Ⲡⲓⲁⲫⲉ ⲛ̀ⲥⲟⲛⲓ
Ⲁⲥϣⲱⲡⲓ ⲇⲉ ⲙⲉⲛⲉⲥⲛⲁ ⲛⲁⲓ ⲁⲡ̀ⲥⲱⲓⲧ ⲙ̀ⲡⲉⲛⲓⲱⲧ ⲁⲃⲃⲁ Ⲇⲁⲛⲏⲓⲗ ⲥⲱⲣ ⲉⲃⲟⲗϧⲉⲛ ⲙⲁⲓ ⲛⲓⲃⲉⲛ ⲟⲩⲟϩ ⲛⲁⲣⲉ ϩⲁⲛⲙⲏϣ ⲉⲣⲉⲡⲓⲑⲩⲙⲓⲛ ⲡⲉ ⲉϣⲁϣⲛⲓ ⲉⲡⲉϥⲥ̀ⲙⲟⲩ ⲉ̅ⲑ̅ⲩ̅ ⲙⲁⲗⲓⲥⲧⲁ ⲛⲓⲙⲟⲛⲏ ⲛ̀ⲧⲉ ⲛⲏⲉ̅ⲑ̅ⲩ̅.
Ⲛⲉ ⲟⲩⲟⲛ ⲟⲩⲙⲟⲛⲏ ϧⲉⲛ ⲛⲁⲓⲑⲟϣ ⲛ̀ⲟⲩⲱⲧ ⲉⲩⲭⲏ ⲉⲡⲁⲓⲛⲓϣϯ ⲛ̀ⲁⲅⲁⲑⲟⲛ ⲉⲧⲉ ⲡⲓⲛⲁⲓ ⲡⲉ ⲉⲧⲟⲩⲓⲣⲓ ⲙ̀ⲙⲟϥ ϧⲉⲛ ⲟⲩⲟⲛ ⲛⲓⲃⲉⲛ ⲁϥϣⲉⲛⲁϥ ⲉϧⲟⲩⲛⲛ ⲉⲡ̀ϩⲏⲧ ⲛ̀ⲟⲩⲁⲫⲉ ⲛ̀ⲥⲟⲛⲓ ϧⲉⲛ ⲛⲓϭⲏ ⲉⲧⲉⲙⲙⲁⲩ ⲉⲑⲣⲉϥϭⲓ ⲛⲉⲙⲁϥ ⲛ̀ⲛⲓⲣⲱⲙⲓ ⲧⲏⲣⲟⲩ ⲉⲧⲟⲓ ⲛ̀ⲥⲟⲛⲓ ⲉⲧⲙⲟϣⲓ ⲛⲉⲙⲁϥ ϧⲉⲛ ⲡⲓⲉϫⲱⲣϩ ⲉϭⲙⲟⲛⲏ ⲉⲧⲉⲙⲙⲁⲩ ⲛ̀ⲧⲉϣⲟⲗⲥ.
