Ⲛ̅ⲤⲂⲞⲨ ⲚⲤⲒⲖⲞⲨⲀⲚⲞⲤ
Ⲃⲱⲗ ⲉⲃⲟⲗ ⲛ̅ϩⲏⲗⲓϭⲓⲁ ⲛⲓⲙ ⲙ̅ⲙⲛ̅ⲧϣⲏⲙ . ⲛⲅ̅ϫⲡⲟ ⲛⲁⲕ ⲛ̅ⲧⲙⲛ̅ⲧϫⲱⲣⲉ ⲙ̅ⲡⲛⲟⲩⲥ ⲙⲛ̅ⲧⲯⲩⲭⲏ ⲛⲅ̅ⲧⲁϫⲣⲟ ⲙ̅ⲡⲡⲟⲗⲉⲙⲟⲥ ⲟⲩⲃⲉⲙⲛ̅ⲧⲁⲑⲏⲧ ⲛⲓⲙ ⲛ̅ⲧⲉⲙ̅ⲡⲁⲑⲟⲥ ⲙ̅ⲡⲉⲣⲱⲥ ⲙⲛ̅ⲧⲡⲟⲛⲏⲣⲓⲁ ⲉⲑⲟⲟⲩ ⲁⲩⲱ ⲧⲙⲛ̅ⲧⲙⲁⲉⲓⲉⲟⲟⲩ ⲁⲩⲱ ⲧⲙⲛ̅ⲧⲙⲁⲉⲓϯⲧⲱⲛ . ⲙⲛ̅ⲡⲕⲱϩ ⲉⲧϩⲟⲥⲉ ⲙⲛ̅ⲡϭⲱⲛⲧ ⲙⲛ̅ⲧⲟⲣⲅⲏ . ⲙⲛ̅ⲧⲉⲡⲓⲑⲩⲙⲓⲁ ⲙ̅ⲙⲛ̅ⲧⲙⲁⲉⲓⲭⲣⲏⲙⲁ . ⲣⲟⲉⲓⲥ ⲉⲧⲉⲧⲛ̅ⲡⲁⲣⲉⲙⲃⲟⲗⲏ ⲙⲛ̅ϩⲉⲛϩⲟⲡⲗⲟⲛ ⲙⲛ̅ϩⲉⲛⲃⲉⲣⲏϩ . ϩⲱⲕ ⲙ̅ⲙⲟⲕ ⲙⲛ̅ⲙⲁⲧⲟⲉⲓ ⲧⲏⲣⲟⲩ ⲉⲧⲉⲛ̅ⲗⲟⲅⲟⲥ ⲛⲉ . ⲙⲛ̅ⲛ̅ⲁⲣⲭⲱⲛ ⲉⲧⲉⲛ̅ϣⲟϫⲛⲉ ⲛⲉ ⲙⲛ̅ⲡⲉⲕ Ⲭ ⲡ̅ⲉ̅ , ⲛⲟⲩⲥ ⲛ̅ϩⲏⲅⲉⲙⲟⲛⲓⲕⲟⲛ . Ⲡⲁϣⲏⲣⲉ ⲛⲟⲩϫⲉ ⲛ̅ⲗⲏⲥⲧⲏⲥ ⲛⲓⲙ ⲉⲃⲟⲗ ϩⲛ̅ⲛⲉⲕⲡⲩⲗⲏ . ⲁⲣⲓⲧⲏⲣⲉⲓ ⲛ̅ⲛⲉⲕⲡⲩⲗⲏ ⲧⲏⲣⲟⲩ ϩⲛ̅ϩⲉⲛⲫⲁⲛⲟⲥ ⲉⲧⲉⲛ̅ⲗⲟⲅⲟⲥ ⲛⲉ . ⲁⲩⲱ ⲕⲛⲁϫⲡⲟ ⲛ̅ⲛⲁⲓ ⲧⲏⲣⲟⲩ ⲛ̅ⲛⲟⲩⲃⲓⲟⲥ ⲉϥⲥϭⲣⲁϩⲧ . Ⲡⲉⲧⲛⲁⲁⲣⲉϩ ⲇⲉ ⲉⲛⲁⲓ ⲁⲛ ϥⲛⲁϣⲱⲡⲉ ⲛ̅ⲑⲉ ⲛ̅ⲟⲩⲡⲟⲗⲓⲥ ⲉⲥⲉ ⲛ̅ⲉⲣⲏⲙⲟⲥ ⲉⲁⲩϫⲓⲧⲥ̅ . Ⲁⲛⲑⲏⲣⲓⲟⲛ ⲧⲏⲣⲟⲩ ⲣ̅ⲕⲁⲧⲁⲡⲁⲧⲉⲓ ⲙ̅ⲙⲟⲥ . ϩⲉⲛⲑⲏⲣⲓⲟⲛ ⲅⲁⲣ ⲉⲑⲟⲟⲩ ⲛⲉ ⲙ̅ⲙⲉⲉⲩⲉ ⲉⲧⲛⲁⲛⲟⲩⲟⲩ ⲁⲛ . ⲁⲩⲱ ⲧⲉⲕⲡⲟⲗⲓⲥ ⲛⲁⲙⲟⲩϩ ⲛ̅ⲗⲏⲥⲧⲏⲥ . ⲛⲅ̅ⲛⲁϫⲡⲟ ⲛⲁⲕ ⲁⲛ ⲛ̅ⲟⲩⲉⲓⲣⲏⲛⲏ ⲉⲓⲙⲏⲧⲓ ⲁϩⲉⲛⲑⲏⲣⲓⲟⲛ ⲧⲏⲣⲟⲩ ⲛ̅ⲁⲅⲣⲓⲟⲛ . Ⲫⲁⲩⲗⲟⲥ ⲉⲧⲟ ⲛ̅ⲧⲩⲣⲁⲛⲛⲟⲥ . ϥⲟ ⲛ̅ϫⲟⲉⲓⲥ ⲉⲛⲁⲓ . ⲉϥⲣ̅ϩⲙ̅ⲙⲉ ⲙ̅ⲡⲁⲓ ϥϣⲟⲟⲡ ϩⲁⲡⲛⲟϭ ⲛ̅ⲃⲟⲣⲃⲟⲣⲟⲥ . Ⲧⲡⲟⲗⲓⲥ ⲧⲏⲣⲥ̅ ⲛⲁⲧⲁⲕⲟ ⲉⲧⲉⲧⲉⲕⲯⲩⲭⲏ ⲧⲉ . Ⲥⲁϩⲱ ⲉⲃⲟⲗ ⲛ̅ⲛⲁⲓ ⲧⲏⲣⲟⲩ ⲱ̅ ⲧⲯⲩⲭⲏ ⲛ̅ⲧⲁⲗⲁⲓⲡⲱⲣⲟⲥ . Ⲁⲛⲓⲛⲉ ⲉϩⲟⲩⲛ ⲛⲉ ⲙ̅ⲡⲉϩⲏⲅⲟⲩⲙⲉⲛⲟⲥ ⲡⲉⲥⲁϩ ⲫⲏⲅⲟⲩⲙⲉⲛⲟⲥ ⲙⲉⲛ ⲡⲉ ⲡⲛⲟⲩⲥ . Ⲡⲥⲁϩ ⲇⲉ ⲡⲉ ⲡⲗⲟⲅⲟⲥ . ⲁⲩⲱ ⲥⲉⲛⲁⲛ̅ⲧⲉ ⲉⲃⲟⲗ ϩⲙ̅ⲡⲧⲁⲕⲟ ⲙⲛ̅ⲛⲕⲓⲛⲇⲩⲛⲟⲥ. Ⲥⲱⲧⲙ̅ ⲡⲁϣⲏⲣⲉ ⲉⲧⲁⲥⲩⲙⲃⲟⲩⲗⲓⲁ . ⲙ̅ⲡⲣ̅ϯⲧⲉⲕϫⲓⲥⲉ ⲉⲛⲉⲕϫⲁϫⲉ ⲉⲕⲡⲏⲧ . ⲁⲗⲗⲁ ⲙⲁⲗⲗⲟⲛ ⲡⲱⲧ ⲛ̅ⲥⲁⲛⲁⲓ ϩⲱⲥ ϫⲱⲣⲉ Ⲭⲡ̅Ⲋ , ⲙ̅ⲡⲣ̅ϣⲱⲡⲉ ⲛ̅ⲧⲃ̅ⲛⲏ ⲉⲣⲉⲛ̅ⲣⲱⲙⲉ ⲡⲏⲧ ⲛ̅ⲥⲱⲕ . ⲁⲗⲗⲁ ϣⲱⲡⲉ ⲛ̅ⲧⲟϥ ⲛ̅ⲣⲱⲙⲉ ⲉⲕⲡⲏⲧ ⲛ̅ⲥⲁⲛ̅ⲑⲏⲣⲓⲟⲛ ⲉⲑⲟⲟⲩ . ⲙⲏⲡⲱⲥ ⲛ̅ⲉⲥϫⲣⲟ ⲉⲣⲟⲕ ⲁⲩⲱ ⲛ̅ⲥⲉⲣ̅ⲕⲁⲧⲁⲡⲁⲧⲉⲓ ⲙ̅ⲙⲟⲕ ϩⲱⲥ ⲣⲉϥⲙⲟⲟⲩⲧ . ⲛⲅ̅ⲱϫⲛ̅ ⲉⲃⲟⲗ ϩⲓⲧⲟⲟⲧⲥ̅ ⲛ̅ⲧⲟⲩⲙⲛ̅ⲧⲡⲉⲧϩⲟⲟⲩ . Ⲱ̅ ⲡⲧⲁⲗⲁⲓⲡⲱⲣⲟⲥ ⲡⲣⲱⲙⲉ ⲟⲩ ⲡⲉⲧⲕⲛⲁⲁⲁϥ ⲉⲕϣⲁⲛϩⲉ ⲉϩⲣⲁⲓ ⲉⲛⲟⲩϭⲓϫ . Ⲁⲣⲓⲧⲏⲣⲓ ⲙ̅ⲙⲟⲕ ⲟⲩⲁⲁⲕ ⲙⲏⲡⲟⲧⲉ ⲛ̅ⲥⲉⲧⲁⲁⲕ ⲉⲧⲛ̅ⲛⲉⲕϫⲁϫⲉ . Ⲧⲁⲁⲕ ⲛ̅ⲧⲟⲟⲧⲟⲩ ⲙ̅ⲡⲉⲓⲥⲟⲉⲓϣ ⲛ̅ϣⲃⲏⲣ ⲥⲛⲁⲩ . ⲡⲗⲟⲅⲟⲥ ⲙⲛ̅ⲡⲛⲟⲩⲥ . ⲁⲩⲱ ⲙ̅ⲙⲛ̅ⲗⲁⲁⲩ ⲛⲁϫⲣⲟ ⲉⲣⲟⲕ . Ⲙⲁⲣⲉⲡⲛⲟⲩⲧⲉ ϩⲙⲟⲟⲥ ϩⲛ̅ⲧⲉⲕⲡⲁⲣⲉⲙⲃⲟⲗⲏ ⲛ̅ⲧⲉⲡⲉϥⲡ̅ⲛ̅ⲁ̅ ϩⲁⲣⲉϩ ⲉⲛⲉⲕⲡⲩⲗⲏ . Ⲡⲛⲟⲩⲥ ⲛ̅ⲧⲉⲙⲛ̅ⲧⲛⲟⲩⲧⲉ ⲛϥ̅ϩⲁⲣⲉϩ ⲉⲛⲥⲟⲃⲉⲧ . ⲡⲗⲟⲅⲟⲥ ⲉⲧⲟⲩⲁⲁⲃ ⲙⲁⲣⲉϥϣⲱⲡⲉ ⲙ̅ⲫⲁⲛⲟⲥ ⲙ̅ⲡⲉⲕⲛⲟⲩⲥ ⲉϥⲣⲱⲕϩ̅ ⲛ̅ⲛ̅ϣⲉ ⲉⲧⲉⲡⲛⲟⲃⲉ ⲧⲏⲣϥ̅ ⲡⲉ . Ⲉⲕϣⲁⲛⲣ̅ⲡⲁⲓ ⲇⲉ ⲱ ⲡⲁϣⲏⲣⲉ ⲕⲛⲁϫⲣⲟ ⲉⲛⲉⲕϫⲁϫⲉ ⲧⲏⲣⲟⲩ ⲁⲩⲱ ⲛ̅ⲥⲉⲛⲁϣⲣ̅ⲡⲟⲗⲉⲙⲟⲥ ⲁⲛ ⲉϩⲏⲧⲕ̅ . ⲟⲩⲇⲉ ⲛ̅ⲥⲉⲛⲁϣⲱϩⲉ ⲁⲛ ⲉⲣⲁⲧⲟⲩ . ⲟⲩⲇⲉ ⲛ̅ⲥⲉⲛⲁϣⲉⲓ ⲁⲛ ⲉⲧⲉⲕϩⲓⲏ ⲉⲕϣⲁⲛϭⲛ̅ⲛⲁⲓ ⲅⲁⲣ ⲕⲛⲁⲣ̅ⲕⲁⲧⲁⲫⲣⲟⲛⲓ ⲙ̅ⲙⲟⲟⲩ ⲛ̅ⲑⲉ ⲛ̅ⲛⲓϭⲁⲗⲙⲉⲥ ⲥⲉⲛⲁϣⲁϫⲉ ⲛⲙ̅ⲙⲁⲕ ⲉⲩⲕⲱⲣϣ̅ ⲉⲣⲟⲕ ⲉⲩⲥⲟⲡⲥⲡ̅ ⲉⲩⲣ̅ϩⲟ Ⲭⲡ̅ⲍ̅, ⲧⲉ ⲁⲛ ϩⲏⲧⲕ̅ ⲁⲗⲗⲁ ⲉⲩⲣ̅ϩⲟⲧⲉ ϩⲏⲧⲟⲩ ⲛ̅ⲛⲉⲧⲟⲩⲏϩ ϩⲣⲁⲓ ⲛ̅ϩⲏⲧⲕ̅ ⲉⲧⲉ ⲛ̅ⲣⲉϥⲣⲟⲉⲓⲥ ⲛⲉ ⲛ̅ⲧⲙⲛ̅ⲧⲛⲟⲩⲧⲉ ⲙⲛ̅ⲧⲉⲥⲃⲱ . Ⲡⲁϣⲏⲣⲉ ϫⲓ ⲉⲣⲟⲕ ⲛ̅ⲧⲡⲁⲓⲇⲓⲁ ⲙⲛ̅ⲧⲉⲥⲃⲱ . ⲁⲗⲗⲁ ⲉⲩϣⲁⲛϯⲥⲃⲱ ⲛⲁⲕ ϫⲓ ⲉⲣⲟⲕ ⲙ̅ⲡⲣⲁϣⲉ . Ⲁⲩⲱ ⲉⲩϣⲁⲛⲡⲁⲓⲇⲉⲩⲉ ⲙ̅ⲙⲟⲕ ϩⲛ̅ϩⲱⲃ ⲛⲓⲙ ϣⲱⲡⲉ ⲉⲕⲣ̅ⲡⲉⲧⲛⲁⲛⲟⲩϥ . ⲕⲛⲁϣⲱⲛⲧ̅ ⲛ̅ⲟⲩⲕⲕⲗⲟⲙ ⲙ̅ⲡⲁⲓⲇⲉⲓⲁ ⲙ̅ⲡⲉⲕϩⲏⲅⲉⲙⲟⲛⲓⲟⲛ . Ⲧⲉⲥⲃⲱ ⲉⲧⲟⲩⲁⲁⲃ ⲧⲁⲁⲥ ϩⲓⲱⲱⲕ ϩⲱⲥ ⲥⲧⲟⲗⲏ . ⲁⲁⲕ ⲛ̅ⲉⲩⲅⲉⲛⲏⲥ ϩⲛ̅ⲧⲡⲟⲗⲓⲧⲉⲓⲁ ⲉⲧⲛⲁⲛⲟⲩⲥ . Ⲕⲱ ⲛⲁⲕ ⲛ̅ⲧⲥⲧⲩⲫⲏ ⲛ̅ⲧⲙⲛ̅ⲧⲉⲩⲧⲁⲕⲧⲟⲥ . ⲁⲣⲓⲕⲣⲓⲛⲉ ⲙ̅ⲙⲟⲕ ⲟⲩⲁⲁⲕ . ϩⲱⲥ ⲣⲉϥϯϩⲁⲡ ⲛ̅ⲥⲟⲫⲟⲥ . Ⲙ̅ⲡⲣ̅ⲥⲱⲣⲙ̅ ⲛ̅ⲧⲁⲥⲃⲱ ⲛⲅ̅ϫⲡⲟ ⲛⲁⲕ ⲛ̅ⲟⲩⲙⲛ̅ⲧⲁⲧⲥⲃⲱ ⲙⲏⲡⲱⲥ ⲛⲅ̅ⲥⲱⲣⲙ̅ ⲙ̅ⲡⲉⲕⲗⲁⲟⲥ . Ⲙ̅ⲡⲣ̅ⲡⲱⲧ ⲉⲃⲟⲗ ⲙ̅ⲡⲑⲉⲓⲟⲛ ⲙⲛ̅ⲧⲉⲥⲃⲱ ⲉⲧϣⲟⲟⲡ ϩⲣⲁⲓ ⲛ̅ϩⲏⲧⲕ̅ . Ⲛ̅ⲧⲟϥ ⲅⲁⲣ ⲉⲧⲧⲥⲁⲃⲟ ⲙ̅ⲙⲟⲕ ϥⲙⲉ ⲙ̅ⲙⲟⲕ ⲉⲙⲁⲧⲉ . Ϥⲛⲁⲕⲱ ⲅⲁⲣ ⲛⲁⲕ ⲛ̅ⲟⲩⲥⲧⲩⲫⲏ ⲉⲥⲙ̅ⲡϣⲁ . Ⲧⲫⲩⲥⲓⲥ ⲛ̅ⲧⲃ̅ⲛⲏ ⲛ̅ⲟϫⲥ̅ ⲉⲃⲟⲗ ⲙ̅ⲙⲟⲕ . Ⲁⲩⲱ ⲡⲗⲟⲅⲓⲥⲙⲟⲥ ⲙ̅ⲫⲁⲩⲗⲟⲥ ⲙ̅ⲡⲣ̅ⲕⲁⲁϥ ⲉϩⲟⲩⲛ ⲉⲣⲟⲕ . ⲉⲛⲉⲥⲟⲩⲡⲱϣ ⲅⲁⲣ ⲉⲕⲥⲟⲟⲩⲛ ⲛ̅ⲑⲉ ⲉϯϯⲥⲃⲱ ⲛⲁⲕ ⲉϣϫⲉ ⲛⲁⲛⲟⲩⲥ ⲉⲁⲣⲭⲉⲓ ⲉⲛϩⲟⲗⲓⲅⲟⲛ ⲛ̅ⲑⲉ ⲉⲧⲕ̅ⲛⲁⲩ ⲉⲣⲟⲥ ⲡⲟⲥⲱ ⲙⲁⲗⲗⲟⲛ ϥⲥⲟⲧⲡ̅ ⲉⲧⲣⲉⲕ Ⲭⲡ̅ⲏ̅ ,
ⲁⲣⲭⲉⲓ ⲉⲟⲩⲟⲛ ⲛⲓⲙ ⲉⲕⲟ ⲛ̅ⲛⲟϭ ⲉϫⲛ̅ⲥⲟⲟⲩϩⲥ̅ ⲛⲓⲙ ⲁⲩⲱ ⲗⲁⲟⲥ ⲛⲓⲙ . ⲁⲩⲱ ⲛ̅ϫⲓⲥⲉ ⲙ̅ⲙⲓⲛⲉ ⲛⲓⲙ ⲙⲛ̅ⲟⲩⲗⲟⲅⲟⲥ ⲛ̅ⲑⲉⲓⲟⲥ. ⲉⲁⲕϣⲱⲡⲉ ⲛ̅ϫⲟⲉⲓⲥ ⲉϫⲛ̅ⲇⲩⲛⲁⲙⲓⲥ ⲛⲓⲙ ⲛ̅ϩⲁⲧⲃ̅ⲯⲩⲭⲏ . Ⲡⲁϣⲏⲣⲉ ⲙⲏ ϣⲁⲣⲉⲗⲁⲁⲩ ⲣ̅ⲉⲡⲓⲑⲩⲙⲉⲓ ⲉⲣ̅ϩⲙ̅ϩⲁⲗ . ⲡⲱⲥ ⲛ̅ⲧⲟⲕ ⲕϣⲧⲟⲣⲧⲣ̅ ⲙ̅ⲙⲟⲕ ⲕⲁⲕⲱⲥ . Ⲡⲁϣⲏⲣⲉ ⲙ̅ⲡⲣ̅ⲣϩⲟⲧⲉ ϩⲏⲧϥ̅ ⲛ̅ⲗⲁⲁⲩ ⲉⲓⲙⲏⲧⲓ ⲉⲡⲛⲟⲩⲧⲉ ⲙⲁⲩⲁⲁϥ ⲡⲉⲧϫⲟⲥⲉ . Ⲧⲙⲛ̅ⲧⲡⲁⲛⲟⲩⲣⲅⲟⲥ ⲙ̅ⲡⲇⲓⲁⲃⲟⲗⲟⲥ ⲛⲟϫⲥ̅ ⲥⲁⲃⲟⲗ ⲙ̅ⲙⲟⲕ . Ϫⲓ ⲙ̅ⲡⲟⲩⲟⲉⲓⲛ ⲛ̅ⲛⲉⲕⲃⲁⲗ . ⲛⲅ̅ⲛⲟⲩϫⲉ ⲉⲃⲟⲗ ⲙ̅ⲙⲟⲕ ⲙ̅ⲡⲕⲁⲕⲉ . Ⲁⲣⲓⲡⲟⲗⲓⲧⲉⲩⲉ ϩⲙ̅ⲡⲉⲭ̅ⲥ̅ . ⲁⲩⲱ ⲕⲛⲁϫⲡⲟ ⲛⲁⲕ ⲛ̅ⲛⲟⲩⲁϩⲟ ϩⲛ̅ⲧⲡⲉ . Ⲙ̅ⲡⲣ̅ϣⲱⲡⲉ ⲙ̅ⲙⲟⲛⲑⲩⲗⲟⲥ ⲛ̅ϩⲁϩ ⲛ̅ϩⲱⲃ ⲉⲙⲛ̅ϩⲏⲩ ⲛ̅ϩⲏⲧⲟⲩ . ⲁⲩⲱ ⲙ̅ⲡⲣ̅ϣⲱⲡⲉ ⲛ̅ⲣⲉϥϫⲓⲙⲟⲉⲓⲧ ϩⲏⲧⲥ̅ ⲛ̅ⲧⲉⲕⲙⲛ̅ⲧⲁⲧⲥⲟⲟⲩⲛ ⲉⲧⲟ ⲛ̅ⲃⲗ̅ⲗⲏ . Ⲡⲁϣⲏⲣⲉ ⲥⲱⲧⲙ̅ ⲉⲧⲁⲥⲃⲱ ⲉⲧⲛⲁⲛⲟⲩⲥ ⲉⲧⲟ ⲛ̅Ⲭ̅ⲣ̅ⲥ̅ . ⲁⲩⲱ ⲛⲅ̅ⲗⲁϭⲉ ⲉⲫⲓⲛⲏⲃ ⲉⲧϩⲟⲣϣ̅ ⲉϫⲱⲕ . Ⲁⲙⲟⲩ ⲉⲃⲟⲗ ϩⲛ̅ⲧⲉⲃϣⲉ ⲧⲁⲓ ⲉⲧⲙⲟⲩϩ ⲙ̅ⲙⲟⲕ ⲛ̅ⲕⲁⲕⲉ . ⲛ̅ⲑⲉ ⲉⲛⲉⲙ̅ⲙⲛ̅ϭⲟⲙ ⲙ̅ⲙⲟⲕ ⲉⲣ̅ϩⲱⲃ ⲛⲓⲙ ⲛⲁⲓⲛⲁϫⲟⲟⲩ ⲁⲛ ⲛⲁⲕ ⲡⲉ . Ⲁⲡⲉⲭ̅ⲥ ⲇⲉ ⲉⲓ ⲉϯ ⲛⲁⲕ ⲛ̅ⲧⲉⲉⲓⲇⲱⲣⲉⲁ ⲉⲧⲃⲉⲟⲩ ⲉⲕⲡⲏⲧ ⲛ̅ⲥⲁⲡⲕⲁⲕⲉ ⲉⲣⲉⲡⲟⲩⲟⲉⲓⲛ ⲕⲏ ⲛⲁⲕ ⲉϩⲣⲁⲓ . ⲉⲧⲃⲉⲟⲩ ⲉⲕⲥⲱ ⲛ̅ⲟⲩⲙⲟⲟⲩ ⲉϥϩⲟⲟⲩ ⲉⲣⲉⲡⲉⲧϩⲟⲗϭ̅ ⲕⲏ ⲛⲁⲕ ⲉϩⲣⲁⲓ . Ⲧⲥⲟⲫⲓⲁ ⲣ̅ⲡⲁⲣⲁⲕⲁⲗⲉⲓ ⲙ̅ⲙⲟⲕ Ⲭ ⲡ̅ⲑ̅ , ⲁⲩⲱ ⲕⲟⲩⲱϣ ⲧⲙⲛ̅ⲧⲁⲑⲏⲧ ϩⲙ̅ⲡⲉⲕⲟⲩⲱϣ ⲁⲛ ⲉⲕⲉⲓⲣⲉ ⲛ̅ⲛⲁⲓ . ⲁⲗⲗⲁ ⲧⲫⲩⲥⲓⲥ ⲛ̅ⲧⲃ̅ⲛⲏ ⲉⲧⲛ̅ϩⲏⲧⲕ̅ ⲡⲉⲧⲉⲓⲣⲉ ⲛ̅ⲛⲁⲓ . Ⲧⲥⲟⲫⲓⲁ ⲣ̅ⲡⲁⲣⲁⲕⲁⲗⲉⲓ ⲙ̅ⲙⲟⲕ ϩⲛ̅ⲧⲉⲥⲙⲛ̅ⲧⲭ̅ⲥ̅ ⲉⲥϫⲱ ⲙ̅ⲙⲟⲥ ϫⲉ ⲁⲙⲉⲓⲧⲛ̅ ϣⲁⲣⲟⲓ ⲧⲏⲣⲧⲛ̅ ⲱ̅ ⲛ̅ⲁⲑⲏⲧ ⲛ̅ⲧⲉⲧⲛ̅ϫⲓ ⲛ̅ⲟⲩⲇⲱⲣⲉⲁ ⲧⲙⲛ̅ⲧⲣⲙ̅ⲛ̅ϩⲏⲧ ⲉⲧⲛⲁⲛⲟⲩⲥ ⲉⲧⲥⲟⲧⲡ̅. ϯϯ ⲛⲁⲕ ⲛ̅ⲟⲩⲥⲭⲏⲙⲁ ⲛ̅ⲁⲣⲭⲓⲉⲣⲉⲩⲥ ⲉϥⲥⲁϩⲧ̅ ϩⲛ̅ⲥⲟⲫⲓⲁ ⲛⲓⲙ . Ⲁϣ ⲡⲉ ⲡⲙⲟⲩ ⲉⲑⲟⲟⲩ ⲉⲓⲙⲏⲧⲓ ⲁⲧⲙⲛ̅ⲧⲁⲧⲥⲟⲟⲩⲛ . Ⲁϣ ⲡⲉ ⲡⲕⲁⲕⲉ ⲉⲑⲟⲟⲩ ⲉⲓⲙⲏⲧⲓ ⲉⲡⲥⲟⲟⲩⲛ ⲛ̅ⲧⲃ̅ϣⲉ . Ⲛⲟⲩϫⲉ ⲙ̅ⲡⲉⲕⲣⲟⲟⲩϣ ⲉⲡⲛⲟⲩⲧⲉ ⲟⲩⲁⲁϥ . Ⲙ̅ⲡⲣ̅ϣⲱⲡⲉ ⲉⲕⲙⲉ ⲙ̅ⲡⲛⲟⲩⲃ ⲙⲛ̅ⲡϩⲁⲧ ⲛⲁⲓ ⲉⲙⲛ̅ϩⲏⲩ ⲛ̅ϩⲏⲧⲟⲩ . ⲁⲗⲗⲁ ϭⲱⲗⲉ ⲙ̅ⲙⲟⲕ ⲛ̅ⲧⲥⲱⲫⲓⲁ ⲛ̅ⲑⲉ ⲛ̅ⲛⲓⲥⲧⲟⲗⲏ . ⲁⲩⲱ ⲧⲉⲡⲓⲥⲧⲏⲙⲏ ⲛⲅ̅ⲧⲁⲁⲥ ⲉϫⲱⲕ ⲛ̅ⲑⲉ ⲛ̅ⲛⲓⲕⲗⲟⲙ . Ϩⲙⲟⲟⲥ ϩⲓϫⲛ̅ⲟⲩⲑⲣⲟⲛⲟⲥ ⲛ̅ⲁⲓⲥⲑⲏⲥⲓⲥ . ϫⲉ ⲛⲁⲓ ⲛⲟⲩⲕ ⲛⲉ ⲉⲛⲁϫⲓⲧⲟⲩ ⲟⲛ ⲙ̅ⲡⲥⲁ ⲛ̅ϩⲣⲉ ⲛ̅ⲕⲉⲥⲟⲡ . ⲟⲩⲣⲱⲙⲉ ⲅⲁⲣ ⲛ̅ⲁⲑⲏⲧ ϣⲁϥϯ ϩⲓⲱⲱϥ ⲛ̅ⲧⲙⲛ̅ⲧⲁⲑⲏⲧ ⲛ̅ⲑⲉ ⲛ̅ⲛⲓⲥⲧⲟⲗⲏ . ⲁⲩⲱ ⲛ̅ⲑⲉ ⲛ̅ⲛⲓϣⲧⲏⲛ ⲙ̅ⲡⲉⲛⲑⲟⲥ ⲉϥϯ ϩⲓⲱⲱϥ ⲙ̅ⲡϣⲓⲡⲉ . Ⲁⲩⲱ ϣⲁϥϯⲕⲗⲟⲙ ⲉϫⲱϥ ϩⲛ̅ⲟⲩⲙⲛ̅ⲧⲁⲧⲥⲟⲟⲩⲛ . ⲁⲩⲱ ⲛϥ̅ϩⲙⲟⲟⲥ ϩⲓϫⲛ̅ⲟⲩⲑⲣⲟⲛⲟⲥ ⲙ̅ⲙⲛ̅ⲧⲁⲧⲉⲓⲙⲉ ⲉϥϣⲟⲟⲡ ⲅⲁⲣ ⲛ̅ⲁⲗⲟⲅⲟⲥ Ⲭϥ̅ⲁ̅ , ⲛ̅ⲥⲁϩ ⲉⲛⲁⲛⲟⲩϥ . Ⲛⲟⲩϫⲉ ⲙ̅ⲡⲙⲟⲩ ⲉⲃⲟⲗ ⲙ̅ⲙⲟⲕ ⲡⲉⲛⲧⲁϥϣⲱⲡⲉ ⲛⲁⲕ ⲛ̅ⲉⲓⲱⲧ . ⲉⲣⲉⲡⲙⲟⲩ ⲅⲁⲣ ϣⲟⲟⲡ ⲁⲛ . ⲟⲩⲧⲉ ⲛϥ̅ⲛⲁϣⲱⲡⲉ ⲁⲛ ϩⲛ̅ⲑⲁⲏ . ⲁⲗⲗⲁ ⲉⲡⲓⲇⲏ ⲁⲕⲛⲟⲩϫⲉ ⲉⲃⲟⲗ ⲙ̅ⲙⲟⲕ ⲙ̅ⲡⲛⲟⲩⲧⲉ ⲡⲓⲱⲧ ⲉⲧⲟⲩⲁⲁⲃ . ⲡⲱⲛϩ ⲛ̅ⲁⲗⲓⲑⲉⲓⲛⲟⲛ . ⲧⲡⲏⲅⲏ ⲙ̅ⲡⲱⲛϩ̅ . ⲉⲧⲃⲉⲡⲁⲓ ⲁⲕⲣ̅ⲕⲗⲏⲣⲟⲩ ⲉⲡⲙⲟⲩ ⲛ̅ⲉⲓⲱⲧ ⲛⲁⲕ ⲁⲩⲱ ⲧⲙⲛ̅ⲧⲁⲧⲥⲟⲟⲩⲛ ⲁⲕϫⲡⲟⲥ ⲙ̅ⲙⲁⲁⲩ ⲛⲁⲕ . ⲁⲩⲣ̅ⲁⲡⲟⲥⲧⲉⲣⲓ ⲙ̅ⲙⲟⲕ ⲛ̅ⲧⲅⲛⲱⲥⲓⲥ ⲙ̅ⲙⲉ . Ⲡⲁϣⲏⲣⲉ ⲛⲟⲟⲩϩⲕ̅ ⲇⲉ ⲉϩⲟⲩⲛ ⲉⲡⲉⲕⲉⲓⲱⲧ ⲛ̅ϣⲟⲣⲡ̅ ⲡⲛⲟⲩⲧⲉ . ⲁⲩⲱ ⲧⲥⲟⲫⲓⲁ ⲧⲉⲕⲙⲁⲁⲩ ⲧⲁⲓ ⲛ̅ⲧⲁⲕϣⲱⲡⲉ ⲉⲃⲟⲗ ⲛ̅ϩⲏⲧⲥ̅ ϫⲓⲛⲛ̅ϣⲟⲣⲡ̅ ⲉⲧⲣⲉⲕϯ ⲟⲩⲃⲉⲛⲉⲕϫⲁϫⲉ ⲧⲏⲣⲟⲩ ⲛ̅ⲇⲩⲛⲁⲙⲓⲥ ⲙ̅ⲡⲁⲛⲧⲓⲕⲓⲙⲉⲛⲟⲥ . Ⲥⲱⲧⲙ̅ ⲡⲁϣⲏⲣⲉ ⲁⲧⲁⲥⲩⲙⲃⲟⲩⲗⲓⲁ . ⲙ̅ⲡⲣ̅ϣⲱⲡⲉ ⲛ̅ϫⲁⲥⲓϩⲏⲧ ⲟⲩⲃⲉⲅⲛⲱⲙⲏ ⲛⲓⲙ ⲉⲛⲁⲛⲟⲩϥ . ⲁⲗⲗⲁ ϫⲓ ⲉⲣⲟⲕ ⲙ̅ⲡⲥⲁ ⲛ̅ⲧⲙⲛ̅ⲧⲛⲟⲩⲧⲉ ⲙ̅ⲡⲗⲟⲅⲟⲥ . Ⲁⲣⲉϩ ⲉⲛⲉⲛⲧⲟⲗⲏ ⲉⲧⲟⲩⲁⲁⲃ ⲛ̅ⲓ̅ⲥ ⲡⲉⲭ̅ⲥ̅ . ⲁⲩⲱ ⲕⲛⲁⲣ̅ⲣ̅ⲣⲟ ⲉϫⲛ̅ⲧⲟⲡⲟⲥ ⲛⲓⲙ ⲛ̅ⲧⲉⲡⲕⲁϩ . ⲁⲩⲱ ⲕⲛⲁϣⲱⲡⲉ ⲉⲕⲧⲁⲓⲏⲟⲩ ⲛ̅ⲧⲛ̅ⲛ̅ⲁⲅⲅⲉⲗⲟⲥ ⲙⲛ̅ⲛ̅ⲁⲣⲭⲁⲅⲅⲉⲗⲟⲥ . Ⲕⲛⲁϫⲡⲟⲟⲩ ⲇⲉ ⲛⲁⲕ ⲛ̅ϣⲃⲏⲣ . ⲁⲩⲱ ⲛ̅ϣⲃⲏⲣϩⲙ̅ϩⲁⲗ . ⲕⲛⲁϫⲡⲟ ⲇⲉ ⲛⲁⲕ ⲛ̅ϩⲉⲛⲧⲟⲡⲟⲥ ϩⲛ̅ⲧⲡⲉ ⲛ̅ⲥⲁⲧⲡⲉ . ⲡⲑⲉⲓⲟⲛ ⲉⲧϣⲟ Ⲭ ϥ̅ⲃ̅ , ⲟⲡ ⲛ̅ϩⲣⲁⲓ ⲛ̅ϩⲏⲧⲕ̅ ⲙ̅ⲡⲣ̅ϯⲗⲩⲡⲏ ⲛⲁϥ ϩⲓϩⲓⲥⲉ . ⲁⲗⲗⲁ ⲉⲕⲛⲁⲣ̅ⲑⲁⲗⲡⲉⲓ ⲙ̅ⲙⲟϥ ⲛⲅ̅ⲕⲱⲣϣ̅ ⲉⲣⲟϥ ⲉⲧⲣⲉⲕϭⲱ ⲉⲕⲟⲩⲁⲁⲃ ⲛⲅ̅ϣⲱⲡⲉ ⲛ̅ⲉⲅⲕⲣⲁⲧⲏⲥ ϩⲛ̅ⲧⲉⲕⲯⲩⲭⲏ ⲙⲛ̅ⲡⲉⲕⲥⲱⲙⲁ . ⲁⲩⲱ ⲕⲛⲁϣⲱⲡⲉ ⲛ̅ⲑⲣⲟⲛⲟⲥ ⲛ̅ⲧⲥⲟⲫⲓⲁ . ⲁⲩⲱ ⲛ̅ⲣⲙ̅ϩⲛ̅ⲏⲉⲓ ϩⲙ̅ⲡⲛⲟⲩⲧⲉ . ϥⲛⲁϯ ⲛⲁⲕ ⲛ̅ⲟⲩⲛⲟϭ ⲛ̅ⲟⲩⲟⲉⲓⲛ ⲉⲃⲟⲗ ϩⲓⲧⲟⲟⲧⲥ̅ . Ϩⲁⲧⲉϩⲓⲏ ⲇⲉ ⲛ̅ϣⲁϫⲉ ⲛⲓⲙ ⲥⲟⲩⲱⲛⲡⲉⲕϫⲡⲟ . Ⲥⲟⲩⲛⲅ̅ ϫⲉ ⲛⲧⲕ̅ⲟⲩⲉⲃⲟⲗ ϩⲛ̅ⲁϣ ⲛ̅ⲑⲩⲥⲓⲁ . ⲏ ⲛ̅ⲧⲕ̅ⲟⲩⲉⲃⲟⲗ ϩⲛ̅ⲁϣ ⲛ̅ⲅⲉⲛⲟⲥ . ⲏ̅ ⲉⲃⲟⲗ ϩⲛ̅ⲁϣ ⲙ̅ⲫⲩⲗⲏ . ⲙ̅ⲙⲉ ⲙ̅ⲙⲟⲕ ϫⲉ ⲛ̅ⲧⲁⲕϣⲱⲡⲉ ⲉⲃⲟⲗ ϩⲛ̅ϣⲟⲙⲉⲧ ⲛ̅ⲅⲉⲛⲟⲥ . ⲉⲃⲟⲗ ϩⲛ̅ⲡⲕⲁϩ . ⲁⲩⲱ ⲉⲃⲟⲗ ϩⲙ̅ⲡⲉⲡⲗⲁⲥⲙⲁ . ⲁⲩⲱ ⲉⲃⲟⲗ ϩⲙ̅ⲡⲧⲉⲛⲟ . ⲛ̅ⲧⲁⲡⲁⲥⲱⲙⲁ ϣⲱⲡⲉ ⲉⲃⲟⲗ ϩⲙ̅ⲡⲕⲁϩ ϩⲛ̅ⲟⲩⲟⲩⲥⲓⲁ ⲛ̅ⲕⲁϩ . Ⲡⲉⲡⲗⲁⲥⲙⲁ ⲇⲉ ⲁϥϣⲱⲡⲉ ⲉⲧⲃⲉⲧⲯⲩⲭⲏ ⲉⲃⲟⲗ ϩⲙ̅ⲡⲙⲉⲉⲩⲉ ⲙ̅ⲡⲑⲉⲓⲟⲛ . Ⲡⲧⲉⲛⲟ ⲇⲉ ⲡⲉ ⲡⲛⲟⲩⲥ ⲡⲉⲛⲧⲁϥϣⲱⲡⲉ ⲕⲁⲧⲁⲑⲓⲕⲱⲛ ⲙ̅ⲡⲛⲟⲩⲧⲉ . Ⲡⲛⲟⲩⲥ ⲙⲉⲛ ⲛ̅ⲑⲉⲓⲟⲥ ⲟⲩⲛ̅ⲧⲁϥ ⲙ̅ⲙⲁⲩ ⲛ̅ⲟⲩⲟⲩⲥⲓⲁ ⲉⲃⲟⲗ ϩⲙ̅ⲡⲑⲉⲓⲟⲛ . ⲧⲯⲩⲭⲏ ⲇⲉ ⲡⲉⲛⲧⲁϥⲣ̅ⲡⲗⲁⲥⲥⲉ ⲛ̅ⲛⲉⲩϩⲏⲧ ⲟⲩⲁⲁⲩ . Ⲉⲓⲙⲉⲉⲩⲉ ⲅⲁⲣ ϫⲉ ⲉⲥϣⲟⲟⲡ ⲛ̅ⲥϩⲓⲙⲉ ⲙ̅ⲡⲉⲛⲧⲁϥϣⲱⲡⲉ ⲕⲁⲧⲁⲑⲓⲕⲱⲛ . ⲡⲥⲱⲙⲁ ⲇⲉ ⲛ̅ⲧⲁϥϣⲱⲡⲉ ⲉⲃⲟⲗ ϩⲙ̅ⲡⲕⲁϩ ⲧⲉϥⲟⲩⲥⲓⲁ ⲧⲉ ⲑⲩⲗⲏ . ⲉⲕϣⲁⲛⲧⲟϩⲕ̅ ⲕⲛⲁϫⲡⲟ ⲛⲁⲕ ⲙ̅ⲡ Ⲭϥ̅ⲅ̅ , ϣⲟⲙⲉⲧ ⲙ̅ⲙⲉⲣⲟⲥ . ϩⲙ̅ⲡⲧⲣⲉⲕϩⲉ ⲉⲃⲟⲗ ϩⲛ̅ⲧⲁⲣⲉⲧⲏ ⲉⲡⲓⲧⲛ̅ ⲉⲩϭⲱϫⲃ̅ . Ⲁⲣⲓⲡⲟⲗⲓⲧⲉⲩⲉ ⲕⲁⲧⲁⲡⲛⲟⲩⲥ . Ⲙ̅ⲡⲣ̅ⲙⲉⲉⲩⲉ ⲉⲛⲁⲧⲥⲁⲣⲝ̅ . Ϫⲡⲟ ⲛⲁⲕ ⲛ̅ⲧⲙⲛ̅ⲧϫⲱⲱⲣⲉ . ⲉⲃⲟⲗϫⲉ ⲟⲩϫⲱⲱⲣⲉ ⲡⲉ ⲡⲛⲟⲩⲥ . ⲉⲕϣⲁⲛϩⲉ ⲉⲃⲟⲗ ϩⲛ̅ⲧⲉⲓⲕⲉⲟⲩⲉⲓ ⲁⲕϣⲱⲡⲉ ⲛ̅ϩⲟⲟⲩⲧⲥϩⲓ̅ⲙⲉ . Ⲧⲟⲩⲥⲓⲁ ⲇⲉ ⲙ̅ⲡⲛⲟⲩⲥ ⲉⲧⲉⲧⲛⲟⲏⲥⲓⲥ ⲧⲉ . ⲉⲕϣⲁⲛⲛⲟϫⲥ̅ ⲉⲃⲟⲗ ⲙ̅ⲙⲟⲕ . ⲁⲕϭⲱϫⲉ ⲙ̅ⲫⲟⲟⲩⲧ . ⲁⲕⲕⲟⲧⲕ̅ ⲉⲧⲥϩⲓ̅ⲙⲉ ⲟⲩⲁⲁⲥ . Ⲁⲕϣⲱⲡⲉ ⲙ̅ⲯⲩⲭⲓⲕⲟⲥ ⲉⲁⲕϫⲓ ⲛ̅ⲧⲟⲩⲥⲓⲁ ⲙ̅ⲡⲉⲡⲗⲁⲥⲙⲁ . Ⲡⲕⲉⲕⲟⲩⲉⲓ ⲛ̅ⲧⲉⲡⲁⲓ ⲉⲕϣⲁⲛⲛⲟϫϥ̅ ⲉⲃⲟⲗ ϩⲱⲥⲧⲉ ⲛⲅ̅ⲧⲙ̅ⲥⲱⲧ ⲉⲩϫⲡⲟ ⲛⲁⲕ ⲛ̅ⲟⲩⲙⲉⲣⲟⲥ ⲛ̅ⲣⲱⲙⲉ . ⲁⲗⲗⲁ ⲁⲕϫⲓ ⲉⲣⲟⲕ ⲙ̅ⲡⲙⲉⲉⲩⲉ ⲙⲛ̅ⲡⲓⲛⲉ . Ⲁⲕϣⲱⲡⲉ ⲛ̅ⲥⲁⲣⲕⲓⲕⲟⲥ ⲉⲁⲕϫⲓ ⲛ̅ⲟⲩⲫⲩⲥⲓⲥ ⲛ̅ⲧⲃ̅ⲛⲏ . ⲥⲙⲟⲕϩ ⲅⲁⲣ ⲁϭⲓⲛⲉ ⲛ̅ⲟⲩⲯⲩⲭⲓⲕⲟⲥ . Ⲡⲟⲥⲱ ⲙⲁⲗⲗⲟⲛ ⲁϭⲓⲛⲉ ⲙ̅ⲡϫⲟⲉⲓⲥ . ⲉⲓϣⲁϫⲉ ⲇⲉ ϫⲉ ⲡⲛⲟⲩⲧⲉ ⲡⲉ ⲡⲉⲡⲛ̅ⲁ̅ⲧⲓⲕⲟⲥ . ⲡⲣⲱⲙⲉ ⲛ̅ⲧⲁϥϫⲓⲙⲟⲣⲫⲏ ⲉⲃⲟⲗ ϩⲛ̅ⲧⲟⲩⲥⲓⲁ ⲙ̅ⲡⲛⲟⲩⲧⲉ ⲧⲯⲩⲭⲏ ⲛ̅ⲑⲉⲓⲟⲛ ⲥⲣ̅ⲕⲟⲓⲛⲱⲛⲓ ⲉⲡⲁⲓ ϩⲛ̅ⲟⲩⲙⲉⲣⲟⲥ . Ⲡⲁⲗⲓⲛ ⲧⲯⲩⲭⲏ ⲥⲣ̅ⲕⲟⲓⲛⲱⲛⲓ ⲉⲧⲥⲁⲣⲝ̅ ϩⲛ̅ⲟⲩⲙⲉⲣⲟⲥ . Ⲧⲯⲩⲭⲏ ⲙ̅ⲫⲁⲩⲗⲟⲥ ϣⲁⲣⲉⲥⲣⲓⲕⲉ ⲛ̅ⲥⲁ ⲉⲥⲁ . ⲧⲉⲓϩⲉ ⲧⲉⲧⲥ̅ⲣ̅ⲇⲟⲕⲉⲓ ⲛ̅ⲧⲁⲗⲏⲑⲓⲁ . Ⲛⲁⲛⲟⲩⲥ ⲛⲁⲕ ⲱ ⲡⲣⲱⲙⲉ Ⲭϥ̅ⲇ̅ , ⲉⲧⲣⲉⲕⲣⲁⲕⲧⲕ̅ ⲉⲡⲣⲱⲙⲉ ⲛ̅ϩⲟⲩⲟ ⲉⲣⲁⲕⲧⲕ̅ ⲉⲧⲫⲩⲥⲓⲥ ⲛ̅ⲧⲃ̅ⲛⲏ . ⲉⲓϣⲁϫⲉ ⲉⲧⲥⲁⲣⲕⲓⲕⲏ . ⲡⲙⲁ ⲉⲧⲕ̅ⲛⲁⲣⲁⲕⲧⲕ̅ ⲉⲙⲁⲩ ⲕⲛⲁϫⲓⲡⲉϥⲉⲓⲛⲉ . ϯⲛⲁϫⲱ ⲛ̅ⲕⲉϣⲁϫⲉ ⲉⲣⲟⲕ . Ⲡⲁⲗⲓⲛ ⲉⲧⲃⲉⲛⲓⲙ ⲕⲛⲁⲟⲩⲣⲟⲧ ⲛ̅ϩⲏⲧ . Ⲁⲣⲉⲟⲩⲱϣⲉ ⲅⲁⲣ ⲁⲣ̅ⲧⲃ̅ⲛⲏ ⲛ̅ⲧⲁⲣⲉϣⲱⲡⲉ ϩⲛ̅ⲧⲉⲓⲫⲩⲥⲓⲥ ⲛ̅ⲧⲉⲓⲙⲓⲛⲉ . Ⲙⲁⲗⲗⲟⲛ ⲇⲉ ⲁⲣⲕⲟⲓⲛⲱⲛⲓ ⲉⲩⲫⲩⲥⲓⲥ ⲙ̅ⲙⲉ ⲛ̅ⲧⲉⲡⲃⲓⲟⲥ . Ⲧⲙⲛ̅ⲧⲧⲃ̅ⲛⲏ ⲙⲉⲛ ⲉⲥⲛⲁⲣ̅ϩⲙ̅ⲙⲉ ⲙ̅ⲙⲟⲕ ⲉϩⲟⲩⲛ ⲉⲡⲅⲉⲛⲟⲥ ⲙ̅ⲡⲕⲁϩ . Ⲧⲫⲩⲥⲓⲥ ⲇⲉ ⲛ̅ⲛⲟⲉⲣⲟⲛ ⲉⲥⲛⲁⲣ̅ϩⲙ̅ⲙⲉ ⲙ̅ⲙⲟⲕ ϩⲛ̅ϩⲉⲛⲥⲙⲟⲧ ⲛ̅ⲛⲟⲉⲣⲟⲛ . Ⲣⲁⲕⲧⲕ̅ ⲉϫⲛ̅ⲧⲫⲩⲥⲓⲥ ⲛ̅ⲛⲟⲉⲣⲟⲛ ⲛⲅ̅ⲛⲟⲩϫⲉ ⲉⲃⲟⲗ ⲙ̅ⲙⲟⲕ ⲛ̅ⲧⲫⲩⲥⲓⲥ ⲛ̅ϫⲡⲟ ⲛⲕⲁϩ . Ⲱ ⲧⲯⲩⲭⲏ ⲧⲣⲉϥϩⲩⲡⲟⲙⲓⲛⲉ Ⲁⲣⲓⲛⲏⲑⲉ ⲛ̅ⲧⲉⲛⲁϩ ⲡⲉ ϯϩⲉ ⲉⲧⲉ ⲡⲁⲓ ⲡⲉ ⲡϩⲱⲃ ⲛ̅ⲧⲙⲛ̅ⲧⲁⲧⲥⲟⲟⲩⲛ . ⲉⲣⲉϣⲁⲛϩⲩⲡⲟⲙⲓⲛⲉ ⲛ̅ⲧⲉⲡⲟⲗⲓⲧⲉⲩⲉ ϩⲙ̅ⲡⲥⲱⲙⲁ . ⲉⲣⲉⲟⲩⲏϩ ϩⲛ̅ⲧⲙⲛ̅ⲧⲁⲅⲣⲟⲓⲕⲟⲥ . ⲛ̅ⲧⲁⲣⲉⲉⲓ ⲉϩⲟⲩⲛ ⲉⲩϫⲡⲟ ⲛ̅ⲥⲱⲙⲁⲧⲕⲟⲛ ⲁⲩϫⲡⲟⲟ̅ . Ⲁⲣⲉϣⲱⲡⲉ ⲙ̅ⲡϩⲟⲩⲛ ⲙ̅ⲡⲛⲩⲙⲫⲱⲛ ⲁⲣⲉⲣ̅ⲟⲩⲟⲉⲓⲛ ϩⲙ̅ⲡⲛⲟⲩⲥ . Ⲡⲁϣⲏⲣⲉ ⲙ̅ⲡⲣ̅ϣⲱⲡⲉ ⲉⲕⲛⲏⲏⲃⲉ ϩⲙ̅ⲙⲟⲟⲩ ⲛⲓⲙ . ⲁⲩⲱ ⲙ̅ⲡⲣ̅ⲧⲣⲉⲩϫⲁϩⲙⲉⲕ ϩⲛ̅ϩⲉⲛⲅⲛⲱⲥⲓⲥ ⲛ̅ϣⲙ̅ⲙⲟ . Ⲙⲏ ⲕⲥⲟⲟⲩⲛ ⲁⲛ ϫⲉ Ⲭϥ̅ⲉ̅ , ⲡⲁⲛⲧⲓⲕⲓⲙⲉⲛⲟⲥ ϩⲉⲛⲕⲟⲩⲓ ⲁⲛ ⲛⲉ ⲛⲉϥⲉⲡⲓⲛⲟⲓⲁ . ⲁⲩⲱ ⲙ̅ⲙⲁⲅⲁⲛⲟⲛ ⲉⲧⲉⲟⲩⲛ̅ⲧⲁϥⲥⲉ ⲥⲉϣⲟⲃⲉ . Ⲡⲛⲟⲏⲧⲟⲥ ⲛ̅ⲣⲱⲙⲉ . ⲙⲁⲗⲓⲥⲧⲁ ⲁⲩⲣ̅ⲁⲡⲟⲥⲧⲉⲣⲓ ⲙ̅ⲙⲟϥ ⲛ̅ⲧⲙⲛ̅ⲧⲣⲙ̅ⲛ̅ϩⲏⲧ ⲙ̅ⲫⲟϥ . ϣ̅ϣⲉ ⲅⲁⲣ ⲉⲣⲟⲕ ⲉⲧⲣⲉⲕϣⲱⲡⲉ ⲉⲕⲧⲏⲧ ϩⲛ̅ⲧⲙⲛ̅ⲧⲣⲙ̅ⲛ̅ϩⲏⲧ ⲙ̅ⲡⲉⲥⲛⲁⲩ . ϩⲛ̅ⲧⲙⲛ̅ⲧⲣⲙ̅ⲛ̅ϩⲏⲧ ⲙ̅ⲫⲟϥ . ⲁⲩⲱ ϩⲛ̅ⲧⲙⲛ̅ⲧⲃⲁⲗϩⲏⲧ ⲛ̅ⲧⲉϭⲣⲟⲙⲡⲉ ⲙⲏⲡⲱⲥ ⲛϥ̅ⲉⲓ ⲉϩⲟⲩⲛ ϣⲁⲣⲟⲕ ⲙ̅ⲡⲥⲙⲟⲧ ⲙ̅ⲡⲉⲧⲕ̅ⲱⲣϣ̅. Ϩⲱⲥ ϣⲃⲏⲣ ⲙ̅ⲙⲉ ⲉϥϫⲱ ⲙ̅ⲙⲟⲥ . ϫⲉ ϯⲣ̅ⲥⲩⲙⲃⲟⲩⲗⲉⲩⲉ ⲛⲁⲕ ⲉⲧⲛⲁⲛⲟⲩⲟⲩ . ⲛ̅ⲧⲟⲕ ⲇⲉ ⲉⲙⲡⲉⲕⲉⲓⲙⲉ ⲉⲙⲙⲛ̅ⲧⲡⲁⲛⲟⲩⲣⲅⲟⲥ ⲙ̅ⲡⲁⲓ . ⲉϣϫⲉ ⲛ̅ⲧⲁⲕϫⲓⲧϥ̅ ⲛⲁⲕ ⲛ̅ϣⲃⲏⲣ ⲙ̅ⲙⲉ . ⲙ̅ⲙⲉⲉⲩⲉ ⲅⲁⲣ ⲉⲑⲟⲟⲩ ⲉⲡⲉⲕϩⲏⲧ ϩⲱⲥ ⲛⲉⲧⲛⲁⲛⲟⲩⲟⲩ . ⲁⲩⲱ ⲑⲩⲡⲟⲕⲣⲓⲥⲓⲥ ⲙ̅ⲡⲥⲙⲟⲧ ⲛ̅ⲧⲙⲛⲧⲣⲙ̅ⲛ̅ϩⲏⲧ ⲉⲧⲟⲣϫ̅ . Ⲁⲩⲱ ⲧⲙⲛ̅ⲧⲙⲁⲉⲓⲭⲣⲏⲙⲁ ⲙ̅ⲡⲥⲙⲟⲧ ⲛ̅ⲟⲩⲟⲓⲕⲟⲛⲟⲙⲓⲁ ⲉⲥⲛⲟⲩϩⲙ̅ . ⲁⲩⲱ ⲧⲙⲛ̅ⲧⲙⲁⲉⲓⲉⲟⲟⲩ ⲙ̅ⲡⲥⲙⲟⲧ ⲛ̅ⲛⲉⲧⲛⲉⲥⲱⲟⲩ . ⲁⲩⲱ ⲧⲙⲛ̅ⲧⲁⲗⲁⲍⲱⲛ ⲙⲛ̅ⲧⲙⲛ̅ⲧϣⲟⲩϣⲟ ⲙ̅ⲡⲥⲙⲟⲧ ⲛ̅ⲟⲩⲛⲟϭ ⲛ̅ⲥⲧⲩⲫⲏ . ⲁⲩⲱ ⲧⲙⲛ̅ⲧⲁⲧⲛⲟⲩⲧⲉ ⲛ̅ⲑⲉ ⲛ̅ⲟⲩⲛⲟϭ ⲙ̅ⲙⲛ̅ⲧⲛⲟⲩⲧⲉ . Ⲭϥ̅Ⲋ, Ⲡⲉⲧϫⲱ ⲅⲁⲣ ⲙ̅ⲙⲟⲥ ϫⲉ ⲟⲩⲛ̅ϯϩⲁϩ ⲛ̅ⲛⲟⲩⲧⲉ ⲉϥⲉⲛ̅ⲛⲁⲧⲛⲟⲩⲧⲉ . ⲁⲩⲱ ⲧⲅⲛⲱⲥⲓⲥ ⲉⲧⲟⲣϫ̅ ⲁⲛ ϥⲛⲟⲩϫⲉ ⲙ̅ⲙⲟⲥ ⲉⲡⲉⲕϩⲏⲧ ⲙ̅ⲡⲥⲙⲟⲧ ⲛ̅ϩⲉⲛⲗⲟⲅⲟⲥ ⲙ̅ⲙⲩⲥⲧⲏⲣⲓⲟⲛ :
Ⲛⲓⲙ ⲡⲉⲧⲛⲁϣⲧⲁϩⲉⲛⲉϥⲙⲉⲉⲩⲉ ⲙⲛ̅ⲛⲉϥⲕⲟⲧⲥ̅ ⲉⲧϣⲟⲃⲉ. ⲉϥϣⲟⲟⲡ ⲛ̅ⲛⲟϭ ⲛ̅ⲛⲟⲩⲥ ⲛ̅ⲛⲉⲧⲟⲩⲱϣ ⲉϫⲓⲧϥ̅ ⲛⲁⲩ ⲛ̅ⲣ̅ⲣⲟ . Ⲡⲁϣⲏⲣⲉ ⲁϣ ⲧⲉ ⲑⲉ ⲉⲧⲉⲕⲛⲁϣⲧⲁϩⲉⲙ̅ⲙⲉⲉⲩⲉ ⲛ̅ⲡⲁⲓ . ⲏ ⲡⲉϥϣⲟϫⲛⲉ ⲛ̅ⲣⲉϥϩⲁⲧⲃ̅ⲯⲩⲭⲏ . Ⲛⲁϣⲉⲛⲉϥⲕⲟⲧⲥ̅ ⲅⲁⲣ ⲙⲛ̅ⲛⲉⲡⲓⲛⲟⲓⲁ ⲛ̅ⲧⲉϥⲡⲟⲛⲏⲣⲓⲁ . ⲁⲩⲱ ⲁⲣ̅ⲛⲟⲉⲓ ⲛ̅ⲛⲉϥⲡⲩⲗⲏ ϫⲉ ⲁϣ ⲧⲉ ⲑⲉ ⲉⲧϥ̅ⲛ̅ⲛⲏⲩ ⲉϩⲟⲩⲛ ⲉⲧⲉⲕⲯⲩⲭⲏ . ⲁⲩⲱ ϩⲓⲧⲛ̅ⲁϣ ⲛ̅ϩⲃ̅ⲥⲱ ⲉϥⲛⲏⲩ ϣⲁⲣⲟⲕ . Ϫⲓ ⲉⲣⲟⲕ ⲙ̅ⲡⲉⲬ̅ⲥ̅ ⲡⲁⲓ ⲉⲩⲛ̅ϭⲟⲙ ⲙ̅ⲙⲟϥ ⲉⲃⲟⲗⲕ̅ ⲉⲃⲟⲗ . ⲡⲉⲛⲧⲁϥϫⲓ ⲉⲣⲟϥ ⲛ̅ⲛ̅ⲕⲟⲧⲥ̅ ⲙ̅ⲡⲉⲧⲙ̅ⲙⲁⲩ . ϫⲉⲕⲁⲁⲥ ϩⲓⲧⲛ̅ⲡⲁⲓ ⲉϥⲛⲁⲣ̅ⲕⲁⲧⲁⲗⲁⲩⲉ ⲙ̅ⲙⲟϥ ϩⲛ̅ⲟⲩⲕⲣⲟϥ . Ⲡⲁⲓ ⲅⲁⲣ ⲡⲉ ⲡⲣ̅ⲣⲟ ⲉⲧⲉⲟⲩⲛ̅ⲧⲁⲕϥ̅ ⲉⲙⲁⲩϫⲉⲣⲟ ⲉⲣⲟϥ ⲛ̅ⲗⲁⲁⲩ ⲛ̅ⲟⲩⲉⲓϣ . ⲡⲁⲓ ⲉⲙⲛ̅ⲗⲁⲁⲩ ⲛⲁϣϯⲟⲩⲃⲏϥ . ⲟⲩⲇⲉ ⲉϫⲉϣⲁϫⲉ ⲛⲁϥ . Ⲡⲁⲓ ⲡⲉ ⲡⲉⲕⲣ̅ⲣⲟ ⲁⲩⲱ ⲡⲉⲕⲉⲓⲱⲧ ⲙ̅ⲙⲛ̅ⲡⲉⲧⲧⲛ̅ⲧⲱⲛ ⲅⲁⲣ ⲉⲣⲟϥ . Ⲡⲥⲁϩ ⲛ̅ⲑⲉⲓⲟⲥ ϥϩⲁⲧⲏⲕ ⲛ̅ⲟⲩⲬϥ̅ⲍ̅ , ⲟⲉⲓϣ ⲛⲓⲙ ϥⲟ ⲛ̅ⲃⲟⲏⲑⲟⲥ . Ϥⲧⲱⲙⲛ̅ⲧ̅ ϫⲉ ⲉⲣⲟⲕ ⲉⲧⲃⲉⲧⲛⲟϥⲣⲉ ⲉⲧⲛ̅ϩⲏⲧⲕ̅ . Ⲙ̅ⲡⲣ̅ϯ ⲛ̅ⲟⲩϣⲁϫⲉ ⲙ̅ⲡⲟⲛⲏⲣⲓⲁ ϩⲛ̅ⲧⲉⲕⲅⲛⲱⲙⲏ . Ⲣⲱⲙⲉ ⲅⲁⲣ ⲛⲓⲙ ⲙ̅ⲡⲟⲛⲏⲣⲟⲥ ϥⲣ̅ⲃⲗⲁⲡⲧⲉⲓ ⲙ̅ⲡⲉϥϩⲏⲧ . ⲟⲩⲣⲱⲙⲉ ⲅⲁⲣ ⲛ̅ⲁⲑⲏⲧ ϣⲁϥⲃⲱⲕ ⲟⲩⲁⲁϥ ⲉϩⲟⲩⲛ ⲉⲡⲉϥϣⲟⲣϣⲣ̅ . Ⲟⲩⲣⲱⲙⲉ ⲇⲉ ⲛ̅ⲥⲟⲫⲟⲥ ϥⲥⲟⲟⲩⲛ ⲛ̅ⲧⲉϥϩⲓⲏ . ⲟⲩⲣⲱⲙⲉ ⲇⲉ ⲛ̅ⲁⲑⲏⲧ ⲙⲁϥϩⲁⲣⲉϩ ⲉϣⲁϫⲉ ⲙ̅ⲙⲩⲥⲧⲏⲣⲓⲟⲛ . ⲟⲩⲣⲱⲙⲉ ⲛ̅ⲥⲟⲫⲟⲥ ⲙⲁϥⲛⲉϫϣⲁϫⲉ ⲛⲓⲙ ⲉⲃⲟⲗ ⲁⲗⲗⲁ ϥⲛⲁϣⲱⲡⲉ ⲛ̅ⲣⲉϥⲑⲉⲱⲣⲓ . ⲛ̅ⲛⲉⲧⲥⲱⲧⲙ̅ . Ⲙ̅ⲡⲣ̅ⲛⲉϫϣⲁϫⲉ ⲛⲓⲙ ⲉⲃⲟⲗ ⲉⲕϩⲏⲛ ⲉϩⲟⲩⲛ ⲉⲛⲉⲧⲕ̅ⲥⲟⲟⲩⲛ ⲙ̅ⲙⲟⲟⲩ ⲁⲛ . Ⲕⲁⲟⲩⲙⲏⲏϣⲉ ⲛⲁⲕ ⲛ̅ϣⲃⲏⲣ ⲁⲗⲗⲁ ⲛ̅ⲣⲙ̅ⲛ̅ϣⲟϫⲛⲉ ⲁⲛ . Ⲁⲣⲓⲇⲟⲕⲓⲙⲁⲍⲉ ⲛ̅ϣⲟⲣⲡ̅ ⲙ̅ⲡⲉⲕⲣⲙ̅ⲛ̅ϣⲟϫⲛⲉ . ⲣⲱⲙⲉ ⲅⲁⲣ ⲛⲓⲙ ⲉϣⲁϥⲕⲱⲣϥ̅ ⲙ̅ⲡⲣ̅ⲧⲁⲉⲓⲟϥ . ⲡⲟⲩϣⲁϫⲉ ⲙⲉⲛ ϩⲟⲗⲉϭ ⲛ̅ⲑⲉ ⲙ̅ⲡⲉⲃⲓⲱ . ⲡⲉⲩϩⲏⲧ ⲇⲉ ⲙⲉϩ ⲛ̅ⲉⲗⲗⲉⲃⲟⲣⲟⲛ . ϩⲟⲧⲁⲛ ⲅⲁⲣ ⲉⲩϣⲁⲛⲙⲉⲉⲩⲉ ϫⲉ ⲁⲩϣⲱⲡⲉ ⲛ̅ϣⲃⲏⲣ ⲉϥⲧⲁϫⲣⲟⲉⲓⲧ . ⲧⲟⲧⲉ ϩⲛ̅ⲟⲩⲕⲣⲟϥ ⲥⲉⲛⲁⲕⲟⲧⲟⲩ ⲉⲣⲟⲕ ⲛ̅ⲥⲉⲛⲟϫⲕ̅ ⲉⲡⲓⲧⲛ̅ ⲉⲡⲃⲟⲣⲃⲟⲣⲟⲥ . Ⲙ̅ⲡⲣ̅ⲧⲁⲛϩⲟⲩⲧⲕ̅ ⲙ̅ⲙⲛ̅ⲗⲁⲁⲩ ⲛ̅ϣⲃⲏⲣ . ⲡⲉⲓⲕⲟⲥⲙⲟⲥ ⲅⲁⲣ ⲧⲏⲣϥ̅ ⲛ̅ⲧⲁϥϣⲱⲡⲉ ϩⲛ̅ⲟⲩⲕⲣⲟϥ . ⲁⲩⲱ ⲣⲱⲙⲉ ⲛⲓⲙ ⲉϥϣⲧⲣ̅ⲧⲱⲣ ⲉⲡϫⲓⲛϫⲏ . ϩⲱⲃ ⲛⲓⲙ ⲛ̅ⲧⲉ Ⲭϥ̅ⲏ̅ , ⲡⲕⲟⲥⲙⲟⲥ ϩⲉⲛϩⲏⲩ ⲁⲛ ⲛⲉ . ⲁⲗⲗⲁ ⲉⲩϣⲱⲡⲉ ϩⲛ̅ⲟⲩⲡⲉⲧϣⲟⲩⲉⲓⲧ . ⲙⲛ̅ⲗⲁⲁⲩ ⲟⲩⲇⲉ ⲙⲛ̅ⲥⲟⲛ . ⲉⲣⲉⲡⲟⲩⲁ ⲡⲟⲩⲁ ϣⲓⲛⲉ ⲛ̅ⲥⲁⲧⲉϥⲛⲟϥⲣⲉ . Ⲡⲁϣⲏⲣⲉ ⲙ̅ⲡⲣ̅ⲕⲁⲣⲱⲙⲉ ⲛⲓⲙ ⲛⲁⲕ ϩⲱⲥ ϣⲃⲏⲣ ⲉⲕϣⲁⲛϫⲡⲟϥ ⲇⲉ ⲙ̅ⲡⲣ̅ⲧⲁⲁⲕ ⲛ̅ⲧⲟⲟⲧϥ̅ . Ⲧⲁⲁⲕ ⲛ̅ⲧⲟⲟⲧϥ̅ ⲙ̅ⲡⲛⲟⲩⲧⲉ ⲟⲩⲁⲁϥ ϩⲱⲥ ⲉⲓⲱⲧ ⲁⲩⲱ ϩⲱⲥ ϣⲃⲏⲣ . ⲣⲱⲙⲉ ⲅⲁⲣ ⲛⲓⲙ ⲉⲩⲙⲟⲟϣⲉ ϩⲛ̅ⲟⲩⲕⲣⲟϥ . Ⲡⲕⲁϩ ⲧⲏⲣϥ̅ ⲉϥⲙⲉϩ ⲛ̅ϩⲓⲥⲉ ϩⲓⲙ̅ⲕⲁϩ . ⲛⲁⲓ ⲉⲙⲛ̅ϩⲏⲩ ⲛ̅ϩⲏⲧⲟⲩ . Ⲉϣⲱⲡⲉ ⲉⲕⲟⲩⲱϣⲉ ⲉⲣ̅ⲡⲉⲕⲁϩⲉ ⲉⲕⲥϭⲣⲁϩⲧ̅ ⲙ̅ⲡⲣ̅ⲙⲟⲟϣⲉ ⲙ̅ⲙⲛ̅ⲗⲁⲁⲩ . Ⲕⲁⲛ ⲉⲕϣⲁⲛⲙⲟⲟϣⲉ ⲛⲙ̅ⲙⲁⲩ ϣⲱⲡⲉ ⲛⲅ̅ⲙⲟⲟϣⲉ ⲁⲛ . ϣⲱⲡⲉ ⲉⲕⲣ̅ⲁⲛⲁϥ ⲙ̅ⲡⲛⲟⲩⲧⲉ ⲁⲩⲱ ⲛⲅ̅ⲣ̅ⲭⲣⲉⲓⲁ ⲁⲛ ⲛ̅ⲗⲁⲁⲩ . Ⲁⲣⲓⲡⲟⲗⲓⲧⲉⲩⲉ ⲙⲛ̅ⲡⲉⲬ̅ⲥ̅ ⲁⲩⲱ ϥⲛⲁⲛⲁϩⲙⲉⲕ . Ⲛ̅ⲧⲟϥ ⲅⲁⲣ ⲡⲉ ⲡⲟⲩⲟⲉⲓⲛ ⲙ̅ⲙⲉ ⲁⲩⲱ ⲡⲣⲏ ⲙ̅ⲡⲱⲛϩ̅ . ⲛ̅ⲑⲉ ⲅⲁⲣ ⲙ̅ⲡⲣⲏ ⲉⲧⲟⲩⲟⲛϩ̅ ⲉⲃⲟⲗ ⲉⲧⲣ̅ⲟⲩⲟⲉⲓⲛ ⲉⲛ̅ⲃⲁⲗ ⲛ̅ⲧⲥⲁⲣⲝ̅ . ⲧⲁⲓ ⲧⲉ ⲑⲉ ⲙ̅ⲡⲉⲬ̅ⲥ̅ . Ϥⲣ̅ⲟⲩⲟⲉⲓⲛ ⲉⲛⲟⲩⲥ ⲛⲓⲙ ⲁⲩⲱ ⲉⲫⲏⲧ . Ⲟⲩⲡⲟⲛⲏⲣⲟⲥ ⲅⲁⲣ ϩⲙ̅ⲡⲥⲱⲙⲁ ⲟⲩⲙⲟⲩ ⲉϥϩⲟⲟⲩ ⲡⲉ . Ⲡⲟⲥⲱ ⲙⲁⲗⲗⲟⲛ ⲡⲉⲧⲉⲟⲩⲛ̅ⲧⲁϥ ⲙ̅ⲙⲁⲩ ⲙ̅ⲡⲉϥⲛⲟⲩⲥ ⲉϥⲟ ⲃ̅ⲃⲗ̅ⲗⲉ . Ⲃⲗ̅ⲗⲉ ⲅⲁⲣ ⲛⲓⲙ ϥⲙⲟⲟϣⲉ ⲛ̅ⲑⲉ ⲉⲛⲁⲩ ⲉⲣⲟϥ ⲕⲁⲧⲁ Ⲭϥ̅ⲑ̅, ⲑⲉ ⲙ̅ⲡⲉⲧⲉⲙ̅ⲙⲛ̅ⲧⲁϥ ⲙ̅ⲙⲁⲩ ⲙ̅ⲡⲉϥⲛⲟⲩⲥ ⲉϥⲟⲩⲟϫ . Ⲙⲁϥϩⲏⲇⲁⲛⲉ ⲉϫⲡⲟ ⲛⲁϥ ⲙ̅ⲡⲟⲩⲟⲉⲓⲛ ⲙ̅ⲡⲉⲬ̅ⲥ̅ ⲉⲧⲉⲡⲗⲟⲅⲟⲥ ⲡⲉ . Ϩⲱⲃ ⲅⲁⲣ ⲛⲓⲙ ⲉⲧⲟⲩⲟⲛϩ ⲉⲃⲟⲗ ⲉϥϣⲟⲟⲡ ⲛ̅ⲧⲩⲡⲟⲥ ⲙ̅ⲡⲉⲧϩⲏⲡ . ⲛ̅ⲑⲉ ⲅⲁⲣ ⲛ̅ⲟⲩⲕⲱϩⲧ̅ ⲉϥϫⲉⲣⲟ ϩⲛ̅ⲟⲩⲧⲟⲧⲟⲥ ⲉϥⲙⲏⲣ ⲁⲛ ⲉϩⲟⲩⲛ ⲉⲡⲧⲟⲡⲟⲥ . ⲧⲁⲓ ⲧⲉ ⲑⲉ ⲙ̅ⲡⲣⲏ ⲉⲧϩⲛ̅ⲧⲡⲉ ⲛⲉϥⲁⲕⲧⲓⲛ ⲧⲏⲣⲟⲩ ⲥⲉⲡⲏϩ ⲉⲛⲧⲟⲡⲟⲥ ⲉⲧϩⲓϫⲙ̅ⲡⲕⲁϩ . ⲧⲁⲓ ⲧⲉ ⲑⲉ ⲙ̅ⲡⲉⲬ̅ⲥ̅ ⲟⲩϩⲩⲡⲟⲥⲧⲁⲥⲓⲥ ⲛ̅ⲟⲩⲱⲧ ⲧⲉⲧⲉⲟⲩⲛ̅ⲧⲁϥⲥ̅ ⲁⲩⲱ ϥⲣ̅ⲟⲩⲟⲉⲓⲛ ⲉⲧⲟⲡⲟⲥ ⲛⲓⲙ . ⲧⲉⲓϩⲉ ⲟⲛ ⲧⲉⲧϥ̅ϫⲱ ⲙ̅ⲙⲟⲥ ϩⲓⲡⲉⲛⲛⲟⲩⲥ . ⲙ̅ⲡⲥⲙⲟⲧ ⲛ̅ⲟⲩϩⲏⲃⲉⲥ ⲉϥϫⲉⲣⲟ ⲉϥⲣ̅ⲟⲩⲟⲉⲓⲛ ⲉⲡⲧⲟⲡⲟⲥ . ϩⲛ̅ⲟⲩⲙⲉⲣⲟⲥ ⲛ̅ⲧⲉⲧⲯⲩⲭⲏ ϥⲣ̅ⲟⲩⲟⲉⲓⲛ ⲉⲛⲙⲉⲣⲟⲥ ⲧⲏⲣⲟⲩ . Ⲡⲁⲗⲓⲛ ϯⲛⲁϫⲉⲡⲉⲧϫⲟⲥⲉ ⲉⲡⲁⲓ . ⲡⲛⲟⲩⲥ ⲕⲁⲧⲁⲑⲩⲡⲟⲥⲧⲁⲥⲓⲥ ϥϩⲛ̅ⲟⲩⲧⲟⲡⲟⲥ ⲉⲧⲉⲡⲁⲓ ⲡⲉ ϥϩⲙ̅ⲡⲥⲱⲙⲁ ⲕⲁⲧⲁⲧⲉⲡⲓⲛⲟⲓⲁ ⲇⲉ ⲡⲛⲟⲩⲥ ϩⲛ̅ⲧⲟⲡⲟⲥ ⲁⲛ . ⲡⲱⲥ ⲅⲁⲣ ⲉϥϣⲟⲟⲡ ϩⲛ̅ⲧⲟⲡⲟⲥ . ϩⲟⲡⲟⲧⲉ ϥⲣ̅ⲑⲉⲱⲣⲓ ⲛ̅ⲧⲟⲡⲟⲥ ⲛⲓⲙ . Ⲟⲩⲛ̅ϭⲟⲙ ⲇⲉ ⲙ̅ⲙⲟⲛ ⲛ̅ⲧⲛ̅ϫⲱ ⲙ̅ⲡⲉⲧϫⲟⲥⲉ ⲉⲡⲁⲓ . ⲙ̅ⲡⲣ̅ⲡⲙⲉⲉⲩⲉ ⲅⲁⲣ ϩⲙ̅ⲡⲉⲕϩⲏⲧ ϫⲉ ⲉⲣⲉⲡⲛⲟⲩⲧⲉ ϣⲟⲟⲡ ϩⲛ̅ⲟⲩⲧⲟⲡⲟⲥ . Ⲉϣϫⲉ ⲡϫⲟⲉⲓⲥ ⲙ̅ⲡⲧⲏⲣϥ̅ ⲉⲕⲕⲱ ⲙ̅ⲙⲟϥ Ⲭ ⲣ̅ , ϩⲛ̅ⲟⲩⲧⲟⲡⲟⲥ . Ϩⲓ̅ⲉ ϣ̅ϣⲉ ⲉⲧⲣⲉⲕϫⲟⲟⲥ ϫⲉ ⲡⲧⲟⲡⲟⲥ ϫⲟⲥⲉ ⲉⲡⲉⲧⲟⲩⲏϩ ϩⲙ̅ⲡⲧⲟⲡⲟⲥ . ⲡⲉⲧϣⲱⲡ ⲅⲁⲣ ϥϫⲟⲥⲉ ⲉⲡⲉⲧⲟⲩϣⲱⲡ ⲙ̅ⲙⲟϥ . ⲙⲛ̅ⲧⲟⲡⲟⲥ ⲅⲁⲣ ⲉⲩⲙⲟⲩⲧⲉ ⲉⲣⲟϥ ϫⲉ ⲁⲧⲥⲱⲙⲁ . Ⲟⲩⲇⲓⲕⲁⲓⲟⲛ ⲅⲁⲣ ⲁⲛ ⲡⲉ ⲉⲧⲣⲉⲛϫⲟⲟⲥ ϫⲉ ⲟⲩⲥⲱⲙⲁ ⲡⲉ ⲡⲛⲟⲩⲧⲉ ⲧⲁⲕⲟⲗⲟⲩⲑⲓⲁ ⲅⲁⲣ ⲧⲉ ⲉⲧⲣⲉⲛϯ ⲛ̅ⲟⲩⲁⲛⲁⲓ ⲙⲛ̅ⲟⲩϭⲱϫⲃ̅ ⲙ̅ⲡⲥⲱⲙⲁ . ⲁⲩⲱ ⲡⲉⲧϩⲟⲥⲉ ⲇⲉ ⲛ̅ⲛⲁⲓ ϥⲛⲁⲙⲟⲩⲛ ⲉⲃⲟⲗ ⲁⲛ ⲉϥⲟ ⲛ̅ⲁⲧⲧⲁⲕⲟ . Ⲡⲣⲉϥⲥⲱⲛⲧ̅ ⲙⲉⲛ ⲛ̅ⲥⲱⲛⲧ̅ ⲛⲓⲙ ϥⲙⲟⲕϩ̅ ⲙⲉⲛ ⲁⲛ ⲉⲥⲟⲩⲱⲛϥ̅ . Ⲟⲩⲁⲧϭⲟⲙ ⲇⲉ ⲡⲉ ⲉⲧⲁϩⲉⲡⲓⲛⲉ ⲙ̅ⲡⲁⲓ . Ⲛ̅ⲣⲱⲙⲉ ⲅⲁⲣ ⲟⲩⲁⲁⲩ ⲁⲛ ⲛⲉⲧⲥ̅ⲙⲟⲕϩ̅ ⲛⲁⲩ ⲉⲧⲁϩⲉⲡⲛⲟⲩⲧⲉ . ⲁⲗⲗⲁ ⲥⲙⲟⲕϩ̅ ⲙ̅ⲫⲩⲥⲓⲥ ⲛⲓⲙ ⲛ̅ⲑⲉⲓⲟⲥ ⲛ̅ⲁⲅⲅⲉⲗⲟⲥ ⲁⲩⲱ ⲛ̅ⲁⲣⲭⲁⲅⲅⲉⲗⲟⲥ . Ⲟⲩⲁⲛⲁⲅⲕⲁⲓⲟⲛ ⲡⲉ ⲉⲥⲟⲩⲱⲛⲡⲛⲟⲩⲧⲉ ⲛ̅ⲑⲉ ⲉⲧϥ̅ϣⲟⲟⲡ ⲙ̅ⲙⲟⲥ . Ⲙ̅ⲙⲛ̅ϭⲟⲙ ⲙ̅ⲙⲟⲕ ⲉⲥⲟⲩⲱⲛⲡⲛⲟⲩⲧⲉ ϩⲓⲧⲛ̅ⲗⲁⲁⲩ ⲉⲓⲙⲏⲧⲓ ϩⲓ̅ⲧⲙ̅ⲡⲉⲬ̅ⲥ̅ . ⲡⲁⲓ ⲉⲧⲉⲟⲩⲛ̅ⲧⲁϥ ⲙ̅ⲙⲁⲩ ⲛ̅ⲑⲓⲕⲱⲛ ⲙ̅ⲡⲓⲱⲧ . ⲧⲉⲓϩⲓⲕⲱⲛ ⲅⲁⲣ ⲥⲟⲩⲱⲛϩ̅ ⲉⲃⲟⲗ ⲙ̅ⲡⲓⲛⲉ ⲙ̅ⲙⲉ . ⲕⲁⲧⲁⲡⲉⲧⲟⲩⲟⲛϩ̅ ⲉⲃⲟⲗ ⲙⲁⲩⲥⲟⲩⲱⲛⲣ̅ⲣⲟ ⲭⲱⲣⲓⲥ ϩⲓ̅ⲕⲱⲛ . Ⲁⲣⲓⲛⲟⲉⲓ ⲛⲁⲓ ⲙ̅ⲡⲛⲟⲩⲧⲉ ϫⲉ ϥϣⲟⲟⲡ ϩⲛ̅ⲧⲟⲡⲟⲥ ⲛⲓⲙ . Ⲡⲁⲗⲓⲛ ϥϩⲛ̅ⲗⲁⲁⲩ ⲁⲛ ⲛ̅ⲧⲟⲡⲟⲥ . ⲕⲁⲧⲁⲧϭⲟⲙ Ⲭⲣ̅ⲁ̅ , ⲙⲉⲛ ϥϩⲛ̅ⲧⲟⲡⲟⲥ ⲛⲓⲙ . Ⲕⲁⲧⲁⲧⲙⲛ̅ⲧⲛⲟⲩⲧⲉ ⲇⲉ ϥϩⲛ̅ⲗⲁⲁⲩ ⲁⲛ ⲛ̅ⲧⲟⲡⲟⲥ . ⲧⲉⲓϩⲉ ⲅⲁⲣ ⲟⲩⲛ̅ϭⲟⲙ ⲉⲥⲟⲩⲱⲛⲡⲛⲟⲩⲧⲉ ⲛ̅ⲟⲩⲕⲟⲩⲉⲓ . ⲕⲁⲧⲁⲧⲉϥϭⲟⲙ ⲙⲉⲛ ϥⲙⲟⲩϩ ⲙ̅ⲙⲁ ⲛⲓⲙ . ϩⲙ̅ⲡϫⲓⲥⲉ ⲇⲉ ⲛ̅ⲧⲉϥⲙⲛ̅ⲧⲛⲟⲩⲧⲉ ⲙ̅ⲙⲛ̅ⲗⲁⲁⲩ ϣⲱⲡ ⲙ̅ⲙⲟϥ . Ⲟⲩⲟⲛ ⲛⲓⲙ ϣⲟⲟⲡ ϩⲙ̅ⲡⲛⲟⲩⲧⲉ . ⲡⲛⲟⲩⲧⲉ ⲇⲉ ϩⲛ̅ⲗⲁⲁⲩ ⲁⲛ . Ⲟⲩⲟⲩ ⲇⲉ ⲡⲉ ⲉⲥⲱⲟⲩⲛⲡⲛⲟⲩⲧⲉ . ⲡⲧⲏⲣϥ̅ ⲇⲉ ⲉⲧϩⲛ̅ⲧⲙⲉ ⲡⲉ ⲡⲛⲟⲩⲧⲉ . Ⲟⲩⲁⲧϭⲟⲙ ⲇⲉ ⲡⲉ ⲁⲣ̅ⲑⲉⲱⲣⲓ ⲙ̅ⲡⲉⲬ̅ⲥ̅ ⲛ̅ⲑⲉ ⲙ̅ⲡⲣⲏ . Ⲡⲛⲟⲩⲧⲉ ⲛⲁⲩ ⲉⲟⲩⲟⲛ ⲛⲓⲙ ⲙ̅ⲙⲛ̅ⲗⲁⲁⲩ ⲣ̅ⲑⲉⲱⲣⲓ ⲙ̅ⲙⲟϥ . ⲠⲉⲬ̅ⲥ̅ ⲇⲉ ⲛ̅ⲟⲩⲱϣ ⲛ̅ⲣ̅ⲫⲑⲟⲛⲓ ϣⲁϥϫⲓ ⲛϥ̅ϯ . Ⲛ̅ⲧⲟϥ ⲇⲉ ⲡⲉ ⲡⲟⲩⲟⲉⲓⲛ ⲙ̅ⲡⲓⲱⲧ ⲉϥⲣ̅ⲟⲩⲟⲉⲓⲛ ⲛ̅ⲟⲩⲱϣ ⲛ̅ⲣ̅ⲫⲑⲟⲛⲓ . Ⲧⲁⲓ ⲧⲉ ⲑⲉ ⲉϥⲣ̅ⲟⲩⲟⲉⲓⲛ ⲉⲧⲟⲡⲟⲥ ⲛⲓⲙ . Ⲡⲉⲭ̅ⲥ̅ ⲇⲉ ⲡⲉ ⲡⲧⲏⲣϥ̅ . ⲡⲉⲛⲧⲁϥⲣ̅ⲕⲗⲏⲣⲟⲩ ⲉⲡⲧⲏⲣϥ̅ ⲉⲃⲟⲗ ϩⲙ̅ⲡⲉⲧϣⲟⲟⲡ . ⲡⲧⲏⲣϥ̅ ⲅⲁⲣ ⲡⲉ ⲡⲉⲬ̅ⲥ̅ . ⲭⲱⲣⲓⲥ ⲧⲙⲛ̅ⲧⲁⲧⲧⲁⲕⲟ . Ⲉⲕϣⲁⲛⲣ̅ⲛⲟⲓ ⲅⲁⲣ ⲙ̅ⲡⲛⲟⲃⲉ ⲟⲩⲟⲩⲥⲓⲁ ⲁⲛ ⲡⲉ . Ⲧⲛⲟⲏⲥⲓⲥ ⲅⲁⲣ ⲛ̅ⲧⲙⲛ̅ⲧⲁⲧⲧⲁⲕⲟ ⲡⲉ ⲡⲉⲬ̅ⲥ̅ . ⲁⲩⲱ ⲡⲟⲩⲟⲉⲓⲛ ⲡⲉ ⲉϥⲡⲣ̅ⲣⲓⲱⲟⲩ ⲉϥϫⲁϩⲙ̅ ⲁⲛ . Ⲡⲣⲏ ⲅⲁⲣ ϩⲛ̅ⲧⲟⲡⲟⲥ ⲛⲓⲙ ⲛ̅ⲁⲕⲁⲑⲁⲣⲧⲟⲛ ⲁⲩⲱ ⲛϥ̅ϫⲱϩⲙ̅ ⲁⲛ . Ⲧⲁⲓ ⲧⲉ ⲑⲉ ⲙ̅ⲡⲉⲬ̅ⲥ̅ ⲉϣϫⲉ ϥϩⲙ̅ⲡϣⲧⲁ . ⲁⲗⲗⲁ ⲟⲩⲁⲧϣⲧⲁ ⲡⲉ . Ⲁⲩⲱ ⲉϣϫⲉ ⲛ̅ⲧⲁⲩϫⲡⲟϥ Ⲭⲣ̅ⲃ̅ , ⲉⲩⲁⲧϫⲡⲟϥ ⲡⲉ . Ⲧⲁⲓ ⲧⲉ ⲑⲉ ⲙ̅ⲡⲉⲭ̅ⲥ̅ ⲉϣϫⲉ ⲥⲉⲁⲙⲁϩⲧⲉ ⲙⲉⲛ ⲙ̅ⲙⲟϥ . ⲕⲁⲧⲁⲧⲉϥϩⲩⲡⲟⲥⲧⲁⲥⲓⲥ ⲇⲉ ⲟⲩⲁⲧⲁⲙⲁϩⲧⲉ ⲙ̅ⲙⲟϥ ⲡⲉ . Ⲡⲉⲭ̅ⲥ̅ ⲡⲉ ⲡⲧⲏⲣϥ̅ . ⲡⲉⲧⲉⲡⲱϥ ⲁⲛ ⲡⲉ ⲡⲧⲏⲣϥ̅ ⲙⲛ̅ϭⲟⲙ ⲛϥ̅ⲥⲟⲩⲱⲛⲡⲉⲭ̅ⲥ̅ . Ⲡⲁϣⲏⲣⲉ ⲙ̅ⲡⲣ̅ⲧⲟⲗⲙⲁ ⲉϫⲉϣⲁϫⲉ ϩⲁⲡⲣⲁ ⲙ̅ⲡⲁⲓ . ⲟⲩⲧⲉ ⲡⲛⲟⲩⲧⲉ ⲙ̅ⲡⲧⲏⲣϥ̅ ⲙ̅ⲡⲣ̅ⲕⲁⲁϥ ⲛⲁⲕ ⲛ̅ϩⲉⲛⲉⲓⲛⲉ ⲛ̅ϩⲏⲧ . Ⲡⲉⲧⲕⲁⲧⲁⲕⲣⲓⲛⲉ ⲅⲁⲣ ⲉⲩⲁⲕⲣⲓⲛⲉ ⲙ̅ⲙⲟϥ ⲁⲛ ϩⲓⲧⲛ̅ⲡⲉⲧⲕⲁⲧⲁⲕⲣⲓⲛⲉ . Ⲛⲁⲛⲟⲩⲥ ⲙⲉⲛ ⲉϣⲓⲛⲉ ⲁⲩⲱ ⲉⲙ̅ⲙⲉ ϫⲉ ⲛⲓⲙ ⲡⲉ ⲡⲛⲟⲩⲧⲉ . ⲡⲗⲟⲅⲟⲥ ⲙⲛ̅ⲡⲛⲟⲩⲥ ⲟⲩⲣⲁⲛ ⲛ̅ϩⲟⲟⲩⲧ ⲡⲉ . ⲡⲉⲧⲟⲩⲱϣ ⲙⲉⲛ ⲁⲉⲓⲙⲉ ⲉⲧⲃⲉⲡⲁⲓ ⲙⲁⲣⲉϥϣⲓⲛⲉ ϩⲛ̅ⲟⲩⲥϭⲣⲁϩⲧ̅ ⲙⲛ̅ⲟⲩϩⲣ̅ⲧⲉ . Ⲟⲩⲕⲓⲛⲇⲩⲛⲟⲥ ⲅⲁⲣ ϣⲏⲙ ⲁⲛ ⲡⲉ ⲉϣⲁϫⲉ ϩⲁⲡⲣⲁ ⲛ̅ⲛⲁⲓ . ⲉⲕⲥⲟⲟⲩⲛ ϫⲉ ⲥⲉⲛⲁϯϩⲁⲡ ⲉⲣⲟⲕ ϩⲁⲛⲉⲧⲕ̅ϫⲱ ⲙ̅ⲙⲟⲟⲩ ⲧⲏⲣⲟⲩ . ⲙ̅ⲙⲉ ⲇⲉ ϩⲙ̅ⲡⲁⲓ ϫⲉ ⲡⲉⲧϩⲙ̅ⲡⲕⲁⲕⲉ ⲛϥ̅ⲛⲁϣⲛⲁⲩ ⲁⲛ ⲉⲗⲁⲁⲩ ⲉϥⲧⲙ̅ϫⲓⲡⲟⲩⲟⲉⲓⲛ ⲛϥ̅ⲛⲁⲃⲁⲗ ⲛ̅ϩⲏⲧϥ̅ . Ⲁⲣⲓⲇⲟⲕⲓⲙⲁⲍⲉ ⲙ̅ⲙⲟⲕ ⲉϣϫⲉ ϩⲟⲗⲱⲥ ⲟⲩⲛ̅ⲧⲁⲕ ⲙ̅ⲙⲁⲩ ⲙ̅ⲡⲟⲩⲟⲉⲓⲛ . ϫⲉⲕⲁⲁⲥ ⲉⲕϣⲁⲛϣⲓⲛⲉ ⲉⲧⲃⲉⲛⲁⲓ ⲉⲕⲛⲁⲙ̅ⲙⲉ ϫⲉ ⲁϣ ⲧⲉ ⲑⲉ ⲉⲧⲕ̅ⲛⲁⲣ̅ⲃⲟⲗ ⲙ̅ⲙⲟⲥ . Ⲟⲩⲛ̅ϩⲁϩ ⲅⲁⲣ ϣⲓⲛⲉ ϩⲙ̅ⲡⲕⲁⲕⲉ . ⲁⲩⲱ ⲥⲉϭⲟⲙϭⲙ̅ ⲉⲩⲟⲩⲱϣ ⲉⲥⲟⲟⲩⲛ ⲉⲙⲡⲟⲩⲟⲉⲓⲛ ⲕⲏ ⲛⲁⲩ ⲁⲛ ⲉϩⲣⲁⲓ . ⲠⲁⲬⲣ̅ⲅ̅ , ϣⲏⲣⲉ ⲙ̅ⲡⲣ̅ⲧⲣⲉⲡⲉⲕⲛⲟⲩⲥ ⲉⲓⲱⲣⲙ̅ ⲉⲡⲥⲁ ⲛ̅ⲡⲓⲧⲛ̅ . ⲁⲗⲗⲁ ⲙⲁⲗⲗⲟⲛ ϩⲙ̅ⲡⲟⲩⲟⲉⲓⲛ ⲙⲁⲣⲉϥϭⲱϣⲧ̅ ⲉⲛⲁⲡⲥⲁ ⲛ̅ⲧⲡⲉ . ⲡⲟⲩⲟⲉⲓⲛ ⲅⲁⲣ ⲉϥⲛ̅ⲛⲏⲩ ⲙ̅ⲡⲥⲁ ⲛ̅ⲧⲡⲉ ⲛ̅ⲟⲩⲟⲉⲓϣ ⲛⲓⲙ . Ⲕⲁⲛ ⲉϥϩⲓϫⲙ̅ⲡⲕⲁϩ ⲙⲁⲣⲉϥϣⲓⲛⲉ ⲛ̅ⲥⲁⲡⲱⲧ ⲛ̅ⲥⲁⲛⲁⲧⲡⲉ . Ⲁⲣⲓⲟⲩⲟⲉⲓⲛ ⲉⲡⲉⲕⲛⲟⲩⲥ ϩⲙ̅ⲡⲟⲩⲟⲉⲓⲛ ⲛ̅ⲧⲡⲉ . ϫⲉⲕⲁⲁⲥ ⲉⲕⲛⲁⲡⲱⲱⲛⲉ ⲉϩⲟⲩⲛ ⲉⲡⲟⲩⲟⲉⲓⲛ ⲛ̅ⲧⲡⲉ . Ⲙ̅ⲡⲣ̅ϩⲓⲥⲉ ⲉⲕⲧⲱϩⲙ̅ ⲉϩⲟⲩⲛ ⲉⲡⲣⲟ ⲙ̅ⲡⲗⲟⲅⲟⲥ . ⲁⲩⲱ ⲙ̅ⲡⲣ̅ⲕⲁⲧⲟⲟⲧⲕ̅ ⲉⲃⲟⲗ ⲉⲕⲙⲟⲟϣⲉ ϩⲓ̅ⲑⲓⲏ ⲙ̅ⲡⲉⲭ̅ⲥ̅ . ⲙⲟⲟϣⲉ ⲛ̅ϩⲏⲧⲥ̅ ϫⲉⲕⲁⲁⲥ ⲉⲕⲛⲁϫⲓⲡⲉⲙⲧⲟⲛ ⲛ̅ⲛⲉⲕϩⲓ̅ⲥⲉ . Ⲉⲕϣⲁⲛⲙⲟⲟϣⲉ ϩⲛ̅ⲕⲉⲟⲩⲉ̅ⲓ ⲧⲉϩⲓⲏ ⲉⲧⲕ̅ⲛⲁⲁⲁⲥ ⲙ̅ⲙⲛ̅ϩⲏⲩ ⲛ̅ϩⲏⲧⲥ̅ . Ⲕⲁⲓ ⲅⲁⲣ ⲛⲉⲧⲙⲟⲟϣⲉ ϩⲓ̅ⲧⲉϩⲓ̅ⲏ ⲉⲧⲟⲩⲉⲥⲧⲱⲛ ⲧⲉⲩϩⲁⲏ ⲉⲩⲛⲁⲃⲱⲕ ⲉⲡⲓⲧⲛ̅ ⲉⲡⲧⲁⲛⲟ ⲙ̅ⲡⲃⲟⲣⲃⲟⲣⲟⲥ . ⲉⲙⲛ̅ⲧⲉ ⲅⲁⲣ ⲟⲩⲟϣⲥ̅ ⲉⲃⲟⲗ ⲛ̅ⲧⲯⲩⲭⲏ ⲁⲩⲱ ⲡⲧⲟⲡⲟⲥ ⲙ̅ⲡⲧⲁⲕⲟ ϥⲟⲩⲉⲥⲧⲱⲛ . Ϫⲓ ⲉⲣⲟⲕ ⲙ̅ⲡⲉⲬ̅ⲥ̅ ⲧⲉϩⲓⲏ ⲉⲧⲗⲟϫϩ̅ . ϥⲣ̅ⲑⲗⲓⲃⲉ ⲅⲁⲣ ⲁⲩⲱ ϥ̅ϥⲓⲙⲟⲕϩⲥ̅ ⲉⲧⲃⲉⲡⲉⲕⲛⲟⲃⲉ . Ⲱ ⲧⲯⲩⲭⲏ ⲧⲣⲉϥϩⲩⲡⲟⲙⲓⲛⲉ ⲉⲣⲉϣⲟⲟⲡ ϩⲛ̅ⲁϣ ⲙ̅ⲙⲛ̅ⲧⲁⲧⲥⲟⲟⲩⲛ . Ⲛⲓⲙ ⲅⲁⲣ ⲡⲉ ⲡⲣⲉϥϫⲓⲙⲟⲉⲓⲧ ϩⲏⲧⲉ ⲉϩⲟⲩⲛ ⲉⲡⲕⲁⲕⲉ . ⲟⲩⲏⲣ ⲛ̅ⲉⲓⲛⲉ ⲁⲡⲉⲬ̅ⲥ̅ ϫⲓⲧⲟⲩ ⲉⲧⲃⲏⲧⲉ ⲉϥϣⲟⲟⲡ ⲛ̅ⲛⲟⲩⲧⲉ ⲁⲩϭⲓⲛⲉ Ⲭⲣ̅ⲇ̅ , ⲙ̅ⲙⲟϥ ϩⲛ̅ⲛ̅ⲣⲱⲙⲉ ϩⲱⲥ ⲣⲱⲙⲉ . Ⲁϥⲃⲱⲕ ⲉⲡⲓⲧⲛ̅ ⲁⲉⲙⲛ̅ⲧⲉ ⲁϥⲃⲱⲗ ⲉⲃⲟⲗ ⲛ̅ⲛⲙ̅ⲙⲓⲥⲉ ⲙ̅ⲡⲙⲟⲩ . ⲁⲩϯⲛⲁⲁⲕⲉ ⲙ̅ⲙⲟⲟⲩ ⲕⲁⲧⲁⲑⲉ ⲛ̅ⲧⲁⲧⲉⲅⲣⲁⲫⲏ ⲙ̅ⲡⲛⲟⲩⲧⲉ ϫⲟⲟⲥ . ⲁⲩⲱ ⲁϥⲣ̅ⲥⲫⲣⲁⲅⲓⲍⲉ ⲙ̅ⲫϩⲏⲧ ϩⲣⲁⲓ ⲛ̅ϩⲏⲧϥ̅ . ⲁⲩⲱ ⲛⲉϥⲡⲓⲧⲉ ⲉⲧϫⲟⲟⲣ ⲁϥϩⲟϣϥⲟⲩ ⲉⲙⲁⲧⲉ . ⲁⲩⲱ ⲛ̅ⲇⲩⲛⲁⲙⲓⲥ ⲧⲏⲣⲟⲩ ⲛ̅ⲧⲁⲣⲟⲩⲛⲁⲩ ⲉⲣⲟϥ ⲁⲩⲡⲱⲧ . ϫⲉⲕⲁⲁⲥ ⲛ̅ⲧⲟⲕ ⲡⲧⲁⲗⲁⲓⲡⲟⲣⲟⲥ ⲉϥⲛⲁⲛ̅ⲧⲕ̅ ⲉϩⲣⲁⲓ ϩⲙ̅ⲡⲛⲟⲩⲛ ⲛϥ̅ⲙⲟⲩ ϩⲁⲣⲟⲕ ⲛ̅ⲥⲱⲧⲉ ⲙ̅ⲡⲉⲕⲛⲟⲃⲉ . ⲁϥⲛⲁϩⲙⲉⲕ ⲉⲧϭⲓϫ ⲉⲧϫⲟⲟⲣ ⲛ̅ⲉⲙⲛ̅ⲧⲉ . Ⲛ̅ⲧⲟⲕ ⲇⲉ ϩⲱⲱⲕ ⲙⲟⲅⲓⲥ ϯⲧⲉⲕⲡⲣⲟϩⲉⲣⲉⲥⲓⲥ ⲛⲁϥ ϩⲓ̅ⲧⲛ̅ⲟⲩⲓⲭⲛⲟⲥ . ϫⲉⲕⲁⲁⲥ ⲉϥⲛⲁϫⲓⲧⲕ̅ ⲉϩⲣⲁⲓ ϩⲓ̅ⲧⲛ̅ⲟⲩⲣⲁϣⲉ . Ⲧⲡⲣⲟϩⲉⲣⲉⲥⲓⲥ ⲇⲉ ⲡⲉ ⲡⲇⲱⲣⲟⲛ ⲙ̅ⲡⲉⲬ̅ⲥ̅ ⲉⲧⲉⲡⲑⲃ̅ⲃⲓⲟ ⲛ̅ϩⲏⲧ ⲡⲉ . Ⲑⲩⲥⲓⲁ ⲉⲧϣⲏⲡ ⲡⲉ ⲟⲩϩⲏⲧ ⲉϥⲧⲛ̅ⲛⲟⲉⲓⲧ . ⲉⲕϣⲁⲛⲑⲃ̅ⲃⲓⲟⲕ ⲉⲩⲛⲁϫⲉⲥⲧⲕ̅ ⲛ̅ϩⲟⲩⲟ̅ . ⲁⲩⲱ ⲉⲕϣⲁⲛϫⲁⲥⲧⲕ̅ ⲥⲉⲛⲁⲑⲃ̅ⲃⲓⲟⲕ ⲉⲙⲁⲧⲉ . Ⲡⲁϣⲏⲣⲉ ϩⲁⲣⲉϩ ⲉⲣⲟⲕ ⲉⲧⲡⲟⲛⲏⲣⲓⲁ . ⲁⲩⲱ ⲡⲉⲡ̅ⲛ̅ⲁ̅ ⲛ̅ⲧⲡⲟⲛⲏⲣⲓⲁ ⲙ̅ⲡⲣ̅ⲧⲣⲉϥⲛⲟϫⲕ̅ ⲉⲡⲓⲧⲛ̅ ⲉⲡⲛⲟⲩⲛ . ϥⲗⲟⲃⲉ ⲅⲁⲣ ⲁⲩⲱ ϥⲥⲁϣⲉ . ⲟⲩⲥⲧⲣ̅ⲧⲣ̅ ⲡⲉ . ⲁⲩⲱ ϥⲛⲟⲩϫⲉ ⲛ̅ⲟⲩⲟⲛ ⲛⲓⲙ ⲉⲡⲓⲧⲛ̅ ⲉⲩϩⲓ̅ⲉⲓⲧ ⲛ̅ⲧⲉⲡⲃⲟⲣⲃⲟⲣⲟⲥ . Ⲟⲩⲛⲟϭ ⲛ̅ϩⲱⲃ ⲉⲛⲁⲛⲟⲩϥ ⲡⲉ ⲉⲧⲙ̅ⲙⲣ̅ⲣⲉⲧⲡⲟⲣⲛⲓⲁ . ⲁⲩⲱ ⲉⲧⲙ̅ⲣ̅ⲡⲙⲉⲉⲩⲉ ⲛ̅ⲧⲧⲁⲗⲁⲓⲡⲱⲣⲟⲥ ⲣⲱ Ⲭⲣ̅ⲉ̅ , ⲧⲏⲣϥ̅ . Ⲁⲣ̅ⲡⲉⲥⲙⲉⲉⲩⲉ ⲅⲁⲣ ⲡⲙⲟⲩ ⲡⲉ . ⲛⲥ̅ⲣ̅ⲛⲟϥⲣⲉ ⲇⲉ ⲁⲛ ⲛ̅ⲣⲱⲙⲉ ⲛⲓⲙ ⲉϩⲉ ⲉϩⲣⲁⲓ ⲉⲡⲙⲟⲩ . Ⲟⲩⲯⲩⲭⲏ ⲅⲁⲣ ⲉⲁⲩϩⲉ ⲩ ⲉⲣⲟⲥ ϩⲙ̅ⲡⲙⲟⲩ ⲥⲛⲁϣⲱⲡⲉ ⲛ̅ⲁⲗⲟⲅⲟⲥ . Ⲛⲁⲛⲟⲩⲥ ⲅⲁⲣ ⲉⲧⲙ̅ⲱⲛϩ̅ ⲛ̅ϩⲟⲩⲟ̅ ⲉϫⲡⲉⲟⲩⲱⲛϩ̅ ⲛ̅ⲧⲃ̅ⲛⲏ . Ⲁⲣⲓⲧⲏⲣⲓ ⲙ̅ⲙⲟⲕ ⲙⲏⲡⲱⲥ ⲛⲅ̅ⲣⲱⲕϩ̅ ϩⲛ̅ⲛ̅ⲥⲟⲧⲉ ⲛ̅ⲧⲡⲟⲣⲛⲓⲁ . Ⲟⲩⲛ̅ϩⲁϩ ⲅⲁⲣ ⲛ̅ⲣⲉϥϫⲁⲗⲕ̅ ⲥⲟⲧⲉ ⲉⲩⲟ̅ ⲛⲁⲥ ⲛ̅ϩⲩⲡⲏⲣⲉⲧⲏⲥ . Ⲛⲁⲓ ⲉⲧⲕ̅ⲥⲟⲟⲩⲛ ⲁⲛ ⲙ̅ⲙⲟⲟⲩ ⲉⲩϣⲟⲟⲡ ⲛⲁⲕ ⲛ̅ϫⲁϫⲉ . Ⲱ̅ ⲡⲁϣⲏⲣⲉ ⲑⲃ̅ⲥⲱ ⲛⲁⲥ ⲛ̅ⲧⲡⲟⲣⲛⲓⲁ ⲕⲁⲁⲕ ⲁϩⲏⲟⲩ ⲙ̅ⲙⲟⲥ. Ⲛⲅ̅ϯ ϩⲓ̅ⲱⲱⲕ ⲛ̅ⲧϣⲧⲏⲛ ⲉⲧⲣⲁϩⲉ ⲉⲧⲡⲣ̅ⲣⲓⲱⲟⲩ ⲉⲛⲉⲥⲱⲕ ϩⲣⲁⲓ ⲛ̅ϩⲏⲧⲥ̅ . ⲉⲩⲛ̅ⲧⲁⲕ ⲇⲉ ⲙ̅ⲙⲁⲩ ⲛ̅ϯϩⲃ̅ⲥⲱ ⲁⲣⲓⲧⲏⲣⲓ ⲙ̅ⲙⲟⲥ ⲕⲁⲗⲱⲥ . Ⲃⲟⲗⲕ̅ ⲉⲃⲟⲗ ϩⲛ̅ⲙⲣ̅ⲣⲉ ⲛⲓⲙ ϫⲉⲕⲁⲁⲥ ⲉⲕⲛⲁϫⲡⲟ ⲛⲁⲕ ⲛ̅ⲟⲩⲙⲛ̅ⲧⲉⲗⲉⲩⲑⲉⲣⲟⲥ . ⲉⲕϣⲁⲛⲛⲟⲩϫⲉ ⲉⲃⲟⲗ ⲙ̅ⲙⲟⲕ ⲛ̅ⲧⲉⲡⲓⲑⲩⲙⲓⲁ ⲉⲧⲉⲛⲁϣⲉⲛⲉⲥⲕⲟⲧⲥ̅ . ⲁⲩⲱ ⲛⲅ̅ⲃⲟⲗⲉⲕ ⲉⲃⲟⲗ ϩⲛ̅ⲛⲟⲃⲉ ⲛ̅ⲑⲏⲇⲟⲛⲏ . Ⲥⲱⲧⲙ̅ ⲧⲯⲩⲭⲏ ⲉⲧⲁⲥⲩⲙⲃⲟⲩⲗⲉⲓⲁ . ⲙ̅ⲡⲣ̅ϣⲱⲡⲉ ⲛ̅ⲃⲏⲃ ⲛ̅ⲃⲁϣⲟⲣ ⲙⲛ̅ⲛ̅ϩⲟϥ . ⲟⲩⲇⲉ ⲛ̅ϣⲕⲟⲗ ⲛ̅ⲛ̅ⲇⲣⲁⲕⲱⲛ ⲙⲛ̅ⲛ̅ϩⲃⲱ . ⲟⲩⲇⲉ ⲙ̅ⲙⲁ ⲛ̅ϣⲱⲡⲉ ⲛ̅ⲛⲙ̅ⲙⲟⲩⲉⲓ . ⲏ ⲙⲁ ⲙ̅ⲡⲱⲧ ⲛ̅ⲛ̅ϩⲟϥ ⲛ̅ⲥⲓⲧ . Ⲉⲣϣⲁⲛⲛⲁⲓ ϣⲱⲡⲉ ⲛⲉ ⲱ ⲧⲯⲩⲭⲏ ⲟⲩ ⲡⲉⲧⲉⲛⲁⲁⲁϥ . Ⲛⲁⲓ ⲅⲁⲣ ⲛⲉ ⲛ̅ⲇⲩⲛⲁⲙⲓⲥ Ⲭⲣ̅Ⲋ, ⲙ̅ⲡⲁⲛⲧⲓⲕⲓⲙⲉⲛⲟⲥ ⲛ̅ⲕⲁ ⲛⲓⲙ ⲉϥⲙⲟⲟⲩⲧ ⲉⲩⲛ̅ⲛⲏⲟⲩ ⲉϩⲟⲩⲛ ⲉⲣⲟ ϩⲓⲓⲧⲛ̅ⲡⲁⲓ . ⲧⲟⲩϩⲣⲉ ⲅⲁⲣ ⲧⲉ ⲛ̅ⲕⲁ ⲛⲓⲙ ⲉϥⲙⲟⲟⲩⲧ ϩⲓ̅ⲁⲕⲁⲑⲁⲣⲥⲓⲁ ⲛⲓⲙ . ⲉⲣⲉⲛⲁⲓ ⲅⲁⲣ ϣⲟⲟⲡ ⲛ̅ϩⲣⲁⲓ ⲛ̅ϩⲏⲧⲉ ⲛⲓⲙ ⲉⲧⲟⲛϩ ⲡⲉ ⲉⲧⲛ̅ⲛⲏⲩ ⲉϩⲟⲩⲛ ϣⲁⲣⲟ . ⲥⲉⲛⲁϫⲓⲧⲉ ⲛ̅ⲃⲟⲧⲉ ⲛ̅ϭⲓⲛ̅ⲁⲅⲅⲉⲗⲟⲥ ⲉⲧⲟⲛϩ̅ . Ⲛⲉⲣⲉϣⲟⲟⲡ ⲡⲉ ⲛ̅ⲣ̅ⲡⲉ ⲛ̅ⲧⲁⲫⲟⲥ ⲛ̅ⲧⲉϣⲱⲡⲉ ⲛ̅ⲣ̅ⲡⲉ . ϫⲉⲕⲁⲁⲥ ⲉⲡⲥⲟⲟⲩⲧⲛ̅ ⲙⲛ̅ⲧⲙⲛ̅ⲧⲛⲟⲩⲧⲉ ⲛⲁϭⲱ ⲛ̅ϩⲏⲧⲉ . Ⲡⲟⲩⲟⲉⲓⲛ ⲉⲧⲛ̅ϩⲏⲧⲉ ϫⲉⲣⲱϥ ⲙ̅ⲡⲣ̅ϫⲛⲁϥ . Ⲙⲁⲣⲉⲗⲁⲁⲩ ⲅⲁⲣ ϫⲉⲣⲉϩⲏⲃⲉⲥ ⲉⲑⲣⲓⲟⲛ ⲟⲩⲧⲉ ⲉⲛⲉⲩϣⲏⲣⲉ . Ⲛⲉⲕⲣⲉϥⲙⲟⲟⲩⲧ ⲛ̅ⲧⲁⲩⲙⲟⲩ ⲧⲱⲱⲛ ⲙ̅ⲙⲟⲟⲩ . ⲛⲉⲩⲟⲛϩ̅ ⲅⲁⲣ ⲛ̅ⲧⲁⲩⲙⲟⲩ ⲉⲧⲃⲏⲏⲧⲕ̅ . Ⲙⲁϯ ⲛⲁⲩ ⲙ̅ⲡⲱⲛϩ̅ . Ⲡⲁⲗⲓⲛ ⲥⲉⲛⲁⲱⲛϩ̅ . Ⲡϣⲏⲛ ⲅⲁⲣ ⲙ̅ⲡⲱⲛϩ̅ ⲡⲉ ⲡⲉⲬ̅ⲥ̅ ⲛ̅ⲧⲟϥ ⲡⲉ ⲧⲥⲟⲫⲓⲁ . Ⲛ̅ⲧⲟϥ ⲅⲁⲣ ⲡⲉ ⲧⲥⲟⲫⲓⲁ ⲛ̅ⲧⲟϥ ⲟⲛ ⲡⲉ ⲡⲗⲟⲅⲟⲥ . Ⲛ̅ⲧⲟϥ ⲡⲉ ⲡⲱⲛϩ̅ ⲁⲩⲱ ⲧⲇⲩⲛⲁⲙⲓⲥ . ⲁⲩⲱ ⲡⲣⲟ . ⲛ̅ⲧⲟϥ ⲡⲉ ⲡⲟⲩⲟⲉⲓⲛ ⲁⲩⲱ ⲡⲁⲅⲅⲉⲗⲟⲥ ⲁⲩⲱ ⲡϣⲱⲥ ⲉⲧⲛⲁⲛⲟⲩϥ . Ⲧⲁⲁⲕ ⲛ̅ⲧⲟⲟⲧϥ̅ ⲙ̅ⲡⲁⲓ ⲛ̅ⲧⲁϥϣⲱⲡⲉ ⲙ̅ⲡⲧⲏⲣϥ̅ ⲉⲧⲃⲏⲏⲧⲕ̅ . Ⲧⲱϩⲙ̅ ⲉϩⲟⲩⲛ ⲉⲣⲟⲕ ⲟⲩⲁⲁⲕ ⲛ̅ⲑⲉ ⲛ̅ⲛⲓⲣⲟ . ⲁⲩⲱ ⲛⲅ̅ⲙⲟⲟϣⲉ ϩⲣⲁⲓ ⲛ̅ϩⲏⲧⲕ̅ ϩⲱⲥ ϩⲓⲏ ⲉϥⲥⲟⲩⲧⲱⲛ . Ⲉⲕϣⲁⲛⲙⲟⲟϣⲉ ⲅⲁⲣ ϩⲓ̅ⲧⲉϩⲓⲏ ⲙ̅ⲙⲛ̅ϣϭⲟⲙ ⲛⲅ̅ⲣ̅ⲡⲗⲁⲛⲁ . Ⲭⲣ̅ⲍ̅ , Ⲁⲩⲱ ⲉⲕϣⲁⲛⲧⲱϩⲙ̅ ϩⲛ̅ⲧⲁⲓ ⲉⲕⲧⲱϩⲙ̅ ⲉϩⲟⲩⲛ ⲉϩⲉⲛⲉϩⲱⲣ ⲉⲩϩⲏⲡ . ⲉϥϣⲟⲟⲡ ⲅⲁⲣ ⲛ̅ⲥⲟⲫⲓⲁ ϥⲉⲓⲣⲉ ⲙ̅ⲡⲁⲑⲏⲧ ⲛ̅ⲥⲟⲫⲟⲥ . ⲉⲥϣⲟⲟⲡ ⲛ̅ⲟⲩⲙⲛ̅ⲧⲉⲣⲟ ⲉⲥⲟⲩⲁⲁⲃ . ⲁⲩⲱ ⲛ̅ⲥⲧⲟⲗⲏ ⲉⲥⲡⲣ̅ⲣⲓⲱⲟⲩ . Ⲟⲩϩⲁϩ ⲅⲁⲣ ⲛ̅ⲛⲟⲩⲃ ⲡⲉ ⲉϥϯ ⲛⲁⲕ ⲛ̅ⲟⲩⲛⲟϭ ⲛ̅ⲉⲟⲟⲩ . Ⲧⲥⲟⲫⲓⲁ ⲙ̅ⲡⲛⲛⲟⲩⲧⲉ ⲉⲧⲃⲏⲏⲧⲕ̅ ⲁⲥϣⲱⲡⲉ ⲛ̅ⲟⲩⲧⲩⲡⲟⲥ ⲛ̅ⲥⲉϭⲉ ϫⲉⲕⲁⲁⲥ ⲛ̅ⲧⲟⲕ ⲡⲁⲑⲏⲧ ⲛ̅ⲥⲉϫⲓⲧⲕ̅ ⲉϩⲣⲁⲓ ⲛⲥ̅ⲁⲁⲕ ⲛ̅ⲣⲙ̅ⲛ̅ϩⲏⲧ . Ⲁⲩⲱ ⲡⲱⲛϩ̅ ⲁϥⲙⲟⲩ ⲉⲧⲃⲏⲏⲧⲕ̅ ϩⲟⲡⲟⲧⲉ ⲟⲩⲁⲧϭⲟⲙ ⲡⲉ . ϫⲉⲕⲁⲁⲥ ϩⲓⲧⲙ̅ⲡⲉϥⲙⲟⲩ ⲛ̅ⲧⲟⲕ ⲡⲉⲣⲙⲟⲩ ⲉϥⲛⲁϯ ⲛⲁⲕ ⲙ̅ⲡⲱⲛϩ̅ . Ⲧⲁⲁⲕ ⲛ̅ⲧⲟⲟⲧϥ̅ ⲙ̅ⲡⲗⲟⲅⲟⲥ ⲛⲅ̅ⲥⲁϩⲱⲕ ⲉⲃⲟⲗ ⲛ̅ⲧⲙⲛ̅ⲧⲧⲃ̅ⲛⲏ . ϥⲟⲩⲟⲛϩ ⲅⲁⲣ ⲉⲃⲟⲗ ⲛ̅ϭⲓⲡⲧⲃ̅ⲛⲏ . ⲡⲁⲓ ⲉⲧⲉⲙ̅ⲙⲛ̅ⲧϥ̅ⲗⲟⲅⲟⲥ ⲙ̅ⲙⲁⲩ . Ⲟⲩⲛ̅ϩⲁϩ ⲅⲁⲣ ⲙⲉⲉⲩⲉ ϫⲉ ⲟⲩⲛ̅ⲧⲟⲩⲡⲗⲟⲅⲟⲥ ⲙ̅ⲙⲁⲩ . ⲁⲗⲗⲁ ⲉⲕϣⲁⲛⲙⲟⲩϩ ⲛ̅ⲥⲱⲟⲩ ⲡⲟⲩϣⲁϫⲉ ⲟⲩⲙⲛ̅ⲧⲧⲃ̅ⲛⲏ ⲡⲉ . ϯⲟⲩⲣⲟⲧ ⲛⲁⲕ ⲉⲃⲟⲗ ϩⲛ̅ⲧⲃⲱ ⲛ̅ⲛⲉⲗⲟⲟⲗⲉ ⲙ̅ⲙⲉ ⲙ̅ⲡⲉⲬ̅ⲥ̅ . Ⲧⲥⲓⲟⲕ ⲉⲃⲟⲗ ϩⲙ̅ⲡⲏⲣⲡ̅ ⲛ̅ⲁⲗⲏⲑⲓⲛⲟⲛ . ⲡⲁⲓ ⲉⲧⲉⲙ̅ⲙⲛ̅ϯϩⲉ ϣⲟⲟⲡ ϩⲣⲁⲓ ⲛ̅ϩⲏⲧϥ̅ ⲟⲩⲇⲉ ⲙ̅ⲙⲛ̅ⲥⲱⲣⲙ̅ . ⲟⲩⲛ̅ⲧⲁϥ ⲅⲁⲣ ⲙ̅ⲙⲁⲩ ⲛ̅ⲑⲁⲏ ⲙ̅ⲡⲥⲱ ⲉϣⲁϥϣⲱⲡⲉ ϩⲣⲁⲓ ⲛ̅ϩⲏⲧϥ̅ ⲉϯⲟⲩⲣⲟⲧ ⲛ̅ϩⲏⲧ ⲛ̅ⲧⲯⲩⲭⲏ ⲙⲛ̅ⲡⲛⲟⲩⲥ ϩⲙ̅ⲡⲉⲡ̅ⲛ̅ⲁ̅ ⲙ̅ⲡⲛⲟⲩⲧⲉ . Ⲭⲣ̅ⲏ̅ , ϣⲟⲣⲡ̅ ⲇⲉ ⲙⲟⲛⲉ ⲛ̅ⲛⲉⲕⲗⲟⲅⲓⲥⲙⲟⲥ . ϩⲁⲧⲉϩⲏ ⲉⲙⲡⲁⲧⲕ̅ⲥⲱ ⲉⲃⲟⲗ
ⲛ̅ϩⲏⲧϥ̅ . Ⲙ̅ⲡⲣ̅ⲕⲟⲛⲥⲕ̅ ϩⲛ̅ⲧⲥⲏϥⲉ ⲙ̅ⲡⲛⲟⲃⲉ . Ⲙ̅ⲡⲣ̅ⲣⲟⲕϩⲕ̅ ⲱ̅ ⲧⲁⲗⲁⲓⲡⲱⲣⲟⲥ ϩⲙ̅ⲡⲕⲱϩⲧ̅ ⲛ̅ⲑⲏⲇⲟⲛⲏ . Ⲙ̅ⲡⲣ̅ⲧⲁⲁⲕ ⲛ̅ⲧⲟⲟⲧⲟⲩ ⲛ̅ⲛⲓⲃⲁⲣⲃⲁⲣⲟⲥ ⲛ̅ⲑⲉ ⲛ̅ⲛⲓⲁⲓⲭⲙⲁⲗⲱⲧⲟⲥ . ⲟⲩⲇⲉ ⲛ̅ⲧⲟⲟⲧⲟⲩ ⲛ̅ⲛⲓⲑⲏⲣⲓⲟⲛ ⲛ̅ⲁⲅⲣⲓⲟⲛ ⲉⲩⲟⲩⲱϣ ⲉⲣ̅ⲕⲁⲧⲁⲡⲁⲧⲓ ⲙ̅ⲙⲟⲕ . ⲉⲩϣⲟⲟⲡ ⲅⲁⲣ ⲛ̅ⲑⲉ ⲛ̅ⲛⲓⲙⲟⲩⲉⲓ ⲉⲧϩⲙ̅ϩⲙ̅ ⲉⲙⲁⲧⲉ . Ⲙ̅ⲡⲣ̅ϣⲱⲡⲉ ⲉⲕⲙⲟⲟⲩⲧ ⲙⲏⲡⲟⲧⲉ ⲛ̅ⲥⲉⲣ̅ⲕⲁⲧⲁⲡⲁⲧⲉⲓ ⲙ̅ⲙⲟⲕ . ⲉⲕⲉⲣ̅ⲣⲱⲙⲉ ⲟⲩⲛ̅ϭⲟⲙ ⲙ̅ⲙⲟⲕ ϩⲙ̅ⲡⲗⲟⲅⲓⲥⲙⲟⲥ ⲛⲅ̅ϫⲣⲟ ⲉⲛⲁⲓ . Ⲡⲣⲱⲙⲉ ⲇⲉ ⲉⲧⲣ̅ⲗⲁⲁⲩ ⲁⲛ ⲉϥⲙ̅ⲡϣⲁ ⲙ̅ⲡⲗⲟⲅⲓⲕⲟⲥ ⲛ̅ⲣⲱⲙⲉ ⲁⲛ . Ⲡⲗⲟⲅⲓⲕⲟⲥ ⲛ̅ⲣⲱⲙⲉ ⲡⲉⲧⲣ̅ϩⲟⲧⲉ ϩⲏⲧϥ̅ ⲙ̅ⲡⲛⲟⲩⲧⲉ . ⲡⲉⲧⲣ̅ϩⲟⲧⲉ ⲇⲉ ϩⲏⲧϥ̅ ⲙ̅ⲡⲛⲟⲩⲧⲉ ⲙⲁϥⲣ̅ⲗⲁⲁⲩ ⲛ̅ⲧⲟⲗⲙⲏⲣⲓⲁ . Ⲡⲉⲧⲣ̅ⲧⲏⲣⲓ ⲇⲉ ⲙ̅ⲙⲟϥ ⲉⲧⲙ̅ⲣ̅ⲗⲁⲁⲩ ⲛ̅ⲧⲟⲗⲙⲏⲣⲓⲁ . ⲡⲁⲓ ⲡⲉⲧⲁⲣⲉϩ ⲉⲡⲉϥϩⲏⲅⲉⲙⲟⲛⲓⲕⲟⲛ ⲛ̅ⲧⲟϥ ⲉⲩⲣⲱⲙⲉ ⲡⲉ ⲉϥϣⲟⲟⲡ ϩⲓ̅ϫⲙ̅ⲡⲕⲁϩ ⲉϥⲧⲟⲛⲧⲛ̅ ⲙ̅ⲙⲟϥ ⲉⲡⲛⲟⲩⲧⲉ . Ⲡⲉⲧⲧⲟⲛⲧⲛ̅ ⲇⲉ ⲙ̅ⲙⲟϥ ⲉⲡⲛⲟⲩⲧⲉ ⲡⲉⲧⲣ̅ⲗⲁⲁⲩ ⲁⲛ ⲉϥⲁⲧⲙ̅ⲡϣⲁ ⲙ̅ⲡⲛⲟⲩⲧⲉ . ⲕⲁⲧⲁⲧⲉⲥⲙⲏ ⲙ̅ⲡⲁⲩⲗⲟⲥ ⲡⲁⲓ ⲛ̅ⲧⲁϥϣⲱⲡⲉ ⲉϥⲧⲛ̅ⲧⲱⲛ ⲉⲡⲉⲬ̅ⲥ̅. Ⲛⲓⲙ ⲅⲁⲣ ⲡⲉⲧⲣ̅ⲥⲉⲃⲉⲥⲑⲁⲓ ⲉⲡⲛⲟⲩⲧⲉ . ⲉϥⲟⲩⲱϣ ⲉⲓⲣⲉ ⲁⲛ ⲛ̅ⲛⲉⲧⲣ̅ⲁⲛⲁϥ ⲙ̅ⲡⲛⲟⲩⲧⲉ . Ⲧⲙⲛ̅ⲧⲣⲉϥϣⲙ̅ϣⲉⲛⲟⲩⲧⲉ ⲅⲁⲣ ⲧⲉ ⲧⲉⲧϣⲟⲟⲡ Ⲭⲣ̅ⲑ̅ , ⲉⲃⲟⲗ ϩⲙ̅ⲫϩⲏⲧ . ⲧⲙⲛ̅ⲧⲣⲉϥϣⲙ̅ϣⲉⲛⲟⲩⲧⲉ ⲇⲉ ⲉⲃⲟⲗ ϩⲙ̅ⲫⲏⲧ ⲧⲉ ⲯⲩⲭⲏ ⲛⲓⲙ ⲉⲧϩⲏⲛ ⲉⲡⲛⲟⲩⲧⲉ . ⲧⲯⲩⲭⲏ ⲇⲉ ⲉⲧⲟ ⲛ̅ⲣⲙ̅ϩⲛ̅ⲏⲉⲓ ⲉⲡⲛⲟⲩⲧⲉ ⲧⲉⲧⲟⲩϩⲁⲣⲉϩ ⲉⲣⲟⲥ ⲉⲥⲟⲩⲁⲁⲃ . ⲧⲯⲩⲭⲏ ⲇⲉ ⲉⲧⲉⲣⲉⲡⲉⲬ̅ⲥ̅ ⲧⲟ ϩⲓⲱⲱⲥ ⲛ̅ⲧⲟⲥ ⲧⲉ ⲧⲉⲧⲟⲩⲁⲁⲃ . Ⲁⲩⲱ ⲙ̅ⲙⲛ̅ϣϭⲟⲙ ⲉⲧⲣⲉⲥⲣ̅ⲛⲟⲃⲉ . Ⲡⲙⲁ ⲇⲉ ⲉⲧⲉⲣⲉⲡⲉⲬ̅ⲥ̅ ⲙ̅ⲙⲁⲩ ϣⲁⲣⲉⲡⲛⲟⲃⲉ ⲟⲩⲱⲥϥ̅ . ⲘⲁⲣⲉⲡⲉⲬ̅ⲥ̅ ⲉⲓ ⲉϩⲟⲩⲛ ⲉⲡⲉⲕⲕⲟⲥⲙⲟⲥ ⲟⲩⲁⲁϥ . ⲁⲩⲱ ⲙⲁⲣⲉϥⲟⲩⲱⲥϥ̅ ⲛ̅ⲇⲩⲛⲁⲙⲓⲥ ⲛⲓⲙ ⲉⲁⲩⲉ̅ⲓ ⲉϫⲱⲕ . Ⲙⲁⲣⲉϥⲉⲓ ⲉϩⲟⲩⲛ ⲉⲡⲣ̅ⲡⲉ ⲉⲧⲛ̅ϩⲏⲧⲕ̅ . ϫⲉⲕⲁⲁⲥ ⲉϥⲉⲛⲟⲩϫⲉ ⲉⲃⲟⲗ ⲛ̅ⲛⲉϣⲱⲧ ⲛⲓⲙ . Ⲙⲁⲣⲉϥϩⲙⲟⲟⲥ ϩⲙ̅ⲡⲉⲣ̅ⲡⲉ ⲉⲧϣⲟⲟⲡ ϩⲣⲁⲓ ⲛ̅ϩⲏⲧⲕ̅ ⲁⲩⲱ ⲛⲅ̅ϣⲱⲡⲉ . ⲛⲁϥ ⲛ̅ⲟⲩⲏⲏⲃ ⲙⲛ̅ⲟⲩⲗⲉⲩⲉⲓⲧⲏⲥ ⲉⲕⲃⲏⲕ ⲉϩⲟⲩⲛ ϩⲛ̅ⲟⲩⲧⲃ̅ⲃⲟ . Ⲛⲁⲓⲁⲧⲉ ⲧⲯⲩⲭⲏ ⲉⲣⲉϣⲁⲛϭⲙ̅ⲡⲁⲓ ϩⲙ̅ⲡⲉⲣ̅ⲡⲉ . Ⲛⲁⲓⲁⲧⲉ ⲇⲉ ⲛ̅ϩⲟⲩⲟ ⲉⲣⲉϣⲁⲉⲓⲣⲉ ⲙ̅ⲡⲉϥϣⲙ̅ϣⲉ . Ⲡⲉⲧⲛⲁⲥⲱⲱϥ ⲇⲉ ⲙ̅ⲡⲉⲣⲡⲉ ⲙ̅ⲡⲛⲟⲩⲧⲉ ⲡⲁⲓ ⲡⲛⲟⲩⲧⲉ ⲛⲁⲧⲁⲕⲟϥ . Ⲕⲟⲩⲟⲛϩ̅ ⲅⲁⲣ ⲉⲃⲟⲗ ⲱ̅ ⲡⲣⲱⲙⲉ ⲉⲕϣⲁⲛⲛⲟⲩϫⲉ ⲙ̅ⲡⲁⲓ ⲉⲃⲟⲗ ϩⲙ̅ⲡⲉⲕⲣ̅ⲡⲉ . Ϩⲟⲧⲁⲛ ⲅⲁⲣ ⲉⲣϣⲁⲛⲧⲙ̅ⲛ̅ϫⲁϫⲉ ⲛⲁⲩ ⲉⲡⲉⲬ̅ⲥ̅ ϩⲣⲁⲓ ⲛ̅ϩⲏⲧⲕ̅ . ⲧⲟⲧⲉ ⲥⲉⲛ̅ⲛⲏⲩ ⲉϩⲟⲩⲛ ⲉⲣⲟⲕ ⲉⲩϩⲏⲕ ⲉⲧⲣⲉⲩⲧⲛ̅ⲛⲟ ⲙ̅ⲙⲟⲕ . Ⲱ̅ ⲡⲁϣⲏⲣⲉ ⲁⲓϩⲱⲛ ⲉⲧⲟⲟⲧⲕ̅ ⲉⲧⲃⲉⲛⲁⲓ ⲛ̅ϩⲁϩ ⲛ̅ⲥⲟⲡ . Ⲭⲣ̅ⲓ̅ , ϫⲉⲕⲁⲁⲥ ⲉⲕⲛⲁϩⲁⲣⲉϩ ⲉⲧⲉⲕⲯⲩⲭⲏ ⲛ̅ⲛⲁⲩ ⲛⲓⲙ . Ⲛ̅ⲧⲟⲕ ⲁⲛ ⲡⲉⲧⲛⲁⲛⲟϫϥ̅ ⲉⲃⲟⲗ ⲙ̅ⲙⲟⲕ . ⲁⲗⲗⲁ ⲛ̅ⲧⲟϥ ⲡⲉⲧⲛⲁⲛⲟϫⲕ̅ . ⲛ̅ⲧⲟⲟⲕ ⲅⲁⲣ ⲉⲕϣⲁⲛⲡⲱⲧ ⲉⲃⲟⲗ ⲙ̅ⲙⲟϥ ⲕⲛⲁϩⲉ ⲉϩⲣⲁⲓ ⲉⲩⲛⲟϭ ⲛ̅ⲛⲟⲃⲉ . Ⲛ̅ⲧⲟⲕ ⲟⲛ ⲉⲕϣⲁⲛⲡⲱⲧ ⲛ̅ⲧⲟⲟⲧϥ̅ ⲕⲛⲁϣⲱⲡⲉ ⲛ̅ϩⲣⲉ ⲛ̅ⲛⲉⲕϫⲁϫⲉ . Ϫⲟⲟⲩⲧ ⲅⲁⲣ ⲛⲓⲙ ϣⲁⲩⲡⲱⲧ ⲛ̅ⲧⲙ̅ⲡⲟⲩϫⲟⲉⲓⲥ . ⲡϫⲟⲟⲩⲧ ⲇⲉ ϩⲛ̅ⲧⲁⲣⲉⲧⲏ ⲙⲛ̅ⲧⲥⲟⲫⲓⲁ ϣⲁϥⲡⲱⲧ ⲛ̅ⲧⲙ̅ⲡⲉⲬ̅ⲥ̅ . Ⲣⲱⲙⲉ ⲅⲁⲣ ⲛⲓⲙ ⲉϣⲁϥⲟⲩⲱⲱⲧ ϣⲁϥϩⲉ ⲉϩⲣⲁⲓ ⲉⲛϭⲓϫ ⲛ̅ⲛⲉⲑⲏⲣⲓⲟⲛ . Ⲛⲓⲙ ⲡⲉ ⲡⲉⲬ̅ⲥ̅ ⲥⲟⲩϣⲛϥ̅ ⲁⲩⲱ ⲛⲅ̅ϫⲡⲟϥ ⲛⲁⲕ ⲛ̅ϣⲃⲏⲣ . Ⲡⲁⲓ ⲅⲁⲣ ⲡⲉ ⲡⲉϣⲃⲏⲣ ⲉⲧⲛ̅ϩⲟⲧ . Ⲛ̅ⲧⲟϥ ⲟⲛ ⲡⲉ ⲡⲛⲟⲩⲧⲉ ⲁⲩⲱ ⲡⲥⲁϩ . ⲡⲁⲓ ⲉⲩⲛⲟⲩⲧⲉ ⲡⲉ ⲁϥϣⲱⲡⲉ ⲛ̅ⲣⲱⲙⲉ ⲉⲧⲃⲏⲏⲧⲕ̅ . Ⲡⲁⲓ ⲡⲉ ⲛ̅ⲧⲁϥⲃⲱⲗ ⲉⲃⲟⲗ ⲛ̅ⲛⲙ̅ⲙⲟⲭⲗⲟⲥ ⲛ̅ⲃⲁⲛⲓⲡⲉ ⲛ̅ⲁⲙⲛ̅ⲧⲉ ⲁⲩⲱ ⲛ̅ⲕⲗ̅ ⲛ̅ϩⲟⲙⲉⲧ . Ⲡⲁⲓ ⲡⲉ ⲛ̅ⲧⲁϥϩ̅ⲓⲧⲟⲟⲧϥ̅ ⲁϥⲧⲁⲩⲟ ⲉⲡⲉⲥⲏⲧ ⲛ̅ⲧⲩⲣⲁⲛⲛⲟⲥ ⲛⲓⲙ ⲉⲧϫⲟⲥⲉ ⲛ̅ϩⲏⲧ . ⲡⲉⲛⲧⲁϥⲃⲱⲗ ⲉⲃⲟⲗ ⲛ̅ⲧⲟⲟⲧϥ̅ . ⲛ̅ⲙ̅ⲙⲣ̅ⲣⲉ ⲉⲛⲉϥⲁⲙⲁϩⲧⲉ ⲙ̅ⲙⲟⲟⲩ . Ⲁϥⲉⲓⲛⲉ ⲉϩⲣⲁⲓ ⲛ̅ⲛ̅ϩⲏⲕⲉ ϩⲙ̅ⲡⲛⲟⲩⲛ ⲁⲩⲱ ⲛⲉⲧⲙⲟⲕϩ̅ ⲛ̅ϩⲏⲧ ϩⲛ̅ⲉⲙⲛ̅ⲧⲉ . ⲡⲉⲛⲧⲁϥⲑⲃ̅ⲃⲓⲟ ⲛ̅ⲛ̅ⲇⲩⲛⲁⲙⲓⲥ ⲉⲧϫⲟⲥⲉ ⲛ̅ϩⲏⲧ . ⲡⲉⲛⲧⲁϥϯϣⲓⲡⲉ ⲙ̅ⲡϫⲁⲥⲓϩⲏⲧ ϩⲓ̅ⲧⲛ̅ⲡⲑⲃ̅ⲃⲓⲟ . ⲡⲉⲛⲧⲁϥⲧⲁⲩⲟ ⲉⲡⲉⲥⲏⲧ ⲙ̅ⲡϫⲱⲱⲣⲉ . ⲁⲩⲱ ⲡⲣⲉϥⲃⲁⲃⲉⲣⲱⲙⲉ ϩⲓⲧⲛ̅ⲧⲙⲛ̅ⲧϭⲱⲃ . ⲡⲉⲛⲧⲁϥϣⲱⲥ ⲙ̅ⲡⲉⲧⲟⲩ Ⲭⲣ̅ⲓ̅ⲁ̅ , ⲙⲉⲉⲩⲉ ⲉⲣⲟϥ ϫⲉ ⲟⲩⲧⲁⲉⲓⲟ ⲡⲉ . ϩⲣⲁⲓ ϩⲙ̅ⲡⲉϥϣⲱⲥ . ϫⲉⲕⲁⲁⲥ ⲉⲣⲉⲡⲑⲃ̅ⲃⲓⲟ ⲉⲧⲃⲉⲡⲛⲟⲩⲧⲉ ⲛⲁϫⲓⲥⲉ ⲉⲙⲁⲧⲉ ⲡⲉⲛⲧⲁϥϭⲱⲗⲉ ⲙ̅ⲡⲣⲱⲙⲉ . Ⲁⲩⲱ ⲡⲛⲟⲩⲧⲉ ⲡⲉ ⲡⲑⲉⲓⲟⲥ ⲗⲟⲅⲟⲥ . ⲡⲉⲧϥⲓ ⲉϩⲣⲁⲓ ϩⲁⲡⲣⲱⲙⲉ ⲛ̅ⲟⲩⲟⲉⲓϣ ⲛⲓⲙ . ⲁⲩⲱ ⲁϥⲟⲩⲱϣ ⲁⲉⲓⲣⲉ ⲙ̅ⲡⲑⲃ̅ⲃⲓⲟ ϩⲙ̅ⲡⲉⲧϫⲟⲥⲉ . ⲡⲉⲛⲧⲁϥϫⲓⲥⲉ ⲙ̅ⲡⲣⲱⲙⲉ ⲁϥϣⲱⲡⲉ ⲉϥⲧⲛ̅ⲧⲱⲛ ⲉⲡⲛⲟⲩⲧⲉ . ϫⲉⲕⲁⲁⲥ ⲁⲛ ⲉϥⲛⲁⲉⲓⲛⲉ ⲉⲡⲉⲥⲏⲧ ⲙ̅ⲡⲛⲟⲩⲧⲉ ϣⲁⲡⲣⲱⲙⲉ . ⲁⲗⲗⲁ ⲉⲧⲣⲉⲡⲣⲱⲙⲉ ϣⲱⲡⲉ ⲉϥⲧⲛ̅ⲧⲱⲛ ⲉⲡⲛⲟⲩⲧⲉ . Ⲱ̅ ϯⲛⲟϭ ⲙ̅ⲙⲛ̅ⲧⲭ̅ⲥ̅ ⲛ̅ⲧⲉⲡⲛⲟⲩⲧⲉ . Ⲱ̅ ⲡⲉⲬ̅ⲥ̅ ⲡⲣ̅ⲣⲟ ⲡⲉⲛⲧⲁϥⲟⲩⲱⲛϩ̅ ⲉⲃⲟⲗ ⲛ̅ⲛ̅ⲣⲱⲙⲉ ⲛ̅ⲧⲛⲟϭ ⲙ̅ⲙⲛ̅ⲧⲛⲟⲩⲧⲉ . ⲡⲣ̅ⲣⲟ ⲛ̅ⲁⲣⲉⲧⲏ ⲛⲓⲙ . ⲁⲩⲱ ⲡⲣ̅ⲣⲟ ⲙ̅ⲡⲱⲛϩ̅ . ⲡⲣ̅ⲣⲟ ⲛ̅ⲛⲉⲱⲛ ⲁⲩⲱ ⲡⲛⲟϭ ⲛ̅ⲛⲙ̅ⲡⲏⲩⲉ . ⲥⲱⲧⲙ̅ ⲉⲛⲁϣⲁϫⲉ ⲁⲩⲱ ⲛⲅ̅ⲕⲱ ⲉⲃⲟⲗ ⲛⲁⲓ . Ⲡⲁⲗⲓⲛ ⲁϥⲟⲩⲱⲛϩ̅ ⲉⲃⲟⲗ ⲛ̅ⲟⲩⲛⲟϭ ⲛ̅ⲥⲡⲟⲩⲇⲏ ⲙ̅ⲙⲛ̅ⲧⲛⲟⲩⲧⲉ . ⲉϥⲧⲱⲛ ⲥⲟⲫⲟⲥ ⲏ ⲇⲩⲛⲁⲧⲟⲥ ⲛ̅ⲣⲙ̅ⲛ̅ϩⲏⲧ ⲛ̅ⲣⲱⲙⲉ . ⲏ ⲟⲩⲣⲱⲙⲉ ⲉⲛⲁϣⲉⲡⲉϥⲕⲟⲧⲥ̅ ⲉϥⲥⲟⲟⲩⲛ ⲛ̅ⲧⲥⲟⲫⲓⲁ . Ⲙⲁⲣⲉϥϫⲱ ⲛ̅ⲧⲥⲟⲫⲓⲁ ⲙⲁⲣⲉϥⲧⲁⲩⲟ ⲛ̅ⲟⲩⲛⲟϭ ⲛ̅ϣⲟⲩϣⲟⲩ . Ⲁⲣⲱⲙⲉ ⲅⲁⲣ ⲛⲓⲙ ⲣ̅ⲥⲟϭ ⲡⲉϫⲁϥ ⲉⲃⲟⲗ ϩⲙ̅ⲡⲉϥⲥⲟⲟⲩⲛ . Ⲁϥⲡⲱϣⲥ̅ ⲅⲁⲣ ⲛ̅ⲛ̅ϣⲟϫⲛⲉ ⲛ̅ⲛⲓⲥⲁ ⲛⲕⲟⲧⲥ̅ . ⲁⲩⲱ ⲁϥⲧⲁϩⲟ ⲛ̅ⲛ̅ⲥⲁⲃⲉ ϩⲛ̅ⲧⲉⲩⲙⲛ̅ⲧⲣⲙ̅ⲛ̅ϩⲏⲧ . Ⲛⲓⲙ ⲡⲉⲧⲛⲁϣϭⲙ̅ϭⲟⲙ ⲛ̅ϭⲓⲛⲉ ⲙ̅ⲡϣⲟϫⲛⲉ ⲙ̅ⲡⲡⲁⲛⲧⲟⲕⲣⲁⲧⲱⲣ . ⲏ̅ ⲉϫⲱ ⲛ̅ⲧⲙⲛ̅ⲧⲛⲟⲩⲧⲉ ⲏ̅ ⲉⲧⲁⲩⲟⲥ ⲕⲁⲗⲱⲥ . Ⲭⲣ̅ⲓ̅ⲃ̅ , Ⲉϣϫⲉ ⲙ̅ⲡⲉⲛϣϭⲙ̅ϭⲁⲙ ⲣⲱ ⲉⲧⲁϩⲉⲛ̅ϣⲟϫⲛⲉ ⲛ̅ⲛⲉⲛⲣⲏⲩ . ⲛⲓⲙ ⲡⲉ ⲉⲧⲛⲁϣⲙ̅ⲙⲉ ⲉⲧⲙⲛ̅ⲧⲛⲟⲩⲧⲉ . ⲏ ⲁⲛⲙⲛ̅ⲧⲛⲟⲩⲧⲉ ⲛ̅ⲛⲙ̅ⲡⲏⲩⲉ . Ⲉϣϫⲉ ⲛⲉⲧϩⲓϫⲙ̅ⲡⲕⲁϩ ⲙⲟⲅⲓⲥ ⲉⲛϭⲓⲛⲉ ⲙ̅ⲙⲟⲟⲩ ⲛⲓⲙ ⲡⲉ ⲉⲧⲛⲁϩⲟⲧϩⲧ̅ ⲛ̅ⲥⲁⲛⲁⲧⲡⲉ . Ⲁϥⲟⲩⲱⲛϩ̅ ⲉⲃⲟⲗ ⲙ̅ⲡⲕⲟⲥⲙⲟⲥ ⲛ̅ϭⲓⲟⲩⲛⲟϭ ⲛ̅ⲁⲙⲁϩⲧⲉ ⲙⲛ̅ⲟⲩⲛⲟϭ ⲛ̅ⲉⲟⲟⲩ . ⲁⲩⲱ ⲡⲱⲛϩ̅ ⲛ̅ⲧⲡⲉ ⲉϥⲟⲩⲱϣ ⲉⲣ̅ⲡⲧⲏⲣϥ̅ ⲃ̅ⲃⲣ̅ⲣⲉ ⲉⲧⲣⲉϥⲛⲟⲩϫⲉ ⲉⲃⲟⲗ ⲙ̅ⲡⲉⲧϭⲟⲛ ⲁⲩⲱ ⲥⲭⲏⲙⲁ ⲛⲓⲙ ⲛ̅ⲕⲁⲙⲉ ⲉⲧⲣⲉⲟⲩⲟⲛ ⲛⲓⲙ ⲡⲓⲣⲉ ϩⲛ̅ϩⲉⲛϩⲃ̅ⲥⲱ ⲛ̅ⲧⲉⲙ̅ⲡⲏⲩⲉ . ⲉⲟⲩⲱⲛϩ̅ ⲉⲃⲟⲗ ⲙ̅ⲡⲟⲩⲁϩⲥⲁϩⲛⲉ ⲙ̅ⲡⲓⲱⲧ ⲉⲧⲣⲉϥϯⲕⲗⲟⲙ ⲛ̅ⲛⲉⲧⲟⲩⲱϣ ⲉϣⲱϫⲉ ⲕⲁⲗⲱⲥ . ⲈⲣⲉⲡⲉⲬ̅ⲥ̅ ⲟ̅ ⲛ̅ⲁⲅⲱⲛⲟⲑⲉⲧⲏⲥ . ⲡⲉⲛⲧⲁϥϯⲕⲗⲟⲙ ⲛ̅ⲟⲩⲟⲛ ⲛⲓⲙ ⲉϥⲧⲥⲁⲃⲟ ⲛ̅ⲟⲩⲟⲛ ⲛⲓⲙ ⲉϣⲱϫⲉ . ⲡⲁⲓ ⲛ̅ⲧⲁϥϣⲱϫⲉ ⲛ̅ϣⲟⲣⲡ̅ ⲁϥϫⲓⲡⲉⲕⲗⲟⲙ ⲁϥⲣ̅ϫⲱⲱⲣⲉ ⲁϥⲟⲩⲱⲛϩ̅ ⲉⲃⲟⲗ ⲉϥⲣ̅ⲟⲩⲟⲉⲓⲛ ⲉⲟⲩⲟⲛ ⲛⲓⲙ . Ⲡⲧⲏⲣϥ̅ ⲇⲉ ⲛ̅ⲧⲁⲩⲁⲁⲩ ⲃ̅ⲃⲣ̅ⲣⲉ ϩⲙ̅ⲡⲉⲡ̅ⲛ̅ⲁ̅ ⲉⲧⲟⲩⲁⲁⲃ ⲙⲛ̅ⲡⲛⲟⲩⲥ . Ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ϯⲛⲁϯ ⲛⲁⲕ ⲟⲩⲏⲣ ⲛ̅ⲉⲟⲟⲩ . ⲙ̅ⲡⲉⲗⲁⲁⲩ ⲇⲉ ϭⲙ̅ϭⲟⲙ ⲉϯⲉⲟⲟⲩ ⲙ̅ⲡⲛⲟⲩⲧⲉ ⲛ̅ⲑⲉ ⲉⲧϥ̅ⲟ̅ ⲙ̅ⲙⲟⲥ . Ⲛ̅ⲧⲟⲕ ⲡⲉⲛⲧⲁⲕϯⲉⲟⲟⲩ ⲙ̅ⲡⲉⲕⲗⲟⲅⲟⲥ ⲉⲧⲟⲩϫⲉⲟⲩ ⲟⲛ ⲛⲓⲙ ⲡⲛⲁⲏⲧ ⲛ̅ⲛⲟⲩⲧⲉ . ⲡⲉⲛⲧⲁϥⲉⲓ ⲉⲃⲟⲗ ϩⲛ̅ⲣⲱⲕ ⲁⲩⲱ ⲉϩⲣⲁⲓ ϩⲙ̅ⲡⲉⲕϩⲏⲧ . ⲡϣⲣⲡ̅ ⲙ̅ⲙⲓⲥⲉ ⲧⲥⲟⲫⲓⲁ . ⲡϣⲣⲡ̅ ⲛ̅ⲧⲩⲡⲟⲥ . ⲡϣⲟⲣⲡ̅ ⲛ̅ⲟⲩⲟⲉⲓⲛ . ⲟⲩⲟⲩⲟⲉⲓⲛ ⲅⲁⲣ ⲡⲉ ⲉⲃⲟⲗ Ⲭⲣ̅ⲓ̅ⲅ̅ , ϩⲛ̅ⲧϭⲟⲙ ⲛ̅ⲧⲉⲡⲛⲟⲩⲧⲉ . ⲁⲩⲱ ⲟⲩϩⲉϯⲉ ⲡⲉ ⲛ̅ⲧⲉⲡⲉⲟⲟⲩ ⲉⲧⲟⲩⲁⲁⲃ ⲙ̅ⲡⲡⲁⲛⲧⲟⲕⲣⲁⲧⲱⲣ . ⲁⲩⲱ ϯⲁⲗ ⲉⲧⲟⲩⲁⲁⲃ ⲡⲉ ⲛ̅ⲧⲉⲛⲉⲛⲉⲣⲅⲓⲁ ⲙ̅ⲡⲛⲟⲩⲧⲉ . ⲁⲩⲱ ⲑⲓⲕⲱⲛ ⲡⲉ ⲛ̅ⲧⲉϥⲙⲛ̅ⲧⲁⲅⲁⲑⲟⲥ . Ⲕⲁⲓ ⲅⲁⲣ ⲡⲟⲩⲟⲉⲓⲛ ⲡⲉ ϣⲁⲉⲛⲉϩ . Ⲑⲟⲣⲁⲥⲓⲥ ⲡⲉ ⲉⲧϭⲱϣⲧ̅ ⲛ̅ⲥⲁⲡⲓⲁⲧⲛⲁⲩ ⲉⲣⲟϥ ⲛ̅ⲉⲓⲱⲧ . ⲉϥⲣ̅ⲇⲓⲁⲕⲟⲛⲓ ⲛ̅ⲟⲩⲟⲉⲓϣ ⲛⲓⲙ . ⲁⲩⲱ ⲉϥⲙⲟⲩⲛⲅ̅ ϩⲙ̅ⲡⲟⲩⲱϣ ⲙ̅ⲡⲓⲱⲧ . ⲡⲉⲛⲧⲁⲩϫⲡⲟϥ ⲟⲩⲁⲁϥ ϩⲙ̅ⲡⲱⲕ ⲛ̅ϩⲏⲧ ⲙ̅ⲡⲓⲱⲧ . ⲟⲩⲗⲟⲅⲟⲥ ⲅⲁⲣ ⲛ̅ⲛ̅ⲁⲧⲁⲙⲁϩⲧⲉ ⲙ̅ⲙⲟϥ ⲡⲉ . ⲁⲩⲱ ⲧⲥⲟⲫⲓⲁ ⲙⲛ̅ⲡⲱⲛϩ̅ ⲡⲉ . Ⲛ̅ⲍⲱⲟⲛ ⲧⲏⲣⲟⲩ ⲙⲛ̅ⲛ̅ϭⲟⲙ ⲉϥⲧⲛ̅ϩⲟ ⲁⲩⲱ ⲉϥⲥⲁⲛϣ̅ ⲙ̅ⲙⲟⲟⲩ . ⲕⲁⲧⲁⲑⲉ ⲉⲧⲉⲣⲉⲧⲯⲩⲭⲏ ⲧⲛ̅ϩⲟ ⲛ̅ⲛⲙ̅ⲙⲉⲗⲟⲥ ⲧⲏⲣⲟⲩ . ⲉϥⲁⲙⲁϩⲧⲉ ⲙ̅ⲡⲧⲏⲣϥ̅ ϩⲛ̅ⲧϭⲟⲙ ⲁⲩⲱ ⲉϥⲧⲛ̅ϩⲟ ⲙ̅ⲙⲟⲟⲩ . Ⲛ̅ⲧⲟϥ ⲅⲁⲣ ⲡⲉ ⲧⲉϩⲟⲩⲉⲓⲧⲉ ⲁⲩⲱ ⲑⲁⲏ ⲛ̅ⲟⲩⲟⲛ ⲛⲓⲙ . ⲉϥⲣⲟⲉⲓⲥ ⲉⲡⲧⲏⲣϥ̅ ⲁⲩⲱ ⲉϥⲕⲱⲧⲉ ⲉⲣⲟⲟⲩ ϥϩⲟⲥⲉ ⲇⲉ ϩⲁⲟⲩⲟⲛ ⲛⲓⲙ ⲁⲩⲱ ϥⲣⲁϣⲉ . ⲁⲩⲱ ⲟⲛ ϥⲣ̅ϩⲏⲃⲉ . ϥⲣ̅ϩⲏⲃⲉ ⲙⲉⲛ ϩⲁⲛⲉⲛⲧⲁⲩⲕⲗⲏⲣⲟⲩ ⲉⲡⲧⲟⲡⲟⲥ ⲛ̅ⲧⲕⲟⲗⲁⲥⲓⲥ . ϥϩⲟⲥⲉ ⲇⲉ ϩⲁⲟⲩⲟⲛ ⲛⲓⲙ ⲛⲁⲓ ⲉⲧϥ̅ⲉⲓⲛⲉ ⲙ̅ⲙⲟⲟⲩ ⲉϩⲟⲩⲛ ⲉⲧⲥⲃⲱ ϩⲛ̅ⲟⲩϩⲓⲥⲉ . ϥⲣⲁϣⲉ ⲇⲉ ϩⲁⲟⲩⲟⲛ ⲛⲓⲙ ⲉⲧϣⲟⲟⲡ ϩⲙ̅ⲡⲧⲃ̅ⲃⲟ . Ⲁⲣⲉϩ ϭⲉ ⲉⲣⲟⲕ ⲙⲏⲡ̅ⲱⲥ ⲛⲅ̅ϩⲉ ⲉⲧⲟⲟⲧⲟⲩ ⲛ̅ⲛⲓⲗⲏⲥⲧⲏⲥ . ⲁⲩⲱ ⲙ̅ⲡⲣ̅ϯ ⲛ̅ⲟⲩϩⲓⲛⲏⲃ ⲛ̅ⲛⲉⲕⲃⲁⲗ . ⲟⲩⲇⲉ ⲙ̅ⲡⲣ̅ϯ ⲛ̅ⲛⲟⲩⲣⲉⲕⲣⲓⲕⲉ ⲛ̅ⲛⲉⲕⲃⲁϩⲟⲩ . ϫⲉⲕⲁⲁⲥ ⲉⲕⲉⲛⲟⲩϩⲙ̅ ⲛ̅ⲑⲉ ⲛ̅ⲟⲩϭⲟϩⲥⲉ ⲉϩⲉⲛⲉⲗⲱ . ⲁⲩⲱ ⲛ̅ⲑⲉ ⲛ̅ⲟⲩⲬⲣ̅ⲓ̅ⲇ̅, ϩⲁⲗⲏⲧ ⲉⲩⲡⲁϣⲥϥ̅ . ϣⲱϫⲉ ⲙ̅ⲡⲛⲟϭ ⲛ̅ⲁⲅⲱⲛ ϩⲉⲱⲥ ⲡⲁⲅⲱⲛ ⲕⲁⲁⲧ ⲉϩⲣⲁⲓ . ⲉⲣⲉⲛ̅ⲇⲩⲛⲁⲙⲓⲥ ⲧⲏⲣⲟⲩ ⲉⲓⲟⲣⲙ̅ ⲛ̅ⲥⲱⲕ ⲛⲉⲧⲟⲩⲁⲁⲃ ⲇⲉ ⲟⲩⲁⲁⲩ ⲁⲛ. Ⲁⲗⲗⲁ ⲛ̅ⲕⲉⲇⲩⲛⲁⲙⲓⲥ ⲧⲏⲣⲟⲩ ⲙ̅ⲡⲁⲛⲧⲓⲕⲓⲙⲉⲛⲟⲥ . Ⲟⲩⲟⲉⲓ ⲛⲁⲕ ⲉⲩϣⲁⲛϫⲣⲟ ⲉⲣⲟⲕ ⲛ̅ⲧⲙⲏⲧⲉ ⲛ̅ⲟⲩⲟⲛ ⲛⲓⲙ ⲉⲧϭⲁϣⲧ̅ ⲛ̅ⲥⲱⲕ . Ⲉⲕϣⲁⲛϣⲱϫⲉ ⲙ̅ⲡⲁⲅⲱⲛ ⲁⲩⲱ ⲛⲅ̅ϫⲣⲟ ⲁⲛⲇⲩⲛⲁⲙⲓⲥ ⲉⲧϯⲟⲩⲃⲏⲕ ⲕⲛⲁⲕⲱ ⲛ̅ⲟⲩⲛⲟϭ ⲛ̅ⲣⲁϣⲉ ⲛ̅ⲟⲩⲟⲛ ⲛⲓⲙ ⲉⲧⲟⲩⲁⲁⲃ . ⲁⲩⲱ ⲕⲛⲁⲕⲱ ⲛ̅ⲟⲩⲛⲟϭ ⲛ̅ϩⲏⲃⲉ ⲛ̅ⲛⲉⲕϫⲁϫⲉ . Ⲡⲉⲕⲁⲅⲱⲛⲟⲑⲉⲧⲏⲥ ⲧⲏⲣϥ̅ ⲣ̅ⲃⲟⲏⲑⲉⲓ ⲉϥⲟⲩⲱϣ ⲉⲧⲣⲉⲕϫⲣⲟ . Ⲥⲱⲧⲙ̅ ⲡⲁϣⲏⲣⲉ ⲁⲩⲱ ⲙ̅ⲡⲣ̅ϣⲱⲡⲉ ⲉⲕⲱⲥⲕ̅ ϩⲛ̅ⲛⲉⲕⲙⲁⲁϫⲉ . Ⲧⲱⲱⲛ ⲙ̅ⲙⲟⲕ ⲉϩⲣⲁⲓ ⲉⲁⲕⲕⲱ ⲛ̅ⲥⲱⲕ ⲙ̅ⲡⲉⲕⲣ̅ⲙⲛ̅ⲁⲥ ⲛ̅ⲑⲉ ⲛ̅ⲛⲓⲁⲉⲧⲟⲥ . Ⲁⲣⲓϩⲟⲧⲉ ϩⲏⲧϥ̅ ⲙ̅ⲡⲛⲟⲩⲧⲉ ϩⲣⲁⲓ ϩⲛ̅ⲛⲉⲕⲡⲣⲁⲝⲓⲥ ⲧⲏⲣⲟⲩ . ⲁⲩⲱ ⲉⲃⲟⲗ ϩⲓⲧⲙ̅ⲫⲱⲃ ⲉⲧⲛⲁⲛⲟⲩϥ ϯⲉⲟⲟⲩ ⲙ̅ⲡⲛⲟⲩⲧⲉ . ⲉⲕⲥⲟⲟⲩⲛ ϫⲉ ⲣⲱⲙⲉ ⲛⲓⲙ ⲉⲧⲣ̅ⲁⲛⲁϥ ⲁⲛ ⲙ̅ⲡⲛⲟⲩⲧⲉ . ⲡϣⲏⲣⲉ ⲙ̅ⲡⲧⲁⲕⲟ ⲡⲉ . ϥⲛⲁⲃⲱⲕ ⲉϩⲣⲁⲓ ⲉⲡⲛⲟⲩⲛ ⲛ̅ⲁⲙⲛ̅ⲧⲉ . Ⲱ̅ ϯⲙⲛ̅ⲧϩⲁⲣϣ̅ϩⲏⲧ ⲛ̅ⲧⲉⲡⲛⲟⲩⲧⲉ ⲉⲧⲣ̅ⲁⲛⲉⲭⲉ ⲛ̅ⲟⲩⲟⲛ ⲛⲓⲙ . ⲧⲁⲓ ⲉⲧⲟⲩⲱϣ ⲉⲧⲣⲉⲟⲩⲟⲛ ⲛⲓⲙ ⲟⲩϫⲁⲓ . ⲛⲁⲓ ⲛ̅ⲧⲁⲩϣⲱⲡⲉ ϩⲁⲛⲟⲃⲉ . ⲁⲗⲗⲁ ⲙ̅ⲙⲛ̅ⲗⲁⲁⲩ ⲣ̅ⲕⲱⲗⲩⲉ ⲙ̅ⲙⲟϥ ⲉⲣ̅ⲡⲉⲧϥ̅ⲟⲩⲁϣϥ̅. Ⲛⲓⲙ ⲅⲁⲣ ⲡⲉ ⲡϫⲱⲱⲣⲉ ⲉⲣⲟϥ ϫⲉⲕⲁⲁⲥ ⲉϥⲛⲁⲣ̅ⲕⲱⲗⲩⲉ ⲙ̅ⲙⲟϥ . Ⲉϣϫⲉ ⲛ̅ⲧⲟϥ ⲡⲉⲧϫⲱϩ ⲉⲡⲕⲁϩ ⲉϥⲧⲣⲉϥⲥⲧⲱⲧ . ⲁⲩⲱ ⲟⲛ ⲉϥⲧⲣⲉⲛ̅ⲧⲟⲩⲉⲓⲏ ϯⲕⲁⲡⲛⲟⲥ . ⲡⲉⲛⲧⲁϥⲥⲟⲩⲱϩ ⲉϩⲟⲩⲛ ⲛ̅ⲑⲁⲗⲁⲥⲥⲁ Ⲭⲣ̅ⲓ̅ⲉ̅ , ⲛ̅ϯⲁⲉⲓⲏ ⲛ̅ⲑⲉ ⲛ̅ⲛⲓⲁⲥⲕⲟⲥ . ⲁⲩⲱ ⲁϥϣⲓⲡⲙⲟⲟⲩ ⲧⲏⲣϥ̅ ϩⲛ̅ⲧⲉϥϩⲃ̅ϩⲉ . ⲁⲩⲱ ⲧϭⲓϫ ⲛ̅ⲟⲩⲱⲧ ⲙ̅ⲡϫⲟⲉⲓⲥ ⲧⲉⲛⲧⲁⲥⲧⲁⲙⲓⲉⲛⲁⲓ ⲧⲏⲣⲟⲩ . Ⲧⲁⲓ ⲅⲁⲣ ⲧⲉ ⲡⲉⲬ̅ⲥ̅ . ⲧϭⲓϫ ⲙ̅ⲡⲓⲱⲧ ⲁⲩⲱ ⲉⲥⲙⲟⲩⲛⲅ̅ ⲙ̅ⲡⲧⲏⲣϥ̅ . ⲉⲃⲟⲗ ϩⲓⲧⲟⲟⲧⲥ̅ ⲛ̅ⲧⲁⲡⲧⲏⲣϥ̅ ϣⲱⲡⲉ . ⲉⲁⲥϣⲱⲡⲉ ⲙ̅ⲙⲁⲩ ⲙ̅ⲡⲧⲏⲣϥ̅ . Ⲛ̅ⲧⲟϥ ⲅⲁⲣ ⲡⲉ ⲛ̅ⲟⲩⲟⲉⲓϣ ⲛⲓⲙ ⲉϥϣⲟⲟⲡ ⲛ̅ϣⲏⲣⲉ ⲙ̅ⲡⲓⲱⲧ . Ⲁⲣⲓⲛⲟⲉⲓ ⲛⲁⲓ ⲙ̅ⲡⲛⲟⲩⲧⲉ ⲡ̅ⲡⲁⲛⲧⲟⲕⲣⲁⲧⲱⲣ ⲉⲧϣⲟⲟⲡ ⲛ̅ⲟⲩⲟⲉⲓϣ ⲛⲓⲙ . ⲛ̅ⲛⲉⲣⲉⲡⲁⲓ ϣⲟⲟⲡ ⲁⲛ ⲉϥⲉ ⲛ̅ⲣ̅ⲣⲟ ⲛ̅ⲟⲩⲟⲉⲓϣ ⲛⲓⲙ . ⲙⲏⲡⲱⲥ ⲛϥ̅ϣⲱⲡⲉ ⲉϥϣⲁⲁⲧ ⲙ̅ⲡϣⲏⲣⲉ ⲛ̅ⲑⲉⲓⲟⲥ . ⲉⲣⲉⲡⲧⲏⲣϥ̅ ⲅⲁⲣ ⲟⲩⲏϩ ϩⲙ̅ⲡⲛⲟⲩⲧⲉ . Ⲛⲉⲛⲧⲁⲩϣⲱⲡⲉ ⲉⲃⲟⲗ ϩⲓⲧⲙ̅ⲡⲗⲟⲅⲟⲥ ⲉⲧⲉⲡⲁⲓ ⲡⲉ ⲡϣⲏⲣⲉ ⲛ̅ⲑⲉⲓⲕⲱⲛ ⲙ̅ⲡⲓⲱⲧ . ⲡⲛⲟⲩⲧⲉ ⲅⲁⲣ ⲡⲉⲧϩⲏⲛ ⲉϩⲟⲩⲛ ⲁⲩⲱ ⲉϥⲟⲩⲏⲩ ⲉⲃⲟⲗ ⲁⲛ . Ⲁⲣⲏϫϥ̅ ⲛⲓⲙ ⲛ̅ⲑⲉⲓⲟⲛ ⲛⲉ ⲛ̅ⲣⲙ̅ϩⲛ̅ⲏⲉⲓ ⲙ̅ⲡⲛⲟⲩⲧⲉ . ⲉⲣⲉϣⲁⲛⲡⲓⲑⲉⲓⲟⲛ ϭⲉ ϥⲓ ⲛⲙ̅ⲙⲁⲕ ϩⲛ̅ⲟⲩϩⲱⲃ ⲉⲃⲟⲗ ϩⲛ̅ⲟⲩⲙⲉⲣⲟⲥ . Ⲙ̅ⲙⲉ ϫⲉ ⲡⲑⲉⲓⲟⲛ ⲧⲏⲣϥ̅ ⲧⲏⲧ ⲛ̅ϩⲏⲧ ⲛⲙ̅ⲙⲁⲕ . Ⲙⲁⲣⲉⲡⲉⲉⲓⲑⲉⲓⲟⲛ ⲇⲉ ⲱⲕ ⲛ̅ϩⲏⲧ ⲙ̅ⲙⲛ̅ⲗⲁⲁⲩ ⲙ̅ⲡⲟⲛⲏⲣⲟⲥ . Ⲛ̅ⲧⲟϥ ⲅⲁⲣ ⲡⲉⲧϯⲥⲃⲱ ⲛ̅ⲣⲱⲙⲉ ⲛⲓⲙ ⲉⲩⲡⲉⲧⲛⲁⲛⲟⲩϥ . Ⲡⲁⲓ ⲡⲉ ⲛ̅ⲧⲁⲡⲛⲟⲩⲧⲉ ⲧⲁⲁϥ ⲙ̅ⲡⲉⲅⲉⲛⲟⲥ ⲛ̅ⲛ̅ⲣⲱⲙⲉ ϫⲉⲕⲁⲁⲥ ⲉⲧⲃⲉⲡⲁⲓ ⲉⲣⲉⲣⲱⲙⲉ ⲛⲓⲙ ⲛⲁϣⲱⲡⲉ ⲉϥⲥⲟⲧⲡ̅ ⲙ̅ⲡⲉⲙⲧⲟ ⲉⲃⲟⲗ ⲛ̅ⲛ̅ⲁⲅⲅⲉⲗⲟⲥ ⲧⲏⲣⲟⲩ ⲙⲛ̅ⲛ̅ⲁⲣⲭⲁⲅⲅⲉⲗⲟⲥ ⲙ̅ⲡⲛⲟⲩⲧⲉ ⲅⲁⲣ ϣⲁⲁⲧ ⲁⲛ ⲉⲧⲣⲉϥⲣ̅ⲇⲟⲕⲓⲙⲁⲍⲉ ⲛ̅ⲗⲁⲁⲩ Ⲭⲣ̅ⲓ̅Ⲋ, ⲛ̅ⲣⲱⲙⲉ . Ϥⲥⲟⲟⲩⲛ ⲛ̅ϩⲱⲃ ⲛⲓⲙ ϩⲁⲑⲏ ⲉⲙⲡⲁⲁⲧⲟⲩϣⲱⲡⲉ . ⲁⲩⲱ ϥⲥⲟⲟⲩⲛ ⲛ̅ⲛⲉⲑⲏⲡ ⲛ̅ⲧⲉⲫⲏⲧ . Ⲥⲉϭⲟⲗⲉⲃ ⲇⲉ ⲉⲃⲟⲗ ⲧⲏⲣⲟⲩ ⲁⲩⲱ ⲥⲉϣⲁⲁⲧ ⲛ̅ⲛⲁϩⲣⲁϥ . Ⲙ̅ⲡⲣ̅ⲧⲣⲉⲗⲁⲁⲩ ϫⲟⲟⲥ ⲉⲛⲉϩ . ϫⲉ ⲡⲛⲟⲩⲧⲉ ⲛ̅ⲛ̅ⲁⲧⲥⲟⲟⲩⲛ . Ⲟⲩⲇⲓⲕⲁⲓⲟⲛ ⲅⲁⲣ ⲁⲛ ⲡⲉ ⲉⲛⲉϫⲡⲇⲏⲙⲓⲟⲩⲣⲅⲟⲥ ⲛ̅ⲥⲱⲛⲧ̅ ⲛⲓⲙ ϩⲛ̅ⲟⲩⲙⲛ̅ⲧⲁⲧⲥⲟⲟⲩⲛ . Ⲕⲁⲓ ⲅⲁⲣ ⲛⲉⲧϣⲟⲟⲡ ϩⲙ̅ⲡⲕⲁⲕⲉ ⲉⲩϩⲁϩⲧⲏϥ ⲙ̅ⲡⲥⲙⲟⲧ ⲙ̅ⲡⲟⲩⲟⲉⲓⲛ . ⲙ̅ⲙⲛ̅ ϭⲉ ⲗⲁⲁⲩ ⲅⲁⲣ ϩⲏⲡ ⲉⲓⲙⲏⲧⲓ ⲡⲛⲟⲩⲧⲉ ⲟⲩⲁⲁϥ . ϥⲟⲩⲟⲛϩ̅ ⲇⲉ ⲉⲃⲟⲗ ⲛ̅ⲟⲩⲟⲛ ⲛⲓⲙ . ⲁⲩⲱ ϥϩⲏⲡ ⲉⲙⲁⲧⲉ . Ϥⲟⲩⲟⲛϩ̅ ⲇⲉ ⲉⲃⲟⲗ ⲉⲧⲃⲉϫⲉ ⲡⲛⲟⲩⲧⲉ ⲥⲟⲟⲩⲛ ⲙ̅ⲡⲧⲏⲣϥ̅ . Ⲕⲁⲛ ⲉⲩϣⲁⲛⲧⲙ̅ⲟⲩⲱϣ ⲉϫⲟⲟⲥ ⲥⲉⲛⲁϫⲡⲓⲟⲟⲩ ⲉⲃⲟⲗ ϩⲓ̅ⲧⲙ̅ⲡⲟⲩϩⲏⲧ . Ϥϩⲏⲡ ⲇⲉ ⲉⲧⲃⲉϫⲉ ⲙ̅ⲙⲛ̅ⲗⲁⲁⲩ ⲣ̅ⲛⲟⲓ ⲛ̅ⲛⲁⲡⲛⲟⲩⲧⲉ . ⲟⲩⲁⲧⲛ̅ⲣⲁⲧϥ̅ ⲅⲁⲣ ⲡⲉ ⲁⲩⲱ ⲟⲩⲁⲧϩⲉⲧϩⲱⲧϥ̅ ⲡⲉ ⲉⲥⲟⲩⲱⲛⲡϣⲟϫⲛⲉ ⲙ̅ⲡⲛⲟⲩⲧⲉ . Ⲡⲁⲗⲓⲛ ⲥⲙⲟⲕϩ̅ ⲛ̅ⲛ̅ⲣⲁⲧϥ̅ . ⲁⲩⲱ ⲥⲙⲟⲕϩ̅ ⲛ̅ϭⲛ̅ⲡⲉⲬ̅ⲥ̅ . ⲛ̅ⲧⲟϥ ⲅⲁⲣ ⲡⲉⲧⲟⲩⲏϩ ϩⲛ̅ⲧⲟⲡⲟⲥ ⲛⲓⲙ ⲟⲛ ⲉϥϩⲛ̅ⲧⲟⲡⲟⲥ ⲁⲛ . ⲙ̅ⲙⲛ̅ⲗⲁⲁⲩ ⲅⲁⲣ ⲉϥⲟⲩⲱϣ ⲛⲁϣϭⲙ̅ϭⲟⲙ ⲉⲥⲟⲩⲱⲛⲡⲛⲟⲩⲧⲉ ⲛ̅ⲑⲉ ⲉⲧϥ̅ϣⲟⲟⲡ ⲙ̅ⲙⲟⲥ . ⲟⲩⲧⲉ ⲡⲉⲬ̅ⲥ̅ ⲟⲩⲧⲉⲡⲉⲡ̅ⲛ̅ⲁ̅ . ⲟⲩⲧⲉ ⲡⲭⲟⲣⲟⲥ ⲛ̅ⲛ̅ⲁⲅⲅⲉⲗⲟⲥ ⲟⲩⲇⲉ ⲛ̅ⲛ̅ⲁⲣⲭⲁⲅⲅⲉⲗⲟⲥ Ⲭⲣ̅ⲓ̅ⲍ, ⲙⲛ̅ⲛⲑⲣⲟⲛⲟⲥ ⲛ̅ⲛⲉⲡ̅ⲛ̅ⲁ̅ ⲁⲩⲱ ⲙ̅ⲙⲛ̅ⲧϫⲟⲉⲓⲥ ⲉⲧϫⲟⲥⲉ ⲁⲩⲱ ⲡⲛⲟϭ ⲛ̅ⲛⲟⲩⲥ . ⲉⲕϣⲧⲙ̅ⲥⲟⲩⲱⲛⲅ̅ ⲟⲩⲁⲁⲕ ⲛⲅ̅ⲁϣϭⲙ̅ϭⲟⲙ ⲁⲛ ⲛ̅ⲥⲟⲩⲱⲛⲛⲁⲓ ⲧⲏⲣⲟⲩ . Ⲟⲩⲱⲛ ⲛⲁⲕ ⲙ̅ⲡⲣⲟ ϫⲉⲕⲁⲁⲥ ⲉⲕⲛⲁⲥⲟⲩⲱⲛⲡⲉⲧϣⲟⲟⲡ . Ⲧⲱϩⲙ̅ ⲉϩⲟⲩⲛ ⲉⲣⲟⲕ ⲟⲩⲁⲁⲕ ϫⲉⲕⲁⲁⲥ ⲉⲣⲉⲡⲗⲟⲅⲟⲥ ⲛⲁⲟⲩⲱⲛ ⲛⲁⲕ . Ⲛ̅ⲧⲟϥ ⲅⲁⲣ ⲡⲉ ⲡⲣ̅ⲣⲟ ⲛ̅ⲧⲡⲓⲥⲧⲓⲥ ⲙⲛ̅ⲧⲥⲏϥⲉ ⲉⲧⲧⲏⲙ . ⲉⲁϥϣⲱⲡⲉ ⲙ̅ⲡⲧⲏⲣϥ̅ ⲛ̅ⲟⲩⲟⲛ ⲛⲓⲙ . ⲉⲧⲃⲉϫⲉ ϥⲟⲩⲱϣ ⲉⲛⲁ ⲛ̅ⲟⲩⲟⲛ ⲛⲓⲙ . Ⲡⲁϣⲏⲣⲉ ⲥⲃ̅ⲧⲱⲧⲕ̅ ⲉⲉ̅ⲓ ⲉⲃⲟⲗ ϩⲛ̅ⲛ̅ⲕⲟⲥⲙⲟⲕⲣⲁⲧⲱⲣ ⲛ̅ⲧⲉⲡⲕⲁⲕⲉ . ⲁⲩⲱ ⲡⲉⲓⲁⲏⲣ ⲛ̅ⲧⲉⲓϭⲟⲧ ⲉϥⲙⲉϩ ⲛ̅ⲇⲩⲛⲁⲙⲓⲥ . Ⲉϣⲱⲡⲉ ⲇⲉ ⲉⲩⲛ̅ⲧⲁⲕ ⲙ̅ⲙⲁⲩ ⲙ̅ⲡⲉⲬ̅ⲥ̅ ⲕⲛⲁϫⲣⲟ ⲉⲡⲉⲓⲕⲟⲥⲙⲟⲥ ⲧⲏⲣϥ̅ . ⲡⲉⲧⲕ̅ⲛⲁⲟⲩⲱⲛ ⲙ̅ⲙⲟϥ ⲛⲁⲕ ⲕⲛⲁⲟⲩⲱⲛ ⲙ̅ⲙⲟϥ . Ⲡⲉⲧⲕ̅ⲛⲁⲧⲱϩⲙ̅ ⲉⲣⲟϥ ⲛⲁⲕ ⲕⲛⲁⲧⲱϩⲙ̅ ⲉⲕⲣ̅ⲱⲫⲉⲗⲉⲓ ⲙ̅ⲙⲟⲕ ⲟⲩⲁⲁⲕ . Ϭⲛ̅ϩⲏⲩ ⲙ̅ⲙⲟⲕ ⲡⲁϣⲏⲣⲉ ⲉⲛⲕⲙⲟⲟϣⲉ ⲁⲛ ϩⲛ̅ⲛⲉⲧⲉⲙ̅ⲙⲛ̅ϩⲏⲩ ⲛ̅ϩⲏⲧⲟⲩ . Ⲡⲁϣⲏⲣⲉ ⲧⲟⲩⲃⲟⲕ ⲛ̅ϣⲟⲣⲡ̅ ⲉⲧⲡⲟⲗⲓⲧⲓⲁ ⲉⲧϩⲓ̅ⲃⲟⲗ . ϫⲉⲕⲁⲁⲥ ⲉⲕⲛⲁϣϭⲙ̅ϭⲟⲙ ⲛ̅ⲧⲟⲩⲃⲉ ⲧⲁⲫⲟⲩⲛ . ⲁⲩⲱ ⲙ̅ⲡⲣ̅ϣⲱⲡⲉ ⲉⲕⲟ ⲛ̅ⲛⲉϣⲱⲧ ⲙ̅ⲡϣⲁϫⲉ ⲙ̅ⲡⲛⲟⲩⲧⲉ . Ⲁⲣⲓⲇⲟⲕⲓⲙⲁⲍⲉ ⲛ̅ϣⲟⲣⲡ̅ ⲛ̅ϣⲁϫⲉ ⲛⲓⲙ ϩⲁⲑⲏ ⲉⲙⲡⲁⲧⲉⲕⲛⲟⲩϫⲟⲩ ⲉⲃⲟⲗ ⲙ̅ⲡⲣ̅ⲟⲩⲱϣ ⲉϫⲡⲉⲛⲓⲉⲟⲟⲩ ⲉⲧⲉⲛ̅ⲥⲉⲧⲁϫⲣⲏⲩ ⲁⲛ . ⲟⲩⲧⲉ Ⲭⲣ̅ⲓ̅ⲏ, ⲧⲙⲛ̅ⲧⲃⲁⲃⲉⲣⲱⲙⲉ ⲧⲁⲓ ⲉⲧⲉⲓⲛⲉ ⲙ̅ⲙⲟⲕ ⲉⲡⲧⲁⲕⲟ . ϫⲓ ⲉⲣⲟⲕ ⲛ̅ⲧⲥⲟⲫⲓⲁ ⲙ̅ⲡⲉⲬ̅ⲥ̅ ⲛ̅ϩⲁⲣϣ̅ϩⲏⲧ ⲁⲩⲱ ⲛ̅ⲣⲙ̅ⲣⲁϣ ⲁⲩⲱ ⲛⲅ̅ϩⲁⲣⲉϩ ⲉⲧⲁⲓ ⲱ̅ ⲡⲁϣⲏⲣⲉ . ⲉⲕⲥⲟⲟⲩⲛ ϫⲉ ⲟⲩϩⲏⲟⲩ ⲛ̅ⲟⲩⲟⲉⲓϣ ⲛⲓⲙ ⲧⲉ ⲧⲉϩⲓⲏ ⲙ̅ⲡⲛⲟⲩⲧⲉ : ,,,,,,,,,,
Ⲓⲭⲑⲩⲥ ⲑⲁⲩⲙⲁ ⲏ ⲏ ⲏ ⲁⲙⲏⲭⲁⲛⲟⲛ ⲧⲩ