⲉⲩϫⲱ ⲛ̅ⲛⲁⲓ ⲙⲛ̅ ⲛⲉⲩⲉⲣⲏⲟⲩ ϫⲛ̅ⲧⲱⲧⲛ̅ ⲡⲉⲛⲧⲁⲧⲉⲧⲛ̅ⲙⲟⲩⲟⲧ̅ ⲙ̅ⲡⲣⲱⲙⲉ ⲁϥⲉⲓ ⲉⲃⲟⲗ ⲛ̅ϭⲓ ⲡϩ̅ⲗⲗⲟ ⲉϥⲃⲏⲕ ⲉⲣⲉⲧⲉϥϩⲉⲣⲃⲱⲧ ⲛ̅ⲧⲟⲟⲧϥ. ⲛ̅ⲧⲉⲣⲉⲥⲛⲏⲩ ⲇⲉ ⲛⲁⲩ ⲉⲣⲟϥ ⲁⲩⲡⲱⲧ ⲉⲃⲟⲗ ϩⲏⲧϥ̅ ⲉⲩⲣⲓⲙⲉ ⲉⲩϫⲱ ⲙ̅ⲙⲟⲥ ϫⲉ ⲃⲟⲏⲑⲉⲓ ⲉⲣⲟⲓ ⲡⲉⲛⲉⲓⲱⲧ ⲁⲩⲱ ⲁⲩⲧⲁⲩⲟ ⲉⲣⲟϥ ⲙ̅ⲡϣⲁϫⲉ ⲛ̅ⲧⲟϥ ⲇⲉ ⲁϥⲕⲓⲙ ⲉⲧⲉϥϩⲣ̅ⲃⲱⲧ ⲉⲡⲉⲧⲙⲟⲟⲩⲧ ⲡⲉϫⲁϥ ϫⲉ ⲛⲉⲓⲥⲛⲏⲩ ⲁⲩⲣⲁϩⲧⲕ̅ ⲡⲉϫⲁϥ ⲛ̅ϭⲓ ⲡⲉⲧⲙⲟⲟⲩⲧ ϫⲉ ⲙ̅ⲙⲟⲛ. ⲡⲉϫⲉ ⲡϩⲗ̅ⲗⲟ ⲛⲁϥ ϫⲉ ⲛ̅ⲧⲁⲕⲣ̅ ⲟⲩ. ⲡⲉϫⲁϥ ϫⲉ ⲁⲛⲟⲛ ϩⲛ̅ⲥⲟⲟⲛⲉ. ⲁⲛⲓⲙϣⲉ ⲙⲛ̅ ⲛⲉⲛⲉⲣⲏⲩ ⲁⲩⲣⲁϩⲧ̅ ⲁⲩⲃⲱⲕ. ⲁⲩⲣ̅ ϣⲡⲏⲣⲉ ⲛ̅ϭⲓ ⲛⲉⲣⲱⲙⲉ ⲙ̅ⲙⲁⲧⲉ.
ⲁϥϫⲟⲟⲥ ⲛ̅ϭⲓ ⲁⲡⲁ ϫⲓϫⲱⲓ ϫⲉ ⲙ̅ⲡⲉⲟⲩⲉⲓϣ ⲉⲓϩⲛ̅ ϣⲓⲏⲧ ⲙⲛ̅ ⲁⲡⲁ ⲙⲁⲕⲁⲣⲓⲟⲥ ⲁⲛⲃⲱⲕ ⲉϩⲣⲁⲓ ⲛⲙ̅ⲙⲁϥ ⲁⲛϩⲱⲥ̅ ⲉⲛⲟ ⲉ̅ⲛⲥⲁϣϥ ⲛ̅ⲥⲟⲛ. ⲁⲩⲱ ⲉⲓⲥ ⲟⲩⲭⲏⲣⲁ ⲉⲥⲥⲣⲓⲧ ϩⲓ ⲡⲁ̀ϩⲟⲩ ⲙ̅ⲙⲟⲛ ⲉⲥⲣⲓⲙⲉ ⲁⲩⲱ ⲙ̅ⲡⲉⲥⲕⲁ ⲧⲟⲟⲧⲥ̅ ⲉⲥⲣⲓⲙⲉ. ⲡϩ̅ⲗⲗⲟ ⲇⲉ ⲁϥⲙⲟⲩⲧⲉ ⲉⲡϫⲟⲓⲥ ⲙ̅ⲡⲉⲕⲧⲏⲙⲁ ⲡⲉϫⲁϥ ⲛⲁϥ ⲁϩⲣⲟⲥ ⲧⲉⲓϩⲗ̅ⲗⲱ ⲉⲥⲣⲓⲙⲉ ⲛ̅ⲧⲉⲓϩⲉ. ⲡⲉϫⲁϥ ⲛⲁϥ ϫⲉ ⲉⲧⲓ ⲉⲣⲉⲡⲉⲥϩⲁⲓ ⲟⲛⲁϩ ⲉⲣⲉ ϩⲛ̅ⲛ̅ⲕⲁ ϭⲁⲗⲱⲟⲩ ⲉⲣⲟϥ ⲛ̅ⲧⲉ ⲟⲩⲣⲱⲙⲉ ⲁϥⲙⲟⲩ ⲇⲉ ϩⲛ̅ ⲟⲩϣⲡⲉⲛϣⲱⲡ ⲛ̅ⲟⲩⲉϣⲛ̅ ϣⲁϫⲉ ⲙ̅ⲡⲉϥϫⲟⲟⲥ ϫⲉ ⲛ̅ⲧⲁϥⲕⲁⲁϥ ⲧⲱⲛ. ⲉⲣⲉⲡⲉⲛⲧⲁⲗⲱⲟⲩ ⲇⲉ ⲟⲩⲱϣ ⲉϫⲓ ⲙ̅ⲡⲉⲧⲉ ⲡⲱϥ ⲡⲉ ⲙ̅ⲡⲉⲥϭⲛ̅ⲧϥ̅ ⲉϥⲟⲩⲱϣ ⲉϫⲓⲧⲥ̅ ⲙⲛ̅ ⲛⲉⲥϣⲏⲣⲉ ⲉⲁⲁⲩ ⲛⲁϥ ⲛϩⲙ̅ϩⲁⲗ. ⲡϩ̅ⲗⲗⲟ ⲇⲉ ⲡⲉϫⲁϥ ⲛⲁϥ ϫⲉ ⲁϫⲓⲥ ⲛⲁⲥ ⲙⲁⲣⲉⲥⲉⲓ ⲉⲡⲙⲁ ⲉϣⲁⲛⲉⲙⲧⲟⲛ ⲛ̅ϩⲏⲧϥ̅ ⲙ̅ⲡⲁⲩⲙⲁ. ⲛ̅ⲧⲉⲣⲉⲥⲉⲓ ⲇⲉ ⲡⲉϫⲉ ⲡϩ̅ⲗⲗⲟ ⲛⲁⲥ ϫⲉ ⲉⲧⲃⲉ ⲟⲩ ⲧⲉⲣⲓⲙⲉ ⲛ̅ⲛⲁⲩ ⲛⲓⲙ. ⲡⲉϫⲁⲥ ⲛⲁϥ ϫⲉ ⲛ̅ⲧⲁⲡⲁϩⲁⲓ ⲙⲟⲩ ⲉⲁϥϫⲓ ⲛ̅ⲟⲩϭⲟⲓⲗⲉ ⲛ̅ⲧⲉ ⲟⲩⲗ ⲁⲩⲱ ⲙ̅ⲡⲉϥϫⲟⲟⲥ ⲉϥⲛⲁⲙⲟⲩ ϫⲉ ⲛ̅ⲧⲁϥⲕⲁⲁϥ ⲧⲱⲛ. ⲡⲉϫⲁϥ ⲛⲁⲥ ϫⲉ ⲁⲙⲏ ⲛ̅ⲧⲉⲥⲁⲃⲟⲛ ϫⲉ ⲛ̅ⲧⲁⲣⲧⲟⲙⲥϥ̅ ⲛ̅ⲧⲱⲛ. ⲁⲩⲱ ⲁϥϫⲓ ⲛ̅ⲛⲉⲥⲛⲏⲩ ⲁϥⲃⲱⲕ ⲛⲙ̅ⲙⲁⲥ. ⲛ̅ⲧⲉⲣⲟⲩⲉⲓ ⲇⲉ ⲉϫⲙ̅ ⲡⲙⲁ ⲡⲉϫⲉ ⲡϩⲗ̅ⲗⲟ ⲛⲁⲥ ϫⲉ ⲃⲱⲕ ⲛⲉ ⲉⲡⲟⲩⲏⲓ. ⲁⲩⲱ ⲁⲩϣⲗⲏⲗ. ⲁϥⲙⲟⲩⲧⲉ ⲛ̅ϭⲓ ⲡϩⲗ̅ⲗⲟ ⲉⲡⲉⲧⲙⲟⲟⲩⲧ ⲉϥϫⲱ ⲙ̅ⲙⲟⲥ ϫⲉ ⲙⲉϣⲉ ⲛⲓⲙ ⲛ̅ⲧⲁⲕⲕⲁ ⲛⲉⲥⲕⲉⲩⲏ ⲛ̅ⲡⲣⲱⲙⲉ ϩⲛ̅ ⲁϣ ⲙ̅ⲙⲁ. ⲛ̅ⲧⲟϥ ⲇⲉ ⲁϥⲟⲩⲱϣⲃ̅ ϫⲉ ⲥⲉⲕⲏ ϩⲙ̅ ⲡⲁⲏⲓ ϩⲁ ⲧⲟⲩⲉⲣⲏⲧⲉ ⲙ̅ⲡⲁϭⲗⲟϭ. ⲡⲉϫⲉ ⲡϩⲗ̅ⲗⲟ ⲛⲁϥ ϫⲉ ⲛ̅ⲕⲟⲧⲕ̅ ϭⲉ ϣⲁ ⲡⲉϩⲟⲟⲩ ⲛ̅ⲧⲁⲛⲁⲥⲧⲁⲥⲓⲥ. ⲁⲩⲛⲁⲩ ⲇⲉ ⲛ̅ϭⲓ ⲛⲉⲥⲛⲏⲩ ⲁⲩϩⲉ ϩⲁ ⲛⲉϥⲟⲩⲉⲣⲏⲧⲉ. ⲡⲉϫⲁϥ ⲛ̅ϭⲓ ⲡϩⲗ̅ⲗⲟ ϫⲉ ⲛ̅ⲧⲁⲡⲁⲓ ϣⲱⲡⲉ ⲁⲛ ⲉⲧⲃⲏⲧ. ⲁⲛⲟⲕ ⲅⲁⲣ ⲁⲛⲅ̅ ⲟⲩⲗⲁⲁⲩ. ⲁⲗⲗⲁ ⲉⲧⲃⲉ ⲧⲉⲭⲏⲣⲁ ⲙⲛ̅ ⲛⲉⲓⲟⲫⲁⲛⲟⲥ ⲁⲡⲛⲟⲩⲧⲉ ⲉⲓⲣⲉ ⲙ̅ⲡⲉⲓϩⲱⲃ. ⲁϥⲉⲓ ⲇⲉ ⲁϥϫⲟⲟⲥ ⲛ̅ⲧⲉⲭⲏⲣⲁ ϫⲉ ⲉⲣⲉⲡϭⲟⲓⲗⲉ ⲕⲏ ⲛ̅ⲧⲱⲛ. ⲛ̅ⲧⲟⲥ ⲇⲉ ⲁⲥϫⲓⲧϥ ⲁⲥⲧⲁⲁϥ ⲙ̅ⲡⲉϥϫⲟⲉⲓⲥ ⲁⲥϣⲱⲡⲉ ⲛ̅ⲣⲙ̅ϩⲉ ⲙⲛ̅ ⲛⲉⲥϣⲏⲣⲉ. ⲁⲩⲱ ⲛⲉⲛⲧⲁⲩⲥⲱⲧⲙ̅ ⲁⲩϯ ⲉⲟⲟⲩ ⲙ̅ⲡⲛⲟⲩⲧⲉ.
ⲁⲁⲡⲁ ⲃⲁⲛⲉ ⲇⲉ ϫⲛⲉ ⲁⲡⲁ ⲁⲃⲣⲁϩⲁⲙ ⲛ̅ⲟⲩϩⲟⲟⲩ ⲉϥϫⲱ ⲙ̅ⲙⲟⲥ ϫⲉ ⲟⲩⲣⲱⲙⲉ ⲛ̅ⲧⲁϥⲣ̅ ⲑⲉ ⲛ̅ⲁⲇⲁⲙ ϩⲙ̅ ⲡⲡⲁⲣⲁⲇⲓⲥⲟⲥ ϥⲣ̅ⲭⲣⲓⲁ ⲛ̅ⲕⲉⲥⲟⲡ ⲉⲧⲉⲩϫⲓ ϣⲟϫⲛⲉ ⲛⲁϥ. ⲛ̅ⲧⲟϥ ⲇⲉ ⲡⲉϫⲁϥ ⲛⲁϥ ϫⲉ ⲥⲉ ⲃⲁⲛⲉ. ⲉⲛⲉⲛⲧⲁⲁⲇⲁⲙ ⲅⲁⲣ ϫⲓ ϣⲟϫⲛⲉ ⲙⲛ̅ ⲛ̅ⲁⲅⲅⲉⲗⲟⲥ ϫⲉ ⲉⲛⲉ ⲧⲁⲟⲩⲱⲙ ⲉⲃⲟⲗ ϩⲙ̅ ⲡϣⲏⲛ. ⲛⲉⲩⲛⲁϫⲟⲟⲥ ⲛⲁϥ ⲡⲉ ϫⲙ̅ⲙⲟⲛ.
ⲁⲁⲡⲁ ϩⲏⲗⲓⲁⲥ ⲛ̅ϣⲓⲏⲧ ϫⲟⲟⲥ ϫⲉ ⲛ̅ⲧⲉⲣⲓⲡⲱⲧ ⲉϩⲟⲩⲛ ⲉϣⲓⲏⲧ ⲁⲓⲁⲝⲓⲟⲩ ⲛ̅ⲁⲡⲁ ⲓⲉⲣⲁⲝ ϫⲉ ⲕⲁⲁⲧ ⲛⲁⲕ ⲛ̅ϣⲏⲣⲉ ⲧⲁⲙⲁⲑⲉⲩⲧⲉ ϩⲁⲣⲁⲧⲕ̅. ⲡⲉϫⲁϥ ⲛⲁⲓ ⲉϥⲡⲓ̀ⲣⲁⲍⲉ ⲙ̅ⲙⲟⲓ ϫⲉ ⲕⲛⲁⲥⲱⲧⲙ̅ ⲛ̅ⲥⲱⲓ ϩⲙ̅ ⲡⲉϯⲛⲁϫⲟⲟϥ ⲛⲁⲕ. ⲡⲉϫⲁⲓ ⲛⲁϥ ϫⲉ ⲥⲉ ⲧⲱⲛⲟⲩ. ⲁⲩⲱ ⲁϥϫⲉⲣⲉ ⲟⲩⲕⲱϩⲧ̅ ⲡⲉϫⲁϥ ⲛⲁⲓⲉⲣⲡⲓ̀ⲣⲁⲍⲉ ⲙ̅ⲙⲟⲓ ϫⲉ ⲉϣϫⲉ ⲕⲛⲥⲱⲧⲙ̅ ⲛ̅ⲥⲱⲓ. ϯ ⲛ̅ⲧⲉⲕϭⲓϫ ⲉϩⲟⲩⲛ ⲉⲡⲉⲓⲕⲱϩⲧ̅. ⲁⲩⲱ ⲁⲓϭ ⲛ̅ⲧⲁⲡⲓϫ ⲉϩⲟⲟⲩⲛ ⲉⲡⲕϩⲱⲧ̅ ⲁⲓⲕⲁⲁⲥ ϣⲁⲛⲧⲉⲥⲕⲁ ⲙⲟⲟⲩ. ⲉⲓⲙⲏⲧⲓ ⲛ̅ⲧⲁϥϭⲟⲡⲥ̅ ⲁϥⲛ̅ⲧⲥ̅ ⲉⲃⲟⲗ ⲙ̅ⲡⲓⲉⲛⲧⲥ. ⲁⲛⲟⲛ ⲇⲉ ⲁϥⲧⲥⲁⲃⲟⲛ ⲉⲡⲙⲁⲉⲓⲛ ⲉⲧϩⲛ̅ ⲧⲉϥϭⲓϫ.