Ⲉⲧⲁϥϫⲱ ⲇⲉ ⲙ̀ⲡⲓⲥⲁϫⲓ ⲛ̀ⲛⲉϥⲣⲱⲙⲓ ⲁⲩⲣⲁϣⲓ ⲉⲙⲁϣⲱ ⲥⲁⲧⲟⲧⲟⲩ ⲇⲉ ⲁⲩⲓ̀ ⲉϯⲙⲟⲛⲏ ⲛⲁⲩϯ ⲛ̀ϩ̀ⲑⲏⲟⲩ ⲉⲣⲟⲥ ⲡⲉ ϫⲉ ⲁⲩⲛⲁϭⲓⲧⲥ ⲛ̀ⲁϣ ⲛ̀ⲣⲏϯ ⲟⲩⲟϩ ⲁⲩϫⲓⲙⲓ ⲙ̀ⲡⲓⲣⲏϯ ⲁⲛ ⲡⲉ ϫⲉ ⲟⲩⲏⲓ ⲛⲁⲣⲉ ⲡⲓⲥⲟⲃⲧ ⲛ̀ⲧⲉ ϯⲙⲟⲛⲏ ⲧⲁϫⲣⲏⲟⲩⲧ ⲛ̀ⲕⲁⲗⲱⲥ ⲡⲉ ⲛⲓⲥⲓⲛⲱⲟⲩⲓ ⲇⲉ ⲉⲧⲁⲩⲛⲁⲩ ⲉⲧⲟⲩⲙⲉⲧⲁⲧϫⲟⲙ ⲁⲩⲉⲣⲙ̀ⲕⲁϩ ⲛ̀ϩⲏⲧ. ⲡⲓⲁⲫⲉ ⲛ̀ⲥⲟⲛⲓ ⲇⲉ ⲁϥⲥⲁϫⲓ ⲛⲉⲙⲱⲟⲩ ⲉϥϫⲱ ⲙ̀ⲙⲟⲥ ϫⲉ ⲓⲙⲏϯ ⲛ̀ⲧⲉⲧⲉⲛⲓⲣⲓ ⲕⲁⲧⲁ ⲫ̀ⲣⲏϯ ⲉϯⲛⲁϫⲟⲥ ⲛⲱⲧⲉⲛ ⲙ̀ⲙⲟⲛ ϣ̀ϫⲟⲙ ⲙ̀ⲙⲱⲧⲉⲛ ⲉⲱⲗⲓ ⲛ̀ϩ̀ⲗⲓ ⲉⲃⲟⲗⲛ̀ϧⲏⲧⲥ. ⲛ̀ⲑⲱⲟⲩ ⲇⲉ ⲡⲉϫⲱⲟⲩ ⲛⲁϥ ⲇⲉ ⲫⲏⲉⲧⲉⲕⲛⲁϫⲟϥ ⲛⲁⲛ ⲧⲉⲛⲛⲁⲁⲓϥ.
Ⲡⲉϫⲁϥ ⲛⲱⲟⲩ ϫⲉ ⲧⲱⲟⲩⲛⲟⲩ ⲛ̀ⲧⲉⲧⲉⲛϫⲓⲙⲓ ⲛⲏⲓ ⲛ̀ϩⲁⲛϩ̀ⲃⲱⲥ ⲙ̀ⲙⲟⲛⲁⲭⲟⲥ ⲟⲩⲃⲁⲁⲗⲗⲓⲛ ⲛ̀ⲭⲁⲙⲉ ⲛⲉⲙ ⲟⲩⲭⲗⲁϥⲧ ⲉⲧⲙⲉϩ ⲛ̀⳧ ⲙ̀ⲡ̀ⲓⲛⲓ ⲛ̀ⲁⲃⲃⲁ Ⲇⲁⲛⲓⲏⲗ ⲛ̀ⲧⲉ Ϣⲓϩⲏⲧ ⲉϣⲱⲡ ⲛ̀ⲧⲉ ⲡⲓⲛⲁⲩ ⲉⲣⲡⲟⲕⲟⲡⲧⲓⲛ ϯⲛⲁⲧⲏⲓⲧⲟⲩ ϩⲓⲱⲧ ⲛ̀ⲧⲁϭⲓ ⲛ̀ⲟⲩⲃⲁⲓ ϧⲉⲛ ⲧⲁϫⲓϫ ϯⲛⲁⲕⲱⲗϩ ϩⲓⲣⲉⲛ ⲫ̀ⲣⲟ ⲛ̀ϯⲙⲟⲛⲏ ⲟⲩⲟϩ ⲉϣⲱⲡ ⲛ̀ⲧⲟⲩⲛⲁⲩ ⲉⲣⲟⲓ ⲥⲉⲛⲁⲟⲩⲱⲛ ⲛⲏⲓ ⲉⲑⲃⲏⲧϥ ⲟⲩⲟϩ ⲁⲛⲟⲕ ϩⲱ ϯⲛⲁⲧⲁⲙⲱⲧⲉⲛ ⲛ̀ⲭⲱⲗⲉⲙ ⲛ̀ⲧⲉⲧⲉⲛϭⲓⲧⲥ ϧⲉⲛ ⲟⲩⲙ̀ⲧⲟⲛ
Ⲉⲧⲁⲩⲥⲱⲧⲉⲙ ⲇⲉ ⲉⲛⲁⲓ ⲁⲩⲣⲁϣⲓ ⲉⲙⲁϣⲱ ⲟⲩⲟϩ ⲁⲩⲕⲱϯ ϧⲉⲛ ⲟⲩⲥⲛⲟⲩⲇⲏ ⲁⲩⲓⲛⲓ ⲛⲁϥ ⲛ̀ⲛⲓϩⲃⲱⲥ ⲕⲁⲧⲁ ϯϧⲉ ⲉⲧⲁϥϫⲟⲥ ⲛⲱⲟⲩ ⲟⲩⲟϩ ⲉⲧⲁ ⲡⲓⲛⲁⲩ ϣⲱⲡⲓ ⲁϥⲧⲱⲛϥ ⲛ̀ϫⲉ ⲡⲓⲁⲫⲉ ⲛ̀ⲥⲟⲛⲓ ⲁϥϯ ⲛ̀ⲛⲓϩⲃⲱⲥ ϩⲓⲱⲧϥ ⲁϥϭⲓ ⲛ̀ⲟⲩⲃⲁⲓ ϧⲉⲛ ⲧⲉϥϫⲓϫ ⲁϥⲓ̀ ϩⲓⲣⲉⲛ ⲫ̀ⲣⲟ ⲛ̀ϯⲙⲟⲛⲏ.
Ⲉⲧⲁϥⲕⲱⲗϩ ⲉϧⲟⲩⲛ ⲁϯⲙ̀ⲛⲟⲩⲧ ⲉⲣⲟⲩⲱ ⲛⲁϥ ϫⲉ ⲛ̀ⲑⲟⲕ ⲫⲁ ⲑⲱⲛ ⲡⲁⲓⲱⲧ ⲓⲉ ⲉⲕⲉⲣ ⲉⲛⲭⲣⲓⲁ ⲛ̀ⲟⲩ ⲛ̀ⲑⲟϥ ⲇⲉ ⲡⲉϫⲁϥ ⲛⲁⲥ ϫⲉ ⲙⲁϣⲉⲛⲉ ⲁϫⲟⲥ ⲛ̀ϯⲁⲙⲙⲁ ϫⲉ ⲁⲃⲃⲁ Ⲇⲁⲛⲓⲏⲗ ⲡⲓⲡⲣⲉⲥⲃⲩⲧⲉⲣⲟⲥ ⲛ̀ⲧⲉ Ϣⲓϩⲏⲧ ϥ̀ⲟϩⲓ ⲉⲣⲁⲧϥ ϩⲓⲣⲉⲛ ⲡⲓⲣⲟ ϫⲉ ϣⲟⲡⲧ ⲉⲣⲟ ϣⲁ ϩⲁⲛⲁⲧⲟⲟⲩⲓ.
Ϯⲙ̀ⲛⲟⲩⲧ ⲇⲉ ⲁⲥϣⲉⲛⲁⲥ ⲁⲥϫⲱ ⲙ̀ⲡⲁⲓⲥⲁϫⲓ ⲛ̀ϯⲁⲙⲙⲁ ϫⲉ ⲡⲉⲛⲓⲱⲧ ⲁⲃⲃⲁ Ⲇⲁⲛⲓⲏⲗ ⲡⲓⲡⲣⲉⲥⲃⲩⲧⲉⲣⲟⲥ ⲛ̀ⲧⲉ Ϣⲓϩⲏⲧ ϥ̀ⲟϩⲓ ⲉⲣⲁⲧϥ ϩⲓⲣⲉⲛ ⲡⲓⲣⲟ ⲟⲩⲟϩ ⲛⲁⲓ ⲁϥϫⲟⲧⲟⲩ ⲛⲏⲓ ⲉⲑⲣⲓϫⲟⲧⲟⲩ ⲛⲉ. ϧⲉⲛ ⲡ̀ϫⲓⲛⲑⲣⲉⲥⲥⲱⲧⲉⲙ ϫⲉ ⲁⲃⲃⲁ Ⲇⲁⲛⲓⲏⲗ ϩⲓⲣⲉⲛ ⲡⲓⲣⲟ ⲁⲥⲧⲱⲛⲥ ⲥⲁⲧⲟⲧⲥ ⲛⲉⲙ ⲛⲓⲥⲛⲏⲟⲩ ⲧⲏⲣⲟⲩ ⲁⲩϭⲟϫⲓ ⲉⲃⲟⲗ ϩⲓⲣⲉⲛ ⲡⲓⲣⲟ ⲁⲓϯⲫⲓ ⲉⲛⲉⲛϭⲁⲗⲁⲩϫ ⲙ̀ⲡⲓⲣⲱⲙⲓ ⲁⲩⲉⲛϥ ⲉϧⲟⲩⲛ ϧⲉⲛ ⲟⲩⲧⲓⲙⲏ.
Ϯⲁⲙⲙⲁ ⲇⲉ ⲛⲉⲙ ⲛⲓⲥⲛⲏⲟⲩ ⲁⲩϯ ⲙ̀ⲡⲓⲙⲱⲟⲩ ⲉϯⲗⲁⲕⲁⲛⲏ ⲁⲩⲓⲱⲓ ⲛ̀ⲛⲉϥϭⲁⲗⲁⲩϫ ⲉⲃⲟⲗ. ⲟⲩⲟϩ ⲉⲧⲁⲩⲟⲩⲱϣ ⲉⲑⲣⲟⲩⲫⲱⲣϣ ⲛⲁϥ ⲥⲁⲡϣⲱⲓ ⲛ̀ϯⲙⲟⲛⲏ ⲁϥⲧⲁϩⲛⲟ ⲙ̀ⲙⲱⲟⲩ ⲉϥϫⲱ ⲙ̀ⲙⲟⲥ ϫⲉ ϥ̀ⲟⲛϧ ⲛ̀ϫⲉ Ⲡⲟ̅ⲥ̅ ϫⲉ ϯⲛⲁⲥⲉⲛ ⲡⲁⲓⲙⲁ ⲉⲃⲟⲗ ⲁⲛ ϣⲁ ϣⲱⲣⲡ.
Ⲉⲧⲁⲩⲕⲏⲛ ⲉⲩⲓⲱⲓ ⲛ̀ⲛⲉϥϭⲁⲗⲁⲩϫ ⲉⲃⲟⲗ ⲁϯⲁⲙⲙⲁ ϭⲓ ⲉⲃⲟⲗϧⲉⲛ ⲡⲓⲙⲱⲟⲩ ⲁⲥⲭⲱ ϩⲓϫⲉⲛ ⲧⲉⲥⲁⲫⲉ ⲛⲉⲙ ⲡⲉⲥϩⲟ ⲡⲁⲓⲣⲏϯ ⲟⲛ ⲛⲓⲥⲛⲏⲟⲩ ⲧⲏⲣⲟⲩ ⲛⲁⲩϭⲓ ⲉⲃⲟⲗϧⲉⲛ ⲡⲓⲙⲱⲟⲩ ⲛ̀ⲧⲉ ϯⲗⲁⲕⲁⲛⲏ ⲉⲩⲭⲱ ⲉϫⲉⲛ ⲧⲟⲩⲁⲫⲉ ⲛⲉⲙ ⲡⲟⲩϩⲟ ϧⲉⲛ ⲟⲩⲛⲁϩϯ.
Ⲛⲉ ⲟⲩⲟⲛ ⲟⲩⲥⲱⲛⲓ ϧⲉⲛ ⲛⲓⲥⲛⲏⲟⲩ ⲉⲥⲟⲓ ⲛ̀ⲃⲉⲗⲗⲏ ⲓⲥϫⲉⲛ ⲧⲉⲥⲙⲉⲧⲕⲟⲩϫⲓ ⲉⲧⲁⲥⲥⲱⲧⲉⲙ ϩⲱⲥ ⲉⲡⲓⲣⲁϣⲓ ⲛ̀ⲧⲉ ⲛⲓⲥⲛⲏⲟⲩ ⲡⲉϫⲁⲥ ⲛⲱⲟⲩ ϫⲉ ⲙⲟⲓ ⲛⲏⲓ ϩⲱ ⲉⲃⲟⲗϧⲉⲛ ⲡⲓⲙⲱⲟⲩ ⲛ̀ⲧⲉ ⲡⲓϧⲉⲗⲗⲟ. ⲛ̀ⲑⲱⲟⲩ ⲇⲉ ⲁⲩⲁⲙⲟⲛⲓ ⲙ̀ⲙⲟⲥ ⲁⲩⲉⲛⲥ ⲉϫⲉⲛ ϯⲗⲁⲕⲁⲛⲏ ⲁⲥⲱϣ ⲉⲃⲟⲗ ⲉⲥϫⲱ ⲙ̀ⲙⲟⲥ ϫⲉ ⲱⲟⲩ ⲛ̀ⲓⲁⲧⲕ ⲛ̀ⲑⲟⲕ ⲡⲁⲓⲱⲧ ⲁⲃⲃⲁ Ⲇⲁⲛⲓⲏⲗ Ⲫϯ ⲛⲉⲙ ⲡⲉⲕⲣⲁⲛ ⲛⲁⲓ ⲛⲏⲓ.
Ⲟⲩⲟϩ ⲁⲥⲙⲟϩ ⲛ̀ⲧⲉⲥϫⲓϫ ⲙ̀ⲙⲱⲟⲩ ⲁⲥϩⲓⲧⲥ ⲉϫⲉⲛ ⲡⲉⲥϩⲟ ϧⲉⲛ ϯⲟⲩⲛⲟⲩ ⲁⲥⲛⲁⲩ ⲙ̀ⲃⲟⲗ. ⲱ ⲟⲩⲏⲣ ⲡⲉ ⲡⲓⲱϣ ⲉⲃⲟⲗ ⲛⲉⲙ ⲡⲓⲣⲁϣⲓ ⲛ̀ⲧⲉ ⲛⲓⲥⲛⲏⲟⲩ ⲧⲏⲣⲟⲩ ⲙ̀ⲡⲓⲛⲁⲩ ⲉⲧⲉⲙⲙⲁⲩ ⲉⲩϭⲟϫⲓ ⲉⲩϯⲫⲓ ⲉⲛⲉⲛϭⲁⲗⲁⲩϫ ⲙ̀ⲡⲓⲣⲱⲙⲓ ⲛ̀ⲥⲟⲛⲓ ⲛ̀ϩⲟⲩⲟ ⲇⲉ ⲑⲏⲉⲧⲁⲥⲛⲁⲩ ⲙ̀ⲃⲟⲗ ⲉⲥⲱϣ ⲉⲃⲟⲗ ⲉⲥϫⲱ ⲙ̀ⲙⲟⲥ ϫⲉ ⲱⲟⲩ ⲛ̀ⲓⲁⲧⲕ ⲡⲁⲓⲱⲧ ⲉ̅ⲑ̅ⲩ̅ ϫⲉ ϩⲓⲧⲉⲛ ⲡⲓⲙⲱⲟⲩ ⲛ̀ⲧⲉ ⲛⲉⲕϭⲁⲗⲁⲩϫ ⲁⲕϯ ⲙ̀ⲫⲟⲩⲱⲓⲛⲓ ⲛⲏⲓ ⲛ̀ⲕⲉⲥⲟⲡ.
Ⲡⲓϫⲱϫ ⲛ̀ⲥⲟⲛⲓ ⲇⲉ ⲉⲧⲁϥⲛⲁⲩ ⲉⲛⲁⲓ ⲁⲟⲩⲥⲑⲟⲣⲧⲉⲣ ⲛⲉⲙ ⲟⲩϩⲟϯ ⲧⲁϩⲟϥ ⲙⲉⲛⲉⲛⲥⲁ ⲑⲣⲉ ⲛⲓⲥⲛⲏⲟⲩ ⲧⲏⲣⲟⲩ ϩⲩⲛⲓⲙ ⲛ̀ⲑⲟϥ ⲇⲉ ⲙ̀ⲡⲉϥⲉⲛⲕⲟⲧ ⲉⲡⲧⲏⲣϥ ⲁⲗⲗⲁ ⲛⲁϥϩⲉⲙⲥⲓ ⲡⲉ ⲉϥⲣⲓⲙⲓ ϣⲁⲧⲉ ⲛⲉϥⲉⲣⲙⲱⲟⲩⲓ ϩⲱⲣⲡ ⲙ̀ⲡⲓⲕⲁϩⲓ ⲉϥϫⲱ ⲙ̀ⲙⲟⲥ ϫⲉ ⲟⲩⲟⲓ ⲛⲏⲓ ⲁⲛⲟⲕ ϧⲁ ⲡⲓϫⲱⲃ ⲛ̀ⲣⲉϥⲉⲣⲛⲟⲃⲓ ϫⲉ ⲁⲓϣⲟ ⲙ̀ⲡⲁⲥⲏⲟⲩ ⲧⲏⲣϥ ⲉⲃⲟⲗ ⲛ̀ⲕⲁⲗⲱⲥ ϧⲉⲛ ⲟⲩⲛⲓϣϯ ⲙ̀ⲙⲉⲧⲉⲫⲗⲏⲟⲩ.
Ⲓⲥϫⲉ ⲡⲁⲓⲣⲱⲙⲓ ⲙ̀ⲙⲁⲩⲁⲧϥ ⲁⲓⲧⲁⲗⲟ ⲙ̀ⲡⲉϥⲣⲁⲛ ⲉⲣⲟⲓ ⲁϥⲑⲣⲉ ⲛⲓⲙⲱⲟⲩ ⲛ̀ⲧⲉ ⲛⲁϭⲁⲗⲁⲩϫ ϯ ⲙ̀ⲫⲟⲩⲱⲓⲛⲓ ⲛ̀ⲛⲓⲃⲉⲗⲗⲉⲩ ⲓⲉ ⲟⲩⲁϣ ⲛ̀ⲣⲏϯ ⲡⲉ ⲡⲓⲣⲱⲙⲓ ⲉⲧⲉⲙⲙⲁⲩ ⲟⲩⲟⲓ ⲛⲏⲓ ⲁⲛⲟⲕ ϧⲁ ⲡⲓϫⲱⲃ ⲛ̀ⲣⲉϥⲉⲣⲛⲟⲃⲓ ϫⲉ ⲁⲓϣⲱⲡⲓ ⲉⲓⲟⲓ ⲛ̀ⲁⲙⲉⲗⲉⲥ ⲉⲡⲁⲟⲩϫⲁⲓ.
Ⲛⲁⲓ ⲇⲉ ⲉⲣⲉ ⲡⲓⲥⲟⲛⲓ ϫⲱ ⲙ̀ⲙⲱⲟⲩ ⲉϥⲣⲓⲙⲓ ⲛⲉϥⲣⲱⲙⲓ ⲇⲉ ϩⲱⲟⲩ ⲁⲩⲉⲣ ⲡⲓⲉϫⲱⲣϩ ⲧⲏⲣϥ ϩⲓⲣⲉⲛ ⲡⲓⲣⲟ ⲛⲉⲙ ⲛⲓⲥⲏϥⲓ ⲉⲩⲟϩⲓ ⲛⲁϥ ⲉⲑⲣⲉϥⲟⲩⲱⲛ ⲛⲱⲟⲩ ⲟⲩⲟϩ ⲛⲁϥϭⲓⲥⲙⲏⲉⲣⲱⲟⲩ ⲡⲉ ⲉϥⲭⲱ ⲛ̀ⲣⲱϥ ⲙ̀ⲡⲉϥⲥⲁϫⲓ. ⲉⲧⲁ ⲡⲓⲟⲩⲱⲓⲛⲓ ⲇⲉ ⲓ ⲉⲃⲟⲗ ⲉⲩⲭⲏ ϩⲓⲣⲉⲛ ⲡⲓⲣⲟ ⲙ̀ⲫⲣⲏϯ ⲛ̀ϩⲁⲛⲟⲩϩⲱⲣ ⲁⲩⲕⲟⲧⲟⲩ ⲉⲡⲟⲩⲙⲁ ⲛ̀ⲕⲉⲥⲟⲡ ϧⲉⲛ ⲟⲩϣⲓⲡⲓ. ⲉⲡⲉϥⲣⲁⲥϯ ⲁϥⲧⲱⲛϥ ⲛ̀ϫⲉ ⲡⲓⲥⲟⲛⲓ ⲁϥⲓ̀ ⲉⲃⲟⲗϩⲓⲧⲉⲛ ⲛⲓⲥⲛⲏⲟⲩ ϧⲉⲛ ⲟⲩϩⲓⲣⲏⲛⲏ ⲉϥⲙⲟϣⲓ ⲇⲉ ϩⲓ ⲡⲓⲙⲱⲓⲧ ⲁⲛⲓⲥⲛⲱⲟⲩⲓ ⲕⲱϯ ⲉⲣⲟϥ ⲡⲉϫⲱⲟⲩ ⲛⲁϥ ϫⲉ ⲟⲩⲡⲉⲧⲁϥϣⲱⲡⲓ ⲙ̀ⲙⲟⲕ ⲙ̀ⲡⲁⲓⲉϫⲱⲣϩ ⲧⲏⲣϥ.
Ⲡⲉϫⲁϥ ⲛⲱⲟⲩ ϫⲉ ⲙ̀ⲙⲟⲛ ϩⲱⲃ ⲛ̀ⲧⲏⲓ ⲛⲉⲙⲱⲧⲉⲛ ⲛ̀ⲕⲉⲥⲟⲡ ⲡⲉϫⲱⲟⲩ ⲛⲁϥ ϫⲉ ⲉⲑⲃⲉ ⲟⲩ ⲛ̀ⲑⲟϥ ⲇⲉ ⲁϥⲧⲁⲙⲱⲟⲩ ⲉϩⲱⲃ ⲛⲓⲃⲉⲛ ⲉⲧⲁϥⲩϣⲱⲡⲓ ⲙ̀ⲙⲟϥ ⲥⲁⲧⲟⲧϥ ⲁϥϯ ⲙ̀ⲡⲉϥⲟⲩⲟⲓ ⲉϢⲓϩⲏⲧ ϣⲁ ⲡⲉⲛⲓⲱⲧ ⲉ̅ⲑ̅ⲩ̅ ⲁⲃⲃⲁ Ⲇⲁⲛⲓⲏⲗ ⲁϥⲉⲣⲁⲡⲟⲇⲁⲥⲍⲉⲥⲑⲉ ⲛ̀ϩⲱⲃ ⲛⲓⲃⲉⲛ ⲉⲁϥϣⲱⲡⲓ ⲛ̀ⲟⲩⲥⲱⲧⲡ ⲙ̀ⲙⲟⲛⲁⲭⲟⲥ ϣⲁ ⲡⲓⲉϩⲟⲟⲩ ⲛ̀ⲧⲉ ⲡⲉϥⲙⲟⲩ.